+971 50 7554105
ತುಮ್ಚ್ಯಾ ಗಮನಾಕ್:

ಪಾಟಿಂ ಗಾಂವಾಕ್  -  ಅವಸ್ವರ್ 9


ಹಾಂಗಾ ಫೆಸ್ತಾಂ ಮ್ಹಳ್ಯಾರ್ ಕಿತೆಂ ಪರ್ಬೊ ಮ್ಹಳ್ಯಾರ್ ಕಿತೆಂ, ದಿಸಾಚಿಂ ಹರ್‍ಯೆಕ್ ವೊರಾಂ, ಹಾಪ್ತ್ಯಾಚೆ ಹರ್‍ಯೆಕ್ ದೀಸ್, ಮಹಿನ್ಯಾಚೆ ಹರ್‍ಯೆಕ್ ಹಾಪ್ತೆ, ವರ್‍ಸಾಚೆ ಹರ್‍ಯೆಕ್ ಮಹಿನೆ ಹಾಂಗಾ ಫೆಸ್ತಾಂ. ದೀಸ್ ಮ್ಹಣೊನ್ ನಾ ಥೊಡ್ಯಾಂಕ್ ರಾತ್ ಮ್ಹಣೊನ್ ನಾ. ಕಶ್ಟ್‌ಗೀ ಸುಃಖ್‌ಗೀ ದೆವ್ ಜಾಣಾ. ಫಕತ್ ಕಾಮ್ ಕಾಮ್ ಆನಿಂ ಕಾಮ್. ಆನಿಂ ಗಾಂವಾ ಥಾವುನ್ ಸಭಾರ್ ಸ್ವಪ್ಣಾಂ ಘೆವ್ನ್ ಆಯಿಲ್ಲ್ಯಾ ಹಾಂಕಾ ದುಸ್ರಿ ವಿಂಚವ್ಣ್ ಕಾಂಯ್ ನಾ. ಏಕ್ ಕಾಮ್ ಬರೆಂ ನಾ ಮ್ಹಣೊನ್ ತೆಂ ಸೊಡ್ನ್ ಹಾಂಗಾ ದುಸ್ರೆಂ ಕಾಮ್ ಕರ್‍ಚೆಪರಿಂ ನಾ. ಏಕ್ ಕಾಮ್ ಬರ್‍ಯಾ ಥರಾನ್ ಸೊಡ್ನ್ ಗಾಂವಾಕ್ ಗೆಲ್ಯಾರೀ ಪರತ್ ಹಾಂಗಾ ಯೇಂವ್ಕ್ ಉಣ್ಯಾರ್ ಉಣೆಂ ಸ ಮಹಿನೆ ಪುಣೀಂ ರಾವಾಜಯ್. ಪುಣ್ ತ್ಯಾ ಸ ಮಹಿನ್ಯಾಂನಿ ಜಾಂವ್ಕ್ ಆಸ್ಚೊ ಖರ್ಚ್ ಕೊಣಾಕ್ ಜಾಯ್. ತೇಂಯ್ ಪರತ್ ಪಾಟಿಂ ಯೇಂವ್ಕ್ ಸಾಧ್ಯ್ ಆಸಾ ಮ್ಹಳ್ಳಿ ಖಾತ್ರಿಯ್ ನಾ. ಎಕಾದಾವೆಳಾ ಅಯ್ಲ್ಯಾರೀ ಕಾಮ್ ಮೆಳ್ತಾ ಮ್ಹಳ್ಳಿ ನಖ್ಖಿಯಿ ನಾ.

ಎಕಾದಾವೆಳಾ ಕಾಮ್ ಸೊಧ್ಚೆಂ ತರ್ ಪಯ್ಲೆಂ ಹಾಂಗಾ ಆಯಿಲ್ಲಿ ಗಜಾಲ್ ತಾಂಕಾ ಕಳಯ್ಜಾಯ್. ನಾತ್ಲ್ಯಾರ್ ತಾಂಕಾ ಪಾಸ್‌ಪೋರ್ಟ್ ಪಳೆತಾನಾ ಕಳ್ತಾ. ಪಯ್ಲೆಂ ಕಾಮ್ ಕೆಲ್ಲಿ ಗಜಾಲ್ ಕಳಯ್ತಾನಾ ಖಂಯ್ ಕಾಮ್ ಕೆಲ್ಲೆಂ ಮ್ಹಳ್ಳೆಂಯ್ ಕಳಂವ್ಚಿ ಗರ್ಜ್ ಆಸಾ. ಕಿತ್ಯಾಕ್ ಸೊಡ್‌ಲ್ಲೆಂ ಮ್ಹಳ್ಳೆಂ ಜಾಣಾಂ ಜಾಂವ್ಚಿ ಗರ್ಜ್ ಆಸಾ. ಗರ್ಜ್ ಪಡ್ಲ್ಯಾರ್ ತಿಂ ತಾಂಚೆಲಾಗಿಂ ಉಲಂವ್ಕೀ ಸಕ್ತಿತ್. ಪಯ್ಲೆಂ ಕಾಮ್ ಕರಯಿಲ್ಲಿಂ ಬರೆಂ ಉತಾರ್ ಸಾಂಗ್ತಿತ್ ತರ್ ಕಿತ್ಯಾಕ್ ತೆಂ ಕಾಮ್ ಸೊಡ್ಲೆಂ ಮ್ಹಳ್ಳಿಂ ಸವಾಲಾಂ ಯೆತಾತ್. ತಿಂ ಪಾಡ್ ಸಾಂಗ್ತಿತ್ ತರ್ ವಿಷಯ್ ಹಾಂಗಾಚ್ಚ್ ಸಂಪ್ತಾ, ಫುಡೆಂ ಉಲಂವ್ಚಿ ಗರ್ಜ್‌ಚ್ಚ್ ನಾ.

ಥೊಡಿಂ ಫ್ರೀ ವಿಜಾ ಕಾಡುನ್ ಹಾಂಗಾಚ್ಚ್ ಕಾಮ್ ಕರ್ತಾತ್. ಪುಣ್ ಫ್ರೀ ವಿಜಾಕ್ ಚಡುಣೆಂ ಪಾಂಯ್ಶಿ ಯಾ ಸಯ್ಶಿ ದಿನಾರ್ ಭರುಂಕ್ ಆಸಾತ್. ಗಾಂವ್ಚೆ ಪಾವಣ್ಶೆಂ ಹಜಾರ್ ರುಪಯ್. ತಿತ್ಲೆ ಪೊಯ್ಶೆ ಭರುಂಕ್ ಸಾಧ್ಯ್ ಆಸ್ಚಿಂ ಹ್ಯಾ ತೀಸ್ ಯಾ ಚಾಳಿಸ್ ದಿನಾರ್ ಸಾಂಭಾಳಾಂಕ್ ಕಾಮ್ ಕರುಂಕ್ ರಾಂವ್ಚೆಂ ಪಿಶೆಂಪಣ್. ದೆಖುನ್ ಥೊಡಿಂ ಚೊರಿಯೆರ್ ರಾವ್ತಾತ್ ತರ್ ಥೊಡಿಂ ಹಾಂಗಾಚಾ ಥೊಡ್ಯಾಂ ಯೇಜಂಟಾಂಕ್ ಧರುನ್ ಕೊಣಾಚಾಗೀ ಘರಾ ಕಾಮ್ ಕರ್‍ತಾಂ ಮ್ಹಣೊನ್ ರೆಸಿಡೆನ್ಸಿ ಮಾರ್‍ತಾ. ಪುಣ್ ಹರ್‍ಯೆಕಾ ದಿಸಾ ಭಿಂಯಾಚಾ ಸಾವ್ಳೆಂತ್ ತಿಕಾ ರಾವೊಂಕ್ ಆಸ್ತೆಲೆಂ. ಪೊಲಿಸ್ ತವಳ್ ತವಳ್ ಚೆಕ್ ಕರ್ತಾನಾ ಸಿವಿಲ್ ಆಯ್‌ಡಿ ದಾಖಯ್ಜಾಯ್. ಸಿವಿಲ್ ಆಯ್‌ಡಿ ದಾಖಯ್ತಾನಾ ತಾಂತುಂ ಘರ್ ಕಾಮಾಚೆಂ ಮ್ಹಣೊನ್ ಬರವ್ನ್ ಆಸ್ತಾನಾ ತರ್ ಕಶೆಂ? ಕಿತ್ಯಾಕ್? ಭಾಯ್ರ್ ಆಯ್ಲೆಂಯ್ ಮ್ಹಳ್ಳೆಂ ಸವಾಲ್. ಶೀದಾ ಜೈಲಾಕ್ ಧಾಡ್ತಾತ್ ಆನಿಂ ಸ್ಪೋನ್ಸರಾಕ್ ಆಪಂವ್ಕ್ ಲಾಯ್ತಾತ್. ಸದಾಂ ಕಾಮಾಚೆಂ ಮಾತ್ರ್ ನ್ಹಂಯ್ ಕಾನೂನಾಕೀ ಭಿಂಯೆವ್ನ್ ಚಲಾಜಯ್ ಪಡ್ತಾ. ತಸಲಿ ವಿಜಾ ಕಾಡ್ನ್ ಕೊಣಾಯ್ಚಾಯ್ ಘರಾ ರಾವಾನಾಸ್ತಾಂ ಕಾಮ್ ಕೆಲೆಂ ತರ್ ರಾವೊಂಕ್ ಏಕ್ ಘರ್ ಜಾಯ್, ಆಪ್ಲ್ಯಾ ನಾಂವಾರ್ ಘರ್ ಜಾಯ್ನಾ ದೆಖುನ್ ಕೊಣಾ ಕೊಣಾಸವೆಂ ರಾವೊಂಕ್ ಪಡ್ತೆಲೆಂ. ಘರಾ ರಾಂದುಂಕ್, ಗರ್ಜೆಚೊ ಸಾಮಾನ್ ಹಾಡುಂಕ್ ಮ್ಹಣ್ತಾನಾ ಹೊ ಇತರ್ ಖರ್ಚ್. ತರೀ ಕಿತೆಂ ಕರ್‍ಯೆತ್? ಮಜ್ಬೂರಿ, ಗರ್ಜ್, ಆಪ್ಲ್ಯಾ ಕುಟ್ಮಾಕ್ ಬರೆ ದೀಸ್ ದಿವಂವ್ಕ್ ಎಕಾ ದಾದ್ಲ್ಯಾನ್, ಭಾಯ್ಲೆನ್ ಕರುಂಕ್ ಆಸ್‌ಲ್ಲೆ, ಕರುನ್ ಆಸ್ಚೆ ಸಾಕ್ರಿಫಿಸ್.

ತಿಯೊ, ಮಣಿ ಆನಿಂ ಗೋಪಿ ಎಕಾಮೆಕಾ ಬರ್‍ಯಾನ್ ಆಸ್‌ಲ್ಲೆ. ತೆಗೀ ಪ್ರಾಯೆನ್ ಲಗ್ಬಗ್ ಚಾಳೀಸಾಂಲಾಗಿಂ ಪಾವ್‌ಲ್ಲೆ ಜಾಲ್ಲೆವರ್‍ವಿಂ, ಮಾತ್ ನ್ಹಂಯ್ ಜಿಣ್ಯೆಂತ್ ಸಗ್ಳ್ಯಾಂನೀ ಕಶ್ಟ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಬರ್‍ಯಾನ್ ಸಮ್ಜಾಲ್ಲ್ಯಾನ್ ತಾಂಚೆಮಧೆಂ ಕಸಲೊಚ್ಚ್ ತಕ್ರಾರ್ ಉದೆಲ್ಲೊ ನಾ. ಎಕಾಮೆಕಾ ಹಾತ್ ದಿವುನ್ ಕಾಮ್ ಕರ್‍ತಾಲೆ. ಸಾಂಗಾತಾ ವಸ್ತ್ರಾಂ ಹುಂಬುಳ್ತಾಲೆ. ಥೊಡೆಪಾವ್ಟಿಂ ಸಾಂಗ್ತಾತಾ ರಾಂದ್ತಾಲೆ ಆನಿಂ ಸಾಂಗಾತಾ ಜೆವ್ತಾಲೆ. ಎಕಾಮೆಕಾ ಸುಃಖ್ ದೂಃಖ್ ವಾಂಟುನ್ ಘೆತಾಲೆ. ಎಕಾಮೆಕಾ ಆಧಾರ್ ಜಾತಾಲೆ. ಬೊಸೊನ್ ಉಭ್ಘೊಣ್ ಭೊಗ್ತಾನಾ ತೆ ಗುದಾಂವಾ ಭಾಯ್ರ್ ಯೆತಾಲೆ ಆನಿಂ ದರ್‍ಯಾ ತಡಿಂತ್ ಆಸ್ಚಾ ಫೊಲೆರಾ ಪಂದಾ ಬೊಸೊನ್ ಆಪ್ಲ್ಯಾ ಕುಟ್ಮಾಚೊ ನಿಹಾಳ್ ಕರ್ತಾಲೆ.

ಜಿಣ್ಯೆಂತ್ ತಾಣಿಂ ಪಳೆಂವ್ಕ್ ನಾತ್‌ಲ್ಲಿ ಧಗ್ ಆನಿಂ ಗರ್ಮಿ ಹಾಂಗಾ ತಾಂಕಾ ಸೊಸುಂಕ್ ಮೆಳ್ಳಿ. ದೀಸ್ ಮ್ಹಣೊನ್ ನಾ. ರಾತ್ ಮ್ಹಣೊನ್ ನಾ. ಆಂಗಾ ಥಾವುನ್ ವಾಳೊನ್ ಗೆಲ್ಲ್ಯಾ ಘಾಮಾಕ್ ಲೇಕ್ ನಾ. ತವಳ್‌ತವಳ್ ಮಣಿ ಹಾಂಕಾ ಘೆವ್ನ್ ಇಲ್ಲೊ ಲಿಂಬ್ಯಾಚಿ ಶರ್ಬತ್ ಕರ್‍ತಾಲೊ. ಇಬ್ರಾಹಿಮಾಚಾ ಕುಡಾಂತ್ ಏ.ಸಿ ಆಸ್‌ಲ್ಲಿ ಆನಿಂ ಫ್ರಿಜ್ ಆಸ್‌ಲ್ಲ್ಯಾನ್ ತಾಂಕಾ ಪಿಂಯೆಂವ್ಕ್ ಥಂಡ್ ಉದಾಕ್ ಮೆಳ್ತಾಲೆಂ. ಕಾಂಯ್ ಧಗ್ ವಿಪ್ರೀತ್ ಜಾಯ್ತ್ ತರ್ ತಿಂ ತೆಂ ಫ್ರಿಜ್ಜಾಚೆಂ ಉದಾಕ್ ಪಿಯೆತಾಲೆ ಆನಿಂ ತಕ್ಲೆರ್ ಇಲ್ಲೆಂ ವೊತ್ತಾಲೆ ಸಯ್ತ್. ತಿಯೊಕ್ ಹೆ ಗಿಮಾಳೆ ದಿಸಾಂಚೊ ಅನ್ಭೋಗ್, ಕಾಂಯ್ ಗಾಂವಾಂತ್ ಸೊರ್ಮುಣಾ ಬಗ್ಲೆಕ್ ಬೊಸ್‌ಲ್ಲೆಪರಿಂ ಭೊಗ್ತಾಲೆಂ.

ಕಸೊಯ್ ಧಗಿಚೊ ವೇಳ್ ಉತ್ರೊನ್ ಆತಾಂ ಹಿಂವ್ ಸುರು ಜಾಲ್ಲೆಂ. ಜಸೊ ಗಿಮೆ ದೀಸ್ ಆಸ್‌ಲ್ಲೊಗೀ ತಸೊಚ್ಚ್ ಹಿಂವಾಳೊ ದೀಸ್‌ಯಿ ಆಸ್‌ಲ್ಲೊ. ಉದ್ಕಾಕ್ ಹಾತ್ ಘಾಲ್ತಾನಾ ಆಯ್ಸಾಚಾ ಉದ್ಕಾಕ್ ಹಾತ್ ಘಾಲ್ಲೆಪರಿಂ ಜಾತಾಲೆಂ. ತೆಂ ಪಾವಾನಾತ್‌ಲ್ಲ್ಯಾಕ್ ವ್ಹಾಳ್‌ಚೆಂ ಥಂಡ್ ವಾರೆಂ ತಾಂಕಾ ಖೊಂಕ್ತಾಲೆಂ. ಗಿಮೆಚಾ ದಿಸಾಂನಿ ಆಸ್‌ಲ್ಲೆಪರಿಂ ಹಿಂವಾಕೀ ತಿಯೊಚಾ ನಾಕಾಂತ್ ರಗಾತ್ ಫುಟೊನ್ ಆಯ್ಲೆಂ ಆನಿಂ ಲಗ್ಬಗ್ ತೀನ್ ದೀಸ್ ಪರ್‍ಯಾಂತ್ ಸರಾಗ್ ರಗಾತ್ ವ್ಹಾಳ್ಳೆಂ. ಗಿಮೆಚಾ ದಿಸಾಂತ್ ಧಂಯ್ ಖಾಂವ್ಕ್ ಮಣಿನ್ ಸಾಂಗ್‌ಲ್ಲೆಂ ಪುಣ್ ಹ್ಯಾ ಥಂಡೆಚಾ ದಿಸಾಂನಿ ಧಂಯ್ ಖಾಂವ್ಕ್ ಜಾಲೆಂನಾ ಇಬ್ರಾಹಿಮಾಲಾಗಿಂ ಇಲೆಂ ಓಲಿವ್ ತೇಲ್ ಆಸ್‌ಲ್ಲೆಂ ಆನಿಂ ತಾಣೆಂ ತಿಯೊಚಾ ತಕ್ಲೆಚೆರ್ ಇಲ್ಲೆಂ ತೇಲ್ ವೊತ್ಲೆಂ ಆನಿಂ ಸದಾಂ ಎಕೇಕ್ ತಾಂತಿಂ ಓಲಿವ್ ತೆಲಾಸವೆಂ ಖಾಂವ್ಕ್ ಸಾಂಗ್ಲೆಂ.

ರಾತಿಂ ನಿದ್‌ಲ್ಲೆಕಡೆ ಸಯ್ತ್ ಏಕ್ ಕಾಂಬೊಳ್ ಪಾವಾನಾತ್‌ಲ್ಲಿ. ದಾರಾಚಾ ಇಡ್ಯಾಂತೂನ್ ಯೆಂವ್ಚೆಂ ಥಂಡ್ ವಾರೆಂ ತಾಂಕಾಂ ಉಟೊನ್ ಭಾಯ್ರ್ ವೆಚೆಂಚ್ ಅಸಾಧ್ಯ್ ಮ್ಹಣೊನ್ ಭೊಗ್ತಾಲೆಂ. ಭಾಯ್ರ್ ದವರ್ಲೆಲೆಂ ನಾರ್ಲಾಚೆಂ ತೇಲ್ ಸಯ್ತ್ ಘಟ್ ಜಾಲ್ಲೆಂ. ಆನಿಂ ಎದೊಳ್‌ಚ್ ತೆಗಾಂಯ್ಚೆಯ್ ವೋಂಟ್ ಫುಟ್‌ಲ್ಲೆ. ಆನಿಂ ತ್ಯಾ ಹಿಂವಾಂತ್‌ಯಿ ತಾಂಕಾ ಭಾಯ್ರ್ ಬೊಸೊಂಸ್ಕ್ ಆಸ್‌ಲ್ಲೆಂ. ತೆಂ ತಾಂಚೆಂ ಕಾಮ್.

ಎಕಾಚ್ಚ್ ವರ್ಸಾ ಭಿತರ್ ಶೇಖ್ ಅಲ್ ಖಲೀಫಾಚಿ ಸುಪರ್‌ಮಾರ್‍ಕೆಟ್ ವೃದ್ಧಿ ಜಾಲ್ಲಿ. ದೆಖುನ್ ಆನ್ಯೇಕ್ ಸುಪರ್ ಮಾರ್ಕೆಟ್ ಘೆತ್‌ಲ್ಲಿ ಆನಿಂ ಶೆರಾಥಾವುನ್ ಚಡುಣೆಂ ತೀಸ್ ಮೈಲಾಂ ಪಯ್ಸ್ ಆಸ್ಚಾ ಆಹ್ಮದಿಂತ್ ಆನ್ಯೇಕ್ ಗುದಾಂವ್ ಘೆತ್ಲೆಂ ಆನಿಂ ಗೋಪಿಕ್ ಹಾಂಗಾ ಥಾವುನ್ ಆಹ್ಮದಿಕ್ ವೆಲೊ. ಗೋಪಿಕ್ ಏಕ್ ಪಾವ್ಟಿಂ ಗಾಂವಾಕ್ ವಚೊನ್ ಆಪ್ಲ್ಯಾ ಆವಯ್ಚಿ ಸಾರ್ಕಿ ತಪಾಸ್ಣಿಂ ಕರವ್ನ್ ತಿಕಾ ವಕಾತ್ ದಿವಂವ್ಚಿ ಆಶಾ ಆಯ್ಲಿ ತರೀ ತೊ ಚುಕಾನಾಸ್ತಾಂ ಮಯ್ನ್ಯಾ ಮಯ್ನ್ಯಾಕ್ ಪೊಯ್ಶೆ ಧಾಡ್ತಾಲೊ ಆನಿಂ ತಾಚಿ ಆವಯ್ ಗಾಂವಾಂತ್‌ಚ್ ಅಯುರ್ವೇದಿಕ್ ವಕಾತ್ ಘೆತಾಂ ಮ್ಹಣೊನ್ ಬರಯಿಲ್ಲೆವರ್‍ವಿಂ ತೊ ದೋನ್ ವರ್ಸಾಂ ಕಾಭಾರ್ ಜಾಂವ್ಕ್ ರಾವ್ಲೊ.

ತೆಗಾಂಯ್ಕೀ ಅಸಲೆಂ ಹಿಂವ್ ನವೆಂ ಜಾಲ್ಲೆವರ್‍ವಿಂ ತೆಗಾಂಯ್ಕೀ ಹೊ ನವೊ ಅನ್ಭೋಗ್. ಪುಣ್ ತಿಯೊಪರಿಂ ಮಣಿಕ್ ಜಾಂವ್, ಯಾ ಗೋಪಿಕ್ ಜಾಂವ್ ನಾಕಾಂತ್ ಥಾವ್ನ್ ರಗಾತ್ ದೆಂವಾನಾತ್‌ಲ್ಲೆಂ. ಭಲಾಯ್ಕೆ ವಿಶ್ಯಾಂತ್ ಮಣಿಕ್ ಚಡ್ ಜಾವ್ನ್ ಜಾಗ್ರುತ್‌ಕಾಯ್ ಆಸ್‌ಲ್ಲಿ ಆನಿಂ ತವಳ್‌ತವಳ್ ತೊ ತಿಯೊಕ್ ಆನಿಂ ಗೋಪಿಕ್ ಬೂದ್ ಬಾಳ್ ಸಾಂಗ್ತಾಲೊ. ಆನಿಂ ಆಯಿಲ್ಲೆ ಸುರ್‍ವೆರ್ ಘರಾ ಬರಯಿಲ್ಲೆಪರಿಂ ಪರತ್ ಘರಾ ಹ್ಯೇವಿಶಿಂ ಬರವ್ನ್ ಬಾಯ್ಲ್‌ಭುರ್ಗ್ಯಾಂಕ್ ಖಂತಿನ್ ಘಾಲುಂಕ್ ತಿಯೊಕ್ ನಾಕಾಸ್‌ಲ್ಲೆಂ. ಅಸಲ್ಯೊ ಚಿಲ್ಲರ್ ಪಿಡಾ ತವಳ್‌ತವಳ್ ಯೆತಾಲಿ.

ತಿಯೊಪರಿಂಚ್ ಮಣಿ ಆನಿಂ ಗೋಪಿ ಸಯ್ತ್ ಮಹಿನ್ಯಾ ಮಹಿನ್ಯಾಕ್ ಗಾಂವಾಂಕ್ ಪೊಯ್ಶೆ ಧಾಡ್ತಾಲೆ. ತೆಗಾಂನೀ ಯೇಜಂಟಾಕ್ ಎಕಾಚ್ಚ್ ಮಾಪಾನ್ ಪೊಯ್ಶೆ ದೀಂವ್ಕ್ ನಾತ್‌ಲ್ಲೆ ತರೀ ತೆಗಾಂಯ್ಚೆಂಯ್ ಕಾಮ್ ಏಕ್‌ಚ್ಚ್ ಆನಿಂ ಮೆಳ್ಚೊ ಸಾಂಭಾಳ್ ಮಾತ್ ಸಾಟ್ ದಿನಾರ್. ಆಮ್ಚಾ ದೇಶಾಚೆ ಚಡುಣೆಂ ಆಟ್ ಯಾ ನೋವ್ ಹಜಾರ್ ರುಪಯ್. ತಾಂಕಾ ಖಾಂವ್ಕ್ ಜೇಂವ್ಕ್ ಮೆಳ್ತಾಲೆಂ ದೆಖುನ್ ಚಡಾವತ್ ಪೊಯ್ಶೆ ಉರ್ತಾಲೆ. ಕಸಲ್ಯೊಚ್ಚ್ ವಾಯ್ಟ್ ಸವಯೊ ನಾತ್‌ಲ್ಲ್ಯಾನ್ ಎಕೇಕ್ ಫಿಲ್ಸ್ ಜಮೊ ಕರುನ್ ತೆಗೀ ಫುಡಾರಾಚಿಂ ಸ್ವಪ್ಣಾಂ ದೆಖ್ತಾಲೆ.

ಮಹಿನ್ಯಾ ಮಹಿನ್ಯಾಕ್ ಚಾರ್ ಹಜಾರ್ ಪುಣೀಂ ತಿಯೊ ಆಪ್ಲ್ಯಾ ಗಾಂವಾಕ್ ಧಾಡ್ತಾಲೊ. ಅಶೆಂ ಬಾರಾ ತೆರಾ ಮಹಿನೆ ಉತರ್ತೆಚ್ಚ್ ತಾಚೆಲಾಗಿಂ ಚಡುಣೆಂ ತೀಸ್ ಹಜಾರ್ ಜಮೊ ಜಾಲ್ಲೆ. ಮಹಿನ್ಯಾಕ್ ಏಕ್ ಯಾ ದೋನ್ ಪಾವ್ಟಿಂ ಮಾರ್ಕುಸವೆಂ ತಿಯೊ ಭಾಯ್ರ್ ವೆತಾಲೊ. ಮಾರ್ಕುಚಾ ಘರಾ ಕೊಣಾಯ್ಕೀ ವಚೊಂಕ್ ಸಾಧ್ಯ್ ನಾತ್‌ಲ್ಲೆಂ. ಮೆಳ್ಚೆಂ ಸೊಡ್, ಫೊನಾರ್ ಉಲಂವ್ಕ್‌ಯಿ ಆವ್ಕಾಸ್ ಮೆಳ್ಚೊ ಭೋವ್ ಉಣೊ.

ತಶೆಂ ಆತಾಂ ತಿಯೊಸವೆಂ ಮಣಿ ಯಾ ಗೋಪಿ ಸಯ್ತ್ ಸಾಂಗಾತಾ ಆಸ್‌ಲ್ಲೆ. ಭಾಯ್ರ್ ಚಡಾವತ್ ವೇಳ್ ಪಾಶಾರ್ ಕರ್‍ತಚ್ಚ್ ಪಾಟಿಂ ಯೆತಾಲೆ. ಥೊಡೆ ಫಾವ್ಟಿಂ ಮತ್ ಇಲ್ಲಿ ಹಗುರ್ ಜಾತಾಲಿ ತರ್ ಥೊಡೆಪಾವ್ಟಿಂ ಥಂಯ್ಚಾ ಲೊಕಾಂಚೆ ಕಶ್ಟ್ ಆಯ್ಕೊನ್ ಮತಿಕ್ ಎಕಾ ಥರಾಚೆ ಉಬ್ಧೇಸ್ ಭೊಗ್ತಾಲೆ.

ಅಶೆಂ ಆಸ್ತಾಂ ಮಾರ್ಕುಚಾ ಕಾಮಾ ವಿಶ್ಯಾಂತ್ ಮಾರ್ಕು ಕಿತೆಂಚ್ ಸಾಂಗಾನಾತ್‌ಲ್ಲೊ. ತೊ ತ್ಯಾ ಘರಾಂತ್ ರಾಂದ್ಪಿ ಜಾಲ್ಲೆವರ್‍ವಿಂ ತೆದಾಳಾ ತೆದಾಳಾ ಘರ್ಚೊ ಸಾಮಾನ್ ಹಾಡುಂಕ್ ಭಾಯ್ರ್ ವಚೊಂಕ್ ಪಡ್ತಾಲೆಂ ಆನಿಂ ಹಾಪ್ತ್ಯಾಂತ್ ಏಕ್ ಯಾ ದೋನ್ ಪಾವ್ಟಿಂ ಮಾಸ್ಳಿ ಹಾಡುಂಕ್ ಯಾ ಮಾಸ್ ಹಾಡುಂಕ್ ವೆತಾಲೊ. ಆನಿಂ ಅಶೆಂ ತಾಕಾ ತಾಚಾ ಹಾತಾಂತ್ ಕಾಂಯ್ ಇಲ್ಲೆ ಚಿಲ್ಲರ್ ಪೊಯ್ಶೆ ಉರಂವ್ಕ್ ಆವ್ಕಾಸ್ ಮೆಳ್ತಾಲೊ. ಅಶೆ ಉರುಲ್ಲೆ ಚಿಲ್ಲರ್ ಪೊಯ್ಶೆ ಜಮೊ ಕೆಲ್ಯಾರ್ ಕಾಂಯ್ ಮಹಿನ್ಯಾಕ್ ಸಾತ್ ಯಾ ಆಟ್ ದಿನಾರ್ ಜಾತಾಲೆ. ತೆಂ ಮಾತ್ರ್ ನ್ಹಂಯ್ ಆಸ್ತಾಂ ಕಾಂಯ್ ಸಯ್ರಿಂ ಯೆತಿತ್ ತರ್ ತಾಂಕಾ ರಾಂದುಂಕ್ ಆಸ್ತಾಲೆಂ. ಆನಿಂ ತಿಂ ಸಯ್ರಿಂ ವೆತಾನಾ ಭಕ್ಶೀಷ್ ಮ್ಹಣೊನ್ ದಿಲ್ಲೆ ಇಲ್ಲೆ ಪೊಯ್ಶೆಯ್ ತೊ ಜಮೊ ಕರ್ತಾಲೊ.

ಎದೊಳ್ ಕಶೆಂ ಪುಣಿಂ ಕರ್‍ನ್ ಬರೆಂ ಘರ್ ಬಾಂದಯಿಲ್ಲ್ಯಾ ಮಾರ್ಕುಕ್ ತಾಚಾ ಜಾಗ್ಯಾಂತ್ ಇಲ್ಲೆಂ ತೋಟ್ ಆಸಾ ಕರುಂಕ್ ಆಶಾ ಆಸ್‌ಲ್ಲಿ. ಆನಿಂ ತ್ಯೆ ಖಾತಿರ್ ತಾಕಾ ಮೆಳ್ಚೆ ಚಾಳಿಸ್ ದಿನಾರ್ ಸಾಂಬಾಳ್ನ್ ದವರ್ತಾಲೊ. ತಾಕಾಯ್ ಜೆವ್ಣಾಕ್ ಜಾಂವ್ ಯಾ ಇತರ್ ಖರ್ಚ್ ನಾತ್‌ಲ್ಲ್ಯಾನ್ ಸಗ್ಳೆ ಪೊಯ್ಶೆ ತೊ ಗಾಂವಾಕ್ ಧಾಡ್ತಾಲೊ.

ಅಶೆಂ ಆಸ್ತಾಂ ಗಾಂವಾಂ ಥಾವುನ್ ಮಾರ್ಕುಚಾ ಬಾಯ್ಲೆನ್ ತಾಂಚಾ ಗಾಂವಾಂತ್‌ಚ್ ವಿಕುಂಕ್ ಆಸ್ಚಾ ಜಾಗ್ಯಾ ವಿಶ್ಯಾಂತ್ ಮಾಹೆತ್ ದಿಲಿ. ಚಡುಣೆ ಅಡೇಜ್ ಎಕ್ರ್ಯಾಂಚೊ ಜಾಗೊ. ಘರ್ ನಾತ್‌ಲ್ಲ್ಯಾನ್ ಕಾಂಯ್ ಉಣ್ಯಾರ್ ಮೆಳೊಂಕ್ ಸಾಧ್ಯ್ ಆಸ್‌ಲ್ಲೆಂ. ದೇಡ್ ಲಾಖ್ ರುಪಯ್ ಮ್ಹಣೊನ್ ನಿಮಾಣೆಂ ಏಕ್ ಲಾಖ್ ವೀಸ್ ಹಜಾರಾಂಕ್ ಮಾರ್‍ಕುನ್ ಮೆಲಾಕ್ ಘೆತ್ಲೊ ಆನಿಂ ತ್ಯೇ ಖಾತಿರ್ ತಾಣೆಂ ಎದೊಳ್ ಜಮೊ ಕೆಲ್ಲೆ ಪೊಯ್ಶೆ ಧಾಡ್ನ್ ದಿಲೆ ಆನಿಂ ಇಲ್ಲೆ ಉಣೆಂ ಪಡ್‌ಲ್ಲ್ಯಾನ್ ತಾಣೆಂ ಕಾಮ್ ಕರ್ಚಾ ಧನ್ಯಾಲಾಗ್ಚೆಂ ಇಲ್ಲೆಂ ರೀಣ್ ಮಾಗೊನ್ ಗಾಂವಾಕ್ ಧಾಡ್ಲೆ ತೊ ಜಾಗೊ ಆನಿಂ ಮೊಲಾಕ್ ಜಾಗೊ ಘೆವ್ನ್ ಆಪ್ಲ್ಯಾ ಬಾಯ್ಲೆಚಾ ನಾಂವಾರ್ ಕರಯ್ಲೊ.

ಮಾರ್ಕುನ್ ಜಾಗೊ ಘೆತ್‌ಲ್ಲಿ ಖಬಾರ್ ತಿಯೊನ್ ಎಸ್ತೆಲಾಕ್ ಬರಯ್ಲಿ ಆನಿಂ ಎದೊಳ್‌ಚ್ ತಿಯೊಚಾ ಹಾತಾಂತ್‌ಯಿ ಚಡುಣೆಂ ತೀಸ್ ಹಜಾರ್ ರುಪಯ್ ಜಮೊ ಜಾಲ್ಲೆ. ದೆಖುನ್ ತಾಣೆಂ ಆಪ್ಲ್ಯಾ ಘರಾಕ್ ಕರೆಂಟ್ ಘಾಲಂವ್ಕ್ ಚಿಂತ್ಲೆಂ. ಘರಾ ಕರೆಂಟ್ ಆಯ್ಲೆಂ ತರ್ ಭುರ್ಗ್ಯಾಂಕ್ ರಾತಿಂ ಬೊಸೊನ್ ಲಿಸಾಂವ್ ಕರ್ಯೆತ್. ಪುಣ್ ಕರೆಂಟ್ ಯೆಂವ್ಚಾದಿಂ ತಾಚೆಂ ಆತಾಂಚೆಂ ಘರ್ ವಡ್ ಕರ್ಚಿ ಗರ್ಜ್ ಮ್ಹಣೊನ್ ತಾಕಾ ಭೊಗ್ಲೆಂ. ಆತಾಂ ಭುರ್ಗಿಂ ಲ್ಹಾನ್. ಪುಣ್ ದೀಸ್ ಗೆಲ್ಲೆಪರಿಂ ಭುರ್ಗಿಂ ವಡ್ ಜಾತೆಲಿಂ. ತಾಂಕಾ ಶಿಕ್ಪಾಕ್ ಕಾಂಯ್ ತ್ರಾಸ್ ಜಾಯ್ನಾಯೆ ಮ್ಹಣೊನ್ ಚಿಂತ್ಲೆಂ. ನವೆಂ ಘರ್ ಬಾಂದಂವ್ಕ್ ಖಂಡಿತ್ ಸಾಧ್ಯ್ ನಾ ದೆಖುನ್ ಕಾಂಯ್ ಏಕ್ ದೋನ್ ಕುಡಾಂ ಬಾಂದ್ಯೆತ್ ಮ್ಹಣೊನ್ ಎಸ್ತೆಲಾಕ್ ಬರಯ್ಲೆಂ.

ಎಸ್ತೆಲಾಕ್ ಕಾಗಾದ್ ವಾಚುನ್ ಖುಶಿ ಜಾಲಿಚ್. ಭುರ್ಗಿಂ ಸಯ್ತ್ ಸಂತೊಸಾನ್ ನಾಚ್ಲಿಂ. ತರೀ ಎಸ್ತೆಲಾನ್ ಎದೊಳ್ ಬೆಂಕಾಕ್ ಪೊಯ್ಶೆ ಭರುಂಕ್ ನಾತ್‌ಲ್ಲ್ಯಾನ್ ಘರ್ಚೊ ಜಾಗೊ ಎದೊಳ್ ಬೆಂಕಾಂತ್‌ಚ್ ಆಸ್‌ಲ್ಲೊ. ಎಸ್ತೆಲಾನ್ ಆಪ್ಲಿ ಖುಶಿ ಆನಿಂ ಭುರ್ಗ್ಯಾಂಚೊ ಸಂತೊಸ್ ಸಗ್ಳೊ ತಿಯೊಕ್ ಬರಯ್ಲೊ ಆನಿಂ ವೆಗಿಂಚ್ ತಿಯೊಕ್ ಪೊಯ್ಶ್ಯಾಂ ಖಾತಿರ್ ಕಾಗಾದ್ ಬರಯ್ಲೆಂ. ತಿಯೊನ್ ತುರಂತ್ ತೀಸ್ ಹಜಾರ್ ರುಪಯ್ ಧಾಡ್ಲೆ. ಆನಿಂ ಉಣೆ ಪಡ್ಲ್ಯಾರ್ ಪಾಟ್ಲ್ಯಾನ್ ಧಾಡ್ತಾಂ ಮ್ಹಣೊನ್ ಬರಯ್ಲೆಂ. ಎಸ್ತೆಲಾನ್ ಕರೆಂಟಾಕ್ ಅರ್ಜಿ ಘಾಲಿ. ಪುಣ್ ಕರೆಂಟ್ ಪಾಸ್ ಜಾಂವ್ಕ್ ಘರ್ಚಾ ಜಾಗ್ಯಾಚಿಂ ದಸ್ತಾವೆಜಾಂ ದಾಖಂವ್ಚಿ ಗರ್ಜ್ ಆಸ್‌ಲ್ಲಿ. ಆನಿಂ ಘರ್ಚಿಂ ದಸ್ತಾವೆಜಾಂ ಬೆಂಕಾಂತ್ ಆಡೊವ್ ಆಸ್‌ಲ್ಲ್ಯಾನ್ ಆತಾಂ ತೆಂ ಕಾತ್ರೆಂತ್ ಶಿರ್ಕಾಲ್ಲೆಂ. ಆತಾಂ ತಾಕಾ ಕಿತೆಂಚ್ ವಾಟ್ ದಿಸ್ಲಿನಾ. ಆಪ್ಲೆಂ ಘರ್‌ಯಿ ಹೆರಾಂಚಾ ಘರಾಪರಿಂ ದಿಸಾಜಯ್ ತರ್ ಆಪ್ಣಾನ್ ಅಲಂಗಾರ್ ಬೆಂಕಾಂತ್ ಜಮೊ ಆಸ್ಚೆ ಪೊಯ್ಶೆ ಕಾಡಿಜಯ್ ಮ್ಹಣೊನ್ ತೆಂ ಚಿಂತಿಲಾಗ್ಲೆಂ. ಅಲಂಗಾರ್ ಬೆಂಕಾಂತ್ ಎದೊಳ್‌ಚ್ ಚಾಳಿಸ್ ಹಜಾರ್ ರುಪಯ್ ಜಮೊ ಕೆಲ್ಲೊ.

ಲತೀಫಾಕ್ ಹಿ ಗಜಾಲ್ ಕಳ್ತಚ್ ತಾಚಿ ಮತ್ ಕಿತೆಂಗೀ ಚುರುಕ್ ಜಾಲಿ ಆನಿಂ ತಾಣೆಂ ಎಸ್ತೆಲಾಕ್ ಬೊಲ್ತಿಚ್ ಸಲಹಾ ದಿಲಿ. "ತೆ ತೀಸ್ ಹಜಾರ್ ರುಪಯ್ ಬೆಂಕಾಕ್ ಭರುನ್ ತ್ಯಾ ಮೆನೆಜರಾಲಾಗಿಂ ಪರತ್ ರೀಣ್ ಕಾಡ್ ಆನಿಂ ತೊ ನಾ ಮ್ಹಣ್ಚೊನಾ"

ಎಸ್ತೆಲಾಕ್ ಹಿ ಸಲಹಾ ರುಚ್ಲಿ. ತಾರ್ಲೊ ದೀವ್ನ್ ಬಾಂಗ್ಡೊ ಘೆಂವ್ಚೆಂ ಬರೆಂ ಮ್ಹಣೊನ್ ದಿಸ್ಲೆಂ. ದುಸ್ರೆ ದೀಸ್ ತೆಂ ಬೆಂಕಾಚಾ ಮೆನೆಜರಾಕ್ ಮೆಳ್ಳೆಂ. ತಿಯೊನ್ ತೀಸ್ ಹಜಾರ್ ರುಪಯ್ ಧಾಡ್‌ಲ್ಲ್ಯಾ ವಿಶ್ಯಾಂತ್ ಕಳಯ್ಲೆಂ. ತಿಯೊನ್ ಪೊಯ್ಶೆ ಧಾಡುಂಕ್ ವೇಳ್ ಕೆಲ್ಲೊ ಸುಕೊ ಸಯ್ಲಾಪ್ ಉಚಾರ್‍ಲೊ. ಮೆನೆಜರಾನ್ ಹಾಡವ್ನ್ ದಿಲ್ಲಿ ಚಾ ಪಿಯೆಲೆಂ ಆನಿಂ ಎಸ್ತೆಲಾನ್ ಆಪ್ಣಾನ್ ಆಯಿಲ್ಲೊ ಉದ್ದೇಶ್ ಸಾಂಗ್ಲೊ.

ಮೆನೆಜರ್ ಏಕ್ ಘಡಿ ಚಿಂತುಂಕ್ ಪಡ್ಲೊ. ತಾಕಾ ತಿಯೊಚೆರ್ ಭರ್‍ವಸೊ ಆಸ್‌ಲ್ಲೊ. ತಡವ್ ಕೆಲೊ ತರೀ ಎಕ್‌ಚ್ ಪಾವ್ಟಿಂ ತೀಸ್ ಹಜಾರ್ ದಿಲ್ಲ್ಯಾ ತಾಕಾ ಸಂತೊಸ್ ಜಾಲ್ಲೊ. ತಾಣೆಂ ಎಸ್ತೆಲಾಕ್ ದೋನ್ ದಿಸಾಂ ಉಪ್ರಾಂತ್ ಯೇಂವ್ಕ್ ಸಾಂಗ್ಲೆಂ.

ದೋನ್ ದೀಸ್ ಉತರ್ತೆಚ್ಚ್ ಎಸ್ತೆಲ್ ಬೆಂಕಾಕ್ ಗೆಲೆಂ. ಮೆನೆಜರಾನ್ ತಾಕಾ ಚಡ್ ವೇಳ್ ಬೊಸಯ್ಲೆಂ ನಾ. ಜಾಗ್ಯಾಚೆಂ ದಸ್ತಾವೆಜಾಂ ದೀವುನ್ ಸಾಂಗ್ಲೆಂ. ಪಳೆ ಬಾಯೆ. ಮ್ಹಾಕಾ ತುಮ್ಚೆರ್ ಭರ್‍ವಸೊ ಖಂಡಿತ್ ಆಸಾ. ಪುಣ್ ಬೆಂಕಾಚಿ ರಿವಾಜ್ ಹಿ ದೆಖುನ್ ತುಂ ಹಿಂ ದಸ್ತಾವೆಜಾಂ ವರ್ ಆನಿಂ ತುಕಾ ಗರ್ಜ್ ಆಸ್‌ಲ್ಲ್ಯಾಂಕ್ ಹಾಚೊ ಪ್ರತಿಯೊ ದೀ ಆನಿಂ ಅಖ್ರೇಕ್ ಪಾಟಿಂ ಹಾಡುನ್ ಯೇ ಆನಿಂ ತವಳ್ ತುಜಾ ಲೊನಾಚಿ ಅರ್ಜಿ ಜಿ ಹಾಂವೆ ಎದೊಳ್ ತಯಾರ್ ಕೆಲ್ಯಾ ತಿ ಅರ್ಜಿ ಹಾಂವ್ ಮಂಜೂರ್ ಜಾಯ್ಶೆಂ ಕರ್ತಲೊಂ. ಆನಿಂ ಪರತ್ ಪಾಂಚ್ ಹಜಾರ್ ರುಪಯ್ ತುಕಾ ಪಯ್ಲೆಂ ಭರುಂಕ್ ಆಸ್ತೆಲೆ. ತುಂ ಪಾಂಚ್ ಹಜಾರ್ ಭರ್ಶಿ ತರ್ ಉರುಲ್ಲೆ ಪಾಂಚ್ ಹಜಾರ್ ಹಾಂವ್ ಉಣೆಂ ಕರ್ತಾಂ ಆನಿಂ ತುಮ್ಚೆಂ ಪಯ್ಲೆಂಚೆ ಲೋನ್ ಅಖೇರ್ ಜಾಲ್ಲೆಪರಿಂಚ್ ಮ್ಹಣೊನ್ ಲೆಖ್ತಾಂ. ಬೆಂಕಾಂತ್ ಏಕ್ ಲೋನ್ ಆಸೊನ್ ಅನ್ಯೇಕ್ ಲೋನ್ ಕಾಡುಂಕ್ ಕಶ್ಟ್ ಬಾಯೆ" ಮ್ಹಣಾಲೊ.

ಮೆನೆಜರಾಚಿಂ ಉತ್ರಾಂ ಆಯ್ಕೊನ್ ಎಸ್ತೆಲ್ ಏಕ್ ಘಡಿ ಚಿಂತುಂಕ್ ಪಡ್ಲೆಂ. ಆನಿಂ ದಸ್ತಾವೆಜಾಂ ಘೆವುನ್ ತೆಂ ಘರಾ ಗೆಲೆಂ. ಘರಾ ಆಯಿಲ್ಲ್ಯಾ ಲತೀಫಾಲಾಗಿಂ ಉಲಯ್ತಾನಾ ಲತೀಫಾನ್ ಪಾಂಚ್ ಹಜಾರ್ ರುಪಯ್ ಭರ್ಚೆ ಬರೆ ಮ್ಹಳ್ಳಿ ಸಲಹಾ ದಿಲಿ.

ಫುಡ್ಲೊ ಏಕ್ ಹಾಪ್ತೊ ಎಸ್ತೆಲ್ ಲತೀಫಾಸವೆಂ ಥಂಯ್ ಹಾಂಗಾ ಮ್ಹಣೊನ್ ಭಂವ್ಲೆಂ. ಕರೆಂಟಾಕ್ ಅರ್ಜಿ ಘಾಲಿ. ತಶೆಂ ಅಲಂಗಾರ್‌ಚಾ ಬೇಂಕಾಕ್ ವಚೊನ್ ಪಾಂಚ್ ಹಜಾರ್ ರುಪಯ್ ಕಾಡುನ್ ಹಾಡ್ನ್ ಮೂಡ್‌ಬಿದ್ರಿಚಾ ಬೇಂಕಾಂತ್ ಭರ್ಲೆ ಆನಿಂ ತಿಯೊಚೆಂ ಲೋನ್ ಕಶೆಂಯ್ ಫಾರಿಕ್ ಜಾಲೆಂ. ಆನಿಂ ನವೆಂ ಪನ್ನಾಸ್ ಹಜಾರಾಂಚೆಂ ಲೋನ್ ಪಾಸ್ ಜಾಲೆಂ. ತೆ ಪನ್ನಾಸ್ ಹಜಾರ್ ರುಪಯ್ ವೆಗಿಂಚ್ ಎಸ್ತೆಲಾಚಾ ನಾಂವಾರ್ ಬೆಂಕಾಂತ್ ಜಮೊ ಜಾತೆಲೆ ದೆಖುನ್ ಎಸ್ತೆಲಾಕ್ ಬೆಂಕಾಂತ್ ಎಕಾಂವ್ಟ್ ಓಪನ್ ಕರಯ್ಲೆಂ.

ಫುಡ್ಲ್ಯಾ ದೋನ್ ತೀನ್ ಹಾಪ್ತ್ಯಾಂನಿ ಎಸ್ತೆಲಾನ್ ಆಪ್ಲ್ಯಾ ಎಕಾಂವ್ಟಾಂತ್ ಜಾಮೊ ಆಸ್ಚೆ ಪೊಯ್ಶೆ ಕಾಡ್ನ್ ಕಾಮಾಂ ಕರಂವ್ಕ್ ಮುಖಾರ್ ಗೆಲೆಂ, ಅಶೆಂ ಎಸ್ತೆಲಾನ್ ದೋನ್ ಲ್ಹಾನ್ ಕುಡಾಂ ಬಾಂದಂವ್ಕ್ ಸುರು ಕೆಲೆಂ. ಲತೀಫಾಚಾ ವಳ್ಕಿಚೊ ಎಕ್ಲೊ ಆಪ್ಲ್ಯಾ ಕಾಮಾಚಾಂಕ್ ಘೆವ್ನ್ ಆಯ್ಲೊ ಆನಿಂ ಎಕಾಚ್ ಹಾಪ್ತ್ಯಾಂತ್ ಕುಡಾಂ ತಯಾರ್ ಜಾಲಿಂ. ಕುಡಾಂ ಬಾಂದುನ್ ಜಾತೆಚ್ಚ್ ಸಗ್ಳ್ಯಾ ಘರಾಕ್ ನವೊ ಪೇಂಟ್ ಘಾಲಂವ್ಕ್ ಚಿಂತಾನಾಂಚ್ ಕರೆಂಟ್ ಆಯ್ಲೆಂ ಆನಿಂ ಕರೆಂಟ್ ಆಯಿಲ್ಲೆಂಚ್ ಘರಾಕ್ ನವೊ ಪೇಂಟ್ ಕಾಡ್ಲೊ. ಆತಾಂ ಘರ್ ಸಗ್ಳೆಂ ನವೆಂಚ್ ದಿಸ್ತಾಲೆಂ.

ಎಸ್ತೆಲಾನ್ ಆಪ್ಣಾನ್ ಬೆಂಕಾಚೆಂ ಲೋನ್ ಫಾರಿಕ್ ಕರಯಿಲ್ಲಿ ಗಜಾಲ್, ತಶೆಂಚ್ ಪೊಯ್ಶೆ ಉಣೆ ಪಡ್‌ಲ್ಲ್ಯಾನ್ ಬೆಂಕಾಚೆಂ ಲೋನ್ ಘೆತ್‌ಲ್ಲಿ ಗಜಾಲ್ ತಿಯೊಕ್ ಕಳಯ್ಲಿ. ಆನಿಂ ಘರಾಕ್ ಬಾಂದಯಿಲ್ಲಿಂ ದೋನ್ ಕುಡಾಂ ವಿಶ್ಯಾಂತ್, ಕರೆಂಟಾ ವಿಶ್ಯಾಂತ್ ಬರಯ್ಲೆಂ. ಇಲ್ಲೆ ಪೊಯ್ಶೆ ಧಾಡ್ ಮ್ಹಣೊನ್ ಬರಂವ್ಕ್ ವಿಸ್ರಲೆಂನಾ. ಘರ್ ವಕೊಲ್ ಕರ್ಚೆವಿಶ್ಯಾಂತ್‌ಯಿ ಬರಯ್ಲೆಂ.

ತಿಯೊಕ್ ಆಪ್ಲಾಚೆಂ ಏಕ್ ಸ್ವಪಾಣ್ ಎಕಾಚ್ಚ್ ವರ್ಸಾ ಭಿತರ್ ಜ್ಯಾರಿ ಜಾಲ್ಲೆಂ ಪಳೆವ್ನ್ ಸಂತೊಸ್ ಜಾಲೊ. ಆನಿಂ ತಾಣೆಂ ಹಾತಾಂತ್ ಏಕ್ ಪೊಯ್ಸೊ ಸಯ್ತ್ ದವ್ರಿನಾಸ್ತಾಂ ಪರತ್ ಧಾ ಹಜಾರ್ ಧಾಡ್ಲೆ. ಘರ್ ವಕೊಲ್ ಬರ್‍ಯಾನ್ ಕರುಂಕ್ ಎಸ್ತೆಲಾಕ್ ಬರಯ್ಲೆಂ.

ಭಾಯ್ಲೆಂ ಜೆವಾಣ್ ಹಾಡಯಿಲ್ಲೆಂ, ಲಗ್ಬಗ್ ಪನ್ನಾಸ್ ಲೋಕ್ ಆಸ್‌ಲ್ಲೊ. ಫೊಟೊ ಕಾಡಯ್ಲೆ ಮ್ಹಣೊನ್ ಬರಯ್ಲೆಂ.

ಘರ್ ಜಾಲೆಂ, ಘರಾ ಕರೆಂಟ್ ಆಯ್ಲೆಂ ಆನಿಂ ಎಕೆಕ್‌ಚ್ ವಸ್ತು ಕೆಲ್ಯಾರ್ ಜಾಲೆಂ. ತಶೆಂ ಆಸ್ತಾಂ ತಾಕಾ ಘರಾ ಆಸ್ಚಾ ಬಾಂಯ್ಕ್ ಏಕ್ ಪಂಪು ಘಾಲುನ್ ತ್ಯಾ ಉದ್ಕಾಂತ್ ಇಲ್ಲೆ ಚಡ್ ಮಾಡ್ ಲಾಂವ್ಕ್ ಮನ್ ಆಯ್ಲೆಂ. ದೆಖುನ್ ತಾಣೆಂ ಎಸ್ತೆಲಾಕ್ ತ್ಯೇಶಿಂ ಬರವ್ನ್ ಧಾಡ್ಲೆಂ ಆನಿಂ ಘರ್ಚಾ ಬಾಂಯ್ಕ್ ಪಂಪು ಘಾಲಂವ್ಕ್ ಬರಯ್ಲೆಂ.

ಫುಡ್ಲ್ಯಾ ದೋನ್ ಮಹಿನ್ಯಾಂತ್ ತಿಯೊಕ್ ಖರ್ಚ್ ಚಡ್ಲೊ. ಹಾತಾಂತ್ ತಾಚಾ ಏಕ್ ಪೊಯ್ಸೊ ನಾತ್‌ಲ್ಲೊ. ತರೀ ಗಾಂವಾಂತ್ ಆಪ್ಲ್ಯಾ ಘರಾಂತ್ ಆಸ್ಚಾ ಬಾಯ್ಲ್ ಭುರ್ಗ್ಯಾಂಕ್ ಕಾಂಯ್ ಇಲ್ಲೆಂ ಸುಃಖ್ ಸಮಧಾನ್ ದಿಲೆಂ ಮ್ಹಳ್ಳಿ ತೃಪ್ತಿ ಆಸ್‌ಲ್ಲಿ.

ಏಕ್ ದೀಸ್ ಪೆಂಟೆರ್ ಸಾಯ್ಕಲಾರ್ ವೆಚಾ ಜೊಯೆಲಾಕ್ ಏಕ್ ಲೊರಿ ಅದಾಳ್ಳಿ ಆನಿಂ ಜೊಯೆಲ್ ಘಾಯೆವ್ನ್ ರಸ್ತ್ಯಾರ್ ಪಡ್ಲೊ. ಲೊಕಾಂನಿ ತಾಕಾ ಸಾಂಭಾಳ್ನ್ ಆಸ್ಪತ್ರೆಕ್ ವೆಲೊ. ತಪಾಸ್ಣಿಂ ಕರ್ತಾನಾ ಕಳೊನ್ ಆಯ್ಲೆಂ ಜೊಯೆಲಾಚೊ ಹಾತ್ ಮೊಡ್ಲಾ ಮ್ಹಣೊನ್. ಎಸ್ತೆಲಾಕ್ ಕಿತೆಂ ಕರ್ಚೆಂ ಮ್ಹಣೊನ್ ಕಳ್ಳೆಂನಾ. ಬರ್‍ಯಾ ಡೊಕ್ಟರಾಕ್ ಧರ್ನ್ ವಕಾತ್ ಕರಯ್ಲೆಂ. ಹಾತಾಕ್ ಬೇಂಡೇಜ್ ಘಾಲಯ್ಲೆಂ. ಆನಿಂ ತಿಯೊಕ್ ಹ್ಯೇವಿಶಿಂ ಕಾಗಾದ್ ಬರಯ್ಲೆಂ.

ಎದೊಳ್‌ಚ್ ಆಪ್ಲೊ ಸಗ್ಳೊ ಸಾಂಬಾಳ್ ಘರಾ ಧಾಡ್‌ಲ್ಲ್ಯಾ ತಿಯೊಕ್ ಕಿತೆಂ ಕರ್ಚೆಂ ಮ್ಹಳ್ಳೆಂಚ್ಚ್ ಕಳ್ಳೆಂನಾ. ಪಯ್ಲೆಪಾವ್ಟಿಂ ಅಸಲಿ ಪರಿಗತ್ ಆಯ್ಲಿ ಮ್ಹಣೊನ್ ತಾಣೆಂ ಬೆಂಗಾಲಿಕ್ ಸಾಂಗವ್ನ್ ಕಸೊಯ್ ಶೇಖ್ ಖಲೀಫಾಕ್ ಮೆಳ್ಳೊ ಆನಿಂ ಕಾಂಯ್ ಇಲ್ಲ್ಯಾ ಪೊಯ್ಶ್ಯಾಂಚಿ ಕುಮೊಕ್ ಮಾಗಾಲಾಗ್ಲೊ. ಶೇಖಾನ್ ಹಾಚಿ ಗರ್ಜ್ ಸಮ್ಜೊನ್ ತುರಂತ್ ಶೆಂಭೊರ್ ದಿನಾರ್ ದಿಲೆ ಆನಿಂ ಹಳ್ತಾರ್ ತೆ ಫಾರಿಕ್ ಕರ್ಚೆಪರಿಂ ಬೆಂಗಾಲಿಕ್ ಸಾಂಗೊನ್ ದಿಲೆಂ. ಆನಿಂ ತಿಯೊನ್ ತೆ ಪೊಯ್ಶೆ ಗಾಂವಾಕ್ ಧಾಡ್ಲೆ.

ತಿಯೊಕ್ ಆತಾಂ ರಾತಿಂ ನಿದ್ಲ್ಯಾರೀ ನೀದ್ ಪಡ್ಲಿನಾ. ಫಕತ್ತ್ ತಾಚಾ ದೊಳ್ಯಾಂಹುಜಿರ್ ತಾಚೊ ಪೂತ್ ಯೆತಾಲೊ. ಕಾಂಯ್ ವ್ಹಡ್ ಮಾರ್ ಜಾಲಾಗಾಯ್? ಎಸ್ತೆಲ್ ಪುಣಿಂ ಮ್ಹಜೆಲಾಗಿಂ ಹಾಂವ್ ಖಂತ್ ಕರ್‍ತಾಂ ವ್ಮ್ಹಣೊನ್ ಲಿಪಯ್ತಾಗಾಯ್ ಮ್ಹಳ್ಳೊ ದುಭಾವ್ ಆಯ್ಲೊ. ದಿಸಾಕ್ ಕಾಮ್ ಕರ್ತಾನಾ ಸಯ್ತ್ ತಾಚೆಂ ಗಿನ್ಯಾನ್ ತಾಚಾ ಚೆರ್‍ಕ್ಯಾಚೆರ್ ಆಸ್‌ಲ್ಲೆಂ. ಆಪ್ಣಾನ್ ಸಾಯ್ಕಲ್ ಘೆವ್ನ್ ದಿಲ್ಲಿ ಚೂಕ್ ಜಾಲಿ ಮ್ಹಣೊನ್ ತಿಯೊಕ್ ಭೊಗ್ಲೆಂ. ತಾಚಿ ಖಂತ್ ತಾಣೆಂ ಮಣಿಲಾಗಿಂ ಸಾಂಗ್ಲಿ. ಮಣಿಕ್ ತಾಚಿಂ ಭಗ್ಣಾಂ ಸಮ್ಜಾಲಿಂ ಜಾಯ್ಜಯ್ "ಖಂತ್ ಕರಿನಾಕಾ, ಘಡೊಂಕ್ ಆಸ್ಚೆಂ ಕೊಣಾಯ್ಕೀ ಆಡಾಂವ್ಕ್ ಜಾತಾಯೆ? ಬರೆಂ ಜಾಲೆಂ ದೆವಾನ್ ತುಜಾ ಚೆಡ್ಯಾಕ್ ರಾಕ್ಲೊ. ಆಜ್‌ಕಾಲ್ ರಸ್ತ್ಯಾ ಆವ್ಘಡಾಂತ್ ಕೊಣಾಯ್ಚೊಯ್ ಜೀವ್ ವಾಂಸ್ಚೊ ಅಪ್ರೂಪ್. ಆನಿಂ ದೆವಾನ್ ತುಕಾ ತಶೆಂ ಕಾಂಯ್ ಕರುಂಕ್‌ನಾ. ಫಕತ್ ಹಾತಾಕ್ ಇಲ್ಲೊ ಮಾರ್ ಜಾಲಾಸ್ತಲೊ ಆನಿಂ ತುಂ ಕಾಂಯ್ ಫಿಕಿರ್ ಕರಿನಾಕಾ, ಸಗ್ಳೆಂ ಸಾರ್‍ಕೆಂ ಜಾತೆಲೆಂ, ವೆಗಿಂಚ್ ತುಜೊ ಪೂತ್ ಬರೊ ಜಾತಲೊ"

ಮಣಿಚಾ ಸಮಧಾನೆಂತ್ ತಿಯೊಕ್ ಇಲ್ಲೆಂ ಸಮಧಾನ್ ಜಾಲೆಂ ತರೀ ತಾಚಿ ಮತ್ ಮಾತ್ ಆಪ್ಲ್ಯಾ ಕುಟ್ಮಾಚೊ ನಿಹಾಳ್ ಕರುಂಕ್ ಲಾಗ್ಲಿ. ಆಪ್ಣಾನ್ ಕಿತ್ಲೆ ಕಶ್ಟ್ ಸೊಸ್ಲ್ಯಾರೀ ಆಪ್ಲ್ಯಾ ಭುರ್ಗ್ಯಾಂಚಾ ಎಕಾ ಲೊಂವೆಕ್ ಸಯ್ತ್ ಕಶ್ಟ್ ಮೆಳಾನಾಯೆ ಮ್ಹಣೊನ್ ತೊ ಗಾಂವಾಂತ್ ತ್ಯಾ ವೊತಾಚಾ ಭರಾಂತ್ ಘೊಳೊನ್ ಆಸ್ತಾನಾ ಆಪ್ಲ್ಯಾ ಪತಿಣೆಕ್ ಸಾಂಗ್ತಾಲೊ. ಬಿಬ್ಯಾಚಾ ರುಕಾಕ್ ಚಡೊನ್ ತಾಚೊ ಪಾಲೊ ಕಾಡ್ತಾನಾ ಸಯ್ತ್ ತ್ಯಾ ರುಕಾಚೊ ದೀಕ್ ತಿಯೊಚಾ ದೊಳ್ಯಾಂಕ್ ಪಡೊನ್ ತೊ ದೋನ್ ತೀಸ್ ದೀಸ್ ನಿದ್‌ಲ್ಲೊ. ತರೀ ತಾಣೆಂ ಮಿನತ್ ಕೆಲ್ಲಿ ಫಕತ್ತ್ ಆಪ್ಲ್ಯಾ ಝಡಾಂ ಖಾತಿರ್, ತೊಟಾಖಾತಿರ್, ಕಾಂಯ್ ತೋಟ್ ಇಲ್ಲೆಂ ಬರೆಂ ಜಾಯ್ತ್ ತರ್, ಇಲ್ಲೆ ಚಡ್ ನಾರ್ಲ್ ಆಪ್ಲೆ ಮಾಡ್ ದೀಂವ್ಕ್ ಸಕ್ತಿತ್ ತರ್ ಆಪ್ಲ್ಯಾ ಭುರ್ಗ್ಯಾಂಕ್ ಇಲ್ಲೆ ಉಣೆಂ ಕಶ್ಟ್ ಮೆಳ್ತಿತ್ ಮ್ಹಳ್ಳೆಂ ಚಿಂತಾಪ್ ತಾಚೆಂ ಜಾಂವ್ನಾಸ್‌ಲ್ಲೆಂ. ಆನಿಂ ಆತಾಂ ಕಿತ್ಲೆ ಧಯ್ರ್ ಘೆತ್ಲ್ಯಾರೀ ತಾಚೆಂ ಕಾಳಿಜ್ ಪಿಂರ್ಗತಾಲೆಂ.

ಖಂಚಿಯ್ ಚೂಕ್ ಏಕ್ ಯಾ ದೋನ್ ಪಾವ್ಟಿಂ ಕರ್‍ತಾನಾ ಮಾತ್ ಮತ್ ಇಲ್ಲಿ ಭಿಂಯೆತಾ. ಕೆನ್ನಾ ತಿ ಚೂಕ್ ಆಪ್ಲಿ ಸವಯ್ ಜಾತಾಗೀ ತೆನ್ನಾ ತೆಂ ಗುನ್ಯಾಂವ್ಕಾರಿ ಚಿಂತಾಪ್ ಮಾಯಾಗ್ ಜಾತಾ ಆನಿಂ ಸದಾಂಚೆಂ ಜಾತಾ. ಆನಿಂ ತಶೆಂಚ್ ಜಾಲೆಂ ಎಸ್ತೆಲಾಕ್. ತಿಚೊ ಲತೀಫಾಸವೆಂ ಆಸ್ಚೊ ಸಂಬಂಧ್ ಚಾಲುಚ್ ಆಸ್‌ಲ್ಲೊ. ತ್ಯೇ ಭಾಯ್ರ್ ಘರಾಂತ್ ಎಕ್ಲೊ ದಾದ್ಲೊ ನಾತ್ಲ್ಯಾರ್ ಥಂಯ್ ಎಕೆಕ್‌ಚ್ ಅನ್ವಾರ್ ಯೆತಾತ್ ಮ್ಹಳ್ಳೆಂ ಎಸ್ತೆಲಾನ್ ಸಮ್ಜೊನ್ ಘೆತ್‌ಲ್ಲೆಂ.

ಚಡುಣೆಂ ಧಾ ದೀಸ್ ಪರ್‍ಯಾಂತ್ ಘರಾಚ್ಚ್ ಆಸ್ಚಾ ಜೊಯೆಲಾಕ್ ಇಸ್ಕೊಲಾಚಿಂ ಲಿಸಾಂವಾಂ ಕರುಂಕ್ ಜಾಲಿಂನಾಂತ್. ಹೆಣೆಂ ಲತೀಫಾಕ್ ಆನಿಂ ಎಸ್ತೆಲಾಕ್ ಜೊಯೆಲಾಚೊ ಹಾತ್ ದೂಖ್ ಆಸೊನ್ ಘರಾ ಆಸ್ಚೆಂ ಅಡ್ಕಳ್‌ಶೆಂ ಭೊಗ್ತಾಲೆಂ. ಎಸ್ತೆಲಾನ್ ಆನಿಂ ಲತೀಫಾನ್ ತಾಂಚೊ ಗುನ್ಯಾಂವ್ ಮುಖಾರಿಲ್ಲೊ ಆನಿಂ ಹೊ ಸದಾಂಚೊ ಜಾಲ್ಲೊ. ಪುಣ್ ಬಾವ್ಡೊ ತಿಯೊ ಆಪ್ಲ್ಯಾ ಸತಾ ನಿತಿನ್ ಹ್ಯಾ ಕಸ್ಲ್ಯಾಚ್ಚ್ ಸಂಗ್ತ್ಯಾಂಚೆರ್ ಗಮನ್ ನಾಸ್ತಾಂ ಮಹಿನ್ಯಾ ಮಹಿನ್ಯಾಕ್ ಚುಕಾನಾಸ್ತಾಂ ಪೊಯ್ಶೆಂ ಧಾಡ್ತಾಲೊ.

ಚಡಾವತ್ ಜಾವ್ನ್ ಹರ್‍ಯೆಕಾ ದೋನ್ ವರ್ಸಾಂಕ್ ಏಕ್ ಪಾವ್ಟಿಂ ಮಾರ್‍ಕು ದೋನ್ ಮಹಿನ್ಯಾಚಾ ರಜೆರ್ ಗಾಂವಾಕ್ ವೆತಾಲೊ. ಪುಣ್ ಹ್ಯೇ ಪಾವ್ಟಿಂ ಗಾಂವಾಂತ್ ಏಕ್ ಬರೊ ಜಾಗೊ ವಿಕ್ರ್ಯಾಕ್ ಆಸಾ ಮ್ಹಳ್ಳೆಂ ತಾಚಾ ಬಾಯ್ಲೆನ್ ಬರಯಿಲ್ಲ್ಯಾನ್ ತೊ ಜಾಗೊ ಮೊಲಾಕ್ ಘೆಂವ್ಚೆವಿಶಿಂ ಮಾರ್ಕುನ್ ವಿಚಾರ್ ಕೆಲ್ಲೊ. ಗರ್ಜ್ ಪಡ್ಲ್ಯಾರ್ ಹ್ಯೇ ಪಾವ್ಟಿಂ ತೀನ್ ವರ್ಸಾಂ ರಾವೊನ್ ಕಾಂಯ್ ಇಲ್ಲೆ ಪೊಯ್ಶೆ ಜಮೊ ಕರುನ್ ಉಪ್ರಾಂತ್ ಗಾಂವಾಕ್ ಗೆಲ್ಯಾರ್ ಜಾಲೆಂ ಮ್ಹಣೊನ್ ಪಯ್ಲೆಂ ತಾಣೆಂ ಚಿಂತ್ಲೆಂ, ತರೀ ಕಶೆಂಯ್ ಬೆಂಕಾಂತ್ ಇಲ್ಲೆ ಪೊಯ್ಶೆ ಆಸಾತ್. ಉಣೆಂ ಪಡ್ಲ್ಯಾರ್ ತೆಚ್ಚ್ ಬೆಂಕಾ ಥಾವುನ್ ಇಲ್ಲೆಂ ಲೋನ್ ಘೆಂವ್ಚೆಂ ಮ್ಹಣೊನ್ ಚಿಂತುನ್ ತೊ ದೊನ್೦ಚ್ ವರ್ಸಾಂ ಜಾಂವ್ಕ್ ರಾಕ್ತಾಲೊ. ಆನಿಂ ದೋನ್ ವರ್ಸಾಂ ಜಾಲ್ಲೆಪರಿಂಚ್ ರಜೆರ್ ವಚೊಂಕ್ ಆಯ್ತೊ ಜಾಲ್ಲೊ.

ಅಶೆಂ ಮಾರ್ಕುನ್ ಗಾಂವಾಕ್ ವೆಚೊ ದೀಸ್ ನಿಘಂಟ್ ಜಾಲ್ಲೊ. ತಾಣೆಂ ಯೇವ್ನ್ ತಿಯೊಕ್ ಸಾಂಗ್ಲೆಂ ಗಾಂವಾಕ್ ವರುಂಕ್ ಕಿತೆಂಯ್ ಆಸಾ ತರ್ ತೆಂ ದೀವ್ನ್ ಧಾಡ್ ಮ್ಹಣೊನ್. ತಿಯೊಚಾ ಕಾಳ್ಜಾಂತ್ ಕಸ್ಲೆಗೀ ಧಡ್ದಡೆ ಜಾಂವ್ಕ್ ಸುರು ಜಾಲೆ. ಗಾಂವ್ ಮ್ಹಣ್ತಾನಾ ತಾಕಾಯ್ ಆತಾಂಚ್ ಗಾಂವಾಕ್ ಯಾ, ಆಪ್ಲ್ಯಾ ಬಾಯ್ಲೆ ಭುರ್ಗ್ಯಾಂಚೆರ್ ಎಕೊಡಿ ನದರ್ ಮಾರ್‍ಯಾಂ ಮ್ಹಣೊನ್ ತಾಳ್ಣಿಂ ಯೆತಾಲಿ. ಪುಣ್ ಕಿತೆಂ ಕರ್ತಲೊ ಬಾವ್ಡೊ ತೊ? ಪಯ್ಲೆಂಚ್ ಖಾಲಿ ಹಾತ್. ತೆಂ ಪಾವಾನಾತ್‌ಲ್ಲ್ಯಾಕ್ ಎದೊಳ್‌ಚ್ ಶೆಖಾಲಾಗ್ಚೆಂ ಘೆತ್‌ಲ್ಲೆಂ ರೀಣ್ ಫಾರಿಕ್ ಕೆಲ್ಲೆಶಿವಾಯ್ ಖಂಡಿತ್ ರಜಾ ದೀಂವ್ಕ್ ಶೇಖ್ ಕಬೂಲ್ ಜಾಂವ್ಚೊನಾ ಮ್ಹಳ್ಳೆಂ ತಿಯೊ ಜಾಣಾಸ್‌ಲ್ಲೊ. ತ್ಯೇ ಭಾಯ್ರ್ ಗಾಂವಾಕ್ ವಚೊನೀಂ ಆಪ್ಣಾನ್ ಕಸಲೆಂ ಸಾಧನ್ ಕರುಂಕ್ ಉರ್ಲಾಂ? ಕಾಂಯ್ ಆನಿಂ ಥೊಡೊ ತೇಂಪ್ ರಾವೊನ್ ಕಾಂಯ್ ಇಲ್ಲೆ ಪೊಯ್ಶೆ ಉರವ್ನ್ ಗೆಲೊಂ ತರ್ ಕಿತೆಂ ತರೀ ಕರ್ನ್ ಯೇಂವ್ಕ್ ಆಪ್ಣಾಕ್ ಸಾಧ್ಯ್ ಜಾಯ್ತ್ ಮ್ಹಣೊನ್ ಚಿಂತಿಲಾಗ್ಲೊ.

ದೀಸ್ ಗೆಲ್ಲೆಪರಿಂಚ್ ಮಾರ್‍ಕುನ್ ಗಾಂವಾಕ್ ವೆಚೊ ದೀಸ್ ಲಾಗಿಂ ಯೆತಾಲೊ ಆನಿಂ ತಾಕಾ ಜಾಯ್ ಪುರ್ತಿ ತಯಾರಾಯ್ ಮಾರ್‍ಕುನ್ ಎದೊಳ್‌ಚ್ ಸುರು ಕೆಲ್ಲಿ. ತಿಯೊನ್ ಎಸ್ತೆಲಾಕ್ ಮಾರ್ಕುನ್ ಗಾಂವಾಕ್ ಯೆಂವ್ಚೆವಿಶ್ಯಾಂತ್ ಬರಯಿಲ್ಲೆಂ. ತಾಚೆಲಾಗಿಂ ತಿಕಾ ಕಾಪಾಡ್, ಭುರ್ಗ್ಯಾಂಕ್ ಇಲ್ಲಿಂ ವಸ್ತ್ರಾಂ, ಆನಿಂ ವಾಣೊಂ ದೀವ್ನ್ ಧಾಡ್ತಾಂ ಮ್ಹಣೊನ್ ಬರಯ್ಲೆಂ.

ಚಡುಣೆಂ ಪಂದ್ರಾ ದಿಸಾಂ ಭಿತರ್ ಜೊಯೆಲಾಚಾ ಹಾತಾಚೆಂ ಬೇಂಡೆಜ್ ಕಾಡ್ಲೆಂ ಆನಿಂ ಜೊಯೆಲ್ ಆತಾಂ ಬರೊ ಜಾವ್ನ್ ಇಸ್ಕೊಲಾಕ್ ವೆತಾಲೊ. ಸದಾಂ ಸಾಂಭಾಳ್ನ್ ವಚೊಂಕ್ ತಾಕಾ ಎಸ್ತೆಲಾನ್ ತಾಕಿದ್ ದಿಲ್ಲಿ. ಬರೆಂ ಜಾಲೆಂ ತ್ಯೇ ದೀಸ್ ಜೊಯೆಲಾಕ್ ಲೊರಿ ಆದಾಳ್ತಾನಾ ಸಾಯ್ಕಲಾರ್ ಜಿವಿತಾ ನಾತ್‌ಲ್ಲೆಂ. ನಾತ್ಲ್ಯಾರ್ ಜಿವಿತಾಕ್‌ಯಿ ಮಾರ್ ಜಾತೊ.

ಗಾಂವಾಕ್ ವೆಚಾ ಮಾರ್ಕುಲಾಗಿಂ ತಿಯೊನ್ ಕಾಂಯ್ ಇಲ್ಲಿಂ ಚೊಕ್ಲೆಟಾಂ ಆನಿಂ ಇಲ್ಲೆ ಸಾಬು ಆನಿಂ ಇಲ್ಲಿಂ ವಸ್ತ್ರಾಂ, ಕಾಪಾಡ್, ವಾಣೊ ಆನಿಂ ಏಕ್ ಕಾಗಾದ್ ಆನಿಂ ತಾಂತುಂ ಚಾರ್ ಹಜಾರಾಂಚಿ ಡ್ರಾಫ಼್ಟ್ ದೀವ್ನ್ ಧಾಡ್ಲಿ. ಆನಿಂ ಆಪ್ಲ್ಯಾ ದೋನ್ ಮಹಿನ್ಯಾಚಾ ರಜೆರ್ ಮಾರ್‍ಕು ಗಾಂವಾಕ್ ಭಾಯ್ರ್ ಸರ್ಲೊ.

ಮಾರ್ಕುನ್ ಗಾಂವಾಕ್ ವೆತಾನಾ ತಾಚೆಸವೆಂ ಆಪ್ಣಾನ್೦ಯಿ ವಚಾಜಯ್ ಆಸ್‌ಲ್ಲೆಂ ಮ್ಹಳ್ಳಿ ಖತ್ಕತಿ ಆಶಾ ತಿಯೊಚಾ ಕಾಳ್ಜಾಂತ್ ಉದೆಲ್ಲಿ ತರೀ ತಾಣೆಂ ದೋನ್ ವರ್‍ಸಾಂ ಸಂಪಂವ್ಕ್ ಅಜೂನೀಂ ಚಾರ್ ಪಾಂಚ್ ಮಹಿನೆ ಉರುಲ್ಲೆ. ತರೀ ಆಪ್ಲ್ಯಾ ಬಾಯ್ಲ್ ಭುರ್ಗ್ಯಾಂನಿ ಆಪ್ಣಾಚಿ ವಾಟ್ ರಾಕ್ಚಿ ನಾಕಾ ಮ್ಹಣೊನ್ ತಾಣೆಂ ಚಾರ್ ಮಹಿನ್ಯಾ ಉಪ್ರಾಂತ್ ಗಾಂವಾಕ್ ಯೆಂವ್ಚಿ ಆಶಾಯಿ ಆಪ್ಲ್ಯಾ ಕಾಗ್ದಾಂತ್ ಬರಯಿಲ್ಲಿ. ಪುಣ್ ನಿಘಂಟ್ ಬರಂವ್ಕ್ ತಾಕಾ ಧಯ್ರ್ ನಾತ್‌ಲ್ಲೆಂ ಕಿತ್ಯಾಕ್ ಮ್ಹಳ್ಯಾರ್ ತಾಣೆಂ ಎದೊಳ್‌ಚ್ ಶೇಖಾಲಾಗ್ಚೆಂ ರೀಣ್ ಘೆತ್‌ಲ್ಲೆಂ.

ಮಾರ್‍ಕುನ್ ಗಾಂವಾಕ್ ಗೆಲ್ಲ್ಯಾ ಉಪ್ರಾಂತ್ ತಿಯೊ ಎಕ್ಸುರೊಚ್ ಇಗರ್ಜೆಕ್ ವೆತಾಲೊ ಆನಿಂ ಆತಾಂ ತಾಕಾ ಗೋಪಿ ಯಾ ಮಣಿ ಸಾಂಗಾತ್ ದಿತಾಲೆ. ಗೋಪಿ ಕೆನ್ನಾ ತಾಚಾ ಗಾಂವ್ಚೆಂ ಮಲ್ಯಾಳಿ ಮೆಳ್ತಾತ್‌ಗೀ ತೆನ್ನಾ ತಾಂಚಾ ಮಲ್ಯಾಳಿ ಭಾಸೆಂತ್ ಉಲಂವ್ಕ್ ಧರ್ತಾಲೊ.

ಮುಂದರ್‍ಸಿಲಾಂ...

Tags:  Vally Quadras,e konkani novel, Konkani, Mangalore, Mangalorean, Mother Tongue

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE