:: ಮಾಯ್ ಭಾಸ್

ಗಾಂವಾಂತ್ ಆಸ್ತಾನಾ ಪರ್ಗಾಂವ್ಚಿಂ ಸ್ವಪ್ಣಾಂ ಮತಿಭರ್ ಭರೊನ್ ಕಿತ್ಲೆಶಿಂ ಸ್ವಪ್ಣಾಂ ರಾವ್ಳೆರಾಂ ಬಾಂಧುನ್ ಘೆತ್‌ಲ್ಲ್ಯಾಂಕ್ ಪರ್ಗಾಂವಾಕ್ ಪಾವ್ತಚ್ಚ್ ನಿರಾಸ್ ಭೊಗಾನಾ? ಪರ್ಗಾಂವಾಂತ್ ಯೇವ್ನ್ ಕೋಣ್ ಖಾಣಾಕ್ ವಳ್ವಾಳ್ತಾ. ಸಾರ್ಕೆಂ ಖಾಣ್ ಮೆಳಾನಾ. ಮೆಳ್ತಾ ಹಾಂಗಾಚೆ ಚರಬೆಚೆಂ ಖಾಣ್. ಮಾಸ್. ಸವಯ್ ಆಸ್‌ಲ್ಲ್ಯಾಂಕ್ ಚಲ್ತಾ. ಪುಣ್ ಹ್ಯಾ ಖಾಣಾಂ ಮುಖಾರ್ ಗಾಂವ್ಚಿಂ ಏಕ್ ದೋಯ್ ನೀಸ್ ಪೇಜ್, ಏಕ್ ಲೊಣ್ಚಾಚೆಂ ತೋರ್, ಹಾಂಗಾ ಅಮ್ರತ್ ಮ್ಹಣ್ಯೆತ್.

ಪರ್ಗಾಂವ್ಚಾ ಘರ್ಚಾಂಕ್ ಗಾಂವಾಂತ್ ಕಸಲಿ ಮಜಾ? ಕಾಂಯ್ ರಜೆರ್ ಎಕಾ ದೋನ್ ಮಹಿನ್ಯಾಚಾ ರಜೆರ್ ಆಯಿಲ್ಲ್ಯಾಂಚಾ ಘರ್ಚಾಂಕ್ ಕಸಲೊ ದಬಾಜೊ? ಎಕೆಕಾ ಪೊಯ್ಶಾ ಖಾತಿರ್ ತಾಣೆ ಕೆಲ್ಲಿ ಮಿನತ್, ಆಟಯಿಲ್ಲೆಂ ಚಿಂತಾಪ್, ಕಾಡ್‌ಲ್ಲಿ ಮಿನತ್, ಭೊಗ್‌ಲ್ಲೆಂ ಎಕ್ಸುರ್ಪಣ್, ಕೆನ್ನಾ ಆಪ್ಲೆಂ ಕಾಮ್ ವೆತಾಗಾಯ್ ಮ್ಹಳ್ಳೆಂ ಭ್ಯೆಂ. ಸಕಾಳಿಂ ಉಟೊನ್ ಕಾಮಾಕ್ ವೆತಾನಾ ಸಾಂಜೆರ್ ಆಪುಣ್ ಶಾಭೀತಾಯೆನ್ ಪಾಟಿಂ ಯೆತಾಂಗಾಯ್ ಮ್ಹಳ್ಳಿ ನಖ್ಖಿ ಕೊಣಾಕೀ ಆಸಾಗೀ? ಕಂಪೆನ್ಯಾಂನಿ ಕಾಮ್ ಕರ್ತೆಲ್ಯಾಂಕ್ ಹಿ ಸ್ಥಿತಿ ತರ್ ಘರ್ ಕಾಮ್ ಕರ್‍ತೆಲ್ಯಾಂಕ್ ಸಾಂಗ್ಚೆಂಚ್ ನ್ಹಂಯ್. 'ಸಾಂಗೊಂಕ್ ಗೆಲ್ಯಾರ್ ಲಜ್ ಪೊಟಾಕ್ ನಾ ಪೇಜ್' ಮ್ಹಳ್ಲೆಪರಿಂ ತಾಣಿಂ ಭೊಗ್ಚೆ ಕಶ್ತ್ ಮ್ಹಳ್ಯಾರ್ ಫಕತ್ತ್ ತಾಂಕಾಂಚ್ ಕಳಿತ್. ಎಕಾ ಸಕಾಳಿಂ ಉಟೊನ್ ಕಾಮ್ ಸುರು ಕೆಲೆಂ ತರ್, ನಿತಳ್‌ಕಾಯ್ ಕರುಂಕ್, ವಸ್ತ್ರಾಂ, ಆಯ್ದಾನಾ ಧುಂವ್ಕ್, ರಾಂದುಂಕ್, ಘರ್ಚಾ ಧನ್ಯಾಂನಿ ಜೆವ್ತಾಪರ್‍ಯಾಂತ್ ರಾಕೊನ್ ರಾವೊಂಕ್. ತಾಣಿಂ ಜೆವ್ತಚ್ ಜೆವ್ತಾನಾ ದನ್ಪಾರಾಂ ತೀನ್‌ಗೀ ಚಾರ್‌ಗೀ ಕೋಣ್ ಜಾಣಾಂ? ಸಾಂಜೆರ್ ಪರ್ತುನ್ ತಿಚ್ಚ್ ನಿತಳಾಯ್. ಸುಕ್‌ಲ್ಲ್ಯಾ ವಸ್ತ್ರಾಂಕ್ ಇಸ್ತ್ರಿ ಕರುಂಕ್, ಪರತ್ ರಾತಿಚೆಂ ರಾಂದುಂಕ್, ತಾಂಕಾ ತೆಂ ಜೆವಾಣ್ ಮಾಂಡುನ್ ದವ್ರುಂಕ್, ತಾಣಿಂ ಜೇಂವ್ಕ್ ವೇಳ್ ಕೆಲೊ ತರ್ ಪರತ್ ತೆಂ ಜೆವಾಣ್ ವ್ಹರ್ನ್ ಹುನ್ ಕರುಂಕ್, ರಾತಿಂ ದೇಡ್ ಯಾ ದೋನ್ ವೊರಾಂಕ್ ತಿಂ ಜೆವ್ತಿತ್ ತರ್ ಉಪ್ರಾಂತ್ ಜೇಂವ್ಕ್. ಸಾರ್ಕಿ ನೀದ್ ನಾ. ಸಾರ್ಕ್ಯಾ ವೆಳಾರ್ ಖಾಣ್ ನಾ. ಜೆವಾಣ್ ನಾ. ಕೊಣಾಕೀ ಆಪ್ಲ್ಯಾ ಪೆಲ್ಯಾಕ್ ಮೆಳೊಂಕ್ ನಾ. ಉಲಂವ್ಕ್ ನಾ. ಹೆಂ ಜಿವಿತ್‌ಗಿ? ಮ್ಹಳ್ಳೆಂ ತಾಂಕಾಂಚ್ ಕಳಾನಾ. ಮದ್ಯಾನೆ ರಾತಿಂ ನಿದ್ಲ್ಯಾರ್ ಕೆದಾಳಾ ಉಟಯ್ತಾತ್ ಮ್ಹಣ್ ನಾ.

ಘರ್‌ಕಾಮಾಕ್ ದಾದ್ಲೆ ಆಸ್ಲ್ಯಾರ್ ಹಿ ಗತ್ ತರ್ ಬಾಯ್ಲಾಂಕ್ ಹೆರ್ ರಿತಿಚೆ ಸಮಸ್ಸೆ. ತಾಂಚಾ ಕುಡಿಚೆರ್ ಸದಾಂ ಹಾಂಗಾ ಯೆಂವ್ಚಾ ವೆಚಾಂಚೆ ಆಬ್ಲೆಶಿ ದೊಳೆ. ಹಾಂಚೊ ಮಾನ್ ಕೆದಾಳಾ ಕೋಣ್ ಕಸೊ ಲುಟ್ತಾ ಮ್ಹಣೊನ್ ಕೊಣೀಂ ನೆಣಾಂತ್. ತರೀ ಹೆಂ ಸಗ್ಳೆಂ ಸೊಸುನ್ ದೀಸ್ ಕಾಡಿಜಯ್. ಕಿತ್ಯಾಕ್ ಮ್ಹಳ್ಯಾರ್ ಗಾಂವಾಂತ್ ಆಸ್ಚೆ ಕಶ್ಟ್ ಹಾಚಾಕೀ ಕಠೀಣ್. ಕಾಂಯ್ ಇಲ್ಲೆ ಕಶ್ಟ್ ಕಾಡ್ಲ್ಯಾರ್ ಆಪ್ಲ್ಯಾ ಕುಟ್ಮಾಕ್ ಬರೆ ದೀಸ್ ಯೆತಿತ್ ಮ್ಹಳ್ಳಿ ಆಶಾ. ಆಪ್ಲ್ಯಾ ಕುಟ್ಮಾಚಾ ಬರ್‍ಯಾಪಣಾ ಖಾತಿರ್ ಹೆ ಕಶ್ಟ್ ಸೊಸ್ಚೆ ಗರ್ಜೆಚೆ ಮ್ಹಳ್ಳೆಂ ಚಿಂತಾಪ್.

ಸುರ್‍ವೆರ್ ಆಯಿಲ್ಲಿಂ ಸಗ್ಳಿಂ ಫ಼ಕತ್ತ್ ದೋನ್ ಯಾ ತೀನ್ ವರ್‍ಸಾಂ ಕಾಮ್ ಕೆಲ್ಯಾರ್ ಜಾಲೆಂ. ಕಾಂಯ್ ಇಲ್ಲೊ ದುಡು ಜಮೊ ಕರ್‍ನ್ ಉಪ್ರಾಂತ್ ಗಾಂವಾಕ್ ಗೆಲ್ಯಾರ್ ಅಸಲೆ ದೀಸ್ ಪರತ್ ಕಾಡುಂಕ್ ಆಸ್ಚೆನಾಂತ್ ಮ್ಹಳ್ಳಿಂ ಚಿಂತ್ನಾಂ. ಪುಣ್ ದೋನ್ ಯಾ ತೀನ್ ವರ್‍ಸಾಂ ಕೊಣಾಯ್ಕೀ ಯೇನಾಂತ್. ವರ್ಸಾಂ ಉತರ್ಲೆಲೆಪರಿಂಚ್ ಘರ್ಚಾಂಚೊ ಗರ್ಜೊ ಚಡ್ತಾತ್. ಆನಿಂ ತ್ಯೇ ಖಾತಿರ್ ಹಾಂಗಾಸರ್ ಚಡಿತ್ ಕಾಮ್ ಕರ್ಚಿ ಗರ್ಜ್ ಯೆತಾ. ಗಾಂವ್ಚಾಂಕ್ ತರೀ ಹಾಂಚಿ ಮಿನತ್ ಜಾಂವ್, ತ್ಯಾಗ್ ಜಾಂವ್ ದಿಸಾನಾ, ಬಗಾರ್ ಫಕತ್ತ್ ಪೊಯ್ಶೆ ದಿಸ್ತಾತ್.

ಕೋಣ್ ವರ್ಸಾಂ ಕಾಮ್ ಕರ್ನ್ ಯೆತಾನಾ ಕಾಂಯ್ ಬರೆ ದೀಸ್ ಸರುಂಕ್ ಸಕ್ತಾ ತರ್ ಚಡಾವತ್ ಜಣಾಂಚಾ ಘರ್ಚಿಂ ಎದೊಳ್‌ಚ್ ಸೊರೊ ಪಿಯೆವ್ನ್, ಸಗ್ಳ್ಯಾ ಜೊಡಿಚಿ ಸತ್ತ್ಯಾನಾಸ್ ಕರುನ್ ಆಸ್ತಾನಾ ತ್ಯಾ ಘರಾಂತ್ ಉರ್ತಾ ಫಕತ್ ಗಾಳಿ ಶಿರಾಪ್, ಆನಿಂ ನಾಲಿಸಾಯ್. ಥೊಡೆಪಾವ್ಟಿಂ ಆಪ್ಲೊ ಜಾವ್ನ್ ಗಲ್ಫಾಂತ್ ಘೊಳೊನ್ ಯೆತಾನಾಂ ಆಪ್ಲೆಂ ಘರ್‌ಚ್ ಪರ್ಕಿ ಜಾತಾ. ಕೊಣಾಕ್ ಪೊಸ್ಲೊಗೀ ತೊಚ್ ಉಪ್ರಾಟ್ತಾ. ಕಿತ್ಲೆಶ್ಯಾಂಕ್ ತಾಂಚಾಚ್ ಘರಾಂತ್ಲೊ ಭಾಯ್ರ್ ಘಾಲಾ. ತರೀ ಹೆಂ ಜಿವಿತ್ ಆನಿಂ ಹೆಂ ಎದೊಳೀ ಚಲ್ಲಾಂ ಆತಾಂಯ್ ಚಲೊನ್ ಆಸಾ ಆನಿಂ ಫುಡೆಂಯ್ ಚಲ್ತೆಲೆಂ.

ಮಣಿಚಾ ಲಾಂಭಾಯೆಚಾ ಉಲವ್ಣ್ಯಾಂತ್ ಗೋಪಿ ಆನಿಂ ತಿಯೊ ಸಯ್ತ್ ಕಾಲುಬುಲೆ ಜಾಲೆ. ಮಣಿ ಸತ್ ಉಲಯಿಲ್ಲೊ. ಸತ್ ಕೆದಾಳಾಯ್ ಕೊಡು. ಆನಿಂ ಮಣಿಚಾ ಚಡಾವತ್ ಉಲವ್ಣ್ಯಾಂತ್ ಆಪ್ಲ್ಯಾ ಜಿಣ್ಯೆಚೊ ಅನ್ಭೋಗ್ ಆಟಾಪುನ್ ಆಸ್‌ಲ್ಲೊ ತೊ ಸ್ವಶ್ಟ್ ದಿಸ್ತಾಲೊ.

ಆತಾಂ ಹಾಪ್ತ್ಯಾಚಾ ಹರ್‍ಯೆಕಾ ರಜೆಚಾ ಆಯ್ತಾರಾ ಇಗರ್ಜೆಕ್ ವೆಚೆಂ ಆನಿಂ ಮೀಸ್ ಆಯ್ಕೊನ್ ಯೇವ್ನ್ ಇಲ್ಲಿ ಚಾ ಪಿಯೆವ್ನ್ ತ್ಯಾ ಎಕಾ ಆಂಗ್ಡಿಚಾ ಬಗ್ಲೆನ್ ಜಮೊ ಆಸ್ಚಾ ಲೊಕಾಂ ಪಯ್ಕಿ ಎಕ್ಲೊ ಜಾವ್ನ್ ತಿಯೊಕ್ ಸವಯ್ ಜಾಲ್ಲಿ. ಯೇನಾ ತರ್ ಕಿತೆಂಗೀ ಚುಕ್‌ಲ್ಲೆಪರಿಂ ಜಾತಾಲೆಂ. ಗೆಲ್ಯಾರ್ ಥಂಯ್ ಆಸ್‌ಲ್ಲ್ಯಾ ಲೊಕಾಂನಿ ಉಲಂವ್ಚಿಂ ಉತ್ರಾಂ ಆಯ್ಕೊನ್ ಕಠೀಣ್ ವಿರಾರಾಯ್ ಜಾತಾಲಿ. ಥೊಡೆಪಾವ್ಟಿಂ ಹಾಸೊಂಕ್ ಯೆತಾಲೆಂ.

ದೀಸ್ ಗೆಲ್ಲೆಪರಿಂಚ್ ಹಾಂಗಾ ಯೆಂವ್ಚೊ ಲೋಕ್ ಚಡ್ತಾ. ಜಾಂವ್ಕ್ ಪುರೊ ಆಜ್ ಆಯಿಲ್ಲೊ ಯೆಂವ್ಚಾ ಹಾಪ್ತ್ಯಾಂತ್ ಯೇನಾ ಆನಿಂ ಹ್ಯಾ ವರ್‍ಸಾ ಆಯಿಲ್ಲೊ ಥೊಡೊ ಲೋಕ್ ಫುಡ್ಲ್ಯಾ ವರ್ಸಾಂತ್ ಯೇನಾ. ಪುಣ್ ಥೊಡಿಂ ವೆತಾನಾ ಸಭಾರ್ ನವೊ ಲೋಕ್ ಯೆತಾಲೊ. ಆನಿಂ ಸಗ್ಳ್ಯಾಂಚಾ ಗರ್ಜಾಂಕ್ ಹೊ ಗಾಂವ್ ಖಾಂದ್ ಮಾರ್ತಾಲೊ. ಲೊಕಾಂಚೊ ವಿವಿಧ್ ನಮುನ್ಯಾಚೊ ಆವಾಜ್ ವಿವಿಧ್ ನಮುನ್ಯಾಚಿಂ ಉತ್ರಾಂ ಆಯ್ಕೊಂಕ್ ಮೆಳ್ತಾಲಿಂ. ಕೋಣ್ ತಾಂಕಾ ಗಾಂವಾಂತ್ ಭುರ್ಗೆಂ ಜಾಲೆಂ ಮ್ಹಣೊನ್ ಲಾಡು ವಾಂಟಾಲಿಂ ತರ್ ಥೊಡಿಂ ಗಾಂವಾಂಕ್ ಗೆಲ್ಲಿಂ ಪಾಟಿಂ ಯೆತಾನಾ ತಾಂಚೆಸವೆಂ ಹಾಡ್ನ್ ಆಯಿಲ್ಲಿಂ ಕಾಗ್ದಾಂ ಎಕಾಮೆಕಾ ಸೊಧುನ್ ವಾಂಟ್ತಾಲಿಂ. ಥೊಡಿಂ ಕಾಪ್ಡಾಂ, ವಸ್ತ್ರಾಂ ಆಪ್ಲ್ಯಾ ಪೊತ್ಯಾಂತ್ ಘೆವ್ನ್ ವಿಕ್ತಾಲಿಂ, ತರ್ ಥೊಡಿಂ ಚೆಸ್ಮಾ, ಸೆಂಟಾಚೊ ಬಾಟ್ಲ್ಯೊ ವಿಕ್ತಾಲಿಂ.

ಗಾಂವಾಥಾವುನ್ ಪಾಟಿಂ ಆಯಿಲ್ಲ್ಯಾಕ್ ವೆಡೊ ಘಾಲ್ನ್ ಥೊಡಿಂ ಆಮ್ಗೆರ್ ಗೆಲ್ಲೊಯ್ಗೀ? ಕಶಿಂ ಆಸಾತ್? ಹಾಂವೆ ಧಾಡುನ್ ದಿಲ್ಲ್ಯೊ ವಸ್ತು ತಾಂಕಾ ಖಾಯ್ಸ್ ಜಾಲ್ಯೊಗೀ? ಹಾಂವೆ೦ ಧಾಡ್‌ಲ್ಲೆಂ ಪೇಂಟ್ ಸಾರ್ಕೆಂ ಜಾತಾಗೀ? ಲಾಂಭ್ ಯಾ ಮಟ್ವೆಂ ಜಾತಾಗೀ? ಎಕಾ ಪಾಟ್ಲ್ಯಾನ್ ಏಕ್ ಸವಾಲ್ ಕರ್ತಾನಾ ಕಾಲುಬುಲೊ ಜಾಂವ್ಚೆ ತೆ ಕೊಣಾಕ್ ಜಾಪ್ ದಿಂವ್ಚೆಂ ಮ್ಹಳ್ಳೆಂ ಸಮ್ಜಾನಾಸ್ತಾಂ ದೊಳೆ ವಾಟಾರ್‍ನ್ ಪಳೆತಾಲೆ.

ಬರೆಂಪಣ್ ಪಳೆಂವ್ಚಿ ನದರ್ ಆಸ್ಲ್ಯಾರ್ ಜಾಯಿತ್ತೆಂ ಬರೆಂಪಣ್ ಹ್ಯಾ ಗಾಂವಾಂತ್ ಆಸ್‌ಲ್ಲೆಂ. ಹಾಂಗಾಚಿ ಮಾರ್ಗಾಯ್ ಆಮ್ಚಾ ದೇಶಾಚಾ ಮಾರ್ಗಾಯೆಸವೆಂ ತುಲನ್ ಕೆಲಿ ತರ್ ಖಂಡಿತೀ ಚಡ್. ಪುಣ್ ಹಾಂಗಾಸರ್ ಉಸ್ವಾಸ್ ಸೊಡುಂಕ್ ಕಾಂಯ್ ಇಲ್ಲೊ ವೇಳ್ ಮೆಳ್ತಾಲೊ. ಕಶ್ಟ್ ಜರೂರ್ ಆಸಾತ್ ತರೀ ಹ್ಯಾ ಕಶ್ಟಾಂಕ್ ಗಾಂವ್ಚೆ ಕಶ್ಟ್ ಧಾಂವ್ಡಾಂವ್ಚಿ ಸಕತ್‌ಯಿ ಆಸಾ. ಗಾಂವಾಂತ್ ಎಕೇಕ್ ರುಪಯ್ ಉರಯ್ಜಾಯ್ ತರ್ ಜಿವಾರ್ ಯೆತಾಲೆಂ. ಜೊಡ್‌ಲ್ಲೆಂ ಸಗ್ಳೆಂ ಮೊಡುಂಕ್ ಪಡ್ತಾಲೆಂ.

ಪುಣ್ ಹಾಂಗಾಸರ್ ಉಗ್ತ್ಯಾನ್ ಪಿಯೊಣೆಂ ಜಾಂವ್, ಜುಗಾರ್ ಜಾಂವ್, ವ್ಯಭಿಚಾರ್ ಜಾಂವ್ ನಾತ್‌ಲ್ಲ್ಯಾನ್ ಯಾ ಹಾಂಗಾಚಿಂ ಕಾನೂನಾಂ ಲೊಕಾಂಚಾ ಹಾಡಾಂನಿ ಸಯ್ತ್ ಭಿರಾಂತೆಚೊ ಸುಳಿಯೊ ಭರ್ತಾನಾ, ಪೊಟಾಚಾ ಜೊಡಿಖಾತಿರ್ ಆಯಿಲ್ಲ್ಯಾ ಚಡಾವತ್ ಲೊಕಾಂಕ್ ಅಸಲಿಂ ಕಾಮಾಂ ಕರುಂಕ್ ಧಯ್ರ್ ಮೆಳಾನಾತ್‌ಲ್ಲೆಂ. ತಿತ್ಲೆಂಚ್ ನ್ಹಂಯ್. ಚಡಾವತ್ ಲೋಕ್ ಘರ್ ಕಾಮ್ ಯಾ ಘರಾಂನಿ ಡ್ರಾಯ್ವರ್ ಯಾ ಕಂಪೆನೆನಿ ಹೆಲ್ಪರ್ ಜಾವ್ನ್ ಕಾಮ್ ಕರ್‍ಚೊ ಜಾಲ್ಲೆವರ್ವಿಂ ಕೊಣಾಯ್ಕೀ ಆಪ್ಲ್ಯಾ ಕಾಮಾಚೆರ್ ಭ್ಯೆಂ ಆಸ್‌ಲ್ಲೆಂ. ಕಾಮಾಚೊ ಕಾಂಯ್ ಭರ್ವಸೊ ನಾತ್‌ಲ್ಲ್ಯಾನ್ ಕೊಣಾಯ್ಕೀ ಆಯ್ಚೆಂ ಕಾಮ್ ಫ಼ಾಲ್ಯಾಂ ಉರತ್ ಮ್ಹಳ್ಳೊ ಭರ್ವಸೊ ನಾತ್‌ಲ್ಲೊ. ಸದಾಂ ಸಕಾಳಿಂ ಉಟ್ತಾನಾ ಕಾಳ್ಜಾಂತ್ ಜಾಂವ್ಚೆಂ ದಡ್ದಡೆ. ಕಾಮ್ ನಾತ್ಲ್ಯಾರ್ ಗಾಂವಾಂತ್ ಜಾಂವ್ಕ್ ಆಸ್ಚೆ ಆಟೆವಿಟೆ ಮತಿಪಡ್ದ್ಯಾಭಿತರ್ ಯೆತಾಲೆ. ಸರ್ಕೆಂ ನೆಸೊಂಕ್, ಪಿಡೆಂತ್ ಬರೆಂ ವಕಾತ್ ಘೆಂವ್ಕ್‌ಯಿ ಸಾಧ್ಯ್ ನಾತ್‌ಲ್ಲ್ಯಾಂಕ್ ಜರ್‌ತರ್ ಕಿತೆಂಯ್ ಕರುನ್ ದಾಕಯ್ಜಾಯ್ ತರ್ ಖಂಡಿತ್ ಜಾವ್ನ್ ತಾಣಿಂ ಹಾಂಗಾಚ್ಚ್ ಯೇಜಯ್ ಮ್ಹಳ್ಳೆಂ ಚಿಂತಾಪ್ ತಿಯೊಚಾ ಮತಿಂತ್ ಆಯ್ಲೆಂ. ತಶೆಂ ಮ್ಹಣೊನ್ ಗಾಂವಾಂತ್ ಬರ್‍ಯಾ ರಿತಿನ್ ದೀಸ್ ಕಾಡ್ಚಿಂ ಸಗ್ಳಿಂ ಗಲ್ಫಾಕ್ ವಚೊನ್ ಘೊಳೊನ್ ಆಯಿಲ್ಲಿಂ ಮ್ಹಣೊನ್ ಬಿಲ್ಕುಲ್ ನ್ಹಂಯ್. ಗಾಂವಾತ್ ಜಾಲ್ಯಾರೀ ಬರೆಂ ಶಿಕಾಪ್ ಜೊಡುನ್ ಬರ್‍ಯಾ ಕಾಮಾರ್ ಆಸ್ಚೆ ಸಭಾರ್ ಆಸಾತ್. ಪುಣ್ ಶೆಂಭೊರಾಂತ್ ಹಾಂಚೊ ಸಂಖೊ ಕಿತ್ಲೊ? ಧಾಂನಿ ಯಾ ವಿಸಾಂನಿ ಮಾತ್ ಶಿವಾಯ್ ಪಾವಣ್ಶಿಂ ಯಾ ಶೆಂಭೊರ್ ನ್ಹಂಯ್. ತರ್ ಉರುಲ್ಲ್ಯಾಂಕ್ ಆಸ್ಚಿ ಎಕ್‌ಚ್ ವಾಟ್ ಮ್ಹಳ್ಯಾರ್ ಗಲ್ಫ್.

ಹಾಂಗಾಸರ್ ಯೆಂವ್ಚೊ ಚಡಾವತ್ ಲೋಕ್ ಏಕ್ ನ್ಹಂಯ್ ತರ್ ಏಕ್ ನವಿ ಖಬರ್ ಹಾಡುನ್ ಯೆತಾಲೊ. ಏಕ್ ಖಬಾರ್ ಕಶಿ ಎಕೆಕ್ಲ್ಯಾಚಾ ಜಿಬೆ ಥಾವುನ್ ಹಾತ್ ಪಾಂಯ್ ಪಾಕಾಟೆ ಫುಟೊನ್ ನಾನಾ ರಿತಿರ್ ಉಭ್ತಾಲ್ಯೊ. ಥೊಡ್ಯಾಂಕ್ ಗಾಂವ್ಚೊ ಖಬ್ರೊ ತರ್ ಥೊಡ್ಯಾಂಕ್ ಗಲ್ಫಾಚೊ ಖಬ್ರೊ. ಆನಿಂ ಖಬ್ರೊ ಆಯ್ಕೊನ್ ಸವಯ್ ನಾತ್‌ಲ್ಲ್ಯಾ ತಿಯೊಕ್ ಸಯ್ತ್ ಆತಾಂ ಹ್ಯೊ ಖಬ್ರೊ ಆಯ್ಕೊಂವ್ಚಿ ಆತುರಾಯ್.

ಹೊ ಗಾಂವ್ ಪರ್‍ಕಿ ಗಾಂವ್, ಹಾಂಗಾಸರ್ ಆಮಿಂ ಸಗ್ಳಿಂ ಪರ್ದೇಶಿಂ. ಗೊರ್‍ಯಾಂಕ್ ಹಾಂಗಾ ಬರೊ ಮಾನ್ ಆಸಾ. ಅರ್ಭ್ಯಾಂಕ್ ತಾಂಚಾ ದುಡ್ವಾಚಾ ಹಾಂಕಾರಾಂತ್ ಕಿತೆಂಯ್ ಮೊಲಾಕ್ ಘೆವ್ಯೆತಾ. ತಾಂಕಾ ಭಿಗ್ಡಾಂವ್ಕ್ ಕಾಂಯ್ ಆಮ್ಚಾ ಗಾಂವ್ಚೊ ಲೋಕ್ ಉಣೊ ನಾ. ತಾಂಚಾ ಮಜತೆನ್ ಆರ್ಭ್ಯಾಂಕ್ ತಾಂಚಾ ಪೊಯ್ಶಾಂಕ್ ಸಗ್ಳೆಂ ಮೆಳ್ತಾಲೆಂ. ಸೊರೊ, ಮನ್ಶಾಂ, ಚೆಡ್ವಾಂ, ಡ್ರಗ್ಸ್. ಗರ್ಜ್ ಪಡ್ಲ್ಯಾರ್ ಕೊಣಾಯ್ಕೀ ಉಕ್ಲುನ್ ವರುನ್ ಖಾತರ್ನ್ ಘಾಲೆಂ ತರ್ ತಾಂಕಾ ವಿಚಾರ್‍ತೆಲಿಂ ಕೋಣ್? ಕಾಂಯ್ ಇಲ್ಲೆಶ್ಯಾ ಸಂದರ್‍ಭಾಂನಿ ಎಕ್ಲ್ಯಾ ದೊಗಾಂಕ್ ಶಿಕ್ಶಾ ಮೆಳ್ತಾಲಿ. ಪುಣ್ ಸಗ್ಳ್ಯಾಂಕ್ ನ್ಹಂಯ್. ತೆ ಕಾನೂನ್ ಕೆಲ್ಲೆ ಮನಿಸ್ ಆನಿಂ ತೆಂ ಕಾನೂನ್ ಹೆರಾಂಕ್ ಲಗು ಜಾತಾಲೆಂ ಪುಣ್ ತಾಂಕಾ ನ್ಹಂಯ್. ಮಾಲ್ಘಡ್ಯಾಂನಿ ಸಾರ್ಕೆಚ್ ಸಂಗ್ಲಾಂ ಜಾಯ್ಜಯ್ 'ಗ್ರೇಸ್ತಾಂನಿ ಖಾಂವ್ಚೆಂ ವಕ್ತಾಕ್ ತರ್ ದುಬ್ಳ್ಯಾಂನಿ ಖಾಂವ್ಚೆಂ ಪೊಟಾಕ್ ನಾಸ್ತಾಂ'

ಹಾಂಗಾ ಸದಾಂಚೊ ಕಾಣಿಯೊಂ ಮ್ಹಳ್ಯಾರ್ ಚಾರ್ ಪಾಂಚ್ ವರ್ಸಾಂಚಾ ಭುರ್ಗ್ಯಾಂಕ್ ಸಯ್ತ್ ಉಕ್ಲುನ್ ವರ್ತಾತ್ ಆನಿಂ ತಾಂಕಾ ಪಾಡ್ ಕರ್ನ್ ಖಂಯ್ಚಾಗೀ ರೆಂವೆಚಾ ರಾಶಿರ್ ಉಡವ್ನ್ ವೆತಾತ್. ಎಕ್ಸುರೆಂ ಚೆಡುಂ ಕಾಂಯ್ ವಾಟೆಮಧೆಂ ಸಾಂಪಡ್ಲೆಂ ತರ್ ತಾಕಾ ಸಗ್ಳೆ ಮೆಳೊನ್ ಅತ್ತ್ಯಾಚಾರ್ ಕರ್‍ತಾತ್. ಹಾಂತುಂ ಆಮ್ಚಾ ದೆಸಾಚೆ ಮಾಪ್ಳ್ಯಾಂನಿಂಯ್ ಕಾಂಯ್ ಸೊಡ್ನ್ ದೀಂವ್ಕ್ ನಾ. ಎಕ್ಲೊ ಮಾಪ್ಳಿ ಕುವೆಯ್ಟಾಂತ್ ಬಂಗ್ಲ್ಯಾಂತ್ ಕಾಮ್ ಕರುನ್ ಆಸ್‌ಲ್ಲೊ ಆನಿಂ ಅಶೆಂಚ್ ಬಂಗ್ಲ್ಯಾಂತ್ ಕಾಮ್ ಕರ್ಚಾ ಎಕ್ಲ್ಯಾ ಚೆಡ್ವಾಕ್ ಪಳೆವ್ನ್ ಭುಲ್ಲೊ. ಪುಣ್ ತಾಚೆಂ ಗುಮಾನ್ ಕರಿನಾತ್‌ಲ್ಲ್ಯಾ ತ್ಯಾ ಚೆಡ್ವಾಕ್ ತಾಚಾ ಇಸ್ಟಾಂಸವೆಂ ಎಕಾ ದಿಸಾ ವ್ಹರ್ನ್ ತಿಚೆರ್ ಬಲಾತ್ಕಾರ್ ಕೆಲೊ.

ಹೆರಾಂಕ್ ಖಬಾರ್ ಕಳ್ಳ್ಯಾರ್ ದೊಗಾಂಯ್ಚೆಂ ಕಾಮ್ ವೆತಾ ಮಾತ್ರ್ ನ್ಹಂಯ್ ಆಪ್ೞಾಚಿ ಮಾನ್ ಮರ್‍ಯಾದ್ ವೆತಾ ಮ್ಹಳ್ಳ್ಯಾ ಭಿಂಯಾಂತ್ ತೆಂ ಚೆಡುಂ ವಗೆಚ್ಚ್ ರಾವ್ಲೆಂ ತರೀ ಘುಟ್ ಘುಟ್ ಜಾವ್ನ್ ಉರ್‍ಲೊನಾ. ಚೆಡ್ವಾಕ್ ಗರ್ಭ್ ಭರೊನ್ ಆಯ್ಲೊ ಆನಿಂ ಅಶೆಂ ತಿಚಾ ಘರ್ಚಾಂಕ್ ಖಬಾರ್ ಕಳ್ತಚ್ಚ್ ತಾಣಿಂ ತ್ಯಾ ಚೆಡ್ವಾಕ್ ಪೊಲಿಸಾಂಚಾ ಹಾತಾಂತ್ ದಿಲೊ. ಆನಿಂ ಪೊಲಿಸಾಂಚಾ ಭಿಂಯಾಂತ್ ತೊ ತ್ಯಾ ಚೆಡ್ವಾಲಾಗಿಂ ಕಾಜಾರ್ ಜಾಂವ್ಕ್ ಕಬೂಲ್ ಜಾಲೊ ಆನಿಂ ಅಶೆಂ ತಾಂಚೆ ಕುವೆಯ್ಟಾಂತ್‌ಚ್ಚ್ ಕಾಜಾರ್ ಜಾಲೆಂ.

ಕಾಜಾರ್ ಜಾಲೊ ಆನಿಂ ಉಟಾಉಟಿಂ ಎಕಾ ಪಾಟ್ಲ್ಯಾನ್ ಏಕ್ ಮ್ಹಣೊನ್ ಪಾಂಚ್ ಭುರ್ಗಿಂ ಕೆಲಿಂ ಆನಿಂ ಅಶೆಂ ಭುರ್ಗಿಂ ವ್ಹಡ್ ಜಾವ್ನ್ ಆಯ್ಲಿಂ ಆನಿಂ ಆತಾಂ ತೊ ಮಾಪ್ಳಿ ತಾಂಚಾ ಎಕಾ ಭುರ್ಗ್ಯಾಕ್‌ಯಿ ಏಕ್ ಇಜಿಪ್ಶಿಯನಾಚಾ ಘರಾ ಕಾಮಾಕ್ ದವರ್‍ಲೊ. ದೀಸ್ ಗೆಲ್ಲೆಪರಿಂಚ್ ಘಡೊಂಕ್ ಆಸ್‌ಲ್ಲೆಂ ಘಡಜಾಯ್ ಆಸ್‌ಲ್ಲೆಂ. ತಾಲ್ವಾರ್ ಧರ್‌ಲ್ಲ್ಯಾಂಕ್ ತಲ್ವಾರೆಂತ್ ನಾಸ್ ಜಾಂವ್ಕ್ ಆಸ್‌ಲ್ಲೆಂ.

ತಾಚಿ ಧುವ್ ಎಕಾ ಇಜಿಪ್ಶಿಯನಾಚಾ ಘರಾ ಕಾಮ್ ಕರ್ತಾಲಿ. ತ್ಯಾ ಇಜಿಪ್ಶಿಯನಾಕ್ ಚಾರ್ ಭುರ್ಗಿಂ ಆಸ್‌ಲ್ಲಿಂ. ಎಕಾ ದಿಸಾ ಬಾಯ್ಲೆಕ್ ಆನಿಂ ಭುರ್ಗ್ಯಾಂಕ್ ತ್ಯಾ ಇಜಿಪ್ಶಿಯನಾನ್ ಎಜಿಪ್ತಾಕ್ ಧಾಡ್ಲೊ ಆನಿಂ ಎಕ್ಸುರ್‍ಯಾ ತ್ಯಾ ಚೆಡ್ವಾಚೆರ್ ಬಲಾತ್ಕಾರ್ ಚಲಯ್ಲೊ. ಭ್ಯೆಂ ಆನಿಂ ಅಕ್ಮಾನಾಂತ್ ಭರ್‌ಲ್ಲ್ಯಾ ತ್ಯಾ ಚೆಡ್ವಾಕ್ ಹೆರ್ ಕಸ್ಲಿಚ್ಚ್ ವಾಟ್ ದಿಸ್ಲಿನಾ ತರೀ ತೆಂ ಘರಾಭಿತರ್‌ಚ್ ಉರ್‍ಲೆಂ. ಭಾಯ್ರ್ ಧಾಂವೊಂಕ್ ತಿಕಾ ಕಸ್ಲೊಚ್ಚ್ ಆವ್ಕಾಸ್ ಮೆಳ್ಳೊನಾ. ಚಡುಣೆಂ ಚಾರ್ ದೀಸ್ ಪರ್‍ಯಾಂತ್ ಅಶೆಂ ಬಲಾತ್ಕಾರ್ ಸೊಸ್‌ಲ್ಲ್ಯಾ ತ್ಯಾ ಚೆಡ್ವಾನ್ ಅಖ್ರೇಕ್ ಬಿಲ್ಡಿಂಗಾ ಥಾವುನ್ ಉಡಿ ಮಾರುನ್ ಜೀವ್ಘಾತ್ ಕೆಲೊ. ಖಬಾರ್ ವಿಸ್ತಾರ್‍ಲಿ, ಪೊಲಿಸ್ ಆಯ್ಲೆ, ಇಜಿಪ್ಶಿಯಾನಾಕ್ ಕುಡಾಯ್ಲೊ. ಪುಣ್ ಕಾನೂನಾಚೊ ವ್ಹಡ್ಲೊ ಹಾತ್ ತಾಕಾ ಆಸ್‌ಲ್ಲ್ಯಾನ್ ಥೊಡ್ಯಾಚ್ಚ್ ದಿಸಾಂನಿ ತಾಕಾ ಸೊಡ್ಲೊ. ಪೊಲಿಸಾಂನಿ ಫಯ್ಸಲ್ ದಿಲೆಂ ತ್ಯೇ ಚೆಡ್ವಾಕ್ ಭಾಯ್ಲ್ಯಾ ಚೆಡ್ಯಾಸವೆಂ ಸಳಾವಳ್ ಆಸ್‌ಲ್ಲಿ ಆನಿಂ ತಾಣೆಂ ಕಾಜಾರ್ ಜಾಂವ್ಕ್ ಇನ್ಕಾರ್ ಕೆಲ್ಲೊಚ್ಚ್ ತಾಣೆಂ ಜೀವ್ಘಾತ್ ಕೆಲೊ. ಅಶ್ಯೊಚ್ಚ್ ಕಾಣಿಂಯೊಂ ಘಡ್ಲ್ಯೊ. ಪುಣ್ ಹ್ಯಾ ಕಾಣಿಯೆಂತ್ ಆಸ್‌ಲ್ಲಿಂ ಸಗ್ಳಿಂ ಸವಾಲಾ ತರ್ ತ್ಯಾ ಚಲಿಯೆಚೆರ್ ಕಸೊ ಅತ್ಯಾಚಾರ್ ಘಡ್ಲೊ? ಇತ್ಯಾದಿ ಸವಾಲಾಂಕ್ ಉಸ್ತುನ್ ಸವಾಲ್ ಕರ್‍ಚಿಂ ಕೋಣೀಂ ನಾತ್‌ಲ್ಲಿಂ. ಚಡ್ ಆವಾಜ್ ಕೆಲೊ ತರ್ ತ್ಯಾ ಮಾಪ್ಳ್ಯಾಚೆಂ ಕಾಮ್ ವೆಚೆಂ ಖಂಡಿತ್ ದೆಖುನ್ ತೊ ಮಾಪ್ಳೊ ವಗೊಚ್ ರಾವ್ಲೊ.

ಅಶೆಚ್ಚ್ ದೀಸ್ ಬದಲ್ಲೆ ಆನಿಂ ತೊ ಮಾಪ್ಳೊ ಬರ್‍ಯಾ ದಿಸಾಕ್ ರಾಕೊನ್ ಉರ್‍ಲೊ ಆನಿಂ ರಾಕೊನ್ ಆಸ್‌ಲ್ಲ್ಯಾ ತಾಕಾ ಏಕ್ ದೀಸ್ ತ್ಯಾ ಈಜಿಪ್ಶಿಯಾನಾಚೆಂ ಭುರ್ಗೆಂ ಮೆಳ್ಳೆಂ. ಪ್ರಾಯೆನ್ ತೆಂ ಕಾಂಯ್ ಧಾ ಯಾ ಇಕ್ರಾ ವರ್‍ಸಾಂಚೆಂ. ಮೆಳ್‌ಲ್ಲೊ ಆವ್ಕಾಸ್ ಬರೊಚ್ ಗಳ್ಸಿಲ್ಲ್ಯಾ ತಾಣೆಂ ತ್ಯಾ ಚೆಡ್ವಾಕ್ ಬಲತ್ಕಾರಾನ್ ತಾಚಾ ಸಾಂಗಾತ್ಯಾಂಚಾ ಕುಮ್ಕೆನ್ ಕಾರಾರ್ ಘಾಲ್ನ್ ಪಯ್ಸ್ ವ್ಹೆಲೊ ಆನಿಂ ಎಕಾ ಪಾಟ್ಲ್ಯಾನ್ ಎಕ್ಲ್ಯಾನ್ ತಿಚೆರ್ ಬಲತ್ಕಾರ್ ಕರುನ್ ಅಖ್ರೇಕ್ ತಿಚೆ ಹಾತ್ ಪಾಂಯ್ ಕಾತರ್ನ್ ಅಮಾನುಷ್ ರಿತಿನ್ ಖುನ್ ಕರುನ್ ಪಾಟಿಂ ಆಯ್ಲೆ.

ಪೊಲಿಸ್ ಆಯ್ಲೆ, ತನ್ಕಿ ಚಲ್ಲಿ. ಮಾಪ್ಳೊ ಸಾಂಪಡ್ಲೊ ಆನಿಂ ಆಪ್ಲೊ ಗುನ್ಯಾಂವ್ ವಳ್ಕಾಲೊ, ಆಪ್ಣಾನ್ ಆಪ್ಲ್ಯಾ ಧುವೆಚೆರ್ ಜಾಲ್ಲ್ಯಾ ಅನ್ನ್ಯಾಯಾಚೆಂ ಫಾರಿಕ್ಪಣ್ ಘೆತ್ಲೆಂ ಮ್ಹಣೊನ್ ಸಾಂಗ್ಲೆಂ. ಆನಿಂ ಹಾಂಗಾ ಅಸಲ್ಯಾ ಗುನ್ಯಾಂವಾಂಕ್ ಶಿಕ್ಶಾ ಲಾಭೊಂಕ್ ವರ್ಸಾಂ ಲಾಗಾನಾಂತ್. ವೆಗಿಂಚ್ ತಾಕಾ ಫಾಶೆಚಿ ಶಿಕ್ಶಾ ದಿಲಿ. ತಾಚಾ ಸಾಂಗಾತ್ಯಾಂಕ್ ಸಾತ್ ವರ್ಸಾಂಚಿ ಶಿಕ್ಶಾ ಲಾಭ್ಲಿ.

ಎಕ್‌ಚ್ ಗುನ್ಯಾಂವ್. ಸುರ್‍ವಾತ್ ಕೆಲ್ಲಿ ಕೊಣೆಂ, ಶಿಕ್ಶಾ ಕಶಿ ಕೊಣಾಕ್ ಮೆಳ್ಳಿ? ಎಕ್ಲ್ಯಾಕ್ ತೊ ಗುನ್ಯಾಂವ್ ತರ್ ಅನ್ಯೇಕ್ಲ್ಯಾಕ್ ತೊ ಅಪ್ರಾಧ್. ಗುನ್ಯಾಂವಾಂಕ್ ಭೊಗ್ಸಾಣೆಂ ಆನಿಂ ಅಪ್ರಾಧಾಕ್ ಶಿಕ್ಶಾ. ಅಸಲ್ಯಾ ಧ್ವೇಶಾಂತ್‌ಯಿ ಲಾಸೊನ್ ಆಸೊನ್ ತರೀ ಕಾಮ್ ಕರಿಜಯ್.

ಅಸಲ್ಯೊ ಖಬ್ರೊ ಹಾಂಗಾಚಾ ಲೊಕಾಂಕ್ ಕಾಂಯ್ ನವ್ಯೊ ನ್ಹಂಯ್. ಆಜ್ ಕೋಣ್ ನಪಂಯ್ಚ್ ಜಾಲಾಂ ತರ್ ಫಾಲ್ಯಾಂ ಕೊಣಾಚೆಂಗೀ ಮೊಡೆಂ ಮೆಳ್ಳಾಂ. ನಶಿಬ್‌ವಂತಾಂಚೆಂ ಮೊಡೆಂ ತರೀಮೆಳ್ತಾ ಪುಣ್ ಕಿತ್ಲೆಶ್ಯಾಂಚಿಂ ಮೊಡಿಂ ಅಜೂನೀಂ ಮೆಳೊಂಕ್‌ನಾಂತ್. ಬಾವ್ಡಿಂ ತಾಂಚಾ ಕುಟ್ಮಾಚಿಂ ಅಜೂನೀಂ ತಾಕಾ ಯಾ ತಿಕಾ ರಾಕೊನ್ ಆಸಾತ್, ತಾಂಚಾ ಕಾಗ್ದಾಂಚಿ ವಾಟ್ ರಾಕೊನ್ ಆಸಾತ್. ತರೀ ಲೋಕ್ ಹಾಂಗಾ ಯೆತಾ, ಲೊಕಾಂಕ್ ಹಾಂಗಾಚಿ ಜೋಡ್ ಜಾಯ್. ಲೊಕಾಂಕ್ ಹಾಂಗಾಚೆ ಪೊಯ್ಶೆ ಜಾಯ್. ಹಾಂಚೆ ವಿರೋಧ್ ಆವಾಜ್ ಕರುಂಕ್ ಜಾಯ್ನಾ. ಆವಾಜ್ ಕೆಲ್ಲ್ಯಾಂಚೊ ಆವಾಜ್ ಬಂಧ್ ಕರುಂಕ್ ತಾಂಕಾ ಸಾಧ್ಯ್ ಆಸಾ. ಯಾ ಜೀವ್ ಹೊಗ್ಡಾಯ್ಶೆ ಕರ್‍ಚಿ ಶ್ಯಾಥಿಯಿ ತಾಂಕಾಂ ಆಸಾ.

ತಿಯೊಚಾ ಮತಿಂತ್ ಆತಾಂ ಕಿತೆಂ ಶಿಜ್ತಾಲೆಂ ಮ್ಹಳ್ಳೆಂ ತೊಚ್ಚ್ ನೆಣಾಂ ಜಾಲೊ. ಪಯ್ಸಿಲೊ ಗುಡೊ ಪಯ್ಸ್ ಥಾವ್ನ್ ಸೊಭಿತ್ ದಿಸ್ತಾ. ತಶೆಂ ಆಸ್ತಾಂ ತಾಕಾ ಪಯ್ಸ್ ಥಾವುನ್ ಪಳೆಂವ್ಚೆಂಚ್ ಬರೆಂ ಶಿವಾಯ್ ತ್ಯಾ ಗುಡ್ಯಾಕ್ ಚಡೊನ್ ಪಳೆಂವ್ಚೆಂ ನ್ಹಂಯ್. ಕಿತ್ಯಾಕ್ ಮ್ಹಳ್ಯಾರ್ ತ್ಯಾ ಗುಡ್ಯಾಕ್ ಚಡೊಂಕ್ ಲಾಗ್ತಾನಾ ಕಳೊನ್ ಯೆತಾ ತಾಂತುಂ ಕಿತ್ಲೆ ಕಾಂಟೆ ಆಸಾತ್, ಫಾತೊರ್ ಆಸಾತ್, ಫೊಂಡ್ ಆಸಾತ್ ಮ್ಹಳ್ಳೆಂ.

ಗಾಂವಾಂತ್ ಆಸ್ತಾಂ ಗಲ್ಫ್ ಮ್ಹಳ್ಳೊ ಸಬ್ಧ್ ಕಾಳ್ಜಾಂತ್ ಫುಲಾಂ ಭರ್ತಾಲಿಂ ಪುಣ್ ನೀಜ್ ಜಾವ್ನ್ ಗಲ್ಫ್ ದೆಖ್ತಾನಾ ತಿಂ ಫುಲಾಂ ಫುಲಾಂ ನ್ಹಂಯ್ ಕಾಂಟೆ ಮ್ಹಣೊನ್ ಭೊಗ್ತಾಲೆಂ ಆನಿಂ ತವಳ್‌ತವಳ್ ಹೆ ಕಾಂಟೆ ತೊಪ್ತಾಲೆ, ಖೊಂಕ್ತಾಲೆ ಆನಿಂ ದುಖ್ತಾಲೆ. ಕೊಣಾಕ್ ಎಕ್ಸುರ್‍ಪಣಾಚೆ ಕಾಂಟೆ, ಕೊಣಾಕ್ ಹರ್‍ಯೆಕ್ ಘಡಿ ಯೆಂವ್ಚಾ ಘರ್ಚಾ ಉಡಾಸಾಚೆ ಕಾಂಟೆ, ಕೊಣಾಕ್ ದೀಸ್ ಮ್ಹಣೊನ್ ನಾ ರಾತ್ ಮ್ಹಣೊನ್ ನಾ ಕರುಂಕ್ ಆಸ್ಚಾ ಕಾಮಾಚೆ ಕಾಂಟೆ, ಕಿತೆಂ ಆಸ್ಲ್ಯಾರೀ ಥೊಡ್ಯಾಂಕ್ ಮಾತ್ ಮಹಿನೊ ಸಂಪೊನ್೦ಯಿ ಮೆಳಾನಾತ್‌ಲ್ಲ್ಯಾ ಸಾಂಭಾಳಾಚೆ ಕಾಂಟೆ. ಹರ್‍ಯೆಕ್ಲ್ಯಾಕ್ ಎಕೆಕ್ ರಿತಿಚಿ ದೂಕ್ ಆನಿ ವಿರಾರಾಯ್.

ಎಕ್ಲ್ಯಾ ದೊಗಾಂನಿ ಆಪ್ಲ್ಯಾ ಭಾಂವಾಂಕ್, ಮಿವ್ಣ್ಯಾಂಕ್ ಗಲ್ಫಾಕ್ ಆಪವ್ನ್ ಹಾಡ್ಲೊ, ತಾಂಚೊ ಸಾಂಭಾಳ್ ಉಣೊ ಆಸ್‌ಲ್ಲ್ಯಾನ್ ಕೊಣಾ ಕೊಣಾಚೆ ಪಾಂಯ್ ಧರುನ್ ಕೊಣಾ ಕೊಣಾಕ್ ಪೊಯ್ಶೆ ಭರುನ್ ತಾಂಕಾ ಗಲ್ಫಾಕ್ ಹಾಡ್ಲೊ. ದಾಟ್ಟುಚಾ ಗುಸ್ತ್ಯಾರ್, ಬಾಯೆಚಾ/ಭಾವೊಜಿಚಾ ಗುಸ್ತ್ಯಾರ್, ಗಲ್ಫಾಕ್ ಆಯಿಲ್ಲೆ ಕಾಂಯ್ ನಶಿಬಾಂತ್ ಕಸ್ಲೆಂಯ್ ಕಾಮ್ ಕರುಂಕ್ ಜಾಣಾಂತ್ ತರ್ ಕಿತೆಂಯ್ ಪುಣಿಂ ಕಾಮ್ ಮೆಳ್ಚೊ ಸಂದರ್ಭ್ ಉದೆತ್. ಪುಣ್ ಖಂಚೇಂಯ್ ಕಾಮ್ ಜಾಯ್ತ್ ಮ್ಹಣೊನ್ ಬಸ್ವಾಪರಿಂ ಕೆಲೆಂ ತರ್ ಆಪವ್ನ್ ಹಾಡ್‌ಲ್ಲ್ಯಾಕ್ ಬೊಡಿ ದೀವ್ನ್ ಮಾರ್ ಕೆಲ್ಲೆಪರಿಂಚ್. ಆಪಡ್ಲೆಂಯ್ ಕಿತ್ಯಾಕ್ ಧುವ್ನ್ ಸೊಡ್ ಮ್ಹಳ್ಳೆಪರಿಂ, ಗಾಂವಾಂತ್‌ಚ್ಚ್ ಆಸ್ತೊಂನೆ? ಆತಾಂ ಗಲ್ಫಾಕ್ ಹಾಡ್ಲೊಯ್ ಮ್ಹಳ್ಳೆಂ ಹಂಗ್. ಕಾಮ್ ಮೆಳ್ಳೆಂ ತರ್ ಮೆಳ್ಳೆಂ. ನಾತ್‌ಲ್ಯಾರ್ ನಾ. ಥೊಡೆಪಾವ್ಟಿಂ ಕಾಮ್ ಮೆಳಾನಾಸ್ತಾಂ ಆಸ್ತಾನಾ ಕೊಣೆಂಯ್ ವಿಜಾ ದೀನಾಸ್ತಾಂ ಮೆಳ್‌ಲ್ಲೆಂ ಕಾಮ್೦ಯಿ ಕರಿಜಯ್ ಪಡ್ತಾ. ಪಾಟಿಂ ಗಾಂವಾಕ್ ಗೆಲ್ಲೆಪರಿಂ ನಾ. ತಶೆಂ ಆಸ್ತಾಂ ಮೆಳ್‌ಲ್ಲೆಂ ಕಾಮ್ ಘುಟಾನ್ ಕರುಂಕ್ ಪಡ್ತಾ. ಕಾಮಾಮಧೆಂಯಿ ಕಾಂಯ್ ಶಿರ್ಕೊನ್ ಪಡ್ತಾಂಗೀ ಮ್ಹಳ್ಳೆಂ ಭ್ಯೆಂ, ಕಾಂಯ್ ಪೊಲಿಸ್ ಧರ್ತಿತ್ ತರ್ ಪಾಟಿಂ ಮುಖಾರ್ ವಿಚಾರ್ ಕರಿನಾಸ್ತಾಂ ಜಯ್ಲಾಕ್ ವರ್ತಾತ್. ಎಕಾ ವಾಟೆರ್ ಭಾಸ್ ಯೇನಾಸ್ತಾಂ ಕಂಗಾಲ್ ತರ್ ಅನ್ಯೇಕಾ ವಾಟೆರ್ ಮುಖಾರ್ ಕಿತೆಂ ಜಾಯ್ತ್ ಮ್ಹಳ್ಳಿ ಭಿರಾಂತ್. ಹ್ಯಾ ದಡ್ದಡ್ಚಾ ಕಾಳ್ಜಾಕ್ ಘೆವ್ನ್ ಹಾಂಗಾಚಿಂ ಹರ್‍ಯೆಕ್ ಮಿನುಟಾಂ ಪಾಶಾರ್ ಕರುಂಕ್ ಆಸಾತ್.

ಎಕೇಕ್ ದೀಸ್ ಕಾಡ್ಚೊ ಮ್ಹಳ್ಯಾರ್ ಥೊಡ್ಯಾಂಕ್ ವರ್‍ಸಾಂ ಪಾಶಾರ್ ಕೆಲ್ಲೆಪರಿಂಚ್ಚ್. ಇತ್ಲಿ ಮಿನತ್ ಕೆಲಿ ತರೀ ಸದಾಂ ದುಭಾವಿ ನದರ್ ಸದಾಂ ಆಸ್ತಾಲಿ. ಕಾಂಯ್ ಏಕ್ ದೋನ್ ದಿಸಾಂ ಖಾತಿರ್ ತಿಂ ಸಯ್ರ್ಯಾಂಗೆರ್ ವೆಚೆಂ ತರೀ ಘರಾಕ್ ಬೀಗ್ ಘಾಲ್ನ್ ಭಾಯ್ರ್ ಪಾರೊತ್ ಕರುಂಕ್ ಮನ್ಶಾಂಕ್ ದವ್ರುನ್ ಘರ್‌ಕಾಮಾಚಾಂಕ್ ಭಾಯ್ಲ್ಯಾ ಕುಡಾಂನಿ ದವ್ರುನ್ ವೆತಾಲಿಂ. ಕಾಂಯ್ ಥೊಡಿಂ ಹಾಂತುಂ ಬರಿಂ ಆಸ್ತಿತ್. ಪುಣ್ ಚಡಾವತ್ ಜಣಾಂಚಿ ಪರಿಗತ್ ಹಿಚ್ಚ್.

ಹಾಂಚಾ ಭುರ್ಗ್ಯಾಂನಿ ಜಾಲ್ಯಾರೀ ವಿಭಾಡ್ಚೊ ದುಡು ಹಾಂಗಾ ಕಾಮ್ ಕರುನ್ ಆಸ್ಚಾಂಕ್ ಸಾಂಬಾಳ್ ಜಾವ್ನ್ ಲೆಗುನ್ ಮೆಳಾನಾತ್‌ಲ್ಲೊ. ಜಾಂವ್ಕ್ ಪುರೊ ಖಾಣಾಚೊ ವಿಭಾಡ್, ಜಾಂವ್ಕ್ ಪುರೊ ನೆಸ್ಪಾಚೊ ವಿಭಾಡ್, ಜಾಂವ್ಕ್ ಪುರೊ ಹೆರ್ ವಿಭಾಡ್. ಪೊಯ್ಶ್ಯಾಂನಿ ಕುಸ್ಚೊ ಲೋಕ್, ಸಂಸಾರಾಕ್, ಮನ್ಶಾಂಕ್, ವಸ್ತುಂಕ್ ಹರ್‍ಯೆಕಾಂಕ್ ಮೊಲಾಕ್ ಘೆಂವ್ಚಿ ಶ್ಯಾಥಿ ಆಮ್ಕಾಂ ಆಸಾ ಮ್ಹಳ್ಳೊ ಹಾಂಕಾರ್. ಹಾಂಚೊ ಹಾಂಕಾರ್ ಮನ್ಶಾಂಕ್ ಮಾತ್ ಸೀಮಿತ್ ನ್ಹಂಯ್, ದೆವಾಂಕ್ ಸಯ್ತ್. ಹೆರಾಂಚಾ ಗಳ್ಯಾರ್ ಆಸ್ಚೊ ಬೆಂತಿಣ್ಯೊ, ಆರ್ಲುಕೊ, ಖುರಿಸ್ ಕಿತ್ಲೆಶೆಪಾವ್ಟಿಂ ಹುಮ್ಟುನ್ ಕಾಡ್ತಾತ್. ಕಿತ್ಲೆಶೆಪಾವ್ಟಿಂ ತೆ ಹೆರಾಂಚಾ ಧರ್‍ಮಾಚಿ ಖೊಡ್ ಕಾಡ್ತಾತ್? ತಾಂಚೊ ಮಾತ್ ದೇವ್ ಹೆರಾಂಚೊ ನ್ಹಂಯ್ ಮ್ಹಳ್ಳೆಂ ಚಿಂತಾಪ್. ದಿಸಾಕ್ ಪಾಂಚ್ ಸ ಪಾವ್ಟಿಂ ನಮಾಜ್ ಕೆಲ್ಲೆ ಯಾ ಕರ್‍ಚೆ ಹೆ ಹಾಂಚಾ ಜಿಣ್ಯೆಂತ್ ಕಿತೆಂ ಕರ್ತಾತ್? ಬಾಸ್ಕಳ್ಪಣ್ ಆನಿಂ ಪೊಜ್ಡೆಂಪಣ್ ಹಾಂಚಾ ಶಿರಾಂ ಶಿರಾಂನಿ ಆಸಾ. ಹಾಂಚಾ ಬಾಯ್ಲಾಂಕ್ ಭುರ್ಗ್ಯಾಂಕ್ ಕೊಣೆಂಯಿ ದೀಶ್ಟ್ ಉಕಲ್ನ್ ಪಳೆನಾಯೆ. ಪುಣ್ ಹೆರಾಂಚೊ ಭಯ್ಣ್ಯೊ ಬಾಯ್ಲೊ ಹಾಂಕಾ ದಿಸ್ತಾತ್ ಎಕಾಚ್ಚ್ ನದ್ರೆಂತ್. ಹಾಂಚಾ ಧರ್ಮಾಕ್ ಆನಿಂ ಹಾಂಚಾ ಜಿಣ್ಯೆಕ್ ಪಳೆತಾನಾ ಹಾಂಕಾ ಮನ್ಶಾಪಣ್ ಮ್ಹಳ್ಳ್ಯಾಚೊ ಅರ್ಥ್ ಕಳಿತ್ ಆಸಾಗೀ ಮ್ಹಳ್ಳೆಂ ಸವಾಲ್ ಧೊಸ್ತಾ. ಕಾಂಯ್ ಆಮಾಸೆಕ್ ಏಕ್ ಯಾ ಪುನವೆಕ್ ಏಕ್ ಮ್ಹಳ್ಳೆಪರಿಂ ಥೊಡೆ ಬರೆ ಮನಿಸ್ ಆಸಾತ್. ತಾಂಚೆ ವಿಚಾರ್ ಪರಿಪೂರ್ಣ್ ಆಸಾತ್. ಮನ್ಶಾಂಕ್ ಮನ್ಶಾಚಾ ನದ್ರೆಂತ್ ದೆಕ್ಚೆ ಆಸಾತ್. ಸಂಸಾರ್ ಬದಲ್ಲಾ ಆನಿಂ ಬದ್ಲೊನ್೦ಚ್ ಆಸಾ. ಅಸಲೆ ಮನಿಸ್ ಆಜ್‌ಕಾಲ್ ಆಮ್ಚಾ ಗಾಂವಾಂತ್‌ಚ್ಚ್ ಆಸ್ತಾನಾ ಹ್ಯಾ ಆರ್ಭಿ ಯಾ ಮಾಪ್ಳ್ಯಾ ಲೊಕಾಂಕ್ ಮಾತ್ರ್ ಕಿತ್ಯಾಕ್ ದುರ್ಸಜಯ್?

ಥೊಡ್ಯಾಂಕ್ ಹಾಪ್ತ್ಯಾಕ್ ಮೆಳ್ಚೊ ಅರ್ಧೊ ದೀಸ್ ರಜಾಯಿ ಕಶ್ಟಾಂನಿ ಮೆಳ್ತಾ. ಮೆಳಾನಾ ತರೀ ಝಗ್ಡೆಂ ಕೆಲ್ಲೆಪರಿಂ ನಾ. ವಿಚಾರ್ ಕೆಲೆಂ ತರ್ 'ತುಂ ರಜಾಖಾತಿರ್ ಕಾಮ್ ಕರ್‍ತಾಯ್ಗೀ ಯಾ ಕಾಮಾಖಾತಿರ್ ರಜಾ ಘೆತಾಯ್' ಮ್ಹಳ್ಳೆಂ ಸವಾಲ್ ಕರ್‍ತಾತ್. ಥೊಡ್ಯಾಂಕ್ ವಿಚಾರ್‍ಲ್ಯಾರ್ ಮಾರ್ ಸಯ್ತ್ ಖಾಂವ್ಕ್ ಪಡ್ತಾತ್. ತರೀ ಆವಾಜ್ ಕೆಲ್ಲೆಪರಿಂ ನಾ. ಥೊಡ್ಯಾಂಕ್ ಹಾಪ್ತ್ಯಾಚಿ ರಜಾ ಪಂದ್ರಾ ದಿಸಾಂಕ್ ಏಕ್ ಪಾವ್ಟಿಂ ಮೆಳ್ತಾ. ತೇಂಯ್ ಅರ್ಧೊ ದೀಸ್ ಮಾತ್ರ್. ತ್ಯಾ ದಿಸಾ ತಾಂಕಾ ಕ್ರೀಸ್ತಾಂವ್ ಜಾಲ್ಯಾರ್ ಮಿಸಾಕ್ ವಚೊಂಕ್ ಆಸ್ತಾ, ವಳ್ಕಿಚಾಂಕ್ ಮೆಳೊಂಕ್ ಆಸ್ತಾ, ಕಾಂಯ್ ಇಲ್ಲೆಂ ಸುಃಖ್ ದೂಃಖ್ ಉಲಂವ್ಕ್ ಆಸ್ತಾ. ಪಾಟಿಂ ಯೆತಾನಾ ಕಾಂಯ್ ಇಲ್ಲೊ ವೇಳ್ ಜಾಲೊ ತರ್ ಕಠೀಣ್ ಗಾಳಿ ಸೊವೊ ಖಾಂವ್ಕ್‌ಯಿ ಪಡ್ತಾ. ತರೀ ಕೊಣಾಯ್ಕೀ ಹಾಚೆರ್ ಉಪ್ರಾಟೊಂಕ್ ಸಾಧ್ಯ್ ನಾ. ಉಪ್ರಾಟ್ಲೊ ತರ್ ದುಸ್ರೆಚ್ಚ್ ದಿಸಾ ಸಾಟ್ಲಿ ಪೊಟ್ಲಿ ಬಾಂಧುನ್ ಗಾಂವಾಕ್ ವಚೊಂಕ್ ಪಡೊಂಕೀ ಪುರೊ. ಥೊಡ್ಯಾಂಕ್ ಚೊರಿಯೆಚೊ ಅಪ್ರಾಧ್ ಲಾವ್ನ್ ಪೊಲಿಸಾಂಚಾ ತಾಬೆಂತ್ ದೀಂವ್ಕೀ ಪುರೊ, ತಾಣೆಂ ಮ್ಹಜಾ ಭಾಯ್ಲೆಚೆರ್ ವಾಯ್ಟ್ ನದರ್ ಘಾಲಿ, ಧರುಂಕ್ ಆಯ್ಲೊ ಮ್ಹಣೊನ್ ಸಾಂಗೊಂಕೀ ಪುರೊ. ದಾದ್ಲ್ಯಾಂಕೀ ಕಾಂಯ್ ಕಶ್ಟ್ ಉಣೆಂ ನಾಂತ್.

ಗಾಂವಾಂತ್ ತಾಂಚೊ ಬಾಯ್ಲೊ ಗಳೊಭರ್ ಭಾಂಗಾರ್ ಘಾಲ್ನ್ ಘೊವಾನ್ ಹಾಡ್‌ಲ್ಲೊ ಸೆಂಟ್ ಘಾಲುನ್, ಪೌಡರ್, ಕ್ರೀಮ್ ತೋಂಡ್‌ಭರ್ ಥಾಪುನ್ ಮಿರಯ್ಲ್ಯಾರೀ ಹಾಂಗಾ ಘೊವಾಂನಿ ಭೊಗ್ಚೆ ಆಟೆವಿಟೆ ಕೊಣಾಯ್ಕೀ ನಾಕಾತ್.

ಬಾಯ್ಲಾಂಚೆಯ್ ಕಶ್ಟ್ ಕೊಣಾಕೀ ನಾಕಾತ್. ಕಾಂಯ್ ಆಪ್ಲಿಂ ಮ್ಹಳ್ಳಿಂ ಕೊಣೀಂ ಆಸ್ತಿತ್ ತರ್ ತಿ ಗಜಾಲ್ ವೆಗ್ಳಿ. ಎಕಾದಾವೆಳಾ ಆಪ್ಲಿಂ ಮ್ಹಳ್ಳಿ ಕೊಣೀಂ ನಾಂತ್ ಮ್ಹಣೊನ್ ಜರ್ ತಾಂಕಾ ಕಳ್ಳೆಂ ತರ್ ತಿ ಗಜಾಲ್ ವೆಗ್ಳಿಚ್ಚ್. ವಿಚಾರ್ ಕರ್ತೆಲಿಂ ಕೊಣೀಂ ನಾಂತ್ ತರ್ ತಾಂಕಾ ಭೊಗೊಂಕ್ ಆಸ್ಚೆ ಕಶ್ಟ್ ಕೊಣಾಯ್ಕೀ ನಾಕಾತ್. ದಾದ್ಲೊ ಬರೊ ಜಾಲ್ಲೊ ತರ್ ಬಾಯ್ಲೆಕ್ ಪರ್ಗಾಂವಾಕ್ ಧಾಡ್ತೊವೆ ಮ್ಹಣೊನ್ ಸಭಾರ್ ಉಲಯ್ತಾತ್. ತೆಂಯ್ ಸತ್ ಆಸ್ಯೆತ್. ಚಡಾವತ್ ಭೊಂವೊನ್ ಖಾಂವ್ಚೆ ದಾದ್ಲೆ ಆಶೆತಾತ್ ಕಾಜಾರ್ ಜಾಂವ್ಕ್ ಆನಿಂ ಖಾಂವ್ಕ್ ಜೇಂವ್ಕ್ ಆನಿಂ ಭುರ್ಗಿಂ ಕರುಂಕ್ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್. ಉಪ್ರಾಂತ್ ಭುರ್ಗಿಂ ಜಾತೆಚ್ಚ್ ಕಶ್ಟ್ ಅನ್ವಾರ್ ಯೆತೆಚ್ಚ್ ಘರಾಂತ್ ಗೋಳ್, ಭುರ್ಗ್ಯಾಂಕ್ ಜಲ್ಮ್ ದಿಲ್ಲ್ಯಾ ಆವಯ್ಕ್ ಭುರ್ಗ್ಯಾಂನಿ ಪೊಟಾಕ್ ನಾಸ್ತಾಂ ವಳ್ವಳ್ಚೆಂ ಪಳೆಂವ್ಕ್ ಜಾಯ್ನಾಸ್ತಾಂ ಕೊಣಾ ಕೊಣಾಚೆ ಹಾತ್ ಪಾಂಯ್ ಧರುನ್ ಕೊಣಾ ಕೊಣಾಚೊ ಪಾಶಾಂವಿ ನದ್ರೊ ಸೊಸುನ್ ಕಶ್ಯೊಯ್ ಗಲ್ಫಾಕ್ ಪಾವ್ತಾತ್. ಆನಿಂ ಬಾಯ್ಲ್ಯೊ ಹಾಂಗಾ ಯೇವ್ನ್ ಅಸಲೆ ಆಟೇವಿಟೆ ಅಕ್ಮಾನ್ ಆನಿಂ ಅನ್ಯಾಯ್ ಸೊಸುನ್ ಕಾಮ್ ಕರುನ್ ಪೊಯ್ಸೊ ಧಾಡ್ತಾ ಆಪ್ಲೊ ಘೊವ್, ಭುರ್ಗಿಂ ಬರ್‍ಯಾನ್ ಜಿಯೆಂವ್ದಿತ್ ಮ್ಹಣೊನ್. ಪುಣ್ ಬರೊ ಘೊವ್ ತರ್ ಥಂಯ್ ಏಕ್ ಬರೆಂ ಕುಟಾಮ್ ರುತಾ ಜಾತಾ. ಎಕಾಧಾವೆಳಾ ಘೊವ್ ಬೆಬ್ಧೊ ತರ್ ಸೊರ್‍ಯಾಚೊ ಗುಲಾಮ್ ಜಾತಾ ಆನಿಂ ಭುರ್ಗಿಂ ತಾಂಚಿಚ್ ವಾಟ್ ಧರ್ತಾತ್ ಆನಿಂ ಘರಾಂತ್ ಚಡಿತ್ ನಾಲಿಸಾಯ್ ಭರೊನ್ ಯೆತಾ.

ಅಶೆಂ ಕಾತಿಚೆರ್ ಮಿರಿಯೊ ಪಡ್ತಾಸರ್ ಘೊಳೊನ್ ಪಾಟಿಂ ಆಯಿಲ್ಲೆ ತ್ಯೆ ಬಾಯ್ಲೆಕ್ ಮೆಳ್ಚೆ ಕಿತೆಂ ಆಸಾ? ಫಕತ್ತ್ ದುಬ್ಳಿಕಾಯ್ ಆನಿಂ ಪಿಡಾ ಶಿಡಾ, ಖಂತ್ ಹುಸ್ಕೊ, ಬೆಜಾರಾಯ್ ಆನಿಂ ಸಮಾಜೆಂತ್ ನಾಲಿಸಾಯ್.

ಕಿತ್ಲೆಶಿಂ ಕುಟ್ಮಾಂ ಉಭಿಂ ಜಾಲ್ಯಾಂತ್ ಹ್ಯಾ ಗಲ್ಫಾ ವರ್‍ವಿಂ ತರ್ ಜಾಯಿತ್ತಿಂ ಕುಟ್ಮಾಂಚಿ ದೆಸ್ವಾಟ್ ಜಾಲ್ಯಾ ಹ್ಯಾ ಗಲ್ಫಾ ಥಾವುನ್. ಗಲ್ಫಾಂತ್ ಕಾಮ್ ಕರ್‍ತೆಲ್ಯಾಂಕೀ ಹಾಂಗಾಸರ್ ತಾಣಿಂ ಭೊಗ್ಚಾ ಕಶ್ಟಾಂ ಮಧೆಂಯ್ ಥೊಡ್ಯಾಂಕ್ ಮಿಂಜಾಸ್ಕೆಚಿ ಸಾಯ್ ಆಸ್ತಾ. ಕಿತ್ಲೆಶಿಂ ಚೆಡ್ವಾಂ ಘರ್ ಕಾಮ್ ಕರ್‍ತಾತ್ ಜಾಲ್ಯಾರೀ ಅರ್ಧೆಂಕುರೆಂ ನೆಸಾಪ್ ನೆಸೊನ್ ಯೆತಾತ್. ಗಲ್ಫಾಕ್ ಪಾವ್ತಚ್ಚ್ ತರ್ಣಾಟ್ಯಾಂಕ್ ಸಯ್ತ್ ಮಿಂಜಾಸ್ಕೆಚಿಂ ಶಿಂಗಾಂ ಫುಟ್ತಾತ್. ವಿದೇಶಿ ಮನ್ಶಾಂಪರಿಂ ನೆಸ್ತಾತ್, ತೊಂಡಾರ್ ತಾಂಚಾ ಕಿತೆಂ ಸಿಗ್ರೆಟ್ಯೊ, ಕಿತೆಂ ತಾಂಚೆ ನೆಸಾಪ್? ಕಶಿ ಉಲಯ್ತಾನಾ ಪಾದ್ದೆಂವ್ಚಿ ತಾಂಚಿ ಜೀಬ್? ಪನ್ನಾಸ್ ಉತರ್ಲೆಲ್ಯಾ ಮಾತಾರ್‍ಯಾಕೀ ಆಪ್ಲೆ ಕೇಸ್ ಕಾಳೆ ಕರುನ್ ತರ್ನಾಟೊ ಮ್ಹಣೊನ್ ದಾಕಂವ್ಚೊ ಹೊರ್ಬೊಸ್. ಆನಿಂ ಪನ್ನಾಸ್ ಉತರ್ಲೆಲ್ಯಾ ಬಾಯ್ಲಾಂಕ್ ಕೊಣೆಂಯ್ ಆಂಟಿ ಸೊಡ್, ಬಾಯೆ ಮಣೊನ್ ಉಲೊ ಕೆಲೆಂ ತರೀ ಚಿಡ್ತಾತ್. ತಾಂಕಾ ನಾಂವಾನ್೦ಚ್ ಆಪಯ್ಜಾಯ್. ಆನಿಂ ಧಾ ಭಾರಾ ವರ್ಸಾಂಚಾ ಭುರ್ಗ್ಯಾಂನಿ ಸಯ್ತ್ ತಾಂಕಾ ತಾಂಚಾ ಕ್ಲಾಶೆಂತ್ ಶಿಕ್ಚಾಂಪರಿಂ ಲೆಖಿಜಾಯ್. ಕಿತೆಂ ಲಿಪ್‌ಸ್ಟಿಕ್, ಕಿತೆಂ ಪೌಡರ್, ಕಿತೆಂ ವಸ್ತ್ರಾಂ ಪುಣ್ ಹೊ ಸಗ್ಳೊ ವೇಸ್ ಆನಿಂ ಕೃತಕ್ ವೇಸ್ ಎಕಾ ಸತಾಕ್ ಲಿಪಂವ್ಕ್ ಪ್ರೇತನ್ ಕರ್ಚೊ ಸ್ವಶ್ಟ್ ದಿಸ್ತಾಲೆಂ, ಆಪ್ಣಾನ್ ಭೊಗ್ಚೆ ಕಶ್ಟ್ ಹೆರಾಂನಿ ದೆಖಾನಾಯೆ, ಹೆರಾಂನಿ ಸಮ್ಜಾನಾಯೆ, ಹೆರಾಂಕ್ ಸಮ್ಜಲ್ಯಾರ್ ಕಾಂಯ್ ಆಪ್ಣಾಚೆ ಕಶ್ಟ್ ಉಣೆ ಜಾಂವ್ಚೆನಾಂತ್ ಪುಣ್ ತಾಣಿಂ ಉಪ್ರಾಂತ್ ಕಾಡುಂಕ್ ಆಸ್ಚಾ ಖೊಡಿ ಖುಲ್ಪಾಂತ್ ಆಪ್ಣಾಚಿ ಜಿಣಿ ಪಿಡ್ಡ್ಯಾರ್ ಜಾಂವ್ಕ್ ಆಸಾ. ಹರ್‍ಯೆಕಾ ದಿಸಾಚೆಂ ಜಿವಿತ್‌ಯಿ ಮರಣ್ ಜಾಂವ್ಕ್ ಆಸಾ ಮ್ಹಳ್ಳಿ ಭಿರಾಂತ್. ಕಶ್ಟ್ ಜಾಂವ್ ಸುಃಖ್ ಜಾಂವ್, ಹೆಂ ಆಪ್ಣಾಚೆಂ ಜಿವಿತ್ ಆನಿಂ ಹೆಂ ಜಿವಿತ್ ಜಿಯೆಂವ್ಚೆಂ ಆಪ್ಣಾನ್೦ಚ್ ಆಸ್ತಾಂ ಆಪ್ಣಾಚೆ ಕಶ್ಟ್ ಹೆರಾಂಕ್ ಕಳೊನ್ ತಾಂತುಂ ಜಾವ್ಯೆತ್ ಆಸ್‌ಲ್ಲೊ ಫಾಯ್ದೊ ಕಸಲೊ ಮ್ಹಳ್ಳೆಂ ಚಿಂತಾಪ್ ಚಡಾವತ್ ಜಣಾಂಚಾ ಮತಿಂತ್ ಆಸ್ಯೆತ್ ದೆಖುನ್೦ಚ್ ಜಾವ್ಯೆತ್ ಲೋಕ್ ಅಸಲೊ ಡೋಂಗ್ ಕರ್‍ತಾ.

ಮುಂದರ್‍ಸಿಲಾಂ...

Tags: Vally Quadras,e konkani novel, Konkani, Mangalore, Mangalorean, Mother Tongue

From around the world

ಪಾಟಿಂ ಗಾಂವಾಕ್ - ಅವಸ್ವರ್ 8

Post your comments

ಅವಸ್ವರ್ 1

ಅವಸ್ವರ್ 2

ಅವಸ್ವರ್ 3

ಅವಸ್ವರ್ 4

ಅವಸ್ವರ್ 5

ಅವಸ್ವರ್ 6

ಅವಸ್ವರ್ 7

ಅವಸ್ವರ್ 8

ಅವಸ್ವರ್ 9

ಅವಸ್ವರ್ 10

ಅವಸ್ವರ್ 11

ಅವಸ್ವರ್ 12

ಅವಸ್ವರ್ 13

ಅವಸ್ವರ್ 14

ಅವಸ್ವರ್ 15

ಅವಸ್ವರ್ 16

ಅವಸ್ವರ್ 17

ಅವಸ್ವರ್ 18

ಅವಸ್ವರ್ 19

ಅವಸ್ವರ್ 20

ಅವಸ್ವರ್ 21

ಅವಸ್ವರ್ 22

ಅವಸ್ವರ್ 23

ಅವಸ್ವರ್ 24

ಅವಸ್ವರ್ 25

ಅವಸ್ವರ್ 26

ಅವಸ್ವರ್ 27

ಅವಸ್ವರ್ 28

Connect

Our Address
Mangalore

Our Address
Udupi

Our Address
Dubai

From around the world

Post your comments

Connect

Our AddressMangalore

Our AddressUdupi

Our AddressDubai

Our Address
Mangalore

Our Address
Udupi

Our Address
Dubai