:: ಮಾಯ್ ಭಾಸ್

ಸಗ್ಳೆಂ ಆಪ್ಣಾನ್ ಚಿಂತ್‌ಲ್ಲೆಪರಿಂಚ್ ಜಾಲ್ಲೆಂ ಪಳೆವ್ನ್ ಲತೀಫ್ ಆತಾಂ ಭೋವ್ ಸಂತೊಸಾನ್ ಆಸ್‌ಲ್ಲೊ. ಮೂಡ್‌ಬಿದ್ರಿ ಪೆಂಟೆಂತ್‌ಚ್ಚ್ ಮಾರ್ಕೆಟಿಚಾ ಬಗ್ಲೆಕ್ ಜಾಲ್ಲ್ಯಾ ನವ್ಯಾ ಬಾಂದ್ಪಾಂತ್ ತಾಣೆಂ ದೋನ್ ಆಂಗ್ಡ್ಯೊ ಭಾಡ್ಯಾಕ್ ಘೆತ್ಲ್ಯೊ ಆನಿ ತಾಂತುಂ ಎಕಾಕ್ ಕಟ್ಲೆರಿ ಆಂಗಡ್ ಕೆಲಿ ಆನ್ಯೇಕ್ ಆಂಗಡ್ ತರ್ಕಾರಿ, ಆನಿ ಫುಲಾಂ ವಿಕ್ಚಿ ಕೆಲಿ. ದೊನೀಂ ಆಂಗ್ಡಿಂಕ್ ಪನ್ನಾಸ್ ಹಜಾರ್ ಡಿಪೋಸಿಟ್ ದಿಲೆ ಆನಿ ದೇಡ್ ಹಜಾರ್ ರುಪಯ್ ಮಹಿನ್ಯಾಚೆ ಭಾಡೆಂ ದೀಂವ್ಕ್ ಆಸ್‌ಲ್ಲೆಂ. ಅಶೆಂ ಲತೀಫಾನ್ ಆಪ್ಲ್ಯಾ ಮಾವ್ಳ್ಯಾಸವೆಂ ಮೆಳೊನ್ ಆಪ್ಲೊಚ್ ವಹಿವಾಟ್ ಸುರು ಕೆಲೊ. ತಾಚೊ ಮಾವ್ಳೊ ಎದೊಳ್‌ಚ್ ಮೂಡ್‌ಬಿದ್ರಿಂತ್ ಸಗ್ಳ್ಯಾ ಗಿರಾಕಿಂಕ್ ವಳ್ಕಾತಾಲೊ ತ್ಯೇ ದೆಖುನ್ ದೊನೀಂ ಆಂಗ್ಡ್ಯೊ ಸಾಂಭಾಳುಂಕ್ ತಾಕಾ ಕಾಂಯ್ ತ್ರಾಸ್ ಜಾಲೆನಾಂತ್. ತ್ಯಾ ಶಿವಾಯ್ ಚೊವ್ತಿ ಕ್ಲಾಶಿಂತ್ ತೀನ್ ಪಾವ್ತಿಂ ಫೇಯ್ಲ್ ಜಾಲ್ಲೊ ತಾಚೊ ಪೂತ್ ಖಾದಿರ್ ಸಯ್ತ್ ಆತಾಂ ಲತೀಫಾಚಾ ಆಂಗ್ಡಿಂತ್ ಕಾಮ್ ಕರ್ತಾಲೊ.

ಮೆಜೂನ್ ಪಾಂಚ್ ಮಯ್ನ್ಯಾಂನಿ ಲತೀಫಾಚೆಂ ನಶಿಬ್ ಉಘಡ್‌ಲ್ಲೆಂ. ತಾಚೊ ದೊನೀಂ ಆಂಗ್ಡ್ಯೊ ಸರಾಗ್ ಚಲ್ತಾಲ್ಯೊ. ಕಟ್ಲೆರಿಚಿ ಆಂಗಡ್ ಚಡ್ ಜಾವ್ನ್ ತಾಚೊ ಮಾವ್ಳೊ ಸಾಂಭಾಳ್ತಾಲೊ ದೆಖುನ್ ಲತೀಫ್ ಚಡಾವತ್ ಜಾವ್ನ್ ಫುಲಾಂಚಾ ಆಂಗ್ಡಿಕ್ ಆಪ್ಲೆಂ ಧ್ಯಾನ್ ದಿತಾಲೊ. ಪಾಂಗ್ಳಾ ಥಾವುನ್, ಬೆಳ್ಮಣ್ ಥಾವ್ನ್, ಕಾರ್ಕೊಳ್ ಥಾವ್ನ್, ಪಾಲಾಡ್ಕಾ ಥಾವುನ್, ಅಲಂಗಾರ್ ಥಾವುನ್, ಬಳ್ಕುಂಜೆ ಥಾವ್ನ್, ಕಿನ್ನಿಗೋಳಿ ಥಾವ್ನ್ ಆನಿ ತಶೆಂಚ್ ನಾರಾವಿ, ಶಿರ್ತಾಡಿ ಥಾವ್ನ್ ಸಯ್ತ್ ಲೊಕಾಂಚಿಂ ಫುಲಾಂ ಬಸ್ಸಾಚೆ ಡ್ರಾಯ್ವರ್ ಹಾಡ್ನ್ ದಿತಾಲೆ. ಆನಿ ಲೆಖಾಂತ್ ಲತೀಫ್ ಕೊಣಾಯ್ಕೀ ಉಣೆಂ ಕರಿನಾತ್‌ಲ್ಲೊ ದೆಖುನ್ ತಾಚೊ ವ್ಯಾರ್‌ಯ್ ಬರೊಚ್ಚ್ ಚಲ್ತಾಲೊ.

ಚಡಾವತ್ ಗಾಂವ್ಚಿಂ ಮೊಗ್ರಿಂ, ಆಬೊಲಿಂ, ಶಿಂವ್ತಿಂ ಫುಲಾಂ ತಾಕಾ ಬಸ್ಸಾಂನಿ೦ಚ್ ಯೆತಾಲಿಂ ತರೀ ತಾಕಾ ಮೊಗ್ರಿಂ ಮಾತ್ರ್ ವಿಕುಂಕ್ ಸಲೀಸ್ ಜಾತಾಲೆಂ. ಉರುಲ್ಲಿಂ ಫುಲಾಂ ವೆಗಿಂ ಪಾಡ್ ಜಾತಾತ್ ಆಸ್ತಾಂ ತಾಂಕಾ ಚಡ್ ತೇಂಪ್ ದವ್ರುಂಕ್ ಇಲ್ಲೆ ಕಶ್ಟ್ ಜಾತಾಲೆ. ಆಯಿಲ್ಲೆಚ್ ದಿಸಾ ವಿಕೊನ್ ಗೆಲ್ಯಾರ್ ಜಾಲೆಂ. ನಾಂ ತರ್ ಉಪ್ರಾಂತ್ ತಿಂ ವಿಕೊನ್ ವಚಾನಾಂತ್ ತರ್‌ಯಿ ತಿಂ ಧಾಡ್‌ಲ್ಲ್ಯಾ ಲೊಕಾಂಕ್ ಪೊಯ್ಶೆ ದೀಂವ್ಕ್ ಪಡ್ತಾಲೆ.

ಅಶೆಂ ಹರ್‍ಯೆಕಾ ಹಾಪ್ತ್ಯಾಂತ್ ತೊ ಗಾಂವಾರ್ ಗಾಂವ್ ಭಂವ್ತಾಲೊ ಆನಿಂ ಪೊಯ್ಶೆ ಫ಼ಾರಿಕ್ ಕರ್‍ತಾಲೊ.

ಆಪ್ಣಾಚಿ ಆಂಗಡ್ ಬರಿ ಕರುನ್ ಚಲೊನ್ ಆಸ್ತಾನಾ, ಲತೀಫಾಕ್ ಆತಾಂ ಏಕ್ ಬಾಯ್ಕ್ ಘೆಂವ್ಕ್ ಚಿಂತ್ಲೆಂ ಆನಿ ತ್ಯಾ ಖಾತಿರ್ ತೊ ಎದೊಳ್‌ಚ್ ವಚೊನ್ ಬೆಂಕಾಕ್ ವಚೊನ್ ಮೆನೆಜರಾಲಾಗಿಂ ಉಲಯ್ಲೊ. ಮೆನೆಜರಾನ್ ತಿ ಆಂಗಡ್ ಎಸ್ತೆಲಾಚಿಚ್ ಮ್ಹಣೊನ್ ಚಿಂತ್‌ಲ್ಲೆಂ ಶಿವಾಯ್ ಲತೀಫಾಚಿ ಮ್ಹಳ್ಳೆಂ ಕಳಿತ್ ನಾತ್‌ಲ್ಲೆಂ. ಲತೀಫಾನ್ ಬೆಂಕಾ ಥಾವುನ್ ತೀಸ್ ಹಜಾರ್ ರುಪಯ್ ಲೋನ್ ಘೆತ್ಲೆ. ಆನಿ ಎಸ್ತೆಲಾನ್ ಜಾಮಿನ್ ರಾವ್‌ಲ್ಯಾನ್ ಕಾಂಯ್ ಚಡ್ ಕಶ್ಟ್ ನಾಸ್ತಾಂಚ್ ತಾಕಾ ಲೋನ್ ಮೆಳ್ಳೆಂ.

ಎಕಾಚ್ ಹಫ್ತ್ಯಾಂತ್ ಲತೀಫಾನ್ ಬಾಯ್ಕ್ ಘೆತ್ಲೆಂ ಆನಿ ಆತಾಂ ತಾಕಾ ಗಾಂವಾರ್ ಗಾಂವ್ ವಚೊಂಕ್ ಸಲೀಸ್ ಜಾಲ್ಲೆಂ.

ದೀಸ್ ಗೆಲ್ಲೆಪರಿಂಚ್ ತಾಚೆಲಾಗಿಂ ಪೊಯ್ಶೆ ಉರ್ತಾಲೆ. ತ್ಯಾ ಭಾಯ್ರ್ ತೊ ಕಾಜಾರಾಂಕ್ ಆನಿ ಫೆಸ್ತಾಂಕ್ ಇಗರ್ಜಾಂಕ್, ದಿವ್ಳಾಂಕ್, ಹೊಲಾಂಕ್ ಫುಲಾಂ ವರುನ್ ವೆತಾಲೊ ಆನಿ ಡೆಕೊರೇಶನ್ ಕರುನ್ ದಿತಾಲೊ. ಗರ್ಜೆಚಾ ವೆಳಾರ್ ದೊಡ್ಯಾ ಮೊಲಾಂತ್ ತಿಂ ಫುಲಾಂ ವಿಕ್ತಾಲೊ ಆನಿ ಬರೊ ಮುನಾಫೊ ಘೆತಾಲೊ.

ಅಶೆಂ ಎಕ್ಲ್ಯಾ ಥಾವುನ್ ದುಸ್ರ್ಯಾಕ್ ಮ್ಹಣೊನ್ ಲತೀಫಾಕ್ ಆತಾಂ ಗಾಂವಾಂತ್ ಬರಿ ವಳೊಕ್ ಜಾಲಿ ಆನಿ ತಶೆಚ್ ಹಾತಾಂತ್ ಪೊಯ್ಶೆಯ್ ಜಾಲೆ. ಚುಕಾನಾಸ್ತಾಂ ತಾಣೆಂ ಮಯ್ನ್ಯಾ ಮಯ್ನ್ಯಾಕ್ ಬೆಂಕಾಚೆ ಪೊಯ್ಶೆ ಬಾಂದುಂಕ್ ಧರ್ಲೆಂ. ಹೆಂ ಲೋನ್ ಬರೆಂ ಕರ್ನ್ ಭರ್ಲೆಂ ತರ್ ಫುಡೆಂ ಕಿತೆಂಯ್ ಮೊಲಾಕ್ ಘೆಂವ್ಚಿ ತಾಕಾ ಆಶಾ ಆಸ್‌ಲ್ಲಿ. ದೆಖುನ್ ತೊ ಸಗ್ಳೆಂ ಚಿಂತುನ್ ಆನಿ ಲೇಖಾನ್ ಚಲ್ತಾಲೊ.

*******

ಜೊಯೆಲಾನ್ ಧಾವೆ ಕ್ಲಾಶೆಂತ್ ಆಸ್ತಾನಾ ಆಸ್‌ಲ್ಲೆ ಈಶ್ಟ್ ಆತಾಂ ಬಾಯ್ಕ್ ಆಯಿಲ್ಲೆಂಚ್ ದೊಡೆ ಜಾಲೆ. ಆನಿ ಬಾಯ್ಕಾಚೊ ಪರಿಣಾಮ್ ಎದೊಳ್‌ಚ್ ತಾಕಾ ಕಳೊನ್ ಆಯಿಲ್ಲೊ. ತೊ ಫಸ್ಟ್ ಕ್ಲಾಸ್ ಪಾಸ್ ಜಾಂವ್ಚಾ ಬದ್ಲಾಕ್ ಕಸೊಯ್ ಪಾಸ್ ಜಾಲೊ. ಆನಿ ಕೊಲೆಜಿಕ್ ವಚೊಂಕ್ ಲಾಗ್ಲೊ. ಕೊಲೆಜಿಂತ್ ತಾಣೆಂ ಪಾಂಯ್ ದವರ್ತೆಚ್ಚ್ ತಾಕಾ ನವಿಂ ಶಿಂಗಾ ಫುಟ್‌ಲ್ಲ್ಯಾ ಪಾಡ್ಕ್ಯಾಪರಿಂ ಭೊಗ್ಲೆಂ. ಕಾನಾಂಕ್ ವಾರೆಂ ರಿಗ್‌ಲ್ಲ್ಯಾ ಪಾಡ್ಕ್ಯಾನ್ ಕಶೆಂ ಉಡಿ ಮಾರ್ನ್ ಧಾಂವ್ಚೆಗೀ ತಶೆಂಚ್ ಜೊಯೆಲಾಕ್ ಭೊಗ್ಲೆಂ.

ತಾಣೆಂ ಬರಯಿಲ್ಲೆಪರಿಂ ಆತಾಂ ತಿಯೊನ್ ಎಸ್ತೆಲಾಕ್ ಬರವ್ನ್, ಜೊಯೆಲಾಚಾ ಬಾಯ್ಕಾಕ್ ಪೆಟ್ರೊಲ್ ಘಾಲುಂಕ್ ಪೊಯ್ಶೆ ದೀಂವ್ಕ್ ಕಳಯಿಲ್ಲೆಂ ಆನಿ ಜೊಯೆಲಾಕ್ ಆತಾಂ ಖಂಚಾಚೆಂಚ್ ಉಣೆಂ ನಾತ್‌ಲ್ಲೆಂ.

ಘರಾಂತ್ ಜಾಲ್ಯಾರೀ ತಾಂಚೊ ವಿಚಾರ್ ಕರ್ತೆಲಿಂ ಕೊಣೀಂ ನಾತ್‌ಲ್ಲಿಂ. ಘರಾ ಯೆತೆಚ್ ಜೇಂವ್ಕ್ ತಾಂಕಾ ಮೆಳ್ತಾಲೆಂ ಆನಿ ಕಾಂಯ್ ವಿಚಾರ್ ಕೆಲೊ ತರ್ ಆಪುಣ್ ಇಶ್ಟಾಂಚಾ ಘರಾ ವಚೊನ್ ಶಿಕ್ತಾಲೊಂ ಮ್ಹಳ್ಳೆಂ ನೀಬ್ ದೀಂವ್ಕ್‌ಯಿ ಜೊಯೆಲ್ ಶಿಕ್‌ಲ್ಲೊ. ತ್ಯಾ ಭಾಯ್ರ್ ಭುರ್ಗಿಂ ಭಾಯ್ರ್ ಆಸ್ಲ್ಯಾರ್ ಘರಾಂತ್ ಆಪ್ಣಾಕ್ ಜಾಯ್ ಜಾಲ್ಲೆಪರಿಂ ಕರ್‍ಯೆತ್ ಮ್ಹಳ್ಳಿಂ ಚಿಂತ್ನಾಂ ಮತಿಂತ್ ಆಸ್‌ಲ್ಲ್ಯಾ ಎಸ್ತೆಲಾಕ್ ಹ್ಯಾ ಸಂಗ್ತ್ಯಾಂನಿ ಚಡ್ ಗುಮಾನ್ ದಿಲೆಂನಾ.

ಮನ್ಶಾಚಾ ಜಿಣ್ಯೆಂತ್ ತರ್ನಾಟ್ಪಣ್ ಭೋವ್ ಅಪಾಯಾಚೆಂ. ಹ್ಯಾ ಹಂತಾರ್ ಮನಿಸ್ ಕಿತ್ಲೊ ಜಾಗ್ರುತ್ ಆಸ್ಲ್ಯಾರೀ ಏಕ್ ಮೇಟ್ ಚುಕೊಂಕ್ ತಾಕಾ ಚಡ್ ವೇಳ್ ನಾಕಾ. ಆನಿ ಏಕ್ ಮೇಟ್ ಚುಕ್ಲ್ಯಾರ್ ಉಪ್ರಾಂತ್ಲಿಂ ಮೆಟಾಂ ಚುಕ್ಚಾಂತ್ ಕಾಂಯ್ ನವೆಂ ಮ್ಹಣೊನ್ ಭೊಗಾನಾ. ಅಶೆಂಚ್ ಜೊಯೆಲಾಚಾ ಸಾಂಗಾತ್ಯಾಂ ಪಯ್ಕಿ ಥೊಡೆ ಫಕತ್ತ್ ತಾಂಚಾ ಆವಯ್ ಬಾಪಾಂಯ್ಚಾ ಪೊಯ್ಶಾಂಚಾ ಬಳಾನ್ ಕೊಲೆಜಿಕ್ ಯೆತಾಲೆ. ತಾಂಕಾ ಹಿ ಕೊಲೆಜ್ ಮ್ಹಳ್ಯಾರ್ ಏಕ್ ಪಿಕ್ನಿಕ್. ತರ್ನಾಟ್ಪಣ್ ಮಜೆನ್ ಖರ್ಚುಂಚೊ ಜಾಗೊ. ತ್ಯಾ ಶಿವಾಯ್ ಸಗ್ಳ್ಯಾಂ ಲಾಗಿಂ ಬಾಯ್ಕ್ ಯಾ ಗಾಡಿಯೊ ಆಸ್‌ಲ್ಲ್ಯಾನ್, ಗಾಂವಾಂತ್ ತಾಂಚಾ ಘರ್ಚೆಂ ನಾಂವ್ ಊಂಚ್ ಆಸ್‌ಲ್ಲ್ಯಾನ್, ಹಾತಾಂತ್ ತಾಂಚಾ ಸರಾಗ್ ಪೊಯ್ಶೆ ಆಸ್‌ಲ್ಲ್ಯಾನ್ ತಾಂಚೆಂ ಗಮನ್ ಶಿಕ್ಪಾ ಥಾವ್ನ್ ನಿಸ್ರೊನ್ ಪಿಚ್ಚಾರಾಂಕ್ ವೆಚೆಂ, ಪಿಕ್ನಿಕಾಂಕ್ ವೆಚೆಂ, ಚೆಡ್ವಾಂಕ್ ಘೆವ್ನ್ ಬಿಚಾಂಕ್ ವೆಚೆಂ, ಹ್ಯಾ ಸಂಗ್ತ್ಯಾ ತೆವ್ಶಿನ್ ಗೆಲೆಂ.

ದೀಸ್ ಗೆಲ್ಲೆಪರಿಂಚ್ ಜೊಯೆಲಾಚಾ ಮತಿಂತ್ ಆಸ್ಚಿಂ ಚಿಂತ್ನಾಂ ಬದ್ಲೊನ್ ಯೆತಾಲಿಂ. ತೊಯ್ ಹ್ಯಾ ಸಾಂಗಾತ್ಯಾಂಚಾ ಮೆಳಿಂತ್ ಮೆಳ್ಳೊ ಆನಿ ಎಕಾ ದಿಸಾ ತಾಂಚೆ ಪಯ್ಕಿ ಎಕ್ಲ್ಯಾಚಾ ಘರಾಂತ್ ಆಸ್ಚಾ ಫೆಸ್ತಾಕ್ ಗೆಲ್ಲೆ ಸಗ್ಳೆ ಪಯ್ಲೆ ಪಾವ್ಟಿಂ ಪಿಯೆಲೆ ಆನಿ ತೆ ಸಗ್ಳೆ ತಾಂಚಾ ಕುಡಾಂತ್ ಬಸೊನ್ ಬ್ಲೂ ಫಿಲ್ಮ್ ಪಳೆಲಾಗ್ಲೆ. ಸೊರ್‍ಯಾಚೆಂ ಆಮಾಲ್ ತಕ್ಲೆರ್ ಆಸ್‌ಲ್ಲ್ಯಾನ್ ಕೋಣ್ ಕಿತೆಂ ಕರ್ತಾ ಮ್ಹಳ್ಳೆಂ ಸಮ್ಜಾಲೆಂ ನಾ. ಕುಡಾಂತ್ ಎದೊಳ್‌ಚ್ ಸಿಗ್ರೆಟಿಚೊ ಧುಂವರ್ ಭರ್‌ಲ್ಲೊ. ತೆ ಸಗ್ಳೆ ಮೆಳೊನ್ ಸಿಗ್ರೆಟ್ ವೊಡುನ್ ಧುಂವರ್ ಸೊಡಿಲಾಗ್ಲೆ. ತಾಂಚಾ ಮೆಳಿಂತ್ ಆಸ್ಚೊ ಜೊಯೆಲ್‌ಯ್ ಆತಾಂ ಸಿಗ್ರೆಟ್ ವೋಡ್ನ್ ತೊಂಡಾಂತ್ ಆನಿ ನಾಕಾಂತ್ ಧುಂವರ್ ಸೊಡಿಲಾಗ್ಲೊ.

ಜಿಣ್ಯೆಂತ್ ಪಯ್ಲೆಪಾವ್ಟಿಂ ಪಿಯೆಲ್ಲೊ ಜೊಯೆಲ್ ಸಾಂಜೆರ್ ತಾಂಗೆರ್ ವೊಂಕ್ಲೊ. ತಾಚೆ ಹೆರ್ ಸಾಂಗಾತಿ ತಾಚೆರ್ ಹಾಸಾಲಾಗ್ಲೆ. ತುಂ ಆನಿಕೀ ಲ್ಹಾನ್ ಭುರ್ಗೊ ಜೊಯೆಲ್, ಆಮ್ಕಾಂ ಎದೊಳ್‌ಚ್ ತಿ ಸವಯ್ ಜಾಲ್ಯಾ. ದೆಖುನ್ ಕಿತ್ಲೆಂ ಪಿಯೆಲ್ಯಾರೀ ಆಮಾಲ್ ಜಾಯ್ನಾಂ. ತಾಚಾ ಸಾಂಗಾತ್ಯಾಂಚಿಂ ಉತ್ರಾಂ ಕಿತ್ಯಾಕ್‌ಗೀ ಜೊಯೆಲಾಕ್ ಖೊಂಕ್ತಾತ್ ಮ್ಹಣೊನ್ ಜೊಯೆಲಾನ್ ಅಪ್ಲೇಸ್ತಕಿಂ ಚಿಂತ್ಲೆಂ.

ಅಶೆಂ ದೀಸ್ ಪಾಶಾರ್ ಜಾಲ್ಲೆಪರಿಂಚ್ ಜೊಯೆಲಾನ್ ತಾಚಾ ಸಾಂಗಾತ್ಯಾಸವೆಂ ಮೆಳೊನ್ ಸರಾಗ್ ಪೊಯೆಂವ್ಕ್, ಸಿಗ್ರೆಟ್ ವೊಡುಂಕ್ ಆನಿ ಪಿಚ್ಚಾರಾಂಕ್ ವಚೊಂಕ್ ಧರ್ಲೆಂ. ತವಳ್ ತವಳ್ ತಿಂ ಸಗ್ಳಿಂ ಮೆಳೊನ್ ಬ್ಲೂ ಫಿಲ್ಮಾಂ ಪಳೆತಾಲಿ. ತಾಂಚೆ ಪಯ್ಕಿ ಎಕ್ಲ್ಯಾಕ್ ಶೆರಾಚಾ ವಿಡಿಯೊ ಶೊಪಾಚಾ ಧನ್ಯಾಚಿ ವಳೊಕ್ ಆಸ್‌ಲ್ಲಿ ಆನಿ ಅಸಲಿಂ ಬುರ್ಶಿಂ ಪಿಂತುರಾಂ ಪಳೆಂವ್ಚಾಂತ್ ತಾಂಕಾ ದಾಧೊಸ್ಕಾಯ್ ಭೊಗ್ತಾಲಿ.

ತಾಂಚೆಪಯ್ಕಿ ಎಕ್ಲೊ ಸಾಂಗಾತಿಚೊ ಬೊಣ್ಕೊ ಬಾಪುಯ್ ಮಂಗ್ಳುರಾಂತ್ ಆನಿ ಉಡ್ಪಿಂತ್ ದೋನ್ ಹೊಟ್ಲಾಂ ಬಾಂದುನ್ ತಾಂಕಾ ಚಲಯ್ತಾಲೊ. ದೊನೀಂ ವ್ಹಡ್ಲಿಂ ಹೊಟ್ಲಾಂ ಆನಿ ಜಾಯ್ತಿಂ ಜಣಾಂ ತಾಚಾ ಹೊಟ್ಲಾಂಚಾ ಕುಡಾಂನಿ ರಾವ್ತಾಲಿಂ. ಆಪ್ಲ್ಯಾ ಚಿಂತ್ನಾಂನಿ ಬಳಿಶ್ಟ್ ಆಸ್ಚಾ ತಾಣೆ ಏಕ್ ಹೊಟೆಲ್ ಕರುಂಕ್ ಇಲ್ಲೆಂ ಲೋನ್ ಘೆತ್‌ಲ್ಲೆಂ ತರೀ ಆತಾಂ ಘಡ್ಯೆನ್ ಅನ್ಯೇಕ್ ಹೊಟೆಲ್ ಉಗ್ತೆಂ ಕೆಲ್ಲೆಂ ಕಶೆಂ ಮ್ಹಳ್ಳೆಂ ಕೊಣಾಯ್ಕೀ ಸಮ್ಜೊಂಕ್ ನಾತ್‌ಲ್ಲೆಂ. ಥೊಡ್ಯಾಂಕ್ ಮಿನತ್ ಕರ್ನ್ ಪೊಯ್ಶೆ ಕರ್ಚಾಂತ್ ಮಾತ್ರ್ ಪಾತ್ಯೆಣಿಂ ಆಸ್‌ಲ್ಲಿ ತರ್ ಥೊಡ್ಯಾಂಕ್ ಫಕತ್ತ್ ಪೊಯ್ಶೆ ಕರ್ಚಾಂತ್ ಮಾತ್ರ್.

ಕೊಡ್ಯಾಳಾಂತ್ ಯಾ ಉಡ್ಪಿಂತ್ ಸಭಾರ್ ಕೊಲೆಜೊ ಆಸ್‌ಲ್ಲ್ಯೊ ಆನಿ ಸಭಾರ್ ಭಾಯ್ಲ್ಯಾ ಗಾಂವ್ಚೊ ಲೋಕ್ ಯೆತಾಲೊ. ತಶೆಂ ಆಸ್ತಾಂ ಚಡಾವತ್ ತರ್ನಾಟಿಂ ಯೇವ್ನ್ ಹ್ಯಾ ಬೊಣ್ಕ್ಯಾಚಾ ಹೊಟೆಲಾಂತ್ ಭಾಡ್ಯಾಕ್ ಕೂಡ್ ಘೆವ್ನ್ ರಾವ್ತಾಲಿಂ, ಮಜಾ ಕರುನ್ ವೆತಾಲಿಂ. ಆನಿ ಹಾಣೆಂ ಮನಾಂತ್ ಹ್ಯಾ ಸಂಗ್ತ್ಯಾಂಚೊ ಫಾಯ್ದೊ ಜೊಡ್‌ಲ್ಲೊ. ಅಶೆಂ ಗರ್ಜೆಕ್ ಜಾಂವ್, ಮರ್ಜೆಕ್ ಜಾಂವ್, ಯಾ ಖೊರ್ಜೆಕ್ ಜಾಂವ್ ತಾಚಾ ಹೊಟೆಲಾಂತ್ ಯೆಂವ್ಚಾಂಕ್ ಪಳೆತಾನಾಂಚ್ ಕಳ್ತಾಲೆಂ ತಿಂ ಕಿತ್ಯಾಕ್ ಆಯ್ಲ್ಯಾಂತ್ ಮ್ಹಳ್ಳೆಂ. ಪೊಲಿಸಾಂಕ್ ಪೊಯ್ಶೆ ಕಶೆಯ್ ತೆ ದಿತಾಲೆ ದೆಖುನ್ ಪೊಲಿಸಾಂಚೆ ಕಾಂಯ್ ಭ್ಯೆಂ ತಾಕಾ ನಾತ್‌ಲ್ಲೆಂ. ತಾಣೆಂ ಎದೊಳ್‌ಚ್ ರಿಸೆಪ್ಶನಾಂತ್ ಹಿಶಾರೊ ದಿಲ್ಲೊ. ಕೊಣೀಂ ತರ್ನಾಟಿಂ ಕುಡಿಚಾ ಪಾಶಾಂವಾ ಖಾತಿರ್ ಕೂಡ್ ಭಾಡ್ಯಾಕ್ ಘೆಂವ್ಕ್ ಯೆತಾತ್ ತರ್ ತಾಂಕಾ ಎಕಾ ಮಾಳಿಯೆರ್ ಆಸ್ಚಿಂ ಸಗ್ಳಿಂ ಕುಡಾಂ ಅಸಲ್ಯಾಂ ಖಾತಿರ್‌ಚ್ ಅಮಾನತ್ ಕರ್ನ್ ದವರ್ಲೆಲಿ. ಕಿತ್ಯಾಕ್ ಮ್ಹಳ್ಯಾರ್ ತಿಂ ಆಯಿಲ್ಲಿಂ ಕಾಂಯ್ ಚಡ್ ತೇಂಪ್ ರಾವಾನಾಂತ್. ಕೋಣ್ ಕೊಲೆಜಿಕ್ ಮ್ಹಣೊನ್ ಆಯಿಲ್ಲಿಂ ಹಾಂಗಾಸರ್ ಯೆತಾಲಿಂ ಆನಿ ಥೊಡಿಂಚ್ ವೊರಾಂ ಮಜಾ ಕರುನ್ ಪಾಟಿಂ ವೆತಾಲಿಂ. ತಶೆಂ ಆಸ್ತಾಂ ಸಗ್ಳ್ಯಾ ದಿಸಾಚೆಂ ಆನಿ ರಾತಿಚೆಂ ಭಾಡೆಂ ಭರ್‌ಲ್ಲೆಂ ಕೂಡ್ ಚಡಾವತ್ ಜಾವ್ನ್ ಖಾಲಿ ಆಸ್ತಾಲೆಂ.

ತಿತ್ಲೆಂಚ್ ನ್ಹಂಯ್. ತ್ಯಾ ಕುಡಾಂತ್ ಆಸ್ಚಾ ಬೆಡ್‌ರೂಮಾಂತ್ ಹಾಣೆಂ ಘುಟಾಚೆ ಕೆಮರಾ ದವರ್ಲೆಲೆ. ಆನಿ ಭಿತರ್ ಕಿತೆಂ ಸಗ್ಳೆಂ ಘಡ್ತಾ ತಾಚೆಂ ಸಗ್ಳೆಂ ರೆಕೋರ್ಡಿಂಗ್ ಚಲ್ತಾಲೆಂ. ಆನಿ ತೆಂ ರೆಕೋಂರ್ಡಿಂಗ್ ಕೆಲ್ಲ್ಯೊ ಕೆಸೆಟ್ಯೊ ಬ್ಲೂ ಫಿಲ್ಮಾಂ ಮ್ಹಳ್ಳ್ಯಾ ನಾಂವಾರ್ ವಿಕೊನ್ ವೆತಾಲ್ಯೊ. ತಸಲ್ಯೊ ಕೆಸೆಟ್ಯೊ ಮೊಲಾಕ್ ಘೆಂವ್ಚಿ ಕೋಣ್ ಮ್ಹಳ್ಳೆಂ ಚಡಾವತ್ ಜಾವ್ನ್ ವೀಡಿಯೊ ಪಾರ್ಲರಾಂಚೆ ಧನಿ ಜಾಣಾಂತ್ ಜಾಲ್ಲೆವರ್ವಿಂ ತ್ಯೊ ಕೆಸೆಟ್ಯೊ ಸಭಾರ್ ಕೊಪಿ ಕರುನ್ ಗಾಂವಾಂತ್ ತಶೆಂಚ್ ಪರ್ಗಾಂವಾಂತ್ ವಿಕೊನ್ ವೆತಾಲ್ಯೊ.

ಅಶೆಂಚ್ ಆಸ್ತಾನಾ ಎಕ್ಲೊ ಡೊಕ್ಟರ್ ಸೌದಿಂತ್ ಕಾಮ್ ಕರ್ನ್ ಆಸ್‌ಲ್ಲೊ. ತಾಕಾ ಅಸಲ್ಯಾ ಕೆಸೆಟಿಂಕ್ ಘೆವ್ನ್ ಪಳೆಂವ್ಚಿ ಪಿಸಾಯ್ ಪಠೀಣ್ ಆಸ್‌ಲ್ಲಿ. ತ್ಯಾ ಖಾತಿರ್ ತೊ ಕಿತ್ಲೆಯ್ ಪೊಯ್ಶೆ ದೀಂವ್ಕ್ ತಯಾರ್ ಆಸ್‌ಲ್ಲೊ. ಸೌದಿಂತ್ ಎಕ್ಸುರೊ ತೊ ಆಸ್‌ಲ್ಲೊ, ತಾಚಿ ಬಾಯ್ಲ್ ಗಾಂವಾಂತ್ ಆಸ್‌ಲ್ಲಿ. ಏಕ್ ಪಾವ್ಟಿಂ ತ್ಯಾ ಡೊಕ್ಟರಾನ್ ತಸ್ಲಿಚ್ ಏಕ್ ಕೆಸೆಟ್ ಘೆವ್ನ್ ಘರಾ ಯೇವ್ನ್ ಪಳೆತಾನಾ ಕಿತೆಂ ಪಳೆತಾ ತೊ? ತಾಚಿಚ್ ಬಾಯ್ಲ್ ಎಕಾ ತರ್ನಾಟ್ಯಾಸವೆಂ ಮಜಾ ಮಾರ್ಚಿ ಕೆಸೆಟ್ ಘೆವ್ನ್ ತೊ ಉಟಾಉಟಿಂ ಗಾಂವಾಕ್ ಆಯ್ಲೊ. ಆನಿ ಪೊಲಿಸಾಂಕ್ ಖಬಾರ್ ದಿಲಿ. ಪೊಲಿಸಾಂಕ್ ಕಾಂಯ್ ಹೆಂ ವಿಶೇಷ್ ನ್ಹಂಯ್. ಕಾಂಯ್ ತಿ ಕೆಸೆಟ್ ಸಾಮಾನ್ಯ್ ಮನ್ಶಾನ್ ಹಾಡ್‌ಲ್ಲಿ ತರ್ ತಾಕಾ ಭೆಶ್ಟಾವ್ನ್ ತೋಂಡ್ ಧಾಂಪಯ್ತೆ, ಪುಣ್ ಹೊ ಡೊಕ್ಟರ್ ಆನಿ ವಶೀಲಾಯ್ ತಾಕಾ ಆಸ್ಚಿ ಬರ್‍ಯಾನ್ ಜಾಣಾಂ ಆಸ್ಚಾ ಪೊಲಿಸಾಂನಿ ಧನ್ಯಾಕ್ ಘುಟಾನ್ ಖಬಾರ್ ದಿಲಿ ಆನಿ ಹೊಟೆಲಾಕ್ ಧಾಡ್ ಘಾಲಿ.

ಪುಣ್ ಹೊ ಸಗ್ಳೊ ನಾಟಕ್ ಥೊಡ್ಯಾಚ್ ದಿಸಾಂನಿ ಘಡ್ಲೊ. ಸಗ್ಳ್ಯಾ ಶೆರಾಂತ್ ಖಬಾರ್ ವಿಸ್ತಾರ್ಲಿ ಆನಿ ಧನ್ಯಾನ್ ಲಾಕಾಂನಿ ಪೊಯ್ಸೊ ವಾಳಯ್ಲೊ ಆನಿ ತೊ ಸಗ್ಳೊ ಅಪ್ರಾಧ್ ತ್ಯಾ ಹೊಟ್ಲಾಂತ್ ಕಾಮ್ ಕರ್ನ್ ಆಸ್ಚಾ ಮನ್ಶಾಂಚೆರ್ ಘಾಲ್ನ್ ಹಾತ್ ಧುಲೆ. ಆನಿ ತಾಂತ್ಲ್ಯಾ ಎಕ್ಲ್ಯಾ ದೊಗಾಂಕ್ ಜಯ್ಲಾಕ್ ಘಾಲೊ. ಪುಣ್ ಸಂಗತ್ ಬದಲ್ಲಿ ನಾ. ಹೊಟ್ಲಾಂತ್ ಅಶಿ ಸುರ್ವಾತ್ ಜಾಲ್ಲಿ ಕೆಮೆರಾಚಿ ಗಜಾಲ್ ಹೆರಾಂನಿ ಸಮ್ಜೊನ್ ಘೆತ್ಲಿ ಆನಿ ಆತಾಂ ಖಂಚಾಯ್ ಫೇಶನ್ ಸ್ಟೋಲಾಂತ್ ವಸ್ತ್ರಾಂ ಬದ್ಲುಂಕ್ ಗೆಲ್ಯಾರ್ ತೆಂ ಕೆಮರಾರ್ ಟೇಪ್ ಜಾತಾ ಮ್ಹಳ್ಳೆಂ ಥೊಡ್ಯಾಂಕ್ ತರೀ ಕಳಿತ್ ಆಸ್‌ಲ್ಲೆಂ.

ತರ್ನಾಟ್ಪಣ್ ಆನಿಂ ಹಂಕಾರ್ ಆಸ್ತಾನಾ ಖಂಚೆಂ ಬರೆಂ ಆನಿಂ ಖಂಚೆ ವಾಯ್ಟ್ ಮ್ಹಣೊನ್ ಕೋಣ್ ಚಿಂತಾ? ತೇಂಯ್ ಬೊಲ್ಸಾಂತ್ ಸರಾಗ್ ಪೊಯ್ಶೆ ಆಸ್ತಿತ್ ತರ್ ತಿ ವೆಗ್ಳಿಚ್ ಗಜಾಲ್.

*********

ಪಯ್ಲೆಂ ತರ್ ಇಸ್ಕೊಲಾಂತ್ ಕಿತೆಂ ಜಾತಾ ಮ್ಹಳ್ಳ್ಯಾಚಿ ಸಗ್ಳಿ ಖಬಾರ್ ಆಸ್ಚೆಂ ಜಿವಿತಾ ಆತಾಂ ಜೊಯೆಲಾನ್ ಕೊಲೆಜಿಕ್ ರಿಗ್ತಚ್ ತಿಂ ಎಕಾಮೆಕಾ ಪಯ್ಲೆಂಚೆಪರಿಂ ಸಂಪರ್ಕಾರ್ ನಾತ್‌ಲ್ಲಿಂ. ಎಕಾಚ್ ಘರಾಂತ್ ರಾವ್ತಾಲಿಂ ತರೀ ಜೊಯೆಲಾನ್ ಧಾವೆಂತ್ ಉಣೆ ಮಾರ್ಕ್ ಹಾಡ್‌ಲ್ಲೆವರ್ವಿಂ ತಿಯೊನ್ ಜಿವಿತಾಕ್ ಬರೆಂ ಕರುನ್ ಶಿಕೊಂಕ್ ಬರಯಿಲ್ಲೆಂ ಆಸ್ತಾಂ ಆಜ್‌ಕಾಲ್ ಜಿವಿತಾಕ್ ಆಪ್ಲ್ಯಾ ಶಿಕ್ಪಾಚೆರ್ ಧ್ಯಾನ್ ದೀಂವ್ಕ್ ಪಡ್ತಾಲೆಂ.

ಅಶೆಂಚ್ ದೀಸ್ ಗೆಲ್ಲೆಪರಿಂ, ಧಾವೆಚಿ ಪರಿಕ್ಶಾ ಕಶೀಯ್ ದಿಲಿ ಮಾತ್ರ್ ನ್ಹಂಯ್ ದುಸ್ರ್ಯಾ ವರ್ಗಾಂತ್ ಪಾಸ್‌ಯಿ ಜಾಲೆಂ. ಆನಿ ಕೊಲೆಜಿಕ್ ವಚೊಂಕ್‌ಯಿ ಲಾಗ್ಲೆಂ. ಪಯ್ಲೆ ಪಯ್ಲೆ ಥೊಡೆ ದೀಸ್ ತೆಂ ಜೊಯೆಲಾಸವೆಂ ಬಾಯ್ಕಾರ್ ಗೆಲೆಂ ತರೀ ಥೊಡೆ ಪಾವ್ಟಿಂ ಜೊಯೆಲ್ ತಡವ್ ಕರ್ನ್ ವೆತಾಲೊ ದೆಖುನ್ ಜಿವಿತಾ ಬಸ್ಸಾಂನಿ ವೆತಾಲೆಂ.

ಜಿವಿತಾ ಕೊಲೆಜಿಕ್ ಗೆಲ್ಲೆಂಚ್ ಪಯ್ಲ್ಯಾ ದಿಸಾ ಥಾವ್ನ್೦ಚ್ ತಾಚಾ ಸೊಭಾಯೆಕ್ ಪಿಸೊ ಜಾಲ್ಲೆ ಸಭಾರ್ ತರ್ನಾಟೆ ಜಿವಿತಾಸವೆಂ ಇಶ್ಟಾಗಾತ್ ಕರುಂಕ್ ಆಶೆತಾಲೆ. ತ್ಯಾ ಶಿವಾಯ್ ಜಿವಿತಾಯ್ ಕಾಂಯ್ ಸೊಭಾಯೆಂತ್ ಉಣೆಂ ನಾತ್‌ಲ್ಲೆಂ. ಲಾಂಭ್ ರಶ್ಮಿ ಕೇಸ್ ತಾಚಾ ಪಾಟಿರ್ ಚರೊನ್ ಕುಲ್ಯಾಂಚೆರ್ ಖೆಳ್ತಾಲೆ. ಗೊರ್ಶಿ ಕಾತ್, ತಾಂಬ್ಶೆ ಪೊಲೆ, ತಾಂಬ್ಡೆ ವೋಂಟ್, ಸೊಭಿತ್ ಲಾಂಬ್ ನಿಳ್ಶೆ ದೊಳೆ, ತ್ಯಾ ಶಿವಾಯ್ ಜಿವಾನ್ ಫುಲೊನ್ ಆಯಿಲ್ಲಿ ಕೂಡ್, ತಾಚಿ ಬಾಜು ಕಾಂಯ್ ಆತ್ತಾಂ ಚಿರೊನ್ ಭಾಯ್ರ್ ಪಡೊಂಕ್ ಆಯ್ತೆ ಜಾಲಿಂ ತಾಚಿಂ ಭರ್‌ಲ್ಲಿ ಸ್ಥನಾಂ ಕೊಣಾಯ್ಕೀ ಏಕ್ ಘಡಿ ಪಿಶೆಂ ಕರ್ಚಾಂತ್ ವಿಶೇಷ್ ನಾತ್‌ಲ್ಲೆಂ.

ಅಶೆಂ ಕೊಲೆಜಿಕ್ ವೆಚಾ ಜಿವಿತಾಕ್ ಎದೊಳ್‌ಚ್ ಸಭಾರ್ ಸಾಂಗಾತಿಣ್ಯೊ ಜಾಲ್ಲ್ಯೊ. ಥೊಡೆಪಾವ್ಟಿಂ ತ್ಯೊ ಜಿವಿತಾಚಾ ಘರಾ ಯೆತಾಲಿಂ ಆನಿ ಥೊಡೆ ಪಾವ್ಟಿಂ ಜಿವಿತಾ ತಾಂಚಾ ಘರಾಂನಿ ವೆತಾಲೆಂ.

ಅಶೆಂ ಸದಾಂ ಕೊಲೆಜಿಕ್ ವೆಚಾ ತಾಕಾ ಜೊಯೆಲ್ ಅಪ್ರೂಪಾನ್ ಮೆಳ್ತಾಲೊ ತರೀ ಆತಾಂ ತಾಕಾ ಸವಯ್ ಜಾಲ್ಲಿ ದೆಖುನ್ ತೆಂ ಆಪ್ಲೆಂ ಲಿಸಾಂವ್ ಜಾತೆಚ್ ಆಪ್ಲ್ಯಾ ಸಾಂಗಾತಿಣಿಂ ಬರಾಬರ್ ಬಸ್ಸಾಂನಿ ಘರಾ ಯೆತಾಲೆಂ.

ಅಶೆಂ ಸರಾಗ್ ಆಪ್ಲ್ಯಾ ಬಸ್ಸಾರ್ ಯೆಂವ್ಚಾ ಜಿವಿತಾಚೆರ್ ಎಕ್ಲೊ ಹಿಂದ್ವಾಂಚೊ ಕಂಡೆಕ್ಟರ್ ದೊಳೊ ದವರ್ನ್ ಆಸ್‌ಲ್ಲೊ ಆನಿ ಸದಾಂ ಮೆಳ್ಚಾ ವಳ್ಕಿಂತ್ ಎಕಾಮೆಕಾ ತಾಣಿಂ ಪಯ್ಲೆ ಹಾಸೊಂಕ್ ಸುರು ಕೆಲೆಂ. ಉಪ್ರಾಂತ್ ತಾಂಚಿ ಸಳಾವಳ್ ಉಲವ್ಣ್ಯಾಂತ್ ಬದ್ಲಾಲಿ ಆನಿ ಅಶೆಂ ದೀಸ್ ಗೆಲ್ಲೆಪರಿಂಚ್ ಜಿವಿತಾಚಿ ಆನಿ ತ್ಯಾ ಕಂಡೆಕ್ಟರಾಚಿ ಸಳಾವಳ್ ಮೊಗಾಂತ್ ಬದಾಲ್ಲಿ. ಜಿವಿತಾಚಿ ಸೊಭಾಯ್ ಪಳೆವ್ನ್ ಸಗ್ಳೊಚ್ ಪಿಸೊ ಜಾಲ್ಲೊ ಕಂಡಕ್ಟರ್ ರಮೇಶ್ ಸದಾಂ ಜಿವಿತಾಕ್ ಕೊಲೆಜಿಕ್ ವೆತಾನಾ ಆನಿ ಪಾಟಿಂ ಯೆತಾನಾ ಬಸ್ಸಾರ್ ಸಾಂಬಾಳ್ನ್ ಬಸಯ್ತಾಲೊ.

ದೀಸ್ ಅಶೆಚ್ಚ್ ಪಾಶಾರ್ ಜಾಲೆ ಆನಿ ಜಿವಿತಾ ಥೊಡೆಪಾವ್ಟಿಂ ರಜೆಚಾ ದಿಸಾಂನಿ ತಾಚಾ ಇಶ್ಟಿಣ್ಯಾಂಗೆರ್ ವೆತಾಲೆಂ ಆನಿ ಅಸಲೊಚ್ ಏಕ್ ಸಂದರ್ಭ್ ಪಳೆವ್ನ್ ತೆಂ ಹ್ಯಾ ಕಂಡೆಕ್ಟರಾಸವೆಂ ಕೊಡ್ಯಾಳಾಕ್ ಗೆಲೆಂ ಆನಿ ದೊಗಾಯ್ನೀಂ ಸಾಂಗಾತಾ ಪಿಚ್ಚರ್ ಪಳೆಲೆಂ ಆನಿ ಆಯ್ಸ್‌ಕ್ರೀಮ್ ಪಾರ್ಲಾರಾಕ್ ವಚೊನ್ ತಾಣಿಂ ಆಯ್ಸ್‌ಕ್ರೀಮ್ ಖಾವ್ನ್ ಪಾಟಿಂ ಆಯ್ಲಿಂ.

ದೀಸ್ ವೆತಾಂ ವೆತಾಂ ಭುರ್ಗ್ಯಾಂನಿಂ ಭಾಯ್ರ್ ಆಪ್ಲೊ ವೇಳ್ ಪಾಶಾರ್ ಕರ್ಚೆಂ ಕಳ್‌ಲ್ಲೆಂ ಎಸ್ತೆಲ್ ಕಿತೆಂಯ್ ಸಾಂಗ್ಚಾರ್ ನಾತ್‌ಲ್ಲೆಂ. ಸಾಂಗೊಂಕ್ ಕಾಂಯ್ ಎಸ್ತೆಲಾಲಾಗಿಂ ರುಜ್ವಾತ್ ನಾತ್‌ಲ್ಲಿ ಆನಿ ಮಾತ್ರ್ ನ್ಹಂಯ್ ನೈತಿಕ್ ಜಾವ್ನ್ ತಶೆಂ ಸಾಂಗೊಂಕ್ ಎಸ್ತೆಲ್ ಸಕಾನಾತ್‌ಲ್ಲೆಂ.

ಅಶೆಂ ಜೊಯೆಲ್ ಎಕಾ ಸಕಾಳಿಂ ಕೊಲೆಜಿಕ್ ಗೆಲ್ಯಾರ್ ತಾಣೆಂ ಪಾಟಿಂ ಯೆಂವ್ಚೆಂ ರಾತಿಂಚ್ಚ್. ಕೆದಾಳಾ ಧಾ ವೊರಾಂ ಜಾತಾಲಿಂ ತರ್ ಕೆದಾಳಾ ಬಾರಾ ವೊರಾಂ. ಪಯ್ಲೆಂ ಜೊಯೆಲಾಕ್ ರಾಕೊನ್ ಬೊಸ್ಚೆಂ ಎಸ್ತೆಲ್ ಆತಾಂ ವೊರಾಂ ನೋವ್ ಜಾತಾನ್೦ಚ್ ಲತೀಫಾನ್ ಹಾಡ್ನ್ ದಿಲ್ಲೊ ಸೊರೊ ಪಿಯೆವ್ನ್ ತಕ್ಲಿ ಸಾರ್ಕ್ಯಾ ಥಾರ್‍ಯಾರ್ ನಾಸ್ತಾಂ ನಿದ್ತಾಲೆಂ.

ತವಳ್ ತವಳ್ ಆಪ್ಲ್ಯಾ ಘರಾ ಯೇವ್ನ್ ವೆಚಾ ತೇಂಯ್ ಚಡಾವತ್ ಜಾವ್ನ್ ಕಾಳೊಕ್ ಜಾತೆಚ್ಚ್ ಯೆಂವ್ಚಾ ಆನಿ ರಾತ್ ಪರ್ಯಾಂತ್ ಆಸ್ಚಾ ಲತೀಫಾಚೆರ್ ಆತಾಂ ಜಿವಿತಾಕ್ ಎಕಾ ಥರಾಚೊ ದುಭಾವ್ ಜಾತಾಲೊ ತರೀ ತಾಕಾ ಚಿಂತುಂಕ್ ಆವ್ಕಾಸ್ ನಾತ್‌ಲ್ಲೊ. ಆಪ್ಣಾನ್ ಅಶೆಂ ಚಿಂತ್ಚೆಂ ಕಾಂಯ್ ಚೂಕ್‌ಗೀ ಮ್ಹಳ್ಳೊ ದುಭಾವ್‌ಯಿ ತಾಕಾ ಯೆತಾಲೊ. ದೀಸ್ ಗೆಲ್ಲೆಪರಿಂಚ್ ಲತೀಫಾಚಿ ಮತ್ ಜಿವಿತಾಚಾ ಕುಡಿಚೆರ್ ಪಡ್ತಾಲಿ. ಪುಣ್ ಮತಿ ಭಿತರ್ ಎಕಾ ಥರಾಚಿ ಕಾವ್ಜೆಣಿಂ ಆಸ್‌ಲ್ಲಿ.

ಕಾಂಯ್ ಆಪ್ಣಾನ್ ಚುಕೊನ್ ಪಡೊನ್ ದೋನ್ ದೊಣಿಂತ್ ಪಾಂಯ್ ದವರ್ಲೊ ತರ್ ದೊನಾಂತೀ ನಾಸ್ತಾಂ ಮಧೆಂ ಆಸ್ಚಾ ಉದ್ಕಾಂತ್ ಪಡ್ಲ್ಯಾರ್ ಮ್ಹಳ್ಳಿ ಭಿರಾಂತ್ ತಾಕಾ ಆಯ್ಲಿ. ತ್ಯಾ ಶಿವಾಯ್ ತಾಕಾ ಇತ್ತುನ್ ಪರ್ಯಾಂತ್ ಸಾಂಭಾಳ್ಳೆಲ್ಲ್ಯಾ ಎಸ್ತೆಲಾಕ್ ದಖೊ ದೀಂವ್ಕ್ ನಾಕಾಸ್‌ಲ್ಲೆಂ. ತಾಕಾ ಎಸ್ತೆಲಾಚೆರ್ ಕಸ್ಲೊಗೀ ಅವ್ಯೆಕ್ತ್ ಬಾಂಧ್ ಆಸ್‌ಲ್ಲೊ.

ಅಶೆಂಚ್ ಲತೀಫಾಚೆರ್ ದುಭಾವ್ ಕರುನ್ ಆಸ್ಚಾ ಜಿವಿತಾಕ್ ಕಿತೆಂಗೀ ಲತೀಫಾಚೆರ್ ಭರ್ವಸೊ ಉದೆಲೊ ಆನಿ ಹೆಂ ಸಗ್ಳೆಂ ಸಮ್ಜಲ್ಲ್ಯಾ ಲತೀಫಾನ್‌ಯಿ ತಾಚಿ ಚತ್ರಾಯ್ ಸಾಂಭಾಳ್ಳಿ.

ತಿಯೊಚಾ ಘರಾಕ್ ಫೋನ್ ಆಯಿಲ್ಲೆಂ ಸಗ್ಳ್ಯಾಂಚಾಕೀ ಚಡ್ ಜಾವ್ನ್ ಜಿವಿತಾಕ್ ಬರೆಂ ಜಾಲೆಂ. ತೆಂ ರಾತಿಂ ಸಯ್ತ್ ಕುಡಾ ಭಿತರ್ ಬೊಸೊನ್ ಕಿತೆಂ ಉಲಯ್ತಾಲೆಂ ಮ್ಹಳ್ಳೆಂ ಕೊಣೀಂ ನೆಣಾಂತ್. ತ್ಯಾ ಶಿವಾಯ್ ತವಳ್‌ತವಳ್ ಜಿವಿತಾಚೊ ಸಾಂಗಾತಿಣ್ಯೊ ಜಿವಿತಾಕ್ ಫೋನ್ ಕರ್ತಾಲ್ಯೊ ಆನಿ ಥೊಡೆ ಪಾವ್ಟಿಂ ರಮೇಶ್‌ಯಿ ಫೋನ್ ಕರ್ತಾಲೊ ಆನಿ ವ್ಹೊರಾಂಗಟ್ಲೆ ಉಲವ್ನ್ ಬೊಸ್ತಾಲೊ.

ಘರಾಕ್ ಫೋನ್ ಆಯಿಲ್ಲ್ಯಾ ಉಪ್ರಾಂತ್ ಮಯ್ನ್ಯಾಕ್ ಏಕ್ ಪಾವ್ಟಿಂ ಪುಣೀಂ ದೋನ್ ಮಿನುಟಾಂ ಖಾತಿರ್ ತಿಯೊ ಫೋನ್ ಕರ್ತಾಲೊ ಆನಿ ಎಸ್ತೆಲಾಕ್ ಆನಿ ಭುರ್ಗ್ಯಾಂಕ್ ಆಪ್ಲ್ಯಾ ಭಲಾಯ್ಕೆ ವಿಶ್ಯಾಂತ್ ಸಾಂಗ್ತಾಲೊ. ಆನಿ ಎಸ್ತೆಲಾನ್ ಉಲಂವ್ಚಾ ಹರ್ಯೆಕಾ ಉತ್ರಾಂನಿ ಪೊಯ್ಶೆ, ವಸ್ತು, ಭಾಂಗಾರ್ ಆಸ್‌ಲ್ಲ್ಯೊ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್.

ಭುರ್ಗ್ಯಾಂಚೆಂ ಶಿಕಾಪ್ ಜಾಲೆಂ ತರ್ ಉಪ್ರಾಂತ್ ತಿಯೊಕ್ ಚಡ್ ಕಶ್ಟ್ ನಾಂತ್ ಮ್ಹಣೊನ್ ತೊ ಜಾಣಾಸ್‌ಲ್ಲೊ. ಭುರ್ಗಿಂ ಕಾಂಯ್ ಬರೆಂ ಶಿಕೊನ್ ಕಾಮಾಕ್ ಲಾಗ್ತಿತ್ ತರ್ ಉಪ್ರಾಂತ್ ಆಪ್ಣಾಕ್ ಮಿನತ್ ಕರ್ಚಿ ಗರ್ಜ್ ನಾ. ತಾಣಿಂ ಬರೆಂ ಜಿವಿತ್ ಜೊಡಿಜಯ್ ಮ್ಹಳ್ಳ್ಯಾ ಎಕಾಚ್ಚ್ ಉದ್ದೇಶಾನ್ ತಿಯೊಕ್ ಇತ್ಲೊ ತೇಂಪ್ ಪರ್ಗಾಂವಾಂತ್ ರಾವೊಂಕ್ ಸಾಧ್ಯ್ ಜಾತಾಲೆಂ. ತರೀ ತೊ ಹರ್ಯೆಕಾ ಮಹಿನ್ಯಾಚಾ ಎಕಾ ಆಯ್ತಾರಾ ಇಗರ್ಜೆಲಾಗಿಂ ಗೆಲ್ಲೊಚ್ಚ್ ಘರಾ ಫೋನ್ ಕರ್ತಾಲೊ.

ಪುಣ್ ಕಿತೆಂ ತರೀ ಆಪ್ಣಾಚಾ ಭಲಾಯ್ಕೆ ವಿಶ್ಯಾಂತ್ ಜಾಂವ್ ಆಪ್ಣಾನ್ ವಕಾತ್ ಘೆಂವ್ಚೆ ವಿಶ್ಯಾಂತ್ ಜಾಂವ್ ತಿಯೊನ್ ಏಕ್ ಸಬ್ಧ್ ಎಸ್ತೆಲಾಕ್ ಯಾ ಭುರ್ಗ್ಯಾಂಕ್ ಜಾಂವ್ ಸಾಂಗ್ಲೆಂನಾ. ಭೆಶ್ಟೆಂಚ್ ತಾಂಕಾ ಖಂತಿನ್ ಘಾಲುಂಕ್ ತಿಯೊಕ್ ನಾಕಾಸ್‌ಲ್ಲೆಂ.

ಎಸ್ತೆಲಾಕ್ ಘರಾಂತ್ ಬೊಸೊನ್ ವೇಳ್ ಪಾಶಾರ್ ಕರುಂಕ್ ಟಿವಿ ಆಸ್‌ಲ್ಲಿ, ಇಲ್ಲೊ ವೇಳ್ ರಾಂದುನ್ ಖರ್ಚಿತಾಲೆಂ ತರ್ ಉಪ್ರಾಂತ್ ಇಲ್ಲೊ ವೇಳ್ ಫೊನಾರ್ ಖರ್ಚಿತಾಲೆಂ. ತಾಕಾ ಆತಾಂ ಘರ್ಚಾ ಜಾಗ್ಯಾರ್ ಝಡಾಂ ಲಾಂವ್ಕ್ ಉರ್ಭಾ ನಾತ್‌ಲ್ಲಿ. ಗೊಟ್ಯಾಂತ್ ಆಸ್‌ಲ್ಲ್ಯೊ ಗಾಯೊ ಎದೊಳ್‌ಚ್ ವಿಕ್‌ಲ್ಲ್ಯೊ. ತ್ಯಾ ಶಿವಾಯ್ ಘರಾಂತ್ ಆಸ್ಚಿಂ ಕುಂಕ್ಡಾಂ ಯೇವ್ನ್ ಆಂಗಣ್ ಮ್ಹೆಳೆಂ ಕರ್ತಾತ್ ಮ್ಹಣೊನ್ ಕುಂಕ್ಡಾಂಕ್‌ಯ್ ವಿಕ್ಲೆಂ. ಘರಾಂತ್ ಆಸ್‌ಲ್ಲೆ ಪೆಟೆ ಎಕಾ ಪಾಟ್ಲ್ಯಾನ್ ಏಕ್ ಮೊರೊನ್ ಗೆಲ್ಲೆ ಆನಿ ನವ್ಯಾ ಪಿಲಾಂಕ್ ಹಾಡ್ನ್ ಪೊಸುಂಕ್ ತಾಕಾ ನಾಕಾಸ್‌ಲ್ಲೆಂ. ತಾಂಚಿ ಚಾಕ್ರಿ ಕೋಣ್ ಕರ್ತಾ ಮ್ಹಳ್ಳೆಂ ಚಿಂತಾಪ್ ಎಸ್ತೆಲಾಚೆಂ ಜಾಲ್ಲೆಂ.

ಅಶೆಂ ದೀಸ್ ಗೆಲ್ಲೆಪರಿಂಚ್ ಎಸ್ತೆಲಾಚಾ ಕುಡಿಂತ್ ಆಳ್ಸಾಯ್ ಭರೊನ್ ಆಯ್ಲಿ. ಪೊಯ್ಶೆಯ್ ಸರಾಗ್ ಯೆತಾಲೆ ದೆಖುನ್ ತಾಕಾ ಆತಾಂ ಸಂಸಾರ್ ದಿಸಾನಾತ್‌ಲ್ಲೊ. ತರೀ ಜಿವಾಂತ್ ಅಜೂನೀಂ ಎಸ್ತೆಲ್ ತರ್ನಾಟೆಂಚ್ ಜಾವ್ನ್ ದಿಸ್ತಾಲೆಂ. ಪಯ್ಲೆಂಚ್ ಗೊರೆಂ ಆಸ್ಚೆಂ ತೆಂ ಆತಾಂ ಘರಾ ಭಿತರ್‌ಚ್ ಬೊಸೊನ್ ಅನಿಕ್‌ಯಿ ಗೊರೆಂ ದಿಸ್ತಾಲೆಂ.

ಪಯ್ಲೆಂಚೆ ಪರಿಂ ಆತಾಂ ಸಗ್ಳೊ ದೀಸ್ ಆಪ್ಲ್ಯಾ ಘರಾಂತ್ ಕೊಣೀಂ ನಾತ್‌ಲ್ಲೆಂ ಲತೀಫಾಕ್ ಬರೆಂ ಜಾತಾಲೆಂ. ತಾಚಾ ಮತಿಂತ್ ಕಾಜಾರಾಚಿಂ ಚಿಂತ್ನಾಂ ಎದೊಳ್ ಪರ್‍ಯಾಂತ್ ಆಯಿಲ್ಲಿಂಚ್ ನಾಂತ್.

********

ಮುಂದರ್‍ಸಿಲಾಂ...

Tags: Vally Quadras,e konkani novel, Konkani, Mangalore, Mangalorean, Mother Tongue

From around the world

ಪಾಟಿಂ ಗಾಂವಾಕ್ - ಅವಸ್ವರ್ 18

Post your comments

ಅವಸ್ವರ್ 1

ಅವಸ್ವರ್ 2

ಅವಸ್ವರ್ 3

ಅವಸ್ವರ್ 4

ಅವಸ್ವರ್ 5

ಅವಸ್ವರ್ 6

ಅವಸ್ವರ್ 7

ಅವಸ್ವರ್ 8

ಅವಸ್ವರ್ 9

ಅವಸ್ವರ್ 10

ಅವಸ್ವರ್ 11

ಅವಸ್ವರ್ 12

ಅವಸ್ವರ್ 13

ಅವಸ್ವರ್ 14

ಅವಸ್ವರ್ 15

ಅವಸ್ವರ್ 16

ಅವಸ್ವರ್ 17

ಅವಸ್ವರ್ 18

ಅವಸ್ವರ್ 19

ಅವಸ್ವರ್ 20

ಅವಸ್ವರ್ 21

ಅವಸ್ವರ್ 22

ಅವಸ್ವರ್ 23

ಅವಸ್ವರ್ 24

ಅವಸ್ವರ್ 25

ಅವಸ್ವರ್ 26

ಅವಸ್ವರ್ 27

ಅವಸ್ವರ್ 28

Connect

Our Address
Mangalore

Our Address
Udupi

Our Address
Dubai

From around the world

Post your comments

Connect

Our AddressMangalore

Our AddressUdupi

Our AddressDubai

Our Address
Mangalore

Our Address
Udupi

Our Address
Dubai