:: ಮಾಯ್ ಭಾಸ್

ಅಶೆಂ ಮಾರ್‍ಕು ಗೆಲ್ಲ್ಯಾ ಹಾಪ್ತ್ಯಾಂತ್‌ಚ್ ಅಹ್ಮದಿ ಥಾವ್ನ್ ಆಯಿಲ್ಲೊ ಗೋಪಿ ಇಲ್ಲೊ ದುಖೇಸ್ತ್ ಆಸ್‌ಲ್ಲೊ. ಆಪ್ಲ್ಯಾ ಆವಯ್ಚಾ ಮರ್ಣಾಚಿ ಖಭಾರ್ ಘೆವ್ನ್ ತೊ ಆಯಿಲ್ಲೊ ಆನಿಂ ತೆಚ್ಚ್ ಸಾಂಜೆರ್ ತಾಕಾ ಗಾಂವಾಕ್ ವಚೊಂಕ್ ಆಸ್‌ಲ್ಲೆಂ. ಖಬಾರ್ ಆಯ್ಕೊನ್ ಏಕ್ ಪಾವ್ಟಿಂ ತಿಯೊ ಶೆರ್‍ಮೆಲೊ. ತರೀ ಕಿತೆಂ ಕರ್‍ಚೆಂ? ದೆವಾಚಿ ಖುಶಿ ತಿ ಜಾವ್ನಾಸ್‌ಲ್ಲಿ. ತಿಯೊನ್ ಗೋಪಿಕ್ ಅದೇವ್ಸ್ ಮಾಗ್ಲೊ ಆನಿಂ ಗೋಪಿ ಎದೊಳ್‌ಚ್ ಮಣಿಕ್ ಮೆಳೊನ್ ಆಯಿಲ್ಲೊ ಆನಿಂ ತೆಚ್ಚ್ ಸಾಂಜೆರ್ ತೊ ಗಾಂವಾಕ್ ಭಾಯ್ರ್ ಸರ್‍ಲೊ.

ಗೋಪಿ ಗಾಂವಾಕ್ ಗೆಲ್ಲೊಚ್ಚ್ ತಿಯೊ ಬಾವ್ಲೊ. "ಕಸ್ಲ್ಯೊ ಸಗ್ಳ್ಯೊ ಆಶಾ ಅತ್ರೆಗ್ ಘೆವ್ನ್ ಆಯಿಲ್ಲೊ ಜಾಯ್ಜಯ್ ಬಾವ್ಡೊ ಆನಿಂ ಆತಾಂ ತಾಣೆಂ ಜಮೊ ಕೆಲ್ಲೆ ಪೊಯ್ಶೆ ಆಪ್ಲ್ಯಾ ಪಿಡೇಸ್ತ್ ಆವಯ್ಕ್ ವರುನ್ ಬರಿ ಚಿಕಿತ್ಸಾ ಕರುಂಕ್ ಚಿಂತ್‌ಲ್ಲೆಂ ಚಿಂತಾಪ್ ಸಗ್ಳೆಂ ಆಧುರೆಂಚ್ಚ್ ಉರುಲ್ಲೆಂ. ತಾಚಿ ಆವಯ್ ಆಪ್ಲಿ ಸಂಸಾರಿ ಜಿಣಿ ಸಂಪವ್ನ್ ಗೆಲ್ಲಿ. ಎಕ್ಸುರಿ ಸಂಸಾರಾಕ್ ಆಯಿಲ್ಲ್ಯಾ ತಿಕಾ ಎಕ್ಸುರೆಂಚ್ ಪಾಟಿಂ ವಚೊಂಕ್ ಪಡ್ಲೆಂ. ಗೋಪಿನ್ ಕುವೆಯ್ಟಾಕ್ ಆಯಿಲ್ಲೆಂಚ್ ಘರಾಂತ್ ಎಕಾ ಬಾಯ್ಲೆಕ್ ಕಾಮಾಕ್ ದವರ್ಲೆಲೆಂ. ತಿ ಬಾಯ್ಲ್ ಜಾಲ್ಯಾರೀ ಬರಿ ಚಾಕ್ರಿ ಕರ್ತಾಲಿ ಆನಿಂ ಮರಣ್ ಕೊಣಾಯ್ಕೀ ಆಡಾಂವ್ಕ್ ಸಾಧ್ಯ್ ಆಸಾಯೆ? ಹರ್‍ಯೆಕಾ ಸಂಗ್ತ್ಯಾಂನಿ ಗೋಪಿ ತಿಯೊಕ್ ಏಕ್ ಮಿಸ್ತೆರ್‌ಸೊ ದಿಸೊನ್ ಆಯ್ಲೊ.

ಮಣಿ ಸಯ್ತ್ ತ್ಯೇ ದೀಸ್ ತಿಯೊಸವೆಂ ಉಲವ್ನ್ ಬೊಸ್ಲೊ. ಆಪ್ಲ್ಯಾಚ್ಚ್ ಕೊಣಾಯ್ಚೆಂಗೀ ಮರಣ್ ಜಾಲಾಂ ಮ್ಹಳ್ಳೆಂ ಚಿಂತಾಪ್ ತಾಂಚೆಂ ಜಾಲೆಂ. 'ಆವಯ್' ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಭುರ್ಗ್ಯಾಪಣಾರ್ ಆವಯ್ಕ್ ಹೊಗ್ಡಾಯಿಲ್ಲ್ಯಾ ತಿಯೊಕ್ ಆನಿ ಮಣಿಕ್ ಕಳಿತ್ ಆಸ್‌ಲ್ಲೆಂ. ದೊಗೀ ಜೆವ್ಲೆನಾಂತ್. ತಾಂಕಾ ಫಕತ್ತ್ ಗೋಪಿಚಾ ಜಿಣ್ಯೆಂತ್ ಆಯಿಲ್ಲ್ಯೊ ಘುಂವ್ಡ್ಯೊ ಅಜ್ಯಾಪಾಂಚೊ ಜಾಲ್ಲ್ಯೊ. ತಾಚಾ ಜಿಣ್ಯೆಚಿಂ ಧ್ಯೇಯಾಂ ವಿಚಿತ್ರ್ ಮ್ಹಣೊನ್ ಲಾಗ್ಲಿಂ. ತೊ ಫಕತ್ ಹೆರಾಂಖಾತಿರ್ ಜಿಯೆತಾಲೊ ಮ್ಹಳ್ಳೆಂ ತಾಚಾ ಜಿಣ್ಯೆಂತ್ ತಾಣೆಂ ರುಜು ಕೆಲೆಂ. ವಾಟ್ ಚುಕೊನ್ ಗೆಲ್ಲ್ಯಾ ಎಕಾ ವೇಶ್ಯಾಕ್ ಬರ್‍ಯಾ ವಾಟೆರ್ ಹಾಡುಂಕ್ ಪ್ರೇತನ್ ಕರ್‍ಚಿ ತಾಕಾ ಕಸ್ಲಿ ಗರ್ಜ್ ಆಸ್‌ಲ್ಲಿ? ಕೊಣೀಂ ಸವಯೆಚೊ ಗುಲಾಮ್ ಜಾಲ್ಲೊ ತಿತ್ಲೆ ವೆಗಿಂ ಬದ್ಲತಾತ್‌ವೆ? ಆಪ್ಲ್ಯಾ ಜಿಣ್ಯೆಂತ್ ಗೋಪಿನ್ ಹಾಡುನ್ ದಿಲ್ಲಿ ಬದ್ಲಾವಣ್ ವೊಪುನ್ ಘೆವ್ನ್ ಕೊಣೀಂ ಹೆರ್ ಬಾಯ್ಲ್ ತರ್ ಜೀಣ್‌ಭರ್ ತಾಕಾ ವಿಧೇಯ್ ರಾವ್ತಿ. ಪುಣ್ ಗೋಪಿಚಿ ಬಾಯ್ಲೆನ್ ಕೆಲ್ಲೊ ಘಾತ್ ಗೋಪಿಕ್ ಮಾತ್ರ್ ನ್ಹಂಯ್, ಬಿರ್ಮತೆಚೆಂ ಕಾಳಿಜ್ ಆಸ್ಚಾ ಕೊಣಾಯ್ಕೀ ಏಕ್ ಘಡಿ ತಾಂಚೆ ಕಾಳಿಜ್ ಪಿಗ್ಳಾಂವ್ಚೆ ತಸಲೆಂ. ಆನಿಂ ತಾಚೆ ಥಾವುನ್ ಗೋಪಿಕ್ ಮೆಳ್‌ಲ್ಲೊ ಪ್ರತಿಫಳ್ ಕಸಲೊ? ಘಾತ್ ಆನಿಂ ಫಟಿಂ. ಹಾಕಾ ಸರ್ವ್ ಕೋಣ್ ಕಾರಾಣ್? ಆಬ್ಲೇಸ್ಪಣ್? ಥೊಡೆಪಾವ್ಟಿಂ ಸತ್‌ಚ್ ವಾಯ್ಟಾಕ್ ಕಾರಾಣ್ ಜಾತಾ ನಂಯ್ಗೀ? ಸತ್ಯಾನ್ ತಾಣೆಂ ಬಾಯ್ಲೆಕ್ ಬೊಂಬೊಯ್ ವೆಲೊ. ಪಿಡೇಸ್ತ್ ಆವಯ್ಚಿ ಚಾಕ್ರಿ ಕರುಂಕ್ ಘರಾಚ್ ದವರ್‌ಲ್ಲೆಂ ತರ್ ಅಸಲೆಂ ಅನಾಹುತ್ ಘಡ್ತೆಂಗೀ?"

ತಿಯೊಚಾ ತೊಂಡಾಂತೂನ್ ಅಪಾಪಿಂ ಉತ್ರಾಂ ದೆಂವ್ಲಿಂ.

"ಘಡೊಂಕ್ ಆಸ್ಚೆಂ ಕೊಣಾಯೀ ಆಡಾಂವ್ಕ್ ಅಸಾಧ್ಯ್ ತಿಯೊ, ತೆಂ ತಶೆಂ ಗೋಪಿಚಾ ಜಿಣ್ಯೆಂತ್ ಘಡೊಂಕ್ ಆಸ್‌ಲ್ಲೆಂ ಆನಿಂ ತೆಂ ಘಡ್ಲಾಂ ಆನಿಂ ತಾಂತುಂ ಕೊಣೆಂಯ್ ಕಿತೆಂಯ್ ಕರ್‍ಯೆತ್ ಆಸ್ಚೆಂ ಭೋವ್ ಉಣೆಂ." ಮಣಿನ್ ಸಾಂಗ್ಲೆಂ. ದೊಗೀ ಜೆವ್ಲೆನಾಂತ್. ಸರೊನ್ ಗೆಲ್ಲ್ಯಾ ಆಪ್ಲ್ಯಾ ಕೊಣಾಚೊಗೀ ಉಡಾಸ್ ಕಾಡುನ್ ತೆ ಬೊಸ್ಲೆ.

ತಿಯೊಚೆಂ ಘರ್ ಹಳ್ತಾಚಾ ಗುಡ್ಯಾಚೆರ್ ಆಸ್‌ಲ್ಲ್ಯಾನ್ ತಾಚಾ ಘರಾಲಾಗಿಂ ಆಸ್ಚಾಂಕ್ ಘರಾಕ್ ಕೋಣ್ ಯೆತಾತ್ ಆನಿಂ ವೆತಾತ್ ಮ್ಹಳ್ಳೆಂ ಪಳೆಂವ್ಕ್ ಜಾತಾಲೆಂ. ರುಕಾಚಾ ಆಡೊಸಾಕ್ ಕಾಂಯ್ ತಿಯೊಚಾ ಘರಾ ಥಾವುನ್ ಹೆರಾಂಚಿ ಘರಾಂ ದಿಸಾನಾತ್‌ಲ್ಲಿಂ ತರೀ ಕೊಣೀಂ ಘರಾ ತೆವ್ಶಿನ್ ಚಲೊನ್ ಯೆಂವ್ಚೆಂ ಸ್ವಶ್ಟ್ ದಿಸ್ತಾಲೆಂ.

ತಿಯೊ ಆಸ್ತಾನಾ ಜಾಲ್ಯಾರೀ ತಾಚಾ ಘರ್ಚಿಂ ಸೆಜಾರ್‍ಚಿಂ ತವಳ್‌ತವಳ್ ಯೆತಾಲಿಂ. ತ್ಯಾ ಶಿವಾಯ್ ಉಲವ್ಣ್ಯಾಂತ್ ಮೊಗಾಳ್ ಜಾವ್ನಾಸ್‌ಲ್ಲ್ಯಾ ತಿಯೊ ತಶೆಂಚ್ ಎಸ್ತೆಲಾಚೆರ್‌ಯಿ ಚಡಾವತ್ ಲೊಕಾಂಕ್ ಅಭಿಮಾನ್ ಆನಿಂ ಮೋಗ್ ಆಸ್‌ಲ್ಲೊ. ತಾಂಚಿ ಭುರ್ಗಿಂ ತವಳ್‌ತವಳ್ ಜೊಯೆಲಾಸವೆಂ ಆನಿಂ ಜಿವಿತಾಸವೆಂ ಖೆಳ್ತಾಲಿಂ.

ತಾಂಚೆ ಪಯ್ಕಿ ಏಕ್ ಕ್ರೀಸ್ತಾಂವ್ ಘರಾಣೆಂ ದಾವಿದಾಚೆಂ. ದಾವಿದ್ ಆಪ್ಲ್ಯಾ ಪ್ರಾಯೆಸ್ತ್ ಆವಯ್ ಬಾಪಾಯ್ಚಿ ಚಾಕ್ರಿ ಕರ್ನ್ ಆಪ್ಲ್ಯಾ ತೀನ್ ಭುರ್ಗ್ಯಾಂಕ್ ಪೊಸ್ತಾಲೊ. ದಾವಿದ್‌ಯಿ ಸತ್ತಿ ಮನಿಸ್, ಸರ್ಕಾರಾಚಾ ಪಂದ್ರಾ ಸೆಂಟ್ಸ್ ಜಾಗ್ಯಾರ್ ಆಪ್ಲೆಂ ಲ್ಹಾನ್ ಘರ್ ಬಾಂಧುನ್ ಥಂಯ್ ಹಾಂಗಾ ಮ್ಹಣೊನ್ ಥೊಡೆಪಾವ್ಟಿಂ ತಿಯೊ ಗಾಂವಾಂತ್ ಆಸ್‌ಲ್ಲೆ ವೆಳಾರ್ ತಿಯೊಸವೆಂ ಕಾಮ್ ಕರ್ತಾಲೊ. ಆನಿಂ ಮೆಳ್ಚಾ ಜೊಡಿಂತ್ ಆಪ್ಲೆಂ ಕುಟಾಮ್ ಪೊಸ್ತಾಲೊ. ದಾವಿದಾಚಿ ಬಾಯ್ಲ್ ಎಲಿಜ಼್‌ಯಿ ಕಾಮಾಂತ್ ಚುರುಕ್ ಆಸ್‌ಲ್ಲೆಂ ತರೀ ತಾಕಾ ಉಸ್ಮೊಡೆಚಿ ಪಿಡಾ ಆಸ್‌ಲ್ಲ್ಯಾನ್ ತಾಕಾ ಚಡಾವತ್ ಕಾಮ್ ಕರ್‍ಚೆಂ ದಾವಿದ್ ಆಡಾಯ್ತಾಲೊ.

ಭುರ್ಗಿಂ ಲ್ಹಾನ್ ಆಸ್‌ಲ್ಲ್ಯಾನ್ ದೊಗಾಂ ಇಸ್ಕೊಲಾಕ್ ವೆತಾಲಿಂ ಆನಿಂ ಎಕ್ಲೆಂ ಅನಿಕೀ ಲ್ಹಾನ್ ಆಸ್‌ಲ್ಲೆಂ. ಪೆಂಟೆ ಥಾವುನ್ ತಿಯೊಚಾ ಘರಾ ವಚಾಜಯ್ ತರ್ ದಾವಿದಾಚೆಂ ಘರ್ ಉತ್ರೊನ್೦ಚ್ ವಚಾಜಯ್ ದೆಖುನ್ ಪೆಂಟೆಕ್ ವೆತಾನಾ ಯಾ ಯೆತಾನಾ ದಾವಿದಾಕ್ ಯಾ ತಾಚಾ ಘರ್ಚಾಂಕ್ ಏಕ್ ಉಲೊ ದೀವ್ನ್ ವೆಚಿ ತಿಯೊಚಿ ಆದ್ಲಿ ಸವಯ್ ಜಾಲ್ಲಿ. ತ್ಯಾ ಶಿವಾಯ್ ದಾವಿದಾಚಾ ಭುರ್ಗ್ಯಾಂಕ್ ಜೊಯೆಲ್ ಆನಿಂ ಜಿವಿತಾ ಥೊಡೆ ಪಾವ್ಟಿಂ ಸಾಂಭಾಳ್ನ್ ಇಸ್ಕೊಲಾಕ್ ತಾಂಚೆಸವೆಂ ಆಪವ್ನ್ ವರ್ತಾಲಿಂ.

ತಿಯೊ ಪರ್ಗಾಂವಾಕ್ ವೆಚಾ ಆದ್ಲ್ಯಾ ದಿಸಾ ತಾಕಾ ಮೆಳೊಂಕ್ ದಾವಿದ್ ಆಯಿಲ್ಲೊ ಆನಿಂ ತಿಯೊನ್ ಘರಾಶಿಂ ಇಲ್ಲಿ ಜತನ್ ಘೆಂವ್ಕ್ ದಾವಿದಾಕ್ ಸಾಂಗ್‌ಲ್ಲೆಂ. ಎಕಾ ವ್ಹಡ್ ಭಾವಾಪರಿಂ ತಾಚಾ ಭುರ್ಗ್ಯಾಂಚಿ ಜತನ್ ಘೆಂವ್ಕ್‌ಯಿ, ಕಾಂಯ್ ಚಡುಣೆಂ ಜಾಲೆಂ ತರ್ ತಾಂಕಾ ಸಾಂಭಾಳ್ನ್ ವರುಂಕ್‌ಯಿ ಸಾಂಗ್‌ಲ್ಲೆಂ.

ತಿಯೊ ಗಲ್ಫಾಕ್ ಗೆಲ್ಲೆಂಚ್ ತಿಯೊಚಾ ಘರಾಂತ್ ಜಾಲ್ಲಿ ಬದ್ಲಾವಣ್ ಪಳೆವ್ನ್ ಎಲಿಜ಼್ ಅಜಾಪ್ಲೆಂ. ಎದೊಳ್ ಮ್ಹಣಾಸರ್ ಕಿತೆಂ ಮ್ಹಣೊನ್ ಉಲಯ್ಲ್ಯಾರ್ ಉಣ್ಯಾರ್ ಉಣೆಂ ಬರೆಂ ಮ್ಹಣೊನ್ ಜಾಪ್ ಪುಣಿಂ ದಿಂವ್ಚೆಂ ಎಸ್ತೆಲ್ ತಿಯೊ ಗಲ್ಫಾಕ್ ಗೆಲ್ಲೆಂಚ್ ಉಲಂವ್ಚೆಂ ಉಣೆಂ ಕೆಲ್ಲೆಂ. ಏಕ್ ದೋನ್ ಪಾವ್ಟಿಂ ಎಸ್ತೆಲಾಚಾ ಘರಾ ಯೇವ್ನ್ ವೆಚೆಂ ಎಲಿಜ್ ಉಪ್ರಾಂತ್ ಯೆಂವ್ಚೆಂಚ್ಚ್ ಬಂದ್ ಕೆಲೆಂ.

ಪಾಟ್ಲ್ಯಾ ಸಭಾರ್ ದಿಸಾಂ ಥಾವುನ್ ಸರಾಗ್ ಯೇವ್ನ್ ಆಸ್ಚಾ ಲತೀಫಾಚೆರ್ ಕಿತ್ಯಾಕ್‌ಗೀ ಎಲಿಜಾಕ್ ದುಭಾವ್ ಉದೆಲೊ. ಪಯ್ಲೆಂ ದಿಸಾಕ್ ಮಾತ್ರ್ ಯೇವ್ನ್ ಫುಲಾಂ ವರ್‍ಚಾ ತಾಚೆರ್ ತಿತ್ಲೊ ದುಭಾವ್ ಯೇಂವ್ಕ್ ನಾಂ ತರೀ ಅಛಾನಕ್ ತಿಯೊ ಗೆಲ್ಲೊಚ್ಚ್ ಸದಾಂ ಸಾಂಜೆರ್ ಯೇವ್ನ್ ಭುರ್ಗ್ಯಾಂಕ್ ಸಾಯ್ಕಲ್ ಶಿಕಂವ್ಚಿ ಉರ್ಭಾ ತಾಕಾ ಕಶಿ ಆಯ್ಲಿ ಮ್ಹಳ್ಳೆಂ ಎಲಿಜಾಕ್ ಮಿಸ್ತೆರ್‌ಸೊ ಜಾಲ್ಲೊ. ಆತಾತಾಂ ತೊ ಸಾಂಜೆರ್ ಯೆತಾ. ಎಕ್ಸುರೆಂ ಎಸ್ತೆಲ್‌ಯಿ ತಶೆಂಚ್, ಲತೀಫ್ ಯೆತೆಚ್ಚ್ ಘರ್ಚಿಂ ದಾರಾಂ ಬಂದ್ ಜಾತಾತ್. ಥೊಡೆ ಪಾವ್ಟಿಂ ತೆಂ ತಾಚೆಸವೆಂ ಭಾಯ್ರ್ ವೆತಾ ಮ್ಹಣ್ತಾನಾ ಎಲಿಜಾಕ್ ಕಿತೆಂಗೀ ಮಿಸ್ತೆರ್‌ಸೊ ದಿಸ್ಲೊ. ಏಕ್ ದೋನ್ ಪಾವ್ಟಿಂ ದಾವಿದಾಚಾ ಕಾನಾಲಾಗಿಂ ಪುಸ್ಪುಸ್ಲೆಂ ತರೀ ಪುರಾಸಾಣೆಂತ್ ಆಯಿಲ್ಲ್ಯಾ ದಾವಿದಾನ್ ತ್ಯೇಶಿಂ ಗುಮಾನ್ ದಿಲೆಂನಾ. ಬಾಯ್ಲಾಂಕ್ ದುಸ್ರೆಂ ಕಾಂಯ್ ಕಾಮ್ ನಾ ದೆಖುನ್ ಅಸಲಿಂಚ್ ಪೊಕೊಳ್ ಚಿಂತ್ನಾಂ ಚಿಂತಾತ್ ಮ್ಹಣೊನ್ ಲೆಕ್ಲೆಂ.

ಎಲಿಜಾಕ್ ಹೊ ಕಸಲೊ ಮಿಸ್ತೆರ್ ಮ್ಹಳ್ಳೆಂ ಸಮ್ಜೊಂಚಿ ಆತುರಾಯ್ ಆಯ್ಲಿ ಆನಿಂ ಏಕ್ ಪಾವ್ಟಿಂ ದನ್ಪಾರಾಂಚೆಂ ಲತೀಫ್ ಆಯಿಲ್ಲೆಂಚ್ ತೆಂ ಕಸಲೆಂಗೀ ನೀಬ್ ಘೆವ್ನ್ ಎಸ್ತೆಲಾಚಾ ಘರಾ ತೆವ್ಶಿನ್ ಆಯ್ಲೆಂ. ಘರ್ಚಾ ಸುಣ್ಯಾಂನಿ ವಳೊಕ್ ಆಸ್‌ಲ್ಲ್ಯಾನ್ ಹಳ್ತಾರ್ ಘೊಂಕುಂಕ್ ಲಾಗ್ತಾನಾ ಎಸ್ತೆಲಾಕ್ ಆಪ್ಲ್ಯಾ ಘರಾಶಿಂ ಕೋಣ್೦ಗೀ ಯೆತಾತ್ ಮ್ಹಳ್ಳೊ ದುಭಾವ್ ಯೇವ್ನ್ ಅರ್ಧ್ಯಾ ಮನಾನ್ ದಾರ್ ಉಘಡ್ನ್ ಭಾಯ್ರ್ ದೀಶ್ಟ್ ಘಾಲ್ತಾನಾ ಘರಾತೆವ್ಶಿನ್ ಯೆಂವ್ಚಾ ಎಲಿಜಾಕ್ ಪಳೆವ್ನ್ ಎಕಾಚ್ಚ್‌ಫರಾಂ ಶೆರ್ಮೆಲೆಂ. ಎಸ್ತೆಲಾಚೆಂ ವಸ್ತುರ್‌ಯಿ ಇಲ್ಲೆಂ ಅಸ್ತ್‌ವೆಸ್ತ್ ಆಸ್‌ಲ್ಲೆಂ ಘಡಿಯೆನ್ ಸಾರ್ಕೆಂ ಕೆಲೆಂ.

"ಕಿತೆಂ ಎಲಿಜ್ ಅಛಾನಕ್ ಉದೆಲೆಂಯ್?" ಕಿತ್ಯಾಕ್ ಆಯ್ಲಿಯ್ ಮಾರ್ ಮ್ಹಳ್ಳ್ಯಾ ಜೀನ್ಸಾರ್ ಸವಾಲ್ ಕೆಲೆಂ.

"ಆಮ್ಗೆಲ್ಯಾನ್ ಕಾಲ್ ಮೀಟ್ ಹಾಡುಂಕ್ ವಿಸ್ರಲ್ಲ್ಯಾನ್ ಆತಾಂ ರಾಂದ್ತಾನಾ ನಿಸ್ತ್ಯಾಕ್ ಘಾಲುಂಕ್ ಏಕ್ ಕಡೊ ಮೀಟ್ ನಾ ದೆಖುನ್ ಇಲ್ಲೆಂ ಮೀಟ್ ವರ್‍ಯಾಂ ಮ್ಹಣೊನ್ ಆಯ್ಲಿಂ"

ಎಲಿಜಾನ್ ಎದೊಳ್‌ಚ್ಚ್ ಉಲಂವ್ಣ್ಯಾಕ್ ತಯಾರಾಯ್ ಕೆಲ್ಲಿ ಆನಿಂ ತಿಚಾ ಹಾತಾಂತ್ ಆಸ್ಚಿ ಪೀರ್ ಎಸ್ತೆಲಾಕ್ ದಿಲಿ. ಎಸ್ತೆಲಾಕ್ ದುಸ್ರೊ ಉಪಾಯ್ ನಾಸ್ತಾನಾ ತಿ ಪೀರ್ ಘೆವ್ನ್ ಇಲ್ಲೆಂ ಮೀಟ್ ದೀಂವ್ಕ್ ಭಿತರ್ ರಿಗ್‌ಲ್ಲೆಂಚ್ ಎಲಿಜಾಚಿ ದೀಶ್ಟ್ ಎಸ್ತೆಲಾಚಾ ಘರಾಭಿತರ್ ಆರಾಮ್ ಕದೆಲಾಚೆರ್ ಬಸೊನ್ ಪೆಪರ್ ವಾಸ್ಚೆಪರಿಂ ಕರ್ಚಾ ಲತೀಫಾಚೆರ್ ಗೆಲಿ. ತಿಣೆಂ ಕಿತೆಂಚ್ ಪಳೆಂವ್ಕ್ ನಾತ್‌ಲ್ಲೆಪರಿಂ ಕೆಲೆಂ.

ಮೀಟ್ ದೀಂವ್ಕ್ ಆಯಿಲ್ಲ್ಯಾ ಎಸ್ತೆಲಾಕ್ ಪಳೆವ್ನ್ ಎಲಿಜ್ ಮ್ಹಣಾಲೆಂ "ಘರಾಂತ್ ಎಕ್ಲ್ಯಾಕ್ ಬೊಸೊನ್ ಉಭ್ಗೊಣ್ ಯೆತಾ ತರ್ ಆಮ್ಚೆಶಿಂ ಯೇ ಎಸ್ತೆಲಾ" ಮ್ಹಣೊನ್ ಸಾಂಗೊನ್ ಎಸ್ತೆಲಾಚಾಚ್ಚ್ ತೊಂಡಾಕ್ ಪಳೆಲೆಂ.

"ಜಾಯ್ತ್ ಪಳೆಯಾಂ" ಏಕ್ ಪಾವ್ಟಿಂ ವಚ್ ಮ್ಹಳ್ಳ್ಯಾ ಜೀನ್ಸಾರ್ ಎಸ್ತೆಲಾನ್ ಜಾಪ್ ದಿಲಿ.

ಮೀಟ್ ಘೆವ್ನ್ ಘರಾ ಪರ್ತಾಲ್ಲ್ಯಾ ಎಲಿಜಾಕ್ ಎಸ್ತೆಲಾಚಾ ತೊಂಡಾಚೊ ಬದ್ಲಾಲ್ಲೊ ಜಿನೊಸ್ ಪಳೆತಾನಾ ತಿಚೊ ದುಭಾವ್ ಖಂಡಿತ್ ಖರೊ ಮ್ಹಣೊನ್ ಭೊಗ್ಲೆಂ. ತಿತ್ಲೆಂಚ್ ನ್ಹಂಯ್, ತಿಚಾ ಮತಿಂತ್ ಎಕಾ ಪಾಟ್ಲ್ಯಾನ್ ಏಕ್ ಸವಾಲ್ ಉದೆಲೆಂ.

ಎಕ್ಲೆಂ ಆಸ್ಚಾ ಹ್ಯಾ ಬಾಯ್ಲೆಸವೆಂ ತ್ಯಾ ತರ್‍ನಾಟ್ಯಾಕ್ ಕಸಲೆಂ ಕಾಮ್? ಕಿತ್ಯಾಕ್ ತೊ ಘರಾಭಿತರ್ ಆಸಾ? ಕಿತ್ಯಾಕ್ ತಾಣೆಂ ಯೆತೆಚ್ ಹೆಂ ದಾರಾಂ ಧಾಂಪ್ತಾ? ತ್ಯಾ ಶಿವಾಯ್ ತವಳ್‌ತವಳ್ ಮೂಡ್‌ಬಿದ್ರಿ ಮಾರ್‍ಕೆಟಿಕ್ ವೆಚಾ ಎಲಿಜಾಕ್ ಥಂಯ್ ಆಸ್ಚೆ ಕೋಣ್ ಕಸಲ್ಯಾ ವರ್ಗಾಚೆ ಆನಿಂ ಖಂಚಾ ಖಾಸ್ತಾಚೆ ಮ್ಹಳ್ಳೆಂ ಖಂಡಿತ್ ಕಳಿತ್ ಆಸ್‌ಲ್ಲೆಂ. ತ್ಯಾ ಮೊವಾಲಿ ತರ್‍ನಾಟ್ಯಾಂ ಸವೆಂ ಬೊಸೊನ್ ಬಿಡಿ ಸಿಗ್ರೆಟಿ ವೊಡ್ನ್ ಥಂಯ್ ಯೆಂವ್ಚಾ ವೆಚಾ ಬಾಯ್ಲಾಂಕ್, ಚೆಡ್ವಾಂಕ್ ತುಕ್ಲಾಂವ್ಚಾ ಪಂಗ್ಡಾಂತ್ ಏಕ್ ದೋನ್ ಪಾವ್ಟಿಂ ಲತೀಫ್‌ಯಿ ಝಳ್ಕಾಲ್ಲೊ ಉಡಾಸ್ ತಿಕಾ ಆಸ್‌ಲ್ಲೊ.

ಅಶೆಂ ಸಾಂಜೆರ್ ಸೆಜಾರ್‍ಚಾ ಭಾಯ್ಲೆಲಾಗಿಂ ಉಲವ್ನ್ ಆಸ್ತಾನಾಂ ತಿಚೊ ದುಭಾವ್ ತಿಣೆಂ ಸೆಜಾರ್ಚೆ ಭಾಯ್ಲೆಲಾಗಿಂ ಉಚಾರ್‍ಲೊ. ತಿಣೆಂ ತಿಚಾ ಸೆಜಾರ್ಚಾಂಕ್ ಕಳಯ್ಲೆಂ ಆನಿಂ ರಾನಾಂತ್ ಉಜೊ ಪೆಟೊಂಕ್ ಚಡ್ ವೇಳ್ ಲಾಗಾನಾ ಮಣ್ಚೆಪರಿಂ ವಾಡ್ಯಾಂಕ್ ಥೊಡ್ಯಾಚ್ಚ್ ದಿಸಾಂನಿ ಹಿ ಖಬಾರ್ ವಿಸ್ತಾರ್ಲಿ.

ಲ್ಹಾನ್‌ಸೊ ಗಾಂವ್ ಆನಿಂ ಅಸಲ್ಯೊ ಖಬ್ರೊ ವಿಸ್ತಾರೊಂಕ್ ಚಡ್ ವೇಳ್ ನಾಕಾ. ತಶೆಂಚ್ ಹಿ ಖಭಾರ್ ಘಡ್ಯೆನ್ ವಿಸ್ತಾರ್‍ಲಿ ಆನಿಂ ಎಕೆಕ್ಲಿಂ ಎಕೆಕಾ ರಿತಿನ್ ಉಲಯ್ಲಾಗ್ಲಿಂ. ಪುಣ್ ಎಸ್ತೆಲ್ ಮಾತ್ರ್ 'ಮಾಜ್ಹರ್ ದೊಳೆ ದಾಂಪುನ್ ದೂದ್ ಪಿಯೆವ್ನ್ ಲೊಕಾಂಕ್ ಕಳಾನಾಂ' ಮ್ಹಣೊನ್ ಚಿಂತ್ಚೆಪರಿಂ ಚಿಂತಾಲೆಂ. ತಿಣೆಂ ಕರ್ಚೆಂ ಬರೆಂಗೀ ಯಾ ವಾಯ್ಟ್‌ಗೀ ವ್ಮ್ಹಣೊನ್ ತಿಕಾ ಸಾಂಗ್ಚಿಂ ಕೊಣೀಂ ನಾತ್‌ಲ್ಲಿಂ. ಸಾಂಗ್ತೆಲ್ಯಾಂಕ್‌ಯಿ ಹ್ಯೊ ಸಂಗ್ತ್ಯೊ ಸಾಂಗೊಂಕ್ ಜಾಲೆಂನಾ. ಕಾಂಯ್ ದೂದ್ ಪಿಯೆಂವ್ಚೆಂ ಬಾಳ್ಶೆಂಗೀ? ದೋನ್ ಭುರ್ಗ್ಯಾಂಚಿ ಆವಯ್ ಜಾಲ್ಲ್ಯಾಕ್ ಜವಾಬ್ಧಾರಿ ಮ್ಹಳ್ಯಾರ್ ಕಿತೆಂ ಮ್ಹಳ್ಳಿ ಕಳಿತ್ ನಾಂಗೀ? ಅಸಲಿಂಚ್ ಚಿಂತ್ನಾಂ ಮತಿಂತ್ ದವ್ರುನ್ ದಾವಿದ್‌ಯಿ ಥಂಡ್ ಬೊಸ್ಲೊ.

ಘರಾಚೆಂ ವಕೊಲ್ ಜಾತಾನಾ ತಾಕಾ ತ್ಯಾ ಘರಾಂತ್ ತ್ಯಾ ಮಾಪ್ಳ್ಯಾ ಚೆಡ್ಯಾಕ್ ಘಡ್ಯೆನ್ ಘಡಿ ತೆವ್ಶಿನ್ ಹೆವ್ಶಿನ್ ಆಶಾರ್ ಪಾಶಾರ್ ಜಾಂವ್ಚೊ ಪಳೆಲ್ಲೊ ತರೀ ತಾಚಾ ಮತಿಂತ್ ಕಾಂಯ್ ವಾಯ್ಟ್ ನಾತ್‌ಲ್ಲ್ಯಾನ್ ತಾಕಾ ತಾಂತುಂ ಕಾಂಯ್ ವಿಶೇಷ್ ದಿಸ್‌ಲ್ಲೆಂ ನಾ. ಪುಣ್ ಆತಾತಾಂ ಸೆಜಾರಾ ಜಾಂವ್ಚೊ ಖಬ್ರೊ ಆನಿಂ ಸೆಜಾರ್‍ಚಾಂನಿ ಉಲಂವ್ಚಿ ಉತ್ರಾಂ ತಾಕಾ ತವಳ್‌ತವಳ್ ಆಯ್ಕೊಂಕ್ ಮೆಳ್ತಾಲಿಂ. ತಾಕಾ ಅಸಲಿಂ ಉತ್ರಾಂ ಆಯ್ಕೊಂಕ್ ಪಸಂದ್ ನಾತ್‌ಲ್ಲಿಂ. ಇತ್ಲ್ಯಾ ದೇವ್ ಭಿರಾಂತೆಚಾ ಘರಾಂತ್ ಅಸಲೆಂಯಿ ಘಡೊಂಕ್ ಸಾಧ್ಯ್ ಆಸಾಗಿ? ಮ್ಹಳ್ಳೊ ದುಭಾವ್ ತಾಕಾ ಆಯ್ಲೊ. ತಾಕಾ ತಿಯೊಚೆರ್ ಬರೊ ಅಭಿಪ್ರಾಯ್ ಆಸ್‌ಲ್ಲೊ. ತಶೆಂ ತಾಕಾ ಎಸ್ತೆಲಾಚೆರ್‌ಯಿ ಅಭಿಮಾನ್ ಆಸ್‌ಲ್ಲೊ. ಪುಣ್ ಆತಾಂ ಹ್ಯಾ ರಿತಿಚೊ ಖಬ್ರೊ ಆಯ್ಕೊನ್ ತೊ ಕಿತ್ಯಾಕ್‌ಗೀ ಇಲ್ಲೊ ಶೆಳೊ ಪಡ್‌ಲ್ಲೊ. ತಿಯೊಚಾ ಘರಾ ವೆಚಾ ಆಪ್ಲ್ಯಾ ಭುರ್ಗ್ಯಾಂಕ್ ಥಂಯ್ ವೆಚೆಂ ನಾಕಾ ಮ್ಹಣೊನ್ ಆಡಾಯ್ಲೆಂ.

ದೀಸ್ ಗೆಲ್ಲೆಪರಿಂಚ್ ತಾಕಾ ಕಶೆಂ ಪುಣೀಂ ಕರ್ನ್ ತಿಯೊಕ್ ಖಬಾರ್ ದೀಜಯ್ ಮ್ಹಳ್ಳೆಂ ಚಿಂತಾಪ್ ತಾಚಾ ಮತಿಂತ್ ಆಯ್ಲೆಂ. ಪುಣ್ ತೊ ತಿಯೊಕ್ ಜಾಣಾ ಆಸ್‌ಲ್ಲೊ. ಪಳೆಂವ್ಕ್ ದಡಂಗ್ ಜಿವಾಚೊ ತಿಯೊ ಜಾಲ್ಲೊ ತರೀ ಕಾಳ್ಜಾಂತ್ ತೊ ಅಸ್ಕತ್ ಆಸ್‌ಲ್ಲೊ. ಕೊಣಾಯ್ಕೀ ತೊ ಉಲಯ್ತಾನಾ ದುಃಖಯ್ನಾತ್‌ಲ್ಲೊ ಆನಿಂ ತಶೆಂಚ್ ತಾಕಾಯ್ ಕೊಣೀಂ ದುಖವ್ನ್ ಉಲಯ್ತಾನಾ ತೊ ಪಾಟಿಂ ಉಲಯ್ನಾತ್‌ಲ್ಲೊ. ಆತಾಂ ಪರ್ಗಾಂವಾಂತ್ ಖಂಚಾ ಸ್ಥಿತೆರ್ ಆಸಾ ಕೋಣ್ ಜಾಣಾಂ? ಆನಿಂ ಪರ್ಗಾಂವಾಂತ್ ಆಸ್ಚಾಂಕ್ ಅಸಲ್ಯೊ ಖಬ್ರೊ ದಿಲ್ಯೊ ತರ್ ಕಿತೆಂಯ್ ಘಡೊಂಕ್ ಸಾಧ್ಯ್ ಆಸಾ. ಆನಿಂ ಹ್ಯಾ ವರ್‍ವಿಂ ತಾಚಾ ಕಾಮಾಕ್ ಕಾಂಯ್ ಬಾಧಕ್ ಜಾಯ್ತ್ ತರ್ ತಾಕಾ ಸಗ್ಳೊಚ್ ಹಾಂವ್ ಕಾರಣ್ ಮ್ಹಣ್ತಿತ್ ತರ್ ಕಿತೆಂ ಕರ್‍ಚೆಂ ಮ್ಹಳ್ಳೊ ದುಭಾವ್‌ಯಿ ಆಯ್ಲೊ. ತ್ಯಾ ಭಾಯ್ರ್ ಘೊವ್‌ಬಾಯ್ಲೆ ಮಧೆಂ ಪಡ್ಚೆಂ ಮ್ಹಳ್ಯಾರ್ ಬೊಡಿ ದೀವ್ನ್ ಮಾರ್ ಖಾಂವ್ಚೆಪರಿಂ. ಕಾಂಯ್ ಫಾಲ್ಯಾಂ ತಿಂ ಏಕ್ ಜಾತಿತ್ ತರ್ ಉಪ್ರಾಂತ್ ದುಸ್ಮಾನ್ ಹೆರಾಂ. ದೆಖುನ್ ಅಸಲಿ ಖಬಾರ್ ದೀಂವ್ಕ್ ಆಯಿಲ್ಲೆಂ ಚಿಂತಾಪ್ ತಾಣೆಂ ಥಂಯ್‌ಚ್ಚ್ ರಾವಯ್ಲೆಂ.

ಪುಣ್ ತಾಚಾ ಮತಿಂತ್ ಏಕ್ ದುಭಾವ್ ತವಳ್‌ತವಳ್ ಧೊಸ್ತಾಲೊ. ಎಕಾಧಾವೆಳಾ ಫ಼ಾಲ್ಯಾಂ ತಿಯೊ ಅಪ್ಣಾಕ್ ಯೇವ್ನ್ ವಿಚಾರಿತ್ "ದಾವಿದಾ, ತುಕಾ ಮ್ಹಜೊಚ್ಚ್ ಮನಿಸ್ ಮ್ಹಳ್ಳ್ಯಾನ್ ನಂಯ್ಗೀ ಘರಾಶಿಂ ನದರ್ ದವ್ರುಂಕ್ ಸಾಂಗ್‌ಲ್ಲೆಂ? ಕಾಂಯ್ ಬರೆಂ ವಾಯ್ಟ್ ಘಡ್ತಾನಾ ತುಂ ಜಾಣಾಂ ಆಸೊನೀಂ ಮ್ಹಾಕಾ ಕಿತ್ಯಾಕ್ ತುವೆಂ ಖಬಾರ್ ದಿಲಿನಾಂಯ್?" ಮ್ಹಣೊನ್ ವಿಚಾರಿತ್ ತರ್ ಆಪುಣ್ ತಾಕಾ ಕಿತೆಂ ಜಾಪ್ ದೀಂವ್ ಮ್ಹಳ್ಳೆಂ ದಾವಿದಾಕ್ ಸಮ್ಜಾಲೆಂ ನಾ. ತೊ ಆತಾಂ ಕಾತ್ರೆಂತ್ ಶಿರ್ಕಾಲ್ಲೆಪರಿಂ ತಾಕಾ ಭೊಗ್ತಾಲೆಂ.

ಏಕ್ ದೀಸ್ ಆಯ್ತಾರಾ ಮಿಸಾಕ್ ವಚೊನ್ ಆಯಿಲ್ಲೊ ದಾವಿದ್ ಆಪ್ಲ್ಯಾ ಘರಾಚ್ಚ್ ಆಸ್‌ಲ್ಲೊ. ದನ್ಪಾರಾಶೆಂ ತಿಯೊಚಾ ಘರಾಶಿಂ ಯೆಂವ್ಚಾ ಲತೀಫಾಕ್ ಪಳೆವ್ನ್ ದಾವಿದ್ ಭಾಯ್ರ್ ಆಯ್ಲೊ ಆನಿಂ ಲತೀಫಾಕ್ ತಾಣೆಂ ರಾವಯ್ಲೊ. ಆನಿಂ ಮೊಗಾನ್ ತಾಕಾ ಸಮ್ಜಾಯ್ಲಾಗ್ಲೊ.

"ಪಳೆ ಪುತಾ, ಆಮಿಂ ಕಿತ್ಲಿಂ ಬರಿಂ ಜಾಲ್ಯಾರೀ ಲೊಕಾಂಚಾ ಜಿಬಾಂಕ್ ಆಡಾಂವ್ಕ್ ಜಾತಾಯೆ? ತಶೆಂ ಮ್ಹಣೊನ್ ಲೊಕಾಂಕ್ ಉಲಂವ್ಕ್ ಕಿತ್ಯಾ ಆವ್ಕಾಸ್ ಕರ್ನ್ ದಿಂವ್ಚೊ? ತುಕಾ ಘರಾಂತ್ ಎಕ್ಲಿ ಬಾಯ್ಲ್ ಆಸ್ತಾನಾ ಕಸಲೆಂ ಕಾಮ್? ಪಳೆ ತುಂ ತರ್ನಾಟೊ ಆನಿಂ ಆಂಕ್ವಾರ್. ದೆಖುನ್.."

ದಾವಿದಾಚಿಂ ಉತ್ರಾಂ ಆಯ್ಕೊನ್ ಲತೀಫ್ ಚಿಡ್ಲೊ.

ಪಳೆ ಹಾಂವ್ ಹಾಂಗಾ ಯೆತಾಂ ಚೊರುಂಕ್ ಯಾ ಕೊಣಾಯ್ಕೀ ನೆಗಾಂವ್ಕ್ ನ್ಹಂಯ್. ತಿಚಾ ಘೊವಾನ್ ಮ್ಹಾಕಾ ಘರ್ ಸಾಂಭಾಳುಂಕ್ ಸಾಂಗ್ಲಾಂ. ಹಾಂವ್ ದೆಖುನ್ ತಾಂಚಾ ಘರ್ಚಿಂ ಫುಲಾಂ ವರುಂಕ್ ಆನಿಂ ತಾಂಕಾ ಗರ್ಜೆಚೊ ಸಾಮಾನ್ ಹಾಡೂಂಕ್ ಯೆತಾಂ. ತಾಂತುಂ ತುಕಾ ಪಳೆಂವ್ಕ್ ಬರೆಂ ದಿಸಾನಾ ತರ್ ತೊ ತುಜೊ ಮೊಸೊರ್ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್. ಘೊವ್ ಪಯ್ಸ್ ಆಸ್ಚಾ ಎಕ್ಸುರ್‍ಯಾ ಬಾಯ್ಲೆಕ್ ಪಳೆವ್ನ್ ತುಕಾ ತುಜಾ ಮತಿಂತ್ ವಾಯ್ಟ್ ಚಿಂತ್ನಾಂ ಯೆತಾತ್ ಮ್ಹಣೊನ್ ಸಗ್ಳಿಂ ತುಜೆಪರಿಂವೆ?"

ಲತೀಫಾನ್ ಖಡಕ್ಕ್ ಜಾಪ್ ದಿಲಿ. ದಾವಿದಾಚೊ ರಾಗ್ ತಳ್ಮಟ್ಯಾಕ್ ಚಡ್ಲೊ ಆನಿಂ ಎಕಾಚ್ಚ್ ಹಾತಾನ್ ಧರ್ನ್ ತ್ಯಾ ಚೆಡ್ಯಾಕ್ ಉಡಂವ್ಕ್ ತಾಚಾನ್ ಸಾಧ್ಯ್ ಜಾತೆಂ. ತಿತ್ಲೆಂ ತ್ರಾಣ್‌ಯಿ ತಾಚೆಲಾಗಿಂ ಆಸ್‌ಲ್ಲೆಂ ತರೀ ತೊ ವಗೊಚ್ಚ್ ಉರ್ಲೊ.

ಚಡ್ತಿಕ್ ಉಲಯ್ನಾಸ್ತಾಂ ಲತೀಫ್ ಶೀದಾ ಎಸ್ತೆಲಾಗೆರ್ ಗೆಲೊ ಆನಿಂ ಘಡ್‌ಲ್ಲ್ಯಾಚೆ ಅಥ್ವೆಂಚ್ ವಿವರಣ್ ತಾಣೆಂ ವಚೊನ್ ಎಸ್ತೆಲಾಕ್ ದಿಲೆಂ. ಚೊರಾಕ್ ಚೋರ್ ಮ್ಹಳ್ಯಾರ್ ಖಂಯ್ ನಾತ್‌ಲ್ಲೊ ರಾಗ್ ಯೆತಾ ಖಂಯ್. ತಶೆಂಚ್ ಎಸ್ತೆಲಾಕ್ ಭೊಗ್ಲೆಂ.

ತೆಂ ಉಟಾಉಟಿಂ ದಾವಿದಾಚಾ ಘರಾ ಪಾವ್ಲೆಂ ಆನಿಂ ಕಿತೆಂ ಮ್ಹಣೊನ್ ಸಯ್ತ್ ವಿಚಾರಿನಾಸ್ತಾಂ

"ದಾವಿದಾ ತುಂ ಏಕ್ ನಿತಿವಂತ್ ಮನಿಸ್ ಮ್ಹಣೊನ್ ಹಾಂವ್ ಚಿಂತಾಲಿಂ. ಪುಣ್ ತುವೆಂ ಕೆಲ್ಲೆಂ ಕಾಮ್ ಬರೆಂ ನ್ಹಂಯ್. ತುಜಿ ಬಾಯ್ಲ್ ಹೆರಾಂಲಾಗಿಂ ಉಲಯ್ತಾ ಮ್ಹಣೊನ್ ತಾಂಕಾಂ ಆನಿಂ ತುಜಾ ಬಾಯ್ಲೆಕ್ ಹಾಂವೆ ಬಾಂದುನ್ ದಿಲ್ಲೆಂ ತರ್ ತುಕಾ ಕಿತೆಂ ಭೊಗ್ತೆಂ?, ತುವೆಂ ಕಶೆಂ ತ್ಯೇ ಪರಿಂ ತ್ಯಾ ಚೆಡ್ಯಾಕಡೆಂ ವಿಚಾರ್ ಕೆಲೊಯ್?"

ಎಸ್ತೆಲ್ ಆತಾಂ ನಾಗಿಣ್ ಜಾಲ್ಲೆಂ. ಪಯ್ಲೆಂಚ್ ಘೊವಾಚಾ ಗಲ್ಫಾಚಾ ಜೊಡಿಚಿ ಮಿಂಜಾಸ್ಕಿ ಆಸ್‌ಲ್ಲೆಂ ಎಸ್ತೆಲ್ ಆತಾಂ ದಾವಿದಾಚೆಂ ಮೌನ್ ಪಳೆವ್ನ್ ಅನಿಕೀ ಉಚಾಂಬಳ್ ಜಾಲೆಂ.

"ಮ್ಹಜಾ ಘರಾ ಹಾಂವ್ ರಾವ್ತಾಂ ಆನಿಂ ಮ್ಹಾಕಾ ಕಶೆಂ ಜಿಯೆಜಾಯ್ ಮ್ಹಣೊನ್ ಕಳಿತ್ ಆಸಾ. ತುಂ ತುಜಾ ಕುಟ್ಮಾಕ್ ಸಾಂಭಾಳ್, ಹೆರಾಂಚಾ ಜಿಣ್ಯೆಂತ್ ಮೆತೆರ್ ಜಾಂವ್ಕ್ ವಚಾನಾಕಾ.."

ದಾವಿದಾಕ್ ಆಪ್ಣಾನ್ ಕಿತ್ಯಾಕ್ ತ್ಯಾ ಚೆಡ್ಯಾಚಾ ತಳ್ಳೆಕ್ ಗೆಲೊಂ ಮ್ಹಣೊನ್ ಭೊಗ್ಲೆಂ. ಜರ್ತರ್ ಎಕ್ಲೊ ಕ್ರೀಸ್ತಾಂವ್ ಚೆಡೊ ಮಾಪ್ಳ್ಯಾಂಗೆರ್ ಅಸೊ ವೆತೊ ತರ್ ತಿಂ ಮಾಪ್ಳಿಂ ಸೊಡ್ತಿತ್‌ಗೀ? ತರ್ ಆತಾಂ ಆಮ್ಚೆಂಚ್ ಭಾಂಗಾರ್ ಬರೆಂ ನಾಂ ತರ್ ಸೊನಾರಾಕ್ ಕಿತ್ಯಾಕ್ ದುರ್ಸೊಂವ್ಚೆಂ? ಬರೆಂ ಚಿಂತುನ್ ದೋನ್ ಉತ್ರಾಂ ಉಲಯಿಲ್ಲ್ಯಾಚೊ ಪರಿಣಾಮ್ ಇತ್ಲೊ ವಾಯ್ಟ್ ಜಾಯ್ತ್ ಮ್ಹಣೊನ್ ಪಯ್ಲೆಂಚ್ ಕಳ್‌ಲ್ಲೆಂ ತರ್ ಆಪುಣ್ ವಗೊಚ್ ಬೊಸ್ತೊಂ ಮ್ಹಣೊನ್ ದಾವಿದಾನ್ ಲೆಕ್ಲೆಂ. ತೊ ರೀತ್‌ಯಿ ಚುಕೊಂಕ್ ನಾತ್‌ಲ್ಲೊ, ನೀತ್‌ಯಿ ಚುಕೊಂಕ್ ನಾತ್‌ಲ್ಲೊ. ಫಕತ್ತ್ ಮನ್ಶಾಚೊ ಸ್ವಾರ್ಥ್ ಹಾಂಗಾಸರ್ ಜಿಕ್‌ಲ್ಲೊ. ಆಬ್ಲೇಸ್ಪಣ್, ಜೆಂ ಪರತ್ ಪರತ್ ಮನ್ಶಾಪಣಾ ಮುಖಾರ್ ಜಿಕೊನ್೦ಚ್ ವೆತಾ ಆನಿಂ ಮನ್ಶಾಪಣ್ ದಿಸಾನ್‌ದೀಸ್ ಸಲ್ವೊನ್೦ಚ್ ವೆತಾಲೆಂ.

ತ್ಯಾ ದಿಸಾ ಉಪ್ರಾಂತ್ ಸೆಜಾರಾ ಎಕಾಮೆಕಾ ಉಲವ್ಣೆಂ ರಾವ್ಲೆಂ. ಪಯ್ಲೆಂ ಭುರ್ಗಿಂ ಸಯ್ತ್ ಎಕಾಮೆಕಾ ಮಾಯಾಮೊಗಾನ್ ಆಸ್ತಾಲಿಂ ತಿಂ ಆತಾಂ ತಾಣಿಂಯ್ ಎಕಾಮೆಕಾ ದುಸ್ಮಾನಾಂಪರಿಂ ಲೆಖುಂಕ್ ಸುರು ಕೆಲೆಂ. ಸಾಂಗಾತಾ ಇಸ್ಕೊಲಾಕ್ ವೆಚಿಂ ಆತಾಂ ಎಕಾಮೆಕಾ ಎಕಾ ವಾಟೆರ್ ಎಕಾ ಸಾಂಗಾತಾ ಸಯ್ತ್ ಚಲಾನಾತ್‌ಲ್ಲಿಂ.

ಲಜ್ ನಾತ್‌ಲ್ಲಿಂ ಗಾಂವಾಕ್ ವಡ್ ಮ್ಹಣ್ಚೆಪರಿಂ ಎಸ್ತೆಲಾನ್ ಆತಾತಾಂ ಲತೀಫಾಸವೆಂ ವೆಚೆಂ ಉಣೆಂ ಕೆಲೆಂನಾ. ತವಳ್‌ತವಳ್ ತೆಂ ಲತೀಫಾಸವೆಂ ಅಲಂಗಾರ್ ಬೇಂಕಾಕ್ ವೆತಾಲೆಂ. ಆನಿಂ ತಿಯೊನ್ ಧಾಡ್‌ಲ್ಲೆ ಪೊಯ್ಶೆ ಜಮೊ ಕರ್ತಾಲೆಂ. ತಿಯೊಚೆ ಪೊಯ್ಶೆ ಮಯ್ನ್ಯಾ ಮಯ್ನ್ಯಾಕ್ ಸರಾಗ್ ಯೆತಾಲೆ. ಪುಣ್ ಮೂಡ್‌ಬಿದ್ರಿ ಬೆಂಕಾಂತ್ ಘೆತ್‌ಲ್ಲೆಂ ರೀಣ್ ಅಜೂನ್ ತಶೆಂಚ್ ಆಸ್‌ಲ್ಲೆಂ. ಬೆಂಕಾಂತ್ ರೀಣ್ ಆಸ್‌ಲ್ಲಿ ಗಜಾಲ್ ತಿಯೊಕ್ ಎಸ್ತೆಲಾನ್ ಬರಯಿಲ್ಲಿ. ತರೀ ಕಿತ್ಲೆಂ ರೀಣ್ ಆಸಾ ಮ್ಹಣೊನ್ ಬರಯಿಲ್ಲೆಂ ನಾ. ಕಿತೆಂ ಜಾಲ್ಯಾರೀ ಆಪ್ಣಾಚಿ ಬಾಯ್ಲ್ ಜಾಣಾಂ ಆಪುಣ್ ಕಿತ್ಯಾಕ್ ಹಾಂಗಾಸರ್ ಆಯ್ಲಾಂ ಮ್ಹಳ್ಳೆಂ ಆನಿಂ ತೆಂ ಖಂಡಿತ್ ಜಾವ್ನ್ ಕಿತೆಂಯ್ ಕರ್ತಾ ತರ್ ಬರ್‍ಯಾಕ್‌ಚ್ಚ್ ಮ್ಹಣೊನ್ ತೊ ಚಿಂತಾಲೊ. ತ್ಯಾ ಶಿವಾಯ್ ಆತಾಂ ಫಟಿಂ ಮಾರುಂಕ್ ಶಿಕ್‌ಲ್ಲ್ಯಾ ಎಸ್ತೆಲಾಕ್ ತಶೆಂ ಕಾಂಯ್ ಫಟಿಂ ಮಾರುಂಕ್‌ಯಿ ಕಾಂಯ್ ಚಡ್ ತ್ರಾಸ್ ಭೊಗ್ಲೆನಾಂತ್ ಆನಿಂ ಎಸ್ತೆಲಾನ್ ಬರಯಿಲ್ಲೆ ಸತ್‌ಗೀ ಫಟ್‌ಗೀ ಮ್ಹಣೊನ್ ಏಕ್ ಘಡಿ ದುಭಾವ್ ಕರ್ಚೆ ತಸಲೊ ಸ್ವಭಾವ್ ತಿಯೊಕ್ ನಾತ್‌ಲ್ಲೊ.

ಘರ್ ದುರಸ್ತ್ ಕರುಂಕ್ ಬೆಂಕಾಚೆಂ ಲೋನ್ ಘೆವ್ನ್ ಥೊಡೆ ಮಹಿನೆ ಉತಾರ್ಲೆ ತರೀ ಕಾಂಯ್ ಪೊಯ್ಶೆ ಭರಿನಾತ್‌ಲ್ಲ್ಯಾಕ್ ಮೆನೆಜರಾನ್ ಏಕ್ ಪಾವ್ಟಿಂ ತಿಯೊಚಾ ಘರಾ ವಚೊನ್ ಯೆವ್ಯಾಂ ಮ್ಹಣೊನ್ ಚಿಂತ್ಲೆಂ ತರೀ ತಾಕಾ ಆಜ್ ನ್ಹಂಯ್ ತರ್ ಫಾಲ್ಯಾಂ ಖಂಡಿತ್ ಜಾವ್ನ್ ತಿಯೊ ಫಾರಿಕ್ ಕರ್ತಲೊ ಮ್ಹಣೊನ್ ಚಿಂತುನ್ ವಗೊಚ್ಚ್ ಬೊಸ್ಲೊ. ಏಕ್ ಘಡಿ ತೊ ಚಿಂತುಂಕ್ ಪಡ್ಲೊ. ಕಾಂಯ್ ಆಪ್ಣಾನ್ ತಿಯೊನ್ ನಾಸ್ತಾಂಚ್ ದಿಲ್ಲೆಂ ಲೋನ್ ಆಪ್ಣಾಕ್ ಮಾರೊಗ್ ಪಡ್ಚೆಂನಾಮೂ? ತರೀ ಕಸ್ಲೆಂಗೀ ಚಿಂತಾಪ್ ತಾಚಾ ಮತಿಂತ್ ಆಯಿಲ್ಲ್ಯಾ ಹ್ಯಾ ಚಿಂತ್ಪಾಕ್ ಆಡಾಂವ್ಕ್ ಲಾಗ್ಲೆಂ.

ತರೀ ತಾಚಾ ಮತಿಕ್ ಏಕ್ ದುಭಾವ್ ಯೆತಾಲೊ. ಗಲ್ಫಾಕ್ ವಚೊನ್ ಇತ್ಲೆ ಮಹಿನೆ ಜಾಲೆ ತರೀ ತಾಣೆಂ ಘರಾಕ್ ಪೊಯ್ಶೆ ಧಾಡ್ಚೆ ಕಶೆ? ಕಾಂಯ್ ತಿಯೊಕ್ ದುಸ್ರ್ಯಾ ಬೆಂಕಾಂತ್ ಎಕಾಂವ್ಟ್ ಆಸಾ? ಪಯ್ಲೆಂ ಪಯ್ಲೆಂ ಇಲ್ಲೊ ದುಭಾವ್ ಜಾಲೊ ತರೀ ಚಡಾವತ್ ಲೋಕ್ ಬೆಂಕಾಚಾಕೀ ಚಡ್ ಮೆಳ್ತಾತ್ ಮ್ಹಣೊನ್ ಹುಂಡಿ ಕರ್ನ್ ಪೊಯ್ಶೆ ಧಾಡ್ತಾಲಿಂ ತಶೆಂ ಕಾಂಯ್ ಧಾಡ್ತಾ ಕೊಣ್ಣಾ. ಕಿತೆಂ ಜಾಲ್ಯಾರೀ ಪಯ್ಲೆಂ ಘೆತ್‌ಲ್ಲೆಂ ಲೋನ್ ತಾಣೆಂ ಎಕಾಚ್ಚ್ ಮಾರಾನ್ ಫಾರಿಕ್ ಕೆಲ್ಲೆವರ್‍ವಿಂ ಮೆನೆಜರ್ ಸದ್ದ್ಯಾಕ್ ವಗೊಚ್ಚ್ ಬೊಸ್ಲೊ.

ಮುಂದರ್‍ಸಿಲಾಂ...

Tags: Vally Quadras,e konkani novel, Konkani, Mangalore, Mangalorean, Mother Tongue

From around the world

ಪಾಟಿಂ ಗಾಂವಾಕ್ - ಅವಸ್ವರ್ 10

Post your comments

ಅವಸ್ವರ್ 1

ಅವಸ್ವರ್ 2

ಅವಸ್ವರ್ 3

ಅವಸ್ವರ್ 4

ಅವಸ್ವರ್ 5

ಅವಸ್ವರ್ 6

ಅವಸ್ವರ್ 7

ಅವಸ್ವರ್ 8

ಅವಸ್ವರ್ 9

ಅವಸ್ವರ್ 10

ಅವಸ್ವರ್ 11

ಅವಸ್ವರ್ 12

ಅವಸ್ವರ್ 13

ಅವಸ್ವರ್ 14

ಅವಸ್ವರ್ 15

ಅವಸ್ವರ್ 16

ಅವಸ್ವರ್ 17

ಅವಸ್ವರ್ 18

ಅವಸ್ವರ್ 19

ಅವಸ್ವರ್ 20

ಅವಸ್ವರ್ 21

ಅವಸ್ವರ್ 22

ಅವಸ್ವರ್ 23

ಅವಸ್ವರ್ 24

ಅವಸ್ವರ್ 25

ಅವಸ್ವರ್ 26

ಅವಸ್ವರ್ 27

ಅವಸ್ವರ್ 28

Connect

Our Address
Mangalore

Our Address
Udupi

Our Address
Dubai

From around the world

Post your comments

Connect

Our AddressMangalore

Our AddressUdupi

Our AddressDubai

Our Address
Mangalore

Our Address
Udupi

Our Address
Dubai