:: ಮಾಯ್ ಭಾಸ್

ತಿಯೊನ್ ಏಕ್ ನದರ್ ತಾಚಾ ಘರಾಚೆರ್, ತಾಚಾ ಕುಟ್ಮಾಚೆರ್ ಘಾಲಿ. ಆನಿ ತಾಚಾ ಮತಿಂತ್‌ಯಿ ಆಪ್ಲ್ಯಾ ಕುಟ್ಮಾಚೊ ಫೊಟೊ ಹಾಡ್‌ಲ್ಲೊ ತರ್ ಬರೆಂ ಆಸ್‌ಲ್ಲೆ ಮ್ಹಳ್ಳಿಂ ಚಿಂತ್ನಾಂ ಯೇಂವ್ಕ್ ಲಾಗ್ಲಿಂ. ಮಣಿನ್ ತಾಚಾ ಕುಟ್ಮಾಚೊ, ತಾಚಾ ಭಾಂವ್ಡಾಂಚೊ ಫೊಟೊ ಸಯ್ತ್ ಹಾಡ್‌ಲ್ಲೊ ಆನಿ ಆಪ್ಲ್ಯಾ ಭಾಂವಾಂಚಿ ವಳೊಕ್ ಕರುನ್ ದಿತಾನಾ ಮಣಿಚಾ ತೊಂಡಾರ್ ತಾಂಚೆವಯ್ರ್ ಪಯ್ಲೆಂ ಆಸ್‌ಲ್ಲೊ ರಾಗ್ ಬಿಲ್ಕುಲ್ ನಾತ್‌ಲ್ಲೊ. ತೊ ಉಲಂವ್ಕ್ ಲಾಗ್ಲೊ.

ಚಾರ್ ದಿಸಾಂಚಾ ಸಂಸಾರಾಂತ್ ರಾಗ್ ಕಿತ್ಯಾಕ್ ಮೊಸೊರ್ ಕಿತ್ಯಾಕ್? ಕೆಲ್ಲಿಂ ಖಾತಾತ್ ಆನಿ ವಾಟ್‌ಲ್ಲಿಂ ಪಿಯೆತಾತ್ ಆನಿ ತಶೆಂಚ್ ಜಾಲೆಂ ಮ್ಹಜಾ ಜಿಣ್ಯೆಂತ್. ಸಗ್ಳ್ಯಾಂನಿ ಸೊಡ್ನ್ ಘಾಲ್ಯಾರೀ ಮ್ಹಜಾ ದೆವಾನ್ ಮ್ಹಾಕಾ ಸೊಡ್ನ್ ಘಾಲೊನಾ ಆನಿ ತಾಚಾ ದಯೆನ್ ಆಜ್ ಮ್ಹಾಕಾ ಮ್ಹಜೆಂ ಸಗ್ಳೆಂ ಕುಟಾಮ್ ಪಾಟಿಂ ಮೆಳ್ಳೆಂ. ಎದೊಳ್ ಹಾಂಗಾ ಎಕ್ಸುರೊ ಕಶ್ಟ್ ಆನಿ ಮಿನತ್ ಕಾಡ್‌ಲ್ಲಿ ಪುರೊ. ಆನಿ ಪುಣಿಂ ಮ್ಹಾಕಾ ಗಾಂವಾಂತ್ ರಾವಾಜಯ್.

ಹಾಂವ್ ಗಾಂವಾಂತ್‌ಚ್ಚ್ ಕಿತೆಂ ತರೀ ವಹಿವಾಟ್ ಸುರು ಕರ್ತಾಂ ತಿಯೊ, ಮ್ಹಜಾ ಭಾವಾಂನಿ ಸಯ್ತ್ ಮ್ಹಜೆಸವೆಂ ಹಾತ್ ಮೆಳಂವ್ಕ್ ಚಿಂತ್ಲಾಂ. ಆಮಿಂ ಎಕಾಮೆಕಾ ಹಾತ್ ದೀವ್ನ್ ಮಿನತ್ ಕರ್ತಾಂವ್ ಆನಿ ಮೆಳ್ಚೊ ಆದಾಯ್ ಎಕಾಮೆಕಾ ವಾಂಟುನ್ ಘೆತಾಂವ್. ಮ್ಹಜೆ ತರೀ ಚಡ್ ದೀಸ್ ಗೆಲೆ ಆನಿ ಉರ್‌ಲ್ಲೆ ಇಲ್ಲೆ ದೀಸ್ ಮ್ಹಜಾ ಕುಟ್ಮಾಸವೆಂ ಖರ್ಚಿತಾಂ.

ಮುಖಾರ್ಸುನ್ ತೊ ಮ್ಹಣಾಲೊ ಮ್ಹಾಕಾಯ್ ಮ್ಹಜಾ ಕುಟ್ಮಾಚೆರ್ ಖಂಡಿತ್ ರಾಗ್ ಆಸ್‌ಲ್ಲೊ ತಿಯೊ. ಮ್ಹಜಾ ಭಾಂವಾಂಕ್ ಹಾಂವೆ ಕಿತ್ಲೆ ಕಶ್ಟ್ ಕಾಡ್ನ್‌ಯಿ ಬರೆಂ ದಿಲೆಂ ತರೀ ತಾಂಚೆ ಥಾವುನ್ ಮ್ಹಾಕಾ ಕಿತೆಂ ಪಾಟಿಂ ಮೆಳ್ಳೆಂ? ಹಾಂವ್ ಚಡ್ ಶಿಕಾಪ್ ಜೊಡಿನಾಸ್ತಾಂ ಸಯ್ತ್ ಹಾವೆಂ ತಾಂಕಾ ಶಿಕಾಪ್ ದಿಲೆಂ. ಆನಿ ಆತಾಂ ತಿಂಚ್ ಮ್ಹಜಿಂ ಬಾಂವ್ಡಾಂ ಮ್ಹಾಕಾ ಮುಖಾರ್ ರಾವ್ತಾನಾ ಮ್ಹಜೆಲಾಗಿಂ ಹ್ಯಾ ಸಂಭಂಧಾಚೊ ಭರ್ವಸೊ ಉಡೊನ್ ಗೆಲ್ಲೊ. ತರೀ ಹಾವೆಂ ಸಗ್ಳೆಂ ವಿಸ್ರಜಾಯ್ ಪಡ್ಲೆಂ. ಜಾಲ್ಲೆಂ ಸಗ್ಳೆಂ ಏಕ್ ಸ್ವಪಾಣ್ ಮ್ಹಣೊನ್ ಚಿಂತಿಜಾಯ್ ಪಡ್ಲೆಂ. ನಿಜಾಯ್ಕೀ ಜಾಂವ್ಚೆಂ ಸಗ್ಳೆಂ ಬರ್‍ಯಾಕ್‌ಚ್ಚ್. ಆನಿ ತಾಂಚೆ ವರ್‍ವಿಂಚ್ ನಂಯ್ಗೀ ಹಾಂವೆಂ ಗಲ್ಫಾಕ್ ಯೆಂವ್ಚಿ ಆಲೋಚನ್ ಕೆಲ್ಲಿ? ತಾಂಚೆ ಪಾಸತ್ ನಂಯ್ಗೀ ಹಾಂವ್ ಹಾಂಗಾ ಪಾವ್‌ಲ್ಲೊಂ?

ತಾಕಾ ತವಳ್‌ತವಳ್ ಮಣಿ ಆಪ್ಲ್ಯಾ ಭುರ್ಗ್ಯಾಂನಿ ಬರಂವ್ಚಾ ಕಾಗ್ದಾ ವಿಶ್ಯಾಂತ್ ಆಯ್ಕಾತಾನಾ ಸಂತೊಸ್ ಭೊಗ್ತಾಲೊ. ತಾಕಾಯ್ ತಾಚಾ ಭುರ್ಗ್ಯಾಂಚೆರ್ ಏಕ್ ದೀಶ್ಟ್ ಘಾಲ್ಚಿ ಆಶಾ ಯೆತಾಲಿ. ಅಶೆಂ ಉಮಾಳೊನ್ ಯೆಂವ್ಚಾ ಆಶಾಂಕ್ ತೊ ಥಂಯ್ಚ್ ರಾವಯ್ತಾಲೊ. ಆಪ್ಲ್ಯಾ ಭುರ್ಗ್ಯಾಂಚಾ ಹರ್‍ಯೆಕಾ ಗರ್ಜಾಂಕ್ ಆಪ್ಣಾನ್ ಪಾವಾಜಯ್ ತರ್ ಆಪ್ಣಾನ್ ಹೊ ಸ್ಸಾಕ್ರಿಫಿಸ್ ಕರ್ಚೊ ಗರ್ಜ್ ಮ್ಹಣೊನ್ ತೊ ಸಮ್ಜಾಲ್ಲೊ. ತಾಕಾ ಉಟ್ತಾನಾ, ಬೊಸ್ತಾನಾ, ನಿದ್ತಾನಾ, ಯಾ ಜಾಗೊ ಆಸ್ತಾನಾ ಫಕತ್ತ್ ತಾಚಾ ಕುಟ್ಮಾಕ್ ಬರೆ ದೀಸ್ ಹಾಡ್ಚೆಂಚ್ ತಚಾ ಮತಿಂತ್ ಆಸ್‌ಲ್ಲೆಂ. ಆನಿ ತ್ಯೇ ಖಾತಿರ್ ತಾಕಾ ಕಿತ್ಲೆ ಕಶ್ಟ್ ಆಯ್ಲ್ಯಾರೀ ತಾಕಾ ತೆ ಕಶ್ಟ್ ಮ್ಹಣೊನ್ ಭೊಗ್ಲೆನಾಂತ್. ತಾಕಾ ಕಾಮಾಂತ್ ಕಾಂಯ್ ಕಶ್ಟ್ ನಾತ್‌ಲ್ಲೆ ತರೀ ಭೊಗ್ಚಿ ಉಬ್ಗೊಣ್, ಹೆರಾಂಚಾ ಜಿವಿತಾಚಿ ಕಾಣಿಂ ಆಯ್ಕಾತಾನಾ ಆಪ್ಲ್ಯಾ ಜಿಣ್ಯೆಂತ್‌ಯ್ ಅಸಲೆ ಕಶ್ಟ್ ಯೆಂವ್ಚೆ ನಾಕಾತ್ ಮ್ಹಳ್ಳೆಂ ಚಿಂತಾಪ್ ಯೆತಾಲೆಂ.

ಉಲಯ್ತಾಂ ಉಲಯ್ತಾಂ ತಾಣೆಂ ಉಲಯಿಲ್ಲೆಂ ಆಯ್ಕೊಂವ್ಚಾ ತಿಯೊಕ್ ಪಳೆವ್ನ್ ತಾಣೆಂ ಸವಾಲ್ ಕೆಲೆಂ ಆತಾಂ ಸಾಂಗ್ ತುಜಿ ಕಿತೆಂ ಖಬಾರ್? ಗಲ್ಫಾಕ್ ಯೇವ್ನ್ ಚಾರ್ ವರ್ಸಾಂ ಎದೊಳ್‌ಚ್ಚ್ ಉತ್ರಾಲಿಂ. ಪುಣ್ ತುಂ ಗಾಂವಾಕ್ ವೆಚೆವಿಶ್ಯಾಂತ್ ಕಿತ್ಯಾಕ್ ಚಿಂತಿನಾಂಯ್ ತಿಯೊ? ತುಜಾ ಬಾಯ್ಲೆಚೊ ಆನಿ ಭುರ್ಗ್ಯಾಂಚೊ ಉಡಾಸ್ ತುಕಾ ಯೇನಾಂಗೀ? ತಾಂಕಾ ಪಳೆಂವ್ಚಿ ಆಶಾ ತುಕಾ ನಾಂಗೀ?

ಎಕಾ ಪಾಟ್ಲ್ಯಾನ್ ಏಕ್ ಸವಾಲ್ ವಿಚಾರ್‍ಚಾ ಮಣಿಕ್ ಕಿತೆಂ ಜಾಪ್ ದಿಂವ್ಚಿ ಮ್ಹಳ್ಳೆಂ ತಿಯೊಕ್ ಕಳಾನಾತ್‌ಲ್ಲೆಂ.

"ಸಗ್ಳ್ಯಾಂಚಿ ಜಿಣಿ ಎಕಾಚ್ಚ್ ಮಾಪಾನ್ ಆಸಾನಾ ಮಣಿ. ತುಜೆಪರಿಂಚ್ ಮ್ಹಜಾಯ್ ಘರಾಂತ್ ಜಾಯಿತ್ತೆ ಕಶ್ಟ್ ಆಸ್‌ಲ್ಲೆ. ತುಜೆಪರಿಂ ಮ್ಹಾಕಾ ಭಾವ್ ನಾಂತ್ ಆನಿ ಜಾಗೊಯ್ ನಾ. ತುಜೆಪರಿಂ ಮ್ಹಜೆಲಾಗಿಂ ಕಾಂಯ್ ಇಲ್ಲೆ ಪೊಯ್ಶೆ ಬೆಂಕಾಂತ್ ಜಮೊ ನಾತ್‌ಲ್ಲೆ. ಹಾಂವ್ ಯೆತಾನಾ ಆಸ್‌ಲ್ಲೆಂ ತರ್ ಮ್ಹಜಾ ಬಾಯ್ಲ್ ಭುರ್ಗ್ಯಾಂಚೆಂ ಆನಿ ಮ್ಹಜೆಂ ನಶಿಬ್, ಬೆಂಕಾಚೆಂ ಚಾಳಿಸ್ ಹಜಾರ್ ಲೋನ್ ಆನಿ ದೋನ್ ಕುಡಾಚೆಂ ಏಕ್ ಲ್ಹಾನ್ ಘರ್. ಘರ್ಚೆ ದೀಸ್ ಕಾಡುಂಕ್ ಥಂಯ್ ಜಾಂವ್ಚೊ ತರ್ಕಾರ್‍ಯೊ ಆನಿ ಫುಲಾಂ ಪಾವ್ತಾಲಿಂ. ಪುಣ್ ಕಿತ್ಲೊ ತೇಂಪ್? ವ್ಹಡ್ ಜಾವ್ನ್ ಯೆಂವ್ಚಾ ಭುರ್ಗ್ಯಾಂಕ್ ತಾಂಚೊ ಗರ್ಜೊ ವಾಡ್ತಾನಾ ತಾಣಿಂ ಎಕೆಕಾ ವಸ್ತು ಖಾತಿರ್ ಮ್ಹಜೆಪರಿಂ ಕಶ್ಟೆಂವ್ಚೆಂ ಮ್ಹಜಾನ್ ಪಳೆಂವ್ಕ್ ಜಾಯ್ನಾ ದೆಖುನ್ ಹಾಂವೆ ಜಿತ್ಲೆ ದೀಸ್ ಹಾಂಗಾ ರಾವ್ಲ್ಯಾತ್‌ಗೀ ತಿತ್ಲೆಂ ಬರೆಂ ಜಿವಿತ್ ಮ್ಹಜಾ ಭುರ್ಗ್ಯಾಂಚೆ ಜಾತೆಲೆಂ ಮ್ಹಳ್ಳೊ ಭರ್ವಸೊ ಮ್ಹಾಕಾ ಖಂಡಿತ್ ಆಸಾ. ಮ್ಹಜಾ ಭುರ್ಗ್ಯಾಂಕ್ ಮ್ಹಜಾ ಜಿಣ್ಯೆ ಥಾವ್ನ್ ಕಸಲೆಂ ಲಿಸಾಂವ್ ದಿವ್ಯೆತ್? ಮ್ಹಜಾ ಉತ್ರಾಂಚಾಕೀ ಚಡ್ ಜಾವ್ನ್ ಮ್ಹಜಾ ಭುರ್ಗ್ಯಾಂನಿ ಪಳೆಂವ್ಚಿ ಆನಿ ಶಿಕ್ಚಿ ಮ್ಹಜಿ ಜಿಣಿ ಆನಿ ಮ್ಹಜಾ ಸಮ್ಜಣೆ ಪ್ರಕಾರ್ ಮ್ಹಜಿ ಜಿಣಿ ತಾಂಕಾ ಖಂಡಿತ್ ಜಾವ್ನ್ ಏಕ್ ಬರೊ ಮನಿಸ್ ಜಾಂವ್ಕ್ ಉಪ್ಕಾರ್ತೆಲಿ ಮ್ಹಳ್ಳೆಂ ಮ್ಹಜೆಂ ಚಿಂತಾಪ್. ಕಿತ್ಯಾಕ್ ಮ್ಹಳ್ಯಾರ್ ಸಗ್ಳ್ಯಾ ದಾನಾಂತ್ ಬರೆಂ ದಾನ್ ಮ್ಹಳ್ಯಾರ್ ಸಮಧಾನ್ ಮ್ಹಣೊನ್ ಮ್ಹಜಿಂ ಮ್ಹಾಲ್ಗಡಿಂ ಸಾಂಗ್ತಾಲಿಂ."

ಮಣಿ ಕಿತ್ಯಾಕ್‌ಗಿ ಆಜ್ ಭಾವುಕ್ ಜಾಲ್ಲೆಪರಿಂ ತಿಯೊಕ್ ಭೊಗ್ಲೆಂ.

"ತುಕಾ ಹಾಂವೆಂ ಸಾಂಗ್‌ಲ್ಲೆಂ ತುಂ ಆಯ್ಕಾನಾಂಯ್ ತಿಯೊ, ತುಜಾ ಭಲಾಯ್ಕೆಚಿ ಕಾಂಯ್ ಇಲ್ಲಿ ಫಿಕಿರ್ ತುಕಾ ಆಸ್ತಿ ತರ್ ತುಂ ಗಾಂವಾಕ್ ವಚೊನ್ ಇಲ್ಲೊ ತೇಂಪ್ ಹಾವೊ ಬದ್ಲುನ್ ಯೆತೊಯ್. ತುಂ ಕಾಂಯ್ ಮ್ಹಾತಾರೊ ಜಾಂವ್ಕ್ ನಾಂಯ್. ಪ್ರಾಯ್ ಪಂಚ್ಚಾಳಿಸ್ ಜಾತೆಚ್ಚ್ ಕೊಣೀಂ ಮ್ಹಾತಾರೊ ಜಾಯ್ನಾ. ಹಾಂವ್ ಪಳೆ ಆತಾಂಯ್ ತರ್ನಾಟೊಚ್ಚ್ ಆಸಾಂ" ಖೊಂಕ್ಲಿ ಕಾಡಿತ್ತ್ ಮಣಿನ್ ಹಾಸ್ಲೊ.

ತಿಯೊನ್ ಕಾಂಯ್ ಜಾಪ್ ದಿಲಿನಾ.

"ದೆವಾನ್ ಬರೆಂ ಮ್ಹಳ್ಯಾರ್ ಯೆಂವ್ಚಾ ವರ್ಸಾ ರಜೆರ್ ವೆಚೆಂ ಮ್ಹಣೊನ್ ಚಿಂತ್ಲಾಂ ಹಾವೆಂ. ಕಾಂಯ್ ಇಲ್ಲೆಂ ಭಾಂಗಾರ್ ಕರ್ಚೆಂ ಆನಿ ಇಲ್ಲೆ ಪೊಯ್ಶೆ ಜಾತೆಚ್ಚ್ ಗಾಂವಾಕ್ ವೆಚೆಂ ಮ್ಹಣೊನ್ ಹಾವೆಂ ಚಿಂತ್ಲಾಂ."

ಅಶೆಚ್ಚ್ ಸಭಾರ್ ವೇಳ್ ತೆ ಉಲಯ್ಲೆ ಆನಿ ತೊ ದೀಸ್ ಸುಕ್ರಾರ್ ಜಾಲ್ಲೆವರ್‍ವಿಂ ಸಾಂಜ್ ಜಾಲ್ಲೆಪರಿಂಚ್ ತೆ ಇಗರ್ಜೆಲಾಗಿಂ ಗೆಲೆ. ಕಾಂಯ್ ವಳ್ಕಿಂಚಾಂಕ್ ಮೆಳೊನ್ ಸುಃಖ್ ದುಃಖ್ ಉಲವ್ಯಾಂ ಮ್ಹಣೊನ್.

ಥಂಯ್ ಆಸ್ಚಾ ಲೊಕಾಂ ಮಧೆಂ ಹೇಯ್ ಮೆಳ್ಳೆ ಆನಿ ಲೊಕಾಂನಿ ಉಲಂವ್ಚೊ ಖಬ್ರೊ ಆಯ್ಕೊಂಚಾರ್ ಪಡ್ಲೆ. ಕೋಣ್ ಗಲ್ಫಾಚಾ ಗಾಂವಾಂತ್ ಜಿಯೆತೆಲ್ಯಾಂಚಾ ಸಮಸ್ಯಾಂವಿಶಿಂ ಉಲಯ್ತಾಲೆ.

ಭಲಾಯ್ಕೆ ವಿಶ್ಯಾಂತ್ ಉಲಯ್ತಾನಾ ಕೋಣ್‌ಗೀ ಕೊಣಾಚ್ಯೊಗೀ ಕಾಣಿಯೊ ಸಾಂಗ್ತಾಲಿಂ. ಆಪ್ಲ್ಯಾ ಜಿಣ್ಯೆಂತ್ ಪಯ್ಲೆಪಾವ್ಟಿಂ ಗಾಂವ್ ಸೊಡ್ನ್ ಆಯಿಲ್ಲೊ ಎಕ್ಲೊ ಬಾವ್ಡೊ ದೀಸ್ ರಾತ್ ಕಾಮ್ ಕರ್ತಾಲೊ. ಯೇಜಂಟಾಕ್ ಚಡುಣೆ ಪನ್ನಾಸ್ ಹಜಾರ್ ರುಪಯ್ ದೀವ್ನ್ ಶೆಂಭೊರ್ ದಿನಾರ್ ಸಾಂಭಾಳ್ ಮ್ಹಣೊನ್ ಆಯಿಲ್ಲ್ಯಾ ತಾಕಾ ಹಾಂಗಾ ಪಾವ್ತಚ್ ಸಾಂಭಾಳ್ ಪನ್ನಾಸ್ ದಿನಾರ್ ಮ್ಹಣೊನ್ ಕಳಯ್ತಾನಾ ತೊ ಶಿರಿಂ ಚುಕ್ಲೊ.

ತರೀ ಕಿತೆಂ ಕರ್ತಾಲೊ ತೊ? ಕಶ್ಟಾಂನಿ ಆಯಿಲ್ಲ್ಯಾ ತಾಕಾ ಆತಾಂ ರಾಂವೊಂಕ್‌ಯಿ ನ್ಹಂಯ್ ಆನಿ ಪಾಟಿಂ ವಚೊಂಕ್‌ಯಿ ನ್ಹಂಯ್. ಹಾಂಗಾ ಕಾಮಾಕ್ ಮ್ಹಣೊನ್ ಗಾಂವಾ ಥಾವುನ್ ಯೆತೆಲ್ಯಾಂಚೊ ಅಸ್ಕತ್ಕಾಯೊ ಸಾರ್ಕ್ಯೊ ಜಾಣಾಸ್ಚಾ ಅರ್ಬ್ಯಾನ್ ತಾಕಾ ಶೀದಾ ಉತ್ರಾಂನಿ ಸಾಂಗೊನ್ ಸೊಡ್ಲೆಂ. 'ತಾಂಕ್ತಾ ತರ್ ಕಾಮ್ ಕರ್ ನಾತ್ಲ್ಯಾರ್ ಹೆಂ ಕಾಮ್ ಕರುಂಕ್ ಕಾಂಯ್ ಉಣಿಂ ನಾಂತ್'. ಮ್ಹಣ್ತಾನಾ ಕಿತೆಂ ಜಾಪ್ ದಿತಲೊ ತೊ? ಕಾಮ್ ಕೆಲ್ಲೆಶಿವಾಯ್ ಹೆರ್ ಉಪಾಯ್ ತಾಕಾ ನಾತ್‌ಲ್ಲೊ ದೆಖುನ್ ದಿಸಾಕ್ ತೊ ತ್ಯಾ ಅರ್ಭ್ಯಾಚಾ ಸುಪರ್‌ಮಾರ್ಕೆಟಿಂತ್ ಕಾಮ್ ಕರ್ತಾಲೊ ತರ್ ರಾತಿಂ ಕೊಣಾ ಕೊಣಾಚಿಂ ಕಾರಾಂ ಧುತಾಲೊ. ಸಕಾಳಿಂ ಫಾಂತ್ಯಾರ್ ಉಟೊನ್ ಉರುಲ್ಲಿಂ ಕಾರಾಂ ಧುತಾಲೊ ಆನಿ ಕಚ್ರ್ಯಾ ಡಬ್ಬ್ಯಾಂತ್ ಉಡಯಿಲ್ಲ್ಯೊ ಪೆಪ್ಸಿಚೊ ಯಾ ಹೆರ್ ಟಿನ್ನಾಂ ವಿಂಚ್ತಾಲೊ. ಏಕ್ ಕಿಲೊ ಟಿನ್ನಾಂ ಜಮೊ ಕೆಲಿಂ ತರ್ ತಾಕಾ ಮೆಳ್ತಾಲೆ ಥೊಡೆ ಫಿಲ್ಸ್ ಆನಿ ಅಶೆಂ ಎಕೇಕ್ ಫಿಲ್ಸ್ ಜಮೊ ಕರ್ಚೆ ಖಾತಿರ್ ತೊ ವಾಂವ್ಟ್ ಕಾಡ್ತಾಲೊ. ತಾಕಾ ಜೇಂವ್ಕ್ ಜೆವಾಣ್ ಎಕಾ ಮಲ್ಯಾಳಿ ಹೊಟೆಲಾಂತ್ ಮೆಳ್ತಾಲೆಂ. ರಾವೊಂಕ್ ತಾಕಾ ಎಕಾ ಲ್ಹಾನ್‌ಶಾ ಕುಡಾಂತ್ ಹೆರ್ ಸಾತ್ ಜಣಾಂಸವೆಂ ರಾವೊಂಕ್ ಮೆಳ್ತಾಲೆಂ. ಗಿಮೆಚಾ ದಿಸಾಂತ್‌ಯಿ ದೊಳೆ ಉಗ್ತೆ ಕರುಂಕ್ ಸಾಧ್ಯ್ ನಾತ್‌ಲ್ಲೆ ವೆಳಾರ್‌ಯಿ ಎ.ಸಿ. ಜಾಂವ್ ಯಾ ಥಂಡ್ ಉದಾಕ್ ಜಾಂವ್ ತಾಕಾ ಮೆಳಾನಾತ್‌ಲ್ಲೆಂ.

ಅಶೆಂ ಹೊಟೆಲಾಚೆಂ ತೆಲಾಚೆಂ ಖಾಣ್ ಖಾವ್ನ್ ಥೊಡ್ಯಾಚ್ಚ್ ತೆಂಪಾನ್ ತಾಕಾ ಪಿಡಾ ಆಯ್ಲಿ ಆನಿ ಹಾಂಗಾಚಾ ಕ್ಲಿನಿಕಾಕ್ ಚಿಕಿತ್ಸಾ ಕರುಂಕ್ ಗೆಲ್ಲೆವೆಳಿಂ ತಾಕಾ ಹಾಂಗಾಚಾ ಡೊಕ್ಟರಾಂನ್ ಮಾಮೂಲಿ ಪೊಟಾಂತ್ ದೂಃಕ್ ಮ್ಹಣೊನ್ ವಕಾತ್ ದಿಲೆಂ. ಪುಣ್ ತ್ಯಾ ಬಾವ್ಡ್ಯಾಕ್ ಆಪ್ಣಾಕ್ ಕಾಳ್ಕಾಯೆಚಿ ಪಿಡಾ ಆಯ್ಲ್ಯಾ ಮ್ಹಣೊನ್ ಕಳೊನ್ ಯೆತಾನಾ ವೇಳ್ ಉತಾರ್‌ಲ್ಲೊ. ತರೀ ತುರ್ತಾನ್ ಗಾಂವಾಕ್ ಭಾಯ್ರ್ ಸರ್ಲೊ ಪುಣ್ ತಾಣೆಂ ಸಗ್ಳಿ ತಯರಾಯ್ ಕರ್‍ನ್‌ಯೀ ಗಾಂವ್ಚೆಂ ವಿಮಾನ್ ಧರ್ಚಾಧಿಂಚ್ ಆಪ್ಲ್ಯಾ ಜಿಣ್ಯೆಚೆಂ ಪಯ್ಣ್ ಅಖೇರ್ ಕರ್ನ್ ಜಾಲ್ಲೆಂ. ಹಾಂಗಾ ಯೇವ್ನ್ ಇತ್ಲಿ ಮಿನತ್ ಕರ್ನ್, ವೋತ್ ಮ್ಹಣೊನ್ ನಾ ಸಾವ್ಳಿ ಮ್ಹಣೊನ್ ನಾ. ಗೀಮ್ ಮ್ಹಣೊನ್ ನಾ ಹಿಂವ್ ಮ್ಹಣೊನ್ ನಾ ಅಶೆಂ ಕಾಮ್ ಕೆಲ್ಲ್ಯಾ ತಾಕಾ ಹಾಂಗಾ ಮೆಳ್‌ಲ್ಲಿ ಪಿಡಾ, ಕಶ್ಟ್ ಆನಿ ಅಖ್ರೇಕ್ ಮರಣ್ ಮಾತ್ರ್.

ಎಕ್ಲೊ ಗಾಂವಾಂತ್ ಆಸ್ತಾನಾ ಹಳ್ತಾಚೆಂ ಕಾಮ್ ಆಸ್‌ಲ್ಲೊ, ಮಹಿನ್ಯಾಕ್ ಕಾಂಯ್ ಪಾಂಚ್ ಹಜಾರ್ ಸಾಂಭಾಳ್ ಘೆಂವ್ಚೊ ಗಲ್ಫಾಂತ್ ಭಾಂಗಾರ್ ಪಿಕ್ತಾ ಮ್ಹಳ್ಳೆಂ ಸಮ್ಜೊನ್ ಆಸ್ಚೆಂ ಕಾಮ್ ಸೊಡುನ್ ಆಯ್ಲೊ. ತಾಚಾ ಉತ್ರಾಂನಿ ಕಾಂಯ್ ಇಲ್ಲೆಂ ಸತ್‌ಯಿ ಆಸ್‌ಲ್ಲೆಂ. ಆಜ್‌ಕಾಲ್ ಗಾಂವಾಂತ್ ಶಿಕ್‌ಲ್ಲ್ಯಾಂಕ್ ಸರ್ಕಾರಿ ಕಾಮ್ ಸೊಡ್, ಸಾರ್ಕೆಂ ಕಾಮ್‌ಯಿ ಮೆಳಾನಾ. ಸರ್ಕಾರಿ ಕಾಮ್ ಮೆಳೊಂಕ್ ಹಜಾರಾಂನಿ ಯಾ ಲಾಖಾಂನಿ ಲೋಂಚ್ ದೀಂವ್ಕ್ ಪಡ್ತಾಲೆಂ. ತೇಂಯ್ ಕ್ರೀಸ್ತಾಂವಾಂಕ್ ತೆಂ ಕಾಮ್ ಮೆಳೊಂಕ್ ಕಶ್ಟ್. ಕಿತ್ಯಾಕ್ ಕಶ್ಟ್ ಮ್ಹಳ್ಳ್ಯಾಚೊ ವಿಚಾರ್ ಕರ್ಚಿಂ ಕೊಣೀಂ ನಾಂತ್. ತಶೆಂ ಆಸ್ತಾಂ ತಾಂಕಾ ಉರ್ತಾ ಎಕ್‌ಚ್ಚ್ ವಾಟ್ ಮ್ಹಲ್ಯಾರ್ ಗಲ್ಫಾಚಿ. ಆಜ್‌ಕಾಲ್ ಗಲ್ಫಾಂತ್ ಸಗ್ಳಿಂ ಆಸಾತ್. ಕ್ರಿಸ್ತಾಂವ್ ಜಾಂವ್, ಹಿಂದ್ವಾಂ ಜಾಂವ್ ಯಾ ಮುಸ್ಲಿಮ್ ಜಾಂವ್. ಅಶೆಂ ಯೇಜಂಟಾಕ್ ಪೊಯ್ಶೆ ಭರುನ್ ಆಯಿಲ್ಲ್ಯಾ ತಾಕಾ ಹಾಂಗಾಚೆಂ ಕಾಮ್ ಪಳೆವ್ನ್ ಧಾಂವೊಂಕ್ ಪುರ್ಸೊತ್ ಮೆಳ್ಳಿನಾ. ತಾಣೆಂ ಸ್ವಪ್ಣಾಂತೀ ಚಿಂತುಂಕ್ ನಾತ್‌ಲ್ಲೆ ಕಶ್ಟ್ ತಾಕಾ ಹಾಂಗಾ ಮೆಳ್ಳೆ. ಅಶೆಂ ಪಾಟಿಂ ಗೆಲ್ಲ್ಯಾ ತಾಕಾ ಪಯ್ಲೆಂಚೆಂ ಕಾಮ್ ಮೆಳ್ಳೆಂನಾ. ಆತಾಂ ಗಾಂವಾಂತ್‌ಚ್ಚ್ ಕಾಮ್ ಸೊಧುನ್ ಭಂವ್ತಾ. ಗಲ್ಫಾಕ್ ಬಿಲ್ಕುಲ್ ವಚೊಂಕ್ ತಾಕಾ ನಾಕಾ ಖೈಂ. ಪೊಳ್ಕುರೆ ಥೊಡೆ ಎದೊಳ್‌ಚ್ಚ್ ಧಾಂವ್ಲ್ಯಾತ್. ಥೊಡ್ಯಾಂಚಾ ಮತಿಂತ್ ಗಲ್ಫ್ ಮ್ಹಳ್ಯಾರ್ ಸರ್ಗ್ ಮ್ಹಣೊನ್ ಆಸ್ತಾ. ಪುಣ್ ಗಲ್ಫಾಕ್ ಯೆತೆಚ್ಚ್ ಹಾಂಗಾಚೆಂ ಜಿವಿತ್ ಪಳೆತಾನಾ ತಾಂಕಾ ಕಳ್ತಾ ಸರ್ಗ್‌ಗೀ ಯಾ ಖರ್ಗ್‌ಗೀ ಮ್ಹಳ್ಳೆಂ.

ಕುವೆಯ್ಟಾಂತ್ ಎಕಾ ಘರಾಂತ್ ತೆಗಾಂ ಗಾಂವ್ಚಿಂ ಕಾಮ್ ಕರುನ್ ಆಸ್‌ಲ್ಲಿಂ. ತೆಗಾಂಯ್ ಗಾಂವ್ಚಿಂ ಬಾಯ್ಲಾಂ ಆನಿ ತ್ಯಾ ತೆಗಾಂ ಪಯ್ಕಿ ಎಕ್ಲೆಂ ಚೆಡುಂ ಉಲಯಿಲ್ಲ್ಯಾ ಉತ್ರಾಂಕ್ ಗಾಳಿ ಶಿರಾಪ್ ದೀವ್ನ್ ಉಲಯ್ತಾಲೆಂ. ತಾಣೆಂ ಉಲಂವ್ಚಾ ಹರ್‍ಯೆಕಾ ವಾಖ್ಯಾಂತ್ ಏಕ್ ಗಾಳ್ ಪುಣೀಂ ಆಸ್ತಾಲಿ. ಆನಿ ಅಶೆಂ ಉಲಂವ್ಚಿ ತಾಚಿ ಸದಾಂಚಿ ಸವಯ್ ಜಾಲ್ಲಿ. ಘರ್ ಖಾತ್ಯಾಂತ್ ಕಾಮ್ ಕರುನ್ ಆಸ್‌ಲ್ಲೆಂ ಆನಿ ಆಯ್ತಾರಾ ರಜೆರ್ ಆಯಿಲ್ಲೆವೆಳಾರ್ ಹಾಂಗಾ ಯೆತಾಲೆಂ ಆನಿ ಸಗ್ಳ್ಯಾಂ ಮುಕಾರ್ ತಿಚಾ ಧನ್ಯಾಕ್, ಧನಿನೆಕ್, ಆನಿ ಧನಿನೆಚಾ ಭುರ್ಗ್ಯಾಂಕ್ ಗಾಳಿ ಸೊವೊ ದಿತಾಲೆಂ. ಜಾಯಿತ್ತ್ಯಾ ಜಾಣ್ತ್ಯಾಂನಿ ತಿಕಾ ಸಮ್ಜಾಯ್ಲೆಂ ತರೀ ತಿಚಿ ಸಂಯ್ಬಾಚಿ ಸವಯ್ ರಾವ್ಲಿನಾ. ಅಶೆಂ ಆಸ್ತಾಂ ಎಕಾ ಆಯ್ತಾರಾ ತಿಚೊ ಧನಿ ತಾಂಚೆ ಪಯ್ಕಿ ಎಕ್ಲ್ಯಾಕ್ ಗಾಂವಾಕ್ ಧಾಡ್ತಾ ಮ್ಹಳ್ಳಿ ಖಬಾರ್ ಘೆವ್ನ್ ಆಯ್ಲೆಂ ಆನಿ ಸಾಂಜೆರ್ ಘರಾ ಗೆಲ್ಲ್ಯಾ ತಿಕಾ ಕಳ್ಳೆಂ ತಾಂಚೆ ಪಯ್ಕಿ ಗಾಂವಾಕ್ ವಚೊಂಕ್ ಆಸ್ಚೆಂ ಆಪ್ಣಾಕ್‌ಚ್ಚ್ ಮ್ಹಳ್ಳೆಂ. ಆನಿ ತೆಚ್ಚ್ ರಾತಿಂ ತಿಕಾ ಪೊಟ್ಲಿ ಬಾಂಧುನ್ ಗಾಂವಾಕ್ ಧಾಂವ್ಡಾಯ್ಲೆಂ. ತಿಚೆಂ ವರ್ತನ್ ಸೊಸುನ್ ಸೊಸುನ್ ಪುರೊ ಜಾಲ್ಲ್ಯಾ ತಿಚಾ ಸಾಂಗಾತಿಣಿಂಕ್ ಇಲ್ಲೊ ಸುಶೆಗ್ ಜರೂರ್ ಮೆಳ್ಳೊ.

ಪುಣ್ ಅಸಲಿಂ ಕಾಣಿಂ ಹಾಂಗಾ ಕಾಮ್ ಕರ್ತೆಲ್ಯಾಂಚಿ ಜಾಂವ್ಕ್ ಸಾಧ್ಯ್ ಆಸಾ.

ಎಕಾ ಸುಪರ್‌ಮಾರ್ಕೆಟಿಂತ್ ಕಾಮ್ ಕರ್ನ್ ಆಸ್‌ಲ್ಲ್ಯಾ ಎಕ್ಲ್ಯಾಚಿ ಕಾಣಿ ಆಯ್ಕಾತಾನಾ ಆಂಗಾಚಿ ಲೋಂವ್ ಉಭಿ ಜಾತಾಲಿ. ಸುಪರ್ ಮಾರ್ಕೆಟಿಕ್ ಯೆಂವ್ಚಾ ವೆಚಾ ಹರ್‍ಯೆಕಾ ಗಿರಾಕಿಚೆರ್ ನದರ್ ದವರ್ಚಿ ಗರ್ಜ್ ಆಸ್ತಾ. ವ್ಹಡ್ಲ್ಯಾ ಸುಪರ್ ಮಾರ್ಕೆಟಿಂನಿ ಕೊನ್ಶಾ ಕೊನ್ಶಾಂನಿ ಕ್ಯಾಮರಾ ಲಾಯಿಲ್ಲೆ ಆಸ್ತಾತ್ ತರೀ ಲ್ಹಾನ್ ಲ್ಹಾನ್ ಸುಪರ್‌ಮಾರ್ಕೆಟಿಂನಿ ತಶೆಂ ಕ್ಯಾಮರಾ ಲ್ಹಾಂವ್ಕ್ ಸಾಧ್ಯ್ ನಾತ್‌ಲ್ಲೆವರ್ವಿಂ ಥಂಯ್ ಕಾಮ್ ಕರ್ಚಾ ಮನ್ಶಾಂನಿ೦ಚ್ ಸಗ್ಳ್ಯಾಂಚೆರ್ ನದರ್ ದವ್ರಿಜಯ್ ಪಡ್ತಾ. ನಾಂ ತರ್ ಮಹಿನ್ಯಾಚೆಂ ಲೇಖ್ ಜಾತಾನಾ ಥಾಂಯ್ ಕಾಮ್ ಕರ್ತೆಲ್ಯಾಂಚಾ ಸಾಂಭಾಳಾಂತ್ ತ್ಯಾ ಚೊರಿ ಜಾಲ್ಲ್ಯಾ ವಸ್ತುಂಚೆ ಮೋಲ್ ವಸೂಲ್ ಜಾತಾಲೆಂ. ಅಸಲ್ಯಾ ಸುಪರ್‌ಮಾರ್ಕೆಟಿಂನಿ ಚಡ್ತಾವ್ ಯೆಂವ್ಚೆಂ ಆಮ್ಚಾ ದೇಶಾಚಾನಿಂಚ್, ತರೀ ಪಾಕಿಸ್ತಾನಿ, ಬಾಂಗ್ಲಾಚೆ ಆನಿ ಶ್ರೀಲಂಕಾಚಿಂ ಯೆತಾಲಿಂ. ಥೊಡಿಂ ಇತ್ಲಿಂ ಹುಶಾರ್‌ಗೀ ಮುಖಾರ್ ಆಸ್ತೆಲ್ಯಾಂಚಾ ದೊಳ್ಯಾಂಚೆರ್ ದೀಶ್ಟ್ ಘಾಲುನ್೦ಚ್ ಚೊರಿ ಕರುಂಕೀ ತಿಂ ಜಾಣಾಂತ್. ಅಶೆಂ ಆಸ್ತಾನಾ ಥೊಡ್ಯಾ ಪಿಲಿಪಿನೊ ಚೆಡ್ವಾಂನಿ ಸಾಂಗಾತಾ ಮೆಳೊನ್ ಯೇಂವ್ಕ್ ಸುರು ಕೆಲೆಂ ಆನಿ ಥಂಯ್ ಆಸ್ಚಾ ಕಾಮಾಂಚಾಂಚಾ ದೊಳ್ಯಾಂಕ್ ಮಾತಿ ಘಾಲುಂಕ್ ಸುರು ಕೆಲೆಂ ಆನಿಂ ಥಂಯ್ಚೊ ಇಲ್ಲ್ಯೊ ಮೊಲಾಚೊ ವಸ್ತು ಚೊರುಂಕ್ ಧರ್‍ಲ್ಯೊ. ಆನಿ ತಾಣಿಂ ಕೆಲ್ಲ್ಯೊ ಚೊರಿ ಕೊಣಾಯ್ಕೀ ಕಳೊಂಕ್ ನಾತ್‌ಲ್ಲೆವರ್ವಿಂ ತಿಂ ತವಳ್‌ತವಳ್ ಯೇವ್ನ್ ಸಂದರ್ಭ್ ಪಳೆವ್ನ್ ಹಾತಾಕ್ ಮೆಳ್‌ಲ್ಲೆಂ ಚೊರಿಲಾಗ್ಲಿಂ.

ತೆಚ್ಚ್ ಸುಪರ್ ಮಾರ್ಕೆಟಿಚಾ ಪಾಟ್ಲ್ಯಾನ್ ಎಕ್ಲೊ ಅರ್ಭಿ ಥೊಡ್ಯಾ ಚೆಡ್ವಾಂಕ್ ದವರ್ನ್ ದಂದೊ ಚಲಯ್ತಾಲೊ ಆನಿ ಹ್ಯಾ ಸುಪರ್ ಮಾರ್ಕೆಟಿಂತ್ ಕಾಮ್ ಕರುನ್ ಆಸ್ಚೊ ಎಕ್ಲೊ ಬೆಂಗಾಲಿ ತವಳ್ ತವಳ್ ಥಂಯ್ ವೆತಾಲೊ ತಾಚಿ ಖಬಾರ್ ಕೊಣಾಯ್ಕೀ ಕಳಿತ್ ನಾತ್‌ಲ್ಲಿ. ಅಶೆಂ ಆಸ್ತಾನಾ ತ್ಯಾ ಸುಪರ್‌ಮಾರ್ಕೆಟಿಂತ್ ಆಸ್ಚಾ ಗಾಂವ್ಚಾ ಎಕ್ಲ್ಯಾನ್ ರಜೆರ್ ವೆಚಿ ತಯಾರಿ ಕರುನ್ ಆಸ್ತಾನಾ ಗರ್ಜೆಚಾ ಕಾಮಾಂತ್ ತೊ ಭಾಯ್ರ್ ವಚೊಂಕ್ ಆಸ್‌ಲ್ಲ್ಯಾನ್ ತಾಣೆಂ ಹ್ಯಾ ಬೆಂಗಾಲಿಕ್ ಗಲ್ಲ್ಯಾರ್ ಬೊಸವ್ನ್ ಪಂದ್ರಾಚ್ ಮಿನುಟಾಂ ಭಾಯ್ರ್ ವಚೊನ್ ಆಪ್ಲೆಂ ಕಾಮ್ ತಿರ್ಸುನ್ ಪಾಟಿಂ ಆಯ್ಲೊ. ಪುಣ್ ತೊ ಕಿತೆಂ ಜಾಣಾಂ ತಿಂ ಪಂದ್ರಾ ಮಿನುಟಾಂ ತಾಚಾ ಜಿಣ್ಯೆಂತ್ ಏಕ್ ಆವ್ರ್ ಹಾಡ್ತಾ ಮ್ಹಳ್ಳೆಂ? ತ್ಯಾ ಸುಪರ್ ಮಾರ್ಕೆಟಿಚಾ ಗಲ್ಲ್ಯಾಂತ್ ಆಸ್ಚೆ ಸಗ್ಳೆ ಪೊಯ್ಶೆ ಚೊರಿ ಜಾಲ್ಲೆ.

ಬೆಂಗಾಲಿನ್ ಜಾಗ್ರೂತೆನ್ ತೆ ಪೊಯ್ಶೆ ಕಾಡ್‌ಲ್ಲೆ ಮಾತ್ರ್ ನ್ಹಂಯ್ ಘಡಿಯೆನ್ ತೆ ವರ್ನ್ ಲಿಪವ್ನ್೦ಯಿ ದವರ್ಲೆಲೆ. ಸಾಂಜ್ ಜಾತಾನಾ ಧನ್ಯಾಕ್ ಖಬಾರ್ ಮೆಳ್ಳಿ ಆನಿ ಗಾಂವಾಕ್ ವಚೊಂಕ್ ಭಾಯ್ರ್ ಸರ್‌ಲ್ಲ್ಯಾಕ್ ಧರ್ಲೊ. ತ್ಯಾ ಶಿವಾಯ್ ತೊ ಪಂದ್ರಾ ಮಿನುಟಾಂ ಭಾಯ್ರ್ ವಚೊನ್ ಆಯಿಲ್ಲಿ ಗಜಾಲ್ ತ್ಯಾ ಬೆಂಗಾಲಿನ್ ಧನ್ಯಾಕ್ ಕಳಯ್ಲಿ. ಹೆಚ್ಚ್ ಘಡಿಯೆಕ್ ತೊ ರಾಕೊನ್ ಆಸ್‌ಲ್ಲೊ. ಆಪ್ಣಾನ್ ಪೊಯ್ಶೆ ಚೊರುಂಕ್ ನಾಂತ್. ಪುಣ್ ಕಶೆ ತ್ಯಾ ಪೊಯ್ಶ್ಯಾಂಚಿ ಚೊರಿ ಜಾಲಿ ಮ್ಹಳ್ಳೆಂ ಆಪ್ಣಾಕ್ ಕಳಿತ್ ನಾ ಮ್ಹಣೊನ್ ಪರತ್ ಪರತ್ ಸಾಂಗ್ತಾನಾ ಭಿಗಡ್ಲಲ್ಯಾ ಧನ್ಯಾನ್ ತಾಕಾ ಧರ್ನ್ ಪೊಲಿಸಾಂಚಾ ಹಾತಾಂಕ್ ದಿಲೊ ಆನಿ ಪೊಲಿಸಾನಿ ತಾಕಾ ವ್ಹೆರ್ಲೊ ಆನಿ ತೊ ಗಾಂವಾಕ್ ವೆಚಾ ಪಯ್ಲೆಂ ತಾಚಾ ಎಕಾ ಹಾತಾಚಿಂ ಬೊಟಾಂಚ್ಚ್ ಕಾತರ್ಲಿಂ. ಆನಿ ತಾಕಾ ಕಾಮಾಂತ್ಲೊ ಕಾಡ್ಲೊ. ಅಶೆಂ ಹಾಂಗಾ ಘಡ್ಚೆಂ ಆಪ್ರೂಪ್ ತರೀ ಹೆಂ ಸಾಧ್ಯ್ ಆಸ್‌ಲ್ಲೆಂ. ಹಾಂಗಾಚಿಂ ಕಾನೂನಾಂ ಕಠೀಣ್ ಆಸ್‌ಲ್ಲ್ಯಾನ್ ಜಾವ್ಯೆತ್ ಹಾಂಗಾ ಜಾಂವ್ಚೊ ಚೊರಿಯೊ ಯಾ ಹೆರ್ ಅಕ್ರಮಾಂಚೊ ಸಂಖೊ ಇಲ್ಲೊ ಉಣೊ ಆಸ್‌ಲ್ಲೊ. ಪುಣ್ ಅಸಲಿಂ ಕಾಮಾಂ ಕರ್ಚಿಂ ಮಾತ್ರ್ ಸದಾಂ ಕರ್ತಾಲಿಂ.

ಗಲ್ಫಾಕ್ ಯೇವ್ನ್ ಫಕತ್ತ್ ಪೊಯ್ಶೆ ಕರುಂಕ್ ಶೀದಾ ವಾಟ್ ಸೊಡುನ್ ಥೊಡ್ಯಾಂನಿ ವಾಂಕ್ಡಿ ವಾಟ್ ಧರ್ಲಿ. ಸಭಾರಾಂನಿ ಆಪ್ಲ್ಯಾ ಘರಾಂನಿ ಸೊರೊ ಉಕ್ಡೊಂಕ್ ಧರ್ಲೊ ಆನಿ ಘುಟಾನ್ ವಿಕುಂಕ್ ಧರ್ಲೊ. ಪೊಯ್ಲೆ ಸರಾಗ್ ಪೊಯ್ಶೆ ಕೆಲೆ. ಪುಣ್ ಹಜಾರ್ ಚೊರಿ ಕೆಲ್ಲೊ ಚೋರ್ ಏಕ್ ಪಾವ್ಟಿಂ ಪುಣೀಂ ಶಿರ್ಕೊನ್ ಪಡಾನಾಯೆ ತರ್? ತಶೆಂಚ್ಚ್ ಜಾಲೆಂ. ಥೊಡೆ ಹಾಂಚೆಲಾಗ್ಚೊ ಸೊರೊ ಮೊಲಾಕ್ ಘೆವ್ನ್ ಯಾ ಪಿಯೆವ್ನ್ ಗೆಲೊ ಆನಿ ಪೊಲಿಸಾಂಕ್ ಖಬಾರ್ ದಿಲಿ. ಪೊಲಿಸಾಂನಿ ಯೇವ್ನ್ ಹಾಂಕಾ ಧರ್ನ್ ವೆಲೊ. ಹಾಂತುಂ ದಾದ್ಲೆ ಮಾತ್ರ್ ನ್ಹಂಯ್ ಬಾಯ್ಲಾಂಯ್ ಉಣಿಂ ನಾತ್‌ಲ್ಲಿಂ. ಸೊರೊ ಮ್ಹಳ್ಯಾರ್ ಕೊಣಾಕ್ ನಾಕಾ? ಆಮ್ಚಾ ಗಾಂವಾಂತ್ ಜಾಂವ್ಚಾ ಹರ್‍ಯೆಕಾ ಕಾರ್‍ಯಾಂಕ್ ಸೊರೊ ಜಾಯ್ಜಯಿಚ್ಚ್. ಜಲ್ಮತಾನಾ ಸೊರೊ, ವೊಲಾಕ್ ಸೊರೊ, ಕುಮ್ಗಾರಾಕ್ ಸೊರೊ, ಕ್ರೀಜ್ಮಾಕ್ ಸೊರೊ, ಜಲ್ಮಾಲ್ಲೊ ದೀಸ್ ಆಚರಣ್ ಕರುಂಕ್‌ಯಿ ಜಾಯ್ ಸೊರೊ, ಇಸ್ಕೊಲಾಂತ್ ಪಾಸ್ ಜಾಲ್ಯಾರೀ ಸೊರೊ, ಸೊರೊ ನಾಸ್ತಾಂ ಘರಾಂತ್ ಫೆಸ್ತಾಂ ಪರ್ಬೊ ಜಾಯ್ನಾಂತ್. ಫೆಸ್ತಾಂ ಸಂದರ್ಭಾನಿಂ ಸೊರ್‍ಯಾಕ್ ಉಣೆಂ ಮೋಲ್ ಆಸ್ತಾ. ಚಡಿತ್ ವಿಕೊನ್ ವಚೊಂಕ್. ಉಪ್ರಾಂತ್ ಕೊಣಾಯ್ಕೀ ಸಯ್ರಿಕ್ ಜಾಲ್ಯಾರ್ ಸೊರೊ, ಮುದಿಯೆಚಾ ದಿಸಾಯ್ ಸೊರೊ, ಕಾಜಾರಾ ದಿಸಾಯ್ ಸೊರೊ, ಪರತ್ ಆಪವ್ಣ್ಯಾ ದಿಸಾಯ್ ಸೊರೊ, ಬಾಯ್ಲ್ ಗುರ್ವಾರ್ ಜಾತಾನಾಂಯ್ ಸೊರೊ, ಕೊಣೀಂ ಮೆಲಿಂ ತರೀ ಸೊರೊ, ಕೋಣ್ ಗಲ್ಫಾಕ್ ಗೆಲ್ಯಾರೀ ಸೊರೊ, ಕೊಣಾಚಿಂ ಗಲ್ಫಾಕ್ ಗೆಲ್ಯಾರೀ ಸೊರೊ. ಸೊರೊ ಆಸ್ಲ್ಯಾರ್ ಕಾರ್‍ಯೆಂ ಸೊಭ್ತಾ, ಸೊರೊ ಆಸ್‌ಲ್ಲ್ಯಾ ಕಾರ್‍ಯಾಂಕ್ ಮಾತ್ ಸೊಭ್ ಆಸ್ತಾ. ಸೊರೊ ಪಿಯೆವ್ನ್ ಥಾರ್‍ಯಾರ್ ನಾತ್‌ಲ್ಲ್ಯಾಂಚಾ ಘರಾಂತ್ ಆಸ್ಚಾ ಬಾಯ್ಲ್ ಭುರ್ಗ್ಯಾಂಸವೆಂ ಹೆರಾಂ ಮಿರಯ್ತಾನಾಯ್ ತಾಂಕಾ ಜಾಯ್ ಫಕತ್ ಸೊರೊ, ಸೊರೊ ಫೆಶನ್, ಸೊರೊ ಪಿಯೆನಾತ್‌ಲ್ಲೊ ಭೆರೊ.

ಎಕ್ಲ್ಯಾನ್ ಕಶ್ಟ್ ಮಿನತ್ ಕಾಡ್ನ್ ನವೆಂ ಘರ್ ಬಾಂಧ್ಲೆಂ. ಘರ್ ವಕೊಲ್ ಕರ್ತಾನಾ೦ಯ್ ಸೊರೊ. ಸೊರ್‍ಯಾವರ್ವಿಂ ಆಮ್ಚಿಂ ಕಿತ್ಲಿಂ ಕುಟ್ಮಾಂ ಸತ್ತ್ಯಾನಾಸ್ ಜಾಲಿಂ ಆನಿ ಜಾವ್ನ್ ಆಸಾತ್ ಆನಿ ಜಾತೆಲಿಂ. ತರೀ ಆಮ್ಕಾಂ ಜಾಯ್ ಸೊರೊ, ಥೊಡ್ಯಾಂಕ್ ಜಿಯೆತಾನಾ ಮಾತ್ರ್ ನ್ಹಂಯ್, ಮೊರ್ತಾನಾ ಅಖ್ರೇಚೊ ಉಸ್ವಾಸ್ ಸೊಡುಂಕ್‌ಯಿ ಸೊರೊ ತರ್ ಥೊಡ್ಯಾಂಕ್ ಮೆಲ್ಲ್ಯಾ ಉಪ್ರಾಂತೀ ತಾಂಚಾ ಮೊರ್ನಾಚಾ ಪೆಟೆಭಿತರ್ ಸೊರೊ. ಮೆಲ್ಲ್ಯಾ ಉಪ್ರಾಂತ್ ತಾಣೆ ಮೆಲ್ಲೆ ದಿಸಾ ತಾಚಾ ಮೊರ್ನಾಚಾ ದುಃಖಾಚೊ ಸೊರೊ, ಉಪ್ರಾಂತ್ ತಿಸ್ರೆ ದಿಸಾಚಾ ಮಿಸಾ ದಿಸಾ, ಸಾತ್ವೆ ದಿಸಾಚಾ ಮೊರ್ನಾ ದಿಸಾ, ಮಹಿನ್ಯಾಚಾ ಮಿಸಾ ದಿಸಾ, ವರ್ಸಾಚಾ ಮಿಸಾ ದಿಸಾಯ್ ತಾಚಾ ಉಡಾಸಾಚಾ ಲೆಖಾರ್ ಸೊರೊಚ್ಚ್ ಸೊರೊ. ಎಕಾ ಘರ್ಚಾ ಬಾಯ್ಲೆನ್ ಆಪ್ಲೊ ಗೋಳ್ ಉಚಾರ್ಲೊ. ತಿಚೊ ಘೊವ್ ಸೊರೊ ಪಿಯೆತಾಲೊ. ತಾಚೆಂ ಕಾರಾಣ್ ಎಕ್‌ಚ್ಚ್ ತಾಚಿ ಬಾಯ್ಲ್ ಗಲ್ಫಾಂತ್ ಆಸಾ ಮ್ಹಳ್ಳೆಂ ದೂಖ್. ತಾಚಾ ಬಾಯ್ಲೆಚಿ ಕಾಣಿಂ ಬೊಲ್ತಿಚ್. ಘೊವ್ ಆಪ್ಲೊ ಗಾಂವಾಂತ್ ಕಾಮ್ ಕರಿನಾ. ಆಪ್ಣಾಕ್ ಆಸ್ಚೊ ಚಾರ್ ಧುವೊ ಆನಿ ತಾಂಚೆ ಕಾಜಾರ್ ಕರಿಜಾಯ್ ತರ್ ಆಪ್ಣಾನ್ ತರೀ ಕಾಮ್ ಕರಿಜಾಯ್ ಮ್ಹಳ್ಳಿ ಕಾಣಿಂ. ಗಾಂವಾಂತ್ ಆಸ್ಚಾ ಘೊವಾಕ್ ಜಾಯ್ ಫಕತ್ ಸೊರೊ. ಆನಿ ತಾಚಾ ಸೊರ್‍ಯಾಚಾ ಜಿವಿತಾಂತ್ ವಡ್ ಜಾಲ್ಲ್ಯೊ ಧುವೊ. ಘರಾಂತ್ ವಿಚಾರ್ ಕರ್ಚಿಂ ಕೊಣೀಂ ನಾಂತ್. ಬಾಪಾಯ್ಕ್ ಏಕ್ ಬೋತ್ಲ್ ಗಳ್ಯಾಕ್ ಬಾಂದ್ಲ್ಯಾರ್ ಜಾಲೆಂ, ಉಪ್ರಾಂತ್ ತೊ ಬಾಂಕಾರ್ ನಿದ್ಲ್ಯಾರೀ ಯಾ ಗಾದ್ಯಾಂತ್ಲ್ಯಾ ಮೆರೆಂತ್ ಆಸ್ಲ್ಯಾರೀ ಎಕ್‌ಚ್ಚ್. ಉಪ್ರಾಂತ್ ಧುವಾಂಕ್ ತಾಂಚೆಚ್ ಮ್ಹಳ್ಳೆಂ ಜಿವಿತ್. ದಿಸಾಕ್ ಎಕೆಕ್ಲೆ ಘರಾಕ್ ಯೆಂವ್ಚೆಂ ಆನಿ ಘರ್ ಆಸ್ಚೆಂ ಯೆಮ್ಕೊಂಡ್ ಜಾತಾ. ತಿ ಪರ್ಗಾಂವಾಂತ್ ಘೊಳೊನ್ ಆಸ್ಚಾ ಬಾಯ್ಲೆಕ್ ಪಾಟಿಂ ಗಾಂವಾಕ್ ಯೆತಾನಾ ಕಿತೆಂ ಮೆಳ್ತಾ? ಘೊವಾನ್ ಸೊರೊ ಪಿಯೆವ್ನ್ ದಿಲ್ಲ್ಯೊ ಇಲ್ಲ್ಯೊ ಗಾಳಿಯೊ ಮಾತ್ರ್.

ಸೊರೊ ಗ್ರೇಸ್ತಾಂಕೀ ಜಾಯ್ ದುಬ್ಳ್ಯಾಂಕೀ ಜಾಯ್. ಪೊಯ್ಶೆ ಆಸ್ಚೊ ತಾಕಾ ಬ್ರಾಂಡಿ ಆನಿ ವಿಸ್ಕಿ ಮ್ಹಣೊನ್ ಪಿಯೆತಾ ಆನಿ ದುಬ್ಳೊ ತಾಕಾ ಕಂಟ್ರಿ ಆನಿ ಉಕಡ್ಲಲೊ ಮ್ಹಣೊನ್ ಪಿಯೆತಾ. ಪುಣ್ ದೊನಾಂತೀ ಮನ್ಶಾಕ್ ತಕ್ಲಿ ಪಿಸಾಯ್ ಕರ್‍ಚಿ ಸಕತ್ ಆಸ್‌ಲ್ಲಿ. ಆಪ್ಣಾನ್ ಎಕಾ ಘಡಿಯೆಚಾ ಪಾಶಾಂವಾ ಖಾತಿರ್ ಘೆಂವ್ಚೆಂ ವೀಕ್ ತೆಂ ಜಾವ್ನಾಸ್‌ಲ್ಲೆಂ. ತಾಂಚಾ ಸುಃಖಾ ಸಮಧಾನಾ ಖಾತಿರ್ ಪಿಯೆಂವ್ಚೆಂ ತೆಂ ಜಾವ್ನಾಸ್‌ಲ್ಲೆಂ.

ಥೊಡ್ಯಾಂಚಾ ಘರಾಂನಿ ಥೊಡಿಂ ಗಲ್ಫಾಂತ್ ರಗಾತ್ ಘಾಮ್ ವಾಳಯ್ತಾತ್ ಆನಿ ತಾಂಚಾ ಘರಾಂನಿ ದಿಸಾಚಿ ಸುರ್‍ವಾತ್ ಜಾತಾಚ್ಚ್ ಸೊರ್‍ಯಾನಿ. ಹಿ ಕಾಣಿಂ ನ್ಹಂಯ್ ಬಗಾರ್ ಸತ್ ಆನಿ ಹಕೀಗತ್.

ಕಾಂಯ್ ಎಕ್ಲೊ ಬೆಬ್ದೊ ಆನಿ ಅನ್ಯೇಕ್ಲೊ ಪಿಯೆನಾತ್‌ಲ್ಲೊ ಎಕಾ ವೆಳಾ ಜಗ್ಡೊನ್ ಪಡ್ಲೆ ಆನಿ ತೆಂ ಜಗ್ಡೆಂ ಕಾಂಯ್ ಮಾರ್‌ಫಾರ್ ಜಾವ್ನ್ ಬದ್ಲಾಲೆಂ ಮ್ಹಣೊನ್ ಚಿಂತ್ಯಾಂ. ಬೆಬ್ದೊ ಕಸೊಯ್ ಬೆಬ್ದೊಚ್ಚ್ ಆನಿ ತೊ ಪಿಯೆನಾತ್‌ಲ್ಲೊ ವಗೊಚ್ ಬೊಸ್ಚೆ ಶಿವಾಯ್ ಹೆರ್ ವಾಟ್ ನಾಸ್ತಾಂ ಸೊಸ್ತಾ ಆನಿ ದುಸ್ರೆ ದೀಸ್ ತೊಚ್ಚ್ ಚುಕಿದಾರ್ ಜಾತಾ. 'ಹಾಂವ್ ಪಿಯೆವ್ನ್ ಉಲಯಿಲ್ಲೊ ದೆಖುನ್ ಮತಿಂತ್ ಧರಿನಾಕಾ' ಮ್ಹಣ್ತಾ ಯಾ 'ಪಿಯೆತೆಲ್ಯಾಂಚೆಂ ಆಯ್ಕೊನ್ ಕೊಣೀಂ ಉಲಯ್ನಾ' ಮ್ಹಣ್ತಾ. ತರ್ ಎಕಾದಾ ವೆಳಾ 'ತುಂ ಪಿಯೆವ್ನ್ ಬಾಂಯ್ಕ್ ಉಡಿ ಮಾರ್‍ಶಿ ತರ್ ಕಿತೆಂ ತಿ ಬಾಂಯ್ ತುಕಾ ವಯ್ರ್ ಘಾಲ್ತಾಗೀ?' ಮ್ಹಣೊನ್ ತ್ಯಾ ಪಿಯೆನಾತ್‌ಲ್ಲ್ಯಾನ್ ತ್ಯಾ ಬೆಬ್ದ್ಯಾಕ್ ಸವಾಲ್ ಕೆಲೊ ತರ್? ತಾಚೆಲಾಗಿಂ ಖಂಡಿತ್‌ಯ್ ಹ್ಯಾ ಸವಾಲಾಕ್ ಜಾಪ್ ಆಸ್ಚಿನಾ.

ಹಿಂ ಸಗ್ಳಿಂ ನಿಬಾಂ. ಜಶೆಂ ನಿಬಾಕ್ ಏಕ್ ನಿಂವ್ಣೆಂ ಮ್ಹಣೊನ್ ಮಾಲ್ಘಡೆ ಸಾಂಗ್ತಾಲೆಗೀ ತಶೆಂಚ್ಚ್ ಬೆಬ್ದ್ಯಾಂಕ್ ಸೊರೊ ಏಕ್ ನೀಬ್.

ಥೊಡ್ಯಾಂಚಾ ಘರಾಂತ್ ಆಪ್ಲೊ ಪೂತ್ ಸೊರೊ ಪಿಯೆತಾ ಆನಿ ಆಪ್ಲೊ ಭಾವ್ ಆಪ್ಲೊ ಘೊವ್ ಸೊರೊ ಪಿಯೆತಾ ಮ್ಹಣೊನ್ ಸಂತೊಸಾನ್ ಸಾಂಗ್ಚಾಂಕೀ ಜಾಯಿತ್ತೆಂ ಪಳೆಲಾಂ. 'ಸೊರೊ ಲೆಕಾರ್ ಪಿಯೆಲ್ಯಾರ್ ಜಿವಾಕ್ ಬರೊ. ಜಿರ್ವಣೆಕ್ ಬರೊ ಮ್ಹಣೊನ್ ಡಾಕ್ಟರ್ ಸಯ್ತ್ ಸಾಂಗ್ತಾತ್. ಜೆಜುನ್೦ಯಿ ಉದಾಕ್ ಆಸ್‌ಲ್ಲೊ ಸೊರೊ ಕೆಲ್ಲೊ ಮ್ಹಣೊನ್ ಪವಿತ್ರ್ ಪುಸ್ತಕಾಂತ್ ಆಸಾ ನಂಯ್ಗೀ? ಮ್ಹಜೊ ಪೂತ್ ಅಪ್ರೂಪಾನ್ ಇಲ್ಲೆಂ ಪಿಯೆತಾ. ಮ್ಹಜೊ ಭಾವ್ ಅಪ್ರೂಪಾಂತ್ ಪಿಯೆತಾ. ಮ್ಹಜೊ ಘೊವ್ ತವಳ್ ತವಳ್ ಇಲ್ಲೆಂ ಶೆಕ್ತಾ' ಮ್ಹಣೊನ್ ಶೆಂಕಾರೆಂ ಫುಲಂವ್ಚಿಂ ವಿಸರ್ತಾತ್ ಹಜಾರ್ ಮೈಲಾಂಚೆ ಪಯ್ಣ್ ಆರಾಂಭ್ತಾ ಎಕಾಚ್ಚ್ ಮೆಟಾನ್ ಮ್ಹಳ್ಳೆಂ. ಸುರ್ವಾತ್ ಜಾತಾನಾ ಕೊಣೀಂ ಮೈಲಾಂಚಿಂ ಪಾವ್ಲಾಂ ಕಾಡಿನಾಂತ್. ಎಕೆಕ್‌ಚ್ ಮೆಟಾಂ ಕಾಡ್ತಾತ್. ಆನಿ ಕಶೆಂ ಮೈಲ್ ಸಂಪ್ತಾ ಮ್ಹಣೊನ್೦ಚ್ ಕಳಾನಾ. ತಶೆಂಚ್ ಸೊರೊಯ್. ಎಕೇಕ್ ಥೆಂಭೊ ಯಾ ಎಕೇಕ್‌ಚ್ಚ್ ಘೊಟ್ ಮ್ಹಣೊನ್ ಉಪ್ರಾಂತ್ ಹಳ್ತ್ ಚುಕೊಂಕ್ ಕಾಂಯ್ ವೇಳ್ ನಾಕಾ.

ತೆಂ ತೆಂ ಎಕೆಕಾ ಮನ್ಶಾಚೆರ್ ಹೊಂದ್ವೊನ್ ಆಸಾ. ಸರ್ಪಾಲಾಗಿಂ ಆಸ್ಚೆಂ ವೀಕ್ ತೆಂ ಸರ್ಪಾಕ್ ವೀಕ್ ನ್ಹಂಯ್. ತಶೆಂಚ್ ಸೊರೊ ಬರೊ ಯಾ ಪಾಡ್ ಆಪಾಪ್ಲ್ಯಾ ಚಿಂತ್ಪಾಚೆರ್ ಆಪಾಪ್ಣಾನ್ ಸಮ್ಜೊನ್ ಘೆತ್‌ಲ್ಲ್ಯಾ ಸಂಗ್ತೆಚೆರ್ ಹೊಂದ್ವೊನ್ ಆಸಾ. ತ್ಯಾ ಅರ್ಥಾನ್ ಪಳೆಲ್ಯಾರ್ ಸಂಸಾರಾಂತ್ ಆಸ್ಚೆಂ ಹರ್‍ಯೆಕ್ ಬರೆಂ ಯಾ ಪಾಡ್ ಬರೆಂ ಯಾ ಪಾಡ್ ಜಾಂವ್ಕ್‌ಚ್ ಜಾಯ್ ಮ್ಹಣೊನ್ ನಾ.

ಪವಿತ್ರ್ ಪುಸ್ತಕಾಕ್ ಆಮ್ಚಾ ಜಿಣ್ಯೆಕ್ ಕಶೆಂ ಜಾಯ್ ತಶೆಂ ವಾಪಾರ್ಲಾಂ. ಪವಿತ್ರ್ ಪುಸ್ತಕಾಂತ್ ದುಸ್ಮಾನಾಂಕ್ ಭೊಗ್ಶಿಯಾ ಮ್ಹಣೊನ್ ಬರಯ್ಲಾಂ. ಹೆರಾಂಚೆ ಚೊರಿನಾಕಾತ್ ಫಾರಿನಾಕಾತ್, ಪ್ರದುವಾರ್ ಕರಿನಾಕಾತ್, ಜಿವೆಶಿಂ ಮಾರಿನಾಕಾತ್ ಮ್ಹಣೊನೀ ಬರಯ್ಲಾಂ. ತೆಂ ಸಗ್ಳೆಂ ಕೊಣಾಯ್ಚಾಯ್ ದೊಳ್ಯಾಂಕ್ ದಿಸಾನಾ. ಬಗಾರ್ ಜೆಜುನ್ ಉದಾಕ್ ಆಸ್‌ಲ್ಲೆಂ ಸೊರೊ ಕೆಲ್ಲೆಂ ಮಾತ್ರ್ ದಿಸ್ತಾ. ಜೆಜುನ್ ಉದಾಕ್ ಆಸ್ಚೆಂ ಸೊರೊ ಕರುಂಕ್ ನಾ. ತಶೆಂ ಚಿಂತ್ಚಾ ಬೆಕೂಫಾಂನಿ ಪರತ್ ತೊ ಪವಿತ್ರ್ ಪುಸ್ತಕ್ ವಾಸ್ಚೊ ಬರೊ. ಜೆಜುನ್ ಉದಾಕ್ ಆಸ್ಚೊ ವಾಯ್ನ್ ಕೆಲ್ಲೊ. ಆನಿ ತ್ಯಾ ಗಾಂವಾಂತ್ ಕೊಣೀಂ ಆಪ್ಲ್ಯಾ ಘರಾ ಆಯಿಲ್ಲ್ಯಾ ವೆಳಾರ್ ಇಲ್ಲೊ ದಾಕಾಂಚೊ ರೋಸ್ ದಿಂವ್ಚಿ ರಿವಾಜ್ ಆಸ್‌ಲ್ಲಿ ಆನಿ ತೆಚ್ಚ್ ಪ್ರಕಾರ್ ತಾಣೆಂ ಉದಾಕ್ ಆಸ್ಚೆಂ ಬೆಸಾಂವ್ ದೀವ್ನ್ ವಾಯ್ನ್ ಕೆಲ್ಲೊ ಮ್ಹಣೊನ್ ಮಾತ್ರ್ ಬರಯ್ಲಾಂ. ಪುಣ್ ಸಂಸಾರ್ ಬದಾಲ್ಲಾ. ಜೆಜುಕ್ ಆಜ್‌ಕಾಲ್ ಜೇಮ್ಸ್ ಬೋಂಡಾಪರಿಂ ಹಾತಾಂತ್ ಪಿಸ್ತುಲ್ ಘೆವ್ನ್ ಪಳೆಂವ್ಕ್ ಆಶೆತಾತ್. ಜೆಜುಕ್‌ಯಿ ಫ್ರೆಂಚ್ ಖಾಡಾಚೆರ್ ಪಳೆಂವ್ಕ್ ಆಶೆತಾತ್. ಪಿಲಾತಾನ್ ತಾಚೆ ಹಾತ್ ಧುವ್ನ್ ತಾಚಾ ಖಾಂದ್ಯಾರ್ ಖುರಿಸ್ ದಿತಾನಾ ಜೆಜುನ್ ಕರಾಟೆ ಯಾ ಜೂಡೊ ಖೆಳೊನ್ ಥಂಯ್ಚಾ ಜುದೆವಾಂಕ್ ಸಲ್ವಾಂವ್ಚೆಂ ಪಳೆಂವ್ಕ್ ಆಶೆತಾತ್. ಪುಣ್ ಜೆಜುಚಾ ನೀಜ್ ತತ್ವಾಂಕ್ ಸಮ್ಜೊಂವ್ಚಿಂ ಯಾ ಸಮ್ಜೊಂಕ್ ಪ್ರೇತನ್ ಕರ್‍ಚಿಂ ಕೆದಿಂಕ್‌ಚ್ಚ್ ಜೆಜುಚಾ ಉತ್ರಾಂಚಿ ಖೆಳ್ಕುಳಾಂ ಕರಿನಾಂತ್.

ಅಶೆಂ ಜೆಜುನ್ ಉದಾಕ್ ಆಸ್ಚೆಂ ವಾಯ್ನ್ ಕೆಲ್ಲೊ ಮಾತ್ರ್ ಶಿವಾಯ್ ಸೊರೊ ಕೆಲ್ಲೊ ನ್ಹಂಯ್. ಆನಿ ತೊ ವಾಯ್ನ್ ಪಿಯೆಲ್ಲೊ ಲೋಕ್ ಟಾಯ್ಟ್ ಜಾವ್ನ್ ಖಣಿಂತ್‌ಗೀ ಯಾ ಗಾದ್ಯಾ ಮೆರೆಂತ್‌ಗೀ ಥಾರ್‍ಯಾರ್ ನಾಸ್ತಾಂ ಪಡ್‌ಲ್ಲೊ ಮ್ಹಣೊನ್ ಬರಯ್ಲಾಂಗೀ?

ಮನ್ಶಾಂಕ್ ಮನಿಸ್ ಆಪ್ಣಾಚಾ ಖೆಳಾಚಿ ಬಾವ್ಲಿ ಕರುಂಕ್ ಆಶೆತಾನಾ ಆಜ್‌ಕಾಲ್ ದೆವಾಕ್‌ಯ್ ಸೊಡುಂಕ್ ಮನಿಸ್ ಆಶೆನಾ. ದೆವಾಕ್‌ಯಿ ತಾಂಚಾ ಸ್ವಾರ್ಥಾ ಪ್ರಕಾರ್ ವಾಪಾರ್ತಾ. ಆನಿ ಹಾಚೊ ಪರಿಣಾಮ್ ಜಾವ್ನ್ ಭಾವಾಡ್ತ್ ಮ್ಹಳ್ಳ್ಯಾ ಸಬ್ದಾಚೆರ್ ಪರ್ದೊ ಪಡ್ಲಾ. ಆತಾಂ ಸಗ್ಳೆ ಆಪ್ಣಾಕ್‌ಚ್ ಆಪುಣ್ ದೇವ್ ಮ್ಹಣೊನ್ ಮಾಂದುಂಕ್ ಲಾಗ್ಲಾ.

ಮುಂದರ್‍ಸಿಲಾಂ...

Tags: Vally Quadras,e konkani novel, Konkani, Mangalore, Mangalorean, Mother Tongue

From around the world

ಪಾಟಿಂ ಗಾಂವಾಕ್ - ಅವಸ್ವರ್ 17

Post your comments

ಅವಸ್ವರ್ 1

ಅವಸ್ವರ್ 2

ಅವಸ್ವರ್ 3

ಅವಸ್ವರ್ 4

ಅವಸ್ವರ್ 5

ಅವಸ್ವರ್ 6

ಅವಸ್ವರ್ 7

ಅವಸ್ವರ್ 8

ಅವಸ್ವರ್ 9

ಅವಸ್ವರ್ 10

ಅವಸ್ವರ್ 11

ಅವಸ್ವರ್ 12

ಅವಸ್ವರ್ 13

ಅವಸ್ವರ್ 14

ಅವಸ್ವರ್ 15

ಅವಸ್ವರ್ 16

ಅವಸ್ವರ್ 17

ಅವಸ್ವರ್ 18

ಅವಸ್ವರ್ 19

ಅವಸ್ವರ್ 20

ಅವಸ್ವರ್ 21

ಅವಸ್ವರ್ 22

ಅವಸ್ವರ್ 23

ಅವಸ್ವರ್ 24

ಅವಸ್ವರ್ 25

ಅವಸ್ವರ್ 26

ಅವಸ್ವರ್ 27

ಅವಸ್ವರ್ 28

Connect

Our Address
Mangalore

Our Address
Udupi

Our Address
Dubai

From around the world

Post your comments

Connect

Our AddressMangalore

Our AddressUdupi

Our AddressDubai

Our Address
Mangalore

Our Address
Udupi

Our Address
Dubai