:: ಮಾಯ್ ಭಾಸ್

ಗಾಂವಾಕ್ ಇತ್ಲ್ಯಾ ತೆಂಪಾ ಉಪ್ರಾಂತ್ ಯೇವ್ನ್ ಆತಾಂ ಪಯ್ಲೊ ದೀಸ್‌ಚ್ ಇತ್ಲೊ ಪಾಡ್ ಜಾಯ್ತ್ ಮ್ಹಣೊನ್ ತಿಯೊಕ್ ಕಳ್ತಚ್ ತಾಕಾ ಆಪ್ಣಾಚೆರ್ ಇಲ್ಲೊ ಶಿಣ್ ಆಯ್ಲೊ. ಸಕಾಳಿಂ ನಿದ್‌ಲ್ಲೆ ಥಂಯ್ಚ್ ಉಟೊಂಕ್ ಪ್ರೇತನ್ ಕರ್ಚಾ ತಿಯೊಚಿ ತಕ್ಲಿ ಜೊರಾನ್ ಫಡ್ತಾಲಿ. ತಾಣೆಂ ದೊಳೆ ಉಘಡ್ತಾನಾ ತಾಕಾ ಆಪುಣ್ ಖಂಯ್ ಆಸಾಂ ಮ್ಹಳ್ಳೆಂ ಕಳ್ಳೆಂನಾ. ಹಳ್ತಾರ್ ತಾಕಾ ಕಾಲ್ಚೆ ರಾತಿ ಘಡ್‌ಲ್ಲ್ಯಾ ಸಂಗ್ತೆಚೊ ಉಡಾಸ್ ಆಯ್ಲೊ. ಆಪ್ಣಾಚೊ ಬೆಪಾರ್ವಾ ಕರ್ಚಿಂ ಆಪ್ಣಾಚಿಂ ಭುರ್ಗಿಂ, ಕುಡಾಂತ್ ಬೊಸ್‌ಲ್ಲೆಂ ಜಿವಿತಾ ಆನಿ ರಾತಿಂ ಆಮಾಲಾಂತ್ ಭರೊನ್ ಆಯಿಲ್ಲೊ ಜೊಯೆಲ್ ಆನಿ ತಾಚಾ ಕಾನ್ಸುಲಾಕ್ ಏಕ್ ಥಾಪಡ್ ಘಾಲ್ಲೆಂ. ಸಗ್ಳೆಂ ಉಡಾಸ್ ಆಯ್ಲೆಂ. ತಕ್ಲಿ ಜೊರಾನ್ ಫಡ್ತಾಲಿ ತಶೆಂಚ್ ತಾಚಾ ಹಾತಾಂಚಾ ಮುಟಿಂನಿ ರಗಾತ್ ವಾಳ್ತಾಲೆಂ ಆನಿ ಹಾತಾಚಿಂ ಬೊಟಾಂ ಹುಲ್ಪಾತಾಲಿಂ. ಭೋವ್ಶಾ ರಾತಿಂ ನಿದೆಂತ್ ಉದ್ರೇಕ್ ಜಾಲ್ಲೆ ಕಡೆ ಖಾಟಿಕ್ ಯಾ ವೊಣದೆಕ್ ಮಾರ್ಲೆಂ ಜಾಯ್ಜಯ್ ಮ್ಹಣೊನ್ ತಿಯೊನ್ ಲೆಕ್ಲೆಂ.

ಸಕಾಳಿಂ ನಿದ್‌ಲ್ಲೆಕಡೆಚ್ ಎಸ್ತೆಲಾನ್ ಚಿಂತುಂಕ್ ಧರ್ಲೆಂ. ತಿಯೊನ್ ಸೊರೊ ಪಿಯೆವ್ನ್ ರಾಗಾರ್ ಜಾಲ್ಲೆಂ ಪಳೆಲ್ಲೆಂ ಎಸ್ತೆಲ್ ಇಲ್ಲೆಂ ಕಾವ್ಜೆಲ್ಲೆಂ. ತಾಕಾಯ್ ಜೊಯೆಲಾಕ್ ಮಾರ್‌ಲ್ಲೆಂ ದುಃಖ್‌ಲ್ಲೆಂ. ಜೊಯೆಲ್ ರಾತಿಂ ತಡವ್ ಕರುನ್ ಯೆತಾಲೊ ದೆಖುನ್ ತಾಣೆಂ ಪಿಯೆಂವ್ಚಿ ಗಜಾಲ್ ಎದೊಳ್ ಕೊಣಾಯ್ಕೀ ಕಳಿತ್ ನಾತ್‌ಲ್ಲಿ. ಜಿವಿತಾ ಆಪ್ಲ್ಯಾ ಸಂಸಾರಾಂತ್‌ಚ್ಚ್ ಆಸ್‌ಲ್ಲೆಂ. ತಾಚಾ ಮೊಗಾರ್ ಪಡ್‌ಲ್ಲೊ ಕಂಡೆಕ್ಟರ್ ರಮೇಶ್ ಆಪ್ಲೊ ಧರ್ಮ್ ಬದ್ಲುಂಕ್ ತಯಾರ್ ಆಸ್‌ಲ್ಲೊ. ಕಶೆಂ ಪುಣಿಂ ತಿಯೊಕ್ ಸಾಂಗೊನ್ ತಾಕಾ ಗಲ್ಫಾಕ್ ವರಂವ್ಕ್ ತೊ ಜಿವಿತಾಕ್ ಸಾಂಗ್ತಾಲೊ. ಹರ್ಯೆಕಾ ಮಯ್ನ್ಯಾಂತ್ ದೊಗಾಂಯ್ ಕೊಡ್ಯಾಳ್ ವೆತಾಲಿಂ ಆನಿ ಮಜಾ ಮರ್ತಾಲಿಂ. ಎದೊಳ್ ಪರ್‍ಯಾಂತ್ ಜಿವಿತಾಚಾ ಕಸಲ್ಯಾಚ್ ಸಂಗ್ತ್ಯಾಂ ವಿಶ್ಯಾಂತ್ ಎಸ್ತೆಲಾಕ್ ಕಳಿತ್ ನಾತ್‌ಲ್ಲೆಂ. ಜಿವಿತಾ ಕುಡಾಂತ್ ಘಂಟೆ ಭರ್ ಉಲವ್ನ್ ಬೊಸ್ಚೆಂ ತಿಕಾ ಕಳಿತ್ ಆಸ್‌ಲ್ಲೆಂ ತರೀ ಕೊಣಾ ಕಡೆ ಉಲಯ್ತಾ ಮ್ಹಳ್ಳೆಂ ತಿಣೆಂ ಚಿಂತುಂಕ್‌ಚ್ ನಾ. ಕಿತ್ಯಾಕ್ ಮ್ಹಳ್ಯಾರ್ ದೀಸ್‌ಭರ್ ಜಿವಿತಾ ಭಾಯ್ರ್ ಆಸ್ತಾಲೆಂ ಆನಿ ರಾತಿಂ ಎಸ್ತೆಲ್ ಥಾರ್‍ಯಾರ್ ಆಸಾನಾತ್‌ಲ್ಲೆಂ. ಅಶೆಂ ಮಾಜರ್ ನಾತ್‌ಲ್ಲ್ಯಾ ಘರಾಂತ್ ಉಂದಿರ್ ರಾಜ್ ಚಲಯ್ತಾಲೆ.

ತಿಯೊನ್ ಆಯಿಲ್ಲ್ಯಾ ಉಪ್ರಾಂತ್ ಆಪ್ಲೆಂ ಸ್ವಾತಂತ್ರ್ ಗೆಲ್ಲೆಂ ಸಗ್ಳ್ಯಾಂಚಾಕಿ ಚಡ್ ಜಾವ್ನ್ ಎಸ್ತೆಲಾಕ್ ಸೊಸ್ಲೆಂ ನಾ. ಪಯ್ಲೆ ತರ್ ಆಪ್ಣಾನ್ ಕಿತೆಂಯ್ ಕರಿಜಯ್ ತರ್ ಕೊಣಾಕೀ ಸಾಂಗಾಜಯ್, ವಿಚಾರಿಜಯ್ ಮ್ಹಳ್ಳಿ ಗರ್ಜ್ ನಾತ್‌ಲ್ಲಿ. ತ್ಯಾ ಶಿವಾಯ್ ಘರಾಕ್ ಲತೀಫ್ ತರೀ ಆಪ್ಲ್ಯಾ ವೆಳಾ ಪರ್ಮಾಣೆಂ ಯೆತಾಲೊ. ಪುಣ್ ಆತಾಂ ತಾಕಾ ಪಯ್ಲೆಂಚೆಪರಿಂ ಯೇಂವ್ಕ್ ಜಾಲೆಂ ನಾ ತೆಂ ಪಳೆಲ್ಲ್ಯಾ ಎಸ್ತೆಲಾಚಾ ಮತಿಕ್ ಕಿತೆಂಚ್ ಸುಸ್ತಾಲೆಂನಾ.

ಹೆಂ ಸಗ್ಳೆಂ ಆಪ್ಲ್ಯಾ ಪಿಡೆವರ್ವಿಂ ಜಾಲೆಂ ಮ್ಹಣೊನ್ ತಿಯೊನ್ ಲೆಕ್ಲೆಂ. ಕಾಂಯ್ ಆಪ್ಣಾಚಿ ಪಿಡಾ ಕಳೊನ್ ಆಪ್ಲ್ಯಾ ಬಾಯ್ಲ್ ಭುರ್ಗ್ಯಾಂಚಾ ಖಾಂದ್ಯಾರ್ ಅನ್ಯೇಕ್ ವೊಜೆಂ ಜಾಂವ್ಕ್ ತಿಯೊಕ್ ನಾಕಾಸ್‌ಲ್ಲೆಂ. ತೊ ಗಾಂವಾಕ್ ಕಸೊಯ್ ಆಯಿಲ್ಲೊ ಆನಿ ಹಾಂಗಾ ಆಪ್ಣಾಚಿ ಪಿಡಾ ಖಂಡಿತ್ ಬರಿ ಜಾತೆಲಿ. ಆಪ್ಲ್ಯಾ ರಗ್ತಾಚಾ ವತ್ತಡಾಚಾ ಪಿಡೆಂತ್‌ಗೀ ಯಾ ಸೊರೊ ಪಿಯೆವ್ನ್ ಸವಯ್ ನಾಸ್ತಾಂನಾ ಅಶೆಂ ಘಡ್ಲೆಂ ಮ್ಹಳ್ಲೆಂ ಕಳ್ಳೆಂನಾ ತರೀ ಘಡ್‌ಲ್ಲೆಂ ಚಿಂತುನ್ ತಾಚೆಂ ಮನ್ ಕರ್ಗಾಲೆಂ. ತರೀ ತಾಚಾ ಮತಿಂತ್ ಜೊಯೆಲ್ ಆಮಾಲ್ ಸೆಂವ್ಚೆಂ ಕಿತ್ಯಾಕ್‌ಗೀ ನಾಕಾ ನಾಕಾ ಮ್ಹಳ್ಯಾರೀ ಆಯ್ಲೆಂ. ತಾಕಾ ಪಾತ್ಯೆಂವ್ಕ್ ಕಶ್ಟ್ ಮಾರ್ಲೆ ತರೀ ಆತಾಂ ಪಾತ್ಯೆಲ್ಲೆಶಿವಾಯ್ ದುಸ್ರಿ ವಾಟ್ ತಾಕಾ ನಾತ್‌ಲ್ಲಿ. ತರೀ ಕಾಂಯ್ ಕಾಳ್ಕಾಯ್ ರೋಗ್ ಆಸ್ಚಾಂಕ್ ಲೋಕ್ ಸಗ್ಳೊ ಹಳ್ಧುವೊ ದಿಸ್ತಾಲೊ ಮ್ಹಳ್ಳೆಪರಿಂ ತಾಕಾ ಭೊಗ್ಲೆಂ. ಕಾಂಯ್ ಆಪ್ಣಾನ್ ಸೊರೊ ಚಡ್ ಪಿಯೆಲ್ಲೆವರ್ವಿಂ ತಶೆಂ ದಿಸ್ಲೆಂ ಜಾಯ್ಜಯ್ ಮ್ಹಣೊನ್ ತಿಯೊನ್ ಲೆಕ್ಲೆಂ.

ಸಕಾಳಿಂ ಉಟೊನ್ ತಾಕಾ ಆಜ್ ಮಾರ್ಕುಚಾ ಘರಾ ವಚೊಂಕ್ ಆಸ್‌ಲ್ಲೆಂ. ದೆಖುನ್ ಪಯ್ಲೆಂ ಬೆಂಕಾಕ್ ವಚೊನ್ ಆಪ್ಲ್ಯಾ ಹಾತಾಂತ್ ಆಸ್ಚೆ ಪೊಯ್ಶೆ ಆಪ್ಲ್ಯಾ ಎಕಾಂವ್ಟಾಕ್ ಜಮೊ ಕರುನ್ ಉಪ್ರಾಂತ್ ಮಾರ್ಕುನ್ ದಿಲ್ಲೆಂ ಲ್ಹಾನ್ ಪಾರ್ಸೆಲ್ ತಾಂಚಾ ಘರಾಕ್ ಪಾವಿತ್ ಕರುಂಕ್ ಆಸ್‌ಲ್ಲೆಂ. ತ್ಯಾ ಶಿವಾಯ್ ಮಾರ್ಕುಚಾ ಘರಾ ಎದೊಳ್‌ಚ್ ಮಾರ್ಕುನ್ ಫೋನ್ ಕರ್ನ್ ಸಾಂಗ್‌ಲ್ಲೆಂ ದೆಖುನ್ ರುಕಾಚಾ ಮಿಲ್ಲಾಂತ್ ಕಾಮ್ ಕರ್ಚೊ ತಾಚೊ ದಾಟ್ಟು ಘರಾಂತ್‌ಚ್ ಆಸ್‌ಲ್ಲೊ ಆನಿ ತಿಯೊಕ್ ರಾಕ್ತಾಲೊ. ತ್ಯಾ ಉಪ್ರಾಂತ್ ಕೊಡ್ಯಾಳಾಕ್ ವಚೊನ್ ಡೊಕ್ಟರಾಕ್ ಮೆಳೊನ್ ಆಪ್ಣಾಚಿ ತಪಾಸ್ಣಿಂ ಕರ್ಚಿ ಮ್ಹಳ್ಳೆಂ ಚಿಂತುನ್ ತೊ ಉಟ್ಲೊ.

ಬೆಂಕಾಕ್ ಯೇವ್ನ್ ಆಪ್ಲಿ ವಳೊಕ್ ಸಾಂಗ್ತಚ್ ಮೆನೆಜರಾನ್ ತಿಯೊಕ್ ಸಂತೊಸಾನ್ ಆಪ್ಲ್ಯಾ ಕುಡಾಕ್ ವೆಲೊ. ತಿಯೊನ್ ಆಪ್ಣಾಸವೆಂ ಹಾಡ್‌ಲ್ಲೆ ಸಗ್ಳೆ ಪೊಯ್ಶೆ ಎಕಾಂವ್ಟಾಂತ್ ಜಮೊ ಕೆಲೆ. ಲಗ್‌ಬಗ್ ದೇಡ್ ಲಾಖ್ ರುಪಯ್ ತಾಂತುಂ ಆಸ್‌ಲ್ಲೆ.

ಆನಿ ಮೆನೆಜರಾನ್ ಹಾಡವ್ನ್ ದಿಲ್ಲಿ ಚಾ ಪಿಯೆತಾನಾ ಮೆನೆಜರಾನ್ ಆಂಗ್ಡಿ ಖಾತಿರ್ ಕಾಡ್‌ಲ್ಲ್ಯಾ ಲೊನಾ ವಿಶ್ಯಾಂತ್ ಉಲಂವ್ಕ್ ಧರ್ಲೆಂ.

"ಕಸೊ ಚಲ್ತಾ ವ್ಯಾರ್ ಮಿ.ತಿಯಾದೊರ್? ತುಜೆರ್ ಬೆಂಕಾಕ್ ಆಸ್‌ಲ್ಲ್ಯಾ ಪಾತ್ಯೆಣೆಂತ್ ಎದೊಳ್ ಬೆಂಕಾನ್ ಕಾಂಯ್ ಕಾನೂನ್ ಕ್ರಮ್ ಹಾತಿಂ ಘೆಂವ್ಕ್ ನಾ. ತುಜಾ ನಾಂವಾರ್ ತ್ಯಾ ಆಂಗ್ಡಿ ಖಾತಿರ್ ತುಜಾ ಬಾಯ್ಲೆನ್ ಘೆತ್‌ಲ್ಲೆಂ ದೋನ್ ಲಾಕ್ ರುಪ್ಯಾಂತ್ ತುವೆಂ ಎದೊಳ್ ದೋನ್ ಪಾವ್ಟಿಂ ಭರ್‌ಲ್ಲೆ ಪಾಂತೀಸ್ ಹಜಾರ್ ಮಾತ್ರ್ ಶಿವಾಯ್ ವಾಡ್ ಮೆಳೊನ್ ಆತಾಂ ತುಕಾ ಏಕ್ ಲಾಖ್ ನೊವೊದ್ ಹಜಾರ್ ಭರುಂಕ್ ಪಡ್ತೆಲೆ, ತೆ ತುಂ ಎಕಾಚ್ಚ್ ಕಂತಾನ್ ಭರ್ಶಿ ತರ್ ತುಕಾ ಬಿಜ್ನೆಸ್ ಲೊನಾಚಾ ಲೆಖಾರ್ ಮ್ಹಣೊನ್ ಕಾಂಯ್ ಧಾ ಹಜಾರ್ ಉಣೆಂ ಕರ್ಯೆತ್."

ತಿಯೊ ಕಾಲುಬುಲೊ ಜಾಲೊ. ಮೆನೆಜರ್ ಆಪ್ಣಾಲಾಗಿಂ ಉಲಯ್ತಾಗೀ ಯಾ ಕೊಣಾಲಾಗಿಂ ಮ್ಹಳ್ಳೆಂ ತಾಕಾಚ್ ಸುಸ್ತಾಲೆಂ ನಾ. ಆಂಗಡ್? ಆಪ್ಣಾಚಿ? ಲೋನ್?

"ತುಂ ಕಿತೆಂ ಉಲಯ್ತಾಯ್ ಮೆನೆಜರ್ ಸಾಯ್ಭಾ? ಮ್ಹಾಕಾ ಎಕೀ ಸಮ್ಜಾನಾ. ಖಂಚೆಂ ಲೋನ್? ಖಂಚಿ ಆಂಗಡ್?"

"ತುಂ ವಿಸ್ರಲೊಯ್ ಮಿ.ತಿಯಾದೊರ್? ತುಜಾ ಖುಶೆಪ್ರಕಾರ್ ತುಜಿ ಯೆಜ್ಮಾನ್ ಯೇವ್ನ್ ಘರಾಕ್ ಕಾಡ್‌ಲ್ಲೆಂ ಲೋನ್ ಫಾರಿಕ್ ಕರ್ನ್ ಉಪ್ರಾಂತ್ ಏಕ್ ಅಂಗಡ್ ಮೊಲಾಕ್ ಘೆಂವ್ಕ್ ಆಸಾ ಮ್ಹಣೊನ್ ದೋನ್ ಲಾಖ್ ರುಪ್ಯಾಂಚೆಂ ಲೋನ್ ಕಾಡ್ನ್ ಗೆಲ್ಲಿ? ದೋನ್ ತೀನ್ ಮಯ್ನ್ಯಾಂನಿ ತುಂ ಇಲ್ಲೆ ಇಲ್ಲೆ ಫಾರಿಕ್ ಕರ್ಶಿ ಮ್ಹಣೊನ್ ಚಿಂತುನ್ ಬೆಂಕಾನ್ ಲೋನ್ ದಿಲೆಂ. ತ್ಯಾ ಶಿವಾಯ್ ತುಜೆರ್ ಆಸ್‌ಲ್ಲ್ಯಾ ಪಾತ್ಯೆಣೆಂತ್ ತೆಂ ಲೋನ್ ದಿಲ್ಲೆಂ. ಪುಣ್ ತುಕಾ ದೋನ್ ವರ್ಸಾಂ ಜಾಲಿಂ ತರೀ ಬೆಂಕಾನ್ ಕಾಂಯ್ ತ್ರಾಸ್ ದೀಂವ್ಕ್ ನಾಂತ್. ಉಪ್ರಾಂತ್ ತುವೆಂ ಧಾಡ್‌ಲ್ಲೆ ಪೊಯ್ಶೆ, ಏಕ್ ಪಾವ್ಟಿಂ ವೀಸ್ ಹಜಾರ್ ಆನ್ಯೇಕ್ ಪಾವ್ಟಿಂ ಪಂದ್ರಾ ಹಜಾರ್ ಮಾತ್ರ್ ತುಜಾ ಬಾಯ್ಲೆನ್ ಮಿ.ಲತೀಫಾಕ್ ಧಾಡ್ನ್ ಭರ್ಲೆ. ವಾಡ್ ಸೊಡ್ನ್ ಅನಿಕೀ ಏಕ್ ಲಾಕ್ ಸಾಟ್ ಆನಿ ಪಾಂಚ್ ಹಜಾರ್ ಭರುಂಕ್ ಉರ್ಲ್ಯಾತ್ ಮ್ಹಳ್ಳೆಂ ಭೋವ್ಶಾ ತುಂ ವಿಸ್ರಲಾಯ್."

ತಿಯೊಚಾ ತಕ್ಲೆರ್ ಘಡ್ಗಡೊ ಪಡ್‌ಲ್ಲೆಪರಿಂ ಜಾಲೆಂ. ತರ್ ಲತೀಫಾನ್ ಅಂಗಡ್ ಘಾಲ್ಯಾ ಎಸ್ತೆಲಾಚಾ ಪೊಯ್ಶ್ಯಾಂತ್? ಆನಿ ಎಸ್ತೆಲಾನ್ ಆಪ್ಲ್ಯಾ ನಾಂವಾರ್ ಲೋನ್ ಘೆವ್ನ್ ತಾಕಾ ಪೊಯ್ಶೆ ದಿಲ್ಯಾತ್? ಕಿತೆಂ ತರೀ ಘುಟ್ಮಳ್ ಆಸಾ ಹಾಂತುಂ. ಖಂಚಾಕೀ ಎಸ್ತೆಲಾಕ್ ಮೆಳೊನ್ ಸಮ್ಜೊಂವ್ಚೆಂ ಬರೆಂ ಮ್ಹಳ್ಳೆಂ ತಿಯೊಕ್ ಸುಸ್ತಾಲೆಂ. ತೊ ಕಿತೆಂಚ್ ಉಲಯ್ಲೊ ನಾ. ಥಂಯ್ಚೊ ಉಟೊನ್ ಭಾಯ್ರ್ ಆಯ್ಲೊ. ತಾಚಾ ಖಾಂದ್ಯಾರ್ ಇತ್ಲೆಂ ವಡ್ ವೊಜೆಂ ಆಯ್ಲೆಂ ಮ್ಹಳ್ಳೆಂ ಭೊಗಾತ್ ತಾಕಾ ಕಿತ್ಯಾಕ್‌ಗೀ ಅಸ್ಕತ್ ಕರಿಲಾಗ್ಲೆಂ. ಥಂಯ್ ಥಾವ್ನ್ ತೊ ಶೀದಾ ಮಾರ್ಕುಚಾ ಘರಾ ಗೆಲೊ.

ದನ್ಪಾರ್ ಲಾಗಿಂ ಆಯಿಲ್ಲೊ. ತಿಯೊನ್ ಯೆಂವ್ಚಿ ನಖ್ಖಿ ಖಬಾರ್ ಆಸ್‌ಲ್ಲ್ಯಾನ್ ಎದೊಳ್‌ಚ್ ಘರ್ಚಾ ಬಾಯ್ಲಾಂನಿ ರಾಂದುಂಕ್ ಧರ್‌ಲ್ಲೆಂ. ತ್ಯಾ ಶಿವಾಯ್ ಸಕಾಳ್ ಹಳ್ತಾರ್ ದನ್ಪಾರ್ ಜಾಂವ್ಕ್ ಆಯ್ತೊ ಜಾತಾಲೊ. ತಿಯೊನ್ ಘರಾ ಆಯಿಲ್ಲೆಂ ಪಳೆವ್ನ್ ತೊ ಸಂತೊಸ್ಲೊ. ಮಾರ್ಕುಚಿ ಬಾಯ್ಲ್ ಮೊಗಾಳ್ ಆನಿ ಮಯ್ಪಾಶಿ ಉಲವ್ಣ್ಯಾಚಿ ತಶೆಂಚ್ ದಾಟ್ಟುಚಿ ಬಾಯ್ಲ್‌ಯಿ ಆತಾಂ ತಿಯೊಕ್ ಜೇವ್ನ್ ವಚೊಂಕ್ ಸಳ್ ಕರಿಲಾಗ್ಲಿ, ಅಶೆಂ ಜಾಲ್ಲೆ ವರ್ವಿಂ ತಿಯೊಕ್ ಜೆವ್‌ಲ್ಲೆ ಶಿವಾಯ್ ವಚೊಂಕ್ ತಿಣೆಂ ಸೊಡ್ಲೆಂನಾ. ತಿ ಕುಜ್ನಾಂತ್ ರಿಗೊನ್ ರಾಂದ್ಪಾಚಿ ತಯರಾಯ್ ಕರುಂಕ್ ಪಡ್ಲಿ. ದಾಟ್ಟುನ್ ಎದೊಳ್‌ಚ್ ತಾಂಚಾ ಫ್ರಿಜ್ಜಾಂತ್ ಬಿಯರ್ ದವರ್ಲೆಲಿ. ಪಯ್ಲೆ ಪಾವ್ಟಿಂ ಗಲ್ಫಾ ಥಾವುನ್ ಯೇವ್ನ್ ಘರಾ ಆಯಿಲ್ಲ್ಯಾ ತಿಯೊಕ್ ತಾಣಿಂ ಬಿಯರ್ ವೊತುನ್ ದಿಲಿ. ಆನಿ ಬಿಯರಿಂತ್ ಕಾಂಯ್ ಆಮಾಲ್ ನಾ ಮ್ಹಳ್ಳೆವರ್ವಿಂ ತಾಣೆಂ ತೊ ಗ್ಲಾಸ್ ತೊಂಡಾಕ್ ತೆಂಕ್ಲೊ.

ತಿಯೊ ವಿಶ್ಯಾಂತ್ ದಾಟ್ಟುಕ್ ಆನಿ, ಮಾರ್ಕುಚಾ ಬಾಯ್ಲೆಕ್ ಬರೊ ಅಭಿಪ್ರಾಯ್ ಆನಿ ಗೌರವ್ ಆಸ್‌ಲ್ಲೊ. ತಿಯೊಚಿ ಮಿನತ್ ಆನಿ ಸತ್ತೀ ಮನಾಕ್ ತಿಂ ಮೊಸ್ತ್ ಮಾಂದ್ತಾಲಿಂ. ಮಾರ್ಕು ಸಯ್ತ್ ತವಳ್ ತವಳ್ ತಿಯೊವಿಶ್ಯಾಂತ್ ಫೊನಾರ್ ಉಲಯ್ತಾಲೊ. ಪುಣ್ ಎಸ್ತೆಲಾ ವಿಶ್ಯಾಂತ್ ತಾಂಕಾ ಬರೆಂ ಚಿಂತಾಪ್ ನಾತ್‌ಲ್ಲೆಂ. ದಾಟ್ಟುನ್ ಎಕೆಕ್‌ಚ್ ವಿಶಯ್ ಉಲವ್ನ್ ಅಖ್ರೇಕ್ ಎಸ್ತೆಲಾ ವಿಶ್ಯಾಂತ್ ಉಲಂವ್ಕ್ ಧರ್ಲೆಂ. ಆನಿ ಸವಿಸ್ತಾರ್ ರಿತಿನ್ ತಿಯೊಕ್ ತಾಚಾ ಘರಾಂತ್ ಕಿತೆಂ ಘಡ್ತಾ ಮ್ಹಳ್ಳೆಂ ವಿವರಣ್ ದಿಲೆಂ.

"ಬೆಜಾರ್ ಕರಿನಾಯಾ ತಿಯಾ, ಏಕ್ ವಡ್ ಭಾವ್ ಮ್ಹಳ್ಳೆಪರಿಂ ಮಾತ್ರ್ ತುಕಾ ಹಾವೆಂ ಹೆಂ ಸಾಂಗ್ಲೆಂ ಶಿವಾಯ್ ಹೆರ್ ಕಸಲ್ಯಾಯ್ ಸಂಗ್ತೆಕ್ ಚಿಂತುನ್ ನ್ಹಂಯ್. ಘೊವ್ ಬಾಯ್ಲೆ ಮಧೆಂ ಪಡ್ಚೆಂ ಬರೆಂ ನ್ಹಂಯ್ ಮ್ಹಳ್ಳೆಂ ಹಾಂವ್ ಜಾಣಾಂ. ಪುಣ್ ತುಜಾ ಘರಾಂತ್ ಕಿತೆಂ ಘಡ್ತಾ ಮ್ಹಳ್ಳೆಂ ಸಗ್ಳಿ ಸಮಾಜ್ ಜಾಣಾ. ಪೊಯ್ಶೆ ಯೆತಾತ್ ಆನಿ ವೆತಾತ್ ತಿಯಾ, ಪುಣ್ ಗೆಲ್ಲಿ ಮರ್‍ಯಾದ್ ಪಾಟಿಂ ಯೇನಾ. ದೆಖುನ್ ತುಜಾ ಘರ್ಚಿ ಮರ್‍ಯಾದ್ ರಾಕ್ಚಿ ತುಜಾ ಹಾತಾಂತ್ ಆಸಾ. ತುವೆಂ ಸಾಕ್ರಾಮೆಂತಾಂತ್ ಹಾತ್ ಧರ್‌ಲ್ಲ್ಯಾ ಬಾಯ್ಲೆಕ್ ಸೊಡುಂಕ್ ಜಾಯ್ನಾಂ ಖರೆಂ. ಪುಣ್ ಆತಾಂ ತುವೆಂ ಚತ್ರಾಯೆನ್ ಪಾವ್ಲಾಂ ಕಾಡುಂಕ್ ಆಸಾತ್. ದೆಖುನ್ ಧಯ್ರ್ ಘೆ. ಪಯ್ಲೆಂ ತ್ಯಾ ಮಾಪ್ಳ್ಯಾಕ್ ಆನಿ ತುಜಾ ಬಾಯ್ಲೆಕ್ ಆಸ್ಚಿ ಸಳಾವಳ್ ರಾವಯ್. ಆಮ್ಚೆಂ ಭಾಂಗಾರ್ ಬರೆಂ ಆಸ್ಲ್ಯಾರ್ ಸೊನಾರಾಕ್ ಆಮಿಂ ದುರ್ಸನಾಯೆ. ತಶೆಂ ಆಮ್ಚಿಂ ಮನ್ಶಾಂಚ್ ಪಾವ್ಲಾಂ ಚುಕ್ಲ್ಯಾಂತ್ ಆಸ್ತಾಂ ಹೆರಾಂಕ್ ತಾಂತುಂ ಚುಕಿದಾರ್ ಕರ್ನ್ ಕಿತೆಂ ಉಪ್ಕಾರ್?"

ದಾಟ್ಟುಚಿಂ ಎಕೇಕ್ ಉತ್ರಾಂ ತಿಯೊಚಾ ಮತಿಂತ್ ಘಡ್ಗಡೊ ಜಾವ್ನ್ ಪ್ರತಿಫಲಿತ್ ಜಾಲಿಂ. ತಾಚಾ ಕಪಲಾರ್ ಶೆಳೊ ಘಾಮ್ ಉದೆಲೊ. ತರ್ ಜ್ಯೇ ಕಿತೆಂ ಮಾರ್ಕುನ್ ಆಪ್ಣಾಕ್ ಸಾಂಗ್‌ಲ್ಲೆಂ ತೆಂ ಖರೆಂ? ದೆವಾ, ಹೆಂ ಸತ್ ಜಾಯ್ನಾಂ ಜಾಂವ್, ದೆವಾ ಹೆಂ ಫಟ್ ಕರ್ ದೆವಾ. ಮ್ಹಜಾನ್ ಹೆಂ ಆಯ್ಕೊಂಕ್ ಸಾಧ್ಯ್ ನಾ. ದೆವಾ ಮ್ಹಾಕಾ ತುಂ ರಾಕೊನ್ ವರ್. ತಿಯೊನ್ ಆಪ್ಲೆ ಮತಿ ಭಿತರ್‌ಚ್ ದೆವಾಕ್ ಉಲೊ ದಿಲೊ.

ಪುಣ್ ಜಾಂವ್ಕ್ ಆಸ್ಚೆಂ ಕೊಣಾಯ್ಕೀ ಆಡಾಂವ್ಕ್ ಸಾಧ್ಯ್ ನಾ ತರೀ ಕಾಂಯ್ ಇಲ್ಲೆಂ ಬದ್ಲುಂಕ್ ಪ್ರೇತನ್ ಕರ್ಯೆತ್, ತಶೆಂ ಎದೊಳ್ ಜಾಲ್ಲೆಂ ಸಗ್ಳೆಂ ಆತಾಂ ಪಾಟಿಂ ಕಾಡ್ಚೆಪರಿಂ ನಾತ್‌ಲ್ಲೆಂ. ತಿಯೊಚಿ ಮತ್ ಆತಾಂ ಎಕೆಕಾ ಮಾರಾಂನಿ ಪಿಟೊ ಪಿಟೊ ಜಾಲ್ಲಿ. ಸಗ್ಳಿ ತಾಚಿ ತಕ್ಲಿ ಭೆಸಾಂ ಜಾಲ್ಲೆಪರಿಂ ಭೊಗ್ಲೆಂ.

ಬಿಯೆರೆಚೊ ಏಕ್ ಗ್ಲಾಸ್ ಎದೊಳ್‌ಚ್ ಪಿಯೆವ್ನ್ ಖಾಲಿ ಕೆಲೊ. ಚಡ್ತಿಕ್ ಪಿಯೆವ್ನ್ ಕಾಲ್ ಜಾಲ್ಲೆಪರಿಂ ಕಾಂಯ್ ಘಡ್ಚೆಂ ತಿಯೊಕ್ ನಾಕಾಸ್‌ಲ್ಲ್ಯಾನ್ ತೊ ಚಡ್ತಿತ್ ಕಾಂಯ್ ಉಲಯ್ಲೊನಾ. ತಾಚಾ ಘಾಯೆಲ್ಲ್ಯಾ ಹಾತಾಕ್ ಪಳೆವ್ನ್ ದಾಟ್ಟುನ್ ವಿಚಾರ್ ಕರ್ತಾನಾ ತಿಯೊನ್ 'ಘರ್ಚಾ ಆಂಗ್ಣಾರ್ ನಿಸ್ರೊನ್ ಪಡ್ಲೊ' ಮ್ಹಳ್ಲೆಂ ನೀಬ್ ದಿಲೆಂ ತರೀ ಆತಾಂ ಹ್ಯಾ ಗಿಮೆಂತ್ ನಿಸ್ರೊನ್ ಪಡ್ಚೆಂ ಕಶೆಂ? ಆನಿ ಪಡ್ಲ್ಯಾರೀ ಎಕಾ ಹಾತಾಚಾ ಪಾಟ್ಲ್ಯಾ ಕುಶಿಕ್ ಮಾರ್ ಬೊಸ್ಚೊ ಕಸೊ ಮ್ಹಳ್ಳೆಂ ದಾಟ್ಟುಕ್ ಸಮ್ಜಾಲೆಂ ನಾ. ತರೀ ತಾಣೆಂ ಸಮ್ಜೊಂಕ್ ಪ್ರೇತನ್‌ಯ್ ಕೆಲೆಂನಾ. ಮಾರ್ಕುಚಾ ಬಾಯ್ಲೆನ್ ತಾಕಾ ಕುಲೆರ್ ಹಾಡ್ನ್ ದಿಲೆಂ ಆನಿ ದಾಟ್ಟುಸವೆಂ ಮಾರ್ಕುಚಾ ಬಾಯ್ಲೆನ್ ಆನಿ ದಾಟ್ಟುಚಾ ಬಾಯ್ಲೆನ್ ರಾಂದ್‌ಲ್ಲೆಂ ಜೆವ್ಲೊ ಆನಿ ಉಟಾಉಟಿಂ ಥಂಯ್ಚೊ ಗೆಲೊ.

ತಿಯೊನ್ ಯೇವ್ನ್ ಏಕ್ ದೀಸ್ ಗೆಲ್ಲೆಪರಿಂಚ್ ಎಸ್ತೆಲಾಚಾ ಮತಿಂತ್ ಅಪರಿಚಿತ್ ಚಿಂತ್ನಾಂ ಧೊಸ್ತಾಲಿಂ. ಆಪ್ಲ್ಯಾ ನಾಂವಾರ್ ಕಶೆಯ್ ಇತ್ಲೆ ಪೊಯ್ಶೆ ಆಸಾತ್. ತ್ಯಾ ಶಿವಾಯ್ ಆಪ್ಣಾಕ್ ದೆವಾನ್ ದಿಲ್ಲಿ ಸೊಭಾಯ್ ಎದೊಳ್ ಪರ್‍ಯಾಂತ್ ಆಸ್ತಾನಾ ಕಿತ್ಯಾಕ್ ಆಪ್ಣಾನ್ ಆಪ್ಣಾಕ್ ಜಾಯ್ ಜಾಲ್ಲಿ ಜಿಣಿಂ ವಿಂಚುಂಕ್ ನ್ಹಜೊ? ಭುರ್ಗಿಂ ವ್ಹಡ್ ಜಾಲ್ಯಾಂತ್ ಆನಿ ಫಾಲ್ಯಾಂ ತಾಚಾ ಫುಡಾರಾಕ್ ಪಾವ್ತಾತ್ ಆನಿ ಹಾಂವ್ ಉಪ್ರಾಂತ್ ತೆಚ್ಚ್ ಪಿಡೇಸ್ತ್, ಮಾತಾರ್‍ಯಾ ಘೊವಾಸವೆಂ ಜಿಯೆಂವ್ಚೆಂ ಕಶೆಂ ಮ್ಹಳ್ಳಿಂ ಚಿಂತ್ನಾಂ ಆಯ್ಲಿಂ. ಬೆಂಕಾಚೆಂ ಲೋನ್ ಎದೊಳೀ ಲತೀಫಾನ್ ಭರುಂಕ್ ನಾತ್‌ಲ್ಲೆಂ, ತ್ಯಾ ಶಿವಾಯ್ ಮೆನೆಜರಾರ್ ಸಭಾರ್ ಫಟಿಂಚಿಂ ಸಾಂಕಳ್ ಘುಂತುನ್ ಕಶೆಂಯ್ ಫಟಯ್ಲಾಂ. ಕಾಂಯ್ ಪಾಂತೀಸ್ ಹಜಾರ್ ರುಪಯ್ ಮಾತ್ರ್ ಭರ್ಲ್ಯಾತ್ ಪುಣ್ ತ್ಯಾ ಶಿವಾಯ್ ಎದೊಳ್‌ಚ್ ಗಾಂವ್ಚಾ ಸಭಾರಾಂಕ್ ಘುಟ್ ಕಳಿತ್ ಆಸ್‌ಲ್ಲ್ಯಾನ್ ತಿಯೊಚಾ ಕಾನಾಂಕ್ ಪಡ್ಲ್ಯಾರ್ ಆಪ್ಣಾಕ್ ಕಿತೆಂ ಕರಿತ್ ಮ್ಹಳ್ಳೆಂ ಕಳಿತ್ ನಾ, ಪುಣ್ ಆಪ್ಣಾಕ್ ಖಂಡಿತ್ ಬಚಾವಿ ಆಸ್ಚಿನಾ. ತಾಚಾ ಪಯ್ಲೆಂಚ್ ಕಾಂಯ್ ಆಪ್ಣಾನ್ ಧಾಂವ್ಣಿಂ ಮಾರ್ಲಿ ತರ್ ಬರಿ ಆಸ್‌ಲ್ಲಿ. ಪುಣ್ ಕಿತೆಂ ಕರುಂಕೀ ತಿಕಾ ಆತಾಂ ಕಳ್ಳೆಂ ನಾ.

ದೆಕುನ್ ದುಸ್ರೆ ದೀಸ್ ತಿಯೊ ಭಾಯ್ರ್ ಗೆಲ್ಲೊಚ್ ತಿಣೆ ಲತೀಫಾಕ್ ಫೋನ್ ಕೆಲೊ ಆನಿ ತುರ್ತಾನ್ ಉಲಂವ್ಕ್ ಆಪಯ್ಲೊ. ಕಾಲ್ ಸೊರೊ ಪಿಯೆವ್ನ್ ಕಾಂಯ್ ಘೊವ್ ಬಾಯ್ಲಾಂ ಝಗ್ಡೊನ್ ಪಡ್ಲಿಂಗಾಯ್ ಮ್ಹಳ್ಳೊ ದುಬಾವ್ ಮತಿಂತ್ ಧರುನ್ ಆಯಿಲ್ಲ್ಯಾ ಲತೀಫಾಕ್ ಬೊಸೊಂಕ್ ಕರುನ್ ಎಸ್ತೆಲಾನ್ ಸಾಂಗ್ಲೆಂ.

"ಲತೀಫ್, ಎದೊಳ್ ಪರ್‍ಯಾಂತ್ ಆಮಿಂ ಚಿಂತ್‌ಲ್ಲೆಪರಿಂ ಮ್ಹಜೊ ಘೊವ್ ಗಲ್ಫಾಕ್ ಪಾಟಿಂ ವೆಚಾರ್ ನಾ. ತ್ಯಾ ಶಿವಾಯ್ ತೊ ಘರಾಂತ್ ಆಸ್ತಾನಾ ಆಮಿಂ ಅಶೆಂ ಸದಾಂ ಘರಾ ಭಾಯ್ರ್ ಮೆಳೊಂಕೀ ಜಾಂವ್ಚೆಂನಾ. ದೆಖುನ್ ಆಮಿಂ ಆತಾಂ ಆಮ್ಚಾ ಜಿಣ್ಯೆವಿಶ್ಯಾಂತ್ ಚಿಂತ್ಚಿ ಗರ್ಜ್ ಆಸಾ. ತುಜೆಖಾತಿರ್ ಹಾಂವ್ ಕಿತೆಂಯ್ ಕರುಂಕ್ ತಯಾರ್ ಆಸಾಂ. ಪುಣ್ ಮಾಕಾ ತುಜೊ ಮೋಗ್ ಜಾಯ್."

ಲತೀಫಾಕ್ ಎದೊಳ್ ಪರ್‍ಯಾಂತ್ ಅಸಲಿಂ ಉತ್ರಾಂ ಉಲಂವ್ಕ್ ನಾತ್‌ಲ್ಲ್ಯಾ ಎಸ್ತೆಲಾ ವಯ್ರ್ ಅಜಾಪ್ ಜಾಲೆಂ. ತಾಣೆಂ ಎದೊಳ್ ಸಭಾರ್ ಪಾವ್ಟಿಂ ಎಸ್ತೆಲಾಕ್ ಧಯ್ರ್ ದಿಲ್ಲೆಂ ಆಸಾ "ತುಕಾ ಕಾಂಯ್ ಚಡ್‌ಉಣೆಂ ಜಾಯ್ತ್ ತರೀ ಹಾಂವ್ ಆಸಾಂ, ಹಾಂವ್ ತುಕಾ ಸೋಡ್ನ್ ಘಾಲಿಸೊನಾ. ಹಾಂವ್ ತುಕಾ ಆಪ್ಲ್ಯಾ ಘರಾ ಆಪವ್ನ್ ವರ್ತಾಂ, ಗರ್ಜ್ ಪಡ್ಲ್ಯಾರ್ ತುಜೆ ಖಾತಿರ್ ಹಾಂವ್ ಗಾಂವ್ ಸೊಡ್ನ್ ಯೇಂವ್ಕೀ ತಯಾರ್ ಆಸಾಂ" ಮಣೊನ್ ಸಾಂಗ್‌ಲ್ಲೆಂ ವಯ್. ಪುಣ್ ತಿಂ ಫಕತ್ ಉತ್ರಾಂ ಜಾವ್ನಾಸ್‌ಲ್ಲಿಂ. ಆನಿ ಆತಾಂ ತೆಂಚ್ ಖರೆಂ ಜಾಯ್ತ್ ಮ್ಹಣೊನ್ ತಾಣೆಂ ಸ್ವಪ್ಣಾಂತೀ ಚಿಂತುಂಕ್ ನಾತ್‌ಲ್ಲೆಂ. ತಾಣೆಂ ಬುದ್ವಂತ್ಕಾಯ್ ಎದೊಳ್‌ಚ್ ಖರ್ಚಿಲ್ಲಿ, ಆನಿ ದೆಖುನ್ ತೆಂ ಲೋನ್ ತಾಣೆಂ ತಿಯೊಚಾ ನಾಂವಾರ್ ಘೆತ್‌ಲ್ಲೆಂ ಶಿವಾಯ್ ಆಪ್ಣಾಚಾ ನಾಂವಾರ್ ಘೆಂವ್ಕ್ ನಾ.

"ಲತೀಫ್, ಮ್ಹಕಾ ವಾಂಚಯ್ ಲತೀಫ್, ಮ್ಹಜೊ ಘೊವ್ ಆಮ್ಚೆವಿಶಿಂ ಸಮ್ಜಲ್ಯಾರ್ ಆಮ್ಕಾಂ ವಾಂಚೊಂಕ್ ಆಸ್ಚೆಂನಾ. ದೆಖುನ್ ಮ್ಹಾಕಾ ಭ್ಯೆಂ ದಿಸ್ತಾ. ಆಮಿಂ ಹಾಂಗಾಚೊ ಗಾಂವ್ ಸೊಡ್ನ್ ಯಾ, ಮ್ಹಜಾ ನಾಂವಾರ್‌ಯಿ ಇಲ್ಲೆ ಪೊಯ್ಶೆ ಆಸಾತ್, ತೆ ಆಮ್ಕಾಂ ಪುರೊ. ದೆಖುನ್ ದಯಕರ್ನ್ ಮ್ಹಕಾ ಘೆವ್ನ್ ವಚ್, ಆನಿ ಆಮಿಂ ಪಯ್ಸ್ ವಚೊನ್ ಸಾಂಗಾತಾ ಜಿಯೆವ್ಯಾಂ."

"ತುಂ ಕಿತೆಂ ಉಲಯ್ತಾಯ್? ಹೆಂ ಕಶೆಂ ಸಾಧ್ಯ್ ಆಸ್ಚೆಂ? ತುಂ ಏಕ್ ಕಾಜಾರಿಂ ಬಾಯ್ಲ್ ಆನಿ ತುಕಾ ದೊಗಾಂ ಭುರ್ಗಿಂ ಸಯ್ತ್ ಆಸಾತ್ ಆನಿ ಹಾಂವ್ ಆನಿ ತುಂ ಸಾಂಗಾತಾ ಜಿಯೆಂವ್ಕ್ ಕಶೆಂ ಸಾಧ್ಯ್?"

ಏಕ್ ಘಡಿ ಎಸ್ತೆಲ್ ಕಾಂಯ್ ಆಪ್ಣಾಕ್ ಲತೀಫ್ ತುಕ್ಲಾಯ್ತಾಗೀ ಯಾ ಆಪ್ಣಾಚಿ ಪರೀಕ್ಶಾ ಕರ್ತಾಗಿ ಮ್ಹಳ್ಳೆಂ ಭೊಗಾಪ್ ಆಯ್ಲೆಂ.

"ಲತೀಫ್, ಹೊ ವೇಳ್ ಖುಶಾಲಾಯೆಚೊ ವೇಳ್ ನ್ಹಂಯ್ ದೆಖುನ್ ಜೆಂ ಕಿತೆಂ ಹಾಂವ್ ಸಾಂಗ್ತಾಂ ತೆಂ ಹಾಂವ್ ನಿಜಾಯ್ಕೀ ಚಿಂತುನ್ ಆಸ್ಚೆಂಚ್. ಎದೊಳ್ ಪರ್‍ಯಾಂತ್ ಪಯ್ಸ್ ಆಸ್‌ಲ್ಲ್ಯಾಂತ್ ಹೆಂ ಚಿಂತಾಪ್ ಆಮ್ಕಾಂ ಚಿಂತುಂಕ್ ಜಾಲ್ಲೆಂನಾ. ಪುಣ್ ಆತಾಂಯ್ ಕಾಂಯ್ ವೇಳ್ ಉತ್ರೊಂಕ್ ನಾ. ದೆಖುನ್ ಹ್ಯೇ ವಿಶಿಂ ಆಮಿಂ ಎಕಾ ನಿರ್ಧಾರಾಕ್ ಯೆವ್ಯಾಂ."

ಲತೀಫಾಚಾ ತೊಂಡಾಚೊ ಜಿನೊಸ್ ತಸೊಚ್ ಆಸ್‌ಲ್ಲೊ. "ನಾ ಮಿಸೆಸ್ ರೊಜಾರಿಯೊ, ಹಾಂವ್ ಕಾಂಯ್ ಖುಶಾಲಾಯ್ ಉಲಯ್ನಾ, ಜೆಂ ಹಾಂವ್ ಉಲಯ್ಲಾಂ ಯಾ ಉಲಯ್ತಾಂ ತೆಂ ಸತ್ ಜಾವ್ನಾಸಾ. ಹಾಂತುಂ ಚಿಂತುಂಕ್ ಕಿತೆಂ ಆಸಾ? ಎದೊಳ್‌ಚಿ ಜಿಣಿ ಆಮಿಂ ಸದ್ದ್ಯಾಕ್ ವಿಸ್ರೊಂಚಿ ಬರಿ.."

ಆಯ್ಕೊನ್ ಎಸ್ತೆಲ್ ಉದ್ರೇಕಿತ್ ಜಾಲೆಂ. ತಾಚಾ ಗಳ್ಯಾಚೊ ಶಿರೊ ಉಟೊನ್ ತಿಚೆಂ ರಗ್ತಾ ವತ್ತಡ್ ಚಡೊನ್ ಆಯ್ಲೆಂ.

"ಕಿತೆಂ? ಹಾಂವ್ ಕಾಜಾರಿ ಬಾಯ್ಲ್ ಮ್ಹಳ್ಳೆಂ ತುಕಾ ಪಯ್ಲೆಂ ಕಳಿತ್ ನಾತ್‌ಲ್ಲೆಂ? ಮ್ಹಾಕಾ ಭುರ್ಗಿಂ ಪಯ್ಲೆಂ ನಾತ್‌ಲ್ಲಿಂ? ತರ್ ತುಂವೆ ಮ್ಹಾಕಾ ಖಂಚಾ ಅರ್ಥಾನ್ ಭಾಸ್ ದಿಲ್ಲಿಯ್? ಕಶ್ಟಾಂತ್ ಆಕಾಂತಾಂತ್ ಸೋಡ್ನ್ ಘಾಲಿಸೊನಾ ಮ್ಹಣೊನ್ ಸಾಂಗ್ಲೆಂಯ್? ತರ್ ಮ್ಹಜೆಸವೆಂ ಗರ್ಜ್ ಪಡ್ಲಿ ತರ್ ಗಾಂವ್ ಸೋಡ್ನ್ ವಚೊಂಕೀ ತಯಾರ್ ಆಸಾಂ ಮ್ಹಣೊನ್ ತುವೆಂ ದಿಲ್ಲಿ ಭಾಸ್ ಬನಾವಟ್?" ಎಸ್ತೆಲಾಚಾ ಉತ್ರಾಂನಿ ಆತಾಂ ಉಜೊ ಘುಸ್ಲೊ.

"ತುಂ ಸಮ್ಜೊನ್ ಘೆ ಮಿಸೆಸ್ ರೊಜಾರಿಯೊ, ಜ್ಯೆ ಕಿತೆಂ ಆಮ್ಚೆ ಮಧೆಂ ಘಡ್ಲಾಂ ತಿ ಫಕತ್ ಮ್ಹಜಿ ವಿಂಚವ್ಣ್ ನ್ಹಂಯ್ ಆಸ್‌ಲ್ಲಿ. ತಾಂತು ತುಜೊ ಆನಿ ಮ್ಹಜೊ ಸಮಾಸಮ್ ವಾಂಟೊ ಆಸಾ. ದೆಖುನ್ ಘಡ್‌ಲ್ಲೆಂ ಸಗ್ಳೆಂ ಮ್ಹಜಾ ಮಾತ್ಯಾರ್ ಥಾಪುಂಕ್ ಪಳೆನಾಕಾ. ತುಕಾ ಹಾ೦ವೆಂ ಭಾಸ್ ದಿಲ್ಲಿ ವಯ್ ಪುಣ್ ಆತಾಂ ತಿ ಪರಿಗತ್ ಬದ್ಲಾಲ್ಯಾ. ಮ್ಹಾಕಾ ಆತಾಂ ಮ್ಹಜೊಚ್ ರಾಟಾವಳ್ಯೊ ಚಡ್ಲ್ಯಾತ್ ದೆಖುನ್ ತುವೆಂ ಚಿಂತ್ಚೆಂ ಮ್ಹಜಾನ್ ಅಸಾಧ್ಯ್. ತುವೆಂ ತುಜಿ ಜಿಣಿಂ ಜಿಯೆಲ್ಲೆಪರಿಂ ಆತಾಂ ಮ್ಹಾಕಾ ಮ್ಹಜಿ ಜಿಣಿ ಜಿಯೆಂವ್ಕ್ ಸೊಡ್."

ಉಚಾಂಬಳ್ ಜಾಂವ್ನ್ ಯೇವ್ವ್ಚಾ ಲಾರಾಂಕ್ ರಾಂವಂವ್ಕ್ ಪ್ರೇತನ್ ಕರ್ಚಾ ತಡಿಪರಿಂ ಲತೀಫಾಚಿಂ ಉತ್ರಾಂ ಎಸ್ತೆಲಾಕ್ ಪಿಸಾಂತುರ್ ಕರಿಲಾಗ್ಲಿಂ. ತಿಕಾ ಆತಾಂ ಕಿತೆಂ ಕರ್ಚೆಂ ಮ್ಹಳ್ಳೆಂ ಸಯ್ತ್ ಕಳ್ಳೆಂನಾ. ಹೊ ಲತೀಫ್ ಇತ್ಲೊ ಬೆಮಾಣ್ ಜಾಯ್ತ್ ಮ್ಹಳ್ಳೆಂ ತಿಚಾ ಮತಿಂತ್ ಎದೊಳ್ ತಿಣೆಂ ಚಿಂತ್‌ಲ್ಲೆಂಚ್ ನಾ.

"ಲತೀಫ್, ಪಳೆ ಹಿ ಗಜಾಲ್ ತಿಯೊಕ್ ಕಳತ್ ತರ್ ಉಪ್ರಾಂತ್ ಮ್ಹಾಕಾ ಸತ್ ಸಾಂಗಾಜಯ್ ಪಡ್ತೆಲೆಂ. ಆನಿ ತೆಂ ಸತ್ ಜಾಣಾ ಜಾಲ್ಯಾರ್ ಉಪ್ರಾಂತ್ ತಿಯೊ ತುಕಾ ಕಿತೆಂ ವಿಚಾರ್ ಕರ್ತಲೊ ಮ್ಹಳ್ಳೆಂ ಸಮ್ಜೊನ್ ಘೆ."

ಆತಾಂ ಎಸ್ತೆಲಾನ್ ಇಲೆಂ ಭೆಶ್ಟಾಂವ್ಕ್ ಚಿಂತ್ಲೆಂ.

"ಕಿತೆಂ ಮ್ಹಣೋನ್ ಸಾಂಗ್ತೆಲೆಂಯ್? ಖಂಚೆಂ ಸೊಡ್ತೆಲೆಂಯ್? ಮ್ಹಜೆಲಾಗಿಂ ದಿಸಾನ್‌ದೀಸ್ ಸೊರೊ ಹಾಡವ್ನ್ ಪಿಯೆಲ್ಲೆಂ? ಮ್ಹಜೆಸವೆಂ ಘರಾ ಭಿತರ್ ಆನಿ ತಶೆಂಚ್ ಘರಾ ಭಾಯ್ರ್ ಖರ್ಚಿಲ್ಲ್ಯಾ ವೆಳಾ ವಿಶ್ಯಾಂತ್? ಅಲಂಗಾರ್ ತುಜಾ ನಾಂವಾರ್ ಜಮೊ ಆಸ್ಚಾ ಪೊಯ್ಶ್ಯಾಂ ವಿಶ್ಯಾಂತ್? ಯಾ ತುವೆಂ ಬೆಂಕಾಂತ್ ಘೆತ್‌ಲ್ಲ್ಯಾ ಲೊನಾ ವಿಶ್ಯಾಂತ್?" ಲತೀಫಾನ್ ತಿಚೆಂಚ್ ಆಯ್ದ್ ವಾಪಾರ್ಲೆಂ.

ಆತಾಂ ಎಸ್ತೆಲ್ ಕಾತ್ರೆಂತ್ ಶಿರ್ಕಾಲ್ಲೆಂ.

"ತರ್ ತುಕಾ ಆತಾಂ ಶಿಕಯ್ತಾಂ ಬೂದ್, ಅಲಂಗಾರ್ ಆಸ್ಚೆ ಪೊಯ್ಶೆ ತೆ ಹಾಂವ್ ತಾಕಾಚ್ ದಿತೆಲಿಂ. ಪುಣ್ ತೆಂ ಲೋನ್ ಘೆತ್‌ಲ್ಲೆಂ ತುಜೆಖಾತಿರ್, ತೆ ತುಕಾ ಆತಾಂ ಫಾರಿಕ್ ಕರುಂಕ್ ಪಡ್ತೆಲೆಂ"

"ತೆಂ ತುಂ ಆನಿ ಹಾಂವ್ ಮಾತ್ರ್ ಜಾಣಾಂವ್. ಪುಣ್ ತಿ ಆಂಗಡ್ ಮ್ಹಜಿ, ತಿ ಚಲಂವ್ಚಿ ಹಾಂವೆ೦, ತಾಕಾ ತುವೆಂ ಇಲ್ಲಿ ಕುಮೊಕ್ ಕೆಲ್ಲಿಯ್ ಪುಣ್ ತಿ ಸಗ್ಳಿ ತುಜಾ ಸೊರ್‍ಯಾವರ್ವಿಂ ಎದೊಳ್‌ಚ್ಚ್ ವಸೂಲ್ ಜಾಲ್ಯಾ. ಖಂಚಾ ಲೊನಾ ವಿಶ್ಯಾಂತ್ ಉಲಯ್ತಾಯ್ ತುಂ?"

ಲತೀಫ್ ಇತ್ಲೊ ಹಲ್ಕಟ್ ಜಾಯ್ತ್ ಮ್ಹಣೊನ್ ಎಸ್ತೆಲಾನ್ ಸ್ವಪ್ಣಾಂತೀ ಚಿಂತುಂಕ್ ನಾ. ಚೊರಾಂಕ್ ಮಾತ್ರ್ ಚೊರಾಂಚೊ ಸಹವಾಸ್ ರುಚ್ತಾ ಮ್ಹಳ್ಳೆಪರಿಂ ಆತಾಂ ಎಸ್ತೆಲಾಕ್ ಆಪ್ಣಾನ್ ಬರೊ ಮ್ಹಣೊನ್ ಲೆಕ್‌ಲ್ಲೊ ಲತೀಫ್ ಇತ್ಲೊ ಕಾಸಾಪ್ಪಿ ಜಾಲ್ಲೊ ಪಳೆತಾನಾ ಉರುಲ್ಲಿ ಏಕ್‌ಚ್ ವಾಟ್, ವಿನತೆಚಿ.

ಸಭಾರ್ ವೇಳ್ ದೊಗಾಂಯ್ ಉಲಯ್ಲಿಂನಾಂತ್. ಎಸ್ತೆಲಾಕ್ ಥಂಯ್ ಬೊಸೊಂಕೀ ನ್ಹಂಯ್, ಥಂಯ್ಚೆಂ ಉಟೊಂಕೀ ನ್ಹಂಯ್ ಮ್ಹಳ್ಳೆಪರಿಂ ಭೊಗ್ಲೆಂ.

"ಲತೀಫ್, ದಯಾಕರ್ನ್ ಮ್ಹಾಕಾ ಘಾತ್ ಕರಿನಾಕಾ, ತುಜೆರ್ ಹಾಂವ್ ಪಾತ್ಯೆವ್ನ್ ನಂಯ್ಗೀ ತುಕಾ ಇತ್ತುನ್ ಪರ್‍ಯಾಂತ್ ಆಪ್ಣಾಚೊ ಕರ್ನ್ ಘೆತ್‌ಲ್ಲೊ? ತುಜೊ ಮೋಗ್ ಕೆಲ್ಲೊ? ಮ್ಹಜಾ ಘೊವಾಕ್ ಸಯ್ತ್ ಫ಼ಟಯ್ಲೊ ಆನಿ ತುಜಾ ಹರ್‍ಯೆಕಾ ಖುಶೆಕ್ ಹಾಂವೆ೦ ಖಾಲ್ತಿಮಾನ್ ಘಾಲೊ. ಆನಿ ಆತಾಂ ಮ್ಹಜಾ ಕಶ್ಟಾಂಚಾ ವೆಳಾರ್ ತುಂ ಮ್ಹಾಕಾ ಕಿತ್ಯಾಕ್ ಆಶೆಂ ಕಶ್ಟ್ ದಿತಾಯ್? ದಯಾಕರ್ನ್ ಘಾತ್ಕಿ ಜಾಯ್ನಾಕಾ. ಮ್ಹಾಕಾ ತುಂ ಘಾತ್ ಕರ್‍ಶಿ ತರ್ ತುಜಾ ಜಿಣ್ಯೆಂತ್‌ಯಿ ತುಕಾ ಕೋಣ್ ನಾಂ ತರ್ ಕೋಣ್ ಪುಣೀಂ ಘಾತ್ ಕರ್ತೆಲಿಂ ಮ್ಹಳ್ಳೆಂ ಉಡಾಸ್ ದವರ್" ಎಸ್ತೆಲಾಚಾ ತಾಳ್ಯಾಂತ್ ವಿನತಿ ಆಸ್‌ಲ್ಲಿ.

"ಮಿಸೆಸ್ ರೊಜಾರಿಯೊ, ಭೋವ್ಶಾ ಆಮ್ಚಾ ಸಂಭಂದಾಂತ್ �ಘಾತ್� ಮ್ಹಳ್ಳ್ಯಾ ಸಬ್ದಾಚೊ ಉಪ್ಯೋಗ್ ಕರಿನಾತ್ಲ್ಯಾರ್ ಬರೆಂ. ಕಿತ್ಯಾಕ್ ಮ್ಹಳ್ಳೆಂ ತುಂಚ್ ತುಕಾ ವಿಚಾರ್ ಕರ್. ಕೊಣೆಂ ಕೊಣಾಕ್ ಘಾತ್ ಕೆಲ್ಲೊ? ಹಾಂವೆ ತುಕಾ? ಯಾ ತುವೆಂ ತುಜಾ ಘೊವಾಕ್? ಜೀಣ್‌ಭರ್ ಸುಃಖಾಂತ್ ಆನಿ ದುಃಖಾಂತ್ ಸಾಂಗಾತ್ ದಿತಾಂ ಮ್ಹಣೊನ್ ಭಾಸ್ ದಿಲ್ಲಿ ತುವೆಂ ಯಾ ಹಾಂವೆ? ಹಾಂವ್ ತುಮ್ಗೆರ್ ಯೇವ್ನ್ ಚೂಕ್ ಕೆಲಿ ಮ್ಹಳ್ಳೆಂ ಚಿಂತಾಪ್ ಯೇವ್ನ್ ಯೇನಾಸ್ತಾಂ ರಾವ್‌ಲ್ಲ್ಯಾ ಮ್ಹಾಕಾ ಕೊಣೆಂ ಆಪವ್ನ್ ಧಾಡ್ಲೊ? ಆನಿ ತುಜಾ ಆನಿ ತುಜಾ ಕುಟ್ಮಾಚಾ ಹರ್‍ಯೆಕಾ ಗರ್ಜೆಕ್ ಹಾಂವ್ ಪಾವ್ಲಾಂ ಆನಿ ಮ್ಹಾಕಾ ಘಾತ್ಕಿ ಮ್ಹಣೊನ್ ವೊಲಾಂವ್ಕ್ ತುಕಾ ಕಸಲೆಂ ಹಕ್ಕ್ ಆಸಾ?"

೧೧೧ಆಸ್ಚೊ ಸಗ್ಳ್ಯೊ ವಾಟೊ ಆತಾಂ ಎಸ್ತೆಲಾಕ್ ಬಂಧ್ ಜಾಲ್ಯಾತ್ ಮ್ಹಳ್ಳೆಂ ಕಳೊನ್ ಆಯ್ಲೆಂ. ತಿಣೆಂ ಸರ್ವ್ ರಿತಿನ್ ಲತೀಫಾಕ್ ಭುಲಂವ್ಕ್ ಆನಿ ನಾಡುಂಕ್ ಪ್ರೇತನ್ ಕೆಲೆಂ ತರೀ ನಿರ್ಫಳ್. ಅಬ್ಲೇಸ್ಪಣ್ ದಾಕವ್ನ್, ಧಮ್ಕುನ್, ವಿನತಿ ಕರುನ್. ಪುಣ್ ತಿನಾಂತೀ ಲತೀಫ್ ಜಿಕ್‌ಲ್ಲೊ. ಘಾತ್ಕ್ಯಾಂಕ್ ಘಾತ್‌ಚ್ ಪಾಟಿಂ ಮೆಳ್‌ಲ್ಲೊ. ತಲ್ವಾರ್ ಧರ್ಚಾಕ್ ತಾಲ್ವಾರ್‌ಚ್ ಪಳೆಂವ್ಕ್ ಮೆಳ್‌ಲ್ಲಿ.

ಆತಾಂ ಕಿತೆಂ ಕರ್‍ಚೆಂ? ಮ್ಹಳ್ಳೆಂ ಚಿಂತುನ್ ಆಸ್ತಾಂಚ್ ತೆಂ ಥಂಯ್ಚೆಂ ಉಟ್ಲೆಂ.

ಆತಾಂ ಎಸ್ತೆಲಾಕ್ ಕಸಲಿ ವಾಟ್ ಉರ್ಲ್ಯಾ? ಕಾಂಯ್ ಆಪ್ಲ್ಯಾ ಘೊವಾಕ್ ಕಳತ್ ತರ್ ಮ್ಹಳ್ಳೆಂ ಚಿಂತಾಪ್ ಎದೊಳ್ ಪರ್‍ಯಾಂತ್ ಎಸ್ತೆಲಾಚಾ ಮತಿಂತ್ ಕಿತ್ಯಾಕ್ ಯೇಂವ್ಕ್ ನಾ ಮ್ಹಳ್ಳೆಂ ಎಸ್ತೆಲಾಕ್‌ಚ್ ಕಳ್ಳೆಂನಾ. ಆತಾಂ ಎಸ್ತೆಲಾಕ್ ಉರುಲ್ಲ್ಯೊ ವಾಟೊ ಖಂಚೊ? 'ಎಕ್‌ಚ್ ತಿಯೊಕ್ ಕಾಂಯ್ ಕಳ್ಚೆಂನಾ' ಯಾ ಕಳತ್ ತರ್ ಆಪ್ಣಾಕ್ ತೊ ಜಿವೆಶಿಂ ಮಾರುಂಕ್‌ಯ್ ಆಸಾ. ಕಿತ್ಯಾಕ್ ಮ್ಹಳ್ಯಾರ್ ಆಪ್ಣಾನ್ ಕೆಲ್ಲೊ ಗುನ್ಯಾಂವ್ ಇತ್ಲೊ ವಡ್‌ಕೀ ಹಾಕಾ ಮರಣ್ ಮೆಳ್ಳೆಂ ತರೀ ಉಣೆಂಚ್. ಯಾ ಕಾಂಯ್ ಆಪ್ಣಾಕ್ ಜೀವ್ಘಾತ್ ಕರಿಜಾಯ್ ಪಡತ್? ನಾ ತಾಂತುಂ ನಾಲಿಸಾಯ್, ಆಪ್ಣಾಕ್ ನಾಲಿಸಾಯ್, ಆಪ್ಲ್ಯಾ ಕುಟ್ಮಾಕ್ ನಾಲಿಸಾಯ್.

ನಾಲಿಸಾಯ್??? ಕುಟ್ಮಾಕ್ ನಾಲಿಸಾಯ್??? ಎಸ್ತೆಲಾಚಾ ಮತಿಭಿತರ್ ಹೆಂ ಚಿಂತಾಪ್ ಎಕಾ ಸವಾಲಾ ಭಾಶೆನ್ ಕಶೆಂ ಆಯ್ಲೆಂ ಮ್ಹಳ್ಳೆಂ ಎಸ್ತೆಲಾಕ್ ಕಳ್ಳೆಂನಾ. ಎದೊಳ್ ಪರ್‍ಯಾಂತ್ 'ಆಪ್ಲ್ಯಾ' ಕುಟ್ಮಾವಿಶ್ಯಾಂತ್ ಯಾ ಎಕಾ 'ಕುಟ್ಮಾವಿಶ್ಯಾಂತ್' ಚಿಂತ್‌ಲೆಂಚ್ ನಾ ಆಸ್ತಾಂ ಆತಾಂ ಕಶೆಂ ಎಕ್‌ಚ್ ಪಾವ್ಟಿಂ ಅಸಲೆಂ ಚಿಂತಾಂಪ್ ಆಯ್ಲೆಂ? ಸೆಜಾರಾ ಕಳೊನ್, ಆಪ್ಲ್ಯಾ ಘರ್ಚಾಂಕ್ ಕಳೊನ್ ನಾಲಿಸಾಯ್ ಭೊಗ್ಚಾಕೀ ತಾಚಾ ಪಯ್ಲೆಂ ಎಕ್‌ಚ್ ಆಪ್ಣಾನ್ ಆಪ್ಲಿ ಚೂಕ್ ವಳ್ಕೊನ್ ತಿಯೊಚೆ ಪಾಂಯ್ ಧರುನ್ ಮಾಫ್ ಮಾಗಾಜಯ್. ಯಾ ಕಿತೆಂಚ್ ಜಾಂವ್ಕ್ ನಾತ್‌ಲ್ಲೆಪರಿಂ ಚಿಂತುನ್ ಜೆಂ ಜಾಂವ್ಕ್ ಆಸಾ ತೆಂ ಜಾಂವ್ದಿ ಮ್ಹಣೊನ್ ಜಿಯೆಜಯ್. ಪುಣ್ ಖಂಚೆಂ ಕರುಂಕೀ ಎಸ್ತೆಲಾಕ್ ಆತಾಂ ಸುಸ್ತಾಲೆಂನಾ.

ಲತೀಫಾಚೆರ್ ತಿಕಾ ಎಕಾ ಥರಾಚೊ ಕಾಂಠಾಳೊ ಆಯ್ಲೊ.

"ಬರೆಂ ತರ್, ತುಂ ಆಯ್ಚಾನ್ ಹಾಂಗಾ ಯೇನಾಕಾ, ತುಜೊ ಆನಿ ಆಮ್ಚೆ ಮಧ್ಲೊ ಸಂಬಂಧ್ ಸಂಪ್ಲೊ ಮ್ಹಣೊನ್ ತುಂ ಚೀಂತ್" ಎಸ್ತೆಲಾಚಿಂ ಉತ್ರಾಂ ಅಖೇರ್ ಜಾಂವ್ಚಾಧಿಂಚ್ ಉಟ್‌ಲ್ಲೊ ಲತೀಫ್ ಆಯ್ಲೆಂ ಬಾಯ್ಕ್ ಚಾಲು ಕರ್ನ್ ಥಂಯ್ಚೊ ಗೆಲೊ.

ಎದೊಳ್ ಪರ್‍ಯಾಂತ್ ಎಸ್ತೆಲಾನ್ ಜಿಯೆಲ್ಲ್ಯಾ ಜಿಣ್ಯೆಂತ್ ಆಸ್‌ಲ್ಲೊ ಅಬ್ಲೇಸ್ಪಣಾಚೊ ವಾಂಟೊ ಆತಾಂ ವಡ್ಲೊ ರಾಕ್ಕೊನ್ ಜಾಲ್ಲೊ. ಪುಣ್ ಹಿ ಸಂಗತ್ ಇತ್ತುನ್ ಪಾವತ್ ಮ್ಹಳ್ಳೆಂ ಕೊಣೆಂ ಚಿಂತ್‌ಲ್ಲೆಂ? ಎಸ್ತೆಲಾನ್ ಫಕತ್ ಆಪ್ಲ್ಯಾ ಕುಡಿಕ್ ಆಯ್ಕಾಲ್ಲೆಂ ಶಿವಾಯ್ ಅತ್ಮ್ಯಾಕ್ ನ್ಹಂಯ್. ವೊಡ್ಣ್ಯಾಂಕ್ ಆಯ್ಕಾಲ್ಲೆಂ ಶಿವಾಯ್ ಸ್ಪಿರಿತಾಕ್ ನ್ಹಂಯ್. ತಿಯೊ ಪರ್ಗಾಂವಾಂತ್ ಆಸ್ತಾನಾ ಘರಾಚ್ ಆಪ್ಲ್ಯಾ ಪಾಶಾಂವಾಚಿ ತಾನ್ ಭಾಗಂವ್ನ್ ಜಿಯೆವ್ನ್ ಜಾಲ್ಲಿ ಸವಯ್ ಆತಾಂ ತಿಯೊಚಾ ಯೆಣ್ಯಾಉಪ್ರಾಂತ್ ಹೆಂ ಘರ್ ಎಕಾ ಜಯ್ಲಾಪರಿಂ ಭೊಗೊನ್ ಆಯಿಲೆಂ. ಉದಾಕ್ ಪಾವ್ಸ್ ಯೇನಾತ್‌ಲ್ಲಿ ರೆಂವೆಚಾ ಗಾಂವಾಪರಿಂ ಭೊಗ್ಲೆಂ. ಆನಿ ಭಾಯ್ರ್ ವಚೊಂಕ್ ಸಯ್ತ್ ಧಯ್ರ್ ಆಯ್ಲೆಂ. ಪುಣ್ ಹೆಂ ಸಗ್ಳೆಂ ಧಯ್ರ್ ದಿಲ್ಲೊ ಮನಿಸ್ ಇತ್ಲೊ ಕಾಸಾಪ್ಪಿ? ಆನಿ ತ್ಯಾ ಕಾಸಾಪ್ಪಿಚೆರ್ ಆಪ್ಲೊ ಭರ್‍ವಸೊ ದವರ್ನ್ ಆಸ್ಚಿಂ ಆಪುಣ್ ಕಿತ್ಲಿಂ ಬುದ್ವಂತ್? ಮ್ಹಳ್ಳಿಂ ಎಕಾ ಪಾಟ್ಲಿಂ ಏಕ್ ಸವಾಲಾಂ ಯೇವ್ನ್ ಎಸ್ತೆಲಾಕ್ ದೆದೆಸ್ಪ್ರಾರ್ ಕರಿಲಾಗ್ಲಿಂ.

ಎಕಾ ಘಡ್ಯೆ ತಿಕಾ ತಿಚೆರ್ ಲಜ್ ಆಯ್ಲಿ. ಆಪುಣ್ ಪ್ರಾಯೆನ್ ಇತ್ಲಿಂ ವಡ್ ಜಾವ್ನ್ ಅಸಲೆಂ ಕೀಳ್ ಕಾಮ್ ಕರುಂಕ್ ಚಿಂತುನ್ ಆಯಿಲ್ಲ್ಯಾಚೊ ಕಾಂಠಾಳೊ ಆಯ್ಲೊ. ಎದೊಳ್ ಪರ್‍ಯಾಂತ್ ಆಪ್ಲ್ಯಾ ಸತ್ತಿ ಘೊವಾಕ್ ಪಯ್ಸ್ ದವರ್ನ್ ಸಾರ್‌ಲ್ಲೆಂ ಜಿವಿತ್ ತರ್ ಏಕ್ ಪಾತ್ಕಾಚೆಂ ಕೋಂಡ್ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್ ಮ್ಹಣೊನ್ ತಿಕಾ ಆತಾಂ ಸುಸ್ತಾಲೆಂ. ತ್ಯಾ ಶಿವಾಯ್ ಸೆಜಾರಾ ಝಗ್ಡೆಂ, ನಾಲಿಸಾಯ್, ಖಬ್ರೊ, ಭುರ್ಗ್ಯಾಂಕ್ ವಾಯ್ಟ್ ದೇಖ್, ಎಕೇಕ್ ಚಿಂತ್ನಾಂ ಯೆತಾನಾ ಎಸ್ತೆಲಾಕ್ ನಿರಾಶಾ ಆನಿ ದೂಃಖ್ ಉಮಾಳೊನ್ ಆಯ್ಲೆಂ.

ಮುಖಾರ್‍ಸಿಲಾಂ...

Tags: Vally Quadras,e konkani novel, Konkani, Mangalore, Mangalorean, Mother Tongue

From around the world

ಪಾಟಿಂ ಗಾಂವಾಕ್ - ಅವಸ್ವರ್ 25

Post your comments

ಅವಸ್ವರ್ 1

ಅವಸ್ವರ್ 2

ಅವಸ್ವರ್ 3

ಅವಸ್ವರ್ 4

ಅವಸ್ವರ್ 5

ಅವಸ್ವರ್ 6

ಅವಸ್ವರ್ 7

ಅವಸ್ವರ್ 8

ಅವಸ್ವರ್ 9

ಅವಸ್ವರ್ 10

ಅವಸ್ವರ್ 11

ಅವಸ್ವರ್ 12

ಅವಸ್ವರ್ 13

ಅವಸ್ವರ್ 14

ಅವಸ್ವರ್ 15

ಅವಸ್ವರ್ 16

ಅವಸ್ವರ್ 17

ಅವಸ್ವರ್ 18

ಅವಸ್ವರ್ 19

ಅವಸ್ವರ್ 20

ಅವಸ್ವರ್ 21

ಅವಸ್ವರ್ 22

ಅವಸ್ವರ್ 23

ಅವಸ್ವರ್ 24

ಅವಸ್ವರ್ 25

ಅವಸ್ವರ್ 26

ಅವಸ್ವರ್ 27

ಅವಸ್ವರ್ 28

Connect

Our Address
Mangalore

Our Address
Udupi

Our Address
Dubai

From around the world

Post your comments

Connect

Our AddressMangalore

Our AddressUdupi

Our AddressDubai

Our Address
Mangalore

Our Address
Udupi

Our Address
Dubai