:: ಮಾಯ್ ಭಾಸ್

ಹೆಂ ಸಗ್ಳೆಂ ಆಯ್ಕೊನ್ ಎಕಾ ಕೊನ್ಶಾಕ್ ವಗೊಚ್ ಆಸ್ಚೊ ವಿವೇಕ್ ಹ್ಯಾ ವಿಚಾರಾಂಕ್ ವಿರೋಧ್ ಆಸ್‌ಲ್ಲೊ.

"ಜಿಣ್ಯೆಂತ್ ಕಂಚೇಂಯ್ ಬರೆಂ ಯಾ ವಾಯ್ಟ್ ಮ್ಹಳ್ಳೆಂ ತಾಚಾ ಚಿಂತ್ಪಾಚೆರ್ ಹೊಂದ್ವೊನ್ ಆಸ್ತಾ. ನಿರಾಶೆಚೆಂ ವೋಕ್ಲ್ ದೊಳ್ಯಾಂಕ್ ಲಾವ್ನ್ ಪಳೆಲ್ಯಾರ್ ಸಂಸಾರ್ ಸಗ್ಳೊ ನಿರಾಶೆಚಾ ಕೊಂಡಾಂತ್ ಬುಡ್‌ಲ್ಲೊ ದಿಸ್ತಾ. ಪುಣ್ ತೊಚ್ಚ್ ಸಂಸಾರ್ ಆಶೆಚಾ ವೊಕ್ಲಾಕ್ ದವರ್ಲ್ಯಾರ್ ದುಸ್ರೊಚ್ ದಿಸ್ತಾ. ಕೊಣೀಂ ಮನಿಸ್ ಜಲ್ಮಾಥಾವ್ನ್ ಬರೊ ಯಾ ಪಾಡ್ ಮ್ಹಣೊನ್ ಜಲ್ಮಾನಾ. ತೊ ಬರೊ ಯಾ ಪಾಡ್ ಉಪ್ರಾಂತ್ ತಾಣೆಂ ಸಂಸಾರಾಕ್ ದೆಖ್ಚಾ ರಿತಿರ್ ಜಾತಾ. ಬರಿಂ ಚಿಂತ್ನಾಂ ಚಿಂತ್ಚಾಕ್ ಸಗ್ಳೆಂ ಬರೆಂಚ್ ದಿಸ್ತಾ ಆನಿ ತೊ ಬರೆಂಚ್ ಕರ್ತಾ. ಪಾಡ್ ಚಿಂತ್ಚಾಂಕ್ ಸಗ್ಳೆಂ ಪಾಡ್ ದಿಸ್ತಾ ಆನಿ ಸಗ್ಳ್ಯಾಂಚೊ ಕರ್ನ್ಯೊ ಪಾಡ್‌ಚ್ ದಿಸ್ತಾತ್. ಕೊಣಾಯ್ಚಾಯ್ ಘರಾಕ್ ಎಕ್ಲೊ ಪರ್ಕಿ ಮನಿಸ್ ಆಯ್ಲೊ ತರ್, ತೊ ಮನಿಸ್ ಬರೊ ತರ್ ತ್ಯಾ ಪರ್ಕ್ಯಾಕ್ ತೊ ಕಿತ್ಲೊ ಪಾಡ್ ಮನಿಸ್ ತರೀ ತಾಕಾ ಬರೊ ಮ್ಹಣ್೦ಚ್ ಲೆಕ್ತಾ. ತಶೆಂಚ್ ಹೊ ಮನಿಸ್ ಪಾಡ್ ತರ್ ತಾಚಾ ಘರಾ ಕಿತ್ಲೊ ಬರೊ ಮನಿಸ್ ಯೇತ್ ತರೀ ತಾಕಾ ತೊ ಪಾಡ್ ನದ್ರೆಂತ್‌ಚ್ ಪಳೆತಾ."

ಹಿ ಆಸ್ಪತ್ರ್ ಆನಿ ಎಕಾ ಖಟ್ಲ್ಯಾರ್ ಪಡೊನ್ ಆಸ್ಚಾ ಬದ್ಲಾಕ್ ಹಾಂಗಾಸರ್ ತತ್ವಾಂ, ತರ್ಕಾಂ, ವಿಚಾರ್ ಎಕಾಮೆಕಾ ಆಶಾರ್ ಪಾಶಾರ್ ಜಾತಾಲೆ. ಆನಿ ಆಯ್ಕೊಂವ್ಚಾ ತಿಯೊಚಾ ಕಳ್ಜಾಂತ್ ಗೂಂಡ್ ಬೊಸ್ತಾಲೆಂ. ತಾಕಾ ಅಸಲೆಂ ಉಲವ್ಣೆಂ ಆಯ್ಕತಾನಾ ತಾಚಾ ಗಲ್ಫಾಂತ್ಲ್ಯಾ ಸಾಂಗಾತ್ಯಾಂಚೊ ಉಡಾಸ್ ಯೆತಾಲೊ. ಪ್ರತ್ಯೇಕ್ ಜಾವ್ನ್ ಗೋಪಿಚೊ.

ಆಸ್ಪತ್ರೆಕ್ ಯೆಂವ್ಚಾ ಎಸ್ತೆಲಾಕ್ ಕಶೆಂ ಕಶೆಂ ಉಲಂವ್ಕ್ ಚಿಂತ್ಲ್ಯಾರೀ ತಿಯೊ ಉಲಯ್ನಾತ್‌ಲ್ಲೊ ಏಕ್ ಮಿಸ್ತೆರಾ ಭಾಶೆಂತ್ ದಿಸ್ತಾಲೆಂ. ಎಸ್ತೆಲ್ ಜಾವ್ನ್ ಭುರ್ಗಿಂ ಪರೀಕ್ಷಾ ಆಸ್‌ಲ್ಲ್ಯಾನ್ ಲಿಸಾಂವಾಂತ್ ಮೆತೆರ್ ಆಸಾತ್ ದೆಖುನ್ ಮ್ಹಜೆಸವೆಂ ತಾಂಕಾ ಯೇಂವ್ಕ್ ಜಾವ್ನಾ ಮ್ಹಣೊನ್ ಎಸ್ತೆಲಾನ್ ಸಾಂಗ್ಲೆಂ ತರೀ ತಿಯೊಚಾ ತೊಂಡಾಂತೂನ್ ಎಕೀ ಉತಾರ್ ಆಯ್ಲೆಂನಾ. ತ್ಯಾ ಶಿವಾಯ್ ತ್ಯಾ ಕುಡಾಂತ್ ಹೆರ್ ದೋಗ್ ಪಿಡೇಸ್ತ್ ಆಸ್‌ಲ್ಲ್ಯಾನ್ ಎಸ್ತೆಲಾಕ್‌ಯಿ ಚಡ್ ಸಳ್ ಕರುಂಕ್ ಸಾಧ್ಯ್ ನಾತ್‌ಲ್ಲೆಂ. ತ್ಯಾ ಶಿವಾಯ್ ತಿಯೊಕ್ ಸವಲಾಂ ಕರುನ್ ತಾಚಾ ಮತಿಕ್ ವಿರಾರ್ ಕರುಂಕ್‌ಯಿ ಮನ್ ನಾತ್‌ಲ್ಲೆಂ.

ತಿಯೊಕ್ ಆತಾಂ ಕೊಣಾಚೆರ್‌ಚ್ ರಾಗ್ ನಾತ್‌ಲ್ಲೊ. ಮನಸ್ತಾಪ್ ನಾತ್‌ಲ್ಲೊ. ತಾಚಾ ವಾಂಟ್ಯಾಚಿ ಜಿಣಿ ತಾಕಾ ಫಾವೊ ಜಾಲ್ಲಿ ತಿ ತಾಣೆಂಚ್ ಜಿಯೆಯ್ಜಾಯ್ ಆಸ್‌ಲ್ಲಿ. ಅಪ್ಲ್ಯಾ ನಶೀಬಾಂತ್ ಆಸ್‌ಲ್ಲೆಂ ಚುಕಂವ್ಕ್ ಕೊಣಾಯ್ಕೀ ಜಾಯ್ನಾಂ ಮ್ಹಳ್ಳೆಂ ಸತ್ ತಿಯೊ ಎದೊಳ್ ಹೆರಾಂಚಿ ಜಿಣಿಂ ಪಳೆವ್ನ್ ಆನಿ ಆತಾಂ ತಾಚಿ ಆಪ್ಲಿ ಜಿಣಿ ಪಳೆವ್ನ್ ಸಮ್ಜಾಲ್ಲೊ. ಪುಣ್ ತಾಚಾ ಜಿಣ್ಯೆಂತ್ ಏಕ್ ತೊ ಏಕ್ ವಾತ್ ಜಾವ್ನ್ ಪೆಟೊಂಕ್ ಆಶೆತಾಲೊ. ಜಿ ವಾತ್ ಆಪ್ಣಾಕ್ ಜಳವ್ನ್ ತರೀ ಹೆರಾಂಕ್ ಉಜ್ವಾಡ್ ದಿಂವ್ಚಿಂ. ಜಿ ವಾತ್ ಹೆರಾಂಕ್ ಉಜ್ವಾಡ್ ಫಾಂಕಯ್ತಾ ತರೀ ಆಪ್ಲ್ಯಾ ಭಂವಾರಿಂ ಕಾಳೊಕ್ ದವರ್ತಾ.

ಆಸ್ಪತ್ರೆಂತ್ ಆಸ್ಚೊ ತಿಯೊ ಆತಾಂ ಫಕತ್ ಮತಿ ಭಿತರ್ ಆಪ್ಣಾಲಾಗಿಂ ಉಲಂವ್ಕ್ ಲಾಗ್ಲೊ. ಬಾಯ್ಲ್, ಭುರ್ಗಿಂ, ಆಸ್ತ್ ಬದಿಕ್ ಹ್ಯಾ ಸಗ್ಳ್ಯಾ ಸಂಗ್ತ್ಯಾಚೆರ್ ತಾಕಾ ಕಸಲೊಗೀ ಕಾಂಠಾಳೊ ಆಯ್ಲೊ. ಸಂಸಾರಾಂತ್ ಸಗ್ಳೆ ಸಂಬಂಧ್ ಅಸ್ಥಿರ್ ಮ್ಹಳ್ಳೆಂ ಭೊಗಾಪ್ ತಾಕಾ ಆಯ್ಲೆಂ. ತಾಚಾ ಕುಡಾಂತ್ ಆಸ್ಚೊ ವಿವೇಕ್ ಆಪ್ಲ್ಯಾ ದೊನೀಂ ಕಿಡ್ನಿಚಾ ಪಿಡೆಂತ್ ವಳ್ವಳ್ತಾಲೊ. ತರೀ ತೊ ಕೋಣ್? ತಾಚಿ ಜಾತ್ ಖಂಚಿ? ಮ್ಹಳ್ಳೆಂ ಕಳಿತ್ ನಾತ್ಲ್ಯಾರೀ ಯೇವ್ನ್ ತಿಯೊಕ್ ಸಾಂಭಾಳ್ತಾಲೊ. ಕಸಲೊ ಬಾಂಧ್ ಮ್ಹಳ್ಳೊ ತಾಂಕಾಂಚ್ ಕಳಿತ್ ನಾತ್‌ಲ್ಲೊ.

ತಿಯೊಚಾ ಕುಡಾಂತ್ ಆಸ್ಚೆ ಹೆರ್ ದೋಗ್ ಪಿಡೇಸ್ತ್ ಕಾಂಯ್ ತಿಯೊಪ್ರಾಸ್ ಬರೆ ನಾತ್‌ಲ್ಲೆ. ಎಕಾಮೆಕಾ ತೆ ಆಪ್ಲೇಸ್ತಕಿಂ ಚಿಂತುನ್ ಆಸ್‌ಲ್ಲೆ ಆಪ್ಲ್ಯಾ ಜಿಣ್ಯೆಂತ್ ಮಾತ್ರ್ ಕಶ್ಟ್ ಆಸಾತ್ ಮ್ಹಣೊನ್ ತರೀ ಹಕೀಕತೆಂತ್ ಸಗ್ಳ್ಯಾಂಚಾ ಜಿಣ್ಯೆಚಿ ಕಾಣಿ ಎಕ್‌ಚ್. ವಿವೇಕ್ ಬಾವ್ಡೊ ಘರಾಂತ್ ಆಸ್ಚಾ ಎಕ್ಲ್ಯಾ ಪಿಡೇಸ್ತ್ ಆವಯ್ಕ್ ತಿಚಾ ಉತರ್ ಪ್ರಾಯೆರ್ ಕಿತೆಂಚ್ ಕರುಂಕ್ ಸಕ್ಚಾಧಿಂಚ್ ತಾಕಾ ತಾಚಾ ಕಿಡ್ನೆಚಾ ಪಿಡೆವರ್ವಿಂ ಆಸ್ಪತ್ರೆಕ್ ಯೇವ್ನ್ ರಾವೊಂಕ್ ಪಡ್ಲೆಂ. ತಾಚಾ ಜಿಣ್ಯೆಚೊ ಕಸ್ಲೊಚ್ ಭರ್ವಸೊ ತಾಕಾ ನಾತ್‌ಲ್ಲೊ. ಕೆನ್ನಾ ಮರಣ್ ಯೆತಾ ಮ್ಹಳ್ಲೆಂಯ್ ತೊ ನೆಣಾಸ್‌ಲ್ಲೊ. ಪೊಸ್ಟಾಂತ್ ಪೆದೊ ಜಾವ್ನ್ ತಾಚೊ ಬಾಪುಯ್ ಕಾಮ್ ಕರ್ನ್ ಆಸ್‌ಲ್ಲ್ಯಾನ್ ತಾಚಾ ಮರ್ಣಾ ಉಪ್ರಾಂತ್ ಯೆಂವ್ಚಾ ಪೆನ್ಶಾನಾಂತ್ ತಾಂಚೆ ಘರಾಣೆಂ ಚಲ್ತಾಲೆಂ. ಪುಣ್ ಕೆನ್ಸರಾಚಾ ಪಿಡೆಂತ್ ವಳ್ವಳ್ಚಾ ತಾಚಾ ಆವಯ್ಕ್ ತಿಚಾ ಮರ್ಣಾಚಾಕೀ ಚಡ್ ಜಾವ್ನ್ ಆಪ್ಲ್ಯಾ ಪುತಾನ್ ವಾ೦ಸ್ಚೆಂ ಚಡ್ ಗರ್ಜೆಚೆಂ ಜಾಲ್ಲೆಂ. ಕಸಲಿ ಪಿಡಾ ಮ್ಹಳ್ಳೆಂ ಕಳಿತ್ ನಾತ್‌ಲ್ಲ್ಯಾ ತ್ಯಾ ವಿವೇಕಾಕ್ ಆಸ್ಪತ್ರೆಂತ್ ಯೆತೆಚ್ ಕಳ್ಳೆಂಗೀ ಆಪ್ಲ್ಯೊ ಕಿಡ್ನ್ಯೊ ಆನಿ ಚಡ್ ತೇಂಪ್ ಕಾಮ್ ಕರಿನಾಂತ್ ಮ್ಹಳ್ಳೆಂ. ತಾಣೆಂ ಸಗ್ಳೊ ಭರ್ವಸೊ ದೆವಾಚೆರ್ ಸೊಡ್‌ಲ್ಲೊ ತಾಕಾ ವಾಂಸ್ಚೊ ಕಸ್ಲೊಚ್ ಭರ್ವಸೊ ನಾತ್‌ಲ್ಲೊ. ದೆಖುನ್ ಜಿವಂತ್ ಆಸ್ತಾನಾ ಖರ್ಚುಂಚೊ ಹರ್ಯೆಕ್ ದೀಸ್, ಹೆರಾಂಚಾ ಗರ್ಜೆಕ್ ಪಾಂವೊಂಕ್ ಜಾಯ್ ಮ್ಹಳ್ಳಿ ಖತ್ಕತಿ ಆಶಾ ಘೆವ್ನ್ ತೊ ಜಿಯೆತಾಲೊ.

ತಾಂಚಾ ಕುಡಾಂತ್ ಆಸ್ಚೊ ತಿಸ್ರೊ ಇಲ್ಲೊ ಉತರ್ ಪ್ರಾಯೆಚೊ ಮನಿಸ್. ದೋನ್ ದಿಸಾಂಕ್ ಏಕ್ ಪಾವ್ಟಿಂ ಎಕೆಕ್ಲಿಂ ಯೇವ್ನ್ ತಾಕಾ ವಕ್ತಾಕ್ ಆನಿ ಫಳಾರ್ ಹಾಡ್ನ್ ದಿತಾಲಿಂ. ಉಪ್ರಾಂತ್ ತಾಚಿ ಕಾಣಿ ತಾಣೆಂಚ್ ಸಾಂಗ್ತಾನಾ ಪಾತ್ಯೆಂವ್ಕ್ ಕಶ್ಟ್ ಮಾರ್ತಾಲೆಂ ತರೀ ಸತ್ ತೆಂ ಸತ್‌ಚ್.

"ಮ್ಹಾಕಾ ತೆಗಾಂ ಭುರ್ಗಿಂ. ದೊಗಾಂ ಚೆಡ್ವಾಂ ಆನಿ ಏಕ್ ಚೆಡೊ. ಮ್ಹಜಿ ಬಾಯ್ಲ್ ಮೊರ್‍ತೆರ್ ಮ್ಹಜಾ ಭುರ್ಗ್ಯಾಂಚಾ ಫುಡಾರಾ ಖಾತಿರ್ ಹಾಂವ್ ಕಾಜಾರ್ ಜಾಲ್ಲೊನಾ. ಕಾಂಯ್ ಲ್ಹಾಲ್ಹಾನ್ ಆಸ್ಚಾ ಮ್ಹಜಾ ಭುರ್ಗ್ಯಾಂಚೆರ್ ಮ್ಹಜಿ ಮುಕ್ಲಿ ಬಾಯ್ಲ್ ಕಾಂಯ್ ಅನೀತ್ ಕರಿತ್ ತರ್ ಮ್ಹಜಾ ಭುರ್ಗ್ಯಾಂಚೊ ಗೋಳ್ ಮ್ಹಜೆರ್ ಭೆಜ್ತಲೊ ಮ್ಹಣೊನ್ ಹಾಂವ್ ಆಂಕ್ವಾರ್‌ಚ್ ಉರ್ಲೊಂ. ಹಾಂವ್ ಎಕಾ ಖಾಸ್ಗಿ ಮಿಲ್ಲಾಂತ್ ಬರೆಂ ಕಾಮ್ ಕರ್ನ್ ಆಸ್‌ಲ್ಲೊಂ ಆನಿ ಪೆಂಟೆಂತ್‌ಚ್ ಆಪ್ಲೆಂ ಘರ್ ಆನಿ ಚಡುಣೆಂ ಏಕ್ ಎಕ್ರೊಭರ್ ಜಾಗೊ ಆನಿ ತಾಂತುಂ ಇಲ್ಲೆಂ ತೋಟ್ ಆಸ್‌ಲ್ಲೆಂ. ಭುರ್ಗ್ಯಾಂಕ್ ಬರೆಂ ಶಿಕಾಪ್ ದಿವಯ್ಲೆಂ ಆನಿ ದೊಗಾಂ ಚೆಡ್ವಾಂಕ್ ಬರ್‍ಯಾ ಘರಾಣ್ಯಾಕ್ ದೀವ್ನ್ ಕಾಜಾರ್ ಕರಯ್ಲೆಂ. ಚೆಡ್ವಾಂ ತಿಂ ಚೆಡ್ವಾಂ, ಪೆಲ್ಯಾಂಚಿ ಆಸ್ತ್. ಪುಣ್ ಮ್ಹಜೊ ಪೂತ್ ಮೈಸೂರಾಂತ್ ಎಕಾ ಬೆಂಕಾಂತ್ ಬರ್‍ಯಾ ಕಾಮಾರ್ ಆಸಾ. ತಾಕಾ ತಾಚೊ ಮ್ಹಳ್ಳ್ಯೊಚ್ ಅಸ್ಕತ್ಕಾಯೊ ಆಸಾತ್. ತಾಚಿ ಬಾಯ್ಲ್‌ಯ್ ಬೆಂಕಾಂತ್ ಕಾಮ್ ಕರ್ತಾ. ದೆಖುನ್ ತೊ ಕಿತ್ಲೆ ಪೊಯ್ಶೆ ಧಾಡುಂಕೀ ತಯಾರ್ ಆಸಾ ಪುಣ್ ಮ್ಹಾಕಾ ಹ್ಯಾ ಉತರ್ ಪ್ರಾಯೆರ್ ತೆ ಪೊಯ್ಶೆ ಕಿತ್ಯಾಕ್? ಮ್ಹಾಕಾ ಜಾಯ್ ಆಪ್ಲಿಂ ಕೊಣೀಂ ಜಿಂ ಮ್ಹಜೆಲಾಗಿಂ ರಾವೊನ್ ಮ್ಹಜಾ ಕುಮ್ಕೆಕ್ ಯೆತಾತ್ ತಿಂ. ಮ್ಹಾಕಾ ಎದೊಳ್‌ಚ್ ಪ್ರಾಯ್ ಸತ್ತರ್ ಉತರ್ಲ್ಯಾಂತ್ ಆಸ್ತಾಂ ಉರುಲ್ಲೆ ಥೊಡೆ ದೀಸ್ ಪುಣೀಂ ಬರೆ ಕರ್ನ್ ಜಿಯೆಂವ್ಕ್ ಜಾಲೆಂನಾ. ತ್ಯಾ ಶಿವಾಯ್ ಹಿ ಕಾಳ್ಜಾಚಿ ಪಿಡಾ. ಹಾಂವ್ ಕೆದಾಳಾ ಹೆಂ ಆಪ್ಲೆಂ ಪಯ್ಣ್ ಕಾಭಾರ್ ಜಾಯ್ತ್ ಮ್ಹಳ್ಳಿ ಘಡಿ ರಾಕೊನ್ ಆಸಾಂ. ಮ್ಹಜಾ ಎಕಾ ಧುವೆಚೊ ಘೊವ್ ವಕೀಲ್. ತಾಣೆಂ ವಕಾಲತ್ ಉಲವ್ನ್ ಘರ್ ಜಾಗೊ ವಾಂಟೊ ಕರಯ್ಲೊ ಆನಿ ಆತಾಂ ಮ್ಹಜಿ ಆಸ್ತ್ ತಾಣಿಂ ಎಕಾಮೆಕಾ ವಾಂಟುನ್ ಘೆತ್ಲಿ. ತೀನ್ ವಾಂಟೆ ಕೆಲೆ ಆನಿ ಹಿ ಆಸ್ತ್ ಕೆಲ್ಲೊ ಹಾಂವ್ ಮಾತ್ರ್ ವಾಟೆರ್. ಮ್ಹಜಾ ಪುತಾಕ್ ಕೊಣೆಂಗೀ ಎಕ್ಲ್ಯಾನ್ ಸಾಂಗ್‌ಲ್ಲಿ ಬೂದ್ ತಾಕಾ ಇಲ್ಲಿ ಸಮ್ಜಾಲಿ ಜಾಯ್ಜಯ್. ದೆಖುನ್ ತಾಣೆಂ ಗಾಂವಾಕ್ ಯೇವ್ನ್ ಮ್ಹಜೆರ್ ಸಯ್ಲಪಾಚೊ ಹುಸ್ಕೊ ದಾಖಯ್ತಾನಾ ಮ್ಹಜೆಂ ಕಾಳಿಜ್ ಕಡ್ಲೆಂ. ಪುಣ್ ಮ್ಹಜೊ ಪೂತ್, ಸಂಸಾರಾಕ್ ದಾನ್ ಧರ್ಮ್ ಕರ್ತಾ, ಇಗರ್ಜ್ ದಿವ್ಳಾಂನಿ ಆಸ್ಚಾ ದುದಾ ಫಾತ್ರಾಂನಿ ತಾಚೆಂ ನಾಂವ್ ಕಾಂತಯ್ತಾತ್. ಸಭಾರ್ ಇಸ್ಕೊಲಾಂಕ್ ತಾಣೆಂ ಕುಮೊಕ್ ದಿಲ್ಯಾ. ತಾಕಾ ಜಾಯ್ ಆಸ್‌ಲ್ಲೆಂ ನಾಂವ್. ದೆಖುನ್ ಮ್ಹಾಕಾ ತಾಣೆಂ ಎಕಾ ಪ್ರಾಯೆಸ್ತ್ ಆಶ್ರಮಾಂತ್ ಘಾಲಾಂ. ಮಯ್ನ್ಯಾ ಮಯ್ನ್ಯಾಕ್ ಪೊಯ್ಸೆ ಧಾಡ್ತಾ. ಆನಿ ತ್ಯಾ ಆಶ್ರಮಾಂತ್ಲಿಂ ಮ್ಹಾಕಾ ಪಳೆತಾತ್. ಮ್ಹಾಕಾ ಮ್ಹಜಾ ಜಿಣ್ಯೆಚೆರ್ ಆನಿ ಕಾಂಯ್ ಆಶಾ ನಾಂತ್.

ತ್ಯಾ ಪ್ರಾಯೆಸ್ತಾಚಿ ಕಾಣಿ ಆಯ್ಕೊನ್ ತಿಯೊಕ್ ಚಡ್ ಅಜಾಪ್ ಜಾಲೆಂನಾ. ಸಂಸಾರಾಂತ್ ಜಿಯೆಂವ್ಚಾ ಹರ್‍ಯೆಕಾ ಮನ್ಶಾಕ್ ತಾಂಚೊ ಮ್ಹಳ್ಳ್ಯೊಚ್ ಕಾಣಿಯೊ ಆಸಾತ್. ಕೊಣೀಂ ಸಂಸಾರಾಕ್ ದಿಸ್ಚೆಪರಿಂ ಸುಃಖಿ ನಾಂತ್. ಹೆಂ ಸುಃಖ್ ಮ್ಹಳ್ಳೊ ಏಕ್ ಡೋಂಗ್. ಬರೆಂ ಮ್ಹಜೆಲಾಗಿಂ ಗಾಂವಾಂತ್ ರಾವೊಂಕ್ ಮ್ಹಜಾ ಪುತಾಕ್ ಯಾ ಸುನೆಕ್ ಜಾಯ್ನಾಂ ತರ್ ಮ್ಹಾಕಾ ತಾಂಚೆಸವೆಂ ರಾವವ್ಯೆತ್ ನಂಯ್ಗೀ? ಪುಣ್ ತಾಂಕಾ ತಿ ಖುಶಿ ನಾ. ತಾಂಕಾ ಹೆಂ ಸಮಾಜೆ ಮುಖಾರ್ ನಾಲಿಸಾಯ್. ಮ್ಹಜಿ ಕಾಣೀಂ ಕಾಂಯ್‌ಚ್ ನ್ಹಂಯ್, ಹ್ಯಾ ಆಶ್ರಮಾಂತ್ ಆಸ್ಚಾಂಚಿ ಎಕೇಕ್ ಕಾಣಿಂ ಆಯ್ಕಲ್ಯಾರ್ ಪುರೊ ಜಾತಾ. ಮ್ಹಾಕಾ ಡೊಕ್ಟರ್ ಆನಿ ತ್ಯಾ ಆಶ್ರಮಾಂತ್ ಆಸ್ಚೆ ಪಾದ್ರಿ ಸಯ್ತ್ ಸದಾಂ ಸಾಂಗ್ತಾತ್ ತುಕಾ ಕಾಳ್ಜಾಚಿ ಪಿಡಾ ಆಸಾ ತುವೆಂ ಚಡ್ ಚಿಂತುಂಕ್ ನಜೊ, ಖಂತ್ ಬೆಜಾರಾಯ್ ಸಾಂಡುನ್ ದೀಸ್ ಕಾಡಿಜಯ್ ಮ್ಹಣೊನ್. ಪುಣ್ ತುಮಿಂ ಸಾಂಗಾ ಜಿವಂತ್ ಆಸ್ತಾನಾ ಹ್ಯಾ ಸ್ಥಿತೆರ್ ಖಂತ್ ಯಾ ಬೆಜಾರಾಯ್ ಯೇನಾಸ್ತಾಂ ರಾವತ್? ಆತಾಂ ಕಿತೆಂ ವಾಟ್ ಉರ್ಲ್ಯಾ? ಮೊರ್ತಾ ಪರ್‍ಯಾಂತ್ ಜಿಯೆಂವ್ಚೆಂ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್."

"ಕಾಂಯ್ ನಜೊ ಮಾಮಾ, ತುಕಾ ಬೂದ್ ಸಾಂಗೊಂಕ್ ಹಾಂವ್ ಫಾವೊ ನ್ಹಂಯ್. ಹಾಂವ್ ತುಮ್ಚಾಕೀ ಮೊಸ್ತ್ ಲ್ಹಾನ್. ತರೀ ಜಾಂವ್ಚೆಂ ಸಗ್ಳೆಂ ಆಮ್ಚಾ ಬರ್‍ಯಾಕ್‌ಚ್. ಆನಿ ದೆವಾಚೆಂ ಹೆಂ ನಿರ್‍ಮೊಣೆಂ ಕೊಣಾಯ್ಚಾನೀ ಚುಕಂವ್ಕ್ ಸಾಧ್ಯ್ ನಾ. ತಶೆಂ ಆಸ್ತಾಂ ದೆವಾನ್ ದಿಲ್ಲ್ಯಾ ಹ್ಯಾ ಜಿಣ್ಯೆಕ್ ಆಸಾ ತಶಿ ಘೆಜಯ್ ಆನಿ ಆಮ್ಚಾ ತಾಂಕಿ ಪರ್ಮಾಣೆಂ ತಿ ಬರ್‍ಯಾನ್ ಜಿಯೆಜಾಯ್" ವಿವೇಕಾನ್ ಆಪ್ಲೆಂ ಆಶಾವಾದಿ ಚಿಂತಾಪ್ ವೆಕ್ತ್ ಕೆಲೆಂ.

ದೀಸ್ ಗೆಲ್ಲೆಪರಿಂಚ್ ಆಸ್ಪತ್ರೆಚಾ ವಕ್ತಾಂನಿ ಸಯ್ತ್ ತಿಯೊಚಾ ಹಾತಾಕ್ ಜಾಲ್ಲೊ ಘಾಯ್ ಗೂಣ್ ಜಾಲೊನಾ. ದಿಸಾನ್ ದೀಸ್ ತೊ ಚಡೊನ್೦ಚ್ ಆಯ್ಲೊ ಆನಿ ಅಶೆಂ ಎಕಾ ದಿಸಾ ತಾಂತುಂ ಪೂ ಭರೊನ್ ಆಯ್ಲೊ. ತಿಯೊಕ್ ಆಪ್ಲ್ಯಾ ಜಿಣ್ಯೆಚೆಂ ಅಂತ್ಯ್ ಆಯಿಲ್ಲೆಪರಿಂ ಭೊಗ್ಲೆಂ.

ಆತಾಂ ತಿಯೊ ರಾತಿಂ ಸಯ್ತ್ ದೊಳೆ ಆಡ್ ಜಾಂವ್ಕ್ ಆಯ್ಕಾನಾಸ್ತಾಂ ಎಕೇಕ್ ನಿಹಾಳ್ ಕರ್ನ್ ಉದ್ರೇಕಾನ್ ಭರ್ತಾಲೊ ಆನಿ ವೊಣದಿಕ್ ಆಪ್ಲ್ಯಾ ಹಾತಾಂನಿ ಮಾರ್ತಾಲೊ. ಆನಿ ದುಃಖಿಚೊ ತಾಚೊ ಉಜ್ವೊ ಹಾತ್ ಆತಾಂ ಪೂ ಭರೊನ್ ಫಡಾಫಡ್ ದಿತಾಲೊ.

ಡೊಕ್ಟರಾನ್ ತಾಚಿ ತಪಾಸ್ಣಿಂ ಕೆಲಿ ಆನಿ ತಿಯೊಚೊ ಹಾತ್ ಪಳೆವ್ನ್ ತಾಚೊ ಹಾತ್ ಬರೊ ಜಾಂವ್ಕ್ ಸಾಧ್ಯ್ ನಾತ್‌ಲ್ಲೆಂ ಸಮ್ಜೊನ್ ತೊ ಹಾತ್ ಕಾತ್ರುಂಕ್ ಜಾಯ್ ನಾಂ ತರ್ ತಾಚಾ ಜಿವಾಕ್ ಬಾಧಕ್ ಆಸಾ ಮ್ಹಳ್ಳೆಂ ಫೈಸಲ್ ದಿಲೆಂ. ಅಶೆಂ ದುಸ್ರೆ ದೀಸ್ ಒಪರೇಶನ್ ಥಿಯೇಟರಾಕ್ ವರುನ್ ತಿಯೊಚೊ ಉಜ್ವೊ ಹಾತ್ ಅರ್ಧೊ ಕಾತರ್ಲೊ.

ತಿಯೊ ಇತ್ಲೆ ದೀಸ್ ಆಸ್ಪತ್ರೆಂತ್ ಆಸ್ಲ್ಯಾರೀ ತಾಚಿಂ ಭುರ್ಗಿಂ ಎದೊಳೀ ಆಸ್ಪತ್ರೆಕ್ ಯೇವ್ನ್ ಭೆಟ್ಲಿಂ ನಾಂತ್. ತಿಯೊಚಾ ಕಾಳ್ಜಾಂತ್ ಆತಾಂ ಕೊಣಾಯ್ ಥಾವ್ನ್ ಕಸ್ಲೀಯ್ ಆಶಾ ನಾತ್‌ಲ್ಲಿ. ಎಸ್ತೆಲ್ ದೋನ್ ಯಾ ತೀನ್ ದಿಸಾಂಕ್ ಏಕ್ ಪಾವ್ಟಿಂ ಯೇವ್ನ್ ವೆತಾಲೆಂ ಆನಿ ತಿಯೊ ಏಕ್ ಸಬ್ಧ್ ಸಯ್ತ್ ಉಲಯ್ನಾತ್‌ಲ್ಲೊ. ತಾಕಾ ಉಲಂವ್ಕ್ ಕರುಂಕ್ ಎಸ್ತೆಲ್‌ಯ್ ಸಕಾನಾತ್‌ಲ್ಲೆಂ. ಏಕ್ ಹಾತ್ ಕಾತರ್ನ್ ಘೆತ್‌ಲ್ಲ್ಯಾ ತಿಯೊಕ್ ಪಳೆವ್ನ್ ಎಸ್ತೆಲಾಚೆಂ ಕಾಳಿಜ್ ಏಕ್ ಘಡಿ ರಾವ್ಲೆಂ. ತರ್ ಆನಿ ತಿಯೊಚಾನ್ ಕಾಮ್ ಕೆಲ್ಲೆಪರಿಂ ನಾ ಮ್ಹಳ್ಳೆಂ ತಾಕಾ ನಖ್ಖಿ ಜಾಲೆಂ. ತಿಯೊಚಾ ಹ್ಯಾ ಸ್ತಿತೆರ್ ಆಪ್ಣಾನ್ ತಾಕಾ ಪಾವಾಜಯ್ ಮ್ಹಳ್ಳಿಂ ಚಿಂತ್ನಾಂ ಎಸ್ತೆಲಾಕ್ ಧೊಸುಂಕ್ ಲಾಗ್ಲಿಂ.

ಪಯ್ಲೆಂ ಅವ್ಘಡಾಂತ್ ಆನಿ ಆತಾಂ ಹಾತ್ ಕಾತರ್ನ್ ತಿಯೊಚೆಂ ರಗಾತ್ ಪುರಾ ವಾಳ್‌ಲ್ಲೆವರ್ವಿಂ ತಿಯೊಚಾ ತೊಂಡಾಚೊ ರಂಗ್ ಬದ್ಲಾಲೊ. ಧೊವೊಚ್ ದಿಸೊಂಕ್ ಲಾಗ್ಲೊ. ದೀಸ್ ಗೆಲ್ಲೆಪರಿಂಚ್ ತಾಚಾ ದೊಳ್ಯಾಂ ಭಂವಾರಿಂ ಕಾಳ್ಭಾಣ್ ಮಾಂಡೊನ್ ಆಯ್ಲಿ. ತಾಚೆ ದೊಳೆ ಅನಿಕೀ ಭಿತರ್ ಗೆಲೆ. ಖಂತಿನ್ ಆನಿ ಬೆಜಾರಾಯೆನ್ ತಾಚೆಂ ವದನ್ ಚಿವಳ್ಳೆಂ. ಹಳ್ತಾರ್ ತಾಚಿ ಅಸ್ಕತ್ಕಾಯ್ ಚಡ್ಲಿ. ತಾಚಾ ಕುಡಿಚಾ ದುಃಖಿ ಪ್ರಾಸ್ ಚಡ್ ಜಾವ್ನ್ ತಾಚಾ ಕಾಳ್ಜಾಚಿ ದೂಃಖ್, ತಾಚಾ ಮತಿಚಿ ದೂಃಖ್ ಚಡ್ಲಿ. ತೊ ಪಿಸಾಂತುರ್ ಜಾಲೊ. ತಾಕಾ ತಾಣೆಂ ಜಿಯೆಂವ್ಚಿ ಹರ್‍ಯೆಕ್ ಘಡಿ ಕಾಂಠಾಳ್ಯಾಚಿ ಜಾವ್ನ್ ಪಾವ್ಲಿ. ಹಿ ಆಸ್ತ್ ಬದಿಕ್, ಹೊ ದುಡು, ಭಾಂಗಾರ್ ಶೃಂಗಾರ್, ಸಗ್ಳ್ಯಾಚೆರ್ ತಾಕಾ ಎಕಾ ಥರಾಚೊ ಕಾಂಠಾಳೊ ಆಯ್ಲೊ.

ದೊನೀಂ ಕಿಡ್ನಿ ಪಾಡ್ ಜಾಲ್ಲೆವರ್ವಿಂ ಆಪ್ಣಾನ್ ಮೊರ್ಚೆಂ ಖಂಡಿತ್ ಮ್ಹಣೊನ್ ಸಮ್ಜಾಲ್ಲೊ ತೊ ಆತಾಂ ಉರುಲ್ಲೆ ಥೊಡೆ ದೀಸ್ ಪುಣೀಂ ಗರ್ಜೆವಂತಾಂಕ್ ಕುಮೊಕ್ ಕರುಂಕ್ ಆಪ್ಣಾನ್ ಚಿಂತ್ಲಾಂ ಮ್ಹಣೊನ್ ಸಾಂಗ್ಚೆಂ ತಿಯೊ ಆಯ್ಕಾತಾಲೊ. ತಾಚಾ ನಿರಾಶಾವಾದಿ ಚಿಂತ್ನಾಂಕ್ ಎದೊಳ್‌ಚ್ ತ್ಯಾ ಕಿಡ್ಣಿ ಪಿಡೇಸ್ತ್ ವಿವೇಕಾನ್ ಬರಿ ದಿಶಾ ದಾಖಯಿಲ್ಲಿ. ಪೊಕೊಳ್ ಉತ್ರಾಂ ಆಯ್ಕೊನ್ ಸುಸ್ತಾಲ್ಲ್ಯಾ ತಾಚಾ ಮತಿಕ್ ತಾಣೆಂ ಕಿತೆಂಚ್ ಉಲವ್ನ್ ದಾಖಯಿಲ್ಲೆಂ ನಾಂ. ಸಗ್ಳೆಂ ತಾಚೊ ಕರ್ನ್ಯೊ ಉಲಯ್ತಾಲ್ಯೊ. ಜಾತ್ ಧರ್ಮ್ ಕಾತ್ ಕುಳಿ ಸಂತಾನ್ ಕಿತೆಂಚ್ ನಾಸ್ತಾಂ ಸಯ್ತ್ ತೊ ತಿಯೊಚೊ ಸರ್ವಸ್ವ್ ಜಾಲ್ಲೊ. ತಿಯೊ ಸಕಾಳಿಂ ನಿದ್‌ಲ್ಲೆಕಡೆಚ್ಚ್ ಚಿಂತುಂಕ್ ಪಡ್ಲೊ. ತಾಕಾ ತಾಚಾ ಕಾತರ್ನ್ ಗೆಲ್ಲ್ಯಾ ಹಾತಾಚೆರ್ ಎದೊಳ್‌ಚ್ ಶಿಣ್ ಆಸ್‌ಲ್ಲೊ. ತಾಕಾ ತಾಚೊ ಹಾತ್ ಕಾತರ್ಲೆಲೊ ಶಿಣ್ ನ್ಹಂಯ್. ಆಪ್ಣಾಚಾ ಕುಡಿ ಥಾವುನ್ ಮೆಕ್ಳೊ ಜಾಲ್ಲೊ ತೊ ಹಾತ್ ಕಾಂಯ್ ಸಂಸಾರಾಂತ್ ಹಾತ್ ನಾತ್‌ಲ್ಲ್ಯಾ ಕೊಣಾಯ್ಕೀ ಕುಮ್ಕೆಕ್ ಪಾವ್ಲೊನಾ ಮ್ಹಳ್ಳೊ ಶಿಣ್.

ಅಶೆಂ ಚಿಂತುನ್ ಆಸ್ತಾಂ ತಾಚಾ ಮತಿಂತ್ ನವಿಂ ಚಿಂತ್ನಾಂ ಜಲ್ಮೊಂಕ್ ಲಾಗ್ಲಿಂ. ಹಾಂತುಂ ಆಪ್ಣಾಕ್ ಶಿಕೊಂಕ್ ಮೊಸ್ತ್ ಆಸಾ ಆನಿ ಆಪ್ಣಾನ್ ತೆಂ ಖಂಡಿತ್ ಶಿಕಾಜಾಯ್. ದೆಖುನ್ ತೊ ಹಳ್ತಾರ್ ಉಟೊನ್ ತಾಚಾ ಕುಡಾಂತ್ಲೊ ಭಾಯ್ರ್ ಆಯ್ಲೊ. ಭಾಯ್ರ್ ಆಯಿಲ್ಲೊ ತಿಯೊ ಶೀದಾ ಡೊಕ್ಟರಾ ತೆವ್ಶಿನ್ ಗೆಲೊ. ಡೊಕ್ಟರ್ ಎಕಾ ಪಿಡೆಸ್ತಾಕ್ ತಪಾಸ್ತಾಲೊ ದೆಖುನ್ ಇಲ್ಲೊ ವೇಳ್ ರಾವ್ಲೊ. ಥೊಡ್ಯಾಚ್ ದಿಸಾಂನಿ ಹಳ್ತಾರ್ ಬರೊ ಜಾವ್ನ್ ಯೆಂವ್ಚಾ ತಿಯೊಕ್ ಪಳೆವ್ನ್ ಡೊಕ್ಟರ್ ಉತ್ಸಾಹಿತ್ ಜಾಲೊ "ಸಂಸಾರಾಂತ್ ಆಶಾವಾದಿ ಮನಿಸ್ ಮಾತ್ರ್ ವಾಂಚೊಂಕ್ ಸಕ್ತಾತ್ ಮಿ.ತಿಯಾದೊರ್, ತುವೆಂ ಬರೊ ಜಾವ್ನ್ ಆಯಿಲ್ಲಿ ಸಂತೊಸಾಚಿ ಸಂಗತ್, ತರೀ ತುಕಾ ಇತ್ಲೆ ವೆಗಿಂ ಘರಾ ವಚೊಂಕ್ ಹಾಂವ್ ಸೊಡಿನಾ. ತುಜಾ ಹಾತಾಚಿ ಸಂಪೂರ್ಣ್ ಜತನ್ ಘೆಂವ್ಕ್ ಮ್ಹಾಕಾ ಆಸಾ. "

"ಸಂಸಾರಾಂತ್ ಜಿತ್ಲೆ ಆಶಾವಾದಿ ಆಸಾತ್‌ಗೀ ತಿತ್ಲೆಚ್ ನಿರಾಶಾವಾದಿ ಮನಿಸ್‌ಯಿ ಆಸಾತ್. ದೆಖುನ್ ಜಿಯೆಂವ್ಚೆ ಸಗ್ಳೆ ಆಶಾವಾದಿ ನ್ಹಂಯ್. ಥೊಡ್ಯಾಂಕ್ ಜಿಯೆತಾನಾ ಮರ್ಣಾ ಶಿವಾಯ್ ಆಸ್ಚಿ ಏಕ್ ಪಾತ್ರ್ ವಿಂಚವ್ಣ್ ಮ್ಹಳ್ಯಾರ್ ಜಿಣಿ ಜಿಯೆಂವ್ಚಿ. ಆನಿಂ ತೆ ಖಂಚಾ ನದ್ರೆಂತ್ ಆಶಾವಾದಿ ಜಾತಾತ್? ತರೀ ಡೊಕ್ಟರ್ ಹಾವೆಂ ಆಯಿಲ್ಲೊ ಉದ್ದೇಶ್ ಮ್ಹಾಕಾ ಹಾಂಗಾ ಥಾವುನ್ ಸುಡ್ಕಾ ಘೆಂವ್ಚಿ ನ್ಹಂಯ್. ಹಾಂವ್ ಎಕಾ ಖಾಸ್ಗಿ ಗರ್ಜೆಂತ್ ಹಾಂಗಾ ಆಯ್ಲಾಂ. ಆನಿ ಮ್ಹಜಾ ಹ್ಯಾ ಗರ್ಜೆಂತ್ ತುಮ್ಚಿ ಸಲಹಾ ಆನಿ ತುಮಿಂ ಮ್ಹಾಕಾ ದಿಂವ್ಚಿಂ ಕುಮೊಕ್ ಮ್ಹಾಕಾ ನ್ಹಂಯ್ ಅನ್ಯೇಕ್ಲ್ಯಾಕ್ ಕುಮೊಕ್ ಜಾತಾ" ತಿಯೊನ್ ಡೊಕ್ಟರಾಚೆಂ ಉತಾರ್ ಥಂಯ್ಚ್ ಕಾತರ್ನ್ ಉಲಯ್ಲೊ.

ಡೊಕ್ಟರ್ ಏಕ್ ಘಡಿ ತಿಯೊಕ್ ಪಳೆಂವ್ಚಾರ್ ಪಡ್ಲೊ. "ಬರೆಂ ಉಲಯ್ಲೊಯ್ ತುಂ ಮಿ.ತಿಯಾದೊರ್, ತುಜಾ ವಾದಾಕ್ ಹಾಂವ್ ಪಾಟಿಂ ವಾದ್ ಮಾಂಡುಂಕ್ ಆಪೇಕ್ಶಿನಾ ತರೀ ತುಜಾ ಎಕಾ ವಾಖ್ಯಾಕ್ ಇಲ್ಲೆಂ ತಿದ್ವುನ್ ಸಾಂಗ್ತಾಂ 'ಸಂಸಾರಾಂತ್ ಆಶಾವಾದಿ ಮನಿಸ್ ಮಾತ್ರ್ ಜಿಯೆತಾತ್' ಮ್ಹಳ್ಳ್ಯಾ ಮ್ಹಜಾ ಸಾಂಗ್ಣೆಚೊ ಅರ್ಥ್ ನಿರಾಶಾವಾದಿ ಮನಿಸ್ ಮೊರ್ತಾತ್ ಯಾ ಮೆಲ್ಯಾತ್ ಮ್ಹಣೊನ್ ಬಿಲ್ಕುಲ್ ನ್ಹಂಯ್. ಹಾಂವೆ ಹಾಂಗಾಸರ್ ಉಲ್ಲೇಖ್ ಕರ್ಚೆಂ ಜಿವಿತ್ ಬೊಲ್ತೆಂಚ್. ನಿರಾಶಾ ಮನ್ಶಾಕ್ ಕೆನ್ನಾ ಯೆತಾ? ಕೆದಾಳಾ ಮನಿಸ್ ಚಡಿತ್ ಆಶಾವಾದಿ ಜಾತಾ ಆನಿ ಅಶೆಂ ಎಕಾ ಘಡ್ಯೆ ತೊ ಹಕೀಕತ್ ಪಳೆತಾ ತೆನ್ನಾ ಮನಿಸ್ ನಿರಾಶಾವಾದಿ ಜಾತಾ. ಆನಿ ಹೆಂ ಜಾಂವ್ಕ್ ಪಾವ್ತಾ ತಾಚಾ ಜಿವಿತಾಚಿ ಸಲ್ವಣಿ ಯಾ ಏಕ್ ಭೌತಿಕ್ ಮರಣ್. ಮನಿಸ್ ಜಿಯೆಜಾಯ್ ಜರ್ ಖಂಚಾ ಖಂಚಾ ರಿತಿಚಿಂ ಮರ್ಣಾಂ ಸದಾಂ ಮೊರಾನಾ? ಆನಿ ಅಶೆಂ ನಿರಾಶಾವಾದಿಚಾ ಚಿಂತ್ನಾಂನಿ, ಉತ್ರಾಂನಿ, ಕರ್ನೆಂನಿ ಮರಣ್ ಆಸ್ತಾ ಶಿವಾಯ್ ಜಿವಿತ್ ನ್ಹಂಯ್. ಪುಣ್ ಸೊಡ್ಯಾಂ ತಿ ಗಜಾಲ್. ತುವೆಂ ಸಾಂಗೊಂಕ್ ಆಸ್ಚೆಂ ಮ್ಹಜೆಲಾಗಿಂ ಸಾಂಗ್ಯೆತ್. ಹಾಂವ್ ಖಂಡಿತ್ ಜಾವ್ನ್ ತುಜಿ ಮಜತ್ ಕರುಂಕ್ ಮ್ಹಜಾ ತಾಂಕಿ ಭಿತರ್ಲೆಂ ಪ್ರೇತನ್ ಕರ್ತಲೊಂ" ಡೊಕ್ಟರ್ ಆತಾಂ ತತ್ವ್‌ಶಾಸ್ತಿರ್ ಉಲಯ್ತಾಲೊ.

ತಾಚಿಂ ತತ್ವಾಂ ಯಾ ತರ್ಕಾಂ ಅರ್ಥ್ ಕರುಂಕ್ ತಿಯೊಕ್ ನಾಕಾಸ್‌ಲ್ಲಿಂ. ಎದೊಳ್ ಪರ್‍ಯಾಂತ್ ತಾಚಾ ಮತಿಂತ್ ತಾಣೆಂ ಝುಜೊನ್ ಆಯಿಲ್ಲ್ಯಾ ಝುಜಾನ್ ತಾಕಾ ಎದೊಳ್‌ಚ್ ಪೊಳ್ಕುರೊ ಕರ್ನ್ ಸೊಡ್‌ಲ್ಲೊ. ಡೊಕ್ಟರಾಚಾ ಉತ್ರಾಂನಿ ಸಾಂಗ್ಚೆಂ ತರ್ ಎದೊಳ್ ಪರ್‍ಯಾಂತ್ ಅಸಲಿಂ ಮರ್ಣಾಂ ಮೊರೊನ್ ಜಿಯೆಲ್ಲ್ಯಾ ತಿಯೊಕ್ ಪರತ್ ಏಕ್ ಮರಣ್ ನಾಕಾಸ್‌ಲ್ಲೆಂ.

"ಡೊಕ್ಟರ್, ಮ್ಹಜಾ ಕುಡಾಂತ್ ಎಕ್ಲೊ ತರ್ನಾಟೊ ಆಸಾ, ವಿವೇಕ್. ತಾಚೊ ದೊನೀಂ ಕಿಡ್ಣಿ ಚಲಾನಾಂತ್ ಮ್ಹಣೊನ್ ಹಾಂವೆ ಆಯ್ಕಲಾಂ.. ಮ್ಹಜಾ ಸಮ್ಜೊಣೆ ಪ್ರಕಾರ್ ಮನ್ಶಾಕ್ ದೋನ್ ಕಿಡ್ಣಿ ಆಸ್ತಾತ್ ಆನಿ ಎಕಾ ಕಿಡ್ನೆಂತ್ ಮನಿಸ್ ವಾಂಚೊಂಕ್ ಸಕ್ತಾ. ದೆಖುನ್ ಕಿತ್ಯಾಕ್ ಮ್ಹಜಿ ಏಕ್ ಕಿಡ್ಣಿ ತಾಕಾ ದೀಂವ್ಕ್ ನಜೊ?"

ಡೊಕ್ಟರಾಕ್ ಆತಾಂ ತಿಯೊಚಾ ಚಿಂತ್ಪಾಚಾ ಗುಂಡಾಯೆಚೊ ಅಂದಾಜ್ ಜಾಲೊ ಜಾಯ್ಜಯ್. ತೊ ಸಭಾರ್ ವೇಳ್ ಚಿಂತುಂಕ್ ಪಡ್ಲೊ. ತಾಚಾ ದೊಳ್ಯಾಂಚೊ ಆಸ್ಡ್ಯೊ ಏಕ್ ಪಾವ್ಟಿಂ ವಯ್ರ್ ಗೆಲ್ಲ್ಯೊ.

"ಬರಿ ಆಲೋಚನ್ ತುಜಿ ಮಿ.ತಿಯಾದೊರ್, ಪುಣ್ ತುಂ ನೆಣಾಂ ಆಸೊಂಕ್ ಪುರೊ, ತುಂ ಏಕ್ ಪಿಡೇಸ್ತ್ ಆನಿ ಆತಾಂ ತುಕಾ ತುಜಾ ಭಲಾಯ್ಕೆಚಿ ಫಿಕಿರ್ ಘೆಂವ್ಚಿ ಗರ್ಜ್ ಆಸಾ. ತ್ಯಾ ಶಿವಾಯ್ ಹ್ಯಾ ಸ್ಥಿತೆರ್ ತುವೆಂ ಅಸಲಿಂ ಚಿಂತ್ನಾಂ ಚಿಂತ್ಚಿಂ ಬರಿಂ ನ್ಹಂಯ್. ಪುಣ್ ತುಜಿ ಅಲೋಚನ್ ಖಂಡಿತ್ ಜಾವ್ನ್ ಸತ್ ತರ್ ತಿ ಮ್ಹಾಕಾಯ್ ಖುಶಿ. ಕಿತ್ಯಾಕ್ ಮ್ಹಳ್ಯಾರ್ ಆಮಿಂ ಡೊಕ್ಟರ್ ಜಾವ್ನ್ ಏಕ್ ಜೀವ್ ವಾಂಚಂವ್ಕ್ ಸಕ್ತಾಂವ್ ತರ್ ತೆಂ ಬರೆಂಚ್ ನಂಯ್ಗೀ?"

"ತಿತ್ಲೆಂಚ್ ನ್ಹಂಯ್ ಡೊಕ್ಟರ್, ಮ್ಹಜೆ ಚಡ್ ದೀಸ್ ಗೆಲೆ ಆನಿ ಇಲ್ಲೆ ದೀಸ್ ಉರ್ಲ್ಯಾತ್ ಆಸ್ತಾಂ, ಮ್ಹಜೆ ದೊಳೆ ಸಯ್ತ್ ಮ್ಹಜಾ ಮರ್ಣಾ ಉಪ್ರಾಂತ್ ಹಾಂವ್ ಕೊಣಾಕ್ ಪುಣೀಂ ದಾನ್ ದೀಂವ್ಕ್ ಆಶೆತಾಂ. ಮ್ಹಜಾ ಕುಡಿಂತ್ ಹ್ಯಾ ದೊಳ್ಯಾಂಕ್ ಫಕತ್ ದೂಃಖ್ ಭೊಗ್ಲಾಂ ಆಸ್ತಾಂ, ಹ್ಯಾ ದೊಳ್ಯಾಂನಿ ಹೆರಾಂಚಾ ಕುಡಿಂತ್ ತರೀ ಆಸೊನ್ ಸುಃಖ್ ಮ್ಹಳ್ಳ್ಯಾಚೆಂ ಭೊಗಾಪ್ ಭೊಗುಂದಿಂತ್."

"ಹೆಂ ಮಾತ್ರ್ ಇಲ್ಲೆಂ ಕಶ್ಟ್ ಮಿ.ತಿಯಾದೊರ್. ತುವೆಂ ತುಜೆ ದೊಳೆ ಖಂಚಾಯ್ ಚಾರಿಟಿ ಟ್ರಸ್ಟಾಲಾಗಿಂ ದಾನ್ ಕೆಲೆಂಯ್ ತರ್ ತಿಂ ತಾಚಿ ಜತನ್ ಘೆತೆಲಿಂ. ಹಾಂವ್ ಫಕತ್ ಏಕ್ ವಯ್ಜ್ ಆನಿ ಮ್ಹಜಾ ಹಾತಾಂತ್ ಜ್ಯೆ ಕಿತೆಂ ಸಾಧ್ಯ್ ಆಸಾ ತೆಂ ಹಾಂವ್ ಹೆರಾಂಕ್ ಬರೆಂ ಲಾಭ್ಚೆ ತಸಲೆಂ ತರ್ ಖಂಡಿತ್ ಕರ್ತಲೊಂ."

"ಪುಣ್ ಎಕಾ ಶರ್ತಾಖಾಲ್ ಡೊಕ್ಟರ್.. ಹಿ ಗಜಾಲ್ ಮ್ಹಜಾ ಆನಿ ತುಮ್ಚಾ ಮಧೆಂ ಮಾತ್ರ್ ಆಸಾಜಯ್ ಶಿವಾಯ್ ತ್ಯಾ ವಿವೇಕಾಕ್ ಸಯ್ತ್ ತುಮಿಂ ಕಳಂವ್ಚೆಂ ನ್ಹಂಯ್. ತೊ ಕೋಣ್ ಆನಿ ತಾಚಿ ಕುಳಿ ಖಂಚಿ? ಜಾತ್ ಖಂಚಿ ಮ್ಹಳ್ಳೆಂ ಮ್ಹಾಕಾ ಗರ್ಜೆಚೆಂ ನ್ಹಂಯ್. ತೊ ಮ್ಹಜೆಪರಿಂಚ್ ಏಕ್ ಮನಿಸ್ ಆನಿ ಮ್ಹಜಾ ಥಾವ್ನ್ ತಾಕಾ ಏಕ್ ಜಿವಿತ್ ಮೆಳೊಂಕ್ ಸಕ್ತಾ ತರ್ ತೆಂ ಬರೆಂಚ್."

ತಿಯೊಚಿಂ ಉತ್ರಾಂ ಆಯ್ಕೊನ್ ಡೊಕ್ಟರಾಕ್ ಅಜ್ಯಾಪ್ ಜಾಲೆಂ. ತಾಣೆಂ ತಿಯೊಕ್ ಘುಟ್ ಉರಂವ್ಚಿ ಭಾಸ್ ದಿಲಿ.

ತಿಯೊ ಡೊಕ್ಟರಾಲಾಗಿಂ ಉಲವ್ನ್ ಉಟ್‌ಲ್ಲೊಚ್ ತಾಚೆಂ ಕಾಳಿಜ್ ಇಲ್ಲೆಂ ಹಗುರ್ ಜಾಲ್ಲೊ ಅನ್ಭೋಗ್ ತಾಕಾ ಜಾಲೊ. ತಾಚಾ ಮತಿಂತ್ ಅವ್ಯೆಕ್ತ್ ಸವಾಲಾಂ ಉದೆಲಿಂ.

ಹೆರಾಂಚಿ ಬೋಬ್ ಆಯ್ಕೊಂಕ್ ಸಕಾನಾಸ್ಚೆ ಕಾನ್ ಕಿತ್ಯಾಕ್? ಹೆರಾಂಚಿ ಪಡ್ಣಿಂ ಪಳೆಂವ್ಕ್ ಸಕಾನಾತ್‌ಲ್ಲೆ ದೊಳೆ ಕಿತ್ಯಾಕ್? ಹೆರಾಂಕ್ ಸಮ್ಜೊಂಕ್ ಸಕಾನಾತ್‌ಲ್ಲೆಂ ಕಾಳಿಜ್ ಕಿತ್ಯಾಕ್? ಹೆರಾಂಕ್ ಉಕ್ಲುಂಕ್ ಸಕಾನಾತ್‌ಲ್ಲೆ ಹಾತ್ ಕಿತ್ಯಾಕ್?

ಡೊಕ್ಟರಾನ್ ಆಪ್ಲಿ ಭಾಸ್ ಉರಯಿಲ್ಲಿ. ಆನಿ ತ್ಯೆಚ್ ಪ್ರಕಾರ್ ಫುಡ್ಲ್ಯಾ ದೋನ್ ದಿಸಾಂನಿ ತಿಯೊಕ್ ಒಪರೇಶನ್ ಥಿಯೆಟರಾಕ್ ವೆಲೊ ಆನಿ ತ್ಯಾ ವಿವೇಕಾಕ್‌ಯಿ ವೆಲೊ. ತಿಯೊಚಿ ಏಕ್ ಕಿಡ್ಣಿ ಕಾಡ್ನ್ ವಿವೇಕಾಕ್ ಬೊಸಯ್ಲಿ. ವಿಶಯ್ ಕಿತ್ಲ್ಯಾ ಘುಟಾನ್ ದವ್ರುಂಕ್ ಡೊಕ್ಟರಾನ್ ಚಿಂತ್ಲ್ಯಾರೀ ಒಪ್ರೇಶನ್ ಕರ್ತಾನಾ ಆಸ್‌ಲ್ಲ್ಯಾ ನರ್ಸಾಂಕ್ ಹಿ ಖಬಾರ್ ಆಸ್‌ಲ್ಲಿ. ಪುಣ್ ತಿಯೊನ್ ಡೊಕ್ಟರಾಕ್ ಘುಟ್ ಸಾಂಭಾಳುಂಕ್ ಸಾಂಗ್‌ಲ್ಲಿ ಗಜಾಲ್ ಕಳಿತ್ ನಾತ್‌ಲ್ಲಿ.

ಆತಾಂ ಡೊಕ್ಟರಾಕ್ ಸಯ್ತ್ ಆಪ್ಣಾನ್ ಏಕ್ ಬರೆಂ ಕಾಮ್ ಕೆಲೆಂ ಮ್ಹಳ್ಳೆಂ ಚಿಂತಾಪ್ ಮತಿಂತ್ ಆಯ್ಲೆಂ.

ಮುಖಾರ್‍ಸಿಲಾಂ... ಮುಕ್ಲೊ ಅವಸ್ವರ್ ನಿಮಾಣೊ

Tags: Vally Quadras,e konkani novel, Konkani, Mangalore, Mangalorean, Mother Tongue

From around the world

ಪಾಟಿಂ ಗಾಂವಾಕ್ - ಅವಸ್ವರ್ 27

Post your comments

ಅವಸ್ವರ್ 1

ಅವಸ್ವರ್ 2

ಅವಸ್ವರ್ 3

ಅವಸ್ವರ್ 4

ಅವಸ್ವರ್ 5

ಅವಸ್ವರ್ 6

ಅವಸ್ವರ್ 7

ಅವಸ್ವರ್ 8

ಅವಸ್ವರ್ 9

ಅವಸ್ವರ್ 10

ಅವಸ್ವರ್ 11

ಅವಸ್ವರ್ 12

ಅವಸ್ವರ್ 13

ಅವಸ್ವರ್ 14

ಅವಸ್ವರ್ 15

ಅವಸ್ವರ್ 16

ಅವಸ್ವರ್ 17

ಅವಸ್ವರ್ 18

ಅವಸ್ವರ್ 19

ಅವಸ್ವರ್ 20

ಅವಸ್ವರ್ 21

ಅವಸ್ವರ್ 22

ಅವಸ್ವರ್ 23

ಅವಸ್ವರ್ 24

ಅವಸ್ವರ್ 25

ಅವಸ್ವರ್ 26

ಅವಸ್ವರ್ 27

ಅವಸ್ವರ್ 28

Connect

Our Address
Mangalore

Our Address
Udupi

Our Address
Dubai

From around the world

Post your comments

Connect

Our AddressMangalore

Our AddressUdupi

Our AddressDubai

Our Address
Mangalore

Our Address
Udupi

Our Address
Dubai