From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಕೊರೊನಾ ಆನಿ ಸೊರೊನಾ
Wednesday, April 22, 2020
ಕೊರೊನಾ ವೈರಸ್ ತಸಲ್ಯಾ ಮಹಾಮಾರಿ ಪಿಡೆವಯ್ರ್ ವ್ಯಂಗ್ಯ್, ತಮಾಶೆ, ಹಾಸ್ಯ್, ಖೆಳ್ಕುಳಾಂ ವ ಫೊಕಣಾಂ ಕರ್ಚಿಂ ಸಾರ್ಕೆಂ ನ್ಹಂಯ್ ಮ್ಹಣ್ ಭೊಗ್ತಾ. ತರ್‌ಯಿ ಘರಾಭಿತರ್ ರೊವಾಣೆಚ್ಯಾ ಕೊಂಬ್ಯೆಬರಿಂ ಕುರ್‍ವೊನ್ ಬಸುನ್ ಉಬ್ಗೊಣ್, ಆಳ್ಸಾಯ್ ವ ಮಂಡ್ಡೆ ಬೆಚ್ಚ ಕರ್ಚ್ಯಾ ಬದ್ಲಾಕ್ 'ಲಾಫ್ಟರ್ ಈಜ್ ದ ಬೆಸ್ಟ್ ಮೆಡಿಸನ್' ಮ್ಹಣ್ ಮತಿಂತ್ ದವರುನ್ ಹಾಸೊನ್ ಖೆಳೊನ್ ವೇಳ್ ಪಾಶಾರ್ ಕರ್ಚೊ ಬರೊ ನ್ಹಂಯ್‌ವೇ ತರ್? ಕೊರೊನಾವಿಶಿಂ ಆಯ್ಲೆವಾರ್ ವಾಟ್ಸಪ್ಪಾರ್ ದಿಸಾನ್ ದೀಸ್ ನವೆ ನವೆ ಜೋಕ್ಸ್, ಫೊಕಣಾಂ, ಹಾಸ್ಕುಳೆ, ನವಿಂ ನವಿಂ ಹಾಸ್ಯ್ ಪದಾಂ, ವೆಂಗ್ಯ್ ಚಿತ್ರಾಂ ವ್ಹಾಳ್ತೇ ಆಸಾತ್.
ಥೊಡೆ ಜಣ್ ಹಿಂದಿ ಪದಾಂಚಾ ಸಂಗೀತಾಕ್ ಕೊಂಕ್ಣಿ ಉತ್ರಾಂ ಗುಂತುನ್ ಪದಾಂ ಗಾಯ್ತಾತ್. ಸಬಾರ್ ಜಣಾಂ ಫೇಸ್‌ಬುಕ್, ವಾಟ್ಸಪ್, ಡ್ಯುಒ, ಗೂಗಲ್ ಹ್ಯಾಂಗ್‌ಔಟ್, ಝೂಮ್, ಮೆಸ್ಸೆಂಜರ್ ಆನಿ ಹೆರ್ ಸಮಾಜಿಕ್ ಜಾಳಿಜಾಗ್ಯಾಂನಿ ವೆಸ್ತ್ ಆಸ್ತಾತ್.
ಥೊಡೆ ದಾದ್ಲೆ ಆನಿ ತರ್ನಾಟೆ ರಮ್ಮಿ, ಕ್ರಿಕೆಟ್, ಟೆನ್ನಿಸ್ ವ ಕಬಡಿ ಖೆಳ್ತಾನಾ, ಥೊಡಿಂ ಬಾಯ್ಲ್‌ಮನ್ಶಾಂ ಆನಿ ಚಲಿಯೊ ಶಟಲ್ ಕೊಕ್, ಬೆಡ್‌ಮಿಂಟನ್, ಲಗೋರಿ ವ ಲುಡೊ ಖೆಳೊನ್ ವೇಳ್ ಪಾಶಾರ್ ಕರ್ತಾತ್.
ಕೊರೊನಾ ವೈರಸ್ 'ಮೇಡ್ ಇನ್ ಚೈನಾ' ಜಾಲ್ಲ್ಯಾನ್ ತಾಚಿ ಬಾಳ್ವಿ ಉಣಿ ಖಂಯ್. ಐಟಿ ಕಂಪ್ಣೆಂನಿ ಕಾಮ್ ಕರುನ್ ಆಸ್ಚಿಂ ಕಾಜಾರಿ ಜೊಡಿಂ 'ವರ್ಕ್ ಫ್ರೊಮ್ ಹೋಮ್' ಕರ್ತಾತ್. ತಸಲ್ಯಾಂ ಪಯ್ಕಿ ಎಕ್ಲೊ ಸೊಫ್ಟ್‌ವೇರ್ ಇಜ್ನೆರ್ ಮ್ಹಣ್ತಾ ಕಿ, 'ಕೊರೊನಾ ವೈರಸ್ ಮೊರ್‍ಚಾ ಆದಿಂ ಆಮಿಂಚ್ ಎಕಾಮೆಕಾ ಝಗ್ಟುನ್ ಮೊರ್‍ತಾಂವ್ ಕೊಣ್ಣಾ!'
'ಕೋವಿದ್ - 19' (ಕೊರೊನಾ ವೈರಸ್) ವರ್ವಿಂ ಕಂಗಾಲ್ ಜಾಲ್ಲೆಂ ಜನಾಂಗ್ ಮ್ಹಳ್ಯಾರ್ 'ಎಮ್.ಎಲ್.- 90'. ಹೆಂ ಜನಾಂಗ್ 'ಹಾಲು' ನಾಸ್ತಾಂ ಕಿತ್ಲೀಂಯ್ ವರ್ಸಾಂ ವಾಂಚತ್ ಪುಣ್ 'ಆಲ್ಕೋಹಾಲ್' ನಾಸ್ತಾಂ ಥೊಡೆ ದೀಸ್‌ಯಿ ಜಿಯೆಂವ್ಕ್ ಸಕನಾ. ದಿಸ್ಪೊಡ್ತೆಂ ಸಕಾಳಿಂಚಿ ಭೆಟೊವ್ಣಿ ಕರಿನಾತ್ಲ್ಯಾರ್ ತಾಂಚೆ ಹಾತ್‌ಪಾಯ್ ಕಾಂಪ್ತಾತ್, ಕಾನಾಂತ್ ಕೋಣ್‌ಗೀ ಉಲಯಿಲ್ಲ್ಯಾಬರಿಂ ಭೊಗ್ತಾ, ಭಿರಾಂಕುಳ್ ಸಪ್ಣಾಂ ಪಡ್ತಾತ್, ವಿಮಾನಾಥಾವ್ನ್ ಲೊಟುನ್ ಘಾಲ್ಲೆಬರಿಂ ಭೊಗ್ತಾ, ಕಾನಾಭಿತರ್ ಹೆಲಿಕೊಪ್ಟರಾಚೊ ಆವಾಜ್ ಆಯ್ಕತಾ, ಸುಣೆಂ ವಾಗಟ್, ವಾಗ್, ಸಿಂವ್ ವ ಬೊಲ್ಪೊ ಆಂಗಾರ್ ಉಡ್‌ಲ್ಲೆಬರಿಂ ಭೊಗ್ತಾ. ಸಯ್ತಾನ್ ಆಂಗಾರ್ ಆಯಿಲ್ಲೆಬರಿಂ ಥೊಡ್ಯಾಂಕ್ ಕಾಂಪ್ ಸುರು ಜಾತಾ. ಸಿಸ್ರಿನ್ ಪಾಂಯ್ ಚಾಬೊನ್ ವೋಡ್ನ್ ವ್ಹೆಲ್ಲೆಬರಿಂ ಭೊಗ್ತಾ. ಅಸಲ್ಯಾ ಅಮಲಾನಂದ ಸೊಮ್ಗುಳಾಂಕ್ 'ಪಿರಿ' ಕಾಡುಂಕ್ ಅಬ್ಕಾರಿ ಮಂತ್ರಿನ್ ಅನುಮತಿ ದೀಜಾಯ್‌ಗೀ ನಾಕಾ?
ಸಂಸಾರಾಂತ್ಲೊ 'ದೊಡ್ಡಣ್ಣ' ವ 'ದಾಟ್ಟು' ಮ್ಹಣೊನ್ ದವ್ಲತ್ ಆನಿ ಧಿಮಾಕ್ ದಾಕೊವ್ನ್ ಆಸ್‌ಲ್ಲೊ ಆಮೇರಿಕಾ ದೇಶ್ ಸಯ್ತ್ ಕೊರೊನಾಚಾ ಮಾರಾಕ್ ಥರ್ಥರೊನ್ ಧರ್ಣಿಕ್ ಶೆವ್ಟಲಾ. ಇಟೆಲಿ ಆನಿ ಸ್ಪೇಯ್ನ್ ದೇಶಾಂನಿ 'ಕೋವಿದ್-19' ಮಹಾಮಾರಿ ಪಿಡಾ ಸುಕ್ಯಾ ಕರ್‍ಡಾಕ್ ಲಾಗ್‌ಲ್ಲ್ಯಾ ಉಜ್ಯಾಬರಿಂ ವಿಸ್ತಾರ್ಲಿ. ತವಳ್ ತ್ಯಾ ದೇಶಾಂತ್ಲಾ ದಾಕ್ತೆರಾಂನಿ, ನರ್‍ಸಾಂನಿ ಆನಿ ಪಾರಾ ಮೆಡಿಕಲ್ ಶಿಬಂದೆನ್ ಆಪ್ಲೆ ಜೀವ್ ರಿಸ್ಕೆರ್ ಘಾಲ್ನ್ ಪಿಡೆಸ್ತಾಂಕ್ ಚಿಕಿತ್ಸಾ ದಿಲಿ ಆನಿ ತಾಂಚಿ ಸೆವಾ ಚಾಕ್ರಿ ಕೆಲಿ. ತಾಂಚೊ ಉಪ್ಕಾರ್ ಬಾವುಡ್ಚೆ ಖಾತಿರ್ ತ್ಯಾ ದೇಶಾಂಚಾ ಲೊಕಾನ್ ಸಾಂಜೆರ್ 5 ವೊರಾರ್ ಬಾಲ್ಕನಿರ್ ರಾವೊನ್ ತಾಳಿಯೊ ಪೆಟ್ಲ್ಯೊ. ತೆಂ ಪಳೆವ್ನ್ ಆಮ್ಚಾ ದೇಶಾಂತ್‌ಯಿ ತಶೆಂಚ್ ಬಾಲ್ಕನಿರ್ ರಾವುನ್ ತಾಳಿಯೊ ಪೆಟಿಜಾಯ್ ಮ್ಹಣ್ ಪ್ರಧಾನಿನ್ ಉಲೊ ದಿಲೊ. ಪುಣ್ ಆಮ್ಚೊ ಲೋಕ್ ಭಾರಿಚ್ ಬುದ್ವಂತ್ ಆನಿ ಹುಶಾರ್. ತಾಣಿಂ ತಾಳಿಯೊ ಪೆಟ್ಲ್ಯೊ ಮಾತ್ರ್ ನ್ಹಂಯ್, ಥೊಡ್ಯಾಂನಿ ಶಂಖ ಫುಂಕ್ಲೆ, ಥೊಡೆ ವಾಟ್ಲ್ಯೊ, ತೊಪ್ಲಿಂ ಆನಿ ಹೆರ್ ಆಯ್ದನಾಂ ಬಡೊವ್ನ್ 'ಡಿಂಗಿರಿ ಮಾಮಾ ಡಿಂಗಿರಿ ಮಾಮಾ, ಮಸ್ಕಿರಿ ಮಾಲ್ಪಾಡೆ' ಮ್ಹಣ್ ಲುಂಗಿ ಡಾನ್ಸ್ ನಾಚಾಲಾಗ್ಲೆ. ಮಾಗಿರ್ ಥೊಡೆ ಮಾಲೆಪಟಾಕಿ ಮಾರುನ್ ಬೈಲಾ ನಾಚ್ಲೆ!
ಎಕ್ಲಿ ಬಾಯ್ಲ್ ಲುಸಿಫೆರ್ ಆಂಗಾರ್ ಆಯಿಲ್ಲೆಬರಿಂ ವಾಟ್ಲಿ ಬಡೊವ್ನ್ 'ಕೊರೊನಾ ಗೊ..ಗೊ..ಗೊ' ಮ್ಹಣ್ ಕಿಂಕ್ರಾಟ್ ಮಾರುನ್ ಬೊಬಾಟ್ಲಿ. ಮಾಗಿರ್ ಎಕ್ಲೊ ಡಿಂಗ್ ಮಾಸ್ಟರ್ 'ಕೊರೊನಾ ಗೊ.. ಕೊರೊನಾ ಚಲ್.. . ಕೊರೊನಾ... ತುಜ್ಯಾ ಮಾಂಯ್ಚೊ ಘೊವ್' ಮ್ಹಣುನ್ ನಾಚುಂಕ್ ಲಾಗ್ಲೊ.
ಹಾಂವೆಂಯಿ ತಾಳಿಯೊ ಪೆಟ್ಲ್ಯೊ, ಬಾಲ್ಕನಿರ್ ವಚುನ್ ತಾಳಿಯೊ ಪೆಟ್ಲ್ಯೊ. ಕುಜ್ನಾಂತ್ ಆಸ್‌ಲ್ಲಿ ಬಾಯ್ಲ್ ಮ್ಹಜಿ ಬೊಬಾಟುನ್ ಸಾಂಗಲಾಗ್ಲಿ, 'ಪುರೊ ಯೇ ಸೆಜಾರ್ಚಾ ಘರ್ಚೆಂ ಕುಳಾರಾ ಗೆಲಾಂ!'
'ಘರಾಚ್ ರಾವ್, ಸುರಕ್ಶಿತ್ ರಾವ್' ಹಿ ಬೂದ್‌ಬಾಳ್ ಪಾಳಿಜಾಯ್ ತರ್ ಹೆ ದೋನ್ ವಿಶಯ್ ಮತಿಂತ್ ದವರುಂಕ್ ಜಾಯ್- ಕೊರೊನಾಕ್ ಭಿಂಯೆನಾಯೆ, ಲಡಾಯ್ ಕರಿಜಾಯ್. ಪುಣ್ ಬಾಯ್ಲೆಕಡೆ ಲಡಾಯ್ ಕರಿನಾಯೆ, ಪುಣ್ ಭಿಂಯೆಜಾಯ್!
ಘರಾ ಭಾಯ್ರ್ ಗೆಲ್ಯಾರ್ ಕೊರೊನಾ, ಘರಾ ಭಿತರ್ ಬಸ್ಲ್ಯಾರ್ ಸೊರೊನಾ ಮ್ಹಳ್ಳಿ ಗಜಾಲ್. ಕೊರೊನಾ ಮಹಾಮಾರಿನಿಮ್ತಿಂ ಸೊರೊನಾ ಮ್ಹಣ್ ಬೆಜಾರಾಯ್ ಉಚಾರ್‌ಲ್ಲ್ಯಾ ಸಬಾರಾಂ ಪಯ್ಕಿ ನೊರೊನ್ಹಾ, ಆರಾನ್ಹಾ, ಸಲ್ಡಾನ್ಹಾ, ಡಿಕುನ್ಹಾ, ಕುಟಿನ್ಹಾ ಆಸಾತ್ ಮ್ಹಣೊನ್ ತಾಂಚೆ ಪಾಂಯ್ ವೊಡ್ಚೆ ಬಿಲ್ಕುಲ್ ಸಾರ್ಕೆಂ ನ್ಹಂಯ್. ಅಸಲಿ ಖಂತ್, ಬೆಜಾರಾಯ್, ವಿರಾರಾಯ್ ಆನಿ ಕರಂದಾಯ್ 90 ಸೆಂವ್ಚಾ ಚಡಾವತ್ ದಾದ್ಲ್ಯಾಂಕ್ ಸಹಜ್‌ ಜಾವ್ನ್ ಧೊಸ್ತಾ. ಪೊಲಿಸಾಂನಿ 'ಕಂಡಲ್ಲಿ ಗುಂಡು' ಮ್ಹಳ್ಳೆಂ ಆರ್ಡರ್ ದಿಲ್ಲೆಂಚ್ ಥೊಡೆ ಪಿಡ್ಕ್ ಸ್ಪೆಶಲಿಸ್ಟ್ ಬಾರಾಂ ಆನಿ ವಾಯ್ನ್ ಶೊಪಾಂ ಸೊದುಂಕ್ ಲಾಗ್ಲ್ಯಾತ್ ಮ್ಹಳ್ಳಿ ಖಬರ್. ವಿಶೇಸ್ ಕಿತೆಂಗೀ ಮ್ಹಳ್ಯಾರ್ ವಾಯ್ನ್ ಶೊಪಾಂನಿ 'ಕೊರೊನಾ' ಬಿಯರ್ ಆನಿ 'ವೈರಸ್' ವೊಡ್ಕಾಕ್ ಕಂಡಾಪಟ್ಟೆ ಡಿಮಾಂಡ್ ಖಂಯ್. ಆಯ್ಲೆವಾರ್ ಮೆಕ್ಸಿಕೊಂತ್ ಆನ್ನಾಮರಿಯಾ ಜೊಸ್ ರಾಫಾಯೆಲ್ ಗೊನ್ಸಾಲ್ವೆಜ್ ಮ್ಹಳ್ಳೆ 34 ವರ್ಸಾಂ ಪ್ರಾಯೆಚೆ
ಸ್ತ್ರೀಯೆನ್ ಜೊವ್ಳ್ಯಾಂಕ್ ಜಲ್ಮ್ ದಿಲಾ. ಜೊವ್ಳ್ಯಾಂ ಪಯ್ಕಿ ಚೆಡ್ವಾಕ್ ತಿಣೆಂ 'ಕೊರೊನಾ' ಆನಿ ಚೆರ್ಕ್ಯಾಕ್ 'ವೈರಸ್' ಮ್ಹಣ್ ನಾಂವ್ ದಿಲಾಂ ಖಂಯ್. ಫುಡ್ಲ್ಯಾ ದಿಸಾಂನಿ ಆಮ್ಚಾ ದೇಶಾಂತ್‌ಯಿ ಚೆಡುಂ ಭುರ್ಗ್ಯಾಂಕ್ ಕರೀನಾ, ಕಾರ್ಮೀನಾ ವ ಕಾತ್ರೀನಾ ತಸಲ್ಯಾ ನಾಂವಾಂ ಬದ್ಲಾಕ್ 'ಕೊರೊನಾ' ನಾಂವಾಂ ದವರುಂಕ್ ಪರೊ. ಆನಿ ಚೆರ್ಕ್ಯಾಂ ಭುರ್ಗ್ಯಾಂಕ್ ವೈಟಸ್, ವೀರಸ್ ತಸಲ್ಯಾ ನಾಂವಾಂ ಬದ್ಲಾಕ್ 'ವೈರಸ್' ಮ್ಹಣುನ್ ವೊಲಾಂವ್ಕ್ ಪುರೊ. ಆಪುಟ್ ಭಾರತೀಯ್ ನಾಂವಾಂ ಜಾಯ್ ತರ್ 'ಶಂಕಿತಾ' ಆನಿ 'ಶೋಬಿತಾ' ಮ್ಹಳ್ಳಿಂ ನಾಂವಾಂಯಿ ದವರ್‍ಯೆತ್!
ಚವ್ದಾ ದಿಸಾಂಚೆಂ ವ ಅಟ್ಟಾವೀಸ್ ದಿಸಾಂಚೆಂ 'ಕ್ವಾರಂಟೈನ್' ಮ್ಹಳ್ಳೆಂ ಮಹಾ ಪ್ರಾಚಿತ್ ವೆಗಿಂಚ್ ಆಕೇರ್ ಜಾಂವ್ ಮ್ಹಣ್ತಾತ್ ಥೊಡಿಂ 'ವಾಲೆಂಟೈನ್ಸ್'. ಘರಾ ಭಿತರ್‌ಚ್ ರಾಂವ್ಚೆಂ ಮ್ಹಳ್ಯಾರ್ ಮಂಗ್ಳುರ್-ಮಡ್ಗಾಂವ್ ಇಂಟರ್‌ಸಿಟಿ ಟ್ರೇಯ್ನಾರ್ ಪಯ್ಣ್ ಕೆಲ್ಲ್ಯಾಬರಿಂ. ಸಾಲಾಂತ್ ಬಸ್ಚೆಂ ಆನಿ ಟೊಯ್ಲೆಟಾಕ್ ವೆಚೆಂ. ಕುಡಾಕ್ ವೆಚೆಂ ಆನಿ ಬೆಡ್ಡಾರ್ ಆಡ್ ಪಡ್ಚೆಂ. ಭುಕ್ ಲಾಗ್ತಾನಾ ಜೆಂವ್ಚೆಂ, ಕಾಂಯ್ ಆಸ್ಲ್ಯಾರ್ ಸೆಂವ್ಚೆಂ.
ಆಮಿ ಮಂಗ್ಳುರಿ ಕೊಂಕ್ಣಿ ಕಥೊಲಿಕ್, ವಿಂಚುನ್ ಕಾಡ್ಲಲಿ ಪರ್ಜಾ ನಿಜಾಯ್ಕಿ ಭಾಗಿ. ಕಾರಣ್, ಆಮ್ಕಾಂ ಟಿವಿರ್ ಮಿಸಾಂ ಪಳೆಂವ್ಕ್, ಸೆರ್ಮಾಂವ್ ಆಯ್ಕುಂಕ್, ರೆತಿರ್‍ಯೊ ಕರುಂಕ್, ಮಾಗ್ಣೆಂ ರಜಾರ್, ನೊವೆನಾಂ ಕರುಂಕ್, ಕಂತಾರಾಂ, ಭಕ್ತಿಕ್ ಗಿತಾಂ ಆನಿ ಪ್ರವಚನಾಂ ಆಯ್ಕುಂಕ್ ಖೂಬ್ ಅವ್ಕಾಸ್ ಮೆಳ್ಳ್ಯಾತ್. ಕೊರೊನಾ ವೈರಸ್ ಸವ್ಕಾಸ್ ಸವ್ಕಾಸ್ ಮಾಯಾಕ್ ಜಾತಾನಾ ಆಮ್ಚೆ ಥಂಯ್ ಬದ್ಲಾವಣ್ ಘಡ್ತೆಲಿ ಆನಿ ಆಮ್ಚೆಪಯ್ಕಿ ಕಾಂಯ್ ಥೊಡಿಂ ಜಣಾಂ ಪುಣಿ ಜಿವೆ ಸಾಂತ್ ವ ಸಾಂತಿಣ್ ಜಾತಲಿಂ ಮ್ಹಣ್ಚಾಂತ್ ದುಬಾವ್ ನಾ. ಆಮ್ಚ್ಯಾ ಲೊಕಾಕ್ ಟಿವಿರ್ ಮೀಸ್ ಅಯ್ಕುನ್ ಸವಯ್ ಜಾಲ್ಲೆವರ್ವಿಂ ಫುಡ್ಲ್ಯಾ ದಿಸಾಂನಿ ಆಮ್ಚ್ಯೊ ಇಗರ್ಜೊ ಆನಿ ಪೂನ್‌ಶೆತಾಂ ಲೊಕಾವಿಣೆಂ ಖಾಲಿ ಪಡನಾತ್ಲ್ಯಾರ್ ಪುರೊ!
Tags:
Corona, COVID-19, CGS Taccode, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
2/27/2021 ಹೆರೊಲ್ಪಿಯುಸ್: ಏಕ್ ಅವ್ಚಿತ್ ಭೆಟ್...
-
12/20/2020 ಯುವಜಣಾಂಕ್ ಪ್ರೇರಣ್ - ಜೆಸ್ಸಿಕಾ ಆನ್ನಾ ಲಿಝಾ...
-
12/6/2020 ಆಸ್ತ್ ........
-
11/25/2020 ಭಾರತಾಚಿಂ ಖಬ್ರೆ ಟಿವಿ ಚಾನೆಲಾಂ ಮರಣ್ ಪಾವ್ಲ್ಯ...
-
11/9/2020 ನಾಂವ್ ಬದಲ್ಲ್ಯಾನ್ ಗಾಂವ್ ಬದಲ್ನಾಂ...!...
-
10/17/2020 ಮಂಗ್ಳುರ್‌ಚೊ ಖ್ಯಾತ್ ಗ್ರಾಫೊಲೊಜಿಸ್ಟ್, ಸ್ಟೇ&...
-
-
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.