From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
MODERN ಪ್ರಾಚಿತ್ ಆನಿ ಕರೆಜ್ಮ್
Saturday, April 8, 2017ಬರಯ್ಣಾರಾ ವಿಶಿಂ ಜಾಣಾ ಜಾ...
ಕ್ರೀಸ್ತ್ ಯೆಣ್ಯಾಚೊ ಕಾಳ್ ಸಂಪವ್ನ್, ಸಾದ್ಯಾ ಕಾಳಾರ್ ಆಸ್ಚಿ ಕ್ರೀಸ್ತೀ ಭಾವಾಡ್ತಿ ಪರ್ಜಾ, ಸಿಂಜಿಚ್ಯಾ ಬುದ್ವಾರಾ ಪ್ರಾಜಿತ್ ಕಾಳಾಕ್ ವೇಂಗ್ ಮಾರ್ತಾ. ಆಮ್ಚ್ಯಾ ಸೊಡ್ವಣ್ದಾರಾ ಜೆಜು ಕ್ರೀಸ್ತಾನ್, ಅರಣ್ಯಾಂತ್ ಮಾಗ್ಣೆಂ ಆನಿ ಉಪ್ವಾಸಾ ಸಂಗಿಂ ಜಿಯೆಲ್ಲಿ ಚಾಳೀಸ್ ದಿಸಾಂಚಿ ಜಿಣಿ ನಿಯಾಳ್ಚೊ ಕಾಳ್ ಹೊ. ಸಂಸಾರ್‌ಭರ್ ಶಿಂಪಡ್ಲಲೊ ಕ್ರೀಸ್ತಾಂವ್ ಲೋಕ್ ಪ್ರಾಚಿತ್ ಕಾಳಾರ್ ಮಾಗ್ಣ್ಯಾನ್ ಆನಿ ಪ್ರಾಚಿತಾನ್ ಜಿಯೆತಾ. ಜಾಂವ್ಕ್ ಪುರೊ ಜೆಜು ಕ್ರೀಸ್ತಾಕ್ ತಾಳ್ನ್ಯಾಕ್ ಸಾಂಪ್ಡಾಯ್ಲಲೊ ದೆಂವ್ಚಾರ್ ಆಮ್ಕಾಂಯೀ ಜಾಯ್ತ್ಯಾ ರುಪಾರ್ ತಾಳ್ತಾ. ತರ್‌ಯೀ ದೈವಿಕ್ ಕಾಕುಳ್ತಿಚಿ ಸಕತ್ ಹಾಚೆರ್ ಜಯ್ತ್ ವ್ಹರುಂಕ್ ಆಧಾರ್ ದಿತಾ. ಜಾಯ್ತಿಂ ಜಣಾಂ ಹ್ಯಾ ವೆಳಾರ್ ಪ್ರಾಚಿತಾಚಿ ಕರ್ನಿ ಆಧಾರ್ನ್ ಕ್ರೀಸ್ತಾಕ್ ಮಾನ್ವೊಂವ್ಚಿ ಜಿಣಿ ಜಿಯೆತಾತ್. ಏಕ್ ಸುಟಾವೆಂ ಕುಮ್ಸಾರ್ ಜಾವುನ್, ಪಾತ್ಕಾಂನಿ ಮ್ಹೆಳೊ ಜಾಲ್ಲೊ ಅತ್ಮೊ ನಿತಳ್ ಕರುನ್, ಮನೋರಂಜನ್ ಬಗ್ಲೆಕ್ ದವರ್ನ್, ಆಮಾಲ್ ಪಿಯೊವ್ಣೆಂ ಸೊಡುನ್, ಧುಂವ್ರ್ ಪೀವನ್ ಸಾಂಡುನ್, ಮಾಸ್ ಮಾಸ್ಳಿ ಖಾಯ್ನಾಸ್ತಾನಾ, ಉಪ್ವಾಸ್ ಕರುನ್, ಜೆಜುಚ್ಯಾ ಕಷ್ಟಾಂ ಮರ್ನಾಚೊ ಪಾಶಾಂವ್ ಕುರ್ಸಾ ವಾಟೆಚ್ಯಾ ಭಕ್ತಿ ಪಣಾನ್ ಆಧಾರ್ನ್, ಮಾಗ್ಣ್ಯಾನ್ ಆನಿ ತ್ಯಾಗಾನ್ ಪಾಸ್ಖ್ ಪರ್ಬೆ ಮ್ಹಣಾಸರ್ ಖಾಲ್ತಿ ಜಿಣಿ ಜಿಯೆಂವ್ಕ್ ಪ್ರಯತನ್ ಕರ್ತಾತ್. ಪೂಣ್ ಜಾಯ್ತ್ಯಾಂನಿ ಚಾಳಿಸ್ ದೀಸ್ ತ್ಯಾಗ್ ಕೆಲ್ಲೆಂ ಪಾಸ್ಖ್ ಪರ್ಬೆ ದಿಸಾ, ಎಕಾಚ್ಚಾಣೆ ಬಾಂದ್ಪಾಸಾಂತ್ಲೆ ಸುಟ್ಚ್ಯಾಪರಿಂ ಗ್ರಾಸಿಲ್ಲೆಂ ಆಸಾ.
ಆಯ್ಚ್ಯಾ ದಿಸಾಂನಿ ಪ್ರಾಚಿತ್ ಕಾಳಾಕ್ ಲಗ್ತಿ ಜಾವ್ನ್ ಆಧಾರ್ಚ್ಯೊ ಜಾಯ್ತ್ಯೆ ಬರೆ ಕರ್ನ್ಯೊ ಆಮ್ಕಾಂ ಪಳೆಂವ್ಕ್ ಮೆಳ್ತಾತ್. ಇಗರ್ಜೆಚ್ಯಾ ವಠಾರಾಂನಿ ಸಂಘ್ ಸಂಸ್ಥೆ ಮುಕಾರ್ ಯೇವ್ನ್ ಗರ್ಜೆವಂತಾಂಕ್ ಕುಮಕ್, ಪಿಡೇಸ್ತಾಂಕ್ ಆಧಾರ್, ಪ್ರಾಯೇಸ್ತಾಂಚ್ಯಾ ಆಸ್ರ್ಯಾಂಕ್ ಭೆಟ್, ಜೈಲಾಂಕ್ ಭೆಟ್... ಅಶೆಂ ಜಾಯ್ತಿಂ ಬರಿಂ ಕಾಮಾಂ ಜಾತಾತ್. ದೈವಿಕ್ ಆಧಾರ್ ಜೊಡುಂಕ್ ವಾಡ್ಯಾಂನಿ ಖುರ್ಸಾ ವಾಟೆಚೆಂ ಭಕ್ತಿಪಣ್, ಇಗರ್ಜೆಂನಿ ಸಾಕ್ರಾಮೆಂತಾಚಿ ಆರಾಧಾನಾಂ, ರೆತಿರ್... ಮಾಂಡುನ್ ಹಾಡ್ತಾತ್. ಪೂಣ್ ಸಬಾರಾಂಕ್ ಸಾಧೊ ಕಾಳ್ ಆನಿ ಪ್ರಾಚಿತ್ ಕಾಳ್ ಏಕ್‌ಚ್...!. ಮಾಯಾಮೋಗ್, ಭೊಗ್ಸಾಣೆ, ಪೆಲ್ಯಾಂಚೊ ಹುಸ್ಕೊ ಹಾಚೆಂ ಕಿತೆಂಚ್ ಗಮನ್ ನಾ, ಕಿತೆಂ ಮ್ಹಣ್ ಕಳಿತ್ ನಾ..!. ಹಾಂಚೆ ವಿಶಿಂ ಉಲವ್ನೀ ಫಾಯ್ದೊ ನಾ. ಅಸಲ್ಯಾಂಕ್ ಜೆಜು ಕ್ರೀಸ್ತ್‌ಚ್ ಬರೆಂ ಮನ್ ದೀವ್ನ್, ಮತ್ ಉಜ್ವಾಡೊಂವ್ದಿ ಮ್ಹಣ್ ಮ್ಹಜೆಂ ಮಾಗ್ಣೆಂ.
ಹಾಂಚೆ ಮಧೆಂ ಆನಿ ಥೊಡಿಂ ಆಧುನಿಕ್ ಕಾಳಾರ್ ನವ್ಯಾಚ್ ರಿತಿನ್ ಪ್ರಾಚಿತಾಚಿ ಕರ್ನಿ ಆಧಾರ್ಚಿಂ ಆಸಾತ್. ನವ್ಯಾ ರಿತಿನ್ ಮ್ಹಣ್ ಗುಸ್ಪೊಡ್ನಾಕಾತ್! ಕರ್ನಿ ಪ್ರಾಚಿತಾಚಿಚ್. ಪೂಣ್ ಹಿ ಫಕತ್ ಭಾಯ್ಲ್ಯಾ ಆಡಂಬರಾಕ್ ಆನಿ ಆಪ್ಲ್ಯಾ ಕುಡಿಚಿ ಸೊಭಾಯ್ ಸಾಂಬಾಳುಂಕ್, ಪುಣ್ ಅತ್ಮೊ ನಿತಳ್ ಕರುಂಕ್ ಬಿಲ್ಕುಲ್ ನ್ಹಂಯ್. ಖಾಡ್ ಮಿಶಿ ವಾಡೊವ್ನ್ ಥೊಡೆ ಫಿಲ್ಮ್ ಸ್ಟಾರ್ ಜಾತಾತ್ ತರ್ ಆನಿ ಥೊಡಿಂ ನಷ್ಟೊ, ನೋನ್ ವೆಜ್ ಸೊಡುನ್, ಲೈಟ್ ಜೆವಾಣ್ ಜೇವ್ನ್ ಸ್ಲಿಮ್ ಜಾಂವ್ಕ್ ಪಳೆತಾತ್. ಹಿ ಏಕ್ ಬರಿ ಆಲೋಚನ್ ಪೂಣ್ ಹಾಂಕಾಂ ಪ್ರಾಚಿತ್ ಕಾಳ್‌ಚ್ ಮೆಳಾಜೆಗೀ? ಹಾಂಕಾ ಪಳೆತಾನಾ ಕ್ರೀಸ್ತ್ ಜಯಂತಿಚ್ಯಾ ಕಾಳಾರ್, ದಿಸಾಕ್ ತಿತೀನ್ ಗಮ್ಮಾತಾಚಿಂ ಜೆವ್ಣಾಂ ಜೇವ್ನ್ ಜೀವಾಂತ್ ಮಾಂಡ್‍ಲ್ಲಿ ಚರಬ್ ಉಣೆಂ ಕರುಂಕ್ ಆನಿ ನಾಕ್‌ಬರ್ ಘೊಟುನ್ ಪೊಪ್ಸಾಕ್ ಶೆಳೊ ಮಾಂಡ್‌ಲ್ಲೊ ಧುವ್ನ್ ಕಾಡುಂಕ್ ಕಾಂಯ್ ಹೊಚ್ ಆಯಿನ್ನ್ ವೇಳ್ ಮ್ಹಣ್ ಭೊಗ್ತಾ!
ಪ್ರಾಚಿತ್ ಕಾಳಾಚ್ಯಾ ನಿಮಾಣ್ಯಾ ಹಪ್ತ್ಯಾಂತ್ ಆಮಿಂ ಲಾಗಿಂ ಆಸಾಂವ್. ಹೊ ಹಪ್ತೊ ಪವಿತ್ರ್. ಜೆಜುನ್ ಕಷ್ಟ್ ಸೊಸುನ್ ಖುರ್ಸಾಚೆಂ ಮರಣ್ ಪಾವ್‌ಲ್ಲೊ ಹಪ್ತೊ. ಹೊ ಹಪ್ತೊ ಭಾಗೆವಂತ್. ಪೂಣ್ ಪಾಟ್ಲ್ಯಾ ಹಫ್ತ್ಯಾಂತ್ ಮ್ಹಜ್ಯಾ ಕಾನಾರ್ ಪಡ್‌ಲ್ಲೆಂ ದೊಗಾಂ ಕಾಜಾರಿ ಬಾಯ್ಲಾಂಚೆಂ ಸಂಬಾಷಣ್ ಆನಿ ಹಾಂವೆಂ ಮ್ಹಜ್ಯಾ ಜಿಣಿಯೆಂತ್ ದೆಕ್‌ಲ್ಲ್ಯಾ ಹೆರಾಂ ಥೊಡ್ಯಾಚೆಂ ಪ್ರಾಚಿತ್ ಕಾಳಾಚೆಂ ಜಿಣೆಂ ಹೆಂ ಬರಂವ್ಕ್ ಪ್ರೇರಣ್. ಮ್ಹಾಕಾ ಸಂಬಂಧ್ ನಾತ್‌ಲ್ಲೆಂ, ಹೆರಾಂಚೆ ಗಜಾಲಿ ಉಲೊಂವ್ಚೆ, ಆಯ್ಕೊಂಚೆ ಚೂಕ್. ತರೀ, ನಾಕಾ ನಾಕಾ ಮ್ಹಳ್ಯಾರೀ ಹಾಂವೆಂ ಹಾಂಚೆ ಉಲೊವ್ಣೆ ಆಯ್ಕಲ್ಲೆಂ. ಜಾಂವ್ಕ್ ಪುರೊ ಜಾಯ್ತ್ಯಾ ತೆಂಪಾನ್ ತಿಂ ಸಂಗಿಂ ಮೆಳ್‌ಲ್ಲಿಂ. 'ಪ್ರಾಚಿತ್ ಕಾಳಾರ್ ಕಸಲೊ ಪ್ರಾಚಿತ್ ಧರ್ಲಾಯ್?' ಮ್ಹಣ್ ವಿಚಾರ್ ಕೆಲ್ಲ್ಯಾ ಎಕ್ಲ್ಯಾಚ್ಯಾ ಸವಾಲಾಕ್ ದುಸ್ರ್ಯಾನ್ ದಿಲ್ಲಿ ಜಾಪ್ ಆಯ್ಕೊನ್ ವಿಜ್ಮಿತ್ ಜಾಲ್ಲೊಂ. 'ಆಜ್ ಕಾಲ್ ಒಫಿಸಾಚೆಂ ಕಾಮ್ ಚಡ್ ಜಾಲಾಂ. ಏಸಿಂತ್ ಬಸವ್ನ್ ಮೊಟಾಯ್ ಚಡ್ಲ್ಯಾ. ಸಕ್ಕಡ್ ಹಾಂವ್ ಮೊಟಿಂ ಜಾಲ್ಯಾಂ, ಮೊಟಿಂ ಜಾಲ್ಯಾಂ ಮ್ಹಣ್ತಾತ್. ಗಾಂವಾಂತ್ ಥಾವ್ನ್ ಹಾಡ್‌ಲ್ಲಿಂ ಸಲ್ವಾರಾಂ ಟೈಟ್ ಜಾತಾತ್ ತಶೆಂ ಹ್ಯಾ ಪಾವ್ಟಿಂ ಮಾಸ್ ಮಾಸ್ಳಿ ಖಾಯ್ನಾಸ್ತಾನಾ, ಇಲ್ಲೆಂ ಲೈಟ್ ಜೆವುನ್ ಪುಣೀ ಬಾರಿಕ್ ಜಾತಾಂಗಿ ಪಳೆಯ್ಜೆ.!!' ಆನಿಕ್‍ಯೀ ಮುಂದರುನ್ ಮ್ಹಣಾಲೆಂ, 'ಹಾಂವೆಂ ಹ್ಯಾ ಪಾವ್ಟಿಂ ಕರೆಜ್ಮಾಂತ್ ಗ್ರೀನ್ ಟೀ ಮಾತ್ರ್ ಪಿಯೆತಾಂ... ದೂದಾಚಿ ಚಾ ಬಿಲ್ಕುಲ್ ಪಿಯೆನಾ... ಭಾರಿ ತ್ರಾಸ್ ಜಾತಾ... ಪುಣ್ ಆತಾಂ ಸಂವಯ್ ಜಾಲ್ಯಾ. ಆನಿ ಥೊಡೆ ದೀಸ್ ಸುಧಾರ್ಸುನ್ ವ್ಹರ್ಚೆಂ...' ಜಾಪ್ ದಿಲ್ಲಿಚ್ ದೊಗಾಂಯ್ ಹಾಸ್ಲಿಂ. ಕಾಂಯ್ ಹೆಂ ಚಿಂತಪ್ ಪ್ರಾಚಿತ್ ಕಾಳಾಕ್ ಮಾತ್ರ್ ಸೀಮಿತ್ ಕರಿನಾಸ್ತಾಂ ಸಾದ್ಯಾ ಕಾಳಾರ್ ಆನಿ ಹೆರ್ ವೆಳಾರ್ ಪಾಳ್‌ಲ್ಲೆಂ ತರ್ ಚರಬ್‍ಯೀ ಮಾಂಡ್ತಿ ನಾ, ಮೊಟಾಯ್ ಯೆತಿಚ್ ನಾ ಕೊಣ್ಣಾ!
ಮ್ಹಜೊ ಮಿತ್ರ್ ಹರ್ಯೆಕ್ ವರ್ಸಾ, ಪ್ರಾಚಿತ್ ಕಾಳಾರ್ ಮಾಸ್ ಖಾಯ್ನಾಸ್ತಾಂ, ಸೊರೊ ಬಿಯೆರ್ ಪಿಯೆನಾಸ್ತಾಂ, ಖಾಡ್ ಮಿಶಿ ವಾಡಾಯ್ತಾ ಆನಿ ಪ್ರಾಚಿತ್ ಕಾಳಾಚೆಂ ಭಕ್ತಿಪಣ್ ಉಚಾರ್ತಾ. ಅಲ್ಲೆಲೂಯಾಚ್ಯಾ ಸನ್ವಾರಾ ಸೆಲೂನಾಕ್ ವಚುನ್, ಖಾಡ್ ಮಿಶಿ ತಾಸುನ್, ಪಾಟಿಂ ಘರಾ ಯೆತಾನಾ ಮಾಸ್ ಆನಿ ಸೊರೊ ಘೆವ್ನ್ ಯೆತಾ. ಪಾಸ್ಖಾಂಚೆ ಮೀಸ್ ಜಾಲ್ಲೆಂಚ್ ಖಿಣಾನ್ ಘರಾ ಪಾವ್‌ಲ್ಲೊ ಪ್ರಾಚಿತ್ ಕಾಳಾಚೊ ಭಕ್ತ್, ಸಂತೊಸಾನ್ ಚಾಳೀಸ್ ದಿಸಾಂ ಉಪ್ರಾಂತ್ ಕೆಸಾಂಚಿ ಅಡ್ಕಳ್ ನಾತ್‌ಲ್ಲಿ ಆಪ್ಲಿ ಕಾಟ್ಕಿ ಪುಸುನ್, ಕುಂಕ್ಡಾಚೆ ಪಾಯ್ ಚಿಂವೊವ್ನ್ ಫಾತೆಂ ಜಾಂವ್ಚ್ಯಾ ಫುಡೆಂ ಬಾಟ್ಲಿ ಅರ್ದಿ ಖಾಲಿ ಕರ್ತಾ! ಪ್ರಾಜಿತ್ ಕಾಳಾರ್ ತಾಣೆ ಕರ್ಚ್ಯಾ ಹ್ಯಾ ನಿಚೆವಾಕ್ ಪಾಸ್ಖಾಂ ದಿಸಾ ಗಡ್ ದವರಿನಾತ್‌ಲ್ಲಿ ತರ್, ಉತರ್ ಪ್ರಾಯೆಕ್ ಪಾವ್‌ಲ್ಲಿ ತಾಜಿಂ ಆವಯ್ ಬಾಪಯ್ ಪುತಾಚ್ಯಾ ಮೀತ್ ನಾತ್‍ಲ್ಲ್ಯಾ ಅಮಾಲ್ ಪಿಯೊಣ್ಯಾ ವಿಶಿಂ ಖಂತ್ ಕಾಡ್ತಿಂ ನಾಂತ್ ಆಸ್‍ಲ್ಲಿಂ ಕೊಣ್ಣಾ!!
ಏಕ್ ಘರಾಣೆಂ ಕರೆಜ್ಮಾವೆಳಾ ಭಕ್ತಿಪಣಾಚೆಂ ಜಿಣೆಂ ಜಿಯೆತಾ. ಚಾಳೀಸ್ ದೀಸ್ ಹಾಂಚ್ಯಾ ಕುಣ್ಲ್ಯಾಂತ್ ಮಾಸ್ ಮಾಸ್ಳಿ ಶಿಜನಾ. ಘರಾಂತ್ ತೇರ್ಸ್ ಆನಿ ಖುರ್ಸಾವಾಟೆಚೆಂ ಭಕ್ತಿಪಣ್... ಸುತ್ತುರಾಂಚ್ಯಾಕೀ ದೈವಿಕ್ ಸಕತ್ ವಾಂಟ್ತಾ. ಸದಾಂ ಚುಕಾನಾಸ್ತಾಂ ಮಿಸಾಕ್ ವಚೊನ್, ಆಲ್ತಾರಿ ಸಾಮ್ಖಾರ್ ದಿಂಬ್ಯೆರ್ ಪಡೊನ್ ಮಾಗ್ಣಿಂ ಕರುನ್. ಶಾಂತ್ ಸಮಾಧಾನಾನ್ ಸಾಕ್ರಿಫಿಸ್ ಆಧಾರ್ನ್ ಪ್ರಾಜಿತ್ ಕಾಳಾರ್ ಹಾಣಿಂ ಜಿಯೆಂವ್ಚಿ ಜಿಣಿ ಪಳೆತೆಲ್ಯಾಂಕ್ ಅಪುರ್ಬಾಯ್. ಜರ್ ಆಮಿ ಅಸಲಿ ಜಿಣಿ ಜಿಯೆಲ್ಯಾರ್, ದೆವಾಕ್ ಮಾನ್ವೊತಾಲ್ಯಾಂವ್ ಮ್ಹಣ್ ಸಾಂಗ್ಚ್ಯಾಂತ್ ಚೂಕ್ ನಾ, ಪೂಣ್ ಕರೆಜ್ಮ್ ಸಂಪ್ತೆಚ್ ಹಾಂಚೆ ಖಾಲ್ತೆಪಣ್ ಖಂಯ್ ಮಾಯಾಗ್ ಜಾತಾ ಸಮ್ಜಾನಾ. ಖಂಯ್ಚೊ ಸ್ಪಿರಿತ್ ಹ್ಯಾ ಘರಾಣ್ಯಾಂತ್ ಘುಸ್ತಾ ಮ್ಹಣ್ ಕಳಾನಾ. ದುಸ್ರ್ಯಾಂಕ್ ಧೊಸ್ಚೆಂ. ಕೊಡ್ತಿಂತ್ ಆಸ್‌ಲ್ಲ್ಯಾ ಕೇಜಿಚಿಂ ಫೈಲಾಂ ಪರ್ತುನ್ ಉಗ್ತಿಂ ಕರ್ಚಿಂ ಹಾಂಚಿ ಸವಯ್. ಘರಾ ಮುಕ್ಲ್ಯಾನ್ ಹೆರಾಂಕ್ ಉಪ್ಕಾರ್ಚೊ ಮಾರೊಗ್ ವರ್ಸಾಕ್ ಧಾ ಪಾವ್ಟಿಂ ಕುಂಡ್ಚೊ ಹಾಂಚೆ ಕಾಮ್. ಚಾಳೀಸ್ ದೀಸ್ ಹಾಣಿಂ ಕೆಲ್ಲ್ಯಾ ಪ್ರಾಚಿತ್, ನಿಚೆವ್ ಆನಿ ಮಾಗ್ಣಾಚೊ ಫಳ್ ಖಂಯ್ಸರ್ ಲಿಪ್ತಾ? ಜರ್ ಹೆಂ ಕುಟಾಮ್ ವರ್ಸ್‌ ಭರ್ ಏಕ್ ಸಾಧಿ ಆನಿ ಖಾಲ್ತೆಪಣಾಚಿ ಕ್ರೀಸ್ತೀ ಜಿಣಿ ಜಿಯೆಂವ್ಕ್ ಪೆಚಾಡ್ಲೆಂ ತರ್, ಪೆಲ್ಯಾಂಕ್ ದೇಕ್ ದಿಂವ್ಚೆಂ ಕುಟಾಮ್ ಜಾವ್ನ್ ರೂಪಿತ್ ಜಾಂವ್ಚೆಂ ನಾಂಗೀ?
ಏಕ್ ಸುಟಾವೆಂ ಕುಮ್ಸಾರ್ ಜಾಂವ್ಚೆಂ, ಜಿಣಿಯೆಂತ್ ಬರೊ ನಿಚೆವ್ ಕರ್ಚೊ ಖಂಡಿತ್ ಜಾವ್ನ್ ಬರೆಂಚ್. ಪೂಣ್ ಹಾಂಚ್ಯಾ ಜಿವಿತಾಂತ್ ನಿಚೆವ್ ಮ್ಹಳ್ಳ್ಯಾ ಸಬ್ದಾಕ್ ಪಾಸ್ಕ್ ಮ್ಹಣಾಸರ್ ಮಾತ್ರ್ ಆರ್ಥ್?? ಪರತ್ ಕುಮ್ಸಾರ್ ಜಾವ್ನ್ ನಿಚೆವ್ ಕರಿಜೆ ತರ್ ಪರತ್ ಆನ್ಯೆಕ್ ಪ್ರಾಚಿತ್ ಕಾಳ್ ಯೇಜೆ? ಪ್ರಾಜಿತ್ ಕಾಳಾರ್ ಮಾತ್ರ್ ಹಾಣಿಂ ಕ್ರೀಸ್ತಾ ಖಾತಿರ್ ಜಿಯೆಂವ್ಚೆಂ? ಅಸಲಿಂ ಜಾಯ್ತಿಂ ಸವಾಲಾಂ ಮ್ಹಜ್ಯಾ ಮತಿಂತ್ ಉದೆತಾತ್. ಕರೆಜ್ಮಾಂತ್ ಕರ್ಚೊ ನಿಚೆವ್ ಆನಿ ಕೆಲ್ಲಿಂ ಪಾತ್ಕಾಂ ಒಳ್ಕುನ್ ಭೊಗ್ಚೊ ಪಶ್ಚತ್ತಾಪ್ ಸದಾಂಚೆ ಜಿಣ್ಯೆಂತ್ ಹರ್ಯೆಕ್ ಕಾಳಾರ್ ಹಾಳ್ವಾಯೆನ್ ಕೆಲ್ಲೊ ತರ್ ಕ್ರೀಸ್ತೀ ಜಿಣ್ಯೆಕ್ ನೀಜ್ ಅರ್ಥ್ ಮೆಳ್ತೊ.
ಕರೆಜ್ಮಾಂತ್ ಆಮಿಂ ಜಾಯ್ತಿಂ ಬರಿಂ ಕಾಮಾಂ ಕರ್ತಾಂವ್. ನಿಮಾಣ್ಯಾ ಸುಕ್ರಾರಾ ಖುರ್ಸಾರ್ ಮಾರ್‌ಲ್ಲ್ಯಾ ಆಮ್ಚ್ಯಾ ಸೊಮಿಯಾಚ್ಯಾ ಕಷ್ಟಾಂ ಮರ್ನಾಚೊ ಪಾಶಾಂವ್ ನಿಯಾಳ್ನ್. ಕೆಲ್ಲ್ಯಾ ಪಾತ್ಕಾಂಚೊ ಉಗ್ಡಾಸ್ ಕಾಡ್ನ್ ಪಶ್ಚಾತ್ತಾಪ್ ಪಾವ್ತಾಂವ್. ಜಿಣಿಯೆಂತ್ ಏಕ್ ನಿಚೆವ್ ಕರ್ತಾಂವ್. ಮಾಗ್ಣ್ಯಾಕ್ ಚಡ್ ವೇಳ್ ದಿತಾಂವ್. ಉಪ್ವಾಸ್ ಕರ್ತಾಂವ್. ಸಕ್ಕಡ್ ಬರೆಂಚ್ ಆನಿ ಪ್ರಾಚಿತ್ ಕಾಳಾರ್ ಆಮ್ಚ್ಯಾ ಭಾವಾಡ್ತಿ ಜಿಣ್ಯೆಕ್ ಗರ್ಜೆಚೆಂ. ಪೂಣ್ ಹೆಂ ಭಾಯ್ಲ್ಯಾ ಆಡಂಬರಾಕ್ ಜಾಯ್ನಾಶೆಂ ಜಾಂವ್. ಆಪ್ಣಾಚೆಂ ನಾಂವ್ ಸಗ್ಳ್ಯಾಂನಿಂ ವಳ್ಕಾಜೆ ಮ್ಹಣ್ ಕರೆಜ್ಮಾಚ್ಯೆ ವೆಳಾರ್ ಉಗ್ತ್ಯಾನ್ ದಾನ್ ಧರ್ಮ್ ಕೆಲ್ಯಾರ್, ಆಪ್ಣಾಕ್ ಸಗ್ಳ್ಯಾನಿ ಪಳೆಜೆ ಮ್ಹಣ್ ಕಾಟ್ಕೆರ್ ಖಾಡ್, ವೊಂಠಾರ್ ಮಿಶಿ ಆನಿ ಮಾತ್ಯಾರ್ ಲಾಂಬ್ ಕೇಸ್ ಸೊಡುನ್ ಭೊಂವ್ಲ್ಯಾರ್, ಪೆಲ್ಯಾಚ್ಯೆ ದಿಷ್ಟಿಕ್ ಆಪುಣ್ ಸೊಭಿತ್ ದಿಸಾಜೆ ಮ್ಹಣ್ ಉಪ್ವಾಸ್ ಕರುನ್ ಕುಡಿಚಿ ಮೊಟಾಯ್ ಉಣಿ ಕೆಲ್ಯಾರ್ ಹಿ ಜಿಣಿ ದೆವಾಕ್ ಮೆಚ್ವೊಂಚಿ ನಾ.
ಆಮ್ಚೊ ಭಾವಾಡ್ತ್ ಜಿವಾಳ್ ದವರುಂಕ್ ಮಾಗ್ಣೆಂ, ಆರಾಧಾನ್, ಮಿಸಾಚೆಂ ಬಲಿದಾನ್, ಕುಮ್ಸಾರಾಂ, ರೆತಿರ್, ಕರೆಜ್ಮಾಚ್ಯಾ ವೆಳಾ ಜಿಂಜ್ವಾರ್ ಮಹತ್ತರಾಚೆಂ ಪಾತ್ರ್ ಘೆತಾತ್. ಪೂಣ್ ಭೆಟವ್ಛಿಂ ಮಾಗ್ಣಿಂ ಆನಿ ಆಧಾರ್ಚೆ ಸಾಕ್ರಿಫಿಸ್ ಗುಪಿತ್ ಆಸ್‌ಲ್ಲ್ಯಾ ಬಾಪಾಕ್ ಮಾತ್ರ್ ಕಳೊಂವ್. ಸಾಂಗಾತಾ ಆಮಿ ಸಮಾಜೆಂತ್ ಕರ್ಚೆಂ ದಾನ್ ಧರ್ಮಾಂ ಆಮ್ಚ್ಯಾ ಕ್ರೀಸ್ತೀ ಜಿಣ್ಯೆಕ್ ನೀಜ್ ಆರ್ಥ್ ದೀಂವ್ಕ್ ಪಾವ್ತಾತ್. ಆಮಿಂ ಕರ್ಚಿಂ ಪೆಲ್ಯಾಚ್ಯಾ ಗರ್ಜೆಂಕ್ ಪಾಂವ್ಚಿಂ ಬರಿಂ ಕಾಮಾಂ, ಸಮಾಜೆಚ್ಯಾ ಮುಕಾರ್ ಕರಿನಾಸ್ತಾಂ, ಕರೆಜ್ಮಾಂತ್ ಮಾತ್ರ್ ಅಸಲ್ಯಾ ಕಾಮಾಂಕ್ ಮಹತ್ವ್ ದೀನಾಸ್ತಾಂ, ಜಿಣೆಯೆ ಪಯ್ಣಾರ್ ಸದಾಂ ಕೆಲಿಂ ತರ್ ಘುಟಾನ್ ಕೆಲ್ಲ್ಯಾ ಆಮ್ಚ್ಯಾ ಕಾಮಾಕ್ ಸರ್ಗಿಂಚೊ ಬಾಪ್ ಪ್ರತಿಫಳ್ ದಿತಲೊ. ಭಾಗೆವಂತ್ ಹಪ್ತೊ ಆಮ್ಕಾಂ ಸರ್ವಾಂಕ್ ನೀಜ್ ಭಕ್ತಿಪಣಾನ್ ಸಾರುಂಕ್ ಪ್ರೇರಿತ್ ಜಾಂವ್.
Tags:
Modern Lent, Easter, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
2/27/2021 ಹೆರೊಲ್ಪಿಯುಸ್: ಏಕ್ ಅವ್ಚಿತ್ ಭೆಟ್...
-
12/20/2020 ಯುವಜಣಾಂಕ್ ಪ್ರೇರಣ್ - ಜೆಸ್ಸಿಕಾ ಆನ್ನಾ ಲಿಝಾ...
-
12/6/2020 ಆಸ್ತ್ ........
-
11/25/2020 ಭಾರತಾಚಿಂ ಖಬ್ರೆ ಟಿವಿ ಚಾನೆಲಾಂ ಮರಣ್ ಪಾವ್ಲ್ಯ...
-
11/9/2020 ನಾಂವ್ ಬದಲ್ಲ್ಯಾನ್ ಗಾಂವ್ ಬದಲ್ನಾಂ...!...
-
10/17/2020 ಮಂಗ್ಳುರ್‌ಚೊ ಖ್ಯಾತ್ ಗ್ರಾಫೊಲೊಜಿಸ್ಟ್, ಸ್ಟೇ&...
-
-
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.