:: ಮಾಯ್ ಭಾಸ್

"ತುಂ ಎಕ್ಲೊ ಬೆಪ್ಪಾ. ತುಕಾ ಕಾಂಯ್ ಸಂಸ್ಕೃತೆ ವಿಶ್ಯಂತ್ ಕಳಿತ್ ನಾ. ತುಂ ನೆಣಾಂಯ್ ಆಮ್ಚೆ ಆದ್ಲೆ ಮಾಲ್ಘಡೆ ಕಂಳ್ಬಿ ನಾಚ್ ನಾಚ್ತಾಲೆ, ಗುಮ್ಟಾಂ ವಾಜವ್ನ್ ನಾಚ್ತಾಲೆ, ಆನಿ ಆತಾಂ ಹಿ ಪ್ರಗತಿ, ಮನಿಸ್ ಬದಲ್ಲಾ ಆನಿ ಮನಿಸ್ ಸುಧಾರ್ಲಾ" ಎಕಾ ಮ್ಹಾಜಣಾನ್ ತಾಳೊ ಮೆಳಯ್ಲೊ.

"ಹೋ ಹಿ ತರ್ ಪ್ರಗತಿ, ತರ್ ಆದ್ಲೆ ಆಮ್ಚೆ ಮಾಲ್ಘಡೆ ಶಿಕಾಪ್ ನಾಸ್ತಾಂ ಜಾವ್ಯೆತ್ ಯಾ ಹೆರ್ ಖಂಚಾಯ್ ಕಾರಾಣಾಂಕ್ ಲಾಗೊನ್ ಅಸಲೆಂ ಕರ್ತಾಲೆ. ಬರೆಂ ತಾಂತುಂ ಕಾಂಯ್ ಪಾಡ್ ನಾ. ಪುಣ್ ತಾಂಚಾ ಕರ್‍ಯಾಂನಿ ಅಸಲಿ ನಾಲಿಸಾಯ್, ವೀದ್ ವಾವ್ಳಿ ಯಾ ಖೆಳ್ಕುಳಾಂ ಆಸ್‌ಲ್ಲಿಂ? ಕಿತ್ಲ್ಯಾ ಮಾನ್ ಮಾಣ್ಸುಗೆಂತ್ ಆಸ್ತಾಲಿಂ?

ಆದಿಂ ಲಾತೆಂತ್ ಮೀಸ್ ಆಯ್ಕೊಂಕ್ ಮಯ್ಲಾಂ ಮಯ್ಲಾಂ ಚಲೊನ್ ವೆಚಾ ತಾಣಿಂ ಥೊಡ್ಯಾಂನಿ ಮಿಸಾ ವೆಳಾರ್ ಕೊಂತಾಚೊ ತೇರ್ಸ್ ಕರ್ಚೊ ಆಸ್‌ಲ್ಲೊ ಖಂಯ್. ಕಿತ್ಯಾಕ್? ತಾಂಕಾ ಮೀಸ್ ಆನಿ ಕೋಂತ್ ಹ್ಯಾ ಮಧ್ಲೊ ತಫಾವತ್ ತಿತ್ಲೊ ಕಳಿತ್ ನಾತ್‌ಲ್ಲೊ? ಆತಾಂ ಮಿಸಾಂ ಆಮ್ಕಾಂ ಸಮ್ಜೊಂವ್ಚಾ ಭಾಶೇಂತ್ ಜಾತಾತ್ ದೆಖುನ್ ಮಿಸಾ ವೆಳಾರ್ ಕೊಣೀಂ ತೇರ್ಸ್ ಕರಿನಾ. ಬರೆಂ ಹಿ ಪ್ರಗತಿ ಬರೆಂ, ಪುಣ್ ಆಪ್ಲ್ಯಾ ಕಾರ್‍ಯಾಕ್ ಸೊರೊ ದಿಲೊ ತರ್ ತಿ ಪ್ರಗತಿ, ಘರ್ಚೊ ಘುರ್ಕಾರ್ ಆಪ್ಲ್ಯಾ ಕಾರ್‍ಯಾಕ್ ಗಾಂವ್ಚಾಂಕ್ ಆಪವ್ನ್ ವಡಾ ದಬಾಜೆನ್ ಆಚರಣ್ ಕರ್‍ಚಿ ಪ್ರಗತಿ, ತ್ಯಾ ಕಾರ್‍ಯಾಕ್ ಹೊಲಾಂತ್ ದವರ್ಲೆಂ ತರ್ ಥಂಯ್ ಆಪಯಿಲ್ಲೊ ಯಾ ಆಪಯ್ನಾಸ್ತಾಂ ಸಯ್ತ್ ಯೆಂವ್ಚೆ ಹೆರ್ ಜಾತಿಚೆ ಸಗ್ಳೆ ಯೇವ್ನ್ ಹಾಂಗಾ ಮೆಳ್ಚೊ ಫುಂಕ್ಯಾಚೊ ಸೊರೊ ನಾಕ್‌ಭರ್ ಪಿಯೆವ್ನ್, ಪೊಟ್ ಪುಟ್ಟಾಸರ್ ಭೊಕಾವ್ನ್ ಉಪ್ರಾಂತ್ ಹ್ಯಾ ಕಾರ್‍ಯಾಕ್ ಆಯಿಲ್ಲ್ಯಾ ಹೆರ್ ಮತ್ ಆನಿ ಗತ್ ನಾತ್‌ಲ್ಲ್ಯಾಂಚಾ ಬಾಯ್ಲಾಂಕ್, ಭಯ್ಣ್ಯಾಂಕ್, ಧುವಾಂಕ್ ವೋಡ್ನ್ ನಾಸ್ಲೆ ತರ್ ತೊ ದಬಾಜೊ.. ವಾ!!.. ಬರಿ ಪ್ರಗತಿ, ಬರಿ ಪ್ರಗತಿ!.. ಲಾಂಬ್ ಜಿಯೊಂ ಹಿ ಪ್ರಗತಿ.. ಮ್ಹಾಕಾ ಅಸಲಿ ಪ್ರಗತಿ ನಾಕಾ.. ಅಸಲೊ ದಬಾಜೊ ನಾಕಾ.. ಅಸಲೆಂ ಆಚರಣ್ ನಾಕಾ... ಅಸಲಿಂ ಖೆಳ್ಕುಳಾಂ ನಾಕಾತ್...".

ಆಮ್ಚೆ ಮದ್ಲಿ ವಿಚಾರ್‌ಧಾರ್ ಮೆಲ್ಯಾ. ಚಿಂತ್ಪಾ ಸಕತ್ ದಾಡ್ಡ್ ಜಾಲ್ಯಾ. ಚಾರ್ ದಿಸಾಂಚಿ ಜಿಣಿಂ ದೆಖುನ್ ಮಜಾ ಕರಿಜಯ್ ಮ್ಹಳ್ಳೆಂ ಚಿಂತಾಪ್ ಆಯ್ಕೊಂಕ್ ಮೆಳ್ತಾ. ಬರೆಂ ಮಜಾ ಕರುಂದಿತ್. ಪುಣ್ ಎಕ್ಲ್ಯಾಚಿ ಮಜಾ ಹೆರಾಂಕ್ ಸಜಾ ಜಾಂವ್ಚಿ ಕೊಣಾಕ್‌ಯಿ ಕಳ್ತಾ? ಎಕ್ಲೊ ಆಪ್ಲ್ಯಾ ಬೊಲ್ಸಾಂತ್ಲೆ ಪೊಯ್ಶೆ ಕಾಡ್ತಾ ಆನಿ ಆಪ್ಲ್ಯಾ ಹಾತಾಂತ್ ಸಿಗ್ರೆಟ್ ಪೆಟವ್ನ್ ಆಪ್ಲ್ಯಾ ವೊಂಟಾರ್ ದವರ್ತಾ. ತಾಕಾ ಹಿ ಖರಿಚ್ ಮಜಾ. ಪುಣ್ ತಾಚಾಸವೆಂ ಎಕಾ ಬಸ್ಸಾರ್ ಯಾ ಉಗ್ತ್ಯಾ ಸುವಾತೆರ್ ಆಸ್ಚೆ ಹೆರ್ ಸಿಗ್ರೆಟ್ ವೊಡಿನಾತ್‌ಲ್ಲೆ ಕಿತೆಂ ಭೊಗ್ತಾತ್ ಮ್ಹಳ್ಳೆಂ ಚಿಂತಾಪ್ ತಾಂಚಾ ಮತಿಕ್ ಬಿಲ್ಕುಲ್ ಯೇನಾ. ಹಿ ಪ್ರಗತಿ. ಅದ್ಲ್ಯಾ ಕಾಳಾರ್ ಕೊಣೀಂ ಆಪ್ಲ್ಯಾ ಆವಯ್ ಬಾಪಾಯ್ ಮುಖಾರ್ ಬಿಡಿ ಸಿಗ್ರೆಟ್ ವೊಡಿನಾತ್‌ಲ್ಲೆ ತಶೆಂಚ್ ಸುರ್ ಸೊರೊ ಜಾಂವ್ ಪಿಯೆನಾತ್‌ಲ್ಲೆ ಆತಾಂಚಾ ಕಾಳಾರ್ ಎಕಾಚ್ ಸಿಗ್ರೆಟಿಕ್ ವಾಂಟುನ್ ಘೆತಾತ್ ಆನಿ ಎಕಾಚ್ಚ್ ಗ್ಲಾಸಾಂತ್ ಪಿಯೆತಾತ್. ಹಿ ಪ್ರಗತಿ. ಆನಿಂ ಥೊಡ್ಯಾಂಚಿ ಪ್ರಗತಿ ಅನಿಕೀ ಮುಖಾರ್ ಪಾವ್ತಾ. ಎಕಾಚ್ ಪಿಡೆಂತ್ ಆಸಾತ್ 'ಏಡ್ಸ್'. ಪ್ರಗತಿ.. ಪ್ರಗತಿ.. ಪ್ರಗತಿ.

ಸಭಾರ್ ಪಾವ್ಟಿಂ ಆಮಿಂ ಏಕ್ ಚಿಂತುನ್ ಕೆಲ್ಲೆಂ ಕಾಮ್ ಹೆರಾಂಕ್ ಬೊಲ್ತೆಂಚ್ ಘಡ್ತಾ. ಜಾಣಾರ್‍ಯಾಂನಿ ಖರೆಂಚ್ ಮ್ಹಳಾಂ 'ಆಮಿಂ ಆಮ್ಚೆವಿಶ್ಯಾಂತ್ ಆಮಿಂಕಿತೆಂ ಕರುಂಕ್ ಸಕ್ತಾಂವ್ ಮ್ಹಳ್ಳೆಂ ಚಿಂತಾಪ್ ತರ್ ಹೆರಾಂ ಆಮ್ಚೆ ವಿಶ್ಯಾಂತ್ ಆಮಿಂ ಕಿತೆಂ ತಾಂಕಾ ಯೆದೊಳ್ ಕೆಲಾಂ ಮ್ಹಳ್ಳ್ಯಾಚೆರ್ ಚಿಂತಾತ್'. ತಿಯೊಚೆರ್ ಬರೊ ಅಭಿಮಾನ್ ಆಸೊನ್ ಮಾರ್‍ಕುನ್ ಕಿತೆಂಯ್ ಚಿಂತ್‌ಲ್ಲೆಂ ತರ್, ತೆಂ ತಿಯೊಚೆಂ ಬರೆಂಪಣ್. ತೆ ಎಕಾಚ್ಚ್ ಕ್ಲಾಸಿಂತ್ ಶಿಕೊನ್ ವಡ್ ಜಾಲ್ಲೆ. ಎಕಾಚ್ಚ್ ಭುತಿಯೆಕ್ ವಾಂಟುನ್ ಖಾವ್ನ್ ವಡ್ ಜಾಲ್ಲೆ. ಆನಿ ತಿಯೊಚಾ ಮನಾಕೀ ಆನಿ ಕಶ್ಟಿ ಸ್ವಭಾವಾಕ್ ಕೊಣೆಂಯ್ ಘಾತ್ ಕರಿನಾಯೆ ಮ್ಹಳ್ಳ್ಯಾ ಇರಾದ್ಯಾನ್ ಮಾರ್ಕುನ್ ತಿಯೊಕ್ ಚತ್ರಾಯ್ ಸಾಂಗ್‌ಲ್ಲಿ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್. ಪುಣ್ ದುಡು, ಭಾಂಗಾರ್, ಆಸ್ತ್, ಆನಿ ಸ್ತ್ರೀ ಖಂಚಾಯ್ ಬಾಂಧಾಕ್ ಬಾಧಕ್ ಹಾಡುಂಕ್ ಸಕ್ತಾ ಮ್ಹಳ್ಳೆಂ ಸತ್ ಮಾರ್ಕುಕ್ ಕಳ್ಳೆಂ.

ತಾಚಾ ಮತಿಂತ್ ತಿಯೊಚೆರ್ ಘಾತ್ ಜಾಂವ್ ಮೊಸೊರ್ ಜಾಂವ್ ನಾತ್‌ಲ್ಲೊ. ಮನ್ಶಾ ಸಂಯ್ಬಾಂತ್ ಮೊಸೊರ್ ಏಕ್ ಅಸ್ಕತ್ಕಾಯ್ ತರೀ ತೊ ಮೊಸೊರ್ ಆಸ್ಚೊ ಸಹಜ್. ತೇಂಯ್ ತಿಯೊ ಪರ್ಗಾಂವಾಕ್ ಪಾವ್ಲಾ ತರ್ ತೆಂ ಮಾರ್ಕುಚಾ ಮಜತೆನ್. ಆನಿ ಗಲ್ಫಾಕ್ ಪಾವ್‌ಲ್ಯಾ ತಿಯೊಚೆಂ ಕಾಮ್ ತಿಯೊಚಾಕೀ ಸಭಾರ್ ವರ್ಸಾಂಧಿಂ ಗಲ್ಫಾಕ್ ಆಯಿಲ್ಲ್ಯಾ ಮಾರ್ಕುಕ್ ನಾತ್‌ಲ್ಲೆಂ. ಕಾಮ್ ಚಡ್ ಆನಿ ಸಾಂಭಾಳ್ ಉಣೊ. ಪುಣ್ ತವಳ್‌ತವಳ್ ಮಾರ್ಕುಕ್ ತಾಂಚಾ ಘರಾ ಯೆಂವ್ಚಿಂ ಸಯ್ರಿಂ ಥೊಡೆಪಾವ್ಟಿಂ ಪಾರ್‍ಟ್ಯೊ ಆಸ್ತಾನಾ ಕಾಂಯ್ ಭಕ್ಶೀಷ್ ದಿತಾಲಿಂ ಆನಿ ಹಾಂತ್ಲೆ ಹರ್‍ಯೆಕ್ ಚಿಲ್ಲರ್ ಪೊಯ್ಶೆ ಜಮೊ ಕರುನ್ ಮಾರ್ಕು ದವರ್ತಾಲೊ.

ಮಾರ್ಕುಚಾ ಘರಾಂತ್ ಆತಾಂ ಕೊಣಾಚಾಯ್ ಹಂಗಾ ಬಗಾರ್ ಜಿಯೆಂವ್ಕ್ ಸಾಧ್ಯ್ ಆಸ್‌ಲ್ಲೆಂ. ತಾಚಿಂ ಭುರ್ಗಿಂ ಬರೆಂ ನೆಸ್ತಾಲಿಂ ಬರೆಂ ಜಿವಿತ್ ಜಿಯೆತಾಲಿಂ.

ಆಪ್ಣಾನ್ ತಿಯೊಕ್ ಎಸ್ತೆಲಾ ವಿಶ್ಯಾಂತ್ ಸಾಂಗ್‌ಲ್ಲೊ ಉದ್ದೇಶ್ ಕಿತ್ಲೊ ಬರೊ ಆಸ್‌ಲ್ಲೊ ತರೀ ತಾಚೆಂ ಪರಿಣಾಮ್ ಹ್ಯಾ ಪರಿಂ ಜಾಲ್ಲೊ ಪಳೆವ್ನ್ ಮಾರ್ಕುಕ್ ಆಪ್ಣಾಚೆರ್‌ಚ್ಚ್ ಶಿಣ್ ಆಯ್ಲೊ. ತರೀ ತ್ಯೇ ವಿಶ್ಯಾಂತ್ ತಿಯೊಕ್ ಏಕ್ ಪಾವ್ಟಿಂ ಮೆಳೊನ್ ತಾಚೆವಿಶ್ಯಾಂತ್ ತರ್ಕ್ ಕರುಂಕ್ ಚಿಂತಾಲೊ. ತರೀ ತಾಂತುಂ ಜಾಂವ್ಚೊ ಪರಿಣಾಮ್ ಕಸಲೊ? ಕುಟಾಮ್ ತುಟ್ತೆಲೆಂ. ಜಾಲ್ಲೆಂ ಕೊಣಾಯ್ಚಾನೀಂ ಆಡಾಂವ್ಕ್ ಸಾಧ್ಯ್ ಆಸಾಗೀ? ತ್ಯೇ ಶಿವಾಯ್ ಎಸ್ತೆಲ್ ಅಸಲ್ಯಾ ವರ್ಗಾಚಿ ಬಾಯ್ಲ್ ಮ್ಹಳ್ಳೆಂ ಕಳ್ತೆಚ್ಚ್ ಮಾರ್ಕುಕ್ ಕಿತ್ಯಾಕ್‌ಗೀ ತಾಣೆಂ ಪಾಟಿಂ ಯೆಂವ್ಚಾಧಿಂ ಪರತ್ ತಿಯೊಚೆರ್ ವಚೊಂಕ್ ಮನ್ ಜಾಲ್ಲೆಂನಾ. ತಾಕಾ ತಾಚಾ ಬಾಯ್ಲ್ ಭುರ್ಗ್ಯಾಂಕ್ ತಿಯೊಚಾ ಘರಾಕ್ ವ್ಹರಿನಾತ್‌ಲ್ಲೆಂ ಬರೆಂಚ್ ಜಾಲೆಂ ಮ್ಹಣೊನ್ ಭೊಗ್ಲೆಂ. ಕಾಂಯ್ ಆಪ್ಲ್ಯಾ ಬಾಯ್ಲೆಕ್ ತಿಚಾ ವಿಶ್ಯಾಂತ್ ಕಳಿತ್ ಆಸೊನ್ ಆಪ್ಣಾನ್ ತಾಂಕಾ ಥಂಯ್ ಆಪವ್ನ್ ವೆಲೊ ತರ್ ದುಸ್ರಿಚ್ ಕಾಣಿಂ ಘಡೊಂಕ್ ಆಸಾ ಮ್ಹಣೊನ್ ಮಾರ್ಕುನ್ ಲೇಕ್ ಘಾಲೆಂ.

ಮಾರ್ಕು ಗಾಂವಾ ಥಾವುನ್ ಕುವೆಯ್ಟಾಕ್ ಪಾಟಿಂ ಯೇವ್ನ್ ಸಭಾರ್ ಮಹಿನೆ ಜಾಲೆ ತರೀ ತಿಯೊ ಪಯ್ಲೆಂಚೆಪರಿಂ ಆಪ್ಣಾಕ್ ಭೆಟೊನ್ ಯೇಂವ್ಕ್ ನಾತ್‌ಲ್ಲೊ ಪಳೆವ್ನ್ ಮಾರ್ಕುಕ್ ತಿಯೊಚೆರ್ ಮತಿಂತ್ ಮೊಸ್ತ್ ಬೆಜಾರಾಯ್ ಆಸ್‌ಲ್ಲಿ. ಪಯ್ಲೆಂ ತಿಯೊಕ್ ಎಕ್ಸುರೊ ಸೊಡುಂಕ್ ಚಿಂತ್‌ಲ್ಲ್ಯಾ ಮಾರ್ಕುಕ್ ಅಖ್ರೇಕ್ ಕಳ್ಳೆಂ ತಿಯೊ ಆಪ್ಣಾಚೆರ್ ರಾಗಾರ್ ಆಸಾ ಮ್ಹಣೊನ್. ಹರ್ಯೆಕಾ ಆಯ್ತಾರಾ ತೊ ಮೀಸ್ ಜಾತೆಚ್ಚ್ ತಿಯೊಕ್ ರಾಕ್ತಾಲೊ. ತಾಕಾಯ್ ತಿಯೊಸವೆಂ ಉಲವ್ನ್ ಸವಯ್ ಜಾಲ್ಲಿ ಆನಿ ತಾಂಕಾ ಸಾಂಗಾತಾ ಪಳೆಲ್ಲ್ಯಾ ಜಾಯಿತ್ತ್ಯಾಂನಿಂ ಏಕ್ ದೋನ್ ಪಾವ್ಟಿಂ ತಿಯೊಕ್ ಸವಾಲ್ ಕೆಲ್ಲೆಂಯ್ ಆಸಾ. ತರೀ ಮಾರ್ಕುನ್ ತಾಂಕಾ ಕಿತೆಂಚ್ ಜಾಪ್ ದಿಲ್ಲಿ ನಾ.

ಪುಣ್ ತಿಯೊಚಾ ಮತಿಂತ್ ದುಸ್ರಿಂಚ್ ಚಿಂತ್ನಾಂ ಆಸ್‌ಲ್ಲಿಂ. ತಾಕಾ ಮತಿಭಿತರ್ ಕಸಲೆಂಗೀ ಉಣೆಂಪಣ್ ಭೊಗ್ತಾಲೆಂ. ಕಿತೆಂ ಜಾಲ್ಯಾರೀ ಬಾಯ್ಲ್ ತಿ ಬಾಯ್ಲ್‌ಚ್ಚ್ ಬರಿ ಜಾಂವ್ ಯಾ ವಾಯ್ಟ್. ಜೀಣ್‌ಭರ್ ತಿಚೆಸವೆಂ ಆಪ್ಣಾನ್ ದೀಸ್ ಕಾಡುಂಕ್ ಆಸಾ. ತಿ ಬರಿ ನ್ಹಂಯ್ ತರೀ ತಿಚೆ ವಿಶ್ಯಾಂತ್ ವಾಯ್ಟ್ ಉಲಯಿಲ್ಲ್ಯಾಂಸವೆಂ ಬರೆಂ ಚಿಂತುಂಕ್ ಕೊಣಾಯ್ಕೀ ಇಲ್ಲೆ ಕಶ್ಟ್. ತೊ ಚಿಂತಾಲೊ ಕಾಂಯ್ ಮಾರ್ಕು ಯೇತ್ ತರ್ ತಾಚೆಲಾಗಿಂ ಉಲಯ್ಜಾಯ್ ಮ್ಹಣೊನ್. ಪುಣ್ ಮಾರ್ಕು ಯೇನಾತ್‌ಲ್ಲೊ ಪಳೆಲ್ಲ್ಯಾ ತಿಯೊಕ್ ವಚೊನ್ ಮಾರ್ಕುಕ್ ಮೆಳೊಂಕೀ ಎಕಾ ಥರಾಚಿ ಕಾವ್ಜೆಣ್ ಭೊಗ್ಲಿ. ತಾಚಾ ಮಧೆಂ ತಾಚೆಂ ಕಾಮ್ ಆನಿ ಹೆರ್ ರಾಟಾವಳ್ಯೊ ಮ್ಹಣ್ತಾನಾ ಕಶೆ ಹಪ್ತೆ ಮಹಿನೆ ಜಾವ್ನ್ ಬದಾಲ್ಲೆ ಮ್ಹಳ್ಳೆಂ ತಿಯೊಕ್ ಕಳ್ಳೆಂನಾ. ತರೀ ತಾಚಾ ಮತಿಂತ್ ಮಾರ್ಕುಕ್ ಮೆಳಾನಾಸ್ತಾಂ ಆಪ್ಣಾಕ್ ಕಿತೆಂಗೀ ಚುಕ್‌ಲ್ಲೆಪರಿಂ ಭೊಗ್ತಾಲೆಂ. ಅಶೆಂ ಸಭಾರ್ ಪಾವ್ಟಿಂ ತಾಚಾ ಮತಿಂತ್ ಏಕ್ ಪಾವ್ಟಿಂ ವಚೊನ್ ತಿಯೊಕ್ ಮೆಳ್ಯಾಂ ಮ್ಹಣೊನ್ ಭೊಗ್‌ಲ್ಲೆಂಯ್ ಆಸಾ. ತರೀ ಎದೊಳ್ ಪರ್‍ಯಾಂತ್ ತೊ ಮೆಳೊಂಕ್‌ನಾ ಆನಿ ಅಶೆಂ ಏಕ್ ದೀಸ್ ತಾಣೆಂ ಮನ್ ಕರ್ನ್ ತಿಯೊಕ್ ಮೆಳ್ಚೆಂ ಮ್ಹಣೊನ್ ಚಿಂತ್ಲೆಂ ಆನಿ ಮೀಸ್ ಜಾತೆಚ್ಚ್ ಯೇವ್ನ್ ತಿಯೊಕ್ ಮೆಳ್ಳೊ.

ತೊ ದೀಸ್ ಆಯ್ತಾರ್ ಆನಿ ರಜೆಚೊ ದೀಸ್ ಜಾಲ್ಲೆವರ್ವಿಂ ತಿಯೊ ತಾಚಿಂ ವಸ್ತ್ರಾಂ ಉಂಬ್ಳುನ್ ಘರಾಚ್ ಇಲ್ಲಿ ನಿತಳಾಯ್ ಕರ್ಚಾರ್ ಪಡ್‌ಲ್ಲೊ. ಅವ್ಚಿತ್ ಆಯಿಲ್ಲ್ಯಾ ಮಾರ್ಕುಕ್ ಪಳೆವ್ನ್ ಏಕ್ ಘಡಿ ಕಾಂಯ್ ಆಪ್ಣಾಕ್ ವಾಯ್ಟ್ ಆಯ್ಕೊಂಕ್ ಮೆಳ್ತಾಗೀ ಮ್ಹಣೊನ್ ದುಭಾವ್ ಜಾಲೊ. ತಿಯೊ ಆಪ್ಣಾಕ್ ಪಳೆತೆಚ್ಚ್ ರಾಗಾರ್ ಜಾತಲೊ ಮ್ಹಳ್ಳೆಂ ಚಿಂತುನ್ ಆಸ್‌ಲ್ಯಾ ಮಾರ್ಕುಕ್ ಸಮಧಾನ್ ಜಾಲೆಂ. ಥಂಯ್ ಚಡಿತ್ ಉತ್ರಾಂಚಿ ಗರ್ಜ್ ನಾತ್‌ಲ್ಲಿಂ ತಾಂಚೆಂ ಮಧೆಂ ಆಸ್ಚೆಂ ಮೌನ್೦ಚ್ ತಾಂಕಾ ಎಕಾಮೆಕಾ ಕಾಳ್ಜಾಂತ್ ನಾ-ಸಮಧಾನ್ ಆಸ್‌ಲ್ಲ್ಯಾಚೆ ಚುರ್ಚುರೆ ಹಾಡ್ತಾಲೆ. ತಿಯೊನ್ ಮಾರ್ಕುಕ್ ಇಲ್ಲಿ ಕಾಪಿ ಹಾಡವ್ನ್ ದಿಲಿ ಆನಿ ಮಾರ್ಕುನ್ ತಿ ಕಾಪಿ ಪಿಯೆತಾನಾ ತಿಯೊ ನೆಸೊನ್ ಆಯ್ತೊ ಜಾಲೊ ಆನಿ ಸಭಾರ್ ತೆಂಪಾ ಉಪ್ರಾಂತ್ ಮಾರ್ಕುಸವೆಂ ಭಾಯ್ರ್ ಗೆಲೊ.

ತ್ಯೇ ದೀಸ್ ಸಗ್ಳ್ಯಾನಿತ್ಲ್ಯಾನ್ ಧುಳಿಚಿ ಧುಂವ್ರಿ ಭರ್‌ಲ್ಲಿ. ದೊಳೆ ಉಗ್ತೆ ಕರುಂಕ್ ಸಾಧ್ಯ್ ನಾತ್‌ಲ್ಲೆಂ. ದೋನ್ ಮೆಟಾಂ ಚಲ್ತಚ್ಚ್ ಸಗ್ಳ್ಯಾ ಆಂಗಾಚೆರ್, ಕಾನಾಂ ಭಿತರ್, ದೊಳ್ಯಾಂ ಭಿತರ್ ರಿಗ್ಚಿ ಧುಳ್ ಭಾಯ್ರ್ ವೆಚೆಂಚ್ಚ್ ನಾಕಾ ಮ್ಹಳ್ಳೆಂ ಚಿಂತಾಪ್ ದಿತಾಲೆಂ. ಎಕಾ ವಾಟೆರ್ ಧುಳಿಚಿ ಧುಂವ್ರಿ ತರ್ ಅನ್ಯೇಕಾ ವಾಟೆರ್ ವಾರೆಂ ವಿಪ್ರೀತ್ ಜಾಲ್ಲೆಂ.

ತಿಯೊನ್ ಉಲಂವ್ಚಾಕ್ ಕಿತೆಂ ಸುರ್‍ವಾತ್ ಕರ್ಚಿ ಮ್ಹಳ್ಳೆಂ ಸಮ್ಜಾನಾಸ್ತಾಂ ಮಣಿಚಾ ಕುಟ್ಮಾ ವಿಶ್ಯಾಂತ್ ಆನಿ ಗೋಪಿಚಾ ಜಿಣ್ಯೆವಿಶ್ಯಾಂತ್ ಉಲಯ್ಲೊ. ತಿಯೊನ್ ಗೋಪಿಚಾ ಜಿಣ್ಯೆ ವಿಶ್ಯಾಂತ್ ದಿಲೆಂ ವಿವರಣ್ ಆಯ್ಕಾಲ್ಲೊ ಮಾರ್ಕು ಥಟಾಕ್ಲೊ.

ತೆ ದೊಗೀಂ ಪರತ್ ಇಗರ್ಜೆಲಾಗಿಂ ಗೆಲೆ ಆನಿ ಸದಾಂಚಾ ತಾಂಚಾ ಜಾಗ್ಯಾರ್. ತಾಣಿಂ ಉಲಂವ್ಚಾಕೀ ಲೊಕಾಂನಿ ಉಲಂವ್ಚೆಂ ತೆ ಆಯ್ಕಾತಾಲೆ. ತಿತ್ಲ್ಯಾರ್ ಎಕ್ಲೊ ತಾಚೆ ಭಂವಾರಿಂ ಆಸ್ಚಾಂಕ್ ಸಮ್ಜೊಣಿಂ ದಿತಾಲೊ. ಆನಿ ತಾಂಚಿಂ ಉತ್ರಾಂ ನಾಕಾ ನಾಕಾ ಮ್ಹಳ್ಯಾರೀ ತಿಯೊ ಆನಿಂ ಮಾರ್ಕುಕ್ ಆಯ್ಕಾತಾಲೆಂ.

"ಕಾಜಾರ್ ಮ್ಹಳ್ಯಾರ್ ಕಾಂಯ್ ಭುರ್ಗ್ಯಾಂಚೊ ಖೆಳ್ ನ್ಹಂಯ್. ಎಕಾಮೆಕಾಕ್ ಹೊ ಜಿಣ್ಯೆಭರ್ ಬಾಂಧ್ ಆನಿ ಹೊ ಬಾಂಧ್ ತುಟೊಂಕ್ ಜಾಯ್ನಾ. ಸಭಾರ್ ಪಾವ್ಟಿಂ ಎಕಾಮೆಕಾ ಥಾವುನ್ ಜಾಯಿತ್ತ್ಯೊ ಆಶಾ ಆಕಾಂಕ್ಷಾ ಆಸೊನ್ ತ್ಯೊ ಸುಫಳ್ ಜಾಯ್ನಾತ್‌ಲ್ಲೆ ವರ್ವಿಂ ನಿರಾಶಾ ಭೊಗ್ತಾ. ಹೆಂ ಸಹಜ್, ಕಿತ್ಯಾಕ್ ಮ್ಹಳ್ಯಾರ್ ಜಿತ್ಲಿ ವ್ಹಡ್ ಆಶಾಗೀ ತಿತ್ಲಿ ವಡ್ ನಿರಾಶಾ. ಪುಣ್ ತೆಚ್ಚ್ ವೆಳಾರ್ ಆಪ್ಣಾಚಿ ಸಾಂಗಾತಿಣ್ ಯಾ ಸಾಂಗಾತಿ ಆಪ್ಣಾ ಥಾವುನ್ ಕಿತೆಂ ಆಶೆತಾ ಮ್ಹಳ್ಳೆಂ ಸಮ್ಜೊನ್ ಘೆಂವ್ಚಿ ತಾಂಕ್ ಯಾ ಶ್ಯಾತಿ ಆಮ್ಕಾಂ ನಾತ್‌ಲ್ಲೆವೆಳಾರ್ ಮನಸ್ತಾಪ್ ಉದೆತಾ ಆನಿ ಥಂಯ್ ಎಕಾ ಅಂತ್ಯಾಚಿ ಸುರ್‍ವಾತ್ ಜಾತಾ."

ಥಂಯ್ ಜಮೊ ಆಸ್ಚೆ ವಿವಿಂಗಡ್ ಪಂಗಡ್ ತಾಂಚಾ ತಾಂಚಾ ಪಂಗ್ಡಾಸವೆಂ ಆಸ್ಚೆ ಎಕ್ಲೆ ದೋಗ್ ತುಂಡುರಾಯ್. ಆನಿ ತಾಣಿಂ ಸಾಂಗ್‌ಲ್ಲ್ಯಾಕ್ ಆನಿ ಸಾಂಗ್ಚಾಕ್ ಹುಂ ಕುಟ್ಟುಂವ್ಚೆ ಹೆರ್. ಸಗ್ಳೆಂ ಹಾಂಗಾ ಸದಾಂಚೆಂ. ಥೊಡೆ ತಾಂಚಾಂಚಾ ಭಾಸಾನಿ ಉಲಯ್ತಾಲೆ, ಥೊಡೆ ಇಂಗ್ಲಿಶಾಂತ್ ಉಲಯ್ತಾನಾ ಥೊಡೆ ಅರ್ಭಿ ಭಾಸೆಂತ್ ಉಲಯ್ತಾಲೆ. ಥೊಡೆ ಫೊಕಣಾಂ ಉಲಯ್ತಾಲೆ ತರ್ ಥೊಡೆ ಜಿಣ್ಯೆಚಿಂ ತರ್ಕಾಂ ಉಲಯ್ತಾಲೆ ಆನಿ ಹೆರ್ ಥೊಡೆ ತಾಂಕಾ ಕಾನ್ ದೊಳೆ ನಾಕ್ ತೋಂಡ್ ಉಗ್ತೆಂ ಕರುನ್ ಆಯ್ಕತಾಲೆ.

"ಮನ್ಶಾಚಾ ಜಿಣ್ಯೆಂತ್ ಆಸಾ ತರೀ ಕಿತೆಂ? ಜಲ್ಮಲ್ಲೊ ಕಿತ್ಯಾಕ್ ಜಲ್ಮಾಲೊ ಮ್ಹಣೊನ್ ಕೊಣಾಯ್ಚೊಯ್ ವಿಚಾರ್ ಕೆಲ್ಲೆಪರಿಂ ನಾ. ಜಲ್ಮಾಲ್ಲೊ ತಾಚಿ ವಿಂಚವ್ಣ್ ನ್ಹಂಯ್ ತಶೆಂ ಆಸ್ತಾಂ ತಾಕಾ ಮೆಳ್‌ಲ್ಲಿ ತಿ ಜಿಣಿ ಲೆಗುನ್ ತಾಚಿ ವಿಂಚವ್ಣ್ ನ್ಹಂಯ್. ಜಿಯೆತಾನಾ ತರೀ ಪಯ್ಲೆಂಚೆ ಹಂತ್ ಭುರ್ಗ್ಯಾಪಣಾಚೆಂ ಹಂತ್. ಆಪ್ಲ್ಯಾ ಆವಯ್ ಬಾಪಾಯ್ನ್ ದಿಲ್ಲ್ಯಾ ಶಿಕವ್ಣೆ ಪ್ರಕಾರ್ ವ್ಹಡ್ ಜಾಯ್ಜಯ್. ತಾಚಾ ಆವಯ್ ಬಾಪಾಯ್ಕ್ ಕಿತೆಂ ಬರೆಂ ಮ್ಹಣ್ ದಿಸ್ತಾ ತೆಂಚ್ ಬರೆಂ ಮ್ಹಣೊನ್ ಮಾಂದುನ್ ಘೆಜಾಯ್. ತಾಂಚಾ ಖುಶೆಚೆಂ ಉಲವ್ಪ್, ತಾಂಚಾ ಖುಶೆಚೆಂ ಶಿಕಾಪ್, ತಾಂಚಾ ಖುಶೆಚೆಂ ನೆಸಾಪ್. ಹೆಂ ಸಕ್ಕಡ್ ವೆವಸ್ತಿತ್ ರಿತಿನ್ ಚಲೊನ್ ವೆತಾನಾ ಪಿಡಾ ಶಿಡಾಮಧೆಂ ಭುರ್ಗೆಂಪಣ್ ಖಬಾರ್ ನಾಸ್ತಾಂಚ್ ಧಾಂವ್ತಾ.

ಉಪ್ರಾಂತ್ಲೆಂ ಹಂತ್ ತರ್ನಾಟ್‌ಪಣಾಚೆಂ ಹಂತ್. ಹುನ್ ಹುನ್ ರಗ್ತಾಚೆಂ ಹಂತ್. ತಕ್ಲೆರ್ ಶಿಂಗಾ ಫುಟ್‌ಲ್ಲ್ಯಾ ಪಾಡ್ಕ್ಯಾನ್ ಮೆಳ್‌ಲ್ಲ್ಯಾಂಕ್ ಹಾಂಡುಂಕ್ ಯೆಂವ್ಚೆಪರಿಂ, ರಾವಾನಾಸ್ತಾಂ ಯೆಂವ್ಚಿಂ ಎಕಾ ಪಾಟ್ಲ್ಯಾನ್ ಏಕ್ ಚಿಂತ್ನಾಂ ಆನಿ ಆಶಾ ಬರೆಂಗೀ ಯಾ ಪಾಡ್‌ಗೀ ಮ್ಹಳ್ಳೆಂ ಸಮ್ಜೊಂವ್ಚಾಧಿಂಚ್ ಘಡ್ಚೊ ಕರ್‍ನ್ಯೊ, ತವಳ್ ಧಾಂವ್ಣಿ ಆರಂಭ್ತಾ. ಕೋಣ್ ಮನ್ಶಾಂ ಪಾಟ್ಲ್ಯಾನ್ ಧಾಂವ್ತಾ, ಕೋಣ್ ಪೊಯ್ಶ್ಯಾಂ ಪಾಟ್ಲ್ಯಾನ್ ಧಾಂವ್ತಾ, ಕೋಣ್ ನಾಂವಾ ಪಾಟ್ಲ್ಯಾನ್ ಧಾಂವ್ತಾ ಕೋಣ್ ಹೆರ್ ಸಂಗ್ತ್ಯಾ ಪಾಟ್ಲ್ಯಾನ್ ಧಾಂವ್ತಾ ತರ್ ಕೋಣ್ ಸೊರ್‍ಯಾ ಪಾಟ್ಲ್ಯಾನ್ ಧಾಂವ್ತಾ. ಆನಿ ಹ್ಯಾ ಸಗ್ಳ್ಯಾ ಧಾಂವ್ಣೆಂತೀ ಮನ್ಶಾಕ್ ಮೆಳ್ಚೊ ಶೆವೊಟ್ ಇತ್ಲೊಚ್ 'ಖರ್ಶೆವ್ಣಿಂ'.

ಮನಿಸ್ ಖರ್ಶೆಂವ್ಕ್ ಲಾಗ್ತಾನಾ ತಾಚೆಂ ಚಡ್ತಾವ್ ತರ್ನಾಟ್ಪಣ್ ಉಭ್ತಾ. ತವಳ್ ತಾಕಾ ಬಾಯ್ಲ್ ಆನಿಂ ಭುರ್ಗಿಂ ಆಸ್ತಾತ್. ಉಪ್ರಾಂತ್ ಭುರ್ಗ್ಯಾಂಕ್ ವ್ಹಡ್ ಕರುಂಕ್ ತಾಂಚಾ ಬರ್‍ಯಾ ಫಾಲ್ಯಾ೦ ವಿಶ್ಯಾಂತ್ ಚಿಂತುಂಕ್. ಭುರ್ಗಿಂ ಬರಿಂ ಜಾಲಿಂ ತರ್ ನಶಿಬ್. ತಶೆಂಚ್ ವಾಯ್ಟ್ ಜಾಲಿಂ ತರ್ ಭೊಗ್ಚೆಂ ನಾಸಮಧಾನ್ ವೆಗ್ಳೆಂಚ್.

ಭುರ್ಗ್ಯಾಂಕ್ ಎಕಾ ಫುಡಾರಾಕ್ ಪಾವಾಯ್ತಾನಾ ತರ್ನಾಟ್ಪಣ್ ಉತ್ರೊನ್ ಮ್ಹಾತಾರ್‍ಪಣ್ ಯೆತಾಚ್ಚ್. ಆನಿ ಹ್ಯಾ ಮ್ಹಾತಾರ್‍ಪಣಾರ್ ಉರ್ತಾ ಖಂತ್ ಆನಿ ಹುಸ್ಕೊ. ಖಂತ್ ಆಪ್ಣಾನ್ ಸಾಂಡ್‌ಲ್ಲೆ ಜಿಣ್ಯೆಚೊ ತರ್ ಹುಸ್ಕೊ ಸಂಸಾರಾಂತ್ ಆಪ್ಣಾನ್ ಆಪ್ಣಾಯಿಲೆಂ ಸಾಂಡುನ್ ವೆಚೊ. ಹ್ಯಾ ಖಂತ್ ಆನಿ ಹುಸ್ಕ್ಯಾ ಮಧೆಂ ಕಳನಾಸ್ತಾಂ ಆಯಿಲ್ಲೆಂ ಮರಣ್ ಅವ್ಚಿತ್ತ್ ಥರಾನ್ ಅವ್ಘಡಾ ರುಪಾನ್ ಯಾ ಪಿಡೆಶಿಡೆಚಾ ರುಪಾನ್ ಯೇವ್ನ್ ಮನ್ಶಾಂಕ್ ಆಪ್ಲೆ ತಾಬೆಂತ್ ಘೆತಾನಾ೦ಯಿ ತೆಂ ಮರಣ್ ತಾಚಿ ವಿಂಚವ್ಣ್ ಜಾವ್ನ್ ಉರಾನಾ. ತರೀ ಸಂಸಾರಾಚೆಂ ನಿಯಮ್ ಹೆಂ ಆನಿ ಕಿತ್ಯಾಕ್ ಯೆತಾ ಮ್ಹಳ್ಳೆಂ ಸಯ್ತ್ ತಾಕಾ ಕಳಾನಾ ಕಿತ್ಯಾಕ್ ವೆತಾ ಮ್ಹಳ್ಳೆಂ ಸಯ್ತ್ ತಾಕಾ ಕಳಾನಾ.

ಜಿಣ್ಯೆಂತ್ ಜಾಲ್ಯಾರೀ ಜಲ್ಮಾ ಥಾವ್ನ್ ಮರ್ಣಾ ಮಧ್ಲೊ ಅಂತರ್‌ಚ್ಚ್ ಮನ್ಶಾಚಿ ಜಿಣಿಂ, ಆನಿ ಹ್ಯಾ ಜಿಣ್ಯೆರ್ ಕಿತ್ಲೆಂ ಆರಾಯ್ಲಾಂ ಯಾ ಕಿತ್ಲೆಂ ನೆರಾಯ್ಲಾಂ ಮ್ಹಳ್ಳ್ಯಾಂತ್ ತ್ಯಾ ಮನ್ಶಾಚಿ ಜಿಣಿ ಆಟಾಪಾನಾ ಬಗಾರ್ ಕಿತ್ಲೆ ಆಪ್ಲ್ಯಾ ಪೆಲ್ಯಾಕ್ ಬರೆಂ ಕೆಲಾಂ ಆನಿ ಕಿತ್ಲೆಂ ಹೆರಾಂ ಖಾತಿರ್ ಜಿಯೆಲಾಂ ಮ್ಹಳ್ಳ್ಯಾಚೆರ್ ಹೊಂದ್ವೊನ್ ಆಸಾ.

ಕೋಣ್‌ಗೀ ಎಕ್ಲೊ ತತ್ವ್ ಶಾಸ್ತಿರ್ ಉಲಯ್ತಾಲೊ. ತಾಚಿಂ ತರ್ಕಾಂ ಆಯ್ಕಾಲ್ಲೆ ಥೊಡೆ ಕಾನ್ ದೊಳೆ ಹಾಲಯ್ತಾಲೆ. ಉಲಯ್ತೆಲ್ಯಾಚೆ ಆನಿ ಆಯ್ಕತೆಲ್ಯಾಂಚಾ ಕಪಲಾರ್ ಮಿರಿಯೊ ಆಸ್‌ಲ್ಲ್ಯೊ. ಲಾಗ್ಸಿಲ್ಯಾನ್ ಥೊಡೆ ರಾವೊನ್ ಫೊಕಣಾಂ ಉಲಯ್ತಾಲೆ. ಹಾಸ್ತಾಲೆ, ಉಡ್ತಾಲೆ, ಪಡ್ತಾಲೆ, ನಾಸ್ತಾಲೆ. ಆನಿ ತಾಂಚೆ ಮಧೆಂ ಎಕ್ಲಿಂ ದೊಗಾಂ ಕೊಣಾಕ್‌ಗೀ ತುಕ್ಲಾಯ್ತಾಲೆ.

ಹಪ್ತ್ಯಾಚೊ ಏಕ್ ದೀಸ್ ಮೆಳ್ತಾ ಆನಿ ದಿಸಾಚಾ ಹರ್ಯೆಕಾ ಘಡಿಯೆ ನಿರಾಶಾ ದೂಃಖ್ ಭೊಗೊನ್ ಆಸ್ಚಾಂಕ್ ಹ್ಯಾ ದಿಸಾ ಇಲ್ಲೊ ಸುಶೆಗ್ ಗರ್ಜೆಚೊ. ಕಾಂಯ್ ಇಲ್ಲೆಂ ಮತಿಕ್ ಸಮಧಾನ್ ಮೆಳ್ಳೆಂ ತರ್ ತೆಂಚ್ ತಾಂಚಾ ಫುಡ್ಲ್ಯಾ ದಿಸಾಂಕ್ ಆಧಾರ್ ಜಾತಾಲೆಂ.

ಗಲ್ಫಾಕ್ ಯೇವ್ನ್ ಕಾಮ್ ಹೊಗ್ಡಾಯಿಲ್ಲ್ಯಾಂಚಿ ಗಜಾಲ್ ವೆಗ್ಳಿಚ್ಚ್. ಖಂಯ್ಚಾಯ್ ಕಾರಾಣಾಕ್ ಲಾಗೊನ್ ತಾಚೆಂ ಕಾಮ್ ಗೆಲೆಂ ತರ್ ಫುಡೆಂ ಕಿತೆಂ? ಥೊಡ್ಯಾಂಕ್ ತಾಂಚೆ ರೆಸಿಡೆನ್ಸಿ (ಹಾಕಾಮಾ) ಆಸ್ತಾ ತರೀ ಸಭಾರಾಂಕ್ ಆಸಾನಾ. ದೆಖುನ್ ಥೊಡಿಂ ದೊದೋನ್ ಪಾಸ್‌ಪೋರ್ಟ್ ಕರ್ತಾತ್. ಏಕ್ ಖರೊ ತರ್ ಅನ್ಯೇಕ್ ಫಟ್ಕಿರೊ. ಕಿತೆಂ ಬರೆಂ ಕಿತೆಂ ವಾಯ್ಟ್ ಮ್ಹಳ್ಳೆಂ ತಾಂಕಾ ಕಳಿತ್ ಆಸಾ ತರೀ ಕಿತೆಂ ಕರ್ತೆಲೆ ಬಾವ್ಡೆ ತೆ. ತಾಂಚೆಲಾಗಿಂ ಹೆರ್ ಕಸ್ಲ್ಯೊಚ್ ವಾಟೊ ನಾಂತ್. ಗಾಂವಾಕ್ ಪಾಟಿಂ ಗೆಲ್ಯಾರ್ ನಾಲಿಸಾಯ್ ಆನಿ ಪರತ್ ತೆಂಚ್ಚ್ ಜಿವಿತ್. ದೆಖುನ್ ಹಾಂಗಾಸರ್ ಘುಟಾನ್, ಚೊರಿಯೆರ್ ಥಂಯ್ ಹಾಂಗಾ ಕಾಮ್ ಕರ್ತಾತ್. ಜರ್ತರ್ ಪೊಲಿಸಾಂಚಾ ಹಾತಾಂಕ್ ಸಾಂಪಡ್ಲೆ ತರ್ ತುರ್ತಾನ್ ತಾಂಕಾ ಜಯ್ಲಾಂತ್ ಭರ್ತಾಲೆ. ತರೀ ಘುಟಾನ್ ಹೆ ಹಾಂಗಾ ಕಾಮ್ ಕರ್ತಾಲೆ. ಆನಿ ಮೆಳ್ಚಾ ಜೊಡಿಂತ್ ಗರ್ಜೆಂತ್ ಆಸ್ಚಾ ಆಪ್ಲ್ಯಾ ಕುಟ್ಮಾಕ್ ಪೊಸ್ತಾಲೆ.

ಥೊಡ್ಯಾಂಕ್ ಕಾಮ್ ಮೆಳಾನಾಸ್ತಾಂ ಕಾಮ್ ನಾ ತರ್ ಥೊಡ್ಯಾಂಕ್ ಕಾಮ್ ಕರುಂಕ್ ಗರ್ಜ್ ನಾಸ್ತಾಂ ಕಾಮ್ ನಾ. ಹಿ ಗತ್ ಸಾರ್ಕೆಂ ಕಾಮ್ ನಾತ್‌ಲ್ಲ್ಯಾಂಕ್ ಮಾತ್ರ್ ನ್ಹಂಯ್. ಕಾಮ್ ಆಸ್ಚೆ ತರೀ ಆಪ್ಲ್ಯಾ ಬಾಯ್ಲಾಂಕ್ ಹಾಂಗಾ ಹಾಡುನ್ ತಾಂಕಾಂಯ್ ಕಾಮ್ ಮೆಳ್ಳೆಂ ತರ್ ತಿ ದುಸ್ರಿ ಗಜಾಲ್. ಎಕಾಧಾವೆಳಾ ತಾಂಕಾ ಕಾಮ್ ಮೆಳಾನಾ ತರ್ ತಾಣಿಂ ಸಗ್ಳೊ ದೀಸ್ ಘರಾಂತ್ ರಾವಾಜಯ್. ಹಾಂಗಾ ಹೆರ್ ಮುಸ್ಲಿಮ್ ರಾಶ್ಟ್ರಾಂಪರಿಂ ತೊಂಡಾಕ್ ಭುರ್ಖಾ ಘಾಲುಂಕ್ ನಾ ತರೀ ಘರಾಂತ್ ಸಗ್ಳೊ ವೇಳ್ ಪಾಶಾರ್ ಕರುಂಕ್ ಕಶ್ಟ್. ದೀಸ್‌ಭರ್ ತಿಂ ಅರ್ಭಿ ಟಿವಿಂತ್ ಯೆಂವ್ಚೆಂ ಕೊಣಾಯ್ಕೀ ಸಮ್ಜಾನಾತ್‌ಲ್ಲೆಂ ಮಾತ್ರ್ ನ್ಹಂಯ್, ಗಾಂವ್ಚೆಪರಿಂ ಸೆಜಾರಾ ವೆಚೆಪರಿಂ ನಾ. ಎಕ್ಸುರ್‍ಯಾ ಬಾಯ್ಲೆಕ್ ಪಳೆಂವ್ಕ್ ಹಜಾರ್ ಥರಾಂಚೆ ಮನಿಸ್ ಆನಿ ತಾಂಚೆ ಹಜಾರ್ ನಮುನ್ಯಾಚೆ ದೊಳೆ. ಕಾಮ್ ಕರ್ತೆಲ್ಯಾಂಕ್ ದೀಸ್ ಅಶೆಚ್ಚ್ ಪಾಶಾರ್ ಜಾತಾಲೆ ತರೀ ಕಾಮ್ ಕರಿನಾತ್‌ಲ್ಲ್ಯಾ ಬಾಯ್ಲಾಂಕ್ ಘರಾಂತ್ ಎಕ್ಸುರೆಂ ಬೊಸೊನ್ ಎಕೇಕ್ ದೀಸ್ ಕಾಡ್ಚೆಚ್ಚ್ ಕಶ್ಟ್ ಮ್ಹಳ್ಳೆಪರಿಂ ಭೊಗ್ತಾಲೆಂ.

ಘರಾಂನಿ ಸಭಾರ್ ಕಡೆ ಉಗ್ತ್ಯಾಂನಿ ಕ್ರೀಸ್ತಾಂವಾಂಕ್ ಮಾಗ್ಣಿಂ ಕರುಂಕ್ ಸಾಧ್ಯ್ ಆಸ್ತಾಲೆಂ ತರೀ ಭಿಂಯಾನ್೦ಚ್ ತಿಂ ಮಾಗ್ಣಿಂ ಕರಿಜಾಯ್ ಪಡ್ತಾಲೆಂ. ಹಾಂಗಾಚಾ ಥೊಡ್ಯಾ ಧರ್ಮ್ ಆಂದ್ಳ್ಯಾಂಕ್ ಹೆರಾಂಚಾ ಧರ್ಮಾಚೆರ್ ಕಸ್ಲೊಚ್ ಗೌರವ್ ನಾತ್‌ಲ್ಲೊ. ಇಯಿತ್ತೆಪಾವ್ಟಿಂ ತಾಂಚಾ ಘರಾಂನಿ/ ಕಾರಾಂನಿ ಆಸ್ಚೆ ಖುರಿಸ್, ಇಮಾಜೊ, ಕೊಂತಾಂ ಕಾಡುಂಕ್ ಸಾಂಗ್ತಾಲೆ. ತ್ಯಾ ಶಿವಾಯ್ ತಾಂಚಾ ಮಾಗ್ಣ್ಯಾಚಾ ಮ್ಹಳ್ಯಾರ್ ನಮಾಜೆಚಾ ವೆಳಾರ್ ಕೊಣಾಯ್ಚಾಯ್ ಘರಾಂನಿ ವಡ್ಲ್ಯಾನ್ ಸಂಗೀತಾಚೊ ಆವಾಜ್ ಸಯ್ತ್ ಆಯ್ಕೊಂಕ್ ನಜೊ ಮ್ಹಣೊನ್ ಸಯ್ತ್ ಸಾಂಗ್ತಾಲೆ.

ಗಾಂವಾಂತ್ ಆಸ್ಚಾ ಹಾಂಚಾ ಕುಟ್ಮಾಚಾಂಕ್ ಹ್ಯಾ ಖಂಚಾಯ್ ಸಂಗ್ತ್ಯಾಂಚಿ ಫಿಕಿರ್ ಆಸತ್ ಯಾ ನಾ ಜಾಯ್ತ್. ಫಿಕಿರ್ ಸೊಡ್ ಥೊಡೆಪಾವ್ಟಿಂ ಖಬಾರ್ ಸಯ್ತ್ ಆಸಾನಾ. ಜಾಯ್ತ್ಯಾಂ ಕುಟ್ಮಾಂಕ್ ತೊ ಕಸೊಯ್ ಆಸೊಂ, ಕಿತೆಂಯ್ ಕರುಂ, ಪುಣ್ ಪೊಯ್ಸೊ ಧಾಡ್ಲ್ಯಾರ್ ಜಾಲೆಂ. ತೇಂಯ್ ವೆಳಾರ್ ಪೊಯ್ಸೊ ಧಾಡ್ಲ್ಯಾರ್ ಜಾಲೆಂ. ಆನಿ ಹಾಂಗಾಚಾ ತಾಂಚಾ ಜಿವಿತಾಂತ್ ತಾಣಿಂ ಜಿಯೆಂವ್ಚೊ ಹರ್‍ಯೆಕ್ ದೀಸ್, ದಿಸಾಚಿಂ ಹರ್‍ಯೆಕ್ ವೊರಾಂ, ವೊರಾಚೊ ಹರ್‍ಯೆಕ್ ಮಿನುಟಾಂ ಆನಿ ಮಿನುಟಾಚಿಂ ಹರ್‍ಯೆಕ್ ಸೆಕುಂದಾಂ ದೂಃಖ್ ಆನಿ ನಿರಾಶಾ ಆನಿ ಪರ್ಕಿ ಮ್ಹಳ್ಳೆಂ ಚಿಂತಾಪ್. ಎಕಾ ವಾಟೆರ್ ಆಪುಣ್ ಪರ್ದೆಸಿ ಮ್ಹಳ್ಳೆಂ ಚಿಂತಾಪ್ ತರ್ ಅನ್ಯೇಕಾ ವಾಟೆರ್ ಭ್ಯೆಂ. ಕಾಂಯ್ ಚಡ್‌ಉಣೆಂ ಜಾತಾ ಕೊಣ್ಣಾ, ಮ್ಹಳ್ಳಿ ಭಿರಾಂತ್.

ತಿತ್ಲ್ಯಾರ್ ಎಕ್ಲಿ ಬಾಯ್ಲ್ ಉಲಯ್ತಾಲಿ. ತಿ ಕಾಜಾರ್ ಜಾಲಿ ಆನಿ ತಿಚಾ ಪತಿನ್ ಎಕಾ ಪಾಟ್ಲ್ಯಾನ್ ಏಕ್ ಮ್ಹಣೊನ್ ಸ ಭುರ್ಗಿಂ ಕೆಲಿಂ. ದುಬ್ಳಿಕಾಯ್ ಎಕಾ ವಾಟೆನ್ ತರ್ ತಿಚೊ ಪತಿ ಸರಾಗ್ ಕಾಮ್ ಕರ್ಚೊ ನ್ಹಂಯ್. ಭಂವೊನ್ ಖಾಂವ್ಚಾ ವರ್ಗಾಂತ್ಲೊ. ಭುರ್ಗಿಂ ಜಾತೆಚ್ ತಾಚೆಂ ಕರ್ತವ್ಯ್ ಸಂಪ್ಲೆಂ. ತ್ಯಾ ಭುರ್ಗ್ಯಾಂಚೊ ಪೋಸ್ ಕರುಂಕ್ ಜಾಂವ್, ತಾಂಕಾ ನೆಸಾಪ್ ಜಾಂವ್, ಶಿಕಾಪ್ ಜಾಂವ್ ಕಾಂಯ್ ದೀಂವ್ಕ್ ತಾಚಾನ್ ಜಾಲೆಂನಾ. ಆತಾಂ ಬಿರ್ಮತ್ ತಿ ಆವಯ್ ಕಿತೆಂ ಕರ್ತೆಲಿ ಬಾವ್ಡಿ? ಕಿತೆಂ ಜಾಲ್ಯಾರೀ ಜಲ್ಮ್ ದಿಲಾ ಆನಿ ಆತಾಂ ಭೊಗಿಜಯ್ ತ್ಯಾ ಆವಯ್ನ್೦ಚ್ ಆನಿ ತಿ ಬಾವ್ಡಿ ತಾಂಚೆ ಹಾಂಚೆ ಹಾತ್ ಪಾಂಯ್ ಧರ್ನ್ ಥಂಯ್ ಹಾಂಗಾ ಭಂವಾಡೊ ಕಾಡ್ನ್, ತಾಂಚೆ ಹಾಂಚೆ ಸೊಸುನ್ ಕಶೀಯ್ ಗಲ್ಫಾಕ್ ಪಾವ್ಲಿ.

ಗಲ್ಫಾಕ್ ಪಾವ್‌ಲ್ಲಿ ತಿ ಕಾಂಯ್ ಆಪ್ಲೆ ಕಶ್ಟ್ ಸಮ್ಜಲ್ಲೊ ಅರ್ಭಿ ಆಪ್ಲ್ಯಾ ಕುಮ್ಕೆಕ್ ಪಾವತ್ ಮ್ಹಳ್ಳ್ಯಾ ಚಿಂತ್ನಾನ್ ತಿಚಿ ಸಗ್ಳಿ ಕಾಣಿಂ ತಿಣೆಂ ಉಚಾರ್‍ಲಿ, ಆನಿ ತಿಚೆ ಸಗ್ಳೆ ಕಶ್ಟ್ ಆಯ್ಕಾಲ್ಲ್ಯಾ ಆರ್ಭಿಕ್ ಬರೆಂ ಜಾಲೆಂ. ತಾಣೆಂ ತಿಕಾ ತಾಚಾ ಘರಾಂತ್‌ಚ್ ರಾವೊಂಕ್ ಸಾಂಗ್ಲೆಂ.

ಘರಾಂತ್ ಉಪಾಶಿಂ ಮೊರ್ಚಾಕೀ ಗಲ್ಫಾಂತ್ ಕಶ್ಟ್ ಕಾಡ್ಚೆಚ್ಚ್ ಬರೆ ಮ್ಹಣೊನ್ ಚಿಂತ್‌ಲ್ಲ್ಯಾ ತಿಕಾ ತಿಚೆ ಕಶ್ಟ್ ಸಮ್ಜಾಲ್ಲ್ಯಾ ಅರ್ಭಿನ್ ಗಾಂವಾಕ್ ಧಾಡ್ಲೊಚ್ ನಾ ಆನಿ ಘರಾಂತ್‌ಚ್ಚ್ ಜಯ್ಲ್ ಮ್ಹಳ್ಳೆಪರಿಂ ಕೆಲೆಂ. ತಿಣೆಂ ಮಹಿನ್ಯಾ ಮಹಿನ್ಯಾಕ್ ಮ್ಹಣೊನ್ ವರ್ಸಾಂನ್ ವರ್ಸಾಂ ಪೊಯ್ಶೆ ಧಾಡ್ಲೆ.

ಆತಾಂ ತಿಂ ಭುರ್ಗಿಂ ವ್ಹಡ್ ಜಾಲ್ಯಾಂತ್ ತರೀ ತಿಕಾ ತ್ಯಾ ಭುರ್ಗ್ಯಾಂಚೆರ್ ಏಕ್ ದೀಶ್ಟ್ ದೀಂವ್ಕ್ ಸಾಧ್ಯ್ ಜಾಂವ್ಕ್ ನಾ. ತಿಣೆಂ ಕಿತೆಂಚ್ ಕೆಲ್ಲೆಪರಿಂ ನಾ. ಸತ್ ಸಾಂಗೊನ್ ತಿಣೆ ಕೆಲ್ಲೊ ಗುನ್ಯಾಂವ್ ಆತಾಂ ತಿಕಾಚ್ ಮಾರಗ್ ಪಡ್‌ಲ್ಲೊ. ತ್ಯಾ ಶಿವಾಯ್ ತಿಚೊ ವಿಚಾರ್ ಕರ್‍ತೆಲೊಯ್ ಆತಾಂ ಹಾಂಗಾ ಕೊಣೀಂ ನಾತ್‌ಲ್ಲೆಂ ಅರ್ಭಿಕ್ ಬರೆಂಚ್ ಜಾಲೆಂ. ಘರಾಂತ್ಲೊ ಭಾಯ್ರ್ ವಚೊಂಕ್ ತಿಕಾ ಸಾಧ್ಯ್ ನಾ. ಆನಿ ಆತಾಂ ತಿಚಿ ಪ್ರಾಯ್ ಪನ್ನಾಸ್ ಉತಾರ್ಲ್ಯಾ ತರೀ ತಿಕಾ ಗಾಂವಾಕ್ ವೆಚೆಪರಿಂ ನಾ.

ಹಾಂಗಾ ಬಾಯ್ಲಾಂಚೊ ಗೋಳ್ ಪಳೆಂವ್ಕ್ ಮೆಳ್ತಾ. ಕಿತ್ಯಾಕ್ ಆಮ್ಚಿಂ ಬಾಯ್ಲಾಂ ಗಲ್ಫಾಕ್ ಯೇವ್ನ್ ಆಪ್ಲೊ ಗೋಳ್ ಕರ್ತಾತ್? ಕೊಣೆಂಗೀ ಸವಾಲ್ ಕೆಲೆಂ. ಗಾಂವಾಂತ್ ಕೆಲ್ಲೊ ಗೋಳ್ ಪಾವಾನಾ ದೆಖುನ್ ಗಲ್ಫಾಂತ್ ಯೇವ್ನ್ ಗೋಳ್ ಕರ್ತಾತ್. ಅನ್ಯೇಕ್ಲ್ಯಾನ್ ತಾಕಾ ಜಾಪ್ ದಿಲಿ.

ಅಶೆಂ ಉಲವ್ನ್ ಆಸ್ತಾನಾ ಥೊಡ್ಯಾಂನಿ ಅನಿ ಕೊಣಾಚಿಗೀ ಖಬಾರ್ ಹಾಡ್ಲಿ. ನರ್ಸಾಚೆಂ ಕಾಮ್ ಮ್ಹಣೊನ್ ಎಕಾ ಪಿಲಿಪಿನೊ ಚೆಡ್ವಾಕ್ ಯೇಜಂಟಾನ್ ಗಲ್ಫಾಕ್ ಧಾಡ್ಲೆಂ ಆನಿ ಗಲ್ಫಾಕ್ ಆಯಿಲ್ಲ್ಯಾ ತ್ಯಾ ಚೆಡ್ವಾಕ್ ವಿಜಾ ದಿಲ್ಲ್ಯಾ ಅರ್ಬ್ಯಾನ್ ತುಕಾ ಕಾಮ್ ಕಳಿತ್ ನಾ ದೆಖುನ್ ಮ್ಹಜಾ ಭುರ್ಗ್ಯಾಂಕ್ ಪಳೆ ಮ್ಹಣೊನ್ ತಾಚಾ ಘರಾಂತ್ ಬೇಬಿ ಸಿಟ್ಟಿಂಗಾಚೆಂ ಕಾಮ್ ದಿಲೆಂ. ಹಜಾರಾಂನಿ ದುಡು ಭರ್ನ್ ತೆಂ ಆಯಿಲ್ಲೆಂ. ಖಾಲಿ ಹಾತಾನ್ ಆಯಿಲ್ಲೆಂ. ಶಿಕಾಪ್ ತಾಕಾ ಕಾಂಯ್ ಆಸ್‌ಲ್ಲೆಂ ಪುಣ್ ಪೊಯ್ಶೆ ಹಾತಾಂತ್ ನಾಸ್ತಾನಾ ರಿತ್ಯಾ ಹಾತಾಂತ್ ಪಾಟಿಂ ವಚೊಂಕ್‌ಯಿ ಸಾಧ್ಯ್ ನಾತ್‌ಲ್ಲೆಂ.

ಕಶೆಂಯ್ ಕಶ್ಟಾಂನಿ ಹಾಂಗಾ ಯೇವ್ನ್ ಅಶೆಂಚ್ ಇಲ್ಲೊ ತೇಂಪ್ ಕಾಮ್ ಕರುನ್ ಪಾಟಿಂ ಆಪ್ಲ್ಯಾ ಗಾಂವಾಕ್ ವೆಚೆಂ ಮ್ಹಳ್ಳ್ಯಾ ಚಿಂತ್ನಾಂನಿ ತೆಂ ಕಾಮ್ ಕರ್ತಾಲೆಂ. ಭುರ್ಗ್ಯಾಂಕ್ ಸಕಾಳಿಂ ಉಟವ್ನ್ ತಾಂಕಾ ತಯಾರಾಯ್ ಕರ್ನ್ ಇಸ್ಕೊಲಾಕ್ ಪಾವವ್ನ್ ಯೆಂವ್ಚಿ ತಾಚಿ ಜವಾಬ್ದಾರಿ. ಆನಿ ತಾಕಾ ಇಸ್ಕೊಲಾಕ್ ಆಪವ್ನ್ ವರುಂಕ್ ಆನಿ ಹಾಡುಂಕ್ ಡ್ರಾಯ್ವರ್ ಆಸ್‌ಲ್ಲೊ. ಅರ್ಭಿ ದೀಸ್‌ಭರ್ ಬಿಸ್‌ನೆಸ್ ಮ್ಹಣೊನ್ ಘರಾ ಭಯ್ರ್ ಆಸ್ತಾಲೊ ಆನಿ ಇಸ್ಕೊಲಾ ಥಾವುನ್ ಪಾಟಿಂ ಆಯಿಲ್ಲ್ಯಾ ಡ್ರಾಯ್ವರಾಕ್ ಘೆವ್ನ್ ತ್ಯಾ ಅರ್ಬಿಚಿ ಬಾಯ್ಲ್ ತಿಚಾ ಇಶ್ಟಾಂಕ್ ಮೆಳೊಂಕ್ ಭಾಯ್ರ್ ವೆತಾಲಿ. ತೋಂಡ್‌ಭರ್ ಕಾಳೆಂ ವಸ್ತುರಾಚೆಂ ಧಾಂಪ್ಣೆಂ (ಭುರ್ಖಾ) ಆಸ್‌ಲ್ಲ್ಯಾನ್ ತಾಂಚಿ ಕೋಣ್ ಮ್ಹಣೊನ್ ವೆಗ್ಗಿಂಚಾಕ್ ಕೊಣೆಂಯ್ ವಳೊಕ್ ಧರ್‌ಲ್ಲೆಪರಿಂಯ್ ನಾತ್‌ಲ್ಲೆಂ. ಹಾಂಗಾಚೆ ಥೊಡೆ ಅರ್ಭಿ ಕಿತ್ಲೆ ಹರಾಮಿಂಗೀ ತಾಂಚೆಪರಿಂಚ್ ತಾಂಚೊ ಬಾಯ್ಲ್ಯೊಯ್ ಹರಾಮಿ ಆಸ್ತಾಲ್ಯೊ. ಸಭಾರಾಂಕ್ ನಾಂವಾಕ್ ಎಕ್ಲೊ ಘೊವ್ ತರೀ ಭಾಯ್ರ್ ಜಾಯಿತ್ತೆ ಇಶ್ಟ್ ಆನಿ ಕುಂಪಾರ್ ಆಸ್ತಾಲೆ.

ಎಕಾ ದಿಸಾ ಅಶೆಂ ಘಡ್ಲೆಂ. ಭುರ್ಗ್ಯಾಂಕ್ ಇಸ್ಕೊಲಾಕ್ ಪಾವವ್ನ್ ಪಾಟಿಂ ಆಯಿಲ್ಲ್ಯಾ ತ್ಯಾ ಚೆಡ್ವಾಕ್ ಸೊಡ್ನ್ ತೊ ಡ್ರಾಯ್ವರ್ ಮಾಡಾಮೆಕ್ ಭಂವ್ಡಾಂವ್ಕ್ ಗೆಲ್ಲೆಪರಿಂಚ್ ಅರ್ಬಿ ಪಾಟಿಂ ಆಯ್ಲೊ. ಆನಿ ತಾಚಾ ಮತಿಂತ್ ಪಾಶಾಂವ್ ಆಸ್‌ಲ್ಲೊ ಆನಿ ತ್ಯಾ ಚೆಡ್ವಾಕ್ ಆಪ್ಲ್ಯಾ ಕುಡಾಕ್ ಯೇಂವ್ಕ್ ಉಲೊ ದೀಲಾಗ್ಲೊ. ತಾಚಾ ಉಲ್ಯಾಚೊ ಅರ್ಥ್ ಸಮ್ಜಾಲ್ಲ್ಯಾ ತ್ಯಾ ಚಾಲಾಕ್ ಆಸ್ಚಾ ಚೆಡ್ವಾಕ್ ಹೆರ್ ಕಸ್ಲಿಚ್ಚ್ ವಾಟ್ ನಾತ್‌ಲ್ಲಿ. ಬೋಬ್ ಘಾಲಿ ತರ್ ಆಯ್ಕತೆಲಿಂ ಕೊಣೀಂ ಥಂಯ್ಸರ್ ನಾತ್‌ಲ್ಲಿಂ ಆನಿ ಅಸಲ್ಯೊ ಕಿತ್ಲೆಶ್ಯೊ ಬೊಬೊ ಜಿರಂವ್ಕ್ ಹೊ ಗಲ್ಫ್ ಸಕ್ತಾಲೊ. ದೆಖುನ್ ತ್ಯಾ ಚೆಡ್ವಾನ್ ಉಪಾಯ್ ಕೆಲೊ. ಆಪುಣ್ ನಾಂವ್ನ್ ಯೆತಾಂ ದೆಖುನ್ ನಾಂವ್ನ್ ಯೇಂವ್ಕ್ ಇಲ್ಲೊ ವೇಳ್ ದೀ ಮ್ಹಣೊನ್ ಹಾಸೊನ್ ಹಾಸೊನ್‌ಶೆಂ ಮಾಗ್ತಾನಾ ಅರ್ಭ್ಯಾನ್ ತಾಕಾ ನಾಣಿಯೆಕ್ ವಚೊಂಕ್ ಸೊಡ್ಲೊ ಆನಿ ನಾಣಿಯೆಕ್ ಗೆಲ್ಲೆಂ ಚೆಡುಂ ಥಂಯ್ಚಾ ಉಗ್ತ್ಯಾ ಜನೆಲಾಂತ್ಲ್ಯಾನ್ ಉಡೊನ್ ಭಾಯ್ರ್ ಉಡ್ಲೆಂ ಆನಿ ಆಂಗಾಕ್ ಘಾಯ್ ಜಾಲೆ ತರೀ ಧಾಂವೊನ್ ಧಾಂವೊನ್ ಯೆವ್ನ್ ತಾಂಚಾ ಫಿಲಿಪಿನೊಚಾ ಇಗರ್ಜೆಕ್ ರಿಗ್ಲೆಂ.

ತಾಚಿ ಪರಿಗತ್ ಸಮ್ಜಾಲ್ಲ್ಯಾ ಇಗರ್ಜೆಂತ್ ತಾಕಾ ಕಾಮ್ ದಿಲಾಂ ತರೀ ತಾಚೊ ಪಾಸ್‌ಪೋರ್ಟ್ ಆನಿ ವಿಜಾ ತ್ಯಾ ಅರ್ಭ್ಯಾಚಾ ಹಾತಾಂತ್ ಆಸಾ. ತ್ಯಾ ಭಾಯ್ರ್ ಕಾಂಯ್ ಧಾಂವ್‌ಲ್ಲೆಂ ಚೆಡುಂ ಪೊಲಿಸಾಂಕ್ ಖಬಾರ್ ದೀತ್ ತರ್ ಆಪ್ಣಾಕ್ ಇಲ್ಲೆ ಕಶ್ಟ್ ಜಾತೆಲೆ ಮ್ಹಳ್ಳೆಂ ಸಮ್ಜಾಲ್ಲ್ಯಾ ತ್ಯಾ ಅರ್ಭ್ಯಾನ್ ಪಯ್ಲೆಂಚ್ ವಚೊನ್ ಪೊಲಿಸಾಂಕ್ ದೂರ್ ದಿಲೆಂ. ಆಪ್ಲ್ಯಾ ಘರಾಂತ್ ಕೋಣೀಂ ನಾತ್‌ಲ್ಲೆಂ ಪಳೆವ್ನ್ ಚೊರಿ ಕರ್ನ್ ತೆಂ ಧಾಂವ್ಲಾಂ ಮ್ಹಣೊನ್ ಕಳಯ್ಲೆಂ. ಆತಾಂ ಕೆದಾಳಾ ತೆ ಪೊಲಿಸ್ ಯೇವ್ನ್ ಆಪ್ಣಾಕ್ ಧರುನ್ ವರ್ತೆಲೆ ಮ್ಹಳ್ಳೆಂ ತೆಂಚ್ ನೆಣಾಂ. ಹೆಂ ಹಾಂಗಾಚಾ ಬಾಯ್ಲಾಂಚೆಂ ಜಿವಿತ್. ಸದಾಂ ಜಾಗೆ ಆಸ್ತಾನಾ ಸಯ್ತ್, ನಿದೆಂತ್ ಸಯ್ತ್ ಭಿಂಯಾನ್ ದೀಸ್ ಕಾಡುಂಕ್ ಆಸಾತ್. ಕಾಂಯ್ ಪೊಲಿಸಾಂಚಾ ಹಾತಾಂತ್ ಅಸಲಿಂ ಕೊಣೀಂ ಚೆಡ್ವಾಂ ಸಾಂಪಡ್ಲಿಂ ತರ್ ಜಯ್ಲಾಂತ್ ಲೆಗುನ್ ಪೊಲಿಸಾಂಚೊ ಬಲತ್ಕಾರ್ ಸೊಸುಂಕ್ ಪಡ್ತಾ ಖೈಂ.

ಹಾಂಗಾಚೊ ಎಕೇಕ್ ಕಾಣಿಂಯೊ ಕಿತ್ಲ್ಯೊ ಸತ್ ಆನಿ ಕಿತ್ಲ್ಯೊ ಫಟ್ ಮ್ಹಳ್ಳೆಂ ಸಮ್ಜಾನಾತ್‌ಲ್ಲೆಂ ತರೀ ಹಾಂಗಾಚಿಂ ಸತಾಂಚ್ ತಶಿಂಚ್. ಸತ್ ಮ್ಹಣೊನ್ ಪಾತ್ಯೆಂವ್ಕ್‌ಯಿ ನ್ಹಂಯ್ ಆನಿ ಫಟ್ ಮ್ಹಣೊನ್ ಪಾತ್ಯೆನಾಸ್ತಾಂ ರಾವೊಂಕೀ ನ್ಹಂಯ್.

ಎಕೆಕ್ಲ್ಯಾಚಾ ಆಂಗಾರ್ ಎಕೇಕ್ ಶಿರ್ಶಿರೊ ಹಾಡಯ್ತಾಲ್ಯೊ. ತರೀ ಹಾಂಗಾ ಸಭಾರ್ ಜಣಾಂಕ್ ಗಲ್ಫ್ ಆಮ್ಚಾ ದೇಶಾಚಾಕೀ ಬರೊ ಮ್ಹಣೊನ್ ಭೊಗ್ತಾ. ಹಾಂಗಾಚಿಂ ಕಾನೂನಾಂ, ಹಾಂಗಾಚಿಂ ಕಾಮಾಂ ಹಾಂಗಾಚೊ ಲೋಕ್ ಸಗ್ಳೊ ಬರೊ ಲಾಗ್ತಾಲೊ.

ತವಳ್ ಎಕ್ಲೊ ಎಕಾ ಮಲ್ಯಾಳಿ ಬಾಯ್ಲೆವಿಶ್ಯಾಂತ್ ಸಾಂಗಾಲಾಗ್ಲೊ. ತಾಂಚಾಚ್ಚ್ ಬಿಲ್ಡಿಂಗಾಂತ್ ರಾವ್ಚಾ ಎಕಾ ಮಲ್ಯಾಳಿ ಕುಟ್ಮಾಂತ್ ಏಕ್ ದಾದ್ಲೊ ತಾಚಿ ಬಾಯ್ಲ್ ಆನಿ ದೊಗಾಂ ಭುರ್ಗಿಂ ರಾವ್ತಾಲಿಂ. ದಾದ್ಲೊ ಸರಾಗ್ ಘೊಳ್ತಾಲೊ ತರಿ ತಾಚೆ ಸಗ್ಳೆ ಪೊಯ್ಶೆ ವರ್ನ್ ಸೊರ್‍ಯಾಕ್ ಘಾಲ್ತಾಲೊ ಆನಿ ಕಶ್ಟಾಂನಿ ಘರ್ಚೆಂ ಭಾಡೆಂ ದಿತಾಲೊ. ಬಾಯ್ಲ್ ಎಕ್ಲಿ ಬಾವ್ಡಿ ಸಾಂಗೊನ್ ಸಾಂಗೊನ್ ಥಕೊನ್ ಅಖ್ರೇಕ್ ಥಂಯ್ ಹಾಂಗಾ ವಚೊನ್ ತಾಂಚೆ ಹಾಂಚೆ ಪಾಂಯ್ ಧರುನ್ ರಿಣಾಕ್ ಪೊಯ್ಶೆ ಹಾಡ್ತಾಲಿ. ಅಶೆಂ ದೀಸ್ ಗೆಲ್ಲೆಪರಿಂಚ್ ಘೆತ್‌ಲ್ಲೆಂ ರೀಣ್ ಪಾಟಿಂ ಭರುಂಕ್ ಜಾಯ್ನಾಸ್ತಾಂ ತಿ ಬಾಯ್ಲ್ ಕಂಗಾಲ್ ಜಾಲಿ. ತಶೆಂ ಆಸ್ತಾಂ ತಿಣೆ ಸೆಜಾರ್‍ಚಾ ಆನಿ ವಳ್ಕಿಚಾ ಧಾ ಭಾರಾ ಜಣಾಂಕ್ ಎಕ್ಟಾಂಯ್ ಕರುನ್ ಮಹಿನ್ಯಾ ಮಹಿನ್ಯಾಚಿ ಹುಂಡಿ ಸುರು ಕೆಲಿ ಆನಿ ಅಶೆಂ ಮೆಳ್ಚೆ ಪೊಯ್ಶೆ ತಾಂಕಾ ಹಾಂಕಾ ಮ್ಹಣೊನ್ ಘುಂವ್ಡಾಂವ್ಕ್ ಧರ್ಲೆಂ.

ಮುಂದರ್‍ಸಿಲಾಂ...

Tags: Vally Quadras,e konkani novel, Konkani, Mangalore, Mangalorean, Mother Tongue

From around the world

ಪಾಟಿಂ ಗಾಂವಾಕ್ - ಅವಸ್ವರ್ 20

Post your comments

ಅವಸ್ವರ್ 1

ಅವಸ್ವರ್ 2

ಅವಸ್ವರ್ 3

ಅವಸ್ವರ್ 4

ಅವಸ್ವರ್ 5

ಅವಸ್ವರ್ 6

ಅವಸ್ವರ್ 7

ಅವಸ್ವರ್ 8

ಅವಸ್ವರ್ 9

ಅವಸ್ವರ್ 10

ಅವಸ್ವರ್ 11

ಅವಸ್ವರ್ 12

ಅವಸ್ವರ್ 13

ಅವಸ್ವರ್ 14

ಅವಸ್ವರ್ 15

ಅವಸ್ವರ್ 16

ಅವಸ್ವರ್ 17

ಅವಸ್ವರ್ 18

ಅವಸ್ವರ್ 19

ಅವಸ್ವರ್ 20

ಅವಸ್ವರ್ 21

ಅವಸ್ವರ್ 22

ಅವಸ್ವರ್ 23

ಅವಸ್ವರ್ 24

ಅವಸ್ವರ್ 25

ಅವಸ್ವರ್ 26

ಅವಸ್ವರ್ 27

ಅವಸ್ವರ್ 28

Connect

Our Address
Mangalore

Our Address
Udupi

Our Address
Dubai

From around the world

Post your comments

Connect

Our AddressMangalore

Our AddressUdupi

Our AddressDubai

Our Address
Mangalore

Our Address
Udupi

Our Address
Dubai