:: ಮಾಯ್ ಭಾಸ್

ತಿಯೊಕ್ ಗಲ್ಫಾಕ್ ಯೇವ್ನ್ ಇತ್ಲೊ ತೇಂಪ್ ಜಾಲೊ ತರೀ ಕೊಣಾಯ್ಚಿಯ್ ವಳೊಕ್ ನಾತ್‌ಲ್ಲಿ. ಪಳೆವ್ನ್ ತೊ ಸಗ್ಳ್ಯಾಂಕ್ ವಳ್ಕಾತಾಲೊ ಆನಿ ಥೊಡ್ಯಾಂಚಿಂ ನಾಂವಾಂ ಜಾಣಾಸ್‌ಲ್ಲೊ ತರ್‌ಯೀ ತಾಚಾಕೀ ಚಡಿತ್ ತೊ ಕಿತೆಂಚ್ ನೆಣಾಸ್‌ಲ್ಲೊ. ಸಭಾರ್ ಪಾವ್ಟಿಂ ತಾಚೆಲಾಗಿಂ ಗಾಂವಾಂತ್ ಆಸ್ಚಾ ಆಪ್ಲ್ಯಾ ಪತಿಕ್ ಆನಿ ಭುರ್ಗ್ಯಾಂಕ್ ಕಾಗಾದ್ ಬರಂವ್ಕ್ ಎಕ್ಲಿ ಹಳ್ತ್ ಪ್ರಾಯೆಚಿ ಬಾಯ್ಲ್ ಯೆತಾಲಿ - ಮೆರಿಬಾಯ್.

ಗಲ್ಫಾಂತ್ ಆಸ್ಚಾ ಕಿತ್ಲೆಶ್ಯಾ ಬಾಯ್ಲಾಂಪಯ್ಕಿ ಮೆರಿ ಎಕ್ಲಿ. ಗಲ್ಫಾಂತ್ ಘರ್ ಕಾಮ್ ಕರ್‍ಚಾ ಚಡಾವತ್ ಬಾಯ್ಲಾಂಚೆಂ ನಾಂವ್ ಮೆರಿ ಜಾವ್ನಾಸ್ತಾಂ ಹ್ಯಾ ಮೆರಿಬಾಯೆಚೆಂ ಖರೆಂ ನಾಂವ್ ಮೆರಿ ದಲ್ಗಾದೊ.

ಕೊಡ್ಯಾಳಾಂತ್ ಜಲ್ಮೊನ್ ವಡ್ ಜಾಲ್ಲಿ ತರೀ ಆಪ್ಲ್ಯಾ ಭಯ್ಣಿಚಾ ಪಾಗುರ್ ಮಾಂವಾನ್ ತಾಕಾ ಬೊಂಬೊಂಯ್ತ್ ಎಕಾ ಪಾರ್ಸ್ಯಾಚಾ ಘರಾ ಕಾಮಾಕ್ ದವರ್ಲೆಲೆ ವರ್ವಿಂ ಆಪ್ಲ್ಯಾ ಇಕ್ರಾ ವರ್ಸಾಂಚಾ ಪ್ರಾಯೆರ್‌ಚ್ ತೆಂ ಬೊಂಬೊಯ್ ಆಯ್ಲೆಂ. ಆಸ್ಚೊ ಬಾಪುಯ್ ಕಾಜಾರ್ ಜಾವ್ನ್ ಪಾಟಾಪಾಟ್ ದೋನ್ ಚೆಡ್ವಾಂಕ್ ತಾಚಾ ಆವಯ್ನ್ ಜಲ್ಮ್ ದಿಲ್ಲೊಚ್ ತಾಂಕಾ ಸೊಡ್ನ್ ಗೆಲ್ಲೊ ಖಂಯ್ ಆಸಾ ಮ್ಹಳ್ಳೆಂ ಸಯ್ತ್ ಕೊಣಾಯ್ಕೀ ಕಳಿತ್ ನಾತ್‌ಲ್ಲೆಂ. ತೊ ಜೀವ್ ಆಸಾಗೀ ಯಾ ಮೆಲಾಗೀ ಮ್ಹಳ್ಳೆಂ ಸಯ್ತ್ ಕೊಣಾಯ್ಕೀ ಕಳಿತ್ ನಾತ್‌ಲ್ಲೆಂ. ಕಳಿತ್ ಜಾವ್ನ್‌ಯಿ ಕರ್ಚೆಂ ಕಿತೆಂ? ಗಾಂವಾಂತ್ ಆಸ್ತಾನಾ ಸಯ್ತ್ ತಾಣೆಂ ಕೆಲ್ಲೆಂ ಯಾ ಕರ್‍ಚೆಂ ಕಾಂಯ್ ನಾತ್‌ಲ್ಲೆಂ. ದೀಸ್‌ಭರ್ ಥಂಯ್ ಹಾಂಗಾ ಮ್ಹಣೊನ್ ಭಂವೊನ್ ತಲ್ಟ್ಯಾಚಿ ಸುರ್ ಪಿಯೆಂವ್ಚಿ ಕಠೀಣ್ ಪಿಸಾಯ್ ತಾಕಾ ಆಸ್‌ಲ್ಲಿ. ತವಳ್ ತವಳ್ ಜಾಳ್ ಘೆವ್ನ್ ವಡಾ ಘುಂಡ್ಯೆಕ್ ವೆತಾಲೊ ಆನಿ ಮಾಸ್ಳಿ ಧರುನ್ ಹಾಡ್ತಾಲೊ. ಹೆಂ ಮಾತ್ರ್ ತಾಚೆಂ ಕಾಮ್. ಪುಣ್ ಘರಾಂತ್ ದೊಗಾಂ ಭುರ್ಗ್ಯಾಂಕ್ ಆನಿ ಜಿವೆ ಬಾಳ್ತಿಂತ್ ಖಾಣ್ ಜಾಂವ್ ವಕ್ತಾಂ ಜಾಂವ್ ಖಂಯ್ ಥಾವ್ನ್ ಯೆತಾತ್ ಮ್ಹಳ್ಳೊ ವಿಚಾರ್ ಕೆಲ್ಲೊಚ್ ತಾಚಾ ಆವಯ್ಚೊ ಗುನ್ಯಾಂವ್. ತಶೆಂ ಉಟೊನ್ ಆಪ್ಲೆಂ ಪುಡ್ವೆಂ ನೆಸೊನ್ ಗೆಲ್ಲೊ ಅಜೂನ್ ಪಾಟಿಂ ಯೇಂವ್ಕ್ ನಾತ್‌ಲ್ಲೊ.

ಚಲೊಂಕ್ ಶಿಕ್ಚಾ ವಡ್ಲ್ಯಾ ಭಯ್ಣಿಸವೆಂ ಮೇರಿಯ್ ವ್ಹಡ್ ಜಾಲೆಂ ಆನಿ ಬೂದ್ ಯೆಂವ್ಚಾ ಪಯ್ಲೆಂಚ್ ಕೊಣಾ ಕೊಣಾಚಾ ಘರಾ ಕಾಮ್ ಕರುಂಕ್ ಲಾಗ್ಲೆಂ. ವಡ್ಲಿ ಭಯ್ಣ್ ಎಕಾ ಘಾಟಾಗಾರಾಲಾಗಿಂ ಕಾಜಾರ್ ಜಾಲ್ಲೆಂಚ್ ಆವಯ್ನ್ ಮಾಂದ್ರಿ ಧರ್ಲಿ. ಚಡ್ ಪ್ರಾಯ್ ಜಾಂವ್ಕ್ ನಾ ತರೀ ಭಾತ್ ಲುಂವ್ತಾನಾ ದಾಂತ್ರ್ಯಾ ಕೊಯ್ತಿ ಆಪ್ಲ್ಯಾ ಪಾಂಯಾಕ್ ಲಾಗೊನ್ ಇಲ್ಲೊ ತೇಂಪ್ ವಳ್ವಳೊನ್ ಉಪ್ರಾಂತ್ ಚಡುಣೆಂ ತೀನ್ ಮಯ್ನೆ ಮಾಂದ್ರೆರ್ ನಿದ್ಲಿ. ಆತಾಂ ದುಸ್ರಿ ಕಸ್ಲಿಚ್ ಉತ್ಪತ್ತಿ ನಾಸ್ತಾನಾ ಬೊಂಬೊಯ್ ಆಯಿಲ್ಲೆಂ ಮೆರಿ ಎಕಾ ಪಾರ್‍ಸಿಚಾ ಘರಾ ಕಾಮ್ ಕರಿಲಾಗ್ಲೆಂ. ಅಶೆಚ್ಚ್ ಸಭಾರ್ ವರ್ಸಾಂ ತಾಣೆಂ ಕಾಮ್ ಕೆಲೆಂ. ಹರ್‍ಯೆಕಾ ದೋನ್ ಯಾ ತೀನ್ ಮಯ್ನ್ಯಾಂತ್ ಏಕ್ ಪಾವ್ಟಿಂ ತೆಂ ಘರಾಕ್ ಪೊಯ್ಶೆ ಧಾಡ್ತಾಲೆಂ. ಆನಿ ತ್ಯಾ ಪೊಯ್ಶ್ಯಾಂನಿ ತಾಚಿ ಆವಯ್ ದೀಸ್ ಕಾಡ್ತಾಲಿ. ತಾಂಕಾ ರಾವೊಂಕ್ ಘರ್ ನಾತ್‌ಲ್ಲೊ. ತಿಂ ಪಟೆಲಾಚಾ ಜಾಗ್ಯಾರ್ ಘೊಳ್ತಾಲಿಂ ದೆಖುನ್ ತಾಂಕಾ ರಾವೊಂಕ್ ಏಕ್ ಕೊಲ್ವಾಚೆಂ ಪಾಕೆಂ ದಿಲ್ಲೆಂ. ತಾಂತುಂ ಕಾಂಯ್ ಇಲ್ಲಿ ನೀಸ್ ಪೇಜ್ ರಾಂದುನ್ ತಾಕಾ ಮೀಟ್ ಮಿರ್ಸಾಂಗ್ ಚಿಡ್ಡುನ್ ತಿ ಜೆವ್ತಾಲಿ.

ಅಶೆಂ ಬೊಂಬೊಯ್ ಕಾಮ್ ಕರ್ಚೆಂ ಮೆರಿ ತ್ಯಾ ಪಾರ್ಶ್ಯಾಚಾ ಹೊಟ್ಲಾಂತ್ ರಾಂದ್ಪ್ಯಾಚೆಂ ಕಾಮ್ ಕರ್ಚಾ ಬೊನಾಲಾಗಿಂ ಕಾಜಾರ್ ಜಾಲೆಂ. ಮೆರಿಚಾಕೀ ಪ್ರಾಯೆನ್ ಪಂದ್ರಾ ವರ್ಸಾಂ ವಡ್ ಜಾಲ್ಲ್ಯಾ ಬೊನಾಕ್ ತೆದೊಳ್ ಪರ್ಯಾಂತ್ ಕಸ್ಲಿಚ್ ಪಾಡ್ ಸವಯ್ ನಾತ್‌ಲ್ಲಿ ತಿ ತಾಣೆಂ ಮೆರಿಲಾಗಿಂ ಕಾಜಾರ್ ಜಾತಾನಾ ತಾಕಾ ಮೆಳ್‌ಲ್ಲಿ ದೋತ್ ದೊನ್ಶಿಂ ರುಪಯ್. ಅಶೆಂ ದೊಗಾಂಯ್ ಕಾಮ್ ಕರ್ತಾಲಿಂ ಆನಿ ದೊಗಾಂ ಭುರ್ಗ್ಯಾಂಕ್ ಜಲ್ಮ್ ದಿಲ್ಲ್ಯಾ ಮೆರಿಕ್ ಕಾಮ್ ಕರುಂಕ್ ಆನಿ ಭುರ್ಗ್ಯಾಂಕ್ ಸಾಂಭಾಳುಂಕ್ ಕಶ್ಟ್ ಜಾಲೆ. ಆತಾಂ ಎಕ್‌ಚ್ ಮೆರಿನ್ ಕಾಮ್ ಸೊಡ್ನ್ ಗಾಂವಾಕ್ ಯೇಜಯ್ ಯಾ ಬೊನಾನ್ ಕಾಮ್ ಸೊಧುನ್ ಗಾಂವಾಕ್ ಯೇಜಯ್ ಮ್ಹಳ್ಳೆಂ ಕಳೊನ್ ಮೆರಿ ಆಪ್ಲ್ಯಾ ಭುರ್ಗ್ಯಾಂಕ್ ಘೆವ್ನ್ ಗಾಂವಾಕ್ ಆಯ್ಲೆಂ ಆನಿ ಆವಯ್ ಸವೆಂ ಜಿಯೆಂವ್ಕ್ ಲಾಗ್ಲೆಂ. ಬೊನಾಕ್ ಆತಾಂ ಜವಾಬ್ಧಾರಿ ಚಡ್‌ಲ್ಲಿ.

ಪುಣ್ ಬೊನಾಕ್ ಆತಾಂ ಜಾಯ್ತೆ ಈಶ್ಟ್ ಜಾಲ್ಲೆ ಆನಿ ತೊ ಹಳ್ತಾರ್ ಪಿಂಯೆಂವ್ಕ್ ಶಿಕ್ಲೊ ಆನಿ ದಿಸಾನ್‌ದೀಸ್ ತಾಚೆಂ ಪಿಯೊಣೆ ಚಡ್ಲೆಂ. ಆನಿ ಆಪ್ಲ್ಯಾ ಘರಾಂತ್ ಆಸ್ಚಾ ಭುರ್ಗ್ಯಾಂಚಿ ತಾಕಾ ಹಳ್ತಾರ್ ವಿಸರ್ ಪಡ್ಲಿ. ಮೆರಿ ಬಾವ್ಡೆಂ ಖಂತಿನ್ ಬುಡ್ಲೆಂ. ತಾಕಾ ಶಿಕಾಪ್ ಕಾಂಯ್ ನಾತ್‌ಲ್ಲೆಂ. ಸೆಜಾರ್ಚಾ ಕೊಣಾ ಕೊಣಾಲಾಗಿಂ ವಚೊನ್ ತಾಣೆಂ ಬೊನಾಕ್ ಸಮ್ಜಾವ್ನ್ ಕಾಗಾದ್ ಬರಯ್ಲೆಂ. ತಿಸ್ರಿ ಕ್ಲಾಸ್ ಶಿಕ್‌ಲ್ಲ್ಯಾ ಬೊನಾಕ್ ಕಿತೆಂಚ್ ಮತಿಕ್ ಗೆಲೆಂನಾ.

ಎಕಾ ದಿಸಾ ಪಿಯೆವ್ನ್ ತೊ ರಾಂದ್ಪಾ ಕುಡಾಕ್ ಗೆಲೊ ಆನಿ ತ್ಯೇ ದೀಸ್ ರಾಂದ್ಪಾಚೆಂ ಸತ್ತ್ಯಾನಾಸ್ ಜಾಲೆಂ. ಬೊನಾಚಾ ಪಿಯೊವ್ಣ್ಯಾಚಿ ಖಬಾರ್ ಎದೊಳ್‌ಚ್ ಆಸೊನ್ ತ್ಯಾ ಖಾತಿರ್ ಏಕ್ ದೋನ್ ಪಾವ್ಟಿಂ ತಾಕಾ ಜಾಗ್ರುತ್ ದಿಲ್ಲ್ಯಾ ಧನ್ಯಾನ್ ತಾಕಾ ಕಾಮಾಂತ್ಲೊ ಕಾಡ್ಲೊ. ಆನಿ ಬೊನಾ ಬೆಕಾರ್ ಜಾಲೊ. ಬೊನಾ ಆಪ್ಲ್ಯಾ ಗಾಂವಾ ಚಿಕ್‌ಮಗ್ಳೂರಾ ಥಾವ್ನ್ ಬೊಂಬೊಯ್ ಆಯಿಲ್ಲೆ ಸುರ್ವೆರ್ ತಾಚಾ ಪಯ್ಸಿಲ್ಯಾ ಮಾವ್ಳ್ಯಾನ್ ತಾಕಾ ರಾವಾಶೆಂ ಕೆಲ್ಲ್ಯಾ ಕೂಡಾಂತ್ ತೊ ರಾವೊಂಕ್ ಲಾಗ್ಲೊ. ಆನಿ ಮೆರಿಕ್ ತಾಚಾ ಕಾಮಾಂತ್ ಆಸ್ಚಾ ಕಶ್ಟಾಂವಿಶ್ಯಾಂತ್ ಬರಯ್ಲೆಂ. ಆಪ್ಣಾಚಿ ಭಲಾಯ್ಕಿ ವಿಭಾಡ್ಲಿ ದೆಖುನ್ ಆಪ್ಣಾಚೆಂ ಕಾಮ್ ಗೆಲೆಂ ಆನಿ ದೆಖುನ್ ಘರ್ ಪೊಯ್ಶೆ ಧಾಡುಂಕ್ ಜಾಲೆನಾಂತ್ ಮ್ಹಣೊನ್ ಕಳಯ್ಲೆಂ. ಕಾಗಾದ್ ವಾಚ್‌ಲ್ಲ್ಯಾ ಮೆರಿಕ್ ಆತಾಂ ಕಿತೆಂ ತರೀ ಕರಿಜಯ್ ಪಡ್ಲೆಂ. ತಾಣೆಂ ಬೊಂಬೊಯ್ಚೆಂ ಕಾಮ್ ಸೊಡ್ನ್ ಗಾಂವ್ ಧರ್ನ್ ಎದೊಳ್‌ಚ್ ಸಾತ್ ಮಯ್ನೆ ಜಾಲ್ಲೆ. ಭುರ್ಗಿಂ ಅನಿಕೀ ಲ್ಹಾನ್ ಆಸಾತ್ ದೆಖುನ್ ತೆಂ ಕೊನ್ವೆಂತಾಚಾ ಮಾದ್ರಿಲಾಗಿಂ ವಚೊನ್ ಆಪ್ಲೆ ಕಶ್ಟ್ ಸಾಂಗಾಲಾಗ್ಲೆಂ. ಆನಿ ಮಾದ್ರಿನ್ ತಾಂಚಾ ವಳ್ಕಿಂಚಾಲಾಗಿಂ ಸಾಂಗೊನ್ ತಾಣಿಂ ಎಕಾ ಯೇಜಂಟಾಕ್ ಸಾಂಗೊನ್ ಕಶೆಂಯ್ ಮೆರಿಕ್ ಗಲ್ಫಾಚೆಂ ಕಾಮ್ ಮೆಳಾಶೆಂ ಕೆಲೆಂ.

ಮೆರಿಲಾಗಿಂ ಯೇಜಂಟಾಕ್ ದಿಂವ್ಚಾಕ್ ಪೊಯ್ಶೆ ನಾತ್‌ಲ್ಲೆ ದೆಖುನ್ ತಾಕಾ ಕೊವೆಂತಾಚಾ ಮಾದ್ರಿನ್೦ಚ್ ದೋನ್ ಹಜಾರ್ ರುಪಯ್ ಭರ್ಲೆ ಆನಿ ಮೆರಿನ್ ಬೊನಾಕ್ ಗಾಂವಾಕ್ ಹಾಡಯ್ಲೊ ಆನಿ ತೆಂ ಆಪ್ಲ್ಯಾ ಕುಟ್ಮಾಕ್ ಸಾಂಡುನ್ ಗಲ್ಫಾಕ್ ಪಾವ್ಲೆಂ.

ಜಿಣ್ಯೆಂತ್ ಕೆದಿಂಕ್‌ಚ್ ತಾಣೆಂ ಚಿಂತ್‌ಲ್ಲೆಂ ನಾ ಏಕ್ ದೀಸ್ ಆಪುಣ್ ಪರ್ಗಾಂವಾಕ್ ಪಾವ್ತೆಲಿಂ ಮ್ಹಳ್ಳೆಂ. ಭಾಸ್ ಕಳಿತ್ ನಾ, ಶಿಕಾಪ್ ನಾ, ಪರ್ಕಿ ಗಾಂವ್ ಮ್ಹಣ್ತಾನಾ ಮೆರಿಕ್ ಪಯ್ಲೆಂಚೆ ಥೊಡೆ ದೀಸ್ ಪಾಶಾರ್ ಕರುಂಕ್ ಕಠೀಣ್ ಕಶ್ಟ್ ಜಾಲೆ. ಪುಣ್ ತಿಕಾ ಮಯ್ನ್ಯಾ ಮಯ್ನ್ಯಾಕ್ ಪಾಂಚ್ ಹಜಾರ್ ಸಾಂಭಾಳ್ ಮೆಳ್ತಾಲೊ ಆನಿ ತೆಂ ತೊ ಸಗ್ಳೊ ಸಾಂಬಾಳ್ ಆಪ್ಲ್ಯಾ ಘರಾ ಧಾಡ್ತಾಲೆಂ. ತಾಕಾ ಘರಾ ಥಾವ್ನ್ ಬೊನಾ ಸರಾಗ್ ಕಾಗ್ದಾಂ ಬರಯ್ತಾಲೊ. ಭುರ್ಗ್ಯಾಂಕ್ ಆವಯ್ ಸಾಂಭಾಳ್ತಾನಾ ಬೊನಾ ಗಾಂವಾಂತ್ ಥಂಯ್ ಹಾಂಗಾ ಮ್ಹಣೊನ್ ಕಾಮ್ ಕರ್ತಾಲೊ. ಬೊನಾ ಬರೊ ಮ್ಹಣೊನ್ ಬರೊಯ್ ನ್ಹಂಯ್ ಖೊಟೊ ಮ್ಹಣೊನ್ ಖೊಟೊಯ್ ನ್ಹಂಯ್. ದೀಸ್ ಗೆಲ್ಲೆ ಪರಿಂಚ್ ಬೊನಾನ್ ಇಲ್ಲಿ ತಕ್ಲಿ ವಾಪಾರ್ಲಿ ಆನಿ ಇಲ್ಲೊ ಜಾಗೊ ಮೊಲಾಕ್ ಘೆತ್ಲೊ. ಅಶೆಂ ಗುಡೊ ಆಸ್‌ಲ್ಲೊ ಇಲ್ಲೊ ಜಾಗೊ ತಾಣೆಂ ತಿನ್ಶಿಂ ರುಪಯ್ ದೀವ್ನ್ ಮೊಲಾಕ್ ಘೆತ್ಲೊ ಆನಿ ತಾಂತುಂ ಹಳ್ತಾಚೆಂ ಏಕ್ ಘರ್ ಬಾಂಧುಂಕ್ ಧರ್ಲೆಂ.

ಅಶೆಂ ಮೆರಿನ್ ಗಲ್ಫಾಕ್ ವಚೊನ್ ದೋನ್ ವರ್ಸಾಂ ಜಾತಾನಾ ದೋನ್ ಕುಡಾಂಚೆಂ ಹಳ್ತಾಚೆಂ ಘರ್ ತಯಾರ್ ಜಾಲೆಂ. ಆನಿ ಆತಾಂ ಮೆರಿಕ್ ಆಪ್ಲೆಂ ನವೆಂ ಘರ್ ಜಾಲ್ಲೆಂ ಮೊಸ್ತ್ ಸಂತೊಸಾಚೆಂ ಜಾಂವ್ಕ್ ಪಾವ್ಲೆಂ. ಸೆಜಾರ್ಚಾಂಕ್ ಬೊನಾಚೆರ್ ಅಭಿಮಾನ್ ಚಡ್ಲೊ ಆನಿ ತಾಕಾ ತಿಂ ಸಗ್ಳಿಂ ಮಾನ್ ದೀಂವ್ಕ್ ಲಾಗ್ಲಿಂ. ಆಪ್ಲ್ಯಾ ಸ್ವಂತ್ ಗಾಂವಾಂತ್ ಕೊಣಾಯ್ಕೀ ಮಾನ್ ಮೆಳಾನಾ ತರೀ ಆಪ್ಲ್ಯಾ ಗಾಂವಾಕ್ ಆಯಿಲ್ಲ್ಯ್ ಖಂಚಾ ಖಾಸ್ತಾಚಾ ಮನ್ಶಾಕೀ ಮಾನ್ ಚುಕಾನಾ ಮ್ಹಳ್ಳೆಪರಿಂ ಬೊನಾಕ್ ದಿಸಾನ್‌ದೀಸ್ ಈಶ್ಟ್ ಚಡ್ಲೆ.

ಆನಿ ಗಾಂವಾಂತ್ ಬೊನಾ ಆತಾಂ ಇಲ್ಲೊ ನಾಂವಾಡ್ದಿಕ್ ಮನಿಸ್ ಜಾಂವ್ಕ್ ಪಾವ್ಲೊ. ಕೊಣಾಚಾ ಭುರ್ಗ್ಯಾಚೆಂ ವೋಲ್ ಜಾತಾನಾ ತ್ಯಾ ಭುರ್ಗ್ಯಾಚಿ ವಾತ್ ಧರುಂಕ್, ಕೊಣಾಕ್ ಸಯ್ರಿಕ್ ಸೊಧುಂಕ್ ವೆತಾನಾ ತಾಂಚೆಸವೆಂ ಚೆಡ್ವಾಕ್ ಪಳೆವ್ನ್ ಯೇಂವ್ಕ್ ಮ್ಹಣ್ತಾನಾ ಬೊನಾ ವಾಡ್ಯಾಂತ್ ವಡ್ಲೊ ಮನಿಸ್ ಜಾಲೊ. ತ್ಯಾ ಶಿವಾಯ್ ಬಾಯ್ಲೆಚ್ಯಾ ಗುಸ್ತ್ಯಾರ್ ತಾಕಾ ಗರ್ಜೆಚಾಂಕ್ ಇಲ್ಲೆಂ ರೀಣ್ ದೀಂವ್ಕ್ ಜಾತಾಲೆಂ ಆನಿ ತ್ಯಾ ದೆಖುನ್ ಚಡಾವತ್ ಲೋಕ್ ತಾಕಾ ಮಾನ್ ದೀಂವ್ಕ್ ಲಾಗ್ಲೊ. ಭುರ್ಗಿಂ ಆತಾಂ ವಡ್ ಜಾವ್ನ್ ಯೆತಾಲಿಂ ಆನಿ ಇಸ್ಕೊಲಾಕ್ ವೆತಾಲಿಂ. ಪುಣ್ ಥಂಯ್ ಪರ್ಗಾಂವಾಂತ್ ಬಾವ್ಡೆಂ ಮೆರಿ ಘೊಳ್ತಾಲೆಂ. ಕೊಣಾ ಕೊಣಾಚೊ ಗಾಳಿ ಆಯ್ಕೊನ್, ಆಪ್ಲ್ಯಾ ಭುರ್ಗ್ಯಾಂಕ್ ಏಕ್ ಪಾವ್ಟಿಂ ಪಳೆವ್ಯಾಂ ಮ್ಹಳ್ಳಿ ಆಶಾ ಆಯ್ಲ್ಯಾರೀ ತಾಂಕಾ ಧಾಂಬುನ್ ದವ್ರುನ್ ಮೆರಿ ಘೊಳ್ತಾಲೆಂ.

ಮೆರಿಕ್ ಹಾಪ್ತ್ಯಾಚಾ ಹರ್‍ಯೆಕಾ ಆಯ್ತಾರಾ ಅರ್ಧೊ ದೀಸ್ ರಜಾ ಮೆಳ್ತಾನಾ ತೆಂ ಯೇವ್ನ್ ಕೊಣಾ ಕೊಣಾಚೆ ಪಾಂಯ್ ಧರುನ್ ಜಾಲ್ಯಾರೀ ಘರಾ ಕಾಗಾದ್ ಬರಯ್ತಾಲೆಂ. ತಾಕಾ ಆಯಿಲ್ಲೆಂ ಕಾಗಾದ್ ವಾಚಂವ್ಕ್ ಜಾಲ್ಯಾರೀ ತೆಂ ಕೊಣಾ ಕೊಣಾಚೆ ಪಾಂಯ್ ಧರಿಜಾಯ್ ಪಡ್ತಾಲೆಂ.

ದೀಸ್ ಗೆಲ್ಲೆಪರಿಂ ಘರ್ಚೊ ಗರ್ಜೊ ಚಡೊನ್ ಯೆತಾಲ್ಯೊ ದೆಖುನ್ ಮೆರಿಕ್ ಗಾಂವಾಕ್ ವೆಚೆಂ ಭಾಗ್ ಮೆಳ್ಳೆಂಚ್ ನಾ. ತ್ಯಾ ಶಿವಾಯ್ ಬೊನಾ ದೋನ್ ಮಯ್ನ್ಯಾಕ್ ಏಕ್ ಪಾವ್ಟಿಂ ಪೊಯ್ಶೆ ಯೇನಾತ್ಲ್ಯಾರ್ ಮೆರಿಕ್ ಜ್ಯೊರಾನ್ ಕಾಗಾದ್ ಬರಯ್ತಾಲೊ.

"ಹಾಂವ್ ಚಲ್ಲೊಂ, ತುಜಾ ಆವಯ್ಕ್ ಆನಿ ಭುರ್ಗ್ಯಾಂಕ್ ತುಂಚ್ ಸಾಂಬಾಳ್. ಮ್ಹಾಕಾ ಬೊಂಬೊಯ್ ಗೆಲ್ಯಾರ್ ಕಾಮ್ ಮೆಳೊಂಕ್ ಕಶ್ಟ್ ನಾಂ. ಮ್ಹಜೆಂ ಪೋಟ್ ಹಾಂವ್ ಖಂಯ್ ವಚೊನೀ ಭರುಂಕ್ ಸಕ್ತಾಂ"

ಮ್ಹಳ್ಳೆಂ ಕಾಗಾದ್ ಪರ್ಗಾಂವಾಂತ್ ಆಸ್ತಾನಾ ಕೊಣಾ ಕೊಣಾಚಾ ತೊಂಡಾಂತ್ ತೆಂ ಕಾಗಾದ್ ವಾಚಯ್ತಾನಾ ಉಚಾರ್‍ಚಿಂ ತಾಂಚಿಂ ತಿಂ ಉತ್ರಾಂ ಆಯ್ಕಾತಾನಾ ಮೆರಿಕ್ ಜೀವ್ ಗೆಲ್ಲೆಪರಿಂ ಜಾತಾಲೆಂ. ತರೀ ಕಿತೆಂ ಕರ್ತೆಲೆಂ ತೆಂ? ಕಾಗಾದ್ ವಾಚ್‌ಲ್ಲೊ ಪರ್ಕಿ ಕಿತೆಂ ಚಿಂತಾ ಮ್ಹಳ್ಳೆಂ ಮೆರಿಕ್ ಸಮ್ಜಾನಾತ್‌ಲ್ಲೆಂ.

ಬಾಯ್ಲೆಕ್ ಕಿತೆಂ ತೊಂಡಾಕ್ ಆನಿ ಮತಿಕ್ ಆಯಿಲ್ಲೆಂ ಬರಯ್ಲ್ಯಾರ್ ಬೊನಾ ಜಾಣಾಸ್‌ಲ್ಲೊ ಆಪ್ಣಾಚಿ ಬಾಯ್ಲ್ ಗಾಂವಾಕ್ ಪೊಯ್ಶೆ ಖಂಡಿತ್ ಜಾವ್ನ್ ಧಾಡ್ತಾ ಮ್ಹಳ್ಳೆಂ. ಆನಿ ತಾಚಾ ಹರ್‍ಯೆಕಾ ಕಾಗ್ದಾಂಕ್ ಮೆರಿ ಬಾವ್ಡೆಂ ಸಮಧಾನೆನ್ ಕಾಗ್ದಾಂ ಬರಯ್ಶೆಂ ಕರುನ್ ಧಾಡ್ತಾಲೆಂ.

"ತುಜಿ ಜೋಡ್ ಆನಿ ಮ್ಹಜಿ ಜೋಡ್ ಮ್ಹಣೊನ್ ನಾ. ತುಜಿಂ ಭುರ್ಗಿಂ ಆನಿ ಮ್ಹಜಿಂ ಭುರ್ಗಿಂ ಮ್ಹಣೊನ್ ನಾಂತ್. ದೆಖುನ್ ಭುರ್ಗ್ಯಾಂಕ್ ಬರೆಂ ಕರ್ನ್ ಸಾಂಭಾಳ್. ಹಾಂವ್ ಪೊಯ್ಶೆ ಧಾಡ್ತಾಂ. ಪುಣ್ ಥೊಡೆ ಪಾವ್ಟಿಂ ಮ್ಹಾಕಾ ವೆಳಾರ್ ಡ್ರಾಫ಼್ಟ್ ಕರುಂಕ್ ಕೊಣೀಂ ಮೆಳಾನಾಂತ್. ತ್ಯಾ ಶಿವಾಯ್ ಮ್ಹಾಕಾ ಶಿಕಾಪ್ ನಾಂ ಮ್ಹಳ್ಳೆಂ ತುಂ ಜಾಣಾಂಯ್ ದೆಖುನ್ ತುಂ ಕಾಂಯ್ ದುಸ್ರೆಂ ಚಿಂತಿನಾಕಾ. ಭಲಾಯ್ಕಿ ಸಾಂಭಾಳ್" ಮ್ಹಣೊನ್ ಬರಯ್ತಾಲೆಂ.

ಅಶೆಂ ಆಪ್ಲ್ಯಾ ಬಾಯ್ಲೆಚಿ ಅಸ್ಕತ್ಕಾಯ್ ಸಮ್ಜಾಲ್ಲ್ಯಾ ಬೊನಾಕ್ ಸಗ್ಳೊ ಸಂಸಾರ್ ತಾಚಾ ಮುಟಿಂತ್ ಆಸ್ಚೆಪರಿಂ ಭೊಗ್ಲೆಂ. ಗಾಂವಾಂತ್ ಕೊಣಾಚೆಂಯ್ ಕಾಜಾರ್ ಜಾಲೆಂ ತರ್ ತ್ಯಾ ವೊಕ್ಲೆ ನವ್ರ್ಯಾಂಕ್ ಬೊನಾಗೆರ್ ಸಮ್ಮಾನ್ ಜಾತಾಲೊ. ಗಾಂವಾಂತ್ ಕೊಣಾಕ್ ಗುರ್ವಾರೆಕ್ ಧಾಡುಂಕ್ ಪಡ್ಲೆಂ ತರೀ ಬೊನಾಕ್ ಸಾಂಗಾನಾಸ್ತಾಂ ತೆಂ ಕಾರ್‍ಯೆಂ ಜಾಯ್ನಾತ್‌ಲ್ಲೆಂ. ಗಾಂವಾಂತ್ ಕೊಣಾಚಾ ಘರಾಯ್ ಕಸ್ಲಿಂಯ್ ಕಾರ್‍ಯಿಂ ಯಾ ಮೋರ್ನ್ ಜಾಲೆಂ ತರ್ ಬೊನಾ ತ್ಯಾ ಕಾರ್‍ಯಾಂತ್ ನಾಸ್ತಾಂ ತೆಂ ಕಾರ್‍ಯೆಂ ಜಾಯ್ನಾತ್‌ಲ್ಲೆಂ. ತ್ಯಾ ಕಾರ್‍ಯಾಕ್ ಗೆಲ್ಲ್ಯಾ ಬೊನಾನ್ ಖಂಡಿತ್ ಜಾವ್ನ್ ಅರ್ಧಿ ಬೋತ್ಲ್ ಘೆತೆಚ್ ಏಕ್ ಕಣಾಚೊ ತೇರ್ಸ್ ಆನಿ ಪಾಂಚ್ ಸಾಂತಾಚೊ ಉಡಾಸ್ ಕಾಡ್ಲ್ಯಾರ್ ಘರ್ಚಾಂಕ್ ತಾಂಚಾ ಕಾರ್‍ಯಾಕ್ ಪಾದ್ರಿ ಆಯಿಲ್ಲೆ ತಿತ್ಲೊಚ್ ಸಂತೊಸ್ ಜಾತಾಲೊ.

ಅಶೆಂ ದೀಸ್ ವೆತಾಂ ವೆತಾಂ ಬೊನಾ ಗಾಂವಾಂತ್ ನಾಂವಾಡ್ದಿಕ್ ಮನಿಸ್ ಜಾಲೊ. ಗಲ್ಫಾಂತ್ ಬಾಯ್ಲ್ ಆಸ್ತಾನಾ ಆನಿ ಚಿಂತ್‌ಲ್ಲೆ ತೆದಾಳಾ ಚಿಂತ್‌ಲ್ಲೆ ಪರಿಂ ಪೊಯ್ಶೆ ಧಾಡ್ತಾನಾ ತಾಕಾ ಕಿತೆಂ ಉಣೆಂ? ಖಂಚಾ ಮೊಲ್ಯಾಂತ್ ಜಾಂವ್ ಖಂಚಾ ಮುಲ್ಯಾಂತ್‌ಯಿ ಜಾಂವ್. ಗತ್ ನಾತ್‌ಲ್ಲೊ ಜಾಂವ್ ಯಾ ಕೊಣೀಂ ಜಾಂವ್ ಬೊನಾಕ್ ಕಾಜಾರಾಕ್ ಆಪವ್ಣೆಂ ದಿಲೆಂ ತರ್ ಜಾಲೆಂ. ಮೆರಿನ್ ಕೊಣಾ ಕೊಣಾಲಾಗಿಂ ಧಾಡುನ್ ದಿಲ್ಲೊ ಟೇಪ್ ರೆಕೋರ್ಡರಾಕ್ ಬೆಟ್ರಿ ಘಾಲ್ನ್ ಪೆಂಟೆರ್ ವೆತಾನಾ ತಾಚಾ ಸಂಗೀತಾಕ್ ಪಿಸೊ ಜಾಯ್ನಾತ್‌ಲ್ಲೆ ಮಾರ್ ಕೊರ್ಗೆ ಕೊಣೀಂ ನಾಂತ್. ಕಾಜಾರಾಕ್ ವೆತಾನಾ ತಕ್ಲೆರ್ ಕಿತೇಂಯ್ ಆಸೊಂ. ಪುಣ್ ಪಾಟಿಂ ಯೆತಾನಾ ತಾಚಾ ತಕ್ಲೆರ್ ಸಾತ್ ಶಿಂಗಾಂಚೊ ಸಯ್ತಾನ್ ಖಂಡಿತ್ ಜಾವ್ನ್ ಆಸ್ತಾಲೊ.

ಹೊ ಸೊರೊ, ಹಿ ನಾಲಿಸಾಯ್ ಕೊಣಾಕ್ ಮ್ಹಳ್ಳೆಂ ತಾಕಾಚ್ಚ್ ಸಮ್ಜಾನಾತ್‌ಲ್ಲೆಂ. ಕೊಣಾಕ್ ಕಿತ್ಯಾಕ್? ತಿ ನಾಲಿಸಾಯ್ ಮ್ಹಣೊನ್ ತಾಕಾಚ್ ಸಮ್ಜಾನಾತ್‌ಲ್ಲೆಂ. ಅಶೆಂ ದೀಸ್ ವೆತಾಂ ವೆತಾಂ ಮಾತಾರಿ ಜಾವ್ನ್ ಆಯಿಲ್ಲಿ ಮೆರಿಚಿ ಆವಯ್ ಪಿಡೆಂತ್ ವಳ್ವೊಳೊಂಕ್ ಲಾಗ್ಲಿ. ಘರಾಂತ್ ತಿಕಾ ಕಿತ್ಲೆಂ ತಾಂಕಾನಾ ತರೀ ಭುರ್ಗ್ಯಾಂಕ್ ರಾಂದುನ್ ತಿ ವಾಡ್ತಾಲಿ. ಮೀಟ್ ಮಿರ್ಸಾಂಗ್ ಜಾಂವ್ ಯಾ ಪೇಜ್ ಚೆಟ್ಣಿ ಜಾಂವ್ ತಿ ರಾಂದ್ತಾಲಿ. ತಿಚಾ ಶಿಕ್ಪಿ ಜಾಂವ್ಯಾಚೆರ್ ತಿಕಾ ಅಭಿಮಾನ್ ಆಸ್‌ಲ್ಲೊ. ತಿಕಾ ದೋನ್ ಅಕ್ಶರಾಂ ಕಳಿತ್ ನಾತ್‌ಲ್ಲಿಂ ತ್ಯಾ ಶಿವಾಯ್ ಬೊನಾಕ್ ವಾಚುಂಕ್ ಯೆತಾ, ಬರಂವ್ಕ್ ಯೆತಾ. ವಾಂಜೆಲಾಚಿಂ ಉತ್ರಾಂ ತೊ ಕೆದಾಳಾಯ್ ಉಲಯ್ತಾ ರೆತಿರೆಕ್ ಆಯಿಲ್ಲ್ಯಾ ಕಾಪುಜಿನ್ ಪಾದ್ರಿಪರಿಂ. ಗಾಂವ್ಚೊ ಲೋಕ್ ತಾಕಾ ಬರೊ ಮಾಂದ್ತಾ ಮ್ಹಣ್ತಾನಾ ತಿ ಕಶಿ ತಾಕಾ ಮಾದ್ಚಿನಾ? ಕಿತೆಂ ಜಾಲ್ಯಾರೀ ಘರಾ ಖಾಣಾಕ್ ಜಾಂವ್ ಪಿಯೆಂವ್ಕ್ ಜಾಂವ್ ತೊ ಉಣೆಂ ಕರಿನಾತ್‌ಲ್ಲೊ. ಪಟೆಲಾಚಾ ಜಾಗ್ಯಾರ್ ತಾಚಾ ಹಂಗಾರ್ ರಾಂವ್ಚೆ ದೀಸ್ ಆತಾಂ ತಿಚಾ ಶಿಕ್ಪಿ ಜಾಂವ್ಯಾನ್೦ಚ್ ನಂಯ್ಗೀ ಅಖೇರ್ ಕೆಲ್ಲೆ?.

ಕೊಣಾಕ್ ಎಕ್ಲ್ಯಾಕ್ ಗತ್ ನಾತ್‌ಲ್ಲ್ಯಾಕ್ ಬೆಂಡಾ ವಾಜ್ಪಾರ್ ಕಾಜಾರ್ ಜಾಯ್ಜಯ್? ತಾಂಕಾ ವಾಡ್ ಬಿಲ್ಕುಲ್ ತೊ ಘೆನಾಸ್ತಾಂ ರಿಣಾ ರುಪಾನ್ ಬೊನಾ ಪೊಯ್ಶೆ ದಿತಾಲೊ. ಕೊಣಾಕ್ ಕಾಜಾರಾಕ್ ಸೂಟ್ ಶಿವೊಂಕ್ ಜಾಯ್ನಾ ತಾಂಕಾ ಬೊನಾನ್ ಪಾರ್‍ಸ್ಯಾಂಚಾ ಹೊಟ್ಲಾಂತ್ ಕಾಮ್ ಕರ್ಚಾಧಿಂ ಇರಾನಿಚಾ ಘರಾ ಕಾಮ್ ಕರ್ತಾನಾ ತಾಣಿಂ ದಿಲ್ಲೊ ಸೂಟ್ ಆಸ್‌ಲ್ಲೊ. ಆನಿ ತ್ಯಾಚ್ಚ್ ಸುಟಾರ್ ಗಾಂವಾಂತ್ ಸೂಟ್ ಶಿಂವಂವ್ಕ್ ಗತ್ ನಾತ್‌ಲ್ಲ್ಯಾಂಚೆ ಕಾಜಾರ್ ಜಾತಾಲೆಂ. ಫಕತ್ ಬೊನಾಕ್ ತಾಣಿಂ ಆಪವ್ಣೆಂ ದಿಲ್ಯಾರ್ ಜಾಲೆಂ. ಆನಿ ಕಾರ್‍ಯಾವೆಳಾರ್ ತಾಕಾ ಸಗ್ಳ್ಯಾ ಸಯ್ರ್ಯಾಂ ಮುಖಾರ್ 'ದೇಬ್ರೆರುಂ' ಮ್ಹಳ್ಯಾರ್ ಜಾಲೆಂ.

ಗಲ್ಫಾಂತ್ ಕೋಣ್ ಜಾಣಾಂ ಅಸಲ್ಯೊ ಕಿತ್ಲೆಶ್ಯೊ ಮೆರಿ ಬಾಯೊ ಆಸಾತ್ ಆನಿ ಗಾಂವಾಂತ್ ಅಸಲೆ ಕಿತ್ಲೆ ಬೊನಾ ಆಸಾತ್. ಆನಿ ಹಾಂಚಾ ಎಕ್ಸುರ್‍ಯಾ ಜಿಣ್ಯೆಕ್ ಕಾಂಯ್ ಮೋಲ್ ಆಸಾ? ಗಾಂವಾಕ್ ಯೆತೆಚ್ ಸೊರೊ ಆನಿ ದಬಾಜೊ. ದಬಾಜೊ ಕರಿನಾತ್ಲ್ಯಾರ್ ಸಮಜೆಂತ್ ಮಾನ್ ನಾ ಮ್ಹಳ್ಳೆಂ ಚಿಂತಾಪ್ ಕೋಣ್ ಜಾಣಾ ಕೊಣೆಂ ದಿಲ್ಲೆಂ ಮ್ಹಳ್ಳೆಂ. ಅಸಲೆಂ ಚಿಂತಾಪ್ ಮನ್ಶಾಚಾ ಮತಿಂತ್ ಖಂಚೊನ್ ವೆತಾ ಪರ್‍ಯಾಂತ್ ಸಂಸಾರಾಂತ್ ಫುಡೆಂ ಅಶೆಂಚ್ ಘಡ್ತೆಲೆಂ. ಕೊಣಾಚೊ ಘೊವ್ ಗಲ್ಫಾಂತ್ ತರ್ ಕೊಣಾಚಿ ಬಾಯ್ಲ್ ಗಲ್ಫಾಂತ್. ಥಂಯ್ ತಿಂ ಎಕ್ಸುರಿಂ ತರ್ ಹಾಂಗಾ ಹಿಂ ಎಕ್ಸುರಿಂ. ತಾಂಚಾ ಮಧೆಂ ನಾಡುಂಕ್ ಯೆಂವ್ಚೆ ಲುಸಿಫೆರ್ ಕಾಂಯ್ ಉಣೆಂ ನಾಂತ್. ಆನಿ ಉಪ್ರಾಂತ್ ಸುರು ಜಾತಾ ದುಭಾವ್, ಝಗ್ಡಿಂ, ಗಾಳಿ ಶಿರಾಪ್ ಆನಿ ಸರ್‍ವ್ ಥರಾಚೊ ಭೊಂಗೊಸ್ತೊಳ್. ಕೋಣ್ ಬಾವ್ಡಿಂ ಪರ್ಗಾಂವಾಂತ್ ಕಾಮ್ ಕರುನ್ ಪಾಟಿಂ ಯೆತಾನಾ ಬರೆಂ ಜಿವಿತ್ ಜಿಯೆಂವ್ಕ್ ಸಕ್ತಾತ್ ತರ್ ಥೊಡಿಂ ಪರ್ಗಾಂವಾಂತ್‌ಚ್ ಮಾತ್ಯೆಕ್ ಸಾರೆಂ ಜಾತಾತ್. ಥೊಡಿಂ ಪರ್ಗಾಂವಾಕ್ ಗೆಲ್ಲಿಂ ಥಂಯ್ಚ್ ರಾವ್ತಾತ್ ತರ್ ಥೊಡಿಂ ಪಾಟಿಂ ಯೆತೆಚ್ 'ಹಾಂವ್೦ಚ್ ವಡ್ಲೊ' ಮ್ಹಳ್ಳ್ಯಾ ಚಿಂತ್ನಾನ್ ಭರೊನ್ ಎಕಾಮೆಕಾಚಿಂ ಮಾಸಾಂ ಖಾತಾತ್. ಹೆಂ ಸಗ್ಳೆಂ ಎಕಾಚ್ ಅಬ್ಲೇಸ್ಪಣಾಂತ್ ಘಡ್ತಾ. ಸಂಸಾರಾಂತ್ಲೆ ಜಿತ್ಲೆ ಸಾಧ್ಯ್ ಆಸಾಗಿ ತಿತ್ಲೆಂ ಆಪ್ಲೆಂ ಕರ್ಚೆಂ ಅಬ್ಲೇಸ್ಪಣ್.

ದೀಸ್, ಮಯ್ನೆ, ವರ್ಸಾಂ ಕಿತ್ಲೆ ಪಾಶಾರ್ ಜಾಲೆ ಮ್ಹಳ್ಳೆಂ ಮೆರಿ ಬಾಯೆಕ್ ಸರ್ಕೆಂ ಕಳಿತ್ ನಾ. ಹರ್‍ಯೆಕ್ ಪಾವ್ಟಿಂ ತಿಕಾ ಏಕ್ ನ್ಹಂಯ್ ತರ್ ಏಕ್ ಗರ್ಜ್ ಉದೆತಾಲಿ. ಆನಿ ಎಕ್ಸುರ್ಪಣಾಂತ್ ಸದಾಂ ಕೊಣಾ ಕೊಣಾಕ್ ಭಿಂಯೆವ್ನ್ ಕಾಮ್ ಕರುನ್ ಆಸೊನ್ ದೀಸ್ ಕಾಡಿಜಯ್. ಅಶೆಂ ಅರ್ಧೆಂ ಆವ್ಕ್ ಕಾಬಾರ್ ಜಾತಾನಾ ಯೆತಾ ಪಿಡಾ. ಖಂತಿಚಿ ಆನಿ ಎಕ್ಸುರ್ಪಣಾಚಿ ಪಿಡಾ. ಥೊಡ್ಯಂಕ್ ಹಿ ಪಿಡಾ ನಿವ್ರಾಂವ್ಕ್ ಜಾತಾ ತರ್ ಥೊಡ್ಯಾಂಕ್ ಹಿ ಪಿಡಾಚ್ ನಿವ್ರಾಯ್ತಾ.

ಅಶೆಂ ಆಸ್ಚಿ ಮೆರಿ ಬಾಯೆನ್ ಗಲ್ಫಾಕ್ ಯೇವ್ನ್ ಸಾತ್ ವರ್ಸಾಂ ಜಾತೆಚ್ ಪಯ್ಲೆ ಪಾವ್ಟಿಂ ಗಾಂವಾಕ್ ರಜೆರ್ ಗೆಲ್ಲಿ ಆಪ್ಲ್ಯಾ ಭುರ್ಗ್ಯಾಂಸವೆಂ ಆಪ್ಲೆ ದೀಸ್ ಖರ್ಚಿಲೆ, ಬೊನಾಚಿ ರಾಜ್ವಟ್ಕಿ ಪಳೆವ್ನ್ ಸಂತೊಸ್ಲೆಂ. ಎದೊಳ್ ಆಪ್ಣಾನ್ ಘೊಳ್‌ಲ್ಲೆಂ ಸಗ್ಳೆಂ ಖಂಯ್ ಗೆಲೆಂ ಮ್ಹಳ್ಳೆಂ ತೆಂಚ್ ನೆಣಾಂಸ್‌ಲ್ಲೆಂ. ತಾಚೊ ವಿಚಾರ್ ಕರ್ಚೆಪರಿಂ ನಾತ್‌ಲ್ಲೆಂ. ವಿಚಾರ್ ಕೆಲೊ ತರೀ ತಾಕಾ ಜಾಪ್ ಮೆಳ್ತಿಗೀ ಮ್ಹಳ್ಲಿ ಗಜಾಲ್ ವಿಂಗಡ್. ಇತ್ಲ್ಯಾ ತೆಂಪಾ ಉಪ್ರಾಂತ್ ಗಾಂವಾಕ್ ಗೆಲ್ಲ್ಯಾ ಮೆರಿಬಾಯೆಕ್ ತಿಚಾ ಕಶ್ಟಾಂ ವಿಶ್ಯಾಂತ್ ಕೊಣೆಂಯ್ ಸಮ್ಜಾಲ್ಲೆಂ ನಾ. ಸಾತ್ ವರ್ಸಾಂನಿ ಸಾತ್ ಮಯ್ನ್ಯಾಚಿ ರಜಾ ಆಸ್‌ಲ್ಲಿ ತರೀ ಎದೊಳ್‌ಚ್ ಭುರ್ಗ್ಯಾಂಕ್ ತೆಂ ಜಾಯ್ ಹೆಂ ಜಾಯ್ ಮ್ಹಣ್ತಾನಾ ಆನಿ ತಾಣಿಂ ಮಾಗ್‌ಲ್ಲೆಂ ಸಗ್ಳೆಂ ಘೆವ್ನ್ ದಿತಾನಾ ತಿಚೊ ಗಳೊ ಮಾತ್ರ್ ನ್ಹಂಯ್, ಪೊಯ್ಶೆಯ್ ಖಾಲಿ. ಆನಿ ಚಾರ್ ಮಯ್ನ್ಯಾಂತ್‌ಚ್ ಮೆರಿಚೆ ಹಾತ್ ಖಾಲಿ ಜಾಲೆ ಆನಿ ಪಾಟಿಂ ಆಯಿಲ್ಲೆ ಶಿವಾಯ್ ದುಸ್ರಿ ವಾಟ್ ಮೆರಿಕ್ ನಾತ್‌ಲ್ಲಿ. ಆನಿ ಅಶೆಂ ಮೆರಿ ಪರತ್ ಗಲ್ಫಾಕ್ ಪಾಟಿಂ ಆಯ್ಲೆಂ. ಫುಡ್ಲ್ಯಾ ಕಿತ್ಲ್ಯಾ ವರ್ಸಾಂ ಖಾತಿರ್ ಮ್ಹಳ್ಳೆಂಚ್ ನೆಣಾಸ್ತಾಂ.

********

ಎಕ್ಲೊ ತರ್‍ನಾಟ್ಯಾಚಿ ಕಾಣಿಂ ಆಯ್ಕತಾನಾ ಹಾಸ್ಚೆಂಗೀ ರಡ್ಚೆಂಗೀ ಮ್ಹಳ್ಳೆಂ ಕಳಾನಾತ್‌ಲ್ಲೆಂ. ಪಳೆಂವ್ಕ್ ದಾಟೊ ಮೊಟೊ ಜಾವ್ನ್ ಗೊರೊ ಗೊರೊ ಆಸೊನ್ ಬರೊ ದಿಸ್ಚಾ ತಾಕಾ ಸೊಭಿತ್ ಆನಿ ಗ್ರೇಸ್ತ್ ಚೆಡ್ವಾಲಗಿಂ ಕಾಜಾರ್ ಜಾಂವ್ಕ್ ಮನ್ ಆಸ್‌ಲ್ಲೆಂ. ತರೀ ತಾಚೆಂ ನಶಿಬ್ ಬರೆಂ ನಾತ್‌ಲ್ಲ್ಯಾನ್ ಎಕಾ ಪೆಟ್ರೊಲ್ ಸ್ಟೇಶನಾಂತ್ ಕಾಮ್ ಕರ್ತಾಲೊ. ಯೆಂವ್ಚಾ ವೆಚಾ ಗಾಡಿಯಾಂಕ್ ಪೆಟ್ರೊಲ್ ಭರ್ತಾಲೊ.

ಥಂಯ್ ಯೆಂವ್ಚಿ ಸಭಾರ್ ಗ್ರೇಸ್ತ್ ಚೆಡ್ವಾಂ ತಾಂಚೊ ಗಾಡಿಯೊ ಹಾಡ್ತಾಲಿಂ ಆನಿ ಪೆಟ್ರೊಲ್ ಭರ್ತಾಲಿಂ. ಆನಿ ತಾಂಚಿ ವಳೊಕ್ ತಾಕಾ ವೆಗಿಂಚ್ ಜಾಲಿ. ಆನಿ ಅಶೆಂ ಎಕಾ ದಿಸಾ ತಾಕಾ ಎಕಾ ಗ್ರೇಸ್ತ್ ಚೆಡ್ವಾಚಿ ವಳೊಕ್ ಇಶ್ಟಾಗತೆಂತ್ ಬದ್ಲೊನ್ ದೀಸ್ ಗೆಲ್ಲೆಪರಿಂಚ್ ಹಿ ಇಶ್ಟಾಗಾತ್ ಮೊಗಾನ್ ಬದ್ಲಾಲಿ.

ಮೋಗ್ ಕುಡ್ಡೊ ಆನಿ ಮೋಗ್ ಕರ್‍ಣಾರ್‍ಯಾಂಕ್ ದೊಳೆ ಆಸಾನಾಂತ್ ಮ್ಹಣೊನ್ ಮಾಲ್ಘಡ್ಯಾಂನಿ ಸಾರ್ಕೆಂಚ್ ಮ್ಹಳಾಂ ಜಾಯ್ಜಯ್. ತಶೆಂ ಕೊಲೆಜಿಕ್ ವೆಚಾ ತ್ಯಾ ಚೆಡ್ವಾಕ್ ಆತಾಂ ತ್ಯಾ ತರ್‍ನಾಟ್ಯಾ ಶಿವಾಯ್ ದೀಸ್ ಕಾಡುಂಕ್ ಕಶ್ಟ್ ಮ್ಹಳ್ಳೆಪರಿಂ ಜಾಲೆಂ. ಗಾಂವಾಂತ್ ಹಿ ಖಬಾರ್ ವಿಸ್ತಾರ್ಲಿ. ತೆಂ ಚೆಡುಂ ಕೊರ್ಟಾಂತ್ಲ್ಯಾ ಎಕಾ ವಕಿಲಾಚಿ ಧುವ್ ಜಾಲ್ಲೆವರ್ವಿಂ ಏಕ್ ದೀಸ್ ತಾಕಾ ಖಬಾರ್ ಮೆಳೊನ್ ತಾಣೆಂ ಆಪ್ಲ್ಯಾ ಧುವೆಕ್ ಸಮ್ಜೊಣಿಂ ದೀಂವ್ಕ್ ಪ್ರೇತನ್ ಕೆಲೆಂ. ತರೀ ತ್ಯಾ ಚೆಡ್ವಾನ್ ತ್ಯಾ ತರ್‍ನಾಟ್ಯಾಕ್ ಬಿಲ್ಕುಲ್ ಸೊಡುಂಕ್ ಆಯ್ಕಲೆಂನಾ. 'ಆಪ್ಣಾಚೆಂ ಕಾಜಾರ್ ಜಾಲೆಂ ತರ್ ತಾಚೆಲಾಗಿಂಚ್ ನಾತ್ಲ್ಯಾರ್ ಆಪುಣ್ ಜೀವ್ಘಾತ್ ಕರ್ನ್ ಮೊರ್ತೆಲಿಂ ಮ್ಹಳ್ಳಿ ಧಮ್ಖಿ ಕಿತಾನಾ ವಕೀಲ್ ಬಾಪಾಯ್ಕ್ ದುಸ್ರಿ ವಾಟ್ ದಿಸ್ಲಿನಾ. ದೀಸ್ ಗೆಲ್ಲೆಪರಿಂಚ್ ಆಪ್ಲಿ ಧುವ್ ಬದ್ಲತೆಲಿ ಮ್ಹಣೊನ್ ಲೆಕ್ಚಾ ತಾಕಾ ಆಪ್ಲ್ಯಾ ಧುವೆನ್ ಕಾಜಾರಾಕ್ ತಯಾರ್ ಜಾಲ್ಲೆಂ ಪಳೆವ್ನ್ ಆಜ್ಯಾಪ್ ಜಾಲೆಂ. ಪುಣ್ ಆತಾಂ ಉರುಲ್ಲಿ ವಾಟ್ ಎಕ್‌ಚ್. ತಾಣೆಂ ಎಕ್‌ಚ್ ಆಪ್ಲ್ಯಾ ಧುವೆಕ್ ವಿಸ್ರಜಾಯ್ ಯಾ ಕಾಜಾರ್ ಕರ್ನ್ ದೀಜಯ್ ಮ್ಹಣೊನ್ ಚಿಂತುನ್ ತೊ ಕಾಜಾರಾಕ್ ವೊಪ್ಲೊ.

ತ್ಯಾ ತರ್‍ನಾಟ್ಯಾನ್ ಆಪ್ಲ್ಯಾ ಘರ್ಚಿ ಪರಿಗತ್ ಪಳೆವ್ನ್ ಆತಾಂ ಕಿತೆಂ ತರೀ ಕರ್ನ್ ಕಾಜಾರ್ ಗಡ್ದ್ ಕರುಂಕ್ ಚಿಂತ್ಲೆಂ. ತ್ಯಾ ಶಿವಾಯ್ ಗಾಂವಾಂತ್ ಲೋಕ್ ಸಾಂಗ್ತಾಲೊ 'ಕಾಜಾರ್ ಜಾಂವ್ಚೆಂ ಜಿಣ್ಯೆಂತ್ ಏಕ್ ಪಾವ್ಟಿಂ ದೆಖುನ್ ಕಾಜಾರ್ ಗಡ್ದಾಯೆನ್ ಜಾಯ್ಜಯ್' ದೆಖುನ್ ಆಪ್ಲ್ಯಾ ವಳ್ಕಿಂತ್ ತಾಣೆಂ ಬೆಂಕಾ ಥಾವ್ನ್ ದೋನ್ ಲಾಖ್ ಲೋನ್ ಘೆತ್ಲೆಂ ಆನಿ ಆಪ್ಲೆಂ ಕಾಜಾರ್ ವ್ಹಡಾ ಗಡ್ದಾಯೆನ್ ಶೆರಾಚಾ ಎಕಾ ಹೊಲಾಂತ್ ಕರಯ್ಲೆಂ. ಕಾಜಾರ್ ಜಾಲೆಂ. ಹಜಾರ್ ಲೋಕ್ ಆಯ್ಲೊ. ನಾಚ್ಲೊ ಹಾಸ್ಲೊ ಜೆವ್ಲೊ ಆನಿ ಗೆಲೊ. ಆತಾಂ ಬಾವ್ಡೊ ಕಿತೆಂ ಕರ್ತಲೊ? ಕಾಜಾರ್ ಜಾಲೆಂ, ಹುನ್ ರಗಾತ್ ನಿಂವೊನ್ ಯೆತಾನಾ ಬೆಂಕಾಚೆಂ ಲೋನ್ ವಡ್ಲಿ ತಕ್ಲಿ ಫಡಾಫಡ್ ಜಾಲಿ. ವಕಿಲಾಚಿ ಧುವ್ ಮ್ಹಳ್ಳ್ಯಾ ಗ್ಯಾರಂಟೆರ್ ಲೋನ್ ಕಶೇಂಯ್ ಘೆತ್‌ಲ್ಲ್ಯಾ ತ್ಯಾ ತರ್‍ನಾಟ್ಯಾಕ್ ಮೆಳ್ಚೊ ಸಾಂಭಾಳ್ ಆಟ್ಶಿಂ ರುಪಯ್. ತಾಂತುಂ ತೊ ಕಿತೆಂ ಖಾತಲೊ? ಕಿತೆಂ ಲೋನ್ ಭರ್ತಲೊ? ಆತಾಂ ಮೋಗ್ ಸಗ್ಳೊ ನಿಂವೊನ್ ಯೆತಾನಾ ತ್ಯಾ ವಕಿಲಾನ್ ಹ್ಯಾ ತರ್‍ನಾಟ್ಯಾಕ್ ಯೇಜಂಟಾಕ್ ಧರುನ್ ಕಸೊಯ್ ಗಲ್ಫಾಕ್ ಧಾಡ್ಲೊ ಆನಿ ಧುವೆಕ್ ಆಪ್ಲ್ಯಾ ಘರಾಚ್ ದವರ್ಲೊ.

ಆನಿಂ ತೊ ತರ್‍ನಾಟೊ ಆತಾಂ ಗಲ್ಫಾಂತ್ ಎಕಾ ಆರ್ಭ್ಯಾಚಾ ಘರಾ ಡ್ರಾಯ್ವರಾಚೆಂ ಕಾಮ್ ಕರ್ತಾ ಆನಿ ಗಡ್ದಾಯೆಚೆಂ ಕಾಜಾರ್ ಜಾಂವ್ಚಾಂಕ್ ಏಕ್ ಲಿಸಾಂವ್ ದಿತಾ.

ಕಾಜಾರ್ ಮ್ಹಳ್ಯಾರ್ ಏಕ್ ಸಾಂಕ್ರಾಮೆಂತ್ ಆನಿ ಏಕ್ ಸಂತೊಸ್ ಜೊ ಆಪ್ಲ್ಯಾ ಕುಟ್ಮಾಚಾ ಸಾಂದ್ಯಾಂಸವೆಂ, ಇಶ್ಟಾಂಸವೆಂ ಖರ್ಚುಂಚೊ ಏಕ್ ದೀಸ್. ತ್ಯಾ ದಿಸಾಚೊ ಮಹತ್ವ್ ಫಕತ್ತ್ ಎಕಾ ಸಾಕ್ರಾಮೆಂತಾಚೊ ಜಾಯ್ಜಯ್ ಶಿವಾಯ್ ದಬಾಜ್ಯಾಚೆರ್ ನ್ಹಂಯ್. ಹೆರಾಂಚಿಂ ಕಾಜಾರಾಂ ಭಾರಿ ಗಡ್ದಾಯೆನ್ ಜಾತಾತ್ ಮ್ಹಣೊನ್ ಆಪ್ಣಾಚೆಂ ಕಾಜಾರ್‌ಯಿ ತಶೆಂ ಕರುಂಕ್ ಗೆಲ್ಯಾರ್ ತೆಂ ಹಸ್ತಿಚಿ ಲಾದಿ ಪಳೆವ್ನ್ ತ್ಯಾ ಪರಿಂಚ್ ಲಾದಿ ಘಾಲುಂಕ್ ವೆಚಾ ಎಕಾ ಕೊಲ್ಯಾಪರಿಂ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್. ಕಾಜಾರ್ ಏಕ್ ಜಿಣಿಭರ್ ರಾಕೊನ್ ವರಿಜಯ್ ಜಾಲ್ಲೊ ಸಾಕ್ರಾಮೆಂತ್ ಆನಿ ಕಾಜಾರಾಚೆಂ ಜೆವಾಣ್ ಕಿತ್ಲೆಂ ಬರೆಂ ಕರುನೀ, ಕಿತ್ಲ್ಯಾ ಪರ್ಮಳಾಚೆಂ ಕರುನೀ, ಕಾಜಾರಿ ಜಿವಿತಾಂತ್ ಜರ್ ಸುಃಖ್ ಸಮಧಾನ್ ನಾಂ ತರ್ ಕಿತೆಂ ಉಪ್ಕಾರ್?

ಸಮಾಜೆ ಮುಖಾರ್ ನಾಲಿಸಾಯ್ ನಂಯ್ಗೀ? ಹೊಲಾಂತ್ ಕಾಜರಾಂ ಜಾಲ್ಯಾರ್ ಮಾತ್ರ್ ತಿಂ ಗಡ್ದ್ ಆನಿ ಘರಾಂನಿ ಯಾ ಮಾಟ್ವಾಂನಿ ಕಾಜಾರಾಂ ಜಾಲ್ಯಾರ್ ನ್ಹಂಯ್ ಮ್ಹಣೊನ್ ಕೊಣೆಂ ನಿಯಮ್ ಕೆಲಾಂ? "ಮ್ಹಜೆಂ ಕಾಜಾರ್ ಇಗರ್ಜೆಚಾ ಭಾಯ್ರ್ ಆಸ್ಚಾ ಉಗ್ತ್ಯಾ ಮಾಟ್ವಾಂತ್ ಜಾಲ್ಲೆಂ. ಫಕತ್ ವಾಡ್ಯಾಚೊ ಇಲ್ಲೊ ಲೋಕ್ ಆಸ್‌ಲ್ಲೊ. ಬೇಂಡ್ ಜಾ, ವಾಜಾಪ್ ನಾ, ನಾಚ್ ನಾ, ಡೆಕೊರೇಶನ್ ನಾ. ಆಯಿಲ್ಲ್ಯಾಂಕ್ ಪಿಯೆಂವ್ಕ್ ನಾಕ್‌ಭರ್ ಸೊರೊಯ್ ನಾ. ಹಾತ್ ಪಾಂಯ್ ಪಾಪುಡ್ನ್ ಆಂಗ್ ಪಾಂಗ್ ಹಾಲವ್ನ್ ಕೊಣಾ ಕೊಣಾಕ್ ವೊಡುನ್ ಜಾಂವ್ಚೊ ನಾಚಾಚೊ ಭೊಂಗೊಸ್ತೊಳ್‌ಯ್ ನಾ. ತರೀ ಮ್ಹಜೆಂ ಕಾಜಾರ್ ಜಾಲೆಂ. ಸಮಾಜ್ ಕಿತೆಂಯ್ ಮ್ಹಣೊಂದಿ. ಹಾಂವೆ ಮ್ಹಜಿ ಜಿಣಿ ಜಿಯೆಂವ್ಕ್ ಆಸಾ. ಕಾಜಾರ್ ಮ್ಹಣೊನ್ ಹಾಂವೆ ವಡ್ಲೊ ರಿಣಾಚೊ ಫೊಂಡ್ ಖೊಂಡ್ಲೊ ತರ್ ಫಾಲ್ಯಾಂ ತೊ ಭರುಂಕ್ ತೊ ಕಾಜಾರಾಕ್ ಆಯಿಲ್ಲೊ ಲೋಕ್ ಕೊಣೀಂ ಯೆಂವ್ಚೊನಾ. ಆಯಿಲ್ಲೊ ಲೋಕ್ ಫಕತ್ ತೆಂ ಬರೆಂ ಆಸಾ ಹೆಂ ನಾ. ತಾಕಾ ಮೀಟ್ ಚಡ್ ಆಸಾ ಹಾಕಾ ಮಿರ್ಸಾಂಗ್ ಉಣಿಂ ಆಸಾ ಮ್ಹಣೊನ್ ಗಾಣಾಂ ಗಾತಲೊ. ಬರೆಂ ಜಲೆಂ ತರ್ ಧುಂಪಯ್ತಲೊ ಆನಿ ದೆಂಖ್ ಕಾಡ್ನ್ ಚಲ್ತಲೊ. ಪುಣ್ ಫಾಲ್ಯಾಂ ತೊ ಫಂಡ್ ಭರುಂಕ್ ಮ್ಹಾಕಾಚ್ ಆಸ್ತೆಲೆಂ." ಎಕ್ಲೊ ತರ್‍ನಾಟೊ ಆಪ್ಲೆಂ ರಾಜಾಂವ್ ಉಲಯ್ಲಾಗ್ಲೊ.

ಕಾಜಾರ್ ಜಾಂವ್ಚೆಂ ಏಕ್ ಪಾವ್ಟಿಂಚ್. ಸಗ್ಳೆ ಎಕ್‌ಚ್ ಪಾವ್ಟಿಂ ಜಾತಾತ್. ತಶೆಂ ಪಳೆಲ್ಯಾರ್ ಜಿಣ್ಯೆಂತ್ ಸಗ್ಳ್ಯಾಂಕ್ ಮೆಳ್ಚೆ ಚಡಾವತ್ ಸಗ್ಳೆ ಸಾಕ್ರಾಮೆಂತ್ ಏಕ್ ಪಾವ್ಟಿಂಚ್ ಮೆಳ್ತಾತ್. ಕೊಣಾಯ್ಕೀ ದೋನ್ ಪಾವ್ಟಿಂ ವೋಲ್ ಲಾಯ್ನಾಂತ್, ದೋನ್ ಪಾವ್ಟಿಂ ಕುಮ್ಗಾರ್, ಕ್ರೀಜ್ಮ್ ದೀನಾಂತ್, ಕೊಣೀಂ ದೋನ್ ಪಾವ್ಟಿಂ ಮೊರಾನಾ. ತರ್ ಹೆಂ ನಿಯಮ್ ಕಾಜರಾಕ್ ಮಾತ್ರ್ ಕಿತ್ಯಾಕ್? ಸಂಸಾರ್ ಬದಾಲ್ಲಾ ತರೀ ಮನ್ಶಾಚಾ ವಿಚಾರೆಚಿ ಸಕತ್ ಅಸ್ಕತ್ ಜಾಲ್ಯಾ. ಕಾಜಾರಾಂ ಹೊಲಾಂನಿ ಜಾಲಿಂ, ಆನಿ ಕಾಜಾರಾಂಕ್ ಸೊರೊ ದಿಲೊ ತರ್ ಜಾಲೆಂ ಕಾಜಾರ್ ಗಡ್ದ್ ಮ್ಹಣೊನ್ ಜಾಲೆಂ. ಸಮಾಜೆ ಮುಖಾರ್ ಆಪ್ಲೆಂ ನಾಕ್ ಊಂಚ್ ಮ್ಹಣೊನ್ ದಾಖಂವ್ಕ್ ಜಾಲೆಂ. ಶೆಂಕಾರೆಂ ಫುಲಂವ್ಕ್ ಜಾಲೆಂ. ದಾಂಗ್ರೊ ಫೆರಾಂವ್ಕ್ ಜಾಲೆಂ. ಕಾಂಯ್ ಎಕ್ಲೊ ದೋಗ್ ಹ್ಯಾ ಚಿಂತ್ಪಾಕ್ ಸವಾಲ್ ಕರಿತ್ ತರ್, ಆಪ್ಲೆ ವಿಚಾರ್ ಸಾರ್ಕೆ ತರ್ ತಶೆಂಚ್ ಕಾಜಾರ್ ಜಾತಿತ್ ತರ್ ತಾಂಕಾ ಸಮಾಜೆನ್ ವೊಲಾವ್ನ್ ಜಾಲೆಂ 'ಕಂಜೂಸ್' ಯಾ 'ಪಿಸೊ' ಯಾ 'ಏಕ್ ಪಿಶಿ ಶಿರ್ ಆಸ್‌ಲ್ಲೊ' ಪುಣ್ ತ್ಯಾ ಎಕ್ಲ್ಯಾ ದೊಗಾಂಕ್ ತಶೆಂ ಆಪಂವ್ಚಾ ಆಪ್ಣಾಚಿಚ್ ಶಿರ್ ಪಿಶಿ ಮ್ಹಳ್ಳೆಂ ತಾಂಕಾ ಫ಼ಂಡಾಕ್ ವೆತಾ ಪರ್‍ಯಾಂತ್ ಸಮ್ಜಾನಾ ಮ್ಹಳ್ಳೆಂ ಏಕ್ ವಿಪರ್‍ಯಾಸ್.

ಹೆಂ ಹೋಲ್, ದಬಾಜೊ, ನಾಸ್, ಸೊರೊ, ಖಂಯ್ಚಾ ಗಾಂವ್ಚಿ ರಿವಾಜ್?

ಮುಂದರ್‍ಸಿಲಾಂ...

Tags: Vally Quadras,e konkani novel, Konkani, Mangalore, Mangalorean, Mother Tongue

From around the world

ಪಾಟಿಂ ಗಾಂವಾಕ್ - ಅವಸ್ವರ್ 19

Post your comments

ಅವಸ್ವರ್ 1

ಅವಸ್ವರ್ 2

ಅವಸ್ವರ್ 3

ಅವಸ್ವರ್ 4

ಅವಸ್ವರ್ 5

ಅವಸ್ವರ್ 6

ಅವಸ್ವರ್ 7

ಅವಸ್ವರ್ 8

ಅವಸ್ವರ್ 9

ಅವಸ್ವರ್ 10

ಅವಸ್ವರ್ 11

ಅವಸ್ವರ್ 12

ಅವಸ್ವರ್ 13

ಅವಸ್ವರ್ 14

ಅವಸ್ವರ್ 15

ಅವಸ್ವರ್ 16

ಅವಸ್ವರ್ 17

ಅವಸ್ವರ್ 18

ಅವಸ್ವರ್ 19

ಅವಸ್ವರ್ 20

ಅವಸ್ವರ್ 21

ಅವಸ್ವರ್ 22

ಅವಸ್ವರ್ 23

ಅವಸ್ವರ್ 24

ಅವಸ್ವರ್ 25

ಅವಸ್ವರ್ 26

ಅವಸ್ವರ್ 27

ಅವಸ್ವರ್ 28

Connect

Our Address
Mangalore

Our Address
Udupi

Our Address
Dubai

From around the world

Post your comments

Connect

Our AddressMangalore

Our AddressUdupi

Our AddressDubai

Our Address
Mangalore

Our Address
Udupi

Our Address
Dubai