:: ಮಾಯ್ ಭಾಸ್

ಅಶೆಚ್ ಎಕೇಕ್ ದೀಸ್ ಪಾಶಾರ್ ಜಾವ್ನ್ ಕಸೊಯ್ ದೇಡ್ ಮಹಿನೊ ಉತ್ರಾಲೊ. ಎಸ್ತೆಲಾಕ್ ತಿಯೊಚೆಂ ಅನ್ಯೇಕ್ ಕಾಗಾದ್ ಆಯ್ಲೆಂ ಆನಿಂ ತ್ಯಾ ಕಾಗ್ದಾಸವೆಂ ಚಾರ್ ಹಜಾರಾಂಚಿ ಡ್ರಾಫ್ಟ್ ಧಾಡ್ಲಿ. ಆನಿಂ ತಿಯೊನ್ ತಾಂತ್ಲೆ ದೋನ್ ಹಜಾರ್ ಬೆಂಕಾಕ್ ಭರುಂಕ್ ಕಳಯಿಲ್ಲೆಂ ಆನಿಂ ಪೊಯ್ಶ್ಯಾಂ ವಿಶ್ಯಾಂತ್ ಸಗ್ಳಿ ಜವಾಬ್ಧಾರಿ ಆತಾಂ ಎಸ್ತೆಲಾಕ್ ಒಪ್ಸುನ್ ದಿಲಿ. ತಶೆಂಚ್ ಆಪ್ಲ್ಯಾ ಭಲಾಯ್ಕೆ ವಿಶ್ಯಾಂತ್ ದೋನ್ ಸಬ್ಧ್ ಬರಂವ್ಕ್ ವಿಸ್ರಲೊನಾ. ವಿಪ್ರೀತ್ ಧಗಿನಿಮ್ತಿಂ ನಾಕಾಚಾ ಫುಡಾಂತೂನ್ ದೆಂವ್ಚಾ ರಗ್ತಾವಿಶ್ಯಾಂತೀ ಬರಯ್ಲೆಂ.

ಪುಣ್ ಎಸ್ತೆಲಾಚೆಂ ಗಿನ್ಯಾನ್ ತಿಯೊಚಾ ಬಲಾಯ್ಕೆಚಾಕೀ ಚಡ್ ಮಾಪಾನ್ ತಿಯೊನ್ ಧಾಡ್‌ಲ್ಲ್ಯಾ ಪೊಯ್ಶ್ಯಾಂಚೆರ್ ಗೆಲೆಂ ಜಾಯ್ಜಯ್.

ಎಸ್ತೆಲಾಚಾ ಸಂತೊಸಾಕ್ ಗಡ್ ನಾತ್‌ಲ್ಲಿ. ಜಿಣ್ಯೆಂತ್ ಪಯ್ಲೆಪಾವ್ಟಿಂ ತಾಣೆಂ ಚಾರ್ ಹಜಾರಾಂಕ್ ಧರ್ಚೆಂ. ಪೊಯ್ಶಾಂ ಖಾತಿರ್ ತಾಣೆಂ ಎದೊಳ್‌ಪರ್‍ಯಾಂತ್ ಕಿತ್ಲೆಶೆ ಆವ್ತಾರ್ ಘೆಂವ್ಕ್ ನಾಂತ್? ಲ್ಹಾನ್ ಥಾವ್ನ್ ಆಜೂನ್ ಪರ್‍ಯಾಂತ್ ಕೊಣಾಕೊಣಾಚಾ ಬಾಗ್ಲಾಂತ್ ಉಭೆ ರಾವೊನ್ ಕಾಮಾಚಿ ಭಿಕ್ ಮಾಗೊಂಕ್ ನಾ? ಕೊಣಾ ಕೊಣಾಚೊ ಗಾಳಿ ಶಿರಾಪಾಚಿಂ ಉತ್ರಾಂ ಆಯ್ಕೊಂವ್ಕ್ ನಾಂತ್? ತರೀ ಸಾರ್‍ಕೊ ಸಾಂಭಾಳ್ ಸಯ್ತ್ ದೀನಾತ್‌ಲ್ಲಿಂ ಮನ್ಶಾಂ ಕಿತ್ಲಿಂ ಪಳೆಲ್ಲಿಂ ನಾಂತ್ ತಾಣೆಂ? ಸಗ್ಳೆಂ ತಾಕಾ ಏಕ್ ಘಡಿ ಉಗ್ಡಾಸಾಕ್ ಆಯ್ಲೆಂ.

ಅಶೆಂ ದಿಸಾನ್‌ದೀಸ್ ಯೆಂವ್ಚಾ ಲತೀಫಾಚೆಂ ಯೆಣೆಂ ಆತಾಂ ಎಸ್ತೆಲಾಕ್ ಜಾಂವ್ ಯಾ ಭುರ್ಗ್ಯಾಂಕ್ ಜಾಂವ್ ಕಾಂಯ್ ನವೆಂ ಮ್ಹಣೊನ್ ಭೊಗ್ಲೆಂನಾ. ತಶೆಂ ಕಾಂಯ್ ಏಕ್ ದೋನ್ ಪಾವ್ಟಿಂ ಲತೀಫ್ ಯೇನಾ ತರ್ ತಾಂಕಾ ಕಿತೆಂಗೀ ಚುಕ್‌ಲ್ಲೆಪರಿಂ ಭೊಗ್ತಾಲೆಂ.

ಅಶೆಂಚ್ ದನ್ಪಾರಾಂ ಫುಲಾಂ ವರುಂಕ್ ಆಯಿಲ್ಲ್ಯಾ ಲತೀಫಾಲಾಗಿಂ ಉಲಯ್ತಾನಾ ಆಪಾಪಿಂಚ್ ಎಸ್ತೆಲಾಚಾ ದೊಳ್ಯಾಂನಿ ದುಃಖಾಂ ಯೇಂವ್ಕ್ ಲಾಗ್ಲಿಂ.

ತಿಣೆ ಚುಕಾನಾಸ್ತಾಂ ಲತೀಫಾಕ್ ಪೊಯ್ಸೊ ಆಯಿಲ್ಲಿ ಗಜಾಲ್ ಕಳಯ್ಲಿ. ಲತೀಫಾನ್ ಸಂತೊಸಾನ್ ಭರೊನ್ ತ್ಯೇಚ್ ಘಡಿಯೆ ಪೆಂಟೆಕ್ ವಚೊನ್ ತಾಚಾ ಲೆಖಾರ್ ಇಲ್ಲಿ ಮಾಸ್ಳಿ ಹಾಡುನ್ ಆಯ್ಲೊ. ಆನಿಂ ಎಸ್ತೆಲ್ ಖುಶೇನ್ ತ್ಯಾ ಮಾಸ್ಳ್ಯಾಂಕ್ ನಿಸ್ತೆಂ ಕರುನ್ ಜಾತೆಚ್ ಭುರ್ಗ್ಯಾಂಸವೆಂ ಲತೀಫಾಕೀ ರಾಂದುನ್ ವಾಡ್ಲೆಂ.

ಜೇವ್ನ್ ಜಾತೆಚ್ಚ್ ಭುರ್ಗಿಂ ತಾಂಚಿಂ ಲಿಸಾಂವಾಂ ಕರ್ತಾನಾ ಎಸ್ತೆಲ್ ಚಿಂತುನ್ ಬೊಸ್ಲೆಂ, ಪೊಯ್ಶ್ಯಾಂ ಖಾತಿರ್ ಕೋಣ್ ಖಂಚೆ ಪುರಾ ನಾಟಕ್ ಕರಿನಾ? ತೊ ಬಾವ್ಡೊ ಲತೀಫ್ ಪಳೆ. ಕೋಣಾ ಕೊಣಾಚಾ ಘರಾ ಬಾಗ್ಲಾಕ್ ವೆತಾ. ತಾಂಚೊ ಗಾಳಿ ಶಿರಾಪ್ ಆಯ್ಕತಾ. ತಾಂಚಿ ಬುಟ್ಟಿ ಚಾಕ್ರಿ ಕರ್ತಾ. ತಾಚಿ ಅಮ್ಮಿ ಪಳೆ ಕೊಣಾ ಕೊಣಾಗೆರ್ ಘೊಳ್ತಾ. ಮನ್ಶಾಕ್ ಪಯ್ಸೊ ನಾತ್ಲ್ಯಾರೀ ಖಂತ್ ಆನಿಂ ಪೊಯ್ಸೊ ಆಸ್ಲ್ಯಾರೀ ಖಂತ್.

ಎಸ್ತೆಲಾಚಾ ಖಂತಿಚೆಂ ಕಾರಣ್ ಸಮ್ಜಾಲ್ಲ್ಯಾ ಲತೀಫಾ ಮತಿಂತ್ ಏಕ್ ನವೆಂ ಚಿಂತಾಪ್ ಆಯ್ಲೆಂ. ಮಿನತೆಚೆ ಪೊಯ್ಶೆ ತೆ ಜಾಲ್ಲೆವರ್‍ವಿಂ ಬರ್‍ಯಾ ಉದ್ದೇಶಾಖಾತಿರ್ ತೆ ಗಳ್ಸಿಜಾಯ್. ಜಿಣ್ಯೆಂತ್ ಫುಡೆಂ ಕಾಂಯ್ ಆಪ್ಣಾನೀಂ ಕಾಂಯ್ ಅಪ್ಲೊಚ್ಚ್ ವಹಿವಾಟ್ ಸುರು ಕರುಂಕ್ ಚಿಂತ್ಲ್ಯಾರ್ ಭೋವ್ಶಾ ಹಿಂ ಕುಮೊಕ್ ಕರುಂಕ್ ಸಕ್ತೆಲಿಂ ಮ್ಹಳ್ಳೆಂ ಮತ್ಲಾಭಿ ಚಿಂತಾಪ್ ತಾಚಾ ಮತಿಭಿತರ್ ಗಮ್ಲೆಂ. ತಾಕಾ ತಿಯೊನ್ ಬೆಂಕಾಥಾವುನ್ ರೀಣ್ ಕಾಣ್ಗೆಲ್ಲಿ ಗಜಾಲ್ ಕಳಿತ್ ಆಸ್‌ಲ್ಲಿ ತರೀ ಕಿತ್ಲೆ ಪೊಯ್ಶೆ ಮ್ಹಳ್ಳೆಂ ಕಳಿತ್ ನಾತ್‌ಲ್ಲೆಂ. ದೆಖುನ್ ತಾಣೆಂ ಎಸ್ತೆಲಾಕ್ ಅಲಂಗಾರ್ ಆಸ್ಚಾ ಬೆಂಕಾಂತ್ ಎಸ್ತೆಲಾಚಾ ನಾಂವಾರ್ ಎಕಾಂವ್ಟ್ ಉಗ್ತೆಂ ಕರುನ್ ತೆ ಪೊಯ್ಶೆ ಬೆಂಕಾಂತ್ ಜಮೊ ಕರಂವ್ಕ್ ಸೂಚನ್ ದಿಲೆಂ.

ಪುಣ್ ಹಿಂ ಚಿಂತ್ನಾಂ ಎಸ್ತೆಲಾಚಾ ಮತಿಂತ್ ವೆಗ್ಳ್ಯಾಚ್ಚ್ ರಿತಿನ್ ಖಂಚ್ಲಿಂ ಆನಿಂ ಅಶೆಚ್ ಥೊಡೆ ದೀಸ್ ಸಂಪ್ಲೆ. ತಿ ಡ್ರಾಫ್ಟ್ ಎಸ್ತೆಲಾಸವೆಂಚ್ ಆಸ್‌ಲ್ಲಿ. ಎಸ್ತೆಲಾಚಾ ಮತಿಂತ್ ಏಕ್ ನವೆಂ ಚಿಂತಾಪ್ ಆಯ್ಲೆಂ. ಲತೀಫಾಚಿಂ ಉತ್ರಾಂ ತಿಕಾ ಕಿತ್ಯಾಕ್‌ಗೀ ಸಾರ್ಕಿಂ ಮ್ಹಣೊನ್ ದಿಸ್ಲಿಂ. ಫಾಲ್ಯಾಂ ಕಾಂಯ್ ಚಡ್‌ಉಣೆಂ ಜಾಲೆಂ ತರ್ ಆಪ್ಣಾಲಾಗಿಂ ಕಾಂಯ್ ಪೊಯ್ಶೆ ನಾಂತ್ ದೆಖುನ್ ಇತ್ಲೆವೆಗಿಂ ಬೆಂಕಾಕ್ ಕಿತ್ಯಾಕ್ ದಿಂವ್ಚೆ? ಅಶೆಂ ಚಿಂತುನ್ ತಾಣೆಂ ಭುರ್ಗ್ಯಾಂಕ್ ಇಲ್ಲಿಂ ನವಿಂ ವಸ್ತುರಾಂ ಹಾಡ್ಲಿಂ ಆನಿಂ ಉರುಲ್ಲೆ ಪೊಯ್ಶೆ ವರ್ನ್ ಅಲಂಗಾರ್‌ಚಾ ಎಕಾ ಬೆಂಕಾಂತ್ ಲತೀಫಾ ಚಾ ಮಜತೆನ್ ಜಮೊ ಕೆಲೆ.

ಆನಿಂ ಹ್ಯಾ ವಿಶ್ಯಾಂತ್ ಕಸ್ಲೆಚ್ಚ್ ಉಲ್ಲೇಕ್ ನಾಸ್ತಾಂ ತಿಯೊಕ್ ಜಾಪ್ ಬರಯ್ಲಿ. ಭುರ್ಗ್ಯಾಂಕ್ ವಸ್ತುರಾಂ ಹಾಡ್ಲಿಂ ಮ್ಹಣೊನ್೦ಯ್ ಬರಯ್ಲೆಂ. ಭಲಾಯ್ಕಿ ಸಾಂಭಾಳುಂಕ್‌ಯಿ ಸಾಂಗ್ಲೆಂ. ಭುರ್ಗಿಂ ಬಾಳಾಂ ಸಗ್ಳಿಂ ತಿಯೊಚಾ ಭಲಾಯ್ಕೆ ಖಾತಿರ್ ಚಿಂತುನ್ ಬೊಸ್ತಾತ್ ಮ್ಹಳ್ಳೆಂ ಬರಯ್ಲೆಂ. ಆನಿಂ ಹೆಂ ಕಾಗಾದ್ ಲತೀಫಾಲಾಗಿಂ ದೀವ್ನ್ ಪೋಸ್ಟ್ ಕರಯ್ಲೆಂ.

ಗಲ್ಫಾಕ್ ಗೆಲ್ಲ್ಯಾ ಬಾಪಾಯ್ಚಿಂ ಭುರ್ಗಿಂ ಇಸ್ಕೊಲಾಂತೀ ಸಂತೊಸಾನ್ ಆಸ್‌ಲ್ಲಿಂ. ಆಜ್‌ಕಾಲ್ ಮಾಸ್ತೆರಾಂ ಟೀಚರಾಂ ಸಯ್ತ್ ತಾಂಚೆಲಾಗಿಂ ಮೊವಾಳಾಯೆನ್ ಉಲಯ್ತಾಲಿಂ. ಹ್ಯಾ ನವ್ಯಾ ನವ್ಯಾ ಸಂಗ್ತ್ಯಾಂನಿ ಭುರ್‍ಗ್ಯಾಂಚಾ ಮತಿಂತೀ ನವಿಂ ನವಿಂ ಚಿಂತ್ನಾಂ ಫುಟೊನ್ ಯೇಂವ್ಕ್ ಲಾಗ್ಲಿಂ. ಜೊಯೆಲಾಕ್ ಸಾಯ್ಕಲ್ ಶಿಕ್ಚಿ ಉರ್ಭಾ ಆನಿಂ ಆಶಾ ಉದೆಲಿ. ಆನಿಂ ತಾಣೆಂ ಸದಾಂ ಘರಾ ಯೆಂವ್ಚಾ ಲತೀಫಾಕ್ ಆಪ್ಣಾಕ್ ಸೈಕಲ್ ಶಿಕಯ್ ಮ್ಹಣೊನ್ ಪರಾತ್ತುಂಕ್ ಧರ್ಲೆಂ.

ಅಶೆ ಸಭಾರ್ ದೀಸ್ ಪಾಶಾರ್ ಜಾಲೆ ಆನಿಂ ಸಾಯ್ಕಲ್ ಶಿಕೊಂಕ್ ಪಿಸಾಯ್ ಆಸ್ಚಾ ಜೊಯೆಲಾಕ್ ಸದಾಂ ಯೇವ್ನ್ ಲತೀಫಾನ್ ಸಾಯ್ಕಲ್ ಶಿಕಂವ್ಕ್ ಸುರು ಕೆಲೆಂ ಆನಿಂ ಸಾಂಜ್ ಪರ್‍ಯಾಂತ್ ಸಾಯ್ಕಲ್ ಶಿಕವ್ನ್ ಪುರೊ ಜಾತೆಚ್ ಸಾಂಜೆರ್ ಇಲ್ಲಿ ಚಾ ಆನಿಂ ಎಸ್ತೆಲಾನ್ ದಿಲ್ಲಿ ಇಲ್ಲಿ ಪೊಳಿ ಖಾವ್ನ್ ಲತೀಫ್ ವೆತಾಲೊ. ಆನಿಂ ಅಶೆಂ ದೀಸ್ ವೆತಾಂ ವೆತಾಂ, ಜೊಯೆಲ್ ಹಳ್ತಾರ್ ಸಾಯ್ಕಲ್ ಸೊಡುಂಕ್ ಶಿಕ್ಲೊ.

ಜೊಯೆಲಾನ್ ಸಾಯ್ಕಾಲ್ ಸೊಡುಂಕ್ ಶಿಕ್‌ಲ್ಲಿ ಗಜಾಲ್ ಎಸ್ತೆಲಾಚಾ ಕಾಗ್ದಾ ಥಾವುನ್ ವಾಚುನ್ ತಿಯೊ ಸಂತೊಸ್ಲೊ. ಕಾಂಯ್ ಗರ್ಜ್ ಪಡ್ಲ್ಯಾರ್ ಘರಾ ಏಕ್ ಸಾಯ್ಕಲ್ ಆಸ್ಲ್ಯಾರ್ ಜೊಯೆಲ್ ಘಡ್ಯೆಂತ್ ಪೆಂಟೆಕ್ ವಚೊಂಕ್ ಸಕ್ತಲೊ ಮ್ಹಣೊನ್ ತಿಯೊನ್ ಲೆಕ್ಲೆಂ. ಬರೆಂ ಕರ್ನ್ ಶಿಕೊನ್ ಬರೆ ಮಾರ್ಕ್ಸ್ ಹಾಡ್ಲ್ಯಾರ್ ಆಪುಣ್ ಜೊಯೆಲಾಕ್ ಸಾಯ್ಕಾಲ್ ಘೆಂವ್ಕ್ ಪೊಯ್ಶೆ ಧಾಡ್ತಾಂ ಮ್ಹಣೊನ್ ಬರಯ್ಲೆಂ. ಹೆಂ ಸಮ್ಜಾಲ್ಲ್ಯಾ ಜೊಯೆಲಾಚಿ ಹುಮೆದ್ ದೊಡ್ತಿ ಜಾಲಿ.

ಮಹಿನ್ಯಾ ಮಹಿನ್ಯಾಕ್ ತಿಯೊನ್ ಚುಕಾನಾಸ್ತಾಂ ಪೊಯ್ಶೆ ಧಾಡ್ಲೆ. ಆನಿಂ ಬಾಯ್ಲಾಂಕ್ ಬೂದ್ ದೊಂಪ್ರಾಸಕಯ್ಲ್ ಮ್ಹಣೊನ್ ಮಾಲ್ಗಡ್ಯಾಂನಿ ಸಾಂಗ್ಚೆಪರಿಂ ಎಸ್ತೆಲಾನ್ ತೆ ಪೊಯ್ಶೆ ವರ್ನ್ ಅಲಂಗಾರ್ ಬೆಂಕಾಂತ್ ಜಮೊ ಕೆಲೆ. ಅಶೆಂ ದೀಸ್ ವೆತಾಂ ವೆತಾಂ ಪೊಯ್ಶೆ ಜಮೊ ಕೆಲ್ಲೆಪರಿಂಚ್ ತಿಚಾ ಮತಿಚಿ ಆಶಾ ವಾಡೊನ್೦ಚ್ ಗೆಲಿ. ವೆಗಿಂಚ್ ಇಲ್ಲೆ ಚಡ್ ಪೊಯ್ಶೆ ಜಮೊ ಕೆಲ್ಯಾರ್ ಕಿತೆಂ ಸಗ್ಳೆಂ ಘೆವ್ಯೆತ್? ತಿಣೆಂ ತಿಚಾ ಮತಿಂತ್ ಎದೊಳ್‌ಚ್ ಲೇಕ್ ಘಾಲ್ಲೆಂ. ಘರ್ ಕಶೆಂಯ್ ಫುಲಾಂನಿಂ ಆನಿಂ ತರ್‍ಕಾರೆಚಾ ಖರ್ಚಾನ್ ಚಲ್ತಾಸ್ತಾಂ, ಘೊವಾಚಾ ಪೊಯ್ಶ್ಯಾಂನಿ ಖಂಡಿತ್ ಜಾವ್ನ್ ಕಿತೆಂ ತರೀ ಕರ್‍ಯೆತ್ ಮ್ಹಣೊನ್ ಚಿಂತ್ಲೆಂ. ತ್ಯಾ ಭಾಯ್ರ್ ಎಕ್ಲೆಂ ಚೆಡುಂ ಭುರ್ಗೆಂ ಆಸಾ. ಫಾಲ್ಯಾಂ ತಾಚೆಂ ಕಾಜಾರ್ ಕರುಂಕ್ ಆಸಾ. ತಾಕಾ ದೋತ್ ದೀಂವ್ಕ್ ಆಸಾ. ತಾಚೊ ಫುಡಾರ್ ಬಾಂಧುಂಕ್ ಆಸಾ. ಚೆಡೊ ತರೀ ಕಸೊಯ್ ಜಿಯೆತ್. ಎಸ್ತೆಲಾಚಿಂ ಚಿಂತ್ನಾಂ ಎದೊಳ್‌ಚ್ ಗಾದ್ಯಾ ಥಾವುನ್ ಕಾಟ್ ತುಟ್‌ಲ್ಲ್ಯಾ ಮೆರೆ ಥಾವುನ್ ಉದ್ಕಾವಾಳೊ ವಾಳ್ಚೆಪರಿಂ ಚಿಂತ್ನಾಂಚೊ ಕಾಟ್ ತುಟೊನ್ ಚಿಂತ್ನಾಂ ಎಕಾ ಪಾಟ್ಲ್ಯಾನ್ ಏಕ್ ಯೇಂವ್ಕ್ ಲಾಗ್ಲಿಂ.

ಅಶೆಚ್ಚ್ ದೀಸ್ ಉತರ್ಲೆ ಆನಿಂ ತಿಯೊಕ್ ಲೋನ್ ದಿಲ್ಲೊ ಮೂಡ್‌ಬಿದ್ರಿ ಬೆಂಕಾಚೊ ಮೆನೆಜರ್ ಏಕ್ ಘಡಿ ಅಜಾಪ್ಲೊ. ವಚೊನ್ ಮಹಿನ್ಯಾಭಿತರ್ ಪೊಯ್ಸೊ ಧಾಡ್ತಾಂ ಮ್ಹಣೊನ್ ಗೆಲ್ಲೊ ತಿಯೊ ಪೊಯ್ಸೊ ನ್ಹಂಯ್ ತರ್ ಏಕ್ ಕಾಗಾದ್ ಸಯ್ತ್ ಧಾಡುಂಕ್ನಾ ಕಿತ್ಯಾಕ್ ಮ್ಹಣೊನ್ ನಿಹಾಳುಂಕ್ ಲಾಗ್ಲೊ. ತಾಕಾ ತಿಯೊಚೆರ್ ದುಭಾವ್ ನಾತ್‌ಲ್ಲೊ ತರೀ, ಕಾಂಯ್ ಫಟ್ಕಿರ್‍ಯಾ ಯೇಜಂಟಾನ್ ಫಸಯ್ಲೊಗೀ? ಯಾ ಖಂಚಾಯ್ ರಿತಿನ್ ತಿಯೊ ಫಸ್ಲೊಗೀ ಮ್ಹಳ್ಳೆಂ ಭ್ಯೆಂ ತಾಚಾ ಮತಿಂತ್ ರಿಗ್ಲೆಂ ಜಾಯ್ಜಯ್. ಅಶೆಂ ಅವ್ಚಿತ್ತ್ ಮ್ಹಳ್ಳೆಪರಿಂ ಏಕ್ ದೀಸ್ ತೊ ಮೆನೆಜರ್ ತಿಯೊಚಾ ಘರಾ ಆಯ್ಲೊ "ಕಸಲ್ ಜಾಲೆಂ ಬಾಯೆ.. ತುಮ್ಗೆಲ್ಯಾಚೆಂ ಕಗ್ಗದ್ ಆಸ್ಸಾವೆ?" ಮ್ಹಣಾಲೊ.

ಎಸ್ತೆಲಾಕ್ ಕಿತೆಂ ಸಾಂಗ್ಚೆಂ ಮ್ಹಳ್ಳೆಂಚ್ ಕಳ್ಳೆಂನಾ. ಶಿಂಪಿ ಗಿಳೀತ್ತ್ ಜಾಪ್ ದೀಲಾಗ್ಲೆಂ "ಕಾಗಾದ್ ಆಯ್ಲಾಂ ಪುಣ್ ಪೊಯ್ಶೆ ಮಾತ್ರ್ ಧಾಡುಂಕ್ನಾಂತ್. ವೆಗಿಂಚ್ ಧಾಡ್ತಾಂ ಮ್ಹಣೊನ್ ಬರಯ್ಲಾಂ"

"ಪುಣ್ ಬರೊ ಆಸಾಮೂ? ಕಾಮಾಂತ್ ಕಾಂಯ್ ಅಡ್ಕಳ್ ನಾಂತ್‌ಮೂ"

"ದೆವಾಚಾ ದಯೆನ್ ಎದೊಳ್ ಮ್ಹಣಾಸರ್ ಕಾಂಯ್ ತಸಲೆಂ ನಾಂ"

ಎಸ್ತೆಲಾಚೊ ಫಟಿಂಕ್ ಕಿತ್ಯಾಕ್‌ಗೀ ಮೆನೆಜರ್ ಪಾತ್ಯೆಲೊ ಆನಿಂ ಎಸ್ತೆಲಾನ್ ದಿಲ್ಲಿ ಕಾಪಿ ಪಿಯೆವ್ನ್ ಪಾಟಿಂ ಗೆಲೊ. ತಾಕಾ ತಿಯೊಚೆರ್ ಭರ್ವಸೊ ಆಸ್‌ಲ್ಲೊ. ಆಜ್ ನ್ಹಂಯ್ ತರ್ ಫಾಲ್ಯಾಂ ಪೊಯ್ಶೆ ಖಂಡಿತ್ ಮೆಳ್ತೆಲೆ ಮ್ಹಳ್ಳಿ ಪಾತ್ಯೆಣಿಂ ತಾಕಾ ಆಸ್‌ಲ್ಲಿ.

ಪಯ್ಲಿ ಫಟ್ ಮಾರುಂಕ್, ಪಯ್ಲಿ ಚೊರಿ ಕರುಂಕ್ ಕಶ್ಟ್ ಖೈಂ. ಏಕ್ ಪಾವ್ಟಿಂ ಹಾಂತುಂ ಜಿಕ್ಲ್ಯಾರ್ ಉಪ್ರಾಂತ್ ಹಾಂತುಂ ಕೊಣಾಕೀ ಸನದ್ ಜೊಡ್ಯೆತ್ ಖೈಂ. ತಶೆಂಚ್ ಎಸ್ತೆಲಾಕ್ ಭೊಗೊಂಕ್ ಲಾಗ್ಲೆಂ. ಎಸ್ತೆಲಾಕೀ ಕೆನ್ನಾ ತೆಂ ಅಪ್ಲೇಸ್ತಕಿಂ ಚಿಂತಾನಾ ಆಪ್ಣಾನ್ ಕರ್‍ಚೆಂ ಬರೆಂಗೀ ವಾಯ್ಟ್‌ಗೀ ಮ್ಹಳ್ಳೆಂ ಕಳ್ಳೆಂನಾ. ತಾಕಾ ವಾಟ್ ಪಳೆಂವ್ಕ್ ಹೆರಾಂ ಕೊಣೀಂ ನಾತ್‌ಲ್ಲಿಂ ಆನಿಂ ಎಕಾಧಾವೆಳಾ ಚುಕ್‌ಲ್ಲಿ ವಾಟ್ ಸಾರ್‍ಕಿ ಕರ್‍ತಲೊಯ್ ಕೋಣೀಂ ನಾತ್‌ಲ್ಲ್ಯಾನ್ ಸಭಾರ್ ಸಂಗ್ತ್ಯೊ ಎಸ್ತೆಲಾಚಾ ಮತಿಕ್ ರಿಗ್ಲ್ಯೊಚ್ ನಾಂತ್.

ದೀಸ್ ವೆತಾಂ ವೆತಾಂ ಎಸ್ತೆಲಾಚಾ ಮತಿಂತ್ ಎಕಾ ಥರಾಚಿ ಬದ್ಲಾವಣ್ ಜಾವ್ನ್ ಆಯ್ಲಿ. ತೆಂಯ್ ಥಕ್‌ಲ್ಲೆಂ. ಹಿ ಮಿನತ್ ಕರ್ನ್, ಹೊ ಘಾಮ್ ಪಿಳುನ್ ತೆಂ ಥಕ್‌ಲ್ಲೆಂ. ಎದೊಳ್‌ಚ್ ತಿಚಾ ಹಾತಾಂಚಾ ಕಾತ್ ಖೊರೆಂ ಪಿಕ್ಕಾಸ್ ಧರ್ನ್ ದಾಡ್ಡ್ ಜಾಲ್ಲಿ. ಆನಿಂ ಕಿತ್ಲೊ ತೇಂಪ್ ಆಪ್ಣಾನ್ ಖೊರೆಂ ಪಿಕ್ಕಾಸ್ ಹಾತಾಂತ್ ಧರ್ಚೆಂ? ಕಿತ್ಲೊ ತೇಂಪ್ ಗಾದ್ಯಾಂತ್ ದಿಪ್ಳಾಂ ಗುಡ್ಡಾಂವ್ಚಿಂ? ಕಿತ್ಲೊ ತೇಂಪ್ ತೆಂ ಸಾರೆಂ ಹುಂಗ್ಚೆಂ? ಮ್ಹಳ್ಳಿಂ ಸವಾಲಾಂ ಮತಿಕ್ ಆಯ್ಲಿಂ. ತಿಕಾಯ್ ಆಪ್ಣಾನ್ ಸೊಭಿತ್ ದಿಸಾಜಯ್ ಆನಿಂ ಆಪ್ಣಾನೀ ಹೆರಾಂ ಗಲ್ಫಾಗಾರಾಂಚಾ ಭಾಯ್ಲಾಂಪರಿಂ ಆಟ್‌ನೇಟ್ ಕರಿಜಾಯ್ ಮ್ಹಳ್ಳಿ ಆಶಾ ಆಯ್ಲಿ. ಆಶಾ ಕೊಣಾಕ್ ನಾ? ತೇಂಯ್ ಎಸ್ತೆಲಾಕ್ ಆತಾಂ ಸಗ್ಳೊ ಸ್ವಾತಂತ್ರ್ ಆಸ್‌ಲ್ಲೊ. ಸಗ್ಳೆಂ ಘರ್ ಆತಾಂ ಸಾಂಭಾಳ್ಚೆಂ ಎಸ್ತೆಲಾನ್೦ಚ್. ಜಿಣ್ಯೆಂತ್ ಎದೊಳ್ ಪರ್‍ಯಾಂತ್ ತಾಕಾ ಜವಾಬ್ದಾರಿ ಮ್ಹಳ್ಯಾರ್ ಕಸಲಿ ತೆಂ ಕಳಿತ್ ನಾತ್‌ಲ್ಲಿ. ಕಳಿತ್ ಜಾಂವ್ಕ್ ಆವ್ಕಾಸ್ ತರೀ ಕಸೊ ಯೇತ್? ಲ್ಹಾನ್ ಆಸ್ತಾಂ ಬಾಪಾಯ್ಚಾ ಗುಸ್ತ್ಯಾರ್ ವ್ಹಡ್ ಜಾಂವ್ಕ್ ಜಾಲೆಂ. ಉಪ್ರಾಂತ್ ಕೊಣಾ ಕೊಣಾಚಾ ಘರಾಂನಿ ಕಾಮ್ ಕರ್ತಾನಾಂ ತಾಂಚೆಂ ಘುರ್‍ಕಾರ್ಪಣ್ ಜಾಲೆಂ. ತ್ಯೇ ಉಪ್ರಾಂತ್ ಕಾಜರ್ ಜಾಲೆಂ ಆನಿಂ ಘೊವಾಚಾ ಘುರ್‍ಕಾರ್ಪಣಾಖಾಲ್ ತೆಂ ಜಿಯೆಲೆಂ. ಆತಾಂ ಪಯ್ಲೆಪಾವ್ಟಿಂ ಮೆಳ್‌ಲ್ಲೆಂ ಸ್ವಾತಂತ್ರ್ ಎಸ್ತೆಲಾಕ್ ಕಳಿತ್ ನಾಸ್ತಾಂಚ್ ತಾಚಿ ವಾಟ್ ಧರುನ್ ಮುಖಾರ್ ವಚಾಲಾಗ್ಲೆಂ.

ನೀಜ್ ಭಾಂಗಾರಾಚಾಕೀ ಚಡ್ ಜಾವ್ನ್ ವೊಪಾಚಾ ಭಾಂಗಾರಾಕ್ ಪರ್ಜಳ್ ಚಡ್ ಮ್ಹಳ್ಳೆಪರಿಂ. ಪಯ್ಲೆಂ ಆಪ್ಲ್ಯಾ ಗುಣಾಂನಿ ಎಸ್ತೆಲಾಚೆಂ ಆನಿಂ ಭುರ್ಗ್ಯಾಂಚೆಂ ಮನ್ ಜಿಕೊಂಕ್ ಲತೀಫ್ ಸಕ್‌ಲ್ಲೊ. ತಾಚಾ ಮನಾಂತ್ ನಾನಾ ರಿತಿಂನಿ ಸಯ್ತಾನಾಚೊ ಕರ್‍ನ್ಯೊ ಯೆತಾಲ್ಯೊ. ಹಾಕಾ ಕಾರಾಣ್೦ಯ್ ಆಸ್‌ಲ್ಲೆಂ. ಸಗ್ಳೊ ದೀಸ್ ತ್ಯಾ ಮಾರ್ಕೆಟಿಂತ್ ಯೆಂವ್ಚಾ ವೆಚಾ ಲೊಕಾಂಕ್ ಪಳೆತಾನಾ, ತ್ಯಾ ಮೊವಾಲಿ ಸಾಂಗಾತ್ಯಾಂಸವೆಂ ಮೆಳ್ತಾನಾ. ಲತೀಫಾಕ್ ತಾಣಿಂ ಜಾಯ್ತೆಂ ಕುಸ್ಡೆಂ ಭರ್‌ಲ್ಲೆಂ. ಜಸೊ ಏಕ್ ಬರೊ ಬೂಕ್ ಎಕಾ ಬರ್‍ಯಾ ವೆಕ್ತಿತ್ವಾಕ್ ರೂಪಿತ್ ಕರ್‍ತಾಗೀ ತಶೆಂಚ್ ಏಕ್ ಬರೊ ಸಾಂಗಾತ್ ಎಕಾ ಬರ್‍ಯಾ ಮನ್ಶಾಕ್ ರೂಪಿತ್ ಕರ್‍ತಾ. ಪುಣ್ ಬಾವ್‌ಲ್ಲ್ಯಾ ರುಕಾಚಾ ಫಳಾಂತ್ ಕಸ್ಲೊ ಸಾರ್ ಆಸ್ಯೆತ್?

ಆನಿಂ ಅಶೆಂಚ್ ದೀಸ್ ಪಾಶಾರ್ ಜಾತಾನಾ ಏಕ್ ದೀಸ್ ಲತೀಫಾನ್ ಕೊಣಾಚೊಗೀ ಟೇಪ್ ರೆಕೋರ್ಡರ್ ಹಾಡ್ನ್ ಎಸ್ತೆಲಾಕ್ ದಿಲೊ. ತಾಕಾ ತಾಚಾ ಮಾವ್ಳ್ಯಾನ್ ದಿಲ್ಲೊ ಜಾಯ್ಜಯ್. ಇಲ್ಲೊ ತೇಂಪ್ ತುಮ್ಚೆಲಾಗಿಂ ದವರಾ ಮ್ಹಣೊನ್ ಇಲ್ಲಿಂ ಪದಾಂ ಆಸ್ಚೊ ಕೆಸೆಟ್ಯೊಯ್ ತಾಣೆಂ ದಿಲ್ಯೊ. ಆನಿಂ ಘರಾಂತ್ ಭುರ್ಗ್ಯಾಂನಿ ಇಸ್ಕೊಲಾಕ್ ಗೆಲ್ಲೆಂಚ್ ಎಸ್ತೆಲಾಕ್ ಇಲ್ಲೊ ವೇಳ್ ಪಾಶಾರ್ ಕರುಂಕ್ ಆವ್ಕಾಸ್ ಮೆಳ್ಳೊ.

ಪಯ್ಲೆಪಾವ್ಟಿಂ ಘರಾಂತ್ ಆಯ್ಕೊಂವ್ಚೆಂ ಸಂಗೀತ್ ಭುರ್ಗ್ಯಾಂಕೀ ರುಚ್ಲೆಂ. ಸದಾಂ ಸಾಂಜೆರ್ ತಾಂಚಾ ಕಂತಾರಾಂ ಬದ್ಲಾಕ್ ತಾಂಚಾ ತೊಂಡಾಂತ್ ತಿಂ ಪದಾಂ ಯೇಂವ್ಕ್ ಲಾಗ್ಲಿಂ. ಭುರ್ಗಿಂಯಿ ಎಕೇಕ್‌ಚ್ ಪದಾಂ ಘುಣ್ಗುಣೊಂಕ್ ಲಾಗ್ಲಿಂ. ಎಸ್ತೆಲಾಕ್ ಕಳಾನಾಸ್ತಾಂಚ್ ತಾಚಿ ಮತ್ ಹಳ್ತಾರ್ ಹ್ಯಾ ಸಂಸಾರಾಚಾ ಸಂಗ್ತ್ಯಾಂಚೆರ್ ಮಾಲ್ವೊಂಕ್ ಲಾಗ್ಲಿ.

ಉಗ್ತ್ಯಾ ವಸ್ತುಂಚೆರ್ ಧುಳ್ ಪಡೊಂಕ್ ಚಡ್ ವೇಳ್ ನಾಕಾ, ತಶೆಂಚ್ ಆಪ್ಲಿ ಮತ್ ಆನಿಂ ಮತಿಂತ್ಲಿಂ ಚಿಂತ್ನಾಂ ಉಗ್ತಿಂ ದವರ್ಲೆಲ್ಯಾ ಎಸ್ತೆಲಾಕ್ ದೀಸ್ ವೆತಾಂ ವೆತಾಂ ಎಸ್ತೆಲಾಚಾ ಕುಡಿಂತ್ ಆಳ್ಸಾಯ್ ಭರೊನ್ ಆಯ್ಲಿ. ಆನಿಂ ತಾಣೆಂ ತರ್ಕಾರೆಚೊ ಪೋಸ್ ಕರ್ಚೊ ರಾವಯ್ಲೊ. ಆಪುಣ್ ಎಕ್ಲ್ಯಾನ್ ಕಿತ್ಲೆಂ ಮ್ಹಣೊನ್ ವದ್ದಾಡ್ಚೆಂ ಮ್ಹಣೊನ್ ಲೆಖುನ್ ಫಕತ್ ಫುಲಾಂ ಝಡಾಂಕ್ ಶೆಣಾ ಉದಾಕ್‌ಗೀ ಸಾರೆಂಗೀ ಘಾಲ್ನ್ ತಾಂಚೊ ಪೋಸ್ ಕರಿಲಾಗ್ಲೆಂ.

ಅಶೆಂ ದೀಸ್ ವೆತಾಂ ವೆತಾಂ ತರ್ಕಾರೆಚೊ ವಾಲಿ ಜೀವ್ ಸೊಡ್ನ್ ಕರ್ಪಾಲ್ಯೊ. ಪುಣ್ ಆತಾತಾಂ ಸಾರ್‍ಕೆಂ ಖಾಣ್ ಜೆವಾಣ್ ಜೇವ್ನ್, ಪಾವ್ಡರ್, ಕ್ರೀಮ್ ಸಾರವ್ನ್ ಎಸ್ತೆಲ್ ಗೊರೆಂ ಗೊರೆಂ ಜಾಲ್ಲೆಂ. ಜಿವಾಂತೀ ಇಲ್ಲೆಂ ಭರೊನ್ ಆಯಿಲ್ಲೆಂ, ಪಯ್ಲೆಂಚೆಪರಿಂ ಸಗ್ಳೊ ದೀಸ್ ವೊತಾಂತ್ ಆಸಾನಾಸ್ತಾಂ ಘರಾಂತ್‌ಚ್ ಬೊಸೊನ್ ಆಸ್‌ಲ್ಲ್ಯಾನ್ ಪಯ್ಲೆಂಚ್ ಲಕ್ಶಣ್ ದಿಸ್ಚೆಂ ಎಸ್ತೆಲ್ ಆತಾಂ ತಾಚಾ ಪ್ರಾಯೆಚಾಕೀ ಚಡುಣೆಂ ಪಾಂಚ್ ವರ್ಸಾಂ ಲ್ಹಾನ್ ದಿಸೊಂಕ್ ಲಾಗ್ಲೆಂ.

ಆಶೆಚ್ ದೀಸ್ ವೆತಾಂ ವೆತಾಂ ಜೊಯೆಲ್ ಸಾರ್ಕೆಂ ಸಾಯ್ಕಲ್ ಸೊಡುಂಕ್ ಶಿಕ್ಲೊ. ಆನಿಂ ಆತಾಂ ಲತೀಫಾಚಾ ಮಜತೆಶಿವಾಯ್ ಸಾಯ್ಕಲ್ ಸೊಡುಂಕ್ ತಾಕಾ ಸಲೀಸ್ ಜಾಲೆಂ. ದೆಖುನ್ ಸದಾಂ ಕೆನ್ನಾ ಲತೀಫ಼್ ಯೆತಾಗಾಯ್ ಮ್ಹಣೊನ್ ರಾಕೊನ್ ರಾವೊಂಕ್ ಲಾಗ್ಲೊ. ಆನಿಂ ಜಿವಿತಾಯ್ ದಾಟ್ಟು ಬರಾಬರ್ ಸಾಯ್ಕಾಲಾಚಾ ಪಾಟ್ಲ್ಯಾ ಸಿಟಿರ್ ಬೊಸೊಂಕ್ ಆತುರಾಯೆನ್ ರಾಕ್ತಾಲೆಂ. ಆಜ್‌ಕಾಲ್ ತಾಂಚೆ ತೆವ್ಶಿನ್ ಎಸ್ತೆಲಾಚೆಂ ಗಮನ್ ಇಲೆಂ ಉಣೆಂ ಜಾವ್ನ್ ಆಯಿಲ್ಲೆಂ. ತಿಚೆಂ ಗಮನ್ ಫಕತ್ತ್ ಮಹಿನ್ಯಾ ಮಹಿನ್ಯಾಕ್ ಚುಕಾನಾಸ್ತಾಂ ಯೆಂವ್ಚಾ ಆಪ್ಲ್ಯಾ ಪತಿಚಾ ಪೊಯ್ಶ್ಯಾಂಚೆರ್ ಆನಿಂ ಅಲಂಗಾರ್ ಬೆಂಕಾಂತ್ ಜಮೊ ಕೆಲ್ಲ್ಯಾ ಪೊಯ್ಶ್ಯಾಂಚೆರ್ ಆನಿಂ ಲತೀಫಾನ್ ಹಾಡುನ್ ದಿಲ್ಲ್ಯಾ ಟೇಪ್‌ರೆಕೋರ್ಡರಾಚೆರ್ ಆನಿಂ ತಾಂತುಂ ಯೆಂವ್ಚಾ ಪದಾಂಚೆರ್ ಗೆಲ್ಲೆಂ.

ಏಕ್ ದೀಸ್ ಸಾಂಜೆರ್ ವೊರಾಂ ಸಾಡೆ ಸ ಜಾಲ್ಯಾರೀ ಲತೀಫ್ ಯೇಂವ್ಕ್ ನಾತ್‌ಲ್ಲೊ ಪಳೆವ್ನ್ ಭುರ್ಗಿಂ ಕಂಗಾಲ್ ಜಾಲಿಂ. ಸದಾಂಚೆಪರಿಂ ನಾವ್ನ್ ತಿಂ ತಯಾರ್ ರಾವ್‌ಲ್ಲಿಂ ಆನಿಂ ಇಲ್ಲ್ಯಾ ವೆಳಾರ್ ಎಸ್ತೆಲ್ ನಾಂವ್ಕ್ ಗೆಲ್ಲೆವೆಳಾರ್ ಸಾಯ್ಕಾಲಾಚೆಂ ಬೆಲ್ಲ್ ಜಾಲೆಂ ಆನಿಂ ಎಕಾಚ್ಚ್‌ಫರಾಂ ಭುರ್ಗಿಂ ಆಂಗ್ಣಾಕ್ ಉಡ್ಲಿಂ.

ಲತೀಫಾಚಾ ಹಾತಾಂತ್ಲೆಂ ಸಾಯ್ಕಲ್ ಜೊಯೆಲಾನ್ ಘೆತ್ಲೆಂ ಆನಿಂ ಭಯ್ಣಿಕ್ ಪಾಟ್ಲ್ಯಾ ಸಿಟಿರ್ ಬೊಸವ್ನ್ ಗೆಲೊ. ಲತೀಫ್ ಘರಾಶಿಂ ಯೆತಾನಾ ಎಸ್ತೆಲ್ ದಿಸ್ಲೆಂನಾ. ಘರಾ ಭಾಯ್ಲ್ಯಾ ನಾಣಿಯೆಚಾ ಕೊಡ್ಕ್ಯಾಂತ್ ಎಸ್ತೆಲಾನ್ ನಾತಾನಾ ಯೆಂವ್ಚೊ ಉದ್ಕಾಚೊ ಆವಾಜ್ ಸ್ವಷ್ಟ್ ಯೆತಾಲೊ. ಸೊರ್ಪಾಕ್ ಕಿತ್ಲೆಂ ಬರೆಂ ದೂದ್ ದಿಲ್ಯಾರೀ ತಾಚೆಂ ವೀಕ್ ಬರೆಂ ಜಾತಾಯೆ ತರ್? ತಶೆಂಚ್ ಲತೀಫಾಚಾ ತಕ್ಲೆಂತ್ ಘಡ್ಯೆನ್ ಪಿಶೆಂ ಚಡ್ಲೆಂ ಆನಿಂ ತೊ ನಾಣಿಯೆತೆವ್ಶಿನ್ ಪಾವ್ಲೊ. ಭಿತರ್ ನಾಣಿಯೆಕ್ ಘಾಲ್ಲೊ ಉಜೊ ಝಳೊನ್೦ಚ್ ಆಸ್‌ಲ್ಲೊ. ಆನಿಂ ತ್ಯಾ ಕಾಳೊಕಾಚಾ ಕುಡಾಂತ್ ಪೆಟ್ಚೊ ಉಜೊ, ಭಾಯ್ಲ್ಯಾ ಕಸಲ್ಯಾಚ್ ಸಂಗ್ತ್ಯಾಂಚಿ ಪರ್ವಾ ನಾಸ್ತಾಂ ನಾಂವ್ಚಾ ಎಸ್ತೆಲಾಚಾ ವಿಣ್ಗ್ಯಾ ಕುಡಿಚೆರ್ ಉಜ್ವಾಡ್ ಫಾಂಕಯ್ತಾಲೊ. ಲತೀಫಾಚೆಂ ಆಂಗ್ ಏಕ್ ಪಾವ್ಟಿಂ ಕಾಂಪ್ಲೆಂ. ಚಡುಣೆಂ ವೀಸ್ ವರ್ಸಾಂಚಾ ತಾಚಾ ಕುಡಿರ್ ಎದೊಳ್ ಪರ್‍ಯಾಂತ್ ಅಸಲೊ ಅನ್ಭೋಗ್ ಪಯ್ಲೆಂ ಜಾಲ್ಲೊಚ್ಚ್ ನಾ. ತಾಕಾ ನಾಕಾ ನಾಕಾ ಮ್ಹಳ್ಯಾರೀ ಎಸ್ತೆಲಾಚಾ ಕುಡಿಚಿ ಸೊಭಾಯ್ ಉಟೊನ್ ಉಟೊನ್ ದಿಸ್ತಾಲಿ. ಕುಡಿಂತ್ ಭರೊನ್ ಆಸ್‌ಲ್ಲ್ಯಾ ಎಸ್ತೆಲಾಚಿಂ ಭರ್‌ಲ್ಲೆ ವಿಸ್ವೆ ತೊ ದೊಳೆ ಧಾಂಪಿನಾಸ್ತಾಂ ದಾರಾಚಾ ಬುರಾಕಾಂತ್ಲ್ಯಾನ್ ಪಳೆಂವ್ಚಾರ್ ಪಡ್ಲೊ.

ಕಿತ್ಲೊ ವೇಳ್ ಪಳೆಲಾಗ್ಲೊ ತೆಂ ತೊ ಜಾಣಾ ಜಾಂವ್ಚಾಧಿಂಚ್ ತೆಂ ದಾರ್ ಉಗ್ತೆಂ ಕರುನ್ ಎಸ್ತೆಲ್ ಭಾಯ್ರ್ ಆಯ್ಲೆಂ ಆನಿಂ ಮುಖಾರ್ ಉಭೊ ಆಸ್ಚಾ ಲತೀಫಾಕ್ ಪಳೆವ್ನ್ ಏಕ್ ಪಾವ್ಟಿಂ ಆಂಕಾಂತ್ಲೆಂ. 'ಅಬ್ಬಾ ದೆವಾ ತೂಂಗೀ' ಮ್ಹಣೊನ್ ಆಪ್ಲೆಂ ಅರ್ಧೆಂ ವಿಣ್ಗೆಂ ಆಂಗ್ ಧಾಂಪುನ್ ಘಡ್ಯೆನ್ ಘರಾಭಿತರ್ ಧಾಂವ್ಲೆಂ.

ಇಲ್ಲ್ಯಾ ವೆಳಾಉಪ್ರಾಂತ್ ಸಾರ್ಕೆಂ ನೆಸೊನ್ "ಭುರ್ಗಿಂ ಖೈಂ ಗೆಲಿಂ?" ಮ್ಹಣೊನ್ ಭಾಯ್ರ್ ಯೇವ್ನ್ "ಜೊಯೆಲಾ" ಮ್ಹಣೊನ್ ತಾಳೊ ಕಾಡಿಲಾಗ್ಲೆಂ ಆನಿಂ ತಿತ್ಲ್ಯಾರ್ ಜೊಯೆಲ್ ಆನಿಂ ಜಿವಿತಾ ಹಾಸೊನ್ ಹಾಸೊನ್ ಖೆಳೊನ್ ಪಾಟಿಂ ಯೆಂವ್ಚಿಂ ದಿಸೊನ್ ತೆಂ ವಗೋ ಬೊಸ್ಲೆಂ. ಭುರ್ಗಿಂ ಯೆತೆಚ್ ಲತೀಫ್ ರಾವ್ಲೊನಾ. ತಾಕಾ ಆಪ್ಣಾನ್ ಕಸಲಿಗೀ ಚೂಕ್ ಕೆಲಿ ಮ್ಹಳ್ಳೆಂ ಚಿಂತಾಪ್ ಖಾಂವ್ಕ್ ಲಾಗ್ಲೆಂ ಆನಿಂ ಗುನ್ಯಾಂವ್ಕಾರಿ ಚಿಂತ್ನಾಂತ್ ತೊ ಉಟಾಉಟಿಂ ಸಾಯ್ಕಲ್ ಘೆವ್ನ್ ಗೆಲೊ. ತಾಕಾ ಆಡಾಂವ್ಕ್ ಎಸ್ತೆಲಾನೀಂ ಕಾಂಯ್ ಪ್ರೇತನ್ ಕೆಲೆಂನಾ.

ಭುರ್ಗಿಂ ಬಾವ್ಡಿಂ ಹ್ಯಾ ಕಸಲ್ಯಾಚ್ ಸಂಗ್ತ್ಯಾಂಚಿ ಪರ್‍ವಾ ಕರ್ನಾಸ್ತಾಂ ತಾಂಚೆಇತ್ಲ್ಯಾಕ್ ಯೇವ್ನ್ ಆಮೊರಿ ಜಾತೆಚ್ ಜೇವ್ನ್ ನಿದ್ಲಿಂ.

ರಾತಿಂ ನಿದೊಂಕ್ ಗೆಲ್ಲ್ಯಾ ಎಸ್ತೆಲಾಚಾ ದೊಳ್ಯಾಂಕ್ ನೀದ್ ಬಿಲ್ಕುಲ್ ಪಡ್ಲಿನಾ. ತಿಚಾ ದೊಳ್ಯಾಂ ಹುಜಿರ್ ನಾಕಾ ನಾಕಾ ಮ್ಹಳ್ಯಾರೀ ನಾಣಿಯೆ ಭಾಯ್ರ್ ಚೊರಾಪರಿಂ ಉಭೊ ಆಸ್ಚೊ ಲತೀಫ್ ದಿಸ್ಲೊ. ತೊ ಕಿತ್ಯಾ ಚೊರಾಪರಿಂ ಕರ್ತಾಲೊ? ಕಾಂಯ್ ತಾಣೆಂ ಆಪ್ಣಾಕ್ ನಾಂವ್ಚೆಂ ಪಳೆಲಾಂ? ದಾರ್ ಬಂದ್ ಆಸ್‌ಲ್ಲ್ಯಾನ್ ತೆಂ ತಿತ್ಲೆಂ ಸಲೀಸ್ ನ್ಹಂಯ್ ಮ್ಹಣೊನ್ ಚಿಂತ್ಲೆಂ. ಅಶೆಂ ಎಸ್ತೆಲಾಕ್ ಕಳಾನಾಸ್ತಾಂಚ್ ಏಕ್ ವೋಡ್ ಆಯ್ಲಿ. ದಾದ್ಲ್ಯಾಚೊ ಸಾಂಗಾತ್ ಪಾಟ್ಲ್ಯಾ ಚಡುಣೆಂ ಪಾಂಚ್ ಮಹಿನ್ಯಾಂ ಥಾವುನ್ ನಾಸ್ತಾಂ ರಾಂವ್ಚೆಂ, ತೇಂಯ್ ರಗ್ತಾ ಮಾಸಾಚಾ ಕುಡಿಕ್ ಆಪ್ಲ್ಯಾ ಸ್ಥಿಮಿತೆರ್ ದವ್ರುಂಚೆ ಇಲ್ಲೆ ಕಶ್ಟ್ ಮ್ಹಣೊನ್ ಭೊಗ್ತಾಲೆಂ, ಆಪ್ಲ್ಯಾ ಕುಡಿಚಾ ವೊಡ್ಣೆಕ್ ಆಪ್ಲ್ಯಾ ಸ್ಥಿಮಿತೆಂತ್ ದವ್ರುಂಕ್ ಗರ್ಜೆಚೆಂ ಶಿಕಾಪ್ ತಾಕಾ ನಾತ್‌ಲ್ಲ್ಯಾನ್ ಜಾಯ್ಜಯ್, ತರೀ ಆಪ್ಲ್ಯಾ ಘೊವಾಚೆ ಸಾಕ್ರಿಫ಼ಿಸ್ ಆಪ್ಣಾನ್ ವಿಸ್ರೊಂಕ್ ನಜೊ ಮ್ಹಣೊನ್ ತೆಂ ದೊಳೆ ಆಡ್ ಕರ್ನ್ ನಿದೊಂಕ್ ಗೆಲೆಂ.

ದುಸ್ರ್ಯಾ ದಿಸಾ ಲತೀಫಾಕಡೆಚ್ ಶೀದಾ ವಿಚಾರ್ತೆಲಿಂ ಮ್ಹಣೊನ್ ಚಿಂತ್ಲಿಲಾಗ್ಲೆಂ ತರೀ ಲತೀಫ್ ದುಸ್ರೆದೀಸ್ ಯೇಂವ್ಕ್ ನಾತ್‌ಲ್ಲೆಂ ಕಿತ್ಯಾಕ್‌ಗೀ ನಿರಾಶಿ ಜಾಲೆಂ. ಸಾಂಜೆರ್ ಭುರ್ಗ್ಯಾಂಕೀ ಲತೀಫ್ ಕಿತ್ಯಾಕ್ ಯೇಂವ್ಕ್ ನಾ ಮ್ಹಣೊನ್ ಮಿಸ್ತೆರ್‌ಸೊ ಜಾಲೊ. ಜಿವಿತಾಕೀ ಆಪ್ಣಾಕ್ ಆಜ್ ದಾಟ್ಟುಸವೆಂ ಸಾಯ್ಕಾಲಾರ್ ಬೊಸೊಂಕ್ ಮೆಳೊಂಕ್‌ನಾ ಮ್ಹಣೊನ್ ಇಲ್ಲೆ ಕಳ್ವಳೆ ಜಾಲೆ.

ದುಸ್ರೆ ದಿಸಾ ರಾತಿಂ ನಿದ್‌ಲ್ಲೆಕಡೆ ಎಸ್ತೆಲಾಚಾ ದೊಳ್ಯಾಹುಜಿರ್ ಲತೀಫ್ ಆಯ್ಲೊ. ಕಿತ್ಯಾಕ್‌ಗೀ ಲತೀಫಾಕ್ ಪಳೆಯ್ಜಾಯ್ ಮ್ಹಳ್ಳಿ ಆಶಾ ಜಾಲಿ.

ಪುಣ್ ಲತೀಫ್ ಕಿತ್ಯಾಕ್ ಯೇಂವ್ಕ್ ನಾಂ ಮ್ಹಳ್ಳೆ ಭಿರಾಂತೆನ್ ತೆಂ ನಿದ್ಲೆಂ.

ಅಜ್ಯಾಪ್! ತಿಸ್ರೊ ದೀಸ್. ಪುಣ್ ಲತೀಫಾಚೊ ಪಾತ್ತೊ ನಾ. ಹೆಣೆಂ ಬಾಂಧುನ್ ದವರ್ಲೆಲಿಂ ಫುಲಾಂ ಪಾಡ್ ಜಾವ್ನ್ ಯೆತಾಲಿಂ ದೆಖುನ್ ಇಸ್ಕೊಲ್ ಸೊಡ್ತಚ್ ಲತೀಫಾಕ್ ಆಪಯ್ಲಾಂ ಮ್ಹಣ್ ಸಾಂಗಾ ಮ್ಹಣೊನ್ ಎಸ್ತೆಲಾನ್ ಭುರ್ಗ್ಯಾಂಕಡೆ ಸಾಂಗೊನ್ ಧಾಡ್ಲೆಂ.

ಕಿತ್ಯಾಕ್‌ಗೀ ಮೋಡ್ ದಾಟ್ ಜಾವ್ನ್ ಆಯಿಲ್ಲೆವರ್ವಿಂ ಸಾಂಜೆಚಿಂ ಪಾಂಚ್ ಜಾತಾನಾಂಚ್ ಪ್ರಥ್ವೆಚೆರ್ ಕಾಳ್ಭಾಣ್ ಪಡ್‌ಲ್ಲಿ. ಆಜ್ ಭುರ್ಗ್ಯಾಂಚಾಕೀ ಚಡ್ ಎಸ್ತೆಲಾಕ್ ಲತೀಫಾನ್ ಯೇಜಯ್ ಮ್ಹಳ್ಳಿ ಆಶಾ ಆಯ್ಲಿ. ಆನಿಂ ಇಲ್ಲೆವೆಳಾರ್ ಲತೀಫ್ ಆಯ್ಲೊ. ಯೆತೆಚ್ ಎಸ್ತೆಲಾಚಾ ತೊಂಡಾರ್ ಸಂತೊಸ್ ಉಮಾಳ್ಳೊ ತರೀ ತಿಣೆಂ ಕಿತೆಂಚ್ ದಾಖಯ್ಲೆಂನಾ. ಭುರ್ಗಿಂ ಎಕಾಚ್‌ಫ಼ರಾಂ ಧಾಂವೊನ್ ಲತೀಫಾಚಾ ಹಾತಾಂತ್ಲೆಂ ಸಾಯ್ಕಲ್ ವೋಡ್ನ್ ಘೆವ್ನ್ ಚಲ್ತಚ್ಚ್ ಲತೀಫ್ ಘರಾತೆವ್ಶಿನ್ ಮೆಟಾಂ ಕಾಡಿಲಾಗ್ಲೊ.

ಆಪ್ಣಾಚಿ ತನ್ಕಿ ಕರಿತ್‌ಗೀ ಮ್ಹಣೊನ್ ಲತೀಫಾನ್ ಲೆಕ್‌ಲ್ಲೆಂ ಜಾಯ್ಜಯ್. ತಾಣೆಂ ದೀಶ್ಟ್ ಉಕಲ್ಲಿನಾ.

ಎಸ್ತೆಲಾನ್ ದಿಲ್ಲಿ ಕಾಪಿ ಪಿಯೆಲೊ. ಎಸ್ತೆಲಾಚಾ ಕುಡಿಂತೀ ಆತಾಂ ಆಪುಣ್ ಎಕಾ ದಾದ್ಲ್ಯಾಸವೆಂ ಆಸಾಂ ಮ್ಹಳ್ಳೆಂ ಭೊಗಾಪ್ ಆಯ್ಲೆಂ. ಕಾಪಿಯೆಚೊ ಗ್ಲಾಸ್ ದಿತಾನಾಂಯ್, ಆನಿಂ ಖಾಲಿ ಗ್ಲಾಸ್ ಪಾಟಿಂ ಘೆತಾನಾಂಯ್ ಜಾಯ್ ಜಾಯ್ ಮ್ಹಣೊನ್ ಬಾಗೊನ್ ಆಪ್ಲೊ ಪಾಲಂವ್ ನಿಸ್ರಾಯ್ಲೊ. ತೆಂ ಪಾಶಾಂವಾಂತ್ ಬುಡ್‌ಲ್ಲೆಂ. ಎಕಾ ಮೆಣಾಚಾ ವಾತಿಪರಿಂ. ಆನಿಂ ಅಸಲೊ ಆವ್ಕಾಸ್ ಆಪ್ಣಾಕ್ ಖಂಡಿತೀ ಲಾಭ್ತಲೊ ಮ್ಹಳ್ಳೆಂ ಚಿಂತುನ್ ತ್ಯಾ ಖಾತಿರ್ ರಾಕೊನ್ ಆಸ್‌ಲ್ಲೊ ಲತೀಫ್ ಕಿತೆಂಚ್ ಪಾಟಿಂ ಫುಡೆಂ ಚಿಂತಿನಾಸ್ತಾಂ ವಾಂಟೆಲಿ ಜಾಲೊ. ಎದೊಳ್‌ಚ್ ದಾಟ್ ಮೊಡಾಂಕ್ ವಾವಯಿಲ್ಲೆಂ ಮೊಳಾಬ್ ಸಲ್ವಾಲ್ಲೆಂ ಜಾಯ್ಜಯ್ ಎಕಾಚ್ಚ್‌ಫರಾಂ ಪಾವ್ಸಾಚೊ ಶೆಣೊಂ ಪಡ್ಲ್ಯೊ. ಸುಕೊನ್ ಆಯಿಲ್ಲಿ ಧರ್ತಿ ಹಳ್ತಾರ್ ಭಿಜೊಂಕ್ ಲಾಗ್ಲಿ.

ಇಲ್ಯಾ ವೆಳಾರ್ ಸಗ್ಳೆಂ ಆಂಗ್ ಭಿಜೊನ್ ಆಯಿಲ್ಲ್ಯಾ ಭುರ್ಗ್ಯಾಂಕ್ ದೆಂಖ್ಣೆ ಘಾಲೆ ಎಸ್ತೆಲಾನ್. ಕಿತ್ಯಾಕ್‌ಗೀ ತಿಚಿ ತಕ್ಲಿ ಥಾರ್‍ಯಾರ್ ನಾಂಶೆಂ ತಿಕಾ ಭೊಗ್ಲೆಂ. ಭುರ್ಗಿಂ ವಚೊನ್ ತುವಾಲ್ಯಾರ್ ತಾಂಚಿ ತಕ್ಲಿ ಪುಸೀತ್ ಬೊಸ್ಲಿಂ. ಪುಣ್ ಕಸ್ಲೆಂಚ್ ಉಲವ್ಣೆಂ ನಾಸ್ತಾಂ ಎಸ್ತೆಲಾನ್ ಭುರ್ಗ್ಯಾಂಕ್ ವಾಡ್ಲೆಂ ಆನಿಂ ಜೆವಿನಾಸ್ತಾಂ ವಚೊನ್ ನಿದ್ಲೆಂ.

ತಿಚಾನ್ ಪಾತ್ಯೆಂವ್ಕ್ ಕಶ್ಟ್ ಮಾರ್‍ಲೆ. ಆಪ್ಣಾವರ್‍ವಿಂ ಅಸಲೆಂ ಏಕ್ ಪಾತಾಕ್ ಜಾಯ್ತ್‌ಗಾಯ್ ಮ್ಹಳ್ಳೆಂ ತಿಚಾ ಸ್ವಪ್ಣಾಂತೀ ತಿಣೆಂ ಚಿಂತುಂಕ್ ನಾತ್‌ಲ್ಲೆಂ. ತೆಂ ಕೊನ್ವೆಂಟಾಂತ್ ಕಾಮ್ ಕರುನ್ ಆಸ್ತಾಂ ಸಯ್ತ್ ತಿಕಾ ನಾಡುಂಕ್ ಆಯಿಲ್ಲೆ ನಾಡ್ಕುರ್ ಉಣೆಂಗೀ? ಇಗರ್ಜೆಚೊ ಬೊಟ್ಲೆರ್ ಜಾಂವ್, ಮಿರ್ನ್ಯಾಮಾಚೊ ಪೊಕ್ರಿ ಪೂತ್ ಜಾಂವ್, ಚಾಮಾದೊರಾಚೊ ಮಿವ್ಣೊ ಜಾಂವ್, ಕೋಣಾಯ್ಚಿಯ್ ಪರ್‍ವಾ ತಾಣೆ ಕೆಲ್ಲಿನಾ. ಆನಿಂ ಆಬ್ಳೆ ದೊಗಾಂ ಬುರ್ಗ್ಯಾಂಚಿ ಆವಯ್ ಜಾವ್ನೀ ಆಪ್ಣ್ಯಾಚಾಕೀ ಚಡುಣೆಂ ಧಾ ವರ್‍ಸಾಂ ಲ್ಹಾನ್ ಪ್ರಾಯೆಚಾ ಎಕಾ ಮುಸಲ್ಮಾನ್ ತರ್ನಾಟ್ಯಾಕ್ ಆಪ್ಲಿ ಮಾಣ್ಸುಗಿ ಒಪ್ಸುನ್ ದಿಲ್ಲಿ.

ಆಪ್ಲ್ಯಾ ಧ್ಯೇಯಾಂ ಮುಖಾರ್ ಆಪ್ಲ್ಯಾ ಕುಡಿಚಿ ವೊಡ್ಣಿ ಜಿಕ್‌ಲ್ಲಿ. ತಿಣೆ ಕೆಲ್ಲಿ ಕರ್‍ನಿ ಕೊಣೆಂಯ್ ಪಳೆಂವ್ಕ್ ನಾ ಜಾವ್ಯೆತ್. ಪುಣ್ ಆಪ್ಲ್ಯಾ ಕರ್‍ನೆಚೆರ್ ಆಪ್ಣಾನ್ ಕಿತೆಂಗೀ ಚೂಕ್ ಕೆಲಿ ಮ್ಹಳ್ಳೆಂ ಭೊಗಾಪ್ ತಿಕಾ ಏಕ್ ಘಡಿ ಆಯ್ಲೆಂಚ್.

ತರೀ ಆತಾಂ ಕಿತೆಂ ಕರ್ಯೆತ್? ಜಾಂವ್ಚೆಂ ಜಾವ್ನ್ ಗೆಲಾಂ. ಕೊಣಾಕೀ ಕಳತ್ ತರ್? ಫಾಲ್ಯಾಂ ಆಪ್ಲ್ಯಾ ಘೊವಾಕ್ ಕಾಂಯ್ ಕಳತ್ ತರ್? ಕಿತೆಂ ಜಾಂವ್ಕ್ ಆಸಾ? ಭುರ್ಗ್ಯಾಂ ಮುಖಾರ್, ಸಮಾಜೆ ಮುಖಾರ್ ಆಪ್ಲಿ ಮರ್‍ಯಾದ್ ಖೈಂ ಉರತ್? ಕಶೆಂ ಕಶೆಂ ನಿದ್ಲ್ಯಾರೀ ಎಸ್ತೆಲಾಕ್ ನೀದ್ ಬಿಲ್ಕುಲ್ ಆಯ್ಲಿನಾ. ಎಕಾ ಥರಾಚಿ ಕರ್ಕರ್‍ಯಾಂಚೊ ಸಂತೊಸ್ ಜಾವ್ನ್ ಆಯ್ಲೊ.

ಆನಿಂ ಎಸ್ತೆಲಾನ್ ಏಕ್ ನಿಚೆವ್ ಕೆಲೊ. "ನಾ.. ಹಾವೆಂ ಹ್ಯಾಚ್ಚ್ ಚುಕಿ ಥಾವುನ್ ಶಿಕಾಜಯ್. ಆಯ್ಚಾನ್ ಕೆದಿಂಕ್‌ಚ್ ಅಸಲಿಂ ಕಾಮಾಂ ಕರುಂಕ್ ನಜೊ..." ಅಶೆಂ ಚಿಂತುನ್ ಕಶಿಯ್ ರಾತ್ ಫಾಲಾಂ ಕೆಲಿ.

ದುಸ್ರೊ ದೀಸ್ ಉದೆಲೊ. ಭುರ್ಗಿಂ ಹರ್‍ಶೆಂಚಾ ಪರಿಂ ಇಸ್ಕೊಲಾಕ್ ಗೆಲಿಂ ಆನಿಂ ಅವ್ಜಿತ್ ಲತೀಫ್ ವೆಗಿಂಚ್ ಉದೆಲೊ. ತಾಚಾ ಹಾತಾಂತ್ ತಳ್ಯಾಚಿ ಮಾಸ್ಳಿ ಆಸ್‌ಲ್ಲಿ ಆನಿಂ ಹಾತಾಂತ್ ಏಕ್ ಲಾನ್ ಬೋತ್ಲ್ ಆಸ್‌ಲ್ಲಿ. ಎಸ್ತೆಲಾನ್ ಲತೀಫಾಕ್ ಖಡಕ್ಕ್ ಸಾಂಗ್ಲೆಂ "ಪಳೆ ಕಾಲ್ ಕಿತೆಂ ಜಾಲಾಂ ತೆಂ ಜಾವ್ನ್ ಗೆಲಾಂ. ಪುಣ್ ಆಯ್ಚಾನ್ ಆಮಿಂ ತಸಲೆಂ ಕಾಂಯ್ ಕರ್ಚೆಂ ಬರೆಂ ನ್ಹಂಯ್. ಹಾಂವ್ ತುಕಾ ಎಕಾ ವ್ಹಡ್ ಭಯ್ಣಿಪರಿಂ"

ಎಕಾಚ್‌ಫ಼ರಾಂ ಅಸಲಿಂ ಉತ್ರಾಂ ಉಲಯ್ತ್ ಮ್ಹಳ್ಳೆಂ ಚಿಂತುಂಕ್ ನಾತ್‌ಲ್ಲ್ಯಾ ಲತೀಫಾನ್ 'ಜಾಯ್ತ್ ಮ್ಹಳ್ಳೆ ಜೀನ್ಸಿಂ' ಬಾವ್‌ಲ್ಲೆಂ ವದನ್ ದಾಖವ್ನ್, ಬಾಂದುನ್ ದವರ್‍ಲೆಲಿಂ ಫುಲಾಂ ಘೆವ್ನ್ ವಚೊಂಕ್ ಭಾಯ್ರ್ ಸರ್ಲೊ.

ಆಪುಣ್ ಬೆಶ್ಟಿಂಚ್ ಉಲಯ್ಲಿಂ ಮ್ಹಳ್ಳೊ ಚುರ್ಚುರೊ ಘೆವ್ನ್ ಎಸ್ತೆಲಾನ್ ತಾಣೆಂ ಹಾಡ್‌ಲ್ಲ್ಯಾ ಮಾಸ್ಳೆಚೆಂ ಪೊತೆಂ ಘೆತ್ಲೆಂ. ಜೆವ್ಣಾಕ್ ಖಂಡಿತ್ ಯೇ ಮ್ಹಣೊನ್ ತೊಂಡಾ ಉತ್ರಾಕ್ ಸಾಂಗ್ಲೆಂ.

ಎಸ್ತೆಲಾಚಾ ಉತ್ರಾಂಕ್ ಲತೀಫಾನ್ ಸಯ್ತ್ ಸಯ್ ಘಾಲ್ಲೆಂ ಎಸ್ತೆಲಾಕ್ ರುಚ್ಲೆಂ ಆನಿಂ ತಾಣೆಂ ತಿ ಮಾಸ್ಳಿ ರಾಂದ್ಲಿ ಆನಿಂ ಕಿತ್ಯಾಕ್‌ಗೀ ತ್ಯಾ ಬೊತ್ಲೆ ಥಂಯ್ ತಿಚೆಂ ಗಮನ್ ಗೆಲೆಂ. ತಿಣೆಂ ತ್ಯಾ ಬೊತ್ಲೆಕ್ ಉಘಡ್ಲೆಂ. ಪರ್ಮಳ್ ಘೆತಾನಾ ತಿಕಾ ತೊ ವಾಯ್ನ್ ಮ್ಹಳ್ಳೆಂ ಕಳ್ಳೆಂ. ಮಾದ್ರಿಂಚಾ ಕೊನ್ವೆಂಟಾಂತ್ ಮಾದ್ರ್ಯೊ ಫೆಸ್ತಾಂ ಪರ್ಬೆಚಾ ದಿಸಾಂನಿ ವಾಯ್ನ್ ಕರ್ತಾಲಿಂ ತೆಂ ಜಾಣಾಸ್‌ಲ್ಲೆಂ.

ಎಸ್ತೆಲಾನ್ ಜ್ಯೇ ಕಿತೆಂ ಲತೀಫಾಕ್ ಸಾಂಗ್‌ಲ್ಲೆಂ ಆನಿಂ ಆಪ್ಲೆಂ ಅಂತಸ್ಕರ್ನ್ ಜ್ಯೆ ಕಿತೆಂ ಸಾಂಗ್ತಾ ಆನಿಂ ಆಪ್ಲ್ಯಾ ಕುಡಿಚೊ ವೊಡ್ಣ್ಯೊ ಕಿತೆಂ ಸಾಂಗ್ತಾತ್ ಹ್ಯಾ ತಿನಾಂತ್‌ಯಿ ತಫಾವತ್ ಆಸ್‌ಲ್ಲೊ. ತಿಚಾ ಅಂತಸ್ಕರ್ನಾಚೊ ತಾಳೊ, ಕುಡಿಚಾ ಭುಲಿಮುಖಾರ್ ಅಸ್ಕತ್ ಜಾಲ್ಲೊ. ಎಕಾ ಘಡ್ಯೆ ಆಪ್ಣಾನ್ ತಶೆಂ ಸಾಂಗೊಂಕ್ ನಜೊ ಆಸ್‌ಲ್ಲೆಂ ಮ್ಹಣೊನ್ ಭೊಗ್ಲೆಂ.

ಎದೊಳ್ ಪರ್‍ಯಾಂತ್ ವಾಯ್ನ್ ಜಾಂವ್ ಸುರ್ ಜಾಂವ್ ಪಿಯೆವ್ನ್ ಸವಯ್ ನಾತ್‌ಲ್ಲ್ಯಾ ಎಸ್ತೆಲಾನ್ ದನ್ಪಾರಾಂಚೆಂ ಜೆವಾಣ್ ರಾಂದುನ್ ಲತೀಫಾಚಾ ಯೆಣ್ಯಾಕ್ ರಾಕ್ಲೆಂ. ತೊ ಯೇತ್‌ಗೀ ಮ್ಹಳ್ಳೊ ದುಭಾವ್ ಏಕ್ ಘಡಿ ಆಯ್ಲೊ ತರೀ ತಿಚೆಂ ಅಂತಸ್ಕರ್ನ್ 'ಖಂಡಿತ್ ಯೇತ್' ಮ್ಹಣೊನ್ ಸಾಂಗ್ತಾಲೆಂ.

ಅಶೆಂ ಬೊಸೊನ್ ಆಸ್ತಾಂ ಎಕಾ ಗ್ಲಾಸಾಂತ್ ತೊ ವಾಯ್ನ್ ವೊತುನ್ ತೆಂ ಪಯ್ಲೆಪಾವ್ಟಿಂ ಪಿಯೆಂವ್ಕ್ ಬೊಸ್ಲೆಂ. ವೊರಾಂ ಎದೊಳ್‌ಚ್ ಸಾಡೆ ಭಾರಾ ಉತ್ರಾಲ್ಲಿಂ. ಎಕೇಕ್ ಘೊಟ್ ಮ್ಹಣ್ತಾನಾ ಹಳ್ತಾಚೆಂ ಆಮಾಲ್ ಎಸ್ತೆಲಾಕ್ ಚಡ್ಲೆಂ ಆನಿಂ ಚಡುಣೆಂ ದೇಡ್ ವೊರಾಂ ಜಾತಾನಾ ಸಾಯ್ಕಾಲಾಚೊ ಆವಾಜ್ ಆಯ್ಕಾಲೊ. ಲತೀಫ್ ಆಯಿಲ್ಲೊ. ಜೆವಾಣ್ ತಾಣೆಂ ವಾಡ್ಲೆಂ ತರೀ ಜೆವ್ತಾಂ ಜೆವ್ತಾಂ ತೆಂ ಥಂಯ್ಚ್ ಗಳ್ಳೆಂ. ತೆಚ್ಚ್ ಆವ್ಕಾಸಾಕ್ ರಾಕೊನ್ ಆಸ್‌ಲ್ಲೊ ಲತೀಫಾನ್ ತಿಕಾ ಥಂಯ್ಚೆಂ ಉಟವ್ನ್ ಮಾಂದ್ರೆರ್ ನಿದಾಯ್ಲೆಂ.

ಕಿತ್ಲೊ ವೇಳ್ ತೆಂ ನಿದ್ಲೆಂ ತೆಂಚ್ ನೆಣಾಂ. ಸಾಂಜೆಚಿಂ ಪಾಂಚ್ ಜಾಂವ್ಕೀ ತಿಣೆಂ ಉಟ್ತಾನಾ ತಿಚಿ ತಕ್ಲಿ ಕಿತ್ಯಾಕ್‌ಗೀ ಜಡ್ ಜಾಲ್ಲೆಪರಿಂ ಭೊಗ್ಲೆಂ. ಆನಿಂ ದೊಳೆ ಉಘಡುನ್ ಉಟೊಂಕ್ ಪಳೆತಾನಾ ಸಗ್ಳೆಂ ಆಂಗ್ ದುಖ್ತಾಲೆಂ. ಆನಿಂ ಸಗ್ಳೆಂ ವಸ್ತುರ್ ಪಿಡ್ಡ್ಯಾರ್ ಜಾಲ್ಲೆಂ. ಕೇಸ್ ಸಗ್ಳೆ ಕಿಸ್ಪರ್‌ಲ್ಲೆ. ವೆಗಿಂ ವೆಗಿಂ ಉಟೊನ್ ತೆಂ ನಾಣಿಯೆಕ್ ವಚೊನ್ ನಾವ್ನ್ ಆಯ್ಲೆಂ. ಭುರ್ಗಿಂ ಯೆಂವ್ಚಾಧಿಂ ನಾವ್ನ್ ಜಾಯ್ಜಯ್ ಮ್ಹಣೊನ್ ನಾವ್ನ್ ಯೇವ್ನ್ ಭಾಯ್ರ್ ಬೊಸ್ಲೆಂ.

ಮುಂದರ್‍ಸಿಲಾಂ...

Tags: Vally Quadras,e konkani novel, Konkani, Mangalore, Mangalorean, Mother Tongue

From around the world

ಪಾಟಿಂ ಗಾಂವಾಕ್ - ಅವಸ್ವರ್ 6

Post your comments

ಅವಸ್ವರ್ 1

ಅವಸ್ವರ್ 2

ಅವಸ್ವರ್ 3

ಅವಸ್ವರ್ 4

ಅವಸ್ವರ್ 5

ಅವಸ್ವರ್ 6

ಅವಸ್ವರ್ 7

ಅವಸ್ವರ್ 8

ಅವಸ್ವರ್ 9

ಅವಸ್ವರ್ 10

ಅವಸ್ವರ್ 11

ಅವಸ್ವರ್ 12

ಅವಸ್ವರ್ 13

ಅವಸ್ವರ್ 14

ಅವಸ್ವರ್ 15

ಅವಸ್ವರ್ 16

ಅವಸ್ವರ್ 17

ಅವಸ್ವರ್ 18

ಅವಸ್ವರ್ 19

ಅವಸ್ವರ್ 20

ಅವಸ್ವರ್ 21

ಅವಸ್ವರ್ 22

ಅವಸ್ವರ್ 23

ಅವಸ್ವರ್ 24

ಅವಸ್ವರ್ 25

ಅವಸ್ವರ್ 26

ಅವಸ್ವರ್ 27

ಅವಸ್ವರ್ 28

Connect

Our Address
Mangalore

Our Address
Udupi

Our Address
Dubai

From around the world

Post your comments

Connect

Our AddressMangalore

Our AddressUdupi

Our AddressDubai

Our Address
Mangalore

Our Address
Udupi

Our Address
Dubai