:: ಮಾಯ್ ಭಾಸ್

ಹಾಂಗಾಚೆಂ ಜಿವಿತ್ ಕೊಣಾಕ್ ಫುಲಾಂಚಿ ಗಜ್ಡಿ ತರ್ ಕೊಣಾಕ್ ಖಾಂಟ್ಯಾಂಚೊ ಮುಕುಟ್. ಕೊಣಾಕ್ ಗಲ್ಫಾಚೆಂ ಕಾಮ್ ಅಂತ್ರಳಾರ್ ಉಭಯ್ತಾ ತರ್ ಕೊಣಾಕ್ ಜೆರ್ಭಾಂದ್ ಮಾರ್ತಾ ಆನಿ ಖಾಂದ್ಯಾರ್ ಖುರಿಸ್ ದಿತಾ. ಹಾಂಗಾಯ್ ಜುದೆವ್ ಕಾಂಯ್ ಉಣೆಂ ನಾಂತ್. ಕರ್ಚೆಂ ಸಗ್ಳೆಂ ಕರುನ್ ನಿಮಾಣೆಂ ಆಪ್ಣಾನ್ ಕಿತೆಂಚ್ ಕರುಂಕ್ ನಾ ಮ್ಹಣೊನ್ ಪಿಲಾತಾಪರಿಂ ಹಾತ್ ಧುಂವ್ಚೆಂ ಕಾಂಯ್ ಉಣೆಂಗೀ? ಪೆಲ್ಯಾಂಚಾ ದುಃಖಾಂನಿ ನ್ಹಾಂವ್ಚೆ ಕಾಂಯ್ ಉಣೆಂಗೀ? ಹಾಂಚೆ ಮಧೆಂ ಮನ್ಶಾಂಕ್ ಏಕ್ ನಿಸಣ್ ಜಾಂವ್ನ್ ವಾಪಾರ್‍ಚೆ ಮನಿಸ್ ಉಣೆಂಗೀ? ಗರ್ಜ್ ಜಾತಾ ಪರ್‍ಯಾಂತ್ ಫುಲಾಂ ಮಾಳುನ್ ಉಪ್ರಾಂತ್ ಜೆವ್‌ಲ್ಲ್ಯಾ ಬೊಶಿಯೆಚೆರ್‌ಚ್ ತೋಂಡ್ ಧುವ್ನ್ ವೆಚೆ ಕಿತ್ಲೆಶೆ ನಾಂತ್? ಮನ್ಶಾಕ್ ಸಾರ್‍ಕೊ ವಾಪಾರ್‍ಲೊ ಆನಿ ಸಾರ್‍ಕಿ ಶಿಡಿ ಚಡ್ತಚ್ಚ್ ತಿ ನಿಸಣ್ ಕಿತ್ಯಾಕ್? ಕೊಣೀಂ ತಿ ನಿಸಣ್ ಖಾಂದ್ಯಾರ್ ಘೆವ್ನ್ ವಚಾನಾ. ಮನ್ಶಾಂಚಿ ಸಮ್ಜೊಣಿಂ ಪ್ರಾಯೆನ್ ಮೆಜ್ಚೆ ಥೊಡೆ. ಪ್ರಾಯ್ ಕತ್ತ್ಯಾಕೀ ಜಾತಾ. ತರ್ ಕಾತ್ತೆಂ ಜಾಣ್ತೆಂವೆ ತರ್? ಫಕತ್ತ್ ಆಪುಣ್ ಮಹಾನ್, ಆಪುಣ್ ಬರೊ ಆಪ್ಣಾಚೆಂ ಶ್ರೇಶ್ಟ್ ಆನಿ ಆಪ್ಣಾಚೆಂ ಬರೆಂ ಆನಿ ಹೆರಾಂ ಸಗ್ಳಿಂ ಕೀಳ್ ಮ್ಹಳ್ಳೆಂ ಚಿಂತಾಪ್ ಏಕ್ ಪಿಡಾ ನಯ್ಗೀ? ಅಸಲಿ ಪಿಡಾ ತಾಂಚಾ ಕುಟ್ಮಾಕ್ ಕಶಿಯ್ ಸತ್ತ್ಯಾನಾಸ್ ಕರ್ನ್ ಗೆಲ್ಲಿ ಪಿಡಾ. ಜಿ ಆಪ್ಲ್ಯಾ ದೊಳ್ಯಾಂಕ್ ದಿಸಾನಾತ್‌ಲ್ಲಿ ಪಿಡಾ ಜಿ ಹೆರಾಂಕೀ ಪಿಡೇಸ್ತ್ ಕರುಂಕ್ ಭಾಯ್ರ್ ಸರ್ಚಿ ಪಿಡಾ. ತೊ ಪಾಡ್, ಹೊ ಪಾತ್ಕಿ ತೊ ಘಾತ್ಕಿ ಹೊ ಕೀಳ್ ಮ್ಹಣೊನ್ ಸದಾಂ ಪೆಲ್ಯಾಂಚೊ ಖೊಡಿ ಕಾಡ್ಚೆ ಸುಭಾಗಿ ಆಮ್ಚೆಮಧೆಂ ಕಿತ್ಲೆ ನಾಂತ್? ಉಪ್ರಾಂತ್ ಸಗ್ಳ್ಯಾಂಚೊ ಖೊಟೊ ಖಾವ್ನ್ ಕೊನ್ಶಾರ್ ಶಿಮ್ಟಿ ಪಂದಾ ಘಾಲುನ್ ಬೊಸೊನ್ ಎಕಾ ತತ್ವ್ ಜ್ನಾನಿಪರಿಂ ಅಪ್ಣಾಚಿ ಪಾಟ್ ಥಾಪ್ಡುನ್ ಘೆಂವ್ಚೆ ಪಿಶೆ ಕಾಂಯ್ ಆಮ್ಚೆಮಧೆಂ ಉಣೆಂಗೀ? ಹ್ಯಾ ಆಂದ್ಳ್ಯಾಪಣಾಥಾವುನ್ ಸುಡ್ಕಾ ಘೆಂವ್ಕ್ ಕಿತ್ಲೆ ಕಶ್ಟ್? ಆಪ್ಣಾಕ್ ಹೆರಾಂ ಸವೆಂ ಹೊಂದ್ವೊನ್ ಜಿಯೆಂವ್ಕ್ ಅಸಾಧ್ಯ್. ಹೆರಾಂ ಸೊಡ್ ಆಪ್ಲ್ಯಾ ಹಾತ್ ಧರ್‌ಲ್ಲ್ಯಾ ಬಾಯ್ಲೆಕ್ ತಿಚೆಂ ಜಿವಿತಾಚೊ ಭೊಂಗೊಸ್ತೊಳ್ ಕರ್ಚಾ ಹಾಂಚಾ ಪಿಡೆಂತ್ ಹೆರಾಂಕ್ ಪಿಡೆಸ್ತ್ ಮಾತ್ರ್ ಕರ್‍ಯೆತ್ ಶಿವಾಯ್ ಸಮಾಜೆಕ್ ಬರೆಂ ನ್ಹಂಯ್.

ಜರೀ ತರೀ ತಾಂಚಾ ನಾಕ್ಶೆ ಇಡ್ಯಾಂತ್ ಕಾಂಯ್ ಇಲ್ಲಿ ಲಜ್ ಆನಿ ಮಾನ್ ಮರ್‍ಯಾದ್ ಆಸ್ಲ್ಯಾರ್ ತಾಣಿಂ ತಾಂಚಾ ಗಳ್ಯಾಕ್ ದಾಂತೆಫಾತೊರ್ ಬಾಂಧುನ್ ಗುಂಡಿಯೆಕ್ ಉಡ್ಲ್ಯಾರೀ ಉದ್ಕಾಂತ್ ಆಸ್ಚಾ ಮಾಸ್ಳ್ಯಾಂಕ್ ಹಾಂಚಿ ಪಿಡಾ ಲಾಗತ್.

ಎಕೆಕ್ಲೆ ಎಕೆಕಾ ಪಿಡೆಚೆ. ಕೋಣಾಕ್ ಫಕತ್ತ್ ಘಾಮ್ ಕಾಡುನ್ ಮಿನತೆನ್ ಕಾಮ್ ಕರ್ಚಿ ಪಿಡಾ ತರ್ ಥೊಡ್ಯಾಂಕ್ ಮೆಜಾ ವಯ್ಲೆಂ ಕೆಳೆಂ ಕಾಡುನ್ ಫಿಲ್ಯಾದ್ ಜೊಡ್ಚಿ ಪಿಡಾ. ಹ್ಯಾ ಗಲ್ಫಾಂತ್‌ಯಿ ಸರ್ವ್ ಥರಾಚೆ ಪಿಡೇಸ್ತ್ ಆಸ್‌ಲ್ಲೆ. ಹಾಂಗಾ ಕೋಣ್ ಆಪ್ಲೆ ಕೋಣ್ ಪರ್ಕಿ ಮ್ಹಣೊನ್ ಚಿಂತ್‌ಲ್ಲೆಪರಿಂ ನಾ. ಆಪ್ಲೆ ಮ್ಹಣೊನ್ ಲಾಗಿಂ ವೊಡುಲ್ಲೆಪರಿಂ ನಾಂ ಆಪಡ್ಲೆಂಯ್ ಕಿತ್ಯಾಕ್ ಧುವ್ನ್ ಸೊಡ್ ಮ್ಹಳ್ಳೆಪರಿಂ ಕಾಂಯ್ ಗಳ್ಯಾರ್ ಪಡ್ತಿತ್. ಆನಿ ಪೆಲೆ ಮ್ಹಣೊನ್ ಪಯ್ಸ್ ಲೊಟ್‌ಲ್ಲೆಪರಿಂ ನಾ. ಗರ್ಜೆ ಆಕಾಂತಾಂತ್ ಪಾವಜೆ ತರ್ ತಾಣಿಂ ಮಾತ್ರ್. ತಾಂಚೆ ಮಧೆಂ ನೀಜ್ ಗರ್ಜೆಕ್ ಪಾಂವ್ಚೆ ಮ್ಹಳ್ಯಾರ್ ಇಶ್ಟಾಂನಿ ಮಾತ್ರ್.

ಹಾಂಗಾ ಜಿಯೆಂವ್ಚೊ ಸಾದೊ ಲೋಕ್ ಖಂಚಾ ಖಂಚಾ ಸ್ಥಿತೆರ್ ಜಿಯೆತಾ? ಕೊಣಾಕ್ ಪೊಟಾಕ್ ಖಾಂವ್ಕ್ ಸಯ್ತ್ ಚಾರ್ ಪಾವ್ಟಿಂ ಚಿಂತಿಜಾಯ್ ಪಡ್ತಾ. ಸುಕೊ ಸಾಂಭಾಳ್ ಮೆಳ್ಚಾಂಕ್ ಸಗ್ಳೆಂ ಮೊಲಾಕ್ ಹಾಡಿಜಯ್. ಏಕ್ ಖೆಲೆಂ ತರ್ ಉಣೆಂ ಜಾತಾ ಆನಿ ದೋನ್ ಖೆಲ್ಯಾರ್ ಚಡ್ ಜಾತಾ ಮ್ಹಳ್ಳಿ ಸ್ಥಿತಿ. ಖಾಂವ್ಚಾ ಹರ್‍ಯೆಕಾ ಖಾಣಾಕ್ ಜಾಂವ್ಚೊ ಖರ್ಚ್ ದೋನ್ ತೀನ್ ಪಾವ್ಟಿಂ ಚಿಂತುನ್ ಕಿತ್ಲೆಸೊ ಲೋಕ್ ಬೊಸಾನಾ? ತಾಂಕಾ ಉಟ್ತಾನಾ ಬೊಸ್ತಾನಾ ಯೆಂವ್ಚಿಂ ಚಿಂತ್ನಾಂ ತಾಂಚಾ ಗಾಂವ್ಚಿಂ ಆನಿ ಗಾಂವಾಂತ್ ಕಶ್ಟೊಂವ್ಚಾ ಮನ್ಶಾಂಚಿಂ. ಥೊಡಿಂ ಸಾರ್‍ಕೆಂ ರಾವೊಂಕ್‌ಯಿ ಕಶ್ಟತಾತ್. ಹಾಂಗಾಚಿಂ ಕಾನೂನಾಂಯ್ ತಸಲಿಂಚ್. ಪೊಯ್ಶೆ ಆಸ್ಚಾಂನಿ ಮಾತ್ರ್ ತಾಂಚಾ ಕುಟ್ಮಾಕ್ ಹಾಡ್ಯೆತ್ ಆನಿ ಉಣ್ಯಾ ಸಾಂಭಾಳಾಚಾಂನಿ ಏಕ್ ಘರ್‌ಯಿ ಭಾಡ್ಯಾಂಕ್ ಘೆತ್‌ಲ್ಲೆಪರಿಂ ನಾ. ದೆಖುನ್ ಕೊಣಾ ಕೊಣಾಚಾ ಘರಾ ಭಾಡೆಂ ದೀವ್ನ್ ರಾಂವ್ಚೆಂ ಪಡ್ತಾ. ಆನಿ ಹಾಂಗಾ ಹೊಯ್ ಏಕ್ ದಂಧೊಚ್ಚ್. ಕೋಣ್ ಎಕಾ ಕುಡಾಂತ್ ದೊಗಾಂಕ್ ಘಾಲ್ತಾ ತರ್ ಕೊಣಾಚಾ ಘರಾಂನಿ ಎಕಾ ಕುಡಾಂತ್ ಧಾ ಭಾರಾ ಜಣಾಂಕೀ ಭಾಡ್ಯಾಕ್ ದವರ್ತಾತ್. ಕಿತೆಂ ಕರ್ತೆಲೆ ತೆ ಬಾವ್ಡೆ? ಕಾಮಾಥಾವ್ನ್ ಪಯ್ಸ್ ಆಸ್ಲ್ಯಾರ್ ತಾಂಕಾ ತಾಣಿಂ ಕಾಮಾಕ್ ವೆಚಾ ಗಾಡಿಯೆಕ್ ಬಾಡೆಂ ದೀಂವ್ಕ್ ಆಸ್‌ಲ್ಲೆಂ. ಕಾಂಯ್ ಇಲ್ಲೆ ಪೊಯ್ಶೆ ಉರ್ತಿತ್ ತರ್ ತೆ ಪೊಯ್ಶೆ ರಾಖೊನ್ ರಾಂವ್ತಾತ್ ಕೊಣಾಚೊ ಬಾಯ್ಲ್ಯೊ, ಕೊಣಾಚಿಂ ಭುರ್ಗಿಂ, ಕೊಣಾಚೊ ಆವಯೊ, ಕೊಣಾಚಿಂ ಸಯ್ರಿಂ. ಆನಿ ಹ್ಯಾ ಪೊಯ್ಶ್ಯಾಂ ಖಾತಿರ್ ಹಾಂಗಾಸರ್ ಹರ್‍ಯೆಕ್ ಘಡಿ ಹರ್‍ಯೆಕ್ ದೀಸ್ ಮಿನತ್ ಕರ್‍ಚಾಂಕ್ ಹಿಚ್ ಏಕ್ ವಾಟ್ ಆನಿ ಹೆಂಚ್ ತಾಂಚೆ ಜಿವಿತ್.

ಕೋಣ್ ಬಾವ್ಡೊ ಘರ್ ಖಾತ್ಯಾಂತ್ ಕಾಮ್ ಕರ್‍ಚೊ, ತಾಣೆಂ ಉಟ್ಟಾ ಬೊಸ್ತಾನಾ ಗಾಳಿ ಸೊವೊ ಆಯ್ಕಜಯ್. ದೀಸ್‌ಭರ್ ಕಾಮ್ ಕರುನ್೦ಯಿ ಎಕಾ ಚೊರಾಪರಿಂ ಘರಾ ರಾವಾಜಯ್. ತಾಚಾ ಧನ್ಯಾಂನಿ ಪಳೆಲ್ಲೆಂ ತಾಣೆಂ ಪಳೆಂವ್ಚೆಪರಿಂ ನಾ. ತಾಣಿಂ ಖೆಲ್ಲೆಂ ಹಾಣೆಂ ಖೆಲ್ಲೆಪರಿಂ ನಾ. ತಾಣಿಂ ನೆಸ್‌ಲ್ಲೆಪರಿಂ ಹಾಣೆಂ ನೆಸ್‌ಲ್ಲೆಪರಿಂ ನಾ? ಹೆಂ ತಾಂಚೆಂ ಜಿವಿತ್ ಆನಿ ಹಾಣೆಂ ಕಿತೆಂ ಜೆವಿಜಯ್ ಆನಿ ಕಿತೆಂ ನೆಸಾಜಯ್? ಕಶೆಂ ಜಿಯೆಜಾಯ್ ಮ್ಹಳ್ಳೆಂ ಸ್ವಾತಂತ್ರ್ ಹಾಕಾಚ್ಚ್ ನಾ. ತರೀ ಅಸಲೆಂ ಜಿವಿತ್ ತಾಕಾ ಜಿಯೆಜಾಯಿಚ್ಚ್ ಆನಿ ಹೆರ್ ಖಂಚಿಚ್ಚ್ ವಾಟ್ ತಾಕಾ ನಾಂ. ಕಿತ್ಯಾಕ್ ಮ್ಹಳ್ಯಾರ್ ಹಾಣೆಂ ಕಿತೆಂಯ್ ಚಡುಣೆಂ ಜಾಲೆಂ ಮ್ಹಣೊನ್ ಉಪ್ರಾಟ್ಲೊ ತರ್ ಹಾಚಾ ಕಾಮಾಚಿ ಭದ್ರತಿ ನಾ. ಫಾಲ್ಯಾಂಚ್ ಕಾಮಾಂತ್ಲೊ ಖೊಟ್ ಘಾಲ್ನ್ ಉಸ್ಳಾಯ್ಲೊ ತರೀ ಉಸ್ಳಾಯ್ಲೊ. ಬರೊ ಮನಿಸ್ ತರ್ ಇತ್ಲೆಂಚ್ ಕರಿತ್. ಹಾಚಾಕೀ ಹಾರಾಮಿ ತರ್ ಆಪ್ಲ್ಯಾ ಬಾಯ್ಲೆಚೆರ್, ಧುವಾಂಚೆರ್ ದೊಳೆ ಘಾಲೆ ಮ್ಹಳ್ಳೊ ಗುನ್ಯಾಂವ್ ಮಾಂಡುನ್ ಜಯ್ಲಾಕ್ ಲೊಟ್ಲೊ ತರೀ ಲೊಟ್ಲೊ. ದಿಸಾಕ್ ಜಾಗೊ ಆಸ್ತಾನಾ ಭಿರಾಂತ್, ನಿದ್ಲ್ಯಾರೀ ಭಿರಾಂತ್. ಸಾರ್‍ಕಿ ನೀದ್ ನಾ. ಕೆನ್ನಾ ಉಟಯ್ತಿತ್ ಮ್ಹಣೊನ್ ಕೊಣೀಂ ನೆಣಾಂತ್. ನಿದೆಂತ್‌ಯೀ ಭಿರಾಂತ್ ಆನಿ ಹಿ ಸಗ್ಳಿ ಭಿರಾಂತ್ ಫಕತ್ ಆಪ್ಲ್ಯಾ ಕುಟ್ಮಾ ಖಾತಿರ್. ತಶೆಂ ಮ್ಹಣೊನ್ ಘರ್ ಕಾಮಾಂತ್ ಆಸ್ಚಾ ಸಗ್ಳ್ಯಾಂಕ್ ಕಾಂಯ್ ಹಿ ಜಿಣಿಂಚ್ಚ್ ಜಿಯೆಂವ್ಕ್ ಪಡ್ತಾ ಮ್ಹಣೊನ್ ಕಾಂಯ್ ನಾ. ಥೊಡ್ಯಾಂಕ್ ಬರೆಂ ಘರಾಣೆಂಯಿ ಮೆಳ್ತಾ. ತಾಂಕಾಂಯ್ ತ್ಯಾ ಘರಾಣ್ಯಾಂತ್ ಮಾಯಾ ಮೋಗ್ ಮೆಳ್ತಾ. ತಾಂಕಾಯ್ ತ್ಯಾ ಘರಾಂತ್ ಎಕಾ ಸಾಂದ್ಯಾಪರಿಂ.

ಲೆಕ್ಚಿಂ ಆಸಾತ್. ಪುಣ್ ಶೆಂಭೊರಾಂತ್ ಹಾಂಚೊ ಅಂಖೊ ಫಕತ್ ಧಾ ಯಾ ಪಂದ್ರಾ.

ಘರ್ ಖಾತ್ಯಾಂತ್ ಕಾಮ್ ಕರ್‍ಚಾಂಚಿ ಹಿ ವೀದ್ ವಾವ್ಳಿ ತರ್ ಥೊಡೆ ಬಾವ್ಡೆ ಬಿಲ್ಡಿಂಗಾ ಬಾಂದ್ಚೆಲಾಗಿಂ ಹೆಲ್ಪರ್ ಜಾವ್ನ್ ಕಾಮ್ ಕರ್‍ತಾತ್ ತಾಂಚೊ ಗೋಳ್ ಮಾತ್ರ್ ದೇವ್ ಜಾಣಾಂ. ತಾಂಕಾ ವೋತ್ ಮ್ಹಣೊನ್ ನಾ ಸಾವ್ಳಿ ಮ್ಹಣೊನ್ ನಾ. ತ್ಯಾ ಉಭ್ಚಾ ಹುನ್ ರೆಂವೆರ್ ಆಂಗಾಕ್‌ಚ್ ಹುಲ್ಪಾಂವ್ಚಾ ಧಗಿಂತ್ ತಾಂಕಾ ಆಂಗ್ ಮೋಡ್ನ್ ಕಾಮ್ ಕರುಂಕ್ ಆಸ್ತಾಲೆಂ. ತಶೆಂ ಮ್ಹಣೊನ್ ತಾಂಚಾ ಜಿವಾಚಿ ಖಾತ್ರಿ ತಾಂಕಾಂಚ್ ನಾತ್‌ಲ್ಲಿ. ಚಡಾವತ್ ಜಾವ್ನ್ ಅಶೆಂ ಘಡಾನಾ ತರೀ ಕಾಂಯ್ ಅವ್ಘಡಾಂತ್; ವಯ್ರ್ ಕಾಮ್ ಚಲೊನ್ ಆಸ್ತಾನಾ ಕಾಂಯ್ ಪಾಂಯ್ ಚುಕೊನ್ ಪಡ್ಲೊ ಯಾ ವಯ್ರ್ ಕಾಮ್ ಚಲೊನ್ ಆಸ್ತಾನಾ ಸಕಯ್ಲ್ ಕಾಮ್ ಕರ್ತಾನಾ ವಯ್ರ್ ಥಾವ್ನ್ ಕಾಂಯ್ ಚುಕೊನ್ ಪಡ್ಲೆಂ ತರ್ ತಾಚಾ ಜಿವಾಕ್ ಅಪಾಯ್ ಆಸ್‌ಲ್ಲೊ. ಆನಿ ಥಂಯ್ಚ್ ತೊ ಕೋಣೀಂ ಶನಿ ಲಾಗ್‌ಲ್ಲೊ ಮೆಲೊ ತರ್ ತಾಕಾ ವಿಚಾರ್ ಕರ್ಚಿಂ ಕೊಣೀಂ ನಾಂತ್. ತರೀ ಹ್ಯಾ ಕಾಮಾಕ್‌ಯಿ ಹಜಾರಾಂನಿ ಪೊಯ್ಶೆ ಯೇಜಂಟಾಂಕ್ ಭರುನ್ ಯೆಂವ್ಚೆ ಕಾಂಯ್ ಉಣೆಂ ನಾತ್‌ಲ್ಲೆ. ಸಾರ್ಕೊ ಕಾಮಾಚೊ ವೇಳ್ ನಾಂ, ಸಾರ್ಕೆಂ ಜೇಂವ್ಕ್ ಜೆವಾಣ್ ನಾ, ಆನಿ ಅಸಲ್ಯಾ ಸ್ಥಿತೆಂತ್ ತಾಣಿಂ ಕಾಮ್ ಕರಿಜಯಿಚ್ಚ್. ಕೆನ್ನಾ ತೊಂಡಾಕ್ ವಸ್ತ್ರಾ ಕುಡ್ಕೊ ಬಾಂಧುನ್ ಆನಿ ಕೆನ್ನಾ ದೊಳ್ಯಾಂಕ್ ಗ್ಲಾಸ್ ಧರುನ್. ಹಾಂಗಾಚಾ ವೊತಾಂತ್ ಕೊಣಾಯ್ಕೀ ಭಾಯ್ರ್ ಯೇಂವ್ಕ್ ಜಾಯ್ನಾಂ ತವಳ್ ತಾಣಿಂ ತ್ಯಾ ವೊತಾಂತ್ ವೊಜಿಂ ಉಕ್ಲುಂಕ್ ಆಸ್‌ಲ್ಲಿಂ. ಆನಿ ತಾಂಚೆಂ ರಗಾತ್ ಘಾಮಾರುಪಾರ್ ವಾಳ್ತಾಲೆಂ. ಇತ್ಲಿ ಮಿನತ್ ಕರ್ನ್ ತಾಂಕಾ ಮೆಳ್ಚೊ ಸಾಂಭಾಳ್ ಕಿತ್ಲೊ? ಕಾಂಯ್ ಆಮ್ಚಾ ದೇಶಾಚೊ ಆಟ್ ಯಾ ನೋವ್ ಹಜಾರ್.

ಥೊಡ್ಯಾಂಕ್ ಕಾಂಯ್ ಚಡ್ ಕಾಮ್ ಕೆಲ್ಯಾರ್ ಓವರ್‌ಟಾಯ್ಮ್ ಮೆಳ್ತಾ ಆನಿ ಥೊಡ್ಯಾಂಕ್ ಕಾಮಾಕ್ ಇತ್ಲಿಂಚ್ ವೊರಾಂ ಮ್ಹಣೊನ್ ನಾಂತ್. ಹಾಂಗಾ ಕಾನುನಾಂ ಬರಿಂ ಆಸಾತ್. ಗಿಮೆಚಾ ದಿಸಾ ಜರ್ ಧಗ್ ಪನ್ನಾಸ್ ಡಿಗ್ರಿಚಾಕೀ ಚಡ್ ಆಸಾ ತರ್ ತ್ಯೇ ದೀಸ್ ಕಂಪೆನಿಂತ್ ಕಾಮ್ ಕರ್ಚಾಂಕ್ ರಜಾ ದೀಂವ್ಕ್ ಆಸ್‌ಲ್ಲಿ. ಪುಣ್ ಕಾರ್‍ಯಾಂತ್ ಅಶೆಂ ಘಡ್ಚೆಂ ಹಜಾರಾಂತ್ ಏಕ್ ತರೀ ತೆಂ ವ್ಹಡ್. ಹ್ಯಾ ಕಾಮಾಂ ಮಧೆಂ ತಾಂಚಾ ಮತಿಂತ್ ಕಸಲಿಂ ಚಿಂತ್ನಾಂ ಆಸ್ತಿತ್? ಫಕತ್ತ್ ಆಪ್ಲ್ಯಾ ಕುಟ್ಮಾಚೊ ಆನಿ ಮಾಂಯ್‌ಗಾಂವಾಂತ್ ಆಸ್ಚಾ ಆಪ್ಲ್ಯಾ ಮನ್ಶಾಂಚೊ. ಹಾಂಚಾ ಮಧೆಂ ಮನ್ಶಾಪಣಾಚೆಂ ಚಿಂತಾಪ್ ಕಿತ್ಲೆಂ ಊಂಚ್ ಆಸಾ? ಕಾಂಯ್ ಎಕ್ಲ್ಯಾಚಾ ಘರಾ ಬರೆಂ ಫಾಲೆಂ ಜಾಲೆಂ, ಕೋಣಾಕ್ ಭುರ್ಗೆಂ ಜಾಲೆಂ ಕೊಣಾಚಾ ಪುತಾನ್ ಪಾಸ್ ಜಾಲ್ಲಿ ಖಬಾರ್ ಆಯ್ಲಿ ತರ್ ಕಿತ್ಲ್ಯಾ ಸಂತೊಸಾನ್ ತಾಂಚೊ ಸಂತೊಸ್ ಎಕಾಮೆಕಾ ವಾಂಟುನ್ ಘೆತಾತ್? ಕಸಲೊ ಸಂತೊಸ್ ತಾಂಚೊ? ಜಾಂವ್ಕ್ ಪುರೊ ತಾಂಚೊ ಸಂಭ್ರಮ್ ಏಕ್ ಲಾಡು ವಾಂಟುನ್ ಖಾಂವ್ಚೊ ಯಾ ಕಿತೆಂಯ್ ಆಸ್ಯೆತ್.

ತರೀ ಹೆರಾಂಚೊ ಸಂತೊಸ್ ಆಪ್ಲೊಚ್ಚ್ ಸಂತೊಚ್ ಮ್ಹಣೊನ್ ತೆ ಚಿಂತಾಪ್. ತಶೆಂಚ್ ತಾಂಚೆಪಯ್ಕಿ ಎಕ್ಲ್ಯಾಚೊ ಕೊಣೀಂ ಆಪ್ಲೊ ಸರ್ಲೊ ತರ್ ತಾಚಾ ದುಃಖಾಂತ್ ಕಶೆ ವಾಂಟೆಲಿ ಜಾತಾತ್? ಹೆಂ ಜಿವಿತ್ ಕಿತ್ಲೆಂ ಬರೆಂ ಜಿವಿತ್? ಸಗ್ಳ್ಯಾಂಕೀ ಕಶ್ಟ್ ಮ್ಹಳ್ಯಾರ್ ಕಿತೆಂ? ಮಿನತ್ ಮ್ಹಳ್ಯಾರ್ ಕಿತೆಂ? ಆಶಾ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಕಳಿತ್ ಆಸಾ. ಎಕ್ಸುರಿಂ ಅಸ್ಚಾ ತಾಂಕಾ ತಾಂಚೆಸವೆಂ ಕಾಮ್ ಕರ್ಚಿಂಚ್ಚ್ ತಾಂಚಿಂ ಸಾಂಗಾತಿಂ. ಗಾಂವಾಂತ್ ಆಸ್ಚಾ ತಾಂಚಾ ಘರ್ಚಾಂಕ್ ಹಿಂ ಗಲ್ಫಾಂತ್ ಆಸಾತ್ ತರೀ ಗಲ್ಫಾಂತ್ ಖಂಚಾ ಸ್ಥಿತೆರ್ ಆಸಾತ್? ಕಿತೆಂ ಖಾತಾತ್? ಕಿತೆಂ ಪಿಯೆತಾತ್? ಮ್ಹಳ್ಳೆಂ ಸಮ್ಜೊಂಕ್ ಕೊಣೀಂ ನಾಂತ್. ತಾಂಕಾಂಯ್ ತಾಂಚೆ ಅಕ್ಲಾಸ್ ಆನಿ ಆಕಾಂತ್ ಸಂಸಾರಾಕ್ ಸಾಂಗೊಂಕ್ ನಾಕಾ. ಸಂಸಾರಾಕ್ ಕಳ್ತಚ್ ಜಾಂವ್ಚೆಂ ತರೀ ಕಿತೆಂ? ಕಾಂಯ್ ಇಲ್ಲಿ ನಾಲಿಸಾಯ್ ಆನಿ ಅಕ್ಮಾನ್. ಸಮಾಜೆಂತ್ ತಾಂಕಾಂ ಹೆರಾಂ ಮುಖಾರ್ ಲ್ಹಾನ್ ಕರುಂಕ್, ಲ್ಹಾನ್ ಉಲಂವ್ಕ್ ಹೆರಾಂಕ್ ಏಕ್ ಆವ್ಕಾಸ್ ಸೊಡ್ಲ್ಯಾರ್ ಹೆರ್ ಕಿತೆಂಚ್ ನ್ಹಂಯ್. ಥೊಡಿಂ ಕಿತ್ಲೆ ಕಶ್ಟ್ ಆಯ್ಲ್ಯಾರೀ ಆಪ್ಲ್ಯಾ ಕುಟ್ಮಾಚಾ ಸಾಂದ್ಯಾಂಕ್ ಬರೆಂ ನೆಸಾಪ್ ದೀಶೆಂ ಪಳೆತಾತ್ ತರ್ ಹೆರಾಂಕ್ ತಾಂಚೆರ್ ಮೊಸೊರ್, ಪಳೆ ತಾಚೊ ಬಾಪುಯ್ ತಾಚಿ ಆವಯ್ ಥಂಯ್ ಗಲ್ಫಾಂತ್ ಕತ್ತೆ ಚಾಕ್ರಿ ಕರ್ತಾ ಆನಿ ಹಾಂಗಾ ಪಳೆ ತಾಚಿಂ ಭುರ್ಗಿಂ ಮಿರಯ್ತಾತ್.

ಅಸಲ್ಯಾ ಖಬ್ರಾಂಕ್ ಭಿಂಯೆವ್ನ್ ಬಾವ್ಡೆ ತೆ ಕಿತ್ಲೆ ಕಶ್ಟ್ ಆಯ್ಲ್ಯಾರೀ ಆಪ್ಲ್ಯಾ ವಾಂಟ್ಯಾಚಿ ಕೊಡು ಕಾಲ್ಸ್ ಮ್ಹಣೊನ್ ತಿ ಪಿಯೆತಾತ್ ಆನಿ ವಗೆಚ್ಚ್ ರಾವ್ತಾತ್.

ಹೆಂ ಗಲ್ಫಾಚೆಂ ಜಿವಿತ್ ಆನಿ ಕೋಣಾಯ್ಕೀ ಫಾವೊ ಕರಿನಾಕಾ ದೆವಾ. ಫಾವೊ ಕೆಲ್ಯಾರೀ ತಾಂಕಾ ಬರಿಂ ಕಾಮಾಂ ದೀ ಮ್ಹಳ್ಳಿಂ ಚಿಂತ್ನಾಂ ತಿಯೊಚಾ ಮತಿಂತ್ ಆಯ್ಲಿಂ. ತಾಕಾ ಕಿತ್ಲೆ ಕಶ್ಟ್ ಜಾಲ್ಯಾರೀ ಗಲ್ಫಾಕ್ ಆಯಿಲ್ಲ್ಯಾಂತ್ ನಂಯ್ಗೀ ತಾಚೆಂ ಘರ್ ಬರ್‍ಯಾನ್ ಚಲೊಂಕ್, ತ್ಯಾ ಘರಾಕ್ ವೀಜ್ ಸಕತ್ ಘಾಲುಂಕ್, ಫೋನ್ ಘಾಲುಂಕ್ ಸಾಧ್ಯ್ ಜಾಲೆಂ?

ಅಶೆಂ ತೊ ಮಯ್ನ್ಯಾಕ್ ಏಕ್ ಪಾವ್ಟಿಂ ಚುಕಾನಾಸ್ತಾಂ ಗಾಂವಾಕ್ ಫೋನ್ ಕರುನ್ ಉಲಯ್ತಾಲೊ. ಆತಾಂತಾಂ ಯೆಂವ್ಚಿಂ ಕಾಗ್ದಾಂ ಉಣಿಂ ಜಾವ್ನ್ ಆಯಿಲ್ಲಿಂ. ಫೋನ್ ಆಯಿಲ್ಲೆಂ ಕಿತ್ಲೆಂ ಬರೆಂ ಜಾಲೆಂ ಮ್ಹಣೊನ್ ತಿಯೊಕ್ ಆತಾಂ ಸಮ್ಜಾಲೆಂ.

ಕೋಣ್ ಹಾಸೊಂದಿ ಯಾ ಕೋಣ್ ರಡೊಂದಿ. ಪುಣ್ ವೆಳಾಚಿಂ ರೊದಾಂ ಕಸಲ್ಯಾಚಿಚ್ಚ್ ಪರ್‍ವಾ ಕರಿನಾಸ್ತಾಂ ಘುಂವ್ತಾಲಿಂ. ಆನಿ ಅಶೆಚ್ ದೀಸ್ ಪಾಶಾರ್ ಜಾತಾಲೆ. ಮಾರ್‍ಕುನ್ ರಜೆಂತ್ಲೊ ಯೇವ್ನ್ ಪರತ್ ದೋನ್ ವರ್ಸಾಂ ಉತ್ರಾಲ್ಲಿಂ. ಆನಿ ದೋನ್ ವರ್ಸಾಂಕ್ ಏಕ್ ಪಾವ್ಟಿಂ ಮೆಳ್ಚಿ ದೋನ್ ಮಹಿನ್ಯಾಚಿ ರಜಾ ಆಸ್‌ಲ್ಲ್ಯಾನ್ ತೊ ಪರತ್ ಗಾಂವಾಕ್ ವೆಚಾ ತಯಾರೆರ್ ಪಡ್ಲೊ. ಸಂಸಾರಾಚಿ ಫಿಕಿರ್ ತಾಕಾ ನಾತ್‌ಲ್ಲಿ.

ಹ್ಯಾ ದೋನ್ ವರ್ಸಾಂನಿ ತಾಣೆಂ ಎದೊಳ್‌ಚ್ ಘೆತ್‌ಲ್ಲ್ಯಾ ಜಾಗ್ಯಾಂತ್ ಬಾಂಯ್ ತಾಣೆಂ ಖೊಂಡಯ್ಲಿ, ಪಂಪು ಘಾಲಯ್ಲೊ ಆನಿ ಮಾಡ್ ಲಾಯ್ಲೆ ಆನಿ ಗಿಮೆಚಾ ದಿಸಾಂನಿ ತಾಂಕಾ ಸರಾಗ್ ಉದಾಕ್ ಸೊಡುಂಕ್ ಕಾಮಾಚಾಂಕ್ ನಮಿಯಾರ್ಲೊ. ಆನಿ ತಾಚಾ ಬಾಯ್ಲ್ ಭುರ್ಗ್ಯಾಂಕ್ ಇಲ್ಲೆಂ ಭಾಂಗಾರ್ ಕೆಲೆಂ ಆನಿ ಉರುಲ್ಲೆ ಪೊಯ್ಶೆ ಬೆಂಕಾಕ್ ಧಾಡ್ಲೆಂ. ಆನಿ ಹ್ಯೇ ಪಾವ್ಟಿಂ ಗಾಂವಾಂತ್ ಸಗ್ಳೆಂ ಸಾರ್ಕೆಂ ಆಸಾ ತರ್ ಪಾಟಿಂ ಯೇವ್ನ್ ಆನಿ ದೋನ್ ವರ್ಸಾಂ ಕಾಮ್ ಕರ್ಚಿಂ ಆನಿ ತ್ಯೇ ಉಪ್ರಾಂತ್ ಗಾಂವಾಂತ್‌ಚ್ಚ್ ರಾವೊನ್ ತಾಚಾ ತೊಟಾಚಿ ವೃದ್ಧಿ ಕರ್ಚಿ ಮ್ಹಣೊನ್ ತೊ ಮತಿಂತ್‌ಚ್ಚ್ ಲೇಕ್ ಘಾಲಿಲಾಗ್ಲೊ.

ತಿಯೊಕ್ ತಾಚೆಸವೆಂ ಗಾಂವಾಕ್ ಯೇಂವ್ಕ್ ತಾಣೆಂ ವಿಚಾರ್ಲೆಂ ಕುಟ್ಮಾಚೊ ಗರ್ಜೊ ಕೆದಿಂಕ್‌ಚ್ಚ್ ಮುಗ್ದಾನಾಂತ್ ತಿಯೊ, ಮ್ಹಜಾ ಕುಟ್ಮಾಂತ್ ತರೀ ತಿಚ್ಚ್ ಗತ್. ಪುಣ್ ತುಜೆಪರಿಂ ಸಗ್ಳೆಂ ಎಕಾಚ್ಚ್ ಮಾರಾನ್ ಫಾರಿಕ್ ಜಾಯ್ನಾ. ದೆಖುನ್ ತುಂ ತುಕಾ ಆಸ್ಚಿ ಚಾರ್ ಮಹಿನ್ಯಾಚಿ ರಜಾ ಘೆವ್ನ್ ಯೇ ಆನಿ ಉಪ್ರಾಂತ್‌ಲೆಂ ಉಪ್ರಾಂತ್ ಪಳೆವ್ಯಾಂ. ಮಾರ್ಕುಚಾ ಉತ್ರಾಂನಿ ಏಕ್ ಘಡಿ ತಿಯೊಚಾ ಮತಿಂತ್ ಗಾಂವಾಕ್ ವಚೊನ್ ಯೆಂವ್ಚಿ, ಆಪ್ಲ್ಯಾ ಬಾಯ್ಲ್ ಭುರ್ಗ್ಯಾಂಸವೆಂ ಇಲ್ಲೆ ದೀಸ್ ಖರ್ಚುಂಚಿ ಆಶಾ ಜರೂರ್ ಆಯ್ಲಿ ತರೀ, ತಾಣೆಂ ಗಾಂವಾಕ್ ವಚೊನ್ ಚಾರ್ ಮಹಿನೆ ಜಾತಾತ್ ಪರತ್ ತಿಚ್ಚ್ ಪರಿಗತ್ ಯೆತೆಲಿ ಮ್ಹಳ್ಳೆಂ ಭ್ಯೆಂ ತಾಚಾ ಮತಿಂತ್ ಖಾತಾಲೆಂ. ತ್ಯಾ ಶಿವಾಯ್ ಶೇಖ್ ಖಲೀಫಾ ತಾಚಾ ಮನ್ಶಾಂಕ್ ರಜಾ ಘೆನಾತ್ಲ್ಯಾರ್ ತ್ಯಾ ಮಹಿನ್ಯಾಂಚೊ ಸಾಂಭಾಳ್ ದಿತಾಲೊ ದೆಖುನ್ ತಿಯೊನ್ ತ್ಯಾ ಚಾರ್ ಮಹಿನ್ಯಾಂಚೊ ಸಾಂಭಾಳ್ ಘೆತ್‌ಲ್ಲೊ ಆನಿ ಬೇಂಕಾಚೆಂ ರೀಣ್ ಫಾರಿಕ್ ಜಾಂವ್ಚಾ ಖಾತಿರ್ ಗಾಂವಾಕ್ ಧಾಡ್‌ಲ್ಲೊ ದೆಖುನ್ ಆತಾಂ ಪರತ್ ರಜಾ ವಿಚಾರುಂಕ್ ತಾಕಾ ಸಾಧ್ಯ್ ನಾತ್‌ಲ್ಲೆಂ. ಆತಾಂ ಆಪ್ಣಾಸವೆಂ ಗಾಂವಾಕ್ ಯೇಂವ್ಕ್ ತಯಾರ್ ನಾತ್‌ಲ್ಲ್ಯಾ ತಿಯೊಕ್ ತೊಂಡಾ ಉತ್ರಾಕ್ ತಾಣೆಂ ಸಾಂಗ್ಲೆಂ ತರೀ ತಾಕಾ ತಿಯೊಚಾ ಘರಾ ವಚೊಂಕ್ ಮನ್ ನಾತ್‌ಲ್ಲೆಂ. ಎಕಾ ಥಾರಾಚೆಂ ಪರ್ಕಿ ಚಿಂತಾಪ್ ತಾಕಾ ಆಯ್ಲೆಂ. ಕಾಂಯ್ ಆಪ್ಣಾನ್ ತಿಯೊಚಾ ಖಾಸ್ಗಿ ಜಿಣ್ಯೆವಿಶ್ಯಾಂತ್ ಕಾಂಯ್ ಸಾಂಗೊಂಕ್ ನಾತ್‌ಲ್ಲೆಂ ತರ್ ತಿ ಗಜಾಲ್ ವಿಂಗಡ್. ಆತಾಂ ಸಾಂಗ್‌ಲ್ಲ್ಯಾನ್ ತಾಕಾ ದೊಡ್ಯಾನ್ ಲುಕ್ಸಾಣ್ ಜಾಲ್ಲಿ. ಏಕ್ ತಿಯೊ ಮಾರ್ಕುಚೆರ್ ಚಡುಣೆಂ ದೇಡ್ ವರ್ಸಾಂಭರ್ ಉಲಯಿಲ್ಲೊ ಯಾ ಮೆಳ್‌ಲ್ಲೊ ನಾ ಆನಿ ಹಿ ಖಬಾರ್ ತಿಯೊಚಾ ಬಾಯ್ಲೆಕ್ ಕಳ್ಳ್ಯಾ ತರ್ ಆತಾಂ ತಿಚಿಂ ಉತ್ರಾಂಯ್ ಆಯ್ಕೊಂಕ್ ಆಸ್ತೆಲಿಂ ಮ್ಹಳ್ಳಿ ಭಿರಾಂತ್ ತಾಕಾ ಆಸ್‌ಲ್ಲಿ ದೆಖುನ್ ಭಿತರ್ಲೆ ಭಿತರ್ ಹಿಂ ಚಿಂತ್ನಾಂ ದವ್ರುನ್ ಕಿತೆಂಚ್ ದಾಖಯ್ನಾತ್‌ಲ್ಲೆಪರಿಂ ತೊ ಚಲೊಂಕ್ ಲಾಗ್ಲೊ.

ಮಾರ್ಕುನ್ ಗಾಂವಾಕ್ ವೆಚಿ ತಯಾರಾಯ್ ಕೆಲ್ಲೆಪರಿಚ್ಚ್ ತಿಯೊನ್ ವಚೊನ್ ಭುರ್ಗ್ಯಾಂಕ್ ಇಲ್ಲಿಂ ವಸ್ತ್ರಾಂ ಮೊಲಾಕ್ ಘೆತ್ಲಿಂ, ಜೊಯೆಲಾಕ್ ಪೇಂಟಾಂ ಘೆತ್ಲಿಂ, ಆನಿ ಎಸ್ತೆಲಾಕ್ ಏಕ್ ಕಾಗಾದ್ ಆನಿಂ ಡ್ರಾಫ್ಟ್ ಕರ್ನ್ ತಿ ಮಾರ್ಕುಚಾ ಹಾತಾಂತ್ ದಿಲಿ. ಆನಿ ಘರಾಕ್ ಫೋನ್ ಕರುನ್ ಎಸ್ತೆಲಾಕ್ ತ್ಯೇ ವಿಶ್ಯಾಂತ್ ಸಾಂಗ್ಲೆಂ.

ಮನಿಸ್ ಗಲ್ಫಾಕ್ ಯೆತಾನಾ ಕಿತ್ಲೊ ಖಂತೀಶ್ಟ್ ಜಾವ್ನ್ ಆಸ್ಲ್ಯಾರೀ, ಆನಿ ಗಲ್ಫಾಕ್ ಯೇವ್ನ್ ಕಿತ್ಲೆ ಕಶ್ಟ್ ಸೊಸ್ಲ್ಯಾರೀ ಪಾಟಿಂ ತಾಚಾ ಗಾಂವಾಕ್ ವೆತಾನಾ ಸಂತೊಸಾನ್ ವೆತಾ. ಕಶೆಂ ಏಕ್ ಪಾವ್ಟಿಂ ಗಾಂವಾಕ್ ಪಾವ್ತಾಂ ಆನಿ ಆಪ್ಲ್ಯಾ ಮನ್ಶಾಂಚೆರ್ ಏಕ್ ದೀಶ್ಟ್ ಘಾಲ್ತಾಂ ಮ್ಹಳ್ಳೆಂ ಚಿಂತುನ್ ತಾಣೆಂ ಬೊಸ್‌ಲ್ಲ್ಯಾ ವಿಮಾನಾರ್ ಹರ್‍ಯೆಕ್ ಘಡಿ ಗಾಂವ್ಚಾ ಉಡಾಸಾಂತ್ ಪಾಶಾರ್ ಕರ್ತಾ.

**********************************************************************

ಗಾಂವಾಕ್ ಪಾವ್‌ಲ್ಲ್ಯಾ ಮಾರ್ಕುನ್ ಜಾಯ್‌ಗೀ ನಾಕಾಗೀ ಮ್ಹಳ್ಳೆಪರಿಂ ತಿಯೊಚಾ ಘರಾ ಭೆಟ್ ದಿಲಿ. ತೊ ಆಯ್ತಾರಾಚ್ ಆಯಿಲ್ಲೊ ತರೀ ಭುರ್ಗಿಂ ದೊಗಾಂಯ್ ಭಾಯ್ರ್ ಗೆಲ್ಲಿಂ ಮ್ಹಣೋನ್ ಎಸ್ತೆಲಾನ್ ಕಳಯ್ಲೆಂ ಆನಿ ತ್ಯೇ ದೀಸ್ ಕಿತ್ಯಾಕ್‌ಗೀ ಎಸ್ತೆಲಾಚಿ ತಕ್ಲಿಯ್ ಜೊರಾನ್ ಫಡ್ತಾಲಿ ಆನಿ ಇಲ್ಲೆಂ ಆಂಗ್ ದೂಕ್ ಆಸ್‌ಲ್ಲೆಂ ಜಾಲ್ಲ್ಯಾನ್ ಮಾರ್ಕುಕ್ ಪಯ್ಲೆಂಚ್ ಥಂಯ್ಚೊ ವೆತಾ ಮ್ಹಣಾಸರ್ ಪುರೊ ಜಾಲ್ಲೆಂ ಬರೆಂಚ್ ಜಾಲೆಂ ಮ್ಹಣೊನ್ ಚಿಂತುನ್ ತಿಯೊನ್ ದಿಲ್ಲಿ ಪೊಟ್ಲಿ ಎಸ್ತೆಲಾಚಾ ಹಾತಾಂತ್ ದೀವ್ನ್ ಎಸ್ತೆಲಾನ್ ಕರ್ನ್ ದಿಲ್ಲಿ ಕೊಪಿ ಪಿಯೆವ್ನ್ ಗೆಲೊ. ವಾಟೆರ್ ವೆತಾನಾ ದಾವಿದಾಕ್ ಮೆಳೊನ್ ಇಲ್ಲೊ ವೇಳ್ ತಾಂಗೆರ್ ಬೊಸೊನ್ ತಿಯೊವಿಶ್ಯಾಂತ್, ತಾಚಾ ಭಲಾಯ್ಕೆ ವಿಶ್ಯಾಂತ್ ತಾಣೆಂ ಭೊಗ್ಚಾ ಎಕ್ಸುರ್ಪಣಾ ವಿಶ್ಯಾಂತ್ ಸವಿಸ್ತಾರ್ ರಿತಿನ್ ಸಾಂಗ್ಲೆಂ. ದಾವಿದಾಕ್ ಮಾತ್ರ್ ನ್ಹಂಯ್ ಎಲಿಜಾಕ್‌ಯಿ ತಿಯೊಚೆರ್ ಬಿರ್ಮತ್ ಉದೆಲಿ. ತಾಕಾಚ್ಚ್ ಮ್ಹಾಲ್ಘಡೆ ಸಾಂಗ್ತಾತ್ 'ಜಿಣ್ಯೆಂತ್ ವಡ್ಲಿಂ ಸತಾಂ ಕೆದಾಳಾಯ್ ಸಂಪಿಂ ಜಾವ್ನಾಸ್ತಾತ್. ವಡ್ಲಿಂ ಮನ್ಶಾಂ ಕೆನ್ನಾಂಯ್ ಸಂಪಿ ಜಿಣಿ ಜಿಯೆವ್ನ್ ಆಸ್ತಾತ್' ಮ್ಹಳ್ಳೆಂ.

ದೋನ್ ಮಯ್ನಾಚಿ ರಜಾ ಮಾರ್ಕುನ್ ಕಾಭಾರ್ ಕೆಲಿ. ತಾಣೆಂ ಆನಿ ಪಾಟಿಂ ವೆಚೆಂ ನಾಕಾ ಮ್ಹಣೊನ್ ತಾಚಿ ಬಾಯ್ಲ್ ಆನಿ ಭುರ್ಗಿಂ ತಾಕಾ ವತ್ತಾಯ್ ಕರಿಲಾಗ್ಲಿಂ ತರೀ, ಹೆಂಚ್ ನಿಮಾಣೆಂ. ಹ್ಯೇ ಪಾವ್ಟಿಂ ಗೆಲ್ಲೊಂ ಆನಿ ಗಾಂವಾಂತ್‌ಚ್ ರಾವ್ತಾಂ, ಮ್ಹಳ್ಳೊ ನಿಚೆವ್ ಕರುನ್ ಮಾರ್ಕು ಸಂತೊಸಾನ್ ಆಪ್ಲಿ ರಜಾ ಕಾಭಾರ್ ಕರ್ನ್ ಕುವೆಯ್ಟಾಕ್ ವೆಚಾ ದೋನ್ ದಿಸಾಂಧಿಂ ತಿಯೊಚಾ ಘರಾ ಫೋನ್ ಕರ್ನ್ ತಿಯೊಕ್ ಕಾಂಯ್ ಧಾಡುಂಕ್ ಆಸಾ ತರ್ ತೆಂ ತಯಾರ್ ದವ್ರುಂಕ್ ಸಾಂಗೊನ್ ದೋನ್ ದಿಸಾಂ ಉಪ್ರಾಂತ್ ತಿಯೊಗೆರ್ ಗೆಲೊ. ತ್ಯಾ ದಿಸಾ ಆಯ್ತಾರಾ ಲತೀಫ್ ಘರಾಂತ್‌ಚ್ ಆಸ್‌ಲ್ಲೊ. ಜಿವಾಂತ್ ಆತಾಂ ಲತೀಫ್ ಪಯ್ಲೆಂಚೆಪರಿಂ ನಾತ್‌ಲ್ಲೊ. ಕುಡಿಂತ್ ಪುಡ್ಪುಡಿತ್ ಜಾಲ್ಲೊ ಮಾತ್ರ್ ನ್ಹಂಯ್ ತಾಣೆಂ ನೆಸ್‌ಲ್ಲ್ಯಾ ನೆಸ್ಣಾಂತ್‌ಯಿ ಆತಾಂ ಸುಧ್ರಾಪ್ ಆಯಿಲ್ಲೊ ತೊ ಮಾರ್ಕುನ್ ಪಳೆಲೊ. ಪುಣ್ ಮಾರ್ಕು ಕಿತೆಂಚ್ ಕಳಿತ್ ಆಸ್ಚೆಪರಿಂ ಕರಿನಾಸ್ತಾಂ ಬರೆಂ ಉಲವ್ನ್ ಎಸ್ತೆಲಾನ್ ದಿಲ್ಲೆಂ ಕಾಗಾದ್ ಮಾತ್ರ್ ವರ್ನ್ ಗೆಲೊ.

ಖಂಚೊಯ್ ಘುಟ್ ಕಿತ್ಲೊ ತೇಂಪ್ ಪರ್‍ಯಾಂತ್ ಘುಟ್ ಜಾವ್ನ್ ಉರತ್? ಏಕ್ ನಹಿಂ ತರ್ ಏಕ್ ದೀಸ್ ಸಂಸಾರಾಕ್ ಕಳ್ತಾಚ್ಚ್. ತಶೆಂ ಹಿ ಖಬಾರ್ ಎದೊಳ್‌ಚ್ ಮಾರ್ಕುಚಾ ಘರಾ ಪಾವ್‌ಲ್ಲಿ. ತ್ಯಾ ಶಿವಾಯ್ ಲತೀಫಾನ್ ತಿಯೊಚಾ ನಾಂವಾರ್ ಆಂಗಡ್ ಘಾಲ್ಲಿ ಗಜಾಲ್‌ಯಿ ಮಾರ್ಕುಕ್ ಕಳಿತ್ ಆಸ್‌ಲ್ಲಿ. ಪುಣ್ ತಿಯೊನ್ ಆಪ್ಣಾಕ್ ಕಿತ್ಯಾಕ್ ತೆಂ ಸಾಂಗೊಂಕ್ ನಾ ಮ್ಹಳ್ಳೆಂ ಮಾರ್ಕುಕ್ ಮಿಸ್ತೆರ್ ಜಾಲೊ. ಕಿತೆಂಯ್ ಜಾಂವ್ ಆಪ್ಲ್ಯಾ ಕಾಳ್ಜಾಂತ್ ತಿಯೊಚೆರ್ ಮೊಸೊರ್ ಜಾಂವ್ ಹಗೆಂ ಯಾ ರಾಗ್ ನಾತ್‌ಲ್ಲೊ ದೆಖುನ್ ತಾಕಾ ತಿಯೊನ್ ಅಶೆಂ ಘುಟ್ ಕೆಲ್ಲಿ ಗಜಾಲ್ ವಿಚಿತ್ರ್ ದಿಸ್ಲಿ ತರೀ ತಾಣೆಂಯ್ ಕಿತೆಂಚ್ ಕಳಿತ್ ನಾತ್‌ಲ್ಲೆಪರಿಂ ಕೆಲೆಂ.

ದೋನ್ ಮಯ್ನ್ಯಾಂಚಿ ರಜಾ ಕಾಭಾರ್ ಕರ್ನ್ ಕುವೆಯ್ಟಾಕ್ ಪಾಟಿಂ ಆಯಿಲ್ಲ್ಯಾ ಮಾರ್ಕುನ್ ಫುಡ್ಲ್ಯಾಚ್ಚ್ ಹಪ್ತ್ಯಾನ್ ಯೇವ್ನ್ ತಿಯೊಕ್ ಮೆಳೊನ್ ಎಸ್ತೆಲಾನ್ ದಿಲ್ಲೆಂ ಕಾಗಾದ್ ದಿಲೆಂ. ತಾಂತುಂ ಮಾರ್ಕುನ್ ಹಾಡ್‌ಲ್ಲ್ಯಾ ವಸ್ತುಂಚೆ ವಿಶ್ಯಾಂತ್ ಆನಿ ಭುರ್ಗ್ಯಾಂಕ್ ಕಿತೆಂ ಹಾಡಿಜಯ್ ಯಾ ಧಾಡಿಜಯ್ ಮ್ಹಳ್ಳೆಂ ಬರಯಿಲ್ಲೆಂ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್. ತರೀ ಕಿತೆಂ ಮ್ಹಣ್ತಾನಾ ಫಕತ್ ಬರೆಂ ಮ್ಹಣೊನ್ ಜಾಪ್ ದಿಂವ್ಚಾ ಮಾರ್ಕು ವಿಶ್ಯಾಂತ್ ತಿಯೊಕ್ ಕಸ್ಲೊ ಮಿಸ್ತೆರ್ ಮ್ಹಳ್ಳೆಂ ಸಮ್ಜಾಲೆಂನಾ.

ತಿತ್ಲೆಂಚ್ ನ್ಹಂಯ್. ಆದ್ಲೆಪಾವ್ಟಿಂ ರಜೆರ್ ಗೆಲ್ಲೊ ಮಾರ್ಕು ಭುರ್ಗ್ಯಾಂ ವಿಶ್ಯಾಂತ್ ಉಲಯ್ತಾಲೊ. ಜಾಗ್ಯಾ ವಿಶ್ಯಾಂತ್ ಉಲಯ್ತಾಲೊ ಪುಣ್ ಹ್ಯೇ ಪಾವ್ಟಿಂ ತಿ ಕಾಂಯ್ ಖಬಾರ್ ಉಲಯ್ನಾತ್‌ಲ್ಲೊ ಕಿತ್ಯಾಕ್ ಮ್ಹಳ್ಳೆಂ ತಿಯೊಕ್ ಕಳ್ಳೆಂನಾ.

**********************************************************************

ಇಬ್ರಾಹಿಮಾನ್ ಸಾರ್ಕೆಂಚ್ ಸಾಂಗ್‌ಲ್ಲೆಂ. ಶೇಖ್ ಅಲ್ ಖಲೀಫಾಕ್ ನಿಜಾಯ್ಕೀ ಘೊಡ್ಯಾಂಚೊ ರೇಸ್ ಪಳೆಂವ್ಚಿ ಕಠೀಣ್ ಪಿಸಾಯ್ ಆಸ್‌ಲ್ಲಿ. ತಾಂತುಂ ತಾಣೆಂ ಜಾಯಿತ್ತೆ ಪೊಯ್ಶೆ ಜೊಡ್‌ಲ್ಲೆ. ಹೆರಾಪರಿಂ ತಾಕಾ ತೆಲಾಚೊ ವೆಪಾರ್ ನಾತ್‌ಲ್ಲೊ ತರೀ ಬಿಸ್‌ನೆಸ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ತೊ ಬರ್‍ಯಾನ್ ಜಾಣಾಸ್‌ಲ್ಲೊ. ತಾಚಾ ಹಾತಾಂತ್ ಆಸ್ಚೊ ಸುಪರ್‌ಮಾರ್ಕೆಟ್ಯೊ ಸಯ್ತ್, ಗುದಾಂವಾಂ ಸಯ್ತ್, ತ್ಯಾಚ್ ಪೊಯ್ಶಾಂನಿ ತಾಣೆಂ ಘೆತ್‌ಲ್ಲಿಂ ಜಾವ್ನಾಸಾತ್. ಹರ್‍ಯೆಕಾ ಹಪ್ತ್ಯಾಂತ್ ತೊ ಭಾಯ್ಲ್ಯಾ ಗಾಂವಾಕ್ ವೆತಾಲೊ ಫಕತ್ತ್ ಘೊಡ್ಯಾಚಾ ರೆಸಾ ಖಾತಿರ್. ದೀಸ್ ಆತಾಂ ಪಯ್ಲೆಂಚೆಪರಿಂ ನಾತ್‌ಲ್ಲೆ. ಎಕಾ ಮಾರಾಕ್ ಏಕ್ ಕುಡ್ಕೊ ಮ್ಹಳ್ಳಿಂ ತತ್ವಾಂ ಮತಿಂತ್ ದವ್ರುನ್ ಕಾಣ್ಘೆಲ್ಲ್ಯಾ ಶೆಖಾಕ್ ದಿಸಾಂನ್ ದೀಸ್ ದುಸ್ಮಾನ್ ಚಡೊನ್ ವೆತಾಲೆ ಆನಿ ಚಡ್‌ಲ್ಲೆ ಹೆ ದುಸ್ಮಾನ್ ಶೇಖಾ ವಿರೋಧ್ ಘುಟ್ಮೊಳ್ ಕರ್ತಾಲೆ ಆನಿ ಅಶೆಂ ತಾಣೆಂ ಆಪ್ಲೆ ಮ್ಹಣೊನ್ ಚಿಂತ್ಚೆಂ ಸಭಾರ್ ಮನಿಸ್ ಶೆಖಾಚೆ ವಿರೋಧಿ ಆಸ್‌ಲ್ಲೆ.

ದುಡ್ವಾನ್ ತೊ ಕುಸ್ತಾಲೊ ತರೀ ಲೆಖಾಂತ್ ಕಾಂಯ್ ಕೊಣಾಯ್ಕೀ ಸೊಡ್ನ್ ದೀನಾತ್‌ಲ್ಲೊ. ತಶೆಂ ಮ್ಹಣೊನ್ ತಾಚಾ ಸಗ್ಳ್ಯಾ ಕಾಮಾಚಾಂಕ್ ವೆಳಾರ್ ಸಾಂಬಾಳ್ ದಿತಾಲೊ ಆನಿ ಕೊಣಾಯ್ಚಾಯ್ ಗರ್ಜಾಂತ್ ಪಾವ್ತಾಲೊ ದೆಖುನ್ ತಾಕಾ ಚಡಾವತ್ ಕಾಮಾಚೆಂ ಮಾಂದ್ತಾಲೆ.

ಎಕೆಕ್ ಸುಪರ್‌ಮಾರ್ಕೆಟೆಚೆಂ ಆಡಳ್ತೆಂ ಪಳೆಂವ್ಕ್ ತಾಣೆಂ ತಾಚಾ ಖಾಸ್ ಮನ್ಶಾಂಕ್ ನಮಿಯಾರ್ಲೆಲೆಂ ತಶೆಂ ತ್ಯಾ ಖಾಸ್ ಮನ್ಶಾಂವಿಶ್ಯಾಂತ್ ತವಳ್‌ತವಳ್ ಖಬ್ರೊ ಘೆಂವ್ಕ್ ಬೆಂಗಾಲಿಪರಿಂ ಸಭಾರ್ ಚಮ್ಚಾಂಕ್೦ಯಿ ದವರ್ಲೆಂಲೆಂ. ತೆ ತಾಕಾ ಭಿಂಯೆತಾಲೆ ಆನಿ ತಾಚಾ ಪೊಯ್ಶಾಂಕ್ ಲಾಲೆತಾಲೆ. ಆನಿ ತಾಂಚೆವರ್ವಿಂ ಜಾಹಿತ್ತೆ ಭಿತರ್ಲೆ ಘುಟ್ ಶೆಖಾಕ್ ಮೆಳೊಂಕ್ ಸಾಧ್ಯ್ ಜಾತಾಲೆಂ.

ಜುಗಾರೆಂತ್ ಮೆಳ್ಚಿ ಜೀಕ್ ಯಾ ಸಲ್ವಣ್ ಕೊಣಾಯ್ಕೀ ಶಾಶ್ವತ್ ನ್ಹಂಯ್ ಆಸ್‌ಲ್ಲಿ. ಚರಿತ್ರೆಚಿಂ ಪಾನಾಂ ಉಸ್ತಿಲ್ಯಾರ್ ತಾಂತುಂ ಆಮ್ಕಾಂಯ್ ಪಳೆಂವ್ಕ್ ಮೆಳ್ಚೆಂ ಯಾ ವಾಚುಂಕ್ ಮೆಳ್ಚೆಂಯ್ ಇತ್ಲೆಂಚ್. ಹಾಚಿ ಪಿಸಾಯ್ ಆಸ್ಚಾ ಖಂಚಾಯ್ ರಾಯಾಚೆಂ ಯಾ ಚಕ್ರವರ್ತಿಚೆಂ ನಾಸ್ ತೆಚ್ ಜುಗಾರೆಂತ್ ಜಾಲ್ಲೆಂ. 'ಕಾಜು ಆಸ್‌ಲ್ಲೊ ಪಾಜು ಜಾಂವ್ಕ್ ಆನಿ ಪಾಜು ಆಸ್‌ಲ್ಲೊ ಕಾಜು ಜಾಂವ್ಕ್ ಚಡ್ ವೇಳ್ ಕಾಂಯ್ ನಾಕಾ. ಫಕತ್ತ್ ತೆಂ ಏಕ್ ನಿರ್ಮೊಣೆಂ. ಆನಿ ಕೊಣಾಚಾ ಜಿವಿತಾಂತ್ ದೇವ್ ಕಸಲಿ ಆನಿ ಕಿತ್ಯಾಕ್ ಘುಂವ್ಡಿ ಹಾಡ್ತಾ ಮ್ಹಳ್ಳೆಂ ಫಕತ್ತ್ ತೊ ದೇವ್ ಮಾತ್ ಜಾಣಾ.

ಅಶೆಂ ಆಸ್ತಾಂ ಏಕ್ ಪಾವ್ಟಿಂ ಘೊಡ್ಯಾಚಾ ರೆಸಾಂತ್ ಸಭಾರ್ ವರ್ಸಾಂ ಉಪ್ರಾಂತ್ ತಾಕಾ ಸಲ್ವಣಿಂ ಆಪ್ಣಾಂವ್ಕ್ ಪಡ್ಲಿ ಆನಿ ದೆಖುನ್ ತಾಚೆಂ ಅನ್ಯೇಕ್ ಸುಪರ್‌ಮಾರ್ಕೆಟ್ ಮೊಲಾಕ್ ಘೆಂವ್ಚಿ ತಯರಾಯ್ ಸದ್ದ್ಯಾಕ್ ರಾವಯ್ಲಿ. ಅಶೆಂ ಸಲ್ವಣೆಚಿ ಜಾಲ್ಲಿ ಸುರ್ವಾತ್ ಫುಡ್ಲ್ಯಾ ಸಭಾರ್ ಪಾವ್ಟಿಂ ಪರತ್ ಪರತ್ ಆಯ್ಲಿ. ಆನಿ ಫುಡ್ಲ್ಯಾ ತೀನ್ ಚಾರ್ ಮಹಿನ್ಯಾಂನಿ ತಾಣೆಂ ಜಿಕ್ಚಾಕೀ ಚಡ್ ಜಾವ್ನ್ ಸಲ್ವೊಂಕ್ ಪಡ್ಲೆಂ. ತಾಚಾ ಕಾಮಾಚಿಂ ತಾಂಚಾ ತಾಂಚಾ ಮತಿಂತ್ ಆಯಿಲ್ಲಿಂ ಚಿಂತ್ನಾ ಚಿಂತುಂಕ್ ಪಡ್ಲಿಂ. ಥೊಡಿಂ ಮ್ಹಣಾಲಿಂ 'ಕೆಲ್ಲಿಂ ಕರ್ಮಾಂ ಭೊಗುಂಕ್ ನಾಯೆ ತರ್?'.

ತಾಕಾ ಕಿತೆಂ ಬರೆಂ ಮ್ಹಣೊನ್ ದಿಸ್ತಾ ತೆಂ ತೊ ಕರ್ತಾಲೊ. ತಾಕಾ ಕೋಣ್ ಖಾಲ್ ಜಾತಾ ತಾಂಕಾ ಮಾತ್ರ್ ತೊ ತಾಚೆಸವೆಂ ಘೆತಾಲೊ ಆನಿ ಎಕಾದಾವೆಳಾ ಸಾಧ್ಯ್ ನಾತ್‌ಲ್ಲ್ಯಾರ್ ತಾಂಕಾ ಖೊಟಾವ್ನ್ ಸೊಡ್ತಾಲೊ. ಗರ್ಜ್ ಪಡ್ಲ್ಯಾರ್ ತಾಂಕಾ ಜಿವೆಶಿಂ ಮಾರುಂಕ್‌ಯಿ ಪಾಟಿಂ ಸರಾನಾತ್‌ಲ್ಲೊ. ತೊ ಬರೊ ಮಣೊನ್ ಸಗ್ಳೊ ಬರೊಯ್ ನ್ಹಂಯ್, ಖೊಟೊ ಮ್ಹಣೊನ್ ಸಗ್ಳೊ ಖೊಟೊಯ್ ನ್ಹಂಯ್.

ಶೆರಾಚಾ ಮಾರ್ಕೆಟಿಂತ್‌ಯಿ ಆತಾಂ ಶೆಖಾಚೆ ಆಪ್ಲೆ ಮನಿಸ್ ಜೆ ತಾಕಾ ಕೊರೊಡಾಂಚೊ ಮುನಾಫೊ ಕರುನ್ ದಿಲ್ಲೆ ಸಯ್ತ್ ಎಕೆಕ್ಲೆ ನಿಸ್ರಾಲ್ಲೆ. ತ್ಯಾ ಭಾಯ್ರ್ ಆತಾಂತಾಂ ಶೇರ್ ಮಾರ್ಕೆಟಿಂತ್ ಚಡಾವತ್ ಜಣಾಂನಿ ಶೆಖಾಚಿ ಚಾಲ್ ವಳ್ಕೊನ್ ತಾಚೆಪರಿಂಚ್ ಕರುಂಕ್ ಧರ್ತಾನಾ ಶೇಖಾಕ್ ನವಿ ಚಾಲ್ ಧರುಂಕ್ ಅನಿವಾರ್‍ಯ್ ಜಾಲೆಂ. ಅಶೆಂ ತಾಕಾ ಶೇರ್ ಮಾರ್ಕೆಟಿಂತ್‌ಯಿ ಕಾಂಯ್ ಲಾಭ್ ಮೆಳ್ಳೊನಾ. ಬದ್ಲಾಕ್ ತಾಣೆಂ ಘೆತ್‌ಲ್ಲೆ ಶೇರ್ ಏಕ್ ಪಾವ್ಟಿಂ ವಿಕೊನ್ ಗೆಲೆ ತರ್ ಬರೆಂ ಮ್ಹಣೊನ್ ಭೊಗ್ಲೆಂ.

ಅಶೆಂ ಆಸ್ತಾಂ ದುಡ್ವಾಕ್ ಕಾಂಯ್ ತಾಕಾ ಬರ್ಗಾಲ್ ನಾತ್‌ಲ್ಲೊ. ತರೀ ತಾಚಿ ಮತ್ ಆತಾಂ ಸಾರ್ಕಿ ಕಾಮ್ ಕರಿನಾತ್‌ಲ್ಲಿ. ಪುಣ್ ಹಠಾರ್ ಪಡ್‌ಲ್ಲೊ ಮನಿಸ್ ಕಿತೆಂಯ್ ಕರುಂಕ್ ಪಾಟಿಂ ಸರಾನಾ ಮ್ಹಳ್ಳೆಪರಿಂ ತೊ ಹಠಾರ್ ಪಡ್ಲೊ ಆನಿ ಕೊಣಾಯ್ಚೆಂಯಿ ಆಯ್ಕಾನಾಸ್ತಾಂ ತಾಣೆಂ ಎಕಾಚ್ ಮಾರಾನ್ ತಾಣೆಂ ಹೊಗ್ಡಾಯಿಲ್ಲೆಂ ಸಗ್ಳೆಂ ಜಿಕೊಂಕ್ ಚಿಂತುನ್ ಲಾಖಾಂನಿ ದಿನಾರ್ ತ್ಯಾ ಎಕಾಚ್ ಹಪ್ತ್ಯಾಂತ್ ಹೊಗ್ಡಾಯ್ಲೆ. ಆತಾಂ ತಾಕಾ ದೆಂವೊಂಕ್ ಪಡ್ಲೆಂ. ಪಾಟಿಂ ಆಯಿಲ್ಲ್ಯಾ ತಾಕಾ ತಾಣೆಂ ನವೆಂ ಉಗ್ತೆಂ ಕೆಲ್ಲಿ ಸುಪರ್‌ಮಾರ್ಕೆಟಿಂತ್ ಲುಗ್ಸಾಣ್ ಭೊಗೊಂಕ್ ಪಡ್ತೆಚ್ ತಿ ಕೊಣಾಕ್‌ಗೀ ವಿಕ್ಲಿ ಆನಿ ತಾಚಾ ದುಸ್ರ್ಯಾ ಗುದಾಂವಾಕ್‌ಯಿ ವಿಕ್ಲೊ. ಆನಿ ಅಶೆಂ ಗೋಪಿಚಾ ಮರ್ಣಾ ಉಪ್ರಾಂತ್ ತಾಚಾ ಜಾಗ್ಯಾರ್ ಕಾಮ್ ಕರ್‍ಚಾ ಅನ್ಯೇಕ್ಲ್ಯಾ ಮಲ್ಯಾಳಿಕ್ ಪಾಟಿಂ ತಿಯೊಸವೆಂ ಕಾಮ್ ಕರುಂಕ್ ಆಯ್ಲೊ. ಆನಿ ತ್ಯಾ ಬೆಂಗಾಲಿಕ್ ತಾಣೆಂ ಪಯ್ಲ್ಯಾ ಸುಪರ್‌ಮಾರ್ಕೆಟಿಚಿ ನಿತಳ್‌ಕಾಯ್ ಪಳೆಂವ್ಕ್ ದವರ್ಲೊ.

ಅಶೆಚ್ ದೀಸ್ ಪಾಶಾರ್ ಜಾತಾಸ್ತಾನಾ ಶೆಖಾಕ್ ಮತಿಚೆಂ ಸಮಧಾನ್ ವಿಭಾಡ್ಲೆಂ. ಎಕಾ ಥರಾಚೆಂ ಆಮಾಲ್ ಯಾ ಪಿಶೆಂ ತಾಚಾ ಮತಿಕ್ ರಿಗ್ಲೆಂ. ಜ್ಯೆ ತಾಣೆಂ ಹೊಗ್ಡಾಯ್ಲಾಂ ತೆಂ ಪರತ್ ಘೆಂವ್ಚಿ ಪಿಸಾಯ್ ಇತ್ಲಿ ಚಡ್ಲಿಗೀ ತಾಣೆಂ ತಾಚಾ ಮತಿಚೆಂ ಸ್ಥಿಮಿತ್ ಹೊಗ್ಡಾಯ್ಜಯ್ ಪಡ್ಲೆಂ. ಎದೊಳ್ ಪರ್‍ಯಾಂತ್ ಕಾಮಾಚಾ ಮನ್ಶಾಂಲಾಂಗಿಂ ಬರ್‍ಯಾನ್ ಆಸ್‌ಲ್ಲೊ ತೊ ಆತಾತಾಂ ಕಠೀಣ್ ರಿತಿನ್ ಚಲಾಲಾಗ್ಲೊ. ಕೊಣೆಂಯ್ ಕಾಂಯ್ ಚೂಕ್ ಆಧಾರ್‍ಲಿ ತರ್ ತಾಕಾ ತೆದಾಳಾಚ್ ಕಾಮಾಂತ್ಲೊ ಕಾಡುಂಕ್ ಧರ್ಲೆಂ. ಕಾಮ್ ಕರ್ಚಾ ಲೊಕಾಂಕ್ ಆತಾಂ ಉಣೆಂ ಕರುಂಕ್ ಚಿಂತಿಲಾಗ್ಲೊ.

ತಶೆಂ ಮ್ಹಣೊನ್ ಕೊಣೆಂಯ್ ಸಾಂಗ್‌ಲ್ಲೆಂ ಆಯ್ಕೊಂವ್ಚಿ ಸವಯ್ ಶೇಖಾಕ್ ನಾತ್‌ಲ್ಲಿ. ತಾಚಾ ಸ್ವ ಚಿಂತ್ನಾನ್ ಕಿತೆಂ ಕರಿಜಯ್ ಮ್ಹಣ್ ಭೊಗ್ತಾಗೀ ತೆಂ ತೊ ಕರ್ತಾಲೊ. ಆನಿ ತಶೆಂ ತಾಕಾ ಕಿತೆಂ ಬರೆಂ ಆನಿ ಕಿತೆಂ ವಾಯ್ಟ್ ಮ್ಹಣೊನ್ ಸಾಂಗೊಂಕೀ ಹೆರಾಂ ಭಿಂಯೆತಾಲಿಂ.

ಅಶೆಚ್ ದೀಸ್ ಪಾಶಾರ್ ಜಾತಾಲೆ ಆನಿ ತವಳ್‌ತವಳ್ ಯೆಂವ್ಚೊ ಬೆಂಗಾಲಿ ಶೇಖಾಚಾ ಕಂಗಾಲ್ ಪರಿಗತೆ ವಿಶ್ಯಾಂತ್ ಸಾಂಗ್ತಾನಾ ತಿಯೊಕ್ ಭಿರಾಂತ್ ದಿಸ್ತಾಲಿ. ಕಾಂಯ್ ಆಪ್ಲ್ಯಾ ಕಾಮಾಕ್ ಕಾಂಯ್ ತೊಂದ್ರೆ ಜಾತಿತ್ ತರ್ ಕಿತೆಂ ಗತ್ ಮ್ಹಳ್ಳಿ ತಾಚಾ ಸಮ್ಜೊಣೆಕ್ ಯೇನಾತ್‌ಲ್ಲೆಂ. ತಸಲೆಂಚ್ ಚಿಂತಾಪ್ ಮಣಿಚಾ ಮತಿಂತ್ ಆನಿ ತಿಯೊಚಾ ಮತಿಂತ್‌ಯಿ ಆಸ್‌ಲ್ಲೆಂ ಸಗ್ಳ್ಯಾಂಕೀ ತಾಂಚೆ ಮ್ಹಳ್ಳೆಚ್ ಕಶ್ಟ್ ಆಸಾತ್, ಸಮಸ್ಸೊ ಆಸಾತ್. ತೆಗಾಂಯ್ನೀ ಯೇಜಂಟಾಕ್ ಹಜಾರಾಂನಿ ಪೊಯ್ಶೆ ಭರುನ್ ಗಲ್ಫಾಕ್ ಆಯ್ಲ್ಯಾತ್ ಆನಿ ಎದೊಳ್ ಘೊಳ್‌ಲ್ಲ್ಯಾಂತ್ ತೆಂ ರೀಣ್ ಭರುಂಕ್ ಆನಿ ಕಾಂಯ್ ಇಲ್ಲೊ ಜಾಗೊ ಘೆಂವ್ಕ್ ಯಾ ಘರ್ ಬಾಂದುಂಕ್ ಸಾರ್ಕೆಂ ಜಾಲ್ಲೆಂ. ತಿತ್ಲೆಂಚ್ ನ್ಹಂಯ್ ಘರ್ಚೊ ಸಗ್ಳೊ ಖರ್ಚ್ ತಾಣಿಂ ಮಹಿನ್ಯಾ ಮಹಿನ್ಯಾಕ್ ಧಾಡ್ಚಾ ಪೊಯ್ಶ್ಯಾಂತ್ ವಚೊಂಕ್ ಆಸ್‌ಲ್ಲೆಂ. ದೆಖುನ್ ಎಕ್‌ಚ್ ಪಾವ್ಟಿಂ ಜರ್ ಆಮ್ಚೆಂ ಕಾಮ್ ಗೆಲೆಂ ತರ್ ಖಂಡಿತ್ ಜಾವ್ನ್ ಇಲ್ಲೆ ತ್ರಾಸ್ ಭೊಗ್ತೆಲೆ ಮ್ಹಳ್ಳೆಂ ಚಿಂತಾಪ್ ತಾಂಚಾ ಮತಿಂತ್ ಆಸ್‌ಲ್ಲೆಂ.

ಮುಂದರ್‍ಸಿಲಾಂ...

Tags: Vally Quadras,e konkani novel, Konkani, Mangalore, Mangalorean, Mother Tongue

From around the world

ಪಾಟಿಂ ಗಾಂವಾಕ್ - ಅವಸ್ವರ್ 22

Post your comments

ಅವಸ್ವರ್ 1

ಅವಸ್ವರ್ 2

ಅವಸ್ವರ್ 3

ಅವಸ್ವರ್ 4

ಅವಸ್ವರ್ 5

ಅವಸ್ವರ್ 6

ಅವಸ್ವರ್ 7

ಅವಸ್ವರ್ 8

ಅವಸ್ವರ್ 9

ಅವಸ್ವರ್ 10

ಅವಸ್ವರ್ 11

ಅವಸ್ವರ್ 12

ಅವಸ್ವರ್ 13

ಅವಸ್ವರ್ 14

ಅವಸ್ವರ್ 15

ಅವಸ್ವರ್ 16

ಅವಸ್ವರ್ 17

ಅವಸ್ವರ್ 18

ಅವಸ್ವರ್ 19

ಅವಸ್ವರ್ 20

ಅವಸ್ವರ್ 21

ಅವಸ್ವರ್ 22

ಅವಸ್ವರ್ 23

ಅವಸ್ವರ್ 24

ಅವಸ್ವರ್ 25

ಅವಸ್ವರ್ 26

ಅವಸ್ವರ್ 27

ಅವಸ್ವರ್ 28

Connect

Our Address
Mangalore

Our Address
Udupi

Our Address
Dubai

From around the world

Post your comments

Connect

Our AddressMangalore

Our AddressUdupi

Our AddressDubai

Our Address
Mangalore

Our Address
Udupi

Our Address
Dubai