:: ಮಾಯ್ ಭಾಸ್

ಪಯ್ಲ್ಯಾ ದೋನ್ ತೀನ್ ದಿಸಾಂನಿ ತಿಯೊಚಾ ನಾಕಾ ಥಾವುನ್ ರಗಾತ್ ದೆಂವ್ಚೆಂ ಆಪಾಪಿಂಚ್ ರಾವ್ಲೆಂ. ಆನಿಂ ಹಾಚೆಂ ಕಾರಣ್ ಹಾಂಗಾಚೊ ಹವೊ ಜಾವ್ಯೆತ್, ಯಾ ಪಾಟ್ಲ್ಯಾ ದಿಸಾಂನಿ ತಿಯೊನ್ ಖೆಲ್ಲೆಂ ಮಾಸ್ ಜಾವ್ಯೆತ್. ಪಯ್ಲೆಂ ಅಥ್ವೊಚ್ ಅರ್ಥ್ ಘೆವ್ನ್ ಕಾಂಯ್ ಆಪ್ಲ್ಯಾ ಕಾಮಾಕ್ ಹ್ಯಾ ವರ್‍ವಿಂ ತ್ರಾಸ್ ಜಾತಿತ್‌ಗೀ ಮ್ಹಣೊನ್ ತಿಯೊ ಭಿಂಯೆಲೊ. ಪುಣ್ ಬರೊ ಜಾಲ್ಲೊಚ್ ದೆವಾಕ್ ಅರ್ಗಾಂ ದೀಂವ್ಕ್ ಲಾಗ್ಲೊ.

ಮಣಿಕ್ ಇಲ್ಲಿ ವಕ್ತಾಂಚಿ ಸಮ್ಜಣಿ ಆಸ್‌ಲ್ಲಿ ಆನಿಂ ತಾಚಾ ಮಜತೆನ್ ತಿಯೊನ್ ಸದಾಂ ಇಲ್ಲೆಂ ಧಂಯ್ ಘೆವ್ನ್ ಪಿಯೆಂವ್ಕ್ ಸುರು ಕೆಲೆಂ ಆನಿಂ ಅಶೆಂ ತಿಸ್ರೆ ದೀಸ್ ನಾಕಾಂತೂನ್ ದೆಂವ್ಚೆಂ ರಗಾತ್ ರಾವ್‌ಲ್ಲೆಂ.

ಕಾಮ್ ಕಾಂಯ್ ಕಶ್ಟಾಂಚೆಂ ನ್ಹಂಯ್, ಆನಿಂ ಗಾಂವಾಂತ್ ವೋತ್‌ಭರ್ ಘೊಳೊನ್ ಸವಯ್ ಆಸ್ಚಾ ತಿಯೊಕ್ ಹೆಂ ಕಾಮ್ 'ಏಕ್ ಕಾಮ್' ಮ್ಹಳ್ಳೆಂಚ್ ಕಳ್ಳೆಂನಾ. ವ್ಹಡ್ಲ್ಯೊ ಗಾಡಿಯೊ ಯೆತಾನಾ ಭಾಯ್ರ್ ವೆಚೆಂ, ಡ್ರಾಯ್ವರಾನ್ ದಿಲ್ಲೆಂ ಕಾಗಾದ್ ಹಾಡ್ಚೆಂ, ಬುಕಾರ್ ಗಾಡಿಯೆಚೆಂ ನಂಬರ್ ಬರಂವ್ಚೆಂ, ಆನಿಂ ತ್ಯಾ ಕಾಗ್ದಾರ್ ಸಾಂಗ್‌ಲ್ಲೆ ತಿತ್ಲ್ಯೊ ಗೊಣಿ ಸಾಮಾನ್ ಆಯ್ಲಾಗೀ ಮ್ಹಣೊನ್ ಲೇಖ್ ಕರ್‍ಚೆಂ ಆನಿಂ ಗಾಡಿ ಚಲ್ತಚ್ಚ್ ಗೇಟ್ ಬಂಧ್ ಕರ್ಚಿ. ಇತ್ಲೆಂಚ್ ಕಾಮ್. ಶೆರಾಂತ್ ಏಕ್ ಸುಪರ್‌ಮಾರ್‍ಕೆಟ್ ಆಸ್ಚಾ ಶೆಕಾನ್ ಥಂಯ್ ಯೆಂವ್ಚೊ ಮಾಲ್ ಸಗ್ಳೊ ದಾಸ್ತಾನ್ ಕರ್ಚೊ ಹ್ಯಾಚ್ ಗುದಾಂವಾಂತ್. ಆನಿಂ ಸದಾಂ ಮಾಲ್ ವಿಕೊನ್ ಗೆಲ್ಲೆಪರಿಂಚ್ ಗೊಣಿಂಯೊ ಯೆತಾಲ್ಯೊ ಆನಿಂ ವೆತಾಲ್ಯೊ. ತಾಚಾ ಗುದಾಂವಾಂತ್ ಫಕತ್ ಶೇಖಾಚೊ ಮಾತ್ರ್ ನ್ಹಂಯ್, ಹೆರಾಂಚೊ ಗಾಡಿಯೊ ಸಯ್ತ್ ಯೆತಾಲ್ಯೊ. ಆನಿಂ ಹೆರಾಂ ಬಾಡೆಂ ದೀವ್ನ್ ಆಪ್ಲೊ ಸಾಮಾನ್ ಹ್ಯಾ ಗುದಾಂವಾಂತ್ ಭರ್ತಾಲೊ.

ಲೊಕಾಂಚಿ ಭಾಸ್ ತಿಯೊಕ್ ಸಮ್ಜಾನಾತ್‌ಲ್ಲಿ ತರೀ ಚಡಾವತ್ ಡ್ರಾಯ್ವರ್ ಮಲ್ಬಾರಿ ಆನಿಂ ಬಾಂಗ್ಲಾಚೆ ಆನಿಂ ಹಿಂದಿ ಜಾಣಾ ಆಸ್ಚೆ ಜಾಲ್ಲೆವರ್ವಿಂ ತಾಕಾ ಹಳ್ತಾರ್ ದೀಸ್ ಗೆಲ್ಲೆಪರಿಂಚ್ ಹೆಂ ಕಾಮ್ ಸದಾಂಚೆಂ ಜಾಲೆಂ. ಕಾಂಯ್ ಸಮಸ್ಸೊ ಉದೆಲ್ಯಾರ್ ಇಬ್ರಾಹಿಮ್ ಆಸ್‌ಲ್ಲೊ ಆನಿಂ ತೊ ಸಾಂಭಾಳ್ತಾಲೊ. ಇಬ್ರಾಹಿಮ್ ಶೆಕಾಚೊ ಖಾಸ್ ಮನಿಸ್ ಮ್ಹಣೊನ್ ತೊಚ್ ಸಾಂಗ್ತಾಲೊ. ಶೆಕಾಚಿ ಚೊವ್ತಿ ಬಾಯ್ಲ್ ಈಜಿಪ್ಶಿಯನ್ ಖಂಯ್ ಆನಿಂ ಇಬ್ರಾಹಿಮಾಚಾಚ್ ಗಾಂವ್ಚಿ ಖೈಂ. ಅನ್ಯೇಕಾ ಉತ್ರಾನ್ ಸಾಂಗ್ಚೆಂ ತರ್ ಹೆ ತೆಗೀ ಇಬ್ರಾಹಿಮಾಚೆ ಸಹಾಯಕ್.

ಅಶೆಂ ಕಾಮಾಂ ಮಧೆಂ ವೇಳ್ ಮೆಳ್ತಾನಾ ಚಡಾವತ್ ವೇಳ್ ತಿಯೊ ಆಪ್ಲ್ಯಾ ಭುರ್ಗ್ಯಾಂಚಾ ಫುಡಾರಾವಿಶ್ಯಾಂತ್ ನಿಹಾಳ್ತಾಲೊ. ಏಕ್ ಪಾವ್ಟಿಂ ಬೆಂಕಾಚೆಂ ರೀಣ್ ಫಾರಿಕ್ ಜಾತೆಚ್ಚ್ ಘರ್ಚೊ ಜಾಗೊ ಜೊ ಬೆಂಕಾಂತ್ ಆಡವ್ ಆಸಾ, ತೊ ಸೊಡೊಂವ್ಚೊ. ಆನಿಂ ಎಕೆಕ್‌ಚ್ ಕಾಮ್ ಕರಂವ್ಚೆಂ. ಪಯ್ಲೆಂ ಘರಾಕ್ ಕರೆಂಟ್ ಹಾಡಿಜಯ್. ಘರಾಕ್ ನಳೆ ಘಾಲಯ್ಜಾಯ್. ಮ್ಹಜಾ ಬಾಯ್ಲೆನ್‌ಯೀ ಆನಿಂ ಪುಣಿಂ ಬರೆ ದಿಸ್ ಕಾಡಿಜಯ್. ಎದೊಳ್ ತ್ಯಾ ವೊತಾಂತ್ ಘೊಳ್‌ಲ್ಲೆಂ ಪುರೊ. ಆನಿಂ ಪುಣಿಂ ತೆಂ ಆಮ್ಚಾ ಭುರ್‍ಗ್ಯಾಂಚಿ ಬರಿ ಜತನ್ ಘೆಂವ್ದಿ. ಮ್ಹಜೆಂ ಘರ್‌ಯಿ ಬರೆಂ ದಿಸಾಜಯ್. ಬರ್‍ಯಾ ಮನ್ಶಾಂನಿ ಥಂಯ್ ಯೇಜಯ್. ಮ್ಹಜಾ ಭುರ್ಗ್ಯಾಂಕೀ ಬರ್‍ಯಾ ಇಶ್ಟಾಂಚಿ ಗರ್ಜ್ ಆಸಾ. ವ್ಹಡ್ ಜಾವ್ನ್ ಯೆಂವ್ಚಾ ಭುರ್ಗ್ಯಾಂಕ್ ಹಾವೆಂ ಹೆಂ ಸರ್‍ವ್ ದೀಜಯ್. ಕಾಂಯ್ ಇಲ್ಲೊ ವೇಳ್ ಮೆಳ್ಳೊ ತರ್ ತಿಯೊಚಾ ಮತಿಭಿತರ್ ಹಿಂ ಸರ್ವ್ ಚಿಂತ್ನಾಂ ಯೆತಾಲಿಂ.

ಕಸೊಯ್ ಏಕ್ ಹಾಪ್ತೊ ಸಂಪ್ಲೊ ಆನಿಂ ಬೆಂಗಾಲಿನ್ ಸಾಂಗ್‌ಲ್ಲೆಪರಿಂಚ್ ದುಸ್ರ್ಯಾ ಹಾಪ್ತ್ಯಾಂತ್ ಹ್ಯಾ ತೆಗಾಂಯ್ಚೆ ಮೆಡಿಕಲ್ ಆನಿಂ ಇತರ್ ಕಾಮಾಂ ಜಾಲಿಂ ಆನಿಂ ಪಂದ್ರಾ ದಿಸಾಂ ಭಿತರ್ ರೆಸಿಡೆನ್ಸಿ ಮಾರ್ಲಿ ಆನಿಂ ಸಿವಿಲ್ ಆಯ್.ಡಿ. ಮೆಳ್ಳಿ. ಭಾಯ್ರ್ ವಚೊಂಕ್ ವಾಟ್, ಭಾಸ್, ಕಳಿತ್ ನಾಂ ಎಕಾ ವಾಟೆರ್ ತರ್ ಅನ್ಯೇಕಾ ವಾಟೆರ್ ಹಾತಾಂತ್ ಕಾಂಯ್ ಪೊಯ್ಶೆ ನಾತ್‌ಲ್ಲ್ಯಾನ್ ತಿಯೊ ಜಾಂವ್ ಮಣಿ ಜಾಂವ್ ಯಾ ಗೋಪಿ ಜಾಂವ್ ರಜೆಚಾ ದಿಸಾಂನಿ ಭಿತರ್‌ಚ್ ಬೊಸ್ಲೆ. ಭಾಯ್ರ್ ವೆಚೆಂ ತರೀ ಖೈಂ? ಕಾಂಯ್ ಇಲ್ಲಿಂ ವಸ್ತುರಾಂ ಉಂಬಳ್ಳಿಂ. ಕೂಡ್ ನಿತಳ್ ಕೆಲೆಂ. ಇಲ್ಲೆ ಭಾಯ್ರ್ ಪಾಂಯಾವಾಟೆರ್ ಭಂವ್ಲೆ. ಲಾಗಿಂಚ್ ಆಸ್ಚಾ ತ್ಯಾ ಫೊಲೆರಾಪಂದಾ ಬೊಸೊನ್ ಚಿಂತಾಲೆ, ಉಲಯ್ತಾಲೆ. ಎದೊಳ್ ತೆ ಥೊಡೆ ಥೊಡೆ ಅರ್ಭಿ ಸಬ್ದ್ ಶಿಕ್ಲೆ ಆನಿಂ ತಾಂಚಾ ಹಿಂದಿ ಭಾಸೆಂತೀ ಇಲ್ಲೊ ಸುಧ್ರಾಪ್ ದಿಸೊನ್ ಆಯ್ಲೊ.

ತಶೆಂ ಆಸ್ತಾಂ ಹಾಪ್ತ್ಯಾಚಾ ಎಕಾ ಆಯ್ತಾರಾ ದನ್ಪಾರ್ ಉತರ್‌ಲ್ಲೆಪರಿಂಚ್ ತಿಯೊಕ್ ವಿಚಾರುನ್ ಎಕ್ಲೊ ಆಯ್ಲೊ ಆನಿಂ ತೊ ಮಾರ್ಕು ಜಾವ್ನಾಸ್‌ಲ್ಲೊ. ಅಪ್ರೂಪಾಂತ್ ಆಪ್ಲ್ಯಾ ಮಾಯ್‌ಗಾಂವ್ಚಾಕ್ ತೇಂಯ್ ಮಾರ್ಕುಕ್ ದೆಖ್ತಚ್ ತಿಯೊ ಸಂತೊಸ್ಲೊ. ಇಲ್ಲೊ ವೇಳ್ ಮಾರ್ಕುಸವೆಂ ಭಾಯ್ರ್ ಗೆಲ್ಲೊ ತಿಯೊ ಸಭಾರ್ ಸಂಗ್ತ್ಯೊ ಉಲಯ್ಲೊ. ಗಾಂವ್ಚೆವಿಶ್ಯಾಂತ್, ತಾಚೆ ವಿಶ್ಯಾಂತ್, ಬೆಂಕಾಚಾ ಲೊನಾ ವಿಶ್ಯಾಂತ್, ತಿತ್ಲೆಂಚ್ ನ್ಹಂಯ್, ತಾಚಾ ನಾಂಕಾಂತೂನ್ ಆಯಿಲ್ಲ್ಯಾ ರಗ್ತಾ ವಿಶ್ಯಾಂತ್ ಸಯ್ತ್. ತಿಯೊಚಾ ಕಾಳ್ಜಾಂತ್ ಮಾರ್ಕುಕ್ ಬರೊ ಮಾನ್ ಆಸ್‌ಲ್ಲೊ. ಆಪುಣ್ ಗಲ್ಫಾಕ್ ಆಯಿಲ್ಲ್ಯಾ ಪಾಟ್ಲ್ಯಾನ್ ಖಂಡಿತ್ ಜಾವ್ನ್ ಮಾರ್ಕುಚೊ ಹಾತ್ ಆಸ್‌ಲ್ಲೊ ಮ್ಹಳ್ಳೆಂ.

ಮಾರ್ಕುನ್ ತಿಯೊಕ್ ಇಗರ್ಜೆಕ್ ಆಪವ್ನ್ ವೆಲೊ. ಸಾಂಜೆಚೆಂ ಮೀಸ್ ಆಯ್ಕೊನ್ ತೆ ಭಾಯ್ರ್ ಆಯ್ಲೆ. ಸಾಂಗಾತಾ ಹೊಟೆಲಾಕ್ ವಚೊನ್ ಚಾ ಪಿಯೆಲಾಗ್ಲೆ. ಚಾಯೆಚೆಂ ಬಿಲ್ಲ್ ಫಾರಿಕ್ ಕರ್ತಾನಾ ಹರ್‍ಯೆಕಾ ದಿನಾರಾಂಕ್ ಕಿತ್ಲೆ ರುಪಯ್ ಜಾತಾತ್ ಮ್ಹಳ್ಳೆವಿಶಿಂ ಚಿಂತ್ನಾಂ ತಿಯೊಚಾ ಮತಿಂತ್ ಆಯ್ಲಿಂ. ಗಾಂವಾಂತ್ ಜಾಲ್ಯಾರ್ ದೋನ್ ಯಾ ತೀನ್ ರುಪ್ಯಾಂಕ್ ಏಕ್ ಕೋಪ್ ಚಾ ಮೆಳ್ತಾಲಿ. ಆನಿಂ ಹಾಂಗಾಸರ್ ತೆಚ್ಚ್ ಚಾಯೆಕ್ ಕಾಲ್ದೊ ದಿನಾರ್ ಯಾ ಅರ್ಧೊ ದಿನಾರ್. ಮ್ಹಳ್ಯಾರ್ ಚಡುಣೆಂ ಸಾಟ್ ಯಾ ಸತ್ತರ್ ರುಪಯ್. ತಿಯೊಚಿ ಮತ್ ಲೇಕ್ ಘಾಲ್ತಾಲಿ.

ಮಾರ್ಕುನ್ ತಿಯೊಕ್ ಕುವೆಯ್ಟಾ ವಿಶ್ಯಾಂತ್, ಹಾಂಗಾಚಾ ರೆಗ್ರ್ಯಾಂ ವಿಶ್ಯಾಂತ್ ಇಲ್ಲಿ ಸಮ್ಜಣಿಂ ದಿಲಿ.

ಹರ್ಶೆಂಚೆಪರಿಂ ತ್ಯೇ ದೀಸ್‌ಯೀ ಲೊಕಾಂಚಿ ಖೆಟ್ ಚಡ್‌ಲ್ಲಿ. ಲೊಕಾಂಚಿ ಖೆಟ್ ಪಳೆವ್ನ್ ಕಾಂಯ್ ಆಜ್ ಹಾಂಗಾ ಫ಼ೆಸ್ತ್‌ಗೀ ಮ್ಹಣೊನ್ ತಿಯೊ ವಿಚಾರಿಲಾಗ್ಲೊ. ಹಾಸೊನ್ ಮಾರ್ಕುನ್ ಜಾಪ್ ದಿಲಿ;

" ಹಾಂಗಾಚೆಂ ಜಿವಿತ್ ಸದಾಂ ಫ಼ೆಸ್ತ್. ಕೊಣಾಕ್ ಫ಼ೆಸ್ತ್ ತರ್ ಕೊಣಾಕ್ ಖ್ಯಾಸ್ತ್."

"ಹಾಂಗಾ ಆಯಿಲ್ಲೊ ಚಡ್ತಾವ್ ಲೋಕ್ ತಾಣಿಂ ಭೊಗ್ಚೆ ವಳ್ವಳೆ, ಕಳ್ವಳೆ ಎಕಾಮೆಕಾ ವಾಂಟುನ್ ಘೆಂವ್ಕ್ ಯೆತಾತ್. ಜಾಂವ್ಕ್ ಪುರೊ ತೆ ಎಕಾಮೆಕಾ ಸಯ್ರೆ, ಈಸ್ಟ್, ವಾಡ್ಯಾಚೆ ಯಾ ಫಿರ್ಗಜೆಚೆ, ಯಾ ನಿಮಾಣೆಂ ಆಮ್ಚಾಚ್ಚ್ ದೇಸಾಚೆ. ಕೋಣ್ ರಡ್ತಾ ಆನಿ ಕೋಣ್ ಭುಜಯ್ತಾ. ಕೋಣ್ ಹಾಸ್ತಾ ತರ್ ಕೋಣ್ ರಡ್ತಾ. ಕೋಣ್ ದುಖಾಂ ಗಳಯ್ತಾ ತರ್, ಕೋಣ್ ದುಖಾಂ ಪುಸ್ತಾ. ಹಾಂಗಾಸರ್ ಕಶ್ಟ್ ಮ್ಹಳ್ಳೆ ಸಮ್ಜಾನಾತ್‌ಲ್ಲೆ ಕೊಣೀಂ ನಾಂತ್. ಹರ್‍ಯೆಕ್ಲ್ಯಾಕ್ ತಾಂತಾಂಚೆಚ್ಚ್ ಮ್ಹಳ್ಳೆ ಕಶ್ಟ್ ಆಸಾತ್. ತಾಂಚೆಂ ಸುಃಖ್ ದೂಃಕ್ ಎಕಾಮೆಕಾ ವಾಂಟುನ್ ಘೆಂವ್ಕ್ ಮಾತ್ರ್ ಹರ್‍ಯೆಕಾ ದಿಸಾ ಸಗ್ಳೆ ಹಾಂಗಾಸರ್ ಜಮೊ ಜಾತಾತ್. ಕೋಣ್ ಯೆತಾ ಗಾಂವ್ಚಾ ಆಪ್ಲ್ಯಾ ಘೊವಾಕ್, ಭುರ್ಗ್ಯಾಂಕ್, ಕಾಗ್ದಾಂ ಬರಂವ್ಕ್, ಕೋಣ್ ಯೆತಾ ಗಾಂವ್ಚಾಂಚಿ ಕಾಗ್ದಾಂ ವಾಚುಂಕ್. ಕೋಣ್ ಬರಯ್ತಾ ಪೊಯ್ಶೆ ಧಾಡುಂಕ್, ಕೋಣ್ ಬರಯ್ತಾ ವಸ್ತು ಧಾಡುಂಕ್. ಪುಣ್ ಹಾಂಗಾಸರ್ ಎಕ್ಸುರ್ಪಣ್, ಕಶ್ಟ್ ಅಕ್ಲಾಸ್ ಭೊಗುನ್ ಆಸ್ಚಾಂಕ್ ಹಿಂ ದುಃಖಾಂ ಸದಾಂಚಿಂ"

ತಿಯೊಚೆಂ ಕಾಳಿಜ್ ಏಕ್ ಘಡಿ ಬಿರ್ಮತೆನ್ ಭರ್ಲೆಂ. ವ್ಹಯ್ ತೊ ಆನಿಂ ಮಾರ್ಕು ವಚೊನ್ ಎಕಾ ಕೊನ್ಶಾರ್ ಬೊಸ್ಲೆ. ರಸ್ತ್ಯಾ ಬಗ್ಲೆನ್ ಜಾಯ್ತೊ ಲೋಕ್ ಜಮೊ ಜಾಲ್ಲೊ. ಕೊಣಾಕ್ ತಿ ಹಾಪ್ತ್ಯಾಚಿ ರಜಾ, ಕೊಣಾಕ್ ಮಹಿನ್ಯಾಚಿ. ಕೊಣಾಕ್ ತಿ ರಜಾ ಆನಿ ಕೊಣಾಕ್ ತಿ ಮಜಾ. ಮೀಸ್ ಜಾತೆಚ್ ಮೆಳ್ಚಿಂ ತಿಂ ದೋನ್ ತೀನ್ ವೊರಾಂನಿ ತಾಣಿಂ ಜಾಹಿತ್ತೆಂ ಉಲಂವ್ಕ್ ಆಸಾ. ಜಾಹಿತ್ತೆಂ ಆಯ್ಕೊಂಕ್ ಆಸಾ. ಗಾಂವಾಕ್ ವೆಚಾಂ ವಿಶ್ಯಾಂತ್, ಗಾಂವಾಥಾವುನ್ ಯೆಂವ್ಚಾಂ ವಿಶ್ಯಾಂತ್. ತರ್ನಾಟೆ ಥೊಡೆ ತೆವ್ಶಿನ್ ಹೆವ್ಶಿನ್ ಜವಾಬ್ಧಾರೆಚೊ ಭರೊ ನಾಸ್ತಾನಾ ತೊಂಡಾರ್ ಸಿಗ್ರೆಟ್ ದವ್ರುನ್ ಭಂವಾಡೊ ಕಾಡ್ತಾಲೆ, ಫುಲಾಂಕ್ ಸೊಧುನ್ ವೆಚಾ ಭ್ರಮರಾಪರಿಂ. ಘರ್ ಕಾಮ್ ಕರ್ತಾನಾ ಸರ್‍ವ್ ಥರಾಚೆ ಕಶ್ಟ್ ಸೊಸುನ್‌ಯಿ ಹಾಂಗಾಚಾ ಮನ್ಶಾಂನಿ ಸಾಂಗ್‌ಲ್ಲೆಂ ಸಗ್ಳೆಂ ಸೊಸುನ್, ರಾತ್ ಮ್ಹಣ್ ನಾ, ದೀಸ್ ಮ್ಹಣ್ ನಾ. ಉಲೊ ಮಾರ್ತಾನಾ ವಚಾಜಯ್, ಸಾಂಗ್‌ಲ್ಲೆಂ ಕಾಮ್ ಕರಿಜಾಯ್. ತರೀ ಕೊಣಾಕ್ ಕೆದಾಳಾ ಕಾಮಾಂತ್ಲೊ ಖೊಟಾವ್ನ್ ಧಾಡ್ತಾತ್ ಮ್ಹಳ್ಳೆಂ ಕೊಣೀಂ ನೆಣಾಂತ್. ಭಿತರ್ ಬಾಂಧುನ್ ದವರ್ಲೆಲೊ ರಾಗ್, ತಾತ್ಸಾರ್ ಭಾಯ್ರ್ ಘಾಲುಂಕ್ ಹಾಂಕಾ ಆಯ್ಚೊ ದೀಸ್.

ಎಕೆಕ್ಲಿಂ ಎಕೆಕ್ ಕಾಣಿಯೊಂ ಸಾಂಗ್ತಾಲಿಂ. ಎಕ್ಲೊ ಸಾಂಗ್ತಾಲೊ. "ಯೇಜಂಟಾಕ್ ಸಾಟ್ ಹಜಾರ್ ಭರುನ್ ಆಯ್ಲೊಂ. ಪುಣ್ ಕಂಪೆನಿಚಾ ವಿಜಾರ್ ಹಾಡ್‌ಲ್ಲ್ಯಾ ಧನ್ಯಾನ್ ಮ್ಹಾಕಾ ಘರ್‌ಕಾಮಾಕ್ ಲಾಗಯ್ಲೆಂ. ಕಾಮ್ ಕೆಲ್ಲೆಶಿವಾಯ್ ಹೆರ್ ನಿರ್‍ವೋಗ್ ನಾ. ಘರಾಂತ್ ಕಾಂಯ್ ಉತ್ಪತ್ತಿ ನಾ. ಜೊಡ್ತೆಲ್ಯಾಂಚಾಕೀ ಚಡ್ ಮೊಡ್ತೆಲಿಂ ಆಸಾತ್. ಪಿಡೇಸ್ತ್ ಆವಯ್ ಆಸಾ. ತಿಚಿ ಚಾಕ್ರಿ ಕರ್ಚಿಂ ಆಸ್ಲ್ಯಾರೀ ವಕ್ತಾಂ ಮೊಲಾಚಿಂ. ಆನಿಂ ಹಾಂಗಾ ಮಹಿನ್ಯಾಚೊ ಸಾಂಬಾಳ್ ಸಾರ್ಕೊ ಮೆಳಾನಾ ತರೀ ಗಾಂವಾಕ್ ಮಹಿನ್ಯಾಕ್ ವೆಳಾರ್ ಪೊಯ್ಶೆ ಧಾಡುಂಕ್ ಜಾಯ್".

ಎಕ್ಲಿ ಪ್ರಾಯೆಸ್ತ್ ಬಾಯ್ಲೆ ವಿಶ್ಯಾಂತ್ ಕೊಣೆಂಗೀ ಸಾಂಗ್ಚೆಂ ಆಯ್ಕಾತಾಲೊ ತಿಯೊ. "ಇಕ್ರಾ ವರ್ಸಾಂ ಪ್ರಾಯೆರ್ ಆಯಿಲ್ಲಿ. ಆತಾಂ ಪಳೆ ಪನ್ನಾಸಾಂ ವಯ್ರ್ ಪ್ರಾಯ್ ಜಾಲ್ಯಾ. ಆಜೂನೀ ತೆಚ್ಚ್ ಘರಾಂತ್ ಘೊಳೊನ್ ಆಸಾ. ದೊಗಾಂ ಭಯ್ಣ್ಯಾಂಕ್ ಕುವೆಯ್ಟಾಕ್ ಹಾಡಯ್ಲೆಂ. ಹಾಂಗಾಚ್ ತಾಂಕಾ ಕಾಜಾರ್ ಕರವ್ನ್ ದಿಲೆಂ. ತಿಂ ಬರ್‍ಯಾ ಘರಾಣ್ಯಾಕ್ ಪಾವ್ಲಿಂ. ಆನಿಂ ತಿ ಅಜೂನ್ ಅಂಕ್ವಾರ್ ಉರೊನ್ ಆಪ್ಲ್ಯಾ ಭಯ್ಣ್ಯಾಂಕ್, ತಾಂಚಾ ಭುರ್ಗ್ಯಾಂಕ್ ಸಾಂಭಾಳ್ತಾಲಿ. ಎಕಾ ಭಯ್ಣಿಚಾ ಘೊವಾನ್ ಆಪ್ಲ್ಯಾ ಬಾಯ್ಲೆಕ್ ಸೊಡ್ನ್ ಎಕಾ ಫಿಲಿಪಿನೊ ಚೆಡ್ವಾಸವೆಂ ಧಾಂವ್‌ಲ್ಲ್ಯಾ ಉಪ್ರಾಂತ್ ತ್ಯಾ ಭಯ್ಣಿಚೊ ಗೋಳ್ ಜಾಲ್ಲೊ. ಕಾಮ್ ಕರ್ಚೆಕಡೆ ಕರಂದಾಯ್. ಆನಿಂ ಹೆಂ ಸಗ್ಳೆಂ ತ್ಯೆ ಪ್ರಾಯೆಸ್ತ್ ಬಾಯ್ಲೆನ್ ಆಪ್ಲ್ಯಾ ಖಾಂದ್ಯಾರ್ ವೋಡ್ನ್ ಸಾಂಭಾಳ್‌ಲ್ಲೆಂ. ಆತಾಂ ಇತ್ಲಿ ಪ್ರಾಯ್ ಜಾತಾನಾ ಎದೊಳ್ ಸಾಂಗಾತ್ ದಿಲ್ಲಿ ಭಲಾಯ್ಕಿ ಆತಾಂ ಭಿಗಡ್ಲ್ಯಾ. ಗೋಡ್‌ಮುತಾಚಿ ಪಿಡಾ, ಬ್ಲಡ್‌ಪ್ರೆಶ್ಶರ್, ಮ್ಹಣೊನ್ ತೆಂ ಖಾ ಹೆಂ ಖಾಯ್ನಾಕಾ ಮ್ಹಣ್ತಾನಾ ತಿಚಿ ಗತ್ 'ದಾಂತ್ ಆಸ್ತಾಂ ಚಣೆಂ ನಾಂತ್ ಆನಿಂ ಚಣೆಂ ಆಸ್ತಾನಾ ದಾಂತ್ ನಾಂತ್' ಮ್ಹಳ್ಳೆಪರಿಂ ಜಾಲ್ಲಿ. ತಿ ಕೊಣಾ ಖಾತಿರ್ ಘೊಳ್ತಾ ಮ್ಹಳ್ಳೆಂ ತಿಕಾಚ್ ಕಳಿತ್ ನಾತ್‌ಲ್ಲೆಂ. ಚಡ್ ಕಿತ್ಯಾಕ್ ಫಾಲ್ಯಾ೦ ತಿಣೆಂ ಮೆಲ್ಯಾರ್ ತಿಚಾ ಮರ್ಣಾಕ್ ದೋನ್ ಥೆಂಭೆ ದೂಕ್ ಗಳಂವ್ಚಿಂ ಕೋಣೀ ಆಸ್ಚಿಂನಾಂತ್. ತರೀ ತಿ ಹರ್‍ಯೆಕಾ ಹಾಪ್ತ್ಯಾಂತ್ ಚುಕಾನಾಸ್ತಾಂ ಮಿಸಾಕ್ ಯೆತಾಲಿ. ಆನಿಂ ಹೆಚ್ಚ್ ಜಾಗ್ಯಾರ್ ಯೇವ್ನ್ ಬೊಸ್ತಾಲಿ. ಉಲಯ್ತಾಲಿ, ಆಯ್ಕಾತಾಲಿ. ವಳೊಕ್ ಪಾಳೊಕ್ ನಾತ್‌ಲ್ಲ್ಯಾಂಕೀ ಭುಜಯ್ತಾಲಿ, ಧಯ್ರ್ ದಿತಾಲಿ. ಸಕ್ಡಾಂ ತಿಕಾ ಮೊಗಾನ್ ಮಾವ್ಶಿ ಮ್ಹಣೊನ್ ಆಪಯ್ತಾಲಿಂ. ಆನಿಂ ಪೋರ್ ತಿ ಸರ್ಲಿ. ಭಿರ್ಮತ್ ತಿಚಿ ಮೆಲ್ಲಿ ಕೂಡ್ ಲೆಗುನ್ ಆಮ್ಚಾ ದೇಸಾಕ್ ಪಾಟಿಂ ಧಾಡ್ಚಿಂ ಕೊಣೀಂ ನಾಸ್ತಾಂ ಹಾಂಗಾಚ್ಚ್ ತಿಕಾ ಮಾತ್ಯೆಕ್ ಪಾವಯ್ಲೆಂ".

ಇಲ್ಲೊ ವೇಳ್ ಜಾತಾನಾ ಕುಶಿನ್ ಆಸ್ಚೆ ಥೊಡೆ ಖಂಚಾಗೀ ತರ್ನಾಟ್ಯಾ ವಿಶ್ಯಾಂತ್ ಉಲಯ್ತಾಲೆ. ದೊಗಾಂ ಭಯ್ಣಾಂಚೊ ಎಕ್ಲೊಚ್ ಭಾವ್ ಜಾವ್ನ್ ತೊ ಆಯಿಲ್ಲೊ. ಯೇಜಂಟಾಕ್ ಪೊಯ್ಶೆ ದೀವ್ನ್ ಆಯಿಲ್ಲೊ ಬಾವ್ಡೊ ಮೊಸ್ತ್ ವಳ್ವಳ್ಳೊ. ಕಾಮ್ ಕೆಲೆಂ ತರೀ ಸಾಂಬಾಳ್ ಅಜೂನ್ ನಾ. ತೀನ್ ಮಹಿನೆಂ ಕಾಮ್ ಕೆಲೆಂ ತರೀ ಏಕ್ ಪೊಯ್ಸೊ ಲೆಗುನ್ ಮೆಳಾನಾಸ್ತಾಂ ಅಖ್ರೇಕ್ ತಾಣೆಂ ಸಾಂಬಾಳ್ ವಿಚಾರ್‌ಲ್ಲ್ಯಾಕ್ ತಾಕಾ ಕಾಮಾಂತ್ಲೊ ಕಾಡ್ಲೊ. ಜಿಯೆಂವ್ಚಿ ವಾಟ್ ಕಳಾನಾಸ್ತಾಂ ಕಂಗಾಲ್ ಆಸ್‌ಲ್ಲೊ ತೊ ಕಾಮಾ ಖಾತಿರ್ ಥಂಯ್ ಹಾಂಗಾ ಧಾಂವ್ಲೊ. ತಾಂಚೆ ಹಾಂಚೆ ಪಾಂಯ್ ಧರ್ಲೆ.

ಕೋಣ್ ಮ್ಹಣಾಲೊ "ಆತಾಂ ಕಿತೆಂ ಮ್ಹಳ್ಯಾರೀ ಗಲ್ಫ್ ಪಯ್ಲೆಂಚೆಪರಿಂ ನಾ ಹಾಬಾ. ಪಯ್ಲೆಂಚೆಪರಿಂ ಜಾಲ್ಲೆಂ ತರ್ ತುಕಾ ಕಾಮ್ ಸೊಧ್ಚೆಂ ಮ್ಹಜಾ ಎಕಾ ಘಡಿಯೆಚೆಂ ಕಾಮ್"

ಅನಿ ಕೋಣ್ ಮ್ಹಣಾಲೊ "ಛೆಕ್ಕ್! ತುವೆಂ ಆತಾಂ ಸಾಂಗ್ಚೆಂಗೀ? ಹಾಂವೆ ಪೋರ್‌ಚ್ ತ್ಯಾ ಇರ್ಮಾಂವ್ಕ್ ಕಾಮಾಕ್ ಲಾಗಯ್ಲೊ.ಆತಾಂ ಪಳೆ ತಾಕಾ ಕಿತ್ಲೊ ಸಾಂಭಾಳ್ ಮೆಳ್ತಾ?"

ಪೊಕೊಳ್ ಉಲವ್ಣೆಂ ಉಲಂವ್ಚೆಂ ಬಂಡಲ್ಬಾಜ್ ಮನಿಸ್ ಕಾಂಯ್ ಉಣೆಂಯೆಂ?

ಅನಿಂ ಕೋಣ್ ಮ್ಹಣಾಲೊ "ಪಳೆ ತುಂ ಆಮ್ಚಾ ಮಾಂಯ್‌ಗಾಂವ್ಚೊ ಭಾವ್ ದೆಖುನ್ ತುಕಾ ಮ್ಹಜತ್ ಕರ್‍ತಾಂ. ಮ್ಹಾಕಾ ಮ್ಹಜೆಂ ಆಫ಼ಿಸ್ ಸಾಂಬಾಳುಂಕ್ ಏಕ್ ಮ್ಹನಿಸ್ ಜಾಯ್. ತುಕಾ ವಿಜಾ ಹಾಂವ್ ದಿತಾಂ. ತುವೆಂ ಯೇವ್ನ್ ಆಫಿಸಾಂತ್ ಬೊಸ್ಯೆತ್. ಪುಣ್ ಸಾಂಭಾಳ್ ಮಾತ್ ನಾ"

ಕಠೀಣ್ ಕಂಗಾಲ್ ಪರಿಗತೆಂತ್ ಆಸ್ಚಾ ಹಾಣೆಂ ಯೇವ್ನ್ ಚಾರ್ ಮಹಿನೆ ಉತರ್‍ಲ್ಯಾರೀ ಗಾಂವಾಕ್ ಬಿಲ್ಕುಲ್ ಪೊಯ್ಶೆ ಧಾಡುಂಕ್ ಜಾಯ್ನಾಸ್ತಾಂ, ಪಾಟಿಂ ಗಾಂವಾಕ್ ವೆಚಾಕೀ ಹಾಂಗಾಸರ್‌ಚ್ ಮೊರ್ಚೆಂ ಅಧಿಕ್ ಬರೆಂ ಮ್ಹಣೊನ್, ಚಾರ್ ಮಾಳಿಯೆ ಥಾವುನ್ ಉಡೊನ್ ಜೀವ್ಘಾತ್ ಕರ್ನ್ ಮೆಲೊ.

ತಿಯೊಕ್ ಕಿತ್ಯಾಕ್‌ಗೀ ಕೋಣ್‌ಗೀ ಆಪ್ಲಿಂಚ್ ಸರ್ಲಿಂ ಮ್ಹಳ್ಳಿ ದೂಃಖ್ ಆಯ್ಲಿ. ಹಾಂಗಾ ಆಸ್ಚಾಂಪಯ್ಕಿ ತರ್ ಆಪುಣ್ ವಡ್ ನಶಿಬ್‌ವಂತ್. ತಿಯೊ ಅಪ್ಲೇಸ್ತಕಿಂ ಚಿಂತಿಲಾಗ್ಲೊ. ತರ್ ಹಾಂಗಾಸರ್ ಮ್ಹಜೆಂಚ್ ಕಾಮ್ ಕಾಂಯ್ ಕಶ್ಟಾಂಚೆಂ ನ್ಹಂಯ್. ವೆಳಾರ್ ಖಾಂವ್ಕ್ ಮೆಳ್ತಾ ತಶೆಂಚ್ ಸಾಂಭಾಳ್‌ಯಿ ಮೆಳ್ತಾ. ಹೆಂ ಸಗ್ಳೆಂ ಮ್ಹಜಾ ಭುರ್ಗ್ಯಾಂಚೆಂ ನಶಿಬ್ ಮ್ಹಣೊನ್ ನಿಹಾಳ್ಳೊ.

ಸಭಾರ್ ವೇಳ್ ಮಾರ್ಕುಸವೆಂ ಉಲವ್ನ್ ಜಾತೆಚ್ ಮಾರ್ಕುನ್ ತಾಕಾ ಪಾಟಿಂ ವರ್ನ್ ಪಾವವ್ನ್ ತೊ ಆಪ್ಲ್ಯಾ ಕಾಮಾಚಾ ಘರಾ ಗೆಲೊ.

ಪರ್ಗಾಂವ್, ಗಲ್ಫ್ ತರ್ ಆಪ್ಣಾನ್ ಚಿಂತ್‌ಲ್ಲೆಪರಿಂ ನಾತ್‌ಲ್ಲೊ. ಹಾಂಗಾ ದುಡ್ವಾಚಿಂ ಝಡಾಂ ಲಾಯ್ಲ್ಯಾಂತ್ ಆನಿಂ ಗಲ್ಫಾಕ್ ವೆಚೆಂ ಆನಿಂ ತೊ ರೂಕ್ ಹಾಲಾಂವ್ಚೊ ಆನಿಂ ತವಳ್ ಕಿತ್ಲೊ ದುಡು ಝಡ್ತಾ, ತೊ ಎಕ್ಟಾಂಯ್ ಕರ್ನ್ ಗಾಂವಾಕ್ ಧಾಡ್ಚೊ ಮ್ಹಣೊನ್ ಚಿಂತುನ್ ಆಸ್‌ಲ್ಲ್ಯಾಂಕ್ ಹಾಂಗಾಚಿ ನೀಜ್ ಪರಿಗತ್ ದೆಖ್ತಾನಾ ಖಂಡಿತ್ ಜಾವ್ನ್ ಹುನ್ ಹುನ್ ತೂಪ್ ತೊಂಡಾಂತ್ ಘಾಲ್ಲೆಪರಿಂ ಅನ್ಭೋಗ್ ಜಾತಾ ಮ್ಹಣ್ಯೆತ್. ಗಿಳುಂಕೀ ನ್ಹಂಯ್, ಥುಕುಂಕೀ ನ್ಹಂಯ್. ತರೀ ಆತಾಂ ತಿಯೊಕ್ ದೆವಾನ್ ಕಾಂಯ್ ಉಣೆಂ ಕೆಲ್ಲೆಂ ನಾ. ಗಾಂವಾಂತ್ ಸ್ಥಾನ್ ಮಾನ್ ಮೆಳಾನಾ ಮ್ಹಣೊನ್ ಹಾಂಗಾ ಗಲ್ಫಾಕ್ ಆಯಿಲ್ಲ್ಯಾಂಚೊ ಭೊಂಗೊಸ್ತೊಳ್ ಜಾಲ್ಲೊ ಆಯ್ಕಾತಾನಾ, ಹಾಂಗಾ ಆಮಿಂ ಪಯ್ಲೆಚ್ ಪರ್ದೆಶಿ ಆನಿಂ ದುಡ್ವಾ ಖಾತಿರ್ ಕಿತೆಂಯ್ ಕರ್ಚೆ ಆಬ್ಲೇಶಿ ಮ್ಹಣೊನ್ ಅರ್ಭಿ ಸಮ್ಜತಾತ್. ತಾಂಚಾ ದುಡ್ವಾಚಾ ಭಳಾನ್ ಆನಿಂ ಹಾಂಕಾರಾನ್ ಕೊಣಾ ಕೊಣಾಚೆಂ ಮನ್ಶಾಪಣಾಚೊಚ್ ಬೊಂಗೊಸ್ತೊಳ್ ಕರ್ತಾತ್. ತರೀ ಹೊ ಗಲ್ಫ್ ಆಮ್ಕಾಂ ಜಾಯ್ಜಯ್. ಗಾಂವಾಂತ್ ತರೀ ಆಮಿಂ ಕರ್ಚೆಂ ಕಿತೆಂ ಆಸಾ? ಕಿತ್ಲೆಂ ಜೊಡ್ಲ್ಯಾರೀ ತಿತ್ಲೆಂಚ್. ಗರ್ಜೊ ಎಕಾ ಪಾಟ್ಲ್ಯಾನ್ ಏಕ್ ಸದಾಂ ಆಸ್ತಾತ್. ತ್ಯೇ ಮಧೆಂ ಹಿ ಮಾರ್ಗಾಯ್, ತಾಂಚೆ ಮಧೆಂ ಯೆಂವ್ಚಿ ಹಿ ಪಿಡಾ ಶಿಡಾ ಮ್ಹಣ್ತಾನಾ ಗಾಂವ್‌ಯಿ ನ್ಹಂಯ್ ಗಲ್ಫ್‌ಯಿ ನ್ಹಂಯ್ ಮ್ಹಣೊನ್ ಭೊಗೊಂಕ್ ಲಾಗ್ಲೆಂ.

ತೊ ಪಾಟಿಂ ಯೇವ್ನ್ ಜೇವ್ನ್ ಖಂತೀಸ್ಟ್ ಜಾಲ್ಲೊ ಪಳೆಲ್ಲ್ಯಾ ಮಣಿಕ್ ಕಿತೆಂಗೀ ದುಭಾವ್ ಭೊಗ್ಲೊ ಆನಿಂ ತಾಣೆಂ ತಿಯೊಕ್ ವಿಚಾರ್ನ್ ಸೊಡ್ಲೊ. ತಿಯೊನ್ ಆಪ್ಣಾನ್ ಪಳೆಲ್ಲೊ, ಆಯ್ಕಾಲ್ಲೊ ಅನ್ಭೋಗ್ ಸಾಂಗಾತಾ ಮಣಿ ಹಾಸ್ಲೊ.

"ಹಾಂಗಾ ಕೋಣ್ ಮನಿಸ್ ಸಂತೊಸಾನ್ ಯಾ ಸಂತೊಸಾ ಖಾತಿರ್ ಯೆತಾ? ಹೊ ಏಕ್ ಸಾಕ್ರಿಫ಼ಿಸ್, ಆನಿಂ ಆಪ್ಲ್ಯಾ ಕುಟ್ಮಾಚಾ ಉದರ್ಗತೆಖಾತಿರ್ ಹೊ ಸಾಕ್ರಿಫ಼ಿಸ್ ಖಂಡಿತ್ ಜಾವ್ನ್ ಗರ್ಜೆಚೊ. ಕಶ್ಟ್ ಕೊಣಾಕ್ ನಾಂತ್? ತುಕಾ ತುಜೆ ಮ್ಹಳ್ಳೆ ಕಸ್ಟ್ ನಾಂತ್‌ಗೀ? ಗೋಪಿಕ್ ಗೋಪಿಚೆ ಮ್ಹಳ್ಳೆಚ್ ಕಶ್ಟ್ ಆಸಾತ್ ಆನಿಂ ತಶೆಂಚ್ ಮ್ಹಾಕಾ ಮ್ಹಜೆ ಮ್ಹಳ್ಳೆಚ್ಚ್"

ಕಿತ್ಯಾಕ್‌ಗೀ ಮಣಿಚಿಂ ಉತ್ರಾಂ ತಿಯೊಚಾ ಕಾಳ್ಜಾಕ್ ತೊಪುಂಕ್ ಲಾಗ್ಲಿಂ.

ಮುಖಾರುನ್ ತೊ ಮ್ಹಣಾಲೊ.

"ಹಾಂವ್ ಮ್ಹಜಾ ಕುಟ್ಮಾಂತ್ಲೊ ಮ್ಹಾಲ್ಘಡೊ. ಆನಿಂ ಆಮ್ಕಾಂ ದೋಗ್ ಭಯ್ಣ್ಯೊ ಆನಿಂ ದೋಗ್ ಭಾವ್. ಆಮ್ಚೊ ಬಾಪುಯ್ ಮ್ಹಜಾ ನಿಮಾಣ್ಯಾ ಭಯ್ಣಿಚಾ ಜಲ್ಮಾಲ್ಲ್ಯಾ ಪಯ್ಲ್ಯಾ ಹಾಪ್ತ್ಯಾಂತ್‌ಚ್ ಅಂತರ್ಲೊ. ಆನಿಂ ಘರ್ಚೊ ಸಗ್ಳೊ ಹಾರ್‌ಭಾರ್ ಮ್ಹಜೆರ್ ಪಡ್ಲೊ.

ತರೀ ಹಾಂವ್ ಕಂಗಾಲ್ ಜಾಂವ್ಕ್ ನಾ. ಮ್ಹಜಿ ಆವಯ್ ಥಂಯ್ ಹಾಂಗಾ ಮ್ಹಣೊನ್ ಕಾಮ್ ಕರ್ತಾಲಿ ಆನಿಂ ಹಾಂವೆಂಯ್ ಭೋವ್ ಲ್ಹಾನ್ ಪ್ರಾಯೆರ್ ಕಾಮ್ ಕರುಂಕ್ ಧರ್ಲೆಂ ಆನಿಂ ಮ್ಹಜಾ ಭಾವಾಂಕ್ ಶಿಕಾಪ್ ದಿವಯ್ಲೆಂ, ಭಯ್ಣ್ಯಾಂಕ್ ಕಾಜಾರ್ ಕರಯ್ಲೆಂ. ಹಾಂತುಂ ಕಿತೆಂಚ್ ವಿಶೇಷ್ ನಾಂ. ಹಾಂವೆಂ ಫಕತ್ ಮ್ಹಜೆಂ ಕರ್ತವ್ಯ್ ಕೆಲೆಂ. ಕಿತ್ಲೆಶೆ ದೀಸ್ ಉಪಾಶಿಂ ರಾವ್ಲಾಂ. ತರೀ ನಿಮಾಣೆಂ ಮ್ಹಜಾ ಭಾಂವಾಂ ಭಯ್ಣ್ಯಾಂಕ್ ಎಕಾ ಹಂತಾಕ್ ಪಾವಯ್ಲಾಂ ಮ್ಹಳ್ಳೊ ಸಂತೊಸ್ ಮ್ಹಾಕಾ ಆಸ್‌ಲ್ಲೊ.

ಆತಾಂ ಪಳೆ ಮ್ಹಜಿ ಪ್ರಾಯ್ ಚಾಳೀಸ್ ಉತಾರ್ಲ್ಯಾ. ಪಾಟ್ಲ್ಯಾ ಇಕ್ರಾ ವರ್ಸಾಂ ಥಾವುನ್ ಹಾಂವ್ ಮದ್ರಾಸ್ ಸೊಡ್ನ್ ಬೊಂಬೊಯ್ ಆಯಿಲ್ಲ್ಯಾನ್ ಗಾಂವಾಂತ್ ಆಸ್ಚಾ ಜಾಗ್ಯಾಂತ್ ಏಕ್ ಹಳ್ತಾಚೆಂ ಘರ್ ಬಾಂದಯ್ಲೆಂ. ನಿಮಾಣೆಂ ಹಾವೆಂಯ್ ಕಾಜಾರ್ ಜಾವ್ನ್ ಮ್ಹಾಕಾಯ್ ಭುರ್ಗೆಂ ಜಾಲೆಂ. ಆತಾಂ ಪಳೆ, ಮ್ಹಜಾ ಧಾಕ್ಟ್ಯಾ ಭಾವಾಂಚೊ ಬಾಯ್ಲ್ಯೊ ಯೆತೆಚ್ ಘರಾಕ್ ವಾಂಟೆ ಜಾಯ್ಜಯ್ ಮ್ಹಣ್ತಾತ್. ತೆಂ ಘರ್ ಉಭಾರ್‌ಲ್ಲೆಂ ಹಾವೆಂ. ಆನಿಂ ಮ್ಹಾಕಾ ಹೆ ಕಾನೂನಾ ವಿಶ್ಯಾಂತ್ ಸಾಂಗ್ತಾತ್. ಕಾನೂನಾ ಪ್ರಕಾರ್ ಹೊ ಜಾಗೊ ವಾಂಟೊ ಜಾಯ್ಜಯ್ ಮ್ಹಣ್ತಾತ್. ತಾಂಕಾ ಶಿಖಾಪ್ ಕೊಣೆಂ ದಿಲ್ಲೆಂ ಮ್ಹಳ್ಳೆಂ ಸಯ್ತ್ ಸಾಕ್ಸ್ ದಿಂವ್ಚಿ ಆಮ್ಚಿ ಆವಯ್ ಎದೊಳ್‌ಚ್ ಮೊರೊನ್ ಮಾತಿಯೆಕ್ ಸಾರೆಂ ಜಾವ್ನ್ ಗೆಲ್ಯಾ. ತಶೆಂ ಆಸ್ತಾಂ ಎಕ್ಲೊ ಭಾವ್ ಸಾಂಗಾಲಾಗ್ಲೊ 'ಕಾಂಯ್ ನಜೊ. ಹಾಂವ್ ವಾಂಟ್ಯಾಕ್ ಝುಜಾನಾ, ಫಕತ್ ಮ್ಹಾಕಾ ದೋನ್ ಲಾಖ್ ರುಪಯ್ ದಿಶಿ ತರ್ ಹಾಂವ್ ಶೆರಾಂತ್‌ಚ್ ರಾವ್ತಾಂ'.

ಆನಿಂ ಹಾಂವೆಂ ದೋನ್ ಲಾಖ್ ಖಂಯ್ ಥಾವ್ನ್ ಹಾಡುಂ? ದೆಖುನ್ ಹಾವೆಂಚ್ ತಾಂಚೆಲಾಗ್ಚೆ ದೋನ್ ಲಾಖ್ ಮಾಗೊನ್, ತಾಂತ್ಲೆಂ ಥೊಡೆ ಪೊಯ್ಶೆ ಬೆಂಕಾಂತ್ ಜಮೊ ಕರ್ನ್, ಥೊಡೆ ಯೆಜೆಂಟಾಕ್ ದೀವ್ನ್ ಕಸೊಯ್ ಗಲ್ಫಾಕ್ ಪಾವ್ಲಾಂ. ಮ್ಹಜಿ ಬಾಯ್ಲ್ ಆನಿ ಭುರ್ಗಿಂ ಭಾಡ್ಯಾಚಾ ಘರಾಂತ್ ರಾವ್ತಾತ್. ಬರೆಂ ಜಾಲೆಂ ಮ್ಹಜಾ ಧುವೆಚಾ ನಶಿಬಾಂತ್ ಮ್ಹಾಕಾ ಗಲ್ಫಾಕ್ ಯೇಂವ್ಕ್ ಸಾಧ್ಯ್ ಜಾಲೆಂ. ಗಾಂವಾಂತ್‌ಯ್ ಕಶ್ಟ್ ಆಸಾತ್. ಆನಿಂ ಆಮಿಂ ಕಶ್ಟ್ ಕಾಡುಂಕ್‌ಚ್ ಜಲ್ಮಲ್ಲ್ಯಾಂವ್. ಪುಣ್ ತಫಾವತ್ ಇತ್ಲೊಚ್‌ಗೀ ಹಾಂಗಾಸರ್ ಕಾಂಯ್ ದೋನ್ ಕಾಸ್ ಉರವ್ಯೆತ್. ಪುಣ್ ಗಾಂವಾಂತ್ ತೆಂ ಅಸಾಧ್ಯ್."

ಮಣಿಚಿಂ ಉತ್ರಾಂ ಆಯ್ಕಾಲ್ಲ್ಯಾ ತಿಯೊಕ್ ಏಕ್ ಘಡಿ ಆರ್ ಮಾರ್‌ಲ್ಲೆಪರಿಂ ಜಾಲೆಂ ಜಾಯ್ಜಯ್. ತೊ ಥಂಡ್ ಜಾಲೊ. ಸಂಸಾರಾಂತ್ ಮನಿಸ್ ದೀಸ್ ಕಾಡುಂಕ್ ಕಿತ್ಲೆ ಸರ್ವ್ ವೇಸ್ ಪಾಂಗುರ್ತಾ ಮ್ಹಳ್ಳೆಂ ತಿಯೊಕ್ ಸಮ್ಜಾಲೆಂ. ಹಾಂಚೆಮಧೆಂ ಹೆ ಸಂಭಂಧ್, ಸಯ್ರಿಂ, ಮ್ಹಳ್ಳೆ ಸಬ್ಧ್ ಹ್ಯಾ ಜಿವಿತಾಂತ್ಲ್ಯಾ ಮಿಸ್ತೆರಾಂಕ್ ಅನಿಕೀ ನಿಗೂಢ್ ಕರ್ತಾಲೆ.

ಅಶೆಚ್ ದೀಸ್ ಪಾಶಾರ್ ಜಾಲೆ, ಎಕಾ ಸಾಂಜೆರ್ ಬೆಂಗಾಲಿ ಆಯ್ಲೊ ಆನಿಂ ಗಾಂವ್ಚಿಂ ದೋನ್ ಕಾಗ್ದಾಂ ದೀವ್ನ್ ಗೆಲೊ. ಆತಾಂ ತೆಗಾಂಚಾ ಕಾಳ್ಜಾಚೆ ದಡ್ದಡೆ ಚಡೊಂಕ್ ಲಾಗ್ಲೆ. ಪುಣ್ ತ್ಯಾ ದೋನ್ ಕಾಗ್ದಾಂ ಪಯ್ಕಿ ಏಕ್ ತಿಯೊಕ್ ಆಯಿಲ್ಲೆಂ ಅನ್ಯೇಕ್ ಮಣಿಕ್ ಆಯಿಲ್ಲೆಂ. ಗೋಪಿಚೆಂ ತೋಂಡ್ ಮಾತ್ ಬಾವ್ಲೆಂ.

ವೆಗಿಂ ವೆಗಿಂ ಕಾಗಾದ್ ಉಗ್ತೆಂ ಕೆಲ್ಲ್ಯಾ ತಿಯೊಕ್ ಆಪ್ಲ್ಯಾ ಬಾಯ್ಲೆಚೆಂ ಪಯ್ಲೆಂ ಕಾಗಾದ್ ಜಾಲ್ಲೆವರ್‍ವಿಂ. ಬಾಯ್ಲೆಭುರ್ಗ್ಯಾಂಚಾ ಮೊಗಾನ್ ಜಳೊನ್‌ಆಸ್ಚಾ ತಿಯೊಕ್ ಕಾಗಾದ್ ವಾಚುನ್ ಕಸ್ಲೊಗೀ ಜೀವ್ ಭರ್ಲೊ.

ಜಿಣ್ಯೆಂತ್ ಪಯ್ಲೆಪಾವ್ಟಿಂ ತಿಯೊನ್ ತಾಚಾಚ್ ಕುಟ್ಮಾಚೆಂ ಕಾಗದ್ ವಾಸ್ಚೆಂ. ಕಿತ್ಲೆಶ್ಯಾ ದಿಸಾಂ ಥಾವುನ್ ತೊ ಹ್ಯಾ ಕಾಗ್ದಾಚಿ ವಾಟ್ ರಾಕೊನ್ ಆಸ್‌ಲ್ಲೊ ಮ್ಹಳ್ಳೆಂ ತೊಚ್ಚ್ ಜಾಣಾಂ. ಕಾಂಯ್ ಮ್ಹಜೆಂ ಕಾಗಾದ್ ತಾಂಕಾಂ ಪಾವ್ಲಾಂಗೀ? ಘರಾ ಬಾಯ್ಲ್ ಭುರ್ಗಿಂ ಖಂತಿನ್ ಆಸಾತ್‌ಗೀ? ಮ್ಹಳ್ಳಿಂ ಚಿಂತ್ನಾಂ ಕಿತ್ಲೆಶೆಪಾವ್ಟಿಂ ತಿಯೊಚಾ ಮತಿಂತ್ ಆಯಿಲ್ಲಿಂ ನಾಂತ್? ಆನಿಂ ಆತಾಂ ಆಯಿಲ್ಲೆಂ ಕಾಗಾದ್ ಪರತ್ ಪರತ್ ತಾಣೆಂ ವಾಚ್ಲೆಂ ಆನಿ ಎಕಾ ವಯ್ರ್ ಏಕ್ ಉಮೆ ದೀಲಾಗ್ಲೊ.

ಮುಂದರ್‍ಸಿಲಾಂ...

Tags: Vally Quadras,e konkani novel, Konkani, Mangalore, Mangalorean, Mother Tongue

From around the world

ಪಾಟಿಂ ಗಾಂವಾಕ್ - ಅವಸ್ವರ್ 5

Post your comments

ಅವಸ್ವರ್ 1

ಅವಸ್ವರ್ 2

ಅವಸ್ವರ್ 3

ಅವಸ್ವರ್ 4

ಅವಸ್ವರ್ 5

ಅವಸ್ವರ್ 6

ಅವಸ್ವರ್ 7

ಅವಸ್ವರ್ 8

ಅವಸ್ವರ್ 9

ಅವಸ್ವರ್ 10

ಅವಸ್ವರ್ 11

ಅವಸ್ವರ್ 12

ಅವಸ್ವರ್ 13

ಅವಸ್ವರ್ 14

ಅವಸ್ವರ್ 15

ಅವಸ್ವರ್ 16

ಅವಸ್ವರ್ 17

ಅವಸ್ವರ್ 18

ಅವಸ್ವರ್ 19

ಅವಸ್ವರ್ 20

ಅವಸ್ವರ್ 21

ಅವಸ್ವರ್ 22

ಅವಸ್ವರ್ 23

ಅವಸ್ವರ್ 24

ಅವಸ್ವರ್ 25

ಅವಸ್ವರ್ 26

ಅವಸ್ವರ್ 27

ಅವಸ್ವರ್ 28

Connect

Our Address
Mangalore

Our Address
Udupi

Our Address
Dubai

From around the world

Post your comments

Connect

Our AddressMangalore

Our AddressUdupi

Our AddressDubai

Our Address
Mangalore

Our Address
Udupi

Our Address
Dubai