:: ಮಾಯ್ ಭಾಸ್

ಪಯ್ಲೆಂ ಆಪ್ಲ್ಯಾ ಖುಶೆಕ್ ಆನಿಂ ದುಸ್ರೆಪಾವ್ಟಿಂ ಲತೀಫಾಚಾ ಖುಶೆಕ್ ಎಸ್ತೆಲಾನ್ ಖಾಲ್ತಿಮಾನ್ ಘಾಲ್ಲೊ. ಕಿತ್ಯಾಕ್‌ಗೀ ಬೊಸ್‌ಲ್ಲೆಕಡೆಚ್ಚ್ ಎಸ್ತೆಲಾಕ್ ಹಿ ದೂಕ್ ರುಚ್ಲಿ, ಆನಿಂ ತಿಚಾ ಮತಿಂತ್ ಹೊ ಗುನ್ಯಾಂವ್ ಮ್ಹಣೊನ್ ಆಸ್‌ಲ್ಲೆಂ ಚಿಂತಾಪ್ ಹಳ್ತಾರ್ ಉಣೆಂ ಜಾವ್ನ್ ಆಯ್ಲೆಂ.

ಹಾಂಚಿಂ ಖಂಚಿಚ್ಚ್ ಪರ್‍ವಾ ನಾಸ್ತಾಂ ದೀಸ್ ಪರ್ತಾತಾಲೆ. ದೀಸ್ ಹಾಪ್ತೆ ಜಾವ್ನ್, ಹಾಪ್ತೆ ಮಹಿನೆ ಜಾವ್ನ್. ಮಹಿನ್ಯಾ ಮಹಿನ್ಯಾಕ್ ತಿಯೊ ಕಾಗ್ದಾಂ ಆನಿಂ ಪೊಯ್ಶೆ ಧಾಡ್ತಾಲೊ. ಜೊಯೆಲಾಕ್ ಸಾಯ್ಕಲ್ ಘೆಂವ್ನ್ ದೀಂವ್ಕ್ ತಿಯೊನ್ ಬರಯಿಲ್ಲ್ಯಾನ್, ಎಸ್ತೆಲಾನ್ ಜೊಯೆಲಾಕ್ ಏಕ್ ಸಾಯ್ಕಲ್ ಘೆವ್ನ್ ದಿಲ್ಲೆಂ. ಆನಿಂ ಸದಾಂ ಜೊಯೆಲ್ ಜಿವಿತಾಕ್ ಘೆವ್ನ್ ಇಸ್ಕೊಲಾಕ್ ವೆತಾಲೊ.

ಚಡಾವತ್ ತೆಗಾಂಯ್ಕೀ ಹಾಂಗಾಚೆಂ ಕಾಮ್ ಕಾಂಯ್ ವಿಶೇಷ್ ಮ್ಹಣೊನ್ ಭೊಗ್ಲೆಂನಾ. ತಶೆಂ ಆಸ್ತಾಂ ವೇಳ್ ಮೆಳ್ತಾನಾ ಎಕಾಮೆಕಾ ತೆಗೀ ಮೆಳ್ತಾಲೆ. ಆನಿಂ ಗಜಾಲಿ ಉಲಯ್ತಾಲೆ. ಪರ್‍ಗಾಂವಾಂತ್ ಮಲ್ಬಾರಿ, ತಮ್ಳಾಂಚೆ ಕಡಪಾಚೆ, ಬೆಂಗಾಲಿ, ಶ್ರೀಲಂಕಾಚೆ, ಪಿಲಿಪಿನೊಚೆ, ಪಾಕಿಸ್ತಾನಾಚೆ ತವಳ್ತವಳ್ ಎಕಾಮೆಕಾ ಝಗ್ಡೊನ್ ಪಡ್ಚೆವಿಶ್ಯಾಂತ್ ಆಯ್ಕಾಲ್ಲೆಂ ತರೀ ಆಪುಣ್ ಬರೊ ತರ್ ಸಂಸಾರ್ ಬರೊ ಮ್ಹಳ್ಳೆಪರಿಂ ಹೆ ತೇಗ್ ಎದೊಳ್ ಪರ್‍ಯಾಂತ್ ಮಾಯಾಮೊಗಾನ್ ಜಿಯೆಂವ್ಕ್ ಲಾಗ್ಲೆ.

ಇಬ್ರಾಹಿಮ್ ಥೊಡೆಪಾವ್ಟಿಂ ಗರ್ಜ್ ಪಡ್ಲ್ಯಾರ್ ಸುಕ್ರಾರಾ ಸಯ್ತ್ ಮಣಿಕ್ ಯಾ ತಿಯೊಕ್ ಯಾ ಗೋಪಿಕ್ ಎಕ್ಲ್ಯಾಕ್ ಕಾಮಾಕ್ ರಾವವ್ನ್ ದೊಗಾಂಕ್ ಭಾಯ್ರ್ ವಚೊಂಕ್ ಪರ್ವಣ್ಗಿ ದಿತಾಲೊ. ತಾಂಕಾ ರಜೆಚೊ ದೀಸ್ ಆಯ್ತಾರ್ ತರೀ ಮಣಿ ಸುಕ್ರಾರಾ ರಜಾ ಮೆಳ್ಳ್ಯಾರ್ ತಾಚಾ ವಳ್ಕಿಂಚಾಂಕ್ ಮೆಳೊನ್ ಯೆತಾಲೊ. ಆನಿಂ ತಿಯೊಕ್ ಆಯ್ತಾರ್‌ಚ್ ಬರೊ ಲಾಗ್ತಾಲೊ ಕಿತ್ಯಾಕ್ ಮ್ಹಳ್ಯಾರ್ ಆಯ್ತಾರಾ ದಿಸಾ ತಾಕಾ ಮಿಸಾಕ್ ವಚ್ಯೆತ್ ಆನಿಂ ಮಾರ್ಕುಕ್ ಮೆಳೊನ್ ಇಲ್ಲಿ ಮತ್ ಹಗುರ್ ಕರ್ಯೆತ್ ಮ್ಹಣೊನ್ ಚಿಂತಾಲೊ.

ಆತಾಂ ತೆಗಾಂಯ್ಕೀ ಇಲ್ಲಿ ಅರ್ಭಿ ಭಾಸ್ ಉಲಂವ್ಕ್ ಯೆತಾಲೆಂ ಜಾಲ್ಲೆವರ್ವಿಂ ತೆ ತವಳ್‌ತವಳ್ ವಚೊನ್ ಇಬ್ರಾಹಿಮಾಕ್ ಮೆಳ್ತಾಲೆ ಆನಿಂ ತಾಚೆಲಾಗಿಂ ಗಜಾಲಿ ಕಾಂತಾಲಿಂ. ಅಶೆಂಚ್ ಶೇಖ್ ಅಲ್ ಖಲೀಫಾ ವಿಶ್ಯಾಂತ್ ಇಬ್ರಾಹಿಮ್ ತವಳ್‌ತವಳ್ ತಾಂಚೆಲಾಗಿಂ ಉಲಯ್ತಾಲೊ. ದುಡ್ವಾನ್ ಶೇಖ್ ಕುಸ್ತಾಲೊ. ಪುಣ್ ಹೊ ದುಡು ತಾಕಾ ಯೆಂವ್ಚೊ ಜುಗಾರೆವರ್‍ವಿಂ. ಘೊಡ್ಯಾಂಚೊ ರೇಸ್ ಆನಿಂ ಇತರ್ ಜುಗಾರ್ ತೊ ಸದಾಂ ಖೆಳ್ತಾಲೊ. ಶೇರ್ ಮಾರ್ಕೆಟಿಂತ್ ತಾಚೊ ವಹಿವಾಟ್ ಆಸ್‌ಲ್ಲೊ. ಖಂಚಾಯ್ ಎಕಾ ಕಂಪೆನಿಚಿಂ ಶೆರಾಂಚೆಂ ಮೋಲ್ ಅಛಾನಕ್ ಚಡ್ತಾಲೆಂ ತಶೆಂಚ್ಚ್ ಅನ್ಯೇಕಾ ಕಂಪೆನಿಚಾ ಶೆರಾಚೆಂ ಮೋಲ್ ಅಛಾನಕ್ ಪಡ್ತಾಲೆಂ. ಹಾಂತುಂ ಶೇಖ್ ಅಲ್ ಖಲೀಫಾಚೊ ವಡ್ಲೊ ಹಾತ್ ಆಸ್ತಾಚ್ಚ್ ಆನಿಂ ಅಸಲ್ಯಾ ಸಂದರ್ಭಾರ್ ಜಾಹಿತ್ತೆ ಪೊಯ್ಶೆ ತೊ ಜೊಡ್ತಾಲೊ. ಖಂಚಾಯ್ ಎಕಾ ಲ್ಹಾನ್ ಕಂಪೆನಿಚಿಂ ಶೆರಾಂ ಘೆಂವ್ಚೊ ತೊ ಎಕಾ ಅಛಾನಕ್ ದಿಸಾ ತ್ಯಾ ಕಂಪೆನಿಚಾ ಶೆರಾಂಚೆಂ ಮೋಲ್ ಮೊಳ್ಬಾಕ್ ಚಡ್‌ಲ್ಲೆಂಚ್ಚ್ ತಿಂ ಶೆರಾಂ ವಿಕ್ತಾಲೊ ಆನಿಂ ಖಂಚಾ ಕಂಪೆನಿಚಿಂ ಶೆರಾಂ ದೆಂವ್ಲ್ಯಾಂತ್‌ಗೀ ತಾಂಚೆಂ ಶೆರಾಂ ಮೊಲಾಕ್ ಘೆತಾಲೊ. ಥೊಡ್ಯಾಚ್ಚ್ ತೆಂಪಾ ಭಿತರ್ ಕೊರೊಡಾಂಚೊ ಮುನಾಫೊ ಜೊಡ್ತಾಲೊ.

ಪುಣ್ ಸಗ್ಳೊ ರಂಗ್ ಕಾಳ್ಯಾ ರಂಗಾನ್ ಗಿಳ್ಚೆಪರಿಂ ತೊ ಹೊ ಸಗ್ಳೊ ಮುನಾಫೊ ವರುನ್ ಘೊಡ್ಯಾ ರೆಸಾಂತ್ ಘಾಲ್ತಾಲೊ ಆನಿಂ ಥೊಡೆಪಾವ್ಟಿಂ ಸಲ್ವಲ್ಯಾರೀ ಸಭಾರ್ ಪಾವ್ಟಿಂ ಜಿಕ್ತಾಲೊ. ಥಂಯ್ಸರ್‌ಯಿ ತಾಕಾ ಹಾತ್ ಆಸ್‌ಲ್ಲೊ ಆನಿಂ ಹೆಂ ಸಗ್ಳೆಂ ಎಕಾ ವ್ಯವಸ್ತಿತ್ ಥರಾನ್ ಚಲ್ತಾಲೆಂ. ತಾಚೊ ಪಯ್ಲ್ಯೊ ಬಾಯ್ಲ್ಯೊ ಇಜಿಪ್ತಾಂತ್ ಆಸ್‌ಲ್ಲ್ಯೊ. ಆತಾಂ ತಿಸ್ರೆ ಬಾಯ್ಲೆ ಸವೆಂ ತೊ ಕುವೆಯ್ಟಾಂತ್ ರಾವ್ತಾಲೊ ತರೀ ತವಳ್‌ತವಳ್ ಇಜಿಪ್ತಾಕ್ ವಚೊನ್ ತಾಚಾ ಬಾಯ್ಲಾಂಕ್ ಮೆಳ್ತಾಲೊ.

ಗುದಾಂವಾಂತ್ ಚಡಾವತ್ ಜಾವ್ನ್ ರಾತಿಚಿ ಡ್ಯೂಟಿ ಆಸ್‌ಲ್ಲ್ಯಾಂಕ್ ಕಾಂಯ್ ಕಾಮ್ ನಾತ್‌ಲ್ಲೆಂ. ಆಯ್ಲ್ಯಾರ್ ಏಕ್ ದೋನ್ ಗಾಡಿಯೊ ಯೆತಾಲ್ಯೊ ನಾಂ ತರ್ ತ್ಯೊಯ್ ನಾಂತ್. ತಶೆಂ ಆಸ್ತಾಂ ರಾತಿಂಚಿ ಡ್ಯೂಟಿ ಆಸ್ಚೆಯ್ ಕುಡಾಂತ್ ಬೊಸೊನ್ ಯಾ ಉರುಲ್ಲೆ ದೊಗೀ ಗೆಟಿಕಡೆ ಬೊಸೊನ್ ಗಜಾಲಿ ಮಾರ್‍ತಾಲೆ. ಗಾಂವಾಂತ್ ದೀಸ್‌ಭರ್ ಮಿನತ್ ಕರುನ್ ಕಸೊ ದೀಸ್ ಪಾಶಾರ್ ಜಾಲ್ಲೊ ಕಳಾನಾತ್‌ಲ್ಲೊ ತರ್ ಹಾಂಗಾಸರ್ ಮೆಳ್ಚೊ ವೇಳ್ ಕಸೊ ಪಾಶಾರ್ ಕರ್‍ಚೊ ಮ್ಹಳ್ಳೊಚ್ಚ್ ತೆಗಾಂಯ್ಕೀ ಏಕ್ ಮಿಸ್ತೆರ್ ಜಾಲೊ. ಅಶೆಂ ಎಕಾ ರಾತಿಂ ಗೋಪಿಸವೆಂ ಉಲಯ್ತಾಸ್ತಾನಾ ಗೊಪಿನ್ ತಾಚಾ ಎಕಾ ಸಾಂಗಾತಿ ವಿಶ್ಯಾಂತ್ ಉಲಂವ್ಕ್ ಸುರು ಕೆಲೆಂ.

ಮನಿಸ್ ಜಾವ್ನ್ ಜಲ್ಮಾಲ್ಲೊ ಚೂಕ್ ಕರಿನಾಯೆ ತರ್? ಪುಣ್ ಸಭಾರ್ ಪಾವ್ಟಿಂ ತಾಣಿಂ ಕೆಲ್ಲ್ಯೊ ಯಾ ಕರುನ್ ಆಸ್ಚೊ ಚೂಕಿ ಮ್ಹಳ್ಳೆಂ ಚಿಂತಾಪ್ ಸಯ್ತ್ ತಾಂಚಾ ಮತಿಂತ್ ಯೇನಾ ದೆಖುನ್ ತಾಂಕಾ ಕೊಣೆಂ ತರೀ ಸಮ್ಜೊಣಿಂ ದಿಂವ್ಚಿ ಗರ್ಜ್. ಏಕ್ ಪಾವ್ಟಿಂ ಅಸಲೆಂಚ್ ಘಡಿತ್ ಮ್ಹಜಾ ಎಕಾ ಲಾಗ್ಸಿಲ್ಯಾ ಮನ್ಶಾಕ್ ಘಡ್ಲೆಂ.

ಕಾಮಾಚಾ ಭಂವ್ಡೆರ್ ಬೊಂಬೊಯ್ ಆಯಿಲ್ಲ್ಯಾ ತಾಕಾ ತಾಚೆಪರಿಂಚ್ ಕಾಮಾಕ್ ಆಯಿಲ್ಲ್ಯಾ ಹೆರ್ ಬೇಕಾರಿ ತರ್ನಾಟ್ಯಾಂಚಿ ಸಳಾವಳ್ ಜಾಲಿ. ವಳೊಕ್ ಇಸ್ಟಾಗತೆಂತ್ ಬದಾಲ್ಲಿ ಆನಿಂ ಸದಾಂ ಹೆ ಈಸ್ಟ್ ಎಕಾಮೆಕಾ ಮೆಳ್ತಾಲೆ. ದೀಸ್‌ಭರ್ ಕಾಮ್ ಸೊಧ್ತಾಲೆ ಆನಿಂ ಸಾಂಜೆರ್ ಖಂಯ್ ಖಂಯ್ ವಚೊನ್ ಮೆಳ್‌ಲ್ಲೊ ಸೊರೊ ಘೊಟ್ತಾಲೆ. ಆನಿಂ ದೀಸ್ ಗೆಲ್ಲೆಪರಿಂ ಎಕ್ಲ್ಯಾಕ್ ಕಾಮ್ ಮೆಳ್ಳೆಂ. ಆನಿಂ ತಾಚಾ ವಳ್ಕೆಂತ್ ದುಸ್ರ್ಯಾಕೀ ತಾಣೆಂ ಕಾಮ್ ದಿವಯ್ಲೆಂ ಆನಿಂ ಹೆ ಅಶೆಚ್ ಏಕ್ ದೀಸ್ ನವ್ಯಾಚ್ಚ್ ಸಂಸಾರಾಕ್ ಪಾಂಯ್ ತೆಂಕಿಲಾಗ್ಲೆ.

ಬೊಂಬೊಯ್ ಸೆಂಟ್ರಲ್ ಥಾವ್ನ್ ಲಗ್ಬಗ್ ತೀನ್ ಫರ್ಲಾಂಗಾ ಪಯ್ಸ್ ಆಸ್ಚಾ ಗ್ರಾಂಟ್‌ರೋಡಾರ್ ಆಸ್‌ಲ್ಲ್ಯಾ ಗಲ್ಲೆಕ್ ಗೆಲೆ. ಏಕ್ ಪಾವ್ಟಿಂ ಗೆಲ್ಲ್ಯಾಂಕ್ ಪರತ್ ಪರತ್ ಥಂಯ್ಚ್ ವಚೊಂಕ್ ಪಡ್ಲೆಂ. ಆನಿಂ ತಾಂತುಂ ಎಕ್ಲ್ಯಾಕ್ ತ್ಯೇ ಚಲಿಯೆಚೊ ಸಾಂಗಾತ್ ಪಸಂದ್ ಜಾಲೊ. ಕಸಲಿಗೀ ಅವ್ಯೆಕ್ತ್ ಬಿರ್ಮತ್ ತಾಚಾ ಕಾಳ್ಜಾಂತ್ ಉದೆಲಿ ಆನಿಂ ತೊ ತ್ಯಾ ಚಲಿಯೆ ಪಾಟ್ಲ್ಯಾನ್ ಪಿಸೊಚ್ಚ್ ಜಾಲೊ.

ಅಶೆಂ ಜಾಲ್ಲಿ ತಾಂಚಿ ಸಳಾವಳ್ ತಾಂಚಾ ಕಾಜಾರಾಚಾ ನಿರ್ಧಾರಾ ತಿತ್ತುನ್ ಸಯ್ತ್ ಪಾವ್ಲಿ ಆನಿಂ ಅಶೆಂ ಆಪ್ಲೊ ನಿರ್ಧಾರ್ ತಾಣೆಂ ತಾಚಾ ಸಾಂಗಾತ್ಯಾಕ್ ಕಳಯ್ಲೊ. ಸಾಂಗಾತಿ ಹಾಸ್ಲೊ "ಪಳೆ. ಹಾಂಗಾಸರ್ ಯೆಂವ್ಚಿಂ ವೆಚಿಂ ಸಗ್ಳಿಂ ಅಸಲೆಂಚ್ ಚಿಂತಾಪ್ ಘೆವ್ನ್ ಆಯಿಲ್ಲಿಂ ತರ್ ಸಂಸಾರಾಂತ್ ವೇಶ್ಯಾಂಚೊ ಸಂಸಾರ್ ಆಸ್ತೊನಾ. ವೇಶ್ಯ್ ತಿ ವೇಶ್ಯ್‌ಚ್ ಆನಿಂ ತಾಂಕಾ ತಾಂಚಾಚ್ ಜಾಗ್ಯಾರ್ ದವ್ರಿಜಯ್, ಜಶೆಂ ವಾಣಾಂಚೊ ಜಾಗೊ ಪಾಂಯ್ ಶಿವಾಯ್ ತಕ್ಲಿ ನ್ಹಂಯ್."

ಕಿತಾಕ್‌ಗೀ ಸಾಂಗಾತ್ಯಾಚಿಂ ಉತ್ರಾಂ ಹಾಕಾ ಕೊಡು ಲಾಗ್ಲಿಂ ಜಾಯ್ಜಯ್. ತಾಣೆಂ ಹಾಚೊ ಸಾಂಗಾತ್ ಸೊಡ್ಲೊ ಆನಿಂ ಎಕಾ ದಿಸಾ ತ್ಯೇ ಚಲಿಯೆಕ್ ಘೆವ್ನ್ ಗಾಂವ್ ಸೊಡ್ನ್ ಪೊಳ್ಳೊ.

ಕಾಮ್ ಸೊಧುನ್ ಬೊಂಬೊಯ್ ಗೆಲ್ಲೊ ಆತಾಂ ಪಾಟಿಂ ಆಪ್ಲ್ಯಾ ಗಾಂವಾಕ್ ಎಕಾ ಚಲಿಯೆಕ್ ಘೆವ್ನ್ ಆಯಿಲ್ಲ್ಯಾ ವಿಶ್ಯಾಂತ್ ಗಾಂವ್ಚೊ ಲೋಕ್ ನಾನಾ ರಿತಿಚೊ ಖಬ್ರೊ ಉಲಯ್ತಾಲೊ. ಪುಣ್ ಹ್ಯಾ ಕಸ್ಲ್ಯಾಚ್ ಸಂಗ್ತ್ಯಾಂಚಿ ಫಿಕಿರ್ ನಾಸ್ತಾನಾ ತಾಣೆಂ ತ್ಯೇ ಚಲಿಯೆಲಾಗಿಂ ಕಾಜಾರ್ ಜಾಲೊ.

ವೇಶ್ಯ್ ಜಾವ್ನಾಸ್‌ಲ್ಲ್ಯಾ ತ್ಯೇ ಚಲಿಯೆಕ್ ಹಾಣೆ ಕೆಲ್ಲೊ ಸಾಕ್ರಿಫಿಸ್ ಕಿತ್ಲೊ ಮಹಾನ್!

ಅಶೆಚ್ಚ್ ದೀಸ್ ಪಾಶಾರ್ ಜಾಲೆ. ಕಾಮ್ ಸೊಡುನ್ ಬೊಂಬೊಯ್ ಗೆಲ್ಲೊ ಪರತ್ ಕಾಮ್ ಸೊಧುನ್ ಬೊಂಬೊಯ್ ಆಯ್ಲೊ. ಆನಿಂ ಹ್ಯೇ ಪಾವ್ಟಿಂ ತೊ ದುಸ್ರ್ಯಾ ಎಕಾ ವಳ್ಕಿಚಾ ಮನ್ಶಾಚಾ ಘರಾ ಇಲ್ಲೊ ತೇಂಪ್ ರಾವ್ಲೊ. ಥೊಡ್ಯಾಚ್ ವೆಳಾನ್ ತಾಕಾ ಘಾಟ್‌ಕೋಪರಾಂತ್ ಎಕಾ ಫೆಕ್ಟರಿಂತ್ ಕಾಮ್ ಮೆಳ್ಳೆಂ. ಆನಿಂ ರಾವೊಂಕ್‌ಯಿ ಲಾಗಿಂಚ್ ಆಸ್ಚಾ ಚಾಲಿಂತ್ ಏಕ್ ಲ್ಹಾನ್ ಕೂಡ್ ಮೆಳ್ಳೆಂ. ಪುಣ್ ಘರಾಂತ್ ಆಸ್ಚಾ ತಾಚಾ ಪಿಡೇಸ್ತ್ ಅವವ್ಚಿ ಚಾಕ್ರಿ ಕರುಂಕ್ ತಾಚಿ ಬಾಯ್ಲ್ ತಯಾರ್ ನಾತ್‌ಲ್ಲ್ಯಾನ್ ವೆಗಿಂಚ್ ತಾಣೆಂ ತಾಚಾ ಬಾಯ್ಲೆಕ್ ಬೊಂಬೊಯ್ ಹಾಡಯ್ಲೆಂ ಆನಿಂ ಬರೀ ಮಿನತ್ ಕರುನ್ ಕಾಮ್ ಕೆಲೆಂ.

ಸಾಬಾಚಿ ಫೆಕ್ಟರಿ ತಿ ಜಾಲ್ಲೆವರ್‍ವಿಂ ಥಂಯ್ಚೊ ಸಾಭ್ ಎಕಾ ಸುವಾತೆರ್ ದಾಸ್ತಾನ್ ಕರ್‍ಚೊ, ಆನಿಂ ಪೇಕ್ ಕರ್ಚೆಂ ಕಾಮ್ ತಾಕಾ ಆಸ್‌ಲ್ಲೆಂ. ತ್ಯೇ ಶಿವಾಯ್ ವಿಭಾಡ್ ಜಾಂವ್ಕ್ ಆಸ್ಚೊ ಸಾಭಾಚೊ ಪಿಟೊ ತೊ ವರ್ತಾಲೊ. ಸೆಜಾರ್ಚಾ ಘರಾಂಕ್ ವಾಂಟ್ತಾಲೊ ಆನಿಂ ಥೊಡ್ಯಾಚ್ ದಿಸಾಂನಿ ತಿಂ ತ್ಯೆ ಚಾಲಿಂತ್ ಸಗ್ಳ್ಯಾಂಕ್ ವಳ್ಕಿಚಿಂ ಜಾಲಿಂ.

ಅಶೆಚ್ಚ್ ದೀಸ್ ಪಾಶಾರ್ ಜಾಲೆ. ಬರಿ ಮಿನತ್ ಕರುನ್ ಯೆಂವ್ಚಾ ಹಾಕಾ ಹಾಚಿ ಬಾಯ್ಲ್ಲ್ ಬರೆಂ ರಾಂದುನ್ ವಾಡ್ತಾಲಿ. ಆನಿಂ ಅಶೆಂ ವರ್ಸಾಂ ಪಾಶಾರ್ ಜಾತಾನಾ ಎಕಾ ಪಾಟ್ಲ್ಯಾನ್ ಅನ್ಯೇಕ್ ಮ್ಹಣೊನ್ ದೋನ್ ಭುರ್ಗ್ಯಾಂಕ್ ತಿ ಬಾಳಾಂತ್ ಜಾಲಿ.

ಘರಾಂತ್ ಭುರ್ಗಿಂ ಎತೆಚ್ಚ್ ಖರ್ಚ್ ವಾಡ್ತಾ ಆನಿಂ ತಶೆಂಚ್ ಜಾಲೆಂ. ದಿಸಾಕ್ ಆಟ್ ವೊರಾಂ ಕಾಮ್ ಕರ್‍ಚೊ ಹೊ ಆತಾಂ ಧಾ ವೊರಾಂ ಕಾಮ್ ಕರಿಲಾಗ್ಲೊ. ಧಾ ವೊರಾಂ ಆಸ್‌ಲ್ಲಿಂ ಬಾರಾ ಜಾಲಿಂ ಆನಿಂ ಬಾರಾ ಆಸ್‌ಲ್ಲಿಂ ಚೊವ್ದಾ ಜಾಲಿಂ. ದಿಸಾಕ್ ಚೊವ್ದಾ ವೊರಾಂ ಕಾಮ್ ಕರ್ನ್ ಘರಾ ಯೆತಾಲೊ ಫಕತ್ತ್ ಆಪ್ಲ್ಯಾ ಕುಟ್ಮಾಚಾ ಸುಃಖಾಖಾತಿರ್.

ಪುಣ್ ಕಾಜ್ರ್ಯಾಚಾ ಮುಳಾಂತ್ ಕಿತ್ಲಿ ಸಾಕರ್ ವೊತ್ಲ್ಯಾರೀ ಕಾಜ್ರ್ಯಾ ಫಳ್ ಗೋಡ್ ಜಾಯ್ನಾಂಗೀ, ತಶೆಂಚ್ ಘಡ್ಲೆಂ. ಸದಾಂ ಭುರ್ಗ್ಯಾಂಕ್ ಘೆವ್ನ್ ಭಾಯ್ರ್ ಭಂವ್ಡಾಂವ್ಕ್ ವೆಚಾ ತಾಚಾ ಬಾಯ್ಲೆಕ್ ಎಕಾ ಮರಾಟ್ಯಾಚಿ ಸಳಾವಳ್ ಜಾಲಿ. ಕುಡಿಂತ್ ದಾಟೆಂ ಮೊಟೆಂ ಆಸ್ಚಿಂ ಹಾಚಿ ಬಾಯ್ಲ್ ಕಿತ್ಯಾಕ್ ಘರಾಚ್ ಬೊಸ್ತಾ ಮ್ಹಣೊನ್ ತಾಣೆಂ ನಾಡ್ಲೆಂ ಆನಿಂ ಆಪುಣ್ ತಿಕಾ ಕಾಮ್ ದಿವಯ್ತಾಂ ಮ್ಹಣೊನ್ ಸಾಂಗ್ತಚ್ ಏಕ್ ದೀಸ್ ಘೊವಾಚಿ ಪರ್ವಣ್ಗಿ ಘೆವ್ನ್ ತೆಂ ಹ್ಯಾ ಮರಾಟ್ಯಾಚಾ ವಳ್ಕಿಂತ್ ಎಕಾ ಲೇಡಿಸ್ ಬಾರಾಂತ್ ಡೇನ್ಸರ್ ಜಾವ್ನ್ ಕಾಮಾಕ್ ಲಾಗ್ಲೆಂ.

ಹೊಟ್ಲಾಂತ್ ಕಾಮ್ ಕರ್‍ತಾಂ ಮ್ಹಳ್ಲೆಂ ಮಾತ್ ಆಯ್ಕಾಲ್ಲ್ಯಾ ತಾಚಾ ಘೊವಾಕ್ ಕಸಲೆಂ ತೆಂ ಕಾಮ್ ಮ್ಹಳ್ಳೆಂ ಸಮ್ಜಾಲ್ಲೆಂಚ್ ನಾ.

ಅಶೆ ದೀಸ್ ಪಾಶಾರ್ ಜಾತಾಲೆ. ಘೊವಾಚೆ ಮಹಿನ್ಯಾಚೆ ಪೊಯ್ಶೆ ತೆಂ ಎಕಾಚ್ಚ್ ದಿಸಾಂತ್ ಘೊಳ್ತಾಲೆಂ. ಪೊಯ್ಶೆ ಮೆಳ್ತಾನಾ ಎಕೆಕ್‌ಚ್ ಆಶಾ ಫುಟ್ತಾತ್. ಅಶೆಂ ಎಕೆಕ್ ಆಶಾ ಜ್ಯಾರಿ ಜಾತಾನಾ ಎಕೆಕ್‌ಚ್ ಸತ್ ಲಿಪ್ತಾ. ಪರಿಸರ್ ಮನ್ಶಾಕ್ ಬದ್ಲುಂಕ್ ಸಕ್ತಾ. ಪುಣ್ ಕಿತ್ಲೊ ಬದ್ಲಾಲ್ಲೊ ಮನಿಸ್‌ಯಿ ಪರತ್ ತೆಚ್ಚ್ ಪರಿಸರಾಕ್ ಪಾಟಿಂ ವೆತಾನಾ ಪರತ್ ಪರತ್ ತ್ಯೊಚ್ ಚುಕಿ ಯಾ ಗುನ್ಯಾಂವ್ ಆಧಾರ್ತಾ.

ಪೊಯ್ಶ್ಯಾಂ ಖಾತಿರ್ ಜಿಣ್ಯೆಂತ್ ತಾಣೆಂ ಭೊಗ್‌ಲ್ಲೆಂ ಜಾಯಿತ್ತೆಂ ಆಸ್‌ಲ್ಲೆಂ. ದಿಸಾಕ್ ಎಕೆಕ್ಲ್ಯಾಕ್ ತಾಚಿ ಕೂಡ್ ವಿಕುನ್ ಮೆಳ್‌ಲ್ಲೆ ಪೊಯ್ಶೆ ತಾಕಾ ಸಂಸಾರಿ ಗರ್ಜೊ ದೀಂವ್ಕ್ ಸಕ್ತಾಲ್ಯೊ ತರೀ ಸಮಧಾನ್ ನ್ಹಂಯ್. ಅಶೆಂ ಆಸ್ತಾಂ ಹ್ಯಾ ಜಿಣ್ಯೆ ಥಾವುನ್ ಮುಕ್ತಿ ದಿವಯಿಲ್ಲ್ಯಾ ತಾಚಾ ಘೊವಾಚೊ ಸಾಕ್ರಿಫ಼ಿಸ್ ದಿಸಾಂ ದಿಸಾಂನಿ ತೆಂ ವಿಸ್ರಾಲೆಂ. ಸಗ್ಳೆಂ ತಿಣೆಂ ಚಿಂತ್‌ಲ್ಲೆಪರಿಂಚ್ ಘಡ್‌ಲ್ಲೆಂ. ಮರಾಟ್ಯಾಚಾ ಶಿಕವ್ಣೆ ಪ್ರಕಾರ್ ತೆಂ ಚಲ್‌ಲ್ಲೆಂ. ಸದಾಂ ರಾತಿಂ ಶಾಭೀತಾಯೆನ್ ಪಾಟಿಂ ಹಾಡ್ನ್ ಪಾವಂವ್ಚಾ ತಾಚೆರ್ ತಿಕಾ ಕಸ್ಲೊಗೀ ಭರ್ವಸೊ ಆಸ್‌ಲ್ಲೊ. ತಿತ್ಲೆಂಚ್ ನ್ಹಂಯ್. ತಿಣೆಂ ಸದಾಂ ನಾಸೊನ್ ಘೊಳ್ಚಾ ಪೊಯ್ಶಾಂತ್ ಏಕ್ ಪೊಯ್ಸೊ ಸಯ್ತ್ ವಿಚಾರಿನಾತ್‌ಲ್ಲ್ಯಾ ತಾಚೆರ್ ತಿಕಾ ಕಸ್ಲೊಗೀ ಅಭಿಮಾನ್ ಭೊಗ್ಲೊ.

ಪುಣ್ ದೀಸ್ ಗೆಲ್ಯಾರೀ ದಿಸಾಚಿ ವಾಡ್ ವೆತಾವೆ? ಸದಾಂ ಸಾಂಜೆರ್ ಚಾರ್ ವೊರಾರ್ ತಯಾರ್ ಜಾವ್ನ್ ತಾಕಾ ಹೊಟೆಲಾಕ್ ವರುಂಕ್ ತೊ ಮರಾಟಿ ಚೆಡೊ ಯೆತಾಲೊ. ಭುರ್ಗ್ಯಾಂಕ್ ಸೆಜಾರಾ ಖೆಳೊಂಕ್ ಸೊಡುನ್ ತೆಂ ಪಾಂಚಾಂಕ್ ಹೊಟ್ಲಾಕ್ ಪಾವ್ಲೆಂ ತರ್ ರಾತಿಂ ಸಾಡೆ ಬಾರಾ ವೊರಾಂ ಪರ್‍ಯಾಂತ್ ರಾವ್ತಾಲೆಂ. ತೆಂ ರಾಂದುನ್ ವೆತಾಲೆಂ ದೆಖುನ್ ಇಕ್ರಾ ವೊರಾಶೆಂ ಪಾಟಿಂ ಯೆಂವ್ಚೊ ಘೊವ್ ಸೆಜಾರಾ ಆಸ್ಚಾ ಭುರ್ಗ್ಯಾಂಕ್ ಹಾಡ್ನ್, ತಾಂಕಾ ಜೆವವ್ನ್, ತೊಯ್ ಜೇವ್ನ್ ಆಡ್ ಪಡ್ತಾಲೊ.

ದಿಸಾನ್ ದೀಸ್ ತಿಕಾ ಮೆಳ್ಚೆ, ತಿಚಾ ನಾಸಾಕ್ ಹೊಗ್ಳಿಕ್ ದಿಂವ್ಚೆ ಗಿರಾಯ್ಕ್ ಚಡ್ಲೆ. ತೊ ನಾಚ್‌ಯ್ ಕಸಲೊ? ಫಕತ್ ವಸ್ತ್ರಾಂ ಉಣಿಂ ಕರ್ನ್ ವಿಸ್ವೆ ದಾಖಂವ್ಚೆಂ. ಜಿತ್ಲೆ ಚಡ್ ವಿಸ್ವೆ ದಾಖಯ್ತಾಯ್ ತಿತ್ಲೆ ಚಡ್ ಪೊಯ್ಶೆ ಮೆಳ್ತಾಲೆ. ಜಿತ್ಲೆಂ ಉಣೆಂ ವಸ್ತುರ್ ನೆಸ್ತಾಯ್ ತಿತ್ಲೆ ಚಡ್ ಪೊಯ್ಶಾಚೆ ಹಾರ್ ಪಡ್ತಾಲೆ. ಹೆ ನಾಚ್ ಪಳೆಂವ್ಕ್ ಯೆಂವ್ಚೆ ಸಮಾಜೆಚೆ ಮಾನೆಸ್ತ್, ಘನೆಸ್ತ್, ಮರ್‍ಯಾದೆಸ್ತ್ ಮನಿಸ್ ಕಾಂಯ್ ಉಣೆಂ ನಾತ್‌ಲ್ಲೆ.

ಏಕ್ ಪಾವ್ಟಿಂ ತೊ ಮರಾಟಿ ಎಕಾ ಪ್ರಾಯೆಸ್ತಾಕ್ ಹಾಡ್ನ್ ಆಯ್ಲೊ. ಆನಿಂ ರಾತಿಂ ಪಾಟಿಂ ವೆತಾನಾ ತಾಚಿ ವಳೊಕ್ ಕರುನ್ ದಿಲಿ. "ಪಳೆ ಹೊ ಏಕ್ ವಡ್ಲೊ ಫಿಲ್ಮಾಚೊ ಪ್ರೊಡ್ಯೂಸರ್. ಹಾಣೆಂ ಮನ್ ಕೆಲೆಂ ತರ್ ತುಕಾ ತಾಚಾ ಮುಖ್ಲ್ಯಾ ಫಿಲ್ಮಾಂತ್ ಛಾನ್ಸ್ ಮೆಳ್ತಾ. ಲಾಖಾಂನಿ ಪೊಯ್ಶೆ ಮೆಳ್ತೆಲೆ. ಉಪ್ರಾಂತ್ ತುಕಾ ಹಾಂಗಾ ಯೇವ್ನ್ ನಾಚಾಜಯ್ ಮ್ಹಣೊನ್ ನಾ. ಪುಣ್ ಫಕತ್ತ್ ತುಕಾ ಖುಶಿ ಆಸ್ಲ್ಯಾರ್ ಮಾತ್ರ್"

ತೆಂ ಲಾಖಾಂಚೆಂ ಉಲವ್ಣೆಂ ಆಯ್ಕತೆಚ್ಚ್ ಭುಲ್ಲೆಂ. "ದೆಖುನ್ ಹಾವೆಂ ಕಿತೆಂ ಕರಿಜಾಯ್?" ವಿಚಾರ್‍ಲೆಂ.

"ಫಾಲ್ಯಾಂ ತುಂ ಜರ್ತರ್ ಸ್ಕ್ರೀನ್ ಟೆಸ್ಟಾಕ್ ಆಯ್ಲ್ಯಾರ್ ತುಕಾ ನಟನಾಚೆಂ ದೆಣೆಂ ಕಿತ್ಲೆಂ ಆಸಾ ಮ್ಹಳ್ಳೆಂ ಕಳ್ತೆಲೆಂ"

ದುಸ್ರೆ ದೀಸ್ ಉಟ್‌ಲ್ಲ್ಯಾ ತಿಚಾ ಮತಿಂತ್ ಲಾಖಾಂಚಿಂ ಚಿಂತ್ನಾಂ ಭರ್‌ಲ್ಲಿಂ.

ಸುಡ್ಸುಡಿತ್ ಜಾವ್ನ್ ಉಟ್‌ಲ್ಲೆಂ ತೆಂ ವೆಗಿಂಚ್ ನೆಸೊನ್ ತಯಾರ್ ಜಾಲ್ಲೆಂ. ಕಿತೆಂಚ್ ಭಿಂಯೆಂವ್ಚಿ ಗರ್ಜ್ ನಾ ಮ್ಹಣೊನ್ ಮರಾಟ್ಯಾನ್ ಸಾಂಗ್‌ಲ್ಲೆಂ ದೆಖುನ್ ತೆಂ ನೆಸೊನ್ ಆಯ್ತೆಂ ಜಾಲ್ಲೆಂಚ್ ಮರಾಟಿ ಆಯ್ಲೊ ಆನಿಂ ಟೆಕ್ಸೆಚೆರ್ ತಾಕಾ ಘೆವ್ನ್ ಬೆಂಡ್ರಾ ಖಾರ್ ಲಾಗಿಂ ಎಕಾ ಬಂಗ್ಲ್ಯಾಕ್ ಆಪವ್ನ್ ವರ್ನ್ ಗೆಲೊ.

ಭಾರ್ಯ್ ಸಾಲಾಂತ್ ಬೊಸೊನ್ ಆಸ್‌ಲ್ಲ್ಯಾ ಥೊಡ್ಯಾಚ್ ವೆಳಾರ್ ಕಾಮಾಚೆಂ ಚೆಡುಂ ಯೇವ್ನ್ ತಾಂಕಾ ಪಿಯೆಂವ್ಕ್ ಜ್ಯೂಸ್ ದಿಲೊ. ದೊಗಾಯ್ನೀಂ ತೊ ಜ್ಯೂಸ್ ಪಿಯೆತಾನಾ ಮಾತಾರೊ ಪ್ರೊಡ್ಯೂಸರ್ ಆಯ್ಲೊ. ಮಾತಾರ್‍ಯಾನ್ ತಿಕಾ ಭಿತರ್ ವೆಲೊ. ಸ್ಕ್ರೀನ್ ಟೆಸ್ಟ್ ಮ್ಹಣೊನ್ ತಾಣೆಂ ಹಿಚಿಂ ವಸ್ತ್ರಾ ಕಾಡಯ್ಲಿಂ ಆನಿಂ ಘಡೊಂಕ್ ಸಾಧ್ಯ್ ಆಸ್ಚೆಂ ಸಗ್ಳೆಂ ಘಡ್ಲೆಂ. ಮಾತಾರ್‍ಯಾಚೊ ಹೊರ್ಭೊಸ್ ನಿಂವ್ತಚ್ ಹೊ ಮರಾಟಿ ಆಯ್ಲೊ. ಆತಾಂ ಮಾರಾಟಿನ್ ಆಪ್ಲೊ ಪಾಶಾಂವ್ ಸಂಪಯ್ಲೊ.

ಹಾಂತುಂ ಕಸ್ಲೊಚ್ ಆಘಾತ್ ತಿಕಾ ಬೊಗ್ಲೊನಾ. ಪೊಯ್ಶ್ಯಾಂಚೆ ನೋಟ್ ತ್ಯಾ ಮಾತಾರ್‍ಯಾನ್ ದಿತಾನಾ ತಿಕಾ ಕಿತೆಂಚ್ ಉಡಾಸಾಕ್ ಆಯ್ಲೆಂನಾ.

ತಿಚಾ ಜಿಣ್ಯೆಂತೀ ಎದೊಳ್ ಪರ್‍ಯಾಂತ್ ಸಮ್ಜಾಲ್ಲ್ಯೊ ಸಂಗ್ತ್ಯೊ ಮ್ಹಳ್ಯಾರ್ ಪೊಯ್ಶೆ ಆನಿಂ ಕೂಡ್. ಪೊಯ್ಶ್ಯಾಂ ಭಿತರ್ಲೆಂ ಕಿತೆಂಚ್ ಜಾಂವ್ ಯಾ ಕುಡಿ ಭಾಯ್ಲೆಂ ಕಿತೆಂಯ್ ಜಾಂವ್ ತಿಕಾ ಕಳಾನಾತ್‌ಲ್ಲೆಂ.

ದೀಸ್‌ಭರ್ ಕಾಮ್ ಕರ್‍ಚಾ ತಿಚಾ ಘೊವಾ ಥಾವುನ್ ತೆಂ ಆಶೆಲ್ಲೆಂ ಪೊಯ್ಶೆ ಆನಿಂ ಪುರಾಸಣೆಂತ್ ಪಾಟಿಂ ಆಯಿಲ್ಲ್ಯಾ ತಾಚೆ ಥಾವುನ್ ತೆಂ ಆಶೆಲ್ಲೆಂ ತಾಚಿ ಕೂಡ್. ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್. ಬೊಂಬೊಯ್ಚಾ ಗಾಂವಾಂತ್ ಕಿತೆಂ ಮೆಳಾನಾ? ಜಲ್ಮ್ ದಿಲ್ಲಿಂ ಆವಯ್ ಬಾಪುಯ್ ಸೊಡ್ಲ್ಯಾರ್ ಖಂಚಾಯ್ ಸಂಗ್ತೆಚೊ ಬರ್ಗಾಲ್ ನಾತ್‌ಲ್ಲೊ.

ಅಶೆಂ ಆತಾಂ ತಿಚಾ ಜಿಣ್ಯೆಂತ್ ನವಿ ಘುಂವ್ಡಿ ಆಯಿಲ್ಲಿ. ಆತಾಂ ಮರಾಟ್ಯಾಕ್ ನವೆ ನವೆ ಪ್ರೊಡ್ಯೂಸರ್ ಮೆಳ್ತಾಲೆ. ತಾಂಚೆಸವೆಂ ಹಾಕಾಯ್ ಹಾಚಿ ಆಶಾ ಜಾರಿ ಜಾತಾಲಿ. ಹಾಚೆ ಬೋಲ್ಸ್‌ಯ್ ಭರ್ತಾಲೆ. ಆತಾಂತಾಂ ಸಾಂಜೆರ್ ಹೊಟ್ಲಾಕ್ ಡೆನ್ಸಾಕ್ ವೆಚಾ ಬದ್ಲಾಕ್ ತಿಂ ಚಡಾವತ್ ಜಾವ್ನ್ ನವ್ಯಾ ನವ್ಯಾ ಪ್ರೊಡ್ಯೂಸರಾಲಾಗಿಂ ವೆತಾಲಿಂ. ಅಶೆಚ್ಚ್ ದೀಸ್ ಪಾಶಾರ್ ಜಾಲೆ. ಘರಾಂತ್ ನವೊ ನವೊ ಸಮಾನ್ ಭರೊಂಕ್ ಲಾಗ್ಲೊ.

ಏಕ್ ದೀಸ್ ತ್ಯಾ ಮರಾಟ್ಯಾಚಾ ಮತಿಂತ್ ಕಸ್ಲಿಂಗೀ ವಿಕಾಳ್ ಚಿಂತ್ನಾಂ ಯೇಂವ್ಕ್ ಲಾಗ್ಲಿಂ. ಕಸೊಯ್ ಹಿಚೊ ಘೊವ್ ತಾಚಾಚ್ ಸಂಸಾರಾಂತ್ ಆಸ್ತಾನಾ ತಾಕಾ ಹಿಚಾ ಜಿಣ್ಯೆಂತ್ಲೊ ನಾ ಕೆಲೊ ತರ್ ಉಪ್ರಾಂತ್ ಹಿ ಹಾಣೆಂ ಸಾಂಗ್‌ಲ್ಲೆಪರಿಂ ಕರ್ತೆಲಿ. ಊಟ್ ಮ್ಹಳ್ಯಾರ್ ಉಟ್ಲೆಲಿ. ಬೋಸ್ ಮ್ಹಳ್ಯಾರ್ ಬೊಸ್ತೆಲಿ. ಅಶೆಂ ಚಿಂತುನ್ ತಿಕಾ ಕಸ್ಲಿಗೀ ಅಡ್ಹೂಕ್ ಸಲಹಾ ದಿಲಿ. ತಿ ಏಕ್ ಘಡಿ ಭಿಂಯೆಲಿ ತರೀ ಉಪ್ರಾಂತ್ ತಿ ವೊಪ್ಲಿ.

ಏಕ್ ದೀಸ್ ತಿಂ ಕಾಮಾಕ್ ಗೆಲಿಂ ನಾಂತ್. ಭುರ್ಗ್ಯಾಂಕ್ ವೆಗಿಂಚ್ ನಿದಾವ್ನ್ ತಿಂ ನಿದ್ಲಿಂ. ಮರಾಟಿಯ್ ಥಂಯ್ಚ್ ನಿದ್ಲೊ. ರಾತ್ಚೆ ಇಕ್ರಾ ವೊರಾಂಕ್ ಆಯಿಲ್ಲೊ ತಿಚೊ ಘೊವ್ ಭಿತರ್ ರಿಗ್ತನಾಂಚ್ ತಯಾರ್ ಆಸ್ಚೊ ತೊ ಮರಾಟಿನ್ ದಾರಾ ಪಾಟ್ಲ್ಯಾನ್ ರಾವೊನ್ ಎಕಾ ರುಕಾಚಾ ಕುಡ್ಕ್ಯಾಂತ್ ಭಳಾನ್ ಮಾರ್‍ಲೊ. ದೀಸ್‌ಭರ್ ಕಾಮ್ ಕರ್ನ್ ಆಯಿಲ್ಲೊ ಬಾವ್ಡೊ ಘಡಿಯೆನ್ ಥಂಯ್ಚ್ ಗಳ್ಳೊ.

ಕಿತ್ಲೊ ವೇಳ್ ಜಾಲೊ ಮ್ಹಳ್ಳೆಂ ತೊ ನೆಣಾಂ. ತಾಣೆಂ ದೊಳೆ ಉಗ್ತೆ ಕರ್‍ತಾನಾ ತಕ್ಲೆರ್ ಕಸ್ಲಿಗೀ ದೂಖ್ ಆಸ್ಚಿ ಕಳ್ಳಿ. ದಿವೊ ಅಜೂನೀ ಪೆಟೊನ್ ಆಸ್‌ಲ್ಲೊ. ಘರಾಂತ್ ಏಕ್ ಮನಿಸ್‌ಯಿ ನಾತ್‌ಲ್ಲೊ. ಫಾಂತೆಂ ಲಾಗಿಂ ಜಾವ್ನ್ ಆಯಿಲ್ಲೆಂ. ತಕ್ಲೆರ್ ಹಾತ್ ಭಂವ್ಡಾಯ್ಲೊ ಥಂಯ್ ಥಾವುನ್ ವಾಳ್‌ಲ್ಲೆಂ ರಗಾತ್ ಗೆಟೆ ಜಾಲ್ಲೆಂ. ಹಳ್ತಾರ್ ಉಟೊನ್ ಆಪುಣ್ ಖಂಯ್ ಆಸಾಂ ಮ್ಹಣೊನ್ ತೊ ಚಿಂತಿಲಾಗ್ಲೊ. ಉಟೊನ್ ಇಲ್ಲೆಂ ಉದಾಕ್ ಪಿಯೆಲೊ.

ಸಕಾಳಿಂ ದೂದ್ ಹಾಡ್ನ್ ಆಯಿಲ್ಲೊ ಬಯ್ಯಾ ಹಾಚಿ ಸ್ಥಿತಿ ಪಳೆವ್ನ್ ಭಿಂಯೆಲೊ ಆನಿಂ ವೆಗಿಂಚ್ ಸೆಜಾರಾ ಖಬಾರ್ ದಿಲಿ ಆನಿಂ ಸೆಜಾರ್‍ಯಾನ್ ತಾಕಾ ಎಕಾ ಆಸ್ಪತ್ರೆಕ್ ವರುನ್ ಗೆಲೊ.

ಕಿತ್ಲೆ ದೀಸ್ ತೊ ಥಂಯ್ ಆಸ್‌ಲ್ಲೊ ತೊಚ್ ನೆಣಾಂ ಉಪ್ರಾಂತ್ ತಾಕಾ ಎಕೆಕ್‌ಚ್ ಉಡಾಸ್ ಆಯ್ಲೆಂ. ತಾಚಿ ಬಾಯ್ಲ್, ನಿದೊನ್ ಆಸ್ಚಿಂ ತಾಚಿಂ ಭುರ್ಗಿಂ, ದಾರಾಪಾಟ್ಲ್ಯಾನ್ ರಾವ್‌ಲ್ಲೊ ಕೋಣ್‌ಗೀ ಆಪ್ಣಾಕ್ ಲಗಾಡ್ ಕಾಡುಂಕ್ ತಯಾರ್ ಜಾಲ್ಲೊ.

ತಾಚೊ ಉಡಾಸ್ ಇಲ್ಲೊ ಇಲ್ಲೊ ಪಾಟಿಂ ಆಯಿಲ್ಲೊ. ತಾಕಾ ಹ್ಯಾ ಸರ್ಕಾರಿ ಆಸ್ಪತ್ರೆಕ್ ಕೊಣೆಂ ಪಾವಯಿಲ್ಲೊ ಮ್ಹಳ್ಳೆಂಚ್ ಸಮ್ಜಾಲೆಂ ನಾ. ತಿತ್ಲ್ಯಾರ್ ತಾಚೊ ಸೆಜಾರಿ ಆಯ್ಲೊ. ಆನಿಂ ಹಾಸೊನ್‌ಶೆಂ ಮ್ಹಣಾಲೊ. "ಭಿಂಯೆನಾಕಾ. ತುಂ ಆತಾಂ ಬರೊ ಆಸಾಯ್. ಆಮಿಂ ಆಸಾಂವ್ ಕಾಂಯ್ ಫಿಕಿರ್ ಕರ್‍ನಾಕಾ" ಆನಿಂ ತಾಕಾ ಘೆವ್ನ್ ತೊ ಪಾಟಿಂ ಘರಾ ಚಲ್ಲೊ.

ಪಾಟಿಂ ಆಯಿಲ್ಲ್ಯಾ ತಾಕಾ ದೆಖೊನ್ ತಾಚಿ ಚಾಕ್ರಿ ಕರುಂಕ್ ತಾಚಿಂ ಸೆಜಾರ್ಚಿಂಚ್ ಪಾವ್ಲಿಂ. ಹಳ್ತಾರ್ ತಾಕಾ ಕಳೊನ್ ಆಯ್ಲೆಂ ತಾಚಿ ಬಾಯ್ಲ್ ದೊನೀಂ ಭುರ್ಗ್ಯಾಂಕ್ ಘೆವ್ನ್ ತ್ಯಾ ಮಾರಾಟ್ಯಾಸವೆಂ ಧಾಂವ್ಲಾಂ ಮ್ಹಣೊನ್. ತಾಂಣಿಂ ಚಿಂತ್ಚೆ ಪ್ರಕಾರ್ ಹಾಣೆ ಜಿವಂತ್ ಆಸ್ಚೆಂ ಅಸಂಭವ್.

ಗೋಪಿಚಾ ದೊಳ್ಯಾಂತ್ ಆತಾಂ ದುಃಖಾಂ ಮಾತ್ ಆಸ್‌ಲ್ಲಿಂ.

"ಸಾಂಗ್. ತಾಣೆಂ ಕಿತೆಂ ಚೂಕ್ ಕೆಲ್ಲಿ? ವಾಟ್ ಚುಕೊನ್ ವೆಚಾ ಎಕಾ ವೇಶ್ಯ್ ಚಲಿಯೆಕ್ ಸಾರ್‍ಕ್ಯಾ ವಾಟೆರ್ ಪರ್ತುಂಕ್ ತಾಕಾ ಕಸಲಿಚ್ ಗರ್ಜ್ ನಾತ್‌ಲ್ಲಿ. ತರೀ ತಾಣೆಂ ಆಪ್ಲ್ಯಾ ಅಂತಸ್ಕರ್ನಾ ಪರ್ಮಾಣೆಂ ಚಲೊನ್ ಕಿತೆಂ ಜೊಡ್ಲೆಂ?"

"ಉಪ್ರಾಂತ್ ಕಿತೆಂ ಜಾಲೆಂ ಗೋಪಿ?" ತಿಯೊಚಾ ತಾಳ್ಯಾಂತ್ ಆತುರಾಯ್ ಆಸ್‌ಲ್ಲಿ.

"ಉಪ್ರಾಂತ್ ಹಾಂವ್ ಗಾಂವಾಕ್ ಗೆಲೊಂ.."

ಗೋಪಿನ್ ಎಕಾಚ್ಚ್‌ಫ಼ರಾಂ ಉತ್ರಾಂ ರಾವಯ್ಲಿಂ.

ತಿತ್ಲ್ಯಾರ್ ಮಣಿ ಲಾಗಿಂ ಆಯ್ಲೊ "ಆಮಿಂ ಸಮ್ಜತಾಂವ್ ಗೋಪಿ, ತುಜಿಂ ಭಗ್ಣಾಂ ಆಮಿಂ ಸಮ್ಜತಾಂವ್. ಆಮ್ಚೆಲಾಗಿಂ ಲಿಪಂವ್ಕ್ ಪಳೆನಾಕಾ. ಕಿತೆಂ ಆಸಾ ತೆಂ ಸಾಂಗ್ಲ್ಯಾರ್‌ಚ್ ನಂಯ್ಗೀ ಮತ್ ಹಗುರ್ ಜಾತಾ? ಜಾಂವ್ಚೆಂ ಸಗ್ಳೆಂ ಬರ್‍ಯಾಕ್‌ಚ್. ಕಿತೆಂಯ್ ಜಾಂವ್ ಆತಾಂ ತುಂ ತುಜಿ ಜಿಣಿ ಜಿಯೆಂವ್ಕ್ ಸಕ್ತಲೊಯ್."

ಆತಾಂ ತಿಯೊಕ್ ಕಳೊನ್ ಆಯ್ಲೆಂ ಕಿತ್ಯಾಕ್ ತ್ಯೇ ದೀಸ್ ಗೋಪಿಕ್ ಕಾಗಾದ್ ಯೇಂವ್ಕ್ ನಾ ಆನಿಂ ಆಮ್ಕಾಂ ಆಯಿಲಿಂ ಕಾಗ್ದಾಂ ಪಳೆತೆಚ್ಚ್ ಗೋಪಿಚೆಂ ತೋಂಡ್ ಕಶೆಂ ಬಾವ್ಲೆಂ ಮ್ಹಳ್ಳೆಂ.

"ಸಾರ್ಕೆಂ ಸಾಂಗ್ಲೆಂಯ್ ಮಣಿ ತುವೆಂ. ಆತಾಂ ಮ್ಹಾಕಾ ಮ್ಹಜಿಂ ಮ್ಹಳ್ಳಿಂ ಕೊಣೀಂ ಆಸಾತ್ ತರ್ ಮ್ಹಜಿ ಪಿಡೇಸ್ತ್ ಪ್ರಾಯೆಸ್ತ್ ಆವಯ್. ತಿಣೆಂ ತಿಚಾ ಜಿಣ್ಯೆಂತ್ ಜಾಯಿತ್ತೆ ಕಶ್ಟ್ ಸೊಸ್ಲ್ಯಾತ್ ದೆಖುನ್ ಆತಾಂ ತರಿ ತಿಣೆಂ ಬರೆ ದೀಸ್ ಕಾಡಿಜಯ್. ದೆಖುನ್೦ಚ್ ಹಾಂವ್ ಗಲ್ಫಾಕ್ ಆಯ್ಲಾಂ. ತಿಚಿ ಚಾಕ್ರಿ ಸುನೆನ್ ಕರಿಜಾಯ್ ಆಸ್‌ಲ್ಲಿ. ಪುಣ್ ತೆಂ ಭಾಗ್ ಮ್ಹಾಕಾ ಜಾಂವ್ ಮ್ಹಜಾ ಆವಯ್ಕ್ ಜಾಂವ್ ಫಾವೊ ನಾತ್‌ಲ್ಲ್ಯಾನ್ ಘರಾ ಎಕಾ ಗಾಂವ್ಚಾ ಬಾಯ್ಲೆಕ್ ಕಾಮಾಕ್ ದವರ್‍ನ್ ಹಾಂವ್ ಆಯ್ಲಾಂ. ಮ್ಹಕಾ ಫಕತ್ತ್ ತಿಚಿ ಖುಶಿ ಆನಿಂ ಬರಿ ಭಲಾಯ್ಕಿ ಜಾಯ್. ದೆಖುನ್ ಕಿತ್ಲೆ ಕಶ್ಟ್ ಜಾಲ್ಯಾರೀ ಕಾಡ್ತಲೊಂ ಆನಿಂ ಇಲ್ಲೆ ಪೊಯ್ಶೆ ಜಮೊ ಕರುನ್ ಮ್ಹಜಾ ಆವಯ್ಕ್ ದೇಶಾಚಾ ವಡ್ಲ್ಯಾ ಆಸ್ಪತ್ರೆಂತ್ ವರುನ್ ತಿಚಾ ಕೇನ್ಸರಾಚಿ ಚಿಕಿತ್ಸಾ ಕರಯ್ತಲೊಂ."

ಎಕಾಚ್ಚ್‌ಫ಼ರಾಂ ಸಗ್ಳಿಂ ಥಂಡ್ ಪಡ್ಲಿಂ. ಜಿಣ್ಯೆಂತ್ ಕೊಣಾಯ್ಕೀ ಇತ್ಲೆ ಕಶ್ಟ್ ಯೆತಾತ್‌ಗಾಯ್ ಮ್ಹಳ್ಳೊ ಮಿಸ್ತೆರ್ ತಾಂಚಾ ಮತಿಂತ್ ಉದೆಲೊ.

"ಕಿತೆಂ ಜಾಲ್ಯಾರೀ ತಿಚಿ ಏಕ್ ಆಶಾ ಹಾಂವ್ ಜ್ಯಾರಿ ಕರುಂಕ್ ಸಕ್ತಾಂಗೀ ನಾಂಗೀ ತೆಂ ಹಾಂವ್ ನೆಣಾಂ" ಗೋಪಿ ಮುಖಾರುನ್ ಉಲಯ್ಲೊ. "ತಿಚಿ ಏಕ್‌ಚ್ ಆಶಾ, ಹಾವೆಂ ಪರತ್ ಜಿಯೆಜಾಯ್, ಪರತ್ ಕಾಜಾರ್ ಜಾಯ್ಜಯ್ ಮ್ಹಳ್ಳಿ. ಪುಣ್ ಮ್ಹಾಕಾ ಹ್ಯಾ ಕಾಜಾರ್, ಚೆಡುಂ, ಮ್ಹಳ್ಳ್ಯಾ ಸಬ್ಧಾಂಚೆರ್ ಪಾತ್ಯೆಣಿ ನಾ. ಹೊ ಮೋಗ್, ಮಯ್ಪಾಸ್ ಮ್ಹಳ್ಳೊ ಫಕತ್ತ್ ಏಕ್ ಮತ್ಲಾಭಿ ಸಬ್ಧ್ ಶಿವಾಯ್ ಸಂಸಾರಾಂತ್ ಹ್ಯಾ ಕಸ್ಲ್ಯಾಚ್ ಸಂಗ್ತ್ಯಾಂಕ್ ಸ್ಥಾನ್ ನಾ"

"ಮಾನ್ ಆಸಾ ಗೋಪಿ, ಮಾನ್ ಆಸಾ.. ಸಂಸಾರಾಂತ್ ಹರ್‍ಯೆಕಾ ಸಂಗ್ತ್ಯಾಂಕೀ ತಾಂಚೆಂ ಮ್ಹಳ್ಳೆಂಚ್ ಸ್ಥಾನ್ ಆಸಾ. ಮಾನ್ ಆಸಾ. ಪುಣ್ ಅಯಿನ್ನ್ ಘಡಿಯೆ ಮಾತ್ರ್ ತೆಂ ಎಕಾಮೆಕಾ ಲಗು ಜಾತಾ. ದೆಖುನ್ ತುಂ ನಿರಾಶಿ ಜಾಯ್ನಾಕಾ. ತುಜಾ ಜಿಣ್ಯೆಂತ್ ತುವೆಂ ಜಾಯಿತ್ತೆ ಕಶ್ತ್ ಭೊಗ್ಲ್ಯಾತ್ ಜಾವ್ಯೆತ್. ಏಕ್ ಘಡಿ ತುಕಾ ತುಜಾ ಸತಾನ್ ಸೊಡ್ನ್ ಘಾಲಾಂ ಮ್ಹಣೊನ್ ಭೊಗ್ಲಾಂ ಜಾವ್ಯೆತ್. ಪುಣ್ ಸತ್ ತೆಂ ಸತ್‌ಚ್ಚ್. ತೆಂ ಕೆದಿಂಕ್‌ಚ್ ಬುಡಾನಾ. ತುವೆಂ ಪೆಲ್ಯಾಕ್ ಕಾಂಯ್ ಲುಕ್ಸಾಣ್ ಕರುಂಕ್ ನಾಂಯ್. ಪೆಲ್ಯಾಂನಿ ತುಕಾ ಲುಕ್ಸಾಣ್ ಕೆಲಾಂ ತಶೆಂ ಆಸ್ತಾಂ ತುವೆಂ ತುಜೆಂ ಮನ್ ಆನಿಂ ಕಾಳಿಜ್ ಲ್ಹಾನ್ ಕರ್ಚಾಂತ್ ಅರ್ಥ್ ನಾ. ಧಯ್ರ್ ಘೆ. ಆಮ್ಚಿಂ ಮಾಗ್ಣಿಂ ತುಜಾ ಆವಯ್ ಖಾತಿರ್ ಸದಾಂ ಆಸ್ತೆಲಿಂ"

ತಿಯೊಚಾ ಭರ್‍ವಸ್ಯಾಚಾ ಉತ್ರಾಂನಿ ಗೋಪಿ ಇಲ್ಲೊ ಸಮಧಾನ್ ಪಾವ್ಲೊ.

"ಸಂಸಾರಾಚಿ ಫಿಕಿರ್ ಮ್ಹಾಕಾ ನಾ. ಸಂಸಾರ್ ಫಕತ್ತ್ ಪೊಯ್ಶಾಂಕ್ ಭುಲ್ತಾ. ಪೊಯ್ಸೊ ಆಸ್ಲ್ಯಾರ್ ಕಿತೆಂಯ್ ಕರ್‍ಯೆತ್. ಕೊಣಾಕೀ ಮೊಲಾಕ್ ಘೆವ್ಯೆತ್. ಪೊಯ್ಸೊ ಆಸ್ಲ್ಯಾರ್ ಸಯ್ರಿಂ ಆಸಾತ್, ಈಶ್ಟ್ ಆಸಾತ್, ವಕ್ತಾಂ ಆಸಾತ್, ಬೂಕ್ ಆಸಾತ್, ಫಕತ್ ಪೊಯ್ಶೆ ಆಸ್ಲ್ಯಾರ್ ಮಾತ್ರ್"

"ತುಂ ಚುಕ್ಲಾಯ್ ಗೋಪಿ. ಪೊಯ್ಶೆ ಆಸ್ಲ್ಯಾರ್ ವ್ಹಯ್, ತುವೆಂ ಸಾಂಗ್‌ಲ್ಲೆಪರಿಂ ಪೊಯ್ಸೊ ಆಸ್ಲ್ಯಾರ್ ಸಯ್ರಿಂ ಮೆಳ್ತಿತ್ ಪುಣ್ ಸಯ್ರಿಕ್ ನ್ಹಂಯ್, ಈಶ್ಟ್ ಮೆಳ್ತಿತ್ ಪುಣ್ ಇಶ್ಟಾಗಾತ್ ನ್ಹಂಯ್, ವಕ್ತಾಂ ಮೆಳ್ತಿತ್ ಪುಣ್ ಭಲಾಯ್ಕಿ ನ್ಹಂಯ್, ಬೂಕ್ ಮೆಳ್ತಿತ್ ಪುಣ್ ಶಿಕಾಪ್ ಯಾ ಜಾಣ್ವಾಯ್ ನ್ಹಂಯ್. ತಶೆಂ ಆಸ್ತಾಂ ಜಿಣಿಂ ತುಂ ಖಂಚಾ ಕೊನ್ಶಾರ್ ಪಳೆತಾಯ್ ತಾಚೆರ್ ಹೊಂದ್ವೊನ್ ಆಸಾ. ನಿರಾಶಿ ಕೊಂಡಾಂತ್ ಆಸೊನ್ ತುಂ ಪಳೆಶಿ ತರ್ ತುಕಾ ಸಗ್ಳೊ ಸಂಸಾರ್ ಲ್ಹಾನ್ ಆನಿಂ ದುಃಖಿ ದಿಸ್ತಲೊ. ತಶೆಂಚ್ ತುಂ ಆಶಾವಾದಿ ಕೊಂಡಾಂತ್ ರಾವೊನ್ ತಿಳ್ಶಿ ತರ್ ತೊಚ್ಚ್ ಸಂಸಾರ್ ತುಕಾ ಸಮ್ರದ್ದ್ ದಿಸ್ತಲೊ"

ಮಣಿನ್ ಆಪ್ಲೆ ವಿಚಾರ್‌ಯಿ ಮೆಳಯ್ಲೆ.

ಮಣಿಚಿಂ ಉತ್ರಾಂ ಆಯ್ಕೊನ್ ತಿಯೊ ಆಪ್ಲೇಸ್ತಕಿಂ ಚಿಂತಿಲಾಗ್ಲೊ. ಹೆರಾಂಕ್ ಬೂದ್‌ಬಾಳ್ ಸಾಂಗ್ತಾನಾ ಆಮಿಂ ಕಿತ್ಲಿಂ ಮುಖಾರ್ ಆನಿಂ ತಿಚ್ಚ್ ಬೂದ್‌ಬಾಳ್ ಆಪ್ಲ್ಯಾ ಜಿಣ್ಯೆಂತ್ ಪಾಳುಂಕ್ ಪ್ರೇತನ್ ಕರ್ತಾನಾ ಕಿತ್ಲೆ ಪಾಟಿಂ ಮ್ಹಣೊನ್.

ಹೆರಾಂಚಾ ಜಿಣ್ಯೆಕ್ ಆಪ್ಲ್ಯಾ ಜಿಣ್ಯೆಕ್ ಸರಿ ಕೆಲಿ ತರ್ ಆಪುಣ್೦ಚ್ ಭಾಗಿ ಮ್ಹಳ್ಳೆಂ ಚಿಂತಾಪ್ ತಿಯೊಚಾ ಮತಿಕ್ ಆಯ್ಲೆಂ.

ತಾಣೆಂ ಆಪ್ಣಾನ್ ಆಯ್ಕಾಲ್ಲಿ, ಪಳೆಲ್ಲಿ ಹೆರಾಂಚಾ ಜಿಣ್ಯೆಚಾ ಕಶ್ಟಾಂ ವಿಶ್ಯಾಂತ್ಲಿ ಕಾಣಿ ಗೋಪಿಕ್ ಆನಿಂ ಮಣಿಕ್ ಸವಿಸ್ತಾರ್ ಜಾವ್ನ್ ಸಮ್ಜಾಯ್ಲಿ. ತಶೆಂ ಆಸ್ತಾಂ ಆಯ್ತಾರಾ ದಿಸಾ ತಿಯೊಸವೆಂ ಮಣಿ ಯಾ ಗೋಪಿ ಯೇಂವ್ಕ್ ತಯಾರ್ ರಾವ್ಲೆ.

"ಹೆಂ ಘಡೊನ್ ಕಿತ್ಲಿಂ ವರ್‍ಸಾಂ ಜಾಲಿಂ?"

"ಕಾಂಯ್ ಧಾ ಭಾರಾ ವರ್ಸಾಂ ಜಾಲಿಂ. ತವಳ್ ತವಳ್ ಮ್ಹಜಾ ತಕ್ಲೆಚೊ ಶಿರೊ ಕಠೀಣ್ ಫಡ್ತಾತ್. ತ್ಯೇ ಖಾತಿರ್ ಹಾವೆಂ ಚಡಿತ್ ಚಿಂತ್ಚೆಂ ಸೊಡ್ಲಾಂ. ಪಯ್ಲೆಂ ಪಯ್ಲೆಂ ಮ್ಹಜಾನ್ ಸೊಸುಂಕ್ ಅಸಾಧ್ಯ್ ಜಾವುನ್ ಹಾಂವ್ ಸೊರ್‍ಯಾಚೊ ಗುಲಾಮ್ ಜಾಲ್ಲೊಂ. ದೀಸ್ ಮ್ಹಣೊನ್ ನಾ ರಾತ್ ಮ್ಹಣೊನ್ ನಾ. ಫಕತ್ತ್ ಸೊರೊ ಪಿಯೆವ್ನ್ ಭಲಾಯ್ಕಿ ಹೊಗ್ಡಾಯಿಲ್ಲಿ. ಅಶೆಂ ಆಸ್ತಾಂ ಕಂಪೆನಿನ್ ಮ್ಹಾಕಾ ಜಾಯಿತ್ತ್ಯೊ ಜಾಗ್ರುತೊ ದಿಲ್ಯೊ ಆನಿಂ ಅಖ್ರೇಕ್ ಮ್ಹಾಕಾ ಕಾಮಾಂತ್ಲೊ ಕಾಡ್ಲೊ. ಆನಿಂ ಬೊಂಬೊಂಯ್ತ್ ತ್ಯೆಚ್ಚ್ ವಾತಾವಾರಣಾಂತ್ ಆಸ್ಚಾ ಮ್ಹಾಕಾ ಜಿಯೆಂವ್ಚೆಂ ಅಸಾಧ್ಯ್ ಮ್ಹಣೊನ್ ಭೊಗೊನ್ ಹಾವೆಂ ಪರತ್ ಪಾಟಿಂ ಗಾಂವಾಂಕ್ ಗೆಲೊಂ. ಗಾಂವಾಂತ್ ಏಕ್ ನವಿ ಜಿಣಿ ಸುರು ಕರುಂಕ್ ಚಿಂತ್ಲೆಂ. ಸುರ್‍ವೆರ್ ಗಾಂವ್ಚಾ ಮನ್ಶಾಂಚಿ 'ಕೋಣ್? ಕಿತ್ಯಾಕ್? ಕಸೊ? ಕೆದಾಳಾ? ಖೈಂ? ಮ್ಹಳ್ಳಿಂ ಸವಾಲಾಂ ಮ್ಹಾಕಾ ಕಂಗಾಲ್ ಕರಿಲಾಗ್ಲಿಂ. ತರೀ ಹಿ ಮ್ಹಜಿ ಜಿಣಿ ಆನಿಂ ಹಾವೆಂ ಜಿಯೆಜಯಿಚ್ ಆಸ್‌ಲ್ಲಿ ಆನಿಂ ಹಾಂವ್ ಜಿಯೆಲೊಂ."

ಗೋಪಿ ಉಲಯ್ತಾಂ ಉಲಯ್ತಾಂ ದೊಳ್ಯಾಂ ಥಾವುನ್ ದುಃಖಾಂ ಗಳಯ್ಲಾಗ್ಲೊ.

ಹ್ಯಾ ಗಲ್ಫಾಂತ್ ಅಸಲಿಂ ದುಃಖಾಂ, ಅಸಲಿಂ ಭಗ್ಣಾಂ, ಕಾಂಯ್ ನವಿಂ ನ್ಹಂಯ್. ಹಾಂಗಾಸರ್ ಆಯಿಲ್ಲಿಂ, ಯೆಂವ್ಚಿಂ, ಸಗ್ಳಿಂ ಅಸಲ್ಯೊಚ್ಚ್ ಕಾಣಿಯೊ ಘೆವ್ನ್ ಯೆತಾತ್. ಹಾಂಗಾಚಾ ಮಾತಿಯೆಕ್ ಹಾಂಗಾಚಾ ರೆಂವೆಕ್ ಹ್ಯಾ ದುಃಖಾಂಕ್ ಸುಕಂವ್ಚಿ ಸಕತ್ ಆಸಾ. ಅಸಲಿಂ ಚಿಂತ್ನಾಂ ಮನ್ಶಾಚಾ ಜಿಣಿಯೆಂತ್ ಏಕ್ ಅಡ್ಕಳ್ ಮಾತ್ರ್ ನ್ಹಂಯ್ ಏಕ್ ಪರಿಕ್ಶಾ, ಎಕಾ ಥರಾಚೆಂ ಝುಜ್. ಕೋಣ್ ಬರೊ ಝುಜ್ತಾಗೀ ತೊ ಜಿಕ್ತಾ. ಆನಿಂ ಕೋಣ್ ಪೊಳ್ತಾಗೀ ತೊ ಸಲ್ವತಾ.

ಗಾಂವಾಂತ್ ಆಸ್ತಾನಾ ಪರ್ಗಾಂವ್ ಬರೊ ಮ್ಹಣೊನ್ ದಿಸ್ತಾ. ಪುಣ್ ಪರ್ಗಾಂವಾಂತ್ ಯೆತೆಚ್ ಕಳ್ತಾ ಹಾಂಗಾಚೆಂ ಜಿವಿತ್ ಆನಿಂ ಭೊಗೊಂಕ್ ಆಸ್ಚೆ ಆಟೆವಿಟೆ. ತರೀ ಹಾಂತುಂ ಪೊಳಾಪಳ್ ಘೆತ್‌ಲ್ಲೆಪರಿಂ ನಾ. ಎಕ್ಸುರಿ ಜಿಣಿ ತರ್ ತಿ ಗಜಾಲ್ ವೆಗ್ಳಿ. ಪುಣ್ ಹಾಂಗಾಸರ್ ಆಮಿಂ ಜಿಯೆಂವ್ಚಿ ಜಿಣಿ ಜರ್ ಆಮ್ಚಾ ಕುಟ್ಮಾಚಾ ಸ್ಥಿತೆಕ್ ಬದ್ಲುಂಕ್ ಯಾ ಪರಿಣಾಮ್ ಘಾಲುಂಕ್ ಸಕ್ತಾ ತರ್ ಹಾಂಗಾ ಆಸ್ಚೆ ಕಸ್ಟ್ ಸಗ್ಳೆ ಖಾಂದ್ ಮಾರಿಜಯ್.

ಮುಂದರ್‍ಸಿಲಾಂ...

Tags: Vally Quadras,e konkani novel, Konkani, Mangalore, Mangalorean, Mother Tongue

From around the world

ಪಾಟಿಂ ಗಾಂವಾಕ್ - ಅವಸ್ವರ್ 7

Post your comments

ಅವಸ್ವರ್ 1

ಅವಸ್ವರ್ 2

ಅವಸ್ವರ್ 3

ಅವಸ್ವರ್ 4

ಅವಸ್ವರ್ 5

ಅವಸ್ವರ್ 6

ಅವಸ್ವರ್ 7

ಅವಸ್ವರ್ 8

ಅವಸ್ವರ್ 9

ಅವಸ್ವರ್ 10

ಅವಸ್ವರ್ 11

ಅವಸ್ವರ್ 12

ಅವಸ್ವರ್ 13

ಅವಸ್ವರ್ 14

ಅವಸ್ವರ್ 15

ಅವಸ್ವರ್ 16

ಅವಸ್ವರ್ 17

ಅವಸ್ವರ್ 18

ಅವಸ್ವರ್ 19

ಅವಸ್ವರ್ 20

ಅವಸ್ವರ್ 21

ಅವಸ್ವರ್ 22

ಅವಸ್ವರ್ 23

ಅವಸ್ವರ್ 24

ಅವಸ್ವರ್ 25

ಅವಸ್ವರ್ 26

ಅವಸ್ವರ್ 27

ಅವಸ್ವರ್ 28

Connect

Our Address
Mangalore

Our Address
Udupi

Our Address
Dubai

From around the world

Post your comments

Connect

Our AddressMangalore

Our AddressUdupi

Our AddressDubai

Our Address
Mangalore

Our Address
Udupi

Our Address
Dubai