+971 50 7554105
ತುಮ್ಚ್ಯಾ ಗಮನಾಕ್:

ಪಾಟಿಂ ಗಾಂವಾಕ್  -  ಅವಸ್ವರ್ 11


ಗಲ್ಫಾಗಾರಾಚಾ ಭುರ್ಗ್ಯಾಂಕ್ ಗಾಂವಾಂತ್ ತಶೆಂಚ್ ಇಸ್ಕೊಲಾಂತ್ ಮೆಳ್ಚಿ ಮರ್‍ಯಾದ್ ವೆಗ್ಳಿಚ್ಚ್. ಆನಿಂ ತೆಚ್ ಪ್ರಕಾರ್ ಜೊಯೆಲಾಕ್ ಆನಿಂ ಜಿವಿತಾಕ್‌ಯಿ ಘಡ್ಲೆಂ. ಜೊಯೆಲ್ ಆತಾಂ ಹಾಯ್‌ಸ್ಕೂಲಾಂತ್ ಶಿಕ್ತಾಲೊ ಆನಿಂ ಜಿವಿತಾ ಸಾತ್ವೆಂತ್ ಶಿಕ್ತಾಲೆಂ.

ದೀಸ್ ಗೆಲ್ಲೆಪರಿಂಚ್ ತೆಚ್ ಇಸ್ಕೊಲಾಂತ್ ಶಿಕ್ಚಾ ಹೆರ್ ಗಲ್ಫಾಗಾರಾಂಚಾ ಭುರ್ಗ್ಯಾಂಪರಿಂ ಜೊಯೆಲಾಕ್‌ಯಿ ತಾಚಾ ಹಾತಾಕ್ ವೊಚ್ ಬಾಂದಿಜಯ್ ಆನಿಂ ಭಾಂಗಾರಾಚಿ ಚೇಯ್ನ್ ಆನಿಂ ಬ್ರೇಸ್‌ಲೆಟ್ ಘಾಲಿಜಯ್ ಮ್ಹಳ್ಳಿ ಆಶಾ ಧೊಸುಂಕ್ ಲಾಗ್ಲಿ. ನವಿಂ ನವಿಂ ಪೆಂಟಾಂ ಆನಿಂ ಟಿಶರ್ಟಾಂ ಘಾಲುಂಕ್ ಮನ್ ಆಯ್ಲೆಂ. ಅಶೆಂ ಆಸ್ತಾಂ ತಾಣೆಂ ತಾಚಾ ಪಪ್ಪಾಕ್ ಏಕ್ ಕಾಗಾದ್ ಬರಂವ್ನ್ ಆಪ್ಣಾಕ್ ಜಾಯ್ ಜಾಲ್ಲ್ಯೊ ಹ್ಯೊ ವಸ್ತು ತಾಣೆಂ ಗಾಂವಾಕ್ ಯೆತಾನಾ ಹಾಡುಂಕ್ ಯಾ ಕೊಣೀಂ ಗಾಂವಾಕ್ ಯೆಂವ್ಚಿಂ ಆಸಾತ್ ತರ್ ತಾಂಚೆಲಾಗಿಂ ಧಾಡುಂಕ್ ಮಾಗ್ಲೆಂ.

ಜಿವಿತಾಕ್‌ಯಿ ಆತಾಂ ಇಸ್ಟಿಣ್ಯೊ ಚಡ್‌ಲ್ಲ್ಯೊ. ಪೆಂಟೆಸಾಲಾಚಾ ಕೊಂಕ್ಣ್ಯಾಚೊ ಧುವೊ ಸಯ್ತ್, ಬೆಟಾ ಘರ್ಚಾ ಬ್ರಾಹ್ಮಣಾಚೊ ಧುವೊ ಸಯ್ತ್ ಆತಾಂ ಜಿವಿತಾಕ್ ಲಾಗಿಂ ವೊಡ್ತಾಲಿಂ. ಕಾಂಯ್ ಗಲ್ಫಾಚೊ ತಾಚೊ ಬಾಪುಯ್ ಯೇತ್ ತರ್ ಆಪ್ಣಾಕೀ ಕಾಂಯ್ ಇಲ್ಲಿಂ ಚೊಕ್ಲೆಟಾಂ ಮೆಳ್ತಿತ್ ಮ್ಹಳ್ಳ್ಯಾ ಭರ್ವಸ್ಯಾನ್ ಆಸ್ಯೆತ್. ತಶೆಂಚ್ ತಾಕಾಯ್ ತಾಚಾ ಪಪ್ಪಾಕ್ ಬರವ್ನ್ ತಾಚೆ ಖಾತಿರ್ ರಂಗಾಳ್ ಪೆನ್ನಾಂ, ಇಲ್ಲೊ ಪೌಡರ್, ಕ್ರೀಮ್, ಆನಿಂ ಇಲ್ಲೆಂ ಪರ್ಮಳಾಚೆಂ ಸೆಂಟ್ ಧಾಡುಂಕ್ ತಾಣೆಂಯ್ ಬರಯ್ಲೆಂ.

ಭುರ್ಗ್ಯಾಂಚೊ ಆಶಾ ಅತ್ರೆಗ್ ಆಟಾಪ್ಚಿಂ ಕಾಗ್ದಾಂ ಲತೀಫಾನ್ ಪೋಸ್ಟ್ ಕೆಲ್ಲಿಂ ಚಡುಣೆಂ ಪಂದ್ರಾ ದಿಸಾಂ ಭಿತರ್ ತಿಯೊಚಾ ಹಾತಾಂತ್ ಪಾವ್ಲಿಂ ಆನಿಂ ಏಕ್ ಘಡಿ ತಿಯೊ ಆಪ್ಲಿಂ ಭುರ್ಗಿಂ ಇತ್ಲಿಂ ವಡ್ ಜಾಲ್ಲಿಂ ಪಳೆವ್ನ್ ಸಂತೊಸ್‌ಚ್ ಜಾಲೊ. ಭುರ್ಗ್ಯಾಂಚಿ ಕಾಗ್ದಾಂ ಪಳೆಲ್ಲೊ ತಿಯೊ ಅನಿಕೀ ಉತ್ಸಾಹಾಂತ್ ಭರ್ಲೊ ಆನಿಂ ಭುರ್ಗ್ಯಾಂಕ್ ತಾಣಿಂ ಆಶೆಲ್ಲೆಂ ಖಂಡಿತ್ ಆಪ್ಣಾನ್ ಘೆವ್ನ್ ದೀಜಯ್ ಯಾ ಧಾಡ್ನ್ ದೀಜಯ್ ಮ್ಹಣೊನ್ ಮನಾಂತ್ ಲೇಖ್ ಘಾಲಿಲಾಗ್ಲೊ. ತೇಂಯ್ ದೋನ್ ಕಾಗ್ದಾಂ ಆಸ್‌ಲ್ಲ್ಯಾನ್ ಆಪ್ಲ್ಯಾ ಪುತಾಚೊ ಹಾತ್ ಆತಾಂ ಖಂಡಿತ್ ಬರೊ ಜಾಲಾ ಮ್ಹಳ್ಳೆಂ ತಿಯೊಚಾ ಮತಿಕ್ ನಖ್ಖಿ ಜಾಲೆಂ ಆನಿಂ ಚಡಿತ್ ಸಂತೊಸ್ಲೊ.

ಹಾಪ್ತ್ಯಾಚಿ ರಜಾ ಆಯಿಲ್ಲ್ಯಾ ಎಕಾ ಆಯ್ತಾರಾ ತೊ ವಚೊನ್ ಮಾರ್ಕುಕ್ ಮೆಳ್ಳೊ. ಮಾರ್ಕುಸವೆಂ ಭಾಂಗಾರ್ ವಿಕ್ಚಾ ಆಂಗ್ಡೆಕ್ ಗೆಲೊ ಆನಿಂ ಭುರ್ಗ್ಯಾಂಚಾ ದೋನ್ ಚೇಯ್ನಿಂಕ್ ಆನಿಂ ಏಕ್ ಬ್ರೇಸ್‌ಲೆಟಾಕ್ ಕಿತ್ಲೆಂ ಮೋಲ್ ಜಾತಾ ಮ್ಹಣೊನ್ ಲೇಖ್ ಘಾಲಿಲಾಗ್ಲೊ. ಚಡುಣೆಂ ಶೆಂಭರ್ ದಿನಾರ್ ಜಾತಾತ್ ಮ್ಹಳ್ಳೆಂ ಕಳ್ತಚ್ಚ್ ತಾಣೆಂ ಫುಡೆಂ ಯೇವ್ನ್ ವೆಲ್ಯಾರ್ ಸಯ್ ಮ್ಹಣೊನ್ ಲೇಖ್ ಘಾಲೆಂ. ಕಿತ್ಯಾಕ್ ಮ್ಹಳ್ಯಾರ್ ತಾಕಾ ತ್ಯಾ ಭಾಂಗಾರಾಚಾ ಮೊಲಾಚೊ ಅಂದಜ್ ಮಾತ್ರ್ ಜಾಯ್ ಆಸ್‌ಲ್ಲೊ ಶಿವಾಯ್ ಮೊಲಾಕ್ ಘೆಂವ್ಕ್ ತಿತ್ಲೆ ಪೊಯ್ಶೆ ತಾಚೆಲಾಗಿಂ ತವಳ್ ನಾತ್‌ಲ್ಲೆ.

ಮಾರ್ಕು ಆನಿಂ ತಿಯೊ ತಾಂಚಾ ಭುರ್ಗ್ಯಾಂ ವಿಶ್ಯಾಂತ್ ಎಕಾಮೆಕಾ ಉಲಯ್ಲಾಗ್ಲೆ ಆನಿಂ ತಿಯೊ ಮಾರ್ಕುಚಾ ಭುರ್ಗ್ಯಾಂಚೊ ತಾರಿಫಾ ಆಯ್ಕಾತಾಲೊ. ತಾಣೆಂ ತಾಚಾ ಭುರ್ಗ್ಯಾಂಕ್ ದೆಖೊನ್ ವರ್ಸಾಂ ಉತ್ರಾಲ್ಲಿಂ ದೆಖುನ್ ತಾಕಾ ಆತಾಂ ಸಂತೊಸಾಚಿ ಗಜಾಲ್ ಮ್ಹಳ್ಯಾರ್ ತಾಣಿಂ ಬರಂವ್ಚಿಂ ಕಾಗ್ದಾಂ ಮಾತ್ರ್.

ಅಶೆಂ ಪಾಟಿಂ ಗುದಾಂವಾಕ್ ಆಯಿಲ್ಲೊ ತಿಯೊ ಆಪ್ಲ್ಯಾ ಕಾಮಾ ಮಧೆಂ ಚಿಂತುಂಕ್ ಪಡ್ಲೊ. ತಾಚಾ ತಕ್ಲೆಂತ್ ಕೆನ್ನಾ ಆಪುಣ್ ಶೆಂಭರ್ ದಿನಾರ್ ಕರ್ತಾಂ ಆನಿಂ ಕೆನ್ನಾ ಭುರ್ಗ್ಯಾಂಕ್ ತಾಣಿಂ ವಿಚಾರ್‍ಲೆಲ್ಯೊ ವಸ್ತು ದಿತಾಂ ಮ್ಹಳ್ಳೆಂ ಘುಂವ್ತಾಲೆಂ. ತಾಣೆಂ ಎದೊಳ್‌ಚ್ ಜಮೊ ಕೆಲ್ಲೆ ಪೊಯ್ಶೆ ಕಿತ್ಲೆ ಆಸಾತ್ ಮ್ಹಣೊನ್ ಲೇಖ್ ಕೆಲೆಂ. ಪುಣ್ ಪಂಚ್ವೀಸ್ ದಿನಾರ್ ಮಾತ್ರ್ ಆಸ್‌ಲ್ಲೆ ಆನಿಂ ಏಕ್ ಪಾವ್ಟಿಂ ಶೇಖಾಲಾಗ್ಚೆಂ ರೀಣ್ ವಿಚಾರುಂಕ್ ನಾಟಕ್ ಕೆಲ್ಲ್ಯಾ ಬೆಂಗಾಲಿಕ್ ಪರತ್ ಸಾಂಗೊನ್ ಇಲ್ಲೆ ಪೊಯ್ಶೆ ಮಾಗೊಂಕ್ ತಾಕಾ ಏಕ್ ತಾಳ್ಣಿ ಆಯ್ಲಿ ತರೀ 'ಪಳೆಯಾಂ ಕಿತೆಂ ಜಾತಾ ಮ್ಹಳ್ಳೆಂ' ಮ್ಹಣೊನ್ ಚಿಂತುನ್ ವಗೊಚ್ ಬೊಸ್ಲೊ.

ಅಶೆಂ ದೋನ್ ದೀಸ್ ಪರ್‍ಯಾಂತ್ ಇಲ್ಲೊ ಖಂತಿನ್ ಭರ್‌ಲ್ಲ್ಯಾ ತಿಯೊಕ್ ಪಳೆಲ್ಲ್ಯಾ ಮಣಿಕ್ ಕಿತೆಂ ತರೀ ವಿಶೇಷ್ ಘಡ್ಲಾಂ ಮ್ಹಳ್ಳೆಂ ಸುಸ್ತಾಲೆಂ. ದೆಖುನ್ ಕಸಲ್ಯಾಗೀ ಆತುರಾಯೆನ್ ತಾಣೆಂ ತಿಯೊಕ್ ಸವಾಲ್ ಕೆಲೆಂ.

"ಕಿತೆಂ ಗಜಾಲ್ ತಿಯೊ? ಕಾಂಯ್ ಸಂಕಶ್ಟಾರ್ ಪಡ್ಲಾಯ್ಗೀ? ತುಜಾ ಭುರ್ಗ್ಯಾಂಚಿಂ ಕಾಗ್ದಾಂ ವಾಚ್‌ಲ್ಲ್ಯಾ ದಿಸಾ ಥಾವುನ್ ತುಂ ಸಂಸಾರಾಂತ್‌ಚ್ ನಾಂಯ್. ಕಿತೆಂ ಗಜಾಲ್?".

ಆಛಾನಕ್ ಮಣಿಚಾ ಸವಾಲಾಂಕ್ ತಿಯೊ ಕಾಲುಬುಲೊ ಜಾಲೊ ತರೀ ತಾಕಾ ಲಿಪಂವ್ಕ್ ಮನ್ ಜಾಲೆಂ ನಾ.

"ಕಿತೆಂ ಸಾಂಗೊ ಮಣಿ ತುಕಾ? ಎದೊಳ್ ಪರ್‍ಯಾಂತ್ ಮ್ಹಜಾ ಭುರ್ಗ್ಯಾಂನಿ ಮ್ಹಾಕಾ ಕಿತೆಂಚ್ ವಿಚಾರ್‌ಲ್ಲೆಂ ನಾ. ಆನಿಂ ಆತಾಂ ತಾಂಕಾ ತಾಣಿಂ ವಿಚಾರ್‌ಲ್ಲೆಂ ಧಾಡುಂಕ್ ಪಳೆತಾನಾ ಮ್ಹಜಾನ್ ಸದ್ದ್ಯಾಕ್ ಸಾಧ್ಯ್ ನಾ".

"ತಸಲೆ ಕಿತೆಂ ವಿಚಾರ್ಲಾಂ ತಾಣಿಂ ತುಜೆಲಾಗಿಂ?" ಮಣಿನ್ ಪರತ್ ಸವಾಲ್ ಕೆಲೆಂ.

"ತಾಂಕಾ ತೆಂ ಚಿಲ್ಲರ್ ಮಣಿ ಪುಣ್ ಮ್ಹಾಕಾ ತೆಂ ವ್ಹಡ್ಲೆಂಚ್. ಪುತಾನ್ ಏಕ್ ಭಾಂಗಾರಾಚಿ ಚೇಯ್ನ್ ಆನಿಂ ಬ್ರೇಸ್‌ಲೆಟ್ ತಶೆಂಚ್ ಏಕ್ ವೋಚ್ ಧಾಡುಂಕ್ ಬರಯ್ಲಾಂ. ಧುವೆನ್ ಏಕ್ ಚೇಯ್ನ್ ಆನಿಂ ಇಲ್ಲ್ಯೊ ಹೆರ್ ವಸ್ತು ವಿಚಾರ್‍ಲ್ಯಾತ್".

"ಹೋ.. ಗಜಾಲ್ ಹೀಗೀ? ಹಾಂವೆ ಕಾಂಯ್ ತಾಣಿಂ ಮೊಳಾಬ್ ಕೊಸ್ಳಾಂವ್ಕ್ ಯಾ ನೆಕೆತ್ರಾಂ ಹುಮ್ಟುನ್ ಧಾಡ್ ಮ್ಹಣೊನ್ ಬರಯ್ಲಾಂ ಮ್ಹಣೊನ್ ಲೆಕ್‌ಲ್ಲೆಂ. ಕಿತೆಂ ಜಾಲೆಂ, ತುಜಿಂಚ್ ಭುರ್ಗಿಂ ನೆ? ತಾಂಕಾ ದಿಲ್ಲೆಂ ತುವೆಂ ಉರಯಿಲ್ಲೆಪರಿಂಚ್ ನಂಯ್ಗೀ?".

ಮಣಿಚಿಂ ಉತ್ರಾಂ ಅಖೇರ್ ಜಾಯ್ಜಯ್ ತರ್ ತಿಯೊನ್ ಏಕ್ ನೀಳ್ ಸ್ವಾಸ್ ಸೊಡ್ಲೊ ಆನಿಂ ಜಾಪ್ ದಿಲಿ.

"ಗಜಾಲ್ ಹಿ ನ್ಹಂಯ್ ಮಣಿ, ಮ್ಹಜಿಂ ಭುರ್ಗಿಂ ದೆಖುನ್ ತಾಣಿಂ ಮ್ಹಜೆಂ ಆಂತ್ ಕಾಡ್ಣ್ ಧಾಡ್ ಮ್ಹಣೊನ್ ವಿಚಾರ್‍ಲೆಂ ತರೀ ಹಾಂವ್ ದೀಂವ್ಕ್ ಪಳೆತಾಂ. ಪುಣ್ ತ್ಯಾ ಭಾಂಗಾರಾಕ್ ಉಣ್ಯಾರ್ ಉಣೆಂ ಶೆಂಭೊರ್ ದಿನಾರ್ ಪುಣೀಂ ಆಸಾತ್. ಪುಣ್ ಆಪ್ಣಾಲಾಗಿಂ ಆತಾಂ ಫಕತ್ತ್ ಪಂಚ್ವೀಸ್ ದಿನಾರ್ ಮಾತ್ರ್ ಆಸಾತ್. ಶೇಖಾಲಾಗಿಂ ಪರತ್ ವಿಚಾರುಂಕ್ ಮ್ಹಾಕಾ ಭ್ಯೆಂ ದಿಸ್ತಾ".

ತಿಯೊಚೆಂ ಸುಟಾವೆಂ ಕುಮ್ಸಾರ್ ಆಯ್ಕೊನ್ ಮಣಿನ್ ತಿಯೊಚೆರ್ ಏಕ್ ನದರ್ ಘಾಲಿ. ತಿಯೊಕ್ ತೊ ಪಾತ್ಯೆತಾಲೊ ದೆಖುನ್ ಮ್ಹಣಾಲೊ.

"ತುಕಾ ಕೆದಾಳಾ ತುಜಾ ಭುರ್ಗ್ಯಾಂಕ್ ಭಾಂಗಾರ್ ಧಾಡುಂಕ್ ಆಸಾ ಮ್ಹಳ್ಳೆಂ ಸಾಂಗ್ ಆನಿಂ ತೆದಾಳಾ ಹಾಂವ್ ತುಜಿ ಮಜತ್ ಕರ್ತಾಂ".

ಮಣಿಚಿಂ ಉತ್ರಾಂ ಆಯ್ಕೊನ್ ತಿಯೊಚೆ ವೋಂಟ್ ರುಂದಾಲೆ. ತಾಕಾ ಖರೊಚ್ಚ್ ಸಂತೊಸ್ ಜಾಲ್ಲೊ.

"ತುಕಾ ಕಿತ್ಯಾಕ್ ತ್ರಾಸ್ ಮಣಿ, ತುಕಾಯ್ ತುಜೆಚ್ ಕಶ್ಟ್ ಆಸಾತ್ ನಂಯ್ಗೀ?" ತಿಯೊನ್ ನರ್ಗೊನ್‌ಶೆಂ ಜಾಪ್ ದಿಲಿ.

"ಕಶ್ಟ್ ಮ್ಹಳ್ಳೆ ಕೊಣಾಕ್ ನಾಂತ್ ತಿಯೊ? ಕಶ್ಟ್ ನಾತ್‌ಲ್ಲೆ ತರ್ ಆಮ್ಕಾಂ ಎಕಾಮೆಕಾ ಮೆಳೊಂಕ್ ಜಾತೆಂಗೀ? ಕಶ್ಟ್ ನಾತ್‌ಲ್ಲೆ ತರ್ ಆಮ್ಕಾಂ ಗಲ್ಫಾಕ್ ಯೆಂವ್ಚಿ ಗರ್ಜ್ ಯೆತಿಗಿ? ಕಶ್ಟ್ ನಾತ್‌ಲ್ಲೆ ತರ್ ಮನ್ಶಾಂಕ್ ಮಿನತ್ ಕರ್ಚಿ ಗರ್ಜ್ ಉದೆತಿಗೀ?. ಕಿತೆಂ ಜಾಲೆಂ ಆಜ್ ಹಾಂವ್ ತುಜಾ ಗರ್ಜೆಕ್ ಪಾವ್‌ಲ್ಲೆಪರಿಂ ಫಾಲ್ಯಾಂ ತುಂಯ್ ಮ್ಹಜಾ ಗರ್ಜೆಕ್ ಪಾವೊಂಕ್ ಸಕ್ಶಿ. ಆಮಿಂ ಎಕಾಮೆಕಾ ಕಾಮ್ ಕರುನ್ ಆಸ್ತಾನಾ ಅಶೆಂ ಎಕಾಮೆಕಾ ಕುಮೊಕ್ ಕರಿನಾತ್ಲ್ಯಾರ್ ಮನ್ಶಾಪಣ್ ಮ್ಹಳ್ಳ್ಯಾ ಸಬ್ಧಾಕ್ ಆರ್ಥ್ ಆಸ್ತೊವೆ?"

ಮಣಿಚಿಂ ಉತ್ರಾಂ ಆಯ್ಕಲ್ಲ್ಯಾ ತಿಯೊಕ್ ಖರೊಚ್ಚ್ ಸಂತೊಸ್ ಜಾಲ್ಲೊ. ತಾಣೆ ಆತಾಂ ರಜೆರ್ ಗಾಂವಾಕ್ ವೆಚಾ ಮಾರ್ಕುಲಾಗಿಂ ತೆಂ ಭಾಂಗಾರ್ ಧಾಡುಂಕ್ ಚಿಂತ್ಲೆಂ. ತಾಚಿ ಮತ್ ಇಲ್ಲಿ ಹಾಳು ಜಾಲಿ. ಫುಡ್ಲ್ಯಾ ಆಯ್ತಾರಾ ಮಾರ್ಕುಕ್ ಮೆಳ್ಳ್ಯಾರ್ ತಾಣೆಂ ಗಾಂವಾಕ್ ವೆಚಿ ತಾರಿಕ್ ಸಾರ್ಕಿ ಸಮ್ಜೊನ್ ತೆಚ್ಚ್ ಪರ್ಮಾಣೆಂ ಕಾಂಯ್ ಇಲ್ಲೆಂ ಭಾಂಗಾರ್ ಧಾಡುನ್ ದಿಂವ್ಚೆಂ ಮ್ಹಣೊನ್ ತೊ ಚಿಂತಿಲಾಗ್ಲೊ.

ತೆಚ್‌ಪರಿಂ ಆಯ್ತಾರಾ ತೊ ಮಾರ್ಕುಕ್ ಮೆಳ್ಳೊ ಆನಿಂ ಮಾರ್ಕುಕ್ ಹ್ಯೇ ಪಾವ್ಟಿಂ ಗಾಂವಾಕ್ ಗೆಲ್ಯಾರ್ ಇಲ್ಲೊ ಜಾಗೊ ಮೊಲಾಕ್ ಘೆಂವ್ಕ್ ಆಸ್‌ಲ್ಲ್ಯಾ ದೆಖುನ್ ತಾಚಾ ಹಾತಾಂತ್ ಕಾಂಯ್ ಭಾಂಗಾರ್ ನಾತ್‌ಲ್ಲೆಂ ತಿಯೊಕ್ ಬರ್‍ಯಾಕ್‌ಚ್ ಪಡ್ಲೆಂ. ದೆಖುನ್ ತಿಯೊನ್ ಆಪ್ಲ್ಯಾ ಭುರ್ಗ್ಯಾಂಕ್ ಭಾಂಗಾರ್ ಘೆವ್ನ್ ದಿತಾಂ ಮ್ಹಳ್ಳ್ಯಾಕ್ ಮಾರ್ಕುನ್ ಕಬ್ಲಾತ್ ದಿಲಿ.

ಪಾಟಿಂ ಆಯಿಲ್ಲ್ಯಾ ತಿಯೊನ್ ಮಣಿಲಾಗ್ಚೆಂ ಪಾವಣ್ಶಿಂ ದಿನಾರ್ ಘೆತ್ಲೆ ಆನಿಂ ದುಸ್ರಾ ಹಫ್ತ್ಯಾಂತ್ ವಚೊನ್ ಆಪ್ಲ್ಯಾಚ್ ಅಂದಾಜೆರ್ ದೊನೀಂ ಭುರ್ಗ್ಯಾಂಕ್ ಎಕೇಕ್ ವೋಚ್, ದೋನ್ ಹಳ್ತಾಚೊ ಭಾಂಗಾರಾಚೊ ಚೇಯ್ನಿಂ, ಏಕ್ ಬ್ರೇಸ್‌ಲೆಟ್ ಮೊಲಾಕ್ ಘೆತ್ಲೆಂ. ಶೆಂಭರ್ ಆನಿಂ ತೀನ್ ದಿನಾರ್ ಖರ್ಚ್ ಜಾಲೊ. ಆನಿಂ ಧುವ್ ಜಿವಿತಾ ಖಾತಿರ್ ಥೊಡ್ಯೊ ವಸ್ತು ಮೊಲಾಕ್ ಘೆತ್ಲ್ಯೊ ಆನಿಂ ಮಾರ್ಕುಚಾ ಹಾತಾಂತ್ ದಿಲ್ಯೊ. ಪಂದ್ರಾ ದಿಸಾಂನಿ ತೊ ಗಾಂವಾಕ್ ವೆಚಾರ್ ಆಸ್‌ಲ್ಲೊ.

ಅಶೆ ಕಶೆ ಪಂದ್ರಾ ದೀಸ್ ಕಾಭಾರ್ ಜಾಲೆ ಮ್ಹಳ್ಳೆಂ ತಿಯೊಕ್ ಕಳ್ಳೆಂನಾ. ತಾಣೆಂ ಎಸ್ತೆಲಾ ಖಾತಿರ್ ಏಕ್ ಕಾಪಾಡ್ ಘೆತ್‌ಲ್ಲೆಂ ಆನಿಂ ಏಕ್ ಕಾಗಾದ್ ಬರವ್ನ್೦ಯ್ ಧಾಡ್ಲೆಂ. ತ್ಯಾ ಕಾಗ್ದಾಂತ್ ತಾಣೆಂ ಆಪುಣ್ ಗಾಂವಾಕ್ ಯೇಂವ್ಕ್ ಆನಿಕೀ ಇಲ್ಲೊ ಮಯ್ನೆ ಉರ್ಲ್ಯಾತ್ ಆಸ್ತಾಂ ಆತಾಂ ಆಪುಣ್ ಯೇಂವ್‌ಗೀ ಯಾ ಮುಖ್ಲ್ಯಾ ವರ್ಸಾ ಯೇಂವ್ ಮ್ಹಣೊನ್ ಬರಯ್ಲೆಂ. ತಶೆಂಚ್ ಭುರ್ಗ್ಯಾಂಕ್ ಬರೆಂ ಕರ್ನ್ ಶಿಕೊಂಕ್‌ಯ್ ಬರಯ್ಲೆಂ. ಆನಿಂ ಭುರ್ಗ್ಯಾಂನಿ ಬರಯಿಲ್ಲೆಂ ಸಗ್ಳೆಂ ದೀವ್ನ್ ಧಾಡ್‌ಲ್ಲೆವಿಶ್ಯಾಂತ್ ಬರಯ್ಲೆಂ.

ಪಂದ್ರಾ ದಿಸಾಂ ಉಪ್ರಾಂತ್ ರಜೆಕ್ ಗಾಂವಾಕ್ ಪಾವ್‌ಲ್ಲೊ ಮಾರ್ಕು ಆಪ್ಲ್ಯಾ ಘರಾಂತ್ ಬಾಯ್ಲೆ ಭುರ್ಗ್ಯಾಂಸವೆಂ ಇಲ್ಲೆ ದೀಸ್ ರಾವ್ಲೊ ಆನಿಂ ದುಸ್ರ್ಯಾ ಹಾಪ್ತ್ಯಾಂತ್ ತೊ ತಿಯೊಚಾ ಘರಾ ಭಾಯ್ರ್ ಸರ್ಲೊ. ಆಯ್ತಾರ್ ಜಾಲ್ಲೆವರ್ವಿಂ ಭುರ್ಗ್ಯಾಂಕೀ ಮೆಳೊನ್ ಯೆವ್ಯಾಂ ಮ್ಹಣೊನ್ ತಾಚಿ ಆಶಾ ಜಾವ್ನಾಸ್‌ಲ್ಲ್ಯಾನ್ ತೊ ಎಕಾ ಆಯ್ತಾರಾ ಆಯ್ಲೊ, ಘರಾಕ್ ಜಾಲ್ಲಿ ಬದ್ಲಾವಣ್ ಪಳೆವ್ನ್ ಸಂತೊಸ್ ಪಾವ್ಲೊ.

ಆದ್ಲೆಪಾವ್ಟಿಂ ಯೆತಾನಾ ತೆಂ ಫಕತ್ತ್ ದೋನ್ ಕುಡಾಚೆಂ ಲ್ಹಾನ್ ಘರ್ ಆಸ್‌ಲ್ಲೆಂ ಆತಾಂ ಸೊಭಿತ್ ದಿಸ್ತಾಲೆಂ. ತೇಂಯ್ ಘರಾಕ್ ವೀಜ್ ಸಕತ್ ಆಯಿಲ್ಲ್ಯಾನ್ ಸಗ್ಳ್ಯಾನ್ ಬಲ್ಬ್ ಆಸ್‌ಲ್ಲೆ. ಭಾಯ್ರ್ ಹೊಲಾಂತ್ ಬೊಸ್‌ಲ್ಲೆಕಡೆಯಿ ಫೆನಾಚೆಂ ವಾರೆಂ ಯೆತಾಲೆಂ. ಇತ್ಲೆವೆಗಿಂ ಘರಾಕ್ ಇತ್ಲಿ ಬದ್ಲಾವಣ್ ಹಾಡಯಿಲ್ಲ್ಯಾ ತಿಯೊಚೆರ್ ತಾಕಾ ಅಭಿಮಾನ್ ಭರ್ಲೊ. ತಿಯೊ ಕಶ್ಟಿ ಆನಿಂ ಮಿನತ್ ಕರ್ಚಾಂತ್ ಪಾಟಿಂ ಉರ್ಚೊ ನ್ಹಂಯ್ ಮ್ಹಳ್ಳೆಂ ಮಾರ್ಕು ಜಾಣಾಸ್‌ಲ್ಲೊ.

ಮಾರ್ಕುನ್ ಎಸ್ತೆಲಾಲಾಗಿಂ ಆನಿಂ ಭುರ್ಗ್ಯಾಂಲಾಗಿಂ ಉಲಯಿತ್ತ್ ತಿಯೊನ್ ದಿಲ್ಲ್ಯೊ ಪೊಟ್ಲ್ಯೊ ಎಸ್ತೆಲಾಕ್ ದಿಲ್ಯೊ. ನವಿಂ ವಸ್ತ್ರಾಂ ಪಳೆಲ್ಲ್ಯಾ ಭುರ್ಗ್ಯಾಂಚಾ ಸಂತೊಸಾಕ್ ಗಡ್ ನಾಂ ಜಾಲಿ. ಎಸ್ತೆಲ್‌ಯಿ ನವೆಂ ಕಾಪಾಡ್ ಪಳೆವ್ನ್ ಸಂತೊಸ್ಲೆಂ. ತಿಯೊಚಾ ಬರ್‍ಯಾ ಭಲಾಯ್ಕೆ ವಿಶ್ಯಾಂತ್ ಮಾರ್ಕುನ್ ಸಾಂಗ್ಲೆಂ. ತಿಯೊನ್ ಬರಯಿಲ್ಲೆಂ ಕಾಗಾದ್ ಎಸ್ತೆಲಾನ್ ವಾಚ್ಲೆಂ ಆನಿಂ ತಾಂತುಂ ಆಸ್‌ಲ್ಲಿ ಡ್ರಾಫ್ಟ್ ಪಳೆವ್ನ್ ಸಂತೊಸ್ ಪಾವ್ಲೆಂ. ವೇಳ್ ದನ್ಪಾರಾಂಚೊ ಜಾವ್ನ್ ಆಯಿಲ್ಲ್ಯಾನ್ ಎಸ್ತೆಲಾನ್ ಮಾರ್ಕುಕ್ ಜೆವ್ಣಾಕ್ ರಾವಯ್ಲೆಂ, ಆನಿಂ ಜೊಯೆಲಾಕ್ ಪೆಂಟೆಕ್ ವಚೊನ್ ಲತೀಫಾಕ್ ಸಾಂಗೊನ್ ಇಲ್ಲಿ ಮಾಸ್ಳಿ ಹಾಡುಂಕ್ ಸಾಂಗೊನ್ ಧಾಡ್ಲೆಂ. ಆನಿಂ ಉಡಾಸಾನ್ ಲತೀಫಾಕ್ ಆಜ್ ಘರಾ ಯೇನಾಕಾ ಮ್ಹಣೊನ್‌ಯಿ ಸಾಂಗೊನ್ ಧಾಡ್ಲೆಂ.

ಜೊಯೆಲ್ ಪೆಂಟೆಕ್ ಗೆಲ್ಲೊಚ್ ಎಸ್ತೆಲ್ ರಾಂದ್ಪಾಂತ್ ಮೆತೆರ್ ಜಾಲೆಂ ಆನಿಂ ಜಿವಿತಾ ಆವಯ್ಕ್ ಕುಮೊಕ್ ಕರುಂಕ್ ಭಿತರ್ ವೆತಾನಾ, ಮಾರ್ಕು ತಿಯೊಚಾ ತೊಟಾಚೆರ್ ಎಕೊಡಿ ನದರ್ ಘಾಲುಂಕ್ ಘರಾ ಭಾಯ್ರ್ ಆಯ್ಲೊ. ಭಾಯ್ರ್ ಯೆವ್ನ್ ಪಳೆತಾನಾ ಕಿತೆಂ ಪಳೆತಾ ತೊ? ಚಡುಣೆಂ ಸಗ್ಳೆಂ ತೋಟ್ ಕರ್ಪೊನ್ ಆಯಿಲ್ಲೆಂ. ತರ್ಕಾರೆಚೊ ಸುಕ್ಯೊ ವಾಲಿ ಮಾತ್ ಆಸ್‌ಲ್ಲ್ಯೊ, ಫುಲಾಂಚಿ ಝಡಾಂ ಕಾಂಯ್ ಮೊರೊಂಕ್ ದೀಸ್ ಮೆಜ್ತಾಲಿಂ. ತಿಯೊಚಾ ಗುಸ್ತ್ಯಾರ್ ಇತ್ಲ್ಯಾ ಆಪುರ್ಭಾಯೆನ್ ಆಸ್‌ಲ್ಲ್ಯಾ ಝಡಾಂಕ್ ದೆಖ್‌ಲ್ಲ್ಯಾ ಮಾರ್‍ಕುಕ್ ಆತಾಂ ಹಾಂಚಿ ಗತ್ ಪಳೆವ್ನ್ ಬಿರ್ಮತ್ ಉದೆಲಿ. ತರೀ ತಾಣೆಂ ಕಿತೆಂಚ್ ದಾಖಯ್ಲೆಂ ನಾ. ಜಾವ್ಯೆತ್ ಘರಾಂತ್ ಎಕ್ಲೆಂಚ್ ಆಸ್ಚಾ ಎಸ್ತೆಲಾಕ್ ಭುರ್ಗ್ಯಾಂಚಿ ಜತನ್ ಕರುಂಕ್ ಚಡ್ ವೇಳ್ ಜಾಯ್ ದೆಖುನ್ ತಾಂಚೊ ಪೋಸ್ ಕರ್ಚಿಂ ಕೋಣೀಂ ನಾಂತ್ ಜಾವ್ಯೆತ್ ಮ್ಹಣೊನ್ ಮಾರ್ಕು ಚಿಂತಿಲಾಗ್ಲೊ.

ಸಗ್ಳೆಂ ತೋಟ್ ಭಂವ್‌ಲ್ಲೊ ಮಾರ್‍ಕು ಘರಾ ಕುಶಿಚಾ ಘರಾ ತೆವ್ಶಿನ್ ಪಳೇವ್ನ್ ರಾವ್ಲೊ.

ಆಪ್ಲ್ಯಾ ಘರಾಶಿಂ ಪಳೆಂವ್ಚಾ ಮಾರ್‍ಕುಕ್ ಪಳೆತೆಚ್ಚ್ ದಾವಿದ್ ಭಾಯ್ರ್ ಆಯ್ಲೊ ಆನಿಂ ಕುವೆಯ್ಟ್ ಥಾವುನ್ ಆಯಿಲ್ಲ್ಯಾ ಮಾರ್‍ಕುಕ್ ಆಪ್ಲ್ಯಾ ಘರಾ ಆಪವ್ನ್ ವೆಲೊ. ಇಲ್ಲ್ಯೊ ಗಜಾಲ್ಯೊ ಕರ್ತೆಚ್ಚ್ ದಾವಿದಾನ್ ಜಾಯ್‌ಗೀ ನಾಕಾಗೀ ಮ್ಹಣೊನ್ ತಾಕಾ ಲತೀಫಾ ವಿಶ್ಯಾಂತ್, ಗಾಂವಾರ್ ಜಾಲ್ಲ್ಯಾ ಖಬ್ರಾಂ ವಿಶ್ಯಾಂತ್ ಸಾಂಗ್ಯಾಂ ಮ್ಹಣೊನ್ ಭೊಂಗ್ಲೆಂ ತರೀ ಏಕ್ ಪಾವ್ಟಿಂ ಪಡ್‌ಲ್ಲ್ಯಾ ಬಾಂಯ್ತ್ ಪರತ್ ಪಡ್ಚೆಂ ಣಾಕಾ ಮ್ಹಣೊನ್ ತಾಣೆಂ ಫಕತ್ತ್ ಏಕ್ ಸವಾಲ್ ಕೆಲೆಂ.

"ಘರಾಂತ್ ತೊ ಮಾಪ್ಳೊ ಚೆಡೊ ಆಯ್ಲಾವೆ?"

ಕಿತೆಂಚ್ ನೆಣಾಸ್‌ಲ್ಲ್ಯಾ ಮಾರ್ಕುಕ್ ಕೊಣಾವಿಶ್ಯಾಂತ್ ತಿಂ ಉಲಯ್ತಾತ್ ಮ್ಹಣೊನ್ ಸಮ್ಜಾಲೆಂ ನಾ.

"ತೊ ಲತೀಫ್, ಸದಾಂ ಹಾಂಗೆರ್ ಯೆತಾ, ರಾವ್ತಾ...ಲೋಕ್ ನಾಕಾ ಜಾಲ್ಲ್ಯೊ ಖಬ್ರೊ ಕರ್ತಾ. ಎಕ್ಸುರಿ ಬಾಯ್ಲ್ ಘರಾಂತ್ ಆಸ್ತಾನಾ ಕೊಣೀಂ ಘರಾಕ್ ಯೆತಾತ್ ತೇಂಯ್ ತರ್ನಾಟೊ ಸರಾಗ್ ಘರಾಕ್ ಯೆತಾ ಮ್ಹಳ್ಳ್ಯಾಚೊ ಖಂಚೊ ಅರ್ಥ್?" ದಾವಿದಾನ್ ಸಂಕ್ಶಿಪ್ತ್ ಥರಾನ್ ಸಗ್ಳೆಂ ಸಾಂಗೊನ್ ಸೊಡ್ಲೆಂ. ಮಾರ್‍ಕುಕ್ ತಾಚಿಂ ಉತ್ರಾಂ ಸಮ್ಜಾಲಿಂ ನಾಂತ್.

ದಾವಿದಾಚಾ ಉತ್ರಾಂನಿ ಏಕ್ ಸಂಗತ್ ಮಾರ್ಕುಕ್ ಸ್ವಶ್ಟ್ ಜಾಲಿ, ಸೆಜಾರಾ ತಾಂಚೆಮಧೆಂ ಬರೆಂ ನಾತ್‌ಲ್ಲೆಂ ಮ್ಹಳ್ಳೆಂ.

ತೊ ಇಲ್ಲ್ಯಾ ವೆಳಾ ಉಪ್ರಾಂತ್ ಥಂಯ್ಚೊ ಉಟೊನ್ ಪಾಟಿಂ ಆಯ್ಲೊ ಆನಿಂ ತವಳ್ ಮಾಸ್ಳಿ ಘೆವುನ್ ಪಾಟಿಂ ಆಯಿಲ್ಲ್ಯಾ ಜೊಯೆಲಾಸವೆಂ ಗಜಾಲಿ ಮಾರ್ತಾಲೊ. ಜೊಯೆಲ್ ಗಲ್ಫಾ ವಿಶ್ಯಾಂತ್ ಎಕೆಕ್ ಸವಾಲ್ ಕರ್ತಾಲೊ. ಗಲ್ಫಾಂತ್ ಹೆಂ ಮೆಳ್ತಾಗೀ? ತೆಂ ಮೆಳ್ತಾಗೀ? ಮ್ಹಣೊನ್. ಆನಿಂ ಮಾರ್ಕು ತಾಕಾ ಜಾಪಿ ದಿತಾಲೊ. ಇಲ್ಲ್ಯಾ ವೆಳಾನ್ ಜಿವಿತಾಯಿ ತಾಂಚೆಸವೆಂ ಮೆಳ್ಳೆಂ. ಎಸ್ತೆಲ್ ಕುಜ್ನಾಂತ್ ಎದೊಳ್‌ಚ್ ಎಕಾ ಕುಂಕ್ಡಾಕ್ ಮಾರ್‍ನ್ ತಾಕಾ ರಾಂದುನ್ ಜಾವ್ನ್ ಆತಾಂ ಮಾಸ್ಳೆಚೆಂ ಆಳೆನ್ ಕಾಡ್ತಾಲೆಂ.

ಅಪ್ರೂಪಾನ್ ಆಯಿಲ್ಲೊ ಮಾತ್ ನ್ಹಂಯ್ ತಿಯೊಕ್ ಗಲ್ಫಾಕ್ ವಚೊಂಕ್ ಮಜತ್ ಕೆಲ್ಲೊ ಮಾರ್‍ಕು ಮ್ಹಣೊನ್ ಎಸ್ತೆಲ್‌ಯಿ ಜಾಣಾಸ್‌ಲ್ಲೆಂ. ಅಶೆಂ ಸಭಾರ್ ವೇಳ್ ಉಲಯ್ತಾನಾ ಭುರ್ಗ್ಯಾಂಚಾ ತೊಂಡಾರ್ ಘಡ್ಯೆ ಘಡ್ಯೆ ಲತೀಫ್ ಮ್ಹಳ್ಳೊ ಸಬ್ಧ್ ಆಯಿಲ್ಲೊ ಮಾರ್‍ಕುಕ್ ಆಸಕ್ತ್ ಹಾಡುಂಕ್ ಲಾಗ್ಲೊ. ಲತೀಫ್ ಮ್ಹಳ್ಯಾರ್ ಕೋಣ್? ಮ್ಹಣೊನ್ ತಾಣೆಂ ಭುರ್ಗ್ಯಾಂಕ್ ವಿಚಾರ್‍ಲೆಂ. ಭುರ್ಗಿಂ ಕಿತೆಂಚ್ ನೆಣಾಸ್ತಾಂ ಸಾಂಗಾಲಾಗ್ಲಿಂ.

"ಲತೀಫ್ ಸದಾಂ ಆಮ್ಗೆರ್ ಯೆತಾ, ಆಮ್ಕಾಂ ಇಸ್ಕೊಲಾ ಥಾವುನ್ ಆಪವ್ನ್ ಹಾಡ್ತಾ...".

"ಪುಣ್ ಆಜ್ ಕಿತ್ಯಾಕ್ ತೊ ಯೇಂವ್ಕ್ ನಾ?" ಮಾರ್ಕುನ್ ಸವಾಲ್ ಕೆಲೆಂ.

"ಮಾಂಯ್ನ್ ತಾಕಾ ಆಜ್ ಯೆಂವ್ಚೆಂ ನಾಕಾ ಮ್ಹಣೊನ್ ಸಾಂಗೊನ್ ಧಾಡ್ಲೆಂ" ಜೊಯೆಲಾನ್ ಆಸಾ ತಶೆಂ ಸಾಂಗ್ಲೆಂ. ಮಾರ್ಕುಕ್ ಕಿತ್ಯಾಕ್ ಮ್ಹಣೊನ್ ವಿಚಾರ್‍ಯಾಂ ಮ್ಹಣೊನ್ ಚಿಂತ್ಲೆಂ ತರೀ ತಾಚಾ ಮತಿಂತ್ ದಾವಿದಾನ್ ಕಾಂಯ್ ಇಲ್ಲೆಂ ಚಿಂತಾಪ್ ಘಾಲ್ಲೆವರ್ವಿಂ ತಾಣೆಂ ತಶೆಂ ವಿಚಾರಿನಾಸ್ತಾಂ ವಗೊಚ್ ರಾವ್ಲೊ.

ಆತಾಂ ಮಾರ್‍ಕುಚಾ ಮತಿಂತ್‌ಯಿ ಎಕಾ ಥರಾಚೊ ದುಭಾವ್ ಮಾರುಂಕ್ ಲಾಗ್ಲೊ. ದಾವಿದಾಚಾ ಉತ್ರಾಂನಿ ಕಾಂಯ್ ತರೀ ಸತ್ ಆಸ್ತೆಲೆಂ ಮ್ಹಣೊನ್ ತಾಣೆಂ ಲೆಕ್ಲೆಂ. ತರೀ ತಾಣೆಂ ಕಿತೆಂಚ್ ದಾಕಯ್ಲೆಂ ನಾ. ಎಸ್ತೆಲಾಕ್‌ಯಿ ರಾಂದ್ಪಾರ್ ಮೆತೆರ್ ಆಸ್‌ಲ್ಲ್ಯಾನ್ ಭಾಯ್ರ್ ಕಿತೆಂ ಘಡ್ತಾ ಮ್ಹಳ್ಳ್ಯಾಚಿ ಖಬಾರ್ ನಾತ್‌ಲ್ಲಿ. ಅಶೆಂ ವೊರಾಂ ದೇಡ್ ಜಾತಾನಾ ಎಸ್ತೆಲಾಚೆಂ ರಾಂದುನ್ ಜಾಲ್ಲೆಂ ಆನಿಂ ತೊ ಕಿತೆಂಚ್ ಕಳ್‌ಲ್ಲೆಪರಿಂ ಕರಿನಾಸ್ತಾನಾ ಯೇವ್ನ್ ಭುರ್ಗ್ಯಾಂ ಸವೆಂ ಜೇವ್ನ್ ಜಾತಚ್ಚ್, ಕುವೆಯ್ಟಾಕ್ ವೆಚಾದಿಂ ಪರತ್ ಯೆತಾಂ ಮ್ಹಣೊನ್ ಸಾಂಗೊನ್ ಗೆಲೊ. ದೋನ್ ಮಹಿನ್ಯಾಚಾ ರಜೆರ್ ಆಯಿಲ್ಲ್ಯಾ ತಾಕಾ ಅಸಲ್ಯಾ ಸಂಗ್ತ್ಯಾಂನಿ ಮೆತೆರ್ ಜಾವ್ನ್ ಆಪ್ಲೆಂ ಸಮಧಾನ್ ವಿಭಾಡುಂಕ್ ನಾಕಾಸ್‌ಲ್ಲೆಂ.

ಅಶೆಚ್ಚ್ ದೀಸ್ ಪಾಶಾರ್ ಜಾಲೆ, ಮಾರ್ಕುನ್ ಗಾಂವಾಕ್ ಯೇವ್ನ್ ಹಾಪ್ತೆ ಉತರ್‌ಲ್ಲೆ. ಮಾರ್‍ಕುನ್ ಘರಾ ಆಯಿಲ್ಲಿ ಖಬಾರ್, ತಾಣೆಂ ದೀವ್ನ್ ಗೆಲ್ಲ್ಯಾ ವಸ್ತುಂಚಿ ಖಬಾರ್, ದಿಲ್ಲ್ಯಾ ಡ್ರಾಫ್ಟ್‌ಚಿ ಖಬಾರ್ ಎದೊಳ್‌ಚ್ಚ್ ಎಸ್ತೆಲಾನ್ ತಿಯೊಕ್ ಬರವ್ನ್ ಧಾಡ್‌ಲ್ಲಿ.

ಮಾರ್‍ಕುಚೆಂ ಘರ್ ಮೂಡ್‌ಬಿದ್ರೆಲಾಗಿಂಚ್ ಆಸ್‌ಲ್ಲ್ಯಾನ್ ತೊ ತವಳ್ ತವಳ್ ಮೂಡ್‌ಬಿದ್ರಿ ಪೆಂಟೆಕ್ ಯೆತಾಲೊ. ಆನಿಂ ತಾಕಾಯ್ ಲೊಕಾಂಚಾ ತೊಂಡಾರ್ ಥಾವ್ನ್ ಲತೀಫಾ ವಿಶಾಯಾಂತ್ಲಿ ಖಬಾರ್ ಏಕ್ ದೋನ್ ಪಾವ್ಟಿಂ ಆಯ್ಕೊಂಕ್ ಮೆಳ್ಳಿ. ತಾಕಾಯ್ ಕೋಣ್ ತೊ ಲತೀಫ್ ಮ್ಹಣೊನ್ ಪಳೆಂವ್ಕ್ ಆತುರಾಯ್ ಭೊಗ್ಲಿ. ಮೆಳೊನ್ ಕರುಂಕ್ ಕಿತೆಂಯ್ ನಾಂ ತರೀ ಮಾರ್‍ಕೆಟಿಂತ್ ತೊ ಆಸ್ಚಿ ಗಜಾಲ್ ಮಾರ್‍ಕುಕ್ ಕಳಿತ್ ಆಸ್‌ಲ್ಲೆಂ. ಏಕ್ ದೀಸ್ ತೊ ಮಾರ್‍ಕೆಟಿಂತ್ ತಾಚೆಯಿತ್ಲ್ಯಾಕ್ ಲತೀಫಾಚಾ ಸೊಧ್ನೆರ್ ಪಡ್ಲೊ ಆನಿಂ ಇಲ್ಲ್ಯಾ ವೆಳಾರ್ ತಾಚಾ ನದ್ರೆಕ್ ಪಡ್ಲೊ. ಲತೀಫಾಕ್ ಮಾರ್ಕು ಮ್ಹಳ್ಯಾರ್ ಕೋಣ್ ಮ್ಹಣೊನ್ ಪಳೆವ್ನ್ ಕಳಿತ್ ನಾತ್‌ಲ್ಲ್ಯಾನ್ ಕಳ್ಳೆಂ ನಾ. ಅಶೆಂ ಆಸ್ತಾಂ ಹ್ಯಾ ಖಬ್ರೆಂತ್ ಕಿತ್ಲೆಂ ಸತ್ ಆಸಾ ಮ್ಹಣೊನ್ ಸಮ್ಜೊಂಕ್ ಆತುರಾಯ್ ಆಯ್ಲಿ ಆನಿಂ ಏಕ್ ದೀಸ್ ತೊ ಕಳಯ್ನಾಸ್ತಾಂಚ್ಚ್ ಎಸ್ತೆಲಾಚಾ ಘರಾಶಿಂ ವಚೊಂಕ್ ಚಿಂತ್ಲೆಂ.

ಗಾಂವ್ಚಿ ರಜಾ ಕಾಬಾರ್ ಜಾವ್ನ್ ಆಯಿಲ್ಲಿಚ್ ಏಕ್ ದಿಸಾ ತೊ ತಿಯೊಚಾ ಘರಾ ವಚೊಂಕ್ ಭಾಯ್ರ್ ಆಯ್ಲೊ. ತಾಚಾದಿಂ ತೊ ಮೂಡ್‌ಬಿದ್ರಿ ಪೆಂಟೆಕ್ ವಚೊನ್ ಟಿಕೆಟ್ ಬುಕ್ ಕರುಂಕ್ ಸಾಂಗೊನ್ ಎಸ್ತೆಲಾಚಾ ಘರಾಕ್ ಪಾವ್ಲೊ. ಘರ್ಚಿಂ ದಾರಾಂ ಬಂದ್ ಆಸ್‌ಲ್ಲ್ಯಾನ್ ಕಾಂಯ್ ಘರಾ ಕೊಣೀಂ ನಾಂತ್‌ಗೀ ಮ್ಹಳ್ಳೊ ದುಭಾವ್ ಜಾಲೊ ಮಾರ್ಕುಕ್. ಪುಣ್ ತಾಕಾ ಸ್ವಾಗತ್ ದೀಂವ್ಕ್ ಪೆಟೆ ತಯಾರ್ ಆಸ್‌ಲ್ಲ್ಯಾನ್ ದಾರ್ ಉಗ್ತೆಂ ಕರುನ್ ಎಸ್ತೆಲ್ ಭಾಯ್ರ್ ಆಯ್ಲೆಂ ಆನಿಂ ತಿಚೆಸವೆ ಲತೀಫ್‌ಯಿ ಭಾಯ್ರ್ ಆಯ್ಲೊ.

ಅವ್ಚಿತ್ ಘರಾ ಆಯಿಲ್ಲ್ಯಾ ಮಾರ್‍ಕುಕ್ ಪಳೆಲ್ಲೆಂ ತೇಂಯ್ ಲತೀಫಾನ್ ಘರಾ ಬಿತರ್ ಆಸ್‌ಲ್ಲೆಂ ಪಳೆಲ್ಲೆಂ ಎಸ್ತೆಲ್ ಏಕ್ ಪಾವ್ಟಿಂ ಶೆರ್ಮೆಲೆಂ. ಪುಣ್ ಕಿತೆಂಚ್ ಕಳಿತ್ ನಾತ್‌ಲ್ಲೆಭಾಶೆನ್ ಮಾರ್‍ಕುನ್ ಆಪ್ಣಾನ್ ಕುವೆಯ್ಟಾಕ್ ವೆಚಿ ತಾರಿಕ್ ಕಳವ್ನ್ ಸಾಂಗ್ಲೆಂ. ತಿಯೊಕ್ ಕಿತೆಂಯ್ ಧಾಡುಂಕ್ ಆಸಾ ತರ್ ತೆಂ ಆಪ್ಣಾಲಾಗಿಂ ದೀವ್ನ್ ಧಾಡ್ಯೆತ್ ಮ್ಹಣೊನ್೦ಯ್ ಸಾಂಗ್ಲೆಂ.

ಮಾರ್ಕುನ್ ಆಯಿಲ್ಲೊ ಉದ್ದೇಶ್ ವೆಗ್ಳೊಚ್ ಆಸ್‌ಲ್ಲೊ ಆನಿಂ ತಾಚಾ ಮತಿಚಾ ದುಭಾವಾಕ್ ಆತಾಂ ಜಾಪಿ ಮೆಳ್‌ಲ್ಲ್ಯೊ ದೆಖುನ್ ತೊ ವಗೊಚ್ ಬೊಸ್ಲೊ ಆನಿಂ ಫಕತ್ತ್ ಕೊಪಿ ಪಿಯೆವ್ನ್ ತೊ ಚಲ್ಲೊ. ತಾಚೊ ದುಭಾವ್ ಸತ್ ಜಾಲ್ಲೊ. ದಾವಿದಾಚಾ ಉತ್ರಾಂಚೆರ್ ತಾಕಾ ಆತಾಂ ಭರ್ವಸೊ ಆಯ್ಲೊ.

ಜಿವಾಂತ್ ಘಟ್‌ಮೂಟ್ ಆಸ್ಚಾ ತಿಯೊಕ್ ಲ್ಹಾನ್‌ಪಣಾ ಥಾವುನ್ ಕಾಮ್ ಕರುನ್ ಸವಯ್ ಆಸೊನ್ ಚಡಾವತ್ ಜಾವ್ನ್ ಪಿಡಾ ಶಿಡಾ ಯೇನಾತ್‌ಲ್ಲಿ. ಆತಾಂ ಗಲ್ಫಾಂತ್ ಜಾಲ್ಯಾರೀ ಕಾಂಯ್ ಇಲ್ಲಿ ಧಗ್ ಯಾ ಹಿಂವ್ ಚಡ್ತಚ್ ಥೊಡೆಪಾವ್ಟಿಂ ನಾಕಾಂತ್ ರಗಾತ್ ದೆಂವ್ತಾಲೆಂ ಸೊಡ್ಲ್ಯಾರ್ ತಿಯೊಕ್ ಹೆರ್ ಕಸಲಿಯ್ ಪಿಡಾ ದೆವಾಚಾ ದಯೆನ್ ನಾತ್‌ಲ್ಲಿ. ಅಛಾನಕ್ ಪಾಟ್ಲ್ಯಾ ಥೊಡ್ಯಾ ದಿಸಾಂ ಥಾವುನ್ ತಾಕಾ ತಕ್ಲಿ ಘುಂವೊಂಕ್ ಸುರು ಜಾತಾಲಿ. ತಶೆಂ ಮ್ಹಣೊನ್ ತೊ ಜಿವಾನ್ ಭರೊನ್ ಆಯಿಲ್ಲೊ ಶಿವಾಯ್ ಭಾಗೊಂಕ್ ನಾತ್‌ಲ್ಲೊ.

ತಶೆಂ ಮ್ಹಣೊನ್ ಕಾಮ್೦ಯಿ ಕಾಂಯ್ ಚಡ್ ನಾತ್‌ಲ್ಲ್ಯಾನ್ ಅಸಲಿ ಅಸ್ಕತ್ಕಾಯ್ ಯೇಂವ್ಕ್ ಕಿತೆಂ ಕಾರಾಣ್ ಮ್ಹಳ್ಳೆಂ ತಾಕಾ ಸಮ್ಜಾಲೆಂ ನಾ. ಗಲ್ಫಾಕ್ ಆಯಿಲ್ಲ್ಯಾಕ್ ಮಣಿ ಕಾಂಯ್ ಅಪ್ರೂಪಾನ್ ಇಲ್ಲೊ ತಕ್ಲಿ ಫಡಾಫಡೆಂತ್ ಆಸ್ತಾಲೊ. ತಾಕಾ ಡಿಪ್ರೆಶ್ಶನಾಚಿ ಪಿಡಾ ಕಾರಾಣ್. ಚಡಾವತ್ ಜಾವ್ನ್ ತಾಣೆಂ ತಾಚಾ ಜಿಣ್‌ಯೆಂತ್ ಘಡೊನ್ ಗೆಲ್ಲ್ಯಾ ಸಂಗ್ತ್ಯಾಂಚೊ ನಿಹಾಳ್ ಕೆಲೊ ತರ್ ಆನಿ ತ್ಯೇ ವರ್‍ವಿಂ ಖಂತ್ ಆನಿಂ ಬೆಜಾರಾಯ್ ಭೊಗೊನ್ ನಿದ್ಲೊ ತರ್ ದುಸ್ರೆ ದೀಸ್ ತಾಕಾ ಕಠೀಣ್ ತಕ್ಲಿ ಫಡಾಫಡ್ ಜಾತಾಲಿ. ತಾಚಿ ತಕ್ಲಿ ಫಡಾಫಡ್ ಇತ್ಲಿ ಕಠೀಣ್ ಜಾತಾಲಿಗೀ ತೊ ತೆದಾಳಾ ಕಿತೆಂಚ್ ಉಲಂವ್ಕ್ ಸಕಾನಾತ್‌ಲ್ಲೊ. ಆನಿಂ ತ್ಯೇ ವೆಳಿಂ ತಾಚೆಂ ಕಾಮ್ ತಿಯೊ ಕರ್ತಾಲೊ.

ಆತಾಂ ಕಾಮಾಂತ್ ಸವಯ್ ಜಾಲ್ಲ್ಯಾ ತಿಯೊಕ್ ಹೆಂ ಕಾಮ್ ಸದಾಂಚೆಂ ಜಾಲ್ಲೆಂ. ಆತಾಂ ಸರಾಗ್ ಅರ್ಭಿ ಭಾಸ್ ಉಲಂವ್ಕ್ ಶಿಕ್‌ಲ್ಲ್ಯಾ ತಾಂಕಾ ಇಬ್ರಾಹಿಮಾಸವೆಂ ಉಲಂವ್ಕ್ ಆವ್ಕಾಸ್ ಮೆಳ್ತಾಲೊ. ಚಡಾವತ್ ಜಾವ್ನ್ ಆಳ್ಶಿ ಜಾಲ್ಲ್ಯಾ ಇಬ್ರಾಹಿಮಾನ್ ದಿಸಾಚಿಂ ಚಡ್ ವೊರಾಂ ಕುಡಾಂತ್ ಟಿವಿ ಪಳೆವ್ನ್ ಆನಿಂ ಘಡಿಯೆ ಘಡಿಯೆ ನಮಾಜೆಕ್ ವಚೊನ್ ವೇಳ್ ಪಾಶಾರ್ ಕರ್ತಾಲೊ. 

ಅಶೆಂ ಅವ್ಚಿತ್ ದೊಳ್ಯಾಂಕ್ ಕಾಳೊಕ್ ಯೇಂವ್ಕ್ ಲಾಗ್ತಾನಾ ತಿಯೊಕ್ ತಾಚೆ ಭಂವಾರಿಂ ಕಾಳೊಕ್ ಜಾಲೊಶೆಂ ಭೊಗ್ತಾಲೆಂ. ಹಾಚೆಂ ಕಾರಾಣ್ ಭೋವ್ಶಾ ರಾತಿಂ ಸಾರ್ಕಿ ನೀದ್ ನಾತ್‌ಲ್ಲಿ ಜಾವ್ಯೆತ್ ಮ್ಹಳ್ಳಿ ಅಂದಜ್ ಕೆಲ್ಲ್ಯಾ ತಿಯೊಕ್ ಹೆರ್ ಕಸಲೊಯ್ ಉಪಾವ್ ನಾತ್‌ಲ್ಲೊ. 

ಏಕ್ ದೀಸ್ ಸಕಾಳಿಂ ತಿಯೊ ನಿದ್‌ಲ್ಲೆಕಡೆಚ್ಚ್ ಆಸ್‌ಲ್ಲೊ. ಉಟೊಂಕ್ ತಾಕಾ ಜಾಲೆಂನಾ. ಮಣಿನ್ ತಿಯೊಕ್ ಉಟಂವ್ಕ್ ಯೆತಾನಾ ಕಳ್ಳೆಂ ತಿಯೊಚಿ ಭಲಾಯ್ಕಿ ಬರಿ ನಾಂ ಮ್ಹಳ್ಳಿ. ಆನಿಂ ತಿಯೊಚೊ ಗಳೊ ಆಪಡ್ನ್ ಪಳೆತಾನಾ ಕಳ್ಳೆಂ ತಿಯೊಚೆಂ ಆಂಗ್ ಸಗ್ಳೆಂ ತಾಪಾನ್ ಭರ್‌ಲ್ಲೆಂ. ವಕ್ತಾಕ್ ವರುಂಕ್ ಲಾಗಿಂಚ್ಚ್ ಕಾಂಯ್ ಆಸ್ಪತ್ರ್ ನಾತ್‌ಲ್ಲಿ ದೆಖುನ್ ಕಿತೆಂ ಕರ್ಚೆಂ ಮ್ಹಳ್ಳೆಂ ಮಣಿಕ್ ಕಳ್ಳೆಂನಾ. ಇಬ್ರಹಿಮಾನ್ ಖಬಾರ್ ಕಳ್ತಚ್ಚ್ ತಾಣೆಂ ಗುದಾಂವಾಕ್ ಆಯಿಲ್ಲ್ಯಾ ಎಕಾ ಗಾಡಿಯೆಚಾ ಡ್ರಾಯ್ವರಾಕ್ ಸಾಂಗೊನ್ ತಾಣೆಂ ಕಶೆಂಯ್ ತಿಯೊಕ್ ಶೆರಾಕ್ ಪಾವಯ್ಲೊ. ಮಣಿ ತಿಯೊಚಾ ಸಾಂಗಾತಾ ಆಸ್‌ಲ್ಲ್ಯಾನ್ ಬರೆಂ ಜಾಲೆಂ. ವಾಟೆರ್ ವೆತಾಸ್ತಾಂ ತ್ಯಾ ಡ್ರಾಯ್ವರಾನ್ ಸಾಂಗ್ಲೆಂ. 

ಮುಂದರ್‍ಸಿಲಾಂ...

Tags:  Vally Quadras,e konkani novel, Konkani, Mangalore, Mangalorean, Mother Tongue

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE