:: ಮಾಯ್ ಭಾಸ್

ಅಶೆಚ್ಚ್ ದೀಸ್ ಹಾಪ್ತೆ ಜಾಲೆ ಆನಿ ಹಾಪ್ತೆ ಮಹಿನೆ ಜಾಲೆ. ಮಯ್ನೆ ಪರತ್ ವರ್ಸಾಂ ಜಾಲಿಂ. ತಿಯೊನ್ ಗಲ್ಫಾಕ್ ಯೇವ್ನ್ ಎದೊಳ್‌ಚ್ ಚಾರ್ ವರ್ಸಾಂ ಜಾಲಿಂ ತರೀ ತಾಕಾ ಪಾಟಿಂ ಗಾಂವಾಕ್ ವೆಚೆಂ ಭಾಗ್ ಎದೊಳ್ ಆಯ್ಲೆಂಚ್ ನಾ. ಏಕ್ ನ್ಹಂಯ್ ತರ್ ಏಕ್ ಗರ್ಜ್ ಉದೆತಾಲಿ ಆನಿ ಹರ್‍ಯೆಕ್ ಪಾವ್ಟಿಂ ತಾಣೆಂ ಚಿಂತ್‌ಲ್ಲೆಂ ಚಿಂತಾಪ್ ಯೆಂವ್ಚಾ ವರ್ಸಾ ಗಾಂವಾಕ್ ಗೆಲ್ಯಾರ್ ಸಯ್ ಮ್ಹಣೊನ್ ಚಿಂತುಂಕ್ ಕರ್ತಾಲೆಂ. ತಿಯೊ ಮಹಿನ್ಯಾ ಮಹಿನ್ಯಾಕ್ ಸರಾಗ್ ಗಾಂವಾಕ್ ಪೊಯ್ಶೆ ಧಾಡ್ತಾಲೊ. ಆನಿಂ ಘರಾಂತ್‌ಯಿ ತಾಂಕಾ ಗರ್ಜೆಚೊ ಸಗ್ಳ್ಯೊ ವಸ್ತು ಜಾಂವ್ಚಾರ್ ಆಸಾತ್ ಮ್ಹಣೊನ್ ಎಸ್ತೆಲಾನ್ ತಿಯೊಕ್ ಬರಯಿಲ್ಲೆಂ.

ಮಣಿ, ಗೋಪಿ ಆನಿ ತಿಯೊ ತವಳ್‌ತವಳ್ ಮೆಳೊನ್ ಇಗರ್ಜೆಲಾಗಿಂ ವೆತಾಲೆ ಯಾ ಗುದಾಂವಾ ಭಾಯ್ರ್‌ಚ್ ಆಸ್ಚಾ ಫೊಲೆರಾ ಪಂದಾ ಬೊಸೊನ್ ದರ್‍ಯಾಂತ್ ಜಿತ್ಲೆ ಪಯ್ಸ್ ದೀಶ್ಟ್ ವೆತಾ ತಿತ್ಲೆ ಪಯ್ಸ್ ದೀಶ್ಟ್ ಘಾಲ್ತಾಲೆ ಆನಿಂ ತಾಂಚಾ ಕುಟ್ಮಾಂ ವಿಶ್ಯಾಂತ್ ಉಲಯ್ತಾಲೆ. ಫೊಲೆರಾಲಾಗಿಂ ಬೊಸ್ತಾನಾ ತಾಂಕಾ ಹಾಂಗಾಚಾ ಮನ್ಶಾಂಚಾ ಜಿಣ್ಯೆಚಿ ಅನ್ಯೇಕ್ ಕೂಸ್ ಪಳೆಂವ್ಕ್ ಮೆಳ್ತಾಲಿ. ತ್ಯಾ ದರ್‍ಯಾದೆಗೆನ್ ಎಕಾ ಲ್ಹಾನ್ ಸುವಾತೆರ್ ಥೊಡಿಂ ಆಪ್ಲ್ಯಾ ಗಾಡಿಯೆಕ್ ಆಡ್ ದವರ್ನ್ ನಾ ನಾ ರಿತಿಂಚಿ ಬಾಸ್ಕಳ್ ಜಿಣಿ ಉಗ್ತ್ಯಾನ್ ದಾಖಯ್ತಾಲಿಂ. ಥೊಡಿಂ ಭುರ್ಗಿಂ ನ್ಹಾತಾಲಿಂ, ಖೆಳ್ತಾಲಿಂ, ಉಡ್ತಾಲಿಂ, ಬೊಬಾಟ್ತಾಲಿಂ, ಹಾಸ್ತಾಲಿಂ. ಥೊಡೆ ತರ್ನಾಟೆ ಲ್ಹಾಲ್ಹಾನ್ ದೊಣಿಂಕ್ ಘೆವ್ನ್ ಉದ್ಕಾಂತ್ ತ್ಯೊ ಚಲಯ್ತಾಲೆ. ಫಕತ್ತ್ ಪೆಟ್ರೊಲ್ ಯಾ ಡಿಸೆಲ್ ಘಾಲ್ಯಾರ್ ಜಾಲೆಂ. ಆನಿ ಹಾಂಗಾ ತೊ ಉದ್ಕಾಚಾಕೀ ಸವಾಯ್ ಆಸ್‌ಲ್ಲ್ಯಾನ್ ಆನಿ ಲ್ಹಾನ್ ಲ್ಹಾನ್ ಬುರ್ಗೆ ಸಯ್ತ್ ತ್ಯೊ ದೊಣಿಂ ಸೊಡುನ್ ಮಜಾ ಮಾರ್ತಾಲೆ.

ಗೋಪಿಚಾ ಜಿಣ್ಯೆಂತ್ ಪರತ್ ಉದೆಲ್ಲೊ ಸಂತೊಸಾನ್ ತಾಚಾ ಜಿಣ್ಯೆಚೊ ಅರ್ಥ್ ಬದ್ಲಾಶೆಂ ಕೆಲ್ಲೊ. ತಾಚಿ ಬಾಯ್ಲ್ ತಾಕಾ ತವಳ್‌ತವಳ್ ಕಾಗ್ದಾಂ ಬರಯ್ತಾಲಿ ಆನಿ ಗಾಂವಾಕ್ ಯೇ ಮ್ಹಣೊನ್ ಬರಯ್ತಾಲಿ. ಗೋಪಿಯಿ ಸಾಂಗ್ತಾಲೊ. "ಜಿಣ್ಯೆಂತ್ ಹಾಂವೆ ಎದೊಳ್ ಕೆಲ್ಲೆಂ ಕಾಂಯ್ ನಾ. ಪೊಯ್ಶೆ ಯೆತಾತ್ ಆನಿ ವೆತಾತ್. ಪುಣ್ ಮೋಗ್, ಬರೆಂ ಜಿವಿತ್ ಕುಟ್ಮಾಸವೆಂ ಖರ್ಚುಂಚೊ ವೇಳ್ ತೊ ಸಗ್ಳೊ ಹಾಂವ್ ವಿಭಾಡುನ್ ಆಸಾಂ. ಎದೊಳ್ ಕಶೆಂಯ್ ಆಪ್ಣಾನ್ ಘೊಳ್‌ಲ್ಲೆಂ ಆಸಾ ಆನಿ ಗಾಂವಾಂತ್ ಕಾಂಯ್ ಇಲ್ಲೊ ವಹಿವಾಟ್ ಸುರು ಕರ್ತಾಂ ಆನಿ ಆಪ್ಲ್ಯಾ ಬಾಯ್ಲ್ ಬುರ್ಗ್ಯಾಂಸವೆಂ ಬರ್‍ಯಾನ್ ದೀಸ್ ಕಾಡ್ತಾಂ" ಮ್ಹಣೊನ್ ಉಚಾರ್ತಾನಾ ಕಿತ್ಯಾಕ್‌ಗೀ ತಿಯೊಚೆಂ ಕಾಳಿಜ್ ಕೊಣೆಂಗೀ ಧರ್ನ್ ಪಿಗ್ಳಾಂವ್ಚೆಂಪರಿಂ ಭೊಗ್ಲೆಂ.

ಮಣಿನ್ ಎದೊಳ್‌ಚ್ಚ್ ಕಾಣ್ಗೆಲ್ಲ್ಯಾ ಜಾಗ್ಯಾಂತ್ ಆತಾಂ ಏಕ್ ನವೆಂ ಘರ್ ಉಭೆ ಜಾಲ್ಲೆಂ ಆನಿ ತ್ಯಾ ಘರಾಂತ್ ವಕೊಲ್ ಕರುಂಕ್ ಮಣಿ೦ಯಿ ಗಾಂವಾಕ್ ರಜೆರ್ ವೆಚೊ ಆಸ್‌ಲ್ಲೊ. ಪುಣ್ ಕುವೆಯ್ಟಾಕ್ ಯೇವ್ನ್ ಇತ್ಲಿಂ ವರ್ಸಾಂ ಉತಾರ್ಲಿಂ ತರೀ ಗಾಂವಾಕ್ ವೆಚೆಂ ಭಾಗ್ ತಿಯೊಕ್ ಲಾಭ್ಲೆಂನಾ.

ಅಶೆಚ್ಚ್ ವೆಳಾಚಿಂ ರೊದಾಂ ಘುಂವ್ತಾಲಿಂ ಆನಿ ದಿಸಾನ್‌ದೀಸ್ ಮ್ಹಳ್ಳೆಪರಿಂ ಹಾಂಗಾಚಾ ಹಾವ್ಯಾಕ್ ತಾಚಾ ತಕ್ಲೆಚೆ ಕೇಸ್ ಝಡೊಂಕ್ ಲಾಗ್ಲೆ ಆನಿ ಕೇಸ್ ಝಡ್ಚೆ ಹಾಂಗಾ ನಂವೆಂ ನ್ಹಂಯ್. ತಿತ್ಲೆಂಚ್ ನ್ಹಂಯ್ ದಿಸಾನ್ದೀಸ್ ಜಿವಾಂತ್ ತೊ ಭರೊನ್ ಆಯಿಲ್ಲೆಪರಿಂಚ್ಚ್ ತಾಚಾ ಕುಡಿಂತ್ ಕಸ್ಲಿಗೀ ಅಸ್ಕತ್ಕಾಯ್ ಆನಿ ತಕ್ಲಿ ಘುಂವಳ್ ಚಡೊನ್ ಆಯಿಲ್ಲೆಪರಿಂಚ್ ಮಣಿಕ್ ತಾಚೆರ್ ಕಿತ್ಯಾಕ್‌ಗೀ ದುಭಾವ್‌ಸೊ ಆಯ್ಲೊ ಆನಿ ತಾಕಾ ತಾಚಿ ತಪಾಸ್ಣಿಂ ಕರುಂಕ್ ಸೂಚಯ್ಲೆಂ.

ಆನಿ ಎದೊಳ್ ಡೊಕ್ಟರಾಕ್ ದಾಖಂವ್ಕ್ ತಾಂಚಾ ಫಿಸಾಕ್ ಭಿಂಯೆಂವ್ಚಾ ತಿಯೊಕ್ ನಿಮಾಣೆಂ ಹೆರ್ ಕಸ್ಲಿಚ್ಚ್ ವಾಟ್ ನಾಸ್ತಾಂ ಮಣಿಸವೆಂ ಡೊಕ್ಟರಾಲಾಗಿಂ ಗೆಲೊ ಆನಿ ಆಪ್ಲ್ಯಾ ಅಸ್ಕತ್ಕಾಯೆಚೊ ಆನಿ ಘಡ್ಯೆನ್ ಘಡಿ ಜಾಂವ್ಚೆಂ ಉದ್ರೇಕ್ಪಣ್ ಆನಿ ಆಂಗ್ ವೋಳ್ ಜಾಂವ್ಚೆ ವಿಶ್ಯಾಂತ್ ಡೊಕ್ಟರಾಕ್ ವಿವರಣ್ ದಿಲೆ. ಡೊಕ್ಟರಾನ್ ತಾಚಾ ಹಾತಾಚೆಂ ಬಡಾಪ್ ಆನಿ ಸಗ್ಳೆಂ ತಪಾಸ್ಲೆಂ. ಆನಿ ತಶೆಂಚ್ ತಪಾಸ್ಣೆ ಖಾತಿರ್ ಇಲ್ಲೆಂ ರಗಾತ್‌ಯಿ ಕಾಡ್ಲೆಂ ಆನಿ ತಾಚೆಂ ಮೂತ್‌ಯಿ ಘೆವ್ನ್ ತಾಚಿ ತಪಾಸ್ಣಿಂ ಜಾವ್ನ್ ತಾಚಾ ರಿಪೋರ್ಟಾ ಖಾತಿರ್ ದೋನ್ ದಿಸಾಂ ಉಪ್ರಾಂತ್ ಆಪಯ್ಲೆಂ.

ದೋನ್ ದಿಸಾಂ ಉಪ್ರಾಂತ್ ಗೆಲ್ಲ್ಯಾ ತಿಯೊಕ್ ಡೊಕ್ಟರಾಚೊ ರಿಪೋರ್ಟ್ ಪಳೆವ್ನ್ ಅಜ್ಯಾಪ್ ಜಾಲೆಂ. ತ್ಯಾ ರಿಪೋರ್ಟಾರ್ ತಾಕಾ ರಗ್ತಾ ವತ್ತಡ್ (ಬ್ಲಡ್‌ಪ್ರೆಶ್ಶರ್) ಆಸಾ ಆನಿ ಗೋಡ್ ಮುತಾಚಿ ಪಿಡಾ ಆಸಾ ಮ್ಹಣೊನ್ ಕಳಯಿಲ್ಲೆಂ. ಎಕಾಚ್ಚ್‌ಫರಾಂ ತಿಯೊಕ್ ಆಘಾತ್ ಜಾಲೊ. ಕಾಂಯ್ ಹೆಂ ಸತ್‌ಗೀ? ಡೊಕ್ಟರಾನ್ ಚುಕೊನ್ ಕಾಂಯ್ ದುಸ್ರ್ಯಾಂಚೊ ರಿಪೋರ್ಟ್ ಮ್ಹಾಕಾ ದಿಲಾಗೀ? ಮ್ಹಳ್ಳೊ ದುಭಾವ್ ಜಾಲೊ. ತ್ಯಾ ಶಿವಾಯ್ ಡೊಕ್ಟರಾನ್ ತಿಯೊಕ್ ತಾಣೆಂ ಖಾಯ್ಜಯ್ ಜಾಲ್ಲ್ಯಾ ಖಾಣಾ ವಿಶ್ಯಾಂತ್‌ಯಿ ಸಾಂಗ್‌ಲ್ಲೆಂ. ತೆಲಾಚೆಂ ಕಿತೆಂಚ್ಚ್ ಸದ್ದ್ಯಾಕ್ ಖಾಯ್ನಾಯೆ, ಖಾಣಾಂತ್ ಮೀಟ್ ಉಣೆಂ ಕರುಂಕ್ ಆನಿ ಶಿತ್ ಬಿಲ್ಕುಲ್ ಖಾಂವ್ಕ್ ನಜೊ ತಾಚಾ ಬದ್ಲಾಕ್ ಗೊಂವಾಚೊ ಭಾಕ್ರ್ಯೊ ಖಾವ್ಯೆತ್ ಮ್ಹಣೊನ್ ಸಾಂಗ್ಲೆಂ. ಮಣಿನ್ ತಾಕಾ ಇಲ್ಲೆಂ ಸಮಧಾನ್ ಕೆಲೆಂ ಆನಿ ತೆ ಪಾಟಿಂ ಆಯ್ಲೆ.

ಪಾಟಿಂ ಆಯಿಲ್ಲ್ಯಾ ತಿಯೊಕ್ ಆತಾಂ ಕಿತೆಂ ಕರ್ಚೆಂ ಮ್ಹಳ್ಳೆಂ ಸಮ್ಜಾಲೆಂ ನಾ. ಎಸ್ತೆಲಾಕ್ ಬರಯ್ಲ್ಯಾರ್ ತಿಂ ಖಂತ್ ಕರ್ನ್ ಬೊಸ್ತೆಲಿಂ. ಬರಯ್ನಾಸ್ತಾಂ ರಾವೊಂಕ್ ಸಾಧ್ಯ್ ನಾ. ಮಣಿನ್ ಆನಿ ಗೋಪಿನ್ ತಾಕಾ ಗಾಂವಾಕ್ ವಚೊಂಕ್ ಸಾಂಗ್ಲೆಂ. ಗಾಂವಾಕ್ ವಚೊಂಕ್ ತಿಯೊಕ್‌ಯಿ ಮನ್ ಆಸ್‌ಲ್ಲೆಂ. ತರೀ ಆಪ್ಣಾನ್ ಎದೊಳ್ ಕೆಲ್ಲೆಂ ಸಗ್ಳೆಂ ಘರಾಕ್ ಘಾಲಾಂ ಆನಿ ಆಪ್ಣಾನ್ ಉರಯಿಲ್ಲೆಂ ಕಾಂಯ್ ನಾ. ಆತಾಂ ಪಯ್ಸ್ ಆಸ್‌ಲ್ಲ್ಯಾನ್ ತಾಕಾ ಕಳಾನಾ. ಪುಣ್ ಗಾಂವಾಕ್ ಪಾಟಿಂ ಗೆಲೊಂ ತರ್ ಪರತ್ ಖರ್ಚ್ ಆಸಾ. ತ್ಯಾ ಶಿವಾಯ್ ಆಪ್ಲ್ಯಾ ಬಾಯ್ಲೆ ಭುರ್ಗ್ಯಾಂಕ್ ಕಾಂಯ್ ಚಡಿತ್ ಇಲ್ಲೆಂ ಭಾಂಗಾರ್ ಕರುಂಕ್‌ಯಿ ತಾಚಾನ್ ಎದೊಳ್ ಜಾಲ್ಲೆಂ ನಾ. ದೆಖುನ್ ಕಸೊಯ್ ಇತ್ಲೊ ತೇಂಪ್ ಆಪುಣ್ ರಾವ್ಲಾಂಸ್ತಾಂ ಆನಿ ಥೊಡೆ ಮಹಿನೆ ಕಾಡ್ಲೆ ತರ್ ಸಗ್ಳೆಂ ಬರೆಂ ಜಾತೆಲೆಂ ಮ್ಹಣೊನ್ ಚಿಂತ್ಲೆಂ.

ಹಿಚ್ಚ್ ಹ್ಯಾ ಗಲ್ಫಾಚಿ ವಿಶೇಷತಾ. ಹಾಂಗಾಸರ್ ಯೆತಾನಾ ಮತಿಂತ್ ಆಶಾ ಘೆವ್ನ್ ಆಯ್ಲ್ಯಾರ್ ತ್ಯಾ ಆಶಾ ಸುಫಳ್ ಜಾತಾತ್ ಮಾತ್ ನ್ಹಂಯ್ ನವ್ಯೊ ನವ್ಯೊ ಆಶಾ ಫುಟೊನ್ ಯೆತಾತ್ ಆನಿ ಅಶೆಂ ಜಿಣ್ಯೆಂತ್ ನವೆ ನವೆ ಶೆವೊಟ್ ಉದೆತಾತ್. ಆನಿ ಜಿಯೆಂವ್ಚಾ ಹರ್‍ಯೆಕಾ ದಿಸಾಂನಿ ಅರ್ಥ್ ಭರ್ತಾತ್. ತಶೆಂಚ್ ತಿಯೊಕ್ ಭೊಗ್ಲೆಂ. ತಶೆಂ ಮ್ಹಣೊನ್ ತೊ ಗಲ್ಫಾಕ್ ಯೆತಾನಾ ತಾಚಾ ಮತಿಂತ್ ಅಮ್ಕ್ಯೊಚ್ಚ್ ಮ್ಹಳ್ಳೊ ಶೆವೊಟ್ ನಾತ್‌ಲ್ಲೊ. ಆಪ್ಲ್ಯಾ ಗಾಂವಾಂತ್ ಕಿತ್ಲಿ ಮಿನತ್ ಕೆಲ್ಯಾರೀ ಕಾಂಯ್ ಉರಂವ್ಕ್ ಜಾಯ್ನಾ ಆನಿ ಕಾಂಯ್ ಉರಯ್ನಾಸ್ತಾಂ ಕಶೆಂ ಆಪ್ಲ್ಯಾ ಭುರ್ಗ್ಯಾಂಕ್ ತಾಂಕಾ ಜಾಯ್ ಜಾಲ್ಲೆಂ ದೀಂವ್ಕ್ ಪಾವ್ತಲೊಂ ಮ್ಹಳ್ಳ್ಯಾ ಎಕಾಚ್ಚ್ ಚಿಂತ್ನಾನ್ ತೊ ಆಯಿಲ್ಲೊ. ಆತಾಂ ತಾಚಿ ಎಕೆಕ್‌ಚ್ಚ್ ಆಶಾ ಜಾರಿ ಜಾತಾಲಿ. ಘರ್ ವಡ್ ಜಾಲೆಂ, ಘರಾ ಕರೆಂಟ್ ಆಯ್ಲೆಂ, ಆನಿ ಎದೊಳ್ ತಾಚಾ ಹಾತಾಂತ್ ನಾತ್‌ಲ್ಲೆ ಪೊಯ್ಶೆ ಆತಾಂ ತಾಚಾ ಹಾತಾಂತ್ ಆಸ್‌ಲ್ಲೆ. ಫುಡೆಂ ಕಾಂಯ್ ಅಛಾನಕ್ ಕಾಂಯ್ ಅನ್ವಾರ್ ಆಯ್ಲೆಂ ತರ್ ತಾಚಿ ಫುಡ್ ಕರುಂಕ್ ತೊ ತಯಾರ್ ಆಸ್‌ಲ್ಲೊ.

ಆತಾಂ ತಿಯೊಚೆಂ ಸಮಧಾನ್ ಇಲ್ಲೆಂ ಇಲ್ಲೆಂ ವಿಭಾಡೊನ್ ಆಯಿಲ್ಲೆಂ. ತಾಚಿ ಪಿಡಾ ಸಯ್ತ್ ತಾಚಾ ಮತಿಂತ್ ಕರ್ಕರ್‍ಯಾಂಚಿ ಜಾಂವ್ಕ್ ಪಾವ್ಲಿ.

ತಿಯೊಚಿ ಪಿಡಾ ದೆಖ್‌ಲ್ಲಿಚ್ ಗೋಪಿ ಭಿಂಯೆಲೊ. ತ್ಯಾ ಶಿವಾಯ್ ಆಪ್ಣಾಕ್ ಬರ್‍ಯಾ ಭಲಾಯ್ಕೆಂತ್‌ಚ್ಚ್ ಪಾಟಿಂ ಶಾಭೀತಾಯೆನ್ ಗಾಂವಾಕ್ ಪಾವಾಜಯ್ ಮ್ಹಣೊನ್ ಚಿಂತುನ್ ಆಸೊನ್ ತಾಣೆಂ ಆತಾಂ ಗಲ್ಫಾಕ್ ಅದೇವ್ಸ್ ಮಾಗೊಂಕ್ ನಿರ್ಧಾರ್ ಕೆಲೊ. ಆನಿ ಆಪ್ಲೊ ನಿರ್ಧಾರ್ ತಾಣೆಂ ಮಣಿಕ್ ಆನಿ ತಿಯೊಕ್ ಕಳಯ್ಲೊ. ಗಾಂವಾಕ್ ಆಯ್ಲ್ಯಾರ್ ಖಂಡಿತ್ ಮೆಳ್ಯಾಂ ಮ್ಹಣೊನ್ ಆಪ್ಲೊ ಗಾಂವ್ಚೊ ಪಾತ್ತೊ ತಾಂಕಾ ದಿಲೊ.

ಗೋಪಿನ್ ಕಾಮ್ ಸೊಡ್ಚಾ ವಿಶ್ಯಾಂತ್ ಶೇಖಾನ್ ಕಿತೆಂಚ್ ಸಾಂಗ್ಲೆಂನಾ. ದೆಖುನ್ ಗೋಪಿನ್ ಆತಾಂ ಗಾಂವ್ಚೆ ವಿಶ್ಯಾಂತ್ ಚಿಂತುಂಕ್ ಧರ್‌ಲ್ಲೆಂ.

ಹಾಂಗಾ ಕೊಣೀಂ ಯೆತಾತ್ ತರ್ ತಿ ತಾಂಚಿ ವಿಂಚವ್ಣ್ ಯಾ ಖುಶಿ ನ್ಹಂಯ್ ಆನಿ ಹಾಂಗಾಚೆ ಕೊಣೀಂ ವೆತಾತ್ ತರೀ ತಿ ತಾಂಚಿ ಖುಶಿ ಯಾ ವಿಂಚವ್ಣ್ ನ್ಹಂಯ್. ಕೊಣಾಕ್ ಕಶೆಂ ಖಂಯ್ ಆನಿ ಕಿತ್ಯಾಕ್ ಧಾಡಿಜಯ್ ಮ್ಹಳ್ಳಿ ಮಾಂಡಾವಳ್ ಎಕಾ ವೆಗ್ಳ್ಯಾಚ್ ಸಂಗ್ತೆಚಿ. ತಾಕಾ ಸಗ್ಳಿಂ 'ವಿಧಿ' ಮ್ಹಣ್ತಾಲಿಂ.

ಅಶೆಂ ಇತ್ಲೊ ತೇಂಪ್ ಜಾವ್ನ್ ಆಯಿಲ್ಲೊಚ್ಚ್ ಆಪ್ಲ್ಯಾ ಗಾಂವಾಕ್ ವೆಚಿ ತಯಾರಾಯೆರ್ ಮೆತೆರ್ ಆಸ್‌ಲ್ಲ್ಯಾ ಗೋಪಿಚಾ ಮತಿಂತ್ ತಾಚಾ ಗಾಂವಾಚಿಂಚ್ ಚಿಂತ್ನಾಂ ಘುಂವ್ತಾಲಿಂ. ತಾಚಾ ಬಾಯ್ಲೆಕ್ ಆನಿ ಭುರ್ಗ್ಯಾಂಕ್ ಎದೊಳ್‌ಚ್ಚ್ ತಾಣೆಂ ಜಾಯೆತ್ತೆಂ ವಸ್ತುರ್ ಘೆತ್‌ಲ್ಲೆಂ. ಆನಿ ಕಶೆಂಯ್ ಪಾಟಿಂ ಯೇಂವ್ಕ್ ನಾ ದೆಖುನ್ ತಾಣೆಂ ಪಯ್ಲೊ ಸಗ್ಳೊ ಸಾಮಾನ್ ಜೊ ಆಮ್ಚಾ ದೇಶಾಂತ್ ಮೆಳಾನಾತ್‌ಲ್ಲೊ ಯಾ ಮೆಳ್ಳ್ಯಾರೀ ಬರೊ ಸಾಮಾನ್ ಮೆಳಾನಾತ್‌ಲ್ಲೊ ಕಾರ್ಗೊ ಕರ್ನ್ ಕಾರ್ಗೊಚೆರ್ ಭರ್ಲೊ ಆನಿ ಅಶೆಂ ಆಂವ್ಸರಾನ್ ಪಾಟಿಂ ಯೆತಾನಾ ರಸ್ತ್ಯಾಮಧೆಂ ಎಕಾ ಗಾಡಿಯೆಕ್ ಆದಾಳ್ನ್ ಪಡ್ಲೊ.

ತ್ಯಾ ವೊತಾಚಾ ಭರಾಂತ್ ರಸ್ತ್ಯಾಂತ್ ಪಡೊನ್ ಆಸ್ಚಾ ತಾಕಾ ಪೊಲಿಸಾಂಚಾ ಮಜತೆನ್ ಆಸ್ಪತ್ರೆಕ್ ವೆಲೊ. ಪುಣ್ ತಕ್ಲೆಚೆರ್ ಕಠೀಣ್ ಮಾರ್ ಬೊಸ್‌ಲ್ಲ್ಯಾ ತಾಚಾ ತಕ್ಲೆಂತ್ಲೆಂ ಸರಾಗ್ ರಗಾತ್ ವಾಳ್‌ಲ್ಲೆಂ ಆನಿ ಹೊ ಪಡ್‌ಲ್ಲೊ ಮಾರ್‌ಯಿ ಇಲ್ಲೊ ವ್ಹಡ್ಲೊ ದೆಖುನ್ ತೊ ಥಂಯ್ಚ್ ಅಖ್ರೇಚೊ ಉಸ್ವಾಸ್ ಸೊಡ್ಲೊ.

ಆಸ್ಪತ್ರೆಂತ್ ಮರಣ್ ಪಾವ್‌ಲ್ಲ್ಯಾ ಗೋಪಿವಿಶ್ಯಾಂತ್ ಖಬಾರ್ ಪಾವ್‌ಲ್ಲ್ಯಾ ಶೇಖಾನ್ ತುರಂತ್ ಬೆಂಗಾಲಿಕ್ ಧಾಡ್ಲೊ ಆನಿ ಬೆಂಗಾಲಿನ್ ಯೇವ್ನ್ ಮಣಿನ್ ಆನಿ ತಿಯೊಕ್ ಖಬಾರ್ ದಿಲಿ. ಖಬಾರ್ ಆಯ್ಕೊನ್ ಏಕ್ ಪಾವ್ಟಿಂ ತಿಯೊಚೆಂ ಕಾಳಿಜ್ ರಾವ್‌ಲ್ಲೆಪರಿಂ ಜಾಲೆಂ.

ಜೆಂ ನಶಿಬಾಂತ್ ಬರವ್ನ್ ಆಸ್ಚೆಂ ಕೊಣಾಯ್ಚಾನೀಂ ಆಡಾಂವ್ಕ್ ಸಾಧ್ಯ್ ನಾ ತಶೆಂಚ್ ಘಡೊಂಕ್ ಆಸ್ಚೆಂ ಘಡೊಂಕ್‌ಚ್ಚ್ ಆಸ್‌ಲ್ಲೆಂ. ಪುಣ್ ಗೋಪಿಚೆಂ ಮರಣ್ ಗೋಪಿಚಾ ಜಿಣ್ಯೆಂತ್ ತಾಣೆಂ ವೆಂಗ್‌ಲ್ಲ್ಯಾ ಸಭಾರ್ ಧ್ಯೇಯಾಂಕ್ ಯಾ ತತ್ವಾಂಕ್ ಸವಾಲ್ ಕರ್ತಾಲಿಂ. ತೊ ಎದೊಳ್ ಪರ್‍ಯಾಂತ್ ಜಿಯೆಲ್ಲೊ ತರೀ ತಾಚೆ ಖಾತಿರ್ ತೊ ಜಿಯೆಲ್ಲೊಚ್ಚ್ ನಾ. ತಾಣೆಂ ಬರೆಂ ಮ್ಹಣೊನ್ ಚಿಂತ್‌ಲ್ಲ್ಯಾ ಸಗ್ಳ್ಯಾಂನಿ ತಾಕಾ ಸೊಡ್‌ಲ್ಲೊ. ಜೀವ್ ದಿಲ್ಲ್ಯಾ ಆವಯ್ನ್ ತಾಕಾ ಜಿವಿತಾಂತ್ ಸೊಡ್‌ಲ್ಲೊ ತರ್ ನವೆಂ ಜಿವಿತ್ ದಿಲ್ಲ್ಯಾ ಬಾಯ್ಲೆನ್ ತಾಕಾ ತರ್ಣಾಟ್‌ಪಣಾರ್ ಸೊಡ್‌ಲ್ಲೊ. ಇತ್ಲ್ಯಾ ಪ್ರಾಯೆರ್ ತಾಣೆಂ ಹಾಂಗಾ ಯೇವ್ನ್ ಘೊಳೊನ್ ಆಪ್ಲ್ಯಾ ಜಿಣ್ಯೆಚೆ ಉರುಲ್ಲೆ ದೀಸ್ ಬರ್‍ಯಾನ್ ಆಪ್ಲ್ಯಾ ಕುಟ್ಮಾಸವೆಂ ಖರ್ಚುಂಕ್ ಚಿಂತಾನಾ ತಾಕಾ ಕಳೊನ್ ಆಯ್ಲೆಂಕೀ ತಾಚಾ ಜಿಣ್ಯೆಂತ್ ಬರೆ ದೀಸ್ ಮ್ಹಳ್ಳೆಚ್ಚ್ ನಾತ್‌ಲ್ಲೆ ಮ್ಹಳ್ಳೆಂ.

ಗೋಪಿಚೆಂ ಮರಣ್ ತಿಯೊಕ್ ಆನಿ ಮಣಿಕ್ ದೊಳೆ ಉಗ್ತೆ ಕರುಂಕ್ ಪಾವ್ಲೆಂ. ಚಾರ್ ದಿಸಾಂಚಾ ಜಿಣ್ಯೆಂತ್ ಬೆಶ್ಟೆಂ ರಾಗ್ ಆನಿ ಮೊಸೊರ್ ಮ್ಹಣೊನ್ ಮಣಿನ್ ಲೆಕ್ಲೆಂ. ತಾಚಾ ಲ್ಹಾನ್ ಭಾವಾಂಕ್ ತಾಣೆಂ ವ್ಹಡ್ ಕೆಲೆಂ, ಶಿಕಾಪ್ ದಿಲೆಂ ತರೀ ತೆ ಬೆಮಾಣ್ ಜಾಲೆ. ದುಡ್ವಾ ಖಾತಿರ್ ಭಾವ್ ಭಯ್ಣಿಂ ಸಯ್ತ್ ಎಕಾಮೆಕಾ ಮಾಸಾಂ ಖಾತಾತ್. ಪುಣ್ ಆಪ್ಣಾನ್ ಕೆಲ್ಲೆಂ ಬರೆಂಪಣ್ ಪಳೆಲ್ಲ್ಯಾ ದೆವಾನ್ ಮ್ಹಾಕಾ ಸಗ್ಳೆಂ ದೊಡ್ಯಾನ್ ಪಾಟಿಂ ದಿಲ್ಲೆಂ ಮ್ಹಣೊನ್ ಮಣಿ ಚಿಂತ್ತಾಲೊ. ತಾಕಾ ಬರೊ ಜಾಗೊ ಮೆಳ್‌ಲ್ಲೊ ಆನಿ ಕಶ್ಟಾನ್ ತರೀ ಥಂಯ್ ಏಕ್ ಘರ್ ಉಭೆಂ ಜಾಲ್ಲೆಂ ಆನಿ ಆತಾಂ ಭಾಡ್ಯಾಕ್ ರಾಂವ್ಚಿ ಗರ್ಜ್ ತಾಚಾ ಬಾಯ್ಲೆಕ್ ಯಾ ಭುರ್ಗ್ಯಾಂಕ್ ನಾತ್‌ಲ್ಲಿ. ತಿತ್ಲೆಂಚ್ ನ್ಹಂಯ್, ಆನಿ ಇಲ್ಲಿಂ ವರ್ಸಾಂ ಮಿನತ್ ಕರ್ನ್ ಕಾಂಯ್ ಇಲ್ಲೆ ಪೊಯ್ಶೆ ಉರಯ್ಲ್ಯಾರ್ ತಾಕಾ ಮುಖ್ಲೆ ದೀಸ್ ಎಕಾ ಮನ್ಶಾಪರಿಂ ಜಿಯೆಂವ್ಕ್ ಕುಮೊಕ್ ಕರ್ತಾಲೆ.

ಕೋಣ್ ಜಾಣಾಂ ಸರ್ವೆಸ್ಪರಾಚಿ ಕಸಲಿ ಮಾಂಡಾವಳ್ ಮ್ಹಳ್ಳಿ? ಮನ್ಶಾನ್ ಚಿಂತ್ಚೆಂ ಏಕ್ ತರ್ ದೆವಾನ್ ಚಿಂತ್ಚೆ ಅನ್ಯೇಕ್ ಆನಿ ಘಡ್ಚೆಂ ಬೊಲ್ತೆಂಚ್.

ದಿಸಾನ್‌ದೀಸ್ ತಿಯೊಕ್ ವಕ್ತಾಂ ಆನಿ ಖಾಣಾ ಪಾಟ್ಲ್ಯಾನ್ ಚಡ್ ಧ್ಯಾನ್ ದೀಂವ್ಕ್ ಪಡ್ತಾಲೆಂ. ಎದೊಳ್ ಪರ್‍ಯಾಂತ್ ತಸಲೆ ಸಮಸ್ಸೆ ನಾತ್‌ಲ್ಲ್ಯಾ ತಿಯೊಕ್ ಪಯ್ಲೆ ಪಾವ್ಟಿಂ ಜಿಣ್ಯೆಂತ್ ಭಲಾಯ್ಕೆಚಾ ಗರ್ಜೆವಿಶ್ಯಾಂತ್ ಫಿಕಿರ್ ಉಬ್ಜಾಲಿ. ಕಾಂಯ್ ಆಪುಣ್ ಬರ್‍ಯಾ ಭಲಾಯ್ಕೆಂತ್ ಆಸ್ತಾನಾ ಜೊಡ್‌ಲ್ಲೆಂ ಆಯ್ಲೆಂ. ಕಾಂಯ್ ಆಪ್ಣಾಚಿ ಭಲಾಯ್ಕಿ ಭಿಗ್ಡಾಲಿ ತರ್ ಉಪ್ರಾಂತ್ ಆಪ್ಣಾಕ್ ಕಾಮ್ ಕರುಂಕ್ ಖಂಡಿತೀ ಅಸಾಧ್ಯ್. ಆನಿ ತವಾಳ್ ಆಪ್ಣಾಚಿ ಚಾಕ್ರಿ ಕರ್ಚಿಂ ಕೊಣೀಂ ಆಸ್ಚಿನಾಂತ್ ಮ್ಹಳ್ಳಿ ಖಂತ್ ತಿಯೊಚಾ ಮತಿಂತ್ ಆಯ್ಲಿ.

ಗೋಪಿಚಾ ಮರ್ಣಾಕ್ ಪಾಟಿಂ ಗಾಂವಾಕ್ ಧಾಡುಂಕ್ ಕೊಣೀಂ ನಾತ್‌ಲ್ಲಿಂ. ಮೋರ್ನ್ ಧಾಡುಂಕ್ ಜಾಲ್ಯಾರೀ ಚಡುನೆಂ ಸಯ್ಶಿಂ ಯಾ ಸಾತ್ಶಿಂ ದಿನಾರ್ ಖರ್ಚ್ ಆಸ್‌ಲ್ಲೊ. ಆನಿ ಫುಕಟ್ಯಾಕ್ ತಿತ್ಲೊ ಖರ್ಚ್ ಕರುಂಕ್ ಶೆಖ್ ತಯಾರ್ ನಾತ್‌ಲ್ಲೊ. ತ್ಯಾ ಭಾಯ್ರ್ ಗೋಪಿಚೆಂ ಮರಣ್ ತಾಣೆ ರಜಾ ಘೆತ್‌ಲ್ಲ್ಯಾ ದಿಸಾ ಜಾಲ್ಲೆಂ ದೆಖುನ್ ಶೇಖಾಕ್‌ಯ್ ಹಾತ್ ಉದಾರೆ ಕರುಂಕ್ ಸಾಧ್ಯ್ ಜಾಲೆಂ. ಅಖ್ರೇಕ್ ಕೇರಳ ಕಮ್ಯೂನಿಟಿಚಾ ಮನ್ಶಾಂನಿ ಮೆಳೊನ್ ತಾಚಿ ಕೂಡ್ ಗಾಂವಾಕ್ ಧಾಡುನ್ ದಿಲಿ.

ಗೋಪಿಚಾ ಕುಡಾಂತ್ ಆಸ್ಚಾ ಪೆಟೆಂತ್ ಜಮೊ ಆಸ್‌ಲ್ಲೆ ಪೊಯ್ಶೆ ಸಭಾರ್ ದಿನಾರ್ ಆಸ್‌ಲ್ಲೆ ಆನಿ ತ್ಯಾ ಪೊಯ್ಶ್ಯಾಂಕ್‌ಯಿ ಮಣಿನ್ ಆನಿ ತಿಯೊನ್ ತಾಚಾ ಬಾಯ್ಲೆಕ್ ಧಾಡ್ಲೆ. ಕಿತೆಂ ಚಿಂತ್‌ಲ್ಲೆಂ ಆನಿ ಕಿತೆಂ ಘಡ್ಲೆಂ ಮ್ಹಳ್ಳೆಂ ತಾಂಕಾ ಸುಸ್ತಾಲೆಂ ನಾ. ತಾಚಾ ಬಾಯ್ಲ್ ಭುರ್ಗ್ಯಾಂಕ್ ಗೋಪಿಚಾ ಮರ್ಣಾಚಿ ಖಬರ್ ಮೆಳ್ತಚ್ಚ್ ಕಸಲೊ ವಿಳಾಪ್ ಕರ್ತಿತ್ ಮ್ಹಳ್ಳೆಂ ಮಣಿಚಾ ಯಾ ತಿಯೊಚಾ ಚಿಂತ್ಪಾ ಭಾಯ್ಲೆಂ ಜಾಲ್ಲೆಂ. ಆತಾಂ ತಾಂಚಾ ಕುಟ್ಮಾಚೊ ಖಾಂಬೊ ಪರ್ತಾಲ್ಲೊ ಆನಿ ಎದೊಳ್ ಪರ್‍ಯಾಂತ್ ತಾಚಾ ಬಾಯ್ಲೆನ್ ಕೆಲ್ಲ್ಯಾ ಗುನ್ಯಾಂವಾಂಕ್ ಆತಾಂ ಕೊಣಾಲಾಗ್ಲೆಂ ಪ್ರಾಚಿತ್ ವಿಚಾರ್‍ಚೆಂ ಮ್ಹಳ್ಳೆಂ ಸಮ್ಜಾಲೆಂನಾ.

ಅಶೆಚ್ಚ್ ದೀಸ್ ಪಾಶಾರ್ ಜಾಲೆ. ಮಣಿಕ್ ಆನಿ ತಿಯೊಕ್ ಆಪ್ಣಾಚೆಚ್ ಕೋಣ್‌ಗೀ ಸರ್ಲೆ ಮ್ಹಳ್ಳೆಂ ಚಿಂತಾಪ್ ಯೆತಾಲೆಂ. ತಾಕಾ ಕಾರಾಣ್೦ಯಿ ಆಸಾ. ಎದೊಳ್ ಪರ್‍ಯಾಂತ್ ಎಕಾಮೆಕಾ ತಾಂಚೆ ಸುಃಖ್ ದೂಃಖ್ ವಾಂಟುನ್ ಘೆಂವ್ಚಾ ತಾಂಕಾ ಎಕಾಮೆಕಾಚಾ ಕಶ್ಟಾಂಕ್ ಆಧಾರ್ ದೀಂವ್ಕ್ ಜಾತಾಲೆಂ. ಗೋಪಿಚ್ ಸರೊನ್ ಎದೊಳ್‌ಚ್ಚ್ ಚಡುಣೆಂ ಏಕ್ ಮಹಿನೊ ಉತ್ರಾಲ್ಲೊ. ಮಣಿ ಸಯ್ತ್ ಗಾಂವಾಕ್ ವೆಚಿ ತಯಾರಾಯ್ ಕರುನ್ ಆಸ್‌ಲ್ಲೊ. ಗೋಪಿನ್ ಜಿಣ್ಯೆಂತ್ ತಾಣೆಂ ಕಸ್ಲೆಚ್ಚ್ ಘುಟ್ ದವರ್ಲೆನಾಂತ್. ಕೊಣಾಯ್ಕೀ ಪೆಲೊ ಮ್ಹಣೊನ್ ತಾಣೆಂ ಚಿಂತ್‌ಲ್ಲೆಂಚ್ಚ್ ನಾ. ಜ್ಯೆ ಕಿತೆಂ ತಾಚಾ ಜಿಣ್ಯೆಂತ್ ಘಡ್ಲಾಂ ತೆಂ ಉಗ್ತ್ಯಾನ್ ಘಡ್ಲಾಂ. ತಾಂತುಂ ತಾಣೆಂ ಕಸ್ಲೊಚ್ಚ್ ಪರ್ಧೊ ಘಾಲ್ಲೊನಾ. ವಾಯ್ಟ್‌ಗೀ ಬರ್‍ಯಾಗೀ ಇಸ್ಟಾಚಾ ಸಳಾವಳೆಂತ್ ತಾಣೆಂ ವೇಶ್ಯಲಾಗಿಂ ಗೆಲ್ಲೊ ಆನಿ ತ್ಯಾ ವೇಶ್ಯಾಕ್ ಆಪ್ಲಿ ಜಿಣ್ಯೆ ಸಾಂಗಾತಿಣ್ ಕರ್ಚೆಂ ಧಯ್ರ್ ಆನಿ ಮನ್ ಕಿತ್ಲ್ಯಾಂಕ್ ಆಸಾ? ಗೋಪಿಚಾ ತತ್ವಾಂ ಪ್ರಕಾರ್ ಆಪ್ಣಾ ತಸಲೆ ಭಾಗೆವಂತ್ ಮನಿಸ್ ಆಸೊನ್೦ಚ್ಚ್ ನಂಯ್ಗೀ ತಸಲಿಂ ವೇಶ್ಯಾಂಚೆ ಜಾಗೆ ಬರ್‍ಯಾನ್ ಚಲ್ತಾತ್? ಪುಣ್ ತಾಚಾ ತತ್ವಾಂಕ್ ಸಮ್ಜೊನ್ ಘೆಂವ್ಕ್ ತಾಚಿ ಬಾಯ್ಲ್ ಸಕ್‌ಲ್ಲಿ ತರ್? ಹಾಕಾ ತಾಂಚಾ ಚಿಂತ್ಪಾ ಮಧ್ಲೊ ಅಂತರ್ ಕಾರಾಣ್ ಜಾವ್ಯೆತ್.

ಆತಾಂ ಮರಣ್ ಪಾವ್‌ಲ್ಲ್ಯಾ ಗೋಪಿಚಾ ಖಾಸ್ಗಿ ಜಿಣ್ಯೆಕ್ ತಿಳುಂಕ್ ತಿಯೊಕ್ ಜಾಂವ್ ಮಣಿಕ್ ಜಾಂವ್ ನಾಕಾಸ್‌ಲ್ಲೆಂ. ತರೀ ತಾಂಚಾ ಮತಿಂತ್ ಹಿಂ ಚಿಂತ್ನಾಂ ಭರೊನ್ ಯೆತಾಲಿಂ. ಕೊಣೀಂ ತಾಚಾ ಜಾಗ್ಯಾರ್ ಆಸ್ತಿಂ ತರ್ ಕಿತೆಂ ಕರ್ತಿಂ? ಘಾತ್ ಕರುನ್ ಗೆಲ್ಲ್ಯಾ ಬಾಯ್ಲೆಕ್ ಪಾಟಿಂ ಘೆತಿಂನಾಂತ್. ಜಿವಿತಾಂತ್ ವಾಟ್ ಚುಕ್‌ಲ್ಲ್ಯಾಕ್ ಪಾಟಿಂ ಹಾಡ್‌ಲ್ಲ್ಯಾಚೆಂಚ್ಚ್ ಜಿವಿತ್ ಸಂಪಂವ್ಕ್ ಮುಖಾರ್ ಸರ್‌ಲ್ಲ್ಯಾ ಮನ್ಶಾಂಕ್ ಜಿಯೆಂವ್ಕ್ ಕಸಲೊಚ್ಚ್ ಅಧಿಕಾರ್ ನಾ. ತ್ಯಾ ಶಿವಾಯ್ ಗೋಪಿನ್ ತಾಚಿ ಬಾಯ್ಲ್ ಪಾಟಿಂ ಆಯಿಲ್ಲಿಚ್ ತ್ಯಾ ಮರಾಟ್ಯಾಚೆರ್ ಕಿತೆಂಚ್ ಫಾರಿಕ್ಪಣಾಚೆಂ ಚಿಂತಾಪ್ ಉಲಯಿಲ್ಲೆಂ ಆಯ್ಕೊಂವ್ಕ್ ನಾತ್‌ಲ್ಲೆಂ. ತ್ಯಾ ಮರಾಟ್ಯಾನ್ ತಾಚೆಂ ಜಿವಿತ್ ಮಾತ್ರ್ ನ್ಹಂಯ್, ತಾಚಾ ಬಾಯ್ಲೆ ಭುರ್ಗ್ಯಾಂಚೊಯಿ ಗೋಳ್ ಕೆಲ್ಲೊ. ಪುಣ್ ಗೋಪಿಕ್ ತಾಂತುಂ ಕಿತೆಂಚ್ ಚುರ್ಚುರೆ ನಾತ್‌ಲ್ಲೆ. ಹರಾಮಿ ಪೊಯ್ಶೆ ಹರಾಮಿ ವಾಟೆರ್‌ಚ್ಚ್ ಸಂಪ್ತೆಲೆ ಮ್ಹಣೊನ್ ತಾಣೆಂ ಚಿಂತ್‌ಲ್ಲೆಂ ಜಾವ್ಯೆತ್.

ತಿಯೊಕ್ ಆತಾಂ ತಾಣೆಂ ಖಾಂವ್ಚಾ ಹರ್‍ಯೆಕಾ ಖಾಣಾಚೆರ್ ಧ್ಯಾನ್ ದೀಂವ್ಕ್ ಪಡ್ಲೆಂ. ತೆಂ ತಿತ್ಲೆಂ ಸುಲಭ್ ನ್ಹಂಯ್ ಮ್ಹಳ್ಳೆಂ ತಿಯೊ ಎದೊಳ್‌ಚ್ ಸಮ್ಜಾಲ್ಲೊ. ಮಣಿ ತಿಯೊಕ್ ಬರೆಂ ಕರ್ನ್ ಸಾಂಭಾಳ್ತಾಲೊ. ಮೀಟ್ ಖಾಂವ್ಕ್ ನಾ, ತೆಲಾಚೆಂ ಖಾಂವ್ಕ್ ನಾ, ಶಿತ್ ಖಾಂವ್ಕ್ ನಾತ್‌ಲ್ಲೆಂ. ತ್ಯಾ ಭಾಯ್ರ್ ತಿಯೊಕ್ ಚಡುಣೆಂ ಪಾಟ್ಲ್ಯಾ ಸ ಸಾತ್ ಮಹಿನ್ಯಾ ಥಾವುನ್ ವಕ್ತಾಂ ಚಾಲು ಆಸ್‌ಲ್ಲಿಂ ತರೀ ಎದೊಳೀ ತಾಣೆಂ ಮಣಿಚಾ ಉತ್ರಾಂಕ್ ಖಾಲ್ತಿಮಾನ್ ಘಾಲುಂಕ್ ನಾತ್‌ಲ್ಲೊ. ಗಾಂವಾಕ್ ವಚೊನ್ ಯೇ, ತುಜಿ ಪಿಡಾ ಅಪಾಪಿಂಚ್ ರಾವ್ತಾ ಮ್ಹಣೊನ್ ಜಾಹಿತ್ತೆಪಾವ್ಟಿಂ ತಿಯೊಕ್ ಸಮ್ಜಾಂವ್ಕ್ ಪ್ರೇತನ್ ಕೆಲ್ಲೆಂ ತರೀ ತಿಯೊ ಕಿತ್ಯಾಕ್‌ಗೀ ಪಾಟಿಂ ಘಾಲ್ತಾಲೊ. ಎದೊಳ್ ತಾಣೆಂ ದೊನ್ಶಾಂ ವಯ್ರ್ ದಿನಾರ್ ಜಮೊ ಕೆಲ್ಲೆ. ಗಾಂವಾಕ್ ವೆಚೆಂ ತರ್ ಖಂಡಿತ್ ಜಾಂವ್ನ್ ಇಲ್ಲೆಂ ಭಾಂಗಾರ್ ವರಿಜಯ್ ಆನಿ ಪೊಯ್ಶೆಯ್ ವರಿಜಯ್ ಮ್ಹಳ್ಳ್ಯಾ ಎಕಾಚ್ಚ್ ಹಟಾನ್ ತಿಯೊ ಗಾಂವಾಕ್ ಗೆಲ್ಲೊನಾ. ಹೆ ಪೊಯ್ಶೆ ತಾಣೆಂ ಉರಯಿಲ್ಲಿ ಗಜಾಲ್ ತಾಣೆಂ ಎಸ್ತೆಲಾಕ್ ಕಳಯಿಲ್ಲೆಂ ನಾ. ಥಂಯ್ ಎಸ್ತೆಲ್ ಮಹಿನ್ಯಾ ಮಹಿನ್ಯಾಕ್ ಗಾಂವಾಕ್ ಧಾಡ್ಚಾ ತಿಯೊಚಾ ಪೊಯ್ಶ್ಯಾಂತ್ ಗರ್ಜೆಚೆ ಕಾಡ್ನ್ ಉರುಲ್ಲೆ ವರ್ನ್ ಅಲಂಗಾರ್ ಬೆಂಕಾಂತ್ ಜಮೊ ಕರ್ತಾಲೆಂ.

ಏಕ್ ದೋನ್ ಪಾವ್ಟಿಂ ಮೂಡ್‌ಬಿದ್ರಿ ಬೆಂಕಾಚೊ ಮೆನೆಜರ್ ಯೇವ್ನ್ ಎಸ್ತೆಲಾಕ್ ತಿಯೊಕ್ ಏಕ್ ಕಾಗಾದ್ ಬರಂವ್ಕ್ ಸಾಂಗೊನ್ ಪೊಯ್ಶೆ ಧಾಡಿಶೆಂ ಕರುಂಕ್ ಸಾಂಗ್‌ಲ್ಲ್ಯಾನ್ ಎಸ್ತೆಲಾನ್ ಏಕ್ ಪಾವ್ಟಿಂ ತಿಯೊನ್ ಧಾಡ್‌ಲ್ಲೆ ಚಾರ್ ಹಜಾರ್ ಬೆಂಕಾಕ್ ಜಮೊ ಕೆಲ್ಲೆ ಆನಿ ಫಟ್ಕಿರಿ ಕಾಣಿಂ ಸಾಂಗೊನ್ ಮೆನೆಜರಾಕ್ ವಗೊ ರಾವಯಿಲ್ಲೊ.

ಪಯ್ಲೆಂ ತಿಯೊನ್ ಎಕ್‌ಚ್ಚ್ ಪಾವ್ಟಿಂ ತೀಸ್ ಹಜಾರ್ ಫಾರಿಕ್ ಕೆಲ್ಲೆವರ್‍ವಿಂ ಮೆನೆಜರಾಕ್ ಪೊಯ್ಶೆ ಆಜ್ ನ್ಹಂಯ್ ತರ್ ಫ಼ಾಲ್ಯಾಂ ಖಂಡಿತ್ ಮೆಳ್ತಾತ್ ಮ್ಹಳ್ಳೆಂ ಕಳಿತ್ ಆಸ್‌ಲ್ಲೆಂ.

ಮಣಿಕ್ ಇತ್ಲೊ ತೇಂಪ್ ಜಾಲ್ಯಾರೀ ಗಾಂವಾಕ್ ವಚೊಂಕ್ ಆಯ್ಕನಾತ್‌ಲ್ಲ್ಯಾ ತಿಯೊಚಾ ಜಿಣ್ಯೆಂತ್ ಕಿತೆಂಗೀ ತೊ ಲಿಪಯ್ತಾ ಮ್ಹಣೊನ್ ತವಳ್‌ತವಳ್ ಭೊಗ್ತಾಲೆಂ. ತರೀ ತಾಂಚೆ ಮಧೆಂ ಕೊಣೀಂ ಘುಟ್ ಕರಿನಾತ್‌ಲ್ಲೆವರ್ವಿಂ ತೊ ವಗೊಚ್ಚ್ ಉರ್ಲೊ. ತರೀ ತಿಯೊಚಾ ಭಲಾಯ್ಕೆಚಿ ಫಿಕಿರ್ ತಿಯೊಚಾಕೀ ಚಡ್ ಜಾವ್ನ್ ಮಣಿಕ್ ಆಸ್‌ಲ್ಲಿ. ಕಿತ್ಯಾಕ್ ಮ್ಹಳ್ಯಾರ್ ತವಳ್ ತವಳ್ ಮಣಿಚಾ ತಕ್ಲಿ ಫಡಾಫಡೆವರ್ವಿಂ ತಾಕಾ ಕಾಮಾಕ್ ವಚೊಂಕ್ ಸಾಧ್ಯ್ ನಾತ್ಲ್ಯಾರ್ ತಿಯೊ ತಾಚೆಂ ಕಾಮ್ ಕರ್ತಾಲೊ. ತಿಯೊನ್ ಕೆದಿಂಕ್‌ಚ್ಚ್ ಕಾಮಾಕ್ ಭಿಂಯೆಲ್ಲೆಂ ನಾ ಆನಿ ಹೊ ತಾಚೊ ಗೂಣ್ ಮಣಿಕ್ ತಿಯೊಚೆರ್ ಬರೊ ಅಭಿಪ್ರಾಯ್ ಅಸೊಂಕ್ ಕಾರಾಣ್ ಜಾತಾಲೆಂ.

ಅಶೆಂ ಮಣಿಚಾ ಸದಾಂಚಾ ಚತ್ರಾಯೆನ್ ಆನಿ ವತ್ತಾಯೆನ್ ಆನಿ ತಿಯೊನ್ ಘೆಂವ್ಚಾ ಪೊತಾವರ್ವಿಂ ಆನಿ ವಕ್ತಾಂ ವರ್ವಿಂ ಜಾಯ್ಜಯ್, ತಾಚಿ ತಕ್ಲಿ ಘುಂವ್ಚಿ ಇಲ್ಲಿ ರಾವ್‌ಲ್ಲಿ. ತರೀ ತಾಕಾ ಪರತ್ ಏಕ್ ಪಾವ್ಟಿಂ ವಚೊನ್ ಡೊಕ್ಟರಾಕ್ ಭೆಟೊನ್ ತಪಾಸ್ಣಿಂ ಕರುಂಕ್ ಪಡ್ಲೆಂ. ಆನಿ ಹ್ಯೇ ಪಾವ್ಟಿಂ ತಿಯೊ ಎಕ್ಲೊಚ್ಚ್ ಗೆಲೊ. ಡೊಕ್ತರಾನ್ ತಾಚಿ ತಪಾಸ್ಣಿ ಕೆಲಿ. ತಾಚಾ ಬ್ಲಡ್ ಪ್ರೆಶ್ಶರ್ ಉಣೆಂ ಜಾಲ್ಲಿ ಗಜಾಲ್ ಕಳಯ್ಲಿ. ತರೀ ತಾಣೆ ಪೋಸ್ ಮುಖಾರ್ಸುಂಕ್ ಸಾಂಗ್ಲೆಂ. ಆತಾಂ ತಿಯೊಚಿ ಖಂತ್ ಚಡ್ಲಿಚ್ಚ್. ಕಿತ್ತುನ್ ಪರ್‍ಯಾಂತ್ ಹಿಂ ವಕ್ತಾಂ ಘೆಂವ್ಚಿಂ? ತರ್ ಹ್ಯಾ ಗಲ್ಫಾಕ್ ಯೇವ್ನ್ ಆಪ್ಣಾನ್ ಕಾಂಯ್ ಇಲ್ಲೆಂ ಜೊಡ್ಲೆಂ ತರ್ ಇಲ್ಲೆಂ ಹೊಗ್ಡಾಯ್ಲೆಂ ಸಯ್ತ್ ಮ್ಹಣೊನ್ ತಾಕಾ ಆತಾಂ ಕಳ್ಳೆಂ. ಗಲ್ಫಾಂತ್ ಹಾಂಗಾ ಪರ್ದೇಶಿ ಜಾವ್ನ್ ಆಪ್ಲ್ಯಾ ಕುಟ್ಮಾ ಥಾವುನ್ ಪಯ್ಸ್ ಆಸೊನ್ ಎಕ್ಸುರ್ಪಣ್ ಭೊಗೊನ್ ಪಿಡಾ ಶಿಡಾ ಭೊಗೊನ್‌ಯಿ ತಾಕಾ ಚಿಂತುಂಕ್ ಹೆರ್ ಉಪಾಯ್ ನಾತ್‌ಲ್ಲೊ. ಗಾಂವಾಕ್ ಆಪ್ಲ್ಯಾ ಭಲಾಯ್ಕೆ ವಿಶ್ಯಾಂತ್ ಬರಯ್ಲ್ಯಾರ್ ಗಾಂವಾಂತ್ ತಿಂ ಭಿಂಯೆಂವ್ಕ್ ಆಸಾತ್, ಭುರ್ಗ್ಯಾಂಕ್ ಅಸಲಿ ಖಬಾರ್ ದಿಲ್ಯಾರ್ ತಾಂಚಾ ಶಿಕ್ಪಾಕ್ ಕಾಂಯ್ ತ್ರಾಸ್ ಜಾಂವ್ಕ್ ಆಸಾತ್ ಮ್ಹಳ್ಳಿಂ ಚಿಂತ್ನಾಂ ತಿಯೊಚಾ ಮತಿಂತ್ ಆಯ್ಲಿಂ. ಜಾಂವ್ಚೆಂ ಸಗ್ಳೆಂ ಬರ್‍ಯಾಕ್‌ಚ್ಚ್ ದೆಖುನ್ ದೆವಾನ್ ನಿರ್‍ಮಿಲ್ಲೆಪರಿಂ ಜಾತೆಲೆಂ ಮ್ಹಣೊನ್ ತಿಯೊನ್ ಲಾಂಬ್ ಸುಸ್ಕಾರ್ ಸೊಡ್ಲೊ.

ಫುಡ್ಲ್ಯಾ ಥೊಡ್ಯಾಚ್ ದಿಸಾಂನಿ ಮಣಿ ಆಪ್ಲೆಂ ನವೆಂ ಘರಾಚೆಂ ವಕೊಲ್ ಮ್ಹಳ್ಳ್ಯಾ ಸಂತೊಸಾನ್ ಜಾಹಿತ್ತ್ಯೊ ವಸ್ತು ಘೆವ್ನ್ ದೇಡ್ ಮಹಿನ್ಯಾಚಾ ರಜೆರ್ ತೊ ಗಾಂವಾಕ್ ಭಾಯ್ರ್ ಸರ್ಲೊ. ಗಾಂವಾಕ್ ವೆತಾನಾ ತಿಯೊಕ್ ಸಭಾರ್ ಚತ್ರಾಯ್ ದಿಲಿ. ವಕ್ತಾಂ ವೆಳಾರ್ ಘೆಂವ್ಕ್ ಸಾಂಗ್ಲೆಂ. ಜೆವ್ಣಾಚೆರ್ ಇಲ್ಲಿ ನದರ್ ದವ್ರುಂಕ್ ಸಾಂಗ್ಲೆಂ ಆನಿ ಬರ್‍ಯಾ ಥರಾನ್ ವಚೊನ್ ಯೇಂವ್ಕ್ ತಿಯೊನ್ ಮಣಿಕ್ ಅದೇವ್ಸ್ ಮಾಗ್ಲೊ ಆನಿ ಮಣಿ ಗಾಂವಾಕ್ ಪಾವ್ಲೊ.

ಗಾಂವಾಂತ್ ತಾಣೆಂ ಚಿಂತ್‌ಲ್ಲೆಪರಿಂ ಘಡೊನ್ ಆಸ್‌ಲ್ಲೆಂ. ತಾಚೆಂ ಘರಾಂತ್ ವಕೊಲ್ ಗಡ್ದಾಯೆನ್ ಜಾಲ್ಲೆಂ. ತಾಚಿಂ ಭಾವ್-ಭಯ್ಣ್ಯೊ ಸಯ್ತ್ ಆಯಿಲ್ಲಿಂ ಆನಿ ಮಣಿನ್ ಆದ್ಲೆಂ ಸಗ್ಳೆಂ ವಿಸ್ರೊನ್ ಮಾಯಾಮೊಗಾನ್ ಚಲ್ಲೊ. ಆಪ್ಲಿಂ ಭಾವ್ ಭಯ್ಣಿಂ ಕಿತ್ಲಿಂ ಪಾಡ್ ತರೀ ತಿಂ ಆಪ್ಣಾಚಿಂಚ್, ದೆಖುನ್ ತಾಂಕಾ ಪಯ್ಸ್ ಕೆಲೆಂ ತರ್ ತೆಂ ಸಮಾಜೆಮುಖಾರ್ ಆಮ್ಚೆಂಚ್ ಉಣೆಂಪಣ್ ಮ್ಹಳ್ಳೆಂ ಭೊಗಾಪ್ ಮಣಿಚಾ ತಕ್ಲೆರ್ ಆಸ್‌ಲ್ಲೆಂ.

ತ್ಯಾ ಶಿವಾಯ್ ತಾಣೆಂ ಗೋಪಿಚಾ ಜಿಣ್ಯೆ ಥಾವುನ್ ಜಾಹಿತ್ತಿಂ ಲಿಸಾಂವಾ ಶಿಕ್‌ಲ್ಲೊ. ಹೊ ರಾಗ್ ಮೊಸೊರ್ ಮನ್ಶಾಚಾ ಜಿಣ್ಯೆಂತ್ ಅಡ್ಕಳ್ ಮ್ಹಳ್ಳೆಂ ಲಿಸಾಂವ್ ತೊ ಶಿಕ್‌ಲ್ಲೊ. ತಸಲಿ ಜಿಣಿಂ ಜಿಯೆಂವ್ಕ್ ಇಲ್ಲೆ ಕಶ್ಟ್ ಕಿತ್ಯಾಕ್ ಮ್ಹಳ್ಯಾರ್ ಆಪುಣ್ ಕಾಂಯ್ ಉಣೊಂ ಮ್ಹಳ್ಳೆಂ ಸಮಜೆ ಮುಖಾರ್ ದಾಖಂವ್ಕ್ ಕೊಣಾಯ್ಕೀ ನಾಕಾ. ಹೆರಾಂ ಆಪ್ಣಾಕ್ ತುಕ್ಲಾಯ್ತಿತ್, ಆಪ್ಣಾಕ್ ಪಳೆವ್ನ್ ಹಾಸ್ತಿತ್ ಮ್ಹಳ್ಳಿಂ ಚಿಂತ್ನಾ ಮತಿಂತ್ ಯೆತಾನಾ ಕೊಣಾಯ್ಕೀ ಆಪ್ಣಾ ವಿರೋಧ್ ಜಾಂವೊ ಅಪ್ರಾಧ್ ಸೊಸುನ್ ವಗೊಚ್ಚ್ ರಾವೊಂಕ್ ನಾಕಾ. ಹಿ ಏಕ್ ಮನ್ಶಾ ಜಿಣ್ಯೆಚಿ ಅಸ್ಕತ್ ಅಡ್ಕಳ್ ಆನಿ ಅಸ್ಕತ್ ಚಿಂತಾಪ್. ಕೆನ್ನಾ ಹೆಂ ಚಿಂತಾಪ್ ಯಾ ಅಡ್ಕಳ್ ನಿವಾರುಂಕ್ ಮನಿಸ್ ಸಕ್ತಾಗೀ ತೆನ್ನಾ ಹರ್‍ಯೆಕ್ ಮನಿಸ್ ಜಿಣ್ಯೆಚೆಂ ನೀಜ್ ಮೋಲ್ ಸಮ್ಜೊಂಕ್ ಸಕ್ತಾ ಮ್ಹಳ್ಳಿಂ ತತ್ವಾಂ ಮಣಿಚಾ ಮತಿಂತ್ ಎದೊಳ್‌ಚ್ ಖಂಚೊನ್ ಆಯಿಲ್ಲಿಂ.

ಮಣಿ ನಾಸ್ತಾಂ, ಗೋಪಿ ನಾಸ್ತಾಂ ಆಸ್ಚಾ ಎಕ್ಸುರ್‍ಯಾ ತಿಯೊಕ್ ಇಲ್ಲಿ ಉಬ್ಗೊಣ್ ಜರೂರ್ ಜಾವ್ನ್ ಭೊಗ್ಲಿ. ಪುಣ್ ಜಾಂವ್ಚೆಂ ಸಗ್ಳೆಂ ಬರ್‍ಯಾಕ್‌ಚ್ಚ್ ಮ್ಹಣೊನ್ ತಾಚಾ ಮತಿಂತ್ ಚಿಂತ್ನಾಂ ಆಯ್ಲಿಂ. ಮಣಿಚೆ ಇಲ್ಲೆ ಪೊಯ್ಶೆ ಎದೊಳ್‌ಚ್ಚ್ ಬೆಂಕಾಂತ್ ಆಸ್‌ಲ್ಲೆ ಆನಿ ತ್ಯಾ ಪೊಯ್ಶ್ಯಾಂಕ್ ತಾಣೆಂ ಆತಾಂ ಹಾಡ್‌ಲ್ಲೆ ಪೊಯ್ಶೆ ಮೆಳವ್ನ್ ಪರತ್ ಬೆಂಕಾ೦ತ್ ಫಿಕ್ಸಾರ್ ಘಾಲೆ ಆನಿ ತಾಚಾ ವಾಡಿಂತ್ ಕಾಂಯ್ ಘರ್ಚೊ ಖರ್ಚ್ ಗೆಲೊ ತರ್ ಉಪ್ರಾಂತ್ ತಾಕಾ ಚಡ್ ತೇಂಪ್ ಗಲ್ಫಾಂತ್ ಆಸ್ಚಿ ಗರ್ಜ್ ನಾತ್‌ಲ್ಲಿ. ಆನಿ ಏಕ್ ಯಾ ದೋನ್ ವರ್ಸಾಂ ಕಾಮ್ ಕೆಲೆಂ ತರ್ ಉಪ್ರಾಂತ್ ಏಕ್ ದೀಸ್ ಕಾಡುಂಕ್ ತಿತ್ಲೆ ಕಶ್ಟ್ ನಾತ್‌ಲ್ಲೆ ಮ್ಹಣೊನ್ ಮಣಿ ಚಿಂತಿಲಾಗ್ಲೊ. ಭುರ್ಗಿಂ ತಾಚಿಂ ಇಸ್ಕೊಲಾಂತ್ ಬರಿಂ ಶಿಕ್ತಾಲಿಂ.

ಗಾಂವಾಂತ್ ದೀಸ್ ಕಾಡ್ಚೆ ಕಾಂಯ್ ಕಶ್ಟಾಂಚೆಂ ನ್ಹಂಯ್. ಹಾಂಗಾಚೊ ಹವೊ ಬರೊ ಆಸಾ ಆನಿ ಹಾಂಗಾ ಕಿತೆಂಯ್ ಚಡ್ ಉಣೆಂ ಜಾಲೆಂ ತರ್ ಆಪ್ಲಿಂ ಮ್ಹಳ್ಳಿಂ ಮನ್ಶಾಂ ಆಸಾತ್. ದೆಖುನ್ ಜಾತಾ ತಿತ್ಲೆಂ ವೆಗಿಂ ತೊ ಗಲ್ಫ್ ಸೊಡ್ನ್ ಯೇಂವ್ಕ್ ಮಣಿನ್ ಚಿಂತ್ಲೆಂ. ಕಿತೆಂ ಜಾಲ್ಯಾರೀ ಹೊ ಆಪ್ಲೊಚ್ಚ್ ಗಾಂವ್ ಆನಿ ಹಾಂಗಾ ಕೊಣೇಂಯ್ ಪರ್ದೇಶ್ಯಾಂ ಪರಿಂ ರಾಂವ್ಚಿ ಗರ್ಜ್ ನಾ. ತ್ಯಾ ಶಿವಾಯ್ ವಡ್ ಜಾವ್ನ್ ಯೆಂವ್ಚಾ ಭುರ್ಗ್ಯಾಂಕ್ ಆತಾಂ ಬಾಪಾಯ್ಚಿ ಗರ್ಜ್ ಆಸ್ತಾ. ತಾಂಚಾ ಜಿಣ್ಯೆಂತ್ ಗರ್ಜೆಚಾ ವೆಳಾರ್ ತಾಂಚೆಸವೆಂ ತಾಂಚಿಂ ಆವಯ್ ಬಾಪುಯ್ ನಾಸ್ತಾನಾ ಕಾಂಯ್ ತಿಂ ವಾಟ್ ಚುಕ್ತಿತ್ ತರ್ ಉಪ್ರಾಂತ್ ಕೋಣ್ ಚುಕಿದಾರ್? ಕಿತ್ಲೆಶ್ಯಾ ಕುಟ್ಮಾಂನಿ ಸಾರ್ಕಿ ದೇಖ್ ದಿತೆಲಿಂ ನಾಸ್ತಾಂನಾ ಭುರ್ಗಿಂ ವಾಟ್ ಚುಕೊನ್ ವಚನಾಂತ್? ತರ್ ಉಪ್ರಾಂತ್ ಕಶೆಂ ಫಕತ್ತ್ ಭುರ್ಗ್ಯಾಂಕ್ ಚುಕಿದಾರ್ ಕರ್ಚೆಂ? ಆವಯ್ ಬಾಪಾಯ್ಚೆಂ ಕರ್ತವ್ನ್ ಫಕತ್ತ್ ಭುರ್ಗ್ಯಾಂಕ್ ಕರ್ನ್ ಘಾಲ್ಚೆಂ ಆನಿ ತಾಂಕಾ ಪೋಟ್ ಭರ್ತಾ ಪರ್ಯಾಂತ್ ಪಳೆಂವ್ಚೆಂ ಮಾತ್ರ್ ನ್ಹಂಯ್ ಮ್ಹಳ್ಳೆಂ ಮಣಿಕ್ ಕಳಿತ್ ಆಸ್‌ಲ್ಲೆಂ. ತರೀ ಏಕ್ ಸತ್ ತೊ ಸಮ್ಜತಾಲೊ. ಆಂಬ್ಯಾ ರುಕಾರ್ ಲಿಂಬೆ ಜಾಯ್ನಾಂತ್ ಆನಿ ಲಿಂಬ್ಯಾ ರುಕಾರ್ ಆಂಬೆ ಜಾಯ್ನಾಂತ್. ಬರ್‍ಯಾ ಆವಯ್ ಬಾಪಾಂಯ್ಕ್ ಬರಿಂ ಭುರ್ಗಿಂ ಖಂಡಿತ್ ಜಾತಾತ್ ಆನಿ ಕಿಡೆರ್‍ಯಾ ರುಕಾ ಥಾವುನ್ ಯೆಂವ್ಚಿ ಫಳಾಂ ಕಿಡೆರಿಂ. ತಾಚಾ ಜಿಣ್ಯೆಚಿಂ ತತ್ವಾಂ ಜಾಲ್ಯಾರೀ ತಾಚಾ ಭುರ್ಗ್ಯಾಂಚಾ ನೆಣ್ತ್ಯಾ ಮತಿಕ್ ಇಲ್ಲೆಂ ತರೀ ಸಮ್ಜೊನ್ ಘೆಂವ್ಚಿ ಸಕತ್ ಆಸ್‌ಲ್ಲಿ. ಸಮಾಜೆ ಪ್ರಕಾರ್ ತಾಕಾ ಭಿವ್ಕುರೊ ಮ್ಹಳ್ಳೆಂ ನಾಂವ್ ಮೆಳ್ಳ್ಯಾರೀ ನೀಜ್ ಜಾವ್ನ್ ತಸಲಿಂಚ್ ಸಮಧಾನಿ, ಸಮ್ಜೊಣೆಚಿಂ ಮನ್ಶಾಂ ಜಾವ್ನಾಸ್‌ಲ್ಲಿಂ.

ಏಕ್ ಕುಟಾಮ್ ಮ್ಹಣ್ತಾನಾ ತಾಂತುಂ ಎಕ್ಲೊ ಆಸಾನಾ ಆನಿ ಏಕ್ ಚಿಂತಾಪ್ ಆಸಾನಾ. ಪಯ್ಲೆಂ ಭುರ್ಗಿಂ ಲ್ಹಾನ್ ಆಸ್ತಾನಾ ಹಾಂತುಂ ಕಾಂಯ್ ಕಶ್ಟ್ ದಿಸಾನಾಂತ್ ಜಾಲ್ಯಾರೀ ತಿಂ ವಡ್ ಜಾವ್ನ್ ಆಯಿಲ್ಲೆಪರಿಂಚ್ ತಾಂಚಾ ಚಿಂತ್ಪಾಕ್ ಆನಿ ಆವಯ್ ಬಾಪಾಯ್ಚಾ ಚಿಂತ್ಪಾಂಕ್ ತಫಾವತ್ ಆಸ್ತಾ ಆನಿ ಚಡಾವತ್ ಜಾವ್ನ್ ಹೊ ತಫಾವತ್ ಜರ್ ಸಾರ್ಕೊ ಕೆಲೊ ತರ್ ಥಂಯ್ ಸಮಧಾನ್ ಆಸ್ತಾ. ನಾಂ ತರ್ ಥಂಯ್ ಸುರು ಜಾತಾ ಝಗ್ಡೆಂ, ಮನಸ್ತಾಪ್, ಗಾಳಿ ಶಿರಾಪ್ ಆನಿ ಅಶೆಂ ಹೆ ಕುಟಾಮ್ ಬದ್ಲೊನ್ ಯೆಮ್ಕೊಂಡ್ ಜಾತಾ.

ಕಿತೆಂ ಜಾಲ್ಯಾರೀ ಮಣಿನ್ ದುಸ್ರೆ ಪಾವ್ಟಿಂ ರಜೆರ್ ಗಾಂವಾಕ್ ಆಯಿಲ್ಲೆ ದೀಸ್ ಬರ್‍ಯಾನ್ ಆಪ್ಲ್ಯಾ ಕುಟ್ಮಾಸವೆಂ ಖರ್ಚಿಲೆ. ವೇಳ್ ಕಾಡ್ನ್ ತಾಚಾ ಸಗ್ಳ್ಯಾ ಕುಟ್ಮಾಸವೆಂ ತಾಚಾ ಭಾಂವಾಚಾಂ ಘರಾ ಗೆಲೊ, ತಾಂಚಾ ಸಂತೊಸಾಂತ್ ವಾಂಟೆಲಿ ಜಾಲೊ ಆನಿ ಮಜೆನ್ ಆನಿಂ ಸಂತೊಸಾನ್ ವೆಗಿಂಚ್ ಪಾಶಾರ್ ಜಾಂವ್ಚೆ ದೀಸ್ ಆಪ್ಲ್ಯಾ ಬಾಯ್ಲ್ ಭುರ್ಗ್ಯಾಂಸವೆಂ ಬರ್‍ಯಾನ್ ಸಾರಿಲಾಗ್ಲೊ.

ಮುಂದರ್‍ಸಿಲಾಂ...

Tags: Vally Quadras,e konkani novel, Konkani, Mangalore, Mangalorean, Mother Tongue

From around the world

ಪಾಟಿಂ ಗಾಂವಾಕ್ - ಅವಸ್ವರ್ 14

Post your comments

ಅವಸ್ವರ್ 1

ಅವಸ್ವರ್ 2

ಅವಸ್ವರ್ 3

ಅವಸ್ವರ್ 4

ಅವಸ್ವರ್ 5

ಅವಸ್ವರ್ 6

ಅವಸ್ವರ್ 7

ಅವಸ್ವರ್ 8

ಅವಸ್ವರ್ 9

ಅವಸ್ವರ್ 10

ಅವಸ್ವರ್ 11

ಅವಸ್ವರ್ 12

ಅವಸ್ವರ್ 13

ಅವಸ್ವರ್ 14

ಅವಸ್ವರ್ 15

ಅವಸ್ವರ್ 16

ಅವಸ್ವರ್ 17

ಅವಸ್ವರ್ 18

ಅವಸ್ವರ್ 19

ಅವಸ್ವರ್ 20

ಅವಸ್ವರ್ 21

ಅವಸ್ವರ್ 22

ಅವಸ್ವರ್ 23

ಅವಸ್ವರ್ 24

ಅವಸ್ವರ್ 25

ಅವಸ್ವರ್ 26

ಅವಸ್ವರ್ 27

ಅವಸ್ವರ್ 28

Connect

Our Address
Mangalore

Our Address
Udupi

Our Address
Dubai

From around the world

Post your comments

Connect

Our AddressMangalore

Our AddressUdupi

Our AddressDubai

Our Address
Mangalore

Our Address
Udupi

Our Address
Dubai