:: ಮಾಯ್ ಭಾಸ್

ದೀಸ್ ಗೆಲ್ಲೆಪರಿಂಚ್ ಎಸ್ತೆಲಾಚಾ ಚಿಂತ್ನಾಂಚಿ ಬದ್ಲಾವಣ್ ಜಾಲ್ಲಿ. ತಾಚಾ ಮತಿಂತ್ ಆಸ್‌ಲ್ಲ್ಯಾ ತಿಯೊಚಾ ಮಿನತೆಚಾ ಕಶ್ಟಾಂಚಾ ಸಮಯಾಚೆರ್ ತಾಣೆಂ ಧಾಡ್ಚಾ ಪೊಯ್ಶ್ಯಾಂನಿ ಧಾಂಪಣ್ ಘಾಲ್ಲೆಂ. ತ್ಯಾ ಶಿವಾಯ್ ತಾಂಚೆ ದೀಸ್ ಬರ್‍ಯಾನ್ ವೆತಾಲೆ. ಭುರ್ಗಿಂ ತಾಂಚೆಯಿತ್ಲ್ಯಾಕ್ ಬರಿಂ ಶಿಕ್ತಾಲಿಂ ಆನಿ ಹರ್‍ಯೆಕಾ ಮಹಿನ್ಯಾಂತ್ ತಿಯೊ ದೆವಾಚಾ ಮಾತ್ಯಾರ್ ಫುಲ್ ಚುಕ್ಲ್ಯಾರೀ ಪೊಯ್ಶೆ ಧಾಡುಂಕ್ ವಿಸ್ರನಾತ್‌ಲ್ಲೊ. ಎಸ್ತೆಲಾಚಿ ಆಳ್ಸಾಯ್ ಆತಾಂ ದಿಸಾನ್‌ದೀಸ್ ಚಡೊನ್ ವೆತಾಲಿ. ತಾಕಾಯ್ ತಾಚಾ ಮತಿಂತ್ ಆಪುಣ್ ಗಲ್ಫಾಗಾರಾಚಿ ಬಾಯ್ಲ್ ಮ್ಹಳ್ಳೊ ಕುಡ್ಡೊ ಹಾಂಕಾರ್ ಆಸ್‌ಲ್ಲ್ಯಾನ್ ಆಪ್ಲ್ಯಾಯ್ ಘರಾ ಹೆರಾಂಚಾ ಘರಾಂತ್ ಆಸ್ಚೆಪರಿಂ ಎಕೆಕ್‌ಚ್ಚ್ ಬರ್‍ಯೊ ವಸ್ತು ಹಾಡಿಜಯ್, ಟಿವಿ, ವಿಡಿಯೊ ಹಾಡುಂಕ್ ಜಾಯ್, ಆಪ್ಲ್ಯಾ ಘರಾ ಸಯ್ತ್ ದಿಸಾನ್‌ದೀಸ್ ಸಂಗೀತ್ ಆಯ್ಕೊಂಕ್ ಜಾಯ್ ಆನಿಂ ಆಪ್ಲ್ಯಾ ಘರಾಯ್ ಚಾಕ್ರಾಂ ಆಸಾಜಯ್ ಮ್ಹಳ್ಳಿಂ ಚಿಂತ್ನಾಂ ತವಳ್‌ತವಳ್ ಯೆತಾಲಿಂ. ಸಮಾಜೆ ಮುಖಾರ್ ಹೆಂ ಸರ್ವ್ ಆಸ್ಚಾಂಕ್ ಮಾತ್ರ್ ಗೌರವ್ ಆಸ್ತಾಲೊ. ಎದೊಳ್‌ಚ್ ಅಲಂಗಾರ್‌ಚಾ ಬೇಂಕಾಂತ್ ತಾಚಾ ನಾಂವಾರ್ ಪೊಯ್ಶೆ ಜಮೊ ಆಸ್‌ಲ್ಲೆ. ತಿಯೊನ್ ಗಲ್ಫಾಂತ್ ಎದೊಳ್‌ಚ್ಚ್ ಚಾರ್ ಪಾಂಚ್ ವರ್ಸಾಂ ಸಂಪಯ್ಲಿಂ ತರೀ ಎಸ್ತೆಲಾಕ್ ಸದಾಂ ಯೆಂವ್ಚೊ ಎಕೇಕ್ ಆಶಾ ತಾಕಾ ಪೊರ್ಚೆ ಪೋರ್ ಗೆಲಾ ಮ್ಹಳ್ಳಿಂ ಚಿಂತ್ನಾ ಹಾಡಯ್ತಾಲಿಂ. ತ್ಯಾ ಶಿವಾಯ್ ಜಿಣ್ಯೆಂತ್ ಪಯ್ಲೆಪಾವ್ಟಿಂ ಮೆಳ್‌ಲ್ಲೆಂ ಸ್ವಾತಂತ್ರ್ ತಾಕಾ ಅಸಲೆಂ ಜಿವಿತ್ ಜೀಂವ್ಕ್ ಸಕಾತ್ ಮ್ಹಳ್ಳೆಂ ಚಿಂತಾಪ್ ಎದೊಳ್ ತಾಕಾ ಕಳ್‌ಲ್ಲೆಂಚ್ ನಾ. ಖಂಚೆಂ ಬರೆಂ ಆನಿ ಖಂಚೆ ವಾಯ್ಟ್ ಮ್ಹಳ್ಳೆಂ ತಾಚಾ ಮತಿಕ್ ಗೆಲೆಂಚ್ ನಾ.

ಧ್ಯೇಯಾಂ ನಾತ್‌ಲ್ಲೊ ಮನಿಸ್ ಆನಿ ಶೆವೊಟ್ ನಾತ್‌ಲ್ಲಿ ಗಾಡಿ ದೊನೀಂ ಎಕ್‌ಚ್ಚ್ ನಂಯ್ಗೀ? ಜಶಿಂ ಗಾಡಿ ಅಪ್ಲ್ಯಾಚ್ಚ್ ಶೆವೊಟಾ ತೆವ್ಶಿನ್ ವೆತಾ ತಶಿಚ್ಚ್ ಜಿವಿತ್ ಅಪ್ಲ್ಯಾಚ್ ವಾಟೆರ್ ಚಮ್ಕಾತಾ ಆನಿ ಜಶಿ ತಿ ಗಾಡಿ ಎಕಾ ಜಾಗ್ಯಾರ್ ಕಾಮ್ ಕರುಂಕ್ ಜಾಯ್ನಾಸ್ತಾಂ ಪಡ್ತಾ ತಶಿಚ್ಚ್ ಹೆಂ ಜಿವಿತ್ ತೆನ್ನಾ ಕೊಣಾಯ್ಕೀ ಉಪ್ಕಾರಾಕ್ ಪಡಾನಾ.

ತ್ಯಾ ಶಿವಾಯ್ ಆತಾಂ ಎಸ್ತೆಲ್ ಸದಾಂ ಪಿಯೆತಾಲೆಂ. ಲತೀಫ್ ತಿಕಾ ಭೊರೊಯ್ತಾಲೊ ಆನಿ ಸೊರ್‍ಯಾಚಾ ಆಮಾಲಾರ್ ಕಿತೆಂ ಜಾತಾ ಮ್ಹಳ್ಳೆಂಚ್ ಎಸ್ತೆಲಾಕ್ ಕಳಾನಾತ್‌ಲ್ಲೆಂ. ಆನಿ ಲತೀಫ್ ಹೊ ಆವ್ಕಾಸ್ ಬರೊ ಕರ್ನ್ ಗಳ್ಸಿತಾಲೊ.

ಲೋನ್ ಘೆವ್ನ್ ಆತಾಂ ಇತ್ಲೊ ತೇಂಪ್ ವೊಗೆಚ್ಚ್ ರಾವ್‌ಲ್ಲ್ಯಾ ಎಸ್ತೆಲಾಚ್ಯಾ ವಯ್ರ್ ಮೆನೆಜರಾಚಾ ಮತಿಂತ್ ಕಸ್ಲೊಗೀ ದುಭಾವ್ ಮಾರುಂಕ್ ಲಾಗ್ಲೊ. ತಿಯೊ ಗಲ್ಫಾಕ್ ವಚೊನ್ ಚಡುಣೆಂ ಪಾಂಚ್ ವರ್ಸಾಂ ಜಾಲಿಂ ಪುಣ್ ಗಾಂವಾಕ್ ತೊ ಅಜೂನೀಂ ಯೇಂವ್ಕ್ ನಾ? ಯಾ ಪೊಯ್ಶೆ ಧಾಡಿನಾ? ಅಶೆಂ ಏಕ್ ದೀಸ್ ತೊ ಮೆನೆಜರ್ ಎಸ್ತೆಲಾಕ್ ಮೆಳೊಂಕ್ ಘರಾ ಆಯ್ಲೊ. ಘರಾಂತ್ ತಶೆಂಚ್ ಜಾಗ್ಯಾಂತ್ ಜಾಲ್ಲಿ ಬದ್ಲಾವಣ್ ಮೆನೆಜರಾಕ್ ಅಜಾಪ್ ಕರಿಲಾಗ್ಲಿ. ಪಯ್ಲೆಂಚೆಪರಿಂ ಆಂಗ್ಣಾದೆಗೆಕ್ ಆಸ್ಚೆ ಪೊಣ್ಸಾಚೆ ಯ್ ಆಂಬ್ಯಾಚೆ ರೂಕ್ ಕಾತರ್ಲೆಲೆ ಜಾಯ್ಜಯ್ ದೆಖುನ್ ಬರೊ ಉಜ್ವಾಡ್ ಫಾಂಕ್ತಾಲೊ. ಸಿಮೆಟಿಚೊ ದೊರೊ ಇಟ್ಯಾಂ ಸವೆಂ ಬಾಂದ್ಲಲೊ ದೆಖ್ತಚ್ ಮೆನೆಜರ್ ಇತ್ಲೆ ವೆಗಿಂ ಹಿ ಬದ್ಲಾವಣ್ ಕರುಂಕ್ ಸಕಾಜಯ್ ತರ್ ತಿಯೊನ್ ಖಂಡಿತ್ ಪೊಯ್ಶೆ ಧಾಡ್ಲ್ಯಾತ್ ಮ್ಹಣೊನ್ ಪಾತ್ಯೆಲಾಗ್ಲೊ.

"ಪಳೆ ಬಾಯೆ, ಮ್ಹಾಕಾ ಕಾಂಯ್ ತುಜೆರ್ ಯಾ ತುಜಾ ಪತಿಚೆರ್ ದುಭಾವ್ ನಾ. ತರೀ ಹಾಂವೆ ವೆಗಿಂಚ್ ವರ್ಗ್ ಜಾವ್ನ್ ವೆಚಾರ್ ಆಸಾಂ ಆನಿ ವೆಚಾಧಿಂ ಕಾಂಯ್ ತುವೆಂ ಘೆತ್‌ಲ್ಲೆಂ ಘರಾಚೆಂ ಲೋನ್ ಫಾರಿಕ್ ಕೆಲ್ಲೆಂ ತರ್ ಜಾತೆಂ. ಕಿತೆಂ ಖೈಂ ತುಮ್ಗೆಲೊ? ಕಾಂಯ್ ದುಡ್ಡು ಪಾಟಯ್ಲಾವೆ? ಹಾಂವ್ ನಿಮ್ಗಿತಾಂ ಮ್ಹಣೊನ್ ಬೆಜ್ಜಾರ್ ಜಾಂವ್ಚೆಂ ನ್ಹಂಯ್".

ಎಸ್ತೆಲಾಕ್ ಆತಾಂ ಕಿತೆಂ ಸಾಂಗೊಂಕೀ ಕಳ್ಳೆಂನಾ. ತಾಚಾ ಮತಿಂತ್ ಆಪ್ಣಾಕ್ ಕಾಂಯ್ ಚಡುಣೆಂ ಜಾಯ್ತ್ ತರ್ ಆಪ್ಣಾಲಾಗಿಂ ಇಲ್ಲೆ ಪೊಯ್ಶೆ ಆಸ್ಲ್ಯಾರ್ ಬರೆಂ ಮ್ಹಳ್ಳೆಂ ಚಿಂತಾಪ್ ಆಸ್‌ಲ್ಲೆಂ ತರೀ ಆತಾಂ ಎದೊಳ್‌ಚ್ಚ್ ಎಸ್ತೆಲಾಚಾ ನಾಂವಾರ್ ಪನ್ನಾಸ್ ಹಜಾರಾಂಚಾಕೀ ಚಡ್ ಆಸ್‌ಲ್ಲೆ. ತ್ಯಾ ಶಿವಾಯ್ ಬೆಂಕಾಚೆಂ ಲೋನ್ ಅನಿಕೀ ಫಾರಿಕ್ ಜಾಂವ್ಕ್ ನಾ ಮ್ಹಣೊನ್ ಬರಯ್ಲ್ಯಾರ್ ತಿಚೊ ಘೊವ್ ಧಾಡ್ತಾ ಮ್ಹಳ್ಳಿ ಪಾತ್ಯೆಣಿಂ ಸಯ್ತ್ ತಿಕಾ ಆಸ್‌ಲ್ಲ್ಯಾನ್ ತಿಣೆಂ ಮೆನೆಜರಾ ಥಾವ್ನ್ ಸಧ್ಯಾಚಿ ಸುಡ್ಕಾ ಜೊಡ್ಚಾ ಖಾತಿರ್ ಅನ್ಯೇಕಾ ಮಹಿನ್ಯಾಚೊ ವಾಯ್ದೊ ಮಾಗ್ಲೊ. ಮೆನೆಜರ್ ಸಯ್ತ್ ಹೆರ್ ಕಸ್ಲೊಚ್ ನಿರ್ವೋಗ್ ನಾಸ್ತಾಂ ಥಂಯ್ ಥಾವ್ನ್ ಉಟೊನ್ ಪಾಟಿಂ ಗೆಲೊ.

ಎಸ್ತೆಲಾಚಿ ಪರಿಗತ್ ಸಮ್ಜಾಲ್ಲ್ಯಾ ಲತೀಫಾಚಾ ಮತಿಂತ್ ಏಕ್ ದುಸ್ರೆಂಚ್ ಚಿಂತಾಪ್ ಆಸ್‌ಲ್ಲೆಂ. ತೊ ಚಿಂತಾಲೊ ತಾರ್ಲೊ ದೀವ್ನ್ ಬಾಂಗ್ಡೊ ಘೆತ್ಲೊ ಆನಿ ಆತಾಂ ಬಾಂಗ್ಡೊ ದೀವ್ನ್ ಕಿತ್ಯಾಕ್ ಶೆವ್ಟೊ ಘೆಂವ್ಕ್ ನಜೊ? ಅಶೆಂ ತಾಚಾ ಸಭಾರ್ ಇಶ್ಟಾಂನಿ ಕೊಣಾ ಕೊಣಾಥಾವುನ್ ಫಾಯ್ದೊ ಜೊಡುನ್ ಬರ್‍ಯಾ ಹಂತಾಕ್ ಪಾವ್ಲ್ಯಾತ್ ಆಸ್ತಾಂ ತಾಂತುಂ ಲತೀಫಾಕ್ ಏಕ್ ಬರೊ ಆವ್ಕಾಸ್ ಮ್ಹಣೊನ್ ಚಿಂತುನ್ ಎಕಾ ನಿರ್ಧಾರಾಕ್ ಪಾವ್ಲೊ. ಕಶೆಂ ತರಿ ಕರ್ನ್ ಮೂಡ್‌ಬಿದ್ರಿ ಬೆಂಕಾಂತ್ ಆಸ್ಚೆಂ ಲೋನ್ ಫಾರಿಕ್ ಕರಯ್ಲೆಂ ತರ್ ಉಪ್ರಾಂತ್ ತಾಚಿ ವಾಟ್ ಸಂಪಿ ಆಸ್‌ಲ್ಲಿ. ದೆಖುನ್ ಎಕಾ ದಿಸಾ ಲತೀಫಾನ್ ದಿಸಾಚಾ ದನ್ಪಾರಾಂ ಏಕ್ ಬೋತ್ಲ್ ಸೊರೊ ಹಾಡ್ನ್ ಎಸ್ತೆಲಾಕ್ ದಿಲೊ ಆನಿಂ ಸೊರ್‍ಯಾಚಾ ಗ್ಲಾಸಾಸವೆಂ ತೆಂ ಲತೀಫಾಸವೆಂ ಉಲಂವ್ಕ್ ಬೊಸ್ಲೆಂ.

ಲತೀಫಾನ್ ಆಪ್ಲ್ಯಾ ಮತಿಂತ್ ಆಸ್ಚೆಂ ಸಗ್ಳೆಂ ವೀಕ್ ಸಾರ್‍ಕ್ಯಾ ವೆಳಾರ್ ಎಸ್ತೆಲಾಚಾ ಮತಿಂತ್ ಘಾಲೆಂ.

ಲತೀಫ್ ಮೂಡ್‌ಬಿದ್ರಿ ಬಜಾರಾಂತ್ ತಾಚಿ ಮ್ಹಳ್ಳಿಚ್ ಏಕ್ ಆಂಗಡ್ ಘಾಲುಂಕ್ ಚಿಂತುನ್ ಆಸ್‌ಲ್ಲೊ. ಆನಿ ತ್ಯಾ ಆಂಗ್ಡಿಕ್ ಖಂಡಿತ್ ದೋನ್ ಯಾ ತೀನ್ ಲಾಖ್ ರುಪ್ಯಾಂಚಿ ಗರ್ಜ್ ಆಸಾ ಆನಿ ತೆ ದೋನ್ ಯಾ ತೀನ್ ಲಾಖ್ ರುಪಯ್ ತಾಕಾ ಮೆಳಾಜಯ್ ತರ್ ಎಸ್ತೆಲಾನಿಮ್ತಿಂ ಮಾತ್ರ್ ಮ್ಹಳ್ಳೆಂ ತಾಣೆಂ ಎದೊಳ್‌ಚ್ಚ್ ಸಮ್ಜೊನ್ ಘೆತ್‌ಲ್ಲೆಂ. ತ್ಯಾ ಶಿವಾಯ್ ಎಸ್ತೆಲಾಕ್‌ಯ್ ಲತೀಫಾಚೆರ್ ಕಿತ್ಯಾಕ್‌ಗೀ ಖೂಬ್ ಭರ್ವಸೊ ಆಸ್‌ಲ್ಲೊ. ತಾಣೆಂ ವಯ್ರ್ ಆಯ್ಲ್ಯಾರ್ ಆಪ್ಣಾಕ್‌ಯಿ ಸಲೀಸ್ ಜಾತೆಲೆಂ ಮ್ಹಳ್ಳೆಂ ಚಿಂತಾಪ್ ತಾಚೆಂ ಜಾಲ್ಲೆವರ್‍ವಿಂ ತಿಚಾ ತಕ್ಲೆರ್ ಸೊರ್‍ಯಾಚೆಂ ಆಮಾಲ್ ಚಡೊನ್ ಆಯಿಲ್ಲೆಪರಿಂಚ್ ತಿ ಎಕಾ ನಿರ್ಧಾರಾಕ್ ಪಾವ್ಲಿ ಆನಿ ಚಡಿತ್ ಇಲ್ಲ್ಯಾ ಪೊಯ್ಶ್ಯಾಂ ಖಾತಿರ್ ತಿಯೊಕ್ ಕಾಗಾದ್ ಬರಯ್ಲೆಂ.

ತಿಯೊ ಕಿತ್ಲೆ ಕಶ್ಟ್ ಜಾಲ್ಯಾರೀ ಪೊಯ್ಶೆ ಖಂಡಿತ್ ಧಾಡ್ತಲೊ ಮ್ಹಳ್ಳೊ ಭರ್ವಸೊ ತಿಕಾ ಆಸ್‌ಲ್ಲೊ. ಸದ್ದ್ಯಾಕ್ ತಿಕಾ ಪೊಯ್ಶ್ಯಾಂ ಶಿವಾಯ್ ಹೆರ್ ಕಿತೆಂಚ್ಚ್ ಮತಿಕ್ ವಚಾನಾತ್‌ಲ್ಲೆಂ ದೆಖುನ್ ತೆಂ ತಿಯೊನ್ ಧಾಡ್ಚಾ ಪೊಯ್ಶಾಂಚೆರ್ ಭರ್ವಸ್ಯಾನ್ ಆಸ್‌ಲ್ಲ್ಯಾನ್ ತಿ ಅಲಂಗಾರ್ ಬೆಂಕಾಕ್ ಗೆಲಿ ಆನಿ ಥಂಯ್ ಆಸ್ಚಾ ಪೊಯ್ಶ್ಯಾಂತ್ ಪನ್ನಾಸ್ ಹಜಾರ್ ರುಪಯ್ ಕಾಡ್ನ್ ಹಾಡ್ಲೆ ಆನಿ ಮೂಡ್‌ಬಿದ್ರಿ ಬೆಂಕಾಕ್ ಹಾಡ್ನ್ ಇಲ್ಲ್ಯಾ ವಾಡಿಸವೆಂ ತೆ ಭರ್ಲೆ. ಆನಿ ಆವ್ಕಾಸ್ ಸೊಧುನ್ ಮೆನೆಜರಾಕ್ ಆಪ್ಣಾಕ್ ಪರತ್ ಲೊನಾಚಿ ಗರ್ಜ್ ಆಸಾ ಮ್ಹಣೊನ್ ಸಮ್ಜಾಯ್ಲೆಂ.

ಮೆನೆಜರಾಚಾ ತೊಂಡಾರ್ ಅಜಾಪ್ ಆಸ್‌ಲ್ಲೆಂ. ಪಾಟ್ಲಿಂ ದೊನೀಂ ಲೊನಾಂ ಇಲ್ಲೊ ವೇಳ್ ತರ್‌ಯೀ ಎಕ್‌ಚ್‌ಪಾವ್ಟಿಂ ಫಾರಿಕ್ ಜಾಲ್ಲೆಂ ಪಳೆಲ್ಲ್ಯಾ ಮೆನೆಜರಾಕ್ ತಿತ್ಲೆಂ ವೆಗ್ಗಿಂ ನಾಂ ಮ್ಹಣೊಂಕ್ ನಾಕಾಸ್‌ಲ್ಲೆಂ.

ಎಸ್ತೆಲ್ ಮುಖಾರುನ್ ಮ್ಹಣಾಲೆಂ. ಮ್ಹಾಜಾ ಘೊವಾಚೆಂ ಕಾಗಾದ್ ಆಯ್ಲಾಂ ಆನಿ ತಾಕಾ ಮೂಡ್‌ಬಿದ್ರಿಂತ್‌ಚ್ಚ್ ಏಕ್ ಆಂಗಡ್ ಮೊಲಾಕ್ ಘೆಂವ್ಕ್ ಆಶಾ ಆಸಾ ದೆಖುನ್ ಕಾಂಯ್ ದೋನ್ ತೀನ್ ಲಾಖ್ ರುಪ್ಯಾಂಚಿ ಗರ್ಜ್ ಆಸಾ ಮ್ಹಣೊನ್ ಕಳಯ್ಲೆಂ.

ಮೆನೆಜರಾನ್ ಲಾಂಬ್ ಉಸ್ವಾಸ್ ಕಾಡುನ್ ಎಸ್ತೆಲಾಕ್ ಸಮ್ಜಾಯ್ಲೆಂ.

"ಪಳೆ ಬಾಯೆ, ಮ್ಹಜಾನ್ ಕಾಂಯ್ ಅಡ್ಡಿ ನಾ. ತುಮ್ಚೆರ್ ಬರೊ ಶಿಫಾರಸ್ ಕರ್ತಾಂ. ಕಿತ್ಯಾಕ್ ಮ್ಹಳ್ಯಾರ್ ತುಮಿಂ ದೊನೀ ಪಾವ್ಟಿಂ ಘೆತ್‌ಲ್ಲೆಂ ಲೋನ್ ಫಾರಿಕ್ ಕೆಲಾಂ. ಪುಣ್ ಹಾಂವ್ ವೆಗಿಂಚ್ ವರ್ಗ್ ಜಾವ್ನ್ ವೆಚಾರ್ ಆಸ್‌ಲ್ಲ್ಯಾನ್ ತ್ಯಾ ಲೊನಾ ವಿಶ್ಯಾಂತ್ ನಿರ್ಣಯ್ ಹಾಂವ್ ಘೆಂವ್ಕ್ ಸಕ್ಚೊಂನಾ. ದೆಖುನ್ ತುಮಿಂ ಅನಿ ಥೊಡೊ ವೇಳ್ ರಾಕೊಂಕ್ ಜಾಯ್."

ಎಸ್ತೆಲಾಕ್ ಮಿಸ್ತೆರ್ ಸಮ್ಜಾನಾತ್‌ಲ್ಲೊ ಮ್ಹಳ್ಳೆಂ ಕಳ್‌ಲ್ಲ್ಯಾ ಮೆನೆಜರಾನ್ ಮುಖಾರ್ಸಿಲೆಂ.

"ಲೋನಾಕ್ ಹಾಂವ್ ಶಿಫಾರಸ್ ಕರ್ತಾಂ ತರ್‌ಯೀ ತುಮ್ಚೊ ಬೆಂಕಾಚೊ ರೆಕೋರ್ಡ್ ಬರೊ ಆಸ್‌ಲ್ಲ್ಯಾನ್ ಫುಡ್ಲ್ಯಾ ಮೆನೆಜರಾಕ್ ಕಾಂಯ್ ಚಡ್ ತ್ರಾಸ್ ಜಾಂವ್ಕ್ ನಜೊ, ತರೀ ಕಿತ್ಲೆಂ ಲೋನ್ ಪಾಸ್ ಕರ್‍ಚೆಂ ಮ್ಹಳ್ಳೆಂ ತೆಂ ಮುಖ್ಲ್ಯಾ ಮೆನೆಜಾರಾಚೆರ್ ಹೂಂದ್ವೊನ್ ಆಸಾ, ಪುಣ್ ಕಿತೆಂ ಜಾಲ್ಯಾರೀ ವೆಗಿಂ ಹೆಂ ಕಾಮ್ ಜಾಂವ್ಚೆಂನಾ. ಇಲ್ಲೊ ವೇಳ್ ರಾಕೊಂಕ್ ಪಡ್ತೆಲೆಂ."

ಮೆನೆಜಾರಾನ್ ವೇಳ್ ಜಾತಾ ಮ್ಹಣೊನ್ ಮಾತ್ರ್ ಮ್ಹಳಾಂ ಶಿವಾಯ್ ದೀಂವ್ಕ್ ಸಾಧ್ಯ್ ನಾ ಮ್ಹಣೊನ್ ಸಾಂಗೊಂಕ್ ನಾತ್‌ಲ್ಲೆಂ ಪಳೆಲ್ಲ್ಯಾ ಲತೀಫಾಚಾ ಮನಾಂತ್ ಇಲ್ಲೊ ಸಂತೊಸ್ ಫಾಂಕ್‌ಲ್ಲೊ. ತೊ ಇತ್ಲೊ ತೇಂಪ್ ಹ್ಯಾ ಬಾಜಾರಾಂತ್ ಕಾಮ್ ಕರುನ್ ವಸ್ತುಂಕ್ ಮೆಜುನ್ ಮಾತ್ರ್ ನ್ಹಂಯ್ ಮನ್ಶಾಂಕ್ ಮೆಜ್ಚೆಂ ಕಶೆಂ ಮ್ಹಳ್ಳೆಂಯ್ ಶಿಕ್‌ಲ್ಲೊ. ತಾಚಾ ಮತಿಂತ್‌ಯಿ ನವ್ಯೊ ನವ್ಯೊ ಆಶಾ ಯೆತಾಲ್ಯೊ. ತಾಚಾ ಮಾವ್ಶೆಚೊ ಪೂತ್ ಎದೊಳ್‌ಚ್ ಸೌದಿ ಗೆಲ್ಲೊ. ಡ್ರಾಯ್ವರಾಚಾ ವಿಜಾರ್ ತೊ ಸೌದಿ ಗೆಲ್ಲೊಚ್ ಆತಾಂ ಲತೀಫಾಕ್‌ಯ್ ಗಲ್ಫಾಕ್ ಆಪಯ್ತಾಲೊ. ಪುಣ್ ಲತೀಫಾಕ್ ಭಾಯ್ಲೊ ಗಾಂವ್ ನಾಕಾಸ್‌ಲ್ಲೊ. ಕಾಂಯ್ ಆಪ್ಣಾನ್ ಭಾಯ್ಲ್ಯಾ ಗಾಂವಾಕ್ ಗೆಲ್ಯಾರ್ ತಿಯೊಚಾ ಬಾಯ್ಲೆಪರಿಂ ಕಾಂಯ್ ಆಪ್ಲಿ ಬಾಯ್ಲ್‌ಯಿ ದುಸ್ರ್ಯಾ ದಾದ್ಲ್ಯಾಚೊ ಸಾಂಗಾತ್ ಧರಿತ್ ತರ್ ಮ್ಹಳ್ಳೊ ದುಭಾವ್ ಯೆತಾಲೊ.

ಆತಾಂತಾಂ ಲತೀಫಾಕ್ ಪೊಯ್ಶೆ ಕರುಂಕ್ ಕಠೀಣ್ ಮನ್ ಆಸ್‌ಲ್ಲೆಂ. ಕಿತೆಂ ತರೀ ಕರ್ನ್ ಆಪ್ಣಾನ್ ಪೊಯ್ಶೆ ಕರಿಜಯ್ ಮ್ಹಳ್ಳಿ ವೊಡ್ಣಿಂ ಆಸ್‌ಲ್ಲಿ. ಪೊಯ್ಶೆ ಆಸ್ಲ್ಯಾರ್ ಕಿತೆಂಯ್ ಕರ್‍ಯೆತ್ ಆನಿ ಕಿತೆಂಯ್ ಘೆವ್ಯೆತ್ ಮ್ಹಳ್ಳಿಂ ಚಿಂತ್ನಾಂ ತಾಚಾ ಮತಿಂತ್ ಯೆತಾಲಿಂ. ಏಕ್ ಆಂಗಡ್ ಕೆಲಿ ತರ್ ಉಪ್ರಾಂತ್ ವಹಿವಾಟ್ ಸಾಂಭಾಳುಂಕ್ ಗರ್ಜ್ ಪಡ್ಲ್ಯಾರ್ ಆಂಗ್ಡಿಂತ್ ಎಕಾ ದೊಗಾಂಕ್ ಕಾಮಾಕ್ ದವರ್ತಾಂ. ಆಂಗಡ್ ಬರಿ ಚಲಾತ್ ತರ್ ಆಪ್ಣಾಕ್ ಏಕ್ ಬಾಯ್ಕ್ ಘೆಜಯ್. ಘರ್ ಬಾಂದಿಜಯ್... ಎಕಾ ಪಾಟ್ಲ್ಯಾನ್ ಏಕ್ ಆಶಾ ಎದೊಳ್‌ಚ್ ತಾಚಾ ಮತಿಂತ್ ಕಿರ್ಲಾಲ್ಲ್ಯೊ.

ಅಶೆಚ್ಚ್ ದೀಸ್ ಪಾಶಾರ್ ಜಾಲೆ. ತಿಯೊಚಾ ಮತಿಂತ್ ಆಸ್ಚೊ ದುಭಾವ್ ಸಗ್ಳೊ ಗೆಲಾ ಮ್ಹಳ್ಳೆಂ ಎಸ್ತೆಲಾಚಾ ಮತಿಕ್ ರಿಗ್ತಚ್ಚ್ ತಿಕಾ ಇಲ್ಲೊ ಸುಶೆಗ್ ಮೆಳ್ಳೊ ತರೀ ತಿಚಾ ಮತಿಂತ್ ಏಕ್ ಸವಾಲ್ ಆಸ್‌ಲ್ಲೆಂ ತಿಯೊಕ್ ಕೊಣೆಂ ತಿ ಖಭಾರ್ ದಿಲಿ ಮ್ಹಳ್ಳೆಂ ಏಕ್ ಮಿಸ್ತೆರ್ ಜಾವ್ನ್೦ಚ್ಚ್ ಉರ್ಲೊ.

ಎಸ್ತೆಲಾಚಾ ತೊಟಾಚೊ ಆತಾಂ ಭೊಂಗೊಸ್ತೊಳ್ ಜಾಲ್ಲೊ. ತರ್ಕಾರೆಚಾ ವಾಲಿಂಚಿ ರುಜ್ವಾತ್‌ಚ್ ನಾತ್‌ಲ್ಲಿ. ಫುಲಾಂ ಕಾಂಯ್ ಥೊಡಿಂ ಜಾತಾಲಿಂ. ತರೀ ತಾಂಕಾಂಯ್ ಸಾರ್ಕೊ ಪೋಸ್ ನಾಸ್ತಾಂ ಜಾಂವ್ಚಿಂ ಮೊಗ್ರಿಂ, ಆಬೊಲಿಂ, ಶಿಂವ್ತಿಂ, ಗುಲೊಬ್ ಸಗ್ಳಿಂ ಫುಲಾಂ ಉಣಿಂ ಜಾವ್ನ್ ಆಯಿಲ್ಲಿಂ. ಹೆಣೆಂ ಎಸ್ತೆಲಾ ಪಾಟ್ಲ್ಯಾನ್ ಲತೀಫ್ ಪುರ್ತೊ ಪಿಸೊ ಜಾಲ್ಲೊ. ಘೊಳ್ಚೆ ಸಗ್ಳೆ ಪೊಯ್ಶೆ ಎಸ್ತೆಲಾಕ್ ಸೊರೊ ಭರವ್ನ್ ಖಾಲಿ ಕರ್ತಾಲೊ. ತರೀ ವಾಡ್ ಗೆಲ್ಯಾರೀ ಎಕಾ ದಿಸಾ ಅಸಲ್ ಸಮೇತ್ ಪಾಟಿಂ ಘೆತಲೊಂ ಮ್ಹಳ್ಳೊ ವಿಶ್ವಾಸ್ ತಾಕಾ ಆಸ್‌ಲ್ಲೊ.

ತ್ಯಾ ಶಿವಾಯ್ ಘರಾಂತ್ ಆಸ್ಚೆ ಪೊಣ್ಸಾಚೆ ರೂಕ್, ಆಂಬ್ಯಾಚೆ ರೂಕ್, ಆನಿ ಇತರ್ ರೂಕ್ ಸಗ್ಳೆ ಕಾತರ್ನ್ ವಿಕ್‌ಲ್ಲೆ ಪೊಯ್ಶೆ ಲತೀಫಾಲಾಗಿಂಚ್ ದವ್ರುಂಕ್ ಎಸ್ತೆಲಾನ್ ಸಾಂಗ್‌ಲ್ಲೆಂ. ಆನಿ ಘರಾಕ್ ಲತೀಫ್ ಸರಾಗ್ ಯೆತಾಲೊ ದೆಖುನ್ ಸಭಾರ್ ಪಾವ್ಟಿಂ ಘರಾಕ್ ಗರ್ಜೆಚೊ ಸಾಮಾನ್೦ಯ್ ತೊಚ್ ಹಾಡ್ತಾಲೊ.

ಆತಾಂತಾಂ ಎಸ್ತೆಲಾನ್ ಸೆಜಾರ್ಚಾಲಾಗಿಂ ಉಲಂವ್ಚೆಂ ಬಂದ್ ಕೆಲ್ಲೆಂ. ತಾಕಾಯ್ ಕಾರಾಣ್ ಆಸ್‌ಲ್ಲೆಂ. ಖಬಾರ್ ಗಾಂವಾರ್ ವಿಸ್ತಾರ್‌ಲ್ಲಿ ಮ್ಹಳ್ಳೆಂ ಆತಾಂ ಎಸ್ತೆಲಾಕ್‌ಯಿ ಸಮ್ಜೊನ್ ಆಯಿಲ್ಲೆಂ. ಪಯ್ಲೆಂ ಎಲಿಜ಼್ ತ್ಯಾ ಉಪ್ರಾಂತ್ ಸಭಾರಾಂ ಲತೀಫ್ ಘರಾ ಯೆತೆಚ್ಚ್ ಎಕಾ ನ್ಹಂಯ್ ತರ್ ಎಕಾ ನಿಬಾಂತ್ ಯೆತಾಲಿಂ ಆನಿ ಎಸ್ತೆಲಾಕ್ ಲತೀಫ್ ಕೋಣ್ ಕಿತೆಂ ಸಾಂಗ್ತಾ ಮ್ಹಳ್ಳೆಂ ಸಾಂಗ್ತಾಲೊ. ಪುಣ್ ಎಸ್ತೆಲಾಕ್ ಆತಾಂ ತಿಚಾ ಕರ್ನೆಂತ್ ಕಸ್ಲೆಚ್ಚ್ ಚುರ್ಚುರೆ ನಾತ್‌ಲ್ಲೆ.

ದೀಸ್ ಗೆಲ್ಲೆಪರಿಚ್ಚ್ ಕಶೆಂ ಎಸ್ತೆಲಾಚಾ ಮತಿಂತ್ ತಿಯೊಸೊ ಉಡಾಸ್ ಉಣೊ ಜಾವ್ನ್ ಆಯ್ಲೊಗೀ ತಶೆಂಚ್ ಭುರ್ಗ್ಯಾಂಚಾ ಮತಿಂತ್‌ಯಿ ತಾಂಚೊ ಪಪ್ಪಾ ನಾ ಮ್ಹಳ್ಳೆಂ ಚಿಂತಾಪ್ ಹಳ್ತಾರ್ ಉಣೆಂ ಜಾವ್ನ್ ಆಯ್ಲೆಂ. ಜೊಯೆಲ್ ಆತಾಂ ಧಾವೆಚಾ ಕ್ಲಾಶಿಂತ್ ಶಿಕ್ತಾಲೊ ಆನಿ ಜಿವಿತಾ ನೊವೆ ಕ್ಲಾಸಿಂತ್ ಶಿಕ್ತಾಲೆಂ. ಜೊಯೆಲಾಕ್ ಧಾವಿ ಜಾತೆಚ್ಚ್ ಕೊಲೆಜಿಕ್ ವೆಚಿ ಆಶಾ ಆಸ್‌ಲ್ಲಿ ಆನಿ ಅಪ್ಲ್ಯಾ ಜಿಣ್ಯೆಂತ್ ಕಿತೆಂ ಜಾಯ್ಜಯ್ ಮ್ಹಳ್ಳಿ ವಿಂಚವ್ಣ್ ತಾಣೆಂ ಕೆಲಿನಾ ತರೀ ಕೊಲೆಜಿಕ್ ವಚಾಜಯ್ ಆನಿ ಆಪ್ಣಾಕೀ ಜಾಯಿತ್ತೆ ಈಶ್ಟ್ ಆಸಾಜಯ್ ಆನಿ ಆಪ್ಣಾಸವೆಂಯ್ ಏಕ್ ಬಾಯ್ಕ್ ಆಸೊಂಕ್ ಜಾಯ್ ಮ್ಹಳ್ಳಿಂ ಚಿಂತ್ನಾಂ ತಾಚಾ ಮತಿಂತ್ ಆಸ್‌ಲ್ಲಿಂ. ದೆಖುನ್ ತಾಣೆಂ ಪರತ್ ಲತೀಫಾಕ್ ಧರುನ್ ಏಕ್ ಡ್ರಾಯ್ವಿಂಗ್ ಲೈಸನ್ಸ್ ಕರಯ್ಲೆಂ. ಆಪ್ಣಾಕ್ ಜಾಯ್ ಜಾಲ್ಲೆಂ ಬರಯ್ಲ್ಯಾರ್ ಆಪ್ಲೊ ಬಾಪುಯ್ ನಾ ಮ್ಹಣಾಸೊನಾ ಮ್ಹಳ್ಳೆಂ ಜಾಣಾಸ್‌ಲ್ಲ್ಯಾ ಜೊಯೆಲಾನ್ ತಿಯೊಕ್ ಏಕ್ ಬಾಯ್ಕ್ ಘೆಂವ್ನ್ ದೀಂವ್ಕ್ ಬರಯ್ಲೆಂ.

ಜೊಯೆಲ್ ಆನಿ ಜಿವಿತಾಯ್ ಆತಾಂ ಭುರ್ಗಿಂ ಜಾವ್ನ್ ಉರ್ಲಿಂ ನಾಂತ್. ತಾಂಚಾಯ್ ಕುಡಿಂತ್ ಬದ್ಲಾವಣ್ ಜಾವ್ನ್ ಆಯಿಲ್ಲಿ. ಜೊಯೆಲ್ ಎದೊಳ್‌ಚ್ ವೊಂಟಾರ್ ಮಿಶಿಯೊ ಫುಟವ್ನ್ ಲಾಂಬ್ ಆನಿ ತಿಯೊಪರಿಂಚ್ ದಾಟೊಮೊಟೊ ಜಾವ್ನ್ ಆಸ್‌ಲ್ಲೊ. ಜಿವಿತಾಯ್ ಹಳ್ತಾರ್ ಫುಲೊನ್ ಆಯಿಲ್ಲೆಂ. ತಾಕಾಯ್ ಆವಯ್ಚಿಚ್ ಸೊಭಾಯ್ ಆಯಿಲ್ಲಿ. ಲಾಂಬ್ ರಶ್ಮಿ ಕೇಸ್, ಗೊರ್‍ಶಿ ಕಾತ್ ಆನಿ ಫುಗ್ರೆ ಗಾಲ್, ತಾಂಬ್ಡೆ ವೋಂಟ್ ಅಸೊನ್ ತೆಂ ಆಟ್ವ್ಯಾ ಕ್ಲಾಶೆಂತ್ ಶಿಕ್ತಾನಾ ಹೆರ್ ಕ್ಲಾಶೆಂತ್ ಶಿಕ್ಚಾಂಕೀ ತಾಚೆರ್ ದೊಳೆ ಆಸ್‌ಲ್ಲೆ. ಇಸ್ಕೊಲ್ ಜಾತೆಚ್ ಸಯ್ತ್ ಗಾಂವ್ಚೆ ಪೊಕ್ರಿ ತರ್ನಾಟೆ ತಾಂಚಾ ಇಸ್ಕೊಲಾ ಭಂವಾರಿಂ ಆಶಾರ್ ಪಾಶಾರ್ ಜಾತಾಲೆ ಆನಿ ಜಿವಿತಾಚೆಂ ಗಮನ್ ಆಪ್ಣಾಚೆಂ ವೊಡುಂಕ್ ಪ್ರೇತನ್ ಕರ್ತಾಲೆ.

ತಿಯೊಕ್ ಬೆಂಕಾಚೆಂ ರೀಣ್ ಫಾರಿಕ್ ಜಾಂವ್ಕ್ ನಾತ್‌ಲ್ಲೆಂ ಆನಿ ಭುರ್ಗ್ಯಾಂನಿ ಬಾಯ್ಕ್ ಹಾಡುಂಕ್ ಸಾಂಗ್‌ಲ್ಲೆಂ ಪಳೆವ್ನ್ ತಾಚಾ ಹಾತಾಂತ್ ಆಸ್ಚೆ ಸಗ್ಳೆ ಪೊಯ್ಶೆ ತಾಣೆಂ ಎಕ್ಟಾಂಯ್ ಕರ್ನ್ ಸುಮಾರ್ ಸಾಟ್ ಹಜಾರ್ ರುಪಯ್ ಗಾಂವಾಕ್ ಧಾಡ್ಲೆ. ಎಸ್ತೆಲಾಕ್ ತಾಣೆಂ ಕಾಗಾದ್ ಬರವ್ನ್ ಸಾಂಗ್ಲೆಂ ತುಕಾ ಆನಿ ಭುರ್ಗ್ಯಾಂಕ್ ಜಾಯ್ ಆಸ್ಚೆಂ ಗರ್ಜೆಚೆಂ ಕಿತೆಂಚ್ ಉಣೆಂ ಕರಿನಾಕಾ ಮ್ಹಣೊನ್.

ಎಸ್ತೆಲಾಚಾ ಚಿಂತ್ಪಾ ಪರ್ಮಾಣೆಂಚ್ ಜಾಲ್ಲೆಂ. ತಿಣೆಂ ಘರಾಕ್ ಗರ್ಜೆಚೊ ವಸ್ತು ಪಯ್ಲೆಂ ಹಾಡ್ಲ್ಯೊ. ಏಕ್ ಇಲ್ಲೆಂ ಪರ್ನೆಂ ಬಾಯ್ಕ್ ಲತೀಫಾಚಾ ವಳ್ಕಿಚಾ ಮನ್ಶಾಲಾಗ್ಚೆಂ ಘೆವ್ನ್ ತೆಂ ಜೊಯೆಲಾಕ್ ದಿಲೆಂ ಆನಿ ಘರಾಕ್ ಜಾಯ್ ಜಾಲ್ಲೊ ಗರ್ಜೆಚೊ ಸಾಮಾನ್ ಹಾಡಿಲಾಗ್ಲೆಂ.

ಕಾಂಯ್ ಗರ್ಜ್ ಪಡ್ಲ್ಯಾರ್ ತಿಚಾ ಹಾತಾಂತ್ ಜಾಗ್ಯಾಚಿಂ ದಸ್ತಾವೆಜಾಂ ಆಸ್‌ಲ್ಲಿಂ ಆನಿ ಬೆಂಕಾಂತ್ ಲೋನ್ ಖಂಡಿತೀ ಮೆಳ್ತಾ ಮ್ಹಣೊನ್ ತೆಂ ಜಾಣಾಸ್‌ಲ್ಲೆಂ. ಅಶೆಂ ದೀಸ್ ಗೆಲ್ಲೆಪರಿಂಚ್ ಎಸ್ತೆಲ್ ಘರಾ ಎಕೆಕ್ ವಸ್ತು ಹಾಡುಂಕ್ ಲಾಗ್ಲೆಂ. ತಾಕಾ ತಿಯೊನ್ ಕೆದಿಂಕ್‌ಚ್ ನಾಕಾ ಮ್ಹಣೊನ್ ಬರಂವ್ಕ್ ನಾತ್‌ಲ್ಲ್ಯಾನ್ ತಾಚಾ ಖುಶೆ ಪ್ರಕಾರ್ ಲತೀಫಾಚಾ ಮಜತೆನ್ ಘರಾಂತ್ ಆತಾಂ ಪಳೆಂವ್ಕ್ ಟಿವಿ ಹಾಡ್ಲಿ, ಬರಿಂ ಕದೆಲಾಂ ಮೆಜಾಂ ಹಾಡ್ಲಿಂ, ಭುರ್ಗ್ಯಾಂಕ್ ಬೂಕ್ ದವ್ರುಂಕ್ ಕಬಾಟಾಂ ಹಾಡ್ಲಿಂ, ವಸ್ತ್ರಾಂ ದವ್ರುಂಕ್ ಕಬಾಟಾಂ ಹಾಡ್ಲಿಂ. ಆನಿ ಉರುಲ್ಲೆ ಸಗ್ಳೆ ಪೊಯ್ಶೆ ವರ್ನ್ ಅಲಂಗಾರ್ಚಾ ಬೆಂಕಾಂತ್ ಘುಟಾನ್ ಜಮೊ ಕೆಲೆ.

ಮೂಡ್‌ಬಿದ್ರಿಚಾ ಮೆನೆಜರಾಚೆಂ ವರ್ಗ್ ಜಾತೆಚ್ಚ್ ನವೊ ಮೆನೆಜರ್ ಆಯ್ಲೊ. ಚಿಕ್‌ಮಗ್ಳೂರಾ ಥಾವ್ನ್ ಆಯಿಲ್ಲೊ ತೊ ಯೇವ್ನ್ ಇಲ್ಲೆಶ್ಯಾ ತೆಂಪಾ ಭಿತರ್ ಬೆಂಕಾಚಾ ಗಿರಾಯ್ಕ್ಯಾಂಕ್ ವಳ್ಕೊಂಕ್ ಲಾಗ್ಲೊ. ಆನಿ ಏಕ್ ದೀಸ್ ಎಸ್ತೆಲ್ ಯೇವ್ನ್ ಮೆನೆಜರಾಕ್ ಮೆಳೊನ್ ಆಪ್ಣಾನ್ ಆಂಗಡ್ ಮೊಲಾಕ್ ಘೆಂವ್ಚಾಕ್ ಲೋನ್ ವಿಚಾರ್‌ಲ್ಲಿ ಸಂಗತ್ ಕಳಯ್ಲಿ. ಮೆನೆಜರಾನ್ ತಿಯೊಚಾ ನಾಂವಾರ್ ಆಸ್ಚೆಂ ಎಕಾಂವ್ಟ್ ಪಳೆಯ್ಲೆಂ. ತಾಂತುಂ ಬಿಲ್ಕುಲ್ ಪೊಯ್ಶೆ ನಾತ್‌ಲ್ಲೆ. ತ್ಯಾ ಶಿವಾಯ್ ತೆಂ ಎಕಾಂವ್ಟ್ ಎನ್.ಆರ್.ಆಯ್ ನ್ಹಂಯ್ ಆಸ್‌ಲ್ಲೆಂ ದೆಖುನ್ ಏಕ್ ಘಡಿ ತೊ ಚಿಂತುಂಕ್ ಪಡ್ಲೊ. ಗಲ್ಫಾಗಾರಾಂಚೆ ಎಕಾಂವ್ಟ್ ಆಸ್‌ಲ್ಲೆಂ ತರ್ ಕಾಂಯ್ ತ್ರಾಸ್ ಜಾತೆನಾಂತ್ ತರೀ ತೊ ಅಪ್ಲೇಸ್ತಕಿಂ ಚಿಂತಿಲಾಗ್ಲೊ.

"ವ್ಹಯ್ ತುಮ್ಕಾಂ ಲೋನ್ ದಿಂವ್ಚಾಕ್ ಆದ್ಲ್ಯಾ ಮೆನೆಜರಾನ್ ಶಿಫಾರಾಸ್‌ಯ್ ಕೆಲ್ಯಾ. ಪುಣ್ ಲೋನ್ ಕೊಣಾಚಾ ನಾಂವಾರ್ ಕಾಡಿಜಯ್? ತಿಯಾದೊರ್ ರೊಜಾರಿಯೊಗೀ ಯಾ ಸ್ಟೆಲ್ಲಾ ರೊಜಾರಿಯೊ?" ಮ್ಹಣೊನ್ ಸವಾಲ್ ಕೆಲೆಂ. ಎಸ್ತೆಲಾನ್ ಏಕ್ ಘಡಿ ಶಿಂಪಿ ತಿಯೊಚಾ ನಾಂವಾರ್ ಕಾಡುಂಕ್ ಸಾಂಗ್ಲೆಂ. ಮೆನೆಜರ್ ಚಿಂತುಂಕ್ ಪಡ್ಲೊ. ಇತ್ಲೊ ದುಡು ಪರ್ಗಾಂವಾಂತ್ ಆಸ್ಚಾ ಮನ್ಶಾಕ್ ಲೊನಾ ರುಪಾರ್ ದೀಂವ್ಕ್ ತಾಚಾನ್ ಸಾಧ್ಯ್ ನಾತ್‌ಲ್ಲೆಂ. ಕಾಂಯ್ ಫಾಲ್ಯಾಂ ಚಡ್‌ಉಣೆಂ ಜಾಯ್ತ್ ತರ್ ಆಪ್ಲ್ಯಾ ಕಾಮಾಕ್ ಸಂಚಿಕಾರ್ ಯೇತ್ ಮ್ಹಳ್ಳಿ ಸಂಗತ್ ತೊ ಬರ್‍ಯಾನ್ ಜಾಣಾಸ್‌ಲ್ಲೊ. ತರೀ ಎಸ್ತೆಲಾನ್ ಮೆನೆಜರಾಕ್ ಸಾಂಗ್ಲೆಂ. ಹಾಚಾಧಿಂ ಸಯ್ತ್ ಆಪ್ಣಾನ್ ಘೆತ್‌ಲ್ಲೆಂ ಲೋನ್ ಆಪ್ಣಾನ್ ಫಾರಿಕ್ ಕೆಲಾಂ ಆನಿ ಘರ್ಚಿಂ ದಸ್ತಾವೆಜಾಂ ಮ್ಹಜಾಲಾಗಿಂ ಆಸಾತ್ ಮ್ಹಣೊನ್ ಎಸ್ತೆಲಾನ್ ಸಾಂಗ್ತಾನಾ ಮೆನೆಜರಾನ್ ಕಪಲಾನ್ ಮಿರಿಯೊ ಘಾಲುನ್ ಏಕ್ ಘಡಿ ಚಿಂತಿಲಾಗ್ಲೊ. ಆನಿ ದೋನ್ ದಿಸಾಂ ಉಪ್ರಾಂತ್ ಯೇಂವ್ಕ್ ಸಾಂಗ್ಲೆಂ.

ದೋನ್ ಯಾ ತೀನ್ ಲಾಖ್ ಮ್ಹಳ್ಯಾ ಕಾಂಯ್ ಚಿಲ್ಲರ್ ನ್ಹಂಯ್ ಮ್ಹಳ್ಳೆಂ ತೊ ಜಾಣಾಸ್‌ಲ್ಲೊ. ತರೀ ಅಸಲ್ಯಾ ಗಿರಾಕಿಂಕ್ ಖಾಲಿ ಹಾತಾಂತ್ ಪಾಟಿಂ ಧಾಡುಂಕ್ ತಾಕಾ ನಾಕಾಸ್‌ಲ್ಲೆಂ. ತೇಂಯ್ ಗಲ್ಫಾಗಾರಾಂಕ್ ಪಾಟಿಂ ಧಾಡ್ಲೊ ತರ್ ತಾಚೊ ಪರಿಣಾಮ್ ಬರೊ ಜಾಂವ್ಚೊನಾ ಮ್ಹಳ್ಳೆಂ ತೊ ಎದೊಳ್‌ಚ್ಚ್ ಸಮ್ಜಾಲ್ಲೊ. ತಾಣೆಂ ತಿಯೊಚಾ ಲೊನಾಚಿ ಚರಿತ್ರಾ ಪಳೆಲಿ. ದೊನೀಂ ಪಾವ್ಟಿಂ ತಾಣೆಂ ಸಗ್ಳೆಂ ಲೋನ್ ಎಕಾಚ್ಚ್ ಕಂತಾನ್ ಭರ್‌ಲ್ಲೆಂ ಆನಿ ಅಶೆಂ ಆಸ್ತಾಂ ತಾಕಾ ಎಸ್ತೆಲಾಚೆರ್ ಕಿತ್ಯಾಕ್‌ಗೀ ಭರ್ವಸೊ ಆಯ್ಲೊ. ಆನಿ ತಾಣೆಂ ದೋನ್ ಲಾಖ್ ರುಪಯ್ ಲೋನ್ ಜಾವ್ನ್ ಪಾಸ್ ಕರ್‍ಯೆತ್ ಮ್ಹಣೊನ್ ಚಿಂತ್ಲೆಂ ಆನಿ ತೆಚ್ಚ್ ಪರ್ಮಾಣೆಂ ಅರ್ಜೊ ತಯಾರ್ ಕೆಲ್ಯೊ.

ದೋನ್ ದಿಸಾಂ ಉಪ್ರಾಂತ್ ಆಯಿಲ್ಲ್ಯಾ ಎಸ್ತೆಲಾನ್ ಘರ್ಚಿಂ ದಸ್ತಾವೆಜಾಂ ಮೆನೆಜಾರಾಚಾ ಹಾತಾಂತ್ ದಿಲಿಂ ಆನಿ ಮೆನೆಜರಾನ್ ದಿಲ್ಲ್ಯಾ ಫೊರ್ಮಾಂನಿ ದಸ್ಕತ್ ಘಾಲಿ. ಆನಿ ಎಕಾ ಹಾಪ್ತ್ಯಾ ಭಿತರ್ ಪೊಯ್ಶೆ ಎಕಾಂವ್ಟಾಕ್ ಜಮೊ ಜಾತೆಲೆ ಮ್ಹಳ್ಳೆಂ ಕಳೊನ್ ತೆಂ ಸಂತೊಸಾನ್ ಗೆಲೆಂ.

ಹಿ ಖಬಾರ್ ಆಯ್ಕಾಲ್ಲ್ಯಾ ಲತೀಫಾಚಾ ಸಂತೊಸಾಚಿ ಗಡ್ ಮಿರ್‍ವಲ್ಲಿ. ತಾಣೆಂ ಚಿಂತ್‌ಲ್ಲೆಪರಿಂಚ್ ಜಾಲ್ಲೆಂ. ತರ್ ಆಪ್ಣಾನ್ ಇತ್ಲೆ ದೀಸ್ ಘೆತ್‌ಲ್ಲಿ ಮಿನತ್ ಸುಫಳ್ ಜಾಲ್ಲಿ ಮ್ಹಳ್ಳೆಂ ಚಿಂತಾಪ್ ತಾಚಾ ಮತಿಂತ್ ಆಯ್ಲೆಂ. ಏಕ್ ಪಾವ್ಟಿಂ ಪೊಯ್ಶೆ ಮೆಳ್ತಿತ್ ತರ್ ಆಪುಣ್ ಎಕಾ ಆಂಗ್ಡಿಚೊ ಧನಿ ಜಾತಲೊಂ. ಆನಿ ಉಪ್ರಾಂತ್ ಆಪ್ಲ್ಯಾ ಜಿಣ್ಯೆಂತ್ ಕಶ್ಟ್ ಆಸ್ಚೆನಾಂತ್ ಮ್ಹಳ್ಳಿಂ ಚಿಂತ್ನಾಂ ಘೆವ್ನ್ ಎಸ್ತೆಲಾಕ್ ತಾಣೆಂ ಅರ್ಗಾಂ ದೀಲಾಗ್ಲೊ.

ತಿಯೊಕ್ ಮಾತ್ ಹ್ಯಾ ಖಂಚಾಚ್ಚ್ ಸಂಗ್ತ್ಯಾಂಚಿ ಖಬಾರ್ ನಾತ್‌ಲ್ಲಿ. ತೊ ಬಾವ್ಡೊ ಏಕ್ ಪಾವ್ಟಿಂ ಆಪ್ಲ್ಯಾ ಘರಾಂತ್ ಆಸ್ಚೆ ಅನ್ವಾರ್ ನಿವಾರೊಂದಿ ಆನಿ ಘರಾಕ್ ಕಿತೆಂ ಜಾಯ್ ತೆಂ ಯೇಂವ್ದಿ ಆನಿ ಕೆನ್ನಾ ಆಪ್ಲ್ಯಾ ಘರಾಂತ್ ಆಪ್ಣಾಚಿ ಗರ್ಜ್ ಮ್ಹಣೊನ್ ದಿಸ್ತಾಗೀ ತೆನ್ನಾ ಗಾಂವಾಕ್ ಗೆಲ್ಯಾರ್ ಜಾಲೆಂ ಮ್ಹಣೊನ್ ಚಿಂತಿಲಾಗ್ಲೊ. ನ್ಹಂಯ್ ತರ್ ತಾಂಚಾ ಮತಿಂತ್ ಆಸ್ಚೊ ಆಶಾ ಆಪ್ಣಾಚಾ ಯೆಣ್ಯಾವರ್ವಿಂ ದೆಸ್ವಾಟೊನ್ ತಾಂಚಾ ನಿರಾಶೆಕ್ ಆಪ್ಣಾನ್ ಕಾರಾಣ್ ಜಾಯ್ನಾಯೆ ಮ್ಹಳ್ಳಿಂ ಚಿಂತ್ನಾಂಯ್ ತಾಚಾ ಮತಿಂತ್ ಆಸ್‌ಲ್ಲಿಂ. ತಾಕಾ ಪರತ್ ರೀಣ್ ಘೆಂವ್ಚಿ ಗರ್ಜ್ ಉದೆಲಿ ನಾ. ತಾಣೆಂ ಮಹಿನ್ಯಾ ಮಹಿನ್ಯಾಕ್ ಚಾರ್ ಹಜಾರ್ ರುಪಯ್ ಧಾಡ್ಲ್ಯಾರೀ, ತಾಚೊ ಖರ್ಚ್ ಕಾಡ್ನ್ ಇಲ್ಲೆ ಪೊಯ್ಶೆ ಉರಯ್ತಾಲೊ. ತ್ಯಾ ಶಿವಾಯ್ ತಾಕಾ ಪಿಯೆವ್ಣ್ಯಾಚಿ ಜಾಂವ್ ಯಾ ಸಿಗ್ರೆಟ್ ವೊಡ್ಚಿ ಜಾಂವ್ ಕಸಲಿಚ್ ಸವಯ್ ನಾತ್‌ಲ್ಲ್ಯಾನ್, ಖಾಂವ್ಕ್ ಪೋಟ್‌ಭರ್ತಾಸರ್ ತೆಚ್ ಗುದಾಂವಾಂ ಬಗ್ಲೆಚಾ ಕೆಂಟಿನಾಂತ್ ಮೆಳ್ತಾಲೆಂ ದೆಖುನ್ ತಾಕಾ ಚಡ್ ಖರ್ಚ್ ನಾತ್‌ಲ್ಲೊ. ತರೀ ತಾಚಾ ಹಾತಾಂತ್, ಆಪ್ಲ್ಯಾ ಕುಟ್ಮಾಚಾಂಕ್ ಭಾಂಗಾರ್ ಘೆಂವ್ಚಾಕ್ ಮ್ಹಣೊನ್ ಜಮೊ ಕೆಲ್ಲೆ ಪೊಯ್ಶೆ ಆಸ್ತಾನಾ ಆಪ್ಣಾನ್ ಭಾಂಗಾರ್ ಘೆಂವ್ಕ್ ನಾತ್‌ಲ್ಲೆಂ ಬರ್‍ಯಾಕ್‌ಚ್ ಪಡ್ಲೆಂ ಮ್ಹಳ್ಳೆಂ ಕಳ್ಳೆಂ. ಗಾಂವಾಂತ್ ಅವ್ಚಿತ್ತ್ ಕಶ್ಟ್ ಯೆತಾನಾ ಹೆ ಪೊಯ್ಶೆ ಧಾಡುಂಕ್ ತಾಕಾ ಸಾಧ್ಯ್ ಜಾತಾಲೆಂ.

ತಾಕಾ ತವಳ್‌ತವಳ್ ಮಣಿ ಆಪ್ಲ್ಯಾ ಭುರ್ಗ್ಯಾಂನಿ ಬರಂವ್ಚಾ ಕಾಗ್ದಾ ವಿಶ್ಯಾಂತ್ ಆಯ್ಕಾತಾನಾ ಸಂತೊಸ್ ಭೊಗ್ತಾಲೊ. ತಾಕಾಯ್ ತಾಚಾ ಭುರ್ಗ್ಯಾಂಚೆರ್ ಏಕ್ ದೀಶ್ಟ್ ಘಾಲ್ಚಿ ಆಶಾ ಯೆತಾಲಿ. ಅಶೆಂ ಉಮಾಳೊನ್ ಯೆಂವ್ಚಾ ಆಶಾಂಕ್ ತೊ ಥಂಯ್ಚ್ ರಾವಯ್ತಾಲೊ. ಆಪ್ಲ್ಯಾ ಭುರ್ಗ್ಯಾಂಚಾ ಹರ್ಯೆಕಾ ಗರ್ಜಾಂಕ್ ಆಪ್ಣಾನ್ ಪಾವಾಜಯ್ ತರ್ ಆಪ್ಣಾನ್ ಹೊ ಸಾಕ್ರಿಫಿಸ್ ಕರ್ಚೊ ಗರ್ಜ್ ಮ್ಹಣೊನ್ ತೊ ಸಮ್ಜಾಲ್ಲೊ. ತಾಕಾ ಉಟ್ತಾನಾ, ಬೊಸ್ತಾನಾ, ನಿದ್ತಾನಾ, ಯಾ ಜಾಗೊ ಆಸ್ತಾನಾ ಫಕತ್ತ್ ತಾಚಾ ಕುಟ್ಮಾಕ್ ಬರೆ ದೀಸ್ ಹಾಡ್ಚೆಂಚ್ ತಾಚಾ ಮತಿಂತ್ ಆಸ್‌ಲ್ಲೆಂ. ಆನಿ ತ್ಯೇ ಖಾತಿರ್ ತಾಕಾ ಕಿತ್ಲೆ ಕಶ್ಟ್ ಆಯ್ಲ್ಯಾರೀ ತಾಕಾ ತೆ ಕಶ್ಟ್ ಮ್ಹಣೊನ್ ಭೊಗ್ಲೆನಾಂತ್. ತಾಕಾ ಕಾಮಾಂತ್ ಕಾಂಯ್ ಕಶ್ಟ್ ನಾತ್‌ಲ್ಲೆ ತರೀ ಭೊಗ್ಚಿ ಉಭ್ಗೊಣ್, ಹೆರಾಂಚಾ ಜಿವಿತಾಚಿ ಕಾಣಿಂ ಆಯ್ಕಾತಾನಾ ಆಪ್ಲ್ಯಾ ಜಿಣ್ಯೆಂತ್‌ಯ್ ಅಸಲೆ ಕಶ್ಟ್ ಯೆಂವ್ಚೆ ನಾಕಾತ್ ಮ್ಹಳ್ಳೆಂ ಚಿಂತಾಪ್ ಯೆತಾಲೆಂ.

ದಾವಿದಾಕ್ ಎಸ್ತೆಲಾಚೆರ್ ಇಲ್ಲೊ ರಾಗ್ ಆಸ್‌ಲ್ಲೊ ತರೀ ತಿಯೊ ಕಸೊ ಆಸಾಗಾಯ್? ಕಿತ್ಯಾಕ್ ಅಜೂನೀಂ ಗಾಂವಾಕ್ ಯೆಂವ್ಕ್ ನಾ ಮ್ಹಳ್ಳಿಂ ಚಿಂತ್ನಾಂ ಮತಿಂತ್ ತವಳ್ ತವಳ್ ಯೆತಾಲಿಂ. ತಾಚಾ ಮಧೆಂ ತಾಚಾ ಪುತಾಚೊ ಕ್ರೀಜ್ಮ್ ಜಾಲೊ ಆನಿ ಸಾದೆಂ ಜೆವಾಣ್ ಕೆಲ್ಲೆಂ ಆನಿ ಸೆಜಾರ್ಚಾ ಎಸ್ತೆಲಾಕ್‌ಯಿ ಆಪಯಿಲ್ಲೆಂ. ಆನಿ ಎಸ್ತೆಲ್ ಗೆಲೆಂನಾ ಬಗಾರ್ ಭುರ್ಗ್ಯಾಂಕ್ ಧಾಡ್ಲೆಂ. ಭುರ್ಗಿಂ ವಚೊನ್ ಜೇವ್ನ್ ಆಯಿಲ್ಲಿಂ.

ದಾವಿದಾಚೆಂ ಘರ್ ಕಶ್ಟಾನ್ ತರೀ ಸಮಧಾನೆನ್ ಚಲೊನ್ ಆಸ್‌ಲ್ಲೆಂ. ತಾಕಾ ತಿಯೊಚಾ ಘರಾಂತ್ ಜಾಲ್ಲಿ ಬದ್ಲಾವಣ್ ಪಳೆತಾನಾ ಚುರ್ಚುರೆ ಭೊಗ್ತಾಲೆ ಶಿವಾಯ್ ಮೊಸೊರ್ ನ್ಹಂಯ್. ಎಕಾ ತೆಂಪಾರ್ ಮ್ಹಜೆಸವೆಂ ಕಾಮ್ ಕರುನ್ ಆಸ್ಚೊ ತಿಯೊ ಆಜ್ ಮಿನತ್ ಕರುನ್ ಗಲ್ಫಾಕ್ ಗೆಲ್ಲೊಚ್ ಇತ್ಲೊ ಮುಖಾರ್ ಪಾವ್ಲಾ ಮ್ಹಳ್ಳೆಂ ಪಳೆವ್ನ್ ತಾಕಾ ಸಂತೊಸ್ ಜಾಲೊ. ತರೀ ತಿಯೊಚಾ ಸಂತೊಸಾಕ್ ಖರೊ ಅರ್ಥ್ ಖಂಡಿತ್ ನಾ ಮ್ಹಳ್ಳಿಂ ಚಿಂತ್ನಾಂ ತಾಚಾ ಮತಿಭಿತರ್ ಆಸ್‌ಲ್ಲಿಂ.

ಅಶೆಂ ಗಲ್ಫಾಚಾ ಜೊಡಿಕ್ ಗೆಲ್ಲ್ಯಾಂಚಾ ಘರಾ ಚಡಾವತ್ ಜಾವ್ನ್ ಭೊಂಗೊಸ್ತೊಳ್ ಜಾಂವ್ಚೊ ತಾಣೆಂ ಆಯ್ಕಾಲ್ಲೊ. ಜಾಯಿತ್ತ್ಯಾಂಚಿ ಘರಾಂ ಬರಿಂ ಜಾಲ್ಲಿಂ ತರೀ ಜಾಹಿತ್ತಿಂ ಘರಾಣಿಂ ಪರ್ತಾಲ್ಲಿಂ. ಫಕತ್ ಅಬ್ಲೇಶ್ಪಣ್ ಆನಿ ದುರಾಶಾ. ಹಾಂವ್೦ಚ್ ವಡ್ ಮ್ಹಳ್ಳಿಂ ಚಿಂತ್ನಾಂ. ಗಲ್ಫಾಂತ್ ಕಸ್ಲೆಯ್ ಕಶ್ಟ್ ಕಾಡುಂಕ್ ತಯಾರ್ ಆಸ್ಚೆ ಆಮಿಂ ಗಾಂವಾಂತ್ ಮಾತ್ರ್ ರಾಯ್ ಮಾತ್ರ್ ನ್ಹಂಯ್ ಚಕ್ರವರ್ತಿ ಸಯ್ತ್.

ಎಸ್ತೆಲಾಚಾ ಮತಿಂತ್ ಫಕತ್ ಏಕ್ ಆಶಾ ಆಸ್‌ಲ್ಲಿ ಕೀ ಆಪ್ಣಾಚಾಯ್ ನಾಂವಾರ್ ಬೆಂಕಾಂತ್ ಲಾಕಾಂನಿ ದುಡು ಆಸಾಜಯ್. ಕಾಂಯ್ ಆಪ್ಣಾಕ್‌ಯಿ ಗರ್ಜ್ ಪಡ್ಲ್ಯಾರ್ ತೊ ದುಡು ಪಾವಾಜಯ್ ಮ್ಹಳ್ಳಿ ದುರಾಶಾ. ಪುಣ್ ಹ್ಯಾ ದುಡ್ವಾಂತ್ ಕೊಣಾಯ್ಕೀ ಹಕ್ಕ್ ಆಸೊಂಕ್ ನಜೊ. ಆಪ್ಣಾಚೊ ದುಡು ತೊ ಆಪ್ಣಾಕ್‌ಚ್. ಕಸಲಿಂ ಪಿಶಿಂ ಚಿಂತ್ನಾಂ?

ಎದೊಳ್ ಪರ್‍ಯಾಂತ್ ಗಲ್ಫಾಂತ್ ಕಾಮ್ ಕರುನ್ ಆಸ್‌ಲ್ಲೊ ತಿಯೊ ಏಕ್ ಪಾವ್ಟಿಂ ಸಯ್ತ್ ಅಸಲಿಂ ಚಿಂತ್ನಾಂ ಚಿಂತುಂಕ್ ನಾತ್‌ಲ್ಲೊ. ತಾಕಾ ತಾಚಾ ಕುಟ್ಮಾಚೆರ್ ಸಗ್ಳಿ ಪಾತ್ಯೆಣಿಂ ಆಸ್‌ಲ್ಲಿ. ತಾಣೆಂ ಜ್ಯೆಂ ಕಿತೆಂ ಜೊಡ್ಲಾಂ ತೆಂ ಎಸ್ತೆಲಾಕ್ ಧಾಡ್‌ಲ್ಲೆಂ. ಕಿತ್ಲೆ ಪೊಯ್ಶೆ ಧಾಡ್ಲೆ ಮ್ಹಳ್ಳೆಂ ಲೇಖ್ ಸಯ್ತ್ ತಾಚೆಲಾಗಿಂ ನಾತ್‌ಲ್ಲೆಂ. ಕಿತ್ಯಾಕ್ ಬೆಶ್ಟೆಂ ಪೊಯ್ಶ್ಯಾಂ ವಿಶ್ಯಾಂತ್ ಚಿಂತುನ್ ಮತಿಚೆಂ ಸಮಧಾನ್ ಪಾಡ್ ಕರ್ಚೆಂ? ಕಿತೆಂ ಜಾಲ್ಯಾರೀ ಆಪ್ಣಾಚಿಚ್ ಬಾಯ್ಲ್ ಆನಿ ಆಪ್ಣಾಚಿಂಚ್ ಭುರ್ಗಿಂ. ದೆಖುನ್ ತಾಣೆಂ ಫಕತ್ ಎಸ್ತೆಲಾಕ್ ಪೊಯ್ಶೆ ಧಾಡ್ಲೆ ಆನಿ ಸಗ್ಳಿ ಜವಾಬ್ಧಾರಿ ಎಸ್ತೆಲಾಚೆರ್ ಸೊಡ್ಲಿ.

ಸಾಕ್ರಾಮೆಂತಾಂತ್ ಆಪ್ಲೊ ಹಾತ್ ಧರ್‌ಲ್ಲ್ಯಾ ಜಿಣ್ಯೆ ಸಾಂಗಾತಿಣೆ ಥಾವುನ್ ಆಪ್ಲ್ಯಾ ಪಿಡೆ ವಿಶ್ಯಾಂತ್ ಲಿಪಂವ್ಚೆಂ ತಿಯೊಕ್ ಬರೆಂ ಲಾಗ್‌ಲ್ಲೆಂ ನಾ. ಕಶ್ಟ್ ಆಸೊಂ ಯಾ ಸುಃಖ್ ದೊನಾಂತೀ ದೊಗಾಂಯ್ಕ್ ಸಾಂಗಾತ್ ದೀಂವ್ಕ್ ಆಸ್‌ಲ್ಲೊ. ರಡ್ಣೆಂ ಆಸೊಂ ಯಾ ಹಾಸೊಂಕ್ ಆಸೊಂ. ದೊಗಾಂಯ್ಕೀ ಎಕಾಮೆಕಾ ಜಿಯೆಂವ್ಕ್ ಆಸ್‌ಲ್ಲೆಂ. ತರೀ ತಿಯೊನ್ ಎಕಾಚ್ಚ್ ಕಾರಾಣಾಕ್ ಲಾಗೊನ್ ತಾಚಾ ಪಿಡೆ ವಿಶ್ಯಾಂತ್ ಲಿಪಯಿಲ್ಲೆಂ. ಕಾಂಯ್ ಆಪ್ಣಾಚಿ ಖಂತ್ ಕರ್ತಿತ್ ತರ್ ಭುರ್ಗ್ಯಾಂಚಾ ಶಿಕ್ಪಾಕ್ ತ್ಯಾ ವರ್ವಿಂ ತ್ರಾಸ್ ಜಾತಿತ್, ಎಸ್ತೆಲಾಚಾ ಭಲಾಯ್ಕೆಕ್ ತ್ಯಾ ವರ್ವಿಂ ಕಶ್ಟ್ ಜಾತಿತ್ ಮ್ಹಳ್ಳ್ಯಾ ಚಿಂತ್ನಾಂನಿ ತಾಣೆಂ ಸಾಂಗ್ಲೆಂ ನಾ. ಶಿವಾಯ್ ಹೆರ್ ಕಸಲ್ಯಾಚ್ ಸಂಗ್ತ್ಯಾಂಕ್ ಚಿಂತುನ್ ಬಿಲ್ಕುಲ್ ನ್ಹಂಯ್.

ತ್ಯಾ ಶಿವಾಯ್ ತವಳ್ ತವಳ್ ಎಸ್ತೆಲ್ ಆಪ್ಣಾನ್ ಫೋನ್ ಕೆಲ್ಲೆ ವೆಳಾರ್ ಘರಾ ಹೆಂ ಘೆಂವ್ಕ್ ಆಸಾ ತೆಂ ಘೆಂವ್ಕ್ ಆಸಾ ಮ್ಹಣೊನ್ ಸಾಂಗ್ತಾನಾ ತಿಯೊಕ್ ಸಂತೊಸ್ ಜಾತಾಲೊ. ಆಪ್ಣಾಚಿ ಬಾಯ್ಲ್ ಘರ್ ಸಜಂವ್ಕ್ ಕಿತ್ಲಿ ಮಿನತ್ ಕಾಡ್ತಾ ಮ್ಹಳ್ಳೆಂ ಚಿಂತುನ್ ತಾಕಾ ಸಂತೊಸ್ ಜಾತಾಲೊ. ಗಲ್ಫಾಂತ್ ಆಸ್ಚಾ ಹೆರಾಂಚಾ ಬಾಯ್ಲಾಂಚೊ ಕಾಣಿಯೊ ಆಯ್ಕಾತಾನಾ ತಾಕಾ ಎಸ್ತೆಲಾಚೆರ್ ಅಭಿಮಾನ್ ಭೊಗ್ತಾಲೊ. ಸೆಜಾರ್ಚಾಂಕ್ ಸಯ್ತ್ ತೆಂ ಮೆಳಾನಾತ್‌ಲ್ಲೆಂ. ಖಬ್ರೊ ಉಲಯ್ನಾತ್‌ಲ್ಲೆಂ. ಆನಿ ದೀಸ್‌ಭರ್ ಘರಾಂತ್ ಆಸ್ಲ್ಯಾರೀ ಘರಾ ಭುರ್ಗ್ಯಾಂಕ್ ಸಾಂಬಾಳ್ತಾಲೆಂ ಮ್ಹಳ್ಳೆಂ ಪಳೆವ್ನ್ ತಿಯೊಕ್ ಸಂತೊಸ್ ಜಾತಾಲೊ.

ಅಶೆಂ ಆಸ್ತಾಂ, ದೋನ್ ಮಹಿನ್ಯಾಂಚಾ ರಜೆಕ್ ವಚೊನ್ ಆತಾಂ ತಿ ರಜಾ ಕಾಭಾರ್ ಕರುನ್ ಗಾಂವಾಥಾವುನ್ ಪಾಟಿಂ ಆಯಿಲ್ಲ್ಯಾ ಮಣಿಕ್ ಪಳೆವ್ನ್ ತಿಯೊಕ್ ಸಂತೊಸ್ ಜಾಲೊ. ಮಣಿಚಾ ತೊಂಡಾರ್ ಸಂತೊಸ್ ಆಸ್‌ಲ್ಲೊ. ಪಯ್ಲೆಂಚೆಪರಿಂ ತಾಚಾ ಕಾಮಾಂತ್ ಹುಮೆದ್ ನಾತ್‌ಲ್ಲಿ. ಕಿತೆಂ ಜಾಲ್ಯಾರೀ ದೋನ್ ಮಹಿನೆ ಆಪ್ಲ್ಯಾ ಕುಟ್ಮಾಸವೆಂ ಖರ್ಚಿತಾನಾ ಹರ್‍ಯೆಕ್ ದೀಸ್ ಕಶೆ ಪಾಶಾರ್ ಜಾಲ್ಲೆ ತೆ ತಾಕಾ ಸಮ್ಜಾಲ್ಲೆಚ್ ನಾಂತ್. ಅಶೆಂ ಆಸ್ತಾಂ ಸಗ್ಳೊ ದೀಸ್ ತಾಚಾ ಮತಿಂತ್ ತಾಚಾ ಕುಟ್ಮಾಚೊ ನಿಹಾಳ್ ಕರ್ತಾಲೊ ತರೀ ತೊ ಯೇವ್ನ್ ತಾಚಾ ಘರ್ಚಾ ವಕೊಲಾ ವೊಶ್ಯಾಂತ್ ಉಲಯ್ಲೊ, ತಾಣೆಂ ಖರ್ಚಿಲ್ಲ್ಯಾ ರಜೆವಿಶ್ಯಾಂತ್ ಉಲಯ್ಲೊ. ತಾಣೆಂ ಹಾಡ್‌ಲ್ಲೆ ತಾಚಾ ಕುಟ್ಮಾಚಾ ಸಾಂದ್ಯಾಂಚೆ ಫೊಟೊ ದಾಕಯ್ಲೆ.

ಮುಂದರ್‍ಸಿಲಾಂ...

Tags: Vally Quadras,e konkani novel, Konkani, Mangalore, Mangalorean, Mother Tongue

From around the world

ಪಾಟಿಂ ಗಾಂವಾಕ್ - ಅವಸ್ವರ್ 16

Post your comments

ಅವಸ್ವರ್ 1

ಅವಸ್ವರ್ 2

ಅವಸ್ವರ್ 3

ಅವಸ್ವರ್ 4

ಅವಸ್ವರ್ 5

ಅವಸ್ವರ್ 6

ಅವಸ್ವರ್ 7

ಅವಸ್ವರ್ 8

ಅವಸ್ವರ್ 9

ಅವಸ್ವರ್ 10

ಅವಸ್ವರ್ 11

ಅವಸ್ವರ್ 12

ಅವಸ್ವರ್ 13

ಅವಸ್ವರ್ 14

ಅವಸ್ವರ್ 15

ಅವಸ್ವರ್ 16

ಅವಸ್ವರ್ 17

ಅವಸ್ವರ್ 18

ಅವಸ್ವರ್ 19

ಅವಸ್ವರ್ 20

ಅವಸ್ವರ್ 21

ಅವಸ್ವರ್ 22

ಅವಸ್ವರ್ 23

ಅವಸ್ವರ್ 24

ಅವಸ್ವರ್ 25

ಅವಸ್ವರ್ 26

ಅವಸ್ವರ್ 27

ಅವಸ್ವರ್ 28

Connect

Our Address
Mangalore

Our Address
Udupi

Our Address
Dubai

From around the world

Post your comments

Connect

Our AddressMangalore

Our AddressUdupi

Our AddressDubai

Our Address
Mangalore

Our Address
Udupi

Our Address
Dubai