:: ಮಾಯ್ ಭಾಸ್

ಪಯ್ಲೆಪಾವ್ಟಿಂ ಆಪ್ಲ್ಯಾ ಗಾಂವಾಭಾಯ್ರ್ ಯೆಂವ್ಚೆಂ ಜಾಲ್ಲೆವರ್ವಿಂ ತಾಕಾ ಉಲಂವ್ಕ್ ಇಲ್ಲೆ ತ್ರಾಸ್ ಜಾತಾ ಮ್ಹಳ್ಳೆ ಕಳಿತ್ ಆಸ್‌ಲ್ಲೆವರ್ವಿಂ ತಾಚೆಸವೆಂ ಕಾಮ್ ಕರ್ಚೆ ಹೆರ್ ದೋಗ್ ಸಾಂಗಾತಿ ಆಸ್‌ಲ್ಲೆವರ್ವಿಂ ತಿಯೊಕ್ ಚಡ್ ತ್ರಾಸ್ ಜಾಲೆನಾಂತ್.

ಕುವೆಯ್ಟಾಂತ್ ಏರ್‌ಪೋರ್‍ಟಾಂತ್ಲೊ ಭಾಯ್ರ್ ಪಡ್ತಾನಾ ಹಾಂಕಾ ವರುಂಕ್ ಎಕ್ಲೊ ಬೆಂಗಾಲಿ ಡ್ರಾಯ್ವರ್ ಆಯಿಲ್ಲೊ.

ಕಸೊಯ್ ಹೆರ್ ದೊಗಾಂಸವೆಂ ತಿಯೊಕೀ ತಾಣೆಂ ಎಕಾ ಘರಾ ವೆಲೊ ಆನಿಂ ಎದೊಳ್ ಕುಡಿ ಅತ್ಮ್ಯಾಂತ್ ಥಕ್‌ಲ್ಲೊ ತಿಯೊ ಪುರಾಸಣ್ ಕಾಡುಂಕ್ ಆಡ್ ಪಡ್ಲೊ.

ಲಾಂಬಾಯೆಚಿ ನೀದ್ ಕಾಡ್ನ್ ಉಟ್‌ಲ್ಲೊ ತಿಯೊ ತಾಚಾ ಕುಡಾಂತ್ ಆಸ್ಚೆ ಹೆರ್ ದೊಗಾನಿಂ ಉಟ್‌ಲ್ಲೆಪರಿಂಚ್ ಉಟ್ಲೊ. ಎಕಾಮೆಕಾಚಿ ಮಟ್ವಿ ವಳೊಕ್ ಕರುನ್ ದಿಲಿ. ಆಪುಣ್ ತಿಯೊ ರೊಜಾರಿಯೊ, ಗಾಂವಾಂತ್ ಮೂಡ್‌ಬಿದ್ರಿಚೊ, ಆನಿಂ ಗಾಂವಾಂತ್ ಮ್ಹಜಿ ಬಾಯ್ಲ್ ಆನಿಂ ದೊಗಾಂ ಇಸ್ಕೊಲಾಕ್ ವೆಚಿಂ ಭುರ್ಗಿಂ ಆಸಾತ್ ಮ್ಹಣೊನ್ ಮಟ್ವ್ಯಾನ್ ವಳೊಕ್ ಕರುನ್ ದಿಲಿ.

ಮಣಿನ್ ಆಪ್ಣಾಚಿ ಆನಿಂ ತಾಚಾ ಬಾಯ್ಲೆಚಿ ಮದ್ರಾಸಾ ಥಾವುನ್ ಚಡುಣೆ ಪಂದ್ರಾ ಮೈಲಾಂ ಪಯ್ಸ್ ಆಸ್ಚಾ ಆಪ್ಲ್ಯಾ ಗಾಂವ್ಚಿ, ಆನಿ ಥಂಯ್ ಆಸ್ಚಾ ತಾಚಾ ಬಾಯ್ಲೆಚಿ ಆನಿಂ ಎಕಾ ಧುವೆಚಿ ವಳೊಕ್ ಕರುನ್ ದಿಲಿ, ತಶೆಂಚ್ ತಾಚೆಸವೆಂ ಹಾಡ್‌ಲ್ಲಿ ತಾಚಾ ಕುಟ್ಮಾಚಿ ತಸ್ವೀರ್ ದಾಖಯ್ಲಿ.

ಗೋಪಿನ್ ಆಪ್ಣಾವಿಶ್ಯಾಂತ್ ಕಿತೆಂಚ್ ಭಗ್ಣಾಂ ನಾಸ್ತಾನಾ ಆಪ್ಲಿ ಪರಿಚಯ್ ದಿಲಿ. ಕಾಸರ್‌ಗೋಡ್ ಥಾವುನ್ ಚಡುಣೆಂ ಇಕ್ರಾ ಮೈಲಾಂ ಪಯ್ಸ್ ಆಸ್ಚಾ ಕುಂಬ್ಳೆಂತ್ ಆಸ್ಚಾ ತಾಚಾ ಘರಾಣ್ಯಾವಿಶ್ಯಾಂತ್, ತಾಚಾ ಬಾಯ್ಲ್ ಭುರ್ಗ್ಯಾಂ ವಿಶ್ಯಾಂತ್ ಉಲಯ್ತಾನಾ ಕಿತ್ಯಾಕ್‌ಗೀ ತಾಚೊ ತಾಳೊ ನಿಸ್ತೇಜ್ ಜಾಲ್ಲೊ ದೊಗಾಂಯ್ಚಾಯ್ ಗಮನಾಕ್ ಗೆಲೆಂ. ತರೀ ಕೊಣೀಂ ವಿಚಾರುಂಕ್ ಮುಖಾರ್ ಗೆಲಿಂ ನಾಂತ್.

ಅಶೆಂ ಥಂಯ್ಚಿ, ಹಾಂಗಾಚಿ ಖಬರ್ ಉಲವ್ನ್ ಆಸ್ತಾಂಚ್ ಹಾಂಕಾ ಹ್ಯಾ ಕುಡಾಂತ್ ಹಾಡ್ನ್ ಗೆಲ್ಲೊ ತೊ ಬೆಂಗಾಲಿ ಡ್ರಾಯ್ವರ್ ಆಯ್ಲೊ. "ತುಮ್ಚೆ ಪಯ್ಕಿ ಕೊಣೀಂ ಮಾಸ್ ಖಾಯ್ನಾತ್‌ಲ್ಲೆ ಆಸಾತ್‌ಗೀ? ಹಾಂಗಾ ಮಾಸ್ ಸವಾಯೆನ್ ಮೆಳ್ತಾ. ಪುಣ್ ತರ್‍ಕಾರೆಚೆಂ ಜೆವಾಣ್ ಮಾತ್ರ್ ಮಾರೊಗ್ ಮಾತ್ರ್ ನ್ಹಂಯ್. ಮೆಳೊಂಕ್ ಇಲ್ಲೆ ಕಶ್ಟ್ ಆಸಾತ್." ಮ್ಹಣತ್ ತಾಂಕಾ ಜೇಂವ್ಕ್ ಥೊಡ್ಯೊ ಖಾಣಾಚೊ ಪೊಟ್ಲ್ಯೊ ದಿಲ್ಯೊ ಆನಿಂ "ತುಮಿಂ ಜೆವಾ, ಆನಿಂ ಇಲ್ಲೊ ವಿಶೆವ್ ಘೆಯಾ, ಫಾಲ್ಯಾಂ ಸಕಾಳಿಂ ಸಾತ್ ವೊರಾಂಕ್ ಹಾಂವ್ ತುಮ್ಕಾಂ ವರುಂಕ್ ಯೆತಲೊಂ" ಮ್ಹಣೊನ್ ಸಾಂಗೊನ್ ಗೆಲೊ. ತೆಗ್‌ಯಿ ಭುಕೆಲ್ಲೆ, ಆನಿ ತಿಯೊಚಾ ಪೊಟಾಂತ್ ಸಕಾಳಿಂ ಥಾವುನ್ ಕಾಂಯ್ ನಾತ್‌ಲ್ಲೆಂ ದೆಖುನ್ ಎದೊಳ್‌ಚ್ ತಾಚಾ ಪೊಟಾಂತ್ ಕಿಡೆ ಉಚಾಂಬಳ್ ಜಾಲ್ಲೆ. ಪೊಟ್ಲ್ಯೊ ಸೊಡೊಯ್ಲ್ಯೊ, ತಾಂತುಂ ಕುಂಕ್ಡಾಚೆಂ ಮಾಸ್, ದಾಳ್, ಆನಿಂ ಭಾಕ್ರ್ಯೊ ಆಸ್‌ಲ್ಲ್ಯೊ. ತೆಗಾಯ್ನೀ ಮೆಳೊನ್ ಪೋಟ್‌ಭರ್ ಖಾವ್ನ್ ಎಕಾಮೆಕಾ ವಿಚಾರ್ ಆಶಾರ್ ಪಾಶಾರ್ ಕೆಲೆ. ಬರೆಂ ಜಾಲೆಂ ತೆಗೀ ಮಾಸ್ ಖಾತಾಲೆ.

ತಿಯೊಪರಿಂಚ್ ತ್ಯಾ ದೊಗಾಂಯ್ಕೀ ಗುದಾಂವಾಂಚೆಂ ಸ್ಟೋರ್‌ಮೆನ್ ಮ್ಹಣೊನ್ ಮಣಿ ಥಾವ್ನ್ ಸಾಟ್ ಹಜಾರ್ ಘೆತ್‌ಲ್ಲೆ ತರ್ ಗೋಪಿ ಥಾವ್ನ್ ಪಾವಣ್ಶೆಂ ಹಜಾರ್ ಘೆತ್‌ಲ್ಲೆ. ಬೇಂಕಾಚೊ ಮ್ಯಾನೆಜರ್‌ಯಿ ವಿಜಾ ಪಳೆತೆಚ್ ತೊಂಡಾರ್ ಲಾಳ್ ಗಳವ್ನ್ ಉಲಯ್ಲೊ. ವೆಗಿಂಚ್ ಪೊಯ್ಶೆ ಪಾಟಿಂ ಭರ್ಲ್ಯಾರ್ ಕಾಂಯ್ ಇಲ್ಲಿ ಸಬ್ಸಿಡಿ ದಿವಯ್ತಾಂ ಮ್ಹಣಾಲೊ. ಕಿತೆಂ ಕರ್ತಲೊ ಬಾವ್ಡೊ ತೊ, ದಿಸಾಕ್ ಎಕೇಕ್ ವೇಸ್ ಘೆವ್ನ್ ಲೋನ್ ವಿಚಾರುಂಕ್ ಯೆಂವ್ಚಿಂ ಕಾಂಯ್ ಉಣಿಂ ನಾತ್‌ಲ್ಲಿಂ. ತಶೆಂ ಆಸ್ತಾಂ ಕೊಣಾಕ್ ಕಶೆಂ ಆನಿಂ ಕೆದಾಳಾ ಪಾತ್ಯೆಜಯ್ ಮ್ಹಳ್ಳೆಂ ಕಳಿತ್ ನಾತ್‌ಲ್ಲ್ಯಾನ್ ಎಕಾ ಬೇಂಕಾಕ್ ಸಾಂಬಾಳ್ಚೆಂ ಕಶೆಂ?

ಗಾಂವ್ಚಾ ಆಟ್ ಹಜಾರ್ ಸಾಂಬಾಳಾ ಖಾತಿರ್ ತಿಯೊನ್‌ಯೀ ಆಪ್ಲೊ ಘರ್-ಜಾಗೊ ಬ್ಯಾಂಕಾಂತ್ ಆಡೊವ್ ಘಾಲ್ನ್ ಚಾಳಿಸ್ ಹಜಾರ್ ಜಮಯಿಲ್ಲೆ. ಆನಿಂ ಅಸಲ್ಯಾ ಕಶ್ಟಾಂಚಾ ಪರಿಗತೆಂತ್ ಹೆರ್ ಕೋಣ್ ಮುಖಾರ್ ಯೇತ್? ವೊರಾಂ ಸಾಂಜ್ ಉತ್ರಾಲ್ಲಿ ಖುಣಾಂ ದಿತಾನಾ ತೆ ತೆಗೀ ಉಟೊನ್ ಕುಡಾಭಾಯ್ರ್ ಆಯ್ಲೆ. ತಾಂತುಂ ಮಣಿ ತಮ್ಳಾಂಚೊ ಜಾಲ್ಲೆವರ್‍ವಿಂ ತಮಿಳ್ ಸೊಡ್ಲ್ಯಾರ್ ಹಿಂದಿ ಉಲಯ್ತಾಲೊ, ಗೋಪಿ ಮಲ್ಬಾರಿ ಜಾಲ್ಲೆವರ್‍ವಿಂ ತಾಕಾ ಹಿಂದಿ ಉಲಂವ್ಕ್ ಇಲ್ಲೆ ತ್ರಾಸ್ ಜಾತಾಲೆ ಆನಿ ತಿಯೊ ಆಪ್ಲಿ ಫುಟ್ಕುರಿ ಹಿಂದಿ ಭಾಸೆಂತ್ ಉಲಯ್ತಾಲೆ. ಆನಿಂ ಕೋಣ್ ಕಿತ್ಲೆಂ ಸಮ್ಜಾತಾಲೆ ತೆಂ ದೇವ್‌ಚ್ ಜಾಣಾಂ.

ತಿಯೊಕ್ ಹಿಂದಿ ಸಮ್ಜಾತಾಲೆಂ. ತರೀ ತಾಚಾ ಹಿಂದಿಂತ್ ಚಡಾವತ್ ಕೊಂಕ್ಣಿ ಸಬ್ಧ್ ಭರ್ಸಾತಾಲೆ. ಪೊಣ್ಸಾಚಾ ಗುಜ್ಯಾಂತ್ ಪೊಂಪ್ಯಾಂ ಭರ್ಸಾಲ್ಲೆಪರಿಂ.

ಅಶೆಂ ಇಲ್ಲೊ ವೇಳ್ ಮೆಳ್ತಾನಾ ಗೋಪಿನ್ ಆಪ್ಲೆಂ ಬೇಗ್ ಉಗ್ತಿ ಕರುನ್ ಗಾಂವಾಂಕ್ ಕಾಗ್ದಾಂ ಬರಂವ್ಕ್ ಬೊಸ್ತಾನಾ, ತಾಚೆಲಾಗ್ಚಿಂ ಇಲ್ಲಿಂ ಕಾಗ್ದಾಂ ಘೆವ್ನ್ ಮಣ್‌ಯಿ ಬೊಸ್ಲೊ ಆನಿ ತಶೆಂಚ್ ತಿಯೊಯ್ ಆಪುಣ್ ಕುವೆಯ್ಟಾಕ್ ಶಾಬೀತಾಯೆನ್ ಪಾವ್‌ಲ್ಲಿ ಗಜಾಲ್ ಎಸ್ತೆಲಾಕ್ ಆನಿ ಭುರ್ಗ್ಯಾಂಕ್ ಕಳಂವ್ಕ್ ಬರಯ್ಲೆಂ.

ತೆಗಾಂಯ್ನೀ ಕಾಗ್ದಾಂ ಬರಯ್ಲಿಂ ಪುಣ್ ಪಾತ್ತೊ ಖಂಚೊ ಬರಂವ್ಚೊ ಮ್ಹಳ್ಳೊ ಕೊಣಾಯ್ಕೀ ಕಳ್ಳೆಂನಾ. ತಶೆಂ ಹಾಂಗಾಚೊ ತಾಂಚೊ ಪಾತ್ತೊ ಸಾರ್ಕೊ ನೆಣಾಸ್ತಾಂ ತಾಣೆಂ ತೆಂ ಕಾಗಾದ್ ತಶೆಂಚ್ ದವರ್ಲೆಂ. ಫಾಲ್ಯಾಂ ಯೆಂವ್ಚಾ ಬೆಂಗಾಲಿಕಡೆ ದಿಲ್ಯಾರ್ ಜಾಲೆಂ, ತೊ ಮಜತ್ ಕರ್ತಲೊ ಮ್ಹಣೊನ್ ಲೆಕ್ಲೆಂ.

ದುಸ್ರೊ ದೀಸ್ ವೆಗಿಂಚ್ ಉದೆಲೊ. ಗಾಂವಾಂತ್ ಸ ವೊರಾಂಕೀ ಸಾರ್ಕೊ ಉಜ್ವಾಡ್ ಜಾಯ್ನಾತ್‌ಲ್ಲೊ ಪುಣ್ ಹಾಂಗಾ ತಾಂಕಾ ಸಕಾಳಿಂ ಉಜ್ವಾಡ್ ಜಾತಾನಾ ವೆವೆಗಿಂ ಉಟ್ಲೆ. ವೊರಾಂ ಪಳೆತಾನಾ ಸಾಡೆ ಚಾರ್ ಜಾಲ್ಲಿಂ ಮಾತ್ರ್. ತೆಗಾಂಯ್ಕೀ ಆಯ್ಚೊ ದೀಸ್ ಮಹತ್ವಾಚೊ. ತಾಂಚಾ ಜಿಣ್ಯೆಂತ್ ತಾಣಿಂ ಆಶೆಲ್ಲೊ. ಗಲ್ಫಾಚಾ ಜೊಡಿಚೊ ಪಯ್ಲೊ ದೀಸ್. ರಾತಿಂ ತೆಂ ನಿದ್‌ಲ್ಲೆ ತರೀ ಕೊಣೀಂ ಸಾರ್ಕೆ ನಿದ್ಲೆನಾಂತ್. ತೆಗಾಂಯ್ಕೀ ಪಯ್ಲೆಪಾವ್ಟಿಂ ಗಲ್ಫಾಚೊ ಅನ್ಭೋಗ್. ಆನಿಂ ಕಾಳ್ಜಾಂತ್ ಕಸ್ಲೆಗೀ ದಡ್ದಡೆ ಯೇಂವ್ಕ್ ಲಾಗ್ಲೆ. ಹಾಕಾಯ್ ಏಕ್ ಕಾರಣ್ ಆಸ್‌ಲ್ಲೆಂ. ಬೊಂಬೊಯ್ಚಾ ಯೇಜಂಟಾನ್ ಸಾಂಗ್‌ಲ್ಲೆಪ್ರಕಾರ್ ದೋಗ್ ಸುಪರ್‌ವಾಯ್ಜರ್ ಜಾಯ್ ಆಸ್‌ಲ್ಲೆ. ಆನಿಂ ಆಮ್ಚಾ ತೆಗಾಂಪಯ್ಕಿ ದೊಗಾಂಕ್ ತೆಂ ಕಾಮ್ ದೀವ್ನ್ ಎಕ್ಲ್ಯಾಕ್ ಪಾಟಿಂ ದಾಡ್ತಿತ್ ತರ್? ಯಾ ಖಂಯ್ ಪುಣೀಂ ಕಶ್ಟಾಂಚೆಂ ಕಾಮ್ ದಿತಿತ್ ತರ್? ಆನಿಂ ತೊ ಎಕ್ಲೊ ಅಪುಣ್ ಜಾಲೊಂ ತರ್? ಮ್ಹಳ್ಳೆಂ ಭ್ಯೆಂ.

ತಿಯೊಕ್ ಕಾಮಾಂತ್ ಭಿರಾಂತ್ ನಾತ್‌ಲ್ಲಿ. ಕಶ್ಟ್ ಮ್ಹಳ್ಳೆ ತಾಚಾ ರಗ್ತಾಂತ್ ಆಸ್‌ಲ್ಲೆ. ಆನಿಂ ಕಸಲಿಯ್ ಮಿನತ್ ಕರುಂಕ್ ತೊ ಪಾಟಿಂ ಪಳೆಂವ್ಚೊ ನ್ಹಂಯ್. ತರೀ ಹೆರಾಂನಿ ಭೊಗ್‌ಲ್ಲೆ ಆಟೆವಿಟೆ ತಾಣೆಂ ಹೆರಾಂಚಾ ತೊಂಡಾಂತೂನ್ ಜಾಯ್ತೆ ಆಯ್ಕಾಲ್ಲೆಂ.

ಕೋಣ್ ಇಂಜಿನಿಯರ್ ಮ್ಹಣೊನ್ ಯೇವ್ನ್ ಕುಜ್ನಾಂತ್ ರಾಂದುಂಕ್ ಮಜ್ಭೂರ್ ಜಾಲ್ಲಿ ಸಂಗತ್, ನರ್ಸ್ ಮ್ಹಣೊನ್ ಹಾಡುನ್ ಆಯಾ ಜಾವ್ನ್ ಕಾಮ್ ಕರಯಿಲ್ಲಿ ಗಜಾಲ್ ಜಾಂವ್, ಟೀಚರ್ ಮ್ಹಣೊನ್ ವಿಜಾ ದೀವ್ನ್ ಭುರ್ಗ್ಯಾಂಕ್ ಪಳೆಂವ್ಚೆಂ ಕಾಮ್ ದಿಲ್ಲೆಂ ಜಾವ್ಯೆತ್ ಯಾ ಡ್ರಾಯ್ವರಾಚಿ ವಿಜಾ ದೀವ್ನ್ ತ್ಯಾ ವೊತಾಂಭರಾಂತ್ ಬಿಲ್ಡಿಂಗಾಚೆಂ ಕಾಮ್ ಕರುಂಕ್ ಘಾಲ್ಲೆ ದಾಖ್ಲೆ ಜಾಹಿತ್ತೆಂ ತಾಣಿಂ ಆಯ್ಕಾಲ್ಲೆ. ಕೋಣ್ ಆಪ್ಲೆಂ ಘರ್‌ದಾರ್ ಆಡೊವ್ ಘಾಲ್ನ್ ತರ್ ಕೋಣ್ ಆಪ್ಲ್ಯಾ ಬಾಯ್ಲೆಭುರ್ಗ್ಯಾಚೆಂ ಭಾಂಗಾರ್ ವಿಕುನ್ ಅಸಲ್ಯಾ ವಿಜಾಂಕ್ ಘೆವ್ನ್ ಆಯಿಲ್ಲೆ. ಥೊಡೆ ಬಾವ್ಡೆ ಸಾರ್ಕೆಂ ಕಾಮ್ ಆನಿಂ ಸಾಂಬಾಳ್ ನಾಸ್ತಾಂ ಪಾಟಿಂ ಗಾಂವಾಕ್ ವಚೊಂಕ್ ಭ್ಯೆಂ, ಲಜ್ ಅಕ್ಮಾನ್ ಭೊಗ್ಚಾಕೀ ಜೀವ್ಘಾತ್ ಬರೆಂ ಮ್ಹಣೊನ್ ಜೀವ್ಘಾತ್ ಕೆಲ್ಲೆ ದಾಖ್ಲೆಯಿ ಧಾರಾಳ್ ಮಾಪಾನ್ ಆಯ್ಕಾಲ್ಲೆ. ಆನಿಂ ತ್ಯೆ ವರ್ವಿಂ ತಾಚೆಂಯ್ ಕಾಳಿಜ್ ದಡ್ದಡ್ತಾಲೆಂ ಆನಿಂ ಥರ್ಥರ್ತಾಲೆಂ.

ತೆಗಾಂಯ್ಚಾಯ್ ಕಾಳ್ಜಾಂತ್ ಹೆಂಚ್ ಭ್ಯೆಂ ಭರೊನ್ ಗೆಲ್ಲೆಂ ತರೀ ಕೊಣೀಂ ಎಕಾಮೆಕಾ ಉಚಾರುಂಕ್ ಕಬೂಲ್ ಜಾಲೆನಾಂತ್.

ಜಾಂವ್ಕ್ ಆಸ್ಚೆಂ ಕೊಣಾಯ್ಚಾನ್ ಆಡಾಂವ್ಕ್ ಜಾತಾವೆ ತರ್? ತಾಕಾ ಹೆಂ ಚಿಂತಾಪ್ ಕಿತ್ಯಾಕ್‌ಗೀ ಸದ್ದ್ಯಾಕ್ ಇಲ್ಲೆಂ ಸಮಧಾನ್ ಹಾಡುಂಕ್ ಲಾಗ್ಲೆಂ.

ಸಕಾಳಿಂ ಉಜ್ವಾಡ್ ವೆಗಿಂಚ್ ಜಾಲ್ಲೆವರ್ವಿಂ ತೆ ಎಕೆಕ್ಲೆಚ್ಚ್ ಉಟ್ಲೆ. ಆನಿಂ ಜುಸ್ತ್ ಸಾತ್ ವೊರಾಂಕ್ ಬೆಂಗಾಲಿ ಆಯ್ಲೊ ಆನಿಂ ಎದೊಳ್‌ಚ್ ನೆಸೊನ್ ತಯಾರ್ ಆಸ್ಚಾ ತೆಗಾಂಕೀ ಘೆವ್ನ್ ಅರ್ಬ್ಯಾಗೆರ್ ವರಿಲಾಗ್ಲೊ. ಘಡ್ಯೆನ್ ಕಾರ್ ವಡ್ ಜಯ್ತ್ ಬಂಗ್ಲ್ಯಾಮುಖಾರ್ ಉಭೆಂ ಜಾಲೆಂ. ಆಮ್ಕಾಂ ಥಂಯ್ಚ್ ಭಾಯ್ರ್ ಉಭೆಕರುನ್ ಬೆಂಗಾಲಿ ಭಿತರ್ ಗೆಲೊ. ತೆಗಾಂಯ್ಕೀ ಹ್ಯಾ ಘರಾಭಿತರ್ ರಿಗ್ತಚ್ಚ್ ಪಾಂಯ್ ದವ್ರುಂಕೀ ಭ್ಯೆಂ ದಿಸ್ಲೆಂ. ಘರಾಂತ್ ನಿತಳ್ ಕರ್‍ನ್ ಕಾರ್ಪೆಟ್ಯೊ ಘಾಲ್ಲ್ಯೊ. ಸಗ್ಳ್ಯಾಂನ್‌ಯೀ ಉಟೊನ್ ದಿಸ್ಚಿ ಗ್ರೇಸ್ತ್‌ಕಾಯ್. ಜಿಣ್ಯೆಂತ್ ಎದೊಳ್ ಪಳೆನಾತ್‌ಲ್ಲ್ಯೊ ವಸ್ತು. ವೊಣೊದಿಚೆರ್‌ಯೀ ಫುಲಾಂಚೊ, ತಳ್ಯಾಂಚೊ, ಮೊಳ್ಯಾಂಚೊ ನಕ್ಶಾ ಆಸ್ಚೊ ಕಾರ್ಪೆಟ್ಯೊ ಆಸ್‌ಲ್ಲ್ಯೊ. ಥಂಯ್ ಥಂಯ್ ಹಳ್ತಾರ್ ಪೆಟೊನ್ ಆಸ್ಚೆ ವೀಜ್ ದಿವೆ. ವಿವಿಧ್ ರಂಗಾಚೆ, ವಿವಿಧ್ ನಮುನ್ಯಾಚೆ. ತ್ಯಾ ವಿಸ್ತಾರ್ ಹೊಲಾಂತ್ ಮಧೆಂಚ್ ವಯ್ರ್ ವಚೊಂಕ್ ಏಕ್ ವಡ್ಲಿ ನಿಸಣ್. ಆನಿಂ ತ್ಯೇ ನಿಸಣೆಚೆರೀ ರಂಗಾಳ್ ಕಾರ್ಪೆಟ್ ಘಾಲ್ಲಿ. ಆನಿಂ ನಿಸಣೆಚಾ ದೊನೀ ಕುಂದ್ಯಾಂಚೆರ್ ಆಸ್ಚೆ ವೀಜ್ ದಿವೆ ಜಿಳ್ಮಿಳ್ತಾಲೆ.

ಘರ್‌ಭರ್ ದೀಶ್ಟ್ ಚರಂವ್ಚಾ ತೆಗಾಂಯ್ಕೀ ವಯ್ಲೆಂ ದಾರ್ ಉಗ್ತೆಂ ಜಾಲ್ಲೊ ಆವಾಜ್ ಆಯ್ಕಾಲೊ. ನಿಸಣೆಚಿಂ ಮೆಟಾಂ ದೆಂವೊನ್ ಯೆಂವ್ಚಾ ಲಾಂಭ್ ದೀಗ್ ದಡಂಗ್ ಜಿವಾಚೊ ಮಾನಾಯ್, ಗೊರ್ಶೆ ಗೊರ್ಶೆ ಪೊಲೆ, ಫಕತ್ ಖಾಡ್ಕೆಚೆರ್ ಇಲ್ಲೆ ಬೊಕ್ಡೆಚೆ ಖಾಡ್ ದವರ್ನ್, ತಕ್ಲೆರ್ ದೊವೊಚ್ ತುವಾಲೊ (ಗತ್ರ) ಘಾಲ್ನ್, ತಾಚೆರ್ ನಿವ್ಣ್ಯಾಪರಿಂ ಏಕ್ ಲುಗ್ಟಾಚಾ ದೊರಿಯೆಪರಿಂ (ಅಗಲ್) ಘಾಲುನ್. ಗಾಂವಾಂತ್ ಪಾದ್ರಿಂನಿ ನೆಸ್ಚೆಪರಿಂ ಆಸ್ಚೊ ಪುಣ್ ಕಾಳೊ ಲೋಬ್ ಘಾಲ್ನ್ ಮೆಟಾಂ ದೆಂವ್ಲೊ ಆನಿಂ ಉಬೆ ಆಸ್ಚಾ ತೆಗಾಂಕೀ ಪಳೆಲಾಗ್ಲೊ. ಆನಿಂ ಹ್ಯಾ ತೆಗಾಂಕ್ ಕಿತೆಂಗೀ ಸಾಂಗಾಲಾಗ್ಲೊ ಆನಿಂ ಹೆ ತೆಗೀ ಎಕಾಮೆಕಾಚಿಂ ತೊಂಡಾಂ ಪಳೆಲಾಗ್ಲಿಂ. ತೆಗಾಂಯ್ಕೀ ತಾಚಿ ಫುಟ್ಕರ್ ಭಾಸ್ ಸಮ್ಜಾನಾತ್‌ಲ್ಲಿ ಸಮ್ಜಾತೆಚ್ಚ್ ತೊ ಶೇಖ್ ಬೆಂಗಾಲಿಕಡೆ ಅರ್ಭಿ ಭಾಶೆಂತ್ ಕಿತೆಂಗೀ ಸಾಂಗಾಲಾಗ್ಲೊ ಆನಿಂ ಬೆಂಗಾಲಿನ್ ತಕ್ಲಿ ಹಾಲವ್ನ್ ಹಾಂಕಾ ಘೆವ್ನ್ ಅನ್ಯೇಕಾ ಜಾಗ್ಯಾಕ್ ಆಪವ್ನ್ ವರ್ನ್ ಗೆಲೊ.

ತ್ಯಾ ತೆಗಾಂಯ್ಚೇಯ್ ಪಾಸ್‌ಪೋರ್‍ಟ್ ಎದೊಳ್‌ಚ್ಚ್ ಬೆಂಗಾಲಿನ್ ಘೆತ್‌ಲ್ಲೆ.

ವಾಟೆರ್ ವೆತಾಸ್ತಾನಾ "ತುಮ್ಕಾಂ ತೆಗಾಂಯ್ಕೀ ಬರ್‍ಯಾ ಮಿನತೆನ್ ಕಾಮ್ ಕರುಂಕ್ ಶೇಕಾನ್ ಸಾಂಗ್ಲಾಂ. ಕಾಂಯ್ ಭಿಂಯೆಂವ್ಚಿ ಗರ್ಜ್ ನಾಂ ಖಂಯ್. ತಾಚೆಂ ಆನಿಂ ದೋನ್ ಗುದಾಂವಾಂ ವೆಗಿಂಚ್ ಉಗ್ತಿಂ ಜಾಂವ್ಚಿಂ ಆಸಾತ್ ಖೈಂ. ತೆದೊಳ್ ಪರ್‍ಯಾಂತ್ ತುಮಿಂ ತೆಗಾಯ್ನೀಂ ಹಾಂಗಾಚ್ಚ್ ಕಾಮ್ ಶಿಕಾಜಯ್ ಖೈಂ" ಬೆಂಗಾಲಿ ಸಾಂಗಾಲಾಗ್ಲೊ.

ತೆಗಾಂಯ್ಕೀ ಗೆಲ್ಲೊ ಜೀವ್ ಏಕ್ ಘಡಿ ಪಾಟಿಂ ಆಯಿಲ್ಲೆಪರಿಂ ಭೊಗ್ಲೆಂ. ತಾಂಚಾ ಸಂತೊಸಾಕ್ ಗಡ್ ನಾತ್‌ಲ್ಲೆಪರಿಂ ಭೊಗ್ಲೆಂ. ಕಿತ್ಯಾಕ್ ಮ್ಹಳ್ಯಾರ್ ಜಾಯಿತ್ತ್ಯಾಂಕ್ ಯೇಜಂಟಾಂನಿ ಫಸಯಿಲ್ಲೆಂ ಜಾಯಿತ್ತೆಂ ತಾಣಿಂ ಆಯ್ಕಾಲ್ಲೆಂ. ಆಪ್ಲ್ಯಾ ದೆವಾನ್ ಆಪ್ಣಾಕ್ ಸೊಡ್ನ್ ಘಾಲೆಂನಾ ತೆಂ ಪಳೆವ್ನ್ ತಿಯೊ ಸಂತೊಸ್ಲೊ. ಆಪ್ಲ್ಯಾ ದೊಗಾಂಯ್ ನೆಣ್ತ್ಯಾ ಭುರ್ಗ್ಯಾಂಚಿಂ ಮಾಗ್ಣಿಂ ದೆವಾನ್ ಆಯ್ಕಾಲಿಂ ಮ್ಹಳ್ಳೊ ಸಂತೊಸ್ ತಾಕಾ ಜಾಲೊ.

ಶೇಕ್ ಅಲ್ ಖಲಿಫ಼ಾ ಪಳೆಂವ್ಕ್ ಹರಾಮಿ ದಿಸ್ತಾಲೊ ತರೀ ಹೆರ್ ಹಾರಾಮಿ ಆರ್ಭ್ಯಾಂಪರಿಂ ಹೊ ನ್ಹಂಯ್ ಆಸ್‌ಲ್ಲೊ ಮ್ಹಣೊನ್ ವಾಟೆರ್ ವೆತಾನಾ ತೊ ಬೆಂಗಾಲಿ ಸಾಂಗ್ತಾಲೊ. ತೊ ಹಾಂಗಾ ಪಾಟ್ಲ್ಯಾ ಸಾಡೆ ಇಕ್ರಾ ವರ್ಸಾಂ ಥಾವುನ್ ಕಾಮ್ ಕರುನ್ ಆಸ್‌ಲ್ಲೊ. ಶೇಕ್ ಖಲೀಫ಼ಾಕ್ ನವೆಂ ಏಕ್ ವಡ್ಲೆಂ ಸುಪರ್‌ಮಾರ್‍ಕೆಟ್ ಘೆತ್‌ಲ್ಲೆವರ್‍ವಿಂ ತಾಚೆ ಖಾತಿರ್ ಗುದಾಂವ್ ಘೆತ್‌ಲ್ಲೆಂ, ಆನಿಂ ತೆಂ ಗುದಾಂವ್ ರಾಕೊಂಕ್ ಹ್ಯಾ ತೆಗಾಂಕ್ ನಮ್ಯಾರ್ಲೆಲೆಂ. ಶೆರಾ ಥಾವುನ್ ಲಗ್ಬಗ್ ತೀಸ್ ಮೈಲಾಂ ಪಯ್ಸ್ ಆಸ್ಚಾ ತ್ಯಾ ಗುದಾಂವಾಕ್ ದಿಸಾಂನಿ ಹರ್ ಥರಾಚೊ ಸಾಮಾನ್ ಯೆತಾಲೊ. ಜಾಂವ್ಕ್ ಪುರೊ ತರ್‍ಕಾರ್‍ಯೊ, ಜಾಂವ್ಕ್ ಪುರೊ ತಾಂದು, ಗೋಂವ್, ಆನಿಂ ಚಡ್ತಾವ್ ಪಿಟೆ. ಮಸಾಲಾ ಪಿಟೊ.

ಅನಿಕೀ ಮುಖಾರುನ್ ತೊ ಸಾಂಗಾಲಾಗ್ಲೊ "ಆಮ್ಚಾ ಶೇಕಾಕ್ ಫಟಿಂ ಉಲಯ್ಲ್ಯಾರ್ ಬಿಲ್ಕುಲ್ ಜಾಯ್ನಾ ಹಾಂವೆಂ ಯೆಂವ್ಚಾ ಪಯ್ಲೆಂ ಎಕ್ಲೊ ಮಸ್ರಿ ಡ್ರಾಯ್ವರ್ ಆಸ್‌ಲ್ಲೊ ಖಂಯ್. ಏಕ್ ಪಾವ್ಟಿಂ ತಾಕಾ ಆನಿಂ ಶೇಕಾಚಾ ತಿಸ್ರ್ಯಾ ಬಾಯ್ಲೆಕ್ ಶೇಕ್ ನಾತ್‌ಲ್ಲೆವೆಳಾರ್ ಎಕಾ ಕುಡಾಂತ್ ಪಳೆವ್ನ್ ತಾಕಾ ಥಂಯ್ಚ್ ಗುಳೊ ಘಾಲ್ನ್ ಲಗಾಡ್ ಕಾಡ್ಲೊ ಖಂಯ್"

"ಮಸ್ರಿ ಮ್ಹಳ್ಯಾರ್ ಈಜಿಪ್ಶಿಯನ್ ಮಾಪ್ಳಿ. ತೆ ಚಡಾವತ್ ನಾಯ್ನಾಂತ್, ದಾಂತ್ ಘಾಸಿನಾಂತ್. ದಾಂತ್ ಘಾಸ್ತಾನಾ ದಾಂತಾಂ ಥಾವುನ್ ರಗಾತ್ ಆಯ್ಲ್ಯಾರ್ ತಾಂಕಾ ಹರಾಮ್ ಖೈಂ. ಮ್ಹಾಕಾ ಸಾರ್ಕೆಂ ಕಳಿತ್ ನಾ" ಬೆಂಗಾಲಿ ಮ್ಹಣಾಲೊ.

ವಾಟ್ ಮುಖಾರುನ್ ಗೆಲ್ಲೆಪರಿಂಚ್ ವಾಟೆರ್ ಬೆಂಗಾಲಿ ಸಮ್ಜಾಯ್ಲಾಗ್ಲೊ. "ತುಮಿಂ ಭಿಂಯೆಂವ್ಚಿ ಗರ್ಜ್ ನಾ. ತುಮ್ಕಾಂ ರಾವೊಂಕ್ ಭಿತರ್ ತೆಚ್ ಗೊಡಾವ್ನಾಂತ್ ಆಸ್ತೆಲೆಂ. ದೆಗೆರ್‌ಚ್ ಏಕ್ ಕೂಡ್ ಆಸಾ. ಆನಿಂ ತುಮ್ಚಾ ಕಾಮಾಚೊ ವೇಳ್ ತುಮ್ಕಾಂ ಥಂಯ್ ಆಸ್ಚೊ ಮಸ್ರಿ ಸಾಂಗ್ತಲೊ. ತುಮ್ಕಾಂ ಜೇಂವ್ಕ್ ಸಗ್ಳೆಂ ಥಂಯ್ಚ್ ಆಸ್ತೆಲೆಂ. ಹಾಪ್ತ್ಯಾಂತ್ ಏಕ್ ದೀಸ್ ರಜೆಚೊ ಆಸ್ತೊಲೊ. ಪುಣ್ ಮಹಿನ್ಯಾಕ್ ಏಕ್ ಹಾಪ್ತೊ ತುಮಿಂ ಕೊಣೆಂಯ್ ಎಕ್ಲ್ಯಾನ್ ತ್ಯಾಚ್ ಗುದಾಂವಾಂತ್ ಕಾಮ್ ಕರುಂಕ್ ಆಸ್ತೆಲೆಂ. ಎಕಾ ಮಹಿನ್ಯಾಂತ್ ಎಕ್ಲ್ಯಾನ್ ರಜೆಚಾ ದಿಸಾ ಕಾಮ್ ಕೆಲೆಂ ತರ್ ದುಸ್ರ್ಯಾ ಮಹಿನ್ಯಾಂತ್ ಅನ್ಯೇಕ್ಲ್ಯಾನ್ ಕರಿಜೆ. ತುಮ್ಕಾಂ ಮೆಳೊಂಕ್ ಹಾಂವ್ ಹರ್ಯೆಕಾ ಹಾಪ್ತ್ಯಾಂತ್ ಯೆತಲೊಂ."

"ಹಾಂಗಾಚಾ ಸರ್ಕಾರ್‍ಚಿಂ ಕಾನುನಾಂ ದಿಸಾಕ್ ಎಕೇಕ್. ಪಯ್ಲೆಂ ಮೆಡಿಕಲ್ ಜಾತೆಚ್, ಫಿಂಗರ್ ಪ್ರಿಂಟ್ ಆಸ್ತೆಲೆಂ. ತೆಂ ಪಾಸ್ ಜಾತೆಚ್ ಪಾಸ್‌ಪೋರ್ಟಾಚೆರ್ ರೆಸಿಡೆನ್ಸಿ ಮಾರುಂಕ್ ಆಸ್ತೆಲಿ. ಉಪ್ರಾಂತ್ ಸಿವಿಲ್ ಐಡಿ ಮೆಳ್ತೆಲಿ. ಪುಣ್ ಹೆಂ ಕಾನೂನ್ ಕೆದಾಳಾಯ್ ಬದ್ಲೊಂಕ್ ಸಾಧ್ಯ್ ಆಸಾ. ಗಾಂವಾಂತ್ ಮೆಡಿಕಲ್ ಕೆಲ್ಲೆಂ ತೆಂ ಹಾಂಗಾ ಚಲಾನಾ"

ತೆಗಾಂಯ್ಚಾಯ್ ಹಾತಾಂನಿ ಕಾಗ್ದಾಂ ಆಸ್ಚಿಂ ಪಳೆಲ್ಲ್ಯಾ ಬೆಂಗಾಲಿನ್ ಸಾಂಗ್ಲೆಂ "ಗಾಂವಾಕ್ ಧಾಡುಂಕ್ ತುಮ್ಚಿಂ ಕಾಗ್ದಾಂ ಆಸ್ಲ್ಯಾರ್ ತುಮಿಂ ತಿಂ ದಿವ್ಯೆತ್ ಆನಿಂ ಹಾಂವ್ ತಿಂ ವರ್ನ್ ಪೋಸ್ಟ್ ಕರ್ತಲೊಂ."

ತೆಗಾಂಯ್ನೀ ತಾಣಿಂ ಬರಯಿಲ್ಲಿಂ ಕಾಗ್ದಾಂ ತ್ಯಾ ಬೆಂಗಾಲಿಕ್ ದಿಲಿಂ ಆನಿಂ ತಾಚೆಲಾಗ್ಚೊ ವಿಳಾಸ್ ಘೆತ್ಲೊ. ಆನಿಂ ಅಶೆಂ ಉಲವ್ನ್ ಆಸ್ತಾಂ ಶೆರಾ ಥಾವುನ್ ಮೊಸ್ತ್ ಭಾಯ್ರ್ ಆಸ್ಚೆಂ, ಚಾರೀ ಕುಶಿನ್ ಕಂಪೌಂಡ್ ಆಸ್ಚಿ ಏಕ್ ಸುವಾತ್ ಮೆಳ್ಳಿ. ಕಾರ್ ರಾವ್ತೆಚ್ ತ್ಯಾ ಗೆಟಿಭಿತರ್ ಆಸ್ಚೊ ಅನ್ಯೇಕ್ ಲೊಬಾಚೊ ದಡಂಗ್ ಜಿವಾಚೊ ಮಾನಾಯ್ ಆಯ್ಲೊ ಆನಿಂ ಗೇಟ್ ಉಘಡಿಲಾಗ್ಲೊ.

ಬೆಂಗಾಲಿನ್ ಗೆಟಿಭಿತರ್ ಕಾರ್ ರಾವಯ್ಲೆಂ ಆನಿಂ ತ್ಯಾ ಮಸ್ರಿಚಿ ವಳೊಕ್ ಕರ್ನ್ ದಿಲಿ. "ಇಬ್ರಾಹಿಮ್"

ಥೊಡ್ಯಾವೆಳಾರ್ ತ್ಯಾ ತೆಗಾಂಯ್ಕೀ ತಾಂಚೆಂ ಕೂಡ್ ದಾಖಯ್ಲೆಂ. ಏಕ್ ಲಾನ್ ಕೂಡ್ ಆನಿಂ ತಾಂತುಂ ತೀನ್ ಲ್ಹಾಲ್ಹಾನ್ ಖಾಟಿ ಆಸ್‌ಲ್ಲ್ಯೊ. ಏಕ್ ಪರ್ನೆ ಫೇನ್ ಆಸ್‌ಲ್ಲೆಂ. ಆನಿಂ ಭಾಯ್ರ್ ಏಕ್ ಖಾಕುಸ್ ಆನಿಂ ಖಾಕ್ಸಾಕ್ ಲಾಗೊನ್ ಉಗ್ತಿ ನಾಣಿಂ. ವಯ್ರ್ ಸಿಮೆಂಟಿಚಿಂ ತಗ್ಡಾಂ ಘಾಲ್ಲೆವರ್ವಿಂ ಜಾಯ್ಜಯ್. ಧಗಿನ್ ಆಂಗ್ ಸಗ್ಳೆಂ ಹುಲ್ಪತಾಲೆಂ.

ದೆಗೆನ್೦ಚ್ ಆಸ್ಚಾ ಎಕಾ ಕುಡಾ ಥಾವುನ್ ಧುಂವರ್ ಭಾಯ್ರ್ ಯೆತಾಲೊ. ಥಂಯ್ ರಾಂದ್ತಾತ್ ಮ್ಹಣೊನ್ ಥಂಯ್ ಥಾವುನ್ ಯೆಂವ್ಚೊ ಪರ್ಮಳ್ ಸಾಂಗ್ತಾಲೊ.

ಖಾಂವ್ಕ್ ಜೇಂವ್ಕ್ ಕಾಂಯ್ ಉಣೆಂ ನಾತ್‌ಲ್ಲೆಂ ಜಾಯ್ಜಯ್. ತ್ಯಾ ಗುದಾಂವಾಂತ್ ಆಸ್ಚಾ ಹೆರಾಂಕ್ ರಾಂದುಂಕ್ ಮ್ಹಣೊನ್ ನಮಿಯಾರ್ಲೆಲಿಂ ಥೊಡಿಂ ಆಸ್‌ಲ್ಲಿಂ. ತಿಂ ಫಕತ್ತ್ ರಾಂದ್ತಾಲಿಂ. ಬೆಂಗಾಲಿನ್ ತಾಂಕಾ ಥಂಯ್ ವೆಲೊ ಆನಿಂ ಎಕ್ಲ್ಯಾ ನೆಪಾಳಿ ಬಹದೂರ್‌ಚಿ ವಳೊಕ್ ಕೆಲಿ ಆನಿಂ ಪೋಟ್‌ಭರ್ ಖಾಂವ್ಕ್ ಸಾಂಗ್ಲೆಂ. ತಶೆಂಚ್ ತಾಂಕಾ ರಾಂದುಂಕ್ ಜಾಯ್ ತರ್ ತಾಣಿಂಯ್ ಯೇವ್ನ್ ತಾಂಕಾ ಗರ್ಜೆಚೆಂ ರಾಂದಾಪ್ ರಾಂದ್ಯೆತ್ ಮ್ಹಣಾಲೊ.

ಸಕಾಳಿಂ ಏಕ್ ಘೊಟ್ ಚಾ ಸಯ್ತ್ ಪಿಯೆನಾಸ್ತಾಂ ಆಯಿಲ್ಲ್ಯಾ ತಾಂಚಾ ಪೊಟಾಂತ್ಲೆ ಕಿಡೆ ದರ್ಬಡ್ತಾಲೆ ಜಾಯ್ಜಯ್. ತೆಗಾಂಯ್ನೀ ದಾಳಿಚಾ ಸಾರಾಸವೆಂ ತಾಣಿಂ ದಿಲ್ಲ್ಯೊ ವ್ಹಡ್ ಇರಾನಿ ಭಾಕ್ರ್ಯೊ ಖೆಲ್ಯೊ.

ಉಪ್ರಾಂತ್ ಇಬ್ರಾಹಿಮಾಲಾಗಿಂ ತೆ ಆಯ್ಲೆ. ಇಬ್ರಾಹಿಮ್ ತಾಂಕಾ ಅರ್‍ಬೆಂತ್ ಕಿತೆಂಗೀ ಸಮ್ಜಾಯ್ಲಾಗ್ಲೊ ಆನಿಂ ಬೆಂಗಾಲಿ ಡ್ರಾಯ್ವರ್ ಎದೊಳ್‌ಚ್ ತ್ಯಾ ತೆಗಾಂಚೊ ಆಪ್ತ್ ಮನಿಸ್ ಜಾಲ್ಲೊ ತೊ ತಾಂಕಾ ಸಮ್ಜಾಯ್ತಾಲೊ "ಹಾವೆಂ ತುಮ್ಕಾಂ ಸಾಂಗ್‌ಲ್ಲೆಂ ನಂಯ್ಗೀ? ದಿಸಾಕ್ ಧಾ ವೊರಾಂಚೆಂ ಕಾಮ್ ಆಸಾ. ಹಾಪ್ತ್ಯಾಂತ್ ಏಕ್ ಪಾವ್ಟಿಂ ಶಿಫ್ಟ್ ಬದ್ಲುಂಕ್ ಪಡ್ತಾ. ದೋನ್ ಹಾಪ್ತೆ ದಿಸಾಕ್ ಕಾಮ್ ತರ್ ಏಕ್ ಹಾಪ್ತೊ ರಾತಿಕ್ ಕಾಮ್. ಫಕತ್ ಗೆಟಿಭಿತರ್ ಯೆಂವ್ಚಾ ಗಾಡಿಯಾಂಚೆಂ ನಂಬರ್ ಬರಂವ್ಚೆಂ, ಆನಿಂ ತಾಣಿಂ ಕಿತ್ಲಿ ಗೊಣಿಂ ಸಮಾನ್ ಹಾಡ್ಲಾ/ವ್ಹೆಲಾ ತಾಚೆಂ ಲೇಖ್ ದವರ್ಚೆಂ."

"ತುಮಿಂ ಯೆಂವ್ಚಾ ವೆಚಾ ಗಾಡಿಯಾಂಚೆರ್ ಮಾತ್ರ್ ನ್ಹಂಯ್, ಗುದಾಂವಾಂ ಭಿತರ್ ಗೊಣಿಯೊ ಚಡಂವ್ಚಾ ದೆಂವಂವ್ಚಾ ಮನ್ಶಾಂಚೆರ್‌ಯ್ ನದರ್ ದವರ್ಚಿ ಗರ್ಜ್."

"ಹಾಂ ತುಮಿಂ ಕಾಮಾವೆಳಾರ್ ನಿದೊಂಕ್ ನಜೊ ಮ್ಹಣೊನ್ ಖಡಕ್ಕ್ ಸಾಂಗ್ಲಾಂ" ಮ್ಹಣೊನ್ ಬೆಂಗಾಲಿ ಸಾಂಗಾಲಾಗ್ಲೊ.

ಅಶೆಂ ತೆಗಾಂಕ್ ಕಾಮ್ ಕರ್ಚೆಲಾಗಿಂ ಸೊಡ್ನ್ "ತುಮ್ಚೊ ಪೆಟೊ ಘೆವ್ನ್ ಹಾಂವ್ ಪರತ್ ಫ಼ಾಲ್ಯಾಂ ಯೆತಲೊಂ" ಮ್ಹಣೊನ್ ಬೆಂಗಾಲಿ ಡ್ರಾಯ್ವರ್ ಪಾಟಿಂ ಗೆಲೊ ಆನಿಂ ತೆ ತೆಗೀ ಭಾಯ್ರ್ ಭಿತರ್ ಭಂವ್ತಾಲೆ.

ಚಡ್ತಿಕ್ ಕಾಮ್ ನಾತ್‌ಲ್ಲೆಂ ದೆಖುನ್ ತಿಯೊಕ್ ಮಾರ್ಕುಚೊ ಉಡಾಸ್ ಆಯ್ಲೊ. ತಾಕಾ ಕಶೆಂ ತರೀ ಮೆಳಜಯ್ ಮ್ಹಣೊನ್ ಚಿಂತ್ಲೆಂ. ಮಾರ್ಕುಚೊ ಪಾತ್ತೊ ಸೊಧುನ್ ಕಾಡುಂಕ್ ತ್ರಾಸ್ ಖಂಡಿತೀ ಭೊಗ್ತೆಲೆ ಕಿತ್ಯಾಕ್ ಮ್ಹಳ್ಯಾರ್ ಮಾರ್ಕುಚೊ ಪೋಸ್ಟ್ ಬೋಕ್ಸ್ ಮಾತ್ರ್ ತಿಯೊಲಾಗಿಂ ಆಸ್‌ಲ್ಲೊ ಶಿವಾಯ್ ಸಾರ್ಕೊ ಪಾತ್ತೊ ನಾತ್‌ಲ್ಲೊ ತರೀ ಆಪ್ಣಾಚೊ ಪಾತ್ತೊ ತಾಕಾ ದಾಡ್ನ್ ಆಪ್ಣಾಕ್ ಮೆಳೊಂಕ್ ಯೇ ಮ್ಹಣೊನ್ ಏಕ್ ಕಾಗಾದ್ ಬರವ್ನ್ ದವರ್ಲೆಂ.

ದುಸ್ರೆ ದೀಸ್ ತಿಯೊಚೊ ಪಯ್ಲೊ ಕಾಮಾಚೊ ದೀಸ್ ಉದೆಲೊ. ತೆಗಾಂಯ್ನೀ ಆಪಾಲ್ಯೊ ಪೆಟೊ ಘೆತ್ಲ್ಯೊ ಆನಿಂ ತೆಗಾಂಯ್ಕೀ ಹಾಡ್ನ್ ಗುದಾಂವಾಕ್ ಪಾವ್ನ್ ಜಾತೆಚ್ಚ್ ತಿಯೊಚೆಂ ಕಾಗಾದ್ ಘೆವ್ನ್ ಚಲ್ಲೊ. ವೆತಾನಾ ಪರತ್ ಸಾಂಗಾಲಾಗ್ಲೊ "ತುಮ್ಕಾಂ ಹಾಪ್ತ್ಯಾಚಿ ರಜಾ ಆಯ್ತಾರಾ ಆಸ್ತೆಲಿ. ಆನಿಂ ಹರ್ಯೆಕಾ ಮಹಿನ್ಯಾಚಾ ಪಾಂಚ್ ತಾರಿಕೆರ್ ತುಮ್ಕಾ ತುಮ್ಚೊ ಸಾಂಬಾಳ್ ಮೆಳ್ತಲೊ".

ಮಾರ್ಕುಕ್ ಬರಯಿಲ್ಲೆಂ ಕಾಗಾದ್ ತಿಯೊನ್ ಬೆಂಗಾಲಿಕ್ ದಿಲೆಂ ಆನಿಂ ಬೆಂಗಾಲಿನ್ ತಾಂಚೆಂ ಕಾಮ್ ವಾಂಟುನ್ ದಿಲೆಂ. ಪಯ್ಲೊ ಹಾಪ್ತೊ ತಿಯೊಕ್ ದಿಸಾಚೆಂ ಕಾಮ್. ದುಸ್ರೊ ಹಾಪ್ತೊಯ್ ದಿಸಾಚೆಂ ಕಾಮ್ ಆನಿ ತಿಸ್ರೊ ಹಾಪ್ತೊ ರಾತಿಚೆಂ ಕಾಮ್. ಅಶೆಂಚ್ ಮಣಿಕ್‌ಯಿ ಸಾಂಗ್ಲೆಂ ಆನಿಂ ಗೋಪಿಕ್ ಪಯ್ಲೊ ಹಾಪ್ತೊ ರಾತಿಚೆಂ ಕಾಮ್ ಕರುಂಕ್ ಸಾಂಗ್ಲೆಂ.

ದೀಸ್‌ಭರ್ ಯೆಂವ್ಚಾ ವೆಚಾ ಗಾಡಿಯಾಂಕ್, ಸಮಾನಾಚಾ ಗೋಣಿಯಾಂಕ್ ಮೆಜುನ್, ಮಧೆಂ ಮಧೆಂ ಇಲ್ಲೊ ವೇಳ್ ಮೆಳ್ತಾನಾ ಆಪ್ಲ್ಯಾ ಭುರ್ಗ್ಯಾಂಚೊ ಆನಿ ಎಸ್ತೆಲಾಚೊ ಉಡಾಸ್ ಕಾಡೀತ್ ತಿಯೊನ್ ಕಸೊಯ್ ಪಯ್ಲೊ ದೀಸ್ ಸಂಪಯ್ಲೊ.

ಹ್ಯಾ ಮಧೆಂ ತಾಕಾ ಸೊಸುಂಕ್ ಕಶ್ಟ್ ಜಾಲ್ಲಿ ಮ್ಹಳ್ಯಾರ್ ಧಗ್. ಗಾಂವಾಂತ್ ಜಾಲ್ಯಾರ್ ಗಿಮೆಚಾ ದಿಸಾಂನಿ ಆಂಗ್ ಉಗ್ತೆಂ ದವರ್ನ್, ಪೆಂಕ್ಟಾರ್ ಏಕ್ ಭಾಯ್ರಾಸ್ ಬಾಂಧುನ್ ತೊ ಕಾಮ್ ಕರ್ತಾಲೊ. ಪುಣ್ ಹೊ ಗಾಂವ್ ಪರ್ಕಿ ಆನಿಂ ನವೊ. ದೆಖುನ್ ಸೊಸುಲ್ಲೆಶಿವಾಯ್ ಹೆರ್ ನಿರ್‍ವೋಗ್ ತಾಕಾ ನಾತ್‌ಲ್ಲೊ.

ದೀಸ್‌ಭರ್ ಉಗ್ತ್ಯಾ ಸುವಾತೆರ್ ಗೆಟಿಲಾಗಿಂಚ್ ಬೊಸೊಂಕ್ ಆಸ್‌ಲ್ಲೆಂ. ತ್ಯಾ ಭಾಯ್ರ್ ತೊ ಜುಲಾಯ್ಚೊ ಮಹಿನೊ ಜಾಲ್ಲೆವರ್ವಿಂ ಧಗ್ ವಿಪ್ರೀತ್ ಆಸ್‌ಲ್ಲಿ. ಹಾಂಗಾಚಾ ಖಾಣಾಚಿ ಸವಯ್ ನಾಸ್ತಾಂಗೀ, ಕಿತೆಂಗೀ ಪಯ್ಲೆದೀಸ್ ತಿಯೊಚೆ ದೊಳೆ ಕಠೀಣ್ ಹುಲ್ಪೊಂಕ್ ಲಾಗ್ಲೆಂ. ಕಶೊಯ್ ದೀಸ್ ಸಂಪೊನ್ ಆಯ್ಲೊ ಆನಿಂ ಕುಡಾಕ್ ಪಾಟಿಂ ಆಯಿಲ್ಲೊ ತಿಯೊ ನಾಂವ್ಕ್ ನಾಣಿಯೆಕ್ ಗೆಲೊ. ಉಗ್ತಿ ನಾಣಿಂ ತರೀ ಥಂಯ್ ಆಸ್ಚೆ ಸಗ್ಳೆ ದಾದ್ಲೆ ಜಾಲ್ಲೆವರ್ವಿಂ ಕೊಣಾಯ್ಕೀ ಕಸ್ಲಿಚ್ ಫಿಕಿರ್ ನಾತ್‌ಲ್ಲಿ.

ತಿಯೊ ತೋಂಡ್ ಧುಂವ್ಕ್ ಬೆಸಿನಾಕ್ ಬಾಗ್ವಲೊ. ನಾಕಾಚೆಂ ಕಿರ್ಮೆ ಕಾಡ್ತಾನಾ ತಾಕಾಚ್ ಅಜ್ಯಾಪ್. ರಗ್ತಾಚೆ ಥೆಂಭೆ ಭಾಯ್ರ್ ಆಯ್ಲೆ. ಏಕ್ ಘಡಿ ತಾಚಾ ಕಾಳ್ಜಾಂತ್ ಜುಮ್ ಜಾಲೆಂ ತರೀ ನಾಂವ್ನ್ ಜಾವ್ನ್ ತೊ ಯೇವ್ನ್ ಮಣಿಲಾಗಿಂ ತಾಚಾ ನಾಕಾಂತ್ ರಗಾತ್ ಆಯಿಲ್ಲಿ ಗಜಾಲ್ ಸಾಂಗ್ಲಿ. ಭೋವ್ಶಾ ಧಗಿಂತ್ ಜಾಯ್ಜಯ್ ಮ್ಹಣೊನ್ ಲೆಕ್ಲೆಂ ಆನಿಂ ರಾತಿಂ ಜೇವ್ನ್ ತೊ ನಿದ್ಲೊ.

ಹ್ಯಾ ಗಾಂವಾಂತ್ ಸಗ್ಳೆಂ ಪರ್ಕಿ ಜಾಲ್ಲೆಂ ತಿಯೊಕ್. ತಾಚಾ ಭಲಾಯ್ಕೆವಿಶ್ಯಾಂತ್ ಫಿಕಿರ್ ಕರ್ಚಿಂ ಕೊಣೀಂ ನಾತ್‌ಲ್ಲಿಂ. ಆಪ್ಣಾಚಿ ಆಪ್ಣಾನ್೦ಚ್ ಫಿಕಿರ್ ಕರ್ಚಿ ಗರ್ಜ್ ಸಮ್ಜಾಲ್ಲೊ ತಿಯೊ ಕಾಂಯ್ ಭಿಯೆಲೊನಾ. ತಾಚಾ ದೊಳ್ಯಾಂ ಹುಜಿರ್ ಫಕತ್ ತಾಚಾ ಬಾಯ್ಲೆಭುರ್ಗ್ಯಾಂಚೆ ಬರೆ ದೀಸ್ ಆಸ್‌ಲ್ಲೆ ಆನಿಂ ತ್ಯಾ ಖಾತಿರ್ ಅಸಲೆ ಸಾಕ್ರಿಫಿಸ್ ಗರ್ಜೆಚೆ ಮ್ಹಳ್ಳೆಂ ತಾಣೆಂ ಎದೊಳ್‌ಚ್ ಸಮ್ಜೊನ್ ಜಾಲ್ಲೆಂ.

ಗುದಾಂವಾ ಪಾಟ್ಲ್ಯಾನ್ ಏಕ್ ಆಂಗಡ್ (ಬಕಾಲಾ) ಆಸ್‌ಲ್ಲಿ. ತಾಂತುಂ ವಿಕ್ಚಿ ತರ್ಕಾರಿ ಕಾಂಯ್ ಇಲ್ಲಿ ಬಾವೊನ್ ಆಯ್ಲಿ ತರ್ ತಿ ತರ್ಕಾರಿ ಹ್ಯಾ ಗುದಾಂವಾಕ್‌ಚ್ ಯೆತಾಲಿ. ಆನಿಂ ಹಿ ತರ್ಕಾರಿ ಗುದಾಂವಾಂತ್ ರಾಂದುಂಕ್ ಪಡ್ತಾಲಿ. ಗುದಾಂವಾಂತ್ ಚಡುಣೆಂ ಪಂದ್ರಾ ಮನ್ಶಾಂ ಆಸ್‌ಲ್ಲಿಂ.

ಕಿತೆಂ ಜಾಲ್ಯಾರೀ ಹಾಂಗಾಸರ್ ಖಾಂವ್ಕ್ ಜಾಯ್‌ತಿತ್ಲೆಂ ಮೆಳ್ತಾಲೆಂ. ತಿತ್ಲೆಂಚ್ ನ್ಹಂಯ್ ಪೋಟ್ ಭರ್ತಾಸರ್ ಖಾಂವ್ಚಿ ಸವಯ್ ಆಸ್ಚೊ ತಿಯೊ ತ್ಯೊ ತೀನ್ ಇರಾನಿ ಭಾಕ್ರ್ಯೊ ಖಾವ್ನ್ ದೆಂಖ್ ಕಾಡ್ತಾನಾ ತಾಚೆಂ ಪೋಟ್ ಭರ್ತಾಲೆಂ. ಪುಣ್ ಗಾಂವಾಂತ್ ಧಗ್ ಜಾಲ್ಯಾರ್ ಉಗ್ತ್ಯಾ ಆಂಗ್ಣಾಂತ್ ಯೇವ್ನ್ ನಿದ್ಚಾ ತಿಯೊಕ್ ಹಾಂಗಾಚಿ ಧಗ್ ವಿಪ್ರೀತ್ ಮ್ಹಣೊನ್ ಭೊಗ್ಲೆಂ. ತ್ಯಾ ಎಕಾ ಫೆನಾ ಥಾವುನ್ ಯೆಂವ್ಚೆಂ ವಾರೆಂ ಹುನ್ ಹುನ್ ಜಾವ್ನ್ ಯೆತಾಲೆಂ. ಮಣಿ ಮಾತ್ರ್ ಎದೊಳ್‌ಚ್ ನಿದೆಂತ್ ಘೊರೆತಾಲೊ. ಪುಣ್ ತಿಯೊ ಆನಿ ಗೋಪಿಕ್ ಭೋವ್ಶಾ ಧಗ್ ಸೊಸುಂಕ್ ಜಾಯ್ನಾಸ್ತಾಂ ಆಪ್ಲ್ಯಾ ಬಾವ್ಳೆ ವೊಳ್ತಾಪರ್ಯಾಂತ್ ಎಕಾ ರಟ್ಟ್ ಘೆವ್ನ್ ವಾರೆಂ ಘಾಲಿಲಾಗ್ಲೆ. ಪುಣ್ ಭಿತರ್ ಯಾ ಭಾಯ್ರ್ ಆಸ್ಚೆಂ ವಾರೆಂಚ್ಚ್ ಹುನ್ ಆಸ್‌ಲ್ಲೆವರ್‍ವಿಂ ತಾಂಕಾ ಕಿತೆಂಚ್ ಕರುಂಕ್ ಜಾಲೆಂನಾ. ಗೋಪಿ ಉಟೊನ್ ಭಾಯ್ರ್ ಆಯ್ಲೊ ಆನಿಂ ಭಾಯ್ರ್ ಆಸ್ಚಾ ನಾಣಿಯೆಂತ್ ವಚೊನ್ ನ್ಹಾಲೊ. ಪುಣ್ ಥಂಯ್ ಆಸ್ಚೆಂ ಉದಾಕ್ ಲೆಗುನ್ ಹುನ್ ಆಸ್‌ಲ್ಲೆಂ.

ತೆಂ ಗುದಾಂವ್ ದರ್‍ಯಾಚಾ ಬಗ್ಲೆನ್೦ಚ್ ಆಸ್‌ಲ್ಲೆವರ್‍ವಿಂ, ಲಾರಾಂಚೊ ಆವಾಜ್ ಸ್ವಸ್ಟ್ ಆಯ್ಕಾತಾಲೊ. ಮಾತ್ರ್ ನ್ಹಂಯ್ ತ್ಯಾ ಕಾಳೊಕಾಂತ್ ತಾಂಚಿ ದೀಶ್ಟ್ ಭಾಯ್ರ್ ಘಾಲ್ತಾನಾ ತಾಂಕಾ ಥಂಯ್ಚೊ ಉಟೊನ್ ಆಸ್ಚೊ ಫ಼ೊಲೆರ್ ದಿಸ್ತಾಲೊ.

ದುಸ್ರೊ ಕಸ್ಲೊಚ್ ನಿರ್‍ವೋಗ್ ನಾಸ್ತಾಂ, ತಿಯೊನ್ ಹಾಂಗಾಚಾ ಹವ್ಯಾಕ್ ಹೊಂದ್ವೊನ್ ಚಲಾಜಯ್ ಆಸ್‌ಲ್ಲೆಂ. ಅಶಿಚ್ಚ್ ಕಾಂಯ್ ಭಲಾಯ್ಕಿ ಭಿಗ್ಡತ್‌ಗೀ ಮ್ಹಳ್ಳೊ ದುಭಾವ್ ಏಕ್ ಗಡಿ ಆಯ್ಲೊ ತರೀ ಜಾಂವ್ಚೆಂ ಸಗ್ಳೆಂ ಬರ್‍ಯಾಕ್‌ಚ್ಚ್ ಮ್ಹಣೊನ್ ಲೆಕುನ್ ತೊ ಚಿಂತಿಲಾಗ್ಲೊ.

ಗಾಂವ್ಚೆಪರಿಂ ಹಾಂಗಾ ಪಾವ್ಸ್ ನಾ. ಹಾಂಗಾಚೆಂ ವೋತ್‌ಯಿ ಕಠೀಣ್ ಹಿಂವ್‌ಯಿ ಕಠೀಣ್ ಮ್ಹಣೊನ್ ತಿಯೊನ್ ಆಯ್ಕಾಲ್ಲೆಂ. ಹಿ ಸುರ್‍ವಾತ್ ಮಾತ್ರ್. ಆನಿಂ ಫುಡೆಂ ಹಾಚಾಕೀ ಚಡ್ ಧಗ್ ಆಸ್ತೆಲಿ ಮ್ಹಣೊನ್ ಮಸ್ರಿನ್ ಸಾಂಗ್‌ಲ್ಲೆಂ ಬೆಂಗಾಲಿನ್ ಸಾಂಗ್ತಾನಾ ತೆಗಾಂಯ್ಚಾಯ್ ತೊಂಡಾರ್ ಉತ್ರಾಂ ನಾತ್‌ಲ್ಲಿಂ. ಕಿತ್ಲೆ ಕಶ್ಟ್ ಆಯ್ಲ್ಯಾರೀ ಹಾಂಗಾಸರ್ ಕಾಂಯ್ ಇಲ್ಲಿಂ ವರ್‍ಸಾಂ ಕಾಮ್ ಕರಿಜಾಯಿಚ್ಚ್ ಮ್ಹಳ್ಳೆಂ ಹಟ್ ಆಸ್‌ಲ್ಲ್ಯಾನ್ ತೆಗಾಂಯ್ಕೀ ಹ್ಯಾ ಹವ್ಯಾಕ್ ಹೊಂದ್ವೊನ್ ಜಿಯೆಲ್ಲೆಖರಿತ್ ಹೆರ್ ವಾಟ್ ದಿಸ್ಲಿನಾ.

ಮುಂದರ್‍ಸಿಲಾಂ...

Tags: Vally Quadras,e konkani novel, Konkani, Mangalore, Mangalorean, Mother Tongue

From around the world

ಪಾಟಿಂ ಗಾಂವಾಕ್ - ಅವಸ್ವರ್ 3

Post your comments

ಅವಸ್ವರ್ 1

ಅವಸ್ವರ್ 2

ಅವಸ್ವರ್ 3

ಅವಸ್ವರ್ 4

ಅವಸ್ವರ್ 5

ಅವಸ್ವರ್ 6

ಅವಸ್ವರ್ 7

ಅವಸ್ವರ್ 8

ಅವಸ್ವರ್ 9

ಅವಸ್ವರ್ 10

ಅವಸ್ವರ್ 11

ಅವಸ್ವರ್ 12

ಅವಸ್ವರ್ 13

ಅವಸ್ವರ್ 14

ಅವಸ್ವರ್ 15

ಅವಸ್ವರ್ 16

ಅವಸ್ವರ್ 17

ಅವಸ್ವರ್ 18

ಅವಸ್ವರ್ 19

ಅವಸ್ವರ್ 20

ಅವಸ್ವರ್ 21

ಅವಸ್ವರ್ 22

ಅವಸ್ವರ್ 23

ಅವಸ್ವರ್ 24

ಅವಸ್ವರ್ 25

ಅವಸ್ವರ್ 26

ಅವಸ್ವರ್ 27

ಅವಸ್ವರ್ 28

Connect

Our Address
Mangalore

Our Address
Udupi

Our Address
Dubai

From around the world

Post your comments

Connect

Our AddressMangalore

Our AddressUdupi

Our AddressDubai

Our Address
Mangalore

Our Address
Udupi

Our Address
Dubai