:: ಮಾಯ್ ಭಾಸ್

ಘೊವಾಕ್ ಹ್ಯಾ ಕಸ್ಲ್ಯಾಯ್ ಸಂಗ್ತ್ಯಾಂಚಿ ಫಿಕಿರ್ ನಾಸ್ತಾಂ ತಸೊಚ್ಚ್ ಆಸ್‌ಲ್ಲೊ. ದೀಸ್‌ಭರ್ ಘೊಳ್ತಾಲೊ ಆನಿ ಸಾಂಜೆರ್ ಪಾಟಿಂ ಯೆತೆಚ್ಚ್ ಸೊರೊ ಪಿಯೆವ್ನ್ ಯೆತಾಲೊ ಆನಿ ಜೇವ್ನ್ ನಿದ್ತಾಲೊ. ತಾಕಾ ಸಂಸಾರಾಚಿ ಜಾಂವ್ ಹೆರ್ ಕಸ್ಲ್ಯಾಚಿಚ್ ಜಾಂವ್ ಫಿಕಿರ್ ನಾತ್‌ಲ್ಲಿ. ಘರ್ ಅಶೆಂಚ್ ಚಲ್ತಾಲೆಂ. ಅಶೆಂ ದೀಸ್ ವೆತಾನಾ ಹುಂಡೆಂತ್ ಜಾಲ್ಯಾರೀ ಧಾ ಜಣಾಂ ಆಸ್‌ಲ್ಲಿಂ ಆನಿ ತೆ ಧಾ ಜಣಾಂಚೆ ಪೊಯ್ಶೆ. ತಾಂತುಂ ಎಕ್ಲೊ ಫಟ್ಕಿರೊ ತಿಸ್ರ್ಯಾ ಮಹಿನ್ಯಾಂತ್ ಪೊಯ್ಶೆ ಘೆವ್ನ್ ಪೊಳ್ಳೊ ಆನಿ ಆತಾಂ ತ್ಯಾ ಬಾಯ್ಲೆಕ್ ಕಠೀಣ್ ಸ್ಥಿತಿ ಆಯ್ಲಿ. ಹೆರಾಂ ನೋವ್ ಜಣಾಂಕ್ ತಿಣೆಂ ಪೊಯ್ಶೆ ದೀಂವ್ಕ್ ಆಸಾತ್. ತಿಣೆಂ ತಿಚಾ ಕಶ್ಟಾಂತ್ ಕಾಂಯ್ ಕುಮೊಕ್ ಜಾತಿತ್ ಮ್ಹಳ್ಲ್ಯಾ ಎಕಾಚ್ಚ್ ಚಿಂತ್ಪಾನ್ ಪೊಯ್ಸೆ ಹಾಡ್‌ಲ್ಲೆ ಸೊಡ್ಲ್ಯಾರ್ ಅಶೆಂ ಜಾಯ್ತ್ ಮ್ಹಣೊನ್ ತಿಣೆಂ ಸಪ್ಣಾಂತೀ ಚಿಂತುಂಕ್ ನಾ. ತಿಚಿ ಸ್ಥಿತಿ ಆತಾಂ ಬೊಡಿ ದೀವ್ನ್ ಮಾರ್ ಖೆಲ್ಲೆಪರಿಂ ಜಾಲ್ಲಿ.

ಅಶೆಂ ದೀಸ್ ಗೆಲ್ಲೆಪರಿಂಚ್ ತಿಕಾ ಪೊಯ್ಶೆ ದೀಂವ್ಕ್ ಆಸ್‌ಲ್ಲೆ ಆನಿ ವಾಯ್ದ್ಯಾ ವಯ್ರ್ ವಾಯ್ದೊ ತಿಣೆ ದಿಲೊ ಆನಿ ಜೊಡಿರ್ ನಾತ್‌ಲ್ಲಿ ತಿ ಬಾವ್ಡಿ ಕಿತೆಂ ಕರ್ತೆಲಿ? ಪಿಯೆಂವ್ಣ್ಯಾಚೊ ಘೊವ್ ಆನಿ ಘರಾಂತ್ ಆಸ್ಚಿಂ ಲ್ಹಾನ್ ಲ್ಹಾನ್ ಇಸ್ಕೊಲಾಕ್ ವೆಚಿಂ ಭುರ್ಗಿಂ. ಭುರ್ಗಿಂ ಬಾವ್ಡಿಂ ಕಿತೆಂ ಸಮ್ಜತಾತ್? ತಾಂಕಾ ಹೆರಾಂಚಾ ಭುರ್ಗ್ಯಾಂಕ್ ಆಸ್ಚೆಪರಿಂಚ್ ಸಗ್ಳೆಂ ಜಾಯ್. ಭಾಯ್ರ್ ವೆತಾನಾ ಬಕಲಾ (ಲ್ಹಾನ್ ಆಂಗಡ್)ಥಾವುನ್ ಸುಪರ್‌ಮಾರ್ಕೆಟಿಂ ಪರ್‍ಯಾಂತ್ ತಾಂಕಾ ಚೊಕ್ಲೆಟಾಂ ಆನಿ ಖೆಳಾಚೊ ವಸ್ತು ಸಗ್ಳ್ಯೊ ಘೆಂವ್ನ್ ದೀನಾತ್ಲ್ಯಾರ್ ರಡ್ತಾಲಿಂ.

ಅಶೆಚ್ಚ್ ದೀಸ್ ಪಾಶಾರ್ ಜಾಲೆ ಆನಿ ರಿಣ್ಕಾರಿಂಕ್ ಹ್ಯಾ ಬಾಯ್ಲೆಚೆರ್ ಆಸ್‌ಲ್ಲೊ ಭರ್ವಸೊ ಸಗ್ಳೊ ಸಂಪೊನ್ ಆಯ್ಲೊ ಆನಿ ಎಕಾ ದಿಸಾ ತೆ ಹಿಚಾ ಘರಾ ಬಾಗ್ಲಾರ್ ಯೇವ್ನ್ ಬೊಸ್ಲೆ. ತ್ಯಾ ಬಿಲ್ಡಿಂಗಾಂತ್ ಯೆಂವ್ಚಿಂ ವೆಚಿಂ ಸಗ್ಳಿಂ ದಾರಾಲಾಗಿಂ ಉಭೊ ಆಸ್ಚಾ ತಾಂಕಾ ಪಳೆಂವ್ಕ್ ಲಾಗ್ಲಿಂ. ತರೀ ತ್ಯಾ ಬಾಯ್ಲೆಕ್ ದುಸ್ರಿ ವಾಟ್ ಮೆಳ್ಳಿನಾ. ವಳ್ಕಿಚಾಂಕ್ ಮೆಳೊನ್ ಕಾಂಯ್ ಇಲ್ಲೆ ಪರತ್ ರೀಣ್ ಮೆಳತ್‌ಗೀ ಮ್ಹಳ್ಳ್ಯಾ ಆಶೆನ್ ಗೆಲಿ. ಪುಣ್ ಖಂಯ್ಸರೀ ತಿಕಾ ಪೊಯ್ಸೆ ಮೆಳ್ಳೆನಾಂತ್. ವಿಕುಂಕ್ ತಿಚಾ ಗಳ್ಯಾರ್ ಏಕ್ ಸುತ್ ಸೊಡ್ಲ್ಯಾರ್ ಹೆರ್ ಕಿತೆಂಚ್ ನಾ.

ದೀಸ್ ಬುಡೊನ್ ರಾತ್ ಜೂನ್ ಜಾಲಿ. ಪುಣ್ ಹೆ ಮನಿಸ್ ದಾರಾಥಾವ್ನ್ ಹಾಲ್ಲೆನಾಂತ್. ಆಪ್ಣಾಚೆ ಪೊಯ್ಶೆ ಮೆಳ್‌ಲ್ಲೆ ಖರಿತ್ ಪಾಟಿಂ ವೆಚಿಂನಾಂವ್ ಮ್ಹಳ್ಳ್ಯಾ ಎಕಾಚ್ಚ್ ಹಟಾನ್ ತೆ ಥಂಯ್ ಉರ್ಲೆ. ಅಶೆಂ ರಾತಿಂ ಸಾಡೆಭಾರಾ ವೊರಾಂಕ್ ಪಾಟಿಂ ಆಯಿಲ್ಲ್ಯಾ ತ್ಯಾ ಭಾಯ್ಲೆಕ್ ಕಿತೆಂ ಜಾಪ್ ದಿಂವ್ಚಿ ಮ್ಹಳ್ಳೆಂಚ್ ಕಳ್ಳೆಂನಾ. ತಿಣೆ ತಾಂಚೆಲಾಗಿಂ ಪರತ್ ದೋನ್ ದಿಸಾಂಚಿ ಆವ್ದಿ ಮಾಗ್ಲಿ. ಆನಿ ಇತ್ಲೊ ವೇಳ್ ರಾವೊನ್೦ಯಿ ಕಾಂಯ್ ಫಾಯ್ದೊ ನಾಂ ಆನಿ ಆತಾಂ ತಾಂಕಾಂಯ್ ಕಿತೆಂ ಕರ್‍ಯೆತಾ? ಚಡ್ ಮ್ಹಳ್ಯಾರ್ ತಿಚೊ ಜೀವ್ ಕಾಡ್ಯೆತ್ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್. ಅಶೆಂ ತೆ ದುಸ್ರಿ ವಾಟ್ ನಾಸ್ತಾಂ ಪಾಟಿಂ ಗೆಲೆ. ಪೊಯ್ಶ್ಯಾಂಚಿ ಗರ್ಜ್ ತಾಂಕಾಯ್ ಆಸ್‌ಲ್ಲಿ ದೆಖುನ್ ತೆ ಇತ್ಲೊ ವೇಳ್ ತರೀ ರಾಕೊನ್ ಬೊಸ್‌ಲ್ಲೆ. ಆನಿ ಆತಾಂ ತಾಂಕಾಯ್ ಹೆ ಪೊಯ್ಶೆ ವಸೂಲ್ ಕರುಂಕ್ ದುಸ್ರೊ ಉಪಾಯ್ ನಾತ್‌ಲ್ಲೊ.

ದುಸ್ರೆ ದೀಸ್ ಸೆಜಾರ್ಚಾಂನಿ ವಿಚಾರುಂಕ್ ಧರ್ಲೆಂ. ತಿಂ ಕೋಣ್? ಕಿತ್ಯಾಕ್ ಆಯಿಲ್ಲಿಂ? ಮ್ಹಣೊನ್. ಬಿಲ್ಡಿಂಗಾಂತ್ ಅಕ್ಮಾನ್ ಆನಿ ಲಜ್. ದುಸ್ರೆ ದೀಸ್ ಭುರ್ಗ್ಯಾಂಕ್ ತಾಂಚೆಸವೆಂ ಖೆಳೊಂಕ್ ಕೊಣೀಂ ಭುರ್ಗಿಂ ನಾತ್‌ಲ್ಲಿಂ ಪಳೆವ್ನ್ ಅಜಾಪ್. ಪುಣ್ ಹೆಂ ಕಿತೆಂಚ್ ಆಪ್ಣಾಕ್ ಕಳಿತ್ ನಾ ಮ್ಹಣೊನ್ ತಿಚೊ ಘೊವ್ ಸುಶೆಗಾತ್ ಪಿಯೆತಾಲೊ. ಆನಿ ಘರಾಂತ್ ಪಡ್ತಾಲೊ.

ದಿಲ್ಲ್ಯಾ ವಾಯ್ದ್ಯಾ ಪ್ರಕಾರ್ ದೋನ್ ದೀಸ್ ಉತಾರ್ಲೆ ಆನಿ ತ್ಯಾ ಬಾಯ್ಲೆಕ್ ಆತಾಂ ಕಿತೆಂ ಕರುಂಕೀ ನ್ಹಂಯ್. ರೀಣ್ ವಿಚಾರುಂಕ್ ಹ್ಯೇ ಪಾವ್ಟಿಂ ತೆ ಆಯ್ಲೆನಾಂತ್, ಬಗಾರ್ ತಾಣಿಂ ಧಾಡ್‌ಲ್ಲೆ ಯೇಜಂಟ್ ಆಯ್ಲೆ. ಯೇಜಂಟಾಂಕ್ ತೀಸ್ ಠಕ್ಕೆ ಕಮಿಶನ್ ದಿಲೆಂ ತರ್ ತೆ ಯೇವ್ನ್ ಕೊಣಾಯ್ಲಾಗ್ಚೆ ಪೊಯ್ಶೆ ವಸೂಲ್ ಕರ್ನ್ ದಿತಾಲೆ. ಆನಿ ಖಂಯ್ ಥಾವ್ನ್ ಆನಿ ಕಶೆ ಪೊಯ್ಶೆ ಹಾಡ್ಚೆ ಮ್ಹಳ್ಳೆಂ ಕಳಾನಾತ್‌ಲ್ಲ್ಯಾ ತ್ಯಾ ಬಾಯ್ಲೆಕ್ ಸಗ್ಳ್ಯಾ ವಾಟಾಂನಿ ಕಾಳೊಕ್‌ಚ್ ದಿಸ್ತಾಲೊ. ತರೀ ತೆಂ ಭಾಯ್ರ್ ವಚೊನ್ ಆಪುಣ್ ಕೊಣಾಯ್ಲಾಗಿಂ ಪುಣಿಂ ಘೆವ್ನ್ ಯೆತೆಲಿಂ ಮ್ಹಣೊನ್ ಭಾಯ್ರ್ ಗೆಲೆಂ. ತೆಂ ಭಾಯ್ರ್ ವೆತೆಚ್ ತೆ ಥಂಯ್ಚ್ ದಾರಾಲಾಗಿಂ ಬೊಸ್ಲೆ.

ರಾತ್ ಜೂನ್ ಜಾವ್ನ್ ಯೆತಾಲಿ ಆನಿ ಮಧ್ಯಾನೆ ರಾತಿಂ ಘರಾ ಸಮೊರ್ ಏಕ್ ಗಾಡಿ ಉಭಿ ಜಾಲಿ. ಆನಿ ತ್ಯಾ ಗಾಡಿಯೆರ್ ಥಾವ್ನ್ ದೋಗ್ ಪೊಲಿಸ್ ದೆಂವ್ಲೆ ಆನಿ ತಾಂಚಾ ಹಾತಾಂತ್ ಆಸ್ಚಾ ಸಿವಿಲ್ ಆಯ್ಡಿಂತ್ ಆಸ್ಚಾ ಪಾತ್ತ್ಯಾಕ್ ಸೊಧಿಲಾಗ್ಲೆ. ಇಲ್ಲೆಶ್ಯಾ ವೆಳಾನ್ ತ್ಯಾ ಬಾಯ್ಲೆಚಾ ಘರಾ ತೆ ಆಯ್ಲೆ ಆನಿ ಎದೊಳ್‌ಚ್ಚ್ ಪಿಯೆಲ್ಲ್ಯಾ ಘೊವಾಕ್ ಪಳೆವ್ನ್ ಅಜಾಪ್ಲೆ. ಹಾಂಗಾಸರ್ ಪಿಯೆಲ್ಲೊ ಮೆಳತ್ ತರ್ ತಾಕಾ ಧರ್ನ್ ಜಯ್ಲಾ ಭಿತರ್ ಘಾಲ್ತಾತ್ ಮಾತ್ರ್ ನ್ಹಂಯ್ ತೊ ಖೈಂ ಪಿಯೆಲ್ಲೊ ಮ್ಹಳ್ಳೆಂ ಸೊಧುನ್ ಕಾಡುನ್ ತಾಂಕಾಂಯ್ ಧರ್ತಾತ್. ರಸ್ತ್ಯಾ ಆವ್ಘಡಾಂತ್ ಸರ್‌ಲ್ಲ್ಯಾ ತ್ಯಾ ಬಾಯ್ಲೆವಿಶ್ಯಾಂತ್ ತಿಚಾ ಹಾತಾಂತ್ ಆಸ್ಚಿ ತಿಚಿ ಸಿವಿಲ್ ಆಯ್ಡಿ ಘೆವ್ನ್ ಆಯಿಲ್ಲ್ಯಾ ಪೊಲಿಸಾಂಕ್ ತಿಚಾ ಮರ್ಣಾಚಿ ಖಬಾರ್ ದಿಂವ್ಚಾಧಿಂ ತಿಚಾ ಪಿಯೆಂವ್ನ್ ಥಾರ್‍ಯಾರ್ ನಾಸ್ಚಾ ತಿಚಾ ಘೊವಾಕ್ ಧರ್ನ್ ತಾಂಚೆಸವೆಂ ವ್ಹೆಲೊ.

ಎಕೆಕ್ಲ್ಯಾಂಚಿ ಜಿಣಿ ಪಳೆತಾನಾ ಹಾಂಗಾಜಿ ಜಿಣಿ ಏಕ್ ಜಿಣಿಂಗೀ ಮ್ಹಳ್ಳೆಂ ಸವಾಲ್ ತಿಯೊಚಾ ಮತಿಕ್ ಯೆತಾಲೆಂ. ಹಾಂಗಾಸರ್ ರಸ್ತ್ಯಾ ಅವ್ಘಡಾಂತ್ ಮೊರ್ಚಿಂ ಕಾಂಯ್ ಉಣಿಂ ನಾಂತ್. ಪೋರ್ ಎಕ್ಲೊ ಬಾವ್ಡೊ ಬಸ್‌ಸ್ಟೋಪಾರ್ ರಾವೊನ್ ಬಸ್ಸಾಕ್ ರಾಕ್ತಾಲೊ. ಪೊಯ್ಶ್ಯಾಂಚಾ ಬಳಾನ್ ಡ್ರಾಯ್ವಿಂಗ್ ಲೈಸನ್ಸ್ ಘೆಂವ್ಚೆ ಹಾಂಗಾಚೆ ಥೊಡೆ ತರ್ನಾಟೆ ರಸ್ತ್ಯಾರ್ ಚಲ್ತೆಲ್ಯಾಂಕ್ ಮಾರೆಕಾರ್ ಜಾಂವ್ಕ್ ಪಾವ್‌ಲ್ಲೆ. ಅಶೆಂ ಆಸ್ತಾನಾ ಗಾಡಿಯೆಕ್ ಆಪ್ಲ್ಯಾ ಸ್ಥಿಮಿತೆರ್ ದವ್ರುಂಕ್ ಸಕಾನಾಸ್ತಾಂ ಬಸ್‌ಸ್ಟೋಪಾಂತ್ ಉಭೊ ಆಸ್ಚಾ ತ್ಯಾ ಮನ್ಶಾಕ್ ಮಾರ್ನ್ ಧಾಂವ್ಲೊ. ಆನಿ ತೆಚ್ಚ್ ಘಡಿಯೆ ತೊ ಮನಿಸ್ ಪಡ್ಲೊ ಆನಿ ಥಂಯ್ಚ್ ಮೆಲೊ.

ಅಸಲಿಂ ಮರ್ಣಾಂ ಹಾಂಗಾ ಸದಾಂಚಿಂ ಜಾಲ್ಲಿಂ. ಕೋಣ್ ರಸ್ತ್ಯಾರ್ ಚಲ್ತಾನಾ ತರ್ ಕೋಣ್ ಗಾಡಿಯೆ ಭಿತರ್ ಬೊಸೊನ್ ಡ್ರಾಯ್ವಿಂಗ್ ಕರ್ತಾನಾ ಸಯ್ತ್. ಹೆರಾಂಕ್ ಹಾಂಗಾಚಿಂ ಕಾನುನಾಂ ಆಸಾತ್. ಹಾಂಗಾ ಡ್ರಾಯ್ವಿಂಗ್ ಲೈಸನ್ಸ್ ಮೆಳೊಂಕ್ ಇಲ್ಲೆ ಕಶ್ಟ್ ಆಸಾತ್. ತರೀ ಆತಾಂತಾಂ ಹಾಂಗಾಚಿ ಸ್ಥಿತಿ ಕಾಂಯ್ ಆಮ್ಚಾ ದೇಶಾಚಾ ಸ್ಥಿತೆಥಾವ್ನ್ ಚಡ್ ವೆಗ್ಳಿ ನಾತ್‌ಲ್ಲಿ. ಪೊಯ್ಶೆ ದೀವ್ನ್ ಕೊಣಾಯ್ಕೀ ಪಾಸ್ ಜಾಂವ್ಕ್ ಸಾಧ್ಯ್ ಆಸ್‌ಲ್ಲೆಂ. ಭೃಶ್ಟಾಚಾರ್ ಹಾಂಗಾಸರ್‌ಯಿ ಜಾತಾಲೊ. ದಲ್ಲಾಳಿ ಹಾಂಗಾಸರ್‌ಯಿ ಆಸ್‌ಲ್ಲೆ. ಆನಿ ಪೊಯ್ಶ್ಯಾಂಚೆ, ಸೊರ್‍ಯಾಚೆ, ವಸ್ತುಂಚೆ, ಚೆಡ್ವಾಂಚೆ ದಲ್ಲಾಳಿ ಹಾಂಗಾಚಾ ಮನ್ಶಾಂಕ್ ಧರ್ತಾಲೆ ಆನಿ ತಾಂಚಾ ಶಿಫಾರಾಸೆಂತ್ ಡ್ರಾಯ್ವಿಂಗಾಚೆಂ ಲೈಸನ್ಸ್ ಕರಯ್ತಾಲೆ.

ಪಯ್ಲೆಂ ಡ್ರಾಯ್ವಿಂಗ್ ಕರುಂಕ್ ಜಾಣಾ ಆಸೊನ್ ಗಾಂವಾಂತ್ ಡ್ರಾಯ್ವಿಂಗ್ ಕೆಲ್ಯಾರೀ ತಾಂಕಾ ಏಕ್ ದೋನ್ ಪಾವ್ಟಿಂ ತರೀ ಫೇಯ್ಲ್ ಕರ್ತಾಲೆ. ಡ್ರಾಯ್ವಿಂಗ್ ಕ್ಲಾಸಿಕ್ ವಚಾಜಯಿಚ್ಚ್ ಆಸ್‌ಲ್ಲೆಂ. ತಶೆಂ ಮ್ಹಣೊನ್ ಕೊಣಾಯ್ಕೀ ನಶಿಬ್‌ವಂತಾಂಕ್ ಪಯ್ಲೆ ಪಾವ್ಟಿಂ ಪಾಸ್ ಕೆಲೊ ತರೀ ಕೆಲೆಂ. ಆನಿ ಬಾಯ್ಲಾಂಕ್ ಹಾಂಗಾ ಲಾಯ್ಸಾನ್ಸ್ ಸುಲಭಾಯೆನ್ ಮೆಳ್ತಾಲೆಂ. ಪುಣ್ ಹಿಂ ಸಗ್ಳಿಂ ಕಾನೂನಾಂ ಸಾದ್ಯಾ ಮನ್ಶಾಂಕ್ ಮಾತ್ರ್ ಲಗು ಜಾತಾಲಿಂ. ಪೊಯ್ಶೆ ಆಸ್ಚಿಂ ಡ್ರಾಯ್ವಿಂಗ್ ಕ್ಲಾಶೆಕ್ ವಚಾನಾಸ್ತಾಂ ಘರಾ ಬೊಸ್ಲ್ಯಾರೀ ತಾಂಕಾ ಡ್ರಾಯ್ವಿಂಗ್ ಲೈಸನ್ಸ್ ಮೆಳ್ತಾಲೆಂ.

ಆನಿಂ ಪರಿಣಾಮ್? ಅಸಲಿಂ ಆವ್ಘಡಾಂ. ಹಾಂಗಾಚೆ ರಸ್ತೆ ಇತ್ಲೆ ಆಪುರ್ಬಾಯೆನ್ ಆಸಾತ್ ಆನಿ ಇತ್ಲ್ಯೊ ನಿಶಾನ್ಯೊ ಆಸಾತ್ ತರೀ ಹಾಂಕಾ ಆಮ್ಸೊರ್ ಆನಿ ಸ್ಥಿಮಿತ್ ಚುಕೊನ್ ಎಕಾಮೆಕಾ ಗಾಡಿಯೊ ಅದ್ಳೊನ್ ಕೊಣಾ ಕೊಣಾಚೊ ಜೀವ್ ಸೊವುರ್ತಾಲೆ. ಹಾಂಗಾಸರ್ ಆಪುಣ್ ಕಿತ್ಲೆಂ ಬರೆಂ ಕರ್ನ್ ಡ್ರಾಯ್ವಿಂಗ್ ಕೆಲೆಂ ತರೀ ಕಾಂಯ್ ತಾಚಾ ನಶಿಬಾಂತ್ ಆಸ್ಚೆಪರಿಂ ದುಸ್ರೊ ಕಾಂಯ್ ಚೂಕ್ ಆಧಾರ್ನ್ ಯೇವ್ನ್ ಆಪ್ಟಿತ್ ತರ್ ತೆಂ ಭೊಗುಂಕ್ ಹಾಕಾ ಮೆಳ್ತಾಲೆಂ.

ಹಾಂಗಾಚಾ ಮನ್ಶಾಂಕ್ ಪೊಯ್ಶಾಂಚೊ ಬರ್ಗಾಲ್ ನಾತ್‌ಲ್ಲೊ. ಪೊಯ್ಶ್ಯಾಂನಿ ಕುಸ್ಚೆ ಮನಿಸ್ ತಾಂಚಾ ಘರಾಂನಿ ಮನ್ಶಾಂಚಾಕೀ ಚಡ್ ಗಾಡಿಯೊ ದವರ್ತಾಲಿಂ. ಆನಿ ಮನ್ಶಾಂ ತಾಂಚಾ ವೆಳಾಪರ್ಮಾಣೆ, ತಾಂಚಾ ಮತಿಚಾ ಸ್ಥಿತೆ ಪರ್ಮಾಣೆ ತಾಂಕಾ ಜಾಯ್ ಜಾಲ್ಲಿ ಗಾಡಿ ಘೆವ್ನ್ ವೆತಾಲಿಂ. ಅಸಲಿಂ ಅವ್ಘಡಾಂ ಜಾಲಿಂ ತರ್ ತಾಂಕಾ ಜಾಂವ್ಚೆಂ ಲುಕ್ಸಾಣ್ ಚಿಲ್ಲರ್. ಪುಣ್ ಶನಿ ಲಾಗ್‌ಲ್ಲೊ ಕೊಣೀಂ ಹಾಂಚಾ ಘಾಸಾಕ್ ಸಾಂಪಡ್ಲೊ ತರ್ ತೊ ಮಾತ್ರ್ ಸತ್ತ್ಯಾನಾಸ್. ಗಾಡಿಯೆಚಾ ಇನ್ಸುರೆನ್ಸಾಕ್ ಧಾಂವ್, ಪೊಲಿಸ್ ಸ್ಟೇಶನಾಕ್ ಧಾಂವ್, ಥಂಯ್ ಹಾಂಗಾ ಧಾಂವ್ತಾನಾ ತಾಚೊ ಅರ್ಧೊ ಭಂಗೊಸ್ತೊಳ್ ಜಾತಾಲೊ.

ಅವ್ಘಡಾವೆಳಾರ್ ತರೀ ಆಯಿಲ್ಲೆ ಪೊಲಿಸ್ ತಾಂಚಾ ನ್ಯಾಯಾಂತ್ ಜಾಲ್ಯಾರೀ ತಫಾವತ್ ಕರ್ತಾಲೆ. ಆಮ್ಚಿ ಕಾಂಯ್ ಚೂಕ್ ನಾಸ್ತಾಂ ಕಾಂಯ್ ಅರ್ಭಿ ಮನ್ಶಾಂಚಿ ಚೂಕ್ ಆಸ್ಲ್ಯಾರೀ ತಿ ತಾಂಚಾ ಅಂದ್ಳ್ಯಾಪಣಾಂತ್ ಧಾಂಪೊನ್ ವೆತಾ. ತೆಂ ಆಸ್ತಾಂ ಕೊರ್ಟಾಕ್ ವಚೊಂಕ್ ಕೊಣಾಕ್ ಸಾಧ್ಯ್ ಆಸಾ? ಕೊರ್ಟಾಕ್ ಗೆಲ್ಯಾರ್ ನ್ಯಾಯ್ ಕೊಣಾಕ್ ಮೆಳ್ತಾ ಮ್ಹಳ್ಳಿ ಗಜಾಲ್ ವೆಗ್ಳಿ. ಸಗ್ಳ್ಯಾಂಕ್ ತಾಂಚೆ ಕಾಮ್೦ಚ್ ಮಹತ್ವಾಚೆಂ. ತಶೆಂ ಆಸ್ತಾಂ ಸಗ್ಳೆಂ ಸೊಸುನ್ ದೀಸ್ ಕಾಡ್ತಾತ್. ಕಿತ್ಯಾಕ್ ಮ್ಹಳ್ಯಾರ್ ಕೊರ್ಟಾಕ್ ಗೆಲ್ಯಾರೀ ಚಡಾವತ್ ಜಾವ್ನ್ ನಿಮಾಣಿಂ ಜೀಕ್ ಮೆಳ್ಚಿ ಅರ್ಭ್ಯಾಂಕ್‌ಚ್.

ಕಿತ್ಲೊ ವೇಳ್ ಥಂಯ್ ಬೊಸೊನ್ ತಿಯೊ ಆನಿ ಮಾರ್ಕು ಲೊಕಾಂಚೆ ಉಲವ್ಣೆಂ ಆಯ್ಕತಾಲೆ. ಮಾರ್ಕುಚಿ ಆನಿ ತಿಯೊಚಿ ಮತ್ ಇಲ್ಲಿ ಹಗುರ್ ಜಾಲ್ಲಿ. ಎಕಾ ವಾಟೆರ್ ಹಗುರ್ ಜಾಲ್ಲಿ ತರೀ ಅಸಲ್ಯೊ ಖಬ್ರೊ ಆಯ್ಕೊನ್ ತಾಂಕಾ ಹ್ಯಾ ಗಲ್ಫಾವಿಶ್ಯಾಂತ್‌ಚ್ಚ್ ಕಾಂಟಾಳೊ ಯೇಂವ್ಕ್ ಲಾಗ್‌ಲ್ಲೊ. ತರೀ ಕಿತೆಂ ಕರ್ತೆಲೆ ತೆ? ದೀಸ್ ಲೊಟ್‌ಲ್ಲೆಶಿವಾಯ್ ಹೆರ್ ನಿರ್ವೋಗ್ ತಾಂಕಾ ನಾತ್‌ಲ್ಲೊ.

ಹಾಂಗಾಚಾ ಮನ್ಶಾಂಚೆಂ ಜಿವಿತ್ ಪಳೆತಾನಾ ಆನಿ ಆಯ್ಕಾತಾನಾ ತಾನ್ ಭುಕ್ ಸಗ್ಳಿ ಉಭ್ತಾಲಿ. ಜಿಣ್ಯೆಂತ್ ಕಶ್ಟ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಸಮ್ಜಾಜಯ್ ತರ್ ತಾಣೆಂ ಗಲ್ಫಾಕ್ ಯೇಜಯ್ ಮ್ಹಣೊನ್ ಕೋಣ್‌ಗೀ ಸಾಂಗ್ತಾಲೊ. ಕಿತ್ಲೊ ವೇಳ್ ತಿಂ ಬೊಸ್ಲಿಂ. ಆತಾಂ ದೊಗೀ ಖಂಯ್ಚಾಗೀ ಭ್ರಮಿದೆಂತ್ ಆಸ್‌ಲ್ಲೆ. ಆನಿ ಧರ್ತೆರ್ ಎದೊಳ್‌ಚ್ಚ್ ಕಾಳೊಕಾಚೆಂ ಧಾಂಪಣ್ ಪಾಂಗ್ರುನ್ ಜೂನ್ ಜಾಂವ್ಚೆ ರಾತಿಕ್ ಆಯ್ತೊ ಜಾತಾಸ್ತಾನಾ ತಿಯೊ ಮಾರ್ಕುಸವೆಂ ಉಟೊನ್ ಪಾಟಿಂ ಗೆಲೊ.

ಪಾಟಿಂ ಆಯಿಲ್ಲ್ಯಾ ತಿಯೊಕ್ ಜೇಂವ್ಕ್ ಜಾಲೆಂನಾ. ತಾಚಿ ಭುಕ್ ಎದೊಳ್‌ಚ್ ಮಾಯಾಗ್ ಜಾಲ್ಲಿ. ತ್ಯಾ ಶಿವಾಯ್ ಪೊಟಾಚೆಂ ಖಾಣ್ - ಸುಕ್ಯೊ ಭಾಕ್ರ್ಯೊ ಖಾಂವ್ಕ್ ತಾಕಾ ಆಜ್ ಜಾಲೆಂನಾ. ತೊ ಇಲ್ಲೆಂ ಉದಾಕ್ ಪಿಯೆಲೊ ಆನಿ ಆಡ್ ಪಡ್ಲೊ. ತಾಚಾ ದೊಳ್ಯಾಂ ಮುಖಾರ್ ನಾಕಾ ಮ್ಹಳ್ಯಾರೀ ಎಕೆಕ್‌ಚ್ ಕಾಣಿಂಯೊ ಆಯ್ಲ್ಯೊ. ಹಾಂಗಾಸರ್ ಕಶ್ಟೊಂಚೊ ಲೋಕ್ ಆನಿ ಹಾಂಗಾಸರ್ ಚಲೊನ್ ಆಸ್ಚಿ ಅನೀತ್ ಆನಿ ಅನ್ಯಾಯ್. ಆನಿ ತೊ ಸಗ್ಳೊ ಸನ್ನ್ಯಾಯ್ ಲಿಪವ್ನ್ ವರುನ್, ತೊ ಸೊಸುನ್, ಜಿಯೆಂವ್ಚೊ ಲೋಕ್. ಆನಿ ಹಿಂ ಸತಾಂ ಕಳಿತ್ ನಾಸ್ತಾಂ ಗಾಂವಾಂತ್ ಮಿನತ್ ಕರುನ್ ಆಸ್ಚಿಂಚ್ ಬರೆಂ ಮ್ಹಣೊನ್ ಚಿಂತಿಲಾಗ್ಲೊ.

ಅಸಲಿಚ್ಚ್ ಮಿನತ್ ಜರ್ ತರ್ ಗಾಂವಾಂತ್ ಕೆಲಿ ತರ್ ಗಾಂವಾಂತ್ ಭಾಂಗಾರ್ ಪಿಕವ್ಯೆತ್. ಕಿತ್ಯಾಕ್ ಮ್ಹಳ್ಯಾರ್ ಗಾಂವ್ ತೊ ಗಾಂವ್೦ಚ್ ಮ್ಹಳ್ಳೆಂ ಚಿಂತಾಪ್ ತಿಯೊಕ್ ಆಯಿಲ್ಲೆಂ. ಕಶ್ಟ್ ಆನಿ ನಿರಾಶಾ ಗಾಂವಾಂತ್‌ಯಿ ಆಸ್‌ಲ್ಲಿ ಖರೆಂ. ಪುಣ್ ಕಿತೆಂ ಮ್ಹಳ್ಯಾರೀ ಆಪ್ಲೊಚ್ ಗಾಂವ್ ತೊ ಆನಿ ಆಪ್ಲ್ಯಾ ಗಾಂವಾಂತ್ ಆಮಿಂ ಪರ್ಕಿ ನ್ಹಂಯ್ ಮ್ಹಳ್ಳೆಂ ಚಿಂತಾಪ್ ತಿಯೊಚೆಂ ಜಾಲ್ಲೆಂ.

ಮಾರ್ಕುಕ್ ಮೆಳೊನ್ ಆಯಿಲ್ಲೆ ಉಪ್ರಾಂತ್ ಕಸೊ ಕಸೊ ನಿದ್ಲ್ಯಾರೀ ತಿಯೊಚಾ ದೊಳ್ಯಾಂಕ್ ನಿದೆಚೊ ಜೊಪ್ ಬಿಲ್ಕುಲ್ ಆಯ್ಲೊನಾ. ತಾಚಾ ಮತಿಂತ್ ಪರತ್ ಪರತ್ ಹಾಂಗಾಚಾ ಲೊಕಾಂಚಾ ಕಶ್ಟಾಂ ವಿಶ್ಯಾಂತ್ ಉಡಾಸ್ ಯೆತಾಲೊ ಆನಿ ತಾಂಚೊ ತಿಯೊ ತಾಂಚಾ ಕುಟ್ಮಾಂ ವಿಶ್ಯಾಂತ್ ನಿಹಾಳ್ ಕರ್ತಾಲೊ.

ಗಾಂವಾಂತ್ ಆಸ್ತಾನಾ ಗಾಂವ್ಚಾ ವಿಶ್ಯಾಂತ್ ತಿಯೊಚಾ ಮತಿಂತ್ ನಿರಾಶಾವಾದಿ ಚಿಂತಾಪ್ ಆಸ್‌ಲ್ಲೆಂ. ದುಸ್ರಿ ಕಿತೆಂಚ್ ವಾಟ್ ನಾಸ್ತಾಂ ತೊ ಗಾಂವಾಂತ್ ಉರ್‌ಲ್ಲೊ. ತಾಕಾ ಗಾಂವ್ಚೊ ಮೋಗ್ ಕೆಲ್ಲೆ ಶಿವಾಯ್ ನಿರ್‍ವೊಗ್ ನಾತ್‌ಲ್ಲೊ. ತ್ಯಾಚ್ಚ್ ಗಾಂವಾಂತ್ ಜಲ್ಮೊನ್ ವ್ಹಡ್ ಜಾವ್ನ್ ಆತಾಂ ಜಿಣ್ಯೆಚೆ ಸಭಾರ್ ಧಾಕ್ಡೆ ಖರ್ಚಿಲ್ಲ್ಯಾ ತಾಕಾ ಎಕಾಚ್ಚ್‌ಫರಾಂ ಗಾಂವಾಚೆರ್ ನಿರಾಶಿ ಚಿಂತಾಪ್ ಆಯಿಲ್ಲೆಂ. ಪುಣ್ ಗಾಂವ್ ಮಾತ್ ಪಯ್ಲೆಂಚೆಪರಿಂಚ್ ಆಸ್‌ಲ್ಲೊ.

ಝಗ್ಲಾಣ್ಯಾ ಉಪ್ರಾಂತ್ ಘಡ್ಗಡೊ ಯೆತಾಲೊ, ಮೊಡಾ ಥಾವ್ನ್೦ಚ್ ಪಾವ್ಸ್ ವೊತ್ತಾಲೊ. ಆನಿ ಧರ್ತಿ ಭಿಜ್ತಾಲಿ. ಸುರ್‍ಯೊ ಮುಡ್ಲಾ ಥಾವ್ನ್೦ಚ್ ಉದೆತಾಲೊ ಆನಿ ಪಡ್ಲಾಂತ್೦ಚ್ ಬುಡ್ತಾಲೊ. ಪ್ರಕ್ರೃತೆಚೆಂ ಕಸ್ಲೆಂಚ್ ನಿಯಮ್ ಬದ್ಲೊಂಕ್ ನಾತ್‌ಲ್ಲೆಂ. ಸುರ್‍ಯೊ ದಿಸಾಕ್ ಉಜ್ವಾಡ್ ಫಾಂಕಯ್ತಾನಾ ರಾತಿಚೊ ಉಜ್ವಾಡ್ ಫಾಂಕಂವ್ಚೆಂ ಕಾಮ್ ಚಂದ್ರಾಚೆಂ ಜಾವ್ನಾಸ್‌ಲ್ಲೆಂ. ಖಂಚೇಂಯ್ ನಿಯಮ್ ಬದ್ಲಾಲಾಂ ತರ್ ಮನ್ಶಾಚೆಂ ನಿಯಮ್, ಮನ್ಶಾಪಣಾಚೆಂ ನಿಯಮ್ ಮಾತ್ರ್ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್, ತೊ ಚಿಂತಾಲೊ.

ಗಾಂವಾಂತ್ ಕಿತೆಂ ಆಸಾ? ಗಾಂವಾಂತ್ ಆಸ್ಚಾಂಕ್ ಕೋಣ್ ಹುಂಗ್ತಾ? ಗಾಂವ್ಚೊ ಮನಿಸ್ ಜರ್ ಗಲ್ಫಾಕ್ ಪಾವ್ಲೊ ತರ್ ಪಳೆ ಗಾಂವಾಂತ್ ತಾಕಾ ಮೆಳ್ಚೊ ಮಾನ್ ಆನಿ ಸಮಾಜೆಂತ್ ತಾಕಾ ಮೆಳ್ಚೆಂ ಸ್ಥಾನ್. ಗಾಂವಾಂತ್ ಶಿಕೊನ್ ಗಾಂವಾಂತ್ ಕಾಮ್ ಕರ್ತೆಲ್ಯಾಂಕ್ ಸಯ್ತ್ ಮೆಳ್ಚೊ ಸಾಂಬಾಳ್ ಕಿತ್ಲೊ? ಜೊಡ್‌ಲ್ಲೆಂ ಸಗ್ಳೆಂ ಮಹಿನೊ ಅಖೇರ್ ಜಾಂವ್ಚಾದಿಂಚ್ಚ್ ಕಾಬಾರ್. ಘರಾಂತ್ ಎಕಾ ಜೊಡಿಂತ್ ಸಗ್ಳ್ಯಾಂಚೆ ದೀಸ್ ವೆತಾತ್ ತರ್ ಸುರು ಜಾಲಿ ಕಂಗಾಲ್ ಪರಿಗತ್. ತೆನ್ನಾ ಘರಾಂತ್ ಜರ್ ಪಿಡಾಶಿಡಾ ಉಬ್ಜತ್ ತರ್ ಮಾರೆಕಾರ್. ಉಪ್ರಾಂತ್ ರೀಣ್, ಆನಿ ಕಶ್ಟ್. ಪುಣ್ ಹ್ಯಾ ಸಗ್ಳ್ಯಾ ಕಶ್ಟಾಂಕ್ ಮಾತೆಂ ಮಾರಿಜಯ್ ತ್ಯಾ ಬಾವ್ಡ್ಯಾ ಕಾಮ್ ಕರ್ಚಾನ್. ಗಾಂವಾಂತ್ ಕಿತ್ಲೆಂ ಜೊಡ್ಲ್ಯಾರೀ ಪಾಂಯಾಕ್ ವೊಡ್ತಾನಾ ತಕ್ಲೆಕ್ ನಾ ಆನಿ ತಕ್ಲೆಕ್ ವೊಡ್ತಾನಾ ಪಾಂಯಾಂಕ್ ನಾ ಮ್ಹಳ್ಳಿ ಸ್ಥಿತಿ. ಗಾಂವಾಂತ್ ದಿಸಾನ್‌ದೀಸ್ ಚಡೊನ್ ಯೆಂವ್ಚಿ ಮ್ಹಾರ್ಗಾಯ್ ಆನಿ ಸಮಾಜೆಂತ್ ಘಡೊನ್ ಆಸ್ಚಿಂ ಫಿತಿಸ್ಪಣಾಂ, ಲೋಕ್ ನವಿಂ ನವಿಂ ಚಿಂತ್ನಾಂ ಚಿಂತಾ, ನವೆ ನವೆ ದೇವ್ ಉದೆತಾತ್, ಅರ್ಧೆಂ ಶಿಕಾಪ್ ಚಡ್ ಅಪಾಯಾಚೆಂ ಮ್ಹಳ್ಳೆಪರಿಂ ಇಲ್ಲೆಂ ಶಿಕಾಪ್ ಜೊಡ್‌ಲ್ಲೆ ಥೊಡೆ ಉದಾಕ್ ಭರ್‌ಲ್ಲ್ಯಾ ಅರ್ಧ್ಯಾ ಕೊಳ್ಶ್ಯಾಪರಿಂ ಆಲ್ಕಂದ್ತಾತ್. ಗಾಂವಾಂತ್ ಆಮ್ಚೆಂ ಮ್ಹಳ್ಳೆಂ ಸ್ವಾತಂತ್ರ್ ಆಸಾ ವಯ್ ತರೀ ಹೆಂ ಸ್ವಾತಂತ್ರ್‌ಗೀ ಮ್ಹಳ್ಳೆಂ ಸವಾಲ್ ಕೊಣೆಂಯ್ ಕೊಣಾಯ್ಕೀ ಕೆಲೆಂ ತರ್ ಕೊಣೀಂ ಸಾರ್ಕಿ ಜಾಪ್ ದೀಂವ್ಕ್ ಸಕ್ಚಿಂ ನಾಂತ್.

ಗಾಂವಾಂತ್ ಜಿಯೆಂವ್ಚಾ ಮನ್ಶಾಂನಿ ಕೆಲ್ಲೊ ತಫಾವತಾಚೊ ವೇಸ್ ಜಿಯೆತೆಲ್ಯಾಂಕ್ ಸವಾಲ್ ಕರ್ತಾಲೊ. ಶಿಕ್ಪಿ ಆನಿ ಅಶಿಕ್ಪಿಂ ಮಧ್ಲೊ ತಫಾವತ್, ಗ್ರೇಸ್ತ್ ಆನಿ ದುಬ್ಳೊ ಮ್ಹಳ್ಳೊ ತಫಾವತ್. ಹಾಂಗಾ ಆತಾಂ ಜಾತಿಜಾತಿ ಮಧೆಂ ತಫಾವತ್, ಕಾತಿ ಕಾತಿ ಮಧೆಂ ತಫಾವತ್. ಊಂಚ್ ನೀಚ್ ಮ್ಹಳ್ಳೊ ತಫಾವತ್. ಬಳ್ ಆಸ್‌ಲ್ಲ್ಯಾಂಚೆಂ ಆನಿ ಬಳ್ ನಾತ್‌ಲ್ಲ್ಯಾಂಚೊ ತಫಾವತ್. ಗಾಂವಾಂತ್ ಆಸ್ಚೆ ಮುಂಡಾಸ್‌ಗಾರ್, ಶಿಂಗಾ ಆಸ್ಚಾ ಹಾಂಡ್ಕುರ್ ರೆಡ್ಯಾಪರಿಂ ಪಾಪಾಚಾಂಕ್ ಲುಟ್ಚೆ ಯೆಮ್ಕುಳೆ, ಆನಿ ಅಸಲ್ಯಾ ಹಾಂಡ್ಕುರ್‍ಯಾ ರೆಡ್ಯಾಂಚಾ ಪಾಸಾಂತ್ ವಳ್ವಳ್ಚಿಂ ಥೊಡಿಂ, ತಳ್ಮಳ್ಚಿಂ ಥೊಡಿಂ ತಾಂಕಾ ಲಾಭ್‌ಲ್ಲೆಂ ಜಿವಿತ್ ನಿಹಾಳ್ ಕರ್ತಾಲಿಂ. ಹಾಚೆಂ ಮಧೆಂ ಹಾಂಚೊಚ್ಚ್ ಸ್ವಾರ್ಥ್.ವ್ಹಾಳ್ಚೆಂ ವಾರೆಂ ಉದಾಕ್ ಸಯ್ತ್ ತಾಂಚಾ ಚಿಂತ್ಪಾ ಪ್ರಕಾರ್ ವ್ಹಾಳಾಜಯ್. ಧರ್ತೆಚಾ ಗರ್ಭಾಂತ್ ಫುಟ್ಚಿ ಝರ್ ಲೆಗುನ್ ತಾಂಚಾ ಚಿಂತ್ಪಾ ಪ್ರಕಾರ್ ಫುಟಾಜಯ್.

ಗಾಂವಾಂತ್‌ಯಿ ಆತಾಂ ಆಂತರಿಕ್ ಝುಜ್ ಚಲ್ತಾ ಆನಿ ಹೆಂ ಝುಜ್ ಚಲೊನ್೦ಚ್ಚ್ ಆಸ್ತೆಲೆಂ. ಪೊಯ್ಶ್ಯಾಂಕ್ ಲಬ್ಧೊಂಚಿಂ ಕಾಂಯ್ ಹಾಂಗಾ ಉಣಿಂ ನಾಂತ್. ಹೊ ಸಂಸಾರ್‌ಚ್ಚ್ ಆತಾಂ ಏಕ್ ಬಾಜಾರ್ ಜಾಲಾ. ಕೋಣ್ ವಸ್ತುಂಕ್ ವಿಕ್ತಾ ಆನಿ ಕೋಣ್ ತಾಂಚಿಂ ಭಗ್ಣಾಂ ವಿಕ್ತಾ ಆನಿ ಕೋಣ್ ತಾಂಚಿಂ ದುಃಖಾಂ ವಿಕ್ತಾ, ಕೋಣ್ ತಾಂಚೊ ಸಂತೊಸ್ ವಿಕ್ತಾ, ಕೋಣ್ ತಾಂಚೊ ಸ್ವಾಭಿಮಾನ್ ವಿಕ್ತಾ ಆನಿ ಕೋಣ್ ತಾಂಚೆಂ ನಿಸ್ಕಳ್ಪಣ್ ವಿಕ್ತಾ ಆನಿ ಕೋಣ್ ತಾಂಕಾಂಚ್ಚ್ ವಿಕ್ತಾ. ಹಾಂಗಾಸರ್ ಸಕ್ಡಾಂಕ್ ಮೋಲ್ ಆಸಾ, ವಾಳ್ಚಾ ಉದ್ಕಾಕ್, ಧರ್ತೆಚಾ ಫಾತ್ರಾಕ್, ಮಾತಿಯೆಕ್ ಸಯ್ತ್, ರಾಂದ್ಣಿಚಾ ಗೊಬ್ರಾಕ್ ಸಯ್ತ್, ಉಜ್ಯಾಂತ್ ಝಳ್ಚಾ ಇಂಗ್ಳ್ಯಾಕ್ ಸಯ್ತ್, ರುಕಾರ್ ಆಸ್ಚಾ ತರ್ನ್ಯಾ ಖೊಲಿಯೆಕ್ ಸಯ್ತ್, ಪಿಕೊಲ್ ಝಡೊನ್ ಸುಕೊನ್ ಗೆಲ್ಲ್ಯಾ ಖೊಲಿಯೆಕ್ ಸಯ್ತ್ ಮೋಲ್ ಆಸಾ. ಸಾರ್‍ಯಾಚಾ ಕಿಡಿಂಕ್ ಸಯ್ತ್, ಕೆದಾಚಾ ಉದ್ಕಾ ಪಂದ್ಲ್ಯಾ ಗಾಂಯ್ದೊಳಾಂಕ್ ಸಯ್ತ್ ಮೋಲ್ ಆಸಾ. ಮೋಲ್ ನಾಂ ತರ್ ಫಕತ್ತ್ ಮನ್ಶಾಕ್ ಆನಿ ಮನ್ಶಾಪಣಾಕ್ ಮಾತ್.

ದಿಸಾನ್‌ದೀಸ್ ಬದ್ಲೊಂಚಿ ಮನ್ಶಾಚಿ ಚಾಲ್, ಮನ್ಶಾಚೆಂ ಚಿಂತಾಪ್ ಮನ್ಶಾಚೆ ಧ್ಯೇಯ್, ಮನ್ಶಾಚೆ ಸಂಸ್ಕಾರ್, ಮನ್ಶಾಚಿ ಸಂಸ್ಕೃತಿ ಸಕ್ಕಡ್ ಮನ್ಶಾಂ ಥಾವ್ನ್೦ಚ್ ಮನ್ಶಾಂ ಖಾತಿರ್ ಉದೆಲ್ಲಿಂ. ಆತಾಂತಾಂ ಹೆಂ ಸಗ್ಳೆಂ ಮನಿಸ್ ಆಪ್ಲ್ಯಾ ಸ್ವಾರ್ಥಾ ಖಾತಿರ್ ಗಳ್ಸುಂಕ್ ಶಿಕ್ಲಾ. ವಾಳ್ಚಾ ವಾರ್‍ಯಾಕ್ ರಾವಂವ್ಕ್ ತೊ ಶಿಕ್ಲಾ ವಾಳ್ಚಾ ಉದ್ಕಾಕ್ ತೊ ಕಾಟ್ ಬಾಂದುಂಕ್ ಶಿಕ್ಲಾ. ಫುಟೊನ್ ಯೆಂವ್ಚಾ ಝರಿಕ್ ತೊ ಎಕಾಚ್ಚ್ ಘಡಿಯೆನ್ ಸುಕಂವ್ಕ್ ಶಿಕ್ಲಾ. ಹಾಂಗಾ ಆಸ್ಚಾಂಚೊ ದಳ್ಬಾರ್ ಪಳೆ, ಆಪ್ಲ್ಯಾ ಪೆಲ್ಯಾಂಕ್‌ಚ್ಚ್ ಲುಟ್ತಾನಾ ಸಂಸಾರ್ ಕಿತೆಂ ಲೇಖ್. ಅನ್ನ್ಯಾಯ್ ಆನಿ ಅನೀತೆನ್ ಆಪ್ಲ್ಯಾ ರಗ್ತಾ ಸಂಭಂದಾಚಿಂಚ್ ಮಾಸಾಂ ಖಾತಾನಾ ಸೆಜ್‌ಸಾಂಭಾರ್‍ಚಿಂ ಕಿತೆಂ ಲೇಖ್? ಹ್ಯೇ ಪರಿಗತೆ ಮಧೆಂ ಬರೊ ಮನಿಸ್ ಜೊ ಹ್ಯಾ ಸಯ್ತಾನಾಂಸವೆಂ ಯಾ ರಾಕ್ಕೊಸಾಂಸವೆಂ ಝುಜೊಂಕ್ ತ್ರಾಣ್ ನಾತ್‌ಲ್ಲೊ ಎಕ್‌ಚ್ಚ್ ತಾಂಕಾ ಖಾಲ್ತಿಮಾನ್ ಘಾಲ್ತಾ ಯಾ ಪೊಳಾಪಳಾ ವಿಶ್ಯಾಂತ್ ಚಿಂತಾ.

೧೧೧ಹಿ ಪೊಳಾಪೊಳ್‌ಯ್ ಅನಿವಾರ್‍ಯ್ ನ್ಹಂಯ್. ಆಪ್ಲ್ಯಾ ಕುಟ್ಮಾಚಾ ಬರ್‍ಯಾಪಣಾ ಖಾತಿರ್ ಅಸಲಿ ಪೊಳಾಪೊಳ್ ಗರ್ಜೆಚಿ. ನ್ಹಂಯ್ ತರ್ ಹಾಂಚೆಂ ಚಿಂತಾಪ್ ಎಕಾ ಧ್ರುವಾ ತೆವ್ಶಿನ್ ಆಸಾ ತರ್ ತಾಂಚೆಂ ಚಿಂತಾಪ್ ಅನ್ಯೇಕಾ ಧ್ರುವಾ ತೆವ್ಶಿನ್ ಆಸ್ತಾನಾ ಥಂಯ್ಸರ್ ಕಸಲೆಂ ಏಕ್‌ಪಣ್ ಆಸೊಂಕ್ ಸಾಧ್ಯ್ ಆಸಾ?

ಹಾಂಗಾಸರ್ ನ್ಯಾಯ್ ನೀತ್ ಚಲಯ್ತೆಲೆ ಲೆಗುನ್ ತಾಂಚಾ ಮತಿಕ್ ಬರೆಂ ಲಾಗ್ಚೆಂಚ್ ತಾಂಚೊ ನ್ಯಾಯ್ ಆನಿ ತಾಂಕಾ ಹಿತ್ ದಿಂವ್ಚೆಂಚ್ ತಾಂಚಿ ನೀತ್. ಹಾಂತುಂ ಕೊಣಾಕೀ ಸೊಡ್‌ದೊಡ್ ನಾ. ಹಾಂತುಂ ಸಗ್ಳ್ಯಾಂನೀ ಸಂಯಮ್ ಸಾಂಭಾಳ್ಚೆಂ ಗರ್ಜೆಚೆಂ. ಜಿಣ್ಯೆಂತ್ ಹಿಂ ಸೂತ್ರಾಂ ಸಮ್ಜೊನ್ ಜಿಯೆಂವ್ಕ್ ಸಕ್‌ಲ್ಲೊ ಶಾಬೀತ್, ಸಮ್ಜಾನಾತ್‌ಲ್ಲೊ ಗೆಲೊ.

ಗಾಂವಾಂತ್ ತರೀ ಸಗ್ಳೆಂ ಆಜ್‌ಕಾಲ್ ವೆವಸ್ತಿತ್ ಥರಾನ್ ಚಲ್ತಾಲೆಂ. ಚೊರಿ ಕರ್‍ಚೆಯ್ ಶಾಭಿತಾಯೆನ್ ಕರ್‍ತಾಲೆ. ಬಾವ್ಡೆ ಲ್ಹಾಲ್ಹಾನ್ ಚೊರಿ ಕರ್ಚೆ ಶಿರ್ಕೊನ್ ಪಡ್ತಾಲೆ. ತಾಂಕಾ ಶಿಕ್ಶಾ ಜಾತಾಲಿ. ಎಕ್ಲೊ ಮ್ಹಣ್ತಾಲೊ 'ತಾಂಕಾ ಶಿಕ್ಶಾ ಮೆಳ್ತಾಲಿ ತಾಣಿಂ ಕೆಲ್ಲ್ಯಾ ಚೊರಿಯೆಕ್ ನ್ಹಂಯ್. ತಾಣಿಂ ಚೊರಿ ಬರಿ ಕರ್ನ್ ಕರಿನಾಸ್ತಾಂ ಶಿರ್ಕೊನ್ ಪಡ್‌ಲ್ಲ್ಯಾಕ್'. ಆತಾಂ ಸರ್ಕಾರಾ ಥಾವುನ್ ಧಾರ್ಮಿಕ್ ಮನ್ಶಾಂ ಪರ್‍ಯಾಂತ್ ಸಗ್ಳೆ ಲುಟ್ಕಾರ್. ಆತಾಂ ಧರ್ಮ್ ಮ್ಹಳ್ಳೊ ಏಕ್ ವಯ್‌ವಾಟ್ ಜಾಲಾ.

ಗಲ್ಫಾಚಿ ಮಹಿಮಾ ತರೀ ವಿಚಿತ್ರ್. ಕೋಣ್ ಬಾವ್ಡೊ ಧಾವಿ ಕ್ಲಾಸ್ ಶಿಕ್ಲ್ಯಾರೀ ಕೊಣಾ ಕೊಣಾಚಾ ಘರಾ ಕಾಮ್ ಕರ್ತಾನಾ ದುಸ್ರಿ ಯಾ ತಿಸ್ರಿ ಕ್ಲಾಸ್ ಶಿಕ್‌ಲ್ಲೆ ಸಯ್ತ್ ಥೊಡೆಪಾವ್ಟಿಂ ಸುಪರ್‌ವಾಯ್ಜರ್ ಜಾತಾತ್. ಹಾಕಾಚ್ ಮ್ಹಣ್ಚೆಂ ನಶಿಬ್ ಮ್ಹಣೊನ್. ಗಾಂವಾಂತ್ ಎಕಾ ರಿತಿಚೆ ಕಶ್ಟ್ ತರ್ ಗಲ್ಫಾಂತ್ ಅನ್ಯೇಕಾ ರಿತಿಚೆ ಕಶ್ಟ್. ಶಿಕಾಪ್ ತರ್ ಕಿತ್ಯಾಕ್? ಶಿಕಾಪ್ ಕಿತೆಂ ದೀಂವ್ಕ್ ಸಕ್ತಾ? ಶಿಕಾಪ್ ಘೆಂವ್ಚೆಂ ಬರೆಂ ಕಾಮ್ ಮೆಳೊಂಕ್‌ಗೀ ಯಾ ಬರಿ ಸಮ್ಜೊಣಿಂ ಆಪ್ಣಾಂವ್ಕ್? ಬರೆಂ ಶಿಕಾಪ್ ಏಕ್ ಬರೆಂ ವೆಕ್ತಿತ್ವ್ ರುತಾಂ ಕರ್ತಾ, ತೆಂ ವೆಕ್ತಿತ್ವ್ ಸಮಾಜೆಂತ್ ಹೆರಾಂಕ್ ಆಶಾವಾದಿ ಕರ್ತಾ. ಹೆರಾಂಕ್ ಬರೆಂಪಣ್ ಜೊಡಿಶೆಂ ಕರ್ತಾ. ತಾಚೊ ಮಹತ್ವ್ ತಾಣೆಂ ಜೊಡ್ಚಾಂತ್ ಆಸ್ಚಾಕೀ ತಾಣೆಂ ದಿಂವ್ಚಾಂತ್ ಆಸ್ತಾ. ಮನಿಸ್ ಆಜ್ ಬದಾಲ್ಲಾ. ಮನಿಸ್ ಬರೊ ಯಾ ವಾಯ್ಟ್, ಬುದ್ವಂತ್ ಯಾ ಮೂರ್ಖ್ ಮ್ಹಳ್ಳೆಂ ತಾಣೆಂ ತಾಕಾ ಕಿತ್ಲೊ ಬರೊ ಕರ್ನ್ ಪೊಯ್ಶ್ಯಾಂಚೆಂ ಯಂತ್ರ್ ಕೆಲಾಂ ಮ್ಹಳ್ಳ್ಯಾಚೆರ್ ಹೊಂದ್ವೊನ್ ಆಸಾ. ಕೋಣ್ ಚಡ್ ಪೊಯ್ಸೊ ಕರ್ತಾ ತೊ ಚಡ್ ಬುದ್ವಂತ್. ದೆಖುನ್೦ಚ್ ಪೊಯ್ಶ್ಯಾಂಚೆರ್ ಆಸ್ಚೊ ಮಹತ್ವ್ ಧ್ಯೇಯಾಂಚೆರ್ ನಾ. ದೆಖುನ್೦ಚ್ ಚಡಾವತ್ ಜಣ್ ಆಡ್ ವಾಟೇನ್ ವಚೊನ್ ತರೀ ತ್ಯಾ ಪೊಯ್ಶ್ಯಾಂಕ್ ಆಪ್ಣಾಯ್ತಾ.

ತಾಂಚಾ ಸಂಸಾರಾಚಾ ಹರ್ಯೆಕಾ ಗರ್ಜಾಂಕ್ ತೆ ಪೊಯ್ಶೆ ಮೊಲಾಕ್ ಘೆಂವ್ಕ್ ಸಕ್ತೆಲೆ ಮ್ಹಳ್ಳ್ಯಾ ಚಿಂತ್ನಾಂನಿ. ಆದ್ಲಿಂ ತತ್ವಾಂ ಆದ್ಲೆ ಧ್ಯೇಯ್ ಸಗ್ಳೆ ಪರ್ನೆ ಜಾಲ್ಯಾತ್. ಆಜ್‌ಕಾಲ್ ಅಸಲ್ಯಾ ಸಂಗ್ತ್ಯಾಂಕ್ ಪ್ರಗತಿ ಮ್ಹಣ್ತಾತ್. ದಬಾಜೊ ಆನಿ ದಾಖವ್ಣಿ ಆಜ್‌ಕಾಲ್ ಹರ್‍ಯೆಕಾ ಮನ್ಶಾಕ್ ಗರ್ಜೆಚೆಂ ಜಾಲಾಂ. ಕೋಣ್ ತಾಚಾ ಘರ್ಚೆಂ ಕಾರ್‍ಯೆಂ ಚಡ್ ದಬಾಜಾನ್ ಕರ್ತಾ ತೆಂ ಕಾರ್‍ಯೆಂ ಚಡ್ ಉತ್ತೀಮ್. ದಬಾಜೊ ನಾತ್‌ಲ್ಲ್ಯಾಚೆಂ ಕಾರ್‍ಯೆಂ ಸಾದೆಂ. ಆನಿ ತೊ ಪಾಟಿಂ ಉರುಲ್ಲೊ ಮನಿಸ್. ಆನಿ ದಬಾಜೊ ಕರ್ಚೆ ಮನಿಸ್ ಮುಖಾರ್ ಪಾವ್‌ಲ್ಲೆ ಮನಿಸ್. ಧರ್ತೆರ್ ಪಾಂಯ್ ಆಸ್ಲ್ಯಾರೀ ತಾಂಚೆಂ ಚಿಂತಾಪ್ ಚಂದ್ರ್‌ಲೋಕಾಂತ್ ಆಸ್ತಾ. ತಿಂ ಊಂಚ್ ಚಿಂತ್ನಾಂ ಚಿಂತಾತ್. ಹಾಂಚೆ ಮಧೆಂ ವಳ್ವಳ್ಚೆ ಸಂಭಂಧ್. ಭಾವ್ ಬಾಂದವ್ಪಣ್. ಆಪ್ಲೆಂ ಪೆಲೆಂಪಣ್. ಸೆಜ್-ಸಾಂಭಾರ್ಪಣ್. ಸಗ್ಳ್ಯಾಕೀ ಖಾತಡ್.

ಗಲ್ಫಾಂತ್ ತರೀ ಪೊಯ್ಶ್ಯಾಂಚಾ ಅಬ್ಲೇಸ್ಪಣಾಂತ್ ಮನ್ಶಾಚೆ ಹೆಚ್ಚ್ ನಿರಾಶೀ ಸುಸ್ಕಾರ್. ಗಾಂವಾಕ್ ಗೆಲ್ಯಾರ್ ಸುಃಖ್ ನಾ ಗಲ್ಫಾಕ್ ಗೆಲ್ಯಾರ್ ಬರ್ಕತ್ ನಾ. ಗಲ್ಫಾಂತ್ ತರೀ ಆಯ್ಕೊಂಕ್ ಮೆಳ್ತಾ ಎಕ್‌ಚ್ ಸುಸ್ಕಾರ್ ಪಯ್ಲೆ ಆಸ್‌ಲ್ಲೆಪರಿಂ ಆತಾಂ ನಾಂ. ಹ್ಯಾ ಅರ್ಭ್ಯಾಂಕ್ ಪಾಡ್ ಕೆಲ್ಲೆಂ ಯಾ ಕರ್ಚೆಂ ಆಮಿಂಚ್. ಎಕಾಮೆಕಾ ಲ್ಹಾನ್ ಕರ್ನ್ ಆಮಿಂ ಎಕಾಮೆಕಾ ಕಾತರ್ನ್ ಘೆತಾಂವ್ ಆನಿ ಹ್ಯಾ ದೊನಾಂಯ್ಚೊಯ್ ಫಾಯ್ದೊ ಜೊಡ್ಲಾ ಆನಿ ಜೊಡುನ್ ಆಸಾತ್ ಅರ್ಬಿ. ಸಂಸಾರಾಚಾ ಚಾರಾಂಯ್ ಪೊಂತಾನಿ ಆತಾ ದುಬ್ಳಿಕಾಯ್ ಆಸಾ. ಪಯ್ಲೆಂ ಆಸ್ಚೆಪರಿಂ ಆತಾಂ ಆಮ್ಚೆ ಮಂಗ್ಳುರ್‌ಗಾರ್ ಯಾ ಗೊಂಯ್ಕಾರ್ ಮಾತ್ರ್ ಕಾಮಾರ್ ನಾಂತ್ ಮಲ್ಭಾರಿ ಆಯ್ಲ್ಯಾತ್ ಆನಿ ಹಾಂಚಾಕೀ ಅರ್ಧ್ಯಾ ಸಾಂಭಾಳಾಕ್ ತೆ ಖಂಚಿಂಯ್ ಕಾಮ್ ಕರುಂಕ್ ಪಾಟಿಂ ಸರಾನಾಂತ್. ಅಶೆಂ ಮಲ್ಭಾರಿ ಭರೊನ್ ಆಸ್ತಾನಾ ಆತಾಂ ಬೆಂಗಾಲಿ ಆಯ್ಲ್ಯಾತ್ ಆನಿ ಮಲ್ಬಾರ್‍ಯಾಂಚಾಂಕೀ ಉಣ್ಯಾ ಸಾಂಭಾಳಾಂತ್ ತೆ ಕಾಮ್ ಕರುಂಕ್ ತಯಾರ್ ಆಸಾತ್. ಬೆಂಗಾಲಿಂಚಾಂಕೀ ಉಣ್ಯಾ ಸಾಂಭಾಳಾಂತ್ ಶ್ರೀಲಂಕಾನಾಂ ಆಸಾತ್, ಫಿಲಿಪಿನೊ ಆಸಾತ್, ಬಾಂಗ್ಲಾಚಿಂ ಆಸಾತ್. ತಶೆಂ ಆಸ್ತಾಂ ಕೊಣಾಯ್ಕೀ ಕೆದಾಳಾ ಕಶೆಂ ಆಪ್ಣಾಚೆಂ ಕಾಮ್ ವೆತಾ ಮ್ಹಳ್ಳೆಂಚ್ ಕಳಿತ್ ಆಸಾನಾ. ಹೊಯ್ ಎಕಾ ಥರಾಚೊ ಸ್ಪರ್ಧೊ.

ಹ್ಯಾ ಗಲ್ಫಾವರ್‍ವಿಂ ಕಿತ್ಲೆಶ್ಯಾಂಚಿ ಕುಟ್ಮಾಂ ವಿಭಾಡ್ಲ್ಯಾಂತ್? ಕಿತ್ಲೆಶ್ಯಾಂಚಾ ಘರಾ ಬೆಬ್ದೆಪಣಾಚಿ ಪಿಡಾ ಲಾಗ್ಲ್ಯಾ? ಥೊಡ್ಯಾಂಕ್ ಪೊಯ್ಶ್ಯಾಂಚೊ ಹಾಂಕಾರ್. ಕುಡ್ಡ್ಯಾ ಸುಣ್ಯಾಕ್ ಸುಕೊ ಗೂ ಮೆಳ್‌ಲ್ಲೆಪರಿಂ ಗಾಂವಾಂತ್ ತಾಂಚೆಂಚ್ ರಾಜ್ ಆನಿ ತಾಂಚೊಚ್ಚ್ ಹಾಂಕಾರ್. ಪೊಯ್ಶ್ಯಾಂ ಖಾತಿರ್ ಪರ್ಗಾಂವಾಂತ್ ಮಿನತ್ ಕರ್ಚಿ ತಾಂಚಾ ಘರ್ಚಾಂನಿ, ಆವಯ್ನ್, ಬಾಪಾಯ್ನ್, ಭಾವಾನ್, ಭಯ್ಣಿನ್, ಘೊವಾನ್ ತರ್ ಹಾಂಗಾ ಉಡ್ಕಾಣಾಂ ಮಾರ್ಚಿಂ ಹಾಣಿಂ. ಥೊಡ್ಯಾಂಕ್ ಪುತಾಂಚಾ ಗುಸ್ತ್ಯಾರ್ ಹಾಂಕಾರ್ ಆನಿ ಥೊಡ್ಯಾಂಕ್ ಧುವಾಂಚಾ ಗುಸ್ತ್ಯಾರ್ ಹಾಂಕಾರ್. ಜಾಂವ್ಯಾಚಾ ಗುಸ್ತ್ಯಾರ್ ಯೆಂವ್ಚೊ ಹಾಂಕಾರ್ ಭೋವ್ ಮಾರೆಕಾರ್. ಹೊ ಹಾಂಕಾರ್ ವಿಕಾಳ್ ಸೊರೊಪಾಚಾ ವಿಕಾಪ್ರಾಸ್ ಚಡ್ ಮಾರೆಕಾರ್. ಉಡ್‌ಲ್ಲಿಂ ಪಡ್ತಾತ್ ಪಡ್‌ಲ್ಲಿಂ ಆನಿ ಹಿ ಪಡ್ಣಿಂ ಆನಿ ಉಟ್ಣಿಂ. ಪೊಯ್ಶ್ಯಾಂ ಖಾತಿರ್ ಕಿತೆಂ ಸಗ್ಳೆಂ ಘಡ್ತಾ ಕಿತೆಂ ಸಗ್ಳೆಂ ಘಡಾನಾ. ಫಕತ್ ಪೊಯ್ಶ್ಯಾಂ ಖಾತಿರ್. ಪೊಯ್ಶೆ ಜಾಯ್ ಥೊಡ್ಯಾಂಕ್ ಗರ್ಜೆಕ್ ಥೊಡ್ಯಾಂಕ್ ಮರ್ಜೆಕ್ ಥೊಡ್ಯಾಂಕ್ ಖೊರ್ಜೆಕ್ ತರೀ ಗಲ್ಫಾಂತ್ ಆಸ್ಚೆ ಚಡಾವತ್ ಸಗ್ಳೆ ಎಕಾಚ್ಚ್ ಇರಾದ್ಯಾನ್ ಕಾಮ್ ಕರ್ತಾಲೆ ತೊ ಇರಾದೊ ಪೊಯ್ಶೆ ಪೊಯ್ಶೆ ಆನಿ ಪೊಯ್ಶೆ.

ಪೊಯ್ಶೆ ಮೆಳ್ತಿತ್ ತರ್ ಥೊಡ್ಯಾಚ್ಚ್ ದಿನಾರಾಂಕ್ ಕೊಣಾಯ್ಚಿಯ್ ಬಾಯ್ಲ್ ಜಾಂವ್ಕ್ ಕಾಂಯ್ ಬಾಯ್ಲಾಂ ಉಣಿಂ ನಾಂತ್. ಪೊಯ್ಶ್ಯಾಂ ಖಾತಿರ್ ಕಿತ್ಲೆಶ್ಯಾಂ ರಂಗಾಂನಿ ಸೊರೊ ಉಕೊಡ್ನ್ ವಿಕ್ತಾತ್? ಫಕತ್ ಸೊರೊ ಕಿತ್ಯಾಕ್? ಕಿತ್ಲೆಶ್ಯಾ ಜಾಗ್ಯಾಂನಿ ಬ್ಲೂ ಫಿಲ್ಮಾಂ ವಿಕಾನಾಂತ್ ಆನಿ ತಿಂಚ್ ಫಿಲ್ಮಾಂ ಘೆವ್ನ್ ಸಮಾಜೆಂತ್ ಭಾಗೆವಂತ್ ಲೋಕ್ ಪಳೆನಾ? ಕುಮ್ಸಾರ್ ಜಾಂವ್ಚಾ ಪಯ್ಲೆಂ ಆನಿ ಕುಮ್ಸಾರ್ ಜಾಲ್ಲ್ಯಾ ಉಪ್ರಾಂತ್‌ಯಿ ಅಸಲ್ಯೊ ಕರ್ನ್ಯೊ ಆಧಾರ್‍ಚಿಂ ರಾವ್ತಾತ್? ನಾಂತ್ ತರ್ ಎಕಾಚ್ಚ್ ಧ್ಯೇಯಾಂತ್. ಹಾಂತುಂ ಬರೊ ಕೋಣ್ ಆನಿ ಪಾಡ್ ಕೋಣ್? ಅಂಕ್ವಾರ್ಪಣಾಚಿ ದುಬ್ಳಿಕಾಯೆಚಿ ಆನಿ ವಿಧೇಯ್ಪಣಾಚಿ ಆಂಗವ್ಣ್ ಕೆಲ್ಲೆ ಕಿತ್ಲೆ ಪಾದ್ರಿ ಮಾದ್ರಿ ಹಾಂಗಾ ಯೇನಾಂತ್? ಫಿರ್ಗಜೆಚಾ ಕುಂದ್ಯಾ ಥಾವ್ನ್ ಖಾಕುಸಾ ಪರ್‍ಯಾಂತ್ ಬಾಂದ್ಪಾಂ ಬಾಂದುಂಕ್ ಕುಮೊಕ್ ವಿಚಾರ್‍ನ್ ಯೇನಾಂತ್? ಆನಿ ಹಾಂಕಾ ಆಪವ್ನ್ ಹಾಡ್ನ್ ಆಪ್ಲ್ಯಾ ಘರಾಂತ್ ರಾವಾಯಿಲ್ಲಿಂ ಮನ್ಶಾಂ ಮಾತ್ರ್ ಆಪುಣ್ ಮೆಲ್ಯಾರ್ ನಿಟ್ಟ್ ಸರ್ಗಾಕ್ ವೆತಾತ್ ಮ್ಹಣೊನ್ ಚಿಂತಿನಾಂತ್? ತರ್ ಗಾಂವಾಂತ್ ಆಸ್‌ಲ್ಲ್ಯಾಂಕ್ ಹಾಂಗಾಚಾ ಮನ್ಶಾಂ ಥಾವುನ್ ದಿಸ್ಚೆ ಮ್ಹಳ್ಯಾರ್ ಫಕತ್ ಪೊಯ್ಶೆ ಆನಿ ಹೆರ್ ಕಿತೆಂಚ್ ನ್ಹಂಯ್.

ದುಡು ಕೊಣಾಕ್ ಜಾಯ್ತ್ ಕೋಡು? ಹಾಂಗಾಚಾ ದುಡ್ವಾನ್ ಜಾಯಿತ್ತೆಂ ಕೆಲಾಂ. ಗಾಂವಾಂತ್ ಘರಾಣೆಂ ಮೊಡ್ಲ್ಯಾರೀ ಜಾಯಿತ್ತೆ ಬಂಗ್ಲೆ ಉಭೆ ಜಾಲ್ಯಾತ್. ಸಂಬಂಧ್ ಮೊಡ್ಲ್ಯಾರೀ ಜಾಯಿತ್ಯಾ ಮೊಗಾಚಾಂಕ್ ಜಮೊ ಕೆಲಾಂ. ತರೀ ಹಾಂಚೆ ಮಧೆಂ ಮನ್ಶಾಪಣ್ ಅಜೂನ್ ಚಿರ್ಡೊನ್ ಮುರ್ಡೊನ್ ತರೀ ಜಿವಂತ್ ಉರ್ಲಾಂ. ಆನಿ ಸತ್ ಅಜೂನ್ ಬುಡೊಂಕ್ ನಾ. ತವಳ್‌ತವಳ್ ತೆಂ ಜಿವೆಂ ಜಾತಾ. ಜಾಂವ್ಕ್ ಪುರೊ ಜೀಕ್ ಚಡಾವತ್ ಜಾವ್ನ್ ಅಸಲ್ಯಾ ಸಂಗ್ತ್ಯಾಂಚಿ ಜಾತಾ ಆನಿ ಜಾಂವ್ಕ್ ಪುರೊ ಹಾಂತುಂಯ್ ಸಲ್ವಣಿಂ ಜಾಂವ್ಚಿ ಅಸ್ಕತ್ ಮನ್ಶಾಂಚಿ ಮಾತ್. ಪಯ್ಲೆಂಚೆ ಪರಿಂ ಕೋಣಾಯ್ಚಾಯ್ ವಳ್ಕಿಂತ್ ಗಲ್ಫಾಕ್ ಆಯ್ಲ್ಯಾರ್ ಜಾತಾ ಆನಿ ಕಾಮ್ ಕಶೆಂಯ್ ಮೆಳ್ತಾ ಮ್ಹಳ್ಳಿ ಪರಿಗತ್ ಆತಾಂ ನಾ. ಆತಾಂ ಗಲ್ಫಾಕ್ ವೆಚೆಂ ಆನಿ ಧಾಡ್ಚೆಂ ಮ್ಹಳ್ಳೆಂಚ್ ಏಕ್ ದಂದೊ ಜಾಲಾ. ಥೊಡೊ ಮಿನತೆನ್ ಆನಿ ಸತಾನ್ ಧಾಡ್ತಾ ತರ್ ಥೊಡ್ಯಾಂಕ್ ಫಕತ್ತ್ ಹೆರಾಂಕ್ ಲುಟುಂಕ್ ಏಕ್ ಅವ್ಕಾಸ್. ಆನಿ ಹ್ಯಾ ಕಾಮಾಂತ್ ಬರ್‍ಯಾಪಣಾಚೊ ಅಂಶ್ ಭೋವ್ ಉಣೊ. ಮನಿಸ್ ಸಂಸಾರ್‌ಭರ್ ಬದಾಲ್ಲಾ. ದೆಖುನ್ ಅರ್ಭಿ ಬದಲ್ಲೆಲ್ಯಾಂತ್ ಕಿತೆಂ ವಿಶೇಷ್?

ಮುಂದರ್‍ಸಿಲಾಂ...

Tags: Vally Quadras,e konkani novel, Konkani, Mangalore, Mangalorean, Mother Tongue

From around the world

ಪಾಟಿಂ ಗಾಂವಾಕ್ - ಅವಸ್ವರ್ 21

Post your comments

ಅವಸ್ವರ್ 1

ಅವಸ್ವರ್ 2

ಅವಸ್ವರ್ 3

ಅವಸ್ವರ್ 4

ಅವಸ್ವರ್ 5

ಅವಸ್ವರ್ 6

ಅವಸ್ವರ್ 7

ಅವಸ್ವರ್ 8

ಅವಸ್ವರ್ 9

ಅವಸ್ವರ್ 10

ಅವಸ್ವರ್ 11

ಅವಸ್ವರ್ 12

ಅವಸ್ವರ್ 13

ಅವಸ್ವರ್ 14

ಅವಸ್ವರ್ 15

ಅವಸ್ವರ್ 16

ಅವಸ್ವರ್ 17

ಅವಸ್ವರ್ 18

ಅವಸ್ವರ್ 19

ಅವಸ್ವರ್ 20

ಅವಸ್ವರ್ 21

ಅವಸ್ವರ್ 22

ಅವಸ್ವರ್ 23

ಅವಸ್ವರ್ 24

ಅವಸ್ವರ್ 25

ಅವಸ್ವರ್ 26

ಅವಸ್ವರ್ 27

ಅವಸ್ವರ್ 28

Connect

Our Address
Mangalore

Our Address
Udupi

Our Address
Dubai

From around the world

Post your comments

Connect

Our AddressMangalore

Our AddressUdupi

Our AddressDubai

Our Address
Mangalore

Our Address
Udupi

Our Address
Dubai