:: ಮಾಯ್ ಭಾಸ್

ಪುಣ್ ಮಾಜ್ರಾಕ್ ಖೆಳ್ ಆನಿ ಉಂದ್ರಾಕ್ ಜಿವಾಚೊ ಅಕ್ಲಾಸ್ ಮ್ಹಳ್ಳೆಪರಿಂ ಶೇಖಾಚಾ ಪಿಸಾಯೆಚೆಂ ಉಣೆಂಪಣ್ ದಿಸ್ಲೆಂನಾ. ಥೊಡೆ ಪಾವ್ಟಿಂ ತೊ ಜಿಕ್ತಾಲೊ ತರೀ ಚಡಾವತ್ ಜಾವ್ನ್ ಸಲ್ವತಾಲೊ. ಹಿ ಜುಗಾರಿ ಮ್ಹಳ್ಳೊ ಖೆಳ್ ಅಸೊಚ್ ನಂಯ್ಗೀ? ಕೊಣೀಂ ಜಿಕ್ತಾ ತರ್ ಕಿತ್ಯಾಕ್ ಜಿಕ್ತಾ ಮ್ಹಣೊನ್ ಕೋಣೀಂ ನೆಣಾಂತ್. ತಶೆಂಚ್ ಕೊಣೀಂ ಮನಿಸ್ ಸಲ್ವಾತಾ ತರ್ ಕಿತ್ಯಾಕ್ ಸಲ್ವತಾ ಮ್ಹಣೊನ್ ಕೊಣೀಂ ನೆಣಾಂತ್. ಸಲ್ವಾಲ್ಲ್ಯಾ ಮನ್ಶಾಕ್ ಸಲ್ವಣಿಂ ಸಾಸ್ಣಾಚಿ ನ್ಹಂಯ್ ತಶೆಂಚ್ ಜಿಕ್‌ಲ್ಲ್ಯಾ ಮನ್ಶಾಚಿ ಜೀಕ್ ಸಾಸ್ಣಾಚಿ ನ್ಹಂಯ್.

ದೀಸ್ ಗೆಲ್ಲೆಪರಿಂಚ್ ಶೇಖಾನ್ ಹೊಗ್ಡಾಂವ್ಕ್ ಧರ್ಲೆಂ ಆನಿ ತಾಚಾ ಹ್ಯಾ ಪಿಸಾಯೆವರ್ವಿಂ ತಾಚಾ ಹಾತಾಂತ್ ಕಾಮ್ ಕರ್ತೆಲ್ಯಾಂಕ್ ಜಿವಾಚೆ ಅಕ್ಲಾಸ್ ಯೇಂವ್ಕ್ ಲಾಗ್ಲೆ. ಥೊಡ್ಯಾಂನಿ ಕಾಮ್ ಸೊಡ್ಲೆಂ ತರ್ ಥೊಡ್ಯಾಂನಿ ದುಸ್ರ್ಯಾ ಜಾಗ್ಯಾಂನಿ ಕಾಮ್ ಸೊಧುಂಕ್ ಸುರು ಕೆಲೆಂ.

ಪುಣ್ ಇತ್ತುನ್ ಪಾವ್ಲೊ ತರೀ ಶೇಖಾಚೆಂ ಜುಗಾರೆಚೆಂ ಪಿಶೆಂ ಉಣೆಂ ಜಾಲೆಂನಾ. ಪರತ್ ತಾಣೆಂ ಸಭಾರ್ ಹಜಾರ್ ದಿನಾರ್ ಹೊಗ್ಡಾಯ್ಲೆ ಆನಿ ತೊ ಎಕಾಚ್ ಹಠಾರ್ ಪಡ್‌ಲ್ಲೊ ಆಪ್ಣಾನ್ ಎಕಾಚ್ ಮಾರಾರ್ ಜ್ಯೆ ಕಿತೆಂ ಹೊಗ್ಡಾಯ್ಲಾಂ ತೆಂ ಜೊಡಿಜಯ್ ಮ್ಹಳ್ಳಿ ಪಿಸಾಯ್. ಆನಿ ಅಶೆಂ ತಾಣೆಂ ನಿಮಾಣೆಂ ತಾಚೆಲಾಗಿಂ ಆಸ್ಚೆ ಸಗ್ಳೆ ದಿನಾರ್ ಚಡುಣೆಂ ಪಾವಣ್ಶಿಂ ಹಜಾರ್ ದಿನಾರ್ ಎಕಾಚ್ ಮಾರಾರ್ ಘಾಲೊ. ಮೆಳ್ಳೊ ತರ್ ತೊ ಲಾಖಾಂನಿ ದಿನಾರ್ ಘೆಂವ್ಚಾರ್ ಆಸ್‌ಲ್ಲೊ. ಪುಣ್ ಹ್ಯೇ ಪಾವ್ಟಿಂಯ್ ತಾಕಾ ಸಲ್ವಣಿಂಚ್ ಘೆಜಯ್ ಪಡ್ಲಿ. ತಾಚೆಂ ಫಲಿತಾಂಶ್ ಜಾವ್ನ್ ಶೇಖ್ ಕಂಗಾಲ್ ಜಾಲ್ಲೊ. ಸುಪರ್‌ಮಾರ್‍ಕೆಟ್ ವಿಕ್ಲಿ, ಗುದಾಂವ್ ವಿಕ್ಲೆಂ. ಕಾಮಾಚೊ ಲೋಕ್ ಕಂಗಾಲ್ ಜಾಲೊ.

ಕಾಮ್ ಕರ್ಚಾ ಲೊಕಾಂಕ್ ಕೊಣಾಕ್ ಎನ್.ಓ.ಸಿ. ಜಾಯ್‌ಗೀ ತಾಂಕಾ ದಿಲಿ ಆನಿ ಕೊಣಾಕ್ ಕಾಮ್ ಕರ್ನ್ ಪುರೊ ಜಾಲಾಂಗೀ ತೆ ಗಾಂವಾಕ್ ಗೆಲೆ.

ಶೇಖಾಚಾ ಲುಕ್ಸಾಣೆಚಿ ಖಬಾರ್ ಮೆಳ್ತಚ್ ಪಯ್ಲೊ ಧಾಂವ್‌ಲ್ಲೊ ಬೆಂಗಾಲಿ. ತಾಕಾ ಸಭಾರ್ ವರ್ಸಾಂ ಕಾಮ್ ಕೆಲ್ಲೆವರ್‍ವಿಂ ಶೇಖಾನ್ ಸರ್ವಿಸಾಚೆ ಇಲ್ಲೆ ಪೊಯ್ಶೆ ದಿಲ್ಲೆ. ಹೆಂ ಪಳೆವ್ನ್ ಹೆರ್ ಥೊಡೆ ಮೆಳ್ಚೆಂ ಸಗ್ಳೆಂ ಆಪ್ಣಾಚೆಂ ನಶೀಬ್ ಮ್ಹಣೊನ್ ಲೆಖಿಲಾಗ್ಲೆ ಆನಿ ಎಕೆಕ್ಲೆಚ್ ಸೊಡ್ನ್ ವಚೊಂಕ್ ಲಾಗ್ಲೆ. ಆತಾಂ ಶೇಖಾಕ್ ಕಳ್ಳೆಂ. ತಾರುಂ ಬುಡೊನ್ ಯೆತಾನಾ ಪಯ್ಲೆಂ ಧಾಂವ್ಚೆ ಉಂದಿರ್ ಮ್ಹಳ್ಳೆಂ. ಆನಿ ಶೇಖಾನ್ ಕೊಣಾಯ್ಕೀ ಪೊಯ್ಶೆ ದಿಂವ್ಚೆ ರಾವಯ್ಲೆ. ಕೋಣ್ ಕಾಮ್ ಸೊಡುನ್ ವೆತಾ ತರ್ ವಚ್ಯೆತ್. ಮ್ಹಜಾನ್ ಕಾಂಯ್ ಆಕ್ಶೇಪ್ ನಾ. ಪುಣ್ ಕೊಣಾಯ್ಕೀ ಕಸಲೆಂಚ್ ಸರ್ವಿಸ್ ಮೆಳ್ಚೆಂನಾ ಮ್ಹಣೊನ್ ಸಾಂಗ್ಲೆಂ.

ಮಣಿ ಆತಾಂ ಚಿಂತುಂಕ್ ಪಡ್ಲೊ. ಹಾಂಗಾ ರಾವ್ಲ್ಯಾರ್ ಬೆಸ್ಟೊಚ್ ಖರ್ಚ್. ಉತ್ಪತ್ತಿ ಕಾಂಯ್ ನಾ. ಆಪ್ಣಾನ್ ಜಾಗೊ ಕಸೊಯ್ ಘೆತ್ಲಾ, ಆನಿ ತೊ ಎದೊಳ್‌ಚ್ ತೋಟ್ ಕರ್ಚಾಂತ್ ಗಳ್ಸಿಲಾ ಆನಿ ತೆಂ ತೋಟ್ ವ್ಹಡ್ ಜಾವ್ನ್ ಯೆತಾನಾ ತಾಚೊ ಬರೊ ಕರ್ನ್ ಪೋಸ್ ಕೆಲೊ ತರ್ ಉಪ್ರಾಂತ್ ತೆಚ್ ಜಾಗ್ಯಾಂತ್ ಗಲ್ಫಾಚಿ ಜೋಡ್ ಘೆವ್ಯೆತ್ ಮ್ಹಣೊನ್ ಚಿಂತ್ಲೆಂ. ತ್ಯಾ ಶಿವಾಯ್ ಬೆಂಕಾಂತ್ ಇಲ್ಲೆ ಪೊಯ್ಶೆ ಕಶೆಯ್ ಆಸಾತ್ ದೆಖುನ್ ತಾಚಾ ಹಾತಾಂತ್ ಇಲ್ಲೆ ಪೊಯ್ಶೆ ಆಸ್‌ಲ್ಲೆ ಆನಿ ಆಪ್ಲ್ಯಾ ಭಾಂವ್ಡಾಂಸವೆಂ ಮೆಳೊನ್ ಇಲ್ಲೊ ವಹಿವಾಟ್ ಸುರು ಕರುಂಕ್‌ಯಿ ಆಪ್ಣಾನ್ ಚಿಂತ್‌ಲ್ಲೆಂ ಬರೆಂಚ್ ಮ್ಹಳ್ಳಿಂ ಚಿಂತ್ನಾಂ ತಾಚಾ ಮತಿಂತ್ ಆಯ್ಲಿಂ. ಆನಿ ಗರ್ಜ್ ಪಡ್ಲ್ಯಾರ್ ಪರತ್ ಯೇಜಂಟಾಕ್ ಧರ್ನ್ ಯೆಂವ್ಚೆಂ. ಆತಾಂ ಅರ್ಭಿ ಭಾಸ್ ಕಶಿಯ್ ಉಲಂವ್ಕ್ ಯೆತಾ ಮ್ಹಳ್ಳ್ಯಾನ್ ತಾಕಾ ಕಸ್ಲೆಂಗೀ ಧಯ್ರ್ ಮೆಳ್ಳೆಂ.

ಶೇಖಾಕ್ ಲುಕ್ಸಾಣ್ ನಾತ್‌ಲ್ಲಿ ತರೀ ಮಣಿ ಚಡ್ ಮ್ಹಳ್ಯಾರ್ ಅನ್ಯೇಕ್ ವರಸ್ ಮಾತ್ರ್ ಕಾಮ್ ಕರುಂಕ್ ಚಿಂತುನ್ ಆಸ್‌ಲ್ಲೊ.

ಅಶೆಂ ಏಕ್ ಘಟ್ ನಿರ್ಧಾರ್ ಕರ್ನ್ ಗಾಂವಾಕ್ ವಚೊಂಕ್ ಆಯ್ಕಾನಾತ್‌ಲ್ಲ್ಯಾ ತಿಯೊಕ್ ಅಖ್ರೇಕ್ ಆದೇವ್ಸ್ ಕರ್ನ್ ಮಣಿಂ ಕುವೇಯ್ಟ್ ಸೊಡ್ನ್ ಗೆಲೊ. ಆತಾಂ ತಿಯೊ ಚಿಂತುಂಕ್ ಲಾಗ್ಲೊ. ಅಪ್ಣಾನ್ ಯೇವ್ನ್ ಇತ್ಲಿಂ ವರ್ಸಾಂ ಉತ್ರೊಂಕ್ ಆಯ್ಲಿಂ ತರೀ ಗಾಂವಾಕ್ ವಚೊಂಕ್ ತಾಕಾ ಮನ್ ಆಸ್‌ಲ್ಲೆಂ. ಹಾತಾಂತ್ ತಾಚಾ ಇಲ್ಲೆ ಪೊಯ್ಶೆಯಿ ಆಸ್‌ಲ್ಲೆ. ತರೀ ಕಿತೆಂ ತೊ ಚಿಂತುನ್ ಆಸ್‌ಲ್ಲೊ ಆನಿ ಆತಾಂ ಕಿತೆಂ ಘಡ್ಲೆಂ? ಆಪುಣ್ ರಜೆರ್ ವಚೊನ್ ಪರತ್ ಪಾಟಿಂ ಯೆತಲೊಂ ಆನಿ ಆಪ್ಲ್ಯಾ ಘರ್ಚಾ ಗರ್ಜಾಂಕ್ ಪರತ್ ಇಲ್ಲಿ ಮಿನತ್ ಕರುನ್ ಪಾವ್ತಲೊಂ ಮ್ಹಳ್ಳಿಂ ಚಿಂತ್ನಾ ಘೆವ್ನ್ ಇತ್ಲಿಂ ವರ್ಸಾಂ ಬೊಸ್‌ಲ್ಲೂ ತಿಯೊ ನಿಜಾಯ್ಕೀ ನಿರಾಶಿ ಜಾಲ್ಲೊ. ತ್ಯಾ ಶಿವಾಯ್ ಆತಾಂ ಮಣಿ ನಾಸ್ತಾಂ ತೊ ಏಕ್ದಮ್ ಎಕ್ಸುರೊ ಜಾಲ್ಲೊ.

ಕಾಮ್ ನಾಸ್ತಾಂ ಹಾಂಗಾ ರಾವೊಂಕ್ ಕಶ್ಟ್ ಮ್ಹಳ್ಳೆಂ ತೊ ಎದೊಳ್‌ಚ್ ಸಮ್ಜಾಲ್ಲೊ, ತರೀ ಇಲ್ಲೆ ದೀಸ್ ತೊ ಕುವೆಯ್ಟಾಂತ್ ರಾವೊನ್ ಕಾಂಯ್ ಕಾಮ್ ಮೆಳತ್‌ಗೀ ಮ್ಹಣೊನ್ ರಾವ್ಲೊ. ಶೇಖಾನ್ ಇಬ್ರಾಹಿಮಾಕ್ ಗುದಾಂವ್ ಸೊಡುಂಕ್ ಪಡ್ತಾ ಮ್ಹಳ್ಳೆಂ ಎದೊಳ್‌ಚ್ ಕಳಯಿಲ್ಲೆಂ. ತರೀ ದಿಸಾನ್ ದೀಸ್ ತಾಕಾ ಹಾಂಗಾ ಜಾಂವ್ಚೊ ಖರ್ಚ್ ಪಳೆತಾನಾ, ತೆಂಯ್ ಗುದಾಂವ್ ಶೇಖಾನ್ ದುಸ್ರ್ಯಾಕ್ ವಿಕ್‌ಲ್ಲ್ಯಾನ್ ತಾಕಾ ತಾಣೆಂ ರಾಂವ್ಚೆಂ ಕೂಡ್‌ಯ್ ಸೊಡುಂಕ್ ಆಸ್‌ಲ್ಲೆಂ. ದೆಖುನ್ ಪಾಟಿಂ ಗೆಲ್ಲೆ ಶಿವಾಯ್ ತಾಕಾ ಹೆರ್ ವಾಟ್ ನಾತ್‌ಲ್ಲಿ.

ಆಸ್ಚೆಂ ಕಾಮ್ ಗೆಲ್ಲೆವರ್ವಿಂ ಆನಿ ಶೇಖಾನ್ ಗುದಾಂವ್‌ಯಿ ವಿಕುನ್ ಸೊಡ್ಚೆವಿಶ್ಯಾಂತ್ ಆಯ್ಕಾಲ್ಲೊ ತಿಯೊಕ್ ಆತಾಂ ರಾತಿಚೆಂ ನಿದ್ಲ್ಯಾರೀ ಸಾರ್ಕಿ ನೀದ್ ಪಡಾನಾ ಜಾಲಿ. ಥೊಡೆ ಪಾವ್ಟಿಂ ಆಪ್ಲ್ಯಾ ಉದ್ರೇಕ್ ಪರಿಗತೆಂತ್ ತೊ ನಿದ್‌ಲ್ಲೆ ಕಡೆಚ್ ಖಾಟಿಕ್ ಯಾ ವೊಣದೆಕ್ ಖೊಟೊ ಮುಟಿ ಘಾಲುಂಕ್ ಲಾಗ್ಲೊ. ಎದೊಳ್ ತಾಚೆಸವೆಂ ಆಸ್‌ಲ್ಲೆ ತಾಚೆ ಸಾಂಗಾತಿ ಎದೊಳ್‌ಚ್ ತಾಂಚಾ ತಾಂಚಾ ಸಂಸಾರಾಂತ್ ಆಸ್‌ಲ್ಲೆ ಅಶೆಂ ತಿಯೊಕ್ ಆತಾಂ ಮುಖಾರ್ ಕಿತೆಂ ಕರ್ಚೆಂ ಮ್ಹಳ್ಳೆಂ ಸಮ್ಜಾಲೆಂ ನಾ. ಎದೊಳ್‌ಚ್ ತಾಣೆಂ ಗಲ್ಫಾಂತ್ ಸಭಾರ್ ವರ್ಸಾಂ ಖರ್ಚಿಲ್ಲಿಂ ಆತಾಂ ಅಖ್ರೇಕ್ ಸೊಡ್ನ್ ವೆಚಾಧಿಂ ತಾಕಾ ಪರತ್ ತೆಚ್ ದಿಸಾಂಕ್ ಪಾಟಿಂ ವಚೊಂಕ್ ನಾಕಾಸ್‌ಲ್ಲೆಂ. ಗಾಂವಾಂತ್ ಸಗ್ಳೊ ದೀಸ್ ಖಂತಿನ್, ಬೆಜಾರಾಯೆನ್, ಪುರಾಸಾಣೆಂತ್ ಆಪ್ಲ್ಯಾ ಭುರ್ಗ್ಯಾಂಚಾ ಫುಡಾರಾಚಾ ಖಂತಿನ್ ಕಾಡ್ಚಾಕೀ ಹಾಂಗಾಚ್ ಗಲ್ಫಾಂತ್ ಮೊರ್ಚೆಂ ಬರೆಂ ಮ್ಹಣೊನ್ ತಾಕಾ ಸುಸ್ತಾಲೆಂ.

ಪುಣ್ ಕಿತೆಂ ಕರ್ತಲೊ ತೊ? ತಾಚಿ ಮತ್‌ಯಿ ಆತಾಂ ಸಾರ್ಕಿ ಕಾಮ್ ಕರಿನಾತ್‌ಲ್ಲಿ. ಪಾಟ್ಲ್ಯಾ ಥೊಡ್ಯಾ ದಿಸಾಂ ಥಾವುನ್ ಸಾರ್‍ಕೆಂ ಪೋತ್ ನಾಸ್ತಾಂ ಆನಿ ವಕ್ತಾಂಯ್ ನಾಸ್ತಾಂ ತಾಚಾ ಭಲಾಯ್ಕೆಂತ್‌ಯ್ ಇಲ್ಲಿ ಬದ್ಲಾವಣ್ ಜಾಲ್ಲಿ.

ಗಲ್ಫಾಂತ್ ಇತ್ಲೊ ತೇಂಪ್ ರಾವ್‌ಲ್ಲೆವರ್ವಿಂ ಹಾಂಗಾಚಾ ಗಿಮಾಕ್ ಆನಿ ಹಿಂವೆಕ್ ಎದೊಳ್‌ಚ್ ತೊ ಸಮ್ಜೊಂಕ್ ಸಕ್‌ಲ್ಲೊ. ತಶೆಂ ಜಾವ್ನ್ ತವಳ್ ತವಳ್ ತಾಕಾ ಯೆಂವ್ಚಿ ಶೆಳ್ ಯಾ ತಾಪ್ ಜಾಂವ್ ಖಂಚಾಯ್ಕೀ ಚಿಲ್ಲರ್ ಲೆಖಾನ್ ತೊ ಕಾಡ್ತಾಲೊ. ಪುಣ್ ಪಾಟ್ಲ್ಯಾ ಥೊಡ್ಯಾ ವರ್ಸಾಂ ಥಾವುನ್ ತಾಚಾ ಭಲಾಯ್ಕೆನ್ ತಾಕಾ ಹಾತ್ ದಿಲ್ಲೊ. ಇತ್ಲೊ ಘಟ್‌ಮೂಟ್ ದಿಸ್ತಾಲೊ ತರೀ, ಇಲ್ಲೆಂ ಚಲ್‌ಲ್ಲೆಂಚ್ ತಾಕಾ ಖರಸ್ ಯೆತಾಲಿ. ಕುಡಿಂತ್ ಅಸ್ಕತ್ಕಾಯ್ ಭರ್‌ಲ್ಲೆಪರಿಂ ತಾಕಾ ಭೊಗ್ತಾಲೆಂ. ಇಲ್ಲೆಂ ಹಠಾನ್ ಚಲೊಂಕ್ ಪ್ರೇತನ್ ಕೆಲೆಂ ತರ್ ತಾಚಾ ದೊಳ್ಯಾಂನಿ ಕಾಳೊಕ್ ಭರ್ತಾಲೊ. ತಾಚಿಂ ವಕ್ತಾಂ ಅಜೂನ್ ಚಾಲು ಆಸ್‌ಲ್ಲಿಂ ತಿಂ ತಾಚೆಂ ಕಾಮ್ ಗೆಲ್ಲೆಂಚ್ ತಾಣೆಂ ರಾವಯ್ಲಿಂ. ಎಕ್ಸುರೊ ಆಸ್ಚಾ ತಿಯೊಕ್ ತಾಚಿ ಜತನ್ ಘೆತೆಲಿಂಯ್ ಕೊಣೀಂ ನಾಸ್ತಾಂ ತಾಕಾ ಗಾಂವಾಕ್ ವೆಚಾ ಬದ್ಲಾಕ್ ಹಾಂಗಾಚ್ ಇಲ್ಲೊ ತೇಂಪ್ ರಾವೊನ್ ನವೆಂ ಕಾಮ್ ಸೊಧ್ಯಾಂ ಮ್ಹಣೊನ್ ಭೊಗ್ತಾಲೆಂ.

ಅಶೆಂ ಎಕಾ ದಿಸಾ ತೊ ತ್ಯಾ ಗುದಾಂವಾಕ್ ಯೆಂವ್ಚಾ ಎಕಾ ವಳ್ಕಿಚಾ ಡ್ರಾಯ್ವಾರಾಚಾ ಸಾಂಗ್ಣೆಪರ್ಮಾಣೆಂ ಎಕಾ ಫೆಕ್ಟರಿಕ್ ಕಾಮ್ ಸೊಧುನ್ ಗೆಲೊ.

ಉಲಂವ್ಕ್ ಯೆತಾಲೆಂ ದೆಖುನ್ ತಾಕಾ ಫೆಕ್ಟರಿಚಾ ಆಫೀಸಾ ಭಾಯ್ರ್ ಎಕಾ ಮಲ್ಬಾರಿನ್ ರಾವಾಯ್ಲೊ.

"ಹಾಂಗಾ ಕಾಮ್ ಆಸಾ ಮ್ಹಣೊನ್ ತುಕಾ ಕೊಣೆಂ ಕಳಯ್ಲೆಂ?"

ತಿಯೊನ್ ತ್ಯಾ ಡ್ರಾಯ್ವರಾಚೆಂ ನಾಂವ್ ಸಾಂಗ್ಲೆಂ.

"ಇಲ್ಲೊ ವೇಳ್ ತುಂ ಹಾಂಗಾಚ್ ಬೋಸ್ ಹಾಂವ್ ಮೆನೆಜರಾಲಾಗಿಂ ವಿಚಾರ್‍ನ್ ಯೆತಾಂ" ಮ್ಹಣೊನ್ ಮಲ್ಬಾರಿ ಭಿತರ್ ಗೆಲೊ ಆನಿ ಭಾಯ್ರ್ ರಾಕ್ಚಾ ತಿಯೊಕ್ ಪಾಟಿಂ ಯೇವ್ನ್ ಸಾಂಗಾಲಾಗ್ಲೊ. "ತೆಂ ಕಾಮ್ ಕರುಂಕ್ ಮನಿಸ್ ಮೆಳ್ಳಾ ಖಂಯ್" ಮ್ಹಣೊನ್ ಜಾಪ್ ದೀಲಾಗ್ಲೊ.

ಅಸಲ್ಯಾ ಕಾಮಾರ್ ಆಸ್ಚೆ ಮಲ್ಬಾರಿ ಅಸಲೆ ಸಂದರ್ಭ್ ಸೊಧುನ್ ಆಸ್ತಾತ್. ಕೆನ್ನಾ ಖಂಯ್ ಪುಣೀಂ ಕಸ್ಲೆಂಯ್ ಕಾಮ್ ಆಸಾ ತರ್ ತೆ೦ ಸೊಧುನ್ ಯೆಂವ್ಚಾಂಕ್ ಆಡಾವ್ನ್ ಆಪ್ಲ್ಯಾ ಸಯ್ರ್ಯಾಂಕ್ ಯಾ ವಳ್ಕಿಚಾಂಕ್ ಭರ್ತಾತ್. ಶಿಫ಼ಾರಸ್ ನಾಸ್ತಾಂ ಹಾಂಗಾಸರ್ ಕಾಮ್ ಮೆಳೊಂಕ್ ಖಂಡಿತ್ ಜಾವ್ನ್ ಕಶ್ಟ್ ಆಸ್‌ಲ್ಲೆ.

ತಿಯೊಕ್ ಆತಾಂ ಕಿತೆಂ ಕರ್ಚೆಂ ಮ್ಹಳ್ಳೆಂಚ್ ಕಳ್ಳೆಂನಾ. ತಿಯೊಕ್ ಪಯ್ಲೆಂ ಪಾವ್ಟಿಂ ಆಪ್ಲ್ಯಾ ಕಾಮಾಚಾಕೀ ಮಾರ್ಕುಚೆಂ ಕಾಮ್೦ಚ್ ಬರೆಂ ಮ್ಹಳ್ಳೆಂ ಚಿಂತಾಪ್ ಆಯ್ಲೆಂ.

ರಜೆರ್ ಥಾವುನ್ ಆಯಿಲ್ಲೊ ಮಾರ್ಕು ಸಯ್ತ್ ಆಪ್ಣಾಲಾಗಿಂ ಪಯ್ಲೆಂಚೆಪರಿಂ ಉಲಯ್ನಾಂ ಕಿತ್ಯಾಕ್ ಮ್ಹಳ್ಳೆಂ ತಿಯೊಕ್ ಸಮ್ಜಾನಾತ್‌ಲ್ಲೆಂ. ಮಾರ್ಕು ಘರ್ ಕಾಮ್ ಕರ್ತಾಲೊ ಆನಿ ತಾಚಾ ಘರಾಂತ್ ಕೊಣಾಯ್ಕೀ ಯೇಂವ್ಕ್ ಸೊಡಿನಾತ್‌ಲ್ಲಿಂ ಆನಿ ತಶೆಂಚ್ ತಾಕಾಯ್ ಘರಾ ಭಾಯ್ರ್ ವಚೊಂಕ್‌ಯಿ ಸೊಡಿನಾತ್‌ಲ್ಲಿಂ.

ತ್ಯಾ ಶಿವಾಯ್ ಮಾರ್ಕುಕ್ ಮೆಳ್ಚಿ ರಜಾ ಫಕತ್ತ್ ಆಯ್ತಾರಾ ಮತ್ರ್. ಪುಣ್ ಸುಕ್ರಾರಾ ಸಾಂಜೆರ್ ತೊ ಚಡಾವತ್ ಭಾಯ್ರ್ ವೆತಾಲೊ ದೆಖುನ್ ತಾಕಾ ಆಯ್ತಾರಾ ಸಾಂಜೆರ್ ಚಾರ್ ವೊರಾಂಚಿ ರಜಾ ಮಾತ್ರ್ ಮೆಳ್ತಾಲಿ. ಅಶೆಂ ಆಸ್ತಾಂ ಮಾರ್ಕುಕ್ ಮೆಳ್ಚೆಂ ತಿಯೊಕ್ ಕಶ್ಟ್ ಜಾಲೆಂ. ಕಿತ್ಯಾಕ್ ಮ್ಹಳ್ಯಾರ್ ಆತಾಂ ತಿಯೊಕ್ ದೀಸ್‌ಭರ್ ಕಾಮ್ ನಾತ್‌ಲ್ಲೆಂ. ತರೀ ಏಕ್ ದೀಸ್ ತೊ ಇಗರ್ಜೆಲಾಗಿಂ ವಚೊನ್ ಮಾರ್ಕುಕ್ ಮೆಳ್ಳೊ. "ಮಾರ್ಕು, ಹಾಂವ್ ಸಲ್ವಾಲೊಂ ಮಾರ್ಕು. ಗಾಂವಾಂತ್ ಆಸ್ತಾನಾಂಯ್ ಹಾಂವ್ ಸಲ್ವಾಲ್ಲೊಂ ಆನಿ ಆತಾಂ ಪರ್ಗಾಂವಾಕ್ ಯೇಂವ್೦ಯ್ ಸಲ್ವಾಲಾಂ. ಹಾಂವೆ ಚಿಂತ್‌ಲ್ಲೆಂ ಎಕೀ ಜಾಲೆಂನಾ. ಏಕ್ ಪಾವ್ಟಿಂ ಗಾಂವಾಕ್ ರಜೆರ್ ವಚೊನ್ ಯೆತಾಂ ಮ್ಹಣೊನ್ ಮನ್ ಘಟ್ ಕೆಲೆಂ ತರ್ ಗಾಂವಾಂತ್ ಏಕ್ ನ್ಹಂಯ್ ಏಕ್ ಗರ್ಜ್ ಉದೆತಾಲಿ ಆನಿ ತಿ ಗರ್ಜ್ ಮ್ಹಜಾ ಆಶಾಂಕ್ ಥಂಯ್ಚ್ ಪುರ್ತಾಲಿ. ಅಶೆಂ ಹಾಂವ್ ಹ್ಯೇ ಪಾವ್ಟಿಂ ತರೀ ಬರ್‍ಯಾನ್ ಕುವೇಯ್ಟ್ ಸೊಡ್ನ್ ಗಾಂವಾಕ್ ವಚೊಂಕ್ ಚಿಂತಾನಾ ಬೊಲ್ತೆಂಚ್ ಘಡ್ಲೆಂ. ಆನಿ ಹ್ಯಾ ಪರಿಗತೆಂತ್ ಹಾಂವ್ ಕಸೊ ಗಾಂವಾಕ್ ವಚೊಂ? ದೆಖುನ್ ತುಜಾ ವಳ್ಕಿಂತ್ ಕಾಂಯ್ ಖಂಯ್ಸರೀ ಕಾಮ್ ಮೆಳ್ಳೆಂ ತರ್ ತುಜೊ ವ್ಹಡ್ ಉಪ್ಕಾರ್ ಜಾತೊ. ತುಜಾಚ್ ಮಜತೆನ್ ಹಾಂವ್ ಆತಾಂ ಗಲ್ಫಾಂತ್ ಆಸಾಂ ಆನಿ ಹ್ಯೇ ಪಾವ್ಟಿಂಯ್ ಮ್ಹಾಕಾ ತುವೆಂಚ್ ಆಧಾರ್ ದೀಜಯ್."

ತಿಯೊನ್ ಖಾಲ್ತೆಪಣಿಂ ಮಾರ್ಕುಲಾಗಿಂ ವಿನತಿ ಕೆಲಿ. ಪುಣ್ ಮಾರ್ಕುಚಾ ಹಾತಾಂತ್ ಕಿತೆಂಚ್ ಸಾಧ್ಯ್ ನಾತ್‌ಲ್ಲೆಂ. ತ್ಯಾ ಶಿವಾಯ್ ಮಾರ್ಕು ಘರ್ ಕಾಮ್ ಕರ್ತಾಲೊ ದೆಖುನ್ ತಾಕಾ ಭಾಯ್ಲ್ಯಾ ಸಂಸಾರಾಚೊ ಚಡ್ ಸಂಪರ್ಕ್‌ಚ್ಚ್ ನಾತ್‌ಲ್ಲೊ. ಕಾಮ್ ಜಾಲೆಂ ಘರ್ ಜಾಲೆಂ ಮ್ಹಳ್ಳ್ಯಾ ಪರಿಗತೆಂತ್ ಆಸ್ಚಾ ಮಾರ್ಕುನ್ ತಿಯೊಕ್ ಸತ್ ಉಚಾರ್‍ಲೆಂಚ್.

"ತಿಯೊ, ತುಜೆ ಕಶ್ಟ್ ಹಾಂವ್ ಸಮ್ಜಾತಾಂ. ತರೀ ಮ್ಹಜೆಲಾಗಿಂ ಜ್ಯೇ ಕಿತೆಂ ಸಾಧ್ಯ್ ಆಸಾ ತೆಂ ಖಂಡಿತ್ ಕರುಂಕ್ ಪಾಟಿಂ ಸರಾನಾ. ತುಕಾ ಹಾಂವ್ ಪೊಯ್ಶ್ಯಾಂನಿ ಕಾಂಯ್ ತರೀ ಕುಮೊಕ್ ಕರುಂಕ್ ಸಕ್ತಲೊಂ ಮಾತ್ರ್ ಶಿವಾಯ್ ತುವೆಂ ಚಿಂತ್‌ಲ್ಲೆಪರಿಂ ನ್ಹಂಯ್. ಮ್ಹಾಕಾ ಕಾಂಯ್ ತಿತ್ಲಿ ವಳೊಕ್ (ವಾಸ್ತಾ) ನಾ. ತ್ಯಾ ಶಿವಾಯ್ ತುಜಾ ಘರ್ಚಾಂಕ್ ಆತಾಂ ತುಜಿ ಗರ್ಜ್ ಆಸಾ. ದೆಖುನ್ ತುಂ ಚಡ್ ವೇಳ್ ವಿಭಾಡ್ ಕರಿನಾಕಾ. ಹಾಂವೆ ಸಾಂಗ್‌ಲ್ಲೆಂ ಆಯ್ಕ್ ಆನಿ ಗಾಂವಾಕ್ ವಚ್. ತುಜಿ ಭಲಾಯ್ಕಿ ಬರಿ ಸಾಂಭಾಳ್."

ಗಲ್ಫಾಕ್ ಯೇವ್ನ್ ಪಯ್ಲೆಂಚೆ ಥೊಡೆ ದೀಸ್ ಪಾಶಾರ್ ಕರ್ತಾನಾ ದಿಸಾಚಾ ಹರ್‍ಯೆಕಾ ದಿಸಾ ಆಪ್ಲ್ಯಾ ಕುಟ್ಮಾಚೊ ಉಡಾಸ್ ಕರುನ್ ಆಸ್ಚಾ ತಿಯೊಕ್ ಆತಾಂ ಕಶೆ ದೀಸ್ ಪಾಶಾರ್ ಜಾತಾತ್ ಮ್ಹಳ್ಳೆಂಚ್ ಸಮ್ಜಾನಾತ್‌ಲ್ಲೆಂ. ಅಶಿಂ ಸಭಾರ್ ವರ್ಸಾಂ ಪಾಶಾರ್ ಎದೊಳ್‌ಚ್ ಪಾಶಾರ್ ಜಾಲ್ಲಿಂ ತರೀ ತಾಕಾ ಗಾಂವಾಕ್ ವೆಚೆಂ ಭಾಗ್ ಮೆಳ್ಳೆಂಚ್ ನಾ. ಹರ್‍ಯೆಕಾ ವರ್ಸಾ ತಾಣೆಂ ಗಾಂವಾಕ್ ವೆಚಿ ಆಲೋಚನ್ ಕರುನ್ ಆಸ್ತಾನಾ, ಏಕ್ ನ್ಹಂಯ್ ತರ್ ಏಕ್ ಗರ್ಜ್ ಉಬ್ಜಾತಾಲಿ ಆನಿ ಹೆಂಚ್ ಏಕ್ ವರಸ್ ಬರ್‍ಯಾನ್ ಸಂಪಯ್ಲೆಂ ತರ್ ಫುಡೆಂ ಆಪ್ಣಾಕ್ ಕಾಯ್ ಕಶ್ಟ್ ಆಸ್ಚೆನಾಂತ್ ಮ್ಹಣೊನ್ ಚಿಂತುನ್ ಕಶಿಂಯ್ ದೀಸ್ ಲೊಟ್ತಾಲೊ. ಏಕ್ ಪಾವ್ಟಿಂ ಕಾಮ್ ಸೊಡ್ಲೆಂ ತರ್ ಉಪ್ರಾಂತ್ ತೆಂ ಮೆಳೊಂಕ್‌ಯಿ ಕಶ್ಟ್ ಆಸಾತ್ ಮ್ಹಳ್ಳೆಂ ತಿಯೊ ಜಾಣಾಸ್‌ಲ್ಲೊ. ತ್ಯಾ ಶಿವಾಯ್ ಗಲ್ಫಾಂತ್ ಆಸ್ಚಾ ಹೆರಾಂಚೆ ಕಶ್ಟ್ ಆಯ್ಕೊನ್ ಎದೊಳ್‌ಚ್ ತಾಚಾ ಕಾಳ್ಜಾ ಮನಾಂತ್ ಭಿರಾಂತ್ ಭರ್‌ಲ್ಲಿ. ಎದೊಳ್ ತಾಣೆಂ ಸಾರ್‌ಲ್ಲೆ ದೀಸ್ ತಾಚೆ ಬರ್‍ಯಾನ್ ಗೆಲ್ಲೆ ಆಸ್ತಾಂ ಫುಡ್ಲ್ಯಾ ದಿಸಾಂಚಿ ಕಿತೆಂ ಮ್ಹಳ್ಳೆಂ ತಾಚಾನ್ ಚಿಂತುಂಕ್ ಸಾಧ್ಯ್ ನಾತ್‌ಲ್ಲೆಂ. ವೇಳ್ ಘಡಿ ಕೊಣಾಯ್ಕೀ ರಾಕ್ತಾವೆ ತರ್?

ಮಾರ್ಕುಕ್ ಆತಾಂ ಕಿತೆಂ ಕರುಂಕ್‌ಯಿ ಮನ್ ಜಾಲೆಂ ನಾ. ತಿಯೊಚೆರ್ ತಾಕಾ ಕಸ್ಲೊಚ್ ರಾಗ್ ಯಾ ಮೊಸೊರ್ ನಾತ್‌ಲ್ಲೊ. ಅಶೆಚ್ ಕಿತ್ಲೆ ದೀಸ್ ಪರ್‍ಯಾಂತ್ ತಿಯೊ ಗಲ್ಫಾಂತ್ ಜಿವಿತ್ ಸಾರ್ತಲೊ? ತೆಂಯ್ ತಾಚೆ ದೀಸ್ ಪಯ್ಲೆಂಚೆಪರಿಂ ನಾತ್‌ಲ್ಲೆ. ಮಯ್ನ್ಯಾಂ ಮಯ್ನ್ಯಾಂಕ್ ತೊ ಗಾಂವಾಕ್ ಪೊಯ್ಶೆ ಧಾಡ್ತಾ ಮ್ಹಳ್ಳೆಂ ಮಾರ್ಕುಕ್ ಕಳಿತ್ ಆಸ್‌ಲ್ಲೆಂ. ಪುಣ್ ಆತಾಂ ತಾಚಾ ಮತಿಂತ್ ಹೆರ್ ಕಸಲಿಂ ಚಿಂತ್ನಾಂ ಆಸಾತ್ ಮ್ಹಳ್ಳಿಂ ಮಾರ್ಕುಕ್ ಕಳ್ಳಿಂ ನಾಂತ್. ಘರ್ ಕಾಮ್ ಕರುನ್ ಆಸ್ಚಾ ಮಾರ್ಕುಕ್ ತಿಯೊಕ್ ಕಶೆಂ ಮಜತ್ ಕರ್ಚಿ ಮ್ಹಳ್ಳೆಂಚ್ ಕಳ್ಳೆಂನಾ. ತಾಚೆಪರಿಂ ಘರ್‌ಕಾಮ್ ಕರಂವ್ಕ್ ತಿಯೊ ಆತಾಂ ಕಾಂಯ್ ಸಕ್ಚೊನಾ. ಆಪ್ಣಾಕ್ ಜಾಲ್ಯಾರೀ ಹಾಂಗಾ ಧನ್ಯಾಚಿಂ ಉತ್ರಾಂ ಆಯ್ಕೊನ್ ಸವಯ್ ಜಾಲ್ಯಾ. ತ್ಯಾ ಶಿವಾಯ್ ಮಾರ್ಕುಚಿ ಗರ್ಜ್ ತಾಚಾ ಕುಟ್ಮಾಕ್ ಆತಾಂ ಚಡ್ ಮಾಪಾನ್ ಆಸಾ. ತಾಚಿಂ ಭುರ್ಗಿಂಯಿ ವಡ್ ಜಾಲ್ಯಾಂತ್ ಆನಿ ಕೊಲೆಜಿಂತ್ ಶಿಕ್ತಾತ್ ದೆಖುನ್ ತಾಂಕಾ ಆಪ್ಲ್ಯಾ ಬಾಪಾಯ್ಚೆಂ ಫುಡ್ಲೆಂ ಜಿವಿತ್ ಬರೆಂ ಕರುಂಕ್ ಕಾಂಯ್ ಕಶ್ಟ್ ನಾಂತ್. ದೆಖುನ್ ಮಾರ್ಕುನ್ ತಾಚಾ ತಾಂಕಿ ಪ್ರಕಾರ್ ತಿಯೊಕ್ ಸಮ್ಜೊಣಿಂ ದೀವ್ನ್ ಗಾಂವಾಕ್ ವಚೊಂಕ್ ಸಾಂಗ್ಲೆಂ.

ಎಕಾ ವಾಟೆರ್ ಸಕ್ಕಡ್ ವಾಟಾಂನಿ ಸಲ್ವಾನಿಂ ದೆಖ್ಚಾ ತಿಯೊಕ್ ತಾಚಾ ನಿಮಾಣ್ಯಾ ಭರ್ವಸ್ಯಾಂನ್ ಮಾರ್ಕುನ್ ತಾಕಾ ಕುವೆಯ್ಟಾಂತ್ ಕಾಮ್ ಸೊಧುಂಕ್ ಜಾಯ್ನಾಂ ಮ್ಹಳ್ಳೆಂಚ್ ಅನ್ಯೇಕಾ ವಾಟೆನ್ ತಾಚಿ ಚಡೊನ್ ಯೆಂವ್ಚಿ ಪಿಡಾ ತಾಕಾ ಚಡಿತ್ ಅಸ್ಕತ್ ಆನಿ ಖಂತೀಶ್ಟ್ ಕರಿಲಾಗ್ಲೆಂ. ಹೆಂ ಸಗ್ಳೆಂ ಚಿಂತುನ್ ಬೊಸೊನ್ ತಕ್ಲೆರ್ ಆಸ್ಚೆ ಥೊಡೆ ಕೇಸ್‌ಯಿ ಆತಾಂ ಝಡ್‌ಲ್ಲೆ. ಪುಣ್ ತಿಯೊಕ್ ಹ್ಯಾ ಖಂಚಾಯ್ ಸಂಗ್ತ್ಯಾಂಚಿ ಫಿಕಿರ್ ನಾತ್‌ಲ್ಲಿ. ತಾಕಾ ಫಿಕಿರ್ ಆಸ್‌ಲ್ಲಿ ತರ್ ತಿ ಫಕತ್ತ್ ಆಪ್ಲ್ಯಾ ಭಲಾಯ್ಕೆಚಿ. ಅಶೆಂ ಕಶೆಂ ಕಶೆಂ ತಿಯೊನ್ ಮಾರ್ಕುಲಾಗಿಂ ಪರಾತ್ತಿಲಾಗ್ಲ್ಯಾರೀ ಮಾರ್ಕುನ್ ತಿಯೊಕ್ ಸಮ್ಜಾಂವ್ಕ್ ಕೆಲೆಂ ಆನಿ ಅಶೆಂ ಪಾಟಿಂ ಆಯಿಲ್ಲ್ಯಾ ತಿಯೊಕ್ ಥೊಡ್ಯಾಚ್ ದಿಸಾಂನಿ ಗುದಾಂವ್ ಖಾಲಿ ಕರುಂಕ್ ಆಸ್‌ಲ್ಲೆಂ. ತ್ಯಾ ಶಿವಾಯ್ ಆತಾಂ ಮಾರ್ಕುಚಾ ಉತ್ರಾಂ ಪ್ರಕಾರ್ ಕಿತೆಂ ಕರುಂಕೀ ಸಮ್ಜಾಲೆಂ ನಾ. ಕಿತೆಂ ಜಾಲ್ಯಾರಿ ಎದೊಳ್ ಪರ್‍ಯಾಂತ್ ಘೊಳ್‌ಲ್ಲ್ಯಾನ್ ಆಪ್ಣಾಕ್ ಕಾಂಯ್ ಚಡ್‌ಉಣೆಂ ಜಾಂವ್ಕ್ ಮ್ಹಜಿಂ ಬಾಯ್ಲ್ ಭುರ್ಗಿಂ ಬಿಲ್ಕುಲ್ ಸೊಡ್ಚಿಂನಾಂತ್ ಮ್ಹಳ್ಳ್ಯಾ ಭರ್ವಸ್ಯಾನ್ ಆತಾಂ ತಿಯೊಕ್ ಪಾಟಿಂ ಗಾಂವಾಕ್ ವೆಚೆಂ ಬರೆಂ ಮ್ಹಣೊನ್ ಭೊಗ್ಲೆಂ.

ದೆಖುನ್ ತೊ ಆತಾಂ ಗಾಂವಾಕ್ ಗೆಲ್ಲೆಖರಿತ್ ಆಪ್ಣಾಕ್ ದುಸ್ರಿ ವಾಟ್ ನಾ ಮ್ಹಣೊನ್ ಚಿಂತುನ್ ಗಾಂವಾಕ್ ವೆಚಿ ತಯಾರಾಯ್ ಕರಿಲಾಗ್ಲೊ. ಪುಣ್ ಇತ್ಲೊ ತೇಂಪ್ ರಾವ್ಲೊ ತರೀ ತಾಣೆಂ ಜೊಡ್‌ಲ್ಲೆಂ ಸಗ್ಳೆಂ ತವಳ್‌ತವಳ್ ಗಾಂವಾಕ್ ಧಾಡ್‌ಲ್ಲ್ಯಾನ್ ಆನಿ ಬಾಯ್ಲ್ ಭುರ್ಗ್ಯಾಂಕ್ ಭಾಂಗಾರ್ ಕರಿಜಯ್ ಮ್ಹಳ್ಳ್ಯಾ ಆಶೆನ್ ತಾಣೆಂ ತಾಚೆಲಾಗಿಂ ಎದೊಳ್ ಜಮೊ ಕೆಲ್ಲೆ ಪೊಯ್ಶೆ ವಕ್ತಾಂಕ್ ವೆತಾಲೆ ದೆಖುನ್ ಇತ್ಲ್ಯಾ ತೆಂಪಾ ಉಪ್ರಾಂತ್‌ಯಿ ಗಾಂವಾಕ್ ವೆಚಾ ತಾಚಾ ಮತಿಂತ್ ಆಪ್ಣಾಚಿ ಬಾಯ್ಲ್ ಆನಿ ಭುರ್ಗಿಂ ಆಪ್ಣಾಕ್ ಸೊಡ್ನ್ ಘಾಲಿನಾಂತ್ ಆನಿ ಕಾಂಯ್ ಉಣೆಂ ಕರ್ಚಿನಾಂತ್ ಮ್ಹಳ್ಳೆಂ ಚಿಂತಾಪ್ ಚಿಂತುನ್ ಸಂತೊಸ್ ಭೊಗ್ತಾಲೊ ತರೀ ಎಕಾ ಕೊನ್ಶಾರ್ ಇಲ್ಲಿ ಖಂತ್ ಬೆಜಾರಾಯ್ ಆಸ್‌ಲ್ಲಿ.

ಪುಣ್ ಹೆಂ ಸಗ್ಳೆಂ ಇತ್ಲೆಂ ಅಛಾನಕ್ ಘಡ್ಲೆಂಕೀ ಅಶೆಂ ಜಾಯ್ತ್ ಮ್ಹಣೊನ್ ತಾಣೆಂ ಚಿಂತ್‌ಲ್ಲೆಂಚ್ ನಾ. ಅಶೆಂ ಸಗ್ಳೆಂ ವಿವರುನ್ ಎಸ್ತೆಲಾಕ್ ಎದೊಳ್‌ಚ್ ತಾಣೆಂ ಕಾಗಾದ್ ಬರವ್ನ್ ಜಾಲ್ಲೆಂ ತಶೆಂಚ್ ಆಪ್ಣಾನ್ ಗಾಂವಾಕ್ ಯೆಂವ್ಚಿ ಟಿಕೆಟ್ ನಖ್ಖಿ ಜಾತೆಚ್ ಫೋನ್ ಕರುನ್ ಕಳಯ್ತಾಂ ಮ್ಹಣೊನ್೦ಯಿ ಬರಯಿಲ್ಲೆಂ. ಎದೊಳ್‌ಚ್ ಎಸ್ತೆಲಾಕ್ ತೆಂ ಕಾಗಾದ್ ಮೆಳ್ಳಾಸ್ತೆಲೆಂ ಮ್ಹಣೊನ್ ತಿಯೊನ್ ಲೆಕ್ಲೆಂ.

ತಶೆಂ ದೀಸ್ ಪಾಶಾರ್ ಜಾಲೆ ಆನಿ ತಿಯೊನ್ ವಚೊನ್ ತಾಚಿ ಟಿಕೆಟ್ ನಖ್ಖಿ ಕರುನ್ ಜಾತೆಚ್ ಎಸ್ತೆಲಾಕ್ ತಾಣೆಂ ಗಾಂವಾಕ್ ಪಾಂವ್ಚಿ ಖಬಾರ್ ದಿಲಿ ಆನಿ ಸಾಧ್ಯ್ ತರ್ ಏರ್‌ಪೋರ್ಟಾಕ್ ಭುರ್ಗ್ಯಾಸವೆಂ ಮುಖಾರ್ ಯೇ ಮ್ಹಣೊನ್‌ಯೀ ಫೋನ್ ಕರ್ನ್ ಕಳಯ್ಲೆಂ.

ತಿಯೊಚಾ ಹಾತಾಂತ್ ಪೊಯ್ಶೆ ಆನಿ ಕಾಮ್ ಆಸ್ತಾನಾ ಸಗ್ಳೆಂ ಘೆಂವ್ಕ್ ಮನ್ ಯೆತಾಲೆಂ ತರೀ ಆತಾಂ ಕಾಮ್ ನಾತ್‌ಲ್ಲೆಂಚ್ ತಾಚಾ ಹಾತಾಂತ್ ಕಿತ್ಲೆ ಪೊಯ್ಶೆ ಆಸ್ಲ್ಯಾರೀ ಗಾಂವಾಂತ್ ಆಸ್ತಾನಾ ಉಣೆಂ ಪಡ್ತಿತ್‌ಗಾಯ್ ಮ್ಹಳ್ಳೆಂ ಚಿಂತಾಪ್ ತಾಕಾ ಧೊಸ್ತಾಲೆಂ. ದೆಖುನ್ ತಾಣೆಂ ಚಡಿತ್ ಮೊಲಾಚೆಂ ಕಿತೆಂಚ್ ಘೆತ್ಲೆಂನಾ ತರೀ ಬಾಯ್ಲ್ ಭುರ್ಗ್ಯಾಂಕ್ ಇಲ್ಲಿಂ ವಸ್ತ್ರಾಂ ಘೆತ್ಲಿಂ, ಆನಿ ಇಲ್ಲಿಂ ಚೊಕ್ಲೆಟಾಂಯಿ ಘೆತ್ಲಿಂ.

ಆಪ್ಣಾನ್ ಇತ್ಲ್ಯಾ ತೆಂಪಾ ಥಾವ್ನ್ ಪರಾತ್ತುನ್ ಆತಾಂ ಪುಣೀಂ ಪಾಟಿಂ ಗಾಂವಾಕ್ ವಚೊಂಕ್ ಭಾಯ್ರ್ ಸರ್‌ಲ್ಲ್ಯಾ ತಿಯೊಕ್ ಪಳೆವ್ನ್ ಮಾರ್ಕು ಸಂತೊಸ್ಲೊ. ತಾಣೆಂ ತಾಚಾ ಘರ್ಚಾಂಕ್ ಕಾಂಯ್ ಇಲ್ಲ್ಯೊ ವಸ್ತು ದಿಲ್ಯೊ ಆನಿ ಫೋನ್ ಕರುನ್ ಖಬಾರ್ ದಿಲಿ. ಆನಿ ತಿಯೊಕ್ ಪಾವಂವ್ಕ್ ಏರ್‌ಪೋರ್ಟಾಕ್ ಯೆತಾಂ ಮ್ಹಣೊನ್ ಕಳಯ್ಲೆಂ.

ಗಾಂವಾಕ್ ವೆಚಿ ಸಗ್ಳಿ ತಯಾರಾಯ್ ಜಾತೆಚ್ ತೊ ಆಪ್ಣಾಕ್ ಪಾಂವ್ಕ್ ಆಯಿಲ್ಲ್ಯಾ ಮಾರ್ಕುಸವೆಂ ಏರ್‌ಪೋರ್ಟಾಕ್ ಭಾಯ್ರ್ ಸರ್ಲೊ. ತಿಯೊ ಆತಾಂ ಕುಡಿಂತ್ ಭರ್‌ಲ್ಲೊ ಆಸೊನ್ ಗೊರೊ ಗೊರೊ ದಿಸ್ತಾಲೊ ತಾರೀ ತಾಚಾ ಕುಡಿಭಿತರ್ಲೆ ಆಟೆವಿಟೆ ಫಕತ್ ತೊ ಮಾತ್ರ್ ಜಾಣಾಸ್‌ಲ್ಲೊ ದೆಖುನ್ ಲೆಕಾವರ್ತಿ ಲಗೇಜ್ ವರಿನಾಸ್ತಾಂ ಗೆಲ್ಲೆವರ್‍ವಿಂ ಏರ್‌ಪೋರ್ಟಾರ್ ತಾಕಾ ಕಾಂಯ್ ತ್ರಾಸ್ ಜಾಲೆನಾಂತ್.

ಜೊಯೆಲಾಕ್ ತ್ಯೇ ದೀಸ್ ಕೊಲೆಜೆಂತ್ ಸ್ಪೋರ್ಟ್ಸ್ ಆಸ್‌ಲ್ಲ್ಯಾನ್ ತಾಕಾ ಏರ್‌ಪೋರ್ಟಾಕ್ ವಚೊಂಕ್ ಜಾಲೆಂನಾ. ಪುಣ್ ಜಿವಿತಾ ಆವಯ್‌ಸವೆಂ ಲತೀಫಾನ್ ಭಾಡ್ಯಾಚಿ ಗಾಡಿ ಹಾಡ್‌ಲ್ಲ್ಯಾನ್ ತಾಚೆಸವೆಂ ಗೆಲಿಂ. ಸಕಾಳಿಂ ಚಡುಣೆಂ ದೇಡ್ ವೋರ್ ತಡವ್ ಕರ್ನ್ ಆಯಿಲ್ಲ್ಯಾ ತಿಯೊಕ್ ಪಳೆತೆಚ್ ತಾಂಕಾ ಅಜ್ಯಾಪ್ ಜಾಲೆಂ. ಪಯ್ಲೆಂಚೆಪರಿಂ ಬಿಲ್ಕುಲ್ ಸಾವ್ಳೊ ದಿಸಾನಾತ್‌ಲ್ಲೊ ತಿಯೊ ಸಗ್ಳೊಚ್ ಗೊರೊ ಜಾಲ್ಲೊ.

ಸಭಾರ್ ವರ್ಸಾಂ ಉಪ್ರಾಂತ್ ಆಪ್ಲ್ಯಾ ಕುಟ್ಮಾಚೆರ್ ದೀಶ್ಟ್ ಘಾಲ್ತಾನಾ ತಿಯೊಚೆಂ ಕಾಳಿಜ್ ಭರೊನ್ ಆಯ್ಲೆಂ. ಗಲ್ಫಾಂತ್ ಭೊಗ್‌ಲ್ಲೆಂ ಎಕ್ಸುರ್ಪಣ್ ಆನಿ ಬೆಜಾರಾಯ್ ಎಕಾಚ್‌ಫರಾಂ ವಿಸ್ರಲೊ. ತೊ ಗಾಂವ್ ಸೊಡುನ್ ವೆತಾನಾ ಲ್ಹಾನ್ ಇಸ್ಕೊಲಾಕ್ ವೆಚೆಂ ಭುರ್ಗೆಂ ಜಾವ್ನ್ ಆಸ್‌ಲ್ಲ್ಯಾ ಜಿವಿತಾಚಾ ಕುಡಿಂತ್ ಆಯಿಲ್ಲಿ ಬದ್ಲಾವಣ್ ಪಳೆವ್ನ್ ತಿಯೊ ಅಜಾಪ್ಲೊ ಆನಿ ಸಂತೊಸ್ಲೊ. ಜೊಯೆಲ್‌ಯಿ ಆಸ್‌ಲ್ಲೊ ತರ್ ಅನಿಕೀ ಸಂತೊಸ್ ಪಾವ್ತೊ ಕೊಣ್ಣಾ.

ತಿಯೊಕ್ ಘರಾ ಪಾವವ್ನ್ ಭಾಯ್ರ್ ಸರ್‌ಲ್ಲ್ಯಾ ಲತೀಫಾಕ್ ರಾವೊಂಕ್ ತಿಯೊನ್ ವತ್ತಾಯ್ ಕೆಲಿ. ಪುಣ್ ಎಸ್ತೆಲಾನ್ ಲತೀಫಾಕ್ ಎದೊಳ್‌ಚ್ ಹಿಶಾರೊ ದಿಲ್ಲೊ ದೆಖುನ್ ತೊ ಆಪ್ಣಾಕ್ ಆತಾಂ ಗರ್ಜೆಚೆಂ ಕಾಮ್ ಆಸಾ ದೆಖುನ್ ಸಾಂಜೆರ್ ಯೆತಾಂ ಮ್ಹಣೊನ್ ಸಾಂಗೊನ್ ಥಂಯ್ಚೊ ಉಟ್ಲೊ.

ಜಿವಿತಾ ಬಾಪಾಯ್ಕ್ ಮೆಳೊಂಕ್ ಏರ್‌ಪೋರ್ಟಾಕ್ ಗೆಲ್ಲೆಂ ಬಾಪಾಯ್ಚಾ ಮೊಗಾಂತ್ ನ್ಹಂಯ್. ತಾಕಾ ದನ್ಪಾರಾಂ ರಮೇಶಾಸವೆಂ ಭಾಯ್ರ್ ವಚೊಂಕ್ ಆಸ್‌ಲ್ಲೆಂ.

ತಾಂಚೆಸವೆಂ ಜಿವಿತಾಚಿಂ ದೊಗಾಂ ಸಾಂಗಾತಿಣಿ ಆನಿ ತಾಂಚೆ ಬೋಯ್ ಫ್ರೆಂಡ್ ಯೆಂವ್ಚಾರ್ ಆಸ್‌ಲ್ಲೆ. ತಿಂ ಸಗ್ಳಿಂ ಮೆಳೊನ್ ಆಜ್ ಕೊಡ್ಯಾಳಾಕ್ ಪಿಚ್ಚರಾಕ್ ವೆಚಿ ಮಾಂಡಾವಳ್ ಘಾಲ್ಲಿ. ಕಾರ್ ಹಾಡ್ನ್ ಆಯಿಲ್ಲ್ಯಾ ಲತೀಫಾಸವೆಂ ತಾಚಾ ಗಾಡಿಯೆರ್ ವಚೊಂಕ್ ಭಾಯ್ರ್ ಸರ್‌ಲ್ಲ್ಯಾ ಜಿವಿತಾಕ್ ತಿಯೊನ್ ಕಿತ್ಯಾಕ್‌ಗೀ ಆಡಾಂವ್ಕ್ ಪ್ರೇತನ್ ಕೆಲೆಂ. ಆಜ್ ಏಕ್ ದೀಸ್ ಕೊಲೆಜಿಕ್ ವಾಚಾನಾಸ್ತಾಂ ರಾವೊಂಕ್ ಜಾಯ್ತ್‌ಗೀ ಪುತಾ? ಆಯ್ಚೊ ದೀಸ್ ಮ್ಹಜೆಸವೆಂ ಉಲವ್ನ್ ಖರ್ಚುಂಕ್ ಜಾತಾಗೀ?"

ಅವ್ಚಿತ್ ಉತ್ರಾಂನಿ ಜಿವಿತಾ ಕಾಂಯ್ ಆಪ್ಲೊ ಬಾಪುಯ್ ಆಪ್ಣಾಕ್ ರಾವಯ್ತ್‌ಗೀ ಮ್ಹಳ್ಳೊ ದುಭಾವ್ ಆಯ್ಲೊ "ನಾ ಪಪ್ಪಾ, ಆಮ್ಚಿ ಪರಿಕ್ಶಾ ಲಾಗಿಂ ಆಯ್ಲ್ಯಾ ದೆಖುನ್ ಆಮಿಂ ತೆಗಾಂ ಫ್ರೆಂಡ್ಸಾಂ ಮೆಳೊನ್ ಲಿಸಾಂವ್ ಕರ್ತಾಂವ್" ತಿಯೊಕ್ ಜಿವಿತಾನ್ ಕೊಲೆಜಿಕ್ ವೆಚಾಕೀ ಎಕಾ ತರ್ನಾಟ್ಯಾಸವೆಂ ವೆಚೆಂ ಪಸಂದ್ ನಾತ್‌ಲ್ಲೆಂ. ತರೀ ತೊ ವಗೊಚ್ ರಾವ್ಲೊ.

ಲಿಸಾಂವ್ ಮ್ಹಳ್ಳೆಂ ಆಯ್ಕೊನ್ ತಿಯೊ ವಗೊಚ್ ರಾವ್ಲೊ. "ಬರೆಂ ಪುತಾ, ವಚೊನ್ ಲಿಸಾಂವ್ ಕರ್. ಬರೆಂ ಲಿಸಾಂವ್ ಕರ್ ಆನಿ ಬರೆ ಮಾರ್ಕ್ ಹಾಡ್ ಪುತಾ. ಪಪ್ಪಾ ಆನಿ ಘರಾಚ್ ಆಸ್ತಲೊ. ಆನಿ ತುಮ್ಕಾಂ ಸೊಡ್ನ್ ಪಾಟಿಂ ವೆಚೊನಾ ಪುತಾ. ದೆಖುನ್ ಉಪ್ರಾಂತ್ ಆಮ್ಕಾಂ ಉಲವ್ಯೆತ್. ತುಂ ಕೊಲೆಜಿಕ್ ವಚೊನ್ ಯೇ."

ವ್ಹಡ್ ಜಾವ್ನ್ ಆಯಿಲ್ಲ್ಯಾ ಧುವೆಕ್ ಆತಾಂ ಮೊಗಾನ್೦ಚ್ ಸಮ್ಜಯ್ಜಾಯ್ ಮ್ಹಳ್ಳೆಂ ತಿಯೊಕ್ ಕಳಿತ್ ಆಸ್‌ಲ್ಲೆಂ. ತ್ಯಾ ಶಿವಾಯ್ ಆಪ್ಲ್ಯಾ ಬಾಪಾಯ್ಕ್ ಆನಿ ಆವಯ್ಕ್ ಸಾಂಗಾತಾ ವೇಳ್ ಮೆಳ್ಚಾಕ್ ಆಪ್ಲಿಂ ಭುರ್ಗಿಂ ಆಜ್ ಭಾಯ್ರ್ ಆಸಾತ್ ಮ್ಹಳ್ಳೆಂ ಚಿಂತಾಪ್ ತಿಯೊಚಾ ಮತಿಕ್ ಯೆತೆಚ್ ತೊ ಆಂಬೊರ್ ಪಿಕೊ ಹಾಸೊ ಹಾಸ್ಲೊ.

ತಿಯೊನ್ ಯೇವ್ನ್ ಎಸ್ತೆಲಾಲಾಗಿಂ ಉಲಂವ್ಕ್ ಧರ್ಲೆಂ. ಘರಾ ವಿಶ್ಯಾಂತ್, ಗಲ್ಫಾಚಾ ತಾಚಾ ಕಾಮಾ ವಿಶ್ಯಾಂತ್, ಮಣಿ ವಿಶ್ಯಾಂತ್, ಗೋಪಿ ವಿಶ್ಯಾಂತ್. ಸಭಾರ್ ವೇಳ್ ತಿಂ ಎಕಾಮೆಕಾ ಉಲಯ್ಲಿಂ. ತಿಯೊನ್ ಆಪ್ಲ್ಯಾ ಕುಟ್ಮಾ ಥಾವ್ನ್ ಪಯ್ಸ್ ಆಸೊನ್ ಖರ್ಚಿಲ್ಲೆ ಹರ್‍ಯೆಕ್ ದಿಸಾಂ ವಿಶ್ಯಾಂತ್, ಆಪ್ಲ್ಯಾ ಭಲಾಯ್ಕೆ ವಿಶ್ಯಾಂತ್ ವಯ್ಲೆ ವಯ್ರ್ ಉಲಯ್ಲೊ. ಫಕತ್ ಪಿಡಾ ಮ್ಹಣೊನ್ ಮಾತ್ರ್ ಸಾಂಗ್ಲಿ ಶಿವಾಯ್ ಖಂಚಿ ಪಿಡಾ ಮ್ಹಳ್ಳೆಂ ಲಿಪಯ್ಲೆಂ. ತಶೆಂಚ್ ಶೇಖಾಚಾ ಗುದಾಂವಾ ವಿಶ್ಯಾಂತ್ ಉಲಯ್ಲೊ. ಆಪ್ಲ್ಯಾ ಕಾಮಾವಿಶ್ಯಾಂತ್ ಉಲಯ್ಲೊ.

"ಎದೊಳ್ ಪರ್‍ಯಾಂತ್ ಹಾಂವೆ ತುಮ್ಚೆ ಥಾವ್ನ್ ಪಯ್ಸ್ ರಾವ್‌ಲ್ಲೆಂ ಪುರೊ, ಎಸ್ತೆಲಾ, ಆನಿ ಹಾಂವ್ ಹಾಂಗಾಚ್ ಆಸ್ತಲೊಂ. ತುಮ್ಚೆ ನದ್ರೆ ಮುಖ್ಲ್ಯಾನ್. ಹೆಂ ಎಕ್ಸುರ್ಪಣ್, ತಿ ಖಂತ್ ಬೆಜಾರಾಯ್, ತೆ ಚುರ್ಚುರೆ, ತೆ ತಳ್ಮಳೆ, ವಳ್ವಳೆ, ಕಳ್ವಳೆ ನಾಕಾತ್. ಆತಾಂ ಭುರ್ಗಿಂ ವಡ್ ಜಾಲ್ಯಾಂತ್, ಸಮ್ಜೊಣೆಕ್ ಪಾವ್ಲ್ಯಾಂತ್. ತಾಂಕಾ ಬರೆಂ ಶಿಕಾಪ್ ದಿವಯ್ಲಾಂ ದೆಖುನ್ ತಾಂಕಾ ದೇವ್‌ಯಿ ಬರೆಂ ಕಾಮ್ ದಿವಯ್ತಲೊ. ಜೊಯೆಲಾಕ್ ಕೊಲೆಜ್ ಜಾತೆಚ್ ಕಾಮ್ ಮೆಳ್ತಾ ಪಳೆ. ತೆದೊಳ್ ಪರ್‍ಯಾಂತ್ ಆಮ್ಕಾಂ ಕಾಂಯ್ ಉಣೆಂ ಆಸ್ಚೆಂನಾ. ಮ್ಹಜೆಲಾಗಿಂ ಇಲ್ಲೆ ಪೊಯ್ಶೆ ಆಸಾತ್. ತೆ ಹಾವೆಂ ಜಾಗ್ರೂತೆನ್ ಹಾಡ್ಲ್ಯಾತ್."

ಎಸ್ತೆಲಾಚಾ ತೊಂಡಾಂತೂನ್ ಕಿತೆಂಚ್ ಭಾಯ್ರ್ ಆಯ್ಲೆಂನಾ. ತೆಂ ಸಗ್ಳೆಂ ಆಯ್ಕಾತಾಲೆಂ ಆನಿ ತಿಯೊಚಾ ಉಲವ್ಣ್ಯಾಕ್ ಹುಂ ಮ್ಹಣ್ತಾಲೆಂ.

"ಕಿತೆಂ ಉಲಯ್ನಾಂಯ್ ಎಸ್ತೆಲಾ ತುಂ? ತುಜೆಲಾಗಿಂ ಉಲಂವ್ಕ್ ಮ್ಹಜಿ ಮತ್ ರಾಕೊನ್ ಆಸ್‌ಲ್ಲಿ. ತುಜೆಶಿವಾಯ್ ಮ್ಹಜಾ ಜಿಣ್ಯೆಂತ್ ಕಿತೆಂ ಆಸಾ? ಆನಿ ಮ್ಹಾಕಾ ತುವೆಂಚ್ ಸಾಂಭಾಳಿಜಯ್ ಎಸ್ತೆಲಾ. ಮ್ಹಾಕಾ ಆತಾಂ ಪಯ್ಲೆಂಚೆಪರಿಂ ತ್ರಾಣ್ ನಾ. ಕುಡಿ ಭಿತರ್‌ಯಿ ಅಸ್ಕತ್ಕಾಯ್ ಭರ್ಲ್ಯಾ. ತರೀ ಮ್ಹಜಾ ತಾಂಕಿ ಪರ್ಮಾಣೆಂ ಹಾಂವ್ ಪರತ್ ಜಾಗ್ಯಾಂತ್ ಜೀವ್ ಹಾಡಂವ್ಕ್ ಪ್ರೇತನ್ ಕರ್ತಾಂ."

ಎಸ್ತೆಲಾನ್ ಕಿತೆಂಚ್ ಉಲಂವ್ಕ್ ನಾತ್‌ಲ್ಲೆಂ ಪಳೆಲ್ಲ್ಯಾ ತಿಯೊಚಾ ಮತಿಂತ್ ಬರೆಂಚ್ ಚಿಂತಾಪ್ ಆಯ್ಲೆಂ. 'ಆಪುಣ್ ದಾದ್ಲೊ ಜಾವ್ನ್ ಆಪ್ಣಾಚೆ ತಳ್ಮಳೆ ಸಾಂಗ್ಲೆ. ತರೀ ಹೆಂ ಸಗ್ಳೆಂ ಎಕ್ಸುರೆಂ ಸೊಸುನ್ ಏಕ್ ಬಾಯ್ಲ್ ಅನಿಕೀ ವಗೊಚ್ ಆಸಾ. ಗಲ್ಫಾಕ್ ವೆತಾನಾ ದೋನ್ ಲ್ಹಾನ್ ಕುಡಾಂ ಆಸ್‌ಲ್ಲೆಂ ಹೆಂ ಘರ್ ಜರ್ ಇತ್ಲ್ಯಾ ಆಪುರ್ಬಾಯೆನ್ ಸಾಂಭಾಳ್ಳಾಂ ತರ್ ತೆಂ ಎಸ್ತೆಲಾನ್ ಆನಿ ಭುರ್ಗ್ಯಾಂಕ್ ಇತ್ಲಿ ಬರಿ ಶಿಕವ್ಣ್ ದಿಲ್ಯಾ ತರ್ ತಿ ಎಸ್ತೆಲಾನ್. ಆನಿ ಆತಾಂ ಪ್ರಾಯ್ ಜಾವ್ನ್ ಯೆಂವ್ಚಾ ವೆಳಾರ್ ಖಂಡಿತ್ ಆಪ್ಣಾಕ್, ಆಪ್ಲ್ಯಾ ಪಿಡೆಚಿ ಯಾ ಖಂಚಾಚ್ ಸಂಗ್ತೆಚಿಂ ಖಂತ್ ಕರ್ಚಿಂ ಗರ್ಜ್ ನಾ' ಮ್ಹಣೊನ್ ತೊ ಚಿಂತಿಲಾಗ್ಲೊ.

"ಮ್ಹಾಕಾ ಚಡಿತ್ ಕಾಂಯ್ ಭಾಂಗಾರ್ ಹಾಡುಂಕ್ ಜಾಂವ್ಕ್ ನಾ ಎಸ್ತೆಲಾ, ಹಾಂವೆ ಜೆಂ ಚಿಂತ್‌ಲ್ಲೆಂ ತ್ಯಾ ಭಾಶೆನ್ ಜಾಲೆಂನಾ. ಶೇಖಾನ್ ಗುದಾಂವ್ ವಿಕ್ಲೆಂ ದೆಖುನ್ ಹಾಂವೆಂ ಇತ್ಲೊ ತೇಂಪ್ ಕಾಮ್ ಕೆಲ್ಲ್ಯಾಚೆ ಸರ್ವಿಸ್ ಸಯ್ತ್ ಮ್ಹಾಕಾ ಮೆಳೊಂಕ್ ನಾ. ತರೀ ಆಪ್ಣಾನ್ ಕಾಂಯ್ ಅನ್‌ಪತ್ಯಾಕ್ ಮ್ಹಣೋನ್ ದವರ್ಲೆಲೆ ಇಲ್ಲೆ ಪೊಯ್ಶೆ ಮಾತ್ರ್ ಮ್ನ್ಹಜೆಲಾಗಿಂ ಆಸಾತ್. ಆನಿ ಬರೆಂ ಜಾಲೆಂ ಪಯ್ಲೆಂ ಕರಯಿಲ್ಲಿ ಏಕ್ ಚೇಯ್ನ್ ಆನಿ ಮುದಿ ಆನಿ ಏಕ್ ಘಡ್ಯಾಳ್. ಪುಣ್ ಆತಾಂ ಮ್ಹಾಕಾ ಘಡ್ಯಾಳಾಚಿ ಗರ್ಜ್ ಕಸಲಿ? ಆತಾಂ ಭುರ್ಗ್ಯಾಂನಿ ಘಡ್ಯಾಳಾಂ ಬಾಂಧಿಜಯ್. ದೆಖುನ್ ತೆಂ ಜೊಯೆಲಾಕ್ ದಿತಾಂ."

ಜೊಯೆಲಾಚಿ ಖಬಾರ್ ಯೆತೆಚ್ ತಿಯೊಚೆಂ ಕಾಳಿಜ್ ಭರೊನ್ ಆಯ್ಲೆಂ. ಕೆದಾಳಾ ಆಪ್ಲೊ ಪೂತ್ ಯೇತ್ ಆನಿ ಕೆದಾಳಾ ಆಪುಣ್ ತಾಚೆರ್ ಏಕ್ ನದರ್ ಘಾಲಿನ್? ಧುವ್ ಕಶಿಯ್ ಇತ್ಲಿ ವಡ್ ಜಾವ್ನ್ ಆತಾಂ ಇತ್ಲೆಂ ಸೊಭಿತ್ ದಿಸ್ತಾ ತರ್ ಜೊಯೆಲ್ ಆತಾಂ ಕಸೊ ದಿಸ್ತಾಗಾಯ್ ಮ್ಹಳ್ಳಿಂ ಚಿಂತ್ನಾ ತಿಯೊಕ್ ಆಯ್ಲಿಂ.

ಇತ್ಲೊ ವೇಳ್ ಉಲವ್ನ್ ಆಸ್‌ಲ್ಲ್ಯಾ ಎಸ್ತೆಲಾನ್ ಆತಾಂ ಕುಜ್ನಾಕ್ ಗೆಲೆಂ. ಎಸ್ತೆಲಾಚಾ ಮತಿಂತ್ ಏಕ್‌ಚ್ ಚಿಂತಾಪ್ ಧೊಸುಂಕ್ ಲಾಗ್ಲೆಂ. 'ತರ್ ಆಪ್ಣಾಚೊ ಘೊವ್ ಆನಿ ಪಾಟಿಂ ಗಲ್ಫಾಕ್ ವಚಾನಾ', 'ಆಪ್ಣಾಕ್ ಕಾಂಯ್ ಭಾಂಗಾರ್ ಹಾಡುಂಕ್ ನಾ' ಅನಿ ಆಪ್ಣಾಕ್ ಸದಾಂಯ್ ಶೆರ್‍ಮಾಂವ್ ಆಯ್ಕೊಂಕ್ ಆಸ್ತಲೊ. ಕಿತೆಂ ಕರಿಜಾಯ್ ಕಿತೆಂ ನಜೊ? ಕಿತೆಂ ಉಲಯ್ಜಾಯ್ ಕಿತೆಂ ನಜೊ? ಕೊಣಾಸವೆಂ ಉಲಯ್ಜಾಯ್ ಕೊಣಾಸವೆಂ ಉಲಂವ್ಕ್ ನಜೊ ಮ್ಹಳ್ಳೆಂ ಭೊಗ್ಪ್ ಕಿತ್ಯಾಕ್‌ಗೀ ಆಯ್ಲೆಂ. ಎದೊಳ್ ಆಪ್ಲ್ಯಾ ಹಾತಾಂತ್ ಘರ್ಚೆಂ ಯಾ ಭುರ್ಗ್ಯಾಂಚೆಂ ಸ್ವಾತಂತ್ರ್ ಆಸ್‌ಲ್ಲೆಂ. ಜಾಯ್ ಜಾಲ್ಲೆಪರಿಂ ಜಿಯೆವ್ಯೆತ್ ಆಸ್‌ಲ್ಲೆಂ. ತ್ಯಾ ಶಿವಾಯ್ ಮಯ್ನ್ಯಾ ಮಯ್ನ್ಯಾಕ್ ಸರಗ್ ಪೊಯ್ಶೆ ಯೆತಾಲೆ. ಆನಿ ತೆ ಪೊಯ್ಶೆ ನಾಂತ್, ಸ್ವಾತಂತ್ರ್ ನಾ, ಮ್ಹಳ್ಳೆಂ ಕಿತ್ಯಾಕ್‌ಗೀ ಎಸ್ತೆಲಾಕ್ ರುಚ್ಲೆಂನಾ. ತಾಣೆಂ ಘಾಲ್ಲೆಂ ಲೇಖ್ ಸಗ್ಳೆಂ ಆತಾಂ ಉಲ್ಟೆಂ ಜಾಲ್ಲೆಂ.

ತರೀ ಹಾಕಾ ಕಿತೆಂ ತರೀ ಪರಿಹಾರ್ ಸೊಧ್ಚಿ ಗರ್ಜ್ ಮ್ಹಳ್ಳೆಂ ಸಮ್ಜಾಲ್ಲೆಂ ಎಸ್ತೆಲ್ ಏಕ್ ಕೋಪ್ ಚಾ ಕರ್ನ್ ಹಾಡ್ನ್ ತಿಯೊಕ್ ದೀತ್ ಮ್ಹಣಾಲೆಂ.

"ತುವೆಂ ಘರಾ ಆಪವ್ನ್ ಹಾಡ್‌ಲ್ಲೊ ಲತೀಫ಼್ ಬರೊ ಮನಿಸ್, ಘರಾ ಮೊಸ್ತ್ ಆಧಾರ್ ಜಾತಾಲೊ. ಘರಾಂತ್ ಆನಿ ಕೋಣ್ ಆಸಾತ್? ಪೆಂಟೆ ಥಾವ್ನ್ ಘರ್ಚಾ ಗರ್ಜೆಚೊ ಸಾಮಾನ್ ಹಾಡುಂಕ್, ಆನಿ ಹೆಂ ಘರ್ ಇತ್ಲೆಂ ಬರೆಂ ಜಾಲಾಂ ತರ್ ತಾಕಾಯ್ ಲತೀಫಾನ್ ಮೊಸ್ತ್ ವಾಂವ್ಟ್ ಕಾಡ್ಲ್ಯಾ. ತಾಚಾ ವಳ್ಕಿಚಾಂಕ್ ಸಾಂಗೊನ್ ತಾಣೆಂ ಮೊಸ್ತ್ ಮಜತ್ ಕೆಲ್ಯಾ. ಭುರ್ಗ್ಯಾಂಕ್ ಸಯ್ತ್ ತೊ ಬರೆಂ ಕರ್ನ್ ಪಳೆತಾ. ಲ್ಹಾನ್ ಆಸ್ತಾನಾ ತಾಂಕಾ ಇಸ್ಕೊಲಾ ಥಾವ್ನ್ ಆಪವ್ನ್ ಹಾಡ್ತಾಲೊ. ಆತಾಂ ಜೊಯೆಲಾಕ್ ಸಾಯ್ಕಲ್ ಸಯ್ತ್ ಶಿಕಯಿಲ್ಲೆಂ ಆನಿ ಬಾಯ್ಕ್ ಸಯ್ತ್ ಶಿಕಯಿಲ್ಲೆಂ ತಾಣೆಂ. ತೊ ನಾತ್ಲ್ಯಾರ್ ಜೊಯೆಲಾಕ್ ಬಾಯ್ಕ್ ಸೊಡ್ಚೆಂ ಲೈಸನ್ಸ್ ಕಾಡುಂಕ್ ಕಿತ್ಲೆಂ ನಾಚೊಂಕ್ ಪಡ್ತೆಂ ತೆಂ ಕೋಣ್ ಜಾಣಾಂ?"

ಮುಂದರ್‍ಸಿಲಾಂ...

Tags: Vally Quadras,e konkani novel, Konkani, Mangalore, Mangalorean, Mother Tongue

From around the world

ಪಾಟಿಂ ಗಾಂವಾಕ್ - ಅವಸ್ವರ್ 23

Post your comments

ಅವಸ್ವರ್ 1

ಅವಸ್ವರ್ 2

ಅವಸ್ವರ್ 3

ಅವಸ್ವರ್ 4

ಅವಸ್ವರ್ 5

ಅವಸ್ವರ್ 6

ಅವಸ್ವರ್ 7

ಅವಸ್ವರ್ 8

ಅವಸ್ವರ್ 9

ಅವಸ್ವರ್ 10

ಅವಸ್ವರ್ 11

ಅವಸ್ವರ್ 12

ಅವಸ್ವರ್ 13

ಅವಸ್ವರ್ 14

ಅವಸ್ವರ್ 15

ಅವಸ್ವರ್ 16

ಅವಸ್ವರ್ 17

ಅವಸ್ವರ್ 18

ಅವಸ್ವರ್ 19

ಅವಸ್ವರ್ 20

ಅವಸ್ವರ್ 21

ಅವಸ್ವರ್ 22

ಅವಸ್ವರ್ 23

ಅವಸ್ವರ್ 24

ಅವಸ್ವರ್ 25

ಅವಸ್ವರ್ 26

ಅವಸ್ವರ್ 27

ಅವಸ್ವರ್ 28

Connect

Our Address
Mangalore

Our Address
Udupi

Our Address
Dubai

From around the world

Post your comments

Connect

Our AddressMangalore

Our AddressUdupi

Our AddressDubai

Our Address
Mangalore

Our Address
Udupi

Our Address
Dubai