:: ಮಾಯ್ ಭಾಸ್

"ಹಾಂಗಾಚೆ ಡೋಕ್ಟರ್ ಪಿಶೆ ಡೋಕ್ಟರ್. ಶೆಳಿಕ್ ತಾಪಾಚೆಂ ವೊಕಾತ್ ದಿತಾತ್ ಆನಿಂ ತಾಪಾಕ್ ತಕ್ಲಿ ಫಡಾಫಡೆಚಿಂ ವಕ್ತಾಂ ದಿತಾತ್. ದೆಖುನ್ ತ್ಯಾ ಕ್ಲಿನಿಕಾಂಕ್ ವೆಚಾ ಬದ್ಲಾಕ್ ಖಾಸ್ಗಿ ಡೋಕ್ಟರಾಂಲಾಗಿಂ ಗೆಲ್ಯಾರ್ ಬರೆಂ ವಕಾತ್ ಮೆಳ್ತಾ. ತ್ಯಾ ಭಾಯ್ರ್ ಆಮ್ಚಾ ದೇಶಾಚೆ ಡೊಕ್ಟರ್ ಹಾಂಗಾಯ್ ಆಸಾತ್."

ಅಶೆಂ ಮ್ಹಣೊನ್ ಎಕಾ ಡೊಕ್ಟರಾಲಾಗಿಂ ಗಾಡಿ ರಾವವ್ನ್ ತಾಂಕಾ ದೆಂವವ್ನ್ ಗೆಲೊ. ಬರೆಂ ಜಾಲೆಂ ಆಮ್ಚಾ ಭಾಸೆಂತ್ ಉಲಂವ್ಚಾ ತ್ಯಾ ಡೊಕ್ಟರಾನ್ ತಿಯೊಚಿ ತಪಾಸ್ಣಿ ಕೆಲಿ ಆನಿಂ ಇಲ್ಲೊ ಫ್ಲೂ ಜಾಲಾ ಆನಿಂ ಭಿಂಯೆಂವ್ಚಿ ಗರ್ಜ್ ನಾ ಮ್ಹಣೊನ್ ಏಕ್ ಇಂಜೆಕ್ಶನ್ ಆನಿಂ ದೋನ್ ದಿಸಾಂಚಿಂ ವಕ್ತಾಂ ದಿಲಿಂ. ಪುಣ್ ತಾಚೆಂ ಬಿಲ್ಲ್ ಮಾತ್ ಪಾಂಚ್ ದಿನಾರ್ ಮ್ಹಣ್ತಾನಾ ತಿಯೊಕ್ ತಕ್ಲೆಕ್ ಘುಂವಳ್ ಆಯ್ಲೊ. ಆಮ್ಚಾ ದೇಶಾಚೆ ಏಕ್ ಹಜಾರ್ ರುಪಯ್? ತರೀ ತಾಚಾ ಜಿವಾ ಮುಖಾರ್ ಹೆ ದಿನಾರ್ ಕಿತೆಂ ಮ್ಹಳ್ಳ್ಯಾ ಮಣಿಚಾ ಸಮಧಾನೆನ್ ತೊ ಮಣಿಸವೆಂ ಎಕಾ ಪಾಟಿಂ ಆಯ್ಲೊ, ಪರತ್ ಟ್ಯಾಕ್ಸೆಚೆಂ ದೋನ್ ದಿನಾರ್ ಭಾಡೆಂ.

ಹಾಂಗಾ ಖರ್ಚಂವ್ಚಾ ಹರ್‍ಯೆಕಾ ಪೊಯ್ಶಾಂಕ್ ರುಪ್ಯಾಂತ್ ಕಿತ್ಲೆ ಜಾತಾತ್ ಮ್ಹಣೊನ್ ಲೇಖ್ ಕರ್ಚಾ ತಿಯೊಕ್ ಕೇಸ್ ಕಾಡ್ಚೆ ಮಾರೊಗ್ ಮ್ಹಣೊನ್ ಭೊಗ್ಲೆಂ. ಕೇಸ್ ಕಾಡ್ಲ್ಯಾರ್ ಚಡುಣೆಂ ಏಕ್ ದಿನಾರ್ ದೀಂವ್ಕ್ ಪಡ್ತಾಲೆ. ಏಕ್ ದಿನಾರ್ ಮ್ಹಳ್ಯಾರ್ ದೆಡ್ಶೆಂ ರುಪಯ್. ಗಾಂವಾಂತ್ ಜಾಲ್ಯಾರ್ ಪಾಂಚ್ ಯಾ ಧಾ ರುಪ್ಯಾಂನಿ ಕೇಸ್ ಕಾಡ್ಯೆತ್ ಆಸ್‌ಲ್ಲೆ.

ವಕಾತ್ ಹಾಡ್ನ್ ಯೇವ್ನ್ ಘರಾಚ್ಚ್ ಆಡ್ ಪಡೊನ್ ಆಸ್‌ಲ್ಲ್ಯಾ ತಿಯೊಕ್ ಬಿಲ್ಕುಲ್ ನೀದ್ ಪಡ್ಲಿನಾ. ಎಕಾ ಪಾಟ್ಲ್ಯಾನ್ ಏಕ್ ಚಿಂತ್ನಾಂ ತಾಚಾ ಮತಿಂತ್ ಪಾಶಾರ್ ಜಾತಾಲಿಂ. ಏಕ್ ಪಾವ್ಟಿಂ ಆಪ್ಲ್ಯಾ ಗಾಂವಾಕ್ ಪಾಟಿಂ ವಚೊನ್ ಆಪ್ಲ್ಯಾ ಬಾಯ್ಲೆಕ್ ಆನಿಂ ಭುರ್ಗ್ಯಾಂಕ್ ಏಕ್ ದೀಶ್ಟ್ ಘಾಲ್ಯಾಂ ಮ್ಹಳ್ಳಿ ಜಬ್ಬೊರ್ ಆಶಾ ಯೆತಾಲಿ. ತರೀ ಆನಿಂ ಥೊಡೆಚ್ಚ್ ಮಹಿನೆ ಮ್ಹಳ್ಳ್ಯಾ ಚಿಂತ್ನಾನ್ ತೊ ಆಪ್ಣಾಕ್ ಆಪುಣ್೦ಚ್ ಸಮಧಾನ್ ಕರುಂಕ್ ಲಾಗ್ಲೊ.

ನೀದ್ ಖಳೊನ್‌ಗೀ ಯಾ ವೊಕ್ತಾಚಾ ಆಮಾಲಾನ್‌ಗೀ ತಾಕಾ ಮಧೆ ಮಧೆಂ ಇಲ್ಲಿ ಜೆಮ್ ಯೆತಾಲಿ ಆನಿಂ ತೊ ನಿದ್ಲೊ. ಜೇಂವ್ಕ್ ತೊಂಡಾರ್ ರೂಚ್ ನಾತ್‌ಲ್ಲಿ. ತ್ಯಾ ಶಿವಾಯ್ ಸದಾಂಚೆಂ ಮಾಸ್ ಖಾವ್ನ್ ತಾಕಾ ಎಕಾ ಥರಾಚೊ ಕಾಂಟಾಳೊ ಆಯಿಲ್ಲೊ. ತರೀ ಕಿತೆಂ ಕರ್ತಲೊ ಬಾವ್ಡೊ? ಹಾಂಗಾ ಮಾಸ್ ಜಿತ್ಲೆಂ ಸ್ಹವಾಯ್‌ಗೀ ತರ್ಕಾರಿ ತಿತ್ಲಿಚ್ಚ್ ಮಾರೊಗ್. ಗಾಂವಾಂತ್ ಜಾಲ್ಯಾರ್ ತಾಪ್ ಯೇತ್ ತರ್ ಹುನ್ ಹುನ್ ಪೇಜ್ ಜೆವ್ಯೆತ್ ಆನಿಂ ಆಂಬ್ಯಾಚೆಂಗೀ, ಲಿಂಬ್ಯಾಚೆಂಗೀ, ಕಾಂರ್ಡಾಂಚೆಂಗೀ ಲೊಣ್ಚೆಂ ತೊಂಡ್ಲಾವ್ನ್ ಜೆವ್ಯೆತ್. ಪುಣ್ ಹಾಂಗಾ ಗಾಂವ್ಚಿ ಪೇಜ್ ಜಾಂವ್ ಲೊಣ್ಚೆಂ ಜಾಂವ್ ಮೆಳೊಂಕ್ ತಿತ್ಲೆಂ ಸುಲಭ್ ನ್ಹಂಯ್. ಕಿತೆಂಯ್ ಜಾಂವ್ ಉಟೊನ್ ಬೊಸೊಂಕೀ ಇಲ್ಲಿ ಅಸ್ಕತ್ಕಾಯ್ ಜಾತಾಲಿ, ತೊಂಡಾಕ್ ಬಿಲ್ಕುಲ್ ರೂಚ್ ನಾತ್‌ಲ್ಲಿ. ತ್ಯಾ ಶಿವಾಯ್ ಸಕಾಳಿಂ ಇಲ್ಲೆಂ ಹುನ್ ಉದಾಕ್ ಪಿಯೆಲ್ಲೊ ಮಾತ್ರ್ ಸೊಡ್ಲ್ಯಾರ್ ಮಧೆಂ ಪೊಟಾಕ್ ಕಿತೆಂಚ್ಚ್ ಘೆಂವ್ಕ್ ನಾ.

ಮಧೆಂ ಮಧೆಂ ಕುಡಾಕ್ ಆಯಿಲ್ಲೊ ಮಣಿ, ತಿಯೊನ್ ನಿದೊನ್ ಆಸ್ಚೆಂ ಪಳೆವ್ನ್ ಥಂಯ್ಚೊಚ್ಚ್ ಪಾಟಿಂ ಗೆಲ್ಲೊ. ಪುಣ್ ಆತಾಂ ಸಾಂಜ್ ಜಾತಾನಾ ತೊ ತಿಯೊಲಾಗಿಂ ಆಯ್ಲೊ ಆನಿಂ ಎದೊಳ್ ಪರ್‍ಯಾಂತ್ ಕಿತೆಂಚ್ ಖಾಂವ್ಕ್ ನಾತ್‌ಲ್ಲ್ಯಾ ತಿಯೊಕ್ ಪಳೆವ್ನ್ ಇಲ್ಲೊ ಚುರ್ಚುರ್ಲೊ. ವೆಗಿಂ ವೆಗಿಂ ವಚೊನ್ ಆಸ್ಚೆಂ ಇಲ್ಲೆಂ ಶಿತ್ ಘೆವ್ನ್ ತಾಕಾ ಇಲ್ಲೆಂ ಉದಾಕ್ ಕರುನ್ ಹುನ್ ಕರ್ನ್ ತಿಯೊಕ್ ಹಾಡ್ನ್ ದೀಲಾಗ್ಲೊ. ಪೆಜೆಪರಿಂ ಆಸ್ಚಾ ಶಿತಾಕ್ ಕಶೆಂಯ್ ದೋನ್ ತೀನ್ ಘಾಸ್ ಜೆವ್ಲೊ ತರೀ ತೊಂಡಾಕ್ ರೂಚ್ ನಾತ್‌ಲ್ಲ್ಯಾನ್ ತಾಂತ್ಲೊ ನೀಸ್ ಮಾತ್ರ್ ಪಿಯೆಲೊ ಆನಿಂ ಪರತ್ ಥಂಯ್ಚ್ ಆಡ್ ಪಡ್ಲೊ. ತಾಚಾನ್ ರಾತಿಂ ಕಾಮಾಕ್ ವಚೊಂಕ್ ಜಾಲೆಂನಾ. ಮಣಿನ್ ತಾಚೆಂ ಕಾಮ್ ಕರ್ತಾಂ ಮ್ಹಳೆಂ ಆನಿಂ ತಿಯೊಕ್ ನಿದಾವ್ನ್ ತೊ ಕಾಮಾಕ್ ಗೆಲೊ.

ದೀಸ್‌ಭರ್ ನಿದೊನ್ ಆಸ್‌ಲ್ಲ್ಯಾ ತಿಯೊಕ್ ರಾತಿಂ ಕಸೊ ಕಸೊ ಕೂಸ್ ಬದ್ಲುನ್ ನಿದ್ಲ್ಯಾರೀ ನೀದ್ ಪಡ್ಲಿನಾ. ದೊಳೆ ಆಡ್ ಕೆಲೆ ತರೀ ನೀದ್ ಬಿಲ್ಕುಲ್ ಆಯ್ಲಿನಾ. ಫಕತ್ ತಾಚಾ ದೊಳ್ಯಾಂ ಮುಖಾರ್ ತಾಚಿಂ ಬಾಯ್ಲ್ ಭುರ್ಗಿಂ ಯೆತಾಲಿಂ. ಆತಾಂ ಮ್ಹಜಿ ಬಾಯ್ಲ್ ಕಿತೆಂ ಕರ್ತಾ ಕೊಣ್ಣಾ, ಮ್ಹಜಿಂ ಭುರ್ಗಿಂ ಕಿತೆಂ ಕರ್ತಾತ್ ಕೊಣ್ಣಾ ಮ್ಹಳ್ಳಿಂ ಚಿಂತ್ನಾಂ ಯೆತಾಲಿಂ. ಆತಾಂ ಕಶೆಂಯ್ ಥೊಡೆ ಮಹಿನೆ ಮಾತ್ರ್. ಉಪ್ರಾಂತ್ ಆಪ್ಣಾಕ್ ಗಾಂವಾಕ್ ವಚ್ಯೆತ್, ಆನಿಂ ದೋನ್ ಮಹಿನ್ಯಾಂಚಾ ರಜೆರ್ ಆಪ್ಲ್ಯಾ ಘರ್ಚಾಂ ಸವೆಂ ಸಂತೊಸಾನ್ ಕಾಡ್ಯೆತ್.

ಎದೊಳ್ ಪರ್‍ಯಾಂತ್ ಮ್ಹಜಾ ಜಿಣ್ಯೆರ್ ಆಸ್‌ಲ್ಲೆ ಕಶ್ಟ್ ಆತಾಂ ಇಲ್ಲೆ ಉಣೆಂ ಜಾಲ್ಲೆ ದೆಖುನ್ ಆತಾಂ ಪರತ್ ಪಯ್ಲೆಂಚೆಪರಿಂ ತ್ಯಾ ವೊತಾಂತ್ ಘೊಳಾಜಯ್ ಮ್ಹಣ್ ನಾ. ಕಾಂಯ್ ಇಲ್ಲೆ ಪೊಯ್ಶೆ ಜಮೊ ಕರ್ನ್ ತೆ ಬೆಂಕಾಂತ್ ದವರಿಜಯ್. ಫುಡೆಂ ಭುರ್ಗ್ಯಾಂಚಾ ಶಿಕ್ಪಾಕ್ ಯಾ ಆಸ್ಚಾ ಎಕಾ ಧುವೆಚಾ ಕಾಜಾರಾಕ್ ಗಳ್ಸಿಯೆತ್ ಮ್ಹಳ್ಳಿಂ ಚಿಂತ್ನಾಂ ತಿಯೊಚಾ ಮತಿಂತ್ ಆಯ್ಲಿಂ. ಧುವೆಚಾ ಕಾಜಾರಾ ವಿಶ್ಯಾಂತ್ ಚಿಂತಾನಾ ತಾಚಾ ತೊಂಡಾರ್ ಹಾಸೊ ಉದೆಲ್ಯೊ. ಚಿಂತುನ್೦ಚ್ ಆಸ್‌ಲ್ಲ್ಯಾ ತಿಯೊಕ್ ಕಿತ್ಯಾಕ್‌ಗೀ ತಾಕಾ ಬಿತರ್ಲೆ ಭಿತರ್ ಅಸ್ಕತ್ಕಾಯೆಚೆಂ ಚಿಂತಾಪ್ ಯೇಂವ್ಕ್ ಲಾಗ್ಲೆಂ. ಸಕಾಳಿಂ ಆಸ್‌ಲ್ಲೊ ತಾಪ್ ಆತಾಂ ಇಲೊ ಉಣೊಂ ಜಾವ್ನ್ ಆಯಿಲ್ಲೊ. ತೊ ಘಾಮೆಲೊ ಆನಿಂ ನಿದೊನ್ ಪುರೊ ಜಾಲ್ಲೊ ತೊ ಉಟೊನ್ ಭಾಯ್ರ್ ಗೆಲೊ. ಪುಣ್ ತಾಪಾಂತ್ ಅನಿಕೀ ಬರೊ ಜಾಯ್ನಾಸ್ತಾಂ ಭಾಯ್ರ್ ಆಯಿಲ್ಲ್ಯಾ ತಿಯೊಕ್ ಮಣಿನ್ ಪರತ್ ಪಾಟಿಂಚ್ ಧಾಡ್ಲೊ ಆನಿಂ ಭಾಯ್ರ್ ವಾರ್‍ಯಾಕ್ ಯೇನಾಕಾ ಮ್ಹಣೊನ್ ಸಾಂಗ್ಲೆಂ.

ತಿಯೊಕ್ ಹ್ಯಾ ಪರ್ಕಿ ಗಾಂವಾಂತ್ ಜಾಲ್ಯಾರೀ ಆಪ್ಲಿಂ ಖಾಸ್ ಮ್ಹಣೊನ್ ಕೊಣೀಂ ನಾತ್‌ಲ್ಲಿಂ. ತಶೆಂ ಆಸ್ತಾಂ ಮಣಿ, ಗೋಪಿ ಎಕಾಮೆಕಾ ಆಧಾರ್ಸುನ್ ಆನಿಂ ಸುಧಾರ್ಸುನ್ ಆಸ್‌ಲ್ಲೆ. ಕಶಿಯ್ ರಾತ್ ಪಾಶಾರ್ ಜಾಲಿ ಆನಿಂ ದುಸ್ರೊ ದೀಸ್ ಉದೆಲೊ. ದುಸ್ರೊ ದೀಸ್ ಉಟ್‌ಲ್ಲೊ ತಿಯೊ ಆಪ್ಣಾಕ್ ತಾಪ್ ನಾತ್‌ಲ್ಲೊ ಪಳೆವ್ನ್ ಉಟ್ಲೊ ತರೀ ತಾಚಾ ತೊಂಡಾರ್ ರೂಚ್ ನಾತ್‌ಲ್ಲಿ. ಪುಣ್ ಕಿತೆಂ ಕರ್ತಲೊ ಭಲಾಯ್ಕಿ ಬರಿ ನಾತ್ಲ್ಯಾರ್ ಕಾಮ್ ಕೆಲ್ಲೆಪರಿಂ ನಾ. ಕಾಮ್ ಕರುಂಕ್ ಸಾಧ್ಯ್ ನಾತ್ಲ್ಯಾರ್ ಹಾಂಗಾ ಘರಾ ಬೊಸ್‌ಲ್ಲೆಪರಿಂ ನಾ. ಘರಾ ಬೊಸ್ಲ್ಯಾರ್ ಮತಿಭಿತರ್ ಯೆಂವ್ಚಿ ನಾನಾ ರಿತಿಚಿಂ ಚಿಂತ್ನಾಂ ಆನಿಂ ಎಕ್ಸುರ್ಪಣ್ ಚಿಂತಾನಾ ಹಾಂಗಾ ಆಸ್ಲ್ಯಾರ್ ಭಲಾಯ್ಕೆಂತ್ ಆಸ್ಚಿ ಗರ್ಜ್ ಮ್ಹಳ್ಳೆಂ ತಿಯೊಚಾ ಮನಾಂತ್ ಎದೊಳ್‌ಚ್ಚ್ ಗೆಲ್ಲೆಂ.

ದುಸ್ರೆ ದೀಸ್ ತಾಣೆಂ ಕಾಮಾಕ್ ಗೆಲ್ಲೆಪರಿಂಚ್ಚ್ ಬೆಂಗಾಲಿ ಆಯ್ಲೊ ಆನಿಂ ತಿಯೊಕ್ ಆಯಿಲ್ಲೆಂ ಕಾಗಾದ್ ದೀವ್ನ್ ಗೆಲೊ. ಬರ್‍ಯಾ ವೆಳಾರ್ ಆಯಿಲ್ಲೆಂ ಕಾಗಾದ್ ವಾಚುಂಕ್ ತಿಯೊ ಆತುರಾಯೆನ್ ರಾಕೊನ್ ರಾವ್ಲೊ. ಹ್ಯಾಚ್ಚ್ ಕಾಗ್ದಾ ಖಾತಿರ್ ತೊ ಸದಾಂ ದೀಸ್ ಮೆಜ್ತಾಲೊ. ಆಪ್ಣಾನ್ ಗಾಂವಾಕ್ ವೆಚಿ ಖಬಾರ್ ಆಯ್ಕಲ್ಲ್ಯಾ ಆಪ್ಲ್ಯಾ ಬಾಯ್ಲ್ ಭುರ್ಗ್ಯಾಂಚೆರ್ ಕಸಲೆಂ ಚಿಂತಾಪ್ ಆಯ್ಲಾಂ ಮ್ಹಳ್ಳೆಂ ಜಾಣಾಂ ಜಾಯ್ಜಯ್ ಮ್ಹಳ್ಳೆಂ ಚಿಂತಾಪ್ ತಾಚಾ ಮತಿಂತ್ ಆಯ್ಲೆಂ. ದೆಖುನ್ ಕಾಗಾದ್ ವಾಚುಂಕ್ ಧರ್ಲೆಂ. ತ್ಯಾ ಕಾಗ್ದಾಂತ್ ಮಾರ್ಕುನ್ ಘರಾ ಆಯಿಲ್ಲಿ ಖಬಾರ್ ಎಸ್ತೆಲಾನ್ ಬರಯಿಲ್ಲಿ. ಮಾತ್ರ್ ನ್ಹಂಯ್ ವಸ್ತು ಪಳೆವ್ನ್ ಭುರ್ಗ್ಯಾಂಕ್ ಸಂತೊಸ್ ಜಾಲ್ಲಿ ಖಬಾರ್‌ಯಿ ಬರಯಿಲ್ಲಿ.

ಮಾರ್ಕುಕ್ ಘರ್ ಪಳೆವ್ನ್ ಸಂತೊಸ್ ಜಾಲ್ಲೊ, ಆನಿಂ ತಾಕಾ ಜೆವ್ಣಾಕ್ ಕಿತೆಂ ರಾಂದ್‌ಲ್ಲೆಂ ತೆಂ ಸಗ್ಳೆಂ ಎಸ್ತೆಲಾನ್ ಬರಯಿಲ್ಲೆಂ. ತಿತ್ಲೆಂಚ್ ನ್ಹಂಯ್ ಮಾರ್ಕುನ್ ಆಪ್ಲ್ಯಾ ಘರಾ ಪಾವೊನ್ ದಿಲ್ಲ್ಯೊ ವಸ್ತು ಪಳೆವ್ನ್ ಭುರ್ಗಿಂ ಸಂತೊಸ್ ಪಾವ್ಲ್ಯಾಂತ್ ಮ್ಹಳ್ಳೆಂ ಎಸ್ತೆಲಾನ್ ಬರಯಿಲ್ಲೆಂ ವಾಚುನ್ ತಿಯೊ ಸಂತೊಸ್ಲೊ. ಫುಡ್ಲಿಂ ಉತ್ರಾಂ ವಾಚ್ತಾನಾ ಮಾತ್ರ್ ತಾಚಾ ಕಾಳ್ಜಾಂತ್ ಹಜಾರ್ ಮುಸೊಳ್ ಘೆವ್ನ್ ಕೊಣೆಂಗೀ ಮಾರ್‌ಲ್ಲೆಪರಿಂ ಭೊಗ್ಲೆಂ. ತಾಚೆಂ ವದನ್ ನಿರಾಶೆಚೆಂ ಕಾಂಳ್ಭಾಣ್ ಪಾಂಗುರ್ಲೆಂ. ಪುಣ್ ನಿರಾಸ್ ಪಾವೊಂಕ್ ತಿಯೊಕ್ ಏಕ್ ಕಾರಣ್ ಆಸ್‌ಲ್ಲೆಂ. ಎಸ್ತೆಲಾನ್ ತಾಕಾ ರಜೆರ್ ಯೆಂವ್ಚೆಂ ಪಾಟಿಂ ಘಾಲುಂಕ್ ಬರಯಿಲ್ಲೆಂ. ಆನಿಂ ಥೊಡೆ ಮಯ್ನೆ ಯಾ ವರ್ಸಾಂ ಕಾಮ್ ಕರುನ್ ಗಾಂವಾಕ್ ಯೇಂವ್ಕ್ ಬರಯಿಲ್ಲೆಂ.

ತಶೆಂ ಮ್ಹಣೊನ್ ತಿಯೊಕ್‌ಯಿ ಕಶ್ಟ್ ಆಸ್‌ಲ್ಲೆ. ತಾಣೆಂ ಘೆತ್‌ಲ್ಲೆಂ ರೀಣ್ ಅಜೂನೀಂ ಫಾರಿಕ್ ಜಾಂವ್ಕ್ ನಾತ್‌ಲ್ಲೆಂ. ಮಹಿನ್ಯಾ ಮಹಿನ್ಯಾಕ್ ಧಾ ದಿನಾರ್ ಕಾಡುಂಕ್ ತಿಯೊನ್ ಸಾಂಗ್‌ಲ್ಲೆವರ್‍ವಿಂ ತಾಚಾ ಸಾಂಭಾಳಾಂತ್ಲೆ ಧಾ ಯಾ ಪಂದ್ರಾ ದಿನಾರ್ ಶೇಖ್ ಖಾತರ್ತಾಲೊ. ಪುಣ್ ಗಾಂವಾಕ್ ವಚೊನ್ ಯೆಂವ್ಚೆಂ ಮ್ಹಳ್ಯಾರ್ ಖರ್ಚ್ ಆಸಾ ಮ್ಹಳ್ಳೆಂ ತಿಯೊಕ್ ಕಳಿತ್ ಆಸ್‌ಲ್ಲೆಂ. ಎಸ್ತೆಲಾನ್ ಬೆಂಕಾರ್ ಆಸ್ಚೆಂ ರೀಣ್ ಫಾರಿಕ್ ಕರ್ಚೆ ವಿಶ್ಯಾಂತ್ ಬರಯಿಲ್ಲೆಂ.

ಭುರ್ಗ್ಯಾಂಕ್ ಅಜೂನ್ ರಜಾ ಮೆಳೊಂಕ್ ನಾ ಮ್ಹಣೊನ್‌ಯಿ ಬರಯಿಲ್ಲೆಂ. ತಿಯೊ ಭೋವ್ಶಾ ಬೊಲ್ತೆಂಚ್ ಆಶೆತಾಲೊ ಜಾಯ್ಜಯ್. ಆಪ್ಣಾಚಾ ಯೆಣ್ಯಾಕ್ ಮ್ಹಜಿ ಬಾಯ್ಲ್ ರಾಕೊನ್ ಆಸ್ತೆಲಿ, ಮ್ಹಜಿಂ ಭುರ್ಗಿಂ ರಾಕೊನ್ ಆಸ್ತೆಲಿಂ ಮ್ಹಣೊನ್ ಚಿಂತುನ್ ಆಸ್‌ಲ್ಲ್ಯಾ ತಿಯೊಕ್ ಹೆಂ ಕಾಗಾದ್ ವಾಚುನ್ ಇಲ್ಲಿ ನಿರಾಶಾ ಜಾಲಿ. ತೇಂಯ್ ತಾಪಾಂತ್ಲೊ ಬರೊ ಜಾವ್ನ್ ಆಯಿಲ್ಲೊ ಮಾತ್ರ್ ತಾಕಾ ಗಾಂವಾಕ್ ವಚೊಂಕ್ ಸಾಧ್ಯ್ ಜಾಲೆಂನಾ ಮ್ಹಳ್ಳೆ ಚುರ್ಚುರೆ ಭೊಗ್ಲೆ.

ಯೆಂವ್ಚಾ ಮಹಿನ್ಯಾ ಥಾವುನ್ ಹರ್‍ಯೆಕಾ ಮಯ್ನ್ಯಾಕ್ ಇಲ್ಲೆ ಇಲ್ಲೆ ಪೊಯ್ಶೆ ಮಣಿಕ್ ಪಾಟಿಂ ದಿಲ್ಯಾರ್ ಜಾಲೆ ಮ್ಹಣೊನ್ ತೊ ಚಿಂತಿಲಾಗ್ಲೊ. ತರೀ ಇಲ್ಲೊ ವೇಳ್ ನಿರಾಸೊನ್ ಆಸ್ಲ್ಯಾರೀ ತಿಯೊಕ್ ಎಸ್ತೆಲಾಚಾ ಉತ್ರಾಂನಿ ಆಸ್ಚೆಂ ಸತ್ ಸಮ್ಜಾಲೆಂ. ಗಾಂವಾಕ್ ವಚೊನ್೦ಯಿ ಕರ್ಚೆತಸಲೆಂ ವಿಶೇಷ್ ಕಿತೆಂ ಆಸಾ? ವ್ಹಯ್ ಬಾಯ್ಲ್ ಭುರ್ಗ್ಯಾಂಚೊ ಉಡಾಸ್ ಯೆತಾ ಪುಣ್ ಸಗ್ಳೆಂ ತಾಚಾ ಸ್ಥಿಮಿತೆರ್ ನಾತ್‌ಲ್ಲೆಂ. ತಿಯೊಚಾ ಪುತಾಚೆಂ ಆಕಸ್ಮಿಕ್ ಆವ್ಘಡ್ ತಾಚಾ ಚಿಂತ್ಪಾ ಭಾಯ್ಲೆಂ ಜಾಲ್ಲೆಂ ಆನಿಂ ತಶೆಂಚ್ ಘರ್ ಆತಾಂ ಬರೆಂ ಕೆಲ್ಲೆಂ, ಘರಾಕ್ ವೀಜ್ ಸಕತ್ ಆಯಿಲ್ಲಿ ಸಗ್ಳಿ ತಾಚಾ ಕಶ್ಟಾಂಚೊ ಫಳ್ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್. ತಶೆಂ ಆಸ್ತಾಂ ಪಯ್ಲೆಂ ಕುವೆಯ್ಟಾಂತ್ ಆಸ್ಚೆಂ ರೀಣ್ ಫಾರಿಕ್ ಕರ್ತಚ್ಚ್ ಗಾಂವ್ಚಾ ಬೆಂಕಾಂತ್ ಆಸ್ಚೆಂ ರೀಣ್ ಫಾರಿಕ್ ಕರುಂಕ್ ತಿಯೊನ್ ಚಿಂತ್ಲೆಂ.

ಕಿತ್ಲೆಂ ರೀಣ್ ಮ್ಹಳ್ಳೆಂ ತಾಕಾ ಕಳಿತ್ ನಾತ್ಲ್ಯಾರೀ ರೀಣ್ ತೆಂ ರೀಣ್೦ಚ್ ಮ್ಹಣೊನ್ ತಾಚಾ ಮತಿಂತ್ ಖಾಂವ್ಕ್ ಲಾಗ್ಲೆಂ.

ಅಶೆಚ್ಚ್ ಥೊಡೆ ದೀಸ್ ಉತಾರ್ಲೆ ಆನಿಂ ಗಾಂವಾಕ್ ಗೆಲ್ಲೊ ಗೋಪಿ ಆಪ್ಲ್ಯಾ ಆವಯ್ಚೆಂ ಮೋರ್ನ್ ಜಾವ್ನ್ ಅನಿಕೀ ಪಾಟಿಂ ಯೇಂವ್ಕ್ ನಾತ್‌ಲ್ಲೆಂ ಪಳೆವ್ನ್ ಅಜಾಪ್ ಪಾವ್ಲೆ. ಆಸ್ಚಿ ಏಕ್ ಆವಯ್ ಮರ್ಣಾಕ್ ವೆಂಗ್‌ಲ್ಲೆವರ್ವಿಂ ತೊ ಕಿತ್ಯಾಕ್ ಅನಿಕೀ ಗಾಂವಾಂತ್ ರಾವ್ಲಾ ಮ್ಹಳ್ಳೆಂ ತಾಂಕಾ ಸಮ್ಜಾಲೆಂ ನಾ. ಧಾ ದಿಸಾಂಚಿ ರಜಾ ಕಾಡ್ನ್ ಗೆಲ್ಲೊ ಆತಾಂ ಪಂದ್ರಾ ದೀಸ್ ಜಾಲೆಂ ತರೀ ಖಬಾರ್ ನಾತ್‌ಲ್ಲಿ ಪಳೆವ್ನ್ ಶೇಕಾನ್ ಬೆಂಗಾಲಿಲಾಗಿಂ ವಿಚಾರ್ನ್ ಧಾಡ್ಲೊ ಆನಿಂ ಬೆಂಗಾಲಿನ್ ಯೇವ್ನ್ ವಿಚಾರ್ತಾನಾ ತಿಯೊ ಜಾಂವ್ ಮಣಿ ಜಾಂವ್ ಜಾಪ್ ದೀಂವ್ಕ್ ಸಕ್ಲೆನಾಂತ್. ಗೋಪಿಚಾ ಘರ್ಚೊ ಎಡ್ರೆಸ್ ಕೊಣಾಯ್ಲಾಗಿಂ ನಾತ್‌ಲ್ಲೊ ದೆಖುನ್ ಕಿತೆಂ ಗಜಾಲ್ ಮ್ಹಳ್ಳಿ ಕೊಣಾಯ್ಕೀ ಕಳಿತ್ ನಾತ್‌ಲ್ಲಿ.

ಅಶೆಂ ಥೊಡ್ಯಾ ದಿಸಾಂ ಉಪ್ರಾಂತ್ ಗೋಪಿ ಪಾಟಿಂ ಆಯ್ಲೊ. ಇತ್ಲೆ ದೀಸ್ ಗಾಂವಾಂತ್ ರಾವೊನ್ ಆತಾಂ ಪಾಟಿಂ ಆಯಿಲ್ಲ್ಯಾ ತಾಕಾ ಪಳೆವ್ನ್ ಮಣಿ ಆನಿಂ ತಿಯೊ ಅಜಾಪ್ಲೆ. ಗೋಪಿಚಾ ತೊಂಡಾರ್ ದುಃಖಾಚಾ ಬದ್ಲಾಕ್ ಸಂತೊಸ್ ಆಸ್‌ಲ್ಲೊ. ಆನಿಂ ಸಾಂಜೆರ್ ತೆ ತೆಗೀ ಮೆಳೊನ್ ಹರ್ಶೆಂಚೆಪರಿಂ ತ್ಯಾ ಫೊಲೆರಾಚಾ ಮುಳಾಕ್ ಬಸ್ಲೆ ಆನಿಂ ಗಜಾಲಿ ಕಾಂತುಂಕ್ ಸುರು ಕರಿಲಾಗ್ಲೆ. ಗೋಪಿ ಮ್ಹಣಾಲೊ

"ಹಾವೆಂ ತುಮ್ಕಾಂ ಸಂತೊಸಾಚಿ ಖಬಾರ್ ಹಾಡ್ಲ್ಯಾ. ಮ್ಹಜಾ ಜಿಣ್ಯೆಂತ್ ಆಸ್ಚೊ ಸುರ್‍ಯೊ ಬುಡ್ಲೊ ಮ್ಹಣೊನ್ ಹಾಂವ್ ಲೆಖುನ್ ಗಾಂವಾಕ್ ಗೆಲ್ಲೊಂ ಪುಣ್ ಏಕ್ ಸುರ್‍ಯೊ ಬುಡ್ತಾನಾ ದೆವಾನ್ ಮ್ಹಾಕಾ ಮ್ಹಜೊ ಅನ್ಯೇಕ್ ಸುರ್‍ಯೊ ಪಾಟಿಂ ದಿಲೊ."

ತಾಚಾ ತೊಂಡಾರ್ ಆಸ್ಚೊ ಸಂತೊಸ್ ಪಳೆತಾನಾ ತಿಯೊಕ್ ಆನಿಂ ಮಣಿಕ್ ಕಿತೆಂ ಚಿಂತ್ಚೆಂ ಮ್ಹಳ್ಳೆಂಚ್ಚ್ ಕಳ್ಳೆಂನಾ. ಗೋಪಿ ಮುಖಾರುನ್ ಸಾಂಗಾಲಾಗ್ಲೊ

"ಮ್ಹಜಿ ಬಾಯ್ಲ್ ಆಪ್ಲೊ ಗುನ್ಯಾಂವ್ ವಳ್ಕೊನ್ ಪಾಟಿಂ ಆಯ್ಲಾಂ. ಭುರ್ಗ್ಯಾಂಕ್ ಘೆವ್ನ್ ಪಾಟಿಂ ಆಯ್ಲಾಂ. ತಾಕಾ ತ್ಯಾ ಮರಾಟ್ಯಾನ್ ಘಾತ್ ಕೆಲೊ ಖಂಯ್. ದುಡ್ವಾ ಖಾತಿರ್ ಕೊಣೀಂ ಏಕ್ ಘಡ್ಯೆ ಬದ್ಲಾತಾ. ಆನಿಂ ಮ್ಹಜಿ ಬಾಯ್ಲ್ ಮ್ಹಾಕಾ ಕಾಂಯ್ ಕೋಣ್‌ಗೀ ನ್ಹಂಯ್ ಪಳೆ. ಮ್ಹಜಿಂಚ್ ಭುರ್ಗಿಂ. ತಶೆಂ ಆಸ್ತಾಂ ಮ್ಹಾಕಾ ಮ್ಹಜೆರ್ ಜಾಲ್ಲ್ಯಾ ಘಾತಾವಿಶ್ಯಾಂತ್ ಚಿಂತುನ್ ಬೊಸೊನ್ ಕಿತೆಂ ಫಾಯ್ದೊ? ಜಾಂವ್ಚೆಂ ತೆಂ ಜಾವ್ನ್ ಗೆಲಾಂ. ತ್ಯಾ ಮರಾಟ್ಯಾನ್ ಮ್ಹಜಾ ಬಾಯ್ಲೆಚೆಂ ಭಾಂಗಾರ್, ದುಡು ಲುಟ್‌ಲ್ಲೆಂಚ್ ತೆಂ ಬೊಂಬೊಯ್ ಆಯ್ಲೆಂ ಖಂಯ್ ಆನಿಂ ಹಾಂವ್ ವಾಂಚ್ಲಾಂ ಆನಿಂ ಗಾಂವಾಕ್ ಗೆಲ್ಲಿ ಖಬಾರ್ ಕಳೊನ್ ಗಾಂವಾಕ್ ಯೆತಾನಾ ಮ್ಹಜಾ ಆವಯ್ಚೆಂ ಮೋರ್ನ್ ಜಾಲ್ಲೆಂ ಆನಿಂ ಜಿಣ್ಯೆಂತ್ ಕಸ್ಲಿಂಚ್ ಸಪ್ಣಾಂ ನಾತ್‌ಲ್ಲ್ಯಾ ಮ್ಹಾಕಾ ಆತಾಂ ತರೀ ಬರೆ ದೀಸ್ ಆಯ್ಲೆ ಮ್ಹಣೊನ್ ಜಾಲೆಂ."

ಗೋಪಿಚಾ ಉತ್ರಾಂನಿ ಆಸ್ಚೆಂ ಸತ್ ತಿಯೊಕ್ ಉಟೊನ್ ದಿಸ್ತಾಲೆಂ ಆನಿಂ ಗೋಪಿ ಉಲವ್ನ್೦ಚ್ ಗೆಲೊ.

"ಪಯ್ಲೆ ಕಿತೆಂ ಕರ್ಚೆಂ ಮ್ಹಳ್ಳೆಂ ಮ್ಹಾಕಾ ಕಳ್ಳೆಂನಾ ತರೀ ಕೆಲ್ಲೊ ಅಪ್ರಾಧ್ ವಳ್ಕೊನ್ ಪಾಟಿಂ ಆಯಿಲ್ಲ್ಯಾಂಕ್ ಜರ್‌ತರ್ ಭೊಗ್ಸಾಣೆಂ ದೀವ್ನ್ ತಾಂಕಾ ಪಾಟಿಂ ಘೆತ್ಲೆಂ ತರ್ ತಿಂ ಪರತ್ ತಸಲ್ಯೊ ಚುಕಿ ಕೆದಿಂಕ್‌ಚ್ಚ್ ಆಧಾರ್ನಾಂತ್. ಆತಾಂ ಭುರ್ಗ್ಯಾಂಕ್ ಇಸ್ಕೊಲಾಕ್ ಘಾಲಾಂ ಆನಿಂ ಮ್ಹಜಾ ಘರಾಯಿ ಮ್ಹಜಿಂ ಮ್ಹಳ್ಳಿಂ ಮನ್ಶಾಂ ಆಸಾತ್. ಕಾಂಯ್ ಪಯ್ಲೆಂ ಅಶೆಂ ಘಡೊಂಕ್ ನಾತ್‌ಲ್ಲೆಂ ತರ್ ಕಾಂಯ್ ಮ್ಹಜಿ ಆವಯ್ ಅನಿ ಇಲ್ಲೊ ತೇಂಪ್ ವಾಂಚ್ತಿ ಕೊಣ್ಣಾಂ. ಕಿತೆಂಯ್ ಜಾಂವ್ ಜಾಂವ್ಕ್ ಆಸ್ಚೆಂ ಕೊಣಾಯ್ಚಾಂನೀ ಆಡಾಂವ್ಕ್ ಸಾಧ್ಯ್ ಆಸಾವೆ ತರ್?"

ತೆಗಾನೀಂ ಲಾಂಭಾಯೆಚೊ ಸ್ವಾಸ್ ಸೊಡ್ಲೊ. ಕಿತೆಂ ಗಲ್ಫಾಚಿಂ ಮಹಿಮಾಂ ಮ್ಹಣೊನ್ ಚಿಂತಿಲಾಗ್ಲಿಂ ಸಗ್ಳಿಂ. ಗಲ್ಫಾಕ್ ಯೆತೆಚ್ಚ್ ಪಳೆ ಥೊಡಿಂ ಆಪ್ಲ್ಯಾಂಕ್ ಹೊಗ್ಡಾಯ್ತಾತ್ ತರ್ ಥೊಡಿಂ ಹೊಗ್ಡಾಯಿಲ್ಲ್ಯಾ ಆಪ್ಣಾಂಕ್ ಪಾಟಿಂ ಘೆತಾತ್. ಜಾಂವ್ಚೆಂ ಸಗ್ಳೆಂ ಬರ್‍ಯಾಕ್‌ಚ್ಚ್ ಆನಿಂ ಬರ್‍ಯಾಕ್‌ಚ್ಚ್ ಹೆಂ ಸಗ್ಳೆಂ ಜಾಂವ್ಕ್ ಜಾಯ್ ಆಸ್‌ಲ್ಲೆಂ. ಕಿತ್ಯಾಕ್ ಮ್ಹಳ್ಯಾರ್ ಗೋಪಿ ತಸಲ್ಯಾ ಮನ್ಶಾಂಕ್ ಖಂಡಿತ್ ಜಾವ್ನ್ ಅಸಲಿ ಜಿಣಿ ಯೇನಾಯೆ. ಜರ್ತರ್ ಗೋಪಿಕ್ ಯಾ ಗೋಪಿ ತಸಲ್ಯಾ ಮನ್ಶಾಂಕ್ ಅಸಲೆ ಕಶ್ಟ್ ಯೆತಿತ್ ತರ್ ಮನಿಸ್ ಕೊಣೀಂ ಹೆರಾಂಕ್ ಬರೆಂ ಕರುಂಕ್ ವೆಚೆಂ ಸೊಡ್, ಚಿಂತುಂಕ್‌ಯಿ ವೆಚೆನಾಂತ್. ಬರೆಂ ಖಂಚೆಂ ವಾಯ್ಟ್ ಖಂಚೆ ಮ್ಹಳ್ಳೆಂ ಸಗ್ಳೆಂ ಮನ್ಶಾಚಾ ಕಾಳ್ಜಾಂತ್ ಆಸಾ. ಸಂಸಾರ್ ಕೊಣಾಕೀ ಕಿತೆಂಯ್ ವೊಲಾಂವ್ದಿ. ಪುಣ್ ಬರೆಂ ಕೆಲ್ಲೆ ಬರೆಂಚ್ಚ್ ಖಾತಾತ್ ಆನಿಂ ವಾಯ್ಟ್ ಕೆಲ್ಲ್ಯಾಂಕ್ ತಾಂಚೆ ವಾಯ್ಟ್ ಎಕಾ ನಾಂ ತರ್ ಅನ್ಯೇಕಾ ರಿತಿನ್ ಮೆಳಾನಾಸ್ತಾಂ ವಚಾನಾ.

ದೀಸ್ ಗೆಲ್ಲೆಪರಿಂಚ್ ಗೋಪಿ ಥಂಯ್ ಆಸ್ಚೆ ಆದರ್ಶ್ ಆನಿಂ ಧ್ಯೇಯ್ ಮಣಿಕ್ ಆನಿಂ ತಿಯೊಕ್ ರುಚ್ಲೆ. ಮನಿಸ್ ಜಾವ್ನ್ ಮನ್ಶಾಪಣಾಚಿ ಕರ್ನಿ ಆಧಾರ್‍ಚಿ ಸಗ್ಳ್ಯಾಂಕೀ ಗರ್ಜ್ ಆಸಾ ಮ್ಹಣೊನ್ ತಾಂಕಾ ಸಮ್ಜಾಲ್ಲೆಂ. ಪುಣ್ ಕಿತೆಂ ಕರ್‍ಯೆತಾ? ಸಕ್ಡಾಂಕ್ ತಾಂಚಾ ಮತಿಂತ್ ಆಸ್ಚೆ ಆಬ್ಲೇಸ್ಪಣಾಚೆ ಪಾಗೊರ್ ಕೊಸ್ಳಾಂವ್ಕ್ ಸಾಧ್ಯ್ ನಾಸ್ತಾಂ ಹೆಂ ಸಗ್ಳ್ಯಾಂಕ್ ಸಾಧ್ಯ್ ಜಾಯ್ನಾ. ಕೆನ್ನಾ ಹೊ ಸ್ವಾರ್ಥ್ ಆನಿಂ ಹೆಂ ಅಬ್ಲೇಸ್ಪಣ್ ಮನಿಸ್ ಆಪ್ಲ್ಯಾ ಮತಿಂತ್ಲೊ ಕಾಡ್ನ್ ಉಡಯ್ತಾ ತೆನ್ನಾ ತೊ ಪಯ್ಲೊ ತಾಕಾ ವಳ್ಕೊಂಕ್ ಸಕ್ತಾ. ಆಪುಣ್ ಏಕ್ ಮನಿಸ್ ಆನಿಂ ಹೆರ್ ಕೋಣೀಂ ಜಾಂವ್, ತಾಚಿ ಜಾತ್ ಖಂಚೀಯಿ ಜಾಂವ್, ತಾಚಿ ಕಾತ್ ಖಂಚೀಯಿ ಜಾಂವ್. ಪುಣ್ ಹೆರ್‌ಯಿ ಮನಿಸ್ ಆನಿಂ ತಾಚಾ ಮನ್ಶಾಪಣಾಕ್ ಎಕಾಮೆಕಾ ಸಮ್ಜೊನ್ ಗೌರವ್ ದೀವ್ನ್ ಚಲ್ಚಾಂತ್ ನಂಯ್ಗೀ ನೀಜ್ ಮನ್ಶಾಂಪಣ್ ಆಟಾಪ್ತಾ?

ತಿತ್ಲ್ಯಾರ್ ಗೋಪಿನ್ ತಿಯೊಕ್ ವಿಚಾರ್‍ಲೆಂ.

"ಹಾಂವ್ ಕಸೊಯ್ ಗಾಂವಾಕ್ ವಚೊನ್ ಆಯ್ಲೊಂ ತರ್ ತುಮಿಂ ಗಾಂವಾಕ್ ವೆಚೆವಿಶ್ಯಾಂತ್ ಕಾಂಯ್ ಚಿಂತ್ಲಾಂಗೀ?"

ತಿಯೊಕ್ ಕಿತೆಂ ಸಾಂಗ್ಚೆಂ ಮ್ಹಳ್ಳೆಂಚ್ ಕಳ್ಳೆಂನಾ.

"ಹಾಂವೆ ವಚೊಂಕ್ ಚಿಂತ್‌ಲ್ಲೆಂ ವ್ಹಯ್ ಗೋಪಿ, ಪುಣ್ ಹಾಂವ್ ಗೆಲ್ಯಾರ್ ಮಣಿಕ್ ರಜಾ ಆಸ್ಚಿನಾ ದೆಖುನ್ ಪಯ್ಲೊ ಮಣಿ ವಚೊನ್ ಯೇಂವ್ದಿ ಮ್ಹಣೊನ್ ಹಾಂವ್ ರಾವ್ಲಾಂ. ತ್ಯಾ ಶಿವಾಯ್ ಹಾವೆಂ ಗಾಂವಾಕ್ ಗೆಲ್ಯಾರೀ ಭುರ್ಗ್ಯಾಂಕೀ ಆತಾಂ ಇಸ್ಕೊಲಾಕ್ ರಜಾ ನಾ, ತಿತ್ಲೆಂಚ್ ನ್ಹಂಯ್, ಹಾಂವೆ ಶೇಖಾಲಾಗ್ಚೆಂ ಘೆತ್‌ಲ್ಲೆಂ ರೀಣ್ ಅಜೂನೀ ಫಾರಿಕ್ ಕರುಂಕ್ ನಾತ್‌ಲ್ಲ್ಯಾನ್ ಸದ್ದ್ಯಾಕ್ ಹಾಂವೆಂ ಗಾಂವಾಕ್ ವೆಚೆಂನಾ ಮ್ಹಣೊನ್ ಚಿಂತ್ಲಾಂ".

ಅಶೆಂಚ್ ಸಭಾರ್ ವೇಳ್ ಉಲವ್ನ್ ತೆ ತೆಗೀ ಥಂಯ್ಚೆ ಉಟೊನ್ ಪಾಟಿಂ ಆಯ್ಲೆಂ ಆನಿಂ ಇಲ್ಲ್ಯಾ ವೆಳಾರ್ ಗೋಪಿ ಥಂಯ್ಚೊ ಗೆಲೊ.

ಹಾಪ್ತ್ಯಾಚೊ ರಜೆಚೊ ಆಯ್ತಾರ್ ಆಯ್ಲೊಚ್ ಆನಿಂ ಹ್ಯಾ ಹಾಪ್ತ್ಯಾಂತ್ ಮಣಿಕ್ ರಜಾ ಆಸ್‌ಲ್ಲ್ಯಾನ್ ತಾಣೆಂ ತಾಚಾ ಬಾಯ್ಲೆ ಭುರ್ಗ್ಯಾಂಕ್ ವಸ್ತು ಘೆವ್ನ್ ದವ್ರುಂಕ್ ಚಿಂತ್ಲೆಂ. ಆನಿಂ ಗೋಪಿಸವೆಂ ಗೆಲ್ಲೊ ಪಾಟಿಂ ಯೆತಾನಾ ಭುರ್ಗ್ಯಾಂಕ್ ಖೆಳೊಂಕ್ ಜಾಯ್ ಜಾಲ್ಲ್ಯೊ ವಸ್ತು, ನೆಸೊಂಕ್ ಇಲ್ಲಿಂ ವಸ್ತುರಾಂ ಘೆವ್ನ್ ಆಯ್ಲೊ. ದುಸ್ರೆ ದೀಸ್ ಗುದಾಂವಾಕ್ ಆಯಿಲ್ಲ್ಯಾ ಬೆಂಗಾಲಿಕ್ ಸಾಂಗೊನ್ ಗಾಂವಾಕ್ ವೆಚಿ ಟಿಕೆಟ್ ನಖ್ಖಿ ಕರುಂಕ್ ಮಾಗ್ಲೆಂ ಆನಿಂ ಬೆಂಗಾಲಿನ್ ಶೆಖಾಕ್ ಸಾಂಗೊನ್ ಟಿಕೆಟ್ ಓಕೆ ಕರಯ್ತಾಂ ಆನಿಂ ವೆಚೊ ದೀಸ್ ನಖ್ಖಿ ಜಾತೆಚ್ಚ್ ಟಿಕೆಟ್ ಹಾಡ್ತಾಂ ಮ್ಹಣೊನ್ ಕಳಯ್ಲೆಂ.

ಗೋಪಿಚಾ ಗುದಾಂವಾಂತ್‌ಯಿ ಎಕ್ಲೊ ಮಸ್ರಿ ಆಸ್‌ಲ್ಲೊ ಆನಿಂ ಗೋಪಿಸವೆಂ ಕಾಮ್ ಕರುಂಕ್ ಎಕ್ಲೊ ಬೆಂಗಾಲಿ ಆಸ್‌ಲ್ಲೊ. ಪುಣ್ ಗೋಪಿಕ್ ಆನಿಂ ತ್ಯಾ ಬೆಂಗಾಲಿಕ್ ತಾಳ್ ಪಡಾನಾತ್‌ಲ್ಲೆಂ ದೆಖುನ್ ಗೋಪಿ ತವಳ್‌ತವಳ್ ತಿಯೊ ಆನಿಂ ಮಣಿ ಆಸ್‌ಲ್ಲೆಕಡೆ ಯೆತಾಲೊ.

ಅಶೆಚ್ಚ್ ದೀಸ್ ಪಾಶಾರ್ ಜಾಲೆ. ಆನಿಂ ಎಕಾ ದಿಸಾ ಗಾಂವಾಕ್ ಗೆಲ್ಲೊ ಮಾರ್ಕು ಪಾಟಿಂ ಆಯ್ಲೊ. ಆಪ್ಲ್ಯಾ ಘರ್ಚಿ ಖಬಾರ್ ಸಮ್ಜತಾ ಪರ್‍ಯಾಂತ್ ತಿಯೊಚೊ ಜೀವ್ ನಾತ್‌ಲ್ಲೊ. ಮಾರ್ಕುನ್ ಗಾಂವಾ ಥಾವುನ್ ಪಾಟಿಂ ಗಲ್ಫಾಕ್ ಯೆಂವ್ಚಾಧಿಂ ಆಪ್ಲ್ಯಾ ಘರಾ ವಚೊಂಕ್ನಾ ಮ್ಹಣೊನ್ ಕಳಯ್ತಾನಾ ತಿಯೊಚೆಂ ತೋಂಡ್ ಇಲ್ಲೆಂ ಬಾವ್ಲೆಂ ಆನಿಂ ಮಾರ್ಕು ಮ್ಹಣಾಲಾಗ್ಲೊ,

"ಕಸೊಯ್ ತುಂ ಆತಾಂ ಗಾಂವಾಕ್ ವೆಚೊ ಆಸಾಯ್ ನೈಂವೆ? ತಶೆಂ ಮ್ಹಣೊನ್ ಹಾಂವೀ ಚಿಂತಾಂ. ವಚೊಂಕ್ ಮನ್ ಆಸ್‌ಲ್ಲೆಂ ತರೀ ಅಖ್ರೇಚಾ ಘಡಿಯೆ ಇಲ್ಲೆಂ ಗರ್ಜೆಚಾ ಕಾಮಾಂತ್ ಹಾಂವ್ ಫಸ್ಲೊಂ ದೆಖುನ್ ವಚೊಂಕ್ ಸಾಧ್ಯ್ ಜಾಂವ್ಕ್ ನಾ" ಮ್ಹಳ್ಳೊ ಚುರ್ಚುರೆ ಉಚಾರಿಲಾಗ್ಲೊ.

"ಹಾಂವ್ ಹ್ಯಾ ವರ್ಸಾ ಗಾಂವಾಕ್ ವೆಚಿ ಆಲೋಚನ್ ಬದ್ಲಿಲ್ಯಾ ಮಾರ್ಕು" ತಿಯೊನ್ ಸಮಧಾನೆನ್ ಜಾಪ್ ದಿಲಿ.

ಆಪ್ಣಾನ್ ಸಾಂಗ್ಚಾಕೀ ತೊ ಖುದ್ಧ್ ಗಾಂವಾಕ್ ವಚೊನ್ ಸಮ್ಜೊಂದಿ ಮ್ಹಣೊನ್ ಚಿಂತುನ್ ಕಿತೆಂಚ್ ಕಳಯಿನಾಸ್ತಾಂ ರಾವ್‌ಲ್ಲ್ಯಾ ಮಾರ್ಕುಕ್ ಆತಾಂ ಕಿತೆಂ ಕರ್ಚೆಂ ಮ್ಹಳ್ಲೆಂ ಸಮ್ಜಾಲೆಂ ನಾ. ಸಾಂಗ್ಚೆಂಗೀ ನಾಕಾಗೀ ಮ್ಹಳ್ಳ್ಯಾ ದೋನ್ ರಿತಿಚಾ ಚಿಂತ್ನಾನ್ ತಾಣೆಂ ಸವಾಲ್ ಕೆಲೆಂ.

"ವೆಚಿ ಅಲೋಚನ್ ನಾ? ಕಿತ್ಯಾಕ್? ಥಂಯ್ ಗಾಂವಾಂತ್ ಎಸ್ತೆಲ್ ಬಾಯ್ ತುಜಾ ಯೆಣ್ಯಾಕ್ ರಾಕೊನ್ ಆಸಾ, ಆನಿಂ ಭುರ್ಗಿಂ ಸಯ್ತ್ ತುಕಾ ರಾಕೊನ್ ಆಸಾತ್. ಪಳೆ ಜೊಯೆಲಾನ್ ಮ್ಹಾಕಾ ತುವೆಂ ಗಾಂವಾಕ್ ಯೆತಾನಾ ಹಾಡುಂಕ್ ವಸ್ತುಂಚಿ ಏಕ್ ವಡ್ಲಿ ಪಟ್ಟಿಚ್ಚ್ ದಿಲ್ಯಾ."

"ನಾ ಮಾರ್ಕು. ತೆಂ ಸಗ್ಳೆಂ ವ್ಹಯ್, ಪುಣ್ ಅನಿಂ ಇಲ್ಲೊ ತೇಂಪ್ ರಾವ್ತಾಂ ಆನಿಂ ಉಪ್ರಾಂತ್ ಹಾಂವ್ ವೆತಾಂ. ಕಿತ್ಯಾಕ್ ಮ್ಹಳ್ಯಾರ್ ಹಾಂವ್ ಆತಾಂ ಗಾಂವಾಕ್ ವಚಾನಾ ಮ್ಹಣೊನ್ ಮಣಿ ಭಾಯ್ರ್ ಸರ್ಲಾ ಆನಿಂ ತೊ ಪಾಟಿಂ ಯೆತಾನಾ ಪಳೆಯಾಂ" ತಿಯೊನ್ ಪರತ್ ಶಾಂತ್‌ಪಣಿಂ ಜಾಪ್ ದಿಲಿ.

"ಕಿತೆಂ ಖಬಾರ್ ಗಾಂವ್ಚಿ ಮಾರ್ಕು?" ತಿಯೊ ಕಿತ್ಯಾಕ್‌ಗೀ ಆತುರಿತ್ ಜಾಲೊ.

"ಖಬಾರ್ ಪುಣಿಂ ಬರಿಚ್ಚ್. ತುಮ್ಚೆಂ ಘರ್ ಬರೆಂ ದಿಸ್ತಾ, ಘರಾಕ್ ಕರೆಂಟ್ ಆಯ್ಲಾಂ, ತುಜೆಂ ತೋಟ್ ಮಾತ್ರ್ ಉದಾಕ್ ನಾಸ್ತಾನಾಂಗೀ ಯಾ ಉದಾಕ್ ಘಾಲ್ತೆಲಿಂ ನಾಸ್ತಾನಾಂಗೀ ಬಾವ್ಲಾಂ. ಪುಣ್ ತುಜಿಂ ಬಾಯ್ಲ್ ಭುರ್ಗಿಂ ಬರಿಂ ಆಸಾತ್, ಖುಶೆನ್ ಆಸಾತ್. ಆನಿಂ ತೊ ಮಾಪ್ಳೊ ಚೆಡೊ ಸರಾಗ್ ಯೆತಾ."

ಉಲಯ್ತಾಂ ಉಲಯ್ತಾಂಚ್ ಕಿತ್ಯಾಕ್‌ಗೀ ಮಾರ್ಕುಚೊ ಬದ್ಲಾಲ್ಲೊ ಜಿನೊಸ್ ಪಳೆಲ್ಲ್ಯಾ ತಿಯೊಕ್ ತಾಚಾ ಉತ್ರಾಂಚೊ ಅರ್ಥ್ ಜಾಲೊ ನಾ. ತಾಕಾ ಕಿತೆಂಗೀ ದುಸ್ರೊ ಅರ್ಥ್ ಆಯ್ಲೊ. ತಾಕಾ ಆಯ್ಕೊಂವ್ಚಿ ಆತುರಾಯ್ ಉದೆಲಿ.

"ತುಂ ಮ್ಹಜೆಲಾಗ್ಚೆಂ ಕಿತೆಂಗೀ ಲಿಪಂವ್ಕ್ ಪಳೆತಾಯ್ ಮಾರ್ಕು. ಪಳೆ ದಯಕರ್ನ್ ತಶೆಂ ಕರ್ನಾಕಾ. ಕಿತೆಂಯ್ ಆಸಾ ತರ್ ತೆಂ ಸಾಂಗೊನ್ ಸೊಡ್. ನಾಂ ತರ್ ಮ್ಹಜಾ ಮತಿಂತ್ ನಾನಾ ರಿತಿಚಿಂ ಚಿಂತ್ನಾಂ ಯೆತೆಲಿಂ."

ತಿಯೊನ್ ಮಾರ್ಕುಲಾಗಿಂ ವಿನತಿ ಕೆಲ್ಲಿ ಪಳೆತಾನಾ ಮಾರ್ಕುಕ್ ಸಾಂಗಾಜಯ್ ಮ್ಹಣೊನ್ ಪಡ್ಲೆಂ.

"ಪಳೆ ತಿಯೊ, ತುಂ ಮ್ಹಾಕಾ ವಾಯ್ಟ್ ಚಿಂತಿನಾಕಾ. ಹೆಂ ಹಾಂವೆ ಸಾಂಗ್ಚೆಂ ನ್ಹಂಯ್, ಗಾಂವ್ಚೊ ಸಗ್ಳೊ ಲೋಕ್ ಉಲಯ್ತಾ, ಆನಿಂ ಘಡ್ಚೆಂ ಸಗ್ಳೆಂ ಪಳೆತಾನಾ ತಾಂಚಾ ಉತ್ರಾಂನಿ ಕಾಂಯ್ ಫಟ್ ನಾಮ್ಹಣೊನ್ ಮ್ಹಾಕಾ ಭೊಗ್ತಾ."

ಮಾರ್ಕುನ್ ಪರತ್ ಬೊಲ್ಯಾ ಇಡ್ಯಾ ರಾವೊನ್ ಫಾತೊರ್ ಮಾರುಂಕ್ ಪಳೆಲೆಂ.

"ಕಿತೆಂ ಸಾಂಗ್ತಾ? ಸಾಂಗ್ ತುಂ ಮ್ಹಾಕಾ. ಕಿತೆಂ ಘಡೊನ್ ಆಸಾ? ಸಾಂಗ್.." ತಿಯೊಚಾ ಉತ್ರಾಂನಿ ಸಳ್ ಆಸ್‌ಲ್ಲೆಂ.

"ತರ್ ಆಯ್ಕ್, ತುಮ್ಗೆರ್ ಸದಾಂ ಯೆಂವ್ಚಾ ತ್ಯಾ ಮಾಪ್ಳ್ಯಾ ಚೆಡ್ಯಾಕ್ ಆನಿಂ ತುಜಾ ಬಾಯ್ಲೆಕ್.."

"ತೋಂಡ್ ಧಾಂಪ್.. ಮಾರ್ಕು.. ದಯಾಕರ್ನ್ ಅಸಲೆಂ ಚಿಂತಾಪ್ ತುಜಾ ಮತಿಂತ್ ವರಿನಾಕಾ.. ತುಂ ಜಾಣಾಂಯ್ಗೀ ತುಂ ಕಿತೆಂ ಉಲಯ್ತಾಯ್ ಮ್ಹಳ್ಳೆಂ?" ತಿಯೊಚಾ ತಾಳ್ಯಾಂತ್ ಆತಾಂ ರಾಗ್ ಆಸ್‌ಲ್ಲೊ ಮಾರ್ಕುನ್ ಸಮ್ಜೊನ್ ಘೆತ್ಲೊ.

"ಸಮಧಾನ್ ಘೆ ತಿಯೊ, ಸತ್ ಪಯ್ಲೆಂ ಜಾಣಾಂ ಜಾ. ಸತ್ ಕೆದ್ನಾಂಯ್ ಕೊಡುಚ್ಚ್ ದೆಖುನ್ ಪಯ್ಲೆಂ ಆಯ್ಕ್. ತೊ ಚೆಡೊ ಲತೀಫ್ ಸದಾಂ ತುಮ್ಗೆರ್ ಯೆತಾ. ಘರಾಂತ್ ಎಕ್ಲೆಂ ಆಸ್ಚಾ ತುಮ್ಗೆರ್ ಸದಾಂ ಯೆತಾ. ಆನಿಂ ಸೆಜಾರ್ಚೊ ಸಗ್ಳೊ ಲೋಕ್ ಹಿ ಗಜಾಲ್ ಜಾಣಾಂ. ತುಮ್ಚೊ ಸೆಜಾರಿ ದಾವಿದ್ ಮ್ಹಾಕಾ ಸಾಂಗ್ತಾಲೊ. ತರಿ ಹಾಂವೆ ಸತ್ ಪಾತ್ಯೆಂವ್ಕ್ ನಾ. ಪಳೆ ತುಜೆರ್ ಮ್ಹಾಕಾ ಕಸಲೊಯ್ ಮೊಸೊರ್ ಯಾ ಹಗೆಂ ನಾ. ದೆಖುನ್ ತುಕಾ ಸಾಂಗ್ತಾಂ. ಏಕ್ ಪಾವ್ಟಿಂ ತ್ಯಾ ಚೆಡ್ಯಾಕ್ ಇಲ್ಲಿ ಬೂದ್ ಸಾಂಗೊಂಕ್ ಗೆಲ್ಲ್ಯಾ ದಾವಿದಾಕ್ ಎಸ್ತೆಲಾನ್ ಸುಶೆಗಾತ್ ಗಾಳಿ ಯೆಟ್ಲ್ಯೊ ಖಂಯ್. ತುಕಾ ತ್ಯಾ ಮಾಪ್ಳ್ಯಾಂಚೊ ಬುದಿ ಕಳಿತ್ ನಾಂತ್ವೆ ತರ್?, ಕಿತೆಂಯ್ ಜಾಂವ್ ತಿಯೊ, ತುವೆಂ ಗಾಂವಾಕ್ ವೆಚಿ ಗರ್ಜ್ ಆಸಾ, ತುಜಾ ಜಿಣ್ಯೆಂತ್ ಕೆಲ್ಲ್ಯಾ ಸಗ್ಳ್ಯಾ ಮಿನತೆಕ್ ಉದಾಕ್ ಜಾಂವ್ಕ್ ಚಡ್ ವೇಳ್ ನಾಕಾ, ದೆಖುನ್ ತುಂ ವೆಗಿಂ ಗಾಂವಾಕ್ ವಚ್ ಆನಿಂ ತುಜಾ ಪಿಡ್ಡ್ಯಾರ್ ಜಾಂವ್ಕ್ ಆಸ್ಚಾ ಕುಟ್ಮಾಕ್ ಸಾಂಬಾಳ್."

ಎಕಾಚ್ಚ್‌ಫರಾಂ ತಕ್ಲೆಕ್ ಹಜಾರ್ ಘಡ್ಘಡೆ ಮಾರ್‌ಲ್ಲೊ ಅನ್ಭೋಗ್ ತಿಯೊಕ್ ಜಾಲೊ. ಎಕಾಚ್ಚ್ ಘಡಿಯೆ ತಾಚಿಂ ಸಗ್ಳಿಂ ಸಪ್ಣಾಂ ರಾವ್ಳೆರಾಂ ಚುರಾನ್ ಚೂರ್ ಜಾಲಿಂ ಮ್ಹಳ್ಳೆಂ ಚಿಂತಾಪ್ ತಾಚಾ ಮತಿಂತ್ ಯೇವ್ನ್ ಗೆಲೆಂ. ತಾಕಾ ತಾಚಾ ಜಿಣ್ಯೆಚೊ ಹರ್‍ಯೆಕ್ ವಾಟೊ ಸಂಪ್ಲ್ಯಾತ್ ಮ್ಹಳ್ಳೆಪರಿಂ ಜಾಲೆಂ. ಚಡ್ ಕಾಂಯ್ ಉಲಂವ್ಕ್ ತಾಚಾನ್ ಜಾಲೆಂನಾ. ಆತಾಂ ತಾಕಾ ಕಳ್ಳೆಂ ಮಾರ್ಕು ಕಿತ್ಯಾಕ್ ಗಲ್ಫಾಕ್ ಪಾಟಿಂ ಯೆಂವ್ಚಾಧಿಂ ಆಮ್ಚಾ ಘರಾ ವಚೊಂಕ್ ನಾ ಮ್ಹಳ್ಳೆಂ.

ಪಾಟಿಂ ಕುಡಾಕ್ ಆಯಿಲ್ಲ್ಯಾ ತಿಯೊಚೊ ಜಿನೊಸ್ ಪಳೆಲ್ಲೊ ಮಣಿ ತಟಾಕ್ಲೊ ತರೀ, ತಾಣೆಂ ಕಸ್ಲೊಚ್ಚ್ ವಿಚಾರ್ ಕೆಲೊನಾ. ಆನಿಂ ತಿಯೊ ಜಾಲ್ಯಾರೀ ಮತಿಂತ್ ಭೊಗ್ಚೆ ಹೆ ಅಕ್ಲಾಸ್ ಕೊಣಾಯ್ಕೀ ಸಾಂಗ್ಚೆ ತಸಲೆ ನ್ಹಂಯ್ ಜಾಲ್ಲೆವರ್ವಿಂ ತಾಕಾ ಸಗ್ಳೆಂ ದೂಃಕ್ ತಾಚಾ ಕಾಳ್ಜಾಭಿತರ್‌ಚ್ಚ್ ದವ್ರಿಜಯ್ ಪಡ್ಲೆಂ.

ಅಶೆಚ್ಚ್ ಥೊಡೆ ದೀಸ್ ಪಾಶಾರ್ ಜಾಲೆ ಆನಿಂ ಕಾಂಯ್ ಆಪುಣ್ ಗಾಂವಾಕ್ ವೆಚೆಂ ಚಿಂತುನ್ ತಿಯೊ ಬಾವ್ಲಾಸ್ತಲೊ ಮ್ಹಣೊನ್ ಮಣಿ ವಗೊಚ್ ರಾವ್ಲೊ. ಕಿತೆಂ ಮ್ಹಳ್ಳೆಂ ಸಮ್ಜೊನ್ ಘೆಂವ್ಚಿ ಆಶಾ ಆಯ್ಲ್ಯಾರೀ ತಿಯೊನ್ ಬಿಲ್ಕುಲ್ ಆಪ್ಲೆಂ ತೋಂಡ್ ಸೊಡ್ಲೆಂನಾ.

ಥೊಡೆ ದೀಸ್ ಅಶೆಚ್ ಪಾಶಾರ್ ಜಾಲೆ. ಮಧೆಂ ತ್ಯಾ ಬೆಂಗಾಲಿನ್ ಯೇವ್ನ್ ಮಣಿಚಿ ಟಿಕೆಟ್ ಓಕೆ ಕರ್ನ್ ದಿಲಿ ಆನಿಂ ದೋನ್ ಮಹಿನ್ಯಾಚಾ ರಜೆರ್ ಮಣಿ ಕಸೊಯ್ ಗಾಂವಾಕ್ ಭಾಯ್ರ್ ಸರ್ಲೊ.

ಮಣಿ ಗಾಂವಾಕ್ ಗೆಲ್ಲ್ಯಾಂತ್ ತಿಯೊ ಎಕ್ಸುರೊ ಪಡ್ಲೊ. ಮಣಿಚೆಂ ಕಾಮ್ ಆತಾಂ ತೊಚ್ ಕರ್ತಾಲೊ. ತರೀ ರಾತ್ ಜಾಂವ್ ದೀಸ್ ಜಾಂವ್, ತಿಯೊಚಾ ಮತಿಂತ್ಲಿಂ ಚಿಂತ್ನಾಂ ಎಕ್‌ಚ್ ಆನಿಂ ತಾಚಾ ಮತಿಂತ್ ಉದೆಂವ್ಚೆಂ ಸವಾಲ್ ಎಕ್‌ಚ್ 'ಆಪ್ಣಾನ್ ಜ್ಯೆ ಕಿತೆಂ ಮಾರ್ಕು ಥಾವ್ನ್ ಆಯ್ಕಾಲಾಂ ತೆಂ ಸತ್‌ಗೀ?' ಮ್ಹಳ್ಳೆಂ. ಮನ್ಶಾಂಕ್ ಮನ್ಶಾವಯ್ರ್ ಮೊಸೊರ್ ಆಸ್ಚೊ ಸಹಜ್. ಎಕ್ಲೊ ಕೊಣೀಂ ಬರೊ ಜಾಲೊ ತರ್ ಮೊಸೊರ್. ಪುಣ್ ಮಾರ್ಕು ತಶೆಂ ಮೊಸೊರ್ ಕರ್ಚಾ ವರ್ಗಾಂತ್ಲೊ ಬಿಲ್ಕುಲ್ ನ್ಹಂಯ್ ಮ್ಹಳ್ಳೆಂ ತಿಯೊ ಸಮ್ಜಾಲ್ಲೊ. ನಿದ್ಲ್ಯಾರ್ ತಾಕಾ ನೀದ್ ಆಯ್ಲಿನಾ. ಫಕತ್ ಲೊಳ್ತಾಲೊ ಆನಿಂ ಎಕ್ಸುರೊಚ್ ಅಸಲೆ ಅಟೆವಿಟೆ ಭೊಗ್ತಾಲೊ.

ಎಕ್ಸುರೊ ಆಸ್ಚಾ ತಿಯೊಕ್ ಆತಾಂ ತಾಚೆತಿತ್ಲ್ಯಾಕ್ ಝುಜ್ ಮಾಂಡುಂಕ್ ಪಡ್ಲೆಂ. ತಾಕಾ ಮಾರ್ಕುಚಿಂ ಹರ್ಯೆಕ್ ಉತ್ರಾಂ ಆನಿಂ ಎಸ್ತೆಲಾಚೆಂ ಕಾಗಾದ್ ಉಡಾಸಾಕ್ ಆಯ್ಲೆಂ. ದೆಖುನ್೦ಚ್ ಜಾಯ್ಜಯ್ ಎಸ್ತೆಲಾನ್ ಆಪ್ಣಾಕ್ ಗಾಂವಾಕ್ ಸದ್ದ್ಯಾಕ್ ಯೇನಾಕಾ ಮ್ಹಣೊನ್ ಬರಯಿಲ್ಲೆಂ ಮ್ಹಣೊನ್ ಲೆಕ್ಲೆಂ.

ಎಕ್ಸುರೊ ಆಸ್ಚಾ ತಿಯೊಕ್ ತಾಚಾ ಮತಿಚಿಂ ಚಿಂತ್ನಾಂ ಅರ್ಥ್ ನಾತ್‌ಲ್ಲ್ಯಾ ದಿಶೆಂತ್ ಘುವೊಂಕ್ ಲಾಗ್ಲಿಂ. ಥೊಡೆಪಾವ್ಟಿಂ ಹೆ ಮತಿಚೆ ಕರ್ಕರ್ ಇತ್ಲೆ ಚಡ್ಲೆಗೀ ತೊ ಆಪ್ಲ್ಯಾ ದೊನೀ ಹಾತಾಂನಿ ತೋಂಡ್ ಧಾಂಪುನ್ ತೊ ರಡ್ಲೊ. ಆಪ್ಲ್ಯಾ ಕುಟ್ಮಾ ಖಾತಿರ್ ಆಪ್ಣಾನ್ ಕೆಲ್ಲೊ ಸಾಕ್ರಿಫಿಸ್ ತರ್ ಹೆಚ್ಚ್ ಖಾತಿರ್‌ಗೀ? ತರ್ ಆಪ್ಲ್ಯಾ ಸಾಕ್ರಿಫಿಸಾಕ್ ಕಾಂಯ್ ಮೋಲ್ ನಾ? ತಿಯೊ ಚಿಂತುನ್೦ಚ್ ಗೆಲೊ.

ತಶೆಂ ಮ್ಹಣೊನ್ ಏಕ್ ಘಡಿ ತಾಚಾ ಮತಿಂತ್ ನಾ ಹೆಂ ಖಂಡಿತ್ ಜಾವ್ನ್ ಸತ್ ನ್ಹಂಯ್, ಹಾಂತುಂ ಖಂಡಿತ್ ಜಾವ್ನ್ ಕಿತೆಂ ತರೀ ಘುಟ್ಮಳ್ ಆಸಾ ಮ್ಹಳ್ಳೆಂ ಏಕ್ ಚಿಂತಾಪ್ ಯೇವ್ನ್ ತಿಯೊಕ್ ಭುಜಾವಣ್ ದೀಂವ್ಕ್ ಲಾಗ್ಲೆಂ.

ಅಶೆಂ ರಾತಿಂ ನಿದ್ಲ್ಯಾರೀ ಸಾರ್ಕಿ ನೀದ್ ಪಡಾನಾಸ್ತಾಂ, ಜೇಂವ್ಕ್‌ಯಿ ಸಾರ್ಕಿ ಭುಕ್ ನಾಸ್ತಾಂ ತಿಯೊನ್ ದೀಸ್ ಕಾಡುಂಕ್ ಸುರು ಕೆಲೆ. ತಾಚಿ ಕೂಡ್ ಥಕೊಂಕ್ ನಾ ತರೀ ತಾಚಿ ಮತ್ ಥಕ್ಲಿ. ಖಂಯ್ಸರ್‌ಗೀ ಆಪುಣ್ ಧಾಂವೊನ್ ಆಸಾಂ ಮ್ಹಳ್ಳೆಂ ಚಿಂತಾಪ್ ತಾಚಾ ಮತಿಂತ್ ಆಯ್ಲೆಂ. ಆತಾಂ ಧಾಂವೊನ್ ಧಾಂವೊನ್ ತಾಕಾ ಖರಸ್ ಆಯಿಲ್ಲಿ. ತಾಕಾ ವಿಶೆವ್ ಜಾಯ್ ಆಸ್‌ಲ್ಲೊ. ಹ್ಯಾ ಪರ್ಗಾಂವಾಂತ್ ತಾಕಾ ಅಸಲ್ಯೊ ಖಬ್ರೊ ಯೆತಾನಾ ತಾಕಾ ಕಿತೆಂ ಕರುಂಕೀ ಜಾಲೆಂನಾ. ಕಿತೆಂಚ್ ತಾಚಾ ಮತಿಂತ್ ಗೆಲೆಂ ನಾ.

ಅಶೆಚ್ಚ್ ಎಕಾ ಪಾಟ್ಲ್ಯಾನ್ ಏಕ್ ದೀಸ್ ಮ್ಹಣೊನ್ ಹಾಪ್ತೆ ದೋನ್ ಉತಾರ್ಲೆ. ತಾಚಾ ಮತಿಂತ್ಲಿಂ ಚಿಂತ್ನಾಂ ತಾಕಾ ಜಿಯೆಂವ್ಕ್ ಆಸ್‌ಲ್ಲಿ ಜಿಣಿ ದುಃಖಾಂಚಿ ಕರುಂಕ್ ಲಾಗ್ತಾನಾ ತಾಣೆಂ ಎಸ್ತೆಲಾಕ್ ಏಕ್ ಕಾಗಾದ್ ಬರಂವ್ಕ್ ಚಿಂತ್ಲೆಂ. ಆನಿಂ ಹ್ಯೆ ಪರಿಂ ಬರಂವ್ಕ್ ಲಾಗ್ಲೊ.

ಮುಂದರ್‍ಸಿಲಾಂ...

Tags: Vally Quadras,e konkani novel, Konkani, Mangalore, Mangalorean, Mother Tongue

From around the world

ಪಾಟಿಂ ಗಾಂವಾಕ್ - ಅವಸ್ವರ್ 12

Post your comments

ಅವಸ್ವರ್ 1

ಅವಸ್ವರ್ 2

ಅವಸ್ವರ್ 3

ಅವಸ್ವರ್ 4

ಅವಸ್ವರ್ 5

ಅವಸ್ವರ್ 6

ಅವಸ್ವರ್ 7

ಅವಸ್ವರ್ 8

ಅವಸ್ವರ್ 9

ಅವಸ್ವರ್ 10

ಅವಸ್ವರ್ 11

ಅವಸ್ವರ್ 12

ಅವಸ್ವರ್ 13

ಅವಸ್ವರ್ 14

ಅವಸ್ವರ್ 15

ಅವಸ್ವರ್ 16

ಅವಸ್ವರ್ 17

ಅವಸ್ವರ್ 18

ಅವಸ್ವರ್ 19

ಅವಸ್ವರ್ 20

ಅವಸ್ವರ್ 21

ಅವಸ್ವರ್ 22

ಅವಸ್ವರ್ 23

ಅವಸ್ವರ್ 24

ಅವಸ್ವರ್ 25

ಅವಸ್ವರ್ 26

ಅವಸ್ವರ್ 27

ಅವಸ್ವರ್ 28

Connect

Our Address
Mangalore

Our Address
Udupi

Our Address
Dubai

From around the world

Post your comments

Connect

Our AddressMangalore

Our AddressUdupi

Our AddressDubai

Our Address
Mangalore

Our Address
Udupi

Our Address
Dubai