:: ಮಾಯ್ ಭಾಸ್

ಎಸ್ತೆಲಾಕ್ ಆಪ್ಲ್ಯಾ ಪತಿಕ್ ಬೆಂಕಾಚಾ ಲೊನಾ ವಿಶ್ಯಾಂತ್ ಕಳ್ಚಾಧಿಂ ಆಪ್ಣಾನ್ ಜಾವ್ನ್ ಕಳಂವ್ಕ್ ಚಿಂತಾಲೆಂ. ತರೀ ತ್ಯಾ ಆವ್ಕಾಸಾಕ್ ತೆಂ ರಾಕೊನ್ ರಾವ್ಲೆಂ. ಆತಾಂ ಆಯ್ಲಾ ಮಾತ್ರ್ ದೆಖುನ್ ಥೊಡೆ ದೀಸ್ ಪಾಶಾರ್ ಜಾಂವ್ದಿ. ಉಪ್ರಾಂತ್ ಸಾಂಗ್ಲ್ಯಾರ್ ಜಾಲೆಂ ಮ್ಹಣೊನ್ ಲೆಕಿಲಾಗ್ಲೆಂ.

ತಿಯೊಚೆಂ ಮೌನ್ ಸೊಸುಂಕ್ ಜಾಯ್ನಾಸ್ತಾಂ ಎಸ್ತೆಲ್ ಮುಖಾರಿಲಾಗ್ಲೆಂ. "ತೊ ಬರೊ ಮನಿಸ್ ದೆಖುನ್ ತಾಕಾ ದೆವಾನ್ ಆತಾಂ ಸಗ್ಳೆಂ ದಿಲಾಂ. ಪೆಂಟೆಂತ್ ತಾಚಿ ಆಂಗಡ್ ಬರಿ ಚಲ್ತಾ. ತಾಂತು ಬರೊ ವ್ಯಾರ್ ಜಾತಾ. ತಾಚೆಲಾಗಿಂ ಆತಾಂ ಏಕ್ ಮೊಟಾರ್ ಬಾಯ್ಕ್ ಆಸಾ ಆನಿ ಏಕ್ ರಿಕ್ಶಾಯ್ ಆಸಾ. ತಿ ತಾಣೆಂ ಚಲಂವ್ಕ್ ದಿಲ್ಯಾ. ಆಮ್ಕಾಂಯ್ ಫುಡೆಂ ಕಸಲೆಯ್ ಕಶ್ಟ್ ಉದೆಲ್ಯಾರ್ ತೊ ಖಂಡಿತ್ ಆಧಾರ್ ಜಾತಲೊ."

ತಿಯೊಚಾ ಮತಿಂತ್ ಕಸ್ಲಿಂಚ್ ಚಿಂತ್ನಾಂ ನಾತ್‌ಲ್ಲಿಂ. ತೊ ಜಾಂವ್ಕ್ ಪುರೊ ಮ್ಹಣೊನ್ ಚಿಂತುನ್ ಎಸ್ತೆಲಾನ್ ಹಾಡ್‌ಲ್ಲಿ ಚಾ ಪಿಯೆವ್ನ್ ಖಾಲಿ ಗ್ಲಾಸ್ ಎಸ್ತೆಲಾಕ್ ದಿಲೊ ಆನಿ ಟಿವಿ ಪಳೆವ್ನ್ ರಾವ್ಲೊ.

ಎಸ್ತೆಲಾಚಾ ಚಿಂತ್ನಾಂಕ್ ಆನಿ ತಿಯೊಚಾ ಚಿಂತ್ನಾಂಕ್ ತಫಾವತ್ ಇತ್ಲೊಚ್. ತಿಯೊ ಆಪ್ಲ್ಯಾ ಭುರ್ಗ್ಯಾಂನಿ ಬರಿ ಇಶ್ಟಾಗಾತ್ ಕರಿಜಯ್, ಬರ್‍ಯಾಂಚೊ ಸಾಂಗಾತ್ ಕರಿಜಯ್ ಆನಿ ಬರಿಂ ತತ್ವಾಂ ಆಪ್ಲ್ಯಾ ಜಿಣ್ಯೆಂತ್ ದವ್ರುನ್ ಘೆಜಯ್ ಮ್ಹಣೊನ್ ಭೊಗ್ತಾಲೆಂ ತರ್ ಎಸ್ತೆಲಾಕ್ ಹ್ಯಾ ಸಂಗ್ತ್ಯಾಂಚೆರ್ ಆಸ್ಚೆಂ ಗುಮಾನ್ ಉಣೆಂ. ತಿಚೆಂ ಚಿಂತಾಪ್ ಆಪ್ಲ್ಯಾ ಭುರ್ಗ್ಯಾಂನಿಯ್ ಆಧುನಿಕ್ ಜಾಯ್ಜಯ್. ತೆಂ ಪಯ್ಲೆಂ ಕಾಮ್ ಕರ್ನ್ ಆಸ್ಚೆಲಾಗಿಂ ತಾಣೆಂ ಪಳೆಲ್ಲೆಂ. ಅರ್ಧೆಂ ನಾಗ್ಡೆಂ ನೆಸಾಪ್ ಘಾಲುನ್ ರಾತ್‌ಭರ್ ಭಾಯ್ರ್ ಆಸ್ಚಾ ಚೆಡ್ವಾಂಕ್ ತಾಂಚಿಂ ಪೊಯ್ಶೆವಾಲಿ ಆವಯ್ ಬಾಪಯ್ ಕಿತೆಂಚ್ ಸಾಂಗಾನಾತ್‌ಲ್ಲಿಂ. ಕಿತೆಂ ಗ್ರೇಸ್ತ್‌ಕಾಯ್ ತಾಂಚಿ? ಕಿತೆಂ ವಡ್ವಿಕ್ ತಾಂಚಿ? ತಶೆಂಚ್ ಆತಾಂ ಆಪ್ಲ್ಯಾ ಭುರ್ಗಾಂನಿಂಯ್ ಸಭಾರ್ ಇಶ್ಟಾಂಕ್ ಆಪ್ಣಾಂವ್ಕ್ ಜಾಯ್. ಆಮಿಂ ಪಳೆಲ್ಲಿ ಜಿಣಿಂ ತಾಣಿಂ ಜಿಯೆಂವ್ಕ್ ಜಾಯ್. ಮ್ಹಳ್ಳೆಂ ಚಿಂತಾಪ್ ಎಸ್ತೆಲಾಚೆಂ ಜಾಲ್ಲೆಂ.

ದನ್ಪಾರ್ ಉತ್ರೊನ್ ಆಯಿಲ್ಲೊ ತರೀ ಘರಾಕ್ ಪಾಟಿಂ ಆಯಿಲ್ಲ್ಯಾ ತಿಯೊಕ್ ಆಪ್ಲ್ಯಾ ಘರಾಚಿ ಬದ್ಲಾವಣ್ ಜಾಲ್ಲಿ ಪಳೆವ್ನ್ ಇಲ್ಲೊ ಸಂತೊಸ್ ಜಾಲೊ ತರೀ ಇಲ್ಲಿ ಬೆಜಾರಾಯ್ ಸಯ್ತ್ ಜಾಲಿ. ತಾಣೆಂ ವೆತಾನಾಂ ಆಸ್‌ಲ್ಲಿ ಆಪ್ಲ್ಯಾ ಜಾಗ್ಯಾಚಿ ನಕ್ಶಾ ಎದೊಳ್ ಬದ್ಲಾಲ್ಲಿ. ಘರಾ ಮುಖಾರ್ ಆಸ್‌ಲ್ಲೆಂ ವೋಡ್ತ್ ಆತಾಂ ಮಾಯಾಗ್ ಜಾವ್ನ್ ತಾಚೆರ್ ಸಿಮೆಟಿಚೆಂ ಆಂಗಣ್ ಆಸ್‌ಲ್ಲೆಂ. ಆನಿ ಆಂಗ್ಣಾಚಾ ಚಾರೀ ಕುಶಿಂನಿ ಚಾರ್ ಸೊಭಾಯೆಚೆ ರೂಕ್ ಆಸ್‌ಲ್ಲೆ. ಘರ್ಚಾ ಜಾಗ್ಯಾ ಭಂವಾರಿಂ ತಿಯೊನ್ ಆಪ್ಲ್ಯಾ ಹಾತಾಂತ್ ಬಾಂದ್‌ಲ್ಲೊ ಮಾತಿಯೆಚೊ ದೊರೊ ಆತಾಂ ಇಟ್ಯಾಂಚೊ ದೊರೊ ಜಾವ್ನ್ ಬದ್ಲಾಲ್ಲೊ. ಆನಿ ದೊರ್‍ಯಾ ಮಧೆಂ ಆಸ್‌ಲ್ಲೊ ರುಕಾಚೊ ಆಕೊಡೊ ಆತಾಂ ಸಿಮೆಟಿಚೆ ಕುಂದೆ ಜಾವ್ನ್ ಬದ್ಲಾಲೊ ಆನಿ ತ್ಯಾ ಕುಂದ್ಯಾಂಚೆರ್ ಭಳಿಶ್ಟ್ ಲೊಂಕ್ಡಾಚಿ ಗೇಟ್ ಆಸ್‌ಲ್ಲಿ. ಆನಿ ದೊನೀಂ ಕುಂದ್ಯಾಂ ವಯ್ರ್ ಎಕೇಕ್ ವೀಜ್ ದಿವೆ ಆಸ್‌ಲ್ಲೆ. ಆನಿ ಜಾಗ್ಯಾ ಭಿತರ್ ಯೇಂವ್ಕ್ ವಚೊಂಕ್ ಕಾಂಯ್ ಪಂದ್ರಾ ವೀಸ್ ಫುಟಿಂಚೊ ರಸ್ತೊ ಆಸಾ ಕೆಲ್ಲೊ. ಘರ್ಚಾ ಆಂಗ್ಣಾಲಾಗಿಂ ಸಯ್ತ್ ಏಕ್ ಲ್ಹಾನ್ ತಗ್ಡಾಚಾ ಶಿಟಿಚೆಂ ಲ್ಹಾನ್ ಪಾಕೆಂ ಆಸೊನ್ ತಾಂತುಂ ಕಾರ್ ರಾವಂವ್ಕ್ ಸುವಾತ್ ಆಸಾ ಕೆಲ್ಲಿ. ತಾಣೆಂ ಎಕಾ ತೆಂಪಾರ್ ಲಾಯಿಲ್ಲಿ ಆನಿ ತ್ಯಾ ತೆಂಪಾರ್ ತಾಂಚೆ ಸಗ್ಳ್ಯಾಂಚೆ ಪೋಟ್ ಭರುಂಕ್ ಸಾಧ್ಯ್ ಆಸ್‌ಲ್ಲಿ ತರ್‍ಕಾರೆಂಚಾ ವಾಲಿಂಚಿ ಜಾಂವ್ ತ್ಯಾ ವೊಳಿಂಚಿ ಜಾಂವ್ ಖುರು ನಾತ್‌ಲ್ಲಿ. ಥಂಯ್ ಥಂಯ್ ಆಸ್‌ಲ್ಲೆ ಪೊಣ್ಸಾಚೆ, ಆಂಬ್ಯಾಚೆ ರೂಕ್ ಎದೊಳ್‌ಚ್ ಕಾತ್ರೊನ್ ಘಾಲ್ಲೆವರ್ವಿಂ ಥಂಯ್ ಉಗ್ತಿ ಸುವಾತ್ ಉಟೊನ್ ದಿಸ್ತಾಲಿ. ಘರಾಲಾಗ್ಚಿಂ ಬಾಂಯ್ಕ್ ಆತಾಂ ಏಕ್ ಸಿಮೆಟಿಚೊ ದೊರೊ ಘಾಲ್ಲೊ. ಆನಿ ಉದಾಕ್ ವೊಡುಂಕ್ ಏಲ್ ಲಾಟೊ ಆಸ್‌ಲ್ಲೊ ತರೀ ತ್ಯಾ ಲಾಟ್ಯಾರ್ ಆಸ್ಚಿ ದೊರಿ ದೆಖ್ತಾನಾ ತ್ಯಾ ಲಾಟ್ಯಾಕ್ ಕೊಣೆಂಚ್ ಹಾತ್ ಲಾಯ್ನಾಸ್ತಾಂ ಮಯ್ನೆ ಜಾಲ್ಯಾತ್ ಮ್ಹಣೊನ್ ಕಳ್ತಾಲೆಂ. ಬಾಂಯ್ಚಾ ಕುಶಿನ್ ಆಸ್ಚೆಂ ಪಂಪಾಚೆಂ ಲ್ಹಾನ್ ಕೂಡ್ ಆನಿ ದೆಗೆನ್ ಆಸ್ಚಿ ಉದ್ಕಾಚಿ ಟ್ಯಾಂಕ್ ಸಗ್ಳೆಂ ತಿಯೊಕ್ ನವೆಂ.

ಹೆಂ ಸಗ್ಳೆಂ ಪಳೆತಾನಾ ಕಾಂಯ್ ಆಪುಣ್ ಮ್ಹಜಾ ಜಾಗ್ಯಾಂತ್ ಆಸಾಂಗೀ ಮ್ಹಳ್ಳೊ ದುಭಾವ್ ಯೆತಾಲೊ. ಪಾಟಿಂ ಘರಾ ಆಯಿಲ್ಲ್ಯಾ ಸಂತೊಸಾನ್ ತಿಯೊ ಆಪ್ಣಾಚೆಂ ವಕಾತ್ ಘೆಂವ್ಕ್ ವಿಸ್ರಾಲೊ ಆನಿ ಎಸ್ತೆಲಾನ್ ಕರ್ನ್ ದಿಲ್ಲಿ ಹುನ್ ಹುನ್ ಚಾ ಪಿಯೆವ್ನ್ ಆಪ್ಣಾನ್ ಹಾಡ್‌ಲ್ಲಿ ಪೇಟ್ ಸೊಡಯ್ಲಿ ಆನಿ ತಾಣೆಂ ಹಾಡ್‌ಲ್ಲ್ಯೊ ವಸ್ತು ಭಾಯ್ರ್ ಕಾಡ್ಲ್ಯೊ ಆನಿ ಎಸ್ತೆಲಾಚಾ ಹಾತಾಂತ್ ದಿಲ್ಯೊ. ಎಸ್ತೆಲಾಕ್ ತಿಯೊಚಾ ಭಲಾಯ್ಕಿ ಭಿಗಡ್ಲೆಲಿ ಖಬಾರ್ ಆಸ್‌ಲ್ಲಿ. ತರೀ ಕಾಂಯ್ ಚಿಲ್ಲರ್ ಆಸ್ತೆಲಿ ಮ್ಹಣೊನ್ ತೆಂ ಚಿಂತಾಲೆಂ ಶಿವಾಯ್ ತಿಯೊಕ್ ಗೋಡ್ ಮುತಾಚಿ ಪಿಡಾ ಆಸಾ ಆನಿ ರಗ್ತಾ ವತ್ತಾಡಾಚಿ ಪಿಡಾ ಆಸಾ ಮ್ಹಣೊನ್ ಕಳಿತ್ ನಾತ್‌ಲ್ಲೆಂ. ತಿಯೊನ್ ಎಸ್ತೆಲಾಕ್ ತ್ಯೇ ವಿಶ್ಯಾಂತ್ ಎದೊಳ್ ಬರಂವ್ಕ್ ಯಾ ಸಾಂಗೊಂಕ್ ನಾತ್‌ಲ್ಲೆಂ. ಗಾಂವಾಕ್ ಗೆಲ್ಲೊಂಚ್ ಸವ್ಕಾಸಾಯೆನ್ ಸಾಂಗ್ಲ್ಯಾರ್ ಜಾಲೆಂ ಮ್ಹಣೊನ್ ಚಿಂತುನ್ ಆಸ್‌ಲ್ಲೊ.

ಬಾಪಾಯ್ಕ್ ಘರಾ ಪಾವವ್ನ್ ಜಿವಿತಾ ಲತೀಫಾಚಾ ಗಾಡಿಯೆರ್ ಕೊಲೆಜಿಕ್ ಮ್ಹಣೊನ್ ರಮೇಶಾಸವೆಂ ಕೊಡ್ಯಾಳಾಕ್ ಗೆಲ್ಲೆಂ. ಅಶೆಂ ಘರ್ಚೊ ಖಬ್ರೊ, ಭುರ್ಗ್ಯಾಂಚಾ ಶಿಕ್ಪಾ ವಿಶ್ಯಾಂತ್ ತಿಯೊ ಉಲಯ್ಲೊ. ತೊ ಆನಿ ಪಾಟಿಂ ವಚಾನಾ ಮ್ಹಳ್ಳೆಂ ಆಯ್ಕಾಲ್ಲ್ಯಾ ಎಸ್ತೆಲಾಕ್ ಭಿತರ್ಲೆ ಭಿತರ್ ಸಂತೊಸ್ ಜಾಲೊನಾ ತರೀ ತಿಣೆಂ ಕಿತೆಂಚ್ ದಾಖಯ್ಲೆಂನಾ. ಅಶೆಂ ಗಜಾಲಿ ಉಲಯಿತ್ತ್ ತಿಯೊ ಎಸ್ತೆಲಾನ್ ಎದೊಳ್‌ಚ್ ರಾಂದ್‌ಲ್ಲೆಂ ಶಿತಾಚೆಂ ಆನಿ ಮಾಸ್ಳೆಚೆಂ ನಿಸ್ತೆಂ ತೊಂಡ್ಲಾವ್ನ್ ಪೋಟ್‌ಭರ್ ಜೆವ್ಲೊ ಆನಿ ಪಯ್ಣಾಚಿ ಪುರಾಸಣ್ ಕಾಡುಂಕ್ ತಿಯೊ ಇಲ್ಲೊ ಆಪ್ಲ್ಯಾ ಕುಡಾಕ್ ಯೇವ್ನ್ ಖಾಟಿಚೆರ್ ಆಡ್ ಪಡ್ಲೊ. ಗಾಂವಾಂತ್ ತಾಚಿ ಭಲಾಯ್ಕಿ ಬರಿ ಜಾತೆಲಿ ಮ್ಹಳ್ಳಿಂ ಪಿಶಿಂ ಚಿಂತ್ನಾ ಘೆವ್ನ್ ಆಸ್‌ಲ್ಲೊ ತಿಯೊ ಥೊಡ್ಯಾ ದಿಸಾಂ ಉಪ್ರಾಂತ್ ಎಕಾ ಬರ್‍ಯಾ ಡೊಕ್ಟರಾಕ್ ಮೆಳೊಂಕ್ ಚಿಂತ್ತಾಲೊ.

ದೀಸ್‌ಭರ್ ಘರಾಂತ್ ಆಸ್‌ಲ್ಲ್ಯಾ ಥಿಯೊನ್ ದನ್ಪಾರಾಂ ಜೇವ್ನ್ ಆಡ್ ಪಡ್‌ಲ್ಲೊ ಹಳ್ತಾಚಿ ನೀದ್ ಕಾಡುನ್ ಉಟ್ತಚ್ ಘರಾಂತ್ ಬೊಸೊನ್ ಇಲ್ಲಿ ಉಬ್ಗೊಣ್ ಆಯಿಲ್ಲಿಚ್ ಉಟೊನ್ ದಾವಿದಾಚಾ ಘರಾಶಿಂ ಚಲ್ಲೊ. ದಾವಿದಾಚಾ ಘರಾಂತ್ ಕಾಂಯ್ ವಿಶೇಷ್ ಬದ್ಲಾವಣ್ ಜಾಲ್ಲಿ ನಾ. ಸಗ್ಳೆಂ ತಶೆಂಚ್ ಆಸ್‌ಲ್ಲೆಂ. ಘರಾಚಿ ಚೊವ್ಕಿ, ಚೊಂವ್ಕೆಚಾ ದೆಗೆನ್ ಆಸ್ಚೊ ಸೊಪೊ, ಸೊಪ್ಯಾಚಾ ಬಗ್ಲೆಕ್ ಆಸ್ಚಿ ದಲಿ, ಆನಿ ತ್ಯಾ ಉಗ್ತ್ಯಾ ದಲಿಯೆಕ್ ಬಾಂದ್‌ಲ್ಲಿ ಮೊಡ್ಲಾಂಚಿ ತಟ್ಟಿ, ಸಗ್ಳೆಂ ಆದ್ಲೆಂಚ್. ತಾಚಿ ನದರ್ ವೊಣದಿಚೆರ್ ಗೆಲಿ. ವೊಣದಿಚೆರ್ ಆಸ್ಚೆಂ ಕಂತ್ರಾಳ್, ಆನಿ ಕಂತ್ರಾಳಾರ್ ರೇಡಿಯೊ, ಚೊವ್ಕೆಚಾ ಮಧ್ಲೊ ಲಂಕ್ಡಾಚೊ ಖಾಂಬೊ, ಮುಖ್ಲಿ ಆಲ್ತಾರ್, ಆನಿ ತ್ಯಾ ಆಲ್ತಾರೆಚೆರ್ ಖುರಿಸ್ ಆನಿ ಹೆರ್ ಇಮಾಜ್ಯೊ, ರಾಮ್, ಕಣ್ಶಿ, ವಾಂಜೆರ್, ವಾತಿ, ಆನಿ ಕ್ರಿಸ್ಮಸ್ ಗೊಟೊ ಬಾಂಧ್ತಾನಾ ಉಪ್ಕಾರ್ಚೊ ಶೆಳಿಯಾಂಚೊ ಇಮಾಜೊ. ಸಕ್ಕಡ್ ಪಯ್ಲೆಂಚೆಪರಿಂಚ್. ತೆಂಚ್ ವಾತಾವರಣ್. ತೊಚ್ ಮಾಯ್ಪಾಸ್, ವೊಣದಿಚಾ ಕೊನ್ಶಾ ಕೊನ್ಶಾಂನಿ ಆಸ್ಚಿಂ ಸಾಂತಾಂಚಿಂ ಪಾಯ್ನಾಲಾಂ. ಮರಿಯೆಚಿ ಇಮಾಜ್, ತಿಚಾ ಇಮಾಜೆಚಾ ಸಕಯ್ಲ್ ಆಸ್ಚಿಂ ಕೊಂತಾಂ ತಿಯೊಚಾ ಜಿಣ್ಯೆಂತ್ ಆಪ್ಣಾನ್ ಹೊಗ್ಡಾವ್ನ್ ಘೆತ್‌ಲ್ಲ್ಯಾ ಜಿಣ್ಯೆಚಿ ರುಜ್ವಾತ್ ದಿತಾಲಿ.

ಕಾಮಾ ಥಾವುನ್ ಆಯಿಲ್ಲೊ ದಾವಿದ್ ತಿಯೊಕ್ ಪಳೆವ್ನ್ ಸಂತೊಸ್ಲೊ. ಮೊಸ್ತ್ ವೇಳ್ ತಿಂ ಎಕಾಮೆಕಾ ಉಲವ್ನ್ ಆಸ್‌ಲ್ಲಿಂ ತರೀ ದಾವಿದಾನ್ ಚುಕೊನ್‌ಯಿ ಎಸ್ತೆಲಾ ವಿಶ್ಯಾಂತ್ ಜಾಂವ್, ಲತೀಫಾ ವಿಶ್ಯಾಂತ್ ಜಾವ್ನ್ ಖಬಾರ್ ಕಾಡ್ಲಿನಾ.

ದಾವಿದಾಚೊ ಎಕ್ಲೊ ಚೆಡೊ ಬಾರಾವಿ ಶಿಕೊನ್ ಆತಾಂ ಗೆರೆಜಿಂತ್ ಮೆಕ್ಯಾನಿಕಾಚೆಂ ಕಾಮ್ ಶಿಕ್ತಾಲೊ. ಆನಿ ಎಕ್ಲೆಂ ಚೆಡುಂ ಬಾರಾವಿ ಶೊಕೊನ್ ಶಿಂವಣೆಚೆಂ ಕಾಮ್ ಶಿಕ್ತಾಲೆಂ.

ತಿತ್ಲ್ಯಾರ್ ಎಲಿಜಾನ್ ಚಾ ಕರ್ನ್ ಹಾಡ್ಲಿ ಆನಿ ಉಪಾಯ್ ನಾಸ್ತಾಂ ತಿಯೊನ್ ತಿ ಚಾ ಪಿಯೆವ್ನ್ ಥಂಯ್ಚೊ ಪಾಟಿಂ ಯೇವ್ನ್ ಆಪ್ಲ್ಯಾ ಘರಾಕ್ ಪಾವ್ಲೊ.

ಸಾಂಜೆಚೊ ವೇಳ್ ಆನಿ ನಾಂವ್ಕ್ ಮ್ಹಣೊನ್ ತಿಯೊ ನಾಣಿಯೆಕ್ ಗೆಲ್ಲೆಪರಿಂಚ್ ಫೊನಾರ್ ಉಲವ್ನ್ ಆಸ್ಚಾ ಎಸ್ತೆಲಾನ್ ಫೊನಾಚೆಂ ರಿಸೀವರ್ ದವರ್ನ್ ಯೇವ್ನ್ ತಿಯೊಕ್ ಇಲ್ಲಿ ಚಾ ಕರ್ನ್ ದಿಲಿ ಆನಿ ತಿಯೊ ತಿಪಿಯೆತಚ್ ಭಾಯ್ರ್ ಏಕ್ ಭಂವಾಡೊ ಕಾಡ್ನ್ ಯೆವ್ಯಾಂ ಮ್ಹಣೊನ್ ಉಟ್ಲೊ. ಪಡ್ಲಾಚಾ ಮೊಳ್ಬಾಂತ್ ಎದೊಳ್‌ಚ್ ಉಜೊ ಪೆಟ್‌ಲ್ಲೊ ಆನಿ ವಾಳ್ಚಾ ವಾರ್‍ಯಾಂತ್ ಉತ್ಸಾಹ್ ಚಡ್‌ಲ್ಲೊ. ಕೊಲೆಜಿಕ್ ಗೆಲ್ಲಿಂ ಭುರ್ಗಿಂ ಎದೊಳ್ ಪಾಟಿಂ ಕಿತ್ಯಾಕ್ ಯೇಂವ್ಕ್ ನಾಂತ್ ಮ್ಹಳ್ಳೆಂ ಚಿಂತುನ್ ತಿಯೊ ತಾಚಾ ವೊಡ್ತಾಂತ್ ಎಕೊಡೊ ಭಂವಾರೊ ಕಾಡ್ತಾನಾ ತಾಚಿ ನದರ್ ಎದೊಳ್‌ಚ್ ಜಾಲ್ಲ್ಯಾ ಪ್ರಗತೆಚೆರ್ ಗೆಲಿ. ಖಂಯ್ ತಾಣೆಂ ಮಿನತ್ ಕಾಡ್ನ್ ಲಾಯಿಲ್ಲಿಂ ಆಬೊಲಿಂ ಶಿಂವ್ತಿಂ ಮೊಗ್ರಿಂ ಆನಿ ಖಂಯ್ ಆತಾಂ ಥಂಯ್ ಉದೆಲ್ಲಿಂ ನಾಂವಾಂ ನಾತ್‌ಲ್ಲಿಂ ಫುಲಾಂ. ಖಂಯ್ ತಾಣೆಂ ಆಸ್ತಾಂ ಫುಲೊನ್ ಆಸ್‌ಲ್ಲ್ಯೊ ಆನಿ ಮಾಡಾಂಕ್ ಆನಿ ಮಾಡಿಯಾಂಕ್ ರೆವ್ಡೊನ್ ಘೆತ್‌ಲ್ಲ್ಯೊ ಮಿರಿಯಾಚೊ, ಕಸ್ರಿಚೊ ವಾಲಿ ಆನಿ ಖಂಯ್ ಆತಾಂ ಎಕ್ಸುರೆ ಉಭೆ ಆಸ್ಚೆ ಮಾಡ್ ಮಾಡಿಯೊ? ಖಂಯ್ ತಿಂ ವಾರ್‍ಯಾಕ್ ಹಾಲ್ಚಿಂ ಮೊಡ್ಲಾಂ ಆನಿ ಸಗ್ಳ್ಯಾ ಮಾಡಾಂನಿ ಉದೆಲ್ಲಿಂ ಬೊಂಡುಲಾಂ ಆನಿ ಖಂಯ್ ತಾಂಬ್ಶಿಂ ಪಡೊನ್ ಆಯಿಲ್ಲಿಂ ಮೊಡ್ಲಾಂ? ತಿಯೊಚೆಂ ಕಾಳಿಜ್ ಎಕಾ ಥರಾನ್ ಪಿಗಳ್ಳೆಂ. ಪುಣ್ ತಾಕಾ ಕಿತೆಂಚ್ ಕೆಲ್ಲೆಪರಿಂ ನಾತ್‌ಲ್ಲೆಂ. ಕಾಂಯ್ ಆನಿ ಮುಖಾರ್ ತ್ಯಾ ರುಕಾಂ ಜಡಾಂಕ್ ಬರೆಂ ಕರ್ನ್ ಪೊಸ್ಯೆತ್ ತರೀ ಪಯ್ಲೆಂಚೆಪರಿಂ ಆಪ್ಣಾಲಾಗಿಂ ಆಸ್‌ಲ್ಲಿ ತಾಂಕ್ ಆತಾಂ ಖಂಡಿತ್ ನಾಂ ಮ್ಹಳ್ಳೆಂ ತಿಯೊ ಎದೊಳ್‌ಚ್ ಸಮ್ಜಾಲ್ಲೊ. ತಿಯೊಕ್ ಆತಾಂ ಆಪ್ಲೆಂ ಘರ್ ಆತಾಂ ವಡ್ಲೆಂ ದಿಸ್ತಾಲೆಂ ತರೀ ತಾಂತ್ಲೆಂ ಘರಾಣೆಂ ಲ್ಹಾಣ್ ದಿಸೊಂಕ್ ಲಾಗ್ಲೆಂ. ಘರಾ ಪಾಟ್ಲ್ಯಾನ್ ಆಸ್ಚೆಂ ಕೊಡ್ಕೆಂ ಕಶೆಂ ಆಸ್ತೆಲೆಂ ಮ್ಹಣೊನ್ ತೊ ಗೆಲ್ಲೊ ತಾಕಾ ಥಂಯ್ ಗಾಯೊ ನಾತ್‌ಲ್ಲ್ಯೊ ಪಳೆವ್ನ್ ಅಜ್ಯಾಪ್ ಜಾಲೆಂ. ಪಯ್ಲೆಂಚೆಂ ಕೊಡ್ಕೆಂ ಎದೊಳ್‌ಚ್ ನಪಂಯ್ಚ್ ಜಾಲ್ಲೆಂ. ಆನಿ ತಾಂತುಂ ಏಕ್ ಸೊಭಿತ್ ನಾಣಿಂ ಆನಿ ಖಾಕುಸ್ ಉಭೊ ಜಾಲ್ಲೊ. ಪಯ್ಲೆಂಚಾ ಕೊಡ್ಕ್ಯಾಂತ್ ಆಸ್‌ಲ್ಲೆ ಪೆಟೆ ಆತಾಂ ನಾತ್‌ಲ್ಲೆ. ಟೊಮಿ ಆನಿ ದಾಸುಚೊ ಏಕ್ ಘಡಿ ತಿಯೊನ್ ಉಡಾಸ್ ಕಾಡ್ಲೊ. ತ್ಯಾ ಕೊಡ್ಕ್ಯಾಂತ್ ಕಿತೆಂ ಸಗ್ಳೆಂ ನಾತ್‌ಲ್ಲೆಂ? ಎಕಾ ಕೊನ್ಶಾರ್ ಗೊರ್‍ವಾಂಕ್ ಖಾಂವ್ಕ್ ಭಾತೆಣ್, ತಣ್ ಆನಿ ವಾಲಿ ತರ್ ಅನ್ಯೇಕಾ ಕೊನ್ಶಾರ್ ನಾಣಿಯೆಕ್ ಗರ್ಜ್ ಪಡ್ಚಿಂ ಆಡಾರಾಂ, ಲಾಂಕುಡ್. ಅನ್ಯೇಕಾ ಕೊನ್ಶಾರ್ ಆಸ್ಚಾ ಗೊಬ್ರಾ ರಾಸಿರ್ ಟೊಮಿನ್ ಆನಿ ದಾಸುನ್ ನಿದ್ಚೆಂ ಆಸ್‌ಲ್ಲೆಂ. ಥಂಡಿಯೆಕ್ ತೆ ಪೆಟೆ ಥಂಯ್ ನಿದ್ತಾಲೆ ತರೀ ಜಾಗ್ಯಾರ್ ಏಕ್ ಖೊಲಿ ಝಡ್ಲ್ಯಾರೀ ಧಾಂವೊನ್ ಭಾಯ್ರ್ ಯೆತಾಲೆ. ಗಿಮೆಚಾ ದಿಸಾಂನಿ ತೆ ಪೆಟೆ ಘರ್ಚಾ ಮುಖ್ಲ್ಯಾನ್೦ಚ್ ನಿದ್ತಾಲೆ. ಪುಣ್ ಆತಾಂ ಘರಾಂತ್ ಖಂಚಿಂಯ್ ಜಾನ್ವಾರಾಂ ನಾತ್‌ಲ್ಲಿಂ. ತಶೆಂಚ್ ಅನ್ಯೇಕಾ ಕೊನ್ಶಾಂತ್ ಆಸ್ಚಾ ಕೊಂಕ್ಡಾ ಗುಡಾಂತ್ ಆಸ್ಚಿಂ ಕುಂಕ್ಡಾಂ, ಸಕಾಳ್ ಜಾಲೊ ಮ್ಹಣೊನ್ ಸಾದ್ ಘಾಲ್ಚೆ ಕೊಂಬೆ, ಸಗ್ಳೆಂ ತಿಯೊಕ್ ಉಡಾಸ್ ಹಾಡಿಲಾಗ್ಲೆಂ. ಕೊಡ್ಕ್ಯಾ ಭಾಯ್ರ್ ಆಸ್ಚಾ ಮೊಡ್ಕೆಂತ್ ಮಿಟಾಕ್ ಘಾಲ್ಲೆ ಆಂಬೆ ಆಸ್ತಾಲೆ. ಕಿತ್ಲೆ ಕಶ್ಟ್ ತರೀ ತಿಯೊ ಗುಡೆ ಸೊಧುನ್ ವಚೊನ್ ಕಾಟ್ ಆಂಬೆ ಜಮೊ ಕರುನ್ ಹಾಡ್ನ್ ತೆ ಮಿಟಾಕ್ ಘಾಲ್ತಾಲೊ. ಆನಿ ಪಾವ್ಸಾಂತ್ ತೆ ಪೆಜೆಸವೆಂ ತೊಂಡ್ಲಾವ್ನ್ ಜೆವ್ತಾಲೊ.

ಆತಾಂ ತಾಕಾ ಕೊಡ್ಕೆಂ ಬದ್ಲಾಲ್ಲೆಂ ದಿಸ್ಲೆಂ. ಹೀಯ್ ಏಕ್ ಪ್ರಗತಿ ಮ್ಹಣೊನ್ ತಿಯೊನ್ ಲೆಕ್ಲೆಂ. ಕಿತೆಂ ಜಾಲ್ಯಾರೀ ಆಪ್ಲ್ಯಾ ಚಿಂತ್ಪಾಕ್ ಆನಿ ಭುರ್ಗ್ಯಾಂಚಾ ಚಿಂತ್ಪಾಕ್ ಆಸ್ಚೊ ತಫಾವತ್ ತಿಯೊಕ್ ಸಮ್ಜೊಂಕ್ ಆಸ್‌ಲ್ಲೆಂ. ಹೊ ಕುಳಿಯೆ ಮಧ್ಲೊ ಅಂತರ್. ತೊ ಜಾಗ್ಯಾರ್ ಭಂವಾಡೊ ಕಾಡ್ತಾನಾ ಸಯ್ತ್ ಘರಾಂತ್ ಘಡ್ಯೆ ಘಡ್ಯೆ ಫೊನಾಚಿ ಕಾಂಪಿಣ್ ವಾಜ್ಚಿ ಆಯ್ಕಾತಾಲಿ. ಆನಿ ಎಸ್ತೆಲ್ ರಾಂದ್ಚಾಂತ್ ಮೆತೆರ್ ಜಾಲ್ಲೆಂ ಯೇವ್ನ್ ಫೊನಾಚೆರ್ ಉಲಯ್ತಾಲೆಂ. ಎಸ್ತೆಲಾಕ್ ಆತಾಂ ಬಾಂಧುನ್ ಘಾಲ್ಲೆಪರಿಂ ಜಾತಾಲೆಂ. ಪಯ್ಲೆ ಜಾಲ್ಯಾರ್ ಸದಾಂ ಸಾಂಜೆರ್ ಆಂಗಡ್ ಬಂಧ್ ಕರುನ್ ಲತೀಫ್ ಯೆತಾಲೊ ಆನಿ ಸದಾಂ ಏಕ್ ಸೊರ್‍ಯಾಚಿ ಕಾಲ್ದಿ ಬೋತ್ಲ್ ಹಾಡ್ತಾಲೊ. ತಿ ಪಿಯೆವ್ನ್ ಸವಯ್ ಜಾಲ್ಲ್ಯಾ ಎಸ್ತೆಲಾಕ್ ಆತಾಂತಾಂ ಸೊರೊ ನಾಸ್ತಾಂ ನೀದ್ ಪಡಾನಾತ್‌ಲ್ಲಿ.

ಸಾಂಜ್ ಜಾಲ್ಲಿ ಆನಿ ಕಾಳೊಕ್ ಎದೊಳ್‌ಚ್ ಪಡ್‌ಲ್ಲೊ ಆನಿ ಜಿವಿತಾ ಅಜೂನೀಂ ಕಿತ್ಯಾಕ್ ಯೇಂವ್ಕ್ ನಾ ಮ್ಹಳ್ಳೆಂ ತಿಯೊಕ್ ಸುಸ್ತಾಲೆಂ ನಾಂ.

"ಎಕಾ ತರ್ನಾಟ್ಯಾ ಚೆಡ್ವಾನ್ ಇತ್ಲೊ ವೇಳ್ ಘರಾ ಭಾಯ್ರ್ ಆಸ್ಚೆಂ ಬರೆಂಗೀ? ತೇಂಯ್ ಕಾಳೊಕ್ ಪಡೊನ್ ಆಯ್ಲೊ. ಘರಾಂತ್ ಆವಯ್ ಬಾಪುಯ್ ರಾಕೊನ್ ಆಸಾತ್ ಮ್ಹಳ್ಳಿ ಫಿಕಿರ್‌ಯ್ ನಾಂಗೀ?" ತಿಯೊಚಾ ಉತ್ರಾಂನಿ ಮಾತ್ಸೊ ಶಿಣ್ ಆಸ್ಚೊ ಪಳೆಲ್ಲ್ಯಾ ಎಸ್ತೆಲಾಕ್ ಕಿತೆಂ ಜಾಪ್ ದಿಂವ್ಚಿಂ ಮ್ಹಳ್ಳೆಂಚ್ ಕಳ್ಳೆಂನಾ.

"ಯೆತೆಲೆಂ, ಸದಾಂ ಯೆತಾನಾ ಆಜ್ ಕಿತೆಂ? ಕೊಲೆಜಿಚೆಂ ಲಿಸಾಂವ್ ಘರಾಂತ್ ಕರುಂಕ್ ಕಶ್ಟ್ ಪಡ್ತಾತ್ ದೆಖುನ್ ಇಶ್ಟಿಣ್ಯಾಸವೆಂ ಬೊಸೊನ್ ಲಿಸಾಂವ್ ಕರ್ತಾತ್" ಎಸ್ತೆಲಾನ್ ಜಿವಿತಾಚೆಂ ವಕೀಲ್ ಜಾತಾನಾಂಚ್ ಮುಖ್ಲ್ಯಾ ಗೆಟಿ ಭಾಯ್ರ್ ಕೊಣಾಚೆಂಗೀ ಬಾಯ್ಕ್ ಯೇವ್ನ್ ರಾಂವ್ಚೆಂ ತಿಯೊನ್ ಆಯ್ಕಾಲೆಂ.

ದಿಸಾಚಿಂ ಚಡಿತ್ ವೊರಾಂ ಘರಾಂತ್ ಖರ್ಚಿಲ್ಲೆವರ್ವಿಂ ತೇಂಯ್ ಭುರ್ಗಿಂ ದೊಗಾಂಯ್ ಕೊಲೆಜಿಕ್ ಗೆಲ್ಲಿಂ ಎದೊಳ್ ಪಾಟಿಂ ಯೇಂವ್ಕ್ ನಾತ್‌ಲ್ಲಿಂ ಪಳೆವ್ನ್ ತಿಯೊಚಾ ಮತಿಂತ್ ಬೆಜಾರಾಯೆಚಿಂ ಕಿಠಾಳಾಂ ಉದೆಲಿಂ. ಎದೊಳ್‌ಚ್ ಪೃಥ್ವೆಚೆರ್ ಕಾಳೊಕ್ ಪಡೊನ್ ಆಯಿಲ್ಲೊ ತರೀ ತಸೊಚ್ ತೊ ಸಗ್ಳೊ ಎಕೊಡೊ ಭಂವಾಡೊ ಕಾಡಿಲಾಗ್ಲೊ. ತಿತ್ಲ್ಯಾರ್ ಮುಖ್ಲ್ಯಾ ಗೆಟಿಲಾಗಿಂ ಏಕ್ ಬಾಯ್ಕ್ ಉಭೆಂ ಜಾಲೆಂ ಆನಿ ಹಳ್ತ್ ಕಾಳೊಕಾಂತ್ ತ್ಯಾ ಬಾಯ್ಕಾಂತ್ಲ್ಯಾನ್ ಕೋನ್೦ಗೀ ದೆಂವೊನ್ ಘರಾ ತೆವ್ಶಿನ್ ಚಲೊನ್ ಯೆಂವ್ಚೆಂ ದಿಸ್‌ಲ್ಲ್ಯಾನ್ ತಿಯೊನ್ ದೊಳೆ ವಾಟಾರ್ನ್ ಪಳೆಲೆಂ. ಆಂಗ್ಣಾಕ್ ಪಾವ್ತಾನಾ, ಘರ್ಚೊ ಉಜ್ವಾಡ್ ಸಾರ್ಕೊ ತೊಂಡಾರ್ ಪಡ್‌ಲ್ಲೊಚ್ ತಿಯೊಕ್ ಕಳ್ಳೆಂ ತೆಂ ಆಪ್ಲಿಚ್ ಧುವ್ ಮ್ಹಳ್ಳೆಂ. ಪುಣ್ ಗೆಟಿಪರ್‍ಯಾಂತ್ ಯೇವ್ನ್ ಘರಾ ಯೇನಾಸ್ತಾಂಚ್ ಪಾಟಿಂ ಗೆಲ್ಲಿಂ ಕೋಣ್ ಮ್ಹಳ್ಳೆಂ ತಿಯೊಕ್ ಸಮ್ಜಾಲೆಂ ನಾ. ಎಸ್ತೆಲಾಕ್ ಹೆಂ ಸಗ್ಳೆಂ ಕಳಿತ್ ಆಸೊನ್‌ಯಿ ಕಿತೆಂಚ್ ಕಳಿತ್ ನಾಸ್ಚೆಪರಿಂ ಕರುನ್ ಆಪ್ಲ್ಯಾ ಕಾಮಾಂತ್ ಮೆತೆರ್ ಆಸ್ಚೆಪರಿಂ ರಾವ್ಲೆಂ. "ಪಪ್ಪಾ ದಾಟ್ಟು ವೆಗ್ಗಿಂ ಯೆತಾ ಮ್ಹಣೊನ್ ಸಾಂಗ್ಲಾಂ" ಮ್ಹಣೊನ್ ಕುಡಾ ಭಿತರ್ ರಿಗೊನ್ ದಾರ್ ಧಾಂಪ್ಲೆಂ. ತಿಯೊಕ್ ಮಿಸ್ತೆರ್‌ಸೊ ಜಾಲೊ. ಕಿತ್ಯಾಕ್ ಮ್ಹಜಿಂ ಭುರ್ಗಿಂ ಮ್ಹಜೆರ್ ಪರ್ಕಿ ಅಭಿಪ್ರಾಯೆರ್ ಆಸಾತ್ ಮ್ಹಳ್ಳೆಂ ತಾಚಾ ಮತಿಕ್ ಗೆಲೆಂನಾ.

ವೊರಾಂ ಸಾಡೆ ಆಟ್ ಉತ್ರಾಲ್ಲಿಂ ತರೀ ಘರಾಂತ್ ಪಯ್ಲೆಂಚೆಪರಿಂ ಆಮೊರಿ ಜಾಂವ್, ಕಂತಾರಾಂ ಜಾಂವ್ ನಾತ್‌ಲ್ಲಿಂ ಪಳೆಲ್ಲೊ ತಿಯೊ ಘರಾಂತ್ ಕಿತೆಂ ಘಡ್ತಾ ಮ್ಹಳ್ಳೆಂಚ್ ಸಮ್ಜೊಂಕ್ ಜಾಲೆಂನಾ. ಇತ್ಲಿ ವರ್ಸಾಂ ಬಾಯ್ಲ್ ಭುರ್ಗ್ಯಾಂಕ್ ಪಳೆನಾಸ್ತಾಂ ರಾವೊನ್ ಆತಾಂ ತಾಂಕಾ ಪಳೆಂವ್ಕ್ ದೊಳೆ ಅತ್ರೆಗೊನ್ ಆಸ್ತಾನಾ ಭುರ್ಗಿಂ ದೊಳ್ಯಾಂ ಮುಖಾರ್ ನಾತ್‌ಲ್ಲೆಂ ತಿಯೊಕ್ ಸೊಸುಂಕ್ ಜಾಲೆಂನಾ. ಘರಾಂತ್ ಟಿವಿ ಚಾಲು ಆಸ್‌ಲ್ಲಿ ಆನಿ ಜಿವಿತಾ ಕುಡಾ ಥಾವುನ್ ಕಸಲೆಂಗೀ ಸಂಗೀತ್ ಆಯ್ಕತಾಲೆಂ. ಭಾಯ್ರ್ ಹೊಲಾಂತ್ ಬೊಸೊನ್ ಟಿವಿ ಪಳೆವ್ನ್ ಆಸ್ಚಾ ತಿಯೊಕ್ ಗೆಟಿ ಮುಖಾರ್ ಕೊಣೆಂಗೀ ಬಾಯ್ಕ್ ರಾವಯಿಲ್ಲೊ ಆವಾಜ್ ಆಯ್ಕಲೊ ಆನಿ ತಾಚಿ ದೀಶ್ಟ್ ಭಾಯ್ರ್ ವೆತಾನಾ ಥಂಯ್ ಸಕಾಳಿಂ ಆಪ್ಣಾಕ್ ಏರ್‌ಪೋರ್‍ಟಾಥಾವುನ್ ಘರಾ ಸೊಡ್ನ್ ಗೆಲ್ಲೊ ಲತೀಫ್ ಯೆಂವ್ಚೊ ದಿಸ್ಲೊ. ತಾಚಾ ಹಾತಾಂತ್ ಏಕ್ ಪೊತೆಂ ಆಸ್‌ಲ್ಲೆಂ ಆನಿಂ ಹಾಸೊನ್‌ಶೆಂ ಆಯಿಲ್ಲೊ ತೊ ಶೀದಾ ಘರಾ ಭಿತರ್ ಆಯ್ಲೊ ಆನಿ ಆಪ್ಲ್ಯಾ ಹಾತಾಂತ್ಲೆಂ ಪೊತೆಂ ಎಸ್ತೆಲಾಕ್ ದೀವ್ನ್ ಯೇವ್ನ್ ತಿಯೊಲಾಗಿಂ ಬೊಸ್ಲೊ.

ತಿಯೊಕ್ ಕಿತೆಂ ಉಲಂವ್ಚೆಂ ಮ್ಹಳ್ಳೆಂ ಸಮ್ಜಾಲೆಂ ನಾ. ತೊ ವೆತಾನಾ ಆಸ್ಚೆಪರಿಂ ಆತಾಂ ಲತೀಫ್ ನಾತ್‌ಲ್ಲೊ. ಜಿವಾನ್ ಫುಗೊನ್ ದಾಟೊ ಮೊಟೊ ದಿಸ್ತಾಲೊ. ಮೊವಾಲ್ಯಾಂಪರಿಂ ಲಾಂಬ್ ಕೇಸ್ ದವ್ರುನ್, ಖಡಕ್ಕ್ ಇಸ್ತ್ರೆಚೆಂ ವಸ್ತುರ್ ಘಾಲ್ನ್ ಆಯಿಲ್ಲೊ. ಪಯ್ಲೆಂಚೊ ಸಾಯ್ಕಲಾಚೊ ಲತೀಫ್ ಖಂಯ್ ಆನಿ ಆತಾಂಚೊ ಕಾರ್ ಸೊಡ್ಚೊ, ಬಾಯ್ಕ್ ಸೊಡ್ಚೊ ಲತೀಫ್ ಖಂಯ್? ತಿಯೊನ್ ಲತೀಫಾಕ್ ಹಾಸೊನ್‌ಶೆಂ ಸಾಂಗ್ಲೆಂ "ಲತೀಫ್, ತುವೆಂ ನಿಜಾಯ್ಕೀ ಮ್ಹಜೆಂ ಉತಾರ್ ದವರ್ಲೆಂಯ್ ಆನಿ ಹಾಂವೆ ಘರಾ ನಾತ್‌ಲ್ಲೆ ವೆಳಾರ್‌ಯಿ ಘರಾಕ್ ಮೊಸ್ತ್ ಆಧಾರ್ ದಿಲೊಯ್. ತುಜೊ ಉಪ್ಕಾರ್ ಕಸೊ ಬಾವ್ಡುಂ ಹಾಂವ್?"

"ತಾಂತುಂ ಕಿತೆಂ ವಿಶೇಷ್ ಆಸಾ ಅಂಕಲ್, ಹೆಂ ಮ್ಹಜೆಂಚ್ ಘರ್ ಮ್ಹಣೊನ್ ಹಾಂವೆ ಚಿಂತುನ್ ಸಗ್ಳೆಂ ಕೆಲ್ಲೆಂ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್" ಲತೀಫಾನ್ ಖಾಲ್ತೆಪಣಾಚೊ ವೇಸ್ ಪಾಂಗ್ರುನ್ ಜಾಪ್ ದಿಲಿ. ಆನಿ ಮುಖಾರುನ್ ಉಲಯ್ಲೊ "ಪುಣ್ ಗಾಂವ್ಚಾ ಲೊಕಾಕ್ ಹೆಂ ಸೊಸಾನಾ. ಹಾಂವ್ ಪರ್ಕಿ ಜಾತಿಚೊ ಮನಿಸ್ ತುಮ್ಗೆರ್ ಕಿತ್ಯಾಕ್ ಸದಾಂ ಯೆತಾಂ ಆನಿ ತುಮ್ಗೆರ್ ಖತಾಂ ಜೆವ್ತಾಂ ಮ್ಹಣೊನ್ ಉಲಯ್ತಾ. ಹಾಂವ್ ಫಕತ್ತ್ ತುಕಾ ದಿಲ್ಲ್ಯಾ ಉತ್ರಾಕ್ ಮಾತ್ರ್ ವಗೊಚ್ಚ್ ಆಸಾಂ" ಲತೀಫಾಕ್ ಉಲಂವ್ಕ್ ಹೊಚ್ ಬರೊ ಆವ್ಕಾಸ್ ಮ್ಹಣೊನ್ ಚಿಂತ್ಲೆಂ.

"ಗಾಂವ್ಚೊ ಲೋಕ್ ಕಿತೆಂಯ್ ಉಲಯ್ತಾ. ಮುಕ್ಲ್ಯಾನ್ ಪೂತ್ ಮ್ಹಣ್ತಾ ಪಾಟ್ಲ್ಯಾನ್ ಭುತ್ ಮ್ಹಣ್ತಾ. ತಾಂಚಿ ಫಿಕಿರ್ ಆಮ್ಚೆಂ ಅಂತಸ್ಕರ್ನ್ ಬರೆಂ ಆಸ್ಲ್ಯಾರ್ ಕಿತ್ಯಾಕ್ ಕರ್ಚಿ?" ತಿಯೊಚಿಂ ಉತ್ರಾಂ ಅಖೇರ್ ಜಾತಾನಾ ಎಸ್ತೆಲ್ ಎಕಾ ಕೊಪಾಂತ್ ಇಲ್ಲಿ ಮಾಸ್ಳಿ ಆನಿ ಲತೀಫ಼ಾನ್ ಹಾಡ್‌ಲ್ಲಿ ವಿಸ್ಕೆಚಿ ಬೋತ್ಲ್ ಭಾಯ್ರ್ ಹಾಡ್ನ್ ಆಯ್ಲೆಂ ಆನಿ ತಿಯೊನ್ ಹೆಂ ಕಾಂಯ್ ಆಪ್ಣಾಕ್ ಖೊಂಕುನ್ ಸಾಂಗ್ಲೆಂಗೀ ಮ್ಹಣೊನ್ ಏಕ್ ಘಡಿ ಚಿಂತುಂಕ್ ಸುರು ಕೆಲೆಂ.

ತಿಯೊಕ್ ಖಂಡಿತ್ ಜಾವ್ನ್ ಪಿಯೆವ್ನ್ ಸವಯ್ ನಾತ್‌ಲ್ಲಿ ತರೀ ಆತಾಂ ಕಸೊಯ್ ಗಾಂವಾಂತ್ ಆಸ್ತಾಂ ತೊ ಸೊರೊ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಸಮ್ಜೊಂವ್ಚಿ ಆತುರಾಯ್ ಆಯ್ಲಿ ಆನಿ ಎಸ್ತೆಲಾ ಬರಾಬರ್ ತೊಯ್ ಏಕ್ ಗ್ಲಾಸ್ ಘೇವ್ನ್ ಬೊಸ್ಲೊ. ಏಕ್ ಗ್ಲಾಸ್ ಲತೀಫಾನ್ ಘೆತ್ಲೊ.

"ತುಮ್ಕಾಂ ಸೊರೊ ಪಿಯೆಂವ್ಕ್ ಆಡ್ವಾರ್ಲಾಂ ನಂಯ್ಗೀ ಲತೀಫ್?" ತಿಯೊಚಾ ಸವಾಲಾಕ್ ಕಿತೆಂ ಜಾಪ್ ದಿಂವ್ಚಿ ಮ್ಹಳ್ಳೆಂ ಕಳಾನಾಸ್ತಾಂ ಲತೀಫ್ ಬಾವ್ಡೊ ಏಕ್ ಘಡಿ ದೊಳೆ ವಾಟಾರ್ನ್ ತಿಯೊಕ್‌ಚ್ ಪಳೆಲಾಗ್ಲೊ.

"ತುಜಾ ಸವಾಲಾಂಕ್ ತೊ ಭಿಂಯೆಂವ್ಕ್ ಆಸಾ.. ಧರ್ಮ್ ಆನಿ ಕರ್ಮ್ ಕೋಣ್ ಪಳೆತಾ. ಆಜ್‌ಕಾಲ್ ಸಗ್ಳಿಂ ಪಿಯೆತಾತ್" ಎಸ್ತೆಲಾನ್ ಫೊಣ್ಣ್ ಘಾಲ್ತಾನಾ ತೆಗಾಂಯ್ ಹಾಸ್ಲಿಂ.

ಸೊರ್‍ಯಾಚೊ ಎಕೇಕ್ ಘೊಟ್ ತಿಯೊಚಾ ಪೊಟಾಂತ್ ಗೆಲ್ಲೊಚ್ ತಾಚಿ ತಕ್ಲಿ ಪಿಸಾಂತುರ್ ಜಾವ್ನ್ ಆಯ್ಲಿ. ವೊರಾಂ ಭರ್ತಿ ಸಾಡೆ ನೋವ್ ಜಾಲ್ಲಿಂ ತರೀ ಜೊಯೆಲ್ ಅಜೂನೀಂ ಯೇಂವ್ಕ್ ನಾತ್‌ಲ್ಲೊ ಪಳೆವ್ನ್ ತಿಯೊಸೊ ರಾಗ್ ಮಸ್ತಕಾಕ್ ಚಡ್ಲೊ.

ಜಿಣ್ಯೆಂತ್ ಪಯ್ಲೆ ಪಾವ್ಟಿಂ ಪಿಯೆಲ್ಲೊ ದೆಖುನ್ ಆತಾಂ ತಿಯೊಚಾ ತಕ್ಲೆಚೆರ್ ಆಮಾಲ್ ಹಳ್ತಾರ್ ಚಡೊನ್ ಯೆತಾಲೆಂ ದೆಖುನ್ ತಕ್ಲಿಯ್ ಘುಂವೊಂಕ್ ಲಾಗ್ಲಿ. ವೊರಾಂ ಎದೊಳ್‌ಚ್ ಧಾ ಉತ್ರಾಲ್ಲಿಂ ತರೀ ಪೂತ್ ಅಜೂನ್ ಯೇಂವ್ಕ್ ನಾತ್‌ಲ್ಲೊ ಪಳೆವ್ನ್ ತಾಚಾ ತೊಂಡಾರ್ ಥಾವ್ನ್ ರಾಗಾಚೆಂ ಉತ್ರಾಂ ಆಯ್ಲಿಂ. ಎಸ್ತೆಲಾಕ್ ತಾಣೆ ಏಕ್ ದೋನ್ ಪಾವ್ಟಿಂ ತಾಳೊ ಉಭಾರ್ನ್ "ಎಸ್ತೆಲಾ ಖಂಯ್ ಗೆಲಾ ತುಜೊ ಪೂತ್? ರಾತ್ ಜೂನ್ ಜಾವ್ನ್ ಆಯ್ಲಿ ತರೀ ಘರಾ ಪಾಟಿಂ ಯೇಂವ್ಚಿ ಫಿಕಿರ್ ತಾಕಾ ನಾಂ? ತ್ಯಾ ಭಾಯ್ರ್ ಹಾಂವೆ ತಾಕಾ ಏಕ್ ದೀಶ್ಟ್ ಸಯ್ತ್ ಲಾಂವ್ಕ್ ನಾ ಅಜೂನ್".

ಎಸ್ತೆಲಾಚಾ ತಕ್ಲೆರ್‌ಯಿ ದೆಂವ್ಚಾರ್ ಆಸ್‌ಲ್ಲೊ ಆತಾಂ ಸೊರ್‍ಯಾಸವೆಂ ಉಚಾಂಬಳ್ ಜಾಲೊ. "ತುಂ ಕಿತೆಂ ಘಡ್ಯೆ ಘಡ್ಯೆ ತುಜೊ ಪೂತ್ ತುಜೊ ಪೂತ್ ಮ್ಹಣೊನ್ ವಿಚಾರ್ತಾಯ್? ಮ್ಹಜೊ ತೊ ಪೂತ್ ತರ್ ತುಕಾ ಕಿತೆಂ ಲೆಕ್ತಾ? ಹಾಂವೆ ತಾಕಾ ಘರಾ ಭಾಯ್ರ್ ರಾವ್ ಮ್ಹಣೊನ್ ಸಾಂಗ್ಲಾಂಗೀ? ಕಿತ್ಯಾಕ್ ಯೇಂವ್ಕ್ ನಾ ಮ್ಹಣೊನ್ ತುಂಚ್ ವಿಚಾರ್. ತುಂ ತಾಚೊ ಬಾಪುಯ್ ನಂಯ್ಗಿ? ಮ್ಹಜೆಲಾಗಿಂ ಕಿತ್ಯಾಕ್ ತುಂ ತಕ್ಲಿ ಖಾತಾಯ್?"

ಪಯ್ಲೆಂಚೊ ತಿಯೊ ತರ್ ಅಸಲೆಂ ಉಲವ್ಣೆಂ ಜಾತಾನಾ ಶಾಂತ್ ಆಸ್ತಾಲೊ. ಪುಣ್ ಆತಾಂ ತಾಚಾ ರಗ್ತಾಚೆಂ ವತ್ತಡ್ ಆನಿ ತ್ಯಾ ಶಿವಾಯ್ ಆತಾ೦ ತಾಂಚಾ ತಕ್ಲೆರ್ ಸಾತ್ ಶಿಂಗಾಚೊ ಸಯ್ತಾನ್ ಭೊಸೊನ್ ಆಸ್ತಾನಾ ತೊ ರಾಗಾನ್ ಪೆಟ್ಲೊ. ಆನಿ ಹಾಂಚೆಂ ಉಲವ್ಣೆಂ ಹಳ್ತಾಚೆಂ ಝಗ್ಡೆಂ ಜಾಂವ್ಕ್ ಪಾವ್ಲೆಂ.

ಸದಾಂ ಆಪ್ಲ್ಯಾ ಸಾಂಗಾತ್ಯಾಸವೆಂ ವೇಳ್ ಖರ್ಚುಂಚಾ ಜೊಯೆಲಾಕ್ ಹರ್ಶೆಂಚೆಪರಿಂ ತ್ಯಾ ಕೊಲೆಜಿ ಮುಖಾರ್ ಆಸ್ಚಾ ದೋನ್ ಖಡ್ಪಾ ಫಾತ್ರಾಮುಳಾಂತ್ ಬಸೊನ್ ಉಲಯ್ತಾನಾ ಸಾಂಗಾತ್ಯಾಂನಿ ದಿಲ್ಲಿ ಸಿಗ್ರೆಟ್ ವೋಡ್ನ್ ಸವಯ್ ಜಾಲ್ಲಿ. ಗಾಂಜಾ ಭರ್‌ಲ್ಲಿ ತಿ ಸಿಗ್ರೆಟ್ ಆತಾಂ ನಾಸ್ತಾಂ ತಾಕಾ ದೀಸ್ ಕಾಡುಂಕ್ ಕಶ್ಟ್ ಜಾಲ್ಲೆ. ತಿ ಸಿಗ್ರೆಟ್ ವೊಡ್ತಚ್ ತೊ ಕಿತೆಂ ಕರ್ತಾ ಮ್ಹಳ್ಳೆಂ ತಾಕಾಚ್ ಕಳಾನಾತ್‌ಲ್ಲೆಂ. ಜಿವಿತಾ ಹ್ಯಾ ಖಂಚಾಯ್ ಸಂಗ್ತ್ಯಾಂಕ್ ಆನಿಂ ಆಪ್ಣಾಕ್ ಕಾಂಯ್ ಸಂಭಂಧ್ ನಾ ಮ್ಹಳ್ಳೆಪರಿಂ ಆಪ್ಲ್ಯಾ ಕುಡಾಂತ್ ಬೊಸೊನ್ ಫ಼ೊನಾರ್ ಉಲಯ್ತಾಲೆಂ. ತಾಚಾ ಕುಡಾಂತ್ ಸಂಗೀತಾಚೊ ಆವಾಜ್ ಜೊರಾನ್ ಆಯ್ಕತಾಲೊ ದೆಖುನ್ ತಾಕಾ ಭಾಯ್ಲ್ಯಾ ಸಂಸಾರಾಚಿ ಖಬಾರ್‌ಚ್ ನಾತ್‌ಲ್ಲಿ.

ಅಶೆಂ ತಿಂ ಉಲವ್ನ್ ಆಸ್ತಾಂ ಭಾಯ್ರ್ ಎಕಾ ಬಾಯ್ಕಾಚೊ ಆವಾಜ್ ಆಯ್ಕಾಲೊ, ಕಶೆಂಯ್ ಜೊಯೆಲ್ ಆಪ್ಲೆಂ ಬಾಯ್ಕ್ ಘೆವ್ನ್ ಆಂಗ್ಣಾಕ್ ಪಾವ್ಲೊಚ್. ಘರಾ ಪಾವ್‌ಲ್ಲೊಚ್ ತೊ ಕಿತೆಂ ಪಳೆತಾ? ಪಿಯೆವ್ನ್ ಟಾಯ್ಟ್ ಜಾಲ್ಲ್ಯಾ ಆವಯ್ ಸವೆಂ ಝಗ್ಡೆಂ ಕರ್ಚೊ ಬಾಪುಯ್. ತಾಚಾ ಮಾತ್ಯಾರ್‌ಯ್ ಆಮಾಲ್ ಆಸ್‌ಲ್ಲೆಂ ಆನಿ ಭಿತರ್ ಯೇವ್ನ್ ಬಾಪಾಯ್ಕ್ ರಾಗಾಚಿ ನದರ್ ಘಾಲ್ಚಾ ಜೊಯೆಲಾಕ್ ಪಳೆಲ್ಲೊ ತಿಯೊಚೊ ರಾಗ್ ಮಸ್ತಕಾಕ್ ಚಡ್ಲೊ. ತ್ಯಾ ಶಿವಾಯ್ ತಿಯೊಚಾ ತಕ್ಲೆರ್ ಆಮಾಲ್ ಆಸ್‌ಲ್ಲೆಂ ತರೀ ತಾಕಾ ಜೊಯೆಲ್ ಆಮಾಲಾರ್ ಆಸ್ಚೆಂ ಪಳೆಂವ್ಕ್ ಸೊಸಾನಾ ಜಾಲೆಂ. ಪಯ್ಲೆಂಚ್ ವೇಳ್ ಜಾಲೊ ಆನಿ ತ್ಯಾ ಭಾಯ್ರ್ ಪಿಯೆಂವ್ನ್ ಆಯ್ಲಾ? ತೊ ಉಟ್ಲೊ ಆನಿ ಆಪ್ಲ್ಯಾ ಭುರ್ಗ್ಯಾ೦ಕ್ ವೋಡ್ನ್ ವೇಂಗ್ ಮರ್‍ಚಾ ತ್ಯಾ ಹಾತಾಂನಿ ಏಕ್ ಹಾತ್ ಉಕಲ್ನ್ ಜೊಯೆಲಾಚಾ ಕಾನ್ಸುಲಾಕ್ ಮಾರ್ಲೊ ಆನಿ ಆಪ್ಲೆಂ ಸ್ಥಿಮಿತ್ ಚುಕೊನ್ ಥಂಯ್ಚ್ ಗಳ್ಳೊ.

ಧರ್ಣಿರ್ ಗಳ್‌ಲ್ಲ್ಯಾ ತಿಯೊಕ್ ಉಕಲ್ನ್ ಲತೀಫಾನ್ ತಾಚಾ ಕುಡಾ ಪರ್ಯಾಂತ್ ಉಕ್ಲುನ್ ವೆಲೊ ಆನಿಂ ತಿಯೊಕ್ ನಿದಾಯ್ಲೊ ಆನಿಂ ಚಡ್ತಿಕ್ ಕಾಂಯ್ ಉಲಯ್ನಾಸ್ತಾಂ ಆಪ್ಲೆಂ ಬಾಯ್ಕ್ ಚಾಲುಕರುನ್ ಥಂಯ್ಚೊ ನಿಕಾಳ್ಳೊ.

ಅಶೆಂ ಆಮಾಲ್ ತಕ್ಲೆರ್ ಚಡೊನ್ ಆಸ್ಚೆಂ ಎಸ್ತೆಲ್ ರಾಂದ್‌ಲ್ಲೆಂ ಜೆವಾಣ್ ಕೊಣೀಂ ಜೆವ್ಲಿಂ ನಾಂತ್ ಮ್ಹಳ್ಳೆಂ ಸಮ್ಜೊನ್ ತಾಕಾಯ್ ಜೇಂವ್ಕ್ ಜಾಯ್ನಾಸ್ತಾಂಚ್ ಯೇವ್ನ್ ಖಾಟಿರ್ ಆಡ್ ಪಡ್ಲೆಂ.

ಪಾಟ್ಲ್ಯಾ ಸಭಾರ್ ವರ್ಸಾಂ ಥಾವುನ್ ಆಪ್ಲ್ಯಾ ವಕ್ತಾಂ ವರ್ವಿಂ ಕಿತೆಂಚ್ಚ್ ವಿಶೇಷ್ ಘಡೊಂಕ್ ನಾತ್‌ಲ್ಲೆಂ ತರೀ ಚಡ್ ಚಲೊಂಕ್ ಸಯ್ತ್ ಆತಾಂ ತಿಯೊಕ್ ಕಶ್ಟ್ ಜಾತಾಲೆ. ಜಿವಾಂತ್ ಜಡಾಯ್ ಚಡ್‌ಲ್ಲಿ. ಗಲ್ಫಾಚಾ ಖಾಣಾಂತ್ ಆಸ್ಚಿ ಚರಬ್ ಎದೊಳ್‌ಚ್ ತಿಯೊಚಾ ಕುಡಿಂತ್ ಭರ್‌ಲ್ಲಿ. ತ್ಯಾ ಶಿವಾಯ್ ಗಾಂವಾತ್ ಆಸ್ತಾನಾ ಜಾಲ್ಯಾರ್ ತಾಕಾ ಕೊಣಾಯ್ಚಾಯ್ ಹಂಗಾರ್ ಯಾ ಭಿಂಯಾನ್ ಜಿಯೆಜಾಯ್ ಮ್ಹಣೊನ್ ನಾತ್‌ಲ್ಲೆವರ್ವಿಂ ತೊ ಬೇಫಿಕಿರೆನ್ ಆಸ್‌ಲ್ಲೊ. ಪುಣ್ ಆತಾಂ ಗಲ್ಫಾಂತ್ ತೆ ದೀಸ್ ತಾಣೆಂ ಹೊಗ್ಡಾಯಿಲ್ಲೆ.

ಹಾಚೊ ಪರಿಣಾಮ್ ಜಾವ್ನ್ ಸಭಾರ್ ಪಾವ್ಟಿಂ ತೊ ಉದ್ರೇಕ್ ಜಾತಾಲೊ. ಥೊಡೆ ಪಾವ್ಟಿಂ ತಾಚಾ ಕಾಳ್ಜಾಂತ್ ದೂಕ್ ಭರ್‌ಲ್ಲಿಯ್ ಆಸಾ. ಪುಣ್ ಕಾಂಯ್ ಗ್ಯಾಸಾಂತ್ ಜಾಯ್ಜಯ್ ಮ್ಹಣೊನ್ ತೊ ಸಮ್ಜಾತಾಲೊ. ಆತಾಂ ಗಾಂವಾಕ್ ಇತ್ಲ್ಯಾ ತೆಂಪಾ ಉಪ್ರಾಂತ್ ಯೇಂವ್ನ್‌ಯಿ ತಾಕಾ ತಾಚಾ ಮತಿಂತ್ ಆಸ್ಚೆಪರಿಂ ಘಡೊಂಕ್ ನಾತ್‌ಲ್ಲೆಂ ನಿಹಾಳ್ತಾನಾ ತಾಕಾ ತಾಚಾ ಜಿಣ್ಯೆಂತ್ ತೊ ಖಂಯ್ಸರ್‌ಗೀ ವಾಟ್ ಚುಕ್ಲಾ ಮ್ಹಳ್ಳೆಂ ಚಿಂತಾಪ್ ಯೆತಾಲೆಂ.

ತಾಣೆಂ ತಾಚಿ ಜಿಣಿಂ ಪಳೆಯಿಲ್ಲಿ ರೀತ್ ಆನಿ ತಾಚಾ ಕುಟ್ಮಾಚಾಂನಿ ಪಳೆಯಿಲ್ಲಿ ರೀತ್ ವೆಗ್ಳಿ ಜಾಲ್ಲೆವರ್ವಿಂ ಜಾಯ್ಜಯ್ ತಿಯೊಚೆಂ ಯೆಣೆಂ ಎಕಾ ಲೆಖಾರ್ ನವ್ಯಾ ಮನ್ಶಾನ್ ಆಯಿಲ್ಲೊ ಸಂತೊಸ್ ಹಾಡಿಲಾಗ್ಲೊ ತರೀ ಎದೊಳ್ ತಿಯೊ ಶಿವಾಯ್ ದೀಸ್ ಕಾಡ್ತಾನಾ ಕೊಣಾಕೀ ಆಪ್ಲೆಂ ಸ್ವಾತಂತ್ರ್ ಮ್ಹಳ್ಳೆಂ ಆಡಾಂವ್ಕ್ ಕೊಣೀಂ ನಾತ್‌ಲ್ಲ್ಯಾನ್ ತಾಂಚಾ ಖುಶೆ ಪ್ರಕಾರ್, ತಾಂಚಾ ಚಿಂತ್ಪಾ ಪ್ರಕಾರ್ ಕರ್‍ಯೆತ್ ಜಾಲ್ಲೆಂ. ಪುಣ್ ಆತಾಂ ತಿಯೊ ಪಾಟಿಂ ಯೆತೆಚ್ ತಾಕಾ ಕಿತೆಂ ಕರುಂಕ್‌ಯಿ ಜಾಲೆಂನಾ. ಭುರ್ಗಿಂ ವಡ್ ಜಾಲ್ಯಾಂತ್ ದೆಖುನ್ ತಾಂಕಾ ಹಾತ್ ಉಬಾರುಂಕ್ ಜಾಯ್ನಾ. ತ್ಯಾ ಶಿವಾಯ್ ಭುರ್ಗಿಂ ಸಮ್ಜೊಂಕ್ ಸಕಾನಾಂತ್. ತಿಯೊ ಯೆತಾನಾ ಭಾಂಗಾರ್ ಮೊತ್ಯಾಂ ಹಾಡ್ತಲೊ ಮ್ಹಳ್ಳೆಂ ಲೇಕ್ ಘಾಲ್ನ್ ಆಸ್‌ಲ್ಲ್ಯಾ ಸಗ್ಳ್ಯಾಂಕ್ ನಿರಾಶಾ ಜರೂರ್ ಜಾಲ್ಲಿ ಜಾಯ್ಜಯ್. ಹೆಂ ಸಗ್ಳೆಂ ತಿಯೊಕ್ ಸಮ್ಜೊಂಕ್ ಚಡ್ ವೇಳ್ ಲಾಗ್ಲೊನಾ.

ಮುಂದರ್‍ಸಿಲಾಂ...

Tags: Vally Quadras,e konkani novel, Konkani, Mangalore, Mangalorean, Mother Tongue

From around the world

ಪಾಟಿಂ ಗಾಂವಾಕ್ - ಅವಸ್ವರ್ 24

Post your comments

ಅವಸ್ವರ್ 1

ಅವಸ್ವರ್ 2

ಅವಸ್ವರ್ 3

ಅವಸ್ವರ್ 4

ಅವಸ್ವರ್ 5

ಅವಸ್ವರ್ 6

ಅವಸ್ವರ್ 7

ಅವಸ್ವರ್ 8

ಅವಸ್ವರ್ 9

ಅವಸ್ವರ್ 10

ಅವಸ್ವರ್ 11

ಅವಸ್ವರ್ 12

ಅವಸ್ವರ್ 13

ಅವಸ್ವರ್ 14

ಅವಸ್ವರ್ 15

ಅವಸ್ವರ್ 16

ಅವಸ್ವರ್ 17

ಅವಸ್ವರ್ 18

ಅವಸ್ವರ್ 19

ಅವಸ್ವರ್ 20

ಅವಸ್ವರ್ 21

ಅವಸ್ವರ್ 22

ಅವಸ್ವರ್ 23

ಅವಸ್ವರ್ 24

ಅವಸ್ವರ್ 25

ಅವಸ್ವರ್ 26

ಅವಸ್ವರ್ 27

ಅವಸ್ವರ್ 28

Connect

Our Address
Mangalore

Our Address
Udupi

Our Address
Dubai

From around the world

Post your comments

Connect

Our AddressMangalore

Our AddressUdupi

Our AddressDubai

Our Address
Mangalore

Our Address
Udupi

Our Address
Dubai