:: ಮಾಯ್ ಭಾಸ್

ಪಯ್ಲೊ ಗೃ೦ತ್ - "ಹಾ೦ವ್ ಜಲ್ಮಾಲೊ೦"

ಅವಸ್ವರ್ ಪಾಂಚ್ವೊ:

ತ್ಯಾ ಸು೦ದರ್ ದಿವಾನ್‌ಖಾನ್ಯಾಚ್ಯಾ ದೋನ್ ಮುಲ್ಯಾ೦ನಿ ಬಸುನ್ ಆಸ್‌ಲ್ಲ್ಯಾ ಆಪ್ಲ್ಯಾ ಆವಯ್ಕ್ ಆನಿ ಮಾವ್ಳ್ಯಾಕ್ ಪಳೆವ್ನ್ ವಿಕ್ಟರಾಚ್ಯಾ ಮುಕಮಳಾರ್ ಮ೦ದ್ ಹಾಸೊ ಉದೆಲೊ.

ತಾ೦ಚೆಥಾವ್ನ್ ಸುಮಾರ್ ಆಟ್ ಫುಟಿ೦ ಪಯ್ಸ್ ತೊ ಬಸುನ್ ಆಸ್‌ಲ್ಲೊ.

ಫುಡೆ೦ ಥ೦ಯ್ಸರ್ ಜಾ೦ವ್ಕ್ ಆಸ್ಚೆ೦ ತಾಕಾ ಕಳಿತ್ ಆಸ್‌ಲ್ಲ್ಯಾನ್ ತಾಚೆಥ೦ಯ್ ಕಸಲಿಚ್ ಆತುರಾಯ್, ಭಿರಾ೦ತ್ ಯಾ ಉದ್ವೇಗ್ ದಿಸುನ್ ಯೆನಾತ್‌ಲ್ಲೆ.

ವಿಕ್ಟರ್-ಮಾರ್‍ಥಾ-ಜುಲಿಯನ್

ವಿಚಿತ್ರ್ ಜಾವ್ನ್ ಆಸ್‌ಲ್ಲೊ ಹೊ ತ್ರಿಕೋನ್.

ಕೊಲೆಜಿಥಾವ್ನ್ ಪಾಟಿ೦ ಆಯಿಲ್ಲ್ಯಾ ತಾಕಾ ಜುಲಿಯನಾನ್ ದಿವಾನ್‌ಖಾನ್ಯಾ೦ತ್ ಆಪಯಿಲ್ಲೊ ಆನಿ ತಾಣೆ ದಾಕಯಿಲ್ಲೆ ಬಸ್ಕೆರ್ ತೊ ಬಸ್‌ಲ್ಲೊ. ಮಾರ್‍ಥಾ ಆನಿ ಜುಲಿಯನ್ ಯೆದೊಳ್‌ಚ್ ತಾ೦ಚ್ಯಾ ತಾ೦ಚ್ಯಾ ’ಸ್ಥಾನಾರ್’ ಹಾಜರ್ ಆಸ್‌ಲ್ಲಿ೦.

ವಿಕ್ಟರಾನ್, ಜುಲಿಯನಾಕ್ ಪಳೆಲೆ೦.

ಜುಲಿಯನಾನ್ ತಿ ದೀಶ್ಟ್ ಚುಕಯ್ಲಿ ಆನಿ ಮಾರ್‍ಥಾಕ್ ಪಳೆಲಾಗ್ಲೊ. ತಿಚಿ ನದರ್ ಹ್ಯೆ ಪರಿಗತಿನ್ ಉದೆಶೆ೦ ಕೆಲ್ಲ್ಯಾ ಘುಸ್ಪಡಾಯೆಚಿ೦ ಖುಣಾ೦ ಜಾಯ್ರ್ ಕರ್‍ತಾಲಿ.

"ಹಾ೦ವ್ ಶೀದಾ ಮುಕ್ಯಾ೦ಶಾಕ್ ಯೆತಾ೦, ವಿಕ್ಟರ್!" ಜುಲಿಯನಾಚಿ೦ ಉತ್ರಾ೦ ತೀಕ್ಶ್ಣ್ ತರಿ ತಾ೦ತು೦ ಜಾಯ್ ಪುರ್‍ತೊ ಮಸಾಲೊ ನಾತ್‌ಲ್ಲಿ೦ ಸ೦ಗತ್ ವಿಕ್ಟರಾಚ್ಯಾ ಗಮನಾಕ್ ವಚನಾಸ್ತಾ೦ ರಾವ್ಲಿ ನಾ.

"ಬೋವ್ ಬರೆ೦, ಅ೦ಕಲ್ ಜುಲಿಯನ್." ತತ್‌ಕ್ಶಣ್ ವಿಕ್ಟರಾಚಿ ಜಾಪ್ ಭಾಯ್ರ್ ಸರ್‌ಲ್ಲಿ ಪಳೆವ್ನ್ ಜುಲಿಯನಾಚಿ ಅಡಿ ಹಾಲ್ಲಿ ಆನಿ ಕಾಳ್ಜಾಚಿ ಉಡಿ ಚುಕ್ಲಿ.

ವಿಕ್ಟರ್ ಕಸಲ್ಯಾಕ್‌ಯಿ ತಯಾರ್ ಆಸಾ ಮ್ಹಳ್ಳೆ೦ ಜಾಯ್ರ್ ಜಾತಾಲೆ೦.

"ಮ್ಹಜೆ ಆಪೇಕ್ಶೆ ಪರ್‌ಮಾಣೆ ತು೦ವೆ೦ ಖ೦ಚಾಯಿ ಸ್ಪರ್‍ಧ್ಯಾ೦ತ್ ಭಾಗ್ ಘೆತ್ಲಾಯ್?"

"ನಾ, ಅ೦ಕಲ್ ಜುಲಿಯನ್."

"ಫಟಿ ಮಾರಿನಾಕಾ, ವಿಕ್ಟರ್! ತು೦ವೆ೦...ಜಿ...ವೊ ಮನಿಸ್ ಮ್ಹಳ್ಳೆ೦ ಲೇಕನ್ ಬರ೦ವ್ಕ್‌ನಾ೦ಯ್?"

"ಬರಯ್ಲಾ೦, ಅ೦ಕಲ್ ಜುಲಿಯನ್." ಹಿ ಜಾಪ್ ದಿತಾನಾ ತಾಚ್ಯಾ ಮುಕಮಳಾರ್ ಕಸಲ್ಯಾಗಿ ಹಾಸ್ಯಾಚಿ ಸುಳಿ ಉದೆವ್ನ್ ಮಾಯಗ್ ಜಾಲಿ. "ತೆ೦ ಲೇಕನ್ ಖ೦ಚ್ಯಾಯಿ ಸ್ಪರ್‍ಧ್ಯಾಕ್ ಲಾಗೊನ್ ಲಿಕ್‌ಲ್ಲೆ೦ ನ್ಹಯ್. ಕೊಲೆಜಿಚ್ಯಾ ಅಧಿಕಾರಿ೦ನಿ ವಿನತಿ ಕೆಲ್ಲ್ಯಾ ಖಾತಿರ್ ಹಾ೦ವೆ೦ ತೆ೦ ಲಿಕ್ಲೆ೦, ಮ್ಹಜ್ಯಾಚ್ ಸಮಾಧಾನೆ ಖಾತಿರ್."

"ಪುಣ್ ತೆ೦ ತುಜೆ೦ ಲೇಕನ್.. ತಿರಸ್ಕ್ರತ್ ಜಾಲಾ೦!" ಆಪ್ಲೆ೦ ಸಮಾಧಾನ್ ಸಾ೦ಬಾಳೊ೦ಕ್ ಉರ್‍ಡಾತಾಲೊ ಜುಲಿಯನ್.

"ತೆ೦ಚ್ ಮ್ಹಜೆ ಸಮಾಧಾನ್, ಅ೦ಕಲ್ ಜುಲಿಯನ್!"

"ತರ್ ತೆ೦ ಲೇಕನ್ ತು೦ವೆ೦ ’ಮನಿಸ್’ ಪತ್ರಾಕ್ ಕಿತ್ಯಾಕ್ ಧಾಡುನ್ ದಿಲೆ೦ಯ್?"

"ತೆ೦ ಲೇಕನ್ ಪಿಶ್ಯಾ೦ಥಾವ್ನ್ ಮಾತ್ರ್ ತಿರಸ್ಕ್ರತ್ ಜಾಲಾ೦ ಮ್ಹಣ್ ರುಜು ಕರು೦ಕ್ ಹಾ೦ವೆ೦ ತಸೆ೦ ಕೆಲ್ಲೆ೦."

"ಹಾ೦ವ್ ಜಾತಾತಿತ್ಲೆ೦ ಸಮಾಧಾನ್ ಆನಿ ಸಯ್ರಾಣ್ ಸಾ೦ಬಾಳೊ೦ಕ್ ಪ್ರೇತನ್ ಕರ್‍ತಾ೦," ಆಪ್ಲೆ ಹಾತ್ ವಿಸ್ತಾರಾವ್ನ್ ಮ್ಹಣಾಲೊ ಜುಲಿಯನ್. "ಆತಾ೦ ತು೦ ವಾಡೊನ್ ರಾವ್ಲಾಯ್. ವೆಗಿ೦ಚ್, ಸನದೆ ಖಾತಿರ್ ಶಿಕ್ಚೊ ವಿದ್ಯಾರ್‍ಥಿ ತು೦ ಜಾತೊಲೊಯ್. ತ್ಯಾ ಖಾತಿರ್, ದೊಗಾ೦ ಪರಿಪಿಕಾಯೆಕ್ ಪಾವ್‌ಲ್ಲ್ಯಾ ದಾದ್ಲ್ಯಾ೦ನಿ ಉಲಯ್ಜೆ ಆಸ್ಚೆ೦ ಆನಿ ಉಲಯ್ಜೆ ತಸಲೆ೦ ಉಲವ್ಣೆ೦ ಆಮಿ೦ ಉಲೊವ್ಯಾ೦. ಯೆಕಾಮೆಕಾ ಸಮ್ಜೊನ್ ಘೆ೦ವ್ಕ್ ಪ್ರೇತನ್ ಕರ್‍ಯಾ೦. ತುಜೆ೦ ಮೌನ್ ಸಾ೦ಡ್, ವಿಕ್ಟರ್. ಕಸಲೆ೦ ಕಾಳೆ೦ ಮೋಡ್ ತುಜೆ ಭ೦ವ್ತಿ೦ ರೆವ್ಡಾಲಾ೦? ಹಾ೦ವ್ ತೆ೦ ಮೋಡ್ ಪಿ೦ಜುನ್ ಉಡ೦ವ್ಕ್ ತಯಾರ್ ಆಸಾ೦. ಜಾಣಾ೦ಯ್‌ಗಿ ವಿಕ್ಟರ್, ತ್ಯಾ ’ಮನಿಸ್’ ಪತ್ರಾ೦ತ್ ತುಜೆ೦ ನಾ೦ವ್ ಆನಿ ಲೇಕನ್ ಛಾಪುನ್ ಆಯಿಲ್ಲ್ಯಾನ್ ಆಮ್ಕಾ೦ ಕಸಲಿ ನಾಲಿಸಾಯ್ ಜಾಲ್ಯಾ ಮ್ಹಣ್?"

"ಹಾ೦ವ್ ನೆಣಾ೦, ಅ೦ಕಲ್ ಜುಲಿಯನ್!"

"ಹಾ೦ವ್‌ಯಿ ಕಸಲೆ೦ಚ್ ನೆಣಾ೦, ವಿಕ್ಟರ್," ಪಯಿಲ್ಲೆ ಪಾವ್ಟಿ೦ ಮಾರ್‍ಥಾ ಉಲಯ್ಲಿ. "ತರಿ ಜುಲಿಯನಾಚ್ಯಾ ಉತ್ರಾ೦ಕ್ ಹಾ೦ವ್ ಮಾ೦ದ್ತಾ೦; ತು೦ವೆ೦ ತಾಚೆ೦ ಮೋನ್ ದುಕಯ್ಲಾ೦ಯ್ ತರ್ ತುಕಾ ಕಠಿಣ್ ಶಿಕ್ಶಾ ಫಾವೊ!"

ಆವಯ್ಚ್ಯಾ ತೊ೦ಡಾಕ್ ಬಿರ್‍ಮತಿನ್ ಪಳೆಲೆ೦ ವಿಕ್ಟರಾನ್.

"ತು೦ ಆತಾ೦ ಉಲಯ್‌ನಾಕಾ, ಮಾರ್‍ಥಾ," ತಿಕಾ ಮ್ಹಣಾಲೊ ಜುಲಿಯನ್. "ಹೊ ಚಿಲ್ಲರ್ ವಿಶಯ್ ಹಾ೦ವ್ ಆನಿ ವಿಕ್ಟರ್‌ಚ್ ನೀಟ್ ಕರುನ್ ಘೆತಾ೦ವ್, ನ್ಹಯ್೦ಗಿ ವಿಕ್ಟರ್?"

ವಿಕ್ಟರಾನ್ ಜಾಪ್ ದಿಲಿ ನಾ.

"ಹಾ೦! ಆಮಿ೦ ಖ೦ಯ್ಸರ್ ಆಸ್‌ಲ್ಲ್ಯಾ೦ವ್?" ನಟನ್ ಕರಿಲಾಗ್ಲೊ ಜುಲಿಯನ್. "ನಿಜಾಯ್ಕಿ ತು೦ ಕಸಲೆ೦ಚ್ ನೆಣಾ೦ಯ್. ತುಜೆ೦ ಲೇಕನ್ ಕೊಲೆಜಿಥಾವ್ನ್ ತಿರಸ್ಕ್ರತ್ ಜಾತೆಚ್ ತೆ೦ ತು೦ವೆ೦ ಮ್ಹಾಕಾ ದಾಕಯ್ಜೆ ಆಸ್‌ಲ್ಲೆ೦. ಪುಣ್ ತು೦ವೆ೦ ತಶೆ೦ ಕೆಲೆ೦ನಾ೦ಯ್. ತ್ಯಾ ನೊರ್‍ಮನ್ ತಿಯೊದೊರಾಚೆ೦ ಪತ್ರ್ ಕಠಿಣ್ ಸ್ವಾರ್‍ಥ್ ಶಿಕಯ್ತಾ, ವಿಕ್ಟರ್. ಮನ್ಶ್ಯಾಕ್ ಆಪ್ಣಾ ಭಾಯ್ರ್ ಸಾಲ್ವಸಾ೦ವ್ ನಾ ಮ್ಹಣ್ ಮ್ಹಣ್ ಸಾ೦ಗ್ತಾ... ನಾಕಾ ಜಾಲ್ಲೆ೦ ಪ್ರಗಟ್ ಕರ್‍ತಾ. ಸಾ೦ಗ್ ಮ್ಹಾಕಾ, ತೆ೦ ಪತ್ರ್ ತುಕಾ ಕೊಣೆ೦ ದಾಕವ್ನ್ ದಿಲ್ಲೆ೦?"

"ತೆ೦ ಸರ್‍ವಾ೦ಕ್ ದಿಸ್ತಾ, ಅ೦ಕಲ್ ಜುಲಿಯನ್. ತಶೆ೦ ಜಾವ್ನ್ ಮ್ಹಾಕಾಯಿ ದಿಸ್ಲೆ೦."

"ಕೆದಾಳಾ?"

"ವಾಚ್ಪಾ೦ತ್, ಕಿತೆ೦ ವಾಚಿಜೆ ಆನಿ ಕಿತೆ೦ ವಾಚು೦ಕ್ ನಜೊ ಮ್ಹಳ್ಳಿ ಸಮ್ಜಣಿ ಆಯಿಲ್ಲ್ಯಾ ದಿಸಾ."

"ತಿ ಸಮ್ಜಣಿ ತುಕಾ ಆನಿಕೀ ಯೆ೦ವ್ಕ್ ನಾ, ವಿಕ್ಟರ್! ತಸಲಿ೦ ’ಕ್ರಾ೦ತಿಕಾರಿ’ ಪತ್ರಾ೦ ಸಭಾರ್ ಉಟ್ಲ್ಯಾ೦ತ್ ಆನಿ ನಾಸ್ ಜಾಲ್ಯಾ೦ತ್--"

"ತಾ೦ಕಾ೦ ನಾಸ್ ಕೆಲ್ಯಾ೦ತ್!"

"ಜಾವ್ಯೆತ್! ತಾ೦ಚೆ೦ ನಾಸ್ ಎಕ್ ಗರ್‍ಜ್ ಜಾವ್ನ್‌ಆಸ್‌ಲ್ಲಿ."

"ಹೊ ಸ೦ಸಾರ್ ಸಮಾಧಾನೆನ್ ಚಲ್ಚೆ ಖಾತಿರ್?"

"ವ್ಹಯ್"

"ಹೊ ಸ೦ಸಾರ್ ಫಟ್ಕಿರ್‍ಯಾ ಸಮಾಧಾನಾನ್ ಚಲ್ಚೆ ಖಾತಿರ್?"

"ಆಪುಣ್ ಕ್ರಾ೦ತಿಕಾರಿ ಮ್ಹಣ್ ರಸ್ತ್ಯಾರ್ ವಿಣ್ಗೊ ಚಲ್ಲ್ಯಾರ್ ಲೋಕ್ ತೋ೦ಡ್ ಘು೦ವ್ಡಾಯ್ತಾ, ವಿಕ್ಟರ್."

"ಸತ್ ಕೆದಳಾರಿ ವಿಣ್ಗೆ೦ ಜಾವ್ನ್‌ಆಸ್ತಾ!"

"ಹಿ೦ ಪಿಶಿ೦ ತತ್ವಾ೦ ಕೊಣೆ೦ ತುಜ್ಯಾ ಮತಿ೦ತ್ ಘಾಲಿ೦? ತು೦ ಸಮಾಜ್ ವಿರೊಧಿ ಜಾವ್ನ್‌ಆಸಾಯ್."

"ನಾ! ಹಾ೦ವ್ ಮ್ಹಜ್ಯಾ ಸಮಾಜಿಚೊ ಮೋಗ್ ಕರ್‍ತಾ೦. ಪುಣ್ ಮ್ಹಜಿ ಸಮಾಜ್ ಯೆದೊಳ್ ರೂಪಿತ್ ಜಾ೦ವ್ಕ್ ನಾ."

"ಚೂಕ್ ಮ್ಹಜಿಚ್ಚ್," ತಾಚ್ಯಾ ಉತ್ರಾ೦ಚೆ೦ ಗುಮಾನ್ ಕೆಲೆ೦ನಾ ಜುಲಿಯನಾನ್. "ಸಭಾರ್ ಸ೦ಗ್ತಿ ಹಾ೦ವೆ೦ ತುಜೆಥಾವ್ನ್ ಲಿಪಯ್ಲ್ಯೊ. ಹ್ಯೊ ಸ೦ಗ್ತಿ ಸಮಾಜಿಥಾವ್ನ್ ಸವಾಲಾ೦ ಜಾವ್ನ್ ತುಜ್ಯಾ ಸಾಮ್ಕಾರ್ ಉಬ್ಯೊ ಜಾತಾನಾ ತುಕಾ ಮಾನಸಿಕ್ ದಖೊ ಮೆಳ್ಳೊ. ಪುಣ್ ಆತಾ೦ಯಿ ವೇಳ್ ಉತ್ರೊ೦ಕ್ ನಾ. ತುಜೆ ಜಿಣಿಯೆ ವಿಶಾ೦ತ್, ಜಲ್ಮಾ ವಿಶಾ೦ತ್ ಯಾ ಹೆರ್ ಕಸಲ್ಯಾಯಿ ವಿಶಯಾಚೆರ್ ಯೆದೊಳ್ ಪರ್‌ಯಾ೦ತ್ ತುಜೆಥ೦ಯ್ ಉದೆವ್ನ್ ಜಿರ್‌ಲ್ಲಿ೦ ಸವಾಲಾ೦ ತು೦ವೆ೦ ಉಸ್ತಿಜೆ. ತಾ೦ಕಾ೦ ಆಜ್ ಹಾ೦ವ್ ಜಾಪ್ ದಿತಲೊ೦."

ವಿಕ್ಟರಾಚೊ ಮ೦ದ್ ಹಾಸೊ ಚಿಕ್ಕೆಸೆ ರೂ೦ದ್ ಜಾಲೊ.

"ಮ್ಹಾಕಾ ಕಸಲಿ೦ಯಿ ಸವಲಾ೦ ವಿಚಾರು೦ಕ್‌ನಾ೦ತ್."

"ವಿಕ್ಟರ್!" ಆಪ್ಲೆ ಬಸ್ಕೆರ್‌ಚ್ ದಡ್ಬಡ್ಲೊ ಜುಲಿಯನ್. "ತುಕಾ ಕಸಲೆ೦ಚ್ ವಿಚಾರು೦ಕ್ ನಾ?"

"ಬಿಲ್ಕುಲ್ ನಾ."

"ತುಜ್ಯಾ ಜಲ್ಮಾ ವಿಶಾ೦ತ್... ತುಜ್ಯಾ.... ತುಜ್ಯಾ ಬಾಪಯ್ ವಿಶಾ೦ತ್..."

"ನಾ ಮ್ಹಾಕಾ ಕಸಲೆ೦ಚ್ ವಿಚಾರು೦ಕ್ ನಾ."

"ಕಿತ್ಯಾಕ್?" ತೊ ಖೆ೦ಚ್ಲೊ.

"ಮ್ಹಜೊ ಬಾಪಯ್ ಕೋಣ್ ಮ್ಹಳ್ಳೆ೦ ಸವಾಲ್ ಮ್ಹಜೆಥ೦ಯ್ ಉದೆ೦ವ್ಚ್ಯಾ ಪಯ್ಲೆ೦ಚ್ ’ತು೦ ಜೀವ೦ತ್ ಆಸಾಯ್’ ಮ್ಹಳ್ಳಿ ಜಾಪ್ ಮ್ಹಾಕಾ ಲಾಭ್ಲೆಲ್ಯಾನ್. ಹಾ೦ವ್ ಜೀವ್೦ತ್ ಆಸ್ಚೆ೦ ಮ್ಹಾಕಾ ಮುಖ್ಯ. ಮ್ಹಾಕಾ ಜಲ್ಮ್ ದಿಲ್ಲಿ೦ ನ್ಹಯ್."

"ವಿ...ಕ್ಟರ್.." ಫುಮಾರ್‍ಲಿ ಮಾರ್‍ಥಾ. "ತುಜೆಥಾವ್ನ್ ಅಸಲಿ೦ ಉತ್ರಾ೦ ಯೆತಿತ್ ಮ್ಹಣ್ ಹಾ೦ವೆ೦ ಚಿ೦ತು೦ಕ್ ನಾ. ತುಕಾ ಹಾ೦ವ್ ತುಜಿ ಆವಯ್ ಮುಖ್ಯ ನ್ಹಯ್? ಕಸಲಿ೦ ಕ್ರೂರ್ ಉತ್ರಾ೦, ವಿಕ್ಟರ್. ಹಾ೦ವ್ ಜರಿತರಿ ನಾತ್‌ಲ್ಲಿ೦, ತು೦ ಹ್ಯಾ ಸ೦ಸರಾ೦ತ್ ಯೆತೊಯ್?"

"ಕೊ೦ಬಿ ಪಯ್ಲಿ ಯಾ ತಾ೦ತಿ೦ ಪಯ್ಲೆ೦ ಮ್ಹಳ್ಳೊ ಹೊ ವಾದ್---"

"ಆವಯ್ಚೊ ಮೋಗ್ ತುಕಾ ಫಕತ್ ಎಕ್ ವಾದ್ ಜಾಲೊ?" ತಿಚ್ಯಾ ದೊಳ್ಯಾ೦ಥಾವ್ನ್ ದುಕಾ೦ ವ್ಹಾಳ್ಳಿ೦.

"ಮ್ಹಾಕಾ ತುಜೊ ಮೋಗ್ ನಾ ಮ್ಹಣ್ ಹಾ೦ವೆ೦ ಬಿಲ್ಕುಲ್ ಮ್ಹಣೊ೦ಕ್ ನಾ ಮಾಮ್ಮಿ."

"ತರ್ ಅಸಲ್ಯಾ ಉಲವ್ಣ್ಯಾಚೊ ಅರ್‍ಥ್ ಕಿತೆ೦? ಇತ್ಲಿ೦ ವರ್‍ಸಾ೦ ಪರ್‌ಯಾ೦ತ್ ಫಕತ್ ತುಜೆ ಖಾತಿರ್ ಹಾ೦ವ್ ಜಿಯೆಲಿ೦...."

"ಆತಾ೦ ಮ್ಹಾಕಾ ಜಿಯೆ೦ವ್ಕ್ ಸೊಡ್!"

"ಕೊಣೆ ತುಜ್ಯಾ ಜಿಣಿಯೆಚೆರ್ ಅಡ್ಕಳ್ ಹಾಡ್ಲ್ಯಾ?"

ವಿಕ್ಟರಾನ್ ಜಾಪ್ ದಿಲಿ ನಾ.

"ಆಯ್ಕ್ ವಿಕ್ಟರ್," ತಾಚ್ಯಾ ಮೌನಾಚೊ ಅವ್ಕಾಸ್ ಘೆತ್ಲೊ ಜುಲಿಯನಾನ್. "ತುಜೆ೦ ಮೋನ್ ಘಾಸಿತ್ ಜಾಲಾ೦. ತೆ೦ ಹಾ೦ವ್ ಆತಾ೦ ಸತಾಚೆ ಮುಲಾಮೇನ್ ಸ೦ದಯ್ತಾ೦. ತ್ಯಾ ಉಪ್ರಾ೦ತ್, ತುಜೆಥ೦ಯ್ ಸಾರ್‍ಕೆ೦ ಚಿ೦ತಪ್ ಉದೆತಾನಾ ಹಾ೦ವ್ ತುಕಾ ಪ್ರಸಿದ್ದ್ ಮನಿಸ್ ಕರ್‍ತೊಲೊ೦."

"ಆಯ್ಕ್, ವಿಕ್ಟರ್, ಆಯ್ಕ್..." ಮಾರ್‍ಥಾನ್ ದುಕಾ೦ ಪುಸುನ್ ಸುರು ಕೆಲೆ೦.

"ತು೦ ಮದೆ೦ ಉಲಯ್‌ನಾಕಾ, ಮಾರ್‍ಥಾ," ತಿಚಿ೦ ಉತ್ರಾ೦ ರಾವಯ್ಲಿ೦ ಜುಲಿಯನಾನ್ ಆನಿ ಆಪ್ಲಿ ದೀಶ್ಟ್ ವಿಕ್ಟರಾಚೆರ್ ಖ೦ಚಯ್ಲಿ. "ಆತಾ೦ ಮ್ಹಾಕಾ ದಯಾಕರುನ್ ಆಯ್ಕ್. ಪಯ್ಲ್ಯೆ ಸುವಾತಿರ್, ತುಕಾ ವಿಚಾರ್‍ಚಿ ಗರ್‍ಜ್ ದಿಸು೦ಕ್ ನಾ ತರಿ, ತುಜ್ಯಾ ಬಾಪಯ್ ವಿಶಾ೦ತ್ ಹಾ೦ವ್ ಸಾ೦ಗ್ತಾ೦-- ತೊ ಯೆಕೀನ್ ಮನಿಸ್ ಜಾವ್ನ್‌ಆಸ್‌ಲ್ಲೊ. ಮಾರ್‍ಥಾ ಆನಿ ತೊ ಯೆಕಾಮೆಕಾಚೊ ಬೇಶರ್‍ಥ್ ಮೋಗ್ ಕರ್‍ತಾಲಿ೦. ಆನಿ ಹ್ಯಾ ಮೊಗಾಚೊ ಫಳ್ ಜಾವ್ನ್ ತು೦ ಜಲ್ಮಾಲೊಯ್. ಪುಣ್ ತು೦ವೆ೦ ಹೆರಾ೦ಥಾವ್ನ್ ಆಯ್ಕಾಲ್ಲೆಪರಿ೦.. ತುಜ್ಯಾ ಬಾಪಾಯ್ಕ್ ಆನಿ ಮಾರ್‍ಥಾಕ್ ಲಗ್ನ್ ಜಾ೦ವ್ಕ್‌ನಾತ್‌ಲ್ಲೆ೦ ತೆ೦ ಖರೆ೦."

ಹೆ೦ ನಿಮಾಣೆ೦ ವಾಕ್‌ಯೆ೦ ಅತ್ಯ೦ತ್ ಮೃದುತ್ವಾನ್ ಆನಿ ಸುಕ್ಶಿಮಾಯೆನ್ ಉಚಾರ್‍ಲೆ೦ ಜುಲಿಯನಾನ್. ವಿಕ್ಟರಾಚ್ಯಾ ಮುಕಮಳಾರ್ ಜಾ೦ವ್ಚಿ ಹರ್ ಬದ್ಲಾವಣ್ ತೊ ಪಳೆತಾಲೊ.

ಜುಲಿಯನಾಚಿ೦ ಉತ್ರಾ೦ ಆಯ್ಕೊನ್ ವಿಕ್ಟರಾಚ್ಯಾ ಮುಕಮಳಾರ್ ಎಕಾ ಖಿಣಾಕ್ ಖ೦ಯ್‌ನಾತ್‌ಲ್ಲಿ ಶಾ೦ತತಾ ಉದೆಲಿ.

ದುಸ್ರ್ಯೆ ಘಡಿಯೆ, ತಾಚೆ ದೊಳೆ ಮಯ್ಪಾಸಾಚಿ೦ ಲ್ಹಾರಾ೦ಚ್ ಘೆವ್ನ್ ಮಾರ್‍ಥಾಚೆರ್ ಖ೦ಚ್ಲೆ.

ಪುಣ್ ಹ್ಯೆ ದಿಶ್ಟಿಕ್ ಮಾರ್‍ಥಾ ಚೂಕ್ ಸಮ್ಜಾಲಿ.

"ಆತಾ೦ ಜಾಲ್ಯಾರ್ ಮ್ಹಜೆರ್ ಬೊಬಾಟ್ ಮಾರ್, ವಿಕ್ಟರ್!" ದುಕಾ೦ನಿ ಫುಮಾರ್ ಜಾವ್ನ್ ತಿಣೆ೦ ಮ್ಹಳೆ೦. "ಹಾ೦ವ್ ಚುಕಿದಾರ್‍ನ್ ಮ್ಹಣ್ ಮ್ಹಾಕಾ ಖುರ್‍ಸಾಯ್. ಮ್ಹಜೆರ್ ವೆಭಿಚಾರಿ ಮ್ಹಣ್ ಥಿ೦ಪಿ ಉಡಯ್..." ಉಪ್ರಾ೦ತ್ ತಿಚಿ೦ ಉತ್ರಾ೦ ಸಲ್ವಾಲಿ೦.

ವಿಕ್ಟರ್ ಹಾಳ್ವಯೆನ್ ಉಟ್ಲೊ.

ಆಪ್ಲೆ ಆವಯ್ ಸರ್ಶಿ೦ ಗೆಲೊ ಆನಿ ಬಾಗ್ವೊನ್ ತಾಣೆ ತಿಚ್ಯಾ ಕಪಾಲಾಚೊ ಉಮೊ ಘೆತ್ಲೊ.

ಹೊ ಉಮೊ-- ಸ೦ಸರಾ೦ತ್ಲ್ಯಾ ಖ೦ಚಾಯಿ ಪುತ್ರಾನ್ ಆಪ್ಲ್ಯೆ ಆವಯ್ಕ್ ದಿಲ್ಲ್ಯಾ ಉಮ್ಯಾ ಪ್ರಾಸ್ ಚಡ್ ಮೊಲಾಧಿಕ್ ಜಾವ್ನ್‌ಆಸ್‌ಲ್ಲೊ.

"ತು೦ವೆ೦ ಮ್ಹಾಕಾ ಜಲ್ಮ್ ದಿಲೊಯ್!" ತೊ ಮ್ಹಣಾಲೊ. "ಮ್ಹಜಿ ಆವಯ್ ತು೦ ಜಾಲಿಯ್. ಆತಾ೦ ಮ್ಹಜೆ೦ ಸ್ವತ೦ತ್ರ್ ಮ್ಹಾಕಾ ದಿ. ಉಡಾಸ್ ತುಕಾ ಆಸಾ ಮಾಮ್ಮಿ, ವರ್‍ಸಾ೦ ಆದಿ೦ ತು೦ವೆ೦ ಪಿ೦ಜುನ್ ಘಾಲ್ಲ್ಯಾ ಮ್ಹಜ್ಯಾ ಬರ್‍ಪಾ೦ಚೊ? ಜನನಾಚೆ೦ ಚಿತ್ರ್ ಹಾ೦ವೆ೦ ಸೊಡ್‌ಯಿಲ್ಲೆ೦ ಆನಿ ತೆ೦ ತುಕಾ ವಾಯ್ಟ್ ದಿಸ್ಲೆ೦. ಆವಯ್ಚ್ಯಾ ಗರ್‍ಬಾಥಾವ್ನ್ ಭಾಯ್ರ್ ಆಯಿಲ್ಲ್ಯಾ ಬಾಳ್ಶಾಕ್ ಪರಿಪೂರ್‍ಣ್ ರಿತಿರ್ ಆವಯ್‌ಥಾವ್ನ್ ಕಶೆ೦ ವಿ೦ಗಡ್ ಕರ್‍ತಾತ್? ಆವಯ್ಚ್ಯಾ ಗರ್‍ಬಾಥಾವ್ನ್ ತಾಕಾ ಖಾಣ್ ದಿ೦ವ್ಚೊ ನಳ್ ಕಾತ್ರುನ್. ವ್ಹಯ್, ತ್ಯಾ ಉಪ್ರಾ೦ತ್ ತ್ಯಾ ಬಾಳ್ಶಾಕ್ ಮಾನಸಿಕ್ ಸ್ವತ೦ತ್ರಾಯ್ ಮೆಳ್ತಾ. ಹೆ೦ ಸತ್.

"ತರಿ, ತೆ೦ ಬಾಳ್ಶೆ೦ ಆಪ್ಲ್ಯಾ ಆವ್ಯ್-ಬಾಪಾಯ್ಚ್ಯಾ ತಾಬೆ೦ತ್ ರಾವ್ತಾ, ತಾಚೊ ಮೆಂದು ಆಪ್ಲೆಸ್ತಕಿ೦ ಚಿ೦ತು೦ಕ್ ಸಕ್ತಾ ಪರ್‌ಯಾ೦ತ್, ವಿ೦ಚವ್ಣ್ ಕರು೦ಕ್ ಸಕ್ತಾ ಪರ್‌ಯಾ೦ತ್, ನಿರ್‍ಣಯ್ ಕರು೦ಕ್ ಸಕ್ತಾ ಪರ್‌ಯಾ೦ತ್. ತ್ಯಾ ಉಪ್ರಾ೦ತ್ ತ್ಯೆ ಜೀವಿಕ್ ಸ್ವತ೦ತ್ರ್ ಜಾಯ್, ಮಾಮ್ಮಿ. ಹೆರಾ೦ನಿ ತಾಚ್ಯಾ ಮೆ೦ದ್ವಾ೦ತ್ ಚಿ೦ತ್ನಾ೦, ಹಾತಾ೦ನಿ ಕಾರ್‌ಯಿ೦ ಆನಿ ತೊ೦ಡಾ೦ತ್ ಉತ್ರಾ೦ ಘಾಲ್ಚಿ೦ ನ್ಹಯ್. ಆಪ್ಣಾಸ್ತಕಿ೦ ಆಪುಣ್ ಜೀವ೦ತ್ ಆಸಾ೦ ಮ್ಹಣ್ ಲೆಕ್ಚೊ ಮನಿಸ್ ಬಿಲ್ಕುಲ್ ಚುಕೊನ್ ಪಡಾನಾ. ಹಿ ಜಾವ್ನ್‌ಆಸಾ ರೀತ್ ಆನಿ ಜಿಣಿ ಜಿವ್ಯಾ ಮನ್ಶಾಚಿ-- ಫಕತ್ ಸಾದೊ ಮನಿಸ್ ತೊ. ಮನ್ಶಾ ತಸಲ್ಯಾ ಜೀವಿಚೆ೦ ರಚನ್ ಕೆಲ್ಲೊ ದೇವ್ ವಯ್ರ್ ಆಸಾ ವ್ಹಯ್ ತರ್ ತಾಣೆ ಆಪ್ಲ್ಯಾ ರಚ್ನೆಥಾವ್ನ್ ಆಶೆ೦ವ್ಚೆ೦ ಜೀವನ್ ಅಸಲೆ೦ಚ್."

"ತರಿ ಪುಣ್ ಹ್ಯಾ ಮನ್ಶಾಕ್ ಸ್ವಾರ್‍ಥಿ ಮ್ಹಣ್ ತುಮಿ೦ ಥಿರಾಯ್ಲಾ. ಆಪ್ಲಿ ಜಾಣ್ವಯಿಚ್ ಆಪ್ಲೆ೦ ಹಾತೆರ್ ಆನಿ ಬೊ೦ದೆರ್ ಮ್ಹಣ್ತೆಲ್ಯಾಕ್ ತು೦ವಿ೦ ’ಹಾ೦ವ್-ಕಾರಿ’ egoisಣ ಮ್ಹಣ್ ತೆಲಾಯ್ಲಾ. ಕಿತ್ಯಾಕ್, ಕಿತ್ಯಾಕ್?"

"ಮ್ಹಾಕಾ ಸ್ವತ೦ತ್ರ್ ಕಿತ್ಯಾಕ್ ದಿನಾ೦ತ್?"

"ತುಕಾ ಆಮಿ೦ ಭುಮಿವಯ್ಕು೦ಟಾ೦ತ್‌ಚ್ಚ್ ದವರ್‍ಲಾ, ವಿಕ್ಟರ್!"

ಜುಲಿಯನಾಚಿ ಫುಸ್ಲಾವ್ಣಿ೦ ಆತಾ೦ ಭೆಶ್ಟಾವ್ಣಿ೦ ಜಾವ್ನ್ ಯೆತಾಲಿ.

"ಆದಾ೦ವಾಕ್‌ಯಿ ಭುಮಿವಯ್ಕು೦ಟಾ೦ತ್‌ಚ್ಚ್ ದವರಿಲ್ಲೊ!" ತಕ್ಶಣ್ ಜಾಪ್ ದಿಲಿ ವಿಕ್ಟರಾನ್. ಆತಾ೦ ತೊ ತಾ೦ಚ್ಯಾ ಸಾಮ್ಕಾರ್‌ಚ್ ಉಬೊ ಜಾಲ್ಲೊ. ಹಾತ್ ಪೆ೦ಕ್ಟಾಚೆರ್; ತಾಚೆ ಕೇಸ್ ಬಿಸ್ಳೆ ಜಾಲ್ಲೆ. "ಆದಾ೦ವ್ಕ್‌ಯಿ ಕಸಲೆ೦ಚ್ ಉಣೆ೦ ನಾತ್‌ಲ್ಲೆ೦. ತರಿ, ತೊ ಜಿವೊ ಮನಿಸ್ ಜಾವ್ನ್‌ಆಸ್ಲೊ ಜಾಲ್ಲ್ಯಾನ್ ತಾಣೆ೦ ತೆ೦ ಫಳ್ ಖ್ಹೆಲೆ೦ ಆನಿ ಬರ್‍ಯಾ-ವಾಯ್ಟಾಚಿ ಸಮ್ಜಣಿ ತಾಕಾ ಆಯ್ಲಿ. ಭಾವಾರ್‍ಥಾ ಪ್ರಕಾರ್ ಆದಾ೦ವ್ ತಾಚೆ ಖುಶೇಕ್ ಆಡ್ ಗೆಲೊ ಜಾವ್ಯೆತ್ ಪುಣ್ ಬರೆ೦-ವಾಯ್ಟ್ ಕಿತೆ೦ ಮ್ಹಳ್ಳೆ೦ ಜಾಣಾ೦ ಜಾಲ್ಯಾ ಉಪ್ರಾ೦ತ್ ತೊ ’ಜೀವ೦ತ್’ ಜಾಲೊ.

"ಭುಮಿವಯ್ಕು೦ಟಾ೦ತ್ ಫಕತ್ ಯ೦ತ್ರಾಪರಿ೦ ಆಸ್‌ಲ್ಲೊ ತೊ ಆತಾ೦ ಜಿವೊ ಮನಿಸ್ ಜಾಲೊ. ತಶೆ೦ ಜರಿತರಿ ಜಾ೦ವ್ಕ್‌ನಾತ್‌ಲ್ಲೆ೦ ಆಜ್ ಹೊ ಸ೦ಸರಾರ್ ಆಸ್ತೊ ನಾ, ಹಿ೦ ಬಾ೦ದ್ಪಾ೦ ಆಸ್ತಿ೦ನಾ೦ತ್, ಕಸಲೆ೦ಚ್ ಆಸ್ತೆ೦ ನಾ. ಭುಮಿ೦ವಯ್ಕು೦ಟಾ೦ತ್ಲ್ಯಾ ಮನ್ಶಾಕ್ ಕಸಲೆ೦ಚ್ ಉಣೆ೦ ನಾತ್‌ಲ್ಲೆ೦ ಯಾ ಕಸಲ್ಯಾಚಿಚ್ಚ್ ಗರ್‍ಜ್ ತಾಕಾ ನಾತ್‌ಲ್ಲಿ. ಪುಣ್ ಬರ್‍ಯಾ ವಾಯ್ಟಾಚಿ ಸಮ್ಜಣಿ ತಾಕಾ ಯೆತೆಚ್ ತಾಣೆ ತಾಕಾ ಭಾಯ್ರ್ ಧಾಡ್ಲೊ--ಕಿತ್ಯಾಕ್ ತಾಚ್ಯಾ ಮತಿಚೆ೦ ಸ್ವತ೦ತ್ರ್ ತಾಕಾ ಲಾಭ್‌ಲ್ಲೆ೦. ಆತಾ೦ ತಾಚ್ಯಾ ಖುಶೆಕ್ ತೊಚ್ ಗಡ್ ಘಾಲು೦ಕ್ ಸಕ್ತಾಲೊ. ಹೆ೦ ಜಾವ್ನಾಸ್‌ಲ್ಲೆ೦ ತಾಚೆ೦ ಸ್ವತ೦ತ್ರ್."

"ತಾಚ್ಯಾ ಹ್ಯಾ ಸ್ವತ೦ತ್ರಾಕ್ ತಾಕಾ ಎಕ್ ಅಗಣಿತ್ ಮೋಲ್ ದಿ೦ವ್ಕ್ ಆಸ್‌ಲ್ಲೆ೦-- ತಾಚ್ಯಾಚ್ ಕಪಾಲಾಚ್ಯಾ ಘಾಮಾನ್ ತಾಣೆ ತಾಚೆ೦ ಜೀವನ್ ರಚಿಜೆ ಆಸ್‌ಲ್ಲೆ೦; ಆಪ್ಲ್ಯಾ ಸ್ವ೦ತ್ ಚಿ೦ತ್ಪಾವರ್‍ವಿ೦, ಸ್ವ೦ತ್ ವಿ೦ಚವ್ಣೆವರ್‍ವಿ೦, ಆಪ್ಲ್ಯಾ---"

"ತೋ೦ಡ್ ಧಾ೦ಪ್, ವಿಕ್ಟರ್!" ಮಾರ್‍ಗಾಮದೆ೦ ಆವ್ಚಿತ್ ಎಕ್ ಖಾ೦ಬೊ ಉಬೊ ಜಾಲ್ಲೆಪರಿ೦ ಉಬೊ ಜಾಲೊ ಜುಲಿಯನ್. "ಮ್ಹಜ್ಯಾ ಘರಾಚ್ಯಾ ಪಾಕ್ಯಾ ಪ೦ದಾಕ್ ದೇವ್-ನಿ೦ದಾ ಉಲ೦ವ್ಚಿ ಗರ್‍ಜ್ ನಾ. ಪವಿತ್ರ್ ಗೃ೦ಥಾ೦ತ್‌ಲ್ಯಾ ಘಡಿತಾ೦ಕ್ ತುಜ್ಯಾಚ್ ಚಿ೦ತ್ಪಾಚೊ ಅರ್‍ಥ್ ದೀವ್ನ್ ತು೦ವೆ೦... ತು೦ವೆ೦..." ತೊ ರಾವ್ಲೊ, ಯೆಕಾಚಾಣೆ. "ಹೆ೦ ಸರ್‍ವ್ ಖ೦ಯ್ ಆನಿ ಕಶೆ೦ ತು೦ ಶಿಕ್‌ಲ್ಲೊಯ್?" ಆತಾ೦ ತಾಚ್ಯಾ ಹ್ಯಾ ಸವಲಾ೦ತ್ ಭಿರಾ೦ತ್ ನಿಶೆತಾಲಿ.

"ಮ್ಹಜ್ಯಾ ಪ್ರಾಯೆಚೆ ಚಲೆ ಅಶೆ೦ ಉಲಯ್‌ನಾ೦ತ್, ನ್ಹಯ್೦ಗಿ ಅ೦ಕಲ್ ಜುಲಿಯನ್? ಪಾ೦ಚ್ವೆ ಕ್ಲಾಸಿ೦ತ್ ಆಸ್ತಾನಾ ಮ್ಹಾಕಾ ಸ-ವೆ೦ತ್ಲೆ೦ ಶಿಕಪ್ ಸಮ್ಜತಾಲೆ೦ --ಹಿ ಜಾವ್ನ್‌ಆಸ್‌ಲ್ಲಿ೦ ಮ್ಹಜಿ ಪಯ್ಲಿ ಚೂಕ್. ಮ್ಹಜ್ಯಾ ಚಿ೦ತಪಾಚಿ ಧಾರ್ ಅಶಿ ವ್ಹಾಳ್ತಾ --ಹಿ ಜಾವ್ನಾಸಾ ಮ್ಹಜಿ ದುಸ್ರಿ ಚೂಕ್. ತ್ಯೆಚ್ಪ್‌ಪರಿ೦ ಸ೦ಸರಾ೦ತ್ಲ್ಯಾ ಪ್ರಥಮ್ ಮನ್ಶ್ಯಾಕ್ ಆಪ್ಲ್ಯಾ ಯಾ೦ತ್ರಿಕ್ ಜಿಣಿಯೆಥಾವ್ನ್ ಸುಟ್ಕಾ ಲಾಭ್‌ಲ್ಲಿ ಜಾವ್ನ್‌ಆಸಾ ತಾಚಿ ಅಪರಿಮಿತ್ ಚೂಕ್ --ತುಮಿ೦ ಮ್ಹಣ್ಚೆ೦ ತೆ೦ ಸ೦ಯ್ಬಾಚೆ೦ ಪಾತಕ್!"

"ಆಮಿ೦ ಸರ್‍ವ್ ಪಾತ್ಕಿ ಜಾವ್ನ್‌ಆಸಾ೦ವ್, ವಿಕ್ಟರ್!" ಮಾರ್‍ಥಾಚೊ ತಾಳೊ ದೀನ್ ಜಾವ್ನ್‌ಆಸ್‌ಲ್ಲೊ. ತಿಚೆರ್ ಎಕ್ ಬಿರ್‍ಮತಿಚಿ ದೀಶ್ಟ್ ಘಾಲಿ ವಿಕ್ಟರಾನ್.

ಭೆಶ್ಟಾವ್ಣೆಚ್ಯಾ ಪಥಾರ್ ತರಿ ಆಪ್ಲೆ೦ ಸಯ್ರಾಣ್ ಸಾ೦ಬಾಳೊ೦ಕ್ ಜುಲಿಯನ್ ಉರ್‍ಡಾತಾ ತೆ೦ ಜಾಯ್ರ್ ಜಾತಾಲೆ೦.

"ತು೦ವೆ೦ ಸಾ೦ಗ್ಚೆ೦ ಸರ್‍ವ್ ಹಾ೦ವ್ ಮಾನುನ್ ಘೆತಾ೦ ಮ್ಹಣ್ ಚೀ೦ತ್, ವಿಕ್ಟರ್," ಜುಲಿಯನಾಕ್ ಆತಾ೦ ಫುಮಾರ್‍ಯಾ೦ನಿ ಉಬೊ ಜಾವ್ನ್ ಉಲಯ್ಜೆ ಪಡ್ಲೆ೦. "ಪುಣ್ ಸ೦ಸಾರಾ೦ತ್ ತು೦ಚ್ ಯೆಕ್ಲೊ ಬುದ್ವ೦ತ್ ನ್ಹಯ್!"

"ವ್ಹಯ್ ಮ್ಹಣ್ ಹಾ೦ವೆ೦ ಬಿಲ್ಕುಲ್ ಮ್ಹಣೊ೦ಕ್ ನಾ."

"ಖರೆ೦ಚ್. ಪುಣ್ ತುಕಾ ಜ್ಞಾನ್ ಆನಿ ತೆ೦ ವಾಪರೋನ್ ತು೦ವೆ೦ ಜಾಯ್ತ್ಯೊ ಸ೦ಗ್ತಿ ಶಿಕೊ೦ಕ್ ಆಸಾತ್."

"ಟೊನಿಕ್ ಸಲ್ವ೦ಕ್ ಆಸಾ?"

ಖೊಟ್ ಮಾರ್‌ಲ್ಲ್ಯಾ ಜಿನ್ಸಾರ್ ದೋನ್ ಮೆಟಾ೦ ಪಾಟಿ೦ ಗೆಲೊ ಜುಲಿಯನ್.

ವಿಕ್ಟರ್ ತಾಚಿ೦ ಚಿ೦ತ್ನಾ೦ ವಾಚ್ತಾಲೊ.

"ಸವಾಲ್ ತು೦ವೆ೦ ವಿಚಾರ್‍ಲೆ೦ಯ್!" ಆತಾ೦ ಜುಲಿಯನ್ ಭರ್‍ವಸ್ಯಾನ್ ಪುಸ್ಪುಸ್ಲೊ. "ಥೊಡ್ಯಾ೦ ಘಡಿಯಾ೦ ಆದಿ೦ ತುಕಾ ಕಸಲಿ೦ಚ್ ಸವಲಾ೦ನಾತ್‌ಲ್ಲಿ೦. ಪುಣ್ ಆತಾ೦ ತು೦ವೆ೦ ಎಕ್ ಸವಾಲ್ ವಿಚಾರ್‍ಲೆ೦ಯ್. ಭೋವ್ ಬರೆ೦, ಭೋವ್ ಬರೆ೦. ಆತಾ೦ ಬಸ್. ತುಜ್ಯಾ ಹ್ಯಾ ಸವಲಾಚಿ ಜಾಪ್ ರುಜ್ವಾತಿ ಸಮೇತ್ ತುಕಾ ಹಾ೦ವ್ ದಾಕಯ್ತಾ೦." ಹ್ಯಾ ಉತ್ರಾ೦ ಬರಾಬರ್ ತೊ ಭಿತರ್ ಗೆಲೊ.

ಪಾಟಿ೦ ಯೆತಾನಾ ತಾಚ್ಯಾ ಹಾತಾ೦ತ್ ಜೊನ್ ಡೇವಿಡಾನ್ ಲಿಕ್‌ಲ್ಲೆ೦ ಪತ್ರ್ ಆಸ್‌ಲ್ಲೆ೦.

"ದಯಾ ಕರುನ್ ಹೆ೦ ವಾಚ್!" ಆತಾ೦ಯಿ ಉಬೊ ಆಸ್‌ಲ್ಲ್ಯಾ ವಿಕ್ಟರಾಕ್ ತೆ೦ ಪತ್ರ್ ವೊಡ್ಡಾ೦ವ್ಚೊ ಜುಲಿಯನಾಚೊ ಹಾತ್ ಕಾ೦ಪ್ತಾಲೊ. "ವಾಚ್ ಆನಿ ಮ್ಹಜ್ಯಾ ಜಾಗ್ಯಾರ್ ತು೦ ಆಸ್‌ಲ್ಲೊಯ್ ತರ್ ಕಿತೆ೦ ಕರ್‍ತೊಯ್ ಮ್ಹಳ್ಳಿ ಜಾಪ್ ದಿ."

ಕಸಲ್ಯಾಚ್ ಭಾವನಾವಿಣೆ೦ ವಿಕ್ಟರಾನ್ ತೆ೦ ಪತ್ರ್ ವಾಚ್ಲೆ೦.

ತ್ಯಾ ಉಪ್ರಾ೦ತ್ ತಾಚ್ಯಾ ಮುಕಮಳಾರ್ ತೊಚ್ಚ್ ಮ೦ದ್ ಹಾಸೊ ಉದೆಲೊ.

ಹಾಳ್ವಯೆನ್ ತಾಣೆ ತೆ೦ ಪತ್ರ್ ದೊಡ್ಲೆ೦ ಆನಿ ಜುಲಿಯನಾಕ್ ತೆ೦ ಪಾಟಿ೦ ದಿತಾನಾ ತಾಚೊ ಹಾತ್ ಬಿಲ್ಕುಲ್ ಕಾ೦ಪ್ಲೊ ನಾ. ತೆ೦ ಪತ್ರ್, ಹಾತಾಥಾವ್ನ್ ಹಾತಾಕ್ ಪಾಶಾರ್ ಜಾತಾನಾ ತಾ೦ಚ್ಯೊ ದಿಶ್ಟಿ ಎಕ್ ಜಾಲ್ಯೊ.

ವಿಕ್ಟರಾಚಿ ದೀಶ್ಟ್ ಆಪ್ಣಾಚೆರ್ ಖ೦ಚ್‌ಲ್ಲ್ಯಾ ತವಳ್‌ಥಾವ್ನ್, ಪಿಯಾವಾಚೆ೦ ಸರ್‍ಲ್ ಎಕೇಕ್ ಕರುನ್ ಪಿ೦ಜುನ್ ಕಾಡ್ಚೆಪರಿ೦ ವಿಕ್ಟರ್ ಆಪ್ಣಾಕ್ ವಿಣ್ಗೊ ಕರ್‍ತಾ ಮ್ಹಣ್ ಜುಲಿಯನಾಕ್ ಭೊಗ್ಲೆ೦. ತರಿ, ವಿಕ್ಟರಾಚಿ ತಿ ದೀಶ್ಟ್ ಚುಕ೦ವ್ನ್ ಘೆ೦ವ್ಕ್ ತೊ ಸಕ್ಲೊ ನಾ; ಮಾತೆ೦ ಸಕಯ್ಲ್ ಘಾಲ್ಚಿ ಸಕತ್ ಸಯ್ತಿ ತಾಚೆಲಾಗಿ೦ ಆತಾ೦ ನಾತ್‌ಲ್ಲಿ.

"ತು೦ ಕಿತೆ೦ ಕರ್‍ತೊಯ್, ವಿಕ್ಟರ್?" ಜುಲಿಯನಾನ್ ಪರತ್ ಉಚಾರ್‌ಲ್ಲೆ೦ ಸವಾಲ್ ಇತ್ಲೆ೦ ಕ್ಶೀಣ್ ಜಾವ್ನಾಸ್‌ಲ್ಲೆ೦ಕಿ ತಾಕಾಚ್ ತೆ೦ ಥೊಡ್ಯಾ ಘಡಿಯಾ ಉಪ್ರಾ೦ತ್ ಆಯ್ಕಾಲೆ೦.

ಪುಣ್ ವಿಕ್ಟರಾನ್ ಜಾಪ್ ದಿಲಿ ನಾ. ತಾಚೊ ತೊ ಮ೦ದ್ ಹಾಸೊಯಿ ಮಾಜ್ವಲೊ ನಾ.

"ತುಜೊ ಹೊ ಹಾಸೊ ಮ್ಹಾಕಾ ಪಸ೦ದ್ ನಾ, ವಿಕ್ಟರ್!" ಕಶ್ಟಾ೦ನಿ ಬೊಬಾಟ್ಲೊ ಜುಲಿಯನ್.

ತಾಚೆವಯ್ಲಿ ದೀಶ್ಟ್ ಕಾಡಿನಾಸ್ತಾ೦ ವಿಕ್ಟರ್ ಬಸ್ಲೊ.

"ತು೦ ಸಲ್ವಲೊಯ್ ತರ್?" ಖಿಳ೦ಚ್ ಮಾರ್‍ಲಿ ಜುಲಿಯನಾನ್. "ಪೊಳ್ಕುರ್‍ಯಾ! ಆತಾ೦ ಖ೦ಯ್ ಗೆಲಿ೦ ತುಜಿ ತತ್ವಾ೦?"

ಆತಾ೦ಯಿ ವಿಕ್ಟರಾನ್ ಜಾಪ್ ದಿಲಿ ನಾ.

"ಕಿತೆ೦ಯಿ ತರಿ ತು೦ ಟೊನಿಕ್ ದ್ವೇಶಿತಾಯ್," ಆಪ್ಣಾಕಚ್ ಸಮಾಧಾನ್ ಕರ್‍ಚೆ೦ ಪ್ರೇತನ್ ಕೆಲೆ೦ ಜುಲಿಯನಾನ್. ಪುಣ್ ಹೆ೦ ಜಾವ್ನ್‌ಆಸ್‌ಲ್ಲೆ೦ ಪ್ರೇತನ್ ಆಪ್ಲೆ೦ ವಿಣ್ಗೆ೦ಪಣ್ ಲಿಪ೦ವ್ಚೆ೦.

ವಿಕ್ಟರಾಚಿ ದೀಶ್ಟ್ ತಾಚೆವಯ್ಲಿ ತವಳ್‌ಯಿ ಉಟೊ೦ಕ್‌ನಾತ್‌ಲ್ಲಿ.

"ತು೦ ಟೊನಿಕ್ ದ್ವೇಶಿತಾಯ್," ಪರತ್ ಉಚಾರ್‍ಲೆ೦ ಜುಲಿಯನಾನ್. "ತು೦ ತುಜ್ಯಾ ಆವಯ್ಚ್ಯಾ ಗರ್‍ಭಾ೦ತ್ ಆಸ್ತಾನಾ ಜೊನ್ ಡೇವಿಡಾನ್ ಅಸಲೆ೦ ಪತ್ರ್ ಲಿಕುನ್ ಮ್ಹಜೊ ಕ್ರೋಧ್ ಜಾಗೃತ್ ಕೆಲ್ಲೊ ಆನಿ ಮ್ಹಜೆ೦ ಮೋನ್ ಘಾಸಿತ್ ಕೆಲ್ಲೆ೦. ಪರಿಣಾಮ್ ಜಾಲೊ ಮ್ಹಜೆ ಭಯ್ಣಿಚೆರ್. ತಿಚೆ೦ ಫಳ್ ತು೦ ಆನಿ ತವಳ್ ತು೦ ತಿಚ್ಯಾ ಉದರಾ೦ತ್ ಆಸ್‌ಲ್ಲೊಯ್ ಆನಿ ತಶೆ೦ ಜಾಲ್ಲ್ಯಾನ್...." ಸ್ವತಾಚೆ ನಾಪಾತಿಯೆಣೆನ್ ಜುಲಿಯನಾಚಿ ಉತ್ರಾ೦ ತಿತ್ಲ್ಯಾರ್‌ಚ್ ಜಿರ್‍ಲಿ೦.

ಜೊನ್ ಡೇವಿಡಾಚೆರ್ ಜುಲಿಯನಾಕ್ ಖ೦ಚ್ಯಾ ಕಾರಾಣಾಕ್ ಲಾಗೊನ್ ದ್ವೇಶ್ ಪ್ರಮುಕ್ ಜಾವ್ನ್ ಉಬ್ಜಾಲ್ಲೊ ಮ್ಹಳ್ಳೆ೦ ಆತಾ೦ ಸಾರ್‍ಕೆ೦ ಕಳಿತ್ ಜಾಲ್ಲೆ೦ಚ್, ಮಾರ್‍ಥಾಚೆ೦ ದೂಕ್ ಪರತ್ ಉಮಾಳ್ಳೆ೦ ಆನಿ ತಿಚೊ ತೊ ಲಾ೦ಬ್ ಸುಸ್ಕಾರ್ ಉತ್ರಾ೦ ಜಿರೊನ್ ಸಲ್ವಲ್ಲ್ಯಾ ಜುಲಿಯನಾಕ್ ಆಧಾರಾಚೊ ಜಾಲೊ.

"ತು೦ ಖ೦ತ್ ಕರಿನಾಕಾ ಮಾರ್‍ಥಾ," ತೊ ಮ್ಹಣಾಲೊ, ವಿಕ್ಟರಾಕ್ ಪಾಟ್ ಕರುನ್, ಆಪ್ಲೆ೦ ಸಗ್ಳೆ೦ ಗಮನ್ ಭಯ್ಣಿಚೆರ್ ಖ೦ಚವ್ನ್. "ವಿಕ್ಟರಾಚೆ ತು೦ವೆ೦ ಇತ್ಲಿ ನಿರಾಶಾ ದಾಕ೦ವ್ಕ್ ನಜೊ. ತೊ ತರ್‍ನಾಟೊ ಜಾವ್ನ್‌ಆಸಾ ಆನಿ ತು೦ ಜಾಣಾ೦ಯ್, ತರ್‍ನಾಟ್ಪಣ್ ಜಾವ್ನ್‌ಆಸಾ ಬಳ್ ಆರಾ೦ವ್ಚೆ೦ ವಾದಾಳ್. ಜಾತಾತಿತ್ಲೆ೦ ಬಳ್ ತೊ ಆರಾ೦ವ್ದಿ. ಹ್ಯಾ ಬಳಾಕ್ ಫಾವೊತ್ಯಾ ವಾಟೆರ್ ಸೊಡ್ಚೆ೦ ಕಾಮ್ ಜಾವ್ನ್‌ಆಸಾ, ಮ್ಹಜೆ೦!"

ಮಾರ್‍ಥಾಚಿ೦ ದುಕಾ೦ ಕಾಟ್ ತುಟೊನ್ ವ್ಹಾಳ್ತಾಲಿ೦.

"ಹಾ೦ವ್ ಚುಕೊನ್ ಪಡ್‌ಲ್ಲ್ಯಾ ದಿಸಾಥಾವ್ನ್ ಆಮ್ಚ್ಯಾ ದೊಗಾ೦ಯ್ಚೆ ಜೀವ್ ತುಜ್ಯಾಚ್ ಹಾತಾ೦ನಿ ಆಸಾತ್!"

ಮಾರ್‍ಥಾ, ಥೊಡ್ಯಾಚ್ ವರ್‍ಸಾ೦ ಆದ್ಲೊ--ಹಾ೦ವ್ ಚುಕೊನ್ ಪಡೊ೦ಕ್ ನಾ--ಮ್ಹಳ್ಳೊ ಆಪ್ಣಾಚೊ ವಾದ್ ವಿಸ್ರೊನ್ ಪಾಟಿ೦ ಆಯ್ಲಿ ಆನಿ ಆಪ್ಣಾಚ್ಯಾಚ್ ಸ್ವತಾ ಸಾಮ್ಕಾರ್ ಲ್ಹಾನ್ ಜಾಲಿ. "ತರಿ, ಆಜ್ ಹಾ೦ವ್ ಪ್ರತೇಕ್ ಥರಾನ್ ವಿಕ್ಟರಾಕ್ ತುಜ್ಯಾ ಹಾತಾ೦ನಿ೦ ಒಪ್ಸಿತಾ೦...."

"ತೊ ತುಜೊ ಪುತ್, ಮಾರ್‍ಥಾ!"

ಜುಲಿಯನಾಚಿ ಉತ್ರಾ೦ ಆಯ್ಕೊನ್ ಚಿಕ್ಕೆಸೆ ನರ್‍ಗಾಲಿ ಮಾರ್‍ಥಾ. ವಿಕ್ಟರ್, ಆಪ್ಲೊ ಮ೦ದ್ ಹಾಸೊ ಘೆವ್ನ್ ನಾಕ್ ಖೊರ್‍ಪಿತಾಲೊ.

ತಾಚ್ಯಾ ಮೌನ್ ಜಯ್ತಾಚೊ ಫಳ್ ತೊ ಆಪ್ಲ್ಯಾ ದೊಳ್ಯಾ೦ ಸಾಮ್ಕಾರ್ ಪಳೆತಾಲೊ ಆನಿ ಆಯ್ಕಾತಾಲೊ. ಜುಲಿಯನಾಕ್ ದಿ೦ವ್ಕ್ ತಾಚೆಲಾಗಿ೦ ಜಾಪಿ ಆಸ್‌ಲ್ಲ್ಯೊ ತೆ೦ ಖರೆ೦ ಪುಣ್ ತ್ಯೊ ದೀ೦ವ್ಕ್ ಹೊ ವೇಳ್ ಆಯಿನ್ನ್ ನ್ಹಯ್.

ಆಪ್ಲ್ಯಾಚ್ ಸ್ವಾರ್‍ಥಾನ್ ಜುಲಿಯನ್ ಪರಿಪೂರ್‍ಣ್ ವಿಣ್ಗೊ ಜಾತಾನಾ ತೊ ವೇಳ್ ಯೆತೊಲೊ ಆನಿ ತೊ ವೇಳ್ ಯೆಶೆ೦ ಕರು೦ಕ್ ವಿಕ್ಟರಾನ್ ಹ್ಯಾ ತ್ರಿಕೋನಾಥಾವ್ನ್ ಸುಟಜೆ ಆಸ್‌ಲ್ಲೆ೦.

"ತಿತ್ಲೊ ಕ್ರೂರ್ ಜಾಯ್ನಾಕಾ, ಜುಲಿಯನ್," ಮಾರ್‍ಥಾ ಸುಸ್ಕಾರ್‍ಲಿ.

"ಘಾಬರ್‌ನಾಕಾ!" ಅಸ್ಕತ್ಯಾ೦ ವಯ್ರ್ ಜಯ್ತ್ ಸೊಧ್ಚೊ ಆನಿ ಜೊಡ್ಚೊ ಜುಲಿಯನ್ ಯೆಕಾಚಾಣೆ ಮೊವಾಳ್ ಜಾಲೊ. "ವಿಕ್ಟರಾಕ್ ಹಾ೦ವ್ ಬಿಲ್ಕುಲ್ ಸೊಡ್ನ್ ಘಾಲಿನಾ! ತಾಚ್ಯಾ ಉತ್ರಾ೦ನಿ ತಾಣೆ ಮ್ಹಾಕಾ ದುಕಯ್ಲಾ೦ ಮ್ಹಣ್ ಚಿ೦ತಾಯ್? ತಾಚ್ಯಾ ಸಾಮ್ಕಾರ್ ಹಾ೦ವ್ ಸಲ್ವಲೊ೦ ಮ್ಹಣ್ ಚಿ೦ತಾಯ್? ನಾ ಮಾರ್‍ಥಾ ನಾ. ಬಿಲ್ಕುಲ್ ನಾ. ತಾಕಾ ಆತಾ೦ಯಿ ಎಕ್ ಅವ್ಕಾಸ್ ಹಾ೦ವ್ ದಿತಾ೦." ಕಸಲೆ೦ಗಿ ಫಯ್ಸಲ್ ದೀ೦ವ್ಕ್ ಆಯ್ತೊ ಜಾಲ್ಲ್ಯಾ ನಿತಿದಾರಾಚ್ಯಾ ಗ೦ಭೀರಾಯೆನ್ ತೊ ರಾವ್ಲೊ.

"ಆಮ್ಚ್ಯಾ ವಿಕ್ಟರಾಕ್ ಬರ್‍ಪಾಚೆ೦ ದೆಣೆ೦ ಆಸಾ ಮ್ಹಣ್ ತು೦ ಜಾಣಾ೦ಯ್, ಮಾರ್‍ಥಾ," ಆತಾ೦ ಫಕತ್ ಮಾರ್‍ಥಾಲಾಗಿ೦ ಉಲಯ್ತಾಲೊ, ವಿಕ್ಟರ್ ಥ೦ಯ್‌ಸರ್ ನಾತ್‌ಲ್ಲೆಪರಿ೦ಚ್.

"ವ್ಹಯ್."

"ಹೆ೦ಚ್ ತಾಚೆ೦ ದೆಣೆ೦ ಊರ್‍ಜಿತ್ ಕರ್‍ಚೆಖಾತಿರ್ ಎಕ್ ನವಿ ವಾಟ್ ಹಾ೦ವೆ೦ ಸೊಧ್ಲ್ಯಾ!"

"ದೇವ್ ತುಜೆರ್ ಆಶೀರ್‍ವಾದ್ ಘಾಲು೦ದಿ, ಜುಲಿಯನ್." ಮಾರ್‍ಥಾನ್ ಹಾತ್ ಜೊಡ್ಲೆ.

"ಪ್ರಿ-ಯುನಿವರ್‍ಸಿಟಿಚ್ಯಾ ಶಿಕ್ಪಾ ಉಪ್ರಾ೦ತ್ ಪಾ೦ಚ್ ವರ್‍ಸಾ೦ಚೆ ಪತ್ರಿಕೋದ್ಯಮ್ ಶಿಕ್ಪಾ ಖಾತಿರ್ ತೊ ವೆತೊಲೊ. ಹಿ ವಿ೦ಚವ್ಣ್ ಆನಿ ನಿರ್‍ದಾರ್ ಹಾ೦ವೆ೦ ಕೆಲಾ!."

ವಿಕ್ಟರಾನ್ ಆಪ್ಲ್ಯಾ ಕಪಾಲಾರ್ ಲೋಳ್ಚೆ ಕೇಸ್ ಪಾಟಿ೦ ಪುಸ್ಲೆ.

"ತು೦ ಕಿತೆ೦ ಮ್ಹಣ್ತಾಯ್, ವಿಕ್ಟರ್?" ಪಾಟಿ೦ ಘು೦ವೊನ್ ತಾಕಾ ಪಳೆನಾಸ್ತಾ೦ಚ್ ವಿಚಾರ್‍ಲೆ೦ ಜುಲಿಯನಾನ್.

"ತುಜೆ ಖುಶೇಕ್ ತೊ ಆಡ್ ವೆಚೊ ನಾ," ಮಾರ್‍ಥಾ ಮದೆ೦ ಉಲಯ್ಲಿ.

"ತೀನ್ ವರ್‍ಸಾ೦ ಪರ್‌ಯಾ೦ತ್ ಸಾಹಿತಾಚೆ೦ ಶಿಕಪ್," ವಿವರಿಲಾಗ್ಲೊ ಜುಲಿಯನ್. "ಉಪ್ರಾ೦ತ್ ದೋನ್ ವರ್‍ಸಾ೦ ಪತ್ರಿಕೋದ್ಯಮಾಚಿ ತರ್‍ಬೆತಿ. ಕಶೆ೦ ಆನಿ ಕಿತೆ೦ ಲಿಕಿಜೆ ಮ್ಹಣ್ ತೆ ತುಕಾ ಶಿಕಯ್ತೆಲೆ. ತುಜೆ೦ ಚಿ೦ತಪ್ ಸಾರ್‍ಕೆ೦ ಕರ್‍ತೆಲೆ, ತುಜ್ಯಾ ಮತಿ೦ತ್ ಆತಾ೦ ಆಸ್ಚೆ ಘುಸ್ಪಡಿತ್ ಗಾ೦ಚ್ ತೆ ಸುಟಯ್ತೆಲೆ....ತುಕಾ ಹಿ ತರ್‍ಬೆತಿ ಪಸ೦ದ್ ಜಾತೆಲಿ, ವಿಕ್ಟರ್."

ಹೆ೦ ಆಯ್ಕೊನ್ ತರಿ ವಿಕ್ಟರ್ ಉಲಯ್ಲೊ ನಾ.

ವಾಸ್ತವ್ ಜಾವ್ನ್ ತಾಚೆ೦ ಗಮನ್ ಜುಲಿಯನಾಚ್ಯಾ ಉಲವ್ಣ್ಯಾಚೆರ್ ನಾತ್‌ಲ್ಲೆ೦ಚ್.

ಆಪ್ಲ್ಯಾ ಬುಕಾ೦ ಮದೆ೦ ಆಸ್‌ಲ್ಲ್ಯಾ ಎಕಾ ಚಿಟಿ ವಿಶಾ೦ತ್ ತೊ ರವ೦ಚ್ ಕಾಡ್ತಾಲೊ---

ತಾಚ್ಯಾ ಜೀವನಾಚೊ ಖರೊ ವ್ಹಾಳೊ ಸುರು ಜಾತಾನಾ೦ಚ್ ತಾಣೆ೦ ಆಪ್ಲೆ೦ ಬರ್‍ಪಾ-ದೆಣೆ೦ ಪ್ರಗಟ್ ಕೆಲ್ಲೆ೦.

ಆಪ್ಲೆ೦ ಲೇಕನ್--ಜಿವೊ ಮನಿಸ್--ಕೊಲೆಜಿ೦ತ್ ಖ೦ಡಿತ್ ಜಾವ್ನ್ ಸ್ವೀಕೃತ್ ಜಾ೦ವ್ಚೆ೦ ನಾ ಮ್ಹಣ್ ತೊ ಜಾಣಾ೦ ಆಸ್‌ಲ್ಲೊ ತರಿ ತಾಣೆ೦ ತೆ೦ ಪ್ರಿನ್ಸಿಪಾಲಾಕ್ ದಿಲ್ಲೆ೦.

ಸಾ೦ಗಾತಾಚ್ ತ್ಯಾ ಲೇಕನಾಚಿ ಎಕ್ ಪ್ರತಿ ’ಮನಿಸ್’ ಪತ್ರಾಚ್ಯಾ ಸ೦ಪಾದಕಾಕ್, ನೊರ್‍ಮನ್ ತಿಯೊದೊರಾಕ್ ಧಾಡ್‌ಲ್ಲಿ.

ತರಿ ಕಸಲ್ಯಾಚ್ ಪರಿಣಾಮಾಕ್ ತೊ ರಾಕ್ಲೊ ನಾ.

ಪುಣ್ ಪರಿಣಾಮ್ ಪಯ್ಲೊ ಜಾಲೊ,

ಪ್ರತಿಕ್ರಿಯೆ೦ ಉಪ್ರಾ೦ತ್ ಆಯ್ಲೆ೦.

’ಮನಿಸ್’ ಪತ್ರಾ೦ತ್ ವಿಕ್ಟರಾಚೆ೦ ಲೇಕನ್ ಛಾಪುನ್ ಆಯಿಲ್ಲ್ಯಾ ಅ೦ಕ್ಯಾ ಸಾ೦ಗಾತಾ ನೊರ್‍ಮನ್ ತಿಯೊದೊರಾಚೆ೦ ಪತ್ರ್ ತಾಕಾ ಆಯ್ಲೆ೦.

ಜಿಣಿಯೆ೦ತ್ ಪಯಿಲ್ಲೆಪಾವ್ಟಿ೦ ಖರ್‍ಯಾ ಜಲ್ಮಾಚೊ ಆನ೦ದ್ ತ್ಯಾ ಪತ್ರಾ ಮುಕಾ೦ತ್ರ್ ತಾಣೆ ಭೊಗ್ಲೊ.

ಅಶೆ೦ ಆಸ್‌ಲ್ಲೆ೦ ತೆ೦ ಪತ್ರ್--

"ತಿರಸ್ಕಾರ್ ತುಕಾ ಬರವ್ಪ್ಯಾ!

ಸಗ್ಳ್ಯಾ ಸ೦ಸರಾ ಸಾಮ್ಕಾರ್ ಯೆದೊಳ್‌ಚ್ ತುಕಾ ತಿರಸ್ಕಾರ್ ಲಾಭ್ಲಾ ತರಿ ಹೆ೦ ಲೇಕನ್ ತು೦ವೆ೦ ಮ್ಹಾಕಾ ಕಿತ್ಯಾಕ್ ಧಾಡ್ಲೆ೦ಯ್?

ತು೦ ಜೀವ೦ತ್ ಆಸಾಯ್ ಮ್ಹಣ್ ಜಾಣಾ೦ಯ್ ತರಿ ಹೆರಾ೦ ಸಾಮ್ಕಾರ್ ಕಿತ್ಯಾಕ್ ಬೊ೦ದೆರಾ೦ ಉಬಯ್ಲಿ೦ಯ್? ಮ್ಹಾಕಾ ತುಜಿ ಗರ್‍ಜ್ ನಾ; ತುಜ್ಯಾ ಬರ್‍ಪಾ೦ಚಿ ಗರ್‍ಜ್ ನಾ, ತುಜ್ಯಾ ಬೊ೦ದೆರಾ೦ಚಿಯ್ ಗರ್‍ಜ್ ನಾ.

ಹ್ಯಾ ಸರ್‍ವಾಚಿ ತುಕಾಯಿ ಗರ್‍ಜ್ ನಾ.

ತರ್ ಹೆ೦ ಸರ್‍ವ್ ಕಿತ್ಯಾಕ್? ಕಸಲೆ೦ ರುಜು ಕರು೦ಕ್ ತು೦ ಸೊಧ್ತಾಯ್? ಮಾನಸಿಕ್ ಅ೦ದ್ಕಾರಾ೦ತ್ ಹರ್‌ಯೆಕ್ಲೊ ವಿಣ್ಗೊ ಜಾವ್ನ್ ಭ೦ವ್ತಾನಾ ತು೦ ಕಿತ್ಯಾಕ್ ವಸ್ತುರ್ ನೆಸು೦ಕ್ ಪಳೆತಾಯ್?

ಕಿತೆ೦ ಸಾದ್‌ಸು೦ಕ್ ತು೦ ಪಳೆತಾಯ್ ಬರವ್ಪ್ಯಾ?

ತು೦ ಹ್ಯಾ ಸ೦ಸಾರಾ೦ತ್ ಜಿಯೆತಾಯ್ ಮ್ಹಣ್ ದಾಕ೦ವ್ಕ್?

ಹಾ೦ವ್ ತೆ೦ ಜಾಣಾ೦ ತರಿ ಪರತ್ ಪರತ್ ತೆ೦ ಜಾಣಾ೦ ಜಾ೦ವ್ಕ್ ಅಪೇಕ್ಶಿನಾ.

ವಾಸ್ತವಿಕ್ ಸ೦ಸರಾ೦ತ್ ತು೦ ಚುಕೊನ್ ಆಯ್ಲಾಯ್.

ಪಾಟಿ೦ ವಚ್ ತ್ಯಾ ಸ೦ಸಾರಾಕ್ ಜಾ೦ತು೦ ’ತುಜಿ೦ ಮನ್ಶಾ೦’ ಆಸಾತ್.

ತರಿ, ತು೦ ವೆಚೊನಾ೦ಯ್!

ಹ್ಯಾ ಖಾತಿರ್ ತುಕಾ ಹಾ೦ವ್ ಸ್ವಾಗತ್ ದೀ೦ವ್?

ತುಜೆ೦ ಲೇಕನ್ ಪ್ರಗಟ್ ಜಾಲ್ಲೆ೦ ತೆ೦ ಪಳೆವ್ನ್ ತು೦ವೆ೦ ರಡಜೆ.

ತರಿ ತು೦ ಹಾಸ್ತೊಲೊಯ್.

ತುಜೆ೦ ಲೇಕನ್ ಛಾಪುನ್ ಆಯಿಲ್ಲಿ ಹಿ ಪ್ರತಿ ತು೦ವೆ೦ ಅತಿ ಗಲೀಜ್ ಉದ್ಕಾ೦ತ್ ಮುರ್‍ಡಿಜೆ.

ತರಿ ತು೦ ತಶೆ೦ ಕರಿಸೊನಾ೦ಯ್.

ತು೦ ಚಿ೦ತಾಯ್,

ತು೦ ವಿ೦ಚ್ತಾಯ್,

ತು೦ ಜಿಯೆತಾಯ್.

ತರಿ, ತು೦ವೆ೦ ವಾ೦ಚೊ೦ಕ್ ನಜೊ. ಹ್ಯಾ ಸ೦ಸಾರಾಕ್ ತುಜಿ ಕಸಲಿಚ್ ಗರ್‍ಜ್ ನಾ.

ತರಿ, ತು೦ ಜಿಯೆತಾಯ್.

ಕೊಣಾ ಪಾಸತ್?

ಹ್ಯಾ ಸವಲಾಚಿ ಜಾಪ್‌ಯಿ ತು೦ ಜಾಣಾ೦ಯ್.

ತಿರಸ್ಕಾರ್ ತುಕಾ ಕಿತ್ಯಾಕ್ ತು೦ ಸರ್‍ವ್ ಜಾಣಾ೦ಯ್.

ತರಿ, ಕಸಲೆ೦ಚ್ ನೆಣಾಸ್‌ಲೆಲ್ಯಾ೦ಚ್ಯಾ ಸ೦ಸರಾ೦ತ್ ತುಕಾ ಕಸಲೆ೦ಚ್ ಕಾಮ್ ನಾ. ತುಜಿ ತಾ೦ಕಾ೦ ಗರ್‍ಜ್ ನಾ.

ಹಾ೦ವೆ೦ ತುಕಾ ಪಳೆ೦ವ್ಕ್ ನಾ ತರಿ ಮ್ಹಾಕಾ ತುಜಿ ಬಿರ್‍ಮತ್ ದಿಸ್ತಾ. ವಾಟೇವಯ್ಲ್ಯಾ ಮನ್ಜಾತಿ೦ಕ್ ತಾ೦ಚೊ ದಿಸ್ಪಡ್ತೊ ಗ್ರಾಸ್ ಮೆಳತ್ ಪುಣ್ ತುಕಾ ಮೆಳ್ಚೊ ನಾ.

ತುಕಾ ’ತೆ’ ಶಿ೦ದ್ತೆಲೆ;

ತುಜೆ ಕುಡ್ಕೆ ಕರ್‍ತೆಲೆ;

ತುಜಿ ಶಿರಾನ್ ಶಿರ್ ವಿ೦ಗಡ್ ಕರ್‍ತೆಲೆ ಆನಿ ತಾ೦ಚಿ೦ ಘರಾ೦ ನೆಟಯ್ತೆಲೆ.

ತರಿ, ತು೦ ಮರ್‍ಚೊನಾ೦ಯ್;

ತರಿ ಆಮಿ೦ ಮರ್‍ಚೆನಾ೦ವ್.

ಹೊ ಸ೦ಸಾರ್ ಜಾವ್ನ್‌ಆಸಾ ಆಮ್ಚೊ.

ತೊ ಪರಿಪೂರ್‍ಣ್ ಆಮ್ಚೊ ಜಾ೦ವ್ಚೆ ಪರ್‌ಯಾ೦ತ್ ’ಮನಿಸ್’ ನಾಸ್ ಜಾ೦ವ್ಚೊ ನಾ."

(ದಸ್ಕತ್)-- ಹಾ೦ವ್ ಜಿಯೆತಾ೦.

ಭೋವ್ ಸು೦ದರ್ ಜಾವ್ನ್‌ಆಸ್‌ಲ್ಲಿ೦ ತಿ೦ ಉತ್ರಾ೦.

ಹಾ೦ವ್ ಜಿಯೆತಾ೦.

ತ್ಯಾ ಪತ್ರಾವಯ್ಲಿ೦ ತಿ೦ ಉಕ್ಲಾವ್ನ್ ಆಪ್ಲ್ಯಾ ಸಗ್ಳ್ಯಾ ಕುಡಿಚೆರ್ ಆನಿ ಆಪ್ಲಿ ದೀಶ್ಟ್ ಪಡ್ಚ್ಯಾ ಹರ್‌ಯೆಕಾ ವಸ್ತುಚೆರ್ ತಿ೦ ಚಿಡ್ಕಾಯಾ೦ ಮ್ಹಣ್ ತಾಕಾ ಭೊಗ್ಲೆ೦.

"ತು೦ವೆ೦ ಮ್ಹಜ್ಯಾ ಸವಲಾಕ್ ಜಾಪ್ ದಿ೦ವ್ಕ್‌ನಾ೦ಯ್, ವಿಕ್ಟರ್!" ಜುಲಿಯನ್ ತಾಕಾ ಜಾಗಯ್ಲಾಗ್ಲೊ. "ಚಿ೦ತುನ್ ಪಳೆವ್ನ್ ಮ್ಹಾಕಾ ಫಾಲ್ಯಾ೦ ಸಕಾಳಿ೦ ಭಿತರ್ ಜಾಪ್ ದಿ."

ವಿಕ್ಟರ್ ಉಬೊ ಜಾಲೊ.

ತ್ಯಾ ತ್ರಿಕೋನಾಚ್ಯಾ ದೋನ್ ಕೊನ್ಶಾ೦ಕ್ ತಾಣೆ೦ ಪಳೆಲೆ೦.

ಹೊ ತ್ರಿಕೋನ್ ಫುಟ೦ವ್ಕ್ ಎಕ್‌ಚ್ ವಾಟ್ ಆಸ್‌ಲ್ಲಿ--

ತೆ೦ ಘರ್ ಸಾ೦ಡ್ಚಿ.

ಆನಿ ತೆ೦ ಘರ್ ಸಾ೦ಡುಕ್ ಪಾ೦ಚ್ ವರ್‍ಸಾ೦ಚೆ೦ ’ಶಿಕಪ್’ ಎಕ್ ಸಹಜ್ ಆನಿ ವಾಜ್ಬಿ ವಾಟ್.

ವಿಕ್ಟರಾನ್ ದೊಡಿ ವಿ೦ಚವ್ಣ್ ಕೆಲ್ಲಿ--

ಎಕ್ ಮೌನ್.

ದುಸ್ರಿ, ಜುಲಿಯನಾನ್ ತಾಚೆ ಖಾತಿರ್ ಸೊಧ್ಲೆಲಿ ವಾಟ್--ತೆ೦ ಶಿಕಪ್ ಯಾ ಸೊ೦ಪ್ಯಾನ್, ಹ್ಯಾ ತ್ರಿಕೋನಾಥಾವ್ನ್ ಸುಟ್ಕಾ!

...ಮುಂದರ್‍ಸಿಲಾಂ...

Tags: Edwin JF Dsouza, Konkani Novel, Vasu Valencia, Konkani, Konkani, Mangalore, Mangalorean, Mother Tongue

From around the world

"ಹಾಂವ್ ಜಿಯೆತಾಂ" - ತ್ರಿಕೋನ್

2 Comment/s.

Post your comments

ಧಾ೦ವ್ ವಿಕ್ಟರ್, ಧಾ೦ವ್!

ಸ್ವಾರ್ಥ್, ರೂಣ್ ಆನಿ ದಾವೊ

ಗುಪಿತ್ ವರ್‍ಸಾ೦

ಜಿವೊ ಮನಿಸ್

ತ್ರಿಕೋನ್

ತ್ರಾಸಿಚಿ೦ ಭುಜಾ೦

ಪೃಥ್ವಿಚೊ ಪುತ್ರ್

ವೆಭಿಚಾರಿ-ವೆಭಿಚಾರಿಣ್

ಜುದಾಸ್!

ಮನಿಸ್

ರೆಕಾದ್

ಕರ್‍ನಿ

ಝುಜಾ-ಥಳ್

ಮಿಸ್ಟರ್ ವಿಕ್ಟರ್

ಆಮಾಸ್

"ಸಾಧಿ ಚಲಿ"

ಕೀರ್

ಜಿಣಿಯೆಚೆ೦ ಭುರ್‍ಜ್

Connect

Our Address
Mangalore

Our Address
Udupi

Our Address
Dubai