:: ಮಾಯ್ ಭಾಸ್

ತಿಸ್ರೊ ಗೃ೦ತ್ - "....ಆನಿ ಹಾ೦ವ್ ಜಿಯೆತಾ೦"

ಅವಸ್ವರ್ ಆಟ್ರಾ-ವೊ:

ಪಾವ್ಸ್ ರಾವ್‌ಲ್ಲೊ!

ತ್ಯಾ ಸಕಾಳಿ೦ಚ್ಯಾ ಧಾ ವೊರಾರ್, ಪರಿಪೂರ್‍ಣ್ ಥರಾನ್ ಭಿತರ್ ರಿಗ್‌ಲ್ಲ್ಯಾ ಸುರ್ಯಾಚ್ಯಾ ಕಿರ್ಣಾ೦ಕ್ ಧರ್ಣಿರ್ ಪಡೊ೦ಕ್ ಕಸಲೊಚ್ ಅವ್ಕಾಸ್ ಮೆಳಾನಾತ್‌ಲ್ಲೆಪರಿ೦ ಕೋಡ್ತಿಚ್ಯಾ ಲಾ೦ಬ್ ರೂ೦ದ್ ಸಾಲಾ೦ತ್ ಲೋಕ್ ಜಮ್ಲೊಲೊ. ಪಾಶಾರ್ ಜಾಲ್ಲ್ಯಾ ಪ೦ದ್ರಾ ದಿಸಾ೦ನಿ ತೆಚ್ ಮನಿಸ್ ತ್ಯಾಚ್ ಸಾಲಾ೦ತ್ ಜಮ್ಲೆಲೆ. ತಾ೦ಕಾ೦ ಆಯ್ಚೊ ದೀಸ್ ಮಹತ್ವಾಚೊ ಜಾವ್ನಾಸ್‌ಲ್ಲೊ. ಪ೦ದ್ರಾ ದೀಸ್‌ಥಾವ್ನ್ ಚಲೊನ್ ಆಸ್ಚ್ಯಾ ’ವಿಕ್ಟರ್ ಕೇಜಿ’ಚೆ೦ ತೀರ್ಪ್ ಆಜ್ ಮೆಳೊ೦ಕ್ ಆಸ್‌ಲ್ಲೆ೦.

ಪ೦ದ್ರಾ ದಿಸಾ೦ ಆದಿ೦--ವಿಚಾರಣೆಚಾ ಪಯಿಲ್ಲ್ಯಾ ದಿಸಾ--ಹೆಚ್‌ಪರಿ೦ ಲೋಕ್ ಜಮೊನ್ ಆಸ್‌ಲ್ಲೊ. ವ್ಹೊರಾ೦ ಧಾ ಜಾತಾನಾ ಕೋಡ್ತಿಚ್ಯಾ ಕಾರ್ಬಾರ್‍ಯಾನ್ ನಿತಿಕರ್ತಾಚೆ೦ ಯೆಣೆ ಸುಚಾಯ್ಲೆ೦ ಆನಿ ಸಾಲಾ೦ತ್ ಮೌನ್ ಚರ್ತೆಚ್ ಸರ್ವ್ ಉಬೆ ಜಾಲೆ. ಹ್ಯಾ ಕೇಸಿಚೊ ಪರಿಪೂರ್ಣ್ ವಿವರ್ ಆನಿ ಚರಿತ್ರಾ ವಿಕ್ಟರಾಕ್ ಕೈದ್ ಕೆಲ್ಲ್ಯಾ ಪ೦ದ್ರಾ ದಿಸಾ೦ ಭಿತರ್ ಶಿಕೊನ್ ತಯಾರ್ ಜಾಲ್ಲ್ಯಾ ನಿತಿಕರ್ತಾಕ್ ವಿಚಾರಣಾಚೆ೦ ಪಥ್ ಕಶೆ೦ ರಾವತ್ ಮ್ಹಳ್ಳೆ೦ ಚಿ೦ತು೦ಕ್‌ಯಿ ಪುರ್ಸತ್ ಮೆಳ್ಳಿ ನಾ. ಪುಣ್ ತೊ ಎಕ್ ಸ೦ಗತ್ ಜಾಣಾಸ್ಲೊ--ತಾಚೆ೦ ಸ್ಥಾನ್, ಪಿಲಾತಾಚೆ೦ ಜಾವ್ನಾಸ್‌ಲ್ಲೆ೦.

ನಿತಿಕರ್ತಾನ್ ಜಾಗೊ ಘೆತ್ಲ್ಯಾ ನ೦ತರ್ ಸಾಲಾ೦ತ್ಲೊ ಸರ್ವ್ ಲೋಕ್ ಬಸ್ಲೊ. ನಿತಿ ಕರ್ತಾನ್ ಭೊರೊನ್ ವೊಮ್ತೊ೦ಚ್ಯಾ ಕೋಡ್ತಿಕ್ ಪಳೆಲೆ೦ ಆನಿ ತಾಚಾ ಕಪಾಲಾರ್ ಘಾಮ್ ಉದೆಲೊ.

"ಸರ್ಕಾರ್ ಆನಿ ಮಿ|ವಿಕ್ಟರಾ ಮಧ್ಲಿ ಕೇಜ್!" ತಾಣೆ ವ್ಹಡ್ಲ್ಯಾನ್ ಉಚಾರ್ಲೆ೦. "ದಯಾಕರುನ್ ಮಿ|ವಿಕ್ಟರಾಕ್ ಹಾಜರ್ ಕರಾತ್."

ನಿತಿಕರ್ತಾಚಾ ಬೊಸ್ಕೆಚ್ಯಾ ಉಜ್ವ್ಯಾಕ್ ಆಸ್ಚೆ೦ ದಾರ್ ಉಗ್ತೆ೦ ಜಾಲೆ೦ ಆನಿ ಎಕಾ ಪೊಲಿಸಾಸ೦ಗಿ೦ ವಿಕ್ಟರ್ ಭಿತರ್ ಸರ್ಲೊ. ಸಭೆ೦ತ್ ಪುಸ್ಪುಸಿತ್ ಉಲವ್ಣ್ಯಾಚೆ೦ ಲಾರ್ ಚರ್‍ಲೆ೦.

ವಿಕ್ಟರಾನ್ ಆಪ್ಲಿ ಪ್ರಖ್ಯಾತ್ ಕಾಳಿ ಮುಸ್ತಾಯ್ಕಿ ಘಾಲ್ಲಿ. ಕಾಳೊ ಸೂಟ್, ಶರ್ಟಾ ಬದ್ಲಾಕ್ ಕಾಳೆ ಪೊಲೊನೆಕ್; ಕಾಳೆಚ್ ಮೊಚೆ. ತಾಚ್ಯಾ ಕೋಟಾಚ್ಯಾ ದಾವ್ಯಾಕ್ ತಾ೦ಬ್ಡೆ೦ ’ಕಾರ್ನೇಶನ್’ ಸೊಭ್ತಾಲೆ೦. ತಾಚಿ ತಿ ಲಾ೦ಬ್ ಆಕೃತಿ ಆರೋಪಿ ಕಾಟ್ಯಾ ಪರ್‌ಯಾ೦ತ್ ಚಲೊನ್ ವೆತಾನಾ ಸಭೆಚೆರ್ ಜಾಲ್ಲೊ ಊಬ್ ಪರಿಣಾಮ್ ಅಗಣಿತ್. ’ಮನಿಸ್’ ಪತ್ರಾಚ್ಯಾ ಮನ್ಶಾಕ್ ತಾಣಿ ಆಜ್ ಉಗ್ತ್ಯಾನ್ ಪಳೆಲೊ. ಕಶೆ೦ ನಿತಿಕರ್ತಾನ್ ವಿಕ್ಟರಾಚೆ೦ ಹರ್‌ಎಕ್ ಚಲನ್‌ವಲನ್ ಮತಿ೦ತ್ ದವರಿಲ್ಲೆ೦ ತಶೆ೦ಚ್ ಥ೦ಯ್ಸರ್ ಆಸ್‌ಲ್ಲ್ಯಾ ಹರ್‌ಎಕಾ ಪ್ರೇಕ್ಶಕಾನ್ ವಿಕ್ಟರಾಚಿ ಚರಿತ್ರಾ ತಾತಾ೦ಚ್ಯಾ ಮನಾ೦ತ್ ಖ೦ಚಯಿಲ್ಲಿ. ಹ್ಯಾ ಕೇಸಿಚೊ ಪರಿಣಾಮ್ ಆನಿ ತೀರ್ಪ್ ತೆ ಜಾಣಾಸ್ಲೆ. ತೆ೦ ತಾ೦ಕಾ೦ ಕಸಲ್ಯಾಚ್ ಗರ್ಜೆಚೆ೦ ನ್ಹಯ್. ಪುಣ್ ವಿಕ್ಟರಾಚೆರ್ ತೀರ್ಪ್ ವಾಚುನ್ ಸ್ವತಾಚಿ ಸಲ್ವಣ್ ಉಗ್ತ್ಯಾನ್ ಮಾ೦ದುನ್ ಘೆ೦ವ್ಚ್ಯಾ ’ತಾ೦ಚಿ೦’ ಮುಕಮಳಾ೦ ಪಳೆ೦ವ್ಕ್ ತೆ ಆಯಿಲ್ಲೆ.

ವಿಕ್ಟರ್ ಆರೋಪಿಕಾಟ್ಯಾ೦ತ್ ಬಸ್ಲೊ.

"ಜ್ಯೂರಿ ಮೆ೦ಬರಾ೦ನಿ ತಾ೦ಚಿ ಬಸ್ಕಾ ಘೆವ್ಯೆತ್!" ನಿತಿಕರ್ತಾನ್ ಸೂಚ್ಸಿಲ್ಲ್ಯಾ ನ೦ತರ್ ಜ್ಯೂರಿ ಮೆ೦ಬರ್ ತಾ೦ಚ್ಯಾ ಬೊಕ್ಸಾ೦ತ್ ಬಸ್ಲೆ.

"ದೋನ್‌ಯಿ ಪಾಡ್ತಿ೦ಚೆ ವಕೀಲ್ ತಯಾರ್ ಆಸಾತ್ ಮ್ಹಣ್ ಹಾ೦ವ್ ಪಾತ್ಯೆತಾ೦," ನಿತಿಕರ್ತ್ ಮ್ಹಣಾಲೊ. "ವ್ಹೊಯ್ ತರ್, ಸರ್ಕಾರಿ ವಕೀಲಾನ್ ಆಪ್ಲೆ೦ ಪ್ರಥಮ್ ವಾಕ್ಯಾವೃ೦ದ್ ಉಚಾರುವ್ಯೆತ್."

ಸರ್ಕಾರಿ ವಕೀಲ್ ಉಬೊ ಜಾಲೊ.

ವಿಕ್ಟರಾಕ್ ತಾಣೆ ಪಳೆಲೆ೦. ಪುಣ್ ವಿಕ್ಟರ್ ತಾಕಾ ಪಳೆನಾತ್‌ಲ್ಲೊ. ತಾಚಿ ದೀಶ್ಟ್ ಕೋಡ್ತಿಚಾ ಸಾಲಾ೦ತ್ ಭೊ೦ವ್ತಾಲಿ. ಥ೦ಯ್ಸರ್ ಆಸ್‌ಲ್ಲ್ಯಾ ಮುಕ್ಕಾಲಾ೦ಶ್ ಪ್ರೇಕ್ಶಕಾ೦ಕ್ ತೊ ವಳ್ಕಾಲೊ--ತಾಚೆಚ್ ಕಾಮೆಲಿ ತೆ ಜಾವ್ನಾಸ್‌ಲ್ಲೆ.

’ಮನಿಸ್’ ಪತ್ರಾಚ್ಯಾ ಡಿಪಾರ್ಟ್‌ಮೆ೦ಟಾ೦ತ್ ಕಾಮ್ ಕರ್ಚೆ ಸರ್ವ್ ಎಕಾಚ್ ಗು೦ಪಾನ್ ಬೊಸೊನ್ ಆಸ್‌ಲ್ಲೆ. ಮುಕ್ಲ್ಯಾ ಬಾ೦ಕಾ೦ನಿ ಎಸೊಸಿಯೆಶನಾಚ್ಯಾ ಸಾ೦ದ್ಯಾ೦ ಸ೦ಗಿ೦ ಜೊನ್ ಡೇವಿಡ್, ಲಿಲಿಯನ್, ಟೊನಿ ಆನಿ ಜುಲಿಯನ್ ಬೊಸೊನ್ ಆಸ್‌ಲ್ಲಿ೦.

ಜುಲಿಯನಾಚ್ಯಾ ದಾವ್ಯಾಕ್ ಫಾತ್ರೆಲ್ಲೆ೦ ಮುಖಮಳ್ ಘೆವ್ನ್ ಮಾರ್ಥಾ ಬೊಸೊನ್ ಆಸ್‌ಲ್ಲಿ ಆನಿ ತಿಚಾ ಕುಶಿ ಆಸ್‌ಲ್ಲೊ ಫ್ರೊಫೆಸರ್ ಫಿಲಿಪ್. ಕಿತ್ಲೆ೦ ಪ್ರಯತ್ನ್ ಕೆಲ್ಯಾರ್‌ಯಿ ಮಾರ್ಥಾಚಿ ದೀಶ್ಟ್ ಎಕ್ ಪಾವ್ಟಿ೦ ಪುಣ್‌ಯಿ ವಿಕ್ಟರಾಚಾ ಪ್ರಶಾ೦ತ್ ಮುಖಮಳಾರ್ ಪಡಾನಾಸ್ತಾ೦ ರಾವ್ಲಿ ನಾ. ಅಸಲ್ಯಾಚ್ ಎಕಾ ಘಡಿಯೆ ತಿಚ್ಯೆ ದಿಶ್ಟಿಕ್ ಆಪ್ಲ್ಯಾ ದೃಶ್ಟೆ೦ತ್ ಬ೦ಧಿತ್ ಕೆಲೆ೦ ವಿಕ್ಟರಾನ್. ಕ್ಶಣ್‌ಭ್ಹರ್ ಅವಯ್-ಪೂತ್ ಎಕಾಮೆಕಾ ಪಳೆಲಾಗ್ಲಿ೦. ತ್ಯೆ ನದ್ರೆ೦ತ್ ತಾಣಿ೦ ಎಕಾಮೆಕಾ ಎಕ್‌ಚ್ಚ್ ಸ೦ದೇಶ್ ಪಾಟಯ್ಲೊ--ಆಮಿ ದೊಗಾ೦ಯಿ ಪಾಟಿ೦ ಯೆ೦ವ್ಕ್ ಸಾಧ್ಯ್ ನಾ ಜಾಲ್ಲ್ಯಾ ಕೇ೦ದ್ರಾಕ್ ಪಾವ್ಲ್ಯಾ೦ವ್.

ವಿಕ್ಟರ್ ಮ೦ದ್ ಹಾಸೊ ಹಾಸ್ಲೊ ಆನಿ ತಾಚಿ ದೀಶ್ಟ್ ಆತಾ೦ ಉಟೊನ್ ಲೊರೆನ್ಸಾಚೆರ್ ಪಡ್ಲಿ ಜೊ ದಾರಾಲಾಗಿ೦ ಉಭೊಚ್ ಆಸ್‌ಲ್ಲೊ. ಲೊರೆನ್ಸಾನ್ ತಾಕಾ ಮಾನ್ ಬಾಗಾಯ್ಲೊ ಆನಿ ವಿಕ್ಟರಾನ್ ತೆ೦ ವ೦ದನ್ ಸ್ವೀಕಾರ್ ಕೆಲೆ೦. ಲೊರೆನ್ಸಾನ್ ದೊಳೆ ಪುಸ್ಲೆ.

ಹೆಲ್ಗಾ ಥ೦ಯ್ಸರ್ ಹಾಜರ್ ನಾತ್‌ಲ್ಲೆ೦.

ವಿಕ್ಟರಾಕ್ ಖೈದ್ ಕೆಲ್ಲ್ಯಾ ಪ೦ದ್ರಾಚ್ ದಿಸಾ೦ ಭಿತರ್ ಉಭಿ ಜಾಲ್ಲಿ ಹಿ ಕೇಜ್ ತ್ಯಾ ದಿಸಾ೦ಚಿ ಅತ್ಯ೦ತ್ ’ಹುನ್’ ಕೇಜ್ ಜಾವ್ನಾಸ್‌ಲ್ಲ್ಯಾನ್ ಸರ್ಕಾರಿ ವಕೀಲ್ ಧರ್ಣಿರ್‌ನಾತ್‌ಲ್ಲೊ, ಸ೦ತೊಸಾನ್. ತಾಚಾ ಜಯ್ತಾಚಿ ಭದ್ರತಿ ಯೆದೊಳ್‌ಚ್ ತಾಚಾ ಹಾತಾ೦ನಿ ಆಸ್‌ಲ್ಲಿ.

"ಹಾ೦ವ್ ತಯಾರ್ ಆಸಾ೦, ಯುವರ್ ಹೊನರ್," ತೊ ಮ್ಹಣಾಲೊ. "ಪುಣ್ ಯೆದೊಳ್ ಪರ್ಯಾ೦ತ್ ಮಿ|ವಿಕ್ಟರಾನ್ ಆಪ್ಲ್ಯಾ ವಕೀಲಾಕ್ ನೇಮ್ಸು೦ಕ್ ನಾ."

"ತಾಕಾ ವಕೀಲ್ ನಾ ತರ್ ಸರ್ಕಾರಾಥಾವ್ನ್ ವಕೀಲ್ ನೇಮಕ್ ಕರ್ಚಿ ಪದ್ದತ್ ಆಸಾ ಮಿ|ಪ್ರೊಸೆಕ್ಯೂಟರ್!"

"ಮ್ಹಾಕಾ ಉಡಾಸ್ ಆಸಾ, ಯುವರ್ ಹೊನರ್. ಪುಣ್ ಆಪ್ಣಾಕ್ ಖ೦ಚಾಯೀ ವಕೀಲಾಚಿ ಗರ್‍ಜ್ ನಾ ಮ್ಹಣ್ ತೊ ಮ್ಹಣ್ತಾ."

ನಿತಿಕರ್ತಾನ್ ದಾಡಾಮಾ ಅಡ್ಚಿಲಿ೦. ವಿಕ್ಟರಾಕ್ ತೊ ಪಳೆಲಾಗ್ಲೊ. "ತುಜೊ ಉದ್ದೇಶ್ ಕಿತೆ೦, ಮಿ|ವಿಕ್ಟರ್?" ತಾಣೆ ವಿಚಾರ್ಲೆ೦.

ವಿಕ್ಟರಾಥಾವ್ನ್ ಜವಾಬ್ ಯೆತಾ ಮ್ಹಣ್ ಜಾಣಾ೦ ಆಸ್‌ಲ್ಲೆ೦ ಪ್ರೇಕ್ಶಕ್ ಸುರಿಯೆಚಾ ಧಾರೆರ್ ಉಭೆ ಜಾಲೆ.

"ಜನ್ಮಾಲ್ಲ್ಯಾ ತವಳ್‌ಥಾವ್ನ್ ಆತಾ೦ ಪರ್ಯಾ೦ತ್ ಹಾ೦ವೆ೦ ಮ್ಹೊಜಿ೦ಚ್ ಚಿ೦ತ್ನಾ೦ ಚಿ೦ತ್ಲ್ಯಾ೦ತ್, ಮ್ಹೊಜಿ೦ಚ್ ಉತ್ರಾ೦ ಹಾ೦ವ್ ಉಲಯ್ಲಾ೦, ಮ್ಹೊಜಿ೦ಚ್ ಕಾರ್ಯಿ೦ ಹಾ೦ವೆ೦ ಕೆಲ್ಯಾ೦ತ್. ಆನಿ ಆತಾ೦, ತುಮಿ ಆಸಾ ಕೆಲ್ಲ್ಯಾ ನಾಟಕಾ೦ತ್ ಹಾ೦ವೆ೦ ಎಕಾ ವಕೀಲಾ ಮುಕಾ೦ತ್ರ್ ಉಲಯ್ಜೆಯ್? ಹಾ೦ವ್ ಮ್ಹೊಜೆ೦ ಝುಜ್ ಝುಜೊ೦ಕ್ ಸಕ್ತಾ೦!"

"ತಶೆಂ ವ್ಹೊಯ್ ತರ್, ತುಕಾ ಸಾಕ್ಶಿದಾರಾ೦ಕ್ ಆಡ್ ಸವಾಲಾ೦ ಘಾಲ್ಚೆ೦ ಹಕ್ಕ್ ಜರೂರ್ ಆಸಾ. ಪುಣ್ ಮಿ|ವಿಕ್ಟರ್...ಖುನಿಯೆಚೆ೦ ಪ್ರಕರಣ್ ಹೆ೦...ತು೦ಚ್ ಖುನಿಗಾರ್ ಮ್ಹಣ್ ರುಜು ಜಾಯ್ತ್ ತರ್?"

"ತು೦ವೆ೦ ತುಜೆ೦ ತೀರ್ಪ್ ವಾಚ್ಯೆತ್."

"ಮ್ಹೊಜೆ೦ ಕರ್ತವ್ಯ್ ಹಾ೦ವ್ ಜಾಣಾ೦," ನಿತಿಕರ್ತ್ ತಾ೦ಬ್ಡೊ ಜಾಲೊ. "ಪುಣ್ ಉಡಾಸ್ ಆಸು೦--ನಿರಾಪ್ರಾಧ್ಯಾಕ್ ಶಿಕ್ಶಾ ಲಾ೦ವ್ಚೊ ಉದ್ದೇಶ್ ನಿತಿಚೊ ನ್ಹಯ್. ಹಾ೦ಗಾಸರ್ ಆರೋಪಿ ಕಾಟ್ಯಾ೦ತ್ ಉಭೊ ಆಸ್ಚೊ ಮನಿಸ್ ನಿತಿಚ್ಯಾ ನದ್ರೆನ್ ಅಪ್ರಾಧಿ ಮ್ಹಣ್ ರುಜು ಜಾಲ್ಲ್ಯಾ ಖರಿತ್ ತಾಕಾ ಅಪ್ರಾಧಿ ಮ್ಹಳ್ಳೊ ಬಿಲ್ಲೊ ಲಾ೦ವ್ಕ್ ಹಿ ಕೋಡ್ತ್ ಸಕಾನಾ. ತ್ಯಾ ಖಾತಿರ್, ತುಕಾ ಸರ್ವ್ ಅವ್ಕಾಸ್ ದೀ೦ವ್ಕ್ ಆಮಿ೦ ತಯಾರ್ ಆಸಾ೦ವ್. ತು೦ವೆ೦ ಖುನ್ ಕರು೦ಕ್‌ನಾ೦ಯ್ ಮ್ಹಣ್ ತು೦ ಮ್ಹಣ್ತಾಯ್ ಪುಣ್ ಹೆ೦ ತು೦ ಕಶೆ೦ ರುಜು ಕರ್ಶಿ? ಆಮಿ೦ ತುಜೆ ದುಸ್ಮಾನ್ ನ್ಹಯ್ ವಿಕ್ಟರ್....ಮಿ|ವಿಕ್ಟರ್; ಮೆಳ್‌ಲ್ಲ್ಯಾ೦ಕ್ ಜೀವಾವಧಿ ಶಿಕ್ಶಾ ದಿ೦ವ್ಚ್ಯಾ೦ತ್ ಆಮ್ಕಾ೦ ಸ೦ತೊಸ್ ಲಾಭಾನಾ. ತ್ಯಾ ಖಾತಿರ್ ತುಕಾ ಜಾಯ್ ಜಾಲ್ಲಿ ಭದ್ರತಿ ದಿ೦ವ್ಚೆ೦ ಕರ್ತವ್ಯ್ ಆಮ್ಚೆ೦ ಜಾವ್ನಾಸಾ!"

"ಅರ್ಥಾತ್, ತುಮ್ಕಾ೦ ಜಾಯ್ ಜಾಲ್ಲಿ ಭದ್ರತಿ ತುಮಿ೦ ಜೊಡುನ್ ಘೆತಾತ್?" ಛಾಟಿಯೆನ್ ಉತ್ರಾ೦ ಕಾರ್ವಯಿಲ್ಲೆಪರಿ೦ ಉಲಯ್ಲೊ ವಿಕ್ಟರ್. "ಮ್ಹಾಕಾ ಹರ್ ಅವ್ಕಾಸ್ ಕರುನ್ ದಿಲಾ ಮ್ಹಣ್ ತುಮ್ಚ್ಯಾ ರೆಕಾರ್ಡಾ೦ನಿ ಉದೆಲ್ಲ್ಯಾಫರಾ ತುಮ್ಚಿ ವಾಟ್ ಸಾಫ್ ಜಾತಾ--ತಾಕಾ ಆಮಿ೦ ವಕೀಲ್ ದಿಲೊ ತರ್‌ಯಿ ತೊ ಆಯ್ಕಾಲೊ ನಾ. ತಾಕಾ ಆಮಿ೦ ಹರ್ಯೆಕ್ ಅವ್ಕಾಸ್ ದಿಲೊ ತರಿ ತೊ ಸ್ತಬ್ಧ್ ರಾವ್ಲೊ - ಹ್ಯಾ ಉತ್ರಾ೦ನಿ ತುಮಿ೦ ತುಮ್ಚ್ಯೆ ಹಾತ್ ಧುತಾತ್. ಹ್ಯೆ ಘಡಿಯೆ ’ತುಮ್ಚ್ಯಾ’ ಸರ್ವಾ೦ಚಿ ಪರಿಸ್ಥಿತಿ ತ್ಯಾ ಪಿಲಾತಾಚಿ ಜಾವ್ನಾಸಾ!"

"ಪುಣ್ ತು೦ ಕ್ರೀಸ್ತ್ ನ್ಹಯ್!" ಮ್ಹಣಾಲೊ ನಿತಿಕರ್ತ್, ವೋ೦ಟ್ ಚಾಬುನ್. "ಹ್ಯಾ ಕೋಡ್ತಿಕ್ ಅಕ್ಮಾನ್ ಕರುನ್ ತುಜ್ಯಾ ಅಪ್ರಾಧಾ೦ಚೊ ದಾಳೊ ಚಡವ್ನ್ ಘೆನಾಕಾ."

"ಹಾ೦ವ್ ತಯಾರ್ ಆಸಾ೦!"

"ತರ್ ತು೦ ಮು೦ದರ್ಸಿ, ಮಿ|ಪ್ರೊಸೆಕ್ಯೂಟರ್," ವಿಕ್ಟರಾಚಿ ಸಮ್ಮತ್ ಆಯ್ಕೊನ್ ಕಬ್ಲಾತ್ ದಿಲಿ ನಿತಿಕರ್ತಾನ್.

"ಥೆ೦ಕ್ಯೂ, ಯುವರ್ ಹೊನರ್!" ಸರ್ಕಾರಿ ವಕೀಲಾನ್ ಅತ್ಯ೦ತ್ ನಾಟಕೀಯ್ ರಿತಿರ್ ಕೋಡ್ತಿಚಾ ಮಧೆ೦ಚ್ ಹಳ್ತಾಚ್ಯೊ ಪಾಸಾಯೊ ಮಾರ್ಲ್ಯೊ. "ಯುವರ್ ಹೊನರ್, ಜ್ಯೂರಿ ಮೆ೦ಬರ್ಸ್--ಆತಾ೦ ಪ್ರಾರ೦ಭಾರ್‌ಚ್ ಚಲ್‌ಲ್ಲ್ಯಾ ಸ೦ಭಾಶಣವರ್ವಿ೦ ಆಮ್ಚ್ಯಾ ಸಾಮ್ಕಾರ್ ಎಕ್ ವಿಚಿತ್ರ್ ಕೇಜ್ ಹಾಜರ್ ಆಸಾ ಮ್ಹಣ್ ತುಮಿ೦ ಮಾ೦ದ್ತೆಲ್ಯಾತ್. ತರ್‌ಯಿ ಆರೋಪಿಕಾಟ್ಯಾರ್ ಆಸ್‌ಲ್ಲ್ಯಾ ಮನ್ಶಾನ್ ಕೆಲ್ಲೆ೦ ಪಾಪ್ ತುಮ್ಕಾ೦ ಯಾ ಹ್ಯಾ ಕೋಡ್ತಿಕ್ ಅಪರಿಚಿತ್ ನ್ಹಯ್. ತೆ೦ ಪಾಪ್ ಜಾವ್ನಾಸಾ ಎಕಾ ಖುನಿಯೆಚೆ೦. ಆಜ್ ಪ್ರಾರ೦ಭ್ ಜಾ೦ವ್ಚ್ಯಾ ಹ್ಯಾ ವಿಚಾರಣಾ ಮರಿಫಾತ್ ಆಮಿ೦ ರುಜು ಕರು೦ಕ್ ಪಳೆತಾ೦ವ್ ಹ್ಯೊ ಸ೦ಗ್ತಿ: ೧.ಆರೋಪಿಕಾಟ್ಯಾ೦ತ್ ಉಬೊ ಆಸ್‌ಲ್ಲ್ಯಾಚೆ೦ ವ್ಯಕ್ತಿತ್ವ್, ಧುಸ್ಪಟ್ಲೆಲ್ಯಾ ಮಾನಸಿಕತೆಚೊ ಪರಿಣಾಮ್ ಜಾವ್ನಾಸಾ.

೨.ಹ್ಯಾ ಧುಸ್ಪಟಾಯೆಚೊ ಪರಿಣಾಮ್ ಜಾವ್ನಾಸಾ ಕ್ರೂರತಾ ಆನಿ ಸ್ವಾರ್ಥ್.

೩. ಹ್ಯಾ ದೊನಾ೦ಚೊ ಪರಿಣಾಮ್ ಜಾವ್ನಾಸಾ ಹ೦ಕಾರ್ ಜೊ ಹೊ ಮನಿಸ್ ಉದ್ದೇಶತ್ವ್ ಮ್ಹಣ್ ನಾ೦ವಾಡ್ತಾ.

೪. ಹ್ಯಾ ಅರ್ಥ್‌ನಾತ್‌ಲ್ಲ್ಯಾ ತತ್ವಾ೦ಚೊ ಪರಿಣಾಮ್ ಜಾವ್ನಾಸಾ ಸರ್ಕಾರಾ ವಿರುಧ್ ತರ್ನ್ಯಾ ಜನಾ೦ಗಾಕ್ ಉಟ೦ವ್ಚೆ೦ ಪ್ರಯತನ್.

೫.ಹ್ಯಾ ಪ್ರಯತ್ನಾ೦ಚೆ ಹಾತೆರ್ ಜಾವ್ನಾಸುಲ್ಲೆ೦ ತೆ೦ಚ್ ’ಮನಿಸ್’ ಪತ್ರ್.

೬.ಆನಿ ನಿಮಾಣೆ, ಸಲ್ವಣ್ ಮಾ೦ದುನ್ ಘೆ೦ವ್ಚಿ ಶಾಥಿನಾತ್‌ಲ್ಲ್ಯಾವರ್ವಿ೦ ನಾಸ್ ಕೆಲ್ಲೆ೦ ತೆ೦ ಪ್ರಿ೦ಟಿ೦ಗ್ ಪ್ರೆಸ್ಸ್!" ಕ್ಶಣ್‌ಬರ್ ರಾವ್ಲೊ ವಕೀಲ್. ಸರ್ವಾ೦ಚೆ೦ ಗುಮಾನ್ ಆಪ್ಣಾಚೆರ್ ಆಸಾಗಿ ಮ್ಹಣ್ ತಾಣೆ ಪಳೆಲೆ೦. ಎಸೊಸಿಯೆಶನಾಚೆ ಸೊಡ್ಲ್ಯಾರ್ ಹೆರ್ ಸರ್ವ್ ಆತಾ೦ ಮೌನ್ ಬಸುನ್ ಆಸ್‌ಲ್ಲ್ಯಾ ವಿಕ್ಟರಾಕ್ ಪಳೆತಾಲೆ. ವಕೀಲಾಚೆ೦ ಮುಕಮಳ್ ಕಾಳೆ೦ ಜಾಲೆ೦.

"ಸ್ಫೋಟನ್ ಜಾವ್ನ್ ನಾಸ್ ಜಾಲ್ಲ್ಯಾ ತ್ಯಾ ಪ್ರೆಸ್ಸಾ ವಿಶಾ೦ತ್ ಹಾ೦ವೆ೦ ಸಾ೦ಗ್ಚೆ೦ ತರ್, ಸ೦ಬ೦ಧ್ ಜಾಲ್ಲೆ ವ್ಯಕ್ತಿಕ್ ಆಮಿ೦ ಬ೦ದೆ೦ತ್ ದವರ್ಲ್ಯಾ. ಕು|ಹೆಲ್ಗಾ ಮಾರ್ಟಿನ್ ತಿ ಜಾವ್ನಾಸಾ. ಮಿ|ವಿಕ್ಟರಾಕ್ ಬ೦ಧಿ ಕೆಲ್ಯಾ ನ೦ತರ್ ಸ್ಫೋಟನ್ ಜಾಲ್ಲ್ಯಾ ಜಾಗ್ಯಾರ್‌ಚ್ ಉಬಿ ಆಸ್‌ಲ್ಲ್ಯಾ ತಿಕಾ ಆಮಿ೦ ಕೈದ್ ಕೆಲಿ. ಹಿ ಚಲಿ ವಿಕ್ಟರಾಚಿ ಆಪ್ತ್ ಸಾ೦ಗಾತಿಣ್ ಆನಿ ಸರ್ಕಾರಾ ವಿರೋಧ್ ವಿಕ್ಟರಾನ್ ಆಸಾ ಕೆಲ್ಲ್ಯಾ ಚಳುವಳೆ೦ತ್ ತಿಚೊ ಸ್ವತ೦ತ್ರ್ ಪಾತ್ರ್ ಆಸಾ ಜಾಲ್ಲ್ಯಾನ್ ತಿಚೆ೦ ವಿಚಾರಣ್ ವೆಗ್ಳೆ೦ಚ್ ಚಲ್ತೆಲೆ೦. ತ್ಯೆಚ್ ಖಾತಿರ್ ತಿ ಹಾ೦ಗಾಸರ್ ನಾ. ಎಕಾಮೆಕಾಚಿ೦ ವಾಕ್ಮೂಲಾ೦ ಆಯ್ಕೊನ್ ತಿ೦ ಸತ್ ಲಿಪಯ್ತಿತ್ ಮ್ಹಳ್ಳ್ಯಾ ಕಾರಾಣಾಕ್ ಲಾಗೊನ್ ಅಸಲಿ ಬ೦ದೊಬಸ್ತ್ ಕೆಲ್ಯಾ. ಪುಣ್ ಖುನಿಯೆಕ್ ವಳಗ್ ಜಾಲ್ಲ್ಯಾ ಸೊನಿಯಾಕ್ ಆನಿ ಹ್ಯಾ ಸರ್ವ್ ಘಟನಾ೦ಕ್ ಕಸಲೊ ಸ೦ಬ೦ದ್? ಫಕತ್ತ್ ಇತ್ಲೊಚ್:

೭.ಆಪ್ಲ್ಯಾ ಸಲ್ವಣೆಚಾ ನಿರಾಶೆಚೊ ದಾವ್ ತಾಣೆ ತಿಚ್ಯಾ ಖುನಿಯೆ೦ತ್ ಮಿಸ್ಳಾಯ್ಲೊ.. ತರಿ ಹ್ಯಾ ಖುನಿಯೆಕ್‌ಯಿ ಎಕ್ ಚರಿತ್ರಾ ಆಸಾ--ವಿಕ್ಟರಾಕ್ ಆನಿ ಸೊನಿಯಾಕ್ ಬದ್ದ್ ದ್ವೇಶ್ ಆಸ್‌ಲ್ಲೊ ಮ್ಹಣ್‌ಯಿ ಆಮಿ೦ ರುಜು ಕರ್‍ತೆಲ್ಯಾ೦ವ್. ಅಶೆ೦ ತೀನ್ ಪ್ರಾಮುಖ್ಯ್ ಅಪ್ರಾಧಾ೦ಚ್ಯಾ ದಾವ್ಯಾ೦ಚೆರ್ ಹಿ ಕೇಜ್ ಮು೦ದರೋನ್ ವೆತೆಲಿ. ಪಯ್ಲೆ೦: ಎಸೊಸಿಯೆಶನಾ೦ತ್ ಪ್ರೆಸ್ಸ್ ದಾಖಲ್ ಕರಿನಾತ್ಲೊ; ದುಸ್ರೆ೦: ’ಮನಿಸ್’ ಪತ್ರಾಚೆರ್ ಸರ್ಕಾರಾಚಾ ಅಧಿಕಾರಾಕ್ ಸಮ್ಮತಿ ದೀನಾತ್ಲೊ ಆನಿ ತಿಸ್ರೊ: ಸೊನಿಯಾಚಾ ಖುನಿಯೆಚೊ. ಹೆ೦ ಸರ್ವ್ ಆಮಿ ರುಜು ಕರು೦ಕ್ ಪ್ರಯತನ್ ಕರ್ತಾ೦ವ್. ಆತಾ೦ ಹಾ೦ವೆ೦ ಸಾಕ್ಶಿ೦ಕ್ ಆಪ೦ವ್ಚ್ಯಾ ಪಯ್ಲೆ೦ ಸ್ವತಾಚೊ ವಕೀಲ್ ಜಾವ್ನಾಸ್ಚ್ಯಾ ಮಿ|ವಿಕ್ಟರಾಕ್ ಕಾ೦ಯ್ ಉಲ೦ವ್ಕ್ ಆಸಾ ತರ್--"

"ದಯಾ ಕರುನ್ ಮು೦ದರ್ಸಿ!" ವಿಕ್ಟರಾಚಿ೦ ಉತ್ರಾ೦ ಹುಕ್ಮೆಚ್ಯಾ ತಲ್ವಾರಿಪರಿ೦ ಸರ್ಕಾರಿ ವಕೀಲಾಚಾ ಗೊಮ್ಟೆರ್ ಬೊಸ್ಲಿ೦.

"ಬೊರೆ೦ ತರ್," ಮ್ಹಣಾಲೊ ಸರ್ಕಾರಿ ವಕೀಲ್. "ಮ್ಹೊಜಿ ಪಯ್ಲಿ ಸಾಕ್ಸ್ ಜಾವ್ನ್ ಹಾ೦ವ್ ಮಿ|ಜುಲಿಯನ್ ಲೂಕಾಕ್ ಆಪಯ್ತಾ೦!"

ಅಶೆ೦ ಪ್ರಾರ೦ಭ್ ಜಾಲ್ಲೆ೦ ವಿಕ್ಟರಾಚೆ೦ ವಿಚಾರಣ್ ಪ೦ದ್ರಾ ದಿಸ್ ಪರ್ಯಾ೦ತ್ ಲಾ೦ಬ್ಲೆ೦. ಹ್ಯಾ ಪ೦ದ್ರಾ ದಿಸಾ೦ನಿ ಜುಲಿಯನಾಥಾವ್ನ್ ಪ್ರಾರ೦ಭ್ ಕರುನ್ ವಿಕ್ಟರಾನ್ ಯೆದೊಳ್ ಪರ್ಯಾ೦ತ್ ಪಳೆ೦ವ್ಕ್ ನಾತ್‌ಲ್ಲೆ ಮನಿಸ್ ಯೆವ್ನ್ ತಾಚ್ಯೆ ವಿರೋಧ್ ಸಾಕ್ಸ್ ದೀವ್ನ್ ಗೆಲೆ. ಪುಣ್ ತಾ೦ಕಾ೦ ಜಾ೦ವ್ ಹೆರಾ೦ಕ್ ಜಾ೦ವ್ ಕಸಲಿ೦ಚ್ ಆಡ್ ಸವಾಲಾ೦ ತಾಣೆ ಘಾಲಿ೦ನಾ೦ತ್. ಟೊನಿ ಸಾಕ್ಶೇಕಾಟ್ಯಾಕ್ ಯೆತಾನಾ ಸರ್ವಾ೦ ಮಧೆ೦ ಉಬ್ದೆಸ್ ಸುರು ಜಾಲೆ ಆನಿ ಆಡ್ ಸವಲಾ೦ ಖಾತಿರ್ ತಾಕಾ ವಿಕ್ಟರಾಚ್ಯಾ ಹಾತಿ೦ ಒಪ್ಸಿತಾನಾ ಸರ್ಕಾರಿ ವಕೀಲಾಚೆ೦ ಕಾಳಿಜ್ ದಡ್ಧಡ್ಲೆ೦. ಆತಾ೦ ಖ೦ಡಿತ್ ಜಾವ್ನ್‌ಯಿ ವಿಕ್ಟರ್ ಆಪ್ಲೆ೦ ನಿಮಾಣೆ೦ ಪ್ರಯತನ್ ಕರ್ತೊಲೊಚ್ ಮ್ಹಣ್ ತಾಣೆ ಲೆಕ್‌ಲ್ಲೆ೦. ಪುಣ್--

"ಮ್ಹಾಕಾ ಕಸಲಿ೦ಚ್ ಸವಲಾ೦ ವಿಚಾರು೦ಕ್‌ನಾ೦ತ್!" ಮ್ಹಣ್ ಸಾದ್ಯಾ ತಾಳ್ಯಾನ್ ವಿಕ್ಟರಾನ್ ಕಳಯ್ತಾನಾ, ತೊಚ್ ನ್ಹಯ್ ಸರ್ವಯಿ ಘುಸ್ಪಡ್ಲೆ. ಸಾಕ್ಶಿಕಾಟ್ಯಾಥಾವ್ನ್ ದೆ೦ವ್ಚೆ೦ಗಿ ನಾಕಾಗಿ ಮ್ಹಣ್ ಪಾದ್ದೆ೦ವ್ಚ್ಯಾ ಟೊನಿಕ್ ಸರ್ಕಾರಿ ವಕೀಲಾನ್ ಹಿಶಾರೊ ದಿಲ್ಯಾ ನ೦ತರ್ ಮಾತ್ರ್ ತೊ ದೆ೦ವೊನ್ ಸಾಕ್ಶಿ೦ಚಾ ರುಮಾಕ್ ಗೆಲೊ. (ವಿಚಾರಣಾವೆಳಿ೦ ಸರ್ವ್ ಸಾಕ್ಶಿ೦ಕ್ ವಿ೦ಗಡ್ ರೂಮಾ೦ತ್ ಬೊಸೊ೦ವ್ಚಿ ವ್ಯವಸ್ಥಾ ಆಸ್‌ಲ್ಲಿ. ಎಕಾಮೆಕಾಚಿ ವಾಕ್ಮೂಲಾ೦ ಆಯ್ಕೊನ್ ಸತ್ ಲಿಪಯ್ನಾ ಜಾ೦ವ್ಚ್ಯಾ ಖಾತಿರ್.)

ಚೊವ್ದಾವ್ಯಾ ದಿಸಾ ಸರ್ಕಾರಿ ವಕೀಲಾನ್ ಆಪ್ಲ್ಯಾ ನಿಮಾಣ್ಯಾ ಸಾಕ್ಶಿಕ್ ಆಪವ್ನ್ ಆಪ್ಲಿ ಕೇಜ್ ಸ೦ಪಯ್ಲಿ.

ಆತಾ೦ ವಿಕ್ಟರಾನ್ ಆಪ್ಣಾಚಾ ಪಾಡ್ತಿನ್ ಆಪ್ಣಾಚಿಚ್ ಕೇಜ್ ಉಭಿ ಕರು೦ಕ್ ಆಸ್‌ಲ್ಲ್ಯಾನ್---

"ಹ್ಯಾ ಸಾಕ್ಸಿ ಬರಾಬರ್ ಮೊಜ್ಯೆ ಕೇಜಿಚೆ೦ ಕೊಟೆ೦ ಬ೦ದ್ ಜಾತಾ!" ಸಮಾಧಾನೆನ್ ಕಳಯ್ಲಾಗ್ಲೊ ಸರ್ಕಾರಿ ವಕೀಲ್. "ಮಿ|ವಿಕ್ಟರಾನ್ ಹ್ಯಾ ಕೇಜಿ೦ತ್ ಕಸಲೆ೦ಚ್ ಉತ್ತೇಜನ್ ದಾಕ೦ವ್ಕ್ ನಾ ಮ್ಹಣ್ ವಕೀಲಾಚ್ಯೆ ನದ್ರೆನ್ ಹಾ೦ವೆ೦ ಮ್ಹಣಾಜೆ. ತರ್‌ಯಿ ಹಿ ಕೇಜ್ ಜ್ಯೂರಿಚಾ ನಿರ್ಣಯಾಕ್ ಅರ್ಪು೦ಚ್ಯಾ ಪಯ್ಲೆ೦ ಮಿ|ವಿಕ್ಟರಾಚಾ ಹಾತಿ೦ ಹಾ೦ವ್ ಸೊಡ್ತಾ೦. ತಾಣೆ ಆಪ್ಲ್ಯೊ ಸಾಕ್ಶಿ ಮುಕಾರ್ ಹಾಡ್ಯೆತ್!."

ವಿಕ್ಟರ್ ಹಾಳ್ವಾಯೆನ್ ಉಬೊ ಜಾಲೊ.

"ಮೊಜ್ಯಾ ಪಾಡ್ತಿನ್ ಕಸಲ್ಯೊಚ್ ಸಾಕ್ಶಿನಾ೦ತ್!" ತಾಣೆ ಕಳಯ್ಲೆ೦.

ಅತ್ಯ೦ತ್ ದಾಟ್ ಮೌನ್ ಥ೦ಯ್ಸರ್ ದೆ೦ವ್ಲೆ೦.

"ತರ್ ತು೦ವೆ೦ ತುಜೆ೦ ನಿಮಾಣೆ೦ ವಾಕ್ಯಾವೃ೦ದ್ ಜ್ಯೂರಿ ಸಾಮ್ಕಾರ್ ದವರುವ್ಯೆತ್!" ನಿತಿಕರ್ತಾನ್ ಸರಕಾರಿ ವಕೀಲಾಕ್ ಸೂಚಾಯ್ಲೆ೦.

ಪಯ್ಲೊಚ್ ಥಕ್‌ಲ್ಲೊ ಪ್ರೊಸೆಕ್ಯೂಟರ್ ವೊಚ್ಯಾಕ್ ಪಳೆಲಾಗ್ಲೊ. "ಮ್ಹೊಜಿ ಉತ್ರಾ೦ ಲಾ೦ಬ್ ಆಸಾ ಜಾಲ್ಲ್ಯಾನ್ ತಿ೦ ಹಾ೦ವ್ ಫಾಲ್ಯಾ೦ಕ್ ಬಾಕಿ ದವೊರ್ತಾ೦ ಯುವರ್ ಹೊನರ್. ಆಯ್ಚ್ಯಾ ದಿಸಾಕ್ ಹಿ ಕೋಡ್ತ್ ಫಾಸ್ಳಾವ್ಯೆತ್ ಮ್ಹಳ್ಳೆ೦ ಮ್ಹಜೆ೦ ಖಾಲ್ತೆ೦ ಸುಚನ್."

"ಹೆರ್ ಕಸಲ್ಯಾಯಿ ಸಾಕ್ಶೆ೦ಚ್ಯಾ ಸೊಧ್ನೆರ್ ತು೦ ಆಸಾಯ್ ಮಿ|ಪ್ರೊಸೆಕ್ಯೂಟರ್?"

"ನಾ ಯುವರ್ ಹೊನರ್."

"ಬರೆ೦ ತರ್, ವೇಳ್ ಜಾಯಿತ್ ಆಯ್ಲೊ ಜಾಲ್ಲ್ಯಾನ್ ಹಿ ಕೇಜ್ ಫಾಲ್ಯಾ೦ ಮು೦ದರ್ತೆಲಿ."

ಅಶೆ೦ ಉದೆಲೊ ತೊ ಪ೦ದ್ರಾವೊ ದೀಸ್.

ಸರ್ವ್ ಹಾಜರ್ ಜಾವ್ನ್ ಕೋಡ್ತ್ ಜೀವ೦ತ್ ಜಾತೆಚ್ ಸರ್ಕಾರಿ ವಕೀಲ್ ಜ್ಯೂರಿ ಮೆ೦ಬರಾ೦ ಸಾಮ್ಕಾರ್ ಹಾಜರ್ ಜಾಲೊ. ತಾ೦ಚೆ೦ ಪರಿಪೂರ್ಣ್ ಗಮನ್ ಜಿಕ್ಚ್ಯಾ ಖಾತಿರ್ ತಾಣೆ ಆಪ್ಲೆ ಹಾತ್ ವಿಸ್ತಾರ್ಲೆ.

"ಜ್ಯೂರಿಚಾ ಮಾನೇಸ್ತ್ ಆನಿ ಶಿಕ್ಪಿ ಸಾ೦ದ್ಯಾ೦ನೊ!" ತಾಣೆ ಮಾನಾಳ್ ವಾಕ್ಯಾಸ೦ಗಿ೦ ಆಪ್ಲೆ೦ ಭಾಶಣ್ ಪ್ರಾ೦ಭ್ ಕೆಲೆ೦. "ಪಾಶಾರ್ ಜಾಲ್ಲ್ಯಾ ಚವ್ದಾ ದಿಸಾ೦ನಿ ಹ್ಯಾ ಅಸಾಧಾರಣ್ ಆನಿ ಅಮಾನುಶ್ ಕೇಜಿಚೆ೦ ಎಕೇಕ್‌ಚ್ ಕರಾಳ್ ಪಾನ್ ಹಾ೦ವೆ೦ ತುಮ್ಚ್ಯಾ ಸಾಮ್ಕಾರ್ ಉಗ್ತೆ೦ ಕೆಲೆ೦. ಆತಾ೦ ಹ್ಯಾ ಪಾನಾ೦ಚೆರ್ ಮತಿಚಿ ನಜರ್ ಮಾರುನ್ ತ್ಯಾ ಮನ್ಶಾಚೊ ಅಪ್ರಾಧ್ ಯಾ ನಾ ಅಪ್ರಾಧ್ ತುಮಿ೦ ನಿರ್ಣಯ್ ಕರ್ತಾತ್ ಆನಿ ತುಮ್ಚ್ಯಾ ನಿರ್ಣಯಾಚೆರ್ ಹೊ೦ದೊನ್ ನಿತಿಕರ್ತ್ ಆಪ್ಲೆ೦ ತೀರ್ಪ್ ದಿತೊಲೊ. ಪುಣ್ ಹೆ೦ ಜಾ೦ವ್ಚ್ಯಾ ಫುಡೆ೦, ಭೋವ್ ಸ೦ಕ್ಶೇಪ್‌ಥರಾನ್ ಸಾಕ್ಶಿಗಾರಾ೦ ಮುಖಾ೦ತ್ರ್ ಆಮ್ಕಾ೦ ಕಳಿತ್ ಜಾಲ್ಲ್ಯೊ ಸ೦ಗ್ತಿ ಆನಿ ಸತಾ೦ ಪರ್ತ್ಯಾನ್ ಹಾ೦ವ್ ತುಮ್ಚ್ಯೆ ಸಾಮ್ಕಾರ್ ದವೊರ್ತಾ೦. ತುಮ್ಚೆ೦ ಗಮನ್ ದಯಾಕರುನ್ ಮೊಜ್ಯಾ ಉತ್ರಾ೦ಚೆರ್ ಆಸು೦. ಪ್ರಾರ೦ಭಾಚೆರ್, ಮಿ|ಜುಲಿಯನ್ ಲೂಕಾಥಾವ್ನ್, ಮಿ|ವಿಕ್ಟರಾಚಾ ಬಾಳ್ಪಣಾವಿಶಿ೦ ಆಮಿ ಥೊಡ್ಯೊ ಗುಪಿತ್ ಸ೦ಗ್ತಿ ಉಗ್ತ್ಯಾನ್ ಜಾಣಾ೦ ಜಾಲ್ಯಾ೦ವ್. ಅನೈತಿಕ್ ಸ೦ಬ೦ಧಾನ್ ಜನ್ಮಾಲೊ ತೊ. ಹೆ೦ ಸತ್ ಉಚಾರೊ೦ಕ್ ಕಸಲಿಚ್ ಅಡ್ಕಳ್ ಹಾಡಿನಾತ್‌ಲ್ಲ್ಯಾ ಲೂಕ್ ಭಾವ್-ಭಯ್ಣಿಕ್ ಹಾ೦ವ್ ಅಭಾರಿ ಜಾವ್ನಾಸಾ೦. ಮಾನವಾಚಿ೦ ಮೋವ್ ಭೊಗ್ಣಾ೦ ಘಾಸಿತ್ ಜಾತಾನಾ ಮನಿಸ್ ಧೆಧೆಸ್ಪ್ರಾರ್ ಜಾತಾ ಆನಿ ಅಶೆ೦ಚ್ ಘಡ್ಲೆ೦ ಮಿ|ಜುಲಿಯನ್ ಲೂಕಾಥಾ೦ಯ್. ತಾಚಾ ಲಗ್ನಾ ಸ೦ಬ೦ಧಿ ತಾಕಾ ಭೊಗ್‌ಲ್ಲೊ ಅಕ್ಮಾನ್ ಅತೀವ್ ಜಾವ್ನ್‌ಆಸ್‌ಲ್ಲೊ ಆನಿ ಪರಿಣಾಮ್ ಜಾವ್ನ್ ತಾಚ್ಯೆ ಮಧೆ೦ ಆನಿ ಜೊನ್ ಡೇವಿಡಾ ಮಧೆ೦ ದುಸ್ಮಾನ್ಕಾಯ್ ಉಬ್ಜಾಲಿ. ಮಿ|ಜುಲಿಯನ್ ನಿಸ್ವಾರ್ಥಿ ತತ್ವಾ೦ಚೊ ಮನಿಸ್ ಜಾಲ್ಲ್ಯಾನ್ ಆಪ್ಲಿ೦ ತತ್ವಾ೦ ವಿಕ್ಟರಾ ಪರ್ಯಾ೦ತ್ ವಿಸ್ತಾರಾ೦ವ್ಕ್ ತಾಣೆ ಚಿ೦ತ್ಲೆ೦ ಆನಿ ಜೊನ್ ಡೇವಿಡಾಚಾ ಪುತಾಚೊ, ಟೊನಿಚೊ ಪ್ರತಿಸ್ಪರ್ಧಿ ತಾಕಾ ಕೆಲೊ. ಹೊ ಉದ್ದೇಶ್ ಸಾಮಾನ್ಯ್, ತತ್ವಾಭರಿತ್ ಆನಿ ನಿಸ್ವಾರ್ಥಿ. ಪುಣ್ ಸ೦ಯ್ಬಾಥಾವ್ನ್೦ಚ್ ಕ್ರೂರಿ ಜಾವ್ನಾಸ್‌ಲ್ಲ್ಯಾ ವಿಕ್ಟರಾನ್ ಹ್ಯಾ ತತ್ವಾ೦ಚೊ ದುರುಪಯೋಗ್ ಕೆಲೊ ಆನಿ ಮಿ|ಜುಲಿಯನಾಕ್ ಕಳಾನಾತ್‌ಲ್ಲೆಪರಿ೦ಚ್ ತಾಚಿ ಕ್ರೂರತಾ ಆನಿ ಸ್ವಾರ್ಥ್ ತಾಣೆ ಚಡಯ್ಲೊ. ಹಾಚೆ೦ ಬಳಿಶ್ಟ್ ಉದಾಹರಣ್ ಜಾವ್ನಾಸಾ ತೆ೦ ಕೀರಾಚೆ೦ ಪ್ರಕರಣ್. ಹ್ಯಾ ಘಟನಾ ನ೦ತರ್ ಸಭಾರ್ ಸ೦ಗ್ತಿ ಘಡ್ಲ್ಯೊ ಆನಿ ತಾ೦ಚೊ ಮನಸ್ತಾಪ್ ವಿಸ್ರೊನ್ ಡೇವಿಡಾಗೆಲೆ೦ ಆನಿ ಜುಲಿಯನ್ ಲೂಕಾಚೆ೦ ಕುಟಾ೦ಭ್ ಲಾಗಿ೦ ಸರ್ಲೆ೦ ತರಿ ವಿಕ್ಟರ್ ತಸೊಚ್ ಉರ್ಲೊ. ಹಿ ಜಾವ್ನಾಸಾ ತಾಚಿ ಮಾನಸಿಕ್ ಧುಸ್ಪಟಾಯ್. ಹಿ ಧುಸ್ಪಟಾಯ್ ವಾಡೊನ್ ಯೆತಾನಾ ತಾಚೆಥ೦ಯ್ ದುರಹ೦ಕಾರ್ ಚಡ್ಲೊ ಜಾಲ್ಲ್ಯಾನ್ ಹೆರಾ೦ಚಾ ನದ್ರೆ೦ತ್ ಸಾ೦ತ್ ಜಾ೦ವ್ಚ್ಯಾ ಖಾತಿರ್ ಆಪ್ಲ್ಯಾ ಕ್ರೂರತೆಕ್, ಸ್ವಾರ್ಥಾಕ್ ಆನಿ ಹ೦ಕಾರಾಕ್ ವಿಕ್ಟರಾನ್ ನವೆ೦ ನಾ೦ವ್ ದಿಲೆ೦: ಉದ್ದೇಶತ್ವ್!"

"ಹ್ಯಾ ತತ್ವಾ೦ನಾತ್ಲೆಲ್ಯಾ ತತ್ವಾಕ್ ತೊ ಆರಾವ್ನ್ ಧರುನ್ ಆಸ್ತಾನಾ ನೊರ್ಮನ್ ತಿಯೊದೊರಾಚೆ೦ ಕ್ರಾ೦ತಿಕಾರಿ ಪತ್ರ್ ’ಮನಿಸ್’ ತಾಕಾ ದಿಶ್ಟಿಕ್ ಪಡ್ಲೆ೦ ಆನಿ ಆಪ್ಲ್ಯಾ ಅರ್ಥ್‌ನಾತ್‌ಲ್ಲ್ಯಾ ಜಿಣಿಯೆಕ್ ಆಧಾರ್ ಜಾವ್ನ್ ತಾಣೆ ನೊರ್ಮನಾಕ್ ಆನಿ ’ಮನಿಸ್’ ಪತ್ರಾಕ್ ಲಾಗಿ೦ ಘೆತ್ಲೆ೦. ಪರಿಣಾಮ್ ಜಾವ್ನ್ ವಿಕ್ಟರಾಮಧೆ೦ ಆನಿ ಆಪ್ಣಾಮಧೆ೦ ಚಲ್‌ಲ್ಲೆ೦ ಸ೦ಭಾಶಣ್ ತುಮಿ ಮಿ|ಜುಲಿಯನಾಥಾವ್ನ್೦ಚ್ ಆಯ್ಕೊನ್ ಜಾಣಾ೦ತ್. ಆಪ್ಲೆ೦ ನಿಸ್ವಾರ್ಥಿ ಪ್ರಯತನ್ ಸೊಡಿನಾಸ್ತಾ೦ ಮಿ|ಜುಲಿಯನಾನ್ ವಿಕ್ಟರಾಕ್ ಪತ್ರಿಕೋದ್ಯಮ್ ಕೊಲೆಜಿಕ್ ದಾಕಲ್ ಕೆಲೊ. ವಿಕ್ಟರಾಥ೦ಯ್ ಬರ್ಪಾಚೆ೦ ದೆಣೆ೦ ಆಸಾ ವ್ಹೊಯ್ ಪುಣ್ ತೆ೦ ಫಾವೊತ್ಯೆಪರಿ೦ ಗಳ್ಸಿನಾಸ್ತಾ೦ ಕಶೆ೦ ಪ್ರಥಮ್ ಲೇಖನ್೦ಚ್ ಪೊಜ್ಡೆ೦ ಬರಯಿಲ್ಲೆ೦ ಮ್ಹಣ್ ಫ್ರೊಫೆಸರ್ ಫಿಲಿಪಾನ್ ಆಮ್ಕಾ ತಿಳ್ಸಿಲಾ೦. ಸಹಜ್ ಜಾವ್ನ್ ತೀನ್ ವರ್ಸಾ೦ ಭಿತರ್ ತಾಕಾ ತ್ಯಾ ಕೊಲೆಜಿಥಾವ್ನ್ ನಿಕ್ಳಾಯ್ಲೊ."

"ಹಾ೦ಗಾಸರ್ ಪ್ರವೇಸ್ ಜಾತಾ ನೊರ್ಮನ್ ತಿಯೊದೊರಾಚಿ ಧುವ್ ಸೊನಿಯಾ. ಹಾ೦ಕಾ೦ ಪಯ್ಲಿ ಪರಿಚಯ್ ಆಸ್‌ಲ್ಲಿ ಕಿತ್ಯಾಕ್, ವಿಕ್ಟರ್ ನೊರ್ಮನಾಚ್ಯಾ ಪ್ರೆಸ್ಸಾ೦ತ್ ಕಾಮ್ ಕರ್ತಾಲೊ. ವಿಕ್ಟರಾಕ್ ಕೊಲೆಜಿ೦ತ್ಲೊ ಭಾಯ್ರ್ ಘಾಲ್ಲ್ಯಾ ದಿಸಾಚ್ಯೆ ಸಾ೦ಜೆರ್ ಸೊನಿಯಾ ತಾಕಾ ಭೆಟ್ಲೆ೦ ಆನಿ ತಾಣೆ ತಾಚೊ ಮಾನ್‌ಭ೦ಗ್ ಕರುನ್ ಟೊನಿಕ್‌ಯಿ ತಾಚಾ ಕರ್ನೆ೦ತ್ ಸಾ೦ಪ್ಡಾ೦ವ್ಚ್ಯಾ ಇರಾದ್ಯಾನ್ ಸೊನಿಯಾಕ್ ಟೊನಿಚ್ಯಾ ರುಮಾಕ್ ಧಾಡ್ಲೆ೦. ಪುಣ್ ಟೊನಿ ಸಮ್ಜಣೆಚೊ ಆನಿ ಬೊರ್‍ಯಾ ಕುಳಿಯೆಚೊ ಜಾಲ್ಲ್ಯಾನ್ ಜೀವನಾ೦ತ್ ನಿರಾಶಿ ಜಾಲ್ಲ್ಯಾ ಸೊನಿಯಾಕ್ ತಾಣೆ ಆಧಾರಿಲೆ೦ ಆನಿ ಎಸೊಸಿಯೆಶನಾ೦ತ್ ಕಾಮ್ ಕರ್ನ್ ದೀವ್ನ್ ಜಿಣಿಯೆಚಿ ವಾಟ್ ದಾಕಯ್ಲಿ."

"ಹಾ೦ಗಾಸರ್ ವಿಕ್ಟರಾಚೊ ದ್ವೇಶ್ ವಿಕ್ಟರಾಚ್ಯಾ ಕಾಳ್ಜಾ೦ತ್ ರೊ೦ಬ್ಲೊ. ಸೊನಿಯಾಕ್‌ಯಿ ತಾಚೆರ್ ರಾಗ್‌ನಾತ್‌ಲ್ಲೊ ಮ್ಹಣ್ ನ್ಹಯ್. ಟೊನಿನಿ೦ಚ್ ಕಳಯಿಲ್ಲ್ಯಾ ಪ್ರಕಾರ್ ತೆ೦ ಆಪ್ಲ್ಯಾ ಬಾಪಾಯ್ಕ್ ಬೊರ್‍ಯಾ ವಾಟೆಕ್ ಹಾಡು೦ಕ್ ಪಳೆತಾಲೆ೦ ಪುಣ್ ತಾಕಾ ವಿಕ್ಟರ್ ಆಡ್ ಆಸ್‌ಲ್ಲೊ. ಆಪ್ಲೊ ಬಾಪಯ್ ದೆವಾಧೀನ್ ಜಾಲ್ಲ್ಯಾ ದಿಸಾ ತೆ೦ ವಿಕ್ಟರಾಚೆರ್ ಎಕ್ದಂ ಚಾಳ್ವಾಲ್ಲೆ೦ ಮ್ಹಣ್ ಟೊನಿ೦ಚ್ ಆಮ್ಕಾ೦ ಕಳಯ್ಲಾ೦."

"ಪರಿಸ್ಥಿತಿ ಅಶಿ ಆಸ್ತಾ೦, ನೊರ್ಮನ್ ಮೆಲೊ ಆನಿ ಮೊರ್ಚ್ಯಾ ಫುಡೆ೦ ’ಮನಿಸ್’ ಸರ್ವ್ ಹಕ್ಕಾ೦ ತಾಣೆ ವಿಕ್ಟರಾಕ್ ಸೊಡ್ನ್ ದಿಲಿ೦. ವಿಕ್ಟರಾನ್ ಪತ್ರ್ ಜಿವಾಳ್ ದವರ್ಚೆ೦ ಪ್ರಯತನ್ ಕರ್ತನಾ ಹೆಲ್ಗಾ ಮಾರ್ಟಿನ್ ತಾಚ್ಯಾ ಕುಮ್ಕೆಕ್ ಆಯ್ಲೆ೦. ತಾಚೊ ಆನಿ ವಿಕ್ಟರಾಚೊ ಸ೦ಬ೦ಧ್ ಆಜ್ ಕಾಲ್ಚೊ ನ್ಹಯ್. ತೆ೦ ಆಯ್ಲೆ೦ ಆನಿ ಆಪ್ಲ್ಯಾ ಬಾಪಾಥಾವ್ನ್ ಮೆಳ್‌ಲ್ಲೆ೦ ಪ್ರೆಸ್ಸ್ ತಾಣೆ ವಿಕ್ಟರಾಚ್ಯಾ ನಾ೦ವಾರ್ ಕೆಲೆ೦. ’ಮನಿಸ್’ ಪತ್ರ್ ಪರ್ತ್ಯಾನ್ ಜಿವಾಳ್ಳೆ೦ ಆನಿ ಪರಿಣಾಮ್ ಜಾಲೊ ಆಮ್ಚ್ಯಾ ತರ್ನ್ಯಾ ಜನಾ೦ಗಾಚೆರ್. ಆತಾ೦ಚಾ ದಿಸಾ೦ನಿ ಸರ್ವಾ೦ತ್‌ಯಿ ನವೆಸಾ೦ವ್ ಆನಿ ಕ್ರಾ೦ತಿ ಸೊಧ್ಚ್ಯಾ ಜನಾ೦ಗಾಕ್ ’ಮನಿಸ್’ ಪತ್ರಾ೦ತ್ಲಿ೦ ತತ್ವಾ೦ ನವಿ೦ಚ್ ದಿಸ್ಲಿ೦ ಆನಿ ತಾ೦ಕಾ೦ ತಾಣಿ೦ ವೇ೦ಗ್ ಮಾರ್ಲಿ. ವಾಸ್ತವ್ ಜಾವ್ನ್ ಹಿ ತತ್ವಾ೦ ಜಾವ್ನ್ ಆಸಾತ್ ಮುಳಾ೦

sಚಿಜism, mಚಿsoಛಿhism, ಠಿeಡಿveಡಿಣeಜ sex, ಟಿಚಿಡಿಛಿissism ಚಿಟಿಜ seಟಜಿ-ಠಿiಣಥಿ-ಚಿ೦.

ಹಾ೦ಚೊ ಘೋರ್ ಪರಿಣಾಮ್ ಯುವಜಣಾ೦ಚೆರ್ ಜಾತಾನಾ ಆಮ್ಚೆ೦ ಆನಿ ದೇಶಾ೦ತ್ಲಿ೦ ಹೆರ್ ಎಸೊಸಿಯೆಶನಾ ಜಾಗಿ೦ ಜಾಲಿ೦. ಆಮ್ಚ್ಯಾ ಪ್ರಾ೦ತೀಯ್ ಎಸೊಸಿಯೆಶನಾನ್ ಹೆರಾ೦ಕ್ ವಾಟ್ ದಾಕಯ್ಲಿ ಮ್ಹಣ್ ಹಾ೦ವೆ೦ ಮ್ಹಣ್ಯೆತ್. ಫುಡಾರಿ ಜುಲಿಯನ್ ಲೂಕಾವರ್ವಿ೦ ಆನಿ ಫ್ರೊಫೆಸರ್ ಫಿಲಿಪಾಚಾ ಅವಿರತ್ ಶ್ರಮಾವರ್ವಿ೦ ಛಾಪ್ಯಾ೦ಕ್ ಆನಿ ಪತ್ರಿಕೋದ್ಯಮಾ೦ಕ್ ಲಗ್ತಿ ಜಾಲ್ಲೆ೦ ನವೆ೦ ಶಾಸನ್ ಜ್ಯಾರಿಯೆಕ್ ಆಯ್ಲೆ೦. ಸರ್ವ್ ಉದ್ಯಮಿ ಜೆ ವಯ್ರ್ ಸಾ೦ಗ್‌ಲ್ಲ್ಯಾ ಉದ್ಯಮಾ೦ಕ್ ಸೆರ್ವಾಲ್ಲೆ ಜಾವ್ನಾಸಾತ್--ತಾಣಿ೦ ತಾ೦ಚಿ ಕಬ್ಲಾತ್ ಕಸಲ್ಯಾಚ್ ಘಳಾಯೆವಿಣೆ ದಿಲಿ ಆನಿ ಸರ್ಕಾರಾನ್ ದಿಲ್ಲ್ಯೊ ಸವ್ಲತ್ಯೊ ಹಾತಿ೦ ಘೆತ್ಲ್ಯೊ. ಪುಣ್ ’ಮನಿಸ್’ ಪತ್ರಾಚ್ಯಾ ಕಾರ್ಬಾರ್‍ಯಾ೦ನಿ--ಅರ್ಥಾತ್ ಮಿ|ವಿಕ್ಟರ್ ಆನಿ ಕು|ಹೆಲ್ಗಾನ್ ಮಾತ್ರ್ ಹ್ಯಾ ಶಾಸನಾಕ್ ತಕ್ಲಿ ಬಾಗಾಯ್ಲಿ ನಾ. ಪರಿಣಾಮ್ ಜಾವ್ನ್ ಶಾಸನಾಚೊ ಅಧಿಕಾರ್ ಜಾಗೃತ್ ಜಾಲೊ ಆನಿ ಎಕಾ ಪಾಟಾಪಾಟ್ ಎಕ್ ಜಾವ್ನ್ ವಿಕ್ಟರಾಚ್ಯಾ ಪ್ರೆಸ್ಸಾ೦ತ್ಲಿ೦ ಡಿಪಾರ್ಟ್‌ಮೆ೦ಟಾ೦ ಬ೦ದ್ ಜಾಯಿತ್ ಆಯ್ಲಿ೦. ಪುಣ್ ಅಶೆ೦ ಜಾ೦ವ್ಚ್ಯಾ ಫುಡೆ೦ ಹ್ಯಾ ಶಾಸನಾನ್ ಆನಿ ಎಸೊಸಿಯೆಶನಾನ್ ವಿಕ್ಟರಾಕ್ ಜಾಯ್ ತೆ ಅವ್ಕಾಸ್ ದಿಲ್ಲೆಗಿ? ನಿಜಾಯ್ಕಿ ದಿಲ್ಲೆ ಮ್ಹಣ್ ತುಮಿ೦ ಸಾಕ್ಶೇ೦ವರ್ವಿ೦ ಜಾಣಾ೦ ಜಾಲ್ಯಾತ್. ಪುಣ್ ಕಸಲ್ಯಾಚೆ೦ಯಿ ಗುಮಾನ್ ತಾಣೆ ಕೆಲೆ೦ ನಾ."

"ನಿವ್ಸ್‌ಪ್ರಿ೦ಟ್ ಬ೦ದ್ ಜಾಲ್ಯಾ ನ೦ತರ್ ’ಮನಿಸ್’ ಪತ್ರ್ ಭಾಯ್ರ್ ಕಾಡ್ಚಿ ಕಸಲಿಯಿ ವಾಟ್ ತಾಕಾ ಉರ್ಲಿ ನಾ. ಸೊನಿಯಾಚಿ ಖುನ್ ಜಾಲ್ಲ್ಯಾ ದಿಸಾಚ್ ’ಮನಿಸ್’ ಪತ್ರಾಚೊ ನಿಮಾಣೊ ಅ೦ಕೊ ಭಾಯ್ರ್ ಆಯಿಲ್ಲೊ. ತ್ಯೆ ವೆಳಿ೦ ವಿಕ್ಟರಾಚಿ ಮಾನಸಿಕತಾ ಕಶಿ ಆಸಾತ್ ಮ್ಹಣ್ ಆಮ್ಕಾ೦ ಚಿ೦ತುನ್ ಪಳೆ೦ವ್ಕ್ ಕಶ್ಟ್ ಜಾ೦ವ್ಚೆನಾ೦ತ್. ಆಪ್ಲ್ಯಾ ಸಲ್ವಣೆಚ್ಯಾ ಭುರ್ಜಾಕ್ ತೊ ಪಾವ್‌ಲ್ಲೊ. ತಾಚಿ ಸಲ್ವಣ್ ಇತ್ಲಿ ದಾಟ್ ಜಾವ್ನಾಸ್‌ಲ್ಲಿಕಿ ಫುಡೆ೦ ಸಲ್ವೊ೦ಕ್ ಕಸಲೆ೦ಚ್ ಬಾಕಿನಾತ್‌ಲ್ಲೆ೦. ಅಸಲ್ಯಾ ಮಾನಸಿಕ್ ಸ್ಥಿತಿಯೆರ್ ತೊ ಆಸ್ತಾನಾ ಸೊನಿಯಾ ತಾಚೆ ಸರ್ಶಿ೦ ಪಾವ್ಲೆ೦. ಹಾ೦ಗಾಸರ್ ಆಮಿ ಕ್ಶಣ್‌ಬರ್ ರಾವ್ಯಾ೦. ಸೊನಿಯಾ ಥ೦ಯ್ಸರ್ ಗೆಲ್ಲೆ೦ಗಿ ಯಾ ತಾಕಾ ವೆಲ್ಲೆ೦ಗಿ ಮ್ಹಳ್ಳೆ೦ ಯೆದೊಳ್ ರುಜು ಜಾ೦ವ್ಕ್ ನಾ. ಫ್ರೊಫೆಸರ್ ಫಿಲಿಪಾನ್ ದಿಲ್ಲ್ಯಾ ಜಾಪಿ೦ ಪ್ರಕಾರ್ ಸಾ೦ಜೆ ಉಪ್ರಾ೦ತ್‌ಯಿ ಲಾ೦ಬ್‌ಲ್ಲ್ಯಾ ಮೀಟಿ೦ಗಾ ನ೦ತರ್ ತೆ೦ ಎಸೊಸಿಯೆಶನಾಚಾ ಬಾ೦ದ್ಫಾ ಭಾಯ್ರ್ ಗೆಲ್ಲೆ೦. ಉಪ್ರಾ೦ತ್ ಎಸೊಸಿಯೆಶನಾಚಾ ಖ೦ಚಾಯೀ ಸಾ೦ದ್ಯಾನ್ ತಾಕಾ ಜೀವ೦ತ್ ಪಳೆ೦ವ್ಕ್ ನಾ. ತರ್ ಸೊನಿಯಾ ವಿಕ್ಟರಾ ಸರ್ಶಿ೦ ಗೆಲ್ಲೆ೦ಗಿ? ಗೆಲ್ಲೆ೦ ತರ್ ಕಿತ್ಯಾಕ್? ಯೆದೊಳ್ ಆಯ್ಕಾಲ್ಲ್ಯಾ ಸಾಕ್ಶಿ೦ಚಾ ವಾಕ್ಮೂಲಾ೦ ಮುಕಾ೦ತ್ರ್‌ಚ್ ಹ್ಯಾ ಸವಲಾ೦ಕ್ ಜಾಪಿ ಸೊಧುನ್ ಕಾಡ್ಯೆತ್. ಡೊಕ್ಟರಾಚ್ಯಾ ವಾಕ್ಮೂಲಾ ಪ್ರಕಾರ್ ಸೊನಿಯಾಚಾ ಕುಡಿಚೆರ್ ಉಣ್ಯಾರ್ ಉಣೆ ಸ ಥಾವ್ನ್ ಆಟ್ ಪಾವ್ಟಿ೦ ಅತ್ಯಾಚಾರ್ ಚಲ್ಲಾ. ಪುಣ್ ಹೊ ಅತ್ಯಾಚಾರ್ ಎಕ್ಲ್ಯಾವರ್ವಿ೦ ಸಾಧ್ಯ್ ನಾ ಜಾಲ್ಲ್ಯಾನ್ ಸಭಾರ್ ದಾದ್ಲ್ಯಾ೦ಚಾ ಪ೦ಗ್ಡಾನ್ ಸೊನಿಯಾಚೆರ್ ಅತ್ಯಾಚಾರ್ ಚಲಯ್ಲಾ ಮ್ಹಣ್ ಕಳೊನ್ ಯೆತಾ."

"ಪುಣ್ ಹೊ ಅತ್ಯಾಚಾರ್ ಚಲ್‌ಲ್ಲೊ ಖ೦ಯ್ಸರ್? ಹ್ಯಾ ಸವಲಾಕ್‌ಯಿ ನಿಘ೦ಟ್ ಜಾಪ್ ಯೆದೊಳ್ ಮೆಳೊ೦ಕ್ ನಾ. ಸ್ಫೋಟನ್ ಜಾಲ್ಲ್ಯಾ ಪ್ರೆಸ್ಸಾಚೆ೦ ವಠಾರ್ ಅತ್ಯ೦ತ್ ಚತ್ರಾಯೆನ್ ಸೊಧ್ನೆ೦ಕ್ ವಳಗ್ ಕರ್ತನಾ ಆಮ್ಚ್ಯಾ ಚತುರ್ ಪೊಲಿಸಾ೦ಕ್ ಲಾಗ್ಸಿಲ್ಯಾ ತಣಾಚೆರ್ ಆನಿ ಖಣ್ಯೆ೦ತ್ ರಗ್ತಾಚೆ ಕಣ್ ಸಾ೦ಪಡ್ಲ್ಯಾತ್. ಪಾವ್ಸ್ ಯೆತಾಲೊ ಜಾಲ್ಲ್ಯಾನ್ ರಗ್ತಾಕ್ ಘಟ್ ಜಾ೦ವ್ಕ್ ಅವ್ಕಾಸ್ ನಾತ್‌ಲ್ಲೊ ತರಿ ವಿಚಿತ್ರ್ ಥರಾನ್ ರುಜ್ವಾತ್ ಉರ್ಚೆಪರಿ೦ ಥೊಡೆ ರಗ್ತಾಚೆ ಕಣ್ ಸಾ೦ಪಡ್ಲ್ಯಾತ್ ಆನಿ ಹೆ ರಗ್ತಾ ಕಣ್ ಸೊನಿಯಾಚ್ಯಾ ರಗ್ತಾಕ್ ತಾಳ್ ಪಡ್ತಾತ್."

"ಪುಣ್ ಸೊನಿಯಾಚೆರ್ ಚಲ್‌ಲ್ಲೊ ಅತ್ಯಾಚಾರ್ ಪ್ರೆಸ್ಸಾಸರ್ಶಿ೦ನ್೦ಚ್ ಚಲ್‌ಲ್ಲೊ ಮ್ಹಳ್ಳ್ಯಾಕ್ ಬಳಿಶ್ಟ್ ರುಜ್ವಾತ್ ದಿ೦ವ್ಚಿ೦ ತೀನ್ ಆಯ್ದಾ೦ ಇxhibiಣs ಂ,ಃ ಚಿಟಿಜ ಅ ಆಮ್ಕಾ೦ ಸಾ೦ಪಡ್ಲ್ಯಾ೦ತ್. ಪಯ್ಲೆ೦ ಆಯ್ದ್ ಜಾವ್ನಾಸಾ bಚಿಡಿbeಜ-ತಿiಡಿe-೦ಚೆ ಕೊವ್ಳೆ೦; ದುಸ್ರಿ ಜಾವ್ನಾಸಾ ಖೊರ್ವೊ೦ತಾ ಸಾರ್ಕಿ ಸುರಿ ಆನಿ ತಿಸ್ರೆ೦, ಮಾಸ್ ಚಾಚಾ೦ವ್ಚೆ೦ ಖಿಳ್ಯಾ೦ಚೆ ಮೊಡ್ತೆಲ್. ಹ್ಯಾ ತೀನ್‌ಯಿ ಆಯ್ದಾ೦ಚೆರ್ ಬೊಟಾ೦ಚೆ ಘುರ್ತ್ ನಾತ್‌ಲ್ಲೆ ತರಿ ಹಿ ಆಯ್ದಾ೦ ಪ್ರೆಸ್ಸಾ ಲಾಗ್ಸಿಲ್ಯಾ ಖಣಿಯೆ೦ತ್ ಮೆಳ್‌ಲ್ಲಿ೦ ಜಾವ್ನಾಸಾತ್. ತರಿ ಸೊನಿಯಾಚಿ ಕೂಡ್ ಹೆಲ್ಗಾಚ್ಯಾ ಘರಾ೦ತ್ - ವಿಕ್ಟರ್ ಥ೦ಯ್ಸರ್ ರಾವ್ತಾಲೊ - ಆಮ್ಕಾ೦ ಸಾ೦ಪಡ್ಲಿ. ಸೊನಿಯಾಚೆರ್ ಚಲ್‌ಲ್ಲ್ಯಾ ಅತ್ಯಾಚಾರಾಕ್ ಪಳೆಲ್ಯಾರ್ ತಾಕಾ ಪ್ರೆಸ್ಸಾಥಾವ್ನ್ ವಿಕ್ಟರಾಚ್ಯಾ ಘರಾ ಪರ್ಯಾ೦ತ್ ಚಲೊನ್ ಯೆ೦ವ್ಕ್ ಸಾಧ್ಯ್‌ಚ್ ನಾ; ತರ್ ತಾಚಿ ಕೂಡ್ ಘರಾ ಪರ್ಯಾ೦ತ್ ಕಿತ್ಯಾಕ್ ಹಾಡ್ಲಿ? ಹ್ಯಾ ಸವಲಾಕ್ ಜವಾಬ್ ದೀ೦ವ್ಕ್ ಸೊನಿಯಾನ್೦ಚ್ ಯೆಜಾಯ್ ತರಿ ಆಮಿ೦ ಆಮ್ಚೆ೦ ಪ್ರಯತ್ನ್ ಕರ್‍ಯಾ೦."

"ಟೊನಿಚ್ಯಾ ವಾಕ್ಮೂಲಾ ಪ್ರಕಾರ್ ಸೊನಿಯಾ ಎಕ್ ಚತುರ್ ಚಲಿ ಜಾವ್ನಾಸ್‌ಲ್ಲಿ. ಆಪ್ಣಾಚೆರ್ ಅತ್ಯಾಚಾರ್ ಚಲ್‌ಲ್ಲೊ ಪಳೆಲ್ಯಾ ನ೦ತರ್‌ಯಿ ತಿ ನಿರಾಶಿ ಜಾಲಿ ನಾ ಜಾಯ್ಜೆಯ್. ಆಪ್ಲ್ಯೆ ಬಚಾವೆ ಖಾತಿರ್ ತಿಣೆ ಉಪಾಯ್ ಕೆಲೊ. ’ಮ್ಹಾಕಾ ಬಚಾವ್ ಕರ್ಶಿ ತರ್ ಎಸೊಸಿಯೆಶನಾಚೊ ಎಕ್ ಮಹತ್ವಾಚೊ ಘುಟ್ ತುಕಾ ಸಾ೦ಗ್ತಾ೦,’ ಅಶೆ೦ ತಾಣೆ ಮ್ಹಳ್ಳೆ೦ ಜಾಯ್ಜೆಯ್. ವಿಕ್ಟರ್ ತಾಕಾ ಪಾತ್ಯೆಲೊ ಕಿತ್ಯಾಕ್ ತಾಕಾ ತಾಚ್ಯಾ ಸಲ್ವಣೆಚೆ೦ ವೊಜೆ೦ ಚಡ್ ಜಾಲ್ಲೆ೦. ಅಶೆ೦ ಪಾತಿಯೆಲ್ಲ್ಯಾ ವಿಕ್ಟರಾನ್ ತಾಕಾ ಘರಾ ಹಾಡ್ಲೆ೦ ಆನಿ ಸೊನಿಯಾನ್ ಥ೦ಯ್ಸರ್ ಪ್ರಾಣ್ ಕೆಲೊ. ವಿಕ್ಟರಾನ್ ಪೊಳಾಪಳ್ ಘೆ೦ವ್ಚ್ಯಾ ಫುಡೆ೦ಚ್ ಟೊನಿ, ಇನ್ಸ್‌ಪೆಕ್ಟರ್ ಆನಿ ಕೋಡ್ತಿಚೊ oಜಿಜಿiಛಿiಚಿಟ seಡಿveಡಿ ಥ೦ಯ್ಸರ್ ಪಾವ್ಲೆ ಜಾಲ್ಲ್ಯಾನ್ ತಾಕಾ ಕಿತೆ೦ಚ್ ಕರು೦ಕ್ ಜಾಲೆ೦ ನಾ; ತೊ ಸಾ೦ಪಡ್ಲೊ."

"ಹ್ಯಾ ಘಡ್ಬಡೇ೦ತ್ ಆಮ್ಚೆ೦ ಗಮನ್ ಹೆಲ್ಗಾವಯ್ಲೆ೦ ಉಟ್ಲೆ೦ ಮ್ಹಣ್ ಅಮಿ೦ ವೊಪ್ತಾ೦ವ್. ಹ್ಯಾ ಸ೦ದರ್ಭಾಚೊ ಫಾಯ್ದೊ ಜೊಡ್ನ್, ಡಾಯ್ನಾಮೈಟ್ ವಾಪಾರ್ನ್ ಹೆಲ್ಗಾನ್ ಪ್ರೆಸ್ಸ್ ನಾಸ್ ಕೆಲೆ೦. ಹಿ ಮಾ೦ಡ್ಣಿ೦ ತಾಣಿ೦ ಪಯ್ಲಿಚ್ ಕೆಲ್ಲಿ ಮ್ಹಣ್ ಆಮ್ಕಾ೦ ಕಳಿತ್ ಜಾಲಾ೦. ಪ್ರೆಸ್ಸಾಚೆರ್ ಸರ್ಕಾರಿ ಮ್ಹೊರ್ ಪಡೊ೦ಕ್ ನಾ ತರಿ ವಿಕ್ಟರ್ ಕೈದಿ ಜಾಲೊ. ಖುನಿಯೆಚಾ ಪ್ರಕರಣಾ೦ತ್ ಚಿಛಿಛಿessoಡಿಥಿ ಮ್ಹಳ್ಳ್ಯಾ ಆರೋಪಾಚೆರ್ ಆನಿ ಪ್ರೆಸ್ಸ್ ನಾಸ್ ಕೆಲ್ಲ್ಯಾ ಅಪ್ರಧಾಚೆರ್ ಹೆಲ್ಗಾಕ್‌ಯಿ ಕೈದಿ ಕರುನ್ ದವೊರ್ಲಾ೦. ಜ್ಯೂರಿಚಾ ಮಾನೇಸ್ತ್ ಮೆ೦ಬರಾ೦ನೊ, ಹಿ ಜಾವ್ನಾಸಾ ಮ್ಹೊಜಿ ಕೇಜ್. ಸ್ವಾರ್ಥಾಚ್ಯಾ ಲ್ಹಾನ್ ಸುತಾ ಕುಡ್ಕ್ಯಾಥಾವ್ನ್ ವಿಕ್ಟರಾನ್ ಪ್ರಾರ೦ಭ್ ಕೆಲ್ಲೆ೦ ಹೆ೦ ಜಾಳ್ ಆಜ್ ಖ೦ಯ್ಸರ್ ಪಾವ್ಲಾ೦ ಮ್ಹಣ್ ತುಮಿ೦ಚ್ ಪಳೆಲೆ೦."

"ದೈಹಿಕ್ ಥರಾನ್ ಫಕತ್ ಸೊನಿಯಾಚಿ ಖುನ್ ತಾಣೆ ಕೆಲಿ ಪುಣ್ ಮಾನಸಿಕ್ ರಿತಿರ್ ಕಿತ್ಲ್ಯಾ ತರ್ನಾಟ್ಯಾ೦ಕ್ ತಾಣೆ ಬುಡಯ್ಲ್ಯಾತ್? ವಿಕ್ಟರಾ ತಸಲೆ೦ ವ್ಯಕ್ತಿತ್ವ್ ಆಮ್ಚ್ಯಾ ಸಮಾಜೆಕ್ ಕಳ೦ಕ್ ಜಾವ್ನಾಸಾ. ತಿ ಜಾವ್ನಾಸಾ ಎಕ್ ನಾಲಿ ಖಿಣಾ ಭಿತರ್ ವಾಡೊನ್ ವಿಸ್ತಾರ್ಚಿ; ಸ೦ಸಾರಾಚೆ೦ ಸಮಾಧಾನ್ ಪಿಡ್ಡ್ಯಾರ್ ಕರ್‍ಚಿ. ಹಿ ನಾಲಿ ಆಮಿ೦ ಆತಾ೦ಚ್ ಮುಳಾಥಾವ್ನ್ ಬೆ೦ಡಿಜಾಯ್ ಆನಿ ಹುಲ್ಪಾಯ್ಜೆಯ್. ಮಾನೇಸ್ತಾ೦ನೊ! ನಿತಿಕರ್ತಾಚೆ೦ ತೀರ್ಪ್ ತುಮ್ಚ್ಯಾ ನಿರ್ಣಯಾಕ್ ರಾಕ್ತಾ."

ಕೋಡ್ತಿ೦ತ್ ಮೌನ್‌ಪಣ್ ನ್ಹಯ್, ಶಾ೦ತ್‌ಪಣ್ ಉದೆಲ್ಲೆ೦.

ವಿಕ್ಟರ್ ಶಾ೦ತ್ ಆಸ್‌ಲ್ಲೊ.

"ಆತಾ೦ ತುಜಿ ಸರ್ತಿ, ಮಿ|ವಿಕ್ಟರ್!" ನಿತಿಕರ್ತಾನ್ ತಾಕಾ ಜಾಗಯ್ಲೊ. "ತುಜ್ಯಾ ವಿಶಾ೦ತ್ ಕಸಲೆ೦ಯಿ ಜ್ಯೂರಿ ಮೆ೦ಬರಾ೦ ಸಾಮ್ಕಾರ್ ತುಕಾ ದವರು೦ಕ್ ಆಸಾ ತರ್--"

"ಮ್ಹಾಕಾ ಆತಾ೦ ಕಸಲೆ೦ಚ್ ಉಲ೦ವ್ಕ್ ನಾ."

"ತುಜೊ ನಿಮಾಣೊ ಅವ್ಕಾಸ್ ಹೊ."

"ಹೆರಾ೦ನಿ ರಚುನ್ ದಿಲ್ಲೆ ಅವ್ಕಾಸ್ ಹಾ೦ವ್ ಘೆನಾ."

ತಾಚಿ ಜವಾಬ್ ಆಯ್ಕೊನ್ ನಿತಿಕರ್ತಾನ್ ಆಪ್ಲೆ೦ ಮುಕಮಳ್ ತೆವ್ಶಿನ್ ಘು೦ವ್ಡಾಯ್ಲೆ೦. ತಾಚ್ಯಾ ದೊಳ್ಯಾ೦ನಿ ಆಸ್‌ಲ್ಲೊ ಕ್ರೋಧ್ ಕಸಲ್ಯಾಚ್ ಉಪ್ಕಾರಾಕ್ ಪಡ್ಲೊ ನಾ.

"ಜ್ಯೂರಿಚಾ ಮಾನೇಸ್ತಾ೦ನೊ!" ನಿತಿಕರ್ತಾಚೊ ತಾಳೊ ಉಟ್ಲೊ. "ಹ್ಯಾ ಪ್ರಕರಣಾಚೆರ್ ತುಮ್ಚೊ ನಿರ್ಣಯ್ ದಿ೦ವ್ಚಾ ಫುಡೆ೦ ಜeಟibeಡಿಚಿಣioಟಿ--ನಾ ಖಾತಿರ್ ಭಾಯ್ರ್ ವೊಚ್ಯೆತ್!"

ಜಾತಾತಿತ್ಲೊ ಉಣೊ ಆವಾಜ್ ಕರುನ್ ಜ್ಯೂರಿ ಮೆ೦ಬರ್ ಭಾಯ್ರ್ ಗೆಲೆ.

ಚಡ್ ವೇಳ್ ತಾಣಿ೦ ಕಾಡ್ಲೊ ನಾ.

ಭಿತರ್ ಆಯಿಲ್ಲ್ಯಾ ತಾ೦ಚ್ಯಾ ಮುಕಮಳಾರ್ ಭಿರಾ೦ತ್ ನಿಶೆತಾಲಿ. ತೆ ಬೊಸ್ತೆಚ್ ತಾ೦ಚೆ ಮಧ್ಲೊ ಎಕ್ಲೊ ಉಬೊ ಜಾಲೊ. ತಾಚ್ಯಾ ಕಪಾಲಾ ವಯ್ಲೊ ಘಾಮ್ ನಿಸ್ತೇಜ್ ಥರಾನ್ ಉಜಳ್ತಾಲೊ.

"ಯುವರ್ ಹೊನರ್!" ತಾಚೊ ತಾಳೊ ಕಾ೦ಪ್ತಾಲೊ. "ಜ್ಯೂರಿಚೆ ಸರ್ವ್ ಸಾ೦ದೆ ಕಸಲ್ಯಾಚ್ ತರ್ಕಾವಿಣೆ೦ ನಿರ್ಣಯಾಕ್ ಆಯ್ಲ್ಯಾತ್." ತಾಣೆ ವಿಕ್ಟರಾಕ್ ಬೋಟ್ ಜೊಕ್ಲೆ೦. ವಿಕ್ಟರ್ ಆಪ್ರಾಧಿ ಜಾವ್ನಾಸಾ!"

ಕೋಡ್ತಿ೦ತ್ಲೆ೦ ವಾರೆ೦ಚ್ ಸ್ತಬ್ಧ್ ಜಾಲೆ೦.

ಪುಣ್ ವಿಕ್ಟರ್ ಮಾತ್ರ್ ಹಾಸ್ಲೊ.

ಥ೦ಯ್ಸರ್ ಹಾಜರ್ ಆಸ್‌ಲ್ಲ್ಯಾ ಮಧೆ೦ ಜಾ೦ವ್ಚೆ೦ ಮೌನ್ ಪ್ರತಿಕ್ರಿಯೆ೦ ಪಳೆವ್ನ್ ತಾಕಾ ಎಕ್ ಸ೦ಗತ್ ಕಳಿತ್ ಜಾಲಿ---

ಕೀಟ್ ಪೆಟ್‌ಲ್ಲೆ೦; ವೆಗಿ೦ಚ್ ಉಜೊ ಪೆಟ್ತೊಲೊ!

"ಹಾ೦ವೆ ತೀರ್ಪ್ ದೀವ್ನ್ ಶಿಕ್ಶಾ ವಿಧ್ಸು೦ಚಾ ಪಯ್ಲೆ೦ ಜರ್ತರ್ ತು೦ ತುಜಿ ಚೂಕ್ ಒಳ್ಕೊನ್ ಮಾಫ್ ಮಾಗ್ಶಿ - ಠಿಟeಚಿಜ guiಟಣಥಿ - ತುಜ್ಯಾ ಶಿಕ್ಶೆ೦ತ್ ಕಸಲಿಯಿ ಮಾಫಿ ಯಾ ರಿಯಾಯತಿ ದಾಕೊವ್ಯೆತ್!" ನಿತಿಕರ್ತಾನ್ ಸುಚ್ಸಿಲೆ೦.

ವಿಕ್ಟರ್ ಹಾರ್ಧಿಕ್ ಹಾಸೊ ಹಾಸ್ಲೊ.

"ಮೊಜ್ಯಾ ಜಯ್ತಾಚೆ೦ ಮೋಲ್ ಹಾ೦ವ್ ಖ೦ಚಾಯಿ ಥರಾನ್ ಉಣೆ೦ ಕರು೦ಕ್ ಅಪೇಕ್ಶಿನಾ," ತಾಣೆ ಜಾಪ್ ದಿಲಿ.

ನಿತಿದಾರಾನ್ ತೀರ್ಪ್ ದಿಲೆ೦-

ವಿಕ್ಟರ್ ಅಪ್ರಾಧಿ ಜಾವ್ನಾಸ್‌ಲ್ಲೊ.

ನಿತಿದಾರಾನ್ ಶಿಕ್ಶಾ ವಿಧ್ಸಿಲಿ--

ವಿಕ್ಟರಾಕ್ ಮರಣ್ ಪರ್ಯಾ೦ತ್ ಕಠಿಣ್ ಬ೦ದಡ್ ಫಾವೊ ಜಾಲ್ಲಿ.

"ಆತಾ೦ ಹಿ ಕೋಡ್ತ್ ಫಾಸಾಳ್ತಾ!" ಘಾಮಾನ್ ಬುಡ್ಲಲೊ ನಿತಿಕರ್ತ್ ಉಬೊ ಜಾಲೊ ಆನಿ ಮೌನ್‌ಪಣಿ ಸರ್ವಯಿ ಉಭೆ ಜಾಲೆ.

ದೋಗ್ ಪೊಲಿಸ್ ಅಧಿಕಾರಿ ವಿಕ್ಟರಾಚಾ ಕುಶಿ೦ನಿ ಉಭೆ ಜಾಲೆ.

ವಿಕ್ಟರ್ ಉಬೊ ಜಾಲೊ.

"ಆತಾ೦ ಹಾ೦ವ್ ಉಲಯ್ತಾ೦!" ತಾಚೊ ಘಣ್ಗಣೀತ್ ತಾಳೊ, ಸರ್ವಾ೦ಚ್ಯೊ ದಿಶ್ಟಿ ತಾಚೆರ್ ಪಡಾಶೆ೦ ಕರಿಲಾಗ್ಲೊ.

"ಜಿಣಿಯೆಚಾ ಭುರ್ಜಾಥಾವ್ನ್, ಜಯ್ತಾಚಾ ಶಿಖರಾಥಾವ್ನ್ ಜೀವ೦ತ್ ಆಸುನ್ ಮೆಲ್ಲ್ಯಾ೦ನಿ ಮೊಜ್ಯೆ ಸಾಮ್ಕಾರ್ ಉಗ್ತ್ಯಾನ್ ಸಲ್ವಣ್ ಮಾ೦ದುನ್ ಘೆತ್‌ಲ್ಲ್ಯಾ ಹ್ಯಾ ದಿಸಾ, ಮೊಜ್ಯೆ ಸ೦ಗಿ೦ ಜಿಯೆತೆಲ್ಯಾ೦ಕ್ ಹೊ ಸ೦ದೇಶ್ ಹಾ೦ವ್ ಪಾಟಯ್ತಾ೦--

"ಹಾ೦ವ್ ಜಿಯೆತಾ೦!"

"ಹೆ೦ ಅ೦ತ್ಯ್ ನ್ಹಯ್, ಪ್ರಾರ೦ಭ್ ಜಾವ್ನಾಸಾ"

...ಸಮಾಪ್ತ್...

Tags: Edwin JF Dsouza, Konkani Novel, Vasu Valencia, Konkani, Konkani, Mangalore, Mangalorean, Mother Tongue

From around the world

"ಹಾಂವ್ ಜಿಯೆತಾಂ" - ಜಿಣಿಯೆಚೆ೦ ಭುರ್‍ಜ್

2 Comment/s.

Post your comments

ಧಾ೦ವ್ ವಿಕ್ಟರ್, ಧಾ೦ವ್!

ಸ್ವಾರ್ಥ್, ರೂಣ್ ಆನಿ ದಾವೊ

ಗುಪಿತ್ ವರ್‍ಸಾ೦

ಜಿವೊ ಮನಿಸ್

ತ್ರಿಕೋನ್

ತ್ರಾಸಿಚಿ೦ ಭುಜಾ೦

ಪೃಥ್ವಿಚೊ ಪುತ್ರ್

ವೆಭಿಚಾರಿ-ವೆಭಿಚಾರಿಣ್

ಜುದಾಸ್!

ಮನಿಸ್

ರೆಕಾದ್

ಕರ್‍ನಿ

ಝುಜಾ-ಥಳ್

ಮಿಸ್ಟರ್ ವಿಕ್ಟರ್

ಆಮಾಸ್

"ಸಾಧಿ ಚಲಿ"

ಕೀರ್

ಜಿಣಿಯೆಚೆ೦ ಭುರ್‍ಜ್

Connect

Our Address
Mangalore

Our Address
Udupi

Our Address
Dubai