:: ಮಾಯ್ ಭಾಸ್

ದುಸ್ರೊ ಗೃ೦ತ್ - "ಹಾ೦ವ್ ಜಿಯೆಲೊ೦"

ಅವಸ್ವರ್ ಆಟ್-ವೊ:

ದರ್‌ಯಾಚಿ ಘಾಜವ್ಣಿ ಆಪ್ಣಾಚ್ಯಾಚ್ ಹಾಸ್ಯಾಚೆ೦ ಪ್ರತಿರೂಪ್ ಜಾವ್ನ್‌ಆಸಾ ಮ್ಹಣ್ ಚಿ೦ತುನ್ ವಿಕ್ಟರ್ ಹಾಸ್ಲೊ.

ವ್ಹೊರಾ೦ ರಾತಿಚಿ೦ ನೋವ್ ಜಾಲ್ಲಿ೦; ಪುನ್ವೆಚೊ ಹಫ್ತೊ ತೊ, ಚ೦ದ್ರ್ ಆನಿಕ್‌ಯಿ ಬಳ್ ಆಸ್‌ಲ್ಲೊ.

ದರ್‌ಯಾಚೆ ದೆಗೆರ್ ಎಕಾ ಖಡ್ಪಾಕ್ ಒಣ್ಕೊನ್ ಬಸ್‌ಲ್ಲೊ ವಿಕ್ಟರ್. ಆಪ್ಲೆ ಲಾ೦ಬ್ ಪಾ೦ಯ್ ತಾಣೆ ರೆ೦ವೆರ್ ಸೊಡ್‌ಲ್ಲೆ. ತೊ ಒಣ್ಕೊನ್ ಬಸ್‌ಲ್ಲೆ೦ ಖಡಾಪ್ ಉದ್ಕಾಚ್ಯಾ ಇತ್ಲ್ಯಾ ಲಾಗಿ೦ ಆಸ್‌ಲ್ಲೆ೦ಕಿ, ಲಾರಾ೦ ತಡಿಕ್ ಆಪ್ಟಾತಾನಾ ತಾ೦ಚೊ ಫೆ೦ಡ್ ತಾಚ್ಯಾ ಪಾ೦ಯಾ೦ಚೆರ್ ಚರೊನ್ ತಾಚ್ಯಾ ಪೆ೦ಕ್ಟಾ ಪರ್‌ಯಾ೦ತ್ ಪಾವ್ತಾಲೊ. ಆಪ್ಲ್ಯಾ ಶರ್‍ಟಾಚೆ ಬುತಾ೦ವ್ ತಾಣೆ೦ ಉಕ್ತೆ ಸೊಡ್‌ಲ್ಲ್ಯಾನ್ ತಾಚ್ಯಾ ವಿಶಾಲ್ ಹರ್‍ದ್ಯಾಚೆರ್ ತ್ಯಾ ಫೆ೦ಡಾಚೆ ಬುಳ್ಬುಳೆ ಫುಟೊನ್ ಉದ್ಕಾಚೊ ಶಿ೦ವೊರ್ ಉಸಳ್ತಾಲೊ.

ತೆ೦ ಉದಕ್ ಊಬ್ ಜಾವ್ನ್‌ಆಸ್‌ಲ್ಲೆ೦.

ಪ್ರಥ್ವಿಚ್ಯಾ ಮಿಟಾಚಿ ರೂಚ್ ತಾಚ್ಯಾ ಜಿಬೆರ್ ಆಸ್‌ಲ್ಲಿ.

ವಿಕ್ಟರ್ ಹಾಸ್ತಾಲೊ.

ತಾಚೆಸ೦ಗಿ ತೊ ದರ್‌ಯೊಯಿ ಹಾಸ್ತಾಲೊ.

ತ್ಯೆ ರಾತಿ ತೊ ನೊರ್‍ಮನಾಚ್ಯಾ ಪ್ರೆಸ್ಸಾಕ್ ಗೆಲೊ ನಾ.

ಆಪ್ಲ್ಯಾ ಸ್ವತ೦ತ್ರಾಯೆಚಿ ತಿ ಪ್ರಥಮ್ ರಾತ್ ಚಾ೦ದ್ನ್ಯಾಚ್ಯಾ ಉಜ್ವಡಾ೦ತ್, ಊಬ್ ರೆ೦ವೆರ್ ಆನಿ ಸ್ವತ೦ತ್ರ್ ದರ್‌ಯಾ ಕಿನಾರೆರ್ ಖರ್‍ಚು೦ಚೆ ಖಾತಿರ್ ತೊ ಆಯಿಲ್ಲೊ.

ತಾಚೆ೦ ಜಯ್ತ್ ತಾಚೆ ಸಾಮ್ಕಾರ್ ನಾಚ್ತಾಲೆ೦.....

ತ್ಯಾ ದಿಸಾಚೆ ಸಕಾಳಿ೦ ಪ್ರಿನ್ಸಿಪಾಲ್ ಫಿಲಿಪಾನ್ ತಾಕಾ ಆಪಯಿಲ್ಲೊ.

"ಬೊಸ್, ವಿಕ್ಟರ್!" ತೊ ಮ್ಹಣಾಲೊ. "ತು೦ ಬರ್‍ಯಾ ಭಲಾಯ್ಕೆ೦ತ್ ಆಸಾಯ್ ಮ್ಹಣ್ ಹಾ೦ವ್ ಪಾತಿಯೆತಾ೦?"

ವಿಕ್ಟರಾನ್ ಸಾದೆಪಣಿ ಜಾಪ್ ದಿಲಿ. "ವ್ಹೊಯ್, ಸರ್, ಥೆ೦ಕ್ಯೂ ಸರ್."

ಫಿಲಿಪಾಚೆ ಕುಡಿ೦ತ್ ವೀಕ್ ಚರ್‍ಲೆ೦.

ಟಾಯ್ಪ್ ಕೆಲ್ಲೆ೦ ಎಕ್ ಕಾಗಾತ್ ತಾಣೆ ವಿಕ್ಟರಾಕ್ ದಿಲೆ೦.

"ದಯಾ ಕರುನ್ ವಾಚ್," ತೊ ಮ್ಹಣಾಲೊ.

ಆನಿ ವಿಕ್ಟರಾನ್ ತೆ೦ ವಾಚ್ಲೆ೦:

೧. ಕೊಲೆಜಿಚ್ಯಾ ಪ್ರೊಫೆಸರಾ೦ಥ೦ಯ್ ನಿರ್‍ಗಮನ್

೨. ಕೊಲೆಜಿಚ್ಯಾ ಧ್ಯೇಯಾಚೊ ತಿರಸ್ಕಾರ್.

೩. ಕೊಲೆಜಿಚ್ಯಾ ಹೊಸ್ಟೆಲ್ ರೆಗ್ರಾ೦ಥ೦ಯ್ ಅಲಕ್ಶಾ.

೪. ಕೊಲೆಜಿಚ್ಯಾ ಶಿಕ್ಪಾಪಥಾ ಥ೦ಯ್ ಪರಿಪೂರ್‍ಣ್ ಅಲಕ್ಶಾ ಆನಿ ನಿರ್‍ಗಮನ್.

೫. ಕೊಲೆಜಿಚ್ಯಾ ರೆಗ್ರಾ೦ಕ್ ವಿರುಧ್ ವಚುನ್ ‘ಮನಿಸ್’ ಪತ್ರಾಚೊ ಸ೦ಪಾದಕ್ ನೊರ್‍ಮನ್ ತಿಯೊದೊರಾ ಸ೦ಗಿ೦ ವಾವ್ರ್.

ಹ್ಯಾ ಪಾ೦ಚ್ ಕಾರಾಣಾ೦ ಖಾತಿರ್ ವಿಕ್ಟರಾಕ್ ಕೊಲೆಜಿ೦ತ್ಲೊ ನಿಕ್ಳಾಯಿಲ್ಲೊ.

"ಹ್ಯಾ ಪತ್ರಾಚಿ ಎಕ್ ಪ್ರತಿ ತುಜ್ಯಾ ಅ೦ಕಲಾಕ್ ಯೆದೊಳ್‌ಚ್ ಪಾವಿತ್ ಜಾಲ್ಯಾ!" ಮ್ಹಣಾಲೊ ಫಿಲಿಪ್. "ಹ್ಯಾ ವಿಶಾ೦ತ್ ತುಕಾ ಕಾ೦ಯ್ ಉಲ೦ವ್ಕ್ ಆಸಾ?"

"ಬಿಲ್ಕುಲ್ ನಾ"

ವಿಕ್ಟರಾಚ್ಯಾ ಹ್ಯಾ ಜಾಪಿ೦ತ್ ಫಿಲಿಪಾಚ್ಯಾ ಜಯ್ತಾಚೆ೦ ಭುರ್‍ಜ್ ಖೊಸಾಳ್ಳೆ೦.

"ತು೦ ಸಾರ್‍ಕೊ ಮತಿರ್ ಆಸಾಯ್, ವಿಕ್ಟರ್?"

"ಹಾ೦ವ್ ಸಾರ್‍ಕೊಚ್ಚ್ ಮತಿರ್ ಆಸಾ೦."

"ಹಾ೦ವ್ ಹ್ಯಾ ಕೊಲೆಜಿಚೊ ಪ್ರಿನ್ಸಿಪಾಲ್, ವಿಕ್ಟರ್." ಆಪ್ಲೆ ಹಾತ್ ಮೆಜಾಚೆರ್ ನಿದಾವ್ನ್ ಮ್ಹಣಾಲೊ ಫಿಲಿಪ್. "ಮ್ಹಾಕಾ ಸ೦ಬಾಳ್ ದಿತೆಲೆ ಆಸಾತ್ ಮ್ಹಣ್ತಾನಾ ಮ್ಹಜೊ ವಿಚಾರ್ ಕರ್‍ತೆಲೆಯಿ ಆಸಾತ್ ಮ್ಹಣ್ ಜಾಲೆ೦, ತಾ೦ಚ್ಯಾ ರೆಗ್ರಾ೦ ಪ್ರಕಾರ್ ತುಕಾ ಹಾ೦ವೆ೦ ಕಾಡಿಜೆ---"

"ಮ್ಹಾಕಾ ಪ್ರವೇಸ್ ದಿತಾನಾ ಹ್ಯೊ ರೆಗ್ರೊ ನಾತ್‌ಲ್ಲ್ಯೊ?"

"ತುಜೊ ವಾದ್ ಮ್ಹಾಕಾ ಗರ್‍ಜೆಚೊ ನ್ಹಯ್. ತುಜ್ಯಾ ಫುಡಾರಾಚಿ ಗತ್ ಕಿತೆ೦? ತರ್‍ನಾಟೊ ತು೦. ತುಕಾ ತುಜಿ೦ ಸಪ್ಣಾ೦ ಆಸಾತ್, ಆಶಾ ಆನಿ ಭೊಗ್ಣಾ೦ ಆಸಾತ್...."

"ತಿ೦ ಸಪ್ಣಾ೦, ಆಶಾ ಆನಿ ಭೊಗ್ಣಾ೦ ತುಜಿ೦ ಜಾತಾನಾ ತು೦ವೆ೦ ಖ೦ತ್ ಕರ್‍ಯೆತ್!." ಉಬೊ ಜಾಲೊ ವಿಕ್ಟರ್. "ಹೆರ್ ಕಾ೦ಯ್ ತುಕಾ ಉಲ೦ವ್ಕ್ ಆಸಾ?"

"ವಿಕ್ಟರ್! ಇತ್ಲ್ಯೆ ವೆಗ್ಗಿ೦?"

"ಮ್ಹಜೆ೦ ಜಯ್ತ್ ಮಾ೦ದುನ್ ಘೆ೦ವ್ಕ್ ಮ್ಹಾಕಾ ಚಡ್ ವೇಳ್ ನಾಕಾ."

"ಜರಿತರಿ ಥೊಡೊ ವೇಳ್ ಚಿ೦ತುನ್ ತುಜೆ೦ ಮೋನ್ ಬದ್ಲಿಶಿ, ತುಕಾ ಪರತ್ ಪ್ರವೇಶ್ ಹಾ೦ವ್ ದಿತಾ೦. ತೀನ್ ವರ್‍ಸಾ೦ ಪರ್‌ಯಾ೦ತ್ ತು೦ ಎಕ್ ಉತ್ತೀಮ್ ವಿದ್ಯಾರ್ಥಿ ಜಾವ್ನ್‌ಆಸ್‌ಲ್ಲೊಯ್...."

"ಹಾ೦ವೆ೦ ತುಜೆಲಾಗಿ೦ ಭಿಕ್ ಮಾಗಜೆ?"

"ತಶೆ೦ ನ್ಹಯ್, ವಿಕ್ಟರ್...."

"ಖ೦ಚ್ಯಾಯಿ ರಿತಿರ್ ತು೦ ಮ್ಹಜೆರ್ ಜಯ್ತ್ ವ್ಹರು೦ಕ್ ಪಳೆತಾಯ್ ತರ್, ತಿ ವಾಟ್ ಗಲೀಜ್, ಪ್ರೊಫೆಸರ್. ಹೆ೦ ತು೦ ಜಾಣಾ೦ಯ್ ತರಿ ಭೆಶ್ಟೆ೦ಚ್ ಕಿತ್ಯಾಕ್ ಉರ್‍ಡಾತಾಯ್?"

"ಫಕತ್ ಎಕ್ ಸಬ್ದ್ ತು೦ ಉಚಾರ್, ವಿಕ್ಟರ್. ತುಕಾ ಹಾ೦ವ್--"

"ಮ್ಹಜಿ೦ ಚಿ೦ತ್ನಾ೦, ಮ್ಹಜಿ೦ ಉತ್ರಾ೦, ಮ್ಹಜ್ಯೊ ಕರ್‍ನ್ಯೊ ವಿಕ್ರಪಾಕ್‌ನಾ೦ತ್. ಹಾ೦ವ್ ವೆಭಿಚಾರಿ ನ್ಹಯ್!" ಹ್ಯಾ ಉತ್ರಾ೦ ಬರಾಬರ್ ತೊ ಪ್ರಿನ್ಸಿಪಾಲಾಚ್ಯಾ ರೂಮಾಥಾವ್ನ್ ಭಾಯ್ರ್ ಗೆಲೊ.

ಪ್ರಿನ್ಸಿಪಾಲಾಚ್ಯಾ ದಫ್ತರಾ ಭಾಯ್ರ್ ಟೊನಿ ತಾಕಾ ’ರಾಕ್ತಾಲೊ.’

ತಾಕಾ ಪಳೆವ್ನ್ ವಿಕ್ಟರ್ ಆಪ್ಲೊ ಮ೦ದ್ ಹಾಸೊ ಹಾಸ್ಲೊ.

"ಕ೦ಗ್ರಾಚ್ಯುಲೇಶನ್ಸ್, ಟೊನಿ!" ತೊ ಮ್ಹಣಾಲೊ. "ಆಜ್ ತು೦ ಜಯ್ತೆವ೦ತ್ ಜಾಲೊಯ್."

"ಹಾ೦ವೆ೦ ತುಕಾ ಪಯ್ಲೆ೦ಚ್ ಸಾ೦ಗ್‌ಲ್ಲೆ೦, ವಿಕ್ಟರ್--ತು೦ ಜಿಯೆ೦ವ್ಕ್ ಸಕ್ಚೊನಾ೦ಯ್."

"ಪುಣ್ ತುಮಿ೦ ಮ್ಹಾಕಾ ಜಿಯೆ೦ವ್ಕ್ ಎಕ್ ಹಜಾರ್ ಆನಿ ಎಕ್ ಅವ್ಕಾಸ್ ಕರುನ್ ದಿಲ್ಯಾತ್. ತುಮಿ೦ಚ್ ಮ್ಹಜೆ ವಾಟೇವಯ್ಲೆ ಪಯ್ಸ್ ಸರ್‍ಲ್ಯಾತ್!"

"ಕಠಿಣ್ ಆಶಾವಾದಿ ತು೦!" ನ೦ಜಾಳಿ ಭಿರ್‍ಮತೀನ್ ಹಾಸ್ಲೊ ಟೊನಿ. "ಎಕೆಕಾ ಪ್ರಾಯೆರ್ ಎಕೆಕ್ಲ್ಯಾಕ್ ಎಕೇಕ್ ಪಿಶೆ೦ ಆಸ್ತಾ. ಆತಾ೦ ಆಮಿ೦ ಜಾಲ್ಲೆ೦ ಸರ್‍ವ್ ವಿಸರ್‍ಯಾ೦, ವಿಕ್ಟರ್. ತು೦ವೆ೦ ಮೋನ್ ಕೆಲ್ಯಾರ್ ಹಾ೦ವ್ ತುಕಾ ಪರತ್ ಪ್ರವೇಸ್ ಮೆಳಾಸೊ ಕರು೦ಕ್ ಸಕ್ತಾ೦. ಹ್ಯಾ ವರ್‍ಸಾಚೊ ಯೂನಿಯನ್ ಪ್ರೆಸಿಡೆ೦ಟ್ ಹಾ೦ವ್. ಪ್ರೊಫೆಸರ್ ಫಿಲಿಪ್ ಮ್ಹಜೆ೦ ಉತಾರ್ ಕಾಡ್ನ್ ಘಾಲಿನಾ."

ವಿಕ್ಟರ್ ಹಾಸ್ಲೊ.

"ತು೦ ನಿಜಾಯ್ಕಿ ನಿಸ್ವಾರ್‍ಥಿ ಮನಿಸ್, ಟೊನಿ!" ತಾಣೆ ಟೊನಿಕ್ ನಾಟಕೀಯ್ ರಿತಿರ್ ಮಾನ್ ಭಾಗಾಯ್ಲೊ.

"ತುಜ್ಯಾ ನ೦ಜ್ಯಾ೦ಕ್ ಹಾ೦ವ್ ಬರ್‍ಯಾನ್ ಒಳ್ಕಾತಾ೦, ವಿಕ್ಟರ್," ಮ್ಹಣಾಲೊ ಟೊನಿ. "ತರಿ ಚೀ೦ತ್. ಫುಡೆ೦ ತು೦ ಕಿತೆ೦ ಕರ್‍ತೊಲೊಯ್? ತುಜ್ಯಾ ಅ೦ಕಲಾಚ್ಯಾ ಘರಾ೦ತ್ ತುಕಾ ಪ್ರವೇಸ್ ಆಸ್ಚೊ ನಾ. ತುಜಿ ಆವಯ್ ತುಕಾ ಒಳ್ಕೊ೦ಕ್ ತಯಾರ್ ಆಸ್ಚಿ ನಾ. ಕಿತೆ೦ ತು೦ ಕರ್‍ತೊಲೊಯ್?"

ವಿಕ್ಟರಾನ್ ಜಾಪ್ ದಿಲಿ ನಾ. ಪುಣ್ ಆಪ್ಲೆ೦ ಮುಕಮಳ್ ತಾಣೆ ಜಯ್ತಾಚೆ ಉಬೆನ್ ಉಬಾರ್‍ಲೆ೦. ತಾಚ್ಯಾ ಜಿಣಿಯೆಕ್ ಕುರಾಡ್ ದವ್ರು೦ಕ್ ಆಯ್ತೆ ಜಾಲ್ಲೆ ತಾಚೆಚ್ ದುಸ್ಮಾನ್ ತಾಚ್ಯಾಚ್ ಪಾ೦ಯಾ೦ಲಾಗಿ೦ ಯೇವ್ನ್ ಆಪಾಪ್ಲಿ೦ ಅಸ್ಕತ್ ಆಯ್ದಾ೦ ದಾಕಯ್ತಾಲೆ.

"ಬೋವ್‌ಶಾ ತು೦ ನೊರ್‍ಮನ್ ತಿಯೊದೊರಾ ಸರ್‍ಶಿ೦ ಪಾಟಿ೦ ವೆತೊಲೊಯ್," ವಿಕ್ಟರಾಥಾವ್ನ್ ಪಯ್ಸ್ ಸರೊನ್ ಪೊಳ್ಕುರೊ ಹಾಸೊ ಹಾಸ್ಲೊ ಟೊನಿ. "ಥೊಡ್ಯಾ ದಿಸಾ೦ ಆದಿ೦, ಸೆಕ್ರೆಟರಿಚೆ೦ ಶಿಕಪ್ ಶಿಕೊನ್ ಆಸ್‌ಲ್ಲೆ೦ ತಾಚೆ೦ ಧುವ್ ಸೊನಿಯಾ ಪಾಟಿ೦ ಆಯ್ಲಾ೦ ಮ್ಹಣ್ ಹಾ೦ವೆ೦ ಆಯ್ಕಾಲೆ೦. ತು...ತು...ಜೆ೦ ಹೆಲ್ಗಾ ತುಕಾ ಆನಿ ಗುಮಾನ್ ಕರಿಶೆ೦ ನಾ, ವಿಕ್ಟರ್..."

ತ್ಯಾ ಲಾ೦ಬ್ ಸೊಪ್ಯಾಚೆರ್ ಟೊನಿಚಿ ಕೂಡ್ ಚಲೊನ್ ವೆತಾ ಪರ್‌ಯಾ೦ತ್ ಶೂನ್ಯ್ ನದ್ರೆನ್ ತಾಕಾ ಪಳೆವ್ನ್ ರಾವ್ಲೊ ವಿಕ್ಟರ್. ತಾಚ್ಯಾ ಮತಿ೦ತ್ ಎಕ್ ಲ್ಹಾನ್ ಕಿಟಾಳ್ ಜಾಗೆ೦ ಜಾಲ್ಲೆ೦--ಹೆಲ್ಗಾ.

ಸಾಡೆ-ತೀನ್ ವರ್‍ಸಾ೦ ಜಾಲ್ಲಿ೦ ವಿಕ್ಟರಾನ್ ಹೆಲ್ಗಾಕ್ ಪಳೆನಾಸ್ತಾ೦. ತ್ಯಾ ದಿಸಾಚ್ಯಾ ಉಮ್ಯಾ ಉಪ್ರಾ೦ತ್ ತಾ೦ಚ್ಯೊ ಕುಡಿ ಪರಿಪೂರ್‍ಣ್ ಪರಿಪಿಕಾಯೆಸ೦ಗಿ೦ ಯೆಕಾಮೆಕಾ ಒಳ್ಕಾಲ್ಲ್ಯೊ. ಪರಿಣಾಮ್ ಜಾವ್ನ್ ಆಪ್ಲ್ಯಾಚ್ ಸ್ವ೦ತ್ ಖುಶೇನ್ ಹೆಲ್ಗಾನ್ ಎಕ್ ವಿ೦ಚವ್ಣ್ ಕೆಲಿ: ಪ್ರಿ-ಯುನಿವರ್‍ಸಿಟಿ ಕ್ಲಾಸಿಥಾವ್ನ್ ಪ್ರಾರ೦ಭ್ ಕರುನ್ ಆಪ್ಲೆ೦ ವಿಜ್ಞಾನಾಚೆ೦ ಶಿಕಪ್ ಪಯ್ಶಿಲ್ಯಾ ಎಕಾ ಪ್ರಾ೦ತ್ಯಾ೦ತ್ ಕರ್‍ಚಿ ತಾಚಿ ಇಚ್ಚಾ ತಾಚ್ಯಾ ಬಾಪಾಯ್ನ್ ಮ೦ಜೂರ್ ಕೆಲಿ.

ತ್ಯಾಚ್ ಹಫ್ತ್ಯಾ೦ತ್ ವಿಕ್ಟರಾನ್ ಆನಿ ಹೆಲ್ಗಾನ್ ಆದೇವ್ಸ್ ಮಾಗ್‌ಲ್ಲೊ. ತ್ಯಾ ಆದೇವ್ಸಾ೦ತ್ ದುಕಾ೦ ನಾತ್‌ಲ್ಲಿ೦, ವೇ೦ಗ್ ಯಾ ಉಮೆ ನಾತ್‌ಲ್ಲೆ. ತಾ೦ಚ್ಯಾ ಮಾನಸಿಕತೆಚೊ ಆನಿ ಕುಡಿ೦ಚ್ಯಾ ಪರಿಪಿಕಾಯೆಚೊ ಕ್ಹುರು ಜಾವ್ನ್ ಆದೇವ್ಸಾ ವೆಳಾರ್ ವಿಕ್ಟರಾನ್ ಉಚಾರ್‍ಲೆಲಿ೦ ಉತ್ರಾ೦ ಚಾರಿತ್ರಿಕ್ ಜಾವ್ನ್‌ಆಸ್‌ಲ್ಲಿ೦:

"ವೇಳ್ ಯೆತಾನಾ ಹಾ೦ವ್ ಖ೦ಯ್‌ಸರ್ ಆಸಾ೦ ಮ್ಹಣ್ ತುಕಾ ಕಳಿತ್ ಜಾತೆಲೆ೦!"

ತ್ಯಾ ಉಪ್ರಾ೦ತ್ ತಾ೦ಚಿ ಭೆಟ್ ಜಾ೦ವ್ಕ್ ನಾತ್‌ಲ್ಲಿ.

ನೊರ್‍ಮನ್ ತಿಯೊದೊರಾಚೆ ಧುವೆ ವಿಶಾ೦ತ್ ಟೊನಿನ್ ಉಚಾರ್‌ಲ್ಲೆ೦ ಸತ್. ನೊರ್‍ಮನಾಕ್ ಎಕ್ ಧುವ್ ಆಸಾ ಮ್ಹಣ್ ವಿಕ್ಟರ್ ನೆಣಾ೦ ಆಸ್‌ಲ್ಲೊ. ತ್ಯಾ ಎಕೆ ಸಾ೦ಜೆರ್ ಕೊಲೆಜ್ ಸುಟ್ತೆಚ್ ಪ್ರೆಸ್ಸಾಕ್ ರಿಗ್‌ಲ್ಲ್ಯಾ ತಾಕಾ ನೊರ್‍ಮನಾಲಾಗಿ೦ ರಾವೊನ್ ಕಸಲೆ೦ಗಿ ಉಲ೦ವ್ಚೆ ಚಲಿಯೆಕ್ ಪಳೆವ್ನ್ ವಿಕ್ಟರಾಕ್ ವಿಸ್ಮಿತ್ ಜಾಲೆ೦. ಟಾಯ್ಪ್ ಕೆಜಿ೦ಚ್ಯಾ ರಿಪಾಚೆರ್ ಎಕ್ ಪಾ೦ಯ್ ದವರ್‍ನ್ ಆನಿ ದುಸ್ರೊ ಧರ್‍ಣಿಕ್ ತೆ೦ಕೊನ್ ಆಪ್ಲೆ ಕುಡಿಕ್ ಧಲ೦ವ್ಚ್ಯಾ ತಿಚಿ ಉದ್ರಿಕ್ತ್ ಕುಡಿ-ಆಕೃತಿ ವಿಕ್ಟರಾಚ್ಯಾ ಗಮನಾಕ್ ವಚಾನಾಸ್ತಾ೦ ರಾವ್ಲಿ ನಾ. ತಿಚೊ ದಯ್‌ಹಿಕ್ ಜಿನೊಸ್ ತೊ ಖಿಣಾ ಭಿತರ್ ಜಾಣಾ೦ ಜಾಲೊ.

ಸ೦ಸರಾನ್ ವೊಲಾ೦ವ್ಚಿ ’ಸ೦ಸಾರಿ ಚಲಿ’ ತಿ.

ವಿಕ್ಟರಾಚೆ೦ ಯೆಣೆ೦ ತಿಕಾ ಕಳಿತ್ ಜಾಲ್ಲೆ೦ಚ್ ತಿಚೆ೦ ಉಲವ್ಣೆ೦ ರಾವ್ಲೆ೦, ಆಪ್ಲಿ ಕೂಡ್ ನಾಜೂಕ್ ತೆಲ್ಸಾಣೇನ್ ಒಳಾವ್ನ್ ತಿ ನೀಟ್ ಜಾಲಿ ಆನಿ ವಿಕ್ಟರಾಕ್ ಫುಡ್ ಕರಿಲಾಗ್ಲಿ. ತಿಣೆ ಘಾಲ್ಲ್ಯಾ ಪಾತಳ್ ನಾಜೂಕ್ ಬ್ಲೌಜಾ ಪ೦ದ್ಲ್ಯಾನ್ ತಿಚ್ಯಾ ಸುಪುಶ್ಟ್ ಸ್ಥನಾ೦ಚೆ೦ ಗಾತ್ರ್ ಉಟೊನ್ ದಿಸ್ತಾಲೆ೦.

ವಿಕ್ಟರಾಕ್ ವಯ್ರ್‌ಥಾವ್ನ್ ಸಕ್ಲಾ ಪರ್‌ಯಾ೦ತ್ ವಿಣ್ಗೊ ಕರ್‍ಚೆ ಜಿನ್ಸಾರ್ ತಾಚೆರ್ ದೀಶ್ಟ್ ಚರವ್ನ್ ಆನಿ ಉಪ್ರಾ೦ತ್, ಆಪ್ಣೆ೦ ವಿಕ್ಟರಾಥ೦ಯ್ ಪಳೆಯಿಲ್ಲೆ೦ ಕ್ಶುಲ್ಲಕ್ ಮ್ಹಣ್ಚೆ ರಿತಿರ್ ಆಪ್ಲೆ೦ ಮಾತೆ೦ ಆನಿ ಗಣ್ಣ್ ಕೇಸ್ ಪಾಟಿ೦ ಉಡವ್ನ್ ತಿ ಭಾಯ್ರ್ ಗೆಲಿ.

ಪುಣ್ ತಿಚ್ಯಾ ಹ್ಯಾ ವರ್‍ತನಾ೦ತ್ ಆಸ್‌ಲ್ಲೊ ಸ೦ದೇಶ್ ವಿಕ್ಟರಾಕ್ ಮೆಳೊನ್ ಜಾಲ್ಲೊ.

"ಸೊನಿಯಾ," ಮ್ಹಣಾಲೊ ನೊರ್‍ಮನ್. ಕಸಲಿಗಿ ಅನಿಶ್ಚಿತಾಯ್ ಆಸ್ಚೆಪರಿ೦ ಥೊಡ್ಯಾ ವೆಳಾ ಉಪ್ರಾ೦ತ್ ತಾಣೆ ಕುಡ್ಸುನ್ ಮ್ಹಳೆ೦. "ಮ್ಹಜಿ ಧುವ್!"

ವಿಕ್ಟರ್ ಉಲಯ್ಲೊ ನಾ ಪುಣ್ ಆಪ್ಲ್ಯಾ ಕಾಮಾಚೆರ್ ಪಡ್ಲೊ.

ತ್ಯಾ ಉಪ್ರಾ೦ತ್ ಸದಾ೦ನೀತ್ ಮಳ್ಳೆಪರಿ೦ ಸೊನಿಯಾಕ್ ತೊ ಪಳೆತಾಲೊ ತರಿ ತಾ೦ಚೆ ಮಧೆ೦ ಉಲವ್ಣೆ೦ ಚಲೊ೦ಕ್ ನಾತ್‌ಲ್ಲೆ೦......

ತೊ ಸಗ್ಳೊ ದಿಸ್ ದರ್‌ಯಾಚೆ ತಡಿರ್ ಖರ್‍ಚಿಲ್ಲೊ ವಿಕ್ಟರಾನ್. ಸಾ೦ಜ್ ಜಾ೦ವ್ಚೆ ವರೇಗ್ ಚಾಬ್ಕಾ-ರುಕಾ ಮೊಳ್ಯಾ೦ತ್ ಬಸುನ್ ಆಸ್‌ಲ್ಲೊ ತೊ ಸುರ್‌ಯೊ ಬುಡೊ೦ಕ್ ಜಾತಾನಾ ಖಡ್ಪಾಕ್ ತೆ೦ಕೊನ್ ಬಸ್‌ಲ್ಲೊ. ತಾಚಿ ಮೋತ್ ಸ್ಪಟಿಕಾಪರಿ೦ ನಿತಳ್ ಆಸ್‌ಲ್ಲಿ; ಕೂಡ್ ತರ್‍ನಾಟ್ಪಣಾಚ್ಯಾ ಖತ್ಕತ್ಯಾನ್ ಫುಮಾರ್‍ತಾಲಿ.

ಪಾಶಾರ್ ಜಾಲ್ಲ್ಯಾ ಸಾಡೆ-ತೀನ್ ವರ್‍ಸಾ೦ನಿ ತಾಚೆಥ೦ಯ್ ಧಾರಾಳ್ ಮಾಪಾನ್ ದಯ್‌ಹಿಕ್ ಬದ್ಲಾವಣ್ ಜಾಲ್ಲಿ. ತಾಚೊ ಜೀವ್ ಮೊಟಾಯೆನ್ ಭರೊ೦ಕ್ ನಾತ್‌ಲ್ಲೊ ಪುಣ್ ಬಳಿಶ್ಟ್ ಸ್ನಾಯು೦ವರ್‍ವಿ೦ ಘಟ್ ಜಾಲ್ಲೊ. ದಾ೦ಬೂನ್ ಧರ್‌ಲ್ಲ್ಯಾ ಮಿಲಾವಾಚ್ಯಾ ಕೊವ್ಳ್ಯಾಚಿ, ಆಡಾವ್ನ್ ಧರ್‌ಲ್ಲ್ಯಾ ಆವ್ರಾಚ್ಯಾ ಉದ್ಕಾಚಿ, ಧಾ೦ಪುನ್ ದವರ್‍ಲೆಲ್ಯಾ ಹಬ್ಯಾಚಿ ಸಕ್ತ್ ತ್ಯೆ ಕುಡಿ೦ತ್ ಆಸ್‌ಲ್ಲಿ.

ತಾಚೆ೦ ಹರ್‍ದೆ೦ ರೂ೦ದ್, ಭುಜಾ೦ ಚವ್ಕ್; ಪೆ೦ಕಾಟ್ ಅಶೀರ್ ಪುಣ್ ಪೊಟ್ ಬಳಿಶ್ಟ್ ಮಾಸ್‌ಕುಟಾ೦ಚೆ೦ ಫೊಳೆ೦. ತಾಚ್ಯಾ ಸಗ್ಳ್ಯಾ ಜಿವಾಚಿ ಸೊಬಾಯ್ ತಾಚ್ಯಾ ಹಾತಾ೦ಕ್ ಆಸ್‌ಲ್ಲಿ. ಲಾ೦ಬ್ ತಾಚೆ ಹಾತ್ ಕಿತ್ಲೆ ದೊರಗ್ ದಿಸ್ತಾತ್ ತಿತ್ಲೆಚ್ ನಾಜೂಕ್ ಆಸ್‌ಲ್ಲೆ. ಹಾತಾ೦ಚೆ ತಾಳ್ವೆ ಗುಲೊಬಿ ರ೦ಗಾಚೆ ತಾ೦ಚೆವಯ್ಲೆ ಗೀಟ್ ಕೊಣೆ೦ಗಿ ಎಕ್ ಚಿತ್ರ್ ಸೊಡ್‌ಯ್ಲಾ೦ ಮ್ಹಳ್ಳೆಪರಿ೦ ದಿಸ್ತಾಲೆ, ಸೊಭ್ತಾಲೆ. ತಾಚ್ಯಾ ತ್ಯಾ ಲಾ೦ಬ್, ಸದಿಳ್ ಚಾಲಿ೦ತ್ ಚಲಿಚಿ ತಾಚಿ ಕೂಡ್ ತಾಚ್ಯಾ ಜಯ್ತಾಚೆ ಎಕ್ ಖುಣ್ ಜಾವ್ನ್‌ಆಸ್‌ಲ್ಲಿ.

ತಾಚಿ ತಿ ಚಾಲ್ ’ಹ್ಯಾ ಸ೦ಸರಾಚಿ’ ನ್ಹಯ್... ತಿತ್ಲಿಯಿ ಆಕರ್‍ಶಿಕ್ ತಿ ಜಾವ್ನ್‌ಆಸ್‌ಲ್ಲಿ.

ತಾಚೆ೦ ಮುಕಮಳ್ ತಾಚ್ಯಾ ಜಿವಿತಾಚ್ಯಾ ಅತ್ಮ್ಯಾಚೊ ಆರ್‍ಸೊ. ಗೊರ್‍ಸಾಣ್ ತಾಚೆರ್ ನಾತ್‌ಲ್ಲಿ ತರಿ ನೊವ್ಯಾ ತಾ೦ಬ್ಯಾಚಿ ತಾ೦ಬ್ಸಾಣ್ ಆನಿ ಉಜಳ್ ತ್ಯೆ ಕುಡಿಕ್ ಆಸ್‌ಲ್ಲೊ. ತಾಚ್ಯಾ ದೊಳ್ಯಾ೦ನಿ ಆಸ್‌ಲ್ಲಿ೦ ತಿ೦ ಕಿರ್‍ಣಾ೦ ಶಾಸ್ವತ್. ತಾಚ್ಯಾ ಮುಕಮಳಾರ್ ಕಸಲಿಚ್ ಫುಗಾರಾಯ್ ನಾತ್‌ಲ್ಲ್ಯಾನ್ ಕಸಲಿಚ್ ತೆಲ್ಸಾಣ್ ದಿಸಾನಾತ್‌ಲ್ಲಿ, ಕಸಲ್ಯಾಯಿ ಪುರಾಸಣೆಚೆ೦, ಉಬ್ದೆಸಾ೦ಚೆ೦ ಯಾ ಬಾ೦ದ್‌ಪಾಸಾ೦ಚೆ೦ ಖುಣ್ ದಿಸಾನಾತ್‌ಲ್ಲೆ೦. ತಾಚೆ ಕೇಸ್ ಕಾಳೆಚ್ಚ್ ಆಸುನ್ ಸಭಾವಿಕ್ ರಿತಿರ್ ಉಜಳ್ತಾಲೆ. ತ್ಯಾ ಕೆಸಾ೦ಚೊ ಎಕ್ ಗಣ್ಣ್ ವಾ೦ಟೊ ಕಪಲಾಚ್ಯಾ ದಾವ್ಯಾ ಭಾಗಾಚೆರ್ ಮಾಲ್ವೊನ್ ರಾವ್ತಾಲೊ.

ಎಕ್ ಪರಿಪೂರ್‍ಣ್, ವಿರಳ್ ಆನಿ ಖರ್‍ಯಾ ದಾದ್ಲ್ಯಾಚೆ೦ ರೂಪ್ ತೊ ಜಾವ್ನ್‌ಆಸ್‌ಲ್ಲೊ.....

"ಆಜ್ ಕಾಮಾಕ್ ಯೆ೦ವ್ಕ್‌ನಾ೦ಯ್?"

ಎಕೆ ಚಲಿಯೆಚಿ೦ ಉತ್ರಾ೦ ಆಯ್ಕೊನ್ ತಾಣೆ ಹಾಳ್ವಯೆನ್ ಪಾಟಿ೦ ಪಳೆಲೆ೦.

ಸೊನಿಯಾ ಉಬೆ೦ ಆಸ್‌ಲ್ಲೆ೦!

ಮಟ್‌ವ್ಯಾ, ಅ೦ರ್‍ದುನ್ ಬಸ್‌ಲ್ಲ್ಯಾ ಧೊವ್ಯಾ ಹೊಟ್‌ಪೆ೦ಟಾ-ಥಾವ್ನ್ ಭಾಯ್ರ್ ಆಯಿಲ್ಲಿ೦ ತಾಚಿ೦ ಜಾ೦ಗ್ಳಾ೦ ಕಸಲ್ಯಾಗಿ ಸ೦ಗೀತಾಚ್ಯಾ ನಾದಾಕ್ ಮ್ಹಳ್ಳೆಪರಿ೦ ಕಾ೦ಪ್ತಾಲಿ೦. ಹಿ ಮಿರ್‍ಮಿರಿ ಕಾ೦ಪ್ ವಿಕ್ಟರಾಕ್ ದಿಸಾನಾಸ್ತಾ೦ ಗೆಲಿ ನಾ. ಕಾಳೊಚ್ ರಶೀಮಾಚೊ ಬ್ಲೌಜ್ ತಾಣೆ ಘಾಲ್ಲೊ ಆನಿ ವಿಕ್ಟರಾನ್ ತಾಚೆ ಕುಶಿನ್ ಪಳೆತಾನಾ ತೆ೦ ಜಾಯ್‌ಜಾಯ್ ಮ್ಹಣ್ ಘು೦ವೊನ್ ತಾಕಾ ಫುಡ್ ಕರುನ್ ಉಬೆ೦ ಜಾಲೆ೦, ಆಪ್ಲೆ ಪಾ೦ಯ್ ವಿಸ್ತಾರಾವ್ನ್. ವಾರ್‍ಯಾಚ್ಯಾ ಬಳಾಕ್ ತಾಚೊ ಕಾಳೊ ಬ್ಲೌಜ್ ತಾಚ್ಯಾ ಉಬಾರ್ ಸ್ಥನಾ೦ಕ್ ಚಿಡ್ಕೊನ್ ರಾವ್‌ಲ್ಲೊ.

ವಿಕ್ಟರ್ ಆಪ್ಲೊ ಮ೦ದ್ ಹಾಸೊ ಹಾಸ್ಲೊ.

"ತು೦ ಹಾ೦ಗಾಸರ್ ಆಸಾಯ್ ಮ್ಹಣ್ ಹಾ೦ವ್ ಜಾಣಾ೦ ಆಸ್‌ಲ್ಲಿ೦!" ತೆ೦ ಮ್ಹಣಾಲೆ೦ ಆಪ್ಲ್ಯಾ ಮೊಚ್ಯಾ೦ನಿ ರೆ೦ವೆಕ್ ಖೊಟ್ ಮಾರುನ್.

"ನಿಜಾಯ್ಕಿ?" ವಿಚಾರ್‍ಲೆ೦ ವಿಕ್ಟರಾನ್, ಶೂನ್ಯ್ ತಾಳ್ಯಾನ್.

"ಆಜ್ ತುಕಾ ಮ್ಹಜಿ ಗರ್‍ಜ್ ಆಸಾ, ವಿಕ್ಟರ್!"

"ಹೆ೦ ತುಜೆ೦ ಆಪವ್ಣೆ೦?" ವಿಕ್ಟರಾನ್ ಆಪ್ಲ್ಯಾ ಉಜ್ವ್ಯಾ ದೊಳ್ಯಾವಯ್ಲಿ ಭ೦ವ್ರಿ ವಯ್ರ್ ಕೆಲಿ.

"ಹು೦! ತು೦ ಅಜಾಪ್ಲೊಯ್, ವಿಕ್ಟರ್?" ಸೊನಿಯಾನ್ ವಿಚಾರ್‍ಲೆ೦, ಭಿಜ್‌ಲ್ಲ್ಯಾ ರೆ೦ವೆ೦ಚೆರ್ ಬಸುನ್. "ಮ್ಹಜೊ ಬಾಪಯ್ ತುಜೆ೦ ನಾ೦ವ್ ಸಯ್ತ್‌ಯಿ ನೆಣಾ೦ ಪುಣ್ ಹಾ೦ವ್? ಹಾ೦ವ್ ತುಜೆ ವಿಶಾ೦ತ್ ಸರ್‍ವ್ ಜಾಣಾ೦. ತುಕಾ ಆಜ್ ಕೊಲೆಜಿ೦ತ್ಲೊ ಭಾಯ್ರ್ ಘಾಲಾ, ನ್ಹಯ್? ಆನಿ ತು೦ ದೆದೆಸ್ಪ್ರಾರ್ ಜಾಲಾಯ್. ತುಜೆ ತಸಲೆ.. ದೆದೆಸ್ಪ್ರಾರ್ ದಾದ್ಲೆ... ವಿಚಿತ್ರಾ೦ ಕರು೦ಕ್ ಸಕ್ತಾತ್...."

ಹೆ೦ ವಾಕ್‌ಯೆ೦ ಮಾದಕಾ೦ತ್ ಲೊಳವ್ನ್, ಉಚಾರ್‍ನ್ ಆಪ್ಲಿ ಮಜ್ಭೂತ್ ಕೂಡ್ ಸಗ್ಳ್ಯಾ ಲಾ೦ಬಾಯೆನ್ ರೆ೦ವೆ೦ಚೆರ್ ನಿದಾಯ್ಲಿ ಸೊನಿಯಾನ್.

"ಮ್ಹಾಕಾ ತುಜಿ ಗರ್‍ಜ್ ಆಸಾ, ವಿಕ್ಟರ್!" ತೆ೦ ಮ್ಹಣಾಲೆ೦ ಆಪ್ಲೆ ದೊಳೆ ಅರ್‍ಧೆಕುರೆ ಧಾ೦ಪುನ್. "ತುಜೆ ತಸಲೊ ದಾದ್ಲೊ ವಿರಳ್." ತೆ೦ ಮ್ಹಣಾಲೆ೦, ಆಪ್ಲೆ೦ ಅಪವ್ಣೆ೦ ಆನಿಕಿ ಉಗ್ತಡೆ೦ತ್ ಹಾಡುನ್. "ಮ್ಹಜೆ ತಸಲ್ಯೆ ಸ್ತ್ರೀಯೆಕ್ ಕಸಲೆ೦ ತು೦ ದೀ೦ವ್ಕ್ ಸಕ್ತಾಯ್ ಮ್ಹಣ್ ಹಾ೦ವ್ ಜಾಣಾ೦. ತ್ಯಾ ವಿಶಾ೦ತ್ ತುಜೆ ಪರ್‌ಯಾ೦ತ್ ಪಾ೦ವ್ಚೆ ಖಾತಿರ್..."

ವಿಕ್ಟರಾನ್ ಜಾಪ್ ದಿಲಿ ನಾ.

"ಹಾ೦ವ್ ಹಾ೦ಗಾಸರ್ ಕಿತ್ಯಾಕ್ ಆಯ್ಲ್ಯಾ೦ ಮ್ಹಣ್ ತು೦ ಜಾಣಾ೦ಯ್. ಅಶೆ೦ ವೆಚೊ ಅನ್ಭೋಗ್ ಮ್ಹಾಕಾ ಕಾ೦ಯ್ ನವೊ ನ್ಹಯ್. ಹಾ೦ವೆ ಕೆನ್ನಾ೦ಯ್ ಸೊಧ್ನೆರ್‌ಚ್ ಆಸ್ತಾ೦..." ತೆ೦ ಕುಶಿಕ್ ಪಡೊನ್ ವಿಕ್ಟರಾಚೆ ಕುಡಿಚೆರ್ ದೀಶ್ಟ್ ಚರಯ್‌ಲಾಗ್ಲೆ೦. "ಆನಿ ತು೦....ತುಜಿ ಕೂಡ್‌ಚ್ ಸಾ೦ಗ್ತಾ. ಮ್ಹಾಕಾ ಆಜ್ ತು೦ ಜಾಯ್!"ತೆ೦ ಪಿ೦ರ್‍ಗಾಲೆ೦. "ಆಜ್ ತುಜ್ಯಾ ಹಾತಾ೦ನಿ ಹಾ೦ವ್ ಆನಿ ಮ್ಹಜೆ ಭಿತರ್‍ಲೆ೦ ಮೃಗ್ ಪಿಟೊ ಜಾಯ್ಜೆ."

"ಮ್ಹಜ್ಯಾನ್ ಸಾಧ್ಯ್ ಜಾಲ್ಲೆ೦ ತರ್ ಹಾ೦ವ್ ತುಜೆರ್ ಭಿರ್‍ಮತ್ ಪಾವ್ತೊ, ಸೊನಿಯಾ!" ಮ್ಹಣಾಲೊ ವಿಕ್ಟರ್. "ಪಯ್ಲ್ಯಾಚ್ ದಿಸಾ ತುಜೆ೦ ಆವ್ವಾನ್ ಮ್ಹಾಕಾ ಪಾವಿತ್ ಜಾಲಾ೦. ಹಾ೦ವ್ ಉದ್ಕಾ ಪರ್‌ಯಾ೦ತ್ ವಚಾನ್, ಸೊನಿಯಾ ಪುಣ್ ತೆ೦ ಪಿಯೆ೦ವ್ಚಿ ಮರ್‍ಜಿ ಮ್ಹಜಿ."

"ತು೦ ತುಕಾಚ್ ಸ್ವಾಭಿಮಾನಿ ಮ್ಹಣ್ ಲೆಕ್ತಾಯ್?" ತೆ೦ ಲಟ್ಟ್ ಕರುನ್ ಉಟೊನ್ ಬಸ್ಲೆ೦. "ತುಜೆ ತಸಲ್ಯಾ ಸಭಾರಾ೦ಕ್ ಹಾ೦ವೆ೦ ಪಳೆಲಾ೦. ಪುಣ್ ತೆ ಮ್ಹಾಕಾ ಆನಿ ಮ್ಹಜೆಥ೦ಯ್ ಪಳೆತಾನಾ ಮಾತ್ರ್...." ಆಪ್ಲ್ಯಾ ಕಾಳ್ಯಾ ರಶೀಮ್ ಬ್ಲೌಜಾಚೆ ಬಟನ್ ತಾಣೆ ಸವ್ಕಾಸಾಯೆನ್ ಉಸಾಯ್ಲೆ ಆನಿ ತೊ ಬ್ಲೌಜ್ ಕಾಡ್ನ್ ರೆ೦ವೆರ್ ಉಡಯ್ಲೊ; ಉಬೆ೦ ಜಾವ್ನ್ ಆಪ್ಲ್ಯಾ ಹೊಟ್‌ಪೆ೦ಟಾಚಿ ‘ಜಿಪ್’ ತಾಣೆ ಉಸಯ್ಲಿ ಆನಿ ಹೊಟ್‌ಪೆ೦ಟಾಥಾವ್ನ್ ತೆ೦ ಖಿಣಾ ಭಿತರ್ ಸುಟ್ಲೆ೦. ಆತಾ೦ ತಾಚ್ಯಾ ಆ೦ಗಾರ್ ಕಾಳೊ ‘ಬ್ರಾ’ ಆನಿ ‘ಪ್ಯಾ೦ಟಿ’ ಮಾತ್ರ್ ಆಸ್‌ಲ್ಲಿ. ‘ಹು೦! ಆತಾ೦ ಪಳೆ’ ಮ್ಹಣ್ಚ್ಯಾ ಜಿನ್ಸಾರ್ ವಿಕ್ಟರಾಕ್ ಪಿಲ್ಲಾವ್ನ್ ತೆ೦ ದರ್‌ಯಾಚ್ಯಾ ಲಾರಾ೦ ಕುಶಿನ್ ಗೆಲೆ೦.

ಪ೦ದ್ರಾ ವೀಸ್ ಮಿನುಟಾ೦ಭರ್ ಉಪ್ಯೆವ್ನ್ ತೆ ವಿಕ್ಟರಾಸರ್‍ಶಿ೦ ಪಾಟಿ೦ ಆಯ್ಲೆ೦. ತಾಚ್ಯಾ ಉಸ್ವಸಾ೦ತ್ ಖರಸ್ ಆಸ್‌ಲ್ಲಿ. ಆಪ್ಲಿ ಭಿಜ್‌ಲ್ಲಿ ಕೂಡ್ ತಾಣೆ ವಿಕ್ಟರಾಚ್ಯಾ ಪಾ೦ಯಾ೦ಚೆರ್ ನಿದಾಯ್ಲಿ.

"ತು೦ ಮ್ಹಾಕಾ ಜಾಯ್!" ತೆ೦ ಮ್ಹಣಾಲೆ೦ ತಾಚ್ಯಾ ಉಗ್ತ್ಯಾ ಹರ್‍ಧ್ಯಾರ್ ಹಾತ್ ಚರವ್ನ್. "ಹ್ಯಾ ರುಪಾರ್ ಆಸ್ತಾನಾ ಮ್ಹಾಕಾ ಕೊಣೆ೦ಯಿ ನಿರಾಕರಿಲೆ೦ ನಾ. ತ್ಯೆ ಶಿವಾಯ್..." ಯೆಕಾಚಾಣೆ ತಾಣೆ ವಿಕ್ಟರಾಚ್ಯಾ ವೊ೦ಟಾ೦ಚೆರ್ ಆಪ್ಲೆ ವೋ೦ಟ್ ಬಸಯ್ಲೆ, ಎಕಾ ಉದ್ರಿಕ್ತ್ ಉಂಯಾ೦ತ್. ಪುಣ್ ಹೊ ದಾವ್ ಫಕತ್ ಸೊನಿಯಾಚೊ. ವಿಕ್ಟರಾಥ೦ಯ್ ಕಸಲಿಚ್ ಬದ್ಲಾವಣ್ ಜಾಲಿ ನಾ. ಘಟ್ ಬರ್‍ಫಾ ಕುಡ್ಕ್ಯಾಕ್ ಉಮೊ ದಿಲ್ಲೆಪರಿ೦ ಸೊನಿಯಾಕ್ ಭೊಗ್ಲೆ೦ ಆನಿ ತೆ೦ ಘಾಯೆಲ್ಲ್ಯಾ ನಾಗಿಣೆಯೆಪರಿ೦ ಚಾಳ್ವೊನ್ ವಿಕ್ಟರಾಚ್ಯಾ ಆ೦ಗಾವಯ್ಲೆ೦ ಉಟ್ಲೆ೦.

"ತು೦ ದಾದ್ಲೊ ವ್ಹಯ್ ಯಾ ನ್ಹಯ್?"

"ಹಾ೦ವ್ ಎಕ್ ವಿರಳ್ ದಾದ್ಲೊ ಜಾವ್ನ್‌ಆಸಾ೦!" ಸೊನಿಯಾಚಿ೦ಚ್ ಉತ್ರಾ೦ ಪರತ್ ಉಚಾರ್‍ಲಿ೦ ವಿಕ್ಟರಾನ್. "ಎಕ್ ಸ್ತ್ರೀಯೆಕ್ ಕಸಲೆ೦ ಸುಖ್ ದೀ೦ವ್ಕ್ ಹಾ೦ವ್ ಸಕ್ತಾ೦ ಮ್ಹಣ್ ತು೦ ಜಾಣಾ೦ಯ್ ಆನಿ ತ್ಯಾ ಖಾತಿರ್ ತು೦ವೆ೦ ಮ್ಹಜೆ ವಿಶಾ೦ತ್ ಸರ್‍ವ್ ಜಾಣಾ೦ ಜಾ೦ವ್ಚೆ೦ ಪ್ರೇತನ್ ಕೆಲಾ೦ಯ್...."

"ನ೦ಜ್ಜ್ಯೊ ಬಲ್ತ್ಯಾನ್ ಉಲಯ್ತಾಯ್!" ತೆ೦ ಖೆ೦ಚ್ಲೆ೦. "ತುಜೆ೦ ರಗತ್ ಆನಿಕಿ ತಾಪೊ೦ಕ್ ನಾ ತರ್..."

"ಪ್ರೇತನ್ ಕರಿನಾಕಾ, ಸೊನಿಯಾ!" ಹಾಳ್ವಯೆನ್ ಹಾತ್ ಉಬಾರ್‍ಲೊ ವಿಕ್ಟರಾನ್. "ತು೦ ಸಲ್ವತೆಲೆ೦ಯ್."

ಆಪ್ಲಿ ತಿ ಲಜೆಬರಿತ್ ಸಲ್ವಣ್ ಮಾ೦ದುನ್ ಘೆ೦ವ್ಕ್ ಸೊನಿಯಾ ಬಿಲ್ಕುಲ್ ತಯಾರ್‌ನಾತ್‌ಲ್ಲೆ೦. ಆಪ್ಲ್ಯಾ ಆ೦ಗಾವಯ್ಲಿ ರೆ೦ವ್ ಫಾಫುಡ್ನ್ ತೆ೦ ವಿಕ್ಟರಾಥಾವ್ನ್ ಆನಿಕಿ ಪಯ್ಸ್ ಸರ್‍ಲೆ೦. "ತರ್ ತು೦ವೆ೦ ಎಕೆ ಚಲಿಯೆಚೊ ಮೋಗ್ ಕೆಲಾಯ್ ನ್ಹಯ್?" ತೆ೦ ಖಿಳ೦ಚ್ಲೆ೦. "ಹೆರಾ೦ ಚಲಿಯಾ೦ಕ್ ಹಾತ್-ಬೋಟ್ ಲಾ೦ವ್ಚೊ ನಾ ಮ್ಹಣ್ ತಿಕಾ ತು೦ವೆ೦ ಉತಾರ್ ದಿಲಾ೦ಯ್. ಕಿತ್ಲೊ ನಿಸ್ಕಳ್-ಭಾಗಿ ತು೦! ತಿಚ್ಯಾ ಆ೦ಗಾಕ್‌ಯಿ ತು೦ವೆ೦ ಯೆದೊಳ್ ಬೋಟ್ ಲಾ೦ವ್ಕ್‌ನಾ೦ಯ್. ಸರ್‍ವ್ ತುಮ್ಚ್ಯಾ ಪ್ರಥಮ್ ರಾತಿಕ್ ಬಾಕಿ ದವರ್‍ಲಾ೦ಯ್....ಪಿಸೊ ತು೦!" ಸೊನಿಯಾಚ್ಯಾ ದೊಳ್ಯಾ೦ತ್ಲಿ೦ ದುಕಾ೦ ಪೊಲ್ಯಾ೦ವಯ್ಲ್ಯಾನ್ ದೆ೦ವ್ತಾಲಿ೦. "ತುಜಿ೦ ಸಪ್ಣಾ೦ ಜ್ಯಾರಿ ಜಾತೆಲಿ೦ ಮ್ಹಣ್ ತು೦ ಪಾತ್ಯೆವ್ನ್ ಆಸಾಯ್." ತೆ೦ ರಾವ್ಲೆ೦. "ವರ್‍ಸಾ೦ ಆದಿ೦ ಹಾ೦ವ್ ತಶೆ೦ಚ್ ಚಿ೦ತಾಲಿ೦. ತವಳ್ ಮ್ಹಜಿ ಮಾಮ್ಮಿ ಜೀವ೦ತ್ ಆಸ್‌ಲ್ಲಿ. ’ಮ್ಹಜಿ ಬಾವ್ಲಿ ತು೦’ ತಿ ಮ್ಹಣ್ತಾಲಿ. ತಿಕಾ ಹಾ೦ವ್ ಆಸ್ರೊ ಜಾವ್ನ್‌ಆಸ್‌ಲ್ಲಿ೦ ಆನಿ ತಿ ಮ್ಹಾಕಾ. ಡೆಡಿ ಆಮ್ಚೆ೦ ಗುಮಾನ್ ಕರಿನಾತ್‌ಲ್ಲೊ. ಆಮ್ಕಾ೦ ಜಿವ೦ತ್ ದವರ್‍ತಾಲೊ ತೆ೦ ವ್ಹಯ್. ತಿತ್ಲೆ೦ಚ್. ತಾಚೆ೦ ಧನ್-ಮನ್ ’ಮನಿಸ್’ ಪತ್ರಾಚೆರ್ ಆಸ್‌ಲ್ಲೆ೦. ಮ್ಹಜೆ ಆವಯ್ನ್ ಪರಾತ್ಲೆ೦ ತರಿ ತಾಚಿ೦ ತತ್ವಾ೦ ತಾಕಾ ಮೊಗಾಚಿ ಜಾಲ್ಲಿ೦; ವರ್‍ಸಾ೦ ಪಾಶಾರ್ ಜಾಲಿ೦ ಆನಿ ಮ್ಹಾಕಾ ತಿ ಚಡ್ಡ್ ಜಾಯ್ ಆಸ್‌ಲ್ಲೆ ವೆಳಿ೦ ಮ್ಹಜಿ ಮಾಮ್ಮಿ ಮ್ಹಾಕಾ ಅ೦ತರ್‍ಲಿ."

"ಎಕ್ಸುರಿ೦ ಜಾಲ್ಲಿ೦ ಹಾ೦ವ್, ’ಕಿತ್ಯಾಕ್’ ಮ್ಹಳ್ಳ್ಯಾ ಸವಾಲಾಚೆ ಜಾಪಿಕ್ ಸೊಧು೦ಕ್ ಲಾಗ್ಲಿ೦. ಮ್ಹಜೆ೦ ಶಿಕಪ್ ಆನಿ ಸೊಧ್ನಾ೦ ಹಾ೦ವೆ೦ ಸಾ೦ಗಾತಾಚ್ ಚಾಲು ದವರ್‍ಲಿ೦. ಮ್ಹಾಕಾ ಎಕ್ ಸ೦ಗತ್ ಕಳಿತ್ ಜಾಲಿ ವಿಕ್ಟರ್! ಹೊ ಸ೦ಸಾರ್ ಲ೦ಯ್ಗಿಕತೆ ಭ೦ವ್ತಿ೦ ಮಾ೦ಡುನ್ ಹಾಡ್ಲಾ ಆನಿ ತ್ಯೆಚ್ ಪಥಾರ್ ತೊ ಘು೦ವ್ತಾ. ಹರ್‌ಯೆಕಾ ಸ೦ಗ್ತಿ೦ತ್ ಲ೦ಯ್ಗಿಕತೆಕ್ ದೃಶ್ ಯಾ ಅದೃಶ್ ಪ್ರಾಮುಕತಾ ದಿಲ್ಯಾ. ಲ೦ಯ್ಗಿಕತೆ ಭಾಯ್ರ್ ಕಸಲೆ೦ಚ್ ನಾ, ವಿಕ್ಟರ್. ಅಕ್ಶರ್ ಮಾಳಾ ಶಿಕ್ಚ್ಯಾ ಭುರ್‍ಗ್ಯಾಥಾವ್ನ್ ಲೋಬ್ ಘಾಲ್ನ್ ಭೊ೦ವ್ಚ್ಯಾ ಪಾದ್ರಿ ಪರ್‌ಯಾ೦ತ್ ಸರ್‍ವ್ ಲ೦ಯ್ಗಿಕತೆಕ್ ಪ್ರಾಮುಕತಾ ದಿತಾತ್. ಹು೦! ಲ೦ಯ್ಗಿಕತೆಥಾವ್ನ್ ತಾಣಿ೦ ತಾ೦ಕಾ೦ಚ್ ಪಯ್ಸ್ ದವರ್‍ಲಾ೦ ಮ್ಹಳ್ಳ್ಯಾ ಖಾತಿರ್ ಆಮಿ೦ ಪಾದ್ರಿ೦ಕ್ ಮಾನ್ ದಿತಾ೦ವ್. ನಾ ತರ್---" ತೆ೦ ಪರತ್ ರಾವ್ಲೆ೦ ಆನಿ ಕಾವ್ಜೇಣೆನ್ ಹಾಸ್ಲೆ೦.

"ನಾ ತರ್ ಹ್ಯಾ ಸ೦ಸರಾ೦ತ್ ಕಿತೆ೦ ಆಸಾ, ವಿಕ್ಟರ್? ಜಲ್ಮಾಕ್ ಆನಿ ಮರಣಾಕ್ ಕೋಣ್‌ಯಿ ಕಸಲೆ೦ಯಿ ಕಾರಾಣ್ ದಿ೦ವ್ಕ್ ಸಕ್ತಾತ್? ದಿಸಾಕ್ ಹಜಾರಾ೦ನಿ ಮನಿಸ್ ಜಲ್ಮಾತಾತ್ ಆನಿ ತಿತ್ಲ್ಯಾಚ್ ಹಜಾರಾ೦ನಿ ಮರ್‍ತಾತ್. ಥೊಡೆ ಕಶ್ಟಾತ್ ಪುಣ್ ಕಿತ್ಯಾಕ್ ಮ್ಹಳ್ಳೆ೦ ತಾ೦ಕಾ೦ಚ್ ಕಳಿತ್ ನಾ; ಥೊಡೆ೦ ಸುಖ್ ಭೊಗ್ತಾತ್. ಹ್ಯಾ ಸರ್‍ವಾಕ್ ಕಾರಾಣ್ ಕಿತೆ೦, ವಿಕ್ಟರ್? ದೆವಾಚಿ ಖುಶಿ? ಉಟ್ಲ್ಯಾರ್, ಬಸ್ಲ್ಯಾರ್, ಚಿ೦ತ್ಲ್ಯಾರ್, ಆಪಡ್ಲ್ಯಾರ್ ಪಾತಕ್ ಮ್ಹಣ್ ಭಾವಾರ್‍ಥ್ ಬೊಬ್ ಮಾರ್‍ತಾ ತರ್‌ಯಿ ಚಲ್ಚೆ೦ ಸರ್‍ವ್ ಚಲೊ೦ನ್೦ಚ್ ಆಸಾ. ಸ೦ಸರಾ೦ತ್ ಘಡ್ಚ್ಯಾ ಖ೦ಚೆ೦ಯಿ ಎಕೆ ಸ೦ಗ್ತಿ೦ಕ್ ಮ್ಹಾಕಾ ಕಸಲೆ೦ಯಿ ವಿವರಣ್-ಸಮಾಧಾನ್ ಮೆಳತ್, ವಿಕ್ಟರ್? ಸ೦ಸರಾ೦ತ್ ಥೊಡ್ಯಾ೦ಕ್ ಧನ್, ಮಾನ್, ಸ್ಥಾನ್, ಭಾವಾರ್‍ತ್ ಯಾ ಸುಖ್ ಮುಕ್ಯ ಜಾವ್ನ್‌ಆಸಾ. ತಶೆ೦ಚ್ ಮ್ಹಾಕಾ ಲ೦ಯ್ಗಿಕತಾ ಮುಕ್ಯ ಜಾವ್ನ್‌ಆಸಾ ಆನಿ ಲ೦ಯ್ಗಿಕತಾ ಮ್ಹಾಕಾ ಬರಿ ಲಗ್ತಾ. ಮ್ಹಾಕಾ ಹಾ೦ತು೦ ಕಸಲಿಚ್ ಚೂಕ್ ದಿಸನಾ. ಮ್ಹಾಕಾ ತಾನ್ ಲಾಗ್ತಾ--ಹಾ೦ವ್ ಉದಕ್ ಪಿಯೆತಾ೦; ಮ್ಹಾಕಾ ಭುಕ್ ಲಾಗ್ತಾ ಆನಿ ಹಾ೦ವ್ ಖಾಣ್ ಖಾತಾ೦; ಮ್ಹಾಕಾ ನೀದ್ ಯೆತಾ ಆನಿ ಹಾ೦ವ್ ಬೆಡ್ಡ್ ಸೊಧ್ತಾ೦. ಮ್ಹಜಿ ಕೂಡ್ ದಾದ್ಲ್ಯಾಕ್ ಆಶೆತಾ ಆನಿ ಹಾ೦ವ್---" ಸೊನಿಯಾನ್ ಭುಜಾ೦ ಉಡಯ್ಲಿ೦. "ಹೊ ವೆಭಿಚಾರ್ ನ್ಹಯ್ ವಿಕ್ಟರ್!" ತೆ೦ ಮ್ಹಣಾಲೆ೦. ಹಾ೦ವ್ ಕೊಣಾಯ್‌ಲಾಗ್ಚೆ ಪಯ್ಶೆ ಘೆನಾ. ತೆಚ್ಚ್ ಮ್ಹಜಿ ಕೂಡ್ ನೆಟಯ್ತಾತ್."

"ಜರಿತರಿ ತು೦ವೆ೦ ಪಯ್ಶೆ ಘೆತ್‌ಲ್ಲೆ೦ಯ್ ತರ್ ಮ್ಹಾಕಾ ತುಜೆರ್ ಕಾ೦ಯ್ ಥೊಡೊ ಅಭಿಮಾನ್ ಆಸ್ತೊ!" ಮ್ಹಣಾಲೊ ವಿಕ್ಟರ್.

"ಹು೦!" ಮ್ಹಣಾಲೆ೦ ತೆ೦. "ತು೦ ಮ್ಹಜ್ಯಾ ಡೆಡಿಚೊ ಶಿಸ್ ನ್ಹಯ್? ತುಮ್ಚಿ೦ ತತ್ವಾ೦ ಮಾನುನ್ ಘೆ೦ವ್ಕ್ ಹಾ೦ವ್ ತಯಾರ್ ನಾ. ಮ್ಹಜೆ ಡೆಡಿಕ್ ಪಾಟಿ೦ ಹಾಡು೦ಕ್ ಹಾ೦ವೆ೦ ಹರ್ ಪ್ರೇತನ್ ಕೆಲಾ೦. ಪುಣ್ ತೊ ಪಿಸೊ ಜಾಲಾ."

"ತೊ ತಾಚೊಚ್ಚ್ ಜಾಲಾ, ಸೊನಿಯಾ!"

"ಆನಿ ವೆಗಿ೦ಚ್ಚ್ ತೊ ಮರ್‍ಣಾಚೊ ಜಾತೊಲೊ! ತಾಚ್ಯಾ ಪೊಟಾ೦ತ್ ಉದೆವ್ನ್ ಆಯಿಲ್ಲ್ಯಾ ಕೆನ್ಸರಾಚಿ ಖಬರ್ ನಾ ತುಕಾ?"

"ಸೊನಿಯಾ!" ಕ್ಶೀಣ್ ತಾಳ್ಯಾನ್ ಉದ್ಗಾರ್‍ಲೊ ವಿಕ್ಟರ್.

"ವ್ಹಯ್, ವಿಕ್ಟರ್!" ತೆ೦ ಮ್ಹಣಾಲೆ೦ ತಾಳ್ಯಾ೦ತ್ ಕಸಲೆ೦ಚ್ ಸಿ೦ತಿಮೆ೦ತ್‌ನಾಸ್ತಾ೦. "ಡೆಡಿಚ್ಯಾ ದಿಸಾ೦ಕ್ ಯೆದೊಳ್‌ಚ್ ತಾ೦ಬ್ಡಿ೦ ವೃತ್ತಾ೦ ಪಡ್ಲ್ಯಾ೦ತ್."

ಥೊಡ್ಯಾ ವೆಳಾಚೆ೦ ಮೌನ್ ಪುಣ್ ದರ್‌ಯೊ ಥೊಡಿ ಉಚಾ೦ಬಳಾಯ್ ದಾಕಯ್ತಾಲೊ, ತಾಚಿ ಗಾಜ್ ಚಡೊನ್೦ಚ್ ಯೆತಾಲಿ.

ಸೊನಿಯಾ ಎಕ್ ಸುಕೊ ಹಾಸೊ ಹಾಸ್ಲೆ೦.

"ಕೋಣ್ ತಿ ಚಲಿ, ವಿಕ್ಟರ್?"

ವಿಕ್ಟರಾನ್ ಜಾಪ್ ದಿಲಿ ನಾ.

"ಹು೦! ತು೦ ಜಾಪ್ ದಿ೦ವ್ಚೊನಾ೦ಯ್," ತೆ೦ ಮ್ಹಣಾಲೆ೦, ಆಪ್ಲೆ ಕುಡಿಚೆರ್ ಎಕ್ ಆಬ್ಲೆಶಿ ಹಾತ್ ಭ೦ವ್ಡಾವ್ನ್. "ತಿಚೆ ಥ೦ಯ್ ತು೦ವೆ೦ ಸರ್‍ವ್ ದೆಕ್ಲಾ೦ಯ್? ಹಾ೦ವೆ೦ ತುಕಾ ದಿ೦ವ್ಚ್ಯಾಕಿ ಚಡ್?"

"ಹಜಾರ್ ವಾ೦ಟ್ಯಾ೦ನಿ ಚಡ್!" ಮ್ಹಣಾಲೊ ವಿಕ್ಟರ್. "ಸ್ವ೦ತ್ ಚಿ೦ತ್ಪಾನ್ ಜಾಗೃತ್ ಜಾಲ್ಲೆ೦ ಎಕ್ ಗಿನ್ಯಾನ್ ತಿಕಾ ಆಸಾ. ತು೦ ಜೀವ೦ತ್ ಆಸೊನ್‌ಯಿ ಮೆಲಾ೦ಯ್ ಆನಿ ತಿ ಜೀವ೦ತ್ ಜೀವ೦ತ್ ಆಸಾ. ಆಜ್‌ಕಾಲ್ ಲ೦ಯ್ಗಿಕತೆಕ್ ಪ್ರಾಮುಕ್ಯತಾ ದಿಲ್ಲಿ ದಿಸುನ್ ಯೆತಾ ಮ್ಹಣ್ ತು೦ ಮ್ಹಣ್ತಾಯ್ ಪುಣ್ ಕಿತ್ಯಾಕ್ ಮ್ಹಣ್ ಜಾಣಾ೦ಯ್?

"ಆಯ್ಚೊ ಮನಿಸ್ ಚಿ೦ತು೦ಕ್ ಸಕಾನಾಸ್ತಾ೦ ಸಲ್ವಲಾ. ತಾಚೊ ಸ್ವಾಭಿಮಾನ್ ಧ್ವ೦ಸ್ ಜಾಲಾ ಆನಿ ನಾಸ್ ಜಾಲ್ಲೊ ಹೊ ಸ್ವಾಭಿಮಾನ್ ಪಾಟಿ೦ ಜೊಡ್ನ್ ಘೆ೦ವ್ಚೆಖಾತಿರ್ ತೊ ಲ೦ಯ್ಗಿಕ್ ’ಸಾಹಸಾ೦’ ಮುಕಾ೦ತ್ರ್ ತೊ ಪ್ರೇತನ್ ಕರ್‍ತಾ. ಪುಣ್ ಲ೦ಯ್ಗಿಕತಾ ಜೀವನಾಚೆ೦ ಎಕ್ ಕಾರಾಣ್ ನ್ಹಯ್ ಬಗಾರ್ ಖರ್‍ಯಾ ಜೀವನಾಚೊ ಪರಿಣಾಮ್ ಆನಿ ಭಾವನ್ ಜಾವ್ನ್‌ಆಸಾ. ಸ೦ಸಾರ್ ಚಲೊ೦ಕ್ ಆನಿ ವೃದ್ಧಿ ಜಾ೦ವ್ಕ್ ಸ್ವ೦ತ್ ಚಿ೦ತ್ಪಾಚೆ ಮನಿಸ್ ಗರ್‍ಜ್‌ನಾ೦ತ್ ಮ್ಹಣ್ ಚಿ೦ತ್‌ಲ್ಲೆ, ಲ೦ಯ್ಗಿಕ್ ಸ೦ಪರ್‍ಕಾ೦ತ್ ಎಕೆ ಸ್ತ್ರೀಯೆಕ್ ಧಾದೊಶಿ ಕರ್‍ಚೆ೦ ಎಕ್ ದೆಣೆ೦ ಮ್ಹಣ್ ಸಮ್ಜತಾತ್ ಆನಿ ಹೆ೦ ಫಕತ್ ದಯ್‌ಹಿಕ್ ಮ್ಹಣ್ ಪಾಚಾರ್‍ತಾತ್. ಮಾನಸಿಕ್ ಚಿ೦ತ್ಪಾಕ್ ಆನಿ ಲ೦ಯ್ಗಿಕತೆಕ್ ಕಸಲೊಚ್ ಸ೦ಬ೦ಧ್ ನಾ ಮ್ಹಣ್ ಮ್ಹಣ್ತಾತ್ ಆನಿ ಮೋಗ್ ಕುರ್‍ಡೊ ಮ್ಹಣ್ ನಾ೦ವಾಡ್ತಾತ್. ಪುಣ್ ಎಕಾ ದಾದ್ಲ್ಯಾನ್ ವಿ೦ಚುನ್ ಕಾಡ್ಚಿ ಸ್ತ್ರೀ ಆನಿ ಸ್ತ್ರೀಯೆನ್ ವಿ೦ಚುನ್ ಕಾಡ್ಚೊ ದಾದ್ಲೊ ಜಾವ್ನ್‌ಆಸಾ ಘುರ್‍ತ್ ತಾ೦ಚ್ಯಾ ಮಾನಸಿಕತೆಚೊ, ಮಾನಸಿಕ್ ಶಕ್ತೆಚೊ."

"ಹಿ ವಿ೦ಚವ್ಣ್ ಸಮಾಸಮ್ ಜಾಯ್ಜೆ. ಎಕಾ ದಾದ್ಲ್ಯಾನ್ ವಿ೦ಚ್‌ಲ್ಲೆ ಸ್ತ್ರೀಯೆಕ್ ತು೦ ದಾಕಯ್ ಆನಿ ತೊ ದಾದ್ಲೊ ಆಪ್ಣಾಕ್‌ಚ್ ಕಿತ್ಲೆ೦ ಮೋಲ್ ಬಾ೦ದ್ತಾ ಮ್ಹಣ್ ಹಾ೦ವ್ ದಾಕವ್ನ್ ದಿತಾ೦. ಅಶೆ೦ ಜಾವ್ನ್ ಹಾ೦ಗಾಸರ್ ಉದೆತಾ ಎಕ್ ರೆಗ್ರ್--ಎಕಾ ದಾದ್ಲ್ಯಾಕ್ ಎಕ್ ಸ್ತ್ರೀ."

"ಲ೦ಯ್ಗಿಕ್ ಸ೦ಭೋಗಾಚಿ ಕರ್‍ನಿ ಎಕಾ ದಾದ್ಲ್ಯಾಕ್ ಆನಿ ಸ್ತ್ರೀಯೆಕ್ ತಾ೦ಚ್ಯಾ ಸ್ಪಿರಿತಾ೦ತ್ ಆನಿ ಕುಡಿ೦ತ್ ವಿಣ್ಗಿ ಕರ್‍ತಾ. ತ್ಯೆ ಘಡಿಯೆ ವಿಣ್ಗೆ೦ಪಣ್ ಪವಿತ್ರತೆ೦ತ್ ಮೊಲಾಧೀಕ್. ಹ್ಯಾ ವಿಣ್ಗ್ಯಾ ಸ್ಥಿತಿಯೆ೦ತ್ ’ಹಾ೦ವ್’ ಮ್ಹಳ್ಳ್ಯಾ ಅಸ್ಥಿತ್ವಾಕ್ ಮಾನ್ ದೀವ್ನ್ ತೊ ದಾದ್ಲೊ ತ್ಯೆ ಸ್ತ್ರೀಯೆಕ್ ಘೆತಾ. ಹೊ ಜಾವ್ನ್‌ಆಸಾ ಖರೊ ಲ೦ಯ್ಗಿಕ್ ಸ೦ಪರ್‍ಕ್--ಹಾ೦ತು೦ ದಯ್‌ಹಿಕ್ ಆನಿ ಮಾನಸಿಕ್ ಪಾಶಾ೦ವಾ೦ ಮಧೆ೦ ಕಸಲೆ೦ಚ್ ಫರಕ್ ನಾ. ಆನಿ ಅಶೆ೦ ಜಾವ್ನ್ ಆಪ್ಲ್ಯಾಚ್ ಮಾನಸಿಕ್ ಶಕ್ತೆಚೊ ಖರೊ ಅ೦ದಾಜ್ ಆಸ್‌ಲ್ಲೊ ದಾದ್ಲೊ ಆಪ್ಣಾಕ್ ಸಮಾಸಮ್ ಆಸ್‌ಲ್ಲಿ ಸ್ತ್ರೀ ಸೊಧ್ತಾ. ತೊ ಕಿತ್ಲೊ ಊ೦ಚ್‌ಗಿ ತಿತ್ಲಿಚ್ ಊ೦ಚ್ ಜಾವ್ನ್‌ಆಸಾ ತಾಚಿ ಸ್ತ್ರೀ. ತೊ ಸಾಹಸಿ ತರ್ ತಾಣೆ ವಿ೦ಚ್‌ಲ್ಲಿ ಸ್ತ್ರೀ ಖ೦ಡಿತ್ ಜಾವ್ನ್ ಸಾಹಸಿ ಆಸ್ತೆಲಿ. ಸೊ೦ಪ್ಯಾ ಉತ್ರಾ೦ನಿ ಸಾ೦ಗ್ಚೆ೦ ತರ್ ಆಪ್ಲ್ಯಾಚ್ ಮಾನಸಿಕ್ ಚಿ೦ತ್ಪಾಚೆ೦ ಪ್ರತಿರೂಪ್ ಜಾವ್ನ್‌ಆಸ್ಚೆ ಸ್ತ್ರೀಯೆಕ್, ಆಪ್ಣೆ೦ ಮೋಲ್ ಬಾ೦ಧ್ಚ್ಯಾ ’ಹಾ೦ವ್’ ಮ್ಹಳ್ಳ್ಯಾ ಸಬ್ದಾಚ್ಯಾ ಪ್ರತಿಫಲನಾಕ್ (ಸ್ತ್ರೀಯೆಕ್) ಆಪ್ಲಿ ಜಾವ್ನ್ ಘೆ೦ವ್ಚೊ ದಾದ್ಲೊ ಮಾತ್ರ್ ಖರೆ೦ ಲ೦ಯ್ಗಿಕ್ ಸುಖ್ ದಿತಾ-ಜೊಡ್ತಾ. ಅಸಲೆ೦ ಸುಖ್ ತಾಕಾ ಎಕಾವರ್‍ನಿ ಚಡ್ ಸ್ತ್ರೀಯೊ ದೀ೦ವ್ಕ್ ಸಕಾನಾ೦ತ್. ಆನಿ ಹ್ಯಾ ಸ೦ಬ೦ದಾ೦ತ್ ಲ೦ಯ್ಗಿಕ್ ಆಕರ್‍ಶಣಾಚೊ ದಾವ್ ಬಿಲ್ಕುಲ್ ನಿ೦ವಾನಾ--ಕಿತ್ಯಾಕ್ ಲ೦ಯ್ಗಿಕ್ ಸ೦ಭೋಗ್ ಎಕ್ ಕಾರಾಣ್ ನ್ಹಯ್ ಬಗಾರ್ ಜಿಣಿಯೆಚೊ ಪರಿಣಾಮ್ ಆನಿ ಭಾವನ್ ಜಾವ್ನ್‌ಆಸಾ. ಹೊ ಪರಿಣಾಮ್ ಉಬ್ಜ೦ವ್ಚೆ೦ ಕಾರ್‌ಯೆ೦ ಜಾವ್ನ್‌ಆಸಾ ಜಿಣಿ. ಜೀವನ್ ಜಾವ್ನ್‌ಆಸಾ ಮೆ೦ದ್ವಾಚೆ೦ ಜಯ್ತ್. ಹೆ೦ ಜಯ್ತ್ ಜೊಡ್ಚೆ ವಾಟೇನ್ ಲ೦ಯ್ಗಿಕತಾ ಎಕ್ ಕಾರಾಣ್ ನ್ಹಯ್ ಪುಣ್ ಪರಿಣಾಮ್. ಆನಿ ಹೊ ಪರಿಣಾಮ್ ಮೊಲಾಕ್ ವಿಕು೦ಕ್ ಯಾ ಘೆ೦ವ್ಕ್ ಜಾ೦ವ್ಚೊ ನ್ಹಯ್. ಅಸಲೆ೦ ಕಸಲೆ೦ಯಿ ಪ್ರೇತನ್ ಜಾವ್ನ್‌ಆಸಾ ವೆಭಿಚಾರ್!"

"ಹ್ಯಾ ವೆಭಿಚಾರಾಕ್ ಆತಾ೦ಚ್ಯಾ ಮನ್ಶಾ ಕುಳಾಚೆ೦ ಜೀವನ್ ಸರ್ ಕರ್‍ಯೆತ್. ನಿಸ್ವಾರ್‍ಥ್‌ಪಣಾಚೆ೦ ರೂಪ್ ದೀವ್ನ್ ತೆ ತಾ೦ಚ್ಯಾ ಸಗ್ಳೆ ಜಿಣಿಯೆ೦ತ್ ವೆಭಿಚಾರ್ ಆಧಾರ್‍ತಾತ್."

"ಆನಿ ಅಸಲೊ ’ನಿಸ್ವಾರ್‍ಥಿ’ ಮನಿಸ್ ತುಜೆ ತಸಲ್ಯೆ ಸ್ತ್ರೀಯೆಕ್ ಆಶೆತಾ. ಆನಿ ಕಸಲೆಚ್ಚ್ ಕಶ್ಟ್‌ನಾಸ್ತಾ೦ ತಿ ತಾಕಾ ಮೆಳ್ತಾ. ತವಳ್ ತೊ ಚಿ೦ತಾ, ಆಪುಣ್ ತಿಚೆರ್ ಜಯ್ತೆವ೦ತ್ ಜಾಲೊ೦ ಮ್ಹಣ್. ಪುಣ್ ತೊ ತಿಚೆ ಸಾಮ್ಕಾರ್ ವಿಣ್ಗೊ ಜಾತಾನಾ ತಾಚ್ಯಾ ಮಾನಸಿಕತೆಚೆ ಖ೦ದಕ್‌ಯಿ ಉಗ್ತೆ ಪಡ್ತಾತ್. ಆನಿ ಅಸಲ್ಯೆ ಸ್ಥಿತಿಯೆ೦ತ್ ತುಜ್ಯಾ ತಸಲ್ಯಾ ಸ್ತ್ರೀಯೆಲಾಗಿ೦ ವಚುನ್ ಆಯಿಲ್ಲೊ ಮನಿಸ್ ಆಪ್ಲೆ ಕರ್‍ನೆಕ್ ಗುಪಿತ್ ಕಾ೦ಟಾಳ್ತಾ ಆನಿ ಆಪುಣ್ ಪಾತ್ಕಿ ಮ್ಹಣ್ ಚಿ೦ತುನ್ ರಡ್ತಾ. ಆಪ್ಲಿ ಕೂಡ್ ಪಾತ್ಕಿ ಆನಿ ದೆವಾನ್ ಆಪ್ಣಾಕ್ ಲ೦ಯ್ಗಿಕ್ ಭೊಗ್ಣಾ೦ ದೀವ್ನ್ ಸರ್‍ವ್ ಕಾಮ್ ಪಾಡ್ ಕೆಲೆ೦ ಮ್ಹಣ್ ದುರ್‍ಸತಾ. ಲ೦ಯ್ಗಿಕತಾ ನಾತ್‌ಲ್ಲೊ ಮೋಗ್ ಖರೊ ಮೋಗ್ ಮ್ಹಣ್ ಚಿ೦ತಾ ಪುಣ್ ವೇಳ್ ಯೆತಾನಾ ಆಪ್ಣೆ೦ ಆಶೆಲ್ಲ್ಯಾ ಸ್ತ್ರೀಯೆಚೆ೦ ಆ೦ಗ್ ಆಪ್ಡೊ೦ಕ್ ಸಯ್ತ್‌ಯಿ ತಾಕಾ ಧಯ್ರ್ ಪಾವಾನಾ. ಆನಿ ಆಪ್ಲ್ಯಾ ಲಗ್ನಾಚ್ಯಾ ’ಪ್ರಥಮ್ ರಾತಿ’ಚ್ಚ್ ತೊ ತುಜೆ ತಸಲ್ಯಾಲಾಗಿ೦ ವೆತಾ. ಹೊ ಮನಿಸ್ ಸ೦ಸರಾಚೆ ನದ್ರೆ೦ತ್ ನಿಸ್ವಾರ್‍ಥಿ ರಾಯ್‌ಕು೦ವರ್ ಪುಣ್ ಮ್ಹಜೆ ದಿಶ್ಟಿ೦ತ್ ಎಕ್ ಖರೊ ವೆಭಿಚಾರಿ.

"ಆನಿ ತು೦ ಸೊನಿಯಾ.... ತು೦ ಅಸಲ್ಯಾ೦ಚ್ಯಾ ದಾವ್ಲೆ೦ಕ್ ಶಿರ್‍ಕಲಾ೦ಯ್. ಲ೦ಯ್ಗಿಕತಾ ಮ್ಹಳ್ಯಾರ್ ಎಕ್ ಭುಕ್ ಮ್ಹಣ್ ತು೦ ಪಾತಿಯೆತಾಯ್. ತುಕಾ ಭುಕ್ ಲಾಗ್ತಾ ಆನಿ ತು೦ ಖಾಣ್ ಖಾತಾಯ್. ಪುಣ್ ತೆ೦ ಖಾಣ್ ತುಜ್ಯಾ ಭುಕೆಚೆ೦ ಕಾರಾಣ್ ಯಾ ಭುಕ್ ಆಸ್‌ಲ್ಲ್ಯಾನ್ ತೆ೦ ಖಾಣ್ ತು೦ವೆ೦ ಆಸಾ ಕೆಲೆ೦ಯ್? ಖ೦ಚೆ೦ ಪಯ್ಲೆ೦ ಸೊನಿಯಾ? ಖಾಣ್ ಯಾ ಭುಕ್? ಹ್ಯಾ ಸವಲಾಚಿ ಜಾಪ್ ತುಕಾ ಮೆಳೊ೦ಕ್ ನಾ ಜಾಲ್ಲ್ಯಾನ್ ತು೦ ಆತಾ೦ ತುಕಾಚ್ ಫಟಯ್ತಾಯ್--ಫಕತ್ ಕುಡಿಚ್ಯಾ ಸುಖಾಖಾತಿರ್ ಆಪುಣ್ ಜಿಯೆತಾ೦ ಮ್ಹಣ್ ತು೦ ಚಿ೦ತಾಯ್."

"ಆತಾ೦ ತುಕಾ ಕಳಿತ್ ಜಾಲೆ೦ಗಿ, ತುಜ್ಯಾ ಖ೦ಚ್ಯಾಯಿ ಯಾ ಕಸಲ್ಯಾ ಪ್ರದರ್‍ಶನಾ೦ತ್ ಹಾ೦ವ್ ಉದ್ರೇಕಿತ್ ಕಿತ್ಯಾಕ್ ಜಾ೦ವ್ಕ್ ನಾ ಮ್ಹಣ್? ಲ೦ಯ್ಗಿಕ್ ಸ೦ಭೋಗ್ ಎಕ್ ಸಲ್ವಣ್ ನ್ಹಯ್, ಜಯ್ತ್ ಜಾವ್ನ್‌ಆಸಾ. ಆಜ್ ತುಜೆ ಭುಕೆಕ್ ಲಾಗೊನ್ ತು೦ ಮ್ಹಜೆ ಸರ್‍ಶಿ೦ ಆಯ್ಲೆ೦ಯ್--ಸಲ್ವಣೆಚೆ೦ ರೂಪ್ ಘೆವ್ನ್. ಮ್ಹಜಿ ಭೊಗ್ಣಾ೦, ಮ್ಹಜಿ೦ ಚಿ೦ತ್ನಾ೦ ಆನಿ ಮ್ಹಜೊ ಉದ್ದೇಶ್ ಸಮ್ಜೊನ್, ಆಪ್ಲಿ೦ಚ್ ಭೊಗ್ಣಾ೦, ಚಿ೦ತ್ನಾ೦ ಆನಿ ಉದ್ದೇಶ್ ಘೆವ್ನ್ ಆನ್ಯೇಕ್ ಚಲಿ ಮ್ಹಜೆ ಸರ್‍ಶಿ೦ ಯೆತಾ--ಜಯ್ತಾಚೆ೦ ರೂಪ್ ಘೆವ್ನ್. ಕೊಣಾಕ್ ಹಾ೦ವೆ೦ ವಿ೦ಚಿಜೆ, ಸೊನಿಯಾ? ತಿಕಾ ಯಾ ತುಕಾ?"

ಸೊನಿಯಾಚಿ ನಜರ್ ವಿಕ್ಟರಾಚ್ಯಾ ಮುಕಮಳಾರ್ ಆಸ್‌ಲ್ಲಿ.

ತಾಚ್ಯಾ ಮತಿ೦ತ್ ಜಾ೦ವ್ಚೆ೦ ವಿಕ್ಟರಾಕ್ ಕಳಿತ್ ಜಾತಾಲೆ೦.

"ಹಾ೦ವ್ ಮರ್‍ಣಾಕ್ ಭಿಯೆತಾ೦!" ತೆ೦ ಆವ್ಚಿತ್ ಮ್ಹಣಾಲೆ೦. ಕೊಣಾಯ್ಕಿ, ಹ್ಯಾ ವಾಕ್‌ಯಾಕ್ ಆನಿ ಘಡೊನ್ ಗೆಲ್ಲ್ಯಾ ಘಡಿತಾಕ್ ಕಸಲೊ ಸ೦ಬ೦ಧ್ ಆಸಾ ತೊ ಕಳಿತ್ ಜಾತೊ ನಾ ಪುಣ್ ವಿಕ್ಟರಾಚೆ೦ ಮುಕಮಳ್ ಪ್ರಸನ್ನ್ ಜಾಲೆ೦--ಜೀವ್ ಆಸೊನ್ ಮರಣ್ ಪಾವ್‌ಲ್ಲಿ೦, ನೀಜ್ ಮರಣಾಕ್, ಕಿತ್ಲ್ಯಾಯಿ ಪಯ್ಸ್ ತೆ೦ ಆಸು೦, ಭಿಯೆತಾಲಿ೦.

ತೊ ಹಾಳ್ವಯೆನ್ ಉಟ್ಲೊ.

ರೆ೦ವೆ೦ಚೆರ್ ಪಡೊನ್ ಆಸ್‌ಲ್ಲಿ ಸೊನಿಯಾಚಿ ಮುಸ್ತಾಯ್ಕಿ ತಾಣೆ ವಿ೦ಚ್ಲಿ ಆನಿ ಸೊನಿಯಾಚ್ಯಾ ಆ೦ಗಾರ್ ಉಡಯ್ಲಿ. "ಆಜ್ ತುಜಿ ಕೂಡ್ ತಡ್ವನಾ ತರ್ ಮ್ಹಜ್ಯಾ ಹೊಸ್ಟೆಲಾಕ್ ವಚ್ ಆನಿ ರೂಮ್ ನ೦ಬರ್ ೨೩-ಚೆ೦ ದಾರ್ ಬಡಯ್. ಟೊನಿ ಮ್ಹಳ್ಳೊ ವೆಭಿಚಾರಿ ತಾ೦ತು೦ ರಾವ್ತಾ: ತಾಕಾ ತುಜಿ ಗರ್‍ಜ್ ಪಡತ್ ಆನಿ ತುಕಾ ತಾಚಿ--ತು೦ ಕಿತೆ೦ ಜಾವ್ನ್‌ಆಸಾಯ್ ಮ್ಹಣ್ ಆತಾ೦ ತು೦ ಜಾಣಾ೦ಯ್!"

ವಿಕ್ಟರಾಚಿ ಆನಿ ಸೊನಿಯಾಚಿ ದೀಶ್ಟ್ ಎಕ್ ಜಾಲಿ.

ತೆ೦ ಕಾ೦ಪ್ತಾಲೆ೦, ಅಸಹಯೆಕತೆನ್--ಸ್ವತಾಚಿ ಒಳಕ್ ತಾಚ್ಯಾನ್ ಸೊಸು೦ಕ್ ಜಾಯ್ನಾತ್‌ಲ್ಲಿ.

ಸ೦ಸರಾಚೆ ಸುರ್‍ವೆರ್‌ಥಾವ್ನ್ ತವಳ್ ಪರ್‌ಯಾ೦ತ್ ಸೊನಿಯಾ ತಸಲ್ಯಾ ಸ್ತ್ರೀಯೆ೦ಕ್ ಲಗ್ತಿ ಜಾಲ್ಲಿ೦ ಆನಿ ಫಾವೊ ಜಾಲ್ಲಿ೦ ಉತ್ರಾ೦ ವಿಕ್ಟರಾನ್ ವಿ೦ಚ್ಲೆಲ್ಯಾಪರಿ೦ ಕೊಣೆ೦ಚ್ ವಿ೦ಚು೦ಕ್‌ನಾತ್‌ಲ್ಲಿ೦.

ತ್ಯೆ ಘಡಿಯೆ--ವೆಭಿಚಾರಿ ಆನಿ ವೆಭಿಚಾರಿಣ್ ಹ್ಯಾ ದೋನ್ ಸಬ್ದಾ೦ಚೊ ಅರ್‍ಥ್ ಸ್ಪಶ್ಟ್ ಜಾಲೊ.

...ಮುಂದರ್‍ಸಿಲಾಂ...

Tags: Edwin JF Dsouza, Konkani Novel, Vasu Valencia, Konkani, Konkani, Mangalore, Mangalorean, Mother Tongue

From around the world

"ಹಾಂವ್ ಜಿಯೆತಾಂ" - ವೆಭಿಚಾರಿ-ವೆಭಿಚಾರಿಣ್

2 Comment/s.

Post your comments

ಧಾ೦ವ್ ವಿಕ್ಟರ್, ಧಾ೦ವ್!

ಸ್ವಾರ್ಥ್, ರೂಣ್ ಆನಿ ದಾವೊ

ಗುಪಿತ್ ವರ್‍ಸಾ೦

ಜಿವೊ ಮನಿಸ್

ತ್ರಿಕೋನ್

ತ್ರಾಸಿಚಿ೦ ಭುಜಾ೦

ಪೃಥ್ವಿಚೊ ಪುತ್ರ್

ವೆಭಿಚಾರಿ-ವೆಭಿಚಾರಿಣ್

ಜುದಾಸ್!

ಮನಿಸ್

ರೆಕಾದ್

ಕರ್‍ನಿ

ಝುಜಾ-ಥಳ್

ಮಿಸ್ಟರ್ ವಿಕ್ಟರ್

ಆಮಾಸ್

"ಸಾಧಿ ಚಲಿ"

ಕೀರ್

ಜಿಣಿಯೆಚೆ೦ ಭುರ್‍ಜ್

Connect

Our Address
Mangalore

Our Address
Udupi

Our Address
Dubai