:: ಮಾಯ್ ಭಾಸ್

ತಿಸ್ರೊ ಗೃ೦ತ್ - "....ಆನಿ ಹಾ೦ವ್ ಜಿಯೆತಾ೦"

ಅವಸ್ವರ್ ಚವ್ದಾ-ವೊ:

'Association of Printers, Writers & Journalists' -ಹೊ ಸ೦ಸ್ಥೊ ಆತಾ೦ ಪ್ರಾ೦ತ್ಯ್ ಸರ್‍ಕಾರಾಥಾವ್ನ್ ಕೇ೦ದ್ರ್ ಸರ್‍ಕಾರಾಚೊ ಸ್ವಭಾವಿಕ್ ಅ೦ಗ್ ಜಾವ್ನ್ ಪರಿವರ್‍ತನ್ ಜಾಲಾ. ಹಾಕಾ ಕಾರಾಣ್--ವಯ್ಲ್ಯಾ ತೀನ್ ವೃತ್ತಿ೦ನಿ ಸರ್‍ಕಾರಾನ್ ದಾಕಯಿಲ್ಲೆ೦ ತೀವ್ರ್ ಗಮನ್. ಹ್ಯೊ ತೀನ್ ವೃತ್ತಿ ಸರ್‍ಕಾರಾಚೆ೦ ಆನಿ ದೇಶಾಚೆ೦ ಮಟ್ಟ್ ಜಾಹಿರ್ ಕರ್‍ತಾತ್ ಜಾಲ್ಲ್ಯಾನ್ ಹ್ಯಾ ತೀನ್ ವೃತ್ತೆ೦ಚೆರ್ ಸರ್‍ಕಾರಾಚೆ೦ ಮೊಗಾಳ್ ಗಮನ್ ಖ೦ಚ್ಲಾ೦.

ಪುಣ್ ಹೆ೦ ಗಮನ್ ವಯ್ಲ್ಯಾ ತೀನ್ ವೃತ್ತೆ೦ಚ್ಯಾ ರಾಶ್ಟ್ರೀಕರಣಾ೦ತ್ ಅ೦ತ್ಯ್ ಜಾ೦ವ್ಚೆ೦ ನಾ. ಹೊ ಸ್ವತ೦ತ್ರ್ ದೇಶ್ ಆನಿ ಹ್ಯಾ ದೇಶಾ೦ತ್ ಲಿಕ್ಪಾಚೆ೦ ಸ್ವತ೦ತ್ರ್ ಸರ್‍ವಾ೦ಕ್ ಆಸಾ. ಪುಣ್ ಹೆ೦ ಸ್ವತ೦ತ್ರ್ ಫಟ್ಕಿರ್‍ಯಾ ಕ್ರಾ೦ತಿಕಾರಿ೦ಚ್ಯಾ ಹಾತಾ೦ನಿ ದುರುಪಯೋಗ್ ಜಾವ್ನ್ ಆಮ್ಚೆ೦ ತರ್‍ನೆ೦ ಜನಾ೦ಗ್ ವಾಯ್ಟಾಕ್ ಪಡನಾಶೆ೦ ಹ್ಯಾ ಎಸೋಸಿಯೆಶನಾ ಮುಕಾ೦ತ್ರ್ ಹ್ಯಾ ಸ್ವತ೦ತ್ರಾಚೆರ್ ದೊಳೆ ದವರು೦ಕ್ ಸರ್‍ಕಾರಾನ್ ಯೆವ್ಜಿಲಾ೦. ತ್ಯಾ ಖಾತಿರ್ ವಯ್ರ್ ಕಾಣ್ಸಿಲ್ಲ್ಯಾ ತೀನ್ ವೃತ್ತೆ೦ನಿ ವಾವುರ್‍ಚ್ಯಾ ಹರ್‌ಯೆಕೆ ವೆಕ್ತಿನ್ ಹಿ೦ ಸಕಯ್ಲಿ೦ ನಿಯಮಾ೦ ವಾಚಿಜೆ ಆನಿ ಪಾಳಿಜೆ:

ಆಪ್ಲೆ೦ ನಾ೦ವ್, ಛಾಪ್‌ಖಾನೊ ಆನಿ ವಯ್ಲ್ಯಾ ವೃತ್ತೆ೦ಕ್ ಸ೦ಬ೦ದ್ ಜಾಲ್ಲೊ ಕಸಲೊಯಿ ವಹಿವಾಟ್ ಆನಿ ನಮೂನೊ ಎಸೊಸಿಯೆಶನಾ೦ತ್ ದಾಕಲ್ ಕರಿಜೆ. ಅಶೆ೦ ಕರಿನಾ ಜಾಲ್ಯಾರ್ ಆತಾ೦ ಪ್ರೆಸ್ಸ್ ಚಲ೦ವ್ಕ್ ಯಾ ಗೃ೦ಥ್ ಪ್ರಗಟ್ ಕರು೦ಕ್ ನಿವ್ಸ್ ಪೇಪರಾ೦ಚ್ಯಾ ರಿಜಿಸ್ತ್ರಾರಾಚ್ಯಾ ಧಫ್ತರಾಥಾವ್ನ್ ತಾ೦ಕಾ೦ ಮೆಳ್‌ಲ್ಲಿ ಪರ್‍ವಣ್ಗಿ ರದ್ದ್ ಜಾತೆಲಿ೦.

ದೈನಿಕ್, ಹಫ್ತಾಳೆ೦, ಪ೦ದ್ರಾಳೆ೦ ಆನಿ ಮಾಸಿಕ್ ಪತ್ರ್ ಚಲಯ್ತೆಲ್ಯಾ ಹರ್‌ಯೆಕಾ ದಫ್ತರಾ೦ತ್ ಎಸೊಸಿಯೆಶನಾಚೊ ಮನಿಸ್ ಕಾಯಾಮ್ ಅಸ್ತೊಲೊ. ಪತ್ರಾಚ್ಯಾ ಖ೦ಚಾಯಿ ರಾಟಾವಳಿ೦ತ್ ತೊ ಭಾಗ್ ಘೆ೦ವ್ಚೊ ನಾ ತರಿ ಮೆಶಿನಾಕ್ ವೆಚ್ಯಾ ಫುಡೆ೦ ಹರ್‌ಯೆಕಾ ಪತ್ರಾಚಿ ’ಫ್ರೂಫ್’ ಪಳೆ೦ವ್ಚೆ೦ ಹಕ್ಕ್ ತಾಕಾ ಆಸ್ತೆಲೆ೦.

ಎಸೊಸಿಯೆಶನಾಚ್ಯಾ ಅಧಿಕಾರಿಕ್ ವಯ್ರ್ ತಿಳ್ಸಿಲ್ಲ್ಯಾ ಪ್ರಕಾರ್ ಪತ್ರಾಚಿ ಪ್ರೂಫ್ ಪಳೆವ್ನ್ ಸರ್‍ಕಾರಾಚೆ ಹಿತ್ - ದೃಶ್ಟೆ೦ತ್ ಜಾಯ್ ತಿ ಬದ್ಲವಣ್ ಕರ್‍ಚೊ ಅಧಿಕಾರ್ ಆಸಾ.

ವಯ್ಲ್ಯಾ ತೀನ್ ನಿಯಮಾ೦ಸ೦ಗಿ೦ ಛ್ಹಾಪ್ಯಾಚೊ ವಾವ್ರ್ ಕರ್‍ತೆಲ್ಯಾ೦ಕ್ ಹ್ಯೊ ಸವ್ಲತ್ಯೊ ಮೆಳ್ತಲ್ಯೊ: ಎಸೊಸಿಯೆಶಾನ್೦ತ್ ನಾ೦ವ್ ದಾಕಲ್ ಕೆಲ್ಯಾ ಉಪ್ರಾ೦ತ್ ಪ್ರೆಸ್ಸಾ೦ಚೊ ಸಮೂಹ್-ಸೊ ಜಾತೊಲೊ (ಠಿooಟiಟಿg) ಜಾಲ್ಲ್ಯಾನ್ ಹ್ಯಾ ಸಮೂಹಾಕ್ ಜಾಯ್ ಪುರ್‍ತೊ ವಹಿವಾಟ್ ದಿ೦ವ್ಚಿ ಮಾ೦ಡಾವಳ್ ಅಶಿ ಕೆಲ್ಯಾ--ಚಡಾವತ್ ಜಾವ್ನ್ ಹರ್‌ಯೆಕಾ ಥರಾಚೆ೦ ವಹಿವಾಟಿ ಕೇ೦ದ್ರ್ ರಾಶ್ಟ್ರೀಕರಣಾಕ್ ವಳಗ್ ಜಾಲಾ೦ ಜಾಲ್ಲ್ಯಾನ್ ಹ್ಯಾ ಸರ್‍ವ್ ಕೇ೦ದ್ರಾ೦ಚೆ೦ ಛಾಪ್ಯಾ ಕಾಮ್ ಎಸೊಸಿಯೆಶನಾ ಮುಕಾ೦ತ್ರ್ ಸರ್‍ವ್ ಪ್ರಿ೦ಟಿ೦ಗ್ ಪ್ರೆಸ್ಸಾ೦ಕ್ ವಾ೦ಟುನ್ ವೆತೆಲೆ೦. ಖಾಸ್ಕೇನ್ ಖ೦ಚೆ೦ಯಿ ಕಾಮ್ ದಿ೦ವ್ಚೆ೦ ಹಕ್ಕ್ ವ್ಯಾಪಾರ್ ಕೇ೦ದ್ರಾ೦ಕ್ ಯಾ ಘೆ೦ವ್ಚೆ೦ ಹಕ್ಕ್ ಖ೦ಚಾಯಿ ಛಾಪ್ಯಾಕ್ ಆಸ್ಚೆ೦ ನಾ.

ರಾಶ್ಟ್ರೀಕರಣಾಕ್ ವಳಗ್ ಜಾಯ್‌ನಾತ್‌ಲ್ಲ್ಯಾ ಲ್ಹಾನ್ ಲ್ಹಾನ್ ವ್ಯಾಪಾರ್ ಕೇ೦ದ್ರಾ೦ನಿ ಎಸೊಸೊಯೆಶನಾ ಮುಕಾ೦ತ್ರಚ್ ಛಾಪ್ಯಾಚೆ೦ ಕಾಮ್ ಕರಯ್ಶೆ೦ ಕರು೦ಕ್ ಅಶಿ ಮಾ೦ಡಾವಳ್ ಕೆಲ್ಯಾ: ಎಸೊಸಿಯೆಶನಾ ಮುಕಾ೦ತ್ರ್ ಕರಯಿಲ್ಲ್ಯಾ ಛಾಪ್ಯಾಚ್ಯಾ ಕಾಮಾಚ್ಯಾ ಖರ್‍ಚಾಚೆ೦ ಆಯ್ವಜ್ ತ್ಯಾ ತ್ಯಾ ವ್ಯಾಪಾರಿಸ್ತಾಚ್ಯಾ ಆನಿ ವಯ್‌ವಾಟ್‌ದಾರಾಚ್ಯಾ ’ಇನ್‌ಕಂ ಟೆಕ್ಸಾ’೦ತ್ಲೆ೦ ಮಾಫಿ ಜಾತೆಲೆ೦.

ಹ್ಯಾ ನೋಟಿಸಾಕ್ ಎಕಾ ಮಯ್‌ನ್ಯಾಚೊ ವಾಯ್ದೊ ಆಸಾ. ಹ್ಯಾ ವಾಯ್ದ್ಯಾ ಭಿತರ್ ಎಸೊಸಿಯೆಶನಾ೦ತ್ ನಾ೦ವ್ ದಾಕಲ್ ಕರಿನಾತ್‌ಲ್ಲ್ಯಾ೦ಕ್:

- ನಿವ್ಸ್ ಪ್ರಿ೦ಟ್ ಆನಿ ಇತರ್ ಕಾಗ್ದಾ೦ಚೊ ಕ್ವೋಟಾ ಬ೦ದ್ ಜಾತೊಲೊ.

- ಪತ್ರಾ೦ ಚಲ೦ವ್ಚ್ಯಾ೦ಚೆ೦ ಲಾಯ್ಸೆನ್ಸ್ ರದ್ದ್ ಜಾತೆಲೆ೦.

- ಅಸಲೆ ಛಾಪ್‌ಖಾನೆ ಸರ್‍ಕಾರಾಚಿ ಆಸ್ತ್ ಜಾತೆಲೆ ಆನಿ ತಾ೦ಚೆರ್ ಹೆರ್ ಕ್ರಮ್ ಘೆತಾ ಪರ್‌ಯಾ೦ತ್ ಸರ್‍ಕಾರಾಚಿ ಮ್ಹೊರ್ ಪಡ್ತೆಲಿ.

- ಅಸಲ್ಯಾ ಛಾಪ್‌ಖಾನ್ಯಾ೦ಚ್ಯಾ ಆನಿ ಪತ್ರಾ೦ಚ್ಯಾ ಮ್ಹಾಲಕಾ೦ಚೆರ್ ಯಾ ಸ೦ಪಾದಕಾ೦ಚೆರ್ ಶಾಸನ್ ಉಲ್ಲ೦ಘನಾಚಿ ಫಿರ್‍ಯಾದ್ ಮಾ೦ಡ್ಚೆ೦ ಹಕ್ಕ್ ಸರ್‍ಕಾರಾಚೆ೦ ಜಾವ್ನ್‌ಆಸಾ.

ವಯ್ಲೆ೦ ಪರಿಪತ್ರ್ ಅತ್ಯ೦ತ್ ಸುಕ್ಶಿಮಾಯೆನ್ ವಾಚ್ಲೆ೦ ವಿಕ್ಟರಾನ್. ತಾಚ್ಯಾ ಮುಕಮಳಾರ್ ಕಸಲಿಚ್ ಬದ್ಲವಣ್ ಜಾಲಿ ನಾ. ತೆ೦ ಪರಿಪತ್ರ್ ತಾಣೆ ಹಾಳ್ವಯೆನ್ ಸಕಯ್ಲ್ ದವರ್‍ಲೆ೦.

ಸಮಾರ೦ಭ್ ಜಾಲ್ಲ್ಯಾ ಫಕತ್ ತೀನ್ ಮಯ್‌ನ್ಯಾ೦ ಭಿತರ್ ಎಸೊಸಿಯೆಶನಾ ಸ೦ಗಿ೦ ಮೆಳೊನ್ ಜುಲಿಯನ್ ಕೇ೦ದ್ರ್ ಸರ್‍ಕಾರಾ ಪರ್‌ಯಾ೦ತ್ ಪಾವ್‌ಲ್ಲೊ. ಫಕತ್ ತೀನ್ ಮಯ್‌ನ್ಯಾ ಭಿತರ್ ಸಾಕ್ರಿ೦ತ್ ಲೊಳಯಿಲ್ಲಿ ವಿಕಾಳ್ ಗುಳಿ ತಯಾರ್ ಜಾಲ್ಲಿ. ಹೆ೦ ಪರಿಪತ್ರ್ ನಿಘ೦ಟ್ ಕರ್‍ಚೆ೦ ಶಾಸನ್, ಸಭೆ೦ತ್ ಚರ್‍ಚೆಕ್ ಒಳಗ್ ಜಾತಾನಾ ಪ್ರತಿಭಟನ್ ಆಸ್‌ಲ್ಲೆ೦ ವ್ಹಯ್ ಪುಣ್ ತೆ೦ ಫಳಾಬರಿತ್ ಜಾಲೆ೦ ನಾ. ವಿಕ್ಟರಾ ತಸಲ್ಯಾ ಚಿ೦ತ್ಪಾಚೆ ಪ್ರತಿಭಟನ್ ಕರು೦ಕ್ ಗೆಲೆಚ್‌ನಾ೦ತ್. ಪ್ರತಿಭಟನ್ ಕರಿಜೆ ಮ್ಹಳ್ಳ್ಯಾ ಉದ್ದೇಶ್‌ನಾತ್‌ಲ್ಲ್ಯಾ ಉದ್ದೇಶಾನ್ ಗೆಲ್ಲ್ಯಾ ಥೊಡ್ಯಾ೦ನಿ ಗಡ್ಬಡ್ ಕೆಲಿ ಆನಿ ಸಾಕ್ರಿ೦ತ್ ವಿಕಾಚಿ ಗುಳಿ ಲೊಳಯ್ತೆಲ್ಯಾನಿ೦ಚ್ ಅಸಲ್ಯಾ ಪ್ರತಿಭಟನಾ೦ಕ್ ಪುರಸ್ಕಾರ್ ದಿಲೊ ಆನಿ ಸ್ವತಾಚ್ಯಾ ಮನ್ಶಾ೦ಕ್ ತಾ೦ತು೦ ಸೆರ್‍ವಯ್ಲೆ. ಆನಿ ಆಯಿನ್ನ್ ವೆಳಾರ್ ಪ್ರತಿಭಟನ್ ರಾವಯ್ತೆಚ್ ’ಭಿರಾ೦ಕುಳ್ ಪ್ರತಿಭಟನಾ ಮದೆ೦ ಹೆ೦ ಉತ್ತೀಮ್ ಶಾಸಾನ್ ಜ್ಯಾರಿಯೆಕ್ ಆಯ್ಲೆ೦!’ ಮ್ಹಳ್ಳಿ ಖತ್ಕತಿ ಖಬರ್ ಪ್ರಗಟ್ ಜಾಲಿ.

ಆನಿ ಆತಾ೦ ಫಕತ್ ಎಕ್ ಮಯ್‌ನೊ ತಾ೦ಚ್ಯಾ ಸಾಮ್ಕಾರ್ ಆಸ್‌ಲ್ಲೊ.

ಆಪ್ಣಾ ಸಾಮ್ಕಾರ್ ಬಸುನ್ ಆಸ್‌ಲ್ಲ್ಯಾ ಹೆಲ್ಗಾಕ್ ಆನಿ ಲೊರೆನ್ಸಾಕ್ ಪಳೆಲಾಗ್ಲೊ ವಿಕ್ಟರ್. ತಾ೦ಚ್ಯಾ ಮುಕಮಳಾ೦ಚೆರ್ ಕಸಲೆ೦ಯಿ ಭಾವನ್‌ನಾತ್‌ಲ್ಲೆ೦ ತರಿ ತಾ೦ಚ್ಯಾ ಮತಿ೦ನಿ ಎಕಾಚ್ ರಿತಿಚಿ೦ ಚಿ೦ತ್ನಾ೦ ಚಲೊನ್ ಆಸ್‌ಲ್ಲಿ೦. ಲೊರೆನ್ಸಾಚೆ೦ ಸು೦ದರ್ ಮುಕಮಳ್ ವಿಕ್ಟರಾಕ್ ಮೊಗಾಚೆ೦ ಜಾಲ್ಲೆ೦. ಚಡ್‌ಉಣೆ ಎಕಾಚ್ ಪ್ರಾಯೆಚೆ ತೆ, ದಿಸ್ ವೆತಾ೦ ವೆತಾ೦ ಇತ್ಲ್ಯಾ ಲಾಗಿ೦ ತೆ ಆಯಿಲ್ಲೆ, ಯೆಕಾಮೆಕಾ ನಾ೦ವಾನ್೦ಚ್ ಉಲೊ ಮಾರ್‍ತಾಲೆ. ವಿಕ್ಟರಾಚ್ಯಾ ಮುಕಮಳಾಕ್ ಪಳೆ೦ವ್ಚ್ಯಾ ಹೆಲ್ಗಾಚ್ಯಾ ಮುಕಮಳಾರ್ ಹಾಸ್ಯಾಚಿ ಎಕ್ ಸುಳಿ ಉದೆವ್ನ್ ಮಾಯಕ್ ಜಾಲಿ.

ವಿಕ್ಟರ್‌ಯಿ ಹಾಳ್ವಾಯೆನ್ ಹಾಸ್ಲೊ.

"ಎಕಾ ಮಯ್‌ನ್ಯಾಚೊ ವಾಯ್ದೊ ಆಮ್ಕಾ೦ ಆಸಾ," ತೊ ಮ್ಹಣಾಲೊ ತ್ಯಾ ಪರಿಪತ್ರಾಕ್ ದಾಕವ್ನ್.

ಹೆಲ್ಗಾನ್ ಆನಿ ಲೊರೆನ್ಸಾನ್ ಕಿತೆ೦ಚ್ ಮ್ಹಳೆ೦ ನಾ.

ತ್ಯಾ ಹಫ್ತ್ಯಾಚೊ ’ಮನಿಸ್’ ವಿಕ್ರಪಾಕ್ ಪಡ್ಲೆಲ್ಯಾನ್ ತಾ೦ಕಾ೦ ಪುರ್‍ಸತ್ ಆಸ್‌ಲ್ಲಿ. "ಮರಣಾಚೊ ದೀಸ್ ನಿಗ೦ಟ್ ಕಳಿತ್ ಜಾಲ್ಯಾರ್ ಮನಿಸ್ ಉರ್‌ಲ್ಲೆ ದೀಸ್ ಉತ್ತೀಮ್ ಥರಾನ್ ಖರ್‍ಚಿತಾ ಮ್ಹಣ್ ಹಾ೦ವೆ೦ ಆಯ್ಕಾಲಾ೦," ಮ್ಹಣಾಲೊ ವಿಕ್ಟರ್.

"ತರ್ ಜಯ್ತಾಚೊ ದಿವಸ್ ನಿಗ೦ಟ್ ಕಳಿತ್ ಆಸ್ಲ್ಯಾರ್ ತೊ ಕಿತೆ೦ ಕರಿತ್?" ಹೆಲ್ಗಾಚೆ೦ ಸವಾಲ್ ಆಯ್ಕೊನ್ ತಾಕಾ ಅಭಿಮಾನಾನ್ ಪಳೆಲಾಗ್ಲೊ ವಿಕ್ಟರ್.

ತಾಚಿ೦ ದಾಡಾಮಾ೦ ನಿರ್‍ದಾರಾನ್ ಅಡ್ಚಾಲಿ೦.

ತೊ ಹಾಳ್ವಾಯೆನ್ ಉಬೊ ಜಾಲೊ.

ಕಸಲ್ಯಾಚ್ ಹಿಶಾರ್‍ಯಾವಿಣೆ೦ ಹೆಲ್ಗಾ ಆನಿ ಲೊರೆನ್ಸ್ ಉಬಿ೦ ಜಾಲಿ೦.

ವಿಕ್ಟರಾನ್ ತೆ೦ ಪರಿಪತ್ರ್ ವಿ೦ಚ್ಲೆ೦ ಆನಿ ಪಿ೦ಜುನ್ ಚೂರಾನ್ ಚೂರ್ ಕೆಲೆ೦.

"ಹ್ಯಾ ಪ್ರೆಸ್ಸಾಚೆರ್ ಸರ್‍ಕಾರಾಚಿ ಮ್ಹೊರ್ ಪಡಾನಾಶಿ ಹಾ೦ವ್ ಪಳೆತೊಲೊ೦," ತೊ ಉಚಾರಿಲಾಗ್ಲೊ. "ಮ್ಹಜ್ಯಾ ಹಾತಾ೦ತ್ಲೊ ಕೀರ್ ಹಾ೦ವ್೦ಚ್ ನಾಸ್ ಕರ್‍ತೊಲೊ. ಪುಣ್ ಪರಿಸ್ಥಿತಿ ಮ್ಹಜ್ಯಾ ಹಾತಾ೦ತ್ಲಿ ಚುಕೊನ್ ಹಾ೦ವ್೦ಚ್ ಪಯ್ಲೊ೦ ನಾಸ್ ಜಾ೦ವ್ಚ್ಯಾರ್ ಆಸಾನ್ ತರ್ ಹ್ಯಾ ಪ್ರೆಸ್ಸಾಚೆರ್ ಕಸಲೊಚ್ ಅಪವಿತ್ರ್ ಕಳ೦ಕ್ ಯೆನಾಶೆ೦ ಪಳೆ೦ವ್ಚಿ ಜವಬ್ದಾರಿ ತುಮ್ಚಿ!"

ಪತ್ರಿಕೋದ್ಯಮಾಚ್ಯಾ ಚರಿತ್ರೆ೦ತ್ ಹಿ೦ ಚಾರಿತ್ರಿಕ್ ಉತ್ರಾ೦ ವಿಕ್ಟರಾನ್ ಉಚಾರ್ಲೆಲ್ಯಾ ಫಕತ್ ತೀಸ್ ಆನಿ ತೀನ್ ದಿಸಾ೦ ಭಿತರ್ ಎಸೊಸಿಯೆಶನಾಚೊ ಮನಿಸ್ ವಿಕ್ಟರಾಚ್ಯಾ ದಫ್ತರಾ೦ತ್ ಪ್ರವೇಸ್ ಜಾಲೊ.

ತೊ ಎಕ್ oಜಿಜಿiಛಿiಚಿಟ seಡಿveಡಿ ಜಾವ್ನ್‌ಆಸ್‌ಲ್ಲೊ. ತಾಣೆ ಹಾಡ್‌ಲ್ಲೆ೦ ನೋಟಿಸ್ ವಿಕ್ಟರಾನ್ ವಾಚ್ಲೆ೦.

ತಾಚ್ಯಾ ಪ್ರೆಸ್ಸಾಚೆ೦ ಆನಿ ಪತ್ರಾಚೆ೦ ನಾ೦ವ್ ಎಸೊಸಿಯೆಶನಾ೦ತ್ ದಾಕಲ್ ಕರು೦ಕ್ ದಿಲ್ಲ್ಯಾ ಆವ್ದೆಕ್ ತೊ ಚುಕ್‌ಲ್ಲೊ ಜಾಲ್ಲ್ಯಾನ್ ತಾಚೆ೦ ಕಾರಾಣ್ ಎಸೊಸಿಯೆಶನಾಚ್ಯಾ ಮ೦ಡಳೆ ಸಾಮ್ಕಾರ್ ಸ್ವತಾ ಹಾಜರ್ ಜಾವ್ನ್ ದೀಜೆ ಮ್ಹಳ್ಳಿ ಹುಕುಮ್ ತಾಚೆರ್ ಆಸ್‌ಲ್ಲಿ.

ಪಾಟಿ೦ ಫುಡೆ೦ ಪಳೆನಾಸ್ತಾ೦ ’ನೋಟಿಸ್ ಪಾವಿತ್ ಜಾಲೆ೦’ ಮ್ಹಳ್ಳ್ಯಾ ಫೊರ್ಮಾಚೆರ್ ದಸ್ಕತ್ ಮಾರ್ಲಿ ವಿಕ್ಟರಾನ್. ಎಸೊಸಿಯೆಶನಾಚೊ ಮನಿಸ್ ಅವಾಕ್ಕ್ ಜಾವ್ನ್ ಪಳೆತಾಲೊ. ವಿಕ್ಟರಾಚ್ಯಾ ದಸ್ಕತೆಚೆ೦ ಫೊರ್ಮ್ ಘೆವ್ನ್ ದಫ್ತರಾಥಾವ್ನ್ ಭಾಯ್ರ್ ವೆಚ್ಯಾ ದಾರಾಲಾಗಿ೦ ಪಾವ್‌ಲ್ಲೊಚ್ ತೊ ಯೆಕಾಚಾಣೆ ರಾವ್ಲೊ ಆನಿ ಪಾಟಿ೦ ಘು೦ವ್ಲೊ.

ತಾಚ್ಯಾ ದೊಳ್ಯಾ೦ನಿ ದುಕಾ೦ ಆಸ್‌ಲ್ಲಿ೦.

"ಮಿಸ್ಟರ್ ವಿಕ್ಟರ್!" ತಾಚೊ ಗದ್ಗದೀತ್ ತಾಳೊ ಆಯ್ಕೊನ್ ವಿಕ್ಟರಾನ್ ವಯ್ರ್ ಪಳೆಲೆ೦.

"ಹೆರ್ ಕಾ೦ಯ್ ಆಸಾ?" ತಾಣೆ ವಿಚಾರ್‍ಲೆ೦.

"ಹಾ೦ವೆ೦ ಮ್ಹಜೆ೦ ಕಾಮ್ ಕೆಲೆ೦, ಮಿಸ್ಟರ್ ವಿಕ್ಟರ್!" ಎಸೊಸಿಯೆಶನಾಚೊ ಮನಿಸ್ ಮ್ಹಣಾಲೊ. "ಪಾ೦ಚ್ ಜಣಾ೦ ಭುರ್‍ಗ್ಯಾ೦ಚೊ ಬಾಪಯ್ ಹಾ೦ವ್... ತಾ೦ಚ್ಯಾ ಖಾತಿರ್ ಅಸಲೆ೦ ಕಾಮ್ ಕರುನ್ ಮ್ಹಾಕಾಚ್ ಹಾ೦ವ್ ವಿಕ್ರಿತ್ ಕರ್‍ತಾ೦!"

ವಿಕ್ಟರಾನ್ ಸಮ್ಜಣೇನ್ ತಕ್ಲಿ ಹಾಲಯ್ಲಿ.

"ಖಾಸ್ಕಿ ಮನಸ್ತಾಪ್ ದವರಿನಾಕಾ, ಮಿಸ್ಟರ್ ವಿಕ್ಟರ್," ತ್ಯಾ ಮನ್ಶಾನ್ ಮು೦ದರಿಲೆ೦. "ತಾಣಿ ತುಜೆಥ೦ಯ್ ಕರ್‍ಚೊ ಹೊ ಅನ್ನ್ಯಾಯ್ ಹಾ೦ವ್ ಸಮ್ಜಾತಾ೦ ಆನಿ ತ್ಯಾ ಅ೦ದಾಜಾಚೊ ಸ೦ದೇಶ್ ತುಜೆ ಪರ್‌ಯಾ೦ತ್ ಪಾವ೦ವ್ಚೆ೦ ಖೊಟೆ೦ ನಶೀಬ್ ಮ್ಹಜೆ೦...."

ವಿಕ್ಟರಾನ್ ಆಪ್ಲೆ ಹಾತ್ ಜೊಡ್ಲೆ ಆನಿ ಬೊಟಾ೦ಚ್ಯೊ ತುದಿಯೊ ಆಪ್ಲ್ಯಾ ವೊ೦ಟಾ೦ಕ್ ಲಾಯ್ಲ್ಯೊ.

"ಹಾ೦ವ್‌ಯಿ ’ಮನಿಸ್’ ಪತ್ರಾಚೊ ವಾಚ್ಪಿ, ಮಿಸ್ಟರ್ ವಿಕ್ಟರ್!" ತೊ ಮನಿಸ್ ಉಲವ್ನ್೦ಚ್ ವೆತಾಲೊ. "ಮ್ಹಜೆ೦ ವರ್‍ಗಣಿ ನ೦ಬರ್ ೬೪೨೦, ಮಿಸ್ಟರ್ ವಿಕ್ಟರ್...’ಮನಿಸ್’ ಪತ್ರ್ ತು೦ ಬ೦ದ್ ಕರಿಸೊನಾ೦ಯ್ ಮ್ಹಣ್ ಹಾ೦ವ್ ಖ೦ಡಿತ್ ಪಾತಿಯೆತಾ೦!"

ವಿಕ್ಟರಾನ್ ತಾಕಾ ಜಾಪ್ ದಿಲಿನಾ.

ತಾಚೆ೦ ಮೌನ್೦ಚ್ ಜಾವ್ನ್‌ಆಸ್‌ಲ್ಲಿ ಎಕ್ ಬಳಿಶ್ಟ್ ಜಾಪ್...

ಆಪ್ಲ್ಯಾ ಪ್ರಥಮ್ ಮೊಗಾಕ್ ಭೆಟೊ೦ಕ್ ವೆಚ್ಯೆಖಾತಿರ್ ನೆಸೊನ್ ತಯಾರ್ ಜಾಲ್ಲ್ಯಾ ಆಧುನಿಕ್ ತರ್‍ನಾಟ್ಯಾಪರಿ೦ ನ್ಹೆಸೊನ್ ವಿಕ್ಟರ್ ಎಸೊಸಿಯೆಶನಾಕ್ ವಚು೦ಕ್ ತಯಾರ್ ಜಾಲೊ. ತಾಚ್ಯಾ ಕೋಟಾಚ್ಯಾ ಹರ್‍ಧ್ಯಾಚೆರ್ ಹೆಲ್ಗಾನ್ ಎಕ್ ತಾ೦ಬ್ಡೊ ಗುಲೊಬ್ ಶಿರ್‍ಕಾಯ್ಲೊ. "ಗುಡ್ ಲಕ್," ತೆ೦ ಮ್ಹಣಾಲೆ೦ ತಾಚ್ಯಾ ಪೊಲ್ಯಾಚೊ ಹಾಳ್ವಯೆನ್ ಉಮೊ ಘೆವ್ನ್. "ಮ್ಹಾಕಾ ಆಪವ್ಣೆ೦ ನಾ, ನ್ಹಯ್ ತರ್ ಥ೦ಯ್ ಜಾ೦ವ್ಚೊ ತಮಾಸೊ ಹಾ೦ವ್‌ಯಿ ಪಳೆತಿ೦."

"ಹಾ೦ಗಾಸರ್ ಕಿತ್ಲೆ೦ ಕಾಮ್ ಆಸಾ ಜಾಣಾ೦ಯ್?" ತಾಚೆ೦ ನಾಕ್ ಚಿರ್‍ಡುನ್ ವಿಚಾರ್‍ಲೆ೦ ವಿಕ್ಟರಾನ್. ಚಿಕ್ಕೆಸೆ ಪಯ್ಸ್ ರಾವೊನ್ ಆಸ್‌ಲ್ಲೊ ಲೊರೆನ್ಸ್ ಹಾಸ್ಲೊ. "ತು೦ ಆನಿ ಲೊರೆನ್ಸ್!," ಯೆಕಾಚಾಣೆ ವಿಕ್ಟರ್ ಮ್ಹಣಾಲೊ. "ತುಮಿ೦ ತುಮ್ಚಿ ವಾವ್ರಾವಾಟ್ ಧರ್‍ಯೆತ್. ಕಾಮ್ ಬಾಕಿ ದವರಿನಾಕಾತ್."

ಲೊರೆನ್ಸ್ ಮುಕಾರ್ ಆಯ್ಲೊ ಆನಿ ವಿಕ್ಟರಾಚೊ ಹಾತ್ ತಾಣೆ ಧರ್‍ಲೊ. ತೆಗಾ೦ಯಿ ಸಾ೦ಗಾತಾಚ್ ತಿ೦ ಭಾಯ್ರ್ ಆಯ್ಲಿ೦....

ಎಸೊಸಿಯೆಶನಾಚ್ಯಾ ಮಜ್ಬೂತ್ ಭಾ೦ದ್ಪಾ ಸಾಮ್ಕಾರ್ ಉಬೊ ಜಾಲ್ಲ್ಯಾ ವಿಕ್ಟರಾನ್ ವಾರ್‍ಯಾಕ್ ಉಬ್ಚೆ ಆಪ್ಲೆ ಕೇಸ್ ಸಮಾ ಕೆಲೆ ಆನಿ ಭಾ೦ದ್ಪಾ ಭಿತರ್ ತೊ ರಿಗ್ಲೊ. ಆಪ್ಲೆ೦ ಕಾರ್‍ಡ್ ರಿಸೆಪ್ಶನಿಸ್ಟಾಕ್ ದಿತೆಚ್ ತೊ ವೇಯ್ಟಿ೦ಗ್ ರೂಮಾ೦ತ್ ಬೊಸ್ಲೊ. ಆಪ್ಲೆ ನಾಜೂಕ್ ಪಾ೦ಯ್ ಪ್ರದರ್‍ಸು೦ಚೆ೦ ರಿಸೆಪ್ಶನಿಸ್ಟ್ ಪಾ೦ಚ್ ಮಿನುಟಾ೦ನಿ ತಾಚೆ ಸರ್‍ಶಿ೦ ಆಯ್ಲೆ೦.

"ಮಿಸ್ಟರ್ ವಿಕ್ಟರ್," ತೆ೦ ಮ್ಹಣಾಲೆ೦ ತೆಲ್ತ್ಯಾ ತಾಳ್ಯಾನ್. "ಅರ್‍ಧೆ೦ ವ್ಹೊರ್‌ಬರ್ ತು೦ವೆ೦ ರಾಕಾಜೆ ಪಡ್ತೆಲೆ೦. ತುಜೆ೦ ಯೆಣೆ೦ ಆವ್ಚಿತ್ ಜಾಲ್ಲ್ಯಾನ್...."

"ಸರ್‍ವ್ ತಯಾರ್‌ನಾ೦ತ್ ಮ್ಹಣ್ ಹಾ೦ವ್ ಸಮ್ಜಾತಾ೦?"

"ತಶೆ೦ ನ್ಹಯ್ ಮಿಸ್ಟರ್ ವಿಕ್ಟರ್..."ಚಲಿ ಘುಸ್ಪಡ್ಲಿ. "ತುಕಾ ವಾಚು೦ಕ್ ಮೆಗಜಿನ್ ಜಾಯ್ ತರ್... ಪಿಯೆ೦ವ್ಕ್ ಪಾನಕ್ ಜಾಯ್ ತರ್...."

"’ಮನಿಸ್’ ಪತ್ರ್ ಆಸಾಗಿ?" ಯೆಕಾಚಾಣೆ ವಿಚಾರ್‍ಲೆ೦ ವಿಕ್ಟರಾನ್. ತಿಚೆ೦ ಮುಕಮಳ್ ವಿವರ್‍ಣ್ ಜಾಲೆ೦. ಜವಾಬ್ ದೀನಾಸ್ತಾ೦ ಆಪ್ಲ್ಯಾ ಜಾಗ್ಯಾರ್ ವಚುನ್ ತಿ ಬಸ್ಲಿ.

ಅರ್‍ಧ್ಯಾ ವ್ಹೊರಾಚೊ ಮತ್ಲಬ್ ವಿಕ್ಟರಾಕ್ ಕಳಿತ್ ಜಾಲ್ಲೊ.

ಹುಕ್ಮೆಚ್ಯಾ ಉಲ್ಯಾಕ್ ಪಾಳೊ ದೀವ್ನ್ ಇತ್ಲೆವೆಗ್ಗಿ೦ ವಿಕ್ಟರ್ ಯೇತ್ ಮ್ಹಣ್ ಪ್ರೊಫೆಸರ್ ಫಿಲಿಪಾನ್ ಚಿ೦ತು೦ಕ್‌ನಾತ್‌ಲ್ಲೆ೦. ಆತಾ೦, ಜಾತಾತಿತ್ಲೆ ವೆಗ್ಗಿ೦ ಸರ್‍ವಾ೦ಕ್ ಕುಡ್ಸೊ೦ವ್ಚೊ ಉಪಾಯ್ ತಾ೦ಚೊ. ವಿವಿ೦ಗಡ್ ಜಾಗ್ಯಾ೦ನಿ ಆಸ್‌ಲ್ಲ್ಯಾ೦ಕ್ ಲಾಗಿ೦ ಕರುನ್ ಎಕ್ ಕೊಟೆ೦ ತಯಾರ್ ಕರು೦ಕ್ ಅರ್‍ಧ್ಯಾ ವ್ಹೊರಾಚಿ ಪುಣ್‌ಯಿ ಫುರ್‍ಸತ್ ತಾ೦ಕಾ೦ ಜಾಯ್ ಆಸ್‌ಲ್ಲಿ.

ತಿ೦ ತೀಸ್ ಮಿನುಟಾ೦ ಪಾಶಾರ್ ಜಾವ್ನ್ ವಯ್ಲ್ಯಾನ್ ಪ೦ದ್ರಾ ಮಿನುಟಾ೦ ಪಾಶಾರ್ ಜಾತಾನಾ ಆಪ್ಲ್ಯಾ ದಾವ್ಯಾ ಕುಶಿಥಾವ್ನ್ ಮೆಟಾ೦ಚೊ ಆವಾಜ್ ಆಯ್ಕೊನ್ ವಿಕ್ಟರಾನ್ ತೆವ್ಶಿನ್ ಪಳೆಲೆ೦. ಸೊನಿಯಾ, ತಾಚ್ಯಾ ಕುಶಿನ್ ಯೆತಾಲೆ೦. ವಿಕ್ಟರಾಚ್ಯಾ ವೊ೦ಟಾ೦ ಇಡ್ಯಾ೦ನಿ ಮ೦ದ್ ಹಾಸೊ ಉದೆಲೊ. ಪುಣ್ ಸೊನಿಯಾನ್ ಪರಿಚಿತಾಯೆಚೆ೦ ಕಸಲೆ೦ಚ್ ಖುಣ್ ದಾಕಯ್ಲೆ೦ ನಾ.

"ಗುಡ್‌ಮೊರ್‍ನಿ೦ಗ್, ಮಿಸ್ಟರ್ ವಿಕ್ಟರ್!" ತೆ೦ ಮ್ಹಣಾಲೆ೦ ವ್ಯವಹಾರ್‌ಪೂರಿತ್ ತಾಳ್ಯಾನ್. "ತುಕಾ ರಾಕೊ೦ಕ್ ಕೆಲ್ಲ್ಯಾಖಾತಿರ್ ಫ್ರೊಫೆಸರ್ ಫಿಲಿಪ್ ಬೆಜಾರ್ ಪಾವ್ತಾ. ಆತಾ೦ ದಯಾ ಕರುನ್ ತು೦ ಮ್ಹಜೊ ಪಾಟ್ಲಾವ್ ಕರ್‍ಶಿ ತರ್....." ತೆ೦ ತಾಕಾ ವಾಟ್ ಸೊಡುನ್ ರಾವ್ಲೆ೦. ವಿಕ್ಟರ್ ಉಬೊ ಜಾಲೊ ಆನಿ ಸೊನಿಯಾ ಪಾಟ್ಲ್ಯಾನ್ ತಾಣೆ ಮೆಟಾ೦ ಕಾಡ್ಲಿ೦.

ಎಸೊಸಿಯೆಶನಾಚ್ಯಾ ಕೊನ್ಫರೆನ್ಸ್ ಹೊಲಾಲಾಗಿ೦ ಪಾವ್ತಾನಾ ಸೊನಿಯಾ ಯೆಕಾಚಾಣೆ ರಾವ್ಲೆ೦. ತವಳ್ ವಿಕ್ಟರಾಚಿ ಕೂಡ್ ಹಾಳ್ವಯೆನ್ ತಾಚ್ಯಾ ಕುಡಿಕ್ ಆದಾಳ್ಳಿ. ಹೊಲಾಚೆ೦ ದಾರ್ ಉಗ್ತೆ೦ ಕರು೦ಕ್ ಮುಕಾರ್ ಗೆಲ್ಲೊ ತಾಚೊ ಹಾತ್ ಕಾ೦ಪ್ತಾಲೊ.

"ವಿಕ್ಟರ್!" ತಾಣೆ ತಾಕಾ ಫುಡ್ ಕೆಲಿ. ಆತಾ೦ ತಾಚ್ಯಾ ಮುಕಮಳಾರ್ ವ್ಯವಹಾರಾಚ್ಯಾ ಭಾವನಾ ಬದ್ಲಾಕ್ ಭಿರಾ೦ತ್ ದಿಸ್ತಾಲಿ. ತಾಚ್ಯಾ ಭ೦ವ್ರ್ಯಾ೦ಚ್ಯಾ ಮುಳಾ೦ನಿ ಘಾಮಾಚೆ ಥೆ೦ಬೆ ಉದೆಲ್ಲೆ. ತಾಚ್ಯಾ ಉಲ್ಯಾಕ್ ವಿಕ್ಟರಾನ್ ಜಾಪ್ ದಿಲಿ ನಾ.

"ತಾ೦ಚ್ಯಾ ಪಾಸಾ೦ತ್ ತು೦ವೆ೦ ಪಾ೦ಯ್ ದವರ್‍ಲಾಯ್, ವಿಕ್ಟರ್!" ತೆ೦ ಪುಸ್ಪುಸ್ಲೆ೦. "ಆಜ್ ಪುಣ್‌ಯಿ ತುಜೆ೦ ಹಟ್ ಸೊಡ್, ಮ್ಹಜ್ಯಾ ಖಾತಿರ್..."

"ಹಾ೦ವ್ ಕೊಣಾಖಾತಿರ್ ಕಸಲೆ೦ಚ್ ಕರಿನಾ, ಸೊನಿಯಾ."

"ಹಾ೦ವ್ ಜಾಣಾ೦. ಪುಣ್ ಹೆಲ್ಗಾ ಖಾತಿರ್ ಪುಣ್‌ಯಿ. ತಿ ಚಲಿ. ಕೆದೊಳ್ ಪರ್‌ಯಾ೦ತ್ ತಿಚೆಸ೦ಗಿ೦ ಅಸೊ ರಾವ್ಶಿ? ಚಲಿಯೆಕ್ ಸಮ್ಜೊ೦ಕ್ ತು೦ ಸಕಾನಾ೦ಯ್."

"ತುಕಾ ಸಮ್ಜೊ೦ಕ್ ಹಾ೦ವ್ ಸಕ್ಲೊ೦."

"ತಿತ್ಲೊ ಕ್ರೂರಿ ಜಾಯ್ನಾಕಾ..."ತೆ೦ ಮ್ಹಣಾಲೆ೦ ವಯ್ರ್ ಪಳೆವ್ನ್. "ಯಾ ಹಿ ಕ್ರೂರತಾ ಮ್ಹಾಕಾ ಫಾವೊ ಮ್ಹಣ್ ಮ್ಹಾಕಾ ಭೊಗ್ತಾ..." ತಾಚಿ೦ ಉತ್ರಾ೦ ಭಿರಾ೦ತೆನ್ ಶೂನ್ಯ್ ಜಾಲಿ೦.

"ತ್ಯಾ ಸಾ೦ಜೆಚೆ೦ ಭ್ಯೆ೦ ದಿಸ್ತಾ, ಸೊನಿಯಾ?" ದರ್‍ಯಾ ಕರಾವಳೆವಯ್ಲೆ೦ ಘಡಿತ್ ಉಡಾಸಾ೦ತ್ ಹಾಡ್ಲೆ೦ ವಿಕ್ಟರಾನ್. ಸೊನಿಯಾಚೊ ಹಾತ್ ದಾರಾಚ್ಯಾ ಹಾತಾಳ್ಯಾವಯ್ಲೊ ಗಳ್ಳೊ. ವಿಕ್ಟರಾನ್ ತೊ ಹಾತಾಳೊ ಘು೦ವ್ಡಾಯ್ಲೊ ಆನಿ ದಾರ್ ಉಗ್ತೆ೦ ಕೆಲೆ೦.

"ತುಜ್ಯಾ ವಾ೦ಟ್ಯಾಚೊ ವೇಳ್ ಉತರ್‍ಲಾ, ಸೊನಿಯಾ!" ತಾಣೆ ಕಳಯ್ಲೆ೦ ಆನಿ ಕೊನ್ಫರೆನ್ಸ್ ರೂಮಾ೦ತ್ ತೊ ರಿಗ್ಲೊ.

ನಿಯ೦ತ್ರಿತ್ ಹವೊ ತ್ಯಾ ಹೊಲಾ೦ತ್ ಆಸ್‌ಲ್ಲೊ. ಸು೦ದರ್ ಲಾ೦ಬ್ ಹೊಲ್ ತೆ೦. ತಾ೦ಬ್ಸ್ಯಾ ಪಡ್ದ್ಯಾ೦ನಿ ಆನಿ ತಾ೦ಕಾ೦ ಮೆಚ್ವೊ೦ಚ್ಯಾ ರತನ್‌ಕಾ೦ಬ್ಳಿ೦ನಿ ಸುರ್‍ಗರಾಯಿಲ್ಲೆ೦. ತ್ಯಾ ಹೊಲಾಚ್ಯಾ ಮಧೆಗಾತ್ ಅರ್‍ಧ್ಯಾ ಚ೦ದ್ರಾಕಾರಾಚೆ೦ ಮೇಜ್ ಆಸ್‌ಲ್ಲೆ೦ ಆನಿ ತ್ಯಾ ಮೆಜಾ ಪಾಟ್ಲ್ಯಾನ್ ನೋವ್ ಜಣಾ೦ಚಿ ಮ೦ಡಳಿ ಬಸುನ್ ಆಸ್‌ಲ್ಲಿ.

ತಾ೦ಚ್ಯಾ ಮದೆ೦ಚ್ ಆಸ್‌ಲ್ಲೊ ಜುಲಿಯನ್ ಲೂಕ್.

ತಾಚೆರ್‌ಚ್ ಆಪ್ಲಿ ದೀಶ್ಟ್ ಖ೦ಚವ್ನ್, ಆಪ್ಲಿ ರಾಯಾಳ್ ಚಾಲ್ ಚಲೊನ್ ವಿಕ್ಟರ್ ತ್ಯಾ ಮೆಜಾ ಲಾಗಿ೦ ಲಾಗಿ೦ ಸರ್‍ತಾಲೊ. ಆಪ್ಲ್ಯಾ ಪಾಟ್ಲ್ಯಾನ್೦ಚ್ ಸೊನಿಯಾ ಆಸಾ ಮ್ಹಣ್ ಮೆಟಾ೦ಚ್ಯಾ ಆವಾಜಾನ್ ತಾಕಾ ಕಳಿತ್ ಜಾತಾಲೆ೦. ಚಲೊನ್ ಯೆ೦ವ್ಚ್ಯಾ ವಿಕ್ಟರಾಚಿ ನಜರ್ ಆಪ್ಣಾಚೆರ್ ಆಸಾ ಮ್ಹಣ್ ಕಳಲ್ಲಿಚ್ ಜುಲಿಯನ್ ಆಪ್ಲ್ಯೆ ಬಸ್ಕೆರ್‌ಚ್ ಚಡ್ಪಡ್ಲೊ.

ವಿಕ್ಟರ್ ಲಾಗಿ೦ ಸರ್‍ತಾನಾ ತಾಚ್ಯಾನ್ ತಡ್ವ೦ಕ್ ಜಾಲೆ೦ ನಾ.

ತೊ ಉಬೊ ಜಾಲೊ!

ಆನಿ ತಾಚೆ ಬರಾಬರ್ ಹೆರ್ ಆಟ್ ಜಣ್‌ಯಿ ಉಬೆ೦ ಜಾಲೆ.

"ಮಿಸ್ಟರ್ ವಿಕ್ಟರ್!" ಅನಿಶ್ಚಿತ್ ತಾಳ್ಯಾನ್ ಕಳಯ್ಲಾಗ್ಲೆ೦ ಸೊನಿಯಾ. "ತೊ ’ಮನಿಸ್’ ಪತ್ರಾಥಾವ್ನ್ ಆಯ್ಲಾ."

ತ್ಯಾ ಬಾ೦ದ್ಪಾಸಾಚಿ ದಾಟಾಯ್ ಸೊನಿಯಾಚ್ಯಾ ತಾಳ್ಯಾನ್ ಶಿ೦ದ್ಲ್ಯಾ ನ೦ತರ್ ತೆ ನೋವ್ ಜಣ್ ಸ್ಥಿಮಿತಾಕ್ ಆಯ್ಲೆ ಆನಿ ಆಮಿ೦ ಉಬೆ ಆಸಾ೦ವ್ ಮ್ಹಳ್ಳೆ೦ ಕಳಿತ್ ಜಾತೆಚ್ಚ್ ಗಡ್ಬಡ್ಲೆ. ಆಪ್ಲ್ಯಾ ಶಿ೦ತಿದಾಚೆರ್ ಸ೦ಯಮ್ ಮೆಳ್ತೆಚ್ ವಳ್ಕಿಚೆ೦ ಕಸಲೆ೦ಚ್ ಭಾವನ್ ದಾಕಯ್‌ನಾಸ್ತಾ೦ ಫ್ರೊಫೆಸರ್ ಫಿಲಿಪ್ ಉಲಯ್ಲೊ.

"ದಯಾ ಕರುನ್ ತುಜಿ ಬಸ್ಕಾ ಘೆ, ಮಿಸ್ಟರ್ ವಿಕ್ಟರ್." ತೊ ಮ್ಹಣಾಲೊ. "ಆಮ್ಚ್ಯಾ ಹುಕ್ಮೆಕ್ ....ಅ...ಪಾಳೊ ದೀವ್ನ್ ತು೦ ಆಯಿಲ್ಲ್ಯಾ ಖಾತಿರ್ ತುಕಾ ಅರ್‍ಗಾ೦."

ವಿಕ್ಟರ್ ಬಸ್ಲ್ಯಾ ನ೦ತರ್ ತೆ ಸರ್‍ವ್ ಬಸ್ಲೆ.

ಜಾ೦ವ್ಚೆ೦ ಸರ್‍ವ್ ಉಲವ್ಣೆ ’ಶೊರ್‍ಟ್‌ಹೆ೦ಡಾ’ನ್ ಬರವ್ನ್ ಘೆ೦ವ್ಚೆಖಾತಿರ್ ಸೊನಿಯಾ ತಾ೦ಚೆಥಾವ್ನ್ ಚಿಕ್ಕೆಸೆ ಪಯ್ಸ್ ಆಪ್ಲ್ಯಾ ಸ್ಥಾನಾರ್ ಬಸ್ಲೆ೦. ತೆ೦ ತಯಾರ್ ಆಸಾ ಮ್ಹಣ್ ಕಳಲೆ೦ಚ್ ಫಿಲಿಪಾನ್ ಪ್ರಾರ೦ಭ್ ಕೆಲೆ೦. "ಆಯ್ಚ್ಯಾ ಹ್ಯಾ ಉಲವ್ಣ್ಯಾಕ್ ಆಮ್ಚೊ ಫುಡಾರಿ ಜುಲಿಯನ್ ಲೂಕ್ ಹಾಜರ್ ಆಸಾ," ಕಳಯ್ಲೆ೦ ಫಿಲಿಪಾನ್. "ಹೆರಾ೦ಚಿ ಪರಿಚಯ್ ತುಕಾ ನಾ ತರ್--"

"ಹಾ೦ವ್ ಸರ್‍ವಾ೦ಕ್ ವಳ್ಕಾತಾ೦!" ಹೊಲಾಕ್ ರಿಗ್‌ಲ್ಲ್ಯಾ ಉಪ್ರಾ೦ತ್ ವಿಕ್ಟರಾಚೆ೦ ಪ್ರಥಮ್ ವಾಕ್ಯೆ೦ ಭಾಯ್ರ್ ಸರ್‍ಲೆ೦.

ಫಿಲಿಪಾಚ್ಯಾ ಉಜ್ವ್ಯಾಕ್ ಬಸುನ್ ಆಸ್‌ಲ್ಲ್ಯಾ ಟೊನಿನ್ ವೋ೦ಟ್ ಚಾಬ್ಲೆ.

"ತರ್ ಗರ್‍ಜೆಭಾಯ್ಲ್ಯಾ ತರ್‍ಕಾನ್ ವೇಳ್ ಖಿರ೦ವ್ಚೊ ನಾಕಾ," ತಕ್ಲಿ ಪ೦ದಾಕ್ ಘಾಲುನ್ ಮ್ಹಣಾಲೊ ಜುಲಿಯನ್. "ಆಮಿ೦ ಮು೦ದರುಯಾ೦."

"ಸಹಜ್ ಜಾವ್ನ್ ಮಿ|ಲೂಕ್," ತಾಕಾ ಮಾನ್ ಬಾಗಾಯ್ಲೊ ಫಿಲಿಪಾನ್. "ಪುಣ್ ಮಿ|ವಿಕ್ಟರಾನ್ ಆಮ್ಕಾ೦ ಚೂಕ್ ಸಮ್ಜು೦ಕ್ ನಜೊ. ಹೆ೦ ಕೊನ್ಪರೆನ್ಸ್ ಎಕ್ದಂ ಸರ್‍ಕಾರಿ ಮ್ಹಣ್ ತಾಣೆ ಲೆಕು೦ಕ್ ನಜೊ. ಪಯ್ಲೆ೦ಥಾವ್ನ್ ತೊ ಆಮ್ಕಾ೦ ಚೂಕ್ ಸಮ್ಜಾಲಾ ಆನಿ ಹೆ೦ ಶ್ಹೆಳೆ೦ ಝುಜ್ ಇತ್ತುನ್ ಪರ್‌ಯಾ೦ತ್ ಪಾವ್ಲಾ೦. ಛ್ಹಾಪ್ಯಾಚೆ ಕುಶಿನ್ ಆಮಿ೦ ಕಾಡ್‌ಲ್ಲೆ೦ ಮೇಟ್ ಪರಿಪೂರ್‍ಣ್ ಅಧಿಕಾರತ್ವಾಚೊ ಘುರ್‍ತ್ ಮ್ಹಣ್ ತೊ ಚಿ೦ತಾ. ಹೆ೦ ಬಿಲ್ಕುಲ್ ಸತ್ ನ್ಹಯ್. ಖ೦ಚಾಯಿ ಪತ್ರಾಚೆ೦ ಧೋರಣ್ ಯಾ ಬರಯ್ಣಾರಾಚೊ ಉದ್ದೇಶ್ ತಿರಸ್ಕಾರ್ ಕರ್‍ಚೊ ಉದ್ದೇಶ್ ಆಮ್ಚೊ ನ್ಹಯ್. ಪುಣ್ ಹೊ ದೇಶ್ ಸಮಾಜ್‌ವಾದಿ ಸರ್‍ಕಾರಾಚೊ. ಹ್ಯಾ ಸರ್‍ಕಾರಾಕ್ ಆಧಾರ್ ಜಾಯ್ಶೆ೦ ಹರ್‌ಯೆಕಾ ಪತ್ರಾನ್ ಆನಿ ಬರವ್ಪ್ಯಾನ್ ಕುಮಕ್ ಕರಿಶೆ೦ ಕೆಲ್ಲೆ೦ ಪ್ರಯತನ್ ಹೆ೦. ಮಿ|ವಿಕ್ಟರಾಚಿ ಫಕತ್ ಕುಮಕ್ ಆಮಿ೦ ಮಾಗ್‌ಲ್ಲಿ ತರಿ ತೊ ಆಮ್ಕಾ೦ ಚೂಕ್ ಸಮ್ಜಾಲೊ." ಇತ್ಲೆ೦ ಜೆರಾಲ್ ಥರಾನ್ ಉಲಯ್ತೆಚ್ ತೊ ವಿಕ್ಟರಾಕ್ ಪಳೆಲಾಗ್ಲೊ. "ತು೦ವೆ೦ ದಸ್ಕತ್ ದೀ೦ವ್ಕ್‌ನಾ೦ಯ್, ಮಿ|ವಿಕ್ಟರ್."

"ವ್ಹೊಯ್! ಹಾ೦ವೆ೦ ಕಬ್ಲಾತೆಚಿ ದಸ್ಕತ್ ದೀ೦ವ್ಕ್ ನಾ."

"ಕಿತ್ಯಾಕ್?"

"ಕಾರಾಣ್ ತು೦ವೆ೦ಚ್ ದಿಲಾ೦ಯ್--ಹಾ೦ವ್ ತುಮ್ಕಾ೦ ಚೂಕ್ ಸಮ್ಜಲಾ೦."

"ಅಸಲೆ೦ ತರ್‍ಕ್ ಉಪ್ಕಾರಾಕ್ ಪಡ್ಚೆ೦ ನ್ಹಯ್, ಮಿ|ವಿಕ್ಟರ್."

"ತರ್ ಮ್ಹಜೆ೦ ಕಾರಾಣ್ ಆಯ್ಕಾತಾಯ್?"

"ದಯಾಕರುನ್ ಮು೦ದರ್‍ಸಿ."

"’ಮನಿಸ್’ ಪತ್ರ್ ಜಾವ್ನ್‌ಆಸಾ ಜಿಯೆ೦ವ್ಚ್ಯಾ ಮನ್ಶಾ೦ಚೆ೦. ತೆ೦ ತಾ೦ಚೆ೦ ಮಾತ್ರ್, ತುಮ್ಚೆ೦ ನ್ಹಯ್. ತ್ಯಾ ಪತ್ರಾಕ್ ಖ೦ಚಾಯಿ ಸರ್‍ಕಾರಾಚಿ ಯಾ ಶಾಸನಾಚಿ ಗರ್‍ಜ್ ನಾ. ತ್ಯಾ ಖಾತಿರ್ ಕ೦ಚಾಯಿ ಖರಾರಾಕ್ ದಸ್ಕತ್ ದೀ೦ವ್ಕ್ ಹಾ೦ವ್ ಕಬೂಲ್ ನಾ."

"ಹಾಚೊ ಪರಿಣಾಮ್ ತು೦ವೆ೦ ಚಿ೦ತುನ್ ಪಳೆಲಾಯ್, ಮಿ|ವಿಕ್ಟರ್?"

"ತುಮ್ಚೆಥಾವ್ನ್ ಯೆ೦ವ್ಚ್ಯಾ ಖ೦ಚಾಯಿ ಪರಿಣಾಮಾಕ್ ಹಾ೦ವ್ ಭಿಯೆನಾ."

"ತು೦ವೆ೦ ಚಲ೦ವ್ಚೆ೦ ಪ್ರೆಸ್ಸ್ ಮಿಸ್ಸ್ ಮಾರ್‍ಟಿನಾಚ್ಯಾ ಬಾಪಾಯ್ಚೊ ಬ೦ಡ್ವಾಳ್ ಜಾವ್ನ್‌ಆಸಾ. ತೆ೦ ಆತಾ೦ ತುಜ್ಯಾ ನಾ೦ವಾರ್ ತಿಣೆ ಕೆಲಾ೦ ಆಸ್ಯೆತ್ ಪುಣ್ ಆತಾ೦ ತುಜ್ಯಾ ಕರ್‍ತುಬಾ೦ನಿ ಜಾ೦ವ್ಚೊ ಪರಿಣಾಮ್ ತಿ ಸೊಸುನ್ ವರಿತ್?"

"ಹ್ಯಾ ಕೊನ್ಪರೆನ್ಸಾಕ್ ಯೆ೦ವ್ಕ್ ತಿ ಕಬೂಲ್ ಆಸ್‌ಲ್ಲಿ!"

"ಆಮ್ಕಾ೦ ಕಳಿತ್ ಆಸ್ಚ್ಯಾ ಪ್ರಕಾರ್ ತುಜ್ಯಾ ಪ್ರೆಸ್ಸಾ೦ತ್ ಲಾಗಿ೦ ಲಾಗಿ೦ ದೊನ್ಶಿ೦ ಕಾಮೆಲಿ ವಿವಿಧ್ ಡಿಪಾರ್‍ಟ್‌ಮೆ೦ಟಾ೦ನಿ ಕಾಮ್ ಕರ್‍ತಾತ್ ಆನಿ ವರ್‍ಸಾಕ್ ಪಾ೦ಚ್ ಲಾಕಾ೦ಚೊ ವಹಿವಾಟ್ ತು೦ ಚಲಯ್ತಾಯ್. ದಯಾಕರುನ್ ಚಿ೦ತುನ್ ಪಳೆ... ಹೆರಾ೦ನಿ ತಾತಾ೦ಚಿ ಕಬ್ಲಾತ್ ದೀವ್ನ್ ಅಮ್ಕಾ೦ ಸಹಕರ್‍ಸಿಲಾ೦."

"ತರ್ ಹಾ೦ವ್ ಎಕ್ಲೊ ಬಾಕಿ ನ್ಹಯ್?" ವಿಕ್ಟರಾನ್ ವಿಚಾರ್‍ಲೆ೦. "ತರಿ ಎಕ್ಲ್ಯಾಚೆ೦ ತುಮ್ಕಾ೦ ಇತ್ಲೆ೦ಯಿ ಭ್ಯೆ೦?"

"ಆಮಿ೦ ತುಕಾ ಭಿಯೆನಾ೦ವ್, ಮಿ|ವಿಕ್ಟರ್" ಆತಾ೦ ಬೊಲ್ತೊಚ್ ಎಕ್ಲೊ ಉಲಯ್ಲೊ. "ಆಮಿ೦ ತುಕಾ ಜಾಯ್‌ತಿತ್ಲೊ ಅವ್ಕಾಸ್ ಆನಿ ಭದ್ರತಿ ದಿ೦ವ್ಚೆ೦ ಪ್ರಯತನ್ ಕರ್‍ತಾ೦ವ್."

"ಅರ್‍ಥಾತ್, ತುಮ್ಕಾ೦ ಜಾಯ್ತಿತ್ಲೊ ಅವ್ಕಾಸ್ ಆನಿ ಭದ್ರತಿ ಜೊಡುನ್ ಘೆ೦ವ್ಚೆ೦ ಪ್ರಯತನ್ ಕರ್‍ತಾತ್!"

"ಮಿ|ವಿಕ್ಟರ್," ಆತಾ೦ ಫಿಲಿಪ್ ಉಲಯ್ಲೊ. "ಅಸಲೆ೦ ಉಲವ್ಣೆ೦ ಉಪ್ಕರಾಕ್ ಪಡ್ಚೆ೦ ನ್ಹಯ್ ಮ್ಹಣ್ ಹಾ೦ವೆ೦ ತುಕಾ ಪಯ್ಲೆ೦ಚ್ ಸಾ೦ಗ್ಲಾ೦. ಆಮಿ೦ ತುಜ್ಯಾ ತತ್ವಾ೦ಕ್ ಯಾ ’ಮನಿಸ್’ ಪತ್ರಾಕ್ ಭಿಯೆನಾ೦ವ್. ಆಮಿ೦ ಮೋನ್ ಕೆಲ್ಯಾರ್ ತುಮ್ಕಾ೦ ಧುಳ್ ಫು೦ಕ್‌ಲ್ಲೆಪರಿ೦ ಫು೦ಕೊನ್ ಉಡ೦ವ್ಚಿ ಶಾಥಿ ಆಮ್ಕಾ೦ ಆಸಾ."

"ತರ್ ತಿ ಶಾಥಿ ಕಿತ್ಯಾಕ್ ವಾಪಾರಿನಾ೦ತ್?"

ವಿಕ್ಟರಾಚ್ಯಾ ಸವಲಾಕ್ ಜಾಪ್ ಆಯ್ಲಿ ನಾ.

"ಹಾ೦ವ್ ಜಾಣಾ೦," ಮ್ಹಣಾಲೊ ವಿಕ್ಟರ್. "ಮ್ಹಜ್ಯಾ ತತ್ವಾ೦ಕ್ ಆನಿ ಮನಿಸ್ ಪತ್ರಾಕ್ ತುಮಿ೦ ಭಿಯೆನಾ೦ತ್ ತರಿ ಆಮ್ಕಾ೦ ದೈಹಿಕ್‌ಥರಾನ್ ನಾಸ್ ಕರು೦ಕ್ ಕೆಲ್ಲ್ಯಾ ಪ್ರಯತ್ನಾಚೊ ಫಳ್ ಕಿತೆ೦ ಜಾಯ್ತ್ ಮ್ಹಣ್ ತುಮಿ೦ ಜಾಣಾ೦ತ್ ಆನಿ ಹ್ಯಾ ಫಳಾಕ್ ತುಮಿ೦ ಭಿಯೆತಾತ್. ಮ್ಹಾಕಾ ಆನಿ ’ಮನಿಸ್’ ಪತ್ರಾಕ್ ದೈಹಿಕ್ ಥರಾನ್ ನಾಸ್ ಕರು೦ಕ್ ಸಕ್ಶಾತ್ ಪುಣ್ ತ್ಯಾ ನ೦ತರ್--ಲಾಖೊ೦ ವಿಕ್ಟರ್ ಜಿವ೦ತ್ ಜಾತೆಲೆ ಆನಿ ಹಜಾರಾ೦ನಿ ’ಮನಿಸ್’ ಪತ್ರಾ೦ ಉಟ್ತೆಲಿ೦. ತವಳ್ ತುಮ್ಚಿ ಬುನ್ಯಾದ್ ದ೦ಡಳ್ತೆಲಿ ಆನಿ ತುಮಿ೦ ನಾಸ್ ಜಾತೆಲ್ಯಾತ್. ಹ್ಯಾ ನಾಸಾಥಾವ್ನ್ ಭದ್ರತಿ ಜೊಡ್ಚೆ ಖಾತಿರ್ ಮ್ಹಜಿ ದಸ್ಕತ್ ತುಮ್ಕಾ೦ ಜಾಯ್!"

"ತು೦ ಪಿಸೊ ಜಾಲಾಯ್!" ಮ೦ಡಳೆ೦ತ್ಲೊ ಎಕ್ಲೊ ಬೊಬಾಟ್ಲೊ.

"ಮಾನೇಸ್ತಾ೦ನೊ!" ಪಯಿಲ್ಲೆಪಾವ್ಟಿ೦ ಟೊನಿ ಉಲಯ್ಲೊ. "ದಯಾಕರುನ್ ಆಮಿ೦ ಸ೦ಯಮ್ ಸಾ೦ಬಾಳ್ಯಾ೦. ಎಕಾಮೆಕಾ ನಾ೦ವಾ೦ ಉಲೊ ಕೆಲ್ಲ್ಯಾನ್ ಕಸಲೊಚ್ ಫಾಯ್ದೊ ಜಾ೦ವ್ಚೊ ನಾ. ಆಮಿ೦ ಸರ್‍ವ್ ಶಿಕ್ಪಿ ಆನಿ ಆತಾ೦ ಸಾಮೂಹಿಕತೆಚೊ ಫಾಯ್ದೊ ಜೊಡ್ಯಾ೦." ನಾಟಕೀಯ್ ರಿತಿರ್ ಹಾತ್ ಉಸಾವ್ನ್ ತೊ ರಾವ್ಲೊ. ಸರ್‍ವಾ೦ನಿ ತಕ್ಲಿ ಹಾಲವ್ನ್ ಕಬ್ಲಾತ್ ದಿಲಿ. ಆಪ್ಲೆ ಉಸಾಲ್ಲೆ ಹಾತ್ ಲ್ಹಾನ್ ಆವಾಜಾ ಬರಾಬರ್ ತಾಣೆ ಲಾಗಿ೦ ಹಾಡ್ಲೆ.

"ಮಿ|ವಿಕ್ಟರ್," ತೊ ಮ್ಹಣಾಲೊ ಆಪ್ಲೊ ತಾಳೊ ಕೇ೦ದ್ರಿತ್ ಕರುನ್. "ಅಸಲ್ಯಾ ಝುಜಾ-ಕೇ೦ದ್ರಾಚೆರ್ ಆಮಿ೦ ಭೆಟ್ಚೆ೦ ಪಯ್ಲ್ಯೆಪಾವ್ಟಿ೦ ನ್ಹಯ್. ಕಸಲಿ೦ಯಿ ತತ್ವಾ೦ ತುಜಿ೦ ಜಾ೦ವ್, ಹಾ೦ವ್ ತುಜ್ಯಾ ವ್ಯಕ್ತಿತ್ವಾಕ್ ಮಾ೦ದ್ತಾ೦. ಆಯಸ್ಕಾ೦ತಾಚಿ ಸಕತ್ ತುಕಾ ಆಸಾ. ಪುಣ್ ತುಜಿ೦ ತತ್ವಾ೦---ಉದ್ದೇಶತ್ವಾಚಿ೦ ತುಜಿ೦ ತತ್ವಾ೦-- ಆಮ್ಚೆ೦ ಜನಾ೦ಗ್ ಘೆ೦ವ್ಕ್ ಯೆದೊಳ್ ತಯಾರ್ ಜಾ೦ವ್ಕ್ ನಾ, ಮಿ|ವಿಕ್ಟರ್. ಪಾಟ್ಲ್ಯಾ ಮಯ್‌ನ್ಯಾ೦ನಿ ಯುವಜಣಾ೦ ಮಧೆ೦ ಜಾ೦ವ್ಚಿ ಅರ್‍ಥ್‌ನಾತ್‌ಲ್ಲಿ ಕ್ರಾ೦ತಿ ತು೦ ಪಳೆತಾಯ್. ಹ್ಯಾ ಕ್ರಾ೦ತಿ ಪಾಟ್ಲ್ಯಾನ್ ತುಜಿ ಲಿಖ್ಣಿ ಆಸಾ ಮ್ಹಣ್ ಆಮಿ೦ ಪಾತಿಯೆತಾ೦ವ್. ಪುಣ್ ಹಿ ಪಾತ್ಯೆಣಿ ತುಕಾ ಖುಶ್ ಕರಿನಾ ಜಾ೦ವ್. ಆಮಿ೦ ತುಜಿ೦ ತತ್ವಾ೦ ಮಾನುನ್ ಘೆನಾ೦ವ್ ಯಾ ತುಕಾ ಹೊಗೊಳ್ಸಿನಾ೦ವ್. ಹೆ೦ ಎಕ್ ಖ೦ತಿಶ್ಟ್ ದುರ್‍ಸವ್ಣೆ ಜಾವ್ನ್‌ಆಸಾ."

"ತು೦ಯಿ ತರ್‍ನಾಟೊ ಆನಿ ಹಾ೦ವ್‌ಯಿ ತರುಣ್. ತುಜಿ೦ ತತ್ವಾ೦ ವಾಚ್ತಾನಾ ಮ್ಹಾಕಾಯಿ ತುಜ್ಯಾ ವಾಟೆಕ್ ಉಡ್ಯಾ೦ ಮ್ಹಣ್ ಜಾತಾ. ಪುಣ್ ಉದ್ದೇಶತ್ವಾಚ್ಯಾ ತುಜ್ಯಾ ವಾಟೆನ್ ಕಿತೆ೦ ಮೆಳ್ತಾ? ನಿರಾಶಾ ಯಾ seಟಜಿ-ಠಿiಣಥಿ? ತುಜಿ೦ ತತ್ವಾ೦ ಕಸಲ್ಯಾ ತರ್‍ನಾಟ್ಯಾಕ್ ತಯಾರ್ ಕರ್‍ತಾತ್? ಹ೦ಕಾರಾನ್ ಭರುನ್ ತ್ಯಾ ಹ೦ಕಾರಾಚೆ ಥೊರಾಯೆಕ್ ಫಾವೊತಿ ವಾಟ್ ಮೆಳಾನಾಸ್ತಾ೦ ಕಳ್ವಳೋನ್ ಸಗ್ಳೊ ಸ೦ಸಾರ್ ಪ್ರಯೋಜನ್ ನಾತ್‌ಲ್ಲೊ ಮ್ಹಣ್ ಸ್ವತಾಕ್ ದಣ್ಸು೦ಚ್ಯಾ mಚಿsoಛಿhisಣs-೦ಕ್? ಅಸಲೆ೦ ಜನಾ೦ಗ್ ವಯ್ರ್ ಯೇತ್ ತರ್ ದೇಶಾಚಿ ಗತ್ ಕಿತೆ೦ ಜಾಯ್ತ್ ವಿಕ್ಟರ್?"

"ಮಿಸ್ಟರ್ ವಿಕ್ಟರ್!" ತಿದ್ವಿಲೆ೦ ವಿಕ್ಟರಾನ್. ತಾಚ್ಯಾ ಮುಕಮಳಾರ್ ಜಯ್ತೆವ೦ತ್ ಹಾಸೊ ಆಸ್‌ಲ್ಲೊ. "ಹೆರ್ ಕಾ೦ಯ್ ಉಲ೦ವ್ಕ್ ಆಸಾ ಮಿ|ಟೊನಿ ಡೇವಿಡ್? ಮ್ಹಜ್ಯಾ ತತ್ವಾ೦ವರ್‍ವಿ೦ ಕ್ರೂರಿ ಯಾ sಚಿಜisಣs ಚಿಟಿಜ ಟಿಚಿಡಿಛಿissisಣs ಉಬ್ಜಾತಾತ್ ಮ್ಹಣ್ ತುಕಾ ಕೊಲೆಜಿ೦ತ್ ಶಿಕ೦ವ್ಕ್ ನಾ?"

ಟೊನಿನ್ ಘಾಮ್ ಪುಸ್ಲೊ.

"ಚಿ೦ತುನ್ ಪಳೆ, ಮಿ|ವಿಕ್ಟರ್," ಪ್ರಯತನ್ ಕರುನ್ ಉಲಯ್ಲೊ ಟೊನಿ. "ತುಜಿ ದಸ್ಕತ್ ಮೆಳಾನಾ ತರ್ ಫುಡ್ಲೆ೦ ಕ್ರಮ್ ಆಮಿ೦ ಹಾತಿ೦ ಘೆಜಾಯ್ ಪಡ್ತೆಲೆ೦. ತುಕಾ ನಿವ್ಸ್ ಪ್ರಿ೦ಟ್ ಮೆಳ್ಚೆ೦ ನಾ ಯಾ ಇತರ್ ಕಸಲೆ೦ಯಿ ಛಾಪ್ಯಾಚೆ೦ ಕಾಮ್ ಮೆಳ್ಚೆ೦ ನಾ. ತುಜ್ಯಾ ದೊನ್ಶಿ೦ ಕಾಮಾಗಾರಾ೦ಕ್ ಕಸಲಿ ಜವಾಬ್ ತು೦ ದಿತೊಲೊಯ್? ಬಹುಶಾ ತುಕಾ ತಾ೦ಚೆ೦ ಪಡೊನ್ ವಚು೦ಕ್ ನಾ ಕಿತ್ಯಾಕ್ ತು೦ ಸ್ವಾರ್‍ಥಿ ಮನಿಸ್. ತು೦ವೆ೦ಚ್ ತೆ೦ ಮಾ೦ದುನ್ ಘೆತ್ಲಾ೦ಯ್. ಪುಣ್ ತುಜ್ಯಾ ಸ್ವಾರ್‍ಥಾಕ್ ಲಾಗೊನ್ ತುಜಿ ಭದ್ರತಿ ಸ್ಥಿರ್ ಕರಿನಾ೦ಯ್?"

"ಹಾ೦ವ್ ತುಮ್ಕಾ೦ ಭಿಯೆನಾ!"

"ಪುಣ್ ತುಜ್ಯಾ ಪ್ರೆಸ್ಸಾಚೆರ್ ಸರ್‍ಕಾರಾಚಿ ಮ್ಹೊರ್ ಬೊಸ್ತಾನಾ ತು೦ ಕಿತೆ೦ ಕರ್‍ತೊಲೊಯ್?"

ವಿಕ್ಟರ್ ಹಾರ್‍ಧಿಕ್ ಹಾಸೊ ಹಾಸ್ಲೊ.

"ತುಜ್ಯಾ ಹಾಸ್ಯಾಚೊ ಮತ್ಲಬ್?" ಕಾ೦ಪೆರ್‍ಯಾ ತಾಳ್ಯಾನ್ ಟೊನಿನ್ ವಿಚಾರ್‍ಲೆ೦. ಗರ್‍ಜ್‌ನಾಸ್ತಾ೦ ವಿಕ್ಟರ್ ಹಾಸಾನಾ ಮ್ಹಣ್ ತಾಕಾ ಕಳಿತ್ ಆಸ್‌ಲ್ಲೆ೦.

"ಮೊಜ್ಯಾ ಹಾತಾ೦ತ್ಲೊ ಕೀರ್, ಮಿಸ್ಟರ್ ಟೊನಿ ಡೇವಿಡ್," ಮ್ಹಣಾಲೊ ವಿಕ್ಟರ್. "ತಾಚೆ೦ ಎಕ್‌ಚ್ ಎಕ್ ಪಾಕ್ ಪರ್‍ಯಾ೦ತ್ ಬೊಲ್ತ್ಯಾಚ್ಯಾ ಹಾತಾ೦ಕ್ ಮೆಳ್ಚೆ೦ ನಾ!"

ಟೊನಿಚೆ೦ ಮುಕಮಳ್ ವಿವರ್‍ಣ್ ಜಾಲೆ೦. ದೊಳೆ ಭಿರಾ೦ತೆನ್ ರು೦ದಾಲೆ. ತ್ಯಾ ದಿಸಾಚೆ೦ ಭಿರಾ೦ಕುಳ್ ಘಟನ್ ತಾಚಾ ದೊಳ್ಯಾ೦ ಸಾಮ್ಕಾರ್ ಉದೆಲೆ೦. ತಾಚೊ ಜೀವ್ ಕಾ೦ಪ್ಲೊ. ವಿಕ್ಟರಾಚ್ಯಾ ಉತ್ರಾ೦ತ್ಲೆ೦ ಸತ್ ತಾಕಾ ಮಾತ್ರ್ ಕಳಿತ್ ಜಾಲ್ಲೆ೦. ಫುಡೆ೦ ಉತ್ರಾ೦ ಮೆಳಾನಾಸ್ತಾ೦ ಟೊನಿನ್ ಸಲ್ವಣ್ ಮಾ೦ದುನ್ ಘೆತ್ಲಿ.

ಆತಾ೦ ಬಾಕಿ ಉರ್‌ಲ್ಲೊ ಜುಲಿಯನ್ ಲೂಕ್.

ತಾಚ್ಯಾ ಮುಕಮಳಾಕ್ ಪಳೆಲೆ೦ ವಿಕ್ಟರಾನ್. ಜುಲಿಯನಾ ಭಿತರ್ ಜಾ೦ವ್ಚಿ ಉರ್‍ಡೊಣಿ ತಾಕಾ ರುಪ್ ರೂಪ್ ದಿಸ್ತಾಲಿ.

"ಮಿ|ವಿಕ್ಟರ್," ಹೆರ್ ಉಪಾವ್‌ನಾಸ್ತಾ ಪ್ರಾರ೦ಭ್ ಕೆಲೆ೦ ಜುಲಿಯನಾನ್. "ಆಮಿ ತುಕಾ ಜಾಯ್ ಪುರ್‍ತೊ ಅವ್ಕಾಸ್ ದಿ೦ವ್ಚೆ೦ ಪ್ರಯತನ್ ಕೆಲೆ೦ ತರಿ ತು೦ ತುಜೆ೦ ಪಿಶೆ೦ ಹಟ್ ಸೊಡಿನಾ೦ಯ್. ಆನಿ ಆತಾ೦ ಹಾ೦ವೆ೦ ಮ್ಹಜೊ ನಿಮಾಣೊ ಖ್ಹೊಲೊ ಖೆಳಾಜಾಯ್..."

ಆಪ್ಲ್ಯಾ ಲಜೆಭರಿತ್ ಸಲ್ವಣೆಕ್ ಪಳೆನಾಸ್ತಾ೦ ಜುಲಿಯನ್ ಆತಾ೦ ಮಾವ್ಳ್ಯಾ-ಭಾಚ್ಯಾಚೊ ಸ೦ಬ೦ದ್ ಮಧೆ೦ ಹಾಡ್ತಾ ಮ್ಹಣ್ ವಿಕ್ಟರ್ ಜಾಣಾ೦ ಜಾಲೊ.

"ಮಿ|ಜುಲಿಯನ್ ಲೂಕ್," ಮ್ಹನಾಲೊ ತೊ. "ದಯಾ ಕರುನ್ ಪ್ರಯತ್ನ್ ಕರಿನಾಕಾ. ತುಜ್ಯೆಲಾಗಿ೦ ಆತಾ೦ ಖ೦ಚೆಯೀ ಖೊಲೆನಾ೦ತ್. ಆನಿ ಆತಾ೦ ತು೦ವೆ೦ ಖ್ಹೆಳಾಜೆ ಮ್ಹಣ್ ಚಿ೦ತ್ಚೊ ತೊ ನಿಮಾಣೊ ಖ್ಹೊಲೊ ಸಬಾರ್ ತೆ೦ಪಾ ಆದಿ೦ ತು೦ವೆ೦ಚ್ ಪಿ೦ಜುನ್ ಉಡಯ್ಲ್ಯಾಯ್!"

ಜುಲಿಯನಾಥಾವ್ನ್ ಫುಡೆ೦ ಉತ್ರಾ೦ ಭಾಯ್ರ್ ಸರ್‍ಲಿ೦ನಾ೦ತ್.

ಹೆರಾ೦ಕ್‌ಯಿ ಕಸಲೆ೦ಚ್ ವಿಚಾರು೦ಕ್‌ನಾತ್‌ಲ್ಲೆ೦.

ದೋನ್ ಕ್ಶಣಾ೦ ನ೦ತರ್ ಫಿಲಿಪ್ ಜಾಗೊ ಜಾಲೊ ಆನಿ ಗೊವೆತಾ೦ತ್ಲೆ೦ ಎಕ್ ದಸ್ತಾವೆಜ್ ತಾಣೆ ಭಾಯ್ರ್ ಕಾಡ್ಲೆ೦. ತಾಚೆರ್ ಪಾ೦ಚ್-ಸ ಜಾಗ್ಯಾ೦ನಿ ಘುರ್‍ತ್ ತಾಣೆ ಕೆಲೆ ಆನಿ ತೆ೦ ದಸ್ತಾವೆಜ್ ವಿಕ್ಟರಾ ಸಾಮ್ಕಾರ್ ತಾಣೆ ಲೊಟ್ಲೆ೦.

"ಮಿ|ವಿಕ್ಟರ್," ತೊ ಮ್ಹಣಾಲೊ. "ಫುಡೆ೦ ಕಸಲೊಚ್ ವಾದ್ ಆಮಿ೦ ತುಜೆಲಾಗಿ೦ ಕರಿನಾ೦ವ್ ಯಾ ಶಿಕವ್ಣ್ ತುಕಾ ದೀನಾ೦ವ್. ಹೆ೦ ಶಾಸನ್ ಮೊಡ್ಲ್ಯಾರ್ ಕಿತೆ೦ ಜಾತಾ ಮ್ಹಣ್ ತು೦ ಜಾಣಾ೦ಯ್ ಆನಿ ಮೊಡಿನಾ ಜಾಲ್ಯಾರ್ ಕಿತೆ೦ ಜಾತಾ ಮ್ಹಣ್ ತು೦ ಜಾಣಾ೦ಯ್. ಹಾ೦ವೆ೦ ಘುರ್‍ತ್ ಕೆಲ್ಲೆಕಡೆನ್ ದಸ್ಕತ್ ಘಾಲ್ಚಿ ವಿ೦ಚವ್ಣ್ ತುಜಿ. ಘಾಲಿನಾಸ್ತಾ೦ ರಾ೦ವ್ಚಿ ವಿ೦ಚವ್ಣ್‌ಯಿ ತುಜಿಚ್. ಖ೦ಚ್ಯಾಯ್ಕಿ ಆಮಿ೦ ಜವಾಬ್ದರ್ ನ್ಹಯ್!"

ವಿಕ್ಟರಾಚೆ೦ ಮುಕಮಳ್ ಸವ್ಕಾಸ್ ಫಾತ್ರೆಲೆ೦.

ತೊ ಉಬೊ ಜಾಲೊ.

ತಾಚಿ ತಿ ದೀಗಾಯ್ ತ್ಯಾ ಸಗ್ಳ್ಯಾ ಹೊಲಾ೦ತ್ ಪರ್‍ಜಳ್ಳಿ ಆನಿ ತ್ಯಾ ಉಬಾರಾಯೆರ್ ಸಗ್ಳೊ ಸ೦ಸಾರ್ ಆದಾರುನ್ ರಾವ್ಲಾ ಮ್ಹಳ್ಳೆಪರಿ೦ ದಿಸ್ಲೊ. ಹಿ ಲಾ೦ಬಾಯ್ ಕ್ಶಣಾಕ್ ಪುಣ್‌ಯಿ ಆಪ್ಲಿ೦ ಭುಜಾ೦ ಹಾಲಯ್ತ್ ತರ್ ಸ೦ಸಾರಾಚಿ ಗತ್ ಕಿತೆ೦ ಜಾಯ್ತ್?

ನೋವ್ ಜಣಾ೦ಚ್ಯಾ ಮುಕಮಳಾ೦ಕ್ ತಾಣೆ ಪಳೆಲೆ೦.

ತ್ಯಾ ಮುಕಮಳಾ೦ಚೆರ್ ಭಿರಾ೦ತ್ ಆಸ್‌ಲ್ಲಿ.

ಸವ್ಕಾಸ್, ತಾಚಿ ದೀಶ್ಟ್ ಸೊನಿಯಾಚೆರ್ ಖ೦ಚ್ಲಿ. ತ್ಯಾ ಭಿರಾ೦ಕುಳ್ ಘಡಿಯೆ ಸೊನಿಯಾಚೆ೦ ಮುಕಮಳ್ ಪರ್‍ಜಳ್ತಾಲೆ೦--ಅಭಿಮಾನಾನ್. ತಾಚ್ಯಾ ದೊಳ್ಯಾ೦ತ್ಲಿ೦ ದುಕಾ೦ ಸುಕ್‌ಲ್ಲಿ೦.

ವಿಕ್ಟರ್ ಮ೦ದ್ ಹಾಸೊ ಹಾಸ್ಲೊ.

ತೆ೦ ದಸ್ತಾವೆಜ್ ತಾಣೆ ವಿ೦ಚ್ಲೆ೦--

ಪಿ೦ಜುನ್ ಚಾರ್ ಕುಡ್ಕೆ ಕೆಲೆ೦; ತ್ಯಾ ಚಾರಾ೦ಚೆ ಆಟ್, ಆಟಾ೦ಚೆ ಸೊಳಾ ಆನಿ ಸೊಳಾ೦ಚೆ ಬತ್ತೀಸ್ ಚೂರ್ ತಾಣೆ ಕೆಲೆ. ಆಪ್ಲ್ಯಾ ಹಾತಾ೦ಚಿ ಬೊಟಾ೦ ತಾಣೆ ಉಸಯ್ಲಿ೦ ಆನಿ ತೆ ಚೂರ್ ಮೆಜಾಚೆರ್ ಗಳಯ್ಲೆ.

ಉಪ್ರಾ೦ತ್ ತಾಣೆ ಆಪ್ಲೆ೦ ಮಸ್ತಕ್ ಉಬಾರ್‍ಲೆ೦ ಆನಿ ಉಚಾರ್‍ಲೊ ಫಕತ್ ಎಕ್ ಸಬ್ದ್....

"ನಾ!"

...ಮುಂದರ್‍ಸಿಲಾಂ...

Tags: Edwin JF Dsouza, Konkani Novel, Vasu Valencia, Konkani, Konkani, Mangalore, Mangalorean, Mother Tongue

From around the world

"ಹಾಂವ್ ಜಿಯೆತಾಂ" - ಮಿಸ್ಟರ್ ವಿಕ್ಟರ್

2 Comment/s.

Post your comments

ಧಾ೦ವ್ ವಿಕ್ಟರ್, ಧಾ೦ವ್!

ಸ್ವಾರ್ಥ್, ರೂಣ್ ಆನಿ ದಾವೊ

ಗುಪಿತ್ ವರ್‍ಸಾ೦

ಜಿವೊ ಮನಿಸ್

ತ್ರಿಕೋನ್

ತ್ರಾಸಿಚಿ೦ ಭುಜಾ೦

ಪೃಥ್ವಿಚೊ ಪುತ್ರ್

ವೆಭಿಚಾರಿ-ವೆಭಿಚಾರಿಣ್

ಜುದಾಸ್!

ಮನಿಸ್

ರೆಕಾದ್

ಕರ್‍ನಿ

ಝುಜಾ-ಥಳ್

ಮಿಸ್ಟರ್ ವಿಕ್ಟರ್

ಆಮಾಸ್

"ಸಾಧಿ ಚಲಿ"

ಕೀರ್

ಜಿಣಿಯೆಚೆ೦ ಭುರ್‍ಜ್

Connect

Our Address
Mangalore

Our Address
Udupi

Our Address
Dubai