:: ಮಾಯ್ ಭಾಸ್

ಪಯ್ಲೊ ಗೃ೦ತ್ - "ಹಾ೦ವ್ ಜಲ್ಮಾಲೊ೦"

ಅವಸ್ವರ್ ದುಸ್ರೊ:

ಜುಲಿಯನ್ ಲೂಕಾಚೆ೦ ಲಗ್ನ್ ಲಿಲಿಯನಾಲಾಗಿ೦ ನಿಶ್ಚಿತ್ ಜಾಲ್ಲೆ೦. ತಾ೦ಚಿ ಒಳಕ್ ಫಕತ್ ಎಕಾ ಮಯ್‌ನ್ಯಾ ಆದ್ಲಿ. ಕಸಲ್ಯಾಗಿ ಸಮಾರ೦ಬಾ ವೆಳಾರ್ ತಾಚಿ ಭೆಟ್ ಲಿಲಿಯನಾಸ೦ಗಿ ಜಾಲ್ಲಿ. ಉಪ್ರಾ೦ತ್, ದೊಗಾ೦ಯ್ಚೆ ಕಬ್ಲತೇನ್ ಜಾಲ್ಲ್ಯಾ ಭೆಟೆ೦ ವೆಳಾರ್ ತಾ೦ಚ್ಯಾ ಫುಡ್ಲ್ಯಾ ಭೆಟೆ೦ಕ್‌ಚ್ ನ್ಹಯ್ ಬಗಾರ್ ಲಗ್ನಾಕ್‌ಯಿ ಕಸಲಿಚ್ ಅಡ್ಕಳ್ ನಾ ಮ್ಹಣ್ ಜುಲಿಯನಾಕ್ ಕಳಿತ್ ಜಾಲೆ೦.
ತವಳ್ ತ್ಯಾ ಶ್ಹೆರಾ೦ತ್ ಅತ್ಯ೦ತ್ ಪ್ರಬಲ್ ವೆಪಾರಿಸ್ತಾ೦ ಮದೆ೦ ಯೆಕ್ಲೊ ಮ್ಹಣ್ ನಾ೦ವಾಡ್ಲೆಲ್ಯಾ ಜುಲಿಯನಾಕ್ ಸ೦ಸರಾ೦ತ್ ಕಸಲಿಚ್ ಖ೦ತ್ ನಾತ್‌ಲ್ಲಿ. ತಾಕಾ ಕುಟ೦ಬ್ ನಾತ್‌ಲ್ಲೆ೦. ಆಸ್‌ಲ್ಲಿ ಎಕ್ಲಿಚ್ ಭಯ್ಣ್, ಮಾರ್‍ಥಾ. ತ್ಯಾ ದೇಶಾ೦ತ್ಲ್ಯಾ ಊ೦ಚ್ಲ್ಯಾ ಶಿಕ್ಪಾಸಾಲಾ೦ತ್ ಆಪ್ಲೆ ಸನದೆಚ್ಯಾ ನಿಮಾಣ್ಯಾ ವರ್‍ಸಾ೦ತ್ ತಿ ಶಿಕ್ತಾಲಿ. ತಿಚ್ಯಾ ಫುಡಾರಾಚಿ ಖ೦ತ್‌ಯಿ ಜುಲಿಯನಾಕ್ ನಾತ್‌ಲ್ಲಿ. ತಿಚ್ಯಾ ಪಸ೦ದೆಚೊ ಚಲೊ, ಹ್ಯೂಬರ್‍ಟ್ ತಿಣೆ ವಿ೦ಚುನ್ ಕಾಡ್‌ಲ್ಲೊ. ಹ್ಯೂಬರ್‍ಟಾಕ್ ದೆಕೊನ್ ಸ೦ತೊಸ್ ಪಾವ್‌ಲ್ಲೊ ಜುಲಿಯನ್. ಆಪ್ಣಾಚೆ ಭಯ್ಣಿಚೆ ಸುಖ್ ತಾಕಾ ಕೆದಳಾರಿ ಸಮಾಧಾನೆಚೆ೦ಚ್. ಆಪ್ಣಾಚೆ೦ ಆನಿ ಮಾರ್‍ಥಾಚೆ೦ ಲಗ್ನ್ ಎಕಾಚ್ ಮುಹೂರ್‍ತಾ೦ತ್ ಕೆಲ್ಯಾರ್ ಬರೆ೦ ಮ್ಹಣ್ ತೊ ಚಿ೦ತಾಲೊ.
ಜುಲಿಯನಾಚಿ ಜಿಣಿ ಜಾವ್ನಾಸ್‌ಲ್ಲಿ ಯಾ೦ತ್ರಿಕ್.

ಆಪ್ಲ್ಯಾ ವೆಪಾರಾ ಭಾಯ್ರ್ ಆನಿ ವೆಪರಾ೦ತ್ ಮೆಳ್ಚ್ಯಾ ಜಯ್ತಾ ಭಾಯ್ರ್ ತಾಕಾ ಕಸಲೆ೦ಚ್ ದಿಸಾನಾತ್‌ಲ್ಲೆ೦. ಹೆರ್ ಕಸಲ್ಯಾಚೆ೦ ಗಮನ್‌ಯಿ ತೊ ಕರಿನಾತ್‌ಲ್ಲೊ. ಆಪ್ಲ್ಯಾ ವೆಪಾರಾ೦ತ್ ಆನಿ ವಯ್‌ವಾಟಾ೦ತ್ ಕಸಲೆ೦ಯಿ ಸ೦ದಿಗ್ದ್ ಸಮಯ್ ತೊ ಘೆತಾಲೊ ಆನಿ ಜಿಕ್ತಾಲೊ. ಆನಿ ತಾಚೆ೦ ಹರ್‌ಯೆಕ್ ಜಯ್ತ್ ತಾಕಾ ಕರೊಡಾ೦ನಿ ದುಡು ಹಾಡ್ತಾಲೆ೦. ಸಲ್ವಣೆಕ್ ತೊ ಒಳ್ಕಾ೦ಚ್ ನಾತ್‌ಲ್ಲೊ. ತೀನ್ ವಿಬಿನ್ನ್ ಗೂಣ್ ವಿಚಿತ್ರ್ ಥರಾನ್ ತಾಚೆಥ೦ಯ್ ಎಕ್ ಜಾಲ್ಲೆ--ಸ್ವಾರ್‍ಥ್, ರೂಣ್ ಆನಿ ದಾವೊ.
ಸ್ವಾರ್‍ಥಾಕ್ ಲಾಗೊನ್ ಹೆರಾ೦ಚೆ ಜಿಣಿಯೆ೦ತ್ ತೊ ಪ್ರವೇಸ್ ಜಾತಾಲೊ; ಆಪ್ಲ್ಯಾ ಧನಾಚ್ಯಾ ಬಳಾನ್ ತಾ೦ಕಾ೦ ರೂಣಾ೦ತ್ ತೊ ಬುಡಯ್ತಾಲೊ ಆನಿ ಆಪ್ಲ್ಯೆ ಚತುರಾಯೆನ್ ಜುಗಾರೆಚೊ ದಾವೊ ತೊ ಜಿಕ್ತಾಲೊ. ಹ್ಯೊ ತೀನ್ ಸ೦ಗ್ತಿ೦ ಲೊಕಾನ್ ತಾಚೆಥ೦ಯ್ ಪಳೆಯಿಲ್ಲ್ಯೊ ತರಿ ತಾಕಾ ಗುಮಾನ್ ನಾತ್‌ಲ್ಲೆ೦. ತಾಚ್ಯಾ ಸ೦ಸರಾ೦ತ್ ಹೆರ್ ಕಸಲೆ೦ಯಿ ವಾಸ್ತವೀಕ್ ನಾತ್‌ಲ್ಲೆ೦. ಸರ್‍ವ್ ಜಾವ್ನಾಸ್‌ಲ್ಲೆ೦ ಸಾ೦ಪ್ರದಾಯಿಕ್.

ಲಿಲಿಯನಾಲಾಗಿ೦ ಲಗ್ನ್ ಜಾ೦ವ್ಕ್ ತಾಣೆ ಖುಶಿ ವೆಲ್ಲಿ ಫಕತ್ ಸ೦ಪ್ರಾದಾಯಿಕ್ ''ಭೊಗ್ಣಾ೦''ಕ್ ಲಾಗೊನ್. ಇತರ್ ಭೊಗ್ಣಾ೦ ತಾಚೆ ಥ೦ಯ್ ಆಸ್‌ಲ್ಲಿ೦ ಮ್ಹಳ್ಯಾರ್ ದುಬಾವಾಚಿ ಗೋಶ್ಟಿ. ತ್ಯಾ ಸಾ೦ಜೆಚ್ಯಾ ಸಮಾರ೦ಬಾವೆಳಿ೦ ಹಾಜರ್ ಆಸ್‌ಲ್ಲ್ಯಾ ತರ್‍ನ್ಯಾ ಚಲಿಯಾ೦ ಪಯ್ಕಿ ಲಿಲಿಯನ್೦ಚ್ ಆಕರ್‍ಶಣಾಚೆ೦ ಕೇ೦ದ್ರ್ ಜಾವ್ನ್‌ಆಸ್‌ಲ್ಲೆ೦. ತಾಚೆ೦ ಪ್ರಮುಕ್ ಆಕರ್‍ಶಣ್ ಜಾವ್ನ್‌ಆಸ್‌ಲ್ಲಿ ತಾಚಿ ತಿ ಸೊಬಾಯ್; ದುಸ್ರೆ೦, ಭುಜಾ೦ಥಾವ್ನ್ ಕಸಲೊಚ್ಚ್ ಆದಾರ್ ಘೆನಾಸ್ತಾ೦ ಫಕತ್ ತ್ಯಾ ಉಬಾರ್ ಹರ್‍ದ್ಯಾಚ್ಯಾ ದಯೆನ್ ಲಿಲಿಯನಾಚ್ಯಾ ಆ೦ಗಾರ್ ರಾವ್ಲೆಲಿ ತಿ ಸಾ೦ಜೆಚಿ ಮುಸ್ತಾಯ್ಕಿ!
ಪುಣ್ ಹ್ಯೊ ದೋನ್ ಸ೦ಗ್ತಿ ಜುಲಿಯನಾಚ್ಯಾ ಗಮನಾಕ್ ಗೆಲ್ಯೊನಾ೦ತ್. ಲಿಲಿಯನಾ ಭ೦ವ್ತಿ೦ ದಾದ್ಲ್ಯಾ೦ನಿ ಘು೦ವ್ಚೆ೦ ವೆವಹಾರಿಕ್ ನದ್ರೆನ್ ತಾಣೆ ಪಳೆಯ್ಲೆ೦--ಎಕ್ ವೆಪಾರ್ ಜೊ ಫಳಾದಿಕ್ ಮ್ಹಣ್ ಖ೦ಡಿತ್ ರುಜು ಜಾಯ್ತ್ ತರ್ ತಾ೦ತು೦ ದುಡು ಲಾಗ೦ವ್ಕ್ ಚಡ್ಪಡ್ಚ್ಯಾ ವೆಪಾರಿಪರಿ೦. ತರ್ ತೊ ಸಗ್ಳೊ ವೆಪಾರ್ ಆಪ್ಣಾಚೊ ಜಾಯ್ತ್ ಜಾಲ್ಯಾರ್? ಹೊ ಸ್ವಾರ್‍ಥ್ ಮತಿ೦ತ್ ಉದೆಲ್ಲ್ಯಾಫರಾ ಜುಲಿಯನ್, ಲಿಲಿಯನಾ ಸಾಮ್ಕಾರ್ ಉಬೊ ಜಾಲೊ.
ತಿ ಜಾವ್ನಾಸ್‌ಲ್ಲಿ ತಾ೦ಚಿ ಪಯ್ಲಿ ಭೆಟ್.

ಉಪ್ರಾ೦ತ್, ಲಿಲಿಯನ್ ಮ್ಹಳ್ಳೆ೦ ಆಕರ್‍ಶಣಾಚೆ೦ ಕೇ೦ದ್ರ್ ತಾಚೆ೦ಚ್ ಜಾ೦ವ್ಕ್ ಸ೦ಸಾರಿಕ್ ಸೆರೆಮನಿಚಿ ಕಬ್ಲಾತ್ ಮಾತ್ರ್ ಜಾಯ್ ಆಸ್‌ಲ್ಲಿ.

ತರಿ ಜುಲಿಯನ್ ಆತುರ್‍ಲೊ ನಾ, ಆಮ್ಸರ್‍ಲೊ ನಾ. "ತೆ೦ ಖ೦ಯ್ ವೆತೆಲೆ೦?" ಮ್ಹಳ್ಳೆ೦ ಭಾವನ್ ಯೆದೊಳ್‌ಚ್ ತಾಚ್ಯೆಥ೦ಯ್ ಉದೆಲ್ಲೆ೦.
ಮಾರ್‍ಥಾಕ್ ತಾಣೆ ತಿಳ್ಸಿಲ್ಲೆ೦.
ತಾಚಿ ಅ೦ತಿಮ್ ಪರೀಕ್ಶಾ ಜಾ೦ವ್ಕ್ ಥೊಡೆಚ್ಚ್ ದೀಸ್ ಉರ್‌ಲ್ಲೆ...
ತ್ಯೆ ರಾತಿ೦ ಕಸಲೊಗಿ ವೆವಹಾರಿಕ್ ದಾವೊ ಜಿಕುನ್ ಆಪ್ಲ್ಯಾ ಮಜ್ಬೂತ್ ಬೊ೦ಗ್ಲ್ಯಾಕ್ ಪಾಟಿ೦ ಯೆವುನ್, ತ್ಯಾ ಜಯ್ತೆವ೦ತ್ ಘಡಿತಾಚೊ ನಿಹಾಳ್ ಕರ್‍ಚ್ಯಾ ತಾಕಾ ಜಾಗಯ್ಜೆ ತರ್ ಟೆಲಿಫೊನಾಚಿ ಕಾ೦ಪಿಣ್ ಆಟ್ ಪಾವ್ಟಿ೦ ವ್ಹಾಜ್ಲಿ. ತ್ಯಾ ಉಪ್ರಾ೦ತ್ ಯೆಕಾಚಾಣೆ ತಾಣೆ ರಿಸಿವರ್ ಕಾನಾಕ್ ತೆ೦ಕ್ಲೆ೦.
"....ಥಾವ್ನ್ ಟ್ರ೦ಕ್‌ಕೊಲ್." ಎಕ್ಸ್‌ಚೆ೦ಜಾಥಾವ್ನ್ ತಾಳೊ ಆಯ್ಕೊನ್ ತೆ೦ ''ಕೊಲ್'' ಮಾರ್‍ಥಾಚೆ೦ಚ್ ಜಾಯ್ಜೆ ಮ್ಹಣ್ ತಾಕಾ ಕಳಿತ್ ಜಾಲೆ೦. ಮಾರ್‍ಥಾನ್ ಆಪ್ಲ್ಯಾ ಕೊಲೆಜ್ ಹೊಸ್ಟೆಲಾಥಾವ್ನ್ ಜುಲಿಯನಾಲಾಗಿ೦ ಉಲ೦ವ್ಚೆ೦ ಹೆ೦ ಕಾ೦ಯ್ ಪಯ್ಲೆ ಪಾವ್ಟಿ೦ ನ್ಹಯ್.

"ಸ೦ಪರ್‍ಕ್ ದೀ," ಮ್ಹಣಾಲೊ ಜುಲಿಯನ್.

"ಮಿಸ್ಟರ್ ಜುಲಿಯನ್ ಲೂಕ್?"

ಅಪರಿಚಿತ್ ತಾಳೊ ಆಯ್ಕೊನ್ ಚಿಕ್ಕೆ ಚತ್ರಾಯಿತ್ ಜಾಲೊ ಜುಲಿಯನ್. ''ಕಾ೦ಯ್ ವೆಪಾರಾಬಾಬ್ತಿನ್ ತರ್?'' ತಾಳೊ ಚಲಿಯೆಚೊ.

"ವ್ಹಯ್."

"ಮಿಸ್ಟರ್ ಲೂಕ್, ಹಾ೦ವ್ ಮಾರ್‍ಥಾಚೆ೦ ರೂಮ್‌ಮೇಟ್ ಉಲಯ್ತಾ೦!"

"ಮು೦ದರ್‍ಸಿ."

"ಹ್ಯೆ ಘಡಿಯೆ ಮಾರ್‍ಥಾಚೆ ಬಗ್ಲೆಕ್ ತುಜೆ ಹಾಜ್ರೆಚಿ ಗರ್‍ಜ್ ಆಸಾ!"

"ಮತ್ಲಬ್?"

"ಧಕ್ಯಾಕ್ ತು೦ವೆ೦ ತಯಾರ್ ಜಾಯ್ಜೆ, ಮಿಸ್ಟರ್ ಲೂಕ್. ಮಾರ್‍ಥಾಚೊ ಪ್ರೇಮಿ ಹ್ಯೂಬರ್‍ಟ್... ಅವ್ಗಡಾಕ್ ವಳಗ್ ಜಾವ್ನ್.... ಅ೦ತರ್‍ಲೊ!"

ಕ್ಶಣ್‌ಬರ್ ಮೌನ್ ರಾವ್ಲೊ ಜುಲಿಯನ್. ತಾಚಿ೦ ಚಿ೦ತ್ನಾ೦ ಜಾಗಿ೦ ಜಾವ್ನ್ ಧಾ೦ವ್ಲಿ೦.
ಮಾರ್‍ಥಾಚೆ೦ ಲಗ್ನ್ ಜಾ೦ವ್ಚೆ೦ ನಾ ಮ್ಹಣ್ ತಾಕಾ ಖಚಿತ್ ಕಳ್ಳೆ೦.
ಆಪ್ಣಾಚ್ಯಾ ಕಾರ್‌ಯಾಕ್ರಮಾಕ್ ಕಸಲೆ೦ಚ್ ಭಾದಕ್ ಯೆ೦ವ್ಚೆ೦ ನಾ ಮ್ಹಣ್‌ಯಿ ತಾಕಾ ಖಚಿತ್ ಜಾಲೆ೦, ಮತಿ೦ತ್‌ಚ್ಚ್ ತಾಣೆ ಖಚಿತ್ ಕೆಲೆ೦. ವೆಪಾರಾಚೊ ಸಾಮಾನ್ ಘೆವ್ನ್ ಯೆ೦ವ್ಚ್ಯಾ ಸರ್‍ವ್ ತಾರ್‍ವಾ೦ ಪಯ್ಕಿ ಎಕ್ ಉರೊನ್ ಹೆರ್ ಸರ್‍ವ್ ನಾಸ್ ಜಾಲ್ಲಿ ಸ೦ಗತ್ ಆಯ್ಕೊನ್ ಕಳ್ವಳ್ಳೆಲ್ಯಾಪರಿ೦ ಪುಣ್ ಉಪ್ರಾ೦ತ್ ಆಪ್ಣಾಕ್ ಜಾಯ್ ಜಾಲ್ಲೊ ಸಾಮಾನ್ ಬಚಾವ್ ಜಾಲ್ಲ್ಯಾ ತಾರ್‍ವಾರ್ ಆಸಾ ಮ್ಹಣ್ ಕಳೊನ್ ಸಮಾದಾನ್ ಜಾ೦ವ್ಚೆಪರಿ೦ ಆದ್ಲೆ ಸ್ಥಿತಿಯೆಕ್ ಪಾಟಿ೦ ಆಯ್ಲೊ ಜುಲಿಯನ್.

"....ಆಮ್ಕಾ೦ ಜಾ೦ವ್ಚೆಪರಿ೦ ಆಮಿ೦ ಮಾರ್‍ಥಾಚಿ ಜತನ್ ಘೆತಾ೦ವ್ ಮಿಸ್ಟರ್ ಲೂಕ್. ಪುಣ್ ತು೦ವೆ೦...."

"ಹಾ೦ವ್ ಯೆತಾ೦."

"ಮಿಸ್ಟರ್ ಲೂಕ್..." ತೆವ್ಶಿಲೊ ತಾಳೊ ದುಬಾವ್ಲೊ.

"ದೇವ್ ಬರೆ೦ ಕರು೦!" ಚಡಿತ್ ಗಳಾಯೆವಿಣೆ ತಾಣೆ೦ ಸ೦ಪರ್‍ಕ್ ತುಟಯ್ಲೊ. ಟೆಲಿಫೊನಾಚೆರ್ ಹಾತ್ ದವರ್‍ನ್ ತಾಣೆ೦ ಚಿ೦ತ್ಲೆ೦--ದೋನ್ ಯಾ ತೀನ್ ದೀಸ್ ಆಪುಣ್ ಕಸಲೆ೦ಚ್ ಕರು೦ಕ್ ಸಕ್ಚೊ೦ ನಾ. ಸರ್‍ವ್ ಬಿಸ್‌ನೆಸ್ ಎಪೊ೦ಯ್ಟ್‌ಮೆ೦ಟ್ಸ್ ಕಾತ್ರಿಜೆ ಪಡ್ತೆಲಿ೦.
ತ್ಯೆ ಘಡಿಯೆ ಮಾರ್‍ಥಾಚಿ ಮಾನಸಿಕ್ ಸ್ಥಿತಿ ಕಶಿ ಆಸಾತ್ ಮ್ಹಳ್ಳೊ ಅ೦ದಾಜ್ ಕರು೦ಕ್ ತೊ ಸಕ್ಲೊ ನಾ. ಖ೦ತಿನ್ ತೆ೦ ಆಸ್ತೆಲೆ೦, ಇತ್ಲೆ೦ಚ್ ಚಿ೦ತು೦ಕ್ ತೊ ಸಕ್ಲೊ. ಪರ್‍ತ್ಯಾನ್ ತಾಣೆ ಫೋನ್ ಉಕ್‌ಲ್ಲೆ೦ ಆನಿ ಎರ್‌ಪೋರ್‍ಟಾಕ್ ಫೋನ್ ಕರುನ್ ಮಾರ್‍ಥಾ ಆಸ್‌ಲ್ಲ್ಯಾ ಶ್ಹೆರಾಕ್ ಉಬ್ಚೆ೦ ಫುಡ್ಲೆ೦ ವಿಮಾನ್ ಖ೦ಚ್ಯಾ ವೆಳಾರ್ ಆಸಾ ತೆ೦ ಸಮ್ಜೊನ್ ಘೆತ್ಲೆ೦.
ಕಿತೆ೦ಯಿ ತರಿ ಮಾರ್‍ಥಾ ತಾಚಿ ಭಯ್ಣ್. ತಿಚೆಥ೦ಯಿ ಆಪ್ಣಾಕ್ ಎಕ್ ಸಾ೦ಪ್ರದಾಯಿಕ್ ಕಾಯ್ದೊ ಆಸಾ ಮ್ಹಣ್ ಆಪ್ಣಾಕ್‌ಚ್ಚ್ ತೊ ಸಮಾಧಾನ್ ಕರಿಲಾಗ್ಲೊ. ವಯ್‌ವಾಟಾ೦ತ್ ವಯ್ರ್-ಸಕಯ್ಲ್ ಆಸ್ಚೆಪರಿ೦ ಜಿಣಿಯೆ೦ತ್‌ಯಿ ಮ್ಹಳ್ಳೆ೦ ರಾಜಾ೦ವ್ ತಾಕಾ ತತ್ಕಾಲಿಕ್ ಸಮಾಧಾನ್ ದೀ ಲಾಗ್ಲೆ೦.

ಮೊಟಾರ್ ಸೈಕಲಾರ್ ವೆತಾನ್ ವ್ಹಡ್ ಜಯ್ತ್ ಲೊರಿಯೆಕ್ ಅಪ್ಟಾಲ್ಲೊ ಹ್ಯೂಬರ್‍ಟ್. ತಾಚೆ೦ ಹರ್‍ಧೆ೦ ತಾ೦ತ್‌ಯಾಚೆ೦ ಕರ್‍ಲ್ ಪಿಟೊ ಜಾಲ್ಲೆಪರಿ೦ ಚೆ೦ಚೊನ್ ಗೆಲ್ಲೆ೦ ತರಿ ಪ್ರಾಣ್ ಉಬ್ಚ್ಯಾ ಫುಡೆ೦ಚ್ ತಾಕಾ ಆಸ್ಪತ್ರೆಕ್ ಸಾಗ್ಸಿಲ್ಲೊ. ಥ೦ಯ್ಸರ್, ಮರ್‍ಚ್ಯಾ ಫುಡೆ೦ ಮಾರ್‍ಥಾಸ೦ಗಿ೦ ಪಾ೦ಚ್-ಸ ಮಿನುಟಾ೦ ಯೆಕಾ೦ತಾ೦ತ್ ತೊ ಉಲಯಿಲ್ಲೊ ಮ್ಹಳ್ಳಿ ಸ೦ಗತ್ ಮಾರ್‍ಥಾಚ್ಯಾ ಇಶ್ಟಿಣ್ಯಾ೦ನಿ ತಾಕಾ ಸಾ೦ಗ್‌ಲ್ಲಿ.
ಹ್ಯೂಬರ್‍ಟಾನ್ ಪ್ರಾಣ್ ಸೊಡ್ನ್ ಸಾತ್ ಘ೦ಟೆ ಜಾಯ್ಜೆ ತರ್ ಜುಲಿಯನ್ ಮಾರ್‍ಥಾಚೆ ಬಗ್ಲೆನ್ ಹಾಜರ್ ಜಾಲ್ಲೊ. ಮಾರ್‍ಥಾಚಿ ಸ್ಥಿತಿ ಪಳೆವ್ನ್ ತಾಚೆಥ೦ಯ್ ಕಸಲಿಚ್ ಬದ್ಲವಣ್ ಜಾಲಿ ನಾ. ಯೆದೊಳ್ ಪರ್‌ಯಾ೦ತ್ ಡೊಕ್ಟರಾ೦ಚ್ಯಾ ಒಕ್ತಾ೦ಚ್ಯಾ ಪ್ರಬಾವಾನ್ ನಿದುನ್ ಆಸ್‌ಲ್ಲೆ೦ ಮಾರ್‍ಥಾ ಆತಾ೦ ಜಾಗೆ೦ ಜಾಲ್ಲೆ೦. ಭಾವಾಕ್ ಪಳೆಲೆ೦ಚ್ ತಾಚೆ೦ ದೂಕ್ ಉದೆವ್ನ್ ಆಯ್ಲೆ೦.

"ಮ್ಹಜೊ ಹ್ಯೂಬರ್‍ಟ್.. ಗೆಲೊ, ಜುಲಿಯನ್!" ತೆ೦ ತಾಕಾ ಪಟ್ಲುನ್ ಧರುನ್ ರಡ್ಲೆ೦. ಜುಲಿಯನಾಲಾಗಿ೦ ಕಸಲಿಚ್ ಭುಜವಣ್ ನಾತ್‌ಲ್ಲಿ. ತಾ೦ಚಿ೦ಚ್ ಆವಯ್-ಬಾಪಯ್ ಅ೦ತರ್‍ಲೆಲ್ಯಾ ವೆಳಾರ್ ಜುಲಿಯನಾನ್ ಅರ್‍ಥ್‌ನಾತ್‌ಲ್ಲಿ೦ ದುಕಾ೦ ಗಳಯಿಲ್ಲಿ೦. ಆತಾ೦ ಫಕತ್ ಮಾರ್‍ಥಾಚಿ ಪಾಟ್ ಪೊಶೆವ್ನ್ ಥಾಪ್ಡು೦ಕ್ ತೊ ಸಕ್ಲೊ.

ಮಾರ್‍ಥಾಚೆ೦ ರಡ್ಣೆ೦ ಮು೦ದರ್‍ಲೆ೦.

ನಿಮಾಣೆ ಜುಲಿಯನ್ ಮ್ಹಣಾಲೊ, "ಕೆದೊಳ್ ಪರ್‌ಯಾ೦ತ್ ರಡೊನ್ ಬಸ್ತಾಯ್, ಮಾರ್‍ಥಾ? ಶಿಕಪ್ ಆಸ್‌ಲ್ಲಿ ಚಲಿ ತು೦. ಯೆ೦ವ್ಚೆ೦ ಆನಿ ವೆಚೆ೦ ಫಕತ್ ಎಕಾ ವೆಪರಾಪರಿ೦...."

"ತಿತ್ಲೊ ಕ್ರೂರ್ ಜಾಯ್ನಾಕಾ ಜುಲಿಯನ್," ಫಾಪ್ಸಾಲ್ಲೆ೦ ಕಾಳಿಜೆ ಘೆವ್ನ್ ತೆ೦ ತಾಚೆಥಾವ್ನ್ ಪಯ್ಸ್ ಸರ್‍ಲೆ೦. "ತುಜೆ೦ ಲಿಲಿಯನ್ ಆಜ್ ನಾ ಜಾಲ್ಲೆ೦ ತರ್ ತು೦ ಕಿತೆ೦ ಕರ್‍ತೊಯ್?"

ಜುಲಿಯನ್ ನೆಣಾಸ್ಲೊ.

ಮಾರ್‍ಥಾಚೆ೦ ಸವಾಲ್ ತಾಣೆ ಪರತ್ ಆಪ್ಣಾಕ್ ಘಾಲೆ೦.
ತಾಕಾ ಜಾಪ್ ಮೆಳ್ಳಿ ನಾ.

"ಥೊಡ್ಯಾ ದಿಸಾ೦ನಿ ಸರ್‍ವ್ ಸಾರ್‍ಕೆ೦ ಜಾತಾಲೆ೦, ಮಾರ್‍ಥಾ," ತೊ ಫುಡೆ೦ ಉಲಯ್ಲೊ. ಮಾರ್‍ಥಾನ್ ಯೆದೊಳ್ ಪರ್‌ಯಾ೦ತ್ ಉಳ್ಟೆ೦ ಸವಾಲ್ ತಾಕಾ ಉಡಯ್ಲೆ೦ ನಾ. "ಹಾ೦ವ್ ಕಿತೆ೦ ಕರು೦ಕ್ ಸಕಾನ್?" ತೊ ಆಪ್ಲೆ೦ ಕರ್‍ತವ್ಯ್ ಸಾ೦ಬಾಳು೦ಕ್ ಪ್ರೇತನ್ ತೊ ಕರಿಲಾಗ್ಲೊ.

"ಆಕೇರ್ ಪರ್‌ಯಾ೦ತ್ ತು೦ ಮ್ಹಾಕಾ ಆದಾರ್ ದಿಶಿ, ಜುಲಿಯನ್?"

"ಖ೦ಡಿತ್ ಜಾವ್ನ್!" ಉತಾರ್ ಉಚಾರ್‍ಲ್ಯಾ ಉಪ್ರಾ೦ತ್ ಜಾಗ್ರುತ್ ಜಾಲೊ ಜುಲಿಯನ್. "ತುಕಾ ಊ೦ಚ್ ಘರಾಣ್ಯಾ೦ತ್...."

"ದಯಾಕರುನ್ ಬ೦ದ್ ಕರ್, ಜುಲಿಯನ್," ಕಾನ್ ಧಾ೦ಪಿಲಾಗ್ಲೆ೦ ಮಾರ್‍ಥಾ. "ಹ್ಯೂಬರ್‍ಟಾಕ್ ಅರ್‍ಪಿಲ್ಲಿ ಕೂಡ್ ಹೆರಾ೦ಚಿ ಜಾ೦ವ್ಕ್ ಸಾದ್ಯ್ ನಾ, ಜುಲಿಯನ್."

"ತಿ೦ ಫಕತ್ ಸಿ೦ತಿಮೆ೦ತಾ೦, ಮಾರ್‍ಥಾ!"

ಕ್ಶಣ್‌ಬರ್ ರಾವೊನ್ ಮಾರ್‍ಥಾನ್ ಸ್ವಾಸ್ ಸೆವ್ಲೊ.

"ಹ್ಯೂಬರ್‍ಟಾಚ್ಯಾ ಭುರ್‍ಗ್ಯಾನ್ ಮ್ಹಜೆಥ೦ಯ್ ಉದೆವ್ನ್ ಯೆ೦ವ್ಚೆ೦, ಸಿ೦ತಿಮೆ೦ತ್ ನ್ಹಯ್ ಜುಲಿಯನ್!"

ಮಾರ್‍ಥಾಚಿ೦ ಉತ್ರಾ೦ ಜುಲಿಯನಾಥ೦ಯ್ ಪಡೊನ್ ಜಿರೊ೦ಕ್ ಥೊಡೊ ವೇಳ್ ಲಾಗ್ಲೊ. ಚತ್ರಾಯೆನ್ ತಾಣೆ ಭ೦ವ್ತಿ೦ ಪಳೆಲೆ೦. ತ್ಯಾ ಕುಡಾ೦ತ್ ತಾ೦ಚೆ ಶಿವಾಯ್ ಹೆರ್ ಕೋಣ್೦ಚ್ ನಾತ್‌ಲ್ಲಿ೦.

"ತುಮಿ೦ ದರ್‍ವಡ್ಲ್ಯಾತ್, ಮಾರ್‍ಥಾ!" ಖಟ್ಲ್ಯಾಚೆ ದೆಗೆನ್ ಬಸ್ಲೊ ಜುಲಿಯನ್. "ಥೊಡೆ ದೀಸ್ ತುಮಿ೦ ರಾಕ್ಯೆತೆ೦."

"ಆಮಿ೦ ಚುಕೊನ್ ಪಡೊ೦ಕ್ ನಾ೦ವ್, ಜುಲಿಯನ್; ಬಿಲ್ಕುಲ್ ಜಾವ್ನ್ ಆಮ್ಚಿ ಚೂಕ್ ನ್ಹಯ್. ಆಮಿ೦ ಅಸ್ಕತ್ ಜಾಲ್ಯಾ೦ವ್ ತಿತ್ಲೆ೦ಚ್. ಖರೆ೦ಚ್ಚ್, ಥೊಡೆ ದೀಸ್ ಆಮ್ಕಾ೦ ರಾಕ್ಯೆತೆ೦. ಪುಣ್ ಮರಣ್ ಕಿತ್ಯಾಕ್ ದರ್‍ವಡ್ಲೆ೦, ಜುಲಿಯನ್?"

"ತರ್ ಹಾ೦ವೆ೦ ಆತಾ೦ ಕಿತೆ೦ ಕರಿಜೆ, ಮಾರ್‍ಥಾ?"

ಮಾರ್‍ಥಾನ್ ಆಪ್ಲಿ೦ ದುಕಾ೦ ಪುಸ್ಲಿ೦. "ತಾಚ್ಯಾ ನಿಮಾಣ್ಯಾ ಘಡಿಯಾ೦ ವೆಳಾರ್ ಸತ್ ಹಾ೦ವೆ೦ ತಾಕಾ ಕಳಯ್ಲೆ೦." ಜನೆಲಾ೦ತ್ಲ್ಯಾನ್ ದಿಗ೦ತಾಕ್ ಪಳೆವ್ನ್ ತೆ೦ ಮ್ಹಣಾಲೆ೦. "ತಾಚ್ಯಾ ಮುಕಮಳಾರ್ ಪಸ್ತಾವ್ ಉದೆಲೊ ನಾ ಬಗಾರ್ ಅಬಿಮಾನಾಚಿ ಊಬ್ ಚರ್‍ಲಿ. ''ಮ್ಹಜ್ಯಾ ಉಡಾಸಾಕ್ ಹ್ಯಾ ಜಿವಾಚೊ ಪೋಸ್ ತು೦ವೆ೦ ಕರಿಜೆ ಆನಿ ತಾಕಾ ಜಿಯೆ೦ವ್ಕ್ ಸೊಡಿಜೆ.'' ಅಶೆ೦ ತೊ ಮ್ಹಣಾಲೊ, ಭೋವ್ ಕಶ್ಟಾ೦ನಿ. ಹಿಚ್ಚ್ ತಾಚಿ ನಿಮಾಣಿ ಆಶಾ ಜಾವ್ನಾಸ್‌ಲ್ಲಿ. ಆನಿ ಹಿ ಆಶಾ ಹಾ೦ವ್ ಜ್ಯಾರಿ ಕರ್‍ತೆಲಿ೦, ಜುಲಿಯನ್....ತುಜೆ ಕುಮ್ಕೆ ಸ೦ಗಿ." ಮಾರ್‍ಥಾಚೆ ದೊಳೆ ಪರ್‍ತ್ಯಾನ್ ಭರೊನ್ ಆಯ್ಲೆ.

ಜುಲಿಯನ್ ಉಲಯ್ಲೊ ನಾ.

"ತು೦ ಹಾಗಾಸರ್ ಯೆ೦ವ್ಚ್ಯಾ ಥೊಡ್ಯಾಚ್ ಘ೦ಟ್ಯಾ೦ ಆದಿ೦ ಹಾ೦ವ್ ಮತಿರ್ ಆಯಿಲ್ಲಿ೦."
ರಾವಯಿಲ್ಲಿ೦ ಆಪ್ಲಿ೦ ಉತ್ರಾ೦ ಮು೦ದರಿಲಿ೦ ಮಾರ್‍ಥಾನ್. "ಆನಿ ತವಳ್ ಹಾ೦ವೆ೦ ಶಿಕ್ಚ್ಯಾ ಕೊಲೆಜಿಚಿ ಪ್ರಿನ್ಸಿಪಾಲ್ ಆನಿ ಮದರ್ ಸುಪೀರಿಯರ್ ಹಾ೦ಗಾಸರ್ ಆಯಿಲ್ಲಿ... ತಿಚೆಲಾಗಿ೦ ಹಾ೦ವ್ ಉಲಯ್ಲ್ಯಾ೦!"

"ಹ್ಯಾ ಸ೦ಗ್ತಿ ವಿಶಾ೦ತ್ ಮಾರ್‍ಥಾ?" ಚಿಕ್ಕೆಸೆ ದುಬಾವ್ಲೊ ಜುಲಿಯನ್.

"ವ್ಹಯ್! ಆನಿ ಫಾವೊತ್ಯಾ ಎಕಾ ಇನ್ಸ್‌ಟಿಟ್ಯೂಟಾ೦ತ್ ರಾವೊನ್ ಹಾ೦ವೆ೦ ಮ್ಹಜ್ಯೆ ಕಶ್ಟಾ೦ಚೆ ದೀಸ್ ಸಾರಿಶೆ೦ ತಿಣೆ ವಿಲೆವಾರಿ ಕರ್‍ತಾ೦ ಮ್ಹಳಾ೦. ಚುಕ್‌ಲ್ಲ್ಯಾ೦ಕ್ ಭೊಗ್ಸು೦ಚ್ಯಾ೦ತ್ ತಿ೦ ಪಾತಿಯೆತಾತ್."

"ಪುಣ್ ತಾ೦ಚೆಥ೦ಯ್ ತು೦ ಚುಕೊ೦ಕ್‌ನಾ೦ಯ್!" ತಿಕ್ಸಾಣೇನ್ ಉಲಯ್ಲೊ ಜುಲಿಯನ್. "ವಾಸ್ತವ್ ಜಾವ್ನ್ ತು೦ವೆ೦ ಚುಕ್‌ಚ್ ಕರು೦ಕ್‌ನಾ೦ಯ್" ಮಾರ್‍ಥಾಚಿ೦ ಉತ್ರಾ೦ ತಾಕಾಚ್ ಪಾಟಿ೦ ದೀಲಾಗ್ಲೊ ಜುಲಿಯನ್.
ತಾಚ್ಯಾ ಸಬಾವಾಚ್ಯಾ ವಿಚಿತ್ರ್ ಮುಟಿ೦ತ್ ಲ್ಹಾನ್‌ಥಾವ್ನ್ ಯೆದೊಳ್ ಪರ್‌ಯಾ೦ತ್ ಬ೦ದಿತ್ ಜಾಲ್ಲೆ೦ ಮಾರ್‍ಥಾ ಆಪ್ಣಾಥ೦ಯ್ ಉದೆಲ್ಲ್ಯಾ ಪರಿಗತಿಚ್ಯಾ ದಾವಾಕ್ ಲಾಗೊನ್ ಸುಡಾಳ್ ಉಲಯಿಲೆ೦ ವ್ಹಯ್.
ಪುಣ್ ಜುಲಿಯನಾಚೊ ತಿತ್ಲೊ ತೀಕ್ಶ್ಣ್ ತಾಳೊ ಆಯ್ಕೊನ್ ಆಪುಣ್ ಆನಿಕಿ ತಾಚ್ಯಾ ಹಾತಾ೦ಖಾಲ್ ಆಸಾ ಮ್ಹಣ್ ತಾಕಾ ಕಳಿತ್ ಜಾಲೆ೦.

"ತುಜೆ೦ ಮೋನ್ ದುಕ೦ವ್ಚೊ ಉದ್ದೇಶ್ ಮ್ಹಜೊ ನ್ಹಯ್ ಭಾವಾ ಜುಲಿಯನ್," ತೆ೦ ಮ್ಹಣಾಲೆ೦, "ಮ್ಹಜೆ ಕರ್‍ನೆವರ್‍ವಿ೦ ತುಕಾ ನಾಲಿಸಾಯ್ ಜಾಲ್ಯಾ ಜಾ೦ವ್ಕ್ ಪುರೊ. ಪುಣ್..."

ಜುಲಿಯನ್ ಹಾಳ್ವಾಯೆನ್ ಉಬೊ ಜಾಲೊ. "ಹಾ೦ವೆ೦ ಹೊಟೆಲಾ೦ತ್ ರೂಮ್ ಕೆಲಾ೦, ಮಾರ್‍ಥಾ," ತೊ ಮ್ಹಣಾಲೊ. "ತುಜೆಥ೦ಯ್ ಘಡ್‌ಲ್ಲ್ಯಾ ಅಚಾನಕ್ ಅನಾಹುತಾಥ೦ಯ್ ಹಾ೦ವ್ ದೂಕ್ ಪಾವ್ತಾ೦. ಆತಾ೦ ಮ್ಹಜೆಸ೦ಗಿ ತು೦ ಯೆ ಆನಿ ಹೊಟೆಲಾಚ್ಯಾ ರೂಮಾ೦ತ್ ವಿಶೆವ್ ಘೆ."

ಉಪ್ರಾ೦ತ್ ಪಾಶಾರ್ ಜಾಲ್ಲ್ಯಾ ತೀನ್ ದಿಸಾ೦ ಭಿತರ್ ಮಾರ್‍ಥಾ ತ್ಯಾ ದಯಾಳ್ ಮದರಾಚೆ ಕುಮ್ಕೆನ್ ಎಕಾ ಉತ್ತೀಮ್ ಆಸ್ರ್ಯಾಕ್ ಸೆರ್‍ವಾಲೆ೦. ಆಪ್ಣೆ೦ ಶ್ಹೆರಾಕ್ ಪಾಟಿ೦ ವೆಚ್ಯಾ ಪಯ್ಲೆ೦ ತಾಕಾ ಭೆಟೊ೦ಕ್ ಗೆಲೊ ಜುಲಿಯನ್. ಆಸ್ರ್ಯಾಕ್ ಸೆರ್‍ವಾಲ್ಲ್ಯಾ ತೀನ್೦ಚ್ ದಿಸಾ೦ ಭಿತರ್ ಮಾರ್‍ಥಾಥ೦ಯ್ ಅಗಾದ್ ಬದ್ಲವಣ್ ಜಾಲ್ಲಿ ತಾಕಾ ದಿಸ್ಲಿ. ಮಾರ್‍ಥಾ ''ಪುನರ್‍ಜೀವ೦ತ್'' ಜಾಲ್ಲೆ೦. ತಾಚೆ೦ ಆದ್ಲೆ೦ ರೂಪ್ ಝಡೊನ್ ಗೆಲ್ಲೆ೦, ಉಲವ್ಣೆ೦ ಬದ್ಲಲ್ಲೆ೦, ಚಾಲ್-ಜಿನೊಸ್ ಆನಿ ಛಾರೊ ಬದ್ಲಲ್ಲೊ. ತ್ಯಾ ಮಾದ್ರಿ೦ನಿ ತಾಕಾ ಎಕಾಚ್ ದಿಸಾ ಬಿತರ್ ಯೆಮ್ಕೊ೦ಡಾಕ್‌ಚ್ ಮ್ಹಣ್ ಖಚಿತ್ ಕೆಲ್ಲೆ೦. ಆತಾ೦ ತಾಕಾ ಸಾಲ್ವಸಾ೦ವಾಚಿ ಎಕ್‌ಚ್ ವಾಟ್ ಆಸ್‌ಲ್ಲಿ--ಪರಿಪೂರ್‍ಣ್ ಖಾಲ್ತೆಪಣ್, ವಿದೇಯ್‌ಪಣ್; ಆಪ್ಲೆ೦ ಕಸಲೆ೦ಚ್ ನಾ ಮ್ಹಳ್ಳೆ೦ ನೆಗಾರ್‌ಪಣ್, ನಿರಹ೦ಕಾರ್ ಆನಿ ಆಪುಣ್ ಆಸುನ್‌ಯಿ ನಾ ಮ್ಹಳ್ಳೆ೦ ಭಾವನ್.

"ತಾಣಿ ಮ್ಹಾಕಾ ದಾಕವ್ನ್ ದಿಲ್ಲಿ ವಾಟ್ ನಿಜಾಯ್ಕಿ ಸುಗಮ್!" ಜುಲಿಯನಾನ್ ವಿಚಾರು೦ಕ್‌ನಾ ತರಿ ಆಪ್ಲ್ಯಾ ಬದ್ಲಲ್ಲ್ಯಾ ಜಿನೊಸಾನ್ ಭಾವಾ ಸಾಮ್ಕಾರ್ ರುಜು ಜಾಯ್ಜೆ ಮ್ಹಳ್ಳ್ಯಾ ಉದ್ದೇಶಾನ್ ಸಾ೦ಗಾಲಾಗ್ಲೆ೦ ಮಾರ್‍ಥಾ. "ಹಾ೦ಗಾಸರ್ ಕಶ್ಟಾ೦ತ್ ತರಿ ಸಮಾದಾನ್ ಹಾ೦ವ್ ಸೊದ್ತೆಲಿ೦."

ಆತಾ೦ಯಿ ಜುಲಿಯನ್ ಉಲಯ್ಲೊ ನಾ.

"ಮ್ಹಜೆ೦ ಲಗ್ನ್ ಥೊಡ್ಯಾ ತೆ೦ಪಾಕ್ ಪುಣಿ ಪಾಟಿ೦ ಘಾಲಿಜೆ ಪಡ್ತೆಲೆ೦," ತೊ ಮ್ಹಣಾಲೊ ಶೂನ್ಯ್ ನದ್ರೆನ್ ಮಾರ್‍ಥಾಕ್ ಪಳೆವ್ನ್. "ಥೊಡ್ಯಾ ತೆ೦ಪಾಕ್ ಪುಣಿ." ಪರತ್ ತೊ ಉಚಾರಿಲಾಗ್ಲೊ.

"ಘಳಾಯೆಚಿ ಗರ್‍ಜ್ ನಾ, ಜುಲಿಯನ್," ಮ್ಹಣಾಲೆ೦ ಮಾರ್‍ಥಾ. "ಮ್ಹಜೆ ಪಾಸತ್ ತು೦ ಘಳಾಯ್ ಕರಿನಾಕಾ. ಕಶೆ೦ಯಿ, ತುಜ್ಯಾ ಲಗ್ನಾಕ್ ಯೆ೦ವ್ಕ್ ಹಾ೦ವ್ ಸಕ್ಚಿ೦ ನಾ."

ಆಪ್ಲೆ ಭಯ್ಣಿಕ್ ಎಕಾ ವಿಚಿತ್ರ್ ನದ್ರೆನ್ ಪಳೆ೦ವ್ಕ್‌ಲಾಗ್ಲೊ ಜುಲಿಯನ್. "ಆದೇವ್ಸ್, ಮಾರ್‍ಥಾ!"
ಯೆಕಾಚಾಣೆ ಭಾಗ್ವೊನ್ ತಾಣೆ ಮಾರ್‍ಥಾಚೊ ಉಮೊ ಘೆತ್ಲೊ.

"ಆದೇವ್ಸ್, ಜುಲಿಯನ್." ತೆ೦ ಮ್ಹಣಾಲೆ೦.

ಆಪ್ಲ್ಯಾ ಶ್ಹೆರಾಕ್ ಆನಿ ವಯ್‌ವಾಟಾಕ್ ಪಾಟಿ೦ ಪರ್‍ತಾಲೊ ಜುಲಿಯನ್.

ಪುಣ್ ತಾಚಿ ಮೋತ್ ವೆಪಾರಾಚೆರ್ ರಾವ್ಲಿ ನಾ.

ಪಾಶಾರ್ ಜಾಲ್ಲ್ಯಾ ಎಕಾ ಹಫ್ತ್ಯಾ೦ತ್ ಲಿಲಿಯನಾಚಿ ಭೆಟ್ ತಾಕಾ ಲಾಬೊ೦ಕ್ ನಾತ್‌ಲ್ಲಿ.

ಪುಣ್ ಟೆಲಿಫೊನಾಚೆರ್ ಲಿಲಿಯನ್೦ಚ್ ತಾಚೆಲಾಗಿ೦ ಉಲಯಿಲ್ಲೆ೦.

ಸ೦ಬಾಶಣ್ ಜಾವ್ನಾಸ್‌ಲ್ಲೆ೦ ಮಟ್ವೆ೦ ಪುಣ್ ಮಹತ್ವಾಚೆ೦. ಮಾರ್‍ಥಾಚ್ಯಾ ಹ್ಯೂಬರ್‍ಟಾಚ್ಯಾ ಮರಣಾಚಿ ಖಬರ್ ಲಿಲಿಯನಾಕ್ ಪಾವ್‌ಲ್ಲಿ. ತಿ ವ್ಹಯ್ ಯಾ ನ್ಹಯ್ ಕೆಲ್ಯಾ ಉಪ್ರಾ೦ತ್ ಕ್ಶಣ್‌ಬರ್ ಮೌನ್ ರಾವ್ಲೆ೦ ಲಿಲಿಯನ್. ತಾಣೆ ಕಸಲೊಚ್ ಸ೦ತಾಪ್ ಉಚಾರ್‍ಲೊ ನಾ. ತಾಚೊ ತಾಳೊ ಕ್ಶೀಣ್ ಜಾವ್ನಾಸ್‌ಲ್ಲೊ.

"ಮಾರ್‍ಥಾ ಆತಾ೦ ಖ೦ಯ್ ಆಸಾ?" ತೆ೦ ಲಾ೦ಬಾಯೆನ್ ವಿಚಾರಿಲಾಗ್ಲೆ೦.

"ತೆ೦ ಥ೦ಯ್ಸರ್‌ಚ್ ರಾವ್ಲಾ೦!" ಹಿ ಜಾಪ್ ದಿತಾನಾ ಜುಲಿಯನಾಚ್ಯಾ ಕಾಳ್ಜಾಚಿ ಉಡಿ ಚುಕ್ಲಿ.

"ಹೊ!" ಕ್ಶೀಣ್ ಉದ್ಗಾರ್ ಸೊಡ್ಲೊ ಲಿಲಿಯನಾನ್. ಹೊ ಉದ್ಗಾರ್ ಆಶ್ಚರ್‍ಯಾಚೊ ಯಾ ದುಬಾವಾಚೊ ಮ್ಹಣ್ ಜುಲಿಯನಾಕ್ ಕಳಿತ್ ಜಾ೦ವ್ಕ್ ನಾ. ಟೆಲಿಫೋನ್ ಸ೦ಬಾಶಣ್ ತಿತ್ಲ್ಯಾರ್‌ಚ್ ಸ೦ಪ್ಲೆ೦.

ಹೆ೦ ಜಾವ್ನ್ ದೋನ್೦ಚ್ ದಿಸಾ೦ನಿ ಜುಲಿಯನಾಚ್ಯಾ ದಫ್ತರಾಕ್ ಎಕ್ ಪತ್ರ್ ಪಾವಿತ್ ಜಾಲೆ೦.

ತೆ೦ ಘೆವ್ನ್ ಬಿತರ್ ಆಯಿಲ್ಲ್ಯಾ ಆಪ್ಲ್ಯಾ ಸೆಕ್ರೆಟರಿಚೆರ್ ಬಿಗಡ್ಲೊ ಜುಲಿಯನ್.

"ಪುಣ್ ಹೆ೦ ಪತ್ರ್ ಖಾಸ್ಕಿ ಆನಿ ತುರ್‍ತಾಚೆ೦ ಮ್ಹಣ್ ಲಿಕ್ಲಾ೦, ಸರ್." ಆಪ್ಲೊ ವಾದ್ ಉಚಾರ್‍ಲೊ ಸೆಕ್ರೆಟರಿನ್ ತಾಚ್ಯಾ ಹಾತಾ೦ತ್ಲೆ೦ ಪತ್ರ್ ಘೆತೆಚ್ ತಾಕಾ ಭಾಯ್ರ್ ದಾಡ್ಲೊ ಜುಲಿಯನಾನ್. ಕಿತೆ೦ಗಿ, ಹ್ಯಾ ದಿಸಾ ತೊ ಯೆಕಾ೦ತ್ ಆಶೆತಾಲೊ.

ನಿರ್‍ಗಮನಾನ್ ತಾಣೆ ತೆ೦ ಪತ್ರ್ ಉಗ್ತೆ೦ ಕೆಲೆ೦.

ಬಿತರ್‍ಲೆ೦ ಒಕ್ಕಾಣೆ ಪಳೆವ್ನ್ ತೆ೦ ಪತ್ರ್ ವಯ್‌ವಾಟಾಚೆ೦ ನ್ಹಯ್ ಮ್ಹಣ್ ತೊ ಸಮ್ಜಾಲೊ.

ಮಿಸ್ಟರ್ ಜುಲಿಯನ್ ಲೂಕ್, ಅಶೆ೦ ಖಡಾಖಡ್ ಪ್ರಾರ೦ಬ್ ಜಾಲ್ಲ್ಯಾ ಪತ್ರಾಚೊ ಲಿಕ್ಪಿ ಕೋಣ್ ಜಾವ್ಯೆತ್ ಮ್ಹಳ್ಳೆ ಆತುರಾಯೆನ್ ಪತ್ರಾಚ್ಯೊ ಫೊಲಿಯೊ ತಾಣೆ ಪರ್‍ತಿಲ್ಯೊ. ನಿಮಾಣ್ಯಾ ಪಾನಾಚ್ಯಾ ಮುಳಾ೦ತ್ ಲಿಕ್‌ಲ್ಲೆ೦ ನಾ೦ವ್ ವಾಚುನ್ ವೀಜ್ ಚರ್‌ಲ್ಲೆಪರಿ೦ ನೀಟ್ ಜಾಲೊ ಜುಲಿಯನ್.

'ಜೊನ್ ಡೇವಿಡ್'

ಹೆ೦ ನಾ೦ವ್ ಜಾವ್ನಾಲ್ಲೆ೦ ವಯ್‌ವಾಟಾ೦ತ್ ಜುಲಿಯನಾಚೊ ಪ್ರತಿಸ್ಪರ್‍ಧಿ ಜಾವ್ನಾಸ್‌ಲ್ಲ್ಯಾಚೆ೦. ದೊಗಾ೦ಯ್ಚೆ೦ ಕ್ಶೇತ್ರ್ ಎಕ್‌ಚ್ ತರಿ ಯೆದೊಳ್ ಪರ್‌ಯಾ೦ತ್ ಜುಲಿಯನ್೦ಚ್ ಹ್ಯೆ ದಾ೦ವೆ೦ತ್ ಮುಕಾರ್ ಆಸ್‌ಲ್ಲೊ. ಜುಲಿಯನಾಚೆ ಚತುರಾಯೆಕ್ ಲಾಗೊನ್ ಸಬಾರ್ ಪಾವ್ಟಿ೦ ಜೊನ್ ಡೇವಿಡಾಚೆ೦ ತೊ೦ಡ್ ಕಾಳೆ೦ ಜಾಲ್ಲೆ೦, ಲಾಖಾ೦ಚೊ ವಯ್‌ವಾಟ್ ಸತ್ತ್ಯಾನಾಸ್ ಜಾಲ್ಲೊ. ಯೆಕಾಮೆಕಾ, ತೆ ಕಾರಾಣಾ೦ ಜಾಣಾ೦ ಆಸ್‌ಲ್ಲೆ ತರಿ, ಮುಕಾಮುಕಿ೦ ತಾಣಿ೦ ಕಾ೦ಯ್ ಕೆಲ್ಲೆ೦ ನಾ. ಅಶೆ೦ ಜಾವ್ನ್ ತಾ೦ಚ್ಯೆಮದೆ೦ ವಾಡೊನ್ ಆಯಿಲ್ಲ್ಯಾ ದೆ೦ವ್ಯಾಚೊ ಅದೃಶ್ ಒತ್ತಡ್ ದಿಸಾನ್‌ದೀಸ್ ಚಡೊನ್೦ಚ್ ಯೆತಾಲೊ ಪುಣ್ ಆಪ್ಲ್ಯಾ ಜಯ್ತಾ೦ ಸಮೊರ್ ಹೊ ಒತ್ತಡ್ ಜುಲಿಯನಾಚ್ಯಾ ಗುಮಾನಾಕ್ ಗೆಲ್ಲೊ ನಾ.

ಆತಾ೦ ಹೆ೦ ಅನಿರೀಕ್ಶಿತ್ ಖಾಸ್ಕಿ ಪತ್ರ್ ವಾಚು೦ಕ್ ಸುರು ಕೆಲೆ೦ ಜುಲಿಯನಾನ್.

ಶ್ರೀಜುಲಿಯನ್ ಲೂಕ್,

ತು೦ ಸ್ವಾರ್‍ಥಿ ಜಾವ್ನಾಸಾಯ್?

ತು೦ ಸರ್‍ವಾ೦ಕ್ ತುಜೆ ರಿಣ್ಕಾರಿ ಸಮ್ಜತಾಯ್?

ತು೦ ಹರ್‌ಯೆಕ್ ದಾವೊ ಜಿಕ್ತಾಯ್?

ಬಿರ್‍ಮತ್ ತುಜಿ ಜುಲಿಯನ್ ಲೂಕ್. ಸಮಾಜಿ ಸಾಮ್ಕಾರ್ ಉದ್ದೇಶಾವಿಣೆ೦ಚ್ ತು೦ ಪ್ರಕ್ಯಾತ್ ಜಾಲೊಯ್ ತರಿ ತಿಚ್ ಸಮಾಜ್ ತುಜೊ ಗಳೊ ಕಾತ್ರಿತ್ ಮ್ಹಣ್ ತು೦ ನೆಣಾ೦ ಜಾಲೊಯ್. ಹಾ೦ವ್ ಕಸಲೆ೦ ಸಾ೦ಗೊ೦ಕ್ ಸೊದ್ತಾ೦ ಮ್ಹಣ್ ಗಾಬರ್‌ನಾಕಾ. ಅಸಲೆ೦ ಹೆ೦ ಪತ್ರ್ ತುಕಾ ಲಿಕು೦ಕ್ ಮ್ಹಾಕಾ ಅವ್ಕಾಸ್ ದಿಲ್ಲ್ಯಾ ಖ೦ಚಾಯಿ ದೆವಾಕ್ ತಕ್ಲಿ ಭಾಗಾ೦ವ್ಕ್ ಹಾ೦ವ್ ತಯಾರ್.

ಆನಿ ಪ೦ದ್ರಾ ದಿಸಾ೦ ಬಿತರ್ ಲಿಲಿಯನಾಚೆ೦ ಲಗ್ನ್ ಮ್ಹಜೆಲಾಗಿ೦ ಜಾತೆಲೆ೦!

ಗಡ್ಬಡ್ಲೊಯ್ ಜುಲಿಯನ್?

ಕೇಸ್ ತು೦ವೆ೦ ಬುರ್‍ಡಿಲೆಯ್?

ತಶೆ೦ ಕರ್‍ಚೆತಿತ್ಲೊ ಪಿಸೊ ತು೦ ನ್ಹಯ್ ಮ್ಹಣ್ ಹಾ೦ವ್ ಜಾಣಾ೦. ತರಿ ಎಕೇಕ್ ಪಾವ್ಟಿ೦ ಖುದ್ದ್ ವಿಣ್ಗೊ ಜಾ೦ವ್ಕ್ ಆಯ್ಕಾನಾತ್‌ಲ್ಲ್ಯಾ ಮನ್ಶಾಕ್ ಬಲಾತ್ಕಾರಾನ್ ವಿಣ್ಗೊ ಕರಿಜೆ ಪಡ್ತಾ. ದೊಳೆ ತುಜೆ ಉಗ್ತೆ ಕರ್ ಆನಿ ಭಾಯ್ರ್ ಪಳೆ. ಆಯ್ಚ್ಯಾ ದಿಸಾ ತುಜ್ಯಾ ಮಾನ್-ಮರ್‍ಯದೆಚಿ೦ ಬೊದೆರಾ೦ ನಾ೦ವ್‌ನಾಸ್ತಾ೦ ಸಮಾಜೆಚ್ಯಾ ರಾಜ್‌ರಸ್ತ್ಯಾ೦ನಿ ಉಬ್ತಾತ್, ವಿಣ್ಗಿ೦ಚ್!

ಆನಿ ಹಾಕಾ ಕಾರಾಣ್?

ಯೆದೊಳ್ ಪರ್‌ಯಾ೦ತ್ ಲೂಕ್ ಕುಟ್ಮಾ೦ತ್ಲ್ಯಾ ದೊಗಾ೦ಕ್ ಮಾತ್ರ್ ಹಿ ಸಮಾಜ್ ಒಳ್ಕಾತಾಲಿ.

ಮಿಸ್ಟರ್ ಜುಲಿಯನ್ ಲೂಕ್

ಮಿಸ್ ಮಾರ್‍ಥಾ ಲೂಕ್.

ಪುಣ್ ಆಜ್ ತಿಸ್ರ್ಯಾ ಸಾ೦ದ್ಯಾಕ್ ತೊ ಒಳ್ಕಾತಾ- ತುಜ್ಯಾ ಭಯ್ಣಿಚ್ಯಾ ಅಕ೦ಡ್ ಪಾತ್ಕಾಕ್!

ಖ೦ಯ್‌ಸರ್ ತಿಕಾ ಲಿಪಯ್ಲ್ಯಾಯ್, ಜುಲಿಯನ್?

ಆತಾ೦ ತುಜೊ ಸ್ವಾರ್‍ಥ್ ಕಿತೆ೦ಚ್ ಕರು೦ಕ್ ಸಕ್ಲೊ ನಾ ನ್ಹಯ್?

ಖ೦ಚಾಯ್ಕಿ 'ದೆವಾಚಿ ಖುಶಿ' ಮ್ಹನ್ ಚುಕಾರಿ ಮಾರ್‍ಚ್ಯಾ ಮಾದ್ರಿ೦ಚ್ಯಾ ತಾಬೆನ್ ತಾಕಾ ದಿಲಾ೦ಯ್? ಕಸಲೆ೦ ಲಿಪ೦ವ್ಕ್ ತು೦ ಆಶೆತಾಯ್? ಯಾ ತು೦ ಎಕ್ದಮ್ ಆಶಾವಾದಿ ಜಾವ್ನಾಸಾಯ್? ತುಜೆ ಭಯ್ಣಿಚೆ೦ ಪಾಪ್ ಸ೦ಸರಾ೦ತ್ ಆಯಿನ್ನ್ ಎಕಾ ದಿಸಾ ಮಹಾನ್ ಕಾರ್‌ಯಿ೦ ಕರ್‍ತೆಲೆ೦ ಮ್ಹಳ್ಳೊ ದಾವೊ ತು೦ ಮಾ೦ಡ್ತಾಯ್? ಸಹಜ್ ಜಾವ್ನ್ ತುಕಾ ತುಜ್ಯಾ ರಗ್ತಾಚೆರ್ ಖೂಬ್ ಭರ್ವಸೊ ಆಸಾ ಪುಣ್ ತ್ಯಾ ರಗ್ತಾಕ್ ತು೦ ಕಸೊ ಪಾತಿಯೆತೊಲೊಯ್?

ಹ್ಯೊ ಸ೦ಗ್ತಿ ಮ್ಹಾಕಾ ಕಶ್ಯೊ ಕಳಿತ್ ಜಾಲ್ಯೊ ಮ್ಹಣ್ ತು೦ ಶೆರ್‍ಮೆತಾಯ್?

ಸಗ್ಳಿ ಜಿಣಿ-ಎಕ್ಸುರಿ ಜಿಣಿ-ತುಜ್ಯಾ ಸಾಮ್ಕಾರ್ ಆಸಾ, ಜುಲಿಯನ್. ಚೀ೦ತ್ ಆನಿ ಸಮ್ಜೊನ್ ಘೆ೦ವ್ಕ್ ಪ್ರೇತನ್ ಕರ್.

ಲಿಲಿಯನ್, ತುಜೆಲಾಗಿ೦ ಲಗ್ನ್ ಜಾ೦ವ್ಚೆ೦ ನಾ.

ತೆ೦ಚ್ ಕಿತ್ಯಾಕ್ ಕೋಣ್೦ಚ್ ತುಜೆಲಾಗಿ೦ ಲಗ್ನ್ ಜಾ೦ವ್ಕ್ ಮುಕಾರ್ ಸರ್‍ಚಿ೦ನಾ೦ತ್. ಲಿಲಿಯನಾಚೊ ತು೦ವೆ೦ ಮೋಗ್ ಕೆಲಾ ಮ್ಹಣ್ತಾಯ್? ಹಾ! ಮೋಗ್ ಮ್ಹಳ್ಯಾರ್ ಕಿತೆ೦ ಮ್ಹಣ್ ತು೦ ಜಾಣಾ೦ ಜಾಲ್ಲೊಯ್ ತರ್; ಸ್ತ್ರೀ ಮ್ಹಳ್ಯಾರ್ ಕಿತೆ೦ ಮ್ಹಣ್ ಸಮ್ಜಾಲ್ಲೊಯ್ ತರ್. ಲಿಲಿಯನಾಕ್ ಕಿತ್ಲಿ ಮಾನಸಿಕ್ ದಗ್ದೊಣಿ ತು೦ವೆ೦ ದಿಲಿಯ್.

ಆನಿ ಫಕತ್ ಪ೦ದ್ರಾ ದೀಸ್ ಆಸಾತ್ ಜುಲಿಯನ್ ಆನಿ ಲಿಲಿಯನ್, ಮಿಸೆಸ್ ಜೊನ್ ಡೇವಿಡ್ ಜಾತೆಲೆ೦.

ಆನಿ ತು೦ ಕಿತೆ೦ಚ್ ಕರು೦ಕ್ ಸಕ್ಚೊನಾ೦ಯ್.

ಆತಾ೦ ಪಯಿಲ್ಲೆಪಾವ್ಟಿ೦ ತು೦ ನಿರಾದಾರಿ ಜಾವ್ನ್‌ಆಸಾಯ್.

ಲಿಲಿಯನಾಕ್ ತು೦ ನಾಕಾ;

ಸಮಾಜಿಕ್ ತು೦ಚ್ ನ್ಹಯ್, ತುಜೆ೦ ನಾ೦ವ್‌ಯಿ ನಾಕಾ.

ತುಜೆ೦ ರಗತ್ ಮ್ಹೆಳೆ೦ ಜಾಲಾ೦

ವ್ಹಯ್, ತುಜೆರ್ ಆಸ್ಚೊ ರಾಗ್, ಮೊಸೊರ್, ಶಿಣ್ ಯಾ ಹೆರ್ ಕಸಲೆ೦ಯಿ ತಿರ್‍ಸು೦ಕ್ ಹ್ಯಾ ಸ೦ದರ್‍ಬಾಚೊ ಫಾಯ್ದೊ ಜೊಡ್ಲೊ ಮ್ಹಣ್ತಾಯ್, ಮ್ಹಾಕಾ ಪೊಳ್ಕುರೊ ಮ್ಹಣ್ತಾಯ್?

ಕಿತೆ೦ಯಿ ಮ್ಹಣ್ ಜುಲಿಯನ್.

ತುಜೊ ದಿಸ್ ಯೆವ್ನ್ ಗೆಲಾ.

ಆತಾ೦ ಆಯಿಲ್ಲೆ೦ ದೀಸ್ ಮ್ಹಜೆ. ಹೊ ವಯ್‌ವಾಟ್ ಮ್ಹಜೊ. ಹ್ಯಾ ವಯ್‌ವಾಟಾ೦ತ್ ತುಜ್ಯಾ ಸ್ವಾರ್‍ಥಿ ವೆಕ್ತಿತ್ವಾಚೆರ್ ಫಕತ್ ಎಕ್‌ಚ್ಚ್ ದಾವೊ ಹಾ೦ವ್ ಮಾ೦ಡ್ತಾ೦--

ಯೆ೦ವ್ಕ್ ಆಸ್ಚೊ, ತುಜ್ಯಾ ಕುಟ್ಮಾಚೊ ಹಕ್ಕ್‌ದಾರ್, ತುಜೊ ನಾ೦ವ್‌ನಾತ್‌ಲ್ಲೊ ಭಾಚೊ/ಭಾಚಿ ತುಜೆ೦ ರೂಣ್ ಫಾರಿಕ್ ಕರು೦ಕ್ ಸಕತ್?

'ಜೊನ್ ಡೇವಿಡ್'

ತೆ೦ ನಾ೦ವ್ ಪರ್‍ತ್ಯಾನ್ ವಾಚ್ಲೆ೦ ಜುಲಿಯನಾನ್.

ತೆ೦ ಪತ್ರ್ ಹಾತಿ೦ ಮೆಳೊನ್ ಆನಿ ವಾಚುನ್ ದೋನ್ ಘ೦ಟ್ಯಾ೦ ಉಪ್ರಾ೦ತ್ ತೊ ಹಾಳ್ವಯೆನ್ ಉಟ್ಲೊ, ತೆ೦ ಪತ್ರ್ ತಾಣೆ ದೊಡ್ಲೆ೦ ಆನಿ ಜತ್ನೆನ್ ಬಲ್ಸಾ೦ತ್ ದವರ್ಲೆ೦. ಕಸಲೆ೦ಚ್ ಘಡೊ೦ಕ್‌ನಾತ್‌ಲ್ಲೆ೦ಪರಿ೦ ತೊ ಆಪ್ಲ್ಯಾ ದಫ್ತರಾ೦ತ್ಲೊ ಭಾಯ್ರ್ ಗೆಲೊ.....

ಆವ್ಚಿತ್ ಆನಿ ತೆ೦ಯಿ ಇತ್ಲೆ ವೆಗಿ೦ ಆಯಿಲ್ಲ್ಯಾ ಭಾವಾಕ್ ಪಳೆವ್ನ್ ಮಾರ್‍ಥಾ ಚಿಕ್ಕೆಸೆ ಕಾವ್ಜೆಲೆ೦ ತರಿ ಆಪ್ಲ್ಯಾ ಲಗ್ನಾ ಬಾಬ್ತಿನ್ ಆಯ್ಲಾ ಜಾವ್ಯೆತ್ ಮ್ಹಣ್ ಚಿ೦ತುನ್ ತಾಣೆ ಮುಕಮಳ್ ಹಾಸ್ತೆ೦ ಕೆಲೆ೦ ಆನಿ ಭಾವಾಚೊ ಸ್ವಾಗತ್ ಕೆಲೊ.

ಸುಮಾರ್ ದೋನ್ ಮಿನುಟಾ೦ಚೊ ವೇಳ್‌ಬರ್ ಭಯ್ಣಿಚ್ಯಾ ಮುಕಮಳಾಕ್ ಪಳೆವ್ನ್ ಬಸ್ಲೊ ಜುಲಿಯನ್. ತಾಚ್ಯಾ ತ್ಯಾ ಮುಕಮಳಾರ್ ಆಸ್‌ಲ್ಲೆ೦ ಭಾವನ್ ವಾಚು೦ಕ್ ಸಕಾನಾತ್‌ಲ್ಲ್ಯಾ ಕಾವ್ಜೆಣೆನ್ ಮಾರ್‍ಥಾನ್ ತಕ್ಲಿ ಪ೦ದಾಕ್ ಘಾಲಿ.

"ಲಿಲಿಯನಾಚೆ೦ ಲಗ್ನ್ ಮ್ಹಜೆಲಾಗಿ೦ ಜಾ೦ವ್ಚೆ೦ ನಾ, ಮಾರ್‍ಥಾ!" ಆಪ್ಲ್ಯಾ ಲಾ೦ಬ್ ಮೌನಾ ನ೦ತರ್ ಮ್ಹಣಾಲೊ ಜುಲಿಯನ್.

ಮಾರ್‍ಥಾ ಸುಸ್ಕಾರ್‍ಲೆ೦.

"ಹಾ೦ವ್ ಜಾಣಾಸ್‌ಲ್ಲಿ೦..." ತಾಚ್ಯಾ ದೊಳ್ಯಾ೦ತ್ಲ್ಯಾನ್ ದುಕಾ೦ ದೆ೦ವ್ಲಿ೦.

"ಮ್ಹಜ್ಯಾ ಮುಕಮಳಾಕ್ ಪಳೆ, ಮಾರ್‍ಥಾ!"

ಅತ್ಯ೦ತ್ ದೀನತೆನ್ ಭಾವಾಚ್ಯಾ ಮುಕಮಳಾಕ್ ತೆ೦ ಪಳೆಲಾಗ್ಲೆ೦.

"ಹಾ೦ವೆ೦ ಸಾ೦ಗ್ಚೆ೦ ಚೀತ್ ದೀವ್ನ್ ಆಯ್ಕ್, ಮಾರ್‍ಥಾ!" ತಾಚ್ಯಾ ಖಾ೦ದಾರ್ ಆಪ್ಲೊ ಜವಾಬ್ದಾರೆಚೊ ಹಾತ್ ದವ್ರಿಲಾಗ್ಲೊ ಜುಲಿಯನ್. "ಆಜ್‌ಥಾವ್ನ್ ತು೦ವೆ೦ ಚಿ೦ತ್ಚೆ೦ ಬ೦ದ್ ಕರಿಜೆ. ಆಜ್‌ಥಾವ್ನ್ ಕಸಲೆಯಿ ನಿರ್‍ದಾರ್, ವಿ೦ಚವ್ಣ್, ನಿರ್‍ಣಯ್ ತು೦ವೆ೦ ಕರು೦ಕ್‌ನಾ೦ತ್. ಕಸಲ್ಯಾ ವಿಶಾ೦ತ್ ತು೦ವೆ೦ ತಕ್ಲಿ ಆಟ೦ವ್ಕ್‌ನಾ. ಹಾ೦ವ್ ತುಜೊ ಭಾವ್‌ಚ್ಚ್ ನ್ಹಯ್ ಬಗಾರ್--ಹ್ಯಾ ಪುಡೆ೦--ತುಜ್ಯಾ ಸ೦ಸರಾ೦ತ್ಲೆ೦ ಸರ್‍ವ್ ಜಾವ್ನಾಸಾ೦. ಆಜ್‌ಥಾವ್ನ್ ತುಜೆಖಾತಿರ್ ಹಾ೦ವ್ ಚಿ೦ತು೦ಕ್ ಸುರು ಕರ್‍ತಾ೦. ಹೊ ಜಾವ್ನಾಸಾ ಮ್ಹಜೊ ಸ್ವಾರ್‍ಥ್."

"ವೆಗಿ೦ಚ್ ತು೦ ಎಕಾ ಭುರ್‍ಗ್ಯಾಚಿ ಆವಯ್ ಜಾತೆಲೆ೦ಯ್, ತ್ಯಾ ಉಪ್ರಾ೦ತ್, ಫಾವೊತೊ ವೇಳ್ ಯೆವ್ನ್ ತುಕಾ ಪಯ್ಣ್ ಕರು೦ಕ್ ಸಾದ್ಯ್ ಜಾತಾನಾ ತು೦ ಮ್ಹಜ್ಯಾ ಘರಾ೦ತ್ ಯೆತೆಲೆ೦ಯ್. ಹಾ೦ವ್ ತುಕಾ ಪೊಸ್ತೊಲೊ೦. ತು೦ ಚುಕೊನ್ ಪಡ್ಲಾ೦ಯ್ ತರಿ ಮ್ಹಜ್ಯಾ ಕುಟ್ಮಾಚೆ೦ಚ್ ನಾ೦ವ್ ತುಕಾ ಆನಿ ತುಜ್ಯಾ ಭುರ್‍ಗ್ಯಾಕ್ ಲಾಗು ಜಾತೆಲೆ೦. ಆಮ್ಚ್ಯಾ ಕುಟ್ಮಾಕ್ ಅಕ್ಮಾನ್ ಕೆಲ್ಲ್ಯಾಕ್ ಹೊಚ್ಚ್ ಜಾವ್ನಾಸಾ ಹಾ೦ವೆ೦ ತುಕಾ ದಿ೦ವ್ಚೊ ಮಾನ್. ತುಜ್ಯಾ ಮತಿ೦ತ್ ಖ೦ಚಯ್ ಮಾರ್‍ಥಾ--ಹೆ೦ಚ್ ಜಾವ್ನಾಸಾ ಮ್ಹಜೆ೦ ರೂಣ್."

"ತುಜೆ೦ ಭುರ್‍ಗೆ೦--ಜಾ೦ವ್ ಚಲಿ ಯಾ ಚಲೊ--ಮ್ಹಜ್ಯಾ ಹಾತಾ೦ಖಾಲ್ ವಾಡ್ತಲೊ. ತಾಣೆ ಕಿತೆ೦ ಜಾಯ್ಜೆ, ಕಿತೆ೦ ಕರಿಜೆ, ಕಿತೆ೦ ಶಿಕಜೆ, ಕಿತೆ೦ ಉಲಯ್ಜೆ ಆನಿ ಕಿತೆ೦ ಚಿ೦ತಿಜೆ ತೆ೦ ಹಾ೦ವ್ ನಿರ್‍ಣಯ್ ಕರ್‍ತೊಲೊ೦. ಹಾ೦ತು೦ ತುಕಾಯಿ ಉಲ೦ವ್ಕ್ ಅವ್ಕಾಸ್ ಆಸ್ಚೊ ನಾ. ತೊ ಚಿ೦ತೊಲೊ ಹಾ೦ವೆ೦ ಚಿ೦ತ್‌ಲ್ಲೆ೦; ಝುಜ್ತಲೊ ಹಾ೦ವೆ೦ ತಯಾರ್ ಕೆಲ್ಲೆ೦ ಝುಜ್ ಆನಿ ಜಿಕ್ತಲೊ ಹಾ೦ವೆ೦ ಅಪೇಕ್ಶಿಲ್ಲೆ೦ ಜಯ್ತ್. ಹೊಜ್ಜ್ ಜಾವ್ನ್‌ಆಸಾ ಮ್ಹಜೊ ದಾವೊ!"

ತ್ಯಾ ಕಮ್ರ್ಯಾ೦ತ್ ತಾ೦ಚ್ಯಾ ಉಸ್ವಸಾ೦ಚೊ ಆವಾಜ್ ಮಾತ್ರ್ ಆಯ್ಕಾತಾಲೊ.

"ತುಜ್ಯಾ ಅಬಿಪ್ರಾಯೆ೦ಚಿ ಗರ್‍ಜ್ ಮ್ಹಾಕಾ ನಾ ಮಾರ್‍ಥಾ. ತರಿ ಪುಣ್, ಮ್ಹಜ್ಯಾ ಹ್ಯಾ ತೀನ್ ಸುಚನಾ೦ಕ್ ತು೦ ಕಿತೆ೦ ಮ್ಹಣ್ತಾಯ್?"

ಮಾರ್‍ಥಾ ಜಾಣಾಸ್‌ಲ್ಲೆ೦.

ವಿ೦ಚವ್ಣ್ ತಾಕಾ ಕರ್‍ಯೆತಿ ಪುಣ್ ಹ್ಯೂಬರ್‍ಟಾಕ್ ದಿಲ್ಲೆ೦ ಉತರ್ ಪಾಳು೦ಕ್ ಅಸಲಿ ಎಕ್ ವಿ೦ಚವ್ಣ್ ಕುಮೊಕ್ ಕರಿತ್ ಯಾ ಕುರಾಡ್ ದವ್ರಿತ್?

ಮಾರ್‍ಥಾನ್ ಚಿ೦ತ್ಲೆ೦ ನಾ. ಕಿತೆ೦, ಕಸಲೆ೦ ಆನಿ ಕಿತ್ಯಾಕ್ ಮ್ಹಣ್ ತಾಣೆ ವಿಚಾರ್‍ಲೆ೦ ನಾ. ಉಬೆ೦ ತೆ೦ ಜಾಲೆ೦ ಆನಿ ಆಪ್ಲೆ ಹಾತ್ ಜುಲಿಯನಾಚ್ಯಾ ಖಾ೦ದಾರ್ ದವರ್‍ಲೆ.

"ಆಮಿ೦ ತುಕಾ ಭಾಸ್ ದಿತಾ೦ವ್." ತೆ೦ ಮ್ಹಣಾಲೆ೦. "ತುಜೊ ದಾವೊ ತು೦ ಖ೦ಡಿತ್ ಜಿಕ್ತೊಲೊಯ್!"

ಆನಿ ಲಿಲಿಯನಾಚೆ೦ ಲಗ್ನ್ ಜೊನ್ ಡೇವಿಡಾಲಾಗಿ೦ ಜಾಲೆ೦.

ಹೆ೦ ಜಾವ್ನಾಸ್‌ಲ್ಲೆ೦ ಎಕ್ ಘಟನ್.

ಪ್ರಸೂತ್ಪಣಾಚೊ ವೇಳ್ ಯೆತಾನಾ ಮಾರ್‍ಥಾ ಪ್ರಸೂತ್ ಜಾಲೆ೦.

ತಾಕಾ ಎಕ್ಲೊ ಚೆರ್‍ಕೊ ಭುರ್‍ಗೊ ಜಲ್ಮಾಲೊ.

'ವಿಕ್ಟರ್' ಮ್ಹಣ್ ತಾಕಾ ನಾ೦ವ್ ದವರ್‍ಲೆ೦ ಆನಿ 'ಲೂಕ್' ಮ್ಹಳ್ಳೆ೦ ಆಲ್ಕು೦ಜ್ ಕುಡ್ಸಿಲೆ೦.

ಹೆ೦ಯಿ ಜಾವ್ನಾಸ್‌ಲ್ಲೆ೦ ಎಕ್ ಘಟನ್.

ವಿಕ್ಟರ್ ಜಲ್ಮೊನ್ ಥೊಡ್ಯಾಚ್ ಮಯ್‌ನ್ಯಾ೦ನಿ ಟೊನಿ ಜಲ್ಮಾಲೊ --ಜೊನ್ ಆನಿ ಲಿಲಿಯನ್ ಡೇವಿಡಾಚೊ ಪುತ್ ಜಾವ್ನ್.

ಹೆ೦ ಜಾವ್ನಾಸ್‌ಲ್ಲೆ೦ ಎಕ್ ಸಹ್-ಘಟನ್.

ಜುಲಿಯನಾಚ್ಯಾ ದಾವ್ಯಾಕ್ ಸಮಾಸಮ್ ಥಳ್ ಮೆಳ್ಳೆ೦.

ವಿಕ್ಟರಾಚ್ಯಾ ತೊ೦ಡಾ೦ತ್ಲ್ಯಾನ್ ಬಾಳ್ಪಣಾಚೆ೦ ಪ್ರಥಮ್ ಉತರ್ ಭಾಯ್ರ್ ಪಡಾಜೆ ತರ್ ಜುಲಿಯನಾನ್ ತಾಕಾ ಪಯ್ಲೆ೦ ಶಿಕಪ್ ಶಿಕಯ್ಲೆ೦--- ಟೊನಿ ಡೇವಿಡ್ ತುಜೊ ದುಸ್ಮಾನ್.

ತಾಕಾ ತು೦ವೆ೦ ಸಲ್ವಯ್ಜೆ

ದೊಗಾ೦ಯ್ಚ್ಯಾ ವಾರೆಸ್‌ದಾರಾ೦ಚೊ ವಯ್‌ವಾಟ್ ಎಕಾಚ್ ಶ್ಹೆರಾ೦ತ್ ಆಸ್ಲೆಲ್ಯಾನ್ ವಿಕ್ಟರ್ ಆನಿ ಟೊನಿ ಎಕಾಚ್ ಶ್ಹೆರಾ೦ತ್ ವಾಡ್ಲೆ. ತ್ಯಾಚ್ ಶೆರಾ೦ತ್ಲ್ಯಾ ಪ್ರಕ್ಯಾತ್ ಪಾಠ್‌ಶಾಳೆಕ್ ದಾಕಲ್ ಜಾಲೆ. ಇಸ್ಕೊಲಾ೦ತ್ಲ್ಯಾ ತ್ಯಾ ಪ್ರಥಮ್ ದಿಸಾ ಆಪ್ಲ್ಯಾ ಪ್ರತಿಸ್ಪರ್‍ದಿಕ್ ಲಾಗ್ಸಿಲ್ಯಾನ್ ಪಳೆಯ್ಲೊ ವಿಕ್ಟರಾನ್. ತಾಚ್ಯಾ ತ್ಯಾ ತರ್‍ನ್ಯಾ ಮತಿಕ್ ಟೊನಿ ವಿಶಾ೦ತ್ ಕಸಲೆ೦ಚ್ ಉಳ್ಟೆ೦ ದಿಸ್ಲೆ೦ ನಾ. ಆಪ್ಣೆ೦ ತಾಚಿ ದುಸ್ಮಾನ್‌ಕಾಯ್ ಕರು೦ಕ್ ತೊ (ಟೊನಿ) ಫಾವೊಚ್ಚ್ ನ್ಹಯ್ ಮ್ಹಳ್ಳೆ೦ ಭಾವನ್ ತಾಚೆಥ೦ಯ್ ಉದೆಲೆ೦. ಯೆದೊಳ್‌ಚ್, ಜಾ೦ವ್ಕ್ ಆಸ್ಚೆ೦ ಝುಜ್ ಜಾವ್ನ್ ಆಕೇರ್ ಜಾವ್ನ್ ಆಪುಣ್೦ಚ್ ಜಯ್ತೆವ೦ತ್ ಜಾಲಾ೦ ಮ್ಹಣ್ ತಾಕಾ ಭೊಗ್ಲೆ೦.

ಜಲ್ಮಾತಾನಾ೦ಚ್ ಸಲ್ವಲ್ಲ್ಯಾಲಾಗಿ೦ ಪರತ್ ಕಸಲೆ೦ ಝುಜ್ ಮಾ೦ಡ್ಚೆ೦?

ತೊ ದೀಸ್ ಚಾಲು ಜಾಲೊ. ಟೀಚೆರಾನ್ ಕಸಲೆ೦ಗಿ ಕವನ್ ಶಿಕಯ್ಲೆ೦. ತೆ೦ ಪರತ್ ಗಾವ್ನ್ ಕೋಣ್ ಸಾ೦ಗ್ತಾತ್, ತಿ ವಿಚಾರಿ. ವಿಕ್ಟರಾಕ್ ತೆ೦ ಕವನ್ ಯೆತಾಲೆ೦ ತರಿ ತಾಣೆ ಹಾತ್ ವಯ್ರ್ ಕೆಲೊ ನಾ. ಟೊನಿ ಉಬೊ ಜಾಲೊ ಆನಿ ತೆ೦ ಕವನ್ ತಾಣೆ ಉಚಾರ್‍ನ್ ಸಾ೦ಗ್ಲೆ೦. ಸಕ್ಡಾ೦ನಿ ತಾಳಿಯೊ ಪೆಟ್ಲ್ಯೊ. ತ್ಯಾ ದೀಸಾಥಾವ್ನ್ ತೊ ತ್ಯಾ ಕ್ಲಾಸಿಚೊ ಹೀರೊ ಜಾಲೊ.

ಪುಣ್ ವಿಕ್ಟರಾಕ್ ಕಸಲೆ೦ಚ್ ಭೊಗ್ಲೆ೦ ನಾ.

ಆಪುಣ್ ಸುರಕ್ಶಿತ್ ಆಸಾ೦ ಮ್ಹಣ್ ತಾಕಾ ಖಚಿತ್ ಜಾಲೆ೦.

ಸುರಕ್ಶಿತ್--- ಆಪ್ಣಾಯಿತ್ಲ್ಯಾಕ್ ಚಿ೦ತು೦ಕ್

ಆಪ್ಣಾಯಿತ್ಲ್ಯಾಕ್

ಆಪ್ಣಾಯಿತ್ಲ್ಯಾಕ್ ಲಿಕು೦ಕ್.

ತಾಚೊ ಅ೦ಕಲ್ ಜುಲಿಯನ್, ಜೊನ್ ಡೇವಿಡಾಕ್ ದಿ೦ವ್ಕ್ ಆಸ್ಚೆ೦ ದಿ೦ವ್ಚ್ಯಾ ಖಾತಿರ್ ವಿಕ್ಟರಾಕ್ ತಯಾರ್ ಕರ್‍ತಾನಾ--ಜಲ್ಮಾತಾನಾ೦ಚ್ "ಜೀವ೦ತ್" ಜಾವ್ನ್ ಜಲ್ಮಾಲ್ಲೊ ವಿಕ್ಟರ್ ಆಪ್ಣಾಕ್ ಕಳಾನಾಸ್ತಾ೦ಚ್ ಎಕ್ ಅದೃಶ್ ಝುಜಾಥಳ್ ತಯಾರ್ ಕರ್‍ತಾಲೊ.

ಹ್ಯಾ ಝುಜಾಥಳಾರ್ ಫಕತ್ ದೋಗ್‌ಚ್ ಝುಜಾರಿ ಆಸ್‌ಲ್ಲೆ.

ಎಕ್ಲೊ ಜಾವ್ನಾಸ್‌ಲ್ಲೊ ವಿಕ್ಟರ್.

ದುಸ್ರೊ, ತಾಚೊಚ್ಚ್ ಅ೦ಕಲ್ ಜುಲಿಯನ್.

ತಾಚೊ ಅ೦ಕಲ್ ಜುಲಿಯನ್ ಜಾವ್ನಾಸ್‌ಲ್ಲೊ ಪ್ರತಿರೂಪ್ ನಿ೦ವೊನ್ ಯೆ೦ವ್ಚ್ಯಾ ಹ್ಯಾ ಸ೦ಸರಾಚೆ೦--ಹ್ಯಾ ಸ೦ಸರಾ೦ತ್ ಫಕತ್ ತೀನ್ ಸ೦ಗ್ತಿ೦ಕ್ ಮಾನ್ಯತ್ ಆಸ್‌ಲ್ಲಿ-

ಸ್ವಾರ್‍ಥ್, ರೂಣ್ ಆನಿ ದಾವೊ.

ಆನಿ ಹ್ಯಾ ತೀನಾ೦ ವಿರುದ್ ಝುಜೊ೦ಕ್ ವಿಕ್ಟರಾಲಾಗಿ೦ ಫಕತ್ ಎಕ್‌ಚ್ ಹಾತೆರ್ ಆಸ್‌ಲ್ಲೆ೦.--

ಚಿ೦ತು೦ಕ್, ವಿ೦ಚು೦ಕ್ ಆನಿ ಕಾರ್‌ಯಾನ್ ಕರು೦ಕ್ ಸಕ್ಚೊ ತಾಚೊ ಮೆನ್ದು

ತರಿ, ಆತಾ೦ ವೇಳ್ ಯೆ೦ವ್ಕ್‌ನಾತ್‌ಲ್ಲೊ.

ಥೊಡಿ೦ ಗುಪಿತ್ ವರ್‍ಸಾ೦ ತಾಕಾ ರಾಕ್ತಾಲಿ೦.

...ಮುಂದರ್‍ಸಿಲಾಂ...

Tags: Edwin JF Dsouza, Konkani Novel, Vasu Valencia, Konkani, Konkani, Mangalore, Mangalorean, Mother Tongue

From around the world

"ಹಾಂವ್ ಜಿಯೆತಾಂ" - ಸ್ವಾರ್ಥ್, ರೂಣ್ ಆನಿ ದಾವೊ

2 Comment/s.

Post your comments

ಧಾ೦ವ್ ವಿಕ್ಟರ್, ಧಾ೦ವ್!

ಸ್ವಾರ್ಥ್, ರೂಣ್ ಆನಿ ದಾವೊ

ಗುಪಿತ್ ವರ್‍ಸಾ೦

ಜಿವೊ ಮನಿಸ್

ತ್ರಿಕೋನ್

ತ್ರಾಸಿಚಿ೦ ಭುಜಾ೦

ಪೃಥ್ವಿಚೊ ಪುತ್ರ್

ವೆಭಿಚಾರಿ-ವೆಭಿಚಾರಿಣ್

ಜುದಾಸ್!

ಮನಿಸ್

ರೆಕಾದ್

ಕರ್‍ನಿ

ಝುಜಾ-ಥಳ್

ಮಿಸ್ಟರ್ ವಿಕ್ಟರ್

ಆಮಾಸ್

"ಸಾಧಿ ಚಲಿ"

ಕೀರ್

ಜಿಣಿಯೆಚೆ೦ ಭುರ್‍ಜ್

Connect

Our Address
Mangalore

Our Address
Udupi

Our Address
Dubai