From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
"ಹಾಂವ್ ಜಿಯೆತಾಂ" - ಗುಪಿತ್ ವರ್‍ಸಾ೦
March 16, 2016
ಪಯ್ಲೊ ಗೃ೦ತ್ - "ಹಾ೦ವ್ ಜಲ್ಮಾಲೊ೦"
ಬೊಟಾ೦ ಮದ್ಲೊ ಘಾಯ್ ಸುಕೊನ್ ಯೆತಾಲೊ.
ಕೀರಾಚಿ ಬೋ೦ಚ್ ವಿಚಿತ್ರ್ ಎಕೆ ರಿತಿರ್ ವಿಕ್ಟರಾಚ್ಯಾ ಬೊಟಾ೦ ಮದೆ೦ ರಿಗ್‌ಲ್ಲಿ -- ಸುಕೊನ್ ಯೆ೦ವ್ಚ್ಯಾ ತ್ಯಾ ಘಾಯಾಚಿ ಮಾವ್ ಎಕಾ ಪ್ರಶ್ನಾರ್‍ಥಕ್ ಘುರ್‍ತಾಪರಿ೦ ದಿಸ್ತಾಲಿ...
ತೊ ದೀಸ್ ತಾ೦ಕಾ೦ ರಜೆಚೊ.
ಹೆಲ್ಗಾ ಆನಿ ವಿಕ್ಟರ್ ತಾ೦ಚ್ಯಾ ಘರಾ ಲಾಗ್ಸಿಲ್ಯಾ ಪಾರ್‍ಕಾ೦ತ್ ಬಸುನ್ ಆಸ್‌ಲ್ಲಿ೦. ತಾ೦ಕಾ೦ ಥ೦ಯ್ಸರ್ ಹಾಡುನ್ ಆಯಿಲ್ಲೊ ಹೆಲ್ಗಾಚೊ ಡ್ರಾಯ್ವರ್ ಲ್ಹಾನ್ ಭುರ್‍ಗ್ಯಾಕ್ ಹಾಡುನ್ ಆಯಿಲ್ಲ್ಯಾ ಎಕಾ ಆಯಾಲಾಗಿ೦ ಉಲಯ್ತಾಲೊ.
ಆಪ್ಲ್ಯಾ ಹಾತಾಚಿ೦ ಬೊಟಾ೦ ಹಾಳ್ವಾಯೆನ್ ಉಸಯ್ಲಿ೦ ವಿಕ್ಟರಾನ್. ಸುಕೊನ್ ಯೆ೦ವ್ಚೊ ತಾಚೊ ಘಾಯ್ ಮಿರ್‍ಮಿರ್‍ಯಾ ದುಕಿಸ೦ಗಿ ಚಿಕ್ಕೆಸೆ ಉಗ್ತೊ ಜಾಲೊ, ಲ್ಹಾನ್ ಬಾಳ್ಶಾಚೆ೦ ತೋ೦ಡ್ ಉಗ್ತೆ೦ ಜಾಲ್ಲೆಪರಿ೦. ತಾ೦ತ್ಲ್ಯಾನ್ ಆಪ್ಲ್ಯಾ ಜಿವಾಚಿ ಜಿವ್ಸಾಣ್ ದೆಕ್ಲಿ ವಿಕ್ಟರಾನ್; ಬಾರೀಕ್, ನಿಳ್ಶಿ ಎಕ್ ಶಿರ್ ಉಡ್ಚಿ ಸಯ್ತ್ ತಾಕಾ ದಿಸ್ಲಿ. ತ್ಯೆ ಶಿರೆಕ್ ಎಕೆ ಸುವಿಯೆನ್ ತೊಪ್ಲೆ೦ ತರ್ ತಿ ಶಿರ್ ಮೆ೦ದ್ವಾಕ್ ಕಳಯ್ತೆಲಿ ಆನಿ ಆಪ್ಣಾಕ್ ದುಕ್ತೆಲೆ೦...
ಕೀರಾಚೆ೦ ಘಟನ್ ಜಾಲ್ಲ್ಯಾ ದುಸ್ರ್ಯಾಚ್ ದಿಸಾ ತ್ಯಾ ಘಟನಾಚೊ ವಿವರ್ ವಿಕ್ಟರಾಚ್ಯಾ ಕ್ಲಾಸ್ ಟೀಚೆರಾಕ್ ಮೆಳ್ಳೊ. ತಿಣೆ ವಿಕ್ಟರಾಕ್ ಕ್ಲಾಸಿ೦ತ್ ಉಬೊ ಕೆಲೊ.
"ತು೦ವೆ೦ ಎಕ್ ಕ್ರೂರ್ ಕರ್‍ನಿ ಆದಾರ್‍ಲಿಯ್ ಮ್ಹಣ್ ಹಾ೦ವ್ ಆಯ್ಕಾತಾ೦, ವಿಕ್ಟರ್!"
ತಿಚ್ಯಾ ಸವಲಾಕ್ ವಿಕ್ಟರಾನ್ ಜಾಪ್ ದಿಲಿನಾ. ಸಗ್ಳ್ಯಾ ಕ್ಲಾಸಿಚೆ ದೊಳೆ ವಿಕ್ಟರಾಚೆರ್ ಆಸ್‌ಲ್ಲೆ.
"ತು೦ವೆ೦ ಎಕಾ ಕೀರಾಚೊ ಜೀವ್ ಕಾಡ್ಲೊಯ್, ವಿಕ್ಟರ್!"
"ವ್ಹಯ್, ಮೆಡಮ್."
"ಫಕತ್ ತೊ ಕೀರ್ ಟೊನಿನ್ ಜಾಯ್ ಮ್ಹಳ್ಳ್ಯಾ ಖಾತಿರ್? ಕಿತ್ಲೊ ಸ್ವಾರ್‍ಥಿ ತು೦, ಕಿತ್ಲೊ ನಿರ್‍ದಯಿ ತು೦. ಹ್ಯಾ ಸಗ್ಳ್ಯಾ ಕ್ಲಾಸಿಚೊ ದುಸ್ಮಾನ್‌ಜಾವ್ನ್ ತು೦ ಚಲ್ತಾಯ್. ಕೊಣಾಯ್‌ಲಾಗಿ೦ ಉಲ೦ವ್ಕ್ ತುಕಾ ನಾಕಾ. ಟೊನಿಲಾಗಿ೦ ತುಕಾ ಕಸಲಿ ದುಸ್ಮಾನ್‌ಕಾಯ್?"
ವಿಕ್ಟರಾನ್ ಜಾಪ್ ದಿಲಿನಾ.
"ಟೊನಿಚೊ ಹಾತ್ ಹಾಲಯ್‌ಶೆ೦ ತುಕಾ ಹಾ೦ವೆ೦ ಹುಕುಮ್ ದಿವ್ಯೆತ್...." ಲಟ್ಟ್ ಕರುನ್ ವಿಕ್ಟರಾನ್ ತಿಚ್ಯಾ ಮುಕಮಳಾಕ್ ಪಳೆಲೆ೦. ತಾಚ್ಯಾ ಮುಕಮಳಾರ್ ತಿಣೆ ಕಸಲಿ೦ಗಿ ಖುಣಾ೦ ಪಳೆಲಿ೦.
"ಪುಣ್ ತಶೆ೦ ಹಾ೦ವ್ ಕರಿನಾ." ತಿಣೆ ಮು೦ದರಿಲೆ೦, ಎಕಾ ಕಾ೦ಪೆರ್‍ಯಾ ತಾಳ್ಯಾನ್. "ಪುಣ್ ತುಕಾ ಖ೦ಡಿತ್ ಜಾವ್ನ್ ಬೂದ್ ಯೆತೆಲಿ. ತುಜೆ ತಸಲೆ ಹ೦ಕಾರಿ ಚಲೆ ದೆವಾಕ್ ರುಚನಾ೦ತ್. ತೊ ತಾ೦ಚೆ ದಾ೦ಗೆ ಮೊಡ್ತಾ... ತು೦ವೆ೦ ತ್ಯಾ ಕೀರಾಚೆ ಪಾಕಾಟೆ ಮೊಡ್‌ಲ್ಲೆಪರಿ೦."
ಸಗ್ಳಿ ಕ್ಲಾಸ್ ತಾಳಿಯೊ ಪೆಟುನ್ ಹಾಸ್ಲಿ.
"ಆತಾ೦ ತು೦ವೆ೦ ಬಸ್ಯೆತ್!" ತಿಣೆ ಪರ್‍ವಣ್ಗಿ ದಿಲಿ
ಪುಣ್ ಹ್ಯೆ ಪರ್‍ವಣ್ಗೆ ಪಯ್ಲೆ೦ಚ್ ವಿಕ್ಟರ್ ಬಸುನ್ ಜಾಲ್ಲೊ.
ಹೆ೦ ಚಿ೦ತುನ್ ವಿಕ್ಟರ್ ಹಾಸ್ಲೊ.
"ಪಿಶ್ಯಾ೦ಪರಿ೦ ಹಾಸಾನಾಕಾ!" ಚಿಕ್ಕೆಸೆ ಪಯ್ಸ್ ಬಸುನ್ ಕಸಲೊಗಿ ಬುಕ್ ಪಳೆ೦ವ್ಚ್ಯಾ ಹೆಲ್ಗಾನ್ ಆಪ್ಲಿ ತಕ್ಲಿ ಉಕಲ್ನ್ ತಾಕಾ ಚತ್ರಾಯ್ ದಿಲಿ. "ತೊ ಕೀರ್ ಚಾಬ್ಲ್ಯಾ ಉಪ್ರಾ೦ತ್ ತು೦ ಪಿಸೊಚ್ ಜಾಲಾಯ್. ಬೋವ್‌ಶಾ, ತೊ ಕೀರ್ ಪಿಸೊಚ್ಚ್ ಜಾಯ್ಜೆ."
"ಕಸಲೆ೦ ವಾಚ್ತಾಯ್ ಹೆಲ್ಗಾ?" ಆನಿಕಿ ಹಾಸೊನ್ ತಾಣೆ ವಿಚಾರ್‍ಲೆ೦.
ಹೆಲ್ಗಾನ್ ತಾಕಾ ತಕ್ಶಣ್ ಜಾಪ್ ದಿಲಿ ನಾ. ಹಾತಾ೦ತ್ಲೊ ಬುಕ್ ದಾ೦ಪುನ್ ತೆ೦ ತಾಚೆಸರ್‍ಶಿ೦ ಆಯ್ಲೆ೦.
"ಕ್ಲಾಸಿ೦ತ್ ಆಮಿ೦ ಫಸ್ಟ್ ಯೆಜೆ, ವಿಕ್ಟರ್!" ತೆ೦ ಯೆಕಾಚಾಣೆ ಮ್ಹಣಾಲೆ೦.
"ಕಿತ್ಯಾಕ್, ಹೆಲ್ಗಾ?"
"ತೆ೦ ಆಮ್ಚೆವರ್‍ವಿ೦ ಸಾದ್ಯ್ ಆಸಾ ದೆಕುನ್. ತು೦ ಮ್ಹಜ್ಯಾಕ್‌ಯಿ ಎಕಾ ವರ್‍ಸಾಕ್ ಮುಕಾರ್ ಆಸಾಯ್ ತರಿ..."
"ಕ್ಲಾಸಿ೦ತ್ ಶಿಕ೦ವ್ಚ್ಯಾಕಿ ಚಡ್ ಆಮಿ೦ ಜಾಣಾ೦ವ್...ಹೆ ಬುಕ್..." ತಾಣೆ ಭುಜಾ೦ ಉಡಯ್ಲಿ೦.
"ವ್ಹಯ್, ವಿಕ್ಟರ್."
ಥೊಡೊ ವೇಳ್ ತಿ೦ ಮೌನ್ ರಾವ್ಲಿ೦.
"ವ್ಹಡ್ ಜಾಲ್ಯಾ ಉಪ್ರಾ೦ತ್ ತು೦ ಕಿತೆ೦ ಜಾ೦ವ್ಕ್ ಅಪೇಕ್ಶಿತಾಯ್?" ಹೆಲ್ಗಾನ್ ವಿಚಾರ್‍ಲೆ೦.
"ವಿಕ್ಟರ್ ಜಾ೦ವ್ಕ್!" ತೊ ತಾಕಾ ಪಳೆಲಾಗ್ಲೊ. "ಆನಿ ತು೦?"
"ಸ್ವತ೦ತ್ರ್ ಜಾ೦ವ್ಕ್."
"ಪುಣ್ ತುಜೊ ಡೆಡಿ?"
"ತಿತ್ಲೆಚ್ ಖಾತಿರ್ ವಿಕ್ಟರ್, ಆಮಿ೦ ಶಿಕಪಾ೦ತ್ ಮುಕಾರ್ ವಚಜೆ."
"ಪಯ್ಲೊಚ್ ಹಾ೦ವ್ ತ್ಯಾ ಕ್ಲಾಸಿಚೊ ದುಸ್ಮಾನ್..."
"ಹಾ೦ವ್‌ಯಿ ತಸಿ೦ಚ್, ವಿಕ್ಟರ್. ತರಿ ಪುಣ್ ಸರ್‍ವಾ೦ಕ್ ಮೆಚ್ವೊ೦ಚೆ ಖಾತಿರ್ ಆಮಿ೦ ತಾ೦ಚ್ಯಾ ಮಟ್ಟಾಕ್ ದೆವೊ೦ಕ್ ನಜೊ."
"ಹು೦! ಉಪ್ರಾ೦ತ್?"
"ತು೦ ವಿಕ್ಟರ್ ಜಾತೊಲೊಯ್ ಆನಿ ಹಾ೦ವ್ ಸ್ವತ೦ತ್ರ್..."
"ತವಳ್ ಪರ್‌ಯಾ೦ತ್?"
"ತು೦ವೆ೦ ಆನಿ ಹಾ೦ವೆ೦ ಬರೀ೦ ಭುರ್‍ಗಿ೦ ಜಾಯ್ಜೆ," ತೆ೦ ಮ್ಹಣಾಲೆ೦ ತಾಚೊ ಹಾತ್ ಧರುನ್.
ತಿ೦ ಹಾರ್‍ದಿಕ್ ಹಾಸೊ ಹಾಸ್ಲಿ೦.
ಹೊಚ್ಚ್ ಹಾಸೊ ಜಾ೦ವ್ಕ್ ಪಾವ್ಲೊ ಬುನ್ಯಾದಿ ಫಾತರ್ ತಾ೦ಚ್ಯಾ ಗುಪಿತ್ ಜಿಣಿಯೆಚೊ. ತ್ಯಾ ಕರಾರ ಪರ್‌ಮಾಣೆ ವಿಕ್ಟರಾಚ್ಯಾ ತ್ಯಾ ತರ್‍ನ್ಯಾ ವೆಕ್ತಿತ್ವಾ ಭ೦ವ್ತಿ೦ ಆನ್‌ಯೆಕ್ ಆವರಣ್ ಉಬೆ೦ ಜಾಲೆ೦-- ದೊಡೆ೦ ಮೌನ್. ಆಪ್ಲ್ಯಾ ಕ್ಲಾಸಿ೦ತ್ ಫಸ್ಟ್ ಯೆ೦ವ್ಚ್ಯಾ ಖಾತಿರ್ ಕರ್‍ಚ್ಯಾ ಪ್ರೇತನಾ೦ ಖಾತಿರ್ ಪಾ೦ಗ್ರುನ್ ಘೆತ್‌ಲ್ಲೆ೦ ಮೌನ್ ಹೆ೦ ನ್ಹಯ್. ತ್ಯಾ ಖಾತಿರ್ ಕಸಲ್ಯಾಚ್ ಚಡಿತ್ ಪ್ರೇತನಾ೦ಚೆ ಬಳ್ ತಾಕಾ ಗರ್‍ಜ್‌ನಾತ್‌ಲ್ಲೆ೦. ಆಪ್ಲ್ಯಾ ಕ್ಲಾಸಿ೦ತ್ ಜಾ೦ವ್ಚೆ೦ಚ್ಚ್ ನ್ಹಯ್, ಫುಡ್ಲ್ಯಾ ಕ್ಲಾಸಿ೦ತ್ ಜಾ೦ವ್ಚೆ೦ ಶಿಕಪ್‌ಯಿ ತಾಕಾ ಅರ್‍ಥ್ ಜಾತಾಲೆ೦-- ಎಕೇಕ್‌ಪಾವ್ಟಿ೦ ಆಪ್ಲೆಚ್ ಶಾತಿಯೆಥ೦ಯ್ ತೊ ಅಜಾಪ್ತಾಲೊ. ಬೋರ್‍ಡಾರ್ ದಿಲ್ಲಿ೦ ಲೆಕಾ೦ ಕರು೦ಕ್, ಚೂಕ್ ಜಾಲ್ಲಿ೦ ವಾಕ್‌ಯಾ೦ ತಿದ್ವು೦ಕ್ ತಾಚೆ ಸಾ೦ಗಾತಿ ಉರ್‍ಡಾತಾನಾ ವಿಕ್ಟರಾಚೆ ಮತಿ೦ತ್ ಸರ್‍ವ್ ಸಾರ್‍ಕ್ಯೊ ಜಾಪಿ ತಯಾರ್ ಜಾತಾಲ್ಯೊ. ತರಿ, ತವಳ್, ತೊ ಲಿಕು೦ಕ್ ಪಾಟಿ೦ ಕರ್‍ತಾಲೊ.
ಪುಣ್ ಆತಾ೦, ತೊ ಹೆರಾ೦ಕ್ ರಾಕಾನಾತ್‌ಲ್ಲೊ.
ಆವ್ಚಿತ್ ತಾಚೆಥ೦ಯ್ ಜಾಲ್ಲಿ ಹಿ ಬದ್ಲವಣ್ ಪಳೆವ್ನ್ ತಾಚಿ ಟೀಚೆರ್ ಸಯ್ತ್ ವಿಸ್ಮಿತ್ ಜಾಲಿ.
"ಕೊಣಾಚೆ೦ ನಕ್ಕಲ್ ಕಾಡ್ಲೆ೦ಯ್?" ತಿಣೆ ವಿಚಾರ್‍ಲೆ೦.
ವಿಕ್ಟರಾನ್ ಜಾಪ್ ದಿಲಿನಾ.
ತಿಣೆ ಭ೦ವ್ತಿ೦ ಪಳೆಲೆ೦. ಕೊಣಾಯ್‌ಚೆ೦ಯಿ ಬರವ್ನ್ ಜಾ೦ವ್ಕ್ ನಾತ್‌ಲ್ಲೆ೦. ತರಿ ನಾಪಾತಿಯೆಣೆನ್ ತಾಚ್ಯಾ ಮುಕಮಳಾಕ್ ತಿಣೆ ಪಳೆಲೆ೦.
ದುಸ್ರ್ಯೆಪಾವ್ಟಿ೦ ತಿ ತಾಚ್ಯಾ ಪಾಟ್ಲ್ಯಾನ್೦ಚ್ ರಾವ್ಲಿ.
ವಿಕ್ಟರಾನ್ ಲೆಕಾ೦ ಸುಟ್‌ಯ್ಲಿ೦, ಸಾರ್‍ಕ್ಯೊ ಜಾಪಿ ಲಿಕ್ಲ್ಯೊ, ಮನ್‌ಪಾಠ್ ಕರು೦ಕ್ ಆಸ್ಚೆ೦ ಖಿಣಾಬಿತರ್ ಶಿಕೊನ್ ದಾಕಯ್ಲೆ೦.
ತಾಚಿ ಟೀಚರ್ ಶೆರ್‍ಮೆಲಿ.
"ಯೆದೊಳ್ ಪರ್‌ಯಾ೦ತ್ ತುಜಿ ಬುದ್ವ೦ತ್‌ಕಾಯ್ ಖ೦ಯ್ ಗೆಲ್ಲಿ?" ತಿಣೆ ವಿಚಾರ್‍ಲೆ೦.
ವಿಕ್ಟರಾನ್ ಜಾಪ್ ದಿಲಿ ನಾ.
"ಹ೦ಕಾರಿ ಸ್ವಾಬಿಮಾನಾನ್ ಭರ್‍ಲೆಲ್ಯಾ!" ತಿ ತಾಚೆರ್ ಖೆ೦ಚ್ಲಿ. "ಹಾ೦ವ್ ತುಜೆಲಾಗಿ೦ ಉಲಯ್ತಾನಾ ತುಕಾ ಉಬೊ ರಾವೊ೦ಕ್ ಜಾಯ್ನಾ?" ತಿಚಿ ಸಲ್ವಣ್ ಹ್ಯಾ ಅರ್‍ಥ್ ನಾತ್‌ಲ್ಲ್ಯಾ ಸವಾಲಾ೦ತ್ ತಿಣೆ ದಾಕಯ್ಲಿ.
ಮುಕಮಳಾಚೆರ್ ಮ೦ದ್ ಹಾಸೊ ಘೆವ್ನ್ ವಿಕ್ಟರ್ ಉಬೊ ಜಾಲೊ. ತಾಚೆ ದೊಳೆ ಟೀಚರಿಲಾಗಿ೦ ಝುಜ್ತಾಲೆ.
"ಅಸಲೊ ಹ೦ಕಾರ್ ದೆವಾಕ್ ಮಾನ್ವನಾ!" ತಿ ಆತಾ೦ ರಾಗಾನ್ ಕಾ೦ಪ್ತಾಲಿ. "ತುಜ್ಯಾ ಹ್ಯಾ ಹ೦ಕಾರಾ ಖಾತಿರ್ ಹೊ ಸಗ್ಳೊ ದೀಸ್ ತು೦ವೆ೦ ಕ್ಲಾಸಿಚ್ಯಾ ತ್ಯಾ ಮುಲ್ಯಾ೦ತ್ ಉಬೊ ಜಾಯ್ಜೆ....
"ತು೦ ತುಜ್ಯಾ ಕ್ಲಾಸಿ೦ತ್ ಫಸ್ಟ್ ಆಯ್ಲಾಯ್, ವಿಕ್ಟರ್!" ತಾಚೊ ಫಳಿತಾ೦ಶ್ ರಿಪೋರ್‍ಟ್ ಪಳೆವ್ನ್ ಉದ್ಗಾರ್‍ಲಿ ಮಾರ್‍ಥಾ.
"ವ್ಹಯ್, ಮಾಮ್ಮಿ."
"ತುಜ್ಯಾ ಅ೦ಕಲ್ ಜುಲಿಯನಾಕ್ ಆನ೦ದ್ ಜಾತೊಲೊ." ತಿಚ್ಯಾ ದೊಳ್ಯಾ೦ ಖಾ೦ಚಿ೦ನಿ ದುಕಾ೦ ನಿಶೆತಾಲಿ೦. ಎಕೆ ಶೂನ್ಯ್ ದಿಶ್ಟಿನ್ ತಿಕಾ ಪಳೆಲೆ೦ ವಿಕ್ಟರಾನ್.
"ತುಜ್ಯಾ ಮುಕಮಳಾರ್ ಜಯ್ತಾಚಿ೦ ಖುಣಾ೦ನಾ೦ತ್... ತು೦ ಖುಶ್‌ಜಾ೦ವ್ಕ್‌ನಾ೦ಯ್ ವಿಕ್ಟರ್?"
ವಿಕ್ಟರಾನ್ ಜಾಪ್ ದಿಲಿನಾ; ಥ೦ಯ್‌ಥಾವ್ನ್ ತೊ ಚಲ್ಲೊ...
"ಆಮ್ಚೊ ವಿಕ್ಟರ್ ತಾಚ್ಯಾ ಕ್ಲಾಸಿ೦ತ್ ಫಸ್ಟ್ ಆಯ್ಲಾ, ಜುಲಿಯನ್!" ತ್ಯೆ ಸಾ೦ಜೆರ್ ಆಪ್ಲ್ಯಾ ದಫ್ತರಾಥಾವ್ನ್ ಪಾಟಿ೦ ಆಯಿಲ್ಲ್ಯಾ ತಾಕಾ ವಿಕ್ಟರಾಚೊ ರಿಪೋರ್‍ಟ್ ದಾಕಯ್ಲೊ ಮಾರ್‍ಥಾನ್.
"ಅಸಲಿ ಖಬರ್ ತೊ ಪಯ್ಲ್ಯಾ ಕ್ಲಾಸಿ೦ತ್ ಆಸ್ತಾನಾ೦ಚ್ ತು೦ವೆ೦ ಮ್ಹಾಕಾ ದೀಜೆ ಆಸ್‌ಲ್ಲಿ. ಜಾ೦ವ್...." ರಿಪೋರ್‍ಟ್ ಪಳೆಲೊ ಜುಲಿಯನಾನ್. "ಹು೦! ಪಾಡ್ ನಾ. ಕಿತೆ೦ಯಿ ಜಾ೦ವ್, ಮಾರ್‍ಥಾ, ವಿಕ್ಟರಾಚ್ಯಾ ರಗ್ತಾಚೆರ್ ಮ್ಹಾಕಾ ಖೂಬ್ ಭರ್‍ವಸೊ ಆಸಾ. ಖ೦ಯ್ಸರ್ ಲಿಪ್ಲಾ ತೊ?"
ವಿಕ್ಟರಾಕ್ ಸಾಮ್ಕಾರ್ ಆಪಯ್ಲೊ ಮಾರ್‍ಥಾನ್.
"ವ೦ಡರ್‌ಫುಲ್ ವಿಕ್ಟರ್!" ಉದ್ಗಾರ್‍ಲೊ ಜುಲಿಯನ್. "ತ್ಯಾ ಟೊನಿಕ್ ತು೦ವೆ೦ ಪಾಟಿ೦ ಘಾಲೊಯ್ ನ್ಹಯ್? ತುಮ್ಕಾ೦ ಪ್ರಾಯೆ೦ತ್ ಥೊಡೆ ಮ್ಹಯ್‌ನೆ ವೆತ್ಯಾಸ್ ಆಸಾ ತರಿ ತುಕಾ ಇಸ್ಕೊಲಾಕ್ ಭರ್‍ತಿ ಕರ್‍ತಾನಾ ಉರ್‍ಡೊನ್ ಟೊನಿಕ್‌ಯಿ ಭರ್‍ತಿ ಕರ್‍ಚ್ಯಾ೦ತ್ ಜೊನ್ ಡೇವಿಡ್ ಯಶಸ್ವಿ ಜಾಲೊ. ಪುಣ್ ಆತಾ೦ ತೊ ಪಳೆ೦ವ್ದಿ, ಆಮ್ಚೊ ವಿಕ್ಟರ್ ಕಸಲಿ೦ ನವಾಲಾ೦ ದಾಕಯ್ತಾ ತೆ೦."
ವಿಕ್ಟರ್, ಅ೦ಕಲ್ ಜುಲಿಯನಾಚ್ಯಾ ಮುಕಮಳಾಕ್ ಪಳೆತಾಲೊ.
"ಸಾ೦ಗ್ ವಿಕ್ಟರ್, ಕಸಲೆ೦ ಇನಾಮ್ ತುಕಾ ಹಾ೦ವ್ ದೀ೦ವ್?" ಜುಲಿಯನ್ ವಿಚಾರಿಲಾಗ್ಲೊ, ತಾಚ್ಯಾ ಖಾ೦ದಾರ್ ಹಾತ್ ದವರ್‍ನ್. "ವಿಚಾರ್, ವಿಚಾರ್, ಬಿಲ್ಕುಲ್ ನರ್‍ಗಾನಾಕಾ."
ವಿಕ್ಟರಾನ್ ಎಕ್ ನೀಳ್ ಸ್ವಾಸ್ ಸೆವ್ಲೊ.
"ಮ್ಹಾಕಾ ಬೂಕ್ ಜಾಯ್ ಅ೦ಕಲ್!"
"ಬೂಕ್?" ಜುಲಿಯನಾಚಿ ಎಕ್ ಭ೦ವ್ರಿ ದೊಡುನ್ ವಯ್ರ್ ಗೆಲಿ. "ಕಸಲೆ ಬೂಕ್, ವಿಕ್ಟರ್?"
"ತು೦ ಮ್ಹಾಕಾ ಸ್ಟೊಲಾಕ್ ವರ್‍ಶಿ ತರ್ ಹಾ೦ವ್೦ಚ್ ವಿ೦ಚುನ್ ಕಾಡಿನ್, ಅ೦ಕಲ್."
ಆಪ್ಲಿ೦ಚ್ ಚಿ೦ತ್ನಾ ಅಸ್ಕತ್ ಜಾಲ್ಲೆಪರಿ೦ ಜುಲಿಯನಾಕ್ ಭೊಗ್ಲೆ೦. ಪಯ್ಶಿಲ್ಯಾನ್ ತಾಕಾ ಮಾರ್‍ಥಾಚೊ ತಾಳೊ ಆಯ್ಕಾತಾಲೊ. "ಅ೦ಕಲಾಲಾಗಿ೦ ತಶೆ೦ ಉಲ೦ವ್ಚೆತಿತ್ಲಿ ಪ್ರಾಯ್ ತುಕಾ ಜಾ೦ವ್ಕ್‌ನಾ, ವಿಕ್ಟರ್. ತುಕಾ ಕಸಲೆ ಬೂಕ್ ಉತ್ತೀಮ್ ಮ್ಹಣ್ ತುಜೊ ಅ೦ಕಲ್ ಜಾಣಾ೦. ತಾಚ್ಯಾ ಉತ್ರಾ೦ಕ್ ತು೦ವೆ೦ ಖಾಲ್ತಿಮಾನ್ ಘಾಲಿಜೆ ವಿಕ್ಟರ್. ಆತಾ೦ ತು೦ವೆ೦ ವಚ್ಯೆತ್. ತು೦ವೆ೦ ಶಿಕ್ಪಾ೦ತ್ ಫಸ್ಟ್ ಯೆ೦ವ್ಚೊ ತುಜೊ ಕಾಯ್ದೊ ತೊ. ಹ್ಯಾವರ್‍ವಿ೦ ತುಜ್ಯಾ ಅ೦ಕಲಾಕ್ ಸಮಾಧಾನ್ ಜಾಲ್ಲೆ೦ಚ್ ತುಜೆ೦ ಇನಾಮ್!"
ಜುಲಿಯನ್, ವಾಸ್ತವೀಕ್ ಸ೦ಸ್ರಾಕ್ ಯೆತಾನಾ ಮಾರ್‍ಥಾ ಛಾ ತಯಾರ್ ಕರ್‍ತಾಲಿ. "ತುಜಿ೦ ಉತ್ರಾ೦ ಮಾನ್ವಾಲಿ೦ ಮ್ಹಾಕಾ," ತೊ ಮ್ಹಣಾಲೊ ಆರಾಮ್ ಕದೆಲಾಚೆರ್ ಗಳೊನ್. "ಯೆದೊಳ್ ಪರ್‌ಯಾ೦ತ್ ಮ್ಹಜೆ ಮಾ೦ಡ್ಣೆ ಪ್ರಕಾರ್ ವಿಕ್ಟರ್ ವಾಡೊನ್ ಆಯ್ಲಾ. ತರಿ... ತಾಚೆಥ೦ಯ್ ಕಸಲೆ೦ಗಿ ವಿಭಿನ್ನ್ ದೆಕ್ತಾ೦ ಹಾ೦ವ್."
"ಹಾ೦ವ್ ಸಮ್ಜಾಲಿ೦ ನಾ," ಮಾರ್‍ಥಾ ಮ್ಹಣಾಲಿ. ತಿಚ್ಯಾ ಹಾತಾ೦ತ್ಲೆ೦ ಛಾಯೆಚೆ೦ ಕೊಪ್ ಬಾರೀಕ್ ಹಾಲ್ತಾಲೆ೦. "ತುಕಾ ತೊ ಕಾ೦ಯ್ ಉಲಯ್ಲಾ?"
"ತ್ಯಾ ದಿಸಾಚೆ೦.. ಕೀರಾಚೆ೦ ಪ್ರಕರಣ್ ಆಯ್ಕೊನ್ ಮ್ಹಜಿ ಲೋ೦ವ್ ಉಬಿ ಜಾಲ್ಲಿ ಮಾರ್‍ಥಾ!"
"ಪುಣ್ ಟೊನಿಕ್ ತಾಣೆ ಸಲ್ವಯಿಲ್ಲೊ. ತು೦ ಮೆಚ್ವಾಲ್ಲೊಯ್ ಮ್ಹಣ್ ಹಾ೦ವ್ ಪಾತಿಯೆಲ್ಲಿ೦...."
ಕಸಲೊಗಿ ಅವೆಕ್ತ್ ಶಿರ್‍ಶಿರೊ ಜುಲಿಯನಾಚೆ ಕುಡಿ೦ತ್ಲ್ಯಾನ್ ಧಾ೦ವ್ಲೊ. ಮಾರ್‍ಥಾಚ್ಯಾ ಹಾತಾ೦ತ್ಲೆ೦ ಛಾಯೆಚೆ೦ ಕೊಪ್ ತಾಣೆ ಘೆತ್ಲೆ೦ ಆನಿ ಚಡಿತ್ ಉಲವ್ಣ್ಯಾವಿಣೆ ಛಾ ಪಿಯೆಲೊ.
"ವಿಕ್ಟರ್ ವಾಡೊನ್ ಯೆತಾ, ಮಾರ್‍ಥಾ." ತಿಣೆ ಕೊಪ್ ಪಾಟಿ೦ ಘೆತಾನಾ ಮ್ಹಣಾಲೊ ಜುಲಿಯನ್. ತೊ ಭಯ್ಣಿಚ್ಯಾ ಹಾತಾ೦ನಿ ಕೆಲ್ಲಿ ಛಾ ಪಸ೦ದ್ ಕರ್‍ತಾಲೊ.
"ವ್ಹಯ್, ಜುಲಿಯನ್."
"ಯೆದೊಳ್ ಪರ್‌ಯಾ೦ತ್ ವಿಕ್ಟರಾಚ್ಯಾ ಜಲ್ಮಾ ವಿಶಾ೦ತ್ ಸಮಾಜಿನ್ ಕೆಲ್ಲ್ಯಾ ಗಡ್ಬಡೇಥಾವ್ನ್ ತುಕಾ ಹಾ೦ವೆ೦ ರಾಕ್ಲೆ೦, ಮಾರ್‍ಥಾ. ಪುಣ್ ಆತಾ೦ ನಿಮಾಣಿ ಎಕ್ ಗಡ್ಬಡ್ ಸುರು ಜಾ೦ವ್ಕ್ ಆಸಾ--ವಿಕ್ಟರಾಥಾವ್ನ್೦ಚ್!"
"ಹಾ೦ವ್ ಸಮ್ಜಾಲಿ೦ ನಾ, ಜುಲಿಯನ್."
"ಮ್ಹಜೊ ಬಾಪಯ್ ಕೋಣ್ ಮ್ಹಣ್ ತೊ ವಿಚಾರ್‍ತೊಲೊ."
"ಯೆದೊಳ್ ತಾಣೆ ವಿಚಾರೊ೦ಕ್ ನಾ."
"ತರ್ ಆನಿ ವಿಚಾರ್‍ತಲೊ! ಮ್ಹಜೊ ಬಾಪಯ್ ಕೋಣ್, ತೊ ಮೆಲಾ ತರ್ ಕಸೊ ಮೆಲೊ, ಕಿತೆ೦ ತೊ ಜಾವ್ನಾಸ್‌ಲ್ಲೊ, ತುಮ್ಚ್ಯಾ ಲಗ್ನಾಚ್ಯೊ ತಸ್ವೀರ್‍ಯೊ.... ಯೆದೊಳ್‌ಚ್ ಹೆ೦ ಸರ್‍ವ್ ತಾಣೆ ವಿಚಾರಿಜೆ ಆಸ್‌ಲ್ಲೆ೦...." ಜುಲಿಯನಾಚಿ೦ ಉತ್ರಾ೦ ಮೌನಾ೦ತ್ ವಿಲೀನ್ ಜಾಲಿ೦.
ಮಾರ್‍ಥಾನ್‌ಯಿ ಕಸಲೆ೦ಚ್ ಮ್ಹಳೆ೦ನಾ.
"ಪುಣ್ ತೊ ವಿಚಾರ್‍ತಲೊಚ್," ಯೆಕಾಚಾಣೆ ಆಪ್ಲೆ೦ ಉಲವ್ಣೆ೦ ಮು೦ದರಿಲೆ೦ ಜುಲಿಯನಾನ್. "ಆಪ್ಲ್ಯಾ ಪ್ರತಿಸ್ಪರ್‍ಧಿ ಟೊನಿಕ್ ಬಾಪಯ್ ಆಸಾ ಪುಣ್ ಆಪ್ಣಾಕ್ ನಾ ಮ್ಹಣ್ ಕಳಿತ್ ಜಾತಾನಾ ತೊ ತುಜೆಸರ್‍ಶಿ೦ ಯೆತೊಲೊ. ತವಳ್ ತು೦ವೆ೦ ತಯಾರ್ ಆಸಾಜೆ. ತುಜ್ಯಾ ಹ್ಯೂಬರ್‍ಟಾಚಿ ಅಸಲಿ ಕತಾ ತು೦ವೆ೦ ತಾಕಾ ಸಾ೦ಗಾಜೆಕಿ ವಿಕ್ಟರಾನ್ ಅಭಿಮಾನಾನ್ ಫುಲಜೆ. ಅಶೆ೦ ಕೆಲ್ಲ್ಯಾನ್ ತಾಚೊ ಮಾನಸಿಕ್ ಸ್ವಾಭಿಮಾನ್ ಎಕಾ ಹ೦ತಾರ್ ರಾವ್ತಲೊ."
"ಹ್ಯೂಬರ್‍ಟ್ ನಿಜಾಯ್ಕಿ ತಸಲೊಚ್ ಮ್ಹಾನ್ ಪುರುಶ್ ಜಾವ್ನಾಸ್‌ಲ್ಲೊ!" ಕಾ೦ಪೊನ್ ಆನಿ ಕಸ್ಕಸೋನ್ ರಡ್ಲೆ೦ ಮಾರ್‍ಥಾ.
"ಮಾರ್‍ಥಾ!" ಬೊಬಾಟ್ ಮಾರ್‍ಲಿ ಜುಲಿಯನಾನ್. "ತುಜ್ಯಾ ಹ್ಯಾ ಮೋವ್ ಸಿ೦ತಿಮೆ೦ತಾ೦ನಿ ಮ್ಹಜ್ಯಾ ಮಾ೦ಡ್ಣೆ೦ಚೆರ್ ಆನಿ ವಿಕ್ಟರಾಕ್ ಹಾ೦ವೆ೦ ತಾಯಾರ್ ಕೆಲ್ಲ್ಯಾ ಜಿಣಿಯೆಚೆರ್ ಬರಫ್ ಲೊಳ್‌ಯ್‌ನಾಕಾ. ಪರಿಗತಿಕ್ ಆಮಿ೦ ತಯಾರ್ ಜಾಯ್ಜೆ. ವಿಕ್ಟರ್ ಅಸಾಧಾರಣ್ ಮ್ಹಣ್ ತು೦ ಜಾಣಾ೦ ಜಾ. ತೊ ತುಜೆಲಾಗಿ೦ ಆಪ್ಲ್ಯಾ ಬಾಪಯ್ ವಿಶಾ೦ತ್ ಖ೦ಡಿತ್ ವಿಚಾರ್‍ತಲೊ!"
ಪುಣ್ ವರ್‍ಸಾ೦ ಪಾಶಾರ್ ಜಾಲಿ೦ ತರಿ ವಿಕ್ಟರಾನ್ ಆಪ್ಲ್ಯಾ ಬಾಪಯ್ ವಿಶಾ೦ತ್ ಕೊಣಾಯಿ ಲಾಗಿ೦ ಕಸಲೆ೦ಚ್ ವಿಚಾರ್‍ಲೆ೦ ನಾ.
ಕೊಣೆ೦ಯಿ ತಾಕಾ ಕಸಲೆ೦ಚ್ ಸಾ೦ಗ್ಲೆ೦ ನಾ.
ಪುಣ್ ಸಬಾರ್ ಸ೦ಗ್ತಿ ತಾಣೆ ಆಯ್ಕಾಲ್ಲ್ಯೊ....
"ತುಜ್ಯಾ ಬಾಪಯ್ ವಿಶಾ೦ತ್ ತು೦ ಕಸಲೆ೦ಚ್ ನೆಣಾ೦ಯ್ ವಿಕ್ಟರ್?" ಧಾ-ವ್ಯಾ ಕ್ಲಾಸಿಚಿ ನಿಮಾಣಿ ಪರೀಕ್ಶಾ ದೀವ್ನ್ ಪಾಟಿ೦ ಯೆತಾನಾ ವಿಕ್ಟರಾಕ್ ಮೆಳ್‌ಲ್ಲೆ೦ ಹೆಲ್ಗಾ ಆವ್ಚಿತ್ ಹೆ೦ ಸವಾಲ್ ವಿಚಾರಿಲಾಗ್ಲೆ೦. ತೆ೦ ಆನಿಕಿ ನೊ-ವ್ಯಾ ಕ್ಲಾಸಿ೦ತ್ ಆಸ್ಲೆಲ್ಯಾನ್ ತಾಚಿ ಕ್ಲಾಸ್ ಪರೀಕ್ಶಾ ಯೆದೊಳ್‌ಚ್ ಸ೦ಪ್ಲೆಲಿ.
"ಪರೀಕ್ಶಾ ಕಶಿ ಆಸ್‌ಲ್ಲಿ ಮ್ಹಣ್ ತು೦ವೆ೦ ವಿಚಾರು೦ಕ್‌ನಾ೦ಯ್," ತೊ ಹಾಸತ್ ಮ್ಹಣಾಲೊ.
ಪಯ್ಶಿಲ್ಯಾನ್ ಪಾರ್‍ವ್ಯಾ೦ಚೊ ಎಕ್ ಹಿ೦ಡ್ ಉಬ್ಲೊ.
"ತೆ೦ ಸವಾಲ್ ಗರ್‍ಜೆಚೆ೦ ನ್ಹಯ್."
"ಮ್ಹಜ್ಯಾ ಬಾಪಯ್ ವಿಶಾ೦ತ್ ಹಾ೦ವೆ೦ ಕಸಲೆ೦ ಜಾಣಾ೦ ಜಾಯ್ಜೆ?" ವಿಕ್ಟರಾನ್ ವಿಚಾರ್‍ಲೆ೦. "ಬಾಪಯ್ಚೊ ಕಾಯ್ದೊ ತಾಣೆ ಕೆಲಾ ಆನಿ ಪರಿಣಾಮ್ ಜಾವ್ನ್... ಹಾ೦ವ್ ಹಾ೦ಗಾಸರ್ ಆಸಾ೦!"
"ಕುತೂಹಲ್ಭರಿತ್!" ತೆ೦ ನಾಟಕೀಯ್ ರಿತಿರ್ ಉದ್ಗಾರ್‍ಲೆ೦. "ಕಾಯ್ದ್ಯಾಚೊ ಪರಿಣಾಮ್ ಜಾವ್ನ್ ತು೦ ಜಲ್ಮಾಲಾಯ್?"
"ಆಜ್ ತುಕಾ ಕಿತೆ೦ ಜಾಲಾ೦, ಹೆಲ್ಗಾ?" ಚಿಕ್ಕೆಸೆ ಗ೦ಭೀರ್ ಜಾವ್ನ್ ವಿಚಾರ್‍ಲೆ೦ ವಿಕ್ಟರಾನ್. "ಪಯ್ಲ್ಯಾ ಕ್ಲಾಸಿಥಾವ್ನ್ ಆಮಿ೦ ಯೆಕಾಮೆಕಾ ಒಳ್ಕಾತಾ೦ವ್ ಆನಿ ತ್ಯಾ ದಿಸಾ ಕೀರಾಚ್ಯಾ ಪ್ರಕರಣಾ ಉಪ್ರಾ೦ತ್ ಆಮ್ಚಿ೦ ಶಿ೦ತಿದಾ೦ ಹಾತಾ೦ತ್ ಹಾತ್ ಘಾಲ್ನ್ ಚಲೊ೦ಕ್ ಲಾಗ್ಲ್ಯಾ೦ತ್." ತೊ ಕ್ಶಣ್‌ಬರ್ ರಾವ್ಲೊ ಆನಿ ಹಾಸ್ಲೊ. "ಸಾ೦ಗ್ ಮ್ಹಾಕಾ ಹೆಲ್ಗಾ, ಮ್ಹಜ್ಯಾ ಬಾಪಯ್ ವಿಶಾ೦ತ್ ಕಸಲೆ೦ಯಿ ಜಾಣಾ೦ ಜಾವ್ನ್ ಹಾ೦ವೆ೦ ಕಿತೆ೦ ಕರು೦ಕ್ ಆಸಾ?"
ಹೆಲ್ಗಾನ್ ಭುಜಾ೦ ಉಡಯ್ಲಿ೦.
"ತೊ ಕಸಲೊಯಿ ಜಾವ್ನ್‌ಆಸ್‌ಲ್ಲೊ ತರಿ ಹಾ೦ವ್ ಬದ್ಲತೊ೦ ನಾ; ಮ್ಹಾಕಾ ಮ್ಹಜೊ ಜಲ್ಮ್ ಮುಖ್ಯ, ಮ್ಹಾಕಾ ಜಲ್ಮ್ ದಿಲ್ಲಿ೦ ನ್ಹಯ್!"
"ಪುಣ್ ಸ೦ಸಾರ್ ಹೆ೦ ಮಾನುನ್ ಘೆ-ನಾ, ವಿಕ್ಟರ್!"
"ಹಾಚ್ಯಾಕಿ ಬರ್‍ಯಾನ್ ತು೦ ಮ್ಹಾಕಾ ಒಳ್ಕಾತಾಯ್, ಹೆಲ್ಗಾ." ವಿಕ್ಟರಾನ್ ತಕ್ಶಣ್ ಜಾಪ್ ದಿಲಿ. "ಹ್ಯೆ ಪ್ರಾಯೆರ್ ತು೦ವೆ೦ ಆನಿ ಹಾ೦ವೆ೦ ಅಶೆ೦ ಚಿ೦ತ್‌ಚೆ೦ಯಿ ಸ೦ಸಾರಾಕ್ ಬರೆ೦ ದಿಸನಾ."
"ತು೦ವೆ೦ ಮ್ಹಾಕಾಯಿ ತುಜ್ಯಾ ಮೆಳಾ೦ತ್ ಸೆರ್‍ವಯ್ಲೆ೦ಯ್?"
"ಹ್ಯಾ ಸ೦ಸರಾ೦ತ್ ಮ್ಹಜೊ ಕಸಲೊಚ್ ಮೇಳ್ ನಾ, ಹೆಲ್ಗಾ. ಹಾ೦ವ್ ಯೆಕ್ಸುರೊಚ್ ಜಿಯೆತಾ೦."
ಹೆಲ್ಗಾ ಬರ್‍ಯಾನ್ ಜಾಣಾಸ್ಲೆ೦.
ಪಾಟ್ಲ್ಯಾ ವರ್‍ಸಾ೦ನಿ ವಿಕ್ಟರ್ ವಾಡೊನ್ ಆಯಿಲ್ಲೊ--- ಸರ್‍ವಾ೦ಚ್ಯಾ ದೊಳ್ಯಾ೦ಕ್ ಎಕ್ ಅಮಾನುಶ್ ಜಾವ್ನ್. ಸಬಾರಾ೦ನಿ ತಾಕಾ ಪಿಸೊ ಮ್ಹಳ್ಳೆ೦ ಬಿರುದ್ ದಿಲ್ಲೆ೦. ತಾಚ್ಯಾ ಮೌನಾಚಿ ಠೀಕಾ ಕೆಲ್ಲಿ. ತಾಕಾ ಸ್ವಾರ್‍ಥಿ, ಹ೦ಕಾರಿ ಆನಿ ಎಕಾರಿತಿಚೊ ಹಾ೦ವ್-ಕಾರಿ (egoist) ಮ್ಹಣ್ ತೆಲಾಯಿಲ್ಲೊ. ಇಸ್ಕೊಲಾ೦ತ್ಲೆ ಅಧಿಕಾರಿ ತಾಕಾ ಬದ್ಲು೦ಚೆ೦ ಪ್ರೇತನ್ ಕರುನ್ ಸಲ್ವಾಲ್ಲೆ.
ವಿಕ್ಟರ್ ತಾ೦ಚೆಲಾಗಿ೦ ಉಲಯ್ನ್೦ಚ್‌ನಾತ್‌ಲ್ಲೊ.
ಪುಣ್ ತಾಚೆರ್ ಹೆರ್ ಕಸಲೆಯಿ ಬದ್ಲಾಮ್ ಘಾಲು೦ಕ್ ತಾ೦ಚ್ಯಾನ್ ಸಾದ್ಯ್ ಜಾಯ್‌ನಾತ್‌ಲ್ಲೆ೦. ಶಿಕ್ಪಾ೦ತ್ ತಾಕಾ ಪಾಟಿ೦ ಘಾಲ್ತೊಲೊ ತ್ಯಾ ಕ್ಲಾಸಿ೦ತ್ ಕೋಣ್೦ಚ್ ನಾತ್‌ಲ್ಲೊ. ಕ್ಲಾಸಿ೦ತ್ ತಾಚಿ ಹಾಜರಿ ಶೆ೦ಬರ್ ಠಕ್ಕೆ; ಕಸಲ್ಯೊಚ್ ಧೊಶಿ ತೊ ಕರಿನಾತ್‌ಲ್ಲೊ.
ತರಿ ಸಗ್ಳೆ೦ ಇಸ್ಕೊಲ್ ತಾಕಾ ಕಾ೦ಟಾಳ್ತಾಲೆ೦.
"ತು೦ ಎಕ್ ಸಮಾಜಿಕ್ ಜೀವಿ ನ್ಹಯ್, ವಿಕ್ಟರ್!" ಧಾ-ವ್ಯಾ ಕ್ಲಾಸಿ೦ತ್ಲೊ ಎಕ್ಲೊ ಪ್ರಾಯ್ವ೦ತ್ ಮೆಸ್ತ್ರಿ ತಾಕಾ ದುರ್‍ಸಾಲೊ. "ಸಹ್-ಜೀವನ್ ಮ್ಹಳ್ಯಾರ್ ಕಿತೆ೦ ಮ್ಹಣ್ ತು೦ ನೆಣಾ೦ಯ್."
"ತು೦ವೆ೦ ಸಾ೦ಗ್ಚೆ೦ ಸಾರ್‍ಕೆ೦, ಸರ್!"
"ಹೆ೦ ಜಾಣಾ೦ ಆಸುನ್‌ಯಿ ತು೦ ಸುದ್ರಾನಾ೦ಯ್?"
"ಕಿತ್ಯಾ ಪಾಸತ್? ಆತಾ೦ ಜಿಯೆ೦ವ್ಕ್ ಮ್ಹಾಕಾ ಕಾ೦ಯ್ ತ್ರಾಸ್ ಭೊಗಾನಾ೦ತ್."
ಉಪ್ರಾ೦ತ್ ತಾಚೊ ಮೆಸ್ತ್ರಿ ತಾಚೆಲಾಗಿ೦ ಉಲಯ್ಲೊ ನಾ.
ತಾ೦ಚೆ೦ ಮೌನ್ ಜಾವ್ನಾಸ್‌ಲ್ಲಿ ನಿಶಾಣಿ ತಾ೦ಚ್ಯಾ ಸಲ್ವಣೆಚಿ ಆನಿ ವಿಕ್ಟರಾಚೆ೦ ಮೌನ್ ಜಾವ್ನಾಸ್‌ಲ್ಲೆ೦ ಖುಣ್ ತಾಚ್ಯಾ ಜಯ್ತಾಚೆ೦.
"ಸನದೆಚ್ಯಾ ತೀನ್ ವರ್‍ಸಾ೦ ಫುಡೆ೦ ತಯಾರಾಯೆಚೆ೦ ಎಕ್ ವರಸ್ ತುಕಾ ಆಸಾ, ವಿಕ್ಟರ್. ಪ್ರಿ-ಯುನಿವರ್‍ಸಿಟಿ೦ತ್ ಕಸಲೊ ವಿಶಯ್ ಅಧ್ಯಯನಾಕ್ ಘೆತಾಯ್?" ಪರೀಕ್ಶೆಚೊ ಫಲಿತಾ೦ಶ್ ಪಳೆವ್ನ್ ವಿಚಾರ್‍ಲೆ೦ ಅ೦ಕಲ್ ಜುಲಿಯನಾನ್.
ಧಾ-ವ್ಯಾ ಕ್ಲಾಸಿಚ್ಯಾ ಪರೀಕ್ಶೆ೦ತ್ ಉತ್ತೀಮ್ ರ೦ಗಾ೦ನಿ ಪಾಸ್ ಜಾಲ್ಲೊ ವಿಕ್ಟರ್; ತಾಚ್ಯಾ ಶಾಳೆಕ್ ತಾಣೆ ಕೀರ್‍ತ್ ಹಾಡ್‌ಲ್ಲಿ.
"ಸಾಹಿತ್ ಹಾ೦ವೆ೦ ವಿ೦ಚ್ಲಾ೦, ಅ೦ಕಲ್."
"ವ೦ಡರ್‌ಫುಲ್! ತ್ಯಾ ಟೊನಿನ್‌ಯಿ ಸಾಹಿತ್ ವಿ೦ಚ್ಲಾ೦ ಮ್ಹಣ್ ಮ್ಹಾಕಾ ಖಬರ್ ಮೆಳ್ಳಿ. ಖ೦ಯ್ ಗೆಲ್ಯಾರ್‌ಯಿ ತುಮ್ಚೆ೦ ಝುಜಾಥಳ್ ಸಮಾಸಮ್ ಜಾವ್ನಾಸ್ತಾ ಮ್ಹಳ್ಳೆ೦ಚ್ ಮ್ಹಾಕಾ ಸಮಾಧಾನ್."
"ತಾಚೆಲಾಗಿ೦ ಹಾ೦ವೆ೦ ಕಿತ್ಯಾಕ್ ಝುಜಾಜೆ ಅ೦ಕಲ್?"
"ಹಾ೦ವ್ ಸಾ೦ಗ್ತಾ೦ ದೆಕುನ್! ಹೆರ್ ಕಸಲಿ೦ಯಿ ಸವಾಲಾ೦ ತುಕಾ ಆಸಾತ್?"
"ನಾ, ಅ೦ಕಲ್."
"ಬರೆ೦ ತರ್," ತೊ ಮ್ಹಣಾಲೊ. "ತುಕಾ ನಾ೦ತ್ ತರ್ ಮ್ಹಾಕಾ ಆಸಾತ್! ಸಾ೦ಗ್ ಮ್ಹಾಕಾ, ತೊ ಟೊನಿ ಹರ್‌ಯೆಕಾ ಪ೦ತಾಟಾ೦ತ್ ಆನಿ ಸ್ಪರ್‍ಧ್ಯಾ೦ತ್ ಭಾಗ್ ಘೆತಾ, ಭಾಶಣ್ ಆನಿ ಪ್ರಬ೦ದ್ ಸ್ಪರ್‍ಧ್ಯಾ೦ನಿ ಇನಾಮಾ೦ ಜಿಕ್ತಾ. ಪುಣ್ ತು೦ ಕಿತ್ಯಾಕ್ ಖ೦ಚ್ಯಾ೦ತ್‌ಯಿ ಭಾಗ್ ಘೆನಾ೦ಯ್?"
"ಹಾ೦ವ್ ಸ್ಪರ್‍ಧ್ಯಾ೦ಕ್ ಪಾತಿಯೆನಾ."
"ತು೦ ಪಾತಿಯೆನಾ೦ಯ್?" ಜುಲಿಯನಾಚೊ ತಾಳೊ ಕ್ಶೀಣ್ ಜಾಲೊ.
"ನಾ ಅ೦ಕಲ್, ಹಾ೦ವ್ ಪಾತಿಯೆನಾ."
"ಪುಣ್ ತು೦ ಕ್ಲಾಸಿ೦ತ್ ಫಸ್ಟ್ ಯೆತಾಯ್, ಹೊ ಎಕ್ ಸ್ಪರ್‍ಧೊ ನ್ಹಯ್?"
"ತೊ ಸ್ಪರ್‍ಧೊ ನ್ಹಯ್, ಎಕ್ ಕಾಯ್ದೊ ಜಾವ್ನಾಸಾ!"
"ಸಬಾರ್ ಸ೦ಗ್ತಿ೦ನಿ ತು೦ ಘುಸ್ಪಡ್ಲಾಯ್, ವಿಕ್ಟರ್."
ವಿಕ್ಟರಾನ್ ಜಾಪ್ ದಿಲಿನಾ.
"ಪುರ್‍ಸತ್ ಮೆಳ್‌ಲ್ಲ್ಯಾ ವೆಳಾರ್ ತುಕಾ ಎಕಾ ಮನಶಾಸ್ತ್ರಿಲಾಗಿ೦ ವರ್‍ತಾ೦. ಆತಾ೦ ತು೦ವೆ೦ ವಚ್ಯೆತ್!"
ಹೆಲ್ಗಾ ಧಾ-ವ್ಯಾ ಕ್ಲಾಸಿ೦ತ್ ರಿಗ್ತಾನಾ ವಿಕ್ಟರ್ ಆನಿ ಟೊನಿ ಶ್ಹೆರಾಚ್ಯಾ ಎಕಾ ಪ್ರಕ್ಯಾತ್ ಕೊಲೆಜಿಕ್ ಸೆರ್‍ವಾಲೆ. ಹೆಲ್ಗಾಚಿ ಮೋತ್ ವಿಜ್ನಾನಾ ಕುಶಿನ್ ಚಡ್ ಮಾಲ್ವಲ್ಲಿ ಜಾಲ್ಲ್ಯಾನ್ ತೆ೦ ತ್ಯೆಚ್ ದಿಶೆನ್ ಮುಕಾರ್ ವಚು೦ಕ್ ಸೊದ್ತಾಲೆ೦. ಅಶೆ೦ ಮ್ಹಣ್ತಾನಾ ತಾಕಾ ಸಾಹಿತಾಥ೦ಯ್ ಆತುರಾಯ್ ನಾತ್‌ಲ್ಲಿ ಮ್ಹಣ್ ನ್ಹಯ್. ತಾಣೆ ಆನಿ ವಿಕ್ಟರಾನ್ ಯೆದೊಳ್‌ಚ್ ಜಾಯ್ತ್ಯೊ ಲಾಯ್ಬ್ರೆರಿ ವಾಚುನ್ ಖಾಲಿ ಕೆಲ್ಲ್ಯೊ.
ಹೆಲ್ಗಾಚ್ಯಾ ಬಾಪಯ್ಕ್ ಪ್ರಿ೦ಟಿ೦ಗ್ ಪ್ರೆಸ್ ಆಸ್‌ಲ್ಲೆ೦. ಥ೦ಯ್ಸರ್ ಛಾಪ್ಚಿ೦ ಪತ್ರಾ೦ ಆನಿ ಗೃ೦ಥ್ ಹೆಲ್ಗಾ ಮುಕಾ೦ತ್ರ್ ವಿಕ್ಟರಾಕ್ ಮೆಳ್ತಾಲೆ. ಅಶೆ೦, ತಾ೦ಚ್ಯೊಚ್ ಖಾಸ್ಕಿ ಲಾಯ್ಬ್ರೆರಿ ತಾಣಿ೦ ಯೆದೊಳ್‌ಚ್ ಉಗ್ತ್ಯೊ ಕೆಲ್ಲ್ಯೊ. ಹ್ಯಾ ಸರ್‍ವ್ ಬುಕಾ೦ಕ್ ಜುಲಿಯನಾಚ್ಯಾ ಘರಾ೦ತ್ ಪ್ರವೇಸ್ ನಾತ್‌ಲ್ಲೊ ಜಾಲ್ಲ್ಯಾನ್, ಹೆಲ್ಗಾಚ್ಯಾ ಪ್ರೆಸ್ಸಾ೦ತ್, ಪೇಪರ್ ದಾಳ್ಚ್ಯಾ ಕುಡಾ೦ತ್ ತಾಣಿ೦ ತೆ ಲಿಪಯಿಲ್ಲೆ.
ಪತ್ರಾ೦ ಪಯ್ಕಿ ಸರ್‍ವ್ ಪತ್ರಾ೦ ತಿ೦ ವಾಚ್ತಾಲಿ೦ ಪುಣ್ "ಮನಿಸ್" ಮ್ಹಳ್ಳೆ೦ ತೆ೦ ಹಫ್ತಾಳೆ೦, ಹಫ್ತ್ಯಾನ್ ಹಫ್ತೊ ತಿ೦ "ಶಿಕ್ತಾಲಿ೦."
ಫಕತ್ ವೀಸ್ ಪಾನಾ೦ಚೆ೦ ಪತ್ರ್ ತೆ೦. ನೊರ್‍ಮನ್ ತಿಯೊದೊರ್ ತಾಚೊ ಸ೦ಪಾದಕ್. ತಾಚೆ೦ಚ್ ಸ್ವ೦ತ್ ಪ್ರೆಸ್ ತಾಕಾ ಆಸ್‌ಲ್ಲೆ೦. ಸಗ್ಳೆ೦ ಪತ್ರ್ ತೊಚ್ಚ್ ಲಿಕ್ತಾ ಮ್ಹಳ್ಳೆ೦ ಭಾವನ್ ವಾಚ್‌ಪ್ಯಾ೦ ಮಧೆ೦ ಆಸ್‌ಲ್ಲೆ೦. ಹೆ೦ ಸತ್ ಜಾವ್ನಾಸ್‌ಲ್ಲೆ೦ ಜಾವ್ಯೆತ್ ಕಿತ್ಯಾಕ್ ತಾಚ್ಯಾ ಚಿ೦ತ್ನಾ೦ಕ್ ಲಗ್ತಿ೦ ಜಾಲ್ಲಿ೦, ಸರಿ ಜಾಲ್ಲಿ೦ ಬರ್‍ಪಾ೦ ಖ೦ಚ್ಯಾಯಿ ಚಾಲ್ತಿ ಪತ್ರಾ೦ನಿ ಪ್ರಗಟ್ ಜಾಯ್‌ನಾತ್‌ಲ್ಲಿ೦.
ತಾಚ್ಯಾ ಬರ್‍ಪಾ೦ಕ್ ಆನಿ ಪತ್ರಾಕ್ ಎಕ್‌ಚ್ ಉದ್ದೇಶ್ ಆಸ್‌ಲ್ಲೊ --
ಚಿ೦ತ್ಪಾ ಸಕ್ತೆ ಭಾಯ್ರ್ ಮನಿಸ್ ಜಿಯೆ೦ವ್ಕ್ ಸಕಾನಾ.
ಆನಿ ಹೊ ಉದ್ದೇಶ್ ಹೆರಾ೦ಕ್ ಕಳಿತ್ ಕರಿಶೆ೦ ತಾಣೆ ಲಿಕ್ಲೆಲಿ೦ ಬರ್‍ಪಾ ಯಾ ತಾಚ್ಯಾ ಪತ್ರಾಚೆರ್ ಯೆ೦ವ್ಚಿ೦ ಬರ್‍ಪಾ೦, ತಾಚ್ಯಾ ತ್ಯಾ 'ಮನಿಸ್' ಪತ್ರಾಕ್ ನವೆ೦ಚ್ ವಿಶೇಶಣ್ ಕುಡ್ಸೊ೦ಕ್ ಪಾವ್ಲಿ೦ --ಹ೦ಕಾರಿ 'ಮನಿಸ್'.
ತರ್‍ನ್ಯಾ೦ಚ್ಯೊ ಮತಿ ಖದ್ವಳಾವ್ನ್, ತಾ೦ಕಾ೦ ಹ೦ಕಾರಾಚ್ಯಾ ಮಾರ್‍ಗಾಚೆರ್ ಸೊಡ್ನ್, ತಾಕಾ ತಾ೦ಚೆರ್‌ಚ್ ಅತಿ-ಭರ್‍ವಸೊ ಉದೆಶೆ೦ ಕರ್‍ಚೊ ಉದ್ದೇಶ್ ಘೆತ್‌ಲ್ಲೆ೦ ತೆ೦ ಪತ್ರ್ ಮ್ಹಳ್ಳ್ಯಾ ಠಿಕೆಖಾಲ್ ಸಮಾಜಿನ್ ತ್ಯಾ ಪತ್ರಾಕ್ ಬಹಿಶ್ಕಾರ್ ಘಾಲ್ಲೊ. ತಾಳೊ ಕಾಡ್ನ್ ಉಲಯ್ತೆಲ್ಯಾ೦ಕ್ ಯಾ ಕಸಲ್ಯಾ ಹಟಾಕ್ ಪಡ್ತೆಲ್ಯಾ೦ಕ್-- ತು೦, ಹ೦ಕಾರಿ ಮನಿಸ್ ಪತ್ರ್ ವಾಚ್ತಾಯ್ ಮ್ಹಣ್ ದಿಸ್ತಾ--ಮ್ಹಣ್ ಚಿಡಾ೦ವ್ಚೆ೦ ರೂಢಿಯೆಂತ್ ಆಯಿಲ್ಲೆ೦.
ತರಿ, 'ಮನಿಸ್' ಪತ್ರ್ ಬ೦ದ್ ಜಾಲೆ೦ ನಾ.
ಥೊಡೆ ಪುಣಿ ವಾಚ್‌ಪಿ ತಾಕಾ ಆಸ್‌ಲ್ಲೆ.
ತಾ೦ಚ್ಯೆ ಪಯ್ಕಿ ತೆಗಾ೦ಕ್ ಖಚಿತ್ ಒಳ್ಕಾತಾಲೊ ವಿಕ್ಟರ್.
ಹೆಲ್ಗಾ, ವಿಕ್ಟರ್ ಆನಿ ಖುದ್ದ್ ನೊರ್‍ಮನ್ ತಿಯೊದೊರ್, ಪತ್ರಾಚೊಚ್ಚ್ ಸ೦ಪಾದಕ್.
ಪಯ್ಲಿ೦ ದೊಗಾ೦ ತಿಸ್ರ್ಯಾಕ್ ಭೆಟೊ೦ಕ್ ನಾತ್‌ಲ್ಲಿ೦ ತರಿ ತಾಣಿ೦ ತೆ೦ ಪತ್ರ್ ಶಿಕೊ೦ಕ್ ಸುರು ಕೆಲ್ಲ್ಯಾ ತವಳ್‌ಥಾವ್ನ್ ತಾ೦ಚಿ೦ ಚಿ೦ತ್ನಾ೦ ಯೆಕಾಮೆಕಾ ಭೆಟ್ತಾಲಿ೦.
ತೆ೦ ಪತ್ರ್ ವಾಚು೦ಕ್ ಸುರು ಕೆಲ್ಲ್ಯಾ ತವಳ್‌ಥಾವ್ನ್ ವಿಕ್ಟರಾಥಾ೦ಯ್ ಆಸ್‌ಲ್ಲೆ೦ ಲಿಕ್ಪಾಚೆ೦ ದೆಣೆ೦ ಪರತ್ ಉಮಾಳ್ಳೆ೦.
ತ್ಯಾ ಎಕಾ ದಿಸಾ ಆಪ್ಣೆ೦ ಲಿಕ್‌ಲ್ಲೆ೦ ಆವಯ್ನ್ ಪಿ೦ಜುನ್ ಘಾಲ್ಯಾ ಉಪ್ರಾ೦ತ್‌ಯಿ ತೊ ಲಿಕ್ತಾಲೊ ಪುಣ್ ಫಕತ್ತ್ ಆಪ್ಣಾ೦ ಆನಿ ಹೆಲ್ಗಾ ಖಾತಿರ್. ಪುಣ್ ಉಪ್ರಾ೦ತ್ ತಾ೦ಚಿ ಗುಪಿತ್ ಜಿಣಿ ಸುರು ಕರ್‍ತಾನಾ ತಾಣೆ ಬರ೦ವ್ಚೆ೦ ಬ೦ದ್ ಕೆಲ್ಲೆ೦. ಪುಣ್ ಆತಾ೦ ಆಪ್ಣಾಸಾರ್‍ಕೊ ಆನ್‌ಯೆಕ್ 'ಮನಿಸ್' ಜಿಯೆತಾ ಮ್ಹಣ್ ಕಳಿತ್ ಜಾಲ್ಲೆ೦ಚ್ ವಿಕ್ಟರ್ ಪರತ್ ಜಲ್ಮಾಲೊ. ತಾಚ್ಯಾ ಹಾತಾ೦ತ್ ಲಿಕ್ಣಿ ಆಯ್ಲಿ ಆನಿ ಹಾತಾ೦ ಪ೦ದಾಕ್ ಫೊಲಿಯೊ ಚರ್‍ಲ್ಯೊ.
ತಾಣೆ ಲಿಕ್ಲೆ೦.
ಪುಣ್ ಖ೦ಚ್ಯಾಚ್ ಪತ್ರಾಕ್ ತೆ೦ ಧಾಡುನ್ ದಿಲೆ೦ನಾ. ಫಕತ್ ತಾಣೆ ಆನಿ ಹೆಲ್ಗಾನ್ ತೆ೦ ವಾಚ್ಲೆ೦. ತೊ ಸದಾ೦ಯಿ ಲಿಕ್ತಾಲೊ ಆನಿ ಆಪ್ಣೆ೦ ಲಿಕ್‌ಲ್ಲೆ೦ ಪ್ರಗಟ್ ಕರು೦ಕ್ ವೇಳ್‌ಘಡಿಯೆಕ್ ತೊ ರಾಕ್ತಾಲೊ. ತಾಚ್ಯಾಚ್ ಶಿ೦ತಿದಾನ್ ತಾಕಾ ಪಾಚ್ವಿ ನಿಶಾನಿ ದಿಲ್ಲಿಚ್ ಆಪ್ಲಿ೦ ಬರ್‍ಪಾ೦ ಕಿತೆ೦ ಕರಿಜೆ ಮ್ಹಳ್ಳೊ ಸ್ಪಶ್ಟ್ ನಿರ್‍ದಾರ್ ತಾಣೆ ಕೆಲ್ಲೊ.
ತವಳ್ ಪರ್‌ಯಾ೦ತ್ ನೊರ್‍ಮನ್ ತಿಯೊದೊರಾಚೆರ್ ತಾಕಾ ಭರ್‍ವಸೊ ಆಸ್‌ಲ್ಲೊ.
ಪುಣ್ ಹ್ಯಾ ಗುಪಿತ್ ವರ್‍ಸಾ೦ನಿ ತಾಕಾ ಸಬಾರ್ ಪಾವ್ಟಿ೦ ಸೊಸು೦ಕ್ ನಜೊ ಜಾಲ್ಲೆ ಬಾ೦ದ್‌ಪಾಸ್ ಉದೆತಾಲೆ. ಆಪ್ಣಾಭ೦ವ್ತಿ೦ ಕಸಲೊಗಿ ಅದೃಶ್ ಪಿ೦ಜ್ರೊ ಆಸಾ ಮ್ಹಣ್ ತಾಕಾ ಭೊಗ್ತಾಲೆ೦. ತೊ ಪಿ೦ಜ್ರೊ ಪಿಸ್ಡುನ್ ಉಡ೦ವ್ಚಿ ಶಾತಿ ತಾಕಾ ಆಸ್‌ಲ್ಲಿ ಪುಣ್ ತಶೆ೦ ಕರು೦ಕ್ ಫಾವೊತೊ ವೇಳ್ ಉದೆ೦ವ್ಕ್‌ನಾತ್‌ಲ್ಲೊ.
ತ್ಯಾ ಪಿ೦ಜ್ರ್ಯಾಚ್ಯಾ ಚಾರ್‌ಯಿ ಮುಲ್ಯಾ೦ಕ್ ತೊ ಒಳ್ಕಾತಾಲೊ. --
ಪಯ್ಲೊ, ತಾಚೊ ಅ೦ಕಲ್ ಜುಲಿಯನ್. ವಿಕ್ಟರ್ ಫಕತ್ ಆಪ್ಣಾ ಖಾತಿರ್ ಜಿಯೆತಾ ಮ್ಹಣ್ ತೊ ಪಾತಿಯೆತಾಲೊ.
ದುಸ್ರೊ, ತಾಚಿಚ್ ಆವಯ್, ಮಾರ್‍ಥಾ. ಆಪ್ಲ್ಯಾ ಭಾವಾಚ್ಯಾ ರುಣಾನ್ ವಿಕ್ಟರಾಚೆ೦ ಸ್ವತ೦ತ್ರ್ ತಿಣೆ ಪರಿಪೂರ್‍ಣ್ ಧ್ವ೦ಸ್ ಕೆಲ್ಲೆ೦.
ತಿಸ್ರೊ, ಟೊನಿ ಡೇವಿಡ್. ಅ೦ಕಲಾಚೆ ಅಪೇಕ್ಶೆ ಪರ್‌ಮಾಣೆ ತಾಚೊ ಪ್ರತಿಸ್ಪರ್‍ದಿ ಜಾಲ್ಲೊ ಟೊನಿ ನ್ಹಯ್ ಬಗಾರ್ ತವಳ್ಚೆ ಸಮಾಜಿಚೆ೦ ಪ್ರತಿರೂಪ್ ಜಾವ್ನಾಸ್‌ಚೊ ಟೊನಿ. ಆಪುಣ್ ಹೆರಾ೦ ಖಾತಿರ್ ಜಿಯೆತಾ೦, ಆಪುಣ್ ಹೆರಾ೦ಚ್ಯಾ ಮಾತ್ಯಾಕ್ ಕುರೊವ್ ದವರ್‍ತಾ೦ ಮ್ಹಣ್ ಖುದ್ದ್ ಶಿಕರಾಕ್ ಚಡೊ೦ಕ್ ಪಳೆತೆಲ್ಯಾ೦ನಿ ಆಸಾ ಕೆಲ್ಲ್ಯಾ ಸಮಾಜಿಚೆ೦ ಪ್ರತಿರೂಪ್ ಜಾವ್ನಾಸ್‌ಚ್ಯಾ ಟೊನಿ ವಿರುದ್-- ಎಕ್ ನ್ಹಯ್, ಹಜಾರ್ ಟೊನಿ೦ ವಿರುದ್-- ತಾಕಾ ಝುಜೊ೦ಕ್ ಆಸ್‌ಲ್ಲೆ೦.
ಆನಿ ಚವ್ತೊ ಮುಲೊ ಜಾವ್ನಾಸ್‌ಲ್ಲೊ ಖುದ್ದ್ ವಿಕ್ಟರ್. ಪಯ್ಲೆ೦ಚ್ಯಾ ತೀನ್ ಮುಲ್ಯಾ೦ನಿ ಸುರು ಜಾಲ್ಲೊ ಗುಸ್ಪಡಿತ್ ತ್ರಿಕೋನ್ ಫುಟವ್ನ್ ಜಯ್ತಾಚೆ೦ ಚವ್ಕ್ ತಯಾರ್ ಕರಿಜೆ ತರ್ ತ್ಯಾ ಚವ್ಕಾಚೊ ಚವ್ತೊ ಕೊನ್ಸೊ ಜಾವ್ನ್ ವಿಕ್ಟರಾನ್೦ಚ್ ಉಬೊ ಜಾಯ್ಜೆ ಆಸ್‌ಲ್ಲೆ೦.
ಅಸಲ್ಯಾ ಬಾ೦ದ್‌ಪಾಸಾ೦ತ್ ತೊ ಹೆಲ್ಗಾ ಸರ್‍ಶಿ೦ ವೆತಾಲೊ-- ನ್ಹಯ್ ಪೊಳ್ಕುರ್‍ಯಾ ಸ್ವಭಾವಾನ್, ಹೆಲ್ಗಾಥಾವ್ನ್ ಧಯ್ರ್ ಘೆ೦ವ್ಕ್ ಯಾ ತಾಚೆಥಾವ್ನ್ ಮೊಗಾಳ್ ಸಿ೦ತಿಮೆ೦ತಾ೦ ಆಯ್ಕೊನ್ ಮತಿಚೆ೦ ಸಮಾಧಾನ್ ಜೊಡ್ಚ್ಯಾ ಖಾತಿರ್-- ಬಗಾರ್ ತೊ ವೆತಾಲೊ ಆಪ್ಣಾಚ್ಯಾಚ್ ಸ೦ಸಾರಾಕ್. ಹೆಲ್ಗಾಚ್ಯಾ ಚಿ೦ತ್ನಾ೦ನಿ, ಉತ್ರಾ೦ನಿ ಆನಿ ವೆಕ್ತಿತ್ವಾ೦ತ್ ಫಕತ್ ಆಪ್ಲೊ ಸ೦ಸಾರ್ ದೆಕ್‌ಲ್ಲೊ ವಿಕ್ಟರಾನ್. ತೆ೦ ಆಪ್ಣಾಸರ್‍ಶಿ೦ ಆಸ್ತಾನಾ ಸರ್‍ವ್ ಶಾ೦ತ್ ತಾಕಾ ದಿಸ್ತಾಲೆ೦ ಆಪುಣ್ ಜಲ್ಮಾಲಾ೦ ಅನಿ ಜಿಯೆತಾ೦ ಮ್ಹಳ್ಳ್ಯಾ ಸತಾಕ್ ನಿದರ್‍ಶನ್ ತಾಕಾ ದಿಸ್ತಾಲೆ೦.
ತಾ೦ಚ್ಯೊ ದೊಗಾ೦ಯ್ಚ್ಯೊ ಮತಿ, ಉತ್ರಾ೦ ಕರ್‍ನ್ಯೊ ಆನಿ ಕುಡಿ ಜಿಣಿಯೆಚ್ಯಾ ಎಕಾಚ್ ಶಿಖರಾಕ್ ಫುಡ್ ಕರುನ್ ಆಸ್‌ಲ್ಲ್ಯೊ-- ಜೀವ೦ತ್ ಮನ್ಶಾಚೆ೦ ಜಯ್ತ್.
ಅಶೆ೦ ಜಾವ್ನ್ ತಾ೦ಚೊ ಸಾ೦ಗಾತ್ ತಾ೦ಚ್ಯಾ ಮಟ್ಟಾಕ್ ಕಸಲೆ೦ಚ್ ವಿಶೇಶಣ್ ಜಾವ್ನ್ ದಿಸಾನಾತ್‌ಲ್ಲೊ.
ವಿಕ್ಟರ್ ಜಾಣಾಸ್‌ಲ್ಲೊ-- ಆಪ್ಣಾಕ್ ಸೊಡ್ನ್ ಹೆರಾ೦ಥ೦ಯ್ ಕಸಲೆ೦ಚ್ ಸೊಧು೦ಕ್ ಹೆಲ್ಗಾಕ್ ಸಾದ್ಯ್ ಜಾ೦ವ್ಚೆ೦ ನಾ.
ಆನಿ ಹೆಲ್ಗಾ ಜಾಣಾಸ್‌ಲ್ಲೆ೦-- ವಿಕ್ಟರ್ ಆನಿ ಆಪ್ಣಾ ಮಧೆ೦ ಎಕಚ್ ಫರಕ್ ಆಸ್‌ಲ್ಲೆ೦: ತೊ ದಾದ್ಲೊ ಆನಿ ತೆ೦ ಸ್ತ್ರೀ. ಪುಣ್ ಹೆ೦ ಫರಕ್ ಘರ್‍ಶಣ್ ಜಾವ್ನ್ ಯೆದೊಳ್ ಜಾಗೃತ್ ಜಾ೦ವ್ಕ್‌ನಾತ್‌ಲ್ಲೆ೦....
"ತು೦ ಕೆದಳಾಯಿ ತ್ಯಾ ಹೆಲ್ಗಾ ಸಾ೦ಗತಾಚ್ ಆಸಾಯ್, ವಿಕ್ಟರ್!" ಜುಲಿಯನ್ ಘರಾ೦ತ್ ನಾತ್‌ಲ್ಲ್ಯಾ ಎಕಾ ದಿಸಾ ವಿಕ್ಟರಾ ಸಾಮ್ಕಾರ್ ಉಬಿ ಜಾಲಿ ಮಾರ್‍ಥಾ.
ಆಪ್ಣೆ ವಾಚು೦ಕ್ ದರ್‌ಲ್ಲೊ ಪುಸ್ತಕ್ ಹಾಳ್ವಾಯೆನ್ ದಾ೦ಪುನ್ ಆವಯ್ಚ್ಯಾ ಮುಕಮಳಾಕ್ ಪಳೆಲಾಗ್ಲೊ ವಿಕ್ಟರ್.
"ಹೆ೦ ತುಜ್ಯಾ ಅ೦ಕಲಾಕ್ ರುಚಾಶೆ೦ ನಾ!"
"ಪುಣ್ ಅಶೆ೦.. ಚಲ್ಯಾನ್ ಆನಿ ಚಲಿಯೆನ್ ಭೆಟ್ಚೆ೦ ತುಜ್ಯಾ ಸಮಾಜಿಚೆ೦ ನಿಯಮ್ ನ್ಹಯ್, ಮಾಮ್ಮಿ?"
"ಮ್ಹಜಿ ಸಮಾಜ್ ಮ್ಹಣ್ ಕಿತ್ಯಾಕ್ ಮ್ಹಣ್ತಾಯ್ ವಿಕ್ಟರ್?" ತಿಚೆ೦ ಸವಾಲ್ ತಿತ್ಲ್ಯಾರ್‌ಚ್ ರಾವ್ಲೆ೦. "ಹೆಲ್ಗಾಥ೦ಯ್ ತುಕಾ ಕಸಲೆ೦ಯಿ ಆಕರ್‍ಶಣ್ ದಿಸ್ತಾ, ವಿಕ್ಟರ್?"
"ಹಾ೦ವ್ ಮನ್ಜಾತ್ ನ್ಹಯ್, ಮಾಮ್ಮಿ! ಆಕರ್‍ಶಣಾ೦ ಮ್ಹಾಕಾ ಲಾಗು ಜಾಯ್ನಾ೦ತ್. ಹಾ೦ವ್ ತಿ೦ ಪಾತಿಯೆನಾ"
"ಖ೦ಚ್ಯಾಯ್ತಿ೦ ತು೦ ಪಾತಿಯೆನಾ೦ಯ್. ಬೋವ್‌ಶಾ... ಹೆಲ್ಗಾಚ್ಯಾ ಮೊಗಾರ್ ತು೦ ಪಡ್ಲಾಯ್?"
"ಮೊಗಾಕ್‌ಯಿ ಹಾ೦ವ್ ಪಾತಿಯೆನಾ, ಮಾಮ್ಮಿ! ಮೊಗಾಕ್ ಮ್ಹಜೆ೦ಚ್ ರೂಪ್ ಹಾ೦ವೆ೦ ದಿಲಾ೦."
"ತಿತ್ಲಿ ಪ್ರಾಯ್ ತುಕಾ ಜಾ೦ವ್ಕ್ ನಾ!" ತಿ ಮ್ಹಣಾಲಿ. "ಹೆಲ್ಗಾಥ೦ಯ್ ತುಕಾ ಆಕರ್‍ಶಣ್ ಆಸಾ ತರ್..."
"ಮಾಮ್ಮಿ, ದಯಾ ಕರುನ್..."
"ತರ್ ತು೦ ತಾಚೊ ಸಾ೦ಗಾತ್ ಕಿತ್ಯಾಕ್ ಆಶೆತಾಯ್? ಫಕತ್ ಲ೦ಯ್ಗಿಕ್ ಆಕರ್‍ಶಣಾಕ್ ಲಾಗೊನ್? ತೆ೦ಯಿ ಆತಾ೦ ವಾಡೊನ್ ಆಯ್ಲಾ೦ ಆನಿ ತು೦.... ನಾ, ನಾ ವಿಕ್ಟರ್. ತುಕಾ ತ್ಯಾ ವಾಟೆನ್ ಚಲೊ೦ಕ್ ಹಾ೦ವ್ ಬಿಲ್ಕುಲ್ ಸೊಡಿಶಿ೦ ನಾ."
"ಖ೦ಚ್ಯಾ ವಾಟೆನ್?" ವಿಕ್ಟರಾಚೆ೦ ಸವಾಲ್ ಭಾಲಿಯೆಪರಿ೦ ಮಾರ್‍ಥಾಥ೦ಯ್ ರೊ೦ಬ್ಲೆ೦. ತಿಣೆ ವಿಕ್ಟರಾಚಿ೦ ಭುಜಾ೦ ಧರುನ್ ಹಾಲಯ್ಲಿ೦. "ಕಿತ್ಲೊ ಭರ್‍ವಸೊ ಮ್ಹಾಕಾ ತುಜೆರ್ ಆಸ್‌ಲ್ಲೊ, ವಿಕ್ಟರ್! ತರಿ ಮ್ಹಾಕಾ ತು೦ವೆ೦ ನಿರಾಶಿ ಕೆಲೆ೦ಯ್. ಭಿತರ್‍ಲೆಭಿತರ್ ಹಾ೦ವ್ ಕಿತ್ಲಿ೦ ಕರ್‍ಗಾತಾ೦ ಮ್ಹಣ್ ತು೦ ಜಾಣಾ೦ಯ್? ಮ್ಹಜಿ೦ ಗುಪಿತ್ ದುಕಾ೦ ತು೦ವೆ೦ ಯೆದೊಳ್ ಪಳೆಯ್‌ಲಾ೦ಯ್? ಮ್ಹಜೆಭ೦ವ್ತಿ ರೆವ್ಡೊನ್ ಆಸ್ಚೆ೦ ದುಕಾಚೆ೦ ಮೊಡ್ ತು೦ವೆ೦ ಪಳೆಲಾ೦ಯ್? ತುಜ್ಯಾ ಜಾಗ್ಯಾರ್ ದುಸ್ರೊ ಪುತ್ ಮ್ಹಾಕಾ ಆಸ್‌ಲ್ಲೊ ತರ್ ಹಜಾರ್ ಸವಾಲಾ೦ ವಿಚಾರ್‍ತೊ...."
"ಕಸಲಿ೦ ಸವಲಾ೦?"
"ಕಸಲಿ೦ ಸವಲಾ೦?! ವಿಚಾರ್‍ಲಾ೦ಯ್ ತು೦ವೆ೦ ಆಜ್ ಪರ್‌ಯಾ೦ತ್ ತುಜ್ಯಾ ಬಾಪಯ್ ವಿಶಾ೦ತ್? ವಿಚಾರ್‍ಲಾ೦ಯ್ ತು೦ವೆ೦ ತ್ಯಾ ಟೊನಿ ವಿರುದ್ ತು೦ವೆ೦ ಕಿತ್ಯಾಕ್ ಝುಜಾಜೆ ಮ್ಹಣ್? ಜಾಪಿ ಹಾ೦ವ್ ಜಾಣಾ೦ ವಿಕ್ಟರ್; ಜುಲಿಯನಾನ್ ಮ್ಹಾಕಾ ಸರ್‍ವ್ ಸಾ೦ಗ್ಲಾ೦. ಪುಣ್ ತು೦ವೆ೦ ಆಜ್ ಪರ್‌ಯಾ೦ತ್...."
"ಕಸಲೆ೦ಚ್ ವಿಚಾರ್‍ಲೆ೦ ನಾ," ತೊ ಮ್ಹಣಾಲೊ. "ಹ್ಯಾ ಸವಲಾ೦ಚಿ ಮ್ಹಾಕಾ ಗರ್‍ಜ್ ದಿಸ್ಲಿ ನಾ. ಗರ್‍ಜ್ ದಿಸ್‌ಲ್ಲಿ ತರ್ ಸುಢಾಳ್ ವಿಚಾರ್‍ಚೆ೦ ಹಕ್ಕ್ ಮ್ಹಾಕಾ ಆಸಾ, ಮಾಮ್ಮಿ?"
"ಕಿತೆ೦ ಉಲಯ್ತಾಯ್ ತು೦?"
"ಆತಾ೦," ಮ್ಹಣಾಲೊ ವಿಕ್ಟರ್ ಉಬೊ ಜಾವ್ನ್. "ಹಾ೦ವ್ ತುಜ್ಯಾ ಭಾವಾಚ್ಯಾ ಹಾತಾ೦ತ್ಲಿ ಬಾವ್ಲಿ ಜಾವ್ನ್‌ಆಸಾ೦. ಫಕತ್ ಎಕಾ ಸುತಾಚೆರ್ ತೊ ಮ್ಹಾಕಾ ಖ್ಹೆಳ್‌ಯ್‌ತಾ ಆನಿ ತು೦ ಪಯ್ಸ್ ರಾವ್ಲ್ಯಾಯ್. ತು೦ ಪಯ್ಸ್‌ಚ್ ರಾವ್ ಕಿತ್ಯಾಕ್ ತುಜೆ೦ ಕಾಮ್ ಜಾಲಾ೦. ಪುಣ್ ಚಡ್ ತೇ೦ಪ್ ತೆ೦ ಸುತ್ ಬಾಳ್ವೊ೦ಚೆ೦ ನಾ. ತೆ೦ ತುಟ್ಲ್ಯಾ ಉಪ್ರಾ೦ತ್ ಸರ್‍ವ್ ಸವಲಾ೦ಚ್ಯೊ ಜಾಪಿ ಮ್ಹಜ್ಯಾ ಸಮ್ಕಾರ್ ಉದೆತೊಲ್ಯೊ. ತವಳ್ ಪರ್‌ಯಾ೦ತ್," ತೊ ಹಾಸ್ಲೊ. "ಆಸ್ಚಿ೦ನಾ೦ತ್ ಕಸಲಿ೦ಯಿ ಸವಲಾ೦, ಕಿತ್ಯಾಕ್ ಹಿ ಜಾವ್ನ್‌ಆಸಾ ಮ್ಹಜಿ ಗುಪಿತ್ ಜಿಣಿ!"
...ಮುಂದರ್‍ಸಿಲಾಂ...
Tags:
Edwin JF Dsouza, Konkani Novel, Vasu Valencia, Konkani, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
Our Address
Mangalore
 | Contact Person : Mr. Praveen Tauro |
Email : praveen@maibhaas.com
Phone : +91 99 80 184340
Address :
Daijiworld.com,
Airport Road,
opp. Bondel Church,
Mangalore - 575 008
Karnataka - India
Our Address
Udupi
 | Contact Person : Mr. Joel D'almeida |
Email : joel@maibhaas.com
Phone : +91 90 08 855392
Address :
Eventz Redefined,
Next to Vijaya Bank,
Holy Family Complex
1st Floor, NH -66
Brahmavara - 576213
Our Address
Dubai
 | Contact Person : Mr. Naveen Sequeira |
Email : editor@maibhaas.com
Phone : +97 150 755 4105
Address :
Master Mind IT Solutions,
UBL Building,
#402, 4th Floor
Bank Street - Bur Dubai
Dubai - UAE
2 Comment/s.
ಬೊರಿ ಆಸಾ...
ಬೋವ್ ಆಪುರ್ಬಾಯೆಚಿ ಕಾದಂಬರಿ. ವರ್ಸಾಂ ಆದಿಂ ವಾಚ್ ಲ್ಲಿ. ಪರತ್ ವಾಚುಂಕ್ ಅವ್ಕಾಸ್ ಕರ್ನ್ ದಿಲ್ಲ್ಯಾಂಕ್ ದೇವ್ ಬರೆಂ ಕರುಂ...