+971 50 7554105
ತುಮ್ಚ್ಯಾ ಗಮನಾಕ್:

"ಹಾಂವ್ ಜಿಯೆತಾಂ"  -  ಜಿವೊ ಮನಿಸ್


ಪಯ್ಲೊ ಗೃ೦ತ್ - "ಹಾ೦ವ್ ಜಲ್ಮಾಲೊ೦"

 ಅವಸ್ವರ್ ಚವ್ತೊ:

"ಆನಿ ಥೊಡ್ಯಾಚ್ ವೆಳಾನ್ ಹಾ೦ವ್ ಪರತ್ ಜಲ್ಮಾತೊಲೊ೦!" ಸದಾ೦ಚ್ಯಾಚ್ ಚಿ೦ತ್ನಾ೦ ಸ೦ಗಿ೦ ದೊಳೆ ಉಗ್ತೆ ಕೆಲೆ ವಿಕ್ಟರಾನ್. ತಾಚ್ಯಾ ಮುಕಮಳಾರ್ ಹಾಸೊ ಖ್ಹೆಳ್ತಾಲೊ. ಜಲ್ಮಾತಾನಾ ಹರ್‌ಯೆಕ್ ಬಾಳ್ಶೆ೦ ರಡ್ತಾ ಮ್ಹಣ್ ತೊ ಜಾಣಾ ಆಸ್‌ಲ್ಲೊ. ಬೋವ್‌ಶಾ, ತೊಯಿ ರಡ್ಲೊ ಜಾಯ್ಜೆ. ಪುಣ್ ತಾಣೆ ಹ್ಯಾ ವಿಶಾ೦ತ್ ಆಪ್ಲೆ ಆವಯ್‌ಲಾಗಿ೦ ವಿಚಾರ್‌ಲ್ಲೆ೦ ನಾ. ವಿಚಾರ್‍ಚಿ ಗರ್‍ಜ್‌ಯಿ ತಾಕಾ ದಿಸ್ಲಿನಾ.

ಉದಾರೊಚ್ ತೊ ನಿದುನ್ ಆಸ್‌ಲ್ಲೊ. ಹಾಳ್ವಾಯೆನ್ ಆಪ್ಲೆ ಲಾ೦ಬ್ ಪಾ೦ಯ್ ತಾಣೆ ನೀಟ್ ಕೆಲೆ. ಆಪ್ಲ್ಯಾ ಪೊಟಾಚಿ೦ ಮಾಸ್‌ಕುಟಾ೦ ಅ೦ರ್‍ದುನ್ ಯೆ೦ವ್ಚಿ೦ ತಾಚ್ಯಾ ಗಮನಾಕ್ ಗೆಲೆ೦. ಕಸಲೆ೦ ವಿಚಿತ್ರ್ ಯ೦ತ್ರ್ ಜಾವ್ನ್‌ಆಸ್‌ಲ್ಲಿ ಹಿ ಕೂಡ್? ತಾಚ್ಯಾಕಿ ಊ೦ಚ್ ಆನಿ ಮಿಸ್ತೆರಾಬರಿತ್ ಯ೦ತ್ರಾ೦ ಮನ್ಶಾನ್ ತಯಾರ್ ಕೆಲ್ಲಿ೦-- ಕುಡಿಚ್ಯಾಕ್‌ಯಿ ಘುಸ್ಪಡಿತ್ ಯ೦ತ್ರಾ೦ ಪುಣ್ ಕೂಡ್ ನ್ಹಯ್. ಹೆ೦ ತಾ೦ಚೆವರ್‍ವಿ೦ ಸಾದ್ಯ್‌ಚ್ ನಾತ್‌ಲ್ಲೆ೦ ಕಿತ್ಯಾಕ್ ಮೆ೦ದು ರಚು೦ಕ್ ತೆ ಸಕಾನಾತ್‌ಲ್ಲೆ. ಮೆ೦ದು ಜಾವ್ನ್‌ಆಸ್‌ಲ್ಲೊ ನೀಜ್ ಜೀವ್ ಎಕಾ ಕುಡಿ೦ತ್ಲೊ. ಅತ್ಮೊ ತ್ಯಾ ಕುಡಿಚೊ; ಧನಿ ತ್ಯಾ ಕುಡಿಚೊ. ಚಿ೦ತು೦ಕ್ ಸಕ್ಚೊ ಮೆ೦ದು...

ಬಾತ್‌ರೂಮಾಚ್ಯಾ ಆರ್‍ಶ್ಯಾ ಸಾಮ್ಕಾರ್ ವಿಣ್ಗೊಚ್ ಉಬೊ ರಾವೊನ್ ದಾ೦ತ್ ಘಾಸ್ತಾಲೊ ವಿಕ್ಟರ್. ತಾಚ್ಯಾ ಉಸಾಲ್ಲ್ಯಾ ವೊ೦ಟಾ೦ ಮದ್ಲ್ಯಾನ್ ಪೇಸ್ಟಾಚೊ ಧೊವೊ ಫೆ೦ಡ್ ನಿಶೆತಾಲೊ. ಬಿಸ್ಳೆ ಜಾಲ್ಲೆ ತಾಚೆ ಕೇಸ್ ಕಪಾಲಾರ್ ಲೊಳ್ತಾಲೆ; ತಾಚ್ಯಾ ದೊಳ್ಯಾ೦ಚ್ಯೊ ತ್ಯೊ ಕಾಳ್ಯೊಚ್ ಮ೦ಡಳ್ಯೊ ವಜ್ರಾ೦ಚ್ಯಾ ತುದಿಯಾ೦ಪರಿ೦ ಪ್ರಕಾಸ್ತಾಲ್ಯೊ. ತಾಚೆ೦ ಸಗ್ಳೆ೦ ಆ೦ಗ್ ತಾ೦ಬ್ಯಾ-ತಾ೦ಬ್ಸ್ಯಾ ವರ್‍ಣಾಚೆ೦. ತಾಚೊ ಜೀವ್ ಲಾ೦ಬ್ ಪುಣ್ ಮಾಸಾಳ್ ನ್ಹಯ್. ತಾಚಿ೦ ತಿ೦ ಪಾತಳ್ ಮಾಸ್‌ಕುಟಾ೦ ತ್ಯಾ ತಾ೦ಬ್ಸ್ಯಾ ಕಾತಿ ಪ೦ದಾಕ್ ಘಟ್‌ಜಾವ್ನ್ ರಾವ್‌ಲ್ಲ್ಯಾ ದರ್‌ಯಾಚ್ಯಾ ಲಾರಾ೦ಪರಿ೦ ಲಿಪೊನ್ ಆಸ್‌ಲ್ಲಿ೦.

ಕಸಲೆ೦ಚ್ ಕರಿನಾಸ್ತಾ೦ ತೊ ಉಬೊ ರಾವತ್ ತರಿ ಕಸಲಿಗಿ ಅಗಣಿತ್ ಸಕತ್ ಯೆಕಾಚಾಣೆ ಫಾತರ್ ಜಾವ್ನ್ ಉಬಿ ಜಾಲ್ಲೆಪರಿ೦ ದಿಸ್ತಾಲಿ. ಹೆ೦ ಭೊಗಾಪ್ ಆಪ್ಣಾಥ೦ಯ್ ಉದೆತಾನಾ ತಾಚೊ ಮೆ೦ದು ಖ೦ಚ್ಯಾಯಿ ಎಕಾ ಮಾಸ್‌ಕುಟಾಕ್ ಹುಕುಮ್ ದಿತಾಲೊ. ತೆ೦ ಮಾಸ್‌ಕುಟ್ ಜಾಗೃತ್ ಜಾತಾನಾ ತಾಚೆ೦ ಆ೦ಗ್ ಹಾಲ್ತಾಲೆ೦, ತಾಚ್ಯಾ ಕಾತಿಪ೦ದಾಕ್ ಜೀವ್ ಚರ್‍ತಾಲೊ. ಕ್ರಮೇಣ್, ಘಟ್ ಜಾಲ್ಲಿ೦ ತಿ೦ ಲ್ಹಾರಾ೦, ಫಾತರ್ ಜಾಲ್ಲಿ ತಿ ಅಗಣಿತ್ ಸಕತ್ ಜೀವ್ ಜಾತಾಲಿ.

ತಾಚ್ಯಾ ಹರ್‍ದ್ಯಾರ್ ಲೊ೦ವ್‌ನಾತ್‌ಲ್ಲಿ ಆನಿ ತಿ ಉದೆ೦ವ್ಚಿ೦ ಖುಣಾ೦ಯಿ ದಿಸನಾತ್‌ಲ್ಲಿ೦. ತಾಚ್ಯಾ ತ್ಯಾ ಸಪಾಯ್ ಹರ್‍ದ್ಯಾಚೆರ್ ವಾಡನಾಸ್ತಾನಾ ಸುಕ್‌ಲ್ಲಿ೦ ದೋನ್ ಖತಾ೦ ತಾಚ್ಯಾ ತ್ಯಾ ವಿಣ್ಗ್ಯಾ ವೆಕ್ತಿತ್ವಾಚ್ಯಾ ದೊಳ್ಯಾ೦ಪರಿ೦ ದಿಸ್ತಾಲಿ೦. ತಾಚೆ೦ ತೆ೦ ವಿಣ್ಗೆ೦ ವೆಕ್ತಿತ್ವ್-- ಪವಿತ್ರ್ ತೆ೦ ಜಾವ್ನ್‌ಆಸ್‌ಲ್ಲೆ೦. ತ್ಯೆ ಪ್ರಾಯೆರ್ ಚಡಾವತ್ ಹರ್‌ಯೆಕ್ಲ್ಯಾನ್ ಕರ್‍ಚೆಪರಿ೦ ತ್ಯಾ ವಿಣ್ಗ್ಯಾಪಣಾಚೊ ದುರುಪಯೋಗ್ ತಾಣೆ೦ ಕೆಲೊನಾ. ಪುಣ್ ತಾಚೆ೦ ಪುರುಶತ್ವ್ ಜಾಗೃತ್ ಜಾ೦ವ್ಕ್‌ನಾತ್‌ಲ್ಲೆ೦ ಮ್ಹಣ್ ನ್ಹಯ್. ತೆ೦ ಜಾಗೃತ್ ಜಾಲ್ಲೆ೦ ಮಾತ್ರ್ ನ್ಹಯ್, ಜಾಣ್ವಯಿತ್‌ಯಿ ಜಾಲ್ಲೆ೦. ಅಶೆ೦ ಜಾವ್ನ್ ತಾಚೊಯಿ ದುರುಪಯೋಗ್ ತಾಣೆ ಕೆಲೊ ನಾ ಕಿತ್ಯಾಕ್ ಖರೊ ಉಪೆಗ್ ತೊ ಜಾಣಾಸ್‌ಲ್ಲೊ.

ಆಪ್ಲೆ೦ ಶಿ೦ತಿದ್ ತತ್ವಾ೦ಚೆ೦ ಎಕ್ ರೊದ್ ಮ್ಹಣ್ ತೊ ಯೆದೊಳ್‌ಚ್ ಜಾಣಾ೦ ಜಾಲ್ಲೊ. ತತ್ವಾ೦--ಬರ್‍ಯಾಥಾವ್ನ್ ವಾಯ್ಟಾಕ್ ವಿ೦ಗಡ್ ಕರ್‍ಚಿ೦ ಸ೦ಸಾರಿಕ್ ತತ್ವಾ೦ ತಿ೦ ನ್ಹಯ್. ಸರ್‍ಗಾಚೆ೦ ಅಗಣಿತ್ ಸುಖ್ ಮ್ಹೆಳ್ಚೆಖಾತಿರ್ ಭಾವಾರ್‍ಥಾನ್ ಆಸಾ ಕೆಲ್ಲಿ೦ ತತ್ವಾ೦ ತಿ೦ ನ್ಹಯ್. ಬಗಾರ್ ಆಪ್ಲ್ಯಾ ಜಯ್ತಾಖಾತಿರ್, ಆಪ್ಲ್ಯಾ ಉದ್ದೇಶಾಖಾತಿರ್ ವಾಟ್ ಸುಗಮ್ ಕರು೦ಕ್ ಜಿವ್ಯಾ ಮನ್ಶಾಚ್ಯಾ ಜಿವ್ಯಾ ಮೆ೦ದ್ವಾನ್ ಆಸಾ ಕೆಲ್ಲಿ೦ ತತ್ವಾ೦. ಸಾದಿ೦ ತತ್ವಾ೦. 

ಪುಣ್ ಸ್ವಾರ್‍ಥಾನ್ ಭರ್‍ಲೆಲ್ಯಾ ಸ೦ಸರಾಕ್ ಸಮ್ಜೊ೦ಚಿ೦ ತತ್ವಾ೦ ತಿ೦ ನ್ಹಯ್. ಕಾಳ್ಯಾ ರ೦ಗಾನ್ ಧೊವ್ಯಾಕ್ ಕಾಳೊ ಮ್ಹಳ್ಳ್ಯಾಪರಿ೦ ಹ್ಯಾ ತತ್ವಾ೦ಕ್ ಸ೦ಸರಾನ್ ಸ್ವಾರ್‍ಥಾಚೆ೦ ರೂಪ್ ದಿಲ್ಲೆ೦.

ತರಿ ಪುಣ್ ವಿಕ್ಟರಾಥಾವ್ನ್ ತಿ೦ ಪಯ್ಸ್ ಸರ್‍ಲಿ೦ನಾ೦ತ್. ಹರ್‌ಯೆಕಾ ವಿಶಯಾಚೆರ್ ತಿ೦ ತತ್ವಾ೦ ರಾಜ್ ಕರ್‍ತಾಲಿ೦--ಜಿಣಿಯೆಚೆರ್, ಶಿಕ್ಪಾಚೆರ್, ಚಿ೦ತ್ಪಾಚೆರ್, ಪಯ್ಶಾ೦ಚೆರ್ ಆನಿ ಮೊಗಾಚೆರ್. ಮೋಗ್, ಮತಿಭೃಶ್ಟ್ ಕವಿ೦ನಿ ವರ್‍ಣಿಲ್ಲೊ ಮೋಗ್ ನ್ಹಯ್. ಮೊಗಾ೦ತ್, ಲ೦ಯ್ಗಿಕತೆಕ್ ಕಸಲೆ೦ಚ್ ಸ್ಥಾನ್ ನಾ ಮ್ಹಳ್ಳೊ ಮತಿಭೃಶ್ಟ್ ಕವಿ೦ಚೊ ವಾದ್ ತೊ ಪಾತಿಯೆನಾತ್‌ಲ್ಲೊ. ಲ೦ಯ್ಗಿಕತೆಚೆ೦ ಸ್ಥಾನ್ ತೊ ಜಾಣಾ೦ ಆಸ್‌ಲ್ಲೊ. 

ಮನ್ಶಾಚ್ಯಾ ಭೊಗ್ಣಾ೦ ಪಯ್ಕಿ ಪ್ರಬಲ್ ಜಾವ್ನ್‌ಆಸ್ಚಿ೦ ಲ೦ಯ್ಗಿಕ್ ಭೊಗ್ಣಾ೦ ಗರ್‍ಜ್‌ನಾಸ್ತಾ೦, ಠಿಕಾಣೆನಾಸ್ತಾ೦ ಯಾ ಅರ್‍ಥ್‌ನಾಸ್ತಾ೦ ಮನ್ಶಾಚ್ಯಾ ಕುಡಿ೦ತ್ ಮಿಸ್ಳೊ೦ಕ್‌ನಾತ್‌ಲ್ಲಿ೦.

ಹೆ ವಾದ್ ಸ೦ಸರಾಕ್ ಕಳಿತ್ ಕರುನ್ ತಾ೦ಚೆಥಾವ್ನ್ ಮಾನ್ ಯಾ ತಿರಸ್ಕಾರ್ ಜೊಡ್ಚಿ ಆಲೋಚನ್ ತಾಚಿ ನ್ಹಯ್; ಬಗಾರ್ ತ್ಯಾ ತತ್ವಾ೦ ಪ್ರಕಾರ್ ಜಿಯೆವ್ನ್ ಜಯ್ತೆವ೦ತ್ ಜಾ೦ವ್ಚೊಚ್ ತಾಚೊ ಧ್ಯೇಯ್; ಸೊ೦ಪ್ಯಾನ್ ಸಾ೦ಗ್ಚೆ೦ ತರ್--ತಾಚೆ೦ ನಿಯಮ್ ತತ್ವ್. ಆನಿ ಅಶೆ೦ ಜಿಯೆ೦ವ್ಕ್ ತಾಣೆ ಯೆದೊಳ್‌ಚ್ ಸುರು ಕೆಲ್ಲೆ೦ ಆನಿ ಆಪ್ಣಾಕ್‌ಚ್ ಸ೦ಸರಾಚ್ಯಾ ಹುಜ್ರಿ೦ ಸ್ವಾರ್‍ಥಿ ಮ್ಹಣ್ ಸ್ಥಾಪಿತ್ ಕೆಲ್ಲೊ.

ಹೊ ಜಾವ್ನ್‌ಆಸ್‌ಲ್ಲೊ ಫಕತ್ ಎಕ್ ಪ್ರಾರ೦ಭ್.
ಆನಿ ಆತಾ೦, ಪ್ರಿ-ಯುನಿವರ್‍ಸಿಟಿಚ್ಯಾ ಶಿಕ್ಪಾಚೊ ನಿಮಾಣೊ ಮ್ಹಯ್‌ನೊ ಲಾಗಿ೦ ಪಾವ್ತಾನಾ ಹೊ ತಾಚೊ ಪ್ರಾರ೦ಭ್ ಕಾಟ್ ತುಟೊನ್ ಬಳಿಶ್ಟ್ ಜಾಯಿತ್ ಆಯ್ಲೊ....

"ಗುಡ್ ಇವ್ನಿ೦ಗ್, ಮಿಸ್ಟರ್ ಲೂಕ್, ದಯಾಕರುನ್ ತುಜಿ ಬಸ್ಕಾ ಘೆ." ಆಪ್ಣಾ ಸಾಮ್ಕಾರ್ ಆಸ್ಚ್ಯಾ ಮೋವ್ ಬಸ್ಕೆಕ್ ದಾಕಯ್‌ಲಾಗ್ಲೊ ಕೊಲೆಜಿಚೊ ಪ್ರಿನ್ಸಿಪಾಲ್. "ಮ್ಹಜ್ಯಾ ಹ್ಯಾ ಆಪವ್ಣ್ಯಾನ್ ತುಕಾ ತೊ೦ದ್ರೆ ಜಾಲೆನಾ೦ತ್ ಮ್ಹಣ್ ಹಾ೦ವ್ ಪಾತಿಯೆತಾ೦."
"ವಿಕ್ಟರಾ ವಿಶಾ೦ತ್ ತುಕಾ ಉಲ೦ವ್ಕ್ ಆಸಾ?" ಆಪ್ಣಾಕ್ ದಾಕಯಿಲ್ಲಿ ಬಸ್ಕಾ ಘೆತ್ಲಿ ಜುಲಿಯನಾನ್. ಆಪ್ಲ್ಯಾ ಹಾತಾ೦ತ್ಲಿ ಬ್ರೀಫ್ ಕೇಜ್ ತಾಣೆ ದೆಗೆನ್ ದವರ್‍ಲಿ.
"ವ್ಹಯ್, ಮಿ|ಲೂಕ್. ಸ೦ಗತ್ ಗರ್‍ಜೆಚಿ ಜಾಲ್ಲ್ಯಾನ್ ಮಾತ್ರ್...."
"ಮು೦ದರ್‍ಸಿ," ವೆವಹಾರ್‌ಪೂರ್‍ಣ್ ಜಾಲೊ ಜುಲಿಯನಾಚೊ ತಾಳೊ.
"ವಿಕ್ಟರ್ ಎಕ್ ಅಸಾಧರಣ್ ವಿದ್ಯಾರ್‍ಥಿ ಮ್ಹಣ್ ತು೦ ಜಾಣಾ೦ಯ್."
"ಹಾ೦ವ್ ಜಾಣಾ೦."
"ಸಾಹಿತ್ ತಾಚ್ಯಾ ಅಧ್ಯಯನಾಚೊ ವಿಶಯ್. ಹ್ಯಾ ವಿಶಯಾ೦ತ್ ತಾಕಾ ಪಾಟಿ೦ ಘಾಲ್ತಲೊ ಕೋಣ್‌ಯಿ ವಿದ್ಯಾರ್‍ಥಿ ನಾ... ಜೊನ್ ಡೇವಿಡಾಚೊ ಪುತ್ ಟೊನಿ ಪ್ರೇತನ್ ಕರ್‍ತಾ ತರಿ...."
ಯೆಕಾಚಾಣೆ ಹಾತ್ ಉಬಾರ್‍ಲೊ ಜುಲಿಯನಾನ್.
"ತಾಚೆ೦ ಪ್ರೇತನ್ ತಾಚ್ಯಾ ಬಾಪಾಯ್‌ಲಾಗಿ೦ ತು೦ವೆ೦ ಸಾ೦ಗ್ಯೆತ್!"
"ಸಾರ್‍ಕೆ೦ಚ್ ಮಿ|ಲೂಕ್. ಹೊಚ್ ವಿಶಯ್ ಜಾವ್ನ್‌ಆಸಾ ಮಹತ್ವಾಚೊ. ಕಾರಾಣ್ ಕಸಲೆ೦ ತೆ೦ ಹಾ೦ವ್ ನೆಣಾ೦ ಪುಣ್ ತುಜೊ ವಿಕ್ಟರ್ ಆನಿ ಟೊನಿ ಪ್ರತಿಸ್ಪರ್‍ಧಿ ಮ್ಹಣ್ ಮ್ಹಾಕಾ ಕಳಿತ್ ಜಾಲಾ೦."
"ತುಜ್ಯಾ ಚಡಿತ್ ಮಾಹೆತಿ ಖಾತಿರ್ ಮಿ|ಪ್ರಿನ್ಸಿಪಾಲ್, ತಾ೦ಕಾ೦ ಪ್ರತಿಸ್ಪರ್‍ಧಿ ಕೆಲ್ಲೆ ಹಾ೦ವೆ೦ಚ್." 
"ತೊ ತುಜೊ ಖಾಸ್ಕಿ ವಿಶಯ್ ಮಿ|ಲೂಕ್. ಪುಣ್ ತಾ೦ಕಾ೦ ಪ್ರತಿಸ್ಪರ್‍ಧಿ ಕರ್‍ತಾನಾ ತಾ೦ಚೆ೦ ಝುಜಾಥಳ್ ಸಮಾಸಮ್ ಆಸಾ ಮ್ಹಣ್ ತು೦ವೆ೦ ಪಳೆಲೆ೦ಯ್?"
"ಮತ್ಲಬ್?"
"ಹಾ೦ವ್ ಶೀದಾ ಉಲಯ್ತಾ೦ ಮಿ|ಲೂಕ್ ಕಿತ್ಯಾಕ್ ಮ್ಹಜ್ಯಾ ವಿದ್ಯಾರ್‍ಥಿ೦ಚೆ೦ ಖಯಾಲ್ ಮ್ಹಾಕಾ ಆಸಾ. ವಿಕ್ಟರಾಚೊ ಬಾಪಯ್ ನಾ ಆನಿ ಸಹಜ್ ಜಾವ್ನ್ ತಾಚ್ಯಾ ಜನ್ಮಾ ವಿಶಾ೦ತ್ ಸಭಾರಾ೦ಕ್ ದುಬಾವ್ ಆಸಾ." 
"ಕಸಲೊ ದುಬಾವ್?"
"ತೊ ಅನಯ್ತಿಕ್ ಸ೦ಬ೦ಧಾನ್ ಜಲ್ಮಾಲ್ಲೊ..."
"ಜಾವ್ಯೆತ್! ಪುಣ್ ತೊ ಲ೦ಯ್ಗಿಕ್ ಸ೦ಪರ್‍ಕಾನ್೦ಚ್ ಆವಯ್ಚ್ಯಾ ಪೊಟಾ೦ತ್‌ಚ್ ಜಲ್ಮಾಲ್ಲೊ." 
"ಹಾ೦ವ್ ಮಾ೦ದ್ತಾ೦, ಮಿ|ಲೂಕ್. ತುಜೊ ವಾದ್ ಸಾರ್‍ಕೊ ಆಸಾ. ತರಿಪುಣ್ ವಿದ್ಯಾರ್‍ಥಿ೦ಕ್ ಆಮಿ೦ ಸಮ್ಜಾಲ್ಲೆಪರಿ೦ ತುಮಿ೦ ಸಮ್ಜೊ೦ಕ್ ಸಕಾನಾ೦ತ್. ತ್ಯಾ ಖಾತಿರ್ ದಯಾಕರುನ್, ವಿಕ್ಟರಾ ಖಾತಿರ್ ಪುಣಿ ಹಾ೦ವೆ೦ ಉಲ೦ವ್ಚೆ೦ ತು೦ವೆ೦ ಆಯ್ಕಾಜೆ."
"ಮು೦ದರ್‍ಸಿ." ಆಪ್ಲೆ ಬಸ್ಕೆರ್ ಪಾಟಿ೦ ಒಣ್ಕಾಲೊ ಜುಲಿಯನ್.

"ವಿಕ್ಟರಾಚೆ೦ ಆಲ್ಕು೦ಜ್‌ಯಿ ತುಜೆ೦ಚ್ ಆನಿ ಹೆ೦ ದುಬಾವಾಕ್ ಆಸ್ಪದ್ ದಿ೦ವ್ಚೆ೦ಚ್. ತ್ಯಾ ಶಿವಾಯ್ ವಿಕ್ಟರ್ ಮೌನ್ ಮ್ಹಳ್ಳ್ಯಾ ನಾಡಿಲಾಗಿ೦ ಲಗ್ನ್ ಜಾಲಾ. ಕೆದೊಳ್ ಪರ್‌ಯಾ೦ತ್ ಹೆ೦ ಮೌನ್? ತಾಚಿ೦ ಗುಪ್ತ್ ಚಿ೦ತ್ನಾ೦ ಎಕಾ ನ್ಹಯ್ ತರ್ ಎಕಾ ವಾಟೆನ್ ಭಾಯ್ರ್ ಯೆತಾತ್..."
"ತು೦ವೆ೦ ಮ್ಹಾಕಾ ಮನಃಶಾಸ್ತ್ರ್ ಶಿಕಯ್ಜೆ ಮ್ಹಣ್ ನಾ. ಕಿತೆ೦ ತು೦ ಸಾ೦ಗೊ೦ಕ್ ಆಶೆತಾಯ್, ಗಡ್ಬಡ್ತಾಯ್ ಯಾ ಚಡ್ಪಡ್ತಾಯ್?" ಜುಲಿಯನಾಚೊ ತಾಳೊ ಆತಾ೦ ಕರ್‍ಕಸ್ ಧಾರ್ ದಾಕಯ್ತಾಲೊ. 
"ವಿಕ್ಟರಾಥ೦ಯ್ ಬರ೦ವ್ಚೆ೦ ದೆಣೆ೦ ಜೀವ೦ತ್ ಜಾಲಾ೦!"
"ತಿ ಪಿಸಾಯ್ ತಾಕಾ ಲಾನ್ಪಣಿ೦ಚ್ ಆಸ್‌ಲ್ಲಿ."
"ಎಕ್ ದೆಣೆ, ಪಿಸಾಯ್ ಜಾ೦ವ್ಚ್ಯಾ ಫುಡೆ೦ಚ್ ಆಮಿ೦ ಆಡಾಯ್ಜೆ, ಮಿ|ಲೂಕ್." ಆಪ್ಲ್ಯಾ ಗೊವೆತಾ೦ತ್ಲ್ಯೊ ಥೊಡ್ಯೊ ಫೊಲಿಯೊ ಆನಿ ಕಸಲೆ೦ಗಿ ಪತ್ರ್ ಭಾಯ್ರ್ ಕಾಡಿಲಾಗ್ಲೊ ಪ್ರಿನ್ಸಿಪಾಲ್. "ವಿಕ್ಟರಾನ್ ಬರಯಿಲ್ಲೆ೦ ಕಸಲೆ೦ಚ್ ಹಾ೦ವೆ೦ ಯೆದೊಳ್ ವಾಚು೦ಕ್ ನಾತ್‌ಲ್ಲೆ೦. ಪುಣ್ ಪಾಟ್ಲ್ಯಾ ಮಯ್‌ನ್ಯಾ೦ತ್ ಆಮ್ಚ್ಯಾ ಕೊಲೆಜ್ ಮೆಗಜಿನಾ ಖಾತಿರ್ ಲೇಕನಾ೦ ಹಾ೦ವೆ೦ ವಿಚಾರ್‌ಲ್ಲಿ೦. ಕಸಲ್ಯಾಯಿ ಸ್ಪರ್‍ಧ್ಯಾ೦ನಿ ಭಾಗ್ ಘೆನಾತ್‌ಲ್ಲ್ಯಾ ವಿಕ್ಟರಾನ್, ಕೊಲೆಜಿ ಖಾತಿರ್ ಆಪ್ಲ್ಯಾ ಶಿಕ್ಪಾ ಭಾಯ್ರ್ ಕಸಲೆ೦ಚ್ ಕರು೦ಕ್ ತಯಾರ್‌ನಾತ್‌ಲ್ಲ್ಯಾ ವಿಕ್ಟರಾನ್ ಲೇಕನ್ ಬರಯಿಲ್ಲೆ೦ ಪಳೆವ್ನ್ ಹಾ೦ವ್ ಥಟಾಕ್ಲೊ ಆನಿ ಸಾ೦ಗಾತಾಚ್ ಸ೦ತೊಸ್ಲೊ೦...."
"ಕೊಲೆಜಿಚ್ಯಾ ಚಟುವಟಿಕಾ೦ನಿ ಭಾಗ್ ಘೆಜೆ ಮ್ಹಣ್ ಹಾ೦ವೆ೦ ತಾಕಾ ಹುಕುಮ್ ದಿಲ್ಲಿ," ಅಭಿಮಾನಾಚ್ಯಾ ತಾಳ್ಯಾನ್ ಮ್ಹಣಾಲೊ ಜುಲಿಯನ್. "ಮ್ಹಜೆ೦ ಉತಾರ್ ತೊ ಮಾ೦ದ್ತಾ."
"ಆನಿ ಹಾ೦ವೆ೦ ತೆ೦ ಲೇಕನ್ ವಾಚ್ಲೆ೦, ಮಿ|ಲೂಕ್."
"ಆನಿ ತು೦ ತಾಚಿ ಶಾಥಿ ಪಳೆವ್ನ್ ಶೆರ್‍ಮೆಲೊಯ್! ಇತ್ಲೆ೦ ಸಾ೦ಗೊ೦ಕ್ ತು೦ ಇತ್ಲೆ೦ ಉರ್‍ಡಾಲೊಯ್?" 
"ತಾಚಿ ಶಾಥಿ ಹಾ೦ವ್ ಮಾನ್ವತಾ೦. ಪುಣ್ ತಾಚಿ೦ ಚಿ೦ತ್ನಾ೦... ಆಪ್ಣಾಚ್ಯಾಚ್ ಜಲ್ಮಾಚೆರ್ ತೊ ದುಬಾವ್ತಾ ಮಿ|ಲೂಕ್!"
"ಮತ್ಲಬ್?"
"ತಾಚೆಥಾವ್ನ್ ಲಿಪೊನ್ ಆಸ್‌ಲ್ಲ್ಯೊ ಸಬಾರ್ ಸ೦ಗ್ತಿ ತಾಚ್ಯಾ ಮತಿಚೆರ್ ಕಠಿಣ್ ಪ್ರಬಾವ್ ಘಾಲು೦ಕ್ ಪಾವ್ಲ್ಯಾತ್ ಆನಿ ತಾಚೆಥ೦ಯ್ ಮಾನಸಿಕ್ ಘುಸ್ಪಡಾಯ್ ಉಬ್ಜಲ್ಯಾ ಆನಿ...."
"ಆನಿ ಹಾಚೊ ಪರಿಣಾಮ್?" ಮುಕಾರ್ ಬಾಗ್ವಾಲೊ ಜುಲಿಯನ್. "ಯೆದೊಳ್ ಪರ್‌ಯಾ೦ತ್ ತಾಣೆ ತಾಚ್ಯಾ ಜಲ್ಮಾ ವಿಶಾ೦ತ್ ಕಸಲಿ೦ಚ್ ಸವಲಾ೦ ವಿಚಾರು೦ಕ್‌ನಾ೦ತ್."
"ತರ್ ಹೆ೦ ವಾಚುನ್ ಪಳೆ, ಮಿ|ಲೂಕ್." ಟಾಯ್ಪ್ ಕೆಲ್ಲ್ಯೊ ಫೊಲಿಯೊ ಜುಲಿಯನಾಚ್ಯೆ ಕುಶಿಕ್ ಲೊಟ್ಲ್ಯೊ ಪ್ರಿನ್ಸಿಪಾಲಾನ್. ಎಕ್ ನದರ್ ತಾಚ್ಯಾ ಮುಕಮಳಾಚೆರ್ ದವರುನ್ ಜುಲಿಯನಾನ್ ತ್ಯೊ ಘೆತ್ಲ್ಯೊ.
ತ್ಯಾ ಲೇಕನಾಚೆ೦ ನಾ೦ವ್ ವಾಚ್ತಾನಾ೦ಚ್ ಜುಲಿಯನಾಚೆ ಕುಡಿ೦ತ್ ಶಿರ್‍ಶಿರೊ ದಾ೦ವ್ಲೊ.

ಜಿವೊ ಮನಿಸ್
ತೊ ವಿಣ್ಗೊಚ್ ಜಲ್ಮಾಲೊ.
ಪ್ರತಮ್ ಉಸ್ವಸಾಚಿ೦ ಅಸ್ಕತ್ ಲ್ಹಾರಾ೦ ತಾಚ್ಯಾ ಚಿವಳ್ಳೆಲ್ಯಾ ಪೊಪ್ಸಾ೦ನಿ ರಿಗ್ತಾನಾ, ತೊ ರಡ್ಲೊ. ತವಳ್, ತೊ ಯಾ ಹೆರ್ ಇತರ್ ಕೋಣ್೦ಚ್ ಹ್ಯಾ ರಡ್ಣ್ಯಾಚೆ೦ ಕಾರಾಣ್ ನೆಣಾಸ್ಲೆ. ಹೆ೦ ರಡ್ಣೆ೦ ಎಕ್ ಸವಾಲ್ ಜಾವ್ನ್‌ಆಸ್‌ಲ್ಲೆ೦. ಪುಣ್ ಹೆ೦ ಸವಾಲ್ ತಾಚೆ ಜಿಣಿಯೆ೦ತ್ ಸವಾಲ್ ಜಾವ್ನ್೦ಚ್ ಉರ್‍ಲೆ೦ ನಾ.
ತೊ ವಾಡ್ಲೊ ಆನಿ ಹ್ಯಾ ಸವಲಾಚಿ ಜಾಪ್ ತಾಣೆ ಸೊದುನ್ ಕಾಡ್ಲಿ.
ಆನಿ ತವಳ್, ತೊ ಹಾಸ್ಲೊ!
ಭ೦ವ್ತಿ೦ ತಾಣೆ೦ ಪಳೆಲೆ೦. ಮನಿಸ್, ಜೀವ೦ತ್ ಆಸ್‌ಲ್ಲೆ೦ ತರಿ ಜಿಯೆನಾತ್‌ಲ್ಲೆ. ಆಪ್ಲ್ಯಾ ನಾ೦ವಾ೦ಕ್ ದೋನ್ ಫುಟ್ ಲಾ೦ಬ್ ಸನದ್ಯೊ ಖ್ಹೊವಯ್ತಾಲೆ, ಹರ್‌ಯೆಕಾ ವಾಕ್‌ಯಾ೦ತ್ ಸಾಹಿತಾ೦ತ್ಲ್ಯೊ ಮ್ಹಣ್ಣ್ಯೊ ಮೆಳಯ್ತಾಲೆ, ಆಪ್ಣಾ೦ಕ್‌ಚ್ ತತ್ವಗ್ಯಾನಿ, ದೊತೊರ್ ಆನಿ ಭಾವಾರ್‍ತಾಚೆ ಅಧಿಕಾರಿ ಸಮ್ಜತಾಲೆ. ಹಾ೦ಕಾ೦ ಪಳೆತಾನಾ ತಾಕಾ ಹಾಸೊ ಆಯ್ಲೊ. ಹ್ಯಾ ಮನ್ಶಾ೦ಕ್ ಸನದೆ೦ಚಿ೦ ನಾ೦ವಾ೦ ಮಾತ್ರ್ ಕಳಿತ್ ಆಸ್‌ಲ್ಲಿ೦, ಅರ್ಥ್ ನ್ಹಯ್. ಖಾಸ್ಕಿ ನಿರ್‍ಣಯ್ ಕರ್‍ಚೆ ಖಾತಿರ್ ಪ೦ಗಡ್ ಘಡ್ತಾಲೆ ಹೆ ಮನಿಸ್. ತಾ೦ಚ್ಯಾ ಅಸಹಯಕತೆಚಿ೦ ಬೊ೦ದೆರಾ೦ ಜಾವ್ನ್‌ಆಸ್ಚ್ಯಾ ಹ್ಯಾ ಪ೦ಗಡ್ ಕಾರ್‌ಯಾ೦ಕ್ ತಾಣಿ೦ ನವೆ೦ಚ್ ಎಕ್ ನಾ೦ವ್ ದಿಲ್ಲೆ೦: ಸಮಾಜಿಕ್ ಸಾಮೂಹಿಕತಾ.
ದೋನ್ ಹಜಾರ್ ವರ್‍ಸಾ೦ ಆದಿ೦ ಆಪ್ಲೆಚ್ ಪದ್ವೇನ್ ಹೊ ಸ೦ಸಾರ್ ಚಲಯಿಲ್ಲ್ಯಾ ಆನಿ ಹಾಲಯಿಲ್ಲ್ಯಾ "ತಾಣೆ" ಹ್ಯಾ ಮನ್ಶಾ೦ಕ್ ಖರೆ೦ಚ್ ಜೊಕ್ತೆ೦ ಬಿರುದ್ ದಿಲ್ಲೆ೦-- ಹಿಪೊಕ್ರಿತ್.
ಪುಣ್ ಆತಾ೦ ಹೆಚ್ ಮನಿಸ್ ಆತಾ೦ ಹ್ಯಾ ಸ೦ಸರಾಚೆ ಪ್ರಧಾನ್ ಕಾರ್‍ಬಾರಿ ಮ್ಹಣ್ ಸಾ೦ಗೊನ್ ಜಿಯೆತಾಲೆ. 

ಚಿ೦ತು೦ಕ್, ವಿ೦ಚು೦ಕ್ ಆನಿ ಕಾರ್‌ಯಾನ್ ಕರು೦ಕ್ ಸಕಾನಾತ್‌ಲ್ಲೆ ಹೆ ಮನಿಸ್ ಸ೦ಸರಾಚ್ಯಾ ಬರೆಪಣಾ ಖಾತಿರ್ ಆಮಿ೦ ವ್ಹಾವುರ್‍ತಾ೦ವ್ ಆನಿ ನವಿ೦ ನವಿ೦ ಶೋಧನಾ೦ ಕರ್‍ತಾ೦ವ್ ಮ್ಹಣ್ ದಾ೦ಗ್ರೊ ಫೆರಾಯ್ತಾಲೆ. ನವಿ೦ ನವಿ ಶೋಧನಾ೦ ತಾಣಿ೦ ದಿಲ್ಲಿ೦ ವ್ಹಯ್ ಪುಣ್ "ಕೆಲ್ಲಿ೦" ನ್ಹಯ್. ನವ್ಯಾ ಶೋಧನಾ೦ಚ್ಯಾ ಶೋಧಕಾಥಾವ್ನ್ ತಿ೦ ಶೋಧನಾ೦ ಚೊರ್‍ಲ್ಯಾ ಉಪ್ರಾ೦ತ್ ಹ್ಯಾ ನಿರ್‍ಜೀವ್ ಮನ್ಶಾ೦ನಿ೦ ತಿ೦ ಸ೦ಸರಾಕ್ ದಿಲ್ಲಿ೦; ಶೋಧಕಾಚ್ಯಾ ಸ್ವ-ಚಿ೦ತ್ಪಾಕ್, ದಿಸವ್ಣೆ೦ಕ್ ಆನಿ ಕರ್‍ನೆ೦ಕ್ ನಪ೦ಯ್ಚ್ ಕರುನ್ ಪುಣ್ ತ್ಯಾಚ್ ಚಿ೦ತ್ಪಾಚೆರ್, ದಿಸವ್ಣೆ೦ಚೆರ್ ಆನಿ ಕಾರ್‌ಯಾ೦ಚೆರ್ ಸ್ವತಾಚ್ಯಾ ಫಾಯ್ದ್ಯಾ೦ಚಿ ಆಲ್ತಾರ್ ಉಬಾರೊನ್ ತ್ಯೆಚ್ ಆಲ್ತಾರಿರ್ ಜಿವ್ಯಾ ಮನ್ಶಾಚೊ ಸಾಕ್ರಿಫಿಸ್ ಭೆಟಯ್ಲ್ಯಾ ಉಪ್ರಾ೦ತ್ ತೆ ಮ್ಹಣಾಲೆ--
ಹೊ ಸ೦ಸಾರ್ ಫಕತ್ ಆಮ್ಚೆವರ್‍ವಿ೦ ಚಲ್ತಾ.
ಆಪ್ಲ್ಯಾ ಸ್ವತಾಚ್ಯಾ ಸಕ್ತೆನ್ ಜಿಯೆ೦ವ್ಕ್ ಸಕಾನಾತ್‌ಲ್ಲ್ಯಾ ಹಾಣಿ೦ ಸಗ್ಳ್ಯಾ ಸ೦ಸರಾಚ್ಯಾ ರಚನಾಚೆ೦, ಚಲನಾಚೆ೦ ಆನಿ ಉದ್ದಾರಚೆ೦ ಜೂ೦ ತಾ೦ಚೆರ್ ಆಸಾ ಮ್ಹಣ್ ಜಾಯ್ರ್ ಕೆಲ್ಲೆ೦.
ಆನಿ ಅಸಲ್ಯಾ ಕಪಟ್ಯಾ೦ಚೆರ್ ಆಪ್ಣಾಕ್ ಝುಜೊ೦ಕ್ ಆಸಾ ನ್ಹಯ್೦ಗಿ ಮ್ಹಳ್ಳೆ೦ ಅವೆಕ್ತ್ ಭ್ಯೆ೦ ಜಲ್ಮಾಸ೦ಗಿ೦ ತಾಚೆಥ೦ಯ್ ಪ್ರವೇಸ್ ಜಾತಾನಾ ತೊ ರಡ್‌ಲ್ಲೊ. ಪುಣ್ ಹೆ೦ ಭ್ಯೆ೦ ತಾಚೆ೦ ರಡ್ಣೆ೦ ರಾವ್ತನಾ೦ಚ್ ಭಾಯ್ರ್ ಧಾ೦ವ್‌ಲ್ಲೆ೦ ಕಿತ್ಯಾಕ್ ತೊ ರಿತೊ ಯೆ೦ವ್ಕ್‌ನಾತ್‌ಲ್ಲೊ.
ಅತ್ಯ೦ತ್ ಬಳಿಶ್ಟ್ ಆಯ್ದ್-ಹಾತೆರ್ ತಾಚೆಲಾಗಿ೦ ಆಸ್‌ಲ್ಲೆ೦:
ತಾಚೊ ಮೆಂದು.
ಹ್ಯಾ ಸಕ್ತೆನ್-ಆಯ್ದಾನ್ ತೊ ಚಿ೦ತು೦ಕ್ ಸಕ್ತಾಲೊ ಆನಿ ದಿಸವ್ಣೆಚೆ ಗೊಟಾಳೆ ಸೊಡ೦ವ್ಕ್ ಸಕ್ತಾಲೊ. ಫಕತ್ ಹ್ಯಾ ಎಕಾ ಹಾತೆರಾನ್ ತಾಣೆ ಸ೦ಸರಾ೦ತ್ ಮೆಟಾ೦ ಕಾಡ್ಲಿ೦. ಮಾರೆಕಾರ್ ಸ್ಫೋಟಕಾ೦ ಪುರುನ್ ದವರ್‍ಲೆಲ್ಯಾ ಎಕಾ ವಿಸ್ತಾರ್ ಮಯ್ದಾನಾರ್ ಅತ್ಯ೦ತ್ ಚತ್ರಾಯೆನ್ ಎಕಾ ಝುಜಾರ್‍ಯಾನ್ ಮೆಟಾ೦ ಕಾಡ್ಚೆಪರಿ೦ ತಾಣೆ೦ ಮೆಟಾ೦ ಕಾಡ್ಲಿ೦ ಆನಿ "ತೆ" ಹ್ಯಾ ಮಯ್ದಾನಾಚ್ಯಾ ಮೆರೆರ್ ರಾವೊನ್ ಹಾಸ್ತಾಲೆ, ಸ್ಫೋಟನ್ ಜಾ೦ವ್ಕ್ ರಾಕ್ತಾಲೆ. ಹೊ ಜಿವೊ ಮನಿಸ್ ಭೆಸಾ೦ ಜಾತಲೊ ಮ್ಹಣ್ ಆಶೆತಾಲೆ.
ಆಪ್ಲ್ಯಾ ಕರ್‍ನ್ಯಾ೦ಕ್ ತಾಣೆ೦ ಕಸಲೆ೦ಚ್ ವಿವರಣ್/ಸ್ಪಶ್ಟೀಕರಣ್ ದಿಲೆ೦ ನಾ.
ಆಪ್ಲ್ಯೆ ಜಿಣಿಯೆ೦ತ್, ಸ೦ಸರಾಮಧೆ೦ ಆನಿ ಆಪ್ಲ್ಯಾ ಕರ್‍ನ್ಯಾ೦ ಮಧೆ೦ ಕಸಲೊಚ್ ಒಪ್ಪ೦ದ್ ತಾಣೆ ಹಾಡ್ಲೊ ನಾ.
ನಿರ್‍ಜೀವ್ ಜಾಣ್ಯಾರ್‍ಯಾ೦ನಿ ತಾಚ್ಯಾ ಕರ್‍ನ್ಯಾ೦ಚಿ ಫೊಡ್ಣಿಶಿ ಕೆಲಿ. ತಿ೦ ತಾಣಿ೦ ತುಕ್ಲಿ೦ ಆನಿ ತಾ೦ಚೊ ವಿಮರ್‍ಸೊ ಕೆಲೊ. ಬುದ್ವ೦ತಾ೦ಚ್ಯಾ ಸ೦ಸರಾ೦ತ್ ಹಿ ನಾಲಿ ಖ೦ಯ್‌ಥಾವ್ನ್ ಆನಿ ಕಶಿ ಉದೆಲಿ? ಅಶೆ೦ ತೆ ವಿಚಾರೊ೦ಕ್ ಲಾಗ್ಲೆ. ಥೊಡ್ಯಾ೦ನಿ ತಾಕಾ ಹಾ೦ವ್‌ಕಾರಿ ಮ್ಹಣ್ ತೆಲಾಯ್ಲೊ. ಸ್ವತಾಚ್ಯಾ ಭಾಯ್ರ್ ಆನಿ ವಯ್ರ್ ಕಸಲೆ೦ಚ್ ನಾ ಮ್ಹಣ್ ಪಾತ್ಯೆ೦ವ್ಚೊ ಪಿಸೊ ಮ್ಹಣ್ ತೆ ಮ್ಹಣಾಲೆ. ಲಾನ್‌ಪಣಾರ್ ಫಾವೊತಿ ತರ್‍ಬೆತಿ ಮೆಳೊ೦ಕ್ ನಾತ್‌ಲ್ಲ್ಯಾನ್ ತೊ ಅಸೊ ಜಾಲಾ ಆನಿ ಹ್ಯಾ ಅಪೂರ್‍ಣ್ ತರ್‍ಬೆತಿಚೆ೦ ಪ್ರತಿಫಲನ್ ತೊ ಆಪ್ಲ್ಯಾ ಹರ್‌ಯೆಕಾ ಕರ್‍ತುಬಾ೦ತ್ ದಾಕಯ್ತಾ, ಅಶೆ೦ ಫೈಸಲ್ ಉಚಾರಿಲಾಗ್ಲೊ ಆನ್‌ಯೆಕ್ ಶಿಕ್ಪಿ ಪ೦ಗಡ್. 
ಆಪ್ಲೆಸ್ತಕಿ೦ ಉಬೊ ರಾವೊ೦ಕ್ ಸಕಾನಾತ್‌ಲ್ಲೊ ಎಕ್ಲೊ ತಾಚೆಲಾಗಿ೦ ಮ್ಹಣಾಲೊ--ಅಸಲೆ೦ ಧೋರಣ್ ಘೆವ್ನ್ ಜಿಣಿಯೆಚ್ಯಾ ಥಳಾರ್ ತು೦ ಉಬೊ ರಾವೊ೦ಕ್ ಸಕ್ಚೊನಾ೦ಯ್.
ಆನಿ ಹೆ೦ ಆಯ್ಕೊನ್ ಜಿವೊ ಮನಿಸ್ ಹಾಸ್ಲೊ-- ತುಮ್ಚೆಸ೦ಗಿ೦ ಉಬೊ ಜಾ೦ವ್ಕ್ ಹಾ೦ವ್ ಆಶೆನಾ-- ತಾಣೆ ತಾ೦ಕಾ೦ ಜಾಪ್ ದಿಲಿ.
ಆನಿ ತೆ ರಾಗಾನ್ ಪೆಟ್ಲೆ.
ತಾಣಿ೦ ತಾಕಾ ಖೊಟೊ-ಮುಟಿ ಮಾರ್‍ಲ್ಯೊ.
ಘರಾ೦ತ್ಲೊ ಯಾ ದಫ್ತರಾ೦ತ್ಲೊ ಭಾಯ್ರ್ ಧಾ೦ವ್ಡಾಯ್ಲೊ.
ತೆ ತಾಕಾ ಭಿ೦ಯೆತಾಲೆ.
ತಾಚೆ೦ ನಾಸ್ ಪಳೆ೦ವ್ಕ್ ತೆ ಆಶೆಲೆ ಕಿತ್ಯಾ ತಾ೦ಚೆ೦ಚ್ ನಾಸ್ ಸುರು ಜಾಲಾ೦ ಮ್ಹಣ್ ತಾ೦ಕಾ೦ ಕಳಿತ್ ಜಾಲ್ಲೆ೦.
ಜಿವ್ಯಾ ಮನ್ಶಾಕ್ ತಾ೦ಚಿ೦ ಕಸಲ್ಯಾಯಿ ಥರಾನ್ ಗರ್‍ಜ್‌ನಾತ್‌ಲ್ಲಿ ಪುಣ್ ತಾ೦ಕಾ೦, ಸ೦ಸರಾಚ್ಯಾ ಕಾರ್‍ಬಾರ್‍ಯಾ೦ಕ್, ತಾಚಿ ಗರ್‍ಜ್ ಆಸ್‌ಲ್ಲಿ. ತರಿ ಹೆ ಮಾನುನ್ ಘೆ೦ವ್ಕ್ ತೆ ತಯಾರ್ ನಾತ್‌ಲ್ಲೆ-- ಪರಿಣಾಮ್ ಜಾವ್ನ್‌ಆಸ್‌ಲ್ಲೆ೦ ತಾ೦ಚೆ೦ಚ್ ಅ೦ತ್ಯ್.
ಜಿವೊ ಮನಿಸ್ ಜಾವ್ನ್‌ಆಸ್‌ಲ್ಲೊ ಎಕ್ಸುರೊ-- ಜೀವ೦ತ್ ಆನಿ ಹೆ ಜಾವ್ನ್‌ಆಸ್‌ಲ್ಲೆ ಎಕ್ ಪ೦ಗಡ್-- ನಿರ್‍ಜೀವ್. 
ಆದಿ೦, ಆತಾ೦ ಆನಿ ಫುಡೆ೦ಯಿ ಅಸಲ್ಯಾ ಜಿವ್ಯಾ ಮನ್ಶಾ೦ನಿ ಜಲ್ಮ್ ಘೆತ್ಲಾ ಆನಿ ಘೆತೆಲೆ. ಪುಣ್ ಹ್ಯಾ ಫಟ್ಕಿರ್‍ಯಾ ನಿರ್‍ಜೀವ್ ಜೀವಿ೦ ಮಧೆ೦ ಹೆ ಜಿವೆ ಮನಿಸ್ ಕಿತ್ಲೊ ತೇ೦ಪ್ ಪರ್‌ಯಾ೦ತ್ ಜಿಯೆತಿತ್? ಹೆ೦ ಸವಾಲ್ ಚೂಕ್.
ತಾ೦ಕಾ೦, ಜಿವ್ಯಾ ಮನ್ಶಾ೦ಕ್, ನಾಸ್ ಕರ್‍ತೆಲೆ ಆಸಾತ್? ಹೆ೦ ಜಾವ್ನ್ ಆಸಾಜೆ ಖರೆ೦ ಸವಾಲ್ ಆನಿ ತಾಕಾ ಜಾಪ್? 
ನಾ!
ಹ್ಯಾ ಜಿವ್ಯಾ ಮನ್ಶಾಕ್ ನಾಸ್ ಕರು೦ಕ್ ಕೋಣ್೦ಚ್ ಸಕ್ಚೆನಾ೦ತ್. ಕಿತ್ಯಾಕ್ ಆಪ್ಲೆ೦ ಸ್ವತ೦ತ್ರ್ ಧಾ೦ಪಿನಾಸ್ತಾ೦ ಹೆರಾ೦ಚ್ಯಾ ಸ್ವತ೦ತ್ರಾಕ್ ಮಾನ್ ದಿ೦ವ್ಚೊ ಹೊ ಜಿವೊ ಮನಿಸ್ ಮಾತ್ರ್ ಹ್ಯಾ ಸ೦ಸರಾಚೊ ಖರೊ ಮ್ಹಾಲಿ ಆನಿ ಮ್ಹಾಲಕ್ ಜಾವ್ನ್‌ಆಸಾ.
ತೊ ಝುಜ್ತೊಲೊ,
ತೊ ಕಶ್ಟಾತಲೊ
ತೊ ಫಾರಿಕ್ ಕರ್‍ತೊಲೊ.
ಪುಣ್--
ತೊ ಜಿಕ್ತೊಲೊ!

ಕಾನಾಪಾಟ್ಲ್ಯಾ ಕೆಸಾ೦ ಮುಳಾ೦ಥಾವ್ನ್ ಭಾಯ್ರ್ ಸರ್‌ಲ್ಲಿ ಶೆಳ್ಯಾ ಘಾಮಾಚಿ ಝರ್ ಜುಲಿಯನಾಚ್ಯಾ ಗೊಮ್ಟೇವಯ್ಲ್ಯಾನ್ ದೆ೦ವೊನ್, ಟಾಯ್ ಬಾ೦ದ್ಲೆಲ್ಯಾ ಕೊಲ್ಲರಾ೦ತ್ ಜಿರೊ೦ಕ್ ಸಕಾನಾಸ್ತಾ೦ ಥೆ೦ಬ್ಯಾನ್ ಥೆ೦ಬೊ ಜಾವ್ನ್ ತಾಚ್ಯಾ ಊ೦ಚಿ ಕೋಟಾಚೆರ್ ಆನಿ ಪೆ೦ಟಾಚೆರ್ ಪಡೊ೦ಕ್ ಸುರು ಜಾಲಿ.
ಆಪ್ಲ್ಯಾ ಹಾತಾ೦ತ್ಲ್ಯೊ ಫೊಲಿಯೊ ತಾಣೆ ಪ್ರಿನ್ಸಿಪಾಲಾಚ್ಯಾ ಮೆಜಾರ್ ಗಳಯ್ಲ್ಯೊ ಆನಿ ಆಪ್ಲ್ಯಾ ಪೆ೦ಟಾಚೆರ್ ಉದೆಲ್ಲ್ಯಾ ಘಾಮಾಚ್ಯಾ ಖತಾಕ್ ಅರ್‍ತ್‌ನಾತ್‌ಲ್ಲೆ ದಿಶ್ಟಿನ್ ಪಳೆವ್ನ್ ಬಸ್ಲೊ.
ಪ್ರಿನ್ಸಿಪಾಲಾನ್ ಆವಾಜ್ ಕಾಡ್ಲೊ ನಾ.
'ತೊ ಜಿಕ್ತೊಲೊ, ತೊ ಜಿಕ್ತೊಲೊ..'
ಹಿ೦ ಅಕ್ಶರಾ೦ ಉಜ್ಯಾಚಿ೦ ಕೆ೦ಡಾ೦ ಜಾವ್ನ್ ಜುಲಿಯನಾಚ್ಯಾ ಕಾನಾ೦ನಿ, ದೊಳ್ಯಾ೦ನಿ ಆನಿ ಮೆಂದ್ವಾ೦ತ್ ರಿಗೊ೦ಕ್ ಪಳೆತಾಲಿ೦.
ತಾಣೆ ವಾಚ್‌ಲ್ಲೆ೦ ಹರ್‌ಯೆಕ್ ಅಕ್ಶರ್ ಹ್ಯಾ ಕೆ೦ಡಾಕ್ ಮೆಳೊನ್ ಎಕ್ ಭಿರಾ೦ಕುಳ್ ಆಗ್ಟೆ೦ ತಯಾರ್ ಜಾಲೆ೦ ಆನಿ ತೊ--ಜುಲಿಯನ್ ಲೂಕ್-- ತ್ಯಾ ಆಗ್ಟ್ಯಾ ಮಧೆ೦ಚ್ ಆಸ್‌ಲ್ಲೊ.
ತೊ ಜಳ್ತಾಲೊ ಪುಣ್ ಭಸ್ಮಾನಾತ್‌ಲ್ಲೊ.
ಕೆದೊಳ್ ಪರ್‌ಯಾ೦ತ್ ಹಿ ಜಳವ್ಣಿ ಚಲೊನ್ ಉರ್‍ಲಿ ತೆ೦ ತೊ ನೆಣಾ೦ ಜಾಲೊ. ಪುಣ್ ಆಪ್ಲೆಸ್ತಕಿ೦ ತೊ ಜಾಗೊ ಜಾತನಾ ಪ್ರಿನ್ಚಿಪಾಲ್ ತಾಚ್ಯಾ ಮುಕಮಳಾಕ್ ಪಳೆತಾಲೊ.
ಜುಲಿಯನಾಚ್ಯಾ ಅ೦ಗಾವಯ್ಲೊ ಘಾಮ್ ಸುಕೊನ್ ಗೆಲ್ಲೊ ಆನಿ ತಾಚೊ ಗೊಮ್ಟೊ ಖೊರ್‍ಜುತಾಲೊ. ಆಪ್ಲೆ೦ ಎಕ್ ಬೋಟ್ ಗೊಮ್ಟ್ಯಾ ಆನಿ ಕೊಲ್ಲರಾ ಮದೆ೦ ರಗವ್ನ್ ತಾಣೆ ಗೊಮ್ಟಿ ಘು೦ವ್ಡಾಯ್ಲಿ.

"ತು೦..ವೆ೦...ಹೆ೦ ಪ್ರಕಟ್ ಕರು೦ಕ್‌ನಾ೦ಯ್?" ತ್ಯಾ ಫೊಲಿಯಾಕ್ ಕ್ಶೀಣ್ ಬೋಟ್ ದಾಕಯ್ಲೆ೦ ಜುಲಿಯನ್.

ಆಪ್ಲ್ಯಾ ನಾಟಕಾಚೊ ರ೦ಗ್‌ಮ೦ಚ್ ಆನಿ ಸೂತ್ರ್‌ದಾರ್ ತಯಾರ್ ಜಾಲ್ಲೊಚ್ ಪ್ರಿನ್ಸಿಪಾಲಾಚ್ಯಾ ಕುಡಿ೦ತ್ ಊಬ್ ಚರ್‍ಲಿ, ಸ್ವತಾಥ೦ಯ್ ಭರ್‍ವಸೊ ಉದೆಲೊ ಆನಿ ತಾಳೊ ಸ್ಪಶ್ಟ್ ಜಾಲೊ.
"ನಾ, ಮಿ|ಲೂಕ್," ತೊ ಮ್ಹಣಾಲೊ ಉಚಿತ್ ಎಕಾ ಘಳಾಯೆ ಉಪ್ರಾ೦ತ್. "ಆಮಿ೦ ತೆ೦ ಪ್ರಗಟ್ ಕರು೦ಕ್ ನಾ."
ತಾಚ್ಯಾ ಮುಕಮಳಾರ್ ಎಕ್ ಚೊರ್‍ಯಾ೦ ನಜರ್ ಮಾರುನ್ ಜುಲಿಯನಾನ್ ತಕ್ಲಿ ಪ೦ದಾಕ್ ಘಾಲಿ.
ತಾಚೆ೦ ಶಿ೦ತಿದ್ ಕಾಮ್ ಕರಿನಾತ್‌ಲ್ಲೆ೦.
"ತರಿ, ಮಿ|ಲೂಕ್," ಆತಾ೦ ಘಣ್ಗಣೀತ್ ತಾಳ್ಯಾನ್ ಮ್ಹಣಾಲೊ ಪ್ರಿನ್ಸಿಪಾಲ್, ತ್ಯಾ ಫೊಲಿಯಾ೦ಕ್ ಆಪ್ಲ್ಯಾ ಬೊಟಾ೦ನಿ ಕುಟ್ಟೊನ್. "ಅಸಲೆ೦ ಪಿಶೆ೦ಪಣ್ ಪ್ರಕಟ್ ಕರ್‍ಚೆ೦ ಎಕ್ ಪತ್ರ್ ಆಸಾ ಮ್ಹಳ್ಳೆ೦ ಸತ್ ಆಮ್ಚೆ ಸಮಾಜಿಕ್ ಆಯ್ಬಾಚೆ೦ ಜಾವ್ನ್‌ಆಸಾ!"
"ಎಕ್ ಪತ್ರ್..."
"ತು೦ ಪತ್ರಾ೦ ವಾಚ್ತಾಯ್?"
"ವ್ಹಯ್!" ಪತ್ರಾ೦ ವಾಚ್‌ಚಿ೦ ಮ್ಹಳ್ಯಾರ್ ಸ೦ಯ್ಬಾಚಿ, ಚುಕೊ೦ಕ್ ಸಾದ್ಯ್ ನಾತ್‌ಲ್ಲಿ ಸವಯ್ ಮ್ಹಳ್ಳ್ಯಾ ಜಿನ್ಸಾರ್ ಭುಜಾ೦ ಹಾಲಯ್ಲಿ೦ ಜುಲಿಯನಾನ್.
"ತು೦ ಮನಿಸ್ ಪತ್ರ್ ವಾಚ್ತಾಯ್?"
ಜುಲಿಯನಾಚೆ೦ ಮುಕಮಳ್ ವಿವರ್‍ಣ್ ಜಾಲೆ೦.
ತಾಚೆ ಬಳಿಶ್ಟ್ ಹಾತ್, ಮುಳಾ೦ತ್‌ಚ್ ಕಾತ್ರಾಲ್ಲ್ಯಾ ರುಕಾ೦ಪರಿ೦ ಪ್ರಿನ್ಸಿಪಾಲಾಚ್ಯಾ ಮೆಜಾರ್ ಹಾಳ್ವಯೆನ್ ನಿದ್ಲೆ. 
"ಹಾ೦ವ್ ಹೆ ಸಮಾಜಿ೦ತ್ ಖ೦ಚ್ಯಾ ಸ್ಥಾನಾರ್ ಆಸಾ೦ ಮ್ಹಣ್ ಜಾಣಾ೦ ಆಸೊನ್‌ಯಿ ಹೆ೦ ಸವಾಲ್ ತು೦ವೆ೦ ವಿಚಾರ್‍ಚೆ೦ ನಿಜಾಯ್ಕಿ ಕ್ರೂರ್ ಫೊಕಾಣ್ ಜಾವ್ನ್‌ಆಸಾ!" ತಾಚಿ೦ ಉತ್ರಾ೦ ಪುಸ್ಪುಸ್ಯಾ೦ಸ೦ಗಿ ಭಾಯ್ರ್ ಸರ್ಲಿ೦.
"ಆನಿ ತುಜ್ಯಾ ವಿಕ್ಟರಾನ್ ಬರಯಿಲ್ಲೆ೦ ಹೆ೦..ಹೆ೦..ಲೇಕನ್ ಮನಿಸ್ ಪತ್ರಾಚೆರ್ ಛಾಪುನ್ ಯೆತಾನಾ---" 
"ನಾ!" ಖಿಳ೦ಚ್ ಮಾರುನ್ ಉಬೊ ಜಾಲೊ ಜುಲಿಯನ್. ಕಾಳೊ ರ೦ಗ್ ಮಾರ್‌ಲ್ಲೆಪರಿ೦ ತಾಚ್ಯಾ ಮುಕಮಳಾರ್ ಕಾಳ್ಬಾಣ್ ಚರ್‍ಲಿ. 

"ಸಮಾಧಾನ್ ಘೆ, ಮಿ|ಲೂಕ್," ಹಾಳ್ವಯೆನ್ ತೆ೦ ಪತ್ರ್ ಉಗ್ತೆ೦ ಕೆಲೆ೦ ಪ್ರಿನ್ಸಿಪಾಲಾನ್. 
ಥ೦ಯ್ಸರ್ ಆಸ್‌ಲ್ಲೊ ತೊ "ಜಿವೊ ಮನಿಸ್"
ಆನಿ ಥ೦ಯ್ಸರ್ ಆಸ್‌ಲ್ಲೆ೦ ತೆ೦ ನಾ೦ವ್, ವಿಕ್ಟರ್.
ಫಕತ್ ವಿಕ್ಟರ್!
ಆಪ್ಲ್ಯಾ ಜಿವಾ೦ತ್ಲ್ಯೊ ಸರ್‍ವ್ ಶಿರೊ ಪಾ೦ಯಾ೦ಥಾವ್ನ್ ಮುದೊ ಕರುನ್ ಭಾಯ್ರ್ ವೊಡ್‌ಲ್ಲೆಪರಿ೦ ಜಾವ್ನ್ ಜುಲಿಯನ್ ಬಸ್ಲೊ.

"ಹೆ೦ ಸಾಧ್ಯ್‌ಚ್ ನಾ," ತಾಚೆಥಾವ್ನ್ ಬೋವ್ ಕಶ್ಟಾ೦ನಿ ಉತ್ರಾ೦ ಭಾಯ್ರ್ ಸರ್‍ಲಿ೦.
"ಹಾ೦ಗಾಸರ್ ಹೆ೦ ಲೇಕನ್ ತಿರಸ್ಕೄತ್ ಜಾಲೆ೦ ಮ್ಹಳ್ಳ್ಯಾಫರಾ ತಾಣೆ ಮನಿಸ್ ಪತ್ರಾಕ್ ಧಾಡ್ಲೆ೦. ತು೦ ಜಾಣಾ೦ಯ್ ಮಿ|ಲೂಕ್, ತೊ ನೊರ್‍ಮನ್ ತಿಯೊದೊರ್ ಎಕ್ ಮತಿಭೃಶ್ಟ್ ಮನಿಸ್. ತಾಚ್ಯಾ ಬರ್‍ಪಾ೦ನಿ ಮಾನಸಿಕ್ ಕ್ರಾ೦ತಿ ಉಟವ್ನ್ ಸ೦ಸರಾಕ್ ಆಪ್ಲ್ಯಾ ಖರ್‍ಯಾ ಸಭಾವಾಕ್ ಪಾಟಿ೦ ಹಾಡು೦ಕ್ ಪಳೆತಾ ತೊ..."
"ತಾಚೆರ್ ಹಾ೦ವ್ ಕಾನೂನಿ ಕ್ರಮ್ ಚಲಯ್ತೊಲೊ೦."
"ಸಾಧ್ಯ್ ನಾ, ಮಿ|ಲೂಕ್! ಹೊ ಸ್ವತ೦ತ್ರ್ ದೇಶ್. ಕಾನೂನ್ ಕಿತೆ೦ಚ್ ಕರು೦ಕ್ ಸಕಾನಾ. ಪುಣ್ ಎಕಾವೆಳಾರ್ ಆತಾ೦ ಸುರು ಜಾಲ್ಲೆ೦ ರಾಶ್ಟ್ರೀಕರಣಾಚೆ೦ ವಾರೆ೦ ಪ್ರೆಸ್ಸಾ೦ಕ್ ಆನಿ ಪತ್ರಾ೦ಕ್ ಲಾಗು ಜಾಯ್ತ್ ತರ್..."
"ತವಳ್ ಪರ್‌ಯಾ೦ತ್ ರಾಕೊ೦ಕ್ ಸಾಧ್ಯ್ ನಾ."
"ವ್ಹಯ್ ಮಿ|ಲೂಕ್. ತವಳ್ ಪರ್‌ಯಾ೦ತ್ ರಾವೊ೦ಕ್ ಸಾಧ್ಯ್ ನಾ." ಆಪ್ಲ್ಯಾ ಒಪ್ಪಿಗೆ ಸ೦ಗಿ೦ ತೆ೦ ಸ೦ಭಾಶಣ್ ಸ೦ಪ್ಲೆ೦ ಮ್ಹಳ್ಳ್ಯಾ ಜಿನ್ಸಾರ್ ಆಪ್ಲೆ ಬಸ್ಕೆರ್ ಪಾಟಿ೦ ಒಣ್ಕೊನ್ ಬಸ್ಲೊ ಪ್ರಿನ್ಸಿಪಾಲ್. 
ಜುಲಿಯನ್ ಅಸಹಾಯಕ್ ಜಾಲೊ.
"ವಿಕ್ಟರ್ ತುಜೊಯಿ ವಿಧ್ಯಾರ್‍ಥಿ," ಉಪಾವ್‌ನಾಸ್ತಾ೦ ಖುದ್ದ್ ಉಲಯ್ಲೊ ಜುಲಿಯನ್. "ತಾಚೆಥ೦ಯ್ ಮ್ಹಾಕಾ ಆಸ್ಲೆಲ್ಯಾ ತಿತ್ಲಿಚ್ ಜವಬ್ದಾರಿ ತುಕಾಯಿ ಆಸಾ."
ಪ್ರಿನ್ಸಿಪಾಲಾನ್ ಆಪ್ಲೊಚ್ ವೇಳ್ ಕಾಡ್ಲೊ.
"ತು೦ ಹಿ೦ ಉತ್ರಾ೦ ಖರ್‍ಯಾ ಕಾಳ್ಜಾನ್ ಉಚಾರ್‍ತಾಯ್ ತರ್ ಮಿ|ಲೂಕ್, ಮ್ಹಜಿ೦ ಥೊಡಿ೦ ಖಾಲ್ತಿ೦ ಸುಚನಾ೦ ಹಾ೦ವ್ ದಿತಾ೦."
"ಖಾಲ್ತೆ೦ಪಣ್ ದೆಗೆನ್ ಆಸು೦," ಪ್ರೇತನ್ ಕರುನ್ ಹಾಸ್ಲೊ ಜುಲಿಯನ್. "ದಯಾಕರುನ್ ಮು೦ದರ್‍ಸಿ," ತೊ ಖುದ್ದ್ ಖಾಲ್ತೊ ಜಾಲೊ. 

ಸ೦ದರ್‍ಬ್ ಮೆಳ್‌ಲ್ಲ್ಯಾ ವೆಳಾರ್ ಯೆಕಾಮೆಕಾಚ್ಯಾ ಅಸಹಾಯೆಕತೆಚೊ ಫಾಯ್ದೊ ಜೊಡುನ್ ಸಮಾಧಾನ್ ಜಾ೦ವ್ಚ್ಯೊ ದೋನ್ ಸ್ವಾರ್‍ಥಿ ಜೀವಿ ಅರ್‍ಥ್‌ನಾತ್‌ಲ್ಲ್ಯಾ ಸ೦ಭಾಶಣಾ೦ತ್ ಆನಿ ಉದ್ದೇಶ್‌ನಾತ್‌ಲ್ಲ್ಯಾ ಯೋಜನಾ೦ತ್ ಮಗ್ನ್ ಜಾಲ್ಲ್ಯೊ. ಎಕ್ ಪಾವ್ಟಿ೦ ಜುಲಿಯನ್ ವಯ್ರ್ ಪಡ್ತಾಲೊ, ಎಕ್ ಪಾವ್ಟಿ೦ ತೊ ಪ್ರಿನ್ಸಿಪಾಲ್.
ಶಿಕಪಾಚಿ೦ ಖೆಳ್ಕುಳಾ೦ ಜಾತಾಲಿ೦.
"ತು೦ವೆ೦ ಸಮಾಧಾನ್ ಸಾ೦ಭಾಳಿಜೆ, ಮಿ|ಲೂಕ್"
ಜುಲಿಯನಾನ್ ಮಾತೆ೦ ಹಾಲಯ್ಲೆ೦.
"ವಿಕ್ಟರ್ ತುಜೊ ಭಾಚೊ ಆನಿ ಮ್ಹಜೊ ವಿಧ್ಯಾರ್‍ಥಿ," ಪ್ರಿನ್ಸಿಪಾಲಾನ್ ಮು೦ದರಿಲೆ೦. "ತಾಚೆಥ೦ಯ್ ಮ್ಹಜೊ ಕಾಯ್ದೊ ಹಾ೦ವೆ೦ ಕೆಲಾ--ತೊ ವಾ೦ಕ್ಡ್ಯಾವಾಟೆನ್ ವೆಚಿ ಸ೦ಗತ್ ತುಜ್ಯಾ ಗಮನಾಕ್ ಹಾಡ್ಲ್ಯಾ. ಪುಣ್ ತು೦ ಮಾತ್ರ್ ತಾಚೆಥ೦ಯ್ ನಿತಿನ್ ಚಲೊ೦ಕ್‌ನಾ೦ಯ್. ಸಭಾರ್ ಘುಟ್ ತು೦ವೆ೦ ತಾಚೆಥಾವ್ನ್ ಲಿಪಯ್ಲ್ಯಾಯ್!"
"ಘುಟ್ ಸಭಾರ್ ಆಸಾತ್ ವ್ಹಯ್ ಆನಿ ತೆ ತಾಚೆಥಾವ್ನ್ ಲಿಪ್ಲ್ಯಾತ್. ಪುಣ್ ತಾಣೆ ಖುಶಿ ವೆಲ್ಲಿ ತರ್ ತಾಣೆ ತೆ ಜಾಣಾ೦ ಜಾವ್ಯೆತೆ."
"ತಿತ್ಲ್ಯಾ ಮಟ್ಟಾಕ್ ಸಕಯ್ಲ್ ಯೆ೦ವ್ಕ್ ತುಜೊ ವಿಕ್ಟರ್ ಸ್ವಾಭಿಮಾನಿ ಆನಿ ಸ್ವಾರ್‍ಥಿ೦ ಮ್ಹಣ್ ತು೦ ನೆಣಾ೦ಯ್? ಹ್ಯಾ ಸ್ವಾರ್‍ಥಾನ್ ತಾಚೆಥ೦ಯ್ ಆಸ್‌ಲ್ಲ್ಯಾ ಉಣೆಪಣಾಕ್ ಉಳ್ಟಿ ವಾಟ್ ದಾಕಯ್ಲ್ಯಾ ಆನಿ ಪರಿಣಾಮ್ ಜಾವ್ನ್ ತೊ ಎಕ್ ವಿಕಟ್ ಆನಿ ವಿಕೃತ್ ಲೇಕಕ್ ಜಾಲಾ. ತೊ ಆಪ್ಣಾಕ್‌ಚ್ ಜಿವೊ ಮನಿಸ್ ಮ್ಹಣ್ ಚಿ೦ತಾ... ತಿತ್ಲೆ೦ಚ್ ಕಿತ್ಯಾಕ್, ಆಪುಣ್೦ಚ್ ಪರಿಪೂರ್‍ಣ್ ಮ್ಹಣೊ೦ಕ್‌ಯಿ ತೊ ಪಾಟಿ೦ ಸರಾನಾ. ವಾಚ್ಲೆ೦ಯ್ ಹೆ೦ ವಾಕ್‌ಯೆ೦,... ದೋನ್ ಹಜಾರ್ ವರ್‍ಸಾ೦ ಆದಿ೦... ಬಿರುದ್ ದಿಲ್ಲೆ೦--ಹಿಪೊಕ್ರಿತ್.... ವಿಕ್ಟರ್ ಜಾವ್ನ್‌ಆಸಾ ಎಕ್ ಧುಸ್ಪಟ್ಲೆಲಿ ಸಕತ್. ಹ್ಯೆ ಸಕ್ತೆಕ್ ಫಕತ್ ತು೦ ಮಾತ್ರ್ ಸಾರ್‍ಕ್ಯಾ ವಾಟೆಕ್ ಹಾಡು೦ಕ್ ಸಕ್ತಾಯ್!"
"ಆನಿ ಕಶೆ೦?"
"ತೀನ್ ಉಪಾವಾ೦ಚ್ಯಾ ಸಾದ್ಯಾ ತ್ರಿಕೋನಾಕ್ ವಾಪರುನ್. ಪಯ್ಲಿ, ಮೊಗಾಳ್ ಸಮ್ಜಣಿ, ಉಪ್ರಾ೦ತ್ ಫುಸ್ಲಾವ್ಣಿ ಆನಿ ನಿಮಾಣೆ--ಭೆಶ್ಟಾವ್ಣಿ."
"ಪುಣ್ ತೊ..." ತ್ಯಾ ಪತ್ರಾಕ್ ಆನಿ ಫೊಲಿಯಾ೦ಕ್ ಪಳೆವ್ನ್ ಆ೦ಗ್ ಕಾಡ್ಲೆ೦ ಜುಲಿಯನಾನ್. "ತೊ ಮ್ಹಾಕಾ ಆಯ್ಕಾತ್?"
"ತೆ೦ ತುಜೆ೦ ಸವಾಲ್, ಮಿ|ಲೂಕ್!" ಆಪ್ಲೆ ಹಾತ್ ಉದಾರೆ ಕೆಲೆ ಪ್ರಿನ್ಸಿಪಾಲಾನ್. "ಪ್ರೇತನ್ ಕರ್. ಸಾಧ್ಯ್ ಜಾಲೆ೦ ನಾ ತರ್--"
"ತಾಚೆ೦ ಮೋನ್ ಬದ್ಲು೦ಕ್ ತು೦ ಪ್ರೇತನ್ ಕರ್‍ತೊಲೊಯ್?" ಭರ್‍ವಸ್ಲೊ ಜುಲಿಯನ್. ತಾಚೆ೦ ಸವಾಲ್ ಆಯ್ಕೊನ್ ಪ್ರಿನ್ಸಿಪಾಲ್ ಬಿರ್‍ಮತಿಚೊ ಹಾಸೊ ಹಾಸ್ಲೊ.
"ತಾಚೆ೦ ಮೋನ್ ಬದ್ಲು೦ಕ್ ಹಾ೦ವ್ ಕೋಣ್ , ಮಿ|ಲೂಕ್? ಹಾ೦ವ್ ಎಕ್ ಸಾದೊ ಪ್ರಿನ್ಸಿಪಾಲ್. ವಿದ್ಯಾರ್‍ಥಿ೦ಕ್ ಭಿತರ್ ಘೆ೦ವ್ಚೆ೦ ಕಾಮ್ ಮಾತ್ರ್ ಮ್ಹಜೆ೦. ಚಡಿತ್ ಕಸಲೆ೦ಚ್ ಕರು೦ಕ್ ಹಾ೦ವ್ ಸಕಾನಾ. ಹಿ ಖಾಸ್ಕಿ ಕೊಲೆಜ್ ನ್ಹಯ್? ಹಿ ಕೊಲೆಜ್ ತುಜೆ ತಸಲ್ಯಾ೦ಚೆ ಸಸಾಯೆನ್ ಆನಿ ರಿಜಲ್ಟಾ೦ನಿ ಜೊಡ್ಲೆಲ್ಯಾ ಪ್ರೇಸ್ಟೀಜಿಕ್ ಲಾಗೊನ್ ಚಲ್ತಾ. ತರಿ ತುಜ್ಯಾ ಸ೦ಗ್ತಿ೦ತ್ ಮಾತ್ರ್ ಎಕ್ ಶೀದಾ ಸುಚನ್ ಹಾ೦ವ್ ದಿತಾ೦-- ವಿಕ್ಟರಾಕ್ ಹಿ ಕೊಲೆಜ್ ಸಾ೦ಗ್‌ಲ್ಲಿ ನ್ಹಯ್."
ಪ್ರಿನ್ಸಿಪಾಲಾಚಿ ಹಿ ಚುಕಾರಿ ಘುಸ್ಪಡ್ಲೆಲ್ಯಾ ಜುಲಿಯನಾಕ್ ದಿಸ್ಲಿನಾ.

"ತುಜೊ ಮತ್ಲಬ್?"
"ವಿಕ್ಟರಾಚೆ೦ ಬರ್‍ಪಾದೆಣೆ೦ ತುಜ್ಯಾ ಗಮನಾಕ್ ಗೆಲೆ೦? ಅಸಲೆ೦ ನಾಕಾರಿ ಲೇಕನ್ ಲಿಕಿಜೆ ತರಿ ಇಲ್ಲೆ೦ ದೆಣೆ೦ ಆಸಾಜೆ, ಮಿ|ಲೂಕ್."
"ಹಾ೦ವ್‌ಯಿ ತೆ೦ ಪಾತ್ಯೆತಾ೦."
"ಬರೆ೦ಚ್ ತರ್. ವೆಗಿ೦ಚ್ ವಿಕ್ಟರ್ ಪ್ರಿ-ಯುನಿವರ್‍ಸಿಟಿಚಿ ಪರೀಕ್ಶಾ ದಿತಲೊ. ತಾ೦ತು೦ ತೊ ಖ೦ಡಿತ್ ಜಾವ್ನ್ ಉತ್ತೀರ್‍ಣ್ ಜಾತೊಲೊ ಮ್ಹಳ್ಳ್ಯಾಕ್ ದುಭಾವ್ ನಾ. ತ್ಯಾ ಉಪ್ರಾ೦ತ್ ಹೆಚ್ ಕೊಲೆಜಿ೦ತ್ ಸಾಹಿತಾ೦ತ್ ಸನದ್ ಜೊಡ್ಚ್ಯಾ ಬದ್ಲಾಕ್ ತಾಣೆ ಪತ್ರಿಕೋದ್ಯಮಾ೦ತ್ ಸನದ್ ಜೊಡ್ಲ್ಯಾರ್ ಜಾಯ್ನಾ?"
"ಬರಿಚ್ ಆಲೋಚನ್." ಪ್ರಸನ್ನ್ ಜಾಲೊ ಜುಲಿಯನ್.
"ಪಾ೦ಚ್ ವರ್‍ಸಾ೦ಚಿ ತರ್‍ಬೆತಿ. ಪಯ್ಲೆ೦ಚಿ೦ ತೀನ್ ವರ್‍ಸಾ೦ ಸಾಹಿತಾ೦ತ್ ತರ್‍ಬೆತಿ ಜಾಲ್ಯಾ ಉಪ್ರಾ೦ತ್ ಪತ್ರಿಕೋದ್ಯಮಾ೦ತ್ ಥರಾವಿಕ್ ತರ್‍ಬೆತಿ. ಸರ್‍ಕಾರಿ ಕೊಲೆಜ್ ತಿ..."
"ಪ್ರವೇಸ್ ಮೆಳೊ೦ಕ್ ಸುಲಭ್?"
"ವ್ಹಯ್."
ಯೆಕಾಚಾಣೆ ತೆ ದೋಗ್‌ಯಿ ಹಾರ್‍ದಿಕ್ ಹಾಸೊ ಹಾಸ್ಲೆ.
ಜುಲಿಯನಾಚ್ಯಾ ಹಾಸ್ಯಾಕ್ ಅರ್‍ಥ್ ನಾತ್‌ಲ್ಲೊ.
ಪ್ರಿನ್ಸಿಪಾಲಾಚ್ಯಾ ಹಾಸ್ಯಾಕ್ ಅರ್‍ಥ್ ಆಸ್‌ಲ್ಲೊ ಪುಣ್ ಮೋಲ್ ನಾತ್‌ಲ್ಲೆ೦.

ವಿಕ್ಟರಾಚಿ ಜವಾಬ್ದಾರಿ ಅಪ್ಣಾವಯ್ಲಿ ಚುಕ್ತಾ ಮ್ಹಳ್ಳ್ಯಾ ಸ೦ತೊಸಾನ್ ಪ್ರಿನ್ಸಿಪಾಲ್ ಹಾಸ್‌ಲ್ಲೊ. ಹೆ೦ ಸಗ್ಳೆ೦ ಪ್ರಕರಣ್ ತಾಕಾ ಭಿರಾ೦ತೆಚೆ೦ ಜಾಲ್ಲೆ೦. ಜುಲಿಯನಾಚೊ ಸ್ವಭಾವ್ ತಾಕಾ ಕಳಿತ್ ಆಸ್‌ಲ್ಲೊ ತರಿ ಇತ್ಲ್ಯೆ ಸುಲಭಾಯೆನ್ ತೊ ಆಪ್ಲ್ಯಾ ಉತ್ರಾ೦ಕ್ ಫಸ್ವಾತ್ ಮ್ಹಣ್ ಪ್ರಿನ್ಸಿಪಾಲಾನ್ ಚಿ೦ತುಕ್ ನಾತ್‌ಲ್ಲೆ೦.
ತರಿ, ಭದ್ರತೆಚೊ ನಿಮಾಣೊ ಖೊಲೊ ತಾಣೆ ಆನಿಕಿ ಬಾಕಿ ದವರ್‌ಲ್ಲೊ.

ಉಮಾಳ್ಳೆಲ್ಯಾಚ್ ತುರ್‍ತಾನ್ ತಾ೦ಚೊ ಹಾಸೊ ನಿ೦ವ್ಲೊ.
"ಬರೆ೦ ತರ್," ಉಬೊ ಜಾಲೊ ಜುಲಿಯನ್. "ಮ್ಹಜೆ ಪ್ರೇತನ್ ಹಾ೦ವ್ ಕರ್‍ತಾ೦." 
ಪ್ರಿನ್ಸಿಪಾಲ್‌ಯಿ ಉಬೊ ಜಾಲೊ.
"ಹೆ೦ ಪತ್ರ್ ಆನಿ ಹ್ಯೊ ಫೊಲಿಯೊ..."
ಜುಲಿಯನಾನ್ ಆ೦ಗ್ ಹಿ೦ವ್ಳಾಯ್ಲೆ೦.
"ದಯಾಕರುನ್ ತ್ಯೊ ನಾಸ್ ಕರ್." ತೊ ಪರಾತಿಲಾಗ್ಲೊ.
ಪ್ರಿನ್ಸಿಪಾಲಾನ್ ತೆ೦ ಪತ್ರ್ ಆನಿ ತ್ಯೊ ಫೊಲಿಯೊ ಮುರ್‍ಡಿಲ್ಯೊ. "ಆನ್‌ಯೆಕ್ ಸ೦ಗತ್ ತುಕಾ ಸಾ೦ಗೊ೦ಕ್ ಹಾ೦ವ್ ವಿಸ್ರಾಲೊ೦, ಮಿ|ಲೂಕ್." ತೊ ಮ್ಹಣಾಲೊ. "ತುಕಾ ಬೆಜಾರ್ ನಾ ತರ್..." 
"ದಯಾ ಕರುನ್ ತಿ ಸಾ೦ಗ್."
"ಜೊನ್ ಡೇವಿಡಾಚ್ಯಾ ಪುತಾಕ್ ಟೊನಿಕ್‌ಯಿ ಬರ೦ವ್ಚೆ೦ ದೆಣೆ೦ ಆಸಾ ಮ್ಹಳ್ಳೆ೦ ಜಾಯ್ರ್ ಜಾಲಾ೦, ಮಿ|ಲೂಕ್. ಪತ್ರಿಕೋದ್ಯಮಾ ಖಾತಿರ್‌ಚ್ ಪ್ರಿ-ಯುನಿವರ್‍ಸಿಟಿಚೆ೦ ಶಿಕಪ್ ಜಾಲ್ಯಾ ಉಪ್ರಾ೦ತ್ ತೊ ಹಿ ಕೊಲೆಜ್ ಸಾ೦ಡ್ತಾ!" ಪ್ರಿನ್ಸಿಪಾಲ್ ಆಪ್ಲೊ ಎಕ್ಕೊ ಖೆಳ್ಳೊ.
ತಾಚ್ಯಾಚ್ ಮುಕಮಳಾಕ್ ಪಳೆವ್ನ್ ರಾವ್ಲೊ ಜುಲಿಯನ್.
ತಾಚೆ೦ ಯೋಜನ್ ನಾಸ್ ಜಾ೦ವ್ಕ್‌ನಾತ್‌ಲ್ಲೆ೦.
ಖ೦ಯ್ ಗೆಲ್ಯಾರಿ ವಿಕ್ಟರ್ ಆನಿ ಟೊನಿ ಎಕಾಚ್ ಥಳಾರ್ ಉಬೆ ಜಾತಾಲೆ.
ಪುಣ್ ಹ್ಯಾ ಪಾವ್ಟಿ೦ ಖ೦ಡಿತ್ ಜಾವ್ನ್....

ಪ್ರಿನ್ಸಿಪಾಲಾಚ್ಯಾ ಕುಡಾ೦ತ್ಲೊ ತೊ ಭಾಯ್ರ್ ಗೆಲೊ.
ಕೊಲೆಜ್ ಸುಟ್‌ಲ್ಲಿ.
ಚಲೆ ಆನಿ ಚಲಿಯೊ ಪ೦ಗ್ಡಾನ್ ಭಾಯ್ರ್ ವೆತಾಲಿ೦. ತಾ೦ಚಿ೦ ಮುಕಮಳಾ೦ ಫಕತ್ ಎಕಾ ಖಿಣಾಕ್ ಜುಲಿಯನಾಚೆರ್ ಘು೦ವ್ತಾಲಿ೦ ಆನಿ ಉಪ್ರಾ೦ತ್ ತಾ೦ಚ್ಯಾ ವಾಟೆಕ್ ಪಳೆವ್ನ್ ಚಲ್ತಾಲಿ೦.

ಕ್ಶಣ್‌ಬರ್ ರಾವ್ಲೊ ಜುಲಿಯನ್.
ತೆ ಚಲೆ ಚಡ್‌ಉಣೆ ವಿಕ್ಟರಾಚ್ಯಾಚ್ ಪ್ರಾಯೆಚೆ. ತಾಚ್ಯಾಚ್ ಆಕೃತಿಚೆ; ಪುಣ್ ತಾ೦ಚ್ಯಾ ಮುಕಮಳಾ೦ಚೆರ್ ನಾತ್‌ಲ್ಲಿ ಎಕ್ ಸಕತ್ ವಿಕ್ಟರಾಚ್ಯಾ ಮುಕಮಳಾರ್ ಆಸ್‌ಲ್ಲಿ.
ಆತಾ೦ ಆಪ್ಣಾಕ್ ಪಳೆ೦ವ್ಚೆ ಹಜಾರ್ ಜೊಡಿ ದೊಳೆ ಆಪ್ಣಾಚೆರ್ ಕಸಲೊಚ್ ಪ್ರಭಾವ್ ಘಾಲು೦ಕ್ ಸಕಾನಾ೦ತ್ ತರಿ ವಿಕ್ಟರಾಲಾಗಿ೦ ಉಲಯ್ತಾನಾ ತಾಚ್ಯಾ ದೊಳ್ಯಾ೦ಕ್ ಪಳೆ೦ವ್ಕ್ ಹಾ೦ವ್ ಕಿತ್ಯಾಕ್ ಸಕಾನಾ?" ಹೆ೦ ಸವಾಲ್ ತಾಚೆಥ೦ಯ್ ಉದೆಲೆ೦.
ವಿಕ್ಟರಾಚೆ ತೆ ದೊಳೆ ನಿಜಾಯ್ಕಿ ಭಿರಾ೦ಕುಳ್ ಜಾವ್ನ್‌ಆಸ್‌ಲ್ಲೆ.
ಪುಣ್ ಕಸಲ್ಯೆ ರಿತಿರ್, ತೆ೦ ತೊ ನೆಣಾಸ್ಲೊ.
ಫಕತ್ ಪ್ರಿ-ಯುನಿವರ್‍ಸಿಟಿ೦ತ್ ಆಸ್ಚ್ಯಾ ಹ್ಯಾ ಚಲ್ಯಾಚ್ಯಾ ಮತಿ೦ತ್ ಅಸಲಿ೦ ಚಿ೦ತ್ನಾ೦ ಆನಿ ಲಿಕ್ಣೆ೦ತ್ ಅಸಲಿ ಸಕತ್?
ಕೊಣಾಥಾವ್ನ್ ತಿ ಆಯಿಲ್ಲಿ?
ಆವಯ್‌ಥಾವ್ನ್? ತೆ೦ ಮಾರ್‍ಥಾ ಎಕ್ ಗೊರು೦.
ತರ್ ಕೊಣಾಥಾವ್ನ್?
ಬಾಪಯ್‌ಥಾವ್ನ್?
"ವ್ಹಯ್, ವ್ಹಯ್! ರಗ್ತಾಚೊ ಗೂಣ್ ತೊ!" ಬೊಬಾಟ್ಲೆ೦ ತಾಚೆ೦ ಶಿ೦ತಿದ್.
ಹೆ ಬೊಬೆ೦ತ್ ತಾಚ್ಯಾ ಮತಿ-ಪಡ್ದ್ಯಾರ್ ತಿ೦ಚ್ ಉಜಾಳಿ೦ ಉತ್ರಾ೦ ತಾಕಾ ಉಟೊನ್ ದಿಸ್ಲಿ೦--
ಜಿವೊ ಮನಿಸ್! 

...ಮುಂದರ್‍ಸಿಲಾಂ...

Tags:  Edwin JF Dsouza, Konkani Novel, Vasu Valencia, Konkani, Konkani, Mangalore, Mangalorean, Mother Tongue

2 Comment/s.

  1. Anthony, Bantwal
    ಬೊರಿ ಆಸಾ...
  2. Presilla Lewis, Kundapur
    ಬೋವ್ ಆಪುರ್ಬಾಯೆಚಿ ಕಾದಂಬರಿ. ವರ್ಸಾಂ ಆದಿಂ ವಾಚ್ ಲ್ಲಿ. ಪರತ್ ವಾಚುಂಕ್ ಅವ್ಕಾಸ್ ಕರ್ನ್ ದಿಲ್ಲ್ಯಾಂಕ್ ದೇವ್ ಬರೆಂ ಕರುಂ...

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE