+971 50 7554105
ತುಮ್ಚ್ಯಾ ಗಮನಾಕ್:

"ಹಾಂವ್ ಜಿಯೆತಾಂ"  -  ಜುದಾಸ್!


ದುಸ್ರೊ ಗೃ೦ತ್ - "ಹಾ೦ವ್ ಜಿಯೆಲೊ೦"

ಅವಸ್ವರ್ ನೊವೊ:

ಅ೦ಕಲ್ ಜುಲಿಯನಾಚ್ಯಾ ಬ೦ಗ್ಲ್ಯಾಚೊ ಫುಡ್ಲೊ ದಾರ್‍ವಟೊ ಬ೦ದ್ ಆಸ್‌ಲ್ಲೊ. ಹಿತ್ಲಾಚ್ಯಾ ಗೇಟಿ ಭಾಯ್ರ್ ಉಭೊ ಆಸ್‌ಲ್ಲ್ಯಾ ವಿಕ್ಟರಾನ್ ಹಾಳ್ವಯೆನ್ ಪಾಟಿ೦ ಪಳೆಲೆ೦. ಸಕಾಳಿ೦ಚೊ ವೇಳ್ ತೊ, ಮನಿಸ್ ಪುರ್‍ತೊ ಜಾಗೊ ಜಾ೦ವ್ಕ್‌ನಾತ್‌ಲ್ಲೊ. ವರ್‍ಸಾ೦ ಆದಿ೦, ಆಪ್ಲ್ಯಾ ತ್ಯಾ ಮೋವ್ ಖಟ್ಲ್ಯಾರ್ ತೊ ನಿದೊನ್ ಆಸ್ತಾನಾ ಆನಿ ಅಸಲ್ಯಾಚ್ ಸಕಾಳಿ೦ ತಾಚಿ ನೀದ್ ಸುಟೊನ್ ಯೆತಾನಾ ತಾಚ್ಯಾ ಮತಿ೦ತ್ ಉದೆ೦ವ್ಚಿ೦ ಚಿ೦ತ್ನಾ೦ ತಾಚ್ಯಾ ಉಡಾಸಾಕ್ ಆಯ್ಲಿ೦. ತೊ ಹಾಳ್ವಯೆನ್ ಹಾಸ್ಲೊ ಆನಿ ಲಾಗ್ಶಿಲೆ೦ ಝಡ್ ತಾಣೆ೦ ಆಪಡ್ಲೆ೦. ಸಕಾಳಿ೦ಚ್ಯಾ ದೊವಾನ್ ಭರ್‍ಲೆಲೆ೦ ತೆ೦ ಝಡ್ ಆಪ್ಲೆ೦ ಆ೦ಗ್ ಕಾ೦ಪ್‌ಯ್‌ಲಾಗ್ಲೆ೦ ಆನಿ ತಾಚ್ಯಾ ಪಾನಾ೦ ವಯ್ಲೊ ದೋವ್ ವಿಕ್ಟರಾಚ್ಯಾ ಹಾತಾರ್ ಪಡ್ಲೊ.

ವಿಕ್ಟರಾನ್ ಗೇಟ್ ಉಗ್ತಿ ಕೆಲಿ.

ತೆಲ್ತ್ಯಾ ಧರ್‍ಣಿ ವಯ್ಲ್ಯಾನ್ ಮೆಟಾ೦ ಕಾಡುನ್ ತೊ ಫುಡ್ಲ್ಯಾ ದಾರ್‍ವಟ್ಯಾಲಾಗಿ೦ ಪಾವ್ಲೊ ಆನಿ ತಾಣೆ ದಾರಾಚ್ಯಾ ಕಾ೦ಪಿಣೆಚೊ ಬುತಾ೦ವ್ ದಾ೦ಬ್ಲೊ. ಬ೦ಗ್ಲ್ಯಾ೦ತ್ಲ್ಯಾ ದಿವಾನ್‌ಖಾನ್ಯಾ೦ತ್ ರ೦ಗೀನ್ ಕಾ೦ಪಿಣ್ ವ್ಹಾಜ್ತಾನಾ ವಿಕ್ಟರಾಚ್ಯಾ ಮನಾ೦ತ್ ಅಭಿಮಾನ್ ಚರ್‍ಲೊ.

ಕಸಲೊ ಶಾತಿವ೦ತ್ ಜಾವ್ನ್‌ಆಸ್‌ಲ್ಲೊ ಮನಿಸ್! ವೀಜ್ ಸಕತ್ ಸೊಧುನ್ ಕಾಡುನ್ ತಿ ಆಪ್ಲ್ಯಾ ಬೊಟಾ೦ ಥಳಾ ತಾಣೆ ದವ್ರಿಲ್ಲಿ. ಫಕತ್ ಎಕಾ ಬೊಟಾಚ್ಯಾ ದಾ೦ಬ್ಣೆನ್ ತೊ ಕಿತೆ೦ ಸರ್‍ವ್ ಕರು೦ಕ್ ಸಕ್ತಾಲೊ! ಆನಿ ಹೆ೦ ಸಾಧ್ಯ್ ಜಾಲ್ಲೆ೦ ಸ್ವ೦ತ್ ಚಿ೦ತ್ಪಾಚ್ಯಾ ಮನ್ಶಾ೦ವರ್‍ವಿ೦. ಸರ್‍ವ್-ಸಾಮಾನ್ಯ್ ಉಪೆಗಾ೦ಚ್ಯಾ ವಸ್ತು೦ಥಾವ್ನ್ ಅತ್ಯ೦ತ್ ಘುಸ್ಪಡೆಭರಿತ್ ಕ೦ಪ್ಯೂಟರಾ ಪರ್‌ಯಾ೦ತ್ ತಾಚಿಚ್ಚ್ ಜಾಣ್ವಾಯ್ ತಾಣೆ ವಾ೦ಟ್‌ಲ್ಲಿ. ಹರ್‌ಯೆಕಾ ವಸ್ತುಕ್ ಎಕೇಕ್ ರಚ್ನಾರ್ ಆಸ್‌ಲ್ಲೊ_ಪರಿಪೂರ್‍ಣ್ ಮಾನವ್_ಕಿತ್ಯಾಕ್ ಹ್ಯಾ ರಚ್ನಾರಾಕ್ ರಚ್‌ಲ್ಲೊ ತೊ ರಚ್ನಾರ್ ಜಾವ್ನ್‌ಆಸಾ ಪರಿಪೂರ್‍ಣ್ ದೆಕುನ್. ಭುರ್‍ಗ್ಯಾ೦ನಿಂ ಖ್ಹೆಳ್ಚಿ ಗೊ೦ಪಿಣ್ - ಕಿತ್ಲಿ ಸಾದಿ ತಿ ದಿಸ್ತಾ. ಎಕಾ ಝಡಾಚ್ಯಾ ಫಾ೦ಟ್ಯಾ೦ನಿ ಕೆಲ್ಲ್ಯಾ ಆಟ್ಟ್ಯಾಕ್ ದೋನ್ ರಬ್ಬರಾಚ್ಯೊ ಪಟ್ಟ್ಯೊ ಬಾ೦ದುನ್ ತಾ೦ಚ್ಯಾ ಸಕ್ತೆನ್ ಉಸ್ಳಾಯಿಲ್ಲೊ ಫಾತರ್ ಎಕ್ ಫಳ್ ಝಡ೦ವ್ಕ್ ಸಕ್ತಾ, ಸುಕ್ಣ್ಯಾಕ್ ಜಿವೆಶಿ೦ ಮಾರು೦ಕ್ ಸಕ್ತಾ... ಗೊಲಿಯಾತಾಕ್ ನಿದಾ೦ವ್ಕ್ ಸಕ್ತಾ. ಪುಣ್ ತ್ಯಾ ರಬ್ಬರಾಚಿ ತಿ ಸಕತ್, ತ್ಯಾ ಅಟ್ಟ್ಯಾಚೆ೦ ಮಹತ್ವ್ ಪಯ್ಲೆ೦ ದೆಕ್‌ಲ್ಲೊ ಮನಿಸ್? ತಾಕಾ ಸರ್‍ವ್ ವಿಸರ್‍ಲ್ಯಾತ್....

ಫುಡ್ಲೊ ದಾರ್‍ವಟೊ ಉಗ್ತೊ ಜಾಲೊ ಆನಿ ಬ೦ಗ್ಲ್ಯಾಚೊ ರಾಕ್ವಲಿ ಹಾಜರ್ ಜಾಲೊ. ವಿಕ್ಟರಾಕ್ ಪಳೆವ್ನ್ ತಾಚೆ೦ ಮುಕಮಳ್ ವಿವರ್‍ಣ್ ಜಾಲೆ೦.

"ದಯಾಕರುನ್ ದಿವಾನ್‌ಖಾನ್ಯಾ೦ತ್ ಬೊಸ್." ಥೊಡ್ಯಾ ಅಪರಿಚಿತ್ ಘಳಾಯೆ ಉಪ್ರಾ೦ತ್ ತೊ ಉಲಯ್ಲೊ. "ಥೊಡ್ಯಾಚ್ ವೆಳಾನ್ ತಿ೦ ಯೆತೆಲಿ೦," ಆಪ್ಲ್ಯಾ ಖಾ೦ದಾವಯ್ಲ್ಯಾನ್ ತೊ ಪಾಟಿ೦ ಪಳೆಲಾಗ್ಲೊ.
"ಹಾ೦ವ್ ಆಯ್ಲಾ೦ ಮ್ಹಣ್ ತಿ೦ ಜಾಣಾ೦ತ್?" ವಿಕ್ಟರಾನ್ ಸವಾಲ್ ಕೆಲೆ೦.
"ತು೦ ಯೆತೊಲೊಯ್ ಮ್ಹಣ್ ತಿ೦ ಜಾಣಾ೦ತ್!" ಹ್ಯಾ ಜಾಪಿಸ೦ಗಿ ರಾಕ್ವಲಿ ದಾರ್‍ವಟ್ಯಾ ಸರ್‍ಶಿಲೊ ದೆಗೆನ್ ಸರ್‍ಲೊ. ಹಾತಾ೦ತ್ ಆಸ್‌ಲ್ಲ್ಯೊ ದೋನ್ ಸುಟ್‌ಕೇಜಿ ದಾರಾ ಭಿತರ್ ದವರ್‍ನ್ ವಿಕ್ಟರ್ ಎಕಾ ಸೊಫಾಚೆರ್ ಬಸ್ಲೊ.

ಅರ್‍ದೆ೦ಕುರೆ೦ ಉಗ್ತೆ೦ ಜಾವ್ನ್ ಪಡ್‌ಲ್ಲ್ಯಾ ದಿಸಾಳ್ಯಾಚೆರ್ ತಾಚಿ ದೀಶ್ಟ್ ಚರ್‍ಲಿ - ತಿ೦ ದಾಟ್ ಕಾಳಿ೦ ಅಕ್ಶರಾ೦ ತಾಚ್ಯಾ ದೊಳ್ಯಾ೦ಕ್ ಮಾರ್‍ಲಿ೦. "ಮಿಲಾವಾಚೆ ಖಾರ್‌ಖಾನೆ ರಾಶ್ಟ್ರೀಕರಣಾಕ್ ವಳಗ್ ಜಾಲೆ." ಕಾಳಿ೦ ಅಕ್ಶರಾ೦, ದೇಶಾಚೆ೦ ಮರಣ್ ಸುಚಾ೦ವ್ಚಿ೦ ಅಕ್ಶರಾ೦. ನಿಸ್ವಾರ್‍ಥಿ ಮನ್ಶಾ೦ಚ್ಯಾ ’ಜಯ್ತಾಚಿ೦’ ಅಕ್ಶರಾ೦. 

ಅತ್ಯ೦ತ್ ಬಳಾನ್ ವಾಡೊನ್ ಆಯಿಲ್ಲೆ ತೆ ಮಿಲಾವಾಚೆ ಖಾರ್‌ಖಾನೆ; ದೇಶಾಚೊ ಪಾಟಿಚೊ ಕಣೊ ತೆ ಜಾವ್ನ್‌ಆಸ್‌ಲ್ಲೆ. ಲಾಕೊ೦ ಲೊಕಾಚೊ ದಿಸ್ಪಡ್ತೊ ಗ್ರಾಸ್, ಲಾಕೊ೦ ದುಡ್ವಾ೦ಚೊ ವಯ್‌ವಾಟ್; ಮಿಲಾವಾಚೆಚ್ಚ್ ನ್ಹಯ್, ಧನ್ ಉತ್ಪನ್ನ್ ಕರ್‍ಚೆ ಖಾರ್‌ಖಾನೆ ತೆ. ದೇಶ್, ಹ್ಯಾ ಖಾರ್‌ಖಾನ್ಯಾ೦ ವಿಣೆ೦ ಕ್ಶಣ್‌ಬರ್ ಜಿಯೆ೦ವ್ಕ್ ಸಕಾನಾತ್‌ಲ್ಲೊ. ಆನಿ ಹ್ಯಾ ವೆಳಾರ್ ನಿಸ್ವಾರ್‍ಥ್ಯಾ೦ಚಿ ದಾವ್ಲಿ ತಾ೦ಚೆರ್ ಪಡ್ಲಿ. ಕಾರಾಣ್? ಭ್ಯೆ೦. ಎಕಾ ದಿಸಾ ಹೆ ಖಾರ್‌ಖಾನೆ ಬ೦ದ್ ರಾವ್ತಿತ್ ತರ್? ಎಕಾ ದಿಸಾ ತ್ಯಾ ಖಾರ್‌ಖಾನ್ಯಾ೦ಚೊ ಮ್ಹಾಲಕ್ ಆಪ್ಲ್ಯಾಚ್ ಖಾರ್‌ಖಾನ್ಯಾ೦ಕ್ ಉಜೊ ದೀತ್ ತರ್? ಆನಿ ಹಿ ಸವಲಾ೦ ಉಬ್ಜೊ೦ಕ್ ಕಾರಾಣ್? ಸರ್‍ಕಾರ್ ಆನಿ ಸರ್‍ಕಾರಿ ರೀತ್; ನಿಸ್ವಾರ್‍ಥಿ ಸರ್‍ಕಾರ್, ಸಮಾಜ್‌ವಾದಿ ಸರ್‍ಕಾರ್, ಸರ್‍ವಾ೦ಕ್ ಸಮಾಸಂ ದೆಕ್ಚೊ ಸ೦ಸಾರ್, ಸ್ವ-ಶಾತಿಯೆನ್ ಫುಲೊನ್ ಆಯಿಲ್ಲ್ಯಾ ಖಾರ್‌ಖಾನ್ಯಾ೦ಕ್ ಪಳೆ೦ವ್ಕ್ ಹೊ ಸರ್‍ಕಾರ್ ಸಕ್ಲೊ ನಾ.

’ತೆ ಖಾರ್‌ಖಾನೆ ಮ್ಹಜೆ ಜಾಯ್ಜೆ. ಹಾ೦ವೆ೦ ಗಾದಿಯೆರ್ ರಾವಾಜೆ ತರ್ ಹ್ಯಾ ದೇಶಾಚೆ೦ ಕಾಳಿಜ್ ಆನಿ ತಾಚ್ಯೊ ಸರ್‍ವ್ ಉಡಿಯೊ ಮ್ಹಜ್ಯಾ ಹಾತಾ೦ನಿ೦ಚ್ ಆಸಾಜೆ. ಸ್ವ-ಶಾತಿಯೆಚ್ಯಾ ಮನ್ಶಾ೦ನಿ೦ ಚಿ೦ತಿಜೆ, ವಾವ್ರಿಜೆ ಆನಿ ಉತ್ಪನ್ನ್ ಕರಿಜೆ - ಮ್ಹಜೆ ಖಾತಿರ್, ಸರ್‍ಕಾರಾ ಖಾತಿರ್. ತಾ೦ಚಿ೦ ಚಿ೦ತ್ನಾ೦, ವಾವ್ರ್ ಆನಿ ಉತ್ಪನ್ನ್ ಹಾ೦ವ್ ಹೆರಾ೦ಕ್ ವಾ೦ಟ್ತಾ೦ ಕಿತ್ಯಾಕ್ ಹಾ೦ವ್ ತುಂಚ್ಯಾ ದೇಶಾಚೊ ಸರ್‍ಕಾರ್. ತುಮಿ೦ ಮ್ಹಜಿ ಪ್ರಜಾ. ತುಂಚೆರ್ ಮ್ಹಾಕಾ ಹಕ್ಕ್ ಆಸಾ - ತುಂಚ್ಯಾ ಜಲ್ಮಾಥಾವ್ನ್ ಮರಣಾ ಪರ್‌ಯಾ೦ತ್. ಹಾ೦ವ್ ತುಂಕಾ೦ ನಾಸ್ ಕರು೦ಕ್ ಸಕ್ತಾ೦ ಆನಿ ತ್ಯಾ ಖಾತಿರ್ ತುಮಿ೦ ಮ್ಹಾಕಾ ಮಾ೦ದಿಜೆ. ತುಮಿ೦ ಕರ್‍ಚೆ೦ ಸರ್‍ವ್ ಮ್ಹಜೆ ಖಾತಿರ್ ಜಾಯ್ಜೆ - ಹಾ೦ವ್ ತುಂಚೊ ಆನಿ ತುಮಿ೦ ಮ್ಹಜೆಚ್ಚ್ ನ್ಹಯ್?’

ಹ್ಯಾ ವಿಕಾಳ್ ನಿಸ್ವಾರ್‍ಥಿ ಚಿ೦ತ್ನಾ೦ಸ೦ಗಿ೦ ಸಮಾಜ್‌ವಾದಿ ಸರ್‍ಕಾರಾನ್ ’ವೇಳ್ ಉತರ್‍ಚ್ಯಾ’ ಫುಡೆ೦ಚ್ ಕ್ರಂ ಹಾತಿ೦ ಘೆತ್‌ಲ್ಲೆ೦. ದೇಶಾಚೆ೦ ಧನ್, ಮಾನ್ ಆನಿ ಶಾಥಿ ಮಾಜ್ವೊನ್ ಯೆತಾಲಿ. ಲೆಕ್ಕಾ೦ಚೆ ಗೊಟಾಳೆ ಸರ್‍ವಾ೦ಚ್ಯಾಕಿ ಪಯ್ಲೆ೦ ಆನಿ ಸುಲಭಾಯೆನ್ ಸುಟ೦ವ್ಕ್ ಸಕ್ಚ್ಯಾ ವಿದ್ಯಾರ್‍ಥಿಕ್, ಪಾ೦ಚ್ವೆ ಕ್ಲಾಸಿ೦ತ್ ಆಸ್ತಾನಾ೦ಚ್ ಸ-ವ್ಯಾ೦ತ್ಲೆ೦ ಜ್ಞಾನ್ ಆಸ್ಚ್ಯಾ ವಿದ್ಯಾರ್‍ಥಿಕ್ ಶಾಭಾಸ್ಕೆ ಬದ್ಲಾಕ್ ಶಿಕ್ಶಾ ಮೆಳತ್ ತರ್ ಕೆದೊಳ್ ಪರ್‌ಯಾ೦ತ್ ತೊ ತ್ಯಾ ಇಸ್ಕೊಲಾ೦ತ್ ರಾವ್ತಲೊ?

ಉಸವ್ನ್ ಪಡ್‌ಲ್ಲೆ೦ ತೆ೦ ಪತ್ರ್ ತಾಣೆ ಧಾ೦ಪ್ಲೆ೦ ಆನಿ ತಾಚೆವಯ್ರ್ ಜಡಾಯ್ ದವರ್‍ಲಿ, ದೇಶಾಚ್ಯಾ ಕಾಳ್ಜಾಚೆರ್ ಫಾತರ್ ಬಸಯಿಲ್ಲೆಪರಿ೦...

ಅಸ್ಕತ್ ಆನಿ ಘುಸ್ಪಡಿತ್ ಮೆಟಾ೦ಚೊ ಅವಾಜ್ ಆಯ್ಕೊನ್ ವಿಕ್ಟರಾನ್ ಆಪ್ಲೆ೦ ಶಾ೦ತ್ ಮುಕಮಳ್ ಉಬಾರ್‍ಲೆ೦. 

ಅ೦ಕಲ್ ಜುಲಿಯನ್ ಆನಿ ಮಾರ್‍ಥಾ ಸಾ೦ಗಾತಾಚ್ ಅಸ್ಥಿರ್ ಮೆಟಾ೦ ಕಾಡುನ್ ದಿವಾನ್‌ಖಾನ್ಯಾಕ್ ಆಯ್ಲಿ೦. ತಾಚೆಥ೦ಯ್ ವಿಚಿತ್ರ್ ಬದ್ಲಾಪ್ ಜಾಲ್ಲೆ೦ - ಅ೦ಕಲ್ ಜುಲಿಯನಾಚೆ ಕೇಸ್ ಬಿಸ್ಳೆ ಜಾಲ್ಲೆ; ದೊಳ್ಯಾ೦ ಭ೦ವ್ತಿ೦ ಕಾಳಿ೦ ವೃತ್ತಾ೦ ಉದೆಲ್ಲಿ೦. ಮಾರ್‍ಥಾಚ್ಯಾ ದೊಳ್ಯಾ೦ನಿ ದುಕಾ೦ ಆಸ್‌ಲ್ಲಿ೦, ಪೊಲೆ ಧೊವ್ಸೆಲ್ಲೆ. ವಿಕ್ಟರಾಚೆರ್ ಪಡ್‌ಲ್ಲಿ ತಾ೦ಚಿ ದೀಶ್ಟ್ ಜಾವ್ನ್‌ಆಸ್‌ಲ್ಲಿ ಸಲ್ವಣೆಚಿ ಪುಣ್ ತಾ೦ಚ್ಯಾ ಹ್ಯಾ ಸಲ್ವಣೆ೦ತ್ ಖ೦ಚಾಯಿ ರಿತಿರ್ ಕುಮಕ್ ಕರು೦ಕ್ ವಿಕ್ಟರ್ ಸಕಾನಾತ್‌ಲ್ಲೊ.

ಆಪ್ಲೆ೦ ಲೇಕ್ ಘೆವ್ನ್ ಆಯಿಲ್ಲ್ಯಾ ಸಾಂಕಾರ್ ರಿಣ್ಕಾರ್‍ಯಾ೦ನಿ ಬಸ್ಚೆಪರಿ೦ ತಾಚೆ ಸಾಂಕಾರ್ ತಿ೦ ಬಸ್ಲಿ೦. ತಾಣೆ ಆಪ್ಲೆ ಆವಯ್ಕ್ ಪಳೆಲೆ೦ ಆನಿ ತಿಣೆ೦ಯಿ ತಾಕಾ ಪಳೆಲೆ೦; ತಿ ಖಿಣಾಭಿತರ್ ಕಸ್ಕಸೋನ್ ರಡ್ಲಿ, ಆಪ್ಲೆ೦ ಮಾತೆ೦ ಜುಲಿಯನಾಚ್ಯಾ ಖಾ೦ದಾರ್ ತೆ೦ಕೊನ್. 

"ಜರ್‍ತರ್ ತು೦ವೆ೦ ತುಜೆ೦ ಮಾತೆ೦ ತುಜ್ಯಾಚ್ ಗೊಮ್ಟೆಚೆರ್ ಆಧಾರಿಲ್ಲೆ೦ಯ್ ತರ್!" ಮನಾ೦ತ್‌ಚ್ಚ್ ಉದ್ಗಾರ್‍ಲೊ ವಿಕ್ಟರ್. ಪುಣ್ ಹೊ ಉದ್ಗಾರ್ ಎಕ್ ಚುರ್‍ಚುರೊ ನ್ಹಯ್ ಆಸ್ಲೊ.

ಅ೦ಕಲ್ ಜುಲಿಯನಾನ್ ಆಪ್ಲೊ ಹಾತ್ ಆಪ್ಲ್ಯಾ ಭಯ್ಣಿಚ್ಯಾ ಖಾ೦ದಾರ್ ದವರ್‍ಲೊ. ಹಾಚೊ ಅರ್‍ಥ್, ಹಾ೦ವ್ ಉಲವ್ಣೆ೦ ಸುರು ಕರ್‍ತಾ೦, ವಿಕ್ಟರಾಕ್ ಕಳಾನಾಸ್ತಾ೦ ಗೆಲೊ ನಾ.

"ತು೦ ಹಾ೦ಗಾಸರ್ ಕಿತ್ಯಾಕ್ ಆಯ್ಲೊಯ್?" ತಗ್ಸಾಲ್ಲ್ಯಾ ತಾಳ್ಯಾನ್ ಜುಲಿಯನಾನ್ ವಿಚಾರ್‍ಲೆ೦. 
"ಮ್ಹಜೆ ನ್ಹಯ್ ಆಸ್‌ಲ್ಲೆ೦ ಸರ್‍ವ್ ಪಾಟಿ೦ ಕರು೦ಕ್, ಅ೦ಕಲ್!" ಘಳಾಯೆವಿಣೆ ಜಾಪ್ ದಿಲಿ ವಿಕ್ಟರಾನ್, ತ್ಯೊ ದೋನ್ ಸುಟ್‌ಕೇಜಿ ದಾಕವ್ನ್.
"ಆತಾ೦ ಹಾ೦ವ್ ತುಜೊ ಅ೦ಕಲ್ ನ್ಹಯ್!" ಕಸ್ಕಸ್ಲೊ ಜುಲಿಯನ್. ಆಪ್ಣಾಚೆ೦ ನಾ೦ವ್ ತೊ ಉಚಾರಿನಾ ಮ್ಹಳ್ಳಿ ಸ೦ಗತ್ ವಿಕ್ಟರಾಚ್ಯಾ ಗಮನಾಕ್ ಗೆಲಿ. ಅಪರಿಮಿತ್ ಸಕತ್ ಪಾಚಾರ್‍ಚೆ ತಾಚೆ ತೆ ದೊಳೆ ಅತ್ಯ೦ತ್ ಕಠುರಾಯೆನ್ ಜುಲಿಯನಾಚೆರ್ ಖ೦ಚ್ಲೆ.
"ತರ್ ಹೊ ಸ೦ಬ೦ಧ್ ತು೦ವೆ೦ಚ್ ಪಾಟಿಂ ಘೆವ್ಯೆತ್ ಕಿತ್ಯಾಕ್ ತು೦ವೆ೦ಚ್ ತೊ ರಚ್‌ಲ್ಲೊಯ್!" 
"ತರ್ ತುಜ್ಯಾ ಪ್ರಕಾರ್ ಹೊ ಸ೦ಬ೦ಧ್ ನಾತ್‌ಲ್ಲೊಚ್ಚ್?"
"ಬಿಲ್ಕುಲ್ ನಾತ್‌ಲ್ಲೊ."
"ಆನಿ ತುಕಾ ಜಲ್ಮ್ ದಿಲ್ಲ್ಯಾ ಆವಯ್ಚೊ?"
"ತಿಚ್ಚ್ ಜಾಣಾ೦!" ಜಾಪ್ ದಿಲಿ ವಿಕ್ಟರಾನ್. "ತಿಚೆ೦ ಶಿ೦ತಿದ್ ತಿಣೆ ತುಕಾ ವಿಕ್ಚ್ಯಾ ಫುಡೆ೦ ತೊ ಸ೦ಬ೦ಧ್ ಆಸ್‌ಲ್ಲೊ. ತುಜ್ಯಾ ಸ್ವಾರ್‍ಥಾನ್ ತು೦ವೆ೦ ತೊ ನಾಸ್ ಕೆಲೊಯ್."
"ಅಸಲ್ಯಾ ಉತ್ರಾ೦ಚೆ೦ ಫಾರಿಕ್ಪೊಣ್ ತು೦ ದಿತೊಲೊಯ್." ಮಾರ್‍ಥಾಚ್ಯಾ ಸುಸ್ಕಾರಾ೦ ಮಧೆ೦ ಉಲಯ್ಲೊ ಜುಲಿಯನ್. "ಆವಯ್ಚೆ೦ ರುಣ್ ಕೆದಿ೦ಚ್ ತಿರ್‍ಸುನ್ ವೆಚೆ೦ ನಾ."
"ಆನಿ ತೆ೦ ರುಣ್ ಫಾರಿಕ್ ಕರು೦ಕ್ ತು೦ವೆ೦ ಮ್ಹಾಕಾ ಆವ್ಕಾಸ್ ದಿಲೊಯ್?" ವಿಕ್ಟರ್ ಆದ್ಲ್ಯಾಚ್ ಶಾ೦ತ್ ತಾಳ್ಯಾನ್ ವಿಚಾರಿಲಾಗ್ಲೊ. "ಆಪ್ಲ್ಯಾ ಕರ್‍ನ್ಯಾ೦ಕ್ ಖುದ್ಧ್ ಖಾ೦ದ್ ಮಾರು೦ಕ್ ತಯಾರ್ ಜಾಲ್ಲೆ ಧೀರ್ ಸ್ತ್ರೀಯೆಕ್ ತು೦ವೆ೦ ತುಜ್ಯಾ ಸ್ವಾರ್‍ಥಾನ್ ತುಜ್ಯಾಚ್ಚ್ ಹಾತಾ೦ತ್ಲೆ೦ ಬೊ೦ಬೆ೦ ಕೆಲೆ೦ಯ್. ತಿಚೆ೦ ಧಯ್ರ್ ಚೊರ್‍ಲೆ೦ಯ್, ತಿಚೆ೦ ಚಿ೦ತಪ್, ತಿಚಿ೦ ಉತ್ರಾ೦ ಆನಿ ತಿಚ್ಯೊ ಕರ್‍ನ್ಯೊ ಚೊರ್‍ಲ್ಯೊಯ್. ತುಜ್ಯಾ ಸ್ವಾರ್‍ಥಾಚೆ೦ ಹಾತೆರ್ ತಿಕಾ ಕರುನ್ ವರ್‍ಸಾ೦ ಆದಿ೦ಚ್ ಆವಯ್-ಪುತಾ ಮಧ್ಲೊ ಸ೦ಬ೦ಧ್ ನಾಸ್ ಕೆಲೊಯ್---"
"ಮ್ಹಜ್ಯಾ ಬ೦ಗ್ಲ್ಯಾ೦ತ್ ಜಾ೦ಕುಳ್ನಾಕಾ!"
"ಹಿ೦ ಉತ್ರಾ೦ ತುಜೆ೦ ನಿಮಾಣೆ೦ ಆನಿ ಎಕಚ್ಚ್ ಹಾತೆರ್. ಇತ್ಲ್ಯೆ ವೆಗ್ಗಿ೦ ತೆ೦ ವಾಪರ್‍ನಾಕಾ." 

"ಮ್ಹಾಕಾ ಕಿತೆ೦ ಪಾಟಿ೦ ದೀ೦ವ್ಕ್ ಆಯ್ಲಾಯ್?" ಪ್ರೇತನ್ ಕರುನ್ ಹಾಸ್ಲೊ ಜುಲಿಯನ್. "ಸರ್‍ವ್ ತು೦ ದಿಶಿ ತರ್ ಹಾ೦ಗಾಥಾವ್ನ್ ವಿಣ್ಗೊ ವಚಾಜೆ ಪಡ್ತೆಲೆ೦."
"ಹಾ೦ವ್ ತಯಾರ್ ಜಾವ್ನ್೦ಚ್ ಆಯ್ಲಾ೦." ವಿಕ್ಟರಾನ್ ಜಾಪ್ ದಿಲಿ. "ಆತಾ೦ ಮ್ಹಜ್ಯಾ ಆ೦ಗಾರ್ ಆಸ್ಚೆ೦ ಮ್ಹಜ್ಯಾಚ್ ಕಮಾಯೆಚೆ೦--ರುಜ್ವಾತ್ ನ೦ಬರ್ ಪಾ೦ಚ್: ಕೊಲೆಜಿಚ್ಯಾ ರೆಗ್ರಾ೦ಕ್ ವಿರೋಧ್ ವಚುನ್ ’ಮನಿಸ್’ ಪತ್ರಾಚೊ ಸ೦ಪಾದಕ್ ನೊರ್‍ಮನ್ ತಿಯೊದರಾಸ೦ಗಿ೦ ನವ್ಕರಿ."
"ಆನಿ ಇತ್ಲಿ೦ ವರ್‍ಸಾ೦ ಪರ್‌ಯಾ೦ತ್ ಹಾ೦ವೆ೦ ತುಜೆ ಖಾತಿರ್ ಖರ್‍ಚಿಲ್ಲೊ ದುಡು?"
"ತು೦ ಎಕ್ ಬಿಸ್‌ನೆಸ್‌ಮೆನ್, ಬ೦ಡ್ವಾಳ್‌ಶಾಹಿ ಮನಿಸ್! ಲಾಕಾ೦ನಿ ವಯ್‌ವಾಟ್ ಚಲ೦ವ್ಚೊ ವೆಪಾರಿ. ಜೊನ್ ಡೇವಿಡಾಚೆ೦ ಎಕ್ ಪತ್ರ್ ಘೆವ್ನ್ ತು೦ವೆ೦ ಮ್ಹಾಕಾ ತುಜೊ ಬ೦ಡ್ವಾಳ್-ಧಿಗೊ ಕೆಲೊಯ್ ಆನಿ ಮ್ಹಜೆ ದುಡು ಬಾ೦ದ್ಲೊಯ್. ಪುಣ್ ಹೊ ವೆಪಾರ್ ಫಲ್ಸಾಲೊ ನಾ. ನಶ್ಟ್ ತು೦ವೆ೦ ಭೊಗ್ಲೊಯ್. ಆತಾ೦ ತು೦ ಜೊನ್ ಡೇವಿಡಾಲಾಗಿ೦ ವೆಶಿ ತರ್---"

ತವಳ್ ಭಾವಾಚ್ಯಾ ಆಧಾರಾಥಾವ್ನ್ ಮಾರ್‍ಥಾ ಸುಟ್ಲಿ ಆನಿ ಆಪ್ಣಾಕ್ ಆಸ್‌ಲ್ಲ್ಯಾ ಬಳಾನ್ ತಿಣೆ ವಿಕ್ಟರಾಚ್ಯಾ ಕಾನ್ಸುಲಾಕ್ ತಿಣೆ ಥಾಪ್ಡಾಯ್ಲೆ೦.

ಕಸಲ್ಯಾಚ್ ಪ್ರತಿಕ್ರಿಯಾವಿಣೆ೦ ತೆ೦ ಥಾಪಾಡ್ ಚಿ೦ವೊನ್ ಘೆತ್ಲೆ೦ ವಿಕ್ಟರಾನ್. ಬಳಿಶ್ಟ್ ವಾರೆ೦ ವ್ಹಾಳ್ತಾನಾ ಧು೦ವರ್‍ಚೊ ಇ೦ಗ್ಳೊ ಕಸೊ ಪ್ರಕಾಸ್ತಾ ತ್ಯೆಚ್‌ಪರಿ೦ ತಾಚೆ೦ ಮುಕಮಳ್ ಉಜಳ್ಳೆ೦, ಪ್ರಜಳ್ಳೆ೦.

"ಹಾ೦ವ್ ತುಕಾ ವ೦ದಿತಾ೦!" ತೊ ಮ್ಹಣಾಲೊ ಘಾ೦ಟಿಚ್ಯಾ ನಾದಾ ಸಾರ್‍ಕ್ಯಾ ತಾಳ್ಯಾನ್. "ವರ್‍ಸಾ೦ ಉಪ್ರಾ೦ತ್ ತರಿ ತುಜ್ಯಾಚ್ ಸ್ವ೦ತ್ ಖುಶೇನ್ ಎಕ್ ಕರ್‍ನಿ ತು೦ವೆ೦ ಆಧಾರ್‍ಲಿಯ್." ಖಿಣ್‌ಬರ್ ತೊ ರಾವ್ಲೊ. ಉಪ್ರಾ೦ತ್ ಅಭಿಮಾನಾಚ್ಯಾ ಉಮಾಳ್ಯಾನ್ ಫುಮಾರ್ ಜಾವ್ನ್ ತಾಣೆ ಉಚಾರ್‍ಲೆ೦ ತೆ೦ ಮೊಲಾಧಿಕ್ ಉತರ್ -- ಮಾ೦!

"ತುಜ್ಯಾ ಕೀಳ್ ವೊ೦ಟಾ೦ಥಾವ್ನ್ ಹೆ೦ ಪವಿತ್ರ್ ಉತರ್ ಆನಿ ಮುಕಾರ್ ಭಾಯ್ರ್ ಯೇನಾ ಜಾ೦ವ್!" ಮಾರ್‍ಥಾಚೆ೦ ಪ್ರತಿಕ್ರಿಯೆ೦ ಭಿರಾ೦ಕುಳ್ ಜಾವ್ನ್‌ಆಸ್‌ಲ್ಲೆ೦. "ತು೦ ಮ್ಹಜೊ ಪುತ್‌ಚ್ಚ್ ನ್ಹಯ್. ವರ್‍ಸಾ೦ ಆದಿ೦ ಹಾ೦ವೆ೦ ಜುಲಿಯನಾಲಾಗಿ೦ ಮ್ಹಳ್ಳೆ೦-- ಹಾ೦ವ್ ಚುಕೊನ್ ಪಡೊ೦ಕ್ ನಾ-- ಪುಣ್ ಆಜ್ ತು೦ವೆ೦ ಮ್ಹಾಕಾ ರುಜು ಕರುನ್ ದಾಕಯ್ಲೆ೦ಯ್: ಹಾ೦ವ್ ಖ೦ಡಿತ್ ಜಾವ್ನ್ ಚುಕೊನ್ ಪಡ್ಲ್ಯಾ೦ ಆನಿ ತು೦ಚ್ಚ್ ಜಾವ್ನ್‌ಆಸಾಯ್ ಮ್ಹಜ್ಯಾ ಪಾತ್ಕಾಚೆ೦ ಕೀಳ್ ಫಳ್."

ವಿಕ್ಟರಾನ್ ಆಪ್ಲೆ೦ ಮುಕಮಳ್ ಉಬಾರ್‍ಲೆ೦.

"ಸಹಜ್ ಜಾವ್ನ್ ತು೦ವೆ೦ ತೆ೦ ಪವಿತ್ರ್ ಉತರ್ ಆಯ್ಕೊ೦ಕ್‌ಚ್ ನಜೊ ಕಿತ್ಯಾಕ್ ಹೊ ಪವಿತ್ರ್ ಸ೦ಬ೦ಧ್ ತು೦ವೆ೦ ವರ್‍ಸಾ೦ ಆದಿ೦ಚ್ ವಿಕ್ಲಾಯ್. ಆನಿ ಆತಾ೦, ತು೦ವೆ೦ ಉಚಾರ್‍ಚಿ೦ ಉತ್ರಾ೦ ನಿರಾಶಿ ಸಿ೦ತಿ೦ಮೆ೦ತಾ೦ಚಿ ಕಿಟಾಳಾ೦ ನ್ಹಯ್, ಧೆದೆಸ್ಪ್ರಾಯೆನ್ ವಿಣ್ಲಲೊ ರಾಗ್ ನ್ಹಯ್ ಬಗಾರ್ ಭುಜವಣ್‌ನಾತ್‌ಲ್ಲೆ ಚುರ್‍ಚುರೆ ಜಾವ್ನ್‌ಆಸಾತ್. ಹ್ಯಾ ತುಜ್ಯಾ ಚುರ್‍ಚುರ್‍ಯಾ೦ಕ್ ಹಾ೦ವ್ ತುಕಾ ಕುಮಕ್ ಕರು೦ಕ್ ಸಕಾನಾ--ಕೋಣ್೦ಚ್ ತುಂಕಾ೦ ಕುಮಕ್ ಕರು೦ಕ್ ಸಕಾನಾ ಕಿತ್ಯಾಕ್ ದೆವಾನ್ ತುಂಕಾ೦ ದಿಲ್ಲಿ ದೊರಿ ಮಟ್ವಿ ಜಾವ್ನ್ ಆಯ್ಲ್ಯಾ!" 

ತೊ ರಾವ್ಲೊ, ಆಪ್ಲಿ೦ ಚಿ೦ತ್ನಾ೦ ಆರಾ೦ವ್ಚೆ ಖಾತಿರ್.

"ಆಜ್ ಹಾ೦ವ್ ಆಯ್ಲಾ೦ ಸ್ವತ೦ತ್ರಾಚೆ ತಲ್ವಾರಿನ್ ಗರ್‍ಜ್‌ನಾತ್‌ಲ್ಲೆ ಸರ್‍ವ್ ಸ೦ಬ೦ಧ್ ತುಟ೦ವ್ಕ್. ಹಾ೦ವ್ ತರ್ ತಶೆ೦ ಕರಿನಾ, ಫಕತ್ ಥೊಡ್ಯಾ ರಸಾಯನಾ೦ಚೆ೦ ಪೊತೆ೦ ಜಾವ್ನ್ ಹಾ೦ವ್ ಬದ್ಲಾತೊಲೊ. ಮಾನಸಿಕ್ ಸ್ವತ೦ತ್ರಾಯ್‌ನಾತ್‌ಲ್ಲೊ ಮನಿಸ್ ರಸಾಯನಾ೦ಚೆ೦ ಎಕ್ ಪೊತೆ೦ ಜಾವ್ನ್‌ಆಸಾ-- ತ್ಯಾ ಚೀಲಾ೦ತ್ ಥೊಡೆ೦ ಉದಕ್, ವಾರೆ೦, ಚರಬ್, ಲೊ೦ಕಾಡ್ ಆನಿ ಥೊಡಿ೦ ರ೦ಜಕಾ೦ ಮಾತ್ರ್ ಆಸಾತ್. ಆನಿ ಆಜ್ ಆಂಚೆ ಭ೦ವ್ತಿ೦ ಅಸಲಿ೦ಚ್ ರಸಾಯನಾ೦ಚಿ ಪೊತಿ೦ ಚಲೊ೦ಕ್ ಲಾಗ್ಲ್ಯಾ೦ತ್."

"ಹಾಕಾ ಕಾರಾಣ್ ಕೋಣ್?"

"ತುಮಿ೦ಚ್ ವ್ಹಡಿಲಾ೦! ಎಕ್ ಬಾಳ್ಶೆ೦ ಸ೦ಸರಾ೦ತ್ ಯೆವ್ನ್ ತಾಚೊ ಪ್ರಥಂ ಉಸ್ವಾಸ್ ಸೆವ್ತಾನಾ೦ಚ್ ತುಮಿ೦ ತಾಚೊ ಜೀವ್ ಕಾಡ್ತಾತ್. ತಾಣೆ ಕಿತೆ೦ ಕರಿಜೆ, ಕಿತೆ೦ ಉಲಯ್ಜೆ, ಕಿತೆ೦ ಖಾಯ್ಜೆ, ಕಿತೆ೦ ಶಿಕಜೆ, ಕಿತೆ೦ ಬರಯ್ಜೆ ತೆ೦ ತುಮಿ೦ ನಿಶ್ಚಿತ್ ಕರ್‍ತಾತ್. ಹ್ಯಾ ವಿಶಯಾ೦ಚೆರ್ ಪಿಶ್ಯಾ೦ನಿ ಲಿಕ್ಲೆಲೆ ಬೂಕ್ ಪಳೆತಾತ್ ಆನಿ ತ್ಯಾ ಪ್ರಕಾರ್ ತುಂಚ್ಯಾ ಭುರ್‍ಗ್ಯಾ೦ಕ್ ವಾಗಯ್ತಾತ್. ತುಂಚ್ಯಾ ಪ್ರಕಾರ್ ಹೊ ಭುರ್‍ಗೊ, ವಯ್‌ಜ್ನಾನಿಕ್ ರಿತಿರ್, ಸುಖಾನ್ ವಾಡೊನ್ ಯೆತಾ.

"ಉಪ್ರಾ೦ತ್ ಉದೆತಾ ತಿ ಪ್ರಾಯ್ ಸವಲಾ೦ಚಿ--ತೊ ಸವಾಲಾ೦ ವಿಚಾರ್‍ತಾ ಕಿತ್ಯಾಕ್ ರಾಜಾ೦ವಾ೦ವಿಣೆ೦ ಪಾತ್ಯೆ೦ವ್ಕ್ ತೊ ಆಯ್ಕಾನಾ. ತಾಚೆ೦ ಚಿ೦ತಪ್ ಜಾಗೆ೦ ಜಾ೦ವ್ಚಿ೦ ಹಿ ಖುಣಾ೦ ದಿಸುನ್ ಯೆತಾನಾ ತುಮಿ೦ ತಾಚೊ ಜೀವ್ ಕಿಮ್ಚಿತಾತ್: ತು೦ವೆ೦ ಸವಲಾ೦ ಕರು೦ಕ್ ನಜೊ, ತರ್‍ಕ್ ಕರು೦ಕ್ ನಜೊ; ತು೦ವೆ೦ ಪಾತಿಯೆಜೆ. ತು೦ವೆ೦ ಪಳೆಜೆ ಪುಣ್ ವಿಚಾರು೦ಕ್ ನಜೊ. ಆಂಕಾ೦ ಸವಲಾ೦ ಘಾಲು೦ಕ್ ತು೦ ಕೋಣ್? ಹಾ೦ವೆ೦ ತಶೆ೦ ಸಾ೦ಗ್‌ಲ್ಲ್ಯಾನ್ ತೆ೦ ತಶೆ೦ಚ್. ತು೦ ಕಸಲೆ೦ಚ್ ನೆಣಾ೦ಯ್: ಆಮಿ೦ ತುಜಿ೦ ವ್ಹಡಿಲಾ೦, ಆಮಿ೦ ಮಾತ್ರ್ ಸರ್‍ವ್ ಜಾಣಾ೦ವ್. ಆಕ್ಶೇಪ್ ಉಚಾರು೦ಕ್ ತು೦ ಕೋಣ್? ಸಮಾಜ್ ಸರ್‍ವ್ ಜಾಣಾ೦."

"ಹ್ಯಾ ಉತ್ರಾ೦ನಿ ತುಮಿ೦ ತಾಕಾ ಭರ್‍ತಾತ್ ಆನಿ ಅಸೊ ವಾಡೊನ್ ಯೆತಾ ತೊ ಸಾತ್‌ಆಟ್ ರಸಾಯನಾ೦ಚೊ ಸ೦ಗ್ರಃ. ಆನಿ ಹೊ ಸ೦ಗ್ರಃ ಕಿತೆ೦ ಜಾಣಾ೦? ದುಕ್ತಾನಾ ’ಹಾಯ್’ ಮ್ಹಣ್ ಉದ್ಗಾರೊ೦ಕ್ ಆನಿ ಸ೦ತೊಸ್ ಭೊಗ್‌ಲ್ಲೆವೆಳಾರ್ ನಾಚೊ೦ಕ್? ಇತ್ಲೆ೦ಚ್ ತೊ ಜಾಣಾ೦. ’ದೂಕ್-ಸ೦ತೊಸ್’ ಯ೦ತ್ರ್ ತೊ ಜಾವ್ನ್‌ಆಸಾ. ಫಕತ್ ಎಕ್ ಯ೦ತ್ರ್, ಜೆ೦ ದುಕ್ತಾನಾ ರಡ್ತಾ ಆನಿ ಆನ೦ದ್ ಮೆಳ್ತಾನಾ ಹಾಸ್ತಾ. ಪುಣ್ ಖರಿ ದೂಕ್ ಆನಿ ಖರೊ ಆನ೦ದ್ ಮ್ಹಳ್ಯಾರ್ ಕಿತೆ೦ ಮ್ಹಣ್ ಹೆ೦ ಯ೦ತ್ರ್ ನೆಣಾ೦ ಕಿತ್ಯಾಕ್ ತೆ೦ ಫಕತ್ ಆನಿ ಖರೆ೦ಚ್ ಎಕ್ ಯ೦ತ್ರ್ ಜಾವ್ನ್‌ಆಸಾ. ಅಸಲ್ಯಾ೦ಚೆ ಜಿಣಿಯೆ೦ಚೆರ್ ತುಂಚೆ೦ ಸಾಹಿತ್ ಉಬೆ೦ ಜಾಲಾ೦. ಮನ್ಶ್ಯಾಚೆ೦ ಜೀವನ್ ಎಕ್ ಹುಮಿಣಿ, ಅಶೆ೦ ಗಾಯ್ತಾತ್ ತುಂಚೆ ಕವಿ. ’ಆತಾ೦ ತೊ ರಡ್ತಾ, ಆತ್ತಾ೦ ತೊ ಹಾಸ್ತಾ ತರಿ ಹೆ೦ಚ್ ತಾಚೆ೦ ಜೀವನ್ ಜಾವ್ನ್‌ಆಸಾ.’ ಅರ್‍ಥ್‌ನಾತ್‌ಲ್ಲ್ಯಾ ಉತ್ರಾ೦ನಿ, ಗರ್‍ಜ್‌ನಾತ್‌ಲ್ಲ್ಯಾ ಚಿ೦ತ್ನಾ೦ನಿ ಆನಿ ಫಾಯ್ದೊನಾತ್‌ಲ್ಲ್ಯಾ ಕರ್‍ನ್ಯಾ೦ನಿ ತಯಾರ್ ಕರುನ್ ತಾಕಾ ಸ೦ಸರಾ೦ತ್ ಸೊಡ್ತಾತ್. ತುಂಚೆ೦ ಕಾಂ ಜಾಲೆ೦ ಮ್ಹಣ್ ತುಮಿ೦ ಸ೦ತುಶ್ಟ್ ಆಸಾತ್. ತುಂಚೊ ಭುರ್‍ಗೊ ಆತಾ೦ ತಾಚ್ಯಾಚ್ ಪಾ೦ಯಾಚೆರ್ ಉಬೊ ಜಾಲಾ!"

"ಪುಣ್ ವಾಸ್ತವ್ ಜಾವ್ನ್ ಹೆ೦ ಸತ್‌ಗಿ?
ಕಿತೆ೦ ಜಾವ್ನ್ ಆಸಾ ತಾಚಿ ಗತ್?
ದೋನ್ ಮೆಟಾ೦ ಕಾಡು೦ಕ್, ದೋನ್ ಉತ್ರಾ೦ ಉಲ೦ವ್ಕ್ ಸುರು ಕರ್‍ಚ್ಯಾ ಎಕಾ ಬಾಳ್ಶಾಕ್ ತರ್ ತಾಚಿ ಆವಯ್ ವಾಟೆರ್ ಸಾ೦ಡಿತ್ ಆನಿ ಮ್ಹಣಾತ್-- ’ಚಲ್, ತುಜಿ ವಾಟ್ ಪಳೆ! ತಿಕಾ ತುಮಿ೦ ಕಸಲಿ ಸ್ತ್ರೀ ಮ್ಹಣ್ತೆಲ್ಯಾತ್? ಕಠಿಣ್ ಸಭಾವಾಚಿ ಆನಿ ದೊಳ್ಯಾ೦ತ್ ರಗತ್‌ನಾತ್‌ಲ್ಲಿ? ತರಿ ಪುಣ್ ತುಮಿ೦ ಚಿ೦ತುನ್ ಪಳೆಲಾ೦ಗಿ, ತುಮಿ೦ ಜತ್ನೆನ್ ವ್ಹಡ್ ಕರುನ್ ರಾವಯಿಲ್ಲ್ಯಾ ತುಂಚ್ಯಾ ಭುರ್‍ಗ್ಯಾಕ್? ತಾಕಾ ಖ೦ಚೆ ಸ್ಥಿತಿಯೆರ್ ತುಮಿ೦ ಸ೦ಸರಾ೦ತ್ ಸೊಡ್ಲೊ? ನ್ಹಯ್‌ಗಿ ತ್ಯಾ ದೋನ್ ವರ್‍ಸಾ೦ಚ್ಯಾ ಭುರ್‍ಗ್ಯಾಚ್ಯಾಚ್ ಸ್ಥಿತಿಯೆರ್? ತ್ಯಾ ಭುರ್‍ಗ್ಯಾಚ್ಯಾ ಆನಿ ತುಮಿ೦ ವ್ಹಡ್ ಕರುನ್ ಉಬೊ ಕೆಲ್ಲ್ಯಾ ಚಲ್ಯಾಥ೦ಯ್ ಕಾ೦ಯ್ ಫರಕ್ ಆಸಾ?"

"ವಾಸ್ತವ್ ಜಾವ್ನ್ ಕಸಲೊಚ್ ಫರಕ್ ನಾ!
ಆನಿ ಹೊ ಚಲೊ ಕಸೊ ಮುಕಾರ್ ವೆತೊಲೊ? ತಾಚೆ೦ ಜೀವನ್, ತಾಚೆ೦ ನ್ಹಯ್, ತಾಚ್ಯೊ ಕರ್‍ನ್ಯೊ ತಾಚ್ಯೊ ನ್ಹಯ್ ಮ್ಹಳ್ಳೆ೦ ಫಿತಿಸ್ಪಣಾಚೆ೦ ರಾಜ೦ವ್ ಮತಿ೦ತ್ ರೊ೦ಬಯ್ಲ್ಯಾ ಉಪ್ರಾ೦ತ್ ತೆ೦ ರಸಾಯನಾ೦ಚೆ೦ ಪೊತೆ೦ ಕಿತೆ೦ ಕರು೦ಕ್ ಸಕಾತ್? ಬರಿ ಜೀಣ್ ತಾಣೆ ಜಿಯೆಜೆ ಮ್ಹಣ್ ತಾಕಾ ಸಾ೦ಗ್ಲಾ೦. ಆನಿ ಕಸಲಿ ಜಾವ್ನ್‌ಆಸಾ ಹಿ ಬರಿ ಜೀಣ್?
ಆಪ್ಲಿ ಕೂಡ್ ಹೆರಾ೦ ಖಾತಿರ್ ಗಳ್ಸು೦ಚಿ
ಆಪ್ಲೆ ಮತಿಥಾವ್ನ್ ಸರ್‍ವ್ ಲ೦ಯ್ಗಿಕ್ ವಿಶಯ್ ಪಯ್ಸ್ ದವರ್‍ಚೆ
ಪಯ್ಶಾ೦ಚೊ ಮೋಗ್ ಕರಿನಾಸ್ತಾ೦ ಸ೦ಸರಾಥಾವ್ನ್ ಪಯ್ಸ್ ರಾ೦ವ್ಚೆ೦.
ಆನಿ ಅಸಲ್ಯಾ ಜಿಣಿಯೆಚೊ ಫಳ್?"

"ಸರ್‍ಗಾರಾಜ್!
ಪುಣ್ ತ್ಯಾ ಸರ್‍ಗರಾಜಾ ಆನಿ ತೊ ಜಲ್ಮಾಲ್ಲ್ಯಾ ಘಡಿಯೆ ಮಧ್ಲೆ೦ ಅ೦ತರ್? ಹ್ಯಾ ವಿಶಾ೦ತ್ ಕೋಣ್‌ಯಿ ಚಿ೦ತಿನಾ. ಭಾವಾರ್‍ಥ್ ಮ್ಹಳ್ಯಾರ್ ಅನ೦ತ್ ಆಮಾಲಾಚೊ ಧಿಗೊ ಕರುನ್ ಘೆವ್ನ್, ಆಪ್ಲ್ಯೊ ಸರ್‍ವ್ ಕರ್‍ನ್ಯೊ ತ್ಯಾ ಆಮಾಲಾ೦ತ್ ಭಿಜವ್ನ್ ವಿಸ್ರೊ೦ಕ್ ತುಮಿ೦ ಪಳೆತಾತ್. ತಾಕಾ (ಕ್ರಿಸ್ತಾಕ್) ತಯಾರ್ ಕೆಲ್ಲ್ಯಾ ಕಾಲ್ಸಿ೦ತ್ಲೊ ನಿಮಾಣೊ ಥೆ೦ಬೊ ಪರ್‌ಯಾ೦ತ್ ಫಕತ್ ತೊ (ಕ್ರಿಸ್ತ್) ಮಾತ್ರ್ ಪಿಯೆಲೊ ಮ್ಹಣ್ ಜಾಣಾ೦ ಆಸುನ್‌ಯಿ---"

"ತು೦ವೆ೦ ತುಜೆ೦ ಪಿಶೆ೦ ರಾಜಾ೦ವ್ ಬ೦ದ್ ಕರ್‍ಯೆತ್!" ವಿಕ್ಟರಾಚೆ೦ ಉಲವ್ಣೆ೦ ಖ೦ಚ್ಯಾ ಪಥಾರ್ ಘು೦ವ್ತಾ ತೆ೦ ಕಳೊನ್ ಯೆತಾನಾ ಜುಲಿಯನ್ ಜಾಗೊ ಜಾಲೊ. "ಭಾವಾರ್‍ಥಾ ವಿಶಾ೦ತ್ ಉಲ೦ವ್ಕ್ ಆಂಕಾ೦ ಕೊಣಾಯ್ಕಿ ಪ್ರಾಯ್ ಜಾ೦ವ್ಕ್ ನಾ!"
"ತುಕಾ ಪ್ರಾಯ್ ಜಾ೦ವ್ಕ್ ನಾ!" ಜುಲಿಯನಾಕ್ ಎಕ್ ಬೊಟ್ ಜೊಕುನ್ ಹಾಳ್ವಯೆನ್ ಮ್ಹಣಾಲೊ ವಿಕ್ಟರ್.
"ವ್ಹಯ್! ತುಕಾ ಮಾತ್ರ್ ಪ್ರಾಯ್ ಜಾಲಿ. ತು೦ ತುಜಿ ಕೂಡ್ ಹೆರಾ೦ ಖಾತಿರ್ ಗಳ್ಸಿನಾ೦ಯ್ ತರಿ ನೊರ್‍ಮನ್ ತಿಯೊದೊರಾಚ್ಯಾ ಧುವೆ ಸಾ೦ಗಾತಾ ನಿಧ್ತಾಯ್. ಹಾ೦ಗಾಸರ್ ಹೆಲ್ಗಾ ಆಸ್‌ಲ್ಲೆ೦---" 

ವಿಕ್ಟರ್ ಉಗ್ತ್ಯಾನ್ ಹಾಸ್ಲೊ.
"ಹಾಸ್ತಾಯ್? ತುಜ್ಯಾ ತತ್ವಾ೦ಕ್ ಲಾಗೊನ್ ನೊರ್‍ಮನಾಸರ್‍ಶಿ೦ ತು೦ ಗೆಲ್ಲೊಯ್? ಬಿಲ್ಕುಲ್ ಫಟ್. ತು೦ ಗೆಲ್ಲೊಯ್ ತಾಚ್ಯಾ ಧುವೆಚ್ಯಾ ಕುಡಿಕ್ ಲಾಗೊನ್. ಹಾ೦ವ್ ಹಾ೦ಗಾಸರ್ ಆಸಾ೦ ತರಿ ಸರ್‍ವ್ ಜಾಣಾ೦ ಆಸಾ೦."

"ತರ್ ಕಿತ್ಯಾಕ್ ಮ್ಹಕಾ ಆಡಾ೦ವ್ಕ್‌ನಾ೦ಯ್?"
"ತುಜೊ ಫೊ೦ಡ್ ತು೦ಚ್ಚ್ ಖೊ೦ಡ್ತಾನಾ ಹಾ೦ವ್ ಕಿತ್ಯಾಕ್ ಆಡಾ೦ವ್?"
"ತು೦ ನಿಸ್ವಾರ್‍ಥಿ ಮನಿಸ್! ಹೆರಾ೦ಚ್ಯಾ ಬರೆಪಣಾಖಾತಿರ್ ತು೦ ಜಿಯೆತಾಯ್."
"ತ್ಯಾ ಬರೆಪಣಾಚೊ ತು೦ವೆ೦ ಉಳ್ಟೊ ಫಾಯ್ದೊ ಜೊಡ್ಲೊಯ್."
"ಥೊಡೊ ದುಡು ತು೦ವೆ೦ ಮ್ಹಜೆಖಾತಿರ್ ಖರ್‍ಚ್ ಕೆಲ್ಲೆ೦ಚ್ ಬರೆಪಣ್ ನ್ಹಯ್!"
ಮಾರ್‍ಥಾ ಪರತ್ ಚಾಳ್ವಲಿ.

ತಿಕಾ ಆಡಾಯ್ಲೆ೦ ಜುಲಿಯನಾನ್. "ಸಮಾಧಾನ್ ಮಾರ್‍ಥಾ, ಸಮಾಧಾನ್." ತೊ ಮ್ಹಣಾಲೊ. ತಾಚೆ೦ ನಟನ್ ಊ೦ಚ್ಲೆ೦ ಜಾವ್ನ್‌ಆಸ್‌ಲ್ಲೆ೦. "ಕಶೆ೦ಯಿ, ಹೊ ದೀಸ್ ಉದೆತಲೊ ಮ್ಹಣ್ ಆಮಿ೦ ಜಾಣಾ೦ ಆಸ್‌ಲ್ಲ್ಯಾ೦ವ್ ಆನಿ ಹ್ಯಾ ದಿಸಾಚೊ ಪರಿಣಾಂ ಆಮಿ೦ ಸೊಸುನ್ ವರ್‍ಯಾ೦. ಪಯ್ಶ್ಯಾ೦ಚೆರ್ ಮ್ಹಾಕಾ ಕೆದಳಾರಿ ಪಾತಿಯೆಣಿ ನಾತ್‌ಲ್ಲಿ ಮಾರ್‍ಥಾ. ಸ೦ಸರಾಚೆ ಸುರ್‍ವೆರ್‌ಥಾವ್ನ್ ಪಯ್ಶಾ೦ವರ್‍ವಿ೦ ಜಾಲ್ಲೆ೦ ಆನಿ ಜಾ೦ವ್ಚೆ೦ ಅನಾಹುತ್ ಆಮಿ೦ ಜಾಣಾ೦ವ್. ಫಕತ್ ತೀಸ್ ನಾಣ್ಯಾ೦ ಖಾತಿರ್---"

ಫುಡೆ೦ ಉಲ೦ವ್ಕ್ ಸಕ್ಲೊ ನಾ ಜುಲಿಯನ್.
ವಿಕ್ಟರ್ ತ್ಯಾ ದಿವಾನ್‌ಖಾನ್ಯಾ೦ತ್ ಆಸಾ ಮ್ಹಳ್ಳಿ ಸ೦ಗತ್ ಎಕ್ ಬಳಿಶ್ಟ್ ಖಾಡು೦ ಜಾವ್ನ್ ತಾಚ್ಯಾ ಉತ್ರಾ೦ಕ್ ಆಡಾಯ್ಲಾಗ್ಲಿ. ಪ೦ದ್ಲ್ಯಾ ದೊಳ್ಯಾ೦ನಿ ತೊ ವಿಕ್ಟರಾಕ್ ಪಳೆಲಾಗ್ಲೊ.

"ಹ್ಯಾ ವಿಶಾ೦ತ್ ತುಕಾ ಕಿತೆ೦ ಮ್ಹಣೊ೦ಕ್ ಆಸಾ?" ಹೆ೦ ನ೦ಜಾಳಿ ಸವಾಲ್, ಆಪ್ಲಿಚ್ ಅಸ್ಕತ್‌ಕಾಯ್ ಲಿಪ೦ವ್ಕ್ ಸಕಾನಾಸ್ತಾ೦, ಚಿ೦ತಿನಾತ್‌ಲ್ಲೆಪರಿ೦ ಜುಲಿಯನಾಚ್ಯಾ ತೊ೦ಡಾ೦ತ್ಲ್ಯಾನ್ ಭಾಯ್ರ್ ಪಡ್ಲೆ೦.

ಆಪ್ಲೆಚ್ ಹಳ್ವಯೆನ್ ವಿಕ್ಟರ್ ಪಾಟಿ೦ ಒಣ್ಕಾಲೊ. ತಾಚೆ ದೊಳೆ ಅರ್‍ಧೆಕುರೆ ಉಸಲ್ಲೆ. ತಾಚ್ಯಾ ವೊ೦ಟಾ೦ಚ್ಯಾ ಇಡ್ಯಾ೦ನಿ ಮ೦ದ್ ಹಾಸೊ ಆಸ್‌ಲ್ಲಿ. "ಸಬಾರ್ ಸ೦ಗ್ತಿ!" ತೊ ಮ್ಹಣಾಲೊ ಆಪ್ಲಿ೦ ಉತ್ರಾ೦ ಖಡ್ಪಾಚೆರ್ ಪಡ್ತೆಲಿ೦ ಮ್ಹಣ್ ಜಾಣಾ೦ ಆಸುನ್‌ಯಿ. ತಾಚ್ಯಾ ಕಾಳ್ಜಾ೦ತ್ ಉಟ್‌ಲ್ಲೆ೦ ತೆ೦ ತುಫಾನ್ ಭಾಯ್ರ್ ಯೆ೦ವ್ಕ್ ಚಡ್ಪಡ್ತಾಲೆ೦.

"ಪಯ್ಶಾ೦ಕ್ ತು೦ ಕಾ೦ಟಾಳ್ತಾಯ್?" ತಾಣೆ ಸುರು ಕೆಲೆ೦. "ಸಹಜ್ ಜಾವ್ನ್! ಕಿತ್ಯಾಕ್ ಪಯ್ಶ್ಯಾ೦ಕ್ ತು೦ ಒಳ್ಕನಾ೦ಯ್, ತಾ೦ಚೆ೦ ಪ್ರಾರ೦ಭ್ ತು೦ ನೆಣಾ೦ಯ್. ತು೦ ಸಂಜತಾಯ್--ತುಜ್ಯಾ ಖುಶೆ೦ಕ್, ತುಜ್ಯಾ ಆಬ್ಲೆಸಾ೦ಕ್ ಆನಿ ತುಜ್ಯಾ ಸ್ವಾರ್‍ಥಾ೦ಕ್ ಧಾ೦ಬ೦ವ್ಕ್ ಸಕ್ಚೆ೦ ಹಾತೆರ್ ಪಯ್ಶೆ ಜಾವ್ನ್‌ಆಸಾತ್ ಮ್ಹಣ್. ತರ್ ಕಿತೆ೦ ತುಜ್ಯಾ ಸ್ವಾರ್‍ಥಾಕ್ ಲಾಗೊನ್ ತೆ ಪಯ್ಶೆ ಉಬ್ಜಾಲೆ? ಫಕತ್ ತುಜೊ ಆಬ್ಲೆಸ್ ಥ೦ಡ್ ಕರ್‍ಚೆ ಖಾತಿರ್ ತೆ ಉದೆಲೆ ತರ್ ತೆ ಖ೦ಡಿತ್ ವಾಯ್ಟ್. ತುಜ್ಯಾ ಚಿ೦ತ್ಪಾ ಪರ್‌ಮಾಣೆ ಸ೦ಸರಾ೦ತ್ ಜಿಯೆ೦ವ್ಚ್ಯಾ೦ಥ೦ಯ್ ವಾಯ್ಟ್ ವೊಡ್ಣ್ಯೊ ಪಯ್ಲ್ಯೊಚ್ ಆಸ್‌ಲ್ಲ್ಯೊ ಆನಿ ತ್ಯೊ ಥಾ೦ಬ೦ವ್ಚೆಖಾತಿರ್ ಪಯ್ಶೆ ಉಬ್ಜಲೆ. ಪುಣ್ ಪಯ್ಶೆ ಉಬ್ಜೊ೦ಕ್ ಸಕಾನಾ೦ತ್.

ತರ್ ತೆ ಹಾ೦ಗಾಸರ್ ಕಶೆ ಆಯ್ಲೆ?

ಎಕ್ ಮನಿಸ್, ದುಸ್ರ್ಯಾ ಖಾತಿರ್ ಆಪ್ಲಿ ಜಿಣಿ ಗಳ್ಸು೦ಕ್ ಚಿ೦ತಿತ್ ತರ್ ತೊ ಖ೦ಡಿತ್ ಜಾವ್ನ್ ಜಿಯೆನಾ ಮ್ಹಳ್ಳೆ೦ ತತ್ವ್ ಆಮಿ೦ ಪ್ರಚಾರೋನ್ ಆಯ್ಲ್ಯಾ೦ವ್. ತರಿ, ಎಕಾ ಮನ್ಶ್ಯಾಚ್ಯಾ ವಾವ್ರಾನ್ ದುಸ್ರ್ಯಾಕ್ ಬರೆಪಣ್ ಜಾತಾ. ಯೆಕ್ಲ್ಯಾನ್ ಸೊಧುನ್ ಕಾಡ್ಲೆಲ್ಯಾ ಸಾಧನಾವರ್‍ವಿ೦ ದುಸ್ರ್ಯಾಕ್ ಫಾಯ್ದೊ ಜಾತಾ. ತರ್ ಹೊ ಸ೦ಬ೦ಧ್ ಕಸೊ ಆಯ್ಲೊ? ಹಾ೦ಗಾಸರ್‌ಚ್ ದಾಕವ್ಯೆತ್ ಪಾತ್ರ್, ಮಹತ್ವ್ ಆನಿ ಗರ್‍ಜ್ ಪಯ್ಶಾ೦ಚಿ. ಯೆಕ್ಲೊ ಮನಿಸ್ ಆಪ್ಲೆಸ್ತಕಿ೦ ಆಪ್ಲೆ೦ ಜೀವನ್ ಸಾರುನ್ ಆಸ್ತಾನಾ, ತಾಚಿ ಜಿಣಿ ಸಾರುನ್ ವೆತಾನಾ, ತಾಚ್ಯಾ ವಾವ್ರಾಕ್ ಸಹಜ್ ಜಾಲ್ಲೆ೦, ಫಾವೊ ಜಾಲ್ಲೆ೦ ’ಧನ್’ ಉಬ್ಜತಾ. ಹಾ೦ವೆ೦ ಉಬ್ಜತಾ ಮ್ಹಳ್ಳೊ ಸಬ್ಧ್ ವಾಪರ್‍ಲೊ ಕಿತ್ಯಾಕ್ ಹೆ೦ ಧನ್ ಕಾಗ್ದಾಚ್ಯಾ ನೋಟಾ೦ಕ್ ಯಾ ಲೋಹಾಚ್ಯಾ ನಾಣ್ಯಾ೦ಕ್ ಜಲ್ಮ್ ದೀನಾ. ಹೆ೦ ಧನ್ ಜಾವ್ನ್‌ಆಸಾ ವಾಡ್ ತ್ಯಾ ಮನ್ಶ್ಯಾನ್ ಸಾರ್‌ಲ್ಲೆ ಜಿಣಿಯೆಚಿ. ತಾಣೆ ಆಪ್ಣಾಕ್ ದಿಲ್ಲೆ೦ ಸರ್‍ವ್ ವಾಪರುನ್ ತೊ ಮನಿಸ್ ಜಿಯೆತಾನಾ ತಾಚೆ೦ ಜೀವನ್ ಸಾರ್‍ಥಕ್ ಜಾತಾ ಆನಿ ತ್ಯಾ ಸಾರ್‍ಥಕತೆಚಿ ವಾಡ್ ಚಡ್ ಆನಿ ಚಡ್ ಮಾಪಾನ್ ತಾಕಾ ಮೆಳ್ತಾ."

"ಪುಣ್ ಹಿ ವಾಡ್ ತೊ ಪರತ್ ಖಿರ೦ವ್ಕ್ ಸಕಾನಾ ಕಿತ್ಯಾಕ್ ತೊ ಹರ್‌ಯೆಕಾ ವಾಟೆನ್ ಸ೦ಪೂರ್‍ಣ್‌ಥರಾನ್ ಜಿಯೆತಾ ಜಾಲ್ಲ್ಯಾನ್, ತ್ಯಾ ವಾಡಿಚಿ ತಾಕಾ ಗರ್‍ಜ್ ನಾ. ಆಪುಣ್ ಹ್ಯಾ ಸ೦ಸರಾ೦ತ್ ಜಿಯೆತಾ೦ ಮ್ಹಳ್ಳ್ಯಾ ಸತಾಚ್ಯಾ ಸ್ವರೂಪಾಕ್ ಮಾನ್ ಜಾವ್ನ್ ತೊ ತಿ ವಾಡ್ ಹೆರಾ೦ಕ್ ದಿತಾ. ಆನಿ ಹಿ ವಾಡ್ ಹೆರಾ೦ಕ್ ಮೆಳ್ತಾನಾ ತಶಿಚ್ ತೊ ದೀ೦ವ್ಕ್ ಸಕಾನಾ ಜಾಲ್ಲ್ಯಾನ್ ತೊ ತಿ ಬದ್ಲುನ್ ಘೆತಾ--ಪಯ್ಶ್ಯಾ೦ ಖಾತಿರ್."

"ಹಾ೦ಗಾಸರ್ ಪಯ್ಶೆ ಪ್ರವೇಸ್ ಜಾತಾತ್."

"ತಾಚೆ ಭ೦ವ್ತಿ೦ ಆಸ್ಚೆ ತಿ ವಾಡ್--ಜಾವ್ಯೆತ್ ಎಕಾ ಸ೦ಸೊಧಾ ರುಪಾರ್ ತಿ ಆಸಾ--ಮೊಲಾಕ್ ಘೆತಾತ್ ಆನಿ ಹ್ಯಾ ವೆವಹಾರಾ೦ತ್ ಪಯ್ಶೆ ಎಕ್ ಪ್ರಮುಖ್ ಹಾತೆರ್ ಜಾವ್ನ್‌ಆಸಾತ್.

ಮನಿಸ್ ಆಪ್ಲೆಸ್ತಕಿ೦ ಆಪ್ಣಾಖಾತಿರ್ ಜಿಯೆಲ್ಯಾರಿ ಕಸೊ ಹೆರಾ೦ ಖಾತಿರ್ ಜಿಯೆತಾ ಮ್ಹಳ್ಳೆ೦ ಸತ್ ಹಾ೦ಗಾಸರ್ ರುಜು ಜಾತಾ.
ಪುಣ್ ವಾಡ್‌ನಾಸ್ತಾ೦ ತೊ ಕಸಲೆ ವಿಕ್ತಲೊ?
ಆಪ್ಣಾಖಾತಿರ್ ಜಿಯೆ೦ವ್ಕ್ ಸಕಾನಾ ತೊ ಮನಿಸ್ ಪಯ್ಶಾ೦ಕ್ ಆಶೆತಾ ಆನಿ ತೆ ಜಮವ್ನ್ ಲಿಪವ್ನ್ ದವರು೦ಕ್ ಪಳೆತಾ--ಆಬ್ಲೆಸಾನ್ ನ್ಹಯ್ ತರಿ ಭಿಯಾನ್--ಕಿತ್ಯಾಕ್ ತೆ ಪಯ್ಶೆ ತಾಣೆ ಶೀದಾ ವಾಟೆನ್ ಜೊಡು೦ಕ್‌ನಾ೦ತ್. 
ತಾಣೆ ತೆ ಅಪಹರ್‌ಸಿಲ್ಯಾತ್. ತೆ ತಾಕಾ ಖ೦ಚಾಯಿ ರಿತಿರ್ ಫಾವೊ ನ್ಹಯ್. ತೊ ಚೋರ್ ಆನಿ ತಾಕಾ ಭ್ಯೆ೦ ದಿಸ್ತಾ. ಪಯ್ಶೆ ಖರ್‍ಚು೦ಕ್‌ಯಿ ತೊ ಭಿಯೆತಾ. ಮಾನಸಿಕ್ ಸಮಾಧಾನ್ ಅಶೆ೦ ಚುಕೊನ್ ಗೆಲ್ಲ್ಯಾ ವೆಳಾರ್ ತೊ ಪಯ್ಶಾ೦ಕ್ ದುರ್‍ಸತಾ; ಆಪ್ಣಾಲಾಗಿ೦ ಪಯ್ಶೆ ಆಸ್ಲ್ಯಾರ್‌ಯಿ ಹೆರಾ೦ಚೊ ಮೊಸೊರ್ ಕರ್‍ತಾ. ಪುಣ್ ಭಿತರ್‍ಲೆ ಭಿತರ್ ಪಯ್ಶಾ೦ಕ್ ಆಶೆತಾ ತರಿ ಆಪುಣ್ ಪಯ್ಶಾ೦ಕ್ ಗುಮಾನ್ ಕರಿನಾ ಮ್ಹಣ್ ದಾಕ೦ವ್ಚೆಖಾತಿರ್ ದಾನ್-ಧರ್‍ಮ್ ಕರ್‍ತಾ."

"ಹ್ಯಾ ಮನ್ಶಾಚಿ ಚತ್ರಾಯ್ ಆಸು೦! ಪಯ್ಶಾ೦ಕ್ ತಿರಸ್ಕಾರ್ ಕರ್‍ತಾ ತೊ ಪಯ್ಶಾ೦ಚೊ ಧನಿ ನ್ಹಯ್ ಬಗಾರ್ ಸ್ವಾರ್‍ಥಿ ಚೋರ್. ಪಯ್ಶಾ೦ಕ್ ಮಾನ್ ದಿತಾ ತೊ ಪಯ್ಶಾ೦ಚೊ ಖರೊ ಧನಿ ಜಾವ್ನ್‌ಆಸಾ."

"ಆನಿ ತು೦----"
ವಿಕ್ಟರ್ ಯೆಕಾಚಾಣೆ ಉಬೊ ಜಾಲೊ.
ತಿ ಘಡಿ ಆಯಿಲ್ಲಿ.
ಕಸಲೆಗಿ ವಿಚಿತ್ರ್ ಸಕ್ತೆನ್ ಮಾರ್‍ಥಾಕ್ ಆನಿ ಜುಲಿಯನಾಕ್‌ಯಿ ಉಬೆ೦ ಕೆಲೆ೦. ಸಭಾರ್ ವರ್‍ಸಾ೦ ಉಪ್ರಾ೦ತ್ ಹೊ ತ್ರಿಕೋನ್ ಪರತ್ ತ್ಯಾ ದಿವಾನ್‌ಖಾನ್ಯಾ೦ತ್ ಉಬೊ ಜಾಲ್ಲೊ--ಸಾಸ್ಣಾಕ್ ಫಾಸ್ಳೊ೦ಚೆ ಖಾತಿರ್.

"ತು೦ ಹಾ೦ಗಾಸರ್ ಕಿತ್ಯಾಕ್ ಆಯಿಲ್ಲೊಯ್? ಹೆ೦ ಜಾವ್ನ್‌ಆಸ್‌ಲ್ಲೆ೦ ತುಜೆ೦ ಪಯ್ಲೆ೦ ಸವಾಲ್." ಮ್ಹಣಾಲೊ ವಿಕ್ಟರ್. "ಹ್ಯಾ ಸವಲಾಕ್ ಸತ್ ಆನಿ ವಾಜ್ಬಿ ಜಾಪ್ ಹಾ೦ವ್ ದಿತಾ೦--ತುಂಚಿಚ್ ಸಲ್ವಣಿ ತುಂಕಾ೦ ಕಳಿತ್ ಕರು೦ಕ್. ತುಮಿ೦ ಸಲ್ವಲ್ಯಾತ್. ತುಂಚೆ೦ ಬಾ೦ದಪ್ ಬುನ್ಯಾದಿಥಾವ್ನ್ ಹಾಲೊ೦ಕ್ ಲಾಗ್ಲಾ೦--" 

"ಆಂಕಾ೦ ತುಜಿ ಗರ್‍ಜ್ ನಾ!" ಮಾರ್‍ಥಾಕ್ ಲಾಗಿ೦ ಆರಾವ್ನ್ ಮ್ಹಣಾಲೊ ಜುಲಿಯನ್.

"ಮ್ಹಾಕಾ ತುಂಚಿ ಕೆದಳಾ ಗರ್‍ಜ್ ಆಸ್‌ಲ್ಲಿ?" ಸಹಜತೇನ್ ವಿಚಾರ್‍ಲೆ೦ ವಿಕ್ಟರಾನ್; ಭಾಯ್ರ್ ವೆಚಿ೦ ಖುಣಾ೦ ತಾಣೆ ದಾಕಯ್ಲಿ೦.

"ಖ೦ಯ್ ವೆತಾಯ್ ತು೦?" ಮಾರ್‍ಥಾನ್ ವಿಚಾರ್‍ಲೆ೦, ಆವ್ಚಿತ್.

"ಚತ್ರಾಯ್, ಮಾರ್‍ಥಾ!" ಮಧೆ೦ಚ್ ಜಾಗಯ್ಲಾಗ್ಲೊ ಜುಲಿಯನ್, ತಾ೦ಚೆ ಮದೆ೦ ಪಯ್ಲೆ೦ಚ್ ಕಸಲೆ೦ಗಿ ಖರಾರ್ ಜಾಲ್ಲೆಪರಿ೦.

ಪುಣ್ ಮಾರ್‍ಥಾ ಉಲಯ್ಲೆ೦ಚ್.

"ತುಜ್ಯಾ ಬಾಪಾಯ್ಕ್ ಹಾ೦ವೆ೦ ಮ್ಹಜಿ ಕೂಡ್ ಅರ್‍ಪಿಲ್ಲೆ ರಾತಿ೦ ಆಂಚೆ ಮಧೆ೦ ಜಾಯ್ತೆ೦ ಉಲವ್ಣೆ೦ ಚಲ್ಲೆ೦. ತೊ ಆಶೆಲ್ಲೊ ಎಕಾ ಪುತಾಕ್--ಪ್ರಕ್ಯಾತ್ ಮನ್ಶಾ೦ಪರಿ೦ ನಾ೦ವ್ ವರ್‍ಚೆ ಖಾತಿರ್. ತಾಕಾ ಹಾ೦ವೆ೦ ಭಾಸ್ ದಿಲ್ಲಿ. ತೊ ಅ೦ತರ್‍ಲೊ ಆನಿ ತ್ಯಾ ವೆಳಾರ್ ಸಯ್ತೀ ಹಾ೦ವೆ೦ ಮ್ಹಜೆ೦ ಉತರ್ ಜಿವೆ೦ ದವರ್‍ಲೆ೦." ಮಾರ್‍ಥಾಚೊ ಜೀವ್ ಸಗ್ಳೊಚ್ ಕಾ೦ಪೊನ್ ಕಾಣ್ಶಿರ್‍ತಾಲೊ. "ಮ್ಹಾಕಾ ಜಾಯ್ ಆಸ್‌ಲ್ಲೆ೦ ತರ್ ಗರ್‍ಭಾ೦ತ್‌ಚ್ ತುಜಿ ಖುನ್ ಕರ್‍ಯೆತಿ. ತಶೆ೦ಚ್ ಕೆಲ್ಲೆ೦ ತರ್ ಆಜ್ ಸುಖ್ ಆಸ್ತೆ೦. ಪುಣ್ ತವಳ್ ಮ್ಹಾಕಾ ತುಜ್ಯಾ ಬಾಪಯ್ಚ್ಯಾ ಮೊಗಾಚೆರ್, ಭಾಸಾವ್ಣ್ಯಾ೦ಚೆರ್ ಆನಿ ಚಡ್ ಜಾವ್ನ್ ರಗ್ತಾಚೆರ್ ಭರ್‍ವಸೊ ಆಸ್‌ಲ್ಲೊ. ತಾಚೆಥಾವ್ನ್ ಮ್ಹಜೆ ಉದರಿ೦ ಜಲ್ಮೊ೦ಚೆ೦ ಫಳ್ ಉತ್ತೀಂ ಜಾವ್ನ್‌ಆಸ್ತೆಲೆ೦ ಮ್ಹಣ್ ಹಾ೦ವ್ ಭರ್‍ವಸ್ಲಿ೦----" 

ಉಸ್ವಾಸ್ ಸೆ೦ವ್ಚೆಖಾತಿರ್ ತೆ೦ ರಾವ್ಲೆ೦.

"ಧಿಕ್ಕಾರ್ ತುಜ್ಯಾ ಬಾಪಾಯ್ಚೆರ್!" ಖಿಳ೦ಚ್ ಮಾರ್‍ಲಿ ಮಾರ್‍ಥಾನ್. ತಿಚ್ಯಾ ಮುಕಮಳಾರ್ ಜಾ೦ವ್ಚಿ ಹರ್‌ಯೆಕ್ ಬದ್ಲವಣ್ ಅಸಹಕತೇನ್ ಪಳೆತಾಲೊ ವಿಕ್ಟರ್. ರೆ೦ವೆ೦ಚ್ಯಾ ರಾವ್ಳೆರಾಚೆರ್ ಪಾವ್ಸ್ ಪಡ್ತಾನಾ ಎಕೇಕ್‌ಚ್ ವಾ೦ಟೊ ಭಿಜೊನ್, ಪಿಗ್ಳೊನ್, ಕುಸ್ಕೊನ್ ಬಸ್ಚೆಪರಿ೦ ಮಾರ್‍ಥಾಚಿ ಮಾನಸಿಕ್ ಸ್ಥಿತಿ ಮುದೊ ಜಾವ್ನ್ ಕುಸ್ಕತಾಲಿ. ಸ೦ಸರಾಚೆ ನದ್ರೆ೦ತ್ ಹ್ಯಾ ಮಾನಸಿಕ್ ನಾಸಾಕ್ ಕಾರಾಣ್ ಜಾವ್ನ್‌ಆಸ್‌ಲ್ಲೊ ವಿಕ್ಟರ್. 

ಪುಣ್ ವಿಕ್ಟರಾಚೆ ದೊಳೆ ಜುಲಿಯನಾಚೆರ್ ಆಸ್‌ಲ್ಲೆ.

"ತಿರಸ್ಕಾರ್ ತುಜ್ಯಾ ಬಾಪಾಯ್ಚೆರ್!" ಪರತ್ ಖಿಳ೦ಚ್ಲಿ ಮಾರ್‍ಥಾ. "ತಾಚ್ಯಾ ಖೊಟ್ಯಾ ರಗ್ತಾನ್ ಮ್ಹಜೆಥ೦ಯ್ ಫಳ್ ದೀಶೆ೦ ಕರುನ್ ಆಂಚ್ಯಾ ಕುಟ್ಮಾಚಿ ಮರ್‌ಯಾದ್ ತಾಣೆ ಕಾಡ್ಲಿ. ತ್ಯಾ ಭಾಯ್ರ್ ತು೦--"

ಮಾರ್‍ಥಾಚೆ ಆನಿ ವಿಕ್ಟರಾಚೆ ದೊಳೆ ಎಕ್ ಜಾಲೆ. ತ್ಯಾ ನಿಮಾಣೆ ನದ್ರೆ೦ತ್ ವಿಕ್ಟರಾನ್ ಆಪ್ಲೊ ಸರ್‍ವ್ ಮೋಗ್--ಆವಯ್ ಖಾತಿರ್ ಆಸ್‌ಲ್ಲೊ ಮೋಗ್--ಮಾರ್‍ಥಾಚೆರ್ ವರ್‍ಗಾಯ್ಸಿಲೊ. ಕಸಲಿಗಿ ಎಕ್ ಊಬ್ ಆಪ್ಣಾಭ೦ವ್ತಿ೦ ರೆವಡ್ಲೆಲೆಪರಿ೦ ಮಾರ್‍ಥಾಕ್ ಭೊಗ್ಲೆ೦ ಆನಿ ತ್ಯಾ ಊಬೆ೦ತ್ ತಿಚೆ೦ ಕಾಳಿಜ್ ಧಲ್ಲೆ೦. ತಿಚೆ ವೋ೦ಟ್ ವಿಕ್ಟರಾಚೆ೦ ನಾ೦ವ್ ಉಚಾರ್‍ಚೆ ಖಾತಿರ್ ಉಸಲೆ ಪುಣ್ ತೆ೦ ನಾ೦ವ್ ಭಾಯ್ರ್ ಆಯ್ಲೆ೦ ನಾ.

ವೇಳ್ ಉತ್ರಾಲ್ಲೊ.

ತಾ೦ಚೆ ಮಧ್ಲೊ ಸ೦ಬ೦ಧ್ ತುಟೊನ್ ಗೆಲ್ಲೊ.

"ಜುದಾಸಾ!" ಜುಲಿಯಾನಾಚಿ ಬೋಬ್ ತಿಚ್ಯಾ ಕಾನಾ೦ಕ್ ಆಯ್ಕಾಲಿ.

ತಿಚ್ಯಾ ವಿಕ್ಟರಾಕ್ ಕೋಣ್ ಅಶೆ೦ ಆಪಯ್ತಾ?

ತಿ ಹಾಸ್ಲಿ. ವಿಕ್ಟರ್? ಕೋಣ್ ವಿಕ್ಟರ್?

"ಜುದಾಸಾ!" ಪರತ್ ಬೊಬಾಟ್ಲೊ ಜುಲಿಯನ್. "ಪೊಳ್ಕುರ್‍ಯಾಪರಿ೦ ಧಾ೦ವ್ತಾಯ್? ತ್ಯಾ ಜುದಾಸಾನ್ ಫಕತ್ ತೀಸ್ ನಾಣ್ಯಾ೦ಕ್ ಕ್ರಿಸ್ತಾಕ್ ವಿಕ್ಲೊ ಪುಣ್ ತಾಕಾ ಗಳ್ಪಾಸ್ ಘೆ೦ವ್ಕ್ ದೊರಿ ತರಿ ಮೆಳ್ಳಿ. ತು೦ವೆ೦ ಮ್ಹಾಕಾ ಫುಕಟ್ ವಿಕ್ಲೊಯ್ ಆನಿ ತುಕಾ ದೊರಿ ಮೆಳಾನಾತ್‌ಲ್ಲೆ ವೆಳಾರ್ ಮ್ಹಜೆ ಸರ್‍ಶಿ೦ ಯೆ."

ಫುಡ್ಲ್ಯಾ ದಾರ್‍ವಟ್ಯಾಲಾಗಿ೦ ಪಾವ್‌ಲ್ಲೊ ವಿಕ್ಟರ್ ರಾವ್ಲೊ ಆನಿ ಹಾಳ್ವಯೆನ್ ಘು೦ವ್ಲೊ.

ದಾರ್‍ವ೦ತಾರ್ ಉಬಿ ಜಾಲ್ಲಿ ತಾಚಿ ಲಾ೦ಬ್, ಸು೦ದರ್ ಆಕೃತಿ ಜೀವ೦ತ್ ಜಾಲ್ಲ್ಯಾ ಮಾರ್‍ಬಲಾಚೆ ಮೂರ್‍ತಿಪರಿ೦ ದಿಸ್ತಾಲಿ. ತಾಚೊ ಎಕ್ ಹಾತ್ ತಾಣೆ ಉಬಾರ್‍ಲೊ ಆನಿ ಜುಲಿಯನಾಕ್ ಜೊಕ್ಲೊ.

"ತುಜೆ ನದ್ರೆ೦ತ್ ಹಾ೦ವ್ ಜುದಾಸ್ ಜಾ೦ವ್ಕ್ ಸಕ್ತಾ೦!" ತೊ ಮ್ಹಣಾಲೊ, ಸ್ಪಶ್ಟ್ ಉತ್ರಾ೦ನಿ. "ಪುಣ್ ಮ್ಹಜೆ ನದ್ರೆ೦ತ್ ತು೦ ಕೆದಿ೦ಚ್ ಕ್ರಿಸ್ತ್ ಜಾ೦ವ್ಕ್ ಸಕ್ಚೊನಾ೦ಯ್!"

...ಮುಂದರ್‍ಸಿಲಾಂ...

Tags:  Edwin JF Dsouza, Konkani Novel, Vasu Valencia, Konkani, Konkani, Mangalore, Mangalorean, Mother Tongue

2 Comment/s.

  1. Anthony, Bantwal
    ಬೊರಿ ಆಸಾ...
  2. Presilla Lewis, Kundapur
    ಬೋವ್ ಆಪುರ್ಬಾಯೆಚಿ ಕಾದಂಬರಿ. ವರ್ಸಾಂ ಆದಿಂ ವಾಚ್ ಲ್ಲಿ. ಪರತ್ ವಾಚುಂಕ್ ಅವ್ಕಾಸ್ ಕರ್ನ್ ದಿಲ್ಲ್ಯಾಂಕ್ ದೇವ್ ಬರೆಂ ಕರುಂ...

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE