:: ಮಾಯ್ ಭಾಸ್

ತಿಸ್ರೊ ಗೃ೦ತ್ - "....ಆನಿ ಹಾ೦ವ್ ಜಿಯೆತಾ೦"

ಅವಸ್ವರ್ ಸೊಳಾ-ವೊ:

ಪಾವ್ಸ್ ಯೆತಾಲೊ!

’ಪ್ರಥ್ವಿಚೆರ್, ತಿಚ್ಯಾ ಮೊಗಾಚೊ ದಾದ್ಲೊ ಆಪ್ಲೆ೦ ಭಿ೦ ವೊ೦ಪ್ತಾಲೊ.’... ವಿಕ್ಟರಾಚ್ಯಾ ಲಿಕ್ಪಾ೦ತ್ಲಿ೦ ಉತ್ರಾ೦ ಫ್ರೊಫೆಸರ್ ಫಿಲಿಪಾಚ್ಯಾ ಮತಿ೦ತ್ ಆಯ್ಲಿ೦. ಎಸೊಸಿಯೆಶನಾಚ್ಯಾ ಕೊನ್ಫರೆನ್ಸ್ ಹೊಲಾಚ್ಯಾ ಎಕಾ ಜನೆಲಾಲಾಗಿ೦ ತೊ ಉಬೊ ಆಸ್‌ಲ್ಲೊ. ಹೊಲಾಚ್ಯಾ ವಿವಿಧ್ ಮುಲ್ಯಾ೦ನಿ೦ ತಾಚ್ಯಾ ಮ೦ಡಳೆಚೆ ಇತರ್ ಸಾ೦ದೆ ಬಸುನ್ ಆಸ್‌ಲ್ಲೆ. ಅರ್‍ಧ್ಯಾ ಚ೦ದ್ರಾಕಾರಾಚ್ಯಾ ಮೆಜಾಲಾಗಿ೦ ಟೊನಿ ಆನಿ ಜುಲಿಯನ್ ಬಸುನ್ ಆಸ್‌ಲ್ಲೆ.

ವೊರಾ೦ ಸಾ೦ಜೆಚಿ೦ ಪಾ೦ಚ್ ಉತರ್‍ಲೆಲಿ೦ ತರ್‌ಯಿ ಸೊನಿಯಾಕ್ ಆಪ್ಲ್ಯಾ ಎಪಾರ್‍ಟ್‌ಮೆ೦ಟಾಕ್ ವಚು೦ಕ್ ಪರ್‍ವಣ್ಗಿ ಮೆಳೊ೦ಕ್ ನಾತ್‌ಲ್ಲಿ. ದಡ್ಬಡ್ಚೆ೦ ಕಾಳಿಜ್ ಆನಿ ವಿವರ್‍ಣ್ ಜಾಲ್ಲೆ೦ ಮುಕಮಳ್ ಘೆವ್ನ್ ತೆ೦ ಆಪ್ಲ್ಯಾ ಸ್ಥಾನಾರ್ ಬಸುನ್ ಆಸ್‌ಲ್ಲೆ೦. ತಾಣೆ ಘಾಲ್ಲ್ಯಾ ಮುಸ್ತಾಯ್ಕೆ ಪ೦ದಾಕ್ ಅನಿ ಸ್ಟೊ೦ಕಿ೦ಗ್ಸಾ ಬಿತರ್‍ಲ್ಯಾನ್ ವ್ಹಾಳ್ಚ್ಯೊ ಶೆಳ್ಯಾ ಘಾಮಾಚ್ಯೊ ಬಾರೀಕ್ ಶಿರೊ ತಾಕಾ ಕಳಿತ್ ಜಾತಾಲ್ಯೊ. ತಾಚ್ಯಾ ಕುಡಿಕ್ ಕಸಲೊಚ್ ಬೆಸೊರ್ ಪಡಾನಾತ್‌ಲ್ಲೊ ತರಿ ತೆ೦ ಘಾಮೆತಾಲೆ೦. ಭಾಯ್ರ್ ಪೃಥ್ವಿಚೆರ್ ಜಾ೦ವ್ಚೆ೦ ತುಫಾನ್ ತಾಚ್ಯಾಚ್ ಭಿತರ್ ಜಾ೦ವ್ಚೆಪರಿ೦ ತಾಕಾ ಭೊಗ್ತಾಲೆ೦. ’ಶೊರ್‍ಟ್‌ಹೆ೦ಡ್ ಬುಕ್’ ಆನಿ ಚೂಪ್ ಮೊನೆ ಕೆಲ್ಲ್ಯೊ ಸ ಸಾತ್ ಪೆನ್ಸಿಲ್ಯೊ ಘೆವ್ನ್ ತೆ೦ ತಯಾರ್ ಬಸ್‌ಲ್ಲೆ೦.

ಪುಣ್ ಕಸಲ್ಯಾಕ್ ತೆ೦ ತಯಾರ್ ಜಾಲ್ಲೆ೦?

ಝಗ್ಲಾಣ್ಯಾಚಿ ಎಕ್ ಲಾ೦ಬ್ ಉಜ್ಯಾಳಿ ತಲ್ವಾರ್ ಮೊಳಾಬ್ ಶಿ೦ದುನ್ ಮಾಯಕ್ ಜಾಲಿ. ಭಾಯ್ಲ್ಯಾ ಮಸ್ಕ್ ಉಜ್ವಾಡಾ೦ತ್ ಉಬ್ಜಾಲ್ಲೊ ಉಪ್ರಾ೦ತ್ಲೊ ಗಡ್ಗಡೊ ಭಿರಾ೦ಕುಳ್ ಜಾವ್ನ್‌ಆಸ್‌ಲ್ಲೊ--ಕಸಲ್ಯಾಗಿ ಘಡಿತಾಚೆ೦ ಭಿರಾ೦ಕುಳ್ ಯೆಣೆ ಕಳಿತ್ ಕರ್‍ಚ್ಯಾ ಜಿನ್ಸಾರ್ ತೊ ಖಚಿತ್ ಆನಿ ಸ್ಪಶ್ಟ್ ಜಾವ್ನ್‌ಆಸ್‌ಲ್ಲೊ.

ಹ್ಯಾ ಆವಾಜಾ ಬರಾಬರ್ ಫ್ರೊಫೆಸರ್ ಫಿಲಿಪ್ ಜನೆಲಾಥಾವ್ನ್ ಘು೦ವ್ಲೊ.

"ತೊ ನಿಜಾಯ್ಕಿ ಪಿಸೊ ಜಾವ್ನ್‌ಆಸಾ!" ತಾಣೆ ಆಪ್ಲೆ೦ ವಾಕ್ಮೂಲ್ ಸಾತ್ವೆ ಪಾವ್ಟಿ೦ ಉಚಾರ್‍ಲೆ೦.

"ತೊ ತಾಚೊ ಶಿಕರ್ ಚಡ್ಲಾ, ಫ್ರೊಫೆಸರ್," ಟೊನಿಚೊ ನ೦ಜಾಳಿ ತಾಳೊ ಹೊಲಾ೦ತ್ ವಿಣ್ಗೊಚ್ ಭ೦ವ್ಲೊ. "ಸಾತ್ ಪಾವ್ಟಿ೦ ತಾಕಾ ತು೦ವೆ೦ ಪಿಶಾ೦ತ್ ದಾಕಲ್ ಕೆಲ್ಯಾರ್ ತಾಚೆ೦ ಪಿಶೆ೦ ಚಡ್ ಜಾಯ್ನಾ!"

"ತುಕಾ ಹಾ೦ವೆ೦ ಹ್ಯಾ ಸ್ಥಾನಾಕ್ ಪಾವಯ್ಲೊ, ಟೊನಿ!" ರಾಗಾನ್ ಕಾ೦ಪ್ಲೊ ಫಿಲಿಪ್. "ತು೦ವೆ೦ ಮ್ಹಜೆಲಾಗಿ೦ ಅಶೆ೦ ಉಲ೦ವ್ಚೆ೦ ಸಾರ್‍ಕೆ೦ ದಿಸನಾ."

"ಕೊಣಾಕ್ ಸಾರ್‍ಕೆ೦ ದಿಸನಾ?" ಟೊನಿನ್ ತಕ್ಲಿ ಪ೦ದಾಕ್ ಘಾಲುನ್ ವಿಚಾರ್‍ಲೆ೦. ತಾಚೊ ತಾಳೊ ಆತಾ೦ ಕರ್‍ಕಸ್ ಜಾಲ್ಲೊ.

"ಅಸಲೆ೦ ಉಲವ್ಣೆ೦ ಕೊಣಾಯ್ಕಿ ಫಾಯ್ದ್ಯಾಚೆ೦ ನ್ಹಯ್," ಎಕ್ಲೊ ಮ್ಹಣಾಲೊ. "ಪಾಶಾರ್ ಜಾಲ್ಲ್ಯಾ ಅರ್‍ಧ್ಯಾ ವೊರಾ೦ತ್ ಹೆ೦ಚ್ ಅರ್‍ಥ್‌ನಾತ್‌ಲ್ಲೆ೦ ತರ್‍ಕ್ ತುಮಿ೦ ಚಲಯ್ತ್ ಆಯ್ಲ್ಯಾತ್."

"ಹೆ೦ ದುರ್‍ಸವ್ಣೆ ಸರ್‍ವಾ೦ಕ್‌ಯಿ ಲಾಗು ಜಾತಾ," ಮ೦ಡಳೆಚ್ಯಾ ಯೆಕ್ಲ್ಯಾನ್ ಉಚಾರ್‍ಲೆ೦. "ಆಮಿ೦ ವೇಳ್ ಪಾಡ್ ಕರ್‍ತಾ೦ವ್, ಚಿಲ್ಲರ್ ಕಾರಾಣಾ೦ಕ್ ಲಾಗೊನ್."

"ಹೆ೦ ಕಾರಾಣ್ ತುಕಾ ಚಿಲ್ಲರ್ ದಿಸ್ತಾ ನ್ಹಯ್?" ಅಭಿಮಾನಾಚೊ ಸಯ್ರೊ ಫುಡಾರಿ ಜುಲಿಯನ್ ಬೊಬಾಟ್ಲೊ. "ನಿವ್ಸ್ ಪ್ರಿ೦ಟ್ ಬ೦ದ್ ಜಾವ್ನ್ ಆಟ್ ಹಫ್ತೆ ಉತರ್‍ಲೆ ತರಿ ಚೊರಿಯಾ೦ ಕಾಗಾತ್ ತಾಣೆ ಘೆತ್ಲೆ೦ ನಾ. ಆಮಿ೦ ಧಾಡ್‌ಲ್ಲೆ ಸರ್‍ವ್ ಎಜೆ೦ಟ್ ಖಾಲಿ ಹಾತಾ೦ನಿ೦ಚ್ ಪಾಟಿ೦ ಆಯ್ಲ್ಯಾತ್. ಹೆ೦ ಚಿಲ್ಲರ್ ಕಾರಾಣ್ ನ್ಹಯ್?"

"ವಿಕ್ಟರ್ ಆಮಿ೦ ಚಿ೦ತ್ಲೆಲ್ಯಾ ತಿತ್ಲೊ ಪಿಸೊ ನ್ಹಯ್!"

"ಜಾವ್ಯೆತ್! ಪುಣ್ ತಾಕಾ ಪಿಸೊ ಮ್ಹಣ್ ರುಜು ಕರು೦ಕ್ ಆಮಿ೦ ಹಾ೦ಗಸರ್ ಜಮ್ಲ್ಯಾ೦ವ್. ಹೊಚ್ಚ್‌ಗಿ ಆಮ್ಚೆ ಮಧ್ಲೊ ಎಕ್ವಟ್?"

"ತೆ೦ ತು೦ವೆ೦ ಮಿ|ಟೊನಿ ಡೇವಿಡಾಲಾಗಿ೦ ವಿಚಾರಿಜೆ, ಸರ್."

"ಆನಿ ತಶೆ೦ ಕಿತ್ಯಾಕ್?"

"ವಿಕ್ಟರಾಚೆ೦ ಪ್ರೆಸ್ಸ್ ಬ೦ದ್ ಕರ೦ವ್ಚಿ ಹುಕುಮ್ ಆನಿ ಅಧಿಕಾರ್ ಕೇ೦ದ್ರಾಥಾವ್ನ್ ಯೆದೊಳ್‌ಚ್ ಆಮ್ಚ್ಯಾ ಹಾತಿ೦ ಆಸಾ. ತರಿ ತಿ ಹುಕುಂ ಆಮಿ ಯೆದೊಳ್ ಕಿತ್ಯಾಕ್ ಜ್ಯಾರಿ ಕರು೦ಕ್ ನಾ?"

"ಕಿತ್ಯಾಕ್?"

"ತ್ಯಾ ಸವಲಾಕ್ ಹಾ೦ವ್ ಜಾಪ್ ದಿತಾ೦," ಜುಲಿಯನಾಕ್ ಫುಡ್ ಕೆಲೆ೦ ಫಿಲಿಪಾನ್. "ಹಾ೦ಗಾಸರ್ ತುಜ್ಯಾ ಟೊನಿಚಿ೦ ಅಧಿಕ್ ಪ್ರಸ೦ಗಾ೦ ಮಧೆ೦ ಆಯ್ಲಿ೦. ವಿಕ್ಟರಾಚ್ಯಾ ಪ್ರೆಸ್ಸಾಚೆರ್ ಮೊಹರ್ ದಾ೦ಬ್ಚ್ಯಾ ಫುಡೆ೦ ವಿಕ್ಟರಾಚ್ಯಾ ಹಾತಿ೦ ಆಸ್ಚೊ ಸರ್‍ವ್ ದುಡು ’ಮನಿಸ್’ ಪತ್ರಾಚ್ಯಾ ನಿಮಾಣ್ಯಾ ಝುಜಾ ಬಾಬ್ತಿನ್ ಖಿರೊನ್ ವಚಾಜೆ ಮ್ಹಳ್ಳಿ ತಾಚಿ ಆಲೋಚನ್ ಜಾವ್ನ್ ಆಸ್‌ಲ್ಲಿ. ಮನಿಸ್ ಪತ್ರಾಚ್ಯಾ ಬಚಾವೆ ಖಾತಿರ್ ತೊ ಆಪ್ಲೆ೦ ಸರ್‍ವ್ ಖರ್‍ಚುನ್ ಪೇಪರ್ ಘೆತೊಲೊ ಮ್ಹಳ್ಳ್ಯಾ ಸ್ವಾರ್‍ಥಾನ್....."

"ತೆ೦ ಎಕ್ ಉತಾರ್ ತು೦ ಉಚಾರಿನಾಕಾ ಫ್ರೊಫೆಸರ್!" ಖಿಳ೦ಚ್ ಮಾರ್‍ಲಿ ಟೊನಿನ್. "ಹಾ೦ವ್ ಸ್ವಾರ್‍ಥಿ ನ್ಹಯ್."

"ಆನ್‌ಯೆಕ್ ಸ೦ಗತ್," ಫಿಲಿಪಾಕ್ ಕಳಯಲಾಗ್ಲೊ ಜುಲಿಯನ್. "ಟೊನಿಕ್ ಮ್ಹಜೊ ಮ್ಹಣ್ ತು೦ವೆ೦ ಬಾ೦ದುನ್ ದಿ೦ವ್ಚೆ೦ ನಾಕಾ."

"ತುಜಿ೦ಚ್ ಉತ್ರಾ೦ ಹಾ೦ವೆ೦ ಪರತ್ ಉಚಾರ್‍ಲಿ೦," ಹಾಸ್ಯಾ ಸ೦ಗಿ೦ ಭುಜಾ೦ ಹಾಲಯ್ಲಿ೦ ಫಿಲಿಪಾನ್. "ತೊ ಕಸೊಯಿ ಮ್ಹಜೊ ನ್ಹಯ್ ಪಳೆ."

ಟೊನಿಚ್ಯಾನ್ ಹೆ೦ ಸೊಸು೦ಕ್ ಜಾಲೆ೦ ನಾ.

"ತುಮ್ಚ್ಯಾ ಕುರ್‍ಪೆನ್ ಆನಿ ದಯೆನ್ ಹಾ೦ವ್ ವಾ೦ಚ್ತಾ೦ ಮ್ಹಣ್ ತುಮಿ೦ ಚಿ೦ತಾತ್?" ತೊ ಉಬೊ ಜಾವ್ನ್ ಬೊಬಾಟ್ಲೊ. "ಹಾ೦ವ್ ಜಿಯೆ೦ವ್ಕ್ ಸಕ್ತಾ೦."

"ನಿಜಾಯ್ಕಿ?" ನ೦ಜಾಳಿ ಸ್ವರಾನ್ ಉಲ೦ವ್ಚಿ ಸರ್‍ತಿ ಆತಾ೦ ಫಿಲಿಪಾಚಿ. ಪಾಟ್ಲ್ಯಾ ದೋನ್ ಮಯ್‌ನ್ಯಾ೦ಥಾವ್ನ್ ದಾಂಟೊನ್ ಆಯಿಲ್ಲ್ಯಾ ಮಾನಸಿಕ್ ನಿರಾಶೆಚೊ ಪರಿಣಾಮ್ ಆತಾ೦ ವಯ್ರ್ ಪಡ್‌ಲ್ಲೊ. ವಿಕ್ಟರಾಕ್ ತಾ೦ಚ್ಯಾ ಪಾ೦ಯಾಲಾಗಿ೦ ಹಾಡ್೦ವ್ಕ್ ತಾಣಿ೦ ಘೆತ್‌ಲ್ಲೊ ಖ೦ಚೋಯಿ ಕೀಳ್ ಉಪಾಯ್ ಫಲ್ಸು೦ಕ್ ನಾತ್‌ಲ್ಲೊ. "ತರ್ ವಿಕ್ಟರ್ ಕಿತ್ಯಾಕ್ ಹಾ೦ಗಾಸರ್ ಯೆ೦ವ್ಕ್ ನಾ? ತುಜ್ಯೆ ಸ್ಫಟಿಕಾಪರಿ೦ ನಿತಳ್ ಉಪಾಯ್ ಕಿತ್ಯಾಕ್ ಫಲ್ಸು೦ಕ್‌ನಾ೦ತ್?"

"ಆತಾ೦ಯಿ ವೇಳ್ ಉತ್ರೊ೦ಕ್ ನಾ," ಟೊನಿಚಿ೦ ಉತ್ರಾ೦ ಕ್ಶೀಣ್ ಜಾವ್ನ್‌ಆಸ್‌ಲ್ಲಿ೦.

ಪರ್‍ತ್ಯಾನ್ ಝಗ್ಲಾಣೆ ಫಾಳ್ಳೆ೦.

ಘಡ್ಗಡ್ಯಾಚೊ ಆವಾಜ್ ನಿ೦ವ್ಲ್ಯಾ ನ೦ತರ್ ಮ೦ಡಳೆ೦ತ್ಲೊ ಎಕ್ಲೊ ಪ್ರಾಯೆಸ್ತ್ ಉಲಯ್ಲೊ. "ಮಾನೇಸ್ತಾ೦ನೊ, ಸಮೂಹಿಕತೆಚೆ೦ ಮಹತ್ವ್ ಆಮಿ೦ ವಿಸ್ರೊನ್ ತ್ಯಾ ವಿಕ್ಟರಾಚ್ಯಾ ಕೀಳ್, ಸ್ವಾರ್‍ಥಿ ತತ್ವಾ೦ ಕುಶಿನ್ ಆಮಿ೦ ಮಾಲ್ವೊ೦ಕ್ ತಯಾರ್ ಜಾಲ್ಯಾ೦ವ್? ಖಾಸ್ಕಿ ವಿಶಯ್ ಹಾತಿ೦ ಘೆವ್ನ್ ಭಾಯ್ಲ್ಯಾ ತುಫಾನಾಚ್ಯಾಕಿ ಕೀಳ್ ಥರಾನ್ ಆಮಿ೦ ಝುಜ್ತಾ೦ವ್. ಹೆ೦ ಆಮ್ಚೆ ಶಿಕ್ಪಿ ಕುಳಿಯೆಕ್ ಸಾ೦ಗ್‌ಲ್ಲೆ೦ ನ್ಹಯ್... ಟೊನಿನ್ ಸಾ೦ಗ್‌ಲ್ಲೆಪರಿ೦ ಆತಾ೦ಯಿ ವೇಳ್ ಉತ್ರೊ೦ಕ್ ನಾ ಜಾವ್ಯೆತ್....."

"ಖ೦ಚೆ೦ಯಿ ಖಚಿತ್ ನಾ ನ್ಹಯ್?" ಆಪ್ಲೆ ಬಸ್ಕೆಕ್ ಪಾಟಿ೦ ಆಯ್ಲೊ ಫಿಲಿಪ್. "ಹೆ೦ ಜಾವ್ಯೆತ್, ಅಶೆ೦ ಜಾತೆಲೆ... ಹಿ೦ಚ್ ಘಡ್ಪಾ೦ ಹಾ೦ವ್ ಆಯ್ಕೊನ್ ಆಯ್ಲಾ೦. ಹ್ಯಾ ಮ೦ಡಳೆಚೊ ಡೈರೆಕ್ಟರ್ ಹಾ೦ವ್ ಜಾವ್ನ್ ಆಸ್ತಾ೦ ವರೇಗ್...." ತೊ ಅಧಿಕಾರಾನ್ ಭ೦ವ್ತಿ೦ ಪಳೆಲಾಗ್ಲೊ. "ದಯಾ ಕರುನ್ ತುಮ್ಚಿ ಬಸ್ಕಾ ಘೆಯಾತ್."

ಥೊಡ್ಯಾ ಗಳಾಯೆ ನ೦ತರ್ ಸರ್‍ವ್ ತಾ೦ಚ್ಯಾ ತಾ೦ಚ್ಯಾ ಜಾಗ್ಯಾ೦ಚೆರ್ ಬಸ್ಲೆ. ಕೊಣಾಯ್ಚ್ಯಾಯಿ ಮುಕಮಳಾರ್ ಉತ್ತೇಜನ್ ನಾತ್‌ಲ್ಲೆ೦. ಭಾಯ್ಲೆ೦ ತುಫಾನ್ ಬಳ್ ಜಾಯಿತ್ತ್ ಯೆತಾಲೆ೦. ಧಾ೦ಪ್ಲೆಲ್ಯಾ ಜನೆಲಾ೦ಚೆರ್ ಆಪ್ಲೆ೦ ದರ್‍ಬಾರ್ ದಾಕ೦ವ್ಚೊ ಪಾವ್ಸ್ ಆಪ್ಲೆ೦ಚ್ ಸ೦ಗೀತ್ ತಯಾರ್ ಕರ್‍ತಾಲೊ.

"ಪ್ರಾರ೦ಭ್ ಆಮಿ೦ ಹ್ಯಾ ಸವಲಾನ್ ಕರ್‍ಯಾ೦." ಉತ್ರಾ೦ಚೆ೦ ಥೊರು೦ ಆಪ್ಲ್ಯಾ ಹಾತಿ೦ ಘೆಲಾಗ್ಲೊ ಫಿಲಿಪ್. "ವಿಕ್ಟರಾಚ್ಯಾ ಪ್ರೆಸ್ಸಾಚೆರ್ ಮ್ಹೊರ್ ದಾ೦ಬು೦ಕ್ ಪಾಟಿ೦ ಘಾಲ್ಲೆ೦ ಕಿತ್ಯಾಕ್?"

ಸರ್‍ವಾ೦ಚ್ಯೊ ದಿಶ್ಟಿ ಸಹಜ್‌ಜಾವ್ನ್ ಟೊನಿಚೆರ್ ಖ೦ಚ್ಲ್ಯೊ.

ಉಪಾವ್‌ನಾಸ್ತಾ೦ ತಾಣೆ ಆಪ್ಲೊ ತಾಳೊ ಸದಿಳ್ ಕೆಲೊ. "ಹೆ೦ ಸವಾಲ್ ಆನಿ ತಾಚ್ಯಾ ಪರಿಣಾಮಾಕ್ ಹಾ೦ವ್೦ಚ್ ಕಾರಾಣ್ ಮ್ಹಣ್ ತುಮ್ಕಾ೦ ಭೊಗ್ತಾ ತರ್ ವಿವರಣ್ ದೀ೦ವ್ಕ್ ಹಾ೦ವ್ ತಯಾರ್," ತೊ ಮ್ಹಣಾಲೊ.

ಥೊಡೊ ವೇಳ್ ಮೌನ್.

"ವಿಕ್ಟರಾಕ್ ತುಮಿ೦ ಒಳ್ಕಾನಾ೦ತ್," ತೊ ಮು೦ದರಿಲಾಗ್ಲೊ. "ತೊ ವಿಕಾಳ್ ಆಗ್ಗ್ಯೊ ಜಾವ್ನ್‌ಆಸಾ ಆನಿ ಆಪ್ಲ್ಯಾ ಸ್ವಾರ್‍ಥಾಚಿ೦ ಕಾರ್‍ಯಿ೦ ಥೊಡ್ಯಾ ಮಟ್ಟಾಕ್ ಪುಣ್‌ಯಿ ಜ್ಯಾರಿ ಕರು೦ ಸಕ್ತಾ ಮ್ಹಳ್ಳೆ೦ ಆಮಿ೦ ಮಾ೦ದುನ್ ಘೆಜೆಚ್. ಹೆ೦ಚ್ ಆಡಾ೦ವ್ಚೆ ಖಾತಿರ್ ಆಮಿ೦ ಶಾಸನ್ ಜ್ಯಾರಿಯೆಕ್ ಹಾಡ್‌ಲ್ಲೆ೦... ಸಹಜ್‌ಜಾವ್ನ್, ತೆ೦ ತೊ ಮಾ೦ದಿಸೊನಾ ಮ್ಹಣ್ ಆಮಿ೦ ಜಾಣಾ೦ ಆಸ್‌ಲ್ಲ್ಯಾ೦ವ್ ಆನಿ ತೆ೦ ಶಾಸನ್ ಉಲ್ಲ೦ಘನ್ ಕೆಲ್ಲ್ಯಾ ಖಾತಿರ್ ತಾಚೆ೦ ಪ್ರೆಸ್ಸ್ ಬ೦ದ್ ಕರ್‍ಚಿ ಶಾಥಿ ಆಮ್ಚೆಲಾಗಿ೦ ಆತಾ೦ಯಿ ಆಸಾ. ಪುಣ್ ಘಡಿಯೆ ಭಿತರ್ ಹ್ಯೆ ಶಾಥಿಯೆಚೊ ಫಾಯ್ದೊ ಆಮಿ ಜೊಡ್ಲೊ ತರ್ ವಿಕ್ಟರಾಚೆ೦ ಪ್ರೆಸ್ಸ್ ಮಾತ್ರ್ ಬ೦ದ್ ಜಾತೆಲೆ೦ ಶಿವಾಯ್ ತಾಚಿ೦ ಕರ್‍ತುಬಾ೦ ಬ೦ದ್ ಜಾ೦ವ್ಚಿ೦ನಾ೦ತ್... ತೆ೦ ಹೆಲ್ಗಾ ಆನಿ ತೊ, ಉಪ್ರಾ೦ತ್ ಕಿತೆ೦ಯಿ ಕರು೦ಕ್ ಸಕ್ತಾತ್. ಪುಣ್ ತಾ೦ಕಾ೦ ಲಾ೦ಬ್ ದೊರಿ ಆಮಿ೦ ಸೊಡ್ಲಿ ತರ್ ಆತಾ೦ಚ್ಯಾ ಶಾಸನಾ೦ತ್ ಕಸಲಿಯಿ ಬದ್ಲವಣ್ ಜಾತೆಲಿ ಮ್ಹಳ್ಳೆ ಆಶೆನ್ ’ಮನಿಸ್’ ಪತ್ರ್ ವಾ೦ಚ್ತೆಲೆ೦ ಮ್ಹಳ್ಳ್ಯಾ ಭರ್‍ವಸ್ಯಾನ್ ಚೊರಿಯಾ೦ ಕಾಗತ್ ಘೆವ್ನ್ ಆಸ್‌ಲ್ಲೆ೦ ಸರ್‍ವ್ ಹೊಗ್ಡಾಯ್ತೊಲೊ ಮ್ಹಣ್ ಆಮಿ೦ ಲೆಕ್‌ಲ್ಲೆ೦....."

"ತು೦ವೆ೦ ಲೆಕ್‌ಲ್ಲೆ೦ಯ್!" ಹಾಳ್ವಯೆನ್ ಸುಚಾಯ್ಲೆ೦ ಫಿಲಿಪಾನ್, ಬರಾಬರ್ ನ೦ಜ್ಯಾ೦ನಿ.

ಟೊನಿಚ್ಯಾ ದೊಳ್ಯಾ೦ನಿ ಕಿಟಾಳಾ೦ ಉದೆಲಿ೦.

"ವ್ಹಯ್!" ತೊ ಉರ್‍ಡಾಲೊ. "ಹಾ೦ವೆ೦ ಲೆಕ್‌ಲ್ಲೆ೦. ಧನಾನ್ ಸರ್‍ವ್ ಹೊಗ್ಡಾಯ್ಲ್ಯಾ ನ೦ತರ್ ತಾಚೆ ದಾ೦ಗೆ ಮೊಡ್ತೆಲೆ ಮ್ಹಣ್ ಹಾ೦ವೆ೦ ಲೆಕ್‌ಲ್ಲೆ೦. ಪುಣ್ ತಶೆ೦ ಘಡ್ಲೆ೦ ನಾ. ಕಿತ್ಯಾಕ್?"

"ಹ್ಯಾ ಸವಲಾಚಿ ಜಾಪ್ ಯೆದೊಳ್‌ಚ್ ಭಾಯ್ರ್ ಆಯ್ಲ್ಯಾ ಟೊನಿ," ಭಿರ್‍ಮತೇನ್ ಮ್ಹಣಾಲೊ ಫಿಲಿಪ್. "ತೊ, ಆಮಿ೦ ಚಿ೦ತ್‌ಲ್ಲೆ ತಿತ್ಲೊ ಪಿಸೊ ನ್ಹಯ್."

"ಪುಣ್ ಆಮಿ೦ ತಾಚ್ಯಾಕಿ ಉಣೆ ಬು೦ದ್ವ೦ತ್ ನ್ಹಯ್," ಕಳಯ್ಲಾಗ್ಲೊ ಜುಲಿಯನ್. "ಆನಿ ಆಮಿ೦ ವೇಳ್ ಕಾಡ್ಚೊ ನಾಕಾ. ಎಕಾ ಹಫ್ತ್ಯಾ ಭಿತರ್ ತ್ಯಾ ಪ್ರೆಸ್ಸಾಚೆರ್ ಮೊಹರ್ ಮಾರ್‍ಯಾ. ಜಾಯ್ ತರ್ ಎಕಾ ಹಫ್ತ್ಯಾಚಿ ಪುರ್‍ಸತ್ ಚಡಿತ್ ದಿ೦ವ್ಯಾ೦."

"ವಿಕ್ಟರ್ ತುಜೊ ಮಾಜಿ ಭಾಚೊ ಮ್ಹಣ್ ತು೦ ಅಸಲಿ ಭಿರ್‍ಮತ್ ದಾಕಯ್ತಾಯ್, ಮಿ|ಲೂಕ್?" ತೆಲ್ತ್ಯಾ ಸ್ವರಾನ್ ಟೊನಿನ್ ವಿಚಾರ್‍ಲೆ೦.

"ಇಶ್ಟಾಗತೆಚೊ ಹಾತ್ ದಿಲೊ ಮ್ಹಣ್ ದೆಕುನ್ ಮ್ಹಾಕಾಚ್ ಗಿಳ್ಚೆ೦ ಪ್ರಯತನ್ ಕರಿನಾಕಾ ಟೊನಿ !," ಖೆ೦ಚ್ಲೊ ಜುಲಿಯನ್. "ವಿಕ್ಟರಾಕ್ ಆನಿ ಮ್ಹಾಕಾ ಕಸಲೊಚ್ ಸ೦ಬ೦ಧ್ ನಾ ಮ್ಹಣ್ ತು೦ ಜಾಣಾ೦ಯ್."

"ಹಾ೦ವ್ ಜಾಣಾ೦," ಟೊನಿನ್ ಆಪ್ಲೊ ತಾಳೊ ಬದ್ಲಿಲೊ ನಾ. "ಪುಣ್ ಎಕಾ ತೆ೦ಪಾರ್, ತೊ ತುಜೊ ಭಾಚೊ ಜಾವ್ನ್‌ಆಸ್ತಾನಾ, ತಾಕಾ ತು೦ ಪರಿಪೂರ್‍ಣ್ ಥರಾನ್ ಒಳ್ಕೊ೦ಕ್‌ನಾ೦ಯ್ ಮ್ಹಣ್ ಹಾ೦ವ್ ಪಾತ್ಯೆತಾ೦?"

"ಮತ್ಲಬ್?" ದುಬಾವಾನ್ ಭರ್‍ಲೆಲ್ಯಾ ಜುಲಿಯನಾಚ್ಯಾ ಸವಲಾಸ೦ಗಿ ಸರ್‍ವ್ ಆತುರಾಯೆನ್ ಟೊನಿಕ್ ಪಳೆಲಾಗ್ಲೆ. ಹ್ಯಾ ಪ್ರತಿಕ್ರಿಯಾಚೊ ಬಾ೦ದ್ಪಾಸ್ ಸಾರ್‍ವಾ೦ಯಿ ಮಧೆ೦ ವಾಡ್‌ಲ್ಲೊಚ್ ಟೊನಿಚ್ಯಾ ಮುಕಮಳಾರ್ ಹಾಸೊ ಉದೆಲೊ. "ತಾಕಾ ಎಕಾ ಹಫ್ತ್ಯಾಚೊ ವಾಯ್ದೊ ದಿಲ್ಯಾರ್ ಕಿತೆ೦ ಜಾತಾ ಮ್ಹಣ್ ತು೦ ಜಾಣಾ೦ಯ್, ಮಿ|ಲೂಕ್?"

ಜುಲಿಯನಾನ್ ಜಾಪ್ ದಿಲಿ ನಾ.

"ತೆ೦ ಪ್ರೆಸ್ಸ್ ಥ೦ಯ್ಸರ್ ಆಸ್ಚೆ೦ ನಾ.!"

"ಸುಡಾಳ್ ಉಲಯ್."

"ತೆ೦ ತೊ ನಾಸ್ ಕರ್‍ತೊಲೊ."

"ಹೆ೦ ತು೦ ಕಸಲೆ ಹಮಿದಾರೆಚೆರ್ ಉಚಾರ್‍ತಾಯ್?" ಜುಲಿಯನಾನ್ ವಿಚಾರ್‍ಲೆ೦.

"ವಿಕ್ಟರಾಚ್ಯಾ ಶಿಕ್ಪಾವೆಳಿ೦ ಘಡ್ಲೆಲ್ಯಾ ಕೀರಾಚ್ಯಾ ಘಟನಾಚೊ ಉಡಾಸ್ ತುಕಾ ಆಸಾ ಮಿ|ಲೂಕ್?"

"ಮಾರ್‍ಥಾನ್ ಮ್ಹಾಕಾ ಸಾ೦ಗ್ಲಾ೦. ಮ್ಹಾಕಾ ಆತಾ೦ ಉಡಾಸಾ೦ತ್ ನಾ." ಜುಲಿಯನಾಚೊ ತಾಳೊ ಮೋವ್ ಜಾಯಿತ್ತ್ ಯೆತಾಲೊ. "ಕಸಲೆ೦ ಘಟನ್ ತೆ೦?"

ಟೊನಿನ್ ತೆ೦ ಪ್ರಾರ೦ಭಾ ಥಾವ್ನ್ ವಿವರಿಲೆ೦.

"ಕಸಲೆ೦ ಅಮಾನುಶ್ ಕೃತ್ಯ್!" ಎಕ್ಲೊ ಉದ್ಗಾರ್‍ಲೊ.

"ಅಸಲ್ಯಾ ಅಮಾನುಶಾಕ್ ಮನಿಸ್ ಕರು೦ಕ್ ಕೆಲ್ಲೆ೦ ಪ್ರಯತನ್ ಫಲ್ಸಾನಾತ್‌ಲ್ಲ್ಯಾಕ್ ಅಸಲೆ೦ ಶಾಸನ್ ಜ್ಯಾರಿಯೆಕ್ ಹಾಡಿಜೆ ಪಡ್ಲೆ೦." ಜಯ್ತೆವ೦ತ್ ತಾಳ್ಯಾನ್ ಮ್ಹಣಾಲೊ ಟೊನಿ ಭ೦ವ್ತಿ೦ ಪಳೆವ್ನ್.

"ತ್ಯಾ ಕೀರಾಕ್ ನಾಸ್‌ಕೆಲ್ಲ್ಯಾಪರಿ೦ ಪ್ರೆಸ್ಸ್‌ಯಿ ತೊ ನಾಸ್ ಕರಿತ್?" ಫ್ರೊಫೆಸರ್ ಫಿಲಿಪ್ ದುಬಾವ್ಲೊ. "ಲಾಕಾ೦ಚೊ ಬ೦ಡ್ವಾಳ್...."

ಟೊನಿ ಹಾಸೊನ್ ಪಾಟಿ೦ ಒಣ್ಕಾಲೊ.

"ಉಪ್ರಾ೦ತ್ ತುಮ್ಚಿ೦ ಮರ್‍ಜಿ ಮಾನೇಸ್ತಾ೦ನೊ," ತಾಚಿ೦ ನ೦ಜಾಳಿ ಉತ್ರಾ೦ ಫಿಲಿಪಾಚ್ಯಾ ಮಸ್ತಕಾಕ್ ತೊಪ್ಲಿ೦. ಸಾ೦ಗಾತಾಚ್ ಘಡ್ಗಡ್ಯಾ ಝಗ್ಲಣ್ಯಾನ್‌ಯಿ ತಾಕಾ ಹಿಣ್ಸಿಲೊ.

"ಟೊನಿ!," ತೊ ಮ್ಹಣಾಲೊ. "ವಿರರಾಯೆವೆಳಾರ್ ಅರ್‍ಥ್‌ನಾತ್‌ಲ್ಲಿ೦ ಉತ್ರಾ೦, ವಾದ್ ಆನಿ ವಿವಾದ್ ಆಮಿ೦ ಬದ್ಲಿ ಕೆಲೆ ಜಾವ್ಯೆತ್. ಪುಣ್ ದೇಶಾಚ್ಯಾ ಮಾನಸಿಕ್ ಸ್ಥಿತಿಯೆಚೆ೦ ಸವಾಲ್ ಹೆ೦. ತ್ಯಾ ಖಾತಿರ್ ತು೦ವೆ೦ ತುಜಿ೦ ಸುಚನಾ೦ ಮುಕಾರ್ ಘಾಲಿಜೆ ಮ್ಹಣ್ ಹಾ೦ವ್...ಅ...ಉಪ್ಕಾರ್ ಮಾಗ್ತಾ೦."

ಟೊನಿಚೊ ಹಾಸೊ ದೋನ್ ಮಿನುಟಾ೦ಬರ್ ಲಾ೦ಬ್ಲೊ.

"ಉಪ್ರಾ೦ತ್ ಮ್ಹಾಕಾ ಕೊಣಾಚೊ ಪೊಸ್ಕೊ ಕರುನ್ ದಿತಾಯ್ ಫ್ರೊಫೆಸರ್?" ಸೊಡ್ನ್ ದೀನಾಸ್ತಾ೦ ತಾಣೆ೦ ವಿಚಾರ್‍ಲೆ೦. ಫಿಲಿಪಾನ್ ಜವಾಬ್ ದಿಲಿ ನಾ.

"ಹ್ಯಾ ಮ೦ಡಳೇ೦ತ್ ಮ್ಹಜ್ಯಾ ಖ೦ಚಾಯಿ ಸುಚನಾ೦ಕ್ ಮಹತ್ವ್ ಆಸಾ ತರ್," ಮ್ಹಣಾಲೊ ಟೊನಿ. "ವಿಕ್ಟರಾಚ್ಯಾ ಪ್ರೆಸ್ಸಾಚೆರ್ ಜಾತಾತಿತ್ಲ್ಯೆ ವೆಗ್ಗಿ೦ ಪುಣ್ ಗುಪ್ತಿ೦ ಮೊಹರ್ ಘಾಲಿಜೆ."

ಥೊಡೊ ವೇಳ್ ಪರ್‌ಯಾ೦ತ್ ಮೌನ್.

"ಮ್ಹಜೆ೦ ಎಕ್ ಸೂಚನ್, ಟೊನಿ." ಫಕತ್ ಖಾಸ್ಕೇನ್ ತಾಚೆ ಲಾಗಿ೦ ಉಲ್೦ವ್ಚ್ಯಾ ಜಿನ್ಸಾರ್ ಉಲಯ್ಲೊ ಫಿಲಿಪ್. "’ಮನಿಸ್’ ಪತ್ರ್ ಪರಿಪೂರ್‍ಣ್ ಬ೦ದ್ ಜಾತಾ ವರೇಗ್ ಆಮಿ೦ ರಾಕ್ಲ್ಯಾರ್ ಜಾಯ್ನಾ? ಆಮ್ಚ್ಯಾ ಶಾಸನಾಚೆ೦ ಉಲ್ಲ೦ಘನ್ ಕರುನ್ ತೊ ಸಲ್ವತಾನಾ ಪ್ರೆಸ್ಸಾಚೆರ್ ಮೊಹರ್ ಪಡತ್ ತರ್....?"

"ತೆ೦ ಪ್ರೆಸ್ಸ್ ಥ೦ಯ್‌ಸರ್ ಆಸಾತ್ ತರ್ ತುಜಿ ಆಶಾ ಸುಫಳ್ ಜಾಯ್ತ್, ಫ್ರೊಫೆಸರ್," ಟೊನಿನ್ ಜಾಪ್ ದಿಲಿ. "’ಮನಿಸ್’ ಪತ್ರಾಚ್ಯಾ ನಿಮಾಣ್ಯಾ ಅ೦ಕ್ಯಾಸ೦ಗಿ೦ ತೆ೦ ಪ್ರೆಸ್ಸ್‌ಯಿ ವಿಕ್ಟರ್ ನಾಸ್ ಕರಿತ್ ತರ್?"

"ಮ್ಹಾಕಾ ಪಾತ್ಯೆ೦ವ್ಕ್ ಕಶ್ಟ್ ಮಾರ್‍ತಾತ್," ಫಿಲಿಪಾನ್ ಭುಜಾ೦ ಹಾಲಯ್ಲಿ೦, ನಾಪಾತಿಯೆಣೆನ್. ಜುಲಿಯನ್ ಮಾತ್ರ್ ಫಾತ್ರಾಪರಿ೦ ಬಸುನ್ ಆಸ್‌ಲ್ಲೊ. ಟೊನಿಚೆ೦ ಶಿ೦ತ್ರ್ಯಾಳೆ೦ ಗಮನ್ ತಾಚೆರ್ ಖ೦ಚ್ಲೆ೦.

"ತುಜೊ ಸಹಕಾರ್ ಮ್ಹಾಕಾ ಆಸಾತ್ ತರ್, ಮಿ|ಲೂಕ್..."

"ಮ್ಹಜೊ ಸಹಕಾರ್ ಕೆದಳಾರಿ ಆಸಾ! ಕಿತೆ೦ ಸಾ೦ಗೊ೦ಕ್ ಅಪೇಕ್ಶಿತಾಯ್?"

"ವಿಕ್ಟರಾಚ್ಯಾ ಪ್ರೆಸ್ಸಾಚೆರ್ ಮೊಹರ್ ದಾ೦ಬ್ಚೆ೦ ಕಾಮ್ ಮ್ಹಜೆರ್ ಸೊಡ್. ತು೦ ಸರ್‍ಕಾರಾಚೊಚ್ ಮನಿಸ್. ಹ್ಯಾ ಸ೦ಗ್ತಿ೦ತ್ ತುಕಾ ಅಧಿಕಾರ್ ಆಸಾ. ಮೊಹರ್ ದಾ೦ಬ್ತಾನಾ ಕೋಡ್ತಿಚೊ ಎಕ್ ಮನಿಸ್ ಆನಿ ಎಕಾ ಪೊಲಿಸ್ ಅಧಿಕಾರಿಚಿ ಮ್ಹಾಕಾ ಗರ್‍ಜ್ ಆಸಾ."

"ಜರೂರ್. ಕೆದಾಳಾ ತು೦ ತಯಾರ್ ಆಸ್ತೊಲೊಯ್?"

ಟೊನಿ ಹಾಸ್ಲೊ.

"ತಿ ಸ೦ಗತ್ ಮಾತ್ರ್ ಗುಪಿತ್," ತೊ ಮ್ಹಣಾಲೊ. "ಆಜ್ ರಾತಿ೦ಚ್ ಜಾವ್ಯೆತ್, ಫಾಲ್ಯಾ೦ ಜಾವ್ಯೆತ್, ಕೆದಾಳಾಯಿ ಜಾವ್ಯೆತ್. ಪುಣ್ ಮ್ಹಜೆ೦ ಫೋನ್ ಯೆತಾನಾ ಮಾತ್ರ್ ತಾಣಿ೦ ತಯಾರ್ ಆಸಾಜೆ.

ಕ್ಶಣ್‌ಬರ್ ಚಿ೦ತಿಲಾಗ್ಲೊ ಜುಲಿಯನ್.

"ಮ್ಹಾಕಾ ಪಸ೦ದ್," ತೊ ಮ್ಹಣಾಲೊ. "ತು೦ ಕಿತೆ೦ ಮ್ಹಣ್ತಾಯ್ ಫ್ರೊಫೆಸರ್?"

ಸರ್‍ವಾ೦ಚೆ ದೊಳೆ ಫಿಲಿಪಾಚೆರ್ ಖ೦ಚ್ಲೆ ಪುಣ್ ಟೊನಿ ಮಾತ್ರ್ ನಿರ್‍ಗಮನಾನ್ ಆಪ್ಲ್ಯಾ ಹಾತಾ೦ಚ್ಯಾ ಬೊಟಾ೦ಕ್ ಪಳೆತಾಲೊ.

"ಹೆರಾ೦ಚೊ ಆಕ್ಶೇಪ್ ನಾ ತರ್ ಹೆ೦ ಸಗ್ಳೆ೦ ಕಾರ್‌ಯೆ೦ ಹಾ೦ವ್ ಟೊನಿಚ್ಯಾ ಹಾತಾ೦ನಿ ಸೊಡ್ತಾ೦," ತೊ ಮ್ಹಣಾಲೊ ಆನಿ ತವಳ್ ಟೊನಿನ್ ತಾಚ್ಯಾ ಮುಕಮಳಾಕ್ ಪಳೆಲೆ೦.

"ದೇವ್ ತುಕಾ ಬರೆ೦ ಕರು೦ದಿ, ಪ್ರೊಫೆಸರ್," ತಾಚ್ಯಾ ಉತ್ರಾ೦ತ್ಲೊ ಮಾರ್ ಫಿಲಿಪಾಚೊ ಗಳೊ ಚಿರ್‍ಡಿಲಾಗ್ಲೊ.

"ತರ್ ಹಾ೦ವ್ ಗಳಾಯ್ ಕರಿನಾ," ಉಟೊನ್ ಉಬೊ ಜಾಲೊ ಜುಲಿಯನ್. ಉಪ್ರಾ೦ತ್ ಫೋನಾಸರ್‍ಶಿ೦ ವಚುನ್ ತೀನ್-ಚಾರ್ ನ೦ಬ್ರಾ೦ ತಾಣೆ ಘು೦ವ್ಡಾಯ್ಲಿ೦ ಆನಿ ತೆಗಾ೦-ಚವ್ಗಾಲಾಗಿ೦ ತೊ ಉಲಯ್ಲೊ. ಉಪ್ರಾ೦ತ್ ಆಪ್ಲ್ಯಾ ಬಸ್ಕೆಕ್ ಪಾಟಿ೦ ಆಯಿಲ್ಲ್ಯಾ ತಾಣೆ ಟೊನಿಲಾಗಿ೦ ಮ್ಹಳೆ೦. "ಸರ್‍ವ್ ತಯಾರ್ ಆಸಾ. ತು೦ವೆ೦ ಎಕ್ ಉತಾರ್ ಸಾ೦ಗ್ಲ್ಯಾರ್ ತೆ ತುಜೆ ಸಾ೦ಗಾತಾ ಯೆತೆಲೆ."

ಜಯ್ತೆವ೦ತ್ ಭಾವನಾನ್ ಟೊನಿ ಉಬೊ ಜಾಲೊ.

ತಾಚೆ ಸಾ೦ಗಾತಾ ಹೆರ್‌ಯಿ ಉಬೊ ಜಾಲೆ.

ವ್ಹೊರಾ೦ ಸಾ೦ಜೆಚಿ೦ ಸಾತ್ ಉತ್ರಾಲ್ಲಿ೦.

"ತರ್ ಹೊ ಕೂಟ್ ಫಾಸ್ಳೊವ್ಯಾ೦!" ತೊ ಮ್ಹಣಾಲೊ ಉನ್ಮತ್ ಆನ೦ದಾನ್. ಸರ್‍ವ್ ಮ್ಹಜ್ಯಾ ಹಾತಾ೦ನಿ ಸೊಡಾ. ಹಾ೦ವ್ ಹಾ೦ಗಾಸರ್ ಥೊಡೊ ವೇಳ್ ರಾವ್ತಾ೦... ಮ್ಹಜ್ಯಾ ಚಿ೦ತ್ಪಾಕ್ ಎಕಾ೦ತಾಚಿ ಗರ್‍ಜ್ ಆಸಾ."

ಸರ್‍ವಾ೦ನಿ ತಾಚೊ ಹಾತ್ ಹಾಲಯ್ಲೊ ಆನಿ ವಚು೦ಕ್ ತಯಾರ್ ಜಾಲೆ.

"ಹಾ೦ವೆ೦ಯಿ ವಚ್ಯೆತ್, ಪ್ರೊಫೆಸರ್?" ಸೊನಿಯಾಚೊ ತಾಳೊ ಆಯ್ಕೊನ್ ಶೂನ್ಯ್ ರಿತಿರ್ ತಾಕಾ ಪಳೆಲಾಗ್ಲೊ ಫಿಲಿಪ್.

"ತು೦ ಆನಿಕಿ ಹಾ೦ಗಾಸರ್?"

"ತು೦ವೆ೦ ರಾವ್ ಮ್ಹಣ್ ಸಾ೦ಗ್‌ಲ್ಲೆ೦ಯ್ ಪ್ರೊಫೆಸರ್."

"ಹಾ೦ವೆ೦? ಆತಾ೦...ಆತಾ೦...ತು೦ವೆ೦ ವಚ್ಯೆತ್."

ಸೊನಿಯಾಚೆ ದೊಳೆ ಟೊನಿಚೆರ್ ಖ೦ಚ್‌ಲ್ಲೆ. ಪುಣ್ ಟೊನಿ ತಾಕಾ ಪಳೆನಾತ್‌ಲ್ಲೊ. ವಾಸ್ತವ್‌ಜಾವ್ನ್ ತೊ ಹ್ಯಾ ಸ೦ಸರಾ೦ತ್ ನಾತ್‌ಲ್ಲೊ. ತಾಕಾ ತ್ಯಾ ಹೊಲಾ೦ತ್ ಸಾ೦ಡುನ್ ಹೆರ್ ಭಾಯ್ರ್ ಗೆಲ್ಯಾ ಉಪ್ರಾ೦ತ್ ಸೊನಿಯಾನ್ ಹಾಳ್ವಯೆನ್ ಮೆಟಾ೦ ಕಾಡ್ಲಿ೦.

ಕೊನ್ಫರೆನ್ಸ್ ಹೊಲಾಚೆ೦ ದಾರ್ ಪಡ್‌ಲ್ಲೊ ಆವಾಜ್ ಆಯ್ಕಾತೆಚ್ ಹಾತ್ ವಿಸ್ತಾರಾವ್ನ್ ಟೊನಿನ್ ಎಕ್ ಲಾ೦ಬ್ ಉಸ್ವಾಸ್ ಸೆವ್ಲೊ. ಚಿಕ್ಕೆಸೆ ವೊಡ್ಲ್ಯಾನ್೦ಚ್ ತೊ ಹಾಸ್ಲೊ. ವಿಕ್ಟರಾಚೆ೦ ನಾಸ್ ಆತಾ೦ ತಾಚ್ಯಾ ಹಾತಾ೦ನಿ ಆಸ್‌ಲ್ಲೆ೦.

ಕೆದಾಳಾ ಜಾಯ್, ತೆದಾಳಾ. ಜುಲಿಯನಾಚಿ೦ ಉತ್ರಾ ಘೊಳವ್ನ್ ತೊ ಹಾಸ್ಲೊ.

ಎಕಾ ಕಬಾಟಾ೦ತ್ ಲಿಪೊನ್ ಆಸ್‌ಲ್ಲಿ ವಿಸ್ಕೆಚಿ ಬೊತ್ಲ್ ತಾಣೆ ಭಾಯ್ರ್ ಕಾಡ್ಲಿ ಆನಿ ಗುಡ್ದಿ ಉಸವ್ನ್ ತಾ೦ತ್ಲೊ ಸ್ಪಿರಿಟ್ ತಾಳ್ಯಾ೦ತ್ ದೆ೦ವಯ್ಲೊ. ತೊ ಜಿವೊ ಸ್ಪಿರಿತ್ ತಾಳ್ಯಾ೦ತ್ ದೆ೦ವ್ತಾನಾ ತಾಕಾ ಬಾ೦ಧ್ಪಾಸ್ ಜಾಲೆ ಆನಿ ತಾಣೆ ಲಾಗ್ಸಿಲೆ೦ ಜನೆಲ್ ಉಗ್ತೆ೦ ಕೆಲೆ೦. ಪಾವ್ಸಾಚ್ಯೊ ಹುತಾವಳಿ ಜನೆಲಾ೦ತ್ಲ್ಯಾನ್ ಭಿತರ್ ರಿಗ್ಲ್ಯೊ ಆನಿ ತಾಚ್ಯಾ ಮುಕಮಳಾರ್ ಶಿ೦ವರ್ ಪಡ್ಲೊ. ತ್ಯಾ ತುಫಾನಾಚ್ಯಾಕಿ ಚಡ್ ವ್ಹಡ್ಲ್ಯಾ ಆವಾಜಾನ್ ಹಾಸ್ಚೆ೦ ಪ್ರಯತನ್ ಕರಿಲಾಗ್ಲೊ. ’ತುಕಾಯಿ ಜಾಯ್?’ ಮ್ಹಣ್ ವಿಚಾರ್‍ಚ್ಯಾ ಜಿನ್ಸಾರ್ ತಾಣೆ ಬೊತ್ಲ್ ಜನೆಲಾ೦ತ್ಲ್ಯಾನ್ ಭಾಯ್ರ್ ಧರ್‍ಲಿ. ತಾಚೊಚ್ಚ್ ಹಾತ್ ಭಿಜ್ಲೊ. ಪರತ್ ಎಕ್ ಘೊಟ್ ಮಾರುನ್ ತೊ ಹೊಲಾಚ್ಯಾ ಮೆಜಾ ಸರ್‍ಶಿ೦ ಆಯ್ಲೊ. ಬೊತ್ಲ್ ತಾಣೆ ಮೆಜಾರ್ ದವರ್‍ಲಿ.

’ತು೦ವೆ೦ ಎಕ್ ಉತಾರ್ ಸಾ೦ಗ್ಲ್ಯಾರ್ ತೆ ತುಜೆಸ೦ಗಿ೦ ಯೆತೆಲೆ.’

"ಕೆದಳಾಯಿ..ಆಜ್‌ಚ್...ಫಾಲ್ಯಾ೦...ಆಜ್‌ಚ್..."

ತಾಚಿ ಕೂಡ್ ಕಾ೦ಪ್ಲಿ. ಆಜ್‌ಚ್...ಪಾವ್ಸಾಳಿ ರಾತ್...ಹೆಚ್ ರಾತಿ೦...ಅಧಿಕಾರ್ ಹಾತಾ೦ತ್ ಆಸ್ತಾನಾ ಘಳಾಯ್ ಕಸಲಿ?

ಸಿಗ್ರೆಟ್ ಪೆಟ೦ವ್ಚೊ ತಾಚೊ ಹಾತ್ ಜೊರಾನ್ ಕಾ೦ಪ್ತಾಲೊ.

"ಆಜ್‌ಚ್ಚ್...ನಿದೆ೦ತ್ಲ್ಯಾ ವಿಕ್ಟರಾಕ್ ಉಟವ್ನ್ ಕೋಡ್ತಿಚಿ ಹುಕುಮ್ ತಾಕಾ ದಾಕವ್ನ್, ಪ್ರೆಸ್ಸಾಸರ್‍ಶಿ೦ ವಚುನ್ ಮ್ಹೊರ್ ದಾ೦ಬ್ತಾನಾ ವಿಕ್ಟರಾಚೆ೦ ಮುಕಮಳ್ ಸಲ್ವಣೆನ್ ಕಶೆ೦ ವೊಳಾತ್?" ತೊ ಅಸ್ಕತ್ ಹಾಸೊ ಹಾಸ್ಲೊ ಆನಿ ಪರತ್ ಆಮಾಲ್ ಘೊಟಿಲಾಗ್ಲೊ. ತಾಚ್ಯಾ ಶಿರಾ೦ಚೆರ್ ಆಮಾಲಾಚೊ ಪ್ರಭಾವ್ ಚಡೊ೦ಕ್ ಸುರು ಜಾಲ್ಲೊ. ಪರ್‍ತ್ಯಾನ್ ಎಕ್ ಘೊಟ್ ಮಾರುನ್ ತಾಣೆ ತಿ ಬೊತ್ಲ್ ಪಾಟಿ೦ ದವರ್‍ಲಿ.

ಆತಾ೦ ತಾಚ್ಯಾ ಶಿರಾ೦ನಿ ಜಾಯ್‌ತಿತ್ಲೆ೦ ಧಯ್ರ್ ಚರ್‍ತಾಲೆ೦.

"ಆಯ್ಚೆಚ್ ರಾತಿ೦..." ಆಪ್ಣಾಯಿತ್ಲ್ಯಾಕ್ ತೊ ಮ್ಹಣಾಲೊ.

"ಆಯ್ಚೆಚ್ ರಾತಿ೦..." ತಾಚೊ ತಾಳೊ ಬೊಳ್ ಜಾಲೊ.

"ಆಯ್ಚೆಚ್ ರಾತಿ೦..." ತಾಣೆ ಖಿಳ೦ಚ್ ಮಾರ್‍ಲಿ. ತಾಚೊ ಸಗ್ಳೊ ಜೀವ್ ಕಾಣ್ಸಿರ್‍ಲೊ. ಆಮಾಲಾಚಿ ವೊಡ್ಣಿ ತಾಕಾ ಪರತ್ ಆಯ್ಲಿ ತರಿ ತೊ ಪಿಯೆಲೊ ನಾ. "ಮ್ಹಾಕಾ ಧಯ್ರ್ ಆಸಾ, ಮ್ಹಾಕಾ ಧಯ್ರ್ ಆಸಾ" ತೊ ಘುಣ್ಗುಣ್ಲೊ. ಪುಣ್ ಉಪ್ರಾ೦ತ್ ತೊ ಫೋನಾಶರ್‍ಶಿ೦ ವೆತಾನಾ ವ್ಹೊರಾ೦ ರಾತಿಚಿ೦ ಆಟ್ ಉತ್ರಾಲ್ಲಿ೦.

"ಆಜ್‌ಚ್ ರಾತಿ೦ ಇಕ್ರಾ ವ್ಹೊರಾಕ್!" ತೊ ಕೋಡ್ತಿಚ್ಯಾ ಮನ್ಶಾಕ್ ಸಾ೦ಗಾಲಾಗ್ಲೊ. "ಜೀಪ್ ತಯಾರ್ ದವರ್," ಪೊಲಿಸ್ ಅಧಿಕಾರಿಕ್‌ಯಿ ತಾಣೆ ಕಳಯ್ಲೆ೦.

ಫೊನಾಚೆ೦ ರಿಸೀವರ್ ತಾಣೆ ಹಾಳ್ವಯೆನ್ ಪಾಟಿ೦ ದವರ್‍ಲೆ೦.

’ಕ್ಲಿಕ್’ ಹ್ಯಾ ಆವಾಜಾ ಬರಬರ್ ಆನ್ಯೇಕ್ ಆವಾಜ್ ತಾಕಾ ಆಯ್ಕಾಲೊ.

ಕೊನ್ಫರೆನ್ಸ್ ಹೊಲಾಚೆ೦ ದಾರ್ ಉಗ್ತೆ೦ ಜಾಲೆ೦.

ಸೊನಿಯಾ ಭಿತರ್ ಆಯ್ಲೆ೦.

ತಾಚ್ಯಾ ಮುಕಮಳಾವಯ್ಲೆ೦ ಅಪರಿಚಿತ್ ಲಕ್ಶಣ್ ಪಳೆವ್ನ್ ಟೊನಿಚೆ೦ ಮುಕಮಳ್ ಸಾವ್ಳೆಲೆ೦. "ತು೦ ಆನಿಕಿ ಘರಾ ವಚು೦ಕ್‌ನಾ೦ಯ್?" ತಾಣೆ ವಿಚಾರ್‍ಲೆ೦. ಪುಣ್ ಸೊನಿಯಾನ್ ಜಾಪ್ ದಿಲಿನಾ. ಮೆಟಾ೦ ಕಾಡಿತ್ ತೆ೦ ತಾಚ್ಯಾ ಸಾಮ್ಕಾರ್ ಉಬೆ೦ ಜಾಲೆ೦. ಪ್ರಯತ್ನ್ ಕರುನ್ ತೊ ಹಾಸ್ಲೊ.

"ಡಾರ್‍ಲಿ೦ಗ್!" ತೊ ಗಾಗೆಲೊ. "ಆಜ್ ತುಜೊ ಜಿನೊಸ್ ಪಳೆತಾನಾ ತುಕಾ ಮ್ಹಜಿ ಎಕ್ದಂ ಗರ್‍ಜ್ ಆಸಾ ಮ್ಹಣ್ ಮ್ಹಾಕಾ ಭೊಗ್ತಾ. ಪುಣ್ ಡಾರ್‍ಲಿ೦ಗ್..." ತಾಚೆ೦ ಭುಜ್ ತಾಣೆ ಪೊಶೆಲೆ೦. "ಮ್ಹಾಕಾ ಆಜ್ ವೇಳ್ ನಾ."

ಸೊನಿಯಾನ್ ತಾಚ್ಯಾ ಮುಕಮಳಾಕ್ ಪಳೆಲೆ೦.

ತಾಚಿ ತಿ ದೀಶ್ಟ್ ತಡ್ವು೦ಕ್ ತಾ೦ಕಾನಾಸ್ತಾ೦ ತೊ ಉಸ್ಮಡ್ಲೊ.

"ತಶೆ೦ ಕಿತೆ೦ ಪಳೆತಾಯ್?"

"ತುಜೆ೦ ವಿಣ್ಗೆ೦ಪಣ್!" ಛಾಟಿಯೆಪರಿ೦ ಸೊನಿಯಾಚಿ೦ ಉತ್ರಾ೦ ತಾಚ್ಯಾ ಕಾನಾ೦ಕ್ ರೆವ್ಡಾಲಿ೦. "ತುಜೆ೦ ಪೊಳ್ಕುರೆ೦ ವಿಣ್ಗೆ೦ಪಣ್." ತಾಣೆ೦ ಕುಡ್ಸಿಲೆ೦.

"ತು೦ ಮತಿಭೃಶ್ಟ್ ಜಾಲಾ೦ಯ್!" ತೊ ಮ್ಹಣಾಲೊ. ಆಪ್ಲ್ಯಾ ಕೆಸಾ೦ ಮುಳಾ೦ನಿ ಘಾಮ್ ಉದೆವ್ನ್ ಯೆ೦ವ್ಚೊ ತಾಕಾ ಕಳಿತ್ ಜಾಲೆ೦.

"ವಿಕ್ಟರಾಕ್ ನಾಸ್ ಕರು೦ಕ್ ತು೦ವೆ೦ ತುಜೊ ಕೀಳ್ ಉಪಾಯ್ ಆಜ್‌ಚ್ ಜ್ಯಾರಿ ಕರ್‍ಚೊ ಉದ್ದೇಶ್...."

"ತರ್ ತು೦ವೆ೦ ಆಯ್ಕಾಲೆ೦ಯ್?" ತೊ ಆಕಾ೦ತೋನ್ ಫೋನಾಕ್ ಪಳೆಲಾಗ್ಲೊ.

"ಸಭಾರ್ ತೇ೦ಪ್‌ಥಾವ್ನ್ ಹಾ೦ವೆ೦ ಸಭಾರ್ ಆಯ್ಕಾಲಾ೦!" ತೆ೦ ಮ್ಹಣಾಲೆ೦. "ಪುಣ್ ಮ್ಹಾಕಾ ಸಮ್ಜಾಲ್ಲೆ೦ ಆಜ್‌ಚ್ಚ್."

"ತು೦ ಆಮ್ಚ್ಯಾ ಮದ್ಲೆ೦ಚ್..."

"ಹು೦! ಹಾ೦ವ್ ತುಜಿ೦ಚ್ ಮ್ಹಣ್ ಕಿತ್ಯಾಕ್ ಮ್ಹಣಾನಾ೦ಯ್?" ಸೊನಿಯಾನ್ ಆ೦ಬೊಟ್ ತಾಳ್ಯಾನ್ ವಿಚಾರ್‍ಲೆ೦. "ತು೦ ಮ್ಹಜೊ ಮೋಗ್ ಕರ್‍ತಾಯ್ ನ್ಹಯ್?""

"ತುಜ್ಯೊ ನ೦ಜ್ಜ್ಯೊ ಆಯ್ಕೊ೦ಕ್ ಮ್ಹಾಕಾ ಫುರ್‍ಸತ್ ನಾ," ಚುಕಾರಿ ಮಾರ್‍ಚೆ೦ ಪ್ರಯತನ್ ಕೆಲೆ೦ ಟೊನಿನ್. ಕಸಲೆ೦ಗಿ ಯೋಜನ್ ತಯಾರ್ ಕರುನ್ ಸೊನಿಯಾ ಆಯ್ಲಾ೦ ಮ್ಹಳ್ಳೊ ಅ೦ದಾಜ್ ತಾಕಾ ಜಾ೦ವ್ಕ್ ಸುರು ಜಾಲ್ಲೊ. "ಜಾಯ್ ಜಾಲ್ಲ್ಯಾ ವೆಳಾರ್ ತು೦ವೆ೦ ಮ್ಹಾಕಾ ತುಜಿ ಕೂಡ್ ದಿಲ್ಯಾಯ್ ಆನಿ ಹಾ೦ವೆ೦ಯಿ ಕಸಲೆ೦ಚ್ ಸುಖ್ ತುಕಾ ಇನ್ಕಾರ್ ಕರು೦ಕ್ ನಾ."

"ಸಹಜ್ ಜಾವ್ನ್!" ತೆ೦ ಮ್ಹಣಾಲೆ೦. "ಹಾ೦ವ್ ಸಾಧಿ ಚಲಿ! ತಿತ್ಲೆ೦ಚ್ ನ್ಹಯ್...ತು೦ ಎಕ್ ನಿಸ್ವಾರ್‍ಥಿ ಚಲೊ. ಮ್ಹಜೆ ತಸಲಿ ಸಾಧಿ ಚಲಿ ತುಜೆಲಾಗಿ೦ ಕಾ೦ಯ್ ತರಿ ವಿಚಾರಿತ್ ತರ್ ತು೦ ಇನ್ಕಾರ್ ಕರಿನಾ೦ಯ್."

"ತುಕಾ ಕಿತೆ೦ ಜಾಯ್ ಸೊನಿಯಾ?" ತೊ ಬೊಬಾಟ್ಲೊ. "ಆಜ್ ತುಜಿ ಕೂಡ್ ಸ೦ಯಮಾ೦ತ್ ರಾವೊ೦ಕ್ ಸಕಾನಾ ತರ್ ಹಾ೦ವ್ ಜವಬ್ದಾರ್ ನ್ಹಯ್. ತುಜೆ ಕುಡಿ೦ತ್ಲೊ ಉಜೊ ಹಾ೦ವೆ೦ ಪೆಟಯಿಲ್ಲೊ ನ್ಹಯ್."

"ಆಯ್ಚೆ ರಾತಿ೦ ತುಕಾ ಫುರ್‍ಸತ್ ಕಿತ್ಯಾಕ್ ನಾ, ಪೊಳ್ಕುರ್‍ಯಾ? ವಿಕ್ಟರಾಕ್ ನಾಸ್ ಕರು೦ಕ್ ಆಸಾ? ತಾಚ್ಯಾ ನಾಸಾಚೆ೦ ಮಹತ್ವ್ ಹ್ಯಾ ಮ್ಹಜ್ಯಾ ಉನ್ಮತ್ತ್ ಕುಡಿಚ್ಯಾಕಿ ಚಡ್ ಜಾವ್ನ್‌ಆಸಾ?"

"ಸೊನಿಯಾ," ತೊ ಸುಕೊ ಹಾಸೊ ಹಾಸ್ಲೊ. "ತುಜ್ಯಾ ಸೊಭಾಯೆಚೆರ್ ತುಕಾ ಅತಿ ಚಡ್ ಪಾತಿಯೆಣಿ ಆಸಾ. ಹ್ಯಾ ಗವ್ರವಾಚ್ಯಾ ಸ್ಥಾನಾರ್ ಹಾ೦ವ್ ಆಸ್ತಾ೦ ಕಿತ್ಲಿ೦ ಚೆಡ್ವಾ೦ ಮ್ಹಾಕಾ ಆಶೆತಾತ್ ತೆ೦ ತು೦ ಜಾಣಾ೦ಯ್? ತಾ೦ಚೆ ಪಯ್ಕಿ ಸಭಾರಾ೦ಕ್ ಹಾ೦ವೆ೦ ವಿ೦ಚ್ಲಾ೦. ಎಕಾ ದಿಸಾಕ್, ದೋನ್ ರಾತಿ೦ಕ್ ತಾ೦ಚ್ಯೊ ಕುಡಿ ಮ್ಹಾಕಾ ರುಚ್ತಾತ್ ಪುಣ್ ಉಪ್ರಾ೦ತ್...ಹು೦...ಪಳೆ೦ವ್ಕ್ ಗೆಲ್ಯಾರ್ ತುಜೆಚ್ಚ್ ಕುಡಿಕ್ ಹಾ೦ವೆ೦ ಚಡ್ ಗಮನ್ ದಿಲ್ಲೆ೦."

"ಆತಾ೦ ತು೦ ಮ್ಹಾಕಾ ಕಾ೦ಟಾಳ್ತಾಯ್?" ಸೊನಿಯಾನ್ ವಿಚಾರ್‍ಲೆ೦. "ತ್ಯೆ ರಾತಿ೦ ಹಾ೦ವ್ ತುಜ್ಯಾ ಹೊಸ್ಟೆಲಾಕ್ ಆಯಿಲ್ಲೆವೆಳಿ೦ ತು೦ ಭಿಯೆಲ್ಲೊ, ಘಾಮೆಲ್ಲೊಯ್ ಪುಣ್ ತುಜೆ೦ ಪುರುಶತ್ವ್ ಹಾ೦ವೆ೦ಚ್ ಜಾಗೆ೦ ಕೆಲ್ಲೆ೦. ತ್ಯೆ ರಾತಿ೦ ಮ್ಹಜ್ಯಾ ಕುಡಿಚ್ಯಾ ಹರ್‍ಯೇಕಾ ಇ೦ಚಾಚೆರ್ ತು೦ ಮೊಗಾರ್ ಪಡ್‌ಲ್ಲೊಯ್. ಮೊಜ್ಯಾ ಕುಡಿವಯ್ಲೆ ಹರ್‍ಯೇಕ್ ಕಾಳೆ ತಿಬೆ ತುಕಾ ನೆಕೆತ್ರಾಪರಿ೦ ಸೊಬ್‌ಲ್ಲೆ...ಹಜಾರ್ ಆನಿ ಎಕ್ ಪಾವ್ಟಿ೦ ’ಹಾ೦ವ್ ತುಜೊ ಮೋಗ್ ಕರ್‍ತಾ೦ ಸೊನಿಯಾ’ ಮ್ಹಣ್ ತು೦ವೆ೦ ಮ್ಹಳ್ಳೆ೦ಯ್."

"ವ್ಹಯ್!" ಟೊನಿ ಉಚಾ೦ಬಳ್ ಜಾಲೊ. "ತ್ಯಾ ಘಡಿತಾಕ್ ಆನಿ ವಿಕ್ಟರಾಚೆರ್ ಯೆ೦ವ್ಚೆ ಸಲ್ವಣೆಕ್ ಕಸಲೊ ಸ೦ಬ೦ಧ್?"

"ತು೦ಚ್ ಚಿ೦ತುನ್ ಪಳೆ."

"ಮತ್ಲಬ್?"

"ಹಾ೦ವ್ ಸಾಧಿ ಚಲಿ ವ್ಹಯ್, ಕಾಮುಕಿ ವ್ಹಯ್....ಪುಣ್ ತು೦ ಇತ್ಲೊ ಪೊಳ್ಕುರೊ ಮ್ಹಣ್ ಹಾ೦ವ್ ನೆಣಾಸ್ಲಿ೦. ವಿಕ್ಟರಾಕ್ ಸಲ್ವಯ್ತಾ೦ ಮ್ಹಣ್ ತುಜಿಚ್ಚ್ ಸಲ್ವಣ್ ಇತ್ಲ್ಯಾ ಉಗ್ತ್ಯಾನ್ ಕಿತ್ಯಾಕ್ ಮಾ೦ದುನ್ ಘೆತಾಯ್?"

ಟೊನಿಚೆ೦ ಥಾಪಾಡ್ ಸೊನಿಯಾಚ್ಯಾ ಕಾನ್ಸುಲಾರ್ ಬಸ್ಲೆ೦.

ತೆ೦, ರಾವ್‌ಲ್ಲೆ ಕಡೆನ್‌ಥಾವ್ನ್ ಕುಸ್ಕುಟ್ ಹಾಲ್ಲೆ೦ ನಾ.

"ತರ್ ವಚ್ ಆನಿ ತಾಚೆಚ್ಚ್ ಸಾ೦ಗಾತಾ ನಿದೆ!" ತೊ ಮ್ಹಣಾಲೊ. "ಹಾ೦ಗಾಸರ್ ಕಿತ್ಯಾಕ್ ಆಯ್ಲಾ೦ಯ್?"

"ತುಕಾ ಎಕ್ ಸ೦ಗತ್ ಕಳ೦ವ್ಕ್ ಆಯ್ಲ್ಯಾ೦: ವಿಕ್ಟರಾಕ್ ಸಲ್ವ೦ವ್ಕ್ ತು೦ ಸಕ್ಚೊನಾ೦ಯ್!"

"ತು೦ ಮತಿಭೃಶ್ಟ್ ಜಾಲಾ೦ಯ್ ಮ್ಹಣ್ಚ್ಯಾಕ್ ಅಡ್ಕಳ್ ನಾ." ತೊ ಮ್ಹಣಾಲೊ. "ಆತಾ೦ ತುಜೆ ಕುಡಿವಿಶಾ೦ತ್ ಉಲಯ್ತಾಯ್, ಆತಾ೦ ಮೊಗಾ ವಿಶಾ೦ತ್ ಉಲಯ್ತಾಯ್. ತುಜ್ಯಾ ಎಪಾರ್‍ಟ್‌ಮೆ೦ಟಾಕ್ ವಚ್ ಆನಿ ನಿದೆ. ಫಾಲ್ಯಾ ಸಕಾಳಿ೦ ತು೦ ಉಟ್ತಾನಾ ಹ್ಯಾ ಎಸೊಸಿಯೆಶನಾಚ್ಯಾ ಅಕ೦ಡ್ ಜಯ್ತಾಚಿ ಖಬರ್ ತುಕಾ ರಾಕೊನ್ ಆಸ್ತೆಲಿ. ತ್ಯಾ ನ೦ತರ್...ಕಿತ್ಲ್ಯೊ ರಾತಿ ತುಕಾ ಜಾಯ್?"

ಸೊನಿಯಾ ರಡ್ಲೆ೦.

"ತು೦ ಮ್ಹಜೊ ಮೋಗ್ ಕರ್‍ತಾಯ್, ಟೊನಿ?" ತೆ೦ ಅವ್ಚಿತ್ ವಿಚಾರಿಲಾಗ್ಲೆ೦.

ಟೊನಿ ಭಿಯೆಲೊ.

"ಮ್ಹಾಕಾ ತುಜಿ ಪತಿಣ್ ಕರುನ್ ಘೆ೦ವ್ಕ್ ತು೦ ತಯಾರ್ ಆಸಾಯ್?"

ಟೊನಿಚ್ಯಾ ಆ೦ಗಾ೦ತ್ಲ್ಯಾನ್ ಶಿರ್‍ಶಿರೊ ಧಾ೦ವ್ಲೊ.

"ಕಿತೆ೦ ಉಲಯ್ತಾಯ್, ಸೊನಿಯಾ?" ತೊ ಗಾಗೆಲೊ. "ಹಾ೦ವ್ ಕೋಣ್ ಆನಿ ಖ೦ಯ್ ಆನಿ ತು೦ ಕೋಣ್? ತು೦ ತ್ಯಾ ಫಿರ್‍ಕಿಸ್ ನೊರ್‍ಮನ್ ತಿಯೊದೊರಾಚಿ ಧುವ್. ಆಮ್ಚೊ ಸ೦ಬ೦ಧ್ ಫಕತ್ ದೈಹಿಕ್. ತುಕಾ ಮ್ಹಜಿ ಕೂಡ್ ಜಾಯ್ ಆನಿ ಮ್ಹಾಕಾ ತುಜಿ. ಹಾ೦ತು೦ ಲಗ್ನಾಚೆ೦ ಸವಾಲಚ್ ಉದೆನಾ. ತೊ ವಿಕ್ಟರ್ ಲಗ್ನ್ ಜಾಲಾಗಿ?"

"ತಾಕಾ ಆನಿ ತುಕಾ ಸರ್ ಕರಿನಾಕಾ!" ತೆ೦ ಬೊಬಾಟ್ಲೆ೦. "ತಾಣೆ ಚಲಿಯೊ ಬದ್ಲು೦ಕ್‌ನಾ೦ತ್."

"ತಾಕಾ ತಶೆ೦ ಕರ್‍ಚಿ ತಾ೦ಕ್ ನಾ," ತೊ ಹಾಸತ್ತ್ ಮ್ಹಣಾಲೊ. "ತೊಯಿ ಪಿಸೊ ಆನಿ ತೆ೦ ಹೆಲ್ಗಾಯಿ ಪಿಶೆ೦. ತುಕಾ ಕಿತೆ೦ ತಾ೦ಚಿ ಭಿರ್‍ಮತ್ ಉಟ್ಲ್ಯಾ? ತಾ೦ಚಿ ವಕಲಾತ್ ಕರು೦ಕ್ ಆಯ್ಲಾ೦ಯ್?"

ಸೊನಿಯಾನ್ ಜಾಪ್ ದಿಲಿ ನಾ.

ತಾಚೆ೦ ಮುಕಮಳ್ ಥೊಡ್ಯಾ ವೆಳಾ ಪರ್‌ಯಾ೦ತ್ ಬಾಗ್ವೊನ್ ರಾವ್ಲೆ೦.

ಉಪ್ರಾ೦ತ್ಲೆ೦ ಎಕಾ ಖಿಣಾ ಭಿತರ್ ಘಡೊನ್ ಗೆಲೆ೦.

ಆಪ್ಲ್ಯಾ ಮುಕಮಳಾ ಸ೦ಗಿ೦ ಸೊನಿಯಾನ್ ಆಪ್ಲೊ ಹಾತ್‌ಯಿ ಉಕಲ್ಲೊ ಆನಿ ಟೊನಿಕ್ ಥಾಪ್ಡಾಯ್ಲೆ೦.

"ತು೦ವೆ೦ ಮ್ಹಜೆರ್ ಹಾತ್ ಉಕಲ್ಲೊಯ್!" ತೊ ಮ್ಹಣಾಲೊ. "ತುಜೆ೦ ಕಾಮ್ ಉಸ್ಳಾ೦ವ್ಚಿ ಶಾಥಿ ಮ್ಹಾಕಾ ಆಸಾ."

"ಹೆರ್ ಕಸಲಿ ಶಾಥಿ ತುಕಾ ಆಸಾ?"

"ಸೊನಿಯಾ!" ತೊ ಬೊಬಾಟ್ಲೊ. "ಹಾ೦ವ್ ನಾತ್‌ಲ್ಲೊ ತರ್ ತುಜಿ ಗತ್ ಕಸಲಿ ಜಾತಿ ಮ್ಹಣ್ ಚೀ೦ತ್."

"ತೆ೦ ಮ್ಹಾಕಾ ಗರ್‍ಜೆಚೆ೦ ನ್ಹಯ್," ತೆ೦ ಮ್ಹಣಾಲೆ೦. "ಹಿ ಮ್ಹಜಿ ಕೂಡ್ ನಾತ್‌ಲ್ಲಿ ತರ್ ತು೦ ಮ್ಹಾಕಾ ಗುಮಾನ್ ಕರ್‍ತೊಯ್?"

"ತೆ೦ ಮ್ಹಾಕಾ ಗರ್‍ಜೆಚೆ೦ ನ್ಹಯ್"

"ಬರೆ೦ ತರ್, ಆಮಿ೦ ದೊಗಾ೦ಯಿ ಎಕಾಚ್ಚ್ ದೊಣಿಚೆರ್ ಆಸಾ೦ವ್."

"ಮ್ಹಾಕಾ ಆನಿ ತುಕಾ ಕಸಲೊಚ್ ಸ೦ಬ೦ಧ್ ನಾ."

"ಶಭಾಸ್!" ಹೆ೦ಚ್ ಆಯ್ಕೊ೦ಕ್ ಹಾ೦ವ್ ಆಯಿಲ್ಲಿ೦." ತೆ೦ ಮ್ಹಣಾಲೆ೦. "ಸ೦ಸರಾ೦ತ್ ಮ್ಹಾಕಾ ಕಸಲೊಚ್ ಉದ್ದೇಶ್‌ನಾತ್‌ಲ್ಲೊ." ಸೊನಿಯಾನ್ ವಿಶಯ್ ಬದ್ಲಿಲೊ. "ವಾಡೊನ್ ಯೆತಾನಾ ಮ್ಹಜೆಥ೦ಯ್ ಜಾಗೃತ್ ಜಾಲ್ಲೆ೦ ತರ್‍ನಾಟ್‌ಪಣ್ ಆನಿ ಕಾಮ್, ಸರ್‍ವಚ್ ಮ್ಹಣ್ ಹಾ೦ವೆ೦ ಲೆಕ್ಲೆ೦ ಆನಿ ಮ್ಹಜಿ ಕೂಡ್ ಗಳ್ಸಿಲಿ. ಆತಾ೦ ಮ್ಹಜೆ ದೊಳೆ ಉಗ್ತೆ ಜಾಲ್ಯಾತ್ ಪುಣ್ ಖರ್‍ಯಾ ಜಿಣಿಯೆಕ್ ಪಾಟಿ೦ ವಚು೦ಕ್ ವೇಳ್ ಉತ್ರಾಲಾ ಮ್ಹಣ್ ಹಾ೦ವ್ ಜಾಣಾ೦. ಮ್ಹಜೆ೦ಚ್ ನಾಸ್ ಮ್ಹಜೆಚ್‌ವರ್‍ವಿ೦ ಜಾ೦ವ್ಚ್ಯಾ ಫುಡೆ೦...." ತಾಣೆ ಆಪ್ಲೊ ರೇನ್‌ಕೋಟ್ ಶಿರ್‍ಕಾಯ್ಲೊ.

ತೆ೦ ವೆತಾ ಮ್ಹಣ್ ಟೊನಿಕ್ ಕಳಿತ್ ಜಾಲೆ೦.

"ವೆಚ್ಯಾ ಫುಡೆ೦," ತೆ೦ ಪರತ್ ಮ್ಹಣಾಲೆ೦. "ಮಿಸ್ಟರ್ ಟೊನಿ ಡೇವಿಡ್, ತುಜ್ಯಾ ಜಯ್ತೆವ೦ತ್ ಸಲ್ವಣೆಚ್ಯಾ ಶಿಕರಾಚೆರ್ ಮ್ಹಜೆ ರೆಕಾದ್ ಸ್ವೀಕರ್‍ಸಿ."

ಆನಿ ತಾಣೆ ಟೊನಿಚ್ಯಾ ಮುಕಮಳಾಕ್ ಥುಕ್ಲೆ೦.

ತೆ೦ ವೆತಾ ಪರ್‌ಯಾ೦ತ್ ಆನಿ ಉಪ್ರಾ೦ತ್‌ಯಿ ತೊ ಸ್ತಬ್ದ್ ಉಬೊ ಜಾಲೊ. ತಾಚ್ಯಾ ತೊ೦ಡಾರ್ ಆಸ್‌ಲ್ಲಿ ಸೊನಿಯಾಚಿ ಥಿ೦ಪಿ ಉಜಳ್ತಲಿ. ತಿ ಪುಸುನ್ ಕಾಡ್ಚೆ೦ ಪ್ರಯತನ್ ತಾಣೆ ಕೆಲೆ೦ ನಾ. ತಾಚಿ ಮೋತ್ ಕಾಮ್ ಕರ್‍ತಾಲಿ.

’ವಿಕ್ಟರಾಕ್ ತು೦ ನಾಸ್ ಕರು೦ಕ್ ಸಕ್ಚೊನಾ೦ಯ್!’ ಸೊನಿಯಾಚಿ೦ ಉತ್ರಾ೦ ತಾಚ್ಯಾ ಮತಿಚೆ ಒಣೊದಿಕ್ ಖೊಟಾಯ್ತಾಲಿ೦.

ಸೊನಿಯಾಕ್ ಟೊನಿಚ್ಯಾ ನಿರ್‍ದಾರಾ ವಿಶಾ೦ತ್ ಕಳಿತ್ ಜಾಲ್ಲೆ೦.

ವಿಕ್ಟರಾಕ್ ತೆ೦ ಕಳಿತ್ ಕರಿತ್ ತರ್?

ಕೀರಾಚೊ ಉಡಾಸ್ ತಾಕಾ ಆಯ್ಲೊ.

"ನಾ!" ತಾಣೆ ಕಿಳ೦ಚ್ ಮಾರ್‍ಲಿ.

ಫೋನಾಲಾಗಿ೦ ತೊ ಧಾ೦ವ್ಲೊ.

ಆಪ್ಲೆ೦ ಯೋಜನ್ ಪಾಟಿ೦ ಘಾಲ್ಚೆ ಖಾತಿರ್ ತಾಣೆ ತೆ೦ ಉಕಲ್ಲೆ೦. ಆನಿ ತಿತ್ಲ್ಯಾರ್--

ತಾಕಾ ಎಕ್ ಉಪಾವ್ ಝಳ್ಕಾಲೊ. ಸೊನಿಯಾ, ವಿಕ್ಟರಾಸರ್‍ಶಿ೦ ವೆತಾ ಮ್ಹಣ್ ತಾಕಾ ಖಚಿತ್ ಕಳಿತ್ ಜಾಲ್ಲೆ೦. ಆಪ್ಣಾಕ್ ಝಳ್ಕಲ್ಲ್ಯಾ ಉಪಾವಾಚ್ಯಾ ಆನ೦ದಾನ್ ತಾಣೆ ವೋ೦ಟ್ ಚಾಬ್ಲೆ. ಸೊನಿಯಾಚೊ ಸ೦ಬ೦ಧ್ ತಾಕಾ ಆತಾ೦ ಗೊಮ್ಟ್ಯಾ ಪರ್‌ಯಾ೦ತ್ ಆಯಿಲ್ಲೊ.

ವಿಕ್ಟರಾಚಿ೦ ಜಯ್ತಾ೦ ತಾಕಾ ಕಳಿತ್ ಆಸ್‌ಲ್ಲಿ೦.

ಆಪುಣ್ ಸಲ್ವಲಾ೦ ಮ್ಹಣ್‌ಯಿ ತಾಕಾ ಕಳಿತ್ ಆಸ್‌ಲ್ಲೆ೦.

ಪುಣ್--

ವ್ಹಯ್, ಪುಣ್...

ರಿಸೀವರ್ ಕಾನಾಕ್ ಲಾವ್ನ್ ತಾಣೆ ಎಕಾ ನಾಯ್ಟ್ ಕ್ಲಬ್ಬಾಚೆ೦ ನ೦ಬರ್ ಲಾಗಯ್ಲೆ೦ ಆನಿ ಎಕಾ ಕರಾಳ್ ವೆಕ್ತಿಲಾಗಿ೦ ತೊ ಮಟ್ವ್ಯಾನ್ ಉಲಯ್ಲೊ.

...ಮುಂದರ್‍ಸಿಲಾಂ...

Tags: Edwin JF Dsouza, Konkani Novel, Vasu Valencia, Konkani, Konkani, Mangalore, Mangalorean, Mother Tongue

From around the world

"ಹಾಂವ್ ಜಿಯೆತಾಂ" - "ಸಾಧಿ ಚಲಿ"

2 Comment/s.

Post your comments

ಧಾ೦ವ್ ವಿಕ್ಟರ್, ಧಾ೦ವ್!

ಸ್ವಾರ್ಥ್, ರೂಣ್ ಆನಿ ದಾವೊ

ಗುಪಿತ್ ವರ್‍ಸಾ೦

ಜಿವೊ ಮನಿಸ್

ತ್ರಿಕೋನ್

ತ್ರಾಸಿಚಿ೦ ಭುಜಾ೦

ಪೃಥ್ವಿಚೊ ಪುತ್ರ್

ವೆಭಿಚಾರಿ-ವೆಭಿಚಾರಿಣ್

ಜುದಾಸ್!

ಮನಿಸ್

ರೆಕಾದ್

ಕರ್‍ನಿ

ಝುಜಾ-ಥಳ್

ಮಿಸ್ಟರ್ ವಿಕ್ಟರ್

ಆಮಾಸ್

"ಸಾಧಿ ಚಲಿ"

ಕೀರ್

ಜಿಣಿಯೆಚೆ೦ ಭುರ್‍ಜ್

Connect

Our Address
Mangalore

Our Address
Udupi

Our Address
Dubai