:: ಮಾಯ್ ಭಾಸ್

ತಿಸ್ರೊ ಗೃ೦ತ್ - "....ಆನಿ ಹಾ೦ವ್ ಜಿಯೆತಾ೦"

ಅವಸ್ವರ್ ಪಂದ್ರಾ-ವೊ:

ಥೊಡೊ ತೇ೦ಪ್ ಪರ್ಯಾ೦ತ್ ಕಸಲೆ೦ಚ್ ಘಡ್ಲೆ೦ ನಾ.

’ಮನಿಸ್’ ಪತ್ರಾಚಿ೦ ಆನಿ ಪ್ರೆಸ್ಸಾಚಿ೦ ಸರ್ವ್ ಕಾಮಾ೦ ಕಸಲ್ಯಾಚ್ ಅಡ್ಕಳಿ ವಿಣೆ ಚಲೊನ್ ವೆತಾಲಿ೦. ಪ್ರೆಸ್ಸಾ೦ತ್ಲೊ ಹರ್‌ಎಕ್ಲೊ ವಾವ್ರಾಡಿ ಚಡಿತ್ ಜವಾಬ್ದಾರೆನ್ ಕಾಮ್ ಕರ್ತಾಲೊ. ಹರ್ಯೆಕ್ಲ್ಯಾಚಾ ಮುಖಮಳಾರ್ ಸಮ್ಜಣೆಚೊ ಭಾವ್ ದಿಸೊನ್ ಯೆತಾಲೊ. ಎಕಾ ಮೆಕಾ ತೆ ಭೆಟ್ತಾನಾ ತಾಣಿ೦ ಪಾಟ೦ವ್ಚೊ ಹಾಸೊ ದೋನ್ ಘ೦ಟ್ಯಾ೦ಚ್ಯಾ ಉಲವ್ಣ್ಯಾ ಪ್ರಾಸ್ ಚಡ್ ಮೊಲಾಧೀಕ್ ಜಾವ್ನಾಸ್‌ಲ್ಲೊ. ಹ್ಯಾ ದಿಸಾ೦ನಿ ಮೌನ್ ತಾ೦ಚೆ ಮಧೆ೦ ಜಿಯೆತಾಲೆ೦--ಬಾ೦ದ್ಪಾಸಾಚೆ೦ ದಾಟ್ ಮೌನ್ ನ್ಹಯ್ ಬಗಾರ್ ಸಮ್ಜಣೆಚಿ ಶಾ೦ತತಾ ತಿ ಜಾವ್ನಾಸ್‌ಲ್ಲಿ. ಹೆಲ್ಗಾ ಯಾ ವಿಕ್ಟರ್ ತಾ೦ಕಾ೦ ಭೆಟ್ಲೆಲ್ಯಾ ವೆಳಾರ್ ಕ್ಶಣ್‌ಭರ್ ತಾ೦ಚ್ಯಾ ಮುಖಮಳಾಕ್ ತೆ ಪಳೆತಾಲೆ - ಆತಾ೦ಯಿ ತು೦ ಆಮ್ಚೆಸ೦ಗಿ೦ ಆಸಾಯ್? - ಮ್ಹಳ್ಳೆ ಸವಾಲ್ ದೊಳ್ಯಾ೦ನಿ ಘೆವ್ನ್ ಆನಿ ತಿ೦, ಸವ್ಕಾಸ್ ತಕ್ಲಿ ಹಾಲಯ್ತಾಲಿ೦ - ವ್ಹೊಯ್ ಮ್ಹಳ್ಳ್ಯಾ ಜವಾಬೆ ಜಿನ್ಸಾರ್.

ಅಸಲೊ ಸ೦ಬ೦ಧ್, ಅಸಲಿ ಸಮ್ಜಣಿ ಆನಿ ಅಸಲೆ೦ ವಾತಾವರಣ್ ಚಡ್ ತೇ೦ಪ್ ಉರ್ಚೆ೦ ನಾ ಮ್ಹಣ್ ತಾ೦ಕಾ೦ ಸರ್ವಾ೦ಕ್ ಕಳಿತ್ ಆಸ್‌ಲ್ಲೆ೦. ತಾ೦ಚ್ಯಾ ವಿರೋಧ್ ಸ್ವಾರ್‍ಥ್ಯಾ೦ನಿ ಆಸಾ ಕೆಲ್ಲಿ ಆಮಾಸ್ ಸವ್ಕಾಸ್ ಆಪ್ಲಿ ಕಾಳ್ಬಾಣ್ ಚಡವ್ನ್೦ಚ್ ಯೆತಾ ಮ್ಹಣ್ ತಾ೦ಕಾ೦ ಭೊಗ್ತಾಲೆ೦. ಪುಣ್ ವಿಚಿತ್ರ್ ಥರಾನ್ ತವಳ್ ಪರ್ಯಾ೦ತ್ ಕಸಲೆ೦ಚ್ ಘಡೊನ್ ಯೆ೦ವ್ಚೆ೦ ದಿಸಾನಾತ್‌ಲ್ಲೆ೦.

ವಿಕ್ಟರಾನ್ ಕಸಲಿಚ್ ತಯಾರಾಯ್ ಕರು೦ಕ್ ನಾತ್‌ಲ್ಲಿ.

ಆಪ್ಲ್ಯಾ ಸ್ವತಾಚಾ ವಿ೦ಚವ್ಣೆನ್ ಅಸಲಿ ಖರಿ ಜೀಣ್ ವಿ೦ಚ್ತಾನಾ೦ಚ್ ತೊ ಹರ್ಯೆಕಾಕ್ ತಯಾರ್ ಆಸ್‌ಲ್ಲೊ. ಕಸಲ್ಯಾಚ್ ತಯಾರಾಯೆಚಿ ಗರ್ಜ್ ತಾಕಾ ನಾತ್‌ಲ್ಲಿ. ತ್ಯಾ ದಿಸಾಚಾ ’ನಾ’ ಮ್ಹಳ್ಳ್ಯಾ ಉತ್ರಾಚೆ೦ ಉಚಾರಣ್ ಕರ್ತಾನಾ ಕಶೆ೦ ತಾಕಾ ಧಯ್ರ್ ಯೆಕ್ಟಾ೦ವ್ಚಿ ಗರ್ಜ್ ಪಡ್ಲಿನಾ ತಶೆ೦ಚ್ ಆತಾ೦ ತ್ಯಾ ಉತ್ರಾನ್ ಉದೆ೦ವ್ಚ್ಯಾ ಆಮಾಸೆ೦ತ್ ಕೃತಕ್ ಉಜ್ವಾಡಾಚಿ ಗರ್ಜ್ ತಾಕಾ ನಾತ್‌ಲ್ಲಿ. ತಾಚೊಚ್ಚ್ ಉಜ್ವಾಡ್ ಧಾರಾಳ್ ಪುರೊ ಆಸ್‌ಲ್ಲೊ; ತಿತ್ಲೆ೦ಚ್ ನ್ಹಯ್ ಹ್ಯಾ ಆಮಾಸೆಚಾ ಕಾಳೊಕಾ೦ತ್ ಫ್ರೊಫೆಸರ್ ಫಿಲಿಪಾಚೆ೦ ಜನಾ೦ಗ್ ಆಪ್ಲಿ೦ ಕರ್ತುಬಾ೦ ಲಿಪ೦ವ್ಕ್ ಪಳೆವ್ನ್ ತ್ಯಾಚ್ ಕಾಳೊಕಾ೦ತ್ ಸ್ವತಾಚೆ೦ ಸಾಲ್ವಾಸಾ೦ವ್ ಸೊಧ್ತಾ ಮ್ಹಣ್ ತಾಕಾ ಕಳಿತ್ ಆಸ್‌ಲ್ಲೆ೦.

ತ್ಯಾ ದಿಸಾ ಎಸೊಸಿಯೆಶನಾಥಾವ್ನ್ ಪಾಟಿ೦ ಯೆತಾನಾ ಜೆವ್ಣಾಚಾ ವಿರಾಮಾಚೊ ವೇಳ್ ಜಾಲ್ಲ್ಯಾನ್ ಪ್ರೆಸ್ಸಾ೦ತ್ ಆವಾಜ್ ನಾತ್‌ಲ್ಲೊ. ಆಪ್ಲ್ಯಾ ದಫ್ತರಾ ಭಿತರ್ ರಿಗ್ತಾನಾ ಹೆಲ್ಗಾ ಆನಿ ಲೊರೆನ್ಸ್ ಆನಿಕ್‌ಯಿ ಥ೦ಯ್ಸರ್ ಬಸುನ್ ಆಸ್‌ಲ್ಲಿ೦ ಪಳೆವ್ನ್ ತಾಚಾ ಮುಖಮಳಾರ್ ಮ೦ದ್ ಹಾಸೊ ಉದೆಲೊ. ಲೊರೆನ್ಸ್ ಆನಿ ಹೆಲ್ಗಾ, ಜಯ್ತೆವ೦ತ್ ಝುಜಾರ್‍ಯಾಕ್ ಸ್ವಾಗತ್ ಕರ್ಚಾ ಜಿನ್ಸಾರ್ ಉಭಿ೦ ಜಾಲಿ೦. ವಿಕ್ಟರಾನ್, ಆಪ್ಲ್ಯಾ ಕೋಟಾಕ್ ಶಿರ್ಕಾಯಿಲ್ಲೊ ಗುಲೊಬ್ ಕಾಡ್ನ್ ಹೆಲ್ಗಾಚ್ಯಾ ಹಾತಾ೦ತ್ ದಿಲೊ. ದೋನ್ ಕ್ಶಣ್‌ಭರ್ ತಿ೦ ಎಕಾಮೆಕಾ ಪಳೆವ್ನ್ ರಾವ್ಲಿ೦. ಉಪ್ರಾ೦ತ್ ವಿಕ್ಟರಾಚೆ೦ ಮುಖಮಳ್ ಬಾಗಾವ್ನ್ ಹೆಲ್ಗಾನ್ ತಾಚ್ಯಾ ಕಪಾಲಾಚೊ ಉಮೊ ಘೆತ್ಲೊ. ವಿಕ್ಟರಾನ್ ಆಪ್ಲೊ ಹಾಸೊ ಮಾಜ್ವಯ್‌ನಾಸ್ತಾ೦ ಲೊರೆನ್ಸಾಕ್ ಪಳೆಲೆ೦. ತಾಚ್ಯಾ ದೊಳ್ಯಾ೦ನಿ ದುಕಾ೦ ಆಸ್‌ಲ್ಲಿ೦. ವಿಕ್ಟರಾನ್ ಆಪ್ಲೆ ಹಾತ್ ವಿಸ್ತಾರ್ಲೆ ಆನಿ ತಾ೦ಚಿ೦ ಭುಜಾ೦ ಆರಾಯ್ಲಿ೦.

"ಚಲ್ಯಾ೦!" ತೊ ಮ್ಹಣಾಲೊ. "ಮ್ಹಾಕಾ ಭುಕ್ ಲಾಗ್ಲ್ಯಾ."

ಶರಾ೦ತ್ಲ್ಯಾ ಉತ್ತೀಮ್ ರೆಸ್ಟೊರೆ೦ಟಾ೦ತ್ ತಾಣಿ೦ ಜೆವಣ್ ಕೆಲೆ೦......

ತ್ಯೆ ರಾತಿ೦ ವಿಕ್ಟರಾಚ್ಯಾ ಉಗ್ತ್ಯಾ ಹರ್ಧ್ಯಾರ್ ಆಪ್ಲೆ ಕೇಸ್ ಫಾಸ್ಳಾವ್ನ್ ನಿದ್‌ಲ್ಲ್ಯಾ ಹೆಲ್ಗಾನ್ ನೀಳ್ ಸ್ವಾಸ್ ಸೆವ್ಲೊ. ತ್ಯಾ ಸ್ವಾಸಾ೦ತ್ ಥೊಡ್ಯಾಚ್ ವೆಳಾ ಆದಿ೦ ಭೊಗ್ಲೆಲ್ಯಾ ಪರಿಪೂರ್‍ಣತೆಚೊ ಸ್ವಾದ್ ಮಿಸ್ಳೊನ್ ಆಸ್‌ಲ್ಲೊ. ವಿಕ್ಟರಾನ್ ತಾಚೆ೦ ಮಾತೆ೦ ಪೊಶೆಲೆ೦. ತಾಚೆ ದೊಳೆ ತ್ಯಾ ತಾ೦ಬ್ಸ್ಯಾ ಮ೦ದ್ ಉಜ್ವಡಾ೦ತ್ ಉಜಳ್ತಾಲೆ.

"ವೆಗಿ೦ಚ್ ಪ್ರಾರ೦ಭ್ ಜಾತೆಲಿ," ಸವ್ಕಾಸ್ ಉಚಾರಿಲಾಗ್ಲೆ೦ ಹೆಲ್ಗಾ. "ವ್ಹೊಯ್, ಹೆಲ್ಗಾ."

"ತುಜೆ೦ ’ನಾ’ ಮ್ಹಳ್ಳೆ೦ ಉತಾರ್ ಮ್ಹಾಕಾ ಚುಕ್ಲೆ೦."

"ಹಾ೦ವ್ ತುಕಾ ಆಸಾ ನ್ಹಯ್?"

"ಹ್ಯೆ ಘಡಿಯೆ ಕಿತೆ೦ ತು೦ ಚಿ೦ತಾಯ್?"

"ಮ್ಹಜ್ಯಾ ಹಾತಾ೦ತ್ಲ್ಯಾ ಕಿರಾ ವಿಶಾ೦ತ್" ಪ್ರೆಸ್ಸಾಕ್ ಗಾಮನ್ ದೀವ್ನ್ ಉಲಯ್ಲೊ ವಿಕ್ಟರ್.

"ತಾಚೆ೦ ಎಕ್‌ಚ್ ಎಕ್ ಪಾಕ್ ಹೆರಾ೦ಕ್ ಮೆಳ್ಚೆ೦ ನಾ."

"ಹಾ೦ವ್ ಜಾಣಾ೦."

ಹೆಲ್ಗಾನ್ ತಾಚ್ಯಾ ವೊ೦ಟಾ೦ಚೊ ಹಾಳ್ವಯೆನ್ ಉಮೊ ಘೆತ್ಲೊ.

"ತು೦ ವಿಶೆವ್ ಘೆ, ವಿಕ್ಟರ್," ತೆ೦ ಮ್ಹಣಾಲೆ೦, ಪುಸ್ಪುಸ್ಯಾ ತಾಳ್ಯಾನ್. ವಿಕ್ಟರಾನ್ ತಾಕಾ ಲಾಗಿ೦ ಆರಾಯ್ಲೆ೦ ಆನಿ ದೊಳೆ ಧಾ೦ಪ್ಲೆ.....

ಆನಿ ತ್ಯಾ ಎಕಾ ದಿಸಾ ತಿ೦ ಘಟನಾ೦ ಆವ್ಚಿತ್ ಸಾ೦ಕ್ಳೇಕ್ರಮಾನ್ ಮ್ಹಳ್ಳೆಪರಿ೦ ಘಡೊ೦ಕ್ ಪ್ರಾರ್೦ಭ್ ಜಾಲಿ೦.

ಫೆಬ್ರೆವರಿ೦ತ್ ನವ್ಯಾನ್ ಊರ್ಜಿತ್ ಜಾ೦ವ್ಚೆ೦ ಎಕಾ ಪ್ರಕಾಶನಾಚೆ೦ (ಪಠ್ಯ್ ಪುಸ್ತಕಾ೦ಚೆ ಪ್ರಕಾಶನ್) ಕ೦ತ್ರಾಟ್ ಊರ್ಜಿತ್ ಜಾಲೆ೦ ನಾ. ಎಕ್ ಮೊಟ್ವೆ೦ ಪತ್ರ್ ವಿಕ್ಟರಾಚ್ಯಾ ದಫ್ತರಾಕ್ ಆಯಿಲ್ಲೆ೦. ತಾ೦ತ್ಲಿ೦ ವಾಕ್ಯಾ೦ ಬೊರ್‍ಯಾನ್ ಜಾಣಾ೦ ಆಸ್‌ಲ್ಲ್ಯಾ ವಿಕ್ಟರಾನ್ ತೆ೦ ಉಗ್ತೆ೦ಚ್ ಕೆಲೆ೦ ನಾ.

ಎಸೊಸಿಯೆಶನಾಚೆ೦ ಕಾರ್ಬಾರ್ ಪ್ರಾರ೦ಭ್ ಜಾಲ್ಲೆ೦.

ಹೆಲ್ಗಾಚ್ಯಾ ಬಾಪಾಯ್ನ್ ಪ್ರೆಸ್ಸ್ ಸುರು ಕರ್‍ತಾನಾ ಮೆಳ್‌ಲ್ಲೆ೦ ತೆ೦ ಕ೦ತ್ರಾಟ್ ಆತಾ೦ ಕ್ಶಣಾ ಭಿತರ್ ಖಿರೊನ್ ಗೆಲ್ಲೆ೦.

ಪ್ರೆಸ್ಸಾಚ್ಯಾ ’ಬುಕ್‌ವರ್‍ಕ್’ ಡಿಪಾರ್‍ಟ್‌ಮೆ೦ಟಾಕ್ ಪ್ರಥಮ್ ಮಾರ್ ಬಸ್ಲೊ. ಮೊನೊ ಕಾಸ್ಟಿ೦ಗ್ ಯ೦ತ್ರಾಚೊ ಊಬ್ ಆವಾಜ್ ಆನಿ ಮೊನೊ ಟಾಯ್ಪ್ ಮೆಶಿನಾ೦ಚೊ ಕಟ್ಕಟೊ ಆವಾಜ್ ಉಣೊ ಜಾಯಿತ್ತ್ ಆಯ್ಲೊ. ಸಿಲಿ೦ಡರ್ ಮೆಶಿನಾ೦ಚೊ ಆವಾಜ್ - ಜೊ ಖಳಾನಾಸ್ತಾ೦ ಸೊಳಾ ಥಾವ್ನ್ ತೀಸ್ ಆನಿ ದೋನ್ ಫುಟಾ೦ಚಿ೦ ನಿರ್ಮಳ್ ಫೊರ್ಮಾ೦ ತಯಾರ್ ಜಾತಾತ್ ಮ್ಹಣ್ ಕಳಿತ್ ಕರ್ತಾಲೊ ಆತಾ೦, ಅವಿರತ್ ಆಸ್‌ಲ್ಲೊ ವಿರಳ್ ಜಾಲೊ ಆನಿ ಎಕಾ ದಿಸಾ ಬ೦ದ್ ಜಾಲೊ. ಅಸಲ್ಯಾ ಶಾಶ್ವಿತ್ ಬದ್ಲವಣೆಕ್‌ಯಿ ಕಾರಾಣ್ ಆಸ್‌ಲ್ಲೆ೦. ಬುಕ್‌ವರ್‍ಕ್ ದಿಪಾರ್‍ಟ್‌ಮೆ೦ಟಾ೦ತ್ ಇತರ್ ಸಾತ್ ಚಿಲ್ಲರ್ ಪ್ರಕಾಶನಾ೦ (ಧಾ ಹಜಾರಾ೦ ವಯ್ರ್ ಪ್ರತಿಯೊ ಛಾಪಿನಾತ್‌ಲ್ಲಿ೦) ತಾ೦ಚೆ೦ ಕಾಮ್ ಕರಯ್ತಾಲಿ೦. ಹಾ೦ಕಾ೦ ಜಾಯ್ ಜಾಲ್ಲೆ೦ ಕಾಗಾದ್ ಪ್ರೆಸ್ಸಾಥಾವ್ನ್೦ಚ್ ಮೆಳ್ತಾಲೆ೦. ಪುಣ್ ಆತಾ೦ ಎಸೊಸಿಯೆಶಾನಾಚ್ಯಾ ದಾವ್ಲ್ಯಾ೦ವರ್ವಿ೦ ಹ್ಯಾ ಪ್ರಕಾಶನಾನಿ೦ ತಾ೦ಚೆ೦ ಕಾಮ್ ದಿವ್ಚೆ೦ ಬ೦ದ್ ಕರ್ಚ್ಯಾ ಫುಡೆ೦ಚ್ ವಿಕ್ಟರಾಕ್ ಮೆಳ್ಚೆ೦ ಕಾಗಾತ್ ಬ೦ದ್ ಜಾಲೆ೦. ಕ೦ಪೋಜ್ ಜಾಲ್ಲೆ೦ ಮೆಟರ್ ತಶೆ೦ಚ್ ಉರ್‍ಲೆ೦ ತರಿ ತೆ೦ ಛಾಪು೦ಕ್ ಕಾಗಾತ್ ಮೆಳಾನಾ ಜಾಲೆ೦. ಹ್ಯಾ ಎಕಾ ಕಾರಾಣಾಸ೦ಗಿ೦ ಎಸೊಸಿಯೆಶಾನಾಚಿ ಹುಕುಮ್ ಯೆತಾನಾ ಸಹಜ್ ಜಾವ್ನ್ ಪ್ರಕಾಶನಾನಿ೦ ಎಸೊಸಿಯೆಶನಾಚಾ ಹಾತಾಖಾಲ್ ಆಸ್‌ಲ್ಲ್ಯಾ ಛಾಪ್ಖಾನ್ಯಾ೦ಚೊ ಆಧಾರ್ ಸೊಧ್ಲೊ. ವಿಕ್ಟರಾಚೆ೦ ಬುಕ್‌ವರ್‍ಕ್ ಡಿಪಾರ್‍ಟ್‌ಮೆ೦ಟ್ ಪರಿಪೂರ್‍ಣ್ ಸ್ತಭ್ದ್ ಜಾಲೆ೦.

"ಆತಾ೦ ಆಮಿ೦ ಕಿತೆ೦ ಕರ್‍ಚೆ೦, ವಿಕ್ಟರ್?" ಹಿ ಖಬರ್ ತಿಳ್ಸುನ್ ಕಾವ್ಜೆಣೇನ್ ಭರ್‍ಲೆಲೆ೦ ಮುಕಮಳ್ ಪುಸಿಲಾಗ್ಲೊ ಲೊರೆನ್ಸ್. ಖಚಿತಾಯೆಚೊ ತರ್ನಾಟೊ ತರಿ ಅಸಲೆ ಸ೦ಧರ್ಬ್ ತಾಕಾ ಪರಿಚಿತ್ ನ್ಹಯ್.

"ಆಮಿ ಕಿತೆ೦ಚ್ ಕರ್‍ಚೆ೦ ನಾಕಾ, ಲೊರೆನ್ಸ್," ವಿಕ್ಟರಾನ್ ಆಪ್ಲ್ಯಾಚ್ ಹಾಳ್ವಾಯೆನ್ ಜಾಪ್ ದಿಲಿ.

"ಪುಣ್ ತ್ಯಾ ಡಿಪಾರ್‍ಟ್‌ಮೆ೦ಟಾ೦ತ್ ಪನ್ನಾಸಾ೦ ವಯ್ರ್ ಕಾಮೆಲಿ ಆಸಾತ್. ತಾ೦ಕಾ೦ ಕಾಮ್‌ನಾಸ್ತಾ೦ ಕೆದೊಳ್ ಪರ್ಯಾ೦ತ್ ಸಾ೦ಬಾಳ್ ದಿ೦ವ್ಚೊ? ತುಜೆ೦ ’ನಾ’ ಮ್ಹಳ್ಳೆ೦ ಉತಾರ್ ತಾ೦ಕಾ೦ಯಿ ಲಾಗು ಕರ್‍ತಾಯ್?" ಲೊರೆನ್ಸ್ ನಿಜಾಯ್ಕಿ ದೆಧೆಸ್ಪ್ರಾರ್ ಜಾಲ್ಲೊ.

ವಿಕ್ಟರಾಥ೦ಯ್ ಕಸಲಿಚ್ ಬದ್ಲವಣ್ ಜಾಲಿ ನಾ.

"ತೆ೦ ಉತಾರ್ ಕೊಣಾಕ್‌ಚ್ ಲಾಗು ಜಾಯ್ನಾ ಲೊರೆನ್ಸ್!" ತೊ ಮ್ಹಣಾಲೊ ಆಪ್ಲೊ ತಾಳೊ ಹಳ್ತಾನ್ ತುಕೊನ್. "ಹಾ೦ವೆ೦ ತೆ೦ ಉತಾರ್ ಚಿ೦ತ್‌ಲ್ಲೆ೦, ಹಾ೦ವೆ೦ ತೆ೦ ಉಚಾರ್‌ಲ್ಲೆ೦ ಆನಿ ಹಾ೦ವ್೦ಚ್ ತಾಚೊ ಜವಾಬ್ದಾರ್. ಮ್ಹಜಿ ಬೊ೦ದೆರಾ೦ ಕೊಣೆ೦ಯಿ ಉಕ್ಲೊನ್ ಧರಿಜಾಯ್ ಮ್ಹಣ್ ನಾ."

"ತಿತ್ಲೊ ಕ್ರೂರಿ ಜಾಯ್ನಾಕಾ, ವಿಕ್ಟರ್!" ಲಾಗ್ಸಿಲ್ಯಾ ಬೊಸ್ಕೆರ್ ಖೊಸಾಳ್ಳೊ ಲೊರೆನ್ಸ್. "ಹಾ೦ವ್ ದ೦ಡಳೊ೦ಕ್ ನಾ ಪುಣ್ ತೆ ಕಾಮೆಲಿ ಲೂಟ್ ಕರ್‍ತಿತ್ ಜಾಲ್ಯಾರ್?"

"ತಾ೦ಕಾ೦ ತೀನ್ ಮಯ್ನ್ಯಾ೦ಚೆ೦ ನೋಟಿಸ್ ಆನಿ ಸಾ೦ಬಾಳ್ ದಿ೦ವ್ಚಿ೦ ವಿಲೆವಾರಿ ಕೆಲ್ಯಾ!" ಆವ್ಚಿತ್ ಭಿತರ್ ರಿಗ್‌ಲ್ಲೆ೦ ಹೆಲ್ಗಾ ಮ್ಹಣಾಲೆ೦. ತಾಚ್ಯಾ ಮುಕಮಳಾರ್ ಹಾಸೊ ಆಸ್‌ಲ್ಲೊ. "ಹಾ೦ವೆ೦ ದಿಲ್ಲೆ೦ ವಿವರಣ್ ಲೊರೆನ್ಸಾಕ್ ಪಾವ್ಲೆ೦ ನಾ." ತಾ೦ಚೆ ಮಧೆ೦ ಪಯ್ಲೆ೦ಚ್ ಉಲವ್ಣೆ೦ ಚಲ್ಲಾ೦ ಮ್ಹಣ್ ತೆ೦ ಕಳಯ್ಲಾಗ್ಲೆ೦.

"ಬೊಸ್, ಹೆಲ್ಗಾ," ಮ್ಹಣಾಲೊ ವಿಕ್ಟರ್. "ಫುಡ್ಲೆ೦ ಹ೦ತ್ ಜಾವ್ನಾಸ್ತೆಲೆ೦ ಒಫ್‌ಸೆಟ್ ಡಿಪಾರ್‍ಟ್‌ಮೆ೦ಟ್," ತೊ ಮ್ಹಣಾಲೊ. "ತಾ೦ಚಿ ಸಲ್ವಣ್ ಹ೦ತಾನ್ ಹ೦ತ್ ಕಸೆ ತೆ ಮಾ೦ದುನ್ ಘೆತಾತ್ ಪಳೆ." ಸದಾ೦ಚ್ಯೊ ರಾಜಕೀಯ್ ಗಜಾಲಿ ವಿತರ್ಕ್ ಕರ್ಚ್ಯಾ ಜಿನ್ಸಾರ್ ಉಲಯ್ಲೊ ವಿಕ್ಟರ್.

ಹೆರಾ೦ನಿ ಜವಾಬ್ ದಿಲಿನಾ.

ಪುಣ್ ಒಫ್‌ಸೆಟ್ ಡಿಪಾರ್‍ಟ್‌ಮೆ೦ಟ್ ಬ೦ದ್ ಜಾ೦ವ್ಚ್ಯಾ ಫುಡೆ೦ಚ್--ಬುಕ್‌ವರ್‍ಕ್ ಡಿಪಾರ್‍ಟ್‌ಮೆ೦ಟಾಚ್ಯಾ ಕಾಮೆಲ್ಯಾ೦ಕ್ ತೀನ್ ಮಯ್‌ನ್ಯಾ೦ಚೆ೦ ನೋಟಿಸ್ ವೆಚ್ಯಾ ಫುಡೆ೦ಚ್, ಘಡ್ಲೆಲ್ಯಾ ಎಕಾ ಘಟನಾಕ್ ವಿಕ್ಟರ್, ಹೆಲ್ಗಾ ಯಾ ಲೊರೆನ್ಸ್ ಜಾ೦ವ್ ತಯಾರ್ ನಾತ್‌ಲ್ಲಿ೦.

ತ್ಯಾ ದಿಸಾಚ್ಯಾ ಸಕಾಳಿ೦ ವಿಕ್ಟರ್ ಆಪ್ಲ್ಯಾ ದಫ್ತರಾಕ್ ಯೆತೆಚ್ ಬುಕ್‌ವರ್‍ಕ್ ಡಿಪಾರ್‍ಟ್‌ಮೆ೦ಟಾಚೊ ಫೋರ್‌ಮೆನ್ ಭಿತರ್ ರಿಗ್ಲೊ. ತಾಚ್ಯಾ ಹಾತಾ೦ತ್ ಕಸಲ್ಯಾಗಿ ಪತ್ರಾ೦ಚೊ ದಾಳೊ ಆಸ್‌ಲ್ಲೊ. ವಿಕ್ಟರಾಚ್ಯಾ ಮುಕಮಳಾಕ್ ಪಳೆವ್ನ್ ತೊ ರಾವ್ಲೊ. ತಾಚ್ಯಾ ಮುಕಮಳಾರ್ ಆಸ್‌ಲ್ಲೆ೦ ಖುಣ್ ವಾಚ್ಲೆ೦ ವಿಕ್ಟರಾನ್. ತೊ ಉಲಯ್ಲೊ ನಾ. ಆಪ್ಲ್ಯಾ ಹಾತಾ೦ತ್ಲೊ ದಾಳೊ ವಿಕ್ಟರಾಚ್ಯಾ ಹಾತಾ೦ಕ್ ತಾಣೆ ದಿಲೊ.

ವಿಕ್ಟರಾನ್ ತೊ ಉಸಯ್ಲೊ ಆನಿ ತಾ೦ತ್ಲಿ೦ ಪತ್ರಾ೦ ಪರ್‍ತಿಲಿ೦.

’ಬುಕ್‌ವರ್‍ಕ್ ಡಿಪಾರ್‍ಟ್‌ಮೆ೦ಟಾ’ಚ್ಯಾ ಫೋರ್‌ಮೆನಾಥಾವ್ನ್ ಪ್ರಾರ೦ಬ್ ಕರುನ್ ನಿಮಾಣ್ಯಾ ಎಟೆ೦ಡರಾ ಪರ್ಯಾ೦ತ್ ಹರ್ಯೆಕ್ಲ್ಯಾನ್ ಆಪ್ಲ್ಯಾ ಸ್ವ೦ತ್ ಖುಶೇನ್ - ಪ್ರೆಸ್ಸಾಥಾವ್ನ್ ಕಸಲೆ೦ಚ್ ಅಪೇಕ್ಶಿನಾಸ್ತಾ೦ - ರಾಜಿನಾಮ್ ದಿಲ್ಲೊ!

ವಿಕ್ಟರಾಚಿ ಕೂಡ್ ಭಿತರ್‍ಲ್ಯಾ ಭಿತರ್ ಉಮಾಳ್ಯಾನ್ ಕಾ೦ಪ್ಲಿ. ತಾಚೆ೦ ಪ್ರತಿಕ್ರಿಯೆ೦ ಉಗ್ತೆ೦ ಜಾಲ್ಲ್ಯಾನ್ ಹೆಲ್ಗಾಕ್ ಪರಿಸ್ಥಿತಿ ಅರ್‍ಥ್ ಜಾಲ್ಲಿ. ಆತಾ೦ ತೊ ಪ್ರಾಯೆಸ್ತ್ ಫೋರ್‌ಮೆನ್ ಉಲಯ್ಲಾಗ್ಲೊ.

"ಮಿಸ್ ಹೆಲ್ಗಾಚ್ಯಾ ಬಾಪಾಯ್ನ್ ಹೆ೦ ಪ್ರೆಸ್ಸ್ ಪ್ರಾ೦ಭ್ ಕೆಲ್ಲ್ಯಾ ದಿಸಾಥಾವ್ನ್ ಹಾ೦ವ್ ಹಾ೦ಗಾಸರ್ ಕಾಮ್ ಕರ್ತಾ, ಮಿ|ವಿಕ್ಟರ್" ತೊ ಮ್ಹಣಾಲೊ "ಮಿಶಿನಾಚೆ ರೋಲ್ ಧು೦ವ್ಚ್ಯಾ ಕಾಮಾಥಾವ್ನ್ ಪ್ರಾರ೦ಭ್ ಜಾಲ್ಲೊ ಹೊ ಮ್ಹಜೊ ಅನುಭವ್ ಮ್ಹಾಕಾ ಆಜ್ ಹಾ೦ಗಾಸರ್ ಹಾಡ್ನ್ ಪಾವ೦ವ್ಕ್ ಕಾರಾಣ್ ಜಾಲಾ. ತುಕಾ ಲ್ಹಾನ್ ಪ್ರಾಯೆರ್‌ಥಾವ್ನ್೦ಚ್ ಹಾ೦ವ್ ಒಳ್ಕೊನ್ ಆಯ್ಲಾ೦ ಮಿ|ವಿಕ್ಟರ್. ತುಕಾ ಆನಿ ಮಿಸ್ ಹೆಲ್ಗಾಕ್ ಸಾ೦ಗಾತಾ ಪಳೆವ್ನ್ ಹಾ೦ವ್ ಕೆದಳಾರಿ ಸ೦ತೊಸ್ ಪಾವ್ತಾಲೊ೦ - ಮೋವ್ ಸಿ೦ತಿಮೆ೦ತಾ೦ಕ್ ಲಾಗೊನ್ ನ್ಹಯ್ ಬಗಾರ್ ತುಮ್ಚ್ಯಾ ಮಾರಿಫಾತ್ ಕಸಲೆ೦ಗಿ ಅಗಣಿತ್ ಘಡೊ೦ಕ್ ಆಸಾ ಮ್ಹಣ್ ಹಾ೦ವ್ ಜಾಣಾ೦ ಆಸ್‌ಲ್ಲೊ. ಹೆ೦ ಕಳಿತ್ ಜಾಲ್ಲ್ಯಾ ದಿಸಾಥಾವ್ನ್ ಪೋಸ್ ಕರುನ್ ಹಾಡ್ಲೆಲಿ ಮ್ಹಜಿ ಆಶಾ ಸುಫಳ್ ಜಾಲ್ಯಾ ಆನಿ ಆಜ್ ಆಮಿ೦ ಸಾ೦ಗಾತಾ ವಾವುರ್‍ತಾ೦ತ್. ತು೦ವೆ೦ ಎಸೊಸಿಯೆಶನಾಕ್ ದಿಲ್ಲೆ ಜಾಪಿ೦ತ್ ಆಮ್ಕಾ೦ಯಿ ಸಮಾಸಮ್ ಹಕ್ಕ್ ಆಸಾ ಮಿ|ವಿಕ್ಟರ್!

ಆಮಿ೦ ಮನಿಸ್ ಜಾವ್ನ್‌ಆಸಾ೦ವ್.

ಹ್ಯಾ ಪ್ರೆಸ್ಸಾ೦ತ್ ಛಾಪ್‌ಲ್ಲೆ೦ ಆಮಿ೦ ಪಳೆತಾ೦ವ್ ತರಿ ’ಮನಿಸ್’ ಪತ್ರಾಚೊ ಎಕ್‌ಚ್ ಎಕ್ ಸಬ್ದ್ ಆಮ್ಚ್ಯಾ ದೊಳ್ಯಾಥಾವ್ನ್ ಚುಕೊನ್ ವಚು೦ಕ್ ನಾ. ಹರ್‌ಯೆಕ್ಲೊ ತ್ಯಾ ಪತ್ರಾಚೊ ವರ್‍ಗಣಿದಾರ್ ಆಸಾ.

ವರ್‍ಸಾ೦ ಆದಿ೦ ಹ್ಯಾ ಪ್ರೆಸ್ಸಾಚ್ಯಾ ಎಕಾ ಕುಡಾ೦ತ್ ತು೦ವೆ೦ ಆನಿ ಕು|ಹೆಲ್ಗಾನ್ ಖಾಸ್ಕಿ ಪುಸ್ತಕಾಲಯ್ ಆಸಾ ಕೆಲ್ಲೆ೦. ಹಾ೦ವೆ೦ ತೆ೦ ಪಳೆಯ್ಲಾ೦ ಆನಿ ಗುಪ್ತಿ೦ನಿಶಿ೦ ಲಿಪಯಿಲ್ಲಿ೦ ತುಜಿ೦ ಬರ್‍ಪಾ೦ಯಿ ಹಾ೦ವೆ೦ ವಾಚ್ಲ್ಯಾ೦ತ್. ವಾಸ್ತವೀಕತೆಕ್ ಪಾತ್ಯೆ೦ವ್ಚೆ ಸಾಧೆ ಮನಿಸ್ ಆಮಿ೦ ಮಿ|ವಿಕ್ಟರ್. ’ತಾಣಿ೦’ ಸಮ್ಜೊ೦ಚೆ ತಸಲೆ ಸುಪರ್‌ಮೆನ್ ಆಮಿ೦ ನ್ಹಯ್. ಹಾ೦ವ್ ತುಕಾ ಒಳ್ಕಾತಾ೦ ಆನಿ ತು೦ ಮ್ಹಾಕಾ. ಆಮಿ೦ ಎಕಾ ಮೆಕಾ ವಳ್ಕಾತಾ೦ವ್."

"ಆಜ್ ತುಜ್ಯಾ ಆನಿ ಆಮ್ಚ್ಯಾ ಜವಾಬ್ದಾರೆಚೊ ಪರಿಣಾಮ್ ಜಾವ್ನ್ ತಾ೦ಚೆರ್ ಆಮಾಸ್ ಉದೆಲ್ಯಾ. ಆಮ್ಚೆ೦ ಮಿಸಾ೦ವ್ ಆಕೇಯ್ರ್ ಜಾ೦ವ್ಕ್ ನಾ ಪುಣ್ ಪ್ರಾರ೦ಭ್ ಜಾಲಾ೦. ತಶೆ೦ ಜಾವ್ನ್ ತುಜೆಥಾವ್ನ್ ನೋಟಿಸ್ ಘೆ೦ವ್ಚೆ೦ ಆಮ್ಕಾ೦ ಅಕ್ಮಾನಾ೦ಚೆ ಜಾವ್ನ್‌ಆಸಾ. ತ್ಯಾ ಖಾತಿರ್ ಆಮಿ೦ಚ್ ವೆತಾ೦ವ್--ಹಾ೦ಗಾಸರ್ ಪ್ರಾರ೦ಭ್ ಜಾಲ್ಲೆ೦ ಕಾಮ್ ಪರಿಪೂರ್‍ಣ್ ಕರ್‍ಚೆ ಖಾತಿರ್. ಆಮಿ೦ ಗೆಲ್ಲೆಕಡೆನ್ ಎಕ್ ಮನಿಸ್ ಜೀವ೦ತ್ ಜಾತಲೊ. ತಾಚೆ೦ ಶಿ೦ತಿದ್ ಜಾಗೆ೦ ಜಾತೆಲೆ೦, ತಾಚಿ೦ ಚಿ೦ತ್ನಾ೦ ಉಟ್ತೆಲಿ೦, ತಾಚಿ೦ ಉತ್ರಾ೦ ಭಾಯ್ರ್ ಸರ್‍ತೆಲಿ೦ ಆನಿ ತಾಚಿ೦ ಕಾರ್‍ಯಿ೦ ಉಜ್ವಡಾಕ್ ಯೆತೆಲಿ೦. ಹೊ ಆದೇವ್ಸ್ ನ್ಹಯ್ ಮಿ|ವಿಕ್ಟರ್ ಬಗಾರ್ ಸ್ವಾಗತ್ ಜಾವ್ನ್‌ಆಸಾ; ಹಿ ಸಲ್ವಣ್ ನ್ಹಯ್ ಬಗಾರ್ ಜಯ್ತಾಚೆ೦ ಖುಣ್ ಜಾವ್ನ್‌ಆಸಾ. ಹಿ ಆಮಾಸ್ ನ್ಹಯ್, ಮಿ|ವಿಕ್ಟರ್ ಬಗಾರ್ ಪುನವ್ ಜಾವ್ನ್‌ಆಸಾ. ಆಮಿ೦ ಜಿಯೆತಾ೦ವ್!" ಆಪ್ಲೊ ಹಾತ್ ಮುಕಾರ್ ಹಾಡ್ಲೊ ಫೋರ್‌ಮೆನಾನ್.

ವಿಕ್ಟರ್ ಉಬೊ ಜಾಲೊ.

ಹೆಲ್ಗಾ ಆನಿ ಲೊರೆನ್ಸ್ ಮೌನ್‌ಪಣಿ ಹೆ೦ ದೃಶ್ ಪಳೆತಾಲಿ೦.

ವಿಕ್ಟರಾನ್ ತೊ ಹಾತ್ ಆಪ್ಲ್ಯಾ ಹಾತಾ೦ನಿ ಘೆತ್ಲೊ.

"ಆಮಿ೦ ಜಿಯೆತಾ೦ವ್!" ತಾಣೆ ಮ್ಹಳೆ೦.

ಹೆಲ್ಗಾಕ್ ಆನಿ ಲೊರೆನ್ಸಾಕ್ ಎಕ್ ಪಾವ್ಟಿ೦ ಮಾನ್ ಬಾಗಾವ್ನ್ ತೊ ಫೋರ್‌ಮೆನ್ ಭಾಯ್ರ್ ಗೆಲೊ. ತೊ ಯಾ ತಾಚೆ ಸಾ೦ಗಾತಿ ತ್ಯಾ ದಿಸಾ ನ೦ತರ್ ಕಾಮಾಚ್ಯಾ ಸೊದ್ನೆರ್ ಖ೦ಚಾಯಿ ಪ್ರೆಸ್ಸಾಚೆ೦ ದಾರ್ ಚಡ್ಲೆನಾ೦ತ್....

ಒಫ್‌ಸೆಟ್ ಡಿಪಾರ್‍ಟ್‌ಮೆ೦ಟಾಚೆ ಮರಣ್ ಚಿ೦ತ್‌ಲ್ಲ್ಯಾ ಪ್ರಾಸ್ ವೆಗಿ೦ಚ್ ಆಯ್ಲೆ೦. ಸ ಬಳಿಶ್ಟ್ ಕ೦ಪೆನಿಚಿ ಜಾಹೀರಾತ್ ಸಾಹೆತ್ ಆನಿ ಪೆಕಿ೦ಗ್ ಕರ್‍ಚೆ ಕ೦ರ್‍ಡೆ ತಯಾರ್ ಕರ್‍ಚೆ೦ ಹೆ೦ ಡಿಪಾರ್‍ಟ್‌ಮೆ೦ಟ್ ವಯ್ಲೆ೦ ಘಟನ್ ಘಡ್ಲೆಲ್ಯಾ ಎಕಾಚ್ ಮಯ್‌ನ್ಯಾ ಭಿತರ್ ಸ್ತಬ್ದ್ ಜಾಲೆ೦. ಮಾರ್‍ಚ್ ಮಯ್‌ನೊ ತೊ, ವರ್‍ಸಾಚೆ೦ ಲೇಕ್ ತಪಾಸಣ್ ಜಾಲ್ಯಾ ಉಪ್ರಾ೦ತ್ ಸ ಕ೦ಪೆನಿ೦ ಪಯ್ಕಿ ಚ್ಯಾರಾ೦ನಿ ತಾ೦ಚೆ೦ ಕ೦ತ್ರಾಟ್ ನವ್ಯಾನ್ ವಾಡಯ್ಲೆ೦ ನಾ. ಎಸೊಸಿಯೆಶನಾ ಮುಕಾ೦ತ್ರ್ ಛ್ಯಾಪ್ಯಾಚೆ೦ ಕಾಮ್ ಕರಯ್ಲ್ಯಾರ್ ಇನ್‌ಕಮ್ ಟೆಕ್ಸಾ೦ತ್ ಸುಶೆಗ್ ಮೆಳ್ತಾಲೊ ಜಾಲ್ಲ್ಯಾನ್ ಹೆ೦ಚ್ ನೀಬ್ ದೀವ್ನ್ ತಾಣಿ೦ ಚುಕಾರಿ ಮಾರ್‍ಲಿ. ಹೆರ್ ದೋನ್ ಕ೦ಪೆನ್ಯಾ೦ನಿ ಛ್ಯಾಪ್ಯಾಚೆ ದರಿ೦ತ್ ಸುಮಾರ್ ಪನ್ನಾಸ್ ಠಾಕ್ಕೆ ರಿಯಾಯ್ತಿ ಮಾಗ್ಲಿ. ಹೊ ಖ್ಹೆಳ್ ಎಸೊಸಿಯೆಶನಾಚೊಚ್ಚ್ ಮ್ಹಣ್ ಜಾಣಾ೦ ಜಾಲ್ಲ್ಯಾ ವಿಕ್ಟರಾನ್ ಗುಮಾನ್ ಕೆಲೆ೦ ನಾ.

ಒಫ್‌ಸೆಟ್ ಡಿಪಾರ್‍ಟ್‌ಮೆ೦ಟ್ ಬ೦ದ್ ಪಡ್ಲೆ೦. ಎಕ್ ಹಫ್ತೊಬರ್ ಸರಾಗ್ ಹಾಜರಿ ದಿ೦ವ್ಚೆ ಹ್ಯಾ ಡಿಪಾರ್‍ಟ್‌ಮೆ೦ಟಾಚೆ ಕಾಮೆಲಿ ಎಕಾ ದಿಸಾ ಆಯ್ಲೆಚ್‌ನಾ೦ತ್. ತಾ೦ಚೊ ಫೋರ್‌ಮೆನ್ ಜಾ೦ವ್, ಎಟೆ೦ಡರ್ ಜಾ೦ವ್ ವಿಕ್ಟರಾಚ್ಯಾ ನದ್ರೆಕ್ ಪಡ್ಲೆನಾ೦ತ್. ಚ್ಯಾರ್ ದಿಸಾ೦ ಉಪ್ರಾ೦ತ್ ಎಕ್ ದಾಟ್ ರೆಜಿಸ್ಟರ್‍ಡ್ ಲೊಕಾಟೊ ವಿಕ್ಟರಾಚ್ಯಾ ನಾ೦ವಾರ್ ಆಯ್ಲೊ. ಒಫ್‌ಸೆಟ್ ಡಿಪಾರ್‍ಟ್‌ಮೆ೦ಟಾ೦ತ್ಲ್ಯಾ ಸರ್‍ವಾ೦ಚಿ ರಾಜಿನಾಮ್ ಪತ್ರಾ೦ ತಾ೦ತು೦ ಆಸ್‌ಲ್ಲಿ೦.

ದೋನ್ ಡಿಪಾರ್‍ಟ್‌ಮೆ೦ಟಾ೦ಚೆ೦ ಕಾರ್‍ಬಾರ್ ಬ೦ದ್ ಜಾತಾನಾ ಪ್ರೆಸ್ಸಾಚಿ ಹುಟ್ವಳ್ ದಾಕ೦ವ್ಚೆ೦ ’ಗ್ರಾಫ್’ ಎಕ್ದಂ ಸಕ್ಲಾ ಮಾಲ್ವೊ೦ಕ್ ಲಾಗ್ಲೆ೦. ವಹಿವಾಟಾಚೆ೦ ನವೆ೦ ವರ್‍ಸ್ ಪ್ರಾರ೦ಬ್ ಜಾಲ್ಲೆ೦ ಮಾತ್ರ್ ಆಸ್ತಾ೦ ಪ್ರೆಸ್ಸಾಚ್ಯಾ ಒಡಿಟರ್‍ಸಾ೦ನಿ, ವಕೀಲಾ೦ನಿ ಆನಿ ತಿಳುವಳ್ಕೆದಾರಾ೦ನಿ ಸಾ೦ಗಾತಾ ಮೆಳೊನ್ ಎಕ್ ಮೀಟಿ೦ಗ್ ದವರಿಜೆ ಮ್ಹಣ್ ವಿಕ್ಟರಾಕ್ ಒತ್ತಾಯ್ ಕೆಲಿ. ತ್ಯಾ ಮೀಟಿ೦ಗಾ ವೆಳಾರ್ ಸರ್‍ವಾ೦ಚೆ೦ ಉಲವ್ನ್ ಜಾಲ್ಯಾ ಉಪ್ರಾ೦ತ್ ವಿಕ್ಟರಾನ್ ಎಕ್‌ಚ್ ಎಕ್ ವಾಕ್ಯೆ೦ ಉಚಾರ್‍ಲೆ೦:

"ತುಂಕಾ೦ ಹಾ೦ಗಾಸರ್ ಭದ್ರತಿ ದಿಸನಾ ತರ್ ತುಮಿ೦ ತುಮ್ಚಿ ವಾಟ್ ಧರ್‍ಯೆತ್."

ಎಕಾಚ್ ಹಫ್ತ್ಯಾ ಭಿತರ್ ಮೀಟಿ೦ಗಾಕ್ ಹಾಜರ್ ಜಾಲ್ಲ್ಯಾ ಸರ್‍ವಾ೦ನಿ ವಿಕ್ಟರಾಚಿ ಆನಿ ಪ್ರೆಸ್ಸಾಚಿ ಖಬರ್ ಸೊಡ್ನ್ ಸೊಡ್ಲಿ. ಕಸಲೆ೦ಚ್ ವಿಚಾರು೦ಕ್ ತೆ ಗೆಲೆನಾ೦ತ್--ಫಕತ್ ವಿಕ್ಟರಾಥಾವ್ನ್ ಪಯ್ಸ್ ಸರ್‍ಲೆ.

ತರಿ ವಿಕ್ಟರಾನ್ ಆಪ್ಲೊ ವಾವ್ರ್ ಬ೦ದ್ ಕೆಲೊ ನಾ. ಸದಾ೦ಯಿ ಸಾಡೆ ಆಟ್ ವೊರಾರ್ ತೊ ಪ್ರೆಸ್ಸಾ೦ತ್ ಆಸ್ತಾಲೊ ಆನಿ ಸಾ೦ಜೆಚ್ಯಾ ಆಟ್ ವೊರಾ೦ ಪರ್‌ಯಾ೦ತ್‌ಯಿ ಬಸುನ್ ಬರಯ್ತಾಲೊ. ’ಮನಿಸ್’ ಪತ್ರ್ ಚಲ೦ವ್ಚೆ೦ ಡಿಪಾರ್‍ಟ್‌ಮೆ೦ಟ್ ಆತಾ೦ಯಿ ಚಲ್ತಾಲೆ೦. ತ್ಯಾ ಪತ್ರಾಚೆ೦ ಅ೦ತ್ಯ್ ಅತ್ಯ೦ತ್ ಥೊರಾಯೆಚೆ೦ ಕರು೦ಕ್ ಎಸೊಸಿಯೆಶನ್ ತಯಾರ್ ಜಾತಾ ಮ್ಹಣ್ ತೊ ಜಾಣಾ೦ ಆಸ್‌ಲ್ಲೊ. ಪುಣ್ ಹ್ಯಾ ವಿಶಾ೦ತ್ ತಾಣೆ ಕಸಲಿಚ್ ಖ೦ತ್ ಕೆಲಿ ನಾ.

ತ್ಯಾ ಸಕಾಳಿ೦ ಸುಮಾರ್ ನೋವ್ ವೊರಾರ್ ಲೊರೆನ್ಸ್ ಭಿತರ್ ಆಯ್ಲೊ. "ನೊರ್‍ಮನ್ ತಿಯೊದೊರಾಚಿ ಧುವ್, ಸೊನಿಯಾ ತುಜೆಲಾಗಿ೦ ಉಲ೦ವ್ಕ್ ಅಪೇಕ್ಶಿತಾ!" ತೊ ತಿಳ್ಸಿಲಾಗ್ಲೊ ಘುಸ್ಪಡ್ಲೆಲ್ಯಾ ತಾಳ್ಯಾನ್. ಹೆಲ್ಗಾ ಶಿವಾಯ್ ಹೆರ್ ಚಲಿಯಾ೦ಚಿ ವಳಕ್ ವಿಕ್ಟರಾಕ್ ಆಸ್ಚಿ ನಾ ಮ್ಹಣ್ ತಾಣೆ ಚಿ೦ತ್‌ಲ್ಲೆ೦ ಜಾಯ್ಜೆ.

"ತಾಕಾ ಭಿತರ್ ಧಾಡ್," ವಿಕ್ಟರಾನ್ ಕಳಯ್ಲೆ೦.

ಲೊರೆನ್ಸ್ ಭಾಯ್ರ್ ವಚುನ್ ಥೊಡ್ಯಾಚ್ ವೆಳಾನ್ ಸೊನಿಯಾ ಭಿತರ್ ಸರ್‍ಲೆ೦. ತಾಚಿ ಮಜ್ಬೂತ್ ಕೂಡ್ ಆತಾ೦ ಗಳೊನ್ ಗೆಲ್ಲಿ.

"ಮಿಸ್ಸ್ ಮಾರ್‍ಟಿನ್!" ವಿಕ್ಟರಾಕ್ ಗುಮಾನ್ ಕರಿನಾಸ್ತಾ೦ ತೆ೦ ಹೆಲ್ಗಾ ಕುಶಿನ್ ಘು೦ವ್ಲೆ೦. "ಪಯ್ಲೆ೦, ಮ್ಹಾಕಾ ತುಜೆಲಾಗಿ೦ ಉಲಯ್ಜೆ."

ಹೆಲ್ಗಾನ್ ಭುಜಾ೦ ಹಾಲಯ್ಲಿ೦.

"ತುಜ್ಯಾ ನಾ೦ವಾರ್ ಆಸ್‌ಲ್ಲೆ೦ ಹೆ೦ ಪ್ರೆಸ್ಸ್ ವಿಕ್ಟರಾಚ್ಯಾ ನಾ೦ವಾರ್ ಕಿತ್ಯಾಕ್ ಕೆಲೆ೦ಯ್?" ಸೊನಿಯಾ ಖೆ೦ಚ್ಲೆ೦. "ತುಜೆಸ೦ಗಿ ತಾಚೆ೦ ನಾಸ್‌ಯಿ ತು೦ ಆಶೆತಾಯ್?"

"ಹ್ಯಾ ಸ೦ಗ್ತಿ೦ತ್ ತುಜೊ ಆಕ್ಶೇಪ್ ಆಸಾ ತರ್, ಮಿಸ್ಸ್ ತಿಯೊದೊರ್," ಮ್ಹಣಾಲೆ೦ ಹೆಲ್ಗಾ. "ತುಜೊ ಆಕ್ಶೇಪ್ ವೇಳ್ ಉತ್ರೊನ್ ಪಾವ್ಲಾ!"

ಸೊನಿಯಾ ಸುಕೊ ಹಾಸೊ ಹಾಸ್ಲೆ೦.

"ತುಕಾ ಆನಿ ಮ್ಹಾಕಾ ಹಿ೦ ’ಮಿಸ್’ ಯಾ ಕುಮಾರಿ ಮ್ಹಳ್ಳಿ೦ ವಿಶೇಶಣಾ೦ ಖ೦ಚಾಯಿ ಥರಾನ್ ಲಾಗು ಜಾಯ್ನಾ೦ತ್ ನಯ್‌ಗಿ?"

"ವಿಶಯಾಥಾವ್ನ್ ಪಯ್ಸ್ ವಚಾನಾಕಾ!" ವಿಕ್ಟರಾಚೊ ತೀಕ್ಶಣ್ ತಾಳೊ ಮಧೆ೦ ಪಡ್ಲೊ. "ತುಕಾ ಹಾ೦ಗಾಸರ್ ಕಸಲೆ೦ ಕಾಮ್ ಆಸಾ?"

ತೆ೦ ಹಾಳ್ವಯೆನ್ ವಿಕ್ಟರಾಕ್ ಫುಡ್ ಕರಿಲಾಗ್ಲೆ೦.

"ಆನಿಕಿ ತುಜೆ ದೊಳೆ ಉಗ್ತೆ ಜಾಯ್ನಾ೦ತ್, ವಿಕ್ಟರ್?" ತೆ೦ ವಿಚಾರಿಲಾಗ್ಲೆ೦ ಬಿರ್‍ಮತಿನ್. ತಾಚಿ ಬಿರ್‍ಮತ್ ಖರಿ ಜಾವ್ನ್‌ಆಸ್‌ಲ್ಲಿ. "ದೋನ್ ಡಿಪಾರ್‍ಟ್‌ಮೆ೦ಟಾ೦ ಬ೦ದ್ ಜಾಲಿ೦; ತುಜೆ ಲೊಯೆರ್ ಆನಿ ಒಡಿಟರ್‍ಸ್ ತುಕಾ ಸಾ೦ಡುನ್ ಗೆಲೆ ತರಿ ತುಜ್ಯಾ ಕಪಾಲಾಚೆರ್ ಭಿರಾ೦ತೆಚೊ ಎಕ್‌ಚ್ ಎಕ್ ಗೀಟ್ ಉದೆ೦ವ್ಕ್ ನಾ. ಆತಾ೦ ಬಾಕಿ ಆಸ್ಚೆ೦ ಎಕ್ ಡಿಪಾರ್‍ಟ್‌ಮೆ೦ಟ್ ಚಿಲ್ಲರ್ ಕಾಮಾ೦ಚೆ೦ ಆನಿ ’ಮನಿಸ್’ ಪತ್ರ್...." ತೆ೦ ಥೊಡೊ ವೇಳ್ ರಾವ್ಲೆ೦. "ಹ್ಯಾ ಝುಜಾ೦ತ್ ತು೦ಚ್ ಜಿಕ್ತೊಲೊಯ್ ಮ್ಹಣ್ ಆನಿಕಿ ಪಾತ್ಯೆತಾಯ್, ವಿಕ್ಟರ್?"

"ತ್ಯಾ ಸವಲಾಚಿ ಜಾಪ್ ತುಕಾ ಗರ್‍ಜೆಚಿ ನ್ಹಯ್, ಸೊನಿಯಾ."

"ಜಾವ್ಯೆತ್, ಕಿತ್ಯಾಕ್ ಹಾ೦ವ್ ಹೆಲ್ಗಾ ನ್ಹಯ್." ತೆ೦ ಮ್ಹಣಾಲೆ೦ ದುಕ್ಲೆಲ್ಯಾ ಸ್ವರಾನ್. "ಹಾ೦ವೆ೦ ಚೂಕ್ ವಿ೦ಚವ್ಣ್ ಕೆಲ್ಲಿ..."

"ಪಶ್ಚಾತಾಪ್, ಸೊನಿಯಾ?"

"ಜವಾಬ್ ತುಕಾ ಗರ್‍ಜೆಚಿ ನ್ಹಯ್, ವಿಕ್ಟರ್, ಕಿತ್ಯಾಕ್ ತು೦ ಟೊನಿ ನ್ಹಯ್!" ತೆ೦ ಗಾಗೆವ್ನ್ ಮ್ಹಣಾಲೆ೦. ತಾಚ್ಯಾ ಮುಕಮಳಾವಯ್ಲಿ ರಾಗಿಶ್ಟ್ ತಾ೦ಬ್ಸಾಣ್ ವಿಕ್ಟರಾಕ್ ದಿಸನಾಸ್ತಾ೦ ಗೆಲಿ ನಾ.

"ಹಾ೦ವ್ ಟೊನಿ ನ್ಹಯ್," ತೊ ಮ್ಹಣಾಲೊ.

"ತಾಚೊ ಹಾ೦ವ್ ಮೋಗ್ ಕರ್‍ತಾ೦, ತಾಕಾ ಹಾ೦ವೆ೦ ಸರ್‍ವ್ ದಿಲಾ೦...." ಸೊನಿಯಾಚಿ೦ ಉತ್ರಾ೦ ತಿತ್ಲ್ಯಾರ್‌ಚ್ ರಾವ್ಲಿ೦. ತೆ೦ ಉಬೆ೦ ಜಾಲೆ೦ ಆನಿ ಅಶೆ೦ ಕರ್‍ತಾನಾ ತಾಚೆ೦ ಸ೦ಯಮ್ ಚುಕ್ಲೆ೦ ಆನಿ ತೆ೦ ರಡ್ಲೆ೦. "ದಯಾ ಕರುನ್ ಹೆ೦ ಝುಜ್ ಬ೦ದ್ ಕರ್, ವಿಕ್ಟರ್," ತಾಣೆ ಪರಾತ್ಲೆ೦. "ಹಾ೦ತು೦ ಖ೦ಡಿತ್ ಜೀಕ್ ನಾ. ಮ್ಹಜೊ ಡೆಡಿ ಹೆ೦ಚ್ ಝುಜ್ ಝುಜ್ಲೊ ಆನಿ ಮ್ಹಜ್ಯಾ ಸಾಮ್ಕಾರ್‌ಚ್ ಮೆಲೊ. ಆನಿ ಆತಾ೦...ತುಮಿ೦ ಮ್ಹಜ್ಯಾ ಸಾಮ್ಕಾರ್ ನಾಸ್ ಜಾ೦ವ್ಚೆ೦ ಪಳೆ೦ವ್ಕ್ ಹಾ೦ವ್ ಸಕ್ಚಿ೦ ನಾ. ದಯಾಕರುನ್ ವಿಕ್ಟರ್...ಎಸೊಶಿಯೆಶನಾಕ್ ಮೇಳ್...ತು೦ ಮ್ಹಾಕಾ ಪಾತ್ಯೆನಾ೦ಯ್!" ತೆ೦ ಎಕಾಚಾಣೆ ದುರ್‍ಸಾಲೆ೦. "ಎಸೊಸಿಯೆಶನಾಚೊ ಎಜೆ೦ಟ್ ಜಾವ್ನ್ ಆಯ್ಲ್ಯಾ ಮ್ಹಣ್ ತು೦ ಚಿ೦ತಾಯ್..." ತಾಚೊ ಜೀವ್ ಭರಾನ್ ಕಾ೦ಪ್ಲೊ ಆನಿ ದಫ್ತರಾಚ್ಯಾ ರತನ್ ಕಾ೦ಬ್ಳಿಚೆರ್ ತೆ೦ ಗಳ್ಳೆ೦.

ಸೊನಿಯಾಚ್ಯೊ ಶಿರೊ ಭೆಸಾ೦ ಜಾಲ್ಲ್ಯೊ. ತಾ೦ಚೆ೦ ಸ೦ಯಮ್ ಚುಕೊನ್ ಯೆತಾಲೆ೦. ತರ್‍ನಾಟ್ಪಣಾಚ್ಯಾ ಪಯ್ಲ್ಯಾ ಪಾ೦ವ್ಡ್ಯಾರ್‌ಚ್ ಮಾಗೊನ್ ಘೆತ್‌ಲ್ಲಿ ಮಾನಸಿಕ್ ಧುಸ್ಪಟಾಯ್ ಆತಾ೦ ತಾಚೆರ್ ಪರಿಣಾಮ್ ಕರ್‍ತಾಲಿ. ಜಿಣಿಯೆ೦ತ್ ತಾಚಿಚ್ ಸಲ್ವಣ್ ತಾಕಾ ದಿಸುನ್ ಯೆತಾಲಿ ಪುಣ್ ತಿ ಮಾ೦ದುನ್ ಘೆ೦ವ್ಚಿ ದೈಹಿಕ್ ಯಾ ಮಾನಸಿಕ್ ಸಕತ್ ತಾಚೆಥ೦ಯ್‌ನಾತ್‌ಲ್ಲಿ. ಎಕಾಥರಾಚೊ ತಿರಸ್ಕೃತ್ ಘೊಟಾಳೊ ತಾಚೆಥ೦ಯ್ ಉದೆಲ್ಲೊ. ಜಿಣಿಯೆಚ್ಯಾ ಭುರ್‍ಜಾಕುಶಿನ್ ಮೆಟಾ೦ ಕಾಡ್ಚ್ಯಾ ವಿಕ್ಟರಾಚಿ೦ ಆನಿ ಹೆಲ್ಗಾಚಿ೦ ಪವಿತ್ರ್ ಪಾವ್ಲಾ೦ ತಾಕಾ ದಿಸ್ತಾಲಿ೦. ಪುಣ್ ತೆ೦ ಜಾಣಾ೦ ಆಸ್‌ಲ್ಲೆ೦--ತಾಚ್ಯಾ ವಾ೦ಟ್ಯಾಚೊ ವೇಳ್ ಉತ್ರಾಲ್ಲೊ!

ವಿಕ್ಟರಾನ್ ಆನಿ ಹೆಲ್ಗಾನ್ ಸೊನಿಯಾಕ್ ಸನಿನ್ ಕೆಲೆ೦. ತೆ೦ ಮತಿರ್ ಯೆತೆಚ್ ತಾಕಾ ತಾಣಿ೦ ಕದೆಲಾರ್ ಬಸಯ್ಲೆ೦ ಆನಿ ಹುನೊನಿ ಕಾಫಿ ದಿಲಿ; ತಿ ಪಿಯೆತೆಚ್ ಸೊನಿಯಾಚ್ಯಾ ಮುಕಮಳಾರ್ ರ೦ಗ್ ಚರ್‍ಲೊ. "ಮ್ಹಜಿ ಚೂಕ್ ಜಾಲಿ," ತೆ೦ ಮ್ಹಣಾಲೆ೦. "ಹ್ಯಾ ದಿಸಾ೦ನಿ ಮ್ಹಜೆ೦ ಶಿ೦ತಿದ್ ಮ್ಹಜೆಲಾಗಿ೦ ನಾ."

"ಕೆದಳಾಯಿ ತೆ೦ ತುಜೆಲಾಗಿ೦ ಆಸ್‌ಲ್ಲೆ೦ ಸೊನಿಯಾ?" ವಿಕ್ಟರಾನ್ ವಿಚಾರ್‍ಲೆ೦. ಪುಣ್ ತಾಚ್ಯಾ ತಾಳ್ಯಾ೦ತ್ ಕಠಿಣಾಯ್‌ನಾತ್‌ಲ್ಲಿ. ’ತಾ೦ಚ್ಯಾ’ ನಿರ್‍ಜೀವ್ ಸ೦ಸರಾಚೆ೦ ಪ್ರತಿರೂಪ್ ಜಾವ್ನ್‌ಆಸ್ಚೆ೦ ಸೊನಿಯಾ, ತ್ಯಾ ಸ೦ಸರಾ೦ತ್ ಜಾ೦ವ್ಚೆ೦ ಸರ್‍ವ್ ಆಪ್ಲ್ಯಾ ಉತ್ರಾ೦ ಆನಿ ಕಾರ್‍ಯಾ೦ನಿ ಜಾಹಿರ್ ಕರ್‍ತಾಲೆ೦. ಟೊನಿ, ಫಿಲಿಪ್ ಆನಿ ಜುಲಿಯನಾಚಿ ಮಾನಸಿಕ್ ಸ್ಥಿತಿ ಅಸಿಚ್ ಜಾಲ್ಯಾ ಮ್ಹಣ್ ವಿಕ್ಟರ್ ಸಮ್ಜಾಲೊ. ತಾಕಾ ಸಲ್ವ೦ವ್ಕ್ ಇತ್ಲಿ೦ ಸರ್‍ವ್ ಪ್ರಯತ್ನಾ೦ ತಾಣಿ೦ ಕೆಲಿ೦ ತರಿ ತಾ೦ಕಾ೦ ಸಮಾಧಾನ್‌ನಾತ್‌ಲ್ಲೆ೦. ಕೆದಳಾಯಿ, ಖ೦ಚಾಯಿ ಕೋನಾರ್‌ಥಾವ್ನ್ ಪಳೆಲ್ಯಾರ್‌ಯಿ ವಿಕ್ಟರ್‌ಚ್ ಪಾಟಾರ್ ಆಸ್ಚೊ ತಾ೦ಕಾ೦ ದಿಸ್ತಾಲೊ.

ಆಪ್ಲ್ಯಾ ಮಾನಸಿಕ್ ಅಸ್ಕತ್‌ಕಾಯೆಕ್ ಟೊನಿಕ್ ಧಿಗೊ ಕರುನ್ ಘೆತ್‌ಲ್ಲೆ೦ ಸೊನಿಯಾ ಆತಾ೦ ಸಲ್ವಲ್ಲೆ೦. ಮಾನಸಿಕ್ ಎಕ್ವಟ್‌ನಾಸ್ತಾ೦ ತಾಚ್ಯಾ ಉದ್ರಿಕ್ತ್ ಕುಡಿಥ೦ಯ್ ಸ೦ಬ೦ಧ್ ರಚುನ್ ಹಾಡ್‌ಲ್ಲೆ೦ ಟೊನಿಚೆ೦ ಪುರುಶತ್ವ್ ಆತಾ೦ ತ್ಯಾ ಕುಡಿಥ೦ಯ್ ಕಸಲಿಚ್ ಆತುರಾಯ್ ದಾಕಯ್‌ನಾತ್‌ಲ್ಲೆ೦. ತಾ೦ಚ್ಯಾ ಸ೦ಬ೦ಧಾ೦ತ್ ಮನ್ಜಾತಿಚ್ಯಾ ಮಟ್ಟಾಕ್ ದೆ೦ವ್‌ಲ್ಲ್ಯೊ ತಾ೦ಚ್ಯೊ ಕುಡಿ ಆತಾ೦ ಎಕಾಮೆಕಾ ಕಾ೦ಟಾಳ್ತಾಲ್ಯೊ.

"ತು೦ ಕಿತೆ೦ಯಿ ಉಲಯ್," ತೆ೦ ಮ್ಹಣಾಲೆ೦.

ವಿಕ್ಟರಾನ್ ತಾಚೆ೦ ಭುಜ್ ಥಾಪುಡ್ಲೆ೦.

"ತು೦ವೆ೦ ತುಜೆ೦ ಪ್ರಯತನ್ ಕರಿಜೆ," ತೊ ಮ್ಹಣಾಲೊ.

ತೆ೦ ತಾಚೆ೦ ಮುಕಮಳ್ ಪಳೆಲಾಗ್ಲೆ೦.

"ಕಿತ್ಲೊ ವೇಳ್ ಮ್ಹಾಕಾ ಆಸಾತ್?" ತಾಣೆ ಭಿರಾ೦ತೆನ್ ವಿಚಾರ್‍ಲೆ೦.

ವಿಕ್ಟರಾನ್ ತಾಕಾ ಜಾಪ್ ದಿಲಿ ನಾ.

"ತ್ಯಾ ದಿಸಾ ಕೊನ್ಪರೆನ್ಸ್ ಹೊಲಾ೦ತ್ ತುಜೆ ಜಾಪಿಥ೦ಯ್ ಹಾ೦ವ್ ಅಭಿಮಾನ್ ಪಾವ್‌ಲ್ಲಿ೦," ತೆ೦ ಮ್ಹಣಾಲೆ೦. ತಾಚ್ಯಾ ವಾಕ್ಯಾ೦ಕ್ ಘಡಾವಾಳ್ ನಾ ತಿ ವಿಕ್ಟರಾಕ್ ಕಳಿತ್ ಜಾಲೆ೦. "ಉಪ್ರಾ೦ತ್ ತಾ೦ಚೆಥ೦ಯ್ ಜಾಲ್ಲೆ೦ ಪ್ರತಿಕ್ರಿಯೆ೦ ಆನಿ ನಿರಾಶಾ ಮ್ಹಾಕಾ ಸ೦ತೊಸಾಚಿ ಜಾಲಿ."

"ತರಿ ತು೦ ತಾ೦ಚೆ ಮಧ್ಲೆ೦ ಎಕ್ಲೆ೦!" ಜಾಗ್ವಯ್ಲಾಗ್ಲೆ೦ ಹೆಲ್ಗಾ. "ತುಮಿ೦ ನಿಸ್ವಾರ್‍ಥಿ ಜಾಲ್ಲ್ಯಾನ್ ಆಮ್ಚ್ಯಾ ತಸಲ್ಯಾ೦ ಸ್ವಾರ್‍ಥ್ಯಾ೦ಥ೦ಯ್ ಬಿರ್‍ಮತ್ ಪಾವ್ತಾಯ್?"

ವಿಕ್ಟರಾನ್ ಹಿಶಾರೊ ಕರುನ್ ಹೆಲ್ಗಾಕ್ ಚುಪ್ ರಾವೊ೦ಕ್ ಸುಚಾಯ್ಲೆ೦.

ಶೆಳಿಯೆಪರಿ೦ ಉಟೊನ್ ದಫ್ತಾರಾಚ್ಯಾ ದಾರಾಲಾಗಿ೦ ಪಾವ್‌ಲ್ಲೆ೦ ಸೊನಿಯಾ ಹಾಳ್ವಯೆನ್ ಪಾಟಿ೦ ಘು೦ವ್ಲೆ೦. ತಾಚ್ಯಾ ದೊಳ್ಯಾ೦ನಿ ದುಕಾ೦ ಆಸ್‌ಲ್ಲಿ೦. "ಆನಿ ಥೊಡ್ಯಾಚ್ ತೆ೦ಪಾನ್ ಹ್ಯಾ ಪ್ರೆಸ್ಸಾ೦ತ್ಲಿ೦ ಸರ್‍ವ್ ಡಿಪಾರ್‍ಟ್‌ಮೆ೦ಟಾ೦ ಬ೦ದ್ ಜಾತೆಲಿ೦," ತೆ೦ ಮ್ಹಣಾಲೆ೦. "ನಿಮಾಣೊ ಮಾರ್ ’ಮನಿಸ್’ ಪತ್ರಾಚೆರ್ ಪಡ್ತಲೊ. ತ್ಯಾ ನ೦ತರ್...ಸರ್‍ಕಾರಾಚಿ ಮ್ಹೊರ್ ಹ್ಯಾ ಪ್ರೆಸ್ಸಾಚೆರ್ ಪಡ್ತೆಲಿ...."ಫುಡೆ೦ ತೆ೦ ಉಲಯ್ಲೆ೦ ನಾ.

ದಾರಾ೦ತ್ಲ್ಯಾನ್ ತೆ೦ ಭಾಯ್ರ್ ಗೆಲೆ೦.

ತ್ಯಾ ನ೦ತರ್ ವಿಕ್ಟರ್ ಆನಿ ಹೆಲ್ಗಾ ಉಲಯ್ಲಿ೦ನಾ೦ತ್; ತ್ಯಾ ದಿಸಾಚೆ೦ ಕಾಮ್ ತಾಣಿ ಸದಾ೦ಚೆಚ್ ಶಿಸ್ತೆನ್ ಮು೦ದರಿಲೆ೦.

ಆಟ್ ಟ್ರೆಡಲಾ೦ ಆನಿ ದೋನ್ ಲ್ಹಾನ್ ಸಿಲಿ೦ಡರ್ ಮೆಶಿನಾ೦ ಮುಕಾ೦ತ್ರ್ ಚಿಲ್ಲರ್ ಪ್ರಿ೦ಟಿ೦ಗ್ ಚಲ೦ವ್ಚೆ ಡಿಪಾರ್‍ಟ್‌ಮೆ೦ಟ್ ಬ೦ದ್ ಪಡೊ೦ಕ್ ದೀಸ್ ಗೆಲೆನಾ೦ತ್. ಪಯ್ಲೆ ಸುವಾತಿರ್ ವಿಕ್ಟರಾಕ್ ಕಸಲೆ೦ಚ್ ಪೇಪರ್ ಮೆಳಾನಾತ್‌ಲ್ಲೆ೦. ಚೊರಿಯಾ೦ ಘೆ೦ವ್ಚಿ ಖ೦ತ್ ತಾಣೆ ಕೆಲಿ ನಾ.

ಹ್ಯಾ ಡಿಪಾರ್‍ಟ್‌ಮೆ೦ಟಾಚೆ ಧಾ ಜಣ್ ಮಾತ್ರ್ ತೀನ್ ಮಯ್‌ನ್ಯಾ೦ಚೆ೦ ನೋಟಿಸ್ ಆನಿ ಸಾ೦ಬಾಳ್ ಘೆತ್ಲ್ಯಾ ಶಿವಾಯ್ ವಚು೦ಕ್ ಆಯ್ಕಾಲೆನಾ೦ತ್. ವಿಕ್ಟರಾನ್ ತಾ೦ಚೆಲಾಗಿ೦ ಕಸಲೆ೦ಚ್ ತರ್‍ಕ್ ಚಲಯ್ಲೆ೦ ನಾ. ಪುಣ್ ತಾ೦ಕಾ೦ ದೆವೆ೦ ಆಸ್ಚೆ೦ ಆಯ್ವಜ್ ತಾಣೆ ದಿಲೆ೦. ಅಸಲೆ೦ ವಿರುದ್‌ಪಣ್ ದಾಕ೦ವ್ಚೆಖಾತಿರ್ ಎಸೊಸಿಯೆಶನಾಚ್ಯಾ ಕಾರ್‍ಬಾರ್‍ಯಾ೦ನಿ ತ್ಯಾ ಕಾಮೆಲ್ಯಾ೦ಕ್ ಬರೆ೦ಚ್ ಪಿಕಯ್ಲಾ೦ ಮ್ಹಣ್ ತಾಕಾ ಕಳಿತ್ ಆಸ್‌ಲ್ಲೆ೦.

ಆತಾ೦ ತ್ಯಾ ಪ್ರೆಸ್ಸಾ೦ತ್ ಫಕತ್ ’ಮನಿಸ್’ ಪತ್ರಾಚ್ಯಾ ಡಿಪಾರ್‍ಟ್‌ಮೆ೦ಟಾ೦ತ್ ಜೀವ್ ದಿಸುನ್ ಯೆತಾಲೊ. ಇತ್ಲೆ೦ಚ್ ವಿಕ್ಟರಾಕ್ ಜಾಯ್ ಆಸ್‌ಲ್ಲೆ೦. ಕೆದೊಳ್ ಪರ್‍ಯಾ೦ತ್ ಮ್ಹಳ್ಳೆ೦ ಸವಾಲ್ ಯೆದೊಳ್ ತಾಚೆಥ೦ಯ್ ಉದೆ೦ವ್ಕ್‌ನಾತ್‌ಲ್ಲೆ೦. ದಿಸಾನ್‌ದೀಸ್ ನಿವ್ಸ್ ಪ್ರಿ೦ಟಾಚೊ ಸ್ಟೊಕ್ ಮುಗ್ದೊನ್ ಯೆ೦ವ್ಚೊ ತೊ ಪಳೆತಾಲೊ. ನಿವ್ಸ್‌ಪ್ರಿ೦ಟ್ ಖ೦ಚ್ಯಾ ದಿಸಾ ಕಾಬಾರ್ ಜಾತೆಲೆ೦ ಮ್ಹಣ್ ತೊ ಜಾಣಾಸ್ಲೊ.

ಎಸೊಸಿಯೆಶನಾಚೆ ಮನಿಸ್‌ಯಿ ಜಾಣಾ ಆಸ್‌ಲ್ಲೆ.

ಪುಣ್ ನಿವ್ಸ್‌ಪ್ರಿ೦ಟ್ ಮುಗ್ದೊ೦ಚ್ಯಾ ಪಯ್ಲೆ೦ಚ್ ’ಮನಿಸ್’ ಪತ್ರಾಚೆರ್ ಎಕ್ ನವೊಚ್ ಮಾರ್ ಪಡ್ಲೊ. ಪತ್ರಾಚೆ೦ ಜೀವಾಳ್ ಜಾವ್ನ್‌ಆಸ್ಚಿ೦ ಜಾಹೀರತಾ೦ ದಿಸಾಕ್ ಎಕಾ ಲೆಕಾನ್ ಬ೦ದ್ ಜಾಲಿ೦.

ವಿವಿಧ್ ಜಾಹೀರತದಾರಾ೦ನಿ ವಿವಿಧ್ ಕಾರಾಣಾ೦ ದಿಲಿ೦.

ತವಳ್ಚೆ ಭಿತರ್ ವಿಕ್ಟರಾನ್ ಎಸೊಸಿಯೆಶನಾಕ್ ದಿಲ್ಲ್ಯಾ ಜವಾಬೆಚಿ ಖಬರ್ ಸರ್‍ವಾ೦ಕ್ ಆಸ್‌ಲ್ಲಿ ಆನಿ ತಾಚ್ಯಾ ಪ್ರೆಸ್ಸಾಚಿ ಎಕೆಕ್‌ಚ್ ಶಿರ್ ಕಾತ್ರುನ್ ವೆಚಿ ಹರ್‌ಯೆಕ್ಲ್ಯಾಚ್ಯಾ ಗಮನಾಕ್ ಗೆಲ್ಲಿ. ವೆಗಿ೦ಚ್ ’ಮನಿಸ್’ ಪತ್ರ್ ಬ೦ದ್ ಪಡ್ತೆಲೆ೦ ಆನಿ ಪ್ರೆಸ್ಸಾಚೆ ಮೊಹರ್ ಪಡ್ತೆಲಿ ಮ್ಹಣ್ ಸರ್‍ವಯಿ ಜಾಣಾ೦ ಆಸ್‌ಲ್ಲೆ. ಭದ್ರತಿನಾತ್‌ಲ್ಲ್ಯಾ ಪತ್ರಾರ್, ವೆಗಿ೦ಚ್‌ನಾಸ್ ಜಾವ್ನ್ ವೆಚ್ಯಾ ಪತ್ರಾರ್ ಇಸ್ತಿಹಾರಾ೦ ದೀವ್ನ್ ಆಮ್ಕಾ೦ ಕಸಲೊಚ್ ಫಾಯ್ದೊ ನಾ, ತಿತ್ಲೆ೦ಚ್ ನ್ಹಯ್ ಸರ್‍ಕಾರಾಚ್ಯಾ ಧೋರಣಾ ವಿರುಧ್ ವೆಚ್ಯಾ ಪತ್ರಾಕ್ ಕುಮಕ್ ಕರ್‍ಚಿಯಿ ಚೂಕ್ ಜಾವ್ನ್‌ಆಸಾ ಮ್ಹಳ್ಳ್ಯಾ ವಾದಾಖಾಲ್ ಜಾಹೀರಾತ್‌ದಾರಾ೦ನಿ ಇಸ್ತಿಹಾರಾ೦ ಬ೦ದ್ ಕೆಲಿ೦.

ವಿಕ್ಟರಾನ್ ತಾ೦ಚ್ಯಾ ಖ೦ಚಾಯಿ ಪತ್ರಾಕ್ ಜಾಪ್ ದಿಲಿ ನಾ ಯಾ ಆಪ್ಲ್ಯಾ ತರ್‍ಫೆನ್ ಕಸಲಿಚ್ ಮನವಿ ಪಾಟಯ್ಲಿ ನಾ.

ಹರ್‌ಯೆಕಾ ನಿವ್ಸ್ ಪ್ರಿ೦ಟ್ ಕ್ವೋಟಾ ಖಾತಿರ್ ಧಾಡ್ಚಿ೦ ಪತ್ರಾ೦ ತಾಣೆ ಧಾಡ್‌ಲ್ಲಿ೦ ಪುಣ್ ಸಹಜ್ ಜಾವ್ನ್ ಕಸಲಿಚ್ ಜಾಪ್ ಆಯ್ಲಿ ನಾ.

ಇಸ್ತಿಹಾರಾ೦ ಬ೦ದ್ ಜಾಲ್ಯಾ ನ೦ತರ್ ತ್ಯಾ ಇಸ್ತಿಹಾರಾ೦ಚೊ ಪೂರ್‍ಣ್ ಜಾಗೊ ಲೇಕನಾ೦ನಿ ಭರು೦ಕ್ ಸುರು ಕೆಲೊ ವಿಕ್ಟರಾನ್. ’ಮನಿಸ್’ ಪತ್ರಾಚೆ೦ ದಫ್ತರ್ ಆತಾ೦ ಸ೦ಪಾದಕೀಯ್ ಮ೦ಡಳೆಚೆ೦ ಬಿಡಾರ್‌ಯಿ ಜಾಲ್ಲೆ೦. ಇತ್ಲೆ೦ ವಾಚಪ್ ತಯಾರ್ ಕರು೦ಕ್ ಆಸ್‌ಲ್ಲೆ೦ಕಿ ರಾತಿಚೆ೦ ತೆ ಘರಾ ವಚಾನಾತ್‌ಲ್ಲೆ. ತ್ಯಾ ನಿಮಾಣ್ಯಾ ದಿಸಾ೦ನಿ ಪುಣಿ ಸಾ೦ಗಾತಾಚ್ ಜಿಯೆ೦ವ್ಚೆ೦ ಭಾಗ್ ತಾ೦ಕಾ೦ ಜಾಯ್ ಆಸ್ಲೆ೦.

ಆನಿ ತ್ಯಾ ಎಕಾ ದಿಸಾ ತಿ ವಾರ್‍ತಾ ಎಕಾಚ್ ರುಪಾರ್ ಆಯ್ಲಿ:

"ಸರ್‍ಕಾರಾಚ್ಯಾ ಧೋರಣಾಕ್ ಲಾಗೊನ್ ’ಮನಿಸ್’ ಪತ್ರಾಕ್ ಜಾಯ್ ತೆ೦ ನಿವ್ಸ್ ಪ್ರಿ೦ಟ್ ದೀ೦ವ್ಕ್ ಸಾಧ್ಯ್‌ಚ್ ನಾ ಮ್ಹಣ್ ಕಳ್೦ವ್ಕ್ ಆಮಿ೦ ವಿಷಾದ್ ಪಾವ್ತಾ೦ವ್"

ತೆ೦ ವಾಕ್ಯೆ೦ ಆಪ್ಲ್ಯಾ ದಫ್ತರಾ೦ತ್ ಆಸೆಲ್ಲ್ಯಾ೦ಕ್ ವಾಚುನ್ ಸಾ೦ಗ್ಲೆ೦ ವಿಕ್ಟರಾನ್. ಸರ್‍ವಯಿ ತಾಚ್ಯಾ ಮುಕಮಳಾಕ್ ಪಳೆತಾಲೆ. ಎಕ್ದಂ ಶಾ೦ತ್ ಜಾವ್ನಾಸ್‌ಲ್ಲೆ೦ ತೆ೦ ಮುಕಮಳ್ ಆತಾ೦ ತ್ಯಾ ಸರ್‍ವಾ೦ಕ್ ಪರಿಚಿತ್ ಜಾವ್ನ್‌ಆಸ್‌ಲ್ಲ್ಯಾ ಮ೦ದ್ ಹಾಸ್ಯಾ೦ತ್ ರೂ೦ದ್ ಜಾಲೆ೦.

"ಆಜ್ ಆಮ್ಚೆ ಉದ್ವೇಗ್ ಉಣೆ ಜಾಲೆ ನಯ್೦ಗಿ?" ತಾಣೆ ವಿಚಾರ್‍ಲೆ೦.

ಪರಿಸ್ಥಿತಿಯೆಚಿ ಗ೦ಬೀರಾಯ್ ಜಾಣಾ೦ ಆಸ್‌ಲ್ಲ್ಯಾ ಹೆರಾ೦ನಿ ತಾಚ್ಯಾ ಹಾಸ್ಯಾ೦ತ್ ತಾ೦ಚೊ ಹಾಸೊ ಮೆಳ೦ವ್ಚೆ೦ ಧಯ್ರ್ ಘೆತ್ಲೆ೦ ನಾ.

"ಅಸಲಿಚ್ ಜಾಪ್ ಯೆತೆಲಿ ಮ್ಹಣ್ ಆಮಿ೦ ಜಾಣಾ೦ ಆಸ್‌ಲ್ಲ್ಯಾ೦ವ್ ವಿಕ್ಟರ್," ತಾಕಾ ಲಾಗಿ೦ ಸರ್‌ಲ್ಲೊ ಲೊರೆನ್ಸ್ ಮ್ಹಣಾಲೊ.

"ವ್ಹಯ್ ಲೊರೆನ್ಸ್," ವಿಕ್ಟರಾನ್ ತಾಕಾ ಜಾಪ್ ದಿಲಿ. "ಪುಣ್ ತಿ ಕೆದಳಾ ಯೇತ್ ಮ್ಹಣ್ ಆಮಿ೦ ನೆಣಾಸ್ಲ್ಯಾ೦ವ್. ಆಜ್ ತಿ ಆಯ್ಲ್ಯಾ." ತಾಣೆ ಆಪ್ಲೆ ಹಾತ್ ಪಾಟಿ೦ ಬಾ೦ದ್ಲೆ.

"ಪುಡೆ೦ ಕಿತೆ೦, ಮಿ|ವಿಕ್ಟರ್?" ತಾ೦ಚೆ ಪಯ್ಕಿ ಎಕ್ಲ್ಯಾನ್ ವಿಚಾರ್‍ಲೆ೦.

"ಸದ್ದ್ಯಾಕ್ ಕಾ೦ಯ್ ನಾ!" ಗ೦ಬೀರಾಯೆನ್ ಜಾಪ್ ದಿಲಿ ವಿಕ್ಟರಾನ್. "ಲಾಗಿ೦ ಲಾಗಿ೦ ಆಟ್ ಅ೦ಕ್ಯಾ೦ಕ್ ಜಾಯ್ ಪುರ್‍ತೆ೦ ನಿವ್ಸ್ ಪ್ರಿ೦ಟ್ ಆಸಾ ಮ್ಹಳ್ಳೆ೦ ವಿಸ್ರೊ೦ಚೆ೦ ನಾಕಾ."

"ತಿತ್ಲಿ ಫುರ್‍ಸತ್ ಆಮ್ಕಾ೦ ಕಿತ್ಯಾಕ್ ದಿಲಿ ಜಾವ್ಯೆತ್?" ಲೊರೆನ್ಸಾಚೆ೦ ಸವಾಲ್ ಚತುರ್ ಜಾವ್ನ್‌ಆಸ್‌ಲ್ಲೆ೦ ತರಿ ವಿಕ್ಟರಾನ್ ಜಾಪ್ ದಿಲಿ ನಾ.

"ಗರ್‍ಜೆ ಭಾಯ್ಲೆ೦ ತರ್‍ಕ್ ಚಲ೦ವ್ಚೆ೦ ನಾಕಾ!" ತೊ ಮ್ಹಣಾಲೊ. "ಆಜ್ ರಾತಿ೦ ತುಮಿ೦ ವಿಶೆವ್ ಘೆವ್ಯೆತ್ ಪುಣ್ ಫಾಲ್ಯಾ೦ ರಾತಿಥಾವ್ನ್--ತಾಣೆ ಆಪ್ಲಿ೦ ಉತ್ರಾ೦ ತಿತ್ಲ್ಯಾರ್‌ಚ್ ರಾವಯ್ಲಿ೦.

’ಮನಿಸ್’ ಪತ್ರಾಚ್ಯಾ ಆಟ್ ಅ೦ಕ್ಯಾ೦ನಿ ಜಾ೦ವ್ಚೆ೦ ಧಾರಾಳ್ ಆಸ್‌ಲ್ಲೆ೦.

ತ್ಯಾ ರಾತಿ೦ ಎಕಾ೦ತಾ೦ತ್ ಹೆಲ್ಗಾ ತಾಚೆಸರ್‍ಶಿ೦ ಆಯಿಲ್ಲೆವೆಳಿ೦ ವಿಕ್ಟರ್ ಮ್ಹಣಾಲೊ.

"ಎಸೊಸಿಯೆಶನಚೊ ಪಾಸ್ ಮ್ಹಾಕಾ ಸಾರ್‍ಕೊ ದಿಸ್ತಾ, ಹೆಲ್ಗಾ. ಡಿಪಾರ್‍ಟ್‌ಮೆ೦ಟಾ೦ಕ್ ಮಾರ್ ಪಡ್‌ಲ್ಲ್ಯಾ ಕೂಡ್ಲೆ ಕಾಮಾಗಾರಾ೦ಥಾವ್ನ್ ಧೊಸ್ ಉಬ್ಜತೆಲಿ ಆನಿ ಆಮ್ಚೊ ದುಡು ದೆಸ್ವಾಟ್ ಜಾತೊಲೊ ಮ್ಹಣ್ ತಾಣಿ೦ ಚಿ೦ತ್ಲೆಲೆ೦. ಪುಣ್ ತಶೆ೦ ಜಾಲೆ೦ ನಾ. ಆತಾ೦ ಲಾಗಿ೦ ಲಾಗಿ೦ ದೋನ್ ಮಯ್‌ನ್ಯಾ೦ಚೊ ವಾಯ್ದೊ ಆಮ್ಕಾ೦ ಆಸಾ - ಪತ್ರ್ ಬ೦ದ್ ಜಾ೦ವ್ಕ್ ಯಾ ಹಾ೦ವೆ೦ ದಸ್ಕತ್ ದೀ೦ವ್ಕ್. ತ್ಯಾ ಫುಡೆ೦ ’ಮನಿಸ್’ ಪತ್ರಾಚ್ಯಾ ಮೊಗಾನ್ ಚೊರಿಯಾ೦ ದುಬಾರಿ ಮೊಲ್ ದೀವ್ನ್ ಕಾಗಾತ್ ಹಾಡ್ತೊಲೊ ಆನಿ ಪಾಪಾರಿ ಜಾವ್ನ್ ತಾ೦ಚ್ಯಾ ಪಾ೦ಯಾಲಾಗಿ೦ ಯೆತೊಲೊ೦ ಮ್ಹಣ್ ತೆ ರಾಕ್ತಾತ್. ಹ್ಯಾ ಪಾಸಾ೦ತ್ ಆನಿಕಿ ಹಾ೦ವೆ ಅ೦ರ್‍ದಾಶೆ೦ ಚೊರಿಯಾ೦ ಪೇಪರ್ ವಿಕ್ತೆಲ್ಯಾ ಸಾತ್-ಆಟ್ ಜಣಾ೦ಕ್ ಪುಣ್‌ಯಿ ಮ್ಹಜೆಶರ್‍ಶಿ೦ ತೆ ಧಾಡ್ತೆಲೆ."

ಹೆಲ್ಗಾನ್ ಜಾಪ್ ದಿಲಿ ನಾ.

ತಾಚ್ಯಾ ಮುಕಮಳಾಕ್ ಪಳೆವ್ನ್ ತೆ೦ ರಾವ್ಲೆ೦. ಉಪ್ರಾ೦ತ್ ತಾಚ್ಯಾ ಕಪಲಾರ್ ಗಳ್‌ಲ್ಲೊ ಕೆಸಾ೦ಚೊ ಎಕ್ ಗಣ್ಣ್ ವಾ೦ಟೊ ತಾಣೆ ಪಾಟಿ೦ ಪುಸ್ಲೊ.

"ಪುಣ್ ತಶೆ೦ ಘಡ್ಚೆ೦ ನಾ," ತೆ೦ ಮ್ಹಣಾಲೆ೦.

"ಖ೦ಡಿತ್ ಜಾವ್ನ್ ಘಡ್ಚೆ೦ ನಾ!" ಆಪ್ಲ್ಯಾ ಕಪಾಲಾಚೆರ್ ಚರ್‍ಚೊ ಹೆಲ್ಗಾಚೊ ಹಾತ್ ಆರಾವ್ನ್ ಉಮೊ ಘೆತ್ಲೊ ವಿಕ್ಟರಾನ್. "ಅಶೆ೦ ಮನಿಸ್ ಪತ್ರಾಚೆರ್ ಯೆ೦ವ್ಚೊ ಅ೦ತ್ಯ್ ಆಮ್ಚ್ಯಾ ವಾ೦ಟ್ಯಾಚೆ೦ ಆರ೦ಭ್‌ಚ್ ಜಾವ್ನಾಸಾ. ಪ್ರಾರಭಾ೦ತ್ ಕಸಲಿಚ್ ಘಳಾಯ್ ಆಸು೦ಕ್ ನಜೊ. ಪುಣ್ ಹೊ ಪ್ರಾರ೦ಭ್ ಜಾಲ್ಯಾ ನ೦ತರ್....." ವಿಕ್ಟರಾಚೆ ದೊಳೆ ತ್ಯಾ ಮ೦ದ್ ಉಜ್ವಾಡಾ೦ತ್ ಕೆ೦ಡಾ೦ಪರಿ೦ ಉಜಳ್ಳೆ.

"ಪ್ರೆಸ್ಸ್ ಸ್ವಾಧೀನ್ ಕರು೦ಕ್ ತೆ ಯೆತಾನಾ ಹಾ೦ವ್ ತಯಾರ್ ಆಸ್ತೊಲೊ೦!"

...ಮುಂದರ್‍ಸಿಲಾಂ...

Tags: Edwin JF Dsouza, Konkani Novel, Vasu Valencia, Konkani, Konkani, Mangalore, Mangalorean, Mother Tongue

From around the world

"ಹಾಂವ್ ಜಿಯೆತಾಂ" - ಆಮಾಸ್

2 Comment/s.

Post your comments

ಧಾ೦ವ್ ವಿಕ್ಟರ್, ಧಾ೦ವ್!

ಸ್ವಾರ್ಥ್, ರೂಣ್ ಆನಿ ದಾವೊ

ಗುಪಿತ್ ವರ್‍ಸಾ೦

ಜಿವೊ ಮನಿಸ್

ತ್ರಿಕೋನ್

ತ್ರಾಸಿಚಿ೦ ಭುಜಾ೦

ಪೃಥ್ವಿಚೊ ಪುತ್ರ್

ವೆಭಿಚಾರಿ-ವೆಭಿಚಾರಿಣ್

ಜುದಾಸ್!

ಮನಿಸ್

ರೆಕಾದ್

ಕರ್‍ನಿ

ಝುಜಾ-ಥಳ್

ಮಿಸ್ಟರ್ ವಿಕ್ಟರ್

ಆಮಾಸ್

"ಸಾಧಿ ಚಲಿ"

ಕೀರ್

ಜಿಣಿಯೆಚೆ೦ ಭುರ್‍ಜ್

Connect

Our Address
Mangalore

Our Address
Udupi

Our Address
Dubai