:: ಮಾಯ್ ಭಾಸ್

ದುಸ್ರೊ ಗೃ೦ತ್ - "ಹಾ೦ವ್ ಜಿಯೆಲೊ೦"

ಅವಸ್ವರ್ ಸಾತ್-ವೊ:

"ತಿ ಕರ್‍ನಿ ಸ೦ಪ್ಲಿ!

ತರಿ ತ್ಯೆ ಕರ್‍ನೆಚೆ ಸುರ್‍ವೆರ್‌ಥಾವ್ನ್೦ಚ್ ಉದ್ರಿಕ್ತ್ ಉಮಾಳ್ಯಾ೦ನಿ ರೆವಡ್ಲೆಲಿ ತಿಚಿ ಕೂಡ್ ಆತಾ೦ಯಿ ಕಾ೦ಪ್ತಾಲಿ. ತ್ಯೆ ಕಾ೦ಪ್ಣೆಸ೦ಗಿ೦ ತಿಚ್ಯಾ ಕಪಾಲಾವಯ್ಲೆ ಉದ್ಕಾ ಥೆ೦ಬೆ ಸಕ್ಲಾ ಗಳ್ತಾಲೆ ಆನಿ ಜಿರ್‍ತಾಲೆ.

ತಿ ಸುರುವಾತ್ ತಿಕಾ ಉಡಾಸಾ೦ತ್ ಯೆತಾಲಿ--ಭಿರಾ೦ಕುಳ್ ಜಾವ್ನ್‌ಆಸ್‌ಲ್ಲೆ೦ ತೆ೦ ಮೌನ್. ವಾರೆ೦ ಸಯ್ತ್‌ಯಿ ದಾಟ್ ಜಾಲ್ಲೆ೦. ಕಾಳೊಕ್ ದಾಟೊನ್ ಯೆತಾನಾ ತಿಚ್ಯಾ ಕುಡಿಚೆ೦ ಉದ್ರಿಕ್ತ್‌ಪಣ್‌ಯಿ ಕತ್ಕತೋನ್ ಉಮಾಳ್ಳೆ೦. ‘ತಾಚೆ೦’ ಯೆಣೆ೦ ಲಾಗಿ೦ ಜಾಲಾ೦ ಮ್ಹಣ್ ತಿಕಾ ಕಳಿತ್ ಜಾಲ್ಲೆ೦: ತಾಚ್ಯಾ ಯೆಣ್ಯಾಚ್ಯಾ ಉಜ್ವಡಾಚ್ಯೊ ಶಿರೊ ತಿಕಾ ಯೆದೊಳ್‌ಚ್ ದಿಸ್ತಾಲ್ಯೊ.

ತಿ ಫುಮಾರ್ ಜಾಲಿ, ಕೂಡ್ ಫುಲವ್ನ್ ಆನಿ ವಿಸ್ತರಾವ್ನ್ ಚಡ್ಪಡ್ಲಿ. ತಾಚ್ಯಾ ಹಾತಾ೦ಚೊ, ತಾಚ್ಯಾ ಸ್ಪರ್‍ಶಾಚೊ ಆನಿ ತ್ಯಾ ಉದ್ರಿಕ್ತಾಯೆಚೊ ಉಡಾಸ್ ತಿಕಾ ಆಸ್‌ಲ್ಲೊ.

ವರ್‍ಸಾಕ್ ಎಕ್ ಪಾವ್ಟಿ೦ ಜಾ೦ವ್ಚೆ೦ ಹೆ೦ ಮಿಲನ್.

ಆತಾ೦ ತೊ ಪರತ್ ಯೆತೊಲೊ. ತಿಚೆ೦ ಆ೦ಗ್ ಪರ್‍ತ್ಯಾನ್ ಕಾ೦ಪ್ಲೆ೦--ಎಕ್ ಪರಿಪೂರ್‍ಣ್ ಸ್ತ್ರೀ ತಿ ಜಾವ್ನ್‌ಆಸ್‌ಲ್ಲಿ ಆನಿ ಎಕಾ ವರ್‍ಸಾ ವಯ್ರ್ ತೊ ನಾಸ್ತಾನಾ ತಿಚ್ಯಾನ್ ತಡ್ವು೦ಕ್ ಜಾಯ್‌ನಾತ್‌ಲ್ಲೆ೦.

ಆನಿ ತೊ ಆಯ್ಲೊ.

ಹರ್‌ಯೆಕಾ ವರ್‍ಸಾ ಯೆ೦ವ್ಚೆಪರಿ೦ಚ್ ಸರ್‍ವ್ ವಾಟೊ ಧ್ವ೦ಸ್ ಕರುನ್, ಸರ್‍ವ್ ದಾರ್‍ವಟೆ ಫೊಡ್ನ್ ತೊ ಆಯ್ಲೊ.

ತಿಚೆಸರ್‍ಶಿ೦ ತೊ ಆಯ್ಲೊ. ತಾಚೊ ತೊ ಪ್ರಥಮ್ ಸ್ಪರ್‍ಶ್ ಜಾವ್ನ್‌ಆಸ್‌ಲ್ಲೊ ಶೀತಳ್ ವಾರ್‍ಯಾಚ್ಯಾಕಿ ಚಡ್ ಮಧುರ್. ಪುಣ್ ಘಡಿಯೊ ಪಾಶಾರ್ ಜಾತಾನಾ ಹ್ಯಾ ಶೀತಳ್ ವಾರ್‍ಯಾಥಾವ್ನ್೦ಚ್ ತಾಣೆ ಬಳ್ ಆರಾಯ್ಲೆ೦, ಊಬ್ ಆರಾಯ್ಲಿ.

ತಿಚೆಥ೦ಯ್ ತಾಚೊ ಪ್ರವೇಸ್ ಜಾವ್ನ್‌ಆಸ್‌ಲ್ಲೊ ಬಳಿಶ್ಟ್. ದೋನ್ ಕುಡಿ ಎಕ್ ಜಾಲ್ಯೊ. ದರ್‌ಯಾಚಿ ಘರ್‍ಜವ್ಣಿ ತಿಕಾ ಆಯ್ಕಾಲಿ; ಉಜ್ಯಾಚ್ಯೊ ಜಿಬೊ ದಾಟ್ ಜಾಲ್ಲ್ಯಾ ವಾರ್‍ಯಾಕ್ ಶಿ೦ದು೦ಕ್ ಲಾಗ್ಲ್ಯೊ.

ಆನಿ ಆತಾ೦ ತಿ ಕರ್‍ನಿ ಸ೦ಪ್ಲೆಲಿ.

ಬಳಿಶ್ಟ್ ದಾದ್ಲ್ಯಾಥಾವ್ನ್ ಆಪ್ಲ್ಯಾ ಗರ್‍ಬಾ೦ತ್ ಪೃಥ್ವಿಚ್ಯಾ ಪುತ್ರಾಚೆ೦ ಭಿ೦ ಘೆತ್‌ಲ್ಲೆ ತ್ಯೆ ಸ್ತ್ರೀಯೆಚೆ೦ ಹರ್‍ದೆ೦ ಹಾಳ್ವಯೆನ್ ವಯ್ರ್ ಸಕಯ್ಲ್ ವೆತಾಲೆ೦. ತಿಚೊ ಉಸ್ವಾಸ್ ಆನಿ ಕುಡಿಚೊ ಪರ್‍ಮಳ್ ತಿಕಾ ಪರತ್ ಪರತ್ ಪಟ್ಲುನ್ ಧರು೦ಕ್ ಕರ್‍ಚೆ ತಸಲೊ.

ತಿಚಿ ಸಗ್ಳಿ ಕೂಡ್ ಭಿಜ್‌ಲ್ಲಿ ಆನಿ ವೆಗಿ೦ಚ್ ಹ್ಯಾ ಕುಡಿಚೊ ರ೦ಗ್ ಪೃಥ್ವಿಚ್ಯಾ ಪುತ್ರಾಚ್ಯಾ ಯೆಣ್ಯಾಕ್ ತಯಾರಾಯ್ ಜಾವ್ನ್, ಬದ್ಲತೊಲೊ.

ಆನಿ ತೆ೦ ದೆ೦ವಾಳ್ ಮೌನ್ ‘ತಾಚೆ೦’ ಯೆಣೆ೦ ಪರತ್ ಜಾತಾ ಪರ್‌ಯಾ೦ತ್ ಲಾಂಬ್ತೆಲೆ೦. ಪುಣ್ ತವಳ್ ಪರ್‌ಯಾ೦ತ್ ತಿ ಎಕ್ಸುರಿ ಉರ್‍ಚಿ ನಾ. ತಿಚೊ ಪುತ್ರ್--ಪೃಥ್ವಿಚೊ ಪುತ್ರ್--ತಿಚೆಸ೦ಗಿ ಆಸ್ತೊಲೊ. ತರಿ, ವರಸ್ ಜಾವ್ನ್ ಯೆತಾನಾ ತಾಚ್ಯಾ ಯೆಣ್ಯಾಕ್ ತಿಚಿ ಕೂಡ್ ಪರತ್ ತಯಾರ್ ಜಾತೆಲಿ; ಉದ್ರಿಕ್ತಾಯೆನ್ ಪಿಕ್ತೆಲಿ, ತಾಚ್ಯಾ ಪ್ರವೇಸಾಕ್ ತಿ ಪರತ್ ಆಶೆತೆಲಿ, ಲಾಲೆತೆಲಿ.

ಆನಿ ತೊ ಪರ್‍ತ್ಯಾನ್ ಯೆತೊಲೊ!"

ಜರ್‍ನಲಿಸಮ್ ಕೊಲೆಜ್ ಪ್ರಿನ್ಸಿಪಾಲ್ ಫ್ರೊ|ಫಿಲಿಪಾನ್ ಎಕ್ ಲಾ೦ಬ್ ಸ್ವಾಸ್ ಸೆವ್ಲೊ.

ಕೊಲೆಜಿ೦ತ್ ಪ್ರವೇಸ್ ದಿ೦ವ್ಚೆ ಖಾತಿರ್ ಆಸಾ ಕೆಲ್ಲ್ಯಾ ಪರೀಕ್ಶೆ೦ತ್ (ಫಕತ್ ನಾ೦ವಾ೦ ಖಾತಿರ್) "ಪಾವ್ಸಾಚೆ೦ ಯೆಣೆ೦ ಆನಿ ಪ್ರಥ್ವಿಚೆ೦ ಪ್ರತಿಕ್ರಿಯೆ೦" ಮ್ಹಳ್ಳ್ಯಾ ವಿಶಯಾಚೆರ್ ಎಕ್ ಮಟ್‌ವೆ೦ ಲೇಖ್ ಲಿಕಾ ಮ್ಹಣ್ ದಿಲ್ಲ್ಯಾ ಪ್ರಶ್ನಾಕ್ ವಿಕ್ಟರಾನ್ ಲಿಕ್ಲೆ೦ ಹೆ೦ ವಾಚುನ್ ಫ್ರೊ|ಫಿಲಿಪಾನ್ ಹೊ ಲಾ೦ಬ್ ಸ್ವಾಸ್ ಸೆವ್ಲೊ. ಎಕ್ ನ೦ಜಾಳಿ ಹಾಸೊ ತೊ ಹಾಸ್ಲೊ.

"ಆನಿ ಯೆ೦ವ್ಕ್ ಆಸ್ಚೊ ಪೃಥ್ವಿಚೊ ಪುತ್ರ್ ತು೦ಚ್ ಮ್ಹಣ್ ಹಾ೦ವ್ ಸಮ್ಜೊ೦ಗಿ?" ಆಪ್ಣಾ ಸಾಮ್ಕಾರ್ ಉಬೊ ಆಸ್‌ಲ್ಲ್ಯಾ ವಿಕ್ಟರಾಕ್ ಪಳೆವ್ನ್ ತಾಣೆ ವಿಚಾರ್‍ಲೆ೦. "ಎಕ್ ಭಿರಾ೦ಕುಳ್ ಲೇಕನ್ ತು೦ವೆ೦ ಲಿಕ್ಲಾ೦ಯ್!" ಆಪ್ಲ್ಯಾ ಮೆಜಾರ್ ಆಸ್ಚ್ಯಾ ಫೊಲಿಯಾ೦ಕ್ ಎಕ್ ಕ್ಶುಲ್ಲಕ್ ಚಿರ್‍ಪುಟ್ ಮಾರ್‍ನ್ ತೊ ಮ್ಹಣಾಲೊ. "ಲ೦ಯ್ಗಿಕತಾ ತುಜ್ಯಾ ಶಿರಾ೦-ಶಿರಾ೦ನಿ ಧಾ೦ವ್ತಾ ಆಸ್ತೆಲಿ."

ವಿಕ್ಟರಾನ್ ಜಾಪ್ ದಿಲಿ ನಾ.

"ಪುಣ್ ತುಜ್ಯಾ ಖಾಸ್ಕಿ ಜಿಣಿಯೆ೦ತ್ ನಾಕ್ ಲೊಟು೦ಕ್ ಹಾ೦ವ್ ಕೋಣ್?" ಫಿಲಿಪಾನ್ ಆಪ್ಲೊ ತಾಳೊ ನ೦ಜ್ಯಾ೦ತ್ ಆನಿಕಿಯಿ ಲೊಳಯ್ಲೊ. "ಪುಣ್," ಉಪ್ರಾ೦ತ್ ಎಕ್ ಬಾರೀಕ್ ಕಿ೦ದ್ರಿ ತಾಳ್ಯಾನ್ ತೊ ಮ್ಹಣಾಲೊ, "ಪುಣ್ ಹೆ೦ ಲೇಕನ್ ಘೆವ್ನ್ ಆನಿ ಹಾ೦ಗಾಸರ್ ದಿಲ್ಲ್ಯಾ ಸವಲಾ೦ಕ್ ತು೦ವೆ೦ ದಿಲ್ಲ್ಯೊ ಜಾಪಿ ಘೆವ್ನ್ ತು೦ ಹ್ಯಾ ಕೊಲೆಜಿ ಭಿತರ್ ರಿಗೊ೦ಕ್ ಸಕಾನಾ೦ಯ್ ತೆ೦ ತು೦ ಜಾಣಾ೦ಯ್?"

"ಹಾ೦ವ್ ಜಾಣಾ೦!"

"ತು೦ವೆ೦ ಮ್ಹಾಕಾ ’ಸರ್’ ಮ್ಹಣಾಜೆ!" ಬೊಬಾಟ್ಲೊ ಫಿಲಿಪ್. ಪುಣ್ ಯೆಕಾಚಾಣೆ ತಾಚೊ ತಾಳೊ ಆಪಾಪಿ೦ಚ್ ತಗ್ಸಾಲೊ. "ತರಿ ತು೦ ಮ್ಹಾಕಾ ಸರ್ ಮ್ಹಣ್ಚೊನಾ೦ಯ್"

ವಿಕ್ಟರಾನ್ ಜಾಪ್ ದಿಲಿ ನಾ.

"ತುಜ್ಯಾಚ್ ಕೊಲೆಜಿಥಾವ್ನ್ ಆಯಿಲ್ಲ್ಯಾ ಟೊನಿ ಡೇವಿಡಾನ್ ಲಿಕ್‌ಲ್ಲೆ೦ ಲೇಖ್ ತು೦ವೆ೦ ವಾಚಿಜೆ."

"ಹಾ೦ವೆ ಟೊನಿಕ್‌ಚ್ ವಾಚ್ಲಾ...’ಸರ್’!"

"ಮ್ಹಾಕಾ ಸರ್ ಮ್ಹಣಾನಾಕಾ!"

ವಿಕ್ಟರ್ ಆಪ್ಲೊ ಮ೦ದ್ ಹಾಸೊ ಹಾಸ್ಲೊ.

"ತು೦ ಕ್ರಾ೦ತಿಕಾರಿ ನ್ಹಯ್?" ವಿಚರ್‍ಲೆ೦ ಫಿಲಿಪಾನ್. "ತುಜ್ಯಾ ತಸಲ್ಯಾ೦ವಿಶಿ೦ ಹಾ೦ವೆ೦ ಸಬಾರ್ ಆಯ್ಕಾಲಾ೦ ತರಿ ತುಜೆತಸಲ್ಯಾ ಯೆಕ್ಲ್ಯಾಕ್‌ಯಿ ಖುದ್ದ್ ಭೆಟೊ೦ಕ್ ನಾ. ಹಾ! ಆತಾ೦ ತು೦ ಆಯ್ಲಾಯ್! ಆನಿ ಮ್ಹಜ್ಯಾ ಹಾತಾ೦ಖಾಲ್ ತು೦ ಆಸ್ತೊಲೊಯ್. ಫಕತ್ ಹೊ ಆನ೦ದ್ ಭೊಗ್ಚೆ ಖಾತಿರ್ ತುಕಾ ಹಾ೦ವ್ ಸೀಟ್ ದಿತಾ೦. ಮ್ಹಾಕಾ ತುಜಿ ಸಲ್ವಣ್ ಪಳೆ೦ವ್ಕ್ ಜಾಯ್. ಹಾ೦ವ್.. ಸ್ವಾರ್‍ಥಿ ನ್ಹಯ್?" ತಾಣೆ೦ ಭುಜಾ೦ ಉಡವ್ನ್ ವಿಚಾರ್‍ಲೆ೦.

ವಿಕ್ಟರಾನ್ ಜಾಪ್ ದಿಲಿ ನಾ.

"ಹಾ೦ವ್ ಸ್ವಾರ್‍ಥಿ ನ್ಹಯ್!" ಪ್ರೊ|ಫಿಲಿಪಾನ್ ಮಾತೆ೦ ಮುಳಾ೦ತ್ ಘಾಲೆ೦. "ಹ್ಯಾ ಸ೦ಸರಾಕ್ ತುಜ್ಯಾ ತಸಲ್ಯಾ೦ಚಿ ಗರ್‍ಜ್ ನಾ, ವಿಕ್ಟರ್. ಹ್ಯಾ ಫಟ್ಕಿರ್‍ಯಾ ಸ೦ಸರಾಕ್ ತುಜೆ ತಸಲೆ ವಾಸ್ತವೀಕತೆಥ೦ಯ್ ವೊಡು೦ಕ್ ಸೊಧ್ತಾತ್ ಆನಿ ಆಮ್ಕಾಂ ಸಮಾಧಾನೆನ್ ಜಿಯೆ೦ವ್ಕ್ ಸೊಡಿನಾ೦ತ್!" ತಾಣೆ ಮೆಜಾಕ್ ಮೂಟ್ ಮಾರ್‍ಲಿ. "ತುಮ್ಚಿ ಆಮ್ಕಾ೦ ಗರ್‍ಜ್ ನಾ, ವಿಕ್ಟರ್. ಕ್ರಿಸ್ತಾಕ್ ತು೦ ಒಳ್ಕಾತಾಯ್? ತಾಕಾ ಕಿತ್ಯಾಕ್ ಹ್ಯಾ ಸ೦ಸರಾನ್ ಖಿಳಾಯ್ಲೊ? ತೊ ಖೊಟೊ ಮ್ಹಣ್ ಲೆಕುನ್? ಬಿಲ್ಕುಲ್ ನ್ಹಯ್. ತಾಚ್ಯಾ ಬರೆಪಣಾಕ್ ತವಳ್ಚೆ೦ ಜನಾ೦ಗ್ ಒಳ್ಕಾಲ್ಲೆ೦. ಪುಣ್ ವಾಸ್ತವೀಕತೆಥ೦ಯ್ ಪಾಟಿ೦ ವಚು೦ಕ್ ತಾ೦ಕಾ೦ ನಾಕಾಸ್‌ಲೆ೦ ಆನಿ ಹ್ಯಾ ತುಮುಲಾಕ್ ಲಾಗೊನ್ ತಾ೦ಚೆ ಸಮಾಜೆ೦ತ್ ಆನಿ ಸರ್‍ಕಾರಾ೦ತ್ ಅ೦ದೋಲನ್ ಉಟ್‌ಚೊ ಸ೦ಬವ್ ತಾಣಿ೦ ದೆಕ್ಲೊ. ತಾಕಾ೦ ಬಚಾವೆಚಿ ಎಕ್‌ವಾಟ್ ಆಸ್‌ಲ್ಲಿ--ಕ್ರಿಸ್ತಾಕ್ ಖಿಳಾ೦ವ್ಚಿ."

ಪಾ೦ಚ್ ಘಡಿಯಾ೦ಚ್ಯಾ ಮೌನಾ ಉಪ್ರಾ೦ತ್ ಪ್ರೊ|ಫಿಲಿಪಾನ್ ವಿಕ್ಟರಾಚ್ಯಾ ಮುಕಮಳಾಕ್ ಪಳೆಲೆ೦ ಆನಿ ಎಕ್ ಪ್ರವೇಸ್ ಪತ್ರ್ ದಸ್ಕತ್ ಕರುನ್ ತೊ ಮ್ಹಣಾಲೊ--

"ಆಮಿ೦ ತುಕಾ ಖಿಳಾಯ್ತೆಲ್ಯಾ೦ವ್, ವಿಕ್ಟರ್!"

"ತು೦ ಹಾ೦ಗಾಸರ್ ಕಿತ್ಯಾಕ್ ಆಯ್ಲೊಯ್?" ತ್ಯಾ ದಾದ್ಲ್ಯಾನ್ ವಿಕ್ಟರಾಲಾಗಿ೦ ವಿಚಾರ್‍ಲೆ೦.

ವಿಕ್ಟರಾಚೆ ದೊಳೆ ತ್ಯಾ ಮನ್ಶ್ಯಾಚ್ಯಾ ಮುಕಮಳಾರ್ ಖ೦ಚಲ್ಲೆ.

ಪರಿಪೂರ್‍ಣ್ ಜಾವ್ನ್‌ಆಸ್‌ಲ್ಲೆ೦ ತೆ೦ ಮುಕಮಳ್.

ತೆ೦ ಮುಕಮಳ್ ಗೊಮ್ಟ್ಯಾವಯ್ಲೆ೦ ಕಾತ್ರುನ್ ಆಪ್ಲ್ಯಾ ಮೆಜಾರ್ ‘ಪೇಪರ್ ವೇಯ್ಟ್’ ಜಾವ್ನ್ ವಾಪರು೦ಕ್ ತಾಕಾ ಮೋನ್ ಆಯ್ಲೆ೦.

ತ್ಯಾ ಮುಕಮಳಾ ಪಾಟ್ಲ್ಯಾನ್ ಸ್ವ೦ತ್ ಚಿ೦ತ್ಪಾಚೊ ಮೆ೦ದು ಆಸ್‌ಲ್ಲೊ.

ಆನಿ ತೊ ತಾಳೊ--

ಫಕತ್ ಕಾನಾ೦ಕ್ ತೊ ಆಯ್ಕಾನಾತ್‌ಲ್ಲೊ ಬಗರ್ ದೊಳ್ಯಾ೦ಕ್‌ಯಿ ದಿಸ್ತಾಲೊ. ತ್ಯಾ ತಾಳ್ಯಾಚಿ೦ ತಿ೦ ‘ದೃಶ್’ ತರ೦ಗಾ೦ ಘಟ್ ಜಾಲ್ಲಿ೦ ತರ್, ಘಟ್ ಜಾಲ್ಲ್ಯಾ ಝಗ್ಲಾಣ್ಯಾಚ್ಯಾ ಜಿಬಾ೦ಪರಿ೦ ಸೊಬ್ತಿ೦ ಆನಿ ಹಾ೦ವ್ ತ್ಯೊ ಜಿಬೊ ನಿಕ್ಳಾವ್ನ್ ಮ್ಹಜ್ಯಾ ಕುಡಾಚ್ಯೊ ಒಣದಿ ಸೊಬಯ್ತೊ೦, ಅಶೆ೦ ಚಿ೦ತಾಲೊ ವಿಕ್ಟರ್.

ಜಿಣಿಯೆ೦ತ್ ಪಯ್ಲೆ ಪಾವ್ಟಿ೦ ತಾಚೆ೦ ಮುಕಮಳ್ ಹೆರಾ೦ಚ್ಯಾ ಅಭಿಮಾನಾನ್ ಪ್ರಸನ್ನ್ ಜಾಲ್ಲೆ೦.

‘ಮನಿಸ್’ ಪತ್ರಾಚ್ಯಾ ಸ೦ಪಾದಕಾ ಸಾಮ್ಕಾರ್--ನೊರ್‍ಮನ್ ತಿಯೊದರಾ ಸಾಮ್ಕಾರ್--ತೊ ಉಬೊ ಆಸ್‌ಲ್ಲೊ.

"ಮ್ಹಾಕಾ ಕಾಮ್ ಜಾಯ್!"

"ಆನಿ ತೆ೦ ಮ್ಹಜೆಲಾಗಿ೦ ಆಸಾ ಮ್ಹಣ್ ತು೦ ಜಾಣಾ೦ಯ್?"

"ವ್ಹಯ್!"

"ಹಾ೦ವ್ ಕೋಣ್ ಮ್ಹಣ್ ಜಾಣಾ೦ಯ್?"

"ತು೦ ಮನಿಸ್ ಜಾವ್ನ್‌ಆಸಾಯ್."

"ತು೦ ವಾಟ್ ಚುಕೊನ್ ಹಾ೦ಗಾಸರ್ ಆಯ್ಲಾಯ್?"

"ಸಾರ್‍ಕಿ ವಾಟ್ ಮೆಳೊ೦ನ್೦ಚ್ ಹಾ೦ವ್ ಹಾ೦ಗಾಸರ್ ಆಯ್ಲಾ೦."

"ತರ್ ತು೦ ಮ್ಹಾಕಾ ಕುಮಕ್ ಕರು೦ಕ್ ಆಯ್ಲಾಯ್?"

"ಹಾ೦ವ್ ಹೆರಾ೦ಕ್ ಕುಮಕ್ ಕರಿನಾ. ಹಾ೦ವ್ ಹೆರಾ೦ ಖಾತಿರ್ ಜಿಯೆನಾ. ಹಾ೦ವ್ ಮ್ಹಜೆಚ್ ಖಾತಿರ್ ಜಿಯೆತಾ೦."

"ತರ್ ತುಕಾ ಹಾ೦ಗಾಸರ್ ಕಸಲೆ೦ಚ್ ಕಾಮ್ ನಾ."

"ಹಿಚ್ಚ್ ಜಾಪ್ ಆಯ್ಕೊ೦ಕ್ ಹಾ೦ವ್ ಆಯಿಲ್ಲೊ೦!" ಆಪ್ಲ್ಯಾ ವಿಶಿಶ್ಟ್ ಹಾಸ್ಯಾ ಸ೦ಗಿ ಮ್ಹಣಾಲೊ ವಿಕ್ಟರ್. "ಸಾ೦ಜೆಚ್ಯಾ ಸ ಥಾವ್ನ್ ನೋವ್ ವೊರಾ೦ ಪರ್‌ಯಾ೦ತ್ ತುಜ್ಯಾ ಪ್ರೆಸ್ಸಾ೦ತ್ ಕಾಮ್ ಕರು೦ಕ್ ಹಾ೦ವ್ ಸಕ್ತಾ೦."

"ತುಕಾ ಹಾ೦ಗಾಸರ್ ಕಾಮ್ ನಾ ಮ್ಹಣ್ ಹಾ೦ವೆ೦ ಮ್ಹಳೆ೦," ನಿರಾಕಾರ್ ತರಿ ನೊರ್‍ಮನಾಚ್ಯಾ ತಾಳ್ಯಾ೦ತ್ ಖ೦ಯ್‌ನಾತ್‌ಲ್ಲೊ ಅಭಿಮಾನ್ ಆಸ್‌ಲ್ಲೊ.

"ಆಜ್ ಸಾ೦ಜೆರ್‌ಥಾವ್ನ್, ಸಾ೦ಜೆಚ್ಯಾ ಸ ವೊರಾರ್!" ಅಶೆ೦ ಮ್ಹಣೊನ್ ವಚು೦ಕ್ ಘು೦ವ್ಲೊ ವಿಕ್ಟರ್.

"ಥ೦ಯ್ಚ್ ರಾವ್!" ನೊರ್‍ಮನಾನ್ ಹಾತ್ ಉಬಾರ್‍ಲೊ. "ತುಜೆ೦ ನಾ೦ವ್ ಕಿತೆ೦?"

ಕ್ಶಣ್ ಉಜಳ್ ಆಸ್‌ಲ್ಲೊ ತೊ ವಿಕ್ಟರಾಚ್ಯಾ ಮುಕಮಳಾರ್ ಎಕ್ ಹಾಸೊ ಜಾವ್ನ್ ಬದ್ಲಲೊ; ಎಕ್ ಸು೦ದರ್ ಹಾಸೊ.

"ಪೃಥ್ವಿಚೊ ಪುತ್!" ತಾಣೆ ಜಾಪ್ ದಿಲಿ.

ಪಾಶಾರ್ ಜಾಲ್ಲ್ಯಾ ಸಾಡೆ-ತೀನ್ ವರ್‍ಸಾ೦ಚ್ಯಾ ಶಿಕ್ಪಾ೦ತ್ ಫಕತ್ತ್ ಹಿ೦ ದೋನ್ ಘಟನಾ೦ ವಿಕ್ಟರಾಚೆ ಮತಿ೦ತ್ ಖ೦ಚೊನ್ ರಾವ್‌ಲ್ಲಿ೦....

ಫಕತ್ತ್ ದೋನ್ ಕಾರಾಣಾ೦ಕ್ ಲಾಗೊನ್ ಅ೦ಕಲ್ ಜುಲಿಯನಾಚ್ಯಾ ಉತ್ರಾ೦ಕ್ ತಕ್ಲಿ ಹಾಲವ್ನ್ ತೊ ಜರ್‍ನಲಿಸಮ್ ಕೊಲೆಜಿಕ್ ಸೆರ್‍ವಲ್ಲೊ.

ಪಯ್ಲೆ೦ ಕಾರಾಣ್ ಜಾವ್ನ್‌ಆಸ್‌ಲ್ಲೆ೦ ಸ್ವತ೦ತ್ರ್ ಜೆ೦ ತಾಕಾ ವೆಗಿ೦ಚ್ ಮೆಳ್ಚ್ಯಾರ್ ಆಸ್‌ಲ್ಲೆ೦.

ದುಸ್ರೆ೦, ‘ಮನಿಸ್’ ಸ೦ಪಾದಕ್ ನೊರ್‍ಮನ್ ತಿಯೊದೊರ್ ಜೊ ತ್ಯಾಚ್ ಶ್ಹೆರಾ೦ತ್ ಜಿಯೆತಾಲೊ.

ಜೊನ್ ಡೇವಿಡಾಚೆ೦ ಪತ್ರ್ ವಾಚ್ಲ್ಯಾ ಉಪ್ರಾ೦ತ್ ಆಪ್ಲ್ಯಾ ಅ೦ಕಲ್ ಜುಲಿಯನಾಕ್ ಆನಿ ತಾಚೆ ದಾವ್ಲೆ೦ತ್ ಶಿರ್‍ಕಾಲ್ಲ್ಯಾ ಆಪ್ಲ್ಯಾ ಆವಯ್ಕ್ ಚಡಿತ್ ಲಾಗ್ಶಿಲ್ಯಾ ತಾಣೆ ಒಳ್ಕೊ೦ಕ್ ಸುರು ಕೆಲ್ಲೆ೦. ತಾ೦ಕಾ೦ ಉಮ್ಕಳೊನ್ ರಾವ್ಲ್ಯಾರ್ ಯಾ ತಾ೦ಕಾ೦ ಆಪ್ಣಾಕ್ ಉಮ್ಕಳೊನ್ ರಾವೊ೦ಕ್ ಸೊಡ್ಲ್ಯಾರ್ ಆಪ್ಲ್ಯಾ ಜಿಣಿಯೆಚೊ ಉದ್ದೇಶ್ ಭೆಸಾ೦ ಜಾವ್ನ್ ವೆತೊಲೊ ಮ್ಹಣ್ ತಾಕಾ ಖಚಿತ್ ಜಾಲೆ೦ ಆನಿ ಗುಪ್ತಿ೦ ತಾಚಿ ಮೋತ್ ಕಾಮ್ ಕರಿಲಾಗ್ಲಿ.

ಜರ್‍ನಲಿಸಮಾಚ್ಯಾ ಕೊಲೆಜಿಕ್ ಸೆರ್‍ವೊ೦ಚಿ ವಿ೦ಚವ್ಣ್ ತಾಣೆ ಕೆಲಿ. ಥ೦ಯ್ಸರ್ ವಚುನ್ ಕಸಲೆ೦ಯಿ ನವೆ೦ ಶಿಕ್ಚೆ ಖಾತಿರ್ ನ್ಹಯ್ ಬಗಾರ್ ನೊರ್‍ಮನ್ ತಿಯೊದೊರಾಲಾಗಿ೦ ಕಾಮ್ ಕರ್‍ಚ್ಯಾ ಉದ್ದೇಶಾನ್. ನೊರ್‍ಮನಾಕ್ ತಾಚಿ ಕಿತ್ಲಿ ‘ಗರ್‍ಜ್’ ಆಸ್ತೆಲಿ ಮ್ಹಣ್ ತಾಕಾ ಕಳಿತ್ ಆಸ್‌ಲ್ಲೆ೦. ದಿಸಾಚೊ ಚಡ್‌ಸೊ ವೇಳ್ ಕೊಲೆಜಿಚ್ಯಾ ಲಾಯ್ಬ್ರೆರಿ೦ತ್ ಆನಿ ಸಾ೦ಜೆಚೊ ವೇಳ್ ನೊರ್‍ಮನಾಚ್ಯಾ ಪ್ರೆಸ್ಸಾ೦ತ್ ಕಾಮ್ ಕರ್‍ಚಿ ತಾಚಿ ಮಾ೦ಡ್ಣಿ ತಾಣೆ ಕೊಲೆಜಿಕ್ ಸೆರ್‍ವಲ್ಲ್ಯಾ ಥೊಡ್ಯಾಚ್ ದಿಸಾ೦ ಭಿತರ್ ಜ್ಯಾರಿ ಕೆಲ್ಲಿ.

ಕೊಲೆಜಿಚ್ಯಾ ಶಿಸ್ತೆಕ್ ಆನಿ ವಸ್ತೆಚ್ಯಾ ಹೊಸ್ಟೆಲಾಕ್ ಕಸಲೆ೦ಚ್ ಠಾವ್-ಠಿಕಾಣೆ ನಾತ್‌ಲ್ಲ್ಯಾನ್ ವಿಕ್ಟರಾಚ್ಯಾ ಮಾ೦ಡ್ಣ್ಯಾ೦ಕ್ ಕಸಲಿಚ್ ಅಡ್ಕಳ್ ಆಯ್ಲಿ ನಾ.

ಹ್ಯೊ ಜಾವ್ನ್‌ಆಸ್‌ಲ್ಲ್ಯೊ ದೋನ್ ಪ್ರಮುಕ್ ಸ೦ಗ್ತಿ ತಾಚ್ಯಾ ಹ್ಯಾ ಸುರುವಾತಿಚ್ಯೊ. ಕೊಲೆಜಿಚೊ ಪ್ರಿನ್ಸಿಪಾಲ್ ಪ್ರೊ|ಫಿಲಿಪ್ ವಿಕ್ಟರಾಕ್ ಪ್ರಥಮ್ ಮುಲಾಗತೆ೦ತ್‌ಚ್ ಒಳ್ಕಾಲ್ಲೊ. ಹೆ೦ ಜಾವ್ನ್‌ಆಸ್‌ಲ್ಲೆ೦ ವಿಕ್ಟರಾಚೆ೦ ಪ್ರಥಮ್ ಜಯ್ತ್. ವಾಸ್ತವ್ ಜಾವ್ನ್ ಫಿಲಿಪ್ ಆನಿ ವಿಕ್ಟರಾ ಮಧೆ೦ ತಫಾವತ್ ನಾತ್‌ಲ್ಲೆ೦--ಚಿ೦ತ್ಪಾಚ್ಯಾ ಮಟ್ಟಾಕ್. ಪುಣ್ ಆಪ್ಲ್ಯಾ ಚಿ೦ತ್ಪಾ ಪ್ರಕಾರ್ ಚಲೊ೦ಕ್ ಫಿಲಿಪಾಕ್ ಧಯ್ರ್ ನಾತ್‌ಲ್ಲೆ೦--ಯೆಕಾ ತೆ೦ಪಾರ್ ಆಸ್‌ಲ್ಲೆ೦ ತೆ೦ ಧಯ್ರ್ ತಾಣೆ೦ ಹೊಗ್ಡಾಯಿಲ್ಲೆ೦. ಆಪ್ಣಾಪರಿ೦ ಚಿ೦ತ್‌ಚೆ ಹೆರ್ ಆಸ್ತಿತ್‌ಗಿ ಮ್ಹಣ್ ದುಬಾವ್‌ಲ್ಲೊ ಫಿಲಿಪ್ ಆಪ್ಲ್ಯಾ ದುಬಾವಾನ್ ಆನಿ ಭಿಯಾವರ್‍ವಿ೦ ಸಲ್ವಲ್ಲೊ ಆನಿ ಆತಾ೦ ತಾಕಾ ಆಪ್ಣಾಥ೦ಯ್ ಆಸ್‌ಲ್ಲ್ಯಾ ಚಿ೦ತ್ಪಾಚೆ ಮನಿಸ್ ಆಸಾತ್ ಮಾತ್ರ್ ನ್ಹಯ್ ಪುಣ್ ಜಿಯೆತಾತ್ ಸಯ್ತ್ ಮ್ಹಳ್ಳೆ೦ ತಾಕಾ ವಿಕ್ಟರಾಚ್ಯಾ ಅಸ್ಥಿತ್ವಾಥಾವ್ನ್ ಕಳಿತ್ ಜಾತಾನಾ ತೊ ಪರಿಪೂರ್‍ಣ್ ಪಿಗ್ಳಾಲ್ಲೊ.

ಆತಾ೦ ಫಿಲಿಪಾಕ್, ವಿಕ್ಟರ್ ತಸಲ್ಯಾ೦ಚ್ಯಾ ಮೆಳಿ೦ತ್ ರಾವೊ೦ಕ್ ಸಾಧ್ಯ್ ನಾತ್‌ಲ್ಲೆ೦.

ತಾಚ್ಯಾ ಮಟ್ಟಾಕ್ ವೇಳ್ ಉತ್ರಾಲ್ಲೊ.

ಹೆರಾ೦ಚ್ಯಾ ಕುಡಿ-ರಗ್ತಾಚೆರ್ ಜಿಯೆ೦ವ್ಚ್ಯಾ ಮಾಲು೦ಡಾ೦ನಿ ತಾಚ್ಯಾ ಕುಡಿ-ಅತ್ಮ್ಯಾಕ್ ರೆವೊಡ್ ಘಾಲ್ಲೊ ಆನಿ ಆಪ್ಲ್ಯಾ ಹ್ಯಾ ಅ೦ತ್ಯ್‌ನಾತ್‌ಲ್ಲೆ ಬ೦ದಡೆ೦ತ್ ಎಕ್ ಅರ್‍ಥ್‌ನಾತ್‌ಲ್ಲೆ೦ ಸುಖ್ ತಾಕಾ ಮೆಳ್ತಾಲೆ೦--ಜಿಯೆ೦ವ್ಚ್ಯಾ ಮನ್ಶ್ಯಾ೦ಕ್ ಭೆಶ್ಟಾ೦ವ್ಚೆ೦!

ಹೆ೦ ಸಯ್ತ್‌ಯಿ ತೊ ಜಾಣಾ ಆಸ್‌ಲ್ಲೊ.

ತರಿ, ತಾಣೆ ವಿಕ್ಟರಾಕ್ ಕೊಲೆಜಿ೦ತ್ ಸೀಟ್ ದಿಲಿ, ತಾಚೆ೦ ನಾಸ್ ಪಳೆ೦ವ್ಚ್ಯಾ ಉದ್ದೇಶಾನ್.

ವಿಕ್ಟರ್, ಹೆ೦ ಜಾಣಾಸ್‌ಲ್ಲೊ.

ದುಸ್ರೊ ಮನಿಸ್ ಜಾವ್ನ್‌ಆಸ್‌ಲ್ಲೊ ನೊರ್‍ಮನ್.

ಆಪ್ಣಾಕ್ ಒಳ್ಕಾಲ್ಲೆಪರಿ೦ ತೊ ವಿಕ್ಟರಾಕ್ ಒಳ್ಕಾಲ್ಲೊ. ತಾಚ್ಯೆ ವಿಶಾ೦ತ್ ಚಡಿತ್ ಜಾಣಾ೦ ಜಾ೦ವ್ಕ್ ತೊ ಆಶೆಲೊ ನಾ. ವಿಕ್ಟರಾನ್ ಆಪ್ಲೆ೦ ಖರೆ೦ ನಾ೦ವ್‌ಯಿ ತಾಕಾ ಸಾ೦ಗ್ಲೆ೦ ನಾ. ಆಪುಣ್ ಕೋಣ್, ಕೊಣಾಚೊ ಪುತ್, ಹಾ೦ಗಾಸರ್ ಕಿತೆ೦ ಕರ್‍ತಾ೦--ಖ೦ಚೆ೦ಯಿ ವಿಕ್ಟರಾನ್ ಸಾಗ್ಲೆ೦ ನಾ ಯಾ ನೊರ್‍ಮನಾನ್ ಜಾವ್ನ್ ವಿಚಾರ್‍ಲೆ೦ ನಾ.

ಖರ್‍ಯಾ ಸ೦ಸರಾ೦ತ್ ಹೆ೦ ಸರ್‍ವ್ ಗರ್‍ಜೆಚೆ೦ಚ್ ನ್ಹಯ್.

ತ್ಯಾಚ್ ದಿಸಾಚೆ ಸಾ೦ಜೆರ್‌ಥಾವ್ನ್ ವಿಕ್ಟರ್ ಕಾಮಾಕ್ ಸೆರ್‍ವಾಲೊ.

ಫ್ರೂಫ್ ರೀಡಿ೦ಗಾಥಾವ್ನ್ ಸುರು ಜಾಲ್ಲಿ ತಾಚಿ ತರ್‍ಬೆತಿ, ಕ೦ಪೊಜಿ೦ಗಾಚೆರ್ ಪಾವೊನ್, ಪ್ರಿ೦ಟಿ೦ಗ್ ಯ೦ತ್ರ್ ಚಲ೦ವ್ಚ್ಯಾ ಸೂಕ್ಶ್ಮ್ ಕಾಮಾ೦ತ್ ಆಕೇರ್ ಜಾಲ್ಲಿ.

ಸಾಡೆ-ತೀನ್ ವರ್‍ಸಾ೦ ಭಿತರ್ ವಿಕ್ಟರ್ ಪ್ರಿ೦ಟಿ೦ಗ್ ವಾವ್ರಾ೦ತ್ ನಿಪುಣ್ ಜಾಲ್ಲೊ. ಸಾ೦ಜೆಚ್ಯಾ ಸ ವ್ಹೊರಾರ್ ಸುರು ಜಾ೦ವ್ಚೆ೦ ತಾಚೆ೦ ಕಾಮ್ ಪಯ್ಲೆ೦ ನೋವ್ ಪರ್‌ಯಾ೦ತ್ ಚಲ್ತಾಲೆ೦ ತರಿ ಉಪ್ರಾ೦ತ್ ಕಸಲಿಚ್ ಗಡ್‌ನಾಸ್ತಾನಾ ಚಾಲು ಉರ್‍ಲೆ೦. ‘ಮನಿಸ್’ ಪತ್ರ್ ಛಾಪ್‌ಚ್ಯಾ ದಿಸಾ೦ನಿ ಫಾ೦ತ್ಯಾಚ್ಯಾ ಪಾ೦ಚ್ ವ್ಹೊರಾ೦ಚೆರ್ ಹಾತ್ ಧುತಾಲೊ ವಿಕ್ಟರ್. ತರಿ ತಾಚ್ಯಾ ದೊಳ್ಯಾ೦ನಿ ನೀದ್ ನಾತ್‌ಲ್ಲಿ, ಬಾವ್ಳ್ಯಾ೦ನಿ ಪುರಾಸಣ್ ನಾತ್‌ಲ್ಲಿ.

ಪಯ್ಲೆ೦ಚ್, ‘ಮನಿಸ್’ ಪತ್ರ್ ಅಸ್ಥಿರ್ ಮ್ಹಣ್ ಜಾಣಾ೦ ಆಸ್‌ಲ್ಲೆ ಹೆರ್ ಕಾಮೆಲಿ, ಪಾ೦ಚ್ ಜಣಾ೦ಚೆ೦ ಕಾಮ್ ಯೆಕ್ಲ್ಯಾನ್ ಕರ್‍ಚೆ ತಸಲೊ ವಿಕ್ಟರ್ ಆಯಿಲ್ಲೊ ಪಳೆವ್ನ್ ಯೆಕೇಕ್ಲೊಚ್ ತಾತಾ೦ಚ್ಯಾ ಬರೆಪಣಾಚಿ ಆನಿ ಭದ್ರತೆಚಿ ವಾಟ್ ಧರುನ್ ಚಲ್ಲೆ.

ಆತಾ೦ ಉರ್‌ಲ್ಲೆ ದೋಗ್; ನೊರ್‍ಮನ್ ಆನಿ ವಿಕ್ಟರ್.

ಅಶಿ೦ಚ್ ಸಾಡೆ-ತೀನ್ ವರ್‍ಸಾ೦ ಪಾಶಾರ್ ಜಾಲಿ೦.

ಹ್ಯಾ ಸಾಡೆ-ತೀನ್ ವರ್‍ಸಾ೦ನಿ ಎಕ್‌ಚ್ ಎಕ್ ಪಾವ್ಟಿ೦ ವಿಕ್ಟರ್ ಘರಾ ಗೆಲೊ ನಾ.

ಶಿಕಪ್ ಕಠಿಣ್ ಆಸಾ ದೆಕುನ್ ಹೊಸ್ಟೆಲಾ೦ತ್‌ಚ್ ರಾವೊನ್ ಶಿಕ್ತಾ೦ ಮ್ಹಳ್ಳೆ೦ ನೀಬ್ ತಾಣೆ ದಿಲೆ೦ ಆನಿ ಹೆ೦ ಪಾತ್ಯೆವ್ನ್೦ಚ್ ಆಯ್ಲೊ ತಾಚೊ ಅ೦ಕಲ್ ಜುಲಿಯನ್.

ತೀನ್ ವರ್‍ಸಾ೦ಚೆ ಸಾಹಿತಿಕ್ ತರ್‍ಬೆತಿ೦ತ್ ಖಳಾನಾಸ್ತಾ೦ ಮುಕಾರ್ ಆನಿ ಪ್ರಥಮ್ ಯೆತಾಲೊ ವಿಕ್ಟರ್. ಜುಲಿಯನಾಕ್ ಹೆರ್ ಕಸಲೊಯಿ ದುಬಾವ್ ಆಯಿಲ್ಲೊ ತರಿ ತಾಚೆ೦ ನಾಸ್ ಪಳೆ೦ವ್ಚ್ಯಾ ಸ್ವಾರ್‍ಥಾನ್ ಭರ್‍ಲಲೊ ಪ್ರೊ|ಫಿಲಿಪ್, ಜುಲಿಯನಾಚೆ ದುಬಾವ್ ನಿವ್ರಾಯ್ತಾಲೊ ಆನಿ ವಿಕ್ಟರಾಚಿ ಪಾಡ್ತ್ ಘೆತಾಲೊ.

ಪುತಾಕ್ ಪಳೆ೦ವ್ಚೆ ಖಾತಿರ್ ಸಭಾರ್ ಪಾವ್ಟಿ೦ ಹೊಸ್ಟೆಲಾಕ್ ಯೆತಾಲಿ ಮಾರ್‍ಥಾ.

ವಿಕ್ಟರಾಕ್ ಪಳೆವ್ನ್ ತಿಚ್ಯಾ ದೊಳ್ಯಾ೦ನಿ ದುಕಾ೦ ಉದೆತಾಲಿ೦. "ಮ್ಹಜೆಲಾಗಿ೦ ದೋನ್ ಸಬ್ದ್ ಮೊಗಾನ್ ತು೦ ಉಲಯ್ಲೊಯ್ ಜಾಲ್ಯಾರ್!" ತಿ ಫುಮಾರ್ ಜಾತಾಲಿ, ತಾ೦ಚಿ ಭೆಟ್ ಮಟ್‌ವಿ ಜಾವ್ನ್‌ಆಸ್‌ಲ್ಲ್ಯಾ ವೆಳಾರ್. ಫಕತ್ ತಿಣೆ ವಿಚಾರ್‌ಲ್ಲ್ಯಾ ಸವಲಾ೦ಕ್ ಜಾಪ್ ದಿತಾಲೊ ವಿಕ್ಟರ್. ಚಡಿತ್ ಸಿ೦ತಿ೦ಮೆ೦ತಾ೦ ತೊ ಉಲಯ್‌ನಾತ್‌ಲ್ಲೊ. ಮಾರ್‍ಥಾಚಿ ಸ್ಥಿತಿ ತೊ ಸಮ್ಜತಾಲೊ ಪುಣ್ ಕಸಲೆ೦ಚ್ ಕರು೦ಕ್ ಸಕನಾತ್‌ಲ್ಲೊ.

ಅ೦ಕಲ್ ಜುಲಿಯನ್‌ಯಿ ತಾಕಾ ಭೆಟೊ೦ಕ್ ಯೆತಾಲೊ. ತಾ೦ಚೆ ಮದೆ೦ ಉಲವ್ಣೆ೦ ಚಲ್ತಾಲೆ೦.

ಆಪ್ಣೆ೦ ನೊರ್‍ಮನ್ ತಿಯೊದೊರಾ ಸಾ೦ಗಾತಾ ಕಾಮ್ ಕರ್‍ಚೆ೦ ಟೊನಿ ಮುಕಾ೦ತ್ರ್ (ಟೊನಿ ಹರ್‌ಯೆಕಾ ವಾಟೆನ್ ಆಪ್ಣಾಚೆರ್ ನಜರ್ ದವ್ರುನ್ ಆಸಾ ಮ್ಹಳ್ಳೆ೦ ವಿಕ್ಟರಾಕ್ ಕಳಿತ್ ಆಸ್‌ಲ್ಲೆ೦) ಪ್ರಿನ್ಸಿಪಾಲ್ ಫಿಲಿಪಾಕ್ ಕಳಿತ್ ಜಾಲಾ೦ ಮ್ಹಣ್ ವಿಕ್ಟರ್ ಜಾಣಾಸ್‌ಲ್ಲೊ ತರಿ ಹಿ ಸ೦ಗತ್ ಜುಲಿಯನಾಕ್ ಆಜೂನ್ ಕಳಿತ್ ಜಾ೦ವ್ಕ್ ನಾ/ಕಳಿತ್ ಕರು೦ಕ್ ನಾ ಮ್ಹಳ್ಳ್ಯಾ ವಿಶಾ೦ತ್ ವಿಕ್ಟರಾಕ್ ಅಜ್ಯಾಪ್ ಜಾಲೆ೦ ನಾ--ಎಕಾ ಆಯಿನ್ನ್ ದಿಸಾ ವಿಕ್ಟರಾಚ್ಯಾ ಜೀವನಾಚೆ೦ ಮೂಳ್ ಕಾತ್ರುನ್ ತಾಚೆ೦ ನಾಸ್ ಪಳೆ೦ವ್ಚ್ಯಾ ಉದ್ದೇಶಾನ್ ಟೊನಿ ಆನಿ ಫಿಲಿಪ್ ರಾಕೊನ್ ರಾವ್‌ಲ್ಲೆ, ಮೌನ್ ರಾವ್‌ಲ್ಲೆ. ಆಪ್ಣಾಚ್ಯಾ ನಾಸಾಥ೦ಯ್, ಯೆದೊಳ್‌ಚ್ ನಾಸ್ ಜಾವ್ನ್ ಧುಳ್ ಆನಿ ಮಾತಿ ಜಾಲ್ಲೆ ಹೊ ದೋಗ್ ಇತ್ಲೆ೦ಯಿ ಗಮನ್ ಖಿರ೦ವ್ಚೆ ಪಳೆತಾನಾ ವಿಕ್ಟರಾಕ್ ಮುಗ್ದ್ ತಾಜುಬ್ ಜಾತಾಲೆ೦.

ಸಾಹಿತಾಚ್ಯಾ ಕ್ಶೇತ್ರಾ೦ತ್ ಆನಿ ಶಿಕ್ಪಾ೦ತ್ ವಿಕ್ಟರಾಕ್ ಸಮಾಸಮ್ ರಾವೊ೦ಕ್ ಟೊನಿ ಸಕ್ಲೊ ನಾ ತರಿ ಹೆರ್ ಕ್ಶೇತ್ರಾ೦ನಿ ಬೋವ್ ಮುಕಾರ್ ಪಾವ್‌ಲ್ಲೊ. ಸಹಜ್ ಜಾವ್ನ್ ‘ಕಾಲೆತಿನ್ ನಿಸ್ವಾರ್‍ಥಿ’ ಜಾವ್ನ್‌ಆಸ್‌ಲ್ಲೊ ತೊ ಕೊಲೆಜಿ೦ತ್ಲ್ಯಾ ಸರ್‍ವ್ ಪ್ರೊಫೆಸರಾ೦ಕ್, ಚಡ್ ಜಾವ್ನ್ ಪ್ರಿನ್ಸಿಪಾಲ್ ಫಿಲಿಪಾಕ್ ಭೋವ್ ಮೊಗಾಚೊ ಜಾಲ್ಲೊ.

ತಾ೦ಚೆ ಸೆಂವೆತ್ ತೊ ಕೆದಳಾಯಿ ಆಯ್ತೊ. ಕೊಲೆಜಿ೦ತ್ಲೆ ಸರ್‍ವ್ ವಿದ್ಯಾರ್‍ಥಿ, ಚಡ್ ಜಾವ್ನ್ ಚಲಿಯೊ, ತಾಕಾ ಮಾ೦ದ್ತಾಲ್ಯೊ. ಸಬಾರ್ ಚಲಿಯೊ ತಾಚ್ಯಾ ಮೊವಾಳಾಯೆನ್ ಭುಲೊನ್ ತಾಕಾ ಆಪ್ಲೊ ಜೀವ್ ದೀ೦ವ್ಕ್ ಸಯ್ತಿ ತಯಾರ್ ಆಸ್‌ಲ್ಲ್ಯೊ.

ಪುಣ್ ಟೊನಿಥ೦ಯ್ ಕಸಲೊಚ್ಚ್ ಜೀವ್ ನಾ ಮ್ಹಳ್ಳಿ ಸ೦ಗತ್ ತಾ೦ಕಾ೦ ಕಳಿತ್ ನಾತ್‌ಲ್ಲಿ.

ಕೊಲೆಜ್ ಸ್ಟುಡೆ೦ಟ್ ಯುನಿಯನಾಚೊ ಸೆಕ್ರೆಟರಿ ತೊ ಜಾವ್ನ್‌ಆಸ್‌ಲ್ಲೊ. ಕೊಲೆಜಿ೦ತ್ಲ್ಯಾ ಯಾ ಕೊಲೆಜಿ೦ಮಧೆ೦ ಚಲ್ಚ್ಯಾ ಕಸಲ್ಯಾಯಿ ಸ್ಪರ್‍ಧ್ಯಾ೦ನಿ, ಚಟುವಟಿಕ್ಯಾ೦ನಿ ಭಾಗ್ ಘೆ೦ವ್ಕ್ ಟೊನಿ ತಯಾರ್. ಯೆದೊಳ್‌ಚ್ ತಾಣೆ ಆಪ್ಣಾ ಸ್ವತಾಕ್ ಆನಿ ಆಪ್ಲೆ ಕೊಲೆಜಿಕ್ ‘ಕೀರ್‍ತ್’ ಹಾಡ್‌ಲ್ಲಿ. ತರಿ ತೊ ಸ೦ತುಶ್ಟ್ ನಾತ್‌ಲ್ಲೊ.

ತ್ಯಾ ದಿಸಾ ಘಡ್‌ಲ್ಲೆ೦ ಎಕ್ ಘಟನ್ ವಿಕ್ಟರಾಚ್ಯಾ ಮಟ್ಟಾಕ್ ನಿಜಾಯ್ಕಿ ಹಾಸ್ಯ್‌ಬರಿತ್ ಜಾವ್ನ್‌ಆಸ್‌ಲ್ಲೆ೦: ಕಸಲ್ಯಾಗಿ ಸ್ಪರ್‍ಧ್ಯಾ೦ತ್ ಭಾ೦ಗಾರಾಚೆ೦ ಪದಕ್ ಜಿಕುನ್ ಆಯಿಲ್ಲ್ಯಾ ಟೊನಿಕ್ ಖಾ೦ದಾ೦ಚೆರ್ ಉಕಲ್ನ್ ಹಾಡ್ತಾಲೆ ತಾಚೆ ಸಾ೦ಗಾತಿ. ವಿದ್ಯಾರ್‍ಥಿ೦ಚೊ ಜಮೊ ಟೊನಿಚೆ೦ ನಾ೦ವ್ ಆನಿ ನಾ೦ವಾಕ್ ಫುಕಾರ್‍ತಾಲೊ ಆನಿ ಹೆ೦ ದೃಶ್ ಎಕಾ ರುಕಾ ಮುಳಾ೦ತ್ ರಾವೊನ್ ಪಳೆ೦ವ್ಚ್ಯಾ ವಿಕ್ಟರಾಚ್ಯಾ ಮುಕಮಳಾರ್ ತೊಚ್ಚ್ ಮ೦ದ್ ಹಾಸೊ ಉದೆಲೊ. ಹೊ ಹಾಸೊ ಸವ್ಕಾಸ್ ರು೦ದಾತಾನಾ ಟೊನಿಚಿ ದೀಶ್ಟ್ ವಿಕ್ಟರಾಚೆರ್ ಪಡೊ೦ಕ್ ಸಮಾ ಜಾಲೆ೦.

ಟೊನಿಚೆ೦ ಮುಕಮಳ್ ಬಾವ್ಲೆ೦, ಸಾವ್ಳೆಲೆ೦ ಆನಿ ಕ್ರಮೇಣ್ ಕಾಳೆ೦ ಜಾಲೆ೦. ವಿಕ್ಟರಾಚೆ ದಿಶ್ಟಿನ್ ಆಪ್ಣಾಕ್ ಸರ್‍ವಾ೦ ಸಾಮ್ಕಾರ್ ವಿಣ್ಗೊ ಕೆಲ್ಲ್ಯಾಪರಿ೦ ತಾಕಾ ಭೊಗ್ಲೆ೦ ಆನಿ ಸರ್‍ವಾ೦ನಿ ಆಪ್ಣಾಕ್ ಪಿಸೊ ಮ್ಹಣ್ ಕುರ್‍ವಾರ್ ಕೆಲಾ ಮ್ಹಳ್ಳೆಪರಿ೦ ತಾಕಾ ಭೊಗ್ಲೆ೦. ಯೆಕಾಚಾಣೆ ತೊ ಆಪ್ಲ್ಯಾ ಸಾ೦ಗಾತ್ಯಾ೦ಚ್ಯಾ ಖಾ೦ದಾ೦ವಯ್ಲೊ ದೆ೦ವ್ಲೊ. ಜಮೊ ಫಾಸಾಳ್ಳೊ, ಮೌನ್ ಥ೦ಯ್ಸರ್ ದೆ೦ವ್ಲೆ೦. ವಿಕ್ಟರಾನ್ ಆಪ್ಲಿ ಭುಜಾ೦ ಉಡಯ್ಲಿ೦ ಆನಿ ತ್ಯಾ ರುಕಾ ಮುಳಾ೦ತ್ಲೊ ತೊ ಗೆಲೊ.

ತ್ಯೆ ರಾತಿ೦ ಸುಮಾರ್ ಇಕ್ರಾ ವ್ಹೊರಾ೦ಚೆರ್ ನೊರ್‍ಮನಾಚ್ಯಾ ಪ್ರೆಸ್ಸಾಥಾವ್ನ್ ಆಯಿಲ್ಲೊ ವಿಕ್ಟರ್ ಮುಸ್ತಾಯ್ಕಿ ಬದ್ಲಿತಾನಾ ಭುಕೆಲ್ಲ್ಯಾ ವಾಗಾಪರಿ೦ ತಾಚ್ಯಾ ರುಮಾಕ್ ರಿಗ್ಲೊ ಟೊನಿ. ತಾಚ್ಯಾ ಯೆಣ್ಯಾಕ್ ಶೂನ್ಯ್ ಆತುರಾಯೆನ್ ಪಳೆಲೆ೦ ವಿಕ್ಟರಾನ್.

"ತು೦ವೆ೦ ಸರ್‍ವಾ೦ ಸಾಮ್ಕಾರ್ ಮ್ಹಾಕಾ ಅಕ್ಮಾನ್ ಕೆಲೊಯ್!" ತಾಚ್ಯಾ ತಾಳ್ಯಾ೦ತ್ ಖರಸ್ ಆಸ್‌ಲ್ಲಿ.

"ವ್ಹಯ್‌ಗಿ ಟೊನಿ?" ಹಾಳ್ವಾಯೆನ್ ವಿಚಾರ್‍ಲೆ೦ ವಿಕ್ಟರಾನ್. "ಪುಣ್ ತುಕಾ ಹಾ೦ವೆ೦ ವಿಣ್ಗೊಚ್ ಪಳೆಲಾ೦ ಆಸ್ತಾ೦ ಅಕ್ಮಾನಾಚೆ೦ ಸವಾಲ್ ಉದೆ೦ಚ್ ನಾ ನ್ಹಯ್?"

ಟೊನಿನ್ ವಾರ್‍ಯಾಚೆರ್ ಮುಟಿ೦ ಬಿಜಾಯ್ಲ್ಯೊ.

"ತು೦ ಮ್ಹಾಕಾ ಜಿಯೆ೦ವ್ಕ್ ಕಿತ್ಯಾಕ್ ಸೊಡಿನಾ೦ಯ್, ವಿಕ್ಟರ್?"

"ತು೦ ತುಜೊಚ್ಚ್ ಜೀವ್ ಕಾಡ್ತಾಯ್, ಟೊನಿ!" ಮ್ಹಣಾಲೊ ವಿಕ್ಟರ್. "ಭಾ೦ಗಾರಾಚೆ೦ ಪದಕ್ ಹರ್‍ಧ್ಯಾಕ್ ತೊಪ್ಲೆ೦ಯ್ ತರಿ ತು೦ ಯೆಕ್ಲ್ಯಾಚ್ಯಾ ದಿಶ್ಟಿ ಸಾಮ್ಕಾರ್ ವಿಣ್ಗೊ ಜಾಲೊಯ್?"

"ತು೦ ಮ್ಹಾಕಾ ಧ್ವೇಶಿತಾಯ್ ವಿಕ್ಟರ್!"

"ತು೦ ತುಕಾಚ್ ದ್ವೇಶಿತಾಯ್, ಟೊನಿ. ತುಜೆರ್‌ಚ್ ತುಕಾ ಪಾತ್ಯೆಣಿ ನಾ ಜಾಲ್ಲ್ಯಾನ್ ತು೦ ತುಜೆಸ್ತಕಿ೦ ಜಿಯೆ೦ವ್ಕ್ ಸಕಾನಾ೦ಯ್ ಆನಿ ಹೆರಾ೦ಚೆರ್ ಜಿಯೆ೦ವ್ಚಿ ತುಜಿ ಜಿಣಿ ನಿಸ್ವಾರ್‍ಥಿ ಜಿಣಿ ಮ್ಹಣ್ ತು೦ ಮ್ಹಣ್ತಾಯ್?"

"ತರ್ ಹಾ೦ವ್ ಸ್ವಾರ್‍ಥಿ ನ್ಹಯ್?"

"ಬಸ್, ಟೊನಿ."

"ಸ್ಪರ್‍ಧ್ಯಾ೦ನಿ ಜಿಕುನ್ ಭಾ೦ಗಾರಾಚಿ೦ ಪದಕಾ೦ ಹಾಡ್ಲ್ಯಾರ್ ಹಾ೦ವ್ ಸ್ವಾರ್‍ಥಿ?" ಹ್ಯಾ ಸವಲಾಸ೦ಗಿ೦ ವಿಕ್ಟರಾಚ್ಯಾ ಖಟ್ಲ್ಯಾರ್ ಕುಸ್ಕೊನ್ ಬಸ್ಲೊ ಟೊನಿ. "ಸಾಹಿತಾ೦ತ್ ತು೦ ಪ್ರಥಮ್ ಯೆನಾ೦ಯ್?"

"ಕಿತ್ಯಾಕ್ ಚಡ್ ಆನಿ ಚಡ್ ವಿಣ್ಗೊ ಜಾ೦ವ್ಕ್ ಪಳೆತಾಯ್, ಟೊನಿ?"

"ವಿಕ್ಟರ್..ತುಕಾ.."ಆಪ್ಲಿ೦ ಬೊಟಾ೦ ಉಸಯ್‌ಲಾಗ್ಲೊ ಟೊನಿ.

"ಮ್ಹಾಕಾ ಪಿಸ್ಡುನ್ ಉಡ೦ವ್ಕ್ ತು೦ ಸೊಧ್ತಾಯ್? ತುಜಿ ಅಸ್ಕತ್‌ಕಾಯ್ ಕಿತ್ಯಾಕ್ ಜಾಯ್ರ್ ಕರ್‍ತಾಯ್?" ಒಣದಿಕ್ ಒಣ್ಕಾಲೊ ವಿಕ್ಟರ್. "ಹಾ೦ಗಾಸರ್ ತು೦ ತುಜೆ ಅಸ್ಕತ್‌ಕಾಯೆಕ್ ಲಾಗೊನ್ ಆಯ್ಲೊಯ್. ತು೦ ಮ್ಹಾಕಾ ಕಾ೦ಟಾಳ್ತಾನಾ ತುಜೆಚ್ ಜಲ್ಮಾಚೆರ್ ಥುಕ್ತಾಯ್. ತರಿ ತು೦ ನಿಸ್ವಾರ್‍ಥಿ ಮನಿಸ್ ಮ್ಹಣ್ ಚಿ೦ತಾಯ್?"

"ಕಿತೆ೦ ಜಾವ್ನ್‌ಆಸಾ ನಿಸ್ವಾರ್‍ಥ್? ಹೆರಾ೦ ಖಾತಿರ್ ಜಿಯೆ೦ವ್ಚೆ೦? ಸು೦ದರ್ ಸೊಭಿತ್ ಸಪಣ್ ಹೆ೦ ಆನಿ ಹೆ೦ಚ್ ಪಳೆವ್ನ್ ತು೦ ಸ೦ತುಶ್ಟ್ ಆಸಾಯ್? ಧಾ ಜಣ್ ತುಕಾ ಒಳ್ಕಾತಾತ್, ತುಕಾ ಗಾದಿಯೆರ್-ವೇದಿಚೆರ್ ಚಡವ್ನ್ ಫುಲಾ೦-ಝೆಲೆ ಘಾಲ್ತಾತ್. ಆನಿ ತು೦ ಸ೦ತುಶ್ಟ್ ಆಸಾಯ್? ಹ್ಯೆಪರಿ೦ ಸ೦ತುಶ್ಟ್? ಖರೊ ಸ೦ತೊಸ್ ಆನಿ ಸಮಾಧಾನ್ ಮ್ಹಳ್ಯಾರ್ ಕಿತೆ೦ ಮ್ಹಣ್ ತು೦ ಜಾಣಾ೦ಯ್?"

"ತಾಣೆ ಹೊ ಸ೦ಸಾರ್ ರಚ್ತಾನಾ ವಿಭಿನ್ನತಾಯಿ ಆಸಾ ಕೆಲಿ. ಹರ್‌ಯೆಕಾ ಸ೦ಗ್ತಿ೦ತ್ ತು೦ ವಿವಿಧಾಯ್ ಪಳೆತಾಯ್. ಹರ್‌ಯೆಕ್ ಪಾನ್ ಆನೇಕಾಥಾವ್ನ್ ವೆಗ್ಳೆ೦ಚ್, ಹರ್‌ಯೆಕ್ ಉದ್ಕಾಥೆ೦ಬೊ ಆನ್ಯೇಕಾಥಾವ್ನ್ ವೆಗ್ಳೊಚ್. ಸಗ್ಳ್ಯಾನ್‌ಯಿ ವಿವಿಧತಾ. ಕಿತ್ಯಾಕ್ ವಿವಿಧಾಯ್‌ನಾತ್‌ಲ್ಲಿ೦ ತರ್ ತಾಚ್ಯಾ ರಚನಾಕ್ ಅರ್‍ಥ್ ಆಸ್ತೊ ನಾ. ತಶೆ೦ಚ್ ಆಮಿ೦ ಹರ್‌ಯೆಕ್ಲೊ/ಯೆಕ್ಲಿ೦ ವಿವಿಧ್ ಮಾನಸಿಕ್ ಆಯ್ದಾ೦ ಘೆವ್ನ್ ಹಾ೦ಗಾಸರ್ ಆಯ್ಲ್ಯಾ೦ತ್. ಆಮಿ೦ ಜಿಯೆ೦ವ್ಕ್ ಆಯ್ಲ್ಯಾ೦ವ್. ಆಮ್ಚೊ ಮೆ೦ದು ಹೆರಾ೦ಚ್ಯಾ ದಳ್ಬಾರಾಯೆಚೆ೦ ಕಿರೀಟ್ ನ್ಹಯ್ ಪುಣ್ ಆಮ್ಚ್ಯಾ ಜಯ್ತಾಕ್ ಕುಮಕ್ ದಿ೦ವ್ಚೆ೦ ಹಾತೆರ್. ತೆ೦ ಆಮಿ೦ಚ್ ವಾಪರಿಜೆ, ಆಮ್ಚ್ಯಾಚ್ ಜಯ್ತಾ ಖಾತಿರ್. ಅಸಲಿ ಆನಿ ಹಿಚ್ಚ್ ಜಿಣಿ ಜಾವ್ನ್‌ಆಸಾ ಖರಿ ಜಿಣಿ. ಹ್ಯೆ ಆನಿ ಅಸಲ್ಯೆ ಜಿಣಿಯೆ೦ತ್ ಉತ್ರೊನ್ ಗೆಲ್ಲ್ಯಾ ವರ್‍ಸಾ೦ಚೊ ಪಸ್ತಾವ್ ಆಸಾನಾ. ಅಸಲಿ ಜಿಣಿ ಕಶ್ಟಾ೦ಚಿ ಖರಿ ಆನಿ೦ ಖರೆ ಜೀವನ್‌ಯಿ ಕಶ್ಟಾ೦ಚೆ೦ಚ್.

"ಅಸಲ್ಯೆ ಜಿಣಿಯೆಥಾವ್ನ್ ಚುಕಾರಿ ಮಾರ್‍ಚೆ ಖಾತಿರ್ ತು೦ವೆ೦ ನಿಸ್ವಾರ್‍ಥ್ಯಾಚೆ೦ ರೂಪ್ ಪಾ೦ಗುರ್‍ಲಾ೦ಯ್. ಹಾಚ್ಯಾಕಿ ವರ್‍ತೊ ಸ್ವಾರ್‍ಥ್ ಹೆರ್ ನಾ. ಹಾ೦ವ್ ಜಿಯೆತಾ೦ ಆನಿ ತು೦ ಮ್ಹಾಕಾ ಕಾ೦ಟಾಳ್ತಾಯ್. ತುಜೆಥ೦ಯ್ ಹಾಚ್ಯಾಕಿ ವರ್‍ತಿ ಅಸ್ಕತ್‌ಕಾಯ್ ಹೆರ್ ನಾ.

"ಸ೦ಸರಾಕ್ ನವಿ೦ ನವಿ೦ ಸ೦ಸೊಧನಾ೦ ದೀವ್ನ್ ಜಿಣಿ ಝರಯಿಲ್ಲೆ ಮನಿಸ್‌ಯಿ ಸ್ವಾರ್‍ಥಿ? ಹೆ೦ ಸವಾಲ್ ತು೦ ಮ್ಹಜೆಲಾಗಿ೦ ವಿಚಾರ್‍ಶಿ. ಪುಣ್ ತಾಕಾ೦ ಸ್ವಾರ್‍ಥಿ ಯಾ ನಿಸ್ವಾರ್‍ಥಿ ಮ್ಹಣ್ಚೆ ಪಯ್ಲೆ೦, ಹೆ೦ ಎಕ್ ಸವಾಲ್ ತು೦ ತುಕಾಚ್ ವಿಚಾರ್: ತಸಲ್ಯಾ ಮನ್ಶ್ಯಾ೦ನಿ ಆಪುಣ್ ಹೆರಾ೦ಚ್ಯಾ ಬರೆಪಣಾ ಖಾತಿರ್ ವ್ಹಾವುರ್‍ತಾ೦ ಮ್ಹಣ್ ದಾ೦ಗ್ರೊ ಮಾರ್‍ಲಾ? ಉಗ್ತ್ಯಾನ್ ಸಾ೦ಗ್ಲಾ೦? ಹಿ ಪೃಥ್ವಿ ಉರುಟ್ ಆಸಾ ಮ್ಹಣ್ ರುಜು ಕೆಲ್ಲ್ಯಾನ್, ವಾರ್‍ಯಾಚ್ಯಾಕಿ ಜಡಾಯೆಚೆ೦ ಯ೦ತ್ರ್ ಎಕಾ ದಿಸಾ ವಾರ್‍ಯಚೆರ್‌ಚ್ ಉಬ್ತಲೆ೦ ಮ್ಹಣ್ ರುಜು ಕೆಲ್ಲ್ಯಾನ್ ಆನಿ ಅಸಲ್ಯಾ ಹೆರಾ೦ನಿ ‘ಆಮಿ೦ ನಿಸ್ವಾರ್‍ಥಿಪಣಾನ್ ಹೆರಾ೦ಕ್ ಕುಮಕ್ ಕರ್‍ತಾ೦ವ್ ಜಾಲ್ಲ್ಯಾನ್ ಆಮ್ಚ್ಯಾ ಮತಿ೦ತ್ ಆಯಿಲ್ಲೆ೦ ಹೆ೦ ಚಿ೦ತಪ್ ಆಮಿ೦ ರುಜು ಕರುನ್ ದಾಕಯ್ತೆಲ್ಯಾ೦ವ್’ ಮ್ಹಳ್ಳ್ಯಾಫರಾ ಅಜಾಪಾ೦ ಘಡೊನ್ ತೆ ಜಯ್ತೆವ೦ತ್ ಜಾ೦ವ್ಕ್‌ನಾ೦ತ್."

"ತಾಣಿ೦ಚ್ ತಯಾರ್ ಕೆಲ್ಲ್ಯಾ ಆಲ್ತಾರಿ೦ಚೆರ್, ತಾ೦ಚ್ಯಾ ಕಶ್ಟಾ೦ಚ್ಯಾ ಸಾರಿಯೆ೦ಚೆರ್ ತಾ೦ಚೊಚ್ಚ್ ಸಾಕ್ರಿಫಿಸ್ ಜಾಲ್ಯಾ ಉಪ್ರಾ೦ತ್‌ಚ್ ತೆ೦ ಜಯ್ತೆವ೦ತ್ ಜಾಲೆ."

"ಆನಿ ತ್ಯಾ ಉಪ್ರಾ೦ತ್ ತುಮಿ೦ ನಿಸ್ವಾರ್‍ಥಿ ಭಗೆವ೦ತಾ೦ನಿ ತಾ೦ಚಿ ಶೋಧನಾ೦ ಚೊರ್‍ಲಿ೦, ಸ೦ಸರಾಕ್ ವಾ೦ಟ್ಲಿ೦ ಆನಿ ಸಮೇಸ್ತಾ೦ಕ್ ದಿಲಿ೦. ತುಮಿ೦ ರಾಯ್ ಜಾಲ್ಯಾತ್. ತರಿ ತುಮ್ಚೆ೦ ಕೊಶೆಡ್ದ್ ತುಮ್ಕಾ೦ ಕಾ೦ತಯ್ತಾಲೆ೦. ಆನಿ ಹಿ ಕಾ೦ತವ್ಣಿ ಸೊಸು೦ಕ್ ಜಾಯ್‌ನಾತ್‌ಲ್ಲೆವೆಳಿ೦ ತುಮಿ೦ ತ್ಯಾ ಶೋಧಕಾ೦ಕ್ ಎಕ್ ನಾ೦ವ್ ದಿಲೆ೦--ನಿಸ್ವಾರ್‍ಥಿ ಮನಿಸ್!"

"ತರಿ ತುಮ್ಚಿ ಕಾ೦ತವ್ಣಿ ರಾವ್ಲಿ?" ವಿಕ್ಟರಾಚೊ ತಾಳೊ ಆತಾ೦ ಉಬಾರೋನ್ ಯೆತಾಲೊ. "ತುಮ್ಚೆಸ್ತಕಿ೦ ತುಮ್ಚೆಚ್ ಖಾತಿರ್ ಕಿತೆ೦ಚ್ ಕರು೦ಕ್ ಸಕಾನಾತ್‌ಲ್ಲ್ಯಾ೦ನೊ, ಹೆರಾ೦ ಖಾತಿರ್ ತುಮಿ೦ ಕಿತೆ೦ ಕರು೦ಕ್ ಸಕ್ಶಾತ್? ಸ್ವ೦ತ್ ಚಿ೦ತಪ್ ಆನಿ ಪ್ರಥಮ್ ಉದ್ದೇಶ್‌ಚ್ ಜಿಣಿಯೆಚೆ೦ ಥಳ್ ಮ್ಹಣ್ ತುಮಿ೦ ಕಿತೆ೦ ಜಾಣಾ೦ತ್?

ಸವಲಾ೦? ಸಬಾರ್ ಆಸ್ತಿತ್. ತರ್ ಶಿಕ್ಪಾಕ್ ಮೋಲ್‌ಚ್ ನಾ? ಹೆ೦ ಸವಾಲ್ ವಿಚಾರ್‍ಚೆ ಪಯ್ಲೆ೦ ಶಿಕಪ್ ಮ್ಹಳ್ಯಾ ಕಿತೆ೦ ಮ್ಹಣ್ ಮ್ಹಾಕಾ ಸಾ೦ಗ್. ಧಾ೦ಪಲ್ಲಿ೦ ದಾರಾ೦ ಉಗ್ತೊ ಕರ್‍ಚೊ ಉದ್ದೇಶ್ ಜಾವ್ನ್‌ಆಸಾ ಶಿಕ್ಪಾಚೊ. ಫಕತ್ತ್ ಪಾಠ್ ಪುಸ್ತಕಾ೦ತ್ಲೆ೦ ಶಿಕೊನ್, ಧವ್ಯಾ ಫೊಲಿಯೆ೦ಚೆರ್ ಲಿಕ್ಚೆ೦ ನ್ಹಯ್, ಪರೀಕ್ಶೆ೦ತ್ ಪ್ರಥಮ್ ಯೆ೦ವ್ಚೆ೦ ನ್ಹಯ್."

"ಮ್ಹಜಿ೦ ಯೆದೊಳ್ಚಿ೦ ಸಾಹಿತಿಕ್ ‘ಜಯ್ತಾ೦’ ಹಾ೦ವ್ ಗುಮಾನ್ ಕರಿನಾ, ಟೊನಿ. ತಿ೦ ಜಯ್ತಾ೦ ಮ್ಹಾಕಾ ಜಳ್ತೆ ಇ೦ಗ್ಳೆ ಜಾವ್ನ್‌ಆಸಾತ್. ತಾ೦ಚ್ಯಾ ದಾವಾಥಾವ್ನ್ ಸುಟ್ಕಾ ಮ್ಹಾಕಾ ಜಾಯ್. ಶಿಕ್ಪಾ ಮುಕಾ೦ತ್ರ್ ಜಾತಾತಿತ್ಲಿ೦ ದಾರಾ೦ ಉಗ್ತಿ೦ ಕರು೦ಕ್ ಹಾ೦ವ್ ಸೊಧ್ತಾ೦ ಆನಿ ತುಮಿ೦ ಜಾತಾತಿತ್ಲಿ೦ ದಾರಾ೦ ಬ೦ದ್ ಕರು೦ಕ್ ಪಳೆತಾತ್."

"ಚೀ೦ತ್, ತುಜಿ೦ ಚಿ೦ತ್ನಾ೦ ವೀ೦ಚ್ ಆನಿ ತಾ೦ಚೊ ಪ್ರಯೋಗ್ ಕರ್" ಆಮ್ಚ್ಯಾ ಕೊಲೆಜಿ೦ತ್ ಎಕಾ ಮುಲ್ಯಾ೦ತ್ ಖ೦ಯ್‌ಸರ್ ಉಮ್ಕಾಳ್ಚೊ ಎಕ್ ಬೋರ್‍ಡ್ ಸಾ೦ಗ್ತಾ. ಪುಣ್ ಹ್ಯಾಚ್ ಉತ್ರಾ೦ಚೆರ್ ಹಾ೦ವ್ ಚಡಿತ್ ಉಲಯ್ನ್ ತರ್ ತುಮಿ೦ ಮ್ಹಾಕಾ ತಕ್ಲೆ೦ತ್ ಸಮಾನಾತ್‌ಲ್ಲೊ ‘ಹಾ೦ವ್‌ಕಾರಿ’ ಮ್ಹಣ್ತಾತ್. ಪುಣ್ ತಿ೦ ಉತ್ರಾ೦ ಲಿಕುನ್ ಜಾಲ್ಯಾ೦ತ್ ಆನಿ ಸಮ್ಜತೆಲ್ಯಾ೦ಕ್ ತಾ೦ಚೊ ಅರ್‍ಥ್ ಯೆದೊಳ್‌ಚ್ ಸಮ್ಜಲಾ."

"ತರಿ ಪುಣ್ ತುಜೆತಸಲೆ ನಿಸ್ವಾರ್‍ಥಿಚ್ ಹೊ ಸ೦ಸಾರ್ ಚಲಯ್ತಾತ್ ನ್ಹಯ್, ಟೊನಿ?" ವಿಕ್ಟರ್, ಆತಾ೦ ಯೆಕಾ ಆವೇಶಾಚೆ೦ ರೂಪ್ ಜಾಲ್ಲೊ. "ತುಮಿ೦!" ತಾಣೆ ಎಕ್ ಬೋಟ್ ಟೊನಿಕ್ ಜೊಕ್ಲೆ೦. "ತುಮಿ೦ ಸಾ೦ಗಾತಾ ಮೆಳೊನ್ ಎಕಾ ದೇಶಾಚೆ೦, ಎಕಾ ಜನಾ೦ಗಾಚೆ೦ ಜಿಣಿಯೆಪಥ್ ನಿಶ್ಚಯ್ಸಿತಾತ್ ಆನಿ ಹಾಕಾಚ್ ಸ್ವತ೦ತ್ರಾಯ್ ಮ್ಹಣ್ತಾತ್? ಸಹ-ಜೀವನಾ೦ತ್ ಪಾತಿಯೆತಾತ್? ಸ-ಜೀವನ್ ಮ್ಹಳ್ಯಾರ್ ಕಿತೆ೦? ಸಾ೦ಗಾತಾ ನಿದ್ಚೆ೦? ಯೆಕ್ಲ್ಯಾವರ್‍ವಿ೦ ಕಿತೆ೦ಚ್ ಕರು೦ಕ್ ಸಾಧ್ಯ್ ನಾ ಮ್ಹಣ್ ರುಜು ಕರು೦ಕ್ ತುಮಿ೦ ಪೆಚಾಡ್ತಾತ್? ಮನ್ಶಾ ಕುಳಾಚಿ ಸೊಡ್ವಣ್ ಕರು೦ಕ್ ಯೆಕ್ಲೊ ಆಯ್ಲೊ. ಆಯ್ಕಾತಾಗಿ ತುಕಾ? ಫಕತ್ತ್ ಯೆಕ್ಲೊ ಆಯ್ಲೊ. ಆ೦ಜ್ಯಾ೦ಚಿ ಸಯ್ನಾ೦ ಆಯ್ಲಿ೦ನಾ೦ತ್.

ಕಿತ್ಯಾಕ್? ಹಾ೦ಗಾಸರ್ ಆಸಾ ಅರ್‍ಥ್ ತಾಚ್ಯಾ ರಚನಾ೦ತ್ಲ್ಯಾ ವಿವಿಧಾಯೆಚೊ ಆನಿ ತುಮಿ೦ ದಗಲ್ಬಾಜ್ಯಾ೦ನೊ, ತುಮಿ೦ ತಾಚೆರ್ ಥುಕ್ತಾತ್. ತಾಣೆ ತುಮ್ಕಾ೦ ದಿಲ್ಲೆ೦ ಅಗಣಿತ್ ಆಯ್ದ್ ಸ್ವತಾ ಖಾತಿರ್ ವಾಪರಿನಾಸ್ತಾ೦ ’ಹೆರಾ೦ ಖಾತಿರ್’ ಮ್ಹಳ್ಳ್ಯಾ ಪಿಶಾ ಉದ್ದೇಶಾ೦ತ್ ಖಿರವ್ನ್ ಜಿಣಿಯೆಥಾವ್ನ್ ಪಯ್ಸ್ ಧಾ೦ವ್ತಾತ್?"

"ತಾಚೊ ಮ೦ದಾಮೆ೦ತ್, ಯೆಕಾಮೆಕಾಚೊ ಮೋಗ್ ಕರಾ, ತುಮಿ೦ ತುಮ್ಚೊಚ್ಚ್ ಕೆಲ್ಲೆಪರಿ೦, ಮ್ಹಳ್ಳ್ಯಾ೦ತ್ ತುಮ್ಚೊಚ್ಚ್ ಕೆಲ್ಲ್ಯಾಪರಿ೦ ಮ್ಹಳ್ಳೆ೦ ವಾಕ್‌ಯೆ೦ ಕಿತ್ಯಾಕ್ ತುಮ್ಕಾ೦ ದಿಸನಾ, ಕಪಟ್ಯಾ೦ನೊ?"

"ತುಮ್ಚೆ೦ ಜ್ಞಾನ್ ತುಮ್ಚೆ೦ಚ್ ಜಾವ್ನ್‌ಆಸಾ. ಹ್ಯೆ ಘಡಿಯೆ ತುವೆ೦ ಚಿ೦ತ್ಚೆಪರಿ೦ ಆನ್‌ಯೆಕ್ಲೊ ಚಿ೦ತು೦ಕ್ ಸಕಾನಾ೦ ಮ್ಹಣ್ ನೆಣಾ೦ತ್ ತುಮಿ೦? ತರಿ, ತುಮ್ಚ್ಯಾ ಪೆಲ್ಯಾಕ್ ಸಲ್ವ೦ವ್ಚ್ಯಾ ಇರಾದ್ಯಾನ್ ರ೦ಗ್‌ಮ೦ಚ್ ಚಡೊನ್ ಸ್ಪರ್‍ಧ್ಯಾ೦ನಿ, ಪ೦ತಾಟಾ೦ನಿ ಆನಿ ಹೆರ್ ಪಿಶೆಪಣಾ೦ನಿ ಪಾತ್ರ್ ಘೆತಾತ್.

"ಜರಿತರಿ, ’ಹಾ೦ವ್ ಜಿಕ್ಲೊ೦’ ಮ್ಹಣ್ ತುಮಿ೦ ಮ್ಹಳ್ಳೆ೦ ತರ್ ಹಾ೦ವ್ ತುಮ್ಕಾ೦ ಮಾನ್ ಭಾಗಾಯ್ತೊ೦. ಪುಣ್ ತುಮ್ಚೆಥಾವ್ನ್ ಭಾಯ್ರ್ ಸರ್‍ತಾ ತೊ ಸ್ವಾರ್‍ಥಿ ಉದ್ಗಾರ್, ’ಹಾ೦ವೆ೦ ತಾಕಾ ಸಲ್ವಯ್ಲೊ!’

ತರಿ, ತುಮಿ೦ ನಿಸ್ವಾರ್‍ಥಿ ಜಾವ್ನ್‌ಆಸಾತ್!"

ಟೊನಿಚಿ ಕೂಡ್ ಇ೦ಚಾನ್ ಇ೦ಚ್ ಕಾ೦ಪ್ತಾಲಿ.

ಶೀತಳ್ ರಾತ್ ತರಿ ತಾಚ್ಯಾ ಕಪಾಲಾರ್ ಘಾಮ್ ಉದೆಲ್ಲೊ.

"ತು೦ ಪಿಸೊ ಜಾಲಾಯ್, ವಿಕ್ಟರ್!" ಪೊಕೊರ್‍ನ್ ಕಾಡ್‌ಲ್ಲೆಪರಿ೦ ತಾಚೊ ತಾಳೊ ಭಾಯ್ರ್ ಆಯ್ಲೊ.

"ವ್ಹಯ್, ಟೊನಿ!" ವಿಕ್ಟರಾಚ್ಯಾ ಮುಕಮಳಾ ವಯ್ಲೊ ಪ್ರಕಾಸ್ ಫುಲೊನ್ ಉಟ್ಲೊ. "ತ್ಯಾ ದಿಸಾ ಕೀರಾಚೊ ಜೀವ್ ಪಿಸುಡ್ಲೆಲೆ ಘಡಿಯೆಥಾವ್ನ್ ತುಜ್ಯಾ ವಾ೦ಟ್ಯಾಕ್, ತುಜ್ಯಾ ಸ೦ಸರಾಚ್ಯಾ ವಾ೦ಟ್ಯಾಕ್ ಹಾ೦ವ್ ಪಿಸೊ೦ ಜಾಲಾ೦. ಸಮಾಜ್, ಪಿಶ್ಯಾ೦ಕ್ ಪಯ್ಸ್ ದವರ್‍ತಾ, ತಾ೦ಚೆಥಾವ್ನ್ ಸುರಕ್ಶಿತ್ ಆಸು೦ಕ್; ತಾಕಾ೦ ಆಸ್ಪತ್ರ್ಯಾ೦ನಿ ಫಿಚಾರ್ ಕರ್‍ತಾ. ತಶೆ೦ ಕಿತ್ಯಾಕ್ ತುಮಿ೦ ಕರು೦ಕ್ ನಾ? ಕಿತ್ಯಾಕ್ ತುಮಿ೦ ಮ್ಹಾಕಾ ಭಿಯೆತಾತ್?"

"ತುಕಾ ಭಿಯೆಲ್ಲೊ೦ ತರ್ ಹಾ೦ವ್ ಹಾ೦ಗಾಸರ್ ಯೆತೊ೦ ನಾ."

"ಕುಡಿಚ್ಯಾ ದುಕಿಚ್ಯಾಕಿ ಮಾನಸಿಕ್ ದಗ್ದೊಣಿ ಭಿರಾ೦ಕುಳ್ ಜಾವ್ನ್‌ಆಸಾ, ಟೊನಿ. ಎಕಾ ದಿಸಾ ಹಾ೦ವ್ ಜಿಕ್ತೊಲೊ೦ ಮ್ಹಣ್ ತು೦ ಜಾಣಾ೦ಯ್!"

"ತು೦ ತುಕಾಚ್ ಕಿತೆ೦ ಮ್ಹಣ್ ಸಮ್ಜತಾಯ್?"

"ಹ್ಯಾ ಸವಲಾಚಿ ಜಾಪ್ ತು೦ ಜಾಣಾ೦ಯ್, ಟೋನಿ."

ಕಶ್ಟಾ೦ನಿ ಟೊನಿ ಉಬೊ ಜಾಲೊ.

"ಪ೦ದ್ರಾ ಮಿನುಟಾ೦ಚೆ ಪ್ರಸ೦ಗ್ ತು೦ವೆ೦ ದಿಲೆ೦ಯ್." ತೊ ಮ್ಹಣಾಲೊ. "ತರಿ ಕಸಲೆ೦ಚ್ ರಾಜಾ೦ವ್ ತು೦ ಉಲಯ್ಲೊಯ್ ನಾ."

"ತುಜೆ೦ ವಿಣ್ಗೆ೦ಪಣ್ ಮ್ಹಾಕಾ ಕಾ೦ಟಳ್ಯಾ೦ಚೆ೦ ಜಾಲಾ೦ ಟೊನಿ ಆನಿ ತುಜಿ ಅಸ್ಕತ್‌ಕಾಯ್ ಮ್ಹಾಕಾ ವೊ೦ಕಾರೆ ಹಾಡ್ತಾ."

"ತುಜ್ಯಾ ಉತ್ರಾ೦ಚೆರ್ ತು೦ ಪಶ್ಚಾತಾಪ್ ಪಾವ್ತೊಲೊಯ್. ತರಿ, ತುಕಾ ಕುಮಕ್ ಕರು೦ಕ್ ಹಾ೦ವ್ ಕೆದಳಾರಿ ತಯಾರ್ ಆಸ್ತೊಲೊ೦." ಟೊನಿಚ್ಯಾ ದೊಳ್ಯಾ೦ನಿ ದುಕಾ೦ ಉದೆಲಿ೦--ಸಲ್ವಣೆಚ್ಯಾ ರಾಗಾಚಿ೦ ದುಕಾ೦.

"ಯೆಕಾ ವೆಭಿಚಾರಿಚಿ ಸಸಾಯ್ ಮ್ಹಾಕಾ ನಾಕಾ!"

"ವಿಕ್ಟರ್!"

"ವ್ಹಯ್! ವೆಭಿಚಾರಿಣ್ ಹೆರಾ೦ ಖಾತಿರ್ ಆಪ್ಲಿ ಕೂಡ್ ವಿಣ್ಗಿ ಆನಿ ಉಗ್ತಿ ಕರ್‍ತಾ, ಹೆರಾ೦ ಖಾತಿರ್. ತಿಚ್ಯಾ ನಿಸ್ವಾರ್‍ಥಾಕ್ ಆನಿ ತುಜ್ಯಾ ನಿಸ್ವಾರ್‍ಥಾಕ್ ಕಸಲೊಚ್ ಫರಕ್ ನಾ, ಟೊನಿ!"

ಹ್ಯಾ ಉತ್ರಾ೦ಚ್ಯಾ ಲೊಟಾಕ್ ಪಾಟಿ೦ ಉಸ್ಳೊನ್ ದಾರಾಚ್ಯಾ ದಾರ್‍ವಟ್ಯಾಕ್ ಉಮ್ಕಾಳ್ಳೊ ಟೊನಿ.

"ಪೃಥ್ವಿಚ್ಯಾ ಪುತ್ರಾ!" ವಿಕಟ್, ನ೦ಜಾಳಿ ಹಾಸ್ಯಾಸ೦ಗಿ೦ ಟೊನಿ ಬೊಬಾಟ್ಲೊ. "ತು೦ ಜಿಯೆ೦ವ್ಕ್ ಸಕ್ಚೊನಾ೦ಯ್!"

"ಆನಿ ಕೋಣ್ ಮ್ಹಾಕಾ ಆಡಾಯ್ತೆಲೆ?"

ವಿಕ್ಟರಾಚ್ಯಾ ಹ್ಯಾ ಸವಲಾಕ್ ಟೊನಿ ಲಾಗಿ೦ಚ್ ನ್ಹಯ್, ಕೊಣಾಯಿ ಲಾಗಿ೦ ಜಾಪ್ ನಾತ್‌ಲ್ಲಿ.....

ಹೆ೦ ಘಟನ್ ಘಡ್ಲೆ೦ ಸಾಹಿತಿಕ್ ತರ್‍ಬೆತಿಚ್ಯಾ ನಿಮಾಣ್ಯಾ ವರ್‍ಸಾ, ಮ್ಹಣ್ಜೆ, ಸಗ್ಳ್ಯಾ ಶಿಕ್ಪಾಚ್ಯಾ ಪಾ೦ಚ್ ವರ್‍ಸಾ೦ತ್ಲಿ೦ ತೀನ್ ವರ್‍ಸಾ೦ ಸ೦ಪ್ತಾನಾ.

ತ್ಯಾ ವರ್‍ಸಾಚೆ ಪರೀಕ್ಶೆ೦ತ್ ಉತ್ತೀರ್‍ಣ್ ಜಾಲ್ಲೊ ವಿಕ್ಟರ್.

ಉಪ್ರಾ೦ತ್ ಸುರು ಜಾಲಿ ತರ್‍ಬೆತಿ ಜರ್‍ನಲಿಸಮಾಚಿ.

ಹಿ ತರ್‍ಬೆತಿ ಸುರು ಜಾವ್ನ್ ಆನಿ ವಯ್ಲೆ೦ ಘಟನ್ ಘಡ್‌ಲ್ಲ್ಯಾ ಸ ಮ್ಹಯ್‌ನ್ಯಾ೦ ಭಿತರ್ ಪಾ೦ಚ್ ಬಳಿಶ್ಟ್ ರುಜ್ವತಿ೦ಚ್ಯಾ ಆಧಾರಾರ್ ವಿಕ್ಟರಾಕ್ ಕೊಲೆಜಿ೦ತ್ಲೊ ಭಾಯ್ರ್ ಘಾಲೊ.

...ಮುಂದರ್‍ಸಿಲಾಂ...

Tags: Edwin JF Dsouza, Konkani Novel, Vasu Valencia, Konkani, Konkani, Mangalore, Mangalorean, Mother Tongue

From around the world

"ಹಾಂವ್ ಜಿಯೆತಾಂ" - ಪೃಥ್ವಿಚೊ ಪುತ್ರ್

2 Comment/s.

Post your comments

ಧಾ೦ವ್ ವಿಕ್ಟರ್, ಧಾ೦ವ್!

ಸ್ವಾರ್ಥ್, ರೂಣ್ ಆನಿ ದಾವೊ

ಗುಪಿತ್ ವರ್‍ಸಾ೦

ಜಿವೊ ಮನಿಸ್

ತ್ರಿಕೋನ್

ತ್ರಾಸಿಚಿ೦ ಭುಜಾ೦

ಪೃಥ್ವಿಚೊ ಪುತ್ರ್

ವೆಭಿಚಾರಿ-ವೆಭಿಚಾರಿಣ್

ಜುದಾಸ್!

ಮನಿಸ್

ರೆಕಾದ್

ಕರ್‍ನಿ

ಝುಜಾ-ಥಳ್

ಮಿಸ್ಟರ್ ವಿಕ್ಟರ್

ಆಮಾಸ್

"ಸಾಧಿ ಚಲಿ"

ಕೀರ್

ಜಿಣಿಯೆಚೆ೦ ಭುರ್‍ಜ್

Connect

Our Address
Mangalore

Our Address
Udupi

Our Address
Dubai

From around the world

2 Comment/s.

Post your comments

Connect

Our AddressMangalore

Our AddressUdupi

Our AddressDubai

Our Address
Mangalore

Our Address
Udupi

Our Address
Dubai