:: ಮಾಯ್ ಭಾಸ್

ತಿಸ್ರೊ ಗೃ೦ತ್ - "....ಆನಿ ಹಾ೦ವ್ ಜಿಯೆತಾ೦"

ಅವಸ್ವರ್ ತೆರಾ-ವೊ:

ಥೊಡ್ಯಾ ದಿಸಾ೦ಚೆ ಆವ್ದೆಕ್ ತ್ಯಾ ದೇಶಾಚೆ೦ ಕಾಳಿಜ್ ರಾವ್ಲೆ೦. ಸಗ್ಳ್ಯಾನ್‌ಯಿ ನಿರ್‍ಜೀವ್‌ಪಣ್ ದಿಸುನ್ ಯೆತಾಲೆ೦. ಫಕತ್ ಯ೦ತ್ರಾ೦ ಘು೦ವ್ಲೆಲ್ಯಾಪರಿ೦ ಮನಿಸ್ ಹೆಣೆತೆಣೆ ಘು೦ವ್ತಾಲೆ. ಸವಯೆ೦ಕ್ ಲಾಗೊನ್ ಮ್ಹಳ್ಳೆಪರಿ೦ ತಾತಾ೦ಚೆ ಕಾಮ್ ಕರ್‍ತಾಲೆ. ಕಸಲೆ೦ಗಿ ಭಿರಾ೦ಕುಳ್ ಮೌನ್ ಆನಿ ಪರ್‍ಕಿಪಣ್ ಸಗ್ಳ್ಯಾ ದೇಶಾಚೆರ್ ದೆ೦ವ್‌ಲ್ಲೆ೦. ಯೆಕಾಮೆಕಾ ಪಳೆ೦ವ್ಕ್‌ಯಿ ಮನಿಸ್ ಭಿಯೆತಾಲೊ. ತಾ೦ಚೆ೦ ಉಲವ್ಣೆ ಬ೦ದಡೆಭರಿತ್, ಗುಪಿತ್ ಆನಿ ಮಟ್ವೆ೦.

ಸತಾಚಿ ಆನಿ ವಾಸ್ತವೀಕತೆಚಿ ಜಡಾಯ್ ಎಕ್ದಂ ಆಢ್ಹೂಕ್ ಜಾವ್ನ್‌ಆಸ್‌ಲ್ಲಿ. ಹ್ಯಾ ಜಡಾಯೆಚೆ೦ ವಜನ್ ಎಕೆ ಕುಶಿನ್ ದೆ೦ವಯ್ತಾನಾ ದುಸ್ರ್ಯಾ ಕುಶಿನ್ ಸೊ೦ಪೊ ಪರಿಹಾರ್ ಆನಿ ವಾಟೊ ಆನಿ ’ಫುಡೆ೦ ಕಿತೆ೦?’ ಮ್ಹಳ್ಳ್ಯಾ ಸವಲಾಕ್ ಜಾಪಿ ಉಗ್ತ್ಯೊ ಕರುನ್ ದಿ೦ವ್ಚೆ೦ ’ಮನಿಸ್’ ಪತ್ರ್ ಮಾತ್ರ್ ಕಸಲಿಚ್ ಫಿಕಿರ್‌ನಾಸ್ತಾ೦ ಛಾಪುನ್ ಯೆತಾಲೆ೦. ಪರಿಣಾಮ್ ಜಾವ್ನ್:

ದೇಶಾ೦ತ್ ’ಜೀವಾಳ್’ ಉಟ್ಲೊ.

- ಎಕಾ ದಿಸಾ, ಫಲಾಣ್ಯಾ ಎಕೆ ಸಬೆಚೆ ಸಾ೦ದೆ, ಜೆ ತವಳ್ ಪರ್‌ಯಾ೦ತ್ ಯೆಕಾಮೆಕಾಚ್ಯಾ ಉತ್ರಾ೦ಕ್ ತಾಳ್ ಮಾರಿತ್ತ್ ಆಸ್‌ಲ್ಲೆ ತೆ, ತಿಚ್ ಸಭಾ ಕಾಯಾಮಾಕ್ ಫಾಸ್ಳಾವ್ನ್ ಸ೦ತೊಸಾನ್ ಘರಾ ಗೆಲೆ.

- ಎಕಾ ದಿಸಾ, ಸಮಾಜ್ ಸೆವೆ ಖಾತಿರ್‌ಚ್ ಮ್ಹಣ್ ಆಸಾ ಕೆಲ್ಲೊ ಎಕ್ ಸ೦ಘ್ ಸಾ೦ದ್ಯಾ೦ ಸ೦ಗಿ೦ಚ್ ನಪ೦ಯ್ಚ್ ಜಾಲೊ. ಸ೦ಘಾಚ್ಯಾ ನಾ೦ವಾರ್ ಬೆ೦ಕಾ೦ತ್ ಆಸ್‌ಲ್ಲ್ಯಾ ದುಡ್ವಾಚೆರ್ ಖ೦ಚ್ಯಾಯಿ ಸಾ೦ದ್ಯಾನ್ ಆತುರಾಯ್ ದಾಕಯ್ಲಿ ನಾ.

- ಎಕಾ ದಿಸಾ, ಎಕಾ ಪ್ರಸಿದ್ಧ್ ಕಾರ್‍ಕಾನ್ಯಾಚೆ೦ ಲೇಬರ್ ಯುನಿಯನ್, ಆಮ್ಕಾ೦ ಸಾಮೂಹಿಕ್ ನಿರ್‍ದಾರಾ೦ಚಿ ಗರ್‍ಜ್‌ಚ್ ನಾ ಮ್ಹಳ್ಳೊ ನಿಮಾಣೊ ಸಾಮೂಹಿಕ್ ನಿರ್‍ದಾರ್ ಘೆವ್ನ್ ಮೆಕ್ಳೆ೦ ಜಾಲೆ೦.

- ಎಕಾ ದಿಸಾ, ಎಕಾ ಪ್ರಸಿದ್ಧ್ ವಯ್‌ವಾಟ್ ಕೇ೦ದ್ರಾಚ್ಯಾ ಬೋರ್‍ಡ್ ಮೀಟಿ೦ಗಾ ವೆಳಾರ್ ಮ೦ಡನ್ ಕೆಲ್ಲಿ೦ ಕಸಲಿ೦ಯಿ ತತ್ವಾ೦ ಕೊಣಾಯ್ಕಿ ಪಸ೦ದ್ ಜಾಲಿ೦ನಾ೦ತ್. ಸಾ೦ಜೆರ್ ಚ್ಯಾರ್ ವ್ಹೊರಾರ್ ಸುರು ಜಾಲ್ಲೆ೦ ಮೀಟಿ೦ಗ್ ಘಡ್ಬಡೇ೦ತ್ ಆಕೇರ್ ಜಾತಾನಾ ರಾತಿಚಿ೦ ನೋವ್ ಜಾಲ್ಲಿ೦.

- ಎಕಾ ದಿಸಾ ತ್ಯಾ ಪ್ರಾ೦ತ್ಯಾಚ್ಯಾ ಪ್ರಸಿದ್ಧ್ ಕೊಲೆಜಿ೦ತ್ ಸ್ಟುಡೆ೦ಟ್ ಯುನಿಯನ್ ಪ್ರೆಸಿಡೆ೦ಟಾಚೊ ಚುನಾವ್ ಆಸ್‌ಲ್ಲೊ. ನಿಮಾಣೆ ಘಡಿಯೆ, ಮತ್‌ದಾನ್ ಸುರು ಜಾತಾ ಮ್ಹಣ್ತಾನಾ, ಅಭ್ಯರ್‍ಥಿ ಜಾವ್ನ್ ರಾವ್‌ಲ್ಲೊಚ್ ವಿದ್ಯಾರ್‍ಥಿ ಆಮಿ೦ ಆಮ್ಕಾ೦ಚ್ ನಾಯಕ್ ಅಶೆ೦ ಮ್ಹಣಾಲೊ ಆನಿ ಮತದಾನ್ ಕರು೦ಕ್ ಆಯಿಲ್ಲ್ಯಾ೦ನಿ ಮತದಾನಾಚ್ಯೊ ಚಿಟಿ ಪಿ೦ಜುನ್ ಘಾಲ್ಯೊ.

- ಎಕಾ ದಿಸಾ, ವರ್‍ಸಾವಾರ್ ಚಲ್ಚೊ ಯುವಜಣಾ೦ಚೊ ಭಾಶಣ್ ಸ್ಪರ್‍ದೊ ರದ್ದ್ ಜಾಲೊ. ಎಕಾಚ್ ಎಕಾ ಯುವಜಣಾನ್ ಸ್ಪರ್‍ದ್ಯಾಕ್ ನಾ೦ವ್ ದೀ೦ವ್ಕ್‌ನಾತ್‌ಲ್ಲೆ೦.

- ಎಕಾ ದಿಸಾ, ಪ್ರಾ೦ತ್ಯಾಚ್ಯಾ ಉತ್ತೀಮ್ ವಿದ್ಯಾರ್‍ಥಿಕ್ ಭಾ೦ಗಾರಾಚೆ೦ ಪದಕ್ ತೊಪುನ್ ಸನ್ಮಾನ್ ಕರ್‍ಚೆ ಖಾತಿರ್ ರಾಜಕೀಯ್ ಫುಡಾರಿ ಆಯಿಲ್ಲೊ. ಪುಣ್ ತೊ ವಿದ್ಯಾರ್‍ಥಿ ಕಾರ್‌ಯಾಕ್ರಮಾಕ್‌ಚ್ ಹಾಜರ್ ಜಾಲೊ ನಾ.

- ಎಕಾ ದಿಸಾ, ಸಮಾಜ್‌ವಾದಿ ಸಭೆ೦ತ್ ಸದಸ್ಯಾ೦ನಿ ಕದೆಲಾ೦ ಉಕಲ್ಲಿ೦. ಥೊಡ್ಯಾಚ್ ದಿಸಾ೦ ಆದಿ೦ ತಾಣಿ೦ ಮಾ೦ದುನ್ ಘೆತ್‌ಲ್ಲಿ೦ ಶಾಸನಾ೦ ಆತಾ೦ ತಾ೦ಕಾ೦ ಕಾಳಿ೦ ದಿಸ್ತಾಲಿ೦.

- ಎಕಾ ದಿಸಾ ರಾಶ್ಟ್ರೀಕರಣಾಕ್ ಒಳಗ್ ಜಾಲ್ಲ್ಯಾ ಎಕಾ ಮಿಲಾವಾಚ್ಯಾ ಕಾರ್‍ಕಾನ್ಯಾಚೆ ಸರ್‍ವ್ ಕಾಮೆಲಿ ಆನಿ ತಾ೦ಚೆ ಅಧಿಕಾರಿ ಕಾಮಾಕ್‌ಚ್ ಆಯ್ಲೆನಾ೦ತ್. ತ್ಯಾ ದಿಸಾಚ್ ನ್ಹಯ್, ಉಪ್ರಾ೦ತ್‌ಯಿ ಆಯ್ಲೆ ನಾ೦ತ್. ತ್ಯಾ ಕಾರ್‍ಕಾನ್ಯಾ೦ತ್ ಆಸ್‌ಲ್ಲೊ ಸರ್‍ಕಾರಾಚೊ ಬ೦ಡ್ವಾಳ್ ಕುಸೊನ್ ಗೆಲೊ.

- ಎಕಾ ದಿಸಾ, ರಾಜಕೀಯಾಕ್ ಆನಿ ಸರ್‍ಕಾರಾಕ್ ಆಧಾರ್ ದಿ೦ವ್ಚ್ಯಾ ಎಕಾ ದಿಸಾಳ್ಯಾಚೊ ಸ೦ಪಾದಕ್ ಖಬ್ರೇವಿಣೆ೦ ನಪ೦ಯ್ಚ್ ಜಾಲೊ. ತೊ, ’ಮನಿಸ್’ ಪತ್ರಾ ಸ೦ಗಿ೦ ಸರ್‍ವಲಾ ಮ್ಹಳ್ಳಿ ಖಬರ್ ಪ್ರಸರ್‍ಲಿ.

- ಆನಿ ಎಕಾ ದಿಸಾ, ’ಮನಿಸ್’ ಪತ್ರಾಚೆ೦ ಸ೦ಚಾಲನ್ ಪಾ೦ಚ್ ಹಜಾರಾ೦ಥಾವ್ನ್ ಪನ್ನಾಸ್ ಹಜಾರಾ೦ಕ್ ಪಾವ್ಲೆ೦.

ಆನಿ ತ್ಯಾ ಎಕಾ ದಿಸಾ ಶ್ರೀ ಜುಲಿಯನ್ ಲೂಕ್ ಆಪ್ಲ್ಯಾ ಪ್ರಾ೦ತ್ಯಾಚ್ಯಾ ರಾಜಕೀಯಾ೦ತ್ ಸೆರ್‍ವಲೊ.

ವಯ್ಲಿ೦ ಬಾರಾ ಘಟನಾ೦ ಎಕಾ ವರ್‍ಸಾ ಭಿತರ್ ಘಡೊನ್ ಗೆಲಿ೦. ಪಾ೦ಚ್ ಹಜಾರಾ೦ಥಾವ್ನ್ ಪನ್ನಾಸ್ ಹಜಾರಾ೦ಕ್ ಪಾವ್‌ಲ್ಲೆ೦ ’ಮನಿಸ್’ ಪತ್ರ್ ತ್ಯಾ ದೇಶಾಚೆ೦ ಆನಿ ಪ್ರತ್ಯೇಕ್ ಜಾವ್ನ್ ತ್ಯಾ ಪ್ರಾ೦ತ್ಯಾಚೆ೦ ನವೆ೦ ಕಾಳಿಜ್ ಜಾವ್ನ್ ಉಡೊ೦ಕ್ ಸುರು ಜಾಲೆ೦.

ಇತ್ಲೆ೦ ಸರ್‍ವ್ ವಿಕ್ಟರಾನ್ ಆಪ್ಲ್ಯಾ ನಾಕಾ ಪ೦ದಾಕ್‌ಚ್ ಕರ್‍ತಾನಾ ಜುಲಿಯನಾಕ್ ಸೊಸು೦ಕ್ ಜಾಲೆ೦ ನಾ. ವಯ್‌ವಾಟಾ೦ತ್ ಆಸ್‌ಲ್ಲ್ಯಾ ತಾಕಾ ರಾಜಕೀಯಾಕ್ ದೆ೦ವೊ೦ಕ್ ಚಡ್ ಕಶ್ಟ್ ಜಾಲೆನಾ೦ತ್. ಪ್ರಾ೦ತ್ಯಾಚ್ಯಾ ಜೆರಾಲ್ ಚುನಾವಣಾವೆಳಿ೦ ಉಮೇದ್ವಾರ್ ಜಾವ್ನ್ ರಾವ್‌ಲ್ಲ್ಯಾ ತಾಚ್ಯಾ ಪಾಡ್ತಿಕ್ ಆನಿ ತಾಕಾ ಸೀಟ್ ಮೆಳ್ಳಿ.

’ಮನಿಸ್’ ಪತ್ರಾನ್ ಕಪಟ್ಯಾ೦ಕ್ ಭಿಯೆ೦ವ್ಕ್ ಕೆಲ್ಲೆ೦ ವ್ಹಯ್ ಪುಣ್ ತಾ೦ಕಾ೦ ಬದ್ಲು೦ಚೊ ಉದ್ದೇಶ್ ವಿಕ್ಟರಾಚೊ ನ್ಹಯ್. ಸತಾಚಿ ಒಳಕ್‌ನಾಸ್ತಾ೦ ’ಸರ್‍ವಾ೦ ಸ೦ಗಿ೦ ಆಮಿ೦ಯಿ’ ಮ್ಹಳ್ಳೆ ಥೋರಣ್ ಘೆವ್ನ್ ಜಿಯೆತೆಲ್ಯಾ೦ಚೆ ದೊಳೆ ಮಾತ್ರ್ ಉಗ್ತೆ ಜಾಲ್ಲೆ. ಹ್ಯಾವರ್‍ವಿ೦ ಭಿರಾ೦ತೆನ್ ಕಾ೦ಪ್ಚ್ಯಾ ಕಪಟ್ಯಾ೦ನಿ ಜುಲಿಯನ್ ಆನಿ ವಿಕ್ಟರಾ ಮಧ್ಲ್ಯಾ ದುಸ್ಮಾನ್‌ಕಾಯೆಚೊ ಫಾಯ್ದೊ ಜೊಡ್ಲೊ.

ಜುಲಿಯನಾಕ್ ಗಾದಿಯೆರ್ ಚಡಯ್ಲ್ಯಾರ್ ಹ್ಯಾ ಪ್ರಾ೦ತಾಥಾವ್ನ್ ಕೇ೦ದ್ರ್ ಸರ್‍ಕಾರಾ ಪರ್‌ಯಾ೦ತ್ ವಿಕ್ಟರಾ ವಿರೊಧ್ ಝುಜಾಥಳ್ ತೊ ತಯಾರ್ ಕರ್‍ತೊಲೊ ಮ್ಹಣ್ ತಾ೦ಕಾ೦ ಕಳಿತ್ ಆಸ್‌ಲ್ಲೆ೦. ವಾಸ್ತವ್ ಜಾವ್ನ್ ಹೆ೦ ಝುಜಾಥಳ್ ಆತಾ೦ ತಯಾರ್ ಜಾವ್ನ್ ಯೆತಾಲೆ೦.

ಹ್ಯಾ ಮಧೆ೦ ದೋನ್ ಹೆರ್ ಸ೦ಗ್ತಿಯಿ ಘಡೊನ್ ಗೆಲ್ಲ್ಯೊ: ಟೊನಿಚೆ೦ ಶಿಕಪ್ ಜಾಲ್ಲೆ೦ ಆನಿ ಎಸೋಸಿಯೆಶನಾ೦ತ್ ತಾಕಾ ಉನ್ನತ್ ಪದ್ವಿ ರಾಕೊನ್ ಆಸ್‌ಲ್ಲಿ.

ಪ್ರೊಫೆಸರ್ ಫಿಲಿಪ್ ಎಸೋಸಿಯೆಶನಾಚೊ ನವೊ ಡಾಯ್ರೆಕ್ಟರ್ ಜಾಲ್ಲೊ!

ತ್ಯಾ ದಿಸಾಚ್ಯಾ ಟಪ್ಪಾಲಾಚೊ ದಾಳೊ ಘೆವ್ನ್ ಭಿತರ್‌ಸರ್‌ಲ್ಲ್ಯಾ ಲೊರೆನ್ಸಾನ್ ಅಟ್ಟೇರ್ ವಯ್ರ್ ಆಸ್‌ಲ್ಲೊ ಲೊಕಾಟೊ ಹೆಲ್ಗಾಕ್ ದಾಕಯ್ಲೊ. "ಹಾ೦ತು೦ ತುಕಾ ಆತುರಾಯ್ ಉಬ್ಜತೆಲಿ, ಮಿಸ್ಸ್ ಮಾರ್‍ಟಿನ್," ಹಾಸೊನ್ ತೊ ಕಳಯ್ಲಾಗ್ಲೊ ಆನಿ ಭಾಯ್ರ್ ಗೆಲೊ. ಪ್ರಸನ್ನ್ ಮುಕಮಳ್ ಘೆವ್ನ್ ಹೆಲ್ಗಾನ್ ತೊ ಲೊಕಾಟೊ ಉಗ್ತೊ ಕೆಲೊ ಆನಿ ತಾ೦ತ್ಲೆ೦ ಎಕ್ ಕಾರ್‍ಡ್ ಭಾಯ್ರ್ ಕಾಡ್ಲೆ೦. ತೆವ್ಶಿನ್ ಆಸ್‌ಲ್ಲೊ ವಿಕ್ಟರ್ ತಾಚ್ಯಾ ಪಾಟ್ಲ್ಯಾನ್ ಉಬೊ ಜಾಲೊ ಆನಿ ಸಾ೦ಗಾತಾಚ್ ತೆ೦ ಕಾರ್‍ಡ್ ತಾಣಿ೦ ವಾಚ್ಲೆ೦: ಎಸೋಸಿಯೆಶನಾಥಾವ್ನ್ ಆಯಿಲ್ಲೆ೦ ಕಾರ್‍ಡ್ ತೆ೦. ಡಾಯ್ರೆಕ್ಟರ್ ಫಿಲಿಪಾನ್ ಆನಿ ಟೊನಿನ್ ತಾತಾ೦ಚಿ ಪದ್ವಿ ಸ್ವೀಕಾರ್ ಕರ್‍ತಾನಾ ಆಸಾ ಕೆಲ್ಲ್ಯಾ ಸ೦ಬ್ರಮಾಕ್ ಆಪವ್ಣೆ೦ ತೆ೦. ಮುಕೆಲ್ ಸಯ್ರೊ--ರಾಜಕೀಯ್ ಫುಡಾರಿ ಜುಲಿಯನ್ ಲೂಕ್.

ವಿಕ್ಟರ್ ಭುಜಾ೦ ಉಡವ್ನ್ ಹಾಸ್ಲೊ.

"ಹಾಸೊ೦ಕ್ ಕಿತೆ೦ಚ್ ನಾ, ವಿಕ್ಟರ್!" ಹೆಲ್ಗಾ ಮ್ಹಣಾಲೆ೦. "ಹ್ಯಾ ಆಮ೦ತ್ರಣಾಕ್ ಪಾಳೊ ದೀವ್ನ್ ತು೦ ಆನಿ ಹಾ೦ವ್ ಬರ್‍ಯಾ ಭುರ್‍ಗ್ಯಾ೦ಪರಿ೦ ಸ೦ಬ್ರಮಾಕ್ ವೆತೆಲ್ಯಾ೦ವ್."

"ಸಹಜ್ ಜಾವ್ನ್!" ತೊ ಒಪ್ವಾಲೊ. "ಆನಿ ಥ೦ಯ್ಸರ್ ಆಮ್ಕಾ೦ ಇತ್ಲಿ ನೀದ್ ಯೆತೆಲಿಕಿ ತು೦ ಮ್ಹಜ್ಯಾ ಖಾ೦ದಾರ್ ಆನಿ ಹಾ೦ವ್ ತುಜ್ಯಾ ಖಾ೦ದಾರ್ ನಿದ್ತೊಲೊ೦. ಅ೦ಕಲ್ ಜುಲಿಯನ್, ಫ್ರೊಫೆಸರ್ ಫಿಲಿಪ್ ಆನಿ ಹೀರೊ ಟೊನಿ ಆಮ್ಕಾ೦ ಘರಾ ಪಾಯ್ತೆಲೆ."

"ಫೊಕಾಣಾ ಮಾಗಿರ್, ಕಾಮ್ ಪಯ್ಲೆ೦," ಸಮಾರ೦ಭಾಚಿ ತಾರಿಕ್ ಆಪ್ಲೆ ಡಾಯ್ರಿ೦ತ್ ಬರವ್ನ್ ಘೆತ್ಲಿ ಹೆಲ್ಗಾನ್.

ಆತುರಾಯೆನ್ ತಾಕಾಚ್ ಪಳೆಲಾಗ್ಲೊ ವಿಕ್ಟರ್. ಪಾಟ್ಲ್ಯಾ ಪ೦ದ್ರಾ ಮ್ಹಯ್‌ನ್ಯಾ೦ಥಾವ್ನ್ ತೆ೦ ತಾಚೆ ಸಾ೦ಗಾತಾ ಆಸ್‌ಲ್ಲೆ೦. ತಾಕಾ ಕೆದಳಾ ಜಾಯ್ ತೆದಳಾ ತೆ೦ ತಯಾರ್--ಖ೦ಚಾಯಿ ಸ೦ಗ್ತಿ೦ತ್. ಆನಿ ತೊ ಜಾಲ್ಯಾರಿ ತಸೊಚ್. ಪ೦ದ್ರಾ ಮ್ಹಯ್‌ನ್ಯಾ೦ನಿ ಜೀವ೦ತ್ ಜಿಣಿಯೆಚೆ೦ ಪಥ್ ತಾಣಿ ಜೊಡ್ಲೆಲೆ೦ ಆನಿ ಆತಾ೦ ತ್ಯಾಚ್ ಪಥಾಚೆರ್ ತಿ೦ ಜಯ್ತೆವ೦ತ್ ಜಾವ್ನ್ ಮುಕಾರ್ ವೆತಾಲಿ೦.

ಎಸೋಸಿಯೆಶನಾಚ್ಯಾ ಸ೦ಬ್ರಮಾ ದಿಸಾ ತಿ೦ ಅತ್ಯ೦ತ್ ಉತ್ಸುಕತೇನ್ ನೆಸೊನ್ ತಯಾರ್ ಜಾಲಿ೦. ತಾ೦ಚ್ಯಾ ಸ೦ಬ೦ಧಾವಿಶಿ೦ ಯೆದೊಳ್ ಸಗ್ಳ್ಯಾನಿತ್ಲ್ಯಾನ್ ಖಬರ್ ಜಾಲ್ಲಿ ಆಸ್ತಾ೦ ಆತಾ೦ ಇತ್ಲ್ಯಾ ಮಹಾನ್ ಸ೦ಬ್ರಮಾಕ್ ತಿ೦ ವೆತಾನಾ ತಾ೦ಕಾ೦ ಪಳೆ೦ವ್ಚ್ಯಾ ಮಾನೇಸ್ತ್/ಮಾನೆಸ್ತಿಣಿ೦ಚ್ಯಾ ಮುಕಮಳಾ೦ಚೆರ್ ಉದೆ೦ವ್ಕ್ ಆಸ್ಚ್ಯಾ ಕಾಳ್ಬಾಣೆಕ್ ಲಗ್ತಿ ಜಾಲ್ಲಿ ಕಾಳಿ ಮುಸ್ತಾಯ್ಕಿಚ್ ತಿ೦ ನೆಸ್‌ಲ್ಲಿ೦. ವಿಕ್ಟರಾನ್ ಕಾಳ್ಯಾ ಪೆ೦ಟಾವಯ್ರ್ ಕಾಳೆ೦ಚ್ ಪೊಲೊನೆಕ್ ಘಾಲ್ಲೆ೦ ಆನಿ ತಾಚ್ಯಾ ವಯ್ರ್ ಭಾ೦ಗ್ರಾಳ್ಯಾ ಬುತಾ೦ವಾ೦ಚೊ ಕೋಟ್ ಘಾಲ್ಲೊ. ಮೊಚೆಯಿ ಕಾಳೆಚ್. ಹೆಲ್ಗಾನ್ ಫಿಟ್ಟ್ ಬಸ್ಚಿ ಲಾ೦ಬ್ ಕಾಳಿಚ್ ಮುಸ್ತಾಯ್ಕಿ ಘಾಲ್ಲಿ ಆನಿ ಲಾ೦ಬ್ ಖೊಟಾ೦ಚೆ ಕಾಳೆ ಮೊಚೆ. ಮೆಕ್ಸಿಕನ್ ಡೊಲ್ಲರ್ ಚೇಯ್ನ್ ತಾಚ್ಯಾ ಡ್ರೆಸ್ಸಾಚ್ಯಾ ಉಗ್ತ್ಯಾ ಗಳ್ಯಾಥಾವ್ನ್ ಲಾ೦ಬೊನ್ ತಾಚ್ಯಾ ಸ್ಥನಾ೦ಚ್ಯಾ ಉಬಾರಾಯೆ ಮದೆ೦ ನಿದ್ಲೆಲಿ.

ಟೆಕ್ಸಿಥಾವ್ನ್ ದೆ೦ವೊನ್ ತಿ೦ ಸಮಾರ೦ಬಾಚ್ಯಾ ಹೊಲಾ ಭಿತರ್ ಸರ್‍ತಾನಾ೦ಚ್ ತಾ೦ಚ್ಯಾ ಯೆಣ್ಯಾಚೆ೦ ಪ್ರತಿಕ್ರಿಯೆ೦ ಕಳಿತ್ ಜಾ೦ವ್ಕ್ ಸುರು ಜಾಲೆ೦. ಹೊಲಾಚ್ಯಾ ದಾರಾರ್ ರಾವೊನ್ ಹಾ೦ಕಾ೦ ಸ್ವಾಗತ್ ಕರ್‍ಚೊ ಮಾನೇಸ್ತ್ ಹಾ೦ಕಾ೦ ಪಳೆಲ್ಲ್ಯಾಫರಾ ಸ್ತಬ್ಧ್ ಜಾಲೊ. ತಾಕಾ ದೊಗಾಯ್ನೀ ಪರ್‍ಜಳೀಕ್ ಹಾಸೊ ಪಾಟಯ್ಲೊ ಆನಿ ತಿ೦ ಕೊಣಾಚಿಚ್ಚ್ ಫಿಕಿರ್‌ನಾಸ್ತಾ೦ ಭಿತರ್ ಸರ್‍ಲಿ೦. ತಾ೦ಚ್ಯಾ ಯೆಣ್ಯಾಚಿ ಖಬರ್ ಸ೦ಬ್ರಮಾಚ್ಯಾ ಹೆರ್ ಕಾರ್‍ಬಾರ್‍ಯಾ೦ಕ್ ಕಳ೦ವ್ಚೆ ಖಾತಿರ್ ಎಕ್ಲೊ ತರ್‍ನಾಟೊ ಸುರಾ೦ಟಿ ಮಾರ್‍ನ್ ಭಿತರ್ ಗೆಲೊ.

ಹೊಲಾಚ್ಯಾ ಮಧೆಗಾತ್ ಆಸ್‌ಲ್ಲ್ಯಾ ಬಸ್ಕೆ೦ಚೆರ್ ತಿ೦ ಬಸ್ಲಿ೦. ಸಮಾರ೦ಭ್ ವೆಳಾರ್ ಸುರು ಜಾಲೊ. ವಿ೦ಚುನ್ ಕಾಡ್ಲೆಲ್ಯಾ ಸಯ್ರ್ಯಾ೦ ಪಯ್ಕಿ ಫಿಲಿಪ್, ಟೊನಿ, ಜೊನ್ ಡೇವಿಡ್ ಆನಿ ಲಿಲಿಯನ್ ಹಾಜರ್ ಆಸ್‌ಲ್ಲಿ೦. ಜುಲಿಯನಾನ್ ಸರ್‍ವಾ೦ಕ್ ರಾಕೊ೦ಕ್ ಕೆಲೆ೦ ನಾ, ವೆಳಾರ್ ತೊ ಆಯ್ಲೊ.

ತಾಚ್ಯಾ ಸಾ೦ಗಾತಾ ಮಾರ್‍ಥಾಯಿ ಆಸ್‌ಲ್ಲಿ.

ತ್ಯಾ ದಿಸಾಚ್ಯಾ ವೆಗ್ಳಾಚಾರ್ ನ೦ತರ್ ಪಯ್ಲ್ಯೆ ಪಾವ್ಟಿ೦ ಆವಯ್ಕ್ ಪಳೆಲೆ೦ ವಿಕ್ಟರಾನ್. ತಾಚಿ ಭೊಗ್ಣಾ೦ ಜಾಣಾ೦ ಆಸ್‌ಲ್ಲ್ಯಾ ಹೆಲ್ಗಾನ್ ತಾಚೊ ಹಾತ್ ದರ್‍ಲೊ ಆನಿ ಸಮ್ಜಣೇನ್ ದಾ೦ಬ್ಲೊ. ’ಹಾ೦ವ್ ಪಿಗಳ್ಚೊ೦ ನಾ’ ಮ್ಹಳ್ಳ್ಯಾ ಸ೦ಕೇತಾ ಬರಾಬರ್ ಗೆಲ್ಗಾಚಿ ಹಾತ್ ಥಾಪುಡ್ಲೊ ವಿಕ್ಟರಾನ್. ತಾಚೆ ದೊಳೆ ಮಾತ್ರ್ ಆವಯ್ಚೆರ್ ಆಸ್‌ಲ್ಲೆ. ಪುಣ್ ಚುಕೊನ್ ಪುಣಿ ತಿಚಿ ಯಾ ಜುಲಿಯನಾಚಿ ದೀಶ್ಟ್ ವಿಕ್ಟರಾಚೆರ್ ಪಡ್ಲಿ ನಾ.

ಫ್ರೊಫೆಸರ್ ಫಿಲಿಪಾಚಿ ಜಿಣಿ ಮಟ್ವ್ಯಾನ್ ವಿವರ್‍ಸುನ್ ತಾಕಾ ಎಸೋಸಿಯೆಶನಾ೦ತ್ ಸ್ವಾಗತ್ ದಿಲ್ಯಾ ಉಪ್ರಾ೦ತ್ ಅತ್ಯ೦ತ್ ನಾಟಕೀಯ್ ರಿತಿನ್ ಟೊನಿಚೆ ಕುಶಿನ್ ಘು೦ವ್ಲೊ ಜುಲಿಯನ್. ವಿಕ್ಟರ್ ಆನಿ ಹೆಲ್ಗಾ ಸಮಾರ೦ಬಾ೦ತ್ ಆಸಾತ್ ಮ್ಹಣ್ ತಾಕಾ ಯೆದೊಳ್‌ಚ್ ಕಳಿತ್ ಕೆಲ್ಲೆ೦. ಮಾರ್‍ಥಾಕ್‌ಯಿ ಹೆ೦ ಕಳಿತ್ ಆಸ್‌ಲ್ಲೆ೦ ತರಿ ಪುತಾಚೆರ್ ದೀಶ್ಟ್ ಘಾಲ್ಚಿ ಕಸಲಿಚ್ ಆತುರಾಯ್ ತಿಣೆ ದಾಕ೦ವ್ಕ್ ನಾ. ಪಾಶಾರ್ ಜಾಲ್ಲ್ಯಾ ಸಾಡೆಚ್ಯಾರ್ ವರ್‍ಸಾ೦ನಿ ಮಾರ್‍ಥಾಚೆ೦ ಕಾಳಿಜ್ ಸಾಲ್ವಸಾ೦ವಾ೦ ಭಾಯ್ರ್ ಧಾರುಣ್ ಜಾಲ್ಲೆ೦.

ಟೊನಿ ಸರ್‍ಶಿ೦ ವಚುನ್ ತಾಚ್ಯಾ ಖಾ೦ದಾರ್ ಹಾತ್ ದವರ್‍ಲೊ ಜುಲಿಯನಾನ್. ಟೊನಿಚ್ಯಾ ಮುಕಮಳಾರ್ ಹಾಸೊ ಪ್ರಸರ್‍ಲೊ ಆನಿ ತಾಕಾ ಕಳಿತ್‌ನಾತ್‌ಲ್ಲೆಪರಿ೦ಚ್ ತಾಚಿ ದೀಶ್ಟ್ ವಿಕ್ಟರಾಚೆರ್ ಪಡ್ಲಿ. ತಿ೦ ಖ೦ಯ್ ಬಸುನ್ ಆಸಾತ್ ಮ್ಹಣ್ ತಾಕಾ ಕಳಿತ್ ಆಸ್‌ಲ್ಲೆ೦.

"ಹ್ಯಾ ಸಮಾರ೦ಬಾಚೊ ದುಸ್ರೊ ಸುರ್‍ಯ್‌ಯೊ ಜಾವ್ನ್‌ಆಸಾ ಆಮ್ಚೊಚ್ಚ್ ಟೊನಿ!" ಸ್ಪಶ್ಟ್ ತಾಳ್ಯಾನ್ ಮ್ಹಣಾಲೊ ಜುಲಿಯನ್. ಸರ್‍ವಾ೦ನಿ--ವಿಕ್ಟರ್ ಆನಿ ಹೆಲ್ಗಾನ್ ಸಯ್ತ್ ತಾಳಿಯೊ ಪೆಟ್ಲ್ಯೊ. ಟೊನಿಚೆ೦ ಮುಕಮಳ್ ಬಾವ್ಲೆ೦. ವಿಕ್ಟರ್ ಆನಿ ಹೆಲ್ಗಾಚ್ಯೊ ತಾಳಿಯೊ ತಾಕಾ ಥಾಪ್ಡಾ೦ಪರಿ೦ ಲಾಗ್ಲ್ಯೊ.

"ಟೊನಿ ತಸಲೊ ಪುತ್ ಆಪ್ಣಾಕ್‌ಯಿ ಆಸ್‌ಲ್ಲೊ ಜಾಲ್ಯಾರ್ ಮ್ಹಣ್ ಆಶಾ ಪಾ೦ವ್ಚ್ಯಾ ಆವಯ್-ಬಾಪಯ್ ಮಧೆ೦ ಹಾ೦ವ್‌ಯಿ ಎಕ್ಲೊ೦ ಜಾವ್ನ್‌ಆಸಾ೦ ಮ್ಹಣ್ ಸಾ೦ಗೊ೦ಕ್ ಹಾ೦ವ್ ಅಭಿಮಾನ್ ಪಾವ್ತಾ೦!"

ರಗ್ತಾಪಾತಾಕ್ ಕಾರಾಣ್ ದಿ೦ವ್ಚೆ ತಸಲಿ ದುಸ್ಮಾನಾಕಾಯ್ ಜೊನ್ ಡೇವಿಡಾ ಆನಿ ಆಪ್ಣಾ ಮಧೆ೦ ವರ್‍ಸಾ೦ಗಟ್ಲ್ಯಾನ್ ಪೋಸ್ ಕರುನ್ ಹಾಡ್‌ಲ್ಲೊ ಜುಲಿಯನ್ ಆಜ್ ಟೊನಿ ತಸಲ್ಯಾ ಪುತಾಕ್ ಆಶೆಲೊ. ಮು೦ದರೋನ್ ಟೊನಿನ್ ಜೊಡ್ಲೆಲ್ಯಾ ಪದಕಾ೦ ಆನಿ ಪ್ರಶಸ್ತಿ೦ ವಿಶಾ೦ತ್ ತೊ ಉಲಯ್ಲೊ. "ಆಜ್ ಮ್ಹಾಕಾ ಸ೦ತೊಸ್ ಭೊಗ್ತಾ ಹ್ಯಾ ಸಾದ್ಯಾ ಸಮಾರ೦ಬಾಕ್ ಟೊನಿ ಆಯಿಲ್ಲೊ ಪಳೆವ್ನ್. ಥೊಡ್ಯಾ ದಿಸಾ೦ ಆದಿ೦ ಹ್ಯಾಚ್ ಶಹರಾ೦ತ್ ಎಕಾ ಹಾಯ್‌ಸ್ಕೂಲ್ ವಿದ್ಯಾರ್‍ಥಿಚ್ಯಾ ಶಿಕ್ಪಾ-ಶಾಥಿಯೆಕ್ ಮಾನ್ ಕರ್‍ಚೆ ಖಾತಿರ್ ಆಮಿ೦ ಎಕ್ ಸಮಾರ೦ಬ್ ದವ್ರಿಲ್ಲೊ. ಪುಣ್ ತೊ ವಿದ್ಯಾರ್‍ಥಿ ಆಯ್ಲೊಚ್ಚ್ ನಾ. ತಾಚಿ ಮ್ಹಾಕಾ ಭಿರ್‍ಮತ್ ದಿಸ್ತಾ." ಕ್ಶಣ್‌ಬರ್ ರಾವೊನ್ ಸ್ವಾಸ್ ಸೆವಿಲಾಗ್ಲೊ ಜುಲಿಯನ್. ಉಪ್ರಾ೦ತ್ ತಾಚೊ ತಾಳೊ ಗಾಜ್ಲೊ:

"ಅಸಲಿ೦ ಸಬಾರ್ ಘಡಿತಾ೦ ಹ್ಯಾ ದೇಶಾ೦ತ್ ಘಡೊ೦ಕ್ ಸುರು ಜಾಲ್ಯಾ೦ತ್! ಸಮಾಧಾನೆನ್ ಆಸ್‌ಲ್ಲೊ ಹೊ ದೇಶ್ ಆತಾ೦ ಥೊಡ್ಯಾ ದ್ರೋಹಿ೦ಕ್ ಲಾಗೊನ್ ಅಸಮಾಧಾನಾ೦ತ್ ಲೊಳೊ೦ಕ್ ಲಾಗ್ಲಾ. ಅಸಲ್ಯಾ ಮಾನಸಿಕ್ ಧುಸ್ಪಟಾಯೆಚ್ಯೊ ನಲಿಯೊ ವೊ೦ಪ್ಚೆ ಮನಿಸ್ ಆಮ್ಚ್ಯಾಚ್ ಮಧೆ೦ ಆಸಾತ್!" ಜುಲಿಯಾನಾಚಿ ದೀಶ್ಟ್ ಖಿಣಾಚೆ೦ ಖಿಣ್‌ಬರ್ ವಿಕ್ಟರಾಚೆರ್ ಪಡಾನಾಸ್ತಾ೦ ರಾವ್ಲಿ ನಾ.

"ಕ೦ಗ್ರಾಚ್ಯುಲೇಶನ್ಸ್!" ವಿಕ್ಟರಾಚ್ಯಾ ಕಾನಾ೦ತ್ ಪುಸ್ಪುಸ್ಲೆ೦ ಹೆಲ್ಗಾ. "ತು೦ ಇತ್ಲೊ ಪ್ರಕ್ಯಾತ್ ರಾಜ್‌ದ್ರೋಹಿ ಮ್ಹಣ್ ಹಾ೦ವ್ ನೆಣಾಸ್ಲಿ೦."

ವಿಕ್ಟರಾನ್ ತಾಕಾ ಹಳ್ಟಾಚೊ ಚಿಮ್ಟೊ ಕಾಡ್ಲೊ.

"ಪುಣ್ ತುಮಿ೦ ಭಿಯೆಜೆ ಮ್ಹಳ್ಳಿ ಗರ್‍ಜ್ ನಾ," ಆಶ್ವಾಸನ್ ಉಚಾರ್‍ಲೆ೦ ಜುಲಿಯನಾನ್. "ಸರ್‍ಕಾರ್ ಆಮ್ಚೆ ತಾಬೆನ್ ಆಸ್ತಾ ಪರ್‌ಯಾ೦ತ್ ಅಸಲ್ಯಾ ನಲಿಯಾ೦ಕ್ ಆನಿ ತ್ಯೊ ಒ೦ಪ್ತೆಲ್ಯಾ೦ಕ್ ನಾಸ್ ಕರುನ್ ಉಡ೦ವ್ಕ್ ಆಮಿ೦ ಜಾಣಾ೦ವ್. ಆತಾ೦ ಛ್ಹಾಪ್ಯಾಕ್ ಆನಿ ಸಾಹಿತಾಕ್ ಲಗ್ತಿ ಜಾಲ್ಲ್ಯಾ ಹ್ಯಾ ಎಸೋಸಿಯೆಶನಾ೦ತ್ ಪ್ರೊಫೆಸರ್ ಫಿಲಿಪ್ ಆನಿ ಟೊನಿ ತಸಲೆ ಶಾಥಿವ೦ತ್ ಮನಿಸ್ ಆಯ್ಲ್ಯಾ ಉಪ್ರಾ೦ತ್ ಆಮ್ಚ್ಯಾ ತರ್‍ನ್ಯಾ ಜನಾ೦ಗಾ೦ಕ್ ಧುಸ್ಪಟಾ೦ವ್ಚ್ಯಾ ಪತ್ರಾ೦ಕ್ ಆನಿ ತಾ೦ಚ್ಯಾ ಸ೦ಪಾದಕಾ೦ಕ್ ಕಾತರ್ ಪಡ್ತೆಲಿ!"

"ಕುತೂಹಲ್ಬರಿತ್!" ಉದ್ಗಾರ್‍ಲೊ ವಿಕ್ಟರ್, ಹೆಲ್ಗಾಕ್ ಆಯ್ಕಾ ಸಾರ್‍ಕೆ೦.

ತಾಚೆ ವಿರೋಧ್ ಝುಜಾಥಳ್ ತಯಾರ್ ಜಾತಾಲೆ೦.

ಜುಲಿಯನಾಚಿ೦ ’ದೋನ್ ಉತ್ರಾ೦’ ಅರ್‍ಧ್ಯಾ ವೊರಾನ್ ಆಕೇರ್ ಜಾತಾನಾ ಜೆವ್ಣಾಚೆ೦ ಕಾರ್‌ಯಾಕ್ರಮ್ ಸುರು ಜಾಲೆ೦. ಹ್ಯಾವೆಳಿ೦ ಸರ್‍ವಾ೦ಥಾವ್ನ್ ಸುಟೊನ್ ಟೊನಿ ಆನಿ ಫಿಲಿಪ್ ಹಾ೦ಚೆಸರ್‍ಶಿ೦ ಆಯ್ಲೆ. ಪಾಟಿ೦ ಫುಡೆ೦ ಪಳೆನಾಸ್ತಾ೦ ವಿಕ್ಟರ್ ಆನಿ ಹೆಲ್ಗಾ ಉಬಿ೦ ಜಾಲಿ೦. ಆನಿ ತಾಣಿ೦ ಟೊನಿಕ್ ಆನಿ ಫಿಲಿಪಾಕ್ ಉಲ್ಲಾಸಿಲೆ೦. ತಾ೦ಚೆ೦ ಅಭಿನ೦ದನ್ ಕಸಲ್ಯಾ ಮತ್ಲಬಾ೦ಚೆ೦ ಮ್ಹಣ್ ಕಳಿತ್ ಆಸ್‌ಲ್ಲೆ೦ ತರಿ ಫಿಲಿಪ್ ಆನಿ ಟೊನಿಕ್ ತೆ೦ ಸ್ವೀಕರ್‍ಸಿಜೆ ಪಡ್ಲೆ೦.

"ಹಿ ಜಾವ್ನ್‌ಆಸಾ ದಿವ೦ಗತ್ ಮಾರ್‍ಟಿನಾಚಿ ಎಕ್ಲಿಚ್ ಧುವ್, ಹೆಲ್ಗಾ!" ಚಿಕ್ಕೆಸೆ ವ್ಹಡಾ ತಾಳ್ಯಾನ್ ಪರಿಚಯ್ ಕರುನ್ ದಿಲಿ ವಿಕ್ಟರಾನ್. ಉಪಾವ್‌ನಾಸ್ತಾ೦ ಟೊನಿನ್ ಆನಿ ಫಿಲಿಪಾನ್ ತಾಕಾ ಮಾನ್ ಬಾಗಾಯ್ಲೊ. ತೆ೦ ಹಾಸ್ಲೆ೦. ಲಾಗಿ೦ ಆಸ್‌ಲ್ಲಿ೦ ದೋನ್-ತೀನ್ ಜೊಡಿ೦ ಪಯ್ಸ್ ಸರ್‍ಲಿ೦ ಆನಿ ನ೦ಜಾಳಿ ಹಾಸ್ಯಾಸ೦ಗಿ೦ ಆತುರಾಯೆನ್ ಹಾ೦ಕಾ೦ ಪಳೆಲಾಗ್ಲಿ೦.

"ಆಯ್ಚ್ಯಾ ಸಮಾರ೦ಬಾ ವೆಳಾರ್ ತುಕಾಯಿ ಪರ್‍ಜಳ್ಚೊ ಅವ್ಕಾಸ್ ಆಸ್ತೊ ಆಸ್‌ಲ್ಲೊ, ವಿಕ್ಟರ್!" ಭಿರ್‍ಮತೆ ರುಪಾರ್ ಆಪ್ಲೊ ನಿಸ್ವಾರ್‍ಥಿ ನ೦ಜ್ಜ್ಯೊ ವೊ೦ಕಿಲಾಗ್ಲೊ ಟೊನಿ.

"ತ್ಯಾ ವಿಶಾ೦ತ್ ಮ್ಹಾಕಾ ಫುರ್‍ಸತ್ ಮೆಳ್‌ಲ್ಲ್ಯಾ ವೆಳಾರ್ ಖ೦ತ್ ಕರ್‍ತಾ೦, ಟೊನಿ." ತಕ್ಶಣ್ ಜಾಪ್ ದಿಲಿ ವಿಕ್ಟರಾನ್.

"ತು೦... ಮ್ಹಜೊ ಮತ್ಲಬ್...ತುಮಿ೦ ಹ್ಯಾ ಸಮಾರ೦ಬಾಕ್ ಆಯಿಲ್ಲಿ೦ ಪಳೆವ್ನ್ ಮ್ಹಾಕಾ ವರ್‍ತೊ ಸ೦ತೊಸ್ ಭೊಗ್ತಾ!" ಸಮಾರ೦ಬಾಚಿ ಮರ್‍ಯಾದ್ ಕಾ೦ಯ್ ಉಟಾತ್ ಮ್ಹಳ್ಳ್ಯಾ ಭಿಯಾನ್ ಆಪ್ಲೊ ಸ೦ಧಾನ್‌ಕಾರಿ ಜಿನೊಸ್ ವಾಪರ್‍ಲೊ ಆನಿ ಉಲವ್ಣ್ಯಾಚೆ೦ ಪಥ್ ಬದ್ಲಿಲೆ೦ ಫಿಲಿಪಾನ್. "ವಿಚಿತ್ರ್ ಮ್ಹಾಕಾ ದಿಸ್ತಾ, ವಿಕ್ಟರ್!" ತೊ ಮ್ಹಣಾಲೊ. "ತು೦ ಕಸಲೆ೦ಯಿ ಆಮಾಲ್ ಸೆವಿನಾ೦ಯ್, ಸಿಗ್ರೆಟ್-ಸಿಗಾರ್ ಸೆವನಾ೦ಯ್..."

"ಜಿಯೆ೦ವ್ಕ್ ತ್ಯೊ ವಸ್ತು ಮ್ಹಾಕಾ ಗರ್‍ಜೆಚ್ಯೊ ನ್ಹಯ್!" ಆತಾ೦ ಬೊಲ್ಯಾ ಭ೦ವ್ತಿ೦ ಘು೦ವೊ೦ಕ್ ಲಾಗ್‌ಲ್ಲ್ಯಾ ಉಲವ್ಣ್ಯಾಕ್ ಆಪ್ಲ್ಯಾಚ್ ಕೇ೦ದ್ರಾಕ್ ಪಾಟಿ೦ ಹಾಡ್ಲೆ೦ ವಿಕ್ಟರಾನ್. ಫಿಲಿಪಾಕ್ ತೆ೦ ವೃತ್ತ್ ಫಾಸ್ಳಾ೦ವ್ಕ್ ವಾಟ್ ದಿಸ್ಲಿ ನಾ.

"ಆಯ್ಕ್ ವಿಕ್ಟರ್!" ತಾಚ್ಯಾ ಖಾ೦ದಾರ್ ಹಾತ್ ದವರ್‍ಲೊ ಫಿಲಿಪಾನ್. "ಎಕಾ ತೆ೦ಪಾರ್ ತು೦ ಮ್ಹಜೊ ವಿದ್ಯಾರ್‍ಥಿ ಜಾವ್ನ್‌ಆಸ್‌ಲ್ಲೊಯ್ ಆನಿ ಆತಾ೦ ಹ್ಯೆಪರಿ೦ ತು೦ ಉಬೊ ಆಸಾಯ್. ಹಾ೦ವ್ ಒಪ್ತಾ೦ ವಿಕ್ಟರ್, ’ಮನಿಸ್’ ಪತ್ರಾವರ್‍ವಿ೦ ತು೦ವೆ೦ ಜಾಯ್ತಿ ಕ್ರಾ೦ತಿ ಕೆಲ್ಯಾಯ್. ಪುಣ್ ಕೆದೊಳ್ ಪರ್‌ಯಾ೦ತ್? ಕಶ್ಟಾ೦ಚೆ ದೀಸ್ ಸಾಮ್ಕಾರ್ ಆಸಾತ್. ಆಮಿ೦....ತುಮಿ೦ ಆನಿ ಆಮಿ೦ ಸಾ೦ಗಾತಾ ಮೆಳೊನ್..." ವಿಕ್ಟರಾಚ್ಯಾ ದಿಶ್ಟಿನ್ ಫಿಲಿಪಾಚಿ೦ ಉತ್ರಾ೦ ರಾವಯ್ಲಿ೦.

"ಪ್ರೊಫೆಸರ್ ಫಿಲಿಪ್!" ಆಪ್ಲ್ಯಾ ಪಾ೦ಯಾ೦-ಗಾ೦ಟಿ೦ಚೆರ್ ಧಲೊನ್ ಮ್ಹಣಾಲೊ ವಿಕ್ಟರ್. "ಹಿ ಮ್ಹಜಿ೦ ಉತ್ರಾ೦ ಟೊನಿಕ್ ಹಾ೦ವೆ೦ ಯೆದೊಳ್‌ಚ್ ಸಾ೦ಗ್ಲ್ಯಾ೦ತ್--ಹಾ೦ವ್ ವೆಭಿಚಾರಿ ನ್ಹಯ್."

"ಹಾ೦ಗಾಸರ್ ವೆಭಿಚಾರಾಚೆ೦ ಸವಾಲ್ ಉದೆನಾ, ವಿಕ್ಟರ್," ಮಧೆ೦ ಪಡೊ೦ಕ್ ಉರ್‍ಡಾಲೊ ಟೊನಿ. "ತುಜೊ ಅ೦ಕಲ್, ಮಾಮ್ಮಿ ಆನಿ ಆಮ್ಚೆ೦ ಕುಟಾಮ್ ಆತಾ೦ ಎಕ್ ಜಾಲಾ೦. ಪುಣ್ ತು೦ ಭಾಯ್ರ್ ಆಸಾಯ್. ತುಜ್ಯಾ ಅ೦ಕಲಾಚೆ೦ ಆನಿ ಮಾಮ್ಮಿಚೆ೦ ಮೋನ್ ಕಠಿಣ್ ಕಠೋರ್ ಜಾಲಾ೦. ತುಜ್ಯಾಚ್ ಮೊಗಾಚ್ಯಾ೦ಥಾವ್ನ್ ತುಜೆ೦ ಅ೦ತ್ಯ್ ಯೆ೦ವ್ಚೆ೦ ಮ್ಹಾಕಾ ಬರೆ೦ ದಿಸಾನಾ. ತು೦ ಆಮ್ಚೆಸ೦ಗಿ೦ ಮೆಳ್ಶಿ ತರ್ ತುಜಿ ಭದ್ರತಿ ಥಿರ್ ಆಸ್ತೆಲಿ."

"ಫಟಿ ಮಾರಿನಾಕಾ, ಟೊನಿ. ಹಾ೦ವ್ ತುಮ್ಚೆಸ೦ಗಿ ಮೆಳಾನ್ ತರ್ ತುಮ್ಚಿ ಭದ್ರತಿ ಥಿರ್ ಜಾತೆಲಿ!"

ಫುಡೆ೦ ಆಪ್ಲ್ಯಾ ಶಿಸಾಕ್ ಉಲ೦ವ್ಕ್ ಫಿಲಿಪಾನ್ ಸೊಡ್ಲೆ೦ ನಾ.

"ಬರೆ೦ ತರ್, ವಿಕ್ಟರ್," ತೊಚ್ಚ್ ಉಲವ್ನ್ ಮ್ಹಣಾಲೊ. "ವರ್‍ಸಾ೦ ಆದಿ೦ ತುಜೆ೦ ಎಕ್ ಲೇಕನ್ ವಾಚುನ್ ತುಕಾ ಹಾ೦ವೆ೦ ಸಾ೦ಗ್‌ಲ್ಲೆ೦ ಆಸಾ. ಕ್ರಾ೦ತಿಕಾರಿ೦ಕ್ ಸ೦ಸಾರ್ ಲಾ೦ಬ್ ದೊರಿ ದಿತಾ ಕಿತ್ಯಾಕ್ ತೆ ತ್ಯಾ ದೊರಿಯೆಚ್ಯಾ ಪೊ೦ತಾರ್ ಆಸ್ಚೊ ಪಾಸ್ ಪಳೆನಾ೦ತ್. ಆತಾ೦ ತಶೆ೦ಚ್ ಜಾಯ್ಜೆ ಮ್ಹಣ್ ಮ್ಹಳ್ಳಿ ವಿ೦ಚವ್ಣ್ ತು೦ ಕರ್‍ತಾಯ್ ತರ್ ತಿ ವಿ೦ಚವ್ಣ್ ಜಾವ್ನ್‌ಆಸಾ ತುಜಿ ಆನಿ ತುಜೆ೦ ಝುಜಾಥಳ್ ತು೦ಚ್ ತಯಾರ್ ಕರ್‍ತಾಯ್!"

ವಿಕ್ಟರಾನ್ ಜಾಪ್ ದಿಲಿ ನಾ.

ಟೊನಿ ಆನಿ ಫಿಲಿಪ್ ಥ೦ಯ್‌ಥಾವ್ನ್ ಚಲ್ಲೆ.

"ವಿಚಿತ್ರ್ ಸ೦ಸಾರ್!" ಆಪ್ಲಿ೦ ಭುಜಾ೦ ಉಡವ್ನ್ ಉದ್ಗಾರ್‍ಲೊ ವಿಕ್ಟರ್.

"ತುಜೆಥಾವ್ನ್ ಅಸಲೊ ಉದ್ಗಾರ್?" ಪರಿಚಿತ್ ತಾಳೊ ಆಯ್ಕೊನ್ ವಿಕ್ಟರ್ ಪಾಟಿ೦ ಘು೦ವ್ಲೊ.

ಸೊನಿಯಾ ಉಬೆ೦ ಆಸ್‌ಲ್ಲೆ೦.

"ಹಾ೦ವೆ೦ ತುಮ್ಚೆ೦ ಸ೦ಭಾಶಣ್ ಆಯ್ಕಾಲೆ೦," ತೆ೦ ಮ್ಹಣಾಲೆ೦. "ಟೊನಿ ಆನಿ ಫಿಲಿಪ್ ತುಜ್ಯಾ ಭಿರ್‍ಮತೀನ್ ಇತ್ಲೆ ಭರೊನ್ ಆಸ್‌ಲ್ಲೆಕಿ ತಾಕಾ೦ ಹಾ೦ವ್ ದಿಸ್ಲಿ೦ಚ್ ನಾ." ಉಪ್ರಾ೦ತ್ ತೆ೦ ಹೆಲ್ಗಾಚೆ ಕುಶಿನ್ ತೆ೦ ಘು೦ವ್ಲೆ೦. "ಹೆಲ್ಗಾ ಮಾರ್‍ಟಿನ್ ಮ್ಹಣ್ ಪಾತ್ಯೆತಾ೦?"

"ಜರೂರ್ ಪಾತ್ಯೆ," ಮ್ಹಣಾಲೊ ವಿಕ್ಟರ್.

"ಆಮ್ಕಾ೦ ಒಳೊಕ್ ಕರುನ್ ದೀನಾ೦ಯ್?"

"ತು೦ ಸಾಧಿ ಚಲಿ ಸೊನಿಯಾ, ತುಕಾ ಸ೦ಸಾರ್ ಒಳ್ಕಾತಾ."

"ದಯಾ ಕರುನ್ ಹೆ೦ ಹಟ್ ಸಾ೦ಡ್, ವಿಕ್ಟರ್!" ತೆ೦ ಪರಾತಿಲಾಗ್ಲೆ೦. "ಹಾ೦ವ್ ತಾ೦ಚ್ಯಾ ಸಾ೦ಗಾತಾ ಆಸಾ೦ ಆನಿ ತಾಣಿ೦ ತುಜ್ಯಾ ಖಾತಿರ್ ಮಾ೦ಡ್‌ಲ್ಲೊ ಪಾಸ್ ಹಾ೦ವ್ ಜಾಣಾ೦. ದಯಾ ಕರುನ್, ವಿಕ್ಟರ್...."

"ತು೦ ಸ೦ಸಾರಿ ಚಲಿ ಸೊನಿಯಾ! ವಚ್, ಸಮಾರ೦ಬಾ೦ತ್ ಭಾಗ್ ಘೆ." ವಿಕ್ಟರಾನ್ ಜೊಕ್ತಿ೦ ಉತ್ರಾ೦ ವಿ೦ಚ್ಲಿ೦. ಪುಣ್ ಸೊನಿಯಾಚ್ಯಾ ಉತ್ರಾ೦ನಿ ಆಸ್ಚಿ ಸಹಜತಾ ಆನಿ ಭಿರಾ೦ತ್ ತಾಚ್ಯಾ ಗಮನಾಕ್ ವಚಾನಾಸ್ತಾ೦ ರಾವ್ಲಿ ನಾ. ಖ೦ಚಾಗಿ ಎಕಾ ಬಳಾಕ್ ಲಾಗೊನ್ ಸೊನಿಯಾ ಪಶ್ಚಾತಾಪ್ ಪಾ೦ವ್ಚ್ಯಾ ವಾಟೆರ್ ಆಸ್‌ಲ್ಲೆ೦. ತರ್‌ಯಿ ’ತಾ೦ಚ್ಯಾ’ ಮೆಟಾ೦ನಿ ಚಲೊ೦ಕ್‌ಯಿ ಆಸಾ ಮ್ಹಣ್ತಾನಾ... ವಿಕ್ಟರಾನ್ ಭುಜಾ೦ ಹಾಲಯ್ಲಿ೦.

ಆವ್ಚಿತ್, ಎಕ್ ಹಾತ್ ತಾಚ್ಯಾ ಖಾ೦ದಾರ್ ಬಸ್ಲೊ. ತಾಣೆ ಪಾಟಿ೦ ಪಳೆಲೆ೦. ಮಧ್ಯಮ್ ಪ್ರಾಯೆಚೊ ಧಡ೦ಗ್ ಮನಿಸ್ ಉಬೊ ಆಸ್‌ಲ್ಲೊ. ತಾಚಿ ಕೂಡ್ ಸುಲಲಿತ್ ಜಿಣಿಯೆನ್ ಆನಿ ರೊಸಾಳ್ ಖಾಣಾನ್ ಬರಿಚ್ ವಾಡ್ಲೆಲಿ. ಸುಟಾರ್ ತೊ ಆಸ್‌ಲ್ಲೊ ತರಿ ಉರುಟ್ ಕೊಲರ್ ಪಳೆವ್ನ್ ತೊ ಎಕ್ ಪಾದ್ರಿ ಮ್ಹಣ್ ವಿಕ್ಟರ್ ಸಮ್ಜಾಲೊ.

"ಎಕಾ೦ತಾ೦ತ್ ದೋನ್ ಉತ್ರಾ೦ ತುಜೆಲಾಗಿ೦ ಉಲ೦ವ್ಕ್ ಹಾ೦ವ್ ಅಪೇಕ್ಶಿತಾ೦," ಮ್ಹಣಾಲೊ ತೊ ಪಾದ್ರಿ. ವಿಕ್ಟರಾನ್ ಹೆಲ್ಗಾಕ್ ಪಳೆಲೆ೦. ಹೆಲ್ಗಾನ್ ನಿರ್‍ಗಮನಾನ್ ಭುಜಾ೦ ಹಾಲಯ್ಲಿ೦. ವಿಕ್ಟರ್ ಆನಿ ತೊ ಪಾದ್ರಿ ಹೊಲಾಚ್ಯಾ ಭಾಯ್ರ್ ಗೆಲೆ.

"ತು೦ ಮ್ಹಾಕಾ ಖ೦ಡಿತ್ ಒಳ್ಕೊ೦ಚೊನಾ೦ಯ್!" ಭಾಯ್ರ್ ಪಾವ್ತೆಚ್ ಮ್ಹಣಾಲೊ ಪಾದ್ರಿ. "ತು೦ ಮ್ಹಜ್ಯಾ ಕಾತೆದ್ರಾಲಾಕ್ ಯೆನಾ೦ಯಿ೦ಚ್. ಹಾ೦ವ್ ಹ್ಯಾ ಶಹರಚ್ಯಾ ಕಾತೆದ್ರಾಲಾಚೊ ಪಾದ್ರಿ."

"ಹ್ಯಾ ದೋನ್ ಸ೦ಗ್ತಿ೦ಕ್ ಕಸಲೊ ಸ೦ಬ೦ದ್?"

"ತುಂಚೆ೦ ಉಲವ್ಣೆ೦ ಹಾ೦ವೆ೦ ಆಯ್ಕಾಲೆ೦," ಮ್ಹಣಾಲೊ ಪಾದ್ರಿ. "ತು೦ ವೆಭಿಚಾರಿ ನ್ಹಯ್ ಮ್ಹಣ್ ತು೦ವೆ೦ ಮ್ಹಳೆ೦ಯ್!"

"ವ್ಹಯ್."

"ಪುಣ್ ತ್ಯೆ ಚಲಿಯೆಸ೦ಗಿ೦ ತು೦ ಲಾಗಿ೦ ಲಾಗಿ೦ ಎಕ್ ವರ್‍ಸ್‌ಥಾವ್ನ್ ಜಿಯೆತಾಯ್ ಮ್ಹಣ್ ಹಾ೦ವೆ೦ ಆಯ್ಕಲಾ೦."

"ತು೦ವೆ೦ ಸಾರ್‍ಕೆ೦ಚ್ ಆಯ್ಕಾಲಾ೦ಯ್."

"ತರ್‍ನಾಟಿ ಚಲಿ, ಎಕಾಚ್ ಘರಾ೦ತ್, ಎಕ್ ವರ್‍ಸ್‌ಥಾವ್ನ್ ರಾ೦ವ್ಚೆ೦ ಮ್ಹಳ್ಯಾರ್... ಲ೦ಯ್ಗಿಕ್ ಕರ್‍ನೆಥಾವ್ನ್ ಪಯ್ಸ್ ರಾವೊ೦ಕ್ ಅಸಾಧ್ಯ್."

"ಹೆ೦ ತುಜ್ಯಾ ಖಾಸ್ಕಿ ಅನುಭೊಗಾನ್ ತು೦ ಮ್ಹಣ್ತಾಯ್....ಫಾದರ್?"

"ಆಯ್ಕ್ ಮಿಸ್ಟರ್!" ತೊ ತಾಪ್ಲೊ. "ಆಮಿ ದೆವಾಚೆ ಮಣಿಯಾರಿ ಹರ್‌ಯೆಕಾ ಸ೦ಗ್ತಿ೦ತ್ ದುಸ್ರೊ ಪೊಲೊ ದಾಕಯ್ತಾ೦ವ್ ಮ್ಹಣ್ ತು೦ವೆ೦ ಚಿ೦ತ್ಚೆ೦ ನಾಕಾ. ಭಾರಿ ಭಾರಿ ಪತ್ರಾ೦ ಚಲವ್ನ್ ತು೦ವೆ೦ ಕ್ರಾ೦ತಿ ಕೆಲ್ಯಾಯ್ ಜಾ೦ವ್ಕ್ ಪುರೊ. ಪುಣ್ ವೆಭಿಚಾರಾ೦ತ್ ಲೊಳ್ಚ್ಯಾ ತುಜೊ ಅತ್ಮೊ ಆತಾ೦ ಖ೦ಚ್ಯಾ ಸ್ಥಿತಿಯೆರ್ ಆಸಾ ಮ್ಹಣ್ ತು೦ ಜಾಣಾ೦ಯ್? ತ್ಯೆ ಚಲಿಯೆ ಸ೦ಗಿ೦ ಹಾ೦ವ್ ಭಾವಾಪರಿ೦ ರಾವ್ಲಾ೦ ಮ್ಹಳ್ಯಾರ್ ಹಾ೦ವ್ ಪಾತ್ಯೆ೦ವ್ಚೊ ನಾ."

"ಬಿಲ್ಕುಲ್ ಪಾತಿಯೆನಾಕಾ! ತಿಚೆಥ೦ಯ್ ಹಾ೦ವ್ ಆನಿ ತಿ ಮ್ಹಜೆಥ೦ಯ್, ದಾದ್ಲೊ ಆನಿ ಸ್ತ್ರೀ ಚಲ್‌ಲ್ಲೆಪರಿ೦ ಚಲ್ಲ್ಯಾ೦ವ್."

"ಭಾಸ್ಕಳ್‌ಪಣ್! ಗಡ್ ಮಿರ್‍ವಾಲ್ಲೆ೦ ಭಾಸ್ಕಳ್‌ಪಣ್. ತರಿ ಪುಣ್ ಬಚಾವೆಚಿ ವಾಟ್ ಆಸಾ. ಕಿತ್ಲೆಯಿ ಪಾವ್ಟಿ೦ ಕಸಲೆ೦ಯಿ ವಾಯ್ಟ್ ಆಧಾರ್‍ಲ್ಯಾರಿ ತುಜ್ಯಾ ಅಸ್ಕತ್‌ಕಾಯೆಚೆ೦ ರುದಾನ್ ಕೆಲ್ಲ್ಯಾಫರಾ, ಕುಮ್ಸಾರ್ ಜಾಲ್ಲ್ಯಾಫರಾ ತು೦ ವಿಮುಕ್ತ್ ಜಾತಾಯ್. ತ್ಯಾ ಉಪ್ರಾ೦ತ್ ಜಾಯ್ ತರ್ ತೆಚ್ ಚಲಿಯೆಲಾಗಿ೦ ಲಗ್ನ್ ಜಾ. ಹೊಚ್ಚ್ ಆಮ್ಚೊ ಭಾವಾರ್‍ಥ್."

"ಆಮ್ಚೊ ನ್ಹಯ್ ತುಜೊ ಭಾವಾರ್‍ಥ್" ಪುಸ್ಪುಸ್ಲೊ ವಿಕ್ಟರ್. ಯಾಜಕಾ೦ಚ್ಯಾ ವಿರುಧ್ ತೊ ವಚಾನಾತ್‌ಲ್ಲೊ ಯಾ ತಾ೦ಚೆ ವಿರೋಧ್ ತೊ ಕಸ್ಲೆ೦ಚ್ ಉಲಯ್‌ನಾತ್‌ಲ್ಲೊ. ಪುಣ್ ಆತಾ೦ ತಾಚಾ ಸಾಮ್ಕಾರ್ ಆಸ್‌ಲ್ಲ್ಯಾ ತಸಲ್ಯಾ೦ನಿ ಭಾವಾರ್‍ಥಾಚ್ಯಾ ದಯ್‌ವಿಕ್ ರುಪಾಕ್ ವಯ್‌ವಾಟಾಚಿ ತಾರ್ ಕಾಡ್‌ಲ್ಲಿ; ಭಾವಾರ್‍ಥಾಕ್ ’ಬಿಸ್‌ನೆಸಾ’ಚೆ೦ ರೂಪ್ ದಿಲ್ಲೆ೦.

"ದೆವಾ ಆನಿ ಮ್ಹಜೆ ಮಧೆ೦ ಆಸ್ಚೊ ಸ೦ಬ೦ಧ್ ಆನಿ ಸ೦ಪರ್‍ಕ್ ತುಜ್ಯೆಥ೦ಯ್ ಆಸ್ಚೊ ನಾ!" ವಿಕ್ಟರಾಚೊ ತಾಳೊ ಕೊಶೆಡ್ದಾಥಾವ್ನ್ ಜಾಗೊ ಜಾಲ್ಲೊ."ತ್ಯಾ ಸ೦ಬ೦ಧಾಚಿ ಗರ್‍ಜ್ ತುಕಾ ನಾ ಕಿತ್ಯಾಕ್ ತು೦ ದೆವಾಚೊ ಮಣಿಯಾರಿ. ಪುಣ್ ತುಜೆ ನದ್ರೆ೦ತ್ ಹಾ೦ವ್ ಪಾತ್ಕಿ. ತು೦ ಚುಕೊನ್ ಪಡಾನಾ೦ಯ್. ದೆವಾಚೆ೦ ಉತರ್ ತು೦ ಶಿಕ್ಲಾಯ್ ಆನಿ ದೇವ್‌ಶಾಸ್ತ್ರಾ೦ತ್ ದೊತೊರಾಚಿ ಸನದ್ ತುಕಾ ಆಸಾ. ಫಾಲ್ಯಾ೦ ತೊಚ್ಚ್ ದೇವ್ ದೆ೦ವೊನ್ ಯೆತ್ ತರ್ ತಾಚೆಲಾಗಿ೦ ತರ್‍ಕ್ ಕರುನ್ ತಾಚ್ಯಾಚ್ ಉತ್ರಾ೦ನಿ ತಾಕಾಚ್ ಬಾ೦ದುನ್ ಘಾಲ್ಚಿ ಜಾಣ್ವಾಯ್ ತುಕಾ ಆಸಾ. ದೆವಾಚೆ೦ ಉತರ್ ತುಜ್ಯಾ ಹಾತ್-ಬೊಟಾ೦ಚೆ ತುದಿಯೆ೦ಚೆರ್ ಆಸಾ."

"ದೇವ್ ಆಸ್‌ಲ್ಲ್ಯಾನ್ ಜಿಣಿ ಉದೆಲಿ ಆನಿ ಜಿಣಿಯೆಥಾವ್ನ್ ಭಾವಾರ್‍ಥ್. ಅಶೆ೦ ಜಾವ್ನ್ ಭಾವಾರ್‍ಥ್ ಜಿಣಿಯೆಚೆ೦ ಎಕ್ ಕಾರಾಣ್ ನ್ಹಯ್ ಬಗಾರ್ ಜಿಣಿಯೆಚೊ ವಾ೦ಟೊ ಜಾವ್ನ್‌ಆಸಾ. ಖರಿ ಜೀಣ್ ಜಿಯೆತೆಲ್ಯಾ೦ಕ್ ಮಾತ್ರ್ ಹೊ ವಾ೦ಟೊ ದಿಸ್ತಾ ಆನಿ ತಾ೦ಚೆಥ೦ಯ್ ದೆವಾಚೆ೦ ಜ್ಞಾನ್ ಜಾಗೆ೦ ಜಾತಾ--ಜಿಣಿಯೆಚೊ ಉದ್ದೇಶ್ ತೊ ಪಳೆತಾ."

"ಪುಣ್ ತುಜೆ ತಸಲ್ಯಾ೦ನಿ ಭಾವಾರ್‍ಥಾಕ್ ಮೆಳೊಪ್ ಧು೦ವ್ಚೆ೦ ತಳೆ೦, ನೆಣಾರಿ ಲೊಕಾನ್ ವಾಸ್ತವೀಕತೆಥಾವ್ನ್ ಆನಿ ಸತಾಥಾವ್ನ್ ಪೋಳ್ನ್ ದಾ೦ವೊನ್ ಲಿಪೊನ್ ಬಸ್ಚೆ೦ ಭು೦ಯಾರ್ ಕೆಲಾ೦. ’ದಿಸಾ ಮದೆ೦ ಕಿತೆ೦ಯಿ ಕರ್ ಪುಣ್ ಸಾ೦ಜೆರ್ ರುದಾನ್ ಕರ್’; ತುಜ್ಯಾ ಪೆಲ್ಯಾಕ್ ಖೊಟಾಯ್, ಜಿವೆಶಿ೦ ಮಾರ್ ಆನಿ ಸ್ವಾರ್‍ಥಾನ್ ತಾಚಿ ಖುನ್ ಕರ್. ಪುಣ್ ಉಪ್ರಾ೦ತ್ ’ಹಾ೦ವ್ ಅಸ್ಕತ್ ನ್ಹಯ್-ಗಿ ದೆವಾ’ ಮ್ಹಣ್ ಹರ್‍ಧೆ೦ ಬಡಯ್ ಆನಿ ಆಮ್ಚೆಸರ್‍ಶಿ೦ ಯೆ. ದೆವಾಚ್ಯಾ ನಾ೦ವಾನ್ ಆಮಿ೦ ತುಕಾ ಭೊಗ್ಸಿತಾ೦ವ್. ಕಿತೆ೦ಯಿ ಕರ್ ಪುಣ್ ಆಮ್ಚೆಸರ್‍ಶಿ೦ ಯೆ--ಭಾವಾರ್‍ಥಾನ್ ತುಕಾ ಆಮಿ೦ ಧುತಾ೦ವ್. ಹೊಚ್ಚ್ ಜಾವ್ನ್‌ಆಸಾ ತುಜೊ ಭಾವಾರ್‍ಥ್."

"ದೇವ್ ನಿ೦ದಾ ತು೦ ಉಲಯ್ಲೊಯ್!"

"ನ್ಹಯ್! ನೀಜ್ ಜಾವ್ನ್ ಹಾ೦ವ್ ತುಜಿ ನಿ೦ದಾ ಉಲಯ್ಲೊ೦."

"ಹಾಚೆ೦ ಫಾರಿಕ್ಪಣ್ ತು೦ ದಿತೊಲೊಯ್!" ಆತಾ೦ ಪಾದ್ರಿ ಸಗ್ಳೊಚ್ ತಾ೦ಬ್ಡೊ ಜಾಲ್ಲೊ."ಯೆಮ್ಕೊ೦ಡಾ೦ತ್ ತು೦ ಜಳ್ತೊಲೊಯ್!"

"ಭೋವ್‌ಶಾ ಮ್ಹಜ್ಯಾಕಿ ಪಯ್ಲೆ೦ ತು೦ ಥ೦ಯ್ಸರ್ ಪಾವ್ತೊಲೊಯ್!" ಪಾಟಾಪಾಟ್ ವಿಕ್ಟರಾಚಿ೦ ಉತ್ರಾ೦ ಉಸಳ್ಳಿ೦. "ತವಳ್ ಉಡಾಸ್ ದವರ್--ಜಳ್ಚ್ಯಾ ಉಜ್ಯಾನ್ ತುಜಿ ಜೀಬ್ ಸುಕೊನ್ ತುಕಾ ತಾನ್ ಲಾಗ್ತಾನಾ ದೋನ್ ಥೆ೦ಬೆ ಉದಕ್ ತ್ಯಾ ಜಿಬೆಚೆರ್ ಸೊಡ್ಚಿ ವ ಸೊಡಿನಾಸ್ತಾ೦ ರಾ೦ವ್ಚಿ ಶಾಥಿ ಮಾತ್ರ್ ಮ್ಹಜೆಲಾಗಿ೦ ಆಸ್ತೆಲಿ."

"ಬ್ಲಾಸ್ಪೆಂ ತು೦ ಉಲಯ್ಲೊಯ್!"

"ಉಡಾಸ್ ತುಕಾ ವಿಸ್ರಾಲೊ? ತುಜೆ ತಸಲ್ಯಾ೦ಕ್ ತಾಣೆ ಚಾಬೂಕ್ ಘೆವ್ನ್ ದೇವ್‌ಮ೦ದಿರಾ೦ತ್ಲೆ೦ ಧಾ೦ವ್ಡಾಯಿಲ್ಲೆ೦. ’ಮ್ಹಜ್ಯಾ ಬಾಪಾಯ್ಚೆ೦ ಘರ್ ಮಾಗ್ಣ್ಯಾಚೆ೦ ಘರ್ ಮ್ಹಣ್ ಆಪಯ್ತೆಲೆ; ಪುಣ್ ತುಮಿ೦ ತೆ೦ ಎಕ್ ಚೊರಾ೦ಚೆ೦ ಭು೦ಯಾರ್ ಕೆಲಾ೦’ ಕೊಣಾಕ್ ಲಗ್ತಿ೦ ಜಾಲ್ಲಿ೦ ಉತ್ರಾ೦ ಹಿ?"

"ಪವಿತ್ರ್ ಉತ್ರಾ೦ಕ್ ತುವೆ೦ ತುಜೊಚ್ಚ್ ಅರ್‍ಥ್ ದಿಲಾಯ್...."

ಪಾದ್ರಿಥಾವ್ನ್ ಫುಡೆ೦ ಉತ್ರಾ೦ ಭಾಯ್ರ್ ಆಯ್ಲಿ೦ನಾ೦ತ್.

"ಆಜ್ ಮ್ಹಜ್ಯಾ ಹಾತಾ೦ತ್ ಚಾಬೂಕ್ ಆಸ್‌ಲ್ಲಿ ತರ್!" ಮ್ಹಣಾಲೊ ವಿಕ್ಟರ್ ಆಪ್ಲೊ ಹಾತ್ ಭಿಜಾವ್ನ್.

ಪಾದ್ರಿ, ದೋನ್ ಮೆಟಾ೦ ಪಾಟಿ೦ ಸರ್‍ಲೊ.

"ತು೦ ತುಕಾಚ್ಚ್ ಕಿತೆ೦ ಸಮ್ಜಾತಾಯ್?" ತೊ ದೊಳೆ ವಾಟಾರಿಲಾಗ್ಲೊ. "ತು೦ ವೆಭಿಚಾರಿ ಮನಿಸ್...."

"ಸಾ೦ಗ್ ಮ್ಹಾಕಾ," ಮಧೆ೦ಚ್ ಉಲಯ್ಲೊ ವಿಕ್ಟರ್. "ಕ್ರೀಸ್ತಾ೦ವ್ ಮ್ಹಳ್ಳ್ಯಾ ಅಪ್ರಧಾಚೆರ್ ಜರಿತರಿ ತು೦ ಕಯ್ದ್ ಜಾಶಿ, ಫಾಶಿಯೆಚ್ಯಾ ಖಾ೦ಬ್ಯಾ ಪರ್‌ಯಾ೦ತ್ ತುಕಾ ವರು೦ಕ್ ಕಿತ್ಲ್ಯೊ ರುಜ್ವಾತಿ ಮೆಳ್ತಿತ್?"

ಪಾದ್ರಿಥಾವ್ನ್ ಜಾಪ್ ಮೆಳ್ಚ್ಯಾ ಫುಡೆ೦ಚ್ ವಿಕ್ಟರ್ ಆಪ್ಲ್ಯಾ ಖೊಟಾ೦ಚೆರ್ ಘು೦ವ್ಲೊ ಆನಿ ಚಡಿತ್ ಉಲಯ್‌ನಾಸ್ತಾ೦ ಹೆಲ್ಗಾ ಆಸ್‌ಲ್ಲೆಕಡೇನ್ ಗೆಲೊ.

ಹೆಲ್ಗಾ ಸರ್‍ಶಿ೦ ಪಾವ್ತಾನಾ ತಾಕಾ ಆಪ್ಲ್ಯಾ ಶಿ೦ತಿದಾಚೆರ್ ದೆ೦ವ್ಲೆಲ್ಯಾ ತೀಕ್ಶ್ಣ್ ಜಡಾಯೆಚೊ ಪರಿಣಾಮ್ ಕಳಿತ್ ಜಾಲೊ. ತಾಚ್ಯಾ ಪೊಲ್ಯಾ೦ಚಿ ಹಾಡಾ೦ ಫಡ್ತಾಲಿ೦. ಭಾವಾರ್‍ಥಾ ವಿಶಾ೦ತ್ ಕೊಣಾಯಿ ಲಾಗಿ೦ ಗರ್‍ಜೆ ಭಾಯ್ಲೆ೦ ತರ್‍ಕ್ ಚಲ೦ವ್ಚೆ೦ ಮ್ಹಳ್ಯಾರ್ ತಾಕಾ ಸ೦ತೊಸಾಚೆ೦ ನ್ಹಯ್. ತಾಣೆ ಅರ್‍ಥ್ ಕರುನ್ ಘೆತ್‌ಲ್ಲೆ ಪ್ರಕಾರ್ ಭಾವಾರ್‍ಥ್ ಜಾವ್ನಾಸ್‌ಲ್ಲಿ ಎಕ್ ಶೀದಾ ವಾಟ್. ಹೆರ್ ಕಸಲಿಯಿ ವಾಟ್ ಆಸ್‌ಲ್ಲೆಪರಿ೦. ತ್ಯಾ ವಾಟೆಚ್ಯಾ ಮಧೆ೦ಚ್ ಚಲ್ಯೆತ್, ದೆಗೆನ್ ಚಲ್ಯೆತ್, ತೊ ಸೊಡ್ನ್‌ಯಿ ಚಲ್ಯೆತ್. ತರಿ ತಿ ವಾಟ್ ಆಸ್ತಾಚ್--ಎಕ್ಲ್ಯಾಚ್ಯಾ ದಾವ್ಯಾಕ್, ಎಕ್ಲ್ಯಾಚ್ಯಾ ಉಜ್ವ್ಯಾಕ್. ತ್ಯಾ ವಾಟೆಚ್ಯಾ ದೆಗೆನ್ ಚಲೊನ್, ಯಾ ತಿ ಸೊಡ್ನ್ ಚಲೊನ್, ಧುಸ್ಪಟ್ಲೆಲ್ಯಾ ವೆಳಿ೦ ಶೀದಾ ವಾಟೆಕ್ ಯೆ೦ವ್ಚೆ೦ ಪ್ರೇತನ್ ಕರುನ್ ಮೆಳೊಪ್ ಫಾಪುಡ್ಲೆಲೆಪರಿ೦ ಭಾವಾರ್‍ಥಾಚೊ ಉಪಯೋಗ್ ಚಲ್ತಾಲೊ: ಮನ್ಶಾನ್ ಆಪ್ಣಾಚ್ಯಾ ಮಾನಸಿಕ್ ಕ್ಶೀಣತೆಚ್ಯಾ ಆನಿ ಪರಿಣಾಮಾಚ್ಯಾ ಫೊಳಾಕ್ ಭಾವಾರ್‍ಥಾಕ್ ಆನಿ ದೆವಾಕ್ ಧಿಗೊ ಕರುನ್ ಘೆತ್‌ಲ್ಲೊ.

ಸಮಾರ೦ಬ್ ಆತಾ೦ ಶಿಕರಾಚೆರ್ ಆಸ್‌ಲ್ಲೊ.

ಹೆಲ್ಗಾಸರ್‍ಶಿ೦ ಮಧ್ಯಮ್ ಪ್ರಾಯೆಚಿ ಸ್ತ್ರೀ, ಅಪರಿಚಿತ್ ಸ್ತ್ರೀ ಉಬಿ ರಾವೊನ್ ಉಲಯ್ತಾಲಿ. ಹೆಲ್ಗಾಚೆ೦ ಮುಕಮಳ್ ಪಳೆತಾನಾ ತ್ಯಾ ಸ೦ಬಾಶಣಾ೦ತ್ ತಾಕಾ ಕಸಲಿಚ್ ಆತುರಾಯ್ ನಾ ಮ್ಹಣ್ ಕಳಿತ್ ಜಾತಾಲೆ೦. ವಿಕ್ಟರ್ ಲಾಗಿ೦ ಸರ್‍ಲೊ.

"...ಆನಿ ಹ್ಯಾ ಮಾನೇಸ್ತಾಕ್ ತು೦ ಒಳ್ಕಾತಾಯ್?" ವಿಕ್ಟರಾಕ್ ಬೋಟ್ ದಾಕವ್ನ್ ತಿಚ್ಯೆಲಾಗಿ೦ ವಿಚಾರ್‍ಲೆ೦ ಹೆಲ್ಗಾನ್.

ತಿ ಸ್ತ್ರೀ ವಿಕ್ಟರಾಚೆ ಕುಶಿನ್ ಘು೦ವ್ಲಿ. "ಹೆ೦ಡ್ಸಂ!" ತಿ ಉದ್ಗಾರ್‍ಲಿ. "ಕೋಣ್ ಹೊ ತರ್‍ನಾಟೊ?"

"ತಾಚೆ೦ ನಾ೦ವ್ ವಿಕ್ಟರ್" ಕಳಯ್ಲೆ೦ ಹೆಲ್ಗಾನ್.

"ವಿಕ್ಟರ್? ಕಸಲೊ ವಿಕ್ಟರ್? ಕುಟ್ಮಾಚೆ೦ ನಾ೦ವ್?"

"ಮ್ಹಾಕಾ ಕುಟಾಮ್ ನಾ," ದಾಟ್ ತಾಳ್ಯಾನ್ ಮ್ಹಣಾಲೊ ವಿಕ್ಟರ್. "ಹಾ೦ವ್ ವಿಕ್ಟರ್ ಆನಿ ಹೆ೦ ಹೆಲ್ಗಾ. ಆಮಿ೦ ’ಮನಿಸ್’ ಪತ್ರ್ ಚಲಯ್ತಾ೦ವ್!"

ತ್ಯೆ ಸ್ತ್ರೀಯೆಚೆ೦ ಮುಕಮಳ್ ವಿವರ್‍ಣ್ ಜಾಲೆ೦. ಕಸಲ್ಯಾಗಿ ಅಸಃಯ್ ಭಿರಾ೦ತೆಚೆ೦ ಖುಣ್ ತಿಚ್ಯಾ ಮುಕಮಳಾರ್ ಉದೆಲೆ೦ ಆನಿ ಅವೆಕ್ತ್ ಕಾ೦ಟಾಳ್ಯಾನ್ ಆ೦ಗ್ ಹಿ೦ವ್ಳಾವ್ನ್ ತಿ ಪಯ್ಸ್ ಸರ್‍ಲಿ.

ಪರಿಸ್ಥಿತಿ ಕಳಿತ್ ಜಾಲ್ಲ್ಯಾ ಹೆಲ್ಗಾನ್ ವಿಕ್ಟರಾಚೊ ಹಾತ್ ಧರ್‍ಲೊ ಆನಿ ತಿ೦ ಸಾ೦ಗಾತಾಚ್ ಹೊಲಾ ಭಾಯ್ರ್ ಆಯ್ಲಿ೦. ವಿಕ್ಟರಾನ್ ಆಪ್ಲೆ೦ ಮುಕಮಳ್ ಉಬಾರ್‍ನ್ ಎಕ್ ಲಾ೦ಬ್ ಸ್ವಾಸ್ ಸೆವ್ಲೊ. ಮೊಳಬ್ ಶುಬ್ರ್ ಆಸ್‌ಲ್ಲೆ೦. ದೇವ್ ದುತಾ೦ಚಿ೦ ಪ್ರೇಮ್ ಸ೦ಕೇತಾ೦ ಪಾಟ೦ವ್ಚೆಪರಿ೦ ನೆಕೆತ್ರಾ೦ ಜಿಳ್ಮಿಳ್ತಾಲಿ೦. ಆಮಾಸೆಕ್ ಲಾಗಿ೦ ಸರ್‍ಚೊ ಚ೦ದ್ರ್ ಪಾಜ್ಲೆಲ್ಯಾ ಕೊಯ್ತೆಪರಿ೦ ದಿಸ್ತಾಲೊ. ವೆಗಿ೦ಚ್ ಆಮಾಸ್ ಯೆತೆಲಿ, ಚ೦ದ್ರ್ ಲಿಪ್ತೊಲೊ.

ಆಪ್ಣೆ೦ ಸೆವ್‌ಲ್ಲೊ ಸ್ವಾಸ್ ಹಾಳ್ವಯೆನ್ ಭಾಯ್ರ್ ಸೊಡ್ಲೊ ವಿಕ್ಟರಾನ್. ಹೆಲ್ಗಾಕ್ ಆನಿ ತಾಕಾ ಫುಡೆ೦ ಯೆ೦ವ್ಕ್ ಆಸ್ಚೆ೦ ಕಳಿತ್ ಆಸ್‌ಲ್ಲೆ೦. ವರ್‍ಸಾ೦ಥಾವ್ನ್ ತಿ೦ ತಯಾರ್ ಆಸ್‌ಲ್ಲಿ೦. ಜಯ್ತ್ ಯಾ ಸಲ್ವಣ್ ಯಾ ವಿಶಾ೦ತ್ ತಿ೦ ಚಿ೦ತಿನಾತ್‌ಲ್ಲಿ೦ ಪುಣ್ ತ್ಯಾ ಫುಡೆ೦ ತಾ೦ಕಾ೦ ಅವ್ಕಾಸಾ೦ತ್ ಕಿತೆ೦ ಸರ್‍ವ್ ಸಾದನ್ ಕರ್‍ಯೆತ್, ಜೀವ೦ತ್ ಆಸುನ್ ಮೆಲ್ಲ್ಯಾ ಕಿತ್ಲ್ಯಾ ಜಣಾ೦ಕ್ ಪುನರ್‌ಜಿವ೦ತ್ಪೊಣ್ ದಿವ್ಯೆತ್ ಮ್ಹಳ್ಳೆ೦ ಮಾತ್ರ್ ತಾ೦ಚ್ಯಾ ಮತಿ೦ತ್ ಆಸ್‌ಲ್ಲೆ೦.

ಝುಜಾಥಳ್ ತಯಾರ್ ಜಾತಾಲೆ೦.

ಹೆಲ್ಗಾನ್ ಆಪ್ಲೆ೦ ಮಾತೆ೦ ವಿಕ್ಟರಾಚ್ಯಾ ಖಾ೦ದಾರ್ ಆಧಾರಿಲೆ೦. ವಿಕ್ಟರಾನ್ ತಾಚೆ ಮೋವ್ ಕೇಸ್ ಪೊಶೆಲೆ ಆನಿ ತಾಚ್ಯಾ ಕಪಾಲಾಚೊ ಹಾಳ್ವಯೆನ್ ಉಮೊ ಘೆತ್ಲೊ. ಲಾಗಿ೦ ಲಾಗಿ೦ ಎಕಾ ವರ್‍ಸಾಚ್ಯಾ ಅವಿರತ್ ಶ್ರಮಾನ್ ದಣ್ಸಾಲ್ಲ್ಯೊ ತಾ೦ಚ್ಯೊ ಮತಿ ಕ್ಶಣಾಚ್ಯಾ ವಿಶೆವಾಕ್ ಆಶೆತಾಲ್ಯೊ. ಹೆಲ್ಗಾಯಿ ಹೆ೦ ಜಾಣಾ೦ ಆಸ್‌ಲ್ಲೆ೦; ಪುಣ್ ವಿಕ್ಟರಾಥಾವ್ನ್ ಉಲೊ ಯೆ೦ವ್ಚ್ಯಾಕ್ ರಾಕ್ತಾಲೆ೦. ಆತಾ೦ ಭಾಯ್ರ್ ಸರ್‌ಲ್ಲ್ಯಾ ವಿಕ್ಟರಾಚ್ಯಾ ನೀಳ್ ಸ್ವಾಸಾ೦ತ್ ತಾಕಾ ತೊ ಉಲೊ ಲಾಭ್ಲೊ.

"ವಿಕ್ಟರ್," ತೆ೦ ತಾಚ್ಯಾ ಸಾಮ್ಕಾರ್ ಉಬೆ೦ ಜಾಲೆ೦.

"ಹೆಲ್ಗಾ!" ತಾಚ್ಯಾ ಭುಜಾ೦ಚೆರ್ ವಿಕ್ಟರಾನ್ ಆಪ್ಲೆ ಹಾತ್ ದವರ್‍ಲೆ.

ಆಪ್ಲೆ೦ ಮುಕಮಳ್ ಘು೦ವ್ಡಾವ್ನ್ ಹೆಲ್ಗಾನ್ ತಾಚ್ಯಾ ಹಾತಾಚೊ ಉಮೊ ಘೆತ್ಲೊ.

"ದೋನ್ ದಿಸಾ೦ಚೆ ಆವ್ದೆಕ್ ಪುಣಿ ಮ್ಹಾಕಾ ತುಜಿ ಆನಿ ತುಕಾ ಮ್ಹಜಿ ಗರ್‍ಜ್ ಆಸಾ--ಎಕಾ೦ತಾ೦ತ್!"

"ವ್ಹಯ್, ಹೆಲ್ಗಾ!"

ತಾಚ್ಯಾ ದೊಳ್ಯಾ೦ಕ್ ಎಕ್ ಕ್ಶಣ್‌ಬರ್ ಸಮ್ಜಣೇನ್ ಪಳೆವ್ನ್ ತೆ೦ ಮಾರ್‍ಗಾಕ್ ದೆ೦ವ್ಲೆ೦ ಆನಿ ಪಾಶಾರ್ ಜಾ೦ವ್ಚಿ ಟೆಕ್ಸಿ ತಾಣೆ ರಾವಯ್ಲಿ.

ದುಸ್ರ್ಯಾಚ್ ದಿಸಾ, ಫಕತ್ ದೋನ್ ದಿಸಾ೦ಚೆ ಆವ್ದೆಕ್ ತಿ೦ ’ಮನಿಸ್’ ಪತ್ರಾಚೆ೦ ಧಫ್ತರ್ ಲೊರೆನ್ಸಾಚ್ಯಾ ಹಾತಾ೦ನಿ ದೀವ್ನ್ ತಿ೦ ಪಯ್ಸ್ ಗೆಲಿ೦.

ಪುಣ್ ತೊ ಜಾಗೊ ತಾ೦ಕಾ೦ ಅಪರಿಚಿತ್ ನ್ಹಯ್.

ತಾ೦ಚೆ೦ಚ್ಚ್ ಝುಜಾಥಳ್ ಸುರು ಜಾಲ್ಲೊ ಜಾಗೊ ತೊ.

ಎಕಾ೦ತಾಚೊ ಜಾಗೊ ತೊ:

ಬ೦ದ್ ಕರುನ್ ದವ್ರಿಲ್ಲ್ಯಾ ನೊರ್‍ಮನಾಚ್ಯಾ ಬಿಡಾರಾಕ್ ತಿ೦ ಗೆಲಿ೦....

ಝುಜಾಥಳ್ ತಯಾರ್ ಜಾತಾಲೆ೦!

...ಮುಂದರ್‍ಸಿಲಾಂ...

Tags: Edwin JF Dsouza, Konkani Novel, Vasu Valencia, Konkani, Konkani, Mangalore, Mangalorean, Mother Tongue

From around the world

"ಹಾಂವ್ ಜಿಯೆತಾಂ" - ಝುಜಾ-ಥಳ್

2 Comment/s.

Post your comments

ಧಾ೦ವ್ ವಿಕ್ಟರ್, ಧಾ೦ವ್!

ಸ್ವಾರ್ಥ್, ರೂಣ್ ಆನಿ ದಾವೊ

ಗುಪಿತ್ ವರ್‍ಸಾ೦

ಜಿವೊ ಮನಿಸ್

ತ್ರಿಕೋನ್

ತ್ರಾಸಿಚಿ೦ ಭುಜಾ೦

ಪೃಥ್ವಿಚೊ ಪುತ್ರ್

ವೆಭಿಚಾರಿ-ವೆಭಿಚಾರಿಣ್

ಜುದಾಸ್!

ಮನಿಸ್

ರೆಕಾದ್

ಕರ್‍ನಿ

ಝುಜಾ-ಥಳ್

ಮಿಸ್ಟರ್ ವಿಕ್ಟರ್

ಆಮಾಸ್

"ಸಾಧಿ ಚಲಿ"

ಕೀರ್

ಜಿಣಿಯೆಚೆ೦ ಭುರ್‍ಜ್

Connect

Our Address
Mangalore

Our Address
Udupi

Our Address
Dubai