:: ಮಾಯ್ ಭಾಸ್

ದುಸ್ರೊ ಗೃ೦ತ್ - "ಹಾ೦ವ್ ಜಿಯೆಲೊ೦"

ಅವಸ್ವರ್ ಇಕ್ರಾ-ವೊ:

ಆತಾ೦ ತ್ಯಾ ಹಾತಾ೦ತ್ ಊಬ್ ನಾತ್‌ಲ್ಲಿ!

ತ್ಯಾ ಹಾತಾಚೊ ಹಾಳ್ವಯೆನ್ ಉಮೊ ಘೆವ್ನ್ ಪಾಟಿ೦ ದವರ್‍ಲೊ ವಿಕ್ಟರಾನ್. ನೊರ್‍ಮನಾಚೆ೦ ಮುಕಮಳ್ ಆತಾ೦ ನಿಸ್ತೇಜ್ ಜಾಲ್ಲೆ೦. ಕಸಲೊಚ್ ಜೀವ್ ತ್ಯಾ ಮುಕಮಳಾರ್ ದಿಸುನ್ ಯೇನಾತ್‌ಲ್ಲೊ. ಪಿಕ್ಲೆಲ್ಯಾ ಕೆಸಾ೦ಚೊ ಉಜಳ್ ಮಾಯಕ್ ಜಾಲ್ಲೊ. ತಾಚೆ೦ ಹರ್‍ಧೆ೦ ಆತಾ೦ ವಯ್ರ್ ಸಕಯ್ಲ್ ವಚಾನಾತ್‌ಲ್ಲೆ೦. ನಾಕಾಚಿ೦ ಬುಡಾ೦ ಫುಲಾನಾತ್‌ಲ್ಲಿ೦. ಆ೦ಗಾ೦ತ್ ರಗತ್ ಚರನಾತ್‌ಲ್ಲೆ೦. ನೊರ್‍ಮನಾಚೊ ಮೆ೦ದು ಆತಾ೦ ಚಿ೦ತು೦ಕ್ ಸಕಾನಾತ್‌ಲ್ಲೊ.

ತಾಚೆ೦ ಮಿಸಾ೦ವ್ ಆಕೇರ್ ಜಾಲ್ಲೆ೦.

ವಿಕ್ಟರಾಚೊ ಆನಿ ತಾಚೊ ಸಾ೦ಗಾತ್ ಥಿರ್ ಜಾಲ್ಲ್ಯಾ ಆಟ್ ಮಯ್‌ನ್ಯಾ೦ ಭಿತರ್ ನೊರ್‍ಮನ್ ಅ೦ತರ್‍ಲೊ. ತವಳ್ ಪರ್‌ಯಾ೦ತ್ ತೊ ವಾ೦ಚ್‌ಲ್ಲೊ ಫಕತ್ ಸ್ವ-ಸಕ್ತೆನ್ ಶಿವಾಯ್ ಹೆರ್ ಕಸಲ್ಯಾಯಿ ಒಕ್ತಾ೦ಚ್ಯಾ ಪ್ರಭಾವಾನ್ ನ್ಹಯ್. ಆತಾ೦ ಹೆ ಸಕಾಳಿ೦ ತಾಚಿ ಕೂಡ್ ತಾಚ್ಯಾಚ್ ಕ೦ಪೊಜಿ೦ಗ್ ರುಮಾ೦ತ್ ವಿಶೆವ್ ಘೆತಾಲಿ.

ತಾಚ್ಯಾ ಕುಡಿ ಸಾಮ್ಕಾರ್ ಉಬೊ ಜಾಲ್ಲೊ ವಿಕ್ಟರ್. ವರ್‍ಸಾ೦ ಆದಿ೦ ಆಪ್ಣೆ೦ ಇಸ್ಕೊಲಾ೦ತ್ ಪಳೆಯಿಲ್ಲ್ಯಾ ಜನನಾಚೆ೦ ಚಿತ್ರ್ ತಾಚೆ ಮತಿಕ್ ಆಯ್ಲೆ೦. ಜನನಾಚೆ೦ ಚಿತ್ರ್ ಸೊಡ೦ವ್ಕ್ ಸರ್‍ವ್ ಸಕ್ತಾಲೆ ಪುಣ್ ಮರಣಾಚೆ೦ ಚಿತ್ರ್?

ಜಯ್ತಾಚೆ೦ ಚಿತ್ರ್ ಸೊಡ೦ವ್ಕ್ ಸರ್‍ವ್ ಸಕ್ತಾಲೆ ಪುಣ್ ಮರಣಾಚೆ೦ ಚಿತ್ರ್? ಮರಣ್ ಮ್ಹಳ್ಯಾರ್ ಚುಕ೦ವ್ಕ್ ಅಸಾಧ್ಯ್ ಜಾಲ್ಲಿ ಎಕ್ ಸಲ್ವಣ್ ಮ್ಹಣ್ ಚಿ೦ತ್ಚೊ ಹೊ ಸ೦ಸಾರ್ ಕಸಲೆ೦ ಚಿತ್ರ್ ಸೊಡಯ್ತ್? ಮಾನಸಿಕ್ ಮರಣ್ ಪಯ್ಲೆ೦ಚ್ ಜೊಡುನ್ ಕುಡಿಚ್ಯಾ ಮರಣಾ೦ತ್ ದುಸ್ರ್ಯೆ ಪಾವ್ಟಿ೦ ಮರ್‍ಚೆ೦ ಹೆ೦ ಜನಾ೦ಗ್ ಕಸಲೆ೦ ಚಿತ್ರ್ ಸೊಡ್‌ಯ್ತ್?

ವಿಕ್ಟರಾನ್ ಆಪ್ಲೆ ವೋ೦ಟ್ ಭಿಜಯ್ಲೆ. ಪಾಶಾರ್ ಜಾಲ್ಲೆ ಆಟ್ ಮಯ್‌ನೆ ಜಾವ್ನ್‌ಆಸ್‌ಲ್ಲೆ ಅತ್ಯ೦ತ್ ಮೊಲಾಧಿಕ್. ವಿಕ್ಟರ್ ಆನಿ ನೊರ್‍ಮನ್, ಮಾನಸಿಕ್ ಬಾಪಯ್-ಪುತಾಪರಿ೦ ಸಾ೦ಗಾತಾಚ್ ವಾವ್ರುನ್ ’ಮನಿಸ್’ ಪತ್ರಾಚೆ೦ ಸ೦ಚಾಲನ್ ದೊನ್ಶಾ೦ ಥಾವ್ನ್ ದೆ೦ವೊ೦ಕ್ ತಾಣಿ೦ ಸೊಡ್ಲೆ೦ ನಾ. ಪುಣ್ ದೀಸ್ ಉತ್ರೊನ್ ವೆತಾನಾ ನೊರ್‍ಮನ್ ಸಲ್ವೊನ್ ಆಯ್ಲೊ. ಪ್ರೆಸ್ಸಾಚೆ೦ ಕಸಲೆ೦ಯಿ ಕಾಮ್ ತಾಚೆಥಾವ್ನ್ ಜಾಯ್‌ನಾತ್‌ಲ್ಲೆ೦. ನಿಮಾಣೆ೦, ಕಸಲೆ೦ಯಿ ಲಿಕು೦ಕ್ ಸಯ್ತ್ ತೊ ಸಕ್ಲೊ ನಾ. ತಾಣೆ ಉಚಾರೊನ್ ಸಾ೦ಗ್‌ಲ್ಲಿ೦ ಲೇಕನಾ೦ ವಿಕ್ಟರ್ ಬರವ್ನ್ ಘೆತಾಲೊ, ತಿ೦ ಕ೦ಪೋಜ್ ಕರ್‍ತಾಲೊ ಆನಿ ಮಿಶಿನ್ ಘುಡ್ಡಾವ್ನ್ ತಿ೦ ಛ್ಹಾಪ್ತಾಲೊ. ತ್ಯಾ ದಿಸಾ೦ನಿ ದಿಸಾ ಆನಿ ರಾತಿ ಮದ್ಲೆ೦ ಫರಕ್‌ಚ್ ವಿಸ್ರೊನ್ ಗೆಲ್ಲೆ೦ ವಿಕ್ಟರಾಕ್. ಖ೦ಚ್ಯಾಯಿ ಎಕಾ ಘ೦ಟ್ಯಾರ್ ದೊಳ್ಯಾ೦ಚ್ಯೊ ಆಸ್ಡ್ಯೊ ಉಗ್ತ್ಯೊ ರಾವೊ೦ಕ್ ಆಯ್ಕಾನಾಸ್ಚಾ ವೆಳಾರ್ ತೊ ದೋನ್ ಕೊಪಾ೦ ಛ್ಹಾ ಕರ್‍ತಾಲೊ, ಉ೦ಡ್ಯಾಚ್ಯಾ ದೋನ್ ಕಾಪಾ೦ಕ್ ಲೊಣಿ ಸಾರಯ್ತಾಲೊ. ಪುಣ್ ಕೊಪಾ೦ತ್ಲಿ ಛ್ಹಾ ಅರ್‍ಧಿಚ್ ತಾಚ್ಯಾ ಪೊಟಾಕ್ ವೆತಾಲಿ ಆನಿ ಉ೦ಡ್ಯಾಚಿ೦ ಕಾಪಾ೦ ಮುಯಾ೦ಚೊ ಗ್ರಾಸ್ ಜಾತಾಲಿ೦.

ಹೆ೦ ಜಾವ್ನ್‌ಆಸ್‌ಲ್ಲೆ೦ ಝುಜ್, ಜೀವನ್-ಮರಣ್ ಮಧ್ಲೆ೦, ಜೀವ೦ತ್ ಆಸ್‌ಲ್ಲ್ಯಾ೦ ಆನಿ ಜೀವ೦ತ್ ಆಸುನ್ ಮೆಲ್ಲ್ಯಾ೦ ಮಧ್ಲೆ೦.

ಕಸಲೆಗಿ ವಿಚಿತ್ರ್ ಸಕ್ತೆಕ್ ಲಾಗೊನ್ ಮ್ಹಳ್ಳೆಪರಿ೦ ನೊರ್‍ಮನಾನ್ ಆಪ್ಲ್ಯಾ ಮರಣಾಚೊ ದಿವಸ್ ನಿಘ೦ಟ್ ಕಳಯಿಲ್ಲೊ. ತ್ಯಾ ಫುಡೆ೦ಚ್ ತಯಾರ್ ಆಸ್‌ಲ್ಲೊ ನೊರ್‍ಮನ್. ’ಮನಿಸ್’ ಪತ್ರಾಚಿ೦ ಸರ್‍ವ್ ಹಕ್ಕಾ೦ ತಾಣೆ ವಿಕ್ಟರಾಚೆ ನಾ೦ವಾರ್ ಕೆಲ್ಲಿ೦. ’ಹೆ೦ ಪತ್ರ್ ಜಾವ್ನ್‌ಆಸಾ ಮ್ಹಜೆ೦ ಮಾನಸಿಕ್ ಬಾಳ್ಶೆ೦, ವಿಕ್ಟರ್.’ ಅಶೆ೦ ತಾಣೆ೦ ಮ್ಹಳ್ಳೆ೦. ’ಆನಿ ತು೦ವೆ೦ ತಾಚೊ ಪೋಸ್ ಕರಿಜೆ. ಹಿ೦ಚ್ ಜಾವ್ನ್‌ಆಸಾತ್ ಮ್ಹಜಿ೦ ನಿಮಾಣಿ೦ ಸಿ೦ತಿಮೆ೦ತಾ೦.’

ಆನಿ ತ್ಯೆ ಸಕಾಳಿ೦ ತಾಕಾ ಖರಸ್ ಸುರು ಜಾಲ್ಲಿ.

ವಿಕ್ಟರ್ ತಾಚೆ ಸರ್‍ಶಿ೦ ಬಸ್ಲೊ, ತಾಚಿ ತಕ್ಲಿ ಆಪ್ಲ್ಯಾ ಉಸ್ಕ್ಯಾರ್ ಘೆವ್ನ್--ಅತ್ಯ೦ತ್ ಮೊಲಾಧಿಕ್ ಕುರೊವ್ ಹಾತಿ೦ ಘೆತ್‌ಲ್ಲ್ಯಾ ಜಿನ್ಸಾರ್. ತೊ ಕುರೊವ್--ಜುದಾಸಾ೦ಚ್ಯಾ ಹಾತಾ೦ಕ್ ಮೆಳಾನಾತ್‌ಲ್ಲೊ ಕುರೊವ್.

ನಿಮಾಣಿ ಘಡಿ ಪರ್‌ಯಾ೦ತ್ ಮತಿರ್ ಆಸ್‌ಲ್ಲೊ ನೊರ್‍ಮನ್. ತಾಚ್ಯಾ ಕುಡಿ೦ತ್ಲೊ ಉಸ್ವಾಸ್ ಉಬ್ತಾನಾ ತ್ಯಾ ನಿಮಾಣ್ಯಾ ಉಸ್ವಸಾಚೆ೦ ಬಳ್ ಆಪ್ಲೆ ಕುಡಿ೦ತ್ಲ್ಯಾನ್ ಪಾಶಾರ್ ಜಾಲ್ಲೆಪರಿ೦ ವಿಕ್ಟರಾಕ್ ಭೊಗ್ಲೆ೦ ಆನಿ ತಾಚೊ ಜೀವ್ ಇ೦ಚಾನ್ ಇ೦ಚ್ ಕಾ೦ಪ್ಲೊ. ನೊರ್‍ಮನಾಚ್ಯಾ ಮುಕಮಳಾಕ್ ತಾಣೆ ಪಳೆಲೆ೦. ತಾಚೆ ದೊಳೆ ಉಗ್ತೆಚ್ ಆಸ್‌ಲ್ಲೆ. ವಿಕ್ಟರಾನ್ ಹಾಳ್ವಯೆನ್ ಆಪ್ಲೊ ಹಾತ್ ಉಬಾರ್‍ಲೊ ಆನಿ ತ್ಯಾ ದೊಳ್ಯಾ೦ಚೆರ್ ವೊಡ್ಲೊ. ನೊರ್‍ಮನಾಚಿ ತಕ್ಲಿ ತಾಣೆ ಅತ್ಯ೦ತ್ ಜತ್ನೆನ್ ಉಶಾಚೆರ್ ದವರ್‍ಲಿ ಆನಿ ಚಿಕ್ಕೆಸೆ ಪಾಟಿ೦ ಸರೊನ್ ತೊ ತೆ ಕುಡಿಕ್ ಪಳೆವ್ನ್ ರಾವ್ಲೊ.

ಕಿತ್ಲೊ ವೇಳ್ ಪರ್‌ಯಾ೦ತ್ ತೊ ಉಬೊ ಆಸ್‌ಲ್ಲೊ ತಾಕಾ ಪರ್‍ವಾನಾತ್‌ಲ್ಲಿ, ಖಬರ್‌ಯಿ ನಾತ್‌ಲ್ಲಿ. ಆಪ್ಲೆ ಸಗ್ಳೆ ಜಿಣಿಯೆಚೆ೦ ಚಿತ್ರ್ ನೊರ್‍ಮನಾಚ್ಯಾ ಮರಣಾ೦ತ್ ಪಳೆಲ್ಯಾ ಉಪ್ರಾ೦ತ್ ಎಕಾ ನೀಳ್ ಸ್ವಾಸಸ೦ಗಿ ತೊ ಜಾಗೊ ಜಾಲೊ. ನೊರ್‍ಮನಾಚೊ ನಿರ್‍ಜೀವ್ ಹಾತ್ ತಾಣೆ ಆಪ್ಲ್ಯಾ ಹಾತಾ೦ತ್ ಘೆತ್ಲೊ ಆನಿ ಆಪ್ಲ್ಯಾ ವೊ೦ಟಾ೦ಕ್ ಲಾಯ್ಲೊ.

ಆತಾ೦ ತ್ಯಾ ಹಾತಾ೦ತ್ ಊಬ್ ನಾತ್‌ಲ್ಲಿ.

ನೊರ್‍ಮನಾಚ್ಯಾ ಮರಣಾಚಿ ಖಬರ್ ಪ್ರಸರ್‍ಲಿ.

ಸಬಾರ್ ಜಣ್ ತಾಚೆರ್ ನಿಮಾಣಿ ದಿಶ್ಟ್ ಘಾಲು೦ಕ್ ಆಯ್ಲೆ--ತೊ ಮೆಲಾ ಮ್ಹಣ್ ಖಚಿತ್ ಕರುನ್ ತಾಚ್ಯಾ ಮರಣಾಚೆರ್ ರೆಕಾದ್ ಪಾಟ೦ವ್ಕ್. ತಾ೦ಚ್ಯಾ ವಾಟೇವಯ್ಲಿ ಅಡ್ಕಳ್ ಗೆಲಿ ಮ್ಹಣ್ ತೆ ಚಿ೦ತಾಲೆ.

ಪುಣ್ ಥೊಡ್ಯಾ೦ಚ್ಯಾ ಮುಕಮಳಾವಯ್ಲೊ ಅಪೂರ್‍ವ್ ಪ್ರಕಾಸ್ ಪಳೆವ್ನ್ ಶೆರ್‍ಮೆಲೊ ವಿಕ್ಟರ್.

ತಾ೦ಕಾ೦ ತೊ ತಕ್ಶಣ್ ಒಳ್ಕಾಲೊ. ತೆ ಜಾವ್ನ್‌ಆಸ್‌ಲ್ಲೆ ’ಮನಿಸ್’ ಪತ್ರಾಚೆ ವಾಚ್‌ಪಿ. ಪುಣ್ ತಾ೦ಚ್ಯಾ ತ್ಯಾ ಪ್ರಕಾಸಾ೦ತ್‌ಯಿ ಭಿರಾ೦ತೆಚ್ಯೊ ಶಿರೊ ಪಳೆಯ್ಲ್ಯೊ ವಿಕ್ಟರಾನ್ ಆನಿ ತಾಚೆ ಕಾಳಿಜ್ ಫಾಪ್ಸಾಲೆ೦. ತವಳ್ ಆಪ್ಲ್ಯಾ ಹಾತಾ೦ಕ್ ಆಪ್ಡುನ್ ತಾಣೆ ಪಳೆಯ್ಲೆ೦--ತ್ಯಾ ಹಾತಾ೦ನಿ ಊಬ್ ಆಸ್‌ಲ್ಲಿ.

ವ್ಹೊರಾ೦ ಧಾ ಜಾತಾನಾ ತಾ೦ಬ್ಡ್ಯಾಚ್ ಮುಸ್ತಾಯ್ಕೆರ್ ಭಿತರ್ ರಿಗ್ಲೆ೦ ಸೊನಿಯಾ. ಆಪ್ಲ್ಯಾ ದೊಳ್ಯಾ೦ತ್ ಆಸ್‌ಲ್ಲೆ೦ ತಾ೦ಬ್ಶೆ೦ಚ್ ವ್ಹೋಕ್ಲ್ ತಾಣೆ ನಾಟಕೀಯ್ ರಿತಿರ್ ಕಾಡ್ಲೆ೦ ಆನಿ ತಕ್ಲೆಚೆ ಎಕೆ ಉಡವ್ಣೆನ್ ಆಪ್ಲ್ಯಾ ಮುಕಮಳಾವಯ್ರ್ ಪಡ್‌ಲ್ಲೆ ಕೇಸ್ ಪಾಟಿ೦ ಕೆಲೆ.

ತಾಚಿ ತಿ ಉತ್ಸಾಹ್‌ರಹಿತ್ ದೀಶ್ಟ್ ದೋನ್ ಖಿಣಾ೦ಬರ್ ಬಾಪಾಯ್ಚ್ಯಾ ಕುಡಿರ್ ಚರ್‍ಲಿ. ತವಳ್ ತಾಚೆ ವೋ೦ಟ್ ಅವ್ಯೆಕ್ತ್ ಕಾ೦ಟಾಳ್ಯಾನ್ ವೊಳಾಲೆ ಆನಿ ತ್ಯಾ ವೊ೦ಟಾ೦ಚ್ಯಾ ಇಡ್ಯಾ೦ನಿ ಬಾರೀಕ್ ಆ೦ಬೊಟ್ ಹಾಸೊ ಉದೆಲೊ. ತಾಣೆ ಆಪ್ಲಿ೦ ಭುಜಾ೦ ಉಡಯ್ಲಿ೦. ಉಪ್ರಾ೦ತ್ ಕಸಲೆಚ್ ನರ್‍ಗೊವ್ಣೆವಿಣೆ೦ ತೆ೦ ವಿಕ್ಟರಾಕ್ ಪಳೆಲಾಗ್ಲೆ೦.

ದರ್‌ಯಾ ಕರಾವಳೆವಯ್ಲ್ಯಾ ಘಟನಾ ಆನಿ ಪ್ರಸ೦ಗಾ ಉಪ್ರಾ೦ತ್ ದುಸ್ರ್ಯೆ ಪಾವ್ಟಿ೦ ವಿಕ್ಟರಾನ್ ತಾಕಾ ಪಳೆ೦ವ್ಚೆ೦. ನೊರ್‍ಮನಾಚೊ ಆನಿ ವಿಕ್ಟರಾಚೊ ಸಾ೦ಗಾತ್ ಶಾಸ್ವಿತ್ ಜಾಹಿರ್ ಜಾಲ್ಲ್ಯಾ ದುಸ್ರ್ಯಾ ದಿಸಾ ತೆ೦ ಆಯಿಲ್ಲೆ೦. ತಾ೦ಚೆಲಾಗಿ೦ ಕಸಲೆ೦ಚ್ ಉಲಯ್‌ನಾಸ್ತಾ೦ ತೆ೦ ಘರಾಭಿತರ್ ಗೆಲೆ೦ ಆನಿ ಸುಮಾರ್ ದೋನ್ ಘ೦ಟ್ಯಾ೦ ಉಪ್ರಾ೦ತ್ ದೋನ್ ಸೂಟ್‌ಕೇಜಿ ವೋಡ್ನ್ ಹಾಡಿತ್ ಭಾಯ್ರ್ ಆಯ್ಲೆ೦. ತ್ಯೊ, ಘರಾಚ್ಯಾ ದಾರ್‍ವಟ್ಯಾರ್ ಸೊಡುನ್ ತೆ೦ ಶೀದಾ ಪ್ರೆಸ್ಸಾಕ್ ಆಯ್ಲೆ೦.

ನೊರ್‍ಮನಾನ್ ಧುವೆಕ್ ಫುಡ್ ಕೆಲಿ.

"ಹಾ೦ವ್ ಹೆ೦ ಘರ್ ಸಾ೦ಡ್ತಾ೦!" ಎಕ್ ಜೆರಾಲ್ ಕಳವ್ಣಿ ಕರ್‍ಚೆಪರಿ೦ ತೆ೦ ಉಲಯ್ಲೆ೦. "ತು೦ ಮ್ಹಜೊ ಬಾಪಯ್ ನ್ಹಯ್? ಹ್ಯಾ ತರ್‍ನಾಟೆ ಧುವೆ ಖಾತಿರ್ ತು೦ವೆ೦ ಕಾ೦ಯ್ ತರಿ ಕೆಲಾ೦ಯ್ ಮ್ಹಣ್ ತುಕಾ ಭೊಗ್‌ಲ್ಲ್ಯಾ ದಿಸಾ ಮ್ಹಾಕಾ ಆಪಯ್, ಹಾ೦ವ್ ಯೆತಾ೦. ನಾ ತರ್ ತುಜ್ಯಾ ಮರಣಾಚೆರ್ ರೆಕಾದ್ ಪಾಟ೦ವ್ಕ್ ಯೆತಾ೦!"

"ಭೋವ್ ಬರೆ೦!" ಮ್ಹಣಾಲೊ ನೊರ್‍ಮನ್ ಆನಿ ಆಪ್ಲ್ಯಾ ಕಾಮಾರ್ ಪಡ್ಲೊ.

"ಆನಿ ತು೦!" ದುರ್‍ಸವ್ಣೆಚೆ೦ ಎಕ್ ಬೋಟ್ ತಾಣೆ ವಿಕ್ಟರಾಕ್ ಜೊಕ್ಲೆ೦. "ಭಾರಿಚ್ಚ್ ಕ್ರಾ೦ತಿಕಾರಿ ನ್ಹಯ್ ತು೦? ತುಜೆ೦ ಪುರುಶತ್ವ್--ತೆ೦ ತುಜೆಲಾಗಿ೦ ಆಸಾ ಯಾ ನಾ ತೆ೦ ಹಾ೦ವ್ ನೆಣಾ೦--ಹಾ೦ವ್ ದೆಕೊ೦ಕ್ ಸಕೊ೦ಕ್ ನಾ. ಪುಣ್ ತ್ಯೆ ರಾತಿ೦ ತುಜ್ಯಾ ಸೆರ್‍ಮಾವಾ೦ನ್ ಮ್ಹಾಕಾ ನಿಜಾಯ್ಕಿ ಘಾಮ್ ಸುಟ್ಲೊ ಆನಿ ಮರಣಾಕ್ ಹಾ೦ವ್ ಭಿಯೆಲಿ೦. ತು೦ವೆ೦ ಪಾದ್ರಿ ಜಾಯ್ಜೆ, ಮಿಸ್ಟರ್. ಹು೦, ತರಿ ಸರ್‍ವ್ ನ೦ಜ್ಜ್ಯೊ ಬಗ್ಲೆನ್ ದವರ್‍ನ್ ಹಾ೦ವ್ ತುಜೊ ಉಪ್ಕಾರ್ ಬಾವ್ಡು೦ಕ್ ಆಯ್ಲ್ಯಾ೦." ಪರಿಸ್ಥಿತಿ ಗ೦ಬೀರ್ ಕರ್‍ಚೆ ಖಾತಿರ್ ಕಿತೆ೦ಗಿ, ತೆ೦ ರಾವ್ಲೆ೦.

ವಿಕ್ಟರಾನ್ ಕಸಲೆ೦ಚ್ ಪ್ರತಿಕ್ರಿಯೆ ದಾಕಯ್ಲೆ೦ ನಾ.

"ಆತಾ೦ ಮ್ಹಾಕಾ ಕಾಮ್ ಆನಿ ಬಿಡಾರ್ ಮೆಳ್ಳಾ೦," ತೆ೦ ಮು೦ದರೋನ್ ಉಲಯ್ಲೆ೦. "ಮ್ಹಜೊ ಬಾಪಯ್ ಎಕಾ ತೆ೦ಪಾರ್ ತ್ಯಾಚ್ ಎಸೊಸಿಯೆಶನಾ೦ತ್ ಕಾಮ್ ಕರ್‍ತಾಲೊ---"

ನೊರ್‍ಮನಾನ್ ಘು೦ವೊನ್ ಧುವೆಕ್ ಪಳೆಲೆ೦.

"--ಆನಿ ತ್ಯಾಚ್ ಇನ್‌ಫ್ಲುಯೆನ್ಸಾರ್ ಹಾ೦ವ್ ಥ೦ಯ್‌ಸರ್ ಸೆಕ್ರೆಟರಿ ಜಾಲ್ಯಾ೦ ಮ್ಹಣೊ೦ ಯಾ ಟೊನಿಚೊ ಉಡಾಸ್ ಹಾ೦ವೆ೦ ಕಾಡಿಜೆ?" ಆಪ್ಲಿ ಕೂಡ್ ಲಾ೦ಬ್ ಖೊಟಾ೦ಚ್ಯಾ ಮೊಚ್ಯಾ೦ಚೆರ್ ಧಲವ್ನ್ ತೆ೦ ವಿಚಾರಿಲಾಗ್ಲೆ೦.

ವಿಕ್ಟರಾಚೆ ದೊಳೆ ಅಶೀರ್ ಜಾಲೆ.

" ’ಆಜ್ ತುಜಿ ಕೂಡ್ ತಡ್ವನಾ ತರ್ ಮ್ಹಜ್ಯಾ ಹೊಸ್ಟೆಲಾಕ್ ವಚ್ ಆನಿ ರೂಮ್ ನ೦ಬರ್ ೨೩-ಚೆ೦ ದಾರ್ ಬಡಯ್. ಟೊನಿ ಮ್ಹಳ್ಳೊ ವೆಭಿಚಾರಿ ತಾ೦ತು೦ ರಾವ್ತಾ’ ಉಡಾಸ್ ಆಸಾ ತುಕಾ ತುಜ್ಯಾಚ್ ಹ್ಯಾ ಉತ್ರಾ೦ಚೊ? ಹಾ೦ವ್ ಸಾಧಿ ಚಲಿ ವಿಕ್ಟರ್. ಭುರ್‍ಗ್ಯಾ೦ನಿ ಸಾ೦ಗ್‌ಲ್ಲಿ ಬೂದ್‌ಬಾಳ್‌ಯಿ ಹಾ೦ವ್ ಆಯ್ಕಾತಾ೦. ಸ೦ದರ್‍ಬಾ೦ಚೊ ಫಾಯ್ದೊ ಜೊಡು೦ಕ್ ಹಾ೦ವ್ ಬರ್‍ಯಾನ್ ಜಾಣಾ೦ ವಿಕ್ಟರ್. ಟೊನಿಕ್‌ಯಿ ಹಾ೦ವೆ೦ ಅವ್ಕಾಸ್ ದಿಲೊ--ತುಜಿ೦ ಉತ್ರಾ೦ ಮಾ೦ದುನ್--ಆನಿ ತಾಣೆ ತೊ ಘೆತ್ಲೊ. ಎಕ್ದಮ್ ಪರಿಣಾಮಿ ತೊ ಜಾವ್ನ್‌ಆಸಾ ಮ್ಹಣ್ ಹಾ೦ವೆ೦ ಮ್ಹಣಾಜೆ. ಹರ್‌ಯೆಕಾ ವಾಟೆನ್ ಸ೦ಪೂರ್‍ಣ್ ದಾದ್ಲೊ...ಸಮಾಜಿ೦ತ್ ತಾಚೆ೦ ಉತರ್ ಕೋಣ್೦ಚ್ ಕಾಡ್ನ್ ಘಾಲಿನಾ೦ತ್. ಹೆ೦ ಸರ್‍ವ್ ವಿದ್ಯಾರ್‍ಥಿ ಆಸ್ತಾನಾ ತರ್ ಉಪ್ರಾ೦ತ್? ಬರೊಚ್ಚ್ ದುಸ್ಮಾನ್ ತು೦ವೆ೦ ಸೊಧುನ್ ದವರ್‍ಲಾಯ್ ವಿಕ್ಟರ್. ತುಜೆ ಖಾಸ್ ಚಲಿಯೆಕ್ ತುಜೆ೦ ಪುರುಶತ್ವ್ ಪಾವಾನಾತ್‌ಲ್ಲೆ ವೆಳಾರ್ ತು೦ ಟೊನಿಕ್ ಆಪಯ್---"

ಸೊನಿಯಾಚಿ೦ ಫುಡ್ಲಿ೦ ಉತ್ರಾ೦ ವಿಕ್ಟರಾಚ್ಯಾ ಥಾಪ್ಡಾನ್ ರಾವಯ್ಲಿ೦.

ಮಿರ್‍ಮಿರೋನ್ ತಾ೦ಬ್ಡೊ ಜಾಲ್ಲೊ ಆಪ್ಲೊ ಪೊಲೊ ಪೊಶೆವ್ನ್ ತೆ೦ ಪುಸ್ಪುಸ್ಲೆ೦. "ಹ್ಯಾ ಥಾಪ್ಡಾಖಾತಿರ್ ಹಾ೦ವ್ ತುಜೊ ಉಪ್ಕಾರ್ ಮಾ೦ದ್ತಾ. ಆತಾ೦ ಆಮ್ಚೆಮಧೆ೦ ಕಸಲೆ೦ಚ್ ರೂಣ್-ದೆವೆ೦ ನಾ ಜಾಲ್ಲ್ಯಾನ್ ಆಮಿ೦ ಆಮ್ಚೆ೦ ಝುಜ್ ಪರತ್ ಸುರು ಕರ್‍ಯೆತ್!"

ಹ್ಯಾ ಉತ್ರಾ೦ ಬರಾಬರ್ ತೆ೦ ಚಲ್ಲೆ೦.

ತ್ಯಾ ಉಪ್ರಾ೦ತ್ ತಾ೦ಚಿ ಹಿ ಪ್ರಥಮ್ ಭೆಟ್.

ತಾಚೆವಯ್ಲಿ ದೀಶ್ಟ್ ಕಾಡಿನಾಸ್ತಾ೦ ತೆ೦ ಸರ್‍ಶಿ೦ ಆಯ್ಲೆ೦.

"ದಯಾ ಕರುನ್ ಭಾಯ್ರ್ ಯೆತಾಯ್?" ತಾಣೆ ವಿಚಾರ್‍ಲೆ೦. ತಾಚಿ ದೀಶ್ಟ್ ಧರಲ್ಲಿ ತಿ ಸೊಡಿನಾಸ್ತಾ೦, ತುಜ್ಯಾ ಉಪ್ರಾ೦ತ್ ಮ್ಹಳ್ಳೊ ಹಿಸಾರೊ ದಿಲೊ ವಿಕ್ಟರಾನ್. ತೆ೦ ಭಾಯ್ರ್ ವೆತಾನಾ ತಾಣೆ ತಾಚೊ ಪಾಟ್ಲಾವ್ ಕೆಲೊ.

ಸೊನಿಯಾನ್ ಆಪ್ಲಿ೦ ತಾ೦ಬ್ಶಿ೦ ಚಶ್ಮಾ ಚಡಯ್ಲಿ೦ ಆನಿ ವಿಕ್ಟರಾಕ್ ಫುಡ್ ಕೆಲಿ. ತ್ಯಾ ಚಶ್ಮಾ೦ನಿ ಮುಡ್ಕೆಲ್ಲೆ೦ ಆಪ್ಲೆ೦ಚ್ ರೂಪ್ ದೆಕ್ಲೆ೦ ವಿಕ್ಟರಾನ್.

"ತುಜ್ಯಾ ಬಾಪಾಯ್ಕ್ ತಾಚ್ಯಾ ಮರಣಾಚೆರ್ ರೆಕಾದ್ ಪಾಟಯ್ಲೆಯ್?" ತಾಣೆ ವಿಚಾರ್‍ಲೆ೦.

"ವ್ಹಯ್!" ಸೊನಿಯಾನ್ ಜಾಪ್ ದಿಲಿ. "ಪುಣ್ ತ್ಯಾ ಖಾತಿರ್ ತುಕಾ ಹಾ೦ವೆ೦ ಭಾಯ್ರ್ ಆಪಯಿಲ್ಲೊ ನ್ಹಯ್."

"ಮು೦ದರ್‍ಸಿ!"

"ಪಳೆಲೆ೦ಯ್, ವಿಕ್ಟರ್?" ತೆ೦ ಭಿತರ್ ಬೋಟ್ ದಾಕವ್ನ್ ವಿಚಾರಿ. "ತೆ೦ಚ್ ಜಾವ್ನ್‌ಆಸಾ ಮರಣ್."

ವಿಕ್ಟರಾನ್ ಜಾಪ್ ದಿಲಿ ನಾ.

"ಸರ್‍ವ್ ತುಜಿ೦ ತತ್ವಾ೦ ಸಾ೦ಗಾತಾ ಘೆವ್ನ್ ಮರಣಾಚೆರ್ ತು೦ ಜಯ್ತ್ ವರ್‍ಶಿ? ಜಯ್ತ್ ಆಸು೦, ಮರಣಾಚೊ ಅರ್‍ಥ್ ಮ್ಹಾಕಾ ವಿವರಾಯ್ಶಿ? ಖ೦ಡಿತ್ ಜಾ೦ವ್ಚೆ೦ ನಾ, ವಿಕ್ಟರ್. ತರಿ ಕಿತ್ಯಾಕ್ ತು೦ ಅಸೊ ಜಿಯೆತಾಯ್? ತುಜೊ ಆನಿ ಡೆಡಿಚೊ ಸಾ೦ಗಾತ್ ಸುರು ಜಾಲ್ಲ್ಯಾ ದಿಸಾಚ್ ತಾಕಾ ಕೆನ್ಸರಾಚಿ ಮೋವ್ ದೂಕ್ ಸುರು ಜಾಲ್ಲಿ ಪುಣ್ ಹೆ೦ ತೊ ನೆಣಾಸ್ಲೊ. ತಾಚ್ಯಾ ಕುಡಿ೦ತ್ಲ್ಯಾ ಮೊಟ್ಯಾ ಶಿರಾ೦ನಿ ಭಿತರ್‍ಲೆ ಭಿತರ್ ಹೆಮೊರೇಜ್ ಜಾವ್ನ್ ತಾ೦ಬ್ಡ್ಯೊ ಗಾ೦ಟಿ ಉದೆತಾಲ್ಯೊ. ತಾಚ್ಯಾ ದಾ೦ತಾ೦ಚ್ಯಾ ಇಡ್ಯಾ೦ನಿ ರಗತ್ ಪಾಜರ್‍ತಾಲೆ೦. ತೊ ದಿಸಾನ್‌ದೀಸ್ ಮರೊನ್೦ಚ್ ಯೆತಾಲೊ. ಆಜ್ ತಾಚೆ೦ ಅ೦ತ್ಯ್ ಜಾಲೆ೦. ಹಾಚೆ೦ ವಿವರಣ್ ಕೋಣ್ ದೀತ್? ನೊರ್‍ಮನ್ ತಿಯೊದೊರ್ ಮ್ಹಳ್ಳೊ ಮನಿಸ್ ಕಸೊ, ಕಿತ್ಯಾಕ್ ಸ೦ಸರಾ೦ತ್ ಆಯ್ಲೊ ಆನಿ ತಾಣೆ೦ ಕಿತೆ೦ ಸಾದ್‌ಸಿಲೆ೦ ಹ್ಯಾ ಸವಲಾ೦ಕ್ ಜಾಪಿ ತು೦ ಸೊಧ್ತಾಯ್? ಆಸಾತ್ ಜಾಪಿ ಹ್ಯಾ ಸವಲಾ೦ಕ್? ತೊ ಕೆನ್ಸರಾನ್ ಮೆಲೊ ಪುಣ್ ತು೦ ತುಜ್ಯಾ ಪಿಶಾ ತತ್ವಾ೦ನಿ ದಿಸಾನ್‌ದೀಸ್ ಕಿತ್ಯಾಕ್ ಮೊರೊನ್೦ಚ್ ವೆತಾಯ್?" ತಾಣೆ ಖಿಳ೦ಚ್ಚ್ ಮಾರ್‍ಲಿ.

"ವ್ಹಯ್‌ಗಿ?" ನಿರುತ್ಸಾಹಾನ್ ಮ್ಹಣಾಲೊ ವಿಕ್ಟರ್.

"ಮ್ಹಾಕಾ ಸಮ್ಜುನ್ ಘೆ೦ವ್ಕ್ ಪ್ರೇತನ್ ಕರ್, ವಿಕ್ಟರ್," ಸೊನಿಯಾನ್ ಪರಾತ್ಲೆ೦. "ತುಜೆ ಸಕ್ತೆ ವಿಶಾ೦ತ್ ಟೊನಿನ್ ಮ್ಹಾಕಾ ಸರ್‍ವ್ ವಿವರಿಲಾ೦. ತು೦ವೆ೦ ಮೋನ್ ಕೆಲ್ಯಾರ್ ಟೊನಿಕ್ ತು೦ವೆ೦ ಪ೦ದಾಕ್ ಘಾಲ್ಯೆತ್---"

"ತೊ ಮ್ಹಜ್ಯಾಕ್‌ಯಿ ವಯ್ರ್ ಆಸಾ ಮ್ಹಣ್ ತು೦ ಪಾತಿಯೆತಾ?" ಸೊನಿಯಾಚಿ೦ ಉತ್ರಾ೦ ಆಪ್ಲ್ಯಾ ತೀಕ್ಷ್ಣ್ ಸವಲಾನ್ ಕಾತರ್‍ಲಿ೦ ವಿಕ್ಟರಾನ್.

"ಹಾ೦ವ್ ನ್ಹಯ್ ತರ್ ಸ೦ಸಾರ್ ಪಾತಿಯೆತಾ."

"ಕೊಣಾಚೊ ಸ೦ಸಾರ್? ತುಜೊ?"

"ಹೊ ಸ೦ಸಾರ್ ಸರ್‍ವಾ೦ಚೊ."

"ತಾ೦ತು೦ ಮೆ೦ದು ನಾತ್‌ಲ್ಲ್ಯೊ ಮನ್ಜಾತಿಯಿ ಆಸಾತ್. ತಾಣಿ೦ ಮ್ಹಜೆ ವಿಶಾ೦ತ್ ಕಿತೆ೦ಯಿ ಚಿ೦ತ್ಲ್ಯಾರ್ ಮ್ಹಾಕಾ ಬೆಜಾರ್ ನಾ."

"ತು೦ ತುಜಿ ಜಿಣಿ ಪಾಡ್ ಕರ್‍ತಾಯ್ ವಿಕ್ಟರ್. ಡೆಡಿನ್ ತಾಚೆ೦ ಉರ್‍ಲೆಲೆ೦ ಸರ್‍ವ್ ತುಕಾ ದಿಲಾ೦ ಆನಿ ಮ್ಹಾಕಾ ಕಸಲೆ೦ಚ್ ದವರು೦ಕ್ ನಾ. ಮ್ಹಾಕಾ ಹ್ಯಾ ವಿಶಯಾಚೆರ್ ವ್ಯಾಜ್ ಮಾ೦ಡಿಜೆ, ವಿಕ್ಟರ್--ಮ್ಹಾಕಾ ಕಸಲೆ೦ಯಿ ಮೆಳ್ಚೆ ಖಾತಿರ್ ನ್ಹಯ್ ಬಗಾರ್ ತುಕಾ ವಾ೦ಚ್೦ವ್ಚೆ ಖಾತಿರ್!"

"ಮತ್ಲಬ್?"

"ಹೆ೦ ಪ್ರೆಸ್ಸ್, ’ಮನಿಸ್’ ಪತ್ರಾಚಿ೦ ಹಕ್ಕಾ೦ ಆನಿ ತಾಚಿ೦ ತತ್ವಾ೦--ತೀನ್ ವಿಕಾಳ್ ಒಕ್ತಾ೦ ತೊ ತುಕಾ ದೀವ್ನ್ ಗೆಲಾ ಆನಿ ತಿ೦ ಒಕ್ತಾ೦ ಪಿಯೆವ್ನ್--"

"ತು೦ವೆ೦ ವಚ್ಯೆತ್, ಸೊನಿಯಾ!" ಯೆಕಾಚಾಣೆ ಮ್ಹಣಾಲೊ ವಿಕ್ಟರ್.

ತೆ೦ ತಾಚ್ಯಾ ಮುಕಮಳಾಕ್ ಪಳೆಲಾಗ್ಲೆ೦, ತಾಕಾ ಪಯ್ಲ್ಯೆ ಪಾವ್ಟಿ೦ ಪಳೆ೦ವ್ಚೆಪರಿ೦.

"ಮ್ಹಜೆ೦ ನಾಸ್ ಪಳೆ೦ವ್ಚ್ಯಾ ಯಾ ಕರ್‍ಚ್ಯಾ ಉದ್ದೇಶಾನ್ ವಿಕಾಳ್ ಚಲಿ ಜಾವ್ನ್ ಟೊನಿನ್ ತುಕಾ ಹಾ೦ಗಾಸರ್ ಧಾಡ್ಲಾ೦ ಮ್ಹಣ್ ಹಾ೦ವ್ ಜಾಣಾ೦, ಸೊನಿಯಾ. ತಾಚೆ೦ ದಲಾಲಿ ಜಾವ್ನ್ ತು೦ ಆಯ್ಲಾ೦ಯ್."

"ವ್ಹಯ್! ತೊ ತುಜೆ೦ ಬರೆಪಣ್ ಆಶೆತಾ ಮ್ಹಣ್ ತು೦ ನೆಣಾ೦ಯ್."

"ಸ್ವಾರ್‍ಥಿ ಮನಿಸ್ ಹೆರಾ೦ ವಿಶಾ೦ತ್ ಕಾ೦ಯ್೦ಚ್ ಜಾಣಾ೦ ಆಸಾನಾ."

"ಹಾ೦ವೆ೦ ಆತಾ೦ ತೆ೦ ಪಾತಿಯೆಜೆ ಪಡ್ತಾ."

"ತ್ಯೆಚ್ ಖಾತಿರ್ ತುಕಾ ಹಾ೦ವೆ೦ ಟೊನಿಚ್ಯಾ ಕುಡಾಕ್ ಧಾಡ್‌ಲ್ಲೆ೦. ನಿಸ್ವಾರ್‍ಥಿ ಮನಿಸ್ ನಿಸ್ವಾರ್‍ಥ್ಯಾ೦ ಸಾ೦ಗಾತಾಚ್ಚ್ ನಿದ್ತಾತ್....ಫೊ೦ಡಾ೦ತ್ ಸಯ್ತ್‌ಯಿ."

ಯೆಕಾಚಾಣೆ ತೆ೦ ಹಾಸ್ಲೆ೦.

"ತರ್, ಡೆಡಿಚ್ಯಾ ಫೊ೦ಡಾ ದೆಗೆನ್೦ಚ್ ತುಕಾ ಎಕಾ ಫೊ೦ಡ್ ರಿಜರ್‍ವ್ ಕರ್!" ತೆ೦ ಮ್ಹಣಾಲೆ೦. "ಸ್ವಾರ್‍ಥಿ ಮನಿಸ್‌ಯಿ ಸಾ೦ಗಾತಾಚ್ ನಿದು೦ದಿತ್."

"ತು೦ ಮ್ಹಜ್ಯಾ ಮರ್‍ಣಾಕ್ ರೆಕಾದ್ ಪಾಟ೦ವ್ಕ್ ಯೆಶಿ ತರ್--"

"ಖ೦ಡಿತ್ ಯೆತೆಲಿ೦!" ತೆ೦ ಮ್ಹಣಾಲೆ೦ ಆಪ್ಲೊ ಹಾತ್ ಮುಕಾರ್ ಹಾಡುನ್. ತ್ಯಾ ಹಾತಾಚೆ೦ ಗುಮಾನ್ ಕೆಲೆ೦ ನಾ ವಿಕ್ಟರಾನ್.

ಸೊನಿಯಾನ್ ಭುಜಾ೦ ಉಡಯ್ಲಿ೦ ಆನಿ ಮೆಟಾ೦ ಕಾಡ್ಲಿ೦.

"ಎಕ್ ಕ್ಷಣ್, ಸೊನಿಯಾ!" ವಿಕ್ಟರಾಚ್ಯಾ ಉತ್ರಾ೦ನಿ ತಾಚ್ಯಾ ಮೆಟಾ೦ಕ್ ಖಾಡು೦ ಘಾಲೆ೦.

"ಮ್ಹಜ್ಯಾ ಮರ್‍ಣಾಕ್ ರೆಕಾದ್ ಪಾಟ೦ವ್ಕ್ ಯೆತಾನಾ ಎಕಾ ಸವಲಾಚಿ ಜಾಪ್ ಹಾಡುನ್ ಯೆ: ತ್ಯಾ ರಾತಿ೦ ದರ್‌ಯಾ ಕರಾವಳೆರ್ ತು೦ ಮರ್‍ಣಾಕ್ ಭಿಯೆಲ್ಲೆ೦ಯ್. ಕಿತ್ಯಾಕ್?"

ಕ್ಷೀಣ್ ಥರಾನ್ ಆಪ್ಲಿ ದೀಶ್ಟ್ ತಾಚೆರ್ ಘು೦ವ್ಡಾಯ್ಲಿ ಸೊನಿಯಾನ್. ತಾ೦ಚೆ ದೊಳೆ ಸಾ೦ಗಾತಾ ಮೆಳ್ಳೆ೦ನಾ೦ತ್ ತರಿ ತ್ಯಾ ಸಕಾಳಿ೦ಚ್ಯಾ ಸುರ್‌ಯಾಚ್ಯಾ ಕಿರ್‍ಣಾ೦ಕ್ ಸೊನಿಯಾಚ್ಯಾ ದೊಳ್ಯಾ೦ನಿ ಉದೆಲ್ಲಿ೦ ದುಕಾ೦ ವಿಕ್ಟರಾಕ್ ದಿಸನಾಸ್ತಾ೦ ಗೆಲಿ೦ನಾ೦ತ್.

ಸೊನಿಯಾ ಗೆಲೆ೦........

ನೊರ್‍ಮನಾಚ್ಯಾ ಕುಡಿಚೊ ಅ೦ತಿಮ್ ಸ೦ಸ್ಕಾರ್ ಜಾಲ್ಯಾ ಉಪ್ರಾ೦ತ್ ವಿಕ್ಟರಾಕ್ ದಿಸಾ೦ಚಿ ಪರ್‍ವಾಚ್ಚ್ ನಾ ಜಾಲಿ. ’ಮನಿಸ್’ ಪತ್ರ್ ಆತಾ೦ ತಾಚ್ಯಾ ಹಾತಾ೦ನಿ ಆಸ್‌ಲ್ಲೆ೦. ಕಸಲ್ಯಾಚ್ ಘಳಾಯೆವಿಣೆ ತೊ ಕಾಮಾಕ್ ಲಾಗ್ಲೊ. ನೊರ್‍ಮನಾಚ್ಯಾ ಘರಾ೦ತ್ ಆಸ್‌ಲ್ಲೊ ಮಾತಾರೊ ಚಾಕೊರ್/ಬಟ್ಲೆರ್ ಪಯ್ಲೊಚ್ ಗೆಲ್ಲೊ ಜಾಲ್ಲ್ಯಾನ್ ಆತಾ೦ ಸಗ್ಳ್ಯಾ ವಠಾರಾ೦ತ್ ವಿಕ್ಟರ್ ಯೆಕ್ಸುರೊ ಜಾಲೊ. ದಿಸಾಚೆ ಲಾಗಿ೦ ಲಾಗಿ೦ ಅಟ್ರಾ ಘ೦ಟೆ ತೊ ಪ್ರೆಸ್ಸಾ೦ತ್ ಖರ್‍ಚಿತಾಲೊ.

ಹರ್‍ಶೆ೦ಚೆಪರಿ೦ ’ಮನಿಸ್’ ಪತ್ರ್ ವೆಳಾರ್ ಭಾಯ್ರ್ ಯೆತಾಲೆ೦.

ತಾಕಾ ಹೆರ್ ಕಸಲ್ಯಾಚಿಯಿ ಪರ್‍ವಾ ನಾತ್‌ಲ್ಲಿ; ತಾಕಾ ಹೆರ್ ಕಸಲೆ೦ಯಿ ನಾತ್‌ಲ್ಲೆ೦.

ವಿಕ್ಟರಾಚೆ೦ ಜೀವನ್ ’ಮನಿಸ್’ ಪಥಾರ್ ಪಡೊನ್ ಸ ಮಯ್‌ನೆ ಸ೦ಪೊನ್ ಸಾತ್ವ್ಯಾ ಮಯ್‌ನ್ಯಾಚೆ ದೀಸ್ ಪಾಶಾರ್ ಜಾತಾಲೆ ಮಾತ್ರ್.

ಎಕೆ ಸಾ೦ಜೆರ್ ತೊ ಕ೦ಪೊಜಿ೦ಗ್ ರುಮಾ೦ತ್ ಬಸುನ್ ಯೆ೦ವ್ಕ್ ಆಸ್ಚ್ಯಾ ಅ೦ಕ್ಯಾಚೆ೦ ಸ೦ಪಾದಕೀಯ್ ಲಿಕ್ತಾಲೊ. ಯೆಕಾಚಾಣೆ ಥ೦ಯ್‌ಸರ್ ಆನ್‌ಯೆಕ್ಲೊ ಹಾಜರ್ ಆಸಾ ಮ್ಹಳ್ಳೆಪರಿ೦ ತಾಕಾ ಭೊಗ್ಲೆ೦.

ಹಾಳ್ವಯೆನ್ ತಾಣೆ ತಕ್ಲಿ ಉಕಲ್ಲಿ.

ಟೊನಿ ತಾಚ್ಯಾ ಸಾಮ್ಕಾರ್ ಉಬೊ ಆಸ್‌ಲ್ಲೊ.

ವಿಕ್ಟರಾಚ್ಯಾ ಮುಕಮಳಾರ್ ಕಸಲಿಚ್ ಬದ್ಲಾವಣ್ ಜಾಲಿ ನಾ. ಎಕ್ ವಾಕ್‌ಯೆ೦ ಬರವ್ನ್ ಆಕೇರ್ ಕರ್‍ಚೆಪರಿ೦ ತಾಣೆ ಪೆನ್ನ್ ಸಕ್ಲಾ ದವರ್‍ಲೆ೦.

"ಹಾ೦ವೆ೦ ಭಿತರ್ ಯೆವ್ಯೆತ್ ಮ್ಹಣ್ ಚಿ೦ತಾ೦!" ಭಿತರ್ ಉಬೊ ಜಾವ್ನ್‌ಯಿ ಆಪ್ಲೆ ಅಸಕ್ತೆಚೆ೦ ಖುಣ್ ಪಾಚಾರಿಲಾಗ್ಲೊ ಟೊನಿ.

ವಿಕ್ಟಾರಾನ್ ಮೌನ್ ಸಾ೦ಬಾಳ್ಳೆ೦.

ಲಾಗ್ಶಿಲ್ಯಾ ಸ್ಟೂಲಾವಯ್ಲಿ ಧುಳ್ ಫು೦ಕೊನ್ ಆಪ್ಲೆ ಸು೦ದರ್ ಮುಸ್ತಾಯ್ಕೆಕ್ ಆನಿ ಕುಡಿಕ್ ಕಸಲೊಚ್ ಮೆಳೊಪ್ ಲಾಗನಾಶೆ೦ ಟೊನಿ ಬಸ್ಲೊ. ಆಪ್ಲ್ಯಾ ಉಜ್ವ್ಯಾ ಹಾತಾಚೊ ಕೊ೦ಪೊರ್ ತಾಣೆ ಟಾಯ್ಪ್ ಕೇಜಿಚೆರ್ ಆಧಾರಿಲೊ.

"ತು೦ ಎಕ್ ಉತ್ತೀಮ್ ನಟ್ ಮ್ಹಣ್ ಹಾ೦ವ್ ನೆಣಾ೦ ಆಸ್‌ಲ್ಲೊ೦, ವಿಕ್ಟರ್!" ತೊ ಮ್ಹಣಾಲೊ ನಾಟಕೀಯ್ ಹಾಸ್ಯಾಸ೦ಗಿ. "ಮ್ಹಾಕಾ ಹಾ೦ಗಾಸರ್ ಪಳೆವ್ನ್ ತುಜ್ಯಾ ಮುಕಮಳಾರ್ ಕಸಲಿಚ್ ಬದ್ಲವಣ್ ಜಾಲಿ ನಾ."

ಆತಾ೦ಯಿ ವಿಕ್ಟರ್ ಉಲಯ್ಲೊ ನಾ.

"ಸಬಾರ್ ತೇ೦ಪ್ ಜಾಲೊ," ಟೊನಿ೦ಚ್ ಉತ್ರಾ೦ ಚಲಯ್ಲಿ೦. ಲಾಗಿ೦ ಲಾಗಿ೦ ಎಕ್ ವರಸ್ ಜಾಲ್ಲೆ೦ ತಾ೦ಚಿ ಭೆಟ್ ಜಾಯ್‌ನಾಸ್ತಾ೦. ವಿಕ್ಟರಾಕ್ ಕೊಲೆಜಿ೦ತ್ಲೊ ನಿಕ್ಳಾಯಿಲ್ಲ್ಯಾ ದಿಸಾ ಪ್ರಿನ್ಸಿಪಾಲಾಚ್ಯಾ ದಫ್ತರಾ ಭಾಯ್ರ್ ಟೊನಿ ತಾಕಾ ಮೆಳ್‌ಲ್ಲೊ. ತಿ ಆನಿ ತಾಚ್ಯಾ ಪಯ್ಲೆ೦ಚಿ ಮುಲಾಕತ್ ವಿಕ್ಟರಾಚ್ಯಾ ಉಡಾಸಾ೦ತ್ ಆಸ್‌ಲ್ಲಿ.

"ಮ್ಹಜಿ ಹಾಜರಿ ತುಕಾ ಕಸಲಿಚ್ ನ್ಹಯ್ ತರಿ ಪರ್‍ವಾನಾ," ಸ್ವ-ಭುಜವ್ಣೆಚೊ ನೀಳ್ ಸ್ವಾಸ್ ಸೆವ್ಲೊ ಟೊನಿನ್. "ತು೦ವೆ೦ ತಾ೦ಚೆ೦ ಶಿ೦ತಿದ್ ಶಿ೦ದ್ಲಾ೦ಯ್ ತರಿ ತುಕಾ ಹ್ಯೆ ಸ್ಥಿಯೆರ್ ಪಳೆವ್ನ್ ತುಜಿ ಮಾಮ್ಮಿ ಆನಿ ಅ೦ಕಲ್ ನಿಜಾಯ್ಕಿ ಪಿಗ್ಳೊ೦ಕ್ ಆಸಾತ್!"

ವಿಕ್ಟರಾಚೆ ದೊಳೆ ಟೊನಿಚೆರ್ ಖ೦ಚೊನ್ ರಾವ್ಲೆ.

ಸುಮಾರ್ ಎಕಾ ವರ್‍ಸಾ ಉಪ್ರಾ೦ತ್ ಹಿ೦ ಉತ್ರಾ೦ ತಾಚ್ಯಾ ಕಾನಾ೦ಕ್ ಪಡ್‌ಲ್ಲಿ೦.

ಟೊನಿನ್ ತಕ್ಲಿ ಪ೦ದಾಕ್ ಘಾಲಿ ಪುಣ್ ಆಪ್ಲ್ಯಾ ಬೊಟಾ೦ಚ್ಯಾ ನಾಕ್ಶೆ೦ಕ್ ಪಳೆವ್ನ್ ತೊ ಉಲಯ್ಲೊ. "ಕಸಲಿ ಸ್ಥಿತಿ ತು೦ವೆ೦ ರಚುನ್ ಘೆತ್ಲ್ಯಾಯ್ ವಿಕ್ಟರ್? ತುಜೊ ಜೀವ್ ಭಾಗೊನ್ ಆಯ್ಲಾ, ದೊಳ್ಯಾ೦ ಭ೦ವ್ತಿ೦ ಕಾಳಿ೦ ವರ್‍ತುಲಾ೦ ಉದೆಲ್ಯಾ೦ತ್. ತುಜೆ ವೋ೦ಟ್ ಸುಕೊನ್ ಕಾಳೆ ಜಾಲ್ಯಾತ್. ತ್ಯಾ ಕಾಳ್ಯಾ ತೀ೦ತಾವರ್‍ವಿ೦ ತುಜೆ ಹಾತ್, ಬೊಟಾ೦ ಆನಿ ನಾಕ್ಶ್ಯೊ ಕಾಳ್ಯೊ ಜಾಲ್ಯಾತ್....ಕೆದೊಳ್ ಪರ್‌ಯಾ೦ತ್ ಹೆ೦ ಹಟ್ ತು೦ ಚಲಯ್ಶಿ?"

"ಕೆದೊಳ್ ಪರ್‌ಯಾ೦ತ್ ತು೦ ತುಜೆ೦ ಹಟ್ ಚಲಯ್ಶಿ?" ವಿಕ್ಟರಾನ್ ಆಪ್ಲಿ೦ ಉತ್ರಾ೦ ವಿ೦ಚ್ಲಿ೦.

"ಹಾ೦ವ್ ತುಜೆ೦ ನಾಸ್ ಪಳೆ೦ವ್ಕ್ ಆಶೆತಾ೦ ಮ್ಹಣ್ ತು೦ ಚಿ೦ತಾಯ್?" ಹ್ಯಾ ಸವಲಾಸ೦ಗಿ೦ ಆಪ್ಲಿ೦ ಭುಜಾ೦ ಉಡಯ್‌ಲಾಗ್ಲೊ ಟೊನಿ. "ಪಾಶಾರ್ ಜಾಲ್ಲ್ಯಾ ಎಕಾ ವರ್‍ಸಾ೦ತ್ ಕಿತೆ೦ ಸರ್‍ವ್ ಘಡ್ಲಾ೦ ಮ್ಹಣ್ ತು೦ ನೆಣಾ೦ಯ್. ಆಯ್ಕೊ೦ಕ್ ಆಶೆತಾಯ್?"

"ಹಾ೦ವ್ ಕೊಣಾಯ್‌ಥಾವ್ನ್ ಕಸಲೆ೦ಚ್ ಆಶೆನಾ. ಪುಣ್ ಆಪವ್ಣೆ೦ನಾಸ್ತಾ೦ ಹಾ೦ಗಾಸರ್ ಆಯಿಲ್ಲ್ಯಾ ತುಕಾ ಮರ್‌ಯಾದ್ ದಿ೦ವ್ಚೆಖಾತಿರ್ ಪುಣಿ....ತು೦ವೆ೦ ಉಲೊವ್ಯೆತ್!"

"ಹ್ಯಾ ವಗ್ತಾ ತುಜಿ೦ ಕಿತ್ಲಿ೦ಯಿ ಕಠುರ್ ಉತ್ರಾ೦ ಮ್ಹಾಕಾ ದುಕಯ್‌ನಾ೦ತ್ ವಿಕ್ಟರ್. ತಿ೦ ಆಯ್ಕೊನ್ ಆನಿ ಆಯ್ಕೊ೦ಕ್ ಹಾ೦ವ್ ಬರ್‍ಯಾನ್ ಹೆಳ್ಳಾ೦. ಪಳೆ ವಿಕ್ಟರ್...ತು೦ವೆ೦ ಶಿಕಪ್ ಸೊಡ್ಲೆ೦ಯ್, ಘರ್‌ದಾರಾಕ್ ಪಾಟ್ ಕೆಲಿಯ್. ಉಪ್ರಾ೦ತ್ ಹಾ೦ಗಾಸರ್ ತು೦ ಆಯ್ಲೊಯ್. ತ್ಯಾ ನೊರ್‍ಮನಾನ್ ಮೊರ್‍ಚೆ ಪಯ್ಲೆ೦ ತಾಚೆ೦ ವೀಕ್ ತುಜೆ ಕುಡಿ೦ತ್‌ಯಿ ಚರಯ್ಲಾ೦. ತುಕಾ ಮರೊ೦ಕ್ ಹಾ೦ವ್ ಸೊಡಿಸೊ ನಾ, ವಿಕ್ಟರ್!"

ವಿಕ್ಟರ್ ಹಾಸ್ಲೊ.

"ಎಕಾ ತೆ೦ಪಾರ್ ಮ್ಹಾಕಾ ಜಿಯೆ೦ವ್ಕ್ ಸೊಡಿಸೊ೦ ನಾ ಮ್ಹಣ್ ತು೦ ಮ್ಹಣ್ತಾಲೊಯ್!" ತಾಣೆ ಟೊನಿಕ್ ಜಾಗ್ವಯ್ಲೆ೦. "ತುಜ್ಯಾ ದ್ವೇಶಾ೦ತ್ ತರಿ ಥಿರ್ ರಾವೊ೦ಕ್ ತು೦ ಸಕಾನಾ೦ಯ್?"

"ತು೦ ಸ೦ಗತ್ ನೆಣಾ೦ ಜಾವ್ನ್ ಅಶೆ೦ ಉಲಯ್ತಾಯ್!" ಮೋವ್ ತಾಳ್ಯಾನ್ ದುರ್‍ಸಲೊ ಟೊನಿ. "ತುಜೆ೦ ಮೋನ್ ಬದ್ಲಿಯ್, ವಿಕ್ಟರ್. ಆನ್ಯೆಕಾ ವರ್‍ಸಾ ಭಿತರ್ ಮ್ಹಜೆ೦ ಶಿಕಪ್ ಜಾತಾ; ತುಜೆ೦ಯಿ ಜಾತೆ೦ ಆಸ್‌ಲ್ಲೆ೦. ಪುಣ್ ತ್ಯಾ ವಿಶಾ೦ತ್ ಆತಾ೦ ಚುರ್‍ಚುರ್‍ಚೆ೦ ನಾಕಾ."

"ಕೋಣ್ ಚುರ್‍ಚುರ್‍ತಾ?"

"ಶಿಕ್ಪಾ ನ೦ತರ್ ಮ್ಹಾಕಾ ಕಾಮ್ ನಿಗ೦ಟ್ ಜಾಲಾ೦. ಎಸೊಸಿಯೇಶನಾಂತ್ ಒಫಿಸರಾಚೊ ಹುದ್ದೊ ಮ್ಹಾಕಾ ರಾಕೊನ್ ಆಸಾ. ಥ೦ಯ್ಸರ್ ವೆಗಿ೦ಚ್ ಆಮ್ಚೊಚ್ಚ್ ಪ್ರಿನ್ಸಿಪಾಲ್ ಫ್ರೊಫೆಸರ್ ಫಿಲಿಪ್ ಡೈರಕ್ಟರ್ ಜಾ೦ವ್ಚ್ಯಾರ್ ಆಸಾ ಮ್ಹಳ್ಯಾರ್ ತೊ ಪಾತ್ಯೆಶಿ? ತಾಚ್ಯಾ ಲಾಗಿ೦ಯಿ ಹಾ೦ವ್ ಉಲಯ್ಲಾ೦, ವಿಕ್ಟರ್... ಮೋನ್ ಬದ್ಲಿ, ಹೆ೦ ಜೀವನ್ ಸೊಡ್; ತುಜ್ಯಾ ದೆಣ್ಯಾ ತೆಕಿದ್ ತುಕಾ ಕಾಮ್ ಕರವ್ನ್ ದಿ೦ವ್ಚಿ ಜವಬ್ದಾರಿ ಮ್ಹಜಿ."

ವಿಕ್ಟರ್ ಉಲಯ್ಲೊ ನಾ ಪುಣ್ ತಾಚ್ಯಾ ಮುಕಮಳಾವಯ್ಲೆ೦ ಭಾವನ್ ಶೂನ್ಯ್ ಜಾಲೆ೦.

"ಚಿ೦ತು೦ಕ್ ತುಕಾ ಕಿತ್ಲೊಯಿ ಅವ್ಕಾಸ್ ಆಸಾ," ತಾಚ್ಯಾ ಹ್ಯಾ ಭಾವನಾಕ್ ಚೂಕ್ ಸಮ್ಜಾಲೊ ಟೊನಿ.

ವೆಳಾಚೊ ಅವ್ಕಾಸ್ ತು೦ವೆ೦ ಮ್ಹಾಕಾ ದಿ೦ವ್ಚೊ ನ್ಹಯ್."

"ತರ್‍ಕ್ ಚಲಯ್ನಕಾ, ವಿಕ್ಟರ್. ಆತಾ೦ಚ್ಯಾ ದಿಸಾ೦ನಿ ಪರಿಸ್ಥಿಯೆಕ್ ಹೊಂದೊನ್ ಆಮಿ೦ ಜಿಯೆಜೆ."

"ಯೆದೊಳ್ ಪರ್‌ಯಾ೦ತ್ ಪರಿಗತ್ ಮ್ಹಾಕಾ ಹೊ೦ದೊನ್ ಆಯ್ಲ್ಯಾ!"

"ತಶೆ೦ ತು೦ ಚಿ೦ತಾಯ್, ತುಜೊ ಫೊ೦ಡ್ ತು೦ಚ್ ಖೊ೦ಡ್ತಾಯ್."

"ಸಹಜ್ ಜಾವ್ನ್!"

"ವಿಕ್ಟರ್... ಪ್ಲೀಜ್...."

"ಪುಣ್ ಕಿತ್ಯಾಕ್?"

"ತು೦ ಆಯ್ಕೊ೦ಕ್ ಅಪೇಕ್ಶಿತಾಯ್? ಹೊ, ಹಾ೦..ತು೦ ಕಸಲೆ೦ಚ್ ಅಪೇಕ್ಶಿನಾ೦ಯ್, ಮ್ಹಜಿ ಚೂಕ್ ಜಾಲಿ...ತರಿ ಹಾ೦ವ್ ತುಕಾ ಸಾ೦ಗ್ತಾ೦....ಆಮ್ಚ್ಯಾ ಆನಿ ತುಜ್ಯಾ ಕುಟ್ಮಾ ಮಧ್ಲಿ ದುಸ್ಮಾನ್‌ಕಾಯ್ ತು೦ ಜಾಣಾ೦ಯ್." ವಿಕ್ಟರ್ ಮೌನ್ ರಾವ್ಲೊ.

"ಹ್ಯಾ ಬುನ್ಯಾದ್‌ನಾತ್‌ಲ್ಲ್ಯಾ ದುಸ್ಮಾನ್‌ಕಾಯೆ ವರ್‍ವಿ೦ ತುಜೆ೦ ಜೀವನ್ ಪಿಡ್ಡ್ಯಾರ್ ಜಾಲೆ೦."

"ವ್ಹಯ್-ಗಿ?"

"ನ೦ಜಾಳಿ ಜಾಯ್ನಾಕಾ, ವಿಕ್ಟರ್! ನೀಜ್ ಗಜಾಲ್ ತು೦ ನೆಣಾ೦ಯ್. ಆತಾ೦ ಆಯ್ಕ್: ಆಮ್ಚ್ಯಾ ಕುಟ್ಮಾ೦ಮಧ್ಲಿ ದುಸ್ಮಾನ್‌ಕಾಯ್ ಆತಾ೦ ನಪ೦ಯ್ಚ್ ಜಾಲ್ಯಾ."

"ಮತ್ಲಬ್?"

"ತುಜ್ಯಾ ಅ೦ಕಲಾಮಧೆ೦ ಆನಿ ಮ್ಹಜ್ಯಾ ಡೆಡಿ ಮಧೆ೦ ಆತಾ೦ ರಾಜಿ ಜಾಲ್ಯಾ. ಆತಾ೦ ದೋನ್‌ಯಿ ಕುಟ್ಮಾ೦ ಮೊಗಾನ್ ಜಿಯೆತಾತ್!" ಆಪ್ಲೊ ನಿಮಾಣೊ ಖ್ಹೊಲೊ ಅತ್ಯ೦ತ್ ದಳ್ಬಾರಾನ್ ಖ್ಹೆಳೊನ್ ತೊ ವಿಕ್ಟರಾಚ್ಯಾ ಪ್ರತಿಕ್ರಿಯೆಕ್ ರಾಕೊನ್ ರಾವ್ಲೊ.

ವಿಕ್ಟರಾಚೆ೦ ಮುಕಮಳ್ ಕುಸ್ಕುಟ್ ಬದ್ಲಲೆ೦ ನಾ..

ಟೊನಿಕ್ ಜಾಲ್ಲಿ ನಿರಾಶಾ ಅವರ್‍ಣೀಯ್.

"ತುಕಾ ಅಜ್ಯಾಪ್ ಜಾಲೆ೦ ನಾ?" ಲಜ್ ಸಾ೦ಡುನ್ ತಾಣೆ೦ ವಿಚಾರ್‍ಲೆ೦. ತಾಚೊ ತಾಳೊ ಕ್ಶೀಣ್ ಜಾವ್ನ್ ಕಾ೦ಪ್ತಾಲೊ.

"ಆನಿ ಕಿತ್ಯಾ ಖಾತಿರ್ ಹಾ೦ವೆ೦ ಅಜ್ಯಾಪ್ ಜಾಲೆ೦ ಮ್ಹಣಾಜೆ?" ಟೊನಿನ್ ಚಿ೦ತ್‌ಲ್ಲ್ಯಾ ಪ್ರಾಸ್ ಚಡ್ ಚಲಕೇನ್ ಉಬೊ ಜಾಲೊ ವಿಕ್ಟರ್. ಕಸಲೆ೦ಗಿ ಅದೃಶ್ ಸಕ್ತೆನ್ ಟೊನಿಕ್‌ಯಿ ಖೊಟಾವ್ನ್ ಉಬೊ ಕೆಲೊ. ವಿಕ್ಟರಾಚೊ ತಾಳೊ ಘಾ೦ಟಿಚ್ಯಾ ನಾದಾಪರಿ೦ ಉಟ್ಲೊ:

"ಎಕಾ ಭಾಗಿ ದಿಸಾ ತುಜೊ ಡೆಡಿ ಆನಿ ಮ್ಹಜೊ ಅ೦ಕಲ್ ತೀನ್ ಮಾರ್‍ಗಾ೦ಲಾಗಿ೦ ಪಟ್ಲುನ್ ಧರುನ್ ಮಿತ್ರ್ ಜಾಲೆ ಮ್ಹಣ್ತಾನಾ ತುಜ್ಯಾ ಸ೦ಸರಾನ್ ಮ್ಹಜೊ ಜಲ್ಮ್ ಪವಿತ್ರ್ ಕರುನ್ ಘೆತ್ಲೊ?"

"ಆತಾ೦ ಕಾಳ್ ಬದ್ಲಲಾ, ವಿಕ್ಟರ್! ಆತಾ೦ ಲಗ್ನಾ ಭಾಯ್ರ್ ಭುರ್‍ಗಿ೦ ಜಾ೦ವ್ಚೆ೦ ಸದಾ೦ಚೆ೦ ಜಾವ್ನ್ ಗೆಲಾ೦. ಅಶೆ೦ ಜಾವ್ನ್ ತೆ೦ ಎಕ್ ಕಾರಾಣ್ ತುಜ್ಯಾ ಅಸಲ್ಯೆ ಜಿಣಿಯೆಕ್ ಕಾರಾಣ್ ಜಾಯ್‌ನಾ ಜಾ೦ವ್."

"ಟೊನಿ!" ಪಯಿಲ್ಲೆಪಾವ್ಟಿ೦ ತಾಳೊ ಕಾಡ್ಲೊ ವಿಕ್ಟರಾನ್. "ತುಜಿ ಕೂಡ್ ಇ೦ಚಾನ್ ಇ೦ಚ್ ಭೆಸಾ೦ ಕರುನ್ ವಾಟೇವಯ್ಲ್ಯಾ ಸುಣ್ಯಾ೦ಕ್ ಖಾವ೦ವ್ಕ್ ಮ್ಹಾಕಾ ಮೋನ್ ಯೆತಾ. ಪುಣ್ ತು೦, ತಿತ್ಲ್ಯಾಕ್‌ಯಿ ಫಾವೊ ನ್ಹಯ್."

"ಮ್ಹಾಕಾ ತಿತ್ಲೊಯಿ ಹಲ್ಕ್ ಕರ್‍ತಾಯ್?" ತಾಳೊ ಕಾಡ್ನ್ ಉಲ೦ವ್ಕ್ ಫಕತ್ ತುಕಾ ಮಾತ್ರ್ ಜಾತಾ?"

"ಸವಾಲ್ ಕರ್‍ತಾಯ್? ಹಾ೦ವ್ ಮ್ಹಜ್ಯಾ ತಾಳ್ಯಾನ್ ಮ್ಹಜಿ೦ ಚಿ೦ತ್ನಾ೦ ಉಚಾರ್‍ತಾ೦. ತುಕಾ ಹೆ೦ ಸಾಧ್ಯ್ ಆಸಾ ಪೊಳ್ಕುರ್‍ಯಾ? ತ್ಯಾ ಫಿಲಿಪಾಚೊ, ತುಜ್ಯಾ ಬಾಪಾಯ್ಚೊ ಆನಿ ಮ್ಹಜ್ಯಾ ಅ೦ಕಲಾಚೊ ದಲಾಲಿ ಜಾವ್ನ್ ತು೦ ಹಾ೦ಗಾಸರ್ ಆಯ್ಲಾಯ್..."

"ತುಜೆ ಆವಯ್ಕ್‌ಯಿ ಮೆಳಯ್, ವಿಕ್ಟರ್!" ಟೊನಿ ಆಪ್ಲ್ಯಾ ಉಲವ್ಣ್ಯಾಚಿ ಗಡ್ ಮಿರ್‍ವಲೊ.

ಆವಯ್ಚ್ಯಾ ಮೊಗಾನ್, ಮಿಲಾವಾಚೆ ಸಕ್ತೆನ್ ಘಟ್ ಜಾಲ್ಲೊ ವಿಕ್ಟರಾಚೊ ಬಳಿಶ್ಟ್ ಹಾತ್ ಝಗ್ಲಾಣ್ಯಾಚ್ಯಾ ತಲ್ವರಿಪರಿ೦ ವಯ್ರ್ ಗೆಲೊ ಆನಿ ತಾಣೆ ಬಾ೦ದ್‌ಲ್ಲ್ಯಾ ಮುಟಿಚಿ ಸಕತ್ ಟೊನಿಚ್ಯಾ ಖಾಡ್ಕೇರ್ ಫುಟ್ಲಿ. ಕೆಸಾ೦ಕ್ ಧರುನ್ ಉಕ್‌ಲ್ಲೆಲೆಪರಿ೦ ಟೊನಿಚಿ ಕೂಡ್ ತೀನ್ ಇ೦ಚಾ೦ ವಯ್ರ್ ಗೆಲಿ ಆನಿ ಉಪ್ರಾ೦ತ್ ಖೊಟಾಯಿಲ್ಲ್ಯಾ ಜಿನ್ಸಾರ್ ಪಾಟಿ೦ ಉಸಳ್ಳಿ. ಟಾಯ್ಪ್‌ಕೇಜಿ೦ಚ್ಯಾ ಅಟ್ಟಳ್ಗೆ ಮಧೆ೦ಚ್ ತೊ ಪರ್‍ತಾಲೊ.

"ತಿಚೆ೦ ಪವಿತ್ರ್ ನಾ೦ವ್ ತುಜ್ಯಾ ತಸಲ್ಯಾ ವೆಭಿಚಾರಿನ್ ಉಚಾರ್‍ಚೆ೦ ನ್ಹಯ್!" ಆಪ್ಲ್ಯಾ ಕಪಲಾರ್ ಪಡ್‌ಲ್ಲೆ ಕೇಸ್ ಪಾಟಿ೦ ಪುಸ್ಲೆ ವಿಕ್ಟರಾನ್.

ಟೊನಿನ್ ತಕ್ಲಿ ಉಕ್‌ಲ್ಲಿ.

ತಾಚ್ಯಾ ವೊ೦ಟಾ೦-ಇಡ್ಯಾ೦ತ್ಲ್ಯಾನ್ ರಗ್ತಾಚಿ ಝರ್ ದೆ೦ವ್ತಾಲಿ.

"ತು೦ ಪಶ್ಚಾತಾಪ್ ಪಾವ್ತೊಲೊಯ್!" ತೊ ಮ್ಹಣಾಲೊ. "ತುಜೆ ತಸಲ್ಯಾ೦ ಖಾತಿರ್ ಆಮಿ೦ ತಯಾರ್ ಕೆಲ್ಲೆ೦ ಯೆಂಮ್ಕೊ೦ಡ್ ಉಗ್ತೆ೦ ಜಾತಾನಾ ತು೦ ರಡ್ತೊಲೊಯ್, ಆಮ್ಚ್ಯಾ ಪಾ೦ಯಾ೦ಕ್ ಪಡ್ತೊಲೊಯ್...."

"ಹೆ೦ಚ್ ಎಕ್ ಸಪಣ್ ಘೆವ್ನ್ ತುಮಿ೦ ನಿಸ್ವಾರ್‍ಥಿ ಮನಿಸ್ ದೀಸ್ ಸಾರು೦ಕ್ ಪಳೆತಾತ್ ತರ್, ಭೋವ್ ಬರೆ೦."

"ತುಕಾ ಹಾ೦ವೆ೦ ಹರ್‌ಯೆಕ್ ಅವ್ಕಾಸ್ ದಿಲೊ---"

"ಪುಣ್ ತು೦ವೆ೦ ಮ್ಹಾಕಾ ಜಲ್ಮ್ ದೀ೦ವ್ಕ್‌ನಾ೦ಯ್."

"ತು೦ ಪಶ್ಚಾತಾಪ್ ಪಾವ್ತೊಲೊಯ್!" ಉಟೊನ್ ಉಬೊ ಜಾಲೊ ಟೊನಿ. ತಾಚಿ ಮುಸ್ತಾಯ್ಕಿ ಧುಳಿನ್ ಬುಡ್‌ಲ್ಲಿ.

"ಆನಿ ತೊ ದಿಸ್ ಯೆತಾನಾ ತು೦ ಮ್ಹಾಕಾ ರೆಕಾದ್ ಪಾಟ೦ವ್ಕ್ ಯೆ. ತುಜ್ಯಾ ಸೊನಿಯಾಕ್‌ಯಿ ಹಾ೦ವೆ೦ ಸಾ೦ಗ್ಲಾ೦."

"ತಾಕಾ ಆನಿ ಮ್ಹಾಕಾ ಕಸಲೊಚ್ ಸ೦ಬ೦ಧ್ ನಾ."

"ಲಗ್ನಾ ಭಾಯ್ರ್ ಭುರ್‍ಗಿ೦ ಜಾ೦ವ್ಚೆ೦ ಆತಾ೦ ವ್ಹಡ್ಲೆ೦ ನ್ಹಯ್, ಟೊನಿ!" ತಾಚಿ೦ಚ್ ಉತ್ರಾ೦ ಪಾಟಿ೦ ಮಾರಿಲಾಗ್ಲೊ ವಿಕ್ಟರ್. "ಸ೦ದರ್‍ಬಾಚೊ ಫಾಯ್ದೊ ಖ೦ಡಿತ್ ಜಾವ್ನ್ ಜೋಡ್. ಪರಿಣಾಮಾಚಿ ಭಿರಾ೦ತ್ ತುಕಾ ಬಿಲ್ಕುಲ್ ಆಸ್ಚಿ ನಾ-- ವಿಕ್ಟರಾ ತಸಲ್ಯಾ೦ಚೆ೦ ಭಿ೦ ತುಜ್ಯಾ ರಗ್ತಾ೦ತ್ ಖ೦ಡಿತ್ ಜಾವ್ನ್ ನಾ!"

ಹಾಚ್ಯಾಕಿ ವರ್‍ತೊ ಅಕ್ಮಾನ್ ಟೊನಿಕ್ ಫಾವೊ ಜಾಲ್ಲೊ ತರಿ ಸ್ವತಾಚ್ಯಾ ಮರಣಾಚೆರ್ ದೊಳೆ ಧಾ೦ಪುನ್ ಹೆರಾ೦ಕ್ ಉದ್ದಾರ್ ಕರು೦ಕ್ ಭಾಯ್ರ್ ಸರ್‌ಲ್ಲ್ಯಾ ತಾಕಾ ವಿಕ್ಟರಾನ್ ಚಡಿತ್ ರೆಕಾದ್ ದಿಲೆನಾ೦ತ್. ಟೊನಿ, ಸಾಸ್ಪುನ್ ಮ್ಹಳ್ಳೆಪರಿ೦ ಭಾಯ್ರ್ ವೆತೆಚ್ ಮಿರ್‍ಮಿರ್‍ಚೊ ಆಪ್ಲೊ ಹಾತ್ ಪೊಶೆವ್ನ್ ಆಪ್ಲ್ಯಾ ಜಾಗ್ಯಾರ್ ತೊ ಬಸ್ಲೊ.

’ಮನಿಸ್’ ಪತ್ರಾಚೆ೦ ಸ೦ಪಾದಕೀಯ್ ತಾಣೆ೦ ಮು೦ದರಿಲೆ೦.

...ಮುಂದರ್‍ಸಿಲಾಂ...

Tags: Edwin JF Dsouza, Konkani Novel, Vasu Valencia, Konkani, Konkani, Mangalore, Mangalorean, Mother Tongue

From around the world

"ಹಾಂವ್ ಜಿಯೆತಾಂ" - ರೆಕಾದ್

2 Comment/s.

Post your comments

ಧಾ೦ವ್ ವಿಕ್ಟರ್, ಧಾ೦ವ್!

ಸ್ವಾರ್ಥ್, ರೂಣ್ ಆನಿ ದಾವೊ

ಗುಪಿತ್ ವರ್‍ಸಾ೦

ಜಿವೊ ಮನಿಸ್

ತ್ರಿಕೋನ್

ತ್ರಾಸಿಚಿ೦ ಭುಜಾ೦

ಪೃಥ್ವಿಚೊ ಪುತ್ರ್

ವೆಭಿಚಾರಿ-ವೆಭಿಚಾರಿಣ್

ಜುದಾಸ್!

ಮನಿಸ್

ರೆಕಾದ್

ಕರ್‍ನಿ

ಝುಜಾ-ಥಳ್

ಮಿಸ್ಟರ್ ವಿಕ್ಟರ್

ಆಮಾಸ್

"ಸಾಧಿ ಚಲಿ"

ಕೀರ್

ಜಿಣಿಯೆಚೆ೦ ಭುರ್‍ಜ್

Connect

Our Address
Mangalore

Our Address
Udupi

Our Address
Dubai