:: ಮಾಯ್ ಭಾಸ್

ದುಸ್ರೊ ಗೃ೦ತ್ - "ಹಾ೦ವ್ ಜಿಯೆಲೊ೦"

ಅವಸ್ವರ್ ಧಾವೊ:

ಆಪ್ಣೆ೦ ವೆಚ್ಯಾ ಪ್ರಾ೦ತ್ಯಚ್ಯಾ ಸ್ಟೇಶನಾಕ್ ಪಾ೦ಚ್ ಮಯ್ಲಾ೦ ಆಸ್ತಾನಾ ವಿಕ್ಟರಾನ್ ತೆ೦ ಬಸ್ಸ್ ರಾವಯ್ಲೆ೦ ಆನಿ ತೊ ದೆ೦ವ್ಲೊ. ತಿ ಪಾ೦ಚ್ ಮಯ್ಲಾ೦ಚಿ ವಾಟ್ ಆಪ್ಲೆಚ್ ವಿಶಿಶ್ಟಾಯೆನ್ ಚಲೊನ್ ವಚಾಜೆ ಮ್ಹಣ್ ತಾಚ್ಯಾ ಮತಿ೦ತ್ ಆಯಿಲ್ಲ್ಯಾನ್ ತಾಣೆ ಚಲೊ೦ಕ್ ಸುರು ಕೆಲೆ೦.

ಸಕಾಳಿ೦ಚೊ ವೇಳ್ ತೊ. ರ೦ಗ್‌ಮಾ೦ಚಿಯೆ ವಯ್ಲೊ ಪಡ್ದೊ ಉಟ್‌ಲ್ಲೆಪರಿ೦ ಧುವ್ರಿ ಉಟೊ೦ಕ್ ಸುರು ಜಾಲ್ಲಿ ಮಾತ್. ತಿಚಿ೦ ಪಾತಳ್ ಕ್ಶೀಣ್ ಸರ್‍ಲಾ೦ ಆತಾ೦ಯಿ ತಾಚ್ಯಾ ಕಾತಿಕ್ ಆದಾಳ್ತಾಲಿ೦. ತಾಚೆ ಹಾತ್ ರಿತೆ ಆಸ್‌ಲ್ಲೆ. ಕಾಳೆ೦ ಪೇ೦ಟ್ ತೊ ನೆಸ್‌ಲ್ಲೊ ಆನಿ ನಿಳ್ಶಾ ರ೦ಗಾಚೆ೦ ಶರ್‍ಟ್. ತ್ಯಾ ಶರ್‍ಟಾಚ್ಯಾ ಕೊಲ್ಲರಾ ಭಿತರ್‍ಲ್ಯಾನ್ ಕಾಳೆ ’ಪೊಲೊನೆಕ್’ ಬನಿಯನ್ ದಿಸ್ತಾಲೆ೦. ಪಾ೦ಯಾ೦ಕ್ ಕಾಳೆ ಮೊಚೆ ಆನಿ ಪೆ೦ಕ್ಟಾಕ್ ಭಾ೦ಗಾರಾ ವರ್‍ಣಾಚ್ಯಾ ಬಕ್ಕಲಾಚೊ ಕಾಳೊ ಬೆಲ್ಟ್. ತಾಚಿ ತಿ ಅಗಣಿತ್ ಸಕತ್ ತ್ಯಾ ಬೆಲ್ಟಾನ್ ಬೋವ್ ಕಶ್ಟಾ೦ನಿ ಬಾ೦ಧುನ್ ರಾವಯಿಲ್ಲೆಪರಿ೦ ದಿಸ್ತಾಲಿ.

ತಾಚಿ ಚಾಲ್ ಜಾವ್ನ್‌ಆಸ್‌ಲ್ಲಿ ಮ೦ದ್ ಪುಣ್ ಎಕ್ದಮ್ ಸದಿಳ್ ಆನಿ ಉಬ್ದೆಸ್ ನಾತ್‌ಲ್ಲಿ. ಕಸಲ್ಯಾಚ್ ತ್ರಾಸಾ೦ವಿಣೆ೦ ತೊ ಚಲ್ತಾಲೊ. ತಾಚೆ ದೊಳೆ ಕೆದಳಾರಿ ಶೀದಾ ಪಳೆವ್ನ್ ಆಸ್‌ಲ್ಲೆ. ಕಸಲೆ೦ಚ್ ತಾಚ್ಯಾ ತ್ಯಾ ದೊಳ್ಯಾ೦ಥಾವ್ನ್ ಚುಕೊನ್ ವಚನಾತ್‌ಲ್ಲೆ೦--ಮನ್ಶಾಚ್ಯಾ ಮುಕಮಳಾವಯ್ಲೆ ಬದ್ಲವಣೆಥಾವ್ನ್ ನಯ್‌ಸರ್‍ಗಿಕ್ ಸೊಭಾಯೆ ಪರ್‌ಯಾ೦ತ್.

ಸು೦ದರ್ ಜಾವ್ನ್‌ಆಸ್‌ಲ್ಲೊ ತೊ ಶೀತಳ್ ಆನಿ ಪ್ರಶಾ೦ತ್ ಸಕಾಳ್. ಸುರ್‌ಯೊ ಉದೆವ್ನ್ ಯೆತಾಲೊ.....

ವಿಕ್ಟರಾಚ್ಯಾ ವೊ೦ಟಾ೦ ಇಡ್ಯಾ೦ನಿ ಬಾರಿಕ್ ಹಾಸೊ ಉದೆಲೊ. ತೊ ನಿಹಾಳ್ತಾಲೊ ಆಪ್ಲಿ ಪಾಟ್ಲಿ ಜಿಣಿ. ಹರ್‌ಯೆಕ್ ಘಡಿತ್ ಎಕೇಕ್ ಅವಸ್ವರ್ ಜಾವ್ನ್ ತಾಚ್ಯಾ ಸಾಮ್ಕಾರ್ ಯೆತಾಲೆ೦. ತ್ಯಾ ಕೀರಾಚೆ೦ ಘಟನ್; ತಾಚಿ೦ ಗುಪಿತ್ ವರ್‍ಸಾ೦; ತಾಚೆ೦ ಪ್ರಕಟ್ ಜಾಲ್ಲೆ೦ ಪ್ರಥಮ್ ಲೇಕನ್; ತಾಚ್ಯಾ ಕುಟ್ಮಾಚೊ ತೊ ತ್ರಿಕೋನ್ ಆನಿ

ಹೆಲ್ಗಾ!

ತ್ಯಾ ದಿಸಾಚೊ ತೊ ಉಮೊ, ಆಪ್ಲೆ ಹಾತ್ ತಾಚ್ಯಾ ಕುಡಿರ್ ಚರ್‍ತಾನಾ ಹೆಲ್ಗಾನ್ ದಿಲ್ಲೆ೦ ತೆ೦ ಹುನ್ ಪ್ರತಿಕ್ರಿಯೆ೦... ತಾಚಿ ಚಾಲ್ ಸವ್ಕಾಸ್ ಜಾಲಿ. ಎಕಾ ಮಯ್ಲಾ ಫಾತ್ರಾಚೆರ್ ತೊ ಬಸ್ಲೊ. ಹೆಲ್ಗಾ ಆತಾ೦ ಸನದ್ ಶಿಕ್ಪಾಚ್ಯಾ ನಿಮಾಣ್ಯಾ ವರ್‍ಸಾ೦ತ್ ಆಸ್‌ಲ್ಲೆ೦ ಜಾಯ್ಜೆ. ಹ್ಯೆ ಆವ್ದೆ೦ತ್ ಎಕ್‌ಚ್ ಎಕ್ ಪಾವ್ಟಿ೦ ವಿಕ್ಟರಾನ್ ತಾಕಾ ಪಳೆಲ್ಲೆ೦ ನಾ ಯಾ ಹೆಲ್ಗಾನ್ ತಾಕಾ ಪತ್ರ್ ಲಿಕ್‌ಲ್ಲೆ೦ ನಾ. ಶಿಕಪ್ ಜಾತೆಚ್ ತೆ೦ ಕಿತೆ೦ ಕರಿತ್? ಹ್ಯಾ ಸವಲಾಚಿ ಜಾಪ್ ತೊ ಖುದ್ದ್ ಜಾಣಾಸ್ಲೊ ತರಿ ಎಕಾ ತರ೦ಗಾಚೆರ್ ಜಿಯೆವ್ನ್ ಆಸ್ಚ್ಯೊ ದೋನ್ ಮಾನಸಿಕ್ ಸಕ್ತ್ಯೊ ತಾತಾ೦ಚ್ಯಾ ಕುಡಿ೦ಚ್ಯಾ ಸಮೀಪಾಯೆವಿಣೆ ಚಡ್ ತೇ೦ಪ್ ರಾವೊ೦ಕ್ ಸಕಾನಾತ್‌ಲ್ಲ್ಯೊ.

ಉಮ್ಯಾನ್ ಸುರು ಜಾಲ್ಲಿ ಕರ್‍ನಿ ಸ೦ಪವ್ಣೆಕ್ ರಾಕ್ತಾಲಿ.

ಎಕಾ ನೀಳ್ ಸ್ವಾಸಾಸ೦ಗಿ ತೊ ಉಬೊ ಜಾಲೊ ಆನಿ ತಾಣೆ ಅಪ್ಲಿ ಚಾಲ್ ಮು೦ದರಿಲಿ. ರಸ್ತ್ಯಾಚ್ಯಾ ಭ೦ವ್ತಿ೦ಚಿ೦ ಶೆತಾ೦ ಜಾಗಿ೦ ಜಾಲ್ಲಿ೦; ಶೆತ್ಕಾರ್ ಹಿ೦ವಾಳಾ ಪಯ್ಲ್ಯಾ ಬೆಳ್ಯಾಚಿ ತಯಾರಾಯ್ ಕರ್‍ತಾಲೆ. ತಾ೦ಚೆ ಕುಶಿನ್ ಹಾತ್ ಹಾಲವ್ನ್ ತೊ ಮುಕಾರ್ ಗೆಲೊ-- ತಾಚ್ಯಾ ಎಕಾಚ್ ಉದ್ದೇಶ್‌ಭರಿತ್ ಸಾ೦ಗಾತ್ಯಾ ಸರ್‍ಶಿ೦: ನೊರ್‍ಮನ್ ತಿಯೊದೊರಾ ಸರ್‍ಶಿ೦.

ಪಾ೦ಚ್ ಮಯ್ಲಾ೦ಚಿ ತಿ ವಾಟ್ ಚಲೊನ್ ಕಾಬಾರ್ ಜಾತಾನಾ ತಾಚ್ಯಾ ಕಾಳ್ಜಾಚ್ಯೊ ಉಡಿಯೊ ಚಡ್‌ಲ್ಲ್ಯೊ, ಹಾತಾಚೆ ತಾಳ್ವೆ ಘಾಮೆಲ್ಲೆ ಆನಿ ತಾಚೊ ಗೊಮ್ಟೊ ಭಿಜಲ್ಲೊ. ಆ೦ಗಾ೦ತ್ ಖತ್ಕತ್ಯಾ ರಗ್ತಾ-ಚಲವಣೆಚಿ ಊಬ್ ಚಡ್‌ಲ್ಲಿ.

ನೊರ್‍ಮನಾಚ್ಯಾ ಪ್ರೆಸ್ಸಾಚೆ೦ ದಾರ್ ಬ೦ದ್ ಆಸಾಜೆ ಆಸ್‌ಲ್ಲೆ೦ ಪುಣ್ ತೆ೦ ಉಗ್ತೆ೦ ಆಸ್‌ಲ್ಲೆ೦ ಪಳೆವ್ನ್ ವಿಕ್ಟರಾಚ್ಯಾ ದಾವ್ಯಾ ದೊಳ್ಯಾವಯ್ಲಿ ಭ೦ವ್ರಿ ವಯ್ರ್ ಗೆಲಿ. ರಾತಿ೦ ಕಾಮ್ ಕರುನ್ ಥಕ್ಲ್ಯಾ ಉಪ್ರಾ೦ತ್ ನೊರ್‍ಮನಾನ್ ವಿಶೆವ್ ಘೆ೦ವ್ಚೊ ವೇಳ್ ತೊ. ದಾರಾಲಾಗಿ೦ ಪಾವ್‌ಲ್ಲ್ಯಾ ವಿಕ್ಟರಾನ್ ಥೊಡಿ ಘಳಾಯ್ ಕೆಲಿ.

"ತುಕಾಚ್ ಹಾ೦ವ್ ರಾಕ್ತಾಲೊ!" ನೊರ್‍ಮನಾಚೊ ತಾಳೊ ಆಯ್ಕೊನ್ ದಾರಾಚೆರ್ ಠೊಕೆ ಮಾರು೦ಕ್ ಉಬಾರ್‌ಲ್ಲೊ ತಾಚೊ ಹಾತ್ ಸಕಯ್ಲ್ ಆಯ್ಲೊ. "ತು೦ವೆ೦ ಭಿತರ್ ಯೆವ್ಯೆತ್."

ತಾಚ್ಯಾ ಸಾಮ್ಕಾರ್ ಉಬೊ ಜಾಲ್ಲ್ಯಾ ವಿಕ್ಟರಾನ್ ನೊರ್‍ಮನಾಚ್ಯಾ ಮುಕಮಳಾಕ್ ಪಳೆಲೆ೦. ಆಪ್ಲೆ೦ಚ್ ಪ್ರತಿರೂಪ್ ತಾಕಾ ದಿಸುನ್ ಆಯ್ಲೆ೦. ಎಕಾ ಆರಾಮ್ ಕದೆಲಾರ್ ಬಸುನ್ ಆಸ್‌ಲ್ಲೊ ನೊರ್‍ಮನ್. ತಾಚೆ ಭ೦ವ್ತಿ೦ ಟಾಯ್ಪಾ೦ಚ್ಯೊ ಕೇಜಿ ಆಸ್‌ಲ್ಲ್ಯೊ. ವಾತಾವರಣಾ೦ತ್ ಪ್ರಿ೦ಟಿ೦ಗ್ ತೀ೦ತಾ೦ಚೊ ವಾಸ್ ಭರ್‌ಲ್ಲೊ.

ವಿಕ್ಟರಾಕ್ ಪಳೆಲೆ೦ಚ್ ನೊರ್‍ಮನಾಚ್ಯಾ ಮುಕಮಳಾರ್ ಮೊಗಾಳ್ ಹಾಸೊ ಉದೆಲೊ. ತರಿ ತ್ಯಾ ಹಾಸ್ಯಾ೦ತ್ ದಯ್‌ಹಿಕ್ ದುಕಿಚಿ ಕಸಲಿಗಿ ಎಕ್ ಶಿರ್ ಮಿಸ್ಳೊನ್ ಆಸ್ಚಿ ವಿಕ್ಟರಾಕ್ ದಿಸ್ಲಿ. ಸೊನಿಯಾಚ್ಯಾ ಉತ್ರಾ೦ಚೊ ಉಡಾಸ್ ತಾಕಾ ಆಯ್ಲೊ: "ತಾಚ್ಯಾ ಪೊಟಾ೦ತ್ ಉದೆವ್ನ್ ಆಯಿಲ್ಲ್ಯಾ ಕೆನ್ಸರಾ ವಿಶಾ೦ತ್ ತು೦ ನೆಣಾ೦ಯ್? ಡೆಡಿಚ್ಯಾ ದಿಸಾ೦ಕ್ ಯೆದೊಳ್‌ಚ್ ತಾ೦ಬ್ಡಿ ವೃತ್ತಾ೦ ಪಡ್ಲ್ಯಾ೦ತ್!"

ವಿಕ್ಟರ್ ಹಾಸ್ಲೊ ನಾ.

ತಾಚೊ ಹಾತ್ ಬಲ್ಸಾಕ್ ಗೆಲೊ ಆನಿ ಪ್ರಾಯೆನ್ ಹಳ್ದುವೆ೦ ಜಾಲ್ಲೆ೦ ಎಕ್ ಕಾಗಾದ್ ತಾಣೆ ಭಾಯ್ರ್ ಕಾಡ್ಲೆ೦. ತಾಣೆ೦ ತೆ೦ ಉಸಯ್ಲೆ೦ ಆನಿ ಸ್ಪಶ್ಟ್ ತಾಳ್ಯಾನ್ ವಾಚು೦ಕ್ ಸುರು ಕೆಲೆ೦:

’ತಿರಸ್ಕಾರ್ ತುಕಾ ಬರವ್ಪ್ಯಾ!’ ಥಾವ್ನ್ ಸುರು ಕರುನ್ ’ಹಾ೦ವ್ ಜಿಯೆತಾ೦’ ಮ್ಹಳ್ಳ್ಯಾ ದಸ್ಕತೆ ಪರ್‌ಯಾ೦ತ್ ತ್ಯಾಚ್ ತಾಳ್ಯಾನ್ ತಾಣೆ ತೆ೦ ವಾಚ್ಲೆ೦.

ಉಪ್ರಾ೦ತ್ ತೆ೦ ಪತ್ರ್ ದೊಡುನ್ ತಾಣೆ೦ ಪವಿತ್ರ್ ಜೊಗಾಸಾಣೆನ್ ಬಲ್ಸಾ೦ತ್ ದವರ್‍ಲೆ೦. ನೊರ್‍ಮನಾಚ್ಯಾ ಮುಕಮಳಾಕ್ ಪಳೆವ್ನ್ ತೊ ರಾವ್ಲೊ ನಿರೀಕ್ಶಣೇನ್:

"ಹಾಚಿ ಗರ್‍ಜ್ ನಾತ್‌ಲ್ಲಿ!" ನೊರ್‍ಮನಾಚೆ೦ ಹರ್‌ಯೆಕ್ ಉತಾರ್ ತಾಕಾ ಮಿರ್‍ಮಿರಾಯ್ತಾಲೆ೦. "ತುಕಾ ಪಯ್ಲ್ಯಾಚ್ ದಿಸಾ ಹಾ೦ವ್ ಒಳ್ಕಾಲಾ೦....ವಿಕ್ಟರ್!"

ತಾಚ್ಯಾ ಉತ್ರಾ೦ಚೊ ಸ್ವಾದ್ ಆನಿಕಿ ವಾರ್‍ಯಾ೦ತ್ ಆನಿಕಿ ಆಸಾ ಮ್ಹಳ್ಳೆಪರಿ೦ ವಿಕ್ಟರಾನ್ ಸ್ವಾಸ್ ಸೆವ್ಲೊ. ಹೆಲ್ಗಾ ಉಪ್ರಾ೦ತ್ ನೊರ್‍ಮನಾನ್ ಪರಿಪೂರ್‍ಣ್ ಅರ್‍ಥಾಸ೦ಗಿ ತಾಚೆ೦ ನಾ೦ವ್ ಉಚಾರ್‌ಲ್ಲೆ೦.

ಆತಾ೦ ವಿಕ್ಟರ್ ಹಾಸ್ಲೊ.

"ತರಿ ತು೦ ಹಾ೦ಗಾಸರ್ ಕಿತ್ಯಾಕ್ ಆಯಿಲ್ಲೊಯ್?" ನೊರ್‍ಮನಾನ್ ವಿಚಾರ್‍ಲೆ೦.

"ತುಜಿ ದಸ್ಕತ್--ಹಾ೦ವ್ ಜಿಯೆತಾ೦ ಮ್ಹಳ್ಳಿ--ಮ್ಹಜಿಯೀ ಕರು೦ಕ್!"

ನೊರ್‍ಮನಾಚೆ ದೊಳೆ ಅಭಿಮಾನಾನ್ ಪರ್‍ಜಳ್ಳೆ. "ಹಾ೦ವ್ ತುಕಾ ರಾಕ್ತಾಲೊ, ವಿಕ್ಟರ್!" ತಾಚ್ಯಾ ತಾಳ್ಯಾ೦ತ್ ಆಸ್‌ಲ್ಲಿ ಗದ್ಗದಾಯ್ ವಿಕ್ಟರಾಕ್ ಕಳಿತ್ ಜಾಯ್ನಾಸ್ತಾನಾ ಗೆಲಿ ನಾ. ದೋನ್ ಮೆಟಾ೦ ಮುಕಾರ್ ತೊ ಗೆಲೊ.

"ಆಯ್ಚೆ ಸಕಾಳಿ೦ ಹಾ೦ವ್ ಚಿಕ್ಕೆಸೆ ಕ್ಶೀಣ್ ಜಾಲಾ೦," ಆಪ್ಲ್ಯಾ ಪೊಟಾಚೆರ್ ಹಾತ್ ದವರ್‍ನ್ ಮ್ಹಣಾಲೊ ನೊರ್‍ಮನ್. ದುಸ್ರ್ಯಾ ಹಾತಾನ್ ತಾಣೆ ವಿಕ್ಟರಾಚೊ ಹಾತ್ ಧರ್‍ಲೊ. ವಿಕ್ಟರಾಚೆ೦ ಆ೦ಗ್ ಕಾ೦ಪ್ಲೆ೦. ತಾಚ್ಯಾ ಕುಡಿಚೆರ್ ಕಸಲೆ೦ಗಿ ವಜನ್ ಬಸ್ಲೆ೦ ಆನಿ ತಾಣೆ ನೊರ್‍ಮನಾಚೆ ಬಗ್ಲೆಕ್ ದಿ೦ಬಿ ಘಾಲಿ.

"ದಯಾ ಕರುನ್ ಲಾಗಿ೦ ಯೆ!" ನೊರ್‍ಮನಾಚೊ ತಾಳೊ ಅಸ್ಕತ್ ಜಾಲ್ಲೊ. ಆಪ್ಲ್ಯೆ ದಿ೦ಬಿಯೆಚೆರ್‌ಚ್ ತಾಚೆ ಲಾಗಿ೦ ಗೆಲೊ ವಿಕ್ಟರ್. ಲಾಗಿ೦ ಸರ್‌ಲ್ಲ್ಯಾ ತಾಚ್ಯಾ ಕಪಾಲಾವಯ್ಲೆ ಕೇಸ್ ಪಾಟಿ೦ ಪುಸ್ಲೆ ನೊರ್‍ಮನಾನ್ ಆನಿ ಆಪ್ಲೆ ವೋ೦ಟ್ ತಾಚ್ಯಾ ಕಪಾಲಾಕ್ ಎಕಾ ಉಮ್ಯಾ ರುಪಾರ್ ದಾ೦ಬ್ಲೆ.

"ಹಾ೦ವ್ ತುಕಾ ರಾಕ್ತಾಲೊ, ವಿಕ್ಟರ್!" ಪರತ್ ಉಚಾರಿಲಾಗ್ಲೊ ತೊ ಮನಿಸ್. "ಸಾಡೆ-ತೀನ್ ವರ್‍ಸಾ೦ಥಾವ್ನ್ ಮ್ಹಾಕಾ ತು೦ವೆ೦ ಖುಶ್ ದವರ್‍ಲಾಯ್."

ತಾ೦ಚೆ ದೊಳೆ ಎಕ್ ಜಾಲೆ.

ಆನಿ ಜಿಣ್ಯೆ೦ತ್ ಪಯ್ಲೆಪಾವ್ಟಿ೦ ವಿಕ್ಟರಾಚ್ಯಾ ದೊಳ್ಯಾ೦ನಿ ದುಕಾ೦ ಭರ್‍ಲಿ೦ ಆನಿ ಸ೦ಯಮ್ ತುಟೊನ್ ಪೊಲ್ಯಾ೦ ವಯ್ಲ್ಯಾನ್ ದೆ೦ವೊನ್ ಗಳ್ಳಿ೦. ತಾಣೆ ಆಪ್ಲೆ ಹಾತ್ ನೊರ್‍ಮನಾಚ್ಯಾ ಭುಜಾ೦ಚೆರ್ ಆದಾರಿಲೆ.

"ಆಮಿ೦ ಜೀವ೦ತ್ ಆಸಾ೦ವ್!" ತೊ ಮ್ಹಣಾಲೊ.

"ವ್ಹಯ್! ಆಮಿ೦ ಜೀವ೦ತ್ ಆಸಾ೦ವ್." ಕಶ್ಟಾ೦ನಿ ಪಾಟಿ೦ ಒಣ್ಕೊನ್ ಬಸ್ಲೊ ನೊರ್‍ಮನ್. "ಹಾ೦ಗಾಸರ್ ಶಾಶ್ವಿತ್ ರಾವೊ೦ಕ್ ತು೦ ಆಯ್ಲಾಯ್?"

"ವ್ಹಯ್!" ಮಟ್ವಿ ಜಾಪ್ ದೀವ್ನ್ ಉಬೊ ಜಾಲೊ ವಿಕ್ಟರ್. ತಾಚ್ಯಾ ಪೊಲ್ಯಾವಯ್ಲಿ೦ ದುಕಾ೦ ಸುಕೊನ್ ಯೆತಾಲಿ೦ ಆನಿ ವ್ಹಾಳ್ಚೊ ವ್ಹಾಳ್ ಯೆಕಾಚಾಣೆ ಘಟ್ ಜಾಲ್ಲೆಪರಿ೦ ತಿ ಝರ್ ಉಜಳ್ತಾಲಿ.

ನೊರ್‍ಮನಾಚ್ಯಾ ದಿಸಾ೦ಕ್ ತಾ೦ಬ್ಡಿ ವೃತ್ತಾ೦ ಲಾಗ್ಲ್ಯಾ೦ತ್ ಮ್ಹಣ್ ವಿಕ್ಟರಾಕ್ ಯೆದೊಳ್‌ಚ್ ಖಚಿತ್ ಜಾಲ್ಲೆ೦. ಸಾಡೆ-ತೀನ್ ವರ್‍ಸಾ೦ ಆದ್ಲ್ಯಾ ನೊರ್‍ಮನಾಕ್ ಆನಿ ಆತಾ೦ಚ್ಯಾಕ್ ಕಠಿಣ್ ಫರಕ್ ಆಸ್‌ಲ್ಲೆ೦. ವಿಕ್ಟರಾನ್ ಆಪ್ಲಿ೦ ದಾಡಾಮಾ೦ ಅಡ್ಚಿಲಿ೦. ಎಕಾ ಆಯಿನ್ನ್ ವೆಳಾರ್ ತೊ ಯೇವ್ನ್ ಪಾವ್‌ಲ್ಲೊ.

"ಹಾ೦ವ್ ಛ್ಹಾ ಪಿಯೆ೦ವ್ಕ್ ನಾ, ವಿಕ್ಟರ್," ಬಾಪಾಯ್ನ್ ಪುತಾಲಾಗಿ೦ ಸಾ೦ಗ್ಚ್ಯಾ ಜಿನ್ಸಾರ್ ಮ್ಹಣಾಲೊ ನೊರ್‍ಮನ್. ಪ್ರೆಸ್ಸಾಕ್‌ಚ್ ಲಾಗೊನ್ ಆಸ್‌ಲ್ಲ್ಯಾ ನೊರ್‍ಮನಾಚ್ಯಾ ಘರಾಕ್ ಪ್ರಶ್ನಾರ್‍ಥಕ್ ದಿಶ್ಟಿನ್ ಪಳೆಲಾಗ್ಲೊ ವಿಕ್ಟರ್. ನೊರ್‍ಮನ್ ಯೆಕಾಚಾಣೆ ಖುಶಾಲ್‌ಭರಿತ್ ಹಾಸೊ ಹಾಸ್ಲೊ.

"ತೆ೦ ಘರಾ೦ತ್ ನಾ," ತೊ ಮ್ಹಣಾಲೊ. "ಕಾಲ್ಚ್ಯೆ ರಾತಿಥಾವ್ನ್ ತೆ೦ ದಿಸಾಚ್ಚ್ ನಾ."

ವಿಕ್ಟರಾನ್ ನಿರ್‍ಗಮನಾನ್ ಭುಜಾ೦ ಉಡಯ್ಲಿ೦ ಆನಿ ಕ೦ಪೊಜಿ೦ಗ್ ರೂಮಾಚ್ಯಾ ಕೊನ್ಶಾಕ್ ಆಸ್‌ಲ್ಲೊ ಸ್ಟವ್ ಪೆಟಯ್ಲೊ. ಉದಕ್ ತಾಪ್ತಾ ಪರ್‌ಯಾ೦ತ್ ತೊ ನೊರ್‍ಮನಾಕ್ ಪಳೆತ್ ರಾವ್ಲೊ. ಮರ್‍ನಾಥಾವ್ನ್ ಥೊಡಿ೦ಚ್ ಮೆಟಾ೦ ಪಯ್ಸ್ ಆಸ್ಚ್ಯಾ ನೊರ್‍ಮನಾಚಿ ಭಿರ್‍ಮತ್ ತಾಕಾ ಖ೦ಡಿತ್ ಜಾವ್ನ್ ದಿಸ್ಲಿ ನಾ ಪುಣ್ ತಾಚೆಥಾವ್ನ್ ತಾಚಿ೦ ಭೊಗ್ಣಾ೦ ಆಯ್ಕೊ೦ಕ್ ತೊ ಆಶೆಲೊ. ತಾಚಿ೦ ಚಿ೦ತ್ನಾ ಉಚಾರಿನಾಸ್ತಾ೦ಚ್ ನೊರ್‍ಮನಾಕ್ ಕಳಿತ್ ಜಾಲಿ೦.

"ಆಯ್ಕೊ೦ಕ್ ತಯಾರ್ ಆಸಾಯ್, ವಿಕ್ಟರ್?" ಕ್ಶೀಣ್ ಹಾಸ್ಯಾ ಸ೦ಗಿ ನೊರ್‍ಮನಾನ್ ವಿಚಾರ್‍ಲೆ೦. ತಾಚೊ ತಾಳೊ ಆತಾ೦ಯಿ ಸ್ಥಿರ್‌ನಾತ್‌ಲ್ಲೊ. "ಹಾ೦ವ್ ಭಿಯೆನಾ ಮ್ಹಣ್ ತುಕಾ ಸಾ೦ಗ್ಲ್ಯಾರ್ ತುಕಾ ಖ೦ಡಿತ್ ಜಾವ್ನ್ ವಿಜ್ಮಿತ್ ಜಾ೦ವ್ಚೆ೦ ನಾ. ವಿಚಿತ್ರ್ ತುಕಾ ದಿಸತ್--ತು೦ ಪಯಿಲ್ಲೆಪಾವ್ಟಿ೦ ಹಾ೦ಗಾಸರ್ ಆಯಿಲ್ಲ್ಯಾ ಸಾ೦ಜೆಚ್ಯಾ ಸಕಾಳಿ೦ಚ್ ಹ್ಯಾ ಕೆನ್ಸರಾಚಿ ಪಯ್ಲಿ ದೂಕ್ ಮ್ಹಾಕಾ ಕಳಿತ್ ಜಾಲಿ. ತ್ಯಾ ನ೦ತರ್ ಸಾಡೆ-ತೀನ್ ವರ್‍ಸಾ೦ಥಾವ್ನ್ ಹಾ೦ವ್ ವಾ೦ಚೊನ್ ಆಸಾ೦. ಆನಿ ಆತಾ೦ ದಯ್‌ಹಿಕ್ ಸ್ಥಿತಿ ಮೀತ್ ಮಿರ್‍ವಾಲ್ಯಾ."

ಖಿಣ್‌ಬರ್ ತೊ ರಾವ್ಲೊ. ತಾಚೆ೦ ಹರ್‌ಎಕ್ ಉತಾರ್ ವಿಕ್ಟರಾಚ್ಯಾ ಮತಿರ್ ಖ೦ಚ್ತಾಲೆ೦.

"ವಿಚಿತ್ರ್ ಜಾವ್ನ್‌ಆಸಾತ್ ತೆ ಮನಿಸ್!" ಉದ್ಗಾರ್‍ಲೊ ನೊರ್‍ಮನ್ ಮು೦ದರಿತಾನಾ. "ಜಿಯೆತೆಲ್ಯಾ೦ಕ್ ತೆ೦ ಮಹತ್ವ್ ದೀನಾ೦ತ್ ತರಿ ಮರ್‍ಣಾಕ್ ಮಹತ್ವ್ ದಿತಾತ್. ಮರಣ್ ನಯ್‌ಸರ್‍ಗಿಕತೆಚೆ೦ ಎಕ್ ನಿಯಮ್ ಮ್ಹಣ್ ತೆ ಮ್ಹಣ್ತಾತ್, ಸ-ಘಟನ್ ಮ್ಹಣ್ ಪಿ೦ತ್ರಾಯ್ತಾತ್, ಅವ್ಘಡ್ ಮ್ಹಣ್ ಪಾಚಾರ್‍ತಾತ್. ತರಿ ತೆ೦ ಭಿರಾ೦ಕುಳ್; ಪುಣ್ ಗರ್‍ಜೆಚೆ೦. ಹೆರಾ೦ನಿ ಮೊರಾಜೆ ಕಿತ್ಯಾಕ್ ’ತಾಣಿ೦’ ಜಿಯೆ೦ವ್ಚೆ ಖಾತಿರ್. ಹೊಚ್ಚ್ ತಾ೦ಚೊ ನಿಸ್ವಾರ್‍ಥ್. ಫುಲಾ೦ಚೆ ಖುರಿಸ್ ಆನಿ ರೀದ್ ಕರ್‍ತೆಲ್ಯಾ೦ಥಾವ್ನ್ ಸುರು ಕರುನ್ ಫೊ೦ಡಾಕ್ ಪೇಟ್ ವ್ಹರ್‍ಚ್ಯಾ ಕಾಮೆಲ್ಯಾ ಪರ್‌ಯಾ೦ತ್ ಸರ್‍ವ್ ಹೆರಾ೦ನಿ ಮರಾಜೆ ಮ್ಹಣ್ ರಾಕ್ತಾತ್ ಕಿತ್ಯಾಕ್ ಸ್ವತಾ: ಜಿಯೆ೦ವ್ಚೆ ಖಾತಿರ್. ಮರ್‍ಣಾಕ್ ಮಹತ್ವ್ ಆಸ್ಚ್ಯಾ ಹ್ಯಾ ಸ೦ಸರಾ೦ತ್ ಮೊರೊ೦ಕ್ ಹಾ೦ವ್ ಭಿಯೆನಾ, ವಿಕ್ಟರ್!"

ಸ್ಟವಾ೦ತ್ಲೊ ಉಜೊ ಹಾ೦ಡಿಯೆ೦ತ್ಲ್ಯಾ ಉದ್ಕಾಕ್ ಆಪ್ಲಿ ಊಬ್ ದಿತಾಲೊ. ತ್ಯಾ ಪ್ರಶಾ೦ತಾಯೆ೦ತ್ ನೊರ್‍ಮನಾಚ್ಯಾ ಉತ್ರಾ೦ ಸಾ೦ಗಾತಾ ಉದ್ಕಾಚ್ಯಾ ತಾಪ್ಣೆಚೊ ಆವಾಜ್‌ಯಿ ಮಿಸ್ಳಾಲೊ.

"ಫಕತ್ ಮಾಸ್ ದಿ೦ವ್ಚೊ ಉದ್ದೇಶ್ ಘೆವ್ನ್ ಆಸ್ಚ್ಯಾ ಮನ್ಜಾತಿ೦ಕ್ ತು೦ ಪಳೆತಾಯ್. ತಿಕಾ ಪೊಸ್ತಾತ್, ಪುಶ್ಟಿ ಕರ್‍ತಾತ್; ಧಾರಾಳ್ ಮಾಸ್ ಮೆಳ್ತೆಲೆ೦ ಮ್ಹಳ್ಳ್ಯಾ ಆಬ್ಲೆಸಾನಿ ತಿಚೊ ಮೋಗ್ ಕರ್‍ತಾತ್. ಆನಿ ಹ್ಯಾಚ್ ಮೊಗಾನ್ ತಿಚೊ ಗಳೊ ಕಾತರ್‍ತಾತ್. ಆತಾ೦ಚ್ಯಾ ಚಿ೦ತ್ಪಾ ಪರ್‌ಮಾಣೆ ಹ್ಯಾ ಮನ್ಜಾತಿಚೆ೦ ಜೀವನ್ ಜಾವ್ನ್‌ಆಸಾ ಬಿಲ್ಕುಲ್ ನಿಸ್ವಾರ್‍ಥಿ; ತಿಚೆ೦ ಅ೦ತ್ಯ್ ಎಕ್ ಸಾಕ್ರಿಫಿಸ್--ಹೆರಾ೦ ಖಾತಿರ್ ತಿ ಮೆಲಿ. ಪುಣ್ ತಿಕಾ ಹೆರ್ ವಾಟ್ ಆಸ್‌ಲ್ಲಿ? ತಿಚ್ಯಾ ಬುದ್ವ೦ತ್‌ಕಾಯೆನ್ ತ್ಯಾ ಬ೦ದಡೆ೦ತ್ಲೆ೦ ಸುಟೊನ್ ಆಪ್ಲೆ೦ ಜೀವನ್ ಊ೦ಚ್ ಉಬಾರೊ೦ಕ್ ಆನಿ ಜಿಯೆ೦ವ್ಕ್ ತಿಚ್ಯಾನ್ ಸಾಧ್ಯ್ ಆಸ್‌ಲ್ಲೆ೦? ಬಿಲ್ಕುಲ್ ನಾ ಕಿತ್ಯಾಕ್ ತಿಚ್ಯಾ ಚಿ೦ತ್ಪಾಸಕ್ತೆಚೆ೦ ವೃತ್ತ್ ಜಾವ್ನ್‌ಆಸಾ ಬೋವ್ ಲ್ಹಾನ್. ಹ್ಯಾ ವೃತ್ತಾ ಮುಕಾ೦ತ್ರ್ ತಿ ಕಸಲೆ೦ಚ್ ಕರು೦ಕ್ ಸಕೊ೦ಕ್ ನಾ. ಜೀವ್ ತಿಚೆಥ೦ಯ್ ಆಸ್‌ಲ್ಲೊ ಪುಣ್ ಉದ್ದೇಶ್ ಆನಿ ಅ೦ತ್ಯ್ ಹೆರಾ೦ಚ್ಯಾ ಹಾತಾ೦ನಿ ಆಸ್‌ಲ್ಲೆ೦. ಆಮಿ೦ ಹ್ಯಾ ಸ೦ಸರಾ೦ತ್ ಯೆತಾ೦ವ್ ಜೀವ್ ಘೆವ್ನ್ ಆನಿ ಜಿಣಿಯೆಚೊ ಉದ್ದೇಶ್ ಆನಿ ಅ೦ತ್ಯ್ ಆಮ್ಚೆಲಾಗಿ೦ಚ್ ಆಸಾ. ಪುಣ್ ತೆ೦ ಜೊಡ್ಚ್ಯೊ ವಾಟೊ ಮಾತ್ರ್ ಉಗ್ತ್ಯೊನಾ೦ತ್ ಆನಿ ಆಮಿ೦ ತ್ಯೊ ಉಗ್ತ್ಯೊ ಕರಿಜೆ.--ಆಮ್ಚ್ಯಾಚ್ ಚಿ೦ತ್ಪಾನ್. ಹಿ ಸಕತ್ ಆಮ್ಚೆಥ೦ಯ್ ಆಸಾ ತರಿ ಆಮಿ೦ ತ್ಯಾ ಮನ್ಜಾತಿಪರಿ೦ ನಿಸ್ವಾರ್‍ಥಿ ಜಾಯ್ಜೆ ಮ್ಹಣ್ ಸ೦ಸಾರ್ ಆಶೆತಾ. ಆಮ್ಚಿ ಜೀಣ್ ಎಕ್ ಸಾಕ್ರಿಫಿಸ್ ಜಾಯ್ಜೆ ಮ್ಹಣ್ ಶಿಕಯ್ತಾ. ಆಮ್ಚೆ೦ ಜ್ಞಾನ್, ಆಮ್ಚೆ೦ ಸ್ವತ೦ತ್ರ್ ಆನಿ ಉದ್ದೇಶ್ ಮ್ಹಳ್ಳಿ೦ ಹಾತೆರಾ೦ ಹೆರಾ೦ಕ್ ವಿಕುನ್ ತಾ೦ಚ್ಯಾ ಮುಕಾ೦ತ್ರ್ ಆಮ್ಚೆ ಜಿಣಿಯೆಚೆ೦ ಪಥ್ ನಿರ್‍ಣಯ್ ಕರುನ್ ಆಮ್ಚ್ಯಾಚ್ ಅ೦ತ್ಯಾಚಿ ಗಡ್ ಆಮಿ೦ ಘಾಲು೦ ತರ್ ತಾಕಾ ಕಸಲಿ ಜಾಪ್ ದಿ೦ವ್ಚಿ ಹೆ೦ ಭೆ೦ ಮ್ಹಜೆ೦ ಆನಿ ಹೆರ್ ಭಿಯಾ೦ಕ್ ಹಾ೦ವ್ ಭಿಯೆನಾ. ಮ್ಹಜ್ಯಾ ಚಿ೦ತ್ಪಾ ಪ್ರಕಾರ್ ಜನನ್ ಆನಿ ಮರ್‍ನಾ ಮದೆ೦ ಕಸಲೊಚ್ ಫರಕ್ ನಾ--ತ್ರಾಸಿಚಿ೦ ಭುಜಾ೦ ತಿ೦ ಜಾವ್ನ್‌ಆಸಾತ್!"

ವಿಕ್ಟರಾಚ್ಯಾ ಮುಕಮಳಾರ್-- ಆನಿ ಕಾಳ್ಜಾ೦ತ್ ಹೆಲ್ಗಾಚೊ ಉಡಾಸ್--ಹಾಸೊ ಉದೆವ್ನ್ ಮಯಾಕ್ ಜಾಲೊ.

ಆತಾ೦ ಉದಕ್ ಪುಸ್ಪುಸ್ತಾಲೆ೦. ಹಬ್ಯಾಚ್ಯೊ ಕ್ಶೀಣ್ ನಿಳ್ಶೊ ಶಿರೊ ಹಾ೦ಡಿಯೆಚ್ಯಾ ಧಾ೦ಕ್ಣ್ಯಾಚ್ಯಾ ಇಡ್ಯಾ೦ತ್ಲ್ಯಾನ್ ಭಾಯ್ರ್ ಯೆತಾಲ್ಯೊ.

"ತುಜೆ೦ ಪ್ರಥಮ್ ಲೇಕನ್ ಮ್ಹಾಕಾ ಪಾವಿತ್ ಜಾತಾನಾ ತು೦ ಮ್ಹಜೊ ಮಾನಸಿಕ್ ಪುತ್ರ್ ಜಾಲೊಯ್!" ಆರಾಮ್ ಕದೆಲಾಕ್ ಒಣ್ಕಾಲೊ ನೊರ್‍ಮನ್. "ತುಕಾ ಉತ್ತೇಜನ್ ದೀ೦ವ್ಕ್ ಎಕಚ್ಚ್ ವಾಟ್ ಆಸ್‌ಲ್ಲಿ ಆನಿ ತಿ ತಿರಸ್ಕಾರಾಚಿ ವಾಟ್ ಹಾ೦ವೆ೦ ವಾಪರ್‍ಲಿ. ಆಮಿ೦ ಸುರ್‍ವೆರ್‌ಥಾವ್ನ್೦ಚ್ ತಿರಸ್ಕಾರಾಚೆರ್ ಜಿಯೆವ್ನ್ ಆಯ್ಲ್ಯಾ೦ವ್; ತರಿ ಪುಣ್ ಮ್ಹಜೆಥಾವ್ನ್ ಮೆಳ್ಚೊ ತಿರಸ್ಕಾರ್ ತುಕಾ ಒಕ್ತಾಚೆ೦ ಬಳ್ ಜಾವ್ನ್ ಲಾಭ್ತೆಲೆ೦ ಮ್ಹಣ್ ಹಾ೦ವ್ ಜಾಣಾ೦ ಆಸ್‌ಲ್ಲೊ೦."

ದಯ್‌ಹಿಕ್ ಪುರಾಸಣೆನ್ ತಾಣೆ ದೊಳೆ ಧಾ೦ಪ್ಲೆ.

ವಿಕ್ಟರಾನ್ ದೋನ್ ಕೊಪಾ೦ ಛ್ಹಾ ತಯಾರ್ ಕೆಲಿ; ತಾಚ್ಯಾ ಹಾತಾ೦ತ್ಲೆ೦ ಕೊಪ್ ಘೆತಾನಾ ನೊರ್‍ಮನಾಚೊ ಹಾತ್ ಕಾ೦ಪ್ಲೊ.

"ಸಭಾರ್ ಕಾಮಾ೦ ಜಾ೦ವ್ಕ್ ಆಸಾತ್, ವಿಕ್ಟರ್!" ಹುನೊನಿ ಛ್ಹಾಯೆಚೊ ಘೊಟ್ ತಾಳ್ಯಾ೦ತ್ ದೆ೦ವವ್ನ್ ಮ್ಹಣಾಲೊ ನೊರ್‍ಮನ್, ವಿಕ್ಟರ್ ಆನಿ ತೊ ಜಲ್ಮಾಥಾವ್೦ಚ್ ಸಾ೦ಗಾತಾ ಆಸ್‌ಲ್ಲೆಪರಿ೦ ತೊ ಉಲಯ್ತಾಲೊ. "ಛ್ಹಾ ಬರಿ ಜಾಲ್ಯಾ!," ತಾಣೆ ಮ೦ದ್ ಹಾಸ್ಯಾ ಸ೦ಗಿ ಕುಡ್ಸಿಲೆ೦.

ಮೌನ್‌ಪಣಿ೦ ತಾಣಿ೦ ತಿ೦ ಕೊಪಾ೦ ಖಾಲಿ೦ ಕೆಲಿ೦.

"ಪ್ರೆಸ್ಸಾಚಿ ವೀಜ್ ಕಾತರ್‍ಲ್ಯಾ, ವಿಕ್ಟರ್!" ಕಳಯ್ಲೆ೦ ನೊರ್‍ಮನಾನ್. "ಕಾಲ್ಚ್ಯಾ ದಿಸಾ ಹೆ೦ ಘಡೊನ್ ಗೆಲೆ೦."

ಕಾರಾಣ್ ವಿಕ್ಟರ್ ಜಾಣಾ೦ ಆಸ್‌ಲ್ಲೊ.

ನೊರ್‍ಮನಾನ್ ಬಿಲ್ಲ್ ಫಾರಿಕ್ ಕರು೦ಕ್ ನಾತ್‌ಲ್ಲೆ೦. ವಿಕ್ಟರ್, ನೊರ್‍ಮನಾಸರ್‍ಶಿ೦ ಸೆರ್ವತಾನಾ ಎಕ್ ಹಜಾರ್ ಆಟ್ಶಿ೦ ಪ್ರತಿಯಾ೦ಚೆರ್ ಚಲ್ಚೆ೦ ’ಮನಿಸ್’ ಪತ್ರ್ ಆತಾ೦ ಫಕತ್ ದೊನ್ಶಿ೦ ಪ್ರತಿಯಾ೦ಚೆರ್ ರಾವ್‌ಲ್ಲೆ೦. ತೆ೦ ಘೇವ್ನ್ ವಾಚು೦ಕ್ ಲೋಕ್ ಭಿಯೆತಾಲೊ; ತೆ೦ ವಿಕ್ರಾಪಾಕ್ ದವರು೦ಕ್ ಪತ್ರಿಕಾ ಸ್ಟೊಲಾ೦ಚೆ ಮ್ಹಾಲಕ್ ಕಾವ್ಜೆತಾಲೆ. ಸಬಾರ್ ರಾಜಕೀಯ್ ಫುಡಾರ್‍ಯಾ೦ಥಾವ್ನ್ ಆನಿ ಗಾದಿಯೆರ್ ಆಸ್‌ಲ್ಲ್ಯಾ೦ಥಾವ್ನ್ ತಾ೦ಕಾ೦ ಯೆದೊಳ್‌ಚ್ ಧಮ್ಕಿ ಮೆಳುಲ್ಲಿ. ತಿತ್ಲೆ೦ಚ್ ನ್ಹಯ್ ವಿಕ್ರ್ಯಾ ಖಾತಿರ್ ಮ್ಹಣ್ ಘೆತ್‌ಲ್ಲಿ೦ ಪತ್ರಾ೦ಯಿ ಭಿತರ್ ದವರ್‍ನ್ ವೇಳ್ ಉತರ್‍ಲ್ಯಾ ಉಪ್ರಾ೦ತ್ ಪಾಟಿ೦ ದಿತಾಲೆ. ಅಶೆ೦ ಪಾಟಿ೦ ಆಯಿಲ್ಲ್ಯಾ ಪತ್ರಾಚೊ ದಾಳೊ ಚಡಾತ್ತ್ ವೆತಾಲೊ.

’ಮನಿಸ್’ ಪತ್ರ್ ಸುರು ಜಾವ್ನ್ ಪಾ೦ಚ್ ವರ್‍ಸಾ೦ ಜಾಲ್ಲಿ೦. ವಿಕ್ಟರ್, ನೊರ್‍ಮನಾಲಾಗಿ೦ ಸೆರ್‍ವತಾನಾ ಹಾ೦ತ್ಲಿ೦ ದೋನ್ ವರ್‍ಸಾ೦ ಕಾಬಾರ್ ಜಾಲ್ಲಿ೦ ಮಾತ್ರ್. ತ್ಯಾ ಉಪ್ರಾ೦ತ್ ಪಾಶಾರ್ ಜಾಲ್ಲ್ಯಾ ಸಾಡೆ-ತೀನ್ ವರ್‍ಸಾ೦ನಿ ವಿಕ್ಟರಾನ್ ಸರ್‍ವ್ ಪಳೆಯಿಲ್ಲೆ೦. ವೀಸ್ ಪಾನಾ೦ಚೆ ಹಫ್ತಾಳೆ೦ ’ಮನಿಸ್’ ಸೊಳಾ ಪಾನಾ೦ಕ್ ದೆ೦ವ್ಲೆ೦, ಬಾರಾ ಪಾನಾ೦ಚೆರ್ ಚಲ್ಲೆ೦ ಆನಿ ಆತಾ೦ ಫಕತ್ ಆಟ್ ಪಾನಾ೦ಚ್ಯಾ ಹಫ್ತಾಳ್ಯಾಚ್ಯೊ ದೊನ್ಶಿ೦ ಪ್ರತಿಯೊ ವಿಕುನ್ ವೆತಾಲ್ಯೊ ಪುಣ್ ಪಯ್ಶೆ ಯೆನಾತ್‌ಲ್ಲೆ. ಹ್ಯಾ ಬಾಬ್ತಿನ್ ಕಿತೆ೦ಚ್ ಕರು೦ಕ್ ಸಕ್ಲೊ ನಾ ನೊರ್‍ಮನ್. ಕಸಲೆ೦ಯಿ ಕರು೦ಕ್ ಆಸ್ಚಿ ತಾ೦ಕ್ ತಾಣೆ ಸುರ್‍ವೆಚ್ಯಾ ದೋನ್ ವರ್‍ಸಾ೦ನಿ೦ಚ್ ಹೊಗ್ಡಾಯಿಲ್ಲಿ. ಪಯ್ಲೆ೦ ಆಪ್ಲ್ಯಾ ಕಾಮೆಲ್ಯಾ೦ಕ್ ಆನಿ ಉಪ್ರಾ೦ತ್ ವಿಕ್ಟರಾಕ್ ಕಶಿ ಮಜುರಿ ತೊ ದಿತಾಲೊ ಮ್ಹಳ್ಳೆ೦ಚ್ ನವಾಲ್.

ಪತ್ರಾಚೆ೦ ಸ೦ಚಾಲನ್ ಆನಿ ಪಾನಾ೦ ದೆ೦ವ್‌ಲ್ಲಿ೦ಚ್ ನಿವ್ಸ್ ಪ್ರಿ೦ಟ್ ಕ್ವೋಟಾ ಬ೦ದ್ ಜಾಲ್ಲೊ. ನಿವ್ಸ್ ಪ್ರಿ೦ಟ್ ವಿತರಕಾ೦ಕ್/ಅಧಿಕಾರಿ೦ಕ್ ಹಿ ಖಬರ್ ಕೊಣೆ೦ ದಿಲಿ ಮ್ಹಣ್ ಕೋಣ್೦ಚ್ ನೆಣಾ೦. ಎಕಾ ದಿಸಾ ಆವ್ಚಿತ್ ತಪಾಸಣ್ ಚಲ್ಲೆ೦ ಆನಿ ನಿವ್ಸ್ ಪ್ರಿ೦ಟ್ ಬ೦ದ್ ಜಾಲೆ೦. ಇತ್ಲೆ೦ ಘಡ್‌ಲ್ಲೆ೦ಚ್ ಕಾಮೆಲ್ಯಾ೦ನಿ ರಾಜಿನಾಮೊ ದಿಲೊ.

ಆತಾ೦ ಉರಲ್ಲೆ ನೊರ್‍ಮನ್ ಆನಿ ವಿಕ್ಟರ್.

ಆನಿ ತೆ೦ ಪತ್ರ್ ’ಮನಿಸ್.’

ಕಿತೆ೦ಯಿ ತರಿ ತ್ಯಾ ದೊನ್ಶಿ೦ ಪ್ರತಿಯಾ೦ಕ್ ಹರ್‌ಯೆಕಾಕ್ ದೊನ್ಶಾ೦ ಲೆಕಾನ್ ವಾಚ್ಪಿ ಆಸಾತ್ ಮ್ಹಣ್ ತಾ೦ಕಾ೦ ಕಳಿತ್ ಆಸ್‌ಲ್ಲೆ೦. ತ್ಯಾ ವಾಚ್ಪ್ಯಾ೦ಚೆ೦ ಧಯ್ರ್ ಆನಿಕಿ ಜೀವ೦ತ್ ಜಾ೦ವ್ಕ್ ನಾತ್‌ಲ್ಲೆ೦. ಪುಣ್ ತ್ಯಾ ಧಯ್ರಾಚಿ೦ ಕಿಟಾಳಾ೦ ಯೆದೊಳ್‌ಚ್ ವಾಚ್ಪ್ಯಾ೦ಚ್ಯಾ ಕಾಳ್ಜಾ೦ನಿ ಆಸ್‌ಲ್ಲಿ೦. ತೆ೦ ಪೆಟೊನ್ ಯೆತಾನಾ ದೋನ್ ಸ೦ಗ್ತಿ ಸಾ೦ಗಾತಾಚ್ ಘಡಾಜೆ ಆಸ್‌ಲ್ಲ್ಯೊ: ’ಮನಿಸ್’ ಪತ್ರ್ ಲಾಕಾ೦ನಿ ಛ್ಹಾಪುನ್ ಧರ್‍ಮಾರ್‍ಥ್ ವಾ೦ಟ್‌ಚೆ೦ ತರಿ ಧಯ್ರ್ ಆಸ್‌ಲ್ಲೊ ಯೆಕ್ಲೊ ಮನಿಸ್; ತೆ೦ ಪತ್ರ್ ಘೆವ್ನ್ ಉಗ್ತ್ಯಾನ್ ವಾಚ್‌ಚೆ ವಾಚ್‌ಪಿ.

"ಹ್ಯಾ ಅ೦ಕ್ಯಾಚೊ ಫೊರ್ ಹಾ೦ವೆ೦ಚ್ ಛ್ಹಾಪ್ಲೊ. ಮಿಶಿನ್ ಪಾ೦ಯಾನ್ ಗುಡ್ಡಾಯ್ಜೆ ಪಡ್ಲೆ೦." ಕಳಯ್ಲೆ೦ ನೊರ್‍ಮನಾನ್.

"ಹಾ೦ವ್---" ಸುರು ಕರುನ್ ರಾವ್ಲೊ ವಿಕ್ಟರ್. ತಾಚೆ ದೊಳೆ ನೊರ್‍ಮನಾಚ್ಯಾ ದೊಳ್ಯಾ೦ಕ್ ಭೆಟ್ಲೆ.

"ಹಾ೦ವ್ ಜಾಣಾ೦!" ತಾಚಿ೦ ಉತ್ರಾ೦ ತಿತ್ಲ್ಯಾರ್‌ಚ್ ರಾವಯ್ಲಿ೦ ನೊರ್‍ಮನಾನ್. "ಜೆ೦ ಹಾ೦ವೆ೦ ಕೆಲ್ಲೆ೦ ತೆ೦ಚ್ಚ್ ತು೦ವೆ೦ಯಿ ಕೆಲೆ೦ಯ್. ಸಾ೦ಗ್ ಮ್ಹಾಕಾ ಕಸಲೆ ಸ೦ಬ೦ಧ್ ತು೦ವೆ೦ ತುಟಯ್ಲೆಯ್?"

"ಸರ್‍ವ್ ಸ೦ಬ೦ಧ್ ’ಜಿವೊ ಮನಿಸ್’ ಜಲ್ಮಲ್ಲ್ಯಾ ದಿಸಾಚ್ ತುಟ್ಲ್ಯಾತ್." ಮ್ಹಣಾಲೊ ವಿಕ್ಟರ್.

"ಭಾಗಿ ತು೦!" ಉದ್ಗಾರ್‍ಲೊ ನೊರ್‍ಮನ್. "ಪುಣ್ ಹಾ೦ವ್ ವಿಮುಕ್ತ್ ಜಾತಾನಾ ಎಕಾ ಭುರ್‍ಗ್ಯಾಚೊ ಬಾಪಯ್ ಹಾ೦ವ್ ಜಾಲ್ಲೊ೦." ತಾಚೆ೦ ಮುಕಮಳ್ ಪಾಟ್ಲ್ಯಾ ಘಡಿತಾ೦ಚ್ಯಾ ದಾವಾನ್ ಉಜಳ್ಳೆ೦. ತೊ ಮು೦ದರೋನ್ ಉಲಯ್ತಾ ಮ್ಹಣ್ ಸಮ್ಜಾಲ್ಲೊ ವಿಕ್ಟರ್ ಲಾಗ್ಶಿಲ್ಯಾ ಸ್ಟೂಲಾರ್ ಬಸ್ಲೊ.

"ಪಾ೦ಚ್ ಜಣಿ೦ ಭಯ್ಣಿ೦ಕ್ ಹಾ೦ವ್ ಯೆಕ್ಲೊಚ್ ಭಾವ್," ತಾಣೆ ಸುರು ಕೆಲೆ೦. "ತಾ೦ಚ್ಯಾ ಸರ್‍ವ೦ಚ್ಯಾಕಿ ಹಾ೦ವ್ ನಿಮಾಣೊ. ಮಹ೦ತನೀ ಕುಟಮ್ ಆಮ್ಚೆ೦, ಮ್ಹಜೊ ಬಾಪಯ್ ತಾರ್‍ವಚೆರ್ ಉನ್ನತ್ ಅಧಿಕಾರಿ ಜಾವ್ನ್‌ಆಸ್‌ಲ್ಲೊ. ತಾಕಾ ಆಮಿ೦ ಚಡ್ ಪಳೆ೦ವ್ಕಚ್ ನಾ. ಆವಯ್‌ಚ್ ಮ್ಹಾಕಾ ಚಡ್ ಮೊಗಾಚಿ. ಪುಣ್ ತಿಚೊ ಮೋಗ್ ಮ್ಹಾಕಾ ಬೋವ್ ಕಶ್ಟಾ೦ನಿ ಮೆಳ್‌ಲ್ಲೊ. ಸುರ್‍ವೆರ್ ತಿಕಾ ಸಮ್ಜೊ೦ಕ್ ಹಾ೦ವ್ ಸಕೊ೦ಕ್ ನಾ. ತಿಚೆ ತಸಲಿ ಆನಿ ತಿತ್ಲಿ ಕ್ರೂರ್ ಆವಯ್ ಸ೦ಸರಾ೦ತ್ ನಾ ಮ್ಹಣ್ ಹಾ೦ವ್ ಸಮ್ಜಲ್ಲೊ೦. ಹಾ೦ವೆ೦ ಕೆಲ್ಲೆ೦ ಖ೦ಚೆ೦ಯಿ ತಿಕಾ ರುಚಾನಾತ್‌ಲ್ಲೆ೦. ಮ್ಹಜ್ಯಾ ಭಯ್ಣಿ೦ಕ್ ತಿಚೊ ಸಹಾರೊ ಕೆನ್ನಾ೦ಯಿ ಆಸ್ತಾಲೊ ಪುಣ್ ಮ್ಹಾಕಾ ನ್ಹಯ್; ಹಾ೦ವ್ ತಿಕಾ ನಾಕಾ ಜಾಲ್ಲೊ೦.

ಪುಣ್ ವಿಕ್ಟರ್ ಹಾ೦ವ್ ತಿತ್ಲ್ಯಾರ್‌ಚ್ ಚುಪ್ ರಾವ್ಲೊ೦ ನಾ. ಹ್ಯಾ ತಿಚ್ಯಾ ವರ್‍ತನಾಚೆ೦ ಕಾರಾಣ್ ಸೊಧ್ಚ್ಯಾ೦ತ್ ಹಾ೦ವ್ ಮಗ್ನ್ ಜಾಲೊ೦. ಮ್ಹಜೆರ್ ಮೌನ್‌ಪಣಾಚೆ೦ ಧಾ೦ಕಾಣ್ ದೆ೦ವ್ಲೆ೦. ಚತ್ರಾಯ್ ಮ್ಹಜೆಥ೦ಯ್ ಚಡೊನ್ ಆಯ್ಲಿ, ಮ್ಹಜೊ ಮೆ೦ದು ದಿಸಾನ್‌ದೀಸ್ ಜೀವ೦ತ್ ಜಾ೦ವ್ಕ್ ಸುರು ಜಾಲೊ. ತರಿ ತಿಚ್ಯಾ ವರ್‍ತನಾಚೊ ಮತ್ಲಬ್ ಮ್ಹಾಕಾ ಸಮ್ಜಾಲೊ ನಾ.

ಅಸೆಚ್ಚ್ ದೀಸ್ ಪಾಶಾರ್ ಜಾಲೆ. ಝುಜ್ ಸುರು ಜಾಲೆ೦. ಮ್ಹಜೊ ಬಾಪಯ್ ಆಸ್‌ಲ್ಲೆ೦ ತಾರು೦ ಧ್ವ೦ಸ್ ಜಾಲೆ೦ ಆನಿ ಸಾ೦ಗಾತಾಚ್ ಮ್ಹಜೊ ಬಾಪಯ್. ಹಿ ಖಬರ್ ಆಮ್ಕಾ೦ ಮೆಳ್ತಾನಾ ತೀನ್ ದೀಸ್ ಉತ್ರಾಲ್ಲೆ. ಆಮ್ಚೆರ್ ಜಾಲ್ಲೊ ಪರಿಣಾಮ್ ಸಹಜ್. ಕಾಳ್ಯಾ ಮಾ೦ತಾ ಭಿತರ್ ಲಿಪೊನ್ ರಾವ್‌ಲ್ಲೆ೦ ಮ್ಹಜ್ಯಾ ಆವಯ್ಚೆ೦ ಮುಕಮಳ್ ಮ್ಹಾಕಾ ಆತಾ೦ಯಿ ಉಡಾಸಾ೦ತ್ ಆಸಾ. ಮ್ಹಜ್ಯಾ ಬಾಪಾಯ್ಕ್, ತಾಣೆ ಝುಜಾ ವೆಳಾರ್ ದಾಕಯಿಲ್ಲ್ಯಾ ಧಯ್ರಾಕ್ ಆನಿ ತ್ಯಾಗಾಕ್ ಕಸಲಿಗಿ ಪ್ರಶಸ್ತಿ ಫಾವೊ ಜಾಲ್ಲಿ. ಪುಣ್ ತಿ ಸ್ವೀಕಾರ್ ಕೆಲಿ ನಾ ಮ್ಹಜೆ ಆವಯ್ನ್! ’ಪ್ರಶಸ್ತಿ ಸ್ವೀಕಾರ್ ಕರುನ್ ತಾಕಾ ಹಾ೦ವ್ ಅಕ್ಮಾನ್ ಕರಿಶಿ೦ ನಾ!’ ಹ್ಯಾ ಉತ್ರಾ೦ನಿ ತಿಣೆ ಆಪ್ಲೊ ನಿರಕಾರ್ ದಾಕಯ್ಲೊ. ಮ್ಹಜೆ ಭಯ್ಣಿ೦ಕ್ ನಿರಾಶಾ ಜಾಲಿ ಪುಣ್ ಮ್ಹಾಕಾ.... ವ್ಹಯ್, ಹಾ೦ವ್ ಚಿ೦ತು೦ಕ್ ಪಡ್ಲೊ೦. ಪುಣ್ ಚಡ್ ತೇ೦ಪ್ ಮ್ಹಾಕಾ ಚಿ೦ತು೦ಕ್ ಪಡ್ಲೆ೦ ನಾ."

ವಿಕ್ಟರಾಚ್ಯಾ ಮುಕಮಳಾಕ್ ಪಳೆವ್ನ್ ಬಸ್ಲೊ ನೊರ್‍ಮನ್. ಕಸಲೆ೦ಗಿ ಪ್ರದರ್‍ಶನ್ ಆಸಾ ಮ್ಹಳ್ಳೆ೦ಪರಿ೦. ಉಪ್ರಾ೦ತ್ ತಾಣೆ ಆಪ್ಲ್ಯಾ ಉಜ್ವ್ಯಾ ಪಾ೦ಯಾಚೊ ಮೊಚೊ ನಿಕ್ಳಾಯ್ಲೊ ಆನಿ ಉಪ್ರಾ೦ತ್ ಸೊಕ್ಸ್. ತೊ ಪಾ೦ಯ್ ಚಿಕ್ಕೆಸೆ ಉಬಾರೋನ್ ಧರ್‍ಲೊ ತಾಣೆ.

ತ್ಯಾ ಪಾ೦ಯಾಚೆ ಲ್ಹಾನ್ ಬೋಟ್ ಮುಳಾ೦ತ್‌ಚ್ ಕುಡ್ಕೆ ಜಾವ್ನ್ ಮುಡ್ಕೆಲ್ಲೆ೦ ವಿಕ್ಟರಾಕ್ ದಿಸ್ಲೆ೦. ತಾಚ್ಯಾ ದೊಳ್ಯಾ೦ವಯ್ಲ್ಯೊ ಭ೦ವ್ರ್ಯೊ ವಯ್ರ್ ಗೆಲ್ಯೊ.

"ಎಕಾ ದಿಸಾ ಆಮ್ಚ್ಯಾ ಕಾರ್-ಶೆಡ್ಡಾ೦ತ್ ಇರ್‍ನೆ೦-ಮೊಡ್ತೆಲ್ ಘೆವ್ನ್ ಹಾ೦ವ್ ಬಾಳ್ಪಣಾಚಿ೦ ಕಸಲಿ೦ಗಿ ಆತರ್‍ವಣಾ೦ ಕರ್‍ತಾನಾ ಹ್ಯಾ ಬೊಟಾಚೆರ್ ಇರ್‍ನೆ೦ ಬಸ್ಲೆ೦ ಆನಿ ತೆ೦ ಕುಡ್ಕೆ ಜಾವ್ನ್ ಉಸಳ್ಳೆ೦." ಹೆ೦ ಸಾ೦ಗ್ತಾನಾ ತಾಚ್ಯಾ ಮುಕಮಳಾರ್ ಪ್ರಕಾಸ್ ಚಡೊನ್ ಯೆತಾಲೊ. "ಕುಡ್ಕೊ ಜಾವ್ನ್ ಪಯ್ಸ್ ಉಸಳ್ಳೆಲೆ೦ ತೆ೦ ಬೋಟ್ ಮ್ಹಾಕಾ ವಿಚಿತ್ರ್ ದಿಸ್ಲೆ೦. ಮ್ಹಜ್ಯಾಚ್ ಕುಡಿಚೊ ಎಕ್ ಭಾಗ್ ಆತಾ೦ ಕಸಲಿಚ್ ಪರ್‍ವನಾತ್‌ಲ್ಲೆ೦ಪರಿ೦ ಪಯ್ಸ್ ಧುಳಿ೦ತ್ ಪಡೊನ್ ಆಸ್‌ಲ್ಲೊ. ತೊ ಕುಡ್ಕೊ ಹಾ೦ವೆ೦ ವಿ೦ಚ್ಲೊ ಆನಿ ಪಾಟಿ೦ ಘಡ್ಸು೦ಚೆ೦ ಪ್ರೇತನ್ ಹಾ೦ವೆ೦ ಕೆಲೆ೦. ಪುಣ್ ಸಹಜ್ ಜಾವ್ನ್ ಜಾಲೆ೦ ನಾ. ತಿತ್ಲೆಭಿತರ್ ಮ್ಹಜ್ಯಾ ಪಾ೦ಯಾ೦ಲಾಗಿ೦ ರಗ್ತಾಚೆ೦ ಎಕ್ ಲ್ಹಾನ್ ಕೊ೦ಡ್‌ಶೆ೦ ಜಾಲ್ಲೆ೦. ಮ್ಹಜ್ಯಾ ಆ೦ಗಾ೦ತ್ಲ್ಯಾ ದುಕಿಚೊ ಘಾಮ್ ದೆ೦ವ್ತಾಲೊ. ಹ್ಯಾ ಬೊಟಾಚೊ ಕುಡ್ಕೊ ಘೆವ್ನ್೦ಚ್ ಮ್ಹಜೆ ಆವಯ್‌ಲಾಗಿ೦ ಗೆಲೊ೦.

’ಮ್ಹಜೆ೦ ಬೋಟ್ ಕುಡ್ಕೆ ಜಾಲೆ೦, ಮಾ೦!’ ಹಾತ್ ಉಗ್ತೊ ಕರುನ್ ತೊ ಕುಡ್ಕೊ ಹಾ೦ವೆ೦ ದಾಕಯ್ಲೊ.

ತಿಚ್ಯಾ ಮುಕಮಳಾರ್ ಕಸಲಿಚ್ ಬದ್ಲವಣ್ ಜಾಲಿ ನಾ.

’ಹಾ೦ಗಾಸರ್ ಯೆ೦ವ್ಚ್ಯಾ ಪಯ್ಲೆ೦ ಹೊ ಕುಡ್ಕೊ ಪಾಟಿ೦ ಘಡ್ಸು೦ಚೆ೦ ಪ್ರೇತನ್ ತು೦ವೆ೦ ಕೆಲೆ೦ಯ್?’

’ವ್ಹಯ್.’

ತಿಚೆ೦ ಹೆ೦ ಸವಾಲ್ ಆನಿ ಮ್ಹಜಿ ಜಾಪ್ ಎಕಾ ಖಿಣಾ ಭಿತರ್ ಆಶಾರ್ ಪಾಶಾರ್ ಜಾಲೆ೦. ಹಾ೦ವೆ೦ ತಿಚ್ಯಾ ಮುಕಮಳಾಕ್ ಪಳೆಲೆ೦. ತ್ಯಾ ಮುಕಮಳಾರ್ ಆಸ್‌ಲ್ಲ್ಯಾ ಅಭಿಮಾನಾಚೊ ಉಜೊ ಪಳೆವ್ನ್ ಮ್ಹಜಿ ದೂಕ್ ಹಾ೦ವ್ ವಿಸರ್‍ಲೊ೦. ತ್ಯಾ ಉಜ್ಯಾನ್ ಕಸಲೆ೦ಗಿ ಲೋಹ್ ಕಡಯಿಲ್ಲೆಪರಿ೦ ತಿಚ್ಯಾ ದೊಳ್ಯಾ೦ಥಾವ್ನ್ ದುಕಾ೦ ದೆ೦ವ್ಲಿ೦. ತಿಣೆ ಮ್ಹಾಕಾ ಉಕಲ್ಲೊ ಆನಿ ಕಪಾಲಾಚೊ ಉಮೊ ಘೆತ್ಲೊ.

ತ್ಯೆ ಘಡಿಯೆ ತಿಕಾ ಆನಿ ತಿಚ್ಯಾ ಮೊಗಾಕ್ ಹಾ೦ವ್ ಪರಿಪೂರ್‍ಣ್ ಥರಾನ್ ಸಮ್ಜಾಲೊ೦.

ಉಪ್ರಾ೦ತ್ ತಿಣೆ ಮ್ಹಾಕಾ ಡೊಕ್ಟರಾಲಾಗಿ೦ ವ್ಹೆಲೊ ಇತ್ಯಾದಿ ಇತ್ಯಾದಿ...." ತಾಣೆ ಎಕ್ ಲಾ೦ಬ್ ಉಸ್ವಾಸ್ ಸೆವ್ಲೊ.

"ತಿಣೆ ಕೆಲ್ಲ್ಯಾಪರಿ೦ ಖ೦ಚಾಯಿ ಸ್ತ್ರೀಯೆನ್ ಆಪ್ಲ್ಯಾ ಪುತಾಚೊ ಮೋಗ್ ಕರು೦ಕ್ ನಾ, ವಿಕ್ಟರ್!"

ವಿಕ್ಟರಾನ್ ಹಾಳ್ವಾಯೆನ್ ತಕ್ಲಿ ಹಾಲಯ್ಲಿ.

ತಾಣೆ ಆಪ್ಲೆ ಆವಯ್ಚೊ ಮೋಗ್ ಕೆಲ್ಲೆಪರಿ೦ ಖ೦ಚಾಯಿ ಪುತಾನ್ ಕರು೦ಕ್‌ನಾತ್‌ಲ್ಲೊ.

"ಮ್ಹಜ್ಯಾ ಭಯ್ಣಿ೦ನಿ ತಾತಾ೦ಚೊ ಭೆಸ್ ವಿ೦ಚ್ಲೊ. ಘರಾಥಾವ್ನ್ ತಿ೦ ಪಯ್ಸ್ ಸರ್‍ತೆಚ್ ತಿಣೆ ಮ್ಹಾಕಾ ಲಾಗಿ೦ ಆಪಯ್ಲೊ. ತವಳ್ ಮ್ಹಜೆ೦ ಶಿಕಪ್ ಜಾಲ್ಲೆ೦. ಪ್ರಾಯ್ ವೀಸ್ ಆನಿ ತೀನ್ ವರ್‍ಸಾ೦.

’ಮ್ಹಜೆ ಮಿಸಾ೦ವ್ ಆಕೇರ್ ಜಾಲೆ೦!’ ತಿ ಮ್ಹಣಾಲಿ. ’ಆತಾ೦ ಹೊ ಗಾ೦ವ್ ಮ್ಹಾಕಾ ಸಾ೦ಗ್‌ಲ್ಲೊ ನ್ಹಯ್. ಹಾ೦ವ್ ಪಯ್ಸ್ ವೆತಾ೦. ಸಾ೦ಗ್ ಮ್ಹಾಕಾ ತುಕಾ ಕಿತ್ಲೊ ವಾ೦ಟೊ ಜಾಯ್?’

ತಿಚೆ೦ ತೆ೦ ಸವಾಲ್ ಆನಿ ತಿ ದೀಶ್ಟ್ ಹಾ೦ವೆ೦ ಭಿಯಾವಿಣೆ೦ ಮುಕಾರಿಲಿ.

’ತುಜೆ೦ ಮಿಸಾ೦ವ್ ಆಕೇರ್ ಕೆಲ್ಲ್ಯಾ ತುಕಾ ಕಿತೆ೦ ಜಾಯ್?’ ಹಾ೦ವೆ೦ ವಿಚಾರ್‍ಲೆ೦, ಕಸಲೆಚ್ ಘಳಾಯೆವಿಣೆ೦.

ಹ್ಯಾ ಸವಲಾಚಿ ಜಾಪ್ ತಿಣೆ ಕಾರ್‍ಯಾನ್೦ಚ್ ಕರುನ್ ದಾಕಯ್ಲಿ. ಆಮ್ಚೆ೦ ಜೆ೦ ಕಿತೆ೦ ಆಸ್‌ಲ್ಲೆ೦ ತಿಣೆ ವಿಕ್ಲೆ೦. ಫಕತ್ ಹೆ೦ ಘರ್ ಸೊಡುನ್. ತೀನ್ ಮಯ್‌ನ್ಯಾ೦ಚೊ ಖರ್‍ಚ್ ತಿಣೆ ಮ್ಹಜ್ಯಾ ಹಾತಾ೦ತ್ ದಿಲೊ. ಆದೇವ್ಸ್ ಮಾಗ್ತಾನಾ ಆಮ್ಚ್ಯಾ ದೊಳ್ಯಾ೦ನಿ ದುಕಾ೦ ಉದೆಲಿ೦ನಾ೦ತ್. ತಿಚಿ೦ ಉತ್ರಾ೦, ತಿ೦ ನಿಮಾಣಿ೦ ಉತ್ರಾ೦ ಮ್ಹಾಕಾ ಆಜೂನ್ ಉಡಾಸಾ೦ತ್ ಆಸಾತ್. ತುಜೊ ವೇಳ್ ಯೆತಾ ಪರ್‌ಯಾ೦ತ್ ತು೦ ಮ್ಹಜೊಚ್ಚ್ ಪುತ್ರ್ ಜಾವ್ನ್ ರಾವ್. ಪೃಥ್ವಿಚೊ ಪುತ್ರ್ ಜಾವ್ನ್ ಜಿಯೆ೦ವ್ಚೆ೦ ಕೆದಳಾ ಮ್ಹಣ್ ತು೦ ಜಾಣಾ೦ ಜಾ೦ವ್ಚೆ ಪರ್‌ಯಾ೦ತ್.’ ಹ್ಯಾ ಉತ್ರಾ೦ ಬರಾಬರ್ ತಿ ಚಲ್ಲಿ. ಯೆದೊಳ್ ಪರ್‌ಯಾ೦ತ್ ತಿಕಾ ಹಾ೦ವೆ೦ ಪರತ್ ಪಳೆ೦ವ್ಕ್‌ನಾ.

ಮ್ಹಾಕಾ ಂssoಛಿiಚಿಣioಟಿ oಜಿ Pಡಿiಟಿಣeಡಿs, Wಡಿiಣeಡಿs ಚಿಟಿಜ ಎouಡಿಟಿಚಿಟisಣs ಹ್ಯಾ ಸ೦ಸ್ಥ್ಯಾ೦ತ್ ಕಾಮ್ ಮೆಳ್ಳೆ೦. ಸಾ೦ಬಾಳ್ ಭಾರಿಚ್ ಬರೊ ಆಸ್‌ಲ್ಲೊ. ಸ೦ಸರಾಚೆ ನದ್ರೆ೦ತ್ ಮ್ಹಜೆ೦ ಜೀವನ್ ಸುರು ಜಾಲ್ಲೆ೦. ಸರ್‍ವ್ ಮ್ಹಜೆಥ೦ಯ್ ಆಸ್‌ಲ್ಲೆ೦: ತರ್‍ನಾಟ್ಪಣ್, ಬರ್‍ಯಾ ಸಾ೦ಬಾಳಾಚೆ೦ ಕಾಮ್, ಘರ್ ಆನಿ ಕುಟ್ಮಾಚೆ೦ ನಾ೦ವ್. ದೇಶಾಖಾತಿರ್ ಮಾರ್‍ಥಿರ್ ಜಾಲ್ಲ್ಯಾಚೊ ಪುತ್. ಬಾಕಿ ಆಸ್‌ಲ್ಲಿ ಎಕ್‌ಚ್ಚ್ ಸ೦ಗತ್--ಸ್ತ್ರೀ. ಹು೦! ಮ್ಹಜೆ ಲಗ್ನ್ ಜಾಲೆ೦. ಮ್ಹಜಿ ಪತಿಣ್ ಎಕ್ ಅಸಾಧಾರಣ್ ಸು೦ದರಿ ಮ್ಹಣ್ ಸಕಡ್ ಮ್ಹಣ್ತಾಲೆ. ಪುಣ್ ಮ್ಹಜ್ಯಾ ವಾ೦ಟ್ಯಾಕ್ ತಿ ಎಕ್ ಬೊ೦ಬೆ೦ ಜಾವ್ನ್‌ಆಸ್‌ಲ್ಲಿ. ಮ್ಹಜ್ಯಾ ಖುಶೇ೦ಚ್ಯಾ ಆವೃತಾ ಭಾಯ್ರ್ ತಿಣೆ ಕಸಲೆ೦ಚ್ ಕರು೦ಕ್ ನಾ. ಹಾ೦ವೆ೦ ಕಸಲೆ೦ಯಿ ಸಾ೦ಗ್ಲ್ಯಾರಿ ತಿ ತಯಾರ್ ಆಸ್ತಾಲಿ. ಕಸಲೆ೦ಯಿ ತರ್‍ಕ್ ಹಾ೦ವೆ ಸುರು ಕೆಲ್ಯಾರ್--ತು೦ಚ್ ಸರ್‍ವ್ ಜಾಣಾರಿ. ಹಾ೦ವ್ ತುಜೆಲಾಗಿ೦ ಕಸಲೆ೦ ತರ್‍ಕ್ ಕರು೦ಕ್ ಸಕಾನ್? ಹ್ಯಾ ಸವಲಾನ್ ತಿ ಚುಕಾರಿ ಮಾರ್‍ತಾಲಿ. ಹಾ೦ವ್ ನಿರಾಸ್ಲೊ೦, ವಿಕ್ಟರ್.

ಲ೦ಯ್ಗಿಕತಾ ಆಸ್‌ಲ್ಲಿ ವ್ಹಯ್ ಪುಣ್ ಚಡ್ ಅವ್ಕಾಸ್ ಹಾ೦ವೆ೦ಚ್ ಘೆತ್ಲೆನಾ೦ತ್. ಮ್ಹಜೆ ಖಾತಿರ್ ತಿ ಕೆದಳಾರಿ ತಯಾರ್ ಆಸ್ತಾಲಿ ಪುಣ್ ತಿ ಸಗ್ಳಿ ಕರ್‍ನಿ ಜಾವ್ನ್‌ಆಸ್ತಾಲಿ ನಿಸ್ತೇಜ್. ಎಕಾ ಬೊ೦ಬ್ಯಾಪರಿ೦ ತಿ ಪಡೊನ್ ಆಸ್ತಾಲಿ ಆನಿ ಉಪ್ರಾ೦ತ್ ಎಕಾ ನೀಳ್ ಸ್ವಾಸಾಸ೦ಗಿ ಪಯ್ಸ್ ಸರ್‍ತಾಲಿ. ಚಡ್ ಪಾವ್ಟಿ೦ ಹೆ೦ ಘಡ್ಲೆ೦ ನಾ ತರಿ ಪುಣ್ ಘಡ್‌ಲ್ಲ್ಯಾ ಪಾವ್ಟಿ೦ಚೊ ಪರಿಣಾಮ್ ಜಾವ್ನ್ ಸೊನಿಯಾ ಜಲ್ಮಾಲೆ೦. ತಾಚ್ಯಾ ಜಲ್ಮಾ ನ೦ತರ್ ತಿ ಚಡ್ ತೇ೦ಪ್ ವಾ೦ಚ್ಲಿ ನಾ. ರಗ್ತಾಸ್ರಾವಾಚೆ ಪಿಡೆನ್ ಪೋಲ್ ಜಾವ್ನ್ ಅ೦ತರ್‍ಲಿ.

ಸೊನಿಯಾ ವಾಡೊನ್ ಯೆತಾ ಪರ್‌ಯಾ೦ತ್ಲೆ೦ ಮ್ಹಜೆ೦ ಜೀವನ್ ಜಾವ್ನ್‌ಆಸ್‌ಲ್ಲೆ೦ ಎಕ್ದಮ್ ಯಾ೦ತ್ರಿಕ್. ತವಳ್ ಮ್ಹಾಕಾ ಹಾ೦ವೆ೦ ಕಾಮ್ ಕರ್‍ಚ್ಯಾ ಎಸೋಸಿಯೆಶನಾಚೊ ಭಿತರ್‍ಲೊ ಘುಟ್ ಮ್ಹಾಕಾ ಕಳಿತ್ ಜಾಲ್ಲೊ." ಕ್ಶಣ್‌ಬರ್ ತೊ ರಾವ್ಲೊ. ವಿಕ್ಟರಾನ್ ಸಮ್ಜಣೇನ್ ತಕ್ಲಿ ಹಾಲಯ್ಲಿ. ಹ್ಯಾ ಎಸೋಸಿಯೆಶನಾ ವಿಶಾ೦ತ್ ತಾಕಾಯಿ ಕಳಿತ್ ಆಸ್‌ಲ್ಲೆ೦.

"ಆತಾ೦ಚ್ಯಾ ಹ್ಯಾ ಸ೦ಸರಾಚೆ ಪ್ರತಿರೂಪ್ ಜಾವ್ನ್ ಸೊನಿಯಾ ವಾಡ್ಲೆ೦. ತಾಕಾ ಬದ್ಲು೦ಕ್ ಹಾ೦ವ್ ಸಕ್ಲೊ೦ಚ್ ನಾ. ತಾಚಿ ಗರ್‍ಜಚ್ಚ್ ನಾತ್‌ಲ್ಲಿ. ತೆ೦ ಯೆದೊಳ್‌ಚ್ ಮರಣ್ ಪಾವಲ್ಲೆ೦. ಆನಿ ತ್ಯಾ ಎಕಾ ದಿಸಾ...." ಜನೆಲಾ೦ತ್ಲ್ಯಾ ಭಾಯ್ರ್ ಪಳೆಲಾಗ್ಲೊ ನೊರ್‍ಮನ್.

"ತಿಚ್ಯಾ ಉತ್ರಾ೦ಚೊ ಉಡಾಸ್ ಆಯ್ಲೊ?" ವಿಕ್ಟರಾನ್ ವಿಚಾರ್‍ಲೆ೦. ನೊರ್‍ಮನಾನ್ ಜಾಪ್ ದಿಲಿ ನಾ. ಜನೆಲಾ೦ತ್ಲ್ಯಾನ್ ತೊ ಭಾಯ್ರ್ ಪಳೇತ್ ರಾವ್ಲೊ. ತಾಚ್ಯಾ ಚಿ೦ತ್ನಾ೦ಕ್ ಗಡ್ ಘಾಲ್ಚೆ೦ ಪ್ರೇತನ್ ಕೆಲೆ೦ನಾ ವಿಕ್ಟರಾನ್.

"ದಾವಾಭರಿತ್ ವೋತ್ ಉದೆಲಾ೦, ವಿಕ್ಟರ್!" ಸಭಾರ್ ವೆಳಾ ಉಪ್ರಾ೦ತ್ ಮ್ಹಣಾಲೊ ನೊರ್‍ಮನ್.

"ಆಮಿ೦ ಭಾಯ್ರ್ ಚಲ್ಯಾ೦?" ಆಪ್ಲೊ ಹಾತ್ ತಾಣೆ ಉಬಾರ್‍ಲೊ.

ವಿಕ್ಟರಾನ್ ತೊ ಹಾತ್ ಧರ್‍ಲೊ ಆನಿ ನೊರ್‍ಮನಾಕ್ ಉಟಯ್ಲೊ.

ಸಾ೦ಗಾತಾಚ್ ತೆ ಭಾಯ್ರ್ ಗೆಲೆ.

ವೊತಾಚ್ಯಾ ದಾವಾ೦ತ್ ಉಜಳ್ತಾಲಿ ತಿ ಪೃಥ್ವಿ.

ನೊರ್‍ಮನಾನ್ ತೆ೦ ನಿತಳ್ ವಾರೆ೦ ಸೆವ್ಲೆ೦; ದೊಳೆ ಅಶೀರ್ ಕರುನ್ ವಿಕ್ಟರ್ ತಾಕಾ ಪಳೆತಾಲೊ.

ನೊರ್‍ಮನಾನ್ ಆಪ್ಲೆ ಹಾತ್ ಖುರ್‍ಸಾ ರುಪಾರ್ ಉಬಾರ್‍ಲೆ. ತಾಚೆ ತೆ ರುಪ್ಯಾಳೆ ಕೇಸ್ ವಾರ್‍ಯಾರ್ ಉಬ್ತಾಲೆ.

"ಹಿ ಪ್ರಥ್ವಿ ಆಮ್ಚಿ ಜಾವ್ನ್‌ಆಸಾ, ವಿಕ್ಟರ್!" ತೊ ಮ್ಹಣಾಲೊ. "ಹಿ ನಾಸ್ ಜಾ೦ವ್ಕ್ ಆಮಿ೦ ಕೆದಿ೦ಚ್ ಸೊಡು೦ಕ್ ನಜೊ."

ವಿಕ್ಟರಾನ್ ಆಪ್ಲೆ೦ ಮುಕಮಳ್ ಉಬಾರ್‍ಲೆ೦ ಆನಿ ಸುರ್‌ಯಾಚ್ಯೆ ಕುಶಿನ್ ಪಳೆಲೆ೦.

"ಕೆದಿ೦ಚ್...." ತೊ ಉಮಾಳ್ಯಾನ್ ಪುಸ್ಪುಸ್ಲೊ.

ನೊರ್‍ಮನಾಚೊ ಹಾತ್ ತಾಚ್ಯಾ ಖಾ೦ದಾರ್ ಬಸ್ಲೊ.

ಯೆಕಾಚಾಣೆ ಘು೦ವ್ಲೊ ವಿಕ್ಟರ್.

ಆಪ್ಲ್ಯಾ ಖಾ೦ದಾವಯ್ಲೊ ಹಾತ್ ತಾಣೆ ಆಪ್ಲ್ಯಾ ಹಾತಾ೦ತ್ ಘೆತ್ಲೊ ಆನಿ ಅತ್ಯ೦ತ್ ಭಕ್ತಿಪಣಾನ್ ಉಬಾರೋನ್ ಆಪ್ಲ್ಯಾ ವೊ೦ಟಾ೦ಕ್ ಲಾಯ್ಲೊ.......

...ಮುಂದರ್‍ಸಿಲಾಂ...

Tags: Edwin JF Dsouza, Konkani Novel, Vasu Valencia, Konkani, Konkani, Mangalore, Mangalorean, Mother Tongue

From around the world

"ಹಾಂವ್ ಜಿಯೆತಾಂ" - ಮನಿಸ್

2 Comment/s.

Post your comments

ಧಾ೦ವ್ ವಿಕ್ಟರ್, ಧಾ೦ವ್!

ಸ್ವಾರ್ಥ್, ರೂಣ್ ಆನಿ ದಾವೊ

ಗುಪಿತ್ ವರ್‍ಸಾ೦

ಜಿವೊ ಮನಿಸ್

ತ್ರಿಕೋನ್

ತ್ರಾಸಿಚಿ೦ ಭುಜಾ೦

ಪೃಥ್ವಿಚೊ ಪುತ್ರ್

ವೆಭಿಚಾರಿ-ವೆಭಿಚಾರಿಣ್

ಜುದಾಸ್!

ಮನಿಸ್

ರೆಕಾದ್

ಕರ್‍ನಿ

ಝುಜಾ-ಥಳ್

ಮಿಸ್ಟರ್ ವಿಕ್ಟರ್

ಆಮಾಸ್

"ಸಾಧಿ ಚಲಿ"

ಕೀರ್

ಜಿಣಿಯೆಚೆ೦ ಭುರ್‍ಜ್

Connect

Our Address
Mangalore

Our Address
Udupi

Our Address
Dubai