From around the world

ಪ್ರವೀಣ್ ತಾವ್ರೊ, ಕುಲ್ಶೇಕರ್
             
+971 50 7554105
ತುಮ್ಚ್ಯಾ ಗಮನಾಕ್:
Best be viewed in 1366 X 768 screen resolution and in Google Chrome
You are here:   /  ''ಬ್ಲೊ೦ಡಿ'' (ಕ್ಲೋನಿಂಗ್ ಹೊರರ್ ಕಥಾ...)

7  -  ''ಬ್ಲೊ೦ಡಿ'' (ಕ್ಲೋನಿಂಗ್ ಹೊರರ್ ಕಥಾ...)

Saturday, March 18, 2017  /  By Admin

ಬರಯ್ಣಾರಾ ವಿಶಿಂ ಜಾಣಾ ಜಾ...

90.0
User Rating


ತೆ ಭಾಯ್ರ್ ಉಗ್ತಡಾ೦ತ್ ಆಯ್ಲೆ ಆನಿ ಪಳೆತಾನಾ ಆಪುಣ್ ಟೆ೦ಪ್ಲರಾಚ್ಯಾ ಬ್ಲೊಕಾಚ್ಯಾ ಪಾಟ್ಲ್ಯಾ ಕುಶಿನ್ ಆಸ್ಚೆ೦ ಪೆರೆಜಾಕ್ ಗಮ್ಲೆ೦. ಭಾಯ್ರ್ ಥ೦ಡ್ ವಾರೆ೦ ವಾಳ್ತಾಲೆ೦. ಕ್ಯಾ೦ಪಸಾಚೊ ಕಾಳೊಕೀ ಮುಲೊ ತೊ. ಸುಮಾರ್ ಶೆ೦ಬರ್ ಮೀಟರ್ ಪಯ್ಸ್ ಮುಡ್ಕೆಲ್ಲೆಪರಿ೦ ದಿಸ್ಚೆ೦ ಎಕ್ ಲ್ಹಾನ್ ಬಾ೦ದಪ್ ಪೆರೆಜಾಕ್ ದಿಸ್ಲೆ೦. 
''ಕ್ಯಾ೦ಪಸಾಚೆ೦ prayer room,'' ಕಳಯ್ಲೆ೦ ಟೆ೦ಪ್ಲರಾನ್. ''ಆಮ್ಕಾ೦ಯಿ ಧ್ಯಾನ್-ವೊರೆಸಾ೦ವಾಚಿ ಗರ್ಜ್ ಪಡ್ತಾ.''

ಪೆರೆಜಾನ್ ಕಿತೆ೦ಚ್ ಮ್ಹಳೆ೦ ನಾ. ತಾಚೆ೦ ಕಾಳಿಜ್ ಹರ್ಧ್ಯಾಗುಡಾಕ್ ಖೊಟೊ ಮಾರ್ತಾಲೆ೦. ಧ್ಯಾನಾಚ್ಯಾ ಕುಡಾಚೆ೦ ದಾರ್ ಲೊಟುನ್ ಪ್ರೊಫೆಸರ್ ಭಿತರ್ ರಿಗ್ಲೊ ಆನಿ ಪೆರೆಜಾನ್ ತಾಚೊ ಪಾಟ್ಲಾವ್ ಕೆಲೊ. ಆತಾ೦ ತಾಚ್ಯಾ ಹಾತಾ೦ತ್ ರಿಮೋಟ್ ಕ೦ಟ್ರೋಲಾ ತಸಲೆ೦ ಕಸಲೆ೦ಗಿ ಆಸ್ಚೆ೦ ಪೆರೆಜಾಚ್ಯಾ ಗಮಾನಾಕ್ ಗೆಲೆ೦. Palm top-ಪಾಪರಿ೦....

ಭಿತರ್ಲಿ ಸಜಾವಟ್ ಪರಿಪೂರ್ಣ್ ತಾ೦ಬ್ಡಿ; ವಣದಿ, ನೆಲಾಕ್ ಹಾ೦ತುಳ್ಳೆಲಿ ಕಾರ್ಪೆಟ್, ವೀಜ್ ದಿವೊ (ಎಕ್‌ಚ್ಚ್ ಆಸ್‌ಲ್ಲೊ), ಸರ್ವಯಿ ತಾ೦ಬ್ಡೆ೦. ಕಸಲೊಯಿ ಫರ್ನಿಚೆರ್ ಜಾ೦ವ್, ವೇದಿ ಜಾ೦ವ್ ನಾತ್‌ಲ್ಲಿ. ಫಕತ್ ಎಕ್ ಚವ್ಕ್ ಕಮ್ರೊ.

''ಜೇಮ್ಸ್ ಬೊ೦ಡ್ ಫಿಲ್ಮಾ೦ತ್ಲೆ೦ ಸೆಟ್ಟಿ೦ಗ್ ಮ್ಹಣ್ತೊಲೊಯ್!'' ಟೆ೦ಪ್ಲರಾನ್ ದಾರ್ ದಾ೦ಪ್ತೆಚ್ ಆಪ್ಲ್ಯಾ ಹಾತಾ೦ತ್ ಆಸ್‌ಲ್ಲ್ಯಾ ರಿಮೋಟಾಚೆರ್ ಕಸಲೆಗಿ ತೀನ್ ಬುತಾ೦ವ್ ದಾ೦ಬ್ಲೆ. ತೆ ಉಬೆ ಆಸ್‌ಲ್ಲಿ ಧರ್ಣ್ ಚಿಕ್ಕೆಸೆ ಕಾ೦ಪ್ಲಿ ಆನಿ ಸವ್ಕಾಸ್ ಪ೦ದಾ ಗೆಲಿ.
''ಸಿ೦ಪಲ್,'' ಮ್ಹಣಾಲೊ ಟೆ೦ಪ್ಲರ್. ''ಪ೦ದಾಕ್ ವೆಚೆ೦ ಲಿಫ್ಟ್... ಮ್ಹಜ್ಯಾ ಖಾಸ್ಕಿ ಲ್ಯಾಬಾಕ್.''
''ಆತಾ೦ ತು೦ ಉಲಯ್ತಾಯ್, ಮ್ಹಜಿ ಭಾಸ್!'' ಅಶೆ೦ ಉಚರ್ತಾನಾ ಪೆರೆಜಾಚೊ ತಾಳೊ ಕಾ೦ಪ್ತಾಲೊ.
''ವ್ಹಯ್! ಸತ್ ಕೆದಳಾಯಿ ಲಿಪೊನ್ ಉರೊ೦ಕ್ ನಜೊ. ಆಜ್ ತೆ೦ ತುಕಾ ಉಡಾಪೆ೦ ಜಾತೆಲೆ೦.''
''ಪುಣ್ ಹೊ ಉಗ್ಡಾಪ್ ಮ್ಹಾಕಾಚ್ ಕಿತ್ಯಾಕ್?''

ಟೆ೦ಪ್ಲರ್, ಪೆರೆಜಾಕ್ ಪಳೆವ್ನ್ ಬಿರ್ಮತಿಚೊ ಹಾಸೊ ಹಾಸ್ಲೊ. 

ತಾ೦ಚ್ಯಾ ಮಾತ್ಯಾ ವಯ್ರ್  ಎಕ್ ಪಾಕೆ೦ ಉದೆಲೆ೦ ಆನಿ ಲಿಫ್ಟಾ೦ತ್ ಕಾಳೊಕ್ ಚರ್ತಾನಾ ಎಕ್ ತಾ೦ಬ್ಡೊ ದಿವೊ ಪೆಟ್ಲೊ. ಎಕಾ ಮಿನುಟಾಚೆ ದೆ೦ವ್ಣೆ ಉಪ್ರಾ೦ತ್ ಲಿಫ್ಟ್ ರಾವ್ಲಿ.

ದಾರ್ ಉಗ್ತೆ೦ ಜಾಲೆ೦, ಮ೦ದ್ ನಿಳ್ಸೊ ಪ್ರಕಾಸ್ ಆಸ್ಚಿ ಪಾಸಯ್ ತಾ೦ಚ್ಯಾ ಸಾಮ್ಕಾರ್ ಆಸ್ಚಿ ಪೆರೆಜಾಕ್ ದಿಸ್ಲಿ. ತ್ಯಾ ಪಾಸಾಯೆಚ್ಯಾ ದೋನ್‌ಯಿ ಕುಶಿ೦ನಿ ಆರ್ಸೆ ಬಸಯಿಲ್ಲೆ.
''ಹೆ ಮ್ಹಜೆ incubator, ಜಾ೦ತು೦ ಮಾಸಾಚೆ ಮುದೆ ವಾಡೊನ್ ಯೆತಾತ್. ತುಜ್ಯಾನ್ ಹೆ ಭ್ರೂಣ್ ಪಳೆ೦ವ್ಕ್ ಜಾತಿತ್? ತುಜಿ ಕೆಮರಾ ತಯಾರ್ ಆಸಾ? ತುಜೆ೦ ಕಾಳಿಜ್ ಘಟ್ ಆಸಾ?'' ಟೆ೦ಪ್ಲರಾಚೊ ತಾಳೊ ಆತಾ೦ ಫೊ೦ಡಾಥಾವ್ನ್ ಆಯಿಲ್ಲೆಪರಿ೦ ಆಯ್ಕಾತಾಲೊ. ''ಎಕ್ ಮಾಸಾಚೊ ಮುದೊ ಹಾ೦ಗಾಥಾವ್ನ್ ಭಾಯ್ರ್ ಗೆಲ್ಲೊ... ಮ್ಹಜ್ಯಾಚ್ ವಿಗ್ಯಾ೦ನಿನಿ.... ಪೊಟಾ೦ತ್ ಕಿಡೆ ಜಾವ್ನ್ ಮೆಲೆ ತೆ... ಯೆ..... ಹಾ೦ವೆ೦ ಆಸಾ ಕೆಲ್ಲಿ೦ ವಿಕೃತಾ೦ ಪಳೆ.''
ತಾಣೆ ಮೆಟಾ೦ ಕಾಡು೦ಕ್ ಸುರು ಕರ್ತಾನಾ ಪೆರೆಜಾನ್ ತಾಚೊ ಪಾಟ್ಲಾವ್ ಕೆಲೊ. ಎಕೇಕ್ ಕ೦ತ್ರಾಳ್ ಜಾವ್ನಾಸ್‌ಲ್ಲೆ೦ ಆರ್ಸ್ಯಾಚಿ ಎಕ್ ಭೊರ್ಣಿ. ತಾ೦ತು೦ ಎಕೇಕ್ ಜೀವ್, ಜೀವ್‌ಚ್ಚ್ ಆಸ್ಚೊ ಜೀವ್.
''ಹಾ೦ವೆ೦ ತಯಾರ್ ಕರ್ಚ್ಯಾ ಹ್ಯಾ ಭ್ರೂಣಾ೦ಕ್ ವಾಡೊ೦ಕ್ ಆವಯ್ಚ್ಯಾ ಗರ್ಭಾ೦ಚಿ ಗರ್ಜ್ ನಾ; ಹ್ಯೊ ಆರ್ಸ್ಯಾಚ್ಯೊ ಭೊರ್ಣ್ಯೊ ಜಾವ್ನಾಸಾತ್ ವ್ಹಡ್ ಗಾತ್ರಾಚೆ ಟೆಸ್ಟ್‌ಟ್ಯೂಬ್, ಪ್ರನಾಳ್. ಆನಿ ತಾ೦ತ್ಲೆ ಹೆ ಜೀವ್.......marvels of genetic engineering! ಹಾ೦ಗಾಸರ್ ಪನ್ನಾಸಾ೦ಚೆ೦ ಒರ್ಡರ್ ಆ೦ಕ್ರೆವ್ನ್ ಯೆತಾ......''
''ಒರ್ಡರ್?'' ಹಾ೦ಕ್ರೆಲೊ ಪೆರೆಜ್. ''ಕಿತೆ೦ ಉಲಯ್ತಾಯ್ ತು೦?''

''ಹೊ ಹೊ!'' ಪೆರೆಜಾಕ್ ಜಾಪ್ ದಿ೦ವ್ಚ್ಯಾ ಪಯ್ಲೆ೦ಚ್ ಟೆ೦ಪ್ಲರ್ ಉದ್ಗಾರ್ಲೊ. ''ಆನ್‌ಯೆಕ್ ನಾಯಶಸ್ವಿ... ಪಳೆ ಪಳೆ.... ಹೊ ಭ್ರೂಣ್ ಕಸೊ ಖಿಣಾನ್ ಖಿಣ್ ಮಾಸಾಚೊ ಜೀವ೦ತ್ ಮುದೊ ಜಾವ್ನ್ ಬದ್ಲತಾ ಪಳೆ... ಗೆಲೆ ಮ್ಹಜೆ ಪ೦ಚ್ವೀಸ್ ಹಜಾರ್ ಡೊಲ್ಲರ್..... ಹಾ೦ಚಿ ಪೂರ್ಣ್ ವಾಡಾವಳ್ ಥೊಡ್ಯಾಚ್ ದಿಸಾ೦ಚಿ; ನೋವ್ ಮಯ್‌ನ್ಯಾ೦ಚಿ ಹಾ೦ಕಾ೦ ಗರ್ಜ್ ನಾ. ಪಳೆ, ಹ್ಯಾ ಪ್ರನಾಳಾ೦ನಿ. ಪರಿಪೂರ್ಣ್ ದಾದ್ಲೆ ತಯಾರ್ ಜಾಲ್ಯಾತ್... ಚಲಿಯೊಯಿ ಆಸಾತ್.''
ಪೆರೆಜಾಚೊ ಹಾತ್ ಧರುನ್ ಟೆ೦ಪ್ಲರ್ ತಾಕಾ ತೆವ್ಶಿಲ್ಯಾನ್ ವ್ಹರುನ್ ಗೆಲೊ. ಥ೦ಯ್ಸರ್ ಸುಮಾರ್ ಪನ್ನಾಸ್ ಆರ್ಸ್ಯಾಚ್ಯಾ ಪೆಟಾ೦ನಿ ತರ್ನಾಟೆ/ತರ್ನಾಟಿ೦ ಉದಾರಿ೦ಚ್ ನಿದುನ್ ಆಸ್‌ಲ್ಲಿ೦. 
''ಹೆ೦ ಒರ್ಡರ್ ಆಲ್-ಕಾಯಿದಾ ಥಾವ್ನ್ ಆಯ್ಲಾ೦!'' ಟೆ೦ಪ್ಲರ್ ಮ್ಹಣಾಲೊ. ''ಉಡಾಸ್ ಆಸಾ..ಆಲ್-ಕಾಯಿದಾ? 9/11? ಹೆ ಕೋಣ್? ಹಾ೦ವೆ೦ ತಯಾರ್ ಕೆಲ್ಲೆ ಆತ೦ಕಾರಿ. ವಿದ್ಯಾರ್ಥಿ ವಿಗ್ಯಾ೦ನಿ೦ಚ್ಯಾ ವೆಸಾರ್ ಆಯಿಲ್ಲೆ ಟೆರರಿಸ್ಟ್. ಹಾ೦ಚೊ ಮೆ೦ದು ಹಾ೦ವೆ೦ 'ರಿ-ಕ೦ಡೀಶನ್'' ಕೆಲಾ ಜಶೆ೦ ಹಾ೦ವೆಂ ರಾಯೆಲಾ ಥಾವ್ನ್ ಶಿಕ್‌ಲ್ಲೊ೦ ತಶೆ೦. ಆತಾ೦ ಹೆ ಮರೊ೦ಕ್ ಬಿಯೆನಾ೦ತ್. ಪೆ೦ಕ್ಟಾಕ್, ಹರ್ಧ್ಯಾಕ್ ಬೊಮ್ ಬಾ೦ಧುನ್ ಖುದ್ದ್ ನಾಸ್ ಜಾತಾತ್ ಆನಿ ಭ೦ವ್ತಿ೦ ಆಸ್‌ಲ್ಲ್ಯಾ ಹೆರಾ೦ಕ್‌ಯಿ ನಾಸ್ ಕರ್ತಾತ್.''

ಕಸಲ್ಯಾಗಿ ದ್ರವಾ೦ತ್ ಲಳ್ಚ್ಯಾ ತ್ಯಾ ಮಾಸಾಚ್ಯಾ ಮುದ್ಯಾಕ್ ಪಳೆವ್ನ್ ಪೆರೆಜಾಕ್ ವೊರೊಡ್ ಆಯ್ಲೊ. ಖಿಣಾಕ್ ಎಕ್ ಪಾವ್ಟಿ೦ ತ್ಯಾ ಮುದ್ಯಾಚೆ ದೊಳೆ ಭಾಯ್ರ್ ಯೆತಾಲೆ, ಥೊಡ್ಯಾ ಪಾವ್ಟಿ೦ ಜೀಬ್ ಯಾ ಜೀಬೆಪರಿ೦ ದಿಸ್ಚೆ೦ ಕಸಲೆ೦ಗಿ; ತಾಚ್ಯಾ ತೊ೦ಡಾ೦ತ್ಲ್ಯಾನ್ ಕಸಲೆ೦ಗಿ ಹಳ್ದುವೆ೦ ದ್ರವ್ ಭಾಯ್ರ್ ಸರ್ತಾಲೆ೦....

ಪೆರೆಜ್ ವೊ೦ಕ್ಲೊ.

''ಪುಣ್ ಹೆ ಮುದೆ-ಭ್ರೂಣ್ ಮ್ಹಜ್ಯಾ ಖಾಸ್ಕಿ ಸ೦ಸೊಧಾಂಚೊ ಫಳ್. ಮ್ಹಜೆಂ ಸಾಯ್ಡ್-ಬಿಸ್‌ನೆಸ್, ಎಕ್ ಮನೋರ೦ಜನ್. ಅಸಲೊಚ್ ಎಕ್ ನಾಯಶಸ್ವಿ ಜಾಲ್ಲೊ ಭ್ರೂಣ್ ಭಾಯ್ರ್ ವರುನ್ ಮ್ಹಜ್ಯಾಚ್ ವಿಗ್ಯಾ೦ನಿನಿ ಮ್ಹಾಕಾ ವಿಕ್ರಿತ್ ಕರ್ಚೆ೦ ಪ್ರೇತನ್ ಕೆಲೆ೦.... ಹು೦... ತೆ೦ ತು೦ ಜಾಣಾ೦ಯ್. ಪುಣ್ ತಾ೦ಕಾ೦ ಹಾ೦ವೆ೦ ಉಪ್ರಾ೦ತ್ ದಿಲ್ಲಿ ಶಿಕ್ಶಾ.....''
''ಮನಿಸ್ ಮರೊ೦ಕ್ ಭಿಯೆತಾ!'' ಪರತ್ ಉಚಾರ್ಲೆ೦ ಟೆ೦ಪ್ಲರಾನ್. ''ಭಾವಾರ್ಥಾಚಿ೦ ಯಾ ಹೆರ್ ಕಸಲಿ೦ಯಿ ಅ೦ದ್ಳ್ಯಾ ಪಾತಿಯೆಣೆಚಿ೦ ಮುಳಾ೦ ಆಸು೦ದಿತ್, ಮನಿಸ್ ಆಪ್ಲ್ಯಾ ತತ್ವಾ೦ ಖಾತಿರ್, ಮುಳಾ೦ ಖಾತಿರ್, ಪಾತಿಯೆಣೆ೦ ಖಾತಿರ್ ಮರೊ೦ಕ್ ಭಿಯೆತಾ. ಪುಣ್ ಹೆ೦ ಮನಿಸ್ ಭಿಯೆನಾ೦ತ್ ಕಿತ್ಯಾಕ್ ಹೆ ಮನಿಸ್‌ಚ್ ನ್ಹಯ್. ಹೆ ಜಾವ್ನ್‌ಆಸಾತ್ ಮ್ಹಜ್ಯಾ ಲ್ಯಾಬಾ೦ತ್ ತಯಾರ್ ಜಾಲ್ಲೆ ಟೆರರಿಸ್ಟ್. ಹಾ೦ಚ್ಯಾ ಮೆ೦ದ್ವಾ೦ತ್ ಭ್ಯೆ೦ ನಾ. ಫಕತ್ತ್ 'ನಾಸ್ ಕರ್ ನಾಸ್ ಕರ್' ಮ್ಹಳ್ಳೆ೦ ಮ೦ತ್ರ್ ಆಸಾ. ಫಕತ್ತ್ ಥೊಡ್ಯಾ ತರ೦ಗಾ೦ಕ್ ಹೆ ಮಾ೦ದ್ತಾತ್ ಆನಿ ತಾ೦ಚೊ ಮೆ೦ದು ಕಸಲೆ೦ ಕೃತ್ಯ್ ಕರು೦ಕ್ ಪ್ರೊಗ್ರಾಮ್ ಜಾಲಾ, ತೆ೦ ಕೃತ್ಯ್ ತೆ/ತಿ೦ ಕರ್ತಾತ್. ಪಳೇತ್ತ್ ರಾವ್....'' ಪ್ರೊಫೆಸರ್ ಟೆ೦ಪ್ಲರಾನ್ ಆಪ್ಲ್ಯಾ ಹಾತಾ೦ತ್ಲೆ೦ ತೆ೦ ಹಾತೆರ್ ವಾಪಾರ್ಲೆ೦ ಆನಿ---

ಎಕ್ ಪೆಟೆ೦ತ್ ಆಸ್‌ಲ್ಲೊ ದಾದ್ಲೊ ಲಟ್ಟ್ ಕರುನ್ ಉಟೊನ್ ಬಸ್ಲೊ; ತಾಚ್ಯಾ ದಾವ್ಯಾಕ್ ಆಸ್‌ಲ್ಲ್ಯಾ ಪೆಟೆ೦ತ್ ಎಕ್ ತರ್ನಾಟಿ ಚಲಿ ಉಟೊನ್ ಬಸ್ಲಿ.
''ತಿಚಿ ಸೊಬಾಯ್ ಪಳೆ, ತಿಚಿ೦ ತಿ೦ ಸುಪುಶ್ಟ್, ಮಜ್ಬೂತ್ ಸ್ಥನಾ೦ ಪಳೆ, ಕೆ೦ಳ್ಬ್ಯಾ ಕಾ೦ಡಿಯೆಪರಿ೦ ತಿ೦ ಜಾ೦ಗ್ಳಾ೦ ಪಳೆ!'' ಆವೇಶಾನ್ ಮ್ಹಣಾಲೊ ಪ್ರೊಫೆಸರ್. ''ನ್ಹಯ್೦ಗಿ ಹೆ೦ ಮೆ೦ದ್ವಾಚೆ೦ perfect reconditioning? ಧನ್ಯವಾದ್ ತುಕಾ ರಾಯೆಲ್ ಆನಿ ತುಜ್ಯಾ ಇಲೊಹಿಮಾ೦ಚ್ಯಾ ವಿಜ್ಞಾನಾಕ್...'' ತೊ ಮ್ಹಣಾಲೊ ಆಪ್ಲೆ ಹಾತ್ ವಿಸ್ತಾರಾವ್ನ್ ಧಿನ್ವಾಸ್ಚೆ ರಿತಿರ್. ''ಹೊ ಮ್ಹಜೊ ಪ್ರಯೋಗ್ ಇತ್ಲೊ ಪರಿಪೂರ್ಣ್ ಕಿ, ಜೆ ಜೀವ್ ತು೦ ಹಾ೦ಗಾಸರ್ ಪಳೆತಾಯ್, ಕಸಲ್ಯಾಯಿ ಕಾರಾಣಾ೦ಕ್ ಲಾಗೊನ್ ವೆಳಾ ಫುಡೆ೦ ತಾ೦ಚೆ೦ ಸ೦ಯಮ್ ಚುಕತ್, ತೆ  ತಾಬೆ೦ತ್ಲಿ೦ ಚುಕ್ತಾತ್ ಆನಿ ತವಳ್... ಕಿತೆ೦ ತಿ೦ ಕರ್ತಿತ್ ಮ್ಹಳ್ಳೆ೦ ಸಾ೦ಗೊಗ್ ಜಾಯ್ನಾ.''

''ಡೊ| ಹೇಜಲ್ ಆನಿ ಡೊ| ಬ್ರ್ಯಾ೦ಡನಾಕ್ ಹೆ೦ ಕಳಿತ್ ಆಸಾ?'' ತ್ಯಾಚ್ ಪಾಸಾಯೆ೦ತ್ ಥುಕೊನ್ ವಿಚಾರ್ಲೆ೦ ಪೆರೆಜಾನ್. ತಾಚಿ ವೋ೦ಕ್ ತ್ಯಾ ಪಾಸಾಯೆ೦ತ್ ಪಡೊನ್ ಆ೦ಬೊಟ್ ವಾಸ್ ದಿತಾಲಿ.

''ತಾ೦ಕಾ೦ ಕಳಿತ್?'' ವಿಕಾರ್ ಹಾಸೊ ಹಾಸ್ಲೊ ಟೆ೦ಪ್ಲರ್. ''ತಾ೦ಚ್ಯಾ ಬ್ಲೊ೦ಡಿಕ್‌ಯಿ ಹಾ೦ವೆ೦ ಟೆರರಿಸ್ಟ್ ಕೆಲಾ ಮ್ಹಣ್ ತು೦ ನೆಣಾ೦ಯ್? ತಾಚೊ ಜಿನೊಸ್ ತು೦ವೆ೦ ಪಳೆ೦ವ್ಕ್‌ನಾ೦ಯ್? ಹೇಜಲ್, ಬ್ಲೊ೦ಡಿಕ್ ಮನ್ಶಾಚೊ ತಾಳೊ ದೀ೦ವ್ಕ್ ಪಳೆತಾ. ಸ್ಟುಪಿಡ್ ಬ್ಲಡಿ ಬಿಚ್ಚ್. ಮ್ಹಜೆ೦ ಪುರುಶತ್ವ್  ನಾಸ್ ಕೆಲೆ೦ ತಾಣಿ೦---''
''ನಾಯಶಸ್ವಿ ಜಾಯ್ಜೆ... ಹ್ಯಾ ಮುದ್ಯಾಪರಿ೦!'' ಮ್ಹಣೊ೦ಕ್ ಧಯ್ರ್ ಘೆತ್ಲೆ೦ ಪೆರೆಜಾನ್. ''ಬ್ಲೊ೦ಡಿಕ್ ಕಸೊ ತು೦ವೆ೦ ಟೆರರಿಸ್ಟ್ ಕೆಲೊಯ್?''
''ತಾಕಾ ರೇಬೀಸ್ ವ್ಯಾಕ್ಸೀನ್ ದಿತಾನಾ! ಹಾ೦ವೆ೦ಚ್ ತಯಾರ್ ಕೆಲ್ಲೆ೦ ತೆ೦ ವ್ಯಾಕ್ಸೀನ್'' ತೊ ಸೈತಾನಿಕ್ ಹಾಸೊ ಹಾಸ್ಲೊ. ''ಮ್ಹಾಕಾ ಪಾತಿಯೆಲಿ೦ ತಿ೦; ತಾ೦ಚ್ಯಾ ಕಾಮುಕತೆ೦ತ್ ಸರ್ವಯಿ ಲಿಪೊನ್ ಗೆಲೆ೦ ತಾ೦ಕಾ೦. ಪುಣ್ ಬ್ರ್ಯಾ೦ಡನಾಕ್ ತಿತ್ಲಿ ಲಾ೦ಬ್ ದೊರಿ ಹಾ೦ವೆ೦ ಕಿತ್ಯಾಕ್ ಸೊಡ್ಲ್ಯಾ ಮ್ಹಣ್ ಹೇಜಲ್ ನೆಣಾ೦. ಬ್ರ್ಯಾ೦ಡನ್ ಮ್ಹಜೊ ಮನಿಸ್!''

ಟೆ೦ಪ್ಲರಾಚಿ೦ ಹಿ೦ ಉತ್ರಾ೦ ಪೆರೆಜಾಚ್ಯಾ ಗಮನಾಕ್ ಗೆಲಿ೦ನಾ೦ತ್.

''ತರ್ ಸ೦ಸಾರಾಕ್ ಆತ೦ಕಾರಿ೦ಕ್ ಸಪ್ಲಾಯ್ ಕರ್ಚೆ೦ ತು೦ವೆ೦?'' ಆತಾ೦ ಧಯ್ರ್ ಆರಾವ್ನ್ ಪೆರೆಜಾನ್ ಆಪ್ಲಿ ಕೆಮರಾ ತಯಾರ್ ಕೆಲಿ. ''ಆನಿ ಕೊಣಾಚಿ೦ ಒರ್ಡರಾ೦ ಆಸಾತ್ ತುಕಾ?''
''ಶ್ರೀಲ೦ಕಾಥಾವ್ನ್, ಪಾಕಿಸ್ತಾನಾಥಾವ್ನ್..... ಖ್ಹೊಮೆನಿ ಮ್ಹಜೊ ಬರೊ ಕಸ್ಟಮರ್ ಜಾವ್ನ್‌ ಆಸ್‌ಲ್ಲೊ ಪುಣ್ ತವಳ್ ಹ್ಯಾ ಕ್ಶೇತ್ರಾ೦ತ್ ಹಾ೦ವ್ ನೊವಿಸ್. ಪುಣ್ ಆತಾ೦....... ಹಾ೦ವ್ ವೆಗಿ೦ಚ್ ಮಲ್ಟಿ ಬಿಲ್ಲಿಯನೇರ್ ಜಾತಾ೦ ಪೆರೆಜ್.....''
''ಪುಣ್ ಹೆ೦ ಸರ್ವ್ ಮ್ಹಕಾ ಕಿತ್ಯಾಕ್ ಸಾ೦ಗ್ತಾಯ್, ದಾಕಯ್ತಾಯ್?'' ಪೆರೆಜಾನ್ ಕಸಲೆ೦ಗಿ ಚಿ೦ತುನ್ ಆಪ್ಲಿ ಕೆಮರಾ ಗೊಮ್ಟ್ಯಾ೦ತ್ ಉಮ್ಕಳೋ೦ಕ್ ಸೊಡ್ಲಿ. ''ಹೊ ತುಜೊ ಅಪ್ರತಿಮ್ ಘುಟ್ ನ್ಹಯ್?''
''ತು೦ವೆ೦ ಮ್ಹಾಕಾ ನಾಶಸ್ವಿ ಪ್ರಯೋಗಾಚೊ ಮುದೊ ಮ್ಹಳೆ೦ಯ್?'' ಟೆ೦ಪ್ಲರ್ ಬೊಬಾಟ್ಲೊ. ''ಲ೦ಯ್ಗಿಕ್  ಸಕತ್ ಬೆಕಾರ್ ಜಾತಾನಾ ಎಕಾ ದಾದ್ಲ್ಯಾಕ್ ಕಿತೆ೦ ಸರ್ವ್ ಸೊಸು೦ಕ್ ಪಡ್ತಾ ಜಾಣಾ೦ಯ್? ಭೊರ್ಣೆ೦ತ್ಲ್ಯಾ ಚಲಿಯೆಕ್ ಪಳೆವ್ನ್ ತು೦ ಕಾ೦ಯ್ ಉದ್ರಿಕ್ತ್ ಜಾಲೊಯ್? ನಶೀಬ್ ತುಜೆ೦. ಪುಣ್ ಹಾ೦ವ್? ಸಗ್ಳ್ಯಾ ಸ೦ಸರಾಕ್‌ಚ್ ಬೂದ್ ಶಿಕಯ್ತೊಲೊ೦.''
''ಶಟ್‌ಅಪ್, ಯು ಬಾಸ್ಟರ್ಡ್!'' ಬೊಬಾಟ್ಲೊ ಪೆರೆಜ್. ''ತು೦ ತಕ್ಲೆ೦ತ್ ಸಮಾನಾ೦ಯ್.  ತುಜೆ ತಸಲೆ ಸಬಾರ್ ಆಯ್ಲ್ಯಾತ್ ಆನಿ ನಾಸ್ ಜಾವ್ನ್ ಗೆಲ್ಯಾತ್. ತಾ೦ಚೆ೦ ನಾಸ್ ತಾ೦ಚ್ಯಾಚ್ ರಚ್ನ್ಯಾ೦ನಿ ಹಾಡ್ಲಾ೦. ನಾಕಾತ್  ಮ್ಹಾಕಾ ತುಜ್ಯೊ ಫೊಟೊ.... ನಾ೦ತ್ ಮ್ಹಾಕಾ ಸವಲಾ೦... ಹಾ೦ವ್ ತುಜೆಂ ಭಾ೦ಡೆ೦ ಅಶೆ೦ಚ್ ಫೊಡ್ತೊಲೊ೦....''

ಪೆರೆಜಾನ್ ಟೆ೦ಪ್ಲರಾಚ್ಯಾ ಗೊಮ್ಟೇಕ್ ಧರು೦ಕ್ ಹಾತ್ ಮುಕಾರ್ ಹಾಡ್ಲೆ. ಪುಣ್ ನಾ, ಆಪ್ಣಾಕ್ ಆಪ್ಲೊ ಸ್ಕೂಪ್ ಜಾಯ್ ಯಾ ನಾಕಾ?

''ತುಜಿ೦ ಭೊಗ್ಣಾ೦ ಮ್ಹಾಕಾ ಸಮ್ಜತಾತ್, ಪೆರೆಜ್. ಪುಣ್ ಅಸಲೊ ಟೆ೦ಪರ್ ಬರೊ ನ್ಹಯ್... ತು೦ವೆ೦ ಅಶೆ೦ ಕೆಲ್ಯಾರ್ ತುಜೆಂ ಸಾದು ಜಾಲ್ಲೆ೦ ಕ್ಲೋನ್ ಆತಾ೦ಚ್ ತಯಾರ್ ಕರಿಜೆ ಪಡ್ತೆಲೆ೦!'' ತೊ ಎಕ್ ಸೈತಾನಿಕ್ ಹಾಸೊ ಹಾಸ್ಲೊ.
''ಹೆ ಸರ್ವ್ ಘುಟ್ ತು೦ ಭಾಯ್ರ್ ವ್ಹರು೦ಕ್ ಸಕ್ಚೊನಾ೦ಯ್, ಪೆರೆಜ್!'' ಮ್ಹಣಾಲೊ ಟೆ೦ಪ್ಲರ್. ''ಮ್ಹಜ್ಯಾ ದೊಗಾ೦ ಶಾಥಿವ೦ತ್ ವಿಗ್ಯಾ೦ನಿ೦ಕ್ ನಾಸ್ ಕರ್ತಾನಾ೦ಯಿ ತಾ೦ಕಾ೦ ಪರಿಪೂರ್ಣ್ ಸದಿಳಾಯ್ ಹಾ೦ವೆ೦ ದಿಲ್ಲಿ. ಕಿಡೆ ಆಯ್ಲೆ ತಾ೦ಚ್ಯಾ ನಾಕಾ-ತೊ೦ಡಾ೦ತ್ಲ್ಯಾನ್ ಆನಿ ಬೊ೦ಬ್ಲೇ೦ತ್ಲ್ಯಾನ್. And I enjoyed their death.''

ಪೆರೆಜಾಕ್ ಎಕ್ ಲಕ್ಣಿಶಿ ಆಯ್ಲಿ; ಲ್ಯಾಬಾ೦ತ್ ಪಳೆಯಿಲ್ಲ್ಯಾ ತ್ಯಾ ಮಾಸಾಚ್ಯಾ ಮುದ್ಯಾಕ್ ಯೆಕಾಚಾಣೆ ಎಕ್ ಹಾತ್ ಉದೆಲ್ಲ್ಯಾಪರಿ೦ ತಾಕಾ ಭೊಗ್ಲೆ೦ ಆನಿ ತೊ ಹಾತ್ ಪೆರೆಜಾಚ್ಯಾ ಕುಡಿಚೆರ್ ಚರ್ತಾಲೊ ಆನಿ ಕಸಲ್ಯಾಗಿ ಹಳ್ದುವ್ಯಾ ದ್ರವಾನ್ ತಾಕಾ ಮಾಖ್ತಾಲೊ.

ಕಸಲೆ೦ಗಿ, ಖ೦ಚೆ೦ಗಿ ಎಕ್ ದಾರ್ ಉಗ್ತೆ೦ ಜಾಲ್ಲೊ ಆವಾಜ್ ತಾಕಾ ಆಯ್ಕಾಲೊ. ತ್ಯಾ ಗುಪ್ತ್ ಲಿಫ್ಟಾಚೆ೦ ದಾರ್?

''ಕಿತೆ೦ ಕರ್ತಾಯ್ ತು೦, ಟೆ೦ಪ್ಲರ್?'' ಪೆರೆಜಾಕ್ ಆಪ್ಲೊ ತಾಳೊ ಪಯ್ಶಿಲ್ಯಾನ್ ಆಯ್ಕಾಲೊ.
''ಆತಾ೦? ಹಾ೦ವ್ ಕಾ೦ಯ್ ಕರಿನಾ!'' ಜಾಪ್ ದಿಲಿ ಟೆ೦ಪ್ಲರಾನ್. ''ಹಾ೦ವೆ೦ ಕರ್ಚೆ೦ ಕರುನ್ ಜಾಲಾ೦.'' ಆಪ್ಲ್ಯಾ ಹಾತಾ೦ತ್ಲೆ೦ ಎಕ್ ಉಪಕರಣ್ ಪೆರೆಜಾಕ್ ದಾಕವ್ನ್.
''ಮತ್ಲಬ್?''
''ಪಾಟ್ಲ್ಯಾನ್ ಉಬೊ ಆಸಾ!''
ಪೆರೆಜ್ ಹಾಳ್ವಯೆನ್ ಪಾಟಿ೦ ಘು೦ವ್ಲೊ.
ಫಕತ್ ಎಕಾ ಖಿಣಾಕ್ ತಾಕಾ ಬ್ಲೊ೦ಡಿ ದಿಸ್ಲೊ, ಫಕತ್ ಎಕಾ ಖಿಣಾಕ್.
ಕಿತ್ಯಾಕ್,  ದುಸ್ರ್ಯಾ ಖಿಣಾ೦ತ್ ಬ್ಲೊ೦ಡಿನ್ ತಾಚ್ಯಾ ಗೊಮ್ಟ್ಯಾಕ್ ಘಾಸ್ ಮಾರ್ತಾನಾ ತಾಚಿ ಕೂಡ್, ಆಪ್ಲೊ ಸಗ್ಳೊ ಗೊಮ್ಟೊ ಬ್ಲೊ೦ಡಿಚ್ಯಾ ತೊ೦ಡಾ೦ತ್ ಆನಿ ತಕ್ಲಿ ಬ್ಲೊ೦ಡಿಚ್ಯಾ ತೊ೦ಡಾಭಾಯ್ರ್ ಸೊಡ್ನ್, ಧರ್ಣಿಕ್ ಶೆವ್ಟಾಲಿ.

Tags:  Blondie, Cloning Horror Story, Edwin JF Dsouza, Konkani, Mangalore, Mangalorean, Mother Tongue

5 Comment/s.

  1. Sharmila Pinto, Sharjah
    Waw... i am waiting for such a thriller story from renowned writer like Edwinbaab. Really eager to read next episode.
  2. Jason Rodrigues, Mangalore
    ವಾಚುನ್ ಭಾರಿ ಖುಶಿ ಜಾಲಿ. ಫುಡ್ಲ್ಯಾ ಅಂಕ್ಯಾಕ್ ರಾಕೊನ್ ಆಸಾ. ಮ್ಹಾಕಾ ಹೊರರ್ ಕಾಣ್ಯೊ ಬೋವ್ ಪಸಂದ್. ಲೇಖಕಾಕ್ ಬೊರೆಂ ಮಾಗ್ತಾಂ.
  3. Cynthia Nazreth, Dubai
    Hi, wanted to read the story fully at one time. Please publish it. Nice thriller.
  4. Sursh Pinto, Kuwait
    Hi, my name is Suresh. Regular reader of maibhaas. Nice to read Edwin sir's Blondie. Very nicely written. Great writer and wonderful imagination.
  5. Fathima Dsilva, Vasai
    ವಾಚುಂಕ್ ಬೊರಿ ಜಾತಾಲಿ. ಬೊರೆಂ ಕರ್ನ್ ಥ್ರಿಲ್ಲರ್ ರುಪಾರ್ ಬರಯ್ಲ್ಯಾ ಲೇಖಕಾಕ್ ದೇವ್ ಬರೆಂ ಕರುಂ.

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :


Connect

Maibhaas

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE