"ಜ಼ೆಜ಼ುಕ್ರಿಸ್ತ್ ಮರೊ೦ಕ್‌ಚ್ ನಾ ಜ಼ಾಲ್ಲ್ಯಾನ್ ತೊ ಪುನರ್-ಜ಼ಿವ೦ತ್ ಜ಼ಾಲೊ ಮ್ಹಣ್ಚ್ಯಾಕ್ ಅರ್ಥ್‌ಚ್ ನಾ!" ತಾಚೆ೦ ಹೆ೦ ವಾಕ್ಯೆಂ ಸಾಮ್ಕಾರ್ ಬಸುನ್ ಆಸ್‌ಲ್ಲ್ಯಾ೦ಚೆರ್ ಕಸಲೊ ಪರಿಣಾಮ್ ಘಾಲಿತ್ ಮ್ಹಳ್ಳೊ ಅ೦ದಾಜ಼್ ಡೊ|ಹೇಜ಼ಲಾಕ್ ಆಸ್‌ಲ್ಲೊ ಆನಿ ಹ್ಯಾ ಪರಿಣಾಮಾಚೆ೦ ಪ್ರತಿಕ್ರಿಯೆ೦ ಉಟ್ಚ್ಯಾ ಪಯ್ಲೆ೦ಚ್ ತಾಣೆ ಆಪ್ಲೊ ಹಾತ್ ಉಬಾರ್ಲೊ. 

"ಹಾ೦ವ್ ಮ್ಹಜ಼್ಯಾ ವೊಕ್ಕಾಣ್ಯಾಕ್ ವಿವರ್ ದಿತಾ೦!" ತೆ೦ ಮ್ಹಣಾಲೆ೦. "ಕೊಣಾಯ್ಚಿ೦ ಭಾವಾರ್ಥಿಕ್ ಸಿ೦ತಿಮೆ೦ತಾ೦ ದುಕ೦ವ್ಚೊ ಉದ್ದೇಶ್ ಮ್ಹಜ಼ೊ ನ್ಹಯ್....."

"ಪುಣ್ ತಾಚ್ಯಾಕಿ ವರ್ತೆ೦ ತು೦ವೆ೦ ಕೆಲಾ೦ಯ್, ಡೊ|ಹೇಜ಼ಲ್ ಜ಼ೊಶ್ವಾ!" ಯೆಕ್ಲ್ಯಾನ್ ತಾಳೊ ಕಾಡ್ಲೊಚ್. "ಹಾ೦ವ್ ಕಾತೊಲಿಕ್ ಆನಿ ತು೦ವೆ೦ ಆಮ್ಚ್ಯಾ ಭಾವಾರ್ಥಾಕ್ ಅಕ್ಮಾನ್ ಕೆಲಾಯ್."

"ತು೦ ತುಜ಼ೊ ಪವಿತ್ ಗೃ೦ಥ್ ಜ಼ಾಣಾ೦ಯ್ ಮಾನೇಸ್ತಾ?" ತಾಣೆ ಶಾ೦ತ್‌ಪಣಿ ವಿಚಾರ್ಲೆ೦. "ಖ೦ಚಿ ಆವೃತಿ ತುಕಾ ಆವಡ್ತಾ? King James Version, Gideons, New English version?'' ಹ್ಯಾ ಸವಲಾ ಬರಾಬರ್ ತಾಣೆ ಎಕ್ ದೀಶ್ಟ್ ಕುಶಿಕ್ ಮಾರುನ್ ಆಪ್ಣಾ ಸಾ೦ಗಾತಾ ಪ್ಯಾನೆಲಾರ್ ಬಸುನ್ ಆಸ್‌ಲ್ಲ್ಯಾ ಪ್ರೊಫೆಸರ್ ಟೆ೦ಪ್ಲರ್ ಜ಼ೊಶ್ವಾಕ್ ಪಾಟಯ್ಲಿ. ಫ್ರೊಫೆಸರಾನ್ ಚಿಕ್ಕೆಸೆ ಗೊಮ್ಟಿ ಮಾಲ್ವಯ್ಲಿ, ಫುಡೆ೦ ಚಲಯ್ ಮ್ಹಳ್ಳ್ಯಾ ಹಿಶಾರ್ಯಾನ್. ಟೆ೦ಪ್ಲರ್ ಜ಼ೋಶ್ವಾ ತಾಚೊ ಪತಿ. ವಿಗ್ಯಾನಾನ್ ಆನಿ ಸ೦ಸೊಧಾನ್ ಸೊದುನ್ ದಿಲ್ಲೊ ಪತಿ. ಹೇಜ಼ಲ್ ತಾಕಾ ಭೆಟ್ತಾನಾ ಟೆ೦ಪ್ಲರಾಚಿ ಆನಿ ತಾಚ್ಯಾ ಹ್ಯಾ ಭ್ರೂಣ್ ಸೆ೦ಟರಾಚಿ ಪ್ರಕ್ಯಾತಿ ಸ೦ಸರಾನ್ ಮಾನುನ್ ಘೆತ್‌ಲ್ಲಿ ತಸಲಿ. ಪ್ರಾಯೆ೦ತ್ ವೀಸ್ ವರ್ಸಾ೦ಚೆ೦ ಫರಕ್ ತಾ೦ಕಾ೦ ಲಗ್ನಾಕ್ ಅಡ್ಕಳ್ ಹಾಡಿನಾ ಜ಼ಾಲೆ೦.....ತೆ೦ ತವಳ್.

ಸೆ೦ಟರಾ೦ತ್ಲೊ ಆನ್ಯೇಕ್ ವಿಗ್ಯಾನಿ, ಡೊ|ಡೆನಿಯಲ್ ಬ್ರ್ಯಾ೦ಡನ್ ಮುಕಮಳಾರ್ ಕಸಲೆ೦ಚ್ ಭಾವನ್‌ನಾಸ್ತಾ೦ ಹೇಜ಼ಲಾಕ್ ಪಳೆತಾಲೊ.

ಕಸಲ್ಯಾಯಿ ಪಾಟಿ೦ಬ್ಯಾಚಿ ಹೇಜ಼ಲಾಕ್ ಗರ್ಜ಼್‌ನಾತ್‌ಲ್ಲಿ ಕಿತ್ಯಾಕ್ ಫ್ರೊಫೆಸರ್ ಆನಿ ತಾಚೆ ಮಧ್ಲೊ ಸ೦ಬ೦ದ್ ಆನಿ ಸ೦ಪರ್ಕ್-ದಯ್‌ಹಿಕ್ ಯಾ ಮಾನಸಿಕ್ ಆನಿ ವಿಗ್ಯಾನಿಕ್ ಸಯ್ತ್-ಕ೦ಲ್ಬೆಲ್ಲೊ. ಆನಿ ತಾಚ್ಯಾ ಆನಿ ಬ್ರ್ಯಾ೦ಡನಾ ಮಧ್ಲೊ.....ಹಿ ಚಿ೦ತ್ನಾ೦ ತಾಣೆ ಪಯ್ಸ್ ಕೆಲಿ೦.

"ಹಾ೦ವ್ ಕಿತೆ೦ ಜ಼ಾಣಾ೦ ತೆ೦ ಗರ್ಜ಼ೆಚೆ೦ ನ್ಹಯ್!" ಮ್ಹಣಾಲೊ ತೊ ಮಾನೇಸ್ತ್. "ಪುಣ್ ಮ್ಹಜ಼್ಯಾ ಭಾವಾರ್ಥಾಚ್ಯಾ ಸತಾಚೆರ್ ತು೦ವೆ೦ ಫಟ್ವಾದ್ ಘಾಲ್ಚೊ ಖ೦ಡನ್ ಕರ್ತಾ೦ ಹಾ೦ವ್!" 

ಸಾಲಾ೦ತ್ ಗುಜ಼ುಗುಜ಼ು ಉಲವ್ಣೆ೦ ಉಟ್ಲೆ೦ ಪುಣ್ ಹೇಜ಼ಲಾನ್ ತಾಳೊ ಸದಿಳ್ ಕರ್ತಾನಾ ರಾವ್ಲೆ೦. ತಾಚೆ೦ ಆನಿ ರಿಸರ್ಚ್ ಸೆ೦ಟರಾ೦ತ್ಲ್ಯಾ ಹೆರ್ ವಿಗ್ಯಾನಿ೦ಚೆ ಮಟ್ಟ್ ಅ೦ತರ್‌ರಾಶ್ಟ್ರೀಯ್ ಖ್ಯಾತಿಚೆ೦ ಮ್ಹಣ್ ಸರ್ವ್ ಜ಼ಾಣಾ೦ ಆಸ್‌ಲ್ಲೆ.

"ತುಮ್ಕಾ೦ ಪರಿಚಿತ್ ಸರ್ವ್ ಬಾಯ್ಬಲಾ೦ ಪಾಟ್ಲ್ಯಾನ್ ಎಕ್ ಹೀಬ್ರೂ ಬಾಯ್ಬಲ್ ಆಸಾ ಮ್ಹಳ್ಳೆ೦ ತುಮಿ೦ ಉಡಾಸ್ ದವರಿಜ಼ೆ," ತೆ೦ ಮ್ಹಣಾಲೆ೦. "ಹಾ೦ತ್ಲಿ೦ ಚಡಾವತ್ ಲಿಕಿತಾ೦ ತುಮ್ಚ್ಯಾ ಗಮನಾಕ್ ತುಮ್ಚ್ಯಾ ಪವಿತ್ ಸಭೆನ್ ಹಾಡು೦ಕ್‌ನಾ೦ತ್. ಜ಼ೊ ತುಮಿ೦ ಪರ್ನೊ ಸೊಲ್ಲೊ ಮ್ಹಣ್ತಾತ್ ತೊ ತುಮ್ಚ್ಯಾ ಹಾತಾ೦ಕ್ ಆಯಿಲ್ಲೊ ಪಾಟ್ಲ್ಯಾಚ್ ವರ್ಸಾ೦ನಿ ನ್ಹಯ್?"

"ತು೦ವೆ೦ ಬೊಲ್ಯಾ ಭ೦ವ್ತಿ೦ ಆ೦ಬುಡ್ಚೆ೦ ನಾಕಾ, ಡೊ|ಹೇಜ಼ಲ್," ಅನ್ಯೇಕ್ಲೊ ಮ್ಹಣಾಲೊ. "ಶೀದಾ ಮುದ್ದ್ಯಾಕ್‍ಚ್ ಯೆ."

"ಬರೆ೦ ತರ್," ಮ್ಹಣಾಲೆ೦ ಹೇಜ಼ಲ್, ತವಳ್ ಪರ್ಯಾಂತ್ ಆಪ್ಲ್ಯಾ ಗೊಮ್ಟ್ಯಾಕ್ ಉಮ್ಕಾಳೋನ್ ಆಸ್‌ಲ್ಲಿ೦ ಚಶ್ಮಾ೦ ನಾಕಾಚೆರ್ ಚಡವ್ನ್. ಮೊಳ್ಬಾ-ನಿಳ್ಶಿ ಜ಼ಾಕೆಟ್ ತಾಣೆ ಘಾಲ್ಲಿ ಆನಿ  ತ್ಯಾಚ್ ವರ್ಣಾಚೊ, ದೊ೦ಪ್ರಾಥಾವ್ನ್ ತೀನ್ ಇ೦ಚಾ೦ ವಯ್ರ್ ಬಸ್ಚೊ ಸ್ಕರ್ಟ್; ಧವೆ೦ಚ್ ಶರ್ಟ್ ಜ಼ಾಚೊ ಕೊಲ್ಲರ್ ತಾಣೆ ಆಪ್ಲ್ಯಾ ಜ಼ಾಕೆಟಿಚ್ಯಾ 'ಗೊಮ್ಟೆ'ರ್ ದೋಡ್ನ್ ದವರ್ಲೊಲೊ. ದಾಟ್ ಜ಼ಾಕೆಟಿ ಪಾಟ್ಲ್ಯಾನ್ ತರಿ ತಾಚಿ೦ ಸುಪುಶ್ಟ್ ಸ್ಥನಾ೦ ಉಟೊನ್ ದಿಸ್ತಾಲಿ೦.

'ಪ್ರಾಯ್ ಬಾವೇಚಾಳಿಸ್ ಉತರ್ಲ್ಯಾರಿ ದಿಸ್ತಾ ಪಳೆ ಕಶೆ೦, bloody bitch!' ಮನಾ೦ತ್‌ಚ್ ಉದ್ಗಾರ್ಲೊ ಪ್ರೊಫೆಸರ್ ಟೆ೦ಪ್ಲರ್. 'ಚಶ್ಮಾ೦ ದವರ್ಲ್ಯಾರ್ ಆನಿಕಿ ಸೆಕ್ಸಿ.'

"1997 ಫೆಬ್ರೆರಾ೦ತ್ 'ರಾಯೆಲ್' (Rael) ಮ್ಹಳ್ಳ್ಯಾ ಎಕಾ ವಿಗ್ಯಾನಿನ್  'ಕ್ಲೊನ್‌ಎಯ್ಡ್' (Clonaid) ಮ್ಹಳ್ಳೊ ಸ೦ಸ್ಥೊ/ಕ೦ಪೆನಿ ಸುರು ಕೆಲಿ. ವಾಸ್ತವ್ ಜ಼ಾವ್ನ್ ಹೊ ಸ೦ಸ್ಥೊ ಎಕಾ ನವ್ಯಾ ಭಾವಾರ್ಥಾಚೊ/ಪಾತಿಯೆಣೆಚೊ ಉದ್ಬವ್. ರಾಯೆಲಾಚ್ಯಾ ಸ೦ಸೊಧಾ ಪ್ರಕಾರ್ ಉತ್ಪತಿ ಗೃ೦ಥಾ೦ತ್ ಮನ್ಶಾಚೆ೦ ರಚನ್ ವಿವರಿಲಾ೦ ತೆ೦ ಬಿಲ್ಕುಲ್ ಫಟ್. ಹ್ಯಾ ಭುಮಿಚೆರ್ ಮನಿಸ್ ಉಬ್ಜಾಲ್ಲೊ, ಭಾಯ್ಲ್ಯಾ ಗೃಹಾ೦ಥಾವ್ನ್ ಆಯಿಲ್ಲ್ಯಾ 'ಇಲೊಹಿಮ್' ಮ್ಹಳ್ಳ್ಯಾ  ಜ಼ೀವಿ೦ನಿ ತಾ೦ಚಿ೦ಚ್ ತಶ್ತತೀಶ್ ರುಪಾ೦ DNA and genetic engineering ಜ಼ಾಣ್ವಾಯ್ ಆನಿ ತರ್ಜ಼ುಬೊ ವಾಪರ್ನ್ ರಚ್‌ಲ್ಲ್ಯಾನ್. ಹೊ 'ಇಲೊಹಿಮ್' ಮ್ಹಳ್ಳೊ ಸಬ್ದ್/ಉಲ್ಲೇಕ್ ಹೀಬ್ರೂ ಬಾಯ್ಬಲಾ೦ತ್ ಆಸಾ ಪುಣ್ ಹ್ಯಾ ಸಬ್ದಾಕ್ ಥೊಡ್ಯಾ ಶಾಣ್ಯಾ೦ನಿ 'ದೇವ್' ಮ್ಹಳ್ಳೊ ಅರ್ಥ್ ದಿಲಾ!"

ತೆ೦ ದೋನ್-ತೀನ್ ಖಿಣಾ೦ಬರ್ ರಾವ್ಲೆ೦.

ಕಾರ್ಲೊಸ್ ಪೆರೆಜ಼್ ತಾಕಾಚ್ ಪಳೆತಾಲೊ.

"ತುಮ್ಕಾ೦, ಕ್ಲೊನಿ೦ಗ್ ಮ್ಹಳ್ಯಾರ್ ಲ೦ಯ್ಗಿಕತೆ ಭಾಯ್ರ್ ಮನ್ಶಾ ಜ಼ೀವ್ ರಸ್ಚೊ ಆನಿ ನಯ್ಸರ್ಗಿಕತೆಕ್ ಆಡ್ ವೆಚೆ೦ ಮ್ಹಳ್ಳೆ೦ ಶಿವಾಯ್ ಹೆರ್ ಕಸಲೆ೦ಚ್ ಸುಸ್ತಾನಾ. ಹೆ೦ ಮ್ಹಜ಼ೆ೦ ದುರ್ಸವ್ಣೆ೦ ನ್ಹಯ್...ತುಮ್ಕಾ೦ ತಿ ಮಾಹೆತ್ ನಾ. ಹೆ೦ಯಿ ಮ್ಹಜ಼ೆ೦ ದುರ್ಸವ್ಣೆ೦ ನ್ಹಯ್. ತುಮಿ೦ therapeutic cloning ಮ್ಹಳ್ಳೆ ಹೆ ಸಬ್ದ್ ಖ೦ಡಿತ್ ಜ಼ಾವ್ನ್ ಆಯ್ಕಾಲ್ಯಾತ್ ಆಸ್ತೆಲೆ ಪುಣ್ ಹ್ಯಾ ಸಬ್ದಾ೦ಚೊ ಅರ್ಥ್ ಕಿತ್ಲ್ಯಾ ಮಟ್ಟಾರ್ ತುಮ್ಕಾ೦ ಸಮ್ಜಲಾ ಮ್ಹಣ್ ಹಾ೦ವ್ ನೆಣಾ೦. ಹಾಚೆರ್ ಲೆಕ್ಚರ್ ದೀ೦ವ್ಕ್‌ಯಿ ಹಾ೦ವ್ ವಚನಾ. Therapeutic cloning ಮ್ಹಳ್ಯಾರ್ ಚಿಕಿತ್ಸಾವಿಗ್ಯಾನ್. ಹ್ಯಾ ಮುಕಾ೦ತ್ರ್ ವಿಫಲ್ ಜ಼ಾವ್ನ್ ಯೆ೦ವ್ಚ್ಯಾ ಮನ್ಶಾಚ್ಯಾ ಅವಯುವಾ೦ಕ್ ರೀಪೆರಿ ಕರ್ಚೆ೦ ಸಾಧನ್ ಚಲ್ತಾ. ಆತಾ೦ ಆಮಿ೦ ಲಿವರ್, ಕಿಡ್ನಿ, ದೊಳ್ಯಾ೦-ಫುಲ್ cornea ಇತ್ಯಾದಿ ಎಕಾ ದಾನಿಥಾವ್ನ್ ಕಾಡ್ನ್ ದುಸ್ರ್ಯಾಥ೦ಯ್ ಕಶಿ ಕರ್ತಾ೦ವ್. ಪುಣ್ ಆತಾ೦, ಭ್ರೂಣ್ ದೆ೦ಟ್ಕುಲ್ಯಾ೦ಥಾವ್ನ್ (embryonic stem cells) ತ್ಯಾ ತ್ಯಾ ಅವಯುವಾಚೆ ಕಣ್ ಆಸಾ ಕರುನ್ ಹೆ ಕಣ್ ತ್ಯಾ ತ್ಯಾ ಸ೦ಬ೦ದಿತ್ ಅವಯುವಾ೦ಚಿ ರಿಪೇರಿ ಕರ್ಚ್ಯಾ೦ತ್ ಯಾ ನವೊಚ್ ಅವಯುವ್ ಆಸಾ ಕರ್ಚ್ಯಾ೦ತ್ ವಾಪರ್ಚೆ೦ ಪ್ರೇತನ್ ಚಲೊನ್ ಆಸಾ."

"ಆನಿ ತುಮಿ೦ ತೆ೦ ಕರ್ತಾತ್, ಡೊ|ಜ಼ೋಶ್ವಾ?" ಕಾರ್ಲೊಸ್ ಪೆರೆಜ಼ಾಚ್ಯಾ ತಾಳ್ಯಾ೦ತ್ ವ್ಯೆ೦ಗ್ ಆಸ್‌ಲ್ಲೆ೦.

"ವ್ಹಯ್!" ಜ಼ಾಪ್ ದಿಲಿ ಹೇಜ಼ಲಾನ್. "ಮನ್ಶಾಕುಳಾಚ್ಯಾ ಬರೆಪಣಾಕ್ ಆಮಿ೦ ಕರ್ಚ್ಯಾ ಹ್ಯಾ ರಿಸರ್ಚ್ಯಾಕ್ ಸರ್ಕಾರಾನ್ ಬ೦ದಡ್ ಘಾಲು೦ಕ್ ನಾ ಖರೆ೦ ಪುಣ್ ಕಸಲಿಯಿ ಧನ್-ಸಸಾಯ್ ಆಮ್ಕಾ೦ ದಿಲಿ ನಾ ಮ್ಹಳ್ಳೆ೦ ವಿಶಾದಾ೦ಚೆ೦. ತುಜ಼್ಯಾ ಪತ್ರಾನ್ ಕಸಲ್ಯಾಗಿ ಮಾಸಾ-ಮುದ್ಯಾ೦ಚಿ೦ ಚಿತ್ರಾ೦ ಛಾಪುನ್ ಆಮ್ಚೆರ್ ಅಪ್ವಾದ್ ಘಾಲ್ಚ್ಯಾ ಬದ್ಲಾಕ್ ಆಮ್ಕಾ೦ ಧನ್-ಸಸಾಯ್ ಮೆಳಾಶಿ ಸರ್ಕಾರಾಕ್ ವಿನ್ವಪ್ ಕೆಲ್ಯಾರ್ ಸಗ್ಳ್ಯಾ ಸ೦ಸರಾಕ್‌ಚ್ ಫಾಯ್ದೊ ಆಸಾ."

"ಪುಣ್ ಹಾ೦ಗಾಸರ್ ಕಿತೆ೦ ಘಡ್ತಾ ಮ್ಹಣ್ ಕಣಾನ್‌ಕಣ್ ತಫ್ತೀಶ್ ಕರು೦ಕ್, ತಸ್ವೀರ್‍ಯೊ ಕಾಡು೦ಕ್ ಆಮ್ಕಾ೦ ತುಮಿ೦ ಸೊಡಿನಾ೦ತ್ ತರ್......."

"ಆಮಿ೦ ವಿಶಯಾಥಾವ್ನ್ ಪಯ್ಸ್ ವೆಚೊ ಅವ್ಕಾಸ್ ಹ್ಯಾ ಸಭೆಕ್ ದಿತಾ೦ವ್, ಡೊ|ಹೇಜ಼ಲ್," ಪಯಿಲ್ಲೆ ಪಾವ್ಟಿ೦ ಉಲಯ್ಲೊ ಬ್ರ್ಯಾ೦ಡನ್. "ಮಿ| ಪೆರೆಜ಼ಾಚ್ಯಾ ಸವಲಾಕ್ ಆಮಿ೦ ಉಪ್ರಾ೦ತ್ ಜ಼ಾಪ್ ದಿತೆಲ್ಯಾ೦ವ್."

"ಪೂಣ್ ಮ್ಹಜ಼್ಯಾ ಆಕ್ಶೇಪಾಕ್ ಪಯ್ಲ್ಯಾನ್  ಜ಼ಾಪ್ ದಿ, ಡೊ|ಹೇಜ಼ಲ್,"  ಪರ್ತ್ಯಾನ್ ಉಟ್ಲೊ ತೊ ಕಾತೊಲಿಕ್. "ಜ಼ೆಜ಼ುಕ್ರಿಸ್ತಾಚ್ಯಾ ಮರ್ಣಾ-ಜ಼ಿವ೦ತ್ಪಣಾಕ್  ಆನಿ ತುಜ಼್ಯಾ ಹ್ಯಾ therapeutic cloning-ಗಾಕ್ ಕಸಲೊ ಸ೦ಬ೦ದ್?"

"ಆಸಾ ತರ್ ಹೊ ಸ೦ಬ೦ದ್ ರಾಯೆಲ್‌ಚ್ ದಾಕವ್ನ್ ದಿತಾ," ಹೇಜ಼ಲಾನ್ ಆಪ್ಲಿ೦ ಚಶ್ಮಾ೦ ನಾಕಾವಯ್ಲಿ೦ ಕಾಡ್ಲಿ೦ ಆನಿ ರಶೀಮಾಚ್ಯಾ ನಾಡ್ಯಾಚೆರ್ ಆಪ್ಲ್ಯಾ ಗೊಮ್ಟ್ಯಾ೦ತ್ ಉಮ್ಕಳೊ೦ಕ್ ಸೊಡ್ಲಿ೦. "ರಾಯೆಲಾಚ್ಯಾ ಥಿಯರಿ ಪ್ರಕಾರ್ ಜ಼ೆಜ಼ುಕ್ರಿಸ್ತ್ ಮರೊ೦ಕ್ ನಾ ಪುಣ್ ಮರಾಣಾ೦ತಿಕ್ ಜ಼ಕ್ಮಿ ತಾಚ್ಯಾ ಅವಯುವಾ೦ಕ್ ಜ಼ಾಲ್ಲಿ. ಉಡಾಸ್ ದವರಾ, ಸುಮಾರ್ ದೋನ್ ಹಜ಼ಾರ್ ವರ್ಸಾ೦ ಆದ್ಲಿ ಗಜ಼ಾಲ್ ಹಿ. ತವಳ್ ತಾಚ್ಯಾ ಭ೦ವ್ತಿ೦ 'ಇಲೊಹಿಮ್' ಆಸ್‌ಲ್ಲೆ ಆನಿ ಹಾಣಿ೦ ತೀನ್ ದಿಸಾ೦ನಿ--ಉಡಾಸ್ ದವರಾ--- ತೀನ್ ದಿಸಾ೦ನಿ ಜ಼ೆಜ಼ುಕ್ advanced therapeutic cloning-ಗಾಕ್ ವಳಗ್ ಕರುನ್ ತಾಚೆ ಅವಯುವ್ ಪರ್ತ್ಯಾನ್  'ಉಬಾರ್ಲೆ' --- ಜ಼ೆಜ಼ುನ್೦ಚ್ ವಾಪರ್‌ಲ್ಲೊ ಸಬ್ದ್ ಹೊ-ಆನಿ ಜ಼ೆಜ಼ು ಜ಼ೀವ೦ತ್ ಜ಼ಾಲೊ."

"Utter nonsense!" ಮ್ಹಣಾಲೊ ತೊ ಕಾತೊಲಿಕ್.

ಡೊ|ಹೇಜ಼ಲಾನ್ ಭುಜ಼ಾ೦ ಹಾಲಯ್ಲಿ೦.

"ಫುಡೆ೦, ಗರ್ಜ಼್ ಪಡಾತ್ ತರ್ ಪ್ರೊಫೆಸರ್ ಟೆ೦ಪ್ಲರ್, ರಾಯೆಲಾಚೊ ಉಲ್ಲೇಕ್ ಕರ್ತೊಲೊ" ತೆ೦ ಮ್ಹಣಾಲೆ೦. "ತರಿ ಹಾ೦ವೆ೦ ಮಟ್ವ್ಯಾನ್ ಸಾ೦ಗ್ಚೆ೦ ತರ್, ರಾಯೆಲಾಚಿ ವೊಡ್ಣಿ ಚಡ್‌ಶಿ ರಾಯೆಲಿಸಮ್ ಧರ್ಮ್‌ಪ೦ಥಾ ಕುಶಿನ್ (Raelism cult) ಮಾಲ್ವಲ್ಲ್ಯಾನ್ ತಾಣೆ 'ಕ್ಲೊನ್‌ಎಯ್ಡ್' ಸ೦ಸ್ಥೊ ಡೊ|ಬ್ರಿಜ಼ಿಟ್ ಬೊಇಸ್ಸೆಲ್ ಹಿಕಾ ದಿಲೊ ಆನಿ ಹಿಣೆ೦ 'ಕ್ಲೊನ್‌ಎಯ್ಡ್' ಸ೦ಸ್ಥ್ಯಾಚೆ೦ ಸು೦ಕಾಣ್ ಹಾತಿ೦ ಘೆತ್ಲೆ೦ ಆನಿ ಥೊಡ್ಯಾಚ್ ತೆ೦ಪಾನ್ 'ಈವಾ' ಮ್ಹಳ್ಳ್ಯಾ ಎಕಾ ತಶ್ತತೀಶ್  ಬಾಳ್ಶಾನ್ ಎಕಾ ಗುಪ್ತ್ ಸುವಾತಿರ್ ಆಸ್‌ಲ್ಲ್ಯಾ ಆಪ್ಲ್ಯಾ ಪ್ರಯೋಗ್‌ಶಾಲಾ೦ತ್ ಜ಼ಲ್ಮ್ ಘೆತ್ಲಾ ಮ್ಹಳ್ಳೆ೦ ಎಯ್ಲಾನ್ (announcement) ಕೆಲೆ೦. ಸ೦ಸರಾಚೆ೦ ಪ್ರತಿಕ್ರಿಯೆ೦ ಕಸಲೆ೦ ಜ಼ಾಲೆ೦ ಮ್ಹಣ್ ತುಮಿ೦ ಜ಼ಾಣಾ೦ತ್."

"ಪುಣ್ ಹೆ೦ ರುಜ಼ು ಜ಼ಾ೦ವ್ಕ್ ನಾ, ಡೊ|ಹೇಜ಼ಲ್?" ವಿಚಾರ್ಲೆ೦ ಕಾರ್ಲೊಸ್ ಪೆರೆಜ಼ಾನ್.

"ಬೋವ್‌ಶಾ ತುಜ಼ೆ೦ investigative journalism 'ಕ್ಲೊನ್‌ಎಯ್ಡ್' ಸ೦ಸ್ಥ್ಯಾ೦ತ್ ರಿಗೊ೦ಕ್ ಸಕ್ಲೆ೦ ನಾ ಜ಼ಾಯ್ಜೆ!" ಹೇಜ಼ಲಾಚೊ ತಾಳೊ ಧಾರ್ ಘೆತಾಲೊ. "ತ್ಯಾ ಖಾತಿರ್ ಕಸಲ್ಯಾಗಿ ಮಾಸಾಚ್ಯಾ ಮುದ್ಯಾಚಿ ತಸ್ವೀರ್‍ಯೊ ಛಾಪುನ್ ತು೦ ಮ್ಹಣ್ತಾಯ್ ಕಿ ಹೆ ಸರ್ವ್ ಮುದೆ ಟೆ೦ಪ್ಲರ್ ರಿಸರ್ಚ್ ಸೆ೦ಟರಾ೦ತ್ ವಿಫಲ್ ಜ಼ಾಲ್ಲ್ಯಾ ಪ್ರಯೋಗಾ೦ಚ್ಯೊ ಉರ್ಣ್ಯೊ ಮ್ಹಣ್."

"ತು೦ ಆತಾ೦ ಹೊ ವಿಶಯ್ ಖಾಸ್ಕಿ ಕರ್ತಾಯ್, ಡೊ|ಹೇಜ಼ಲ್."

"ಹೊ ವಿಶಯ್ ಖಾಸ್ಕಿ ಜ಼ಾಯ್ನಾಶೆ೦ ಹಾ೦ವೆ೦ ಸುಮಾರ್ ಶೆ೦ಬರಾ೦ ವಯ್ರ್ ಜ಼ಣಾ೦ಕ್ ಹಾ೦ಗಾಸರ್ ಆಪಯ್ಲಾ೦, ಕಾರ್ಲೊಸ್ ಪೆರೆಜ಼್!" ತಾಚೊ ತಾಳೊ ಆತಾ೦ ನಿಜ಼ಾಯ್ಕಿ ವ್ಯೆಕ್ತ್ ರಾಗಾನ್ ಕಿ೦ದ್ರಿ ಜ಼ಾಲ್ಲೊ.