From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ರುಕಾ ಮುಳಾಂತ್ಲೆ ಉಪಾದೆಸ್ - 6
January 06, 2016
ಎಡ್ವಿನ್ ಜ಼ೆ.ಎಫ್.ಡಿಸೊಜ಼ಾಆನಿ ಕಸಲಿ ತಿ ಪ್ರಾಯ್, ಮೊಗಾಚ್ಯಾನೊ. ಎಡ್ವಿನಾನ್ ಎಕ್ ಕಾಣಿ ಬರಯ್ಲ್ಯಾರ್ ಚಲಿ ಸಾ೦ಪಡ್ತಾ ಮ್ಹಣ್ತಾಲೆ ಮ್ಹಜ಼ೆ ಇ೦ಗ್ಲಿಶ್ ಮೀಡಿಯಮಾ೦ತ್ಲೆ ಕೊ೦ಕಣಿ ಮಿತ್ರ್ ಜ಼ೆ ಧಾ-ಬಾರಾ ಆಸ್‌ಲ್ಲೆ. ಆತಾ೦ ತಿತ್ಲೆಯಿ ಆಸ್ಚೆನಾ೦ತ್.
ಪುಣ್ ಮ್ಹಜ಼ಿ ಪರ್ನಿ೦ ಫಾಯ್ಲಾ೦ ಉಸ್ತಿತಾನಾ ಆನಿ ದೊಳೆ ಅಶೀರ್ ಕರುನ್ ಮ್ಹಜ಼ಿ೦ಚ್ ಬರ್ಪಾ೦ ವಾಚ್ತಾನಾ, ಚಲಿಯೆನ್ ಸಾ೦ಪಡ್ಚೆ೦ ಸೊಡ್ಯಾ೦, ದೊರ್‍ಯಾವಯ್ಲೆ೦ ಕಾಳೆ೦ ಮಾಜ಼ರ್‌ಯಿ ಮಿಯಾ೦ವ್ ಕರ್ಚೆ೦ ನಾ ಮ್ಹಣ್ ಹಾ೦ವ್ ಜ಼ಾಣಾ೦.
ಧಾವಿ-ಕ್ಲಾಸ್ ಚಾಲು ಆಸ್ತಾನಾ ಆಮ್ಕಾ೦ ಎಕಾಚಾಣೆ ಇ೦ಗ್ಲಿಶ್ ಸಾಹಿತಾಚೆ೦ ವಾರೆ೦ ಲಾಗ್ಲೆ೦ ಕಿತ್ಯಾಕ್ ಮ್ಹಳ್ಯಾರ್ ಶಾಳೆಚ್ಯಾ ಲಾಯ್ಬ್ರೆರಿ೦ತ್ಲೆ ಸರ್ವ್ ಇ೦ಗ್ಲಿಶ್/ಕನ್ನಡಾ ಬುಕ್ ವಾಚುನ್ ಆಮಿ೦ ಕಾಬಾರ್ ಕೆಲ್ಲೆ. ಎಕಾ ದಿಸಾ ಗಡ್ಲೆ೦ ಅಶೆ೦:
ಎಕ್ ನವೊ ಕನ್ನಡಾ ಬುಕ್ ಲಾಯ್ಬ್ರೆರಿ೦ತ್ ಆಯಿಲ್ಲೊ ಪುಣ್ ಪಟ್ಟೇರ್ ಪಡೊ೦ಕ್ ನಾ. ಹ್ಯಾ ಬುಕಾಚೆರ್ ಆಮ್ಚ್ಯಾ ಗೊಡ್‌ಫ್ರಿ-ಚಿ ದೀಶ್ಟ್ ಕಶಿ ಪಡ್ಲಿ ದೇವ್‌ಚ್ ಜ಼ಾಣಾ೦. ಬುಕಾಚೆ೦ ನಾ೦ವ್ ಚಿ೦ತಾಮಣಿ ಚಿಲುಕ. ಎನ್.ನರಸಿ೦ಹಯ್ಯಾನ್ ಮ೦ದ್ ಪೊರ್ನೊಗ್ರಾಫಿ ಬರ೦ವ್ಕ್ ಸುರುಕೆಲ್ಲೆ ದೀಸ್ ತೆ. ಹ್ಯಾ ಬುಕಾ೦ತ್ ನಾಯಕಾನ್ ಎಕೆ ಚಲಿಯೆಚಿ೦ ಸ್ಥನಾ೦ ಪೊಶೆ೦ವ್ಚೆ೦ ವಿವರಣ್ ಆಸ್‌ಲ್ಲ್ಯಾನ್ ಶಾಳೆ೦ತ್ ಹೊ ಬುಕ್ ಬ್ಯಾನ್ ಜ಼ಾಲ್ಲೊ. ತೊ ಆಮ್ಕಾ೦ ದೀ೦ವ್ಕ್ ಮಾರ್ಟಿನ್ ಬಿಲ್ಕುಲ್ ಆಯ್ಕಾಲೊ ನಾ.
ಕಾ೦ಯ್ ನಜ಼ೊ, ಆಮಿ೦ ಕಾ೦ಯ್ ಉಣೆ ಶೇರ್? ಎಕಾಚ್ ಹಫ್ತ್ಯಾ ಭಿತರ್ ಮರ್ವಿನಾನ್ ಹೊ ಬುಕ್ ತಲಾಸ್ ಕೆಲೊ ಆಪ್ಲ್ಯಾಚ್ ರಸಿಕ್ ಮಾವ್ಳ್ಯಾಚ್ಯಾ ಗುಪ್ತ್ ಕಲೆಕ್ಶನಾಥಾವ್ನ್. ಆನಿ ಹೆರ್ ಥೊಡೆ ಬುಕ್‌ಯಿ ಪೊತ್ಯಾ೦ಥಾವ್ನ್ ಪೊತ್ಯಾಕ್ ಪಾಶಾರ್ ಜ಼ಾ೦ವ್ಕ್ ಸುರು ಜ಼ಾಲೆ. ನಾ೦ವಾ೦ ಜ಼ಾಯ್? ರತಿ ವಿಲಾಸ, ಮಾರಾಮಾರಿ ಪ್ರಥಮ ರಾತ್ರಿ ಇತ್ಯಾದಿ. ಕಿತೆ೦ ಥ್ರಿಲ್ ಹೆ ಚೊರಿಯಾ೦ನಿ ವಾಚ್ತಾನಾ! ಕಿತೆ೦ ಮ್ಹಳ್ಳೆ೦ ಹಾ೦ವೆ೦ ಹ್ಯಾ ಕಿಸ್ತಾಚೆ ಸುರ್ವೆರ್? ತಿ ಎಕ್ ಪ್ರಾಯ್! ಬರಾಬರ್ ಸಮ್ಜಾಲೆ೦?
ಕನ್ನಡಾ೦ತ್ ಆಸ್ಚೆ೦ ಅಸಲೆ೦ ಹಳ್ದುವೆ೦ ಸಾಹಿತ್ ವಿತರಣ್ ಕರ್ತೊಲೊ ಆನ್ಯೇಕ್ಲೊ ಆಸ್‌ಲ್ಲೊ: ಸರ್ವಿಸ್ ಬಸ್ಸ್‌ಸ್ಟೆ೦ಡಾ೦ತ್ಲ್ಯಾ ಬುಕ್‌ಸ್ಟೊಲಾಚೊ ಮ್ಹಾಲಕ್ ಜ಼ಾಚೆ೦ ನಾ೦ವ್ ಆಮ್ಕಾ೦ ಕಳಿತ್ ನಾತ್‌ಲ್ಲೆ೦ ದೆಕುನ್ ತಾಕಾ ಆಮಿ೦ ಪೊರ್ನೊಗ್ರಾಫರ್ ಮ್ಹಣ್ ನಾ೦ವ್ ದಿಲ್ಲೆ೦.
ಹಾಚ್ಯಾ ಸ್ಟೊಲಾ೦ತ್ಲೆ ಬುಕ್ ಹಳ್ದುವ್ಯಾ ಸೆಲ್ಲೊಫೇನ್ ಪೇಪರಾ೦ತ್ ರೆವ್ಡಾಯಿಲ್ಲೆ ಆಸ್ತಾಲೆ. ಭಾಯ್ಲೆ೦ ಮುಕ್‌ಚಿತ್ರ್ ಮಾತ್ರ್ ಆಮಿ೦ ಧಯ್ರಾನ್ ಪಳೆತೆಲ್ಯಾ೦ವ್; ಟಾಯ್ಮ್ ಮೆಗಜ಼ಿನಾಚಿ೦ ಪಾನಾ೦ ಪರ್ತಿತಾನಾ ಆಮ್ಚೆ ದೊಳೆ ಮಾತ್ರ್ ಹ್ಯಾ ಬುಕಾ೦ಚೆರ್ ಆಸ್ತಾಲೆ. ಪುಣ್, ಪಾ೦ಚ್-ಧಾ-೦ಚೊ ನೋಟ್ ಭಾಯ್ರ್ ಕಾಡುನ್, ಆ ಪುಸ್ತಕ ಕೊಡಿ, ಮ್ಹಣ್ಚೆ೦ ಧಯ್ರ್ ಕೊಣಾಕ್ ಆಸಾ? ಕಿತೆ೦ಯಿ ಮ್ಹಳ್ಯಾರ್ ಆಮಿ೦ ಡೀಸೆ೦ಟ್ ಕುಟ್ಮಾ೦ತ್ಲೆ, ಇ೦ಗ್ಲಿಶ್ ಮೀಡಿಯಮ್ ಸ್ಟುಡೆ೦ಟ್ಸ್. ಪುಣ್ ಯೆಕಾ ದಿಸಾ ಘಡ್‌ಲ್ಲೆ೦ ವಾಚಾ:
ಹ್ಯಾ ಸ್ಟೊಲಾ೦ತ್ ಮಲೆಯಾಳಮ್ ಭಾಶೆ೦ತ್ಲೆಯಿ ಹಳ್ದುವೆ ಬುಕ್ ಆಸ್ತಾಲೆ ಆನಿ ತ್ಯಾ ದಿಸಾ ಆಮಿ೦ ಕಿತೆ೦ ನವೆ೦ ಆಸಾ ಮ್ಹಣ್ ಸ್ಟೊಲಾ೦ತ್ ದಿಶ್ಟ್ ಭ೦ವ್ಡಾಯ್ತಾನಾ, ತೇಗ್-ಚವ್ಗ್ ಬ್ರದರ್ ಯೆವ್ನ್ ಲಟ್ಲಟ್ ಕರುನ್ ಸಾತ್-ಆಟ್ ಬುಕ್ ವಿ೦ಚುನ್, ಪಯ್ಶೆ ಫಾರಿಕ್ ಕರುನ್ ರಪ್ಪ್ ಕರುನ್ ಮಾಯಕ್ ಜ಼ಾಲೆ.
ಎಡಿ, ಮ್ಹಣಾಲೊ ಗೊಡ್‌ಫ್ರಿ ಮ್ಹಜ಼್ಯಾ ಕಾನಾ೦ತ್. ಆಮಿ೦ಯಿ ಸೆಮಿನರಿ ಜ಼ೊಯ್ನ್ ಜ಼ಾ೦ವ್ಯಾ-ರೆ. ತಾ೦ಕಾ೦ ಆಸ್‌ಲ್ಲೆ ಗಟ್ಸ್ ಆಮ್ಕಾ೦ನಾ೦ತ್.
ತ್ಯಾ ದಿಸಾ ಹಾ೦ವೆ೦ ಪಳೆಯಿಲ್ಲೆ೦ ಮ್ಹಾಕಾ ಅವಾಕ್ಕ್ ಕರು೦ಕ್ ಲಾಗ್ಲೆ೦ ಖರೆ೦ ಪುಣ್ ಮ್ಹಾಕಾ ತಾ೦ತು೦ ಕಸಲೆ೦ಚ್ ವಾಯ್ಟ್ ದಿಸ್ಲೆ೦ ನಾ ಆನಿ ಆತಾ೦ಯಿ ದಿಸನಾ. ತಿ ಎಕ್ ಪ್ರಾಯ್, ಕೊಣಾಕ್‌ಚ್ಚ್ ತಿ ಸೊಡಿನಾ.
ಆತಾ೦, ಇ೦ಗ್ಲಿಶ್ ಬುಕಾ೦ ವಿಶಾ೦ತ್: ಹೊ ಭುತ್ ಲಾಗಯಿಲ್ಲೊ ಆಮ್ಚ್ಯಾಚ್ ಯೆಸ್ ಮೆನ್, ನೊ ಮೆನ್, ವೊಟ್ ಗ್ಯಾಸ್‌ಪೊಟ್ ಮೆನ್ ಕ್ಲಾಸ್‌ಮೇಟಾ೦ನಿ. ಹಾ೦ಚ್ಯಾ ಹಾತಾ೦ನಿ ದಾಟ್ ದಾಟ್ ಇ೦ಗ್ಲಿಶ್ ನೊವೆಲ್ಸ್ ಸೊಬ್ತಾನಾ ಆಮಿ೦ ಕಾ೦ಯ್ ಉಣೆ ನ್ಹಯ್ ಮ್ಹಣ್ ದಾಕಯ್ಜೆ ನ್ಹಯ್? ಇ೦ಗ್ಲಿಶ್ ಮೀಡಿಯಮ್ ಮ್ಹಳ್ಯಾರ್ ಕಿತೆ೦ ತರ್? ಲಾಯ್ಬ್ರೆರಿ೦ತ್ಲ್ಯಾ ಬುಕಾ೦ಕ್ ಬಾ೦ಯ್ಡ್ ಗಾಲಾ೦; ಟೆಕ್ಸ್ಟ್ ಬುಕಾ೦ಪರಿ೦ ತೆ ದಿಸ್ತಾತ್. ಹೆ ಗೆವ್ನ್ ಗೆಲ್ಯಾರ್ ಕೋಣ್ ಆಮ್ಕಾ೦ ಇ೦ಟೆಲೆಕ್ಚುವಲ್ಸ್ ಮ್ಹಣ್ತಿತ್? ಕಾ೦ಯ್ ಗ್ಲೊಸ್ಸಿ ಕವರಾ೦ಚೆ ಅಮೆರಿಕನ್ ಬೂಕ್ ಗೆವ್ನ್ ಭ೦ವ್ಲ್ಯಾರ್ ಕಾ೦ಯ್ ಥೊಡೆ (ಚಲಿಯೊ ಜ಼ಾಲ್ಯಾರ್ ಬರೆ೦ ಆಸ್‌ಲ್ಲೆ೦) ಮ್ಹಣ್ತಿತ್‌ಕಿ, ಪಳೆಯಾ, ಇತ್ಲ್ಯಾ ಲ್ಹಾನ್ ಪ್ರಾಯೆರ್ ಕಸಲೆ ಹೆವೀ ಬುಕ್ ವಾಚ್ತಾತ್.
ಮ್ಹಜ಼ಿ ದಾವ್ಲಿ ಪಡ್ಲಿ ಪ್ರಥಮ್ ಜ಼ಾವ್ನ್ ಅರ್ಲ್ ಸ್ಟೇನ್ಲಿ ಗಾರ್ಡನರಾಚೆರ್. ಮ್ಹಜ಼ಿ ಆ೦ಟಿ ಆನಿ ಅ೦ಕಲಾಕ್ ಗಾರ್ಡನರಾಚೊ ಪೆರ್ರಿ ಮೇಜ಼ನ್ ಮ್ಹಳ್ಯಾರ್ ಪಿಶಿ೦ಚ್ ಜ಼ಾತಾಲಿ೦. ಘರಾ೦ತ್ ಶೆ೦ಬರಾ೦ ವಯ್ರ್ ಬುಕ್ ಆಸ್‌ಲ್ಲೆ. ಹಾ೦ವೆ೦ ವಾಚು೦ಕ್ ಸುರು ಕೆಲೆ೦, ಕಶ್ಟ್ ಮಾರ್ಲ್ಯಾರ್‌ಯಿ. ಪೆರ್ರಿ ಮೇಜ಼ನಾಥಾವ್ನ್ ಜ಼ೇಮ್ಸ್ ಹ್ಯಾಡ್ಲಿ ಛೇಸ್, ನ್ಯಾಗಿಯೊ ಮಾರ್ಶ್, ಅಗಾತಾ ಕ್ರಿಸ್ತಿ...ಹಾ೦...ಆತಾ೦ ಯೆತಾ ರೊಸಾಳ್ ವಾ೦ಟೊ:
ಹೆರಾಲ್ಡ್ ರೊಬಿನ್ಸ್, ನಿಕ್ ಕಾರ್ಟರ್, ಮಿಕ್ಕಿ ಸ್ಪಿಲ್ಲೇನ್...ಹಾ೦ಚಿ೦ ಬರ್ಪಾ೦ ಕಿತ್ಲಿ೦ ಉದ್ರಿಕ್ತ್‌ಗಿ ತಿತ್ಲಿ೦ಚ್ ತಾ೦ಚ್ಯಾ ಬುಕಾ೦ಚಿ೦ ಕವರಾ೦. ಎಕಾ ದಿಸಾ ಜ಼ಾಲೆ೦ ಅಶೆ೦ಕಿ ಅಸಲೆ ಥೊಡೆ ಬುಕ್ ಮ್ಹಜ಼್ಯಾ ಮೆಜ಼ಾರ್ ಆಸ್‌ಲ್ಲೆ ತೆ ಸೆಜ಼ಾರ್ಚ್ಯಾ ರೊಜ಼ಿಬಾಯೆನ್ ಪಳೆವ್ನ್ ಸೊಡ್ಲೆ. ಗುಪ್ತಿನಿಶಿ೦ ಗೆಲಿ ಫಿರ್ಯಾದ್ ಮಾಮ್ಮಿಕ್. ತುಮ್ಚ್ಯಾ ಬಾಬುಚ್ಯಾ ಮೆಜ಼ಾರ್ ನಾಗ್ಡ್ಯಾ ಚಲಿಯಾ೦ಚೆ ಬೂಕ್ ಆಸಾತ್!
ಮಾಮ್ಮಿಚೊ ಸೆನ್ಸಾರ್‌ಬೋರ್ಡ್ ಜ಼ಾಗೊ ಜ಼ಾತಾನಾ ಮ್ಹಜ಼ೆರ್ ಇ೦ಕ್ವಿಜ಼ಿಸಾ೦ವ್ ದೆ೦ವ್ಲೆ೦; ನಿತಿದಾರ್ನ್ ಜ಼ಾವ್ನ್ ಬಸ್ಲಿ ಮ್ಹಜ಼ಿ ಆ೦ಟಿ; ಥೊಡ್ಯಾ ತೆ೦ಪಾಕ್ ಮ್ಹಜ಼್ಯಾ ವಾಚ್ಪಾಚೆರ್ ಖಾಡು೦ ಪಡ್ಲೆ೦ ಪುಣ್ ಆ೦ಟಿನ್೦ಚ್ ಮ್ಹಾಕಾ ಸಾಲ್ವಾರ್ ಕೆಲೊ. ಕಿತ್ಲಿ ಬ೦ದಡ್ ಗಾಲ್ಯಾರ್‌ಯಿ ತು೦ ವಾಚ್‌ಚೆ೦ ವಾಚ್ತೊಲೊಯಿಚ್ಚ್, ತಿ ಮ್ಹಣಾಲಿ. ಪೊಜ಼್ಡೆ೦, ಬುಕಾ೦ನಿ೦ಚ್ ಆಸಾಜ಼ೆ ಮ್ಹಣ್ ನಾ. ಕಿತೆ೦ ಜ಼ಾಯ್ ತೆ೦ ವಾಚ್ ಪುಣ್ ಮತಿ೦ತ್ ಖ೦ಚಯ್ತಾನಾ ಗಾಳ್ನ್-ಪೀಳ್ನ್ ಖ೦ಚಯ್. ಹಾಕಾ ಮ್ಹಣ್ತಾತ್ ಶಾಣೆಪಣ್.
ಮ್ಹಜ಼ೆ೦ ಆನಿ ಮ್ಹಜ಼್ಯಾ ಸಾ೦ಗಾತ್ಯಾ೦ಚೆ೦ ವಾಚಪ್ ಚಾಲು ಉರ್ಲೆ೦ ಆನಿ ಎಕಾ ದಿಸಾ, ಧಾ-ವ್ಯಾ ಕ್ಲಾಸಿಚಿ ಪರೀಕ್ಶಾ ಯೆ೦ವ್ಕ್ ತೀನ್ ಮಯ್‌ನೆ ಆಸ್ತಾನಾ, ಗಣಿತ್ ಶಿಕ೦ವ್ಚ್ಯಾ ಕುವೆಲ್ ಮೆಸ್ತ್ರಿನ್ ಆಮ್ಚ್ಯಾ ಪಯ್ಕಿ ಯೆಕ್ಲ್ಯಾಕ್ (ಡೆ೦ಜ಼ಿಲಾಕ್ ಮ್ಹಣ್ ಮ್ಹಜ಼ೊ ಉಡಾಸ್) ಧರ್ಲೊ. ಅಪ್ರಾದ್? ಗಣಿತ್ ಕ್ಲಾಸಿ೦ತ್ ಹೊ ಮಿಕ್ಕಿ ಸ್ಪಿಲ್ಲೇನಾಚೊ ಈ, ಥೆ ಝುರ್ಯ್ ಬೂಕ್ ವಾಚ್ತಾಲೊ. ತ್ಯಾ ಬುಕಾಚ್ಯಾ ಕವರಾಚೆರ್ ಫಕತ್ತ್ ಬ್ರಾ ಆನಿ ಪ್ಯಾ೦ಟಿರ್ ಆಸ್‌ಲ್ಲಿ ಚಲಿ ಆಮ್ಕಾ೦ ಮೆಗ್ನಮ್- 44 ಜ಼ೊಕುನ್ ಆಸಾ. ಕುವೆಲ್ ಮೆಸ್ತ್ರಿಚೆ೦ ಮುಕಮಳ್ ತಾ೦ಬ್ಸೆಲೆ೦ ಆನಿ ಕಾ೦ಪೆರ್‍ಯಾ ತಾಳ್ಯಾನ್ ತೊ ಮ್ಹಣಾಲೊ, ತುಮಿ೦ ಹ್ಯೆ ಪ್ರಾಯೆರ್ ಕಸಲೆ೦ ಸಾಹಿತ್ ವಾಚ್ತಾತ್ ಮ್ಹಣ್ ಮ್ಹಾಕಾ ಪಳೆಜ಼ೆ! ಬೂಕ್ ಮ್ಹಜ಼ೊ, ಗೆಲೊ ಕುವೆಲಿಚ್ಯಾ ಬೆಗಾ೦ತ್!
ಫಿರ್ಯಾದ್ ಕಾ೦ಯ್ ಹೆಡ್‌ಮಾಸ್ಟರಾಕ್ ವೆತಾ ಮ್ಹಳ್ಳೆ೦ ಖ೦ಡಿತ್; ಥ೦ಯ್‌ಥಾವ್ನ್ ಘರಾ; ಉಪ್ರಾ೦ತ್ ಬೇಸ್-ಆಬೇಸ್.
ಪುಣ್ ವಿಚಿತ್ರ್ ಆನಿ ನೀಜ಼್, ತಸಲೆ೦ ಕಾ೦ಯ್ ಗಡ್ಲೆ೦ ನಾ. ಚ್ಯಾರ್ ದಿಸಾ೦ ಉಪ್ರಾ೦ತ್ ಕುವೆಲ್ ಮೆಸ್ತ್ರಿನ್ ಬೂಕ್ ಪಾಟಿ೦ ದಿಲೊ!
ಆನ್ಯೇಕ್ ವಿಚಾರಿನಾತ್‌ಲ್ಲೊ ವ್ಹಡ್-ರೆ, ಎಡಿ! ಮ್ಹಣಾಲೊ ಗೊಡ್‌ಫ್ರಿ. ವಿಚಾರ್ಲ್ಯಾರ್ ತಾಕಾ ಡಿ.ಹೆಚ್.ಲೊರೆನ್ಸಾಚೊ ಲೇಡಿ ಚಾರ್ಟರ್ಲೀಸ್ ಲವರ್ ದಿವ್ಯಾ೦. ಸೆಕ್ಸ್ ಎಕ್ಸ್‌ಪರ್ಟ್ ಜ಼ಾ೦ವ್ ಪೆಲ್ಯಾನ್.
ವಾಚ್‌ಚ್ಯಾ ಪಿಶೆಪಣಾ ಸಾ೦ಗಾತಾ ಸಿನೆಮಾ೦ಚೆ೦ ಪಿಶೆ೦ ಮಿಸ್ಳಾನಾ ಜ಼ಾಲ್ಯಾರ್ ವರ್ತುಲ್ ಪೂರ್ಣ್ ಜ಼ಾಯ್ನಾ ನ್ಹಯ್? ಹಾ೦ತು೦ಯಿ ಆಮಿ೦ ಕಾ೦ಯ್ ಉಣೆನಾತ್‌ಲ್ಲ್ಯಾ೦ವ್........
Tags:
Edwin JF Dsouza, Konkani e-Serial, Vasu Valencia, Konkani, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
Our Address
Mangalore
 | Contact Person : Mr. Praveen Tauro |
Email : praveen@maibhaas.com
Phone : +91 99 80 184340
Address :
Daijiworld.com,
Airport Road,
opp. Bondel Church,
Mangalore - 575 008
Karnataka - India
Our Address
Udupi
 | Contact Person : Mr. Joel D'almeida |
Email : joel@maibhaas.com
Phone : +91 90 08 855392
Address :
Eventz Redefined,
Next to Vijaya Bank,
Holy Family Complex
1st Floor, NH -66
Brahmavara - 576213
Our Address
Dubai
 | Contact Person : Mr. Naveen Sequeira |
Email : editor@maibhaas.com
Phone : +97 150 755 4105
Address :
Master Mind IT Solutions,
UBL Building,
#402, 4th Floor
Bank Street - Bur Dubai
Dubai - UAE
1 Comment/s.
Edwin is my favourite writer good series