From around the world

ಪ್ರವೀಣ್ ತಾವ್ರೊ, ಕುಲ್ಶೇಕರ್
             
+971 50 7554105
ತುಮ್ಚ್ಯಾ ಗಮನಾಕ್:
Best be viewed in 1366 X 768 screen resolution and in Google Chrome
You are here:   /  ಧುಳ್-ವಾದಾಳ್

2  -  ಧುಳ್-ವಾದಾಳ್

Thursday, August 10, 2017  /  By Admin
ತಾ೦ಚೊ ಮೋಗ್ ಜಾವ್ನಾಸ್‌ಲ್ಲೊ ಎಕ್ ಪಾಶಾ೦ವ್: ದೋನ್ ಭಾವಾರ್ಥಾ೦ ಮಧೆ೦, ಎಕಾ ಆಕ್ರಮಣಾ ಮಧೆ೦, ಎಕಾ ಅ೦ದ್ಳ್ಯಾ ದೇಶ್-ಭಕ್ತಿ ಮಧೆ೦ ಉಟ್‌ಲ್ಲೆ೦ ಎಕ್ ಧುಳ್-ವಾದಾಳ್...

ಬರಯ್ಣಾರಾ ವಿಶಿಂ ಜಾಣಾ ಜಾ...

90.0
User Rating

ಸಲ್ಮಾಚಿ ಹಾ೦ಕ್ರೆವ್ಣಿ ತಾಚೆ ಹೆಳ್ಕೇವಿಣೆ೦ಚ್ ಭಾಯ್ರ್ ಪಡ್ಲಿ. ''ನಾ! ಹೆ೦ ಸಾದ್ಯ್ ನಾ.' ತೆ೦ ಆಪ್ಣಾಕ್‌ಚ್ಚ್ ಸಾ೦ಗಾಲಾಗ್ಲೆ೦. ''ಎಕ್ ಮುಸ್ಲಿಮ್ ಸೆಜಾರಿ ಆನ್ಯೇಕ್ಲ್ಯಾಚೆರ್ ಆಕ್ರಮಣ್ ಕರಿತ್? ತ್ಯಾ ಖ್ಹೊಮೆನಿಚಿ ಸ೦ಗತ್ ವೆಗ್ಳಿ.....''

ಬಿಬಿಸಿ - ಪರ್ತ್ಯಾನ್ ಹೆಡ್‌ಲಾಯ್ನ್ಸ್ ಉಚಾರ್ತಾನಾ ಸಲ್ಮಾಕ್ ಖಚಿತ್ ಜಾಲೆ೦ಕಿ ಪರಿಗತ್ ಭಿಗಡ್ಲ್ಯಾ ಮ್ಹಣ್. ತಾಣೆ ಹಾತ್ ಮುರ್ಡಿಲೆ. ''ಹಾ೦ವ್ ರಿಫಾಯ್ನರಿಕ್ ವೆತಾ೦, ಮಾಮಾ!'' ತೆ೦ ಮ್ಹಣಾಲೆ೦.

''ಖ೦ಯ್ ವೆತಾಯ್?'' ಉಮ್ಮ್ ಆಲಿ ಬೊಬಾಟ್ಲಿ. ''ಆಜ್ ಯೋಮ್ ಖಮೀಜ್ (ಬ್ರೇಸ್ತಾರ್) ನ್ಹಯ್?''

''ಶೇಕ್ ಸಬ್ಹಾನ್ ಮ್ಹಾಕಾ ಕುಸೂಸಿ (ಸ್ಪೆಶಲ್) ಕಾಮಾಕ್ ಆಪಯ್ಲಾ೦.''

''ಹರ್ ಯೋಮ್ ಖಮೀಜಾಕ್ ತು೦ ಹೆ೦ಚ್ ಕಾರಣ್ ದಿತಾಯ್!'' ತಿ ಮ್ಹಣಾಲಿ. ''ಕಿತ್ಲೆಶಾ ಪಾವ್ಟಿ೦ ಹಾ೦ವೆ೦ ಅಬು ಸಾಲೆಮಾಕ್ (ಶೇಕ್ ಸಬ್ಹಾಚೆ೦ ಆನ್ಯೇಕ್ ನಾ೦ವ್) ಪೋನ್ ಕರಿಜೆ ಮ್ಹಣ್ ಚಿ೦ತ್ಲಾ೦.....''

ಕಶೆ೦ ಸಾ೦ಗ್ತೆಲೆ೦ ಸಲ್ಮಾ ಕಿ, ಬ್ರೇಸ್ತಾರಾ ಸಕಾಳಿ೦ಚೊ ಆದೇಸ್ ತೆ೦ ಯಾಸರಾ ಸಾ೦ಗಾತಾ ಶೆರಟನ್, ಹಿಲ್ಟನ್ ಯಾ ಮೆಸ್ಸಿಲಾ ಬೀಚ್ ಹೊಟೆಲಾ೦ನಿ ಖರ್ಚಿತಾಲೆ೦ ಮ್ಹಣ್? ಕಶೆ೦ ಸಾ೦ಗ್ತೆಲೆ೦ ತೆ೦ ಕಿ ಕ್ರಿಸ್ತಾ೦ವ್ ಇರಾಕಿ ಯಾಸರ್ ಆನಿ ಆಪ್ಣಾ ಮದೆ೦ ಮೋಗ್ ಉಬ್ಜಾಲಾ ಮ್ಹಣ್? ಕರ್ನಲ್ ಖಬ೦ದಿ ಹೆ೦ ಜಾಣಾ೦ ಜಾಯ್ತ್ ತರ್ ತಾ೦ಕಾ೦ ದೊಗಾ೦ಯ್ಕಿ ಖುಝಿ ಕರು೦ಕ್ ವಿ೦ಚ್ಲೆಲ್ಯಾ ಕರ್‍ಯಾಚ್ಯಾ ಪಿಲಾ೦ಕ್ ಸೊಲ್‌ಲ್ಲೆಪರಿ೦ ಸೊಲಿತ್......

ತಿತ್ಲ್ಯಾರ್ ತಾ೦ಚ್ಯಾ ಇ೦ಡಿಯನ್ ಖಾದಿಮಾನ್ ಛ್ಹಾ ಹಾಡ್ಲಿ.

ಪಯ್ಸ್‌ಥಾವ್ನ್ ತಾ೦ಕಾ೦ ಕಸಲೆ೦ಗಿ ಮುರ್ಮುರೆ ಆನಿ ಮಿರ್ಮಿರೆ ಆವಾಜ್ ಆಯ್ಕೊ೦ಕ್ ಸುರು ಜಾಲೆ. ಸಲ್ಮಾನ್, ಶ್ಹೇಕ್ ಸಬ್ಹಾಚೆ೦ ನ೦ಬರ್ ಘು೦ವ್ಡಾಯ್ಲೆ೦. ಜಾಪ್ ನಾ. ತಾಚೆ೦ ಕಾರ್ ಪೋನಾಚೆ೦ ನ೦ಬರ್... ಜಾಪ್ ನಾ. ಪ್ಲಾನಿ೦ಗ್ ಸಲಹದಾರ್ ಮಹಮ್ಮದ್ ತವ್‌ಫೀಕ್ ಥಾಹರಾಚೆ೦ ನ೦ಬರ್... ಜಾಪ್ ನಾ. ಸೀನಿಯರ್ ಪ್ಲಾನಿ೦ಗ್ ಇ೦ಜಿನಿಯರ್ ಆದಿಲ್ ಸಮ್ಮಾರಾಚೆ೦ ನ೦ಬರ್... ನಾ ನಾ. ಆದಿಲ್ ಆಪ್ಲ್ಯಾ ಕುಟ್ಮಾಕ್ ಘೆವ್ನ್ ರಜೆರ್ ಗೆಲ್ಲೊ, ಬುಲ್ಗೇರಿಯಾಕ್. ಕಾ೦ಯ್ ಯಾಸರ್ ಪಾಟಿ೦ ಆಯ್ಲಾಗಾಯ್?
ತಾಣೆ ಯಾಸರಾಚೆ೦ ನ೦ಬರ್ ಘು೦ವ್ಡಾಯ್ಲೆ೦. ಜಾಪ್ ನಾ.

'ಯ್ಹ್ಯಾ ಅಲ್ಲ್ಹಾ!' ತೆ೦ ಮನಾ೦ತ್‌ಚ್ ಉದ್ಗಾರ್ಲೆ೦. 'ಬಿಬಿಸಿ-ನ್ ಸಾ೦ಗ್ಚೆ೦ ಖರೆ೦ ತರ್ ಇರಾಕಿ೦ನಿ ರೇಡಿಯೊ, ಟಿವಿ, ಆನಿ ಫೋನಾ೦ ಕಾತರ್ಲ್ಯಾ೦ತ್. ತರ್ ಹಾ೦ವೆ೦ ರಿಫಾಯ್ನರಿಕ್ ವಚಾಜೆಚ್.

''ಸಲ್ಮಾ!'' ಬೊಬಾಟ್ಲಿ ಉಮ್ಮ್ ಆಲಿ. ''ಕಿತೆ೦ ಮ್ಹಣ್ತಾ ಬ್ರಿತಾನಿ ರೇಡಿಯೊ? ಘಡಿಯೆ ಘಡಿಯೆ ಕುವೇತ್ ಕುವೇತ್, ಬಗ್ದಾದ್ ಬಗ್ದಾದ್ ಮ್ಹಣ್ತಾತ್‌ಮೂ?''

ಸಲ್ಮಾನ್ ಆಪ್ಲ್ಯಾ ವೊನಿಯೆ೦ಚೆರ್ ಪರತ್ ಎಕ್ ದೀಶ್ಟ್ ಘಾಲಿ ಆನಿ ಮ್ಹಳೆ೦. ''ಹಾ೦ವ್ ರಿಫಾಯ್ನರಿಕ್ ವಚುನ್ ಯೆತಾ೦. ತುಮಿ೦ ಕಾ೦ಯ್ ಭಿಯೆನಾಕಾತ್... ಕೊಣಾಯ್ಕಿ ದಾರ್ ಉಗ್ತೆ೦ ಕರಿನಾಕಾತ್!'' ಹ್ಯಾ ಉತ್ರಾ೦ ಬರಾಬರ್, ಹಾತಾ೦ತ್ ಛ್ಹಾಯೆಚೆ೦ ಕೊಪ್ ಘೆವ್ನ್ ತೆ೦ ಆಪ್ಲ್ಯಾ ಕುಡಾಕ್ ಧಾ೦ವ್ಲೆ೦.

ಸಲ್ಮಾ ಫಾರೆಸ್ ಅಲ್-ಖಬ೦ದಿಚ್ಯಾ ಬೊ೦ಗ್ಲ್ಯಾ ಥಾವ್ನ್ ರಿಫಾಯ್ನರಿಕ್ ಸುಮಾರ್ ಸ ಕಿಲೊಮೀಟರಾ೦ಚಿ ವಾಟ್. ಪೊಟಾ೦ತ್ ಫಕತ್ ಎಕ್ ಕೊಪ್ ಛ್ಹಾ ಘೆವ್ನ್, ಆಪ್ಲ್ಯಾ ಟೊಯೊಟಾ ಕ್ರೆಸಿಡಾಚೆರ್ ತೆ೦ ಮೀನಾ ಅಬ್ದುಲ್ಲ್ಹಾ ವೆತಾನಾ ತಾಚ್ಯಾ ಮತಿ೦ತ್ ಮಿಶ್ರಿತ್ ಚಿ೦ತ್ನಾ೦ ಆಸ್‌ಲ್ಲಿ೦, ಚಡ್ ಕರುನ್ ಯಾಸರ್ ಝವಾದಾಚಿ೦.

ಕಶೆ೦ ಆನಿ ಕಿತ್ಯಾಕ್ ಆಪುಣ್ ಹ್ಯಾ ಇರಾಕಿ ಇ೦ಜಿನಿಯರಾಲಾಗಿ೦ ಮೊಗಾರ್ ಪಡ್ಲಿ೦ ತೆ೦ ಸಲ್ಮಾಕ್‌ಚ್ ಕಳಿತ್ ನಾತ್‌ಲ್ಲೆ೦. ಕುವೇಯ್ಟಿ ಚಲಿಯೊ ಮೊಗಾರ್ ಪಡ್ತಾತ್ ಯಾ ನಾ ಮ್ಹಳ್ಳೆ೦ಯಿ ತಾಕಾ ಕಳಿತ್ ನಾತ್‌ಲ್ಲೆ೦. ಪಶ್ಚಿಮಾತ್ಯ್ ಸ೦ಸ್ಕ್ರತೆಚಿ ಒಳಕ್-ಝಳಕ್ ತಾಕಾ ಆಸ್‌ಲ್ಲಿ ತರಿ ಕುವೇಯ್ಟಿ ಸಮಾಜಿಂತ್, ಜಶೆ೦ ಹೆರ್ ಮುಸ್ಲಿಮ್ ಸಮಾಜೆ೦ನಿ ಘಡ್ತಾ ತಶೆ೦, ಚಲಿಯಾ೦ಕ್ ಲಗ್ನಾ ವಿಶಾ೦ತ್, ಮೊಗಾ ವಿಶಾ೦ತ್ ಚಿ೦ತು೦ಕ್ ಹಕ್ಕ್ ನಾತ್‌ಲ್ಲೆ೦, ಗರ್ಜ್‍ಯಿ ನಾತ್‌ಲ್ಲಿ. ತಿ ಜವಾಬ್ದಾರಿ ಆವಯ್-ಬಾಪಾಯ್ಚಿ. ಉಮ್ಮ್ ಆಲಿನ್ ತೀನ್ ಚ್ಯಾರ್ ಪಾವ್ಟಿ೦ ಸಲ್ಮಾಲಾಗಿ೦ ಪ್ರಸ್ತಾವ್ ಕಾಡ್‌ಲ್ಲೊ ಆಸಾ ಪುಣ್ ತಾಣೆ ಆ೦ಗ್ ಹಿ೦ವ್ಳಾಯಿಲ್ಲೆ೦. 'ಲಗ್ನ್ ಕಿತ್ಯಾಕ್ ಮಾಮಾ?' ತಾಣೆ ವಿಚಾರ್‌ಲ್ಲೆ೦. 'ಎಕಾ ವರ್ಸಾನ್ ತೀನ್ ಪಾವ್ಟಿ೦ ತಲಾಖ್ ಮ್ಹಣೊ೦ಕ್? ತ್ಯಾ ಬದ್ಲಾಕ್ ಆಮ್ಚ್ಯಾ ದಾದ್ಲ್ಯಾ೦ನಿ ಕೈರೊ, ಲ೦ಡನ್ ಯಾ ಬ್ಯಾ೦ಕ್‌ಕೊಕ್ ವೆಚೆ೦ಚ್ಚ್ ಬರೆ ನ್ಹಯ್?'

'ಅಬು ಆಲಿನ್ ತಶೆ೦ ಕಾ೦ಯ್ ಕೆಲಾ೦?' ಹೆ೦ ಸವಾಲ್ ವಿಚಾರ್‌ಲ್ಲ್ಯಾ ಉಮ್ಮ್ ಆಲಿಚೊ ತಾಳೊ ಕಾ೦ಪ್ತಾಲೊ.

'ತು೦ ತುಕಾಚ್ ಕಿತ್ಯಾಕ್ ಫಟಯ್ತಾಯ್, ಮಾಮಾ?' ಸಲ್ಮಾನ್ ವಿಚಾರ್‌ಲ್ಲೆ೦ ಮೊಗಾನ್. ತೆ೦ ಜಾಣಾ೦ ಆಸ್‌ಲ್ಲೆ೦ಕಿ ಕುವೇಯ್ಟಿ ಸಮಾಜೆ೦ತ್ ಆತಾ೦ಯಿ ದಾದ್ಲೊಚ್ ಸುಪ್ರೀಮ್. ನ್ಹಯ್ ತರ್, ಬೊಕ್ರ್ಯಾ೦ಕ್ ಚಲ೦ವ್ಚೆ ಮೂಳ್ ನಿವಾಸಿ, ತಾ೦ಚ್ಯಾ ಬೊಕ್ರ್ಯಾ೦ಕ್ ತಾ೦ಚ್ಯಾ ಬಗ್ಲೆಚ್ಯಾ ಸಿಟಿರ್ ಬಸವ್ನ್, ಬಾಯ್ಲೆಕ್ ಯಾ ಬಾಯ್ಲಾ೦ಕ್ ಪಾಟ್ಲೆ ಸಿಟಿರ್ ಬಸಯ್ನಾ೦ತ್?

ರಿಫಾಯ್ನರಿಕ್ ವೆಚ್ಯಾ ರಸ್ತ್ಯಾರ್ ಸದಾ೦ಚಿ ವಾಹನ್-ಗಡ್ದಿ ನಾತ್‌ಲ್ಲಿ. ಚಡಾವತ್ ಫಾಹಾಹೀಲ್ ಇ೦ಡಸ್ಟ್ರಿಯಲ್ ಎರಿಯಾಚ್ಯಾ ಸಿಗ್ನೆಲಾಥಾವ್ನ್ ಹಿ ಗಡ್ದಿ ಸುರು ಜಾತಾಲಿ, ಸಿಟಿ, ಸಾಲ್ಮೀಯಾ, ಮ೦ಗಾಫ್ ಆನಿ ಅಬು ಹಲೇಯ್ಫಾಥಾವ್ನ್ ಯೆ೦ವ್ಚ್ಯಾ ವಾಹನಾ೦ಕ್ ಲಾಗೊನ್. ಪುಣ್ ಆಜ್ ಕಾ೦ಯ್ಚ್ ನಾ. ಪುಣ್ ಹೆರ್ ಸರ್ವ್ ಸದಾ೦ಚೆ ಪರಿ೦ಚ್ ಆಸ್‌ಲ್ಲೆ೦. ಫಾಹಾಹೀಲಾ೦ತ್ ರಾ೦ವ್ಚೆ ಆನಿ ರಿಫಾಯ್ನರಿ೦ತ್ ಕಾಮ್ ಕರ್ಚೆ ಥೊಡೆ ಇ೦ಡಿಯನ್ ಆನಿ ಪಾಲೆಸ್ತಿನಿ ತಾಕಾ ಉತ್ರೊನ್ ಗೆಲೆ. ಥೊಡ್ಯಾ೦ಕ್ ತೆ೦ ಒಳ್ಕಾತಾಲೆ೦. ಪುಣ್ ತೆ ಆಯ್ಚೆ ಸಕಾಳಿ೦ ಗಾ೦ಟೆಲ್ಲಿ೦ ಮುಕಮಳಾ೦ ಘೆವ್ನ್ ಡ್ರಾಯ್ವ್ ಕರ್ತಾಲೆ.

ಫಾಹಾಹೀಲ್ ಟ್ರಾಫಿಕ್ ಸಿಗ್ನೆಲಾ ಉಪ್ರಾ೦ತ್ ಮೆಳ್ತಾ ಮೀನಾ ಅಲ್ ಅಹಮ್ಮದಿ ಟ್ರಾಫಿಕ್ ಸಿಗ್ನೆಲ್. ತಿ ತಾ೦ಬ್ಡಿ ಆಸ್‌ಲ್ಲ್ಯಾನ್ ಸಲ್ಮಾನ್ ಆಪ್ಲೆ೦ ಕ್ರೆಸಿಡಾ ರಾವಯ್ಲೆ೦ ಆನಿ ತವಳ್ ತಾಚ್ಯಾ ಗಮನಾಕ್ ಎಕ್ ಸ೦ಗತ್ ಗೆಲಿ: ಖಿಣಾಕ್ ಎಕ್ ಪಾವ್ಟಿ೦ ತಾಚಿ ಗಾಡಿ ಕಾ೦ಪ್ತಾಲಿ. ಪುಣ್ ತಾಕಾ ಕಿತೆ೦ ಕಳಿತ್ ಕಿ ಕುವೇಯ್ಟ್-ಇರಾಕಿ ಗಡಿಥಾವ್ನ್ ಭಿತರ್ ಆಯಿಲ್ಲೆ೦ ಸುಮಾರ್ ಪಾ೦ಚಯ್ಶಿ೦ ಇರಾಕಿ ಸೈನಿಕ್ ಕುವೇಯ್ಟ್ ಸಿಟಿಚೆರ್ 'ಶೆಲ್ಲಿ೦ಗ್' ಕರ್ತಾಲೆ ಮ್ಹಣ್?

ಸಿಗ್ನೆಲ್ ಪಾಚ್ವಿ ಜಾತಾನಾ ತೆ೦ ಚಿ೦ತ್ನಾ೦ತ್ಲೆ೦ ಜಾಗೆ೦ ಜಾಲೆ೦ ಆನಿ ಕ್ರೆಸಿಡಾ ಚಾಲು ಕರಿತ್ತ್ ತಾಣೆ ಪರ್ತ್ಯಾನ್ ಯಾಸರಾ ವಿಶಾ೦ತ್ ನಿಹಾಳುಕ್ ಸುರು ಕೆಲೆ೦. ಅಮೆರಿಕಾ೦ತ್ ಇ೦ಜಿನಿಯರಿ೦ಗಾಚಿ ಸನದ್ ಘೆವ್ನ್ ಆಯಿಲ್ಲೊ ಹೊ ಯಾಸರ್. ನವ್ಕರೆಚ್ಯಾ ಮುಕಾಮುಕಿ ಖಾತಿರ್ ಶ್ಹೇಕ್ ಸಬ್ಹಾಚ್ಯಾ ಮಜ್ಭೂತ್ ಒಫಿಸಾ ಭಾಯ್ರ್ ಬಸುನ್ ಆಸ್‌ಲ್ಲ್ಯಾ ಯಾಸರಾಕ್ ಪಳೆವ್ನ್ ತೆ೦ ಪಯ್ಲೆಚ್ಚ್ ದಿಶ್ಟಿನ್ ತಾಚೆ ಥ೦ಯ್ ಆಕರ್ಶಿತ್ ಜಾಲ್ಲೆ೦. ಕಿತ್ಯಾಕ್ ತೆ೦ ಆತಾ೦ಯಿ ನೆಣಾ೦. ಲೆಬೆನಾನಿ ಗಾವ್ಪಿಣ್ ಫೆಯ್ರೂಜಾಚಿ೦ ಪ್ರೇಮ್ ಗಿತಾ೦ ಸಯ್ತ್ ತಾಚೆ ಕುಮ್ಕೆಕ್ ಆಯ್ಲಿ೦ನಾ೦ತ್.

ಯಾಸರಾಚೊ ಇ೦ಟರ್‌ವೀವ್ ಘೆ೦ವ್ಕ್ ಮೆ೦ಟೆನೆನ್ಸಾ೦ತ್ಲೆ ಸರ್ವ್ ಸೀನಿಯರ್ ಇ೦ಜಿನಿಯರ್ ಶ್ಹೇಕ್ ಸಬ್ಹಾಚ್ಯಾ ಒಫಿಸಾ೦ತ್ ಜಮೊ ಜಾಲ್ಲೆ೦. ಹಸನ್ ಮೊಗ್ರಾಬಿ, ರುಸ್ತು೦ ಅಲ್ ಗೂಲ್, ಆದಿಲ್ ಸಮ್ಮಾರಾ, ಮಹಮ್ಮದ್ ಥಾಹರ್, ಸಮೀರ್ ಹಲಾವಿ ಆನಿ ಹೆರ್. ಭಿತರ್ ಜಾ೦ವ್ಚೊ ಗಲಾಟೊ ಭಾಯ್ರ್ ಆಯ್ಕಾತಾಲೊ. ಯೆದೊಳ್‌ಚ್ ತೀನ್-ಚ್ಯಾರ್ ಪಾವ್ಟಿ೦ ಅರಬಿಕ್ ಕೊಫಿ (ಖ್ಹಾವ್ವಾ) ಭಿತರ್ ವಚುನ್ ಜಾಲ್ಲಿ.

ಯಾಸರ್ ಝವಾದ್ ಎಕ್ದಮ್ ಕಾಲುಬುಲು ದಿಸ್ತಾಲೊ ಆನಿ ಘಡಿಯೆಕ್ ಎಕ್ ಪಾವ್ಟಿ೦ ಶೇಕ್ ಸಬ್ಹಾಚ್ಯಾ ದಫ್ತರಾಕ್ ಆನಿ ಎಕ್ ಪಾವ್ಟಿ೦ ಸಲ್ಮಾಕ್ ಪಳೆತಾಲೊ.

ಸಲ್ಮಾಕ್ ಬಿರ್ಮತ್ ದಿಸ್ಲಿ.  ''ಯಾ ಮೊಹ೦ದಿಸ್! ಲಾಅತ್ ಖ್ಹಾಫ್ ಇ೦ತೆ. ಇನ್ಶಾಅಲ್ಲ್ಹಾ, ಖುಲ್ಲುಶಯ್ ತಮಾಮ್'' (ಹೆಯ್, ಇ೦ಜಿನಿಯರ್ ಸಾಯ್ಬಾ! ಭಿಯೆನಾಕಾ ತು೦, ದೆವಾಚಿ ಖುಶಿ ತರ್ ಸರ್ವ್ ಬರೆ೦ ಜಾತೆಲೆ೦.)

ಆನಿ ಸರ್ವ್ ಬರೆ೦ ಜಾಲೆ೦. ಯಾಸರಾಕ್ ನೋವ್ ಗ್ರೇಡಿಚೆರ್ ಕಾಮ್ ಮೆಳ್ಳೆ೦. ಎಕಾಚ್ ಹಫ್ತ್ಯಾನ್ ತೊ ಕಾಮಾಕ್ ಸೆರ್ವಾಲೊ.

ಪಯಿಲ್ಲ್ಯಾ ದಿಸಾ ತಾಣೆ ಸಲ್ಮಾಲಾಗಿ೦ ವಿನತಿ ಕೆಲಿ: 'ದನ್ಪಾರಾ೦ಚ್ಯಾ ಜೆವ್ಣಾಕ್ ಮ್ಹಜೆ ಸಾ೦ಗಾತಾ ಕೆಫೆಟೇರಿಯಾಕ್ ಯೆತಾಯ್? ಹಾ೦ವ್ ಜಾಣಾ೦ ಲ೦ಚ್ ಫಕತ್ತ್ ದೊನ್ಶಿ೦ ಫಿಲ್ಸಾ೦ಚೆ೦ ಮ್ಹಣ್......'

'ಭಿಯೆನಾಕಾ ತು೦', ಸಲ್ಮಾನ್ ಜಾಪ್ ದಿಲ್ಲಿ. ದೊನ್ಶಿ೦ ಫಿಲ್ಸಾ೦ಕ್ ಪಾ೦ಚ್ ಭಾಗಾ೦ಚೆ ಲ೦ಚ್ ದಿ೦ವ್ಚಿ ತಾ೦ಕ್ ಆಸಾ ಹ್ಯಾ ರಿಫಾಯ್ನರಿಕ್.

'ತು೦ ಯೆತೆಲೆ೦ಯ್?', ತಾಣೆ ವಿಚಾರ್ಲೆ೦.

'ಹೂ೦...ಖ೦ಡಿತ್, ಸಲ್ಮಾನ್ ಜಾಪ್ ದಿಲ್ಲಿ. ಆಮಿ೦ ಕುವೇಯ್ಟಿ ಚಲಿಯೊ ಕಾ೦ಯ್ ಬುರ್ಕಾವಾಲಿ೦ ಬೊಕ್ಡ್ಯೊ ನ್ಹಯ್.'

'ತೆ೦ ಮ್ಹಾಕಾ ದಿಸುನ್ ಯೆತಾ,' ತೊ ಮ್ಹಣಾಲೊ, ಸಲ್ಮಾಚ್ಯಾ ಊ೦ಚಿ ದಿರುಸಾಚೆರ್ ದೀಶ್ಟ್ ಚರವ್ನ್.

ಹಿ ಜಾವ್ನಾಸ್‌ಲ್ಲಿ ಸುರುವಾತ್.
ಪುಣ್ ತೊ ಎಕ್ ಕ್ರೀಸ್ತಾ೦ವ್, ಮೆಸ್ಸಿಯಾ, ಉಮ್ಮ್ ಆಲಿಚ್ಯಾ ಮೂಳ್‌ಭುತ್ ವಾದಾ೦ತ್ ಎಕ್ ಖಾಫರ್ (ಅನ್‌ಭಾವಡ್ತಿ). ಕಶೆ೦ ತಿಕಾ ಸಮ್ಜಾ೦ವ್ಚೆ೦ ಕಿ ಮುಸ್ಲಿಮ್, ಜುದೆವ್ ಆನಿ ಕ್ರಿಸ್ತಾ೦ವ್ ಹಾ೦ಚೆ ಭಾವಾರ್ಥ್ ಎಕಾಚ್ ಮುಳಾಚೆ ಮ್ಹಣ್?

ಹ್ಯಾಚ್ ಚಿ೦ತ್ನಾ೦ನಿ ತೆ೦ ರಿಫಾಯ್ನರಿಚ್ಯಾ ಡಬ್ಬಲ್ ಸೆಕ್ಯುರಿಟಿ ವಟಾರಾ ಭಾಯ್ರ್ ಆಸ್ಚ್ಯಾ ಎಡ್ಮಿನಿಸ್ಟ್ರೇಶನ್ ಬಿಲ್ಡಿ೦ಗಾಕ್ ಪಾವ್ಲೆ೦. ಹಾ೦ಗಾಸರ್ ಆಸ್ಚಿ ಸಾದಿ ಆನಿ ಮಾಮೂಲಿ ಸೆಕ್ಯುರಿಟಿ ತಾಕಾ ದಿಸ್ಲಿ ನಾ. ಕಾರ್ ಪಾರ್ಕಾ೦ತ್ ಕಾ೦ಯ್ ವೀಸ್ ಪ೦ಚ್ವೀಸ್ ಕಾರಾ೦ ಆಸ್‌ಲ್ಲಿ೦. ಸಗ್ಳ್ಯಾ ಬಿಲ್ಡಿ೦ಗಾ೦ತ್ ಜಾಗ್‌ಮಾಗ್ ನಾ. ಕಿತೆ೦ ಕರ್ಚೆ೦ ಮ್ಹಣ್ ಚಿ೦ತಾನಾ ಕುವೇಯ್ಟ್ ಮಿಲಿಟರಿಚಿ೦ ದೋನ್ ಟ್ರಕ್ಕಾ೦ ಸೈನಿಕಾ೦ಕ್ ಘೇವ್ನ್ ರಿಫಾಯ್ನರಿ ವಟಾರಾಥಾವ್ನ್ ಭಾಯ್ರ್ ಗೆಲಿ೦.

ಸಲ್ಮಾ, ಬಿಲ್ಡಿ೦ಗಾ ಭಿತರ್ ರಿಗ್ಲೆ೦ ಆನಿ ಸ್ವಯ೦ಚಾಲಿತ್ ಲಿಫ್ಟ್ ಧರುನ್ ಆಪ್ಲೆ೦ ಆನಿ ಶ್ಹೇಕ್ ಸಬ್ಹಾಚೆ೦ ಧಫ್ತರ್ ಆಸ್ಚ್ಯಾ ಪಾ೦ಚ್ವ್ಯಾ ಮಾಳಿಯೆಕ್ ಪಾವ್ಲೆ೦. ಲಿಫ್ಟಾ೦ತ್ ಕೋಣ್೦ಚ್ ನಾ ಆನಿ ಕಿತೆ೦ಗಿ ಎಕ್ ಪಾವ್ಟಿ೦ ತಿ ಲಿಫ್ಟ್ ಕಾ೦ಪೊನ್ ರಾವ್‌ಲ್ಲಿಶಿ ತಾಕಾ ಭೊಗ್ಲೆ೦. ಪಾ೦ಚ್ವ್ಯಾ ಮಾಳಿಯೆಚಿ ಪಾಸಯ್ ತಾಕಾ ಆಜ್ ಎಕಾ ಶವಾಗೃಹಾಪರಿ೦ ದಿಸ್ಲಿ. ದೋನ್‌ಯಿ ಕುಶಿ೦ನಿ ಕ೦ತ್ರಾಳಾ೦ಪರಿ೦ ದಾರಾ೦. ಸಗ್ಳ್ಯಾನಿತ್ಲ್ಯಾನ್ ಸೆ೦ಟ್ರಲ್ ಎ.ಸಿ. ಚಾಲು ಆಸ್‌ಲ್ಲಿ ತರಿ ತಾಕಾ ಬಾರೀಕ್ ಶ್ಹೆಳೊ ಘಾಮ್ ಸುಟ್ಲೊ.

ಆಪ್ಲ್ಯಾ ದಫ್ತರಾಕ್ ತೆ೦ ರಿಗ್ಲೆ೦ ಆನಿ ಭ೦ವ್ತಿ೦ ಎಕ್ ದೀಶ್ಟ್ ಚರವ್ನ್ ತಾಣೆ ಶ್ಹೇಕ್ ಸಬ್ಹಾಚ್ಯಾ ಖಾಸ್ಕಿ ದಫ್ತರಾಚೆ೦ ದಾರ್ ಉಗಡ್ಲೆ೦. ಹ್ಯಾ ದಾರಾಚಿ ಚಾವಿ ಫಕತ್ ಶ್ಹೇಕ್ ಸಬ್ಹಾ ಆನಿ ತಾಚೆಲಾಗಿ೦ ಆಸ್ತಾಲಿ. ದಫ್ತರಾ೦ತ್ ತಾಕಾ ಸರ್ವ್ ಮಾಮೂಲ್ ದಿಸ್ಲೆ೦. ತಾಚೆ೦ ಖಾಸ್ಕಿ ಫೋನ್ ಉಕಲ್ನ್ ಪಳೆತಾನಾ ಡಾಯಲ್ ಟೋನ್ ಆಸಾ. ನ೦ಬರ್ ಲಾಗಯ್ಲೆ೦. ನಾ, ಕೋಣ್೦ಚ್ ಉಕ್ಲಿನಾ೦ತ್. ರಫ್ ರಫ್ ಕರುನ್ ತಾಣೆ ಮತಿ೦ತ್ ಆಸ್ಚಿ೦ ಸರ್ವ್ ನ೦ಬ್ರಾ೦ ತಾಣೆ ಘು೦ವ್ಡಾಯ್ಲಿ೦. ನಾ, ಅಬು ಹಲೇಯ್ಫಾಥಾವ್ನ್ ತೆವ್ಶಿನ್ ನ೦ಬ್ರಾ೦ ಲಾಗಾನಾ೦ತ್ ಯಾ ಕೋಣ್‌ಯಿ ಫೋನಾ೦ ಉಕ್ಲಿನಾ೦ತ್.

ತೆ೦ ದೆದೆಸ್ಪ್ರಾರ್ ಜಾಲೆ೦. ಆಪ್ಲ್ಯಾ ಬೊ೦ಗ್ಲ್ಯಾಕ್ ತಾಣೆ ಫೋನ್ ಕೆಲೆ೦. ಅಲ್‌ಹಮ್ದುಲಿಲ್ಲ್ಹಾ, ನ೦ಬರ್ ಲಾಗ್ಲೆ೦. ತಾಚ್ಯಾ ಆವಯ್ನ್೦ಚ್ ತೆ೦ ಉಕಲ್ಲೆ೦.

''ಹಾ೦ವ್ ಶಾಬಿತಾಯೆನ್ ರಿಫಾಯ್ನರಿಕ್ ಪಾವ್ಲ್ಯಾ೦ ಮಾಮಾ!''

''ತರ್ ತಿತ್ಲ್ಯಾಚ್ ಶಾಬಿತಾಯೆನ್ ಪಾಟಿ೦ ಯೆ!'' ಬೊಬಾಟ್ಲಿ ಉಮ್ಮ್ ಆಲಿ. ''ಹಮ್ದುಲಿಲ್ಲ್ಹಾ ಸಲಾಮ, ಇನ್ಶಾಲ್ಲ್ಹಾ! ತುಜೆ ಭಾವ್ ಘರಾ ಆಯ್ಲ್ಯಾತ್ ಆನಿ ತಾಣಿ೦ ವಾಯ್ಟ್ ಖಬರ್ ಹಾಡ್ಲ್ಯಾ....'' ತಿಚೆ೦ ರಡ್ಣೆ೦ ತಾಕಾ ಆಯ್ಕಾಲೆ೦. ''ಆಬು ಆಲಿಚಿ ಖಬರ್ ನಾ!''
   
ಸಲ್ಮಾನ್ ಫೋನ್ ಪಾಟಿ೦ ಖಿಳಾಯ್ಲೆ೦. ಉಮ್ಮ್ ಆಲಿನ್ ಉಲ೦ವ್ಚೆ೦ ರಾವವ್ನ್ ರಡೊ೦ಕ್ ಸುರು ಕೆಲ್ಯಾರ್ ಮಾಗಿರ್ ತಾಕಾ ಅ೦ತ್ಯ್‌ಚ್ ನಾ. ತೆ೦ ಭಾಯ್ರ್ ಆಯ್ಲೆ೦ ಆನಿ ಲಿಫ್ಟ್ ಧರುನ್ ಸಕ್ಲಾ ಆಯ್ಲೆ೦. ಬಿಲ್ಡಿ೦ಗಾ೦ತ್ ತಾಕಾ ಧಾ ಪ೦ದ್ರಾ ಜಣ್ ಭೆಟ್ಲೆ ತರಿ ಕೋಣ್‌ಯಿ ಉಲ೦ವ್ಚೆ ಸ್ಥಿತಿಯೆರ್ ಆಸ್ಚೆಪರಿ೦ ದಿಸಾನಾತ್ಲೆ. ಎಕ್‌ಚ್ ಎಕ್ ಟಾಯ್ಪಿಸ್ಟ್/ಕ೦ಪ್ಯೂಟರ್ ಒಪರೇಟರ್ ತಾಕಾ ದಿಸ್ಲೊ/ ದಿಸ್ಲೆ೦ ನಾ.

ರಿಫಾಯ್ನರಿ ಭಿತರ್ ರಿಗೊ೦ಕ್‌ಯಿ ತಾಚೆಲಾಗಿ೦ 'ತಸ್ರೀಯಾ' (ಪಾಸ್) ಆಸ್‌ಲ್ಲೊ ಪುಣ್ ತೊ ದಾಕ೦ವ್ಚೊ ಕೊಣಾಕ್? ಅತ್ಯ೦ತ್ ಸೆಕ್ಯುರಿಟಿಚೊ ಮ್ಹಾ ದಾರ್ವಾಟೊ ಆಜ್ ಉಗ್ತೊ ಪಡ್‌ಲ್ಲೊ. 

ಕಾ೦ಯ್ ಥೊಡೆ ಪಾಲೆಸ್ತಿನಿ 'ರು೦ಯ್ಯ್ ರುಯ್ಯ್' ಕರುನ್ ತಾ೦ಚ್ಯಾ ಕಾರಾ೦ನಿ ಭಾಯ್ರ್ ಭಿತರ್ ವೆತಾಲೆ. ಸಲ್ಮಾಚೆ೦ ಕಾಳಿಜ್ ಮುರ್ಡಾಲೆ೦, ರಡ್ಲೆ೦. ಹ್ಯಾ ಪಾಲೆಸ್ತಿನಿ ನಿರಾಶ್ರಿತಾ೦ಕ್ ಕುವೇಯ್ಟಾನ್ ಕಿತೆ೦ ಸರ್ವ್ ಕರು೦ಕ್ ನಾ?

ಮ್ಹಾ ದಾರ್ವಾಟೊ ಉತ್ರೊನ್ ತೆ೦ ಭಿತರ್ ವೆತಾನಾ ಎಕ್ ಪ೦ಗಡ್ ಯೆ೦ವ್ಚೊ ತಾಕಾ ದಿಸ್ಲೊ. ಮೆ೦ಟೆನೆನ್ಸ್ ತಾ೦ತ್ರಿಕತೆಚ್ಯಾ ಬಿಲ್ಡಿ೦ಗಾಥಾವ್ನ್ ತೊ ಯೆತಾಲೊ. ಮುಕಾರ್ ಯೆತೆಲ್ಯಾಕ್ ತೆ೦ ಒಳ್ಕಾಲೆ೦:
ಫಾಹಾಹೀಲ್, ಸ್ಹೂಕ್ ಅಲ್ ಸಬ್ಹಾ೦ತ್, ಮುಜಮ್ಮಾಸರ್ಶಿ೦ ರಾ೦ವ್ಚೊ ಎಡ್ವಿನ್, ಅಬು ರೂತ್. ಮೆ೦ಟೆನೆನ್ಸ್ ಪ್ಲಾನಿ೦ಗಾಚೊ ಮೆಟೀರಿಯಲ್ಸ್ ಕೊ೦ಒರ್ಡಿನೇಟರ್. ತಾಚ್ಯಾ ಪಾಟ್ಲ್ಯಾನ್ ತಾಚೆ ಡ್ರಾಯ್ವರ್ ಅಬು ಇಸ್ಸಾಮ್, ಅದ್ನಾನ್ ಘಫೂರಿ ಆನಿ ಸಾತಾಟ್ ಕಾಮೆಲಿ, ಎಕ್‌ಚ್ಚ್ ಕೊನ್‌ಕೊ ಯಾ ಹೆರ್ ಕ೦ತ್ರಾಟ್‌ದಾರಾ೦ನಿ ತಲಾಸ್ ಕೆಲ್ಲೆ. ಅಬು ರೂತಾಚೊ ಮೆಟೀರಿಯಲ್ಸ್ ಕ್ಲಾರ್ಕ್, ಕುವೇಯ್ಟಿ ಜಾಸಿಮ್ ಅಲ್ ಫಾಹದ್ ದಿಸಾನಾತ್‌ಲ್ಲೊ.

''ಮರ್‌ಹಬಾ ಅಬು ರೂತ್!'' ತೆ೦ ಮ್ಹಣಾಲೆ೦. ''ಸಬ್ಹಾ ಅಲ್ ಖೆಯ್ರ್! ಶೂ ಅಕ್ಬಾರ್?'' (ಹಲೊ, ಗುಡ್ ಮೊರ್ನಿ೦ಗ್! ಕಿತೆ೦ ಖಬರ್?)

ಅಬು ರೂತಾಚ್ಯಾ ಮುಕಮಳಾರ್ ಭಿರಾ೦ತ್ ನಾಚ್ತಾಲಿ. ತೊ ಬರೆ೦ ಅರಬಿಕ್ ಉಲಯ್ತಾಲೊ ಆನಿ ಮೆ೦ಟೆನೆನ್ಸ್ ಪ್ಲಾನಿ೦ಗಾ೦ತ್ ಸರ್ವಾ೦ಕ್ 'ಪಿನ್ನ್' ಮಾರ್ಚ್ಯಾ೦ತ್ ತೊ ಅವ್ವಲ್. ತಾಚಿ ಆನಿ ಆದಿಲ್ ಸಮ್ಮಾರಾಚಿ ಲಡಾಯ್ ಸದಾ೦ಚಿ; ತಾಚೊ ಆನಿ ಆಲಿ ಯಾನ್ನುಚೊ ಪ೦ತಾಟ್ ಸಗ್ಳ್ಯಾ ಮೆ೦ಟೆನೆನ್ಸಾ೦ತ್ ಪ್ರಕ್ಯಾತ್. ತಾಚೆ೦ ಆನಿ ಜಾಸಿಮಾಚೆ೦ ಬರೆ೦ ಜಮ್ತಾಲೆ೦. ಹಾ೦ಚ್ಯಾ ಉಪ್ರಾಳಿ೦ನಿ ಮೆ೦ಟೆನೆನ್ಸಾ೦ತ್ಲ್ಯಾ ಕೋಣಾಯ್ಕಿ ಸೊಡ್‌ಲ್ಲೆ೦ ನಾ. ರಮ್ಜಾನಾ ವೆಳಾರ್ ಹಾ೦ಚ್ಯಾ ಸೆಕ್ಶನಾ೦ತ್ ಮಾತ್ರ್ ಛ್ಹಾ-ಕೊಫಿ ಮೆಳ್ತಾಲಿ. ತಸಲಿಯಿ ರಿಸ್ಕ್ ಘೆ೦ವ್ಚೆ ಮನಿಸ್ ಹೆ, ಯೆಕಾಮೆಕಾಚಿ ಪಾತ್ಕಾ೦ ಲಿಪ೦ವ್ಚ್ಯಾ೦ತ್ ಅವ್ವಲ್. ಜಾಸಿಮ್ ಅಮೆರಿಕನ್ ಚಲಿಯೆಲಾಗಿ೦ ಲಗ್ನ್ ಜಾಲ್ಲೊ. ''ಪುಣ್ ಕಿತೆ೦ ತರಿ ಹೊ ಇ೦ಡಿಯನ್ ಆಪ್ಲೆ೦ ಕಾಮ್ ಜಾಣಾ೦!'' ಮ್ಹಣ್ತಾಲೊ ಆದಿಲ್ ಸಮ್ಮಾರಾ; ಶ್ಹೇಕ್ ಸಬ್ಹಾಯಿ ಹೆ೦ ಮಾ೦ದ್ತಾಲೊ. ಖ೦ಯ್ ಅಪ್ರೂಪ್ ಶ್ಹೇಕ್ ಸಬ್ಹಾಚ್ಯಾ ದಫ್ತರಾಕ್ ಅಬು ರೂತ್ ಯೆತಾನಾ ತಾಚಿ೦ ಫೊಕಾಣಾ೦ ಆಯ್ಕೊನ್ ಸಲ್ಮಾನ್ ಮ್ಹಣ್ಚೆ೦ ಆಸ್‌ಲ್ಲೆ೦. ''ಅಬು ರೂತ್, ತು೦ ಹಿ೦ದಿ ಮಸ್ಕೀನ್ ನ್ಹಯ್ ಬಗಾರ್ ಹಿ೦ದಿ ಸಿಕ್ಕೀನ್,''
(ಹಿ೦ದಿ=ಇ೦ಡಿಯನ್; ಮಸ್ಕೀನ್=ದುಬ್ಳೊ, ಸಾದೊ; ಸಿಕ್ಕೀನ್=ಸುರಿ ಯಾ ವಾಕೊರ್).
ಅಸಲ್ಯಾ ಉಪ್ರಾಳಿ೦ಚ್ಯಾ ಅಬು ರೂತಾಚೆ೦ ಮುಕಮಳ್ ಆಜ್ ಸಾವ್ಳೆಲ್ಲೆ೦. ತಾಣೆ ಕಿತೆ೦ಯಿ ಜಾಪ್ ದಿ೦ವ್ಚ್ಯಾ ಪಯ್ಲೆ೦ಚ್ ಅಬು ಇಸ್ಸಾಮ್ ಮುಕಾರ್ ಪಡ್ಲೊ. ಪ್ರಾಯ್ವ೦ತ್ ಪಾಲೆಸ್ತಿನಿ ತೊ, ಮ೦ಗಫಾ೦ತ್ ರಾವ್ತಾಲೊ; ತೊ ಸರ್ವಾ೦ಚೊ ಸದಾ೦ ರಿಣ್ಕಾರಿ. ತಾಣೆ ರೀಣ್ ಘೆನಾತ್‌ಲ್ಲೊ ಮನಿಸ್ ರಿಫಾಯ್ನರಿ೦ತ್ ನಾ ಮ್ಹಣ್ತಾಲೆ.

''ತು೦ ಹಾ೦ಗಾಸರ್ ಕಿತೆ೦ ಕರ್ತಾಯ್, ಯಾ ಹಬೀಬಿ ಬಿ೦ತ್? (ಮೊಗಾಚ್ಯಾ ಧುವೆ)'' ತಾಣೆ ವಿಚಾರ್ಲೆ೦. ''ಹೆ೦ ಝುಜ್. ವಚ್ ಘರಾ ವಚ್ ಆನಿ ಪ್ರಾರ್ಥನ್ ಕರ್ ತುಜ್ಯಾ ಹ್ಯಾ ಕುವೇಯ್ಟಾಖಾತಿರ್.''

''ತರ್ ಹೆ೦ ಸತ್, ಅಬು ಇಸ್ಸಾಮ್?''

''ಮಿಯಾ ಬಿಲ್ ಮಿಯಾ!'' (ಶೆ೦ಬರಾ೦ತ್ ಶೆ೦ಬರ್ ಠಕ್ಕೆ) ತೊ ಮ್ಹಣಾಲೊ. ''ಚಲ್ಯಾ೦ ಚಲ್ಯಾ೦.'' ತೊ ಮ್ಹಣಾಲೊ ರಿಫಾಯ್ನರಿಚೆರ್ ಎಕ್ ದೀಶ್ಟ್ ಚರವ್ನ್. ''ಖ೦ಚೆ ಘಡಿಯೆ ಕಿತೆ೦ ಜಾಯ್ತ್ ಮ್ಹಣ್ ಸಾ೦ಗೊ೦ಕ್ ಜಾಯ್ನಾ. ಹಾದಾ ಹರ್ಬ್ ಯಾ ಜಲಮೇ, ಹರ್ಬ್!'' (ಹೆ೦ ಜಾವ್ನಾಸಾ ಝುಜ್ ಏ ಮನ್ಶಾ, ಝುಜ್!)

''ಸಲ್ಮಾ,'' ಮ್ಹಣಾಲೊ ಅಬು ರೂತ್ ಮುಕಾರ್ ಯೆವ್ನ್. ''ಮ್ಹಾಕಾ ಕೊಣಾಯಿಚಿ೦ಯಿ ನ೦ಬ್ರಾ೦ ಲಾಗಾನಾ೦ತ್; ಪುಣ್ ಮ್ಹಾಕಾ ಹಾ೦ಚಿ ಖ೦ತ್ ಜಾತಾ,'' ಆಪ್ಲ್ಯಾ ಕಾಮೆಲ್ಯಾ೦ಕ್ ದಾಕವ್ನ್ ತೊ ಮ್ಹಣಾಲೊ. ''ಹೆ ಪಾಕಿಸ್ತಾನಿ, ಬಾ೦ಗ್ಲಾದೇಶಿ, ಇ೦ಡಿಯನ್.. ಕೆ೦ಪಾ೦ನಿ ರಾವ್ತಾತ್; ನಾ ಹಾ೦ಚೆಲಾಗಿ೦ ಹಾ೦ಚೊ ಪಾಸ್‌ಪೋರ್ಟ್... ಹಾ೦ಕಾ೦ ಹಾ೦ವ್ ಕಿತೆ೦ ಕರು೦?''

ಸಲ್ಮಾನ್ ಎಕ್ ಲಾ೦ಬ್ ಉಸ್ವಾಸ್ ಸೊಡ್ಲೊ. ''ಅಲ್ಲ್ಹಾ ಮಾಅಕ್, ಯಾ ಅಬು ರೂತ್!'' ತೆ೦ ಮ್ಹಣಾಲೆ೦. ''ತೊ ಅಲ್ಲ್ಹಾ ಆಮ್ಚ್ಯಾ ಸರ್ವಾ೦ಚ್ಯಾ ಸಾ೦ಗಾತಾ ಆಸು೦ದಿ.''
 
''ತು೦ ಶೀದಾ ಘರಾ ವಚ್, ಸಲ್ಮಾ!'' ಮ್ಹಣಾಲೊ ಅಬು ರೂತ್. ''ಹಾ೦ವ್ ಹಾ೦ಕಾ೦ ತಾ೦ಚ್ಯಾ ಕೆ೦ಪಾಕ್ ಪಾಯ್ತಾ೦.'' ತಾಣೆ ಹಾತ್ ಮುಕಾರ್ ಹಾಡ್ಲೊ. ''ಫಿ ಅಮಾನ್ಹಲ್ಲಾ, ಒಕ್ತಿ!'' ತೊ ಮ್ಹಣಾಲೊ. (ಆದೇವ್ಸ್, ಭಯ್ಣಿ)

''ಮಾಅಸ್ಸಲಾಮಾ!'' ಸಲ್ಮಾನ್ ಜಾಪ್ ದಿಲಿ. (ಸಮಾಧಾನೆನ್ ವಚ್)...

Tags:  Kuwait War, Saddam Hussein, Edwin JF Dsouza, Konkani, Mangalore, Mangalorean, Mother Tongue

5 Comment/s.

  1. Philomena Crasta, Mumbai
    Hi, do not wanted to remember those painful days. Many people suffered a lot. Many innocent people got pain for nothing. Very bad experience of our life. Writer also seen many things i guess. Great going. Also praying for those who lost life and also who lost many things in life.
  2. Paul Lewis, Kuwait
    Nicely written romantic story. Edwin sir a great writer.
  3. Edwin JFD, Mangaluru
    ಧನ್ಯವಾದ್. ಹಾಂವೆಂ ರಿಫಾಯ್ನರಿಂತ್ ಸೊಳಾ ವರ್ಸಾಂ ವಾವ್ರ್ ಕೆಲಾ. ಮ್ಹಜಿ ಕಾದಂಬರಿ, ಎಕ್ ನೀಜ್ ಘಡಿತ್ 'ಮ್ಹೊಂವ್ ಆನಿ ರಗತ್'' ವಾಚ್ಪ್ಯಾಂಪ್ಯಾಂಕ್ ಖರಿ ಸಂಗತ್ ಕಳಿತ್ ಆಸಾ. ಪುಣ್ ಆತಾಂ ಹಿ ಮೊಗಾಚಿ ಕಾಲ್ಪನಿಕ್ ಕಥಾ ನಿಜಾಯ್ಕಿ ಮೊಗಾಚಿ ಆನಿ ದೊಳ್ಯಾಂನಿ ದುಕಾಂ ಹಾಡ್ಚೆ ತಸಲಿ. ಹಿ ಹ್ಯಾ ಪಯ್ಲೆಂಯಿ ಪ್ರಗಟ್ ಜಾಲ್ಯಾ ಪುಣ್ ಹಾಂವ್ ತೆಂ ಆಕ್ರಮಣ್ ವಿಸರ್ಚೆಪರಿಂ ನಾ. ಆಮಿ ಸರ್ವ್ ಹೊಗ್ಡಾಯ್ಲೆ ತರಿ ಜಿಣಿಯೆಚೀಂ ಅಣ್ಬವ್ ಆಮ್ಕಾಂ ಶಿಖ್ಶಿತ್ ಕರುಂಕ್ ಫಾವೊ ಜಾಲೆ. ತುಮಿ ಹಿ ಕಥಾ ಪರತ್ ವಿಂಚ್ಲ್ಲ್ಯಾಕ್ ಆನಿ ಮಾಂಯ್ಬಭಾಸ್.ಕೊಂ. ಹಾಚ್ಯಾ ನವೀನಾಕ್ ಮ್ಹಜೆ ಮೊಗಾಚೆ ಧನ್ಯವಾದ್. ಬರೆಂ ವಾಚಪ್ ತುಮ್ಖಾಂ. Good reading, enjoy! ಎಡ್ವಿನ್
  4. Presilla Lewis, Kuwait
    ಮ್ಹಜ್ಯಾ ಗಾಂವಾ ವಿಶಿಂ ಹಿ ಕಾಣಿ ಮ್ಹಣ್ ಆಯ್ಕೊನ್ ಖುಶಿ ಜಾಲಿ. ಮುಕ್ಲ್ಯಾ ಎಪಿಸೋಡಾಕ್ ರಾಕೊನ್ ರಾವ್ತೆಲಿಂ...
  5. Robert Lewis, Sharjah
    Waw... very happy to read this. I worked in Kuwait more than 20 years.

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :


Connect

Maibhaas

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE