From around the world

ಪ್ರವೀಣ್ ತಾವ್ರೊ, ಕುಲ್ಶೇಕರ್
             
+971 50 7554105
ತುಮ್ಚ್ಯಾ ಗಮನಾಕ್:
Best be viewed in 1366 X 768 screen resolution and in Google Chrome
You are here:   /  ಸಿರಿವಂತಾಚಿಂ ಲಿಕ್ಣೆಂ ಮೊತ್ಯಾಂ

3  -  ಸ್ತ್ರೀಯಾಂಚಿ ಸಾಯ್ಕೊಲೊಜಿ

Saturday, July 1, 2017  /  By Admin

ಬರಯ್ಣಾರಾ ವಿಶಿಂ ಜಾಣಾ ಜಾ...

90.0
User Rating


"ವಿನ್ನಿ......"
ಜವಾಬ್ ನಾ!
"ವಿನ್ನಿ ....."
ಜವಾಬ್ ನಾ!!
ಹಾಂವ್ ಘಡ್ಬಡ್ಲೊಂ! ಹರ್ಶೆಂ ಹಾಸ್ತ್ಯಾ ಮುಖಾನ್ ತೆಂ ಮ್ಹಾಕಾ ಮೆಳೊಂಕ್ ಮುಖಾರ್ ಯೆತಾಲೆಂ; ಪುಣ್ ಆಜ್ ಆಪಯ್ಲ್ಯಾರಿ ತಾಚಿ ಜವಾಬ್ ನಾತ್‍ಲ್ಲಿ!
"ವಿನ್ನಿ....."
"......"
ಸೊಪೊ ಉತ್ರೊನ್ ಕುಡಾಂತ್ ರಿಗ್ಲೊಂ ಹಾಂವ್. ಪುಣ್ ಭಿತರ್ ಸುಸ್ಕಾರ್ ಆಯ್ಕೊನ್ ಥಂಯ್ಚ್ ಸ್ಥಬ್ದ್ ಜಾಲೊಂ! ವ್ಹೊಯ್ ತಾಚೊ‍ಚ್ ತಾಳೊ; ಆಂವ್ಸರಾನ್ ತಾಚೆ ಸರ್ಶಿಂ ಪಾವ್ಲೊಂ ಹಾಂವ್.
ವಿನ್ನಿ ರಡ್ತಾಲೆಂ! ಪುಣ್ ಮ್ಹಾಕಾ ಪಳೆಲ್ಲೆಂಚ್ ತಾಚೆಂ ರಡ್ಣೆಂ ಎಕಾಚ್ಛಾಣೆ ಬಂಧ್ ಜಾಲೆಂ ಆನಿ ಮ್ಹಜೆರ್ ತಾಚಿ ತಿರಸ್ಕಾರಾಚಿ ದೀಷ್ಟ್ ಪಡ್ಲಿ!
"ಅರೆರೆರೆ; ಹಿ ಕಸಲಿ ಅವಸ್ಥಾ?" ಕಳ್ವಳ್ಳೊಂ ಹಾಂವ್. 'ಕಾಜಾರ್ ಜಾವ್ನ್ ಸಾಡೆ-ಧಾ ದೀಸ್ ಜಾಯ್ಜಾಯ್ ಜಾಲ್ಯಾರ್, ಹೆ ಕಸಲೆಂ ಖರ್ಗ್ ಮ್ಹಜೆರ್ ದೆಂವ್ಲೆಂ?' ಮತಿಂತ್‍ಚ್ ಉದ್ಗಾರ್ ಸೊಡ್ತಾಂ ಮಿಸ್ತೆರಾಂನಿ ರೆವಡ್ಲೊಂ.
"ವಿನ್ನಿ......" ಗಜಾಲ್ ಸಮ್ಜೊಂಚ್ಯೆ ಆತುರಾಯೆನ್ ಹಾಂವೆಂ ಮೊಗಾನ್ ಉಲೊ ಕೆಲೆಂ ತಾಕಾ. ಪುಣ್ ತೆಂ ರಪ್ಪ್ ಕರುನ್ ಘುಂವೊನ್ ವೊಣದಿಕ್ ತೊಂಡ್ ದಾಕವ್ನ್ ರಾವ್ಲೆಂ. 'ಕರ್ಮಾಂ ಜಾಲಿಂಮೂ ಹಿಂ!' ಕಿತೆಂ ಕರ್ಚೆಂ ಮ್ಹಣ್ ಕಳಾನಾಸ್ತಾನಾ ಹಾಂವ್ ಥಂಯ್ಚೊ ವಚೊನ್ ಸೊಪ್ಯಾರ್ ಎಕಾ ಕದೆಲಾರ್ ವೊಣ್ಕಾಲೊಂ.
ಸಿಗ್ರೆಟಿಚೊ ಧುಂವೊರ್ ಸವ್ಕಾಸ್ ವಯ್ರ್ ವೆತಾನಾ, ಚಿಂತ್ನಾಂನಿ ಬುಡ್‌ಲ್ಲ್ಯಾ ಮ್ಹಜೆ ಮುಖಾರ್ ವಿನ್ನಿ ಉಬೆಂ ಜಾಲೆಂ. ಪುಣ್, ಹಾಂವೆಂ ತಾಚೆರ್ ದೀಷ್ಟ್ ಲಾಯ್ಜಾಯ್ ಜಾಲ್ಯಾರ್, ಕಾಫಿಯೆಚೆಂ ಕಪ್ ಮ್ಹಜೆ ಮುಖಾರ್ ಆಸ್‌ಲ್ಲ್ಯಾ ಮೆಜಾರ್ 'ಡಬಕ್ಕ್' ಆವಾಜಾನ್ ದೊವರ್ನ್ ತೆಂ ಸರಸರ ಕರುನ್ ಭಿತರ್ ಧಾಂವ್ಲೆಂ.
ಅರ್ಧಿ ಕಾಫಿ 'ಟೇಬಲ್ ಕ್ಲೊತ್' ಪಿಯೆಲೆಂ; ಉರ್‌‍ಲ್ಲಿ ಇಲ್ಲಿ, ತಾನೆನ್ ಗಳೊ ಸುಕ್‍ಲ್ಲ್ಯಾ ಹಾಂವೆಂ ಪೊಟಾಂತ್ ಘಾಲಿ.
ತಿ ಸಗ್ಳಿ ರಾತ್ ಮೌನಾಂತ್‌ಚ್ ಪಾಶಾರ್ ಜಾಲಿ; ಸಕಾಳಿಂಯಿ ಮೌನ್! ಹಾಂವ್‌ಯಿ ವೊಗೊ ರಾವ್‌ಲ್ಲೊಂ. ತಾಣೆಂ ದಿಲ್ಲೆಂ ಇಲ್ಲೆಂ ಕಸಲೆಂಗಿ ಪೊಟಾಂತ್ ಘಾಲ್ತಾಂ, ಕಪ್ಪಾಂತ್ಲಿ ಕಾಫಿ ಘೊಟುನ್ ಆಫಿಸಾಕ್ ಚಲ್ತಚ್ ರಾವ್ಲೊಂ.

ಆಫಿಸಾಕ್ ರಿಗ್ತಾನಾ, ಹಾಂವ್ ಗರಮ್ಂಚ್ ಆಸ್‌ಲ್ಲೊಂ. ಪೆದ್ಯಾನ್ ದಿಲ್ಲೊ ಸಲಾಮ್ ಪಾಟಿಂ ದಿಂವ್ಕ್ ಮ್ಹಜೆ ಥಂಯ್ ಉಲ್ಲಾಸ್ ನಾತ್‌ಲ್ಲೊ. ಶೀದಾ ಭಿತರ್ ರಿಗೊನ್ ಮ್ಹಜೆಂ ಕಾಮ್ ಹಾಂವೆಂ ಸುರು ಕೆಲೆಂ.
ಇಲ್ಲ್ಯಾ ವೆಳಾನ್ ಮ್ಹಾಕಾ ಮೊಟೊ ಘಾಮ್ ದೆಂವೊಂಕ್ ಲಾಗ್ಲೊ. ವಯ್ರ್ ಪಳೆತಾನಾ, ಫೆನ್ ವಿಶೆವ್ ಘೆತಾಲೆಂ.
"ಆ ಫೇನ್ ಸ್ವಲ್ಪ ಹಾಕು ಮ್ಹಾರಾಯಾ" ಮೈಸೂರ್ ಥಾವ್ನ್ ವರ್ಗ್ ಜಾವ್ನ್ ನವೊಚ್ ಮಂಗ್ಳುರಾಕ್ ಆಯಿಲ್ಲ್ಯಾ ತ್ಯಾ ಪೆದ್ಯಾಕ್ ಹಾಂವೆಂ ಧಮ್ಕಿ ಘಾಲಿ.
"ಕರೆಂಟ್ ಇಲ್ಲ ಸ್ವಾಮಿ......."
"....... ನಿನ್ನ ಮೈಸೂರಿನ ಕರ್ಮ! ಆ ಹಗ್ಗವನ್ನಾದರೂ ಎಳಿ!" ಬೊಬಾಟ್ಲೊಂ ಹಾಂವ್.
'ಹಗ್ಗವನ್ನಾದರೂ ಎಳಿ' ಮ್ಹಣ್ತಾನಾ, ಆಫಿಸಾಂತ್ಲ್ಯಾ ಹೆರಾಂಕ್ ಹಾಸೊಂಕ್ ಆಯ್ಲೆಂ ಜಾಯ್ಜಾಯ್. ಪುಣ್ ಪೆದೊ ಮ್ಹಾಕಾಚ್ ಪಿಳಿ ಪಿಳಿ ಪಳೆಂವ್ಕ್ ಲಾಗ್ಲೊ. ಹಾಂವೆಂ ಸಾಂಗ್‌ಲ್ಲೆಂ ತಾಕಾಯಿ ವಿಚಿತ್ರ್ ದಿಸ್‌ಲ್ಲೆಂ. ಪುಣ್ ಮ್ಹಜಿ ರಾಗಿಷ್ಟ್ ದೀಷ್ಟ್ ತಡ್ವುಂಕ್ ತಾಂಕಾನಾಸ್ತಾನಾ ತೊ ಪಾಪ್ ಜನೆಲಾ ಪಾಟ್ಲ್ಯಾನ್ ಉಮ್ಕಾಳ್ಚಿ ತಿ ಪೊರ್ನಿ ದೊರಿ ವೊಡುಂಕ್ ಲಾಗ್ಲೊ.
ಆಫಿಸಾಂತ್ ಫೆನಾಂ ಫಿಟ್ಟ್ ಕೆಲ್ಲಿಂ ಜಾಲ್ಯಾರಿ, ಬ್ರಿಟಿಷಾಂಚಾ ತೆಂಪಾಚೊ ತೊ ಲುಗ್ಟಾಚೊ ಪಂಕೊ ಆನಿಕಿ ಉಮ್ಕಾಳೊನ್ ಆಸ್‍ಲ್ಲೊ. ತಾಚೊ ಉಪಯೋಗ್ ಸಾಂಡುನ್ ವರ್ಸಾಂ ಪಾಶಾರ್ ಜಾಲ್ಲಿಂ. ಮಾತಿ ಖೆಲ್ಲ್ಯಾ ರಾಟ್ಯಾ ಥಾವ್ನ್ ಕಿರಿಂ ಕಿರಿಂ ಆವಾಜ್ ಉಠ್ತಾನಾ, ಪಂಕ್ಯಾಚಾ ಲುಗ್ಟಾಚೆರ್ ಬಸ್‌ಲ್ಲಿ ಧುಳ್-ಮಾತಿ, ಮ್ಹಜಾ ಮಾತ್ಯಾರ್ ಆನಿ ಮ್ಹಜೆ ಮುಖಾರ್ ಮೆಜಾರ್ ಆಸ್‌ಲ್ಲ್ಯಾ ಕಾಗ್ದಾಂ ಪತ್ರಾಂಚೆರ್ ಪಡೊಂಕ್ ಲಾಗ್ಲಿ. ಅಭಿಮಾನಾಕ್ ಲಾಗೊನ್ ಹಾಂವೆಂ ತೊ ಪಂಕೊ ತಾಚೆ ಕರ್ನಾ ಚಾಲುಚ್ ಉರಯ್ಲೊ.

ಸಾಂಜ್ ಜಾಲಿ! ಪುಣ್ ಆತುರಾಯೆನ್ ಘರಾ ವೆಚೊ ಹಾಂವ್ ಕಸಲ್ಯಾಗಿ ಚಿಂತ್ನಾಂನಿ ಪೆಂಟೆಂತ್ ಭೊಂವ್ಲೊಂ. ಮಾರ್ಗಾ ದೆಗೆರ್ ಮೆಳ್ಚಾ ಎಕಾ ಬುಕ್ ಸ್ಟೋಲಾಂತ್ ಏಕ್ ಘಡಿ ರಾವ್ಲೊಂ.
ವಿಮೆನ್ ಸೈಕೊಲೊಜಿ - ಮ್ಹಣ್ಚೆ, ಸ್ತ್ರೀಯಾಂಚೆಂ ಮನಃಶಾಸ್ತ್ರ್. ಹಾಂ! ತೊಚ್ ಬೂಕ್ ಜಾಯ್ ಆಸ್‌ಲ್ಲೊ ಮ್ಹಾಕಾ. ಮಾಜ್ರಾನ್ ಉಂದ್ರಾಕ್ ದಾವ್ಲಿ ಮಾರುನ್ ಧರ್ಚೆಬರಿ ತೊ ಬೂಕ್ ಹಾಂವೆಂ ಆರಾವ್ನ್ ಧರ್ಲೊ! ದಾವ್ಯಾ ಹಾತಾನ್ ಮ್ಹಜಾ ಹರ್ಧ್ಯಾಕ್ ತೊ ಪೊಟ್ಲುನ್ ಧರುನ್, ಉಜ್ವ್ಯಾ ಹಾತಾನ್ ಪೆಂಟಾಚಾ ಬೊಲ್ಸಾಂತ್ಲೆ ಪಯ್ಶೆ ಕಾಡುಂಕ್ ಲಾಗ್ಲೊಂ. ಮ್ಹಜಾ ವರ್ತನಾಕ್ ಥಂಯ್ ಆಸ್‌ಲ್ಲ್ಯಾಂನಿ ಮ್ಹಾಕಾ ಪಿಸೊ ಮ್ಹಣ್ ಲೆಕ್ಲೆಂಗಿ ಕೊಣ್ ಜಾಣಾ!
ವಿದೇಶಿ ಬೂಕ್ ತೊ. ತಾಚೆಂ ಮೊಲ್  6-95 ಡೊಲರ್. ಮ್ಹಳ್ಯಾರ್, ಆತಾಂಚಾ ಮೊಲಾ ದೆಂವವ್ಣೆಚ್ಯೆ ದರಿ ಪ್ರಮಾಣೆ ಸುಮಾರ್ ರುಪಯ್! ಬಾಪ್ರೆ!! ಮ್ಹಾಕಾ ಘಾಮ್ ಸುಟ್ಲೊ. ಹಾಂವೆಂ ತೊ ಕಾಣ್ಘೆನಾಸ್ತಾನಾ ಸೊಡ್ಲ್ಯಾರ್ ಖಂಡಿತ್ ತೆ ಹಾಸ್ತೆಲೆ! ಪಯ್ಶೆ ದೀವ್ನ್ ಹಾಂವ್ ಥಂಯ್ಚೊ ನಿಕಳ್ಳೊಂ.

ವಿನ್ನಿಚಾ ಕಾಲ್ಚಾ, ಆಯ್ಚಾ ಆನಿ ಕೊಣ್ ಜಾಣಾ ಫಾಲ್ಯಾಂಚಾಯಿ ಮನೋಭಾವಾಚೆಂ ಕಾರಣ್ - ತೆಂ ಮೊನೆಂ ಜಾಲ್ಲ್ಯಾನ್ - ತ್ಯಾ ಬುಕಾ ಥಾವ್ನ್ಂಚ್ ಮ್ಹಾಕಾ ಸಮ್ಜಾಜಾಯ್ ಆಸ್‌ಲ್ಲೆಂ. ವೆಗಿಂ ಘರಾ ಪಾವ್ಲೊಂ ಹಾಂವ್ ಆನಿ ಮ್ಹಜಾ ಕುಡಾಂತ್ ಬಸೊನ್ ಆತುರಾಯೆನ್ ತಾಚಿಂ ಪಾನಾಂ ಎಕೇಕ್‌ಚ್ ಪರ್ತಿಲಿಂ. 
ಹುಂ! ಭಾರಿ ಭಾರಿ ಆಸ್‌ಲ್ಲೆಂ ತಾಂತುಂ. ತಾಂಕಾಂ ದುಃಖ್ಚೆಂ ವೆಗಿಂ ಖಂಯ್ ಆನಿ ಲಾಂಬ್ ವೇಳ್ ತಿ ದೂಖ್ ಕಾಳ್ಜಾಂತ್ ರಾವ್ತಾ ಖಂಯ್....... ರಾಗ್‌ಯಿ ತಸೊಚ್... ತೆಂ ಸರ್ವ್ ವಾಚ್ತಾಂ, ಹ್ಯಾ ಸ್ತ್ರೀಯಾಂಚೊ ವ್ಯಾರ್‌ಚ್ ಮ್ಹಾಕಾ ನಾಕಾ ಆಸ್‌ಲ್ಲೊ ಮ್ಹಣ್ ಭೊಗ್ಲೆಂ ಮ್ಹಾಕಾ. ಪುಣ್ ತಾಂಚೆ ಮಸ್ತ್ ಬರೆ ಗೂಣ್‌ಯಿ ತಾಂತು ಆಸ್‌ಲ್ಲೆ ಮ್ಹಣ್ತಾನಾ, ಇಲ್ಲೆಂ ಸಮಾಧಾನ್ ಮ್ಹಜೆ ಥಂಯ್ ಪಾಟಿಂ ಆಯ್ಲೆಂ.
ಜೆವ್ಣಾಕ್ ತೆಂ ಆಪಯ್ನಾತ್‌ಲ್ಲೆಂ; ಹಾಂವ್ ಜಾವ್ನ್ ವೆತೊಂ ಮ್ಹಳ್ಯಾರ್, ಮ್ಹಜೊ ಅಭಿಮಾನ್ ಸುಟಾನಾತ್‌ಲ್ಲೊ! ಆನಿಕಿ ಬುಕಾಚಿಂ ಪಾನಾಂ ಪರ್ತಿಲಿಂ ಹಾಂವೆಂ.
"ಸ್ತ್ರೀಯಾಂಕ್ ಮೊಸೊರ್ ಇಲ್ಲೊ ಚಡ್‍ಚ್ ಆಸ್ತಾ, ಅಪ್ಲ್ಯಾ ದಾದ್ಲ್ಯಾಚೊ ಮೋಗ್ ಜೊಗಾಸಾಣೆನ್ ಸಾಂಬಾಳುಂಕ್ ತಿಕಾ ತೊ ಉಪ್ಕಾರ್ತಾ. ಆಪ್ಲೊ ದಾದ್ಲೊ ಕೊಣಾಯಿ ಸ್ತ್ರೀಯೆಲಾಗಿಂ ಇಲ್ಲೆಂ ಹಾಸೊನ್ ಉಲಯ್ಲೊ ಯಾ ತಾಂಚೆಂ ಉಲವ್ಣೆ ಇಲ್ಲೆಶೆಂ ಲಾಂಬ್ಲೆಂ - ತಕ್ಷಣ್ ತಿಚ್ಯೆ ಮತಿಂತ್ ದುಭಾವ್ ಉಬ್ಜಾ...."
ತ್ಯಾ ಬುಕಾಂತ್ ತೆಂ ವಾಚ್‌ಲ್ಲೆಂಚ್, ಸಟ್ಟ್ ಕರುನ್ ವಿನ್ನಿ ಆನಿ ಮ್ಹಜೆ ಮಧ್ಲ್ಯೆ ಕಿತಾಫತಿಚೆಂ ಕಾರಣ್ ಝಳ್ಕಾಲೆಂ ಮ್ಹಾಕಾ ಆನಿ ತ್ಯಾ ಲತಾಚೊ ಉಗ್ದಾಚೊ ಆಯ್ಲೊ.

ಲತಾ! ನಾಂವ್ ತಶೆಂ ಜಾಲ್ಯಾರಿ, ಆಪುಟ್ ಕ್ರಿಸ್ತಾಂವ್ ತೆಂ. ಮ್ಹಜೆಂ ಪಯ್ಶಿಲೆಂ ಸಂಬಂಧಿಕ್ ಆನಿ ಪಯ್ಲೆಂಚೆಂ ಶೆಜಾರಿ. ಥೊಡ್ಯಾ ವರ್ಸಾಂ ಹೆವ್ಶಿನ್  ತಿಂ ವಕಾಲ್ ಗೆಲ್ಲಿಂ ಆನಿ ತೆಂ, ಖಂಯ್‍ಗಿ ಪಯ್ಸ್, ಉತ್ತರ್ ಇಂಡಿಯಾಂತ್ ಟೀಚರ್ ಜಾವ್ನಾಸ್‌ಲ್ಲೆಂ.
ತ್ಯಾ ದೀಸ್ ರಜಾ ಆಸ್‌ಲ್ಲ್ಯಾನ್ ವಿನ್ನಿ ಆನಿ ಹಾಂವ್ ಸಾಂಗಾತಾ ಸಕಾಳಿಂ ಶೊಪಿಂಗಾಕ್ ವೆತಾಲ್ಯಾಂವ್. ವಾಟೆರ್ ಲತಾ ಭೆಟ್ಲೆಂ. ಹಾಸೊನ್ಂಚ್ ಉಲಯ್ಜಾಯ್ ತಾಕಾ. ಅಪ್ರೂಪ್ ಭೆಟ್‌ಲ್ಲ್ಯಾ ತಾಚೆಲಾಗಿಂಚ್ ಉರ್‌ಲ್ಲಿ ಸಗ್ಳಿ ವಾಟ್ ಹಾಂವ್ ಉಲಯ್ಲೊಂ. ಉಪ್ರಾಂತ್ ಕಸಲ್ಯಾಗಿ ಗರ್ಜೆಚಾ ಕಾಮಾನ್ ವಿನ್ನಿಕ್ ಹಾಂವೆಂ ಎಕ್ಲ್ಯಾಕ್‌ಚ್ ಘರಾ ಪಾಟಿಂ ಧಾಡ್ಲೆಂ ಆನಿ ಹಾಂವ್..... ವ್ಹೊಯ್.....ತೆಣೆಂಚ್ ವೆಚಾ ಲತಾ ಸಾಂಗಾತಾಚ್ ಗೆಲೊಂ. ದೊನ್ಪಾರಾಂ ತಾಂಗೆರ್‌ಚ್ ಜೆವ್ಲೊಂ. ತ್ಯೆಚ್ ಸಾಂಜೆರ್ ಹಾಂವ್ ಘರಾ ಪಾಟಿಂ ಯೆತಾನಾ ವಿನ್ನಿ ಆನಿ ಮ್ಹಜೆ ಮಧೆಂ......
ತಾಕಾ ಪರಿಹಾರ್? ಬುಕಾಂತ್ ನಾತ್‌ಲ್ಲೊ! 'ಮಾಗಿರ್ ಖಂಚಾ ಕರ್ಮಾಕ್ ಹಿ ಸಾಯ್ಕೊಲೊಗಿ ಹಾಂತುಂ ಬರಯ್ಲ್ಯಾ ಹಾಣೆಂ?' ಮನಾಂತ್‌ಚ್ ಗಾಳಿ ದಿಲ್ಯೊ ಹಾಂವೆಂ, ತ್ಯಾ ಜಯ್ತ್ ಬುಕಾಚಾ ಮಹಾನ್ ಲೇಖಕಾಕ್! ಆತಾಂ ಕಿತೆಂ ಕರುಂ? ವಟ್ಟಾರೆ ಅಂತ್ರಳಾರ್ ಉಬ್ಜಾ ಸುಕ್ಣ್ಯಾಬರಿ ಸ್ವತಂತ್ರಿ ಜಾವ್ನ್ ಆಸ್‌ಲ್ಲೊಂ ಹಾಂವ್, ಕಾಜಾರಿ ಬಾಂಧಾಚಾ ಪಿಂಜ್ಯ್ರಾಂತ್ ಪಡ್‌ಲ್ಲ್ಯಾಕ್ ಮ್ಹಾಕಾಚ್ ದುರ್ಸತಾಂ, ತಿ ರಾತ್‌ಯಿ ಮೌನಾಂತ್ಂಚ್ ಪಾಶಾರ್ ಕೆಲಿ ಹಾಂವೆಂ.
ದುಸ್ರೊ ದೀಸ್ ಆಯ್ತಾರ್; ಪರ್ತ್ಯಾನ್ ಆಫಿಸಾಕ್ ರಜಾ! ಮಿಸಾಕ್ ಹಾಂವ್ ಎಕ್ಯೆ ವಾಟೆನ್ ಗೆಲ್ಯಾರ್, ತೆಂ ಆನ್ಯೆಕ್ಯೆ ವಾಟೆನ್ ಗೆಲೆಂ. ಪಾಟಿಂ ಘರಾಂತ್, ಹರ್ಶೆಂ ನವ್ಯಾ ಸಾಂಗಾತಿಣಿಚಾ ಸಹವಾಸಾಂತ್ ಸ್ವಾಧಿಕ್ ತಶೆಂ ಭೊಗ್ಚಾ ಮ್ಹಾಕಾ, ಆಜ್ 'ಸಂಕಡ್-ಮರ್ಕ್' ಜಾಂವ್ಕ್ ಸುರು ಜಾಲೆಂ.

ಸಾಂಜ್ ಜಾವ್ನ್ ಯೆತಾಲಿ. ಭೊಂವೊಂಕ್ ಪುಣಿ ಯೇತ್‌ಗಿ ಮ್ಹಣ್ ಹಾಂವೆಂ ವಿನ್ನಿಕ್ ಪಳೆಲೆಂ. ಲತಾಚಿ ಕಥಾ ಸಾಂಗೊನ್ ತಾಚೆಂ ಮನ್ ಸಮಾಧಾನಿ ಕರುಂಕ್ ಸಂದರ್ಭ್ ಸೊಧುನ್, ತಾಕಾ ಹಾಂವೆಂ ಆಖ್ರೇಕ್ ಏಕ್ ಪಾವ್ಟಿಂ ಪರ್ತ್ಯಾನ್ ತಶೆಂ ಆಪಂವ್ಚೊನಾ ಮ್ಹಣ್ ನಿಚೆವ್ ಕರುನ್ - ಮೊಗಾನ್ ಆಪಯ್ಲೆಂ. ಉಮೊ ಉಬಯಿಲ್ಲ್ಯಾ ಜಿನ್ಸಾರ್. ಪುಣ್ ವಿನ್ನಿಚೆಂ ಪಯ್ಲೆಂಚ್ ಫುಗ್ರೆಂ ತೊಂಡ್ ಫುಗ್ಗ್ಯಾಬರಿ ಫುಲ್ಲೆಂ. 
ಮಲಾಮತಿ! ಮ್ಹಜಾ ಕುಡಾಕ್ ವಚೊನ್ ಹಾಂವೆಂ ಜನೆಲಾಂತ್ಲ್ಯಾನ್ ಭಾಯ್ರ್ ಪಳೆಲೆಂ. ಲತಾ ಆಮ್ಗೆರ್ ಯೆಂವ್ಚೆಂ ದಿಸ್ಲೆಂ ಮ್ಹಾಕಾ! ಅರೆ! ಹೆಂ ಪಿರ್ಕಿ ಹಾಂಗಾ ಕಿತ್ಯಾಕ್ ಆಯ್ಲೆಂ? ತಾಚಾ ಯೆಣ್ಯಾಂತ್ ವಿನ್ನಿ ಆನಿ ಮ್ಹಜೆ ಮಧ್ಲೊ ಸಂಬಂಧ್ ಆನಿಕಿ ಭಿಗ್ಡೊಂಚೊಚ್ ಸಯ್! ಮ್ಹಣ್ತಾನಾ ಮ್ಹಜೆಂ ಸಮಾಧಾನ್ ಚುಕ್ಲೆಂ, ಪುಣ್ ತಾಚೆ ಸಾಂಗಾತಾ ಯೆಂವ್ಚೊ ತರ್ನಾಟೊ ಕೊಣ್ ಮ್ಹಣ್ ಸಮ್ಜೊಂಚ್ಯೆ ಆತುರಾಯೆನ್ ಹಾಂವ್ ಸರ್ವ್ ವಿಸರ್ಲೊಂ. 

ವಿನ್ನಿ ಭಾಯ್ರ್ ಆಯಿಲ್ಲೆಂ. ಲತಾಕ್ ಮೆಳೊಂಕ್ ನಹಿಂ ಹಾಂ! ಹಾಂವೆಂ ವಾಚ್‍ಲ್ಲ್ಯಾ ಸಾಯ್ಕೊಲೊಜಿ ಪ್ರಮಾಣೆ, 'ಮ್ಹಜಾ ಪತಿಚೊ ಮೋಗ್ ಅಪರ್ಸುಂಚೆಂ ತುಂ ಕೊಣ್? ಮ್ಹಣ್ ತಾಚೆರ್ ಸಿಂಹಾಬರಿ ಉಡೊಂಕ್ ಕೊಣ್ ಜಾಣಾ? ತಾಂಕಾಂ ಸ್ವಾಗತ್ ದೀಜಾಯ್ ಜಾಲ್ಯಾರ್, ತಾಚೆ ಸಾಂಗಾತಾ ಆಸ್‌ಲ್ಲೊ ತರ್ನಾಟೊ. "ಹಲ್ಲೊ ವಿನ್ನಿ!" ಮ್ಹಣ್, ವಿನ್ನಿಚೊ ಹಾತ್ ಹಾಲಯ್ತಾಲೊ! ಮ್ಹಾಕಾ ವಿಚಿತ್ರ್ ನವಾಲ್‌ಶೆಂ ದಿಸ್ತಾನಾ, ವಿನ್ನಿ ಮ್ಹಾಕಾ ವಾಂಕ್ಡ್ಯಾ ದೊಳ್ಯಾಂನಿ ಪಳೆತಾಲೆಂ ಆನಿ ತಾಚಾ ಮುಖಮಳಾರ್ ಕಳ್ವಳೆ ಝಳ್ಕಾಲೆ ಮ್ಹಾಕಾ.
ಇಲ್ಲ್ಯಾ ವೆಳಾನ್ ತಿಂ ಗೆಲಿಂ; ಲತಾ ವಿನ್ನಿಲಾಗಿಂ ಉಲಯ್ತಾಲೆಂ ಜಾಲ್ಯಾರ್, ಲತಾಚೊ ಮುಖ್ಲೊ ನವ್ರೊ, ಡೊಲ್ಫಿ, ಮ್ಹಜೆಲಾಗಿಂ ಉಲಯ್ತಾಲೊ. ಕಶೆಂ ಮ್ಹಜೊ ಆನಿ ಲತಾ ಮಧ್ಲೊ ಸಂಬಂಧ್‍ಗಿ, ತಶೆಂಚ್ ವಿನ್ನಿ ಆನಿ ಡೊಲ್ಫಿ ಮಧ್ಲೊ ಸಂಬಂಧ್ ಜಾವ್ನಾಸ್‍ಲ್ಲೊ. ಸೆಜಾರ್ಯಾಂ, ತಶೆಂ ಸಂಬಂಧಿಕಾಂ ಮಧೆಂ ಇಷ್ಟಾಗತ್ ನಾ ಜಾಲ್ಯಾರ್ ಆನಿ ಕೊಣಾ ಮಧೆಂ ಆಸ್ಚಿ?
ಪುಣ್ ಹಾಂವ್ ಗರಮ್ಂಚ್ ರಾವ್ಲೊಂ. ಮ್ಹಜೆರ್ ಅನಾವಶ್ಯಕ್ ದುಭಾವ್ ಕೆಲ್ಲ್ಯಾ ವಿನ್ನಿಕ್ ಬೂಧ್ ಶಿಕಯ್ಜಾಯ್ ಆಸ್‌ಲ್ಲಿ ಮ್ಹಾಕಾ. ತಾಚೆರ್ ತೀಕ್ಷ್ಣ್ ದೀಷ್ಟ್ ಲಾವ್ನ್ 'ತೊ ತರ್ನಾಟೊ ಕೊಣ್?' ಮ್ಹಣ್ಚಾ ಅರ್ಥಾರ್, ವೋಂಠ್ ಚಾಬತ್ತ್ ಹಾಂವ್ ಮ್ಹಜಾ ಕುಡಾಕ್ ಗೆಲೊಂ. ಆನಿ ಖಿಳ್ ಘಾಲುನ್ (ತೆಂ ಭಿತರ್ ಯೆಂವ್ಕ್ ನಜೊ ಮ್ಹಣ್) ತೊ ಸಾಯ್ಕೊಲೊಜಿ ಬೂಕ್ ಪುರ್ತೊ ವಾಚುನ್ ಮುಗ್ದಿಲೊ.

ಇಲ್ಲ್ಯಾ ವೆಳಾನ್ ವಿನ್ನಿಚೊ ತಾಳೊ ಮ್ಹಾಕಾ ಜೇಂವ್ಕ್ ಆಪಯ್ಲಾಗ್ಲೊ.
ಆಬ್ಬಾ! ತೀನ್ ದಿಸಾಂಚಾ ಮೌನಾ ಉಪ್ರಾಂತ್! ಪುಣ್ ಹಾಂವ್ ಕಿತ್ಯಾಕ್ ಉಠ್ತಾಂ? ಪರ್ತ್ಯಾನ್ ಆಪಯ್ಲೆಂ ತಾಣೆಂ. ಇಲ್ಲ್ಯಾ ಮೊಗಾನ್ಂಚ್! ಮ್ಹಾಕಾ ಬಿರ್ಮೊತ್ ದಿಸ್ಲಿ; ಭುಕ್‍ಯಿ ಲಾಗ್ತಾಲಿ. ಪುಣ್, ತಾಕಾ ರಡಯ್ಲ್ಯಾ ಶಿವಾಯ್ 
ಮ್ಜಜೊ ನಾಟಕ್ ಅಂತ್ಯ್ ಕರಿಸೊನಾ ಮ್ಹಣ್ಚಾ ನಿರ್ಧಾರಾಕ್ ಆಯಿಲ್ಲೊಂ ಹಾಂವ್. ಇಲ್ಲೊ ವೇಳ್ ಕರ್ನ್ಂಚ್ 'ಟಪ್ಪ್' ಕರ್ನ್ ವ್ಹಡ್ ಆವಾಜಾನ್ ಖಿಳ್ ಕಾಡುನ್ ಭಾಯ್ರ್ ಆಯ್ಲೊಂ, ಆನಿ ಬಾಗ್ಲಾ ಭಾಯ್ರ್ ರಾಕ್ತೆಲ್ಯಾ ತಾಕಾ ಪಳೆನಾಸ್ತಾನಾಂಚ್ ಶೀದಾ ವಚೊನ್ ಮೆಜಾಲಾಗಿಂ ಜೇಂವ್ಕ್ ಬಸ್ಲೊಂ.

ವಿನ್ನಿ ಪಶ್ಚಾತ್ತಾಪ್ ಪಾವ್‌ಲ್ಲೆಂ. ಲತಾ ಕೊಣ್ ಮ್ಹಣ್ ತೆಂ ಸಮ್ಜಾಲ್ಲೆಂ. ಸಾಂಗಾತಾಚ್ ಡೊಲ್ಫಿನ್ ತಾಚೊ ಹಾತ್ ಹಾಲಯಿಲ್ಲ್ಯಾಕ್ ಆನಿ ಭೋವ್ ಸಳಾವಳಿನ್ ತಾಚೆಲಾಗಿಂ ಉಲಯಿಲ್ಲ್ಯಾಕ್ ಹಾಂವ್ ಕಿತೆಂ ಚಿಂತಾಂಗಿ? ಮ್ಹಣ್ ತೆಂ ದುಭಾವ್ತಾಲೆಂ ಜಾಯ್ಜಾಯ್. ಮ್ಹಜೆಲಾಗಿಂಚ್ ಬಸೊಂಕ್ ಆಯ್ಲೆಂ ತೆಂ. ಮೊಗಾನ್ ಮ್ಹಜೆಲಾಗಿಂ ಮಾಫ್ ಮಾಗೊಂಕ್ ಅತ್ರೆಗ್ತಾಲೆಂ ಕೊಣ್ ಜಾಣಾ? ತೆಂ ಮ್ಹಜೆ ಸರ್ಶಿಂ ಬಸ್‌ಲ್ಲೆಂಚ್, ಹಾಂವ್ ಪಯ್ಸ್ ಬಸೊಂಕ್ ಮ್ಹಜಿ ಬೊಶಿ ಹಾತಾಂತ್ ಘೆವ್ನ್ಂಚ್ ಉಠ್ಲೊಂ.
"ಮ್ಹಜಿ ಚೂಕ್ ಜಾಲಿ....." ತಾಚೊ ತಾಳೊ ಕಾಂಪ್ತಾಲೊ. 
"ಕಾಲ್-ಪೋರ್ , ವಿನ್ನಿ, ವಿನ್ನಿ, ಮ್ಹಣ್ ಮೊಗಾನ್ ಆಪಯ್ತಾನಾ ತುಜೊ ರಾಗ್ ಚಡ್ತಾಲೊ. ಆತಾಂ ಕಳ್ಳೆಂ ನಹಿಂಗಿ ತುಕಾ; ಲತಾ ಕೊಣ್ ಮ್ಹಣ್?" - ಕೃತಕ್ ರಾಗ್ ಹಾಡ್ಲೊ ಹಾಂವೆಂ ತೊಂಡಾರ್. "ಪುಣ್ ತುಜಿ ಗಜಾಲ್ ಕಳಿತ್ ಜಾಲಿ ಮ್ಹಾಕಾ. ತುಜೊ 'ತೊ' ಆಸಾ ಪಳೆ - ಕಸೊ ತುಜೊ ಹಾತ್ ಹಾಲಯ್ತಾಲೊ ತೊ - ಕಿತ್ಲೆ ಬೊಯ್ ಫ್ರೆಂಡ್ಸ್ ಆಸ್‌ಲ್ಲೆ ತುಕಾ?"

ವಿನ್ನಿಚಾ ದೊಳ್ಯಾಂ ಥಾವ್ನ್ ಗಳಗಳ ದುಃಖಾ ಗಳ್ಳಿಂ. ತಿಯಿ ಏಕ್ ಸಾಯ್ಕೊಲೊಜಿ ತಾಂಚಿ! ಮ್ಹಜೊ ನಾಟಕ್ ಮ್ಹಾಕಾ ಮಾಗಿರ್ ಮುಂದರ್ಸುಂಕ್ ಜಾಲೊನಾ. ನಾಕಾ ಜಾಲ್ಲೆ ದುಬಾವ್ ಕರ್ಚೆ ಆನಿ ಲಾಂಬ್ ವೇಳ್ ರಾಗ್ ದೊವರ್ಚೊ ತಿ ಸ್ತ್ರೀಯಾಂಚಿ ಸಾಯ್ಕೊಲೊಜಿ! ಹಾಂವೆಂ ಪುರುಷಾನ್ ತಾಂಚೆಬರಿ ಜಾಂವ್ಕ್ ಪಳೆಲ್ಯಾರ್ ಕಶೆಂ? ಮ್ಹಾಕಾ ವ್ಹಡ್ಲ್ಯಾನ್ ಹಾಸೊಂಕ್ ಆಯ್ಲೆಂ. "ಸೊರಿ, ವೆರಿ ಸೊರಿ!" ಮ್ಹಣ್ ವಿನ್ನಿಚಾ ಸಾಯ್ಕೊಲೊಜಿ ಥಾವ್ನ್ ಉಬ್ಜಾಲ್ಲ್ಯಾ ಸರ್ವ್ ಘೊಟಾಳ್ಯಾಕ್ ಆನಿ ಆತ್ತಾಂ ಹಾಂವೆಂ ತಾಕಾ ದುಖಯಿ‌ಲ್ಲ್ಯಾಕ್ ಮ್ಹಜಿ 'ಎಪೊಲೊಜಿ'(ಪಶ್ಚಾತ್ತಾಪ್) ಉಚಾರ್ಲಿ ಹಾಂವೆಂ.

Tags:  Sirivonth, Salak Publisher, Women Psychology, Konkani, Mangalore, Mangalorean, Mother Tongue

3 Comment/s.

  1. Vineetha Crasta, Virar, Mumbai
    Yes. it is very natural. Writer told the woman psychology very correctly. Nice story.
  2. Jason Rodrigues, Mangalore
    ಬೋವ್ ದಿಸಾ ಉಪ್ರಾಂತ್ ಹಾಂವೆಂ ಸಿರಿವಂತಾಚಿ ಸಾಹಿತ್ಯ್ ವಾಚ್ಲೆಂ. ಎಕಾ ತೆಂಪಾರ್ ಹಾಂವ್ ಮಸ್ತು ತಾಚೆಂ ಸಾಹಿತ್ಯ್ ವಾಚ್ತಲೊಂ. ಆಪ್ಲ್ಯಾ ಸಾಹಿತ್ಯಾ ಮಾರಿಫಾತ್ ತೊ ಆಮ್ಚೆ ಸಾಂಗಾತಾ ಆನಿಕ್ಯೀ ಆಸಾ ಮ್ಹಣ್ ಭೊಗ್ತಾ. ತಾಚ್ಯೆ ಅತ್ಮ್ಯಾಕ್ ಶಾಂತಿ ಲಾಭೊಂ.
  3. Johnson Lewis, Mangalore
    Nice to read article. Thanks maibhaas.com for publishing his article.

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :


Connect

Maibhaas

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE