From around the world

ಪ್ರವೀಣ್ ತಾವ್ರೊ, ಕುಲ್ಶೇಕರ್
             
+971 50 7554105
ತುಮ್ಚ್ಯಾ ಗಮನಾಕ್:
Best be viewed in 1366 X 768 screen resolution and in Google Chrome
You are here:   /  ಥೊಡೆಂ ಥೊಡೆಂ ನವೆಂ ನವೆಂ

3  -  ಖಾಕೆಂತ್ಲಿ ಕೆಸೊಳಿ

May 31, 2016  /  By Admin

ಬರಯ್ಣಾರಾ ವಿಶಿಂ ಜಾಣಾ ಜಾ...

90.0
User Rating

ಅಮೇರಿಕಾಚ್ಯಾ ಕ್ಲಿಂಟನಾನ್ ಪೆಲ್ಯಾ ಸ್ತ್ರೀಯೆಲಾಗಿಂ ಆಪ್ಣೆಂ ಕೆಲ್ಲ್ಯಾ ಪ್ರದುವಾರಾ ವಿಷ್ಯಾಂತ್ ಉಗ್ತ್ಯಾನ್ ಮಾಫಿ ಮಾಗ್ಲೆಲ್ಯಾ ಪಾಟಾಪಾಟ್ ಮ್ಹಜ್ಯಾ ಖಾಕೆಂತ್ ಸಭಾರ್ ತೇಂಪ್ ಥಾವ್ನ್ ಗುಪಿತ್ತ್ ದೂಖ್ ದೀವ್ನ್ ಆಸ್‌ಲ್ಲಿ ಕೆಸೊಳಿ ವಿಪ್ರೀತ್ ಫಡೊಂಕ್ ಸುರು ಜಾಲಿ. ಇತ್ಲ್ಯಾ ಪದ್ವೆದಾರ್ ವ್ಯಕ್ತಿನ್ ಆಪ್ಲಿ ಚೂಕ್ ಸಗ್ಳ್ಯಾ ಸಂಸಾರಾ ಮುಖಾರ್ ಜಾಹೀರ್ ಕೆಲಿ ತರ್ ಹಾಂವೆಂಯ್ ವರ್‍ಸಾಂ ಥಾವ್ನ್ ದಾಂಬುನ್ ದವರ್‍ಲೆಲೆಂ ಪಾತಕ್ ಉಗ್ತ್ಯಾನ್ ಪಾಚಾರ್‍ಚೆಂ ವಾಜ್ಬಿ ಆನಿ ನಿತಿ ಪ್ರಕಾರ್ ಮ್ಹಣ್ ಮ್ಹಜೆಂ ಪಾತ್ಕಿಂ ಮನ್ ಮ್ಹಾಕಾ ಸಾಂಗಾಲಾಗ್ಲೆಂ. ಹಾಂವೆಂ ಭಂವ್ತಿಂ ಪಳೆಲೆಂ. ಮ್ಹಜಿ ಬಾಯ್ಲ್ ದೀವಾನ್ ಖಾನ್ಯಾರ್ ಬಸೊನ್ ವಾರ್ತಾಪತ್ರ್ ವಾಚ್ತಾಲಿ. ತಿಚ್ಯೆಲಾಗಿಂ ವಚೊನ್ ಮ್ಹಳೆಂ "ಮ್ಹಾಕಾ ಮ್ಹಜ್ಯಾ ಪಾತ್ಕಾಂಚಿ ದೂಖ್ ಧರುಂಕ್ ಆಸಾ!"

"ಆಜ್ ಸನ್ವಾರ್, ದನ್ಪಾರಾ ಉಪ್ರಾಂತ್ ಕುಮ್ಸಾರಾಕ್ ವಚ್.."

"ಪುಣ್ ಹೆಂ ಪಾತಕ್ ತಸಲೆಂ ನಹಿಂ, ಕ್ಲಿಂಟನಾನ್ ಕೆಲ್ಲ್ಯಾ ತಸಲೆಂ"

ಬಾಯ್ಲೆನ್ ಆಪ್ಲ್ಯಾ ಕಪಲಾರ್ ಹಜಾರ್ ಮಿರಿಯೊ ಜಮೊ ಕರುನ್ ಮ್ಹಾಕಾ ರಾಗಾನ್ ಭರ್‍ಲೆಲ್ಯಾ ನದ್ರೆನ್ ಪಳೆಲೆಂ. "ಮ್ಹಾಕಾ ಆನಿ ಬಿಡಿಯೊ ಬಾಂದ್ಚ್ಯಾ ಸೊಭಿನಾಕ್ ಅನೈತಿಕ್ ಸಂಬಂಧ್ ಆಸ್‌ಲ್ಲೊ" ಮ್ಹಳೆಂ ಹಾಂವೆಂ ಖಾಲ್ತೊ ಜಾವ್ನ್.

"ಪಾಡ್ ಪಡುಂಕ್ ತುಜೆರ್" ಮ್ಹಣಾಲಿ ಮ್ಹಜಿ ಬಾಯ್ಲ್. "ಮ್ಹಾಕಾ ತುಜ್ಯಾ ಕರ್ತುಂಬಾಚೆರ್ ವರ್‍ಸಾಂ ಥಾವ್ನ್ ದುಬಾವ್ ಆಸ್‌ಲ್ಲೊ. ಪಾಡ್ ಪಡೊಂಕ್ ತ್ಯಾ ಸೊಭಿನಾಕ್ ಆನಿ ತಾಚ್ಯಾ ಸಂತತೆಕ್." 

"ಸೊಭಿನ್ ಮೊರೊನ್ ದೋನ್ ವರ್ಸಾಂ ಜಾಲಿಂ. ತಾಕಾ ಶಿರಾಪ್ ಘಾಲ್ನ್ ಫಾಯ್ದೊ ನಾ. ಚೂಕ್ ಮ್ಹಜಿ" ಮ್ಹಳೆಂ ಹಾಂವೆಂ ದೊಳ್ಯಾಂನಿ ದುಃಖಾ ಘೆವ್ನ್.

"ಪುಲ್ಘತ್ರಿಚ್ಯಾ ಬಾಗ್ಲಾರ್ ಉಮ್ಕಾಳಾಜೆ ತಾಣೆಂ" ಮ್ಹಣಾಲಿ ಮ್ಹಜಿ ಬಾಯ್ಲ್ ಫುಮಾರ್ ಜಾವ್ನ್.

"ಸರ್ಗಾರ್ ವಚೊಂಕ್ ನಜೊ ತಾಣೆಂ. ಮೆಲ್ಲೆಂ ಜಾವ್ನ್ ಭೊಂವಾಜೆ..."

ಇತ್ಲೆಂ ಸಾಂಗೊನ್, ವಾರ್ತಾಪತ್ರ್ ಮ್ಹಜ್ಯಾ ಮುಸ್ಕರಾಕ್ ಮಾರ್‍ನ್ ಮ್ಹಜಿ ಬಾಯ್ಲ್ ಭಿತರ್ ಧಾಂವ್ಲಿ, ಮ್ಹಾಕಾ ಭೊಗ್ಸಾಣೆಂ ಮಾಗ್ಚೊ ಆವ್ಕಾಸ್ ದೀನಾಶೆಂ.

ಮ್ಹಾಕಾ ವರ್ತೆ ಬಾಂದ್ಪಾಸ್ ಜಾಲೆ. ಮ್ಹಜ್ಯಾ ಪಾತ್ಕಾಚಿ ದೂಃಖ್ ಧರ್‍ಲೆಲಿ ತೃಪ್ತಿ ಜಾಲಿನಾ ತ್ಯಾ ದೆಕುನ್ ಉಟೊನ್ ಪಂಚಾಯತ್‌ಚ್ಯಾ ದಫ್ತರಾಕ್ ಗೆಲೊ.

ಪಂಚಾಯತ್ ಸಮಿತಿ ಕಾರ್ಯದರ್ಶಿ ಬೊನಾ ಪೀಂತ್ ಬಸೊನ್ ಫಾಯ್ಲಾಂ ಪರ್ತಿತಾಲೊ. "ಬೊನಾಬಾ ಮ್ಹಾಕಾ ಮ್ಹಜಿ ಚೂಕ್ ಉಗ್ತ್ಯಾನ್ ಜಾಹೀರ್ ಕರುಂಕ್ ಆಸಾ" ಮ್ಹಳೆಂ.

"ಹಾಂವ್ ಪೊರ್‍ಚ್ಯಾ ಸನ್ವಾರಾ ಕುಮ್ಸಾರ್ ಜಾಲಾಂ" ಮ್ಹಣಾಲೊ ತೊ. "ವೆಗಿಂ ವಚ್, ಪಾದ್ರ್ಯಾಬ್ ಕುಮ್ಸಾರಾಕ್ ಬಸ್ಲಾ ಆಸ್ತೊಲೊ. ಸಾಂಜೆರ್ ಆಪ್ಣಾಕ್ ಖಂಯ್ ತರ್‌ಯಿ ಜೆವ್ಣಾಕ್ ಆಪಯ್ಲಾಂ ಮ್ಹಣ್ತಾಲೊ ತೊ".

"ಮ್ಹಜಿ ಚೂಕ್ ತಸಲಿ ನಹಿಂ ಬೊನಾಬಾ, ಹಾಂವೆಂ ಕ್ಲಿಂಟನಾನ್ ಕೆಲ್ಲ್ಯಾ ತಸಲಿ ಚೂಕ್ ಆದಾರ್‍ಲ್ಯಾ" ಮ್ಹಳೆಂ.

"ಪಿಸೊ ತುಂ" ಮ್ಹಣಾಲಾಗ್ಲೊ ಬೊನಾಬ್. "ಕ್ಲಿಂಟನ್ ಅಮೇರಿಕಾಚೊ ಅಧ್ಯಕ್ಷ್. ತಾಣೆಂ ತಸಲಿ ಚೂಕ್ ಕರುಂಕ್ ಫಾವೊ ನಾ. ಕೆಲಿ ತರ್‌ಯೀ ಲಿಪೊನ್ ದವರುಂಕ್ ಫಾವೊ ನಾ. ಮ್ಹಜೆ ತುಜ್ಯೆ ತಸಲ್ಯಾನ್ ತಸಲಿ ಚೂಕ್ ಕರ್‍ಚಿ ವಾಜ್ಬಿ ಆನಿ ನಿತಿ ಪ್ರಕಾರ್ ಕೆಲ್ಲಿ ಚೂಕ್ ಮೊರ್‍ತಾ ಮ್ಹಣಾಸರ್ ಲಿಪೊನ್ ದವರುಂಕ್ ಜಾಯ್. ಹಾಂವೆಂ ಕಿತ್ಲ್ಯಾ ಪಾವ್ಟಿಂ ತಸಲಿಂ ಚೂಕ್ ಆದಾರ್‍ಲ್ಯಾ ತೆಂ ಹಾಂವ್‌ಚ್ ನೆಣಾ." ತೊ ಆಪ್ಣೆಂ ವ್ಹಡ್ ಕೌತುಕ್ ಕೆಲಾಂ ಮ್ಹಳ್ಳ್ಯಾ ಭಾಷೆನ್ ಹಾಸಾಲಾಗ್ಲೊ.

"ಪುಣ್ ಮ್ಹಜೆಂ ಅಂತಸ್ಕರ್ನ್ ಮ್ಹಜೊ ಜೀವ್ ಖಾತಾ ಬೊನಾಬಾ" ಮ್ಹಳೆಂ ಹಾಂವೆಂ ಖಾಲ್ತ್ಯಾ ಕಾಳ್ಜಾನ್.

"ಉಜೊ ಪೆಟೊಂದಿ ತುಜ್ಯಾ ಅಂತಸ್ಕರ್ನಾಕ್" ಮ್ಹಣಾಲೊ ಬೊನಾಬ್ ತಿರಸ್ಕಾರಾನ್. "ತುಜೆ ತಸಲ್ಯಾ ಗರೀಬಾಕ್ ಎಕ್ ಪಿಕೆಂ ಕೆಳೆಂಯ್ ಗುಪ್ತಿಂ ಖಾಂವ್ಕ್ ಪುಟ್ವಾನಾ. ಅಂತಸ್ಕರ್ನ್ ಖಂಯ್, ತುಂ ಎಕ್ ಪಂಚಾಯತಾಚೊ ಸಾಂದೊಯ್ ನಹಿಂ, ಉಗ್ತ್ಯಾನ್ ಭೊಗ್ಸಾಣೆಂ ಮಾಗೊಂಕ್."

ಮ್ಹಾಕಾ ಭೋವ್ ವ್ಹಡ್ ನಿರಾಸ್ ಜಾಲೊ. ಪಾಟಿಂ ಘರಾ ಆಯ್ಲೊಂ.

ಪೆಟೊ ಬಾಗ್ಲಾರ್ ನಿದೊನ್ ಗುಪಿತ್ತ್ ಸಪ್ಣಾಂ ದೆಖ್ತಾಲೊ. ಮ್ಹಾಕಾ ಪಳೆವ್ನ್ "ತುಜ್ಯಾ ಮುಸ್ಕರಾಚೆರ್ ಕಿತೆಂ ಮೊಡಾಂ ಜಮ್ಲ್ಯಾಂತ್?" ಮ್ಹಣಾಲೊ.

ಮ್ಹಜೆಂ ಪಾತಕ್ ಉಸ್ತುಂಕ್ ಹಾಚ್ಯೆ ವರ್ತೊ ಸಂದರ್ಭ್ ನಾ ಮ್ಹಣ್ ಚಿಂತುನ್ ಮ್ಹಳೆಂ, "ಟೊಮಿ, ಮ್ಹಜೆಂ ಕಾಳಿಜ್ ಆಜ್ ರಡ್ತಾ. ಹಾಂವೆಂ ಕೆಲ್ಲ್ಯಾ ಪಾತ್ಕಾಚಿ ಮ್ಹಾಕಾ ದೂಖ್ ಧರುಂಕ್ ತುಜಿ ಸಸಾಯ್ ಜಾಯ್"

ಕಸಲೆ ಪಾತಕ್?!" 

"ಮ್ಹಾಕಾ ಆನಿ ಬಿಡಿಯೊ ಬಾಂದ್ಚ್ಯಾ ಸೊಭಿನಾಕ್ ವರ್‍ಸಾಂ ಥಾವ್ನ್ ಅನೈತಿಕ್ ಸಂಬಂಧ್ ಆಸ್‌ಲ್ಲೊ". 

"ತುಮ್ಚಿ ಮನ್ಶ್ಯಾಕುಳಾಚಿ ಕಾಲೆತಿಚ್ ಮ್ಹಾಕಾ ಸಮ್ಜಾನಾ" ಮ್ಹಣಾಲೊ ಪೆಟೊ. "ಗರ್ಜ್‌ನಾತ್ಲೆಲ್ಯೊ ಸಂಗ್ತಿ ತುಮಿ ಲಿಪಯ್ತಾತ್ ಆನಿ ಜಿಣಿಭರ್ ಚೊರಾಂಚಿ ಜಿಣಿ ಜಿಯೆತಾತ್. ದೆವಾನ್ ಆಮ್ಕಾಂ ರಚ್ಲ್ಯಾ ಎಕಾಮೆಕಾಚೊ ಮೋಗ್ ಕರ್‍ಚ್ಯಾಕ್, ತುಮ್ಕಾಂ ಮೋಗ್ ಕರುಂಕ್‌ಯೀ ಹರ್ದ್ಯಾಂತ್ ಊಬ್ ನಾ." 

"ಮ್ಹಳ್ಯಾರ್?"

"ಆಮ್ಚ್ಯಾ ಜಾತಿಕ್ ಪಳೆ. ಆಮಿ ಕೊಣಾಕ್‌ಯೀ ಭಿಂಯೆನಾಂವ್. ಆಮ್ಚೊ ಮೋಗ್ ಉಗ್ತೊ. ಆಮ್ಚೆ ಸಂಬಂಧ್ ಉಗ್ತೆ, ಆಮ್ಚ್ಯೊ ಕರ್ನ್ಯೊ ಉಗ್ತ್ಯೊ, ಆಮಿ ಹಜಾರ್ ಜೀವಿಂಚ್ಯಾ ದಿಷ್ಟಿ ಮುಖಾರ್ ಮೋಗ್ ಕರ್‍ತಾಂವ್, ಸಂಸಾರಾಚಿ ಪರ್ವಾ ಆಮ್ಕಾಂ ನಾ. ಆಮ್ಚೆಂ ಕಾಳಿಜ್ ಉದ್ಕಾಪರಿಂ ನಿತಳ್. ಆಮ್ಚೆಲಾಗಿಂ ಲಿಪೊನ್ ದವರ್‍ಚೆಂ ಪಾತಕ್‌ಚ್ ನಾ. ದಿಕ್ಕಾರ್ ತುಮ್ಚ್ಯೆರ್ ಮನ್ಶ್ಯಾ ಕುಳಾಚೆರ್. ಕರ್‍ಚೆಂ ಸಕ್ಕಡ್ ಪಡ್ಡ್ಯಾ ಪಾಟ್ಲ್ಯಾನ್ ಕರ್‍ತಾತ್ ಆನಿ ಗುಪಿತ್ತ್ ಕರ್ಗಾತಾತ್."

ಪೆಟ್ಯಾಚಾ ಉತ್ರಾಂನಿ ಸತ್ ಆಸಾ ಮ್ಹಣ್ ಮ್ಹಾಕಾ ಭಗ್ಲೆಂ ತರ್‌ಯೀ ತಾಚ್ಯೆಲಾಗಿಂ ತಶೆಂ ಸಾಂಗೊಂಕ್ ಮ್ಹಜೆಂ ಪಾತ್ಕಿಂ ಮನ್ ಸೊಡಿನಾ ಜಾಲೆಂ. ಮ್ಹಜ್ಯಾ ಮತಿಂತ್ಲಿ ಕರ್ಗೊಣಿ ನಿವಾರ್‍ಲಿನಾ.

ರಾತ್ ಜಾಲಿ. ಹಾಂತುಳ್ನಾರ್ ಪರ್‍ತಾಲ್ಯಾರೀ ನೀದ್ ತಿ ಆಯ್ಲಿಚ್ ನಾ. ಭಂವ್ತಿಂ ದೀಷ್ಟ್ ಘಾಲಿ. ಬಾಯ್ಲ್ ಮ್ಹಜಿ ಖೂಸ್ ಪರ್‍ತುನ್ ನಿದ್ಲೆಲಿ. ತಿಕಾಯ್ ನೀದ್ ಪಡೊಂಕ್ ನಾ ಅಸೆಂ ಭಗ್ಲೆಂ.

"ಮ್ಹಾಕಾ ಭೊಗ್ಸಿ ಮ್ಹಜ್ಯಾ ಬಾಯ್ಲೆ" ಮ್ಹಳೆಂ ಹಾಂವೆಂ ಆಡ್ಡೊಸ್ ಮಾಗೊನ್, "ಆನಿ ಮುಖಾರ್ ಅಸಲೆಂ ನೀಚ್ ಕೃತ್ಯೆಂ ಆಧಾರಿನಾ."

ಬಾಯ್ಲ್ ಮ್ಹಜಿ ಕಸ್ಕಸೊನ್ ರಡಾಲಾಗ್ಲಿ. "ರಡಾನಾಕಾ, ರಡಾನಾಕಾ" ಮ್ಹಳೆಂ ಹಾಂವೆಂ. 

ತಿ ರಡೊನ್೦ಚ್ ಗೆಲಿ ಮ್ಹಜ್ಯಾ ಅಂತಸ್ಕರ್ನಾಚಿ ಕಾಂತೊವ್ಣಿ ವಿಪ್ರೀತ್ ಜಾಲಿ. ಮೊರೊನ್ ಮಾತಿ ಜಾಲ್ಲ್ಯಾ ಸೊಭಿನಾಚ್ಯಾ ಅತ್ಮ್ಯಾಕ್ ಹಾಂವೆಂ ಉಲೊ ಮಾರ್‍ಲೊ. ಮ್ಹಾಕಾ ಹ್ಯಾ ವಿಘ್ನಾಂತ್ಲೆಂ ರಾಕ್ ಸಾಯ್ಬಿಣಿ ಮ್ಹಳೆಂ. ಬಾಯ್ಲ್ ಮ್ಹಜಿ ಕಸ್ಕಸೊನ್ ಕಸ್ಕಸೊನ್ ಮ್ಹಜ್ಯಾ ಕುಶಿನ್ ಘುಂವ್ಲಿ.

"ಹಾಂವ್ ರಡ್ತಾಂ ತುಜ್ಯಾ ಪಾತ್ಕಾ ಖಾತಿರ್ ನಹಿಂ" ಮ್ಹಣಾಲಿ.

"ಮಾಗಿರ್??!"

"ತುಜ್ಯಾ ಆನಿ ಸೊಭಿನಾ ಮಧ್ಲ್ಯಾ ಅನೈತಿಕ್ ಸಂಬಂಧಾ ವಿಷ್ಯಾಂತ್ ಮ್ಹಾಕಾ ಪಯ್ಲೆಂಚ್ ಖಬಾರ್ ಆಸ್‌ಲ್ಲಿ. ಮ್ಹಾಕಾ ತಿ ಖಂತ್ ನಾ. ಪುಣ್ ಸೊಭಿನಾಚ್ಯಾ ಮೊರ್ನಾ ಪಾಟ್ಲ್ಯಾನ್ ಮ್ಹಜೊ ಹಾತ್ ಆಸಾ. ಹಾಂವೆಂ ಆನಿ ಸೊಭಿನಾಚ್ಯಾ ಘೊವಾನ್ ಸಾಂಗಾತಾ ಜಾವ್ನ್ ತಾಕಾ ಆಮಿ ಪೊಟ್ಟು ಬಾಂಯ್ತ್ ಲೊಟುನ್ ಘಾಲ್ಲೆಂ" ಮ್ಹಜ್ಯಾ ತಕ್ಲೆರ್ ನಾರ್‍ಲ್ ಪಡ್ಲೊಲೊ ಅನ್ಭೋಗ್ ಜಾಲೊ.

"ತಶೆಂ ಕಿತ್ಯಾಕ್ ಕೆಲೆಂಯ್ ತುಂವೆಂ ಬಾಯ್ಲೆ?"

ಬಾಯ್ಲ್ ವಿಪ್ರೀತ್ ಕಸ್ಕಸೊನ್ ರಡೊಂಕ್ ಲಾಗ್ಲಿ. "ಮ್ಹಾಕಾ ಮ್ಹಜೆಂ ಪಾತಕ್ ರಡೊಂಕ್ ತುಜೆಂ ಹರ್ದೆಂ ದೀ" ಮ್ಹಣಾಲಿ ಮ್ಹಜಿ ಬಿರ್ಮೊತ್ ಬಾಯ್ಲ್ ಭೋವ್ ಲಾಗಿಂ ಜಾವ್ನ್.

"ಹಾಂವೆಂಯ್ ತುಜ್ಯೆ ಆನಿ ಕ್ಲಿಂಟನಾ ತಸಲೆಂ ಪಾತಕ್ ಆದಾರ್ಲಾಂ. ದೇವ್ ಮ್ಹಾಕಾ ಭೊಗ್ಸುಂಚೊ ನಾ."

"ಕಸಲೆಂ ಪಾತಕ್??!!"

"ಮ್ಹಾಕಾ ಕಾಜಾರಾ ಆದಿಂ ಆನಿ ಉಪ್ರಾಂತ್ ಸೊಭಿನಾಚ್ಯಾ ಘೊವಾಲಾಗಿಂ ರಾಯ್ಯುಲಾಗಿಂ ಅನೈತಿಕ್ ಸಂಬಂಧ್ ಆಸ್‌ಲ್ಲೊ."

"ಸಂಬಂಧ್ ಆಸ್‌ಲ್ಲೊ ಮ್ಹಳ್ಳ್ಯಾರ್??!!"

"ರಾಯ್ಯು ಗೆಲೆತ್ಯಾ ಹಪ್ತ್ಯಾಂತ್ ದೇವಾಗೆರ್ ಗೆಲೊ. ತಾಕಾ ಗೊಳಿಬಜ್ಯಾಂತ್ ವೀಕ್ ಭರ್ಸುನ್ ಮಾರ್‍ಲೆಲೆಂಯ್ ಹಾಂವೆಂಚ್."

ಬಾಯ್ಲ್ ಸುಸ್ಕಾರೊನ್೦ಚ್ ಆಸ್‌ಲ್ಲಿ. ಮ್ಹಜ್ಯಾ ಖಾಕೆಂತ್ಲ್ಯಾ ಕೆಸೊಳಿಚಿ ದೂಖ್ ಆಪಾಪಿಂಚ್ ರಾವ್‌ಲ್ಲಿ.

Tags:  Hemacharya, Humour, Konkani, Mangalore, Mangalorean, Mother Tongue

2 Comment/s.

  1. Santosh Dsilva, Mulky
    ಅಸಲಿ ಫಜಿಂತ್ ಸಬಾರ್ ಪಾವ್ಟಿಂ ಘಡ್ತಾ... ಲೇಕಕಾನ್ ಬೊರೆಂ ಬರಯ್ಲ್ಯಾ...
  2. Walter Lasrado, Nakre/Malad-Mumbai 400095
    ಹೇಮಾಚಾರ್ಯಾನ್ ಬೊರೆಂ ಬರಯ್ಲಾಂ. ವಾಚುನ್ ಖುಶಿ ಜಾಲಿ.

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :


Connect

Maibhaas

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE