From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಚಿಕಾಗೊಂತ್ ಕೊಂಕ್ಣೆಚೊ ಬಾವ್ಟೊ ಉಬಯಿಲ್ಲೊ ದೊ| ಆಸ್ಟಿನ್ ಡಿಸೋಜಾ ಪ್ರಭು
Thursday, July 18, 2019
ವರ್ಸಾವಾರ್ ಮಂಗ್ಳುರ್‌ಚಾ ಸಮನ್ವಯ ಸಂಸ್ಥ್ಯಾನ್ ದಿಂವ್ಚಿ ಕೊಂಕ್ಣಿ ಸಾಹಿತಿ ದೆ| ವಿಕ್ಟರ್ ರೊಡ್ರಿಗಸ್ ಸ್ಮಾರಕ್ ಸಾಹಿತ್ಯ್ ಪ್ರಶಸ್ತಿ, ಹ್ಯೆ ವರ್ಸಾ ಚಿಕಾಗೊಂತ್ ವಾವುರ್ನ್ ಆಸ್ಚೊ ಮಾಲ್ಗಡೊ ಕೊಂಕ್ಣಿ ಫುಡಾರಿ, ಲೇಖಕ್ ಆನಿ ಸಮಾಜ್ ಸೇವಕ್ ದೊ| ಆಸ್ಟಿನ್ ಡಿಸೋಜಾ ಪ್ರಭುಕ್ ಫಾವೊ ಜಾಲ್ಯಾ. ಜುಲಾಯ್ 21 ವೆರ್ ಸಾಂಜೆರ್ 7 ವೊರಾರ್ ಬಿಕ್ಕರ್ನಕಟ್ಟೆ ಕಾರ್ಮೆಲ್ ದೊಂಗ್ರಾರ್ ಆಸ್ಚಾ ಕಾರ್ಮೆಲ್ ಸಭಾಸಾಲಾಂತ್ ಚಲ್ಚಾ ಕಾರ್ಯಕ್ರಮಾಂತ್ ಹಿ ಪ್ರಶಸ್ತಿ ಪ್ರದಾನ್ ಕರ್ತಲೆ. ಹ್ಯಾ ಸುವಾಳ್ಯಾರ್ ಆಸ್ಟಿನ್ ಡಿಸೋಜಾ ಪ್ರಭುಚಾ ವಾವ್ರಾಚಿ ಇಲ್ಲಿಶಿ ಝಳಕ್.
ಪ್ರಸ್ತುತ್ ಅಮೆರಿಕಾಚ್ಯಾ ಚಿಕಾಗೊ ಶೆರಾಂತ್ ಕುಟ್ಮಾ ಸಾಂಗಾತಾ ವಸ್ತಿ ಕರುನ್ ಆಸ್ಚೊ ಡೊ| ಆಸ್ಟಿನ್ ಡಿ'ಸೊಜಾ ಪ್ರಭು, ಮಂಗ್ಳುರಿ ಕಥೊಲಿಕ್ ಸಮುದಾಯಾನ್ ಹೊಗ್ಡಾವ್ನ್ ಘೆತ್‌ಲ್ಲೊ ದಮ್‌ದಾರಿ ಮುಕೆಲಿ. ಮುಳಾನ್ ಮಂಗ್ಳುರ್ ನಂತೂರ್ಚ್ಯಾ ಕಲಾ ಸಂಪತ್ ವೋಣಿಂತ್ಲ್ಯಾ "ಗೋಲ್-ರೋಜ್" ಘರಾಣ್ಯಾಚೊ. ತಾಚೊ ಬಾಪುಯ್ ಮಾನೆಸ್ತ್ ಗಾಲ್ಬರ್ಟ್ ಡಿ'ಸೋಜಾ, ಫ್ಯಾಶನ್ ಡಿಸಾಯ್ನಿಂಗಾಚೊ ವೊಸೊ ಲಾಗಾನಾತ್‌ಲ್ಲ್ಯಾ ತವಳ್ಚ್ಯಾ ಮಂಗ್ಳುರ್ ಶೆರಾಂತ್ ನಾಂವ್ ವೆಸ್ತ್ ಲೇಡಿಸ್ ಟೈಲರ್. ಮಂತನಾಚ್ಯಾ ಕುಟ್ಮಾಂತ್ಲ್ಯೊ ಚಲಿಯೊ ಆನಿ ಸ್ತ್ರಿಯೊ ತಾಚ್ಯಾ ಆಂಗ್ಡಿ ಮುಕಾರ್ ಲಿವಾಜ್ ಶಿವಂವ್ಕ್ ರಾಕೊನ್ ರಾವ್ತಾಲಿಂ. ಅಸಲ್ಯಾ ಕುಟ್ಮಾಂತ್ ತಿಸ್ರೆಂ ಬಾಳ್ ಜಾವ್ನ್ ಜಲ್ಮಾಲ್ಲೊ ಆಸ್ಟಿನ್, ಶಿಕ್ತಾನಾಂಚ್ ಸಾದರ್ ಕಲಾ, ಸಾಹಿತ್ಯಾ ಕುಶಿನ್ ಆಕರ್ಶಿತ್ ಜಾಲೊ ಆನಿ ಯುವ ಸಂಚಾಲನಾಂತ್ ಭರ್ತಿ ಜಾಲೊ. ನಾಟಕ್ ರಚನ್, ಕಾಣಿಯೊ, ಕವಿತಾ, ಪದಾಂ, ನಟನ್, ಕಾರ್ಯಾನಿರ್ವಹಣ್ ಆನಿ ಸಂಘಟನ್ ಮ್ಹಣ್ ತರ್ನಾಟ್ಯಾ ಆಸ್ಟಿನಾನ್ ಕೊಂಕ್ಣೆಂತ್ ಹಾತ್ ಘಾಲಿನಾತ್ಲೆಂ ಶೆತ್ ನಾ ಜಾಲೆಂ.
ಬೆಂದುರ್ ಕಥೊಲಿಕ್ ಮಿನತೆಚೊ ಸಂಘ್, ಕೊಂಕ್ಣಿ ನಾಟಕ್ ಸಭೆಂತ್ ಸಾಮಾನ್ಯ್ ಸಾಂದೊ ತಶೆಂ ಜವಾಬ್ದಾರೆಚೊ ಹುದ್ದೆದಾರ್ ಜಾವ್ನ್ ತಾಣೆ ಸೆವಾ ದಿಲಿ ಮಾತ್ ನಯ್, ಕಲಾಸಂಪತ್ ಮ್ಹಳ್ಳೊ ಸಂಸ್ಥೊ ಬಾಂಧುನ್ ಕೊಂಕ್ಣಿ ನಾಟಕ್, ಸಂಗೀತ್ ಆನಿ ಸಾಹಿತ್ಯಾ ಖಾತಿರ್ ಆಪ್ಲಿ ಅಗಣಿತ್ ದೆಣ್ಗಿ ತಾಣೆ ದಿಲಿ. ಆಸ್ಟಿನ್ ದಿಯೆಸೆಜಿಚ್ಯಾ ಯುವ ಸಂಚಾಲನಾಚೊ ಅಧ್ಯಕ್ಷ್ ಜಾವ್ನಾಸ್ತಾನಾ ಕ್ರೀಸ್ತಾಂವಾ ವಿರೋಧ್ ಮಂಡನ್ ಕೆಲ್ಲ್ಯಾ ತ್ಯಾಗಿ ಮಸೂದ್ ವಿರೋದ್ ಮಂಗ್ಳುರ್ಚ್ಯಾ ಕೇಂದ್ರ್ ( ನೆಹರೂ ) ಮಯ್ದಾನಾರ್ ತಾಣೆ ಆಯೊಜಿತ್ ಕೆಲ್ಲಿ ಬೃಹತ್ ರ‍್ಯಾಲಿ ಚಿಂತಾನಾ ತವಳ್ಚೆ ತರ್ನಾಟೆ (ಆತಾಂ ಮಾಲ್ಘಡೆ) ಆತಾಂಯ್ ಊಬ್ ಜಾತಾತ್. 1973 ಇಸ್ವೆ ಥಾವ್ನ್ 1979 ಇಸ್ವೆ ಪರ್ಯಾಂತ್ 6 ವರ್ಸಾಂ, ದಿಯೆಸೆಜಿಚ್ಯಾ ಕೇಂದ್ರೀಯ್ ಸಮಿತಿಚೊ ಅಧ್ಯಕ್ಷ್ ತಸೆಂಚ್ ಏಕ್ ವರ್ಸ್ ಗೌರವ್ ಅಧ್ಯಕ್ಷ್ ಜಾವ್ನ್ ತಾಣೆ ದಿಯೆಸೆಜಿಚ್ಯಾ ಯುವಜಣಾಂಕ್ ಪ್ರಭಾವಿಕ್ ಮುಕೆಲ್ಪಣ್ ದಿಲೆಂ ಮಾತ್ ನಯ್, ಕೊಂಕ್ಣಿ ಸಾಹಿತ್ಯ್ ಚಳ್ವಳೆಕ್ ಕರ್ನಾಟಕಾಂತ್ ಕೊಂಕ್ಣಿ ಭಾಶಾ ಮಂಡಳ್ ಸ್ಥಾಪನ್ ಕರುಂಕ್ ವಾವುರ್ನ್, ಸ್ಥಾಪಕ್ ಕಾರ್ಯದರ್ಶಿ ಜಾವ್ನ್ ಪಾಂಚ್ ವರ್ಸಾಂ ವಾವ್ರ್ ದಿಲೊ ಆನಿ ಭದ್ರ್ ಬುನ್ಯಾದ್ ಘಾಲಿ. ಆಜ್ ಕೊಂಕ್ಣಿ ಭಾಸ್ ಸಂವಿಧಾನಾಚ್ಯಾ ಅಟ್ವ್ಯಾ ವಳೆರಿಂತ್ ಆಸೊನ್, ಕರ್ನಾಟಕ ಸರ್ಕಾರಾನ್ ಕೊಂಕ್ಣಿ ಸಾಹಿತ್ಯಾಕ್ ಏಕ್ ಅಕಾಡೆಮಿ ದಿಲ್ಯಾ ತರ್, ಏಕ್ ಮುಕೆಲ್ ಕಾರಣ್ ಡೊ| ಆಸ್ಟಿನಾನ್, ಚಾ. ಫ್ರಾ. ದೆಕೊಸ್ತಾ, ಮಾರ್ಕ್ ವಾಲ್ಡರ್, ಬಿ.ವಿ. ಬಾಳಿಗಾ ಆನಿ ಹೆರಾಂ ಸಾಂಗಾತಾ ಕರ್ನಾಟಕಾಂತ್ ಕೊಂಕ್ಣಿ ಭಾಷಾ ಮಂಡಳ್ ಸ್ಥಾಪನ್ ಕರುಂಕ್ ಕಾಡ್‌ಲ್ಲಿ ವಾಂವ್ಟ್ ಆನಿ ಕೆಲ್ಲೊ ಬುನ್ಯಾದಿ ವಾವ್ರ್.
ಹ್ಯಾ ಸರ್ವ್ ಚಳ್ವಳೆಚ್ಯಾ ಕಾಮಾಂ ಮಧೆಂಯ್ ಆಸ್ಟಿನಾನ್ - ಮಿತ್ರ್ ಹಫ್ತ್ಯಾಳೆಂ, ಕಾಣಿಕ್ ಪಂದ್ರಾಳೆಂ, ಝೆಲೊ ಮಯ್ನ್ಯಾಳೆಂ ಅನಿ ಆಮ್ಚೊ ಯುವಕ್ ಮಹಿನ್ಯಾಳೆಂ ಅಶೆಂ ಚ್ಯಾರ್ ಪತ್ರಾಂ ಎಕಾಚ್ ವೆಳಾ ಚಲವ್ನ್ ಕೆಲ್ಲೊ ಧಾಕ್ಲೊ, ಆಜ್ ಛಾಪ್ಯಾಂತ್ ಆಧುನಿಕ್ ತಾಂತ್ರಿಕತಾ ಇತ್ಲಿ ವಾಡ್ಲ್ಯಾ ತರ್‌ಯಿ ಕೊಣಾಚ್ಯಾನ್ ಮೊಡುಂಕ್ ಜಾಂವ್ಕ್ ನಾ.
ಸಾಹಿತ್ಯ್ ಕೃತಿಯೊ ಆನಿ ನಾಟಕ್ :
ಆದರ್ಶ್ ಯುವಜಣ್ - ಶೈಕ್ಷಣಿಕ್ ಬುಕ್ - 1978, 1979 ( ದೋನ್ ಆವೃತ್ಯೊ) - ಕೊಂಕ್ಣಿ ಸ್ವತಂತ್ರ್ ಪ್ರಕಾಶನ್, ಆಂಕ್ವಾರ್ ಸೆಲ್ಲಿ - ಏಕಾಂಕ್ ನಾಟಕ್ - 1995 - ರಾಕ್ಣೊ ಪ್ರಕಾಶನ್, ಆಡೊಸಾಂತ್ಲಿ ಫುಲಾಂ - ಕವಿತಾಂ ಮಾಳೊ - 2002 - ಆಶಾವಾದಿ ಪ್ರಕಾಶನ್, ಮೊತಿಯಾಂ - ಚುಟುಕಾಂ - 2004 - ದಿವ್ಯ ದೀಪ ಪ್ರಕಾಶನ್, ವಜ್ರಾಂ (ಕಾನಡಿ ಲಿಪಿ) - 3,500 ಚುಟ್ಕುಲ್ಯಾಂಚೊ ಪುಂಜೊ - 2009 - ಮರಿಯಾಡ್ಸ್ ಪ್ರಕಾಶನ್, ವಜ್ರಾಂ (ದೇವ್‍ನಾಗರಿ ಲಿಪಿ - 3,500 ಚುಟ್ಕುಲ್ಯಾಂಚೊ ಪುಂಜೊ - 2010 - ಪ್ರಿಯಾ ಪ್ರಕಾಶನ್.
ಡೊ| ಆಸ್ಟಿನಾನ್ ಯೆದೊಳ್ ಆಟ್ ಮಾಂಚಿಯೆಚೆ ನಾಟಕ್, ಪಂದ್ರಾ ನಾಟ್ಕುಳೆ, ಧಾ ರೇಡಿಯೊ ನಾಟಕ್ ಆನಿ ಪಾಂತ್ತೀಸ್ ಕೊಂಕ್ಣಿ ಪದಾಂ ಆನಿ ಹಜಾರಾಂನಿ ಲೆಖನಾಂ ಲಿಖ್ಲ್ಯಾಂತ್.
ಸಾಹಿತ್ಯಾಕ್ ಲಾಭ್‌ಲ್ಲೆ ಪುರಸ್ಕಾರ್ :
ಆದರ್ಶ್ ಯುವಜಣ್ ಹ್ಯಾ ಶೈಕ್ಷಣಿಕ್ ಪುಸ್ತಕಾಕ್ 1978 ವ್ಯಾ ವರ್ಸಾ ಕೊಂಕ್ಣಿ ಭಾಶಾ ಮಂಡಳ್, ಗೊಂಯಾಂ ಹಾಂಚೆ ಥಾವ್ನ್ ವಿಂಚ್ಣಾರ್ ಶೈಕ್ಷಣಿಕ್ ಪುಸ್ತಕ್ ಬಹುಮಾನ್ , ಆಂಕ್ವಾರ್ ಸೆಲ್ಲಿ ಹ್ಯಾ ನಾಟಕಾಕ್ 1976 ವ್ಯಾ ವರ್ಸಾ ಕೊಂಕ್ಣಿ ಭಾಶಾ ಮಂಡಳ್, ಗೊಂಯಾಂ ಹಾಂಚೆ ಥಾವ್ನ್ ವಿಂಚ್ಣಾರ್ ಕೊಂಕ್ಣಿ ನಾಟಕ್ ಪ್ರಯೋಗ್ ಹ್ಯಾ ವಿಭಾಗಾಂತ್ ದುಸ್ರೆಂ ಬಹುಮಾನ್.
ಚಿಕಾಗೊಂತ್ ಲಯನ್ಸ್ ಸಮಾಜ್ ಸೇವಾ ಸಂಸ್ಥ್ಯಾಂತ್ ವಾವ್ರ್ ಆನಿ ಮಾನ್ - ಸಮ್ಮಾನ್ :
ಆಸ್ಟಿನಾನ್ 1978 ಇಸ್ವೆಂತ್ ಪಡೀಲ್ ಲಯನ್ಸ್ ಕ್ಲಬ್ಬಾಕ್ ಸೆರ್ವೊನ್ ಧರ್‌ಲ್ಲೊ ತೊ ಲಯನ್ಸ್ ವಾವ್ರ್ 1981 ಇಸ್ವೆಂತ್ ಚಿಕಾಗೊ ಪಾವ್ಲ್ಯಾ ಉಪ್ರಾಂತ್ ಮುಖಾರುನ್ ವ್ಹೆಲೊ. ಥಂಯ್ಸರ್ ತೊ ಚಿಕಾಗೊ ದಮಾಯನ್ ಕ್ಲಬ್ಬಾಚೊ ಕಾರ್ಯದರ್ಶಿ, ಅಧ್ಯಕ್ಷ್ ಜಾಲೊ. ಉಪ್ರಾಂತ್ ತಾಣೆ ಚಿಕಾಗೊಂತ್ ಲಯನ್ಸ್ ಮುಖೇಲ್ಪಣಾಚಿ ನಿಸಣ್ ಚಡಾತ್ತ್ ವಚೊನ್ 2004 ಆನಿ 2012 ಇಸ್ವೆಂತ್ ತೊ ಜಿಲ್ಲ್ಯಾಚೊ ರಾಜ್ಯ್‌ಪಾಲ್ ಆನಿ ರಾಜ್ಯಾಚೊ ವೈಸ್ ಕೌನ್ಸಿಲ್ ಚೇರ್ಮನ್ ಜಾಲೊ. 2014 ಇಸ್ವೆಂತ್ ತಾಚಿ ಪತಿಣ್ ಟೇರ್ರಿ ಜಿಲ್ಲ್ಯಾಚಿ ರಾಜ್ಯ್‌ಪಾಲಿನ್ ಜಾಲಿ. ತಾಕಾ ಲಯನ್ಸ್ ಮುಖೇಲ್ಪಣಾಕ್ ಮೆಳ್‍ಲ್ಲಿಂ ಬಿರುದಾಂ ಆನಿ ಪದಕಾಂ ಹಾಂಚಿ ಪಟ್ಟಿ ಬರಂವ್ಚಿ ತರ್ ಉಣ್ಯಾರ್ ಚ್ಯಾರ್ ಪಾನಾಂ ತರೀ ಜಾಯ್ ಪಡ್ತಿತ್. ಆಜ್ ತೊ ಇಲ್ಲಿನೊಯ್ ರಾಜ್ಯಾಂತ್ ಏಕ್ಲೊಚ್ 61 ಮೆಲ್ವಿನ್ ಜೋನ್ಸ್ ಪ್ರಗತೆಪರ್ ಬಿರುದಾಂ ಮೆಳ್‍ಲ್ಲೊ ವ್ಯಕ್ತಿ ಮ್ಹಣ್ ನಾಂವಾಡ್ಲಾ. ಲಯನ್ಸ್ ಅಂತರ್ರಾಷ್ಟ್ರೀಯ್ ಅಧ್ಯಕ್ಷಾಂ ಥಾವ್ನ್ ತೀನ್ ಮುಖೇಲ್ಪಣಾಚಿಂ ಪದಕಾಂ ತಸೆಂ ಆನಿ ತೀನ್ ಅಧ್ಯಕ್ಷಾಚಿಂ ಪದಕಾಂ ಮೆಳ್ಳಿಂ ಆನಿ ನೋವ್ ಲೀಡರ್‌ಶಿಪ್ ಸರ್ಟಿಫಿಕೇಟ್ಸ್ ಮೆಳ್ಳ್ಯೊ. 2005 ಇಸ್ವೆಂತ್ ಲಯನ್ಸ್ ಇಂಟರ್‌ನ್ಯಾಶನಲ್ ಹಾಣಿ ತಾಕಾ ಜೀವಾವ್ದಿ ಸಾಂದೊ ಜಾವ್ನ್ ನೆಮ್ಲೊ.
ಡೊ| ಆಸ್ಟಿನ್, ಇಂಡಿಯನ್ ಕಥೊಲಿಕ್ ಎಸೊಸಿಯೇಶನ್ ಆಫ್ ಅಮೇರಿಕಾ ಹಾಚೊ ದೋನ್ ಆವ್ದ್ಯಾಂಕ್ ಅಧ್ಯಕ್ಶ್ ಜಾಲೊ. ತಾಣೆಂ 1996 ಇಸ್ವೆಂತ್ ಅಮೇರಿಕಾಂತ್ ಪ್ರಪ್ರಥಮ್ ಭಾರತೀಯ್ ಮೂಳಾಚೆಂ ಬ್ರಾಡ್‍ವ್ಯೂ ಕಲಾ ಸಂಪತ್ ಲಯನ್ಸ್ ಕ್ಲಬ್ ಘಡ್ಲೆಂ. 2002 ಇಸ್ವೆಂತ್ ಮಂಗ್ಳುರ್‌ಗಾರಾಂಕ್ ಸೀಮಿತ್ ಮ್ಯಾಂಗಲೂರಿಯನ್ ಕ್ರಿಶ್ಚಿಯನ್ ಎಸೊಸಿಯೇಶನ್ ಆಫ್ ಅಮೇರಿಕಾ ಘಡ್ಲೆಂ. 1998 ಇಸ್ವೆಂತ್ ತೊ ಚಿಕಾಗೊ ಆರ್ಚ್ ದಿಯೆಸೆಜಿಚ್ಯಾ ಮುಖೇಲ್ಪಣ್ ಸಮಿತಿಚೊ ಸಾಂದೊ ಜಾವ್ನ್ ವಿಂಚುನ್ ಆಯ್ಲೊ ಆನಿ ಮಾಗ್ಣ್ಯಾ ಪಂಗ್ಡಾಚೊ ಅಧ್ಯಕ್ಷ್ ಜಾವ್ನ್ ವಾವ್ರ್ ದಿಲೊ. 1999 ಇಸ್ವೆಂತ್ ಏಕಾ ಆವ್ದೆಕ್ ತೊ 'ಫೆಡರೇಶನ್ ಆಫ್ ಇಂಡಿಯನ್ ಎಸೊಸಿಯೇಶನ್ಸ್ ಒಫ್ ಮಿಡ್‍ವೆಸ್ಟ್' ಹಾಚೊ ಕಾರ್ಯದರ್ಶಿ ಜಾಲೊ. 2000 ಇಸ್ವೆಂತ್ ತೊ 'ಫೆಡರೇಶನ್ ಒಫ್ ಇಂಡಿಯನ್ ಕ್ರಿಶ್ಚಿಯನ್ ಎಸೊಸಿಯೇಶನ್ಸ್ ಒಫ್ ಅಮೇರಿಕಾ' ಹಾಚೊ ಖಜನ್ದಾರ್ ಜಾವ್ನ್ ಪಾಂಚ್ ವರ್ಸಾಂಕ್ ಆಪ್ಲೊ ವಾವ್ರ್ ದಿಲೊ. ಪ್ರಸ್ತುತ್ ತೊ ಇಲ್ಲಿನೊಯ್ ರಾಜ್ಯಾಚ್ಯಾ ಮಹಿನಾಳ್ಯಾ ಈ - ಮ್ಯಾಗಝೀನಾಚೊ ತಸೆಂಚ್ ಜಿಲ್ಲ್ಯಾಚ್ಯಾ ಮಹಿನಾಳ್ಯಾ ಈ - ಮ್ಯಾಗಝೀನಾಚೊ ಸಂಪಾದಕ್ ಆನಿ ಪ್ರಕಾಶಕ್ ಜಾವ್ನಾಸಾ.
ಡೊ| ಆಸ್ಟಿನಾಕ್, 2000 ಫೆಡರೇಶನ್ ಒಫ್ ಇಂಡಿಯನ್ ಎಸೊಸಿಯೇಶನಾ ಥಾವ್ನ್ ಮಿಲ್ಲೆನ್ನಿಯಮ್ ಲೀಡರ್‌ಶಿಫ್ ಎವಾರ್ಡ್ ಮೆಳ್ಳೆಂ. ತ್ಯಾಚ್ ವರ್ಸಾ ತಾಕಾ 'ಏಶಿಯನ್ ಅಮೇರಿಕನ್ ಹಾಲ್ ಆಫ್ ಫೇಮ್' ಪಂಗ್ಡಾಕ್ ಮೆಳಯ್ಲೊ. 2005 ಇಸ್ವೆಂತ್ ತಾಕಾ 'ಲೀಡರ್‌ಶಿಫ್ ಆಫ್ ದ ಇಯರ್' ಆನಿ 'ಡಿಸ್ಟ್ರಿಕ್ಟ್ ಲಯನ್ ಆಫ್ ದ ಇಯರ್ ಎವಾರ್ಡ್ಸ್' ಮೆಳ್ಳಿಂ. 1994 ಇಸ್ವೆಂತ್ ಮಾರ್ಖಿಸ್ ವ್ಹೂಸ್ ವ್ಹು ಸಂಸ್ಥ್ಯಾನ್ ತಾಚಿ ಜಿಣ್ಯೆ ಕಥಾ 'ವ್ಹೂಸ್ ವ್ಹು ಇನ್ ದ ಮಿಡ್‍ವೆಸ್ಟ್' ಆವೃತ್ತಿಂತ್ ಪ್ರಕಟ್ ಕೆಲಿ ಆನಿ 1996 ವರ್ಸಾ 'ವ್ಹೂಸ್ ವ್ಹು ಇನ್ ದ ವರ್ಲ್ಡ್' ಆವೃತ್ತೆಂತ್ ಪ್ರಕಟ್ ಕೆಲಿ. 1995 ವರ್ಸಾ ಇಂಟರ್‌ನ್ಯಾಶನಲ್ ಬಯೊಗ್ರಾಫಿಕಲ್ ಸೆಂಟರ್, ಕ್ಯಾಂಬ್ರಿಡ್ಜ್, ಇಂಗ್ಲೆಂಡ್ ಹಾಚೊ ಸಲಹಾ ಸಮಿತಿಚೊ ವಾಂಗ್ಡಿ ಕೆಲೊ. 2001 ಇಸ್ವೆಂತ್ ತೊ ಫಾರೆಸ್ಟ್ ಪಾರ್ಕ್ ಸಿಟಿಝನ್ ಪೋಲೀಸ್ ಅಕಾಡೆಮಿಚೊ ವಾಂಗ್ಡಿ ಜಾವ್ನ್ ವಿಂಚುನ್ ಆಯ್ಲೊ. 2003 ಇಸ್ವೆಂತ್ 'ಮ್ಯಾಂಗಲೋರ್ ಕೊಂಕಣ್ಸ್, ದುಬಾಯ್' ಹಾಣಿ ಮಾನ್ ಪತ್ರ್ ದೀವ್ನ್ ಮಾನ್ ದಿಲೊ. 2005 ಇಸ್ವೆಂತ್ ತಾಕಾ ಪಾಕ್ ಅಮೇರಿಕನ್ ಮೆಡಿಕಲ್ ಸೆಂಟರ್ ಹಾಣಿ ಮುಖೇಲ್ಪಣಾಕ್ ಎವಾರ್ಡ್ ದಿಲೆಂ. 2010 ಇಸ್ವೆಂತ್ ತಾಣೆ ಭಾರತಾಚಿ ಅಧ್ಯಕ್ಷಿಣ್ ಪ್ರತಿಭಾ ಪಾಟೀಲಾ ಥಾವ್ನ್ ಅಮೇರಿಕಾಂತ್ಲ್ಯಾ ಕೊಂಕ್ಣಿ ವಾವ್ರಾಕ್ ದಿಲ್ಲಿ ಪ್ರಶಸ್ತಿ ಸ್ವೀಕಾರ್ ಕೆಲಿ. ತ್ಯಾಚ್ ವರ್ಸಾ ಮೈಸೂರ್ ಕ್ರಿಶ್ಚಿಯನ್ ಎಸೊಸಿಯೇಶನಾನ್ ಸನ್ಮಾನ್ ಕರುನ್ "ಮಂಗ್ಳುರ್ಚೊ ಪೂತ್" ಮ್ಹಣ್ ವೊಲಾವ್ನ್ ಮಾನ್ ಪತ್ರ್ ದಿಲೆಂ. 2011 ಇಸ್ವೆಂತ್ ತಾಚ್ಯಾ ಕುಟ್ಮಾಕ್ ಏಶಿಯಾ ಟೀವಿ ಹಾಣಿಂ 'ಫ್ಯಾಮಿಲಿ ಲೀಡರ್‌ಶಿಫ್' ಎವಾರ್ಡ್ ದಿಲೆಂ. ತಸೆಂ 2012 ಇಸ್ವೆಂತ್ 'ಬೆಸ್ಟ್ ಹ್ಯುಮಾನಿಟೇರಿಯನ್ ಕಪ್‍ಲ್' ಎವಾರ್ಡ್ ಪ್ರಾಪ್ತ್ ಕೆಲೆಂ. 2015 ವ್ಯಾ ವರ್ಸಾ ಚಿಕಾಗೊಂತ್ಲ್ಯಾ ಆಟ್ವ್ಯಾ ಕಂಗ್ರೆಶನಲ್ ಜಿಲ್ಲ್ಯಾ ಥಾವ್ನ್ ಕಾಂಗ್ರೆಸ್‍ಮ್ಯಾನ್ ಡೇನಿ ಡೇವಿಸ್ ಜೂನಿಯರ್ ಹಾಣೆ 'ಬೆಸ್ಟ್ ಹ್ಯುಮೇನಿಟೇರಿಯನ್ ಕಪ್‍ಲ್' ಮ್ಹಣ್ ಪ್ರತಿಷ್ಠಿಕಾ ದೀವ್ನ್ ಮಾನ್ ಕೆಲೊ.
ಖಾಸ್ಗಿ ವಿವರ್ :
ಸೈಂಟ್ ಜೋಸೆಫ್ಸ್ ಹಯರ್ ಎಲಿಮೆಂಟರಿ ಸ್ಕೂಲ್ ನಂತೂರ್ ಹಾಂಗಾಸರ್ ಪ್ರಾಥಮಿಕ್ ಶಿಕಪ್, ಪಾದ್ವಾ ಹೈಸ್ಕೂಲ್ ನಂತೂರ್ ಹಾಂಗಾಸರ್ ಮಾಧ್ಯಮಿಕ್ ಶಿಕಪ್, ಐ.ಟಿ.ಐ. ನಂತೂರ್ ಹಾಂಗಾಸರ್ ತಾಂತ್ರಿಕ್ ಶಿಕಪ್ ಆನಿ ಟ್ರೈಟನ್ ಕಾಲೆಜ್ ರಿವರ್ ಗ್ರೋವ್, ನ್ಯಾಶನಲ್ ಲುವಿಸ್ ಯೂನಿವರ್ಸಿಟಿ ವಾರ್ರನ್‍ವಿಲ್ ಆನಿ ಯುನಿವರ್ಸಿಟಿ ಆಫ್ ಇಲ್ಲಿನೊಯ್, ಚಿಕಾಗೊ ಹಾಂಗಾಥಾವ್ನ್ ಉಂಚ್ಲೆಂ ಶಿಕಪ್ ಹ್ಯಾ ಭಾಯ್ರ್ ಆಡಳ್ತ್ಯಾಂತ್ ದಾಕ್ತೆರ್ಗಿ, ಸಿಕ್ಸ್ ಸಿಗ್ಮಾ ಗ್ರೀನ್ ಬೆಲ್ಟ್, ಕ್ವಾಲಿಟಿ ಇಂಜಿನಿಯರಿಂಗ್, ಲಯನ್ಸ್ ಫ್ಯಾಕಲ್ಟಿ ಇನ್ಸಿಟ್ಯೂಟ್ ಹಾಂಚೆ ಥಾವ್ನ್ ಸನದ್ಯೊ.
ಹ್ಯಾಚ್ ಮಾರ್ಚಾಂತ್ ತಾಕಾ ಫಾರೆಸ್ಟ್ ಪಾರ್ಕ್ ಡೈವರ್ಸಿಟಿ ಕಮಿಶನಾಚೊ ಸಾಂದೊ ಜಾವ್ನ್ ಫಾರೆಸ್ಟ್ ಪಾರ್ಕ್ ಮೇಯರ್ ಕಾಲ್ಡೆರೊನಾನ್ ನೇಮಕ್ ಕೆಲೊ ಆನಿ ದೋನ್ಂಚ್ ಮಹಿನ್ಯಾಂನಿ ತೊ ತ್ಯಾ ಕಮಿಶನಾಚೊ ಕಾರ್ಯದರ್ಶಿ ಜಾವ್ನ್ ನೇಮಕ್ ಜಾಲೊ.
2017 ನವೆಂಬ್ರಾಂತ್ ತಾಕಾ ಲಂಡನಾಂತ್ ತಸೆಂಚ್ ಡಬ್ಲಿನಾಂತ್ ಥಂಯ್ಚ್ಯಾ ಕೊಂಕ್ಣಿ ಲೋಕಾನ್ ತಸೆಂ ಥಂಯ್ಚ್ಯಾ ಲಯನ್ಸ್ ಕ್ಲಬ್ಬಾಂನಿ ಮಾನ್ ದೀವ್ನ್ ಸನ್ಮಾನ್ ಕೆಲೊ.
ತೊ ಆತಾಂ ಅಮೇರಿಕಾಚೊ ಅಧ್ಯಕ್ಷ್ ಡೊನಾಲ್ಡ್ ಟ್ರಂಪ್ ಹಾಚ್ಯಾ 'ಎಡ್‍ವಾಯ್ಜರಿ ಬೋರ್ಡಾ'ಚೊ ಸಾಂದೊ ಜಾವ್ನಾಸಾ. ತಸೆಂಚ್ ಅಮೇರಿಕಾಚ್ಯಾ ಅಧ್ಯಕ್ಷಾಚ್ಯಾ 'ವೋಲ್ಯಂಟರಿ ಸರ್ವಿಸ್ ಎವಾರ್ಡ್ಸ್' ಸಂಸ್ಥ್ಯಾಚೊಯ್ ಸಾಂದೊ ಜಾವ್ನ್ 2000 ಇಸ್ವೆ ಥಾವ್ನ್ ವಾವುರ್ನ್ ಆಸಾ.
2010 ಇಸ್ವೆ ಥಾವ್ನ್ ತೊ ಲಯನ್ಸ್ ಜಿಲ್ಲೊ 1ಎ, ಇಲ್ಲಿನೊಯ್ ರಾಜ್ಯ್, ತಸೆಂಚ್ ಯು.ಎಸ್.ಎ. - ಕ್ಯಾನಡಾ ಲೀಡರ್‌ಶಿಪ್ ಫೋರಮ್ ಹಾಚೊ 'ಒಫೀಸಿಯಲ್ ಫೊಟೊಗ್ರಾಫರ್' ಜಾವ್ನ್ ಆಪ್ಲಿ ಧರ್ಮಾರ್ಥ್ ಸೇವಾ ದೀವ್ನ್ ಆಸಾ.
2018 ಫೆಬ್ರೆರ್ 1 ತಾರಿಕ್ ಥಾವ್ನ್ ತಾಣೆ ಚಿಕಾಗೊ ಥಾವ್ನ್ 'ವೀಜ್ ಕೊಂಕಣಿ' ಸಚಿತ್ರ್ ವಾರ್ತಾ ಪತ್ರ್ ಪರ್ಗಟ್ ಕರುಂಕ್ ಧರ್ಲೆಂ ಆನಿ ಆಜೂನ್ ವರೇಗ್ ಕಿತೆಂಚ್ ಖಳಾನಾಸ್ತಾಂ ತೆಂ ಹಫ್ತ್ಯಾವಾರ್ ಪರ್ಗಟುನ್ ಆಸಾ ಆನಿ ಸಂಸಾರಾಭರ್ ಅಂತರ್‌ಜಾಳಾರ್ ಪ್ರಸಾರ್ ಜಾಂವ್ಚೆಂ ಏಕ್‍ಚ್ ಕೊಂಕಣಿ ಪತ್ರ್ ಮ್ಹಣ್ ಅಂತರ್ರಾಷ್ಟ್ರೀಯ್ ಮಟ್ಟಾರ್ ಲೋಕಾ ಮೊಗಾಳ್ ಜಾಲಾಂ. ಹೆಂ ಕೊಂಕಣಿಂತ್ಲೆಂ ಪ್ರಪ್ರಥಮ್ ಧರ್ಮಾರ್ಥ್ ವಾರ್ತಾಪತ್ರ್ ಜಾವ್ನಾಸಾ ಹ್ಯಾ ಪತ್ರಾರ್ ಕೊಂಕಣಿಕ್ ಸಂಬಂಧ್ ಜಾಲ್ಲಿಂ ಸರ್ವ್ ಇಸ್ತಿಹಾರಾಂ ಧರ್ಮಾರ್ಥ್ ತೊ ಛಾಪ್ತಾ.
ಜಲ್ಮಾ ತಾರಿಕ್ : 08 ಅಗೋಸ್ತ್ 1950
ಲಗ್ನ್ : 25 ಅಕ್ತೋಬರ್ 1980 ಟ್ರೀಝಾ ಲಿಲ್ಲಿ ಪಿಂಟೊ ಹಿಚೆಲಾಗಿಂ.
ಭುರ್ಗಿಂ: ಅನಿತಾ - ಸೀನಿಯರ್ ಪ್ರಾಜೆಕ್ಟ್ ಮ್ಯಾನೆಜರ್ - ಏಬ್ಬಟ್ ಲ್ಯಾಬೊರಾಟರೀಸ್, ಅನಿಲ್ - ವೈಸ್ ಪ್ರೆಸಿಡೆಂಟ್ - ಗೋಲ್ಡ್‍ಮ್ಯಾನ್ ಸ್ಯಾಕ್ಸ್, ಅತಿನಾ - ನ್ಯಾಶನಲ್ ಎಕೌಂಟ್ಸ್ ಮ್ಯಾನೇಜರ್, ಪ್ರೊಕ್ಟರ್ ಎಂಡ್ ಗ್ಯಾಂಬ್‍ಲ್ ಆನಿ ಏಂಜಲ್ - ನ್ಯೂ ಎಕೌಂಟ್ಸ್ ಸ್ಟ್ರಾಟೆಜಿಸ್ಟ್ - ಗೂಗ್‍ಲ್.
ಸಂಪರ್ಕ್ ಇ ಮೇಲ್ : govaustin@gmail.com
ಗರ್ಜೆಚ್ಯೊ ವಸ್ತು: ವೈಫೈ, ಹುನ್ ಉದಾಕ್ ಆನಿ ಶಿತ್-ನಿಸ್ತೆಂ. ಸುರ್ ಸೊರೊ ಪಿಯೆನಾ, ಸಿಗ್ರೆಟ್ ವೊಡಿನಾ, ಸಿನೆಮಾ ಪಳೆನಾ.
- ಸಿಜ್ಯೆಸ್ ತಾಕೊಡೆ
Tags:
Austin Dsouza Prabhu, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
-
-
-
-
3/14/2019 'ಚಂದ್ರ್ ಆನಿ ತಾರಾಂ' ಪುಸ್ತಕ್ ಮೊಕ್ಳಿಕ್...
-
10/29/2018 'ಸಂಸ್ಕೃತಿ ಆನಿ ಸಂಭ್ರಮ್' - ಪುಸ್ತಕ್ ಉಗ್ತಾವಣ್...
-
10/9/2018 ದುಬಾಂಯ್ತ್ ''ಗೀತ್ ಗಜಾಲ್''...
-
-
-
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.