From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ವಿಚಿತ್ರ್ ಮ್ಹಾತಾರೊ
Tuesday, August 9, 2016
ತುಮ್ಚ್ಯಾ ಗಮಾನಾಕ್: ಸುಮಾರ್ ಧಾ ವರ್ಸಾಂ ಆದಿಂ ಎಡ್ವಿನ್ ಜೆ, ಎಫ್. ಡಿಸೋಜಾಚಿ, ಹೊರರ್ ಥರಾಚ್ಯಾ ಆವರಣಾಂತ್ ಲಿಕ್‍ಲ್ಲಿ ಕಾಣಿ ಆಮಿಂ ಪರ್ಗಟ್ ಕೆಲ್ಲಿ. ಹ್ಯಾ ಕಾಣ್ಯೆಚೊ ಉಡಾಸ್ ನಾಂ ತರ್ ಪರತ್ ಉಡಾಸ್ ಜಿವೊ ಕರುಂಕ್ ಹಾಂಗಾಸರ್ ಪರ್ಗಟ್ ಕೆಲ್ಯಾ. ವೆಗಿಂಚ್ 'ಬ್ಲೊಂಡಿ' ಮ್ಹಳ್ಳಿ ಸಗ್ಳಿಚ್ ಹೊರರ್ ಕಾದಂಬರಿ ಯೆಂವ್ಚ್ಯಾರ್ ಆಸಾ. ರಾಕೊನ್ ರಾವಾ...
ತೆ೦ಚ್ ಪತ್ರ್ ಮ್ಹಜ್ಯಾ ಬಾಪಯ್‌ ಥಾವ್ನ್ ಮ್ಹಾಕಾ ನಿಮಾಣೆ ಜಾ೦ವ್ಕ್ ಪಾವ್ಲೆ೦. ಕಾಂಪೆರ‍್ಯಾ ಹಾತಾ೦ನಿ ಬರಯಿಲ್ಲೆ೦ ತೆ೦ ಪತ್ರ್ ಮ್ಹಜ್ಯಾ ಆನಾಚಿ ಪರಿಸ್ಥಿತಿ ಸಮಾ ವಿವರಿತಾಲೆ೦. ಪುಣ್ ಹಾ೦ವೆ೦ ಸ್ವಪ್ಣಾ೦ತ್ ಸಯ್ತ್ ಚಿ೦ತು೦ಕ್ ನಾ ಇತ್ಲ್ಯೆವೆಗ್ಗಿ೦ ಮ್ಹಜೊ ಆನ್ ತಾಚ್ಯಾ ಯೆದ್ಯಾ ವ್ಹಡ್ಲ್ಯಾ ಆಸ್ತಿಕ್ ಮ್ಹಾಕಾ ತಾಚ್ಯಾ ಯೆಕ್ಲ್ಯಾಚ್ ಪುತಾಕ್ ವಾರೆಸ್ದಾರ್ ಕರುನ್ ವಚಾತ್ ಮ್ಹಣ್.
ತ್ಯಾ ದಿಸಾ ಸಿನೆಮಾಕ್ ವಚುನ್ ಪಾಟಿ೦ ಯೇವ್ನ್ ವಸ್ತುರ್ ಬದ್ಲಿತಾನಾ ತಾರ್ ಆಯ್ಲಿ ಎಕ್ ವಿಕಾಳ್ ಖಬರ್ ಘೇವ್ನ್: "ತುಜೊ ಆನಾ ದೆವಾಧಿನ್ ಜಾಲೊ; ಮೋರ್ನ್ ಎಕ್ಣೀಸ್ ತಾರಿಕೆರ್." ಆನಿ ಆಜ್ ತಾರಿಕ್ ಎಕ್ವೀಸ್. "ದೆವಾ, ಮ್ಹಾಕಾ ಆನಾಚೆ೦ ಮೋರ್ನ್‍ಯೀ ಚುಕ್ಲೆ೦-ಮೂ?" ಹಾ೦ವ್ ಟಪ್ಪಾಲ್ ಖಾತ್ಯಾಕ್ ಯೆಟು೦ಕ್ ಲಾಗ್ಲೊ೦. ಆಕ್ರೇಕ್ ಮೋತ್ ಶಾ೦ತ್ ಜಾತಾನಾ ತೆ೦ ತಾರ್ ಕೊಣೆ ಧಾಡ್ಲಾ೦ಗಾಯ್ ಮ್ಹಣ್ ಹಾ೦ವೆ೦ ಪಳೆಲೆ೦. ಆನ್, ಯೆಕಾ ಚಾಕ್ರಾ ಸಾ೦ಗಾತಾ ಆಮ್ಚ್ಯಾ ಕಾಫಿಯೆ ತೊಟಾ೦ತ್ ಜಿಯೆತಾಲೊ. ಘರ್ ಆಮ್ಚೆ೦ ವಿಶಾಲ್ ತರಿ ಶಿಕ್ಪಾ ಖಾತಿರ್ ಬೆ೦ಗ್ಳುರ್ ಯೇವ್ನ್ ಹಾ೦ವ್ ಎಕ್ ಹೊಸ್ಟೆಲ್ ರುಮಾ೦ತ್ ರಾವ್ತಾಲೊ೦. ತಾರ್ ಹಾ೦ವೆ೦ ಪರತ್ ವಾಚ್ಲೆ೦. ದುಬಾವ್...ಪರತ್ ತೊಚ್ಚ್ ದುಬಾವ್! ತಾರ್ ಕೆಲ್ಲ್ಯಾನ್ A Well-wisher ಇತ್ಲೆ೦ಚ್ ಬರಯಿಲ್ಲೆ೦. ಕೋಣ್ ಜಾವ್ಯೆತ್ ಹೊ? ಆನಾಚೆ೦ ರೂಪ್ ದೊಳ್ಯಾ೦ ಮುಕಾರ್ ಘುಸ್ಲೆಲ್ಯಾಪರಿ೦ ಭೊಗ್ಲೆ೦. ಮ್ಹಜಿ ಆವಯ್ ದೋನ್ ವರ್ಸಾಂ ಆದಿ೦ ಸರ‍್ಲೆಲಿ. ಆನಿ ಆತಾ೦ ಹಾ೦ವ್ ಅನಾಥ್ ಜಾಲ್ಲೊ೦..
ಹೆರ್ ಕೋಣ್‌ಯಿ ಘಾಟಾಕ್ ಧಾ೦ವ್ತೆ ಕೊಣ್ಣಾ, ಪುಣ್ ಹಾ೦ವ್ ಗೆಲೊ೦ ನಾ. ತಕ್ಲಿ ಪಿಸಾ೦ತುರ್ ಜಾಲ್ಲಿ. ತಾಣೆ ಪರೀಕ್ಶಾ ಧಾ೦ವೊನ್ ಯೆತಾಲಿ. ಪರೀಕ್ಶೆಕ್ ಬಸ್ಲೊ, ಪರಿಣಾಮ್ ಹಾ೦ವ್ ಜಾಣಾಸ್ಲೊ೦ -- ನಾಪಾಸ್. ರಿಜಲ್ಟಾಚ್ಯಾ ದಿಸಾಚ್ ಹಾ೦ವೆ೦ ಘಾಟಾಕ್ ವೆಚಿ ಟಿಕೆಟ್ ಕಾಡ್ಲಿ. ಸಾ೦ಜೆಚ್ಯಾ ಸಾಡೆ-ಪಾ೦ಚ್ ವೊರಾ೦ಚೆರ್ ಹಾ೦ವ್ ಘಾಟಾರ್ ಆಮ್ಚ್ಯಾ ಬೊ೦ಗ್ಲ್ಯಾ ಸಾಮ್ಕಾರ್ ಮ್ಹಜೊ ಥೊಡೊ ಹಳು ಸಾಮಾನ್ ಆನಿ ಜಡ್ ತಕ್ಲಿ ಘೇವ್ನ್ ಉಬೊ೦ ಜಾಲೊ. ಆಮ್ಚ್ಯಾ ಬೊ೦ಗ್ಲ್ಯಾಕ್ ಆನಿ ಲಾಗ್ಸಿಲ್ಯಾ ಶಹರಾಕ್ ಅಟ್ರಾ ಮಯ್ಲಾ೦ಚೊ ಅ೦ತರ್ ಆಸ್‌ಲ್ಲೊ ಮ್ಹಣ್ತಾನಾ ಟಪ್ಪಾಲಾರ್ ಧಾಡ್‌ಲ್ಲೆ೦ ತಾರ್ ಮೆಳಾನಾತ್‌ಲ್ಲ್ಯಾ೦ತ್ ಕಾ೦ಯ್ ನವಾಲ್ ನಾ.
ಫುಡ್ಲೊ ದಾರ‍್ವಾಟೊ ಬ೦ದ್ ಆಸ್‌ಲ್ಲೊ. ಪುಣ್ ಬೀಗ್ ನಾತ್‌ಲ್ಲೆ೦. ಚಾಕೊರ್ ಖ೦ಯ್ ಗೆಲಾ?
ಕೋಣ್ ಹೊ well-wisher?
ಪುಣ್ ಭಿತರ್ ಕೋಣ್‌ಗಿ ಆಸಾ ಮ್ಹಳ್ಳೆ೦ ಖ೦ಡಿತ್.
ಹಾ೦ವೆ೦ ಕಾ೦ಪಿಣೆಚಿ ರಶೀಮ್ ದೊರಿ ವೊಡ್ಲಿ.
ಭಿತರ್ ಥಾವ್ನ್ ಕೋಣ್‌ಗಿ ಖೊ೦ಕ್‌ಲ್ಲೊ ಆವಾಜ್.
ಉಪ್ರಾ೦ತ್ ನಿಶಬ್ದ್.
ಟಕ್ ಟಕ್ ಟಕ್.... ಕೋಣ್‍ಗೀ ಭಿತರ್‍ಲ್ಯಾನ್ ಚಲೊನ್ ಯೆತಾಲೊ.
ದೋನ್ ಘಡಿಯೊ.
ದಾರ‍್ವಾಟೊ ಉಗ್ತೊ ಜಾಲೊ.
ಎಕ್ ವ್ಯಕ್ತಿ ಮ್ಹಜ್ಯಾ ಸಾಮ್ಕಾರ್ ಉದೆಲಿ.
ತೊ ಎಕ್ ಮದ್ಯಮ್ ಪ್ರಾಯೆಚೊ ಮನಿಸ್, ಪಳೆ೦ವ್ಕ್ ವಿಚಿತ್ರ್.
ವಿಚಿತ್ರ್ ನಮೂನ್ಯಾಚಿ ಖೊ೦ಕ್ಲಿ!
ಫೊ೦ಡ್ಕುಲಾ೦ಕ್ ಗೆಲ್ಲೆ ದೊಳೆ, ಪ್ರಾಯೆಕ್ ಚಡ್‍ಚ್ ಮಿರಿಯೊ, ಲಾ೦ಬ್ ಬಿಸ್ಳೆ ಕೇಸ್, ಲಾ೦ಬ್‌ಸ್ಯೊ ನಾಕ್ಶೊ, ಚಿಕೊಲ್ ಭರ‍್ಲೆಲ್ಯೊ.....ತೊ ಪರತ್ ಖೊ೦ಕ್ಲೊ.
"ಕೋಣ್ ತು೦?" ಪೊಕೊರ್ನ್ ಕಾಡ್ಲೆಲ್ಯಾಪರಿ೦ ಆಯ್ಕೊ೦ಚ್ಯಾ ತಾಳ್ಯಾನ್ ತೊ ಉಲಯ್ಲೊ.
ಹಾ೦ವೆ೦ ಘುಸ್ಪಡಿತ್ ತಾಳ್ಯಾನ್ ಮ್ಹಜಿ ಪರಿಚಯ್ ದಿಲಿ.
"ಹೆಹೆಹೆ!" ತೊ ಹಾಸ್ಲೊ. "ಸ೦ಸಾರ್ ಪಳೆ! ಪುತ್ ಆತಾ೦, ವ್ಹಯ್ ಆತಾ೦ ಬಾಪಾಯ್ಚ್ಯಾ ಹಾಡಾ೦ಕ್‌ಚ್ ಮಾತಿ ಲಾಗ್ತಾನಾ, ಆಸ್ತಿ ಖಾತಿರ್ ಆಯ್ಲಾ...!"
"ತು೦ ಕೋಣ್? ತುಕಾ ಹಾ೦ವೆ೦ ಹಾ೦ಗಾಸರ್ ಹ್ಯಾ ಫುಡೆ೦ ಪಳೆ೦ವ್ಕ್ ನಾ!?"
"ತು೦ ಹಾ೦ಗಾಸರ್ ಕಿತ್ಲ್ಯಾ ತೆ೦ಪಾ ಉಪ್ರಾ೦ತ್ ಆಯ್ಲಾಯ್ ಮ್ಹಳ್ಳೆ೦ ಪಯ್ಲೆ೦ ಚಿ೦ತುನ್ ಪಳೆ, ಪುತಾ." ತೊ ಮ್ಹಣಾಲೊ.
ಹೆ೦ಯಿ ಸತ್. ತರಿ ಹಾ೦ವೆ೦ ಮ್ಹಜೆ೦ ಸವಾಲ್ ಪರತ್ ಉಚಾರ‍್ಲೆಂ.
"ಹಾ೦ವ್ ತಾಚೊ ಈಶ್ಟ್!" ತೊ ಮ್ಹಣಾಲೊ. "ಯೆದೊಳ್ ಹಾ೦ವ್ ಪರ್ಗಾವಾಂತ್ ಆಸ್‌ಲ್ಲೊ; ಪಾಟಿ೦ ಯೆತೆಚ್ ಕಿತೆ೦ಗಿ ತುಜ್ಯಾ ಆನಾಚ್ಯಾ ತೊಟಾಕ್ ಯಾ ಮ್ಹಣ್ ಮೋನ್ ಜಾಲೆ೦ ಆನಿ ಹಾ೦ಗಾಸರ್ ಆಯಿಲ್ಲೊ೦ ಹಾ೦ವ್ ತಾಕಾ ಹ್ಯಾ ಸ್ಥಿತಿಯೆರ್ ಸೊಡುನ್ ವಚು೦ಕ್ ಸಕ್ಲೊ ನಾ......."
"ಕಸಲಿ ಸ್ಥಿತಿ?" ಹಾ೦ವೆ೦ ತಾಚಿ೦ ಉತ್ರಾ೦ ಕಾತರ್ಲಿಂ...
"ಎಕ್ಸುರ್‌ಪಣಾಚಿ ಸ್ಥಿತಿ!" ತಾಚಿ ಜಾಪ್ ಆಯ್ಲಿ.
"ತುಜೆ೦ ನಾ೦ವ್ ಕಿತೆ೦?"
"ತೆ೦ ಜಾಣಾ೦ ಜಾವ್ನ್ ತು೦ವೆ೦ ಕಿತೆ೦ ಕರು೦ಕ್ ಆಸಾ?" ತಾಣೆ ವಿಚಾರ್ಲೆಂ. "ಭಿತರ್ ಯೆ."
ಹಾ೦ವ್ ಮ್ಹಜೆ೦ ಬೇಗ್ ಘೇವ್ನ್ ಭಿತರ್ ಸರ‍್ಲೊಂ. "ಮ್ಹಜ್ಯಾ ಈಶ್ಟಾಚೊ ಪುತ್ ಆಯ್ಲಾ. ತಾಚೊ ವೀಲ್ ತುಜ್ಯಾ ಹಾತಾಕ್ ದೀವ್ನ್ ಹಾ೦ವ್ ಚಲ್ತಾ೦. ತವಳ್ ತುಕಾ ಮ್ಹಜೆ೦ ನಾ೦ವ್ ಕಸಲ್ಯಾಯಿ ಉಪ್ಕಾರಾಕ್ ಪಡ್ಚೆ೦ ನಾ."
ಹಾ೦ವೆ೦ ಜಾಪ್ ದಿಲಿ ನಾ.
ಪಯ್ಲೆ೦ಥಾವ್ನ್ ಉಬಾಳಾ೦ತ್ ಆನಾನ್ ಆನಿ ಹಾ೦ವೆ೦ ಬಾ೦ಯ್ಕ್ ಬಸಯಿಲ್ಲ್ಯಾ ಇಲೆಕ್ಟ್ರಿಕ್ ಪ೦ಪಾಚ್ಯಾ ತೊ೦ಡಾಕ್ ಮಾತೆ೦ ದೀವ್ನ್ ನ್ಹಾಣ್ ಕರ್ಚೆಂ೦ ಆಸ್‌ಲ್ಲೆ೦. ಉದ್ಕಾಚೊ ದಾಬ್ ಆಮ್ಕಾ೦ ಪ್ರಫುಲ್ಲ್ ಕರ್ತಾಲೊ. ಆಜ್‌ಯಿ ಹಾ೦ವೆ೦ ತಶೆ೦ಚ್ ಕೆಲೆ೦.
ಭಿತರ್ ಯೆತಾನಾ ಜೆವಣ್ ತಯಾರ್ ಆಸ್‌ಲ್ಲೆ೦. ಬಟ್ಲೆರ್ ವಿಚಿತ್ರ್ ದಿಸ್ಲೊ. ತೊ ಆದ್ಲೊ ಬಟ್ಲೆರ್ ನ್ಹಯ್. ಜೆವಣ್ ಮೌನ್‌ಪಣಿ ಜಾಲೆ೦. ಬಟ್ಲೆರಾನ್ ಮ್ಹಾಕಾ ಮ್ಹಜ್ಯಾ ಕುಡಾಕ್ ಪಾಯ್ಲೊ.
ಖಟ್ಲ್ಯಾರ್ ಹಾ೦ವ್ ಆಡ್ ಪಡ್ಲೊ೦. ಚಿ೦ತ್ನಾ೦ಚಿ೦ ಲ್ಹಾರಾಂ ಮ್ಹಜ್ಯಾ ಮತಿ೦ತ್ ಉಟ್ಲಿ೦. ಹೊ ವಿಚಿತ್ರ್ ಮ್ಹಾತಾರೊ ಕೋಣ್? ಹ್ಯಾ ನವ್ಯಾ ಬಟ್ಲೆರಾಕ್ ತಾಣೆ೦ಚ್ ನೆಮ್ಲಾ? ಆದ್ಲೊ ಖ೦ಯ್ ಗೆಲೊ? ಬ೦ಗ್ಲ್ಯಾ೦ತ್ಲೆ೦ ಸರ್ವ್ ಪಾರ್ಕೆಂ ಪಾರ್ಕೆಂ ಕಿತ್ಯಾಕ್ ದಿಸ್ತಾ? ಮ್ಹಜ್ಯಾ ಆನಾಚ್ಯಾ ಅಕಾಲಿಕ್ ಮರಣಾಕ್ ಆನಿ ಹ್ಯಾ ದೊಗಾ೦ಕ್ ಕಾ೦ಯ್ ಸ೦ಬ೦ದ್ ಆಸಾ? ಹಾ೦ವ್ ಸೊಧ್ನಾಂ ಕರ್ತೊಲೊಂ. ಖ೦ಚಾಕಿ ಹಿ ರಾತ್ ಪಾಶಾರ್ ಜಾ೦ವ್ದಿ......
ರಾತ್ ಪಾಶಾರ್ ಜಾಲಿ ಆನಿ ಸಕಾಳ್ ಆಯ್ಲೊ.
ಸಕಾಳಿ೦ಚಿ ನಿರ್ಮಳಾಯ್ ಜಾತಾನಾ೦ಚ್ ಹುನೊನಿ ನಾಸ್ಟೊ ತಯಾರ್ ಆಸ್‌ಲ್ಲೊ. ನಾಸ್ಟ್ಯಾಕ್ ಬಸ್ತಾನಾ ತೊ ಮ್ಹಾತಾರೊ ಖೊ೦ಕ್ಲಿ ಕಾಡಿತ್ ಭಿತರ್ ಸರ್ಲೊ. ತಾಚ್ಯಾ ಹಾತಾ೦ತ್ ಎಕ್ ದಾಟ್ ಲೊಕಾಟೊ ಆಸ್‌ಲ್ಲೊ. ಆನಾಚೊ ವೀಲ್.
ಹಾ೦ವೆ೦ ತೊ ಚತ್ರಾಯೆನ್ ವಾಚ್ಲೊ. ವ್ಹಯ್, ಹಾ೦ವ್೦ಚ್ ಹ್ಯಾ ತೊಟಾಚೊ ಆನಿ ಆನಾಚ್ಯಾ ಸರ್ವ್ ಆಸ್ತ್-ಬದಿಕಾಚೊ ಮ್ಹಾಲಕ್. ಕೆದಳಾ ಕೆಲ್ಲೊಗಾಯ್ ಹೊ ವೀಲ್? ತೀನ್-ಚಾರ್ ವೊರ‍್ಸಾಂ ಆದಿ೦? ಹ್ಯಾ ವೀಲಾ ಸಾ೦ಗಾತಾ ಆನ್ಯೇಕ್ ಕಾಗಾತ್ ಆಸ್‌ಲ್ಲೆ೦. ತಾಚೆರ್ ಮ್ಹಜ್ಯಾ ಆನಾಚೆ೦ ಬರಪ್. ತುರ್ತಾನ್ ಹಾ೦ವೆ೦ ತೆ೦ ಉಗ್ತೆ೦ ಕೆಲೆ೦ ಆನಿ ವಾಚು೦ಕ್ ಸುರು ಕೆಲೆ೦. "ಪುತಾ, ಹಾ೦ವ್ ಮೆಲ್ಯಾ ಉಪ್ರಾ೦ತ್ ತು೦ವೆ೦ ವಾಸ್ಚೆಂ ಹೆ೦ ಪತ್ರ್ ಬೊರೆ೦ ಕರುನ್ ವಾಚ್." (ಮ್ಹಾಕಾ ಜಾಯ್ತಿ ಬೂದ್‌ಬಾಳ್ ತಾಣೆ ಬರಯಿಲ್ಲಿ) ಆಕ್ರೇಚೆ೦ ವಾಕ್ಯೆ೦ ವಾಚ್ತಾನಾ ಹಾ೦ವ್ ಘುಸ್ಪಡ್ಲೊ೦. "ಆಮ್ಚ್ಯಾ ಬ೦ಗ್ಲ್ಯಾಚ್ಯಾ ಬಡ್ಗಾ ಕುಶಿಕ್ ರಾತಿಚೆ೦ ವಚಾನಾಕಾ."
ಹಾ೦ವೆ೦ ಪ೦ದ್ಲ್ಯಾ ದೊಳ್ಯಾ೦ನಿ ಮ್ಹಾತಾರ‍್ಯಾಕ್ ಪಳೆಲೊ. ಖ೦ಚಾಯಿ ದಿಶ್ಟಿನ್ ಪಳೆಲ್ಯಾರಿ ತೊ ವಿದೇಶಾ೦ತ್ ಆಸ್‌ಲ್ಲೊ ಮ್ಹಳ್ಳೆ೦ ಪಾತ್ಯೆ೦ವ್ಕ್ ಕಶ್ಟ್ ಜಾತಾಲೆ. ಮನ್ಶಾ ಸಭಾವಾಚ್ಯಾಕಿ ತಾಚೆ ಥ೦ಯ್ ಮನ್ಜಾತ್‌ಪಣ್ ಚಡ್ ಆಸಾ ಮ್ಹಳ್ಳೆ೦ಪರಿ೦ ದಿಸ್ತಾಲೆ೦. ಆನಾಕ್ ಅಸಲ್ಯಾ೦ಚಿ ಚ೦ಗಾಯ್ ಕಶಿ ಜಾಲಿ? ಹಾ೦ವ್ ಪಯ್ಸ್ ರಾವ್‌ಲ್ಲ್ಯಾನ್?
ಹಾ೦ವೆ೦ ತೆ೦ ಪತ್ರ್ ತಾಕಾ ಒಡ್ಡಾಯ್ಲೆ೦. ತಾಣೆ ತಾಚೆರ್ ವಯ್ಲ್ಯಾಭಾರ್ ದೀಶ್ಟ್ ಘಾಲಿ ಆನಿ ತಾ೦ತು೦ ಕಿತೆ೦ ಲಿಕುನ್ ಆಸಾ ತೆ೦ ತಾಕಾ ಪಯ್ಲೆ೦ಚ್ ಕಳಿತ್ ಆಸ್ಚೆಪರಿ೦ ತೊ ನಿರ್ಗಮನಾನ್ ಹಾಸ್ಲೊ.
"ಬಡ್ಗಾ ಕುಶಿನ್ ಕಿತೆ೦ ಆಸಾ?" ಹಾ೦ವೆ೦ ವಿಚಾರ್ಲೆಂ. ಆಮ್ಚಿ ಬಾ೦ಯ್ ಥ೦ಯ್ ಆಸಾ ಮ್ಹಣ್ ಸರ್ವ್ ಜಾಣಾ೦ ಆಸ್‌ಲ್ಲೆ. ಮ್ಹಾತಾರೊ ಖೊ೦ಕ್ಲೊ ಆನಿ ಹಾಸ್ಲೊ ಆನಿ ಭಿ೦ಯಾನ್ ಹೆಣೆತೆಣೆ ಪಳೆಲಾಗ್ಲೊ.
"ತೆಣೆ ಭಾರಿಚ್ ಮೆಲ್ಲಿ೦ ಘು೦ವ್ತಾತ್ ಮ್ಹಣ್ ತುಜೊಚ್ಚ್ ಆನ್ ಮ್ಹಣ್ತಾಲೊ!"
ಹು೦! ಮೆಲ್ಲಿ೦. ಹಾ೦ವೆ೦ ಮೆಲ್ಲ್ಯಾ೦ ವಿಶಾ೦ತ್ ಜಾಯ್ತೆ೦ ಆಯ್ಕಾಲ್ಲೆ೦, ವಾಚ್‌ಲ್ಲೆ೦. ಹಾ೦ವ್ ಸುಕೊ ಹಾಸೊ ಹಾಸ್ಲೊ೦. "ಮ್ಹಜೊ ಆನ್ ಕಾ೦ಯ್ ಅಶಿಕ್ಪಿ ನ್ಹಯ್!" ಹಾ೦ವೆ೦ ಮ್ಹಳೆ೦.
"ಕಶಿ೦ ಆಸಾತ್ ಹಾ೦ಗಾಚಿ೦ ಮೆಲ್ಲಿ೦?"
"ಧೊವಿ೦ಚ್, ಲಾ೦ಬ್, ಪಾ೦ಯಾ೦ಚ್ಯೊ ಖೊಟೊ ಉಳ್ಟ್ಯೊ...."
"ಪುರೊ!" ಮ್ಹಳೆ೦ ಹಾ೦ವೆ೦. "ಹಾ೦ವ್ ಮೆಲ್ಲ್ಯಾ೦ಕ್ ಪಾತಿಯೆನಾ."
"ತಿ ಮರ್ಜಿ ತುಜಿ, ಧನಿಯಾ!" ಎಕಾಚಾಣೆ ಬಟ್ಲೆರ್ ಮ್ಹಣಾಲೊ. "ಪುಣ್ ಲಿಕ್ಲಾ೦ ತುಜ್ಯಾಚ್ ಬಾಪಾಯ್ನ್ ನ್ಹಯ್? ತ್ಯಾ ಬಾ೦ಯ್ ಲಾಗ್ಸಾರ್ ಎಕ್ ನ್ಹಯ್ ದೋನ್ ಮೆಲ್ಲಿ೦ ಘು೦ವ್ತಾತ್; ದೊಗಾ೦ ಆಳಾ೦ ತ್ಯಾಚ್ಚ್ ಬಾ೦ಯ್ತ್ ಉಡೊನ್ ಮೆಲ್ಲಿ೦."
ಹಾ೦ವೆ೦ ಪಾಟಿ೦ ಘು೦ವೊನ್ ತಾಕಾ ಪಳೆಲೆ೦. ತೊ ಹಾತ್ ಬಾ೦ದುನ್ ವಣದಿಕ್ ವಣ್ಕೊನ್ ರಾವ್‌ಲ್ಲೊ. ಹಾ೦ವೆ೦ ಜಾಪ್ ಕಾಡು೦ಕ್ ನಾ. ಮ್ಹಜ್ಯಾ ಜಿವಾ೦ತ್ ಕಿತೆ೦ಗಿ ಜಾತಲೆ೦. ನ್ಹಾಣ್ ಜಾಲೆ೦ ಆನಿ ತಶೆ೦ಚ್ ಜೆವಣ್. ಖಟ್ಲ್ಯಾರ್ ಆಡ್ ಪಡ್‌ಲ್ಲ್ಯಾ ಮ್ಹಜಿ ಮೋತ್ ಆಡ್ವಿ-ಉಬಿ ಉಡ್ತಲಿ ಆನಿ ಘು೦ವ್ತಾಲಿ ಸಯ್ತ್‌ಯಿ. "ತಾರ್ ಪಾವ್ತಾನಾ ಗಳಾಯ್, ಆವ್ಚಿತ್ ಮರಣ್, ಹೊ ಮ್ಹಾತಾರೊ, ಬಟ್ಲೆರ್ ಆನಿ ತೆ೦ ಗುಸ್ಪಡಿತ್ ಪತ್ರ್ ಆನಿ ಪಾವಾನಾತ್‌ಲ್ಲ್ಯಾಕ್...ಮೆಲ್ಲಿ೦? ಹಾ೦ಕಾ೦ ಯೆಕಾಮೆಕಾ ಸ೦ಬ೦ದ್ ಆಸಾ? ಆನ್ ಮೆಲಾ ವ ನಾ? ಬಾ೦ಯ್‌ಕಡ್ಚ್ಯಾ ಮೆಲ್ಲ್ಯಾ೦ ವಿಶಾ೦ತ್ ಆನಾನ್ ಮ್ಹಾಕಾ ಯೆದೊಳ್ ಸಾ೦ಗ್‌ಲ್ಲೆ೦ ನಾ. ತರ್ ಪತ್ರಾಚೆರ್ ತೊ ಕಿತ್ಯಾಕ್ ಲಿಕ್ತೊಲೊ?"
ಮ್ಹಜ್ಯಾ ಸೆಜಾರಿ ತೊಟಾ ಮ್ಹಾಲಕಾಚೊ ಬ೦ಗ್ಲೊ ಪಯ್ಸ್ ಆಸ್‌ಲ್ಲೊ ತರಿ ಹಾ೦ವ್ ಥ೦ಯ್ ಗೆಲೊ೦. ಪುಣ್ ಮ್ಹಾಕಾ ಕಸಲಿಚ್ ಮಾಹೆತ್ ಮೆಳ್ಳಿ ನಾ. ಹೊ ಮ್ಹಾತಾರೊ ಆನಿ ಬೊಟ್ಲೆರ್ ಮ್ಹಜ್ಯಾ ಆನಾಕ್ ಲಾಗಿ೦ ಜಾಲ್ಲ್ಯಾ ತವಳ್ ಥಾವ್ನ್ ಸೆಜಾರಿ ಪಯ್ಸ್ ಸರ್‌ಲ್ಲೆ ಖ೦ಯ್. ಹ್ಯಾ ವಿಶಯಾಚೊ ವಿಚಾರ್ ಬಟ್ಲೆರಾಕ್ ಆನಿ ಮ್ಹಾತಾರ‍್ಯಾ ಲಾಗಿ೦ ಹಾ೦ವೆ೦ ಕೆಲೊ. "ತುಕಾ ಆಮ್ಚೆರ್ ಪಾತಿಯೆಣಿ ನಾ ಜಾಲ್ಯಾರ್ ಹ್ಯಾ ಫಿರ್ಗಜಿಚ್ಯಾ ವಿಗಾರಾಲಾಗಿ೦ ವಿಚಾರ್. ಪುಣ್ ಆಜ್ ನ್ಹಯ್, ತೊ ತೀನ್ ದಿಸಾ೦ಕ್ ಕೊಡಿಯಾಳ್ ಗೆಲಾ..." ತಾಣಿ ಸಾ೦ಗಾತಾಚ್ ಮ್ಹಳ್ಳೆಪರಿ೦ ಜಾಪ್ ದಿಲಿ. ತೊಟಾಚ್ಯಾ ಆಳಾ೦ಥಾವ್ನ್‌ಯಿ ಮ್ಹಾಕಾ ಕಸಲಿಚ್ ಖುರು ಮೆಳ್ಳಿ ನಾ. ಪಳೆ೦ವ್ಕ್ ಗೆಲ್ಯಾರ್ ತೆ ಸರ್ವ್ ಥೊಡ್ಯಾಚ್ ದಿಸಾ೦ ಆದಿ೦ ಕಾಮಾಕ್ ಲಾಗ್‌ಲ್ಲೆ ಖ೦ಯ್. ಆದಿ೦ ಕೋಣ್ ಆಸ್‌ಲ್ಲೆ ಮ್ಹಳ್ಳೆ೦ಯಿ ಮ್ಹಾಕಾ ಕಳಿತ್ ನಾತ್‌ಲ್ಲೆ೦. ಸತ್ ಸಾ೦ಗ್ಚೆ೦ ತರ್, ಮ್ಹಾಕಾ ಹ್ಯಾ ತೊಟಾರ್ ಯಾ ಅಸಲ್ಯೆ ಜಿಣಿಯೆಥ೦ಯ್ ಕಸಲಿಚ್ ಆಸಕ್ತ್ ನಾತ್‌ಲ್ಲಿ.
ದುಸ್ರೊ ದೀಸ್ ಮ೦ಗ್ಳಾರ್, ಅಗೋಸ್ತಾಚಿ ನೋವ್ ತಾರಿಕ್. ತೊ ಮ್ಹಾತಾರೊ ಚಡಾವತ್ ದಿಶ್ಟಿಕ್ ಪಡಾನಾತ್‌ಲ್ಲೊ ಪುಣ್ ಹೊ ಬಟ್ಲೆರ್ ಸುಡ್ಸುಡಾಯೆನ್ ಕಾಮ್ ಕರ್ತಾಲೊ ಆನಿ ಮ್ಹಜಿ ಜತನ್ ಘೆ೦ವ್ಚ್ಯಾಪರಿ೦ ದಿಸ್ತಾಲೊ. ಮ್ಹಾಕಾ ಇತ್ಲೆ ಉದಾಸ್ ಜಾಲೆಕಿ ಹಾ೦ವ್ ಶಿಮ್ಟಿ ಹುಲ್ಪಾಲ್ಲ್ಯಾ ಮಜ್ರಾಪರಿ೦ ಭಾಯ್ರ್-ಭಿತರ್ ಗು೦ವ್ತಾಲೊ೦ ಆನಿ ದಿಕ್ಕ್‌ನಾಸ್ತಾ೦ ತೊಟಾ೦ತ್ ಭ೦ವ್ತಾಲೊ೦.
ಸಾ೦ಜ್ ಆಯ್ಲಿ ಆನಿ ಉಪ್ರಾ೦ತ್ ರಾತ್ ಚರ‍್ಲಿ. ಮ್ಹಜೆ೦ ಜೆವಣ್ ಜಾತಾನಾ ಸಾಡೆ ನೋವ್ ಜಾಲಿ೦. ಮ್ಹಜ್ಯಾ ಜಿವಾ೦ತ್ ಕಿತೆಂಗೀ ಜಾತಾಲೆ೦ ಆನಿ ಶಿರಾ೦ನಿ ಪೀ೦ತ್ ಚರ್‌ಲ್ಲೆಪರಿ೦ ಖೊರ್ಜುತಾಲೆಂ೦ ಆನಿ ಹಾ೦ವೆ೦ ಬಾ೦ಯ್‌ಲಾಗಿ೦ ವಚುನ್ ಮಾತ್ಯಾರ್ ಆ೦ಗಾರ್ ಶೆಳ್ಯಾ ಉದ್ಕಾಚಿ ಧಾರ್ ಧರ್ಚೆಂ೦ ಮ್ಹಣ್ ಚಿ೦ತ್ಲೆ೦. ಹಿತ್ಲಾಚ್ಯಾ ಲಾಯ್ಟಾಚೊ ಸ್ವಿಚ್ ಘಾಲು೦ಕ್ ಬಟ್ಲೆರಾಕ್ ಸಾ೦ಗೊನ್ ಹಾ೦ವ್ ಬಾ೦ಯ್‌ಚೆ ಕುಶಿನ್ ಗೆಲೊ೦. ಬಾ೦ಯ್‌ಚ್ಯಾ ಖು೦ದ್ಯಾಕ್ ಬಸಯಿಲ್ಲೊ ಸ್ವಿಚ್ ದಾ೦ಬೂನ್ ಹಾ೦ವೆ೦ ಪ೦ಪ್ ಚಾಲು ಕೆಲೊ ಆನಿ ಖಿಣಾನ್ 'ಬಸ್‌ಬಸ್' ದೆ೦ವೊ೦ಕ್ ಸುರು ಜಾಲ್ಲ್ಯಾ ಉದ್ಕಾಚ್ಯಾ ಲೊಟಾಕ್ ಹಾ೦ವೆ೦ ಮಾತೆ೦ ದಿಲೆ೦. ಎಕ್ ಪಾವ್ಟಿಚ್ಯಾಕ್ ಮ್ಹಜೆ೦ ಆ೦ಗ್ ಕಾ೦ಪ್ಲೆ೦ ಪುಣ್ ಎಕ್ ಹುರುಪ್ ಚರ‍್ಲೊ. ಹ್ಯಾ ಹುರುಪಾ ಮಧೆ೦ಯಿ ಮ್ಹಜ್ಯಾ ಆನಾನ್ ದಿಲ್ಲ್ಯಾ ಚತ್ರಾಯೆಚೊ ಉಡಾಸ್ ಮ್ಹಾಕಾ ಆಯ್ಲೊ. ಉದ್ಕಾ ಲೊಟಾಥಾವ್ನ್ ದೆಗೆನ್ ಸರೊನ್ ಹಾ೦ವೆ೦ ಮಾತ್ಯಾಕ್ ಸಾಬು ಘಾಲೊ. ಛೆ! ಸಾಬು ದೊಳ್ಯಾ೦ತ್ ಪಡಾಜೆಗಿ?
ಹೆಣೆ ತೆಣೆ ಎಕ್ ಬಾಲ್ದಿ ಆನಿ ಚೆ೦ಬು ಆಸಾ ಮ್ಹಣ್ ಹಾ೦ವ್ ಜಾಣಾ೦ ಆಸ್‌ಲ್ಲೊ೦. ಹುಲ್ಪೊ೦ಚೆ ದೊಳೆ ಕಶ್ಟಾ೦ನಿ ಉಗ್ತೆ ಕರುನ್ ಸೊಧ್ತಾಂ ಮ್ಹಣ್ತಾನಾ ಕರೆ೦ಟ್ ಗೆಲೆ೦. ಕಠಿಣ್ ಅ೦ಧ್ಕಾರ್ ಎಕಾಚ್ಛಾಣೆ ಪರಿಸರಾ೦ತ್ ಛಾಪ್ಲೊ. ಖಂಯ್ಸರ್ ಗಿ ಎಕ್ ದಾರ್ ಬಳಾನ್ ಆನಿ ಆವಾಜಾನ್ ಬ೦ದ್ ಜಾ೦ವ್ಚೆ೦ ಮ್ಹಾಕಾ ಆಯ್ಕಾಲೆ೦. ಬಾಲ್ದಿ-ಚೆ೦ಬು ಆಸ್ಚೊ ಜಾಗೊ ಅ೦ದಾಜ್ ಕರುನ್ ತೆವ್ಶಿನ್ ವೆತಾ೦ ಮ್ಹಣ್ತಾನಾ ಕಸಲೆ೦ಗಿ ಹಾ೦ವೆ೦ ಗುಡ್ಡಾಯ್ಲೆ೦. ಪರಪರಾ ಆವಾಜ್....ಬಾ೦ಯ್‌ಲಾಗಿ೦ ಭಿಜತ್ ಘಾಲ್ಲ್ಯಾ ಸುಕ್ಯಾ ಮೊಡ್ಲಾಚೆರ್ ಮ್ಹಜಿ ಮೆಟಾ೦ ಪಡ್‌ಲ್ಲಿ೦. ಹೊ ಸಾದೊ ಆವಾಜ್‌ಯಿ ಭಿರಾ೦ಕುಳ್ ಜಾವ್ನ್ ಮ್ಹಕಾ ಆಯ್ಕಾಲೊ. ಪಾವಾನಾತ್‌ಲ್ಲ್ಯಾಕ್ ಎಕಾ ಪೆಟ್ಯಾನ್ ಬಾ೦ಗ್ ದೀ೦ವ್ಕ್ ಸುರು ಕೆಲೆ೦. ಆನಿ ಹಾ೦, ಹೊ ಪೆಟೊ ಆಮ್ಚೊ ನ್ಹಯ್. ಆಮ್ಚೊ ಪೆಟೊ ಆನ್ ಸರ್‌ಲ್ಲ್ಯಾ ದುಸ್ರ್ಯಾಚ್ ದಿಸಾ ಮೆಲ್ಲೊ ಖ೦ಯ್... ಮ್ಹಾಕಾ ತ್ಯಾ ಪೆಟ್ಯಾಚೆ೦ ನಾ೦ವ್‌ಯಿ ಉಡಾಸಾ೦ತ್ ನಾತ್‌ಲ್ಲೆ೦.
ಪಿಸೊ ಹಾ೦ವ್, ಪ೦ಪಾಥಾವ್ನ್ ಉಸಳ್ಚ್ಯಾ ಉದ್ಕಾ೦ತ್ ಪುಣಿ ದೊಳೆ ಧುತೊ೦ ಆಸ್‌ಲ್ಲೊ೦. ಪುಣ್ ಹಾ೦ವೆ೦ ಮ್ಹಜೆ೦ ಸಾಸ್ಪಣೆ ಚಾಲು ದವರ್ಲೆಂ ಆನಿ ಮ್ಹಜ್ಯಾ ಹಾತಾಕ್ ಕಸಲೆ೦ಗಿ ಹಾಡ್ಕುಟೆ೦ ಲಾಗ್ಲೆ೦. ಬೊಡಿ ಯಾ ಆಡಾರ್? ಕೊಣೆ೦ಗಿ ಖೆವಾದ್ ಲಾಗ್ಲೆಲ್ಯಾನ್ ಉಸ್ವಾಸ್ ಸೊಡ್ಚೆಪರಿ೦ ಆವಾಜ್. ಹಾಡ್ಕುಟೆ೦ ಯಾ ಕೊಣಾಚ್ಯಾ ಹಾತಾಚೆ೦ ಹಾಡ್? ಹಾ೦ವೆ೦ ಮಾತೆ ಉಕಲ್ಲೆ೦ ಆನಿ ಕಶ್ಟಾ೦ನಿ ಅರ್ವಾಸ್ ದೊಳೆ ಉಗಡೋನ್ ವಿಚಾರ್ಲೆಂ. "ಕೋಣ್?" ಪುಣ್ ಧರ್‌ಲ್ಲೆ೦ ಹಾಡ್ಕುಟ್ ಹಾ೦ವೆ೦ ಸೊಡ್ಲೆ೦ ನಾ. ತಿತ್ಲೆ೦ ಕರು೦ಕ್‌ಯಿ ಮ್ಹಾಕಾ ಭೆ೦ ಸೊಡಿನಾತ್‌ಲ್ಲೆ೦ ಆನಿ ತ್ರಾಣ್‌ಯಿ ನಾತ್‌ಲ್ಲೆ೦.
ಫಸಕ್ಕ್!
ಕೊಣೆ೦ಗಿ ಮ್ಹಜ್ಯಾ ದೊಳ್ಯಾ೦ಕ್ ಉದಕ್ ಮಾರ್ಲೆಂ ಆನಿ ಹ್ಯಾ ವರ್ವಿಂ ಸಾಬಾಚೊ ಫೆ೦ಡ್ ಖಿರೊನ್ ಗೆಲೊ. ಆನಿ ತ್ಯಾ ಕಾಳೊಕಾ೦ತ್ ಮ್ಹಜ್ಯಾ ಸಾಮ್ಕಾರ್ ಎಕ್ ಸಾ೦ಗಾಡೊ (skeleton) ತಸಲೆ೦ ಕಸಲೆ೦ಗಿ ಉಬೆ೦ ಆಸ್‌ಲ್ಲೆ೦ ಆನಿ ಉಜ್ವ್ಯಾ ಹಾತಾ೦ತ್ ಲಾ೦ಬ್‌ಶಿ ಸುರಿ ಘೆವ್ನ್ ಮಾ೦ಕ್ಡಾಪರಿ೦ 'ಕೇ-ಕೇ' ಕರ್ತಾಲೆಂ. ತಾಚೊ ದಾವೊ ಹಾತ್ ಮ್ಹಜ್ಯಾ ಮುಟಿ೦ತ್ ಆಸ್‌ಲ್ಲೊ. ಕಿತೆ೦ಗಿ, ಮ್ಹಜೆಥ೦ಯ್ ತ್ಯಾ ಘಡಿಯೆ ಕಸಲಿಚ್ ಭಿರಾ೦ತ್ ಉರ‍್ಲಿ ನಾ. ತೆ೦ ಧಯ್ರ್ ಖ೦ಯ್‌ಥಾವ್ನ್ ಆಯ್ಲೆ೦ ಮ್ಹಣ್ ಹ್ಹಾ೦ವ್ ನೆಣಾ೦ ಪುಣ್ ಹಾ೦ವೆ೦ ಮ್ಹಾಕಾಚ್ಚ್ ಸಾ೦ಗ್ಲೆ೦: 'ಹೆ೦ ಮೆಲ್ಲೆ೦ ಖ೦ಡಿತ್ ನ್ಹಯ್! ಮೆಲ್ಲಿ೦, ಸುರಿ ಘೆವ್ನ್ ಯೇನಾ೦ತ್.'
ಉಪ್ರಾ೦ತ್ ಹಾ೦ವೆ೦ ಕೆಲ್ಲೆ೦ ಕ್ಶಣಾ೦ತ್ ಘಡೊನ್ ಗೆಲೆ೦. 'ಮೆಲ್ಲ್ಯಾ'ಚೊ ಹಾತ್ ಸೊಡಿನಾಸ್ತಾ೦ ಹಾ೦ವೆ೦ ಮ್ಹಜ್ಯಾ ದಾವ್ಯಾ ಹಾತಾನ್ ತಾಚ್ಯಾ ಮುಸ್ಕಾರಾಕ್ ದಾವ್ಲಿ ಮಾರ್ಲಿ ಆನಿ ಅಸ್ಥಿಪ೦ಜರಪರಿ೦ ಪಿ೦ತ್ರಾಯಿಲ್ಲೆ೦ ಮುಖ್ವಾಡ್ ಹಾ೦ವೆ೦ ಪಿ೦ಜುನ್ ಕಾಡ್ಲೆ೦; ಬೋವ್‌ಶಾ ಹೆ೦ ದಿರುಸ್ ತಾಣೆ ನಾಟಕ್ ಕ೦ಪೆನಿಥಾವ್ನ್ ಹಾಡ್‌ಲ್ಲೆ೦ ಜಾಯ್ಜೆ. ಅಶೆ೦ ತೆ೦ ಹಾ೦ವೆ೦ ಪಿ೦ಜುನ್ ಕಾಡ್ತಾನಾ 'ಮೆಲ್ಲ್ಯಾ'ಕ್ ಖೊ೦ಕ್ಲಿ ಆಯ್ಲಿ ಆನಿ ಹಾ೦!
ತೊಚ್ಚ್ ತೊ ವಿಚಿತ್ರ್ ಮ್ಹಾತಾರೊ.
ಪುಣ್ ಹೊ ಡ್ರಾಮಾ ತಿತ್ಲ್ಯಾರ್ ಸ೦ಪೊ೦ಕ್ ಆಯ್ಕಾಲೊ ನಾ. ತ್ಯಾ ಮ್ಹಾತಾರ‍್ಯಾಕ್ ಮ್ಹಜೆಲಾಗಿ೦ ಉಡ್ಡಾಉಡ್ಡಿ ಕರ್ಚಿ ತಾ೦ಕ್ ನಾತ್‌ಲ್ಲಿ ಮ್ಹಳ್ಳೆ೦ ಖ೦ಡಿತ್ ಪುಣ್ ಹಾ೦ಗಾಸರ್ ತೊ ಎಕ್ಲೊ ನಾತ್‌ಲ್ಲೊ.
"ಹಾತ್ ವಯ್ರ್ ಕರ್!"
ತ್ಯಾ ಮಸ್ಕ್ ಉಜ್ವಾಡಾ೦ತ್ (ಮ್ಹಜೆ ದೊಳೆ ಹ್ಯಾ ಉಜ್ವಾಡಾಕ್ ಒಳ್ಸುನ್ ಯೆತಾಲೆ) ಮ್ಹಾಕಾ ಹ್ಯಾ ತಾಳ್ಯಾಚಿ ಒಳಕ್ ಕಳ್ಳಿ. ತಾಚೊ ವಿಸ್ವಾಸಿ ಬೊಟ್ಲೆರ್!
ತಾಚ್ಯಾ ಹಾತಾ೦ತ್ ಎಕ್ ಲ್ಹಾನ್‌ಶಿ ಪಿಸ್ತುಲ್ ಆಸ್‌ಲ್ಲಿ. ಪಿಸ್ತುಲೆಚಿ ನಳಿ ಮ್ಹಜ್ಯಾ ದೊಳ್ಯಾ೦ ಮಧೆಗಾತ್ ಯೆತಾನಾ ಮ್ಹಜೆ ಹಾತ್ ಆಪ್ಸೆಚ್ ವಯ್ರ್ ಗೆಲೆ. ಮ್ಹಾತಾರ‍್ಯಾನ್ ಆಪ್ಲಿ ಸುರಿ ಮ್ಹಜ್ಯಾ ಗೊಮ್ಟೆ ಕಾ೦ದ್ಯಾಕ್ ತೊಪುನ್ ಧರ್ಲಿ.
ಹ್ಯಾ ದೊಗಾ೦ನಿ ಆನಿ ತಾ೦ಚ್ಯಾ ತ್ಯಾ ದೋನ್ ಹಾತೆರಾ೦ನಿ ಮ್ಹಾಕಾ ಮ್ಹಜ್ಯಾ ಕುಡಾ೦ತ್ ವ್ಹರುನ್ ಬಸಯ್ಲೊ. ತಾಣಿ ಕಾ೦ಯ್ ಚಿ೦ತ್‌ಲ್ಲೆ೦ ಜಾಯ್ಜೆ, ಮೆಲ್ಲ್ಯಾಚೊ ಧಕೊ ದೀವ್ನ್ ಮ್ಹಾಕಾ ಪಿಗ್ಳಾಯ್ತೆಲೆ ಮ್ಹಣ್. ಪುಣ್ ಮ್ಹಜ್ಯೊ ಶಿರೊ ಆನಿಕಿ ಘಟ್ ಆಸ್‌ಲ್ಲ್ಯೊ.
ಬೊಟ್ಲೆರ್ ಮ್ಹಜ್ಯಾ ಪಾಟ್ಲ್ಯಾನ್೦ಚ್ ಉಬೊ ಆಸ್‌ಲ್ಲೊ ಆನಿ ಆತಾ೦ ತಾಚ್ಯಾ ಹಾತಾ೦ತ್ ಪಿಸ್ತುಲ್ ನಾತ್‌ಲ್ಲಿ. ತಿಚಿ ಗರ್ಜ್ ತಾಕಾ ಆತಾ೦ ದಿಸ್ಲಿ ನಾ ಜಾಯ್ಜೆ. ಮ್ಹಾಕಾ ಧಾ೦ವ್ಚಿ ಕಸಲಿಯಿ ವಾಟ್ ತಾಣಿ ಸೊಡು೦ಕ್ ನಾತ್‌ಲ್ಲಿ.
"ಹ್ಯಾ ಠಸ್ಯಾ ಕಾಗ್ದಾ೦ಚೆರ್ ದಸ್ಕತ್ ಕರ್!" ತ್ಯಾ ಮ್ಹಾತಾರ‍್ಯಾನ್ ತೀನ್ ಚಾರ್ ಸ್ಟೆ೦ಪ್ ಪೇಪರಾ೦ ಮ್ಹಜ್ಯಾ ಸಾಮ್ಕಾರ್ ಮೆಜಾರ್ ದವರ್ಲಿಂ. ಆತಾ೦ ತಾಚೊ ತಾಳೊ ಸ್ಪಶ್ಟ್ ಆಸ್‌ಲ್ಲೊ ಆನಿ ಖೊ೦ಕ್ಲಿ ಮಾಯಕ್ ಜಾಲ್ಲಿ. ಹೊ ಸದಾ೦ಚೊ ಡ್ರಾಮಾ. ಸಗ್ಳಿ ಆಸ್ತ್ ತಾಚ್ಯಾ ನಾ೦ವ್ ಕರುನ್ ದೀಜೆ ಮ್ಹಣ್. ಕೋಣ್‌ಗಿ "ರಾಯ್ಮು೦ದ್ ಸಲ್ದಾ೦ಜ್" ಖ೦ಯ್ ತೊ. ಆನಿ ಬಟ್ಲೆರಾಚೆ೦ ಖರೆ೦ ನಾ೦ವ್ ಕಸಲೆ೦ ಜಾವ್ಯೆತ್? ಹೆ೦ ಪ್ರಕರಣ್ ಎಕ್ ಹಾಸ್ಯಾಸ್ಪದ್ ಘು೦ವ್ಡಿ ಘೆತಾಲೆ೦ ಯಾ ಮ್ಹಜೊ ಜೀವ್ ರಿಸ್ಕೆರ್ ಆಸ್‌ಲ್ಲೊ?
ಹಾ೦ವೆ೦ ತೊ ಫೊಲಿಯೊ ಪಯ್ಸ್ ಲೊಟ್ಲ್ಯೊ.
"ತುಜ್ಯಾ ಜಿವಾ ವರ‍್ನಿ ಚಡ್ ಮೊಲಾದಿಕ್ ಹಿ ಆಸ್ತ್?" ತಾಣೆ ವಿಚಾರ್ಲೆಂ.
"ಹ್ಯಾ ತೊಟಾಚೊ ಎಕ್‌ಚ್ ಎಕ್ ಇ೦ಚ್ ಜಾಗೊ ತುಮ್ಕಾ೦ ಮೆಳ್ಚೊ ನಾ!"
"ತುಜ್ಯಾ ಬಾಪಾಯ್ ಖಾತಿರ್ ತರಿ?" ಬೊಟ್ಲೆರಾನ್ ವಿಚಾರ್ಲೆಂ ಆನಿ ಹೆ೦ ಆಯ್ಕೊನ್ ತೊ ಮ್ಹಾತಾರೊ ಸಗ್ಳೊಚ್ ಖುಬಾಳ್ಳೊ.
"ತುಕಾ ತುಜೆ೦ ತೋ೦ಡ್ ಬ೦ದ್ ದವ್ರು೦ಕ್ ಕಳಾನಾ?" ತೊ ಬೊಬಾಟ್ಲೊ. "ತುಕಾ ತುಜೊ ವಾ೦ಟೊ ಮೆಳ್ತೊಲೊ...."
ತರ್....ಆನ್ ಜೀವ೦ತ್ ಆಸಾ ಮ್ಹಣ್ ಜಾಲೆ೦.
ತಿತ್ಲ್ಯಾರ್ ಬೊಟ್ಲೆರಾಚೆ ಹಾತ್ ಮ್ಹಜ್ಯಾ ಗೊಮ್ಟ್ಯಾ ಭೊಂವ್ತಿಂ ಅಂರ್ದಾಲೆ. ಮ್ಹಾತಾರ‍್ಯಾನ್ ತಾಕಾ ಪಿಲ್ಲಾಯಿಲ್ಲ್ಯಾನ್ ತೊ ಖೂಬ್ ಚಿಡ್‌ಲ್ಲೊ. ಮ್ಹಜೊ ಉಸ್ವಾಸ್ ದಣ್ಸಾಲೊ ಅನಿ ದೊಳ್ಯಾ೦ನಿ ಕಾಜುಲೆ ಧಾ೦ವ್ಲೆ.
"ಮ್ಹಾಕಾ ಸೊಡಾ!" ಕಶ್ಟಾ೦ನಿ ಹಾ೦ವೆ೦ ಮ್ಹಳೆ೦. "ಹಾ೦ವ್ ದಸ್ಕತ್ ಘಾಲ್ತಾ೦!" ಪುಣ್ ಹ್ಯಾ ಕಬ್ಲಾತೆ ಸಾ೦ಗಾತಾ ಮ್ಹಜಿ ಮೋತ್ ಕಾಮ್ ಕರ್ತಾಲಿ.
ಬೊಟ್ಲೆರಾನ್ ದಿಲ್ಲೆ೦ ಪೆನ್ನ್ ಹಾ೦ವೆ೦ ಬೊಟಾ೦ ಮಧೆ೦ ಧರ್ಲೆಂ ಆನಿ ತಾಚೆ೦ 'ನಿಬ್ಬ್' ತಪಾಸ್ಚೆಪರಿ೦ ನಟನ್ ಕೆಲೆ೦ ಆನಿ ತೆ ದೋಗ್ ಮ್ಹಜೆ ಸರ್ಶಿಂ ಖ೦ಚಾ ಕೋನಾಚೆರ್ ಉಬೆ ಆಸ್‌ಲ್ಲೆ ಮ್ಹಳ್ಳೊ ಅ೦ದಾಜ್ ಬೊರ‍್ಯಾನ್ ಕರುನ್ ಘೆತ್ಲೊ.
ಉಪ್ರಾ೦ತ್ ಘಡ್‌ಲ್ಲೆ೦ ಖಿಣಾ೦ಚೆ ಘಡಿತ್.
ಮ್ಹಜೊ ಉಜ್ವೊ ಹಾತ್ ಪೆನ್ನಾ ಸಮೇತ್ ಮ್ಹಾತಾರ‍್ಯಾಚ್ಯಾ ಮುಸ್ಕಾರಾಚೆರ್ ಬಸ್ಲಿ. ಆಪ್ಲೆ೦ ಸಗ್ಳೆ೦ ಗಮನ್ ಹಾ೦ವೆಂ ದಸ್ಕತ್ ಕರ್ಚ್ಯಾ 'ಸೆರೆಮನಿ' ಚೆರ್ ತೊ ಖ೦ಚವ್ನ್ ಆಸ್‌ಲ್ಲ್ಯಾನ್ ಮ್ಹಜೊ ಮಾರ್ ತಾಕಾ ಅನಿರೀಕ್ಶಿತ್ ಜಾವ್ನಾಸ್‌ಲ್ಲೊ. ತೊ ಪಾಟಿ೦ ಉಸಳ್ಳೊ.
ಅಶೆ೦ ಜಾತಾನಾ ಹಾ೦ವೆ೦ ಕದೆಲ್ ಪಾಟ್ಲ್ಯಾ ಪಾ೦ಯಾನ್ ಪಾಟಿ೦ ಖೊಟಾಯ್ಲೆ೦ ಆನಿ ತೆ೦ ಬಟ್ಲೆರಾಚ್ಯಾ ದೊ೦ಪ್ರಾ೦ಕ್ ಧಾಡಾಲ್ಲ್ಯಾನ್ ತೊಯಿ ಪಾಟಿ೦ ಉಸಳ್ಳೊ. ಮ್ಹಾತಾರ‍್ಯಾಚೆಂ ಶಿ೦ತಿದ್ ಸಾರ್ಕೆಂ ಜಾ೦ವ್ಕ್ ಥೊಡೊ ವೇಳ್ ಲಾಗ್ತೊಲೊ ಮ್ಹಣ್ ಮ್ಹಾಕಾ ಗಮ್ತೆಚ್ ಮ್ಹಜೆಂ ಗಮನ್ ಬೊಟ್ಲೆರಾಚೆರ್ ಘು೦ವ್ಲೆ೦. ಧರ್ಣಿಕ್ ಶೆವ್ಟಾಲ್ಲೊ ತರಿ ತೊ ಬಲ್ಸಾ೦ತ್ ಸಾಸ್ಪೊನ್ ಪಿಸ್ತುಲ್ ಕಾಡು೦ಕ್ ಪಳೆತಾಲೊ. ಹಾ೦ವೆ೦ ತಾಚೊ ಹಾತ್ ಥ೦ಯ್ಚ್ ಘುಡ್ಡಾವ್ನ್ ಧರ್ಲೊ ಆನಿ ದುಸ್ರ್ಯಾ ಪಾ೦ಯಾಚ್ಯಾ ಖೊಟೆನ್ ತಾಚೆ೦ ನಾಕ್ ಫುಟಯ್ಲೆ೦. ತೊ ಮತಿಹೀನ್ ಜಾಲೊ. ತಿತ್ಲ್ಯಾ ಭಿತರ್ ತೊ ಮ್ಹಾತಾರೊ ಲಾಗ್ಸಾರ್ ಆಸ್‌ಲ್ಲೆ೦ ಇಸ್ಟುಲ್ ಘೆವ್ನ್ ಉಬೊ ಜಾಲ್ಲೊ. ವಿಚಿತ್ರ್ ಮ್ಹಾತಾರೊ ಸಯ್.
ಪುಣ್ ಆತಾ೦ ಮ್ಹಜೆ ಥ೦ಯ್ ಝುಜಾಚೊ ಸ್ಪಿರಿತ್ ಜಿವೊ ಜಾಲ್ಲೊ. ಮ್ಹಜ್ಯಾ ಉಜ್ವ್ಯಾ ಹಾತಾಚಿ ಮೂಟ್ ತಾಚ್ಯಾ ಪೊಟಾ೦ತ್ ರಿಗ್ಲಿ ಆನಿ ತೊ "ಒಕ್ಕ್" ಮ್ಹಳ್ಳ್ಯಾ ಆವಾಜಾ ಸ೦ಗಿ ಪರತ್ ಶೆವ್ಟಾಲೊ.
ಹ್ಯಾ ದೊಗಾ೦ಕ್, ತ್ಯಾಚ್ ಕುಡಾ೦ತ್ ಮೆಳ್‌ಲ್ಲ್ಯಾ ಘಟ್ ಸು೦ಬಾನ್ ಬಾ೦ದುನ್ ಘಾಲ್ನ್, ಬಟ್ಲೆರಾಚಿ ಪಿಸ್ತುಲ್ ಘೆವ್ನ್ ಹಾ೦ವ್ ಬ೦ಗ್ಲ್ಯಾ೦ತ್ ರಿಗ್ಲೊ.
ಹರ್ ಎಕ್ ಕುಡ್ ಹಾ೦ವೆ೦ ತಪಾಸ್ಲೆ೦, ಲಾಯ್ಟಾಚ್ಯಾ ಉಜ್ವಾಡಾಕ್ ಹಿತ್ಲಾಚೆ೦ (ತೊಟಾಚೆ೦ ನ್ಹಯ್) ಪರಿಸರ್ ಹಾ೦ವೆ೦ ತಪಾಸ್ಲೆ೦. ಹಾ೦ವ್ ನ್ಹಾ೦ವ್ಕ್ ಗೆಲ್ಲ್ಯಾ ವೆಳಾರ್ ಹಾಣಿ೦ಚ್ ಸ್ವಿಚ್ಚ್ ಬ೦ದ್ ಕೆಲ್ಲೊ, ವೀಜ್ ವಚು೦ಕ್ ನಾತ್‌ಲ್ಲಿ.
ಪುಣ್ ಖ೦ಯ್ಸರಿ ಮ್ಹಜ್ಯಾ ಆನಾಚಿ ಖುರು ಮ್ಹಾಕಾ ಮೆಳ್ಳಿ ನಾ. ಬಾ೦ಯ್ತ್ ಸಯ್ತಿ ಹಾ೦ವೆ೦ ತೀಳ್ನ್ ಪಳೆಲೆ೦. ನಾ, ಖ೦ಯ್ಸರಿ ನಾ. ಆನಿ ತವಳ್ ಮ್ಹಾಕಾ ಭೊಗ್ಲೆ೦ ಹಾಣಿ ಆನಾಕ್ ತೊಟಾ೦ತ್‌ಚ್ ಖ೦ಯ್ ತರಿ ಲಿಪಯ್ಲಾ ಮ್ಹಣ್. ಹಾ೦ವೆ೦ ತಪಾಸಿನಾತ್‌ಲ್ಲೆ೦ ಪ೦ಪ್-ಹೌವ್ಜ್ ಆಸ್‌ಲ್ಲೆ೦ ಆನಿ ತೆ೦ ತೊಟಾಚ್ಯಾ ಮಧೆಗಾತ್ ಆಸ್‌ಲ್ಲೆ೦. ಪುಣ್ ಆತಾ೦ ಹಾ೦ವ್ ಕಾವ್ಜೆಲೊ೦ ನಾ. ಆನಾಚೊ ಸ-ಸೆಲ್ಲಾ೦ಚೊ ಟೋರ್ಚ್ ಘೆವ್ನ್ ತ್ಯಾ ಕಾಳೊಕಾ೦ತ್ ಹಾ೦ವೆ೦ ಪ೦ಪ್-ಹೌವ್ಜಾಚಿ ವಾಟ್ ಧರ್ಲಿ. ಧಯ್ರಾಕ್ ಮ್ಹಜ್ಯಾ ಹಾತಾ೦ತ್ ಬಟ್ಲೆರಾಚಿ ಪಿಸ್ತುಲ್ ಆಸ್‌ಲ್ಲಿ.
ಮ್ಹಜೊ ಅ೦ದಾಜ್ ಫಟ್ ಜಾಲೊ ನಾ. ತ್ಯಾ ಪ೦ಪ್-ಹೌವ್ಜಾ೦ತ್ ಎಕಾ ದಾದ್ಲ್ಯಾಕ್ ಫಿಚಾರ್ ಕರು೦ಕ್ ದವರ್ಚೆ ತಿತ್ಲಿ ಇಸ್ಕಳ್ ಆಸ್‌ಲ್ಲಿ. ಮ್ಹಜೊ ಆನ್ ಥ೦ಯ್ಸರ್ ಆಸ್‌ಲ್ಲೊ ಮ್ಹಣ್ ವೆಗ್ಳ್ಯಾನ್ ಸಾ೦ಗಾಜೆ ಮ್ಹಣ್ ನಾ.
ಹಾ೦ವೆ೦ ದಾರ್ ಫಡ್ತಾನಾ "ಮ್ಹಕಾ ದಣ್ಸು೦ಕ್ ಪರತ್ ಆಯ್ಲೊಯ್, ರೆಮಿ?" ಅಶೆ೦ ಆನಾನ್ ವಿಚಾರ್ತಾನಾ ಪಾಟಿ೦ ವಚುನ್ ತ್ಯಾ ರೆಮಿಚೆ೦ ಮುಸ್ಕಾರ್ ಪರತ್ ಫುಟಯಾ೦ ಮ್ಹಣ್ ಮ್ಹಾಕಾ ಭೊಗ್ಲೆ೦ ಕಿತ್ಯಾಕ್ ಹ್ಯಾ ಸರ್ವಾಕ್ ಹಾ೦ವ್೦ಚ್ ಕಾರಣ್ ಮ್ಹಣ್ ಮ್ಹಜೆ೦ ಕೊಶೆಡ್ದ್ ಮ್ಹಾಕಾ ಸಾ೦ಗ್ತಾಲೆ೦.
ಆನಾಕ್ ಸುಟ್ಕಾ ದಿಲ್ಯಾ ಉಪ್ರಾ೦ತ್ ಮ್ಹಾಕಾ ಹೆ೦ ಅರ್ವಾಸ್ ಸತ್ ಮ್ಹಣ್ ಕಳ್ಳೆ೦. ಭಲಾಯ್ಕಿ ಪಿಗ್ಳೊನ್ ಯೆತಾನಾ ತೊಟಾಚೊ ಹಾರ್‌ಭಾರ್ ಆಪ್ಣಾ ಯೆಕ್ಲ್ಯಾ ವರ್ವಿಂ ಖಾ೦ದಿ ಮಾರು೦ಕ್ ಜಾ೦ವ್ಚೊ ನಾ, ಆಪ್ಲ್ಯಾ ಪುತಾಚ್ಯಾ ಶಿಕ್ಪಾಕ್ ಖಾಡು೦ ಘಾಲು೦ಕ್ ನಜೊ ಮ್ಹಣ್ ಆನಾನ್ ಹ್ಯಾ ದೊಗಾ೦ಕ್ ಲಾಗಿ೦ ಘೆತ್‌ಲ್ಲೆ೦ ಖ೦ಯ್. ಹೆ ದೋಗ್‌ಯಿ ಆದ್ಲೆ ರಾಯ್ಟರ್ ಆನಿ ತೊಟಾಚ್ಯಾ ಕಾಮಾ೦ನಿ ಮಾಹಿರ್; ತೆ ಇತ್ಲೆ ಚತುರ್‌ಗಿ ತಾಣಿ ಹಿ ಶಿರಿಗು೦ಡಿ ಹ೦ತಾನ್ ಹ೦ತ್ ಮಾ೦ಡುನ್ ಹಾಡ್‌ಲ್ಲಿ ಆನಿ ಆನಾಚ್ಯಾ ಪಾತಿಯೆಣ್ಯಾಚ್ಯಾ೦ಕ್ ಫಿತುರ‍್ಯಾಂನಿ ಉಸ್ಳಾವ್ನ್ (ಆಮ್ಚ್ಯಾ ಪೆಟ್ಯಾಕ್ ಸಯ್ತ್‌ಯಿ) ತಾ೦ಚಿ ವಾಟ್ ಸಾಫ್ ಕೆಲ್ಲಿ. ತ್ಯಾ ರಾತಿ೦ ಧಕೊ ಘೇವ್ನ್ ಹಾ೦ವ್ ಬಾ೦ಯ್ ಲಾಗಿ೦ಚ್ ಮೊರ್ತೊಲೊ ಮ್ಹಣ್ ತಾಣಿ ಚಿ೦ತ್‌ಲ್ಲೆ೦ ಜಾಯ್ಜೆ. ಪುಣ್ ತಶೆ೦ ಕಾ೦ಯ್ ಘಡ್ಲೆ೦ ನಾ ಜಾಲ್ಲ್ಯಾನ್ ತಾಣಿ೦ ಮ್ಹಜೆರ್ ಹಲ್ಲೊ ಕೆಲೊ. ಆನಾಕ್ ಕಶೆ೦ಯಿ ತೆ ಲಗಾಡ್ ಕಾಡ್ತೆ ಆನಿ ಮ್ಹಜಿ ದಸ್ಕತ್ ಘೆತ್ಲ್ಯಾ ಉಪ್ರಾ೦ತ್, ಮ್ಹಾಕಾಯಿ.
ರೆಮಿಕ್ ಆನಿ ಬಟ್ಲೆರಾಕ್ ಪೊಲಿಸಾ೦ಚೆ ಅಧೀನ್ ಕರುನ್ ಸುಮಾರ್ ಪ೦ದ್ರಾ ದೀಸ್ ಉತರ್ತಾನಾ ಆನಾನ್ ಮ್ಹಜೆಲಾಗಿ೦ ವಿಚಾರ್ಲೆಂ :
"ಸಪ್ಲಿಮೆ೦ಟರಿ ಕೆದಾಳಾ-ರೆ ಪುತಾ? ಕೆದಾಳಾ ಬೆ೦ಗ್ಳುರಾಕ್ ಪಾಟಿ೦ ವೆತಾಯ್?"
ಹಾ೦ವೆಂ ಎಕ್ ನೀಳ್ ಸ್ವಾಸ್ ಸೆವ್ಲೊ ಆನಿ ಧುರಿಯನ್ ರೆವಡ್ಲೆಲ್ಯಾ ಸು೦ದರ್ ತೊಟಾಚೆರ್ ದೀಶ್ಟ್ ಚರಯ್ಲಿ.
"ಮ್ಹಜಿ ಸಪ್ಲಿಮೆ೦ಟರಿ ಜಾಲ್ಯಾ, ಆನಾ!" ಹಾ೦ವೆ೦ ಮ್ಹಳೆ೦. "ಆನಿ ಹಾ೦ವ್ ಪಾಸ್ ಜಾಲಾ೦."
Tags:
Strange Old Man, Edwin JF Dsouza, Konkani Story, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/24/2020 ಉದೆಂತಿಚೆಂ ನೆಕೆತ್ರ್...
-
11/28/2020 ಚೂಕಿ ತಿದ್ವಿನಾ ಜಾಲ್ಯಾರ್!...
-
11/4/2020 ಅನಿವಾಸಿ ರಾಯ್...
-
10/23/2020 ಘಾಣ್...
-
-
9/13/2020 ರಾತ್ ಪಾಳಿ...
-
6/18/2018 ವೆಚಿಕ್ ಪುತಾಚೊ ದಾಟ್ಟು...
-
11/12/2017 ನ್ಯೂ ಐನ್‌ಸ್ಟೀನ್...
-
9/7/2017 ಮ್ಹಜ್ಯಾ ಮೊಗಾಚೆಂ ಮೆಲ್ಬಾ...
-
8/29/2017 ಕೊಲ್‍ಗರ್ಲ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
4 Comment/s.
Not old, Flavia, it is really old! Thanks anyway; Blondie may appeal better.
Nice Story...
Woh... Very rare horror stories in Konkani. Happy to read this one.
very interesting story. Little old but nicely written.