From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಗುನ್ಯಾಂವ್ ಆನಿ ಶಿಕ್ಷಾ
Tuesday, October 25, 2016
ಶಹರಾಥಾವ್ನ್ ಸುಮಾರ್ ಪಾಂಚ್ ಮಯ್ಲಾಂ ಪಯ್ಶಿಲ್ಯಾ ತ್ಯಾ ಹಳ್ಳೆಂತ್ಲೊ ಚಡಾವತ್ ಲೋಕ್ ದುಬ್ಳೊ. ಶಿಕಾಪ್ ನಾತ್‍ಲ್ಲೊ. ಥೊಡ್ಯಾಂಕ್ ಗಾದೆ ಬೆಸಾಯ್ ಆಸ್‍ಲ್ಲೊ ತರ್ ಹೆರ್ ಲೋಕ್ ಕಸಲಿ ತರಿ ವ್ಯಾಪ್ತ್ ಕರ್ನ್ ಘರ್ ದಾರ್ ಚಲಯ್ತಾಲೊ.
ಪಯ್ಸ್ ಪಯ್ಸ್ ಘರಾಂ. ಗರ್ಜೆಚ್ಯೆ ವಸ್ತುಂ ಖಾತಿರ್ ಪಯ್ಸಿಲ್ಯಾ ಶಹರಾಕ್ ವಚಾಜೆ. ನ್ಹಯ್ ತರ್ ಲ್ಹಾನ್ ಗರ್ಜೆಂ ಖಾತಿರ್ ಲಾಗ್ಸಿಲ್ಯಾ ಪೇಂಟ್ ಮ್ಹಣ್ ಆಪಂವ್ಚ್ಯಾ ಕುಕ್ಕುಕಟ್ಟೆ ಮ್ಹಳ್ಳ್ಯಾಕಡೆ ವಚಾಜೆ.
ಹ್ಯಾ ಜಾಗ್ಯಾರ್ ಏಕ್ ಲ್ಹಾನ್ಶೆಂ ಪೋಸ್ಟ್ ಆಫಿಸ್, ಕೊಂಕ್ಣ್ಯಾಚಿ ಜಿನ್ಸಾಚಿ ಆಂಗಡ್, ಶೆಟ್ಟಿಚೆಂ ಏಕ್ ಚ್ಹಾಯೆಚೆಂ ಹೊಟೆಲ್, ಕೆಲ್ಶ್ಯಾಚೆಂ ಸೆಲೂನ್, ಆನಿ ಏಕ್ ಸರ್ಕಾರಿ ಬಾಂಯ್ ಆಸ್‍ಲ್ಲಿ. ಆನಿ ಪ್ರಮುಖ್ ಜಾವ್ನ್ ಸಾತ್ವಿ ಕ್ಲಾಸ್ ಪರ್ಯಾಂತ್ ಶಿಕಾಪ್ ದಿಂವ್ಚೆಂ ಇಸ್ಕೊಲ್ ಆಸ್‍ಲ್ಲೆಂ.
ಮುಖೆಲ್ ಮೆಸ್ತ್ರಿ ಹೆಗ್ಡೊ ಭಾರಿಚ್ ಶಿಸ್ತೆಚೊ ಮನಿಸ್. ಭುರ್ಗ್ಯಾಂನಿ ವೆಳಾರ್ ಕ್ಲಾಸಿಂತ್ ಆಸೊಂಕ್ ಜಾಯ್. ವಾರೆಂ ಪಾವ್ಸ್ ಆವ್ರ್ ಆಯ್ಲ್ಯಾರೀ ಇಸ್ಕೊಲಾಕ್ ಯೆಂವ್ಚೆಂ ಚುಕೊಂಕ್ ನಜೊ. ಉದಾಕ್ ಭರೊನ್ ನಂಯ್ ಉತ್ರೊಂಕ್ ಜಾವ್ನಾ, ಸತ್ರಿ ನಾತ್‍ಲ್ಲಿ, ಘರಾ ಕೊಣ್ ತರಿ ಪಿಡೇಸ್ತ್ ಆಸಾ, ಸರ್ಲ್ಯಾಂತ್.... ಅಸಲಿಂ ನಿಬಾಂ ಬಿಲ್ಕುಲ್ ಚಲನಾಂತ್. ಹಪ್ತ್ಯಾಂತ್ಲೊ ನಿಮಾಣೊ ದೀಸ್ ಸುಕ್ರಾರ್ ಶಿಸ್ತ್ ಭಂಗ್ ಕೆಲ್ಲ್ಯಾಂಚಿ ಝಡ್ತಿ ಕರ್ಚೊ ದೀಸ್. ಮುಖೆಲ್ ಮೆಸ್ತ್ರಿ ಕ್ಲಾಸಿಚ್ಯಾ ಮೊನಿಟರಾನ್ ಧಾಡಾವ್ನ್ ದಿಲ್ಲಿ ಪಾನ್ ಫೊಡ್ ತೊಂಡಾಂತ್ ಚೆಪುನ್ ಆಪ್ಲೆಂ ಮೊಟೆಂ ಬೆತ್ ಉಕಲ್ತಾ ಆನಿ ಮೆಜಾಕ್ ಜೊರಾನ್ ತೀನ್ ಪಾವ್ಟಿಂ ಮಾರ್ತಾ. ಆವಾಜ್ ಆಯ್ಕೊನ್ ಸಗ್ಳೆಂ ಇಸ್ಕೊಲ್ ಶಾಂತ್ ಜಾತಾ. ಶಿಸ್ತ್ ಭಂಗ್ ಕೆಲ್ಲಿಂ ಭುರ್ಗಿಂ ಭಿಂಯಾನ್ ಕಾಂಪ್ತಾತ್.
ಪಯ್ಲ್ಯಾ ಆನಿ ದುಸ್ರ್ಯಾ ಕ್ಲಾಸಿಂತ್ಲ್ಯಾ ಭುರ್ಗ್ಯಾಂಕ್ ಭಿಯೆಂವ್ಕ್ ಕಾರಣ್ ನಾ. ತಿಂ ಲ್ಹಾನ್. ಏಕ್ ಧೆಂಕ್ಣೊ ಘಾಲ್ತಾನಾಂಚ್ ತಿಂ ಭಿಂಯಾನ್ ಮುತ್ತಾತ್ ದೆಕುನ್ ತಾಂಚಿ ಝಡ್ತಿ ಕರ್ಚೆಂ ನಿಯಮ್ ನಾತ್‍ಲ್ಲೆಂ.
ಚಡಾವತ್ ಭುರ್ಗಿಂ ಸ್ಪಷ್ಟೀಕರಣ್ ದೀನಾಂತ್. ಭಿಂಯಾನ್ ತೊಂಡ್ ಉಗ್ತೆಂ ಕರಿನಾಂತ್. ಸವಾಲಾಂ ವಿಚಾರ್ನ್ ಜಾತಚ್ ಮುಖೆಲ್ ಮೆಸ್ತ್ರಿ ಖುದ್ದ್ ಬೆತ್ ಘೆವ್ನ್ ಥೊಡ್ಯಾಂಚ್ಯಾ ತಳ್ವ್ಯಾ ಹಾತಾಕ್, ಥೊಡ್ಯಾಂಚ್ಯಾ ಪಾಟಿಕ್ ಆನಿ ಹೆರ್ ಥೊಡ್ಯಾಂಚ್ಯಾ ಕುಲ್ಯಾಂಕ್ ಮಾರ್ತಾ. ಚೆಡ್ವಾಂಕೀ ಹಿ ಶಿಕ್ಶಾ ಲಾಗು ಜಾತಾ. ಮಾರಾಂಚ್ಯೆ ದುಕಿವರ್ನಿಂ ಚಡ್ ಅಕ್ಮಾನ್ ಸೊಸುಂಕ್ ಜಾಯ್ನಾಸ್ತಾಂ ಭುರ್ಗಿಂ ದುಕಾಂ ಗಳಯ್ತಾತ್. ಉಬಾರ್ ಸ್ಟೇಜಿರ್ ರಾವೊನ್ ಸಕ್ಕಡ್ ಭುರ್ಗ್ಯಾಂ ಮುಕಾರ್ ಮಾರ್ ಖಾಂವ್ಚೊ ವ್ಹಡ್ ಅಕ್ಮಾನ್ ನ್ಹಯ್?
ಮುಖೆಲ್ ಮೆಸ್ತ್ರಿಚೆಂ ಹೆಂ ಕ್ರೂರ್ ವರ್ತನ್ ಹೆರ್ ಶಿಕ್ಷಕಾಂಕ್ ಪಸಂದ್ ನಾತ್ಲೆಂ. ಮುಖೆಲ್ ಮೆಸ್ತ್ರಿಚೆಂ ದರ್ಬಾರ್ ಚಾಲು ಜಾತಾನಾ ತೆ ಎಕೆಕ್ಲೆಚ್ ಮಾಯಾಕ್ ಜಾತಲೆ. ಲಾಗಿಂಚ್ ಆಸ್‍ಲ್ಲ್ಯಾ ಹೊಟೆಲಾಂತ್ ವಚೊನ್ ಬಸ್ತಾಲೆ. ಉಗ್ತೊ ಅಕ್ಮಾನ್ ಸೊಸುಂಕ್ ಜಾಯ್ನಾಸ್ತಾಂ ಎಕೆಕ್ಲೆಚ್ ವಿದ್ಯಾರ್ಥಿ ಇಸ್ಕೊಲ್ ಸೊಡ್ನ್ ವೆತಾತ್ ಮ್ಹಳ್ಳೆಂ ಸತ್ ತೆ ಜಾಣಾ ಆಸ್ಲೆ ತರೀ ಮಧೆಂ ಪಡ್ಚೆಂ ಧಯ್ರ್ ಕೊಣಾಕೀ ನಾತ್ಲೆಂ. ಭುರ್ಗ್ಯಾಂಕ್ ಕಿತ್ಲಿ ಕಠಿಣ್ ಶಿಕ್ಷಾ ದಿಲ್ಯಾರೀ ತಾಂಚಿಂ ವ್ಹಡಿಲಾಂ ವಿಚಾರ್ ಕರುಂಕ್ ಕಿತ್ಯಾಕ್ ಯೇನಾಂತ್ ಮ್ಹಳ್ಳೆಂ ನೀಬ್ ಆಪ್ಲಿಂ ತೊಂಡಾ ಬಂಧ್ ದವರುಂಕ್ ತಾಂಕಾಂ ಪಾವ್ತಾಲೆಂ. ದುಬ್ಳಿಂ ಅಶಿಕ್ಪಿ ವ್ಹಡಿಲಾಂ ಘರ್ಚೆಂ ಚಡ್ ಗರ್ಜೆಚೆಂ ಕಾಮ್ ಸೊಡ್ನ್ ಶಿಕ್ಪಿ ಮಾಸ್ತೆರಾಂ ಮುಕಾರ್ ಹಾಜರ್ ಜಾಂವ್ಕ್ ಪಾಟಿಂ ಸರ್ತಾತ್ ಮ್ಹಳ್ಳಿ ಗಜಾಲ್ ತಾಂಕಾಂ ಕಳಿತ್ ಆಸ್‍ಲ್ಲಿ. ತಶೆಂ ಜಾಲ್ಯಾರೀ ಭುರ್ಗ್ಯಾಂಚ್ಯಾ ವ್ಹಡಿಲಾಂಚಿಚ್ ಚುಕ್ ಕಾಡ್ನ್ ಆಪ್ಲ್ಯಾ ಜವಾಬ್ದಾರೆ ಥಾವ್ನ್ ಚುಕಾರಿ ಮಾರ್ಚೆಂ ತಾಂಕಾಂ ಚಡ್ ಸುಲಭ್ ಜಾವ್ನಾಸ್ಲೆಂ.
ಮುಖೆಲ್ ಮೆಸ್ತ್ರಿಚೊ ಎಕ್ಲೊಚ್ ಪುತ್ ರಾಜು ಆಪ್ಲ್ಯಾ ಬಾಪಯ್ಚ್ಯಾ ಅಧಿಕಾರಾಚೊ ಬರೊಚ್ ಫಾಯ್ದೊ ಜೊಡ್ತಾಲೊ. ಆಪ್ಲ್ಯಾ ಕ್ಲಾಸಿಂತ್ಲ್ಯಾ ಭುರ್ಗ್ಯಾಂ ವಿಶಿಂ ಥೊಡೆ ಪಾವ್ಟಿಂ ಖರೆ ಆನಿ ಥೊಡೆ ಪಾವ್ಟಿಂ ಫಟ್ಕಿರೆ ಆರೋಪ್ ಮಾಂಡುನ್ ತಾಂಕಾಂ ಶಿಕ್ಷಾ ಮೆಳಾಶಿ ಕರ್ನ್ ತೊ ಸಂತೊಸ್ ಭಗ್ತಾಲೊ. ಆಪ್ಣಾಕ್ ಜಾಯ್ನಾಂತ್ಲ್ಯಾಂಚ್ಯಾ ಬೆಗಾಂತ್ ಆಪ್ಲಿ ಪೆನ್ಸಿಲ್, ರಬ್ಬರ್, ಪುಸ್ತಕ್ ಇತ್ಯಾದಿ ಘಾಲ್ನ್ ಚೊರಿಯೆಚೊ ಆರೋಪ್ ಮಾಂಡ್ಚೆಂ ತಾಕಾ ಸದಾಂಚೆಂ ಜಾವ್ನ್ ಗೆಲ್ಲೆಂ. ಶಿಕ್ಷಾ ದಿಂವ್ಚೆ ಪಯ್ಲೆಂ ಪ್ರಾಮಾಣಿಕ್ಪಣಿ ತನ್ಕಿ ಕರ್ಚಿ, ಕೊಣೆ ತರೀ ಪಳೆಲಾಂಗಿ ಮ್ಹಣ್ ವಿಚಾರ್ಚಿ ಸವಯ್ ಮುಖೆಲ್ ಮೆಸ್ತ್ರಿಕ್ ನಾತ್‍ಲ್ಲಿಚ್.
ತ್ಯೆ ಇಸ್ಕೊಲಾಂತ್ ಆಸ್‍ಲ್ಲೊ ಎಕ್ ಮಾತ್ರ್ ಬ್ರಾಹ್ಮಣಾಂಚೊ ಚೆಡೊ ಶಿವ ಸಾತ್ವೆ ಕ್ಲಾಸಿಂತ್ ಫೇಯ್ಲ್ ಜಾಲ್ಲೊ. ಹರ್ಯೆಕ್ ವರ್ಸ್ ಪಾಸ್ ಜಾವ್ನ್ ರಾಜುಯಿ ತ್ಯೆಚ್ ಕ್ಲಾಸಿಕ್ ಪಾವ್ಲೊ. ಬ್ರಾಹ್ಮಣಾಂಚೊ ಚೆಡೊ ಶಿಕ್ಪಾಂತ್ ಥೊಡೊ ಪಾಟಿಂ ಆಸ್ಲೊ. ಲ್ಹಾನ್ ಆಸ್ತಾನಾಂಚ್ ತಾಚೊ ಬಾಪುಯ್ ಸರ್'ಲ್ಲೊ. ಮಾಲ್ಘಡ್ಯಾಂಚಿ ಆಸ್ತ್ ಆನಿ ಘರ್ ದಾರ್ ಬಾಪ್ಲ್ಯಾಚ್ಯಾ ಆದಿನ್ ಜಾಲ್ಲೆಂ. ಶಿವಾಚ್ಯಾ ವಿಧವ್ ಆವಯ್ಕ್ ಘರಾಂತ್ ಚಾಕರ್ನಿಬರಿ ಕಾಮ್ ಕರುಂಕ್ ಪಡ್ತಾಲೆಂ. ಬಾಪುಯ್ ಜೀವ್ ಆಸ್‍ಲ್ಲೊ ಜಾಲ್ಯಾರ್ ಆಪ್ಲ್ಯಾ ಆವಯ್ಕ್ ಮಾತ್ಯಾಚೆ ಕೆಸ್ ತಾಸುನ್, ಕಾಪ್ಡಾಚ್ಯಾ ವೊರ್ಲಾಂತ್ ಮಾತೆಂ ಲಿಪವ್ನ್ ರಾತ್ ಆನಿ ದೀಸ್ ಕಾಮ್ ಕರ್ನ್ ಸಯ್ತ್ ನಂಜ್ಯಾಳಿ ಉತ್ರಾಂ ಆಯ್ಕೊಂಕ್ ಮೆಳ್ತಿಂನಾಂತ್ ಮ್ಹಣ್ ಚಿಂತುನ್ ಶಿವ ಕರ್ಗತಾಲೊ. ಶಿವಾಕ್ ಆಪ್ಲ್ಯಾ ನಶೀಬಾನ್ ಹಳ್ಳೆಂತ್ಲ್ಯಾ ಇಸ್ಕೊಲಾಂತ್ ಶಿಕ್ಚಿ ಗತ್ ಯೆತಾನಾ ಬಾಪ್ಲ್ಯಾಚೆ ದೊಗೀ ಪುತ್ ಶಹರಾಂತ್ಲ್ಯಾ ಇಸ್ಕೊಲಾಂತ್ ಶಿಕ್ತಾಲೆ.
ರಾಜು ಶಿವಾಚ್ಯಾ ಪಾಟಿಕ್ ಲಾಗ್ಲೊ. ಶಿವಾಕ್ ಕಿತ್ಲೆಂ ಸತಯ್ಲ್ಯಾರೀ ಅಡ್ಕಳ್ ಹಾಡ್ಚೆ ಕೊಣೀ ನಾಂತ್ ಮ್ಹಳ್ಳೆಂ ತೊ ಜಾಣಾಸ್ಲೊ. ಘರಾ ವಚೊನ್ ದೂರ್ ದಿಲ್ಯಾರ್ ಬಾಪ್ಲ್ಯಾಚೆ ಆನಿ ಸಾಂಗತಾಚ್ ಆವಯ್ಚೆಯ್ ಮಾರ್ ಪಡ್ತಾತ್ ಮ್ಹಳ್ಳೆಂ ರಾಜುಕ್ ಕಳಿತ್ ಆಸ್ಲೆಂ. ಶಿವ ವಯ್ಲೆ ಜಾತಿಚೊ, ಹಳ್ಳೆಂತ್ಲ್ಯಾ ಏಕ್ ಮಾತ್ರ್ ದಿವ್ಳಾಂತ್ ಬಾಪ್ಲ್ಯಾ ಸಾಂಗಾತಾ ಪೂಜಾ ಆರತಿ ಕರ್ತಾ. ಲೊಕಾನ್, ಪ್ರತೇಕ್ ಜಾವ್ನ್ ಆಪ್ಲ್ಯಾ ಘರ್ಚ್ಯಾಂನಿ ತಕ್ಲಿ ಬಾಗವ್ನ್ ತಾಚ್ಯಾ ಹಾತಾಂತ್ಲೊ ಪ್ರಸಾದ್ ಸ್ವೀಕಾರ್ಚೆಂ ಪಳೆವ್ನ್ ರಾಜುಕ್ ರಾಗ್ ಯೆತಾಲೊ. ಶಿವಾಕ್ ಅಕ್ಮಾನ್ ಕರುಂಕ್, ಬಾಪಯ್ ಮಾರಿಫಾತ್ ತಾಕಾ ಶಿಕ್ಷಾ ದೀಂವ್ಕ್ ತೊ ಅವ್ಕಾಸ್ ರಚುನ್ ಘೆತಾಲೊ.
ಸಾತ್ವ್ಯಾ ಕ್ಲಾಸಿಂತ್ ಪಯ್ಲ್ಯಾಚ್ ಹಪ್ತ್ಯಾಂತ್ ರಾಜುನ್ ಶಿವಾಚೆರ್ ಚೊರಿಯೆಚೊ ಗುನ್ಯಾಂವ್ ಮಾಂಡ್ಲೊ. ಆಪ್ಲೊ ಇಂಗ್ಲೀಷ್ ಬೂಕ್ ತಾಣೆ ಚೊರಿ ಕೆಲಾ ಮ್ಹಣ್ ರಾಜುನ್ ದೂರ್ ದಿಲೆಂ. ಶಿವಾಚೆಂ ಬೆಗ್ ಉಗ್ತೆಂ ಕರ್ನ್ ಪಳೆತಾನಾ ಚೊರಿ ಜಾಲ್ಲೊ ಬೂಕ್ ಸಾಂಪಡ್ಲೊ. ಇಸ್ಕೊಲಾಚ್ಯಾ ಸಕ್ಕಡ್ ಭುರ್ಗ್ಯಾಂ ಮುಕಾರ್ ತಾಚ್ಯಾ ಪಾಟಿಕ್ ಬೆತಾಚೆ ಮಾರ್ ಪಡ್ಲೆ. ದುಸ್ರೆ ದೀಸ್ ಬಾಪ್ಲ್ಯಾಕ್ ಆಪವ್ನ್ ಹಾಡ್, ನ್ಹಯ್ ತರ್ ಚಡಿತ್ ಮಾರ್ ಖಾಂವ್ಕ್ ತಯಾರ್ ರಾವ್ ಮ್ಹಣ್ ಮುಖೆಲ್ ಮೆಸ್ತ್ರಿನ್ ಆದೇಶ್ ದಿಲೊ. ಶಿವಾನ್ ಘರಾ ವಚೊನ್ ಸಾಂಗ್ಲೆಂನಾ. ತಾಕಾ ಪರತ್ ಮಾರ್ ಪಡ್ಲೆ.
ಹಾತ್ ಬರಪ್ ಸುಂದರ್ ಜಾಂವ್ಚೆ ಖಾತಿರ್ ಇಂಗ್ಲೇಜಾಂತ್ ತೀನ್ ಗಿಟಾಂಚ್ಯಾ ಪುಸ್ತಕಾಂತ್ ಕೊಪಿ ಬರಂವ್ಕ್ ಆಸ್‍ಲ್ಲೆಂ. ಏಕ್ ದೀಸ್ ಕ್ಲಾಸಿಂತ್ಲ್ಯಾ ಎಕೆಕ್ಲ್ಯಾನ್ ಉಟೊನ್ ಆಪಾಪ್ಲೆಂ ಹೊಮ್ ವರ್ಕ್ ಮುಖೆಲ್ ಮೆಸ್ತ್ರಿಕ್ ದಾಕಯ್ಲೆಂ. ಶಿವಾನ್ ಆಪ್ಲೊ ಕೊಪಿ ಬೂಕ್ ಭಾಯ್ರ್ ಕಾಡ್ಲೊ ಆನಿ ತೆದಾಳಾಚ್ ರಾಜುನ್ ವ್ಹಡ್ಲ್ಯಾ ತಾಳ್ಯಾನ್ ಮುಖೆಲ್ ಮೆಸ್ತ್ರಿಕ್ ದೂರ್ ದಿಲೆಂ.
"ಸರ್, ಶಿವಾನ್ ಆಪ್ಲೊ ಕೊಪಿ ಬೂಕ್ ದಾಕಂವ್ಕ್ ನಾ. ತಾಣೆಂಚ್ ರಾಯ್ಟ್ ಕರ್ನ್ ತುಜಿ ದಸ್ಕತ್ ಕೆಲ್ಯಾ." ರಾಜುನ್ ಶಿವಾಚ್ಯಾ ಹಾತಾಂತ್ಲೊ ಬೂಕ್ ವೊಡ್ನ್ ಕಾಣ್ಘೆಲೊ ಆನಿ ಮುಖೆಲ್ ಮೆಸ್ತ್ರಿಕ್ ದಿಲೊ. ವ್ಹಯ್ ಶಿವಾನ್ ತಾಂಬ್ಡೆ ಶಾಯೆನ್ ರಾಯ್ಟ್ ಕರ್ನ್ ದಸ್ಕತ್ ಕೆಲ್ಯಾ. ಶಿವಾನ್ ಅಶೆಂ ಕೆಲಾಂ ಮ್ಹಣ್ ತುಕಾ ಕಶೆಂ ಕಳ್ಳೆಂ ಮ್ಹಣ್ ತಾಣೆ ಪುತಾಕ್ ಸವಾಲ್ ಕೆಲೆಂನಾ. ತ್ಯಾಚ್ ವೆಳಾರ್ ತಾಣೆ ಬೆತ್ ಘೆವ್ನ್ ಮೆಜಾಕ್ ತೀನ್ ಪಾವ್ಟಿಂ ಜೊರಾನ್ ಮಾರ್ಲೆಂ. ಸಗ್ಳೆಂ ಇಸ್ಕೊಲ್ ಶಾಂತ್ ಜಾತಾನಾ ಮುಖೆಲ್ ಮೆಸ್ತ್ರಿನ್ ಶಿವಾನ್ ಕೆಲ್ಲೊ ಗುನ್ಯಾಂವ್ ಸಾಂಗ್ಲೊ ಆನಿ ತಾಚ್ಯೆ ಪಾಟಿಕ್ ಲೆಖ್ ನಾತ್‍ಲ್ಲೆ ಮಾರ್ ಘಾಲೆ. ಶಿವಾನ್ ಏಕ್ ಸಭ್ದ್ ಸಯ್ತ್ ಕಾಡಿನಾಸ್ತಾನಾ, ಫಕತ್ ದುಕಾಂ ಗಳವ್ನ್ ಮಾರ್ ಖೆಲೆ. ಪಾಟ್ ಫುಟೊನ್ ರಗ್ತಾನ್ ಶರ್ಟ್ ಭಿಜ್ತಾನಾ ಮಾರ್ಚೆಂ ರಾವಯ್ಲೆಂ.
ದಿವಾಳಿಚಿ ರಜಾ ಶುರು ಜಾಂವ್ಚೊ ಆದ್ಲೊ ದೀಸ್. ದೊನ್ಫಾರಾಂಚ್ಯಾ ಜೆವ್ಣಾಕ್ ಇಸ್ಕೊಲಾಚಿ ಘಾಂಟ್ ವ್ಹಾಜ್ಲ್ಯಾ ಮಾತ್ರ್... ರಾಜುಚೊ ನವೊ ನಾಟಕ್ ಆರಂಭ್ ಜಾಲೊ.
''ಸರ್, ಬೆಗಾಂತ್ ಆಸ್‍ಲ್ಲಿ ಕೆಂಳ್ಬ್ಯಾ ಗುಟ್ಲಾವ್ನ್ ಹಾಡ್‍ಲ್ಲಿ ಹೋಳಿಗೆಚಿ ಪೊಟ್ಲಿ ಆತಾಂ ನಾ. ಕೊಣೆ ತರಿ ಚೊರಿ ಕೆಲ್ಯಾ. ಮ್ಹಾಕಾ ಭುಕ್ ಲಾಗ್ಲ್ಯಾ ಕಿತೆಂ ಕರುಂ?'' ರಾಜುಚೆಂ ರುದಾನ್ ಆಯ್ಕೊನ್ ಸಗ್ಳಿ ಕ್ಲಾಸ್ ಶಾಂತ್ ಜಾಲಿ. ಜೇಂವ್ಕ್ ಮ್ಹಣ್ ಆಪಾಪ್ಲ್ಯಾ ಜಾಗ್ಯಾ ಥಾವ್ನ್ ಉಟ್‍ಲ್ಲಿಂ ಭುರ್ಗಿಂ ಥಂಯ್ಚ್ ರೂಕ್ ಜಾಲಿಂ. ಸಕ್ಡಾಂಕ್ ಆಪಾಪ್ಲ್ಯಾ ಜಾಗ್ಯಾರ್ ವಚೊನ್ ಬಸೊಂಕ್ ಮುಖೆಲ್ ಮೆಸ್ತ್ರಿನ್ ಹುಕುಮ್ ದಿಲಿ. ಚೊರಾಕ್ ಧರುಂಕ್ ರಾಜುನ್ ಮಜತ್ ಕೆಲಿ.
''ಸರ್, ಮ್ಹಜೆ ಹೋಳಿಗೆ ಖಂಡಿತ್ ಜಾವ್ನ್ ಶಿವಾನ್ ಖೆಲ್ಯಾತ್. ತಾಚ್ಯಾ ಬೆಗಾಂತ್ ಪಳೆಲ್ಯಾರ್ ಕಳ್ತಲೆಂ,'' ತಿತ್ಲೆಂ ಸಾಂಗೊನ್ ರಾಜು ಶಿವಾಲಾಗಿಂ ಗೆಲೊ, ತಾಚೆಂ ಬೆಗ್ ವೊಡ್ನ್ ಕಾಣ್ಘೆಲೆಂ ಆನಿ ಮುಖೆಲ್ ಮೆಸ್ತ್ರಿಚ್ಯಾ ಮೆಜಾರ್ ಖಾಲಿ ಕೆಲೆಂ. ಪುಸ್ತಕಾಂಚ್ಯಾ ಮಧೆಂ ಕೆಂಳ್ಬ್ಯಾಚೊ ಖೊಲೊ ಸಾಂಪಡ್ಲೊ.
ಶಿವಾಕ್ ಕಿತೆಂ ಶಿಕ್ಷಾ ದಿಂವ್ಚಿ ಮ್ಹಳ್ಳ್ಯಾ ವಿಶಿಂ ಜೆವ್ಣಾ ಉಪ್ರಾಂತ್ ನಿರ್ಧಾರ್ ಘೆಂವ್ಚೊ ಮ್ಹಣ್ ಜಾಲೆಂ.
ಬ್ರಾಹ್ಮಣಾಂಕ್ ಸಕಯ್ಲ್ಯಾ ಜಾತಿಚ್ಯಾಂನಿ ರಾಂದ್‍ಲ್ಲೆಂ ಖಾಂವ್ಕ್ ಆಡ್ವಾರ್'ಲ್ಲೆಂ. ಲ್ಹಾನ್ ಆಸ್ತಾನಾ ಶಿವಾನ್ ಏಕ್ ಪಾವ್ಟಿಂ ಚುಕೊನ್ ತೊ ಗುನ್ಯಾಂವ್ ಕೆಲ್ಲೊ ತೆದಾಳಾ ತಾಚ್ಯಾ ಘರಾಂತ್ ಕಠಿಣ್ ಗಲಾಟೊ ಜಾಲ್ಲೊ. ಆವಯ್ಚೆ ಆನಿ ಬಾಪ್ಲ್ಯಾಚೆ ಮಾರ್ ಪಡ್‍ಲ್ಲೆ. ಶುದ್ಧೀಕರಣಾಚಿ ಪೂಜಾ ಕರ್ಚಿ ಗರ್ಜ್ ಪಡ್‍ಲ್ಲಿ. ಗೋಮೂತ್ರ್ ಪಿಯೆವ್ನ್, ಆಂಗಾಕ್ ಶೆಣ್ ಪುಸುನ್ ನ್ಹಾಂವ್ಕ್ ಪಡ್‍ಲ್ಲೆಂ. ಆತಾಂ ತೊ ವ್ಹಡ್ ಜಾಲಾ. ತಾಕಾ ಸಮ್ಜಣಿ ಆಸಾ. ಬಾಪ್ಲ್ಯಾಕ್, ಆವಯ್ಕ್ ಆನಿ ಸಗ್ಳ್ಯಾ ಗಾಂವಾಕ್ ಆತಾಂ ಕಳ್ತಲೆಂ. ಆಪ್ಲಿ ಗತ್ ಕಿತೆಂ ಜಾತಲಿ ಮ್ಹಣ್ ಚಿಂತುನ್ ಶಿವಾಚಿ ಕುಡ್ ಕಾಂಪೊಂಕ್ ಲಾಗ್ಲಿ.
ಶಿವ ಜೇಂವ್ಕ್ ಗೆಲೊನಾ. ಜೆವ್ಣಾ ಉಪ್ರಾಂತ್ ಭುರ್ಗಿಂ ಕ್ಲಾಸಿಕ್ ಪಾಟಿಂ ಆಯ್ಲಿಂ.
ಮುಖೆಲ್ ಮೆಸ್ತ್ರಿನ್ ಮೆಜಾಕ್ ಜೊರಾನ್ ಬೆತ್ ಮಾರ್ಲೆಂ. ಇಸ್ಕೊಲ್ ಶಾಂತ್ ಜಾಲೆಂ. ಹೆರ್ ಶಿಕ್ಷಕ್ ಮಾಯಾಕ್ ಜಾಲ್ಲೆ!
''ಸಕ್ಡಾಂ ಶಾಂತ್ ರಾವೊನ್ ಆಯ್ಕಾ,'' ಮುಖೆಲ್ ಮೆಸ್ತ್ರಿಚೊ ತಾಳೊ ಗರ್ಜಲೊ. ''ಶಿವಾನ್ ಆಜ್ ಕೆಲ್ಲೊ ಗುನ್ಯಾಂವ್ ಬೋವ್ ಚಡ್ ಗಂಭೀರ್ ಜಾವ್ನಾಸಾ. ಏಕ್ ಬ್ರಾಹ್ಮಣಾಂಚೊ ಚೆಡೊ ಜಾವ್ನ್'ಯೀ ತಾಣೆ ರಾಜುಚ್ಯಾ ಪೊತ್ಯಾಂತ್ಲೆ ಹೋಳಿಗೆ ಚೊರಿ ಕರ್ನ್ ಖೆಲ್ಯಾತ್. ಹಾಕಾ ಕಿತೆಂ ಶಿಕ್ಷಾ ದಿಂವ್ಚಿ?''
ತಿತ್ಲ್ಯಾರ್ ರಾಜು ಉಬೆ ರಾವೊನ್ ಮ್ಹಣಾಲೊ, ''ಹಾಕಾ ಶಿಕ್ಷಾ ದಿಂವ್ಚೊ ಆವ್ಕಾಸ್ ಮ್ಹಾಕಾ ಮೆಳೊಂಕ್ ಜಾಯ್. ಹಾಕಾ ಲಾಗೊನ್ ಆಜ್ ಹಾಂವ್ ಉಪಾಶಿಂ ಆಸಾಂ.''
ಮುಖೆಲ್ ಮೆಸ್ತ್ರಿನ್ ಮಾತೆಂ ಹಾಲವ್ನ್ ಆಪ್ಲಿ ಒಪ್ಪಿಗಿ ದಿಲಿ.
ರಾಜು ಸಕಾಳಿಂ ಘರಾಥಾವ್ನ್ ಯೆತಾನಾಂಚ್ ಸಗ್ಳಿ ತಯಾರಾಯ್ ಕರ್ನ್ ಆಯಿಲ್ಲೊ ಮ್ಹಣ್ ಸ್ಪಷ್ಟ್ ಕಳ್ತಾಲೆಂ. ರಾಜುಚ್ಯಾ ಬಾಪಾಯ್ಕ್ ತಿ ಸಂಗತ್ ಕಳಾನಾಸ್ತಾಂ ವೆಚಿನಾ. ಪುಣ್ ತಾಣೆ ಕಾಂಯ್ ಸಾಂಗ್ಲೆಂನಾ.
ರಾಜುನ್ ಶಿವಾಕ್ ಸ್ಟೇಜಿರ್ ಮುಕಾರ್ ಉಬೊ ಕೆಲೊ. ತಾಣೆ ಪಯ್ಲೆಂಚ್ ತಯಾರ್ ಕರ್ನ್ ಹಾಡ್‍ಲ್ಲೊ ವೊಡಾರುಕಾಚಿಂ ಪಾನಾಂ ಗುಂತುಲ್ಲೊ ಝೆಲೊ ಶಿವಾಚ್ಯಾ ಗಳ್ಯಾಕ್ ಘಾಲೊ. ಗೊಂಡ್ಯಾ ಫುಲಾಂಚೆ ದೋನ್ ಲ್ಹಾನ್ ಝೆಲೆ ತಾಚ್ಯಾ ದೊನೀ ಕಾನಾಂಕ್ ಉಮ್ಕಾಳಾಯ್ಲೆ. ಪೊವ್ಲೆ ಥಾವ್ನ್ ತಯಾರ್ ಕೆಲ್ಲಿ, ವ್ಹಡ್ ಹೊಟೆಲಾಂನಿ ಶೆಫ್ ಯಾ ರಾಂದ್ಪಿ ಮಾತ್ಯಾಕ್ ದವರ್ತಾತ್ ತಸಲಿ ವ್ಹಡ್ ಗೋಲ್ ತೊಪಿ ಶಿವಾಚ್ಯಾ ಮಾತ್ಯಾಕ್ ಚಡಯ್ಲಿ. ಚುಡೆತೆನ್ ತಯಾರ್ ಕೆಲ್ಲೆಂ ಏಕ್ ವೋಕ್ಲ್ ತಾಚ್ಯಾ ನಾಕಾರ್ ಚಡಯ್ಲೆಂ. ಕಾಗ್ದಾ ಕುಡ್ಕ್ಯಾಂತ್ ಬಾಂದುನ್ ಹಾಡ್‍ಲ್ಲೊ ಕುಂಕುಮ್ ತಾಚ್ಯಾ ಕಪಲಾಕ್ ಆನಿ ಬಾವ್ಳ್ಯಾಂಕ್ ಪುಸ್ಲೊ. ಶಾಯೆಂತ್ ನಾಮ್ ವೊಡ್ಲೊ.
ಶಿವಾಚೆಂ ವಿಚಿತ್ರ್ ರೂಪ್ ಪಳೆವ್ನ್ ಭುರ್ಗ್ಯಾಂಚೆ ದೊಳೆ ವಾಟಾರೊನ್ ಗೆಲ್ಲೆ. ಮುಖೆಲ್ ಮೆಸ್ತ್ರಿ ಎಕ್ಲೊ ಮಾತ್ರ್ ಜೊರಾನ್ ಹಾಸ್ತಾಲೊ.
ರಾಜುನ್ ಉಪ್ರಾಂತ್ ಪುರ್ಶಾಂವ್ ಕಾಡ್ಲೊ. ಶಿವ ಮುಕ್ಲ್ಯಾನ್ ಆನಿ ಇಸ್ಕೊಲಾಚಿಂ ಸಕ್ಕಡ್ ಭುರ್ಗಿಂ ಪಾಟ್ಲ್ಯಾನ್. ಇಸ್ಕೊಲಾಕ್ ತಾಣಿ ತೀನ್ ಭೊಂವಾಡೆ ಕಾಡ್ಲೆ. ಕುಕಾರ್ಯೊ ಘಾಲುಂಕ್ ರಾಜುನ್ ಒತ್ತಾಯ್ ಕರ್ತಾನಾ ಭುರ್ಗ್ಯಾಂನಿ ಅರ್ದ್ಯಾ ಮನಾನ್ ತಾಣೆ ಸಾಂಗ್‍ಲ್ಲೆಪರಿಂ ಕೆಲೆಂ.
ಉಪ್ರಾಂತ್ ತ್ಯಾ ದಿಸಾಕ್ ರಜಾ ಘೋಷಿತ್ ಜಾಲಿ.
ಗಾಂವಾಂತ್ ಭಾರಿಚ್ ತಂಟ್ಯಾಳಿ ಚೆಡೊ ಮ್ಹಣ್ ನಾಂವಾಡ್ಲಲೊ ಕ್ರೀಸ್ತಾಂವ್ ಚೆಡೊ ಜೆರಿನ್ ಚವ್ತ್ಯಾ ಕ್ಲಾಸಿಂತ್ ಆಸ್ತಾನಾ ಇಸ್ಕೊಲ್ ಸೊಡ್‍ಲ್ಲೆಂ. ತಾಕಾ ಕಾರಣ್ ಹೊಚ್ ಮುಖೆಲ್ ಮೆಸ್ತ್ರಿ. ಗಾಂವಾಂತ್ ಚಡ್ ಅನ್ಕೂಲ್ವಂತ್ ಕುಟ್ಮಾಂತ್ಲೊ ಜಾಲ್ಲ್ಯಾನ್ ತಾಕಾ ಗರ್ಜೆವರ್ನಿ ಚಡ್ ಶಿಕ್ಷಾ ದೀವ್ನ್ ತಾಚ್ಯಾ ಕುಟ್ಮಾಕ್ ಅಕ್ಮಾನ್ ಕೆಲ್ಲ್ಯಾಂತ್ ತಾಕಾ ಆನಂದ್ ಮೆಳ್ತಾಲೊ. ಮುಖೆಲ್ ಮೆಸ್ತ್ರಿಚೆ ಉಪದ್ರ್ ಸೊಸುಂಕ್ ಜಾಯ್ನಾಸ್ತಾನಾ ಜೆರಿನ್ ಇಸ್ಕೊಲಾಕ್ ವೆಚೆಂಚ್ ಬಂಧ್ ಕೆಲ್ಲೆಂ.
ಸೈಕಲಾರ್ ಬಸೊನ್ ಆಪ್ಲ್ಯಾ ಘರಾ ವೆತಾನಾ ವಾಟೆರ್ ಮೆಳ್ಚ್ಯಾ ಏಕ್ ಗೂಂಡ್ ತಳ್ಯಾ ಲಾಗ್ಶಿಲ್ಯಾ ವ್ಹಡ್ ಆಂಬ್ಯಾ ರುಕಾ ಮುಳಾಂತ್ ಚಿಂತೇಸ್ತ್ ಜಾವ್ನ್ ಬಸೊನ್ ಆಸ್‍ಲ್ಲೊ ಶಿವ ತಾಚ್ಯಾ ದಿಷ್ಟಿಕ್ ಪಡ್ಲೊ. ತ್ಯೆ ದೀಸ್ ಇಸ್ಕೊಲಾಂತ್ ಘಡ್‍ಲ್ಲಿ ಸಗ್ಳಿ ಗಜಾಲ್ ತಾಕಾ ಕಳಿತ್ ಆಸ್ಲಿ. ಸೈಕಲ್ ಉಬೆಂ ಕರ್ನ್ ತೊ ಶಿವಾಲಾಗಿಂ ಗೆಲೊ ಆನಿ ತಾಚ್ಯೆ ಬಗ್ಲೆಕ್ ಬಸ್ಲೊ.
''ಸೈಕಲಾರ್ ಹಾಂವ್ ತುಕಾ ಘರಾ ಪಾಯ್ತಾಂ, ಚಲ್ ಮ್ಹಜೆ ಸಾಂಗಾತಾ,'' ಜೆರಿನ್ ಶಿವಾಚ್ಯಾ ಖಾಂದ್ಯಾರ್ ಹಾತ್ ದವರ್ನ್ ಸಾಂಗ್ಲೆಂ.
''ಹಾವೆಂ ಘರಾ ವೆಚ್ಯೆಬರಿ ನಾ. ಸಕ್ಡಾಂಚ್ಯೆ ದಿಷ್ಟಿಕ್ ಹಾಂವ್ ಧರ್ಮ್ ಭ್ರಷ್ಟ್ ಜಾಲ್ಲೊ ಮನಿಸ್. ಬಾಪ್ಪು ಮ್ಹಜೆಂ ಪೆಂಕಾಟ್ ಮೊಡ್ನ್ ಘಾಲ್ತಲೊ. ಮ್ಹಜಿ ಆವಯ್ ಜೀವ್ಘಾತ್ ಕರುಂಕೀ ಪಾಟಿಂ ಸರ್ಚಿನಾ,'' ಶಿವ ಮ್ಹಣಾಲೊ.
''ಹಾಂಗಾ ಬಸೊನ್ ಕಿತೆಂ ಕರುಂಕ್ ಚಿಂತಾಯ್?''
''ದೋನ್ ವಾಟೊ ಉರ್ಲ್ಯಾತ್. ಗಾಂವ್ ಸೊಡ್ನ್ ವೆಚೆಂ, ನ್ಹಯ್ ತರ್ ಹ್ಯಾ ತಳ್ಯಾಂತ್ ಉಡಿ ಮಾರ್ನ್ ಜೀವ್ ದಿಂವ್ಚೆಂ,'' ಶಿವಾನ್ ಮ್ಹಳೆಂ.
ಜೆರಿನ್ ತಾಕಾ ಜಾಯ್ತೆಂ ಸಮ್ಜಾಯ್ಲೆಂ ಆನಿ ನಿಮಾಣೆ ಶಿವ ಜೆರಿಚ್ಯಾ ಘರಾ ವಚೊಂಕ್ ಕಬೂಲ್ ಜಾಲೊ. ಜಾತ್ ಆನಿ ಕರ್ಮಾಂ. ಜೀವ್ಘಾತ್ ಕರ್ನ್ ಮರೊಂಕ್ ತಯಾರ್ ಆಸ್‍ಲ್ಲ್ಯಾಕ್ ಖಂಚಿ ಜಾತ್?
********************
ದೀಪಾವಳಿ ಪರಬ್ ಆಯ್ಲಿ ಆನಿ ಗೆಲಿ. ಇಸ್ಕೊಲ್ ಪರತ್ ಉಗ್ತೆಂ ಜಾಲೆಂ. ಜಾತ್ ಭ್ರಷ್ಟ್ ಕರ್ನ್ ಕಾಣ್ಘೆಲ್ಲೊ ಬ್ರಾಹ್ಮಣಾಂಚೊ ಚೆಡೊ ಗಾಂವ್ ಸೊಡ್ನ್ ಗೆಲಾ ಮ್ಹಳ್ಳಿ ಖಬಾರ್ ಪ್ರಸಾರ್ಲಿ. ಇಸ್ಕೊಲಾಚ್ಯಾ ಭುರ್ಗ್ಯಾಂಕ್ ಬೆಜಾರ್ ಜಾಲೆಂ ತರಿ ರಾಜು ಮಾತ್ರ್ ಚಡ್ ಖುಶ್ ಆಸ್‍ಲ್ಲೊ.
ಕಸಲ್ಯಾಯ್ ವಿಶೇಸ್ ಘಡಿತಾವಿಣೆ ತೊ ಹಪ್ತೊ ಪಾಶಾರ್ ಜಾಲೊ. ಸನ್ವಾರ್ ಆನಿ ಅಯ್ತಾರ್ ರಜೆಚೆ ದೀಸ್ ದೆಕುನ್ ಸಾಂಜೆರ್ ಇಸ್ಕೊಲ್ ಸಂಪ್ತಚ್ ಲಾಗ್ಶಿಲೆ ಭುರ್ಗೆ ಇಸ್ಕೊಲಾಚ್ಯಾ ಮಯ್ದಾನಾರ್ ಖೆಳೊಂಕ್ ರಾವ್ತಾಲೆ. ಕಾಳೊಕ್ ಜಾತಾನಾ ಪುರೊ ಜಾವ್ನ್ ಘರಾ ವೆತಾಲೆ.
ಸಗ್ಳ್ಯಾ ಇಸ್ಕೊಲಾಂತ್ ಶಿಕ್ಷಕ್ ಸೊಡ್ನ್ ರಾಜುಕಡೆ ಮಾತ್ರ್ ಸೈಕಲ್ ಆಸ್‍ಲ್ಲೆಂ. ಸೈಕಲಾರ್ ತೊ ಎಕ್ಲೊಚ್ ಘರಾ ವೆತಾನಾ ತಾಕಾ ವಾಟೆರ್ ಆಪ್ಲ್ಯಾ ಸೈಕಲಾಕ್ ತೆಂಕೊನ್ ಉಬೊ ಆಸ್‍ಲ್ಲೊ ಜೆರಿ ಮೆಳ್ಳೊ. ಪ್ರಾಯೆನ್ ತಶೆಂಚ್ ಜಿವಾನ್ ವ್ಹಡ್ ಆಸ್‍ಲ್ಲ್ಯಾ ಕೇಡಿ ಜೆರಿಕ್ ಪಳೆವ್ನ್ ರಾಜು ಏಕ್ ಪಾವ್ಟಿಚ್ಯಾಕ್ ಕಾವ್ಜೆಲೊ ತರೀ ಧಯ್ರ್ ಘೆವ್ನ್ ತಾಣೆ ಆಪ್ಲಿ ವಾಟ್ ಮುಕಾರ್ಸಿಲಿ. ಲಾಗಿಂ ಪಾವ್ತಾನಾ ಜೆರಿ ತಾಕಾ ಆಡ್ ರಾವ್ಲೊ. ರಾಜುನ್ ಸೈಕಲ್ ರಾವಯ್ಲೆಂ.
''ಸಕಯ್ಲ್ ದೇಂವ್, ತುಜೆಕಡೆ ಗರ್ಜೆಚೆಂ ಉಲಂವ್ಕ್ ಆಸಾ,'' ಜೆರಿನ್ ಮ್ಹಳೆಂ.
ರಾಜು ಸಕಯ್ಲ್ ದೆಂವ್ಲೊ. ವಾಟ್ ಸೊಡ್ನ್ ಥೊಡೆಂಚ್ ಪಯ್ಸ್ ವ್ಹಡ್ಲೆಂ ಖಡಾಪ್ ಆಸ್‍ಲ್ಲೆಂ.
''ತ್ಯಾ ಖಡ್ಪಾಚ್ಯಾ ಮುಳಾಂತ್ ಬಸೊನ್ ಉಲಯಾಂ,'' ಜೆರಿನ್ ಮ್ಹಳೆಂ.
ದೊಗೀ ಆಪಾಪ್ಲೆಂ ಸೈಕಲ್ ಲೊಟುನ್ ಘೆವ್ನ್ ತ್ಯಾ ವಾಟೆನ್ ಚಲೊಂಕ್ ಲಾಗ್ಲೆ. ವಿರೋಧ್ ಕರ್ಚೆಂ ಧಯ್ರ್ ರಾಜುಕ್ ನಾತ್ಲೆಂ. ಜೆರಿಚ್ಯಾ ಬೊಲ್ಸಾಂತ್ ಕೆದಾಳಾಯ್ ಏಕ್ ಸುರಿ ಆಸ್ತಾ ಮ್ಹಣ್ ತಾಣೆ ಆಯ್ಕಾಲ್ಲೆಂ. ನಿರ್ಜನ್ ಜಾಗ್ಯಾರ್ ಖಡ್ಪಾಚ್ಯಾ ಮುಳಾಕ್ ತೆ ಪಾವ್ಲೆ. ಜೆರಿನ್ ರಾಜುಕ್ ಏಕ್ ಫಾತೊರ್ ದಾಕವ್ನ್ ತಾಚೆರ್ ಬಸೊಂಕ್ ಸಾಂಗ್ಲೆಂ. ಲಾಗ್ಸಿಲ್ಯಾ ಆನ್ಯೆಕ್ ಫಾತ್ರಾರ್ ತೊ ಬಸ್ಲೊ.
ಜೆರಿ ಶೀದಾ ಮುಖ್ಯ ಮುದ್ದ್ಯಾಕ್ ಆಯ್ಲೊ.
''ತುಜೊ ಬೆವಾರ್ಶಿ ಬಾಪುಯ್ ತಕ್ಲೆಂತ್ ಸಡಿಳ್ ಮ್ಹಳ್ಳಿ ಗಜಾಲ್ ಗಾಂವಾಂತ್ ಸಕ್ಡಾಂಕ್ ಕಳಿತ್ ಆಸಾ. ತಾಕಾ ಜಲ್ಮಲ್ಲೊ ತುಂ ಪುರ್ತೊ ಪಿಸೊ ಆಸ್‍ಲ್ಲ್ಯಾಂತ್ ಕಾಂಯ್ ವಿಶೇಸ್ ನಾ. ತುಜಿ ಆವಯ್ ಸಯ್ತ್ ಪಿಶಿ, ವ್ಹಯ್ಮೂ?'' ಜೆರಿನ್ ಸವಾಲ್ ಕೆಲೆಂ.
ರಾಜುನ್ ಜಾಪ್ ದಿಲಿನಾ.
''ತ್ಯಾ ನಿರಾಪ್ರಾಧಿ ಶಿವಾಕ್ ತುವೆಂ ಗಾಂವ್ ಸೊಡ್ನ್ ವೆಚ್ಯೆಬರಿ ಕೆಲೆಂ. ತುವೆಂ ಆನಿ ತುಜ್ಯಾ ಪಿಶ್ಯಾ ಬಾಪಾಯ್ನ್ ಸಾಂಗಾತಾ ಮೆಳೊನ್ ತಾಚೆರ್ ಫಟ್ಕಿರೆ ಗುನ್ಯಾಂವ್ ಮಾಂಡ್ಲೆ ತಾಕಾ ಅಕ್ಮಾನ್ ಕೆಲೊ. ಸಕ್ಡಾಂ ಮುಕಾರ್ ತಾಕಾ ಏಕ್ ಜಾನ್ವರಾಕ್ ಪೊಪಾಯ್ತಾತ್ ತಶೆಂ ಪೊಪಾಯ್ಲೆಂ. ತುಮಿ ಬೆವಾರ್ಶಿ ರಾಂಡೆಚ್ಯಾ ಪುತಾಂನಿ ತಶೆಂ ಕಿತ್ಯಾಕ್ ಕೆಲೆಂ? ತಾಣೆ ಕೆಲ್ಲೊ ಗುನ್ಯಾಂವ್ ತರಿ ಕಿತೆಂ?''
''ಆಮ್ಚಿ ಚುಕ್ ಜಾಲಿ,'' ರಾಜು ಪಿಂರ್ಗಾಲೊ.
ಜೆರಿನ್ ಬೊಲ್ಸಾಂತ್ಲಿ ಸುರಿ ಕಾಡ್ನ್ ಉಗ್ತಿ ಕೆಲಿ ಆನಿ ಆಪ್ಲ್ಯೊ ನಾಕ್ಷೊ ನಿತಳ್ ಕರುಂಕ್ ಲಾಗ್ಲೊ.
''ಭೊಗ್ಸಾಣ್ಯಾಕ್ ತುಮಿ ಯೋಗ್ಯ್ ನ್ಹಯ್. ಹ್ಯಾ ಗಾಂವಾಂತ್ ತುಮಿ ಮಸ್ತು ಅನ್ಯಾಯ್ ಕೆಲಾ. ತುಮ್ಕಾಂ ಶಿಕ್ಶಾ ಮೆಳೊಂಕ್‍ಚ್ ಜಾಯ್,'' ಜೆರಿ ಮ್ಹಣಾಲೊ ಪುಸ್ಪುಸ್ಯಾ ತಾಳ್ಯಾನ್.
''ದಯಾಕರ್ನ್ ಮ್ಹಾಕಾ ವಚೊಂಕ್ ಸೊಡ್. ಮ್ಹಜೆಕಡೆ ಉಜ್ವಾಡ್ ನಾ. ಆನಿ ಮುಕಾರ್ ಆನಿ ಕೊಣಾಕೀ ಉಪದ್ರ್ ದಿಂವ್ಚೊನಾ ಮ್ಹಣ್ ಭಾಸ್ ದಿತಾಂ,'' ರಾಜುಚೊ ತಾಳೊ ಕಾಂಪ್ತಾಲೊ.
ಕಾಳೊಕ್ ಜಾವ್ನ್ ಯೆತಾಲೊ. ಮೊಳ್ಬಾವಯ್ಲ್ಯಾನ್ ಸುಕ್ಣ್ಯಾಂಚೆ ಗುಂಪು ಆಪ್ಲಿ ವಾಟ್ ಧರ್ನ್ ಉಭ್ತಾಲೆ. ಸಗ್ಳ್ಯಾನ್ ಶಾಂತ್ ಆಸ್‍ಲ್ಲೆಂ.
''ತುಜ್ಯಾ ಪಿಶ್ಯಾ ಬಾಪಾಯ್ಚಿ ಸಭಾರ್ ವರ್ಸಾಂಚಿ ಅಣ್ವಿ ಸವಯ್ ತಿತ್ಲ್ಯಾ ಸುಲಭಾಯೆನ್ ಸುಟ್ಚಿನಾ. ತಾಚೊ ಸಭಾವ್ ವಿಕಾಳ್ ಜಿವ್ದಾಳಿಚೊ. ಬೋವ್ ಚಡ್ ಕಠಿಣ್ ಶಿಕ್ಷಾ ದಿಲ್ಯಾರ್ ಮಾತ್ರ್ ತಾಣೆ ನೀಟ್ ವಾಟೆಕ್ ಯೆಂವ್ಚೊ ಸಂಭವ್ ಆಸಾ. ತಾಕಾ ಸಾರ್ಕಿ ಬೂದ್ ಶಿಕಂವ್ಚೆ ಖಾತಿರ್ ಹಾಂವ್ ತುಕಾ ಶಿಕ್ಷಾ ದಿತಾಂ. ಆಪ್ಲ್ಯಾ ಎಕಾಚ್ ಪುತಾಕ್ ಮೆಳ್ಳೆಲಿ ಕಠಿಣ್ ಆನಿ ಕ್ರೂರ್ ಶಿಕ್ಷಾ ಪಳೆವ್ನ್ ತೊ ಸುಧಾರ್ಚೊ ಭರ್ವಸೊ ಆಸಾ,'' ಜೆರಿ ಆನಿಕಿ ನಾಕ್ಷೊ ನಿತಳ್ ಕರ್ತಾಲೊ.
''ಮ್ಹಾಕಾ ಭೊಗ್ಸಿ. ಮ್ಹಜೆ ಆವಯ್ಚೆರ್ ಸೊಪುತ್ ಘಾಲ್ನ್ ಸಾಂಗ್ತಾಂ ಆನಿ ಮುಕಾರ್ ಆಮಿ ಕೊಣಾಕೀ ಉಪದ್ರ್ ದಿಂವ್ಚೆನಾಂವ್.'' ರಾಜು ಪುಸ್ಪುಸ್ಲೊ.
''ಮ್ಹಜಿಂ ಥೊಡಿಂ ಶರ್ತಾಂ ಆಸಾತ್,'' ಜೆರಿನ್ ಮ್ಹಳೆಂ. ''ಪಯ್ಲೆಂ ಶರ್ತ್ ಇಸ್ಕೊಲಾಂತ್ ಸಕ್ಕಡ್ ಭುರ್ಗ್ಯಾಂ ಮುಕಾರ್ ತುವೆಂ ತುಜಿ ಚುಕ್ ವಳ್ಕಾಜೆ. ದುಸ್ರೆಂ, ಶಿವಾಕ್ ತ್ಯೆ ದೀಸ್ ತುವೆಂ ಸುಂರ್ಗಾರಾಯಿಲ್ಲೆಬರಿ ತುಜ್ಯಾ ಬಾಪಾಯ್ನ್ ತುಕಾ ಸುಂರ್ಗಾರಾಂವ್ಕ್ ಜಾಯ್. ಆನಿ ಪುರ್ಶಾಂವಾರ್ ಇಸ್ಕೊಲಾಚೆ ತೀನ್ ಭೊಂವಾಡೆ ಕಾಡುಂಕ್ ಜಾಯ್. ಮಂಜೂರ್?'' ಜೆರಿನ್ ತಾಕಾಚ್ ಪಳೆವ್ನ್ ಮ್ಹಳೆಂ.
''ಹಾಂವ್ ತಯಾರ್ ಆಸಾಂ,'' ರಾಜುನ್ ಮ್ಹಳೆಂ.
''ಹಾವೆಂ ಸಾಂಗ್‍ಲ್ಲೆಬರಿ ತುಂ ಕರ್ತಲೊಯ್ ಮ್ಹಳ್ಳಿ ಕಸಲಿ ಗೆರೆಂಟಿ?' ಜೆರಿಚೆಂ ಸವಾಲ್.
ರಾಜುನ್ ಜಾಪ್ ದಿಲಿನಾ.
''ಗೆರೆಂಟಿ ಜಾವ್ನ್ ಹಾಂವ್ ತುಜ್ಯಾ ಹಾತಾಚೆಂ ಏಕ್ ಬೊಟ್ ಕಾತರ್ನ್ ಕಾಡ್ತಾಂ,'' ಬರ್ಫಾಬರಿ ಥಂಡ್ ತಾಳ್ಯಾನ್ ಜೆರಿನ್ ಮ್ಹಳೆಂ ಆನಿ ಬಸ್‍ಲ್ಲೊ ಉಟ್ಲೊ ತೊ.
ರಾಜು ಬಸ್‍ಲ್ಲೆಕಡೆ ಧರ್ಣ್ ಭಿಜೊಂಕ್ ಲಾಗ್ಲಿ. ತೊ ಜೆರಿಚ್ಯಾ ಪಾಯಾಂಕ್ ಪಡ್ಲೊ.
''ಮ್ಹಾಕಾ ಮಾಫ್ ಕರ್. ಮ್ಹಜೆರ್ ದಯಾ ದಾಕಯ್. ಮ್ಹಜೆರ್ ವಿಶ್ವಾಸ್ ದವರ್. ತುಜಿಂ ಸಗ್ಳಿಂ ಶರ್ತಾಂ ಪಾಳುಂಕ್ ಹಾಂವ್ ತಯಾರ್ ಆಸಾಂ. ಜಾಯ್ ತರ್ ಹಾಂವ್ ಬರವ್ನ್ ದಿತಾಂ,'' ರಾಜು ಜೊರಾನ್ ರಡೊಂಕ್ ಲಾಗ್ಲೊ.
''ಪಿಶ್ಯಾ ಮನ್ಶಾಂಚೆರ್ ಮ್ಹಾಕಾ ವಿಶ್ವಾಸ್ ನಾ. ಗೆರೆಂಟಿ ಜಾವ್ನ್ ತುಜೆಂ ಏಕ್ ಬೊಟ್ ಮ್ಹಾಕಾ ಜಾಯಿಚ್. ಬರೆಂ ತರ್, ತುವೆಂ ಆನಿ ತುಜ್ಯಾ ಬಾಪಾಯ್ನ್ ಕೆಲ್ಲ್ಯೊ ಸಕ್ಕಡ್ ಚುಕಿ ಭೊಗ್ಸುಂಕ್ ಹಾಂವ್ ತಯಾರ್ ಆಸಾಂ. ಪುಣ್ ಏಕ್ ನವ್ಯಾ ಶರ್ತಾಖಾಲ್,'' ಜೆರಿ ಮ್ಹಣಾಲೊ.
''ಕಸಲೆಂ ಶರ್ತ್?''
''ತುಜೊ ಸಗ್ಳೊ ಹಾತ್ ಮ್ಹಾಕಾ ಜಾಯ್. ಭಿಂಯೆನಾಕಾ, ಮ್ಹಜೆಕಡೆ ಬರಿಚ್ ಪಾಜುನ್ ಹಾಡ್‍ಲ್ಲಿ ಕುರಾಡ್ ಆಸಾ. ಎಕಾಚ್ ಮಾರಾನ್ ತುಜೊ ಚರ್ಬೆಲ್ಲೊ ಬಾವ್ಳೊ ತುಜ್ಯಾ ಪಾತ್ಕಿ ಆಂಗಾ ಥಾವ್ನ್ ವಿಂಗಡ್ ಜಾತಲೊ.'' ಜೆರಿ ಕ್ರೂರ್ ಹಾಸೊ ಹಾಸ್ಲೊ.
ಜೆರಿ ಆಪ್ಲ್ಯಾ ಸೈಕಲಾಕಡೆ ಗೆಲೊ ಆನಿ ಕೆರಿಯಾರಾಚೆರ್ ವಸ್ತುರಾಂತ್ ಗುಟ್ಲಾವ್ನ್ ದವರ್ಲೆಲಿ ಕುರಾಡ್ ಕಾಡ್ಲಿ. ಪಾಟಿಂ ಯೇವ್ನ್ ತಾಣೆ ಮ್ಹಳೆಂ, ''ತ್ಯಾ ಉಬಾರ್ ಫಾತ್ರಾಚೆರ್ ತುಜೊ ಹಾತ್ ದವರ್ ಆನಿ ದೊಳೆ ಧಾಂಪ್. ತುಕಾ ಚಡ್ ದುಕ್ಚೆಂನಾ ಮ್ಹಳ್ಳಿ ಗೆರಂಟಿ ಹಾಂವ್ ದಿತಾಂ.''
ತೆಂ ಆಯ್ಕೊನ್ ರಾಜುಚಿ ಮತ್ ಚುಕ್ಲಿ. ತಾಕಾ ಹಾತ್ ಸಯ್ತ್ ಲಾಯ್ನಾಸ್ತಾನಾ ಥಂಯ್ಚ್ ಕಾಳೊಕಾಂತ್ ಸೊಡ್ನ್ ಜೆರಿ ಆಪ್ಲಿ ವಾಟ್ ಧರ್ನ್ ಚಲ್ಲೊ. ಕಾಂಯ್ಚ್ ಘಡೊಂಕ್ ನಾತ್ಲೆಬರಿ ಏಕ್ ಪದ್ ಗುಣ್ಗುಣೊಂಕ್ ಲಾಗ್ಲೊ.
*******************
ಥೊಡ್ಯಾಚ್ ದಿಸಾಂ ಉಪ್ರಾಂತ್ ಮುಖೆಲ್ ಮೆಸ್ತ್ರಿನ್ ಆಪ್ಲ್ಯಾ ಹುದ್ದ್ಯಾಕ್ ರಾಜಿನಾಮೊ ದಿಲ್ಲಿ ಆನಿ ಸಾಂಗಾತಾಚ್ ಕುಲದೇವತೆಚ್ಯಾ ಭಯಂಕರ್ ಕ್ರೋಧಾಕ್ ಬಲಿ ಜಾಲ್ಲೊ ರಾಜು ಪಿಸೊ ಜಾಲ್ಲಿ ಖಬಾರ್ ಗಾಂವಾಂತ್ ಪ್ರಸಾರ್ಲಿ. ಮಾತ್ಯಾಕ್ ಪೊವ್ಲೆಚಿ ವ್ಹಡ್ ತೊಪಿ ದವರ್ನ್, ಗಳ್ಯಾಕ್ ವೊಡಾರುಕಾಚ್ಯಾ ಖೊಲ್ಯಾಂಚೊ ಝೆಲೊ ಘಾಲ್ನ್, ದೊನೀ ಕಾನಾಂಕ್ ಗೊಂಡ್ಯಾಫುಲಾಂ ಉಮ್ಕಾಳಾವ್ನ್ ಆಪ್ಲ್ಯಾ ಘರಾಚೆ ಭೊಂವಾಡೆ ಕಾಡ್ತಾ ಮ್ಹಳ್ಳಿ ಸಂಗತ್ ಲೊಕಾಕ್ ಕಳಿತ್ ಜಾಲಿ. ಇಸ್ಕೊಲಾಚೆ ಭೊಂವಾಡೆ ಕಾಡುಂಕ್ ಸಳ್ ಕರ್ತಾ ದೆಕುನ್ ತಾಕಾ ಆಡಾವ್ನ್ ಧರುಂಕ್ ಏಕ್ ಮನಿಸ್ ದವರ್ಲಾ ಮ್ಹಳ್ಳಿಯ್ ಖಬಾರ್ ಆಯ್ಕೊನ್ ಇಸ್ಕೊಲಾಚ್ಯಾ ಭುರ್ಗ್ಯಾಂ ಸಾಂಗಾತಾ ಶಿಕ್ಷಕ್ ಸಯ್ತ್ ನಾಚೊಂಕ್ ಲಾಗ್ಲೆ.
ಆತಾಂ, ಶಿವ ಭಿರಾಂತ್ ನಾಸ್ತಾನಾ ಆಪ್ಲ್ಯಾ ಘರಾ ಗೆಲೊ ಆನಿ ತಾಚ್ಯಾ ಬಾಪ್ಲ್ಯಾನ್ ತಾಕಾ ಪೊಟ್ಲುನ್ ಧರ್ನ್ ಸ್ವಾಗತ್ ಕೆಲೊ.
Tags:
Walter Lasrado, Konkani Short Story, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/24/2020 ಉದೆಂತಿಚೆಂ ನೆಕೆತ್ರ್...
-
11/28/2020 ಚೂಕಿ ತಿದ್ವಿನಾ ಜಾಲ್ಯಾರ್!...
-
11/4/2020 ಅನಿವಾಸಿ ರಾಯ್...
-
10/23/2020 ಘಾಣ್...
-
-
9/13/2020 ರಾತ್ ಪಾಳಿ...
-
6/18/2018 ವೆಚಿಕ್ ಪುತಾಚೊ ದಾಟ್ಟು...
-
11/12/2017 ನ್ಯೂ ಐನ್‌ಸ್ಟೀನ್...
-
9/7/2017 ಮ್ಹಜ್ಯಾ ಮೊಗಾಚೆಂ ಮೆಲ್ಬಾ...
-
8/29/2017 ಕೊಲ್‍ಗರ್ಲ್...
-
12/18/2021 ಕೆನಡಾಂತ್ 'ನವೊ ಭರ್ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.