From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಆಮ್ಚೆಂ ಘರ್
Friday, June 23, 2017
ಆಮ್ಕಾಂ ಸಕ್ಡಾಂಕ್ ಕಸಲಿಯ್ ಅಡ್ಕಳ್ ನಾತ್‍ಲ್ಲಿ ಶಾಂತ್ ಜಿಣಿ ಜಿಯೆಂವ್ಕ್. ಆಮ್ಚ್ಯಾ ಸುಖ್ ಶಾಂತಿ ಖಾತಿರ್ ಹೆರಾಂನಿ ವಾವ್ರ್ ಕರುಂಕ್ ಜಾಯ್. ಆಮ್ಚೆ ಖಾತಿರ್ ಹೆರಾಂನಿ ಆಪ್ಲೊ ವೇಳ್ ಖರ್ಚುಂಕ್ ಜಾಯ್. ಪುಣ್ ತಾಂಚೆ ಖಾತಿರ್ ಆಮ್ಚೆಕಡೆ ಬಿಲ್ಕುಲ್ ವೇಳ್ ಆಸಾನಾ. ಹಾಂವ್, ಮ್ಹಜಿ ಬಾಯ್ಲ್ ಭುರ್ಗಿಂ, ಮ್ಹಜಿಂ ಕುಟ್ಮಾದಾರಾಂ, ಲಾಗ್ಶಿಲಿಂ ಹಿತಚಿಂತಕಾಂ ಹೊಚ್ ಆಮ್ಚೊ ಸಂಸಾರ್. ಆಮಿ ಸ್ವಾರ್ಥಿ ನ್ಹಯ್. ಕಿತ್ಯಾಕ್ ಮ್ಹಳ್ಯಾರ್ ಆಮ್ಚಿಂ ಕಾಮಾ ಕರ್ನ್ ಘೆಂವ್ಚೆ ಖಾತಿರ್ ಫಾರಿಕ್ ಕರುಂಕ್ ಆಮ್ಚೆಕಡೆ ದುಡು ಆಸಾ. ದುಡು ಫಾರಿಕ್ ಕರ್ಚಿ ತಾಂಕ್ ಆಸ್‍ಲ್ಲ್ಯಾ ಆಮ್ಕಾಂ, ದುಡ್ವಾಚಿ ಗರ್ಜ್ ಆಸ್‍ಲ್ಲ್ಯಾಂ ಥಾವ್ನ್ ಸೆವಾ ಅಪೇಕ್ಶಿಲ್ಲ್ಯಾಂತ್ ಕಾಂಯ್ ಚುಕ್ ನಾ.
ಮುಂಬಯ್ ನಗರಾಂತ್ಲ್ಯಾ ಹಜಾರೊಂ ಕೊ-ಒಪರೇಟಿವ್ ಹೌಸಿಂಗ್ ಸೊಸಾಯ್ಟಿಂ ಪಯ್ಕಿ 'ಆಮ್ಚೆಂ ಘರ್ ಸಿಎಚ್ಎಆಸ್' ಏಕ್ ಜಾವ್ನಾಸಾ. ಹ್ಯಾ ಬಿಲ್ಡಿಂಗಾಂತ್ ಪನ್ನಾಸ್ ಫ್ಲೇಟಾಂ ಆಸಾತ್. ಚಡಾವತ್ ಫ್ಲೇಟಾಂನಿ ಲೋಕ್ ವಸ್ತಿ ಕರ್ನ್ ಆಸಾ. ಸುಮಾರ್ ಧಾ ಫ್ಲೆಟಾಂಚ್ಯಾ ಮ್ಹಾಲಕಾಂನಿ ಆಪ್ಲಿಂ ಘರಾಂ ಬಾಡ್ಯಾಕ್ ದಿಲ್ಯಾಂತ್. ಬಂಧ್ ಆಸ್‍ಲ್ಲ್ಯಾ ಫ್ಲೇಟಾಂ ಪಯ್ಕಿ ತೀನ್ ಫ್ಲೇಟಾಂಚೆ ಮ್ಹಾಲಕ್ ಆಪ್ಲ್ಯಾ ಕುಟ್ಮಾ ಸವೆಂ ವಿದೇಶಾಂತ್ ಆಸೊನ್, ವರ್ಸಾಂತ್ ಏಕ್ ದೋನ್ ಪಾವ್ಟಿಂ ಯೇವ್ನ್ ಮೆಂಟೆನೆನ್ಸ್ ಫಾರಿಕ್ ಕರ್ನ್ ಥೊಡೆ ದೀಸ್ ರಾವೊನ್ ಪಾಟಿಂ ವೆತಾತ್.
ಮೆಂದೊಸ್ ಕುಟ್ಮಾಚ್ಯಾ ನಾಂವಾರ್ ತೀನ್ ಫ್ಲೇಟಾಂ ಆಸಾತ್. ನಿವೃತ್ತ್ ಸರ್ಕಾರಿ ಅಧಿಕಾರಿ ಜೆರೊಮ್ ಮೆಂದೊಸಾಕ್ ದೊಗಾಂ ಭುರ್ಗಿಂ, ಏಕ್ ಪುತ್ ಆನಿ ಏಕ್ ಧುವ್. ತಾಂಚೆಂ ದೊಗಾಂಚೆಯ್ ಕಾಜಾರ್ ಜಾವ್ನ್ ವಿದೇಶಾಂತ್ ಆಸಾತ್. ಬಾಪಾಯ್ನ್ ತಾಂಚೆ ಖಾತಿರ್ ವಿಂಗಡ್ ದೋನ್ ಫ್ಲೇಟಾಂ ಘೆವ್ನ್ ದವರ್ಲ್ಯಾಂತ್. ತಿಂ ದೊನೀ ಫ್ಲೇಟಾಂ ಬಂಧ್ ಆಸಾತ್. ಬಾಡ್ಯಾಕ್ ಘೇಂವ್ಕ್ ಏಜೆಂಟ್ ತಯಾರ್ ಆಸಾತ್ ತರಿ ಜೆರೊಮ್ ಮೆಂದೊಸ್ ಕಾನ್ ಹಾಲಯ್ನಾ. ಕಿತ್ಯಾಕ್ ಮ್ಹಳ್ಯಾರ್ ತಾಕಾ ಪಯ್ಶಾಂಚಿ ಗರ್ಜ್ ನಾ!
ಆಪುಣ್ ತೀನ್ ಫ್ಲೇಟಾಂಚೆಂ ಮೆಂಟೆನೆನ್ಸ್ ಭರ್ತಾಂ ಮ್ಹಣ್ ಆಪ್ಲೆಂ ವ್ಹಡ್ಪಣ್ ದಾಕಂವ್ಕ್ ಮೆಳ್ಚೊ ಏಕ್‍ಯೀ ಅವ್ಕಾಸ್ ತೊ ಸೊಡಿನಾ. ಸೊಸಾಯ್ಟಿಚ್ಯಾ ಕಾರ್ಯಾಕಾರಿ ಸಮಿತಿಚ್ಯೊ ಚುಕಿ ಸೊಧುನ್ ಕಾಡ್ನ್ ಧುರ್ಸೊನ್ ಉಲಯ್ನಾಸ್ತಾಂ ತಾಚೆಂ ಖೆಲ್ಲೆಂ ಜಿರಾನಾ. ತಾಚಿ ಬಾಯ್ಲ್ ಡೊರಾ ಸಯ್ತ್ ತ್ಯಾಚ್ ಸ್ವಭಾವಾಚಿ. ತಿ ಏಕ್ ಇಸ್ಕೊಲಾಚಿ ನಿವೃತ್ತ್ ಮುಖೆಲ್ ಮೆಸ್ತ್ರಿಣ್ ಜಾವ್ನಾಸೊನ್ ಸೊಸಾಯ್ಟಿಂತ್ ರಾಂವ್ಚಿಂ ಸಕ್ಡಾಂ ಆಪ್ಲಿಂ ವಿದ್ಯಾರ್ಥಿ, ಆನಿ ಕಾರ್ಯಾಕಾರಿ ಸಮಿತಿಂತ್ಲಿಂ ಸಕ್ಡಾಂ ಆಪ್ಲೆ ಸಕಯ್ಲಿಂ ಕಾಮ್ಗಾರಾಂ ಮ್ಹಣ್ ತಿ ಚಿಂತಾ. ಸೊಸಾಯ್ಟಿಚೆ ತೇಗ್ ಜಣ್ ರಾಕ್ವಲಿ ಆನಿ ಎಕ್ಲೊ ಮ್ಹಾಲಿ ಆಪ್ಲೆ ಖಾಸ್ಗಿ ಗುಲಾಮ್ ಮ್ಹಣ್ ತಿ ಸಮ್ಜಾತಾ ಆನಿ ತಾಂಕಾಂ ತಿ ತಶೆಂಚ್ ಉಟ್ ಬಸ್ ಕರ್ತಾ. ಸಕಾಳಿಂ ಕೋಯ್ರ್ ಕಾಡುಂಕ್ ಯೆಂವ್ಚ್ಯಾ ಫುಲ್‍ವಂತಿಚ್ಯಾ ರಗ್ಳ್ಯಾಂಕ್ ತಿ ವಚನಾ. ಎಕಾ ನತಾಲಾಂಚ್ಯಾ ಫೆಸ್ತಾ ವೆಳಾರ್ ಬಿಲ್ದಿಂಗಾಚಿ ಶಿಡಿ ಧುತಾನಾ ತಾಂಚ್ಯಾ ಬಂಧ್ ಆಸ್‍ಲ್ಲ್ಯಾ ಫ್ಲೇಟಾಂ ಭಿತರ್ ಉದಾಕ್ ಗೆಲ್ಲೆಂ ದೆಕುನ್ ತಿಣೆ ಫುಲ್‍ವಂತಿಕಡೆ ಝಗ್ಡೆಂ ಕೆಲ್ಲೆಂ. ಇಂಗ್ಲೇಜಾಂತ್ ಪೊಜ್ಡ್ಯೊ ಗಾಳಿ ದಿಲ್ಲ್ಯೊ. ಫುಲ್‍ವಂತಿನ್ ತಾಂಚೊ ಕೋಯ್ರ್ ವರ್ಚೆಂ ಬಂಧ್ ಕೆಲೆಂ. ಮಾಫಿ ಮಾಗ್‍ಲ್ಲ್ಯಾ ಶಿವಾಯ್ ತ್ಯಾ ಘರ್ಚ್ಯಾ ಕೊಯ್ರಾಕ್ ಹಾತ್ ಲಾಂವ್ಚಿನಾ ಮ್ಹಣ್ ಹಟ್ ಧರ್ನ್ ರಾವ್ಲೆಂ. ಘಮಂಡಿ ನಿವೃತ್ತ್ ಸರ್ಕಾರಿ ಅಧಿಕಾರಿ ಮೆಂದೊಸಾನ್ ಸಕಾಳಿಂಚೆಂ ಕೊಯ್ರಾಚಿ ಪೊಟ್ಲಿ ಘೇವ್ನ್ ಲಿಫ್ಟಾಂತ್ ದೆಂವೊನ್ ಬಿಲ್ದಿಂಗಾಚ್ಯಾ ಪಾಟ್ಲ್ಯಾನ್ ಆಸ್‍ಲ್ಲ್ಯಾ ಕೊಯ್ರಾಚ್ಯಾ ಡಬ್ಬ್ಯಾಂತ್ ಘಾಲುಂಕ್ ವೆತಾನಾ ಹೆರಾಂನಿ ನಾಕಾಕ್ ತುವಾಲೊ ಧರ್ನ್ ಪುಸ್ಪುಸೊನ್ ಹಾಸ್ಚೆಂ ತೆಂ ದೃಶ್ಯ್ ಪಳೆಂವ್ಚೆ ತಸಲೆಂ ಜಾವ್ನಾಸ್ಲೆಂ. ಅಖ್ರೇಕ್ ಕಾರ್ಯದರ್ಶಿ ಮಿಸೆಸ್ ಜೂಲಿಯಾನಾ ಕ್ರಾಸ್ತಾನ್ ಮಧ್ಯಸ್ತಿ ಕರ್ನ್ ಮೆಂಡೊಸಾಗೆಲ್ಯಾಂನಿ ಫುಲ್‍ವಂತಿಕ್ ಏಕ್ ಹಜಾರ್ ರುಪಯ್ ಮಾನ್‍ನಷ್ಟ್ ದೀಂವ್ಕ್ ಜಾಯ್ ಮ್ಹಣ್ ತೀರ್ಪ್ ದಿಲೆಂ. ಹ್ಯೆ ಮಾಂಡಾವಳಿ ವರ್ವಿಂ ಮೆಂದೊಸಾಗೆಲ್ಯಾಂಕ್ ಕಠಿಣ್ ಅಕ್ಮಾನ್ ಜಾಲ್ಲೊ. ಸಫಾಯ್‍ವಾಲಿಕ್ ನೀಟ್ ವಾಟೆಕ್ ಹಾಡ್ಚೆಂ ಸೊಡ್ನ್ ತಾಚ್ಯೆಚ್ ಪಕ್ಷೆನ್ ವಕಾಲತ್ ಕೆಲ್ಲ್ಯೆ ಕಾರ್ಯದರ್ಶಿ ಜೂಲಿಯಾನಾಚಿ ಪೊಜ್ಡ್ಯಾ ಉತ್ರಾಂನಿ ಪೂಜಾ ಕೆಲ್ಲಿ. ಸೊಸಾಯ್ಟಿಚ್ಯಾ ಆಫಿಸ್ ರೂಮಾಂತ್ ದಾದ್ಲ್ಯಾಂ ಮುಕಾರ್ ಪಾಲಂವ್ ಗಳವ್ನ್ ಬಸ್ಚಿ ಬಾಜಾರಿ ಸ್ತ್ರೀ ಮ್ಹಣ್ ಸಾಂಗುನ್ ಅಕ್ಮಾನ್ ಕೆಲ್ಲೊ. ಹೆಂ ಸಗ್ಳೆಂ ಪಳೆವ್ನ್ ಪಳೆನಾತ್ಲೆಬರಿ ಕರ್ಚ್ಯಾ ತಿಚ್ಯೆ ಪತಿಕ್ ನಪುಂಸಕ್ ಮ್ಹಣ್ ವೊಲಾಯ್ಲೊ ಸಯ್ತ್.
ಏಕ್ ದೀಸ್ ಚಿಂತಿನಾತ್ಲೆಬರಿ ಉದ್ಕಾಚಿ ಸಮಸ್ಯಾ ಉಬ್ಜಾಲಿ. ತ್ಯಾ ಬಿಲ್ಡಿಂಗಾಂತ್ ಚೊವೀಸ್ ವರಾಂ ಉದಾಕ್ ಆಸ್ತಾಲೆಂ ದೆಕುನ್ ಕೊಣಾಕೀ ಉದಾಕ್ ಭರ್ನ್ ದವರ್ಚಿ ಸವಯ್ ನಾತ್ಲಿ. ಸಕ್ಡಾಂವರ್ನಿಂ ಪಯ್ಲೆಂ ಸೆಕ್ರೆಟರಿ ವಿರುಧ್ ಮೆಂದೊಸ್ ಜೊಡ್ಯಾನ್ ಆವಾಜ್ ಉಟಯ್ಲೊ. ಹೆರ್ ಥೊಡ್ಯಾ ನಿವಾಸಿಂಕ್ ಸಾಂಗಾತಾ ಘೆವ್ನ್ ಜೂಲಿಯಾನಾಚ್ಯಾ ಘರಾ ಪುರ್ಶಾಂವ್ ವ್ಹೆಲೊ. ಕಠಿಣ್ ಉತ್ರಾಂನಿ ತಿಚಿ ನಿಂದಾ ಕೆಲಿ. ಅಕ್ಮಾನ್ ಸೊಸುಂಕ್ ಜಾಯ್ನಾಸ್ತಾಂ ತಿಚ್ಯಾ ದೊಳ್ಯಾಂನಿ ದುಕಾಂ ಉದೆಲಿಂ. ಹ್ಯಾ ಅಚಾನಕ್ ಉದೆಲ್ಲ್ಯಾ ಸಮಸ್ಯಾಕ್ ಪರಿಹಾರ್ ಸೊಧ್ಚೆ ಖಾತಿರ್ ತ್ಯೆ ದೀಸ್ ತಿಕಾ ಕಾಮಾಕ್ ವಚನಾಸ್ತಾಂ ಘರಾ ರಾಂವ್ಚೆಂ ಪಡ್ಲೆಂ. ಮೊಲಾಕ್ ಉದಾಕ್ ಸಪ್ಲಾಯ್ ಕರ್ಚ್ಯಾ ಕಂತ್ರಾಟ್ದಾರಾಕ್ ಧರ್ನ್ ಟೆಂಕರಾಂನಿ ಉದಾಕ್ ಹಾಡ್ನ್ ಸದ್ದ್ಯಾಕ್ ಸಮಸ್ಯಾ ಪಯ್ಸ್ ಕೆಲಿ. ಅಶೆಂ ಭರ್ಲಲೆಂ ಉದಾಕ್ ಸಯ್ತ್ ವೆಗಿಂಚ್ ಕಾಬಾರ್ ಜಾಲೆಂ.
ಜೂಲಿಯಾನಾನ್ ವೊಚ್‍ಮೆನಾಕ್ ಆಪವ್ನ್ ಉದ್ಕಾಥಂಯ್ ಚಡಿತ್ ಗುಮಾನ್ ದೀಂವ್ಕ್ ಸಾಂಗ್ಲೆಂ. ಸಾಂಜೆಚ್ಯಾ ವೆಳಾರ್ ಉದಾಕ್ ಯೇಂವ್ಕ್ ಲಾಗ್ತಾನಾ ವೊಚ್‍ಮೆನ್ ಧರ್ಣಿ ಪಂದ್ಲಿ ಟಾಂಕಿ ಪುರ್ತಿ ಭರುನ್ ವೊಮ್ತತಾ ಪರ್ಯಾಂತ್ ಥಂಯ್ಚ್ ಬಸ್ಲೊ. ಉಪ್ರಾಂತ್ ಪಂಪ್ ಚಾಲು ಕರ್ನ್ ವಯ್ಲಿ ಟಾಂಕಿ ಭರ್ಲಿ.
ಫಾಂತ್ಯಾರ್ ಚ್ಯಾರ್ ವರಾಂಕ್ ಜೂಲಿಯಾನಾಚ್ಯೆ ಘರ್ಚೆಂ ಫೊನ್ ಜಾಗೆಂ ಜಾಲೆಂ. ನಳಾಂತ್ ಉದಾಕ್ ಕಿತ್ಯಾಕ್ ಯೇನಾ ಮ್ಹಣ್ ವಿಚಾರುಂಕ್ ಮೆಂದೊಸಾನ್ ಫೊನ್ ಕೆಲ್ಲೆಂ. ಆತಾಂಚ್ ಉದಾಕ್ ಸೊಡುಂಕ್ ಜಾಯ್ ಮ್ಹಣ್ ತಾಣೆ ಹಟ್ ಧರ್ಲೆಂ. ಜೂಲಿಯಾನಾ ಆಂಗಾಕ್ ಏಕ್ ಶೊಲ್ ರೆವ್ಡಾವ್ನ್ ವೊಚ್‍ಮೆನಾಕ್ ಸೊಧುನ್ ಲಿಫ್ಟಾಂತ್ಲ್ಯಾನ್ ಸಕಯ್ಲ್ ಗೆಲಿ. ಜೆಮೆವ್ನ್ ಬಸ್‍ಲ್ಲ್ಯಾ ವೊಚ್‍ಮೆನಾಕ್ ಉಟವ್ನ್ ತಕ್ಷಣ್ ಪಂಪ್ ಚಾಲು ಕರ್ನ್ ಉದಾಕ್ ಚಡಂವ್ಕ್ ಸಾಂಗ್ಲೆಂ.
ಸಕಾಳಿಂಚೊ ವೇಳ್ ಉತ್ರೊನ್ ದೊನ್ಪಾರ್ ಜಾತಾನಾ ಆಫಿಸಾಂತ್ ಬಸುನ್ ಕಾಮ್ ಕರ್ನ್ ಆಸ್‍ಲ್ಲ್ಯೆ ಜೂಲಿಯಾನಾಚ್ಯಾ ಮೆಜಾವಯ್ಲೆಂ ಫೊನ್ ವ್ಹಾಜೊಂಕ್ ಲಾಗ್ಲೆಂ. ಮೆಂದೊಸ್! 'ಉದಾಕ್ ಕಿತ್ಯಾಕ್ ಯೇನಾ, ತುಮ್ಕಾಂ ಕಮಿಟಿಚ್ಯಾ ಮನ್ಶಾಂಕ್ ಕಾಂಯ್ ಪಡೊನ್ ಗೆಲ್ಲೆಂ ನಾ. ಸಾಂಜೆರ್ ಉದಾಕ್ ಯೆತಾ ಪರ್ಯಾಂತ್ ಕಿತೆಂ ಕರ್ಚೆಂ?'
ಜೂಲಿಯಾನಾನ್ ಉದ್ಕಾಚಿ ಬಂದಬಸ್ತ್ ಕರ್ತಾಂ ಮ್ಹಣ್ ಸಾಂಗುನ್ ಮೆಂದೊಸಾಕ್ ಶಾಂತ್ ಕರ್ಚೆಂ ಪ್ರೇತನ್ ಕೆಲೆಂ ತರಿ ಜಾಯ್ತೊ ವೇಳ್ ಪರ್ಯಾಂತ್ ತೊ ಧುರ್ಸೊನ್ ಉಲಯ್ಲೊ. ಜೂಲಿಯಾನಾನ್ ಉದ್ಕಾಚ್ಯಾ ಕಂತ್ರಾಟ್ದಾರಾಕ್ ಫೊನ್ ಕರ್ನ್ ಟ್ಯಾಂಕರಾನ್ ಉದಾಕ್ ಹಾಡವ್ನ್ ಸೊಸಾಯ್ಟಿಚ್ಯಾ ಬಿಲ್ಡಿಂಗಾಚ್ಯಾ ಉದ್ಕಾಚಿ ಟಾಂಕಿ ಭರ್ಲಿ.
ತ್ಯೆಚ್ ದೀಸ್ ರಾತಿಂ ಆಟ್ ವೊರಾಂಕ್ ಜೂಲಿಯಾನಾನ್ ಸೊಸಾಯ್ಟಿಚಿ ಎಮರ್ಜನ್ಸಿ ಸಭಾ ಆಪಯ್ಲಿ. ವೊಚ್‍ಮೆನಾಕ್ ಹರ್ಯೆಕ್ಲ್ಯಾಚ್ಯಾ ಘರಾ ಧಾಡ್ನ್ ಮೀಟಿಂಗಾಕ್ ಹಾಜರ್ ಜಾಂವ್ಕ್ ಮೆಂಬ್ರಾಂಕ್ ವಿನತಿ ಕೆಲಿ. ಚೆಯರ್ಮೆನ್ ಶಹರಾಚ್ಯಾ ಭಾಯ್ರ್ ಪಯ್ಸ್ ಪಾವ್‍ಲ್ಲೊ. ಖಜಾನ್ದಾರ್ ಪಯ್ಸ್ ಟ್ರಾಫಿಕೆಂತ್ ಶಿರ್ಕೊನ್ ಪಡ್‍ಲ್ಲೊ. ಕಮಿಟಿ ಮೆಂಬ್ರಾಂ ಪಯ್ಕಿ ತೆಗಾಂಕ್ ಮಾತ್ರ್ ಮೀಟಿಂಗಾಕ್ ಹಾಜರ್ ಜಾಂವ್ಕ್ ಸಾಧ್ ಜಾಲೆಂ. ನಿವಾಸಿಂ ಪಯ್ಕಿ ಕಾಲ್ದೊ ವಾಂಟೊ ಸಯ್ತ್ ಹಾಜರ್ ಜಾಲಿಂನಾಂತ್. ಮೆಂದೊಸ್ ಆನಿ ತಾಚಿ ಬಾಯ್ಲ್ ಡೊರಾ ಮಾತ್ರ್ ಪಯ್ಲೆಂ ಯೇವ್ನ್ ಬಸ್‍ಲ್ಲಿಂ.
ಜೂಲಿಯಾನಾನ್ ಆಪ್ಲಿಂ ಭೊಗ್ಣಾಂ ಸಭೆ ಮುಕಾರ್ ಉಚಾರ್ಲಿಂ. ಹಾಂವ್ ಬಾರಾ ವರ್ಸಾಂ ಥಾವ್ನ್ ಸೆಕ್ರೆಟರಿಚೊ ಹುದ್ದೊ ಸಾಂಭಾಳ್ಣ್ ಆಸಾಂ. ಸಕ್ಕಡ್ ಮೆಂಬ್ರಾಂಕ್ ಆಪಾಪ್ಲೆ ಪ್ರೊಬ್ಲೆಮ್ ಆಸಾತ್ ತರಿ ಮ್ಹಜೆ ವಿಶಿಂ ಚಿಂತುಂಕ್ ಕೊಣಾಕೀ ಪುರ್ಸತ್ ನಾ. ಮ್ಹಜ್ಯಾ ಜವಾಬ್ದಾರೆಚ್ಯಾ ಕಾಮಾಂತ್ ಮಜತ್ ಕರುಂಕ್ ಕೊಣಿ ಮುಕಾರ್ ಯೇನಾಂತ್. ಮ್ಹಜ್ಯೊ ಚುಕಿ ಉಕಲ್ನ್ ಧರ್ನ್ ರಾತಿಂ ನಿದ್‍ಲ್ಲ್ಯಾ ವೆಳಾರ್ ಸಯ್ತ್ ಫೊನ್ ಕರ್ನ್ ಜಾಗವ್ನ್ ಧುರ್ಸೊಂಚಿಂ ದೊಳ್ಯಾಂತ್ ರಗಾತ್ ನಾತ್‍ಲ್ಲಿಂ ಮನ್ಶಾಂ ಸಯ್ತ್ ಆಸಾತ್. ನಿವೃತ್ತ್ ಜಾವ್ನ್ ಗಾಂಡ್ ಖೊರ್ಪುನ್ ಘರಾ ಬಸುನ್ ಆಸ್‍ಲ್ಲ್ಯಾಂಕ್ ಸಯ್ತ್ ಸೊಸಾಯ್ಟಿಚಿ ಜವಾಬ್ದಾರಿ ಸಾಂಬಾಳುಂಕ್ ನಾಕಾ. ಹಾಂಚಿ ಹುಕುಮ್ ಚಲಂವ್ಚೆ ಸವಯ್ ಸಯ್ತ್ ಸುಟೊಂಕ್ ನಾ. ಆನಿ ಮುಕಾರ್ ಮ್ಹಜ್ಯಾನ್ ಜಾಯ್ನಾ. ಫಾಲ್ಯಾಂಚ್ ಹಾಂವ್ ರಾಜಿನಾಮೊ ಬರವ್ನ್ ದಿತಾಂ. ಪಂದ್ರಾ ದಿಸಾಂ ಭಿತರ್ ತುಮಿ ನವ್ಯಾ ಸೆಕ್ರೆಟರಿಕ್ ವಿಂಚುನ್ ಕಾಡ್ನ್ ಮ್ಹಾಕಾ ಹ್ಯಾ ಸಕ್ಕಡ್ ರಗ್ಳ್ಯಾಂ ಥಾವ್ನ್ ಸುಟ್ಕಾ ದೀಂವ್ಕ್ ಜಾಯ್ ಮ್ಹಣ್ ವಿನತಿ ಕರ್ತಾಂ ಮ್ಹಣ್ ತಿಣೆ ಸಾಂಗ್ಲೆಂ.
ಮೆಂದೊಸ್ ಚಾಳ್ವಲೊ. ಆಪ್ಲಿಂ ತೀನ್ ಫ್ಲೇಟಾಂ ಆಸಾತ್. ವೆಳಾರ್ ಮೆಂಟೆನೆನ್ಸಾಚಿ ಚೆಕ್ ದಿತಾಂ. ಆಪ್ಲಿಂ ದೋನ್ ಫ್ಲೇಟಾಂ ಬಂಧ್ ಆಸಾತ್ ತರಿ ಆಪ್ಣಾಕ್ ಕಾಂಯ್ ರಿಯಾಯ್ತಿ ಮೆಳಾನಾ .....
ಸಭಾ ಸಂಪ್ಲಿ. ಸಕ್ಡಾಂ ಆಪಾಪ್ಲ್ಯಾ ಘರಾ ಗೆಲಿಂ. ಜೂಲಿಯಾನಾ ವೊಚ್‍ಮೆನಾ ಸಾಂಗಾತಾ ವಚುನ್ ಸಕಯ್ಲ್ಯೆ ಟಾಂಕಿಂತ್ ಉದಾಕ್ ಕಿತ್ಲೆಂ ಉರ್ಲಾಂ ಮ್ಹಣ್ ಪಳೆಲಾಗ್ಲಿ. ಉದಾಕ್ ಅರ್ದಿ ಟಾಂಕಿ ಆಸ್ಲೆಂ. ವಯ್ಲಿ ಟಾಂಕಿ ಫಾಂತ್ಯಾರ್ ಖಾಲಿ ಜಾಲ್ಯಾರ್ ಹೆಂ ಉದಾಕ್ ಚಡಂವ್ಚಿ ಗರ್ಜ್ ಪಡ್ತಲಿ.
ಮ್ಹಾತಾರೊ ವೊಚ್‍ಮೆನ್ ಚಿಂತೇಸ್ತ್ ದಿಸ್ತಾಲೊ.
''ಮಿಶ್ರಾಜೀ, ಸಾಂಗ್ ಕಿತೆಂ ಗಜಾಲ್?'', ಜೂಲಿಯಾನಾನ್ ವಿಚಾರ್ಲೆಂ.
''ಮೇಡಮ್‍ಜೀ, ಭಾಯ್ರ್ ಥಾವ್ನ್ ಉದಾಕ್ ಸಾರ್ಕೆಂ ಯೆತಾ. ಟಾಂಕ್ಯೆಂತ್‍ಯೀ ಸಾರ್ಕೆಂ ಭರ್ತಾ. ತಶೆಂ ಜಾಲ್ಯಾರೀ ಉದಾಕ್ ಕಶೆಂ ಉಣೆ ಪಡ್ತಾ, ಟಾಂಕಿ ಕಶಿ ಖಾಲಿ ಜಾತಾ ಮ್ಹಳ್ಳೆಂ ಮ್ಹಾಕಾ ಸಮ್ಜಾನಾ,'' ತಾಚೊ ತಾಳೊ ರಡ್ಕುರೊ ಜಾಲ್ಲೊ.
''ತುಜಿ ಕಾಂಯ್ ಚುಕ್ ನಾ. ತುಂ ಕಿತ್ಯಾಕ್ ಚಿಂತಾ ಕರ್ತಾಯ್?'' ಜೂಲಿಯಾನಾನ್ ತಾಕಾ ಸಮಾಧಾನ್ ಕೆಲೆಂ.
''ಮೇಡಮ್‍ಜೀ, ಸಕ್ಡಾಂಯ್ ಆನಿ ಚಡ್ ಕರ್ನ್ ಮೆಂದೊಸಾಗೆಲಿಂ ಮ್ಹಾಕಾಚ್ ಧುರ್ಸತಾತ್. ಸಕಯ್ಲಿ ಟಾಂಕಿ ಸಾರ್ಕಿ ಭರ್ಚೆ ಪಯ್ಲೆಂ ನಳ್ ಬಂಧ್ ಕರ್ನ್ ಹಾಂವ್ ನಿದೊಂಕ್ ವೆತಾಂ, ಸಕಾಳಿಂ ಕಾರಾಂ ಧುಂವ್ಚೆ ಖಾತಿರ್ ಚಡ್ ಉದಾಕ್ ವಾಪರ್ತಾಂ, ರಿಕ್ಷಾವಾಲ್ಯಾಂಕ್ ಚೊರಿಯೆನ್ ಉದಾಕ್ ವಿಕ್ತಾಂ, ಅಶೆಂ ಮ್ಹಣ್ತಾತ್. ಮ್ಹಾಕಾ ಮ್ಹಜಿಚ್ ಲಜ್ ದಿಸ್ತಾ. ಕೊಣ್ ತರಿ ರಾಗ್ ಕಾಡುಂಕ್ ಉದ್ಕಾಚೊ ನಳ್ ಉಗ್ತೊ ಸೊಡ್ತಾತ್ ಮ್ಹಣ್ ಮ್ಹಾಕಾ ದುಬಾವ್ ಜಾತಾ,'' ವೊಚ್‍ಮೆನ್ ಮ್ಹಣಾಲೊ.
ತಾಚೆಂ ಉಲೊಣೆ ಆಯ್ಕೊನ್ ಜೂಲಿಯಾನಾಚಿ ಮತ್ ಚುರುಕ್ ಜಾಲಿ.
ಮೆಂದೊಸಾಚ್ಯಾ ಖಾಲಿ ಆಸ್‍ಲ್ಲ್ಯಾ ದೋನ್ ಫ್ಲೇಟಾಂ ಪಯ್ಕಿ ಏಕ್ ಪಾಂಚ್ವೆ ಮಾಳ್ಯೆರ್ ಆನ್ಯೆಕ್ ಸಾತ್ವೆ ಮಾಳ್ಯೆರ್ ಆಸ್‍ಲ್ಲೆಂ. ಜೂಲಿಯಾನಾ ವೊಚ್‍ಮೆನಾಕ್ ಸಾಂಗಾತ್ ಘೆವ್ನ್ ತಕ್ಷಣ್ ಸಾತ್ವೆ ಮಾಳ್ಯೆಕ್ ಗೆಲಿ. ರಾತಿಚೊ ವೇಳ್ ದೆಕುನ್ ಬಿಲ್ಡಿಂಗ್ ಶಾಂತ್ ಆಸ್‍ಲ್ಲೆಂ. ಜೂಲಿಯಾನಾ ಮೆಂದೊಸಾಚ್ಯಾ ಬಂಧ್ ಆಸ್‍ಲ್ಲ್ಯಾ ದಾರಾಕ್ ಕಾನ್ ದೀವ್ನ್ ಆಯ್ಕೊಂಕ್ ಲಾಗ್ಲಿ. ಉಪ್ರಾಂತ್ ವೊಚ್‍ಮೆನಾಕ್ ಆಯ್ಕೊಂಕ್ ಹಿಶಾರೊ ಕೆಲೊ.
''ಮೇಡಮ್‍ಜೀ, ಭಿತರ್ ಉದ್ಕಾಚೊ ನಳ್ ಚಾಲು ಆಸಾ,'' ವೊಚ್‍ಮೆನ್ ಉತ್ತೇಜಿತ್ ಜಾವ್ನ್ ಮ್ಹಣಾಲೊ.
ತಿಂ ದೊಗಾಂಯ್ ಲಿಫ್ಟಾಂತ್ಲ್ಯಾನ್ ಸಕಯ್ಲ್ ತಿಸ್ರ್ಯಾ ಮಾಳ್ಯೆಕ್ ಗೆಲಿಂ ಆನಿ ಮೆಂದೊಸಾಚ್ಯಾ ಘರ್ಚಿ ಕಾಂಪಿಣ್ ದಾಂಭ್ಲಿ. ಸಭಾರ್ ಪಾವ್ಟಿಂ ಬೆಲ್ಲ್ ದಾಂಬ್‍ಲ್ಲ್ಯಾ ಉಪ್ರಾಂತ್ ದಾರ್ ಉಗ್ತೆಂ ಜಾಲೆಂ.
''ತುಜ್ಯಾ ಸಾತ್ವ್ಯಾ ಮಾಳ್ಯೆಚ್ಯಾ ಫ್ಲೇಟಾಚಿ ಆತಾಂಚ್ ತಪಾಸ್ಣಿ ಕರುಂಕ್ ಆಸಾ. ಬಿಗಾತ್ ಘೇವ್ನ್ ಯೆ,'' ಜೂಲಿಯಾನಾನ್ ಮ್ಹಳೆಂ.
''ಹ್ಯಾ ವೆಳಾರ್ ತಪಾಸ್ಣಿ ಕರುಂಕ್ ಆಸಾ? ತುಂ ಕೊಣ್ ಮ್ಹಣ್ ಚಿಂತಾಯ್? ಆತಾಂ ಮಾತ್ರ್ ನ್ಹಯ್, ದಿಸಾಚೆಂ ಸಯ್ತ್ ತುಜೆ ಖಾತಿರ್ ಫ್ಲೇಟ್ ಉಗ್ತೆಂ ಕರ್ಚೊಂನಾ,'' ಮೆಂದೊಸ್ ರಾಗಾನ್ ಮ್ಹಣಾಲೊ.
''ತುಜ್ಯಾಚ್ ಬೊರ್‍'ಯಾಕ್ ಸಾಂಗ್ತಾಂ. ವೆಗಿಂ ಮ್ಹಾಕಾ ಫ್ಲೇಟ್ ಉಗ್ತೆಂ ಕರ್ನ್ ದಾಕಯ್. ನಾಂ ತರ್ ಸಕ್ಡಾಂಕ್ ಜಾಗಯ್ತಾಂ ಆನಿ ಪೊಲೀಸಾಂಕ್ ಆಪಯ್ತಾಂ,'' ಜೂಲಿಯಾನಾನ್ ಬರ್ಫಾಬರಿ ಥಂಡ್ ತಾಳ್ಯಾನ್ ಮ್ಹಳೆಂ.
ಮೆಂದೊಸ್, ತಾಚಿ ಬಾಯ್ಲ್ ಡೊರಾ, ಜೂಲಿಯಾನಾ ಆನಿ ವೊಚ್‍ಮೆನ್ ಲಿಫ್ಟಾಂತ್ಲ್ಯಾನ್ ಸಾತ್ವ್ಯಾ ಮಾಳ್ಯೆಕ್ ಗೆಲಿಂ ಆನಿ ಬಂಧ್ ಆಸ್‍ಲ್ಲೆಂ ಫ್ಲೆಟ್ ಉಗ್ತೆಂ ಕೆಲೆಂ. ಉದಾಕ್ ಪಡ್ಚೊ ಆವಾಜ್ ಸ್ಪಷ್ಟ್ ಆಯ್ಕತಾಲೊ. ಚವ್ಗಾಂಯ್ ಭಿತರ್ ಗೆಲಿಂ. ನಾಣಿಯೆಚೊ ನಳ್ ಉಗ್ತೊ ಆಸ್‍ಲ್ಲೊ. ಮೆಂದೊಸಾನ್ ನಳ್ ಗುಂವ್ಡಾಯ್ಲೊ. ಉದಾಕ್ ವ್ಹಾಳ್ಚೆಂ ರಾವ್ಲೆಂನಾ.
ಮೆಂದೊಸ್ ಆಪ್ಲ್ಯೆ ಬಾಯ್ಲೆ ಥಂಯ್ ಘುಂವ್ಲೊ.
''ನಳ್ ಸಾರ್ಕೊ ಕರಯ್ಲಾ ಮ್ಹಳ್ಳೆಂಯ್‍ಮೂ ತುಂವೆಂ?'' ತಾಣೆ ಸವಾಲ್ ಕೆಲೆಂ.
''ವಿಸರ್ಲಿಂ. ಉಜ್ವಾಡ್ತಾನಾ ಕರಯ್ತಾಂ,'' ತಿಣೆ ಭರ್ಮಾನ್ ಜಾಪ್ ದಿಲಿ.
''ಮಿಸ್ಟರ್ ಮೆಂಡೊನ್ಸಾ, ತುಮಿ ಸಭೆ ಮುಕಾರ್ ಜಾಪ್ ದೀಜೆ ಪಡ್ತಲಿ. ಆತಾಂ ಆಮಿ ವೆತಾಂವ್,'' ಜೂಲಿಯಾನಾ ಮ್ಹಣಾಲಿ.
''ಮಿಸೆಸ್ ಕ್ರಾಸ್ತಾ, ಮ್ಹಾಕಾ ಮಾಫ್ ಕರ್. ಹೊ ವಿವಾದ್ ಹಾಂಗಾಚ್ ಇತ್ಯರ್ಥ್ ಕರ್ಯಾಂ,'' ಮೆಂದೊಸಾಚೊ ತಾಳೊ ಮೋವ್ ಜಾಲ್ಲೊ.
''ಫುಡೆಂ ಸಾಂಗ್, ಹಾಂವ್ ಆಯ್ಕಾತಾಂ,'' ಜೂಲಿಯಾನಾ ಮ್ಹಣಾಲಿ.
''ಭಾಯ್ರ್ ಥಾವ್ನ್ ಹಾಡ್‍ಲ್ಲ್ಯಾ ಉದ್ಕಾಚೆಂ ಬಿಲ್ಲ್ ಹಾಂವ್ ಫಾರಿಕ್ ಕರ್ತಾಂ ಆನಿ ಮುಕಾರ್ ಕಮಿಟಿಕ್ ಧುರ್ಸೊನ್ ಉಲಯ್ನಾ,'' ತೊ ಪರಾತ್ತುಂಚ್ಯಾ ತಾಳ್ಯಾನ್ ಮ್ಹಣಾಲೊ.
''ಮುಂದರ್ಸಿ,'' ಜೂಲಿಯಾನಾನ್ ಹಟ್ ಸೊಡ್ಲೆಂ ನಾ.
''ಆನಿಕಿ ಕಿತೆಂ ಕರುಂಕ್ ಜಾಯ್?'', ಮೆಂದೊಸಾನ್ ವಿಚಾರ್ಲೆಂ.
''ತುಮ್ಚೆ ದೊಗಾಂ ಪಯ್ಕಿ ಎಕ್ಲ್ಯಾಕ್ ಹಾಂವ್ ಕಮಿಟಿಂತ್ ಕೊ-ಒಪ್ಟ್ ಕರ್ನ್ ಕಾಣ್ಗೆತಾಂ. ಸೊಸಾಯ್ಟಿಚಿಂ ಜಾಯ್ತಿಂ ಕಾಮಾಂ ಆಸಾತ್. ಪುಣ್ ಕಾಮ್ ಕರುಂಕ್ ಮನ್ಶಾಂ ನಾಂತ್,'' ಜೂಲಿಯಾನಾ ಮ್ಹಣಾಲಿ.
''ಆಮಿ ತಯಾರ್ ಆಸಾಂವ್.'' ಮೆಂದೊಸ್ ಹಾಸೊನ್ ಮ್ಹಣಾಲೊ.
Tags:
Walter Lasrado, Konkani Short Story, Our Home, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/24/2020 ಉದೆಂತಿಚೆಂ ನೆಕೆತ್ರ್...
-
11/28/2020 ಚೂಕಿ ತಿದ್ವಿನಾ ಜಾಲ್ಯಾರ್!...
-
11/4/2020 ಅನಿವಾಸಿ ರಾಯ್...
-
10/23/2020 ಘಾಣ್...
-
-
9/13/2020 ರಾತ್ ಪಾಳಿ...
-
6/18/2018 ವೆಚಿಕ್ ಪುತಾಚೊ ದಾಟ್ಟು...
-
11/12/2017 ನ್ಯೂ ಐನ್‌ಸ್ಟೀನ್...
-
9/7/2017 ಮ್ಹಜ್ಯಾ ಮೊಗಾಚೆಂ ಮೆಲ್ಬಾ...
-
8/29/2017 ಕೊಲ್‍ಗರ್ಲ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.