web analytics

From around the world

ಪ್ರವೀಣ್ ತಾವ್ರೊ, ಕುಲ್ಶೇಕರ್
             
+971 50 7554105
ತುಮ್ಚ್ಯಾ ಗಮನಾಕ್:
Best be viewed in 1366 X 768 screen resolution and in Google Chrome

ಪಿರೇರಿಗೆಲಿಂ ಚೆಡ್ವಾಂ

Monday, December 21, 2015  /  By Admin

ಬರಯ್ಣಾರಾ ವಿಶಿಂ ಜಾಣಾ ಜಾ...

80.5
User Rating
ಹಾಚೆ ಪಯ್ಲೆಂ ಪೆದ್ರು ತಾಚ್ಯಾ ಜಿಣ್ಯೆಂತ್ ಇತ್ಲೊ ಸುಡ್ಸುಡಿತ್ ಜಾಲ್ಲೊ ನಾ. ತ್ಯಾ ಆಯ್ತಾರಾ ಮಿಸಾಕ್ ವಚೊನ್ ಆಯಿಲ್ಲೊ ಪೆದ್ರು ಸಗ್ಳೊಚ್ ನವ್ಯಾ ಸ್ಪಿರಿತಾನ್ ಭರೊಂಕ್‌ಯಿ ಏಕ್ ಕಾರಣ್ ಆಸಾ. ಕುಮ್ಗಾರ್ ಸೆವ್ನ್ ತಾಚ್ಯಾ ಮುಕ್ಲ್ಯಾನ್ ಪಿರೆರಿಗೆಲಿಂ ಚೆಡ್ವಾಂ ಪಾಶಾರ್ ಜಾವ್ನ್ ವೆತಾನಾ ಮಾರ್‌ಲ್ಲ್ಯಾ ಪರ್ಮಳಾಚ್ಯಾ ಲಾರಾಕ್ ಅಮಾಲ್‌ಶೆಂ ಜಾವ್ನ್ ಝೆಮೆವ್ನ್ ಬಸ್‌ಲ್ಲೊ ಪೆದ್ರು, ಕಳವ್ಣೆ ವೆಳಾರ್ ವಿಗಾರಾಚ್ಯಾ ತಾಳ್ಯಾಕ್ ಉಡೊನ್ ಪಡ್‌ಲ್ಲೊ.

ಪಾಟ್ಲ್ಯಾ ಥೊಡ್ಯಾ ತೆಂಪಾ ಥಾವ್ನ್ ದಿಯೆಸೆಜಿಂತ್ಲ್ಯಾ ’ನವಿ ಸಮಾಜ್ ೨೦೦೦’ ಜಮಾತ್ಯಾಂಕ್ ವಚೊನ್ ಯೇವ್ನ್ ಉತ್ತೇಜಿತ್ ಜಾಲ್ಲೊ ದೆವೊತ್ ವಿಗಾರ್, ತಾಂಚಾಯ್ ಗಾಂವಾಂತ್ ಮುಳಾವಿ ಕ್ರೀಸ್ತಾಂವ್ ಸಮಾಜ್ ಬಾಂದುನ್ ಹಾಡ್ಚೆವಿಶಿಂ ಉಲಯಿಲ್ಲೊ. ವಾಡ್ಯಾ ವಾಡ್ಯಾಂನಿ ಸಾತಾತ್ ಕುಟ್ಮಾಚೆ ಲ್ಹಾನ್ ಸಮುದಾಯ್ ಘಡ್ಚೆವಿಶಿಂ ತಾಣೆಂ ವಿವರ್ ದಿಲ್ಲೊ. ಶೆರ್ಮಾಂವಾ ವೆಳಾರ್ ಆಪೊಸ್ತಲಾಂಚ್ಯಾ ಕೃತ್ಯಾಂತ್ಲ್ಯಾ ಮುಳಾವ್ಯಾ ಕ್ರಿಸ್ತಾಂವ್ ಸಮಾಜೆಚಿಶಿಂ ತಾಣೆಂ ಶಿಕವ್ಣ್ ದಿಲ್ಲಿ. ಕಶೆ ತೆ ಸುರ್ವಿಲೆ ಕ್ರಿಸ್ತಾಂವ್ ಆಪ್ಲೆಂ ಸರ್ವ್ ಆಸ್ತ್‌ಬದಿಕ್ ವಿಕುನ್ ಆಪೊಸ್ತಲಾಂಚ್ಯಾ ಪಾಯಾಂ ಮುಳಾಂತ್ ಹಾಡ್ನ್ ದವರ್ತಾಲೆ ಆನಿ ಎಕಾಮೆಕಾ ವಾಂಟುನ್ ಘೆತಾಲೆ, ಎಕಾಚ್ ಕುಟ್ಮಾಬರಿಂ ಜಿಯೆತಾಲೆ ಆನಿ ತ್ಯಾಚ್ ದೆಕಿಖಾಲ್ ಆತಾಂಚ್ಯಾ ಸಂಸಾರಾಂತ್ ಕಶೆಂ ಲಾನ್ ಸಮುದಾಯ್ ಬಾಂದುನ್ ಹಾಡ್ಯೆತ್ ಮ್ಹಳ್ಳೆವಿಶಿಂ ವಿಗಾರಾನ್ ಆಪುರ್ಬಾಯೆನ್ ಸಾಂಗ್ತಾನಾ ಪೆದ್ರುಕ್ ಹೆ ’ಲ್ಹಾನ್ ಸಮುದಾಯ್’ ನಿಜಾಯ್ಕಿ ನವಲಾಂಭರಿತ್ ದಿಸ್‌ಲ್ಲೆಂ.

ತಶೆಂ ಮ್ಹಣ್ ತಾಂಚ್ಯಾ ವಾಡ್ಯಾಂಚ್ಯಾ ಲ್ಹಾನ್ ಸಮುದಾಯಾಚ್ಯಾ ಸರ್ವಾಂನಿ ಆಪ್ಲೆಂ ಸರ್ವ್ ಆಸ್ತ್ ಬದಿಕ್ ವಿಕುನ್ ವಿಗಾರಾಚ್ಯಾ ಪಾಯಾಮುಳಾಂತ್ ದವರ್ಚೆ ಮ್ಹಳ್ಳೆಂ ಚಿಂತಾಪ್ ಪೆದ್ರುಚೆಂ ಬಿಲ್ಕುಲ್ ನ್ಹಂಯ್. ಆತಾಂಚ್ಯಾ ಕಾಳಾರ್ ಅಸಲಿ ಮಾಂಡಾವಳ್ ಕಿತ್ಲಿ ಪ್ರಾಕ್ಟಿಕಲ್ ಜಾಯ್ತ್ ಮ್ಹಳ್ಳೆವಿಶಿಂ ತೊ ಜಾಣಾಸ್‌ಲ್ಲೊ. ಪುಣ್ ತಾಚ್ಯಾ ಸಬಾರ್ ತಕ್ಲಿ ಫಡಾಫಡಿಂಕ್ ಹ್ಯಾ ಲ್ಹಾನ್ ಸಮುದಾಯವರ್ವಿಂ ವಾಟ್ ಮೆಳತ್ ಮ್ಹಳ್ಳೊ ಭರ್ವಸೊ ಪೆದ್ರು ಥಂಯ್ ಉದೆಲ್ಲೊ. ತಾಕಾ ಆಸ್‌ಲ್ಲಿ ’ಮೇಜರ್’ ಖಂತ್ ಮ್ಹಳ್ಯಾರ್ ತಾಚ್ಯಾ ವಾಡ್ಯಾಂತ್ಲಿಂ ಪಿರೇರಿಗೆಲಿಂ ಚೆಡ್ವಾಂ!

ಕಾಂಯ್ ಸತ್ರಾ ಆಟ್ರಾ ವರ್ಸಾಂ ಆದ್ಲಿ ಗಜಾಲ್, ಪೆದ್ರು ಕಾಂಯ್ ಸಾತಾಟ್ ವರ್ಸಾಂಚೊ ಭುರ್ಗೊ. ಪೆದ್ರುಗೆಲ್ಯಾ ಗಾಂವಾಂತ್ ತವಳ್ ವಾಹನಾಂ ಭೋವ್ ಉಣಿಂ, ತೇಂಯ್ ಮಿಸಾಕ್ ಯೆಂವ್ಚಿಂ ಮ್ಹಳ್ಯಾರ್ ನಾತ್‌ಲ್ಲಿಂಚ್ ಮ್ಹಣ್ಯೆತ್, ಪಿರೇರಿಗೆಲಿ ಲೊರಿ ಸೊಡ್ಲ್ಯಾರ್! ತ್ಯಾ ತೆಂಪಾರ್ ತಾಚ್ಯಾ ಗಾಂವಾಂತ್ ಸರ್ವಾಂ ವರ್ನಿಂ ಗ್ರೇಸ್ತ್ ಮ್ಹಳ್ಯಾರ್ ಪಿರೇರಿಗೆಲಿಂ. ಮದ್ಲ್ಯಾ ವರ್ಗಾಚೊ ಲೋಕ್ ಉಣೊ ಆಸೊನ್, ಗರೀಬಾಂಚೊ ವಾಂಟೊ ಚಡ್ ಆಸ್‌ಲ್ಲ್ಯಾ ತ್ಯಾ ಗಾಂವಾಂತ್ ಗ್ರೇಸ್ತಾಂಕ್ ಮೆಜುಂಕ್ ಎಕಾ ಹಾತಾಚಿಂ ಬೊಟಾಂ ಚಡ್ ಜಾತಾಲಿಂ. ತ್ಯಾ ಕಾಳಾರ್ ಹರ್ಯೆಕ್ ಆಯ್ತಾರಾಚೆಂ ಪಿರೇರಿಗೆಲಿಂ ತಾಂಚಾಚ್ ಲೊರ್‍ಯೆರ್ ಮಿಸಾಕ್ ಯೆತಾಲಿಂ. ಪಿರೇರಿಗೆಲಿಂ ಮ್ಹಳ್ಯಾರ್ ಪಿರೇರಾ, ತಾಚಿ ಬಾಯ್ಲ್ ಆನಿ ಭುರ್ಗಿಂ-ದೊಗಾಂ ಚೆಡ್ವಾಂ. ಇಗರ್ಜೆಂತ್ ತಾಂಚಾಚ್, ತಾಂಚೆಂ ನಾಂವ್ ಬರಯಿಲ್ಲ್ಯಾ ಆನಿ ದಿಂಬಿ ಘಾಲುಂಕ್ ’ನೀಲರ್’ ಆಸ್‌ಲ್ಲ್ಯಾ ಬಾಂಕಾರ್ ಬಸ್ತಾಲಿಂ. ಮಿಸಾ ಉಪ್ರಾಂತ್ ಪಾಟಿಂ ವೆತಾನಾ ಇಗರ್ಜೆ ಮಯ್ದಾನಾರ್ ಜಮ್‌ಲ್ಲ್ಯಾ ಭುರ್ಗ್ಯಾಂನಿ ಕುಕಾರ್‍ಯೊ ಮಾರ್ನ್ ದಾರ್ವಾಟ್ಯಾ ಪರ್ಯಾಂತ್ ತ್ಯಾ ಲೊರಿಯೆ ಪಾಟ್ಲ್ಯಾನ್ ಧಾಂವ್ಚೆಂ, ಧಯ್ರಾದಿಕ್ ಥೊಡ್ಯಾಂನಿ ಲೊರಿಯೆ ಪಾಟ್ಲ್ಯಾನ್ ಉಮ್ಕಾಳ್ಚೆಂ. ಏಕ್ ಪಾವ್ಟಿಂ ತಿ ಲೊರಿ ಇಗರ್ಜೆ ದಾರ್ವಾಟ್ಯಾ ಉಪ್ರಾಂತ್ ದೊಳ್ಯಾಂ ಭಾಯ್ರ್ ಜಾಲಿ ತರ್ ಪೆದ್ರುಕ್ ಆನಿ ತಾಚ್ಯಾ ಸಾಂಗಾತ್ಯಾಂಕ್ ಪಿರೇರಿಗೆಲ್ಯಾಂಚೆಂ ದರ್ಶನ್ ಹಫ್ತ್ಯಾ ಉಪ್ರಾಂತ್‌ಚ್.

ಗಾಂವಾಂತ್ಲೊ ಏಕ್ ಮಾತ್ ಬಂಗ್ಲೊ -ಪಿರೇರಿಗೆಲೊ. ಕ್ರಿಸ್ತಾಂವಾಂಚಿ ಏಕ್ ಮಾತ್ ಲೊರಿ -ಪಿರೇರಿಗೆಲಿ. ಪಯ್ಶಿಲ್ಯಾ ಶೆರಾಂತ್ ಕೊವೆಂತಾಂನಿ ಇಂಗ್ಲೆಜ್ ಶಿಕಾಪ್ ಶಿಕ್ಚಿಂ ಭುರ್ಗಿಂ - ಪಿರೇರಿಗೆಲಿಂ. ಪಾಯಾಂ ಗಾಂಟಿ ಪರ್ಯಾಂತ್ ಯೆಂವ್ಚ್ಯಾ ಬುಟಾಂ ಭಿತರ್ ಇಜಾರ್ ಶಿರ್ಕಾವ್ನ್, ಹಾತಾಂತ್ ಬೇತ್ ಧರ್ನ್ ಭರ್ಮಾನ್ ಚಲೊನ್ ಯೆಂವ್ಚೊ - ಪಿರೇರಾ, ಆನಿ ತಾಕಾ ಸತ್ರಿ ಧರುಂಕ್ ಏಕ್ ದಿವೊರ್. ತಾಚೆಂ ಕಾರ್ಬಾರ್ - ದರ್ಬಾರ್ ಪೆದ್ರುಗೆಲ್ಯಾ ಮಾತ್ ಕಿತ್ಯಾಕ್, ಭೊಂವ್ತಣಿಂತ್ಲ್ಯಾ ಪಂದ್ರಾ ಗಾಂವ್ಚ್ಯಾ ಲೊಕಾಂನಿ ಉಲಂವ್ಚೆ ತಸಲೆಂ. ತಶೆಂ ಮ್ಹಣ್ ಪಿರೇರಿಗೆಲಿಂ ಕೊಣಾಯ್ ಸಂಗಿಂ ಭರ್ಸಾಲ್ಲೆಂ, ವೊಲಾಕ್, ಕುಮ್ಗಾರಾಕ್, ಕಾಜಾರಾಕ್ ಯಾ ಮೊರ್ನಾಕ್ ಕೊಣಾಯ್‌ಗೆರ್ ಆಯಿಲ್ಲೆಂ ಪೆದ್ರುಕ್ ಕಳಿತ್ ನಾ. ತಾಣೆಂ ಬಿಲ್ಕುಲ್ ಪಳೆಂವ್ಕ್ ನಾ. ತವಳ್ಚೊ ಪ್ರಾಯೇಸ್ತ್ ವಿಗಾರ್ ದೊತೊರ್ನಿಕ್ ಯೇನಾತ್‌ಲ್ಲ್ಯಾ ಭುರ್ಗ್ಯಾಂಚೆ ಕಾನ್ ವೊಳಾವ್ನ್ ಗೊಂಯಾಂ ದಾಕಯ್ತಾಲೊ ತರೀ, ಪಿರೇರಿಗೆಲಿಂ ಚೆಡ್ವಾಂ ದೊತೊರ್ನಿಕ್ ಆಯಿಲ್ಲೊ ಧಾಕ್ಲೊಚ್ ನಾತ್‌ಲ್ಲೊ. ಒಟ್ಟಾರೆ ತಿಂ ಗಾಂವ್ಚ್ಯಾ ಖಂಯ್ಚ್ಯಾ ಹಿಸಾಪಾಕ್ ಮೆಳಾನಾತ್‌ಲ್ಲಿಂ. ಪೆದ್ರು ಹೆಂ ಸರ್ವ್ ಬರ್‍ಯಾನ್ ಜಾಣಾ, ಕಿತ್ಯಾಕ್‌ಗೀ ಮ್ಹಳ್ಯಾರ್ ಗಾಂವಾಂತ್ಲ್ಯಾ ಹೆರಾಂ ಸರ್ವಾಂ ಪ್ರಾಸ್ ಬರ್‍ಯಾನ್ ತೊ ಪಿರೇರಿಗೆಲ್ಯಾ ಚೆಡ್ವಾಂಕ್ ಒಳ್ಕತಾ. ತಾಣೆಂ ತಾಂಕಾಂ ಗುಮಾನ್ ಕೆಲ್ಲ್ಯಾ ಪಯ್ಲ್ಯಾ ಆಯ್ತಾರಾ ತಾವ್ನ್ ಆತಾಂ ಪರ್ಯಾಂತ್, ಹರ್ಯೇಕಾ ಆಯ್ತಾರಾ ತಿಂ ಮಿಸಾಕ್ ಯೇವ್ನ್ ವೆತಾಂ ಪರ್ಯಾಂತ್ ಇಗರ್ಜೆಂತ್ಲ್ಯಾ ಕುಂದ್ಯಾಕ್ ಒಣ್ಕೊನ್ ತಾಂಕಾಂ ಪಳೆಂವ್ಚೊ ಪೆದ್ರು, ಲ್ಹಾನ್ ಆಸ್ತಾಂ, ಹೆರ್ ಭುರ್ಗೆ ತಾಂಚ್ಯಾ ಲೊರಿಯೆ ಪಾಟ್ಲ್ಯಾನ್ ಧಾಂವ್ತಾನಾ, ತಾಂಚೆ ಸಂಗಿಂ ಬಿಲ್ಕುಲ್ ಧಾಂವ್‌ಲ್ಲೊ ನಾ. ಬಗಾರ್ ಕುಂದ್ಯಾಕ್ ವಣ್ಕೊನ್, ದೊಳೆ ಧಾಂಪುನ್ ಪಿರೇರಿಗೆಲ್ಯಾ ಚೆಡ್ವಾಂಚಿಂ ರುಪ್ಣಿಂ ಆಪ್ಲ್ಯಾ ಮತಿ ಪಡ್ಡ್ಯಾರ್, ಮುಕ್ಲ್ಯಾ ಎಕಾ ಹಪ್ತ್ಯಾ ಪರ್ಯಾಂತ್ ಖಂಚೊನ್ ದವರ್ಚೆಂ ಪ್ರೇತನ್ ಕರ್ತಲೊ. ತೊ ತವಳ್ ಆಟ್ ನೋವ್ ವರ್ಸಾಂಚೊ ತರ್ ತಿಂ ಚೊವ್ದಾ ಆನಿ ಸೊಳಾ ವರ್ಸಾಂ ಪ್ರಾಯೆಚಿಂ. ತೆನ್ನಾಂ ಸುರು ಜಾಲ್ಲಿ ಹಿ ಪರಿಗತ್ ಕೆನ್ನಾಂ ಮೊಗಾಂತ್ ಬದಲ್ಲಿ ತೆಂ ಪೆದ್ರು ನೆಣಾಂ, ಆನಿ ಕೊಣಾಚ್ಯಾ ಮೊಗಾರ್, ವ್ಹಡ್ಲ್ಯಾ ಯಾ ಧಾಕ್ಟ್ಯಾ ಚೆಡ್ವಾಚ್ಯಾ ಮ್ಹಣ್ ವಿಚಾರ್ಲ್ಯಾರ್ ತಾಚೆಲಾಗಿಂ ಜಾಪ್ ನಾಂ. ಅಶೆಂ ಲ್ಹಾನ್ ಥಾವ್ನ್ ಪಿರೇರಿಗೆಲಿಂ ಮ್ಹಳ್ಯಾರ್ ಪೆದ್ರುಕ್ ಖಂಯ್ ನಾತ್‌ಲ್ಲೊ ಗೌರವ್ ಆನಿ ತಾಂಚಿಂ ಚೆಡ್ವಾಂ ಮ್ಹಳ್ಯಾರ್ ಜೀವ್. ಆಯ್ತಾರಾಚೆಂ ಮೀಸ್ ಆನಿ ಪಿರೇರಿಗೆಲಿಂ ಚೆಡ್ವಾಂ, ಪೆದ್ರುಚ್ಯಾ ಜಿಣಿಯೆಚೊ ತುಟೊಂಕ್ ಜಾಯ್ನಾತ್‌ಲ್ಲೊ ಹಿಸೊ ಜಾವ್ನ್, ತಾಚ್ಯಾ ಅಸ್ತಿತ್ವಾವಿಶಿಂ ಪಿರೇರಿಗೆಲ್ಯಾಂ ಚೆಡ್ವಾಂಕ್ ಕಾಂಯ್ ಖಬಾರ್ ಆಸಾಗಿ ಯಾ ನಾ ಮ್ಹಳ್ಳೆಂ ಪೆದ್ರು ನೆಣಾಂ. ಎದೊಳ್ ಪರ್ಯಾಂತ್ ತಾಂಚೆಲಾಗಿಂ ಉಲಯಿಲ್ಲೆಂ ಸೊಡ್, ಮುಕಾಮುಕಿಂ ಪಳೆವ್ನ್ ಹಾಸ್‌ಲ್ಲೆಂ ಸಯ್ತ್ ತಾಚ್ಯಾ ಉಡಾಸಾಕ್ ಯೇನಾ. ಪೆದ್ರುಚ್ಯಾ ವಾಂಟ್ಯಾಕ್ ತಿಂ ಅಂತ್ರಳಾರ್ ಪರ್ಜಳ್ಚಿಂ ಸೊಭಿತ್ ತಾರಾಂ ಆನಿ ತೊ ತಾಂಚೊ ಆರಾಧಕ್.

ಪೆದ್ರು ವಾಡೊನ್ ಯೆತಾನಾ ಗಾಂವಾಂತ್ ಸಗ್ಳೆಂ ಬದ್ಲೊನ್ ಗೆಲ್ಲೆಂ. ಪಿರೇರಿಗೆಲ್ಯಾ ಬೊಂಗ್ಲ್ಯಾ ತೆದೆಂ ನ್ಹಂಯ್ ತರೀ ಇಲ್ಲೆ ಲ್ಹಾನ್ ಸಾತಾಟ್ ಬೊಂಗ್ಲೆ ವಯ್ರ್ ಆಯಿಲ್ಲೆ. ಟೆರೆಸಾಚಿಂ ಘರಾಂ ಚಡ್‌ಲ್ಲಿಂ. ಗಲ್ಫಾಚ್ಯಾ ವಾರ್‍ಯಾಸಂಗಿಂ ಗಾಂವ್ಚಿ ಕಾರ್ಬಾರಾಂಯ್ ವಾಡೊನ್ ಯೇವ್ನ್ ಪೆದ್ರುಚ್ಯಾ ಗಾಂವಾಕ್ ನವೆಂಚ್ ರೂಪ್ ಆಯಿಲ್ಲೆಂ. ಪರ್ನ್ಯಾ ಇಗರ್ಜೆಕ್ ನವೆಂ ಕಾಪಾಡ್ ನೆಸಯಿಲ್ಲೆಲೆಂ. ನವೆ ನಳೆ ಬಸಯಿಲ್ಲೆ. ರಂಗ್ ವೊಡ್‌ಲ್ಲೊ. ಆಲ್ತಾರಿರ್ ಮಾರ್ಬಲ್ ಚಡಯಿಲ್ಲೆ. ನಾಂವಾಂ ಆಸ್‌ಲ್ಲ್ಯಾ ಬಾಂಕಾಂಚಿ ರಿವಾಜ್ ಮೊಡುನ್, ಕುಶಿಚ್ಯಾ ಬಲ್ಕಾಂವಾಂನಿ ಪ್ಲಾಸ್ಟಿಕಾಚಿಂ ಕದೆಲಾಂ ದವರ್‌ಲ್ಲಿಂ. ಇಗರ್ಜೆ ಮಯ್ದನಾರ್ ಆತಾಂ ಆಯ್ತಾರಾಚೆಂ ವಾಹನಾಂ ರಾವೊಂಕ್ ಜಾಗೊ ಪಾವನಾತ್‌ಲ್ಲೊ. ಪಿರೇರಿಗೆಲಿ ಗ್ರೇಸ್ತ್ಕಾಯ್ ತ್ಯಾಚ್ ಮಾಪಾನ್ ವಾಡ್‌ಲ್ಲಿ ಆನಿ ಲೊರಿಯೆ ಬದ್ಲಾಕ್ ತಾಂಚೆಂ ’ಡೆವೊ’ ಮಿಸಾಕ್ ಯೇವ್ನ್ ಹೆರ್ ಮಾರುತಿ ೮೦೦, ಝೆನ್ , ಪದ್ಮಿನಿ , ಸುಮೊ ಆನಿ ಮಹಿಂದ್ರಾ ಮಧೆಂ ಮಿಸ್ಳಾತಾಲೆಂ ಆನಿ ಪೆದ್ರು ಆಪ್ಲೆಂ ಹೊಂಡಾ ಸಿಡಿ೧೦೦ ಹಾಡ್ನ್ ತಾಂಚ್ಯಾ ಕಾರಾ ಬಗ್ಲೆನ್‌ಚ್ ರಾವಯ್ತಾಲೊ. ತಾಂಚ್ಯಾ ನಾಂವಾಚೊ ಬಾಂಕ್ ಆತಾಂ ಇಗರ್ಜೆಂತ್ ನಾ ತರೀ ಪಿರೇರಿಗೆಲಿಂ ಚೆಡ್ವಾಂ ಹರ್ಯೇಕ್ ಆಯ್ತಾರಾಚೆಂ, ಆದಿಂ ತೊ ಬಾಂಕ್ ಆಸ್‌ಲ್ಲ್ಯಾ ಜಾಗ್ಯಾರ್‌ಚ್ ದಿಂಬಿ ಮಾರ್ತಾಲಿಂ ಆನಿ ಪೆದ್ರು ತಾಂಚ್ಯಾ ಭೊಂವ್ತಣಿ ವ್ಹಾಳ್ಚ್ಯಾ ಪರ್ಮಳಾಚ್ಯಾ ವರ್ತುಲಾಂತ್ ಅಮಾಲಿ ಜಾತಾಲೊ. ಆದಿಂ ಗಾಂವಾರ್ ಪಿರೇರಿಗೆಲ್ಯಾ ಗ್ರೇಸ್ತ್‌ಕಾಯೆವಿಶಿಂ ಉಲವ್ಣೆಂ ಚಲ್ತಾನಾ, ಆತಾಂ ತಾಂಚಿಂ ಚೆಡ್ವಾಂ ಕಾಜಾರ್ ಕಿತ್ಯಾಕ್ ಜಾವ್ನಾಂತ್ ಮ್ಹಳ್ಳೊ ಖಬ್ರೊ ಚಲ್ತಾಲ್ಯೊ. 

ಪಿರೇರಿಗೆಲ್ಯಾ ವ್ಹಡ್ಲ್ಯಾ ಚೆಡ್ವಾಕ್ ಪಾಂತಿಸ್ ಜಾವ್ನ್, ಧಾಕ್ಟ್ಯಾಕ್ ತೆತ್ತೀಸ್ ಜಾಲ್ಯಾರೀ ತಿಂ ದೊಗಾಂಯ್ ಎದೊಳ್ ಕಾಜಾರ್ ಜಾವ್ನಾಂತ್. ಮಧೆಂ ಎಕಾ ದಾಕ್ತೆರಾಚಿ ಸೈರಿಕ್ ಆಯಿಲ್ಲಿ. ಖಂಯ್ಚ್ಯಾಗೀ ಇಜ್ನೆರಾಕ್ ವಿಚಾರ್‌ಲ್ಲೆಂ ಮ್ಹಣೊನ್ ಗಾಬೊ ಜಾಲ್ಲ್ಯೊ ತರೀ, ತಿಂ ಕೆನ್ನಾಂ ಕಾಜಾರ್ ಜಾತಾತ್, ಜಾತಾತ್‌ಗೀ ಯಾ ನಾ ಮ್ಹಳ್ಳೆವಿಶಿಂ ಗಾಂವಾರ್ ನಕ್ಕಿ ಕೊಣಾಯ್ಕಿ ಕಳಿತ್ ನಾ. ತಾಂಚೆಲಾಗಿಂ ಉಲವ್ನ್, ವಿಚಾರ್ನ್ ಜಾಣಾ ಜಾಂವ್ಚಿ ಸಳಾವಳೀ ನಾ. ಮ್ಹಾತಾರೊ ಪಿರೇರಾ ಬಾಯ್ಲ್ ಸರ್‌ಲ್ಲ್ಯಾ ಉಪ್ರಾಂತ್ ಚಡ್ ಆನಿ ಚಡ್ ಆಪ್ಲ್ಯಾ ಕಾರ್ಬಾರಾಂತ್ ಬುಡ್‌ಲ್ಲೊ. ಪೆದ್ರು ಮಾತ್ರ್ ಪಿರೇರಿಗೆಲ್ಯಾ ಚೆಡ್ವಾಂವಿಶಿಂ ದೀಸ್ ರಾತ್ ಚಿಂತಾಲೊ ಆನಿ ಕರ್ಗತಾಲೊ. ತಿಂ ಎದೊಳ್ ಕಾಜಾರ್ ಜಾಯ್ನಾಸ್ತಾಂ ಆಪ್ಣಾಕ್‌ಚ್ ರಾಕೊನ್ ರಾವ್ಲ್ಯಾಂತ್ ಮ್ಹಣ್ ತಾಚೆಂ ಭೊಗಾಪ್. ಪಯ್ಲೆಂ ತಿಂ ಆಪುಣ್ ಪ್ರಾಯೆನ್ ವ್ಹಡ್ ಜಾಂವ್ದಿ ಮ್ಹಣ್ ತಿಂ ರಾಕ್ತಾಲಿ ಮ್ಹಣ್ ತೊ ಚಿಂತಾನಾ, ಆತಾಂ ಆಪ್ಣಾಸಂಗಿಂ ಇಲ್ಲೆ ಪಯ್ಶೆ ಜಾವ್ನ್ ಆಪ್ಣಾಚೆಂ ಮಟ್ಟ್ ಇಲ್ಲೆಂ ಚಡೊಂಡಿ ಮ್ಹಣ್ ರಾಕ್ತಾತ್ ಕೊಣ್ಣಾ ಅಶೆಂ ಸ್ವಪ್ಣೆತಾಲೊ. ಪಯ್ಶೆ ಕರ್ಚೆವಿಶಿಂ ಎದೊಳ್‌ಚ್ ಏಕ್ ಲ್ಹಾನ್ ಕಾರ್ಬಾರ್ ತಾಣೆಂ ಸುರು ಕೆಲ್ಲೆಂ ಆನಿ ದೀಸ್ ರಾತ್ ಆಪ್ಲೆಂ ಕಾರ್ಬಾರ್ ವಯ್ರ್ ಹಾಡುಂಕ್ ತೊ ಪೆಚಾಡ್ತಾಲೊ. ಹ್ಯಾ ಮಧೆಂ ಯುವಸಂಚಾಲನಾಚಿ ಲಕ್ಕಿಡಿಪ್ ವಿಕ್ಚ್ಯಾ ನಿಬಾನ್ ಫೆಸ್ತಾವೆಳಾರ್ ವ್ಹಡ್ಲ್ಯಾ ಚೆಡ್ವಾಲಾಗಿಂ ಏಕ್‌ಪಾವ್ಟಿಂ ತೊ ಉಲಯಿಲ್ಲೊ ಆನಿ ಸನ್ವಾರಾ ಏಕ್ ದೀಸ್ ಧಾಕ್ಟ್ಯಾ ಚೆಡ್ವಾಸಂಗಿಂ ಬಸ್ಸಾರ್ ಎಕಾಚ್ ಸಿಟಿರ್ ತಾಣೆಂ ಪಯ್ಣ್ ಕೆಲ್ಲೆಂ. ತೆ ದೋನ್ ದೀಸ್ ತಾಣೆಂ ಆಪ್ಲ್ಯಾ ಮತಿ ಪಡ್ಡ್ಯಾರ್ ಭಾಂಗ್ರಾಳ್ಯಾ ಅಕ್ಷರಾಂನಿ ಕಾಂತವ್ನ್ ದವರ್‌ಲ್ಲೆ.

ಪೆದ್ರು ಬರೊ ತರ್ನಾಟೊ. ಇಗರ್ಜೆಂತ್ ಬರೆಂ ನಾಂವ್ ತಾಕಾ ಆಸಾ. ಯುವಮುಕೆಲಿ ತೊ. ಗಾಯನ್ ಮಂಡಳೆಂತ್ಲೊ ಆಪುರ್ಬಾಯೆಚೊ ಗಾವ್ಪಿ. ಸರ್ವಾಂಕ್ ದೇಕ್ ದಿಂವ್ಚ್ಯಾ ತಸಲೊ ತರ್ನೊ ಉದ್ಯಮಿ. ಕೊಣಾಯ್ಚ್ಯಾ ಗರ್ಜೆಕ್ ಪಾಂವ್ಚೆ ತಸಲೊ. ವಾಡ್ಯಾಂತ್ಲಿಂ ಕಾರ್ಯಿಂ ಸುಧಾರ್ಸುನ್ ವರ್ಚೆ ತಸಲೊ. ಕಾಂಯ್ ಅಪ್ರೂಪ್ ಇಲ್ಲಿಶಿ ಬಿಯರ್ ಪಿಯೆತಾ ತಾಚ್ಯಾ ದಫ್ತಾರಾಂತ್ ಥೊಡ್ಯಾ ಚಲಿಯಾಂಚೆಂ ಫೋನ್ ಯೆತಾ ತರೀ ತೊ ಕೊಣಾಯ್ಕಿ ವಾರೆಂ ಘಾಲಿನಾ. ತಾಣೆಂ ಚಿಂತ್ಚೆಂ ಫಕತ್ ಪಿರೇರಿಗೆಲ್ಯಾ ಚೆಡ್ವಾಂವಿಶಿಂ.

ಮಾರ್ಗಾರ್ ಥಾವ್ನ್ ಪೆದ್ರುಗೆರ್ ವಚೊಂಕ್ ಮಧೆಂ ಏಕ್ ಓಣ್ ಮೆಳ್ತಾ. ಹೆಣೆ ಆನಿ ತೆಣೆ ದೊನ್ ಹಿತ್ಲಾಂಚೆ ವ್ಹಡ್ ಜಯ್ತ್ ದೊರೆ ಆಸೊನ್ ಮಧೆಂ ಲ್ಹಾನ್ ಭುರ್ಗ್ಯಾಂಕ್ ಸತ್ರಿ ಉಸವ್ನ್ ಧರ್ನ್ ಚಲೊಂಕ್ ಜಾಯ್ನಾ ತಿತ್ಲಿ ಬಾರೀಕ್ ವಾಟ್. ಪೆದ್ರು ಲ್ಹಾನ್ ಆಸ್ತಾನಾ ಪಾವ್ಸಾಳ್ಯಾಂತ್ ತ್ಯಾ ಒಣಿಂತ್ ಕಷ್ಟಾಲ್ಲೊ ಆನಿ ವ್ಹಡ್ ಜಾತಚ್ ಸೈಕಲ್ ವರ್ನ್ ಹಾತ್ ಪಾಯ್ ಘಷ್ಟೊನ್ ಮಾರ್ ಕರ್ನ್ ಘೆತ್‌ಲ್ಲೆ. ಆತಾಂ ತಾಚೆಂ ಹೀರೊ ಹೊಂಡಾ ಘರಾ ಪರ್ಯಾಂತ್ ವಚಾನಾತ್‌ಲ್ಲೆಂ. ತ್ಯಾ ದೊನೀ ದೊರ್‍ಯಾಂಚ್ಯಾ ಧನಿಯಾಂಲಾಗಿಂ ಉಲವ್ನ್ ತೆ ದೊರೆ ಇಲ್ಲೆ ಇಲ್ಲೆ ಪಾಟಿಂ ಘಾಲ್ಚೆವಿಶಿಂ ಎದೊಳ್ ಪೆದ್ರುನ್ ಕೆಲ್ಲಿಂ ಸರ್ವ್ ಪ್ರೇತನಾಂ ನಿರ್ಫಳ್ ಜಾಲ್ಲಿಂ.

ಪೆದ್ರುಚ್ಯಾ ಘರಾಲಾಗಿಂಚ್ ಆಸ್ಚ್ಯಾ ತಾಚ್ಯಾ ಬಾಪ್ಪುಗೆಲ್ಯಾಂ ಸವೆಂ ತಾಂಕಾಂ ಗಡಿಚೆ ತಕ್ರಾರ್ ಆಸ್‌ಲ್ಲೆ. ಇಲ್ಲಿ ಸೊಡ್‌ದೊಡ್ ಕರ್ನ್ ಆಸ್ತಿ ಬದ್ಕಾಚಿಂ ದಸ್ತಾವೆಜಾಂ ಸಾರ್ಕಿಂ ಕರ್ನ್ ಘೆಂವ್ಕ್ ಪೆದ್ರುನ್ ಕೆಲ್ಲ್ಯಾ ವಾವ್ರಾಕ್ ಫಳ್ ಮೆಳೊಂಕ್ ನಾತ್‌ಲ್ಲೊ. ಏಕ್ ಪಾವ್ಟಿಂ ತಿಂ ದಸ್ತಾವೆಜಾಂ ಸಾರ್ಕಿಂ ಜಾಲ್ಲಿಂ ತರ್ ಕಾರ್ಬಾರಾ ಖಾತಿರ್ ಕಾಡ್‌ಲ್ಲ್ಯಾ ರೀಣಾಚೊ ಥೊಡೊ ಭೊರ್ ಪೆದ್ರುಚ್ಯಾ ಮಾತ್ಯಾ ವಯ್ಲೊ ಹಾಳು ಜಾತೊ.

ಸೆಜಾರ್ಚ್ಯಾ ಆನಿ ದೋನ್ ಕುಟ್ಮಾಂ ಮಧೆಂ ದುಸ್ರ್ಯಾಚ್ ರಿತಿಚೆ ಕಷ್ಟ್ ತ್ಯಾ ದೊನೀ ಕುಟ್ಮಾಕ್ ಉದ್ಕಾ ಖಾತಿರ್ ಏಕ್‌ಚ್ ಬಾಂಯ್. ತಿಂ ಬಾಂಯ್ ವಿಶೆಂತ್‌ಪಾವ್ಲಾಚ್ಯಾ ಸಭೆಚ್ಯಾಂನಿ ದೊನೀ ಕುಟ್ಮಾಂಚ್ಯಾ ಸೌಲತೆಕ್ ಬಾಂಧುನ್ ದಿಲ್ಲಿ. ತರೀ ಬಾಂಯ್ ಬಾಂಧುನ್ ಜಾಲ್ಯಾ ಉಪ್ರಾಂತ್, ಬಾಂಯ್ ಆಸ್‌ಲ್ಲ್ಯಾ ಜಾಗ್ಯಾಚಿ ಜಿಲ್ಲಿಬಾಯ್, ಸೆಜಾರ್ಚ್ಯಾ ವಿನ್ನಿ ಬಾಯೆಗೆಲ್ಯಾಂಕ್ ಜಾಂವ್, ಆನಿ ಕೊಣಾಕೀ ಏಕ್ ಥೆಂಬೊ ಉದಾಕ್ ದೀಂವ್ಕ್ ತಯಾರ್ ನಾತ್‌ಲ್ಲಿ. ಪೆದ್ರುಕ್ ಖುದ್ ಹಾಂತುಂ ಕಾಂಯ್ ಖಂತ್‌ನಾತ್‌ಲ್ಲಿ ತರೀ ಆಪ್ಲ್ಯಾ ಸೆಜಾರಾ ಫಕತ್ ಉದ್ಕಾಖಾತಿರ್ ದೋನ್ ಕುಟ್ಮಾಂ ಮಧ್ಲಿ ಲಡಾಯ್ ತಾಕಾ ಸಮಾ ದಿಸಾನಾತ್‌ಲ್ಲಿ. ತೆಂಯೀ ಸಾಂ. ವಿಶೆಂತ್ ಪಾವ್ಲಾಚ್ಯಾ ಬಾಂಯ್ ಖಾತಿರ್.

ಅಶೆಂ ಆಸ್ತಾಂ ಪೆದ್ರುಕ್ ಲ್ಹಾನ್ ಸಮುದಾಯ್ ಆನಿ ಮುಳಾವಿ ಕ್ರಿಸ್ತಾಂವ್ ಸಮಾಜ್ ದೆವಾನ್ ದಿಲ್ಲೆಂ ದೆಣೆಶೆಂ ದಿಸ್‌ಲ್ಲ್ಯಾಂತ್ ನವಾಲ್ ನಾ. ವಿಗಾರಾನ್ ಸಾಂಗ್‌ಲ್ಲ್ಯಾಬರಿ ಪಂಗಡ್ ಕೆಲ್ಯಾರ್ ಪಿರೇರಿಗೆಲ್ಯಾ ಘರ್ಚ್ಯಾಂ ಸವೆಂ ಹೆರ್ ಸರ್ವ್ ಕುಟ್ಮಾಂಚೊ ಎಕ್ ಪಂಗಡ್ ಜಾತಾ ಆನಿ ಹ್ಯಾ ಸಮುದಾಯಾಚಿ ಪಯ್ಲಿ ಜಮಾತ್ ಪೆದ್ರುಗೆರ್ ಜಮ್ಚಿ ಜಾಲ್ಲ್ಯಾನ್, ಲೇಕ್ ನಾತ್‌ಲ್ಲ್ಯಾ ಸಾಧ್ಯತಾವಿಶಿಂ ಪೆದ್ರು ಸ್ವಪ್ಣಾಂ ದೆಕ್ತಾಲೊ. ಜಮಾತೆಂತ್ ಸಮುದಾಯಾಂತ್ಲ್ಯಾ ಸರ್ವ್ ಕುಟ್ಮಾಂನಿ ಪಾವ್ಟ್ ಆಸ್‌ಲ್ಲ್ಯಾನಿಂ ಯೇಜೆ ಆಸ್‌ಲ್ಲೆಂ. ಪಿರೇರಿಗೆರ್ ಥಾವ್ನ್ ಪಿರೇರಾ ಯೆಂವ್ಚೊ ನಾ ಮ್ಹಳ್ಳೆಂ ಪೆದ್ರು ಜಾಣಾಸ್‌ಲ್ಲೊ. ಪುಣ್ ಚೆಡ್ವಾಂ...ತಿಂ ಯೇಂವ್ಕ್ ಪುರೊ ಮ್ಹಣ್ ಪೆದ್ರು ಚಿಂತಾಲೊ. ವೊಣಿಚೆ ದೊರೆ ಪಾಟಿಂ ಘಾಲ್ನ್ ಏಕ್ ಲ್ಹಾನ್ ಮಾರೊಗ್ ಕರ್ಚೊ, ಬಾಪ್ಪುಗೆಲ್ಯಾ ಆಸ್ತಿಚಿಂ ದಸ್ತಾವೆಜಾಂ ಸಮಾ ಕರಂವ್ಚಿಂ. ಜಿಲ್ಲಿ ಬಾಯ್ ಆನಿ ವಿನ್ನಿ ಬಾಯೆಗೆಲ್ಯಾಂನಿ ಬಾಂಯ್ಚೆಂ ಉದಾಕ್ ವಾಂಟುನ್ ಘೆಶೆಂ ಕರ್ಚೆಂ, ಆನಿ ಸರ್ವಾಂ ಪ್ರಾಸ್ ಪಿರೇರಿಗೆಲ್ಯಾ ಚೆಡ್ವಾಂಸಂಗಿಂ ಉಲಂವ್ಚೊ ಆನಿ ವಳಕ್ ಕರ್ನ್ ಘೆಂವ್ಚ್ಯಾ ಅವ್ಕಾಸಾವಿಶಿಂ ಚಿಂತುನ್ ಪೆದ್ರು ಸಗ್ಲೊ ಸುಡ್ಸುಡಿತ್ ಜಾಲೊ.

ಪಯ್ಲ್ಯಾ ಜಮಾತಿಚಿ ತಯಾರಾಯ್ ಪೆದ್ರುನ್ ಭೋವ್ ಭರಾನ್ ಕೆಲ್ಲಿ. ಘರಾಂತ್ಲ್ಯಾ ಕೊನ್ಶಾ ಕೊನ್ಶಾಂತ್ಲೊ ಕಚ್ರೊ ಜಾಡ್ನ್, ಘಯ್ರಂ ಕಾಡ್ನ್ ನಿತಳ್ ಕರ್ನ್ ಸಜಯಿಲ್ಲೆಂ. ಸಮುದಾಯಾಂತ್ಲ್ಯಾ ಸರ್ವಾಂಗೆರ್, ಪಿರೇರಾಗೆರ್ ಸಯ್ತ್ ಖುದ್ ವಚೊನ್ ವೊವ್ಳಿಕ್ ದೀವ್ನ್ ಆಯಿಲ್ಲೊ. ಆಯಿಲ್ಲ್ಯಾ ಸರ್ವಾಂಕ್ ಕಾಫಿ ಫಳಾರಾಚಿ ಸರ್ಬಾರಾಯ್ ಕೆಲ್ಲಿ. ವಿಗಾರಾಕ್, ಫಿರ್ಗಜ್ ಉಪಾಧ್ಯಕ್ಷಾಂಕ್, ಕೊವೆಂತಾಚ್ಯಾ ವ್ಹಡಿಲ್ನಿಕ್, ಪತ್ರಾಚ್ಯಾ ಪ್ರತಿನಿಧಿಕ್ ಆನಿ ತಸ್ವೀರ್‍ಯೊ ಕಾಡುಂಕ್ ಆಕಾರ್ ಸ್ಟುಡಿಯೊಕ್ ಆಪವ್ಣೆಂ ದಿಲ್ಲೆಂ.

ತೆ ದೀಸ್, ತಾಂಚ್ಯಾ ಗಾಂವ್ಚ್ಯಾ ಲ್ಹಾನ್ ಸಮುದಾಯಾಂನಿ ಪಯ್ಲ್ಯಾ ಸಮುದಾಯಾಚಿ ಪಯ್ಲಿ ಜಮಾತ್ ಪೆದ್ರುಗೆರ್ ಭೋವ್ ಯಶಸ್ವೆನ್ ಪೊಂತಾಕ್ ಪಾವ್ಲಿ. ವಿಗಾರಾನ್ ಲ್ಹಾನ್ಸೊ ಸೆರ್ಮಾಂವ್ ದಿಲೊ ಆನಿ ಕೊವೆಂತಾಚ್ಯಾ ವಡಿಲ್ನಿನ್ ಲ್ಹಾನ್ ಸಮುದಾಯಾಚಿ ಶಿಕೊವ್ಣ್ ದಿಲಿ. ಉಪಾಧ್ಯಕ್ಷಾನ್ ಪೆದ್ರುಚೆಂ ಮುಕೆಲ್ಪಣ್ ಫುಗರಿಲೆಂ ಆನಿ ಉರ್‌ಲ್ಲ್ಯಾ ತರ್ನಾಟ್ಯಾಂಕ್ ತಾಚ್ಯಾ ಮೆಟಾಂನಿ ಚಲೊಂಕ್ ಉಲೊ ದಿಲೊ. ಪೆದ್ರು ಭಾಯ್ಲ್ಯಾನ್ ಹಾಸ್ತಾಲೊ ತರೀ ತಾಚೆಂ ಕಾಳಿಜ್ ಚಿರ್ಮುಟ್‌ಲ್ಲೆಂ. ಜಮಾತೆಕ್ ಪಿರೇರಿಗೆಲಿಂ ಕೊಣೀ ಯೇಂವ್ಕ್ ನಾತ್‌ಲ್ಲಿಂ. 

ಉಪ್ರಾಂತ್ಲ್ಯಾ ದಿಸಾಂನಿ, ವಾಡ್ಯಾ ವಾಡ್ಯಾಂನಿ ಸಬಾರ್ ಸಮುದಾಯ್ ವಾಡ್ಲೆ, ಚಡ್ಲೆ ಆನಿ ಗಾಂವಾರ್ ಭರ್ಲೆ. ಪೆದ್ರುಗೆಲ್ಯಾ ಸಮುದಾಯಾಚ್ಯೊ ಜಾಯ್ತ್ಯೊ ಜಮಾತ್ಯೊ ಜಮ್ಲ್ಯೊ, ಮಾಗ್ಣಿಂ ಕೆಲಿಂ, ಪಿಡೆಸ್ತಾಂಕ್ ಭೆಟ್ ದಿಲಿ, ಕರೆಜ್ಮಾಂತ್ ಖುರ್ಸಾವಾಟೊ ಕೆಲ್ಯೊ. ಕೊಂಪ್ರಿ ಪುರ್ಶಾಂವಾರ್ ಸೊಮ್ಯಾಚ್ಯಾ ಸ್ವಾಗತಾಕ್ ಬ್ಯಾನರ್ ಘಾಲೆಂ ಆನಿ ತಾಂಚ್ಯಾ ಗಾಂವಾತ್‌ಚ್ ತಾಂಕಾಂ ದೆಕಿಭರಿತ್ ಮ್ಹಣ್ ವಿಗಾರಾನ್ ಕುರ್ವಾರಾಯ್ಲೆಂ. 

ಪುಣ್ ಆತಾಂಯ್ ಪೆದ್ರುಗೆರ್ ವೆಚಿ ವೊಣ್ ತಶಿಚ್ ಆಸಾ ಆನಿ ತಾಚಿ ಧಾಕ್ಟುಲಿ ಭಾಚಿ ಸತ್ರಿ ಉಸವ್ನ್ ಚಲೊಂಕ್ ಕಷ್ಟಾತಾ. ವಿನ್ನಿ ಬಾಯೆಗೆಲ್ಯಾಂಕ್ ಚಾರ್ ಹಿತ್ಲಾಂ ಉತ್ರೊನ್‌ಚ್ ವಚೊನ್ ಪಯ್ಶಿಲೆಂ ಉದಾಕ್ ಹಾಡಿಜೆ ಪಡ್ತಾ. ಪೆದ್ರುಚ್ಯಾ ಬಾಪ್ಪುಗೆಲಿಂ ಜಮಾತೆಕ್ ಆನಿ ಹೆರ್ ಗರ್ಜೆ ವೆಳಾರ್ ಸೊಡ್ಲ್ಯಾರ್ ತಾಂಚೆಲಾಗಿಂ ಉಲಯ್ನಾಂತ್ ಆನಿ ಪಿರೇರಿಗೆಲಿಂ ಚೆಡ್ವಾಂ ಬಿಲ್ಕುಲ್ ಜಮಾತೆಕ್ ಯೇನಾಂತ್ ಆನಿ ತಾಂಕಾಂ ಆಪ್ಣಾವಿಶಿಂ ಕಳಿತ್ ಆಸಾ ಯಾ ನಾ ತೆಂ ಪೆದ್ರು ನೆಣಾ!

Tags:  Stany Bela, Konkani Article, Konkani, Mangalore, Mangalorean, Mother Tongue

1 Comment/s.

  1. Steevan Dsilva, Bantwal
    Nice@ enjoyed...

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :


Connect

Maibhaas

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE