From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ನವ್ಯಾ ಫಿರ್ಗಜ್ ಪಾದ್ರಿಚೆಂ ನವೆಂ ತಣಾಚೆಂ ಅಂಗಣ್
Monday, March 28, 2016
ತ್ಯಾ ಪರ್‍ಧೆಶಿ ಶೆರಾಂತ್ ಬಸ್ಸಾಚೆರ್ ಪಯ್ಣ್ ಕರ್‍ಚಾ ಕತೊಲಿಕ್ ತರ್‍ನಾಟ್ಯಾನ್ ಎಚ್.ಸಿ. ಅಂಡರ್‍ಸಾನಾಚಿ ಮಟ್ವಿ ಕಥಾ 'ಚಕ್ರವರ್ತಿಚಿ ನವಿ ಮುಸ್ತಾಯ್ಕಿ' ವಾಚುನ್ ಪುಸ್ತಕ್ ಧಾಂಪ್ಲೆಂ. ಭಾಯ್ರ್ ನದರ್ ಘಾಲ್ನ್ ಮಾನಸಿಕ್ ಪುರಾಸಾಣೆನ್ ತಾಣೆ ಜಾಂಬಾಯಿ ಕಾಡ್ಲಿ. ಅರ್‍ಥಿಕ್ ಸುಸ್ತೆಕ್ ಬಲಿ ಜಾಲ್ಲ್ಯಾಂ ಪಯ್ಕಿ ತೊಯಿ ಎಕ್ಲೊ. ಕಂಪೆನಿಚಿ ಅರ್‍ಥಿಕ್ ಪರಿಗತ್ ಕುಂಬು ಜಾಲ್ಲ್ಯಾನ್ ತಾಚೆಂ ಸ್ಟೋರ್ ಕೀಪರಾಚೆಂ ಕಾಮ್ ಉಸ್ಳಾಲ್ಲೆಂ. ದೋನ್ ಮಹಿನೆಂ ಪಾಶಾರ್ ಜಾಲ್ಲೆ. ನವ್ಯಾ ಕಾಮಾಚಾ ಶಿಕಾರೆಂತ್ ಯಶಸ್ವಿ ಮೆಳೊಂಕ್ ನಾತ್‍ಲ್ಲಿ. ಬಂಧ್ ಜಾಲ್ಲ್ಯಾ ಕಂಪೆನಿನ್ ಮುಕ್ಲ್ಯಾ ಏಕಾ ಮಹಿನ್ಯಾಚೊ ವಾಯ್ದೊ ದಿಲ್ಲೊ. ನಾಂ ತರ್ ವೀಜಾ ರದ್ದ್ ಕರ್‍ತಾಂ ಮಣ್ಚಿ ಧಮ್ಕಿ ಸೂಚಿತ್ ಜಾಲ್ಲಿ. ತಾಚೆ ಕಾಮಾಚೆರ್ ಅವಲಂಬಿತ್ ಜಾವ್ನ್ ಗಾಂವಾಂತ್ ಘರ್ ಆನಿ ಕುಟ್ಮಾಚೊ ದಿಸ್ಪಟೊ ಗ್ರಾಸ್ ಚಲ್ತಾಲೊ. ತಾಂಕಾಂ ನಿರಾಶಿ ಕರ್‍ಚೊ ನಾ ಮಣ್ಚಾ ಹಟಾಚೆರ್ ತಾಣೆ ಅತೀ ಕಷ್ಟಾಂನಿ ಪಾಟ್ಲೆ ದೋನ್ ಮಹಿನೆ ಪಾಶಾರ್ ಕೆಲ್ಲೆ. ದೀಸ್ ಪಾಶಾರ್ ಜಾಂವ್ಚೆ ಸವೆಂ ಹಾತಿಂ ಐವಜ್ ಉಣೆ ಜಾವ್ನ್ ಯೆತಾಲೊ. ಮತಿಂತ್ ಕಳ್ವಳೆ ಚಡ್‍ಲ್ಲೆ.
ಇಗರ್‍ಜೆ ಲಾಗ್ಸಾರ್ ಬಸ್ಸ್ ಸವ್ಕಾಸ್ ರಾವ್ಲೆಂ. ಬೊಲ್ಸಾಂತ್ಲೆಂ ಕಾರ್‍ಡ್ ಭಾಯ್ರ್ ಕಾಡ್ನ್ ಇಲೆಕ್ಟ್ರೊನಿಕ್ ಯಂತ್ರಾಕ್ ದಾಕವ್ನ್ ತೊ ಭಾಯ್ರ್ ನಿಕಾಳ್ಳೊ. ಸರಾರಾಂ ಮೆಟಾಂ ಕಾಡ್ನ್ ತೊ ದೇವ್‍ತೆಂಪ್ಲಾಕ್ ಪ್ರವೇಶ್ ಜಾಲೊ. ಶಾಂತ್ ಪರಿಸರಾಂತ್ ಮತಿಕ್ ಸಮಧಾನ್ ಮೆಳ್ತಾಲೆಂ. ಮಾಗ್ಣ್ಯಾಂತ್ ಭರ್‍ವೊಸೊ ಚಡ್ತಾಲೊ. ಪ್ರತ್ಯೇಕ್ ಜಾವ್ನ್ ನವ್ಯಾ ಫಿರ್ಗಜ್ ಪಾದ್ರಿಚೆಂ ಮೀಸ್ ತರ್ ವೇಳ್ ಖಿಣಾ ಭಿತರ್ ಪಾಶಾರ್ ಜಾತಾಲೊ. ಆಪ್ಲ್ಯಾ ಆಕರ್‍ಶಿಕ್ ಜಿನೊಸಾಂತ್ ಆನಿ ಖುಶಾಲ್‍ಭರಿತ್ ಉತ್ರಾಂನಿ ಲೊಕಾಕ್ ವೊಡ್ಚಿ ಸಕತ್ ನವ್ಯಾ ಪಾದ್ರ್ಯಾಬಾಕ್ ಆಸ್‍ಲ್ಲಿ. ತಾಣೆ ಆಶೆಲ್ಲೆ ಪರಿಂ ನವ್ಯಾ ಪಾದ್ರ್ಯಾಬಾಚೆಂ ಮೀಸ್ ಆಜ್ ತಾಕಾ ಪರತ್ ಫಾವೊ ಜಾಲ್ಲೆಂ.
ಆಪ್ಲ್ಯಾ ಸೆರ್‍ಮಾವಾಂತ್ ಹಾಸ್ಯ್ ಭರಿತ್ ಕಾಣಿ ಸಾಂಗೊನ್ ಪಾದ್ರಿನ್ ಲೊಕಾಕ್ ಹಾಸಯಿಲ್ಲೆಂ. "ಭೌತಿಕ್ ಯಶಸ್ವಿ ಜೊಡ್ತಾನಾ ಜಾಯ್ತೆ ಪಾವ್ಟಿಂ ಆಮಿ ಕಷ್ಟಾತೆಲ್ಯಾಂಕ್ ವಿಸ್ರಾತಾಂವ್. ಜೆಜುಕ್ ಸಾಮಾನ್ಯ್ ಮನ್ಶಾಂಚೊ ಹುಸ್ಕೊ ಆಸ್‍ಲ್ಲೊ. ತಾಚೆ ಪಾಟ್ಲಾವ್ದಾರ್ ಜಾವ್ನ್ ಸಾಮಾನ್ಯ್ ಮನ್ಶಾಂಚೆ ಕಷ್ಟ್ ನಿವಾರುಂಕ್ ಆಮಿ ಇಲ್ಲೆಶೆಂ ತರೀ ಪ್ರಯತನ್ ಕರಿನಾಂವ್ ತರ್ ಆಮ್ಚಿ ಜಿಣಿ ವೆರ್‍ಥ್. ದೆವಾಚೆರ್ ಭರ್‍ವೊಸೊ ಹೊಗ್ಡಾಯ್ನಾಕಾತ್, ತಾಚಿ ಖುಶಿ ತರ್ ಏಕ್ ದಾರ್ ಧಾಂಪ್ತಾನಾ ಆನ್ಯೇಕ್ ದಾರ್ ಖಂಡಿತ್ ಉಗ್ತೆಂ ಜಾತೆಲೆಂ," ಮಣ್ಚಾ ಘಣ್ಗಣಿತ್ ಉತ್ರಾಂನಿ ಸೆರ್‍ಮಾಂವ್ ಅಕೇರ್ ಜಾಲ್ಲೊ. ಅಪ್ಣಾಕ್ ಬೊಟ್ ಜೊಕುನ್ ತಿಂ ಉತ್ರಾಂ ಸಾಂಗ್‍ಲ್ಲೆ ಜಿನ್ಸಿಂ ತರ್‍ನಾಟ್ಯಾಕ್ ಭೊಗ್ಲೆಂ. ಮೀಸಾಚಾ ಬಲಿದಾನಾಂತ್ ತೊ ಧ್ಯಾನಿತ್ ಜಾಲೊ. ಮೀಸ್ ಅಕೇರ್ ಜಾತಾಚ್ ತಿಳ್ಸೊಣ್ಯೊ ಘೋಷಿತ್ ಕರ್‍ತಾನಾ ಆದ್ಲೆ ಥೊಡ್ಯಾ ಹಫ್ತ್ಯಾಂನಿ ದುಬ್ಳ್ಯಾಂಚಾ ಗರ್‍ಜೆಂ ಖಾತಿರ್ ಎಕ್ಟಾಂಯಿ ಜಾಲ್ಲ್ಯಾ ದುಡ್ವಾಚೊ ಪಾದ್ರಿನ್ ವಿವರ್ ದಿಲೊ. ದಾನಿಂಚೊ ಉಪ್ಕಾರ್ ಬಾವ್ಡುನ್ ದೆವಾಚಿಂ ಧಾರಾಳ್ ಆಶೀರ್‍ವಾದಾಂ ತಾಂಚೆರ್ ಸದಾಂ ಉರ್‍ತೆಲಿಂ ಮಣ್ ತಾಣೆ ಭಾಸಾಯ್ಲೆಂ.
ಮೀಸ್ ಅಕೇರ್ ಜಾತಾಚ್ ಲೋಕ್ ಉಟೊನ್ ಗೆಲೊ ತರೀ ಹ್ಯಾ ತರ್‍ನಾಟ್ಯಾನ್ ಚಡಿತ್ ಥೊಡೊ ವೇಳ್ ದೇವ್‍ತೆಂಪ್ಲಾಂತ್ ಪಾಶಾರ್ ಕೆಲೊ. ಅಪ್ಣಾಕ್ ಏಕ್ ನವ್ಕರಿ ವೆಗಿಂ ಲಾಬೊಂದಿ ಮಣ್ ದೆವಾಲಾಗಿಂ ಪರಾತುನ್ ಮಾಗ್ಲೆಂ. ಪಾದ್ರಿಚೆಂ ಮೀಸ್ ಆಯ್ಕೊನ್ ತಾಚಿ ಉಮೆದ್ ಪುನರ್‌ಜಿವಿತ್ ಜಾಲ್ಲಿ. ಸಾಂಗಾತಾಚ್ ಏಕ್ ಚಿಂತಾಪ್ ತಾಚೆಂ ಮತಿಂತ್ ಆವ್ಚಿತ್ ಕಿರ್‍ಲಾಲೆಂ...... ಫಿರ್ಗಜ್ ಪಾದ್ರಿಕ್ ಜಾಯ್ತೆ ದಾನಿಂಚಿ, ಗಿರೇಸ್ತಾಂಚಿ ಆನಿ ಉದ್ಯಮಿಂಚಿ ಜರೂರ್ ವಳಕ್ ಆಸ್ತೆಲಿ. ತಾಕಾ ಭೆಟೊನ್ ಮಜತ್ ವಿಚಾರ್‍ಚಾಂತ್ ಕಿತೆಂ ಚೂಕ್? ಖಂಡಿತ್ ಕಾಮ್ ಮೆಳೊಂಕ್ ಸಾಧ್ಯ್ ಆಸಾ. ಆಲ್ತಾರಿರ್ ಥಾವ್ನ್ ಉಲಯ್ತಾನಾ ತಾಚೆ ಉತ್ರಾಂನಿ ದುಬ್ಳ್ಯಾ ಧಾಕ್ಟ್ಯಾಂಚೊ ಹುಸ್ಕೊ ಉಮಾಳೊನ್ ದಿಷ್ಟಿಕ್ ಪಡ್ತಾಲೊ. ತೊ ಅಪ್ಣಾಕ್ ಸೊಡ್ನ್ ಘಾಲ್ಚೊ ನಾ ಮಣ್ಚೆಂ ಏಕ್ ಚಿಂತಾಪ್ ತಾಚೆ ಮೆಂದಾಂತ್ ಬಳಿಷ್ಟ್ ಜಾಲೆಂ. ನಿರಾಶಿ ಭೊಗ್ಣಾಂಕ್ ಪಯ್ಸ್ ಕರ್‍ಚೆಂ ಏಕ್ ಆಶಾಕಿರಣ್ ಫಾಲೆಲೆಂ. ನವ್ಯಾ ಉಮೆದಿನ್ ತೊ ದೇವ್‍ತೆಂಪ್ಲಾ ಥಾವ್ನ್ ಭಾಯ್ರ್ ಆಯ್ಲೊ.
ಭೆಂ ಆನಿ ಕಾವ್ಜೆಣಿ ಮಿಶ್ರಿತ್ ಭೊಗ್ಣಾಂನಿ ತೊ ಫಿರ್ಗಜ್ ಪಾದ್ರಿಚಾ ದಫ್ತರಾಕ್ ರಿಗ್ಲೊ. ಕರ್‍ಮಾಚಾರಿ ವಿಭಾಗಾಂತ್ ಏಕ್ಲಿ ಸೊಭಿತ್ ಸ್ತ್ರೀ ಆನಿ ಏಕ್ಲೊ ದಾದ್ಲೊ ಕಾರ್‍ಯನಿರತ್ ಜಾಲ್ಲಿಂ. ಹಫ್ತ್ಯಾಚೊ ರಜೆಚೊ ದೀಸ್ ಜಾಲ್ಲ್ಯಾನ್ ಪಾದ್ರಿಕ್ ಭೆಟೊಂಕ್ ರಾಕ್ತೆಲ್ಯಾಂಚಿ ಲಾಂಬ್ ಲಾಯ್ನ್ ತಾಣೆ ದೆಕ್ಲಿ. ದಫ್ತರಾಚಾ ಬಗ್ಲೆನ್ ಭಿತರ್‍ಲ್ಯಾ ಉಗ್ತ್ಯಾ ಚೌಕಟ್ಟಾಂತ್ ಏಕ್ ಲಾನ್ಶಿ ಉಗ್ತಿ ಸುವಾತ್ ಆಸ್‍ಲ್ಲಿ. ದೊಳ್ಯಾಂಕ್ ಥಂಡಾಯಿ ದಿಂವ್ಚಾ ಪಾಚ್ವ್ಯಾ ತಣಾಚಾ ಅಂಗ್ಣಾಂತ್ ದೋಗಾಂ ಕಾಮೆಲ್ಯಾಂಕ್ ನಿರ್‍ಧೆಶನ್ ದಿಂವ್ಚಾ ಏಕ್ಲ್ಯಾ ಮೇಲ್ಬಿಚಾರಕಾಕ್ ತಾಣೆ ದೆಕ್ಲೆಂ. ನೈಕ್ ಸ್ಪೋರ್ಟ್ಸ್ ನೆಸ್ಣಾಚೆರ್ ಸೊಭ್ಚಾ ಮೇಲ್ವಿಚಾರಕಾಕ್ ಆದಿಂ ಖಂಯ್ಸರ್ ತರೀ ಪಳೆಯಿಲ್ಲ್ಯಾ ಪರಿಂ ತಾಕಾ ಭಾಸ್ ಜಾಲೆಂ.
ದುಸ್ರ್ಯಾ ಕ್ಷಣಾ ಆರ್‍ಸ್ಯಾ ಭಾಯ್ಲೊ ಮೇಲ್ವಿಚಾರಕ್ ಫಿರ್‍ಗಜೆಚೊ ನವೊ ಪಾದ್ರಿ ಮಣ್ಚೆಂ ತಾಚೆ ಗಮನಾಕ್ ಗೆಲೆಂ. ಹ್ಯಾ ಆದಿಂ ತಾಣೆ ಪಾದ್ರಿಕ್ ಫಕತ್ ಲೋಬಾಚೆರ್ ಪಳೆಯಿಲ್ಲೊ ಜಾಲ್ಲ್ಯಾನ್ ಬದ್ಲಾಲ್ಲ್ಯಾ ನೆಸ್ಣಾಂತ್ ಪಾದ್ರಿ ವೆಗ್ಳೊಚ್ ದಿಸ್ಲೊ. ಅಪುಣ್ ತಾಚೊ ವಡ್ಲೊ ಅಭಿಮಾನಿ ತರೀ ಪಾದ್ರಿಲಾಗಿಂ ಮಜತ್ ಕಶೆಂ ವಿಚಾರ್‍ಚಿ ಮಣ್ಚಿಂ ಚಿಂತ್ನಾಂ ಆಟಯ್ತಾನಾ ತೊ ನರ್‍ವಸ್ ಜಾಲೊ.
ಆರ್‍ಸ್ಯಾಚೆಂ ದಾರ್ ಲೊಟುನ್ ಪಾದ್ರಿ ದಫ್ತರಾ ಭಿತರ್ ಪ್ರವೇಶ್ ಜಾಲೊ. ರಾಕೊನ್ ಆಸ್ಚಾ ದರ್‍ಶಕಾಂನಿ ಪಾದ್ರಿಕ್ ವಂದಿಲೆಂ.
"ಕಶೆಂ ದಿಸ್ತಾ ಮಜೆಂ ನವೆಂ ತಣಾಚೆಂ ಅಂಗಣ್?" ಹೆಮ್ಮ್ಯಾನ್ ವಿಚಾರ್‍ಲೆಂ ಪಾದ್ರಿನ್. "ಆದ್ಲೆ ಪಾದ್ರಿನ್ ಹಿ ಸುವಾತ್ ಖಾಲಿ ಸೊಡ್‍ಲ್ಲಿ. ತಿ ಖಾಲಿ ಸುವಾತ್ ಹಾಂವೆಂ ಪಾಚ್ವಿ ಜಾವ್ನ್ ಬದ್ಲಿಲಿ."
"ಭಾರಿ ಸೊಭಿತ್ ದಿಸ್ತಾ ಫಾದರ್." ದೋಗಾಂ-ತೇಗಾಂನಿ ಸಾ-ಸಾಂಗಾತಾ ಜಾಪ್ ದಿಲಿ.
"ಪುಣ್ ಜಾಯ್ತೊ ಖರ್ಚ್ ಜಾಲೊ." ಜಾಪಿಕ್ ರಾಕಾನಾಸ್ತಾನಾ ಪಾದ್ರಿ ಆಪ್ಲೆ ಕೆಬಿನಾಕ್ ಗೆಲೊ. ತೇಲಾಚಾ ಗಾಂವಾನಿ ಖರ್‍ಚಾಚಾ ದ್ರಷ್ಟೆನ್ ತಣಾಚೆಂ ಅಂಗಣ್ ಆಸಾ ಕರ್‍ಚೆಂ ಆನಿ ಸಾಂಬಾಳ್ಚೆಂ ಸತ್ ಕಿತ್ಲ್ಯಾ ಮೊಲಾಧೀಕ್ ಮಣ್ ಚಡಾವತ್ ಸರ್‍ವಾಂಕ್ ಕಳಿತ್ ಆಸ್ಚೊ ವಿಷಯ್!
ದಾರಾಲಾಗಿಂ ಉಬೊ ಆಸ್ಚಾ ತರ್‍ನಾಟ್ಯಾಕ್ ಘಡಿಭರ್ ಕಶೆಂ ಮುಕಾರ್ ಸರ್‍ಚೆಂ ಮಣ್ ಸುಸ್ತಾಲೆಂ ನಾ. ಕುಡಿಂತ್ ಏಕಾ ಥರಾಚಿ ಅಸ್ಕತ್ಕಾಯಿ ಭೊಗ್ಲಿ. ನವ್ಕರಿಚಿ ಮಜತ್ ಮಾಗೊನ್ ಪಾದ್ರಿಕ್ ಭೆಟ್ತಾನಾ ತೊ ಕಸಲಿ ಪ್ರತಿಕ್ರಿಯಾ ದಿತೊಲೊ ಮಣ್ ಚಿಂತ್ಚೆಂ ಪ್ರಯತನ್ ಕರ್‍ತಾನಾ ತೊ ಭಿತರ್‍ಲ್ಯಾ ಭಿತರ್ ಘಾಬ್ರೆಲೊ. ಅಪ್ಲೊ ಉಸ್ವಾಸ್ ನಿಯಂತ್ರಣ್ ಹಾಡ್ಚಾ ಪರಿಶ್ರಮಾಚೆರ್ ಖರಸ್ ಉದೆಲಿ. ಇತ್ಲೊ ಲೋಕ್ ರಾಕೊನ್ ಆಸ್ತಾನಾ ಆಜ್ ಪಾದ್ರಿಕ್ ಭೆಟ್ಚೆಂ ಸಾರ್‍ಕೆಂ ನಯ್ ಮಣ್ ತಾಕಾ ಭೊಗ್ಲೆಂ. ಮೇಟ್ ಪಾಟಿಂ ಕಾಡ್ನ್ ತೊ ಭಾಯ್ರ್ ಆಯ್ಲೊ. ಇಗರ್‍ಜೆಚಾ ಗೇಟಿಲಾಗಿಂ ಯೇವ್ನ್ ಧೂಮ್ರ್‌ಪಾನ್ ಸೆವುಂಕ್ ನಿಯೋಜಿತ್ ಜಾಗ್ಯಾಕ್ ಯೇವ್ನ್ ತಾಣೆ ಸಿಗ್ರೇಟ್ ಜಳಯ್ಲಿ. ಆಜ್ ನಯ್ ಫಾಲ್ಯಾಂ ಪಾದ್ರಿಕ್ ಭೆಟ್ಚೆಂ ಅವಶ್ಯ್ ಮಣ್ ತಾಕಾ ಭೊಗ್ಲೆಂ.
ದುಸ್ರೊ ದೀಸ್ ಸನ್ವಾರ್.
ಮಲಬಾರಿ ರೆಸ್ಟೊರೆಂಟಾಂತ್ ನಾಸ್ಟೊ ಕರ್ನ್ ತಾಣೆ ಇಗರ್‍ಜೆಕ್ ವೆಚೆಂ ಬಸ್ಸ್ ಘೆತ್ಲೆಂ. ಪಾದ್ರಿಚಾ ದಫ್ತರಾಕ್ ರಿಗ್ತಾನಾ ಕಂಪ್ಯೂಟರಾ ಪಾಟ್ಲ್ಯಾನ್ ಮಗ್ನ್ ಜಾಲ್ಲ್ಯಾ ಸ್ತ್ರೀ ಕಾಮೆಲಿಕ್ ಸೊಡ್ಲ್ಯಾರ್ ಹೆರ್ ಕೋಣ್‍ಯಿಂ ದರ್‍ಶಕ್ ನಾತ್‍ಲ್ಲೆ ಪಳೆವ್ನ್ ತೊ ಖುಶ್ ಜಾಲೊ. ಮೊನಿಟರಾಚೆರ್ ತದೇಕ್ ಜಾಲ್ಲ್ಯಾ ಸೊಭಿತ್ ಸ್ತ್ರೀಯೆನ್ ತಕ್ಲಿ ಉಕಲ್ಲಿನಾ. ತಿಚೆಲಾಗಿಂ ಉಲೊಂಕ್ ತಯಾರ್ ಜಾಲ್ಲ್ಯಾ ತರ್‍ನಾಟ್ಯಾಕ್ ಕಶೆಂ ಆರಂಭ್ ಕರ್‍ಚೆಂ ಮಣ್ ಸಮ್ಜಾಲೆಂನಾ. ದೋನ್ ಮಿನುಟಾಂ ಕಳ್ವಳ್ಯಾಂನಿ ತಾಣೆ ಪಾಶಾರ್ ಕೆಲಿಂ. ತಿ ತಕ್ಲಿ ಉಬಾರುನ್ ಅಪ್ಣಾಚೊ ವಿಚಾರ್ ಕರ್‍ತೆಲಿ ಮಣ್ ತೊ ಭರ್‍ವಸ್ಲೊ. ಮುಕ್ಲ್ಯಾ ಪಾಂಚ್ ಮಿನುಟಾಂನಿ ಕಿತೆಂಚ್ ಘಡ್ಲೆಂನಾ. ತಾಣೆ ಖೊಂಕ್ಲಿ ಕಾಡ್ನ್ ತಾಳೊ ಸದಿಳ್ ಕೆಲೊ.
"ಗುಡ್‍ಮೋರ್‍ನಿಂಗ್." ತರ್‍ನಾಟ್ಯಾನ್ ಥಿಂಪಿ ಗಿಳ್ಳಿ.
"ಮೋರ್‍ನಿಂಗ್." ತಿಚೆಂ ಗಮನ್ ತಾಚೆರ್ ಆಯ್ಲೆಂನಾ.
ಪರತ್ ದೋನ್ ಮಿನುಟಾಂ ಮೌನ್‍ಪಣಿಂ ಮುಕಾರುನ್ ಗೆಲಿಂ.
"ಹಾಂವ್ ಪಾದ್ರ್ಯಾಬಾಕ್ ಭೆಟೊಂಕ್ ಆಯ್ಲಾಂ." ತಾಣೆ ಮೌನ್ ಮೊಡ್ಲೆಂ.
"ಕಿತೆಂಯಿ ಸಮಸ್ಯಾ?" ತಿಣೆ ತಕ್ಲಿ ಉಕಲಿನಾಸ್ತಾನಾ ತಾಚೊ ವಿಚಾರ್ ಕೆಲೊ.
"ಸಮಸ್ಯಾ ಜಾಯ್ತೆ ಆಸಾತ್ ಮ್ಯಾಡಾಂ." ತಾಣೆ ಧೈರ್ ಆರಾಯ್ಲೆಂ.
"ಕಾಜಾರಾಕ್ ಸಂಬಂಧ್ ಜಾಲ್ಲೆ ಯಾ ಹೆರ್?" ತಿಣೆ ತಾಕಾ ಪಳೆಯ್ನಾಸ್ತಾನಾ ಸವಲಾಂ ಮುಕಾರ್‍ಸಿಲಿಂ.
"ಕಾಜಾರಾಚೆ ನಯ್. ಹಾಂವ್ ಕಾಮ್ ಸೊಧುನ್ ಆಸಾಂ." ತಾಣೆ ಸ್ಪಷ್ಟೀಕರಣ್ ದಿಲೆಂ.
"ಮೈ ಗುಡ್‍ನೆಸ್." ಆತಾಂ ತಿಣೆ ತಕ್ಲಿ ಉಕಲ್ಲಿ. "ತುಂ ಚೂಕ್ ಜಾಗ್ಯಾಕ್ ಆಯ್ಲಾಯಿ. ತುಜಿ ಮಜತ್ ಕರುಂಕ್ ಪಾದ್ರಿ ಸಕ್ಚೊನಾ. ಹೊ ಕಾಮ್ ದಿಂವ್ಚೊ ಸಂಸ್ಥೊ ನಯ್. ತುಕಾ ಅತ್ಮಿಕ್ ಯಾ ಧಾರ್‍ಮಿಕ್ ಕಿತೆಂಯಿ ಮಜತ್ ಜಾಯ್ ತರ್ ಪಾದ್ರಿಕ್ ಭೆಟ್ಚೆಂ ವಾಜ್ಬಿ. ಕಾಜಾರಾ ಸಂಬಂಧಿ ಕಿತೆಂಯಿ ತೊಂದ್ರೆ ಆಸಾತ್ ತರ್ ಆಮಿ ತುಜಿ ಕುಮಕ್ ಕರುಂಕ್ ಸಕ್ತೆಲ್ಯಾಂವ್,"
"ಹಾಂವೆ ಎಕ್ ಘಡಿಭರ್ ವಳಕ್ ಕರುಂಕ್ ಪಾದ್ರಿಕ್ ಭೆಟ್ಯೆತ್‌ಗಿ?" ತಾಣೆ ಆಶಾ ಸೊಡ್ಲಿನಾ.
"ತಶೆಂ ಮನ್ ಆಯಿಲ್ಲ್ಯಾಪರಿಂ ಪಾದ್ರ್ಯಾಬಾಕ್ ಭೆಟೊಂಕ್ ಜಾಯ್ನಾ." ತಿಣೆ ಸ್ಪಷ್ಟ್ ಕೆಲೆಂ. "ನಿಯೊಜಿತ್ ಭೆಟೆಚೊ ವೇಳ್ ಘೆತ್ಲ್ಯಾರ್ ಮಾತ್ರ್ ಹೆಂ ಸಾಧ್ಯ್."
ಆದಿಂ ಗಾಂವಾಂಕ್ ಪಾದ್ರ್ಯಾಬಾಕ್ ಭೆಟೊಂಕ್ ನಿಯೊಜಿತ್ ವೇಳಾಚಿ ಗರ್ಜ್ ನಾತ್‍ಲ್ಲಿ. ವೇಳ್ ಆನಿ ಕಾಳ್ ಬದ್ಲಾಲಾ. ಬಜಾರಿ ಸಂಸ್ಥ್ಯಾಂಚಾ ದಿರೆಕ್ತೊರಾಂ ಪರಿಂ ಭೊವ್‍ಶ್ಯಾ ಪಾದ್ರಿಂಲಾಗಿಂ ಆಯ್ಚಾ ಯುಗಾಂತ್ ವೇಳ್ ಮಟ್ವೊ ಜಾಲಾ. ತರ್‍ನಾಟ್ಯಾನ್ ಪರಿಗತ್ ಸಮ್ಜೊಂಚೆಂ ಪ್ರಯತನ್ ಕೆಲೆಂ.
"ತರ್ ಮಾಕಾ ಏಕ್ ನಿಯೊಜಿತ್ ವೇಳ್ ದಿಶಿಗಿ?" ತಾಣೆ ವಿನಂತಿ ಕೆಲಿ.
"ಪುಣ್ ಪಾದ್ರಿಕ್ ಭೆಟೊಂಕ್ ತುಜೆಲಾಗಿಂ ಫಾವೊತೆಂ ಕಾರಣ್ ನಾ." ತಿಣೆ ಸಮ್ಜಾಯ್ಲೆಂ.
"ಹಾಂವ್ ತಾಚೊ ವಡ್ಲೊ ಅಭಿಮಾನಿ." ತರ್‍ನಾಟ್ಯಾನ್ ದೀನ್‍ಪಣಿ ಸಾಂಗ್ಲೆಂ.
"ಹ್ಯಾ ನವ್ಯಾ ಪಾದ್ರ್ಯಾಬಾಕ್ ಹಜಾರಾಂನಿ ಅಭಿಮಾನಿಂ ಆಸಾತ್." ತಿ ತಾಪ್ಲಿ. "ತಾಣೆ ಅಪ್ಲೆ ಹರ್‍ಯೆಕಾ ಅಭಿಮಾನಿಕ್ ಭೆಟೊಂಕ್ ಜಾಯ್ನಾ."
ಅಪುಣ್ ಫಿಲ್ಮ್ ಸ್ಟಾರ್ ಯಾ ನಾಂವಾಡ್ದಿಕ್ ಖೆಳ್ಗಾಡ್ಯಾಚಾ ಭೆಟೆಕ್ ಪರಾತ್ಚೆ ಜಿನ್ಸಿಂ ತಾಕಾ ಭೊಗ್ಲೆಂ.
"ಮಾಫ್ ಕರ್." ತಿಣೆ ಅಪ್ಲೆ ದೊಳೆ ಮೊನಿಟರಾಚೆರ್ ಖಂಚಯ್ಲೆ. "ತುಂವೆಂ ವಚ್ಯೆತ್."
ನಿರಾಸ್‍ಪಣಿ ತಾಣೆ ಪಾದ್ರಿಚಾ ತಣಾಚಾ ಅಂಗ್ಣಾಚೆರ್ ದೀಷ್ಟ್ ಚರಯ್ಲಿ. ಏಕ್ ಬಂಜಾರ್ ಜಾಗೊ ಪಾಚ್ವೊ ಜಾವ್ನ್ ಪಾದ್ರಿನ್ ಪರಿವರ್‍ತಿತ್ ಕೆಲಾ ತರ್ ಅಪ್ಣಾಚಾ ಸಲ್ವಲ್ಲ್ಯಾ ಜಿಣ್ಯೆಂತ್ ಪಾಚ್ವ್ಯಾ ತಣಾ ಸಾರ್‍ಕೆಂ ಚೇತನ್ ಹಾಡ್ಚಿ ಸಕತ್ ಪಾದ್ರಿಕ್ ಖಂಡಿತ್ ಆಸ್ತೆಲಿ. ತೊ ಉಮೆದಿನ್ ಭರ್‍ವಸ್ಲೊ. ಹ್ಯಾ ಸೆಕ್ರೆಟರಿಚಿ ಆಡ್ಕಳ್ ನಿವ್ರಾವ್ನ್ ಪಾದ್ರಿಚಾ ಕೆಬಿನಾಕ್ ರಿಗೊಂಕ್ ಕಿತೆಂ ತರೀ ವಾಟ್ ಸೊಧಿಜಾಯಿ. ಆಲೋಚನ್ ಕರ್ನ್ ತೊ ಪಾಟಿಂ ಘುಂವ್ಲೊ.
ದುಸ್ರೊ ದೀಸ್ ಆಯ್ತಾರ್.
ತಾಣೆ ಅಪ್ಲೆ ಮೊಬಯ್ಲಾ ಥಾವ್ನ್ ಇಗರ್‍ಜೆಚೆಂ ನಂಬರ್ ಪ್ರಯತನ್ ಕೆಲೆಂ. ಥೊಡ್ಯಾ ವೇಳಾನ್ ಪಾದ್ರಿಚಿ ಸೆಕ್ರೆಟರಿ ಲಾಯ್ನಿರ್ ಆಯ್ಲಿ.
"ಮಾಕಾ ಪಾದ್ರಿ ಸಂಗಿಂ ಮಿಲಾಗತೆಚೊ ವೇಳ್ ಮೆಳಾತ್‍ಗಿ?" ಬೊರೊ ಸಕಾಳ್ ಮಾಗೊನ್ ತಾಣೆ ವಿಶಯಿ ತಿಳ್ಸಿಲೊ.
"ಖಂಡಿತ್. ಪುಣ್ ಮಿಲಾಗತೆಚೆಂ ಕಾರಣ್ ಜಾಣಾ ಜಾವ್ಯೆತ್‍ಗಿ?" ತಿಣೆ ಸವಾಲ್ ಕೆಲೆಂ.
"ಮಜಾ ಕಾಜಾರಾಂತ್ ಇಲ್ಲೆಶೆ ಕಚ್ಚಾಟ್ ಜಾಲ್ಯಾತ್." ತಾಣೆ ಫಟ್ ಉಚಾರ್‍ಲಿ. "ವಿವಾಹ್ ವಿಚ್ಚೆದನ್ ಕರ್‍ಚಾ ವಿಶಿಂ ಪಾದ್ರಿಚಿ ಸಲಹಾ ಗರ್ಜ್ ಆಸ್‍ಲ್ಲಿ."
"ತುಜಿ ಮಿಲಾಗತೆಚಿ ವೆವೆಸ್ಥಾ ಹಾಂವ್ ಕರ್‍ತಾಂ." ತಿಣೆ ಭಾಸಾಯ್ಲೆಂ.
"ಆಜ್ ಯೇಂವ್?" ತೊ ದರ್‍ವಡ್ಲೊ.
"ಆಜ್ ಜಾಂವ್ಚೆಂ ನಾ. ಆಯ್ತಾರಾಚೆಂ ಜಾಯ್ತಿಂ ಮೀಸಾಂ ಆಸ್ತಾತ್ ಜಾಲ್ಲ್ಯಾನ್ ವೇಳ್ ಮೆಳ್ಚೊನಾ." ತಿಣೆ ಕಳಿತ್ ಕೆಲೆಂ.
"ಫಾಲ್ಯಾಂ ಜಾಯ್ತ್?"
"ಫಾಲ್ಯಾಂ ಪಾದ್ರಿಚೊ ರಜೆಚೊ ದೀಸ್. ತೊ ಕೋಣಾಯ್ಕಿ ಭೆಟಾನಾ."
"ಪೊರ್‍ವಾಂ?"
"ಪೊರ್‍ವಾಂ ಮಂಗ್ಳಾರ್. ಇಗರ್‍ಜೆಚಾ ದಫ್ತರಾಕ್ ಹಫ್ತ್ಯಾಚಿ ರಜಾ."
"ತರ್ ಬುಧ್ವಾರಾ ಯೇಂವ್?"
"ಬುಧ್ವಾರಾ ಫಿರ್ಗಜ್ ಪಾದ್ರಿಚೊ ಸರ್ವ್ ವೇಳ್ ಎದೊಳ್‍ಚ್ ಆಮಾನತ್ ಜಾಲಾ. ಬ್ರೇಸ್ತಾರಾ ಯೇಶಿಗಿ?" ತಿಣೆ ವಿಚಾರ್‍ಲೆಂ.
"ಕಿತ್ಲ್ಯಾ ವೇಳಾರ್?" ತೊ ಸಂತುಷ್ಟ್ ಜಾಲೊ.
"ಸಾಂಜೆರ್ ಸಾಡೆ-ಚಾರಾಂಕ್. ವೇಳಾರ್ ಪಾವಾನಾ ತರ್ ಮಿಲಾಗತ್ ರದ್ಧ್ ಜಾತೆಲಿ." ತಿಣೆ ಚೇತಾವ್ಣಿ ದಿಲಿ.
ಬ್ರೇಸ್ತಾರಾ ಪರ್‍ಯಾಂತ್ ತಾಣೆ ಕಾಮಾಚಾ ಸೊಧ್ನೆರ್ ವೇಳ್ ಪಾಶಾರ್ ಜಾಲೊ. ಬ್ರೇಸ್ತಾರಾ ಸಕಾಳಿಂ ತಾಕಾ ಏಕಾ ಖಾಸ್ಗಿ ಕಂಪೆನಿ ಥಾವ್ನ್ ಸ್ಟೋರ್ ಕೀಪರಾಚಾ ಹುದ್ದ್ಯಾಚಾ ಸಂದರ್‍ಶನಾಕ್ ಸಾಂಜೆರ್ ಸಾಡೆಪಾಂಚಾಂಕ್ ಹಾಜಾರ್ ಜಾಂವ್ಕ್ ಅಪವ್ಣೆ ಆಯ್ಲೆಂ, ಪಾದ್ರಿಚಿ ಮಿಲಾಗತ್ ಸಾಡೆ-ಚಾರಾಂಕ್ ಅಕೇರ್ ಕರ್ನ್ ಇಂಟರ್‌ವ್ಯೂವಾಕ್ ಪಾವೊಂಕ್ ಸಾಧ್ಯ್ ಮಣ್ ತೊ ಪಾತ್ಯೆಲೊ. ಚಾರ್ ಜಾವ್ನ್ ವೀಸ್ ಮಿನುಟಾಂನಿ ತೊ ಇಗರ್‍ಜೆಚಾ ಗೇಟಿ ಭಿತರ್ ರಿಗ್ಲೊ. ಪಾದ್ರಿಚಾ ದಫ್ತರಾ ಭಾಯ್ರ್ ಏಕ್ಲಿ ಸ್ತ್ರೀ ಸಿಗ್ರೇಟ್ ವೊಡ್ತಾಲಿ. ತಿಕಾ ಉತ್ರೊನ್ ತೊ ದಫ್ತರಾಕ್ ಪ್ರವೇಶ್ ಜಾಲೊ ಆನಿ ಆಯಿಲ್ಲೆಂ ಕಾರಣ್ ಸೆಕ್ರೆಟರಿಕ್ ಸಾಂಗ್ಲೆಂ.
"ತುಂ ಪರಿಚಿತ್ ದಿಸ್ತಾಯಿ. ಆದಿಂ ಆಯ್ಲಾಯಿ?" ತಿಣೆ ಆತುರಾಯಿ ದಾಕಯ್ಲಿ.
"ನಾ. ಹಿ ಮಜಿ ಪಯ್ಲಿ ಭೆಟ್." ತಾಣೆ ಖರಸ್ ನಿಯಂತ್ರಿತ್ ಕೆಲಿ.
"ದಯಾ ಕರ್ನ್ ಬೊಸ್. ಪಾದ್ರಿ ಸಂಗಿ ಸಾಂಜೆಚಿ ಪಯ್ಲಿ ಮಿಲಾಗತ್ ತುಕಾಚ್." ತಿಣೆ ಆಶ್ವಾಸಾನ್ ದಿಲೆಂ.
"ತುಮ್ಚೆಂ ತಣಾಚೆಂ ಅಂಗಣ್ ಸೊಭಿತ್ ಆಸಾ." ತಾಣೆ ಪ್ರಶಂಸಾ ಕೆಲಿ.
"ಜಾಯ್ತೊ ದುಡು ಖರ್‍ಚಾಲಾ." ತಿಚಿ ಜಾಪ್ ಆಯ್ಲಿ. "ತಶೆಂ ಹ್ಯಾ ಇಗರ್‍ಜೆಂತ್ ಪಯ್ಶೆ ದರಬಸ್ತ್ ಆಸಾತ್. ಪಾದ್ರಿಚಾ ಏಕಾ ಉತ್ರಾಚೆರ್ ಪಯ್ಶಾಂಚೊ ಪಾವ್ಸ್ ಪಡ್ತಾ."
"ತಾಚೆಂ ಮೀಸ್ ಹಾಂವೆ ಆಯ್ಕಾಲಾಂ. ತಾಚೆಂ ಉತ್ರಾಂನಿ ಮ್ಯಾಜಿಕ್ ಆಸಾ." ತೊ ಅಭಿಮಾನಾನ್ ಮ್ಹಣಾಲೊ.
"ತಾಚೆಂ ಕಾಮ್ ಹಾಂವೆಂ ಆದ್ಲ್ಯಾ ಫಿರ್‍ಗಜೆಂತ್‍ಯಿ ಪಳೆಯ್ಲಾಂ. ತೊ ಹಿ ಇಗರ್‍ಜ್ ಆನಿ ಹೊ ಭಂವಾರ್ ಕಶೆಂ ರಂಗಾಳ್ ಜಾವ್ನ್ ಬದ್ಲಿತೊಲೊ ತೆಂ ತುಂಚ್ ದೆಕ್ತೊಲೊಯಿ." ತಿ ಉಲೊಂಚಾ ಮೂಡಾರ್ ಆಸ್‍ಲ್ಲಿ.
"ಮಳ್ಯಾರ್ ತುಂ ತಾಕಾ ಆದ್ಲೆ ಫಿರ್‍ಗಜೆ ಥಾವ್ನ್ ವೊಳ್ಕಾತಾಯಿ?" ತೊ ಕುತೂಹಲ್‍ಭರಿತ್ ಜಾಲೊ.
"ವಯ್." ತಿಣೆ ತಕ್ಲಿ ಹಾಲಯ್ಲಿ. "ಹಾಂವ್ ಆದ್ಲೆ ಫಿರ್‍ಗಜೆಂತ್‍ಯಿ ತಾಚಿ ಸೆಕ್ರೆಟರಿ ಜಾವ್ನ್ ಆಸ್‍ಲ್ಲಿಂ. ಅಪ್ಲೊ ವರ್ಗ್ ಜಾತಾನಾ ಮಾಕಾ ತಾಣೆ ಹಾಂಗಾಸರ್ ಹಾಡಯ್ಲೆಂ."
"ನಿಜಾಯ್ಕಿ ಬೊರ್‍ಯಾ ಕಾಳ್ಜಾಚೊ ಪಾದ್ರ್ಯಾಬ್." ತೊ ಮಣಾಲೊ. "ಫುಡೆಂ ವರ್ಗ್ ಜಾತಾನಾಂನಿ ತೊ ತುಕಾ ತಾಚೆ ಸಂಗಿಂ ಘೆವ್ನ್ ವೆತೊಲೊ."
"ತುಂ ಆನಾವಶ್ಯಕ್ ಉಲಯ್ತಾಯಿ." ತಿಚೆಂ ಮುಖಮಳ್ ತಾಂಬ್ಶೆಲೆಂ. "ತುಂ ನಿರೀಕ್ಷಣ್ ಕರ್. ಮಾಕಾ ಕಾಮ್ ಆಸಾ."
ಅರ್‍ಧೆಂ ವೊರ್ ಪಾಶಾರ್ ಜಾಲೆಂ. ಇಂಟರ್‌ವ್ಯೂವಾಕ್ ವೊಚೊಂಕ್ ಆಸಾ ಮಣ್ಚಾ ಉಡಾಸಾನ್ ತಾಕಾ ಧೊಸ್ಲೆಂ. ಪಾದ್ರಿ ಸಂಗಿಂ ಮಿಲಾಗತೆಚೊ ವೇಳ್ ಕಷ್ಟಾಂನಿ ಫಾವೊ ಜಾಲ್ಲೊ. ಅಸಹಯಕತೆ ಸಂಗಿಂ ಉಡ್ಡಾತಾನಾ ತಾಕಾ ಸಿಗ್ರೇಟಿಚಿ ವೊಡ್ಣಿ ಉದೆಲಿ. ಪಾಂಚ್ ಮಿನುಟಾಂನಿ ಯೆತೊಲೊಂ ಮಣ್ ಸೆಕ್ರೆಟರಿಕ್ ಸಾಂಗೊನ್ ತೊ ಭಾಯ್ರ್ ಆಯ್ಲೊ. ಬೊಲ್ಸಾಂತ್ಲಿ ಪೆಕೆಟ್ ಕಾಡ್ನ್ ತಾಣೆ ಸಿಗ್ರೇಟ್ ವೊಂಟಾಂ ಮಧೆಂ ಬೊಸಯ್ಲಿ. ಲೈಟರ್ ಕಾಡ್ನ್ ಜಳಂವ್ಕ್ ಚಿಂತಾನಾ ಏಕಾ ಕಾರ್‍ಯಕರ್‍ತಾನ್ ತಾಕಾ ಆಡಾಯ್ಲೊ.
"ಹಾಂಗಾಸರ್ ಧೂಮ್ರ್‌ಪಾನ್ ನಿಷೇಧ್ ಮ್ಹಣ್ ತುಂ ನೆಣಾಂಯಿ?" ಕಾರ್‍ಯಕರ್‍ತಾನ್ ದಾಂತ್ ಚಾಬ್ಲೆ.
"ಥೊಡ್ಯಾ ವೇಳಾ ಪಯ್ಲೆಂ ಹ್ಯಾಚ್ ಜಾಗ್ಯಾರ್ ಏಕಾ ಸ್ತ್ರೀಯೆನ್ ಸಿಗ್ರೇಟ್ ವೊಡ್ಚೆಂ ಹಾಂವೆ ಪಳೆಯ್ಲಾಂ." ತಾಣೆ ಉಲೊಂಚೆಂ ಧೈರ್ ಘೆತ್ಲೆಂ.
"ಹೊ.... ತಿಣೆ ಸಿಗ್ರೇಟ್ ವೊಡ್ಚೆಂ ಪಳೆವ್ನ್ ತುಕಾಯಿ ತೆಂ ಹಕ್ಕ್ ಆಸಾ ಮಣ್ ಚಿಂತಾಯ್ಗಿ?" ಕಾರ್‍ಯಕರ್‍ತಾನ್ ನಕ್ಲಾಂ ಕೆಲಿಂ. "ತಿ ಸೊಭಿತ್ ಸ್ತ್ರೀ ಪಾದ್ರ್ಯಾಬಾಚಿ ನವಿ ಕಾಮೆಲಿ. ತಿಚೊ ವಿಚಾರ್ ಕರುಂಕ್ ಕೋಣಾಯ್ಕಿ ಅಧಿಕಾರ್ ನಾ. ಪುಣ್ ತುಜೊ ವಿಚಾರ್ ಕರುಂಕ್ ಮ್ಹಾಕಾ ಅಧಿಕಾರ್ ಆಸಾ."
ಹಾಕಾ ಕಿತೆಂ ಜಾಪ್ ದಿಂವ್ಚಿ ಮಣ್ ಸಮ್ಜಾಲೆಂನಾ. ಸಿಗ್ರೇಟ್ ಪಾಟಿಂ ಪೆಕೆಟಿಂತ್ ದವರ್ನ್ ತೊ ಪಾಟಿಂ ದಫ್ತರಾಕ್ ಪಾವ್ಲೊ. ಆತಾಂ ಸಿಗ್ರೇಟ್ ವೊಡ್ಚಾ ಸ್ತ್ರೀಯೆನ್ ದಫ್ತರಾಂತ್ ಅಪ್ಲೆಂ ಕದೆಲ್ ಘೆತ್‍ಲ್ಲೆಂ. ತಾಂಚೆ ಸಂಗಿಂ ಎಕ್ಲೊ ದಾದ್ಲೊ ಅಪ್ಲೆ ಬಸ್ಕೆರ್ ಕಾರ್‍ಯನಿರತ್ ಜಾಲ್ಲೊ. ವೊರಾಂ ಸವಾಯಿ ಪಾಂಚ್ ಜಾಲ್ಲಿಂ. ಪಾದ್ರಿಕ್ ಭೆಟ್ಚಾ ಇರಾದ್ಯಾನ್ ಅಪ್ಣೆ ಇಂಟರ್‌ವ್ಯೂವ್ ಹೊಗ್ಡಾಯ್ಲೆಂ ಮಣ್ಚಾ ಪಶ್ತಾತಾಪಾನ್ ತೊ ಚಡ್ಪಡ್ಲೊ. ಪಾದ್ರಿ ಭೆಟ್ಲೊ ತರ್ ಕಾಮಾಚಿ ಕಿತೆಂಯಿ ಬಂದೋಬಸ್ತ್ ಜಾತೆಲಿ ಮಣ್ ತಾಣೆ ಅಪ್ಣಾಕ್ ಸಮಾಧಾನ್ ಕೆಲೆಂ.
ಪಾಂಚ್ ಮಿನುಟಾಂನಿ ಪಾದ್ರಿಚಾ ಕೆಬಿನಾಚೆಂ ದಾರ್ ಉಗ್ತೆಂ ಜಾಲೆಂ. ನಿಳ್ಶಾ ಜೀನ್ಸ್ ಪ್ಯಾಂಟಾಚೆರ್ ಆನಿ ಬ್ರಾಂಡಡ್ ಟಿ-ಶರ್‍ಟಾಚೆರ್ ಸೊಭ್ಚಾ ಪಾದ್ರಿನ್ ಸೆಕ್ರೆಟರಿಚೆರ್ ದೀಷ್ಟ್ ಭಂವ್ಡಾಯ್ಲಿ. ವೇಳ್ ಜಾಲೊ ತರೀ ಫಿರ್ಗಜ್ ಪಾದ್ರಿಕ್ ಭೆಟ್ಚೆಂ ಸಪಾಣ್ ಜ್ಯಾರಿ ಜಾಂವ್ಚಿ ಘಡಿ ಉದೆಲಿ ಮಣ್ ಹೊ ಖುಶ್ ಜಾಲೊ.
"ನಿದ್‍ಲ್ಲೊಂ ಉಟ್ತಾನಾ ಘಳಾಯಿ ಜಾಲಿ." ಪಾದ್ರಿ ದರ್‍ವೊಡ್ಲೊ. "ಸ್ಟಾರ್ ಬಕ್ಸ್ ಕೊಫಿ ಶೊಪಾಂತ್ ಮಾಕಾ ಏಕ್ಲೊ ಪತ್ರ್‌ಕರ್ತ್ ರಾಕೊನ್ ಆಸಾ. ಮಾಕಾ ವೇಳ್ ಜಾಲೊ. ಆಯ್ಚಿಂ ಸರ್ವ್ ಭೆಟೊ ರದ್ಧ್ ಕರ್. ಸಾತ್ ವೊರಾಂಚೆಂ ಮೀಸ್ ಹಾಂವ್ ಸಾಂಗ್ತೊಲೊಂ. ಮೀಸಾ ಉಪ್ರಾಂತ್ ಹೊಟೆಲ್ ಲೀ-ಮೆರಿಡಿಯಾನಾಂತ್ ಮ್ಹಜಾ ಏಕಾ ಖಾಸ್ ಮನ್ಶಾಚಿ ಪಾರ್‍ಟಿ ಆಸಾ. ಆಜ್ ಕಿತೆಂಚ್ ಕಾಮ್ ಜಾಂವ್ಚೆಂ ನಾ."
ಜಾಪಿಕ್ ರಾಕಾನಾಸ್ತಾನಾ ಪಾದ್ರಿನ್ ಪಾಟ್ ಕೆಲಿ.
"ಮಿಸ್ಟರ್...." ಸೆಕ್ರೆಟರಿನ್ ರಾಕ್ಚಾ ತರ್‍ನಾಟ್ಯಾಕ್ ಸಾಂಗ್ಲೆಂ. "ತುಂ ಜಾಣಾಂಯಿ ಪಾದ್ರಿ ಬಿಝಿ ಆಸಾ. ತುಂ ಆನ್ಯೇಕ್ ಪಾವ್ಟಿಂ ಫೋನ್ ಕರ್ನ್ ಮಿಲಾಗತ್ ನಿಯೋಜಿತ್ ಕರ್."
ತರ್‍ನಾಟ್ಯಾಕ್ ಕಿತೆಂ ಪ್ರತಿಕ್ರಿಯೆಂ ದಿಂವ್ಚೆಂ ಮ್ಹಣ್ ಸುಸ್ತಾಲೆಂನಾ. ಜಾಗೊ ಖಾಲಿ ಕರ್‍ಚಾ ಪಯ್ಲೆಂ ಅಕ್ರೇಚಾ ಪಾವ್ಟಿಂ ತಾಣೆ ಪಾದ್ರಿಚಾ ನವ್ಯಾ ತಣಾ ಅಂಗ್ಣಾಚೆರ್ ನದರ್ ಘಾಲಿ. ಆದಿಂ ದೆಕ್‍ಲ್ಲಿ ಪಾಚ್ಬಿ ಸೊಭಾಯಿ ಮಾಜ್ವೊನ್ ಗೆಲ್ಲಿ. ತಣಾ ಪಂದ್ಲಿ ಕಾಳಿ ಮಾತಿ ತಾಚೆ ದೊಳ್ಯಾಂ ಸಾಮ್ಕಾರ್ ಸ್ಪಷ್ಟ್ ಪಿಂತ್ರಿತ್ ಜಾಲಿ. ಕಿತ್ಯಾಕ್ ಮಣ್ ನೆಣಾ ಎಚ್.ಸಿ. ಅಂಡರ್‌ಸನಾಚಿ 'ಚಕ್ರವರ್ತಿಚಿ ನವಿ ಮುಸ್ತಾಯ್ಕಿ' ಕಾಣಿ ಪರತ್ ವಾಚುಂಕ್ ತೊ ಪ್ರೇರಿತ್ ಜಾಲೊ.
Tags:
Stan Ageira, Konkani Story, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/24/2020 ಉದೆಂತಿಚೆಂ ನೆಕೆತ್ರ್...
-
11/28/2020 ಚೂಕಿ ತಿದ್ವಿನಾ ಜಾಲ್ಯಾರ್!...
-
11/4/2020 ಅನಿವಾಸಿ ರಾಯ್...
-
10/23/2020 ಘಾಣ್...
-
-
9/13/2020 ರಾತ್ ಪಾಳಿ...
-
6/18/2018 ವೆಚಿಕ್ ಪುತಾಚೊ ದಾಟ್ಟು...
-
11/12/2017 ನ್ಯೂ ಐನ್‌ಸ್ಟೀನ್...
-
9/7/2017 ಮ್ಹಜ್ಯಾ ಮೊಗಾಚೆಂ ಮೆಲ್ಬಾ...
-
8/29/2017 ಕೊಲ್‍ಗರ್ಲ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
Our Address
Mangalore
 | Contact Person : Mr. Praveen Tauro |
Email : praveen@maibhaas.com
Phone : +91 99 80 184340
Address :
Daijiworld.com,
Airport Road,
opp. Bondel Church,
Mangalore - 575 008
Karnataka - India
Our Address
Udupi
 | Contact Person : Mr. Joel D'almeida |
Email : joel@maibhaas.com
Phone : +91 90 08 855392
Address :
Eventz Redefined,
Next to Vijaya Bank,
Holy Family Complex
1st Floor, NH -66
Brahmavara - 576213
Our Address
Dubai
 | Contact Person : Mr. Naveen Sequeira |
Email : editor@maibhaas.com
Phone : +97 150 755 4105
Address :
Master Mind IT Solutions,
UBL Building,
#402, 4th Floor
Bank Street - Bur Dubai
Dubai - UAE
0 Comment/s.