From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಟಿಮಟಿಚೊ ಸರ್
Thursday, April 21, 2016
ಜಿಣ್ಯೆಂತ್ ಉದೆಲ್ಲೆ ಥೊಡೆ ಮನಿಸ್, ಥೊಡಿಂ ಘಟನಾಂ ಆನಿ ಥೊಡ್ಯೊ ಘುಂವ್ಡ್ಯೊ ಮನೋಪಟಲಾಂತ್ ಮಾಜ್ವಾನಾತ್‌ಲ್ಲೆಂ ಮುದ್ರಣ್ ಸೊಡ್ನ್ ಪಾಶಾರ್ ಜಾತಾತ್. ಹೊ ಏಕ್ ಅಸಲ್ಯಾಚ್ ವರ್‍ಗಾಚೊ ಜಿಣ್ಯೆ ಅವಸ್ವರ್.
ಮಜೆಂ ಜನನ್ 1961 ಇಸ್ವೆಂತ್ ಮುಲ್ಕಿಂತ್ ಜಾಲ್ಲೆಂ. ಶಿಸ್ತ್, ಶಿಕಾಪ್ ಆನಿ ಭಕ್ತ್ ಮ್ಹಣ್ಚಾ ಉಪದೇಸಾಂ ಸವೆಂ ಮಜೆ ಭುರ್‍ಗ್ಯಾಪಣಾಲ್ಯಾ ದಿಸಾಂಚಿ ಸುರ್‍ವಾತ್ ಜಾಲ್ಲಿ. ಮಜೊ ಪಪ್ಪಾ ಭಾರತಾಚಾ ವಾಯುದಳಾಂತ್ ಕಾಮ್ ಕರ್‍ತಾಲೊ ಆನಿ ಮಾಮ್ಮಿ ಆಮ್ಚಿ ಜತನ್ ಘೆತಾಲಿ. ಘರ್, ಸೆಜಾರ್, ಇಗರ್ಜ್ ಆನಿ ಮಾದ್ರಿಂಚೆಂ ಇಸ್ಕಾಲ್ ಹೆಂಚ್ ಮಜೆಂ ವರ್‍ತುಲ್. ಸಾತ್ವಿ ಕ್ಲಾಸ್ ಪಾಸ್ ಜಾತಾ ಪರ್‍ಯಾಂತ್ ಹಾಂವ್ ಹ್ಯಾ ತೀನ್ ಉಪದೇಸಾಂಕ್ ಆರ್‍ನೊನ್ ರಾವ್‌ಲ್ಲೊಂ. ಸಾತ್ವಿ ಕ್ಲಾಸ್ ಪಾಸ್ ಜಾಲ್ಲ್ಯಾ ಉಪ್ರಾಂತ್ ತವಳ್ಚಾ ದಿಸಾಂನಿ ಚೆರ್‍ಕ್ಯಾಂಕ್ ಮುಲ್ಕಿ ಬೆಥನಿ ಕೊನ್ವೆಂಟ್ ಇಸ್ಕಾಲಾಂತ್ ರೀಗ್ ನಾತ್‌ಲ್ಲ್ಯಾನ್ ಹೈಸ್ಕೂಲಾಕ್ ಫಾವೊ ಜಾತಾಲೆಂ ಸರ್‍ಕಾರಿ ಇಸ್ಕಾಲ್.
ವರಸ್ 1973, ತಶೆಂ ಆಟ್ವೆ ಕ್ಲಾಸಿಕ್ ಮಾಕಾಯಿ ಫಾವೊ ಜಾಲೆಂ ಸರ್‍ಕಾರಿ ಇಸ್ಕಾಲ್. ಸರ್‍ಕಾರಿ ಇಸ್ಕಾಲಾಚೊ ಭಂವಾರ್ ಮಳ್ಯಾರ್ ಎಕಾ ರೀತಿಚಿ ಸ್ವತಂತ್ರತಾ. ಸಮ್ಜೊಣಿ ನಾಸ್ತಾನಾ ಮ್ಹಾಕಾ ಮೆಳ್‌ಲ್ಲ್ಯಾ ಹ್ಯಾ ಸ್ವತಂತ್ರ್ ಭಂವಾರಾಂತ್ ಹಾಂವೆಂ ಶಿಸ್ತ್, ಶಿಕಾಪ್ ಆನಿ ಭಕ್ತಿಪಣಾಚಿ ಬೆಪರ್‍ವಾ ಕೆಲಿ ಮಳ್ಯಾರ್ ಚೂಕ್ ನಯ್. ಘರಾ ಭಿತರ್‍ಲ್ಯಾ ವ್ಹಡಿಲಾಂಕ್ ಆನಿ ಇಸ್ಕಾಲಾಂತ್ ಮೇಸ್ತ್ರಿಂಕ್ ಪಾಟಿಂ ಜಾಪ್ ದಿಂವ್ಚಿ ಸವೊಯಿ ಜಾಲಿ, ಕ್ಲಾಸಿಕ್ ಚಕ್ಕರ್ ಮಾರ್ನ್ ಸಿನೆಮಾ ಪಳೆಂವ್ಚೆಂ ಯಾ ಮೈದಾನಾರ್ ಕ್ರಿಕೆಟ್ ಖೆಳ್ಚೆಂ ಚಡಿತ್ ಮಝೆಚೆಂ ಜಾಲೆಂ. ಪೋಲಿ ಇಷ್ಟಾಂಚೊ ಸಾಂಗಾತ್ ಜಾಲಾ ಮಣ್ಚೆ ಹಿಶಾರೆ ಗಾಂವಾಂತ್ ಪಾಶಾರ್ ಜಾಲ್ಲೆ. ಮಜಿ ಅಶಿಸ್ತ್ ಪಾರ್‍ಕುನ್ ಫಿರ್‍ಗಜ್ ಪಾದ್ರಿನ್ ಮಾಕಾ ಆಲ್ತಾರ್ ಭುರ್‍ಗ್ಯಾಂಚಾ ಸೊಡೆಲಿಟಿ ಥಾವ್ನ್ ಕಾಡ್‌ಲ್ಲೊ.
ಆಟ್ವೆ ಕ್ಲಾಸಿಂತ್ ಥೊಡೆಚ್ ಮಹಿನೆಂ ಪಾಶಾರ್ ಜಾತಾನಾ ಆದ್ಲಿ ಸ್ತ್ರೀ ಪ್ರಿನ್ಸಿಪಾಲ್ ನಿವೃತ್ತ್ ಜಾವ್ನ್ ಮುಲ್ಕಿ ಸರ್‍ಕಾರಿ ಜೂನಿಯರ್ ಕೊಲೇಜಿಕ್ ಸರ್ ಜಿ.ವಿ. ಹೆರ್‍ಳೆ ನಾಂವಾಚಾ ಎಕಾ ಪ್ರಿನ್ಸಿಪಾಲಾಚೆಂ ಯೆಣೆಂ ಜಾಲೆಂ. ಅಪುಟ್ಟ್ ಗೊರ್‍ಯಾ ಕಾತಿಚೊ, ನಿತಳ್ ಆನಿ ಹಾಸ್ತ್ಯಾ ಮುಕಮಳಾಚೊ ಜಿ.ವಿ. ಹೆರ್‍ಳೆ ತ್ಯಾ ಸರ್‍ಕಾರಿ ಇಸ್ಕಾಲಾಂತ್ ವೆಗ್ಳ್ಯಾಚ್ ಕಾಸ್ತಾಚೊ ಮಳ್ಳೆಪರಿಂ ಸೊಭ್ತಾಲೊ. ಶಾಂತ್ ಸ್ವಭಾವ್, ನಿಯಂತ್ರಿತ್ ಭರ್ಮ್, ಸುಡಾಳ್ ನಾಜೂಕ್ ಉಲೊಣೆ ಆನಿ ಗುಪಿತ್ ಆತ್ಮ್-ವಿಶ್ವಾಸಾಚೆ ಶೆಗುಣ್ ತಾಕಾ ಆಸ್‌ಲ್ಲೆ. ಆಯಸ್ಕಂತಾ ಪರಿಂ ವೊಡ್ಚೆಂ ಆಕರ್‍ಶಿಕ್ ವೆಕ್ತಿತ್ವ್. ತಾಚಿ ಭಿತರ್‍ಲಿ ನಿತಳಾಯಿ ತೋಂಡಾರ್ ಪ್ರಕಾಸ್ತಾಲಿ. ಮಾಕಾ ತಾಚೆ ವೆಕ್ತಿತ್ವಾ ಥಂಯ್ ವಿಶೇಸ್ ಗಿರಾಂತ್ ನಾತ್‌ಲ್ಲ್ಯಾನ್ ಹಾಂವ್ ಪಯ್ಸಾಪಯ್ಸ್ ರಾವ್ಲೊಂ.
ತಶೆಂ ತಾಕಾ ಮಜಿ ವಳಕ್ ಜಾಂವ್ಚೊ ಸಂಭವ್ ನಾತ್‌ಲ್ಲೊ. ಶಿಕ್ಪಾಂತ್ ಯಾ ಇತರ್ ಚಟುವಟಿಕೆಂನಿ ಅಪ್ರತಿಮ್ ತರ್ ಪ್ರಿನ್ಸಿಪಾಲಾಚಾ ನದ್ರೆಕ್ ತಸಲೆ ವಿದ್ಯಾರ್‍ಥಿ ಸಾಂಪಾಡ್ತಾತ್. ಮಜೆ ಥಂಯ್ ತಸಲಿಂ ದೆಣಿಂ ನಾತ್‌ಲ್ಲಿಂ. ಹಾಂವೆ ಗಣ್ಣೆಂ ಕೆಲೆಂನಾ. ಹಾಂವ್ ಮಜಾ ಅಶಿಸ್ತ್ ಜಿಣ್ಯೆಂತ್ ವಾಳೊನ್ ಆಸ್‌ಲ್ಲೊಂ.
ಪುಣ್ ಪ್ರಾಕೃತಿಕ್ ನಿರ್‍ಮೊಣ್ಯಾ ಥಾವ್ನ್ ಹಾಂವ್ ಬಚಾವ್ ಜಾಲೊ ನಾ!
ಬೆಥನಿ ಕೊನ್ವೆಂಟ್ ಇಸ್ಕಾಲಾಂತ್ ಶಿಕ್ತಾನಾ ಮುಕ್ಲ್ಯಾ ಸ್ಥಾನಾರ್ ಪಾಸ್ ಜಾಂವ್ಚಾ ಚೆರ್‍ಕ್ಯಾಚೆಂ ಶಿಕ್ಪಾ ಪ್ರದರ್‍ಶನ್ ಆತಾಂ ಸರ್‍ಕಾರಿ ಇಸ್ಕಾಲಾಚಾ ಆಟ್ವೆ ಕ್ಲಾಸಿಂತ್ ಭಿಗಡ್ತಾನಾ ಮಜಿ ಮಾಮ್ಮಿ ಗಡ್ಬಡ್ಲಿ. ತಿಣೆ ತುರಂತ್ ಏಕ್ ಇಸ್ಕಾಲಾಕ್ ಭೆಟ್ ದಿಲಿ. ಮಾಕಾ ಹ್ಯಾ ಭೆಟೆಚಿ ಖಬರ್ ನಾತ್‌ಲ್ಲಿ. ತ್ಯಾ ದನ್ಪರಾಂ ಮ್ಹಾಕಾ ಪ್ರಿನ್ಸಿಪಾಲಾಚಾ ದಫ್ತರಾಕ್ ಅಪವ್ಣೆ ಆಯ್ಲೆಂ. ಜಿ.ವಿ. ಹೆರ್‍ಳೆ ಆನಿ ಮಾಮ್ಮಿ ಹುಜ್ರಿಂ ಕ್ಲಾಸ್ ಟೀಚರಿನ್ ಮ್ಹಜೆರ್ ಆರೋಪ್ ಮಾಂಡ್ಲೆ. ಕ್ಲಾಸ್ ಚುಕಯ್ತಾ, ಮೈದಾನಾಚೆರ್ ಖೆಳೊನ್ ವೇಳ್ ವಿಭಾಡ್ತಾ ಆನಿ ಕ್ಲಾಸಿಂತ್ ಶಿಕ್ಪಾಕ್ ಗಮನ್ ದೀನಾ ಮಣ್ತಾನಾ ಮಾಮ್ಮಿನ್ ಮ್ಹಜೆರ್ ಕಠಿಣ್ ನಿಯಂತ್ರಣ್ ದವರುಂಕ್ ಪ್ರಿನ್ಸಿಪಾಲಾಕ್ ಆದೇಶ್ ದಿಲೊ. ಹಾಂವ್ ಪ್ರಿನ್ಸಿಪಾಲಾಚಾ ಸೆರ್‍ಮಾಂವಾಕ್ ಮತಿ ಭಿತರ್ ತಯಾರ್ ಜಾಲೊಂ.
ಜಿ.ವಿ. ಹೆರ್‍ಳೆನ್ ಮ್ಹಜೊ ಆಕ್ಮಾನ್ ಕೆಲೊನಾ ಯಾ ವಡ್ಲ್ಯಾ ತಾಳ್ಯಾನ್ ವಿಚಾರ್ ಕೆಲೊನಾ. ಬದ್ಲಾಕ್ ತೊ ಹಾಸ್ಲೊ ಆನಿ ಮಾಮ್ಮಿಕ್ ಸಮಧಾನ್ ಕರ್ನ್ ಪಾಟಿಂ ದಾಡ್ಲೆಂ.
"ತುಜೆ ಸಾತ್ವೆ ಕ್ಲಾಸಿಚೆ ಮಾರ್ಕ್ಸ್ ಹಾಂವೆಂ ಪಳೆಯ್ಲ್ಯಾತ್. ತುಕಾ ಬೊರೆ ಅಂಕ್ ಕಾಡ್ಚಿ ಶಾತಿ ಆಸಾ ಮ್ಹಣ್ ಹಾಂವೆ ಪಾರ್‍ಕಿಲಾಂ. ಮ್ಹಾಕಾ ತುಜೆರ್ ಭರ್‍ವೊಸೊ ಆಸಾ." ಪ್ರಿನ್ಸಿಪಾಲಾನ್ ಮಜಿ ಪಾಟ್ ಥಾಪುಡ್ಲಿ.
ಹ್ಯಾ ಬೊರ್‍ಯಾ ಮನ್ಶಾಕ್ ಪರತ್ ಭೆಟ್ಚೊನಾ ಮ್ಹಣ್ ಹಾಂವೆಂ ಮತಿಂತ್ ನಿಚೆವ್ ಕೆಲೊ. ಮಜೊ ನಿಚೆವ್ ಮ್ಹಜಾ ನಿಯಂತ್ರಾಣಾರ್ ಉರ್‍ಲೊನಾ. ಎಕಾ ಹಫ್ತ್ಯಾ ಭಿತರ್ ವಿಗ್ಯಾನ್ ಟೀಚೆರಿನ್ ಮ್ಹಜೆ ವಿರೋಧ್ ಪ್ರಿನ್ಸಿಪಾಲಾಕ್ ಕಂಪ್ಲೆಂಟ್ ಕೆಲೆಂ. ತಿ ಶಿಕಯ್ತಾನಾ ಹಾಂವ್ ಉಲೊನ್ ಹೆರಾ ವಿದ್ಯಾರ್‍ಥಿಂಕ್ ಧೊಸ್ತಾಂ ಆನಿ ತಿಕಾ ಕ್ಲಾಸಿಕ್ ನಿಯಂತ್ರಣಾರ್ ದವರುಂಕ್ ಕಷ್ಟ್ ಜಾತಾತ್ ಮ್ಹಣ್ ತಿಚೊ ಬದ್ಲಾಮ್. ಮಾಕಾ ಪ್ರಿನ್ಸಿಪಾಲಾಚಾ ಕೂಡಾಕ್ 'ಬುಲಾವಾ' ಆಯ್ಲೊ.
ತಕ್ಲಿ ಪಂದಾಕ್ ಘಾಲ್ನ್ ಜಿ.ವಿ. ಹೆರ್‍ಳೆಚಾ ಮೆಜಾಕ್ ದಿಗೊ ದೀವ್ನ್ ಹಾಂವ್ ಉಬೊ ಜಾಲೊಂ ಆನಿ ಇಲ್ಲೆಶೆಂ ಮುಕಾರ್ ಧಲ್ಲೊಂ. ಹ್ಯಾ ವಗ್ತಾ ಪ್ರಿನ್ಸಿಪಾಲಾ ಥಾವ್ನ್ ಕ್ರೋಧಾಚೆಂ ಅಗ್ಟೆಂ ಪೆಟ್ತೆಲೆಂ ಮ್ಹಣ್ ಹಾಂವ್ ತೆಂ ಘೆಂವ್ಕ್ ತಯಾರ್ ಜಾಲೊಂ.
"ಟಿಮಟಿ, ಕಸೊ ಆಸಾಯಿ ತುಂ?" ತೊ ಕಿತೆಂಚ್ ಘಡೊಂಕ್ ನಾತ್‌ಲ್ಲೆ ಪರಿಂ ಹಾಸ್ಲೊ. "ಮೆಜಾಕ್ ದಿಗೊ ದೀವ್ನ್ ಧಲಾನಾಕಾ. ಏಕ್‌ಚ್ ನೀಟ್ ಉಬೊ ರಾವ್ ನಾಂ ತರ್, ಬೊಸ್."
ಬೊಸ್ಚೆಂ ಧೈರ್ ಮ್ಹಾಕಾ ನಾತ್‌ಲ್ಲೆಂ. ಹಾಂವ್ ಮೆಜಾಚೊ ಆಧಾರ್ ಸೊಡ್ನ್ ನೀಟ್ ರಾವ್ಲೊಂ. ತಾಚೆ ಮೆಜಾಚೆರ್ ವಜಾನ್ ಘಾಲ್ನ್ ಮುಕಾರ್ ಬಾಗ್ವೊಂಚೆಂ ತಾಕಾ ಪಸಂದ್ ನಾತ್‌ಲ್ಲೆಂ ಮ್ಹಣ್ ಮಾಕಾ ಉಪ್ರಾಂತ್ಲ್ಯಾ ದೋನ್-ತೀನ್ ಭೆಟೆಂನಿ ಕಳಿತ್ ಜಾಲೆಂ.
ಹಾಂವ್ ಸಾಂತ್ ತಿಮೊತಿಚಾ ಫೆಸ್ತಾ ದೀಸಾ ಜಲ್ಮಾಲ್ಲೊಂ ಜಾಲ್ಲ್ಯಾನ್ ತೆಂ ಮಜೆಂ ದುಸ್ರೆಂ ನಾಂವ್. ಪುಣ್ ತಿಮೊತಿ ನಾಂವಾಚೊ ಮಜೊ ಅಂಕಲ್ ಎಕ್ಲೊ ಬೆಬ್ದೊ ಜಾವ್ನ್ ಭಂವ್ತೊಲೊ ಜಾಲ್ಲ್ಯಾನ್ ಮಾಕಾ ತಿಮೊತಿ ನಾಂವಾಚೆರ್ ತಿರಾಸ್ಕಾರ್. ಸರ್ವ್ ಮ್ಹಾಕಾ ಪಯ್ಲ್ಯಾ ನಾಂವಾರ್ ಅಪಯ್ತೆಲೆ ಜಾಲ್ಲ್ಯಾನ್ ತಿಮೊತಿ ನಾಂವ್ ಕಾಡ್ನ್ ಮ್ಹಾಕಾ ಅಪಯಿಲ್ಲೊ ಜಿ.ವಿ. ಹೆರ್‍ಳೆ ಪಯ್ಲೊ ಆನಿ ಎದೊಳ್ ಪರ್‍ಯಾಂತ್ ಅಕ್ರೇಚೊ. ಪುಣ್ ತಾಣೆ ಆಪ್ಲೆ ಇಂಗ್ಲೀಶ್ ಉಚ್ಚಾರಾಣಾಂತ್ 'ಟಿಮಟಿ' ಮಣ್ತಾನಾ ಮ್ಹಾಕಾ ತೆಂ ನಾಂವ್ ತಿತ್ಲ್ಯಾ ಪಾಡ್ ಮ್ಹಣ್ ಭೊಗ್ಲೆಂನಾ.
"ಏಕ್ ವಿಷಯಿ ತುಂವೆಂ ಸಮ್ಜಾಜಾಯಿ." ತಾಣೆ ಮ್ಹಾಕಾ ಸಮ್ಜಾಯ್ಲೊ. "ವೇದಿಚೆರ್ ಭಾಷಣ್ ಕರ್‍ಚಾ ಮನ್ಶಾಕ್ ಆನಿ ಕ್ಲಾಸಿಂತ್ ಲಿಸಾಂವ್ ಶಿಕೊಂಚಾ ಟೀಚರಿಕ್ ಚಡಿತ್ ಫರಕ್ ನಾ. ತಾಣಿಂ ಉಲಯ್ತಾನಾ ಬೊಸುಲ್ಲ್ಯಾಂನಿ ಧೊಸ್ಲೆಂ ತರ್ ತಾಂಚೆಂ ಧ್ಯಾನ್ ವಿಷಯಾ ಥಾವ್ನ್ ದಂಡಳ್ತಾ. ತಶೆಂ ತುಂವೆಂ ಉಲೊಂಚೆಂ ಚೂಕ್ ನಯ್. ತೆಂ ತುಜೆಂ ಹಕ್ಕ್. ಪುಣ್ ಲಿಸಾಂವ್ ಕರ್‍ತಾನಾ ಕ್ಲಾಸಿಂತ್ ನಾಕಾ. ತುಕಾ ಕೆದಾಳಾ ಉಲೊಂಕ್ ಮನ್ ಆಶೆತಾ ತವಳ್ ತುಂ ಮ್ಹಜಾ ಆಫೀಸಾಕ್ ಭೆಟ್ ಕರ್. ಆಮಿ ದೋಗ್‌ಯಿ ಬೊಸೊನ್ ಉಲೊವ್ಯಾಂ."
ತಾಕಾ ಸಮ್ಜೊಂಚಿ ಶಾತಿ ಮ್ಹಜೆಲಾಗಿಂ ನಾತ್‌ಲ್ಲಿ. ಹಾಂವ್ ತಾಚೆ ಥಾವ್ನ್ ಸುಟ್ಯಾಂ ಮಣ್ಚಾ ಇರಾದ್ಯಾನ್ ಮಾಫ್ ಮಾಗೊನ್ ಭಾಯ್ರ್ ನಿಕಾಳ್ಳೊಂ. ತಾಚೆ ಥಾವ್ನ್ ಹಾಂವ್ ಕಿತ್ಲ್ಯಾ ಪಯ್ಸ್ ವೊಚೊಂಕ್ ಪೆಚಾಡ್ತಾಲೊಂ ತಿತ್ಲ್ಯಾಚ್ ಮಾಪಾನ್ ತೊ ಮಜೆ ಲಾಗ್ಸಾರ್ ಝಳ್ಕೊಂಕ್ ಲಾಗ್ಲೊ.
ಎಕಾ ದನ್ಪರಾಂ ಹಾಂವೆಂ ಅಕ್ರೇಚಿ ಪಿರೇಡ್ ಬಾಕಿ ಆಸ್ತಾನಾ ಕ್ಲಾಸಿಚಾ ಜನೆಲಾ ಥಾವ್ನ್ ಭಾಯ್ರ್ ಉಡಿ ಮಾರ್‍ಲಿ. ಉಡಿ ಮಾರ್‌ಲ್ಲ್ಯಾ ಜಾಗ್ಯಾ ಥಾವ್ನ್ ನೀಟ್ ಜಾಯ್ಜಾಯಿ ತರ್ ದೊಳ್ಯಾಂ ಹುಜ್ರಿಂ ಪ್ರಿನ್ಸಿಪಾಲ್ ಜಿ..ವಿ. ಹೆರ್‍ಳೆ ಉಬೊ ಆಸ್‌ಲ್ಲೊ. ಆದಿಂ ಏಕ್ ಪಾವ್ಟಿಂ ಜನೆಲಾ ಥಾವ್ನ್ ಉಡಿ ಮಾರ್‍ತಾನಾ ಶಾರೀರಿಕ್ ತರ್‍ಭೆತಿಚಾ ಮೇಸ್ತ್ರಿಚಾ ಹಾತಿಂ ಸಾಂಪ್ಡಾಲ್ಲ್ಯಾ ತವಳ್ ತಾಣೆ ಮ್ಹಾಕಾ ಪೊಲ್ಯಾರ್ ಬಳಿಷ್ಟ್ ಥಾಪಾಡ್ ಮಾರ್‌ಲ್ಲೆಂ. ಆತಾಂ ಪ್ರಿನ್ಸಿಪಾಲಾಚಾ ಥಾಪ್ಡಾಚಿ ದೂಕ್ ಸ್ವೀಕಾರ್ ಕರುಂಕ್ ಆರ್‍ನೊನ್ ದೊಳೆ ಧಾಂಪ್ಲೆ. ತಾಣೆ ಹಾತ್ ಉಬಾರ್‍ಲೊನಾ. ಬದ್ಲಾಕ್ ಮ್ಹಜೆಂ ಭುಜ್ ಕುಟ್ಟುನ್ ಕ್ಲಾಸಿಚಾ ದಾರಾ ಪರ್‍ಯಾಂತ್ ಸಾಂಗಾತ್ ದಿಲೊ.
"ಕ್ಲಾಸ್ ರುಮಾಚಾ ದಾರಾಂತ್ ಕಿತೆಂಯಿ ಊಣ್ ಆಸಾಗಿ?" ತಾಣೆ ಅಮ್ರುಕೊ ಹಾಸೊನ್ ವಿಚಾರ್‍ಲೆಂ. "ಪ್ರವೇಶ್ ದಾರ್ ಸಮಾ ಆಸ್ತಾನಾ ಜನೆಲಾ ಥಾವ್ನ್ ಉಡ್ಚಿ ಕಿತೆಂ ಗರ್ಜ್?"
"ಸೊರಿ ಸರ್." ಮಜೆಲಾಗಿಂ ಹೆರ್ ಉತ್ರಾಂ ನಾತ್‌ಲ್ಲಿಂ.
ಸನ್ವಾರಾ ದನ್ಪರಾಂ ಘರಾ ಯೇವ್ನ್ ಜೇವ್ನ್ ಮಾಮ್ಮಿಕ್ ಸಾಂಗಾನಾಸ್ತಾನಾ ಹಾಂವ್ ಮಂಗ್ಳುರಾಕ್ ಸಿನೆಮಾ ಪಳೆಂವ್ಕ್ ಭಾಯ್ರ್ ಸರ್‌ಲ್ಲೊಂ. ಬಸ್ಸಾರ್ ಬೊಸೊಂಕ್ ಜಾಗೊ ನಾತ್‌ಲ್ಲೊ. ಭಿತರ್ ರಿಗೊನ್ ಪಾಟಿಂ ಘುಂವಾಜಾಯಿ ತರ್ 'ಟಿಮಟಿ' ಮಣ್ಚೊ ಉಲೊ ಆಯ್ಕಾತಾನಾ ಹಾಂವ್ ಶೆರ್‍ಮೆಲೊಂ. ಮ್ಹಜೆ ಪಾಟ್ಲ್ಯಾನ್ ಉಬೊ ಆಸ್‌ಲ್ಲೊ ಜಿ.ವಿ. ಹೆರ್‍ಳೆ. "ಘರ್‍ಚಾ ಪರ್‍ವಣ್ಗೆನ್ ಕೊಡಿಯಾಳ್ ಪಯ್ಣ್ ಕರ್ನ್ ಆಸಾಯ್ಗಿ?" ಮಣ್ಚೆಂ ಸವಾಲ್ ಕೆಲೆಂ ತರ್ ಕಿತೆಂ ಜಾಪ್ ಮ್ಹಣ್ಚಿ ಮಣ್ ಚಿಂತುನ್ ಹಾಂವ್ ನರ್‍ವಸ್ ಜಾಲೊಂ. ತಾಚೆಲಾಗಿಂ ಫಟ್ ಸಾಂಗ್ಚೆಂ ಮ್ಹಜೆ ವಾಂಟ್ಯಾಕ್ ಸಲೀಸ್ ನಾತ್‌ಲ್ಲೆಂ. ತಾಣೆ ತಸಲೆಂ ಸವಾಲ್ ಕೆಲೆಂನಾ. ಮಂಗ್ಳುರ್ ಪಾವ್ತಾ ಪರ್‍ಯಾಂತ್ ಸಾದ್ಯಾ ವಿಷಯಾಂಚೆರ್ ಗಜಾಲಿ ಕೆಲ್ಯೊ.
ತೊ ಅಪ್ಲೆ ಕುಟ್ಮಾ ಸಂಗಿಂ ಮುಲ್ಕಿ ಇಗರ್‍ಚೆ ಲಾಗ್ಸಾರ್ ಕಾರ್‍ನಾಡ್-ದರ್‍ಗಾ ರಸ್ತ್ಯಾರ್ ವಸ್ತಿ ಕರ್‍ತಾಲೊ. ಮ್ಹಜೊ ಏಕ್ಲೊ ಈಷ್ಟ್ ಗಿರೀಶ್ ನಾಯಕ್. ಗಿರೀಶಾಚಾ ಘರಾ ವೊಚಾಜಾಯಿ ತರ್ ಜಿ.ವಿ. ಹೆರ್‍ಳೆಚಾ ಘರಾ ಮುಕ್ಲೊ ರಸ್ತೊ ಉತ್ರೊಂಚೆಂ ಆನಿವಾರ್ಯ್ ಜಾವ್ನಾಸ್‌ಲ್ಲೆಂ. ಪಾಶಾರ್ ಜಾತಾನಾ ಗೇಟಿಲಾಗಿಂ ಝಳ್ಕಾಲೊ ತರ್ ನಾಂವ್ ಕಾಡ್ನ್ ಅಪಯ್ತಾಲೊ. ರಸ್ತ್ಯಾರ್, ಮೈದಾನಾರ್ ಆನಿ ಇಸ್ಕಾಲಾಚಾ ಕೊರಿಡಾರಾರ್ ತೊ ದೀಷ್ಟಿಕ್ ಪಡ್ಲೊ ತರ್ ಕಾವ್ಜೆವ್ನ್ ತಕ್ಲಿ ಬಾಗಾವ್ನ್ ಪಾಶಾರ್ ಜಾಂವ್ಕ್ ಹಾಂವ್ ಚಡ್ಪಡ್ತಾಲೊಂ. ಪುಣ್ 'ಟಿಮಟಿ ಕಸೊ ಆಸಾಯಿ' ಮ್ಹಣ್ಚಾ ತಾಚಾ ಸವಾಲಾನ್ ತೊ ಮ್ಹಜಿ ತಕ್ಲಿ ಉಬಾರಿಶೆಂ ಕರ್‍ತಾಲೊ. ಪನ್ನಾಸ್-ಶೆಂಭೋರ್ ವಿದ್ಯಾರ್‍ಥಿಂ ಮಧೆಂ ಮಾಕಾ ಎಕ್ಲ್ಯಾಕ್ ತೊ ಸಾರ್‍ಕೊ ವೊಳ್ಕಾತಾಲೊ ಜಾಲ್ಲ್ಯಾನ್ ಜಾಯ್ತೆ ಪಾವ್ಟಿಂ ಮ್ಹಜೆ ಈಷ್ಟಾಂ ಹುಜ್ರಿಂ ಮಾಕಾ ಗರ್ವ್ ಭೊಗುಲ್ಲೆಂಯಿ ಆಸಾ.
ತಾಣೆ ಮ್ಹಜೆ ಹುಜ್ರಿಂ ದೀಷ್ಟಿಕ್ ಪಡ್ಚೆಂ ಇತ್ಲೆಂ ಸಾಮಾನ್ಯ್ ಜಾಲ್ಲೆಂ ಕೀ ಜಾಯ್ತೆ ಪಾವ್ಟಿಂ ತೊ ಲಾಗ್ಸಾರ್ ನಾತ್‌ಲ್ಲೊ ತರೀ ಭಂವ್ತಿಂ ಘುಂವೊನ್ ಆಸಾ ಮ್ಹಣ್ಚೆಂ ಭ್ರಮ್ ಉದೆಲೆಂ. ಮ್ಹಜೆ ಉಪ್ರಾಳಿ ಹುತಾವಾಳಿಂಚೆರ್ ಖಾಡುಂ ಪಡ್ಲೆಂ. ಹಾಂವೆಂ ಧಾವ್ಯೆ ಕ್ಲಾಸಿಂತ್ ಶಿಕ್ತಾನಾ ಆಮ್ಕಾಂ ಶಿಕೊಂಕ್ ಆಸ್ಚಾ ಗಣಿತ್ ಮೇಸ್ತ್ರಿಕ್ ವರ್ಗ್ ಜಾಲೊ. ತಶೆಂ ಥೊಡ್ಯಾ ಮಹಿನ್ಯಾಂಕ್ ತಾತ್ಕಾಲಿಕ್ ಜಿ.ವಿ. ಹೆರ್‍ಳೆನ್ ಆಮ್ಚಿ ಗಣಿತ್ ಕ್ಲಾಸ್ ಘೆತ್ಲಿ. ತಾಣೆ ಗಣಿತ್ ಶಿಕೊಂಚಿ ಕಲಾ ಮ್ಹಾಕಾ ಮಾತ್ರ್ ನಯ್ ಆಖ್ಕ್ಯಾ ಕ್ಲಾಸಿಕ್ ಪಸಂದ್ ಜಾಲ್ಲಿ. ದನ್ಪಾರಾಂಚಿ ಕ್ಲಾಸ್ ತರ್ ತಾಕಾ ಮಧೆಂ ಸವ್ಕಾಕ್ ಧೇಂಕ್ ಕಾಡ್ಚಿ ಸವೊಯಿ ಆಸ್‌ಲ್ಲಿ. ತಾಣೆ ಧೇಂಕ್ ಕಾಡ್ತಾನಾ ತಾಚೆ ದೋನ್‌ಯಿಂ ಪೊಲೆ ಬಲೂನ್ ಮಳ್ಳೆಪರಿಂ ಫುಲ್ತಾಲೆ ಆನಿ ಉಪ್ರಾಂತ್ ತೋಂಡಾ ಥಾವ್ನ್ ಸವ್ಕಾಸ್ ವಾರೆಂ ಭಾಯ್ರ್ ನಿಕಾಳ್ತಾಲೆಂ.
ತೀನ್ ಮಹಿನ್ಯಾ ಉಪ್ರಾಂತ್ ನವ್ಯಾ ಗಣಿತ್ ಮೇಸ್ತ್ರಿಚೆಂ ಆಗಮನ್ ಜಾತಾನಾ ಪ್ರಿನ್ಸಿಪಾಲಾನ್ ಆಮ್ಕಾಂ ಗಣಿತ್ ಶಿಕೊಂಚೆಂ ರಾವಯ್ಲೆಂ. ಜಿ.ವಿ. ಹೆರ್‍ಳೆಚಾ ಗಣಿತ್ ಅಭ್ಯಾಸಾಂತ್ ಸವೊಯಿ ಜಾಲ್ಲ್ಯಾ ಆಮ್ಕಾಂ ನವ್ಯಾ ಮೇಸ್ತ್ರಿಚಿ ರೀತ್ ರುಚ್ಲಿನಾ. ಆಮ್ಚಾ ಕ್ಲಾಸಿಚಾ ತುಂಡು ರಾಯಾಂನಿ ಏಕ್ ಜಮಾತ್ ಅಪಯ್ಲಿ. ಹಾಂವ್ ತ್ಯಾ ಪೊಲಿಟಿಕ್ಸಾಂತ್ ನಾತ್‌ಲ್ಲೊಂ ತರೀ ಮ್ಹಾಕಾ ಏಕ್ ಪ್ರತ್ಯೇಕ್ ಅಪವ್ಣೆ ದಿಲೆಂ. ನವ್ಯಾ ಮೇಸ್ತ್ರೀಚಾ ಗಣಿತ್ ಶಿಕೊಂಚಾ ರೀತಿಂತ್ ಕಂಪ್ಲೆಂಟ್ ಕರ್ನ್ ಪ್ರಿನ್ಸಿಪಾಲಾನ್ ಆಮ್ಚೆಂ ಗಣಿತ್ ಘೇಜಾಯಿ ಮ್ಹಣ್ ಮನವಿ ದೀಂವ್ಕ್ ನಿರ್‍ಧಾರ್ ಕೆಲೊ. ಪ್ರಿನ್ಸಿಪಾಲಾಕ್ ಮ್ಹಜೆಲಾಗಿಂ ಸಳಾವಳ್ ಆಸಾ ಮ್ಹಣ್ ತಾಣಿಂ ಸಮ್ಜಾಲ್ಲ್ಯಾನ್ ಮನವಿ ದೀಂವ್ಕ್ ಸರ್‍ವಾಂನಿ ಮ್ಹಜೆಂ ನಾಂವ್ ಸೂಚಿತ್ ಕೆಲೆಂ. ಹಾಂವ್ ಮತಿ ಭಿತರ್ ಫುಲೊನ್ ಪ್ರಿನ್ಸಿಪಾಲಾಕ್ ಭೆಟ್ಚಾ ಸಾಹಸಾಕ್ ತಯಾರ್ ಜಾಲೊಂ.
ಸರ್ವ್ ಧೈರ್ ಎಕ್ಟಾಂಯಿ ಕರ್ನ್ ಹಾಂವ್ ಪ್ರಿನ್ಸಿಪಾಲಾಚಾ ಕೆಬಿನಾಕ್ ಪಾವ್ಲೊಂ. ಹಾಂವೆಂ ತಾಕಾ ವಿಶ್ ಕೆಲೆಂ. ತಾಚೆ ಟೇಬಲಾಕ್ ದಿಗೊ ದೀನಾಸ್ತಾನಾ ಪಯ್ಸ್ ನೀಟ್ ರಾವ್ಲೊಂ.
"ಹಲ್ಲೊ ಟಿಮಟಿ.... ತುಜಿ ಕಸಲಿ ಕುಮಕ್ ಕರುಂ?" ತಾಣೆ ಅಪ್ಲೆಂ ಕಾಮ್ ರಾವೊನ್ ಆಸ್ಡ್ಯೊ ವಯ್ರ್ ಕೆಲ್ಯೊ.
"ಸರ್.... " ಹಾಂವೆ ಥಿಂಪಿ ಗಿಳ್ಳಿ. ಕಿತೆಂ ಉಲೊಂಕ್ ಆಯಿಲ್ಲೊಂ ಮ್ಹಣ್ ಹಾಂವ್ ಘಡಿಭರ್ ವಿಸ್ರಾಲೊಂ.
"ಕಿತೆಂಯಿ ಗಡ್ಬಡ್?"
"ಸರ್...." ಹಾಂವ್ ಖರ್‍ಶೆಲೊಂ. "ಹಾಂವ್ ಆಮ್ಚೆ ಕ್ಲಾಸಿ ತರ್‍ಫೆನ್ ಆಯ್ಲಾಂ."
"ದೋನ್ ಮಿನುಟಾಂ ವಿರಾಮ್ ಕರ್. ಲಾಂಬ್ ಶ್ವಾಸ್ ಸೊಡ್ನ್ ಉಪ್ರಾಂತ್ ಸಾಂಗ್." ತಾಣೆಂ ಸಲಹಾ ದಿಲಿ.
"........." ಹಾಂವೆ ಲಾಂಬ್ ಲಾಂಬ್ ಶ್ವಾಸ್ ಸೊಡ್ಲೆ ತರೀ ಖರಸ್ ಉಣೆ ಜಾಲಿನಾ.
"ಟೆನ್ಶನ್ ಕರಿನಾಕಾ. ವಿಷಯಿ ಕಿತ್ಲ್ಯಾಯಿ ಗಂಭೀರ್ ಆಸೊಂ, ಶಾಂತ್ ಪಣಿಂ ಸಾಂಗ್." ಮ್ಹಣಾಲೊ ತೊ.
"ಸರ್ ನವ್ಯಾ ಮೇಸ್ತ್ರಿಚೆಂ ಗಣಿತ್ ಆಮ್ಕಾಂ ಸಮ್ಜಾನಾಂ. ಆಮ್ಚಿ ಗಣಿತ್ ಕ್ಲಾಸ್ ತುಮಿಂಚ್ ಘೇಜಾಯಿ ಮ್ಹಣ್ ಆಮ್ಚಾ ಕ್ಲಾಸಿನ್ ಹುಕುಮ್ ದಿಲ್ಯಾ." ಏಕಾಚ್ ಧಮ್ಮಾನ್ ಜೀಬೆರ್ ಆಯಿಲ್ಲೆಂ ತೆಂ ಉಚಾರ್‍ಲೆಂ.
"ಹುಕುಮ್?" ತಾಚೆ ಕಪಾಲಾರ್ ಮಿರಿಯೊ ಚರ್‍ಲ್ಯೊ.
"ಸೊರ್ರಿ ಸರ್.... ವಿನಂತಿ ಜಾವ್ನಾಸಾ." ಹಾಂವೆ ತಿದ್ವಿಲೆಂ.
"ತೊ ನವೊ ಆಯ್ಲಾ ಮಾತ್ರ್." ತಾಣೆ ಸಮಧಾನೆನ್ ಸಮ್ಜಾಯ್ಲೆಂ. "ಏಕ್ ಪ್ರಿನ್ಸಿಪಾಲ್ ಜಾವ್ನ್ ಮ್ಹಾಕಾ ಮಜಿಚ್ ಮ್ಹಣ್ಚಿ ಜವಾಬ್ದಾರಿ ಆಸಾ ಆನಿ ಜಾಯ್ತೆಂ ಕಾಮ್ ಆಸಾ. ಆತಾಂ ನವೊ ಗಣಿತ್ ಮೇಸ್ತ್ರಿ ಆಯ್ಲಾ. ತಾಕಾ ತಾಚೆಂ ಕಾಮ್ ಆಸಾ. ತಾಚೆ ಕಾಮ್ ಹಾಂವೆಂ ಕೆಲೆಂ ತರ್ ತಾಣೆ ಕಿತೆಂ ಕರ್‍ಚೆಂ? ಆನಿ ಮ್ಹಜೆಂ ಕಾಮ್ ಹಾಂವೆಂಂ ಕೆದಾಳಾ ಕರ್‍ಚೆಂ? ತುಮಿ ಥೊಡೊ ತೇಂಪ್ ತಾಕಾ ಆವ್ಕಾಸ್ ದಿಯಾ. ತುಮ್ಕಾಂ ತಾಚೆಂ ಗಣಿತ್ ಸಮ್ಜೊಂಕ್ ಲಾಗ್ತೆಲೆಂ."
ಮಾಕಾ ತಾಚಿಂ ಉತ್ರಾಂ ಸಾರ್‍ಕಿಂ ದಿಸ್ಲಿಂ. ಹಾಂವ್ ವೊಚೊಂಕ್ ತಯಾರ್ ಜಾಲೊಂ.
"ಆನ್ಯೇಕ್ ವಿಷಯಿ..." ತಾಣೆ ಮುಕಾರ್‍ಸಿಲೆಂ. "ಖಂಚಾಯಿ ಮನ್ಶಾ ವಿಶಿಂ ತಾಚೆ ಪಾಟ್ಲ್ಯಾನ್ ಪಾಡ್ ಉಲೊಂಚೆಂ ಬೊರೊ ಗುಣ್ ನಯ್."
ಪರೀಕ್ಷಾ ಲಾಗಿಂ ಯೆತಾನಾ ಅಕ್ರೇಚಾ ವಗ್ತಾ ಮಿನತ್ ಕಾಡ್ನ್ ಹಾಂವ್ ಪಾಸ್ ಜಾತಾಲೊಂ. ವರ್‍ಸಾಂ ವೆರ್ಥ್ ಜಾಲಿಂನಾಂತ್. ಜಿ.ವಿ. ಹೆರ್‍ಳೆಚಾ ವಳ್ಕಿನ್ ಮ್ಹಾಕಾ ಲೊಟುನ್ ಉತ್ತೀರ್ಣ್ ಕೆಲಾ ಮಣಾ ಥೊಡ್ಯಾ ವಿದ್ಯಾರ್‍ಥಿಂನಿ ಖಬರ್ ಕೆಲ್ಲಿಯಿ ಆಸಾ. ಹೈಸ್ಕೂಲಾಚಿಂ ಮ್ಹಜಿಂ ತೀನ್ ವರ್‍ಸಾಂ ಆಶೆಂಚ್ ಲಾನ್-ವ್ಹಡ್ ಘಟನಾಂ ಸವೆಂ ಜಿ.ವಿ. ಹೆರ್‍ಳೆಚಾ ನಿಗಾ ಪಂದಾಕ್ ಪಾಶಾರ್ ಜಾಲಿಂ. 1976 ಇಸ್ವೆಂತ್ ಧಾವಿ ಕ್ಲಾಸಿಚೆಂ ಫಲಿತಾಂಶ್ ಆಯಿಲ್ಲ್ಯಾ ಉಪ್ರಾಂತ್ ತಾಚೆ ಘರಾ ಲಾಗ್ಸಾರ್ ಪಾಶಾರ್ ಜಾತಾನಾ ತಾಣೆಂ ಮ್ಹಜೆಲಾಗಿಂ ಲಾಂಬಾಯೆಚೊ ಸಂವಾದ್ ಕೆಲ್ಲೊ. ಮುಕ್ಲ್ಯಾ ಪ್ಲಾನಾಂ ವಿಶಿಂ ವಿಚಾರ್ನ್ ತಾಣೆ ಮಾಕಾ ಬೊರೆಂ ಮಾಗ್‌ಲ್ಲೆಂ. 'ಸಾಧ್ಯ್ ತರ್ ಶಿಕ್ಪಾ ಮಧೆಂ ಪುರ್‍ಸತ್ ಮೆಳ್ತಾನಾ ಸಕಾರಾತ್ಮಾಕ್ ಹವ್ಯಾಸ್ ಅಪ್ಣಾಂವ್ಚೆಂ ಪ್ರೇತನ್ ಕರ್.' ಮ್ಹಣ್ ತಾಣೆ ಸಲಹಾ ದಿಲಿ. ತಿಚ್ ಜಾಂವ್ಕ್ ಪಾವ್ಲಿ ಆಮ್ಚಿ ಅಕ್ರೇಚಿ ಮಿಲಾಗತ್. ತವಳ್ ಮ್ಹಾಕಾ ಪಂದ್ರಾ ವರ್‍ಸಾಂ ಪ್ರಾಯ್. ಉಪ್ರಾಂತ್ ಏಕ್-ದೋನ್ ಮಹಿನ್ಯಾಂ ಭಿತರ್ ತಾಚೊ ವರ್ಗ್ ಜಾವ್ನ್ ತೊ ಮುಲ್ಕಿ ಥಾವ್ನ್ ಗೆಲಾ ಮ್ಹಣ್ ಹಾಂವೆ ಆಯ್ಕಾಲ್ಲೆಂ.
ಪಿಯುಸಿಚೆಂ ಶಿಕ್ಪಾ ಬಾಬ್ತಿನ್ ಮುಲ್ಕಿ ವಿಜಯಾ ಕೊಲೆಜಿಕ್ ಭರ್‍ತಿ ಜಾತಾನಾ ಮ್ಹಜಾ ಸ್ವಭಾವಾಂತ್ ವಿಚಿತ್ರ್ ಬದ್ಲಾವಣ್ ಜಾಲ್ಲಿ. ಉಚಾಂಬಳ್ ನಡ್ತೆಂ ಶಾಂತ್ ಜಾಲ್ಲೆಂ. ಮತಿಂತ್ ಸಮಧಾನ್ ಆನಿ ತೋಂಡಾಚೆರ್ ಹಾಸೊ ರಾಜ್ ಕರ್‍ತಾಲ್ಯೊ. ತಾಳ್ನೆಂಚೆರ್ ನಿಯಂತ್ರಣ್ ಆನಿ ಗುಪ್ತಿಂ ವಿಚಿತ್ರ್ ಆತ್ಮ್-ವಿಶ್ವಾಸಾಚೆಂ ಯೆಣೆ ಜಾಲ್ಲೆಂ. ತ್ಯಾ ಉಪ್ರಾಂತ್ ವ್ಹಡಿಲಾಂಕ್ ಪಾಟಿಂ ಉಲೊಂಚೆಂ ಸಂಪೂರ್ಣ್ ಬಂಧ್ ಜಾಲೆಂ. ಶಿಸ್ತ್ ಪಾಟಿಂ ಆಯಿಲ್ಲಿ. ಚುಕಾನಾಸ್ತಾನಾ ಕ್ಲಾಸಿಂಕ್ ಹಾಜಾರ್ ಜಾಲೊಂ. ಶಿಕ್ಪಾಚೆರ್ ಧ್ಯಾನ್ ಚಡ್ಲೆಂ. ಸಾಹಿತ್ಯ್, ನಾಟಕ್ ಆನಿ ಮುಕೇಲ್ಪಾಣಾಚಾ ಚಟುವಟಿಕೆಂನಿ ಪಾತ್ರ್ ಘೆತ್ಲೊ. ಕೋಲೆಜ್ ಕ್ರಿಕೆಟ್ ಟೀಮಾಕ್ ಪಾಂಚ್ ವರ್‍ಸಾಂ ಪ್ರತಿನಿಧಿತ್ವ್ ಕೆಲೆಂ. 1981 ಇಸ್ವೆಂತ್ ಬಿಕೊಮ್ ಸನದ್ ಪ್ರಾಪ್ತ್ ಜಾಂವ್ಚಾ ಭಿತರ್ ಜಾಯ್ತೆ ಶಿಕ್ಷಕಾಂಚೊ ಮಿತ್ರ್ ಜಾಲೊಂ. ಇತ್ಲೆಂಚ್ ನಯ್ ಜಿ.ವಿ. ಹೆರ್‍ಳೆಚಿ ಧೇಂಕ್ ಕಾಡ್ಚಿ ರೀತ್ ಸಮೇತ್ ಹಾಂವೆಂ ಪರಿಪೂರ್ಣ್ ರೀತಿನ್ ಮಜಿ ಜಾವ್ನ್ ಘೆತ್‌ಲ್ಲಿ. ಧೇಂಕ್ ಕಾಡ್ತಾನಾ ಮ್ಹಜೆಯಿ ಗಾಲ್ ಸವ್ಕಾಸ್ ಫುಲ್ತಾಲೆ ಆನಿ ಉಪ್ರಾಂತ್ ತೋಂಡಾಕ್ ಹಾತ್ ಧರ್ನ್ ವಾರೆಂ ಭಾಯ್ರ್ ವಿಸರ್ಜಿತ್ ಕರ್‍ತಾಲೊಂ.
ಪರಿಪಿಕಾಯೆಚೊ ವಾಂಟೊ ಜಾವ್ನ್ ಮ್ಹಜೆ ಹೈಸ್ಕೂಲಾಚೆ ದೀಸ್ ಆನಿ ಕೋಲೆಜಿಚಾ ಜಿಣ್ಯೆಚೆಂ ತುಲನ್ ಕರ್‍ತಾನಾ ಬದ್ಲಾವಣ್ ಮ್ಹಜಾ ಗಮನಾಕ್ ಗೆಲಿ. ಜಿ.ವಿ. ಹೆರ್‍ಳೆಚಾ ಸ್ವಭಾವಾಚೆ ಜಾಯ್ತೆ ಅಂಶ್ ಮ್ಹಜಾ ನಡ್ತ್ಯಾಂತ್ ರೊಂಬೊನ್ ಗೆಲ್ಯಾತ್ ತಶೆಂ ಮಾಕಾ ಭೊಗ್ಲೆಂ. ಪಯ್ಲೆಂ ಮೇಟ್ ಜಾವ್ನ್ ಮುಲ್ಕಿ ಸರ್‍ಕಾರಿ ಜೂನಿಯರ್ ಕೊಲೇಜಿಕ್ ವೊಚೊನ್ ಹಾಂವೆಂ ಜಿ.ವಿ. ಹೆರ್‍ಳೆಚೊ ವಿಳಾಸ್ ಸೊಧುನ್ ಕಾಡ್ಲೊ. ಜಿಣ್ಯೆಚಾ ನಾಜೂಕ್ ವರ್‍ಸಾಂನಿ ಮ್ಹಜಾ ಜಿಣ್ಯೆಕ್ ಆಯಿಲ್ಲ್ಯಾಕ್ ಆನಿ ಬದ್ಲಾವಣ್ ಹಾಡ್‌ಲ್ಲ್ಯಾಕ್ ಉಪ್ಕಾರ್ ಆಟವ್ನ್ ಹಾಂವೆಂ ತಾಕಾ ಪತ್ರ್ ಬರಯ್ಲೆಂ. ತಾಚಿ ತುರಂತ್ ಜಾಪ್ ಆಯ್ಲಿ. ಜಿಣ್ಯೆಂತ್ ಬದ್ಲಾಲಾಯಿ ತರ್ ತುಜಾ ಬರೆಪಣಾಕ್, ತುಜೆಂ ಬರೆಪಣ್ ಭಿತರ್ ಕಿತೆಂ ಆಸಾ ತೆಂ ಭಾಯ್ರ್ ಯೇವ್ನ್ ಆಸಾ, ಹಾಂತುಂ ಅಪ್ಣಾಚೊ ಕಿತೆಂಚ್ ಹಾತ್ ನಾ ಮ್ಹಣ್ ತಾಣೆ ಸ್ಪಷ್ಟ್ ಕೆಲ್ಲೆಂ. ತಾಕಾ ಕಾಮಾಂತ್ ಬಡ್ತಿ ಮೆಳೊನ್ ತೊ ರಾಜ್ಯ್ ಸರ್‍ಕಾರಾಚಾ ಎಕಾ ಶಿಕ್ಷಣ್ ವಿಭಾಗಾಂತ್ ಡೆಪ್ಯೂಟಿ ದಿರೆಕ್ತೊರಾಚಾ ಸ್ಥಾನಾಕ್ ಪಾವ್‌ಲ್ಲೊ.
MBA ಶಿಕೊಂಕ್ ಹಾಂವೆ ಗಾಂವ್ ಸೊಡ್ಲೊ. ಉಪ್ರಾಂತ್ ಮುಂಬೈ ಆನಿ ಬೆಂಗ್ಳುರಾಂತ್ ಕಾಮ್ ಕರ್‍ತಾನಾಂಯಿ ಸಂಪರ್ಕ್ ಜೀವಾಳ್ ಉರ್‍ಲೊ. ಅಶೆಂ ಮುಕ್ಲ್ಯಾ ಧಾ ವರ್‍ಸಾಂನಿ ಆಮ್ಚೆ ಮಧೆಂ ಜಾಯ್ತಿಂ ಪತ್ರಾಂ ಆಶಾರ್ ಪಾಶಾರ್ ಜಾಲಿಂ. ಕನ್ನಡಾ ಮಹಿನ್ಯಾಳೆಂ ಮಯೂರಾ ಪತ್ರಾರ್ ಮ್ಹಜಿ ಪ್ರಗಟ್ ಜಾಲ್ಲಿ ಮಟ್ವಿ ಕಥಾ ವಾಚುನ್ ಸಂತೊಸಾನ್ ಆನಿ ಅಭಿಮಾನಾನ್ ತಾಣೆ ಮ್ಹಾಕಾ ಅಭಿನಂದನ್ ಪಾಟಯಿಲ್ಲೆಂ. ಹ್ಯಾ ಮಧೆಂ ಕಾಮಾ ಥಾವ್ನ್ ತೊ ನಿವ್ರತ್ತ್ ಜಾವ್ನ್ ಕುಂದಾಪುರ್-ಉಡ್ಪಿ ಲಾಗ್ಸಾರ್ ಆಸ್ಚಾ ಕೋಟಾ ಗಾಂವಾಂತ್ ವಸ್ತಿ ಕರುಂಕ್ ಲಾಗ್ಲೊ. ಹ್ಯಾ ಆನ್ಮೋಲ್ ಈಷ್ಟಾಗಾತೆಚೊ ಭಾಂದ್ ಬಳಿಷ್ಟ್ ಜಾಲ್ಲ್ಯಾನ್ ತಾಕಾ ಪಳೆಂವ್ಕ್ ಆನಿ ಗಜಾಲಿ ಕರುಂಕ್ ಕೋಟಾ ಯೆತೊಲೊಂ ಮ್ಹಣ್ ತಾಕಾ ಹಾಂವೆ ಭಾಸ್ ದಿಲಿ.
ತರೀ ಪ್ರಾಕ್ರತಿಕ್ ನಿರ್‍ಮೊಣೆ ವಿಚಿತ್ರ್ ಜಾಂವ್ಕ್ ಪಾವ್ಲೆಂ...... ಹಾಂವ್ ಕೋಟಾ ಪಾವ್ಲೊನಾ!
ಹೆಂ ಕಶೆಂ ಘಡ್ಲೆಂ ಮ್ಹಣ್ ಹಾಂವ್ ನೆಣಾಂ. ತಾಕಾ ಖಂಚಾಯಿ ರೀತಿನ್ ದುಕಂವ್ಚೊ ಇರಾದೊ ಮ್ಹಾಕಾ ನಾತ್‌ಲ್ಲೊ. 1991 ಇಸ್ವೆ ಉಪ್ರಾಂತ್ ಕಿತೆಂಚ್ ಕಾರಣ್ ನಾಸ್ತಾನಾ ಹಾಂವ್ ತಾಚೆ ಥಾವ್ನ್ ಪಯ್ಸಾ ಪಯ್ಸ್ ಜಾಲೊಂ. ಜಿ.ವಿ. ಹೆರ್‍ಳೆಕ್ ಭೆಟೊಂಕ್ ಯೆತಾಂ ಮಳ್ಳ್ಯಾ ಭಾಸೆಚಿ ಮ್ಹಾಕಾ ವಿಸರ್ ಪಡ್ಲಿ. ಮಜೆಂ ಲಗ್ನ್ ಜಾಲೆಂ, ಭುರ್‍ಗಿಂ ಜಾಲಿಂ ಆನಿ ಕುಟಾಮ್ ರುತಾ ಜಾಲೆಂ. ದುಬೈ ಪಾವ್ಲಾಂ ಮ್ಹಣ್ಚಿ ಖಬರ್ ತಾಕಾ ನಾತ್‌ಲ್ಲಿ. ವಿದೇಶಿ ಪ್ರವಾಸ್ ಕೆಲೆ ಆನಿ ತಕ್ಕ್ ಮಟ್ಟಾಕ್ ಪ್ರಗತಿ ಜೊಡ್ಲಿ. ನವ್ಯಾ ಜಿಣ್ಯೆಂತ್ ಹಾಂವ್ ವಾಳೊನ್ ಗೆಲ್ಲೊಂ. ಜಿ.ವಿ. ಹೆರ್‍ಳೆಚೆಂ ಫೈಲ್ ಉಡಾಸಾ ಥಾವ್ನ್ ಮಾಜ್ವೊನ್ ಖಂಚಾಗಿ ಕೊನ್ಶಾಂತ್ ಧಾಂಪುನ್ ಗೆಲೆಂ. ಮುಕ್ಲಿಂ ಲಗ್ಭಗ್ ವೀಸ್ ವರ್‍ಸಾಂ ತಾಚೆ ಸಂಪರ್‍ಕಾವಿಣೆ ಉಬೊನ್ ಗೆಲಿಂ. ಹ್ಯಾ ಮ್ಹಜಾ ಅನುರ್‍ಕಾಪಣಾಚೊ ಪಶ್ಚಾತಾಪ್ ಮ್ಹಾಕಾ ಸದಾಂ ಆಸ್ತೊಲೊ.
2012 ಚಾ ಜನೆರ್ ಮಹಿನ್ಯಾಂತ್ ತಾಚೊ ಉಡಾಸ್ ಮ್ಹಾಕಾ ಅಪ್ಲೆಸ್ತಕಿಂ ಧೊಸುಂಕ್ ಲಾಗ್ಲೊ. ತಿಂ ಖುಣಾಂ ಹಾಂವೆಂ ಗಂಭೀರ್ ಘೆತ್ಲಿಂನಾಂತ್. ಥೊಡೆ ಪಾವ್ಟಿಂ ಅಂತರ್‌ಜಾಳಾರ್ ಮಳ್ಯಾರ್ ಪ್ರತ್ಯೇಕ್ ಜಾವ್ನ್ ಫೇಸ್-ಬುಕಾರ್ ತಾಚೆ ಭುರ್‍ಗ್ಯಾಂಚೆಂ ವಿವರಣ್ ಮೆಳ್ತಾ ತರ್ ಸಂಪರ್ಕ್ ಕರ್‍ಯೆತ್ ಮ್ಹಣ್ ಹಾಂವೆ ಚಿಂತ್‌ಲ್ಲೆಂ ಆಸಾ. ಮ್ಹಾಕಾ ತಾಂಚೊ ಇಮೇಯ್ಲ್ ಪಾತ್ತೊ ಮೆಳ್ಳೊ ನಾ. ಕಾಮಾಚಾ ರಾಟಾವಳೆಂತ್ ಜಿ.ವಿ. ಹೆರ್‍ಳೆಚಾ ಉಡಾಸಾಚಿ ಹಾಂವೆಂ ಬೆಪರ್‍ವಾ ಕೆಲಿ.
ಪುಣ್ ಎಕಾ ವರ್‍ಸಾ ಉಪ್ರಾಂತ್ ಮಳ್ಯಾರ್ 2013 ಇಸ್ವೆಚಾ ಜನೆರ್ ಮಹಿನ್ಯಾಂತ್ ಮ್ಹಜೆ ಬೆಪರ್‍ವಾ ವಿರೋಧ್ ತಾಚೆ ಉಡಾಸಾಚಿ ಲಾರಾಂ ಅತೀ ಬೊಳ್ ಜಾಲಿಂ. ಏಕ್ ಅದ್ರಶ್ಯ್ ಸಕತ್ ಕಿತೆಂಗಿ ಸಾಂಗೊಂಕ್ ಆಶೆತಾ ಮಣ್ಚಾ ಜಿನ್ಸಿಂ ಮತಿಂತ್ ತಳ್ಮಳೆ ಉಬ್ಜಾಲೆ. ಹಾಂವ್ ಅಧೀರ್ ಜಾವ್ನ್ ಘಾಬ್ರೆಲೊಂ. ತುರಂತ್ ಜಿ.ವಿ. ಹೆರ್‍ಳೆಚೊ ಸಂಪರ್ಕ್ ಕರಿಜಾಯಿ ಮ್ಹಣ್ಚಿ ಇಚ್ಚಾ ಉದೆಲಿ. ಹಾಂವೆಂ ಮ್ಹಜಾ ಈಷ್ಟಾಂಚೊ ಆಧಾರ್ ಘೆತ್ಲೊ. ಗಾಂವ್ಛಾ ಮಿತ್ರಾಂ ಲಾಗಿಂ ಕೋಟಾಚಾ ಟೆಲಿಫೋನ್ ಡಿರೆಕ್ಟರಿ ಥಾವ್ನ್ ಜಿ.ವಿ. ಹೆರ್‍ಳೆಚೆಂ ಟೆಲಿಫೋನ್ ನಂಬರ್ ಸೊಧುನ್ ಕಾಡುಂಕ್ ಉಪ್ಕಾರ್ ಮಾಗ್ಲೊ. ತಾಣಿಂ ಮಾಹೆತ್ ಸೊಧುನ್ ಕಾಡ್ಚೆಂ ಆಶ್ವಾಸಾನ್ ದಿಲೆಂ. ತ್ಯಾ ಸಂಧಿಗ್ದ್ ವಗ್ತಾ ಹಾಂವೆಂ ಮನಶಾಂತಿ ಹೊಗ್ಡಾಯಿಲ್ಲಿ.
ರಾಕ್ಚೆಂ ಸಂಯಮ್ ಮ್ಹಜೆಲಾಗಿಂ ನಾತ್‌ಲ್ಲೆಂ. ಪಾಟ್ಲೆ ವೀಸ್ ವರ್‍ಸಾಂನಿ ಖರ್‍ಯಾ ಮಸ್ತೆನ್ ಹೊಗ್ಡಾಯಿಲ್ಲೊ ಸಂಬಂಧ್ ಪರತ್ ಜೊಡುಂಕ್ ಹಾಂವ್ ದರ್‍ವಡ್ಲೊ. ಆಟೆವಿಟ್ಯಾಂನಿ ಮ್ಹಾಕಾ ಬಿತರ್‍ಲ್ಯಾ ಭಿತರ್ ಆಸ್ವಸ್ಥ್ ಕೆಲೊ. ಜನೆರಾಚಾ ಬಾವೀಸ್ ತಾರೀಕೆರ್ ಹಾಂವೆಂ ಅಂತರ್‌ಜಾಳಾರ್ ಸೊಧುನ್ ಕೋಟಾ ಪೋಸ್ಟ್ ಆಫೀಸಾಚೆಂ ನಂಬರ್ ಬರವ್ನ್ ಘೆತ್ಲೆಂ. ಚಡಿತ್ ವೇಳ್ ವೆರ್ಥ್ ಕರಿನಾಸ್ತಾನಾ ನಂಬರ್ ಡಯಾಲ್ ಕೆಲೆಂ. ಏಕ್ ಚಲಿಯೆನ್ ಲಾಯ್ನ್ ಘೆತ್ಲಿ ಆನಿ ಮ್ಹಜೆ ವಿನಂತೆಕ್ ಪಾಳೊ ದೀವ್ನ್ ಕೋಟಾ ಪೋಸ್ಟ್ ಮಾಸ್ಟರ್ ಲಾಯ್ನಿರ್ ಆಯ್ಲೊ.
"ಹಾಂವ್ ದುಬೈ ಥಾವ್ನ್ ಉಲಯ್ತಾಂ." ಮ್ಹಜೊ ಸ್ವರ್ ನಿಯಂತ್ರಣ್ ಚುಕೊನ್ ಕಾಂಪ್ಲೊ. "ಹಾಂವ್ ತುಮ್ಚಾ ಗಾಂವ್ಚಾ ಜಿ.ವಿ. ಹೆರ್‍ಳೆಚೊ ಭೋವ್ ಆದ್ಲೊ ಸ್ಟೂಡೆಂಟ್. ಹಾಂವ್ ತಾಚೊ ಸಂಪರ್ಕ್ ಆಶೆತಾಂ. ತಾಚೆಂ ಘರ್‍ಚೆಂ ನಂಬರ್ ಮೆಳಾತ್‌ಗಿ?"
"ಜಿ. ವಿ. ಹೆರ್‍ಳೆಚೆಂ ನಂಬರ್?" ಪೋಸ್ಟ್ ಮಾಸ್ಟರಾನ್ ಗಳಾಯೆನ್ ಜಾಪ್ ದಿಲಿ. "ತಾಚೆಂ ಘರ್‍ಚೆಂ ನಂಬರ್ ಆತಾಂ ಮ್ಹಜೆಲಾಗಿಂ ನಾ. ಲಾಯ್ನಿಚಾ ಪೋಸ್ಟ್‌ಮೇನಾಕ್ ವಿಚಾರ್ನ್ ಸೊಧುನ್ ಕಾಡ್ಯೆತ್. ಪುಣ್..... ಜಿ.ವಿ. ಹೆರ್‍ಳೆ ಮರಣ್ ಪಾವೊನ್ ಆಯ್ಚಾ ದೀಸಾಕ್ ಭರ್‍ತಿ ಏಕ್ ವರ್ಸ್ ಜಾಲೆಂ!"
ಮ್ಹಜಾ ಹಾತಾಂತ್ಲೆಂ ಫೋನ್ ಸಕ್ಲಾ ನಿಸಾರ್‍ಲೆಂ. ಪೋಸ್ಟ್ ಮಾಸ್ಟರಾಚಿಂ ಉತ್ರಾಂ ಹುನೊನಿ ತೆಲಾ ಪರಿಂ ಮ್ಹಜೆ ಕಾನಾಂತ್ ಥಾವ್ನ್ ದೆಂವೊನ್ ಭೊಗ್ಣಾಂಚೊ ಸ್ಪರ್ಶ್ ಕರ್‍ತಾನಾ ಮ್ಹಜೆಂ ಕಾಳಿಜ್ ಲಾಸ್ಲೆಂ. ದೊಳೆ ದುಕಾಂನಿ ಭರ್‍ಲೆ. ಜಿ.ವಿ. ಹೆರ್‍ಳೆ ಮೆಲಾ ಮಣ್ಚಾ ದೂಕಿನ್ ಹಾಂವ್ ರಡ್ಲೊಂ ಯಾ ಪರತ್ ಪಳೆಂವ್ಕ್ ಮೆಳ್ಚೊ ನಾ ಮಣ್ಚಾ ಸಂತಾಪಾನ್ ಯಾ ಹಾಂವೆ ದಿಲ್ಲಿ ಭಾಸ್ ಪಾಳುಂಕ್ ನಾತ್‌ಲ್ಲ್ಯಾ ಚುರ್‍ಚುರ್‍ಯಾನ್ ಮಣ್ಚೆಂ ಮಾಕಾ ಸಮ್ಜಾಲೆಂನಾ. ಜಿ,ವಿ. ಹೆರ್‍ಳೆಚೆಂ ಹಾಸ್ತೆಂ ಮಯ್ಪಾಸಿ ಮುಕಮಳ್ ಆನಿ ತಾಚೆ ಸಂಗಿಂ ಪಾಶಾರ್ ಕೆಲ್ಲ್ಯಾ ಹೈಸ್ಕೂಲಾಚಾ ತೀನ್ ವರ್‍ಸಾಂಚಿಂ ಲಾನ್ ಲಾನ್ ಘಟನಾಂ ಉಮಾಳೊನ್ ದೊಳ್ಯಾಂ ಹುಜ್ರಿಂ ದಿಸೊಂಕ್ ಲಾಗ್ಲಿಂ. ಹಾಂವೆಂ ಆಧಾರ್‌ಲ್ಲಿ ಚೂಕ್ ಕಿತ್ಲ್ಯಾ ಕಠಿಣ್ ಮಾಪಾನ್ ಮ್ಹಾಕಾ ಸತಂವ್ಕ್ ಆನಿ ಚಿಡಾಂವ್ಕ್ ಸಕ್ತೆಲಿ ಮಣ್ಚಾ ಸತಾಚೊ ಅಂದಾಜ್ ಮ್ಹಾಕಾ ಆತಾಂ ಜಾಲೊ.
"ಟಿಮಟಿ..." ಸರ್ ಜಿ.ವಿ. ಹೆರ್‍ಳೆಚೊ ಉಲೊ ಆಯ್ಕಾಲೊ ಮ್ಹಾಕಾ. ಮ್ಹಾಕಾ ತಾಚೊ ಧೇಂಕ್ ಉಡಾಸಾಕ್ ಆಯ್ಲೊ. ಹಾಂವೆಂ ಪೊಲೆ ಫುಲವ್ನ್ ವಾರೆಂ ವಿಸರ್ಜಿತ್ ಕರ್‍ಚೆಂ ಅಸ್ಕತ್ ಪ್ರೇತನ್ ಕೆಲೆಂ.
Tags:
Stan Ageira, Konkani Story, G.V. Herle, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/24/2020 ಉದೆಂತಿಚೆಂ ನೆಕೆತ್ರ್...
-
11/28/2020 ಚೂಕಿ ತಿದ್ವಿನಾ ಜಾಲ್ಯಾರ್!...
-
11/4/2020 ಅನಿವಾಸಿ ರಾಯ್...
-
10/23/2020 ಘಾಣ್...
-
-
9/13/2020 ರಾತ್ ಪಾಳಿ...
-
6/18/2018 ವೆಚಿಕ್ ಪುತಾಚೊ ದಾಟ್ಟು...
-
11/12/2017 ನ್ಯೂ ಐನ್‌ಸ್ಟೀನ್...
-
9/7/2017 ಮ್ಹಜ್ಯಾ ಮೊಗಾಚೆಂ ಮೆಲ್ಬಾ...
-
8/29/2017 ಕೊಲ್‍ಗರ್ಲ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
Our Address
Mangalore
 | Contact Person : Mr. Praveen Tauro |
Email : praveen@maibhaas.com
Phone : +91 99 80 184340
Address :
Daijiworld.com,
Airport Road,
opp. Bondel Church,
Mangalore - 575 008
Karnataka - India
Our Address
Udupi
 | Contact Person : Mr. Joel D'almeida |
Email : joel@maibhaas.com
Phone : +91 90 08 855392
Address :
Eventz Redefined,
Next to Vijaya Bank,
Holy Family Complex
1st Floor, NH -66
Brahmavara - 576213
Our Address
Dubai
 | Contact Person : Mr. Naveen Sequeira |
Email : editor@maibhaas.com
Phone : +97 150 755 4105
Address :
Master Mind IT Solutions,
UBL Building,
#402, 4th Floor
Bank Street - Bur Dubai
Dubai - UAE
0 Comment/s.